CLOSE WINDOW

D1654
བོད་ཡིག

/mtshon cha rengs par bya ba'i rab tu sbyor ba gsungs pa/ gzugs brnyan de'i zhes bya ba la sogs pa ste/ ji skad du gsungs pa'i gzugs brnyan de'i snying gar ji skad bstan pa'i rab tu sbyor ba de dag bya ba ma yin te/dur khrod kyi mes shing bang ga gtsor snying gar bcer te rab tu sbyar bar tshangs pa'i rdo rje ste/ rnam par snang mdzad kyi gzugs brnyan yog par bskus nas bsregs pa'i thal ba blangs pa dang / rdo rje las byung ba zhes bya ba la sogs pa gsal lo/ /de lta bu'i thal ba'i sbyor ba 'dis gdug pa can rnams rnam par 'jig par 'gyur ba yang blta'o//gdug pa can thams cad kyi zhes bya ba la sogs pa ste/ rab tu sbyor bas bsgrub pa'i thal ba des rnal 'byor pa'i lus la byugs nas khros te bltas pa tsam gyis drag po stong yang mgo 'chad par 'gyur ro//de bzhin du sems kyis byas pa tsam gyis smyo bar byed do/ /de bzhin du rab tu grub pa'i thal ba 'di nyid til mar bzang po dang bsres nas mig la byugs na dpag tshad stong na gnas pa'i dngos po rnams kyang mthong bar 'gyur ro//de dngos po de rnams mthong bar gyur na rnal 'byor pa des sbom po dang tha ltag gis brdegs pa tsam gyis de dag rang nyid 'ongs nas gam du nye bar gnas par 'gyur ro/ /de bzhin du thal ba de nyid kyi rab tu sbyor ba gzhan yang gsungs pa/ thal ba de gi wang gis zhes bya ba la sogs pa ste/rnal 'byor pas rab tu sbyor ba 'di byas na 'dis ni dmag gi tshogs stong ngam 'bum yang khas bub tu 'gyel bar 'gyur ro/ /bkrus pa tsam gyis zhes bya ba ni rnal 'byor pa'i mthe bo de 'o mas bkru bar byas na dgra bo rnams slar yang 'tsho bar 'gyur ro//gzhan yang thal ba'i sbyor ba de nyid kyis gzhan du sbyar ba las gser du 'gyur bar blta ba yang thal ba de nyid ces bya ba la sogs pa'o/ /shing bang ga'i khu ba zhes ni shing bang ga'i bcud do/ /de nas rdo rje las byung bar gzhug go/ / lcags kan te zhes bya ba phye mar byas pa yang der blugs so/ /rdo rje dbyug pa'i bcud ni mi bskyod pa'o/ /mkhris chen gyis bsnos nas zhes bya ba ni mi'i mkhris pas bsno ba'o/ /de nas gzhan yang gzhon nu ma'i rdo rje'i rtsis kyi don gyi rab tu sbyor ba gzhan dag gsungs pa/yang thal ba de nyid kyis zhes bya ba la sogs pa ste/ thal ba de spyi bor byin te rdo rje las byung bas kyang gzhon nu ma'i der rab tu brlan par bya'o/ /gzhan yang thal ba de nyid kyis de la thig le yang bya'o/ /de la bdug pa lngas bdugs na zhes bya ba ni gzhon nu ma de la bdud rtsi lnga'i bdug pas bdugs na'o//rab tu sbyor ba de lta bu las gzhon nu ma thams cad smra bar 'gyur ro/ /gzhon nu ma de lta bu'i de'i rab tu sbyor ba 'di byas nas/ gzhan yang grub pa'i ral gri bdun po kha nas 'thon par 'gyur ba'i sbyor ba gzhan dag sbyar bar brjod pa/don 'grub pa'i 'bras bu la zhes bya ba la sogs pa ste/ don 'grub pa'i 'bras bu ni yungs kar gyi 'bras bu'o/ /rab tu sbyor ba 'dis rig pa 'dzin pa'i dngos grub skyed par byed do/ /gzhan yang thal ba de nyid kyis ri lu'i dngos grub bsgrub pa gsungs pa/thal ba de zhes bya ba la sogs pa ste/ lcags gsum gyis dkris nas ri lur byas te zhes bya ba ni zangs ma dang / dngul dang / gser gyi thal ba de phur te rnal 'byor pas ri lu'i dngos grub grub par bya ba'i don du ri lur bya ba yin no/ / de bzhin du gzhan yang grub pa'i sngags bstan pa de yang ji lta ba bzhin yin pas khong du chud pa sla'o/ /'di dag ni rnal 'byor ma'i rgyud bla na med pa sangs rgyas thod pa zhes bya ba rgyud kyi rgyal po'i le'u gnyis pa'i 'grel pa/ slob dpon mkhas pa chen po pad+ma rdo rje zhes bya ba dngos grub chen po brnyes pas mdzad pa'o// //sangs rgyas thod pa'i rgyud kyi dka' 'grel de kho na nyid kyi zla ba zhes bya ba slob dpon mkhas pa chen po pad+ma rdo rjes mdzad pa rdzogs so// // @##/ /rgya gar skad du/ shrI bud+d+ha ka pA la ma hA tan+t+ra rA dza TI kA a b+ha ya pa dwa ti nA ma/ bod skad du/ dpal sangs rgyas thod pa'i rgyud kyi rgyal po chen po'i rgya cher 'grel pa 'jigs pa med pa'i gzhung 'grel zhes bya ba/ dpal rdo rje sems dpa' la phyag 'tshal lo//bskal pa'i mthar thug mchog tu dul ba chen por 'phro ba dpag med 'gro ba'i yum dang rol pa can/ /sna tshogs sde ma dang 'dus shin tu che ba'i mchog tu dga' ba'i sku can srid pa'i 'gro ba ni/ /rdzogs pa'i byang chub phun tshogs lhan cig skyes pa'i bde ba'i ro la rol pa snying la 'jug pa yis//spyod pa dam pas bsgom bya de phyir 'jigs pa med pa 'di yi ltar gsang med 'di bstan par byed/ /rdo rje lha mos gnang ba rnams/ /rmi lam du ni thos pa la'ang / /des byin brlabs las 'jigs med ni/ / sangs rgyas thod 'dir 'grel pa byed/ /nges par bdag ni rdo rje can/ /dang po'i mgon po des byin brlabs/ /gang phyir des gsungs tshig rnams ni/ /rang don rna bar smra ba bzhin/ /dga' ba bsten pa'i skye bo dam pa legs pa rnams ni gtsang dang dga' ba ste/ / de yod tshu rol mthong ba ngan par 'gro zhing don ring srid par 'jug pa rnams/ /'jigs pa med pa'i gzhung 'grel las ni chos kyi gnas mchog ci yang 'char byed cing / /bzod par byed cing dbu mar gnas las mnyam med phun tshogs reg par byed/ /sangs rgyas thod pa'i rgyud le'u bcu bzhi'i bdag nyid can 'di'i ston pa po dang brjod bya ni bcom ldan 'das sangs rgyas thod pa'o//de lta na yang bstan par bya ba dang ston pa po'i 'brel pa dang / rjod par byed pa dang brjod par bya ba'i 'brel pa brjod do/ /gdul bya rnams kyis sangs rgyas thod pa'i don rtogs pa ni dgos pa'o//rdo rje lta bu bde ba chen po dang ro gcig pa 'gro ba mtha' dag la phan par byed pa phyag rgya chen po'i dngos grub ni dgos pa'i dgos pa'o/ /de la 'di skad bdag gis zhes pa la sogs pa nas gyur to zhes pa'i mthar thug pa'i dang por gleng gzhi ste/'di yod pa na stong pa 'jug pa'i phyir ro/ /dus dang yul dang ston pa po dang 'khor rnams tshogs pa ni ston pa'i gleng gzhi ste/ 'di med na ston pa mi 'thad pa'i phyir ro/ /de la 'di skad bdag gis zhes pas de'i chos bsdu bar bya zhing /de bzhin du go rims su rtogs par byas nas zhes bcom ldan 'das kyis chos yang dag par sdud pa'i mdor gsungs te/ de'i phyir sdud pa pos de kho na bzhin du bsdus so/ /'dir sdud pa po su yin/ ming ngas par 'di ci zhe na/ bcom ldan 'das kyis bka' gnang ba kho na des brjod pa'i phyir 'dir bcom ldan 'das kho na'i gsung yin no//yang 'di la rgyud gtad pa nyid kyi phyir phyag na rdo rje'o zhes gsungs so/ /de la bsdu bar bya ba phyin ci ma log pa rgyud kyi don mtha' dag 'di skad ces pa'i tshig phrad 'dis gsal bar byed do//de nas 'di skad kyi yi ge 'di ni rgyud kyi don mtha' dag gi don dang ldan pa rtogs par bya'o/ /rgyud kyi don yang shes rab dang thabs kyi rang bzhin nyid kyis yi ge gnyis kyi yan lag gi ngo bo gnas so zhes 'doms so/ /bdag gis zhes pa sdud pa po bdag gis so//thos pa zhes pa ni rna ba'i rnam shes kyi tshig 'bru dang / yid kyi rnam shes kyi don rtogs kyi/ 'di bdag gis mngon sum du byas pa ni ma yin te/ bcom ldan 'das kho nas chos 'di la thams cad rtogs pa'i phyir ro zhes chos la gus par ston to//de ltar spyir bstan nas khyad par du gleng gzhi de rim gyis ston pa/ dus gcig na zhes pa la sogs pa ste/ gcig ni bsod nams dang ye shes kyi tshogs du mas bskrun pa tshes dang rgyu skar la sogs pas gcad du med pa bsam gyis mi khyab pa'i dus kyi khyad par 'ga' zhig go//de yang 'dir skad cig bzhi pa'i ngo bo dus zhes bshad do/ /dus gcig po de ni bcom ldan 'das bzhugs pa rnams su gyur to zhes pa'i tshig bsgyur bas bzhugs par gyur to zhes 'brel to/ /'di la b+ha ga yod do zhes pa bcom ldan 'das te/de yang dbang phyug la sogs pa'i yon tan rnams so/ /de gsungs pa/ dbang phyug gzugs dang grags pa dang / /dpal dang ye shes brtson 'grus rnams/ /phun sum tshogs pa drug rnams ni/ /skal pa zhes ni bshad pa yin/ / zhes bya'o/ /yang na bdud bzhi rnams bcom pas na bcom ldan no/ /yang na chos thams cad nges par rtog pa nyon mongs pa'i bdud la sogs pa nges par sel ba'i shes rab ni bcom pa ste/ de 'di la de'i bdag nyid du yod do zhes pas bcom ldan no/ / de rdo rje rtse mo'i rgyud du gsungs pa/ shes rab gzhom bya nyon mongs te/ /de phyir shes rab bcom par brjod/ /ces so/ /de bzhin gshegs pa yang de yin la thams cad kyang yin pas de bzhin gshegs pa thams cad de/ mi bskyod pa la sogs pa rnams te/de rnams kyi sku dang gsung dang thugs rnams so/ /rdo rje ni stong pa nyid do/ /de'i ngo bo chen po ste rang dang gzhan gyi don phun sum tshogs pa dag a laM ste/ shin tu bla na med par byed pa ste bya ba dang bya las gang gi yin pa de rgyan chen po ste/ rdo rje snyems ma shes rab kyi pha rol tu phyin pa'i bdag nyid do//de'i dkyil snying po byang chub kyi sems len cing 'dzin pas na dkyil 'khor ni chos 'byung ngo / /de bzhin gshegs pa thams cad kyi sku dang gsung dang thugs rnams kyang de yin la/ rdo rje rgyan chen po'i dkyil 'khor yang yin pa'o//'di'i de bzhin gshegs pa thams cad kyi sku dang gsung dang thugs kyi ngo bo nyid kyang de dang ro gcig pa nyid kyi phyir ro/ /de nyid kyi phyir yang gru gsum ste de'i dbus su'o/ /'dir gzhal yas khang ma gsungs pa nyid na yang chos 'byung gi dbus na gnas pa'i gzhal yas khang du zhes don gyis rtogs par bya ste/dper na grong khyer na phyug po gnas so zhes pa grong khyer na gnas pa'i khang bzang na zhes don gyis 'gyur ba bzhin no/ /de ltar ma gsungs pa ni bde ba chen po'i sa gzhi gtso bor nye bar bstan pa'i don du ste/gzhal yas khang yang de dang ro gcig pa kho nas so/ /yang na rdo rje ni stong pa nyid chos 'byung ste/ der rgyan chen po'i dkyil 'khor ni gzhal yas khang de'i dbus su'o/ /de ltar gyur pa'i gnas su bcom ldan 'das bzhugs par nye bar bstan pas stong pa nyid dang snying rje dbyer med pa lhan cig skyes pa'i sku gsal bar rig par byas la/sku de kho nas rgyud ston pa yang de dang ro gcig par bstan to/ /de ltar dus dang yul dang ston pa po phun sum tshogs pa brjod nas/ 'khor phun sum tshogs pa gsungs pa/thams cad ces pa la sogs pa ste/ mi bskyod pa la sogs pa de bzhin gshegs pa rnams dang / sna tshogs sde ma la sogs pa rnal 'byor ma rnams dang 'phags pa kun dga' bo la sogs pa rnams dang yang bzhugs so/ /'dod chags dang bral ba bzung ba ni nyan thos kyi theg pa can nye bar mtshon pa nyid kyi phyir pha rol tu phyin pa'i theg pa ba rnams kyang rdo rje theg pa kho nas bde ba chen po'i rang bzhin rdzogs pa'i byang chub 'grub po zhes shes pa'i don du'o//'jig rten dbang phyug la sogs pa rnams kyang der 'dus par gyur to//gleng gzhi'i ngag 'di yang ji ltar srid pa ltar kho bos rgyas pa dang bcas par dpal yang dag par sbyor ba'i rgya cher 'grel du bshad zin pas blo bzang rnams kyis nges par bya'o/ /gleng gzhi dang rjes su mthun par bcom ldan 'das kyis bstan pa sdud pa pos de nas zhes pa la sogs pas skabs byed do//rdo rje stong pa nyid kyi rang gi ngo bo'i ye shes lnga rnams 'dzin no zhes pas stong pa nyid dang snying rje dbyer med pa lhan cig skyes pa bde ba chen po'i rang bzhin rdo rje 'dzin pa'o/ /phyag rgya chen po bde ba chen po dang ro gcig pa 'gro ba la phan pa byed pa stong pa nyid de kho na rdo rje ste/sgrib pa thams cad 'byed pa'i phyir ro/ /gnas kyang ste rang dang gzhan gyi don phun sum tshogs pa'i gzhi'o/ /de kho na sngags dang rgyud rnams kyi tshad mas 'thad pa nyid kyi phyir mchog tu nye bar bstan pa nyid kyis ni legs par bstan to//des na de bzhin gshegs pa thams cad kyi ste rnam par snang mdzad la sogs pa rnams kyi bdag pos zhes pa bdag po ste/ bdag po nyid kyis ni 'di ston pa po bla na med pa'o zhes gsal bar byed do/ /rdo rje ni bdag nyid kyi ste pad+ma ni sna tshogs sde ma'i'o//de dag yang dag par sbyor bas so/ /btsun mo ni sna tshogs sde ma ste/ de'i b+ha ga ni chos 'byung ngo / /nang du ni rdo rje byang chub kyi sems dang / pad+ma spyi bo la sogs pa rnams te/ de rnams kho na btsun mo'i ste/ a ba d+hU tI'i b+ha ga rnams so//yongs su mya ngan las 'das pa ste byang chub sems kyi ngo bo zhu bar gyur zhes pa'i don to/ /don dam par ni btsun mo ni shes rab ste/ sna tshogs sde ma ming gzhan kun du bzang mo'o/ /de'i b+ha ga ni stong pa nyid do/ /mang po'i tshig ni sna tshogs sde ma ni btsun mo thams cad bsdus pa'i ngo bo nyid kyi phyir ro//der bcom ldan 'das phyag rgya chen po rdo rje'i gnas kyi shes rab kyis srid pa la mi gnas shing snying rjes zhi ba la mi gnas pa'o zhes pa mi gnas pa'i mya ngan las 'das pas yongs su mya ngan las 'das te/ de'i bdag nyid du gyur nas ro gcig pa'i rang bzhin gyis tha dad mtha' dag gis ma reg pa las 'khor ba'i bar du dpag tu med pa'i de bzhin gshegs pa dang /byang chub sems dpa' dang / rnal 'byor ma dang / 'dod chags dang bral ba dang / phyag rgya dang / dkyil 'khor dang / sngags bye ba phrag brgyad cu po rnams dang lhan cig rnam par rtog pa med par gyur kyang sngon gyi [(]'phan [,]'phen [)]pa'i dbang las sems can thams cad la ci bya ba'i tshul gyis bzhugs so zhes bya ba'i don to/ /de ltar na yang mchog tu zab pa'i chos 'di bdag gis rtogs kyi/ sems can rnams kyang phal cher bsod nams zhan pa/shes rab ngan pa theg pa dman pa la mos pa rnams te/ des na su zhig 'di la mos par 'gyur zhes gdul bya rnon po rnams gus pas rings pa'i don du mya ngan las 'das te/ khong du chud pa'i chos ston pa la bya ba med cing mi spro ba'i zhes pa'i don ston to//de zhes pa srid pa dang zhi ba la mi gnas pa dang mi spro ba'o/ /mchog tu brtse ba dang shes rab dang ldan pas ci bya ba'i tshul gyis bzhugs pa ji ltar mi spro zhes rmad du gyur pa thob pa'o/ /sna tshogs sde ma la zhes pa/ sna tshogs te rnam pa sna tshogs pa dang rmad du byung ba'i sde ste bde ba chen po gang gi yin pa de la'o/ /rnal 'byor ma zhes pa/ shes rab thabs dang snyoms 'jug pa/ /rnal 'byor zhes par mngon par brjod/ /de 'di la shin tu yod pa'o/ /de nyid kyi phyir dris pa lan gdab pa la nus pa'o zhes 'dri'o//gang gis sems can rnams nus pa rang dang gzhan la phan pa rdzogs par byed phod pa 'thob pa'i thabs 'ga' zhig yod dam/ rgyud la sogs pa rnams su sngags kyi thabs bstan pa la dgos pa 'di ga las she na gsungs pa ste/'dir bsdus pa'i don ni/ gang rgyud la sogs pa thub pa'i dbang po rnams kyis gsungs pa de rnams la/ sngags med na nus pa ma mthong zhing / sngags la ni dgos pa mang po rnams skye ste/ de ltar ni chung ngu dang 'bring dang che ba'i bsod nams can gyi sems can rnams kyi rim pa ji lta bar bye ba dang /'bum dang / khri bzlas pa rnams kyis 'grub par rdo rje can chen pos gsungs na/ nga yang ci chung ngu la sogs pa'i nang du rtogs sam ma yin zhes the tshom dang ldan pa ni sems zhen pas ji ltar sngags zlos/ 'dod chags la sogs pas nye bar bcom pa log pa'i shes pa can rnams ji ltar 'dod chags la zhugs pa de las sngags zlos/ 'dod chags la zhugs pa'i sems can rnams zhes klog pa la ni de rnams kyi zhes brtag par bya'o/ /mi shes pa rnams kyi rgyud dang sngags zlos pa la rtsis bgrang ba srid kyang ji ltar nyon mongs pa can gyi sems kyis yin/yang dag pa'i shes pa can gyi yang shin tu ste/ dngos po dang dngos po med pa'i mthar sems dmigs pa ni gang gis nges par brtags pa ste/ niSh+Tha'i mtha' can ni 'ga' zhig tu pha rol tshig phrad do//de'i sngags ni ji ltar sngags te sngags su bya ba bzlas bya yin te/ sems rtogs pa de las yid kyi ngo bo yid dang / skyob pa'i ngo bo skyob pa ste stong pa nyid dang snying rje dbyer med pa don dam pa'i sngags yin cing de kho na las rang dang gzhan gyi don nus pa'i dngos grub yin na sngags bzlas pas ci zhig ces pa dgongs pa'o//thams cad du ji ltar zhes pa dri ba la'o/ /de ltar zhes pa brjod pa'i rim pas rtog dpyod dang ldan pas mi bzlas te/ de la yang zlos pa yod na yang dngos grub gzhan du dngos grub ma yin pa'o//bskal pa skar ma lta bu bye ba zhes pa gsum pa'i don la dang po'o/ /nam mkha' la skar ma dpag tu med pa bzhin du dpag tu med pa'i bskal pa bye bas so/ /de ltar zhes pa ji ltar dgos pa la bzlas pa mi srid pa de ltar don la the tshom za ba la sogs pas res 'ga' bzlas pa yod pa yang dngos grub kyang ngo //bcom ldan 'das zhes pa bcom ldan 'das kyi'o/ /lha mo chen mo ni btsun mo mchog go/ /de nyid kyi phyir bcom ldan 'das bzhin du rgyud thams cad kyi bdag mo ste/ rgyud thams cad ston par rung ba nyid kyis so//de ltar ni 'dis rdo rje phag mo'i gzugs kyis 'bum pa mngon par brjod pa dang / rdo rje mkha' 'gro'i rgyud dag bstan/ /zhes gsungs pa ste/ bcom ldan 'das kho na 'di'o zhes pa ni dgos pa'o/ /dbang phyug ma ni thams cad du thogs pa med cing bsam gyis mi khyab pa'i nus pa dang ldan pa'i phyir ro//gzigs pa tsam gyis bcom ldan 'das/ /zhes pa bcom ldan 'das kyi'o/ /thod par zhes pa thod pa las te/ kam bde ba skyong bar byed ces pa ka pA la byang chub kyi sa bon gzhom du med pa'o/ /de las sngags phyung ngo //'di ni 'dir dgongs pa ste smin ma'i dbus su ye shes kyi sa bon thig le'i rnam par bsgom par bya'o zhes gsungs pa'i phyir/ smin ma'i dbus su thig le'i rnam par sems sgom pas brtan par byas nas sngags spro bar bya'o zhes pa'o/ /yang na bcom ldan 'das dang 'brel pa'i thod pa las te sna tshogs sde ma'i chos 'byung las so//gang gsungs par 'gyur ba/ de'i thod par dkyil 'khor dang sngags dang rgyud legs par rnam par gnas so zhes 'di ni 'dir man ngag ste/ bcom ldan 'das kyi bde ba chen po'i 'khor lo'i gnas gzhom du med pa las 'ongs te/'og gi lam nas byung nas bcom ldan 'das ma'i chos 'byung du zhugs te/ a wa d+hU tI'i sgo smin mtshams kyi dkyil nas sngags byung ba ni lugs 'byung yin zhing lugs mi mthun gyis 'jug pa'o//don 'di nyid ni 'di ltar zhes pa la sogs pa nas thod par zhugs so zhes pa'i mthar thug pa gsal bar mdzad do/ /bcom zhes pa bcom nas so/ /sna tshogs sde ma ni 'dir bcom ldan 'das ma sna tshogs sde ma'i rtsa a wa d+hU tI'i ste/de'i sgo smin mtshams kyi dbus su zhugs shing byang chub kyi sems dang lhan cig zhu bar gyur nas 'og gi thod pa chos 'byung gi nang du zhugs so/ /de nas byung nas bcom ldan 'das kyi rdo rje'i lam gyi steng na a nA ha la rim pa las bzlog pas zhugs pa'o//'di'i zhes pa 'di'o/ /klu'i rnams zhes pa klu rnams so/ /klu thams cad ni rdzu 'phrul chen po zhes pa dang 'brel to/ /nor rgyas dang stobs rgyu la sogs pa dang / gzhan yang gang su yang rung ba dug 'byung ba rnams te/ mthong ba dang / mche ba dang / kha chu dang / reg pa dang / 'od zer dang / za 'phro'i dug rnams las 'byung ba'o/ /bka' bsgo ba ni kye lha mo bdag cag la'o/ /smra ba ni smra ba rnams so/ /gsungs pa ni sna tshogs sde mas so/ /de ltar zhes pa sangs rgyas zhes pa la sogs pa thos pa'i de ma thag kho nar ro//bcom ldan 'das kyis thod pa ni bshad zin to/ /kha phye nas te rnam par gsal bar gyur nas so/ /smin mtshams na gnas pa'i thig le las A li kA li'i rang bzhin nyid kyi phyir/ glegs bam chos thams cad bsdus pa'i rang bzhin bris pa'i 'dab ma'i bdag nyid sngags bzhin du byung ngo //yang na pu zhes pul+lI ra mA la yar lta zhes pa rgyas par byed de kaM bde ba'o zhes pa pusta ka byang chub kyi sems so/ /de kho na bris pa'i 'dab ma'i bdag nyid du glegs bam du 'gyur ro zhes pa'i don to/ / nam mkha' las zhes pa bzlas nas bshad pa las so/ /nam mkha' las te chos 'byung du rdo rje dang pad+ma yang dag par sbyar ba'i dus na gang gi tshe sgra tsam byung ba de'i tshe glegs bam byung ba'o/ /de'i tshe kho na lha rnams kyis nam mkha' las sgra byed bzhin pa byung ba'o//rgyud ces pa la rgyud ni rgyun te/ de yang rnam pa gsum ste/ rgyu dang / 'bras bu dang / thabs kyi byed pa las so/ /de la thog ma dang tha ma med pa'i he ru ka'i bdag nyid ni rgyu'i rgyud de/ de kho na rgyur byas nas 'bras bu'i he ru ka 'byung ba'i phyir ro/ /glo bur gyi dri ma dang bral ba las 'gro ba ma lus pa'i don byed pa'i ngang can 'bras bu'i he ru ka ni 'bras bu'i rgyud de/de kho na'i rnam par dag pa'i thabs ni thabs kyi rgyud de mkha' lding gi sbyor ba la sogs pa rnams ni thabs kyi yan lag nyid kyi thabs rnams so/ /dngos su ba'i thabs ni phyag rgya chen po'i dngos grub kyi dus su phyag rgya'i rnal 'byor las ji skad bshad par sgrub pa dang de'i yang dngos su ba'i thabs ni rdzogs pa'i rim pa ste de'i bskyed pa'i rim pa'o/rgyal po chen po zhes pa chen po ste/ rang dang gzhan gyi don phun sum tshogs pa sgrub pas sems can kha sgyur ba'i phyir ro//'di'i rgyas par bshad pa ni/ sems can kun la phan byed pa/ /zhes pa'o/ /rab tu rgyas par bshad pa ni/ /sems can kun la bde 'bab pa/ /zhes pa'o/ /dngos grub thams cad ces pa gang gi phyir 'di las dngos grub thams cad yin pa'o/ / rnal 'byor ma'i theg pa zhes pa rnal 'byor ma'i rgyud de/ der 'gro ba dang 'dis 'gro ba zhes pa 'bras bu dang / rgyud dang / thabs kyi rang bzhin no/ /gong na med ces pa'i rgyas par bshad pa/ myur du 'bras bu ster byed pa'o/ /zhes pa'o/ /de la dngos su ba'i thabs nyid kyis na rdzogs pa'i rim pa re zhig mdor ston te/spar ba zhes pa la sogs pa'o/ /spar ba ni gzengs bstod pa ste rdo rje'o/ /nang du ni byang chub kyi sems so/ /mnan pa ni rten nyid kyi phyir pad+ma'o/ /de las skyes pa ni chos thams cad kyi rtsa ba nyid kyis na ye shes chen po'o//sgrib pa med pa'i bde ba chen po nyid kyis na bla na med pa'o/ /gnas zhes pa go 'phang ste/ rang dang gzhan gyi don phun sum tshogs pa'i gzhi'o/ /yang na gnas ni rtsa rnams su rgyu ba spangs pa'o/ /rnyed dka' ba ni le lo la sogs pas nye bar bcom pa rnams la'o//gsang ba ni nyan thos la sogs pa rnams la gsal bya min pa'o/ /de nyid kyi phyir mchog phul du byung ba ste/ shes rab rno zhing bsod nams bsags pa rnams kho na'i yul 'di nyid kyi phyir ro/ /nyams dga' ba ni dga' ba la sogs pa dang ldan pa'o/ /lus kun la ni rnam par gnas//zhes pa thams cad du rgyun ma chad par nyams su myong ba'i phyir bde ba chen po yongs su rgyas pa nyid du gsungs so/ /lus kho na dang / de ro gcig par 'byung ba'i phyir rlabs dang chu bzhin no/ /de ltar dngos po thams cad la khyab par byed pa nyid du dkyil 'khor ba dang bcas pa'i rig pa ni dkyil 'khor gyi dbang po bstan to//thabs kyi yan lag mdor bstan te/ /mkha' lding sbyor dang zhes pa la sogs pa gsod pa'i bar las bcu gnyis rnams so/ /bskyed pa'i rim pa mdor ston pa/ /sngags sna tshogs zhes pa hUM yig la sogs pa bskyed pa'i sa bon no//ji ltar rigs pa ni 'chad par 'gyur ba'i le'ur bshad pa'i cho ga yis so/ /rnal 'byor ma rnams ni sna tshogs sde ma la sogs kyi'o/ /ji bzhin 'byung ba ni ji ltar rigs par bskyed pa'o/ /he ru ka zhes pa dpa' bo chen po he ru ka'i'o//bskyed pa'i rgyu ni zla ba la sogs pa'o/ /gnas pa'i rgyu ni chos 'byung la sogs pa'o/ /bskyed pa'i rim pa 'di dang por bsgom par bya'o/ /theg pa chen po'i gsang sngags 'dir las dang po'i sems can rnams dang por gzhug pa'i ched du lha'i sku bsgom pa kho na gsungs te/gang gsungs pa/ dang po'i las can sems can la/ /lha nyid kyi ni sku bsgom pa/ /thog mar rgyud du las thams cad/ /'grub pa'i ched du nges par bstan/ /zhes so/ /bskyed pa'i rim pa'i dngos su ba'i thabs las byung ba rdzogs pa'i rim pa'o zhes pa gang 'dra ba'i bskyed pa'i rim pa thabs yin zhes pa rtogs pa'i don du bskyed pa'i rim pa mdor bstan pa'i de ma thag tu rim pa gnyis kyi khyad par gsungs pa/dngos po zhes pa la sogs pa'o/ /dngos po dang dngos po med pa dag tu sgro btags pa gnod pa mtha' dag gis khyab par byed pa dag med pa'i phyir/dngos dang dngos med spros med pa'o/ /sgrib pa gnyis kyi cha med pa'i phyir gos pa med pa'o/ /'o na gzhan gyi don bya ba ma yin te/ nyan thos kyi mya ngan las 'das pa bzhin no zhe na gsungs pa/ srid par spyod byed ces pa ste/ sgrib pa med kyang gzhan gyi don du snying rje chen pos mu mtha' med pa'i dus su 'khor bar 'byung ba'i phyir ro//de mchog gi dang po'i rgyud du gsungs pa/ dpa' bo mchog rnams ji srid du/ /'khor ba'i gnas su gnas gyur pa/ /de srid mnyam med sems can don/ /mya ngan mi 'da' bya bar nus//zhes so/ /slar yang thabs kyi yan lag gsungs pa/ dgongs pa'i skad ces pa la sogs pa'o/ /gzugs brnyan dag pa la sogs pa ral gri'i mthar thug pa ni las bcu gnyis rnams sngar dang phyi ma'i las bshad pas so/ /bskyed pa'i rim pa la gnas pa dang rdzogs pa'i rim pa la gnas pa'i sangs rgyas thod pa'i sbyor ba yis las thams cad 'grub par 'gyur ro zhes gsal bar byed do//de nyid kyi phyir gsod pa dang ro dag la nye bar mtshon pa nyid kyis gnyis ka la nye bar len pa'o/ /mi snang ba zhes pa bdag nyid do/ / mchog min zhes pa phul byung ma yin pa'o/ /dka' thub nges pa drag rnams kyis/ /lus ni skems shing sdug bsngal nyid/ /sdug bsngal ba las sems g.yengs te/ /g.yeng ba las dngos grub gzhan du'o/ /zhes gsungs pa/ 'dod pa lnga ni bsten bzhin pas/ /zhes so//sgyu ma rnams ni thams cad la/ /bud med sgyu ma khyad par 'phags/ /ye shes gsum gyi dbye ba 'di/ /'di kho na la gsal bar mtshon/ /zhes pa'i rigs pas 'dod pa'i yon tan lnga rnams la nye bar spyod pa na gtso bo bud med bsten pa ste thabs la mkhas pa nyid kyis phyag rgya chen po'i dngos grub kyi rgyu nyid kyi phyir ro//de nas de'i don du ro tsa bar byed pa mdor bstan pa'i don du gsungs pa/ 'jigs pa 'joms byed ces pa la sogs pa ste/ 'jigs pa rnam par rtog pa rnams lhan cig skyes pa 'char ba'i dus su nub par 'gro ba'i phyir 'joms par rung ba'o//g.yul chen po ni dga' rtsed sna tshogs pa'o/ /byed bzhin pa ni skyes pa gcig gis bud med 'bum las rgyal bar byed de ro tsa ba'i byed pas so/ /ci 'di ltar mthong ngam zhe na gsungs pa skyes pa gcig gis zhes te/ skyes pa gcig 'dod pa chen po can du mthong ste 'phags pa chos 'phags la sogs pas bud med stong phrag drug cu rtsa brgyad rnams te/nye bar mtshon pa nyid kyi phyir bud med 'bum phrag zil gyis gnon zhes pa lhag ma'o/ /de'i phyir 'dod pa spyod de/ gcig gis zhes pa gcig pus thams cad ces thams cad ma rnams la'o//'dir yang thabs ni ro tsa bar byed pa zhes pa byang chub kyi sems 'ju bar byed pa dang 'dzin pa dang / 'phel ba ste/ gsum po 'di ji ltar 'gyur ba de 'chad par 'gyur ro/ /de nas zhes bya la sogs pas mkha' lding sbyor ba mdor ston te/ming ji bzhin zhes pa ji ltar rab tu grags par 'gyur ba de ltar bshad par bya'o/ /shA li kA'i byed pa dang rig pa 'dzin pa'i byed pa ni rab tu rgyas par ston par 'gyur ro/ /rgyan po ni cho lo ste/ de rtse bas dug gzhig par byed do/ /rnga brdung pa'o/ /zin pa bud med kyis 'phrog pa'o//ka ra bI ra'i shing gis mgo bo nas bzung nas rkang pa'i mthil ji srid par bsnun pa'o/ /zhags pa zhes pa zhags pa'i rnam pa'i thag pas mgrin par bcings nas 'gugs pa'o/ /khu byug gi sgra byed pa'o/ /pad+ma 'byed pa zhes pa nang gi pad+ma rnams su rtsa ba'i 'don pa'i bsam pas man ngag ji lta bar rlung 'gog pa'o//gzhan ni longs spyod rdzogs pa'i 'khor lo'i rtse gnyis 'khrul 'khor du byed par smra'o/ /stag byed ni stag bzhin du bgrod pa'i tshul gyis 'chag pa'o/ /chu ni rab tu rgyas par ston par 'gyur ro/ /dung zhes pa ni dung gi sgra'o//thod lo kor 'phrog ces pa ni thod lo kor gyis bzung ba'i ming bris pa las dug 'phrog pa'o/ /skyug pa zhes pa skyug par byed pa'o/ /ras kyi gos kyis g.yogs pa'o/ /thal lcag ces pa thal lcag gis bsnun pa'o/ /yig gsum zhes pa D+ha ka ka ra yis brdeg pa'o//ha ho hrIHzhes pa'i yi ge gsum gyis dug 'jig pa'o zhes kha cig go/ /bsam gtan lta bas gtam zhes pa dkar po'i a yig la sogs pa bsgom pa'i lta bas gtam bya ba'o zhes pa sbyor ba bco brgyad po 'di rnams kyis dug dgug par 'gyur ro/ /rdzogs pa'i rim pa mdor bstan pa rgyas par ston te/de nas zhes pa la sogs pa'o/ /rol pa bde ba can pad+mar yod pa ni bzang po ste/ ye shes ni lhan cig skyes pa'i dga' ba'i dga' ba'o/ /ji bzhin pa ni gcig dang du ma'i rang bzhin dang bral ba nyid kyis rang bzhin med pa nyid kyis na de ltar kun rdzob kyi bden pa'o//b+ha ga ni pad+ma ste de'i dbus kyi gzhi la rnam par bzhugs te/ rnam par rtog pa rnams bsal nas bzhugs te/ srid pa dang mya ngan las 'das pa la mi gnas pa nyid kyis so/ /de kye'i rdo rjer gsungs pa/ rdo rje rtse mo'i b+ha ga bzang / / bde ba can du nga bzhugs te/ /sangs rgyas rin chen za ma tog /e yig cha byad ngo bor ro/ /de bzhin du/ btsun mo'i b+ha ga bde chen du/ /khu ba'i ming gis rnam par gnas/ /de med par ni bde mi 'gyur/ /bde ba bor nas de mi 'gyur/ /zhes so/ /de bzhin du/lhan cig skyes dga'i rang bzhin nga / /mchog mtha' khyad dga' dang po can/ /zhes so/ /'dir khu ba'i ming gis zhes pa byang chub sems kyi rnam pa kho na'i sems de ltar gsal ba'i phyir ro/ /mchog mtha' khyad dga' dang po can/ /zhes mchog gi mtha' khyad par dga' ba ni gang gi dang po yin pa ste/mchog gi de ma thag tu khyad par dga' ba dang / de'i de ma thag tu lhan cig skyes pa zhes pa'i don to/ /lugs gzhan la ni khyad par dga' ba'i dang po ste/ mchog dang khyad par dga' ba dag gi dbus su'o zhes pa'i don to/ /'dod pa 'di yang mi 'thad de//khyad dga' dang por mtshon par bya/ /de yang dga' ba gsum po spangs/ /zhes gsungs pa'i phyir ro/ /'dis ni khyad dga' yang 'di yin la dang por yang ngo zhes pas khyad dga'i dus kho nar nye bar 'char ba'i lhan cig skyes pa dang po kho nar mtshon par bya'o zhes rtogs par byas te lhan cig skyes pa shar na ni rnam par rtog pa thams cad nub pa'i rang bzhin nyid kyi phyir ga