CLOSE WINDOW

D1680
བོད་ཡིག

@##/ /rgya gar skad du/ badzra satwa no pi ka /bod skad du/ rdo rje sems dpa'i sgrub thabs/ /dkon mchog gsum la phyag 'tshal lo/ /gang zhig phan mdzad skyob pa'i mgon/ /thams cad don kun ston mdzad cing / /yang dag dkyil 'khor rdzogs pa'i mchog /rigs bdag sems dpa' la phyag 'tshal/ /rnal 'byor sgrub pa'i cho ga dag /rab tu sbyangs pas grol gyur cing / /de nas ye shes bzang po nyid/ /don mchog gsang ba bshad par bya/ /dam tshig 'khor lo rdzogs byas te/ /phyag rgya'i yan lag rnam sbyangs pas//dngos grub kun gyi cha shas dag /nye bar sbyor ba'i yul du 'gyur/ /sa phyogs mngon par dga' ba ru/ /bde ba'i stan la nyer 'dug ste/ /'gro rnams kun dgrol bsam pa yis/ /khrus rnams cho ga bzhin du spyad/ /dus gsum phyogs cha'i bye brag gis//drug gi chos rnams rang bzhin med/ /der snang rtog pa'i cha bral zhing / /'byung tshogs khams rnams ma skyes pa'o/ /'gro ba'i rigs rnams tha dad kyang / /mtshan nyid rten cing 'brel ba'i rgyun/ /bya dang byed tshogs yul can nyid/ /kun brtags ye shes chen pos non//thugs rje snang ba 'od ldan pa'i/ /kun 'byung rin chen phung po'i tshogs/ /rab tu sbyar bas khyab mdzad cing / /nye bar ston pa'i bdag nyid do/ /thugs kyi sngags kyis gsal byas te/ /kun nas spro zhing bsdus pa'i mthus/ /rdo rje sa gzhi la brten pa'i//ra ba gur sogs mtshon char bcas/ /shin tu gsal ba'i snang ba las/ /thabs kyi phyag rgya rdzogs pa nyid/ /gnyen po'i ye shes stobs dang ldan/ /'gro gnas nyon mongs rnam par dag /rigs mchog 'khor lo bzang po'i tshogs/ /kun nas bsdus pas brtan pa dag /rdo rje sems dpa'i bdag nyid sku/ /'od 'bar zla ba'i dkyil 'khor bzhin/ /zhal gcig phyag gnyis sgeg dang bcas/ /rin chen rgyan sogs kun gyis spras/ /g.yas pa rdo rje rtse lnga 'dzin/ /g.yon pa kha T+wAM dril bu 'khrol/ /dbu rgyan rtse bran lnga yis brgyan//byang chub sems kyi cha lugs kyis/ /'od 'bar kha dog sna lnga'i mdangs/ /stod smad na bzas rnam par bklubs/ /pad+ma'i dkyil 'khor la gnas pa'i/ /nyi zla gsal ba'i gdan dang bcas/ /mtshan dang dpe byad phun sum tshogs/ /rigs kyi sprul pas kun don mdzad//gnas gsum yi ge'i mtshan ma las/ /spro bsdus rigs kyi sems dpa' dag /rang gi cha lugs phreng sngags bcas/ /thugs ka'i ye shes sems dpa' nyid/ /ting 'dzin 'khor lo rdzogs pa'i gnas/ /yang dag bskul ba'i byin rlabs kyis//sangs rgyas kun gyis dbang bskur zhing / /rigs lnga'i cod pan rnam par mdzes/ /dam tshig phyag rgya rdzogs pa las/ /ye shes byin brlabs brtan par gzhug /lha mo mchod pas mnyes byas te/ /shin tu gar bcas rol mo'i glus/ / rigs kyi 'khor lo sna tshogs dag /yang dag bstod cing gnas kun brgyan/ /thugs ka'i sngags kyi phreng ba las/ /sna lnga'i phreng ba spro zhing bsdu/ /oM badzra satwa hUM hUM swA hA/ /ji srid brtan par ma gyur par/ /'od 'bar phreng bas kun du rgyas/ /stong pa ma yin mi stong min/ / dbu mar yang ni dmigs su med/ /shes rab pha rol phyin sbyor bas/ /thabs kyi snying rje'i bdag nyid rnams/ /de bas de nyid snying rje thabs/ /shes rab pha rol phyin par gsal/ /kun du 'gro dang 'dug pa dang / /nyal dang langs sogs thams cad du/ /lha yi ting 'dzin brtan byas te//thams cad sbyang zhing byin gyis brlab/ /bza' btung thams cad bdud rtsi'i tshogs/ /yul kun lha mo'i dkyil 'khor nyid/ /bskyed la phyag rgya'i 'khor lo yis/ /bya ba'i phrin las sna tshogs kun/ /'gro gnas 'jug pa'i don bzhin spyad/ /dkyil 'khor mnyes pas mchod bya ste//dga' ba'i sbyin sreg tshim pa'i mchog /tshogs kyi 'khor lo brtul zhugs bzang / /yi ge phyag rgya mtshan ma'i sku/ /rnam gsum mdzad pa sku gsung thugs/ /rtag tu gsang sngags sgra ldan pas/ /phyag rgya'i gnas kun mnyam sbyor zhing //thabs dang shes rab gnyis med pa'i/ /dngos grub sna tshogs nye bar 'grub/ /phyag rgya gcig pa'i bsam gtan mchog /rigs kun yon tan 'byung ba'i gnas/ /rdo rje sems dpa' gsal byed pa'i/ /theg pa bla med dam pa'i mchog /yang dag sbyar ba'i tshul 'di yis//ma lus mngon rdzogs sangs rgyas te/ /dngos grub 'khrigs pa'i phreng bas brgyan/ /rigs mchog phrin las mthar phyin shog /rdo rje sems dpa'i sgrub thabs slob dpon chen po rgyal po in+d+ra b+hU tis mdzad pa rdzogs so// //