CLOSE WINDOW

D1655
བོད་ཡིག

/ //[]@##/ /rgya gar skad du/ shrI bud+d+ha ka pA la sA d+ha naM nA ma/ bod skad du/ dpal sangs rgyas thod pa'i sgrub thabs zhes bya ba/dpal sangs rgyas thod pa la phyag 'tshal lo/ /khrag 'thung yon tan zab mnga' ba/ /dngos po kun gyi rang bzhin mchog /sems can kun la phan dgyes pa/ /sna tshogs sde la rtag tu 'dud/ /ji ltar bla mas bstan pa yi/ /bla ma brgyud rim las 'ongs pa//sems can gang gis shes 'gyur ba/ /de ltar bdag gis sgrub thabs bshad/ /dang po re zhig rnal 'byor pas bde ba'i stan la 'dug ste/ rang gi snying gar dbyangs yig dang po las skyes pa'i zla ba'i dkyil 'khor ro/ /de'i steng du yi ge hUM 'od zer lnga dang ldan pa de bzhin gshegs pa lnga'i bdag nyid bsam par bya'o//de nas hUM de'i 'od zer las byung ba gshin rje mche ba ma la sogs pa mchod pa'i lha mo rnams spros te/ phreng bzangs ma la sogs pa'i rnal 'byor ma nyi shu rtsa bzhis bskor ba sna tshogs sde ma la 'khyud pa'i he ru ka bdud rtsi lnga'i mchod pas mchod par bya'o//mchod pa thams cad kyis yang dag par mchod nas de'i mdun du dkon mchog gsum la sogs pa dran pa dang / sdig pa bshags pa la sogs pa bya'o/ /rnal 'byor gyi rgyud du ni snying rje dang por bsgom pa yin la/ rnal 'byor ma'i rgyud 'dir ni byams pa dang por bsgom par bya'o//de nas snying rje de'i rjes la dga' ba thams cad kyi tha mar btang snyoms so/ /de nas rang gi snying gar nyi ma la gnas pa'i hUM bsam par bya'o/ /de nas 'og gi rlung gi dkyil 'khor gyis sbar bas hUM las 'od zer 'phros pas lus mtha' dag yang dag par bsregs te/ thams cad stong pa nyid du bsam par bya'o/ /de nas yi ge raM las gyur pa las nyi ma/ nyi ma'i steng du yi ge hUM de dag yongs su gyur pa las sna tshogs rdo rje/ sna tshogs rdo rje'i dbus su hUM kho na bsam par bya'o/ /'di las rdo rje nag po'i 'od zer 'phros pas ra ba dang dra ba'i mtshams bcing bar bya'o//rdo rje gyur pa las sna tshogs rdo rje'i sa gzhi bsgom par bya'o/ /rdo rje sa gzhi'i dbus su chud par e gru gsum gyi cha byad chos kyi 'byung gnas bsgom par bya'o/ /de nas de'i dbus su 'byung ba chen po bzhi bsam par bya ste/ yaM gyur pa las rlung gi dkyil 'khor gzhu'i rnam pa lta bu ba dan gnyis kyis mtshan pa bsam par bya'o//de yang rtsa rnams bskyod pa'i gzugs can 'khor lo thams cad thim bzhin pa de'i dbus su rnal 'byor pa gnas par bya'o/ /'dis ni rlung gi dag pa gsungs so/ /raM gyur pa las me'i dkyil 'khor dmar po gru gsum 'bar ba bdun gyis mtshan pa bltas te/rtsa bco brgyad kyi gnas nas 'dzag bzhin par byed par bsam par bya'o/ /baM gyur pa las chu'i dkyil 'khor dkar po zlum po bum pas mtshan pa bsam par bya ste/ rtsa'i 'khor lo thams cad chu'i dkyil 'khor la thim par gyur pa bsam par bya'o/ /laM gyur pa las sa'i dkyil 'khor gru bzhi ser po rdo rjes mtshan pa bsam par bya'o//de ltar 'byung ba chen po bzhi'i dkyil 'khor la yi ge bzhis byin gyis brlabs pa bsgom par bya'o/ /de nas 'byung ba chen po bzhi gyur pa las khang pa brtsegs pa gru bzhi pa sgo bzhi rta babs bzhis brgyan pa dra ba dang dra ba phyed pas brgyan pa g.yer ka'i dra bas mdzes shing ka ba brgyad kyis nye bar spras pa bsam par bya'o//'di'i dbus su pad+ma 'dab ma brgyad pas spras pa