la mtshon//de nyid kyi phyir 'phags pa'i zhabs kyis gsungs pa/ ye shes gsum gyi dbye ba 'di/ /'di kho na la gsal bar mtshon/ /zhes pa 'dis dga' ba gsum po mtshon pa dang bzhi pa mi mtshon par gsungs so//bcom ldan 'das kyis kyang / mtshan nyid bral ba gsum las gzhan/ /zhes pa 'dis so/ /de'i phyir ji ltar lhan cig skyes pa'i rjes thogs su khyad dga' skye ste/ mtshon par mi nus pa nyid kyi phyir ro/ /khyad dga'i de ma thag pa'i dran pa kho nas mtshon pa nyid kyis na nyams su myong ba'i chos ma bstan par 'gyur ro//lhan cig skyes pa 'char ba'i gnas la ni log par rtogs pa med pa kho na'o/ /'o na dang por yang ci'i phyir mtshon te/ nyams su ma myong ba nyid kho na'i phyir ro zhe na/ ma yin te/ tho rangs kyi dus mtshams bzhin no/ /'o na de lta na yang de'i ngo bo nye bar mtshon pa kho na'o zhe na bden te/ nyams su myong ba'i thabs ni 'di ltar nye bar bsten par bya'o/ /'o na de lta bu ni thabs su yang 'gyur bar 'os pa ma yin te/ de nas bzung nas de nye bar mtshon par mngon par zhen pa 'di la de mi srid pa'i phyir ro zhe na/bden te/ gal te de ltar gyur na'o/ /der ni de ltar 'byung bzhin pa ni ji ltar bya ba de ltar bla ma rnams gsungs par 'gyur ro/ /de ltar 'dod pa gnyis ka la yang nye bar mtshon pa'i rim pa gsal bar byas so/ / khyad dga' lhan cig skyes pa'i de ma thag pa nyid na rgyud gzhan rnams dang / bcu drug phyed phyed thig le 'dzin pa phyag rgya'i dngos grub kyang mi 'thad cing / lhan cig skyes pa nyams su myong ba'i thabs kyang mi srid kyi/ lhan cig skyes pa'i rang gi ngo bo kho na 'ba' zhig pa ni mi 'thad pa med do zhes pas lugs snga ma kho na man ngag rig pa rnams gsung ngo zhes pa shin tu zhar la byung bas chog go//ye shes bzang po de dpe nyid kyis 'jig rten pa'i lhan cig skyes pa'i bde ba bsgrub par bya ba'i sgrub par byed par blta bar bya'o zhes gsungs pa/bde ba chen po ster byed pa/ /zhes pa de'i thabs su gyur pa'i lhan cig skyes pa man ngag ji lta ba bzhin goms par byas pas ni mi 'gyur ba bde ba chen po sgrib pa phul du dbyung du med pa thabs las byung ba nye bar bskyed par bya'o/ /thabs dang thabs las byung ba'i bde ba 'di dag gi de kho na nyid ni rang bzhin med pa'i mtshan nyid can stong pa nyid kho na'o//gang rnams bde ba kho na de kho na nyid du yid ches nas gnas pa de rnams kyi 'khrul pa bsal ba'i don du bcom ldan 'das kyis gsungs pa/ gang phyir 'byung ba che bde ba/ /de phyir bde ba de nyid min//zhes so/ /lhan cig skyes pa yang thams cad kyi tshe thams cad du mi 'byung ste/ de ltar na lhan cig skyes pa dngos po'i rang gi ngo bo ste/ de'i don dam pa stong pa nyid kho na dang kun rdzob pa rtogs pa'o/ /bde ba na rtogs pa yin mod kyi/ de lta na yang thams cad kyi tshe thams cad du lhan cig skyes pa yin te/sdug bsngal dang btang snyoms su myong ba'i dus su dang / bsam gtan bzhi pa la dang / gzugs med pa'i khams su rtogs pa bzhin du nyams su ma myong ba nyid kyi phyir ro/ /gang mtshan yang dag par brjod par gsungs pa/bsam gtan bzhi pa'i rtse mo 'chang / /zhes pa der bsam gtan bzhi pa lhan cig skyes pa'i dga' ba'i rtse mor te rnam par rtog pa'i dri ma thams cad dang bral ba rab tu gyur pa mthar thug pa la de'i bdag nyid kyis gnas pa de'i phyir de'i rang gi ngo bo 'dzin pa zhes pa'i don to//bde ba chen po'i rang bzhin du mu mtha' med pa'i khams gsum pa snang bar gyur pa na bsam gtan la sogs pa yang bde ba chen po'i rang bzhin ni bcom ldan 'das kho na ste gzhan gyi ni ma yin no zhes pa bzlas te bshad pa'i don to/ / 'o na ji ltar bde ba lhan cig skyes par brjod ce na/ ji ltar dmigs pa'i snying rje chen po de kho na nyid ma mthong ba'i yod pa ma yin pa lhag par mos pas bsgom bzhin pa ni de kho na nyid rtogs pa na rtogs pa'i bdag nyid kyi phyir kun rdzob pa'i lhan cig skyes par brjod pa de bzhin du bde ba res 'ga' nyams su myong ba'i gnas skabs su dang /nyams su ma myong ba'i gnas skabs su de kho na nyid ma mthong bas lhag par mos pas snying rje chen po dang dbyer med pa'i rang bzhin stong pa nyid kyi bdag nyid rnam pa thams cad kyi mchog dang ldan pas/ sgom pa ni de kho na nyid rtogs pa'i gnas skabs su 'jig rten las 'das pa'i kun rdzob pa'i lhan cig skyes par brjod do//de kho na nyid ma rtogs pa'i gnas skabs su nyams su myong ba ni 'jig rten pa'i kun rdzob pa'i lhan cig skyes pa ste/ lhan cig skyes pa'i grib ma'i rjes su byed pa nyid kyi phyir ro//de skad du yang gsungs pa/ lhan skyes dag las gang skyes pa/ /de ni lhan cig skyes par bshad/ /rang bzhin lhan cig skyes par bshad/ /rnam pa thams cad sdom pa gcig /snying rje thams cad rnal 'byor 'gyur/ /phyag rgya rgyu dang bral ba las//stong nyid snying rje dbyer med pa/ /byang chub sems zhes bshad pa'o/ /zhes so/ /'dir 'di la sdom par bya ba'o zhes pa sdom pa'o/ /rnam pa thams cad kyi ste sngon po dang ser po la sogs kyi gcig ste gnyis pa med pa'i sdom pa ste lhan cig skyes pa kho na de ltar snang ba'i phyir ro//lhan cig skyes pa dag yang gang dag las skyes pa lhan cig skyes par brjod par bya ba de dag ni snying rje dang phyag rgya dag go/ /de'i phyir snying rje dmigs pa med pa'i snying rje chen po'i rang bzhin de gang gi thabs yin pa 'di ltar gyur pa de ni rnal 'byor par 'gyur ro//'di skad bshad de/ thabs kyi de kho na nyid bde ba 'di yin gyi/ shes rab kyi de kho na nyid ni ma yin no/ /phyag rgya ni stong pa nyid dang de kho na chos thams cad skye ba med pa'i mtshan nyid can shes rab dam pa ste rgyu dang bral ba las ni rgyu med pa las te/ chos rnams thams cad gdod ma nas ma skyes pa nyid kyi phyir ro//rang bzhin 'di dag kyang lhan cig skyes pa dag kho na ste/ rang nyid las grub pa nyid kyi phyir ro/ /'di dag las skyes pa'i de kho na nyid byang chub kyi sems stong pa nyid dang snying rje dbyer med pa'o/ /de ci 'di shes rab kyi ye shes las gzhan pa kho na'am zhe na/gzhan ma yin te/ de kho na mi mthun phyogs bsal ba de ni rnam pa 'di lta bu'o zhes rang gi ngo bo rab tu gsal ba'o/ /lhan cig skyes pa shes rab ye shes kyi rang gi ngo bo dag la goms pa las skyes pa'i byang chub kyi sems 'di kho na ni bzhi pa phyag rgya chen po'i dbang bskur te/rnam par rtog pa'i dri ma rnams thams cad dngos su 'dis 'khrud pa'i phyir ro/ /de gsungs pa/ bzhi pa de yang de bzhin no/ /zhes so/ /lhan cig skyes pa'i ngo bo nyid kho na sna tshogs par ston pa gsungs pa de kho nar ni zhes pa la sogs pa'o//bzang po'i ye shes de kho nar dngos po dang dngos po med pa la sogs par sgro btags pa mtha' dag stong pa nyid dang ro gcig par de'i bdag nyid kyi thams cad gnas so/ /byis pa zhes pa byis pa rnams te so so'i skye bo'o/ /'o na ji ltar bdag nyid kyi rang gi ngo bo yang mi shes she na/gang phyir rmongs pa rnams te/ dngos po dang dngos po med pa la sogs par 'dzin pa'i phyin ci log mi shes pa'i rmongs pa 'di rnams las skyes pa'o/ /ye shes de kho na nyid bcud de bde ba chen po dang bcud len te/ stobs dang mi 'jigs pa la sogs pa'i yon tan rgyas pa'i rgyu nyid kyi phyir ro//'di ni khyad par la ste/ phyi rol gyi bcud la sogs pa rnams las khyad par du 'phags pa'o zhes pa'i don to/ /de lta kho nar goms bzhin pa'i ni bde ba chen po ster bar byed pa po ni ji ltar sna tshogs pa'i rnam pa can dngos po dang dngos po med pa la sogs pa dang bral ba'i dngos po yang dag pa ji lta ba rtogs pa las sangs rgyas rnams te/dri ma med pa nyid yongs su dag pas stobs dang mi 'jigs pa la sogs pa ye shes kyi rang bzhin rnams nges par gnas so//'dis ni sems kyi rdo rje'i rang gi ngo bo chos kyi sku gsungs so/ /dkyil 'khor zhes pa sngon po dang ser po la sogs pa sna tshogs pa'i rnam pa can stong pa nyid dang snying rje dbyer med par snyoms par zhugs pa'i lha'i ngo bo dga' ba la sogs pa'i dbye bas tha dad pa skye ba dang 'chi ba dang 'gog pa'i ngo bo spro ba dang sdud pa'i byed pa po rdo rje sems dpa'i dkyil 'khor gyi 'khor lo bde ba chen po'i rang bzhin kho na'o//bzang po ni rdzogs pa'i ngo bo'o/ /bzhi pa'i don kho na bsgom bzhin pa grub par gyur pa ni dbang bzhi par 'gyur ro zhes gsungs pa/der ni slob ma bzang dbang bskur/ /zhes te/ gang b+ha ga'i dbus su bskyed pa'i rim pas dbang bskur ba de ni 'chad par 'gyur ro/ /he ru ka zhes pa he ru ka bcom ldan 'das te/ longs spyod rdzogs pa'i sku'i bdag nyid do/ /pha rol tu phyin pa'i tshul las sa bcu'i dbang phyug byang chub sems dpa' rnams la zab cing rgya che ba'i chos ston pas chos la longs spyod rdzogs pa'i yan lag nyid kyis na mtshan sum cu rtsa gnyis dang dpe byad bzang po brgyad cu'i bdag nyid kyi sku kho na longs spyod rdzogs pa'i sku'o//'dir ni 'di chos kyi sku'i dbang gi gdul bya'i ngor he ru ka la sogs pa'i gzugs kyis de lta de ltar sprul pa'i skur brjod do//gang sprul pa'i sangs rgyas sprul pa'i skur pha rol tu phyin pa'i tshul la gsungs pa/ de 'dir yang de 'dra ba kho na dang sprul pa dang 'dra ba yang ngo / / chos kyi sku'i sprul pa nyid yin na yang longs spyod rdzogs pa'i sku ni pha rol tu phyin pa'i theg par log pa nyid de/ chos la longs spyod rdzogs pa'i phyir ro/ /'dir ni ngag gi ngo bo nyid kyis kyang ste/ longs spyod rdzogs pa nyid kyang ro la rdzogs pa'i longs spyod pa nyid kyis kyang ngo //mi mthun pa'i phyogs dag rtsa ba med par byas pa nyid kyi phyir dpa' ba'o/ /nang du dang dkyil 'khor du yang 'chad par 'gyur ba'i lha mo nyi shu rtsa bzhi'i bde ba chen po'i ro 'thung ba'i phyir dang chos kyi gsung gis skyong ba'i phyir bdag po'o/ /mu mtha' med par rnam pa sna tshogs pa'i sku spros pas gzhan gyi don gyi ngor rab tu 'byung ba'i ngang tshul can nyid kyi phyir gtso bo'o//mkha' lding sbyor ba ni dug gzhil ba'i thabs te/ mchog tu stong pa nyid kho na'o/ /gang gsung par 'gyur ba/ chos rnams thams cad stong pa la/ /sbrul drug de las ji ltar yin//zhes so/ /stong pa nyid la lhag par mi mos pa rnams kyi 'jigs pa'i rgyu nyid kyi phyir 'jigs pa'o/ /lha min sgrub pa zhes pa gang de ltar shes pa'i rnal 'byor pa'i dbang du 'gyur ba ma yin pa de yod pa ma yin pa'i phyir ro/ /dur khrod ces pa bskyed pa'i rim pa la dbugs rgyu'o zhes pa dang ro rnams gnas so zhes bya ba'i nges pa'i tshig gi tshul gyis bdag med pa nyid kyi mtshan nyid can chos kyi dbyings gsal bar byed pa'i ro rnams kun nas gnas pa ni dur khrod de//brgyad kyi grangs su bcad pa ni 'chad par 'gyur ro/ / 'dir ni chos kyi dbyings kyi ngo bo'i lus kho na yan lag brgyad pa'i dur khrod do/ /pha rol tu phyin pa'i tshul la bskal pa grangs med pa gsum rnams kyis sangs rgyas nyid skyed par gsungs pa la/ 'di ni nges pa med pa'i dus kyis so zhes gsungs pa/ yud ces pa yis bskyed pa'i rgyu//zhes so/ /stong gsum du ni rdzu 'phrul che/ /zhes pa stong gsum pa la sogs pa'i 'jig rten gyi khams rnams su dpag tu med cing sna tshogs pa'i sprul pa'i ngo bo'i rdzu 'phrul chen po gang rnams kyi yin pa de rnams de skad do/ /'dis ni sprul pa'i sku ni rdo rjer gsungs so//snod kyi 'jig rten yang de'i rang bzhin no zhes gsungs pa/ 'jig rten gyi khams zhes pa ste/ 'jig rten gyi khams rnams so/ /de nyid ces pa phyag rgya chen po'o/ /mchog tu dga' rtse'i gnas nyid kyi phyir lha mo'o/ /sangs rgyas rnams thams cad bskyed pa ste rgyu'i gnas skabs kyi rang bzhin no//byang chub sems dpa'i dpal chen po ste/ bsod nams dang ye shes kyi tshogs kyi rang bzhin no/ /'bras bu'i gnas skabs su ni/ shes rab pha rol phyin dpung gnyen/ /zhes pas shes rab pha rol tu ste rab kyi mthar phyin par mchog tu bgrod cing mtha' dag par phyin pa ste shes rab kyi pha rol tu phyin pa zhes pa'i don to//dmyal ba'i sgo zhes pa de spong ba rnams kyi'o/ /ji skad du rgyal po rin po che'i phreng bar gsungs pa/ gzhan yang 'di zhes ngan pa'i phyir//rmongs pa mkhas pa'i nga rgyal can/ /'di spong bdag nyid phung byas pa/ /'og tu kha phyogs mnar med 'gro/ /zhes so/ /de kho na ni de kho na'o/ /sgrib pa thams cad dang bral ba ni thar pa'o/ /stong pa nyid dang ro gcig pa'i dmigs pa med pa'i snying rje chen po'i rang bzhin bde ba chen po'i rang bzhin las byung ba 'gro ba ma lus pa'i don gyi sku ni phyag rgya chen po'o//gang du gang gi gzhan las yin pa ni 'di'i rang bzhin nyid kyi phyir grags chen no/ /de nyid kyi phyir sems can kun la phan 'dod ma ste/ snying rje chen po'i rang bzhin nyid kyi phyir ro//bde ba chen po'i rnam pas sna tshogs pa bskyed pa'i phyir ma'o/ /kun rdzob dang don dam pa'i bden pa'i rnam par dbye ba bsgom pas skyes pa nyid kyi phyir sring mo'i bu mo'o/ /kun rdzob dang don dam pa'i bden pa dag gi rnam par dbye ba 'chad pa'i phyir sring mo'o//stobs dang mi 'jigs pa la sogs pa bla na med pa'i yon tan nam mkha'i ba bzhon las 'jo ba'i phyir te bskyed pa'i phyir na bu mo'o/ /bla na med pa'i bde bas rjes su chags pa'i phyir bud med kyi shes pa bud med do/ /shes rab kyi pha rol tu phyin pas rab tu gsal bas bag la nyal rnam par mkhyen nas ji ltar rigs par 'dzud cing dgod pa'i phyir sems can thams cad rjes su chags pa nyid du 'gyur ro zhes pas shes rab kho na bud med ces brjod do//skyes bur legs g.yo zhes pa legs par skyes bu rnams la g.yo ba ste/ snying rje mchog gi zag pa med par med pa mur thug pa med pa'i bde ba chen po'i don sems can so so la bdag nyid kyi phong du gtod par byed pa'i phyir ram/ las dang po pa'i sems can rnams kyis brtan par bya mi nus pa nyid kyi phyir ro/ /shes rab ni spro ba med pa rtogs pa ste shes rab kyi pha rol tu phyin pa dang phyag rgya chen po zhes pa'i bar ro//bla na med pa'i phyag rgya 'di rnams dang gzhan rnams kyang bcu gsum par 'chad par 'gyur ro/ /bsod nams nye bar ma bsags pa de'i rang gi ngo bo ma rig pa nyan thos la sogs pa'i rigs can rnams 'jigs pa'i rgyu nyid kyi phyir na 'jigs byed ma'o//de 'phags pa sgra gcan 'dzin bzang pos gsungs pa/ byis pa rnams la 'jigs ston ma/ /zhes so/ /phyin ci log pa ste chad pa dang sgro 'dogs pas lta ba'i'o/ /mtho ris dang byang grol las phyir phyogs pa'i dmyal ba'i rgyu nyid kyi phyir 'jigs rung ngo //de gsungs pa/ khyod kyis ma mthong bas 'ching 'gyur/ /zhes so/ /'gro ba drug 'jigs rung zhes kha cig tu klog pa de'i tshe 'jigs rung 'khor bo pa'o/ /de'i phyir shes rab gcig pu kho na 'di rnams kyi dang gzhan rnams kyi'ang mya ngan las 'das pa'o//de 'phags pa klu sgrub zhabs kyis gsungs pa/ 'khor ba yongs su shes kho na/ /mya ngan 'das pa zhes par bshad/ /ces so/ /dpal yang dag par sbyor ba'i rgyud du yang gsungs pa/ kun rtog chung min mun pas zil mnan pa//rab tu bcom phyir myos pa'i glog 'gyur dang / /chags sogs bzlog dka'i dri mas gos pa yis/ /sems ni 'khor bar rdo rje can gyis gsungs/ /rab tu 'od gsal rnyogs pas rnam grol ba/ /chags sogs dri mas gos pa rab spangs shing //gzung dang 'dzin pa med pa de nyid ni/ /sems can mchog gis myang 'das mchog tu gsungs/ /de phyir sdug bsngal phung po mang po yi/ /rgyu mtshan gyur pa de las gzhan ci'ang med/ /mtha' yas bde ba 'char ba'i rgyur gyur pa'ang / / de las gzhan pa yod min thar 'dod rnams/ /zhes so/ /mtha' yas pa'i bde ba yang dag par 'byor bas rdzu 'phrul chen po can no/ /'khor ba rgyas par ston te/ rnam rtog ces pa la sogs pa grangs kyi mthar thug pa'o/ /yod pa dang med pa dang rtag pa dang chad pa dang /gzung ba dang / 'dzin pa la sogs pa rnam pa sna tshogs par rtog pa ni rnam rtog ste/ de kho na rgyun du 'jug pa ni kun rtog pa'o/ /'char ba dang nub pa ni skye ba 'gog pa dag go/ /de rtog pa'i thabs ston pa/ rnam par mi rtog ces pa la sogs pa'o//rnam par mi rtog pa ci zhig rnams she na gsungs pa/ dman pa dang zhes pa la sogs pa'o/ /dman pa ni phra ba'i dngos po sems dang sems las byung ba'i ngo bo'o/ /mchog ni byis pa'i bar la dngos po'i tha snyad can nyid kyi phyir na rags pa'i ngo bo'i dngos po'i lus kho na'o//bar ma ni gnyis dag las gzhan A li dang kA li dag go/ /de ltar lus dang / ngag dang / sems rnams ji ltar rigs par dman pa dang bar ma dang mchog gi tshig rnams kyis gsungs so/ /gzhan rnams ni dbang po drug rnams so/ /gang rnams de rnams zhes pa 'dis brtan pas gzhi la sogs pa'i rnams dang g.yo ba gzhan srog chags brjod do//de kye'i rdo rje'i rgyud du gsungs pa/ dman pa phra ba'i tshig don te/ /mchog ni dngos por brjod par bya/ /bar ma gnyis ka spangs pa'o/ /gzhan rnams zhes pa dbang po drug /gang rnams de rnams brtan dang g.yo/ /zhes so/ /dman pa la sogs pa rnam par mi rtog pa rtogs pa med pa'i lhan cig skyes pa'i rang bzhin 'di rnams bsgom bzhin pa rnams ni gsal por 'gyur zhes rkang pa brgyad pas ni ma yin zhes rnam par mi rtog pa'i sgras bsgom pa gsal bar byas so//'o na rnam par mi rtog pa bsgom pa zhes pa don ci zhe na/ bde ba chen po'i thabs kyis chos thams cad mi bsam pa kho na ni bsgom pa'o zhes pa'i don to/ /de ci bde ba chen po yid la byed pa skyon can ma yin no zhe na/ skyon can yin pa yin te/de yang 'gro ba thams cad dang tha mi dad pa nyid kyis te/ 'gro ba stong pa nyid kyi phyir la stong pa nyid bsam par nus pa yang ma yin zhes pas de yang yid la byed pa skyon pa'o/ /sems pa med pa'i rjes su mthun pa nyid kyi phyir ni nye bar bstan pa'o/ /ji skad du gsungs pa/'khrul pa rnams kyis nyer mkho'i chad/ /'khrul pa gzhan ni sel ba'i phyir/ /zhes so/ /de'i phyir rnam par mi rtog par chos thams cad yongs su shes pa kho na rgyun gyis 'jug pa na don dam pa'i sgom pa zhes pa gdags par bya'o/ /sems pa med pa'i rjes su mthun pa nyid kyi phyir brtan pa nyid du gyur pa de'i tshe kho na mnyam par gzhag pa'i rnal 'byor te/gzhan gyi tshe ni mnyam par gzhag pa'i rnal 'byor kho na'o/ /de nyid kyi phyir rdzogs pa'i rim pa la phyag rgya'i rnal 'byor med par yang mnyam par gzhag pa'i rnal 'byor nye bar ston te/bde ba chen po'i thabs kyis chos thams cad rnam par mi rtog pas gnas pa'i phyir ro/ /dngos grub ni phyag rgya'i rnal 'byor kho na las so/ /de ltar 'di gcig pu rang gi don phun sum tshogs pas skal ba chen po dang / gzhan gyi don phun sum tshogs pas sems can kun la bde ba 'bab pa zhes pa mjug bsdu ba'o//de ltar zhes pa rim pa gnyis so/ /dga' ba ni bskyed pa'i rim pa thos pa las so/ /spyan gdangs pa ni rdzogs pa'i rim par thos pa las shin tu dga' ba las so/ /sems bcas zhes pa sems dang ldan pa rnams te rim pa gnyis la mkhas par sbyangs pa'i blo can rnams so//btud ces pa phyag 'tshal nas so/ /don gang zhes pa don brjod bya gang zhig go/ /yang dag par blangs so zhes pa yang dag par bzung ba'o/ /de nas zhes pa la sogs pa la 'dir bsdus pa'i don ni/gang bcom ldan 'das kyi thod pa nas sna tshogs sde ma'i snying gar ngal bsos nas phyung bar gang sngar gsungs pa'i glegs bam de so sor snang ba tsam nyid kyi phyir/ da ltar phyag na rdo rje'i lag pa nas smin mtshams nas gzhug ste gzhung dang don dang bcas pa snying gar zhu bar gyur to zhes pa'o//de nyid kyi phyir phyis sdud pa por 'thad do/ /bzlas pa zhes pa sngon du bsnyen pa na'o/ /sna tshogs zhes pa yul dang dus la sogs pa rnams kyis so/ /spar dang rengs pa la sogs pa gang gsungs pa'o//der rjes su nan tan du bya ba rnams la nges pa'o/ /ji ltar 'gyur zhes pa dris pa gsal bar byed de ci rnams zhes pa la sogs pa'o/ /kaM pa bde ba skyong bar byed pa ka pA la kho na thod pa ste pad+ma'o/ /gru gsum rnams kyi 'byung ngo zhes pa gru gsum yang dag 'byung ngo //bcom ldan 'das dang bcom ldan 'das ma'i rdo rje dang pad+ma de dag gi sbyor ba'o/ /nang du ni rdo rje ni byang chub kyi sems bcom ldan 'das te/ gsang ba'i 'khor lo las yang dag par 'byung ba'o/ /khu ba'i rnam pa bcom ldan 'das zhes gsungs pa'i phyir ro//thod pa'i rtul te thod pa la yod pa nyid kyi phyir ro/ /de nyid kyi phyir gsungs pa/ gru gsum las te gsang ba'i 'khor lo las yang dag 'byung ba'o/ /de dag man ngag ji lta ba bzhin rin chen 'dus sar las kyi gtum mo la sogs pas sbyor ba'o//don dam par ni sangs rgyas dang thod pa dag gi ste stong pa nyid dang snying rje dag gi sbyor ba'o/ /de'i ste sbyor ba rnam pa gsum gyi gsang bar te nang du gnas pa'i rtsa a ba d+hU tI'i ni dngos su na sna tshogs sde ma'o/ /des spros pa'i phyir ni rtsa stong phrag bdun cu rtsa gnyis kyang sna tshogs sde ma'o//yan lag gi don gsum pa sna tshogs zhes pa ste/ ngo mtshar stobs dang mi 'jigs pa la sogs pa'i yon tan sgrib pa med par byed pa ste/ rnam pa thams cad mchog dang ldan pa'i stong pa nyid do/ /de kho na sna tshogs pa ste/ brtan pa dang g.yo ba'i bdag nyid khams gsum pa ni bde ba chen po'i ye shes kyi rang bzhin nyid kyi phyir ro/ /'dis ni ji ltar bcom ldan 'das stong pa nyid dang snying rje dbyer med pa nyid kyis na sangs rgyas thod par brjod pa de ltar bcom ldan 'das ma sna tshogs sde ma yang ngo zhes gsal bar byas so//de ltar na chen po rnams kyi gang gis sam gang du 'gro ba zhes pa theg pa ste rgyu dang 'bras bu'i bdag nyid theg pa chen po'o/ /'di ste 'khor lo skye bo zhes pa'o/ /rnal 'byor ma zhes pa rnal 'byor pa gsum phul du byung ba dang ldan pa nyid kyi phyir rnal 'byor ma rnams te/rnal 'byor ma'i rang bzhin rtsa ni a ba d+hU tI ste/ de las yang dag 'byung ba'o/ /bshad pa'i sbyor bas so/ /de nyid de ye shes bzang po gang sngar gsungs pa de rmad byung ste/ sgom pas drod la sogs pa'i rim pas che mchog ste/ 'bras bu rdo rje 'dzin pa'i ye shes so//sems can kun la bde ba 'bab/ /ces pa go sla'o/ /kha cig tu/ sangs rgyas kun gyi bde ba 'bab/ /ces klog pa de'i tshe/ sangs rgyas kyi rang bzhin gyi phung po la sogs pa rnams kun gyi bde ba 'bab pa'o/ /ji ltar 'di bzhin du yin zhe na gsungs pa/sna tshogs zhes pa la sogs pa ste bzang chen kho na'o/ /thod par te chos 'byung du'o/ /gsang sngags rgyud dang rnam par gnas/ /zhes pa/ oM bud+d+ha zhes pa la sogs pa sngags so/ /rgyud ni sngar brjod zin to/ /de dag dang lhan cig dri ma dang bral bar gnas pa'o//yang na sngags ni stong pa nyid dang ro gcig pa'i bde ba chen po ste/ de rgyud de rgyun du rnam par rtog pa rnams bsal nas gang du gnas pa de de skad do/ /de'i ni thod pa kho na'i'o/ /gru gsum zhes pa gru gsum gyi 'bras bu nyid kyi phyir dang thabs gzhan med par shes pa'i don du nye bar brtags pa'o//der ni zhes pa gang du ye shes bzang po shes rab ye shes kyi ngo bo de skyes pa de la brten pas dang de kho na goms pa las dbang bzhi par 'gyur ba'i gnas der bdun dang lnga zhes pa dang dbang bcu bzhi rnams so//sangs rgyas mngon rjod byed ces pa ni mi bskyod pa la sogs pa rnam par dag pa rnams te de rnams 'chad par 'gyur ro/ /sbyor ba sna tshogs rnams ni zhi ba la sogs pa 'chad par 'gyur ba rnams so/ /tshe 'phel zhes pa tshe la dbang ba nyid kyis na ye shes de kho na'o//yang na sprul pa'i 'khor lo'i 'dud par 'od zer lnga dang ldan pa'i thig le phra mo dkar po ni dbang bskur lnga'i rang bzhin no/ /sangs rgyas bdun ni rjod byed pa/ /zhes pa'i thig le de re khA bdun gyis bskor bar bya zhing phra bar 'bar ba de rnams kyang rlung 'byung ba na 'byung zhing 'jug pa na sems dang lhan cig thig le la 'jug ste/'di ltar sgom pas skyes pa'i lhan cig skyes pa'i ye shes ni dbang bdun rnams so zhes pa'i don to/ /tshe 'phel zhes pa 'jug pa dang 'byung ba dag shes rab dang thabs kyi rang bzhin gyis bzlas pas 'gog pa'i phyir ro zhes pa man ngag go//'di thams cad bla ma'i man ngag med na rtogs par dka'o zhes gsungs pa/ man ngag lam zhes pa ste man ngag gang gi lam de rtogs pa'i thabs yin pa de de skad do//man ngag kyang kho bos rnam par phye zin cing 'byed par yang 'gyur ro/ /mkhas pa 'jigs pa med pa'i 'byung gnas kyi sbas pas mdzad pa'i 'jigs pa med pa'i gzhung 'grel dpal sangs rgyas thod pa'i rgyud chen po'i 'grel pa le'u dang po'o// // bskyed pa'i rim pa rgyas par ston pa'i ched du sngags kyi le'u gsungs pa de nas zhes pa la sogs pa ste/ bskyed pa'i rim pa ni sngags dang sngags kyi sku'i rang bzhin nyid kyi phyir dang bskyed pa'i rim pa'i yan lag las rab 'byam yang sngags kyis bsgrub par bya ba nyid kyi phyir ro//sngags kyi ngo bo ni sngags te/ bod par byed pa de kho na nyid skul bar byed pa'i smra ba'o/ /de gsal bar byed pa'i le'u yang dag par bshad par bya ste/ ji ltar 'dod pa bcom ldan 'das kyis sangs rgyas thod pa'i rtsa ba'i rgyud stong phrag bcu gnyis par ro/ /rdo rje zhes pa ni dam tshig gi rdzas te/de dbul ba'i sngags so/ /dngos grub thams cad gtor ma sngon du 'gro ba nyid kyi phyir gsungs pa/ oM ma hA ka pA la badzra zhes pa la sogs pa'o/ /dbang po la sogs pa rnams 'khor dang bcas pa rnams ni 'byung po thams cad de de rnams 'di'i lha'o zhes pa 'byung po thams cad pa ste/gtor ma ni nye bar spyod pa'i khyad par ro/ /de'i byin gyis brlabs pa'i sngags ni/ 'byung po thams cad pa'i gtor ma'i sngags so/ /'dir phyogs bcu rnams su sangs rgyas dang byang chub sems dpa' la sogs pa rnams dang dbang po la sogs pa 'khor dang bcas pa rnams dang srog chags dpag tu med pa rnams shes rab dang bcas pa rnams shes rab mchog gi dbang du byas pas yud kyis bcom ldan 'das dang bcom ldan 'das ma yang dag par sbyar ba'i gzugs su blta zhing gtor ma yang 'chad par 'gyur ba'i sgom pas sam yud kyis dngul chu 'dra ba bdud rtsi'i rang bzhin bdug spos la sogs pa dang bcas pa de rnams la sbyin par bya'o zhes pa man ngag go//'bras sA lu zhes pa 'bras sA lu dmar po ma chag pa/ ba dkar mo'i 'o mas bkru bar bya'o//gzhon nu ma ni yan lag ma tshang ba med cing ma nyams pa'o/ /shin tu zhib pa'i zhes pa ni shin tu zhib par ro/ /de ltar btags pa'i 'bras des gzugs te he ru ka'i gzugs brnyan bya ste rang nyid kyis bya ba'o/ /shes rab can zhes pa ma nyams pa'i shes rab dang ldan pa'o//rdo rje gtsug ces pa rdo rje gtsug ni gzhon nu ma ma nyams pa'i me tog dang po'i dus su rdo rje dang pad+ma sbyor ba las skyes pa'i gnyi ga'i byang chub kyi sems te/ de dang rang byung gi me tog bsres la de dang lhan cig mnyes shing de dang cha mnyam pa'i dur khrod kyi sol ba'i phye mas gzugs brnyan de byug par bya'o//sangs rgyas thod pa'i rnal 'byor pa/ /zhes pa sbyor ba thams cad la rang nyid he ru ka'i bdag nyid do/ /he ru ka'i rnam pa'i rab tu sbyor bas zhes pas gzugs brnyan dam tshig sems dpa' ye shes sems dpa' dang lhan cig dbyer med pa'i he ru ka dngos su bsgom par bya ste/de ltar na gzugs brnyan he ru ka'i rnam pa'i sbyor bas so/ /gzugs brnyan de la lag pas reg nas oM ma hA badzra zhes pa la sogs pa'i sngags brgyad lhag pa'i brgya bzlas so//chu zhes pa rdo rje'i chu'o/ /de'i rjes su bkrus pa'i gzugs brnyan mchod de mngon par 'dod pa'i bsam pas khrus kyi chu des bdag nyid kyi gdong bkrus pa las sgrub pa po mi snang bar 'gyur ro/ /thal ba'i sbyor ba 'chad pa'i ched du gsungs pa de'i zhes pa la sogs pa'o//bab po la'i shing gis phug nas zhes pa lhag ma'o/ /mes zhes pa ni dur khrod kyi mes so/ /de'i zhes pa gzugs brnyan gyi'o/ /tshangs pa'i rdo rje zhes pa la/ tshangs pa'i rdo rje ni rnam par snang mdzad do/ /de'i zhes pa ni gzugs brnyan gyi'o//thal ba zhes pa thal ba'o/ /'dis zhes pa oM bud+d+ha zhes pa la sogs pas so/ /oM bud+d+ha zhes pa la sogs pa a d+hiSh+Tha ya hrIH hUM zhes pa'i mthar thug pa sngags gcig ste rkang pa lnga pa'o/ /sngags kyi zhes pa sngags so/ /'di ni 'dir man ngag dang bcas pa'i bsdus pa'i don te/dur khrod du shing bab po la'i shun pa skam po dang rnam par snang mdzad skam po gcig tu dur khrod kyi mes sbar la me de la snying gar shing bab po la gzhag pa'i gzugs brnyan de bzhag nas gzugs brnyan de'i snying gar tshangs pa'i rdo rje oM bud+d+ha zhes pa la sogs pa rkang pa lnga pa'i sngags kyis brgyad lhag pa'i brgyar sbyin sreg bya zhing gzugs brnyan de yang bsregs nas thal bar bya'o//de'i rjes su kham phor so ma btang ba dang pad+ma'i snod dbus su pad+ma 'dab ma bzhi pa bri zhing de'i lte bar rkang pa lnga pa'i sngags kyi tsi tra se nA'i rkang pa'o//'dab ma rnams la rkang pa gzhan rnams so/ /sngags rnams thams cad kyang / lha nyid sngags kyi gzugs kyis ni/ /dngos grub mtha' dag sgrub par mdzad/ /ces dpa' bo grub pa'i rgyud du gsungs pa'i phyir/ sngags dang lha dag tha mi dad cing rang gi lha'i rang bzhin du bsgom mo//de nas thal ba de so ma btang ba'i kham phor du bzhag ste/ nyi ma nyi shu rtsa gcig tu nyi ma so sor dus gsum du oM bud+d+ha zhes pa la sogs pa'i sngags kyis brgya rtsa brgyad du mngon par bsngags par bya'o/ / de'i rjes su thod par yang de ltar 'gyur ro zhes pas thal ba sgrub par 'gyur ro/ /des zhes pa ni de ltar bsgrubs pa'i rdo rje gtsug gnur bas so/ /de kho na zhes pa dgra bo'o/ /sbyor ba gnyis pa gsungs pa/ de kho na zhes pa bsgrub pas so/ /mar khu bzang po ni skyes bu sbyangs pa'i mar khu ste des so//de rnams zhes pa gter rnams te/ bsdigs so zhes pa lhag ma'o/ /thams cad ni gter rnams so/ /sbyor ba gsum pa gsungs pa/ thal ba des zhes pa la sogs pa ste/ bsgrubs pas byugs te/ sdigs mdzub kyis bsdigs shing mthe bos bskor nas kha sbub tu ltung bar byed do//sbyor ba bzhi pa gsungs te/ des zhes pa bsgrubs pas so/ /thal ba de dang bdar zhing sbyangs pa'i zha nye'i phye ma dang rdo rje gtsug cha mnyam pa'o/ /cung zad ces pa zha nye'i phye las dman pa'i tshad do/ /'di thams cad bsres par byas nas