CLOSE WINDOW

D1607
བོད་ཡིག

@##/ /rgya gar skad du/ shrI tsa tu ra pI Tha tan+t+ra rA dza s+ya smr-i ti ni ban+d+ha nA ma TI kA/ bod skad du/ rgyud kyi rgyal po dpal gdan bzhi pa'i 'grel pa dran pa'i rgyu mtshan zhes bya ba/ thugs rje chen po 'phags pa spyan ras gzigs dbang phyug la phyag 'tshal lo/ /gang du kun nas me tog 'bras bu sna tshogs gzugs ldan dus mtshungs par//smin cing dag pa'i dpal 'bras ljon shing shin tu dri zhim ror ldan pa'i/ /yid 'ong grib mas mdzes pa'i nags kyi tshal dang 'dra ba'i gdan bzhi pa/ /thub gsung rnam par bkod pa rnams la mos pas rtogs bya la phyag 'tshal/ / bar bar du ni yon tan rgyas min yang / /gzhan du kun nas yon tan rab rgyas pas/ /bdud rtsi du ma'i 'byung gnas gdan bzhi'i rgyud/ /pad dang pad+ma'i rtsa ba lta bu ste/ /gser gyi ri bor gnas pa'i lha rnams kyi/ /bdud rtsi myang mthu can gyis 'di yi don/ /gsal bar byed 'dod nus dang ldan yin gyi//mi 'drar snang ba bdag gi spyod yul gyi/ /ji ltar ri dwags glang chen nor bu ni/ /'phrog 'dod mthus sgrub nus pa yod min pa/ /nyon mongs de dag rdul gyi gseb nas ni/ /rtsa la gcod cing 'di ni rgyu ba 'dra/ /'on kyang ji ltar lcags rnams sman gyi mthus/ / skye bos bza' ru rung bar snyir 'gyur ltar/ /bla ma'i gsung la brten nas rnam dbye ba'i/ /nus pa yod pas 'dir ni drang por bsrang / /sems can blo rnams sna tshogs mi mthun pas/ /de rnams mgu bar sus kyang nus ma yin/ /nye bar bstan dang rjes su mthun pa yi/ / don rnams dran pa'i rgyu mtshan byas pa la /sdeb spyor rtags dang rnam dbye la sogs tshig /phyi rol tha snyad dga' ba'i skye bo la/ /rin chen rgyud 'di'i don rnams mdzes bya ba'i/ /blo can rnams kyis rang gis rdzogs par mdzod/ /'dir rgyud 'bum phrag bco brgyad kyi snying por gyur pa stong phrag bcu gnyis pa'i dpal gdan bzhi pa'i rgyud las rgyud 'di btus pa yin te/des na sdud par byed pas 'di skad bdag gis zhes bya ba la sogs pa'i tshig rgyud 'dir dang por nye bar ma bkod de/ de nyid du gsungs pa'i phyir ro/ /de bas na rnal 'byor ma'i zhes bya ba la sogs pa la/rnal 'byor ma yi dra ba sdom/ /ye shes dbang phyug stong pa can/ /thams cad mkhyen pas 'di skad gsungs/ /zhes bya bar sbyar te/ 'di skad ces bya ba ni/ bcom ldan 'das kyis gsungs pa la mngon par bstod do zhes bya ba'i mthar thug pa'i brjod par bya ba dang /rjod par byed pa'i bdag nyid kyi rgyud mtha' dag gzung ba'i tshig go/ /gsungs zhes bya ba ni rgyud phyin ci ma log par gsungs pa ste/ ji lta ba bzhin du bstan cing gsal bar mdzad pa'o/ /de nas ni rjod par byed pa'i rgyud bstan no//gsang ba bstan pa'i mtshan nyid rnams/ /zhes bya ba la sogs pas ni brjod par bya ba bstan te/ de dag gis ni rjod par byed pa dang / brjod par bya ba'i 'brel pa yang bstan par blta'o/ /'dir dgos bde lhar mngon du byas pa yin la/de'i dgongs pa ni 'gro ba rnams rjes su gzung ba yin par shes par bya'o/ /ji ltar phyin ci ma log par bstan zhe na/ thams cad mkhyen pas zhes bya ba la sogs pa gsungs te/ dngos po thams cad mi rtag pa la sogs pa'i tshul gyis ji lta ba bzhin du mkhyen pas na thams cad mkhyen pa ste bcom ldan 'das so//des ni ston pa phun sum tshogs pa gsungs so/ /de nyid kyi khyad par gsungs pa rnal 'byor ma'i zhes bya ba la sogs pa la/ rnal 'byor ni thabs dang shes rab gnyis su med pa'i ye shes te/ 'dir shes rab ni rang bzhin med pa yin la/thabs ni yongs su dag pa'i snying rje'o/ /de ltar yang / thabs dang shes rab snyoms 'jug pa/ /rnal 'byor zhes ni bya bar brjod/ /gang zhig dngos med shes rab ste/ /dngos po'i mtshan nyid thabs yin no/ /zhes gsungs pas so/ / rnal 'byor de su dag la yod pa de dag ni rnal 'byor ma'o/ /dra ba ni de rnams kyi yongs su dag pa'i sprul pa'o/ /sdom pa zhes bya ba la/ saM ni 'khor ba'i sems can thams cad de/ wa ra ni de rnams kyis de dag sdom zhing kun du skyob pa de la de skad ces bya'o/ / ye shes dbang phyug stong pa can/ /zhes bya ba la/ ye shes ni shes bya rnams shes pa'o/ /stong pa can ni sangs rgyas rnams te/ bsod nams chen po'i ngo bo nyid rdo rje 'dzin pa chen po ni sangs rgyas thams cad skyed par byed pas na/ de rnams kyi dbang phyug go/ /de ltar yang gsungs pa/dpal ldan sangs rgyas kun gyi bdag /rdo rje 'dzin chen go 'phang ni/ /sangs rgyas thams cad 'byin pa po/ /de nyid chos rnams chos nyid yin/ /zhes pas na sangs rgyas thams cad kyi skyed pa po'o/ /bcom ldan 'das kyi khyad par bstan pa'i sgo nas gnas phun sum tshogs pa gsungs pa/gnas gtsang ma na bzhugs nas su/ /zhes bya ba la gtsang ma ni lha rnams so/ /de dag bsrung zhing skyob pas na gnas te ri bo lhun po'o/ /bzhugs pa ni der gnas par mdzad de/ lhun po'i steng na khang bu brtsegs pa'i nang du bzhugs so zhes bya ba'i don to//de la thams cad mkhyen pa zhes bya bas ni bdag gi don phun sum tshogs pa gsungs so/ /ye shes dbang phyug stong pa can/ /zhes bya bas ni/ de'i rgyud phun sum tshogs pa gsungs so/ / gnas gtsang ma na bzhugs nas su/ /zhes bya bas ni gzhan gyi don phun sum tshogs pa gsungs so/ /rnal 'byor ma yi dra ba sdom/ /zhes bya bas ni de'i rgyud phun sum tshogs pa gsungs te/ de dag gis phyin ci ma log par bstan par grub pa nyid de 'di ltar bstan par bya ba dang /bstan pa dang / ston pa po dang / gnas su phun sum tshogs pa rnams rim bzhin du gsungs pa'i phyir ro/ /der 'khor phun sum tshogs pa yang bstan pa'i phyir/ sbyangs pa'i yon tan can dang zhes bya ba la sogs pa smos te/ sbyangs pa'i yon tan can ni byams pa'o//mi sdug pa ni phyag na rdo rje'o/ /'phyang ba ni kun du bzang po'o/ /mgrin pa gsum pa ni nam mkha'i snying po'o/ /ri rab ni sgrib pa rnam par sel ba'o/ /ri rab gtsug tor ni sa'i snying po'o/ /pad+ma ni 'jig rten dbang phyug go/ /pad+mo yangs pa ni 'jam dpal te/byang chub sems dpa'i gtso bo yin pa'i phyir brgyad po de dag smos so/ /rnal 'byor gyi dbang phyug bye ba phrag brgyad cu ni/ gtso bo de dag la sogs pa'i byang chub sems dpa' ste/ de snyed dang ldan pa'i nang nas phyag na rdo rje la gzigs te 'dzum pa mdzad do zhes bya ba ste/'dzum pa ni tshems kyi 'od dang bcas pas cung zad bzhad pa ste/ thams cad mkhyen pas zhes bya ba'i lhag ma yin no/ /ci'i phyir zhe na/ bcom ldan 'das kyi 'khor rnams dpal gdan bzhi pa nyan par 'dod pa'i gzhan gyi sems mkhyen pa dang /phyag na rdo rjes sdud nus par thugs su chud nas/ nga la gsol ba 'debs su gzhug go snyam du dgongs te/ de la gzigs pas bskul zhing bzhad pas spro ba nyid du bstan pa'i phyir ro/ /des de gsol ba 'debs par chas pa bstan pa'i phyir/ 'dzum pa mdzad ma thag tu zhes bya ba gsungs te/ mdzad ma thag tu zhes bya ba ni bar ma chod pa'o/ /lag na rdo rje thogs pas na phyag na rdo rje'o/ /stan las zhes bya ba ni zla ba'i dkyil 'khor las so/ /phrag pa gcig ces bya ba ni gang gis lus kyi phyogs gcig yin pa de la de skad ces bya'o//bla gos gzar ba ni steng gi gos gzar ba'o/ /sa la zhes bya ba ni stan med par ro/ /lag pa thal mo sbyar ba ni rang gi lag pa gnyis kyi thal mo mnyam par gshibs te kha sbyar ba'o/ /de dag gis ni ma 'ongs pa'i gsol ba 'debs pa po rnams la tshul bstan pa'o//gsol ba btab pa gsungs pa/ gsang ba zhes bya ba la sogs pa gsungs pa la/ gsang ba zhes bya ba ni sba bar zhes bya ba ste/ de yang phyag rgya'i ye shes dang dam tshig la sogs pa'o/ /sbyor ba ni zhi ba dang rgyas pa la sogs pa'i las rnams dang chu la sogs pa'i sbyor ba ste/gsang ba dang sbyor ba de dag gi mtshan nyid ni rang bzhin no/ /ye shes dbang zhes bya ba la/ ye shes ni me long lta bu la sogs pa'i ye shes te/ de rnams kyi dbang phyug ni ston pa po rdo rje 'dzin pa'o/ /yang na ye shes ni me long lta bu la sogs pa'i ye shes kyi rang bzhin yin pas na rnam par snang mdzad la sogs pa'o//dbang phyug ni de rnams kyi bdag po ste skyed pa po yin pa'i phyir ro/ /des ni bcom ldan 'das la bod pa ste/ 'di ni 'og tu sbyar bar bya'o/ /sa ni sa gzhi'o/ /nam mkha' ni go 'byed pa'o//ring po'i gnas su thung ngu sbyar ba ni/ sgra dang sgra ma yin pa la ltos pa med par bstan pa ste/ de dag ni brtags pa tsam yin pa'i phyir ro/ /chu dang zhes bya ba la sogs pa ni go sla'o/ /'byung dang zhes bya ba la sogs pa la byung ba ni phyir 'gro ba'o/ / 'jug pa ni nang du 'ong ba ste/ de dag ni chos kyi brdas bstan pa'o/ /dbugs ni sna sgo'i rlung ngo / /bsam gtan ji ltar gzung bar bgyi/ /zhes bya ba ni 'gro ba dang 'ong ba'i rlung gi bsam gtan gyi ngo bo ci 'dra zhes bya ba'i don to/ /yul 'khor skyong ba dang po'i lha/ / dkyil 'khor dag ni ji ltar lags/ /zhes bya ba la yul 'khor ni lus so/ /de skyong bas na yul 'khor skyong ba ste/ rnam par snang mdzad la sogs pa'i de bzhin gshegs pa rnams so/ /de dag nyid 'gro ba'i don gsal bar mdzad cing rdo rje mkha' 'gro ma la sogs pa sna tshogs su sgrub cing sprul nas rnam par rgyu bas na dang po'i lha'o//dkyil 'khor ni de rnams kyi dngos grub ste/ 'gro ba'i don ni snying po bas maN+Da yin la 'bras bu de len cing 'dzin par mdzad pas de la de skad ces bya'o/ /yang na yul 'khor skyong ba ni zhing skyong rnams so//de dag nyid dang po'i lha ste/ de rnams kyi dkyil 'khor ni de dag gi dkyil 'khor pa dang bcas pa'o/ /yang na yul 'khor skyong ba ni phung po khams dang skye mched rnams so/ /de dag nyid ni rnam par snang mdzad la sogs pa'i rang bzhin yin pa'i phyir dang po ni lha'o//ye shes rnam shes lus kyi ni/ /las la sogs pa ji ltar sbyor/ /zhes bya ba la/ ye shes ni brtan pa dang mi brtan pa dang srid pa dang mi srid pa la sogs pa'o/ /rnam shes ni 'tsho ba ste/ de dag dang ldan pa'i lus kyi'o/ /las ni legs par bya ba la sogs pa ste/der sbyor ba'o/ /'khor ba las sgrol zhes bya ba la sogs pa ni lan gsungs pa yin te/ 'khor ba las sgrol ba ni 'khor ba'i pha rol tu sgrol ba ste byang chub tu'o/ /de 'dis mtshon par byed pas na de nyid ni rlung gi de kho na nyid do/ /ji bzhin ni phyin ci ma log pa'o//rdo rje ni phyag na rdo rje ste/ kye phyag na rdo rje ji lta ba bzhin gyi rlung gi de kho na nyid gang gis 'khor ba'i pha rol tu sgrol bar byed pa nyon cig ces bya bar sbyar ro/ /de nyid gsungs pa/ dbugs kyi las la sogs thams cad/ /ye shes can gyi las su sbyor/ / zhes bya ba ste/ nyon cig ces bya ba dang 'brel to/ /las ni dbugs kyi bya ba ste/ de kho na nyid do/ /sogs kyis ni dam pa dang gtso bo zhes bya ba'i bar du gzung ngo / /thams cad ye shes can ni srog chags thams cad do/ /sbyor ba ni sbyor bar 'gro ba'o/ /de ci zhig ce na/ las su zhes bya ba ste las kyis so//'dir gsum pa mi mngon pa yin te/ dbang chen la sogs pa'i sbyor ba'i las kyis zhes bya ba'i don to/ /dbugs kyi las gsungs pa/ nyi khri dang ni chig stong dang / /drug brgya ru ni brtsi bar bya/ /chu tshod drug cu'i dbugs rnams kyis/ /nyin mtshan du ni grags pa yin//zhes bya ba la/ nyi khri ni khri phrag gnyis so/ /chig stong ni stong phrag gcig go/ /drug brgya ni brgya phrag drug go/ /brtsi ba ni de dag bgrang ba'o/ /gang du zhe na/ chu tshod drug cu zhes bya ba gsungs te/ chu tshod ni dbyug pa'o/ /drug cu ni bcu phrag drug ste der bgrang ba'o//dbugs rnams ni 'das ma thag pa'i brgya phrag drug dang bcas pa'i stong phrag nyi shu rtsa gcig ste/ nyin mtshan du ni grags pa yin/ /zhes bya ba ni nyin mtshan gyi dbugs ji snyed pa grangs des 'da' ba'o/ /'byung dang 'jug pa'i dbugs dag ni/ / 'byung ba'i grangs kyis brtsi bar bya/ /zhes bya ba la/ 'byung ba'i dbugs ni rlung phyir 'gro ba'o/ /'jug pa ni de las bzlog pa ste/ de dag ces bya ba ni 'byung ba dang 'jug pa'i dbugs te gnyis las so/ /'byung ba'i grangs kyis brtsi bar bya/ /zhes bya ba la/ grangs ni bgrang ba'o/ /brtsi ba ni mtshon pa ste/ rlung phyir 'gro ba'i grangs bzung bas mtshon par bya ba'o/ /ji ltar bya zhe na/ blo dang ldan pas dbugs gnyis ni/ /'jug pa 'byung la thim par bya/ /zhes bya ba la/ blo dang ldan pa ni blo gros dang ldan pa ste/ phyag na rdo rje la bod pa'o//dbugs gnyis ni 'byung ba dang 'jug pa'o/ /'jug pa 'byung ba thim pa ni/ /'jug pa 'byung ba la thim pa ste/ gcig tu gyur pas zhes bya ba'i don to/ /de bzhin sa ni bcu gnyis la/ /phyi rol mtshan ma gzhag bya ste/ /zhes bya ba la/ phyi rol gyi mtshan ma ni dbugs kyi las las gzhan pa'i ri mo ste/mtshan ma ni ri mo'o/ /sa bcu gnyis zhes bya ba ni re'u mig bcu gnyis la'o/ /de nyid gsungs pa/ tshes grangs mtshan ma ji bzhin du/ /re'u mig bcu gnyis rnams su gzhag /ces bya ba la/ re'u mig bcu gnyis po de rnams dbugs rnams 'jug pa'i tshes gcig la sogs pa nas nyi ma bcu gnyis pa'i bar du tshes grangs gang dang gang gi ming de dang /de'i mtshan ma bri'o zhes bya ba'i don to/ /go rims bcu gnyis rab 'bad pas/ /shar nas dpyid zla 'bring sogs gzhag/ ces bya ba la/ rab 'bad pas zhes bya ba ni/ mchog tu gus pa'i rnal 'byor pas so/ /go rims ni zla ba'i go rims ji bzhin te/ dpyid zla 'bring po dang tha chungs la sogs pa'i rim bzhin du'o/ /shar ni shar phyogs kyi re'u cha ste/ shar dang byang shar la sogs pa'i re'u mig la g.yon skor du bri ba ni gzhag pa ste/'bad pa'i tshig gis ni lug la sogs pa'i ra si yang yin par blta'o/ /bri ba de nyid gsungs pa/ ro hi ta dang zhes pa la sogs pa ste/ tshes gcig la sogs pa'i nyi ma rnams dang / dpyid zla 'bring po la sogs pa'i so so'i zla ba rnams dang /lug la sogs pa'i ra si rnams la rim pa bzhin du/ ro hi ta la sogs pa'i sgrar brjod do/ /sa dbang bcu dang gnyis zhes bya ba la sa ni sa bcu gnyis te/ re'u mig rnams yin la/ de rnams kyi dbang phyug ni ro hi ta la sogs pa'o/ /de dag gi ni nyin zhag gcig la ro hi ta 'phel ba la sogs pa bcu gnyis su 'gyur bar bya ste/de la ro hi ta ji bzhin du ma ka ra ste grangs gsum gyi'o/ /mo hi ta dang kur ma la ni bzhi'o/ /b+ha drA dang br-i Sha b+ha ni lnga'i'o/ /raN+Da dang ka ma la yang lnga'i'o/ /bi dri ka dang bya ku li la ni drug gi'o//mi ki ra dang swap+na la ni bdun gyi ste/ tho rangs kyi chu tshod gsum ni ro hi ta'o/ /de'i 'og tu bzhi ni mo hi ta'o/ /de'i 'og tu lnga ni b+ha drA'o/ /de'i 'og tu de dang 'dra ba ni br-i Sha b+ha'o/ /de'i 'og tu bzhi ni kur ma'o/ /de'i 'og tu gsum ni ma ka ra'o/ /de'i 'og tu lnga ni raN+Da'o//de'i 'og tu bdun ni mi ki ra'o/ /de'i 'og tu drug ni bi dri ka'o/ /de'i 'og tu de dang 'dra ba ni byA ku li'o/ /de'i 'og ma bdun ni swap+na'o/ /de'i 'og ma lnga ni ka ma ste/ de dag ni nyin zhag gcig gi chu tshod drug cu yin la/ de yang tshes dang zla ba dang ra si'i chu tshod 'dzom na ji skad smos pa bzhin du 'gyur gyi gzhan du ni gzhan du 'gyur ro//dgod pa nye bar bsdus pa gsungs pa/ 'di dag shar sogs re'u mig la/ /go rims bzhin du dgod par bya/ /zhes bya ba ste/ ro hi ta la sogs pa 'di dag gis mtshan ma sngar smos pa bzhin du rim bzhin du dgod par bya'o zhes bya ba'i don to//'on kyang dpyid zla tha chungs la sogs pa'i zla ba rnams la/ tshes gcig la sogs pa so so'i ming gis 'khor bar shes par bya ste/ dpyid zla tha chungs kyi tshes gcig ni mo hi ta'o/ /de bzhin du bcu gnyis pa'i bar du yang ro hi ta'i mthar thug pa sbyar ro//dbyar zla ra ba'i tshes gcig ni b+ha dra'o/ /de bzhin du bcu gnyis pa ni mo hi ta'o zhes bya ba la sogs pa dpyid zla 'bring po'i bar du so sor sbyar bar bya'o/ /ro hi ta zhes bya ba la sogs pa la skal ba bzang zhes bya ba ni skye bos dga' bar blta ba'o//gdug pa'i sems la nad bu can/ /zhes bya ba la gdug pa'i sems ni gnod par sems pa ste/ phan par ma yin pa'o/ /nad bu can ni me drod chung ba'o/ /rtag tu mtha' 'khob gtso bo ste/ /zhes bya ba ni mtha' 'khob kyi yul bzang por rgyal po la sogs par 'gyur ba'o//'khrig pa la ni rtag tu dga'/ /zhes bya ba ni/ dga' ba'i don du gnas dang gnas ma yin pa'i dpyad pa med par 'jug pa'o/ /thams cad du ni snyan par smra/ zhes bya ba la/ thams cad du ni rtag tu'o/ /snyan par smra ba ni tshig rtsub mo med pa'o//ro hi ta la lha mchod cing / /zhes bya ba ni ro hi ta la skyes pa'i sems ro hi ta'i dus nyid du lha mchod par 'gyur ba ste/ dus dang skye ba dang sbyar ba 'di ni 'og tu yang blta bar bya'o/ /de bzhin tshe lo bdun cu thub/ /ces bya ba ni/ tshe'i mtha' bdun cur nges pa'o//ro hi ta la nor btang na/ /mdza' bo thams cad ldog par 'gyur/ /zhes bya ba la/ nor btang ba ni bun du btang ba la sogs pa'o/ /mdza' bo ldog pa ni bu lon de nyid la brten nas 'gras par 'gyur ba'o/ /ro hi ta la lus smas na/ /zhes bya ba ni mtshon gyis rma srol btod pa'o//dpal dang kun du phrad par 'gyur/ /zhes pa ni gzhan gyi g.yang 'gugs pa'o/ /ro hi ta la gnas brten na/ /grogs dang nor gyis rgyas par 'gyur/ /zhes bya ba ni ro hi ta'i dus su brten pa'i gnas der nor dang g.yog la sogs pa 'phel ba'o/ / ro hi ta la 'dron zhugs na/ /bsam pa thams cad mngon par 'grub/ /ces bya ba ni/ gang gi phyir lam du zhugs pa'i don de 'grub pas na de'i phyir 'gro bar bya'o zhes bya ba'i don to/ /bag ma blangs dang me yi las/ /zhi ba'i las ni sbyar bar bya/ /zhes bya ba la/ me'i las ni sbyin sreg la sogs pa'i las te/zhi ba'i las zhes bya ba ni bgegs med par 'bras bur 'gyur ba'o/ /kha cig ni nor bsgyur ba'i bya ba la/ btso bsreg la sogs pa ni me'i las so zhes zer ro/ /mo hi ta yi don sbyor ba/ /bgrang ba nyid kyis shes par bya/ / zhes bya ba la/ don sbyor ba ni don gyi tshogs so/ /bgrang ba zhes bya ba ni/ re'u mig bcu gnyis pa bris pa'i rtsis te/ des shes par bya ba'o/ /sems chung la zhes bya ba ni/ sems phra ba'i mtshan nyid can no/ /'khrig pa la ni rtag tu dga'/ /zhes bya ba ni/ rtag tu 'khrig thabs don du gnyer ba'o/ /ca cor ldan zhes bya ba ni/ 'thab rtsod mang ba'o/ /khro la nga rgyal snying stobs med/ /sdig pa byed cing ngang tshul ngan/ /zhes bya ba la/ khro ba ni gtum pa'o/ /nga rgyal ni khengs sems so/ /sdig pa byed pa ni srog gcod pa la sogs pa byed pa'o//ngang tshul ngan pa ni spro thung ba'o/ /yang na lus kyi cha lugs mi sdug pa'o/ /'khyal pa dang ni tshig rtsub smra/ /zhes bya ba ni gang dag don med par mang du smra ba dang / brlang bar smra ba de la de skad ces bya'o/ /mtshon gyis nges par 'chi bar 'gyur//zhes pa ni go sla'o/ /gzhung kha cig las ni/ kun du 'chi bar sems pa'o/ /zhes 'byung ste/ mtshon cha la sogs pa thams cad kyis bdag nyid gsad par sems shing des 'chi bar 'gyur ba'o/ /yang na tshe lo brgyad cu ni/ /rtsa bzhi dag tu rab tu grags//zhes bya ba ni yang na de'i tshe lo drug cu rtsa lnga las brgyad cu rtsa bzhir ring du gnas pa'o/ /rung ba'i sa ni spong byed cing / /mi rung sa la brtson par 'gyur/ /zhes bya ba la rung ba'i sa ni gnas te bya bar 'os pa'o/ /mi rung sa ni gnas ma yin pa ste bya bar mi 'os pa'o//lhag ma ni go sla'o/ /lus kyi yan lag smas na ni/ /'chi bdag dang ni phrad par 'gyur/ /zhes bya ba ni/ mtshon gyis nges par 'chi bar 'gyur/ /zhes bya ba'i bshad pa yin no/ /gal te cung zad nor gtong na/ /gtong ba slar ni mi ldog go/ /zhes bya ba ni skyes bu des btang ba'i bun la sogs pa rnams slar khugs par mi 'gyur ba'o//b+ha trA zhes bya ba la sogs pa la/ kha zas bzang po za ba dang / /zhes bya ba ni zhing la sogs pas 'tsho ba'o/ /bzang po'i las ni byed 'gyur zhing / /zhes bya ba ni/ /zhi ba'i las la sogs pa la gzhol bas so//lo brgya ru ni 'tsho bar 'gyur/ /zhes bya ba ni go sla'o/ /dbul la chos ni spyod pa dang / /zhes bya ba la/ dbul ba ni nor nyung ba'o/ /chos ni mtho ris dang byang grol gyi rgyu mtshan te/ bsod nams kyi chos so/ /chung ma gcig gis tshim pa'i lus/ /bzang po smra ba'i gtso bor 'gyur//zhes bya ba la chung ma gcig gis tshim pa ni chung ma gcig gis chog pa'o/ /bzang po ni mdzes pa ste/ lus dang ngag mdzes pa'o/ /gtso bo ni smras pa bzhin skye bo rnams byed par 'gyur ba'o/ /bzo rnams kun dang dus tshod rig /ces bya ba la bzo rnams ni ri mo 'dri ba la sogs pa'o//kun gyi sgras ni mang bar bstan pa'o/ /dus tshod ni rig pa ste/ rig pa ni shes pa'o/ /rig pa de dag gang zhe na/ rig byed bzhi dang dpyod pa dang / /tshul ni rgyas pa'i bstan bcos drug /chos dang gtsug lag gna' yi rabs/ / rnam pa gsum du brjod pa dang / /gso ba rig dang 'phong gi dpyad/ /rol mo dang ni rnam pa gsum/ /nor gyi bstan bcos thun mong ba/ /bslab pa dang brtag dang brda sprod dang / /nges tshig sdeb sbyor skar ma'i dpyad/ /yan lag drug ces bya ba ste/ /bslab pa glang chen gdul la sogs//brtag pa dran pa'i bstan bcos sogs/ /'di dag mdo ru bsdus pa ni/ /rig pa'i gnas ni bcu dang brgyad/ /ces pa gang yin pa'o/ /rtag tu rang gi gnyen dang mdza'/ /zhes bya ba ni rang gi gnyen rnams la lhag par spro ba'o/ /chad pa gcod pa'i rigs can te//zhes bya ba ni chad pa gcod pas longs spyod 'gugs pa'o/ /yang na rigs kyi bdag nyid chen pos 'tsho ba'o/ /de bzhin lus ni chu ru 'chi/ /zhes bya ba ni/ go sla ba'o/ /br-i Sha b+ha zhes bya ba la sogs pa la/ brtson 'grus ldan zhing dgra la dpa'//zhes bya ba ni brtson 'grus kyis dgra rnams zil gyis gnon pa'o/ /lhag ma ni go sla'o/ /rtag tu gnyen ni mang ba ste/ /zhes bya ba ni rigs dang nye du dang snag gi gnyen mtshams mang po dang ldan pa'o/ /pha yi srog ni 'joms par byed/ /ces bya ba ni skyes ma thag tu pha'i tshe 'joms pa ste 'chi bar 'gyur ba'o//lhag ma rnams ni go sla'o/ /snyom las mu cor smra ba dang / /zhes bya ba ni mang du smra ba dang le los zin pa'o/ /gdug cing las dang ngang tshul ngan/ /zhes bya ba 'di'i don ni bshad zin to/ /mtshon gyis 'chi bar 'gyur ba'am//yang na srog chags gdug pas so/ /zhes bya ba ni mtshon cha dang sbrul la sogs pa'i dug gis srog 'joms pa'o/ /kurma zhes bya ba la sogs pa la/ rtag tu sems khral can du gnas/ /zhes bya ba ni rtag tu gzhan gyi bya ba la sems pas gnas pa'o//gzhung kha cig las/ sems med par ni gnas pa yin/ /zhes 'byung / /de'i tshe snga ma de las bzlog pa yin no/ /chung gis khro zhing chung gis mgu/ /zhes bya ba la sogs pa ni go sla'o/ /drag shul che zhes bya ba ni gtum pa'o//lhag par khro ba ni gnas ma yin par khro ba'o/ /phyug cing thams cad gtong la dga'/ /zhes bya ba ni zang zing dang ldan zhing ldan pa rnams gtong ba'o/ /bu dang chung ma 'chi bar 'gyur/ /zhes bya ba ni bu dang chung ma yun ring du mi 'tsho ba'o/ / lhag ma ni go sla'o/ /da bzhin rang gi yul du 'chi/ /zhes bya ba ni legs par bsams bzhin du 'chi ba'o/ /ma ka ra zhes bya ba la sogs pa la/ tshe ni dgu gsum drug cu ste/ /zhes bya ba la dgu dang gsum dang drug cus ni/ bdun cu rtsa gnyis so/ /gzhung kha cig las ni/dgu bcu dang ni drug yin te/ /zhes 'byung ste/ dgu bcu rtsa drug go/ /tshul khrims phun tshogs bsod nams ldan/ /zhes bya ba la/ tshul khrims ni dge ba la 'jug pa dang / mi dge ba la ldog pa dang gzhan gyi don byed pa ste gsum mo/ /bsod nams ni sbyin pa dang mchod pa la sogs pa'o//'dul ba dang ni spyod pa srung / /zhes bya ba la/ 'dul ba ni dbang po bsdams pa'o/ /spyod pa ni skye bo rnams kyi chos lugs so/ /lhag ma ni go sla'o/ /chung ma gcig ni shin tu gsal/ /zhes bya ba ni gang la chung ma khyad par du 'phags pa gcig yod pa da la de skad ces bya'o//rtag tu sems ni lhod pa ste/ /zhes bya ba la/ lhod pa ni sdug bsngal ba ste/ gzhan gyi sdug bsngal mthong na btags pa dang 'dra bar btul ba'o/ /gnyen gyi nang du gcig pu gtso/ /zhes bya ba ni/ de'i nor la gnyen rnams dang thun mong du spyod pa'o//lhag ma ni go sla'o/ /tshe lo lnga bcu rtsa lnga dang / /yang na drug cu'am sum cu'o/ /zhes bya ba la/ drug cu'am sum cu zhes bya ba ni lung gi tshig ste/ man ngag las bcu'i tshig phyi nas drug cu rtsa gsum du shes par bya'o/ /de dag gis ni de'i tshe tshad thung shos rnam pa gnyis gsungs so//raN+Da zhes bya ba la sogs pa la/ rtag tu sdig pa'i blo can te/ /zhes bya ba ni mtshams med pa byed pa la sogs pa'i blo dang ldan pa'o/ /rtag tu dbul zhing kha gsag can/ zhes bya ba la/ kha gsag ni kha 'jam smra ba'o//lhag ma ni go sla'o/ /gzhan dag la ni yid mi rton/ /zhes bya ba ni blo mi gtod pa'o/ /zol dang bzo sogs kun rig pa/ /zhes bya ba la/ zol gyi bzo ni bu don dang nor bu sbyar ba la sogs pa'o/ /sogs pas ni glang po che bzhon pa la sogs pa bsdu'o/ / lhag ma ni bshad zin to/ /mi ki ra zhes bya ba sogs pa la/ mi ki ra yis zhes bya ba ni mi ki ra la zhes gnyis par shes par bya ste/ dus dang lam dang shin tu sbyor/ /las kyi sgrar ni bshad pa yin/ /zhes gsungs pa'i phyir ro/ /chos shes rang gi rigs kyang mtho/ / zhes bya ba la/ mtho ba ni bstod pa ste/ gang gis rang gi rigs gong nas gong du spel bar byed pa de la de skad ces bya'o/ /lugs kyi bstan bcos zhes bya ba ni rgyal khrims la sogs pa'i bstan bcos so/ /bzo zhes bya ba ni gar la sogs pa'o/ /rig pa ni 'phong gi dpyad la sogs pa'o//lhag ma ni go sla'o/ /bya ba thams cad myur bar 'grub/ /ces bya ba ni dgos pa rnams tshegs med pas phyi bshol med par sgrub pa'o/ /lhag ma ni go sla'o/ /b+hi tri ka ga zhes bya ba la sogs pa la/ de bzhin rang gi khyim na gtso/ /zhes bya ba ni/ gtso bo pha dang ma med pa'i phyir ro//las dang sems khral chung ba ste/ /zhes bya ba la/ chung ba ni dman pa ste/ rigs ngan gyi bya ba byed pa'o/ /gzhung kha cig las/ kha cig sems kyi las can te/ /zhes 'byung ste/ las rnams rang gi bsams bzhin du byed pa'o/ /dpung rnams kyi ni gtso bo nyid//ces bya ba ni dmag dpon du gyur ba'o/ /lhag ma ni go sla'o/ /sdug phongs rnams la brtse bar ldan/ /zhes bya ba la/ sdug pa ni sdug bsngal ba'o/ /phongs pa ni rigs la sogs pas dman pa'o/ /byA ku li zhes bya ba la sogs pa la/blo chung zhes bya ba ni blo gros dman pa'o/ /ngan par smra ba ni gnas ma yin par smra ba'am/ skyon sgrogs pa la dga' ba'o/ /shes rab zhen pa ni glen pa'o/ /lhag ma ni bshad zin to/ /nor dang ba lang shin tu phyug /ces bya ba ni nor rnams dang ba lang rnams mang ba'o//khyim na chung ma gsum la sogs/ /zhes bya ba ni khyim gcig na chung ma gsum las mi nyung bar yod pa'o/ /lhag ma ni go sla'o/ /lhan cig tshong gi rgyu yis 'chi/ /zhes bya ba la/ lhan cig ces bya ba ni nor rnams dang lhan cig tu ste/ nor dang bcas par brlag par 'gyur ba'o//tshong gi rgyu yis 'chi zhes bya ba ni tshong sa nyid du 'chi ba'am/ nor don du gnyer ba'i rgyu mtshan nyid kyis 'chi ba'o/ /sbyor ba brtsam pa'i mtshan ma la/ /ye shes can gyis bgrang bar bya/ /zhes bya ba la sbyor ba zhes bya ba ni ro hi ta la sogs pa'i dus tshod do//mtshan ma ni ji ltar bstan pa bzhin du bris pa'o/ /gang du shes par bya zhe na/ bgrang bar bya zhes pa gsungs te re'u mig bcu gnyis bris pa'i gnas su'o/ /swab+na zhes bya ba la sogs pa la/ mgon med rnams kyi rtsa lag ste/ zhes pa ni pha ma la sogs pa med pa rnams la de'i bya ba byed pa'o//lhag ma ni go sla'o/ /bdag nyid seng ger sems pa dang / /zhes bya ba ni bdag las bzang ba gzhan su yang yod pa ma yin te/ bdag 'ba' zhig bzang po snyam pa'i khengs sems yod pa'o/ /lhag ma ni go sla'o/ /gzhan las brten pas 'tsho ba dang //zhes bya ba ni rgyal po'i 'khor la sogs pa'i las kyis 'tsho ba'o/ /lhag ma ni go sla'o/ /ka ma zhes bya ba la sogs pa la/ nor dang 'bru dang grong dang ni/ /phyugs dang rta sogs bzhon par ldan/ /zhes bya ba ni gser la sogs pa'i nor rnams dang //sA lu la sogs pa 'bru'i phung po la spyod cing / grong khyer ba rnams kyi dpon por bstabs nas/ phyugs la sogs pa mang du bsten pa de la de skad ces bya'o/ /lhag ma ni go sla'o/ /da ni re'u mig bcu gnyis su bkod pa'i nye bar bsdu ba gsungs pa/ sbyor ba'i mtshan ma bstan pa rnams//ngas bshad pa la the tshom med/ /ces bya ba la/ sbyor ba ni ro hi ta la sogs pa'o/ /mtshan ma ni mtshon par bya ba ste/ rim pa de dang des shes par bya'o/ /ngas bshad pa la the tshom med/ /ces bya ba ni/ ngas ji ltar gsungs pa'i tshig la yid gnyis ma byed cig ces rdo rje 'dzin pa'i bka' lung ngo //da ni skar ma la sogs pa mi gsal ba rnams mtshan nyid kyi sgo nas shes par bya ba'i phyir/ ro hi ta zhes bya ba la sogs pa gsungs te/ ro hi ta zhes bya ba ni/ ro hi ta la skyes pa'i mi'o/ /ni zhes bya ba ni nges par gzung ba ste/lha la mchod par byed par ro/ /des ni 'di skad du/ ro hi ta la skyes pa'i mi ni byis pa nas bzung ste nges par lha mchod par 'gyur ba'o zhes ston to/ /mo hi ta la zhes bya ba ni mo hi ta la skyes pa'i mi'o/ /nor la brkam zhes bya ba ni nor la sred cing nor rnyed par 'gyur ba'o//b+ha dra kha zas bzang po za/ /zhes bya ba ni b+ha dra las skyes pa'i mi'i rang bzhin nges par zas bzang po rnyed par 'gyur ba'o/ /br-i Sha b+ha la mang du khro/ /zhes bya ba ni br-i Sha b+ha la skyes pa'i rang bzhin nges pa ni lhag par khro ba zhes pa'i don to/ /kur ma zhes bya ba la sogs pa ni go sla'o//'brel par smra zhes bya ba ni mang du smra ba'o/ /raN+Da la ni sdig sems can/ /mi ki ra ni 'khrig la brten/ /zhes bya ba yang go sla'o/ /bi dri ka ni gnyid log cing / /zhes bya ba ni/ bi dri ka la skyes pa'i mi'i rang bzhin ni gnyid che ba'o/ / byA ku li ni bla rdol lo/ /zhes bya ba ni/ byA ku li las skyes pa'i mi'i rang bzhin ni gnyid log tsam na bla rdol du smra ba'o/ /swa b+na la rang nyid sems/ /zhes bya ba ni sems pa la dga' ba'i bdag nyid do/ /ka ma zhes bya ba la sogs pa la/ ka ma la skyes pa'i mi'i rang bzhin ni glu la sogs pa'i rol mo la dga' ba'o//de la lug gi chu tshod gsum la/ tha skar dang / bra nye dang smin drug gi bzhi cha gcig ste dgu'o/ /de'i 'og tu khyu mchog gi chu tshod bzhi la/ smin drug gi bzhi cha gsum dang / snar ma dang mgo'i phyed do//de'i 'og tu 'khrig pa'i chu tshod lnga la/ mgo'i phyed dang lag dang nab so'i bzhi cha gsum mo/ /de'i 'og tu karka Ta'i chu tshod de dang 'dra ba la/ nab so'i bzhi cha gcig dang / rgyal dang / skag go/ /de'i 'og tu seng ge'i chu tshod bzhi la/ mchu dang gre dang dbo'i bzhi cha gcig go/ /de'i 'og tu bu mo'i chu tshod gsum la dbo'i bzhi cha gsum dang / me bzhi dang / nag pa'i phyed do/ /de'i 'og tu srang gi chu tshod lnga la/ nag pa'i phyed dang / sa ga dang / sa re'i bzhi cha gsum mo/ /de'i 'og tu sdig pa'i chu tshod bdun la/sa ga'i bzhi cha gcig dang / lha mtshams dang / snron no/ /de'i 'og tu gzhu'i chu tshod drug la/ snrubs dang chu stod dang / chu smad kyi bzhi cha gcig go/ /de'i 'og tu chu srin gyi chu tshod de 'dra ba la/ chu smad kyi bzhi cha gsum dang / gro bzhin dang mon gru'i phyed do//de'i 'og tu bum pa'i chu tshod bdun la/ mon gru'i phyed dang / mon gre dang / khrums stod kyi cha gsum mo/ /de nas nya'i chu tshod lnga la/ khrums stod kyi cha gcig dang / khrums smad dang / nam gru'o/ /de ltar na lug la sogs pa'i nyi ma rnams ni skar ma gsum gsum la longs spyod par blta'i re rer ma yin no//ro hi ta la sogs pa'i sgras brjod pa'i chu tshod gsum la sogs pa'i sbyor ba rnams la go rims ji lta ba bzhin du zhi ba la sogs pa'i las rnams bya'o zhes bstan pa'i phyir/ ro hi ta la zhi ba'i las/ /zhes bya ba la sogs pa smos te go sla'o//ra yi khyu mchog grub pa ste/ /bdud rtsi sbyor ba skye bar 'gyur/ /zhes bya ba la/ ra ni rwa can no/ /khyu mchog ni gtso bo ste/ ro hi ta dang ma ka ra dang raN+Da dang mi ki ra rnams so/ /de dag ni b+ha drA la sogs pa'i rwa las ltos na khyu mchog yin no//grub pa zhes bya ba ni byar med pa ste shi zin pa dang 'dra ba'o/ /byar med pa nyid bstan pa'i phyir/ /bdud rtsi'i sbyor ba skye bar 'gyur/ /zhes bya ba smos so/ /yang na bsting ba'i tshig go/ /'khor lo bri ba'i dus la sogs pa'i nges pa bstan pa'i phyir/ /shar zhes bya ba la sogs pa smos te/shar phyogs kyi re'u cha la ro hi ta bkod la/ sogs kyis ni dbang ldan gyi re'u cha la sogs par mo hi ta la sogs pa dgod par bya ba'i don te/ /snga dro ni tho rangs kyi dus su'o/ /brtsi ba ni bgrang bar bya'o/ /ro hi ta la nor btang na/ /zhes bya ba'i bstan pa bshad pa'i phyir/ro hi ta la zhes bya ba la sogs pa smos te/ ro hi ta la btang ba'i nor gal te ldog pa na/ phyug cing rgyags pa nyid kyang ldog par 'gyur ro zhes bya ba'i don to/ /mo hi ta'i yang / gal te cung zad nor gtong na/ /zhes bya ba la sogs pa'i bstan pa bshad pa'i phyir/mo hi ta zhes bya ba la sogs pa smos te/ mo hi ta la nor sdud pa ni gzhan gyis dgag pa ste/ gnod par bya bar mi nus pa'o/ /b+ha drA la ni khyim brtsams na/ /dpal dang yang dag phrad par 'gyur/ /zhes bya ba ni b+ha drA'i sbyor ba la khyim brtsigs na dpal dang ldan par 'gyur ba'o//br-i Sha lha yi rnal 'byor gyis/ /sngags ni kun du grub par 'gyur/ /zhes bya ba la/ br-i Sha'i sbyor ba la lha ste ston pa'i sku gzugs la sogs pa brtsams pa dang / sngags te ston pa'i sngags bzlas pa brtsams na kun du ste kun nas yang dag par 'grub par 'gyur ba'o/kurma'i sbyor bas bag ma blang / /thams cad du ni 'bral mi 'gyur/ /zhes bya ba la/ kurma'i sbyor ba ste/ dus tshod la bag ma blangs na/ dus thams cad du dga' zhing mdza' la mi 'bral bar 'gyur ba'o/ /ma ka ra la zhing btab na/ /gdon mi za bar 'bru rnams 'phel//zhes bya ba ni/ ma ka ra'i sbyor ba la sa bon gdab pa brtsams na 'bru rnams 'phel zhing smin par 'gyur ba'o/ /raN+Dar bud med bgrod byas na/ /shi bar 'gyur kyang mi gtong ngo / /zhes bya ba ni raN+Da'i sbyor ba la bud med dang chags pa spyad na bud med de skye ba gzhan du yang de yir 'gyur ba'o//mi ki ra la tshong byas na/ /gtams pa da lta len par snang / /zhes bya ba ni mi ki ra'i sbyor ba la tshong byas pas thob pa'i nor ni skye ba snga ma la sogs pa la gzhag pa'i nor len pa ltar snang bar 'gyur ro/ /rtag tu brtan par gzhag bya ba'i//la sogs b+hi tri ka la gzung / /zhes bya ba ni b+hi tri ka'i sbyor ba la gang gzung ba de yun ring du gnas par 'gyur ba'o zhes bya ba'i don to/ /bya gu li la mgron zhugs na/ /'tshe ba med par gnas su phyin/ /zhes bya ba ni/ bya ku li'i sbyor ba la/ yul mtha' 'khob tu mgron lam du zhugs na nad dang chom po la sogs pa'i 'tshe ba med par der gnas su phyin pa'o//swap+nas thams cad kun du ni/ /nges par rtag tu mngon par 'ong / /zhes bya ba ni swap+na'i sbyor ba la gang zhig 'gro ba de slar yang ldog par 'gyur ba'o/ /ka ma la ni nor btang na/ /btang ba slar la ldog mi 'gyur//zhes bya ba ni go sla'o/ /klu rnams la yang ro hi ta la sogs pa'i sgras brjod par bstan pa'i phyir/ /ro hi ta ni nor rgyas bu/ /zhes bya ba la sogs pa smos te go sla'o/ /'di dag dug sbyor rim pa bzhin/ /bye brag tu ni shes par bya/ /zhes bya ba la/ sbyor ba zhes bya ba ni ro hi ta la sogs pa'o/ /dug gi rim pa zhes bya ba nyid 'di dag ces bya ba ste/ nor rgyas la sogs pa'o/ /bye brag tu ni shes par bya/ /zhes bya ba ni de dag sbyar te/ so sor shes par bya ba'am/ gsor rung ba dang mi rung ba'i bye brag shes par bya ba'o/ / de nyid kyi phyir gsungs pa/ rwa'i khyu mchog ces bya ba la sogs pa de bshad zin to/ /gang gis mche bas mngon zin pa/ /zhes bya ba ni klu gang gis mche bas zin pa'i sems can te/ dug sbyor rim bzhin shes par bya/ /zhes bya ba snga ma dang 'brel lo/ /'chi bdag dang ni phrad gyur pa'o//zhes bya ba ni 'og nas 'byung ba'i tshul gyis dus la bab pa dang ma bab pa shes par byas la/ gal te dus la bab pa'i tshe mche ba bzhis zin na de'i tshe slar ldog go zhes pa'i don to/ /dug bsdu ba yi sbyor ba dag /gzhan la dug ni sbyar bar bya/ /zhes bya ba la/ gzhan la dug ni sbyar bar zhes bya ba ni dus la ma bab pa'i sbyor ba'i dug rnams la'o/ /dug bsdu ba yi sbyor ba dag /ces bya ba ni bya zhes bya ba dang 'brel to/ /'og nas 'byung ba'i sbyor bas 'chi ba'i dus la ma bab pa'i mche ba brgyad kyis zin pa 'phrog pa ste/ pho nya dang /gzung ba'i gnas dang / tshes dang / skar ma dang / dus tshod rnams las dus la bab pa dang ma bab par shes par byas la sbyar ro zhes pa'i don to/ /da ni zla ba rnams kyi nyin zhag gi chu tshod kyi grangs nges pa bstan par bya ba'i phyir/ dus kyi mtshan ma zhes bya ba la sogs pa smos te/dus kyi mtshan ma ji bzhin du/ /go rims rim pa bzhin du bya/ /zhes bya ba ni re'u mig bcu gnyis la/ dpyid zla 'bring po la sogs pa'i zla ba rnams g.yon skor gyis re'u mig gang dang gang yin par zla ba de dang de'i mtshan ma bris la brtsi'o zhes bya ba'i don to//dpyid zla 'bring sogs rim bzhin du/ /zhes bya ba ni nyi ma byang du 'gro ba na/ dpyid zla 'bring po'i gnam stong nas bzung nas brtsam par bya'o/ /'gro ba'i tshe zhes bya ba ni 'gro ba'i dus so/ /byang du zhes bya ba ni lhor 'gro ba dang / byang du 'gro ba gnyis las lo'i rtsom pa yin pa'i phyir byang du 'gro ba gtso bo nyid du bstan pa'i phyir ro//ji lta'i dus bzhin mtshan ma ni/ /rim gyis rim gyis sbyar bar bya/ /zhes bya ba ni zla ba gang dang gang gi nyi ma de dang der re'u mig bcu gnyis la/ phyi rol gyi rtsis kyis bgrang ba'i rim bzhin shes par bya'o/ / nyin mo'i chu tshod so sor ni/ /mkhas pas bcu gnyis bzhir bsgyur bya/ /mtshan mo drug dang bcu gsum bsgyur/ /chu tshod mkhas pas brtsam par bya/ /zhes bya ba la/ nyi ma byang du 'gro ba'i tshe gnam stong nas bzung ste/ dpyid zla 'bring po'i nyi ma so so la nyi ma bcu gnyis su bsgyur ba ste/nyi ma nyi shu dang yang bzhi bzhi ste/ /chu tshod nyi shu rtsa bzhi'o/ /mkhas pas zhes bya ba ni brtsam par bya zhes bya ba dang sbyar ro/ /mtshan mo zhes bya ba 'dir yang so so zhes bya ba 'di dang sbyar te/ bcu gsum bsgyur zhes bya ba ni bcu phrag gsum du bsgyur ba ste sum cu'o/ / drug ces bya ba ni gzhan drug ste/ de ltar na chu tshod sum cu rtsa drug go/ /de ltar thams cad du sbyar zhing rdzogs par bya'o/ /'di'i bsdus pa'i don ni dpyid zla 'bring po'i nyin mo rnams la ni chu tshod nyi shu rtsa bzhi yin la mtshan mo rnams la ni chu tshod sum cu rtsa drug yin no zhes bya ba 'di yin no//re'u mig dang por son pa'i zla ba'i bstan nas/ re'u mig gnyis pa'i zla ba'i yang bstan pa'i phyir/ re'u mig dag ni gnyis pa la/ /zhes bya ba la sogs pa smos te/ re'u mig gnyis pa la zhes bya ba ni re'u mig gnyis par son pa'i dpyid zla tha chungs kyi'o/ /nyin mo zhes bya ba ni nyi ma'i cha la'o//drug dang bcu gnyis bsgyur zhes bya ba ni/ nyi shu rtsa drug go/ /mtshan mo zhes bya ba ni mtshan mo'i cha la'o/ /bzhi dang bcu gsum bsgyur ba zhes bya ba ni sum cu rtsa bzhi'o/ /dbyar zla ra ba'i bstan pa'i phyir gsungs pa/ brgyad dang zhes bya ba la sogs pa la/ brgyad dang bcu gnyis bsgyur ba dag /ces bya ba nyi shu rtsa brgyad do/ /nyin mo zhes bya ba ni chu tshod ces bya ba dang sbyar ro/ /gnyis dang bcu gsum bsgyur ba zhes bya ba ni sum cu rtsa gnyis so/ /chu tshod sum cu tham pa ni/ /dbus kyi bi shu gnyi gar sbyar/ /zhes bya ba la/ dbus zhes bya ba ni zla ba drug po rnams kyi dbus ma'o//gnyi ga zhes bya ba ni nyin mtshan gnyi ga'i cha la ste/ nyin mtshan cha gnyi ga la chu tshod sum cu sum cu mnyam par sbyar ba 'di ni bi shu zhes bya bar sbyar te/ dbyar zla 'bring po'i'o/ /dbyar zla tha chungs kyi gsungs pa/ /gnyis mtha' bcu ni gsum pa dag /nyin mo'i chu tshod ces pa ste/ /brgyad dang bcu ni gnyis po dag /de yi mtshan mo'i mtshan mar bya/ /zhes bya ba la/ gnyis mtha' zhes bya ba ni 'dir gnyis nyid mtha'o/ /gang gi zhe na/ bcu ni gsum pa dag ces bya ste sum cu tham pa'o/ /brgyad dang bcu ni gnyis po dag /ces bya ba ni nyi shu rtsa brgyad de mtshan mo'i chu tshod ces bya ba'i don to/ /ston zla ra ba'i bstan pa'i phyir gsungs pa/ bzhi dang zhes bya ba la sogs pa la/ bzhi dang bcu gsum ni sum cu rtsa bzhi ste/ zla ba de'i nyin mo'i chu tshod do/ /drug dang bcu ni gnyis bsgyur ba//zhes pa ni nyi shu rtsa drug go/ /ston zla 'bring po'i gsungs pa drug dang zhes bya ba la sogs pa la/ drug dang bcu ni gsum bsgyur ba/ /zhes bya ba ni sum cu rtsa drug go/ /bzhi dang bcu ni gnyis bsgyur ba/ /zhes bya ba ni nyi shu rtsa bzhi'o/ /lhag ma ni go sla'o/ /byang du bgrod pa bshad nas ni//de bzhin gzhan gyi dus zhes bya/ /zhes bya ba la/ dpyid zla 'bring po'i gnam stong nas bzung nas/ nyin zhag sum cu zhing zla bar byas pa'i zla ba drug tu byang du 'gro ba bstan nas/ da ni ston zla 'bring po'i gnam stong nas brtsams nas/ zla ba drug tu ni nyi ma lhor 'gro bar shes par bya'o zhes bya ba'i don to//ston zla tha chungs kyi gsungs pa bzhi dang bcu ni gsum bsgyur zhes bya ba la sogs pa la/ gsum zhes bya ba ni bcu zhes pa'i lhag ma'o/ /des ni sum cur bsgyur ba yin la/ gzhan bzhi dang sbyar bas sum cu rtsa bzhir 'gyur ro//nyin mo ni zla ba de'i nyi ma'i cha la'o/ /drug dang bcu ni gnyis bsgyur ba/ /zhes bya ba ni nyi shu rtsa drug go/ /mtshan mo'i zhes bya ba ni mtshan mo'i cha la'o/ /dgun zla ra ba'i gsungs pa/ gnyis dang bcu ni gsum bsgyur ba/ /zhes bya ba la sogs pa la/ /gnyis dang bcu phrag gsum du bsgyur ba ni sum cu rtsa gnyis so//brgyad dang bcu ni gnyis bsgyur ba/ /zhes bya ba la/ brgyad dang bcu phrag gnyis su bsgyur ba ni nyi shu rtsa brgyad do/ /dgun zla 'bring po'i gsungs pa/ bcu ni gsum du bsgyur ba dag /ces bya ba la sogs pa smos te/ bi shu zhes bya ba ni dbyar zla 'bring po'i bzhin du blta bar bya'o/ /nyin mo'i zhes bya ba ni nyin mo'i cha'o/ /mtshan mo ni mtshan mo'i cha'o/ /bcu ni gsum du bsgyur bar bya/ /zhes bya ba ni sum cu tham pa ste cha gnyi ga la yang sum cu sum cur shes par bya'o/ /dgun zla tha chungs kyi gsungs pa/brgyad dang zhes bya ba la sogs pa la/ brgyad dang bcu ni gnyis bsgyur ba/ /zhes bya ba ni nyi shu rtsa brgyad do/ /gnyis dang bcu ni gsum bsgyur ba/ /zhes bya ba ni sum cu gnyis so/ /dpyid zla ra ba'i gsungs pa/ drug dang zhes bya ba la sogs pa la/ drug dang bcu ni gnyis bsgyur ba//zhes bya ba ni nyi shu rtsa drug go/ /bzhi dang bcu ni gsum bsgyur ba/ /zhes bya ba ni/ sum cu rtsa bzhi'o/ /lhag ma ni go sla'o/ /dpyid zla 'bring po'i nyin zhag gi chu tshod rnams nye bar bsdu ba'i phyir/ sum brgya lnga bcu lnga gnyis kyi//dbugs kyi chu tshod dus rnams 'da'/ /zhes bya ba la sogs pa gsungs te/ sum brgya ni brgya phrag gsum mo/ /lnga bcu ni grangs lnga bcu'o/ /lnga gnyis ni bcu ste bcu dang lnga bcus ni drug cur 'gyur ro/ /dbugs ni sna sgo'i rlung rgyu ba ste/ de ltar na dbugs rgyu ba sum brgya drug cus/chu tshod dus rnams 'da' zhes bya ba chu tshod gcig tu 'gyur ro/ /chu tshod drug cu'i grangs kyis ni/ /nyin mtshan phrugs gcig tu ni brjod/ /ces bya ba ni go sla'o/ /gzhung kha cig las ni sum brgya dang ni drug cu'i zhes 'byung ste/der yang don de nyid yin no/ /zla ba'i go rims ji bzhin du/ /rim pa de bzhin mtshan ma bya/ /zhes bya ba la/ zla ba'i go rims ji bzhin du re'u mig rnams la chu tshod gsum la sogs pa'i mtshan ma'i rim pa bzhin du byas la brtag par bya'o zhes bya ba'i don to//chu tshod dbugs sogs rdzogs pa dang / /bi shu ma gtogs rim 'phel 'dri/ /zhes bya ba la zla ba bcu gnyis kyi dbugs yongs su rdzogs pa'i chu tshod las/ bi shu'i zla ba gnyis ma gtogs pa'i zla ba'i lhag ma rnams kyi nyin dang mtshan gyi chu tshod 'phel ba dang 'bri ba phra mo rnams kyang sngar bshad pa'i rigs pa las shes par bya'o zhes bya ba'i don to//las dang las min bye brag bzhin/ /dbugs ni rim gyis gzung bar bya/ /zhes bya ba la/ las dang las min bye brag ni/ /zhi ba la sogs pa dge ba'i las dang mngon par spyod pa la sogs pa dge ba ma yin pa'i dbye ba'o//dbugs kyi rim gyis gzung bar bya/ /zhes bya ba ni rlung la sogs pa sbyor ba bzhin dbugs kyi rim pas so sor gzung bar bya ba'o/ /de la rlung ni sor drug go/ /me ni sor bzhi'o/ /chu ni sor bcu gnyis so/ /dbang chen ni sor bcu drug tu rgyu bar shes par bya'o//nyi khri dang ni zhes pa la sogs pa'i nye bar bstan pa bshad pa'i phyir/ kha dang ra la sogs zhes bya ba la sogs pa smos te/ sogs pa'i sgra ni gnyi ga dang sbyar bar bya'o/ /des na kha la sogs pa zhes par 'gyur te/ kha la sogs pa'i yi ge nyi shu rtsa bzhi dang /ra la sogs pa'i yi ge drug ni kha dang ra sogs so/ /des ni nyi shu rtsa bzhi dang drug gi mtshan ma bya bar ston to/ /dus tshigs dang zhes bya ba ni dus drug gi mtshan ma gzung bar bya ste/ nyi shu rtsa bzhi dang / drug phrag gnyis kyis ni sum cu rtsa drug tu 'gyur ro//bgrod pa gnyis kyis mtshon par bya/ /zhes bya ba ni sum cu rtsa drug gi mtshan ma de nyid mnyam po gnyis bgos pas/ bco brgyad bco brgyad du 'gyur te/ bco brgyad pa phrag gnyis kyi mtshan ma bya'o/ /gnyis po dag ni bcur bsgyur ba/ /zhes bya ba ni/ gnyis po de dag bcu bcur bsgyur la brtsi ba ste/des kyang brgya brgya bcu phrag gnyis su 'gyur ro/ /de las brgya phrag gnyis gcig tu bsres te/ nyis brgya'i mtshan ma byas la bcu phrag brgyad pa gnyis las bcu'i mtshan ma dang drug gi mtshan ma so sor byas la/ bcu drug gi mtshan ma bya'o//de'i rtsar thig le gnyis bzhag pas nyi khri chig stong drug brgyar 'gyur te/ des ni lo'i chu tshod kyi grangs kyi mtshan mar 'gyur ro/ /de yis mtshan mar ldan pa yis/ /nyin mtshan gyi ni dbugs su brtsi/ /zhes bya ba ni lo'i chu tshod kyi grangs kyi mtshan ma de nyid kyis/nyin mtshan gyi dbugs kyi mtshan ma yang bstan pa yin te/ stong phrag nyi shu rtsa gcig dang drug brgyar 'gyur ro/ /da ni chu zhag brtsi ba bstan pa'i phyir/ ngag gi dbang phyug kun bzung nas/ /zhes bya ba la sogs pa smos te/ de la ngag gi dbang phyug ni 'dri ba po'i ngag gi yi ge rnams so//kun ni mthar thug pa ste/ dper na ma zhes bya ba smos na/ ka'i mthar thug pa nyi shu rtsa lnga'i mtshan ma bya'o/ /de bzhin du gsal byed gzhan la yang sbyar bar bya'o/ /dbyangs kyi yi ge yang gsal byed dang