bsam par bya'o/ /de'i dbus su chos kyi dbyings kyi bdag nyid kyi ro bsam par bya'o/ /der a la sogs pa'i dbyangs yig bcu drug nyis skor du byas pa'i yi ge sum cu rtsa gnyis gyur pa las zla ba'i dkyil 'khor ro//de ni me long lta bu'i ye shes rnam par dag pa'o/ /de la ka la sogs pa sum cu rtsa bzhi la ya ra la wa Da D+ha drug bsnan pas bzhi bcur 'gyur te/ de yang nyis 'gyur du byas pa'i yi ge brgyad cur gyur pa las nyi ma'i dkyil 'khor ro//de ni mnyam pa nyid kyi ye shes kyi rang bzhin no/ /'di dag gi dbus su yi ge hUM shes rab dang thabs kyis bsam par bya'o/ /de ni so sor rtog pa'i ye shes kyi rang bzhin no/ /hUM gyur pa las rdo rje'i lte ba la yang hUM bsam par bya'o/ /de ni bya ba sgrub pa'i ye shes kyi rang bzhin no//'di dag yongs su gyur pa las sna tshogs sde mas 'khyud pa'i sangs rgyas thod pa he ru ka bsgom par bya ste/ kun da dkar po dang zla ba 'dra ba'i 'od mtshungs pa zla ba ltar 'tsher zhing nor bu'i 'od ltar 'phro ba zhal gcig pa phyag bzhi pa/ g.yas na gri gug dang thod pa g.yon na kha T+wAM ga dang rdo rje man ngag las bsgom pa khong du chud par bya'o//'di'i shes rab ma sna tshogs sde ma ni zhal gcig phyag gnyis ma skra grol ma he ru ka la 'khyud de gnas pa/ gcer bu mgo'i phreng ba dang bral ba/ mchod phyir thogs pa/ bde ba thams cad rig cing gzugs mdzes ma/ g.yas na cang te'u dang gri gug /g.yon na kha T+wAM ga 'phyar zhing [(]phyog [,]phyag [)]na thod pa bsnams pa/ bcom ldan 'das kyi gzugs can ma bsgom par bya'o/ /shar gyi 'dab ma la phreng bzangs ma mdog dkar mo'o/ /byang gi 'dab ma la 'dod can ma mdog ser mo'o/ /nub kyi 'dab ma la 'jigs ma mdog dmar mo'o//lho'i 'dab ma la thub dka' ma mdog nag mo ste/ 'di dag nyi ma la gnas shing skyil krung phyed pa'i gar gyis bzhugs pa/ zhal gcig phyag gnyis ma gri gug dang thod pa phyag na bsnams pa bsam par bya'o/ /mtshams kyi 'dab ma bzhi la bdud rtsis gang ba'i thod pa bzhi'o//dbus kyi 'dab ma ni rdo rje phreng bas brgyan pa'o/ /rim pa gnyis pa'i rtsibs brgyad pa la/ pad+ma'i phreng bas brgyan pa ste/ de'i shar gyi rtsibs la dge ba'i ske rags ma'o/ /byang gi rtsibs la gzugs can ma'o/ /nub kyi rtsibs la rnam rgyal ma'o/ / lho'i rtsibs la byed ma'o/ /dbang ldan gyi rtsibs la thod can ma'o/ /me'i rtsibs la mtshon chen ma'o/ /bden bral gyi rtsibs la rgyud byed ma'o/ /rlung gi rtsibs la bdud byed ma ste/ rnal 'byor ma 'di dag ni mdog dmar mo nyi ma'i gdan la gnas pa/ zhal gcig phyag gnyis ma skyil krung phyed pa'i gar gyis gnas shing phyag na gri gug dang thod pa bsnams pa'o//rim pa gsum pa'i rtsibs brgyad pa la rdo rje phreng bas brgyan pa ste/ de'i shar gyi rtsibs la sgrol byed ma'o/ /byang gi rtsibs la 'jigs ma'o/ /nub kyi rtsibs la lA ma'o/ /lho'i rtsibs la mi pham ma'o//dbang ldan gyi rtsibs la dge ma'o/ /me'i rtsibs la 'dzur byed ma'o/ /bden bral gyi rtsibs la dus mtshan ma'o/ /rlung gi rtsibs la grags chen ma'o/ /rnal 'byor ma 'di dag ni mdog dkar mo nyi ma'i stan la gnas pa zhal gcig phyag gnyis ma gri gug dang thod pa bsnams pa'o//shar gyi sgor mdzes ma mdog dkar mo'o/ /byang gi sgor nor 'dzin ma mdog ser mo'o/ /nub kyi sgor skal bzang ma mdog dmar mo'o/ /lho'i sgor grags