CLOSE WINDOW

D1781
བོད་ཡིག

/ @##/ /rgya gar skad du/ shrI ya de wI kA li sA d+ha no pi ka /bod skad du/ dpal lha mo nag mo'i sgrub thabs/ dpal lha mo nag mo la phyag 'tshal lo/ /dpal lha mo sgrub par 'dod pa'i rnal 'byor pas/yo byad phun sum tshogs pa dang ldan par bshams la/ de nas dur khrod dam shing gcig gi drung ngam/ gcong rong ngam khang stong ngam dben pa'i gnas su phyin la/ de nas dang po phyogs skyong la sogs pa 'jig rten pa'i lha 'dre thams cad la gtor ma sbyin zhing /gser skyems rgyas par gtong ngo / /de nas e'i maN+Dal kun du khru re la/ 'phangs su khru gang gi tshad du bya'o/ /de la stegs bu sum rim du bya'o/ /bar ma la zla gam gsum du bya'o/ /tha ma gru gsum du bya'o/ /tha ma'i gru gsum re re la rabs chad kyi thod pa'am/yang na gang yang rung ba'i thod pa re re bzhag ste/ de yang thod pa steng du mngon par byas la/ thod pa'i nang du yi ge ya nag po re re ro sol gyis bri'o/ /thod pa'i phyi la yang yi ge ma dmar po re re khrag gis bri'o/ /zla gam gsum yang dmar pos byug /gru gsum dmar por tshon btang ste/ma legs na yang 'di lta bu'i skyon yod de tshon sbom na slob dpon dang slob bu la nad mang du yong / tshon phras na slob dpon dang slob bu la nor yal ba 'ong ngo / /ya yor gyur na yul du 'khrug pa 'ong ngo / /bar chad par gyur na slob dpon slob bu myur du 'chi bar 'gyur/de bas re khA smyug ma 'bring po tsam pa byas la/ g.yas nas bskor zhing bris te/ tshon dgye ba yang gru gsum nyis 'gyur gyi bar du dgye ste/ nang gi gru gsum nag por bya/ phyi'i gru gsum dmar por bya/ nang gi gru gsum gyi rtse mo re re la/ rdo rje phyed pa re res mtshan par bri/thal chen dang khrag skam po bsres pas e'i dbus su sngags kyi sa bon hUM bri/ nang gi zur gsum la ma mo thams cad kyi srog gi snying po phul ba b+h+yoHre re bri bar bya'o/ /de nas da du ra'i khu ba dang ra rog po'i khrag dang / bya mo nag mo'i khrag dang / de dag cha bsnyams nas bsres la zhib tu btags la tshon rtsi dang sbyar nas/dur khrod kyi ras la dpal lha mo'i sku bris la/ e'i maN+Dal gyi dbus su bzhugs su gsol te/ der yang spos la sogs pa'i mchod pa'i yo byad lnga tshang bar bsags la mchod pa 'bul te/ de yang bdag dam tshig gi lha mor bsgoms te/dang por rnal 'byor pa'i snying ga'i dbus su pad+ma bzhi pa'am/ yang na pad+ma 'dab ma brgyad pa snying po dang bcas pa zhig bsam/ pad+ma de'i snying po'i dbus su yi ge oM klad kor dang bcas pa las 'od 'bar ba cig bsam mo/ /de'i steng du yi ge raM raM gyi gzi brjid kyis raM nyid me ltar 'bar ba cig bsam/me des bdag gi rnam par rtog pa can gyi lus bsregs nas thal bar gyur bar bsam mo/ /de nas yang thal ba de'i dbus su zhi ba'i yid kyis bsam par bya ba/ sngon gyi pad+ma'i snying po la gnas pa srog gi rang bzhin yi ge aM//de'i steng du yi ge baM bsam mo/ /de nas baM de yongs su gyur pa las/ bum pa dkar po kha nas bdud rtsi'i chu rgyun 'bab pa cig bsam/ de nas sngon gyi srog tu bshad pa'i yi ge aM de las bdud rtsi'i chu rgyun bab cing sbrengs pas yi ge kun gyi mchog tu bshad pa'i aM zhes pa chu des lhag par yang brtan zhing brtag par byas nas gzi brjid dang ldan par gyur nas/zla ba dang kha ba dang 'o ma dang / kun+da dang sprin dkar po dang dung lta bur bsams te/ de nas dpal lha mo'i mtshan gyi sngags/ oM ma hA kA li de wI kA rA li/ bi krin+ta/ kA la ra tri/ tsaN+Da rU pi Ni hUM phaT/ ces brjod pa'i sgo nas/ sngags kyi sa bon oM de las sa bon lhar bsgrubs te/ dpal lha mo chen mo'i skur bsgyur zhing bsgom par bya ba ni/ sku mdog nag mo nag po srin dang bung ba lta bur gnag pa/ shin tu sgeg pa/ keng rus kyi lus can/ zhal gcig phyag bzhi/ zhabs gnyis pa/ g.yas kyi dang po na ral gri/ 'og ma na b+han+d+ha dmar gyis bskyil ba/ kha T+wAM ga 'khrol ba/ g.yon gyi dang po'i phyag na shak+ti/ 'og ma na tri shU la'i mgul du dar dpyangs phyar ba thogs pa/ mi ro rengs pa khar bcug nas mche ba bzhi gtsigs pa/ spyan gsum dmar po bzlog nas blta ba/dbu skra ral pa gyen du brdzes shing len bu g.yon du 'khyil ba/ dbu skra la sbrul dang thod phreng gis brgyan pa/ snyan cha g.yas na sbrul gyi mgul na dril bu gsil ba/ snyan cha g.yon pa na seng ge'i ral pa dmar ba/ rna ltag gnyis na me tog dang dar dmar po'i cod pan 'phur pa/lha ma yin la sogs pa'i thod pas do shal du byas pa/ glang po che'i ko rlon gyis stod g.yogs byas pa/ ba lang gi ko rlon chan pas dras pa la/ re lde ser pos sham bur btags pas sku smad dkris pa/ khrag dang zhag gi thig les bris pa/ klu'i rgyal po gshibs pas ska rags byas pa/zhabs gnyis lcags sgrog gis brgyan pa/ bong bu gwa pa'i steng na rtsen skyil du bzhugs pa/ dur khrod brgyad kyi dbus na skad dung dang 'brug gi sgra lta bu sgrogs shing / ma mo dang mkha' 'gro dang / sha za thams cad dbang du sdud pa cig tu bsgom mo//de ltar gsal ba de'i thugs ka'i dbus su/ thugs me'am me stag 'dra ba la/ rang gi sor bzhi'i tshad tsam du/ dbyibs sgo nga'i gzugs dang 'dra ba cig gsal bar bsgom mo/ /sgo nga de'i dbus su hUM nyi ma dang zla ba'i dkyil 'khor dang ldan pa cig bsgom mo/ /de yang hUM gi thig le ni nyi ma'i dkyil 'khor du bsam/hUM gi zla tshes ni zla ba'i dkyil 'khor du bsam mo/ /de'i 'og tu hUM de las 'od zer byung bas/ bzlas pa'i yig 'bru rnams kyi phreng bar gyur par bsam/ hUM de nyid mtha' ma bskor bar bsgom shing / hUM de nyid la blta zhing gsal ba dang / 'dris shing goms pa'i sbyor bas rtse gsum pa kho na bsgom mo/ /de ltar bdag dam tshig gi lha mor gsal ba dang / grub pa'i gnas nas rang bzhin gyi lha mo sngon gyi dang 'dra ba zhig /'khor nag mo gcer bu ral pa can/ thod pa se ral khar brgyan pa/ lag pa g.yas pa na mi'i snying thogs pa/lag pa g.yon pa na b+han+d+ha rak+tas