rdo rje mchu zhes pa phag nag po ste/de'i khu ba ni khrag go/ /rdo rje dbyug pa zhes klog pa la ni rdo rje dbyug pa'i khu ba ni mi'i chu'o/ /des te khrag gam chus bsgos nas/ phyi nas srang gang gi tshad kyi tsher mas dbug tu rung ba'i zangs ma'i snod du bzhag ste/rdo rje mchu'i khu bas sam mi'i gci bas bkang nas zhag bdun du bsgom par bya'o/ /de'i rjes su mkhris pa chen pos te mi'i mkhris pa dang lhan cig zhag bdun du snod de kho nar mnye bar bya'o/ /de nas zhes snod nas so/ /lcags kyi snod du ste/ khab len gyi lcags kyi snod srang gi tshad khab kyis dbug tu rung bar rdo rje mchu la sogs pas bsgom pa la sogs pa byas nas gzhag par bya'o zhes pa'i don to//de zhes pa de'i zangs kyi snod dam lcags kyi snod do/ /me la gzhag ste gzhag par bya'o/ /kha cig smra ba ni bar chad med par 'bar ba'i sa gzhi la bzhag ste thob nas zhag bdun du gzhag par bya'o//gzhan smra ba ni gzhag ste bskol bar bya'o zer ro/ /de nas zangs kyi snod de gser du 'gyur zhing lcags kyi snod ni dngul du 'gyur ro/ /gzhan rnams smra ba ni snod gang ci yang rung bar dang por rdo rje mchu'i khu bas bsgos nas/de nas phyung nas zangs kyi snod dang lcags kyi snod du bsgo ba dang mnye ba dang gzhag pa rnams byas nas zangs kyi snod dam lcags kyi snod de dang lhan cig me'i dbus su ste gzhag go zhes pa snga ma bzhin no/ / 'on kyang bskol ba'i phyogs la gsha' tshe'i phye ma dang khab len gyi phye ma zad par bya'o/ /stong phrag ces pa la sogs pa go sla'o/ /sbyor ba lnga pa gsungs pa/ de nyid kyis zhes pa grub pas so/ /nyi ma bzang po la tho rangs thal ba de gzhon nu ma'i mgor gzhag ste rdo rje gtsug phud kyis bkru'o//spos lnga ni sgron ma lnga'i bdug pas rkang pa lnga'i sngags klog cing bdug par bya'o/ /sbyor ba drug pa gsungs pa/ yungs kar dkar po gzhon nu ma'i thod par bskrun nas de las skyes pa'i 'bras bu'i sngags 'dis sngon du bsnyen pa 'bum bzlas pas lan bdun du mngon par bsngags pa'o//skar rtsis kyi cho ga 'dis sangs rgyas thams cad kyis byin gyis brlabs pa'i gzhon nu ma'i 'am/ sgrub pa po brtan pa nyid las gzhan gyi'ang gdong pa la sngags bzlog cing brdeg par bya'o/ /de nas gzhon nu ma de dgod do//gcig ces pa gzhon nu ma'i kha nas byung ba'i ral gri rnams kyi ral gri gcig yud kyis bzung nas ral gri'i grub par 'gyur ro/ /bzang po zhes pa bzang mo ste rang bzhin du gnas pa'o/ /sbyor ba bdun pa gsungs pa/ de'i zhes pa la sogs pa'o/ / thal ba'i ri lu rim gyis gser dang dngul dang zangs rnams kyis dkris nas de ma thag tu brjod pa'i sngags 'bum bzlas pa byas pas lan bdun du mngon par bsngags pas dro ba dang du ba dang 'bar ba'i rjes thogs su khar gzhug par bya'o/ /'dir gser gyi tshad ni ra ti phyed dang bcas pa bdun lhag pa'i drug nam gsum mo//dngul gyi ni phyed dang bcas pa'i ra ti gnyis lhag pa'i drung nam bzhi'o/ /zangs ma'i ni ra ti lnga lhag pa'i drug nam lnga'o/ /de gsungs pa/ phyed dang brgyad dang mA sa gsum/ /phyed dang gsum dang de bzhin bzhi//ra ti lnga dang mA sa gsum/ /ri lu bcing la yang dag nges/ /zhes so/ /'jig rten gsum bsgrub pa'i sngags zhes pa grong khyer dkrug pa'i sngags so/ /las kyi rjes su 'brang bas bcom ldan 'das dang bcom ldan 'das ma dag gi sku mdog gi dbye ba brgyad par 'chad par 'gyur ro zhes pa mkhas pa a b+ha ya A ka ra gup+tas mdzad pa'i 'jigs pa med pa'i gzhung 'grel du le'u gnyis pa'o// //sngags bshad nas sngags kyi rang bzhin gyi sku dang rdzogs pa'i ngo bo yang bshad pa'i ched du gsungs pa/ de nas zhes pa la sogs pa'o//lha'i le'u zhes pa sngags las skyes pa rnams kyi dang / rdzogs pa'i ngo bo'i lha rnams kyi le'u'o/ /raM yig ces pa la sogs pa dkyil 'khor gyi 'khor lo bsgom pa ni gsal bar phyogs gcig tu 'chad par 'gyur ro/ /nang gi ni rdo rje sa gzhi zhes pa la sogs pa la rdo rje sa gzhi ni lte ba ste de'i dbus su'o//rdzogs pa'i rim pa la ni e yig bdag nyid chen po ni chos kyi dbyings kyi rang bzhin no/ /e yig yongs su gyur pa'i gru gsum ni chos 'byung sprul pa'i 'khor lo ste/ khams gsum bdag nyid bsam par bya'o//gru gsum de'i dbus su e yig gam laM yig sa bon te/ de yongs su gyur pa'i sa'i dkyil 'khor ro/ /snying gar baM yig gam oM yig ni chos te sems yin zhing de'i bdag nyid ni de las byung ba ste/ 'khor lo chos kyi 'khor lo'o/ /rtsa rnams kun gyi ngo bo can//zhes pa rtsa brgyad kyi rang bzhin te/ 'khor lo bzhi'i rtsa rnams kyang bde ba chen po'i sems las tha mi dad pa'i phyir de'i rang bzhin no/ /mgo bo la/ rnal 'byor ma ni rnam par gnas/ /zhes pa rnal 'byor ma sum cu rtsa gnyis rnams te/ khyad par du bde ba chen po'i gnas nas 'dzag pa byang chub kyi sems 'bab pa rnams gang du gnas pa'o//bzang ba ni bde ba chen po'i 'khor lo de'i rang bzhin no/ /rtsa thams cad kyi rang bzhin rtsa sum cu rtsa gnyis po 'di rnams kyi byang chub kyi sems 'bab pa spyi'i las dang khyad par gyi las dang ming yang rgyud gzhan gyi rjes su 'brang bas bshad par bya'o//de la a ba d+hU tI ni byang chub kyi sems kho na 'bebs so/ /rkyang ma lte ba'i rtsa bar 'phyang bzhin pa ni zos pa dang 'thungs pa rnams lto ba'i mes smin pa rnams las zhu ba 'bebs so//de las zhu ba 'di rtsa gzhan dang gzhan du rgyu bas lus mngon par khyab par byed do/ /ra sa nA ni zhu ba las khrag 'bab po/ /de'i phyir de yang de lta kho nar lus la khyab par byed do/ /kun gyi yang bsdu ba 'di yin te/ mi phyed so dang sen mo 'bab/ / phra mo skra dang ba spu 'byin/ /rtsen mo pags pa dri ma 'bab/ /g.yon pa ma ni sha 'bab cing / /mi'u thung ma zhag 'bab 'gyur/ /rus sbal skyes pa rus sbal 'dod/ /sbom pa mo 'gyur mkhal ma 'bab/ /dbang bskur ma ni snying 'bab 'gyur/ /skyon ma mig ni 'bab par 'dod//mjug ma mkhris pa 'bab par bshad/ /ma mo ma ni glo ba 'bab/ /mtshan mo ma ni rgyu ma 'bab/ /bsil ba ma ni lta zur dag /drod ma lto ba 'bab par 'gyur/ /mi bskyod 'bab pa rkyang ma'o/ /a ba d+hU tI zla ba 'bab/ /ro ma khrag 'bab byed par bshad//bshang ba la ni gzhol mar 'dod/ /dga' gdong ma ni skra mtshams la'o/ /spyi ma rnag ni 'bab par byed/ /bad kan rgyu sbyin ma ru bshad/ /rdul 'bab ma ni bral ba ma/ /tshil la dga' ba ma zhes brjod/ /grub ma mya ngan mchi ma 'bab//'ched ma mchil ma la 'dod do/ /yid bzangs ma ni snabs 'bab pa/ /gsum skor ma ni gzugs la 'dod/ /'dod pa ma ni sgra la bshad/ /khyim ma dri 'bab par 'gyur ro/ /ro 'byin byed ma gtum mo'o/ /reg la rnal 'byor mar shes bya/ /chos la bdud 'dral ma ru 'gyur//zhes so/ /'dir la la nA dang ro ma dang kun 'dar ma ni sna tshogs sde ma'o/ /de las gzhan gnyis gnyis ni rim pa bzhin phring bzangs ma dang thod pa can ma dang / 'jigs ma dang thub dka' ma'o/ /de las gzhan rnams ni dge ba'i ska rags ma la sogs pa rnal 'byor ma nyi shu'i ngo bor shes par bya'o//bdud 'dral ma ni a ba d+hU tI dang 'dres pa kho na ste/ lce'i rtse mo ji srid par lte ba nas langs pa dus kyi rtsa ste/ 'gog pa'i mtshan nyid can gyi chos rnal 'byor ma rnams 'bab pa'o/ /da ni rnal 'byor ma bsdus pas rab tu 'jug ste/de ni ma rig pa'i ngo bo nyid yin pa'i phyir ro/ /'o na brtag pa gnyis par byang chub kyi sems sum cu rtsa gnyis 'bab pa rnams so zhes gsungs pa ji ltar zhe na/ dus kyi rtsa ni 'gog pa nyid du 'bab par byed pa'i phyir skyon med do/ /rnal 'byor ma ngo bor rtsa ston pa'i skabs su ni de ston pa yongs su spangs pa'i don to//de'i dbang las 'jig rten 'di bde ba chen po'i rang bzhin du skyes kyang de'i dkyil 'khor mi mthong ngo / /de'i bde ba yang ngo / /de nyid kyi phyir gsungs pa/ 'bad pas kun gyi lhag ma spang / / zhes so/ /bcom ldan 'das byang chub kyi sems rdo rje ni kun gyi thabs so/ /'di yang don dam par sa bon las skye ba med pa kho nar stong pa nyid dang snying rje dbyer med pa'i byang chub kyi sems kyi ngo bo rdzogs pa'i dkyil 'khor gsungs pa/ bcu drug cha yis brgyan gyur pa//zhes pa mgrin par te/ cha ni 'dir rtsa rnams te/ rtsa bcu drug dang ldan pa longs spyod kyi 'khor lo'o/ /sprul pa ni sprul pa'i pad+ma de gang du drug cu rtsa bzhi'i 'dab ma rnams te rtsa rnams yin pa de'o/ /de ltar zhes pa 'khor lo bzhi rnams su rtsa brgya nyi shu ste/rtsa rnams nyi shu lhag pa'i brgyar 'gyur ro/ /de ltar bsam par bya zhes pa de ltar rdzogs pa'i dkyil 'khor bsam par bya ste bsgom par bya zhing bzlas par bya'o/ /de la rkyang mdang ro mar srog gi rlung thun phyed phyed du bdag po nyid kyi phyir nyin mtshan du 'pho ba bcu drug rnams mgrin par ro//de kho na la dkyil 'khor bzhi'i dbye bas dbyu gu bzhi'i bdag po nyid las sprul pa'i 'khor lor dbyu gu drug cu rtsa bzhi rnams su 'gyur ro/ /bcom ldan 'das kyis yang dag par sbyor ba la sogs pa'i rgyud rnams su dang / 'phags pa klu sgrub zhabs kyis kyang ji skad du gsungs pa/me nyid dang ni rlung dang ni/ /dbang chen dang ni de bzhin chu'i/ /dkyil 'khor du ni de rgyu ba/ /steng logs thad ka 'og tu 'gro'o/ /zhes so/ /de kho na la so sor shes rab dang / thabs kyi ngo bo'i dkyil 'khor gnyis longs spyod pa las rtsa ba'i 'khor lor yang dag par rgyu ba'i phyir bde ba chen po'i 'khor lor rtsa sum cu rtsa gnyis rnams so//nyin mo dang mtshan mo'i rnam par dbye bas shes rab dang thabs kyis dbye ba las thun brgyad rnams te snying gar ro/ /rgyud gzhan rnams su nyin zhag dbyu gu drug cu'i bdag nyid du gang gsungs pa de ni dbugs drug cu lhag pa'i sum brgya rnams dbyu gur rnam par gzhag pas so//'dir ni dkyil 'khor bzhir rnam par gzhag pas dbugs phyed dang bcas pa sum cu rtsa bdun lhag pa'i sum brgya rnams dbyu gur rnam par gzhag pa'o//gnyis ka la yang nyin mtshan la dbugs drug brgya lhag pa'i stong phrag nyi shu rtsa gcig tu 'gyur ro zhes pa khyad par med do/ /de ltar rdzogs pa'i rim pa la ltos pas bzlas pa yang rdzogs par gsal bar byas so//de gsungs pa/ rnal 'byor dbang po nyin mtshan gyis/ /nyi khri dang ni stong phrag dang / /de bzhin brgya phrag drug tu ni/ /bzlas pa yis ni grangs byed do/ /zhes so/ /rig pa bzlas pas sems brtan pa na bde ba chen po'i rang bzhin rdzogs pa'i dkyil 'khor la mngon du phyogs par 'gyur ro//shes rab can zhes pa shes rab chen po can rdzogs pa'i rim pa'i dkyil 'khor bsgom pa la mkhas pa'o/ /rdo rje sku la ni stong pa nyid dang ro gcig pa bde ba chen po'i rang bzhin gyi sku la'o/ /de nyid kyi phyir rang dang gzhan dag phyag rgya chen po'i dngos grub tu rung ba nyid kyi phyir bdag nyid chen po'o//der zhes pa chos kyi 'khor lor ro/ /bskyed pa'i rim pa la ni baM las skyes pa'i chu'i dkyil 'khor ro/ /rtsa rnams kun gyi dkyil 'khor ni/ /chu yi dkyil 'khor la thim 'gyur//zhes pa rtsa'i dkyil 'khor gzhan ni snying ga'i rtsa brgyad po rnams kho na 'pho ba ste/ de'i phyir rtsa'i dkyil 'khor thams cad chu'i dkyil 'khor la 'byor par byed do/ /slar yang zhes pa la sogs pa la sprul pa'i 'khor lo'i 'og tu ma yig dmar po las skyes pa'am/raM las skyes pa'i me'i dkyil 'khor gru gsum pa 'bar ba sprul pa'i rtsa'i 'khor lo la 'byar bzhin pa'o/ /me las 'og tu yA yig las skyes pa'am/ yaM yig las skyes pa'i rlung gi dkyil 'khor ro/ /rtsa rnams thams cad g.yo byed gzugs//zhes rlung gi dkyil 'khor des me 'bar bar byed cing rtsa thams cad la gnas pa'i byang chub kyi sems g.yor 'jug go/ /thim bzhin pa ni 'khor lo rig /ces pa 'khor lo la thim bzhin pa ni rig pa ste rig par byed pa des g.yos pa'i byang chub kyi sems rlung gi 'khor lor thim pa de'i tshe lhan cig skyes pa'i bde ba rig par 'gyur ro//de rnams thams cad thim pa yis/ /rnal 'byor pa de dbus su gnas/ /zhes pa der te lhan cig skyes pa'i bde ba rig pa la/ thams cad de phung po la sogs pa rnams thig le bzhin pa rnams dang rnal 'byor pa ni sems te de yang der de'i bdag nyid kyis gnas so//zla ba zhes pa byang chub kyi sems te bde ba chen po'i 'khor lor spyi gtsug ji srid par ro/ /nyi ma ni rdul te sprul pa'i 'og tu'o/ /hUM AHzhes pa la kha cig tu hUM aM zhes klog ste/hUM yig sngon po ni chos kyi 'khor lo la'o/ /AHyig gam aM yig dmar po ni sprul pa'i 'khor lor ro/ /longs spyod kyi 'khor lor oM yig dmar po ste rgyud gzhan du gsungs pa'i phyir ro/ /ka yig ha yig brgyan gyur pa//zhes pa ka yig kyang 'di yin la ha yig kyang yin zhing brgyan pa'ang ngo / /kaM bde ba chen po ste de'i rang bzhin ni bde ba chen po'i 'khor lor ha yig dpral bar stong pa gzhom du med pa zla ba phyed pa dang thig les brgyan pa dkar po bsam par bya'o/ /ka yig ha yig la thim pa//zhes pa bde ba chen po gzhom du med pa la 'dres par gyur pa ste dbyer med pa zhes pa'i bar ro/ /ha hUM dbyer med pa zhes pa gzhom du med pa'i rang bzhin ji lta ba de lta bu ni hUM yig ste/ gnyi ga yang gnyis ka'i rang bzhin no zhes bya ba'i don to//ji ltar/ de yi bde ba 'dod par bshad/ /ces pa'i gsungs las/ kaM shes rab dang ha thabs te de dag dbyer med pa de ltar bde ba'i bdag nyid kyi ha yig ni shes rab UM yig dang ldan pa las ha hUM zhes pa'i yi ge gnyis 'dres pa ni hUM yig sems thabs so zhes pa shes rab dang thabs dbyer med pa'o//hUM yig gi ni 'od zer rnams/ /zhes pa rlung gis me gtum mo'i 'od zer bskul ba bde ba chen po'i 'khor lor son pa ste/ der ri bong can bskul zhing ri bong can gyis rnam par rtog pa'i gdung bzhi ba las kha ba lta bu'i ka yig bde ba chen po dang nyi ma rdul dang ha dang oM dag lhan cig zhu bar gyur nas hUM yig la ngal bso'o//de nas hUM yig kyang zhu bar gyur nas sprul pa'i sa bon la ngal bso'o/ /de dang nyi ma dang zla ba'i dkyil 'khor gnyis kyang 'dres par gyur nas nyi ma zhes pa rdul gyi dkyil 'khor kho na lhag pa'i thig le'i gzugs su blta bar bya/khu ba ni lhag ma min pa'o/ /yang ni hUM yig 'od zer rnams/ /zhes pa hUM yig zhu ba'i thig le'i 'od zer gyi ri mo rtsa'i 'khor lo thams cad la reg pa'o/ /sa bon zhes pa bde ba chen po bskyed pa thig le'i gzugs so//de ltar thig le'i rnal 'byor gsungs so/ /rdzogs pa'i dkyil 'khor bsgom pa la ni sa bon la sogs pa bskyed pa med par rdul gyi ngo bo'i gtum mo nges par 'byung ba yang shin tu 'bar ro/ /des mchog tu sbar ba'i ri bong can yang shin tu ches 'dzeg go//des brtas par byas pa'i gtum mo'o/ /shin tu ches 'bar ro/ /ri bong can des mchog tu gdungs pa yang ches 'dzeg go/ /de ltar nang gi zla ba dang nyi ma mnyam par 'du ba bar ma chad pa bde ba chen po'i rang bzhin phung po dang khams la sogs pa sgro btags pa zil gyis gnon pa rab tu skye'o//gang rnams de ltar mi mos pa de rnams ni ji skad bshad pa'i bzlas pas srog sdom pa la dbang nyid thob pas thur sel gyi rlung bsdus lte ba'i dkyil 'khor du phyag rgya chen po dmigs te/ rlung bkag pas gtum mo 'bar du 'jug go/ /de nas de lta kho nar bde ba chen po gsal bar 'gyur ro/ /de ltar mi nus pas ni de lta kho nar lte ba'i dkyil 'khor du rlung bkag par mos nas gnas pas dbugs 'byung ba ni ri mo drang po gtum mo'i ngo bos bcom ldan 'das ma 'bar ba mos te/bde ba chen po'i gnas rjes su thob pa las dbugs 'jug pa na haM yig zla ba 'dzag pa'i thig le'i gzugs kyis de lta dmigs bzhin pa bde ba chen po'i rang bzhin lte ba'i dkyil 'khor du 'ongs nas dmigs pa med par 'gyur ro/ /de ltar ji srid du srog 'gog pa'i bar du gnas par bya ste/de kho nar dbugs 'byung ba dang / 'jug pa dag yang dang yang du bsgrub par bya'o/ /gang yang srog 'byung ba dang / 'jug pa brtag par mi nus pa de lhag par mos pa tsam kho na sgrub par byed do/ /bskyed pa'i rim pa sgom pa pos ni de sngon ma can kho nar 'di mtha' dag stobs ji lta bar dmigs par bya'o//rgyas pa la dga' bas ni rnal 'byor ma'i 'khor lo mtha' dag gi ngo bo phyag rgya chen po'i bdag nyid bcom ldan 'das ma sna tshogs sde ma gtum mo'i ngo bo 'bar bzhin pas phyogs bcur 'phros pas 'dod chags chen po'i me'i 'od kyis bskul ba'i de bzhin gshegs pa 'dod chags chen po rjes su chags pa rnam pa thams cad bde ba chen po'i 'khor lor zhugs par bltas nas de kho na bzhin du thams cad bsgrub par bya'o//de ltar 'di la sangs rgyas kyi byin rlabs kyang 'byung ngo zhes pa gtum mo'i gdams pa'i dbye ba'o//'di thams cad kyang bla ma dam pas gdams par byas pa bsnyad pa'o/ /de kho nas zhes pa mi'i rgyus pa rlon pas zhes pa lhag ma'o/ /de ltar pha rol phyin ma zhes pa shes rab kyi pha rol tu phyin pa'i rang bzhin no//bcom ldan 'das ni snying rje chen po'i rang bzhin no/ /de yi lus skyes 'od zer rnams/ /zhes pa bcom ldan 'das de'i sku las skyes pa'i gtum mo'i 'od zer rnams so/ /'dzag pa des zhes pa chos kyi 'khor lo'i sa bon bkru ba'i dus su chos kyi 'khor lo'i rtsa brgyad po'i rang bzhin rnal 'byor ma rnams phyi rol du spros nas zhes pa'i don to//dri bzang lnga zhes pa bdud rtsi lnga rnams so/ /me tog ni bud med kyi rdul lo/ /bdug spos ni 'dod chags rdo rje ma'i chags pas 'bar ba'i gtum mo'i mar me'i'o//dpa' bo rdzogs pa zhes pa dpa' bo grub par mthong nas sngar bzhin 'dzag go/ /a mra'i lo ma ni sa ha kA ra'i 'dab ma'o/ /gsol ba gdab ces pa don du gnyer bar bya'o/ /dbang bskur ba yis zhes pa la/dbang bskur ni dri ma med par byed pa'o/ /mkhas pa ni rig pa dang ldan pa ste/ sgrol ba'i thabs rig pa rnams so/ /bu tshe med ces pa la sogs pa la ji ltar bu shi ba'i khyim du bus stong pa ste de ltar dbang bskur dang bral ba'i skyes bu la thams cad mkhyen pa'i ye shes dang bral ba'o//ji ltar thams cad sbyar ba na yang / pi wang rgyud med brdung mi rung / /de las sgra 'grub ma yin no/ /ji srid sangs rgyas kyis mi spong ste/ dmyal ba mi 'dor gyi bar du'o/ /'dis ni dbang bskur thams cad gdon mi za bar gzung bar gsungs so//he ru kar gyur pa na zhes pa/ he ru ka'i gzugs su bsgom pa rdzogs pas/ dgos pa ci ste dbang bskur med na sangs rgyas nyid med pa'i phyir ro/ /bsod nams tsam du ni 'gyur ro zhes pa'i don to/ /de zhes pa de la'o/ /phyi dang gsang ba zhes nye bar mtshon pa las shes rab dang bzhi pa'i dbang bskur dag kyang shes par bya'o//dpal sangs rgyas thod pa'i rgyud chen po'i 'grel pa 'jigs pa med pa'i gzhung 'grel du le'u gsum pa'o// //mkha' lding sbyor ba bshad pa'i ched du gsungs pa/ de nas zhes pa la sogs pa'o//bdag cag gi ni bdag cag rnams so/ /'od zer gyis ni le'u dang por spros pa'i sngags kyi 'od zer gyis so/ /snying ga'i 'od zer rnams zhes pa sna tshogs sde ma'i snying ga'i 'od zer rnams kyis klu rnams gtad par byas nas 'ongs te sna tshogs sde ma'i snying gar zhugs pa rnams so//bka' bsgos pa zhes pa bdag cag rnams so/ /lha mo zhes pa kye lha mo'o/ /gsungs pa zhes pa sna tshogs sde mas so/ /klu rnams la byin gyis brlabs nas de'i khas dug gi de kho na nyid rgyas par bstan pa'i ched du dri ma lnga rnams te//mu stegs la sogs mkha' lding sbyor/ /zhes pa la sogs pa'o/ /khyab 'jug dang dbang phyug la sogs pa rnams kyi dang / bcom ldan 'das rdo rje 'dzin pa'i mkha' lding sbyor ba sngags dang sman dang ting nge 'dzin gyi khyad par ro/ /ji lta bur 'dod de ye shes kyang de yin la yang dag par 'byung ngo zhes pas 'byung ba yang ste/ye shes 'byung ba ji lta bu ma ning nyid ni khyad par lhur byed pa'am gtsug lag nyid kyi phyir ro/ /dug gi zhes pa dug go/ /ji ltar zhes pa rab tu dbye ba dris pa'o/ /zhus pa zhes pa klu rnams kyis so/ / khyab 'jug ces pa la sogs pa mu stegs pa'i phyogs la dri ba lnga pa [(]len [,]lan [)]'don pa'o/ /khyab 'jug dang dbang phyug la sogs pa blo phyin ci log pa dngos po'i de kho na nyid mngon par mi shes pa rnams te/ de rnams kyi lugs la mche bas gzung ba'i dug dang mche ba yang don dam pa yod do//de'i phyir de kho na nyid mi shes pa las dug gi skyon rnams kyis gnod 'gyur te/ 'chi bar 'gyur zhing mkha' lding sbyor bas kyang 'tsho bar nus pa ma yin te/ de ltar dus su gzung bar smra zhes pa/ mda' dang phyogs dus me dang rta/ /zung dang zla ba sogs kyi nyin//drug dang rig byed lag bdun mda'/ /yon tan phun tshogs ri mtshan mo/ /zhes pa la sogs pa'i lan rnams la rim pa ji lta bar thun phyed rnams ni dus te/ de la bzung ba ni bcos su mi rung bar smra'o zhes pa dri ba gsum pa'i lan no/ /dri ba dang po'i lan 'debs pa/sbrul gyi zhes pa la sogs pa ste/ dus su zin pa nyid med na 'phrog go zhes pa 'phrog byed do/ /khyab 'jug dang dbang phyug la sogs pas byas pa'i sbrul gyi dug zil gyis gnon pa'i thabs yod do/ /de ltar gyur na bzung ba la sbrul gyi dug med do//dus su zin pa nyid la mkha' lding gi sbyor ba med na/ sbrul gyis zhes pa la sogs pa nye bar bsdu ba'o/ /rdzu 'phrul che ba ni mkha' lding sbyor ba byed pa'i phyir ro/ /bcom ldan 'das kyi phyogs la dri ba gnyis pa'i [(]len [,]lan [)]ldon te/ bcom ldan 'das zhes pa la sogs pa'o//dor bya dang blang bya ston pa'i phyir ston pa'o/ /khyab 'jug dang dbang phyug la sogs pa yang / de la gus pa rnams kyi ston par brjod do zhes pas gsungs pa/ stong nyid nges gsungs pa zhes te/ thabs byung ste rgyu lkog gyur pas/ /de 'chad pa ni dka' ba yin//zhes pa'i rig pa las dngos po mtha' dag gi de kho na nyid khong du chud pa brtse ba'i gzhan dbang nyid las gdul bya rnams la stong pa nyid kyi bdag nyid kyi de kho na nyid gsungs pa'o/ /nges pa ni zin pa nyid de bya ba'i khyad par ro/ /bde byed la sogs pa rnams ni rang nyid kyis de kho na nyid ma nges shing gzhan rnams la yang nges par mi smra'o zhes pa dgongs pa'o//des bstan pa'i stong pa nyid kyi ting nge 'dzin kho na dug byed pa bla na med pa'o zhes dri ba dang po lan 'debs par byed pa/ stong pa la zhes pa gcig dang du ma'i rang bzhin dang bral ba'i rang bzhin med pa rnams la'o//rten cing 'brel 'byung gang yin pa/ /stong nyid de nyid khyod dgongs pa/ /zhes pa chos rnams thams cad la ste phung po dang khams dang skye mched rnams la'o/ /sbrul dang gzung ba dang dug kyang ji ltar te med pa kho na'o/ /'di ltar stong pa nyid las dug gi de kho na nyid nges pas dug gdon mi za bar 'jig par 'gyur ro zhes pa'i don to//de nyid kyi phyir dri ba gsum pa'i lan ji ltar zhes pa la sogs pa ste/ thams cad du ci ni spong ba la'o/ /dri ba lnga pa la lan zin pas zhes pa la sogs pa ste/ stong pa nyid ni ma nges pa las ni 'chi ste/de'i phyir de rnams stong pa nyid smra bas bstan pas bcom ldan 'das kyis nges pa gsungs so/ /da ni gang rnams la nang gi dug med pa de rnams la sbrul la sogs pa'i dug kyang ngo zhes bshad pa'i ched du gsungs pa/ 'dod chags zhes pa la sogs pa'o/ / 'dod chags ni zag pa dang bcas pa'i dngos po la chags pa'o/ /gti mug ni ma rig pa ste dngos po dang dngos med la sogs par zhen pa'o/ /grags chen ma zhes pa sna tshogs sde ma bod pa'o/ /tha mal pa'i yul zhes pa la tha mal ni 'dir ma rig pa ste/ des sgro btags pa rnams ni tha mal pa'o//rang bzhin yul ni dri ma med/ /ces pa la/ rang bzhin ni 'dir stong pa nyid de des gzugs la sogs pa'i yul lnga sems kyis rnam par bsgrubs pa lnga rnams dri ma 'dod chags pa bag chags dang bcas pa rnams legs par rtsad nas bton cing stong pa nyid kyi rang bzhin gang rnams la yod pa de rnams ni de skad do//mang po nyid la gcig gi tshig ni gtsug lag nyid kyi phyir ro/ /'di rnams kyi dri ma med pa nyid kyang sems dri ma med pa nyid las so/ /sems kyang rang bzhin gyis dri ma med pa ste/ de tshad ma rnam 'grel du gsungs pa/ sems ni rang bzhin 'od gsal ba//dri ma rnams ni glo bur ba/ /zhes so/ /dkyus ma la sbyor ba ni dri ma zhes pa la sogs pa'o/ /don 'di yin te/ 'dod chags la sogs pa kho na nang gi dug ste bsod nams dang ye shes kyi tshogs kyi srog 'joms pa'i phyir ro/ /de'i sems kyi dbang las yul gyi rang gi ngo bo yang dug go//gang gi tshe sems stong pa nyid dang snying rje dbyer med pa'i rang bzhin dri ma med pa nyid las dug med par nges pa de'i tshe yul gyi rang gi ngo bo yang dri ma dang bral ba ste ji ltar te dug ma yin pa kho na'o/ /'di lta bu'i tshul gyis brten pa'i dug la sogs pa za ba la sogs pa na de kho na nyid la mos pa las mi gnod do zhes gsal bar byas so//de kye'i rdo rje'i rgyud du dpe nyid kyis gsungs pa/ gang zhig sems med 'jig rten mi/ /dug zos pa yis brgyal ba yin/ /rmongs spongs de kho na nyid shes/ / de tshe nyid na mya ngan spong / /zhes so/ /'dir rmongs spangs ni dug gi de kho na nyid yongs su shes pa'i phyir ro/ /de kho na nyid shes pa ni dug gi de kho na nyid la mos bzhin pa'o/ /mya ngan ni mya ngan no/ /nang gi dug 'jigs pa yang des dpes bstan pa nyid du gsungs pa/de bzhin myang 'das thabs shes shing / /kye yi rdo rjer ngal ba byas/ /ma rig sogs kyis mi 'ching ste/ /gti mug la sogs 'ching bas min/ /zhes pa ste/ 'dir kye'i rdo rjer zhes pa stong pa nyid dang bde ba chen po dmigs pa med pa'i snying rje chen po dbyer med pa'i ye shes la'o//ma rig la sogs rnams kyis te/ /yan lag bcu gnyis rnams kyis so/ /gti mug la sogs rnams kyis te/ /nyon mongs pa rnams kyis so/ /de ltar nang gi dug dang bral ba la phyi rol gyi dug gis kyang mi gnod par gsungs la/ sbrul gyis kyang zhes pa la sogs pa ste/dri ba bzhi pa'i lan 'debs par byed do/ /tha mal dug dang sbrul gyi dug /nyes pa kho na zhes pa la tha mal ni ma rig pa ste/ des sgro btags pa las byung ba ni tha mal pa'i dug ste/ sbrul gyi 'di yin pa ni sbrul gyi ste/ a Na 'phel ba med pa'i phyir ro/ /de dang yul gyi dug ces pa gnyis ka yang ci zhig byed ces 'brel te/mu stegs pa'i phyogs la dri ba gnyis pa'i lan 'debs pa lha rnams yul gyis bsgrib pa zhes te/ bde byed la sogs pa rnams yul rnams la nyon mongs pa dang / shes bya'i sgrib pa rnams kyis de kho na nyid kyi shes pa bsgrib par byas pa rnams te/de'i phyir de rnams la nang gi dang phyi'i dug yod do/ /'on kyang rdzu 'phrul che ba nyid kyis na dug zhi ba'i thabs byed cing / dus su zin pa gsor mi rung bar smra'o/ /de nyid kyi phyir gsungs par 'gyur ba/ rdzu 'phrul che la blo med pa/ /zhes so/ /bag chags dang bcas pa'i sgrib pa thams cad rtsad nas phyung ba'i bcom ldan 'das sangs rgyas thod pa ni 'dod pa la spyod kyang mi 'ching ngo zhes ston pa yul zhes pa la sogs pa'o//de bzhin du spyod bzhin pa ni sangs rgyas thod pa'i rnal 'byor pa rnams kyang longs spyod kyang mi dgos te sangs rgyas thod pa'i rnal 'byor las so zhes gsungs pa/sangs rgyas zhes pa la sogs pa'o/ /thams cad nye bar mtshon pa nyid kyis mjug sdud pa/ de las dus zin med ces pa sangs rgyas thod pa'i sbyor ba las so/ /de ltar don dam pa'i dug zhi thabs brjod nas kun rdzob pa gsungs pa/ shA gi li zhes pa la sogs pa'o//bsdams te yang dag par bsdams par shA li ka'i byed pa 'dir 'gyur ba'o/ /mu stegs pa rnams dus su bzung ba gsor mi rung bar smra la bcom ldan 'das ni ma yin no zhes dgongs pa'o/ /de skad brjod nas klu rnams kyis/ /sna tshogs sde mar phyag 'tshal nas//rang rang gnas rnams su ni song / /zhes pa sdud pa pos gsungs pa/ 'di 'dra zhes pa la sogs pa'o/ /rab tu rtogs pa zhes pa rang gi ngo bo nges par sems pa'o/ /oM zhes pa sku gsung thugs so/ /shU n+ya tA rang bzhin med pa nyid do/ /dz+nyA na ni thugs rje chen po'o/ /de gsum dbyer med pa nyid kyi phyir rdo rje'i rang bzhin gang gi bdag nyid de rang gi ngo bo yin pa de nga'o//ji ltar de lta bu nga yin pa de ltar mtha' dag go zhes gsungs pa/ stong dang stong min zhes pa la sogs pa ste/ stong pa ste rang gi ngo bo dang bral ba nyid kyi phyir ro/ /stong min te de ltar yang brjod du med pa nyid kyi phyir dang /gnyis dang bral ba'i ngo bor gnas pa'i phyir ro/ /mtho lnga zhes pa sor drug cu pa rtsa ba'i thig gi nang du ste/ gru bzhi pa'i dkyil 'khor ro/ /zlum po ni sor sum cu pa ste/ de nyid du rdo rje sngon po'i phreng bas bskor ba pad+ma 'dab ma brgyad pa sor bcu pa'o/ /rgyud gzhan du sa rko ba la sogs pas zug rngu dbyung ba la sogs pa sbyang ba gsungs so//'dir ni mchog gi rgyud yin pa nyid kyi phyir na lag pas reg nas sngags brgya rtsa brgyad bzlas pas dkyil 'khor gyi sa gzhi 'chad par 'gyur ba'i sbyin sreg gi thab kyi sa gzhi yang sbyang bar bya'o zhes gsungs pa/sa zhes pa la sogs pa'o/ /'dir dug gi thab kyi dbang du byas pa'i dkyil 'khor la lha'i stegs bu dang snam bu mi bya'o zhes gsungs pa/ stegs bu zhes pa la sogs pa'o/ /rdul tshon dmar pos zhes pa phyogs bzhi rnams su dkyil 'khor gyi gnas kun rdul tshon dmar po kho nas dgang bar bya'o//ji ltar 'dus pa la sogs par rnam par snang mdzad la sogs pa'i phyogs kyi dbye bas sa'i kha dog tha dad pa de ltar ma yin no zhes gsungs pa/ gzhan zhes pa la sogs pa'o/ /re khA lnga la sogs pa gzhan ni kha dog lnga'i tshon rnams kyis ji ltar rigs par bya'o//gtor ma sbyin pa dang sa gzhi sbyang ba dang / thig bsngags pa dang / thig gdab pa dang / rdul tshon gdab pa la sogs pa ni he ru ka'i rnal 'byor dang ldan pa'i bla mas bya'o/ /bum pa rnams zhes pa rtsa ba mi nag pa lto ba dang mchu 'phyang ba dang /mgrin pa ring ba rnams te/ dbang ldan dang me la sogs pa'i mtshams su'o/ /bum pa bzhi rnams su grangs ji lta bar mtshan ma bzhi rnams so/ /rnam par rgyal ba'i bum pa ni lnga pa gtso bo'i ste/ 'dir ma brjod kyang rgyud gzhan gyi rigs pas shar sgo las cung zad lhor gtogs pas bya'o//de kho na 'dir las thams cad pa ste/ 'dir mtshan ma ni chos 'byung dbus su cang te'u ste/ cang te'u'i steng du rdo rje dang pad+ma'o/ /slob dpon sangs rgyas thod pa'i rnal 'byor dang ldan par 'gyur ro bya'o/ /ji ltar zhe na gsungs pa/ pad+ma zhes pa la sogs pa ste/sna tshogs pad+ma'i lte bar ro/ /phyis ni zhes pa la