mthong ma mdog nag mo'o/ /rnal 'byor ma 'di dag ni ro dang nyi ma la gnas pa byams pa la sogs pa'i rang bzhin can g.yon brkyang ba'i zhabs kyis gnas pa gar mdzad bzhin ma/zhal gcig phyag gnyis ma gri gug dang thod pa bsnams pa he ru ka la kun du blta ba'o/ /sgo srung ma gtogs pa'i rnal 'byor ma rnams ni skyil krung phyed pa'i gar gyis gnas pa/ stag gi pags pas rked pa dkris shing /rus pa'i rgyan gyis brgyan pa/ 'od zer dmar pos gtibs pa/ skra ser po gyen du 'bar ba/ kha nas khrag 'thor ba thams cad khu ba dang ldan pa bsgom par bya'o/ /bcom ldan 'das rdzogs pa'i dus su rnal 'byor ma thams cad skad cig gi rnam pas hUM las rdzogs par 'gyur ba ste/de ltar lha mo nyi shu rtsa bzhi dang ldan par bdag nyid bsgom par bya'o/ /de nas lha mo nyi shu rtsa bzhis mchod nas thod pa'i bdud rtsi lnga gsol bar mdzad do/ /de nas sna tshogs sde ma'i pad+ma la a/ he ru ka'i rdo rje la hUM bsams te/ sna tshogs sde ma dang bcom ldan 'das gnyis kyi rdo rje dang pad+ma sbyor ba mdzad nas/yang lha mo nyi shu rtsa bzhi la 'dod pa spyad cing chags pa chen po la shin tu chags pas zhu bar gyur nas/ nyi ma'i dkyil 'khor gyi dbus su khu bas gnas so/ /khu ba de mthong nas byams pa la sogs pa'i rang bzhin gyi sgo srung ma rnams kyis glus bskul ba/ci ste 'jig rten snyan mnan na/ /ci phyir khyod ni mi dgyes gyur/ /gal te khyod bdag tshig gsan na/ /mi dgyes gyur pa mtha' dag thong / /mdzes sdug mas bskul ba'o/ /stong pa'i thugs ni ma mdzad par/ /nyid kyi dgongs pa grags par mdzod/ /srid 'jigs skye bo kun slu bas//rnal 'byor ma yi grogs po bzhengs/ /nor 'dzin mas bskul ba'o/ /sngon gtso gal te tshig gsan na/ /bya ba yal bar ma dor cig /khyod mi snang na 'gro ba kun/ /'gro bar ltung bas mi dgar gyur/ /skal bzang mas bskul ba'o/ /log pa'i nga rgyal ma mdzad par//grags pas stong pa'i rang bzhin mthong / /dngos po mtha' dag khyod thong la/ /rnal 'byor ma yi tshogs la spyod/ /gags mthong mas bskul ba'o/ /de ltar glus bskul ma thag tu/ khu ba'i gzugs las a dang hUM de gnyis las gri gug dang rdo rje/ gri gug dang rdo rje las he ru ka sku mdog sngon po zhal gcig phyag bzhi pa/gtso bo hUM zhes sgrogs pa'i sngon du gsungs pa'i mtshan ma dang ldan pa skyil krung phyed pa'i gar gyis gnas pa 'jigs shing khro ba'i bdag nyid stag gi pags pa'i na bza' ma nabs pa mgo bo rlon pa bzhi bcu rtsa dgu'i phreng ba 'chang ba/ mchod phyir thogs pa shin tu bzhad pa drag po chen po snying rje'i bdag nyid kyi gtso bo blta'o/ /dpung rgyan mgul do 'khor gdub dang / /gcer bu rked du ska rags bcings/ /rkang rgyan sil sil sgra sgrogs shing / /bdud kun rab tu 'joms par byed/ /ral pa'i cod pan yang dag ldan//sangs rgyas lnga yis dbu rgyan can/ /zla ba phyed pa 'dzin pa'i lha/ /dbu la sna tshogs rdo rjes mnan/ /'khor lo rna cha mgul do dang / /gdu bu dang ni ska rags nyid/ /phyag rgya lnga ni 'dzin pa'i mgon/ /thal ba'i rdul gyis byugs shing 'jigs/ /thod pa mu tig gis brgyan pa//dpa' bo 'khor ba sgrol bar byed/ /byang chub sa bon rang bzhin can/ /dbugs mi g.yo bar bsgom par bya'o/ /gtso bo'i shes rab chen mo sna tshogs sde ma rnal 'byor ma ni gcer bu mgo bo'i phreng ba dang bral ba rgyan med cing mchod