bkang ba 'dzin pa/ snying gi dbus na srog gi snying po yi ge b+h+yoH re re yod pa bsam gyis mi khyab pa dang bcas te byon par bsam mo/ /de ltar nam mkha' la spyan drangs nas/ mdun gyi e'i dbus su sngags kyi sa bon hUM dang b+h+yoHla so sor thim pas sku phyag rgyar zhes pas bya'o//de yang dgug pa dang / gzhug pa dang bcing ba dang dbang du bya ba'i sngags 'dis bya'o/ /dr-i sh+ya dzaHhUM baM hoH/ sa ma ya s+t+waM/ sa ma ya hoHzhes brjod nas/ de nas gzugs dngos su ston cig par bsgom mo/ /de ltar mi ston na oM hUM b+h+yoH//e a ral+li hrIHdzaHzhes sngags de brjod cing gzir ro/ /mngon sum du ma byung na yang nga'i sems la ci 'dod pa de ni khyod kyis grub par gyis shig par bsgo'o/ /de nas kyang sngags kyi las byed pa'i tshe rigs kyi dam tshig byin te/ dam tshig kyang gur gum gyi chu la sngags kyis btab la sbyin no//dam tshig gi sngags 'di'o/ /oM ha na ha na badzra sa ma ya ma ti kra ma nan hUM phaT/ dam tshig gi chu byin nas bsgo ba/ lha mo khyod dam tshig 'di las 'das na/ bsgo ba bzhin du ma nyan gyi bar du gzir ba chen por byed pa dang / dam tshig gi chu 'di yang dug ha la ha la chen por gyur te/mthong bas khrag tu skyug pa dang / rdo rje za byed chen pos snying drangs te dus ma yin par 'chi bar 'gyur ba dang / gnod sbyin gyis gsod par 'gyur ba dang / 'gas pa dang khro bo za byed chen po dang 'jigs byed chen por 'gyur te/ dpal chen po'i rdo rje chen pos snying dral te/me dpal rdo rje 'bar bas tshig nas lus thal bar byas te/ so so rang rang gi gnas bor ba bzhin du dmyal ba 'bod 'grogs su skye bar 'gyur ro zhes dam tshig bor ro/ /de nas dpal lha mo la mchod pa lnga dang gtor ma dbul te/ oM hUM shri ye de wI kA li ma hA kA li hUM b+h+yo/ /oM badzra puSh+pe pU dza me g+ha sa mu dra s+pha ra Na sa ma ye hUM phaT/ces brjod de me tog dbul lo/ /oM badzra d+hU pa pU dza me g+ha sa mu dra s+pha ra Na sa ma ye hUM phaT/ ces brjod de bdug spos shangs la dbul lo/ /oM badzra dI pa pU dza me g+ha sa mu dra s+pha ra Na sa ma ye hUM phaT/ ces mar me spyan la dbul lo/ /oM badzra g+han+d+he pU dza me g+ha sa mu dra s+pha ra Na sa ma ye hUM phaT/ces dri chab thugs kar dbul lo/ /oM badzra nai bid+ya pU dza me g+ha sa mu dra s+pha ra Na sa ma ye hUM phaT/ ces brjod de lha bshos phyag tu dbul lo/ /de nas ra rog po'i sha khrag dang / bya mo nag mo'i sha khrag dang / gzhan gyi yang khrag sna tshogs gang 'byor dang sha chang la sogs pa bza' ba sna tshogs dang ldan pa'i gtor ma dbul bar byas te/ma hA maM sa khA hi/ ma hA go ro tsa na khA hi/ ma hA ba su ta khA hi/ i daM ba liM gr-ih+Na gr-ih+Na pa ya hUM phaT swA hA/ zhes brjod de gtor ma dbul bar bya'o/ /de nas mchod pa rdzogs par phul nas/ bstod de gling bu'am mi rkang 'bud/cang te'u 'am mi thod kyi rnga brdung zhing dbyangs snyan pas bstod par bya ste/ oM dpal ldan