CLOSE WINDOW

D1633
བོད་ཡིག

/ @##/ /rgya gar skad du/ tata twa u pa de sha br-it+ti/ bod skad du/ de kho na nyid kyi man ngag gi 'grel pa/ 'jam dpal ye shes sems dpa' la phyag 'tshal lo/ /gang du snying gi pad+ma kha sbyar dbus gnas gsal//phra bar blta ba rang byung myong ba'i sems 'jug pa/ /khams gsum ma lus gnyis med par ni nyer 'gro ba/ /gsal ba chos kyi dbyings mchog de la bdag phyag 'tshal/ /zhes pa la/ gang du zhes bya ba ni chos kyi dbyings zhes bya ba dang sbyar te/ 'di ni gnas bzhi ste bdun pa yin la/gang dad de gnyis ni rtag tu 'brel pa yin pa'i phyir de la phyag 'tshal ba yin no/ /de la chos zhes bya ba ni de bzhin nyid de yang dag pa'i mtha'/ /de 'dzin par chos kyi dbyings te/ d+hA tu ni bstun zhes bya ba dbye ba'i tshig gis ni gang du chos kyi dbyings yin pa de ni khams gsum pa nye bar 'gro zhing song ba yin pas de la phyag 'tshal ba'o//gang du zhe na/ snying gi pad+ma kha sbyar dbus gnas zhes bya ba smos te/ snying gi ni snying po/ pad+ma ni chu skyes te/ 'dab ma bzhi pa kha dog dmar po 'byung ba chen po bzhi'i rang bzhin no/ /de la/ lte ba'i dbus gnas kha sbyar gsal/zhes bya ba zla ba dang nyi ma gnyis las yongs su grub pa ste/ 'di gnyis ka yang 'byung ba chen po bzhi'i ngo bo nyid do/ /de la zla ba ni sa dang chu'i rang bzhin no/ /nyi ma ni me dang rlung gi rang bzhin te/ kha sbyar de'i dbus su gnas pa'i ngang tshul 'di la yod pas na kha sbyar gyi dbus na gnas pa'o//de la 'di'i don ni 'di yin te/ yon tan brgyad kyi phreng ba'i rnal 'byor ma'i ngo bo nyid kyi dbus na bzhugs pa de ni bcom ldan 'das chos kyi dbyings te/ de bzhin nyid dang yang dag pa'i mthar thug pa'o/ /gsal byed ces bya ba ni 'bar ba ste/gnyis su med pa'i ngo bo nyid kyis snang bar byed pa'o/ /ji lta zhe na phra bar blta ba zhes bya ba smos te/ phra ba ni bcom ldan 'das yin la/ de ni phra ba rnams las kyang phra rab tu gyur pa rdo rje nam mkha'i khams dang mnyam du 'jug pa'o/ /de la myong ba ni nye bar 'gro ba'o//der blta ba ni rnam par blta ba ste/ pad+ma'i rtsa ba'i snal ma shin tu phra ba'i bu ga la mi yeng bar blta ba'o/ /yang na phra ba yang yin la blta ba yang de nyid yin pas na phra bar blta ba zhes bya bar sbyar ro/ /de'i rang byung ba ni rgyun gyis 'bab pas rab tu 'jug pa'o/ /de la myong ba ring po ma yin pas bar ma chod par nye bar 'gro ba'o//sems kyis 'jug pa ni sems las byung ba ni 'jug pa gang yin pa ste/ rgyu de'i phyir ro/ /de yang gang zhe na/ khams gsum zhes bya ba la sogs pa smos te/ khams gsum ni 'dod khams dang / gzugs khams dang / gzugs med pa ste/de rnams gcig tu bsdus pa ni khams gsum mo/ /bsdus pa'i don gyis khams gsum pa ste/ khams gsum gyi ngo bo nyid ni khams gsum pa'o/ /ma lus pa zhes bya ba ni lhag ma med pa'o/ /gnyis su med par nye bar 'gro ba zhes bya ba ni song ba ste/ bsdus pa'i tshul gyis so sor snang zhing 'di dag thams cad nam mkha'i gzugs su yongs su dag par gyur pa'o zhes bya ba'i don to//ji skad du/ der 'gro yid kyi gong bu ltar/ /gzugs gcig tu ni sgom par byed/ /ces bshad pa dang / gzhan yang 