phral te/ de lta bu'i mtshan ma bya bar bstan par bya ba'i phyir/dbyangs kyi mtshan ma mngon par gzhag /ces bya ba smos te go sla'o/ /yang na ngag gi dbang phyug ni 'dri ba po'o/ /gzung ba ni me tog ste/ me tog gi ming gi yi ge ji snyed yod pa'i mtshan ma snga ma ltar bri ba'o/ /de nas ci zhig bya zhe na/drug 'gyur du ni bzhag nas su/ /zhes bya ba la sogs pa 'og nas 'byung ba dang sbyar ro/ /des kyang ci zhig bya zhe na/ ma ning gnyis ni spangs nas su/ /sa yi dbang phyug kun du gzhag /ces bya ba la sogs smos te/ ma ning gnyis ni r-i r-I dang l-i l-I'o/ / spangs pa ni dor ba'o/ /sa ni re'u mig bcu gnyis so/ /de'i dbang phyug ni a la sogs pa'i dbyangs kyi yi ge bcu gnyis te/ kun du gzhag pa ni rim pa bzhin du gzhag pa'o/ /de'i 'og tu cho ga bzhin du brtsi bar bya ste/ de nyid kyi phyir gsungs pa/ a yi rim pa la bab na//zhes bya ba la sogs pa ste go sla'o/ /ji ltar sngon gyi a zhes pas/ de bzhin tha ma gzung bar bya/ /zhes bya ba ni yi ge a'i 'bras bu yang ji lta ba bzhin du yi ge a'i 'bras bu yang shes par bya ba'i don to/ /ngag gi dbang phyug kun bzung nas/ zhes bya ba gong du thal ba'i 'phro bstan pa'i phyir/drug 'gyur zhes bya ba la sogs pa smos te/ drug 'gyur du ni bzhag nas su/ /zhes bya ba ni sngar gyi yi ge ji snyed yod pa'i mtshan ma de yang drug 'gyur du bsgre ba'o/ /snga ma de sum 'gyur du bya/ /zhes bya ba ni ngag gi yi ge'i grangs ji snyed yod pa de nyid ni snga ma zhes bya ste/de nyid de'i 'og tu sum 'gyur du bsgre bar bya'i drug 'gyur du bsgres pa ji snyed pa ni ma yin no zhes bya ba'i don to/ /sum brgya drug cu bsres nas ni/ /zhes bya ba ni de'i 'og tu yang grangs sum brgya drug cu lhag par bsnan pa'o/ /de nas ci zhig bya zhe na/sa bzhin du ni bcad nas su/ /zhes bya ba smos te/ sa ni sa bcu gnyis so/ /bcad pa ni gtub pa ste grangs bcu gnyis bcu gnyis su gtubs te brtsi ba'o/ /yi ge zhes bya ba la sogs pa la yi ge ni a la sogs pa'o/ /lhag ma ni grangs kyi lhag mar gyur pa ste/ lhag ma ni grangs kyi dbye bas yi ge de bzung la/ dge ba dang mi dge ba mtshon pa ste sngar smos pa bzhin brtag par bya'o zhes bya ba'i don to/ /mo gdab pa bstan pa'i phyir/ yang na zhes bya ba la sogs pa smos te/ yang na ri mo kyag kyog bri/ /dbyangs kyi dang po la sogs bgrang //zhes bya ba ni ye shes mkha' 'gro ma'i sngags kyis btab pa'i thod lo kor gyis/ glang gi gcin rjes lta bu'i ri mo sngags lan cig bzlas nas/ sems kyis ci tsam 'dod par drangs la/ ri mo tha ma nas brtsams te/ dang po'i bar du 'bur ba rnams bgrangs nas/grangs kyi tha ma a la sogs pa'i yi ge gang la bab pa'i 'bras bu yin par brtag par bya'o zhes bya ba'i don to/ /yang na me tog gtor nas na/ zhes bya ba ni/ yang na sngar bris pa'i gnas der blo mi g.yeng bas me tog gtor la/de bzhin sa ni mtshon par bya/ /zhes bya ba re'u mig gis gang yin pas dge ba dang sdig pa mtshon par bya'o/ /snga dro ro hi ta dus su/ /bden pa thams cad blta bar bya/ /zhes bya ba ni bcu g.yag dang mo de dag ro hi ta'i sbyor ba la brtags na/ dge ba dang dge ba ma yin pa thams cad bden pa ste nges par blta bar bya'o zhes bya ba'i don to//rnal 'byor bstan bcos rab tu bsngags/ /zhes bya ba la/ rnal 'byor gyi bstan bcos ni sngags kyi tshul lo/ /rab tu bsngags pa ni dge ba dang sdig pa brtag pa'i cho ga de dag sangs rgyas rnams kyis bstod pa'o//bdag gi gdan gyi rab tu byed pa las zhes bya ba la/ bdag ces bya ba ni rang gi lus te/ de rlung la sogs pa'i de kho na nyid kyi gnas su gyur pas gdan te gzhi'o/ /rab tu byed pa zhes bya ba ni gzhung 'dir rlung gi de kho na nyid la sogs pa rab tu bkod cing gsal bar byas pas na/'di ni rab tu byed pa'o/ /dpal gdan bzhi pa'i 'grel pa dran pa'i rgyu mtshan zhes bya ba las/ bdag gi gdan gyi rim par phye ba dang po'o// //da ni 'chi ba'i mtshan ma shes nas/ de slu ba'i rim par phye ba bstan par bya ba'i phyir/ye shes de nyid ces bya ba la sogs pa smos te/ ye shes de nyid ni bye brag ces bya ba na dug 'phrog pa la sogs pa'o/ /lus kyi mtshan ma ji lta bu/ /zhes bya ba ni lus la snang ba'i 'chi ltas kyi mtshan ma'o/ /de nyid gang la brten par bgyi/ /zhes bya ba ni sngags kyi kho na nyid gang rten la bzlog pa'o//lan gsungs pa/ lus kyi mtshan ma ston pa rnams/ /zhes bya ba la sogs pa smos te/ lus kyi mtshan ma ston pa rnams/ /zhes bya ba ni lus la snang ba'i dbugs rnam par rgod pa la sogs pa 'chi bar ston pa rnams te/ nyon cig ces bya ba dang sbyar ro//'chi ba'i dus la bab par gnas/ /zhes bya ba ni nges par 'chi ba'i dus la bab par gnas pa ste gyur pa'o/ /rdo rje rgyal chen po zhes bya ba la/ rdo rje ni mi bskyod pa'o/ /de nyid ni rgyal po chen po ste sprul pa'i sku rnams kyis mdzes pa'i phyir ro/ /de su'i yin pa de la yang de skad ces bya ste/bod pa'o/ /nyon cig ces bya ba ni 'og nas 'byung ba rnams mnyan pa'i phyir gdams pa'o/ /mtshan ma rnams gsungs pa/ dbugs ni rnam par rgod tsam gyis/ /zhes bya ba la sogs pa la/ dbugs rnam par rgod pa ni tha mal par gnas pa las gzhan du gyur pa ste/'phel ba dang bri ba'o/ /lus can zla ba drug gis 'chi/ /zhes bya ba ni go sla'o/ /yang na rnam par rgod pa zhes bya ba ni/ 'jug pa dang 'byung ba la sogs pa'i gnas phyin ci log tu gyur pa'o/ /rnam par rgod pa ji lta bu zhig gis she na/ 'jigs pa cung zad mthong min na/ /zhes bya ba la sogs pa smos te/ 'jigs pa cung zad mthong ba ni kha cig tu gzugs mi sdug pa mthong bas/ 'jigs pa ste skrag par byas pa'o/ /mthong ba ni nye bar mtshon pa ste/ khon du 'dzin pa'i sgra thos pa la sogs pas skrag pa yang gzung bar bya'o//de lta bu'i 'jigs pa ma gtogs par dbugs rnam par rgod par gyur na/ de'i tshe 'chi bar nges par ston gyi gzhan du 'jigs pa la sogs pas byas pa'i dbugs rnam par rgod pas ni ma yin no/ /'gram pa'i mtshams ni bye gyur na/ /zhes bya ba ni gal te glo bur du 'gram pa'i mtshams kyi sha med cing ri mo shong shong por gyur pa de'i tshe 'chi bar 'gyur ba de nyid du ston te/'dir yang 'jigs pa cung zad mthong min zhes bya ba dang sbyar ro/ /de'i tshe dus la bab par 'gyur/ /zhes bya ba ni gdon mi za bar 'chi ba'i spyod yul la reg pa'o//dbugs ni chad cing chad 'gyur ba/ /zhes bya ba ni rnam par rgod pa'i nye bar bstan pa ste/ tha mal pa las gzhan du gyur pa'o/ /gang gi tshe brtag par bya zhe na/ snga dro ro hi ta dus su/ /zhes bya ba smos te/ tho rangs kyi chu tshod gsum la 'jigs pa la sogs pas byas pa ma yin pa'i lus la snang ba'i rtags thams cad ni nges pa nyid du gzung bar bya'o zhes bya ba'i don to//sna yi bar sha chad gyur na/ /zhes bya ba ni sna zam gyi sha chad pa ste/ gang gi tshe sna la gnas pa'i rtsa chad pa de'i tshe/ sna zam gyi sha chad pas sna yon po nyid du 'gyur ro//nyi ma bdun na gdon mi za/ /zhes bya ba ni nyin zhag bdun na 'chi bar the tshom med pa'o/ /mig gi chu ni chad gyur na/ /zhes bya ba la/ mig gi chu ni mchi ma ste/ chad pa ni zad pa'o/ /gang gi tshe mig la gnas pa'i rtsa chad pa na/ mig gi mchi ma zad par 'gyur pa'o//de bzhin nyi ma lnga yis 'chad/ /ces bya ba la/ 'chad pa ni srog zad cing 'gag pa ste/ nyi ma lnga nas 'chi bar 'gyur ba'o/ /'gram pa'i logs kyi mtshan ma yi/ /zhes bya ba ni 'gram pa'i logs na snang ba'i mtshan ma ste/ gang gi tshe 'gram pa'i logs na gnas pa'i rtsa chad pa de'i tshe/'gram pa'i logs na ri mo shong shong po ring po snang ba'o/ /zhag gcig las ni mi 'tsho'o/ /zhes bya ba ni go sla'o/ /'gram pa'i logs de nyid na ri mo shong shong po khron pa'i khung bu ltar snang bas ni/ zla ba drug na 'chi bar 'gyur ro zhes bya ba snga ma dang sbyar ro//rna ba'i chol zangs ltebs pa yis/ /zhes bya ba la chol zangs ni go bar zad do/ /ltebs pa ni chag pa ste/ gang gi tshe rna ba gnyis la gnas pa'i rtsa chad pa na/ rna ba'i skor chag par 'gyur ro/ /chu tshod lnga na gdon mi za/ /zhes bya ba ni chu tshod lnga tshun chad kyis the tshom med par 'chi bar 'gyur ba'o//'dir ni lce yi thig nag na/ /zhes bya ba ni gang gi tshe lce la gnas pa'i rtsa chad pa de'i tshe 'dir te lus la lce'i thig le nag ste/ lce'i rtse mo la sogs pa nag por snang ba'o/ /lus can zhag gnyis 'chi bar 'gyur//zhes bya ba ni go sla'o/ /steng 'og so ni 'thams pa na/ /zhes bya ba la/ steng 'og gi so 'thams pa ni so'i phreng ba gnyis mtshams med pa ste/ gang gi tshe so'i mtshams na gnas pa'i rtsa chad pa na/ so 'thams pa'i mtshan ma snang bar 'gyur ro/ /zhag gsum 'chi bdag phrad par 'gyur//zhes bya ba ni go sla'o/ /mgrin pa'i logs kyi phyi rol rtsa/ /zhes bya ba la/ gang gi tshe mgrin pa gnyis kyi logs na gnas pa'i rtsa nyams pa de'i tshe/ mgrin pa'i logs gnyis su khyur khyur po mthon por 'gyur te mtshan ma'o/ /zla ba phyed na gdon mi za//zhes bya ba ni zla ba phyed tshun chad na the tshom med par bstan pa'i phyir 'chi ba'o/ /brang gi dra ba zhom gyur na/ /zla phyed sman pas gsor mi rung / /zhes bya ba la/ brang gi dra ba zhom pa ni khung bu brang du bros pa ste/ gang gi tshe brang gi dra ba la gnas pa'i rtsa chad pa de'i tshe brang gi dra ba zhom par gyur pa'o//zla phyed ces bya ba ni zla ba phyed na 'chi ba'o/ /the tshom med par bstan pa'i phyir/ /sman pas gsor mi rung zhes bya ba smos te go sla'o/ /sen mo'i khrag ni med pa yis/ /lus can nyi ma brgyad na 'chi/ /zhes bya bas/ sen mo'i khrag med pa ni glo bur du dkar por gyur pa ste/gang gi tshe sen mo la gnas pa'i rtsa chad par gyur pa de'i tshe/ glo bur du sen mo dkar por snang bar 'gyur ba'o/ /lus can nyi ma brgyad na 'chi/ /zhes bya ba ni go sla'o/ /'chi ba'i mtshan ma brgyad bcas pas/ /zhes bya ba la/ brgyad ni grangs brgyad do/ / bcas pa ni de dang bcas pa ste dgu pa'o/ /de ltar na 'chi ltas kyi mtshan ma dgu yin par ston to/ /'chi ba'i dus bab mtshon par bya/ /zhes bya ba la/ dus bab ni dus la bab par gnas pa ste/ sngar bstan pa'i mtshan ma dgu lus la snang bas lus can rnams the tshom med par 'chi ba nyid du mtshon par bya ba'o//de ltar 'chi ba'i mtshan ma bstan nas/ da ni 'chi ba slu ba bstan pa'i phyir/ sna yi bar sha chad pa la/ /zhes bya ba la sogs pa smos te/ sna yi bar sha chad pa la/ /zhes bya ba ni sna'i rtsa chad pa dgang ba la'o/ /ye shes sa bon gyis gzir bya//zhes bya ba la/ ye shes sa bon ni ye shes mkha' 'gro ma'i sa bon te hUM ngo / /gzir bar bya zhes bya ba ni hUM gis bdud rtsi'i rgyun 'jigs su rung bas gnas te tshim par bya zhes bya ba'i don to/ /yang na hUM yongs su gyur pa las byung ba'i ye shes mkha' 'gro ma 'og nas 'byung ba'i gzugs can gnas der bsgoms la dgang bar bya ste/'di ltar rtsa chad pa'i sgo nas ni 'chi bar 'gyur la/ de bkang ba las ni de ldog par 'gyur ro zhes bya ba'i don to/ /des na thams cad du sa bon gyis tshim par bya ba'am/ lha'i rnal 'byor du bsgom par bya bar ston to//mig gi chu ni chad pa na/ /rdo rje ma yi sa bon gzung / /zhes bya ba la/ mig gi chu chad pa ni des mtshon pa'i mig gi rtsa chad pa'i tshe na'o/ /rdo rje ma yi sa bon gzung / /zhes bya ba ni gnas der rdo rje mkha' 'gro ma'i sa bon yi ge suM mam/ de yongs su gyur pa las byung ba'i rdo rje mkha' 'gro ma'i sku bdud rtsi'i rgyun 'dzag pa dang ldan pas lus tshim par bya'o zhes bya ba'i don to//khur tshos logs kyi mtshan ma la/ /drag mo'i sa bon gzir bar bya/ /zhes bya ba ni khur tshos logs kyi rtsa chad pa la drag mo mkha' 'gro ma'i sa bon yi ge k+ShuM ngam/sa bon gyur pa las byung ba'i drag mo mkha' 'gro ma'i sku'i bdud rtsis dgang bar bya'o zhes bya ba'i don to/ /rna ba'i chol zangs zhom pa la/ /ro langs ma yi sa bon dgang / zhes bya ba ni rna ba'i rtsa chad pa la gnas der ro langs ma'i sa bon yi ge yuM ngam/ sa bon yongs su gyur pa las byung ba'i ro langs ma'i bdud rtsis dgang bar bya'o zhes bya ba'i don to/ /lce yi thig nag 'di la ni/ /gtum mo'i sa bon bsam par bya/ /zhes bya ba ni lce'i rtsa chad pa'i gnas der gtum mo'i yi ge hUM ngam/ de yongs su gyur pa las byung ba'i gtum mo bdud rtsi dang bcas pa bsgom mo zhes bya ba'i don to//so dang so ni 'thams pa la/ /seng ge mo yi sa bon brdeg /ces bya ba ni so'i rtsa chad pa la/ seng ge ma'i sa bon smraM dam/ de yongs su gyur pa las byung ba'i seng ge mo'i gzugs bdud rtsi dang bcas pa brdeg pa ste/gzugs shing bsgom mo zhes bya ba'i don to/ /mgrin pa'i logs kyi phyi rol rtsa/ /stag mo'i sa bon brdeg par bya/ /zhes bya ba ni mgrin pa'i logs kyi rtsa gnyis chad pa'i gnas der stag mo'i sa bon h+m+raM ngam/ de yongs su gyur pa las byung ba'i stag mo bdud rtsi dang bcas par bsgom mo zhes bya ba'i don to//brang gi dra ba zhom pa la/ /ce spyang sa bon gzung bar bya/ /zhes bya ba ni brang gi dra ba'i rtsa chad pa na/ der ce spyang gi sa bon yi ge y+m+raM mo zhes bya ba'i don to//lag pa'i sen khrag med pa la/ /'ug pa mo yi sa bon gzung / /zhes bya ba ni lag pa'i sen mo la gnas pa'i rtsa chad pa la/ der 'ug pa mo'i sa bon yi ge yu k+Sh+m+ra mo zhes bya ba'i don to//nye bar bsdu ba bstan pa'i phyir/ /'chi ltas yan lag mtshan ma ni/ /sa bon de dag dgod pas bsrung / /zhes bya ba smos te/ gang gi lus la 'chi ltas kyi mtshan ma sngar bshad pa rnams snang na/ gnas der de dag ces bya ba ye shes mkha' 'gro ma la sogs pa rnams kyi sa bon hUM la sogs pa sngar bshad pa'i rim pa ltar bkod pas bsrung bar bya'o zhes bya ba'i don to//da ni gnas phyi'i srung ba bstan pa'i phyir/ phyi nas zhes bya ba la sogs pa smos te/ phyi nas ye shes 'khor lo ni/ bri ba'i cho gas rnam shes bsrung //zhes bya ba la/ phyi nas zhes bya ba ni gzhan no/ /ye shes 'khor lo ni 'og nas 'byung ba'i 'khor lo'o/ /rnam shes ni bsgrub par bya ba'i srog go/ /srung ba ni go sla'o/ /gzhung gzhan las ni/ gzhan du srung ba bshad par bya/ /zhes 'byung ste/ der gzhan zhes bya ba ni tshul gzhan gyis so//srung ba ni srog gnas pa ste/ lhag ma ni snga ma bzhin no/ /srung ba'i cho ga nyid bstan pa'i phyir/ ma bsregs zhes bya ba la sogs pa smos te/ ma bsregs kham phor gnyis ni mes ma btsos pa'i kham phor gnyis so/ /gur gum go ro tsa na yis//zhes bya ba ni gur gum dang go ro tsa na gang yang rung bas sam/ yang na de gnyis bsres pas so/ /bri zhes bya ba ni 'khor lo zhes bya ba snga ma dang sbyar ro/ /'og gi cha ni re'u mig dgu/ /zhes bya ba ni kham phor 'og ma'i gzhi la/ thig bzhi btab pas re'u mig gi cha dgur bya ba'o//de bzhin steng la bcu gnyis bya/ /zhes bya ba ni kham phor steng ma'i gzhi la yang snga ma ltar thig bzhi btab pas dgur byas la/ slar yang mtshams kyi re'u mig bzhi la thig bzhi btab pas re'u mig gi cha bcu gnyis su bya ba'o/ /dbus su ming ni bris nas su//zhes bya ba ni 'khor lo'i dbus te snying po'i re'u mig la/ bsgrub par bya ba'i ming bri ba'o/ /de bzhin sa bon mngon par bskor/ /zhes bya ba ni sngags kyi sa bon yi ges mngon par bskor ba ste/ sngags kyi yi ge dang spel ba'i ming bri'o zhes bya ba'i don to/ /spel ba nyid bstan pa'i phyir phyag 'tshal zhes bya ba la sogs pa smos te/phyag 'tshal dbyangs ni yi ge oM ste/ phyag 'tshal gyi sgra'i rang bzhin no/ /dang po zhes bya ba thog ma ste/ ci'i zhe na/ bsgrub bya'i ming gis zhes bya bar blta'o/ /bsgrub bya'i ming yang gang du zhe na/ bsrung ba'i tshig gi sngon du bya//zhes bya ba smos te/ rak+Sha rak+Sha zhes bya ba'i sngon du ming bri zhing mthar rak+Sha zhes bya ba'i tshig bri ba'o/ /sangs rgyas lnga sogs ldan pa yi/ /sa bon mtha' ru gnas pa ste/ /zhes bya ba la/ mthar ni rak+Sha zhes bya ba'i sgra'i mtha' ste/ der sangs rgyas lnga'i sa bon te hUM bri ba'o//sreg byed yi ge de yi mtha'/ /zhes bya ba la/ de'i mtha' ni yi ge hUM gi mthar ro/ /sreg byed kyi yi ge ni swA hA ste de bri ba'o/ /bsdus pa'i don ni/ oM de ba dat+ta rak+Sha rak+Sha hUM swA hA zhes bya bar 'gyur te/ rak+Sha'i sgra gnyis ni man ngag las shes par bya'o//steng sogs mu khyud dbyangs yig dgod/ /ces bya ba la/ steng gi sgra ni phyi rol gyi tshig go/ /mu khyud ni kha khyer te/ re'u mig dgu'i phyi rol gyi ri mo gnyis kyi bar du'o/ /dbyangs yig ces bya ba ni/ dbyangs kyi yi ge bcu drug go/ / kham phor steng ma la yang de bzhin du bri bar shes par bya'o/ /yang na steng zhes bya ba ni steng gi kham phor ro/ /mu khyud ces bya ba ni 'og gi kham phor ro/ /lhag ma ni snga ma bzhin no/ /bskor ba gzhan gsungs pa/ kha pha zhes bya ba la sogs pa la kha zhes bya ba ni hUM ngo //pha zhes bya ba ni yuM ngo / /nyis 'gyur zhes bya ba ni k+ShuM ngo / /lha mo rdo rje ma zhes bya ba ni/ lha mo rdo rje ma'i sa bon yi ge suM ngo / /sangs rgyas lnga'i sa bon zhes bya ba ni sangs rgyas lnga phan tshun ldan pa'i sa bon te hUM ngo / /thams cad phyag 'tshal sred byed mtha'//zhes bya ba la/ thams cad kyi dngos por phyag 'tshal te/ oM dang thams cad mthar sreg byed de swA hA dang sbyar ro/ /de dag gi don ni 'di yin te/ oM de ba dat+taM rak+Sha rak+Sha hUM hUM swA hA/ oM de ba dat+taM rak+Sha rak+Sha yuM hUM swA hA/ oM de ba dat+taM rak+Sha rak+Sha k+ShuM hUM swA hA/ oM de ba dat+taM rak+Sha rak+Sha suM hUM swA hA/ rnal 'byor ma rnams kyi sngags btu ba'o/ /yi ge hUM gi cha shas sangs rgyas lngar bstan pa'i phyir/ dbyug pa 'jig rten dbang phyug mgon/ /zhes bya ba la sogs pa smos te/ dbyug pa zhes bya ba ni yi ge ha'i 'og gi cha'i ri mo'o/ /'jig rten dbang phyug mgon zhes bya ba ni snang ba mtha' yas so//gya gyu zhes bya ba ni zhabs skyed do/ /phyag na rdo rje zhes bya ba ni mi bskyod pa'o/ /lus zhes bya ba ni yi ge ha'i steng gi cha'o/ /'jam pa'i mchog ces bya ba ni rin chen 'byung ldan no/ /bum pa zhes bya ba ni zla ba phyed pa'o/ /byams pa zhes bya ba ni don yod grub pa'o//steng du 'bar ba'i ma yig ni/ /'khor ba thams cad sgrol byed pa/ /zhes bya ba la/ ma yig ces bya ba ni steng gi thig le'o/ /'bar ba zhes bya ba ni rnam par snang mdzad do/ /'khor ba thams cad sgrol byed pa/ /zhes bya ba ni/ de ltar sangs rgyas lnga'i yan lag las bsdus pas ni hUM ngo //de la shar gyi phyogs gnas pa/ /lha mo rdo rje mkha' 'gro ma/ /zhes bya ba ni sngar mkha' 'gro ma rnams kyi sngags btu ba bstan pa'i dgod pa'i gnas dang / lha mo gang gi ngo bo nyid yin pa ston par mdzad pa ste/ shar gyi phyogs gnas pa zhes bya ba ni/ re'u mig dgu'i shar phyogs kyi re'u cha la bri ba'o/ /der ci zhig ce na/ lha mo rdo rje mkha' 'gro ma/ /zhes bya ba ste/ rdo rje mkha' 'gro ma'i rang bzhin gyi sngags/ oM de ba dat+taM rak+Sha rak+Sha suM hUM swA hA zhes bya ba'o/ /byang du drag mo zhes pa'i sa bon nyid ni sbyar bar bya ba ni de bzhin du g.yon skor gyis byang phyogs kyi re'u cha la/drag mo zhes bya ba drag mo'i rang bzhin can gyi sa bon zhes bya ba oM de ba dat+taM rak+Sha rak+Sha k+ShuM hUM swA hA zhes bya ba'i sngags sbyar ba ste bri ba'o zhes bya ba'i don to/ /nub kyi phyogs su gnas pa ni/ /zhes bya ba ni nub phyogs kyi re'u cha la gnas par ro langs ma'i sa bon zhes bya ba ni ro langs ma'i rang bzhin gyi sngags/oM de ba dat+taM rak+Sha rak+Sha yuM hUM swA hA zhes bya ba'o/ /sbyar ba ni bri ba'o/ /lho'i phyogs zhes bya ba ni lho phyogs kyi re'u cha la'o/ /gtum mo'i sa bon zhes bya ba'i oM de ba dat+taM rak+Sha rak+Sha hUM hUM zhes bya ba'i sngags so/ /rdzogs par bstan zhes bya ba ni yongs su rdzogs par bri ba'o//dbang ldan du ni seng ge mo/ /zhes bya ba la sogs pa la dbang ldan gyi mtshams su seng ge mo'i sngags smraM sngags y+m+raM shes par bya'o//mtshams na gnas pa'i sa bon ni/ /bzhi po yi ge drug gi dngos/ /zhes bya ba ni seng ge mo la sogs pa'i sa bon mtshams na gnas pa bzhi po de dag ni re re zhing yang yi ge drug brtsegs pa'i rang bzhin no zhes bya ba'i don to/ /sngags dgod pa nye bar bsdu ba bstan pa'i phyir/phyogs dang zhes bya ba la sogs pa smos te/ phyogs la sogs pa'i re'u mig ji lta ba bzhin du smos pa'i tshul gyis sa bon de dang de dag dgod par bya'o zhes bya ba'i don to/ /steng gi gnas ni bcu gnyis la/ /dbyangs kyi sa bon gzhag par bya//zhes bya ba ni steng gi kham phor gyi re'u mig bcu gnyis la/ dbyangs kyi yi ge bcu gnyis bri bar bya'o zhes bya ba'i don to/ /'og gi kham phor gyi dbus su bri ba'i sngags dang 'dra bar steng gi dbus su yang bri'o zhes bstan pa'i phyir/ /phyag 'tshal sreg byed mtha' dang bcas//zhes bya ba smos te/ phyag 'tshal ni oM mo/ /sreg byed ni swA hA'o/ /bcas pa ni hUM ngo / /des ni 'di skad du/ /kham phor steng ma'i dbus kyi re'u mig la/ oM de ba dat+taM rak+Sha rak+Sha hUM swA hA zhes bya ba'i sngags bri'o zhes bya bar ston to/ /de'i shar gyi re'u mig la r-i/byang du r-I/ nub tu l-i'o/ /lhor ni l-I'o/ /de nyid gsungs pa/ phyogs su ma ning gzhag par bya/ /zhes bya ba ste/ ji ltar bstan pa'i rim gyis phyogs su ma ning gi yi ge bzhi bri ba'o/ /mtshams rnams su ni man ngag gis na dbyangs kyi yi ge brgyad bri bar gsungs te/de la dbang ldan gyi mtshams su g.yas skor gyis i I/ me mtshams su u U/ bden bral dag tu e ai/ rlung mtshams dag tu o au bri bar bya ste bsdus pa'i don to/ /ma ning gi sa bon bzhi ni 'bar ma la sogs pa'i ngo bo nyid de/ de nyid bstan pa'i phyir/'bar ma zhes bya ba la sogs pa smos te go sla'o/ /phyag 'tshal sreg pa mthar gnas pa/ /zhes bya ba ni/ ji ltar re'u mig dgu pa'i dbus su yi ge hUM dang phyag 'tshal dang swA hA dang spel ba ji lta ba bzhin du/ 'dir yang re'u mig bcu gnyis la gnas pa'i yi ge rnams kyang spel bar bya'o zhes bya ba'i don to//oM de ba dat+taM rak+Sha rak+Sha hUM swA hA zhes pa lta bu'o/ /gang gi sa bon gang yin pa de dang de'i phyogs kyi nges pa bstan pa'i phyir/ ji lta'i gnas bzhin gzhag par bya/ /zhes bya ba la sogs pa smos te/ shar phyogs mkha' 'gro ma yi gnas//zhes bya ba ni shar phyogs kyi re'u mig la gnas pa'i sa bon r-i ni lha mo mkha' 'gro ma'i ngo bo nyid do zhes bya ba'i don to/ /byang du gnas pa 'bar ma ste/ /zhes bya ba ni byang gi re'u mig la gnas pa'i sa bon ni lha mo 'bar ma ste r-I'o/ /nub tu 'jib mar rab tu gsungs//zhes bya ba ni nub kyi re'u mig la gnas pa'i sa bon ni lha mo 'jib ma ste l-i'o/ /lho ru 'phrog byed dgod par bya/ /zhes bya ba ni lho'i re'u mig la gnas pa'i sa bon ni lha mo phrog byed ma ste l-I'o/ /sngar bstan pa nye bar bshad pa'i phyir/ dbus su ming ni bri bya ste/zhes bya ba la/ dbus su ni 'khor lo'i dbus so/ /ming ni bsgrub par bya ba'i ming ste sngags dang spel te bri ba'o/ /'og tu de bzhin steng de bzhin/ /zhes bya ba ni/ 'og gi re'u mig dbus la ming bri ba bzhin du steng gi re'u mig la yang bri ba'o zhes bya ba'i don to//yang na dbus zhes bya ba ni phyag 'tshal dang / rak+Sha rak+Sha'i sgra'i dbus su bsgrub bya'i ming bri ba'o/ /'og tu de bzhin steng de bzhin/ /zhes bya ba ni steng gi kham phor ro/ /'og ces bya ba ni dbus te/ 'di'i don ni ji ltar sngar gyi kham phor ltar 'dir yang bri'o zhes bya ba yin no//gnyi ga zhes bya ba la sogs pa la/ gnyi ga kham phor gnyis so/ /kha sbyar ba ni go sla'o/ /skud pa dmar pos dkri ba ni/ skud pa dmar pos kun nas bcing ba'o/ /kun nas zhes bya ba la sogs pa ni go sla'o/ /mchod pa gsungs pa/sna tshogs zhes bya ba la sogs pa la nye bar spyod pa'i gtor ma zhes bya ba ni sha dang nya sha dang sgog skya dang btsong dang khur skya la sogs pa'i tshogs so/ /dbus su 'khrul 'khor bzhag nas ni/ /zhes bya ba ni sngar bshad pa'i maN+Dal gyi steng du 'khrul 'khor gzhag pa ste/rdo rje bsams nas reg bya la/ /zhes bya ba dang 'brel to/ /ji lta bu'i 'khrul 'khor zhe na/ mkha' 'gro ma lnga zhes bya ba la sogs pa smos te/ kham phor kha sbyar gyi steng du ye shes mkha' 'gro ma dang / rdo rje mkha' 'gro ma dang / drag mo dang / ro langs ma dang / gtum mo rnams bsgoms pa'i kham phor ro/ /bdag nyid rdo rje can sbyor bas/ /zhes bya ba ni/ bdag nyid ye shes kyi mkha' 'gro ma'am/ rdo rje mkha' 'gro ma 'khor dang bcas pa bsgom pa'o/ /rdo rje sems dpa' bdag ces brjod//ces bya ba ni/ de'i 'og tu rdo rje sems dpa'i nga rgyal bya ba'am/ yang na rang bzhin med par bsgom pa'o/ /rdo rje lag gi lag rtse ru/ /zhes bya ba ni rdo rje rtse gsum pa'i phyag rgyar bcas pa'i sor mo'i rtse mor ro/ /rdo rje bsams nas zhes bya ba ni go sla'o/ /reg bya zhes bya ba ni kham phor la reg pa'o//yang na lag gis rdo rje thogs te reg pa'o/ /dbus su bstan pa'i sa bon ni/ /zhes bya ba ni kham phor gyi dbus su bris pa'i sngags gang yin pa ste/ oM de ba dat+taM rak+Sha rak+Sha hUM swA hA zhes bya ba'o/ /brgyad brgya ru ni bzlas par bya/ /zhes bya ba ni go sla'o//phan yon gsungs pa/ tshe rabs snga ma'i sdig la sogs/ /lha la sogs la bsgo bar bya/ /zhes bya ba la sogs pa la/ tshe rabs snga ma la sogs pa la bsags pa'i sdig pa rnams lha la bsgo ba ste/ lha rnams kyis med par mdzad pa yin gyis gzhan du na cho ga 'di tsam gyis bsgrub bya'i lus bsrungs pa ma yin no zhes bya ba'i don to//yan lag thams cad gzir ba dang / /'chi ba'i dus bab 'byung mi 'gyur/ /zhes bya ba ni/ sgrub par byed pa'i lus la nad dang dus ma yin par 'chi ba 'byung bar mi 'gyur ro zhes bya ba'i don to/ /nad pa glor gzhag sbyar nas ni//zhes bya ba ni nad pa'i glor 'khrul 'khor bzhag nas sngags bzlas pa sbyar na'o/ /dus rnams kun du nad mi 'byung / /zhes bya ba ni nad dang bral ba'o/ /yang na dus rnams kun du zhes bya ba ni sngags brgyad brgya bzlas pa'i 'khrul 'khor ji srid du gnas pa de srid du dus ma yin par 'chi ba dang nad rnams 'byung bar mi 'gyur ba ste/de nyid la sngags brgyad brgya bzlas pas gal te nad kyis zin pa yang nad dang dus ma yin par 'chi ba zlog par byed pa'o/ /de'i tshe/ lus can tshe ni zad pa yang / /zla ba drug tu gnas par 'gyur/ /zhes bya ba ni/ nad pa'i glor gzhag sbyar na ni//zhes bya ba dang 'brel te/ nad pa'i glor 'khrul 'khor bzhag nas sngags bzlas na tshe zad pa rnams kyang zla ba drug tu tshe nur bar 'gyur ro zhes bya ba'i don to/ /gnas gzhan du ni bzhag nas su/ /rtag tu mchod la brtson par bya/ /zhes bya ba ni glor bzhag pa las gnas gzhan du bzhag nas kyang /mchod pa sngon du 'gro ba'i sngags bzlas nas sngar smos pa ltar 'gyur ro/ /de nyid kyi phyir gsungs pa/ rdo rje rgya ldan sbyor ba yis/ /rnam shes gang du'ang 'gro mi 'gyur/ /zhes bya ba smos te/ ji ltar rgya ldan gyis khang pa'i sgo bsrungs pa'i mi phyir mi 'byung ba ltar cho ga 'dis bsrungs pa'i lus las rnam par shes pa mi 'gro'o zhes bya ba'i don to//da ni dug gso ba bstan pa'i phyir/ gzhan yang zhes bya ba la sogs pa smos te/ gzhan yang las ni bshad par bya/ /zhes bya bar sbyar ro/ /gzhan yang bdag gi dbugs dag ni//der ni rab tu brtag par bya/ /zhes bya ba la bdag gi dbugs ni bdag nyid kyi dbugs rgyu ba'o/ /der ni zhes bya ba ni dug gso ba la'o/ /rab tu brtag par bya zhes bya ba ni dpyad pa la 'bad par bya'o zhes bya ba'i don to/ /de nyid kyi phyir gsungs pa/ dbugs kyi gnas ni mtshungs par ni//zhes bya ba ni bdag gi dbugs sna sgo'i phyogs gang nas rgyu ba'i phyogs de nas gal te pho nya smra bar byed na/ de'i tshe dbugs dang gnas mtshungs pa'o/ /thams cad 'grub par gsungs pa yin/ /zhes bya ba ni de'i dug gso ba la sogs pa'i las de dag 'grub par 'gyur ba'o//de nyid gsal bar bstan par bya ba'i phyir/ g.yas la zhes bya ba la sogs pa smos te/ g.yas la g.yas su gnas pa zhes bya ba ni bdag gi dbugs sna sgo g.yas nas rgyu ba'i tshe/ pho nya yang g.yas su gnas pa ste/ dbugs dang gnas mtshungs pa'o//g.yon la g.yon du gnas zhes bya ba yang de bzhin no/ /der gnas nas ni smra byed pa/ /thams cad 'grub pa nyid du 'gyur/ /zhes bya ba ni go sla'o/ /spang bar bya ba bstan pa'i phyir/ /dbugs dang 'dri ba mi mthun pa/ /grub pa ring bar mtshon par bya/ /zhes bya ba smos te/'dri ba zhes bya ba ni/ lha sbyin mche bas zin na/ de la ji ltar bgyi zhes bya ba la sogs pa'i tshig go/ /dbugs dang mi mthun pa zhes bya ba ni gnas mi mtshungs pa ste/ bdag gi dbugs sna sgo g.yas nas rgyu na/ pho nya g.yon du gnas pa'am/g.yon na rgyu na g.yas su gnas pa ste/ dbugs kyis stong pa'i sna sgor g.yas pa zhes bya ba ni don to/ /dngos grub ring bar mtshon par bya/ /zhes bya ba ni go sla'o/ /de ltar 'grub pa dang mi 'grub pa'i dbugs brtags la mche bas zin pa'i gan du 'gro ba'am mi 'gro bar bya'o//brtags pa'i rnam pa gzhan gsungs te/ skad cig ces bya ba la sogs pa la/ skad cig ces bya ba ni dbugs nang du 'jug pa'o/ /srog ces bya ba ni phyir 'phro ba'o/ /sbyor ba gnyis zhes bya ba ni 'das ma thag pa'i dbugs kyi sbyor ba de gnyis te/dbugs nang du 'jug pa la 'dri ba dang / phyir 'gro ba la 'dri ba'o/ /shes bya ste zhes bya ba ni sbyor ba de gnyis kyi nang nas skad cig gi sbyor ba ni gzung bar bya ba yin la/ cig shos ni spang bar bya bar shes par bya'o zhes bya ba'i don to/ /de nyid kyi phyir gsungs pa/ skad cig ces bya ba la sogs pa la/ bya ba kun ni dgos pa kun no/ /de nyid ci zhig ce na/ rgyas par 'gyur bar rab tu grags/ /zhes bya ba smos te/ rgyas pa la sogs pa thams cad kyang 'grub na/ dug gso ba 'ba' zhig lta ci smos zhes bya ba'am/ yang na rgyas par 'gyur ba ni rdzogs par 'gyur ba ste/bya ba kun nye bar 'grub pa'o/ /srog la bya ba gang byas pa/ /grub pa ring bar the tshom med/ /ces bya ba ni/ srog gi sbyor bas gnas te 'dri ba'i bya ba rnams ni ring ba ste/ mi 'grub po zhes bya ba'i bar du'o/ /mche ba la sogs bsams nas dug /der ni gso ba dag tu bya/ /zhes bya ba la/ sogs kyi sgras ni nad gzhan yang gzung bar bya'o/ /bsams nas zhes bya ba sngar smos pa'i tshul gyis rung ba dang mi rung ba dpyad nas so/ /der ni gso ba dag tu bya/ /zhes bya ba ni go sla'o/ /ci zhig dpyad par bya zhe na/ sbyor sogs sngags kyi mtshan nyid can te/ rim par phye ba snga ma las smos pa'i sbyor ba'i mtshan nyid do/ /thams cad rig pas zhes bya ba ni rnal 'byor pas so/ /klu la bsgo zhes bya ba ni bka' bsgo ba shes nas klu'i nad gso ba'o/ /sngar smos pa'i mtshan nyid bstan pa'i phyir/sbyor ba bzhi la sos btab pa/ /'chi bar 'gyur bar the tshom med/ /ces bya ba smos te/ sbyor ba bzhi zhes bya ba ni rwa can bzhi'o/ /sos btab pa nye bar mtshon pa ste/ nad thams cad do/ /yang na sos btab pa zhes bya ba ni mche ba'i dug 'ba' zhig go/ / sbyor ba bzhi zhes bya ba ni bla ma'i man ngag las mi ki ri la sogs pa ste/ mi ki ra'i sbyor ba la ni rigs ldan gyi sos btab pa'o/ /bi ti ka las ni mgo brgya pas so/ /swa p+na la ni gtsigs pas so/ /ka ma la ni dus kyi mche bas te sbyor ba bzhi po de la zin pa rnams gdon mi za bar 'chi bar 'gyur ro zhes bya ba'i don to//lhag ma rnams ni gzung bar bya ste/ de nyid kyi phyir gsungs pa/ dug bsdu ba yi sbyor ba yis/ /gzhan ma thams cad gso bar bya/ /zhes bya ba la/ gzhan brgyad po thams cad la 'og nas 'byung ba'i dug 'phrog pa'i sbyor bas gso bar bya'o zhes bya ba'i don to//'phrog pa'i sbyor ba de nyid bstan pa'i phyir/ sos btab lus la zhes bya ba la sogs pa smos te/ sa bon gyi ni dgod pas dgod/ /ces bya ba ni/ bsgrub par bya ba'i lus kyi yan lag la sa bon gyi yi ge brgyad dgod pa ste bsam mo zhes bya ba'i don to//de nyid kyi phyir gsungs pa/ yi ge brgyad kyi zhes bya ba la sogs pa la/ yi ge brgyad kyi sngags dag ni/ /yan lag brgyad po rnams su dgod/ /ces bya ba la/ yi ge brgyad nyid sngags te/ de rnams yan lag brgyad po zhes bya ba mgo la sogs pa'i yan lag rnams su bkod cing bsam pas bsrung bar bya ste/ 'di ltar mgor ni k+ShuM ngo / /sna dang rna ba gnyis dag la ni yuM ngo / /mig gnyis su ni hUM ngo / /kha ru ni suM ngo / /mgrin par ni ngo //nam mtshang dag tu ni h+m+raM sa bon rnams kyis yu yid dug dbrog /ces bya ba la/ yid dug ces bya ba ni dug rnams rang gi rnam par rtog pa'i bdag nyid kyi phyir ro/ /sa bon rnams dbrog ces bya ba ni sngar smos pa'i sa bon rnams kyis 'og nas 'byung ba'i cho ga ltar dug gi mthu dbrog pa'o/ / dkyil 'khor dbus su gnas pa yi/ /zhes bya ba la/ dkyil 'khor ni lus so/ /de'i dbus ni snying ga'o/ /der gnas pa'i ye shes ni yi ge hUM ste/ des rnam par shes pa bcing ba ste bsdam par bya ba'o/ /yan lag bsrung ba'i sbyor byas nas/ /de'i 'og phyi rol brtsam par bya//zhes bya ba ni/ sngar smos pa'i rim gyis dug gis zin pa'i lus dang por bsrungs la/ de'i 'og tu phyi'i las brtsam mo zhes bya ba'i don to/ /phyi'i las gsungs pa/ chu dang 'o ma bsres pa yis/ /sa snod yongs su dgang bar bya/ /zhes bya ba la sogs pa ste/sa snod ni sa la sogs pa'i bum pa'o/ /chu dang 'o ma bsres pas dgang ba ni go sla'o/ /zla ba'i dkyil 'khor zhes bya ba la sogs pa'i don ni bum pa gang yin pa de'i nang du pad+ma 'dab ma brgyad pa/ de'i lte bar zla ba'i dkyil 'khor/ de'i steng du suM yongs su gyur pa las byung ba'i rdo rje mkha' 'gro ma gdugs dkar pos brgyan cing mdog dkar mo phyag gnyis na kha T+wAM ga dang /thod pa bsnams shing / sbrul gyi rgyan gyis brgyan pa sems dpa'i skyil krung can/ klu brgyad kyi mgo'i cha rnams gdan zla ba'i dkyil 'khor gyi 'og tu bsdus nas mnan te bzhugs par bsgom pa 'di yin no//da ni pad+ma'i 'dab ma rnams la gnas pa'i klu rnams bstan par bya ba'i phyir/ /shar du zhes bya ba la sogs pa smos te/ shar gyi 'dab ma la ni nor rgyas bu dkar po'o/ /byang du ni 'jog po ser po'o/ /nub tu ni stobs kyi rgyu dmar po'o//lhor ni pad+ma sngon po'o/ /dbang ldan du ni pad+ma chen po dkar ser ro/ /me mtshams su ni dung skyong dkar sngo'o/ /bden bral gyi mtshams su ni rigs ldan sngon dmar po/ /rlung mtshams su ni 'khyil ba ltung ba dmar ser te/ de dag ni klu brgyad do/ /nye bar bsdu ba bstan pa'i phyir/klu brgyad po ni bsams nas su/ /mgo bo rnams ni mnan par bsgom/ /zhes bya ba smos te/ bshad zin to/ /mchod pa bstan pa'i phyir/ rdzas rnams kun gyis zhes bya ba la sogs pa smos te/ rdzas rnams kun ni me tog dang / bdug pa dang / dri dang / mar me dang / lha bshos rnams so/ /me tog bdug sogs gtor ma sbyin/ /zhes bya ba ni klu'i gtor ma sbyin pa'o/ /bdag nyid lha yi rnal 'byor ni/ /rdo rje mkha' 'gro ma ru bsam/ /zhes bya ba ni/ dug dbrog pa'i dus 'dir bdag nyid rdo rje mkha' 'gro ma'i lha'i rnal 'byor du bya ba'o//rma bya'i sgro yi chun po yis/ /chu yi sbyor bas drang bar bya/ /zhes bya ba ni drangs te chu'i nang du ngo bo ba'o/ /gang nas drangs she na/ kun nas rkang par drangs nas su/ /zhes bya ba smos te/ mgo bo la sogs pa'i lus kun ni rma bya'i sgro'i chun pos bya bas la rkang mthil gyi bar du drang ba'o//rkang pa nas ni chur thim bya/ /zhes bya ba ni bum pa'i chu snod kyi nang du dbo zhing lha la gsol bar bya'o zhes bya ba'i don to/ /dug dbrog pa'i sngags gsungs pa/ oM hrIH TaT+TaN+Ta ra hUM phaT swA hA zhes bya ba ni 'dir man ngag las hUM gsum dang phaT gsum du blta bar bya'o//sngon du bsnyen pa bya ba ma gtogs par mi 'grub par bstan pa'i phyir/ rdo rje sems dpar zhes bya ba la sogs pa smos te/ dang por rdo rje sems dpa'i sbyor bas/ bA su ki la sogs pa'i sngags thams cad 'bum phrag re rer bzlas pas bsnyen pa bya ba'o//sngags de dag kyang gsungs pa/ oM bA su ki zhes bya ba la sogs pa ste go sla'o/ /dug dbrog pa'i dus su/ sngags spel ba bstan pa'i phyir/ oM hrIH TaT+TaN+Tar zhes bya ba la sogs pa smos te/ A mu ka s+ya zhes bya ba ni gnyis pa'i don gyis drug pa yin no//kun nas rkang par drangs nas su/ /zhes bya ba ni/ nye bar bstan pa gsungs pa/ 'o ma'i dbus su drangs pa yis/ /zhes bya ba la sogs pa smos te/ oM bA su ki hrIH TaT+TaN+Ta ra de ba dat+tan ni ri ba sh+yaM ru hUM hUM hUM phaT phaT phaT swA hA zhes bya ba'i sngags dang /sngags gzhan thams cad kyang zlos shing / mgo nas brtsams te rkang pa'i bar du byabs nas drangs la chur dbo bar bya'o/ /pho ba tsam gyis de'i tshe 'phral du 'o ma nag por 'gyur ro/ /dug 'phrogs nas 'o ma nag por gyur gyi 'og tu bya ba'i sbyor ba bstan pa'i phyir/ yungs kar zhes bya ba la sogs pa smos te/ dkar po'i sgra ni kun la sbyar bar bya'o/ /gsang sngags zlos shing zhes bya ba ni/ sngar smos pa'i sngags thams cad zlos shing brdeg pa'o/ /brdeg pa tsam gyis bsgrub bya'i snying 'phar ba la sogs par 'gyur ro/ /de nas ci zhig bya zhe na/snying ni zhes bya ba la sogs pa smos te/ ye shes bsdams te gzung bar bya/ /zhes bya ba ni de'i snying gar ye shes te yi ge hUM bsgoms pas rnam par shes pa bcing zhing gzung bar bya'o/ /de tsam gyis ni dbugs g.yo bar 'gyur ro/ /de nas ci zhig bya zhe na/dbugs ni rnam par g.yos pa na/ /zhes bya ba la sogs pa smos te/ bdag gi dbugs kyis gzir bar bya/ /zhes bya ba ni bdag gi sna sgo'i rlung gis mche bas zin pa'i sna sgo nas khong par thim par bya zhing dgang bar bya zhes bya ba'i don to/ /de tsam gyis ni rkang lag la sogs pa 'dar bar 'gyur ro//de nas ci zhig bya zhe na/ yan lag thams cad 'dar ba na/ /zhes bya ba la sogs pa smos te/ bdag nyid dbyangs ni blang bar bya/ /zhes bya ba ni sngags pa bdag nyid kyi glu blang bar bya ba ste/ ci zhig ce na hUM gi glu zhes bya ba smos te/ oM hUM tre na zhes bya ba la sogs pa'o/ /de yang se gol gsum sngon du gtogs la blang ngo zhes bstan pa'i phyir/ se gol gsum gyis blang bar bya/ /zhes bya ba smos te/ se gol gsum dang bcas pa'i glu blangs pa las mche bas zin pa ldang bar 'gyur ro zhes bya ba'i don to/ / nad pa langs nas kyang rdo rje mkha' 'gro mar de'i lus bsgoms te bsrung bar bya'o/ /de nyid bstan pa'i phyir/ mche bas zin pa blangs nas ni/ /de yi yan lag bsrung bar bya/ /zhes bya ba smos te go sla'o/ /de'i 'og tu 'o ma'i bum pa klus byin gyis brlabs pa'i gnas su bskyal ba bstan pa'i phyir/bsdus nas zhes bya ba la sogs pa smos te/ /da ni dug sngags kyi gtso bor sngar bsnyen pa bya ba bstan pa'i phyir/ zla ba'i dkyil 'khor zhes bya ba la sogs pa smos te/ 'di dag gi don ni pad+ma'i steng du zla ba'i dkyil 'khor la hUM gis bskyed pa'i rdo rje sems dpa' sku mdog dkar po phyag gnyis pa/rgyan thams cad kyis brgyan cing rdo rje'i skyil krung du bzhugs pa/ rdo rje dang dril bu phyag g.yas g.yon gyis bsnams par bdag nyid bsgoms la/ oM hrIH zhes bya ba la sogs pa'i sngags 'bum phrag gsum du bzlas na sngar bsnyen pa byas par 'gyur ro zhes bya ba 'di yin no//der yang sngar 'bum phrag gsum bzlas pas bsnyen pas bsnyen pa byas la phyis kyang gdon mi za bar 'bum phrag gcig bzlas par bya'o/ /de nas sgrub pos dug bsdus na/ /'grub 'gyur 'di la the tshom med/ /ces bya ba ni bsnyen pa'i phan yon gsungs pa yin no//bsgrub par bya ba ma yin pa'i mche ba'i gnas bstan pa'i phyir/ kha dang zhes bya ba la sogs pa smos te/ thig le zhes bya ba ni smin ma'i dbus so/ /steng zhes bya ba rkan no/ /sna rtse ni sna sgo gnyis so/ /snying ga zhes bya ba ni mtshan no//gsang ba zhes bya ba ni bshang ba'i lam mo/ /rkang pa'i mthe bo dag ces bya ba ni nye bar mtshon pa ste/ lag pa'i mthe bo dag kyang gzung ngo / /lhag ma ni sgra ji bzhin no/ /zin pa gso bar mi bya ste/ /zhes bya ba ni gsor mi rung zhing spang bar bya zhes bya ba'i don to//de nyid kyi phyir/ 'chi ba nyid kyi rgyu ru gsungs/ /zhes bya ba smos te/ gnas de dag tu zin pa zhes bya ba'i lhag ma'o/ /da ni klu'i zhar la 'ongs pas char dbab pa'i cho ga bstan pa'i phyir/ nyon cig ces bya ba la sogs pa smos te/ rdo rje rgyal chen po zhes bya ba ni phyag na rdo rje la bod pa'o//char pa dbab pa'i cho ga mchog /ces bya ba la/ mchog ni gtso bo ste dam pa'o/ /chu 'gram dang ni nye ba'i zhes bya ba ni tha mal pa'i chu rgyun gyi 'gram du'o/ /sa phyogs mnyam ni dga' ba ru/ /zhes bya ba ni klus byin gyis brlabs pa'i mtsho 'gram du ste/gnas de dag gi rlung mtshams su dkyil 'khor brtsam par bya'o/ /bla re dag ni bris nas su/ /zhes bya ba la sogs pa'i don ni go sla'o/ /gru bzhi pa la sgo bzhi pa/ /zhes bya ba ni rta babs med pa'i sgo bzhi pa'o/ / klu brgyad kyis ni rnam par bklubs/ /zhes bya ba ni/ rgyal ba la sogs pa'i klu brgyad kyis rta babs la sogs pa dang 'dra bar grwa dang sgo rnams su brgyan pa'o/ /de nyid kyi phyir mgo bo zhes bya ba la sogs pa smos te/ sgo rnams su phan tshun gdengs ka gyen du bsgreng ba bsnol zhing /phan tshun du snying sprad pa'o/ /mjug ma gnyis kyis grwa ru mdud/ /ces bya ba ni/ grwa bzhir mjug ma brgyad kyi mdud pas brgyan pa'o/ /de dag kyang gang dag yin zhe na/ shar du rgyal ba bzang po ste/ zhes bya ba la sogs pa smos te go sla'o//klu brgyad kyi ni ra ba ste/ /zhes bya ba ni 'das ma thag pa'i klu brgyad po de dag ni ra ba 'dra bar bskor ba yin te/ phyogs la sogs par rigs brgyad dgod/ /ces bya ba'i tshig 'di dang 'brel bar bstan pas na/ sngar 'das pa'i ra ba'i klu brgyad po de dag 'og nas 'byung ba'i rigs brgyad kyi mdog dang 'dra bar ston to//sogs kyis ni mtshams rnams su gzung bar bya'o/ /de yang gang dag yin zhe na/ nor rgyas zhes bya ba la sogs pa smos te/ dkyil 'khor gyi dbus su pad+ma 'dab ma brgyad pa bris la/ de'i shar gyi 'dab ma la sogs pa rnams la nor rgyas la sogs pa smos pa'i rim bzhin dgod par bya ba ste/ de dag gi kha dog kyang sngar dug dbrog pa'i skabs su bshad pa bzhin du blta bar bya'o/ /sprin gyi dbang phyug rgyal po brgyad/ /phyogs brgyad nas ni dgug par bya//zhes bya ba sgra sgrogs la sogs pa'i sprin brgyad dkyil 'khor gyi phyi rol gyi phyogs mtshams brgyad du bris la/ lhun gyis grub pa'i gnas nas bkug pa dang bsre bar bya'o zhes bya ba'i don to/ /de dag kyang gang zhe na/ sgra sgrogs zhes bya ba la sogs pa smos te/ sgra sgrogs ni shar du'o//rmugs pa ni shar lhor ro/ /drag po ni lhor ro/ /'khyil pa ni lho nub tu'o/ /stug po ni nub tu'o/ /gtum po ni nub byang du'o/ /char 'bebs ni byang du'o/ /rab tu gang ba ni byang shar du'o/ /de dag ni brgyad po zhes bya ste/ shar la sogs pa'i phyogs su dgod//ces bya ba'i don yin no/ /ji ltar phyogs kyi mdog tu bsam/ /zhes bya ba ni nang gi klu rnams dang / mdog 'dra bar bsam pa ste/ 'di dag ni skyes bu'i gzugs can gdengs ka gcig gis brgyan pa'o/ /dbus su rdo rje mkha' 'gro ma/ /pad+ma'i stan la yang dag bzhugs//zhes bya ba ni dkyil 'khor de'i dbus su pad+ma'i lte ba la rdo rje mkha' 'gro dgod par bya'o zhes bya ba'i don to/ /ci 'dra zhe na/ kha T+wAM ga dang rnal 'byor snod/ /ces bya ba la sogs pa smos te go sla'o/ /pad+ma sbrul gyis bskor nas su/ /sbrul gyi gdan du sbyar bar bya//zhes bya ba ni sngar smos pa ltar pad+ma'i 'dab ma rnams klu brgyad kyis bskor nas/ klu rnams kyi mgo bo brgyad lha mo'i gdan gyis mnan par bri'o/ /mchod pa bstan pa'i phyir/ mchod pa rgya chen zhes bya ba la sogs pa gsungs te/ 'o ma'i kham phor brgyad la sogs pas mchod par bya ba'o//mar me sna tshogs rig pas mchod/ /ces bya ba la/ sna tshogs ni mchod pa sna tshogs so/ /rig pa ni rig pa can te rnal 'byor pa'o/ /lhag ma ni go sla'o/ /rnal 'byor ji lta bu dang ldan pa yin zhe na/ ye shes mkha' 'gror bdag bsgoms pa'i//ye shes can gyi rnal 'byor pa/ /zhes bya ba la/ ye shes kyi rang bzhin gyi mkha' 'gro ma ni ye shes mkha' 'gro ma ste/ rdo rje mkha' 'gro mar bsgom pa'o/ /bsgom pa ni nye bar mtshon pa ste sngags zlos pa yang gzung bar bya'o/ /de nyid ni ye shes te de dang ldan pa'o//des ni sngar dkyil 'khor bris nas/ de'i 'og tu bdag nyid rdo rje mkha' 'gro mar bsgoms te sngags bzlas par bstan to/ /nye bar spyod pa'i sngags so zhes bya ba ni bsang gtor dang nye reg la sogs pa'i sngags so/ /oM bA su ki zhes bya ba la sogs pa ni klu brgyad kyi sngags so//oM g+hi li g+hi li zhes bya ba la sogs pa la/ 'dir yi ge Tha rnam pa gsum ni yi ge phaT rnam pa gsum du bsgyur bar bya ste/ des na phaT phaT phaT ces bya bar 'gyur ro/ /lag pa kun du bskor nas su/ /phyogs brgyad du ni bstan par bya//zhes bya ba ni lag pa gnyis pad+mar bskor zhing phyogs brgyad du sprin rnams la bstan pas/ sprin rnams 'gugs par 'gyur te/ ji skad du/ sngar phyogs brgyad nas ni dgug par bya/ /zhes smos pa'i phyir ro/ /g.yon pa khu tshur bcangs nas su//zhes bya ba la sogs pa'i phyag rgya ni go sla'o/ /klu'i rgyal po brgyad kyi phyag rgya zhes bya ba ni klu brgyad kyi dam tshig gi phyag rgya ste/ sngags snga ma dang sbyar la bstan par bya'o/ /de bzhin du sprin rnams kyi sngags dang phyag rgya yang dbyer med par sbyar la so sor bstan par bya'o//oM badzra DA ki nI baR+Sha baR+Sha pa ya hUM phuHswA hA zhes bya ba ni rdo rje mkha' 'gro ma'i char 'bebs pa'i rtsa ba'i sngags so/ /'di klu rnams dang sprin rnams kyi char 'bebs pa'i sngags kyang yin mod kyi/ rdo rje mkha' 'gro ma gtso mo yin pa'i phyir de'i rtsa ba'i sngags su sbyar bar bya'o//sngon du bsnyen pa 'bum phrag ni/ /gsum du byas nas bzlas par bya/ /zhes bya ba ni sngags de nyid kyis sngar bsnyen pa sum 'bum bya'o/ /rnal 'byor can gyis zhes bya ba la sogs pa la/ 'di rnams zhes bya ba ni sngags 'di rnams kyi sngon du bsnyen pa zhes bya ba dang sbyar te/bsnyen pa byas nas las zhes bya ba dkyil 'khor bri ba la sogs pa char dbab pa'i las rnams nges par 'grub par 'gyur ro zhes bya ba lhag ma yin no/ /gzhan yang dge dang sdig pa'i zhes bya ba la sogs pa la/ gzhan yang zhes bya ba ni mtshan ma gzhan te/sngar smos pa'i rlung gi mtshan ma las gzhan pa pho nya'i mtshan ma'o/ /mig yon zhes bya ba la sogs pa ni go sla'o/ /'jigs pa'i gos zhes bya ba ni gos nag po'o/ /dbyig pa thogs pa ni go bar zad do/ /bud med rnams dang 'grogs te 'ong / /zhes bya ba ni bud med dang lhan cig 'grogs te 'ong ba'o//du ba ni dud mos 'debs pa'o/ /skra lhug