lha mo mi pham srid gsum bdag /rang don bsgrub phyir rnam thar la gzhol kyang / /snying rje'i dbang gis rjes la thob pa yi/ /shes rab sna tshogs dag gis 'gro don byed/ /lha mo sku mdog nag mo char sprin mdog /mtshan mo nag mo shin tu gtum pa'i gzugs/ /shin tu sgeg cing keng rus lus can ma/ /zhal gcig phyag bzhi zhabs gnyis brjid pa'i sku/ /ral pa gyen 'greng lan bu g.yon du 'khyil/ /skra rked sbrul la thod pa'i phreng ba can/ /rna ltag me tog dar nag cod pan can//khrag gi chang gis ra ro spyan rtsa dmar/ /mi ro red pa khar bcug mche ba bzhi/ /rnam par gtsigs nas khrag la shin tu dgyes/ /snyan g.yas sbrul gyi mgul nas dril gsil zhing / /gdug pa btul nas tshangs pa'i sgra sgrogs ma/ /snyan cha g.yon pa seng ge'i ral pa dmar/ / dpa' bo khams gsum seng ge'i sgra sgrogs ma/ /phyag bzhi g.yas kyi dang pos ral gri 'dzin/ /'og ma b+han+d+ha rak+ta dmar bskyil 'dzin/ /g.yon gyi dang pos shak+ta'i mtshon cha 'dzin/ /'og ma tri shU'i mgul na dar dpyangs 'phyar/ /shak+ti ral gris mtshon gyis bsad pa yi/ /lha ma yin gyi thod pas do shal byas//glang po che yi ko rlon stod g.yogs 'dzin/ /smad ni ba lang ko rlon dras pa la/ /phyed ni re lde ser po sham bur dkris/ /klu yi dbang po gshibs pa'i rked bcings can/ /zhabs gnyis lcags sgrog dag gis mdzes par brgyan/ /khrag zhag dmar po'i tshom bus thig ler bris//bong bu gwa zhon mtshan mo dur khrod rgyu/ /bong bu'i rmig pa glog gi shugs can ma/ /khams gsum skad cig dag gis skor bar byed/ /skad ni dung dang 'brug gi sgra lta bus/ /ma mo mkha' 'gro sha za dbang du sdud/ /lho phyogs gshin rje'i pho brang rtag tu gnas//dam pa'i sa nas gzugs sku gnyis gzigs ma/ /ting 'dzin dbang thob gzugs khams gnas su byon/ /tshangs pa'i rgyal po la sogs phyag byas ma/ /gzhan la dbang sgyur 'dod khams sa mthar phyin/ /dbang phyug chen po'i sku la dgyes 'khril ma/ /sum cu rtsa gsum gnas bzhir byon pa'i tshe//lha rnams dbang phyug brgya byin phyag byas ma/ /lha ma yin rnams phung bar byas pa'i tshe/ /lha min dbang po kun gyis phyag byas ma/ /sku mchog ri rab che dang bsgril ba'i tshe/ /lte ba'i thad kyi phyogs nas nyi zla 'char/ /rgyal chen bzhi la sogs pas phyag byas ma//rgya mtsho'i gting nas me 'bar mtsho skems nus/ /sa 'og dbang po kun gyis phyag byas ma/ /lha mo khyod kyis cho 'phrul 'di bstan pas/ /bdud dang mu stegs rgyal po 'dar zhing 'dud/ /ma mo srin mo'i tshogs rnams rngam zhing dgod/ /rin chen gur phub tsit+ta'i gzhal yas nas//nyi zla'i dkyil 'khor brtsegs pa'i 'od zer 'bar/ /phyogs bcu'i 'jig rten dag gi bcud bsdus nas/ /nyi ma'i dkyil 'khor dag la thim par mdzad/ /dug gi rlangs pas nag po'i phyogs rnams kyis/ /bzhi brgya rtsa bzhi'i nad rnams slong byed ma//de'i phyir nad kyi bdag mo dam la 'du/ /phyogs bcu'i 'jig rten bdud rtsi'i bcud bsdus nas/ /zla ba'i dkyil 'khor