'gro ba rnams kyi de nyid gcig pu nyid ces bshad pas so//ji ltar na gnyis su med par 'gro ba yin zhe na/ cung zad tsam yang mi gsal ba ma yin gyi/ rnyog ma med pa la gsal bar gyur pa yin te/ de lta bur gyur pa'i bcom ldan 'das chos kyi dbyings kyi ye shes de la phyag 'tshal lo zhes bya bar sbyar ro/ /chos kyi dbyings kyi ye shes de la phyag 'tshal nas/ci zhig bya zhe na/ dbang po g.yo ba'i rta kun nang du nges sbyar ba'i/ /ye shes rgyal ba ma lus 'dus pa'i snod gyur pa/ /khams gsum skye ba'i rgyu nyid du ni nyer 'gro ba/ /mthong ba mkha' dang 'dra ba dri med dpal du 'gyur/ /zhes smos te/ 'phel ba dang 'grib pa bshad par bya ste/ye shes ni yang dag pa'i mtha'o/ /mthong ba ni so sor rtog par byed pa ste/ de lta bu'i rnal 'byor 'di dri ma med pa'i dpal du 'gyur ro zhes bya ba dang sbyar ro/ /de lta na ni bzlog par dka' ba'i dbang po 'di dag ni rta lta bu yin na rnal 'byor pa 'di ji ltar nam mkha' dang 'dra bar 'gyur zhe na/dbang po zhes bya ba smos te/ dbang po'i tshogs drug po ni g.yo zhing mi srun la/ rang gi yul rnams la 'phyar zhing brkam pas rta dang 'dra ba'i phyir na rta ste/ de lta bu'i rnam par g.yeng bar byed pa thams cad nang du sems kyis yang dag par bsdu ba la nges par sbyar zhing /g.yo ba ma lus pa nges par brtags pa'o/ /de ltar ma lus pa'i mthar thug pa thob pa'i rnal 'byor pa ni phyi nas dri ma med par 'gyur ro/ /ye shes de yang ji lta bu zhe na/ ye shes rgyal ba ma lus zhes bya ba la sogs pa smos te/ rgyal ba ni sdig pa thams cad las rgyal ba'i phyir/sangs rgyas bcom ldan 'das la bya'o/ /ma lus zhes bya ba ni phyis 'byung ba de dang mtshams sbyar ba'o/ /de rnams kyis 'dus pa ni yang dag par 'du bar mdzad pa ste/ de lta bu'i snod dang gnas su gyur pa yin no/ /'di skad du ston par 'gyur te/ de bzhin gshegs pa de dag thams cad ni ye shes las skyes pa yin la/rgyal ba mchog gcig pu de las 'khrungs par ma zad kyi/ /khams gsum po de yang de las skyes pa yin te/ khams gsum skyed pa'i rgyur gyur pa ni khams gsum ma lus pa ye shes kyi rnam pa can no zhes bya ba'i don to/ /de lta bur gyur pa'i phra ba'i rdo rje mthong bar gyur pa'i bsgom pa ni nam mkha' dang 'dra bar gyur pa yin te/nam mkha' ni go 'byed pa yin te/ de dang 'dra ba'i dri ma med pa'i ye shes dpal gyis mdzes pa gang la yod pa de la de skad ces bya'o/ /de la rnam par rtog pa'i gdon gyis zin pas 'gro ba rnams la gnyis su snang ba yin te/ji skad du/ rnam rtog gti mug chen po ste/ /'khor ba'i rgya mtshor ltung byed yin/ /mi rtog ting 'dzin la gnas na/ /mkha' bzhin dri ma med par 'gyur/ /zhes bshad pa'i phyir ro/ /'o na bcom ldan 'das 'di ji ltar bsgom par bya ste/sangs rgyas rjes dran sbyor ba yis/ /chos ni rjes su dran pa bsgom/ /chos rjes dran pa'i sbyor ba yis/ /chos kyi skur ni rang nyid 'gyur/ /zhes smos te 'dir sangs rgyas zhes bya ba ni gzung ba dang 'dzin pa'i rtog pa rtsa ba nas bton pa la bya bar bshad la/rdo rje rnal 'byor ma bzhi ni gzugs la sogs pa'i rang bzhin te/ 'di rnams kyi dbus na bcom ldan 'das chos kyi dbyings de dang lhan cig yang