pa ni skra sil bur bshigs pa'o/ /sogs pa'i sgras ni med pa dang brlag pa la sogs pa'i sgra sgrogs pa'o/ /gcer bu nan gyis smra ba dang / /zhes bya ba la/ gcer bu ni gos med pa'o//nan gyis smra ba ni stobs kyis bkri ba la sogs pa smra ba'o/ /sbyor bzhis 'chi bar ston pa yin/ /zhes bya ba ni kar dang bi tri ka dang / swasna dang ka ma na'i sbyor ba bzhi la pho nya 'ongs pa dag ni nad pa 'chi ba nyid du ston pa yin no/ /pho nya ji bzhin bdag nyid la//brtag nas rnam pa gnyis su bya/ /zhes bya ba ni pho nya ji lta ba bzhin du bdag nyid la yang sngar smos pa ltar dbugs kyi mtshan ma brtags nas 'grub pa dang mi 'grub pa gnyis la 'gro ba'am mi 'gro ba gnyis su bya'o zhes bya ba'i don to//de nyid kyi phyir/ de tshe sngags pa 'gro 'dod na/ /grub pa nyams 'gyur the tshom med/ /ces bya ba smos te/ mtshan ma ngan bzhin du 'gro bar 'dod kyang grub pa nyams pa ste/ mi 'grub par 'gyur ro zhes bya ba'i don to/ /bdag gi gdan gyi rab tu byed pa zhes bya ba la/bdag gi gdan ni bshad zin to/ /rab tu byed pa zhes bya ba ni gzhung 'dis 'chi ltas rnams shes nas 'chi ba slu ba la sogs pa gsal bar byed pas na rab tu byed pa'o/ /dpal gdan bzhi pa'i 'grel pa dran pa'i rgyu mtshan zhes bya ba las bdag gi gdan gyi rim par phye ba gnyis pa'o// //tha mal pa'i phung po la sogs pa'i yongs su spong ba sngon du 'gro bas lhar bsgom pa bstan pa'i phyir/ stong pa nyid kyi rim par phye ba gsungs pa/ rnal 'byor zhes bya ba la sogs pa la/ rnal 'byor rtsom pa'i khyad par dag /ces bya ba ni lha'i rnal 'byor rtsom pa'i cho ga'i khyad par ro/ /gang gi sngags rnams 'tshal bar bgyi/ /zhes bya ba ni/ sngags rnams ji ltar 'tshal bar bgyi/ /zhes bya ba'i don to/ /ye shes gzung ba ji ltar lags/ /zhes bya ba ni zhi ba la sogs pa'i dngos grub kyi mtshan ma'i ye shes gzung ba ste/ji ltar sems la brlan par bgyi/ /zhes bya ba ni/ bcom ldan 'das la nyan par 'tshal/ /zhes bya bar sbyar ro/ /lan gsungs pa nyon cig ces bya ba la sogs pa la de kho na zhes bya ba ni phyin ci ma log pa'o//lha'i bdag nyid ces bya ba ni bdag lha'i bsgom pa'i bdag nyid do/ /yang na bdag nyid lhar bya ba'i phyir ro/ /nyon cig ces bya ba ni 'og nas 'byung ba rnams mnyan pa'i phyir gdams pa'o/ /mnyan par bya ba de nyid gsungs pa/ dang por zhes bya ba la sogs pa la/dang por zhes bya ba ni/ lhar bsgoms pa'i dang po ste/ dus dang por der lus stong pa nyid du bsgoms nas de'i 'og tu lhar bsgom mo zhes bya ba'i don to/ /lus can dri ma bkru bar bya/ /zhes bya ba la/ dri ma ni gzung ba dang 'dzin pa la sogs par mngon par zhen pa'o//dri ma de stong pa nyid kyis bkrus nas lhar bsgom mo zhes bya ba'i don to/ /de nyid bshad pa'i phyir/ dang po gzugs ni stong sogs bya/ /zhes bya ba la sogs pa smos te/ btsugs shing brtags pas na gzugs te phung po lnga'o/ /stong pa zhes bya ba ni gzugs de'i rang bzhin nyid do//sogs pa'i tshig gis na mtshan ma med pa dang / smon pa med pa gzung bar bya ste/ gzugs de'i ngo bo nyid dang mtshan ma dang rnam par rtog pa rnams rang bzhin med pa'i phyir/ rnam par thar pa'i sgo gsum du bsgom mo zhes bya ba'i don to/ /phung po lnga 'ba' zhig rnam par thar ba'i sgo gsum gyis sbyang bar ma zad kyi/gzhan yang bsdu bar bstan pa'i phyir/ ji srid bco brgyad yid nyid de/ /zhes bya ba smos so/ /ji srid ces bya ba ni bsdu ba'o/ /gang zhe na/ mig dang / rna ba dang / sna dang / lce dang / lus dang / yid ces bya ba dang dbang po'i khams drug dang /gzugs dang / sgra dang / dri dang ro dang reg bya dang / chos zhes bya ba yul drug dang / de dag la brten te skyes pa'i rnam par shes pa'i khams drug drug ste/ bco brgyad po de dag kyang snga ma ltar rnam par thar pa'i sgo gsum gyis sbyang ngo zhes bya ba'i don to//yid nyid de zhes bya ba ni de dag nye bar brtags na tshad mar gyur pa ni/ rang gi sems 'ba' zhig go zhes bya ba'i don to/ /gal te phyi rol na don yod du zin kyang / de dag rnam par gzhag pa ni sems 'ba' zhig la rag las pa yin te/ de ni rang gi ngang gis gsal zhing thams cad nyams su myong ba tsam yin pa'i phyir ro//da ni stong pa nyid kyi bye brag bstan par bya ba'i phyir/ gzugs khams zhes bya ba la sogs pa smos te/ gzugs zhes bya ba ni dkar po dang ser po dang / ring po dang / thung ngu la sogs pa mig gi yul du gyur pa rnams te bkra ba'i phyir ro//de nyid rang gi mtshan nyid 'dzin pa'i phyir khams te gzugs kyang yin la khams kyang yin pas na gzugs khams so/ /stong pa zhes bya ba ni gzung ba dang 'dzin pa dang bral ba'i ngo bo nyid de de yang 'di ltar rnam par shes pa'i snang ba yin pas/ rnam par shes pa las tha dad pa'i gzung ba dang 'dzin pas stong pa yin gyi/ rnam par shes pa'i snang bas ni ma yin te chu zla bzhin no/ /chu zla yang zla ba'i ngo bo nyid kyis stong gi /chu zla nyid kyang med pa ma yin pa bzhin no/ /ci gzugs la sogs pa'i khams snang ba las tha dad par yod dam zhe na ma yin te/de nyid brtag mi bzod pa'i phyir/ chu zla ltar bden pa dang brdzun pa'i tha snyad dang bral ba'i phyir de nyid de ltar brjod do/ /de nyid du ni sgra yang bya/ /zhes bya ba ni sgra'i khams kyang de ltar gzung ba la sogs pas stong pa nyid do zhes bya ba'i don to/ /'di ltar gzhan la yang sbyar bar bya'o//de nyid du ni gzugs kyang bya/ /zhes bya ba la/ rig cing nyams su myong bas na gzugs te bde ba'i ngo bo nyid chos kyi khams kyi rang bzhin gyi yul lo/ /yul rnams kyi rjes la mig la sogs pa'i dbang po rnams stong par bstan pa'i phyir/ mig gi bdag nyid stong pa la/ /zhes bya ba la sogs pa smos te/ mig la sogs pa yang brtags na 'dzin pa la sogs pa'i rang bzhin med pa'i phyir/ rnam par thar pa'i sgo gsum gyi ngo bo nyid do/ /de dag med na de dag la brten te skye ba'i rnam par shes pa rnams kyang ji ltar yod de stong pa nyid la sogs pa'o zhes bstan pa'i phyir/dbus na zhes bya ba la sogs pa smos so/ /dbus su ci ltar brtag par bya/ /zhes bya ba ni dbus kyi rnam par shes pa'i rang bzhin ji ltar gzung bar bya ste/ 'di dag thams cad ni sems kyi brtags pa tsam mo zhes bya ba'i bar du'o//de nyid la 'jug par bya ba'i phyir snang ba med pa'i ting nge 'dzin gsungs pa yid ni zhes bya ba la sogs pa smos te/ yid ces bya ba ni rnam par rig pa'o/ /nam mkhar thim nas zhes bya ba ni yi ge hUM gi me 'bar bas thams cad bsregs te/ thal ba tsam yang med par byas pas snang ba med par thim pa'o//de nyid kyi phyir/ thams cad stong par bsam par bya/ /zhes bya ba smos te/ mdor bsdus pa'o/ /bstan pa de nyid bshad pa'i phyir/ /gling dang zhes bya ba la sogs pa smos te/ /sogs pa zhes bya ba'i sgras ni rgya mtsho dang rlung gi dkyil 'khor la sogs pa'i bar du gzung ngo //steng zhes bya ba ni nam mkha' la spyod pa'o/ /'og ces bya ba ni sa 'og na spyod pa'o/ /bar zhes bya ba ni sa steng na spyod pa ste/ 'jig rten gsum po de nyid ni khams gsum mo/ /thams cad ces bya ba ni snod dang bcud kyi dbye ba rnam pa gnyis so//nye bar bsdu ba gsungs pa/ phyogs bcu zhes bya ba la sogs pa ste go sla'o/ /de ltar dngos po thams cad so sor bshig nas bdag nyid kyang nam mkha'i ngo bo nyid du bya ba'i phyir/ bdag gi dngos po zad par bya/ /zhes bya ba smos te/ mthar bdag gi lus kyi gzugs la sogs pa'i rnam par rtog pa bsregs pas bshig nas snang ba med par bya'o zhes bya ba'i don to//dngos po 'dres pa dmigs par bya/ /zhes bya ba ni dngos po'i yul ma lus pa nam mkha'i ngo bo nyid kyi ror ro gcig tu bsres nas dmigs pa ste/ lhar bsgom par bya'o zhes bya'o zhes pa'i don to//rnal 'byor pas zhes bya ba ni rnal 'byor can no/ /mkhas pas zhes bya ba ni gzung ba la sogs pa stong pa'i blo can no/ /ye shes gzung ba ci ltar lags/ /zhes bya ba'i lan bstan par bya ba'i phyir/ mnyam pa nyid ces bya ba la sogs pa smos te/ 'das ma thag pa'i tshul gyis nam mkhar thim pa'i stong pa nyid bsams nas de'i dbus su de snang ba med pa'i rang bzhin la bltas nas zhes bya ba ni ye shes gzung bar bya'o zhes bya ba'i don to/ /de ni mtshan ma brtag par bya/ /zhes bya ba ni stong pa nyid kyi ye shes der zhi ba la sogs pa'i dngos grub kyi mtshan ma ste/ltas brtags pa ste dpyad par bya'o zhes bya ba'i don to/ /yang na mtshan ma nyid ye shes te/ 'dis zhi ba la sogs pa'i dngos grub shes par byed pa'i phyir ro/ /der zhes bya ba ni dus de'i tshe'o/ /de nyid gsungs pa mar me zhes bya ba la sogs pa la gang gi tshe mar me lta bu'i 'od snang ba de'i tshe zhi ba'i las 'grub par shes par bya ba'o//dmar po rdul gyis rgyas par 'gyur/ /zhes bya ba la/ rdul ni 'od do/ /rgyas pa ni rgyas par 'gyur ba'o/ /nyi ma'i zhes bya ba la sogs pa'o/ chags pa'i las zhes bya ba ni dbang du bya ba'o//sogs pa'i tshig gis na dgug pa dang / mnan pa la sogs pa gzung bar bya'o/ /mthar ni du ba gnag mthong na/ /zhes bya ba la/ mthar te ting nge 'dzin gyi mthar du ba ltar gnag pa mthong na'o/ /mngon spyod du ni rab tu grags/ /zhes bya ba ni go sla'o/ /rlung gi mdog ltar 'khrugs pa yis//zhes bya ba ni/ rlung gi mdog ltar sngo la lang long du 'khrugs pa'o/ /de yi mod la bskrad par 'gyur/ /zhes bya ba yang go sla'o/ /zla ba dkar po'i 'od zer ltar/ /zhes bya ba ni 'od shin tu dkar ba'o/ /thams cad du zhes bya ba ni yun ring du'o/ / rnal 'byor grub par shes par bya/ /zhes bya ba ni go sla'o/ /ci zhig ce na/ blo ldan 'gro ba yang dag gnas/ /zhes bya ba ste/ 'dis ni 'gro ba rnams kyi dngos po 'das pa dang ma 'ongs pa la sogs pa shes par 'gyur ro zhes bya ba'i don to/ /da ni stong pa nyid kyi rjes la lha bsgom pa bstan par bya ba'i phyir/de 'og ces bya ba la sogs pa smos te/ de 'og ces bya ba ni stong pa nyid bsgoms pa'i mthar/ rnal 'byor las byung ba zhes bya ba ni lha'i rnal 'byor du bskyed pa'o/ /gang gi zhe na/ myu gu la sogs mtshon par bsam/ / zhes bya ba la stong pa nyid kyis sbyangs pa'i lus kyi zhing sa la lha'i sa bon dang sku'i myu gu'i rim gyis bskyed par bya'o zhes bya ba'i don to/ /de nyid ni yang dang yang du ston par 'gyur ro/ /'dir ni phyogs tsam zhig gsungs pa yin te/ dngos po'i yul thams cad stong pa nyid du skad cig gnyis la sogs pa'i bar du rnal 'byor pa gal te gnas par gyur na/lha'i sa bon la sogs pa'i rim gyis/ 'das pa dang ma 'ongs pa shes pa la sogs pa'i 'bras bu smin par 'gyur ro zhes bya ba ni man ngag go/ /stong pa nyid ma gtogs par lha'i rnal 'byor 'ba' zhig gis skyon cir 'gyur zhe na/gang zhig stong zhes bsgom pa ni/ /myur du sems dpa' grol bar 'gyur/ /zhes bya ba smos te/ gang zhig ces bya ba ni rnal 'byor pa'o/ /stong zhes zhes bya ba ni stong pa nyid bsgoms nas so/ /bsgom pa zhes bya ba ni lhar bsgoms nas so//de ni myur du grol bar 'gyur gyi gzhan du ni ma yin no zhes bya bar sbyar ro/ /sems dpa' zhes bya ba ni sems so/ /yang na phyag na rdo rje la bod pa'o/ /de yang ji lta bu zhig ce na/ ye shes kyis ni shes bya blta/ /shes byas 'gro ba brtag par bya/ /zhes bya ba smos te/ ye shes kyis zhes bya ba ni stong pa nyid kyi ye shes kyis so/ /shes bya ni phung po la sogs pa ste/ brtag pa ni de'i rang bzhin du bya ba'o/ /shes byas 'gro ba brtag par bya/ /zhes bya ba la shes bya zhes bya ba ni lha'o/ /'gro ba ni rang bzhin no/ /brtag pa ni dpyad pa ste lha'i rang bzhin yang gnyis su med pa'i ye shes kyis mthar thug par dpyad na/de ni myur du grol bar 'gyur/ /zhes bya ba snga ma dang 'brel to/ /lus can dri ma bkru bar bya/ /zhes bya ba nye bar bshad pa'i phyir/ pha dang zhes bya ba la sogs pa smos te/ pha zhes bya ba ni bdag dang bdag gir 'dzin pa'i bdag nyid kyi gti mug ste/ji ltar pha 'gro ba rnams kyi skyed pa po yin pa bzhin du/ gti mug gis kyang yul rnams bskyed pa'i phyir ro/ /ma zhes bya ba ni sred pa ste ji ltar mas bu rnams 'chi bar gyur kyang mi gtong ba ltar sred pas kyang skyes bu rnams yul rnams mi gtong bsam dang chos mthun pa'i phyir ro//bsad ces bya ba ni de dag gzhom pa'o/ /bram ze gtsang ma gnyis bzung nas/ /zhes bya ba ni 'dod chags dang zhe sdang ste chos kyi brdas bstan pa'o/ /bzung ba ni rgyu ba bsdams pa'o/ /rgyal po'i yul 'khor bcas bcom nas//zhes bya ba la rgyal po zhes bya ba ni nga rgyal te lhag par rlom sems pa'i phyir dang thams cad spro ba'i phyir ro/ /de ltar yang gsungs pa/ thams cad nga rgyal nyid las byung / /zhes bya ba'o/ /yul 'khor zhes bya ba ni lus te nyon mongs pa la sogs pa thams cad kyi gnas yin pa'i phyir ro//bcas zhes bya ba ni rjes su rgyu ba ste lus dang lhan cig rgyu ba'i phyir phung po dang khams la sogs pa rnams so/ /bcom nas zhes bya ba ni stong pa nyid kyi ting nge 'dzin gyis snang ba med par byas pa ste/ des ni/ lus can dri ma dag par 'gyur//zhes bya ba dang sbyar ro/ /gzhung 'di ni mu stegs can la yang yod mod kyi spang bar ni mi bya ste/ thams cad du 'gal ba med pa'i phyir ro/ /'dis ni le'u 'di'i bsdus pa'i don to/ /bdag gi zhes bya ba la sogs pa ni zhi ba la sogs pa'i mtshan ma dang bcas pa'i stong pa nyid ye shes rab tu gsal bar byed pas na rab tu byed pa'o//dpal gdan bzhi pa'i 'grel pa dran pa'i rgyu mtshan zhes bya ba las bdag gi gdan gyi rim par phye ba gsum pa'o// //da ni stong pa nyid kyi mthar lha'i rnal 'byor phyogs tsam zhig bstan par bya ba'i phyir/nyon cig ces bya ba la sogs pa rim par phye ba bzhi pa gsungs te/ rdo rje zhes bya ba ni phyag na rdo rje'o/ /nyon cig ces bya ba ni gnyis su med pa zhes bya ba dang 'brel to/ /ji bzhin lam zhes bya ba ni lam ltar gnon pa'i phyir ro/ /gnyis spangs zhes bya ba ni gzung ba la sogs pa dang bral ba ste/de nyid kyis na gnyis su med pa'o/ /de dag gis ni lha'i rnal 'byor gnyis su med pa nyid byang chub chen por bgrod pa'i lam mo zhes bya bar ston to/ /ji ltar zhe na 'khor ba zhes bya ba la sogs pa smos te/ 'khor ba nyid rgya mtsho ste byis pa rnams kyis brgal dka' ba'i phyir ro//sdug bsngal ba rnam par dka' bas na rab 'jigs pa'o/ /chu yi dgra ni dam pas gang / /zhes bya ba la chu'i dgra ni chu srin la sogs pa ste/ 'dir 'dod chags la sogs pa'i chu srin la sogs pa'i dgra dam pa ste mi bzad pa rnams kyis gang ba'o//dbus su bying ba'i lus can rnams/ /zhes bya ba ni 'khor ba'i rgya mtsho de'i nang du bying ba'i lus can rnams so/ /de dag ci zhig ce na/ sgrol ba'i mtshan nyid ces byar brjod/ /ces bya ba smos te/ mtshan nyid ces bya ba ni mtshon par bya ba ste lha'i rnal 'byor ro//sgrol ba zhes bya ba ni sgrol bar byed pa ste/ 'khor ba'i rgya mtsho las lus can rnams sgrol bar byed pa'i lam mo/ /brjod ces bya ba ni dpag tu med pa'i thub pa thams cad kyis gsungs so zhes bya ba'i don to/ /gnyis su med pa'i ye shes kyi mtshan nyid bstan pa'i phyir/mtshon bya zhes bya ba la sogs pa smos te/ mtshon bya ni lha'i rnal 'byor ro/ /mtshan nyid ni de brtag pa'i bya ba'o/ /'dis mtshon pas na mtshon pa po ste/ byed pa po rnal 'byor pa'o/ /rnam shes dang ni ye shes te/ /zhes bya ba la rnam shes ni shes bya'o/ / ye shes ni rnam par rig pa ste/ mtshan bya la sogs pa de dag gi gzung ba dang 'dzin pa'i mtshan nyid do/ /ye shes kyis ni shes bya blta/ /zhes bya ba la/ ye shes ni stong pa nyid kyi ye shes so/ /shes bya ni phung po la sogs pa ste/ der de dag bya ba'o/ /shes bya'i 'gro ba brtag par bya//zhes bya ba la/ shes bya ni mtshon bya la sogs pa'o/ /'gro ba ni de'i rang bzhin no/ /brtag pa ni dpyad pa ste/ de'i rang bzhin gzung ba dang / 'dzin pa dang bral ba'i rang bzhin gyi ye shes te/ de nyid ni gnyis su med pa'o/ /'gro ba brtags pa'i sems kyis ni//zhes bya ba ni shes bya'i rang bzhin khong du chud pa'i rnal 'byor pas so/ /cir 'gyur zhe na/ ji ltar 'dod bzhin mngon par 'gro/ /zhes bya ba la sogs pa smos te/ gnyis su med pa'i lha'i rnal 'byor gyi lam 'dis ji ltar 'dod pa bzhin te/ rdzogs pa'i byang chub tu bgrod par 'gyur ro zhes bya ba'i don to/ /stong pa nyid rig pa'i lam gyi phan yon gzhan bstan pa'i phyir/ zhags pas zhes bya ba la sogs pa smos te/ glang chen myos bcings ltar zhes bya ba ni ji ltar zhags pas bcings pa'i glang po che myos pa zhags pas bcings su zin kyang longs spyod khyad par can thob pa yin no//de bzhin du 'khor ba'i zhags pas bcings pa'i rnal 'byor pa yang de dang 'dra ste/ 'khor ba'i zhags pas gnad rmongs pa/ /zhes bya ba la/ gnad ni rang bzhin yongs su shes pa'i ye shes te rmongs pa ni der zhugs pa'o//su zhig ce na rnal 'byor pa ste glang po che lta bu'o/ /stong pa nyid phrag gcig ces bya ba ni/ nye bar mtshon pa tsam ste/ ci zhig ce na dpag tu med pa'i tshe rabs snga ma'o/ /'gro las 'gro'o zhes bya ba ni tshe rabs snga ma'i 'gro ba skad cig skad cig cing blangs pa'i 'khor ba des bcings su zin kyang /stong pa nyid rjes su rtogs pa'i lha'i rnal 'byor bsgoms pas ni rdzogs pa'i byang chub grub par ma gyur kyang / shi ba'i dus la bab pa na/ /'gro ba khyad par can du 'gro/ /zhes bya ba'i don to/ /de nyid kyi phyir gsungs pa sngon du zhes bya ba la sogs pa la/sngon du mtshan nyid bstan pa bzhin/ /zhes bya ba ni/ yid ni nam mkhar thim nas su/ /zhes bya ba la sogs pa gang gsungs pa'o/ /stong pa nyid bsgoms nas ci zhig bya zhe na/ stong pa'i zhing zhes bya ba la sogs pa smos te/ stong pa nyid kyis sbyangs pa'i lus kyi zhing sa la blo dang ldan pa ste/chos rnam par 'byed pa'i shes rab kyis blo dang ldan pas sa bon te lha rnams kyi sa bon btab cing btsugs nas 'bras bu smin par 'gyur ro zhes bya ba'i don to/ /ji ltar phung po la sogs pa'i lus la de bzhin gshegs pa'i sa bon gdab par rung zhe na/dpe'i sgo nas bstan pa'i phyir/ dper na zhes bya ba la sogs pa smos te/ gdol pa'i khang pa ni rigs ngan gyi khang pa'o/ /mes bsreg pa ni mes reg pas bsregs pa'o/ /lha yis byin gyis brlabs par rab tu brjod/ /ces bya ba la/lha ni lha rnams te byin gyis brlabs pa ni der sku gdung dang ri mo la sogs pa gzhag pa'o/ /de 'ba' zhig tu ma zad de/ rigs can dge dang mkhas pa kun du gnas/ /zhes bya ba smos te/ rigs can nyid dge ba ste/ rgyal po dang bram ze la sogs pa'o/ / mkhas pa ni rigs pa rnams la byang ba dang de kho na nyid kyi rnal 'byor can la sogs pa ste/ der gnas pa'o/ /de bzhin ting nge 'dzin gyis kun bshig nas/ /zhes bya ba la/ ting nge 'dzin ni stong pa nyid kyi ting nge 'dzin no/ /kun zhes bya ba ni lus kyi khang pa'o/ /bshig pa ni stong pa nyid kyi me lces snang ba med par byas pa'o//sa bon dgod pas rab tu dgod par bya/ /zhes bya ba ni lha rnams kyi sa bon dgod pas lha'i dri gtsang khang la sogs pa dang 'dra ba'i gnas su bya'o zhes bya ba'i don to/ /yi ge brgyad kyi sngags rnams ni/ /gnas dang gnas su brtag par bya//zhes bya bar sbyar ro/ /nye bar bshad pa dang / gang gi sngags rnams 'tshal bar bgyi/ /zhes bya ba'i lan bstan pa'i phyir/ steng du zhes bya ba la sogs pa smos te/ lha'i rnal 'byor la sogs pa rdzogs par byas kyi 'og tu/ sa bon dgod pas rab tu dgod par bya//zhes bya bar sbyar ro/ /steng du zhes bya ba ni rkan la'o/ /me'i sa bon zhes bya ba ni me'i rang bzhin gyi sa bon te yi ge k+ShuM ngo / /sa yi sa bon rnam pa gnyis/ /zhes bya ba ni sa rnam par dag pa'i rang bzhin gyi sa bon hUM rnam pa gnyis so/ /sbyar ba ni dgod pa'o/ /stong sogs rlung gi sa bon ni//zhes bya ba ni/ stong pa nyid rnam par dag pa'i rlung gi sa bon te yuM ngo / /sna dang rna ba dag la zhes bya ba ni sna dag dang rna ba dag la zhes bya bar sbyar te/ gnas de dag tu bsam pa ni bsgom pa'o/ /bdud rtsi chu yi sa bon ni/ /zhes bya ba ni bdud rtsi'i sa bon ni suM ste/ de nyid ni chu'i khams rnam par dag pa'o/ /lce yi dbang po dbang phyug gtso/ /zhes bya ba la/ lce'i dbang po nyid dbang phyug ste/ bdud rtsi la spyod pa'i dbang phyug go/ /de nyid kyi phyir gtso bo'o/ /gang gis brtsegs pa rim bzhin gzung / /zhes bya ba la/ gang gi zhes bya ba ni gnas gang dang gang gi sa bon gang dang gang yin pa ste/gnas bzhi ru ni sbyar bar bya/ /zhes bya ba dang 'brel to/ /brtsegs pa zhes bya ba ni yi ge ma la sogs pa thig le'i bar du rim bzhin du gzhag pa'o/ /de nyid bstan pa'i phyir mgrin par zhes bya ba la sogs pa smos te/gti mug sa bon zhes bya ba ni gti mug rnam par dag pa'i sa bon te smraM pa'i sa bon y+m+raM la/sngar bshad pa'i tshul gyis bkod pa'i sa bon brgyad po nyid ni go cha lta bu ste/ des kun du sbar bar bya zhing bsrung ngo zhes bya ba'i don to/ /ye shes mkha' 'gror bdag byas te/ /lus ni sa bon ldan par bya/ /zhes bya ba ni gzhung nye bar bsdu ba yin te dang po lha mo ye shes mkha' 'gro mar bdag nyid byas la de'i 'og tu sa bon dgod par bya'o zhes bya ba'i don te/ye shes mkha' 'gro ma ni nye bar mtshon pa'o/ /ye shes mkha' 'gro ma'i gzugs bstan pa'i phyir nyi ma'i dkyil 'khor zhes bya ba la sogs pa smos te go sla'o/ /steng du rdo rje dbu rgyan can/ / zhes bya ba la steng ni dbu rgyan gyi rtse mo ste/ der rdo rjes mtshan pa'i dbu rgyan gang la yod pa de la skad ces bya ba'o/ /dar gyi thod ni mdzes pas bcings/ /zhes bya ba ni dar gyi dbu rgyan bcings shing kun du 'phangs pas mdzes par byas pa'o/ /spyan gsum zhes bya ba ni zhal gsum po so so re re zhing yang spyan gsum gsum mo//khro zhing bzhad pa zhes bya ba la/ bzhad pa ni g.yon pa'i zhal lo/ /khro ba ni g.yas pa'i zhal te rtsa ba'i zhal ni 'dir 'jo sgeg tu blta bar bya ba'o/ /shin tu mdzes pa'i na bza' gsol/ /zhes bya ba ni shin tu dkar ba'i kha dog can gyi na bza' mnabs pa'o//ral gri dgra sta rdo rje dang / /zhes bya ba ni phyag g.yas na zhes bya ba'i lhag ma ste/ mtshan ma'i phyag rgya mngon par bsnams/ /zhes bya ba dang 'brel to/ /g.yon pa zhes bya ba la sogs pa ni go sla'o/ /sangs rgyas sprin zhes bya ba ni/ rnam par snang mdzad la sogs pa'i tshogs so//lhag ma ni go sla'o/ /dbugs mi g.yo bar bsgom par bya/ /zhes bya ba la/ dbugs mi g.yo ba ni gang du dbugs kyi rgyu ba med pa'o/ /bsgom par bya zhes bya ba ni ye shes mkha' 'gro mar bsgom pa ste ji srid du lus la dbugs thim par gyur cing sems dang 'dres par gyur gyi bar du bsgom pa ste/'dis ni dmigs pa rtse gcig pa ston to/ /da ni phra mo'i rnal 'byor gsungs pa/ yid ces bya ba la sogs pa la/ yid ces bya ba ni yi ge hUM ngo / /ye shes rnam shes zhes bya ba ni de nyid kyi rnam grangs so/ /shel dang 'dra bar bsam par bya//zhes bya ba ni yi ge hUM de kha dog dkar por bsgom mo zhes bya ba'i don to/ /A li kA li rab sbyor bas/ /de yi sa bon gzung bya ste/ /zhes bya ba la de'i zhes bya ba ni yid la sogs pa'i rang bzhin gyi sa bon de'o/ /gzungs sngags bya ste zhes bya ba ni btu ba'o/ / ci zhig ce na/ A li kA li rab sbyor ba/ /zhes bya ba la sogs pa smos te/ A li zhes bya ba ni yi ge U ring po'o/ /kA li zhes bya ba ni yi ge ha'o/ /thig le ni rjes su 'gro ba'i sgra yin pa'i phyir gnyi ga'o/ /de gang du bsgom zhe na/ smin par thigs pa'i gnas dag tu/ /zhes bya ba la smin par zhes bya ba ni go sla'o//thigs pa'i gnas zhes bya ba ni thig le'i gnas te/ gnas der ye shes can gyi sa bon bsgom/ /zhes bya ba yi ge hUM gis sa bon kha thur du bltas par bsgom mo zhes bya ba'i don to/ /'dir yang dbugs mi g.yo bar bsgom par bya zhes bya ba dang 'brel to//de yang dang por lha'i ting nge 'dzin goms pa'i 'og tu sa bon thig le'i gzugs can zla ba'i dkyil 'khor la gnas pa kha thur du bltas shing bdud rtsi'i rgyun 'dzag pa dang ldan pa'i ting nge 'dzin bsgom mo zhes bya ba'i don to/ /de'i mthar sngags kyi bzlas pa bstan pa'i phyir/ sangs rgyas lnga yis brgyan pa zhes bya ba la sogs pa smos te/ sangs rgyas lnga yis brgyan pa zhes bya ba ni sngar bshad zin to/ /de nyid ci zhig ce na/ yi ge'i sa bon te/ ye shes mkha' 'gro ma'i sa bon no/ /sngags de nyid kyi btu ba bstan pa'i phyir/ rlung dang me'i bdun don la/ / zhes bya ba sogs pa smos te/ de la rlung ni yi ge ya'o/ /de'i bdun pa ni yi ge sa'o/ /me ni yi ge ra ste/ de'i bdun pa ni ha'o/ /de dag nyid ni sgra'i don te/ rlung dang me'i bdun pa zhes bya ba'i sgra'i don yin pa'i phyir/ gzung la zhes bya bar sbyar ro/ /rigs kyi nang na gcig gi tshig yin no//rdo rje ma yi sa bon bskul/ /zhes bya ba la/ rdo rje ma'i sa bon ni rlung gi bdun pa yi ge sa la bya ste/ sku la zhes bya ba ni me'i bdun pa'i sa bon ha'i zla tshes su sbyar ba'o/ /ci'i phyir zhe na/ zla tshes dang rdo rje me'i sa bon gnyi ga bdud rtsi 'dzag pa'i rang bzhin du chos mthun pa'i phyir sa yang zla tshes su sbyar bar bya'o zhes bya ba'i don to//yang ci 'dra zhe na/ sgra dang thig les yang dag mnan/ /zhes bya ba smos te/ de la sgra zhes bya ba ni U ring po'o/ /de ni me'i bdun pa yi ge ha'i gdan du sbyar bar bya'o/ /thig le ni zla tshes kyi steng du thigs pas mnan pa ste bsdus pas hUM zhes bya bar 'gyur ro//char pa'i rgyun zhes bya bar brjod/ /ces bya ba la/ yi ge hUM gi sa bon de nyid bdud rtsi'i char 'dzag pa'i phyir char pa'i rgyun te/ de bzlas par bya'o zhes bya ba dang sbyar ro/ /sa bon de yang ji ltar bzla zhe na/ thog ma zhes bya ba la sogs pa smos te/thog ma ni hUM gi dang por ro/ /bla ma'i yi ge zhes bya ba ni yi ge oM mo/ /sreg byed yi ge mthar bzlas bya/ /zhes bya ba la/ sreg byed kyi yi ge ni swA hA'o/ /mthar ni hUM gi mthar te bsdus pas/ oM hUM swA hA zhes bya bar 'gyur ro/ /ting nge 'dzin dang ldan pa yi/ / blo gros can gyis sum 'bum bzla/ /zhes bya ba ni ye shes mkha' 'gro ma'i ting nge 'dzin thob pa'i sngags pas sngar 'das ma thag pa'i sngags 'bum phrag gsum du bzlas par bya ba ste/ des ni sngar bsnyen pa byas par 'gyur ro/ /bzlas dang ldan pa'i rnal 'byor pa//de yis bsam pa thams cad 'grub/ /ces bya ba ni/ rim pa de ltar bsgom pa dang bzlas par ldan pa'i rnal 'byor pa gang yin pa des ni bsam pa thams cad 'grub par 'gyur ba'o/ /bsam pa thams cad gang zhe na/ las brgyad la sogs dngos grub rnams//zhes bya ba smos te/ de la las brgyad ces bya ba ni zhi ba dang rgyas pa dang / dbang dang / dgug pa dang / mngon par spyod pa dang / bskrad pa dang / dbye ba dang / bcings pa rnams so/ /sogs kyis na dngos grub chen po brgyad la sogs pa gzung bar bya'o/ /sngon du zhes bya ba ni byang chub kyi sngon du ste/las brgyad la sogs pa'i dngos grub mngon du bsgrubs nas phyis byang chub kyang 'grub par 'gyur ro zhes bya ba'i don to/ /ji ltar 'grub ce na/ bsnyen pa zhes bya ba la sogs pa smos te/ bsnyen pa ni bshad zin to/ /de 'og las rnams brtsams byas na//zhes bya ba ni/ phyis sgrub pa'i dus su sngags spel ba dang bcas pas zhi ba la sogs pa'i las rnams brtsams shing bsgrubs na gdon mi za bar 'grub par 'gyur ro zhes bya ba'i don to/ /da ni rdo rje 'chang chen po'i sngags bstan pa'i phyir/ nyon cig ces bya ba la sogs pa smos te go sla'o//sngon du rdo rje'i tshig brjod la/ /zhes bya ba ni badzra zhes bya ba'i tshig sngags kyi dang por gdon pa'o/ /sde tshan dang po'i dang po gzung / /zhes bya ba la sde tshan dang po ni ka'i sde tshan te/ de'i yi ge dang po ni ka nyid do/ /de bzhin sde tshan bzhi pa yi/ /yi ge dang po bzung nas ni/ /zhes bya ba la/sde tshan bzhi pa ni ta'i sde tshan no/ /de'i yi ge dang po ni ta nyid do/ /nyis 'gyur zhes bya ba ni ta nyis brtsegs su bya'o/ /re pha steng du gzhag ces bya ba ni ta nyis brtsegs kyi steng du yi ge ra gzhag pa'o/ /de bzhin i dang re pha sbyar/ /zhes bya ba ni de'i 'og tu yi ge ra gzhag pa yi ge i steng du sbyar ba'o//gang zhig sde tshan gnyis pa yi/ /yi ge gnyis pa thig le can/ /zhes bya ba ni sde tshan gnyis pa tsa'i sde tshan gyi yi ge gnyis pa tsha'i 'gram na thig le gzhag pa dang ldan pa'o/ /lcags kyu yis ni gzir bar bya/ /zhes bya ba la lcags kyu ni yi ge i thung ngu ste de tsha'i steng du sbyar ba'o/ / bzhi pa yi ni gsum par bcas/ /zhes bya ba ni sde tshan bzhi pa'i yi ge gsum pa dang glo na gnas pa dang bcas pa'o/ /lan gnyis su ni bzlas par bya/ /zhes bya ba ni de lan gnyis su brjod pa ste tshin+da tshin+da bya bar 'gyur ro/ /sangs rgyas lnga yis brgyan pa dang / /zhes bya ba la/ sangs rgyas lnga ni yi ge hUM ste brgyan pa zhes bya ba ni de'i 'og tu yi ge'i hUM gdon pas sngags de mdzes par byas pa'o//sngon du phyag 'tshal yi ge ste/ /zhes bya ba ni sngags de thams cad kyi sngon te thog mar phyag 'tshal ba'i yi ge oM gdon par bya'o/ /yi ge drag po mtha' ru sbyor/ /zhes bya ba la/ yi ge drag po ni yi ge phaT do/ /mtha' ru sbyar ba ni sngags thams cad kyi mtha' ru bzla ba ste bsdus pas/ oM badzra karta ri tshin+da tshin+da hUM phaT ces bya bar 'gyur ro/ /sngags 'di'i phan yon bstan pa'i phyir/ sa bon 'di bzlas rnal 'byor pas/ /zhes bya ba la sogs pa smos te/ bcing ba zhes bya ba ni nye bar mtshon pa tsam mo/ /des na sngags 'di bzlas na las thams cad 'grub par 'gyur ro zhes bya ba'i don to/ /phyag rgya bstan pa'i phyir/ lag gnyis zhes bya ba la sogs pa smos te/ lag gnyis sor mo bsnol nas ni/ /zhes bya ba ni dang po lag pa rdo rje bcing bar bya ste/de'i 'og tu rdo rje khu tshur gnyis su bya'o zhes bya ba lhag ma yin no/ /de nyid bza' ba lta bur sbyar/ /zhes bya ba ni de'i 'og tu khu tshur g.yon pa bza' ba lta bur kha'i phyogs su bstan par bya'o zhes bya ba'i don to/ /khu tshur g.yas pa ci zhig bya zhe na/ khro bo dang zhes bya ba la sogs pa smos te/khro bo dang ni dbu ma brkyang / /zhes bya ba ni mdzub mo dang gung mo brkyang ba'o/ /gnyi ga phan tshun drud par bya/ /zhes bya ba la sogs pa ni go sla'o/ /de la khu tshur gyi mtshan nyid ni mthe bo nang du bcug ste/ sor mo lhag ma rnams kyis mnan pa'o/ / dgra yi mgrin pa la sogs pa/ /zhes bya ba la sogs pa'i tshig gis ni rna ba dang sna la sogs pa gzung bar bya ste/ de nyid kyis na dngos po thams cad ces bya ba smos so/ /yid ces bya ba ni de dag thams cad ni yid kyis rol pa ste/ mgo bcad pa la sogs pa yid kyis rol cing rdzogs par bya'o zhes bya ba'i don to//de nas zhes bya ba la sogs pa la/ chu la sogs pa kun zhes bya ba ni/ chu rlabs g.yo ba dang char 'bab pa la sogs pa'o/ /bcing ba ni mnan pa'o/ /gang yang sde tshan tha ma yi/ /yi ge gsum pa gzung bar bya/ / zhes bya ba la/ sde tshan tha ma ni pa'i sde tshan te/ ka la sogs pa sde tshan lnga'i tha ma yin pa'i phyir ro/ /de'i yi ge gsum pa ni ba'o/ /de bzhin sde tshan gsum pa yi/ /yi ge gsum pa nyid dang ni/ /zhes bya ba ni yi ge Da'o/ /de yi sa bon gsum pa la/ /zhes bya ba ni sa bon gsum pa'i sgras ni yi ge wa gzung bar bya'o//de'i zhes bya ba ni ba dang wa 'dra ba'i phyir ro/ /steng du e zhes bya bar sbyar/ /zhes bya ba ni go sla ste/ de dag gis ni ba Da we zhes bya bar 'gyur ro/ /sde tshan lnga pa'i dang po la/ /zhes bya ba ni yi ge pa'o/ /lcags kyu yis ni gzir bar bya//zhes bya ba la lcags kyu'i sgra ni yi ge i thung ngu la bya la/ gzir ba ni de de'i steng du sbyar ba'o/ /tsheg drag yi ge dbus byas te/ /zhes bya ba la tsheg drag gi yi ge ni wa'o/ /dbus su bya ba ni de'i 'og tu gdon pa'o/ /tha ma rdo rje can dang sbyar/ /zhes bya ba la rdo rje can ni yi ge ha'o//re pha glo na lcags kyu can/ /zhes bya ba ni gnyi ga sbyar te 'og tu ra btags shing glor lcags kyu ste I ring po sbyar ba'o/ /mthar ni drag po'i yi ge dang / /zhes bya ba ni yi ge phaT mthar sbyar ba'o/ /dang por phyag 'tshal gzhag par bya/ /zhes bya ba ni go sla'o/ /bsdus pa las oM ba Da we pi wa hrI phaT ces bya bar 'gyur ro//bcing ba yi ni sngags su grags/ /zhes bya ba ni 'di ni char la sogs pa 'ching ba'i sngags so zhes bya ba'i don to/ /phyag rgya gsungs pa/ lag pa gnyis zhes bya ba la sogs pa la/ lag gnyis thal mo sbyar nas su//zhes bya ba ni go sla'o/ /srin lag gnyis ni phan tshun dkri/ /zhes bya ba ni rtsa ba'i bar du srin lag gnyis gdon pa'o/ /khro bo gnyis kyis mnan par bya/ /zhes bya ba ni mdzub mo gnyis kyis srin lag gnyis kyi rtse mo nas dgug pa'o/ /mthe bo gnyis ni dbus su sbyar//zhes bya ba ni mthe bo gnyis kyi rtse mo gung mo gnyis kyi rtsa bar gzugs pa'o/ /lhag ma ni go sla'o/ /sprin gyi lha tshogs sreg par byed/ /ces bya ba ni/ sprin gyi lha la sogs pa bcings par 'gyur ba'o/ /lhag ma yang go sla'o/ /bdag gi gdan zhes bya ba la sogs pa la/lha'i rnal 'byor la sogs pa'i brjod par bya ba'i rim par phye ba bzhis bstan pa de ni bdag gi gdan zhes bya ba'i rab tu byed pa ste/ rdzogs pa ni mthar gtugs pa'o/ /dpal gdan bzhi pa'i 'grel pa dran pa'i rgyu mtshan zhes bya ba las/ bdag gi gdan gyi rim par phye ba bzhi pa'o// //da ni gzhan gyi gdan la/ zhi ba la sogs pa'i sbyin sreg dang / gtor ma sbyin pa dang slob ma'i mtshan nyid bstan pa'i phyir/ rim par phye ba dang po gsungs pa lha'i zhes bya ba la sogs pa la/ lha yi gzugs ni ji lta bu/ /zhes bya ba ni/ zhi ba la sogs pa'i sbyin sreg gi bya ba la/lha'i gzugs te lha'i rnal 'byor ji lta bu ste/ ci 'dra ba zhig blta bar bgyi/ /zhes bya ba lhag ma yin no/ /zhi ba'i sbyin sreg la sogs dang / /zhes bya ba ni/ zhi ba la sogs pa'i sbyin sreg gi bya ba ste/ ji ltar lags zhes bya ba dang 'brel to/ /gtor mar ldan pa zhes bya ba la/gtor ma ni sbyin sreg gi yan lag tu gyur pa'o/ /ldan pa ni sbyor ba ste/ gtor ma sbyin pa'i dus kyi lha'i rnal 'byor ro/ /ji ltar lags zhes bya ba ni/ bcom ldan 'das las nyan par 'tshal/ /zhes bya ba'i tshig snga ma dang 'brel to/ /yang na zhi ba la sogs pa'i sbyin sreg gi bya ba ji ltar lags/lha'i gzugs kyi sbyor ba ni ci 'dra/ gtor ma dag ni ji ltar sbyin/ /zhes bya bar sbyar ro/ /sogs pa'i sgras ni/ slob ma'i mtshan nyid ji ltar blta/ /zhes bya ba gzung ngo / /lan bstan pa'i phyir/ gzugs sogs zhes bya ba la sogs pa smos te/ gzugs zhes bya ba ni lha'i gzugs kyi sbyor ba'o//bsam pa ni bsgom pa'o/ /sogs kyis ni gtor ma la sogs pa gzung bar bya'o/ /rtse gcig ces bya ba ni sems ma yengs pa ste/ nyon cig ces bya ba dang 'brel to/ /sngags dang phyag rgya sbyin sreg gi/ /zhes bya ba la sngags dang phyag rgya ni 'og nas 'byung ba'i sngags dang phyag rgya'i tshogs so//ci zhe na/ sbyin sreg gi zhes bya ba smos te/ sbyin sreg gi bya ba dang 'brel ba'i'o/ /bzlas dang bsam gtan bsgom pa rnams/ /zhes bya ba la/ bzlas pa ni sngags pa zhes bya ba'i nye bar bshad pa'o/ / bsam gtan bsgom pa zhes bya ba ni/ gzugs zhes bya ba'i nye bar bshad pa ste/ sbyin sreg gi dus su lha'i bsam gtan dang / sngags bzla ba dang phyag rgya bcing ba rnams nyon cig ces bya bar sbyar ro/ /sngon du me yi las sogs la/ /blo can bzlas pa shes par bya/ /zhes bya ba la/me'i las ni sbyin sreg gi las so/ /blo can ni blo gros dang ldan pa ste/ blo gros dang ldan pa'i sngags pas me'i las kyi sngon du bzlas pa shes par byas la bzlas pa'i las kyi sngon du yang me'i las bya bar shes par bya'o zhes phan tshun du thog mtha' can du sbyar ro/ /sa ni sbyangs ma thag tu yang //stegs bu'i mtshan nyid 'bad de bya/ /zhes bya ba la/ dang po sbyin sreg gi phyir 'og nas 'byung ba'i phyag rgya la sogs pas sbyangs nas/ stegs bu'i mtshan nyid ces bya ba la/ thab khung rang bzhin 'bad pas bya/ /zhes bya ba thab khung gi mtshan nyid la byang bas brko bar bya'o zhes bya ba'i don to//sor brgyad la sogs brtsams nas ni/ /ji snyed khru gang bar du gzung / /zhes bya ba la/ sor brgyad nas brtsams te khru gang gi bar du gzung ba'am/ yang na sor brgyad nas brtsams nas/ ji snyed ces bya ba khru gang gi bar du bzung la/ khru gang nas brtsams te/ ji snyed khru stong gi bar du gzung ngo zhes zur gnyis su sbyar ro/ /brgyad pa dgra ni 'joms pa ste/ zhes bya ba la sogs pas ni thab khung gi tshad kyi dbye ba rnams las kyi bye brag dang sbyar ba yin no/ /de la brgyad pa ni sor brgyad pa'i tshad do/ /dgra 'joms pa ni mngon spyod kyi sbyin sreg bya ste de der bya'o zhes bya ba'i don to//de bzhin bcu pas rgyas par 'gyur/ /zhes bya ba ni rgyas pa'i sbyin sreg gi phyir sor bcu pa'i thab khung bya ba'o/ /bcu gnyis pas ni dbang du sdud/ /ces bya ba ni dbang gi sbyin sreg gi phyir sor bcu gnyis pa'i me thab bya ba'o//bcu bzhis de bzhin zhi ba nyid/ /ces bya ba ni nad la sogs pa bsal ba'i sbyin sreg gi phyir sor bcu bzhi pa'i me thab bya ba'o/ /thab sor bcu drug tshad kyis ni/ /rigs rnams mngon par 'phel bar byed/ /ces bya ba ni bu dang tsha bo la sogs pa'i rigs ma skyes pa skyed pa dang /skyes pa gnas par bya ba'i phyir sor bcu drug pa'i me thab bya'o/ /mtheb sor bco brgyad gnas kyis ni/ /ba lang rigs sogs mngon par 'phel/ /zhes bya ba la gnas zhes bya ba ni thab khung ngo / /ba lang rigs la sogs zhes bya ba la sogs kyi tshig gis ni rta dang glang po la sogs pa gzung ngo //lhag ma ni go sla'o/ /rgyar ni cha gsum bgos pa las/ /cha gnyis su ni brko bar bya/ /zhes bya ba ni/ rgya'i tshad sngar smos pa cha gsum du bgos pa las cha gcig bor te zabs su cha gnyis brko zhes bya ba'i don to/ /thab khung kun gyi thun mong gi mtshan nyid do//brkos pa yi ni brgyad cha yis/ /zhes bya ba ni zabs su brkos pa'i cha brgyad pas so/ /ci zhig bya zhe na/ khung bu yi ni kha khyer bya/ /zhes bya ba smos te/ thab khung gi khar ni bya ba'o/ /kha khyer gyi ni phyed cha yis/ /phyi rol gyi ni mu khyud bya/ /zhes bya ba ni kha khyer phyi rol du de'i phyed kyi tshad kyi mu khyud kyis bskor ba'o//mu khyud cha brgyad lhag pa la/ /pad+ma'i 'dab ma de'i cha brgyad/ /ces bya ba la mu khyud cha brgyad du bgos pa'i cha gcig tshun chad lte bar bya ba la/ cha brgyad po rnams las lhag ma ni pad+ma'i 'dab mar bya'o zhes bya ba'i don to/ / yang na/ mu khyud cha brgyad lhag pa la/ /zhes bya ba ni thab khung gi mu khyud cha dgur bgos la/ phyi rol gyi cha gcig dgu pas ni/ pad+ma'i mu khyud bya'o zhes bya ba'i don to/ /pad+ma'i 'dab ma de'i cha brgyad/ /ces bya ba ni pad+ma de'i 'dab ma brgyad du bya ba'o/ /gang du zhe na/ pad+ma yi ni phyi rol du//zhes bya ba smos so/ /tshad ci tsam zhe na/ sor gcig pa yi zhes bya ba smos te/ ra ba bya zhes bya ba ni pad+ma'i 'dab ma nyid ra ba dang 'dra bas ra ba'o/ /thab khung nang du rdo rje rnams/ /pad+ma'i steng du gzhag par bya/ /zhes bya ba ni rdo rje sems dpa'i mtshan ma rdo rje dang /mkha' 'gro ma rnams kyi mtshan ma rnams thab khung gi nang du pad+ma'i steng du bri ba'o/ /las kyi bye brag gis dbyibs kyi bye brag bstan pa'i phyir/ mngon spyod la ni zhes bya ba la sogs pa smos te/ mngon par spyod pa'i las la dbyibs gru gsum du bya'o zhes bya ba'i don to//lhag ma ni go sla'o/ /rgyas pa la yang de bzhin no/ /zhes bya ba ni kun nas zlum pa dang sbyar ba'o/ /zla ba phyed pa zhes bya ba ni zla ba tshes brgyad pa'i dbyibs lta bu'o/ /zur brgyad pa zhes bya ba ni rin po che ltar cha brgyad pa'o/ /rim gyis rim gyis sbyar bar bya/ /zhi dang rgyas dang dbang sogs rnams//zhes bya ba ni gzhung nye bar bsdu ba ste/ zhi ba la sogs pa'i las rnams gru bzhi la sogs pa'i thab khung du ji skad smos pa'i rim bzhin du sbyar bar bya ba'i don to/ /thab khung nang du zhes bya ba la sogs pa nye bar bshad pa'i phyir/ sangs rgyas lnga yi mtshan ma rnams/ji bzhin phyogs su dgod par bya/ /zhes bya ba smos te/ sangs rgyas zhes bya ba rdo rje sems dpa' dang mkha' 'gro ma rnams sam/ ye shes mkha' 'gro ma la sogs pa rnams so/ /ji bzhin phyogs su dgod par bya/ /zhes bya ba la/ dbus su ni rdo rje'o/ /phyogs kyi 'dab ma bzhi la ni kha T+wAM ga rnams so//kha khyer gyi ni gnas bzhi ru/ /zhes bya ba ni kha khyer gyi shar la sogs pa'i phyogs cha bzhir ro/ /sangs rgyas mtshan mas brgyan par bya/ /zhes bya ba ni rim bzhin du 'khor lo dang rin po che dang pad+ma dang ral gri rnams bri ba'o/ /zla phyed rdo rjes shin tu mdzes//zhes bya ba ni zla ba phyed pa la gnas pa'i rin po che dang rdo rje'o/ /grwa dang grwa ru kun du gzhag /ces bya ba ni phyi rol du mu ran gyi grwa bzhir bri ba'o/ /ji bzhin stan gyi gnas su yang / /mtheb sor bcu gnyis dag tu ni/ /'phangs su khru phyed ldan pa yi/ /ti se gangs ni mdzes par gzhag /ces bya ba la stan gnas zhes bya ba ni slob dpon gyi stan gyi mtha' g.yon phyogs su'o/ /ti se gangs zhes bya ba ni grags par zad do/ /'phangs su zhes bya ba ni nye bar mtshon pa ste nam 'phangs dang chu zheng du'o/ /khru phyed ldan pa zhes bya ba ni tshad de/ phyed dang ldan pa'i khru phyed do/ / 'dis ni mtho phyed dang gnyis su 'gyur ro/ /mtheb sor bcu gnyis zhes bya ba ni de'i drung du sa skas sor bcu gnyis su bya ba'o/ /'dab ma brgyad kyi gnas rnams su/ /lha mo rnams ni rim bzhin dgod/ /ces bya ba la/ 'dab ma brgyad ni phyi rol mu khyud kyi 'dab ma rnams la'o/ /lha mo rnams zhes bya ba ni lha mo rnams kyi mtshan ma ste/dgod pa ni rim bzhin du bri ba'o/ /de la shar gyi 'dab ma la ni mkha' 'gro ma'i mtshan ma lag pa gnyis khar bcug pa'o/ /byang du ni 'bar ma'i mtshan ma thal mo spyi bor sbyar ba'o/ /nub tu ni 'jib byed ma'i mtshan ma snyim pa nas khrag 'thung ba'o//lhor ni 'phrog byed ma'i mtshan ma sor mo gtun shing gi tshul du byed pa'o/ /dbang ldan la sogs pa'i mtshams bzhir ni seng ge mo dang stag mo dang / ce spyang mo dang 'ug pa mo rnams kyi mtshan ma lcags kyu 'ba' zhig tu bri bar bya'o/ /mtshan ma rnams kyi kha dog bstan pa'i phyir/rnal 'byor pa yis de yi tshad/ /khyad par du ni sbyar bar bya/ /zhes bya ba smos te/ de'i tshad ces bya ba ni/ mtshan ma rnams te so so'i thab khung du gzhal zhing btsugs pas so zhes bya ba ni zhi ba la sogs pa'i las kyi khyad par ro/ /sbyar ba ni de'i mdog tu bya ba'o//oM hi li zhes bya ba la sogs pa la nye bar spyod pa zhes bya ba ni sreg rdzas rnams la bsang gtor bya ba la sogs pa'i sngags so/ /sa sbyang ba la sogs pa nas brtsams pa'i las rnams la bdag nyid ye shes mkha' 'gro mar bsgom pa bstan pa'i phyir/ ye shes zhes bya ba la sogs pa smos te/rang gi lus zhes bya ba ni slob dpon gyi lus so/ /ye shes mkha' 'gror bsgoms pa yis/ /zhes bya ba ni/ tshig ni lha ru sprul par bya/ /zhes bya ba dang sbyar ro/ /cho ga bstan pa'i phyir/ bdag gi yan lag brgyad po ru/ /thams cad bkod pas bsrung bya ste/ /zhes bya ba smos te 'di ni bsdus pa'o//de nyid bshad pa'i phyir lce la yang zhes bya ba la sogs pa smos te/ lce la chu 'di nyid dang ni zhes bya ba la 'di nyid ces bya ba ni bdud rtsi ste/ chu zhes bya ba ni de nyid chu'i rang bzhin gyi phyir ro/ /de rnam par dag pa'i sa bon suM la yang de skad ces bya'o//nam mkha' rna ba sna dag la/ /zhes bya ba la/ nam mkha'i de kho na nyid ni sa bon yuM do/ /sa zhes bya ba ni sa rnam par dag pa'i sa bon hUM ngo / /me zhes bya ba me rnam par dag pa'i sa bon hUM ngo / /tshangs pa zhes bya ba ni steng gi tshangs pa'i gnas te/ rkan nas spyi gtsug gi bar du'o//'di dag ni rdo rje mkha' 'gro ma dang / ro langs ma dang / gtum mo dang / drag mo rnams kyi rang bzhin gyi sa bon du rim bzhin du shes par bya'o/ /mgrin pa zhes bya ba la sogs pa la/ rmongs pa zhes bya ba ni gti mug ste/ de rnam par dag pa'i sa bon s+m+r+yuM de nyid ni lha mo seng ge ma'i rang bzhin yin pas ded dpon te/ltag 'og tu sbyar bar bya'o/ /g.yo ba zhes bya ba ni rlung ste/ de rnam par dag pa'i sa bon y+m+r+yuM bya ba ni 'ug pa ste/de'i sa bon k+Sh+m+r+yuM go cha'i sa bon rnams lha mo rnams kyi rang bzhin du mos par bya'o zhes bya ba'o don to//ji ltar zhe na/ ba dan gsum zhes bya ba la sogs pa smos te/ ba dan gsum gyi phyag rgya zhes bya ba ni mthe bos mthe'u chung gi sen mo mnan te/ sor mo lhag ma gsum brkyang ba'o/ /yan lag brgyad du gtugs te bsrung //zhes bya ba ni spyi bo la sogs pa'i gnas brgyad du phyag rgya des gtugs nas sngar smos pa'i sa bon rnams dgod pa'o/ /da ni gong du thal ba'i ye shes mkha' 'gro ma la dran pa bskyed pa'i phyir dang / sa sbyang ba'i dus su yang ye shes mkha' 'gro ma bsgom pa bstan pa'i phyir/ye shes zhes bya ba la sogs pa smos te/ ye shes mkha' 'gro'i bdag nyid du/ /zhes bya ba ni/ rang gi lus ni bsgom par bya/ /zhes bya ba dang 'brel to/ /ji ltar zhe na/ bdag gi lus ni sprul byas te/ /zhes bya ba smos te/ bdag gi lus bsgyur bas so//kun+da zhes bya ba la sogs pa ni go sla'o/ /phyag na kha T+wAM rdo rje ste/ /zhes bya ba la rdo rje ni g.yas su'o/ /kha T+wAM ga ni g.yon du'o/ /mnyam par gzhag pas zhes bya ba ni/ 'jig rten dang chos la rgyab kyis phyogs pas so/ /dbugs mi g.yo bar bsgom par bya/ / zhes bya ba ni bshad zin to/ /de nas sa ni sbyang byas te/ /zhes bya ba la/ de nas zhes bya ba ni rim gyi don te/ dang po rang gi lus lhar bsgoms nas sa sbyang bar byas la/ de nas ni thab khung brko bar bya'o zhes bya ba'i don to/ /oM zhes bya ba la sogs pa la/ lag pa g.yas pa brkyang nas su//rdo rje bsgoms nas sa la bsnun/ /zhes bya ba ni/ bdag nyid lha'i rnal 'byor dang ldan pas/ lag pa g.yas pa kun nas brkyang ba'i dbus su/ yi ge hUM las gyur pa'i rdo rje rtse lnga pa bsgoms la/ rdo rje dang ldan pa'i lag pa des mkha' 'gro ma lnga'i gnas su sngags 'di zlos bzhin du bsnun la sa gzhi rdo rje'i rang bzhin du bsgom mo zhes bya ba'i don to//rdzas sbyang ba bstan pa'i phyir/ /lag gnyis khu tshur kha sbyar te/ /zhes bya ba la sogs pa smos so/ /'di'i don ni lag pa gnyis kyi khu tshur kha sbyar te/ gung mo gnyis brkyang nas rtse sprad la bstan nas gzung bar bya'o zhes bya ba 'di yin no//phyag rgya 'di ni dag byed pa'o/ /zhes bya ba la/ 'di zhes bya ba ni 'das ma thag pa'o/ /dag byed pa zhes bya ba ni 'og nas 'byung ba'i mar la sogs pa'i rdzas thams cad dag par byed pa'i thun mong gi phyag rgya'o/ /'on kyang sngags ni so sor sbyar bar bya'o//de la sngags gsungs pa/ oM shriM swA hA mar sbyang ba'i sngags so zhes bya ba nas ji srid du yam shing sbyang ba'i sngags so zhes bya ba'i bar du ste go sla'o/ /me lha bskyed pa'i cho ga bstan pa'i phyir/ me dbus pad+ma bsams nas su/ /zhes bya ba la sogs pa smos te/ de la/ me dbus pad+ma bsams nas su/ /zhes bya ba ni bstan pa'o/ /bgrang phreng zhes bya ba la sogs pa ni bshad pa'o/ /me yi lha ni dgug par bya/ /zhes bya ba ni sems dpa' gnyis pa'i cho ga bstan pa'o/ /g.yon pa khu tshur zhes bya ba la sogs pa ni bshad pa ste/ thab khung gi dbus su ji ltar grags pa'i me sbar la/me'i dbus su pad+ma/ pad+ma'i dbus su raM yongs su gyur pa las nyi ma la bzhugs pa'i me lha ral pa ser skya'i thor tshugs can mdog bu ram ltar dmar ser du 'dug pa/ lag pa g.yas g.yon gyis bgrang phreng dang spyi blugs thogs pa/ me 'bar bas 'khrugs pa'i nang na gnas par bsams la/g.yon pa khu tshur bcings nas su/ /zhes bya ba la lag pa g.yon pa'i khu tshur thab kyi phyi rol gyi ku sha'i khres po la bzhag nas/ mdzub mo dang gung mo brkyang ste gung mo'i tshigs gsum pa la/ mdzub mo'i rtse mo bkug ste btsugs nas bskyod pa'i phyag rgya 'di dang /oM A gats+tsha A gats+tsha ag+ne dzaH swA hA zhes bya ba'i sngags 'dis ye shes kyi me lha bkug la/ ar+g+hal sogs pa byin te/ pad+ma'i gdan la bzhugs pa ru/ /thab khung dbus su bsgom par bya/ /zhes pas dam tshig gi me lha la thim nas gnyis su med par bsgom par bya'o//de nas mchod pa bstan pa'i phyir/ /der ni zhes bya ba la sogs pa smos te/ der ni zhes bya ba sngar smos pa'i rim gyis bkug la/ ar+g+ha dang zhabs bsil la sogs pa phul te/ dam tshig gi me lha dang gnyis su med par bstims la/ ci 'byor pa'i me tog la sogs pa nas lha bshos kyi bar du dngos po lngas mchod nas sreg blugs gsum gsum bya zhes bya bar sbyar ro//gang du zhe na/ me dbus me lha'i lce la ni/ /zhes bya ba ste go sla'o/ /gang las she na kun las te sreg rdzas thams cad las so/ /lag gnyis zhes bya ba la sogs pa la/dbu ma kun du brkyang bar bya/ /zhes bya ba ni gung mo gnyis shin tu brkyang ste bskyed pa'o/ /cung zad dbye zhes bya ba ni sor mo lhag ma rnams chung zad kha sbyar ba'o/ /pad+ma'i tshul zhes bya ba ni/ pad+ma kha bye ba'i phyag rgya 'di me lha la bstan nas/ oM ag+ne dzu hU dzu hU swA hA zhes bya ba'i sngags kyis mnyes par bya'o//de nas ci zhig bya zhe na/ de nas 'bad pas se gol gsum gtogs pas 'bar bar thim par bsgom zhes bya ba smos te/ se gol lan gsum gtogs la spyan drangs pa'i me lha me 'bar ba'i gzugs su thim nas ro gcig tu gyur par bsgom mo zhes bya ba'i don to//me yi dbus su kun rig pas/ /de nas sbyang ba brtsam par bya/ /zhes bya ba ni me'i dbus su rang gi 'dod pa'i lha bsgoms nas sbyin sreg bya ba'i dus su sreg rdzas thams cad bsang gtor bya bas sbyang ba brtsam mo zhes bya ba'i don to/ /de nyid gsungs pa oM zhes bya ba la sogs pa la/oM hUM Ta Ti phaT ces bya ba ni sngags so/ /rdo rjer bcas pa'i lag pa yis/ /me tog yungs kar chu yis ni/ /phyogs kun du ni gtor nas su/ /me yi nang du blugs par bya/ /zhes bya ba la/ rdo rjer bcas pa'i lag pa zhes bya ba ni rdo rje gzung ba'i lag pas so//me tog yungs kar chu yis ni/ /zhes bya ba ni me tog dang yungs kar bcas pa'i chus so/ /phyogs kun du ni gtor nas su/ /zhes bya ba ni rdzas kun la gtor ba dang / me'i phyogs mtshams rnams su gtor ba'o/ /me yi nang du blugs par bya/ /zhes bya ba ni go sla'o//sbyang ba ni me dang rdzas sbyang ba'o/ /sngags ni sngags 'di nyid do/ /phyag rgya ni sngar smos pa'i lag gnyis khu tshur kha sbyar te zhes bya ba la sogs pa la rdzas dag par byed pa'i phyag rgya'o/ /oM badzra prA kA ra zhes bya ba la sogs pa ni go sla'o/ /lag pa gnyis ni brkyang nas su//phan tshun rtse mo reg par bya/ /zhes bya ba ni mgo bo'i steng du snyim pa'i phyag rgya sor mo'i rtse mo reg pa tsam du bca' ba'o/ /lhag ma yang go sla'o/ /g.yon pa khu tshur bcangs nas su/ /mthe bo 'og tu brkyang bar bya/ /zhes bya ba ni lag pa g.yon pa khu tshur bcangs nas bzlog ste mthe bo'i rtse mo sa la btsugs pa'o//lhag ma ni go sla'o/ /me la sbyin sreg byas nas 'dod pa'i lha la sbyin sreg bya ba bstan pa'i phyir/ nyi ma'i zhes bya ba la sogs pa smos te/ kha dog dmar sogs zhes bya ba ni las kyi bye brag gis kha dog dkar po la sogs pa yang gzung ba'o//sbyor ba'i gdan zhes bya ba ni/ sems dpa'i skyil krung du bzhugs pa'o/ /las kyi mdog tu bsgom par bya/ /zhes bya ba ni kha dog dmar sogs zhes bya ba'i bshad pa yin no/ /lhag ma ni go sla'o/ /'di dag gi don ni me'i dbus su pad+ma'i steng du nyi ma'i dkyil 'khor de'i steng du hUM yongs su gyur pa las rdo rje rtse mo lnga pa lte bar hUM gi sa bon gyis mtshan pa de thams cad yongs su gyur pa las/dmar po la sogs pa'i kha dog can rgyan dang na bzas bklubs pa phyag g.yas dang g.yon na rdo rje dang kha T+wAM ga bsnams pa'i rang gi 'dod pa'i lha ye shes mkha' 'gro ma la sogs pa sems dpa'i skyil krung can du bsgom pa 'di yin no//ye shes kyi sems dpa' sgrub pa bstan pa'i phyir/ rdo rjes gzugs ni bskyed nas su/ /rang gi dbugs las byung ba yi/ /bdag gi lus ni gang yin la//ye shes mkha' 'gro bstim par bya/ /zhes bya ba smos te/ bdag gi dbugs las byung ba zhes bya ba ni/ bdag gi dbugs las spros pa'i ye shes kyi sems ma'o/ /bdag gi lus ni gang yin la/ /zhes bya ba ni bdag gi rang bzhin dang dbyer med pas na/ bdag gi lus te me'i nang du bskyed pa'i dam tshig sems ma'o/ /lhag ma ni go sla'o/ /oM Tha Tha zhes bya ba la/ Tha'i gnas su hUM brjod par bya ste/ des na oM hUM hUM hUM swA hA zhes bya bar 'gyur ro/ /dbyug pa zhes bya ba ni blugs gzar ro/ /snod ces bya ba dgang gzar ro/ / rdzas rnams sbyang ba'i sngags gsungs pa oM hUM swA hA zhes bya ba'o/ /de nyid rtsa ba'i sngags yin par bstan pa'i phyir/ rtsa ba'i sngags dang phyag rgya'o/ /zhes bya ba smos so/ /phyag rgya zhes bya ba ni/ lag gnyis khu tshur kha sbyar te/ /zhes bya ba la sogs pa la rdzas dag par byed pa'i phyag rgya nyid gzung ste/phyag rgya 'dis ni sngags so so dang sbyar nas me la sbyin sreg bya ba'i rdzas rnams sbyong ba bzhin du rtsa ba'i sngags 'di 'di dang sbyar nas 'dod pa'i lha la sbyin sreg bya ba'i rdzas rnams kyang sbyang bar bya'o/ /mchod pa sna tshogs kyi sngags dang phyag rgya bstan pa'i phyir/ lag pa g.yas pa zhes bya ba la sogs pa smos te go sla'o/ /brkyang ba de nyid kyi zhes bya ba ni khu tshur bcangs te sor mo gsum po dgrol thabs su brkyang ba'o/ /de nyid kyi phyir/ 'og nas khu tshur de nyid las/ /zhes bya ba smos so/ /me tog gi phyag rgya las zhes bya ba ni khu tshur bcangs nas dbu ma bsgreng ba'o//lhag ma ni go sla'o/ /lag pa gnyis ka brkyang ste/ mthe bo gnyis gung mo'i rtsar btsugs la/ bskyod pa dang zhes bya ba ni gtor ma'i phyag rgya ste/ de dag kyang go sla'o/ /me yi kha yi nang du ni/ /lan re bzlas shing lan re sbyin/ /zhes bya ba ni dgang blugs kyi sngags oM hUM hUM hUM swA hA zhes bya ba lan re bzlas pa gang ba'i sbyin sreg me lha'i zhal du lan re zhing dbul bar bya'o zhes bya ba'i don to//dbus su gong bu bsreg par bya/ /zhes pa la/ dbus su ni rang gi 'dod pa'i lha'i zhal du'o/ /gong bu zhes bya ba ni gang ba'i sbyin sreg gi tshig bla dgas so//bdun las lhag pa kun bzung nas/ /zhes bya ba ni dang po gang ba'i sbyin sreg bdun sbyin pa dang / lhag ma ste bsdu ba'i sbyin sreg gi dgang blugs lnga gzung bar bya ba'o/ /'bad de rdzogs pa'i mtha' ru ni/ /lhag ma dag ni bsreg par bya/ /zhes bya ba ni dang po me lha'i khar dgang blugs 'bad pas lan cig phul nas de'i 'og tu lhag ma ste rdzas gzhan rnams la sreg blugs dbul bar bya zhing de bzhin du rang gi 'dod pa'i lha la yang dang por dgang blugs phul la de'i mthar lhag ma sreg blugs dbul lo zhes bya ba'i don to//de dag gis ni 'di skad du/me'i khar dang po dgang blugs gcig byin la/ de nas rdzas thams cad kyi sreg blugs sbyin te de'i 'og tu yang dgang blugs gcig byin la/ de nas yang me'i nang du rang gi 'dod pa'i lha'i zhal du dgod pa'i sbyin sreg gcig byas la/ lhag ma sreg blugs phul te/de'i mthar yang dgang blugs gcig phul la bzod pa gsol nas/ slar yang me'i lha bsgoms la de'i khar dgang blugs gcig byin te/ snga ma bzhin du lhag ma sreg blugs byin la/ de'i 'og tu yang dgang blugs gcig byin nas/ de thams cad kyi mthar yon bdag gi lag pas me'i khar dgang blugs gcig ster du gzhug ste/de tsam gyis ni dgang blugs rnam pa bdun rdzogs pa yin te/ 'di ni gdan bzhi par gnas pa yin no/ /bsregs pa zin nas lha rnams ni/ /bdag gi lus la thim par bsgom//zhes bya ba ni sbyin sreg rdzogs nas ni rang gi 'dod pa'i lha bsdus te rang gi lus la thim par bsgom pa'o/ /dgang blugs kun la rdzogs pa ru/ /sngags dang phyag rgya rdzogs par bya/ /zhes bya ba ni dgang blugs bdun po kun la sngags dang phyag rgya dang sbyar ro zhes bya ba'i don to//da ni bsdu ba'i sbyin sreg dgang blugs lnga dang ldan pa bstan pa'i phyir/ snod ni zhes bya ba la sogs pa smos te dgang blugs bdun dang bcas pa'i sbyin sreg rdzogs nas/ slar yang me'i dbus su rang gi 'dod pa'i lha bsgoms la/ mar gyis bkang ba'i gzar bu chen po dang chung ngu kha sprad de/dgang blugs gcig phul la/ de nas sreg blugs phul nas/ mthar yang dgang blugs dbul lo zhes bya ba'i don to/ /kha cig ni de'i 'og tu me la yang dgang blugs gnyis sbyin no zhes zer ro/ /drangs nas dbugs kyi dngos gyur te//rang gi lus la thim par bya/ /de nas rang gi lus nyid du/ /mkhas pa yis ni bsgom par bya/ /zhes bya ba ni rang gi 'dod pa'i lha gshegs su gsol ba ste/ brda phrad par zad do/ /dbus su me yi lha nyid ni/ /mkhas pa yis ni bsams nas kyang / / zhes bya ba ni rang gi 'dod pa'i lha rang gi dbus la bsdus kyi 'og tu me la bsang gtor la sogs pa byas nas/ sngar bstan pa'i tshul gyis dbus su me lha bsgoms la/ lhag ma lan gsum bsregs nas su/ /zhes bya ba la/ gang ba'i sbyin sreg rnam pa gsum sbyin te/ mchod dang gtor ma sbyin par bya/ /zhes bya ba ni mchod pa dang gtor ma la sogs pa byin te/ bzod pa gsol bar bya ba'o/ /bkra shis dbyangs ni blangs nas su/ /der ni phyag rgya sbyar bar bya/ /zhes bya ba ni bkra shis kyi glu dang bcas pa'i phyag rgya bca' ba'o/ /phyag rgya yang 'dir/lag gnyis thal mo sbyar nas su/ /zhes bya ba la sogs pa pad+ma'i tshul gyi phyag rgya'o/ /de ltar na dang por ni dgang blugs kyi sbyin sreg bdun no/ /de'i 'og tu yang rnam pa lnga ste bsdus pas bcu gnyis su 'gyur bar shes par bya'o/ /sbyin sreg las kyis phye ba gzhan//mdor bsdus rgyas pa min par bshad/ /ces bya ba ni zhi ba la sogs pa'i las kyi bye brag gis dbye ba'i rdzas rnams mdor bsdus te bshad par bya'o zhes bya ba'i don to/ /sA lu zhes bya ba la sogs pa ni go bar zad do/ /yam shing ni bud shing bstan pa'i phyir/ 'o ma can gyi shing lnga las//zhes bya ba smos te/ a mra dang / ba ta dang / n+ya gro d+ha dang / bar ka ta dang / a shwat+tha ste lnga po de dag ni 'o ma can gyi shing lnga'o/ /sor mo bcu bzhir ldan pa'i tshad/ /ces bya ba ni khyad par gyi yam shing bstan pa'o/ /zhi ba'i dus la bab pa na/ /zhes bya ba ni gang gi tshe zhi ba byed pa de'i tshe 'das ma thag pa'i rdzas de dag bsreg pa de ni cho ga'i mchog ste/gtso bo yin no zhes bya ba'i bar du'o/ /rgyas pa'i rdzas bstan pa'i phyir/ til nag ces bya ba la sogs pa smos te go bar zad do/ /yam shing zhes bya ba ni nye bar mtshon pa ste/ bud shing yang de dag nyid las gzung bar bya'o//sgrub pos khyad par bsreg par bya/ /zhes bya ba ni las kyi bye brag gis phye ba'i thun mong ma yin pa'i sreg rdzas so zhes bya ba'i bar du'o/ /dbang gi las kyi rdzas bstan pa'i phyir/ til ni dmar dang gnag pa dang / /zhes bya ba la sogs pa smos te/til nag po dang / dmar po ste/ me tog dmar po la bya'i til ni ma yin no/ /nA ga ge sar zhes bya ba la sogs pa ni go sla'o/ /thang shing zhes bya ba la sogs pa la/ klu shing zhes bya ba ni nA ga ge sar gyi shing ngo / /chags pa'i las zhes bya ba ni dbang du bsdu ba dang dgug pa'i las so//mngon spyod kyi rdzas bstan pa'i phyir/ til nag ces bya ba la sogs pa smos te/ ba la ta ga nag chen 'bras/ /zhes bya ba ni ba la ta ki'i 'bras bu dang / nag po chen po'i 'bras bu zhes bya ba gnyis su sbyar ro/ /khrag ces bya ba ni tha mal pa'i khrag gang yang rung ba'o//lung tang zhes bya ba la sogs pa la/ sgur po'i shing zhes bya ba ni tsher ma sgur po can zhes grags pa'i shing ngo / /lhag ma ni go bar zad do/ /bskrad pa'i las kyi rdzas bstan pa'i phyir/ yungs kar zhes bya ba la sogs pa smos te/ gser shing zhes bya ba ni da du ra'o//'dir yang yam shing gi tshad ni mngon spyod kyi tshad las ltos pa'i phyir ma smos so/ /lhag ma yang go bar zad do/ /bcing ba'i las kyi rdzas bstan pa'i phyir/ nya dang zhes bya ba la sogs pa smos te/ go bar zad do/ /'dir yang yam shing gi tshad ni snga ma bzhin no//de ltar na thang shing dang / n+ya gro d+ha dang / klu shing dang / ba sha ka dang / lung tang dang / sgur po dang / ba la ta ka dang / gser shing dang / bya rog gi tshang gi shing bu dang / so shing rnams ni me spar bar bya ba'i phyir yam shing dang bud shing bstan pa yin la/ lhag ma ni gzhan dag yin par shes par bya'o//da ni rgyal srid la nye bar spyod pa'i sbyin sreg bstan pa'i phyir/ de nas zhes bya ba la sogs pa smos te/ khyad par du zhes bya ba ni/ sngar smos pa'i las drug las bye brag tu gyur pa'am/ yang na 'di ni rgyas pa dang dbang du gyur pa'i las tha mal pa las ltos nas/rgyal srid la nye bar spyod pa'i las la ni khyad par zhes bya'o/ /de yi dbus su mnyam gzhag nas/ /smon lam btab ste khrus byas na/ /zhes bya ba la/ de'i dbus su zhes bya ba ni sbyin sreg gi gnas su'o/ /mnyam gzhag nas zhes bya ba ni/ rgyal srid la sogs pa dmigs pa'i blo mi g.yengs pas so//smon lam btab pa yang rgyal srid la sogs pa'i phyir smon lam bya ba'o/ /khrus bya ba ni rdo rje sems dpa'i bum pa'i chus bkru ba'o/ /lhag ma ni go bar zad do/ /sa gsum zhes bya ba ni sa 'og dang sa bla dang bar snang gi 'jig rten gsum du'o//tshul gzhan bstan pa'i phyir/ mar dang zhes bya ba la sogs pa smos te go sla'o/ /dpal ldan 'gyur zhes bya ba ni rgyal srid kyi go 'phang la gnas pa'o/ /de nyid bstan pa'i phyir/ bya ba gang dang gang bsams pa/ /de de thams cad 'dir 'grub 'gyur/ /zhes bya ba smos te/ gzhan la mi 'os pa'i phyir ro/ /da ni slob ma'i mtshan nyid bstan pa'i phyir/ de nas zhes bya ba la sogs pa smos te/ yongs su zung zhes bya ba ni gzung bar bya ba'am blang bar bya ba'o/ /yan lag thams cad ces bya ba ni lag pa dang mig la sogs pa'o/ /yang na slob ma nyid du rung ba'i mtshan nyid kyi cha shas so//de nyid kyi phyir gsungs pa/ dul zhing spyod pa zhi ba dang / /zhes bya ba la sogs pa smos te/ dul ba zhes bya ba ni dbang po thul ba'o/ /spyod pa zhi ba zhes bya ba ni bzang por spyod pa ste/ sgra'i bstan bcos la sogs pa'i bstan bcos shes pa'o//chos gsum la ni mngon par dang / /ces bya ba ni nyan thos dang / rang sangs rgyas dang byang chub chen pa'i theg pa ste/ theg pa gsum gyi chos la dad pa'o/ /theg pa che la rtag tu dga'/ /zhes bya ba na/ nyan thos kyi sdom pa la gnas kyang / theg pa chen po'i sems bskyed pa dang nam yang mi 'bral ba'o//de skad du yang / nyan thos kyi ni sdom gnas nas/ /theg pa chen po'i sems bskyed bya/ /zhes gsungs so/ /sngags kyi sbyor ba zhes bya ba ni zhi ba la sogs pa'i sngags dang yang dag par ldan pa'o/ /rgyud kyi sbyor ba zhes bya ba ni/zhi ba la sogs pa'i las la 'khrul 'khor bri ba la sogs pa'i sbyor ba'o/ /bzo dang sgyu rtsal thams cad mkhas/ /zhes bya ba la sogs pa ni bshad zin to/ /bsam gtan sbyor la mngon par dga'/ /zhes bya ba ni bsam gtan bsgom pa la dad pa'o//thos dang klog sogs gus dang bcas/ /zhes bya ba ni bde bar gshegs pa'i gsung rab thos pa ste nyan pa dang klog pa dang / sogs kyis ni kha ton bya ba la sogs pa la gus pa yod pa'o/ /dus rnams kun du bla mar gus/ /zhes bya ba ni lus ngag yid gsum gyi bya bas rtag tu bla ma bsten pa'o//sbyin sreg dge ba'i las la brtson/ /zhes bya ba la/ sogs kyis ni snyen par smra ba la sogs pa gzung bar bya'o/ /de ltar dge ba'i yan lag bstan nas/ sdig pa'i yan lag dang bral ba bstan pa'i phyir/ /'dod la dga' ba ma yin zhing //zhes bya ba la sogs pa nas/ ngang tshul ngan min tshig rtsub min/ /zhes bya ba'i bar du smos te/ de dag ni/ yongs gzung slob ma'i mtshan nyid yin/ /zhes bya ba snga ma dang sbyar ro/ /de las bzlog pa'i mtshan nyid bstan pa'i phyir/ sems can kun la smod pa dang //zhes bya ba la sogs pa smos te go sla'o/ /'di lta bu dag spang bar bya/ /zhes bya ba ni/ mtshan nyid nye bar bsdu ba yin te/ de la sogs pa ser sna can dang le lo can la sogs pa ma smos pa gzhan dag kyang bsdu bar bya ba'i don to/ /gzhan gyi gdan zhes bya ba la sogs pa la/bdag gi lus las gzhan pa'i sbyin sreg la sogs pa'i bya ba ni gzhan te gdan ni gnas so/ /gzhung gang gi sbyin sreg la sogs pa'i cho ga rab tu gsal bar ston par byed pa de ni rab tu byed pa'o/ /dpal gdan bzhi pa'i 'grel pa dran pa'i rgyu mtshan zhes bya ba las/gzhan gyi gdan gyi rim par phye ba dang po'o// //da ni chu'i sbyin sreg gi rim par phye ba bstan pa'i phyir/ chu yi zhes bya ba la sogs pa smos te/ sbyin sreg ces bya ba ni mchod sbyin no/ /gzigs mo zhes bya ba ni ngo mtshar gyi yul du gyur pa ste/ji ltar me'i sbyin sreg gis bsod nams thob pa ltar chu'i sbyin sreg gis kyang bsod nams 'thob pa'i phyir ro/ /de nyid nye bar bstan pa'i phyir/ chu yi zhes bya ba la sogs pa smos te/ sogs pa'i sgras ni sreg rdzas dang thab khung la sogs pa gzung ngo / / mtshan nyid ces bya ba ni rang bzhin no/ /lan gsungs pa/ chu sogs zhes bya ba la sogs pa smos te/ yang dag mtshan nyid ces bya ba ni de kho na nyid kyi rang bzhin no/ /de nyid kyi phyir de kho na zhes pa smos te go sla'o/ /de la 'dir chu'i de kho na nyid ni srog chags med cing gtsang la dang ba'o//sogs pa'i sgras ni bum pa la sogs pa'i de kho na nyid rtsa ba ni ri mo nag po med pa la sogs pa'i de kho na nyid gzhan dag kyang gzung bar bya'o/ /bla re dag ni bres nas su/ /sna tshogs gos rnams rab tu dpyad/ /ces bya ba ni gang du sbyin sreg byed pa'i gnas der bla re bre ba dang /rgyal mtshan dang gos la sogs pa bri ba'o/ /shin tu yangs shing gru bzhi par/ /kun tu dri yis byug par bya/ /zhes bya ba la/ shin tu yangs shing zhes bya ba ni man ngag las khru bzhi pa'i tshad du bya'o zhes bshad do/ /gru bzhi pa zhes bya ba ni go sla'o//kun du zhes bya ba ni mnyam pa ste/ skye bos dben zhing yid du 'ong ba'i gnas su gzhi mnyam pa la lci bas byugs la tsan+dan la sogs pas gru bzhi par byugs nas/ bla re la sogs pa bre bar bya'o zhes bya ba'i don to/ /dbus su chu yi snod sogs la/ zhes bya ba la/ dbus su zhes bya ba ni 'das ma thag pa'i maN+Dal gyi dbus su'o/ /chu yi snod ces bya ba ni sa las byas pa'i bum pa rtsa ba nag po la sogs pa'i skyon dang bral ba/ kha'i tshad sor bcu bzhi dang ldan pa/ zabs su de'i sum gnyis yod pa/ zhi ba'i thab khung lta bu'i dbyibs can te/gzhag par bya zhes bya ba lhag ma yin no/ /dri ni dkar pos byugs nas su/ /zhes bya ba ni/ tsan+dan dkar pos byugs pa'o/ /chu dang 'o mar bsres pa yis/ /snod ni mdzes par dgang bar bya/ /zhes bya ba la/ chu ni sngar smos pa'i mtshan nyid can no/ / 'o mar bsres pa ni go sla'o/ /snod mdzes pa ni sngar smos pa'i mtshan nyid can no/ /dbus kyi bum pa bstan nas/ phyogs mtshams kyi bum pa dgod pa'i phyir/ bum pa dag ni zhes bya ba la sogs pa smos te go sla'o/ /dri yi chu zhes bya ba ni dri zhim po dang bcas pa'i chu'o//lhag ma ni brda phrad par zad do/ /bdag nyid ye shes mkha' 'gro ru/ /skad cig gis ni bskyed nas su/ /zhes bya ba ni zhal gsum la sogs pa 'og nas 'byung ba lta bu'i ye shes mkha' 'gro mar bdag nyid bsgom pa'o/ /me tog bdug spos dri sogs pa'i/ / dngos pos bdag nyid mchod byas la/ /zhes bya ba ni bum pa'i nang du son pa'i lha mo 'khor lo bdag dang 'dra ba me tog la sogs pa'i rdzas kyis mchod par bya'o/ /de nyid bstan pa'i phyir/ de 'og ces bya ba la sogs pa smos te/ de 'og ces bya ba ni bdag nyid bskyed kyi 'og tu'o//chu yi las rnams sbyar bar bya/ /zhes bya ba ni snod kyi chu'i nang du lha mo rnams bsgoms nas/ sbyin sreg bya'o zhes bya ba ste mdor bsdus pa'o/ /nye bar bshad pa gsungs pa lag gnyis zhes bya ba la sogs pa la/ lag gnyis thal mo sbyar nas bya//pad+ma'i tshul du cung zad dbye/ /zhes bya ba ni pad+ma'i phyag rgya ste go sla'o/ /sngags gsungs pa/ oM ka ma la b+he swA hA zhes bya ba ste/ sngags dang phyag rgya 'di bum pa rnams la bstan la/ chu'i nang du pad+ma bsgom par bya'o zhes bya ba'i don to/ /de nyid kyi phyir gsungs pa/zla ba'i dkyil 'khor gyis brgyan pa'i/ /pad+ma chu yi nang bkod la/ /zhes bya ba'o/ /gdugs dkar po yis g.yogs pa yi/ /sa bon dbus su bsgom par bya/ /zhes bya ba ni pad+ma dang zla ba'i dkyil 'khor gyi steng du gdugs dang bcas pa'i sa bon hUM rang gi srog gi ngo bo nyid bsgom pa'o//yang na rang gi dbugs las byung ba'o/ /de nyid kyi phyir gsungs pa/ rang gi dbugs las byung ba yi/ /sa bon las ni gzugs su bskyed/ /ces bya ba smos te go sla'o/ /ci 'dra zhe na/ sems dpa'i skyil krung zhes bya ba la sogs pa smos te/'di'i don ni sa bon yongs su gyur pa las ye shes mkha' 'gro ma phyag gnyis pa/ bzhad pa dang khro ba dang / sgeg pa dang bcas pa'i zhal gsum pa/ phyag gnyis na rdo rjes mtshan pa'i dbyug pa bsnams shing sems dpa'i skyil krung can rgyan thams cad kyis bklubs pa kha dog dkar shing shin tu mdzes pa'i na bza' gsol bar bsgom pa 'di yin no//dam tshig phyag rgya zhes bya ba la sogs pa la/ dam tshig gi phyag rgya ni/ lag gnyis phan tshun khu tshur bcings/ /zhes bya ba la sogs pa ste/ phan tshun zhes bya ba ni rgyab sprad pa'o//mdzub mo gnyis kyis mdud par bya/ /zhes bya ba ni rtse mo phan tshun mdud pa'o/ /'di dag gi don yang bdag gi dbugs las byung ba'i ye shes sems ma bsams la/ dam tshig sngags dang phyag rgya bstan la dam tshig sems ma la gnyis su med par bstim par bya'o zhes bya ba yin no//shar la sogs pa'i bum pa rnams su yang rim bzhin du rnal 'byor ma rnams dgod pa bstan pa'i phyir/ shar gyi bum par rdo rje ma/ /zhes bya ba la sogs pa smos te go sla'o/ /so so so sor mtshan ma yi/ /dam tshig phyag rgya bstan par bya//zhes bya ba la/ mtshan ma'i phyag rgya dang dam tshig gi phyag rgya zhes gnyis su phye la/ dam tshig sems ma rnams dang / ye shes sems ma rnams la so sor bstan par bya'o zhes bya bar sbyar ro/ /de la shar phyogs la sogs pa'i bum pa rnams su rang rang gi sa bon las byung ba'i rdo rje ma la sogs pa'i rnal 'byor ma'i tshogs bltas la/'og nas 'byung ba'i mtshan ma'i phyag rgya ste rtsa ba'i phyag rgya rnal 'byor ma rnams la so sor bstan la/ de bzhin du ye shes kyi sems dpa'i tshogs la sngar smos pa'i dam tshig gi phyag rgya so sor bstan nas gnyis su med par thim par bsgom mo zhes bya ba'i don to//de nas ci zhig bya zhe na/ me tog ces bya ba la sogs pa smos te/ mkhas pa yis zhes bya ba ni mchod pa la sogs pa'i dbye ba mi dmigs pas so/ /rtsa ba'i phyag rgya bstan par bya ba'i phyir/ rdo rje khu tshur zhes bya ba la sogs pa smos te/g.yon pa snying gar bzhag nas su/ /zhes bya ba ni khu tshur g.yon pa snying gar gan rkyal du gzhag pa'o/ /g.yas pas steng nas dbub par bya/ /zhes bya ba ni de'i steng du g.yas pa kha sbub ste bzhag pa'o/ /oM dzUM hUM swA hA rtsa ba'i sngags so zhes bya ba ni/lha mo rnams kyi rtsa ba'i sngags te/ sngags des phyag rgya bstan par bya zhing sngags 'di nyid 'bum phrag gsum du bzlas pas sngar bsnyen par yang bya la/ 'di nyid kyis mchod sbyin yang dbul bar bya'o/ /kun+da la sogs me tog dkar/ /zhes bya ba ni me tog dkar po dang gzhan yang rung ba gzung bar bya'o//rtse mor dUr ba btsugs nas su/ /zhes bya ba ni me tog gi rtsa ba nas dUr ba'i rtse mo btsugs te/ me tog gi rtse mo'i bar du dbyung ba ste/ de nyid kyi bum pa'i nang du bsgoms pa'i lha mo rnams la 'das ma thag pa'i sngags kyis mchod sbyin dbul bar bya'o//gang du dbul bar bya zhe na/ lha mo'i dbu steng rdo rje yi/ /cod pan la ni gtor bar bya/ /zhes bya ba smos te go sla'o/ /ji ltar dbul zhe na/ gsang sngags lan re bzlas nas su/ /lan re sbyor bas dbul bar bya/ /zhes bya ba la/ sbyor ba ni dUr ba dang bcas pa'i me tog go//lan re ni re re la'o/ /gsang sngags lan re bzlas nas su/ /zhes bya ba ni go sla'o/ /ji snyed cig ce na/ lan grangs khri yis ni/ zhes bya ba smos te/ cir 'gyur zhe na/ thams cad rig cing tshe 'phel 'gyur/ /zhes bya ba smos te/ thams cad rig ces bya ba ni blo dang yid gzhungs pa la sogs pa rgyas par 'gyur ba'o//rgyas pa'i las so/ /zhi ba'i las gsungs pa/ kar bI ra zhes bya ba la sogs pa la/ dUr ba dang ni ldan pa yis/ /zhes bya ba ni sngar smos pa bzhin du dUr ba dang sbyar ba'o/ /nA ga puSh+pa'i yam shing ni//zhes bya ba ni nA ga puSh+pa'i sreg rdzas de nyid yam shing dang bud shing du yang 'gyur ro zhes bya ba'i don to/ /pad+ma yi ni yam shing rnams/ /zhes bya ba ni dUr ba dang bcas pa'i pad+ma'o/ /las rnams kun la zhes bya ba ni rgyas pa la sogs pa'i las gang 'dod pa la'o/ /sbyar byas na zhes bya ba ni mchod sbyin du dbul ba'o//yul phyogs zhi ba zhes bya ba ni nye bar mtshon pa'o/ /rgyal po'i khab la sogs sbyar na/ /zhes bya ba la/ sogs pa'i sgras ni blon po la sogs pa gzung ngo / /sngags pas rtag tu skyor chu gtor/ /zhes bya ba ni/ sngar smos pa lta bur bum pa'i nang du bcom ldan 'das ma bltas la/skyor chu brgya rtsa brgyad rtag tu nang re zhing rtsa ba'i sngags kyis dbul bar bya'o zhes bya ba'i don to/ /bye brag tu ni rgyas par 'gyur/ /zhes bya ba ni 'bru la sogs pa 'phel bar 'gyur ba'o/ /gzhan gyi gdan zhes bya ba la sogs pa la gzhung gang gis chu'i sbyin sreg la sogs pa rab tu gsal bar byed pa de ni rab tu byed pa'o//dpal gdan bzhi pa'i 'grel pa dran pa'i rgyu mtshan zhes bya ba las/ gzhan gyi gdan gyi rim par phye ba gnyis pa'o// //da ni lha'i rnal 'byor dang dam tshig la sogs pa gsal por bstan pa'i phyir/rim par phye ba gsum pa gsungs pa/ 'khor ba'i pha rol zhes bya ba la sogs pa smos te/ 'dir lha'i rnal 'byor la sogs pa gsol ba btab pa med mod kyi sngar gsol ba btab pa thugs la bzhag nas tshul gzhan gyi sgo nas de'i yan lag dang nying lag ston par mdzad pa yin te/don gzhan la ni brten nas su/ /don de nyid ni ston par mdzad/ /ces gsungs pa'i phyir ro/ /'khor ba'i pha rol sgrol mtshan nyid/ /ces bya ba ni/ gang gis 'khor ba'i pha rol tu son par byed pa'i gnyis su med pa'i chos kyi mtshan nyid nyon cig ces bya bar sbyar ro//lha'i rnal 'byor gsal bar bya ba'i phyir/ gnyis su med pa'i mtshan nyid de gsungs pa/ dngos dang zhes pa la sogs pa smos te/ dngos po'i zhes bya ba ni gang dngos po yod pa'o/ /dngos med ces bya ba ni dngos por med pa'o//rnam par grol zhes bya ba ni de dag las 'das pa ste/ 'di ltar tshad mas dpyad na/ dngos po dngos su yod par mi rung bas dngos po las grol ba'o/ /dngos po ma grub na de med par yang mi 'grub ste/ de ni de la ltos pa'i phyir ro/ /yang na chos can med na de'i chos med pa de yang ji ltar rung ste/de bas na dngos po med pa las grol lo/ /dag dang ma dag rab tu spangs/ /zhes bya ba ni dag pa ni kun nas nyon mongs pa med pa'o/ /ma dag pa ni kun nas nyon mongs pa dang bcas pa ste/ rab tu spangs pa ni de las ring du gyur pa'o//'di ltar rang bzhin gyis rnam par dag pa ni gnyis su med pa'i ye shes yin la/ kun nas nyon mongs pa rnams ni glo bur ba yin pa'i phyir ro/ /'o na gnyis su med pa zhes bya ba ni gnyis dang bral ba'i ngo bo zhig gam/ gnyis gcig tu gyur pa gcig yod dam ci zhe na/ ma yin par bstan pa'i phyir/dngos po gnyis ni rab spangs pas/ /gnyis med chos zhes bya ba ste/ /zhes bya ba smos te/ dngos po la sogs pa med pa na de las rnam par grol ba'i ngo bo dngos por yod pa'am/ gnyis gcig tu gyur pa'i mu gsum pa de dag yod par lta ga la 'gyur te/'di ni rang nyid kyi tshad mas grub bo/ /de skad du yang / yod med ces bya ba 'di yang mtha' yin te/ dag dang ma dag 'di yang mtha' yin pas/ de bas mtha' gnyis rnam par spangs pas na/ dbu ma la yang mi gnas mkhas pa yin//zhes gsungs so/ /gnyis med chos zhes bya ba ni chos thams cad gnyis su med pa'am/ gnyis su med pa'i chos nyid ces bya ba sbyar te zhes bya ba ni tshig bla dgas su btags pa ste/ mngon par zhen pas ni tshig bla dgas so/ /gang gi bla dgas she na/ dngos po gnyis ni rab spangs pa ste yod pa la sogs pa'i mtha' bzhi las rnam par grol ba'i bla dgas so//de yang gsungs pa/ chos rnams thams cad gnyis med cing / /chos kyi mtshan nyid rnam par spangs/ /zhes gang smos pa'o/ /'dis ni chos thams cad rang bzhin med pas stong pa nyid du bstan to//de nyid kyis ni mtshan ma med pa dang / smon pa med par yang shes par bya ste/ de la 'gro ba rnams rgyu mtshan med pas/ skye ba med pa nyid mtshan ma med pa yin te/ de skad du yang / bdag las mi skye gzhan las min/ /gnyis las ma byung rgyu med min//dngos po gang dag gang na yang / /skye ba nam yang yod ma yin/ /zhes gsungs pa'i phyir ro/ /ma skyes pas ngo bo nyid med na/ ci zhig la smon par 'gyur te/ de nyid kyi phyir smon pa med par yang 'gyur ro/ /lha'i rnal 'byor yang tshul de nyid kyis gnyis su med par bstan pa'i phyir/gzugs stod thog ma mthar thug dang / /dbu ma mnyam par gnas pa'o/ /zhes bya ba la sogs pa smos te/ gzugs zhes bya ba ni gzugs kyi phung po ste/ nye bar mtshon pa'i don gyis khams las sogs pa'i bar du gzung ngo / /stong zhes bya ba ni rnam par thar pa'i sgo gsum gyi rang bzhin no//de nyid kyi phyir thog ma mthar thug ces bya ba la sogs pa smos te go sla'o/ /yang na thog ma ni lha'i rnal 'byor rtsom bzhin pa na'o/ /dbus ni rdzogs bzhin pa na'o/ /tha ma ni 'gyur ba bzhin pa na'o/ /mnyam par gnas pa ni stong zhing gnyis su med pa'i mthar thug pa'o/ /dag dang ma dag dbu ma ni//'ga' zhig gis ni mnyam par blta/ /zhes bya ba la ma dag pa ni sred pa dang bcas pa'o/ /dag pa ni de las bzlog pa'o/ /dbu ma ni dag pa dang / ma dag pa'i mtha' dang bral ba ste/ ro gcig tu mnyam pa'o/ /'ba' zhig ces bya ba ni gnyis med pa'o/ /blta ba ni der dmigs pa'o//yang na dag pa ni gtsang ma'o/ /ma dag pa ni gzhan no/ /lhag ma sngar bshad pa bzhin no/ /de nyid nye bar bshad pa'i phyir/ bsten dang bsten min dbu ma yi/ /zhes bya ba smas te/ bsten bya zhes bya ba ni bgrod par bya ba'o/ /bsten min ni bgrod par bya ba ma yin no//dbu ma ni gnyis pa spangs pa ste/ de nyid ni mnyam pa nyid do/ /de nyid bstan pa'i phyir/ ye shes zhes bya ba la sogs pa smos te/ ye shes zhes bya ba ni sems so/ /las byung ba zhes bya ba ni/ rang rig pa'i sems kyang mnyam pa nyid kyi mthar thug pa zhes bya ba'i don to/ /lus ni mnyam par gnas pa ste//zhes bya ba ni sngar smos pa'i tshul gyis chos nyid mnyam pa nyid du mthar thug pa'o/ /dag kyang mnyam par gnas nas su/ /zhes bya ba ni dag kyang mnyam pa nyid du gtugs pa ste/ 'di dag gi don ni ji ltar sems rig pa dang rig par bya ba'i rnam pa rnams mi rang ba'i phyir/mnyam pa nyid kyi mthar thug pa ltar/ lus kyang de bzhin no zhes bya ba dang / ji ltar lus rdul phra rab tu gzhig pas/ gang na yang mi gnas pa ltar sems kyang de bzhin no zhes bya ba dang / ji ltar lus dang sems rang bzhin med pa ltar ngag kyang sgra brnyan dang 'dra bar don dam par rang bzhin med de/mnyam pa nyid kyi mthar thug go zhes bya ba 'di yin no/ /de skad du yang / khyed kyis sems lus lta bu dang lus sems lta bu dang / ngag sems lta bu dang / sems tshig tu brjod pa lta bur skyed cig ces gang gsungs pa yin no/ /de dag gis cir 'gyur zhe na/mnyam nyid ye shes las byung bas/ /mnyam pa'i lta bas blta bar bya/ /zhes bya ba smos te go sla'o/ /slar gsol ba/ mnyam pa zhes bya ba la sogs pa smos te/ ji lta bu zhes bya ba ni/ mnyam pa'i lta ba ji ltar bskyed/ /ces bya ba'i don to/ / gnyis med chos zhes bgyi ba yi/ /bdag nyid ji ltar 'tshal bar bgyi/ /zhes bya ba la/ bdag nyid ni bdag gi phung po la sogs pa'o/ /gnyis med chos zhes bya ba ni mtshan nyid dang bral ba'i lha'i rnal 'byor te/ ji ltar 'tshal bar bgyi zhes bya ba ni mngon sum du ji ltar bgyi zhes bya ba'i don to//lan gsungs pa gnyis med ces bya ba la sogs pa la/ ji bzhin de nyid ces bya ba ni phyin ci ma log cing ma slu ba ste/ de'i mtshan nyid can ji ltar bskyed par bya ba rdo rjes nyon zhes bya bar sbyar ro/ /dngos po gnyis zhes bya ba la sogs pa ni go sla'o//rnal 'byor kun gyi thog ma ru/ /dag pa rnam gsum brjod par bya/ /zhes bya ba la thog ma ni dang po ste/ lha'i rnal 'byor thams cad kyi dang por 'og nas 'byung ba'i sngags gsum brjod par bya'o zhes bya ba'i don to/ /de nyid gsungs pa/ swa b+hA wa zhes bya ba la sogs pa la/swa b+hA wa zhes bya ba ni bden pa dang mi bden pa dang rtag pa dang / mi rtag pa dang / yod pa dang / med pa dang / blang ba dang / dor bar bya ba dang / gzung ba dang / 'dzin pa la sogs pa'i mtshan nyid do/ /shud+d+ha ni stong pa nyid de ngo bo med pa'o/ /ci zhig ce na/ sarba d+harmA ste skye ba dang gnas pa dang 'jig pa'i mtshan nyid 'dzin pas na d+har+m+ma ste phung po la sogs pa'o//de rnams ngo bo nyid kyis rnam par dag pa ltar bdag kyang de dang 'dra ba'o zhes bstan pa'i phyir/ swa b+hA wa shud+d+hou0f85haM zhes bya ba smos te/ glo bur ba'i dri ma rnams bsal ba'i phyir/ rang bzhin r nam par dag pa la dmigs par bya'o zhes bya bar dgongs so//badzra shud+d+ha zhes bya ba la/ badzra ni gnyis su med pa'i ye shes te/ shud+d+ha ni gzung ba la sogs pa ngo bo nyid med pa'o/ /yo ga shud+d+ha zhes bya ba la/ yo ga ni lha'i rnal 'byor ro/ /shud+d+ha ni tha mal pa'i rang bzhin dang bral ba'o//bla med nyid du byas nas ni/ /thal mo sbyar nas de dag brjod/ /ces bya ba ni bla na med pa'i ye shes mngon sum du bya ba'i phyir/ sngags de dag brjod par bya ba ste/ 'di ltar rang gi snying gar rang gi snying po bltas la/ snying po de las 'phros pa'i 'od zer gyis bla ma dang rang gi 'dod pa'i lha snang bar byas nas/me tog la sogs pa'i phyag rgya rnams kyis mchod pa byas nas thal mo sbyar te sdig pa bshags pa dang / bsod nams la rjes su yi rang ba dang / bsod nams yongs su bsngo ba dang / gsum la skyabs su 'gro ba dang / bdag nyid nges par dbul ba dang /lam bsten par dam bca' byas la/ byams pa la sogs pa bsgoms nas bla na med pa'i ye shes mngon du bya ba'i phyir/ dag pa rnam pa gsum brjod par bya'o zhes bya ba'i don to/ /gnas phun sum tshogs pa bstan pa'i phyir/ yid du 'ong ba'i sa phyogs kyi//zhes bya ba la sogs pa smos te/ gang ri bo la sogs pa yid dang rjes su mthun pa'i gnas la la dag tu brten nas/ lha'i bsam gtan brtsam par bya'o zhes bya ba'i don to/ /gnas sbyang ba gsungs pa/ bla re zhes bya ba la sogs pa la/ ba dan zhes bya ba ni nya dang ngang pa la sogs pa'i ri mo med pa'o//rgyal mtshan zhes bya ba ni ri mo dang bcas pa'o/ /gnas bcu dag ni kun du yang / /de bzhin dri yi dkyil 'khor bya/ /zhes bya ba ni bsam gtan rtsom pa'i dus su de bzhin su de bzhin du dri zhim po'i maN+Dal bya ste/ gnas bcu zhes bya ba ni sa gzhi la maN+Dal gru bzhi pa chen po gcig byas la/steng du dri'i thog mar gtor bas phyogs bcur khyab par maN+Dal byas pa nyid du 'gyur ro/ /mchod pa la sogs pa'i rjes la/ bdag nyid ye shes mkha' 'gro mar skad cig tsam gyis bskyed la/ sa sbyang ba la sogs pa thams cad bya'o zhes bstan pa'i phyir/skad cig ces bya ba la sogs pa smos te/ skad cig ni yud tsam gyis so/ /ye shes mkha' 'gro ni ye shes mkha' 'gro 'ba' zhig tu'o/ /gzung ba ni skyes pa'o/ /bdag nyid mchod pas mnyes par bya/ /zhes bya ba ni lha'i dkyil 'khor du bsgom par bya ba'i don to//de nyid kyi go rims gsungs pa/ lag pa gan rkyal bzhag nas su/ /zhes bya ba la sogs pa la/ 'dir man ngag las thog ma kha nub phyogs su bltas te bsam gtan brtsam par bya'o zhes bya'o zhes 'byung bas/ dang po nub phyogs su kha bltas la/lag pa g.yas pa thal mo gan rkyal du brkyang ba'i steng du rdo rje rtse lnga pa 'bar ba bsgoms la/ des dbus su bsnun nas/ shar la sogs pa'i gnas bzhir yang g.yon skor gyis thal mo bsnun la/ oM hUM phaT ces bya ba'i sngags brjod nas/ sa 'og rim pa bdun gyi bar gyi sa gzhi rdo rje'i rang bzhin du bsgoms te/ sngar smos pa'i tshul gyis ra ba la sogs pa bsgom par bya'o/ /sngags de nyid gsungs pa/ phyag 'tshal zhes bya ba la sogs pa la/ 'joms pa zhes bya ba ni yi ge phaT do/ /lhag ma ni go sla'o/ /lhun po zhes bya ba la sogs pa la/de'i 'og tu yi ge oM hUM swA hA zhes bya ba yongs su gyur pa las byung ba'i ri bo lhun po rin po che sna bzhi'i rang bzhin can gyi steng du gser las byung ba'i grong khyer rin po che sna bdun gyis spras pa/ ji ltar 'dod pa bzhin yang dag par bsgoms nas/ der bcom ldan 'das ma bsgom par bya'o zhes bya ba lhag ma yin no//phyag rgya kun gyi thog mar ni/ /dam tshig phyag rgya bcing bar bya/ /zhes bya ba ni bsten par zhes bya bar sbyar te/ gser gyi grong khyer du bcom ldan 'das ma bsgoms la/ dang po dam tshig gi phyag rgya bcings nas bsten par bya'o zhes bya ba'i don to//phyag rgya de nyid gsungs pa/ rdo rje khu tshur gnyis bcings nas/ g.yon pa snying gar bzhag nas su/ /g.yas pa mtshan khung gzhug bya ba/ /dam tshig phyag rgyar shes par bya/ /zhes bya ba ste go sla'o/ /sngags gsungs pa/ phyag 'tshal zhes bya ba la sogs pa la/bsreg pa zhes bya ba ni swA hA'o/ /ji ltar zhes bya ba ni ji bzhin du blta'o zhes bya bar sbyar ro/ /ci zhig ce na/ rdo rje'i dngos po'i sa bon zhes bya ba ste yi ge hUM ngo / /bsdus pas oM hUM swA hA zhes bya bar 'gyur ro/ /lhag ma ni go sla'o/ /da ni gdan bstan par bya ba'i phyir/seng ge'i gdan zhes bya ba la sogs pa smos te/ gnas lnga zhes bya ba ni dbus dang / shar dang / byang dang / nub dang / lho'i gnas rnams su'o/ /byang shar la sogs pa'i gnas rnams su ni glang po che la sogs pa'i stan yin te/ 'og nas ston par 'gyur ro//nyi ma'i gdan ni bsams nas su/ /zhes bya ba ni/ thams cad kyi thun mong du nyi ma'i dkyil 'khor gyi stan bsgom pa ste/ stan bsgom pa sngon du 'gro bas nyi ma'i dkyil 'khor bsgom mo zhes bya ba'i don to/ /rang gi dbugs las byung ba yi/ /zhes bya ba ni dam tshig sems ma rnams bsgoms nas bdag gi lus las ye shes sems ma rnams phyung ste/dam tshig sems ma rnams la thim par bya'o zhes bya ba'i don to/ /ye shes mkha' 'gro dbus su bsam/ /zhes bya ba ni dbus kyi seng ge'i gdan la ye shes mkha' 'gro ma bsgom pa'o//de'i khyad par bstan pa'i phyir/ zhal gsum zhes bya ba la sogs pa smos te/ skra grol bas ni g.yogs pa la/ /sangs rgyas lnga yis mdzes par byas/ /zhes bya ba ni skra lhug par grol ba'i con pan du sangs rgyas lnga 'phro bas brgyan pa'o zhes bya ba'i don to//bzhad dang khro dang sgeg pa yi/ /zhal gsum po zhes bya ba la/ /sgeg pa ni rtsa ba'i zhal lo/ /bzhad pa ni g.yon pa'i zhal lo/ /khro ba ni g.yas kyi zhal lo/ /dbus su mkhas pas bsgom par bya/ /zhes bya ba ni dbus kyi stan la ye shes mkha' 'gro ma nam mkha'i khams rnam par dag par shes pa'i mkhas pas bsgom mo zhes bya ba'i don to//lhag ma ni brda phrad par zad do/ /ye shes kyi zhes bya ba la sogs pa la bdag gi chu las byung ba zhes bya ba ni bdag nyid kyi chu'i khams kyi rang bzhin zhes bya ba'i don to/ /de bzhin du me la sogs pa la yang sbyar bar bya ste/chu'i khams la sogs pa'i khams rnam par dag pa'i rdo rje sgrol ma la sogs pa rnams shar la sogs pa'i gnas rnams su g.yon skor gyis dgod par blta bar bya'o/ /bdag dngos lnga las byung ba yi/ /zhes bya ba la sogs pa ni nye bar bsdu ba ston pa yin te/dngos po lnga ni nam mkha' la sogs pa'i 'byung ba'o/ /byung ba ni rang bzhin no/ /ci zhig ce na/ mkha' 'gro ma ni lnga zhes bya ba smos te/ ye shes mkha' 'gro ma la sogs pa rnams so/ /lnga po zhes bya ba ni mkha' 'gro ma lnga'o/ / lnga ru zhes bya ba ni ye shes lnga ru'o/ /yang na re re zhing yang ye shes lnga lngar ro/ /bsgom pa ni lhag par mos pa'o/ /gzugs rdzogs shin tu mdzes pa yin/ /zhes bya ba ni yon tan thams cad kyis brgyan cing shin tu yid du 'ong ba'o/ /lhag ma ni brda phrad par zad do//dbang ldan zhes bya ba la sogs pa la/ seng gdong ni seng ge'i zhal can no/ /kha dog dkar zhing ser ba zhes bya ba ni sa gzhi'i mdog dang rjes su mthun pa'o/ /rdo rje lcags kyu sdigs mdzub can/ /zhes bya ba ni phyag g.yas kyis rdo rjes mtshan pa'i lcags kyu bsnams shing g.yon pas sdigs mdzub mdzad pa'o//lhag ma ni don gsal lo/ /me mtshams zhes bya ba la sogs pa la/ rin chen bdun zhes bya ba ni rin po che sna bdun gyis bkang ba'i bum pa'o/ /kha dog dkar zhing sngo zhes bya ba ni 'dir yang sa'i cha bzhin no//lag na lcags kyus brgyan pa ste/ /zhes bya ba ni lag pa g.yas kyis lcags kyu thogs pas mdzes pa'o/ /g.yon pa sdigs mdzub zhags pa can/ /zhes bya ba la/ mdzub mo bsdigs shing zhags pa dang ldan pa de la de skad ces bya ste/ lag pa g.yon pa'o//bden bral zhes bya ba la sogs pa la/ mdog ni dmar zhing sngo ba ste/ /zhes bya ba ni 'dir yang sa phyogs kyi cha gnyis 'dus pa'i mdog gis lha mo'i kha dog tu blta'o/ /phyag gnyis lcags kyu zhags pa dang / /sdigs mdzub kyis ni shin tu mdzes/ / zhes bya ba la/ 'dir yang g.yas pa lcags kyus brgyan pa dang / lhag ma cig shos kyis mdzes par blta'o/ /rlung mtshams zhes bya ba la sogs pa la/ kha dog ser zhing dmar ba ste/ /zhes bya ba ni 'dir yang snga ma bzhin no/ /klu yi stan la yang dag bzhugs/ / zhes bya ba ni/ sbrul 'khyil pa'i stan la bzhugs pa'o/ /rgyan du'ang de nyid sbyar bar bya/ /zhes bya ba ni spyi gtsug gi nor bu la sogs pa'i rgyan yang klu chen po brgyad kyis byas pa'o/ /sdigs mdzub lcags kyu zhags pa bsnams/ /zhes bya ba ni snga ma bzhin du sbyar ba'o/ / dbus kyi mkha' 'gro ma brgyad ces bya ba ni dbus kyi pho brang na gnas pa'i seng ge mo la sogs pa mkha' 'gro ma rnam pa brgyad bshad pa yin no zhes bya bar sbyar te/ lhag ma ni go sla'o/ /pho brang gi phyi rim na gnas pa bstan par bya ba'i phyir/ phyi rol dag ni rnam bzhi la/ /zhes bya ba la sogs pa smos te/pho brang gi phyi rim gyi sgo bzhi la gnas pa zhes bya ba'i don to/ /de nyid gsungs pa/ shar du mkha' 'gro rgyal dbang mo/ /zhes bya ba la sogs pa la rgyal dbang mo zhes bya ba ni phyag na rdo rje la bod pa'o/ /shar du ni shar sgor ro/ /mkha' 'gro ni mkha' 'gro ma zhes bya ba'i ming can no//yi dwags kyi stan ni ro'i stan no/ /lag gnyis kha ru bcug nas ni/ /ha har bzhad pas shin tu 'bar/ /zhes bya ba ni gang gis lag pa gnyis kyi thal mo khar bcug nas so'i 'od snang ba dang bcas par dgod pa de la de skad ces bya'o/ / lhag ma ni go sla'o/ /byang du zhes bya ba la sogs pa la/ byang ni byang sgor ro/ /'bar ma ni 'bar ma zhes bya ba'o/ /spyi bo'i steng du lag pa gnyis/ /thal sbyar me mar lta bur 'bar/ /zhes bya ba ni gang gis lag pa gnyis kyi 'od me mar ltar 'bar ba'i thal mo mgo'i steng du sbyar ba yin pa de la de skad ces bya'o//nub kyi zhes bya ba la sogs pa la/ nub ni nub sgor ro/ /'jib byed ma ni 'jib byed ma zhes bya ba'o/ /lag gnyis snyim par sbyar ba nas/ /khrag gi rgyun ni 'thung bar mdzad/ /ces bya ba ni/ gang gis lag pa gnyis kyi snyim pa nas skud pa dang 'dra ba'i khrag gi rgyun 'dzag pa 'thung ba de la de skad ces bya ba'o//lho ru zhes bya ba la sogs pa la/ lho ru ni lho sgor ro/ /'phrog byed ma ni 'phrog byed ma zhes bya bar grags pa'o/ /sdigs mdzub dang ni gtun shing thogs/ /sems can sems ni rmongs par byed//ces bya ba ni/ gang gis phyag g.yas kyis gtun shing thogs nas/ g.yon pas bsdigs pas sems can rnams kyi sems rmongs pa ste/ dbang du sdud par byed pa de la de skad ces bya'o/ /lhag ma ni go sla'o/ /nye bar bsdu ba bstan pa'i phyir/ kun rig pas ni thams cad bsgom//zhes bya ba smos te/ rnal 'byor gyis dkyil 'khor pa thams cad ji lta ba bzhin bsgom mo zhes bya ba yin no/ /de la 'dir seng ge dang glang po che la sogs pa dang / yi dwags kyi stan rnams la/ nyi ma'i dkyil 'khor gdugs dkar pos brgyan pa'i steng du/so so'i sa bon yongs su gyur pa las byung ba'i rnal 'byor ma bcu gsum sngar smos pa lta bu'i mdog dang mtshan ma can thams cad kyang zhabs g.yon pa skyil krung du bcas nas/ g.yas pa cung zad brkyang ba'i sems dpa'i skyil krung gis bzhugs par bsgoms te/khyad par du seng ge mo la sogs pa rnams ni rang gi ming dang mthun pa'i gdang can du bya'o/ /de dag gi ni gzugs mdun du/ /dam tshig dag ni bstan par bya/ zhes bya ba la/ de dag gi mdun ni de dag gi mig sngar ro//dam tshig ni dam tshig gi phyag rgya ste/ 'og nas 'byung ba rnams so/ /ni zhes bya ba ni kyang zhes bya ba'i don to/ /sngags la ltos nas bsdu ba'o/ /sngags de nyid bstan pa'i phyir/ rlung dang zhes bya ba la sogs pa smos te/ rlung ni ya'o/ /me ni ra'o//bdun zhes bya ba ni bdun pa ste/ rkyen mi mngon pa'o/ /de la rlung gi bdun pa ni sa'o/ /me'i bdun pa ni ha'o/ /de nyid ni don te ha la'o/ /rdo rje ma'i sa bon ni sa nyid do/ /dbye zhes bya ba ni zla tshes su gzhag pa ste/ chos mthun pa'i phyir ro/ /sgra dang thig les yang dag mnan//zhes bya ba la/ sgra ni U