dag la thim par mdzad/ /bdud rtsi'i rlangs pas dkar po'i phyogs rnams kyi/ /bzhi brgya rtsa bzhi'i nad ni rtsad gcod ma/ /bdud rtsi sman gyi rgyal mo dam la 'du//gang zhig khyod la dad na ma bas byams/ /de phyir ma gcig nad bdag sman gyi gtso/ /lha mo khyod la bdag gis rtag tu bstod/ /sangs rgyas shAkya thub pa'i spyan snga ru/ /bdag gis 'di nas 'khor ba ji srid bar/ /dkar po'i phyogs kyi nad dang sdug bsngal sogs//zhi bar bya phyir tshe dang longs spyod spel/ /nag po'i phyogs ni dgug cing dbang du bsdu/ /smyo 'bog gsad la sogs pa'i las 'di dag /bstan pa bsrung phyir las 'di grub par bgyi/ /'di las 'gal na rgyal ba'i bka' bslus pas/ /dus gsum rgyal ba'i rdo rjes mgo 'gems shog /de skad rgyal ba'i spyan sngar dam bcas pa/ /dam bcas bzhin du phrin las myur du mdzod/ /rnal 'byor bdag dang bdag gi 'khor rnams la/ /zhal nas bdud rtsi char pa'i rgyun phob la/ /nad sogs sdug bsngal tshogs ni zhi bar mdzod/ / tshe dang dbang dang longs spyod rgyas par mdzod/ /zang zing lo thog 'bru yi phung po dang / /rin chen rkang 'gro'i phyugs rnams 'phel bar mdzod/ /bla ma smod cing dkon mchog dbu 'phang smod/ /bdag gi dge ba'i bar chad byed pa'i dgra/ /che ge mo zhes bya ba'i las ngan 'di/ / khyod kyi khong nas dug gi rlung bus la/ /'du ba rnam bzhi'i nad rnams khong nas slong / /bag bzhi sa la lhung nas brdebs su chug /don snying smad lnga'i khong khrag skyug tu chug /las ngan 'khor bcas brang chen brdung du chug /smre sngags cho nge gnam du 'bod du chug / 'chi ba'i dug mda' smyo 'bog gsad par mdzod/ /gcan gzan mkha' lding la sogs ltas ngan phob/ /bstan pa bsrung ba'i las 'di myur du mdzod/ /oM ru ru ro ru bi tiSh+Tha ba d+hot+si/ kA ma la rAk+kha sI hUM b+h+yoH/ che ge mo mA ra ya hUM phaT/ ces bzlas shing / dam brdar/ gtor mar sbreng zhing /brgya rtsa brgyad dam yang na nyi shu rtsa gcig bzlas la gzhan yang lha mo'i gzungs la sogs pas bstod pa mtha' dag bya'o/ /de nas lha mo'i sbyor ba la gnas nas/ thams cad don ni grub byed pa'i/ /snying po yi ni gsang sngags 'di/ /rtag par bzlas pa byas pa ste/ /myur ba yang ni ma yin pa/'thogs pa yang ni ma yin pa/ mi gsal ba yang ma yin pa/ gug skyed nyams pa ma yin par/ g.yeng ba'i rtog pa spangs la bzlas pa'o/ /oM hUM shrI ya de wI kA li ma hA kA li hUM b+h+yoH/ oM a ra l+li hriM dzaHzhes yig 'bru gsal bar lha mos bzlas te/ sngags kyi bzlas pa thams cad kyang lha mo'i tshig yin par che ba'i nga rgyal bya zhing /rang gi sprul pa'i lha mo thams cad kyi zhal nas kyang sngags kyi sgra byung bar bsam zhing / bzlas pa brtson par byas pas de lta bu thams cad kyis bzlas par 'gyur ro/ /des ni sngon du bsnyen pa bya ba'i sngags te/ 'bum phrag bdun bzlas pa'am/ yang na 'bum phrag gsum bzlas pa'am/ yang na 'bum phrag lnga bzlas pas las thams cad 'grub po/ /de yang na sngags