dag par sbyar bar bya'o/ /sbyor ba des ci zhig bya zhe na/ chos ni zhes bya ba la sogs pa smos te/ chos ni zhes bya ba ni kha sbyor gyi nang na bzhugs pa'i bcom ldan 'das yin la/de yang snga ma bzhin du bsgoms pas phyis chos kyi dbyings su yang dag par skye zhing / nam mkha' snang bar nye bar 'gro ste/ rnal 'byor pa rang nyid chos kyi skur 'gyur ro/ /de'i don ni 'di skad ston par 'gyur ba de yin te/pad+ma'i steng du thig le bzhi las lha mo bzhir bskyed la/ lte ba'i thig le las bcom ldan 'das bskyed pa ni rang gi bdag por bya ste/ de'i thugs ka'i pad+ma kha sbyar gyi dbus na ni chos kyi dbyings so/ /ji lta zhe na/ gang gi tshe rnal 'byor pa 'gro ba dang 'ong ba dang gnas pa'i rim gyis dal bu dal bus skad cig re re la slob par byed pas de'i tshe zhi ba nyid la rab tu 'jug par 'gyur ro//zhi bar gyur nas ni rtsa dbugs gnyis 'gag par 'gyur ro/ /de gnyis 'gags nas kyang dngos po med pa'i gnas su 'gyur ro/ /ji skad du/ 'gro dang 'od dang gnas pa nyid/ /dal gyis dal ba'i rim gyis ni/ /de nas dngos po med 'gyur te/ /zhi ba gcig pu mngon phyogs nas/ /zhes bshad pa ni man ngag go/ /ye shes de bsgoms pa las khyad par ci zhig skye zhe na/ dbus na gsal byed rnam par shes/ / ye shes mchog ni shes rnams kyis/ /shin tu bsgoms pa goms pa las/ /'bar ba 'di la the tshom med/ /ces bya ba la/ dbus kyis gsal bar byed pa ni/ /dbus na gsal bar byed pa'o/ /gsal bar byed pa yin pas na gsal bar byed pa'o/ /nye bar snang bar byed pa'i ye shes te/ dbus na gsal bar byed pa dang rnam par shes pa zhes bya bar sbyar ro/ /rnam par shes pa zhes bya ba ni sems la bya ste/ ji skad du sems dang yid dang rnam par shes pa zhes bya bar rnam grangs su bshad pa'i phyir ro/ /de'i dbus su gsal bar byed pa'i ye shes ni snying ga'i pad+ma kha sbyar gyi nang du chud pa'i mi g.yo bas lta bar byed pa'i ye shes te chos kyi dbyings su gyur pa'o//de gang zhig ce na/ mchog gi ye shes rnams kyi zhes bya ba smos te/ de kho na nyid mthong ba rnams kyi'o/ /gyi na tsam gyis 'byung bar 'gyur ram zhe na/ shin tu zhes bya ba la sogs pa smos te/ shin tu yang rgyun mi 'chad par sbyor bas sgom zhe na/ sems pas rgyun mi chad par goms shing bslab pa'i tshul gyis rnam par lta ba'i rgyu de na 'bar bar 'gyur zhing 'di na ste/ snying la gsal zhing snang bar 'gyur bar the tshom med do/ /'di'i don ni 'di yin te/ ting nge 'dzin gyi gnas skabs la gnas pa'i rnal 'byor pa rnams la ni skad cig tsam gyis ye shes kyi snang ba 'byung bar 'gyur te/ji skad du/ srog dang rtsol ba bsdams nas ni/ /bsgoms na skad cig de la 'bar/ /zhes bshad pas na som nyi mi bya'o/ /don 'di nyid gsal bar bya ba'i phyir/ snying la rtag tu gnas pa yis/ /thig le gcig pu yi ge med/ /skyes bus de ni bsgoms gyur na/ /ye shes skye bar 'gyur ba'i mchog /ces bya ba la snying la zhes bya ba ni pad+ma kha sbyar la bya ba ste/ der thig le zhes bya ba la/ rdo rje phra mo'i ngo bo nyid gnas shing dus thams cad du 'dug pa'o//ci 'di dngos po yin nam/ /'on te ma yin zhe na/ yi ge med ces bya ba smos te/ dngos po med pa'i ngo bo nyid