ring po ste des zhabs skyed du sbyar ba'o/ /thig les yang dag mnan ni thigs pas steng nas mnan pa ste/ bsdus pas hUM zhes bya bar 'gyur ro/ /char pa'i rgyun zhes bya bar brjod/ /ces bya ba ni thams cad kyang bdud rtsi'i yi ge 'dus pa'i phyir yon tan gyi sgras brjod pa yin no//phyag 'tshal dang po sreg byed mtha'/ /zhes bya ba ni brda phrad par zad do/ /ye shes mkha' 'gro'i sa bon yin/ /zhes bya ba la/ gang gi tshe ye shes mkha' 'gro ma bskyed pa'i tshe ni sa bon hUM 'ba' zhig las bskyed par bya la//dam tshig gi phyag rgya ston par byed pa'i tshe ni/ oM hUM swA hA zhes bya ba'i sngags kyis bstan par bya'o zhes bya ba'i don to/ /de bzhin du gzhan dag la yang skyed par byed pa ni sa bon 'ba' zhig yin la/ phyag rgya bstan pa ni sa bon de dag /phyag 'tshal sreg pa'i mthar ldan pa/ /zhes bya ba dang sbyar bar bya'o/ /dbyangs thog sa bon dang po ni/ /zhes bya ba la/ dbyangs kyi thog ma'i sa bon ni yi ge a'o/ /de nyid ni dang po ste/ ye shes mkha' 'gro ma'i sa bon ma gtogs pa sa bon lhag ma bcu gnyis kyi dang po yin pa'i phyir ro//phyag 'tshal dang po sreg byed mtha'/ /zhes bya ba ni/ 'di'i sngags btu ba bstan pa ste/ a yi dang por phyag 'tshal te/ /oM sbyin la a'i mtha' mar ni sreg byed de swA hA sbyin par bya ste/'di ni thams cad du blta bar bya'o/ /shar phyogs rdo rje mkha' 'gro ma'o/ /sa bon du ni rab tu grags/ /zhes bya ba ni rdo rje mkha' 'gro ma skyed par byed pa'i sa bon ni a yin no zhes bya ba'i don to/ /bsdus pas oM a swA hA zhes bya bar 'gyur ro/ /dbyangs kyi yi ge gnyis pa ni//zhes bya ba ni dbyangs kyi sde tshan gyi yi ge gnyis pa a'o/ /phyag 'tshal sreg byed sbyar bar bya/ /zhes bya ba ni bshad zin te/ bsdus pas oM a swA hA zhes bya bar 'gyur ro/ /'di zhes bya ba ni a'o/ /mkha' 'gro drag mo'i sa bon yin//zhes bya ba ni brda phrad par zad do/ /sa bon dag ni 'di nyid la/ /zhes bya ba ni sa bon a 'di nyid la'o/ /dbyug pa glo ru gzhag par bya/ /zhes bya ba ni/ a ring po de nyid kyi steng gi glor yang dbyug pa lta bu'i ri mo ring du drang ba'o/ /phyag 'tshal zhes bya ba la sogs pa bshad zin te/bsdus pas oM AH swA hA zhes bya bar 'gyur ro/ /ro langs ma'i zhes bya ba ni ro langs ma'i sa bon no/ /sa bon dag ni 'di nyid la/ /zhes bya ba ni bshad zin to/ /steng du thig le sbyin par bya/ /zhes bya ba ni go sla'o/ / oM zhes bya bar 'gyur ro/ /phyag 'tshal zhes bya ba la sogs pa la bsdus pas oM aM swA hA zhes bya bar 'gyur ro/ /gtum pa yi ni dbang mo yin/ /zhes bya ba ni sa bon zhes bya ba dang sbyar ro/ /ma ning sa bon dang po ni/ /zhes bya ba la ma ning gi yi ge ni r-i r-I l-i l-I bzhi yin la/de dag gi dang po ni yi ge r-i'o/ /phyag 'tshal zhes bya ba la sogs pa la bsdus pas oM r-i swA hA zhes bya bar 'gyur ro/ /lhag ma ni go sla'o/ /ma ning sa bon gnyis pa ni/ /zhes bya ba ni sngar smos pa'i tshul gyis yi ge r-I ste/ bsdus pas oM r-I swA hA zhes bya bar 'gyur ro/ /de bzhin ma ning sa bon gsum/ /zhes bya ba ni tshul de bzhin du gsum pa ste yi ge l-i'o/ /bsdus pas/ oM l-i swA hA zhes bya bar 'gyur ro/ /ma ning yi ge bzhi pa la/ /zhes bya ba ni yi ge l-I'o/ /bsdus pas oM l-I swA hA zhes bya bar 'gyur ro//hUM byed 'ug pa mo zhes bya ba ni yi ge hUM 'ug pa'i sgra'i gtso bo yin pa'i phyir ro/ /sde tshan dag ni lnga pa yi/ /yi ge dag ni gnyis pa gzung / /zhes bya ba ni yi ge pha'o/ /sa bon zhes bya ba ni de nyid do/ /rtsa ba zhes bya ba thig le'o/ / sgra zhes bya ba ni u ste sbyar ba ni de dag 'og dang steng du sbyin pa'o/ /de ni phuM zhes bya bar 'gyur ro/ /phyag 'tshal zhes bya ba la sogs pa la/ bsdus pas oM phuM swA hA zhes bya bar 'gyur ro/ /lhag ma ni go sla'o/ /sde tshan dag ni lnga pa yi/ /de bzhin yi ge gnyis pa bzung //zhes bya ba ni slar yang pha nyid do/ /e dang thig le sbyar bar bya/ /zhes bya ba ni pheM bya bar 'gyur ro/ /phyag 'tshal zhes bya ba la sogs pa la/ bsdus pas oM pheM swA hA zhes bya bar 'gyur ro/ /sde tshan zhes bya ba la sogs pa yang slar zlos pa ste pha nyid do//oM dang re pha thig ler sbyar/ /zhes bya ba ni logs su ra dang steng du o dang thig le sbyin pa ste/ phroM zhes bya bar 'gyur ro/ /phyag 'tshal zhes bya ba la sogs pa la bsdus pas oM phroM swA hA zhes bya bar 'gyur ro/ /sde tshan zhes bya ba la sogs pa la snga ma bzhin du pha'o//re pha thig le lcags kyur sbyar/ /zhes bya ba la/ lcags kyu ni i ste/ i dang thig le steng sbyar la/ /ra ni 'og tu sbyar te phriM zhes bya bar 'gyur ro/ /phyag 'tshal zhes bya ba la sogs pa/ bsdus pas oM phriM swA hA zhes bya bar 'gyur ro/ /lhag ma ni brda phrad par zad do//da ni phyag rgya bstan par bya ba'i phyir/ khu tshur gnyis ni zhes bya ba la sogs pa smos te/ 'di dag gi don ni lag pa gnyis khu tshur bcings pa'i gung mo gnyis brkyang nas/ rtse mo sprad la oM hUM swA hA zhes bya ba'i sngags zlos shing / ye shes mkha' 'gro ma'i mdun du bstan par bya'o zhes bya ba 'di yin no//lag pa gnyis zhes bya ba la sogs pa la/ lag pa gnyis thal mo sbyar te/ mthe bo gnyis kyis gung mo gnyis kyi rtsar btsugs la yang dang yang du bskyod nas/ oM a swA hA zhes bya ba'i sngags kyis rdo rje ma'i mdun du bstan par bya'o//khu tshur zhes bya ba la sogs pa la lag pa gnyis kyi khu tshur bcings nas/ mthe bo gnyis brkyang ba 'di ni drag mo'i phyag rgya ste oM AHswA hA zhes bya ba'i sngags dang sbyar ro/ /phyag rgya de nyid ces bya ba la sogs pa la/ drag mo'i phyag rgya de nyid las mthe chung gnyis brkyang ba 'di ni ro langs ma'i phyag rgya ste/oM e swA hA zhes bya ba'i sngags dang sbyar ro/ /phyag rgya de nyid ces bya ba la sogs pa la/ phyag rgya de nyid las gung mo gnyis brkyang ba 'di ni gtum mo'i phyag rgya ste/ o AM swA hA zhes bya ba'i sngags dang sbyar ro//de ni phyag rgya bzhi pa'o zhes bya ba ni ye shes mkha' 'gro ma gtogs pa dbus kyi rnal 'byor ma bzhi la ltos nas/ 'di ni grangs bzhi pa'o zhes bya ba'i don to/ /rdo rje khu tshur zhes bya ba la sogs pa la/ rdo rje khu tshur gnyis bcings la mdzub mo gnyis brkyang ste phan tshun rtse mo sprad pa ni//mtshams bzhi zhes bya ba seng ge mo la sogs pa'i phyag rgya thun mong yin te sngags ni so so dang sbyar bar bya'o/ /de la oM r-i swA hA zhes bya ba ni seng ge mo la bstan par bya'o/ /oM r-I swA hA zhes bya ba ni stag mo la'o/ / oM l-i swA hA zhes bya bas ni ce spyang mo la'o/ /oM l-I swA hA zhes bya bas ni 'ug pa mo la'o/ /lag gnyis zhes bya ba la sogs pa la/ lag pa gnyis brkyang nas thal mo khar bcug ste/ oM phuM swA hA zhes bya ba'i sngags kyis shar phyogs mkha' 'gro ma la bstan la/phyi nas ha zhes bya ba brjod cing rim gyis phyag rgya dgrol ba 'di ni mkha' 'gro ma'i'o/ /lag gnyis zhes bya ba la sogs pa la lag pa gnyis brkyang ste spyi bor thal mo sbyar ba 'di ni 'bar ma'i phyag rgya ste/ oM pheM swA hA zhes bya ba'i sngags dang sbyar ro/ / phyag 'tshal zhes bya ba la sogs pa la hUM zhes bya ba brjod pa sngon du 'gro ba'i lag pa gnyis phyag 'tshal ba'i thal mo sbyar te khar gzhag pa 'di ni 'jib byed ma'i phyag rgya ste/ oM phroM swA hA zhes bya ba'i sngags dang sbyar bar bya'o/ /lag gnyis zhes bya ba la sogs pa la/ lag pa gnyis pad+mar bskor ba byas la de'i 'og tu thal mo b+ha ga'i gnas su gzhag pa 'di ni 'phrog byed ma'i phyag rgya ste/ oM phriM swA hA zhes bya ba'i sngags dang sbyar bar bya'o/ /da ni dri la sogs pa'i sngags dang phyag rgya bstan par bzhed nas/ phyag 'tshal zhes bya ba la sogs pa smos te/lag pa g.yas pa kun du brkyang nas dris byug pa ltar byed pa 'di ni dri'i phyag rgya ste sngags ni oM hUM swA hA zhes bya ba yin no/ /bdud rtsi zhes bya ba la sogs pa la/ /bdud rtsi ni yi ge sa'o/ /ra dang thig ler bcas zhes bya ba ni sa'i 'og tu ni ra gdags la steng du ni thig le sbyin par bya ste/sraM zhes bya bar 'gyur ro/ /phyag 'tshal zhes bya ba la sogs pa la bsdus pas oM swaM swA hA zhes bya bar 'gyur ro/ /phyag rgya gsungs pa/ dri'i zhes bya ba la sogs pa la/ dri'i phyag rgya las mthe bo dang mdzub mo sbyar ba ni me tog gi phyag rgya'o//sde tshan zhes bya ba la sogs pa la/ sde tshan dang po'i yi ge ka'o/ /'dir yang / sgra dang thig ler sbyar bar bya/ /zhes bya ba dang sbyar te/ 'og tu u gdags shing steng du thig le byin pas kuM zhes bya bar 'gyur ro/ /phyag 'tshal zhes bya ba la sogs pa la/bsdus pas oM kuM swA hA zhes bya ba yin no/ /phyag rgya gsungs pa/ phyag rgya'i de nyid ces bya ba la sogs pa la/ me tog gi phyag rgya las gung mo bsgreng ba ni bdug pa'i phyag rgya'o/ /dgu mtha' zhes bya ba la sogs pa/ ya nas bgrangs pa'i yi ge dgu'i mtha' ma ni/dgu mtha'i sa bon te yi ge k+Sha'o/ /'dir yang / sgra dang thig ler sbyar bar bya/ /zhes bya bar blta ste/ bsdus pas k+ShuM zhes bya bar 'gyur ro/ /phyag 'tshal zhes bya ba la sogs pa la/ bsdus pas oM k+ShuM swA hA zhes bya ba yin no//phyag rgya gsungs pa/ khu tshur zhes bya ba la sogs pa ste/ lag pa g.yas pa khu tshur bcings nas/ mthe bo bsgreng ba 'di ni mar me'i phyag rgya'o/ /sde tshan zhes bya ba la sogs pa la/ sde tshan dang po'i gsum pa ni yi ge ga'o/ / sgra dang thig le sbyar ba dang / /zhes bya ba la/ sgra ni u thung ngu ste 'og tu sbyar bar bya'o/ /thig le ni rjes su 'gro ba'i dbyangs te/ steng du sbyar bar bya'o/ /bsdus pas guM zhes bya bar 'gyur ro/ /phyag 'tshal zhes bya ba la sogs pa la/ bsdus pas/ oM guM swA hA zhes bya ba yin no//phyag rgya gsungs pa/ lag pa gnyis zhes bya ba la sogs pa la/ phyag rgya 'di ni sngar bshad zin to/ /gtor ma'i sngags ni snga mar sbyar/ /zhes bya ba ni 'das ma thag pa'i sngags dang phyag rgyar sbyar ba ni gtor ma'i las dang 'tsham pa'o//de dag gis ni dri la sogs pa thams cad sngags dang phyag rgyar sbyar bas ci rigs pa'i mchod pa bya bar ston to/ /gnyis med gtor ma snga ma bzhin/ /zhes bya ba ni sha lnga dang bdud rtsi lnga dang sha rlon dang nya sha dang sgog btsong la sogs pa ni gnyis med gtor ma ste/snga ma bzhin zhes bya ba ni/ gtor ma der yang sngags dang phyag rgya dang sbyar ba'i me tog la sogs pas mchod pa'o/ /de nyid 'di yis zhes bya ba ni gtor ma'i de kho na nyid kyis so/ /mchod par bya zhes bya ba ni lha thams cad ces pa'i lhag ma'o//de nyid kyi phyir gsungs pa/ sngon du zhes bya ba la sogs pa ste/ rdzas rnam pa lnga zhes bya ba ni bdud rtsi lnga ste grags par zad do/ /sna tshogs pa yi lcags kyu dang / /zhes bya ba ni go ku da ha na zhes bya ba rnam pa lngar brjod pa ste/mngon par 'dod pa'i don dgug cing 'grub pas na lcags kyu'o/ /dri dang me tog bdug pa sogs/ /zhes bya ba la sogs pas ni mchod pa nyi shu'i mtshams sbyar ba yin te/ sngags dang phyag rgyas zhes bya ba ni gtor ma'i sngags dang phyag rgyas so//phyi nas mchod pa nyi shu yis/ /ye shes can gyis mchod par bya/ /zhes bya ba ni go sla'o/ /de nyid gsungs pa/ hUM zhes bya ba'i glu blangs nas/ /zhes bya ba ni mchod pa nyi shu'o/ /kun la hUM zhes bya ba'i yi ge brjod par bya'o/ /rnal 'byor ma kun mnyes par bya//zhes bya ba ni/ de nyid ni rnal 'byor ma mnyes par byed pa'i gtso bo zhes bya ba'i don to/ /rdo rje khu tshur zhes bya ba la sogs pa la/ rdo rje khu tshur gnyis bcings la/ /rked pa'i mtshams su bzhag nas ni/ /zhes bya ba ni rdo rje khu tshur gnyis kyis rdo rje dang dril bu thogs pa'i tshul du rked pa gnyis su gzugs pa'o//yan lag gsum du hUM gis bskyod/ /ces bya ba ni hUM zhes bya ba brjod pa sngon du 'gro bas mgo bo dang rked pa dang ro smad kyi cha gsum du phye ste bskyod par bya'o/ /dkrol ba'i tshul du dkrol ba dang / zhes bya ba ni lag pa g.yon pa sngon du brkyang ste/de'i steng du lag pa g.yas pa brkyang nas brdung ba ltar byed pa'o/ /pa Ta ha ltar brdung ba dang / /zhes bya ba ni rnga pa Ta ha brdung ba ltar lag pa gnyis g.yas g.yon du gdengs te sprug pa'o/ /ba dan tshul du 'phyar ba dang / /zhes bya ba ni lag pa g.yas pa 'ba' zhig brkyang ba'o//gdugs kyi tshul du dgab pa dang / /zhes bya ba ni lag pa gnyis gdugs kyi yu ba 'dzin pa'i tshul du byed pa'o/ /rdza rnga'i tshul du brdung ba dang / /zhes bya ba ni rdza rnga ltar lag pa gnyis steng nas brdung ba'i tshul du byed pa'o/ /rnga zlum tshul du brdung ba dang //zhes bya ba ni lag pa gnyis rnga zlum brdung ba ltar g.yas g.yon nas brdung ba'i tshul du byed pa'o/ /lhag ma ni go sla'o/ /rnal 'byor ma brgyad de nyid kyi/ /dngos po kun gyis mchod par bya/ /zhes bya ba ni rdo rje dang dril bu 'dzin pa la sogs pa'i dngos po nyi shu'i de kho na nyid kyis rnal 'byor ma'i gtso bo brgyad mnyes par bya'o zhes bya ba'i don to//hUM zhes bya bar bdag gis sprul/ /hUM gi glu ni blang bar bya/ /zhes bya ba la hUM gi glu zhes bya ba ni yi ge hUM gtso bor gyur pa'i glu ste/ rang dgar sems can sgrol ba yi/ /rgyu med dngos la 'dud par bgyi//te na hUM te na te te hUM zhes bya ba la sogs pa ste grags par zad do zhes bya bar bdag gi sprul zhes bya ba ni bdag nyid kyi hUM gi glu blang ba ste/ des ni glu'i mchod pa bstan to/ /de nas bstod pa'i mchod pa bstan pa'i phyir/ /rdo rje zhes bya ba la sogs pa smos te/ rdo rje dga' ba'i mthu dang spyan gyis gzigs//zhes bya ba la/ rdo rje zhes bya ba ni kye'i rdo rje zhes bod pa ste chos kyi sku'i bdag nyid mi phyed pa'i phyir ro/ /dga' ba zhes bya ba ni sems can gyi don mdzad pa'o/ /mthu ni de'i nus pa ste/ 'gro ba'i don mdzad pa'i nus pa dang ldan pa'i phyir ro/ / spyan zhes bya ba ni sha dang lha dang / shes rab dang chos dang sangs rgyas kyi spyan zhes brjod pa rnam pa lnga'o/ /gzigs pa ni des dmigs pa ste/ 'gro ba'i don la dmigs pa gang la yod pa de la/ dga' ba'i mthu dang spyan gyis gzigs/ /zhes bya'o/ /yi ge'i dngos po rang bzhin stong pas rol//zhes bya ba la/ mi 'gyur bas na yi ge ste/ gnyis su med pa'i ye shes so/ /de'i dngos po ni de'i rang bzhin no/ /de'i rang bzhin ni ngo bo nyid med pa ste/ rang bzhin med pa'i rang bzhin can no/ /stong pas rol zhes bya ba la/ stong pa ni 'das ma thag pa ste/ stong pa nyid do//rol pa ni 'gro ba rnams kyi rang gi sems la rnam par rol pa ste/ stong pa nyid kyis rol cing gzigs pa'o/ /dngos dang dngos med las grol dbu ma mkhyen/ /zhes bya ba la/ chos rnams dngos po dang dngos po med pa dag las rnam par grol ba'i dbu ma ni de kho na nyid de de kho na nyid kyi khyad par des/chos rnams mkhyen pa de la de skad ces bya'o/ /mi 'gyur kun bcom lhag ma sems pa'o/ /zhes bya ba la/ mi 'gyur ni yi ge ste/ gang yi ge'i bdag nyid can gyi sgra'i tshogs thams cad ni mi 'gyur kun te/ de bcom pa ni btang ba'o//lhag ma sems pa'o zhes bya ba la lhag ma ni sgras brjod pa'i lhag ma ste/ brjod du med pa nyid do/ /sems pa ni kun du dmigs pa'o/ /gnyis sprod kun 'khyud chu yi bya ba can/ /gnyis sprod ces bya ba ni shes rab dang thabs kyi snyoms par 'jug pa'o/ kun 'khyud ces bya ba ni sbyor ba ste ting nge 'dzin to/ /chu ni byang chub kyi sems te/ de nyid ni don du gnyer bar bya ba'i phyir bya ba'i dgos pa ste/ des yang dag par zhugs pa de la de skad ces bya'o/ /gnyis med chos brnyes thar pa'ang brnyes pa'o/ /zhes bya ba la gnyis med chos ni chos bdag med pa nyid do//brnyes pa ni shin tu thugs su chud pa ste des grol ba brnyes pa de ni thar pa brnyes pa'o/ /bde ba 'khor mnan thar pa btang ba'o/ /zhes bya ba la bde ba ni de kho na nyid mkhyen pa'i shes rab ste/ des 'khor ba mnan pa ni bcom pa'o//thar pa btang ba po zhes bya ba ni 'gro ba'i don gyi phyir snying rjes thar pa bcom pa de la de skad ces bya ste/ de skad du yang / shes pas srid la mi gnas shing / /snying rjes zhi la mi gnas dang / /zhes gang gsungs pas so/ /de ltar na gnyis sprod ces bya ba la sogs pas ni bdag dang gzhan gyi don gyi thabs phun sum tshogs pa bstan to//gnyis med chos brnyes zhes bya ba la sogs pas ni bdag gi don phun sum tshogs pa bstan to/ /bde bas 'khor mnan zhes bya ba la sogs pas ni/ gzhan gyi don phun sum tshogs pa bstan te/de lta bu'i khyad par can gyi bcom ldan 'das la bos nas bstod pa cung zad cig gis bstod pa bstan pa'i phyir/ thams cad ces bya ba la sogs pa smos te/ thams cad dngos kyi rnal 'byor ma sngags rol/ /zhes bya ba la/ thams cad dngos ni rnam pa thams cad kyi dngos po ste sku dang gsung dang thugs kyis so/rnal 'byor ma sngags zhes bya ba la/ rnal 'byor ma nyid sngags te/ 'gro ba rnams kyi yid skyob pa'i phyir ro/ /rol pa ni des gar mdzad pa ste/ bcom ldan 'das so/ /rnal 'byor ma lnga sangs rgyas de nyid mkhyen//zhes bya ba la/ sangs rgyas kyi de kho na nyid ni zad pa dang mi skye ba shes pa'i ye shes dam pa'o/ /de kho na nyid khyad par des rnal 'byor ma lnga'i mtshan nyid nye bar dmigs shing mkhyen pa de la de skad ces bya ste/ de dag gis ni bcom ldan 'das kyi chos kyi sku bstan to//gzugs mang sgyu mas sems can smin mdzad pa/ /zhes bya ba la/ sgyu ma ni rnam par sprul pa ste/ sprul pa rnam pa sna tshogs kyi gzugs kyis sems can smin cing grol bar mdzad pa'o/ /smin pa ni nye bar mtshon pa ste grol ba yang gzung bar bya'o//mdzad ces bya ba ni khyod kyis zhes bya ba'i lhag ma'o/ /rdo rje kun rtog chos kyis rmongs pa gcod/ /ces bya ba la/ rdo rje zhes bya ba stong pa nyid kyi kun rtog zhes bya ba rnam par mi rtog pa'i mtshan nyid thugs su chud pa'o/ /des ni 'di skad du rnam par mi rtog pa'i ye shes kyi stong pa nyid thugs su chud par ston te/de su la yod pa de la de skad ces bya'o/ /chos kyis rmongs pa gcod ces bya ba la chos ni sems can rnams te/ skye ba dang 'chi ba dang bde ba dang sdug bsngal ba la sogs pa'i mtshan nyid 'dzin pa'i phyir ro//rmongs pa ni kun nas nyon mongs pa'o/ /gcod ces bya ba ni/ rdo rje kun du rtogs nas sems can gyi snod kyi bye brag ji lta ba bzhin du rjes su bstan pas zhes bya ba'i lhag ma yin no/ /des ni longs spyod rdzogs pa'i sku bstan to/ /sems can rnams la bos te bskul ba'i phyir//rnal 'byor ma rmongs snying chos tshogs la 'dud/ /ces bya ba la/ snying chos zhes bya ba ni snying po'i chos te/ tshogs ni bsags pa'o/ /des ni snying po'i chos sku gsum po bsags pa'i bcom ldan 'das bstan to/ /de nyid ni rnal 'byor rnams rmongs pa ste bde ba chen pos rmongs pa'i rnal 'byor ma rnams kyi rang bzhin no//thud ces bya ba ni kye sems can rnams de lta bu'i yon tan khyad par can gyi rnal 'byor ma rnams la phyag 'tshol cig ces bya ba'i bar du'o/ /da ni saM skr-i ta'i sgo nas bstod pa bstan pa'i phyir/sems can zhes bya ba la sogs pa smos te/ sems can sgrol mdzad rnal 'byor bdag la bstod phyag 'tshal/ /zhes bya ba la/ rnal 'byor ni thabs dang shes rab snyoms par 'jug pa'o/ /de nyid ni bdag po ste gtso bo yin pa'i phyir ro//des sems can smin cing grol bar mdzad pas na sems can grol mdzad de/ de lta bu'i khyad par can gyi bcom ldan 'das la bstod phyag 'tshal zhes bya bar sbyar ro/ /thams cad bdag skyes gcig dngos de la bstod phyag 'tshal/ /zhes bya ba la/ thams cad kyi bdag nyid ni chos kyi dbyings so//de las 'byung ba gang yin pa de ni thams cad bdag skyes so/ /gcig gi dngos zhes bya ba ni/ gcig gi sems te gnyis su med pa'i ye shes so/ /'khor ba zhes bya ba la sogs pa la/ /'khor ba nyid rgya mtsho ste byis pa rnams kyis brgal dka' ba'i phyir ro//rmongs pa ni shes bya'i sgrib pa ste 'khor ba'i rgya mtsho der gnas pa'i rgyu mtshan gyis rmongs pa de la de skad ces bya'o/ /gcod pa ni sel bar byed pa'o/ /de nyid ces bya ba la sogs pa la/ de nyid gcig ces bya ba ni de kho na nyid mkhyen pas khyod dang 'dra ba'i zla bo gzhan med pa de ni de nyid gcig ste byed pa'o//lhag ma ni go sla'o/ /khyad par du bstod ces bya ba ni khyad par du 'phags par bstod pa'o/ /glu dang bstod sgras nye bar mchod par bya'o zhes bya ba la bstod sgra zhes bya ba ni yon tan dam pa sgrogs par byed pa ste/ rdo rje la phyag 'tshal zhes bya ba la sogs pa'i de kho na nyid brjod pa'o//glu zhes bya ba ni de kho na nyid dam pa ste/ glu 'ba' zhig gis mchod pa'o/ /bar bar du ni hUM gi sgra dang dril bu bsgrags la zhes bya ba ni/ hUM gi sgra brjod pa sngon du 'gro bas dril bu'i sgra sgrogs pa ste/ des skabs su mchod par bya'o//smon lam rnam pa gsum gdab par bya'o zhes bya ba ni rnam pa gsum gyis mos par bya ba ste/ de nyid gsungs pa/ rdo rje thal mo zhes bya ba la sogs pa la/ rdo rje thal mo snying gar bcings nas/ oM swa b+hA wa shud+d+h+ra zhes bya ba la sogs pa'i sngags rnam pa gsum brjod cing mos par bya'o zhes bya ba'i don to//g.yas par zhes bya ba la sogs pa la/ rnam pa gsum po mos par byas pa'i 'og tu lag pa g.yas par pad+ma bsams la/ pad+ma'i tshul du bya zhing g.yon par rdo rje bsams te/ pad+ma'i bskor ba sngon du 'gro bas g.yon pa'i mthe bos mthe'u chung mnan la/lhag ma gsum rdo rje rtse gsum par brkyang ste/ g.yas pa'i pad+ma'i steng du sbyar ba 'di ni phyag rgya chen po'i phyag rgya ste/ 'di'i sngags ni oM ha hoH hrIH swA hA zhes bya ba yin no/ /phyag rgya chen por byin gyis brlab pa'i sngags dang phyag rgya'o zhes bya ba ni smon lam rnam pa gsum byas pa'i 'og tu sngags dang phyag rgya 'dis phyag rgya chen por byed pa ste/der ma zad gzhan yang cung zad bza' ba la sogs pa dang / gtor ma'i dus su yang sngags dang phyag rgya 'dis bdud rtsi myang ba dang / phyag rgya chen por byin gyis brlab par bya'o//de nyid kyi phyir gsungs pa/ rnal 'byor can gyis mtshungs pa ru/ /lha rnams thams cad bsam par bya/ /zhes bya ba la sogs pa smos te/ chang la sogs pa sbyang ba'i dus su/ dkyil 'khor pa'i lha thams cad mtshungs par te/ dus gcig tu skad cig tsam gyis rdzogs par bya'o zhes bya ba'i don te//'jig rten pa sogs ye shes can/ /phyi yi dkyil 'khor brtag par bya/ /zhes bya ba ni de bzhin du yang de dang 'brel ba'i gtor ma'i bya ba bstan pa yin te/ 'jig rten pa zhes bya ba ni zhing skyong rnams so//sogs kyis ni dkyil 'khor ba'i lha rnams gzung bar bya'o/ /ye shes can zhes bya ba ni sgrub pa po ste/ des brtag par bya zhes bya bar 'brel to/ /'dir gsum pa'i don gyis gnyis pa yin no/ /phyi'i zhes bya ba ni bdag las phyi rol du gyur pa ste/ de rnams la gtor ma sbyin pa'i phyir tsan+dan dmar po'am/gur kum gyi maN+Dal gru gsum byas la dbus su zlum po la ni thig bzhi btab pas re'u mig dgur byas la/ de'i shar phyogs la sogs pa'i re'u mig rnams la go rims bzhin du ru tra nag po dang / ru tra chen po dang /lhas byin nag po dang / gtsigs pa dang / mi sdug pa dang / dka' las 'das pa dang / log 'dren rnams bsam par bya'o/ /zhing skyong ba de dag kyang rgan byad ma dang / drag mo la sogs pa rnal 'byor ma sum cu rtsa gnyis kyis/ so so re re zhing bzhi bzhis bskor nas/rang rang gi mtshan ma thogs pa la sogs par bya'o/ /re'u mig dbu ma la ni ye shes mkha' 'gro ma la sogs pa rnal 'byor ma bcu gsum gyi bdag nyid de/ de ltar phyi'i dkyil 'khor bsgom par bya'o/ /so sor dris byug pa dang zhes bya ba la/so so'i sbyor bas dbul bar bya/ /zhes bya ba ni/ 'dir yang cung zad bza' ba la sogs pa'i dus su skad cig gis rdzogs par byas pa'i lha'i dkyil 'khor la so sor dri la sogs pa dbul ba dang / gtor ma'i dus su yang phyi'i dkyil 'khor la ye shes mkha' 'gro ma la sogs pa 'jig rten las 'das pa dang /ru tra nag po la sogs pa 'jig rten pa rnams la so sor dbul bar bya'o zhes bya ba'i don to/ /bdud rtsi lnga dbul ba gsungs pa/ bdud rtsi lnga ni zhes bya ba la sogs pa smos te go sla'o/ /bdud rtsi byin gyis brlab pa'i cho ga gsungs pa/ha zhes bya ba la sogs pa la/ ha zhes bya ba ni bdud rtsi lnga'i nang du bsgom par bya'o zhes bya ba'i lhag ma can no/ /des kyang de'i tha mal pa'i kha dog 'phrog par 'gyur ro/ /de bzhin du hoH zhes bya ba bsgoms pas ni de'i tha mal pa'i dri 'joms par byed do//hrIH zhes bya ba bsgoms pas ni de'i tha mal pa'i ro'i nus pa 'joms par 'gyur ro/ /rnam gsum lan gsum brjod nas su/ /lha gsum du ni bsam par bya/ /zhes bya ba ni/ de ltar yi ge gsum gyi kha dog la sogs pa bsgoms nas/yang de nyid lan gsum brjod de/ rim bzhin du 'jig rten dbang phyug la sogs par bsgom mo zhes bya ba'i don to/ /ha yis ni 'jig rten dbang phyug go/ /hoHyis ni rnam par snang mdzad do/ /hrIH zhes pas ni mi bskyod pa ste/ bdud rtsi lnga po de ltar bsgom mo zhes bya bar dgongs so//pad+ma'i dbang phyug ces bya ba la sogs pa la/ pad+ma'i dbang phyug ni snang ba mtha' yas te/ de nyid ni 'jig rten dbang phyug go/ /gzugs mdzes gser gyi mdog ces bya ba ni/ des yongs su sbyangs pas kha dog la sogs pa gnas skabs gang yang thob pa de bstan pa yin te/gzugs mdzes zhes bya ba ni kha dog khyad par can thob pa'o/ /gser gyi mdog ces bya ba ni brda phrad par zad do/ /bdud rtsi lnga'i kha dog ces bya ba lhag ma yin no/ /gzugs mdzes gser gyi kha dog ces bya ba de nyid kyang 'jig rten dbang phyug tu bsgom mo zhes bya bar sbyar ro//lha gzhan la yang de ltar bsam par bya'o/ /dri chu zhes bya ba ni dri khyad par du 'phags pa'i chu ste rang bzhin khyad par can thob pa'o/ /de yang ci zhig ce na rnam par snang mdzad ces bya ba smos te/ rnam par snang mdzad kyi ngo bo nyid do/ / 'dir kha dog ni dkar po'o/ /myang ba zhes bya ba ni ro khyad par can thob pa ste/ bdud rtsi'o/ /de yang ci zhig ce na/ rdo rje dbang phyug phyag na rdo rje zhes smos te/ rdo rje dbang phyug ces bya ba ni mi bskyod pa'o/ /de nyid ni phyag gis rdo rje bsnams pa'i phyir phyag na rdo rje ste/ 'dir kha dog ni sngon po'o//nye bar bsdu ba bstan pa'i phyir/ lha gsum rnam gsum du ni bsgom par bya/ /zhes bya ba smos te/ yi ge gsum gyis tha mal pa'i kha dog la sogs pa bcom nas/ khyad par du gyur pa'i kha dog la sogs pas gsung rdo rje la sogs pa'i ngo bo nyid bsgom par bya zhes bya ba'i don to//da ni rnal 'byor ma rnams mchod pa'i phyir chang byin gyis brlab pa gsungs pa/ g.yon pa zhes bya ba la sogs pa la/ g.yon pa zla ba'i lag pa la/ /zla ba'i dbus su bdud rtsi yi/ /yi ge kun rig gug skyed bcas/ /zhes bya ba ni/ lag pa g.yon pa'i mthil du zla ba'i dkyil 'khor bsams la/de'i dbus su bdud rtsi'i yi ge sa la/ kun rig gi gug skyed ces bya ba'i yi ge oM sbyar bas oM zhes bya bar 'gyur te/ des bdud rtsi'i rang bzhin du bya ba'o/ /yang sbyang ba bstan pa'i phyir/ mthe bo sor mo sa nyid de/ /srin lag dag ni ri rab bo/ /zhes bya ba smos te/ lag pa g.yas pa'i mthe bo ni sa gzhir bsams la/ srin lag ni ri rab bdun du bsams pa'o/ bsgrubs pa'i stobs kyis zhes bya ba la sogs pa la/ stobs ni lha ma yin 'ba' la'i ngo bo nyid de/rdzas rnams bsrubs pa'i stobs so/ /bdud rtsi zhes bya ba ni ste bsrubs pas cir 'gyur zhe na/ chu ni rnam pa gsum las ye shes kyi chu'i ngo bo nyid du shes par bya'o zhes bya ba'i don to/ /rnam gsum zhes bya ba ni ha hoH hrIH zhes te lag pa g.yon pa'i mthil du chang bzhag la de'i steng du yi ge soM bsgoms nas/mthe bo dang srin lag gis kun du bsrubs la/ ha la sogs pa'i yi ge gsum bsgoms pas/ sngar smos pa'i tshul du kha dog la sogs pa'i lha gsum du bsgom mo zhes bya ba'i don to/ /rnal 'byor ma ni thams cad la//mthe bo'i thor ma so sor dbul/ /zhes bya ba la/ thor ma ni bdud rtsi chu'i yar ma'o/ /mthe bo ni mthe bo dang srin lag go/ /so sor ni rnal 'byor ma so sor tha dad pa ste/ de'i 'og tu dkyil 'khor gyi rnal 'byor ma thams cad la so so'i ming nas smos nas bdud rtsi'i thor ma dbul lo//de'i 'og ces bya ba la sogs pas ni/ de'i 'og tu bdag nyid mchod pa bstan te rang gi dngos po yis zhes bya ba ni ye shes mkha' 'gro ma'i gzugs kyis so/ /bdag nyid la ni bsam par bya/ /zhes bya ba ni bdag nyid der bsgom pa'o//rgyas pa lnga yi mchod rten ni/ /zhes bya ba la mchod rten ni lus te phung po rnam pa lngar gsal bas na rgyas pa lnga'o/ /yang na nyon mongs pa rnams 'joms pas rgyas pa ste/ gang zhe na/ mchod rten du bsgom pa'o/ /rnam pa lnga zhes bya ba ni rigs lnga mdor bsdus pa'i lus so//rnam gsum zhes bya ba ni mthe bo'i thor ma gsum gyis te/ dang po rnal 'byor ma thams cad mthe bo'i thor mas mchod nas/ de'i 'og tu bdag nyid ye shes mkha' 'gro ma'i rnal 'byor dang ldan pa'i lus la mthe bo'i yar mas mchod do zhes bya ba'i don to//thor ma gsum gyi gnas bstan pa'i phyir lce rtse zhes bya ba la sogs pa smos te/ lce rtse zhes bya ba ni lce'i rtse mo'o/ /thig le zhes bya ba ni smin ma'i dbus so/ /steng zhes bya ba ni spyi bo'o/ /blo dang ldan pas gnas gsum mchod/ /ces pa ni lha'i rnal 'byor dang ldan pas gnas gsum po de dag ltar mthe bo'i thor mas mchod pa'o//tshogs kyi dkyil 'khor du chang sbyin pa'i tshigs su bcad pa gsungs pa ltos shig ces bya ba la sogs pa la/ shin tu mdzes pa zhes bya ba ni shin tu rnam par dag pa'o/ /ci zhig ce na/ chos de phyi nang gi chos thams cad do//ltos shig ces bya ba ni mngon par zhen pa med pas zhes bya ba'i lhag ma'o/ /de nyid bstan pa'i phyir/ 'di la rtog pa yod min thong / /zhes bya ba smos te/ thong zhes bya ba ni ro gcig pa'o/ /ci zhig ce na/ rtog pa ste gzung ba dang 'dzin pa la sogs pa'i rtog pa'o//ci'i phyir zhe na/ chos rnams yod pa ma yin pa'i phyir te/ dgra zla la sogs pa ltar snang du zin kyang nam mkha' ltar rang bzhin rnam par dag pa'o zhes bya ba'i don to/ /bram ze khyi dang gdol pa gsum/ /zhes bya ba la/ bram ze'i sgras mtshon pa'i sgo nas/bram ze dang rgyal rigs dang rje'u rigs rnams gzung ngo / /khyi'i sgras mtshon pa'i sgo nas tha mal pa'i byol song thams cad gzung bar bya'o/ /de bzhin du gdol pa'i sgras dmangs rigs thams cad dang mthar gnas pa rnams gzung bar bya'o/ /rang bzhin gcig pa zhes bya ba ni ngo bo nyid mtshungs pa ste/'di ltar mi dang byol song la sogs pa dang bram ze dang gdol pa la sogs pa rnams la rigs la sogs pa tha dad par 'dzin pa 'di ni rang gi rnam par rtog pa 'ba' zhig snying po ste/ 'di ltar khrag dang khu ba dang 'dod chags dang zhe sdang la sogs pa las gyur pa'i lus la/khu ba la sogs pa'i bye brag cung zad cang mi dmigs so zhes bya ba'i don to/ /lhan cig bza' zhes bya ba ni/ rnam par rtog pa thams cad btung bar bya zhes bya ba'i don to/ /lhag ma ni go sla'o/ / len pa po'i bya ba bstan pa'i phyir/ pad+ma'i bskor ba zhes bya ba la sogs pa smos te/ pad+ma'i bskor ba zhes bya ba la sogs pa'i phyag rgya ni sngar bshad zin to/ /sems ni shel ltar bsams nas su/ /zhes bya ba ni/ rnam par rtog pa'i dri ma dang bral ba'i sems te/mngon par zhen pa med pas chos nyid la dmigs pa'o/ /len pa po'i tshig bshad bstan pa'i phyir/ 'dod chags zhes bya ba la sogs pa smos te/ 'dod chags dri ma dang bral ba/ /zhes bya ba la 'dod chags ni sred pa ste/ des sems kyi de kho na nyid mi gsal bar byed pa'i phyir ro//bral ba zhes bya ba ni bral bar byed pa ste/ 'dis rim gyis sred pa 'joms par byed pa'o/ /'o na ci'i phyir zhe sdang la sogs pa ma smos she na bden mod kyi 'dir gtso bo nyid du bstan pa'i phyir te/ 'di ltar 'khor ba'i rgyu mtshan gyi gtso bo ni tshor ba bde ba yin la/de yang chags pa las byung ba yin pas/ chags pa 'khor dang bcas pa spangs na nyon mongs pa gzhan dag kyang zad par 'gyur snyam du dgongs pa yin no/ /rin thang med las legs 'ongs chos/ /zhes bya ba la/ chos zhes bya ba ni kun nas nyon mongs pa dang rnam par byang ba'i chos rnams so//legs zhes bya ba ni rang gi sems te/ 'ongs pa ni de las byung ba'o/ /ci'i phyir na thams cad rang rig pa yin pa'i phyir ro/ /yang na legs 'ongs zhes bya ba ni/ phung po la sogs pa'i dngos po'i chos rnams rang gi sems las byung ba'i phyir/gnyis su med pa'i de bzhin nyid du 'gro ba ste de bzhin gshegs pa zhes bya ba'i don to/ /rin thang med pa zhes bya ba la/ 'di la gang zhig btang bas gang zhig blang bar bya ba de ni rin thang ste/ de 'di la med pas na rin thang med pa ste/ blang ba dang dor ba med pas kun nas mchod par bya ba'i ngo bo zhes bya ba'i don to//'dzin dang 'dzin min rnam spangs pa/ /zhes bya ba la/ 'dzin pa zhes bya ba ni 'dod chags la sogs pa dang bral ba'i rnam par dag par mngon par zhen pa'o/ /'dzin min ni de las bzlog pa'o/ /rnam par spangs pa ni chos thams cad la dngos por mngon par zhen pa dang /dag par mngon par zhen pa gnyi ga las grol ba'o/ /de kho na nyid ces bya ba ni mngon par zhen pa dang bral ba'i de kho na nyid der yid 'jug par bya ba'i phyir/ chos la bdag phyag 'tshal zhes bya bar sbyar ro/ /sbyor ba'i dngos grub don du ni//kun spyod de nyid ji bzhin du/ /rnal 'byor ma yis kun du sbyang / /ji ltar bden par spyod ces brjod/ /ces bya ba las/ sbyor ba zhes bya ba ni yang dag pa'i rdzas so/ /dngos grub ces bya ba ni dam tshig ste/ dam tshig gis tshim par bya ba'i phyir ro/ /don zhes bya ba ni bza' ba dang btung ba la sogs pa ste/de dag sngar smos pa'i tshigs su bcad pas chang gi snod bzung la/ /ji bzhin zhes bya ba ji ltar rnyed pa rnams rnal 'byor ma yis kun du sbyang zhing dag par spyod pas/ kun du spyod ces bya ba kun la brim zhing nye bar spyad par bya'o zhes bya ba'i don to//ji ltar bde bar spyod ces bya ba ni chang gi snod byin la gong ma rnams kyis kyang ji ltar bde bar spyod ces kyang tshig tu brjod par bya'o zhes bya ba'i don to/ /phyi yi dkyil 'khor brtag par bya/ /zhes bya ba nye bar bshad pa'i phyir/ dmar po yi ni rdzas rnams kyis/ / maN+Dal gru gsum byug par bya/ /zhes bya ba smos te/ tsan+dan dmar po dang gur kum la sogs pas phyi rol gru gsum du byug cing / de nas gru bzhir byas la sngar smos pa ltar re'u mig dgu dang ldan pa'i zlum por bya'o zhes bya ba'i don to/ /phyi'i dkyil 'khor gyi lha rnams dgug pa'i sngags dang phyag rgya gsungs pa/rdo rje khu tshur gnyis bcings nas/ /zhes bya ba la/ 'di'i don rdo rje khu tshur gnyis bcings nas phan tshun rgyab dang rgyab sprad de/ mthe'u chung gnyis phan tshun bcings la/ mdzub mo gnyis bsgrengs te/ g.yas pa'i mdzub mo cung zad bkug pa'i rgyab tu g.yon pa'i mdzub mo bzhag pa 'di yin no//sngags ni/ oM zhes bya ba la sogs pa ste/ dgug pa'i sngags dang phyag rgya'o zhes bya ba ni sgra ji bzhin no/ /me tog dmar po ni zhes bya ba la sogs pa ni go sla'o//gtor ma'i rdzas gsungs pa/ nye bar spyod pa'i gtor ma zhes bya ba la sogs pa la/ nye bar spyod pa'i gtor ma ni gnyis su med pa'i gtor ma ste de nyid bshad pa'i phyir/ sha rlon dang ni nya sha sogs/ /zhes bya ba smos te/ sogs pa'i sgras ni sgog btsong la sogs pa gzung ngo //de nyid kyi phyir gsungs pa/ bza' ba'i rdzas rnams thams cad la/ /zhes bya ba ni bza' ba thams cad ces bya ba ni bshad zin to/ /rdzas thams cad ces bya ba ni 'bru'i chang dang bcos pa'i chang rnams so/ /de yang gsungs pa/ 'bru dang shing shun sogs bcos pa//'jig rten grags pa bzhin zhes bya/ /bur shing la sogs las byung ba/ /'bru dang bcos pa'i chang du 'dod/ /ces bya ba gang yin pa'o/ /bdud rtsi lnga dang bcas par dgod/ /ces bya ba la/ bdud rtsi lnga dang bcas pa zhes bya ba ni/der bdud rtsi lnga blugs pa'o/ /dgod ces bya ba ni so so'i sa bon dgod pa'o/ /g.yon gyi cha ru snod bzhag la/ /g.yas su khro bo bstan par bya/ /zhes bya ba ni/ lag pa g.yon par gtor ma'i snod bzhag la/ lag pa g.yas pas bstod de khu tshur bcings nas/mdzub mo bsgrengs te bstan par bya'o/ /khro bo zhes bya ba ni mdzub mo'o/ /yang na cha zhes bya ba ni cha gnyis su bgo ba ste/ gtor ma gnyis g.yon dang g.yas su bzhag la/ g.yon gyis ni dkyil 'khor gyi lha la dbul bar bya'o/ /g.yas kyis ni phyogs skyong ba rnams la dbul bar bya'o//de'i tshe snod ces bya ba ni dkyil 'khor gyi 'khor lo'o/ /khro bo zhes bya ba ni phyogs skyong ba'o/ /oM shing gcig dang ni zhes bya ba nas/ gzhu can ma zhes bya ba'i bar ni 'jig rten skyong ba rnams dgug pa'i sngags yin te/ gdol pa zhes bya ba ni shan pa'i khyim mo/ /snod ces bya ba ni rgya mtsho'o/ /de ltar na shing gcig la sogs pa'i gnas de dag na gnas pa rnams 'dir spyon cig ces bya ba dang 'brel to/ /de dag kyang su dag yin zhe na/ nag po drag po zhes bya ba la sogs pa smos te/sngar smos pa'i re'u mig dgu la bsgoms pa'i zhing skyong gi 'khor rnams la drangs nas gzhug par bya'o/ /de la shar du ni ru tra nag po'o/ /byang du ni ru tra chen po'o/ /nub tu ni lhas byin no/ /lho ru ni nag po'o/ /dbang ldan ru ni gtsigs pa'o/ /me mtshams su ni mi sdug pa'o//bden bral du ni dga' las 'das pa'o/ /rlung mtshams su ni log 'dren te/ de dag spyan gsum pa phyag bzhi pa/ ji skad bstan pa'i mtshon cha dang gos dang rgyan gyis bklubs pa'o/ /phyogs bzhir gnas pa rnams ni go rims bzhin du sngon po dang /ser po dang / dkar po dang / dmar po'i mdog can no/ /dbang ldan la sogs par gnas pa rnams ni/ go rims bzhin du gnag cing ser ba dang / sngo zhing dmar ba dang / dmar zhing dkar ba dang / dkar zhing ser ba'i mdog can no//de la ru tra nag po'i mdun du ni rgan byed ma'o/ /g.yon phyogs na ni drag mo'o/ /rgyab tu ni mi sdug ma'o/ /g.yas su ni u ma ste/ de dag ni rim bzhin du mkha' 'gro ma la sogs pa'i mdog can no/ /ru tra chen po'i shar dbang byang dang nub dang / lho'i phyogs rnams su ni/rgyal ma dang / rnam par rgyal ma dang / mi thub ma dang / gzhan gyis mi thub ma ste/ mar me la sogs pa'i mdog can no/ /lhas byin gyi shar dang / byang dang / nub dang / lho'i phyogs su ni nag mo bzang mo dang / nag mo chen po dang / nag mo sbom mo dang / dbang mo rnams te/ 'jib byed ma la sogs pa'i mdog can no/ /nag po'i shar dang / byang dang / nub dang / lho phyogs su ni zla ba mo dang / drag mo dang / sdang ma dang / 'phyang ma ste 'phrog byed ma la sogs pa'i mdog can no/ /gtsigs pa'i shar dang /byang dang / nub dang / lho'i phyogs rnams su ni/ sum cu rtsa gsum gyi dbang mo dang / 'phrog byed ma dang / mar me ma dang / 'jib byed ma dang / rgan byed ma la sogs pa'i mdog can no/ /mi sdug pa'i shar dang / byang dang / nub dang / lho'i phyogs rnams su ni drag mo'i gzugs dang / gzugs chen mo dang / mche ba gtsigs ma dang / thod pa gcig ma rnams te/ dbang mo la sogs pa'i mdog can no/ /de dag las 'das pa'i shar dang / byang dang / nub dang / lho phyogs rnams su ni thod phreng can ma dang /phreng can ma dang / kha T+wAM ma dang / bdag nyid chen mo rnams te/ nag mo bzang mo la sogs pa'i mdog can no/ /log 'dren gyi shar dang / byang dang / nub dang / lho'i phyogs rnams su ni/ lag na ral gri can dang / lag na dgra sta can dang / lag na rdo rje can dang / lag na gzhu can ma rnams te/ rgyal ma la sogs pa'i mdog can no/ /de la rgan byed ma nas/ bdag nyid chen mo'i mthar thug pa rnams ni me tog la sogs pa'i mchod pa rnam pa lnga lag na thogs pas rnam par rol ba'o//lag na ral gri can la sogs pa bzhi ni ming ji bzhin du lag na mtshon cha thogs pa'o/ /de bzhin chen mo'i mkha' 'gro lnga/ /las kun rjes su sgrub byed pa/ /zhes bya ba ni 'bar ma la sogs pa rnams so/ /sbyor ba'i dkyil 'khor rgyal chen mo/ /de bzhin rdo rje dbang phyug ces bya ba ni ye shes mkha' 'gro ma'i dkyil 'khor ro//gtso bo zhes bya ba ni/ phyogs skyong ba rnams so/ /de bzhin gshegs pa'i sku chen te/ /zhes bya ba ni de dag thams cad de bzhin gshegs pa'i sku'i rang bzhin no zhes bya ba'i don to/ / ci 'dra zhe na/ rdul med rnal 'byor 'byin pa mo/ /zhes bya ba smos te/ /rdul zhes bya ba ni nyon mongs pa med pa rnams te/ dngos por zhen pa'i bdag nyid yin pa'i phyir ro/ /de gang la med pa de ni rdul med pa ste rdul dang bral ba'o/ /rnal 'byor ni ting nge 'dzin to/ / 'byin pa ni phyung ba ste/ des sgrub pa'o/ /rdo rje dbang mo'i bka' 'di yis/ /thams cad kun nas 'dir spyon cig /ces bya ba la/ 'di yis zhes bya ba ni 'dis so/ /rdo rje dbang mo zhes bya ba ni dkyil 'khor gyi gtso mo ste/ ye shes mkha' 'gro ma'o/ /de'i bka' ni ye shes mkha' 'gro ma'i bka' lung ste/sngar smos pa'i sngags kyi mtshan nyid can gyi bka'o/ /thams cad ni phyi rol gyi lha rnams te/ 'dir spyon cig ces pa ni dgug pa'o/ /de nas ci zhig bya zhe na/ oM kak+ka zhes bya ba la sogs pa smos te/ bdud rtsi yis ni kha bkang nas//zhes bya ba la bdud rtsi ni gtor ma'o/ /kha bkang zhes bya ba ni/ sngar smos pa'i tshul gyis phyi rol gyi dkyil 'khor pa rnams bltas la/ oM kak+ka zhes bya ba la sogs pa'i sngags kyis lha rnams kyi kha gtor mas gang bar bya'o zhes bya ba'i don to/ /las kyi go 'phang mngon par bsam//zhes bya ba la gang zhig bsams pa'i las ni las kyi go 'phang ste/ zhi ba la sogs pa'i las la dmigs par bya'o/ /yang na bdud rtsi ni chang ngo / /kha bkang ba ni sgrub pa po rang gi khur ba bkang ba'o/ /las kyi go 'phang ni man ngag las lhag ma'i gtor ma'i nang du kha spru gdab pa'o//mngon par bsams pa ni las la dmigs pa'o/ /yang na pa ta ni gom pa bskyed pa ste/ de'i 'og tu rkang pa bskyod pa la sogs pa'i gar bya'o zhes kha cig zer ro/ /rnal 'byor rnal 'byor ma bsgoms te/ /zhes bya ba ni rnal 'byor dang / rnal 'byor ma rnams bsgoms la gtor ma sbyin no zhes bya ba'i tshig snga ma'o//des ci zhig tu 'gyur zhe na/ /las rnams thams cad rjes su 'grub/ /ces bya ba ste/ zhi ba la sogs pa'i las thams cad 'grub par 'gyur ba'o/ /da ni gtor ma sbyin pa'i sngags dang phyag rgya gsungs pa//rdo rje khu tshur gnyis bcings nas/ /zhes bya ba la sogs pa smos te/ sngags dang phyag rgya 'di dag ni rab tu rgyas par bshad pa'o/ /sngar ni me tog mdor bsdus te bstan pa'i phyogs so/ /ji bzhin las la sogs sbyar nas/ gtor ma'i las la sogs pa sbyar//zhes bya ba ni zhi ba la sogs pa'i las brgyad po gang dang gang gi rab tu sbyor ba de dang de'i gtor ma cho ga 'dis sbyin par bya'o zhes bya ba la sogs pa ni las brgyad smos pa ste go sla'o/ /nye bar bsdu ba bstan pa'i phyir/ /phyi rol gtor ma'i de nyid kyis//gtor ma'i las la sogs pa 'grub/ /ces bya ba smos te/ phyi rol zhes bya ba ni phyi rol gyi lha rnams la'o/ /gtor ma'i de kho na nyid ni ji lta ba bzhin gyi cho ga ste/ des gtor ma byin la las rnams bsgrubs na 'grub par 'gyur ro zhes bya bar dgongs pa'o//da ni gsang ba'i mchod pa bstan par bya ba'i phyir/ de nas zhes bya ba la sogs pa smos te/ khyad par zhes bya ba ni khyad par du 'phags pa ste/ mchod pa dam pa'o/ /'dis ni rnam par snang mdzad la sogs pa'i rang bzhin du bya ba bstan to//rung dang mi rung rnam par spangs/ /zhes bya ba la sogs pa/ rung ba zhes bya ba ni/ gtsang sbra la sogs pas rung zhing gnang bar byas pa'o/ /mi rung ba ni de las bzlog pa ste/ rnam par spangs zhes bya ba ni khyad par gnyis la brten pa de dag rnam par snang mdzad la sogs pa'i rang bzhin du goms pas/tha mal pa'i rtog pa sun phyung ba'o/ /bstan pa de nyid bshad pa'i phyir/ /lcags kyu la sogs rnam pa lnga/ /de nyid lnga ru bya ba ste/ /zhes bya ba la sogs pa smos te/ de nyid lnga zhes bya ba ni/ rnam par snang mdzad la sogs pa'i rang bzhin no/ /bya ba zhes bya ba ni de rnams kyis de rnams sbyang bar bya'o/ /gang dag gis gang dag ce na/ lcags kyu chen po zhes bya ba la sogs pa smos te/ lcags kyu chen po zhes bya ba ni dang po na'i yi ge can no/ /ye shes lhar ni 'dod pa ste//zhes bya ba la/ ye shes kyi lha ni rnam par snang mdzad de/ 'dod pa ni der de lhag par mos pa'o/ /rdo rje lcags kyu mi bskyod pa/ /zhes bya ba la/ rdo rje lcags kyu ni dang po ga'i yi ge can no/ /mi bskyod pa ni mi bskyod pa nyid do/ / gnas kyi lcags kyu rin chen dbang / /zhes bya ba la/ gnas kyi lcags kyu ni dang po'i shwa'i yi ge can no/ /rin chen dbang ni rin chen 'byung ldan no/ /rgyal po lcags kyu don yod grub/ /ces bya ba la/ rgyal po'i lcags kyu ni/ 'dir yi ge ha'i dang po can no//don yod grub ces bya ba ni go sla'o/ /g.yon pa'i lcags kyu 'od dpag med/ /ces bya ba la/ g.yon pa'i lcags kyu ni tha ma shwa'i yi ge can no/ /'od dpag med pa ni snang ba mtha' yas te/ de dag gis ni lcags kyu de rnams 'og nas 'byung ba'i rang rang gi sa bon las byung ba'i rnam par snang mdzad la sogs pa'i rang bzhin du bya bar ston to//de nyid kyi phyir gsungs pa/ lcags kyu lnga la sogs pa la/ /de nyid thams cad sbyang bar bya/ /zhes bya ba smos te/ lcags kyu lnga po rnams ji lta ba bzhin gyi lha'i de kho na nyid du bsgom mo zhes bya ba'i don to//gang zhig 'dod na lha kun dang / /rnal 'byor ma kun tshim par bya/ /zhes bya ba la/ gang zhig ces bya ba'i lcags kyu gang dang gang yin pa rnams 'dod na zhes bya ba so so'i lha'i sa bon te/ des byin gyis brlab pa'o//yang na gang dang gang 'dod pa ste/ lha rnams dang rnal 'byor ma rnams kyi gang dang gang la mos pa de dang des tshim par bya ba'o/ /dam tshig med pa rnams kyis ci nas kyang ma tshor cing ma rig par dam tshig brim par bya'o zhes bstan pa'i phyir 'dod la dga' ba ma yin zhing /longs spyod phyir ni bsten mi bya/ /zhes bya ba smos te/ de la 'dod la dga' ba zhes bya ba la/ 'dod pa ni 'dod pa'i yul lo/ /dga' ba ni chags pa ste/ ji snyed 'dod pa dang / ji ltar 'dod pa'o/ /ma yin pa ni dgag pa ste/de dag gis gzhan gyis go bar 'gyur ba'i phyir ro/ /yang na 'dod la dga' ba ni tha mal pa'i chags pa ste/ chags pa des bza' bar mi bya ba'o/ /longs spyod ces bya ba ni mngon par 'dus byas pa'i ro myang ba ste/ de'i phyir bsten cing bza' bar mi bya'o//gzhan du dam tshig gi phyir myang bar bya ba'o zhes bya ba'i don to/ /yang na longs spyod ni mngon par 'du ba'i khyad par gtso bo la sogs pa ste/ des mi bsten pa'o/ /ci'i phyir zhe na/ gzhan gyis rig par 'gyur ro snyam du dgongs pa'o/ / de yang gsungs pa/ ci nas rig par mi 'gyur bar/ /thams cad mdo ru