sogs pa la/ slob dpon rang nyid lha mo brgyad kyis yongs su bskor ba'i he ru ka'i bdag nyid kyis ye shes sems dpa' bstims pa'i rjes thogs su bdag nyid la dbang bskur bar bya'o/ /he ru ka'i sku las skyes pa'i 'od zer zhes pa snying ga'i rtsa brgyad rnams las spros pa'i 'od zer dang bcas pa'i lha mo brgyad rnams kyis de bzhin gshegs pa rnams la reg tu gzhug par bya ste slob dpon gyis so//lha mo de rnams dang byon pa'i de bzhin gshegs pa'i 'od zer gyis spros pa'i lha mo rnams kyis he ru ka dang lha mo brgyad rnams khrus byed du 'jug go//cod pan can du zhes pa he ru ka cod pan can dang / rnal 'byor ma rnams dang lhan cig ste/ de rnams kyang cod pan can zhes pa'i don to/ /dkyil 'khor rdzogs pa zhes pa de ltar rang nyid he ru ka'i bdag nyid du rdzogs pa na rdul tshon gyi dkyil 'khor la yud kyis dam tshig sems dpa' dang ye shes sems dpa' dang dbang bskur ba dang rgyas gdab pa rnam par bsgoms nas dkyil 'khor sgrub pa'i phyir ro//gtor ma zhes pa klu rnams la'o/ /mar me zhes pa sbrang rtsi dang mar dang nya'i tshil bu dang /dri zhim pa'i 'bru mar te mar me bzhi rnams dkyil 'khor dang nye bar sbyin par bya'o/ /a mra dang na ri ke la dang chu shing dang / ka pit+tha'i 'bras bu bzhi rnams so/ /ras zung gsum ni smad g.yogs dang stod g.yogs dang thod pa'o/ /rnal 'byor ma ni rang nyid kyis phul ba'i bla ma'i shes rab ma dang dpa' bo ni bla ma'o//'khor lo ni tshogs 'du ba'o/ /dam tshig snying por gcig sems kyis/ /zhes pa la/ dam tshig snying po ni bcom ldan 'das so/ /bdag nyid dogs pa zlog byed pa/ /zhes pa dgongs pas dug byung gi dogs pa med pa la ni ma yin no zhes pa'i don to//brtan pa ni bong nga'i dug la sogs pa'o/ /g.yo ba ni sbrul la sogs pa rnams kyi'o/ /lus skyes ni lhog pa la sogs pa'o/ /bcos ma ni mar dang sbrang rtsi la mnyam par sbyor ba la sogs pa'o/ /rnam pa bzhi'i dang dug ni dug med par bgyi zhing ngo //shing bu ni so shing ngo / /slob ma ni he ru ka'i gzugs su bsgom par bya'o/ /mgrin par zhes pa slob dpon gyi dang / slob ma'i'o/ /lag par yang ste g.yon par ro/ /zla bar zhes pa mgrin par gnas pa dang lag par gnas pa la'o/ / bsgom pa'i nus pas zhes pa he ru ka'i sku dang / zla ba la sogs pa sgom par byed cing / de ltar bsgoms pa'i lag pa slob ma'i mgor bzhag nas sngags bzlas so/ /bum pa zhes pa bum pa'i tshad do/ /bzod dka' zhes pa sdug bsngal ba'o/ /nam mkha' lding sbyor zhes pa la sogs pa ni gang gi tshe sems can 'dis mkha' lding gi sbyor ba rtogs par 'gyur ba de'i tshe bdag cag rnams la 'ga' zhig tu yang yongs su bskyab pa'i ched du brtan par bya ba nyid kyis rten du 'gyur ba ma yin no//de ma thag pa zhes pa lhag par gnas pa'i de ma thag tu'o//rjes su sbyin pa zhes pa byed pa po la 'jug bzhin pa la ka ta ste/ gtsug lag nyid kyi phyir ro/ /rim pas dbu la bar bya'o zhes pa'i don to/ /dung chos zhes pa la sogs pa man ji gcig la ni dung ngo / /gnyis pa la ni zangs kyi snod do/ / bum pa ni rnam par rgyal ba'i bum pa dang / bum pa gzhan bzhi rnams so/ /rnal 'byor ma brgyad zhu bar gyur nas zhes pa la bcom ldan 'das dang dkyil 'khor na gnas pa'i lha mo rnams dang lhan cig de'i bdag nyid du gnas pa rnams so/ /dam tshig dang ye shes sems dpa' dag ro gcig par gyur pa kho na ni dkyil 'khor gyi rab gnas so//bum par te rnam par rgyal ba'i bum par bcom ldan 'das dang lha mo brgyad zhu ba bzhugs shing bum pa gzhan rnams su ji ltar rigs par lha mo rnams bsam mo/ /chu zhes pa rnam par rgyal ba'i bum pa la sogs pa'i chu bag tsam zangs snod dang dung chos su gzhag par bya'o//chu zhes pa zangs kyi chus te de'i rjes su dung phor gyi chu cung zad kyis so/ /brjod du gzhug klog tu gzhug cing slob dpon gyi slob ma'o/ /mchod du gzhug ste bla mas slob ma'o/ /slob ma zhes pa gdong g.yogs dkrol ba la'o//yang zhes pa khrus kyi don du gzung ba la ltos nas so/ /rdo rje dang bcas pa'i lag pa gnyis kyis 'thung du gzhug ste/ he ru ka'i sngags zlos shing lan gsum du zangs snod kyi chu bsres pa'i dung gi chu'o/ /chu 'thungs pa'i phan yon 'chad par 'gyur ro//'dir rim pa ni 'di yin te/ slob dpon ji lta ba bzhin du dbang bskur zhing slob mas rjes su gnas pa'i ting nge 'dzin gsum la mkhas pa he ru ka'i bdag nyid sngags bzlas par gyur pas/ yun ring por bar ma chad par legs par brtags pa'i don du gnyer ba'i slob ma la dbang bskur bar 'dod pas/thog mar rgyal po dang rkun po la sogs pa'i nye bar 'tshe ba thams cad dang bral ba'i dkyil 'khor gyi khang pa la sogs par cho ga ji lta bar bzhengs pa'i rdul tshon gyi dkyil 'khor ram ras bris la sogs pa'i dkyil 'khor du ji skad bshad pa'i mar me dang 'bras bu la sogs pa nye bar mchod pa lngas mchod pas klu'i don du 'o ma phul ba na/bum pa rnams lhag par gnas par bya'o/ /de la rnam par rgyal ba'i bum pa chos 'byung gi dbus su gnas pa'i cang te'u dang rdo rje pad+mas mtshan pa dri'i chus gang ba gser dang dngul dang mu men dang mu tig dang byi ru ste rin po che lnga rnams dang /nas dang / gro dang / til dang / sran ma dang 'bras so ba ste/ 'bru sna lnga rnams dang / bri ha tI dang / kaN+Da ka ri dang / a pa ra dzi ta dkar po dang / daN Dot+pa la dang / ha sa de wa ste sman sna lnga rnams nang du ldan pa/a mra'i lo mas kha brgyan pa mgrin pa gos dmar pos dkris pa me tog gi phreng ba dang ldan pa/ me tog phreng ba bcings pa'i rdo rje steng na yod pa/ 'o mas bkang ba'i snod steng na gnas pa/ nang du yud kyis bskyed pa'i dam tshig sems dpa' dang ldan par byas nas/nyi ma dang rdo rje'i lte ba la gnas pa'i hUM gi sa bon gyi 'od zer rnams kyis/ 'og min nas bcom ldan 'das rnal 'byor ma brgyad kyis yongs su bskor ba spyan drangs te snying po'i sngags kyis mchod yon la lan bdun bzlas te/ oM he ru ka badzra ar+g+haM pra tIts+tsha hUM zhes pa 'dis phul nas de'i dbus su bcug pa ste/dam tshig sems dpa' dang lhan cig gcig tu gyur pa'i bde ba chen po'i rang bzhin byang chub kyi sems kyi ngo bor chu de bsams la/ khu tshur g.yon pas rdo rje la bcings pa'i me tog gi phreng ba bzung nas/snying po'i sngags kyis brgya rtsa brgyad du bsngags so/ /dkyil 'khor ba gzhan gyi bum pa'i dri'i chus yongs su gang ba a mra'i yan lag dang ldan pa gos dmar pos mgrin pa dkris pa me tog gi phreng ba can grangs ji lta bar thod pa dang kha T+wAM ga dang gri gug dang cang te'u'i mtshan mas mtshan pa/nang du dam tshig gi lha mos ye shes kyi lha mo dang dbyer med pa zhu ba'i chu dang ldan pa rnams la so sor lha mo'i sa bon gyi sngags kyis brgyad lhag pa'i brgyar mngon par bsngags par bya'o/ /de la thod pas mtshan par chang 'tshong ma dang sna tshogs sde ma'o//kha T+wAM ga yis mtshan par 'byung mo dang legs bzang ma'o/ /gri gug gis mtshan mar phyag bzhi ma dang sa 'og gnas ma'o/ /cang te'us mtshan par nam mkha' gnas ma dang 'dod ma'o/ /hUM oM hUM swAHhUM khaM hUM hUM rim pa bzhin du 'di rnams kyi sa bon no//de'i rjes su tshogs par me tog dang bdug pa la sogs pa rnams kyis yang dag par mchod la gtor ma phul te/ rdo rje pad+ma zhes pa la sogs pas bstod pa sngon du 'gro bas dril bu dkrol phyag bya'o zhes bum pa lhag par gnas pa'i cho ga'i rjes thogs su slob dpon slob mas phul ba'i ras gsum la sogs pas brgyan pa shes rab dang bcas pa rol rtsed byas pas dkyil 'khor gyi gnas las phyi rol gyi stan la 'dug pas slob ma maN+Dal gsum byas pa/me tog gi phreng ba bzung ba/ pus mo sa la btsugs pa/ thal mo sbyar ba/dug zhi thabs la sogs pa'i skal ba can/ blos rang gi lus la bcug nas rdo rje nas phyung ba shes rab kyi pad+mar gnas pa la snying ga'i sa bon gyi 'od zer gyis spyan drangs pa a ba d+hU tI nas zhugs pa'i de bzhin gshegs pa zhu ba rnams kyis dbang bskur ba he ru ka'i gzugs can dkyil 'khor gyi shar sgor bzhag nas/sems can don la gcig tu brtson/ /bcom ldan bla ma ston pa kye/ /dug zhi'i thabs ni bzang po 'tshal/ /shA li ka byed sbyor ba skyes/ /sems can don ni bzang po bgyid/ /dus su bzung ba zlog byed pa//de ni ston chen bdag la gsungs/ /sangs rgyas thod pa'i sbyor ldan pas/ /zhes pa 'dis 'jug pa zhur bcug nas/ dkon mchog gsum la bdag skyabs mchi/ /sdig pa mi dge so sor bshags/ /'gro ba'i dge la rjes yi rang / /sangs rgyas byang chub yid la gzung //zhes lan gsum brjod du gzhug ste/ snying po'i sngags kyis bsrungs la/ de'i snying gar rdo rje nag po'i lte ba la hUM/ mgrin par pad+ma dmar po la AH/ mgo bo la 'khor lo dkar po la oM zhes pa'i yi ge rnams nag po dang / dmar po dang / dkar po rnams bsam par bya'o/ /de nas langs te dri'i chu dang / rdo rje dang ldan pa'i lag pa g.yas pas hUM AH oM zhes brjod cing / snying ga dang / mgrin pa dang / mgo bo rnams la reg nas mgo bo la me tog dang / mdun du spos dang / mar me dang / snying gar dri sbyin no/ / de'i rjes su a shwat+tha la sogs pa'i so shing rtse mo ma gas pa/ 'khyog po la sogs pa ma yin pa/ sor bcu gnyis pa'i tshad tsam pa/ me tog gi phreng ba rtse mo la dkris pa/ dri zhim po'i chus bkrus pa/ so shing gi sngags kyis lan bdun mngon par bsngags pa shar du phyogs pas sbyin par bya'o//slob mas kyang shar ram byang du phyogs pas rtse mo 'chos nas gyen du ltos pa med par sa gzhi ba lang gi ko ba tsam byugs par dor ro/ /de nas kha bshal ba'i don du dri'i chu khyor ba gsum gyi btung ba/ oM hrIHbi shud+d+ha sarba d+harmA sarba pA pa ni tsa a s+ye bi sho d+ha ya sarba bi kalpan a pa na ya hUM zhes pa'i sngags 'dis byed du gzhug go//de'i rjes su slob dpon gyis rang gi lag pa g.yon pa dang / mgrin pa dris byugs shing me tog gis dkris par zla ba'i dkyil 'khor bltas la/ de'i 'od zer rnams kyis phyogs bcu'i sangs rgyas rnams spyan drangs pa 'dod chags chen pos zhu bar gyur nas zla ba gnyis la thim par bsam par bya'o//de nas lag pa de slob ma'i mgor bzhag nas lhag gnas kyi sngags lan bdun du bzlas so/ /de nas mgrin par gnas pa dang / lag par gnas pa'i sangs rgyas de rnams zla ba dang bcas pa slob ma'i lus la zhugs nas/byin rlabs mdzad par bsams te/ slob ma bsrung bar bya'o/ /de nas de la snying po'i sngags bzlas pa'i ku sha rnams bting ste/ sngas dang stan gyi don du sbyin no/ /slob dpon dkyil 'khor gyi khang par zhugs te/bsgom pa dang bzlas pa bya'o zhes pa slob ma lhag par gnas pa byas nas/ tho rangs gtor ma byin te dkyil 'khor gyi khang pa nas byung la slob ma la rmi lam dris te/ snying po'i sngags kyis bsrung bar bya zhing dkyil 'khor gyi khang par 'byor pa ji lta bar mchod nas lha'i 'khor lo dngos su der gnas par mos la/rang gi blos gtso bo bla mar byas te 'chad par 'gyur ba'i slob ma gzhug pa'i cho gas rang nyid dang por dkyil 'khor du zhugs la/ rigs kyi bdag pos bdag nyid la dbang bskur gyi mthar thug pa bsgrubs nas/de nyid las slob dpon gyis las kun la gnang ba thob ste/ bden pa'i byin rlabs bya'o/ /bden pa gang gis ye shes mchog /shes rab thabs bdag dkyil 'khor yin/ /bden pa de yis mgon po khyod/ / bdag gi 'dod pa yongs rdzogs mdzod/ /chos rnams gzugs brnyan dang mnyam pa/ /dngas shing dag la rnyog pa med/ /gzung du med cing brjod du med/ /rgyu dang las la yang dag byung / /de nyid de bzhin nyid las skyes/ /de lta'i bden pas dkyil 'khor ni/ / gzugs brnyan gsal bar slob ma rnams/ /kun gyis sdig med mthong bar shog /ces pas so/ /de'i rjes su slob ma khrus byed du bcug la/ dri bzang po la sogs pas gtsang sbra can du 'gyur ba/ gos dmar po'i smad g.yogs dang stod g.yogs can/ gdong g.yogs dmar po bcings pa/dpal he ru ka'i gzugs su dmigs pa la/ A khaM bI ra hUM zhes pa'i sngags kyis me tog gzung bas yol ba'i phyi ngos su yon phul ba las thams cad pa'i bum chus gtor ba/ hUM yig gis dkyil 'khor gyi shar sgor bzhag pa la/ dkyil 'khor du gzhug pa'i don dri bar bya ste/ kye khyod su yin zhes pa'o/ /des bdag ni rgyal ba'i sras zhes brjod par bya'o/ /de nas 'di la/ oM sarba yo ga tsit+taM ut+pA da yA mi zhes pa 'dis byang chub kyi sems bskyed nas/ me tog dang bcas pa'i rdo rje snying gar hUM su ra te sa ma ya s+t+waM hoH/sid+d+hi badzra ya thA su khaM zhes brjod cing gzhag par bya'o/ /de nas spyi bor rdo rje bzhag nas brjod par bya ste/ 'di ni khyod kyi dam tshig rdo rje ste/ gal te khyod kyis 'di 'ga' zhig la smras na spyi bo 'gems par byed do/ /de nas snying gar rdo rje bzhag nas 'di skad brjod de/oM da ni rdo rje sems dpa' rang / /khyod kyis snying la yang dag zhugs/ /gal te tshul 'di smras na ni/ /de ma thag tu dral te gshegs/ zhes pa 'dis mna' byed du bcug ste/ pad+ma'i snod du 'dug pa yi ge gsum gyis byin gyis brlabs pa'i bdud rtsi lnga bsres pa'i bum pa'i steng na gnas pa'i 'o ma/oM pany+tsa a mr-i ta u da ka ThaHhUM zhes pa 'dis lan bdun du bzlas pa/ 'di ni khyod kyi dmyal ba'i chu/ /dam tshig 'das na sreg par byed/ /dam tshig bsrungs las dngos grub ste/ /rdo rje bdud rtsi'i chu 'thungs shig / ces brjod cing 'thung du gzhug go/ /khyod kyis nga la brnyas par mi bya ste/ khyod dam tshig nyams nas dmyal bar song bar gyur ta re zhes brjod nas/ bcom ldan 'das la thal mo sbyar bas/ dkyil 'khor du ni slob ma dag /bdag gis yang dag bcug pa 'di/ /lha rnams rigs kyi rim pa ni//bsod nams ji lta de ltar shog /'di yis dngos grub ci 'drar 'gyur/ /rigs gang la ni snod yin dang / /bsod nams mthu yang gang 'dra ba/ /de 'dra dkyil 'khor du gyur cig /ces pa bden pa'i byin rlabs byas te/ yi ge lngas sngar bzung ba'i me tog traM yig gis byin gyis brlabs pa hUM yig gis dkyil 'khor gyi dbus su 'phang zhing /oM badzra he ru ka badzra puSh+paM pra tIts+tsha hUM zhes 'don du gzhug go/ /'phangs pa'i me tog de slob ma'i mgo la 'ching zhing / kye stobs po che khyod kyis 'di slar zung shig ces brjod do//de'i rjes su slob ma'i snying gar zla ba la bdag po dang / dpral bar ra yig dang mig gnyis la oM yig gnyis bsgoms nas/ oM rdo rje sems dpa' rang nyid deng / /khyod kyi mig ni 'byed par brtson/ /thams cad mig ni 'byed mdzad de/ /rdo rje'i mig ni bla na med//ces 'don cing gdong g.yogs bsal nas/ dgu yi bdag nyid dkyil 'khor du/ /oM he ru ka badzra puSh+paM pra tIts+tsha hUM zhes pa la sogs pa'i sngags rnams kyis bdug pa la sogs pa'i sngags rnams kyis kyang mchod de/ kye rdo rje ltos shig ces brjod pas/dkyil 'khor gyi lha rnams kyi mtshan brjod pa sngon du 'gro bar bstan par bya'o zhes pa dkyil 'khor du 'jug pa'i rjes thogs su slob mas yan lag lngas phyag byas pas pus mo g.yas pa sa la btsugs pa thal mo sbyar bas/ bdag ni 'khor ba'i 'dam du bying //dpung gnyen skyob pa po mdzod cig /bdag ni skal dman spro ba chung / /sangs rgyas chos dang rnam bral las/ /kye kye mgon ston bla ma che/ /mgon po khyod kyis thugs rje mdzod/ /ces brjod pas gsol ba gdab bo/ /de la slob dpon gyis rang gi lte bar gtum mo 'bar bas bzhu ba'i bdud rtsis snying ga'i sa bon bkrus pa'i dus su/snying ga'i rtsa brgyad kyi rang bzhin gyi lha mo spros pa rnams dang / snying ga'i sa bon gyi 'od zer gyis spyan drangs pa'i phyogs bcu'i de bzhin gshegs pa dang / rig pa'i lha mo rnams dang bcas pa rnams la/snying rje can rnams 'di la dbang bskur stsal du gsol/ /yang yang phyag 'tshal thal sbyar gsol 'debs bgyid/ /ces gsol ba gdab cing / gdugs dang / rgyal mtshan dang / ba dan dang / gos dang / rol mo la sogs pa dang ldan pa/ ye shes kyi chus gang ba'i bum pa dkar po'i phyag can bkra shis kyi glu len pa rnams kyis/gang gi tshe slob ma he ru ka'i gzugs can la dbang bskur bar mdzad pa de'i tshe man ji gnyis la gnas pa'i zangs snod dang / dung chos rnam par rgyal ba'i bum pa la sogs pa'i chus bkang nas/ dang por rdo rje dang bcas pa'i lag pa gnyis kyis bzung ba'i zangs snod kyi chu nyung ngu yis dang de'i rjes su dung gis/ dbang bskur rdo rje chen po ni/ /khams gsum pa yis phyag byas pa/ /sangs rgyas kun gyi gsang gsum gyi/ /gnas las byung ba sbyin par bya/ /oM he ru ka pI ra s+t+waM a b+hi Shiny+tsA mi zhes brjod cing khrus byed pa'i slob ma la cod pan gyis byin gyis brlab par bya'o//de ltar chu dang cod pan gyi dbang bskur ba dag gis dbang bskur ba'i slob ma la de ltar bzung ba'i dung gi zangs snod na gnas pa'i chu lhag ma bsres pa'i chu lhag ma/le'u dang por brjod pa'i sngags/ oM bud+d+ha zhes pa la sogs pa brjod cing / lan gsum blud do zhes pa'o/ /sbyar ba rnams zhes pa byas pa rnams so/ /gzhan rnams ni lhog pa la sogs pa'i lus la skyes pa'i dug rnams so/ /nye ba'i dug ni lam la sogs pa'o//mda' dug gi chu zhes pa'i don to/ /byug pa zhes pa bza' ba'i don du bza' bya la sogs pa la byug pa rnams byas nas so/ /gang rnams zhes pa dug rnams so/ /de rnams zhes pa de thams cad do/ /de nyid du zhes pa gang gis gzung ba'am sbyin pa de rnams kho nar ro/ / shA li kA byed pas zhes pa shA li kA'i byed pa tsam gal te shes par 'dod na de kho nas shes par gyis shig /yang na dug zhi thabs te 'jig rten pa dang don dam pa thams cad ces pa'i don to/ /stong phrag ces pa la sogs pa la stong phrag brgya'i nang na gang bsam pa rnam par dag pa la gdams pa dang /'chad par 'gyur ba'i sngags sbyin no/ /sbrul zhes pa la sogs pa la sbrul gyis zin pa la'o/ /de bzhin zhes pa mi brtson pa'o/ /don 'di yin te/ gzung ba la ji srid du dug gso thabs gzhan sngags dang sbyor ba la sogs pa'i las byed pa'am/byed par 'gyur ba de srid sangs rgyas thod pa'i rnal 'byor pas spro bar mi bya'i 'di ni dus su bzung ba ste shi ba'o zhes dug gsod pa gzhan rnams kyis dor ba na bzung ba la las brtsam par bya'o/ /'od zer rnams zhes pa la sogs pa la/ bdag nyid he ru ka'i gzugs can gyi snying ga'i sa bon gyi 'od zer rnams kyis nor rgyas la sogs pa'i klu'i gnas su bskul bas klu'i snying skams pa ci bgyi zhes zer ba'i klu rnams la gsungs pa'o//sngon zhes pa le'u dang por te/ 'dir yang sangs rgyas thod pa gsungs pa zhes dran du 'jug ste/khyed rnams sngags kyi 'od zer gyis zil gyis mnan pa bcom ldan 'das ma la zhus nas/ de'i bka' khas blangs pa zhes pa dgongs pa'o/ /de nas 'gyur zhes pa 'di ltar rig pa sgrub pa ma yin zhes pa klu rnams kyis gsol ba'o/ /kye 'od zer bzhud cig /gang gi phyir dus su zin pa med cing / gzung ba dang 'dzin pa med de/ 'dzin par byed pa dus su zin pa las gzhan med do/ /dogs pa ste dogs pa can dug gis 'chi ba la dogs pa dang bral ba'i phyir ro/ /'od zer la ni 'od zer ro/ /ba lang gi lci ba sa la ma lhung ba ni ba ser skya'i 'o//des 'dab chags ri skegs dang ri skegs mo yang bya'o/ /snod dkar po ni 'bras dkar po btags pa las byas pa ste/ der 'dab chags gnyis po de gzhag par bya'o/ /der dung la sogs pa'i snod dkar por ro bsregs pa'i sol ba mnyes pa'i snag tsha bzhag cing des ka ra bI ra dkar po'i 'dri smyug gis ri skegs kyi sngags bri bar bya'o//pho dang mo ru zhes pa mo ni ri skegs mo ste/ de'i pho ni ri skegs so/ /'di ni khyad par la ste de'i phyir des bris pa'i sngags kyi grog la sogs pa'i 'dab ma gnyis ri skegs kyi snying gar dang ri skegs mo'i snying gar bzhag go zhes bstan to//snag tsha sbyin par bya zhes pa la sogs pa la/ snag tsha des ri skegs gnyis la byug cing bris la/ bdag nyid kyi mig la phyogs par bzhag ste/ bden pa'i ri skegs gnyis bzhin du blta zhing ka ra bI ra dkar po'i lo mas sngags lan bdun bdun brjod cing bkug pa'i lha'i ri skegs gnyis dang dbyer med par bsgom mo//oM zhes pa la sogs pa swA hA'i mthar thug pa ni sngags gcig go/ /zhugs zhes pa ri skegs de gnyis song nas klu'i gnas su zhugs pa'o//gang gis zhes pa la sogs pa 'dzin pa po'i klu'o/ /ri skegs mthu chen po can mthong nas ma shin yang long bar ni mi 'gyur ro/ /shA li kA rnams la ni shA li kA dag la'o/ /gsol ba ni gsol ba rnams so/ /tshig ni sna tshogs sde ma la khas blangs pa'i tshig ste/rnam pa gzhan du mi bgyid pa'o/ /kha cig tu ma mdzad ces klog pa de'i tshe sprin la zhon gyi/ klu nye bar mi 'tshe ba'i don du byed du bcug pa'i tshig gis bya khyung gi rgyal pos 'dab chags stobs po che thams cad la ngag bya ste/ de'i phyir tshig de rnam pa gzhan du ma mdzad cig ces pa'i don to//de ltar zhes pa la sogs pa ri skegs dang shA li kA mo dag gis mgo dang mjug ma dag gzung nas zin pa'i mdun du khyer 'ong ba'i sbrul long ba la 'gugs pa'i sngags kyis mngon par bsngags pa'i sbrul gyi khung bu'i sa yis 'gugs pa'i sngags brjod pa sngon du 'gro bar brabs pa la/mig byung ba zin pa mthong ba la rkang pa nas mgo bo'i mthar thug pa dang / mgo bo nas rkang pa'i mthar lan gsum du 'gro'o/ /de nas bzung ba langs pa na shA li kA gnyis kyis sbrul rang gi gnas su khyer nas song ba ni/rang gi gnas su rtag tu gnas su gzhug go zhes spyi'i don to/ /yan lag gi don ni bzung ba'i zhes pa bzung ba'o/ /sbrul gyis ni sbrul lo/ /shi ba 'gyel ba'i zhes pa shi zhing 'gyel ba'o/ /'gro ba ni mgo bo'i mthar thug par ro/ /'ong ba ni rkang pa'i bar du'o//kun rdzob pa'i dug gso thabs ri skegs kyi byed pa gsungs nas don dam pa gsungs pa stong pa nyid kyi ye shes zhes pa'o/ /de nyid rgyas par ston te/ stong pa zhes pa la sogs pa'o/ /stong pa ni rang bzhin med pa rnam par rtog pa'i gos pa thams cad dang bral ba'o//mtha' dag ste phyi dang nang gi bdag nyid kyi dngos po'o zhes pa'o/ /yod par sgro 'dogs pa bsal nas med par sgro 'dogs pa spong ste/ chos ni dngos po rnams kyi chos nyid stong pa nyid med de de ni spros pa med pa nyid kyi phyir ro/ /de srid du zhes pa la sogs pa nyin zhag nyi shu rtsa gcig rnams ji srid pa'o//mang pos ci ste ji srid du zin pa'i gdong pa la sogs pa mi dbye ba ste/ gdangs nas mi gnas pa de srid du 'khrul 'khor gyi las bya'o/ /mjug bsdu ba ni/ de ltar zhes pa la sogs pa ste/ de ltar dug gi chu blud pa'i mthar thug pas rjes su bzung nas dug zhi thabs ri skegs kyi byed pa dang /don dam pa lung bstan par bya'o/ /sangs rgyas thod pa'i rnal 'byor gyis oM bud+d+ha ka pA li nI AHhUM zhes pa 'dis lan nyi shu rtsa gcig tu mngon par bsngags pa'i dug bza' bar bya'o/ /phyi rol gyi sar zhes pa dkyil 'khor gyi gnas la ste/dkyil 'khor gshegs su gsol nas so/ /'dis zhes pa brjod zin pas te/ rdul tshon gyi dkyil 'khor dgu'i bdag nyid mchod par bya'o zhes pa sngar bzhin no/ /yang na sgrub pa po sems brtan pa he ru ka'i bdag nyid kyis brjod zin pa'i mchod pa'i sngags 'dis rim pa ji lta bar mchod par bya'o zhes 'brel lo//dkyil 'khor ni tsan+dan la sogs pas zhes pa'i don to/ /dkar po'i lus can zhes pa dkar po'i yon tan gyi tshogs dang ldan pa'o/ /me shigs pa ni mgo bo med pa ste/bde ba'i gnas kyi nang du'o zhes pa man ngag go/ /snod kyi kha ni bum pa'i kha'o/ /zla ba zhes pa zla ba zhu bar gyur pa'o/ /langs par zhes pa ldang bar byed do zhes pa'o/ /sangs rgyas thod pa'i rgyud chen po'i 'grel pa mkhas pa mi 'jigs pa'i 'byung gnas kyi sbas pas mdzad pa mi 'jigs pa'i gzhung 'grel du le'u bzhi pa'o// //bcud len rgyas par ston pa gsungs pa/ de nas zhes pa la sogs pa'o/ /zla ba drug tu zhes pa snar blugs bya'o/ /zhes pa lhag ma'o/ /shes rab bya rog ma ni gang gi gzugs dang kha dog bya rog gi lta bu ste lus nag po'o//ngang pa mo ni shes rab ma ste gang gi gzugs ngang pa'i bye brag gi bzhin du dkar ba'o/ /drod ma ni shes rab ste/ gang gi drod gzugs te sngon po dang dkar po bsres pa'o/ /kha cig ni kha dog sngon po ste drod gzugs zhes pa ni rtag tu 'di'i lus dro ba'o zhes zer ro zhes pa shes rab rnam pa gsum mo//de la bya rog ma'i rdul ni nag po'i phyogs la byung ba gzung bar bya'o/ /ngang pa ma'i dkar po'i phyogs la byung ba'o/ /drod ma'i phyogs gnyis ka la byung ba'o/ /gzhon nu ma la sogs pa rnams kyi mtshan nyid gsungs pa/sngo sangs ni bya rog ma ste mig sngo bas khyad par du byas pa'o/ /de'i lo bco brgyad ma ni rdzas mig rnag dang kha sbyar sbyor ba zhes thabs dang yang dag par sbyar ba'i sbyor ba las skyes pa'i gnyi ga'i byang chub kyi sems dang de'i rdul zhes pa gsum gzhon nu ma can du brjod do//shes rab ma gsum po de rnams su byung bas na der byung ngo / /de rnams su yang de ci'i yin zhe na gsungs pa/ rtsa rnams kyi ste a ba d+hU tI la sogs pa rnams kyi'o/ /pad+ma skyes ni chos 'byung du skyes pa'i rdzas byang chub sems so//de'i yang ci zhig tu gnas she na gsungs pa/ ge sar du ste rtsa tshogs par ro/ /khyad par ji lta bu zhe na/ sbas pa'i spyod yul du ste/ sbas pa'i spyod yul ni gang gis rdzas gnas pa'i yul te/ lte ba nas byung nas ge sar du gnas pa zhes pa'i don to/ /'di'i don ni 'di yin te/shes rab ma gsum po rnams las gang yang rung ba lo bcu gnyis lon pa dang sbyor ba las skyes pa'i gnyi ga'i byang chub kyi sems dang de'i rdul dang po gnyis shA li kA'o/ /me tog ldan pa zhes pa la sogs pa la/ bya rog ma lo bcu drug lon pa rdul dang ldan pa dang sbyar ba las byung ba'i gnyi ga'i byang chub kyi sems ni grub ma'o//nyer spyod tha mi dad pa zhes pa ni spyod pa mtshungs pa'o/ /mi mo ni shes rab ma gsum las gang yang rung ba'o/ /ma nyams ma ni skyes pa gzhan gyis ma bgrod pa ste/ skye gnas ma nyams pa zhes pa'i don te/de las dang por byung ba zhes pa de lo nyi shu ma zla mtshan dang ldan pa'i nyi ma dang po las byung ba'i rdul dang / de'i tshe kho na de dang sbyar ba las skyes pa'i byang chub kyi sems zhes pa gnyis ni byis pa can ma'o/ /lhan cig skyes pa zhes pa la sogs pa shes rab gsum po gang yang rung ba lo nyi shu rtsa lnga ma dang sbyar ba'i gnyi ga'i khu ba dang /bud med shi ba'i thod pa'i rtsa las byung ba'i 'bru mar zhes pa gnyis ni thod pa can ma'o/ /sman lnga po 'di rnams dngul chu dang sbyangs pa ra ti re dang lhan cig rim pa ji bzhin du zla ba drug dang gsum dang gcig dang phyed dang gnyis dang gcig rnams su 'chad par snga dro sbyar bar bya'o//de la sman bya rog ma sna bug g.yon par rlung rgyu ba'i dus su snar blugs par bya'o/ /sman dang pha ma ni g.yas kyis so/ /drod ma ni gnyi ga nas so zhes gsungs pa/zla ba zhes pa la sogs pa'o/ /zla ba ni 'dir rkyang ma'i rlung ngo / /nyi ma ni ro ma'i rlung ngo / /zla ba ni khu ba'o/ /nyi ma zhes pa rdul lo/ /gal te sman de la khu ba shas che na de'i tshe sna bug g.yon par ro/ /ci ste rdul shas che na de'i tshe g.yas nas so//de nas 'di las zhes pa la sogs pa go sla'o/ /rnal 'byor ma'i mchog ces pa bdud rtsi lnga rnams ni rnal 'byor ma rnams so/ /rnal 'byor mchog rnams ni thabs sgron ma lnga rnams so/ /nus te bza' bar zhes pa lhag ma'o/ /rnam rtog ni rnam rtog rnams so//de bzhin gshegs pas mi rtogs so zhes pa la sogs pa'i phul du byung bas brjod pa ni/ gus pa bskyed pa'i don du'o/ /'o na su rnams kyis rtogs she na gsungs pa/ bla ma la gus zhes pa la sogs pa ste/ rtag pa la sogs pa'i mtha' las 'das pa'i stong pa nyid bsgoms pas 'dod chags la sogs pa dang bral ba rnams so//de nyid kyi phyir nyon mongs thams cad rnam spangs pa/ 'di rnams kyis zil gyis mnan pa'o/ /bza' ba la sogs pa la ma zhen pa'o/ /shes rab thabs sogs kyis zhes pa reg bya la sogs pa 'dod pa'i yon tan lnga rnams kyis so//phyogs gcig gis zhes pa phyogs gcig gis te/ bla na med pa'i shes rab dang thabs dag gcig gi ngo bos de kho na nyid mnyam par gzhag pa dang ma bzhag pa'i gnas skabs dag tu sgom par byed pas 'grub po zhes pa'i don to//de kho na nyid sgom pa kho na la lhur len pa nyid kyi don du yul la zhen pa spangs pa gsungs pa/ kye lags zhes pa la sogs pa'o/ /cal col ni 'gal ba'o/ /ci zhe na gang dbang po rnams kyis gnod cing yul rnams la kun nas zhen pa'o/ /sems can 'di ste mngon par zhen pa'i skye bo rnams so//hA hA zhes pa mya ngan no/ /cal col ni de kho na nyid sgom pa las gzhan bza' ba dang / btung ba la sogs pa la sems g.yeng ba'o/ /grib ma ni gzugs brnyan no/ /gnyug ma'i bdag po zhes pa gnyug ma'i bdag po rnams te me long lta bu la sogs pa ye shes lnga'i rang bzhin rnam par snang mdzad la sogs pa'i de bzhin gshegs pa lnga rnams 'grub par 'gyur te/rnal 'byor pa de'i rang bzhin du 'gyur ro zhes pa'i don to/ /mi 'jigs pa'i gzhung 'grel du le'u lnga pa'o// //dbang bskur nas de kho na nyid gsal bar bya zhing /dbang bskur nas dkyil 'khor sngon ma can te/ de nas slob ma dbang po mchog yid kyis rang bzhin gyi dkyil 'khor du dbang bskur bar bya'o zhes rtogs par bya ba'i don du gsungs pa/ de nas zhes pa la sogs pa'o/ /phyi rol gyi dkyil 'khor la mngon par zhen pa rnams 'jigs par byed pa nyid kyi phyir 'jigs pa'o//dbang po rnon po dga' ba'i gnas nyid kyi phyir bzang ba ste yid kyi rang bzhin no/ /mchog ni 'jigs par byed pa'i 'bras bu 'byin pa nyid kyi phyir ro/ /gang gis zhes pa dkyil 'khor gyis so//shes rab thabs kyi sgrub pa ni/ /zhes pa shes rab dang thabs dag gi sgrub pa ste/ des rjes su bsgrub pa'o/ /mtha' ni bya gdong gi rtse mo ste de dang sbyor zhing 'brel ba'o zhes pa mtha' la sbyor ba'o/ /phyi'i dkyil 'khor ni rdul tshon gyi dkyil 'khor ro/ / lha nyid gzhig pa tsam gyis zhes pa bag med pa las lha gshegs su ma gsol ba'i rdul tshon bshig pas zhes rtogs par bya ste/ gzhan du na snga phyi dang rgyud gzhan rnams dang 'gal ba'o/ /de nyid kyi phyir lha bshig pa srid pa nyid kyi phyir rdul tshon gyi lha la gzung 'dzin du 'dzin pas dag pa ste/gnyis med ye shes kyi bdag nyid med cing yid rang bzhin gyi dkyil 'khor la ni yod do zhes mngon par dgongs so/ /lha bshig pa bzhin du de'i mtshan ma bshig na