kun gzhi rnam par shes pa'i rang bzhin khyad par snang ba'o/ /de lta bu'i ngo bo nyid kyi sgom pa las ni ye shes skye bar 'gyur ro/ /ci nyan thos la sogs pa dang 'dra'am/ 'on te ma yin zhe na/ mchog ces bya ba smos te/ de bzhin gshegs pa rnams kyi ye shes rnam par mi rtog pa'o/ /de ltar phyag 'tshal ba sngon du 'gro ba'i tshigs su bcad pa lngas de kho na nyid kyi man ngag bshad nas/ de ni phyi rol gyi mchod pa g.yeng ba dgag par bya ba'i phyir//rdo rje mkha' 'gro thugs rje can/ /'di nyid du ni gnas mdzad cing / /rdzogs sangs rgyas kun byang chub sems/ /'gro ba gsum po 'di la gnas/ /zhes bya ba smos te/ snying ga'i pad+ma kha sbyar ba'i dbus 'di nyid du bcom ldan 'das yum rdo rje mkha' 'gro ma rnam par rtog pa'i dra ba rnam par bsal ba'i thugs rje chen po 'khrigs pa bzhugs te/de rnams ni sems kyi ngo bo nyid yin pa'i phyir ro/ /de ni nam mkha' 'gro ma zhes bya ba'i rdo rje'i tshig gis ye shes lnga'i bdag nyid can du bshad do/ /de gang la yod pa de la de skad ces bya'o/ /rdzogs sangs rgyas kun zhes bya ba ni bcom ldan 'das rnam par snang mdzad la sogs pa'o//byang chub sems dpa' zhes bya ba ni byams pa la sogs pa'o/ /byang chub ces bya ba rnam par mi rtog pa'i ye shes la sems dpa' ste/ dgongs pa gang yin pa de la de skad ces bya'o/ /de skad du/ gzung dang 'dzin pa'i mtshan nyid la//byang chub ces bya 'ga' yang med/ /rtog pa'i shes pa las grol ba'i/ /sems ni byang chub yin zhes bshad/ /ces bshad pa'i phyir/ de dag 'ba' zhig tu ma zad kyi/ 'gro ba gsum po dag kyang gnas pa'o/ /'o na 'di ltar 'gro ba gsum po dag kyang 'di nyid du gnas so zhes bya ba ni tshig 'di ji ltar rig pa yin zhe na/bshad par bya ste/ gang gi phyir khams gsum po 'di dag thams cad ni sems rnam pa yongs su gyur pa yin gyi/ /phyi rol na yod pa ma yin te/ bems po'i bdag nyid can rnams ni snang bar mi rigs pa'i phyir ro zhes bya bar dgongs te/ji skad du/ kye rgyal ba'i sras dag khams gsum po 'di dag ni sems tsam mo zhes gsungs pa'i phyir ro/ /'o na phyi rol la ltos pa med na/ gang gis ji ltar mchod ce na/ 'di nyid mchod pa nyid kyis na/ /mchod 'os thams cad mchod pa yin/ /gang zhig 'di la rtag lta ba//de ni rgyal ba mchod par bzhed/ /ces bya ba smos te/ 'di nyid ces bya ba ni thig le'i rgyal po dngos po med pa de la mchod pas sangs rgyas dang / byang chub sems dpa' thams cad dus thams cad du mchod pa yin no/ /gal te de rnams la mchod pa'i phyir phyi rol gyi mchod pa lnga la ltos na ni/des rnal 'byor pa rnam par g.yeng bar 'gyur ro zhe na/ gang zhig ces bya ba la sogs pa smos te/ bcom ldan 'das phra ba'i rdo rje mgon po 'di la rtag tu lta zhing gnyis su med pa nyid kyis skad cig re re la de nyid mchod pa yin te/ phyi rol gyi mchod pa rnam par g.yeng bar byed pa rnams kyis ci zhig bya//'o na de ltar na ni mchod pa zhes bya ba med de/ des na 'di ni 'gal ba nyid du shes so zhe na/ nang gi sbyor ba'i rdo rje yis/ /rnal 'byor rdo rje can du 'dod/ /de bas rdo rje mchod pa yis/ /yid 'dod rnams kyis lus la mchod/ /ces bya ba smos te/ bdag nyid kyi dbang du