bsdus te bya/ /rig na dam tshig nyams 'gyur bas/ /dngos grub med cing sgrub po min/ /zhes bya ba gang yin pa'o/ /rang 'dod thams cad de nyid de/ /zhes bya ba la/ 'dod pa ni mngon par zhen pa ste/thams cad kyi sgras ni gzugs dang / sgra la sogs pa'i yul thams cad la lta ba po dang blta bar bya ba dang mthong ba la sogs pa rnams la bya'o/ /rang gi don de kho na nyid ces bya ba ni mtshan ma de dag mi dmigs pa ste der 'jug pa'o/ /mchod pa'i las la sogs pa bya//zhes bya ba ni des de bzhin gshegs pa rnams kyi khyad par gyi mchod pa la 'jug pa'o/ /de yi dbus su dpa' bo rnams/ /zhes bya ba la sogs pa ni bla na med pa'i mchod pa bstan pa'i phyir/ de'i dbus su zhes bya ba ni tshogs kyi dkyil 'khor gyi dbus su'o/ / dpa' bo rnams zhes bya ba ni dpa' bo dang rnal 'byor ma rnams so/ /de dag ci zhig bya zhe na/ /A li kA li sbyor bar bya/ /zhes bya ba smos te/ mngon par zhen pa med pas thabs dang shes rab snyoms par gzhug pa'o/ /des rnal 'byor ma rnams mnyes par bya ba bstan pa'i phyir/A li kA li rab sbyor gyis/ /zhes bya ba la sogs pa smos te/ de'i dbus na byung ba'i bdud rtsi zhes bya ba ni dga' bas bzhu ba las byung ba'i khu ba pad+ma'i dbus na gnas pa'o/ /ro kun myang bar bya zhes bya ba ni/ dang po legs par sbyangs te/ pad+ma la gnas pa lces blangs te rang gis bza' ba'o zhes bya ba'i don to//rdzas rnams kun gyi lhag ma dag /ces bya ba ni me tog la sogs pa rang gis longs spyod pa'i lhag ma'o/ /phyi yi dkyil 'khor du ni brtag /ces bya ba ni rang gis longs spyad pa'i 'og tu lhag mar gyur pa las kha'i pad+mas dang por shes rab ma la sbyin zhing yang phyi'i pad+ma'i snod du bzhag la/dam tshig dang ldan pa'i tshogs kyi dkyil 'khor ba gzhan dag la yang dbul bar bya'o zhes bya ba'i don to/ /de'i 'og tu hUM gi glu dang / bkra shis kyi glu blang ba bstan pa'i phyir/ hUM zhes bya ba'i glu dang ni//zhes bya ba la sogs pa smos te/ de la hUM gi glu ni rang dgar sems can grol ba'i zhes bya ba la sogs pa 'og nas 'byung ba gang yin pa'o/ /bkra shis sgra yis dgang bar bya/ /zhes bya ba ni hUM gi glu 'ba' zhig tu ma zad kyi bkra shis kyi dbyangs kyis kyang dgang ba'o//de nyid gsungs pa/ lus can zhes bya ba la sogs pa la/ lus can zhes bya ba ni sems can rnams te/ las kyi dbang gis 'gro ba de dang der 'jug pa'i phyir ro/ /don phyir zhes bya ba ni de rnams kyi ched du'o/ /shes rab ces bya ba ni rnal 'byor ma rnams kyi lus te/sdug bsngal las rnam par 'byed pa'i phyir ro/ /gsol ba btab ces bya ba ni/ gsol ba 'debs pa ste/ yang dag par sbyor ba'i phyir slong ba'o/ /de nas ci zhig mdzad ce na/ kun 'khyud la sogs gnyis kyis gnyis sbyor zhing / /zhes bya ba smos te/ 'khyud pa dang /'o bya ba la sogs pa sngon du 'gro bas thabs dang shes rab snyoms par zhugs nas/ skye ba dang / 'gag pa la sogs pa sgyu ma'i skyes bu lta bu'i sbyor ba'i sprul pa rnams kyis brgyan pa ste/ 'gro ba'i don gyi phyir nye bar gnas pa yin no/ /des ni gzhan gyi don phun sum tshogs pa'i sgo nas bkra shis brjod pa yin no//rang gi don phun sum tshogs pa'i sgo nas bkra shis brjod pa bstan pa'i phyir/ srid pa las grol khyod la phyag 'tshal lo/ /zhes bya ba smos te/ de la srid pa zhes bya ba ni dngos po rnams kyi skye ba dang 'gag pa'o//grol ba zhes bya ba ni de dang bral ba ste/ 'di la dngos po rnams kyi skye ba dang 'gag pa ni/ don dam par yod pa ma yin gyi/ sgyu ma'i skyes bu ltar brdzun pa dag cig kho na kun rdzob tu snang ngo zhes bya ba'i don to/ /des na gang gi phyir 'dis skye ba dang 'gag pa la sogs pa cung zad cig snang du zin kyang dam pa'i don du med pa'i phyir zhen par mi bya'o zhes bya bar dgongs so//bkra shis kyi glu'i 'og tu dril bu'i sgra bsgrags so zhes bstan pa'i phyir ro/ /rang 'dod bkra shis sgra dang ni/ /hUM hUM brjod cing dril bu gsil//zhes bya ba smos so/ /de'i 'og tu smon lam gdab pa bstan pa'i phyir/ rdo rje thal mo dam bcings nas/ /snying ga'i gnas su rab bzhag la/ /zhes bya ba la sogs pa smos te/ 'di dag gi don ni thal mo snying gar dam du bcings la/ sems can thams cad nad med cing //zhes bya ba nas/ rnal 'byor bstan bcos gnas la dgod/ /ces bya ba'i bar du tshig tu brjod de smon lam gdab bo zhes bya ba 'di yin no/ /de'i 'og tu lha rnams gshegs su gsol ba bstan par bya ba'i phyir/ rdo rje khu tshur gnyis bcings nas//zhes bya ba la sogs pa smos te/ rdo rje khu tshur gnyis bcings nas/ /g.yon pa snying gar gzhag par bya/ /g.yas pa sa la brkyang nas ni/ /de yi 'og tu gshegs su gsol/ /zhes bya ba ni phyag rgya 'dis re'u mig dgu'i dbus na bzhugs pa'i ye shes kyi lha'i ye shes mkha' 'gro ma/'khor dang bcas pa gshegs su gsol ba ste/ sngags ni oM At+ma ni tiSh+Tha hUM swA hA zhes bya ba yin no/ /ye shes kyi lha mo gshegs su gsol ba'i 'og tu dam tshig gi ye shes mkha' 'gro ma bsdu ba bstan pa'i phyir/de nas rang gi dbugs kyis ni/ /zhes bya ba la sogs pa smos te go sla'o/ /'jig rten skyong ba rnams gshegs su gsol ba bstan pa'i phyir oM sarba duSh+TaM zhes bya ba la sogs pa smos te/ oM sarba duSh+TaM zhes bya ba la sogs pa ni phyi rol gyi lha gshegs su gsol ba'i sngags so//phyag rgya gsungs pa/ se gol gsum ni gtogs pa yis/ /zhes bya ba smos te lag pa gnyis phan tshun bsnol la se gol gsum gtogs par bya ba'i don te/ rab tu byed pa zhes bya ba la/ 'dir smos pa'i gzhung gis lha'i rnal 'byor nas gzung ste/gtor ma'i mthar thug pa shin tu gsal bar byed pas na rab tu byed pa'o/ /dpal gdan bzhi pa'i 'grel pa dran pa'i rgyu mtshan zhes bya ba las/ gzhan gyi gdan gyi rim par phye ba gsum pa'o// //da ni bdud rtsi lnga la sogs pa'i bye brag shes par bya ba'i phyir/bcom ldan 'das la gsol ba 'debs pa gsungs pa/ bdud rtsi lnga zhes bya ba la sogs pa la/ bdud rtsi lnga yi khyad par dang / /zhes bya ba ni/ bcom ldan 'das las nyan par 'tshal/ /zhes bya ba dang 'brel to/ /de la khyad par zhes bya ba ni/bye brag tu rnam par dbye ba ste/ sngar ni bye brag med par shes la/ 'dir ni re re zhing yang rnam par phye ste/ shes par 'dod pas so/ /gang gis lcags kyu lnga po brlab/ /ces bya ba la/ gang gis zhes bya ba ni khyad par gang gis zhes bya ba ste/ brlab ces bya ba ni bsgrubs pa'o/ /des na khyad par gang las bsgrubs pa'i lcags kyu'i khyad par de dag nyan par 'tshal zhes bya bar sbyar ro/ /yang na sa bon gang gis byin gyis brlabs pa'o/ /gnyis med gnyis su med pa'i chos/ /zhes bya ba la/ gnyis med ni de bzhin nyid do//gnyis su med pa zhes bya ba ni/ shes rab kyi pha rol tu phyin pa'i ngo bo nyid de de bzhin nyid kyi khyad par ro/ /chos zhes bya ba ni de'i ngo bo nyid de rang bzhin med pa'i mtshan nyid do/ /gnyis kyi rnam rtog ji ltar spangs/ /zhes bya ba ni gnyis kyi rnam par rtog pa ste/shes rab kyi pha rol tu phyin pa gnyis su med pa la/ dngos po dang dngos po med pa'i rnam pa gnyis su rnam par rtog pa'o/ /A li kA li ji ltar lags/ /zhes bya ba ni/ thabs dang shes rab kyi sbyor ba ji lta bu zhig ces bya ba'i don to/ /phyi rol phyag rgya'i sems ni ci/ /zhes bya ba la/phyi rol gyi phyag rgya zhes bya ba ni ngag gi brda'o/ /sems zhes bya ba ni mtshan ma'i phyag rgya'o/ /gzhung kha cig las ni mtshan ma zhes 'byung ste/ der yang don ni mtshan ma'i phyag rgya nyid do/ /rnal 'byor bstan bcos tshul rnams ni/ /zhes bya ba la/ rnal 'byor zhes bya ba ni dngos grub kyi thabs sman gyi sbyor ba'o//de nyid ni bstan bcos te/ 'dis sems can rnams kyi sems 'chos par byed cing dam pa'i chos la nye bar sbyor bar byed pas na bstan bcos so/ /tshul ni des sems can rnams dngos grub la sbyor ba ste/ 'di ltar sman gyi dngos grub de dag gis/sangs rgyas kyi lam la yid ches par byas la/ yid ches pa des 'jug par 'gyur ro/ /zhugs pa las nyams su len par 'gyur ro/ /nyams su len pa las rdzogs pa'i byang chub nyid thob par 'gyur te/ de ltar na 'dis gcig nas gcig tu brgyud de/rdzogs pa'i byang chub tu 'dren par byed/ thob par byed pas na tshul lo/ /yang na rnal 'byor bstan bcos nyid tshul te/ de'i phyir bzlas pa dang bsgom pa la sogs pa la 'jug la/ de'i bsod nams kyi stobs kyis gcig nas gcig tu brgyud de byang chub tu 'dren cing thob par byed pa'i phyir ro//lan gsungs pa/ bcom ldan 'das kyis zhes bya ba la sogs pa la/ dang po zhes bya ba ni thog mar te/ bye brag tu shes par bya'o zhes bya ba ni lhag ma yin no/ /ci zhig ce na/ bdud rtsi rdo rje chu zhes bya ba ste/ rdo rje'i cha yang yin la bdud rtsi'i rang bzhin yang yin pas na/bdud rtsi'i rdo rje'i chu ste byang chub kyi sems so/ /gcig po de nyid bye brag lngar phye ste gsungs pa/ lnga yi bdag nyid rab tu 'jug /ces bya ba ste/ me la sogs pa'i rang bzhin 'byung ba chen po lngar 'gyur ro zhes bya ba'i don to/ / bstan pa de nyid bshad pa'i phyir/ reg na dro ba me yin te/ /zhes bya ba la sogs pa gsungs te/ reg na dro ba zhes bya ba ni reg pas dro bar shes pa'o/ /du ba ltar snang rlung yin no/ /zhes bya ba la/ du ba ltar snang ba ni rlangs pa ste/ de nyid rlung gi khams yin pa'o/ /sla ba'i rang bzhin chu zhes bya//zhes bya ba la/ sla ba ni 'og tu 'dzag pa dang snum pa'o/ /rang bzhin ni cha shas te/ snum pa dang / 'dzag pa'i cha ni chu yin pa'o/ /chu zhes pa'i sgra ni gsher ba'o/ /gzugs su snang ba sa yin no/ /zhes bya ba la/ gzugs su snang ba ni sra bar ston pa ste/ cha de ni sa'i khams so zhes bya ba'i don to//ye shes byin rlabs rdo rje nyid/ /ces bya ba la/ shes par byed pas na ye shes te/ 'das ma thag pa'i 'byung ba chen po bzhi byang chub kyi sems kyi gong bu la snang ba'o/ /byin brlabs pa zhes bya ba ni gnas pa ste/ skabs phye zhing der gnas pa'o//rdo rje nyid ces bya ba ni nam mkha' ste dbyer mi phyed pa'i phyir ro/ /des ni 'di skad du/ khu ba'i gong bu las 'byung ba chen po bzhir gnas par snang ba'i phyir de dag gi gnas skabs 'byed par byed pa nam mkha' nyid kyang yod par shes par bya'o zhes ston to/ /lha lnga ru ni bsgom par bya//zhes bya ba ni/ 'byung ba chen po lnga po de dag snang ba mtha' yas dang / don yod grub pa dang / mi bskyod pa dang / rnam par snang mdzad dang / rin chen 'byung ldan gyi ngo bor bsgom pa ste/ khu ba'i thigs pa gcig pu nyid lha lnga ru bsgom mo zhes bya ba'i don to//de dag ji ltar bsgom zhe na/ ma lus zhes bya ba la sogs pa smos te/ dbyibs zhes bya ba ni chu dang 'brel pas na dbyibs te/ yi ge sa'o/ /ma lus zhes bya ba la kA li ni cha shas te zla ba'o/ /sa zhes bya ba ni de dang lhan cig tu 'jug pa ste/ bdud rtsi'i sa bon yin pa'i phyir sa nyid do//zad par byed pa me nyid dang / /zhes bya ba la/ zad par byed pa zhes bya ba ni yi ge k+Sha ste/ k+Sha ya twad ces 'byung ba'i phyir ro/ /de nyid ni me ste/ me dang chos mthun pa'i phyir ro/ /de bzhin rtag tu rlung dang ni/ /zhes bya ba ni yi ge ya ste/ rtag tu rlung gi rang bzhin yin pa'i phyir ro/ /ngang pa mtshungs don sa dbang po/ /zhes bya ba la/ ngang pa ni yi ge haM ngo / /sa zhes bya ba ni sa'i sa bon te de nyid do/ /mtshungs don zhes bya ba ni don thams cad kyi thun mong gi ste/ ci zhig ce na/ dbang po ste stong pa la sogs pa'i gnas thams cad kyi 'das pa la sogs pa'i gnas skabs rnams kyi dpang po dang gnas su gyur pa yin no zhes bya ba'i don to//de ltar na ngang pa zhes bya ba'i yi ge ha nyid sa yang yin la/ dngos po rnams kyi thun mong gi dbang po yang yin pas sa dang mtshungs don dpang ngo //sgra dang thig ler sbyar bar bya/ /zhes bya ba ni sa bon bzhi po de dag thig le dang zhabs kyu dang ldan par bya ba ste/ des ni suM yuM k+ShuM hUM hUM zhes bya bar 'gyur ro/ /ye shes kyi ni yi ge lnga/ /zhes bya ba la/ ye shes zhes bya ba ni yi ge hUM ste/ de nyid ni mi 'gyur bas na yi ge'o//'di ni nam mkha'i sa bon te/ lnga zhes bya ba ni de ltar sa bon rnam lnga'o/ /de yi dbus su zla ba yi/ /dbus su bdud rtsi'i yi ge'o/ /zhes bya ba ni byang chub kyi sems kyi dbus su zla ba'i dkyil 'khor/ /zla ba'i dkyil 'khor gyi gzugs kyi dbus su bdud rtsi'i yi ge a bsgom mo zhes bya ba'i don to//lnga po lnga ru brjod par bya/ /zhes bya ba ni/ bdud rtsi re re zhing yang 'byung ba rnam pa lnga lnga ste/ ji ltar byang chub kyi sems 'byung ba lnga'i sa bon/ suM yuM k+ShuM hUM hUM gi yi ge rnams kyis/ mi bskyod pa dang / don yod grub pa dang /snang ba mtha' yas dang / rnam par snang mdzad dang / rin chen 'byung ldan rnams su byin gyis brlabs nas/ de'i steng du yang zla ba'i dkyil 'khor la bdud rtsi'i yi ge a bsgom par bstan pa de bzhin du/ /bdud rtsi lhag ma bzhi po rnams la yang tshul ji lta ba bzhin du brtags la/so so re re zhing 'byung ba chen po cha lnga lngar gnas pa la sangs rgyas rnam pa lnga lngar byin gyis brlabs pas nyi shu rtsa lngar 'gyur ro zhes bya ba'i don to/ /dngos dang dngos med las grol pa/ /zhes bya ba la/ dngos po ni skye ba'o/ /dngos po med pa ni skye ba med pa'o//gnyis las grol ba ni gnyis pa spangs pa ste/ yun ring du gnas pa'i phyir ro/ /rdo rje chu ni sbyangs pa yis/ zhes bya ba la/ rdo rje chu zhes bya ba ni nye bar mtshon pa ste lhag ma rnams kyang gzung bar bya'o/ /sbyangs pa ni dag par byas pa ste/ de nye bar longs spyod na rnal 'byor pa dngos po dang dngos po med pa las grol zhing grub par 'gyur ro zhes bya ba'i don to//des ni gti mug bsrings pa yin/ /zhes bya ba la/ gti mug ni mi gtsang ba'i 'du shes so/ /bsrings pa ni thag bsrings pa ste dag pa'i 'du shes dang ldan pa'i phyir ro/ / yang na tshul de ltar bdud rtsi rnams bsten pas/ rim gyis de kho na nyid la rmongs pa'i gti mug dang bral bar 'gyur te/ shes rab 'phel bar 'gyur ba'i phyir ro/ /phyi rol bdud rtsi rdzas bzang po/ /me yis btsos nas sbyangs pa ltar/ /zhes bya ba la/ ji ltar phyi rol gyi rdzas mes btsos pa bzang zhing dag la/bdud rtsi dang 'dra bar 'gyur ba bzhin du 'dir yang blta bar bya'o/ /ci zhig ce na/ lto zhes bya ba la sogs pa smos te/ lto sogs ye shes me yis ni/ /lhag ma bshang dang gci ba yin/ /zhes bya ba la lto las byung bas na lto ste bshang dang gci ba la sogs pa'o//de nyid bstan phyir bshang dang gci/ /zhes bya ba smos so/ /lhag ma zhes bya ba ni btso zhes sbyar ba ste/ ye shes kyi mes sbyangs pa'o/ /yang na lha'i ye shes kyi me zhes bya bar sbyar te/ des bshang ba dang gci ba la sogs pa sbyangs pas lhag par 'gyur te/rang bzhin gyis rdzas khyad par can du gyur pa de ni mthu lhag pas na lhag pa'o/ /me yis btsos nas me yis sbyangs/ /dbus su sbyin sreg rtag tu dbul/ /zhes bya ba la/ me yis btsos nas me yis sbyangs/ /zhes bya ba ni/ dang po lha'i ye shes kyi mes btsos nas/ de'i 'og tu ting nge 'dzin gyi ye shes kyi mes tha mal pa'i rtog pa'i bud shing bsreg par bya'o zhes bya ba'i don to//dbus su sbyin sreg rtag tu dbul/ /zhes bya ba ni/ lus kyi nang du ye shes kyi me nyid du dbus su slar yang sbyin sreg tu dbul ba ste/ sngags pas rtag tu bza' bar bya'o zhes bya ba'i don to//rdo rje chu yi sa bon ni/ /sa bon bcas pa bzlas nas kyang / /zhes bya ba la/ rdo rje chu'i sa bon zhes bya ba ni bdud rtsi byin gyis rlob pa'i sngags so/ /sa bon bcas pa zhes bya ba ni/ thabs dang shes rab snyoms par 'jug pa ste/ thabs dang shes rab snyoms par 'jug pas sbyang bar bya ba'i phyir gang gis bdud rtsi dag par byed pa'i sngags de nyid bzla bar bya'o zhes bya ba'i don to//des ni rdo rje dang pad+ma mnyam par sbyor ba sbyang ba bstan pa yin no/ /yang na sa bon gang gis sbyangs pa de nyid bzlas la bza' bar bya'o zhes bya bar ston to/de nyid kyi phyir gsungs pa/ de yi dbus su nyi ma la/ /dur khrod yi ge bsams nas bsreg /ces bya ba smos te/ de'i dbus su zhes bya ba ni/ bdud rtsi'i dbus su bsgom pa'i yi ge a ste/ de dang bcas par bzla zhes bya ba snga ma dang sbyar ro/ / bcas pa de gang zhe na/ nyi ma zhes pa la sogs pa ste/ dur khrod kyi yi ge ni k+ShuM ngo / /nyi ma zhes bya ba ni nyi ma ltar 'bar ba'i lha'i me'o/ /'dis a k+ShuM zhes bzlas la bsreg par bya'o zhes ston to/ /yang nyi ma la k+ShuM bsgom pa'o/ /lhag ma ni bshad zin to/ /bdud rtsi chu zhes bya ba ni//lha ni rnam pa gsum du grags/ /zhes bya ba ni byang chub kyi sems la sogs pa'i bdud rtsi rnams 'jig rten dbang phyug la sogs pa'i lha gsum gyi bdag nyid du bya ba ste/ des ni gzhung nye bar bsdu ba bstan to/ /da ni go rims la mngon par zhen pa spang bar bya ba'i phyir bdud rtsi lnga dris ba'i lan btab pa'i 'og tu/A li kA li dris pa'i lan gdab pa bstan par bya ba'i phyir A li zhes bya ba la sogs pa smos te/ A li zhes bya ba ni dpe med pa'i bde ba'i ro'o/ /li zhes bya ba ni de 'dis len cing shis par byed pas li ste rdo rje'o/ /de nyid ni bung ba ste me tog gi chu 'dren cing 'thung bar byed pa'i phyir ro//de yang 'dir thabs rjod par byed pa yin te/ ji ltar dgyes pa'i rdo rje la sogs pa las A li shes rab kyi ngo bor rjod par byed pa ni dgongs pa gzhan yin par blta bar bya ste/ sgra rnams la rnam par bkod pa nges pa med pa'i phyir ro/ /yang na b+h+ra ma zhes bya ba ni 'khrul pa'o//ra zhes bya ba ni rnam par 'joms pa ste/ rdo rje nyid la 'khrul pa rnam par 'joms pa'i rten yin pa'i phyir ro/ /kha cig ni b+h+ra ma zhes bya ba ni 'khor ba yin la/ ra zhes bya ba ni rnam par rol pa ste/ rdo rje 'dis 'khor ba'i bde ba la rnam par rol pas b+h+ra ma ra zhes zer ro//de nyid ni 'jigs byed yin te/ gnyis su med par rtogs pa'i rten yin pa'i phyir byis pa nyan thos rnams la 'jigs pa ster bar byed pa'i phyir ro/ /rnam pa gnyis bstan par bya ba'i phyir/ /A li nam mkha' mthas gtugs pa'i/ /chos kyi dbyings kyi rang bzhin la//zhes bya ba smos te/ 'dis ni byang chub kyi sems bstan to/ /de yang 'di ltar 'di las sems can rnams skyes shing 'byin pa'i go skabs ltar bas na nam mkha'o/ /pa ri an+ta zhes bya ba las pa ri zhes bya ba ni kun du bde ba'o/ /an+ta zhes bya ba ni skad kyi byings las 'ching bar 'dren te/byang chub kyi sems 'dis kun du bde ba 'ching bas na mthas gtugs pa'o/ /rang gi mtshan nyid 'dzin pas na chos te/ sems can rnams yin la/ de 'dis 'dzin cing gso bar byed pas na dbyings te/ byang chub kyi sems so/ /rang bzhin la zhes bya ba ni ngo bo nyid de dang po'i don gyis gnyis pa yin no//de dag gis ni byang chub kyi sems kyi rnam grangs bstan to/ /dbyings de nyid kyi khyad par bstan par bya ba'i phyir/ rgyu dang zhes bya ba la sogs pa smos te/ dus rtag tu dgos pa med pa'i bya ba la rgyug cing 'jug pa'i phyir/rgyu ba ste so so'i skye bo tha mal pa rnams so/ /rtag tu dgos pa med pa la mi 'jug pa'i phyir/ mi rgyu ba ste dpyod pa sngon du gtong ba rnams so/ /gsang blo can zhes bya ba la/ gsang ba zhes bya ba ni/ thabs dang shes rab gnyis su med pa'i ye shes te/ so so'i skye bo rnams kyis mi shes pa'i phyir gsang ba'o//blo ni de'i rnam pa can gyi sems so/ /de dag gang la yod pa de dag ni gsang blo can te sangs rgyas dang byang chub sems dpa' rnams so/ /lus zhes bya ba ni lus can rnams te de dag nyid do/ /ma lus pa ni lus pa med pa'o/ /skyed pa po ni rgyu mtshan te/'di ltar rdzogs pa dang / ma rdzogs pa'i lus can thams cad ni chos kyi dbyings kyi rang bzhin gyi byang chub kyi sems las byung ngo zhes bya ba'i don to/ /de ltar A li'i ngo bo bstan nas/ de'i zhar las byung ba byang chub kyi sems kyi gnas bstan pa'i tshul gyis khrag dang khu ba bdud rtsi lnga'i snying por bstan cing /de las kyang khu ba 'ba' zhig bdud rtsi lnga'i rang bzhin du bstan pa'i phyir/ bcu dang brgyad kyi zhes bya ba la sogs pa smos te/ bcu dang brgyad kyi rtsa zhes bya ba ni nu ma la sogs pa'i gnas bco brgyad de/ de dag nas drangs nas zhes bya ba dang 'brel to/ / dbang po kun zhes bya ba ni/ /mig la sogs pa'i dbang po'i sgo thams cad de dag gi dbus nas zhes bya bar sbyar ro/ /bcud rtsi zhes bya ba ni byang chub kyi sems so/ /A li zhes bya ba ni rdo rje'o/ /dbus zhes bya ba ni dbus nas zhes bya ba ste lnga pa'i don gyis bdun pa yin no//thim par 'gyur zhes bya ba ni pad+ma'i dbus su dbab bo/ /gang gis drang bar bya zhe na/ 'jigs byed rdo rje'i sgra yis te/ /rdo rjes pad+mo phye ba'i sgra yis so/ /sbyor ba'i rdzas zhes bya ba ni byang chub kyi sems so/ /de nas ci zhig bya zhe na/ sbyang ba bstan par bya ba'i phyir/ rlung dang me'i zhes bya ba la sogs pa smos te/ 'di'i don bshad zin to/ /bdud rtsi'i yi ge btu ba bstan pa'i phyir/ /dbyangs yig dang po mchog sa bon/ /zhes bya ba smos te/ dbyangs yig dang po ni a thung ngu ste yig 'bru rnams kyi dam pa yin pas mchog gi sa bon no/ /de'i dbus su zhes bya ba ni bdud rtsi'i dbus su zla ba'i steng du'o//gzung ba ni bsam pa'o/ /lhag ma ni go sla'o/ /yang na de'i dbus su zhes bya ba ni hUM gi zla tshes dang thig le'i steng du zhes bya ba'i don to/ /yang na dbang po kun gyi zhes pa la sogs pa la/ byang chub kyi sems nyid 'dzag cing 'bab pas na kun no//de nyid ni de kho na nyid shes par byed pa'i phyir dang / bde ba ster bar byed pa'i gtso bo yin pa'i phyir dbang po'o/ /de'i zhes bya ba ni rtsa rnams so/ /dbus zhes bya ba ni rdo rje'i lte bar ro/ /des cir 'gyur zhe na/ A li dbus su thim par 'gyur/ /zhes bya ba smos te/A li zhes bya ba ni khu ba'o/ /dbus zhes bya ba ni shes rab bo/ /thim pa zhes bya ba ni gnyis su med pa ste lhan cig skyes pa'i dga' ba'o/ /'gyur ba ni mngon sum du gyur pa'o/ /de dag gis ni gnas bco brgyad nas byang chub kyi sems drangs te/ rdo rje dang pad+ma'i lte ba'i dbus su son pa de'i tshe lhan cig skyes pa'i dga' ba mngon sum du bya'o zhes bya bar ston to//ji ltar drang zhe na/ 'jigs byed rdo rje zhes bya ba smos te/ sgra zhes bya ba ni sgra'i rnam pa'o/ /de nyid gang zhe na/ rlung dang me'i zhes bya ba la sogs pa la/ rlung zhes bya ba la sogs pa ni ya'o//me zhes bya ba ni ra'o/ /bdun zhes bya ba ni bdun pa'o/ /don zhes bya ba ni mthar gyur pa ste/ don du gnyer bar bya ba'i phyir ro/ /de yang 'di ltar dper na sgrub thabs kyi lam gyi mthar gtugs pa'i 'bras bu ni don du gnyer bar bya bas don zhes zer ba ltar/ 'dir yang rlung dang me'i bdun pa sa dang ha ni mthar gyur pa'i don gyis na don no//yang na bdun zhes bya ba ni rta bdun no/ /don ni de'i mtha' ma yin no/ /de ltar na rta bdun pa zhes bya bar sbyar te/ a swa dang ha la zhes zer ba'i phyir rta bdun pa ni sa dang ha'o/ rdo rje ma yi sa bon sbyar zhes bya ba la/rdo rje ma'i sa bon ni sa nyid do/ sbyar zhes bya ba ni de nyid bdud rtsi'i rang bzhin yin pa'i phyir zla tshes dang chos mthun pas/ ha'i zla tshes su bya ba'o/ /lhag ma ni bshad zin to/ /de ltar thabs kyi lan btab nas/ shes rab kyi lan bstan par bya ba'i phyir/ kA li zhes bya ba la sogs pa smos te/me tog ces bya ba ni bud med rnams kyi chos 'byung ba ste/ rdo rje nyi mas kha phye ba'i phyir ro/ /kA li zhes bya ba la/ ka zhes bya ba ni bde ba'o/ /li zhes bya ba ni de'i ro myong bar byed pa ste/ me tog 'dis bde ba'i ro myong bar byed pa'i phyir kA li'o//kun du mnan zhes bya ba ni rdo rje can gyis zhes bya ba 'og ma dang sbyar te/ rdo rje can zhes bya ba ni bde ba'o/ /mnan zhes bya ba ni bzhugs pa ste/ chos kyi 'byung gnas dkar po gru gsum gyi nang du sna tshogs pad+ma'i lte ba la/ rdo rje snying por rdo rje 'dzin bde ba chen po bzhugs so zhes bya ba'i don to//de ltar yang gsungs pa/ bde ba srung bar byed pa'i phyir/ /de nyid bde ba can du brjod/ /ces so/ /de yang bde ba 'ba' zhig ma yin gyi/ lhan cig skyes pa'i ngo bo nyid du bstan pa'i phyir/ lus me tog ces bya ba smos te/ de la me tog ces bya ba ni byang chub kyi sems de me tog pad+ma las byung ba'i phyir ro//lus zhes bya ba ni bcom ldan 'das kyi sku'i ngo bo nyid do/ /de ltar yang he badzra las/ bcom ldan khu ba'i rnam par gyur/ /zhes gsungs pa'o/ /'khor ba thams cad bskyed pa ste/ sa dang kun gyi ma zhes bya//zhes bya ba la/ kA li de nyid ni sems can thams cad kyi 'byung gnas su gyur pa dang / ngan 'gro dang bde 'gro rnams kyi rten du gyur pa'i phyir sa gzhi dang ma la sogs pa'i sgrar brjod pa yin no/ /bde ba yang kA li'i sgrar bstan pa'i phyir/ ye shes chu'i zhes bya ba la sogs pa smos te 'dir zhes bya ba ni me tog la bsnyegs te chos 'byung ba 'dir ro//ye shes chu bo zhes bya ba ni/ me long lta bu la sogs pa'i ye shes nyid sdug bsngal gyi gdung ba sel bar byed pas chu ste bde ba'o/ /de nyid ni shes rab kyi sgrar brjod de/de bzhin zhes bya ba'i sgras ni kA li zhes bya ba'i sgrar bsnyeg par bya'o/ /rgya mtsho zhes bya ba ni ye shes kyi chu de'i gnas su gyur pa'i phyir chos 'byung ba nyid do/ /shes rab ces bya ba la/ spros dang bral ba'i shes pa ni shes rab ste bde ba nyid yin la/ de'i gnas de la yang nye bar gdags pas de skad ces bya'o//chu srin nya zhes bya ba ni 'dod chags la sogs pa rnam par dag pa'i sangs rgyas rnams te/ de rnams kyis gang ba zhes bya ba lhag ma yin no/ /de ltar yang he badzra las gsungs pa/ rdo rje pad+mo sbyor ba las/ /sra bar snang ba sa yin te//sra ba'i chos nyid gti mug yin/ /gti mug rnam par snang mdzad bzhed/ /ces smos pa gang yin pa'o/ /'dir yang chu srin nya yis shes kyis kA li mtshan par blta bar bya'o/ /de ltar yang gsungs pa/ sangs rgyas rin chen za ma tog /ces bya ba gang yin pa'o//gnyis med ces bya ba la sogs pa la/ gnyis med ces bya ba ni/ A lir gdags pa'i khu ba dang kA lir gdags pa'i bde ba gnyis su med pa'i lhan cig skyes pa bsten to/ /yang na gnyis med ni phyi rol gyi phyag rgya'o/ /'dam zhes bya ba ni/'dam skyes te pad+ma'o/ /dbus ni de'i snying po'o/ /der ci zhig ce na/ thabs kyi myu gu zhes bya ba smos te/ pad+ma'i snying por gyur pas na myu gu yin la/ bde ba de la nye ba'i phyir thabs yin te/ khA ga mu kha'i rtsa'o/ /ban+du ka ltar kha bye ba'i/ /zhes bya ba ni/ me tog ban+du ka ltar kha bye ba dang bcas pa'o//sbrang rtsi bdud rtsi yi ni gnas/ /zhes bya ba la/ sbrang rtsi ni khu ba'o/ /bdud rtsi ni zla mtshan te/ de dag gi 'byung gnas su gyur pa'o/ /de las zla mtshan gang yin pa de yang kA li'i ngo bo nyid du bstan par bya ba'i phyir/ kA li'i bdud rtsi de nyid ni//me tog chu yis kun du bskor/ /zhes bya ba smos te/ me tog ces bya ba ni zla mtshan te 'bras bu la nye ba'i phyir ro/ /de nyid ni chu ltar 'dzag pa'i phyir chu'o/ /bskor zhes bya ba ni gang ba'o/ /de dag gis ni khA ga mu kha zhes bya ba'i rtsa kha bye bar gyur na/ cig car ram rim gyis kyang rung ste/khu ba dang zla mtshan 'dzag par 'gyur ro zhes bya bar ston to/ /da ni de ltar kA li bstan pa'i zhar la/ bdud rtsi'i snying po zla mtshan nyid sha rnam pa lnga'i rang bzhin yin pas de la longs spyod pa'i cho ga bstan pa'i phyir/ yi ge nyis 'gyur zhes bya ba la sogs pa smos te/yi ge nyis 'gyur ni Sha dang ka bsdus pa'i phyir k+Sha'o/ /thig le dang rtsa bar sgra ni yang dag par sbyar zhes bya ba ni/ u dang thig ler ldan pa'o/ /bsdus pas k+ShuM zhes bya bar 'gyur ro/ /lha rnams kyi ni rigs kyi yum/ /zhes bya ba ni rnal 'byor ma rnams bskyed pa'i sa bon no//yang na lha ni me'i lha'o/ /yum ni de'i 'byung gnas so/ /da ni bdud rtsi'i snying po byang chub kyi sems dang zla mtshan yi ge a dang 'das ma thag pa'i k+ShuM gis lhan cig tu byin gyis brlab pa bstan pa'i phyir/ zla ba zhes bya ba la sogs pa smos te/ pad+ma'i lte ba'i nang du rnam pa lnga lngar bsgom mo zhes bya ba'i don to//A li kA li tha snyad lhag ma bstan par bya ba'i phyir dang / bdud rtsi'i snying po nye bar bsdu ba bstan pa'i phyir/ A li zhes bya ba la sogs pa smos te/ 'dir A li dang kA li ni skyes pa dang bud med kyi tha snyad do/ /de bzhin gshegs ma zhes bya ba ni 'dis de bzhin du 'gro bar byed pa'i phyir te/las kyi phyag rgya'o/ /lus gnyis las ni skyes pa dag /ces bya ba ni khu ba dang bcas pa'i zla mtshan dang / byang chub kyi sems so/ /bdud rtsi yi ni cho ga mchog /ces bya ba la/ bdud rtsi ni nye bar mtshon pa ste sha yang gzung bar bya'o//mchog ces bya ba ni/ gnyis po des thams cad bsdus pa'i phyir dam pa'o/ /da ni yi ge a'i sngags btu ba gsal por bstan par bya ba'i phyir/ sde tshan gsum pa zhes bya ba la sogs pa smos te/ sde tshan gsum pa'i yi ge gsum pa ni Da'o/ / dbyug pa phyi mo zhes bya ba ni/ ra'i gzugs can gyi u ste/ de de'i 'og tu gdags par bya'o/ /rdo rje can zhes bya ba ni Da nyid de/ rdo rje'i gzugs 'dra ba'i phyir ro/ /ska bo che yis dkri bar bya/ /zhes bya ba ni de gnyis 'brel bar bya ba'i phyir ro/ /'dis ni ta dang rar 'dus pa'i a bstan gyi ta dang ba'i bdag nyid kyi a ni ma yin no zhes ston to//da ni bdud rtsi lnga'i sa bon phan yon bstan pa'i phyir/ bdud rtsi lnga zhes bya ba la sogs pa smos te/ de la dang po rdo rje bdud rtsi chu/ /A li nam mkha'i mthas gtugs pa/ /zhes bya ba la sogs pa bstan pa'i byang chub kyi sems dang /lhag ma bshang dang gci zhes bya ba bstan pa'i bdud rtsi gnyis dang / me tog chu zhes bya bas bstan pa'i zla mtshan dang / man ngag gis bstan pa'i dar snabs dang lnga ni bdud rtsi lnga'o/ /yang gang bdud rtsi lnga smos pa der ra'i sgras khrag smos pa la/zla mtshan nyid gzung bar bya'i tha mal pa'i khrag ni ma yin no/ /lnga po de dag kyang sngar smos pa'i tshul gyis re re zhing so so lnga lngar bsgrub par bya'o/ /de nyid 'dis zhes bya ba ni sbyang ba'i cho ga smos pa ste de kho na nyid kyis so/ /lus can bdag nyid bkru bar bya/ /zhes bya ba ni/nyon mongs pa rnams dag par bya ba'o/ /bdud rtsi lnga yi khyad par dang / /zhes bya ba ni sbyangs pa'i khyad par ro/ /gang gis shes 'gyur zhes bya ba ni/ gang gis zos pa na zhes bya ba'i bar du'o/ /'chi mi 'gyur zhes bya ba ni/ 'chi ba dang rga ba la sogs pa las ring du 'gyur ba ste/'chi ba nye bar mtshon pa'o/ /ci ste 'chi bar 'gyur na de'i tshe gsungs pa/ 'gro ba'i sgo zhes bya ba la sogs pa ste/ 'gro ba'i sgo ni 'gro ba'i lam mo/ /ci 'dra zhe na/ dag pa'i lus ni skyon med pa/ zhes bya ba smos te/ mi dang lha'i lus su 'gro ba'i lam mo//mthong ba ni der 'gro ba'o/ /bdud rtsi'i sbyor ba kun shes pas/ /rang dgar bdud rtsi myang bar bya/ /zhes bya ba ni go sla'o/ /yang na 'di'i don ni byang chub sems kyi bdud rtsi thabs dang shes rab gnyis su med pa'i sbyor bas/ lhan cig skyes pa'i ro myang bar bya'o zhes bya ba'i don to//da ni lcags kyu lnga zhes pa'i lan bstan pa'i phyir/ bza' ba lnga zhes bya ba la sogs pa smos te/ bye brag ces bya ba la sngar smos pa'i rim pas so/ /gang zhig shes nas zos pa yis/ /zhes bya ba ni sbyang ba'i cho ga gang zhig shes pa sngon du 'gro bas zos na'o//myur du 'gro ba mthong bar 'gyur/ /zhes bya ba ni bshad zin to/ /yang na 'gro ba ni thar pa'o/ /mthong ba ni thob pa'o/ /myur du zhes bya ba ni tshe 'di nyid las te/ gzhan du bskal pa grangs med pas kyang rnyed par dka' ba de mthong ba'i tshe 'di nyid las rnyed par 'gyur ro zhes bya bar dgongs so//lcags kyu rnams gsungs pa blo chen zhes bya ba la sogs pa la blo dang ldan pas na blo chen te/ glang po che'o/ /shin tu lkugs pas na ngag ste/ bsting ba'i tshig gis na ba lang ngo / /yang na sha 'dis ngag snyan pas na ngag go//rang gi rigs la 'gran tshol bas na/ rigs la 'gran te khyi'o/ /reg 'gro zhes bya ba la/ zhon na ring du 'gro bas na reg 'gro ste rta'o/ /lcags kyu chen po ni go sla'o/ /shel dang 'dra zhes bya ba ni shel ltar dag cing sbyangs nas bza' ba'o/ /de nyid kyi phyir gsungs pa/rnam shes zhes bya ba la sogs pa la/ rnam shes sa bon ni yi ge hUM ngo / /gzung bar bya zhes bya ba ni/ bsgom pa ste yi ge hUM bzlas pa dang / bsgom pas lcags kyu chen po sbyang bar bya'o/ /shel gyi sems kyis zhes bya ba ni/ shel ltar dang pa'i sems te/rnam par rtog pa'i dri ma dang bral bas so/ /bgegs kyi lcags kyu zhes bya ba ni/ bi na ya ka'i rang bzhin yin pas na/ bgegs te glang po che'i sha'o/ /gcig pa ni mtshungs pa ste/ lcags kyu chen po dang sbyang ba'i cho ga mtshungs pa'o/ / de nyid kyi phyir hUM zhes bya ba smos te go sla'o/ /gnas kyi bdag po zhes bya ba ni khyi ste/ rang gi gnas su stobs dang ldan pa'i phyir ro/ /lhag ma ni go sla'o/ /rta'i lcags kyu zhes bya ba la sogs pa la/ thams cad rig pa zhes bya ba ni rnal 'byor pa ste/ lcags kyu'i bye brag gis sa bon gyi de kho na nyid rig pa dang ldan pa'o/ /rdo rje lcags kyu zhes bya ba ni go'i dang po can gyi lcags kyu ste/ lcags kyu 'dis lus rdo rje ltar na ba dang / rga ba la sogs pas mi phyed pa'i phyir ro/ /de nyid kyi phyir gsungs pa/ rdo rje'i lus su brjod pa ste//zhes bya ba'o/ /phan yon bstan pa'i phyir/ rnal 'byor pa rnams sdig sbyang ngo / /zhes bya ba smos te/ lcags kyu de rnams bstan pas/ rnal 'byor pa rnams kyi las dang nyon mongs pa'i sdig pa 'dag par 'gyur ba'o/ /de nyid kyi phyir aM ku sha ste/ de la aM zhes bya ba ni don te 'bras bu'o//ku sha zhes bya ba ni byed cing bsgrub pa'o/ /gtor ma'i dus bstan pa'i phyir bcu bzhi dang zhes bya ba la sogs pa smos te/ zla ba yar ngo dang mar ngo'i bcu bzhi la sogs pa'i tshes la lha'i rnal 'byor dang ldan pas cho ga ji lta ba bzhin du gtor ma sbyin pa'o//ji ltar zhe na/ rab tu 'bad de zhes bya ba smos te/ nan tan du bya ba dang bcas pas so/ /rtag tu nges pa dang bcas pas gtor ma sbyin na 'grub par 'gyur ro zhes bya ba bstan pa'i phyir/ rtag tu zhes bya ba la sogs pa smos so/ /spyod pa zhes bya ba ni longs spyod de/mtho ris kyi mtshan nyid do/ /grol ba zhes bya ba ni thar pa ste/ sangs rgyas kyi go 'phang ngo / /las rnams thams cad 'grub par 'gyur/ /zhes bya ba ni/ rgyas pa la sogs pa'i las rnams 'grub pa'o/ /de nyid bstan par bya ba'i phyir/ rgyal po'i pho brang zhes bya ba la sogs pa smos te/rgyal po'i pho brang 'gro na yang / /myur du dpal dang ldan par 'gyur/ /zhes bya ba ni ye shes mkha' 'gro ma'i rnal 'byor dang ldan pas/ rdzas bcu las byas pa'i ri lu sbyang ba byas te khar bcug nas/ rgyal po'i pho brang du 'gro na/de ma thag tu dpal 'phel bar 'gyur ro zhes bya ba'i don to/ /mdza' bo sdug cing zhes bya ba ni/ shin tu yid gcugs par gyur pa'o/ /yid 'ong bar zhes bya ba ni dbang du gyur pa'o/ /mthong ba tsam gyis zhes bya ba ni bltas pa'o/ /dbul po nor gyis phongs pa yang //zhes bya ba la/ dbul po nyid phongs pa ste/ nor dang bral ba'o/ /khyim ni 'byor zhing rgyas par 'gyur/ /zhes bya ba ni khyim nor gyis gang bar 'gyur ba'o/ /de dag thams cad la yang rim pa snga ma nyid dang sbyar bar bya'o/ /'chi ba'i tshe na zhes bya ba la sogs pa ni go sla'o//dri zhim dang ni zhes bya ba la sogs pa la/ dri zhim zhes bya ba ni dri zhim po gang yang rung ba'o/ /sbyar ba ni bsreg pa ste/ ci dang zhe na/ rdzas bcu zhes bya ba smos te/ rdzas bcu zhes bya ba ni rnam par snang mdzad dang / rin chen 'byung ldan dang / snang ba mtha' yas dang /mi bskyod pa zhes bya bar grags pa rnams dang / don yod grub pa zhes bya bar grags pa lud skabs te bdud rtsi lnga dang / go ku da ha na ste lcags kyu lnga'o/ /yi ge bcu yi sngags dag ni/ /zhes bya ba ni sangs rgyas lnga'i snying po hUM hUM k+ShuM yuM suM zhes bya ba lnga dang / go ku da ha na rnams kyi snying po sriM griM hUM dzr-IM hUM zhes bya ba lnga ste bcu'o/ /phyag 'tshal sred pa'i mtha' dang ldan/ /zhes bya ba ni dang por oM dang mtha' mar swA hA spel ba ste/ bsdus pas oM hUM hUM k+ShuM yuM suM sriM griM hUM dzr-IM hUM swA hA zhes bya bar 'gyur ro/ /rnal 'byor pa yis 'bum bzlas te/ / zhes bya ba ni ye shes mkha' 'gro ma'i rnal 'byor dang ldan pas/ thog mar sngags 'di 'bum du bzlas pas bsnyen par bya'o/ /mkha' 'gro'i gtor ma byin brlabs la/ /zhes bya ba ni gtor ma sngon du 'gro bas so/ /sgrub pos 'di yi du bas bdug /ces bya ba ni/ sngags bzlas ma thag pa'i brgya rtsa brgyad bzlas pa'i du bas bdag nyid la bdug pa'o//'gro ba thams cad rmongs par 'gyur/ /zhes bya ba ni chags shing dbang du 'gyur ba'i rnam grangs so/ /gzhan dag la yang bsnyen pa la sogs pa'i cho ga ni 'di nyid yin par blta'o/ /lhag ma ni go sla bas ma phye'o//de dag las su sbyar bar bya/ /ngas bstan pa la the tshom med/ /ces bya ba ni gur gum la sogs pa'i rdzas de dag gis dbang du bsdu ba la sogs pa'i las rnams sbyar zhing bsgrubs na gdon mi za bar 'grub par 'gyur ro zhes bya bar dgongs te nye bar bsdu ba'o//da ni rnal 'byor ma rnams kyi sgrub pa bstan pa'i phyir pho nya zhes bya ba la sogs pa smos te/ ci'i phyir rnal 'byor ma rnams bsgrub ce na/ pho nya'i las kyi bya ba yis/ /grub pa'i rnal 'byor don gnyer phyir/ /zhes bya ba gsungs te/ grub pa'i rnal 'byor ma rnams las thams cad byed pa'i pho nyar don du gnyer bar bya ba'i phyir te/bdag gir bya ba zhes bya ba'i bar du'o/ /lan gsungs pa/ pho nya zhes bya ba la sogs pa la/ pho nya'i las su rab sbyar bas/ /zhes bya ba ni/ rnal 'byor ma rnams pho nyar bya'o/ / las rnams kun gyi snying po bas/ /zhes bya ba ni/ las thams cad la stobs dang ldan pa'i phyir/ gtso bo zhes bya ba'i don to/ /sgrub pa'i cho ga bstan par bya ba'i phyir/ shing gcig ces bya ba la sogs pa smos te/ shing gcig gi ni drung dag tu/ /cho ga bzhin du 'bum du bzlas//zhes bya ba ni 'bar byed ma bsgrub pa'i phyir/ dang por bsnyen pa bstan pa yin no/ /de la shing gcig ces bya ba ni/ rgyang grags tshun chad du zla med pa'o/ /cho ga bzhin du 'bum du bzlas/ /zhes bya ba ni dam tshig bsten pa la gus pa'i rnal 'byor pas gtor ma sbyin pa sngon du 'gro bas bris sku'i mdun du 'bum phrag gcig tu bzlas pa'o//cho ga de nyid bstan pa'i phyir/ khru gang zhes bya ba la sogs pa smos te/ thang kha zhes bya ba ni man ngag las zla mtshan can gyi dgab ma las bya ba'o/ /ci snyed cig tu bya zhe na/ khru gang bzhi char bcas pa ste/ /khru'i bzhi cha gcig dang bcas pa'i khru gang du'o/ /bri ba zhes bya ba ni 'bar byed ma'i gzugs bri ba'o/ /ji snyed cig ce na/ mtheb sor bcu gnyis tshad du ste/ sor bcu gnyis kyi dpangs dang ldan par ro/ /ji ltar zhe na/ kha dog ser mo zhes bya ba la sogs pa ste go sla'o//'bad de mchod pa'i cho ga brtsam/ /zhes bya ba ni mdor bstan pa ste/ 'di nyid bshad pa'i phyir/ dri dang me tog ces bya ba la sogs pa smos so/ /'dis ni dri dmar po dang / me tog dmar pos mchod nas/ sha skam gyi bdug pas bdugs la/nye bar spyod pa'i gtor ma sbyin pa'o zhes ston to/ /rdzas lnga dag dang dngos po lnga/ /zhes bya ba la/ rdzas lnga zhes bya ba ni bdud rtsi lnga'o/ /dngos po lnga zhes bya ba ni go ku da ha na ste sha lnga'o/ /mchod nas de bzhin 'bum du bzlas/ /zhes bya ba ni gtor ma sngon du 'gro ba'i bsnyen pa 'bum du bzlas kyi 'og tu yang gtor ma sngon du 'gro ba'i bzlas pa 'bum gyis bsgrub par bya'o zhes bya ba'i don to/grub pa'i mtshan nyid bstan pa'i phyir/ dang po la ni zhes bya ba la sogs pa smos te go sla'o/ /pho nya 'ongs nas dam tshig gi sngags dang phyag rgya bstan pas mnyam par bya ba'i phyir/de yi sngags kyi brjod nas kyang / /zhes bya ba la sogs pa smos te/ de'i sngags zhes bya ba ni bsnyen pa la sogs pa'i dus su bzlas pa'i sngags so/ /brjod nas zhes bya ba ni phyag rgya bcing ba'i dus su'ang de de nyid bzlas pa'o//mnyes kyi 'og tu bdud rtsi lnga'i chus thod pa bkang ste/ dam tshig byin pas dbang du bsdu ba bstan pa'i phyir/ bdud rtsi lnga zhes bya ba la sogs pa smos te/ don gsal lo/ /dbang du byas nas/ dngos grub bslang ba bstan pa'i phyir/ 'bad de zhes bya ba la sogs pa smos te/rnal 'byor ma dang gnyis med par/ /byin gyis rlobs la da sgrubs shig /ces bya ba ni rnal 'byor ma khyod dang nga dbang po gnyis snyoms par 'jug pa'i phyir nye bar mnos shig pa ste/ chung mar bsgrub par bya ba'i phyir smra bar bya'o//lhag ma ni go sla bas ma phye ba'o/ /thun phyed dang ni lhan cig spyod/ /'khrig la sred pa'i rnal 'byor ma/ /zhes bya ba ni/ rnal 'byor ma 'bar ma de shin tu 'khrig pa la sred pa'i phyir/ thun phyed kyi dus kyi bar du 'khrig pa spyod pas tshim par byas nas dga' bar 'gyur gyi gzhan du ni ma yin no zhes bya ba'i don to//gal te grub par ma gyur na/ /de tshe drag mo'i sa bon bzla/ /zhes bya ba la drag mo'i sa bon ni yi ge k+ShuM ngo / /bzla ba ni de dang spel bar bzla ba ste/ gal te cho ga snga mas ma grub na/ k+ShuM oM dI pe shwa ri hUM sraM pheM k+ShuM zhes bya ba 'bum du bzlas pas bsgrub par bya ba'o//sa bon gyis ni gzir tsam gyis/ /zhes bya ba ni drag mo'i sa bon dang spel te bzlas pas so/ /'bar byed ma yi spyi bo 'gems/ /zhes bya ba ni gal te ma grub na zhes bya ba'i lhag ma ste gdon mi za bar 'grub po zhes bya bar dgongs so//sems can don 'bad sgrub pa pos/ /'bar ma chung mar bsgrub par bya/ /zhes bya ba ni bza' ba dang nor la sogs pa'i sbyin pas sems can 'dul bar 'dod na/ de'i tshe 'bar ma chung mar bsgrub po zhes bya ba'i don to/ /lhag ma gzhan sgrub pa bstan pa'i phyir/grub pa'i zhes bya ba la sogs pa smos te/ gzhan zhes bya ba ni 'bar ma las gzhan pa'i lhag ma rnams so/ /mkha' 'gro ma zhes bya ba ni de rnams kyi nang nas mkha' 'gro ma smos te/ dkar ba'o/ /thang ka khru gnyis dman pa la//zhes bya ba ni bzhi cha gcig gis ma bkab pa'i khru do'o/ /mchod dang gtor ma byin brlab ste/ /de 'og gzugs ni bri bar bya/ /zhes bya ba ni gzugs bris te gtor ma sngon du 'gro ba'i bzlas pas bsgrub par bya'o zhes bya ba'i don to/ /dur khrod kyi ni sa phyogs su//zhes bya ba ni ro bsregs pa'i shul du'o/ /de yang khyad par ci 'dra zhe na/ kun du zhes bya ba la sogs pa smos te go sla'o/ /'dir yang bsnyen pa dang / sgrub pa dang / dgyes par byed pa dang / dbang du bya ba la sogs pa'i cho ga sngar bstan pa bzhin du sbyar bar bya'o/ / rdo rje ma'i sa bon zhes bya ba ni yi ge suM ngo / /sngon du bstan pa'i cho ga bzhin/ /zhes bya ba ni rim par phye ba gzhan las bstan pa'i sngags spel ba'i cho ga ste/ 'dir suM oM DA ki nI hUM hUM phu suM zhes bya bar 'gyur ro/ /de bzhin du gzhan du yang blta bar bya'o/ /lhag ma ni go sla bas rnam par ma phye'o//bstan pa'i las kyis ma grub na/ /las gzhan gyis ni bsgrub par bya/ /zhes bya ba ni sngar smos pa'i zhi ba'i las kyis ma grub na/ drag shul gyi cho ga gzhan gyis sgrub par ston te/ mdor bsdus pa'o/ /de nyid bshad pa'i phyir/ bdag nyid ces bya ba la sogs pa smos te/'di dag gi don ni/ bdag nyid ye shes mkha' 'gro mar bsgoms la/ rkang pa g.yon pas/ 'phrog byed ma'i bris sku mnan la/ 'phrog byed ma nyid kyi sngags lnga brgya bzlas te bsdigs pas bsgrub par bya'o zhes bya ba'i don to/ /bsdigs pas kyang ma grub na/tshar bcad pa'i las kyis sgrub pa bstan pa'i phyir/ gal te zhes bya ba la sogs pa smos te/ dpa' bo'i dbus su zhes bya ba ni rnal 'byor ma'i 'khor lo'i dbus su'o/ /gsod pa zhes bya ba ni yi ge phaT do/ /mtho zhes bya ba ni drag tu bzlas pa'o/ /hUM gi sa bon bsgoms pa yis//zhes bya ba ni bris sku'i dum bu rnams yi ge hUM du bsgom pa'o/ /thams cad du ni bza' bar bsam/ /zhes bya ba ni/ me'i nang du sbyin sreg tu dbul ba'o/ /thams cad kyi ni dbang phyug ma/ /zhes bya ba ni/ /gtso mo ste 'phrog byed ma'o/ /de nyid slar bshad pa'i phyir/bstan pa'i las kyis ma grub na/ /zhes bya ba la sogs pa gsungs te/ bstan pa'i tha mal pa dang bsdigs pa'i las gnyis dang sbyar ro/ /nag po zhes bya ba ni ri sta ka'i shing ste/ ba la ta ga dang nag po'i shing gi ming zhes zlas phye ste/ mtshams sbyar bar bya'o/ / khrag dang bcas pa'i yungs kar ni/ /zhes bya ba ni khrag dang yungs kar dang / ske tshe dang dug dang / nim pa rnams tsha ba'i mar nag gis bsgos la/ bris sku'i dum bu dang bcas par bsreg par bya ba ste/ khrag dang yungs kar ni nye bar mtshon pa tsam mo/ /cho nges 'debs shing 'ongs nas su//nges par las rnams sgrub byed par/ /zhes bya ba ni sdug bsngal gyis gzir bas lus 'jig pa'i skrag pa dang bcas pas/ myur du sgrub pa po'i gan du 'ongs te/ ji ltar bsgo ba bzhin byed par 'gyur ro zhes bya ba'i don to/ /drag shul gyi cho ga 'di ni 'phrog byed ma 'ba' zhig tu ma zad kyi/rnal 'byor ma gzhan dag kyang / gal te so so'i las ji skad smos pas ma grub na/ cho ga 'di nyid kyis tshar gcad par bya'o zhes blta bar bya'o/ /de nyid kyi phyir/ mkha' 'gro ma rnams 'chi 'gyur ram//zhes bya ba smos te/ mkha' 'gro ma rnams zhes bya ba rnal 'byor ma rnams so/ /de la/ gnyis med gnyis su med pa'i chos/ /gnyis kyi rnam rtog ji ltar spang / /zhes bya ba'i lan ni/ dngos dang dngos med las grol bas/ /des ni rmongs pas ring du 'gro/ /zhes bya bas bstan to//rnal 'byor bstan bcos tshul dang ni/ /zhes bya ba'i lan ni/ dri zhim dang ni sbyar ba yis/ /zhes bya ba la sogs pas bstan to/ /dri ba dang lan lhag ma ni so sor brda phrad par zad do/ /da ni tshogs kyi dkyil 'khor du 'jug pa la/ sgo srung dbyig sngon can la gsol ba 'debs pa bsten pa'i phyir/khro bo sngon po zhes bya ba la sogs pa smos te/ sngon po zhes bya ba ni tshig snga ma phyed bor nas phyogs gcig smos te/ 'dir dbyig pa sngon po can la sngon po 'ba' zhig smos pa ni dper na don yod par grub pa la don yod pa zhes bya ba dang //kun du spyan ras gzigs la kun gzigs zhes bya ba lta bu'o/ /dam tshig yid du 'ong zhes bya ba ni/ yid dang 'thad pa'i dam tshig ste/ khro bo nyid 'grong bar mi bya bas na dam tshig go/ /ji ltar na mdzes pa yin zhe na/ nor bu rin chen gces bcings pa'i/ /dbyug pa phyag na bsnams pa ste//zhes bya ba smos te/ nor bu rin chen bsnams pa ste/ /zhes bya ba mang ba'i tshig ni/ mdog dang dbyibs dang / yon tan la sogs pa rnam pa tha dad pa'i nor bu rnams bsdu ba'i phyir ro/ /gces zhes bya ba ni nor bu de dag la srog ltar yid du 'ong ba'i phyir ro//bcings pa ni spras pa'o/ /de dag ni khro bo la bod pa'o/ /bos nas ci zhig bya zhe na/ bdag ni zhes bya ba la sogs pa smos pas gsol ba gdab par bya'o/ /bdag ni zhes bya ba ni rnal 'byor ma'i tshogs kyi dbus su gtong du gsol zhes bya ba dang 'brel to//de ci'i phyir zhe na/ 'khor ba las bsgral ba'i phyir te 'khor ba'i 'jigs pa las bsgral ba'i phyir ro/ /dpa' bos zhes bya ba ni khro bo la bstod pa ste/ 'khor ba'i 'jigs pa med pa'i phyir ram/ /nyon mongs pa'i g.yul las rgyal ba'i phyir ro/ / gnang gis zhes bya ba ni bdag nyid la bstod pa ste/ tshogs kyi dkyil 'khor du 'jug pa la skal ba dang ldan par bstan to/ /bzang po zhes bya ba ni dge ba ste/ thar pa'i grong khyer gyi bdag nyid kyi phyir ro/ /thong zhes bya ba ni thong shig pa'o/ /tshigs su bcad pa 'dis ni tshogs kyi dkyil 'khor du 'jug pa dang 'dra bar slob ma dkyil 'khor du gzhug pa yang bya'o zhes la la dag zer ro//da ni ngag dang lus kyi phyag rgya sngar gsol ba btab tu zin na yang bshad pa mang po zhig gis bar chod pa'i phyir dang / sdom la ma gtogs pa'i rnal 'byor ma bzhi'i sgrub pa gzhan bstan pa dag gis bar chod pas dogs pa'i 'du shes kyis slar yang bskul ba bstan par bya ba'i phyir/rnal 'byor zhes bya ba la sogs pas gsol ba gdab pa bstan to/ /gsang chen zhes bya ba ni tha mal pa'i skye bo rnams la brda'i tshul gyis sbed par byed pa'i phyir ro//gsang dang gsang bas zhes bya ba/ /zhes bya ba ni rnal 'byor pa rnams dang rnal 'byor ma rnams kyis shes par bya ba'o/ /lan gsungs pa/ ngag gi ces bya ba la sogs pa la/ g.yas kyi cha ru rnal 'byor ma/ /zhes bya ba ni/rnal 'byor pa'i g.yas kyi chas brda sprad pa'am/ g.yas kyi char gnas nas brda la 'jug pa'o/ /g.yon du rnal 'byor ma nyid de/ /zhes bya ba yang don de bzhin du shes par bya ba'o/ /sor mo khar ni 'jug byed pa/ /zhes bya ba la sogs pas ni rnal 'byor ma rnams kyi lus kyi mtshan ma bstan pa'o//go g+hu zhes bya ba la sogs pa ni rnal 'byor pa rnams kyi ngag gi brda bstan to/ /mthe bo btsir byed pa zhes bya ba ni gung mo'i 'ching ba'o/ /lhag ma ni brda phrad par zad do/ /gzhan gyi gdan zhes bya ba la sogs pa la/rab tu byed pa zhes bya ba ni gsal bar byed pa ste/ gzhung 'dis bdud rtsi lnga'i de kho na nyid nas bzung ste/ lus dang ngag gi brda'i mthar thug pa rab tu gsal zhing rgyas par ston par byed pas na rab tu byed pa'o/ /gzhan gyi gdan zhes bya ba ni bdag gi gdan gyi rim par phye ba bzhi las gzhan nyan par gyur pa'i rim par phye ba bzhi ni sbyin sreg nas bzung ste/rnal 'byor ma sgrub pa'i mthar thug pa gzhan gyi don gyi sbyor ba ston pa dang / sbyor ba'i gtso bo ston pa'i phyir gzhan yin la/ dngos grub kyi 'byung gnas yin pa'i phyir na gdan te rdzogs so zhes bya ba ni mthar gtugs pa'o//dpal gdan bzhi pa'i 'grel ba dran pa'i rgyu mtshan zhes bya ba las gzhan gyi gdan gyi rim par phye ba bzhi pa'o// //da ni sbyor ba'i gdan gyi dbang du byas nas/ mtshon bya zhes bya ba la sogs pa gsungs so//gzhan zhes bya ba ni gdan gsum pa ste/ gzhan gyi gdan la ltos nas gzhan no/ /de'i nang nas dang por de kho na nyid rnam pa bzhi shes par bya ba'i phyir/ mtshon bya zhes bya ba la sogs pa gsol ba 'debs pa gsungs te/ mtshon bya zhes bya ba ni rdo rje la sogs pa rnam pa bzhi'o//mtshan nyid ces bya ba ni de dag gi rang bzhin te de kho na nyid do/ /de nyid bzhi po ji lta bur shes nas ji ltar sbyar bar bgyi zhes bya ba la/ de nyid bzhi ni rdo rje dang / dril bu dang / bgrang phreng dang / 'gro ba rigs lnga'i 'khor ba'i ye shes rnams te/de rnams kyi de kho na nyid ji ltar shes par bya ba dang / shes nas kyang ji ltar sbyar zhes bya ba ji ltar gzung bar bya zhes bya ba'i don to/ /lan gsungs pa/ 'khor ba las grol zhes bya ba la sogs pa la/ 'khor ba las grol ba'i mtshan nyid ces bya ba ni/ rdo rje la sogs pa'i mtshan nyid de/ de kho na nyid kyi rang bzhin 'dis 'gro ba rnams 'khor ba'i rgya mtsho las grol bar byed pas na/ 'khor ba las grol mtshan nyid do/ /de gnyis su med pa/ dang po rdo rje'i de nyid de/ /zhes bya ba la sogs pa smos te go sla'o/ / 'khor ba las grol mtshan nyid ces bya ba de nyid gsal bar bshad pa'i phyir/ de nyid bzhi yi dba' rlabs kyis/ /ji ltar 'dod bzhin pha rol sgrol/ /zhes bya ba smos te/ rtog pa'i rgya mtsho'i nang nas de kho na nyid bzhi'i rtog pa dam pa'i dba' rlabs kyis sems can gyi tshogs rnams pha rol du sgrol ba ste/thar pa thob par byed do zhes bya ba'i don to/ /de las dang po rdo rje'i de kho na nyid bstan pa'i phyir/ dbus kyi zhes bya ba la sogs pa smos te/ dbus kyi zhes bya ba ni rtse lnga pa'i rtse mo lnga pa'o/ /rnam par dag pas na lha ste/ sa'i khams rnam par dag pa'i rnam par snang mdzad do//yang na lha zhes bya ba ni me long lta bu'i ye shes so/ /thams cad thog ma zhes bya ba ni thams cad kyi dang po ste rin chen 'byung ldan la sogs pa la ltos pa'o/ /yang na thams cad kyi shar phyogs te/ rtse mo lhag ma rnams la ltos pa'o/ / rtse mo lnga ni lha rnams so/ /zhes bya ba ni ye shes lnga'i bdag nyid kyi rnam par dag pa'o/ /pad+ma byang chub yan lag brgyad/ /ces bya ba la/ pad+ma ni chang gzungs kyi mtha' na gnas pa'i pad+ma 'dab brgyad do/ /byang chub kyi yan lag ni byang chub kyi lam gyi yan lag brgyad do/ / sa zhes bya ba ni gnas so/ /gzhag pa zhes bya ba ni dgod pa'o/ /gang dag yin zhe na/ phyag na pad+ma zhes bya ba la sogs pa smos te/ phyag na pad+ma zhes bya ba ni 'jig rten dbang phyug go/ /nam mkha'i zhes bya ba ni nam mkha'i mdzod de nam mkha'i snying po'o/ /gnod sbyin bdag po zhes bya ba ni phyag na rdo rje'o//sa zhes bya ba ni sa'i snying po'o/ /lha ni brgyad po 'di dag ni/ /zhes bya ba la sogs pa ni nye bar bsdu ba'o/ /dbus kyi bcu gsum sgo nga ru/ /zhes bya ba la/ dbus ni rdo rje'i chang gzungs so/ /tri ta sa zhes bya ba ni lha dag go/ / sgo nga ni gnas so/ /ye shes lha ni thim par bya/ /zhes bya ba ni rdo rje 'dzin pa chen po ye shes mkha' 'gro ma dang bcas pa bsam pa'o/ /pad+ma 'dab ma brgyad la zhes bya ba ni chang gzungs kyi mtha'i pad+ma cig shos kyi 'dab ma brgyad la'o/ /lha mo rnams zhes bya ba ni rdo rje lcags kyu ma la sogs pa rnams te/ji bzhin gnas su sbyar bar bya/ /zhes bya ba ni/ shar la sogs pa'i 'dab ma la/ rdo rje lcags kyu ma la sogs pa rnams rim bzhin du dgod pa dang / dbang ldan la sogs pa'i 'dab ma la/skul byed ma la sogs pa rim bzhin du dgod pa'o/ /rdo rje lcags sgrog ming can te/ /zhes bya ba ni gzhan lcags sgrog ma zhes bya ba sngar smos pa la ltos nas ming can te zhes bya bas ming 'dra bar ston gyi don ni tha dad do zhes bya ba'i don to/ /rtse mo lnga yi mkha' 'gro ma//zhes bya ba ni/ 'og gi rtse mo rnam pa lnga/ /mkha' 'gro ma lngar bsam pa'o/ /snga ma ji bzhin bsam par bya/ /zhes bya ba ni/ rtse mo lnga po bshad pa ltar so sor phye ste dgod do zhes bya ba'i don to/ /de nyid kyi phyir shar du zhes bya ba la sogs pa smos so/ / rdo rje de kho na'i lha zhes bya ba ni sngar smos pa'i lha rnams so/ /mkhas pa yis ni shes par bya/ /zhes bya ba ni de kho na nyid nye bar bsdu ba'o/ /tshad la sogs pa'i mtshan nyid bstan pa'i phyir/ cha gsum zhes bya ba la sogs pa smos te go sla'o/ /ut+pal ku mu da ltar mdzes/zhes bya ba ni/ rdo rje'i rtse mo rnams me tog ut+pal dang ku mu da ltar zlum zhing mdzes pa'o/ /rdo rje rtse mo dgu pa'i de kho na nyid bstan pa'i phyir/ phyogs zhes bya ba la sogs pa smos te/ /sogs pa'i sgras ni mtshams gzung bar bya'o/ /dbu ma'i rtse mo sangs rgyas nyid//ces bya ba ni rtse lnga pa dang 'dra ba rnam par snang mdzad nyid do/ /lhag ma rtse mo brgyad ni phyag na pad+mo la sogs pa'i byang chub sems dpa' rnams dang / rdo rje lcags kyu ma la sogs pa'i lha mo brgyad du bsam mo/ /de nyid kyis na lha dgu zhes bya ba smos so/ /lha nyid de zhes bya ba ni de dag thams cad rdo rje 'dzin chen po nyid du bsgom pa'o//lhag ma ni sngar bshad pa bzhin no/ /chu srin las ni byung ba yi/ /rtse mo zhes bya ba ni/ rtse mo dbu ma gtogs pa rtse mo lhag ma rnams chu srin gyi kha nas byung bar bya ba'o/ /'od zer zla bar gnas zhes bya ba ni zla ba'i dkyil 'khor la gnas pa ste/de dag ni thun mong gi mtshan nyid do/ /rtse mo dgu pa zhes bya ba ni rtse mo dgu pa ste/ gsung rab yan lag dgu rnam par dag pa'o/ /ye shes rdo rje 'gro ba sgrol/ /zhes bya ba la/ rdo rje ni rtse lnga pa'o/ /ye shes ni me long lta bu'i ye shes la sogs pa ye shes lnga ste/ye shes lnga rnam par dag pa zhes bya ba'i don to/ /'gro ba sgrol zhes bya ba ni thun mong gi las las so/ /yang na 'gro ba ni 'gro ba rnams so/ /sgrol ba ni rnam par dag pa ste/ /rdo rje'i ngo bo nyid ces bya ba'i don to/ /gang las she na/rdo rje nyid gang yin pas/ /zhes bya ba la sogs pa smos te/ rdo rje'i de kho na nyid ni rdo rje'i rang bzhin no/ /de ci 'dra zhe na/ bdag nyid rdo rje'i bdag nyid bsam/ /zhes bya ba smos te/ bdag nyid ces bya ba ni bdag dang gzhan du kun du rtog pa'o/ /rdo rje'i bdag nyid ces bya ba ni rdo rje'i rang bzhin no//bsam pa ni shes par bya ba ste/ bdag dang gzhan gyi rtog pa thams cad don dam par gnyis su med par shes par bya'o zhes bya ba'i don to/ /rdo rje snying po rnal 'byor pa/ /zhes bya ba la snying po ni sems kyi snying po ste chos nyid do/ /rdo rje ni gnyis su med pa'o//rnal 'byor pas zhes bya ba ni/ sems su bya zhes bya ba dang 'brel to/ /rdo rje'i rang bzhin du blta bar bya zhes bya ba'i don to/ /de nas ci zhig bya zhe na/ rdo rje dag pa bstan byas nas/ /zhes bya ba smos te/ badzra shud+d+haH sarba d+harmA badzra shud+d+hou0f85haM zhes brjod p as brtan par bya'o//de nyid gsal bar bya ba'i phyir/ chos rnams rdo rje las gzhan med/ /thams cad rdo rje de nyid yin/ /zhes bya ba smos te/ don dam par chos thams cad dbyer med pa'i phyir/ rdo rje'i de kho na nyid las gzhan pa med do zhes bya ba'i don to/ /rdo rje las kyi snying po zhes bya ba ni/zhi ba la sogs pa'i las rnams kyang rdo rje'i ngo bo nyid de/ gang gi phyir chos kyi dbyings kyi snying pos thams cad la khyab pa'i phyir ro/ /'phro ba'i sbyor ba zhes bya ba ni/ gnyis su med pa'i ye shes las lha'i dkyil 'khor du 'phro ba'o/ /rdo rje 'khor ba sgrol bar byed//ces bya ba la sogs pa ni rdo rje'i las bstan pa ste/ phal cher ni go sla bas ma phye'o/ /mun pa de bzhin nyon mongs rnams/ /zhes bya ba la sogs pa la/ ji ltar mun pa rnams sgron mas bcom nas/ dngos po rnams gsal bar byed pa ltar nyon mongs pa'i mun pa rnams ye shes kyi rdo rjes bcom nas slar ye shes kyi sgron ma des sgrib pa thams cad bsal te/phyogs kun zhes bya ba chos thams cad snang bar byed pa ste/ gsal bar byed do zhes bya ba'i don to/ /bsgrub par bya ba la sogs pa rnams kyang / gnyis su med pa'i rdo rjer ro gcig par bstan pa'i phyir/ rdo rje'i sgrub pa la sogs kun/ /rdo rje'i bdag nyid blta bar bya/ /zhes bya ba smos so/ /nyon mongs pas bcings pa dang de las grol ba yang rdo rje'i rang bzhin du bstan pa'i phyir/ chos kyi bcing ba rdo rje ste/ /thar pa mchog 'bad rdo rje'o//zhes bya ba smos so/ /'gro ba rnams thabs dang shes rab kyi sgrub pa bstan pa'i phyir/ rdo rje pad+mo mnan nas ni/ /de nyid thams cad bsgrub par bya/ /zhes bya ba smos te/ 'jig rten dang 'jig rten las 'das pa'i chos pad+mo dang 'dra ba thams cad gnyis su med pa'i rdo rjes mnan cing gzung la bsgrub bo zhes bya ba'i don to//yang na 'gro ba thams cad rdo rje dang pad+mo ste/ thabs dang shes rab kyi de kho na nyid kyis bsgrub bo zhes bya ba'i don to/ /rdo rje de yang slob dpon gyis gzung ba bstan pa'i phyir/ rdo rje pad+mor zhugs pa ni//mkhas pa yis ni bsgrub par bya/ /zhes bya ba smos te/ chos thams cad 'dzin pa rdo rje de yang mkhas pa ste/ rdo rje'i de kho na nyid la spyod pa'i slob dpon gyis gzung ba zhes bya ba'i don to/ /da ni dril bu'i de kho na nyid bstan pa'i phyir/ dril bu'i zhes bya ba la sogs pa smos te/shes rab sgra zhes bya ba ni/ shes rab kyi pha rol tu phyin pa'i sgra ste chos thams cad ni stong pa nyid do/ /chos thams cad ni mngon par 'du byed pa med pa'o/ /chos thams cad ni rang bzhin gyis mya ngan las 'das pa'o zhes bya ba la sogs pa'o/ / sgra de nyid kyis yul dang dus la sogs pa thams cad la khyab par bstan pa'i phyir/ nam mkha'i khams kyi mthas gtugs par/ byang chub snying por rnam par gnas/ /zhes bya ba smos te/ byang chub kyi snying po la gnas kyi bar du yul la sogs pa thams cad la sgra des khyab par bsgrags shing bsgom mo zhes bya ba'i don to//nam mkha'i khams kyi mthas gtugs par/ /zhes bya ba slar bshad pa'i phyir/ thams cad rig pas zhes bya ba la sogs pa smos te go sla'o/ /phyogs brgyad ces ni bya ba rnams/ /zhes bya ba la sogs pa'i don ni pad+ma 'dab ma brgyad kyi phyogs mtshams rnams su sgrol ma la sogs pa'i lha mo brgyad gzugs sam sa bon du dgod do zhes bya ba 'di yin no//mdog bzangs zhes bya ba ni nor gyi rgyun no/ /dbyangs snyan zhes bya ba ni skul byed ma'o/ /mdzes ma zhes bya ba ni khro gnyer can ma'o//rdo rje phreng ba mo zhes bya ba ni rdo rje'i phreng ba can ma'o/ /lhag ma ni go sla bas ma phye'o/ /steng gi pad+ma rdo rje rnams/ /zhes bya ba ni steng gi rdo rje'i rtse mo rnams so/ /snga ma bzhin du bsam par bya/ /zhes bya ba ni/ rdo rje'i skabs su bstan pa ltar rnam par snang mdzad la sogs par bsam pa'o//dbus kyi ye shes dbyug pa ste/ /zhes bya ba ni/ bskyod par bya zhes bya ba dang 'brel to/ /ji ltar zhe na/ A li kA li zhes bya ba smos te/ de la A li ni rdo rje'o/ /kA li ni dril bu'o/ /sbyor ba ni mnyam par gzung ba ste/g.yas kyi mthe bo dang srin lag sbyar bas rdo rje blangs la/ g.yon gyi mthe bo dang srin lag sbyar bas dril bu gzung ba'o/ /phyogs brgyad dag tu bskyod par bya/ /zhes bya ba ni shar la sogs pa'i phyogs brgyad du lan brgyad sgra bsgrags par bya'i/de las lhag pa dang chad pa ni mi bya'o/ /des cir 'gyur zhe na/ A li kA li zhes bya ba la sogs pa smos te/ thabs dang shes rab kyi sbyor bas 'khor ba'i 'ching ba gcod pa'o/ /rdo rje dril bu thabs yin te/ /zhes bya ba la rdo rjes mtshan pa'i dril bu ni rdo rje dril bu ste de nyid ni 'bras bu'i rjes su 'gro bas na thabs so//thabs kyi rdo rje dbus gnas so/ /zhes bya ba ni rdo rje nyid thabs te phan tshun rjes su 'gro bar ldan pa'i phyir ro/ /des ni 'di skad du/ gtor ma la sogs pa'i dus su rdo rje ma gtogs pa'i dril bu 'ba' zhig gam/dril bu ma gtogs pa'i rdo rje 'ba' zhig gis mi bsgrub kyi zung du sbyor bas bsgrub bo zhes bya bar ston to/ /dbus nas zhes bya ba ni gzung bar bya zhes bya ba'i lhag ma can te/ chang gzungs kyi dbus nas gzung zhes bya ba'i don to//gzung ba'i cho ga bstan pa'i phyir/ /g.yas pa zhes bya ba la sogs pa gsungs te go sla'o/ /lus rnams la ni thabs dang sbyar/ /zhes bya ba la/ thabs ni rdo rje dang dril bu ste/ de lus la brgyan pa'o/ /ji ltar zhe na/ rang 'dod lha rnams bsam par bya/ / zhes bya ba smos te bshad zin to/ /rdo rje dang dril bu 'dzin pa'i tshigs su bcad pa gsungs pa/ hUM zhes bya ba'i glu yis ni/ /zhes bya ba la sogs pa gsungs te/ glu zhes bya ba ni tshig tu brjod pa'o/ /rdo rje gsor ba mdzes pa yis/ /zhes bya ba la sogs pa'i tshigs su bcad pa ni rdo rje gsor bas na brjod par bya ba ste/rdo rje gsor ba mdzes pa yis/ /sems can rnam thar bsgral bar bya/ /zhes bya ba ni gnyis su med pa'i rdo rje gang gis sems can rnams dngos por 'dzin pa'i lta ba las dgrol nas/ don dam pa'i bden pa la blta ba yin no//de nyid kyi phyir/ rnam thar zhes bya ba smos te/ bi zhes bya ba ni rnam par rtog pa'o/ /muk+ta zhes bya ba ni grol ba'o/ /yang na bi zhes bya ba ni yang dag pa'i rtog pa'o/ /muk+ta zhes bya ba ni ma 'dres pa ste/ so sor rtog pa'i shes rab des sems can bsgral bar bya zhes bya bar sbyar ro//gang las she na/ rnam thar zhes bya ba la sogs pa smos te/ rtog pa las grol ba'i rdo rje chos su bya ba'o/ /yang na bi ni rnam par rtog pa yin la/ muk+ta ni de la gus pa ste/ skad kyi byings la/ muk+ta gus dang bcas pa yin//zhes zer ba'i phyir ro/ /rdo rje shin tu snying po mchog /ces bya ba ni brtan pa'i phyir snying po yin la/ stong pa nyid kyi rang bzhin gyi phyir na mchog go/ /oM zhes bya ba la sogs pa la/ dril bu 'dzin pa na brjod par bya ba'o/ /shes rab thabs kyi gzugs gzhan gyi//zhes bya ba ni bdag nyid lha'i gzugs su byas nas/ gzhan lha'i gzugs la bskul bar bya ba'i phyir/ dkrol lo zhes bya ba'i don to/ /shes rab thabs kyi zhes bya ba ni stong pa nyid dang dngos po gnyis su med pas so/ /shes rab thabs kyi chos kyis ni//zhes bya ba ni/ gnyis su med pa'i tshul de nyid de/ tshul de 'gro ba rnams kyis rtogs par bya ba'am zhes bya bar sbyar ro/ /'am zhes bya ba'i sgra ni rim pa gzhan du sbyar te/ rtog pa la 'jug pa'i phyir te/ dkrol ba dang 'khrol du gzhug par bya ba'i don to//de nyid kyi phyir mi shes zhes bya ba la sogs pa smos te gos la'o/ /gzhung nye bar bsdu ba'i phyir/ rdo rje zhes bya ba la sogs pa smos so/ /de kho na nyid ces bya ba ni don dam pa ste don dam pa'i rnam par dag pas rdo rje gzung ba'o/ /chos kyi zhes bya ba ni chos thams cad ni stong pa nyid do zhes bya ba la sogs pa'i sgra ste/sgra'i dag pa des dril bu dkrol ba'o/ /gnyis par na rdo rje ni rnam par dag pa ste thugs so/ /dril bu ni lus te sku'o/ /dkrol ba ni gsung ngo / /de kho na nyid kyi chos ni rnam par dag pa ste/ de dag gzung ba'o//sems can don byed rnal 'byor pas/ /shes rab thabs su blta bar bya/ /zhes bya ba ni tshul des slob ma dbang bskur ba'i dus su'ang sbyar bar bya'o zhes bya ba'i don to/ /de nyid med pa'i rnal 'byor pa/ /glang chen dril bu'i sgra dang mtshungs/ / zhes bya ba la sogs pa ni de kho na nyid mi shes pa rnams kyis dril bu dkrol bar mi bya zhing / de kho na nyid spyod pa'i slob dpon gyis rdo rje dang dril bu gzung bar bya'o zhes bya ba'i don to/ /da ni bgrang phreng gi de kho na nyid bstan pa'i phyir/ bgrang phreng zhes bya ba la sogs pa gsungs te de dag phal cher go sla bas ma phye'o//phyogs dang phyogs mtshams brgyad dang ni/ /dbu ma nyid dang sangs rgyas dgu/ /zhes bya ba ni/ phyag na pad+mo la sogs pa'i byang chub sems dpa' brgyad dang rdo rje 'dzin pa dang dgu'o/ /lha dgus byin gyis brlab par bya//zhes bya ba ni/ de dag skud pa rnams la dgod pa'o/ /bu mos bkal ba'i skud pa gzung bar bya ba'i phyir/ gzugs sogs zhes bya ba la sogs pa smos te/ de yis bkal ba'i bgrang phreng gis/ /grol ba'i dngos grub skye bar 'gyur//zhes bya ba ni yon tan khyad par can gyi bu mo des bkal ba'i skud pa la brgyus pa'i phreng bas sngags bzlas na zhi ba la sogs pa'i dngos grub kyis rim gyis grol ba 'thob par 'gyur ro zhes bya ba'i don to/ /lhag ma ni go sla bas ma phye'o/ /bgrang phreng sbyang ba'i sngags gsungs pa/yi ge zhes bya ba la sogs pa ste/ yi ge ni A li kA li rnams so/ /yi ge'i rgyu de las byung ba'i dngos po gang yin pa de ni/ A li kA li rgyu las byung ba'i dngos te sngags kyi snying po rnams so/ /mdzes pa ni dag pa'o/ /gang gis dag par bya zhe na/ /bdag med pas sbyang bar bya ba'i phyir/rang bzhin med pa'i grangs bzlas na/ /zhes bya ba smos te/ rang bzhin med pa zhes bya ba ni brag ca ltar ngo bo nyid med pa ste/ bdag med pas so/ /grangs zhes bya ba ni/ sngags rnams so/ /des cir 'gyur zhe na/ rnal 'byor ma yi snying po 'grub//ces bya ba smos te/ rnal 'byor ma rnams kyi ye shes 'grub pa'am/ de rnams kyi sngags khyad par du bsgrub pa'o/ /de nyid kyi phyir gsungs pa/ bram ze mo zhes bya ba la sogs pa ste go sla'o/ /'di ltar yang na bram ze ni lus so/ / rgyal rigs ni sems so/ /dmangs rigs ni ngag go/ /de dag gcig tu gyur pas 'grub pa'o/ /ci zhig ce na/ rnal 'byor ma'i dra ba ste/ sngags kyi tshogs so/ /sngags 'di yis zhes bya ba la sogs pa ste/ yi ge rgyu las byung ba'i dngos/ /zhes bya ba nas/ swA hA zhes bya ba'i mthar thug pa ni sngags 'di ste/ des bgrang phreng sbyar bar bya'o/ /bgrang phreng zhes bya ba la/ bgrang ba ni sngags rnams so/ /phreng ba ni 'dis phreng bar byed zlos par byed pas na bgrang phreng ste phreng ba'o/ /yis zhes bya ba la sogs pa ni 'dis sngags bzlas na/lha rnams 'grub par 'gyur gyi/ gzhan du ni ma yin no zhes bya bar dgongs so/ /da ni 'gro ba lnga'i 'khor ba'i ye shes kyi de kho na nyid bstan pa'i phyir/ ye shes zhes bya ba la sogs pa smos te/ bye brag ces bya ba ni khyad par ro/ /ring du gnas zhes bya ba ni tha dad par rnam par gzhag pa ste ye shes kyi bye brag gang gis 'gro ba rnams tha dad par 'jog par byed pa'o//thun mong ye shes brjod pa ste/ /zhes bya ba ni de lta mod kyi thams cad ye shes kyi rang bzhin du ro gcig pa ste/ 'gro kun rnam shes tsam nyid de/ /zhes bya ba'i rigs pas so zhes bya ba'i don to//dman dang rab dman zhes bya ba la sogs pa ni lha ma yin rnams so/ /gnod sbyin zhes bya ba ni grags par zad do/ /lha min zhes bya ba ni srin mo rnams so/ /grub pa po zhes bya ba ni lha rnams so/ /sgo nga zhes bya ba ni sgo nga las skyes pa'o/ / gzung mi nus zhes bya ba ni dbang pos mi sod pa rnams so/ /lhag ma ni go sla'o/ /lha rnams kyi bye brag bstan pa'i phyir/ nyi shu rtsa gsum lha yi gnas/ /zhes bya ba smos te/ gnas zhes bya ba ni/ sa'am gnas gzhan te/ lha rnams kyi gnas gzhan lhag ma gsum dang bcas pa'i nyi shu'o//gong nas gong du nyis 'gyur ro/ /zhes bya ba ni lha de rnams kyi tshe tshad gong nas gong du nyis 'gyur du spel ba'o/ /de'i rim pa yang 'di yin te/ de la 'dod pa na spyod pa'i lha rnams kyi gnas gzhan ni drug ste/ rgyal chen rigs bzhi dang / sum cu rtsa gsum dang / 'thab bral dang / dga' ldan dang / 'phrul dga' dang / gzhan 'phrul dbang byed rnams so/ /de las steng du gyur pa gzugs kyi khams kyi lha rnams gzhan ni bcu bdun no/ /de la bsam gtan dang po'i gnas gzhan ni gnyis te/ tshangs ris dang / tshangs pa'i mdun na 'don no//tshangs pa chen po ni de nyid las gzhan ma yin pa'i phyir gud du mi bgrang ngo / /bsam gtan gnyis pa'i ni gnas gzhan gsum ste/ 'od chung dang / tshad med 'od dang / 'od gsal lo/ /bsam gtan gsum pa'i gnas gzhan yang gsum ste/dge chung dang tshad med dge dang dge rgyas so/ /bsam gtan bzhi pa'i gnas gzhan ni brgyad de sprin med dang / bsod nams skyes dang / 'bras bu che dang / mi che ba dang / mi gdung ba dang / gya nom snang dang / shin tu mthong dang / 'og min rnams so/ / bcu bdun pa ni 'du shes phra ba rnams te/ 'du shes med pa dang / skye mched mu bzhi'i lha rnams so/ /kha cig ni tshangs pa chen po yang 'du shes phra bar bsdu'o zer te/ de ltar nyi shu rtsa gsum mo/ /de la ni rnams kyi cho lo brgya la/ rgyal chen rigs bzhi'i lha rnams kyi nyin zhag gcig go//de sum cu la ni zla ba'o/ /zla ba bcu gnyis la ni lo'o/ /rgyal chen rigs bzhi pa rnams kyi tshe ni/ de lta bu'i lo lnga brgyar 'tsho'o/ /de bzhin du sum cu rtsa gsum pa rnams kyi tshe tshad ni mi rnams kyi lo stong la/ nyin zhag gcig tu brtsis pa'i zla ba dang /lo'i rim gyis lo stong 'tsho bar 'gyur ro/ /'thab bral ba rnams kyi ni mi rnams kyi tshe lo nyis stong la/ nyin zhag gcig tu brtsis pa'i rim gyis lo nyis stong 'tsho bar 'gyur ro/ /de ltar lhag ma gsum yang / nyis 'gyur nyis 'gyur du brtsi bar bya'o/ /gzugs khams pa rnams la ni nyin zhag gi grangs med pas bskal pa'i rtsis kyis brtsi bar bya ste/de dag kyang gong nas gong du tshe nyis 'gyur du spel bar bya'o/ /lhag ma ni go sla bas rnam par ma phye'o/ /sbyor ba'i gdan zhes bya ba la sogs pa la/ rab tu byed pa zhes bya ba ni rab tu gsal bar byed pa ste/gzhung 'dis rdo rje dang dril bu'i de kho na nyid la sogs pa rab tu gsal bar ston pas na rab tu byed pa'o/ /dpal gdan bzhi pa'i 'grel pa dran pa'i rgyu mtshan zhes bya ba las sbyor ba'i gdan gyi rim par phye ba dang po'o// //da ni 'khor lo la sogs pas zhi ba la sogs pa bsgrub pa'i rim par phye ba bstan pa'i phyir/'khor los bsgrub pa'i khyad par dag /ces bya ba la sogs pa smos te/ 'khor los bsgrub pa zhes bya ba ni bsgrub par bya ba'i las te zhi ba la sogs pa'o/ /khyad par ni bye brag ste/ sngar smos pa'i zhi ba la sogs pa'i las kyi bye brag nyon cig ces bya bar sbyar ro//bsgrub par bya ba de nyid bstan pa'i phyir zhi dang zhes bya ba la sogs pa smos so/ /bsgrub pa'i 'khor lo bstan pa'i phyir/ re'u mig ces bya ba la sogs pa smos te/ re'u mig dgu zhes bya ba ni/'khor lo'i rtsibs brgyad dang lte ba ste/ dgu po de dag ni re'u mig dgu'o/ /phyi rol mu khyud bskor bar bya/ /zhes bya ba ni phyi rol du ska rags lta bu'i mu khyud kyis bskor bar bsgom pa'o/ /ci 'dra zhe na/ 'khor lo zhes bya ba la sogs pa smos te/zhi ba la sogs pa'i las kyi rjes su 'gro ba'i kha dog can no/ /sngags gsungs pa/ oM zhes bya ba la sogs pa'o/ /sa bon de dag thams cad de/ /zhes bya ba ni 'khor lo'i re'u mig rnams la dgod par bya'o zhes bya ba lhag ma ste/ yi ge ta la sogs pa'i sngags kyi sa bon rnams shar la sogs pa'i re'u mig rnams la bri'o zhes bya ba'i don to//phyag 'tshal tha ma dbus su bya/ /zhes bya ba la/ phyag 'tshal ba ni yi ge oM mo/ /tha ma ni ha ste/ dang po dang tha ma'i sa bon de dag dbus kyi re'u mig la bsgom par bya'o//dbus su ming dang bsrung ba yi/ /tshig kyang de bzhin sbyar bar bya/ /zhes bya ba ni/ oM dang ha'i dbus su bsgrub par bya ba'i ming dang / rak+Sha zhes bya ba'i ming tshig tu spel ba bsgom par bya ba ste/ sbyar ba zhes bya ba ni spel ba'o/ /bsdus pas oM lha sbyin rak+Sha ha zhes bya bar 'gyur ro//'khor lo de dag ji ltar bsgom zhe na/ mnyam nyid ces bya ba la sogs pa smos te/ mnyam nyid stong pa zhes bya ba ni nyi tshe'i stong pa rnam par spyad pa ste/ thams cad stong pa nyid do/ /bdag gi lus ni bkru bar bya/ /zhes bya ba ni thams cad stong pa nyid kyi chus tha mal pa'i rtog pa'i dri ma bkru ba'o//mnyam nyid thams cad rig pas gnas/ /srung ba'i 'khor lo zhes bya ba la/ mnyam nyid thams cad rig pa zhes bya ba ni/ thams cad stong par rig pa'i ting nge 'dzin zhes bya'o/ / gnas zhes bya ba ni rten te sgom pa po'i lus so/ /srung ba'i 'khor los bsrung ba ste/ stong pa nyid bsgom pa sngon du 'gro ba'i 'khor lo bsgom pas lus bsrung ngo zhes bya ba'i don to/ /yang na 'di'i don ni stong pa nyid bsgom pa'i rjes la rdo rje dra ba la sogs pa srung ba'i 'khor los phyi rol gyi gnas bsrung bar bya ba 'di yin no//gtso bor bya zhes bya ba ni dbang gi las kyi dus su bdag dang gzhan kha dog dmar por gtso bo zhes bya ba'i don to/ /ye shes can gyis srung ba sgoms na/ /'jigs pa kun las ring bar 'gyur/ /zhes bya ba ni/ srung ba'i 'khor lo des rgyal po'i btson ra la sogs pa'i 'jigs pa thams cad thag bsrings par 'gyur ba'o zhes bya ba'i don to/ /sems can dngos po med pa ru/ /sbyor ba'i dngos pos 'jigs pa la/ /zhes bya ba la sems can dngos po med pa zhes bya ba ni/ thams cad stong pa nyid kyi ting nge 'dzin to/ /ru zhes bya ba ni de las zhes bya ba ste/ lnga pa'i don gyi gnyis pa yin no/ /sbyor ba'i dngos po zhes bya ba la sbyor ba zhes bya ba ni lha'i sbyor ba'o/ /dngos po ni bsgom pa'o/ /gang la zhe na/ 'jigs pa la ste/ 'di'i don ni nad la sogs pa'i 'jigs pa zhi bar bya ba'i dus su las dang rjes su mthun pa'i mdog la sogs pa dang ldan pa'i lha'i sku ru bsgom mo zhes bya ba 'di yin no//lha'i sbyor ba de nyid gsungs pa/ zla ba'i dkyil 'khor zhes bya ba la sogs pa la 'di dag gi don ni stong pa nyid kyi rnal 'byor gyi rjes la/pad+ma 'dab ma brgyad kyi steng du zla ba'i dkyil 'khor la yi ge tAM gi sa bon las byung ba'i ut+pal lta bar tAM gis mtshan pa/ de yongs su gyur pa la/ bdag nyid sgrol ma'i gzugs su bsgom par bya'o zhes bya ba 'di yin no/ /bskyed pa'i mthar yan lag drug tu dgod pa gsungs pa/oM tA re mgo bo la'o zhes bya ba la sogs pa ste/ de dag gis ni/ gnas drug po byin gyis brlab par 'gyur ro/ /da ni phyag la sogs pa'i nges pa bstan pa'i phyir/ phyag gnyis zhes bya ba la sogs pa ste/ kun du mi 'jigs sbyin pa dang //zhes bya ba ni/ skye bo thams cad la mi 'jigs pa sbyin pa ste/ phyag g.yas pa zhes bya ba'i lhag ma'o/ /gzhan gyis zhes bya ba ni/ g.yon pa ste rna drung du ut+pal bsnams zhes bya ba ni/ ut+pala'i 'dab ma rna ba la reg pa dang bcas pa'i ut+pal bsnams pa'o//thams cad 'od zer can bsgoms nas/ /zhes bya ba ni bsrung ba'i skabs su bcom ldan 'das ma dang sngags rnams mdog ljang sngon du bsgoms la sku'i 'od zer sngags dang bcas pa'i 'khor lo'i 'od zer thams cad kyis bsrung bar bya ba la khyad par bsam mo zhes bya ba'i don to//khyad par du ni sngags bzlas bya/ /zhes bya ba ni srung ba'i skabs su phreng ba'i sngags/ oM tA re tut+tA re tu re lha sbyin rak+ShaH swA hA zhes bya ba'i khyad par bzlas pa'o/ /srung ba thams cad kyi sngags so/ /zhes bya ba ni rgyal pos btson rar bcings pa la sogs pa'i 'jigs pa thams cad las bsrung ba'i ched kyi sngags so zhes bya ba'o//lhag ma ni go sla'o/ /shes rab gzhan dang le lo sogs/ /zhes bya ba ni bsam par bya zhes bya ba snga ma dang 'brel te/ yid gzhungs par 'dod pas kyang 'khor lo snga ma de nyid la sngags g.yon skor du bkod nas mu khyud la yang a la sogs pa'i yi ge bkod la/bsgom pa dang bzlas pa byas na blo dman pa rnams blo dang ldan par 'gyur ro/ /'khor lo bris nas bcang bya ba/ /zhes bya ba ni gro ga la sogs pa la 'khor lo bris nas lus la bcang ba'o/ /srung ba bzang po zhes bya ba ni de tsam gyis kyang srung ba'i dam par 'gyur ro zhes bya ba'i don to//'di yis ni zhes bya ba ni sngar bstan pa'i rim pa ste/ bsrung ba'i phyir sgrol ma'i rnal 'byor gyis sngags bsgom pa dang / bzlas pa dang bri ba'i rim pas zhes bya ba'i don to/ / nye bar bsdu ba'i phyir/ srung ba zhes bya ba la sogs pa smos te/ srung ba thams cad kyi phyir/ de nyid sbyor ba zhes bya ba ni lha'i sbyor ba'i de kho na nyid kyi 'khor lo bsgrub par bya'o zhes bya ba'i don to/ /da ni shes rab kyi 'khor lo bstan pa'i phyir/'khor lo zhes bya ba la sogs pa smos te/ 'khor lo 'dab ma brgyad pa zhes bya ba ni 'khor lo rtsibs brgyad pa'o/ /phyi rol mu khyud bskor nas su/ /zhes bya ba ni 'khor lo'i phyi rol ri mo gnyis kyis bskor bar bsgom mo/ /dbus su thog ma tha ma ste/ / zhes bya ba ni 'khor lo sngar bstan pa ltar 'khor lo 'di la yang dbus kyi re'u mig la thog ma dang tha ma'i yi ge oM dang hI bri bar bya'o/ /bzlas pa thams cad gzhag par bya/ /zhes bya ba ni phyi rol gyi rtsibs rnams la bzlas par bya ba'i sngags lhag ma rnams bri ba'o//mu khyud dbyangs kyis bskor nas su/ /zhes bya ba ni mu khyud la dbyangs kyi yi ge rnams bri ba ste/ de la dbus su ni oM hA zhes bya ba'i sa bon bri ba'o/ /rtsibs rnams la ni pradz+nye hUM swA zhes bya ba'i sa bon rnams so/ /mu khyud la ni dbyangs kyi yi ge bri'o zhes bya bar 'gyur ro//'dir yang stong pa nyid kyi bsgom pa sngon du 'gro bas lha'i rnal 'byor gyis 'khor lo bsgoms na/ 'og nas smos pa'i phan yon thob par 'gyur ro zhes bstan pa'i phyir ro/ /yan lag thams cad ces bya ba la sogs pa smos te/ yan lag thams cad phye ba zhes bya ba ni/phung po la sogs pa thams cad 'jig pa'o/ /de nyid bstan pa'i phyir/ sngon gyi mtshan nyid ldan pa yis/ /mnyam nyid stong par bsams nas su/ /zhes bya ba smos so/ /sngon gyi mtshan nyid ldan pa yis/ /zhes bya ba ni bdag gi gdan gyi rim par phye ba gsum pa las bstan pa'i gzugs stong la sogs zhes bya ba la sogs pa'i gzhung gis yul dang dbang po dang rnam par shes pa rnams stong pa'i mtshan nyid du bya ba ste/'di yang rim pa des bdag nyid mnyam pa nyid kyis sbyang bar bya ba'o//sngar bstan bzhin du sbyang bar bya/ /zhes bya ba ni snang ba med pa'i stong pa las ltar bsgoms te/ de yang stong pa nyid kyis sgyu ma ltar dag par bya'o zhes bya ba'i don to/ /'khor lo 'di ltar bsgoms pa yis/ /zhes bya ba ni de nas 'khor lo sngar bshad pa ltar bsgom pa'o//oM zhes bya ba la sogs pa ni bri ba'i sngags te/ pra la sogs pa'i sngags ni/ g.yon skor gyis bri bar bya'o/ /de la rnal 'byor pa thams cad kyi thog mar ni stan bde ba la gnas nas snying gar rang gi sa bon blta ste/ de'i 'od zer gyis bla ma dang sangs rgyas la sogs pa snang bar byas la/ 'od zer de las byung ba'i me tog la sogs pa'i mchod pas mchod nas sdig pa bshags pa la sogs pa byas te/ stong pa nyid bsgoms nas/ lhar bsgom pa 'di ni rnal 'byor thams cad kyi thun mong ngo //de las shes rab kyi pha rol tu phyin pa'i khyad par gyi bsgom pa bstan pa'i phyir/ zla ba'i dkyil 'khor zhes bya ba la sogs pa smos te/ shes rab bdag nyid bsgoms nas su/ /zhes bya ba ni bdag nyid shes rab kyi pha rol tu phyin par bsgom pa'o//'di dag gis 'di skad du/ pad+ma dang zla ba'i steng du sa bon hUM las byung ba'i sdong bu dang bcas pa'i pad+ma'i steng du shes rab kyi pha rol tu phyin pa'i po ti hUM gis mtshan pa de yongs su gyur pa las/ shes rab kyi pha rol tu phyin ma sku mdog dkar mo phyag gnyis chos sgrogs kyi phyag rgya can/gru mo gnyis kyi nang nas sdong bu dang bcas pa'i pad+ma gnyis skyes pa la/ shes rab kyi pha rol tu phyin pa po ti gnyis kyis mtshan pa'i sgrol ma'i rang bzhin du bdag nyid bsgom mo zhes bya ba 'di yin no/ /'di'i phan yon gsungs pa/sa bon 'di ni zhes bya ba la sogs pa ste/ shes rab myu gu zhes bya ba ni/ shes rab kyi yal ga ste sa bon las byung ba'i phyir ro/ /dper na ljon shing gi sa bon las byung ba'i myu gu'i yal ga du mar gyes pa ltar shes rab 'phel bar 'gyur ro zhes bya bar dgongs so//lhag ma ni go sla'o/ /sbyor ba gzhan bstan par bya ba'i phyir/ snying po zhes bya ba la sogs pa smos te/ 'khor lo rim pa bzhi las snying po'i 'khor lo ni ling tshe dgu'o/ /rim pa gnyis pa ni bcu gnyis pa'o/ / rim pa gsum pa ni bcu drug pa'o/ /bzhi pa ni mu khyud do/ /de la re'u mig dgu zhes bya ba ni dbus kyi lte ba dang bcas pa dgu pa'o/ /bar ma zhes bya ba ni snying pa'i rim pa dang / rim pa gsum pa'i bar na gnas pa'i phyir ro/ /phyi rol zhes bya ba ni de'i phyi rol na gang gnas pa'o//mthar thug ces bya ba ni/ thams cad kyi tha mar gyur pa'i phyir ro/ /dbus su zhes bya ba ni snying po'i rim pa'i dbus te lte ba la'o/ /bdag gi sems zhes bya ba ni yi ge hUM ste/ ye shes mkha' 'gro ma'i rang bzhin no/ /phyag 'tshal sreg pa mthar gzhag pa//zhes bya ba ni bshad zin to/ /bsdus pas oM hUM swA hA zhes bya bar 'gyur ro/ /yi ge brgyad po zhes bya ba ni/ mkha' 'gro ma dang / drag mo dang / gtum mo dang / ro langs ma dang / seng ge mo dang / stag mo dang / ce spyang mo dang / 'ug pa mo ste rnal 'byor ma brgyad kyi sa bon gyi yi ge rim pa bzhin du suM k+ShuM yuM hUM s+m+r+yuM h+m+r+yaM y+m+r+yuMk+Sh+m+r+yuM la sogs pa dgod cing /dbang ldan la sogs pa'i mtshams kyi re'u mig la s+m+r+yuM shar la sogs pa mthar chags kyis bri ba'o//ma ning spangs par bri bar bya/ /zhes bya ba la ma ning yi ge ni/ r-i r-I l-i l-i'o/ /spangs pa ni dor ba ste/ lhag ma a la sogs pa gzung ba'i don to/ /sde tshan gsum gyi yi ge rnams/ /zhes bya ba ni ka'i sde tshan dang / tsa'i sde tshan dang /Ta'i sde tshan te sde tshan gsum gyi yi ge bco lnga po rnams gzung ngo / /yi ge lhag ma gcig ces bya ba ni sde tshan lhag ma'i yi ge gcig ste yi ge ta'o/ /yang na bco lnga'i lhag mar gyur pas lhag ma'o/ /bsdus pas bcu drug tu 'gyur ro/ /bcu drug gnas su gzhag par bya//zhes bya ba ni phyi rol gyi re'u mig bcu drug gi gnas su rim bzhin du bsgom pa'o/ /sgra dang thig ler ldan pa ni/ /zhes bya ba ni go bar zad do/ /gsod pa'i yi ge zhes bya ba ni yi ge phaT do/ /des ji ltar bskor zhe na/ thams cad rigs pas kun du bskor/ /zhes bya ba smos te/grangs kyi nges pa med par mu khyud la kun du 'khor bar bskor ro zhes bya ba'i don to/ /'khor lo'i kha dog gsungs pa/ dang po'i zhes bya ba la sogs pa la dang po ni re'u mig dgu pa ste dkar po'o/ /gnyis pa ni re'u mig bcu gnyis pa ste/ ser po'o/ /gsum pa ni re'u mig bcu drug pa ste dmar po'o//bzhi pa ni mu khyud de sngon po'o/ /mngon spyod kyi las la ni re'u mig bcu drug pa'ang sngon por bya'o zhes man ngag las bshad do/ /'khor lo rim pa bzhi pa de dag ni ye shes mkha' 'gro ma'i sku bsgom par shes par bya'o/ /de nyid kyi phyir gsungs pa/sngon bzhin zhes bya ba la sogs pa smos te go sla'o/ /bsgom par bya zhes bya ba ni ye shes mkha' 'gro ma zhes bya ba'i lhag ma'o/ /'khor lo 'di zhes bya ba ni/ 'khor lo mngon du bya ba'i phyir ro/ /mnyam gzhag dngos po bsgom pa yis/ /zhes bya ba ni shin tu mnyam par gzhag cing goms pas so//kun nas thams cad 'bar ba ste/ /zhes bya ba la sogs pa la/ me ltar 'bar ba zhes bya ba ni 'od dang bcas pa'i me 'bar bas shing bsreg pa ltar kun nas thams cad 'bar ba'i 'khor los bgegs la sogs pa'i bdud kyi sde thams cad kyi bud shing bsreg cing med par byed do zhes bya ba'i don to//kun nas nyon mongs g.yogs pa yang / /zhes bya ba ni nyon mongs pa'i rigs can rnams kyang ngo / /lhag ma ni go sla'o/ /sbyor ba gzhan gyis bsgom pa bstan pa'i phyir mnyam nyid ces bya ba la sogs pa smos te/ mnyam nyid ye shes bskyed nas su//bdag nyid nam mkhar bsgoms byas la/ /zhes bya ba'i don ni mnyam pa nyid kyi ye shes las stong pa nyid kyis sbyangs pa'i ye shes kyi mkha' 'gro mar bskyed la/ 'og nas 'byung ba rnams bsgom mo zhes bya ba yin no//de nyid gsungs pa/ 'od zer zhes bya ba la sogs pa la/ snying gar 'od dang ldan pa'i nyi ma'i dkyil 'khor bsgoms la/ de'i dbus su sa bon gyi yi ge gzung ba ste/ bsgom pa'o/ /de yang gang yin zhe na/ sde tshan zhes bya ba la sogs pa smos te/ sde tshan dang po'i yi ge dang po ni yi ge ka'o//lcags kyu ni yi ge i ste/ gzir ba ni steng du bri ba'o/ /rtsa bar re pha sbyar nas su/ /zhes bya ba ni/ 'og tu yi ger gdags pa'o/ /bdud rtsi zhes bya ba ni zla tshes so/ /thig le ni thigs pa ste/ de dag ni steng du dgod pa'o/ /bsdus pas kriM zhes bya bar 'gyur ro//lhag ma ni go sla'o/ /rgyal po ni grags par zad do/ /rgyal po'i pho brang ni rgyal po'i bzhugs gnas kyi grong khyer ro/ /yid can gyis ni bsam par bya/ /zhes bya ba la yid can ni rnal 'byor ba'o/ /bsam par bya zhes bya ba ni rang gi snying gar nyi ma la gnas pa'i sa bon kriM gi 'od zer gyi bdag nyid kyang btso bar bya zhing /rgyal po dang / pho brang gi skye bo rnams kyang kha dog btses shing btsos par bsams na dbang du 'gyur ro zhes bya ba'i lhag ma yin no/ /da ni bu mo dbang du bsdu ba bstan pa'i phyir/ yi ge nyis 'gyur zhes bya ba la sogs pa smos te/yi ge nyis 'gyur zhes bya ba ni yi ge k+Sha'o/ /thigs pa ni go bar zad do/ /rtsa bar sgra ni sbyar bar bya/ /zhes bya ba la rtsa ba ni 'og tu'o/ /sgra ni u thung ngu ste/ U ring po sgra yin par bshad med kyi 'dir man ngag gis u thung ngu gzung bar bya ste/dper na lcags kyu zhes bya ba/ I ring po yin mod kyi skabs su kha cig tu i thung ngu gzung ba yin no/ /bdud rtsi mtha' zhes bya ba la/ bdud rtsi ni chu'o/ /de'i mtha' ni me ste/ 'dir yi ge k+ShuM yang me'i rang bzhin yin pas de skad ces bya'o//yang na bdud rtsi zhes bya ba ni yi ge swA hA'o/ /mthar ni mthar bzhag pa ste/ de dag gi thog mar oM gzhag par shes par bya'o/ /des ni oM k+ShuM swA hA zhes bya ba'i sngags su 'gyur ro/ /'bum phrag gcig gis dbang du sdud/ /ces bya ba ni ye shes mkha' 'gro ma'i rnal 'byor dang ldan pas sngags 'di sngon du bsnyen pa 'bum phrag gcig snga ma ltar bzlas pas bsnyen pa byas la/de nas gang zhig bsgrub par bya ba'i bu mo yang / kha dog dmar por bsams la ye shes mkha' 'gro'i rnal 'byor pas bsgrub bya bsgrub pa'i dus su/ oM k+ShuM che ge mo wa sha ma nA ya swA hA zhes ming dang spel bar bzlas na gdon mi za bar dbang du 'gyur ro zhes bya ba'o/ /sa bon kr-iM gi sbyor ba gzhan bstan pa'i phyir/ bu mo rnams zhes bya ba la sogs pa smos te/ gang bsams pa zhes bya ba la sogs pa ni skyes pa gang zhig bsgom par bya bar 'dod na rang gi skye gnas su yi ge kr-iM dmar po bsgom zhing skyes pa'i snying gar yang yi ge kr-iM gi sa bon bsgoms nas sa bon de nyid 'bum phrag gcig tu bsnyen pa byas nas ming dang spel bar bzlas na gdon mi za bar dbang du 'gyur ro zhes bya ba'i don to//sbyor ba gzhan bstan pa'i phyir sngon gyi mtshan nyid ces bya ba la sogs pa smos te/sngar bstan bzhin du stong pa nyid/ /thams cad bdag nyid bsams nas su/ /zhes bya ba ni stong pa nyid bsgom pa'i mthar bdag nyid ye shes mkha' 'gro ma mdog ser mor bsgoms nas 'byung ba rnams bsgom mo zhes bya ba lhag ma yin no//de dag kyang gang zhe na/ zla ba'i dkyil 'khor zhes bya ba la sogs pa smos te/ bdud rtsi zhes bya ba ni yi ge sa'o/ /kun rig phyi mo zhes bya ba ni yi ge oM mo/ /bcas zhes bya ba ni sbyor ba ste sbyor bas so zhes bya bar 'gyur ro/ /'od zer sna tshogs rnam par 'phro//zhes bya ba ni 'od kyis 'khrugs pa'o/ /'dir man ngag ni ye shes mkha' 'gro ma'i rnal 'byor la gnas nas sngags 'di bsnyen pa 'bum du bya ste/ sgrub pa'i dus su bsgrub par bya ba'i lte ba'i 'og tu zla ba'i dkyil 'khor ser po la yi ge soM dmar dmar po bsgoms te/skye gnas kyi nang du yang yi ge kr-iM bsgoms na 'dzag par 'gyur ro zhes bya ba 'di yin no/ /nor bu dgug pa'i sbyor ba gsungs pa/ kha dog ces bya ba la sogs pa la/ kha dog ces bya ba ni kha dog dmar po'o/ /ser po zhes bya ba ni kha dog ser po'o//thams cad rang gi dbugs kyis dgug /ces bya ba ni rang gi dbugs kyi 'od zer gyi lcags kyus dgug pa'o/ /'dir yang man ngag ni/ rang gi snying gar zla ba'i dkyil 'khor gyi steng du/ yi ge soM ser po bsgoms la/ dgug par bya ba rin po che la sogs pa ni/yi ge soM dmar po'i gzugs su bsams nas rang gi dbugs las byung ba'i sa bon soM gi 'od zer gyi lcags kyus dgug pa 'di yin no/ /sbyor ba gzhan bstan pa'i phyir/ sgrub pa po'i zhes bya ba la sogs pa smos te/ sgrub pa po zhes bya ba ni bsgrub bya'o//lus la zhes bya ba ni snying gar ro/ /nyi ma'i dkyil 'khor dbus gnas par/ /rlung gi sa bon gyis bskor ba'i/ /zhes bya ba la sogs pa'i don ni bsgrub bya kha dog dmar por bsams la de'i snying gar nyi ma'i dkyil 'khor la/ yi ge yuM gis bskor ba'i sa bon kr-iM dmar por sems kyi rang bzhin bsgom mo zhes bya ba yin no//zla ba'i dkyil 'khor dbus gnas par/ /zhes bya ba la sogs pa'i don yang zla ba'i dkyil 'khor gyi steng du bdag nyid ye shes mkha' 'gro ma sku mdog dmar mo phyag g.yon na lcags kyu bsnams shing /g.yas pas sdigs mdzub kyi rtse mor nyi ma la gnas pa'i sa bon kr-iM dang ldan par sprul la/ g.yon pa'i lcags kyus bsgrub bya'i mgrin pa nas bzung ste/ sa bon kr-iM dang ldan pa'i sdigs mdzub bskyod pas bsgrub bya'i snying gar gnas pa'i kr-iM bskyod par bsams la/oM k+ShuM che ge mo'i ma na A kAR+Sha ya swA hA zhes bzlas par bya ba 'di yin no/ /yi ge gnyis 'gyur zhes bya ba la sogs pa ni bshad zin to/ /de ltar bsgom zhing bzlas nas su/ /zhes bya ba la/ bsgom pa zhes bya ba ni bsgrub bya bsgrub pa'i dus su sngar bshad pa ltar yi ge kr-i bsgom pa'o//bzlas pa ni yi ge k+ShuM ngo / /sor mo yang ni bskyod byas na/ /zhes bya ba ni bshad zin to/ /bsgrub bya'i yid ni bskyod 'gyur ba/ /zhes bya ba ni yid 'gugs par 'gyur ba'o/ /'bum phrag gcig gis 'grub par 'gyur/ /zhes bya ba ni sngon du bsnyen pa'i dus su sa bon kr-iM dang k+ShuM gnyi ga 'bum phrag re re bzlas pas 'grub par 'gyur ba'i don to//gzhan bsgrub pa'i dus su ni sa bon k+ShuM bzla bar bya ste/ de yang grangs kyi nges pa ni yod pa ma yin no/ /da ni rgyas pa'i dbang du byas nas gsungs pa/ 'khor lo zhes bya ba la sogs pa la/'dab ma brgyad pa zhes bya ba ni/ rtsibs brgyad pa ste mu khyud dang bcas pa'o/ /mu khyud la dbyangs kyi yi ges bskor bar bya ste/ de nyid kyi phyir dbyangs kyi yi ge zhes bya ba la sogs pa smos so/ /sde tshan lnga pa gang yin pa'i/ /yi ge gsum pa bzung nas su//zhes bya ba ni yi ge pa bzung ba'o/ /i dang re pha sbyar nas ni/ /zhes bya ba ni brda phrad par zad do/ /man ngag gis ni thig la yang gzung bar bya ste/ bsdus pas bri zhes bya bar 'gyur ro/ /'bad pas dbus su gzhag par bya/ /zhes bya ba ni/ re'u mig dbus ma la bri ba'o//ci zhig ce na/ ye shes can gyi sa bon 'di/ /zhes bya ba smos te/ sa bon 'di zhes bya ba ni yi ge briM ngo / /ye shes can ni ye shes dang ldan pa'o/ /sgra'i bdun pa dang sbyar la/ /zhes bya ba la sgra'i bdun pa ni yi ge ri'o/ /sbyar ba ni ldan pa ste/sde tshan lnga pa gang yin pa'i yi ge gsum pa bzung nas su zhes bya ba dang sbyar ro/ /man ngag gis ni thig le yang gzung bar bya ste/ des ni briM zhes bya bar 'gyur ro/ /'dab ma rnams la de nyid de/ /zhes bya ba ni/ phyogs mtshams kyi 'dab ma rnams la yang briM zhes bya ba de nyid bri ba ste/'khor lo'i rtsibs rnams la sgra'i bdun pa dang sbyar bar briM bri'o zhes bya ba'i don to/ /de nyid gsal bar bstan pa'i phyir/ /'dab mar 'di nyid gzhag par bya/ /zhes bya ba smos so/ /kha cig na re sgra'i bdun pa zhes bya ba ni yi ge e la bya ste/des ni briM zhes bya bar 'gyur/ /zhes zer ro/ /gser gyi mdog tu bsgom par bya/ /zhes bya ba ni 'khor lo'i kha dog go/ /ji ltar bsgom zhe na/ sngar bstan zhes bya ba la sogs pa smos te/ sngar bstan bzhin du mkhas pas bsgom//zhes bya ba 'di stong pa nyid kyi ting nge 'dzin bsgom pa'o/ /de 'og lha mo nor rgyun gyi/ /gzugs su bdag nyid bskyed par bya/ /zhes bya ba ni stong pa nyid kyi mthar zla ba'i dkyil 'khor gyi steng