yang sdig pa'o zhes gsungs pa/ rdo rje zhes pa la sogs pa mi bskyod pa la sogs pa'i rigs kyi bdag po rnams kyi mtshan ma ste/yang yid las sa bon rnams dang / lha gzhan rnams kyi yang ngo zhes rig par bya'o/ /song nas zhes pa 'gro ba'o/ /don dam par ni yang sangs rgyas zhes pa la sogs pa ste ci yis te ci zhig gis kyang ma yin no/ /spyan drang ba la sogs pa ni sems can dman pa'i bsam pa'i dbang gis gsungs pa'o//'gar yang zhes pa don dam par 'ga' zhig tu yang ma yin no/ /de 'phags pa shes rab kyi pha rol tu phyin par gsungs pa/ rigs kyi bu de bzhin gshegs pa rnams ni gang las kyang byon pa'am bzhud pa med do//de bzhin nyid ni mi g.yo ba ste de ni de bzhin gshegs pa'o zhes so/ /dri ma med ces pa dri ma med pa rnams te 'dod chags la sogs pa dang bral ba nyid kyi phyir ro/ /shes bya'i sgrib pa dang bral ba nyid kyi phyir dag pa chos sku rnams so//gzhan rnams zhes pa gang rnams don dam par spyan drang ba la sogs pa srid pa na rdul tshon gyi dkyil 'khor rigs pa bzhud pa la sogs pa'i spros pa la grol ba sgrib pa med pa'i de bzhin gshegs pa rnams las gzhan pa'i de bzhin gshegs pa rnams yod do zhes 'dod par mi bya'o//'di la tshad ma ci zhe na gsungs pa 'dir zhes pa la sogs pa'o/ /gang gi pad+mar dkyil 'khor du 'gyur ba shes rab ma ji lta bur zhe na gsungs pa/ lo bcu gnyis ma zhes pa la sogs pa'o/ /zla ba bstan pa ni byang chub kyi sems bsags pa'o//mi g.yo ba zhes pa mi g.yo ba ste skyes pa gzhan la mi 'gro ba zhes pa'i bar ro/ /'di lta bu'i shes rab ma la dbul ba'i slob ma de rnams ni/ 'di rnams kho na zhes pa 'chad par 'gyur ba'i yon tan dang ldan pa rnams so/ /de nyid ni bzhi pa'o//lnga zhes pa chu dang / cod pan dang / rdo rje dang / bdag po dang / ming rnams so/ /sngags dang / rdo rje brtul zhugs dang / spyod pa'i brtul zhugs dang / lung bstan pa dang / phyir mi ldog pa dang / gsang ba rnams rig ma'i brtul zhugs dang bcas pa bdun no//gnyis ni shes rab ye shes dang bzhi pa'o/ /gcig tu bsdus pa zhes pa 'di rnams gcig tu 'dus na dbang bskur bcu bzhi rnams su 'gyur ro/ /de la chu la sogs pa phyir mi ldog pa'i mthar thug pa ni slob dpon gyi dbang du brjod par bya'o/ /de kho na nyid rig ma'i brtul zhugs dang bcas pa ni phyi'o//gsang ba ni gsang ba'i dbang bskur ro/ /gsang ba'i de nyid ni shes rab kyi dbang bskur ro/ /de kho na nyid ni dbang bskur bzhi pa'o/ /de ltar yang rig ma'i brtul zhugs slob dpon gyi dbang ngam/ shes rab kyi dbang bskur du de dang de'i yan lag nyid kyis nang du bsdus nas gsungs pa/slob dpon gsang ba shes rab dang / /bzhi pa de yang de bzhin no/ /zhes so/ /dbul bya zhes pa ni bla ma la slob mas gser la sogs pa'o/ /bla mar zhes pa bla ma'o/ /mi gsung ba ni ting nge 'dzin la phyogs pa'o/ /'di thams cad mtshon pa kho na ste/gsal bar rdzogs pa ni ma yin no zhes sdud pa pos gsungs pa 'di zhes pa la sogs pa'o/ /'dir gdams ngag ni 'di yin te/ 'dir slob dpon lha mo nyi shu rtsa bzhis yongs su bskor ba'i dpal he ru ka'i bdag nyid du dang / slob ma yang de ltar dpal he ru ka'i bdag nyid du bsgoms nas 'khyud pa'i las kyi phyag rgya sna tshogs sde ma'i gzugs can cho ga ji lta bar sbyangs pa'i pad+ma'i sa'i dbus su rang gi snying ga'i sa bon gyi 'od zer gyi tshogs kyis spyan drangs pa'i nyi shu rtsa lnga'i bdag nyid kyi bcom ldan 'das a ba d+hU tI'i steng gi sgo nas bcug ste zhu bar gyur pa'i byang chub kyi sems kyi rdul rdo rje'i lam nas dbab bo//des yud kyis khang pa brtsegs pa dang bcas pa'i lha nyi shu rtsa lnga'i bdag nyid yid kyi rang bzhin rim pa gsum pa'i dkyil 'khor bsgrubs nas slob mas maN+Dal lnga byas pas/ thar pa chen po'i grong mchog tu/ /mgon po bdag ni gzhug tu gsol/ /zhes lan gsum du gsol ba btab pa/ rang gi lus la blos bcug nas rdo rje'i lam nas phyung ba dkyil 'khor gyi shar gyi sgor 'dug pa la/ rang bzhin dag pa sangs rgyas bdag /lus rang bzhin gyi dri ma med//dpa' bo dpa' mo'i dbang mo'i grong / /dkyil 'khor la ni bu khyod ltos/ /zhes brjod cing dkyil 'khor bstan no/ /de nas 'khor ba'i 'dam du bying ba bdag ces pa la sogs pas gsol ba btab pa la gtum mos zhu ba'i byang chub kyi sems kyi bdud rtsis 'khrud bzhin pa dang /snying ga'i sa bon gyi 'od zer gyis bkug pa'i de bzhin gshegs pa dang rig pa'i lha mo rnams steng gi sgo nas zhugs te zhu bar gyur pa'i rdo rje'i lam nas phyung ba rnams kyis mi bskyod pa'i rang bzhin byang chub kyi sems kyi chus/ sangs rgyas thams cad kyi ni dbang //gsang ba gsum gyi gnas las byung / /khams gsum kun gyis phyag byas pa/ /rdo rje chen po sbyin par bya/ /zhes brjod cing / oM shrI tsakra wI ra s+t+wAM a b+hi Shiny+tsA mi/ zhes pa'i sngags kyis dbang bskur bar bya'o zhes chu'i dbang bskur ro/ /de nas chu de rin chen 'byung ldan gyi bdag nyid kyi cod pan du bsgom zhing /a b+hi Shiny+tsa tu maM/ sarba yo gi n+yo mu ku Te a tra a d+hi tiSh+Than+tu/ A gats+tshan+tu hUM swA hA/ zhes brjod par bya'o zhes pa cod pan no/ /'od dpag med kyi bdag nyid kyi rdo rje lag pa g.yas pas snying gar/ he ru ka dpal sogs dpa' bos//de ring khyod ni dbang bskur ro/ /'di de sangs rgyas thams cad nyid/ /rdo rje rab tu grub ched zung / /zhes brjod cing 'dzin du gzhug go zhes pa rdo rje'o/ /don yod grub pa'i rang bzhin gyi dril bu lag pa g.yon pas snying gar 'dzin du gzhug cing / 'di de sangs rgyas thams cad kyis//dbyangs kyi rjes 'gro dril bur bshad/ /khyod kyis kyang ni rtag tu bzung / /byang chub mchog tu rgyal ba bzhed/ /ces brjod cing 'khyud pa'i tshul byed du gzhug go zhes pa bdag po'o/ /de nas slob ma'i mgo bor rdo rje dang dril bu mnyam par 'dzin du gzhug cing /oM shrI tsakra a d+hi pa ti shrI he ru ka wI ra s+t+wAM a b+hi Shiny+tsa mi che ge mo rdo rje khyod do zhes brjod do zhes pa ming ngo / /oM bud+d+ha ka pA li nI AHhA+e he hUM phaT ces pa bdag po'i snying po 'don du gzhug go zhes pa'i sngags so/ /'di de sangs rgyas thams cad nyid/ /he ru ka dpal go 'phang gnas//khyod kyis kyang ni rtag tu gzung / /he ru ka dpal brtul zhugs brtan/ /zhes brjod cing rdo rje sbyin no/ /des kyang oM sarba ta thA ga ta sid+d+hi badzra sa ma ya tiSh+Tha e Sha s+t+waM d+hA ra yA mi/ oM ha ha ha ha hIHzhes brjod cing gzung bar bya'o zhes pa rdo rje'i brtul zhugs so//he ru ka dpal phyag rgya 'di/ /phyi dang nang du yang dag gnas/ /de nas kha T+wAM cang te'u snod/ /byin pa dpa' bos gzung bar gyis/ /zhes brjod cing kha T+wAM ga dang / cang te'u dang thod pa rnams sbyin par bya'o zhes pa spyod pa'i brtul zhugs so/ /lag pa g.yon pas chos gos kyi rna ba bzung nas/lag pa g.yas pa mi 'jigs pa sbyin pas/ rang nyid sangs rgyas kun rang bzhin/ /'khor lo gsum gyi dbang phyug ngas/ /he ru ka dpal zhes bya yi/ /de bzhin gshegs par khyod lung bstan/ /dpal he ru ka zhes pa'i ming can gyi de bzhin gshegs pa'i dngos grub sa ma ya s+t+waM b+hur b+hu wa swaHzhes brjod de lung bstan pa'o//de nas/ gang gis bdag ni da ltar nyid/ /rgyu med 'gro ba'i don byed pa/ /phyir mi ldog pa'i dbang bskur che/ /dpa' bo chen po bdag la stsol/ /zhes gsol ba btab pa'i rjes thogs su snying ga'i sa bon gyi 'od zer gyis spyan drangs pa'i mtha' yas pa'i phyogs na bzhugs pa'i dpa' bo dang lha mo rnams sngar bzhin bcug ste rdo rje nas phyung nas ye shes kyi chus gang ba'i bum pa'i phyag rgya can rnams kyis bkra shis dang /glu dang / mchod pa dang / bkur sti rgya chen pos dbang bskur zhing / dbang bskur rdo rje chen po ni/ /khams gsum po yis phyag byas pa/ /sangs rgyas kun gyi gsang gsum gyi/ /gnas las byung ba sbyin par bya'o/ /oM sarba ta thA ga ta a b+hi She ka sa ma ya shI hUM zhes brjod do/ /de nas mi bskyod pas dbu brgyan par bsams la/dpa' bo dang lha mo gzhan de nyid du ye shes sems dpa'i ngo bor bcug la/ oM su pra tiSh+Tha badzra swA hA/ zhes pa la sogs pa'i sngags brjod do/ /de'i rjes su bka' bsgo bar bya ste/ de nyid rig pa'i rnal 'byor pas/ /mi bya cung zad med de'i phyir/ /dpa' bos de nyid shes nas ni//khyod kyis 'dod pa lnga spyod cig /sems can gzugs brnyan rang bzhin te/ /rten cing 'brel par 'byung chos can/ /de rnams khams gsum pas shes nas/ /khyod kyis sems can don nus kyis/ /zhes pa phyir mi ldog pa'o/ / de'i rjes su/ 'khor ba'i 'dam du bying ba bdag /ces pa la sogs pas bla ma la dang / bdag ni 'khor ba'i 'dam du bying / /rnam rtog ming dang bdag ldan pas/ /bag chags yang dag bcad pa yis/ /mdzes ma khyod kyis bskyab par mdzod/ /grags pa chen mo thugs rjer ldan//de ni nye bar zhi bar mdzod/ /ces pas shes rab ma la gsol ba btab par byas pa la/ rang gi snying ga'i sa bon gyi 'od zer gyis spyan drangs pa'i phyogs bcur bzhugs pa'i dpa' bo dang lha mo rnams sngar bzhin bcug ste zhu bar gyur nas phyung ba'i byang sems snying po'i sngags brjod cing dkyil 'khor du gnas pa'i blos phyi rol du gnas pa'i slob ma mthe bong dang ming med pa dag gis bcing la rdo rje pad+ma las phyung ste dngos su 'thung du gzhug go//slob mas ni a ho su kha zhes smra zhing btung ngo / /shes rab mas kyang langs la/ rang gi chu skyes kyi nang gi byang chub sems kyi lhag ma me tog gi bcud kyi thig le de'i kha'i nang du gos med pa kho nas 'jug par bya'o zhes pa shes rab dang thabs dag gi gsang bas dbang bskur ba'o zhes pa gsang ba'o/ /de nas sngar bzhin du bla ma dang shes rab ma la gsol ba btab pa la/shes rab ma de'am gzhan yang rung bas bka' bsgo ba/ dpa' bo byang chub sems bza' bar/ /khyod ni spro bar gyur tam ci/ /rigs lnga las byung rig ma ni/ /gus pas yang dag mchod byed dam/ /bshang gci stobs dang khrag la sogs//gzhan yang dam tshig bzang po ni/ /de ring rab tu za byed dam/ /bu khyod ji ltar 'dod pa smros/ /zhes pa'o/ /des kyang / ji skad brjod pa'i dam tshig sogs/ /lha mo bdag ni cis mi spro/ /bud med pad+ma mchod pa dang / /rtag tu gus pa cis mi bgyi/ /zhes khas blang ngo //de nas des pad+ma gsal bar byas te/ thar pa bstan cig hoHzhes brjod do/ /des kyang bla ma'i man ngag las dga' ba la sogs pa'i dbye ba khong du chud pas rol par bya'o//pad+ma'i nam mkha' dang nor bu'i lte ba bdag btsir ba'i gnas su/ rdo rje skyil krung las sems ni//nor bu'i nang du gnas blta zhing / /de las skyes pa'i ye shes gang / /de gzugs zhes pa brjod mi nus/ /'dod chags ma yin chags bral min/ /bar mar dmigs pa ma yin te/ /gsum po spangs pa kho na las/ /lhan skyes byang chub brjod par bya//gang du dbang po nyams par 'gyur/ /bdag gi rang bzhin rnam par nyams/ /lhan cig skyes dga' rtogs de yin/ /bla ma'i zhal la gsal 'dri na'o/ /zhes rtogs pas/ rnal 'byor pa yis byang chub sems/ /ji srid gtong bar mi byed pa/ /de srid bar ma chad par ni//dga' skyes bde ba ci yang 'thob/ /dngos grub thams cad kyi ni gter/ /byang chub sems ni lhung ba na/ /phung po rnam shes brgyal ba la/ /dngos grub ma smad ga la yod/ /ces pas ji ltar nus par bzung ste/ dal bus btang nas de kho na nyid la lta bas byang chub kyi sems dam tshig gi ngo bo chu skyes nas lces blang bar bya'o//de'i rjes su des mgo bor rkang pa g.yon pa bzhag nas bka' bsgo ste/ bu khyod de ring nas brtsams te/ /ji srid byang chub snying po'i bar/ /rmi 'drar sems can thams cad kyi//don ni bdag nyid kun gyis byos/ /zhes pas te shes rab ye shes so/ /de nas bla mas/ rig ma 'di ni spangs nas thabs/ /gzhan gyis sangs rgyas nyid min phyir/ /brtul zhugs gong ma'i gong ma ste/ /mnyes gshin rig ma'i brtul zhugs spyod//ces brjod de rig ma'i brtul zhugs so/ /de'i rjes su shes rab ye shes blangs pa kho na'i slob ma la shes rab ye shes kho na goms pa las rdo rje 'dzin pa'i ngo bo bzhi pa'o zhes tshig kho nas dbang bskur bzhi pa bla ma'i man ngag las rtogs par bya ba'i khyad par sbyin no//dpal saM pu Tar gsungs pa/ /ji skad brjod pa'i cho gas dbang byin nas/ /slob ma'i mos pa yid kyis blta bya ste/ /zab cing rgya che'i tshul la mos pa la/ /dbang bskur rin chen tshig nyid kyis sbyin bya/ /zhes so/ /dbang bzhi pa'o zhes pa'o/ / gang slob ma dbang po 'bring po de la/ phyi rol du bsgoms pa'i shes rab ye shes kyi rang bzhin la chos 'byung gi pad+ma'i nang du dpag tshad bye ba'i tshad can yid kyi rang bzhin rim pa gsum pa'i dkyil 'khor bsgoms nas ji ltar rigs par brjod pa'i cho gas dbang bskur bar bya'o//gang bsod nams bsags pa'i dkyil 'khor gnyis po 'di bskyed par nus pa'i bla mas sprul pa gsal bar mthong ba de ni dbang po mchog gi mchog yin te/ de la yang 'di ltar dbang bskur bar bya'o/ /dbang po rtul po ni rdul tshon gyi dkyil 'khor ram ras bris kyi dkyil 'khor du'o//de ltar gdams pa phye nas bya ste/ gdams pa nyams pas 'jigs pa'i phyir ro/ /bskyed pa'i rim pa'i phyogs la dkyil 'khor gsungs nas rdzogs pa'i dkyil 'khor brjod pa'i ched du gsungs pa/ ci ru zhes pa la sogs pa ste/ ci ru zhes pa don dam par rten 'gog pa'o/ /ci zhig ces pa lha'i ngo bo'i brten pa 'gog pa'o/ /dkyil 'khor bzhengs pa la sogs pa bsod nams sgrub par byed pa nyid kyi phyir byang chub chen po'i lam yin mod kyi/ de ltar yang ring ba dang mngon par shes pa la sogs pa'i yon tan rnams kyis stong pa'o zhes gsungs pa/lhung zhes pa la sogs pa ste/ brdzun la zhes pa rnam par rtog pas sgro btags pa brdzun pa'i ngo bo la'o/ /cal col zhes pa g.yeng ba rnam pa sna tshogs su myur du rdzogs pa'i byang chub 'grub pa'i lam las grol ba'i 'gro ba lhung ngo zhes thugs brtse bar mdzad do//'o na sgro ma btags pa ci zhe na gsungs pa/ stong pa zhes pa la sogs pa'o/ /mtha' dag ces pa phung po dang khams la sogs pa'o/ /de 'dra'i dkyil 'khor ni rdzogs pa'o/ / ji ltar zhe na gsungs pa/ pad+ma zhes pa la sogs pa ste/ bde ba chen po la sogs pa'i pad+ma'i dbus su gnas pa'o/ /rnal 'byor ma tshogs ni rtsa'i rang bzhin no/ /ha ru ka ni byang chub kyi sems so/ /de kho na nyid ste bde ba chen po'i bdag nyid stong pa nyid dang ro gcig pa rmi lam dang gzugs brnyan dang /sgyu ma la sogs pa'i rang bzhin ni phung po la sogs pa'i ngo bor skye'o zhes gsungs pa/ mtha' dag skyed byed ces pa'o/ /de'i phyir rdzogs pa'i dkyil 'khor blang bar bya ba 'di bsgoms la mthong bar gyis shig pa'o/ /de dril bu zhabs kyis gsungs pa/sems gnas las kyi thig dang ni/ /rdul tshon dgye ba'i rim las byung / /'gro 'di dkyil 'khor kho na ste/ /rang bzhin gyis grub gnyis med pa'o/ /bcos ma gnyis kyi ngo bo gang / /de ni gdul bya'i dbang las 'dod/ /de ni thar 'dod bsgrub bya min//thar pa yang dag don mthong las/ /zhes so/ /gal te rnam pa de ltar rdzogs pa yin na/ 'o na de ni thams cad kyi tshe yod pa kho na ste/ sgom pas kyang ci bya zhe na gsungs pa/ gnod pas te gnod pa ni phyin ci log pa ste/ rmi lam gyi rang bzhin gyi phung po la sogs pa la rmongs pas so//de'i phyir ltos te blang bya dang dor bya la rmongs pa la nges par dpyod cig /skyen par ni myur bar te ji srid du dal 'byor phun sum tshogs pa yid brtan du med pa 'di yod kyi bar du'o zhes sgom pa la sbyor ba'o/ /'jigs pa med pa'i gzhung 'grel du le'u drug pa'o// //da ni 'bras bu'i rgyud bcom ldan 'das kyi sgom pa brjod pa'i ched du gdul bya'i skye bo'i ngor re zhig phyi'i dkyil 'khor gsungs pa/ de nas zhes pa la sogs pa'o/ /ri bo zhes pa la sogs pa ni sgra ji bzhin pa'o/ /zlum po zhes pa la sogs pa la/de la rim pa 'di yin te/ dkyil 'khor gyi sa gzhi'i cho ga ji lta bar yongs su sbyangs pa'am/ lag pas reg nas sa sbyong ba'i sngags brgyad lhag pa'i brgya bzlas pas sbyangs par kho bos byas pa'i dus 'khor la 'jug par brjod pa'i rigs pas thar ma'i grib ma dang nya dag gis phyogs dang phyogs bral nges par byas nas lha'i sku can gtor ma byin la slob dpon gyis/dang por shar du kha bltas par gyur nas/ so sor ye shes lnga'i bdag nyid kyi de bzhin gshegs pa lngar bsgoms pa'i skud pa nyi shu rtsa lnga bsgril ba slob dpon gyis nas tsam du sbom pa gsar pa ring bar dkyil 'khor gyi nyis 'gyur mtho gang lhag pa'i thig skud/g.yon pa'i rdo rje khu tshur gyis lte bar bzung bas/ slob ma lha'i sku can dang / lhan cig tu ye shes kyi thig ces bya ba tshangs pa'i thig gnyis nam mkha' la btab nas/'og tu sa gzhi la tshangs pa'i thig de ltar drang por gdab bo/ /de nas dkyil 'khor gru bzhi par 'grub pa'i ched du nya'i kha dang / mjug ma dag gi steng du tshangs thig gnyis pa byang du kha phyogs pas gdab bo/ /de nas zur thig gnyis pa cho ga ji lta bar gdab bo//de nas khru gang pa la sogs pa'i tshad can gyi dkyil 'khor gyi rtsa ba'i thig bzhi'o/ /de nas tshangs thig gnyis kyi phyi rol du shar la sogs pa'i phyogs su 'gro zhing / rdul tshon gyi sa'i tshad kyis thig gcig dor nas thig bzhi'o/ /slar yang thig gcig go//de'i rjes su thig gnyis dor nas lha'i snam bu'i thig gcig go/ /de ltar tshangs thig nas bzung nas rtsa ba'i thig dang bcas pa thig bcu rnams logs gcig tu ste/ logs gzhan du yang rim pa 'di ltar ro/ /de nas rtsa ba'i thig las phyi rol du 'khor lo'i brgyad cha'i sgo'i bzhi cha'i tshad du rdul tshon gyi sa'i thig gcig go//de nas sgo'i phyed kyi tshad du lha'i stegs bu'i thig gcig go/ /de nas tshon gyi sa'i tshad kyis rin chen snam bu'i thig gcig go/ /de nas snam bu'i tshad du dra ba dang dra ba phyed pa'i snam bu'i thig gcig go//de nas tshon gyi sa'i tshad kyis ba ku lI'i snam bu'i 'am/ kha cig gi lugs la slar yang rin chen snam bu'i thig gcig go/ /de nas mun pa'i snam bu'i thig thung ba gcig ste/ de kho na la mda' yab rnams so/ /de nas dbyi ba'i ngal bas 'jigs pas thig thung gis sam ring pos kyang rung ste/sgo las sum 'gyur rta babs kyi thig bzhi'o/ /de nas thig gnyis dor nas rta babs dang 'brel ba'i thig gcig go/ /de nas thig gsum dor nas dril bu dang bcas pa rlung gis bskyod pa'i ba dan dang / rgyal mtshan dang /gdugs dang / dpag bsam gyi shing la sogs pa'i gnas kyi thig gcig go/ /slar yang thig gcig dor nas thig gcig go/ /de nas pad+ma'i 'dab ma'i phreng ba'i thig gcig go/ /de nyid kyi phyir pad+ma'i lte ba'i nang du gnas pa'i sna tshogs rdo rje'i lte ba la khang pa brtsegs pa gnas pa'o//lte ba de'i phyi rol pad+ma'i lte ba la ni sna tshogs rdo rje'i ra dang rta babs la sogs pa bri'o/ /de nas rdo rje'i phreng ba'i thig gcig go/ /de nas thig gnyis dor nas 'od zer gyi phreng ba'i thig gcig go/ /pad+ma'i 'dab ma'i phreng ba med do zhes kha cig go//kong ka Na ni rdo rje dang /pad+ma dang / 'khor lo dang / 'od zer gyi phreng ba'i thig bzhi rnams so zhes smra'o/ /de ltar tshon gyi sa'i thig nas brtsams te thig bcu drug rnams ngos gcig tu'o/ /de ltar ngos gzhan du yang ngo zhes pa thig nyi shu rtsa drug rim pa gnyis pa'i dkyil 'khor du gdab pa'i cho ga'o//phyogs 'di kho nas rim pa gsum pa la sogs pa'i dkyil 'khor du thig gdab par bya'o/ /de ltar gcig gi tshe thig btab pas/ dgu dang / bcu gsum dang / bco lnga dang / bcu dgu dang / sum cu rtsa gnyis dang / sum cu rtsa bdun dang / ji srid du 'bum la sogs pa bsdus pa'i dkyil 'khor gyi rnam par shes par bya'o/ /'dir rta babs la sogs pa rnams su nang gi thig gi khyad par dang / sa sbyang ba la sogs pa dang / dbyi ba dang / tshon dgye ba la sogs pa rgyas par kho bo cag gis dkyil 'khor gyi cho gar bshad do//rdo rje gsum gyis yongs su bskor/ /zhes pa sngon po dang / dmar po dang / dkar po'i rdo rje'i phreng ba gsum rnams kyis bskor ba'o/ /yud kyis zhes pa hUM yig gcig kho na las rnal 'byor ma rnams dang / bcom ldan 'das te nyi shu rtsa lnga bskyed pa'i phyir ro//de ru phyung ba zhes pa bcom ldan 'das bskyed pa'i dus su hUM yig las so/ /kha dog lnga'i rnam brgyan pa ni rten gyi dkyil 'khor ro/ /hUM yig bdag nyid ni hUM yig las skyes pa'i bdag nyid gang la yod pa de la de skad do/ /nag dang dkar mo ljang gu rnams//zhes pa/ dbus ma dang / gnyis pa dang / gsum par gnas pa rnams go rims bzhin no/ /sgo skyong ma rnams ni nag mo ste rim pa dbus mar gnas pa ltar ro/ /mi bskyod pa yi cod pan can/ /zhes pa dbus na gnas pa'i mi bskyod pa gtso bo nyid kyis gsungs pa ste gsungs pa yang sangs rgyas lnga'i cod pan can gyis brgyan pa zhes so//rnal 'byor ma kun zhes pa nyi shu rtsa lnga'o/ /de'i gzugs zhes pa ji ltar bcom ldan 'das dbu la rgyan btags pa de ltar de rnams kyang rgyas btab pa ste/ 'on kyang de rnams kyi spyi bor gnas pa'i de bzhin gshegs pa gtso bo so so yin no zhes gsungs pa gtso bo zhes pa la sogs pa'o//'dod par bya ste 'dod du 'jug pa'o/ /rnal 'byor ma rnams ni phreng bzangs ma la sogs pa bzhi rnams so/ /bla ma kha cig sgo skyong ma rnams so zhes so/ / sgyid lug gyur pa ni gzhan gyi ngor sgyid lug par gyur pa ste/ stong pa nyid gcig pu'i mthar thug pa nyid kyi phyir ro/ /mig ces pa 'gro ba 'don par dam bcas pa'o/ /dran byed ni dran par byed pa'o/ /bdag po kye ni mtha' dag gi bdag po'o/ /bya ba zhes pa rang gi don tsam byas nas so//bdag po sngon zhes pa la sogs pa bdag pos sngon ji ltar dam bcas pa dran par gyis shig pa'o/ /sgyid lug ni sgyid lug pa ste 'khor ba'i sdug bsngal gyis nye bar gtses pa nyid kyi phyir ro/ /log pa ni log par yongs su brtags pa la ste dngos po'i mtha' dang dngos po med pa'i mthar ro//nga rgyal zhes pa mngon pa'i nga rgyal lo/ /dges pa zhes pa 'dzin pa'o/ /de ltar dngos por 'dzin par 'gyur ro zhes gsungs pa/ mthong zhes pa la sogs pa ste/ rnal 'byor ma'i tshogs la 'dod pa yis stong pa nyid dang ro gcig pa'i bde ba chen po 'byung ba las dngos po dang dngos po med pa la sogs par mchog tu 'dzin pa zad par 'gyur ro zhes pa'i don to//sngon bzhin zhal dang phyag mtshan sogs/ /zhes pa rgyu rdo rje 'chang bzhin no/ /sku mdog ni 'bras bu rdo rje 'chang gi nag po rgyu rdo rje 'chang gi dkar po'o zhes rgyud gzhan du'o/ / 'dir ni sngon po kho na'o/ /kha cig tu sngon bzhin sku mdog phyag mtshan sogs zhes klog ste/ de'i tshe rgyu rdo rje 'dzin pa yang sngon po'o zhes gsal lo/ /bzhengs so zhes pa ni sna tshogs sde ma dang bcas pa'o/ /'o na me long ye shes la sogs pa'i rang bzhin zla ba dang nyi ma la sogs par yongs su gyur pa ni rgyu rdo rje 'dzin par gdams pa de ltar 'di yang ji ltar min zhe na ma yin te/zhu ba las byung ba'i hUM las skyes pa'i rdo rje dang bcas pa'i hUM yig las skyes pa'i phyir ro/ /de'i 'bras bu rdo rje 'dzin pa'i ye shes lnga'i rang bzhin nam zhe na/ de ltar ma yin te shin tu rnam par dag pa rnams de'i ngo bor skye ba'i phyir ro//de ltar na gang du 'gro ba thams cad me long la bzhin gyi gzugs brnyan du gyur pa so sor snang ba de me long ye shes so/ /mnyam pa nyid kyi ye shes ni gang gis de ltar gzugs brnyan du gyur pa'i 'gro ba mnyam pa nyid du rtogs pa'o//so sor rtog pa'i ye shes ni gang gis de ltar mnyam par gzhag pa kho nas sems can rnams thams cad kyi sems kyi spyod pa rnams so sor rtog pa'o/ /bya ba grub pa'i ye shes ni gang gis de ltar so sor brtags pa'i 'gro ba'i bya ba'i rjes su sgrub pa'o/ / chos kyi dbyings shin tu rnam par dag pa'i ye shes ni gang bag chags dang bcas pa'i sgrib pa gnyis las grol ba bde ba chen po'i rang bzhin snying rje dang shes rab gnyis su med pa chos kyi dbyings rtogs pa rdzogs pa'o/ /de nas 'bras bu rdo rje 'dzin pa yang ye shes lnga'i rang bzhin no/ / ye shes 'di rnams ni las dang po pas lhag par mos pas sgom par byed de/ 'gro ba thams cad kyi yid shin tu dang ba zla ba'i tshul can kho na ni me long dang zla ba dang nyi ma 'dus pa na bde ba chen po'i rang bzhin gyi yid kyis chos rnams thams cad gzugs brnyan lta bu nyid du yang tha dad pa mi mthong ba'i phyir dang /'gro ba'i don la nges par rtog pa lhur len pa dang / sprul pa dpag tu med pa rnams kyis de'i don byed pa de ltar gsal bar gyur pa'o zhes pa bsam pa 'di rnams kyis so/ /rdzogs pa ni de'i don nges par sems pas goms par byed do zhes pa mang pos chog go//'di ni 'dir gdams ngag ji lta bar bsgom pa'i rim pa ste/ 'dir bsgom pa'i dbang du byas pa'i sngags pa lha mo bzhi'i glus bskul bas sad pa snga bar langs te/ hUM phaT ces pa'am/ oM AHhUM zhes pa gnas dang bdag dang rnal 'byor bsrung ba byas nas/dur khrod la sogs pa yid dang rjes su mthun pa'i gnas su stan bde ba la rdo rje skyil krung gis 'dug pa shes rab dang bcas pa'am/ shes rab med pa gcer bu skra grol ba las thams cad pa la kha lhor phyogs bzhi pa la sogs pa'i dbye bas ni rang nyid ji lta ba'i phyogs su gdong phyogs pas/dam tshig gi rdzas bsten pa sngon ma can gyis 'chad par 'gyur ba'i rim pas bdud rtsi bsgrubs te/ gtor ma byin nas rang gi snying gar nyi ma'i dkyil 'khor la gnas pa'i hUM yig gi 'od zer gyi tshogs kyis 'og min na bzhugs pa'i bcom ldan 'das he ru ka gnyug ma'i sna tshogs sde mas 'khyud pa/phreng bzangs ma la sogs pa rdo rje rol pa mo nyi shu rtsa bzhis yongs su bskor ba/ bdag nyid la zhal phyogs pa 'chad par 'gyur ba'i sku mdog la sogs pa can mdun gyi nam mkhar spyan drangs la/hUM yig la 'od zer de zhugs pa'i rjes thogs su hUM yig las cig car 'byung ba'i rdo rje lha mo rnams kyis mchod par bya'o/ /de la bcom ldan 'das kyi shar phyogs rdo rje brtan ma dang pad+ma'i tshul gyis phyag gnyis kyis bzung ba'i thod pas gtso bo la rdul 'bul ba'o//dbang ldan phyogs su rdo rje pho nya mo phyag gnyis kyis cang te'u sgrogs par byed do/ /me mtshams su rdo rje phag mo pad+ma'i tshul gyis bzung ba'i thod pas rnam par snang mdzad gsol du 'jug pa'o/ /srin po'i mtshams su rdo rje ma de ltar bzung ba'i mchod yon gyi snod rdo rjer chus bkang ba 'bul ba'o//lhor rdo rje gtsigs ma lag pa dag gis rnga bo che brdung ba'o/ /rlung mtshams su rdo rje lte ba ma de ltar bzung ba'i thod pas ri dgas mtshan can ma 'bul ba'o/ /chu'i phyogs su rdo rje 'jigs ma de ltar bzung ba'i thod pas gcod byed ces rab tu grags pa ce spyang gi sha gsol du 'jug pa'o//byang du 'dod chags sde ma dang lhan cig de'i bdag nyid du gyur nas yang dag par 'khyud de/ chags pa chen pos rjes su chags par byed pa'o/ /gar dang glu la sogs pa rnams kyis kyang yang dag par mchod nas phyag 'tshal te/sdig pa bshags pa la sogs pa 'di ltar bya'o/ /bdag gis bdag nyid kyi sdig pa thams cad so sor bshags shing slar yang mi bgyid do/ /sangs rgyas dang byang chub sems dpa' dang 'phags pa dang so so skye bo thams cad kyi bsod nams thams cad la rjes su yi rang ngo //bdag nyid kyi bde ba thams cad bla na med pa yang dag par rdzogs pa'i byang chub tu yongs su bsngo bar bgyi'o/ /dkon mchog gsum po 'di lta ste/ sangs rgyas dkon mchog dang shes rab kyi pha rol tu phyin pa chos dkon mchog dang /phyir mi ldog pa'i byang chub sems dpa' 'phags pa'i dge 'dun dkon mchog la byang chub kyi bar du skyabs su mchi'o/ /kye ma ma la bdag nyid sems can kun gyi don dang / phan pa dang / bde ba dang / ji srid du de rnams shin tu mthar thug pa'i mya ngan las 'das pa bla na med pa de bzhin gshegs pa'i ye shes la dgod pa'i ched du de'i lam sgrub pas bla na med pa yang dag par rdzogs pa'i byang chub mngon par byang chub par bgyi'o//de'i rjes su 'og gi rlung gis bskul bas 'bar ba'i gtum mos 'khyud pa'i snying ga'i hUM yig gi 'od zer rnams kyis/khams ma lus pa za zhing / oM shU n+ya tA dz+nyA na badzra swa b+hA wa At+ma kou0f85haM/ zhes pa 'di nang gi brjod pa sngon ma can gyi don mngon du byed cing chos thams cad stong pa nyid la gzhug go/ /de'i rjes su sngon gyi smon lam gyi shugs las raM gyi sa bon l as skyes pa'i nyi mar hUM yig yongs su gyur pa'i sna tshogs rdo rje'i mthil la gnas pa'i hUM yig dag gis bskul ba'i 'od zer gyi yal ga rnams kyis rdo rje ra ba dang gur dang mda'i dra ba dang bla re dang mtshams bcing ba rnams byas nas/'og rdo rje'i sa gzhi dang / de sna tshogs rdo rje sprul pa'i steng du a yig las skyes pa'i chos 'byung dkar po gru gsum gyi nang du chu skyes kyi lte bar gnas pa'i sna tshogs rdo rje'i lte ba la yaM las skyes pa ba dan gnyis pa can gzhu lta bu'i rlung gi dkyil 'khor sngon po'i steng du raM yig yongs su gyur pa las dmar po gru gsum pa 'bar ba bdun 'phro ba'i me'i dkyil 'khor ro//der gnas pa baM las byung ba bum pas mtshan pa dkar zhing zlum pa'i chu'i dkyil 'khor la gnas pa laM yig yongs su gyur pa'i dkyil 'khor rdo rjes mtshan pa gru bzhi pa gser gyi ngo bo yid du 'ong ba'o/ /de ltar rang rang gi sa bon gyis byin gyis brlabs pa'i 'byung ba bzhi po 'dres pa'i khang pa brtsegs pa na zlum po'i rim pa gsum pa phyi gru bzhi pa sgo bzhi pa rta babs bzhis brgyan pa do shal la sogs pa rnams dang lha mo rnams kyi 'od dang ldan pa'i stegs bu bzhi pa can rin po che thams cad kyi rang bzhin ka ba dang dril chung rnams kyis brgyan pa'o//de'i dbus su 'khor lo nag po rtsibs brgyad pa la gnas pa'i sna tshogs pad+ma 'dab ma brgyad pa'i lte ba la chos kyi dbyings kyi rang bzhin ro'o/ /de'i steng du snying gar nyi ma la A li nyis 'gyur yongs su gyur pa mtshan sum cu rtsa gnyis kyi rgyu zla ba'i gzugs me long ye shes kyi rang bzhin no//ya ra la wa Da D+ha dang bcas pa'i gsal byed nyis 'gyur yongs su gyur pa dpe byad brgyad cu'i rgyu mtshan nyi ma mnyam pa nyid kyi ye shes kyi ngo bo de dag gi dbus su hUM las skyes pa'i rdo rje rtse lnga pa'i snying por gnas pa'i hUM yig shes rab dang thabs kyi bdag nyid can so sor rtog pa'i ye shes kyi rang bzhin no//de kho na 'od zer rnam pa lnga byung bas spros