byas pa'i rnal 'byor ni nang gi sbyor ba'o//de yang rnal 'byor ni ldan pa ste/ thabs dang shes rab snyoms par 'jug pa'o/ /de skad du/ shes rab thabs kyis snyoms 'jug pa/ /rnal 'byor zhes ni bya bar bshad/ /ces gsungs pa'i phyir de nyid ni mi phyed pa'i phyir rdo rje dang 'dra bas na rdo rje'o//rgyu de'i phyir rnal 'byor pa nyid rdo rje can yin par 'dod ces gsungs pa'o/ /de bas zhes bya ba ni nye bar bsdu ba bshad pa yin te/ rgyu de'i phyir na rdo rje'i mchod pa yis zhes bya ba ni mi phyed pa'i mchod pa'i ting nge 'dzin bsgoms pas yid la rnal 'byor 'dod pa rnams kyis lus mchod par bya'o//de ltar na bcom ldan 'das thams cad bzlog par mdzad pa yin te/ rgyal ba rnams kyis mchod pa 'di dag nyid rgyud las gsungs pa ci'i phyir zhe na/ mchod pa lnga yi sbyor ba yis/ /myur du sangs rgyas nyid thob par/ /gang 'di rgyud las gsungs bdag /de ni phyi rol gzhan du 'dod/ /ces bya ba smos te/ mchod pa ni dbul bar bya ste/ me tog la sogs pa lnga po 'di dag phyi nang gi bdag nyid can rnams yin la/ des myur du sangs rgyas nyid thob par 'gyur ro zhes bya ba 'di nyid yin te/ de ltar yin du zin kyang / gang 'di rgyud rnams las gsungs pa/de ni phyi rol pa nyid yin la/ /phyi'i rtsom pa'i tshogs kyis rnal 'byor pa thams cad rmongs par 'gyur ro/ /de ltar yin du zin na ni mchod pa zhes bya ba med de chad par lta ba dang mtshungs so zhe na/ dngos med gzhi la bkod pa yis//lha yi gzugs su bsgom pa ni/ /mnyam nyid mchod pa chen po ste/ /sangs rgyas thams cad rab bsgrub pa'o/ /zhes bya ba smos te/ dngos po med pa'i gzhi ni gzung ba dang 'dzin pa'i rnam pa dmigs pa med pa zhes bya ba'i gnas te dngos po dang bcas pa'o/ /de med na dngos po med pa ste dmigs pa med pa zhes bya ba'i don to//de la bkod pa ni yang dag par dmigs pa med pa ste/ rgyu des rang gi lhag pa'i lhar ngo bo nyid kyi rjes su byed pa'o/ /de nyid ni mchod pa chen por 'dod de/ de bzhin gshegs pa ma lus pa dang / rdo rje'i rnal 'byor ma rnams mnyes par byed par 'dod pa yin na/rnam par g.yeng bar byed pa'i phyi'i mchod pa rnams kyis ci zhig bya/ gal te gzhung du yang dag par dgod pa'i bdag nyid can gyis dgongs pa dang 'gal bar 'gyur ro zhe na/ bstan pa tsam du legs 'byung ba'i/ /rgyud 'di don dam ma yin te//don dam yang dag skyes pas na/ /ston pa med cing bstan pa med/ /ces bya ba smos te/ bstan pa zhes bya ba ni/ 'jig rten gdul bar bya ba'i don du gsungs pa yin la/ yang dag skyes pas na zhes bya ba ni/ sems las ye shes 'byung ba'o/ /ston pa med cing zhes bya ba ni ston par byed pa med pa'o//bstan pa med ces bya ba ni gzhung gi tshogs kyang med pa ste/ rnam par mi rtog pa nyid yin pa'i phyir ro/ /phyi rol du g.yeng ba'i blo can rnams kyi gnas la sogs par 'khor bar byed pa dang ldan pa rnams dgag par bya ba'i phyir/nyi shu rtsa bzhir phye ba yi/ /gnas sogs de nyid la gnas te/ /de bas de kun 'khor ba nyid/ /skyo bya de nyid can gyis min/ /zhes bya ba smos te/ nyi shu rtsa bzhir phye ba yi/ /zhes pa ni/ rnam pa nyi shu rtsa bzhir bsres shing bgrang ba ste/ de la gnas dang nye ba'i gnas//zhes