CLOSE WINDOW

D1786
བོད་ཡིག

bod kyi lo tsA ba 'gos lhas btsas kyis yul dbus kyi dpe dang gtugs te bcos pa'o// @#/ /sbyor ba yan lag drug pa zhes bya ba'i 'grel pa/ @##/ /rgya gar skad du/ ShaT aM ga yo ga nA ma TI ka/ /bod skad du/ sbyor ba yan lag drug pa zhes bya ba'i 'grel pa/ dpal rdo rje sems dpa' la phyag 'tshal lo//dbang po rnams dang dbang po rnams kyi yul gnyi ga'i dbang po ste/ dbang po bcu po yul dang yul can de rnams kyi rang gi 'jug pa ni/ ji ltar rang nyid kyi gzung ba dang / 'dzin pa'i rang bzhin gyis 'jug pa ni rang gi 'jug pa'o/ /der gnas pas na rang gi 'jug pa gnas so//thams cad du dman pa dang / bar ma dang / mchog gi bye brag gis so/ /'dod pa so sor sdud pas na/ /zhes bya ba ni 'dod cing chags par bya ba yin pas na/ 'dod pa ste gzugs la sogs pa'o/ /de rnams la ni dbang po rnams kyis gang so sor yang dang yang du sdud cing len pas na sdud pa zhes bya ste/yan lag dang po'i bshad pa'o/ /so sor sdud pa rnam par sbyang bar bya ba'i don du yan lag gnyis pa bstan pa'i phyir 'dod pa lnga ni zhes bya ba la sogs pa gsungs te/ 'dod pa lnga ni dbang po lnga'i yul du gyur pa gzugs la sogs pa ni mdor bsdus nas te/dbang po rnams dang gcig tu gyur nas so/ /sangs rgyas lnga ni mig la sogs pa ste/ de rnams kyi sbyor ba ni yang dag par sbyor bas sangs rgyas lnga ru sbyor ba yin te/ de bas na gzugs la sogs pa rnams kyang sangs rgyas yin no//de ltar gyur pa'i yongs su dag pa'i brtag pa de nyid bsam gtan zhes bshad do/ /de yang rtog pa la sogs pa'i dbye bas rnam pa lngar 'gyur te/ rtog pa dang zhes bya ba la sogs pa ni de'i dbye ba bshad pa'o/ /dbang po dang / yul dang / dbang po'i shes pa ni gsang ba gsum ste/ dbang po lnga dang / dbang po'i shes pa dang / de'i yul rnams ni de bzhin gshegs pa rnam pa lnga'i bdag nyid yin no zhes gang rtog pa de ni rtog pa'o/ /de nyid la rnam par dpyod pa ni gnas pa la spyod pa'o/ / de ltar dpyad nas de kho na nyid la 'jug pa la mngon par phyogs pas gang yid la bde ba'i mtshan nyid can de nyid dga' ba la reg pa'o/ /de kho na nyid la mngon par zhugs pas lus shin tu sbyangs pa la sogs pa'i mtshan nyid can gyi bde ba gang thob pa de ni bde bas bsdus pa'o//de ltar sbyangs pa las rab kyi mthar thug par son pa'i phyir shes pa ste/ mig la sogs pa drug gi 'jug pa'i rnam par shes pa dang shes bya ste/ gzugs la sogs pa nas chos kyi khams kyi bar du 'byung ba ni shes pa dang shes bya byung ba'o/ /de'i zad pa ni sems kyi gzung ba dang 'dzin pa stong pa nyid de/de bas na ye shes kyi mtshan nyid can gyi sems rtse gcig pa la ni rang sems zhes bya'o/ /de lta bu'i sems de ni sangs rgyas kun dngos zhi ba ste/ snang ba tsam dang thams cad stong par gcig tu mthar thug par 'byung bar 'gyur te/ yan lag gnyis pa'i dbye ba rnam pa lnga'o//ye shes lnga'i zhes bya ba la sogs pa'i ye shes lnga'i rang bzhin gyis