pa'i lha rnams kyis kun nas 'gro ba'i don byed pa ni bya ba sgrub pa'i ye shes kyi rang bzhin no/ /zla ba la sogs pa 'di yongs su gyur pa chos kyi dbyings shin tu rnam par dag pa'i rang bzhin bcom ldan 'das sangs rgyas thod pa'i rgyu rdo rje 'chang chu shing gi me tog mngon par gsar pa kha 'bus pa lta bu'am rgyud gzhan gyi rigs pas kun da ltar dkar ba'i 'od can gyi sku/'chang bar 'gyur ba'i 'bras bu rdo rje 'dzin pa lta bu'i phyag la sogs pa can sna tshogs sde ma dmar pos 'khyud pa/hUM yig las bcom ldan 'das 'grub pa'i dus kho nar grub pa'i phreng ba bzang mo la sogs pa'i lha mo nyi shu rtsa bzhi rnams kyis yongs su bskor ba bsgom par bya'o/ /bdag gi bla ma kha cig ni skabs 'dir yang bcom ldan 'das lha mo nyi shu rtsa bzhis phul ba thod pa na gnas pa'i bdud rtsi lnga gsol ba'o zhes gsungs so//de'i rjes su sna tshogs sde ma'i dbu dang mgrin pa dang thugs ka dang gsang ba dang brla dag la rim pa ji lta bur oM AHhUM swA hA/ zhes pa 'di rnams bsgom ste/ phan tshun gyi bar du spros pa de rnams kyis 'di'i sku khyab par byas pas hrIHyig las byung ba'i pad+ma dmar po'i lte bar AH yig dmar po dang /bcom ldan 'das kyi rdo rje hUM yig nag po las skyes shing rtse mo oM yig dkar pos byin gyis brlabs par bsgoms te/ lha mo nyi shu rtsa bzhi sna tshogs sde ma dang lhan cig dbyer med pa rnams kyis rnam pa de lta bu'i rdo rje dang pad+ma sbyor bas bcom ldan 'das la 'dod pa mdzad de bcom ldan 'das kyang ngo //oM sarba ta thA ga ta a nu rA ga Na badzra swa b+hA wa At+ma kou0f85haM/ zhes pa'i sngags kyis dga' ba rtsom bzhin pa ni 'dod chags chen pos bcom ldan 'das ma dang lhan cig n yi ma'i steng du zhu bar 'gyur ro zhes pa dang po'i sbyor ba zhes bya ba ting nge 'dzin dang po'o//de nas sngon gyi smon lam la ltos pa la zhu ba las spros pa'i lha mo bzhi rnams kyis mnga' bdag ma mthong bas gdung ba dang bcas par glu rnams kyis mgon po slong bar byed de/ de la byams pa chen po'i rang bzhin phreng ba bzang mos ci yis khyod ni sgyid lug gyur/'jig rten mgon pos ci zhig yin/ /gal te khyod tshig dran byed na/ /kun gyi bdag po bzhengs mdzod cig /ces pa'i glu 'dis so/ /thod pa can ma snying rje chen po'i bdag nyid kyis/ bdag nyid bya ba byas nas ni//stong pa nyid la sems ma mdzad/ /skye kun srid pa 'jigs par lhung / /rnal 'byor ma yi grogs po bzhengs/ /zhes pa 'dis so/ /'jigs ma dga' ba chen mo'i rang bzhin gyis/ /bdag po sngon gsungs dran par mdzod/ /bya bar sgyid lug ma mdzad cig /khyod nub na ni skye bo kun/ /lhung zhing 'gro ba sgyid lug 'gyur/ /zhes pa 'dis so/ /de ltar bskul ba'i rjes thogs su/ zhu ba de las byung ba'i hUM las skyes pa'i rdo rje dang bcas pa'i hUM yongs su gyur pa'i bcom ldan 'das he ru ka mdog sngon po zhal gcig pa phyag bzhi pa phyag g.yas pa gnyis kyis cang te'u dang gri gug dag dang /g.yon pas kha T+wAM ga dang thod pa dag bsnams pa/ sna tshogs pad+mar nyal ba'i ro'i brang la gnas pa'i nyi ma'i dkyil 'khor la gnas pa/ skyil krung phyed pa bcings pas sgeg pa la sogs pa gar gyi nyams dgus gar mdzad pa/mgrin par mi mgo rlon pa lnga bcu'i phreng ba 'phyang pa mi'i rgyu ma rlon pa'i tshangs skud can/ rgyab kyi char stag gi pags pa 'dzin cing mdun gyi char gcer bu 'khor lo can dang / rna rgyan dang mgul rgyan dang dpung rgyan dang gdu bu dang ske rags grol ba dang /zhabs gdub dang / g.yer kha'i sgras brgyan pa/ sangs rgyas lnga'i cod pan can sna tshogs rdo rje dang zla ba phyed pas mtshan pa'i ral pa'i thor tshugs can/ dpral ba'i mthar thod pa lnga'i phreng ba bcings pa/ ro bsregs pa'i thal bas brgyan pa/ bcos ma'i khro bas drag po chen po'i sku can/ nyi ma shar ka'i dkyil 'khor lta bu spyan gsum pa/ hUM yig sgrogs pas bdud kyi sde dregs pa can gyi rgol ba bsdigs shing phye mar mdzad pa/ mchog tu byams pa dang / thugs rje chen po 'khor ba'i rgya mtsho'i dong du bying ba'i lus can gyi lus 'dzin pa rnams 'don par mdzad pa/rnal 'byor pas dbugs nang du bsdams pas bsgom par bya'o/ /gtso bo 'di'i mdza' mo sna tshogs sde ma bcom ldan 'das dang lhan cig kho nar hUM yig las skyes pa gos med pa rus pa'i rgyan can/ mi mgo'i phreng ba dor ba dbu skra'i tshogs grol zhing dmar ser gyen du 'bar ba ban+du ka'i me tog gi thod can/sgeg cing g.yo bas rtsen pa'i sku can/ mche ba'i myu gu cung zad gtsigs pa'i zhal gcig ma spyan gsum pa/ sgeg pa dang bcas pa'i gtso bo'i mgul pa la 'khyud pa'i phyag g.yon gyis thod par blugs pa'i gnyug ma'i chu skyes kyi bu ga las byung ba'i me tog gi rgyun gtso bo la ltos pa/srid pa gsum na gnas pa/ legs pa'i lam las grol ba'i tshogs la brdeg pa'i tshul gyis gri gug dang bcas pa'i phyag g.yas pa'i snye ma steng du drang po can shIta sgra dang bcas par ma mchu bdud rtsi ster ba la sogs pa rnams dang /shin tu sgyu rtsal rtsed mo rnams la mkhas pas khu ba 'dzag cing / gtso bo'i yid shin tu 'jam zhing chags par mdzad pa'o/ /yab yum 'di dag 'grub pa'i dus su phreng bzangs ma la sogs pa rdo rje rol pa mo rnams grub bo//de la bcom ldan 'das kyi gdan las shar gyi 'dab ma la legs phreng ma'o/ /byang du thod pa can ma'o/ /nub tu 'jigs ma'o/ /lhor thub dka' ma'o/ /dbang ldan la sogs pa phyogs bral gyi 'dab ma rnams la g.yas skor du khu ba dang rdul dang bdud rtsi lnga dang sgron ma lngas gang ba'i thod pa rnams so//'di ni rim pa dang po ste pad+ma 'dab ma brgyad pa rdo rje sngon po'i phreng bas bskor ba'o/ /de nas rim pa gnyis pa rtsibs brgyad dmar po la gnas pa'i pad+ma brgyad de/ phyi rol du mngon par gsal ba'i skya ring ltar dmar po'i rdo rje phreng bas bskor ba'o//de'i shar du rtsibs la dge ba'i ske rags ma'o/ /byang du gzugs can ma'o/ /nub tu rnam par rgyal ma'o/ /lhor byed ma'o/ /dbang ldan du dus can ma'o/ /mer mtsho chen ma'o/ /bden bral du byed ma'o/ /rlung du gsod byed ma'o/ /de nas rim pa gsum pa rtsibs brgyad dkar po la gnas pa'i pad+ma brgyad de rdo rje phreng ba dkar pos bskor ba'o//de'i shar du rtsibs la rdo rje sgrol ma can ma'o/ /byang du 'jigs byed mthong ma'o/ /nub tu legs mthong ma'o/ /lhor mi thub ma'o/ /dbang ldan du dge ba ma'o/ / mer grib gnon ma'o/ /bden bral du dus mtshan ma'o/ /rlung du grags chen ma'o/ /de nas shar gyi sgor pad+ma la mdzes ma'o/ /byang du pad+ma la nor 'dzin ma'o/ /nub tu pad+ma la skal ba bzang mo'o/ /lhor pad+ma la dga' mthong ma'o/ /'di rnams thams cad g.yas pa dang cig shos kyi phyag gi yal gas gri gug dang thod pa 'dzin pa/bdag po la sems pas mchu g.yo ba so cung zad ston pa/ zhal gcig pa phyogs kyi gos can rus pa'i rgyan can mgo bo'i phreng ba dang bral ba/ skra'i tshogs grol zhing dmar ser gyen du 'bar ba shin tu chags pa las khu ba 'dzag pa/me tog man+dA ra ba kha gsar du bye ba lta bu'i nyi ma'i gzugs rnams la skyil krung phyed pas gar mdzad pa rnams so/ /sgo skyong ma rnams ni g.yas brkyang gi zla ba'i zhabs stabs kyis so/ /thams cad kyang stag gi pags pa'i sham thabs can thams cad 'od zer 'bar ba/zhal nas khrag gi rgyun 'dzag pa/ spyan gsum pa/ sgeg pa la sogs pa'i tshogs kyi nyams can mngon par gsar ba'i in+d+ra nI la'i rdo ba bcag pa'i kha dog gi sku dang ldan pa'o/ /yang na legs par phreng ma la sogs pa bzhi rnams nag mo'o//rim pa gnyis pa ma rnams dkar ser ro/ /rim pa gsum par bzhugs pa ma rnams ljang gu rnams so/ /sgo skyong ma'i lha mo rnams nag mo'o/ /bdag gi bla ma gzhan rnams ni legs phreng ma ni dkar mo'o/ /thod pa can ma ni ser mo'o/ /'jigs ma dkar mo'o//thub dka' ma nag mo'o/ /rim pa gnyis pa ma rnams dmar mo'o/ /rim pa gsum par gnas pa rnams dkar mo'o/ /mdzes ma dkar mo'o/ /nor 'dzin ma ser mo/ skal ba bzang mo dmar mo/ dga' mthong ma nag mo ste/ rgyud rgyas par gsungs pa'i phyir ro zhes gsungs so//ji ltar mos pa bsgom par bya ste/ phyogs gnyis pa yang nyung ngu'i rgyud du gsungs pa nyid kyi phyir ro/ /de nas bcom ldan 'das kyi thugs kar oM dpral bar hUM/ mgrin par heM spyi bor haiM phrag pa gnyis la hoM mig gnyis la hauM gsang ba la haM lus thams cad la haHzhes pa go cha'o//de'i rjes su thugs kar hUM nag po las skyes pa'i rdo rje'i lte bar hUM mgrin par AHdmar po yongs su gyur pa'i pad+ma la AHbde ba chen po'i 'khor lo la oM yig dkar po las skyes pa'i 'khor lo la oM zhes pa thugs dang / gsung dang /sku byin gyis brlabs nas/ snying ga'i nyi ma'i rdo rje la gnas pa'i hUM yig gi 'od zer rnams kyis ye shes kyi 'khor lo bkug nas/ hUM yig gis bgegs rnams bskrad de/ mchod yon phul nas sgo skyong ma bzhi po rnams kyis rim pa ji lta bar dzaHhUM baM hoHzhes pas dgug pa dang gzhug pa dang /bcings shing dbang du byas nas/ oM bud+d+ha ka pA li nI AHkhaM kroM druM sruM aM aM aM hUM hUM hUM phaT phaT ces bsgyings pa dang bcas pa brjod cing de dang lhan cig dam tshig gi dkyil 'khor gcig tu gyur bar blta'o/ /de nas lte bar gtum mo 'bar bas rim gyis zhu ba'i bde ba chen po'i 'khor lor gnas pa'i bdud rtsis chos kyi 'khor lo'i sa bon 'khrud pa'i dus su chos kyi 'khor lo'i rtsa brgyad kyi rang bzhin bde ba chen po'i ngo bo'i mkha' 'gro ma brgyad po mchod pa'i dus su brjod pa rnam pa sna tshogs pa'i gos la sogs pa'i rgyan can phul du dbyung du med pa'i gzugs dang sgeg pa dang ngal so'i sa gzhir/lo bcu gnyis lon pa shing a mra'i snye ma dang bcas pa byang chub kyi sems kyis gang ba'i bum pa bsnams pa'i phyag gi yal ga can/ zhi zhing 'dzum pa'i 'od zer dang bcas pa rnams spros nas/phyi rol du gshegs shing / de'i tshe kho na snying ga'i sa bon gyi 'od zer gyis spyan drangs pa'i phyogs bcu'i de bzhin gshegs pa dang / lha mo rnams dang bcas pa de rnams la/ /yang nas yang du phyag 'tshal te/ /thal mo sbyar bas gsol 'debs na/ /thugs rje dang ni ldan pa rnams//bdag la dbang ni bskur du gsol/ /oM a b+hi Shiny+tsa tu mAM sarba yo gi n+yo ma ku Te a tra a d+hiSh+Than+tu A gats+tshan+tu hUM swA hA/ zhes pa 'dis gsol ba btab pa/ gdugs dang / rgyal mtshan dang / ba dan dang / gos dang rol mo la sogs pa'i nye bar mkho ba thams cad dang ldan pa/ye shes kyi chus bkang ba'i bum pa dkar po'i phyag can rnams [(]gyis [,]kyis [)]rgyal bar gyur cig /rgyal bar gyis la sogs pas phyi dang nang dang gsang ba dang shes rab dang bzhi pa'i dbang bskur ba rnams kyis dbang bsku ra bar mdzad do/ /dbang bskur ba'i dus su'ang /dz+yo dz+yod byed pa dang / bkra shis dang / rnga bo che'i sgra dang tsan+dan dang gur gum dang me tog la sogs pa'i char pa nam mkha'i mthil las 'byung ba'o/ /de'i rjes su de rnams rtsa de rnams la thim par bya'o/ /de nas bcom ldan 'das dang lha mo rnams rang rang gi rigs kyi 'dren pas rgyas gdab par bya ste/de la bcom ldan 'das rdo rje sems dpa' la sangs rgyas lnga yis cod pan brgyan zhes gsungs pa'i phyir ro/ /mi bskyod pa la sogs pa'i sangs rgyas lnga rnams kyis so/ /sna tshogs sde ma la ni rnam par snang mdzad chen po ming gzhan rdo rje sems dpas so//legs phreng ma la sogs pa bzhi rnams rin chen 'byung bas so/ /rim pa gnyis par gnas pa rnams 'od dpag med kyis so/ /rim pa gsum par gnas pa rnams rnam par snang mdzad kyis so/ / sgo skyong ma rnams don yod grub pas rgyas gdab bo/ /de nas rtsa brgyad po de las byung ba'i rnal 'byor ma brgyad rnams kyis sngar bzhin du gtso bo la mchod nas/ rdo rje dang ni pad+ma 'dus shing bdud rtsi'i bde rgyas shing / /rim gyis yongs gyur sku can sems can don du gar byed pa//rdo rje lha mo'i rtsed mo'i rol pa rtsen mdzad 'gro rmongs la/ /'gro la mi dman kun dga' ster ba khyod la bdag 'dud do/ /zhes pas bstod de/ 'di ltar bdud rtsi myang bar bya'o/ /bcom ldan 'das dang bcom ldan 'das ma'i dga' ba'i sgras bskul ba'i de bzhin gshegs pa lnga rnams byon te rnam par snang mdzad kyi sgo nas zhugs pa zhu ste pad+ma'i nang du babs so//de'i tshe nang gi bdag nyid kyi ye shes lnga'i bdud rtsi lce'i rtse mo'i rol pas rang nyid kyis blangs shing / dkyil 'khor ba'i lha tshim par bya'o/ /phyi rol du ni yaM yig las skyes shing yaM gi snying po can ba dan g.yo ba gnyis kyis mtshan pa'i rlung gi dkyil 'khor sngon po la raM las byung zhing raM dang ldan pa 'bar ba bdun pa'i me'i dkyil 'khor dmar po la/de'i steng du yi ge gsum las skyes pa'i mgo bo gsum la gnas pa AHyig las skyes pa'i pad+ma'i snod do//de'i dbus su zla ba phyed pa dang / thig le dang bcas pa'i bi ra shu ma mu/ go ku da ha na yongs su gyur pa'i bdud rtsi lnga dang sha lnga oM hUM khaM swa hUM dang bcas pa rnams te/ de nas rlung gis bskul ba'i mes gdungs pas thod pa na gnas pa'i rdzas bcu bsros pa'i rlangs pas mtho gang gi bar can gyi steng gi bar snang la hUM las skyes shing hUM gis mtshan pa'i rdo rje sngon po la reg pas zhu nas zhugs pa las thams cad ro gcig par smin pa'i steng du mtho gang gi bar na oM las skyes shing oM yig gis byin gyis brlabs pa'i bdud rtsi'i 'od can gyi dkyil 'khor gyi oM yig gi 'od zer gyis bkug pa phyogs bcu na gnas pa'i de bzhin gshegs pa la sogs pa'i byang chub sems kyi bdud rtsi rnams dang /nor bu dang sngags dang / sman gyi nus pa'i bye brag rnams dang lhan cig zhugs pa na/de thams cad dngul chu'i mdog can ba mo'i phung po bzhin du bsil ba'i bdud rtsi de nyid gsum gyis lan gsum byin gyis brlabs te/ des lce hUM dkar po las skyes pa'i rdo rje rtse gcig pa 'od zer dang bcas pa'i sbu gu nas bdag nyid dang dkyil 'khor gyi lha rnams tshim par bya'o zhes pa ni dkyil 'khor rgyal po mchog ces bya ba'i ting nge 'dzin gnyis pa'o//de nas bcom ldan 'das kyis bskul ba'i mkha' 'gro ma thams cad dang / bcom ldan 'das kyi sku'i sprin spros pa rnams kyis sems can rnams kyi don mdzad de/rdo rje 'chang chen po'i go 'phang thob par bskyed nas rang gi sku'i sprin rnams rtsa ba'i sku la bsdu'o zhes pa las rgyal po mchog ces bya ba'i ting nge 'dzin gsum pa'o/ /de'i rjes su nang du rdzogs pa'i dkyil 'khor mngon du bya ste/ de la mgo bo pu l+lI ra mA la ya ru phreng bzangs ma'o//spyi bo dzA lan+d+ha ra la thod pa can ma'o/ /rna ba g.yas pa oM Di ya na ru 'jigs ma'o/ /mgo bo'i rgyab tu arbu da ru rgyal dkar ma'o/ /gnas te sa rab tu dga' ba'o/ /rna ba g.yon pa go dA wa rI ru mdzes ma'o/ /smin ma'i dbus rA mai shwa ra la nor 'dzin ma'o//mig gnyis de wI ko Ta ru skal bzang ma'o/ /phrag pa gnyis mA la wa ru dga' mthong ma'o/ /nye ba'i gnas te sa dri ma med pa'o/ /brgyad po 'di rnams ni thugs kyi 'khor lor mkha' la spyod pa rnams so/ /mchan khung dag kA ma rU par dge ba'i ske rags ma'o//o tre nu ma gnyis su gzugs can ma'o/ /zhing ste sa 'od byed pa'o/ /tri sha ku ne lte bar rnam rgyal ma'o/ /ko sa la sna'i rtse mor byed ma'o/ /nye ba'i zhing ste sa 'phro ma'o/ /ka ling+ga kha ru dus can ma'o/ /lam+bA ka mgrin par mtshon chen ma'o//tshan+do ha ste sa sbyang dka' ba'o/ /kAny+tsi snying gar byed pa can ma'o/ /hi mA lA ya rlig pa la gsod byed ma'o/ /nye ba'i tshan+do ha ste sa mngon du gyur pa'o/ /gsung gi 'khor lor sa la spyod pa rnams so/ /pre ta pu ri rtags la sgrol ba can ma'o//gr-i ha de ba ta bshang lam du 'jigs mthong ma'o/ /'du ba ste sa ring du song ba'o/ /sau rASh+Ta brla gnyis la legs mthong ma'o/ /gser gling byin pa la mi thub ma'o/ /nye ba'i 'du ba ste sa mi g.yo ba'o/ /na ga ra sor mo rnams la dge ba ma'o/ / sin+d+hu bol gong dag la grib gnon ma'o/ /dur khrod de sa legs pa'i blo gros so/ /ma ru mthe bong dag la dus mtshan ma'o/ /ku lu tA pus mo dag la grags chen ma'o/ /nye ba'i dur khrod de sa chos kyi sprin no/ /sku'i 'khor lor sa 'og na gnas pa rnams so/ /byang chub kyi sems la sogs pa bzhi ni bde ba chen po la sogs pa'i 'khor lo bzhi la'o//bcom ldan 'das dang sna tshogs sde ma dag gi gnas ni pad+ma'i lte ba gnyis so/ /bcom ldan 'das ni kun rdzob pa'i byang chub kyi sems kyi bdag nyid de/ sna tshogs sde ma'i rdul gyi rang bzhin no//byang chub kyi sems la sogs pa bzhi dang gzhan yang thams cad 'di dag thams cad la 'phros pa'o/ /rang rang gi gnas nas gnas pa'i rtsa'i rang bzhin lha mo nyi shu rtsa bzhi rnams bcom ldan 'das kho nas 'phros pas yang dag par 'khyud pa'o/ /gdams ngag ji lta ba dang de kho na nyid ji lta ba dang mos pa ji lta bar gtum mo'i rab tu dbye ba bsgom pas 'di thams cad dang 'gro ba yang don dam pa stong pa nyid dang /bde ba chen po'i rang bzhin snying rje dbyer med pa'i ngo bo sna tshogs sde ma dang sangs rgyas thod pa'i rang bzhin kho nar bsgom par bya'o zhes pa'o//gal te rnal 'byor pa dngos grub rnams thams cad myur du 'grub pa'i ched du sems brtan par byed 'dod na de'i tshe ting nge 'dzin gsum mdor bsdus nas bsgoms te/ sprul pa'i 'khor lo'i pad+ma 'dab ma drug cu rtsa bzhi pa'i kha steng du phyogs pa'i bu gar oM sngon po'o//chos kyi 'khor lo rtsibs brgyad pa 'og tu phyogs par hUM sngon po'o/ /steng du kha phyogs pa'i longs spyod rdzogs pa'i 'khor lo rtsibs bcu drug par oM dmar po'o/ /bde ba chen po'i 'khor lo rtsibs sum cu rtsa gnyis pa 'og tu kha phyogs pa'i haM dkar po'o//gsang ba'i 'khor lor gnas pa'i rlung gi me bskul ba'i gtum mo'i rang bzhin aM yig 'bar ba'i 'od zer gyis bzhu ba'i hUM yig la sogs pa yi ge gsum dang lhan cig dbyer med pa'i aM yig lhan cig skyes pa'i dga' ba'i rang bzhin gyi thig ler gyur pa'i dpa' bo bsgom zhing bsgom pa yongs su smin par mos nas/de nyid las 'od zer gyi re khA phra mo 'bar ba gcig ltar gnas par blta bar bya'o/ /de'i mthus bdud rtsi 'dzag pas gang bas dpa' bo bkrus pa/ 'od zer gyi re khA de yang bsil bar gyur te/ de nas dpa' bo la sems nges pas ji srid du sems brtan pa thob par mtshan ma rnams kyis nye bar dmigs pa de srid du blta bar bya'o//brtan pa nye bar mtshon pa na/ 'od zer gyi re khA de'i snang bas sna tshogs pa gsal bar byed par bsams te/ thams cad lag mthil gyi skyu ru ra ltar blta'o//ting nge 'dzin thams cad kyang myur du rdzogs par bya'o zhes pa thig le'i rnal 'byor ro/ /man ngag ji lta ba dang / ji ltar mos pa gtum mo'i dbye ba yang bsgom par bya'o/ /rig pa bzlas pa la dngos grub yin pas bzlas pa brjod par bya'o//de la bsgoms pas skyob las rtsa ba'i sngags 'di bzlas par bya ste/ oM hrIHbud+d+ha hUM ka pA li nI AH'di'i bzlas pa'i rim pa ni sna bug gi rlung lte bar gnas pa'i de ma thag tu bshad pa'i thig le la 'jug pa na oM sna bug nas 'byung ba la hrIH'o/ /thig le la gnas pa la bud+d+ha'o//bde ba la hUM ngo / /'gag pa la ka pA li ni'o/ /thig le las ldang ba la aH'o zhes pa yan lag gi bzlas pa la rdo rje bzlas pa'o/ /phra mo'i rnal 'byor yang 'di lta bur rtogs par bya'o/ /oM bud+d+ha ka pA li nI AHhi hai hUM phaT snying po'o/ /oM bud+d+ha ka pA li nI badzre NAM hau dur dza ya dur la k+She hUM phaT nye ba'i snying po'o//'di rnams las gang yang rung ba'i sngags ji ltar 'dod pa bzlas nas ldang ba'i dus su 'byung po thams cad pa'i gtor ma/ oM bud+d+ha ka pA la badzre tsi tre su tsa tre a la~M ba le prI Na ya sarba b+hU tA na/ mA ra ya sarba mA rA na/kI la ya sarba duSh+TA na/ u tsa tsA ya sarba big+h+nAn/ bi trA pa ya b+ho b+ha ga wa ti yak+Sha rak+Sha sa pi shA tsA na/ sho Sha ya tA Da ya sap+ta pA tA la ga tA na/ sa ra sa ra/ pra sa ra pra sa ra hUM hUM hUM phaT phaT phaT ces pa'i sngags kyis byin te/ dge ba 'di thams cad bla na med pa yang dag par rdzogs pa'i byang chub kyi ched du dang /mngon par 'dod pa'i dngos grub kyi ched du yongs su bsngos nas sngar bzhin mchod pa byas te/ dkyil 'khor pa nyi shu rtsa bzhi rnams nang du gnas pa la sogs pa nyi shu rtsa bzhi'i gnas na gnas pa'i rtsa rnams la man ngag ji lta bar nang du 'dus par bya'o//byang chub sems kyi thod pa ni bde ba chen po'i 'khor lor ro/ /rdul gyi thod pa ni sprul pa'i 'khor lor ro/ /bdud rtsi lnga'i thod pa ni snying gar ro/ /sgron ma lnga'i thod pa ni mgrin par ro/ /de ltar nang du bsdus nas bcom ldan 'das mas 'khyud pa'i bcom ldan 'das kyi sku stong pa nyid dang ro gcig pa'i bde ba chen po rang bzhin sgyu ma'i ngo bor bdag dang khams gsum pa mtha' med pa mos pas ji ltar 'dod par gnas par bya'o//nyi ma'i gung dang dgongs ka dang mtshan phyed kyi thun mtshams rnams su lha mo'i 'khor lo thams cad yud kyis spros pas go cha la sogs pa ma lus pa bsgrub par bya'o//nyal ba'i dus su sngar bzhin du zhu bar gyur pa stong pa nyid kyi ngo bo lhan cig skyes pa'i rang bzhin du bdag nyid kyang de'i rang bzhin du mos te nyal bar bya'o/ /ldang bar 'dod na sngar bzhin du lha mo bzhis bskul ba yud kyis langs te de kho na bzhin du mtha' dag ma tshang ba med par bya'o//de ltar ji srid dngos grub kyi mtshan ma rnams thob kyi bar du nyi ma so sor dbang gi cho gas khrus bya'o/ /bza' ba thams cad ni bdud rtsi myang ba'i cho gas so/ /gang gi tshe bcom ldan 'das 'di kho na shes rab ma med par bsgom par bya ba de'i tshe rgyu rdo rje 'chang zhes pa la sogs pa bcom ldan 'das he ru ka zhes pa'i bar gyi gzhung dang /btso bo 'di'i mdza' mo zhes pa la sogs pa nyung ngu'i rgyud du gsungs pa nyid kyi phyir ro zhes pa'i mthar thug dang / sgo skyong bzhi zhes pa la sogs pa dbang du byas nas zhes pa'i bar dang / de la zhes pa la sogs pa rgyas gdab po zhes pa'i bar dang / bcom ldan 'das dang bcom ldan 'das ma zhes pa la sogs pa tshim par bya'o zhes pa'i bar dang / de'i rjes su nang zhes pa la sogs pa rab tu dbye ba bsgom pas zhes pa'i bar dang /sna tshogs sde ma dang zhes pa dang / nyi shu rtsa bzhi zhes pa la sogs pa 'khyud pas shes pa'i bar dang / sngar bzhin du zhu bas zhes pa dang / sngar bzhin du lha mo bzhis bskul ba las zhes pa spangs te/ gzhan brjod pa thams cad shes par bya'o//khyad par ni bcom ldan 'das 'di'i shar dang byang dang nub dang / lho'i pad+ma'i 'dab ma rnams la rim pa ji lta bar oM hUM khaM swa zhes pa'i sa bon las byung ba'i sna tshogs sde ma dang 'dod ma dang sa 'og gnas ma dang rab bzang mo rnams sku mdog sngo ba g.yas brkyang gi zla bo'i rkang stabs can/stag gi pags pa'i sham thabs can/ phyag g.yas gnyis kyis gri gug dang thod pa dag dang / phyag g.yon gnyis kyis kha T+wAM ga dang DA ma ru dag 'dzin pa'o/ /dbang ldan dang me dang bden bral dang rlung gi 'dab ma rnams su rim pa ji lta bar hUM hUM hUM hUM yongs su gyur pa'i chang 'tshong ma dang /'byung po mo dang / phyag bzhi ma dang / nam mkha' la gnas ma kha dog ser ba/ na bza' ser po can/ 'od zer ser po 'phro ba'i sku can g.yas brkyang gi zhabs stabs can/sbrul brgyad kyis brgyan pa/ phyag gi yal ga g.yas pa dag gis gri gug dang / cang te'u dag dang / phyag g.yon pa'i yal ga dag gis kha T+wAM ga dang pad+ma'i snod 'dzin pa rnams so/ /brgyad po 'di rnams kyang phul du dbyung du med pa'i sgeg pa la sogs pa'i nyams shas che ba'i snying po can/mngon par gsar pa'i nyi ma'i dkyil 'khor la gar thabs can/ zhal gyi pad+ma mche ba cung zad gtsigs pa/ dbu skra kham pa gyen du 'greng ba/ thod pa lnga'i phreng ba can/ mi rus las byung ba'i 'khor lo can dang rna rgyan dang mgul rgyan dang / lag gdub dang / ska rags dang / dril bu g.yer kha dang / dpung rgyan dang / zhabs gdub kyi rgyan can/ mi mgo rlon pa lnga bcu'i phreng ba ske la 'phyang ba/ bskal pa'i mtha'i me 'bar ba lta bur rol pa'i 'od zer gyis bdud kyi dkyil 'khor bsreg pa/ gad mo dgod pas cher 'jigs pa/ zhal gcig pa/ zhal nas khrag 'dzag pa/ spyan gsum pa/ phyag bzhi pa/ klu rnams shin tu ches skrag par mdzad pa/ gtso bo la mngon du phyogs nas gzigs pa rnams bsgom mo/ /'dir bcom ldan 'das rdo rje sems dpa' ni/ /sangs rgyas lnga yi cod pan brgyan/ / zhes pa'i gsungs las/ mi bskyod pa la sogs pa'i sangs rgyas lnga rnams kyis rgyas gdab bo/ /sna tshogs sde ma la sogs pa rnams ji lta ba'i rim pas mi bskyod pa dang rnam par snang mdzad dang rin chen 'byung ldan dang 'od dpag med rnams kyis so/ /chang 'tshong ma la sogs pa rnams kyang de bzhin no//nang gi bdag nyid kyi bdud rtsis tshim pa yang gtum mo'i rab tu dbye ba bsgom pa kho nas so/ /de ltar rdo rje rnams sgeg ma brgyad kyis bskor ba'i bcom ldan 'das he ru ka 'di kho na a dr-i sh+yA dang thigs pa dang sol ba'i sbyor ba rnams la dang dug zhi ba'i sbyor ba rnams bsgom par bya'o//mo gsham khrus byed pa'i sbyor ba la ni shes rab dang bcas pa'o/ /rig pa 'dzin pa'i byed pa la ni bcom ldan 'das dang phyogs kyi lha mo rnams dkar ba/ phyogs bral gyi lha mo rnams dmar ba rnams so/ /mo gsham dang bud med bu shi ba'i khrus kyi cho ga la ni bcom ldan 'das 'di shes rab dang bcas pa'o//de'i tshe shes rab ma med pa nyid la spangs pa'i gzhung ji ltar rigs pa nye bar blang bar bya'o/ /gzhal yas khang 'di thams cad kyang dur khrod brgyad kyis yongs su bskor ba rnam par bsam par bya'o//de'i shar phyogs su gtum drag ces bya ba'i dur khrod de/ sgrub pa po rjes su 'dzin pa zhes pa ming gzhan no/ /shing shI ri sha ste yang na pa ta li'o/ /rdzu 'phrul chen po pa glang po che'i gdong pa can nam/ ma he'i gdong can no/ /phyogs skyong ba dbang po nye dbang ngo / /klu nor rgyas dkar po'o//sprin sgrogs pa zhes bya'o/ /mer drag tu rgod pa'am ming gzhan rab 'jigs chen po zhes bya ba'i dur khrod de/ shing ka rany+dza'am/ u dum+WA ra'o/ /rdzu 'phrul chen po pa ra'i gdong pa can nam khyi'i gdong pa can no/ /me lha dang / pad+ma chen po dkar po dang / sprin stug po zhes bya ba'o/ /lhor keng rus 'jigs pa'am ming gzhan 'jigs rung mun zhes pa'i dur khrod de/ shing a mra'am/ shI ri sha dang rdzu 'phrul chen po pa ma he'i gdong pa can nam stag gdong can dang / gshin rje dang pad+ma dkar po dang sprin 'khor byed do/ /bden bral du ku co ca cor sgrogs pa zhes pa'am/ming gzhan rnal 'byor mang du 'dus pa chen po zhes pa ste/ shing parka TI ma wa ta dang / rdzu 'phrul chen po pa ro'i gdong pa can nam bya rgod gdong dang / srin po dang / mtha' yas sngon po dang / sprin 'gengs byed do/ /nub tu 'bar ba 'khrugs pa'am ming gzhan khro bo'i me zhes pa'i dur khrod de/shing kaM kel+li'am tsU ta dang / rdzu 'phrul chen po pa chu srin gyi gdong pa can nam/ 'ug pa'i gdong pa can dang / chu lha dang stobs kyi rgyu ljang gu dang / sprin 'jigs rung ngo / /rlung du 'jigs rung mun pa can nam seng ge'i sgra phe te yig chen po'i sgra sgrogs pa zhes pa'i dur khrod de/ardzu na'am/ a shwat+tha dang / rdzu 'phrul chen po pa ri dgas kyi gdong pa can nam/ phag gi gdong pa can dang / rlung lha dang / rigs ldan khra bo dang / srin char 'be+ebs so/ /byang du kang+ka ri'i dur khrod dam ming gzhan gnyis med byed ces pa'o//shing a shwat+tha'am/ kaM kel+li dang / rdzu 'phrul chen po pa mi'i gdong pa can nam/ byi la'i gdong pa can dang / lus ngan dang / log 'dren dag dang / 'jog po dmar po dang sprin 'ur 'ur sgrogs so/ / dbang ldan du phun tshogs nags sam ming gzhan mtsho skyes dpa' bo zhes pa'i dur khrod de/ pa Ta'am nA ga ge sar dang / rdzu 'phrul chen po ba glang gi gdong pa can nam/ sha za'i gdong pa can dang / dbang ldan dang / dung skyong ser po dang / sprin gtum byed do/ /thams cad du mchod rten lta bur bya'o//de la/ sa srung dkar po la zhon pa/ /rdo rje can ser mig stong pa'o/ /nag mo 'khor lo dbyug to dung / /kau stu b+ha 'dzin mkha' lding gnas/ /me lha dmar po smin ma dang / /ral gtsug sma ra 'bar zhing 'khrug /tshon po rab gnas mi 'jigs dang //bgrang phreng ril pa dbyu gu 'dzin/ /g.yon brkyang ba yi rkang pa can/ /dus nag ma he la gnas pa/ /skra ni gyen du 'bar zhing khros/ /dbyug pa sdigs mdzub 'dzin pa'i lag /de 'dra'i bden bral ro la gnas/ /gcer bu mi rus kyis brgyan pa/ /zhal ni mche ba gtsigs pa nas//gri gug thod pa dag 'dzin pa'o/ /chu srin la ni chu lha dkar/ /gdengs ka bdun pa sbrul zhags 'dzin/ /e na ya ser la gnas pa'i/ /rlung lha ljang gu rlung ras can/ /me la gnod sbyin chen po ser/ /na kul bi dza pU ra 'dzin/ /byi bar glang chen gdong can dkar//la phug dbyug to la du phreng / /dbang ldan khyu mchog la zhon dkar/ /ral pa'i thor tshugs rus rgyan can/ /rtse gsum pas mtshan kha T+wAM ga /cang te'u 'dzin pa'i phyag can no/ /gdengs can brgyad rnams mi'i gdong can/ /rgyan bzang can gang bye brag med//brgya byin la sogs 'di bcu drug /g.yon pas yid 'ong ma la 'khyud/ /cig shos phyag ni sgeg bcas rnams/ /shing dang nye bar shes par bya/ /nyi mar srin po gshin rje ma/ /gzhan rnams zla bar zla 'od can/ /dbang ldan gshin rje srin po rnams//ma gtogs rin chen cod pan 'bar/ /dbang ldan rin chen cod pan can/ /zhes kyang rdzu 'phrul chen po brgyad/ /lus stod phyed mthong phyag rnams kyis/ /thod pa 'dzin par byed pa ste/ /gzhan gyis byin pa'i gtor ma la/ /g.yas pas 'dzin pa'i tshul gyis 'brel//sprin rnams kha dog sna tshogs pa'o/ /brgyad po 'di rnams rnam pa sna tshogs pa'i shing mchog gzhan rnams kyis kyang mdzes par byas pas bya rog dang / 'ug pa dang / bya rgod dang / khyi dang / ce spyang dang / seng ge dang / phag dang / stag la sogs pa rnams kyis 'jigs su rung ba/gau nA sa la sogs pa'i sbrul rnams kyis shin tu bred 'jug pa can/ keng rus dang / gsal shing gis phug pa dang / 'phyang ba dang / phyed tshig pa dang / mgo bo dang / thod pa dang / pus mo dang / ro mgo med pa dang / rus pa dang mgo bo'i dum bu la sogs pa rnams kyis 'jigs su rung ba sna tshogs pa'i grub pa dang rig pa 'dzin pa rnams dang /dam