bya ba la sogs pa rgya cher sbyar ro/ /rgyu des na gnas kyi rdo rje la sogs pa rnams kyang sems kyi rdo rje la gnas so/ /de bas zhes bya ba ni nye bar bsdu ba smra ba yin te/ de rnams su 'khor ba nyid kyis khams zad par byed pa yin pas skyo zhing zhum pa nyid mi bya'o/ /gang gis she na/de nyid can gyis min zhes bya ba smos te/ rnal 'byor chen po rnams kyis mi bya'o/ /'o na phyi rol du zhen pa skyon yin na/ gtso bor bya ba gang yin zhe na/ gal te de nyid med gyur na/ /de yi 'khrul pas ci zhig bya/ /yang na de nyid ldan gyur na/ /de la 'khrul pa ci zhig yod//ces bya ba smos te 'di ni go sla'o/ /'on te bcom ldan 'das nyid kyis gnas la sogs pa bgrod pas dri ma med pa nyid du 'gyur te/ de bas na rang gi gzhung nyid dang 'gal bar 'gyur ro zhe na/ gnas dang nye ba'i gnas sogs rnams/ /brten pas dri ma med par 'gyur/ / yang na mi nus bag med pa'i/ /mi yis gnas ni bsgrag par bya/ /zhes bya ba smos te/ gnas dang nye ba'i gnas la sogs pa la brten cing / bsnyen bkur bya bas rnal 'byor pa dri ma med par 'gyur zhes bya ba ni srid de/ rdo rje rnal 'byor ma rnams kyis/ 'gron po dang bcas pa'i gnas su bgrod cing mchod pas bsod nams su 'gyur ro zhes bya ba la sogs pa ni ngo mtshar med de/yang na la la zhig bgrod par mi nus pa'am/ bag med cing bya ba mang pos g.yengs pa ste/ de gnyis kyis kyang gnas pa la sogs pa'i ming bsgrags pas dag pa 'phel bar 'gyur ro//de yang ci don dam pa nyid du brten pa yin nam zhe na/ ma yin te/ nga yis 'di ltar bshad pa ni/ /sems can bsam pa'i dbang gis te/ /bsam gtan las gzhan bde med phyir/ /de bas bsam gtan mchog gzhol bya/ /zhes bya ba smos te/ gang bdag cag rnams kyis de skad du smras pa de ni sems can rnams kyi bsam pa'i dbang du byas pa yin te/gang gnas bgrod pas dri ma med pa nyid du 'dod pa de'i phyir bstan pa yin gyi/ de yang don dam par ni ma yin no/ /de'i phyir bsam gtan zhes bya ba la sogs pa smos te/ bsam gtan zhes bya ba ni sems rtse gcig pa'i mtshan nyid can yin la 'di nyid las bde ba zhes bya ba gzhan med de/de bas na nyin mtshan rtag tu bsam gtan kho na mchog tu bsten cing de la gzhol bar bya'o/ /'o na phyi rol mngon par zhen cing btsal ba la skyon ci yod ce na/ rnal 'byor pa ni phyi rol 'khor//de yis khams rnams zad par 'gyur/ /de bas phyi rol spangs nas ni/ /rnal 'byor rol pas gnas par bya/ /zhes smos te/ phyi rol gyi sbyor ba la mngon par dga' ba'i rnal 'byor pa de rnams kyi khams rnams yongs su skams par 'gyur te/ de bas na phyi rol gyi bya ba rnams yongs su spangs la//rnal 'byor rnam par rtse bas de kho na nyid kyi sbyor ba la gnas par bya'o/ /'o na khyad par can dag bzhugs pa'i gnas la bgrod pas dgos pa 'grub bam zhe na/ dpal ldan rdo rje'i rnal 'byor can/ /rnam dag ye shes spyan gyis ni/ /thugs rje thugs gdung ring po nas//rdo rje rnal 'byor can rnams gzigs/ /zhes bya ba smos te/ bcom ldan 'das de rnams kyis ye shes dri ma med pa'i spyan gyis thugs rje'i dbang gis ring po nyid nas kyang bsam gtan la rnam par gzigs te/ de bas na gnas bgrod pa la sogs pa mi bya'o/ /'o na de dag gis