dbugs te/ yang de nyid sa la sogs pa'i bdag nyid du rang gi rdo rje'i bu gnas byung nas pad+ma'i sna'i rtse mor gong bu'i gzugs kyis te/ byang chub kyi sems kyi thig le'i gzugs kyis bsgom par bya'o//de nyid gyen du 'gro ba'i dbugs ni kha dog sna lnga pa ste/ de bzhin gshegs pa lnga'i bdag nyid can no/ /de nyid kyis na rin po che'o/ /srog ni 'tsho ba'o/ /rtsol zhing ring du spros pa gang yin pa de ni srog dang rtsol ba zhes byar bshad ces bya ba ste/de nyid du 'jug pa la sogs pa'i ngo bo nyid kyis nyin dang mtshan du zlos par gyur pa'i phyir ro/ /rang sngags snying gar bsams te/ rang gi snying gar bsams te/ rang gi snying ga'i pad+ma la bsams nas/ srog ni thig ler gyur par bzhag /ces bya ba mi shigs pa gtogs par dgod pa ste yan lag gsum pa'o//rang gi gzugs la sogs pa'o/ /dbang po ni mig la sogs pa ste/ de la dbang po gnyis dgag cing nges par thim nas de'i 'og tu yul dang dbang po'i rten du gyur pa'i rin po che ste/ sems kyi rin po che srog dang rtsol ba dang bcas par bkag cing nub par gyur pa'i gzung ba gang yin pa de 'dzin pa yin par bshad de/de yang gang zhe na/ yang dag pa'i mtha' zhes bya ba ste/ sems ni 'gog pa'i rdo rjer 'gyur/ /mtshan ma nyer 'dzin 'byung par 'gyur/ /zhes bya ba la/ 'gog pa'i rdo rje ni 'od gsal ba'o//der gyur pa ni sems der gyur ba'o/ /mtshan ma rnams kyi nye bar 'dzin pa na mtshan mar nyer 'dzin te/ mtshan mar snang ba'o/ /'byung bar gyur pa ni skye bar gyur pa'o/ /mtshan ma'i khams ni rnam pa lngar/ /byang chub rdo rje gsungs pa yin/ /zhes bya ba ni sa chu la thim par gyur pa las smig rgyu dang 'dra bar snang bar gyur pa ni mtshan ma dang po'o//de bzhin du chu me la thim par gyur pa las du ba lta bu ste gnyis pa'o/ /me rlung la thim par gyur pa las/ nam mkha' snang bar gyur pa lta bu ste gsum pa'o/ /khams phra ba kun du snang ba gsum du song ba las mar me ltar snang ba'i tshogs kyi ngo bo nyid ni bzhi pa'o//rang bzhin kun du snang ba la thim par gyur pa las sprin med pa'i nam mkha' dang 'dra zhing rtag tu snang ba 'od gsal ba tsam du gyur pa ni lnga pa'o/ /mtshan ma lnga po de dag gis mya ngan las 'das pa thob par 'gyur ro//de yang ji skad du las kyi mtha' rnam par 'byed pa las/ dang po sa ni chu la thim/ /chu yang me la thim par gyur/ /me ni rlung la thim 'gyur zhing / /rlung yang rnam par shes la 'jug /rnam shes gzung ba de nyid ni/ /'od gsal par yang 'jug pa yin/ /zhes gsungs pas so//brtan par gyur cing rnam par dag par gyur nas/ rdo rje'i lam nas 'da' bar mi bya ba'i mtshan ma lnga'i rim gyis 'od gsal bar 'jug pas nam mkha'i khams te/ 'jig rten gyi khams su spro bar bya zhing chos kyi sku'i tshul gyis khyab par bya'o// de dag ni 'dzin pa'i yan lag ces bya ba ste bzhi pa'o/ /de ltar bdag nyid 'od gsal bar song bar rnam par bsgom zhing mngon sum du byas nas/ gang sngon rjes su dran pa