tshig spyod pa'i rnal 'byor pa dang / rnal 'byor ma'i tshogs kyis dang / ca co sgrogs pa'i gnod sbyin dang / ro langs dang / srin po la sogs pa rnams kyis dang / 'di dang de nas rgyug pa dang / g.yo ba dang / 'greng ba dang / sdod pa dang / nyal ba dang / ldang ba rnams kyis shin tu ngo mtshar bar byed pa dur khrod chen po rnams so zhes pa paN+Di ta a b+ha ya ka ra gu p+tas mdzad pa 'jigs pa med pa'i gzhung 'grel sangs rgyas thod pa'i rgyud chen po'i 'grel pa le'u bdun pa'o// //thabs kyi yan lag rgyas par ston pa de nas zhes pa la sogs pa'o/ /shing gis zhes pa rgyud gzhan nas bshad pas so/ /me tog gis zhes mdor bstan pa rgyas par ston te/ me tog lnga zhes pa 'chad par 'gyur ba'i pad+ma la sogs pa me tog lnga rnams so/'o mas zhes pa nye bar mtshon pa nyid kyi phyir mar la sogs pa rnams kyis so/ /nang gi sbyin sreg la ni shes rab ma lnga rnams kyi rdul rnams me tog lnga dang / 'o ma ni skyes pa'i byang chub kyi sems te/ snyoms par zhugs pa na de'i rdul dang bsres par shes par bya'o zhes gzhan du gsungs te/ 'dir skabs ma yin no/ /zhi ba zhes pa la sogs pa la 'dir thab gru bzhi pa/ rgya dang zabs su sor bcu gnyis pa'o/ /de'i kha'i steng du sor bzhi'i bar dor ro/ /der phyogs bzhi rnams su rdo rje dkar po rtse lnga pa kha gyes pa'o//de'i phyi rol du rgya dang dpangs su sor bzhi pa thab khung gi dbyibs can cung zad kha dmar ba kun nas kha khyer te/ mtshams rnams su rdo rje rtse gsum pas mtshan pa/ phyi ngos su rdo rje rtse gsum pa sngon po'i phreng bas bskor ba'o//thab kyi dbus su chos 'byung gi dbus su gnas pa'i khang pa brtsegs par pad+ma sor brgyad pa rdo rje phreng ba sngon po dang dmar po dang dkar po gsum gyis bskor ba'o/ /pad+ma'i steng du rdo rje rtse lnga pa mgo shar du bstan pa sor bzhi'i tshad tsam pa dpangs su sor gcig pa'o//de'i steng du pad+ma'o/ /de'i dbus su nyi ma'o/ /de'i steng du hrIH'o/ /khang pa brtsegs pa'i grwa rnams su rdo rje rtse dgu pa ser po rnams so/ /rdo rje kha gyes pa la sogs pa 'di thams cad rdul tshon gyis bris pa yang ngo zhes pa bsdus pa'i don to/ / yan lag gi don brjod par bya ste/ hUM yig bdag nyid bskyed pa ni hUM las skyes pa'i rang bzhin du mos pa'am hUM gi snying po can no/ /'khor lo ni gzhal yas khang ngo / /gru gsum ni chos 'byung ngo / /e waM mA ya zhes pa yi ge bzhi las skyes pa'i sa la sogs pa 'byung ba bzhi yongs su gyur par 'khor lo mos par bya'o//lte bas te lte bas mtshon pa'i pad+mas khyad par du byas pa'o/ /nyis 'gyur ni bcu drug lhag pa'i nyis brgya'o/ /kha lU ka yis zhes pa gur gum gyi bye brag gis so/ /'og tu pad+ma zhes pa rdo rje'i 'og tu pad+ma 'dab ma brgyad pa'o//sor bcu gnyis ni slob dpon gyi sor mos so/ /der zhes pa thab tu'o/ /re re'i zhes pa A ma la sogs pa'o/ /dmar ba'i rdo rje thod pa 'dzin/ /zhes pa dmar ba'i rdo rje dang thod pa'o zhes phyag mtshan no/ /khrag gis gang ba'o/ /stong pa nyid ces pa thab kyi dbus su ci yang mi bri ba'o//sha lnga ni go ku da ha na'i shas so/ /me ni me sngar bshad pa'o/ /zhi ba la sogs pa 'di rnams kyi khyad par gzhan rnams ni kho bos byas pa'i sbyin sreg gi cho ga 'od kyi snye mar te/ 'dir bshad pa'i khyad par dang mi mthun pa spangs nas gzung bar bya'o//'di thams cad ni kun rdzob tu'o/ /don dam par ni ci yis bsreg /ces pa la sogs pa'o/ /'jigs pa med pa'i gzhung 'grel du le'u brgyad pa'o// //rim pa gnyis po mngon du gyur pa na yang spyod pa dang bral na phyag rgya chen po'i dngos grub med do zhes pas spyod pa gsungs pa de nas zhes pa la sogs pa'o//lus dang ngag dang yid rnams kyi bya ba khyad par can ni spyod pa'o/ /rtag pa dang chad pa la sogs pa'i mtha' las 'das pa nyid kyis na spyod pa gzhan las khyad par du 'phags pa nyid kyi phyir shin tu mchog go//'jig rten las 'das pa nyid kyis na son pa'o/ /kha cig tu bud med shin tu mchog gyur zhes klog pa de'i tshe de bzung nas zhes pa lhag ma'o/ /'di ni rgod cing g.yengs pa las bab col du mi bya'o zhes gsungs pa dngos grub brgyad ces pa la sogs pa'o//sa 'og dang mig sman dang rkang pa phyug pa dang ri lu dang mi snang ba dang ral gri dang ro dang bcud len gyi dngos grub rnams sam/ dbang phyug gi yon tan brgyad rnams so/ /'dis ni nus pa thob pa la 'dod par gyur na/ spyod pa rjes su gnang ste/ gang las rnal 'byor la dga' ba 'di bag med par mi 'gyur zhing /glags tshol ba rnams kyis kyang 'di la mi tshugs la/ 'di rnams tshar gcod pa dang rjes su 'dzin nus par 'gyur zhing / grang ba dang tsha ba la sogs pa rnams kyis kyang zil gyis mi non pa ste/ 'jig rten gyi chos brgyad la sogs pas mi gnod pa nyid kyi phyir sgrib pa kun las grol ba'o//gang gi phyir nam mkha' mnyam pa nyid du gyur pa ste chos thams cad mnyam pa nyid du ro gcig pa'o/ /stong nyid la dga' zhes pa slongs mo slong ba'i dus su ster ba po rnams kyis med ces dgag pa byas pa na chos thams cad kyi don dam pa stong pa nyid bsgom par bya'o//sgom pa zhes pa thabs sgom pa'o/ /bla na med pa ni shes rab dang thabs dbyer med pa'o/ /chos la mchog tu gzhol ba ni gnyis su med pa'i chos de la rgyun mi 'chad par mngon par sbyor ba'o//rdzas zhes pa la sogs pa ji ltar tshogs pa zas kyis tshim pas ji ltar 'dod pa'i yul dang / dus dang skabs kyi khyad par rnams su goms pa'i khyad par las rnal 'byor rgyun mi 'chad par 'gyur bas/ mar me'i sdong bu'i yun ring por bsags pa'i phug gi mun pa bzhin du yun ring por bsags pa yang rnam par rtog pa'i skyon gyi tshogs chen po bsal nas phyag rgya chen po mngon du bya'o zhes pa spyi'i don to//spyod pa'i rnal 'byor dang ldan pa'i zhes pa dang po'i don la drug pa'o/ /rgyud du ni sangs rgyas thod pa'i rgyud stong phrag bcu gnyis bar ro//rang bzhin gyis dag ces pa la gal te rang bzhin gyis 'gro ba dag na de'i tshe thams cad kyi tshe kho na 'bad pa med par phyag rgya chen po thob par 'gyur zhing / rnal 'byor goms pas ci bya zhe na/ ci rnam par rtog pas nyams zhes brjod pa ma yin nam/de nyid kyi phyir ye shes zhabs kyis gsungs pa/ tha mal rnam rtog 'jug las gzhan/ /srid pa'i sdug bsngal ci yang med/ /de dang 'gal 'di sems 'di yis/ /sngon du 'dir ni byed par 'gyur/ /zhes so/ /mi 'jigs pa'i gzhung 'grel du le'u dgu pa'o// //gzhan rjes su 'dzin pa lhur byed pa la/ de'i thabs bshad pa'i ched du gsungs pa/ de nas zhes pa la sogs pa'o/ /sems can don gcig rab nges pa/ /zhes pa gang du sems can gyi don gcig pu legs par nges par bya ba'o//gser byed cing rab tu gsal bar byed do zhes pa gser byed do/ /byu ru'i ni byu ru'o/ /gang gis zhes pa gser gyis so/ /mu tig la sogs pa'i nor rnams kyis nor ldan du 'gro ste 'gyur ba'o/ /'di'i steng gser de'i phyi rol gyi sman rgyud gzhan du bshad pa rnams med ces mdor ston pa rgyas par ston te/shun lpags zhes pa la sogs pa'o/ /lcags gzhan gyi zhes pa lcags gzhan no/ /'on kyang grub pa'i sman gzhan no/ /dngul gyi ni dngul lo/ /de rnams ci zhes pa ni sman chen po'i mchog de ci yin pa'o/ /bklags pas grub pa zhes pa gang la bklags pa ste nang gi brjod pas grub pa'i sngags yod pa de ni de skad do//de yang zhes pa de yang 'grub po/ /snod du ste shes rab kyi pad+mar ro/ /bza' ba ni sman no/ /bcud ces bya ba byang chub kyi sems so/ /dbus su ni pad+ma'i'o/ /ro steng gi gnas nas 'og tu 'dren no zhes pas ro bcud ma ni a wa d+hU tI ste/der gnas pa'o/ /gzhon nu ma ni dar ma ste lo bcu drug ma'o/ /de yang zhes pa mo de yang ngo / /de bzhin gshegs pa ni sangs rgyas thod pa'i rnal 'byor ma rnams so/ /skyug bro med pa'i zhes pa la sogs pa med pa'o/ / skyug bro srid pa ni rdul dang ldan pa las so/ /mi 'grub ces pa shes rab dang / thabs kyi khu ba dag mnyam pa'i dus su 'phros pa ni dngos grub kyi rgyu'o zhes dgongs pa'o/ /sangs rgyas rnams kyi 'dren pa'i gnas/ /zhes 'brel lo/ /dus cung zad bzung bas mnyam par 'phos pas kyang sman chen po ste gser sgrub par byed cing /bar med par bzung bas ni bde ba chen po'i rang bzhin sangs rgyas nyid do zhes pa snying po'i don to/ /brtan pas bskul bar bya ste/ sman chen po de bya ba'o/ /zla ba ni khu ba'o/ /byugs pa ni khrag gis kyang ngo / / der ni ste zla ba la'o/ /ri rab ni suM yig go/ /bya ba ni snyoms 'jug go/ /gzhug bya ni 'phang bar bya ba'o/ /dngos po ni byang chub kyi sems so/ /g.yon dang g.yas ni rtsa gnyis so/ /bskum pa ni bya ba'i khyad par ro/ /bskum pa yang myur du 'pho ba 'dzin pa'i thabs gsungs so//'on kyang gdams ngag las gsal bar shes par bya'o/ /de ltar ni srog dang thur sel dag lte bar bskum nas man ngag ji lta bar sems brtan pa las sems kyi 'jug pa dbang du byas pa'i byang chub kyi sems rang gi gnas nas dbab pa dang phyir 'gro ba srung ba nyid dang 'phel ba rnams rim pas 'gyur ro//de kho na 'di ro tsa bar byed pa'o/ /gser la sogs pa 'dod pas ni gtong ngo / /de nyid kyi phyir gsungs pa/ lhan cig skyes pa cig car shes rab kyis dang thabs kyis kyang 'phang ngo / /zangs srang gcig gi dngos por bcas zhes kha cig go//logs su ni shes rab ma'i g.yon pa'i gzhogs su'o/ /pad+ma'i nang ngo zhes kha cig go/ /rgyas par ston pa nyid de nas las zhes pa snyoms 'jug go/ /ri rab ces pa la sogs pa dang po'i don la drug pa'o/ /sa bon rgyal po ni hriH yig go//dril bu ni zangs kyi rdog ma'o/ /shes rab can te lha'i sbyor ba dang ldan pas snying po la sogs pa'i sngags rnams kyis bsrung ba bya'o/ /don ni 'di yin te/ rang nyid bcom ldan 'das kyi gzugs kyis bcom ldan 'das ma'i gzugs kyi gzhon nu ma la 'khyud pas/rang gi snying gar byang chub kyi sems zla ba'i dkyil 'khor gyi rnam pa grub pa'i bcud ma lus pa khrag dang 'dres pa ste/ de'i steng du sa bon suM dang / de'i steng du hrIHyig bsams nas gsum po 'di 'dod chags chen pos zhu ba mnyam par dga' ba las byung ba'i byang chub kyi sems dang lhan cig zhu zhing 'dres par gyur nas pad+mar lhung ba shes rab ma'i byang chub kyi sems dang rdul dag dang 'dres pa ste/de dron mos zangs ma'am lcags la myur du byugs te me la 'phang bar bya'o zhes so/ /sangs rgyas tshad ma min pa yang ma yin no/ / de'i phyir 'di zhes pa la sogs pa ste/ dngos po gang dang gang zhes pa bshad zin pa dang / 'chad par 'gyur ba'o/ /tshad min ni tshad ma ma yin par sgro btags pa'o/ /dmyal ba las mi nyams te mi 'dor ba'o/ /chos zhes pa la sogs pa chos kyi phung po stong phrag brgyad cu rtsa bzhi rnams kyi gsang chen bla na med pa ni rnal 'byor ma'i rgyud 'di'o//gser dang dngul du'ang zhes pa zangs ni gser du dang khab len gyi lcags ni dngul du 'gyur ro/ /'di kho na dron mo dang dngul chu sbyangs par ti gcig dang lhan cig zla ba drug tu nyi ma so sor snar blugs par bya ste/'di'i phan yon ni 'tsho'o zhes pa la sogs pa'o/ /yang dag sbyor ba ni rdo rje dang pad+ma dag go/ /bzhi zhes pa rnam par rgyal ba'i bum pa gtso bo nyid kyis nam brjod kyang grub pa nyid kyi phyir ro/ /'dir bum pa lhag par gnas pa ni le'u bzhi par ji skad bshad pa bzhin no//khyad par gsungs pa/ bdag nyid kyi zhes pa la sogs pa ste/ bdag nyid kyi ming med kyi khrag mo gsham gyi khams kyi gtso bo dang bsres pas so/ /nag po dmar po 'jigs chen po/ /zhes pa kha dog nag po dang / dmar po de dag gis 'jigs chen no//nag po bcom ldan 'das dmar ba'i sna tshogs sde mas 'khyud pa ste/ 'dir lha mo brgyad kyis bskor ba zhes pa'i don to/ /bla ma kha cig ni nag po yang yin la cung zad dmar ba yang ngo zhes pa shes rab med pa kho na'o zhes gsung ngo / /don 'di yin te 'dir slob dpon 'khor dang bcas pa'i he ru ka'i bdag nyid kyis cho ga ji ltar bzhengs pa'i dkyil 'khor ram ras bris kyi dkyil 'khor nye bar spyod pa lngas mchod pa'i shar gyi sgor phyogs bcu'i gtor ma byin pas khrag dang khams kyi gtso bos kha'i nang du byugs pa'i bum pa lnga lhag par gnas pa byas nas mo gsham dkyil 'khor la phyogs pa la rdul gyi rjes thogs su khrus byed pa'i dus su rang nyid langs nas dang por rnam rgyal bum pas snying po'i sngags dang hUM yig bsgyings pa dang bcas par brjod cing khrus bya'o//de'i tshe kho na snying ga'i sa bon gyi 'od zer gyis spyan drangs pa'i dpa' bo dang dpa' mo dpag tu med pa rnams kyis byang chub sems kyis gang ba'i bum pa lag pa'i yal gas bzung ba rnams kyis khrus byed du 'jug par mdzad do//de'i cho kho na skyes bu gtum mo shes rab ma med pa'i gcig pu'i bdag nyid kyi he ru ka'i gzugs can ral gri 'dzin pa bzhi rnams kyis cig car ral gris nam mkha' la gdon la sogs pa'i bdud rnams gsod pa'i bsam pas brdeg par bya'o//'di lta bu'i rim pas bum pa gzhan rnams kyis rim gyis bkru'o/ /de'i rjes su 'dod pa spyad par bya'o//de nas de bu'i mngal dang ldan par 'gyur zhing / de bzhin du/ bu shi ma ni bu 'tsho'o/ /zhes pa'o/ /mi 'jigs pa'i gzhung 'grel du le'u bcu pa'o// //rig pa 'dzin pa'i sbyor ba rgyas par ston pa'i ched du gsungs pa/ de nas zhes pa la sogs pa'o//le'u bzhi par ri skegs kyi byed pa'i cho ga'i snga ma thams cad 'dir rtogs par bya'o/ /khyad par gsungs pa/ 'di nyid kyis zhes pa 'chad par 'gyur bas so/ /zin pa zhes pa la sogs pa dus su zin par gyur pa dug gso ba po thams cad kyis mi nus pas gang gi tshe dus su bzung ba'o zhes dor ba de'i tshe las brtsam mo//lus dkar rnams ni zhes pa bcom ldan 'das dang phyogs kyi lha mo rnams dkar ba ste/ mtshams kyi lha mo rnams dmar ba'o/ /cho ga bzhin du zhes pa'i ting nge 'dzin gsum rdzogs par byed pas so/ /ral gri ni sA li btags pa las byung ba'o//de'i tshe rig pa 'dzin pa gnyis kyi'o/ /bri ste gzhug go/ /'dab ma ni gro ga la sogs pa'o/ /lcug ma ni ka ra wI ra dkar po'i'o/ /gcig la zhes pa rig pa 'dzin pa gcig go/ /ltung ba ni zin pa'i steng du'o/ /de'i tshe kho na zin pa ldang ngo //de ltar ri skegs kyi byed pa dang chu'i byed pa dang / rig pa 'dzin pa'i byed pa rgyas par bshad de/ gzhan byed pa bco lnga rnams ni sangs rgyas thod pa'i rgyud stong phrag bcu gnyis pa rgyas par bstan pa rnams shes par bya'o zhes pa'o/ /mi 'jigs pa'i gzhung 'grel du le'u bcu gcig pa'o// //mig sman gyi dngos grub mdor bstan pa gsungs pa/ de nas zhes pa la sogs pa'o/ /gtsor gyur te rnal 'byor ma nyi shu rtsa bzhi rnams kyi'o/ /mthong ba ni mthong ba rnams so/ /gang rnams zhes pa gang rnams su'o//ma gsungs pa ni rgyud gzhan rnams su'o/ /skal ba che ni bsngags par 'os pa ste sgrib pa med pa'i stobs dang mi 'jigs pa nyid la sogs pa'i yon tan chen po ston pa'i phyir ro/ /sems can don la brtson pa nyid las gzhan gyi don phun sum tshogs pa gsungs so//rgyu'i gnas skabs kyi rang bzhin nyid kyi phyir sangs rgyas kun bskyed ma'o/ /'bras bu'i ngo bo nyid kyi phyir phyag rgya chen mo'o/ /rnal 'byor pa ni rnal 'byor pa rnams so/ /kun rnams te thams cad kyi ngo mtshar thob pa'o/ / gzhan pa'i nus pa nges pa thob nas zhes pa lhag ma'o/ /rgyal mtshan ni rgyal mtshan lta bu'i mi'o/ /thab khung ni gru gsum pa'o/ /de nyid du ni thab tu'o/ /mgo bos ni mgo bor te thod par ro/ /de'i ni sha'i'o/ /gzhan yang ni thod pa gzhan du'o/ /bgegs kyi zhes pa bgegs rnams so//du ba zhes pa ma lus pa'o/ /btung bar bya zhes pa rang nyid kyis so/ /'thung du gzhug ces pa shes rab ma'o/ /'dis sangs rgyas thod pa'i rnal 'byor pas dur khrod du sbyangs pa'i ma'i rked pa'i rus pa las byas pa'i thab khung gru gsum pa'i steng du de'i thod par de'i 'phongs kyi sha'i mar khus gang ba dur khrod kyi ras kyi sdong bu la dur khrod kyi mes sbar ba bzhag la/steng du sbyangs pa'i ma'i thod pa gzhan du sngags zlos shing du ba dbab par bya'o/ /du ba de sa la ma reg pa dang por lag pa gnyis kyis bzung nas/de'i rjes su lag pa g.yon par bzhag ste/ ke li mA li 'thungs pa'i bu mo skye gnas ma nyams pa rdul 'bab ma sna tshogs sde ma'i gzugs su mos pa la dal bus 'dod pa spyad nas rdul dang [(]'des [,]'dres [)]pa'i gnyis ka'i byang chub kyi sems cung zad gnyi gas myangs te cha gzhan mang po dang lhan cig g.yas pa'i ming med dang mthe bong dag gis mnur ro//de nas de kho na'i rdul gyis ri lu brgyad lhag pa'i brgya byas te/ ri lu so so la brgyad lhag pa'i brgyar mngon par bsngags nas sngags 'don cing des mig la mig sman du bya'o zhes pa tshogs pa'i don to//'di nyid kyis zhes pa 'di byugs zhes pa la sogs pa dang 'brel lo/ /dpung pa che ni phyag na rdo rje ste/ sems can ma lus pa tshim pa la gzhol ba'i phyag can nyid kyi phyir ro/ /rnal 'byor ma mchog ni rnal 'byor ma'i rgyud du rnyed sla'o//ming med dang mthe bos zhes pa g.yas pas so/ /de bzhin du 'og gi mig sman la yang g.yas pa'i bya ba'o/ /rnal ma zhes pa mig mnyes pa las mig sman ma byugs pa'i gnas skabs bzhin du 'gyur ro/ /pheg rdob bdun gyi tshad du 'gyur te ha cang char ches pa bzlog pa'i don du'o//bdag nyid chen po'i zhes pa mthu las zhes pa lhag ma'o/ /rang gi gzugs ni sgyur ba'i zhes pa dang po'i don la drug pa'o/ /sbyor ba zhes pa rig pa 'dzin pa nyid la sogs pa 'grub pa'i ched du sbyor ba rnams nyung ngu'i rgyud du ma gsungs shing rgyas par ni gsungs pa rnams bla ma'i zhal las shes par bya'o//sngags bzlas pa'i bye brag la bgrang phreng gi bye brag brjod pa'i ched du gsungs pa/ de nas zhes pa la sogs pa'o/ /glang chen rus pas te glang po che'i rus pas mngon spyod kyi dus su bzlas so//rus pa chen po ni mi'i rus pa'o/ /bya'i rus pa ni bya rgod kyi rus pa'o/ /lcags kyis ni lcags kyi bgrang phreng gis so/ /'di thams cad ni skyed pa'i phyogs la yang spros pa yin te/ de lta de ltar gdul bya'i skye bo'i ngor gsungs pa'o/ /rdzogs pa'i rim pa la ni 'di yis ci zhig ces gsungs pa/sems gcig ces pa la sogs pa'o/ /sems gcig pu kho na ni khams gsum pa'i dri med me long ste/ gang phyir des gang bsams pa de gzugs brnyan bzhin du snang bas so/ /'di thams cad ni sems kyis sgro btags shing sems de yang don dam par rmi lam gyi ngo bo spros pa thams cad spongs pa ste/rmongs pa gang rnams kyis mi shes pa de rnams la rnam par rtog pa chen po ma tshang ba med pa yod cing / de rnams thos pa la sogs pa zhes pa yang ste de lta na yang de rnams rnam par rtog pas gzung ba'o zhes pas spros pa med pa'i de kho na nyid sgom pa la chen po sbyor dgongs pas thugs brtse bar gyur pa'o//mi 'jigs pa'i gzhung 'grel du le'u bcu gnyis pa'o// //rim pa gnyi ga la yang de nyid kho na sgrib pa thams cad rnam par dag pa'o zhes gsungs pa de nas zhes pa la sogs pa'o//rnam dag le'u zhes pa la de kho na nyid rnam par dag pa ni rnam dag yin gyi de kho na nyid ni rnam dag ma yin te/ de kho na nyid ni thams cad kyi tshe yod pa'i phyir na thams cad la thams cad kyi tshe rnam par dag par thal bar gyur pa'i phyir ro/ /de yang thabs kyi de kho na nyid med par mngon du bya bar mi sla'o zhes pa de'i thabs dang ldan pa ji lta bas rdo rje theg pa la brten pas mngon du bya ba de ston pa'i ched du gsungs pa/sring mo zhes pa la sogs pa ste/ rnal 'byor pa la sgra ji lta ba bzhin no/ /yang na sring mo ni rdo rje theg pa la yang dag par gnas pa'o//de'i bu mo ni tsha mo'o/ /dbang bskur ster ba mo ni ma'o/ /bu mo ni mnyes gshin ma'am der gzhag par bya'o/ /shes rab can ni rnam par dag pa zhes pa'i phyir ro/ /phyag rgya chen mo zhes pa mngon du bya bar ro/ /'dis ni thabs las byung ba'i de kho na nyid gsungs so//g.yung mo ni bsam gtan la dga' ba'o/ /gar mkhan ma ni rab tu spyod pa mkhan ma'o/ /khrus mkhan ma ni dkar po'i chos la dga' ba'o/ /gtum mo ni nga rgyal nges par bcom pa nyid kyi phyir bzod pa'i ngang tshul ma'o/ /dge ba'i 'du byed rdo rje gsum gyi lus can la dga' ba pags pa mkhan ma'o//nang gi shes rab mo'i sring mo ni rkyang ma'o/ /sring mo'i bu mo ni ro ma'o/ /skyed ma ni a wa d+hU tI'o/ /snga ma dag phyi ma dang bla ma'i man ngag las sbyor ba ni bu mo'o/ /shes rab dang thabs gnyis su med pa'i rang bzhin rtsa gsum pa de rnams yang dag par sbyor ba las skye ba'i bde ba chen po ni chung ngu ma'o//de gsungs pa/ de yi bde ba 'dod mar bshad/ /ces so/ /sgra'i rnam par shes pa g.yung ma'o/ /ro'i rnam par shes pa gar ma'o/ /reg bya'i rnam par shes pa ni 'khrud mkhan ma'o//sna'i rnam par shes pa ni gtum ma'o/ /mig gi rnam par shes pa ni ko lpags mkhan no/ /nges pa'i don ni bla na med pa'i shes rab ma sring mo la sogs pa ni le'u dang por bshad zin to/ /bsod nams dang ye shes kyi tshogs dag bsags par bya'o zhes pa chung ma'o//stong pa nyid dang ro gcig pa nyid kyi phyir glo bur ba'i spros pa rnams thams cad kyis reg bya ma yin pa nyid kyis na g.yung mo'o/ /srid pa dang mya ngan las 'das pa la mi gnas pa nyid kyis rnam pa sna tshogs sgyu ma'i ngo bo'i sprul pa rnams kyis gdul bya rnams la gar byed pa'i phyir gar ma'o//chung ngu'i chung ngu la sogs pa rtogs pa'i rim pas chen po'i chen po la sogs pa'i sgrib pa bag chags dang bcas pa'i dri ma 'khrud pa'i phyir khrus mkhan ma'o/ /tsaN+Da lI ni shes rab rdzogs pa'i rang gi ngo bo nges par rtogs pa'o//A li ni snying rje chen po'o/ /de dag ni phul du dbyung du med pa'i go 'phang du 'dren no zhes pa gtum mo'o/ /srid pa'i yan lag bcu gnyis kyi rjes su song ba'i ma rig pa'i pags pa 'byed pa'i phyir ko spags mkhan ma'o zhes pa bla na med pa'i shes rab bo//phyi dang nang gi bdag nyid kyi shes rab ma 'di rnams kho na'o/ /bla na med pa'i shes rab kyi yon tan rnams kyi rjes su byed pa'i phyir shes rab nyid du rtogs par bya'o/ /de nyid kyi phyir gsungs par 'gyur ba/ rnam par ma dag sems sbyangs las/ / zhes so/ /'dis ni rdzogs pa'i rim pa la/ phyi'i shes rab ma las kyi phyag rgya dang / nang gi shes rab ma chos kyi phyag rgya dang / bla na med pa'i shes rab ma phyag rgya chen mo'o/ /'di kho nas dag pa mthar thug pa la lhag par gnas pa nyid kyi phyir chos kyi phyag rgya ni chos kyi sku ste/de ni bde ba chen po'i sems kyi rang bzhin nyid kyi phyir ro/ /las kyi phyag rgya dang sbyar bas mtshan dang dpe byad kyis rnam par mdzes pa'i sku ni longs spyod rdzogs pa'i sku'o/ /mtshan ma med par sna tshogs shing mtha' yas pa'i dkyil 'khor gyi 'khor lo la sogs pa'i rnam par sprul pa ni gdul bya'i skye bo skal ldan rjes su 'dzin pa'i dus las mi 'da' ba'i phyir dam tshig gi phyag rgya dang sprul pa'i sku'o//phyag rgya chen po khyab par byed pa po ni rang bzhin pa'i sku ste bzhi pa'o/ /yang na phyag rgya chen po mtshan dang dpe byad 'bar ba phyag dang zhal dang phyag mtshan la sogs pa dang ldan pa'i ngo bo ni longs spyod rdzogs pa'i sku'o//dam tshig gi phyag rgyas sems kyi rang bzhin so so rang gis rig par bya ba ni chos kyi sku ste/ dam tshig ni yang dag par rtogs pa'o zhes byas nas so//chos kyi phyag rgya chos dang longs spyod rdzogs pa'i sku'i byin brlabs las sna tshogs pa'i rnam pa'i chos kyi de kho na nyid gsal bar byed pa'i gsung gi bdag nyid do/ /las kyi phyag rgya ni bya ba sgrub pa'i ngo bo nyid kyi phyir sprul pa sna tshogs pa rnams kyis bya ba phun sum tshogs par byed pa'i phyir sprul pa'i sku'o//bskyed pa'i rim pa la ni phyi rol gyi shes rab ma kho nas mngon par 'dod pa'i lha mo'i gzugs su bsgoms pa ni las kyi phyag rgya'o/ /rang 'dra ba'i bud med ni ye shes kyi phyag rgya zhes pa'i ming gzhan no/ /lus la bsgoms pa'i hUM yig la sogs pa yang chos kyi phyag rgya'o//dam tshig gi phyag rgya ni sa bon la sogs pa las rdzogs pa'i dkyil 'khor gyi 'khor lor 'dus pa'i lha spro ba dang sdud pa la sogs pa'i byed pa can rnams te mtshan ma yang ngo / /rang nyid gtso bo'i lha'i gzugs can ni phyag rgya chen po'o zhes gsal bar byas so//nang gi shes rab ma kho na dbang po dang nyon mongs pa dang yul gyi ngo bor brjod pa'i ched du de nas zhes pa la sogs pa'o/ /ro zhes pa lce'o/ /yid ces pa yid kyi nye bar mtshon pa 'dir lus kyi dbang po'o/ /sring mo gzugs su ji ltar 'gyur//zhes pa la sogs pa 'chad par 'gyur ba'i gsung gi phyir mig la sogs pa rnams kyi nye bar mtshon pa nyid kyis gzugs la sogs pa'i yul rnams kyang sring mo la sogs pa'i ngo bor shes par bya'o/ /gang gis zhes pa gang gzugs yin pa ste gti mug gi rgyu nyid kyi phyir gti mug gzugs te/'grel pa'i phyir zhe sdang la sogs pa yang ngo / /'dod chags te 'dod chags kyang ngo / /nga rgyal te nga rgyal yang ngo / /phrag dog kyang ngo / /gzugs la sogs pa'i yul rnams gti mug la sogs pa skyed pa nyid kyi phyir gti mug la sogs par tha snyad bya'o//de kho na nyid du ni ma yin no zhes pa'i don to/ /sems kyi zhes pa/ sems kho na'i gnas skabs kyi khyad par ni mig dang gti mug dang gzugs la sogs pa 'di rnams so/ /sems kyang ma dag pa kho na ste/gti mug la sogs pa'i dri ma rnams kyis so/ /de'i phyir mig la sogs pa rnams kyang ma dag pa'o zhes dgongs pa'o/ /'o na ji ltar sring mo la sogs pa shes rab nyid du bshad ce na gsungs pa/ de phyir zhes pa ste gang gi phyir 'di rnams rnam par dag pa kho na shes rab yin zhing sems rnam par dag pa 'di rnams rnam par dag pa yin pa de'i phyir sems rnam par dag par bya'o//sus she na gsungs pa shes rab che ldan zhes pa shes rab chen po ni phyag rgya chen po yin zhing de sgom pa po ste/ de kho nas dri ma ma lus pa 'khrud pa'i phyir ro//de nyid kyi phyir gsungs pa/ shin tu sbyor ba'i sems ldan pa/ /zhes te/ yod pa dang med pa la sogs pa'i mtha' las shin tu 'das pa shes rab dang thabs gnyis su med par ro gcig pa'o/ /gal te de ltar mi byed na de'i tshe dngos grub ste phyag rgya chen po'i dngos grub tu mi 'gyur ro//gang gi tshe ni gus pas bar med par bsgoms pas rang rig pa'i bde ba chen po'i rang bzhin gyi dag pa kho nar 'gyur na dngos grub 'di kho nar te/ mi'i skye ba la'o/ /dngos grub 'dod pas skad cig kyang / /gzhan pa'i sems kyis mi gnas so//zhes bcom ldan 'das kyis gsungs la/ gus pas bar chad med par bsgom pa las byung ba'i bsod nams dang ye shes kyi tshogs yongs su rdzogs pa ni gcig la'o/ /rnam pa 'di lta bu'i sgom pa dang bral ba ni srid pa gzhan la ste grangs ma nges pa la skye ba mi khom pa brgyad las grol ba goms pa dang rjes su mthun pa rnyed na'o//des na goms pa las rnam par dag pa'o/ /pha rol tu phyin pa'i tshul la ni bya ba'i rang bzhin gyi bsod nams kyi tshogs las dang thabs kyi khyad par med pa las bskal pa grangs med pa gsum rnams kyis rnam par dag pa gsungs so zhes pa 'gal ba med do//'o na 'dir bsgom par bya ba cung zad kyang nye bar bstan pa med de/ rdzogs pa'i ngo bo kho na'i phyag rgya rnams rgyas par ston pa'i phyir dang rnal 'byor pa rnams kyang de'i sgo nas de ltar gsal bar byed pa'i phyir ro zhe na bden te de kho na nyid du bsgom par bya ba dang sgom pa ma skyes pa'i phyir te/chos rnams thams cad gdod ma nas zhi ba nyid kyi phyir ro/ /de ston pa dngos po med pa zhes pa la sogs pa ste dngos po med pa la ste/ dngos por sgro btags pa bkag pa skye ba med pa don dam pa'i bden pa la sgom pa ji ltar te yod pa ma yin pa kho na ste/dang po nas dag pa nyid kyi phyir ro/ /'o na skye ba med pa'i de kho na nyid bsgom byar yod do zhes gsungs pa/ dngos med ci 'dra zhes pa skye ba med pa med de/ don dam par rtogs pa dang / rjes su mthun pa nyid kyi phyir na ni don dam pa de kho na nyid du brjod do/ /gang yang kun rdzob kyi bden pa'i bdag nyid kyi dngos po de yang bsgom bya dngos med ma yin te/ bden pa nyid kyi phyir ro/ /bden pa gnyis gnyis su dbyer med par mthong ba tsam gyis grol ba'i phyir bsgom bya dang sgom pa po dang sgom pa zhes mngon par zhen pa zung 'jug gi rim pa rtogs pa rnams la med do zhes pa dgongs pa'o//de dpal 'dus par gsungs pa/ dngos po med la bsgom pa med/ /bsgom pa bsgom pa min pa nyid/ /de ltar dngos po dngos med pa//bsgom pa dmigs par mi 'gyur ro/ /zhes so/ /de nyid kyi phyir nye bar sdud de/ ci ltar 'gyur zhes bsgom pa ste/ de'i phyir nye bar mi dmigs so zhes pa dgongs pa'o/ /de ci rdzogs pa'i rim pa la sgom pa chad pa kho na'am zhe na chad pa ma yin no//'o na de ci 'dra ba yin zhe na/ de gang 'dra ba yin pa ni 'chad par 'gyur ro/ /de ltar don dam par bsgom par bya ba la sogs par mngon par zhen pa bsal nas/ gzugs la sogs par mngon par gsal bar 'dod pas gsungs pa/ sring mo zhes pa la sogs pa'o//ci ltar te gang gi phyir dkar mo la sogs pa'i dbye ba tha dad pa gzugs dang yang dag par ldan pa dbang po dang phan tshun phan gdags bya 'dogs byed kyi dngos po las 'brel pa sems ma dag pas mthong gi/ /sems dag pas ni ma yin te/ don dam par dbang po dang yul dang de'i shes pa rnams rang bzhin med pa nyid kyi phyir ro/ /de bzhin du phyi mar ro/ /rnam gsum zhes pa/ yid dang yid kyi shes pa dang mi sems pa'i bye brag las so/ /'di 'dra'i sbyor dang ldan pa yi/ /zhes phyag rgya chen po'i rnal 'byor dang ldan pa'o//rnam par byang ba'o zhes pa mnam pa ste dri'o/ /blta min zhes pa blta bya ma yin zhing shes bya min pa'o/ /de nyid kyi phyir dri la sogs pa rnams las 'dod chags dang zhe sdang la sogs pa skye ba ma yin no/ /myang ba'i gzugs kyi zhes pa myang ba'i gzugs med de/lce dang ro dag med pa'i phyir ro/ /yid kyis te yid kyi nye bar mtshon pa lus kyi dbang pos bde ba reg bya'i yul la skye ba dang nye bar mtshon pa las sdug bsngal dang btang snyoms longs spyod de/ de yang ci 'dra zhig go/ /yid kyi dbang po ni yid nyid do/ /bde ba dang nye bar mtshon pa las sdug bsngal te/dga' ba dang skyong ba dang btang snyoms longs spyod pa de yang ci 'dra zhig ces 'brel lo/ /'o na gzugs la sogs