khri phrag re re bzlas nas gtor ma re re gtang ste/ khu tshur bcangs mdzub mo gnyis bsgrengs la/ kha 'gram g.yas g.yon du mche ba ltar byas la/oM b+h+ya ba ba ta li ba ta li tshe/ /zhes lan bdun nam gsum bzlas nas/ 'di skad du/ dur khrod bdag mo dngos grub zhal/ /gtum mo 'jigs byed yi dags kha/ /dam tshig srung ma khrag dga' mo/ /ki li sgra sgrogs sbyor zin mo/ /dur khrod ro yi tshal dbus na//tshogs dang pho nyar bcas pa ru/ /gtsigs byed gtum mo dud sol ma/ /gsol cig bzhes zhig dam tshig lha/ /gnas nas gnas su mdzad du gsol/ /bdag gi sems la ci 'dod pa/ /de ni khyod kyis grub par mdzad/ /bdag gis las ni ci byed kyang //de la kun gyis grogs gyis shig /hUM gr-ih+Na gr-ih+Nan sarba duSh+TAM/ b+hak+Sha b+hak+Sha/ phroM phroM phroM phaT swA hA zhes brjod de/ se gol lan gsum gdab ste gtang bar bya'o/ /'dzab ma rdzogs kyi bar du rgyun de ltar shes par bya'o/ /ji srid skyo bar ma gyur gyi bar du de ltar bzlas la/skyo bar gyur na yang bstod pa byas la mchod pa phul nas/ phyag byas te lha mo slar gshegs su gsol lo/ /dpal lha mo nag mo la sngon du mchod pa chen po dbul zhing / bsnyen pa rdzogs par byas la/ lha mos lung bstan cing mtshan ma thob pa'i rnal 'byor pas kyang /dang po nyid du snying po'i sngags la 'bum phrag gcig tu bzlas la/ de nas bstod cing las la sbyar ro/ /de nas smyo zhing gsad pa'i las bya na/ grog mkhar gyi sa dang / chu 'gram gyi sa dang / dur khrod kyi sa dang / dur khrod kyi thal ba dron mo dang / dur khrod kyi sol ba dang / rdzas de dag gcig tu bsres te zhib tu btags la/ bong bu'i gcin gyis sbrus te bsgrub bya'i gzugs brnyan bya'o/ /ldum bu dang / ldum bu med na lung thang tse'i 'bras bu dang dug dang ske tshe dang lan tshwar khrag dang sbyar bas/mi de'i ming rus rigs kyi bla gang yin pa'i bla gzugs gro ga la bris la/ bla de'i lus la dgra bo de'i ming rus sod cig pa'i bskul tshig dang bcas pa bris te/ 'di skad du hUM che ge mo mA ra ya phaT/ un man+ta ku ru phaT/ ces bris la bla rdo dang sbrags la gzugs brnyan gyi snying gar gzhug /gzhan yang gong gi rdzas dang tsha ba gsum mu zi nag po rnams bsres te/ zhib par btags te bong bu'i gcin dang sbyar te/ gzugs brnyan gyi kun du khyab par bsku'o/ de nas gcan gzan gyi thod pa'i kha nang du bcug la//maN+Dal gyi dbus su gzhag /de nas gang la bya ba de bkug cing gzugs brnyan la bstim/ de yin pa kho nar bsams la de la las bya'o/ /rgya gar phan chod na mi gsod pa'i gsal shing rtse gcig pa byed pas/ 'dir yang lcags las gsal shing rtse gcig pa brdungs la bya'o//byas pas ni lha mo yin te/ gzugs brnyan gyi rkub nas gyen du btsugs te khar phyung la gzugs so/ /de nas sngags 'bum phrag gsum bzlas na dgra bo brlag par 'gyur ro/ /de'i dus su bsam par bya ba ni bsgrub bya de'i snying ga'i dbus kyi yi ge kaM las gyur pa'i sdig pa kha dog nag po mi