smig rgyu 'dra ba la sogs pa'i rnam pas yang dag pa'i mtha' thob pa de dang 'dra zhing / de nyid kyi rim pas spro bar bya zhing bskyed par bya ste/bshad ma thag pa de dag ni rjes su dran pa zhes bshad pa yin par shes shing khong du chud par bya'o/ /so sor snang ba de las skye/ /zhes bya ba la/ so sor snang ba ni yang dag par rig pa ste/ de las rjes su dran pa'i yan lag skye bar 'gyur gyi gzhan du ni ma yin no//thabs dang zhes bya ba la sogs pa la/ thabs dang shes rab snyoms par 'jug pa ste/ kun rdzob dang don dam pa'i bden pa'i sbyor bas dngos po thams cad de rgyu ba dang / mi rgyu ba la gnas pa gong bu'i tshul gyis te/ phyag rgya chen po'i gzugs kyis gcig tu byas nas rgyu ba dang /mi rgyu ba de'i dbus su zung du 'jug pa'i bdag nyid can rdo rje 'chang chen po'i gzugs rnam par bsgom par bya'o/ /rim pa 'di nyid kyis yud kyi zhes pa ste/ skad cig tsam gyis so/ /ye shes rdzogs par byed pa zhes pa ste/ ye shes kyi sku rdzogs par byed pa ni ting nge 'dzin te/yan lag drug pa yin par bshad do/ /dpal sgyu 'phrul dra ba las kyang lha bskyed pa'i dbye ba 'di nyid gsal bar gsungs te/ rnal 'byor rnam gsum shes bya ste/ /byin gyis brlabs dang yongs brtag dang / /gzugs nyid yongs su rdzogs pa ste / / rnal 'byor sangs rgyas rnams kyi bsngags/ /sngags kyis byin brlabs nga rgyal bskyed/ /rnal 'byor byin rlabs yin par gsungs/ /byang chub sems ni dag pa dang / /gsang sngags sa bon skye ba che/ /phyag rgya'i tshogs su brtag pa yis/ /rim gyis gzugs ni rdzogs byas pa//de ni brtag par brjod pa ste/ /rnal 'byor cho ga yin par gsungs/ /sdud dang spro bar byas pa las/ /rnam pa'i mchog kun ldan pa dag /skad cig ye shes kyis rdzogs pa/ /rdzogs pa'i rnal 'byor zhes bshad do/ /zhes bya ba dang / rnam par snang mdzad mngon par byang chub pa las kyang /lha'i rnal 'byor pa rnam pa gnyis ston te/ gsang ba'i bdag po lha'i gzugs kyang rnam pa gnyis te/ yongs su dag pa dang / yongs su ma dag pa'o/ /de la yongs su dag pa ni rtog pa'i ngo bo ste/ mtshan ma thams cad dang bral ba'o/ /yongs su ma dag pa ni mtshan ma dang bcas pa'i gzugs te/kha dog dang dbyibs so/ /de la lha'i gzugs rnam pa gnyis kyis bya ba gnyis 'grub par 'gyur te/ mtshan ma dang bcas pas ni mtshan ma dang bcas pa'o/ /mtshan ma med pas ni mtshan ma dang bcas pa'i dngos grub kyang 'byung bar 'gyur ro//mtshan mar bcas pas mtshan bcas kyis/ /dngos grub rgyal ba dam pa bzhed/ /mtshan ma med la gnas pas ni/ /mtshan ma can yang 'grub tu rung / /de bas rnam pa thams cad du/ /mtshan ma med pa bsten par bya/ /zhes bya ba ste dgongs pas bshad pa'o//sbyor ba yan lag drug pa zhes bya ba'i 'grel pa slob dpon chen po zla ba grags pas mdzad pa rdzogs so// //rgya gar gyi mkhan po A R+Ya shrad+hA ka ra war+m+ma dang / zhu chen gyi lo tsA ba dge slong rin chen bzang pos bsgyur cing bcos te gtan la phab pa'o//