gzigs pas cir 'gyur zhe na/de rnams dgyes pas dngos grub mchog /ci 'dod par ni stsol bar 'gyur/ /des ni rje btsun ye shes kyang / /rab tu 'bad de bsgrub par bya/ /zhes bya ba smos te/ bcom ldan 'das rdo rje'i rnal 'byor can dgyes par gyur nas thugs rje'i dbang gis/dngos grub kyi mchog gi ye shes stsol bar 'gyur zhing bsten par mdzad pa dang / gzhan yang ral gri'i dngos grub la sogs pa ji ltar mngon par dga' ba bzhin du/ /rnal 'byor pa rnams la stsol bar mdzad do/ /de bas na ye shes kyi de kho na nyid rnam pa thams cad du 'bad pas bsgrub par bya zhing mnyes par bya'o//ci rje btsun ye shes mnyes par byed pas spyod pa dang / brtul zhugs rnams la ltos par bya'am zhe na/ sna tshogs spyod par yang dag ldan/ /spyod dang brtul zhugs bshad pa yi/ /spyod dang brtul zhugs 'dir spangs la//de nyid brtul zhugs la dga' bya/ /zhes bya ba smos te/ nyon mongs pa'i rnam pa du ma spyod pa dang / brtul zhugs rnams rgyud de dang de las gsungs pa rnams kyis lus sems rnam par g.yeng bar 'gyur te/ de bas na de spangs shing dor la rnal 'byor pa rnams kyis rjes su mthun pa'i de kho na nyid kyi brtul zhugs spyad par bya'o//bcom ldan 'das kyis kyang bsam pa'i dbang gis spyod pa dang brtul zhugs gsungs pa yin no zhes bya bar gsungs so/ /ci bya ba'i rgyud rnams las kha zas ji lta bur gnas par gsungs pa de lta bu'i kha zas kyis gnas par bya'am/'on te ma yin zhe na/ gang yang rung ba'i zas gnas pa/ /rnam pa de byas brtul zhugs can/ /bsam gtan zas mchog gzhol 'gyur ba/ /smyon pa'i spyod pas gnas par gyis/ /zhes bya ba smos te/ kha zas bsod pa rnams kyang / bsod pa ma yin pa'am/bslang ba'am/ bslangs pa brtags pa'am/ brtags pa ma yin pa'am/ gang yang rung ba'i zas la longs spyod cing gnas pa ni zas kyis gnas pa'o/ /brtul zhing zhugs pa'i phyir brtul zhugs te/ lung las bshad pa'i sdom pa'o/ /de lta bu'i brtul zhugs dang /zas la ma ltos par bsam gtan nyid zas dang 'dra bas na zas so/ /zas de la mchog tu gzhol bar gyur pas na sus kyang rjes su rtog par mi 'gyur bar smyon pa'i spyod pas gnas par gyis shig ces bya ba ste/ gzhan du skye bo rnams dang nye bar 'dres pas kun du gtses par 'gyur ro//rnal 'byor pa gos la sogs pa slong ba la sogs pas brtul zhugs can g.yeng bar gyur na dge ba ji ltar byed ce na/ gcer bu'am yang na gcer bu min/ /gang du ji lta de lta bur/ /rang gi lhag pa'i lhar dmigs la/ /de nyid gcig pu rnam par bsam//zhes bya ba smos te/ gcer bu'am yang na gcer bu min/ /zhes bya ba ni go sla'o/ /bya ba'i rgyud la sogs pa nas gnas kyi nges pa bshad pa 'dir yang de bzhin du'am zhe na/ /gang yang rung ba zhes bya ba smos te/ lam gyi bzhi mdo la sogs pa'i nges pa med do/ /'o na skyil mo krung bcas nas mchan thog thag bzlas brjod bya ba'i spyod pas ni lus la gnod par 'gyur ro zhe na/ji lta de lta bur zhes bya ba smos te/ gnas skabs gang yang rung ba dag tu ste/ spyod lam rnam bzhir de kho na nyid rnam par bsam zhing bsgom par bya'o/ /ci rtog pa mang po dag gis 'di'i ye shes 'grub par 'gyur ram zhe na/zla drug tsam gyis nges par ni/ /zhes bya ba