sdug pa zhig gis/snying gi mar me'i dbus nas snying khrag 'thung zhing sha za bar bsam mo/ /gzhan yang bdag dpal lha mo bsgoms pa'i snying ga'i mar me'i nang gi hUM gi 'od zer las dzaHdmar po bsgril ma phyogs bcur 'phros 'dus pa las/ de yongs su gyur pa las lcags kyi spyang mo ral pa can cig tu bsgom/des bsgrub bya'i snying rtsa dbu mar thon nas khrag 'thung bar bsam zhing sngags bzlas te/ oM hUM shri ye de wI kA li kA li ma hA kA li hUM b+h+yoH/ /mA ma sha trUM a mu ka mA ra ya mA ra ya hUM hUM phaT phaT/ brgya rtsa re bzlas nas/rdzas ni ka na ka'i rtsa ba dang / zi ra nag po dang / dbang po lag pa dang / gnod sbyin lag pa dang / byi'u rug pa dang / skye ba dmar po dang / dur khrod sol ba dang / lan tshwA bsregs pa'i phye ma de rnams zhib tu btags pa'i phye ma'i sbyor ba byas pa la bsngags nas gzugs brnyan la gdab/phur bu rdo rje drag po dmar lhag ge bsregs la snying gar gdab/ de nas gzugs brnyan mtshon rnon pos gtubs la phye ma byas la/ smyo shing gi 'bras bu yod na rab/ med na lang tang tse'i 'bras bu brgya rtsa brgyad rtsab mo'i nang du btags nas gzugs brnyan gyi phye ma dang bsres la/dpal lha mo'i sbyor bas skra bshig gcer bur phud nas/ kha lho phyogs su bltas nas tsher ma'i me la sbyin sreg bya'o/ /de'i sngags la/ oM hUM shri ye de wI kA li kA li ma hA kA li hUM b+h+yo/ /ma ma sha trUM a mu kaM mA ra ya phaT/ un+man+taM ku ru hUM phaT/ces brgya rtsa brgyad bzlas te/ rdzas dang bstun zhing brgya rtsa brgyad du bzlas par bya'o/ /de ltar byas na smyo bar 'gyur ro/ /aM gi thal ba de nyid blangs te/ de nyid kyi spyi bor btab na lo nyi shu rtsa gcig tu smyo bar 'gyur ro zhes kyang bshad do/ /gzhan yang bdag gi rmi ltas su//bu mo nag mo khros pa yang / /gang zhig 'ching bas bcings gyur na/ /mtshan mo nag mor der shes bya/ /bsgrub bya nyi ma bdun na ni/ /'chi ste gshin rje'i yul du 'gro/ /gal te cung zad 'gor na yang / /nyin zhag bdun du bsam gtan 'di bya'o//bsgrub bya'i lus po skams pa rid pa/ mdog nyams pa dri ma can/ skra 'dzings pa snum pa/ khu ba rdul dang khrag 'dzag pa/ 'dar ba'i cha byad can zhig tu bsam/ yang na mngon sum du bsams te/ bdag lha mor gnas pa'i snying ga'i hUM las 'od zer nyi ma'i zer dang me stag lta bu las/bskal pa'i me bzhin du 'bar zhing 'ur sgra dang tog tog dang / chem chem can du drag po'i yi ge hUM du gyur te/ hUM de las rdo rje 'bar ba'i khab tu gyur par bsam/ rdo rje 'bar ba'i khab de dgra bo'i gzhang kha'i sgor zhugs te/ snying phug nas kha'i nang ngam spyi bo tshangs pa'i bu gar phyung nas cher 'bar bar bsams te/snying po'i sngags kyi mjug la/ che ge mo ha na ha na/ da ha da ha/ hUM hUM phaT phaT kyi sngags kyis kha sbub tu lhung bar bsam mo/ /de lta bu'i bsam gtan gyis/ lha chen po yang 'chi na/ 'on kyang 'khor ba na gnas pa'i mi lta smos kyang ci dgos/