pa'i yul lnga rnams dang de'i yul can dbang po lnga rnams dang de dag gi rnam par shes pa rnams shes rab lnga'i rang bzhin du rnam par gzhag cing /yul dang dbang po dang shes pa drug pa rnams mi brjod pa ji ltar zhe na/ yid kyi dbang po ni mig la sogs pa'i dbang po bzhin du logs pa med kyi 'das ma thag pa kho na'i rnam par shes pa ni rnam par shes pa'i khyad par phyi ma skyed pa'i bdag po nyid kyi phyir yid kyi dbang por brjod cing de'i bye brag sems dang sems las byung ba rnam pa dang de'i yul dang yid kyi rnam par shes pa'o//de ltar rtog med dag ni yid kyi dbang po dang de'i yul dag ste dbang po'i shes pa lnga'i rang bzhin dag go/ /sems byung rnams kyang sems rnams las gzhan pa ma yin no//de gsungs pa/ sems las sems byung gzhan ma yin/ /zhes so/ /rtog pa can dag ni yid kyi rnam par shes pa'i rang bzhin dag go/ /yid kyi rnam shes ni/ 'chad dang mtshams sbyor 'dod chags bral/ / nyams dang 'chi 'pho skye ba rnams/ /yid kyi rnam shes kho nar 'dod/ /ces pa'i rigs pa las gtso bo nyid kyi phyir nye bar longs spyod pa'o zhes pas phan 'dogs byed nye bar longs spyod bya/ shes rab kyi ngo bor rnam par gzhag pa ma yin no/ /bla na med pa'i shes rab sngar rnam par gzhag pa yid kyi rnam par shes pa la yod pa kho na'o//gang yid ces gsungs pa de ni 'dir dngos po'i grong khyer ma lus pa rnam par dpyad pa la 'jug pa'i don du'o/ /de ltar ni rab tu 'brel ba 'dis khams bco brgyad rnams gsungs shing / de rnams kho na sdud pa las skye mched bcu gnyis rnams te shin tu 'dus pa la phung po rnams so//khams gsum pa yang de rnams kho na'o/ /de yang sems tsam kho na ste de lang kar gshegs pa'i mdor gsungs pa/ kye rgyal ba'i sras rnams 'di lta ste/ khams gsum pa ni sems tsam mo//zhes so/ /'phags pa klu sgrub zhabs kyis kyang byang chub sems 'grel du gsungs pa/ bdag tu 'dzin pa bzlog don du/ /phung po khams sogs bstan pa ste/ /de yang sems tsam rnam gzhag pas/ /skal ba chen po rnams kyis bshig / ces so/ /sems de yang kun rdzob pa ste/ de nyid du gsungs pa/ 'di rnams thams cad sems tsam zhes/ /thub pa rnams kyis gang bstan pa/ /byis rnams skrag pa spang phyir te/ /de ni de kho na nyid min/ /zhes so/ /ji ltar sems de kho na nyid ma yin zhe na/gsungs pa gnyis rnam dpyad las zhes pa dngos po dang dngos po med pa'i rang gi ngo bo rnam par brtag pa las so/ /'o na rnam par dpyod pa po'i sems don dam par yod do zhe na gsungs pa/ rnam dpyod ces pa ste/ rnam par dpyod du 'jug go zhes pas rnam dpyod de rnam par dpyod pa po'i rnam shes ni der ni ste/gnyis rnam dpyad par gyur pa ma yin no/ /de 'phags pa zhi ba lha'i zhabs kyis gsungs pa/ dpyad bya rnam par dpyad pa dang / /rnam dpyad la ni rten yod min/ /rten med nyid phyir mi skye ste/ /de yang mya ngan 'das par brjod//ces so/ /de bzhin du/ gang tshe dngos dang dngos med la/ /blo yi mdun na mi gnas par/ /de tshe rnam pa gzhan med pas/ /dmigs pa med par rab tu zhi'o/ /zhes gsungs so/ /rgyal po la rin po che'i phreng bar yang gsungs pa/ 'gro ba'i chos kun rnam shes kyi//me yi bud shing nyid du 'dod/ /de rnams ji bzhin rnam dpyod pa'i/ /me yis sreg pa'i nyer zhi'o/ /zhes so/ /ji ltar gnyis rnam par dpyod ce na gsungs pa/ dngos po la zhes pa la sogs pa ste dngos po med pa dag phan tshun de'i bdag nyid du med de 'gal ba'i phyir ro//tha dad du yod do zhes gsungs pa/ dngos po dngos med gnyi ga stong / /zhes te/ dngos po dang dngos po med pa'i rang bzhin dag stong pa dag ste/ sems ni gcig min gyi rang bzhin dang bral ba nyid kyis na rang bzhin med pa nyid kyi phyir ro/ /de ltar ni de gcig ma yin te/gcig nyid ni sngon po dang ser po'i ngo bo nyid du khra bor snang ba'i myong bar mi 'gyur zhing / ser po la sogs pa mtha' dag sngon po'i nang du 'dus par rtogs par thal bar 'gyur ba'i phyir ro/ /sngon po yang snga ma dang phyi ma dang bar ma tha dad na rags par snang ba nyid kyis rtogs par mi 'gyur gyi/gang la phyogs cha dbye ba yod/ /de ni gcig tu mi rung ngo / /zhes pa'i rigs pa las rdul phra rab tsam nyid du snang bar 'gyur ro/ /gcig min yang ma yin te/ sems gcig min nyid na rdul phra rab tu tha dad pa'i phyir na de las gzhan pa yang dag par myong ba med na rdul yang phra rab so sor rang rig pa'i ngo bo nyid kyis na de kho na rdul phra rab so sor snang bar thal bar 'gyur ro//gnyis ka ngo bo nyid du yang mi rigs te/ de lta bu'i rnam pa myong ba med pa'i phyir ro/ /thams cad la kho bo cag gi lta ba tshad ma'i phyir ro//ldog pa'i ngo bo lhan cig pa'am logs pa rjes su rtogs par bya ba mngon sum du myong ba yang nye bar dmigs pa ma yin zhing rjes su dpag pa'i bdag nyid kyang ste/ de ni sngon ma can nyid kyi phyir ro/ /mi dmigs shing tshad ma med pa'i ldog pa'i ngo bo nyid rjes su rtogs par bya ba ji ltar rtog /ci ste khra bo nyid kyis rags pa'i rnam pa rang rig pa'i ngo bo myong ba ni bsnyon mi nus shing de tsam du yod la/ de yang ldog pa'i ngo bo nyid rjes su rtogs par bya ba med na mi 'gyur ro zhes pas so/ /de ni de yod pa las gzhan du mi 'thad pas yongs su brtag par bya'o zhe na de ni ma yin te/gnyi ga ma yin pa'i ngo bo nyid kho nas spros pa med pa nyid du ches gsal bar 'thad pa las don gyi go bar zad pa'i phyir ro/ /de'i phyir skye ba yang mi rigs te/ 'bras bu dang rgyu'i dngos po la tshad ma med pa'i phyir ro/ / snga ma dang phyi ma nyid kyis tshad ma 'jug pa ni 'bras bu dang rgyu'i dngos po rnam par gzhag pa yin na rnam pa gnyis dang bral ba gnyis med par myong ba ni snga ma dang phyi mar 'jug pa dang ldan pa yang med cing de las gzhan pa'i yang dag par rig pa yang yod pa ma yin te/ tshad ma med pa'i phyir ro zhes bsgrubs zin to/ /gang gi tshe de ltar 'bras bu dang rgyu'i dngos po la tshad ma med pa'i phyir skye ba med pa kho na yin pa de'i tshe ga las rang las sam gzhan las sam/ gnyi ga las sam/ rgyu med las yin de ltar skye ba med pa'i phyir sems ni dngos po'i ngo bo nyid du yang med de/'byung ngo zhes pas na dngos po ste/ med pa sngon ma can gyi 'byung ba kho na la rnam par gzhag pa'i phyir ro/ /de nyid kyi phyir de nyams pa'i ngo bo dngos po med pa'i ngo bo nyid kyang med do/ /dngos po dang dngos po med po'i rang bzhin med pa'i phyir yang spros pa thams cad med pa ste de rnams ni dngos po dang dngos po med pa'i rten can nyid kyis na de dag gi khyab pa nyid kyi phyir khyab byed med na/khyab bya yang med pa'i phyir ro/ /des na rnam par dpyad pa 'dis spros pa med pa nyid kyi stong pa nyid rtogs par bya'o//'di kho na yang de kho na nyid mthong ba ste gang shes rab kyi mig gis nges par dpyad pa las yang dag pa'i ye shes kyi snang ba byung ba na chos rnams thams cad mi mthong ba'o zhes pa'o/ /ji skad du bcom ldan 'das mar gsungs pa/ sangs rgyas bcom ldan 'das rnams kyi ye shes kyi spyan ci zhe na/gang gis cung zad kyang mi mthong ba'o/ /de bzhin du don dam pa mthong ba ci zhe na/ gang chos rnams thams cad mi mthong ba'o zhes so/ /des na de kho na nyid kyi rnal 'byor pa spyod lam thams cad la gnas pa rnams kyis kyang chos rnams thams cad mthong yang mthong ba med pa'o//'di 'dra ba kho na mthong ba med par dgongs kyi gnyid log pa dang mig btsums pa dag gi mig bzhin du gang yid la mi byed pas ni ma yin no/ /de lta na ni bag chags ma spangs pa'i phyir 'du shes med pa'i snyoms par 'jug pa la sogs pa las langs pa bzhin du slar yang gzugs la sogs par mngon par zhen pa'i rtsa ba can 'dod chags la sogs pa rnams skye ba'i phyir rnal 'byor pa ma grol ba kho nar 'gyur ro//thog ma med pa'i dus can gyi gzugs la sogs par mngon par zhen pa yid la byed pa yongs su bor ba tsam las spong ba yang ma yin te 'du shes med pa'i snyoms par 'jug pa la sogs pa las kyang spangs par thal bar 'gyur ba'i phyir ro//gzugs la sogs pa'i yul la the tshom spong ba med par de yid la byed pa yongs su spong bar yang nus pa ma yin te/ me ma spangs na tsha ba mi spangs pa bzhin no//de'i phyir the tshom gyi sa bon dang bral ba kho na las gzugs la sogs par mngon par zhen pa bsal bar bya'i tsher ma gdon par bya ba bzhin du ni ma yin no zhes bya ba nges pa'o/ /de ltar dngos po dang dngos po med pa dang rang gi dngos po dang gzhan gyi dngos po la sogs par yid la byed pa bsal bas thams cad las yid bsdus te cung zad kyang mi bsam mo//de de ltar mi sems pa las sngon rnam par spyod pa'i dus kho nar bla ma bsnyen bkur ba'i rnal 'byor pa'i gang bla ma'i drin las rtogs pa kho na'i bcom ldan 'das ma shes rab kyi pha rol tu phyin pa skye ste tshad ma dang gzhal bya dang 'bras bu'i cha dang yang dag par bral ba nyid kyis na rang gsal ba'i rang bzhin spros pa med pa nyid kyis ni spros pa'i bdag nyid can 'khor ba'i rang bzhin gyis sdug bsngal gyi tshogs dang bral ba las mchog tu dga' ba'i rang gi ngo bo nyid mthong ba med pa'i tshul gyis mngon du rtogs te/de'i mthu las kye ma ma la gti mug gi nus pa/ gang gis sems can 'di rnams mya ngan las 'das pa yin yang bdag nyid ma rtogs te/ 'di rnams ji ltar rtogs par bya/ /zhes rnam par bsams te/ de'i bdag nyid kho nar 'gro ba mtha' dag la dmigs te/ dmigs pa med pa'i ngo bo'i snying rje chen po skye'o/ /de'i bdag can kho na'i rdzogs pa'i dkyil 'khor gyi ngo bo bdag dang dngos po thams cad kyi rang bzhin snying rje chen po'i bdag nyid ni/ bcom ldan 'das ma shes rab ma ming gzhan phyag rgya chen mo dang de'i bdag nyid kyi phyir dbyer med pa'i rang bzhin du blta'o//de'i tshe stong pa nyid dang snying rje dag de'i bdag nyid de/ de yang rnam par mi rtog pa'i rnal 'byor ro/ /de kho na/ so sor sdud dang de bzhin du/ /bsam gtan srog sdom 'dzin pa dang / /rjes su dran dang ting 'dzin te/ /rnal 'byor yan lag drug tu 'dod/ /ces 'dus pa phyi mar gsungs pa'i yan lag drug gi rnal 'byor ro//de ltar ni gzhon nu ma'i pra phab pa mthong ba bzhin du dbang po rnams stong pa nyid dang ro gcig pas rang gi yul las 'dzin pa ni so sor sdud pa'o/ /de las bsam gtan te/ de yang rtog pa dngos po nges par rtog pa dang / dpyod pa bzhin du dbang po rnams stong pa nyid dang ro gcig pas rang gi yul las 'dzin pa ni/ dngos po stong pa nyid kyi rang bzhin nyid du rnam par dpyod pa dang / de ltar dpyad pa las de kho na nyid la 'jug pa la mngon du phyogs pas gang yin pa bde ba nyid de dga' ba dang de las lus shin tu sbyangs pa la sogs pa bde ba chen po dang de ltar goms pa las chos thams cad stong pa nyid du gcig pa mthar thug pa'i shes rab kyi bdag nyid sems rtse gcig pa nyid ces pa rnam pa lnga'o//de nas rkyang ma dang ro ma dag 'gags pa'i kun 'dar ma'i lam kho nar 'jug pa dang gnas pa dang 'byung ba'i bdag nyid can gyi srog gi rlung 'jug pa ni srog sdom pa'o//de nas kun 'dar ma las phyir ma byung bar byang chub kyi thig le la sems kyi bzhon pa srog rlung 'jug pa stong pa nyid dang ro gcig pa ni 'dzin pa ste/ de'i tshe yang gtum mo las nges par byung ba cher 'bar zhing ri bong can yang des cher gdungs pas shin tu ches 'dzag go//de'i tshe rdo rje nor bu'i nang du chud pa'i ma nyams pa'i byang chub kyi sems rim gyis rgyu mthun pa la sogs pa'i bde bas rdzogs pa dri ma med pa nyid ji srid par 'gyur ro/ /de nas 'dzin pa las sems rab tu zhugs pa na mtshan ma so sor snang ba sngon ma can rdzogs pa'i dkyil 'khor gyi lha mthong ba gzugs brnyan gyi rnam pa can rnam par rtog pa med pa de las 'od zer du ma 'phro zhing /de las khams gsum pa spro ba zhes pa dran pa'o/ /de nas de kho na rnam par mi rtog pa'i rnal 'byor 'gyur ba'i bde ba chen po'i rang bzhin zung 'jug gi bdag nyid ye shes kyi sku rdo rje 'dzin pa chen po'i rang bzhin ni ting nge 'dzin no zhes pa'o//de ltar rnal 'byor pa gang gi tshe spros pa med pa'i shes rab dang thabs kyi bdag nyid yin pa de'i tshe bsod nams thams cad kyi rang bzhin dang ye shes thams cad kyi rang bzhin dkyil 'khor gyi lha mtha' dag gi bdag nyid dang pha rol tu phyin pa mtha' dag gi rang bzhin du mgon po rnams kyis rnam par gzhag go//de gsungs pa/ 'di de rnal 'byor dam pa ste/ /kun du rtog pa thams cad spangs/ /gang la rnal 'byor pa gnas pa//kun mkhyen bcom ldan dngos su 'gyur/ /'di de de nyid dam pa ste/ /shes rab thabs kyi rang bzhin zhi/ /'di nyid gnyis med ye shes te/ /'di ni byang chub sems mchog go/ /zhes so/ /'phags pa klu sgrub zhabs kyis kyang gsungs pa/ mi gang skad cig gcig tsam yang //byang chub sems ni rab bsgom pa/ /de yi bsod nams phung po ni/ /'di tsam zhes pa bgrang mi nus/ /nyon mongs med pa'i rin chen sems/ /'di ni nor mchog gcig pur brjod/ /nyon mongs bdud sogs chom rkun gyi/ /gzhom du med cing dbrog tu med//ces so/ /'di thams cad la dgongs te gsungs pa/ 'di dag sems kyi dag pa nyid/ /ces pa ste/ 'di rnams ni 'di'o/ /de nyid kyi phyir bde ba chen po'i ngo bo rdo rje 'dzin pa'i sa ni 'di kho na sgrub par byed pa'i phyir pha rol tu phyin pa'i tshul las 'di khyad par ro//'o na 'di ni gnyis su med pa'i ye shes kyi ngo bo kho na ste/ de 'di'i khyad par ci yin zhe na/ khyad par yod de de'i ngo bo nyid du bsgrub pa kho na'o/ /ji ltar dngos por na stong pa nyid dang ro gcig pa'i stobs dang mi 'jigs pa la sogs pa rnams nyan thos kyi tshul la rtogs pa rnams kyang stong pa nyid du ma bsgrubs pa'i phyir dang /pha rol tu phyin pa'i tshul la sgrub pa'i phyir khyad par chen po sgrogs pa bzhin no/ /'o na bsam gtan dang po thob pa rnams kyang 'khor los sgyur ba rnams bzhin du bde ba nye bar ston na/ bdag med pa gnyi ga rtogs pas ci bya/ da ltar ni dga' ba lhag pa kho na las dang pos ni rab tu dga' bar brjod do zhe na bden te/ 'di lhan cig skyes pa'i bde ba ni ma yin zhing / de nyid kyi phyir bde ba chen po ma yin la/ las dang po pa'i gnas skabs su thabs su gyur pa yang ma yin te/ khab kyi bug pa ni bu ga zhes pa nam mkha' dang mnyam pa nyams su myong ba ma yin pas so//'o na shes rab kyi pha rol tu phyin par gang bla na med pa yang dag par rdzogs pa'i byang chub kyi bde ba'o zhes gsungs pa ma yin nam zhe na/ 'di ni gsungs mod/ 'di'i thabs bstan pa ni ma yin te/ thabs su gyur pa lhan cig skyes pa'i bde ba chen po nye bar ma bstan pa'i phyir ro//de nyid kyi phyir de yang rim pa 'di kho nas go bar bya'o/ /de ci pha rol tu phyin pa'i tshul la byang chub med dam zhe na/ de lta ma yin te/ shes rab kyi pha rol tu phyin par bla na med pa yang dag par rdzogs pa'i byang chub kyi dri yang ci las yin/mthar thug bzhi yang nges par thabs 'di la ltos so zhes brjod par bya'o zhes pa shin tu rgya che bas chog ste/ man ngag rig pa rnams kho nas khyad par 'di yongs su gsal bar shes par 'gyur ro/ /bde ba chen po sgrub par byed pa nyid kyis na gtso bor yul reg bya dang de'i dbang po dang de'i rnam par shes pa snying rje la sogs pa'i ngo bo dang shes rab lnga'i ngo bor yang sgrub pa'i ched du gsungs pa/de nas zhes pa la sogs pa'o/ /phyi rol gyi shes rab ma'i lus yul dang / de dang sbyor ba las nang gi lus dang ye shes dag sbyor ba'i phyir ro//gang 'gyur ba de ni 'chad par 'gyur ro/ /lta dang ldan pa zhes pa bud med mchog mthong ba ni snying rje ste/ sdug bsngal dang bral ba'o/ /'khyud pa byams pa ste bde ba dang ldan pa'o/ /dbang po gnyis drud pa las dga' ba ste bde ba dang mi 'bral ba'o/ /byang chub sems 'gyur ba las btang snyoms te rnam par rtog pa thams cad dang bral ba'o//de bzhin du ni nang gi lus dang shes pa dag snying rje la sogs pa'i ngo bo dag go/ /de ltar gyur pa'i rnal 'byor ldan/ /zhes pa'i snying rje la sogs pa'i ngo bo'i phyag rgya chen po dang ldan pa 'dod chags la sogs pa rnams kyis 'ching ba ma yin no//phyag rgya chen po'i rnal 'byor med na 'gro ba 'ching ngo zhes gsungs pa/ mthong ba las zhes pa la sogs pa'o/ /cung zad lhag pa ni de'i 'bras bu'o/ /kun gyi mtha' ste 'gyur ba las so/ /de ltar dga' ba dang skyo ba 'bras bur gsungs so//khams gsum pa skyes pa ni stong pa nyid kyi snying rje la sogs pa rnams kyang grol ba'i rgyu'o zhes pa dgongs pa'o/ /nye bar sdud pa ste/ yang dag dag pa zhes pa la sogs pa'o/ /dngos po gsum zhes pa yul dang dbang po dang rnam par shes pa rnams kyis so//de ltar goms pa lhur len pas/ /ji ltar tshogs pa'i bza' ba 'dus/ /zhes bya ba gsungs pa/ gang zhes pa la sogs pa bshang ba dang gci ba la sogs pa bdud rtsi dang sgron ma lnga la rang bzhin gyi bdud rtsir brtag go/ /'ba' zhig tu ma zad kyi de'i dga' rtsed la sogs pa yang ngo //phyag rgya chen po yang phyag rgya chen po'i ngo bor blta bar bya ste/ 'di 'dra'i sgom dang ldan pa ni 'grub bo/ /ji ltar zhes gsungs pa/ lnga zhes sring mo la sogs pa rnal 'byor ma rnams so/ /dpal dang phyag rgya che ster byed/ /ces pa rang dang gzhan gyi don phun sum tshogs pa'i mtshan nyid ni dpal te phyag rgya chen po kho na de ster te/mchod pa rnams la'o/ /de'i phyir gsungs pa/ mchod par bya zhes so/ /ji ltar zhe na gsungs pa 'dod par bya'o/ /'o na 'di rnams mchod pa mchog ni 'dod pa byed pa kho na ste/ de yang skyon yin no zhe na skyon min te gang gi phyir mi gos pas so//'o na 'dod pa byed pa kho na gos pa'o zhe na ma yin te/ gang gi phyir phrag dog la sogs pa rnams dang ldan pa ni gos par brjod na/ rnal 'byor pa de la phrag dog la sogs pa'i nyes pa de rnams kyis 'di la gnod pa ma yin no/ /'o na ji ltar 'di 'dra ba'i mchod pa ni ches mchog tu gyur pa dang /rjes su 'brel pa can yin/ sgro btags pa'i khyad par yin pa'i phyir ro zhe na/ sgro btags pa rnam pa gnyis te/ de kho na nyid kyi ngo bo dang de kho na nyid ma yin pa'i ngo bo'o/ /de la de kho na nyid kyi ngo bo'i bdag nyid kyi sgro btags pa ni ma la sogs par sgro btags pa bzhin du brgyud nas byang chub sgrub par byed pa'i phyir nyes pa med do//'o na 'ga' zhig gi nyams su myong ba yang bkag pa nyid kyi phyir 'gal bar 'gyur ro zhe na ma yin te/ las ni rnam pa gnyis te/ kun nas bslang bar bya ba dang / kun nas slong ba po'i dbye bas so/ / de la lus dang ngag gi las thams cad kun nas bslang bar bya ba ste/ yid kyis ni kun nas slong ba po'o/ /de yang rnam pa gnyis te/ ma chags pa la sogs pa'i ngo bo dang / de las cig shos so/ /de la chags pa la sogs pas kun nas bslang ba'i lus dang ngag gi las thams cad mi dge ba ste de yang bkag pa'o//ma chags pa la sogs pas kun nas bslang ba thams cad ni dge ba kho na'o/ /phyag rgya chen po gnyis su med pa'i rnal 'byor dang ldan pa'i rnal 'byor pa ni mtha' dag ma chags pa la sogs pa'i bdag nyid 'gro ba la snang bar byed do//des na 'di spyod lam thams cad dang ldan yang mi dge ba mi dmigs pa'i ngo bo nyid kyi phyir dge ba'i bdag nyid kho na'o zhes gsungs pa/ rnal 'byor pa de zhes pa la sogs pa'o/ /de kho na nyid ni phyag rgya chen po'i rang bzhin no/ /de'i phyir 'khor ba'i nyes pa rnams kyis mi gos so//de'i phyir shes rab dang thabs kyi rang bzhin gnyis su med pa'i byang chub kyi sems bsgom pa kho na sdig pa thams cad rnam par sbyong ba legs pa thams cad byed pa'o/ /de 'phags pa klu sgrub zhabs kyis gsungs pa/ 'di ni theg pa che mchog ste/ /'di ni byang chub sems mchog go//mnyam par gzhag rnams 'bad pa yis/ /byang chub sems ni bskyed par gyis/ /'khor ba rang gzhan don sgrub la/ /byang chub sems las ma gtogs pa'i/ /thabs gzhan sangs rgyas rnams kyis ni/ /sngon chad gzigs pa nam yang med/ /ces so//'di de rnal 'byor mchog de'i phyir/ /de bzhin gshegs rnams kyis phyag 'os/ /de las byung ba'i rnal 'byor ni/ /mtha' yas pa rnams rab tu bsgrags/ /de kho na las ting nge 'dzin/ /mtha' yas pa las yang dag 'byung / /phyag rgya dkyil 'khor sngags rnams ni//rnal 'byor de las rnam dag nyid/ /zhi ba rgyas pa nyid kyi las/ /sngags las skyes pa gzhan gang yang / /dza hu'i bu mo'i bye ma'i grangs/ /ji snyed dngos grub phra rnams dang / /phyag rgya'i dngos grub gzhan nyid rnams/ /ji snyed sa la rnam grangs pa/ /rnal 'byor 'di las skyes pa ru//thugs kyi rdo rjes gsungs pa yin/ /gang yang nges 'byed cha mthun pa/ /rnam pa bzhi dang sa bcu dang / /'bras bu la gnas de thams cad/ /rnal 'byor 'di las yang dag skyes/ /byung dang gang yang 'byung 'gyur ba/ /'byung bzhin pa yi rgyal ba'i sras/ / 'jig rten dbang sogs sems dpa' che/ /de rnams kyang 'di kho nar gnas/ /'das dang ma byon sangs rgyas dang / /da ltar byung bar 'dod gang dang / /bse ru nyan thos dge 'dun te/ /de rnams kyang ni 'di las byung / /rnal 'byor spyod dang bya ba yis/ /dbye bas ji snyed sprul pa 'byung //de snyed thams cad rnal 'byor ni/ /'di kho na las nges par 'byung / /kun du brtags pa'i ngo bo ni/ /bag chags stobs las byung rnams dang / /ji srid brten dang g.yo ba'i dngos/ /de snyed de la brten pa'o/ /zhes so/ /'dod pa lnga rnams med na stong pa nyid ni ro bro ba med pa kho nar 'gyur ro zhes gsungs pa/ji srid ces pa la sogs pa de/ ji srid du yul gyi bcud rnams kyis byang chub kyi myu gu skyong bar mi byed pa de srid du/ sangs rgyas kyi dpag bsam gyi shing 'byung bar mi 'gyur te/ chu bran pa dang bral ba'i myu gu las shing phun sum tshogs pa bzhin no//de sa ra ha'i zhabs kyis gsungs pa/ sems kyi myu gu shin tu chung ba ni/ /lus bcud dag pas gal te mi bran na/ /nam mkha' khyab pa'i 'bras bu sbyin pa yis/ /dpag bsam shing nyid ji ltar thob par 'gyur/ /zhes so/ /'jigs pa med pa'i gzhung 'grel du le'u bcu gsum pa'o// //mngon par 'dod pa'i bla na med pa'i don bstan pas rab tu dang ba phul du byung ba skyes pas ji ltar stong pa de ston pa'i ched du gsungs pa/ de nas zhes pa la sogs pa'o/ /bde ba chen pos rnam par brtse ba'i phyir lha mo'o/ /skyed byed ma ni lam gyi ngo bo'o//dpal mo ni rtogs pa dang / spangs pa phun sum tshogs pa 'bras bu'i ngo bo'o/ /rigs med pa rnams cher skrag pa'i gnas nyid kyi phyir 'jigs pa'o/ /grags chen ma ni rnam par thos pa'i grags can no/ /byams pa'i rang bzhin nyid kyi phyir mnyes gshin ma'o/ / dkyil 'khor gyi 'khor lo la sogs pa mtha' yas pa'i rdzu 'phrul gyis rnam par 'phrul pa'i phyir lha mo'o/ /snying rje chen po dang shes rab chen po dag las tha mi dad pa nyid kyi phyir phyag rgya chen po ste 'di dag gis rang don phun sum tshogs pa'o/ /don chen 'bras bu ston mdzad ma/ /don chen ni rdo rje 'dzin pa nyid do//de kho na lam goms pa'i 'bras bu dam pa ste/ de gdul bya rnams la ston no zhes pa gzhan don phun sum tshogs pas bstod par byed do/ /ston pa'i yul gyi sgo nas bstod de/ sangs rgyas zhes pa la sogs pa'o/ /sangs rgyas rnams kyis ni rnam par snang mdzad la sogs pa rnams kyis so//gang rnams kyis zhes pa dngos grub gang zhig byang chub sems dpa' rnams kyi yang spyod yul ma yin pa'o/ /lha mo zhes pa lha mos so/ /gsung gcig gis zhes pa thog mar go dka' ba brjod nas tshig gzhan gyis gsal bar byas pa ni ma yin pa'o/ / chen po'i snod ni chen po 'jig rten pa dang / 'jig rten las 'das pa'i dngos grub rnams kyi snod do/ /kun zhes pa rnal 'byor ma nyi shu rtsa bzhi'i ngo bo'o/ /gang rnams ni gang dngos grub de'o/ /gsungs pa ni sna tshogs sde mas so/ /'di ni zhes pa 'di'i'o/ /sangs rgyas yon tan rnams ni stobs dang /mi 'jigs pa la sogs pa rnams te/ de rnams kyang bdag la bzod mdzod cig ste/ gang gi phyir de rnams kyi rgyu dang 'bras bu'i bdag nyid ni rgyal ba mchog rnams kyi gdul bya rnams la sbas pa'o/ /shin tu rnyed dka'i don shin tu sbas pa'i spyod yul can gyi rgyud 'dir bdag gis gsal bar byas pa'o//de'i phyir bdag gi sgo nas de rnams kho nas 'di bstan pa'o zhes dgongs pa'o/ /bdag la yang phyin ci log tu bstan pa'i gnod pa sgro btags pa las mi bzod pa bya ba min zhes gsungs pa/ rgyal ba mchog rnams bzod mdzod cig /ces rnam dbye ba sgyur ba'o//rgyud thams cad gsungs nas/ dbang bskur rnams kho na 'di la dbang du bya'o zhes bstan pa'i ched du dbang bskur gsungs pa/ de nas zhes pa la sogs pa'o/ /gsol ba gdab ste gsang ba dang shes rab ye shes kyi dbang bskur gyi don du'o/ /lha mo chen mo la'o/ / bcad ces pa khyod kyis so/ /g.yogs zhes klog pa la ni khyab par byed pa ste bdag la'o/ /de'i zhes pa mo de'i'o/ /cis 'di ltar shes rab ma mgu bar bya ba la 'bad ce na gsungs pa/ sangs rgyas thams cad kyis ni mchod/ /rgyu dang 'bras bu'i gnas skabs dag tu las kyi phyag rgya'i rnal 'byor kho nas phyag rgya chen po'i dngos grub bo zhes pa man ngag go//ji ltar na 'di ltar yin zhes gsungs pa/ 'di kho na la ste shes rab ma la sangs rgyas la sogs pa rnams bzhugs te/ de rnams bde ba chen po'i rang bzhin rnams yin zhing / de'i rten yang shes rab ma ste/ de las cho ga ji lta bar shes rab ye shes kyi dbang bskur blang bar bya'o/ /de nyid kyi phyir shes rab ye shes kyi rang gi ngo bo gsal bar byed de/ dbang po zhes pa la sogs pa dbang pos nye bar mtshon pa las yul la sogs pa yang ngo / /bdag ces pa bdag gi sems te/ sems ni bdag ces brtags pa'o zhes pa'i gsung las so//yang na bdag tu gdags pa'i yul nye bar len pa'i phung po lnga rnams bdag 'di thams cad rang bzhin med pa ste/ gang du nye bar mi dmigs pa de mchog tu dga' ba rtogs pa'o/ /mchog dga' ni 'dir lhan cig skyes pa'i dga' ba kho na dang ming gzhan shes rab ye shes te/dbang po la sogs par sgro btags pa dang bral ba'i phyir ro/ /de brtag pa gnyis pa'i rgyud du gsungs pa/ mchog tu dga' ba thob na ni/ /sna tshogs spangs pa'i skad cig la/ /zhes so/ /'char ba'i rim pa kho nas 'di'i yang dag 'thob rtogs par bya'o//de'ang le'u dang por dpyad zin to/ /mchog tu dga' ba kho na la rgyu nyid kyis phyag 'tshal te/ de la zhes pa la sogs pa'o/ /gang zhig shar bas ni lhan cig skyes pa gang shar bas so/ /'bras bu nyid kyis phyag 'tshal te/ /gang yang goms pa las nges par 'byed pa'i cha la phan pa la sogs pa rtogs pa'i rim gyis mngon dga' ste/kun nas mngon par shes pa dang / stobs dang mi 'jigs pa la sogs pa phul du byung ba'i yon tan rin chen rnams yang dag par 'byor pa ni/ rgyal ba rnams kyis nyon mongs pa'i rnyog pa ma lus pa dang bral ba'i phyir mdzes pa/kun du bzang po mchog tu dgyes par gnas pa'i sku ste sku bzhi pa rdo rje 'chang mkhas pa yang dag par rdzogs pa'i sangs rgyas rnams kyi thugs la/ de'i bdag nyid du rnam par rtog pa'i g.yeng ba ma lus pa spangs pa'i phyir sbas te/ tshig dang blo'i spyod yul ci yang ma yin pa'o//de nyid kyi phyir 'di rtogs nas/ sna tshogs sde ma la sogs pa rnams mi smra bar gyur nas gnas par 'chad par 'gyur ro/ /gcig pu ni gnyis su med pa'i mchog tu dga' ba ste/ sgrib pa thams cad kyi bag chags lhag ma'i gnyid dang bral ba'i phyir sad pa ste/ de la phyag 'tshal lo//de nas tshigs su bcad pa 'dis shes rab ye shes de nyid khyad par ba'i ngo bor chu'i rlabs kyi ngo bo bzhin du byung ba ni dbang bzhi pa zhes gsungs so/ /de 'di bde ba chen po'i rang bzhin rdo rje 'dzin pa ni rgyud thams cad kyi gleng gzhi'o zhes pa'o/ /'jigs pa med pa'i gzhung 'grel du le'u bcu bzhi pa rdzogs so// //he ru ka dpal dpa' bo'i lam ni rnam par bkral las dge ba cher byung bas/ /'khor ba'i 'khrul mang bcad nas 'gro 'di de yi dkyil 'khor du ni 'du bar shog /bdag ni thub pa 'di yi mtha' yas sku ni yun ring rnam par 'dzin byed cing //srog chags so so la gzhol che ba'i bde ba spros pa 'jigs pa 'dzin gyur cig /rnam gnon tshul gyis mkhas pa ni/ /'jigs pa med pas gnad reg tshig /dga' ba skyong gi rgyal srid lo/ /nyi shu lnga la 'di byas so/ /srid gsum rnam rgyal phun tshogs sa gzhi ma nyams sku can gyis//'gro la chung min phan bya'i ched du bsags pa yi/ /ma ga d+hA bdag sras po dpal ldan gnod sbyin skyong gi mthu/ /brtan pa yongs 'gyur ched du des don gnyer las 'di gzhung byas/ /dga' ba'i bde sbyin gnyis med dam pa'i bcud kyi rol pas 'phrul pa'i sa gzhi rdo rje btsun mo ni//rtsen pa shes rab dpal 'dis thub pa'i tshogs kyis bkod pa bsgrigs pa'i them skas phreng ba gang gi gnas/ /ma byas byas don don gnyer yang dag rtog pa'i stobs can du ni rgyal mdzad gyur cig de yi yang / /kho bos bkral bas mnyam med dge ba bdud rtsis gang ba don du gnyer bya'i tshim pa 'byung gyur cig /tshigs bcad brgya phrag bcu drug ni/ /rkang bcas 'di ni sdom pa'i tshad/ /mkhas pa rnams kyi rgyan ched 'di'i/ /tshad bzhin snying la dngos po nyid/ /ces pa dpal sangs rgyas thod pa'i rgyud chen po'i 'grel pa mi 'jigs pa'i gzhung 'grel gnas brtan mkhas pa a b+ha ya ka ra gu p+tas mdzad pa rdzogs so// //'di ni sngon lo tsA ba mkhas pa zhig gis bsgyur ba la/ bar skabs su dpe stor bas ma tshang ba las/ dpang lo tsA ba dge slong blo gros brtan pas spyi bo lhas pa mkhan po 'jam dpal ser po'i gsung gis bskul te/le'u dang por bcom ldan 'das kyi phyag rgya chen po rdo rje zhes pa nas/ 'og gi lam nas byung zhes pa'i bar dang / lha'i sku bsgom pa kho na gsungs te/ gang gsungs pa zhes pa nas brtan pa sa gzhi la sogs pa rnams dang g.yo ba zhes pa'i bar dang / le'u gsum pa'i mjug he ru ka'i gzugs su bsgom pa rdzogs pas zhes pa nas le'u bzhi pa'i tha ma la ni 'dir ma rig pa ste des zhes pa'i bar dang /le'u bcu gsum pa'i dbu'i de kho na nyid ni thams cad la zhes pa nas le'u bcu bzhi pa'i mjug na gang zhig shar bas ni zhes pa'i bar dang / srid gsum rnam rgyal zhes pa la sogs pa'i tshigs bcad gnyis rnams hor kong bsabs shing lhag ma rnams la zhu chen bgyis nas bsgyur cing gtan la phab pa'o/