phyir thogs pa dang bral ba thams cad bde ba dang ldan pa zhal gcig phyag gnyis ma skra grol ma sku mdog dkar mo zhal shin tu 'gyur ba mche ba cung zad gtsigs pas 'jigs pa/g.yas na cang te'u dang gri gug /g.yon na kha T+wAM ga dang thod pa bsnams pa pha rol tu phyin pa'i lha mo de ltar bsgom par bya'o/ /de ni bdag nyid kyi snying ga dang /dpral ba dang / spyi gtsug dang / dpung pa gnyis dang / mig gnyis dang / gsang ba dang / lus thams cad kyi gnas bdun du/ oM hAM haiM heM hAM hAM hAM zhes pa'i sngags 'di rnams kyis cho ga bya'o/ /snying gar hUM las thugs rdo rje'o/ /mgrin par AHlas gsung rdo rje'o//spyi bor oM las sku rdo rje'o/ /sku dang gsung dang thugs byin gyis brlabs nas ye shes sems dpa' spyan drang bar bya ste/ snying gar zla ba la gnas pa'i hUM gi 'od zer lcags kyu lta bu bsgoms pa dang / oM bud+d+ha ka pA li ni AHkhaM graM drUM shrUM aHaHaHhUM hUM hUM phaT/ ces pa bsgyings pa dang bcas pas sngags bzlas pas ye shes sems dpa' bkug ste/dam tshig sems dpar bcug pas/ chu dang 'o ma ltar thim par bsam par bya'o/ /de ltar dpa' bo rdzogs par mthong nas rtsa'i 'khor lo 'dzag ste/ 'dzag pa de las rnal 'byor ma rnam pa sna tshogs pa'i snying rje chen po dang ldan pa de bzhin gshegs pa thams cad kyis byin gyis brlabs pa/gos sna tshogs gyon pa gzugs gzhon pas brgyan pa/ lo bcu gnyis ma'i rnal 'byor ma brgyad bskyed de nam mkha'i phyogs su gnas te/ bum pa byang chub sems kyis yongs su gang ba a mra'i shing los kha brgyan pa brgyad thogs pa de thams cad rab tu dang zhing bzhad pa'i zhal gyis rgyal gyur he ru ka zhes smra ba/mgon pos mthong nas dbang bskur ba'i mchog la gsol ba gdab par bya'o/ /brtse ldan grags pa chen po yi/ /rdo rje rnal 'byor ma dbang bskur/ /'khor ba'i 'dam du bying ba'i bdag /dbang bskur ba yis bdag sgrol mdzod/ /ji ltar bu tsha med pa'i khyim/ /shi ma thag tu stong par 'gyur/ /de bzhin dbang dang bral na ni/ /ye shes kun gyis stong par 'gyur/ /tshigs bcad 'dis gsang ba'i dbang bstan to/ /ji ltar pi wang sbyor kun tshogs/ /rgyud dang bral na brdung mi rung //de ltar dbang dang bral na ni/ /sngags dang bsam gtan 'grub mi 'gyur/ /tshigs bcad 'dis ni shes rab ye shes kyi dbang bstan to/ /dbang med na nyes pa che bar 'gyur ba de ltar yang gsungs te/ rmongs pa gang zhig dbang med par/ /bdag ni dbang bskur zhes smra ba//ji srid sangs rgyas bzhugs kyi bar/ /slob mar bcas te dmyal bar 'gro/ /tshigs bcad 'dis ni dbang med pa'i nyes pa bstan to/ /de ltar mkhyen mdzod rnal 'byor ma/ /slar yang bdag la dbang bskur gsol/ /gal te dbang bskur skye med na/ /he ru ka ru bdag gyur cig /de nas rnal 'byor ma rnams kyis rgyal gyur cig ces pas bcom ldan 'das la khrus gsol zhing dbang bskur ro/ /phyi dang gsang bar bcas pa'i dbang bskur ba tsam gyis nam mkha'i ngos nas rnga'i sgra grag cing tsan+dan dang me tog gi char 'bab par 'gyur ro/ /dbang bskur zin nas rnal 'byor ma rnams rtsa'i 'khor lo la thim par gyur to//dkyil 'khor pa'i 'khor lo thams cad la rang gi rigs kyis rgyas gdab par gyur to/ /de nas glu'i bstod pa dang / mchod pa dang bdud rtsi lngas bcom ldan 'das mchod par bya'o/ /de nas yaM gyur pa las rlung gi dkyil 'khor/de'i