smos te/ nges par zla ba drug gis 'di 'tshang rgya ba nyid kyang nges par 'grub pa ni/ /ci skye bo rnams dang 'dres shing g.yengs pas sam zhe na/ lkugs pa'i dngos por thal 'gyur bas/ /zla drug tsam gyis nges par ni//rnal 'byor can gyis nyer brten na/ /rnal 'byor chen po 'di gsal 'gyur/ /zhes bya ba smos te/ lkugs pa'i dngos por thal 'gyur pas/ /zhes bya ba ni dgongs pa'i dbang gis mi smra ba'i brtul zhugs la gnas pa yang nges pa med do/ /de bas na rnal 'byor chen po 'di yang gsal zhing 'bar bar 'gyur te/rdo rje mkha' 'gro'i tshogs rnams kyis nye bar brtse bar 'gyur ro/ /'o na 'di nyid kun gyis bkur ba dang bsnyen pa'i 'os su 'gyur ram zhe na/ ye shes sgron ma mchog mthong na/ /rnal 'byor ma rnams legs 'dus te/ /pad+ma'i 'byung gnas nyams dga' la//ngang pa'i tshogs 'dus ji bzhin no/ /zhes bya ba la/ /ye shes ni rnam par rtog pa ma lus pa bsal ba'i ngo bo nyid do/ /de'i sgron ma ni snang ba'o/ /des mchog tu gyur pa ni dam pa ste/ de lta bas na lha mo rnams yang dag par nye bar sdud do/ /ji lta bu zhe na/ dper na pad+ma'i 'byung gnas kyi mtsho pad+mas khyab par gnas pa la ngang pa'i tshogs rnams 'bab par 'gyur ba dang 'dra'o//ji ltar 'bras bu bstan par bya ba'i phyir/ mig 'phrul mkhan ltar 'jig rten du/ /'gro kun don ni byed pa'o/ /dpal ldan rdo rje 'dzin pa ni/ /mngon 'gyur 'di la the tshom med//ces smos te/ 'di dag ni go sla'o/ /gzhung rtsom par byed pas bskul bar bya ba'i phyir/ spyod pa 'dis ni nges par ni/ /ji skad bshad par der 'gyur bas/ /sems ni dag par gyis shig ces/ /sems can rnams la bdag gsol 'debs/ /zhes bya ba smos te/ de ni go sla'o/ /gang phyir shin tu gsang bas na/ /de nyid bdag gis gsal ma byas/ /des na bla ma yang dag par/ /mnyes byas yang dag 'dod pas blangs/ /zhes bya ba la de kho na nyid shin tu gsang zhing gcig tu sba bar bya ba nyid yin pas ngas gsal bar ma bshad de/ de bas na kye sems can rnams bla ma yang dag par mnyes shing mgu bar byas nas blang zhing gzung bar bya'o//da ni gzhung byed pas bskul ba/ dge la dmigs pas nye bar bsags te 'phel ba yis/ /blo gros brtan rnams mngon dga'i dngos grub gnas su 'gro/ /'gro ba'i spyod pa de ltar snying la yongs bsgoms la//dge la mngon par dga' bar skad cig re res gyis/ /zhes bya ba smos te/ dge la dmigs pa ni de la brten pa'o/ /nye bar bsags te ni rnal 'byor gyis las kyi lam yongs su bsags pa'o/ /'phel ba ni de nyid khyad par du gyur pa'o/ /ji lta bu zhe na/ brtan pa zhes bya ba la/brtan pa ni mi 'gyur ba can no/ /de nyid kyi phyir mngon dga'i gnas su 'gro bar 'gyur bas na/ 'gro ba gtsor byas ba'i spyod pa thams cad de ltar yid la byas te/ dus thams cad du dge ba rgyun mi 'chad par gyis shig pa'o/ /de kho na nyid kyi man ngag bris pa las/ dge ba gang zhig yang dag par thob pa'i rtsa ba bsngo ba ni/de nyid bstan pa legs bris las/ /bdag gis dge ba gang bsags pa/ /des ni sems can ma lus kun/ /de nyid rin chen rab gsal shog /ces gsungs so/ /de kho na nyid kyi man ngag gi 'grel pa/ slob dpon blo bzang snying po'i zhal snga nas mdzad pa rdzogs so/

CLOSE WINDOW