steng du raM gyur pa las me'i dkyil 'khor/ de'i steng du aM gyur pa las thod pa/ thod pa'i dbus su bi mu ra shu ma gyur pa las bdud rtsi lnga'o/ /go ku da ha na gyur pa las sha lnga bsam mo/ /de nas rlung gis me sbar zhing mes thod pa bsros pa 'di las rdo rje'i rnam pa lta bu'i rlangs pa 'byung ngo //yang bsil bar byas pa'i phyir thod pa'i steng mtho gang tsam du oM gyur pa las zla ba'i dkyil 'khor bdud rtsi'i rang bzhin oM gyis byin gyis brlabs pa de las kha ba lta bu'i bdud rtsi babs pas bsil bar 'gyur ro/ /de kho na nyid gsum gyis lha rnams tshim par bya'o//de nas dkyil 'khor gyi 'khor lo rtag tu rmi lam dang sgyu ma lta bur bsgom par bya'o/ /lte bar AH/ snying gar hUM/ mgrin par oM/ dpral bar sgra dang thig ler ldan pa mi shigs pa'i haM ngo / /sa sogs 'byung ba chen po bzhis/ /'khor lo bzhi ru rab tu phye//thun mtshams bzhi ru byin gyis brlabs/ /pad+ma bzhi las yang dag byung / /dga' ba bzhi yi rang bzhin gyis/ /sbyor ba bzhi la kun du brten/ /mchog tu dga' ba'i gzugs kyis ni/ /bya ba byed pa po rang bzhin/ /rdo rje sems dpa' dpal gzugs can//ci bde ba ru 'di ru rol/ /rlung gi 'gro 'ong bsgoms pa yis/ /thim 'gyur bde chen skye bar 'gyur/ /rtsa brgyad phyogs kyi 'dab ma ni/ /'byung chen bzhi yi rang bzhin no/ /mtshams kyi 'dab ma bzhi pa ni/ /bdud rtsi lnga yi rang bzhin gyis/ /de ru mchod pa'i gzugs su gnas//sku gsung thugs kyi dbye ba yis/ /nyi shu rtsa bzhir yang dag gsungs/ /de nyid phyi yi dkyil 'khor ni/ /nyi shu rtsa bzhi'i rang bzhin no/ /sna tshogs sde dang lhan cig tu/ /bcom ldan 'das ni dbus su bzhugs/ /sprul pa'i 'khor lo drug cu rtsa bzhi'i dbus su oM thig le'i gzugs can no//snying ga'i 'khor lo brgyad kyi dbus su hUM thig le'i gzugs can no/ /oM gyi 'od zer steng du 'gro bzhin pa dang / hUM gi 'od zer 'og tu 'gro bzhin pa gnyis ka 'dus te thig le'i gzugs la thim pa de'i tshe bde ba thob ste/ de ltar na 'byung ba dang 'jug pa bsgom par bya'o//zla ba drug tu sbyor ba la goms par byas pas 'dir 'grub par som nyi med do/ /bsgoms pas skyo bar gyur na sngags kyi bzlas pa bya'o/ /oM hrIHbud+d+ha hUM ga pA li ni A/ 'jug pa la oM/ 'byung ba la hrIH/ gnas pa la bud+d+ha/ bde ba la hUM/ nub pa la ka pA li ni/ ldang ba la a'o/ / de ltar yan lag drug gi nang gi bdag nyid kyis sngags kyi bzlas pa bya'o/ /'di nyid la goms pa'i sbyor bas sangs rgyas su 'gyur te/ gzhan du ni ma yin no/ /rtsa ba'i sngags so/ /oM bud+d+ha ka pA li ni/ oM hrIHhai hUM phaT/ snying po'i sngags so/ /oM ka pA la badzrI ni hUM haM dur k+She hUM phaT/ nye ba'i snying po'i sngags so//oM ma hA ka pA la badzre tse tri pu tsa tri a lam+ba ne pri na ya sarba b+hU ta mA rAn mA ra ya sarba mA rAn kI la ya sarba duSh+TAn/ uts+tsha Ta ya sarba big+h+nAn bi tra ya b+ho b+ha ga ba ti yak+Sha rak+Sha/ sa pi shA tsa na sho Sha ya tra ya sap+ta pA tA la ga ta na sa ra sa ra pra sa ra hUM hUM hUM phaT phaT phaT/ thun bzhi ru dkyil 'khor lan bzhir spros te/'dir gtor ma sbyin par bya'o/ /'byung po thams cad kyi gtor ma'i sngags so/ /sangs rgyas thod pa'i lha nyi shu rtsa lnga'i bdag nyid kyi sgrub thabs/ slob dpon chen po sa ra ha'i zhal snga nas kyis mdzad pa rdzogs so// //