du sa bon briM las byung ba'i 'bras kyi snye ma sa bon briM gyis mtshan pa yongs su gyur pa las byung ba'i lha mo nor rgyun ma mdog ser mo phyag gnyis par bsgom pa'o//de nyid kyi khyad par bstan pa'i phyir/ /gzugs mdzes zhes bya ba la sogs pa smos te/ rgyan thams cad kyis bklubs shing / rin po che'i cod pan la rdo rje sems dpas mtshan pa phyag g.yas pas skye bo thams cad la mi 'jigs pa sbyin pa dang /g.yon pas 'bras kyi snye ma bsnams nas nor dang 'bru'i char 'bebs pa'i skur bsgoms la/ de'i thugs kar sngar bstan pa'i 'khor lo bsgom par bya'o/ /bsgoms pas dub na sngags bzlas pa bstan pa'i phyir/dbus su bstan pa'i zhes bya ba la sogs pa smos te/ dbus su bstan pa'i sa bon ni yi ge briM ngo / /phyag 'tshal zhes bya ba la sogs pa ni go sla'o/ /bsdus pas oM briM swA hA zhes bya bar 'gyur ro/ /lhag ma ni brda phrad par zad do/ /sbyor ba gzhan bstan pa'i phyir/bdag nyid ces bya ba la sogs pa smos te/ bdag nyid ces bya ba ni bdag nyid la'o/ /ci zhig ce na/ rnam gzhag thams cad ces bya ba sa bon thams cad gzhag pa'i 'khor lo'o/ /bye brag gzhan zhes bya ba ni las kyi bye brag gzhan te bshad par bya zhes bya bar blta'o//bdag nyid sngon gyi mtshan nyid kyis/ /stong pa'i de nyid bsgoms nas su/ /zhes bya ba ni dang por stong pa'i de kho na nyid bsgoms nas ye shes mkha' 'gro'i bdag nyid du bsgom mo zhes bya ba'i don to/ /nyi ma'i dkyil 'khor dbus gnas par//zla ba'i dkyil 'khor bsgom par bya/ /zhes bya ba ni/ lha mo'i thugs kar pad+ma'i steng 'khor lo'i gzhi nyi ma dang zla ba bsgom pa'o/ /zla ba'i dkyil 'khor dbus gnas par/ /zhes bya ba ni/ 'dab ma brgyad pa'i 'khor lo bsam/ /zhes bya ba dang 'brel to/ / ye shes rnam shes dngos po bsgom/ /zhes bya ba ni/ yi ge hUM bsgom pa'o/ /gang du zhe na/ dbus su zhes bya ba smos te/ 'khor lo'i lte ba la'o/ /phyi rol zhes bya ba la sogs pa ni go sla'o/ /rtsibs rnams la dgod pa gsungs pa/ phyogs kyi zhes bya ba la sogs pa la/ phyogs kyi 'dab ma ni phyogs kyi rtsibs rnams so/ /bdud rtsi zhes bya ba ni sa'o/ /gug skyed kun zhes bya ba ni oM ste sbyar bas na soM zhes bya bar 'gyur ro/ /des ni shar la sogs pa'i rtsibs bzhir sa bon soM zhes bya ba bri bar ston te/ g.yon skor du sbyar bar bya'o/ /mtshams kyi 'dab ma bzhi la yang //sangs rgyas lnga yis mngon par brgyan/ /zhes bya ba ni mtshams kyi rtsibs bzhi la hUM zhes bya ba'i sa bon bzhi g.yas skor du bsgom pa'o/ /zla ba'i dkyil 'khor rdzogs pa ni/ /zhes bya ba ni/ rang gi lus la bsgom par bya/ /zhes bya ba dang 'brel te/rang gi lus kyi snying gar zla ba la gnas pa'i 'khor lo de lta bu bsgom mo zhes bya ba'i don to/ /'od zer sna tshogs 'bar ba can/ /rin chen bdun gyis mdzes pa ste/ /zhes bya ba ni de nas 'khor lo las 'phros pa'i 'od kyis 'gro ba thams cad glang po rin po che la sogs pa rin po che sna bdun dang ldan par byas la/slar bsdus te rang gi lus la bcug nas yang de nyid goms par bsgom pa'o/ /gang 'dod yid ni rtogs bya'i phyir/ /de yi 'od zer sbyar bar bya/ /zhes bya ba ni 'og nas bshad par bya'o/ /rang gi lus la ji ltar bsgom zhe na/ 'jigs pa med cing 'chi med par/ /dngos pos dngos po bsgom par bya/ /zhes bya ba smos te/ 'jigs pa la sogs pa dang bral ba'i gnas su stong pa nyid kyi dngos pos 'khor lo dang bcas pa'i lha'i dngos po goms par bsgom pa'o/ /yang na 'jigs pa dang 'tshe ba ni bying ba dang rgod pa ste/de dang bral bar gyur pa'i bar du bsgom pa'o/ /rmugs dang zhes bya ba la sogs pa ni go sla'o/ /de dag gis ni bdag dang gzhan gyi don bstan to/ /da ni/ gang 'dod yid ni rtogs bya'i phyir/ /zhes bya ba la sogs pa bshad pa'i phyir/mnyam gzhag ces bya ba la sogs pa smos te/ de ltar 'khor lo shin tu goms par bsgoms nas 'khor lo las 'od zer dkar po spros te/ phyogs bcur khyab nas gang gi yid rtogs par 'dod pa de'i ye shes bkug ste/ rang gi sems te yi ge hUM la btsud nas bltas na de'i sems shes par 'gyur ro//sems ni mnyam par bcings nas su/ /zhes bya ba ni yang 'khor lo de nyid de kho na nyid shes pas goms par bsgoms pa las 'khor ba'i pha rol du brgal zhing thar pa thob par 'gyur zhes ston to/ /sbyor ba gzhan bstan pa'i phyir/zla ba'i dkyil 'khor zhes bya ba la sogs pa smos te/ ye shes sa bon gyis sprul pa/ /zhes bya ba ni/ 'phags pa rnam par snang mdzad gtso/ /zhes bya ba dang 'brel to/ /de la ye shes ni rang gi sems kyi sa bon tsam las skad cig gis bskyed do zhes bya ba'i don to//yang na ye shes sa bon ni a ste de las bskyed pa'o/ /de nyid kyi khyad par bstan pa'i phyir/ pad+ma'i stan las zhes bya ba la sogs pa smos so/ /phyag gnyis phyag rgya che bcings nas/ /snying ga'i phyogs su 'ching bar mdzad/ /ces bya ba ni/ phyag gnyis phan tshun bsnol nas snying gar lha mo la 'khyud pa'i tshul du byed pa'o//kha cig ni dngos su lha mo dang bcas pa'o zhes zer ro/ /sangs rgyas sprin ni rnam par spro/ /zhes bya ba ni rang gi sku las sangs rgyas rnam pa lnga 'phro bar bsgom pa'o/ /de ci zhig mdzad ce na/ spro ba sna tshogs mi zad pas//sems can khams ni sgrol bar mdzad/ /ces bya ba smos te/ 'jig rten gyi khams thams cad du khyab na/ sems can rnams 'khor ba las sgrol ba'i bya ba mdzad pa'o/ /mi zad pa zhes bya ba ni 'od zer de/ sdug bsngal gyi tshogs sreg pa la 'jebs pas so//des cir 'gyur zhe na/ shes rab ces bya ba la sogs pa smos te/ shes rab rdo rje zhes bya ba ni mi phyed pa'i shes rab bo/ /'gro ba sgrol ba ni de'i mthu ste de thob par 'gyur ro zhes bya bar sbyar ro/ /'di'i sngags btu ba gsungs pa/ dbyangs yig dang po mchog sa bon//zhes bya ba la sogs pa ste/ dbyangs yig dang po ni a'o/ /de nyid ni sa bon gyi mchog ste yig 'bru'i dam pa'o/ /mtha' ru tsheg drag sbyar bar bya/ /zhes bya ba ni glo ru tshig gnyis gzhag pa'o/ /phyag 'tshal sreg pa'i mtha' dang ldan//zhes bya ba ni bshad zin to/ /bsdus pas oM AHswA hA zhes bya bar 'gyur ro/ /sa bon 'di ni zhes bya ba ni sa bon 'di las bcom ldan 'das bskyed do zhes dgongs so/ /mnyam par gzhag pa'i rnal 'byor pas bsgom pa dang bzlas pa byas na 'grub po snyam du dgongs so//sbyor ba'i gdan zhes bya ba la sogs pa la/ gzhung 'dis bsrung ba dang shes rab kyi 'khor lo la sogs par rab tu gsal bar byed pas rab tu byed pa'o/ /dpal gdan bzhi pa'i 'grel pa dran pa'i rgyu mtshan zhes bya ba las sbyor ba'i gdan gyi rim par phye ba gnyis pa'o// //da ni dbab pa la sogs pa'i rim par phye ba bstan pa'i phyir/ byin rlabs zhes bya ba la sogs pa smos te/ byin rlabs zhes bya ba ni dbab pa'o/ /sbyor ba'i ngo bo dag ces bya ba ni dbab pa'i sbyor ba rnal 'byor pa rnams kyis nyams su blang zhing bsgom pa'o//ci 'dra zhe na/ gang gis sems can rnams la bstan/ /zhes bya ba smos te/ dbab pa gang zhig sngon du 'gro bas sems can rnams la chos bstan pa'o/ /yang na daR+sha na ni blta ba ste/ byin gyis brlab pa'i sbyor ba gang zhig gis sems can la bltas na ye shes dbab par 'gyur ba'o//rim pa zhes bya ba ni dbab pa'i cho ga ste zhes bya ba'i rim pa'o/ /lan gsungs pa/ sems can zhes bya ba la sogs pa la/ sems can rmongs pa gso ba'i phyir/ /zhes bya ba ni/ rmongs pa'i 'dam du bying ba'i sems can rnams kyi nyon mongs pa'i nad gso ba'i phyir te/'di ltar gsal snang dbab pa las ni dad pa skye bar 'gyur ro/ /dad pa las ni lha'i ting nge 'dzin bsgom mo/ /bsgoms pas mi shes pa 'byang ngo / /des nyon mongs pa'i nad sos par 'gyur te/ de'i phyir nyon cig ces bya bar sbyar ro/ /ci zhig ce na/ yang dag 'khor ba sgrol ba yi/ /de nyid ces bya ba smos te/ phyin ci ma log pa'i gsal snang dbab pa'i de kho na nyid kyi lam gang gis sngar smos pa'i tshul gyis na 'khor ba las grol bar 'gyur ba'o/ /byin gyis brlabs te chos bstan pa//zhes bya ba ni snod kyi bye brag bzhin chos bstan pa'i yan lag go/ /chos bstan pa'i phyir snying gar zhes bya ba la sogs pa smos te/ snying gar zla ba bsams nas su/ /zhes bya ba ni rang gi snying gar zla ba'i dkyil 'khor bsgom pa'o/ / hUM gi sa bon zhes bya ba la sogs pa ni go sla'o/ /des cir 'gyur zhe na/ 'od zer zhes bya ba la sogs pa smos te/ phyogs bcu'i 'jig rten khams rnams su/ zhes bya ba ni bsregs nas su/ /sngon bzhin mtshan nyid ldan pa yi/ /dang po stong pa nyid du bya ba dang 'brel te/hUM gi me lces thams cad bsregs nas nam mkha' ltar stong par bsgom pa'o/ /me yi dkyil 'khor bsgom par bya/ /zhes bya ba ni bsgrub bya'i snying gar yang me'i dkyil 'khor gru gsum pa/ dbus su raM gyis mtshan pa bsgom pa'o/ /des ci zhig bya zhe na/gnas rnams zhes bya ba la sogs pa smos te/ gnas rnams thams cad ces bya ba ni slar yang bsgrub bya'i yan lag dang nying lag thams cad do/ /bsregs pa zhes bya ba ni thal ba tsam ma lus par bsregs pa'o/ /me yi dkyil 'khor dbus gnas pa'i/ /sangs rgyas lnga ni bsam par bya//zhes bya ba ni slar yang bsgrub bya'i snying gar me dang / pad+ma dang nyi ma'i dbus su sa bon hUM bsgom pa'o/ /sa bon de nyid gsungs pa/ dbyug pa zhes bya ba la sogs pa smos te/ sngar bshad zin to/ /sa bon de ni zhes bya ba ni sa bon hUM de nyid do/ /de dag kyang ji ltar bsgom zhe na/dang por bdag nyid bsgrub pa bstan pa'i phyir/ pad+ma zhes bya ba la sogs pa smos te/ ye shes mkha' 'gro'i rang bzhin du/ /zhes bya ba ni bdag nyid bsgom mo zhes bya ba dang sbyar bar bya'o/ /ji ltar zhe na/ ye shes kyi sprul pa zhes bya ba smos te/ ye shes kyi sa bon hUM gis bskyed pa zhes bya ba'i don to//de nyid kyi khyad par gsungs pa/ phyag gnyis zhes bya ba la sogs pa la/ steng gi rdo rje cod pan la/ sangs rgyas lnga yis rnam par brgyan/ /zhes bya ba ni cod pan gyi steng du rdo rje rtse lnga pa la/ sangs rgyas lnga yis mtshan pa ste/ de la shar du ni rnam par snang mdzad/byang du ni rin chen 'byung ldan/ nub tu ni snang ba mtha' yas/ lhor ni don yod grub pa/ dbus su ni mi bskyod pa'o/ /kha T+wAM ga dang rnal 'byor snod/ /ces bya ba ni phyag g.yas na kha T+wAM ga bsgreng ba'o/ /g.yon na thod pa bsnams pa'o/ /dbugs mi g.yo bar bsgom par bya//zhes bya ba ni ji srid du sems brtan par gyur pa'i bar du bsgom pa'o/ /bsnyen pa bya ba la sogs pa'i sngags btu ba bstan pa'i phyir/ sde tshan gsum pa zhes bya ba la sogs pa smos te/ 'di dag ni sngar bshad zin to/ /bsdus pas/ oM AH swA hA zhes bya bar 'gyur ro//'bum phrag gsum ni bzlas nas su/ /zhes bya ba ni sngar bsnyen pa'o/ /gnyis med gtor ma'i las kyis ni/ /de yi 'og tu las rnams bya/ /zhes bya ba la de'i 'og tu zhes bya ba ni bsnyen pa zin pa'i 'og tu'o/ /las rnams zhes bya ba ni sngar smos pa'i dbab pa'i cho ga rnams so//bya ba ni dbab par nyams su blang bar bya ba ste/ de dag gi ni 'di skad du bsnyen pa byas pa'i rjes la rang gi snying gar bsgoms pa'i hUM gi me lces chos thams cad bsregs te/ stong pa nyid du bsgoms pa'i mthar pad+ma dang nyi ma la gnas pa'i hUM gis bdag nyid ye shes mkha' 'gro ma ji skad smos pa lta bur bskyed la/de'i snying gar yang zla ba la gnas pa'i sa bon hUM bsgom mo/ /de nas bsgrub par bya ba'i snying gar raM gyis mtshan pa'i me'i dkyil 'khor bsams nas des lus thams cad thal ba tsam ma lus par bsregs te/ thal ba'i phung po las hUM gi sbyor bas blangs la de'i snying gar me'i dkyil 'khor la gnas pa'i pad+ma dang nyi ma'i steng du/sangs rgyas lnga'i snying po hUM bsams nas mkha' 'gro ma rnams la gtor ma sbyin pa sngon du 'gro bas yungs kar la oM AHswA hA zhes bya ba'i sngags 'di nyid yongs su bzlas te/bsgrub par bya ba la bsnun na gsal snang 'bebs par 'gyur ro zhes ston to/ /cho ga lhag ma bstan pa'i phyir/ /bdud rtsi lnga dang ldan pa la/ /zhes bya ba smos te/ bdud rtsi lnga dang ldan pa zhes bya ba ni chang ngo / /brgyad brgya ru ni bzlas nas su/ / zhes bya ba ni sngags snga ma nyid brgya rtsa brgyad bzlas pa ste/ brgyad lhag pa'i brgya ni brgyad brgya'o/ /cho gar ldan pa zhes bya ba ni 'das ma thag pa'i cho ga rnams byas nas so/ /sbyin pa ni blud pa'o/ /babs nas zhes bya ba la sogs pa la/ rdo rje'i glu zhes bya ba ni/rol cig rol cig ces bya ba la sogs pa ste/ rdo rje khyod ces bya ba ni rdo rje 'dzin pa la bod pa'o/ /rol cig ces bya ba ni rol par mdzod cig pa'o/ /shin tu dga' ba'i phyir lan gnyis smos pa'o/ /ci la gnas she na/ thams cad kun nas zhes bya ba la sogs pa smos te/thams cad ni chos rnams so/ /kun nas ni rnam par dag pa ste/ de la rol cig ces bya bar sbyar ro/ /khyod kyis gsol zhes bya ba ni zad cing dengs par mdzad pa'o/ /cis ci zhig ce na/ zhan dang drag po'i sbyor ba yis/ / zhes bya ba smos te/ zhan pa zhes bya ba ni sdig pa'o/ /drag po zhes bya ba ni bsod nams te/ sems can rnams kyi bsod nams dang sdig pa gnyi ga gsol cig pa'o/ /sbyor bas zhes bya ba ni khyod kyi sbyor bas so/ /de nyid gang zhe na/ skad cig 'khor las bdag mnyam bsgral//zhes bya ba smos te/ mnyam pa zhes bya ba ni bcom ldan 'das kyi thabs dang shes rab snyoms par 'jug pas so/ /skad cig ces bya ba ni skad cig las te/ tshe 'di nyid la sangs rgyas su 'jug pa'i phyir ro/ /'khor ba las bdag sgrol cig ces bya ba ni/bcom ldan 'das la bos nas gsol ba btab pa'o/ /glu 'di yis ni gar byed de/ /rdo rje dril bu dkrol bar bya/ zhes bya ba ni/ rdo rje dril bu dkrol ba'i tshul dang bcas pa'i glus bsgrub par bya ba sngon med pa'i gar la sogs pa la 'jug par 'gyur ba ste/gar ni nye bar mtshon pa tsam mo/ /oM tiSh+Tha zhes bya ba la sogs pa'i sngags ni babs kyi 'og tu rnal ma la gzhag cing bstan par bya ba'o/ /'di ni tshim bya thams cad bya/ /zhes pa la/ tshim bya zhes bya ba ni/ de la chang blud par bya ba'o/ / thams cad bya zhes bya ba ni slob ma gdong g.yogs kyi dar gyis bcings nas dkyil 'khor dang nye bar khrid la bzhag nas sgrub pa nyams su blang bar bya'o/ /dbab pa gshegs su gsol ba'i 'og tu dkyil 'khor bstan pa gsungs pa/ rnal 'byor ma kun bstan par bya//zhes bya ba ni gdong g.yogs bkrol nas/ rnal 'byor ma rnams bltar gzhug pa'o/ de'i 'og tu chos bstan pa'i go rims gsungs pa/ dman dang zhes bya ba la sogs pa la/ me tog bor ba las snod rab 'bring rnam pa gsum shes par byas nas de dang rjes su mthun pa'i chos te/sgrub pa'i thabs so sor bstan par bya'o zhes bya bar dgongs so/ /de dag ni dbang bskur ba'i cho ga las rgyas par shes par bya'o/ /da ni sngags bzlas pa tsam gyis kyang dbab pa bstan pa'i phyir/ oM yo ga A be+e sha aH zhes bya ba la sogs pa smos te/shin tu mnyam gzhag rnal 'byor pas/ /'di yis sngon du bsnyen pa bya/ /zhes bya ba ni ye shes mkha' 'gro ma'i rnal 'byor du mnyam par bzhag nas/ sngags 'di yis bsnyen pa 'bum du bzlas so zhes bya ba'o/ /de nas dbab pa'i cho ga gsungs pa/gnyis med gtor mar ldan pa yis/ /zhes bya ba la sogs pa la/ sgrub pa po yis 'dis gdab bya/ /zhes bya ba ni sngar bsnyen pa byas pa'i sngags 'dis yungs kar la mngon par bzlas nas mkha' 'gro ma rnams la gtor ma byin te bsgrub par bya ba la bsnun pa'o//ji ltar zhe na/ hUM gi sgra ni 'jigs pa yis/ /zhes bya ba smos te/ hUM zhes bya ba'i sgra brjod nas so/ /babs nas slar yang gshegs su gsol ba bstan pa'i phyir/ sngar smos pa'i sngags kyis ni/ /bdag nyid ji ltar 'dod bzhin byed//ces bya ba smos te/ sngar smos pa'i sngags zhes bya ba ni/ oM tik+Sha yo ga zhes bya ba la sogs pa'o/ /da ni bltas pas dbab pa bstan pa'i phyir/ oM ma na zhes bya ba la sogs pa gsungs te/ oM ma na g+hu ru g+hu ru g+h+ri ti tsi li tsi li hUM hUM phaT ces bya ba'i sngags 'di ye shes mkha' 'gro ma'i rnal 'byor gyis sngar bsnyen pa 'bum byas na/phyis lan cig bzlas pa tsam gyis kyang gang la bltas pa de la 'bebs par 'gyur ro/ /de nyid bstan pa'i phyir/ rnal 'byor pa yis zhes bya ba la sogs pa smos te go sla'o//mchod cing gang la bltas pa yis/ /mthong bas phab ste gar byed do/ /zhes bya ba ni/ tshogs spyod kyi bza' bca' la longs spyod pa'i dus su gang la bltas pa de phab nas gar byed par 'gyur ba'o/ /'dir yang dgrol ba ni sngags snga ma dang sbyar ro/ /sbyor ba gzhan bstan pa'i phyir/oM be tA lI zhes bya ba la sogs pa gsungs te/ 'dir yang ye shes mkha' 'gro ma'i rnal 'byor gyis bsnyen pa sngar smos pa ltar bya'o/ /sgrub pa gsungs pa/ thal bar zhes bya ba la sogs pa la de dag gis ni ji ltar grags pa'i thal ba la/sngags snga ma nyid lan bdun mngon par bsngags te/ ro la sogs pa gang yang rung ba la gtor na de nyid zhag bdun gyi bar du spyang ki la sogs pa cis kyang za bar mi 'gyur ro zhes bya ba ston to/ /sbyor ba gzhan gsungs pa/ oM phu ru phu ru man tre dza hUM phuHphaT/ces bya ba la sogs pa ste/ 'dir yang bsnyen pa ni sngar bshad pa ltar bya'o/ /sgrub pa gsungs pa/ skud pa dmar la zhes bya ba la sogs pa la/ 'di dag gi don yang skud pa dmar po la sngags snga ma nyid brgyad brgya bzlas te/ gang gi mgrin par bcings pa de ce spyang du gyur nas 'khyams par 'gyur ba yin no//slar bral ba gsungs pa/ skud pa dang ni bral gyur na/ /zhes bya ba la sogs pa smos te go sla'o/ /sngar bstan pa'i ye shes mkha' 'gro ma'i sngags skur bsgoms nas bsnyen pa byas te/ de'i 'og tu bzlas pa'i yungs kar gyis bsnun pa dang /sngags bzlas pa dang bltas pa tsam gyis kyang 'bebs par byed do zhes bya ba de dag la dran pa bskyed pa'i phyir/ byin rlabs rim pa'i rnal 'byor gyis/ /mnyam par gzhag pas bsgom zhing bzla/ /zhes bya ba smos so/ /da ni las gzhan dag bstan par bya ba'i phyir/zla ba'i dkyil 'khor zhes bya ba la sogs pa gsungs te/ 'di dag gi don ni stong pa nyid bsgoms pa'i 'og tu seng ge'i gdan la zla ba'i dkyil 'khor gyi steng du rang gi sa bon las rdo rje mkha' 'gro ma ji skad smos pa bzhin du bskyed la/ de'i mdun du bsgrub par bya ba rlung gi dkyil 'khor la gnas pa bltas la bskrad par bya ba 'di yin no/ /rkang mthil gnyis su me rlung gi/ /sa bon stan du bsgom par bya/ /zhes bya ba ni rlung gi steng du rlung gi sa bon gnyis la bsgrub bya'i rkang pa gnyis gzhag par bya ste/ de ltar na rlung gi sa bon nyid stan te stegs bu zhes bya ba'i don to//sgra dang thig ler ldan pa ni/ /rlung gi sa bon kun gnas par/ /rlung gis bskor ba snying gar gzhag /ces bya ba la/ thig le zhes bya ba ni sems te/ bsgrub bya'i rnam par shes pa'i rang bzhin yi ge hUM ngo //sgra zhes bya ba ni ngag tu brjod pa ste/ bzlas pa dang bcas pa'o/ /de gang du bsam zhe na/ rlung gi sa bon dbus gnas par/ /zhes bya ba smos te/ rlung gi sa bon gyi steng du bsgom pa'o/ /rlung gis bskor ba ni rlung la gnas pa ste/ 'di'i don ni bsgrub bya'i snying gar rlung gi dkyil 'khor/de'i steng du rlung gi sa bon yuM/ de'i steng du yi ge hUM tshig tu bzlas pa dang bcas pas bsgom pa yin no/ /thams cad kha dog sngon por bsam/ /zhes bya ba ni bsgrub bya'i lus la sogs pa sa bon hUM gi bar du sngon por bsgom pa'o//rang gi dbugs kyi rtse mo yi/ /rlung gi mda' ru sbyar bar bya/ /zhes bya ba ni sngar smos pa'i bsgrub par bya ba g.yo ba dang bcas par bsams la/ rang gi sna sgo nas phyir 'byung ba'i dbugs kyi rlung mda' ltar shugs che ba'i rtse mor rlung gi sa bon bsams la/des bsgrub par bya ba bskyed par bsams pa'o/ /oM yuM be raM ba yuM che ge mo yuM phaT/ rnal 'byor pa yi gsang sngags 'di/ /brgyad brgyar bzlas na 'grub par 'gyur/ /zhes bya ba ni sgrub pa'i dus su'o/ /bsnyen pa'i dus su ni ye shes mkha' 'gro ma'i rnal 'byor dang ldan pas bsnyen pa 'bum phrag tu bya'o//da ni 'khrul 'khor bri bas kyang bskrad pa bstan pa'i phyir/ gro ga zhes bya ba la sogs pa smos te/ sogs pa'i sgras ni zla mtshan can gyi ras la sogs pa gzung ngo / /dug ni grags par zad do/ /khrag ni mdzub mo'i khrag go//ske tshe dang lan tshwa la sogs pa dang sbyar bar bya sto/ rdzas de dag gro ga la sogs pa la/ sngar bstan pa'i sngags spel ba dang bcas pa bri'o/ /ji ltar bri zhe na/ rnal 'byor mchog ni bzung nas su/ /zhes bya ba smos te/ sngar bstan pa'i rdo rje mkha' 'gro ma'i rnal 'byor la gnas pas so//thams cad gnas nas bri bar bya/ /zhes bya ba ni/ bsgrub par bya ba snga ma ltar bsgoms nas bri ba'o/ /brgyad brgya ru ni bzlas pa yi/ /skud pa dmar po dkris nas ni/ /shing gi rtse mor gdags par bya/ /zhes bya ba ni/ de'i 'og tu sngags snga ma nyid brgyad brgya bzlas pa'i skud pa dmar pos 'khrul 'khor bcings la/shing gi rtse mor gdags pa'o/ /shing gi rtse mo gang du gdags she na/ rlung gis spur bar bya zhes bya ba smos te/ rlung gis bskyod de phyogs su gdags pa'o/ /bsgom zhes bya ba ni btags pa'i 'og tu bsgrub par bya ba sngar smos pa ltar rlung gis spur zhing bskyod par bsgom pa'o//des cir 'gyur zhe na/ gang du rlung ni gzhol 'gyur ba/ /de yi phyogs su 'gro bar 'gyur/ /zhes bya ba smos te/ 'khrul 'khor phyogs gang du rlung gis bskyod pa'i phyogs der bsgrub par bya ba 'khyams par 'gyur ba'o//rnal 'byor pa yis bskrad pa na/ /'grub 'gyur 'di la the tshom med/ /ces bya ba ni lha'i ting nge 'dzin dang / sngags bzlas pa dang ldan pa'i rnal 'byor pas gdon mi za bar 'grub bo nas bya ba'i don to/ /da ni dgug pa'i sbyor ba gzhan bstan pa'i phyir/zla ba'i dkyil 'khor zhes bya ba la sogs pa smos te/ tshigs su bcad pa dang po'i don ni rdo rje mkha' 'gro ma'i rnal 'byor pas sngags 'og nas 'byung ba 'bum phrag tu bzlas pas sngon du bsnyen pa bya bar ston to/ /gnyis med gsang ba'i gtor ma ni//de yi dbus su sbyar bar bya/ /zhes bya ba la/ de'i zhes bya ba ni/ maN+Dal dmar pos byugs nas su/ /zhes bya ba 'og nas 'byung ba dang sbyar te/ sgra rnams ni bsam pa la rag las pa'i phyir ro/ /dbus su sbyar bar bya zhes bya ba ni gtor ma sngon du 'gro bas sngags dang spel ba'i bsgrub bya'i ming dbus su bri ba ste/dbus su ming ni bris nas kyang / /zhes zer ba'i phyir ro/ /'di'i don dri dmar pos ba lang gi ko ba'i tshad tsam byugs pa'i dbus su gtor ma btang la/ oM badzra DA ki nI de sha oM A kaR+Sha ya/ A kaR+Sha ya/ oM hrI hUM phreM phruM phruM che ge mo A kaR+Sha ya swA hA zhes bya ba bri ba 'di yin no//seng ldeng phur bu brgyad kyis btab/ /ces bya ba ni/ seng ldeng gi phur bu sor brgyad kyi tshad la rdo rje rtse gcig pa'i dbyibs lta bu brgyad kyis maN+Dal gyi phyogs dang phyogs mtshams su gdab pa'o/ /gtor ma yongs su gang bar ldan//zhes bya ba ni las 'di thog mar gtor ma dang sbyar ba'o/ /skud pa dmar la bzlas nas kyang / /lan bdun bskor bas ra ba bya/ /zhes bya ba ni/ de nas skud pa dmar po la sngags snga ma nyid brgyad brgya bzlas nas/ des phur bu rnams kyi rtse mor ra ba ltar rim pa bdun du bskor zhing dkri ba'o//rdo rje lcags kyus drangs nas su/ /gsang sngags 'di ni bzlas byas na/ /zhes bya ba ni/ de nas bdag nyid rdo rje mkha' 'gro ma/ phyag na lcags kyu dang zhags pa thogs par bsgoms la/ lcags kyus snying phug cing zhags pas mgrin pa bcings nas bsgrub bya 'ongs par bltas la sngags bzlas pa'o//sbyor ba'i bdag nyid chen po bstan pa'i phyir/ dpag tshad brgya zhes bya ba la sogs pa smos te/ sbyor ba 'di'i mthus dpag tshad brgya'i phyi rol na gnas pa yang 'gugs shing 'ong bar 'gyur ro zhes bya ba'i don to//gzhung nye bar bsdu ba bstan pa'i phyir/ /maN+Dal zhes bya ba la sogs pa smos te go sla'o/ /de ni bcing pa'i sbyor ba bstan pa'i phyir/ nyi ma'i dkyil 'khor zhes bya ba la sogs pa smos te/ tshigs su bcad pa dang po 'dis ni stong pa nyid bsgom pa sngon du 'gro bas seng ge'i gdan la nyi ma'i dkyil 'khor gyi steng du rang gi sa bon las byung ba'i mkha' 'gro ma drag mor bdag nyid bsgoms nas 'og nas 'byung ba'i las rnams bya'o zhes ston to/ /de nyid gsungs pa/nya mo cig ni bzung nas su/ /zhes bya ba la/ 'di dag gi don ni nya pa cig bzung la mkha' 'gro ma la gtor ma sbyin pa sngon du 'gro bas gro ga la sogs pa'i gzhi la/oM phruM phruM che ge mo'i mu kha ban+d+ha ban+d+ha hri hri hri phruM phaT ces bya ba'i sngags bris la/ sngags nya'i khar bcug nas nya de'i mgo bo rdog pa g.yon pas brdzis nas sngags de nyid brgyad brgyar bzlas pa bya ba 'di yin no//des ni kha bcings par 'gyur ba'o/ /bya ba thams cad bcings par 'gyur/ /zhes bya ba ni/ sngags spel ba tshar gcig tu bris nas sems kyi rgyu ba la sogs pa thams cad bcings par 'gyur ba'o//bcing ba'i sbyor ba gzhan gsungs pa/ thams cad chu la bya ba ste/ /zhes bya ba la sogs pa la/ las gzhan zhes bya ba ni sngags 'di nyid kyi sbyor ba snga ma la ltos pa'o/ /sngags 'di rab tu sbyar nas ni//bag zan gyis ni dril bar bya/ /zhes bya ba ni gro ga la sogs pa la sngags snga ma ltar bris nas/ 'bras phye la sogs pa'i zan gyis dril te ril bur bya'o/ /des ci zhig bya zhe na/ gang du nya ni gnas pa yi/ /nya yi kha ru gzhug par bya/ /zhes bya ba smos te/ gang du zhes bya ba ni mtsho la sogs pa gang na nya rnams zan la sogs pa za ba bltas la de lta bu mthong nas ri lu rnams nya la zan du sbyin pa'o/ /du zhig ji ltar sbyin zhe na/ ri lu brgyad brgya byas nas su/ /lan re bzlas te zar bcug na/ /zhes bya ba smos te/ ri lu brgyad brgya so so re re zhing sngags lan re bzlas la/ri lu thams cad nya rnams kyis rdzogs par zos kyi bar du byin na ci ltar spel bzhin du bya ba thams cad bcings par 'gyur ro/ /b+ha ga bcing ba gsungs pa/ rlung gi zhes bya ba la sogs pa la/ tshigs su bcad pa dang po'i don ni sngar smos pa'i tshul gyis bdag nyid rlung gi dkyil 'khor la gnas pa'i lha mo gtum mo bsgoms nas 'og nas 'byung ba'i las rnams bya'o zhes bya ba yin no//de nyid gsungs pa/ gnyis med gtor ma'i las rnams ni/ /zhes bya ba la sogs pa la/ de'i zhes bya ba ni 'dir yang /lci bas pad+mo'i gzugs byas la/ /zhes bya ba'i tshig 'og ma dang sbyar te/ lci ba las chos 'byung ba'i gzugs su byas la/ de'i dbus su rab tu bya ba'o/ /ci zhig bya zhe na/ rab tu bya ba de nyid bstan pa'i phyir/ /ming dang sngags ni gzhag par bya//zhes bya ba gsungs te/ gro ga la sogs pa la oM staM b+ha ya staM b+ha ya b+ha ga mu draM hUM phruM phruM che ge mo phaT ces bya ba'i sngags bris nas chos 'byung ba'i gzugs byas pa de'i nang du gzhag pa'o/ /gsang sngags 'di dang ming dag ni/ /rkang pa g.yon pas mnan nas su//lan grangs brgyad brgyar bzlas par bya/ /zhes bya ba ni lci ba las byas pa'i chos 'byung ba'i nang du gzhag pa'i ming dang spel ba'i sngags de nyid sgrub pa po'i rdog pa g.yon pas mnan te/ sngags snga ma nyid brgyad brgyar bzlas pa'o/ /des ni gcig bcings par 'gyur ro//de nyid kyi phyir/ chung ma zhes bya ba la sogs pa smos te go sla'o/ /gal te zhi bar 'dod na de'i tshe bya ba bstan pa'i phyir/ mthar ni zhes bya ba la sogs pa smos te/ zhi ba'i sems kyis sngags kyi phreng ba chu dang 'o ma la bskur ba'am chu dang 'o mas bkrus pas kyang zhi bar 'gyur ro//sbyor ba gzhan gsungs pa/ rlung gi zhes bya ba la sogs pa la/ tshigs su bcad pa dang po gnyis kyi don ni rlung dang yi dwags kyi stan la bzhugs pa'i rdo rje mkha' 'gro ma ji skad smos pa'i tshul dang ldan par bdag nyid bskyed la/'og nas 'byung ba'i las rnams bya'o zhes bya ba yin no/ /de nyid gsungs pa/ gnyis med ces bya ba la sogs pa la/ de ru zhes bya ba ni 'dir yang 'bras phye la sogs pa'i khyad par las/ pad+ma'i dbyibs su byas nas su/ /zhes bya ba dang sbyar ro/ / de ru ci zhig bya zhe na/ ming dang sngags su sbyar nas ni/ khyi yi spu yis dgang bar bya/ /zhes bya ba smos te/ 'bras phye la sogs pa'i khyad par las snga ma ltar chos 'byung ba'i gzugs byas nas yang snga ma ltar oM kro d+he shwa re phuM phroM che ge mo'i b+ha ga duSh+Ta ya phaT ces bya ba bris la/der bzhag nas khyi'i spu yis bkang ba ste/ snga ma ltar rdog pas mnan te/ brgyad brgya bzlas nas b+ha ga lug cing zug gzer dang bcas par 'gyur ro/ /las thams cad la yang bsnyen pa'i dus su ni sngags brgya bar 'bum du bzlas la/ sgrub pa'i dus su ni sngags spel ba dang bcas par brgyad brgyar bzlas par bya'o//rdo rje gsang bar gzhug par bya/ /zhes bya ba ni gnyis su med pa'i sngags kyi phreng ba de b+ha ga'i nang du gzhag par bya'o/ /dgrol ba gsungs pa/ phyung na de las thar bar 'gyur/ /zhes bya ba ste/ sngags dang khyi spur bcas pa dbyung ba'o/ /rtsa rnams bzhu ba'i sbyor ba gzhan gsungs pa/ zla ba'i dkyil 'khor zhes bya ba la sogs pa la/ zla ba'i dkyil 'khor dbus gnas par/ /lte bar bdud rtsi'i yi ge bsgom/ /zhes bya ba ni bsgrub par bya ba'i lte bar zla ba'i dkyil 'khor la bdud rtsi'i yi ge saM bsgom pa'o//des ci zhig bya zhe na/ rtsa rnams kun las drangs nas su/ /bdud rtsi'i chu ni 'dzag par bya/ /zhes bya ba smos te/ bdud rtsi chu zhes bya ba ni khu ba'o/ /drang ba ni yi ge gsum gyi 'od zer gyis rtsa rnams nas bskul nas gnas thams cad nas dbab pa'o//de nas ci zhig bya zhe na/ ban+du'i me tog ces bya ba la sogs pa smos te/ b+ha ga'i dbus su gnas pa'i rtsa khA ga mu kha zhes bya ba me tog ban+du ka ltar kha phye ba'i nang du lcags kyu'i yi ge ste yi ge kriM bsgom pa'o/ /de nyid bshad pa'i phyir/gsang zhing gsang bar bsgom par bya/ /zhes bya ba smos te/ de la gsang ba zhes bya ba ni khA ga mu kha'i rtsa'o/ /yang gsang ba zhes bya ba ni lcags kyu'i yi ge'o/ /de nas yang ji zhig bya zhe na/ khro bo zhes bya ba la sogs pa smos te/ /khro bo'i sor mo zhes bya ba ni mdzub mo'o//bdud rtsi'i yi ge ni suM mo/ /bskyed pa ni bskyed par bsgom pa'o/ /snga ma de dag nyid bsdus te bstan pa'i phyir/ /sbyor ba gsum ni bsams pa yis/ /zhes bya ba la sogs pa smos te/ sbyor ba gsum zhes bya ba ni sku'i gnas dang / khA ga mu kha'i rtsa dang /mdzub mo'i rtse mo rnams su yi ge suM dgod pa'o/ /bsam pa ni bsgom pa'o/ /des cir 'gyur zhe na/ /de yi lus kyi gnas rnams nas/ /bdud rtsi'i chu ni 'dzag par bya/ /zhes bya ba smos te/ bdud rtsi chu zhes bya ba ni khu ba'o/ /lus kyi gnas rnams nas zhes bya ba ni yan lag dang nying lag thams cad nas so//'dzag par bya zhes bya ba ni bsgom mo zhes lhag ma yin no/ /b+ha ga shin tu 'dul dka' zhes bya ba ni shin tu ma rungs pa'i bud med do/ /brtag par zhes bya ba ni mnye zhing tshar bcad pa'o/ /smyo bar bya ba'i sman gyi sbyor ba gsungs pa/'od zer can dang zhes bya ba la sogs pa la/ 'od zer can zhes bya ba ni sman 'od zer can zhes bya bar grags pa'o/ /bla mar bya zhes bya ba ni 'ol ma se'o/ /smyo byed yan lag lnga zhes bya ba ni/ d+ha du ra'i 'dab ma dang / me tog dang / 'bras bu dang / rtsa ba dang shun pa rnams so/ /gu gul chen po zhes bya ba ni mi'i klad pa'o/ /mar nag chen po zhes bya ba ni mi'i rkang las byung ba'o/ /bdud rtsi'i chu zhes bya ba ni chang ste/ chang gi nang du 'od zer can la sogs pa'i sman cha mnyam par blugs nas blud pa'o/ /de nyid kyi phyir gsungs pa/lce yi dbang pos myang du gzhug /ces bya ba ni/ 'di ni bla ma dang sangs rgyas la sogs pa la gnod pa byed pa'i mi la bya'i gzhan du ni ma yin no/ /mar zos pas ni grol bar 'gyur/ /zhes bya ba ni zhun mar blud pas de las thar bar 'gyur ba'o/ / mig sman gyi sbyor ba gsungs pa/ yi dwags gos zhes bya ba la sogs pa la/ yi dwags gos ni ma lhung bas/ /mar me yi ni sdong bu bya/ /zhes bya ba ni ji srid du phrag pa las sa la ma lhung pa'i ro'i gos blangs la sdong bu bya ba'o/ /klu dbang zhes bya ba ni ro nye'o/ /rkang gi mar zhes bya ba ni mi'i rkang las byung ba'o//gtor ma'i gnas zhes bya ba ni dur khrod kyi gnas su'o/ /mkha' 'gro ma yi snying sngags kyi/ /zhes bya ba ni/ ye shes mkha' 'gro ma'i sngags so/ /du ba dag ni dbab par bya/ /zhes bya ba ni du ba btang ba ste/ 'dir bstan pa'i don ni ye shes mkha' 'gro ma'i rnal 'byor pas dur khrod dang lam gyi bzhi mdo dang /shing gcig gi drung la sogs par sha dang nya sha la sogs pa dang ldan pa'i gtor ma sngon du 'gro bas thod pa gsum gyi steng du sngar smos pa'i snod dang mar dang sdong bu la sogs pa'i steng na gnas pa'i thod pa bzhag la ye shes mkha' 'gro ma'i sngags brgyad brgya zlos shing du ba btang la/yang dur khrod la sogs par gtor ma sngon du 'gro bas du ba des mig la bskus na mkha' 'gro ma thams cad mthong bar gyur pa 'di yin no/ /dbye ba'i sbyor ba gsungs pa/ lhag ma'i snod ces bya ba la sogs pa ste/dur khrod kyi sol ba zhes bya ba ni go bar zad do/ /tsha ba'i rdzas zhes bya ba ni/ ske tshe dang dug dang khrag la sogs pa'o/ /khro bas bkang ste drud par bya/ /zhes bya ba ni khro ba dang bcas pa'i sems kyis kham phor gnyis phan tshun du drud pa'o/ / 'di dag gi don yang ye shes mkha' 'gro ma'i rnal 'byor pas gtor ma sngon du 'gro bas zas kyi bya ba byas pa'i kham phor gnyis la ji skad smos pa'i snag tsha dang smyu gus bsgrub bya nyid kyi gzugs bris la de'i snying gar oM ki ri ki ri zhes bya ba la sogs pa'i sngags kyi phreng ba bris la/ yang gtor ma sngon du 'gro bas khro ba dang bcas pas kham phor drud cing /oM ka li brta zhes bya ba la sogs pa'i sngags brgya rtsa brgyad bzlas par bya ba 'di yin no/ /lhag ma ni go sla'o/ /zhi ba'i cho ga gsungs pa/ gnyis med ces bya ba la sogs pa la/ 'dis ni ye shes mkha' 'gro ma'i rnal 'byor pas gtor ma sngon du 'gro bas zhi ba'i sems kyis rang gi lus las byung ba'i lha mo bdud rtsi'i bum pa thogs pa rnams kyis dbang bskur bar bsgoms na zhi bar 'gyur bar ston to//sbyor ba'i gdan zhes bya ba la sogs pa la rab tu byed pa zhes bya ba ni gzhung 'dis gsal snang dbab pa nas 'thab rtsod byung ba'i bar du gsal bar ston par byed pas na rab tu byed pa'o//dpal gdan bzhi pa'i 'grel pa dran pa'i rgyu mtshan zhes bya ba las sbyor ba'i gdan gyi rim par phye ba ste gsum pa'o// //da ni rdo rje dang dril bu rnam par dag pas shes rab thabs kyi mnyam par sbyor ba bstan par bya ba'i phyir//gnyis med ces bya ba la sogs pa gsungs te/ gnyis med sbyor ba zhes bya ba ni/ thabs dang shes rab gnyis su med par sbyor ba'o/ /snying po ni dam pa ste nyan par 'tshal zhes bya ba dang 'brel to/ /gnyis med ming gis brjod pa yin/ / zhes bya ba la/ ming ni tha snyad du bya ba ste/ brjod pa ni des brjod par bya'o/ /sbyor ba ji ltar brtsam bgyi ba/ /zhes bya ba ni ji ltar nyams su blang ba bya ba ste/ de ltar na gnyis su med pa'i sbyor ba'i snying po la gnyis su med pa'i ming gis ni ji ltar brjod/ /ngo bo nyid ni ci 'dra/ nyams su ni ji ltar blang bar bgyi zhes bya ba'i don to//lan gsungs pa/ gnyis med ces bya ba la sogs pa la gnyis med sbyor ba zhes bya ba ni bshad zin to/ /de nyid ces bya ba ni de'i rang bzhin te/ nyon cig ces bya ba dang sbyar ro/ /yang dag ces bya ba ni phyin ci ma log pa'o/ /de nyid gsungs pa/rdo rje dril bu phyag rgya dag /so sor gzung ba'i de kho na/ /zhes bya ba la/ de kho na nyid ni kun rdzob dang don dam pa dbyer med pa'i shes rab kyi pha rol tu phyin pa'i sgra rnam par dag pa dbyer med pa ste/ de lta bu'i rdo rje dang dril bu gzung bar bya'o/ /gzung ba ni bsgom pa ste de ltar na shes rab kyi pha rol tu phyin pa'i sgra rnam par dag pa dang /kun rdzob kyi bden par dbyer med pa'i rdo rje dang dril bu'i de kho na nyid bsgom par bya'o zhes bya ba'i don to/ /phyag rgya zhes bya ba ni dril bu rnam par dag pa'i shes rab ste/ de yang phyi dang nang gi shes rab gnyis so//so so zhes bya ba ni thabs te/ de yang phyi dang nang gi dbye ba gnyis so/ /yang na phyag rgya ni gnyis su med par sbyor ba ste/ de yang phyi rol gyi skyes pa dang bud med kyi las kyi phyag rgya mnyam par sbyor ba dang / nang gi chos nyid dang dngos po mnyam par sbyor ba dang / ye shes kyi snying rje dang stong pa nyid mnyam par sbyor ba'o//de nyid ni de kho na ste so sor gzung ba ni yang dag par gzung ba'o/ /yang na rdo rje dang dril bu ni phyi rol gyi thabs dang shes rab po/ /de nyid ni phyag rgya ste so sor dga' bas 'debs pa'i phyir ro/ /de nyid kyi phyir dril bu la rdo rjes steng du mtshan pa yin no/ / yang na phyag rgya ni de gnyis mnyam par sbyor ba las byung ba'i bde ba ste/ lhan cig skyes pa'i ngo bo nyid do/ /de dag thams cad bstan pa'i phyir/ de nyid ces bya ba la sogs pa smos te/ bdag ces bya ba ni rang gi lus te/ gzhan shes rab la ltos pa'i phyir ro/ /de nyid ni rdo rje ste shes rab dang dbyer med par sbyor ba'i phyir ro zhes bya ba ni thabs la yang rdo rje'i sgras brjod par bya ste/shes rab dang dbyer mi phyed par mnyam par sbyor ba'i phyir te rdo rje dang chos mthun par dgongs so/ /yang na zhes bya ba ni mang ba'o/ /dza zhes bya ba ni mdzes pa ste/ thabs 'dis shes rab du ma mdzes par byas pas na rdo rje'o//gnyis par na bdag ces bya ba ni kun rdzob kyi bden pa'o/ /de nyid ni rnam par dpyad na/ don dam pa'i bden pa'i mthar thug pas rdo rje ste/ mi phyed pa'i mtshan nyid can pas rdo rje zhes bya ba ste/ de kho na nyid do/ /de bzhin du don dam pa'i bden pa yang kun rdzob kyi bden pa las gud na med pa'i phyir ro//de kho na nyid kyis dbyer med par gzung bar bya'o/ /de nyid kyi phyir chos kyi zhes bya ba la sogs pa smos te/ de la chos zhes bya ba ni phung po la sogs pa ste/ mi rtag pa la sogs pa rang gi mtshan nyid 'dzin pa'i phyir ro//dril bu zhes bya ba ni rang bzhin gyis rnam par dag pa'i chos nyid de/ des thams cad bsgrub pa'i phyir ro/ /yang na chos kyang chos kyang yin la dril bu yang yin pas chos kyi dril bu ste chos nyid do/ /de nyid ni lha mo ste/ de kho na nyid 'dis rnal 'byor pa rnams la chos thams cad gsal bar byed pa'i phyir ro//kha sbyar sbyor ba phyag rgya ste/ /zhes bya ba la kha sbyar zhes bya ba ni rang gi lus dang / las kyi phyag rgya mnyam par sbyor ba dang / don dam pa'i bden pa dang kun rdzob kyi bden pa mnyam par sbyor ba'o/ /de nyid ni phyag rgya ste phan tshun mi phyed par dkris pa'i phyir ro//de dag gis ni shin tu dbyer med par bstan to/ /de nyid kyi phyir/ thabs ni de ru thim pa'o/ /zhes bya ba smos te/ de ru zhes bya ba ni shes rab la ste las kyi phyag rgya'i shes rab la bdag gi lus 'khyud pa'i tshul du thim pa dang / lhan cig skyes pa'i shes rab kyi sems la kun rdzob kyi sems sam bdag dang gzhan dbyer med par thim pa dang /stong pa nyid la snying rje dang don dam pa la kun rdzob thim pas na dril bu ma gtogs par rdo rje 'ba' zhig gzung bar mi bya ste/ dril bur rdo rje thim pa'i de kho na nyid kyi phyag rgya gzung bar bya'o zhes bya ba'i don to//de la kun rdzob dang don dam pa'i bden pa gnyis su med pa de yang 'dir stong pa nyid kyis sbyangs pa'i lha'i sku'i ting nge 'dzin te gnas der dang po ci zhig bya ba de bstan pa'i phyir/ dang por re zhig ces bya ba la sogs pa smos so/ /dang por zhes bya ba ni thog mar te/rnal 'byor gyi thog mar/ rdo rje thal mo dam bcings nas/ /zhes bya ba dang sbyar ro/ /re zhig ces bya ba ni rim gyi don to/ ra ba dang dra ba la sogs pa dag pa bshad par bya ba yin pa las de dag gzhag ste/ dag pa gsum brjod par bya ba bshad par bya'o zhes bya ba'i don to//yang na sgrub pa po dag pa rnams kyi nang nas dag pa gsum brjod do zhes bya ba'i don to/ /dag pa rnams zhes bya ba ni don to/ /brjod pa zhes bya ba ni de'i sngags gdon pa ste stong pa nyid bsgoms nas/ oM swa b+hA wa zhes bya ba la sogs pa brjod par bya'o//sa bon las byung ba'i rdo rje bsgoms nas oM badzra zhes bya ba la sogs pa brjod par bya'o/ /lha'i gzugs su bskyed nas oM yo ga zhes bya ba la sogs pa brjod par bya'o/ /de ltar rnal 'byor gyi rgyud rnam par dag pa bstan nas ra ba la sogs pa'i rnam par dag pa bstan pa'i phyir/gzung dang 'dzin pa'i zhes bya ba la sogs pa gsungs te/ sngags dang lha la sogs pa'i mtshan nyid kyi kun rdzob dang stong pa nyid kyi don dam par dbyer med pa las dgos pa'i dbang gis gnyis su sprul pa la/ gzugs la sogs pa las rnam par grol bar ston pa ni/sbyin pa ste chos kyi sbyin pa'o/ /yang na dngos po rnams su 'dzin pa stong pa nyid du btang ba ni chos kyi sbyin pa ste/ de'i rnam par dag pas ra ba'o/ /thams cad rtswa bzhin gtang bar bya/ /zhes bya ba la/ thams cad ni nor dang nor gyi mchog dang /yan lag dang yan lag gi mchog ste/ zang zing rnams so/ /rtswa zhes bya ba ni nye bar mtshon pa ste mchil snabs la sogs pa gzung bar bya'o/ /ji ltar yin zhe na/ rnal 'byor ldan pa'i sems kyis ni/ /zhes bya ba smos te/ rnal 'byor zhes bya ba las ni gtong pa po dang /len pa po dang / sbyin pa rnam pa gsum mi dmigs shing mnyam par sbyor ba ste/ de'i sems gang la yod pa de la de skad ces bya'o/ /de dag dang / gzhan mi 'jigs pa'i sbyin pa ste/ chos dang zang zing dang / mi 'jigs pa'i sbyin pa gsum rnam par dag pa'i sbyin pa gsum rab ces bya ba'i don to//dri ma'i rnam par dag pa gsungs pa/ sems can kun la zhes bya ba la sogs pa la/ mi 'jigs pa'i sbyin pa ni 'jigs pa rnams las skyob pa ste/ de yang sngar smos pa ltar mi dmigs pa dang sbyar ro//'dis ni dge ba'i chos la 'jug pas dge ba'i chos sdud pa'i tshul khrims bstan te/ sbyin pa'i yan lag tu'ang blta bar bya'o/ /sdom pa'i bdag nyid kyi sdig pa las ldog pa'i tshul khrims bstan pa'i phyir/ 'gro rnams gtso bor mi bya sogs/ /zhes bya ste/sogs pa'i sgras ni mi dge ba las ldog pa gzhan yang gzung bar bya'o/ /gzhan gyi don spyod pa'i tshul khrims bstan pa'i phyir/ sems can don ni dgag mi bya/ /zhes bya ba smos te go sla'o/ /de dag gis cir 'gyur zhe na/ steng du tshul khrims dra ba'o/ /zhes bya ba smos te/tshul khrims gsum rnam par dag pa'i dra bas steng nas g.yog go zhes bya ba'i don to/ /phur bu'i rnam par dag pa bstan pa'i phyir/ gzhan la gnod pa 'gog pa la sogs/ /zhes bya ba la sogs pa smos te/ gzhan la gnod pa ni gzhan la gnod pa byed pa ste/ 'gog pa ni bzlog pa'o/ /des ni sdug bsngal dang du len pa'i bzod pa bstan no/ /yang na gzhan gyis gnod pa zhes bya bar sbyar te gzhan gyis gnod pa byas pa ci yang mi snyam pa'i bzod pa bstan te/ gsum pa'i don gyis gnyis pa yin no/ /sogs pa'i sgras ni chos nyid zab mo la bzod pa la sogs pa bsdu bar bya'o//des ni bzod pa rnam pa gsum bstan to/ /des cir 'gyur zhe na/ bzod pa'i phur bu 'og tu btab/ /ces bya ba smos te/ sdug bsngal dang sdug bsngal gyi rgyu mtshan rnams bzod pas 'og tu mnan pa ste/ bzod pa rnam par dag pa'i phur bu 'og tu gdab bo zhes bya ba'i don to//gsum po de dag gis ci zhig bya zhe na/ phur bu ra ba dra ba yis/ /zhes bya ba la sogs pa smos te/ sdang ba'i bdud ces bya ba ni 'dis lus la sogs pa sun 'byin par byed/ rnam par sgyur bar byed pas na sdang ba ste/nyon mongs pa dang phung po dang 'chi bdag dang lha'i bu'i bdud rnams so/ /de dag nyid dgra ste bde ba 'joms par byed pa'i phyir ro/ /bskrad pa ni bzlog pa ste de'i phyir ro/ /ci ste dra ba la sogs pa rang gi sems kyis sprul pa ma yin nam/ des ci ltar bzlog par 'gyur zhe na/bdud ni bdud du byed mi 'gyur/ /zhes bya ba smos te/ bdud ces bya ba ni sngar smos pa rnams so/ /bdud du byed mi 'gyur zhes bya ba ni/ de dag gis 'tshe bar mi 'gyur ba'o/ /'dir dgongs pa ni dra ba la sogs pa sems kyis byas pa de'i tshe bdud kyang sems kyis byas pa yin pas bdud nyid gud na med pa'i phyir ro//ji ltar de dag gis 'tshe bar 'gyur te/ 'tshe ba ni de dag la rag las pa yin la/ bdud rnams med na de dag gis ji ltar 'tshe bar 'gyur snyam pa 'di yin no/ /'on te bdud rnams dang des byas pa'i sdug bsngal nyams su myong bzhin du yang med do zhes bya ba 'di ni shin tu rnam par mi 'ong ngo snyam na/rang gi sems kyis bsdams pa'o/ /zhes bya ba smos te/ de'i tshe nyams su myong ba'i phyir thams cad rang gi sems yin par bsgrub par bya ste/ phyi rol gyi ni rigs pas gnod pa'i phyir/don du mi rung ngo zhes khong nas 'byung bar bya'o/ /des kyang cir 'gyur zhe na/ bsdams pa yin zhes bya ba smos te/ ji ltar bdud la sogs pa sems kyis sprul cing nyams su myong bar yod pa ltar dra ba la sogs pas bcings pa dang / dgra rnams bskrad pa yang nyams su myong bar legs par 'grub par 'gyur ba'o//de nyid bstan pa'i phyir/ rang gi sems ni btul ba na/ /bdud kyis 'tshe bar ga la 'gyur/ /zhes bya ba smos te/ sems btul ba zhes bya ba ni/ rang gi rang bzhin shes pa ste/ rang bzhin shes pas nyon mongs pa rnams thul bar 'gyur la/nyon mongs pa'i zhags pa dang bral na/ /bdud gzhan yang ldog par 'gyur te/ de dag ni de'i rtsa ba can yin pa'i phyir ro/ /'di dag gis ni rang bzhin shes na dra ba la sogs pa med pa ltar bdud kyang med pa yin la/ nyams su myong bar bdud rnams yod pa ltar dra ba la sogs pa yod pas srung ba phun sum tshogs pa legs par gnas pa'o zhes ston te/de ltar yang gsungs pa/ ji ltar chu la chu blugs pa/ /ro gcig tu ni gyur pa bzhin/ /sems nyid skyon yon 'byung gnas pas/ / mi mthun gnyen po gang la yod/ /ces bya'o/ /da ni bsam gtan gyi gnas su maN+Dal gru bzhi pa dri yis byug pa'i rnam par dag pa bstan pa'i phyir/ mnyam nyid ces bya ba la sogs pa gsungs te/ mnyam nyid sems zhes bya ba ni khams gsum pa'i sems dang / sems las byung ba rang bzhin gyis 'od gsal zhing mnyam pa nyid yin te/ sems mnyam pa nyid kyi rnam par dag pa des dri'i dkyil 'khor gru bzhi par byug go zhes bya ba'i don to/ /me tog dgram pa'i rnam par dag pa gsungs pa/ lus la zhes bya ba la sogs pa ste/ gang gi lus la ste'us 'jog pa dang / tsan+dan gyis byug pa dag yod pa de ni/ lus la ste'u 'jog tsan+dan byugs te gnyi ga la chags pa dang sdang ba med par sems snyoms pa de ni sems mnyam par gnas pa'i bzod pa ste/ bzod pa rnam par dag pa des rnal 'byor pas me tog dgram pa'o//bdug spos kyi rnam par dag pa gsungs pa/ mnyam nyid ces bya ba la sogs pa la/ rnam par dag pa rang bzhin dag pa zhes bya ba ni swa b+hA wa shud+d+haH sarba d+harmAH swa b+ha wa shud+d+hou0f85haM zhes bya ba ste/ des mnyam pa nyid du rnam par dag pa'i b dug pas bdugs pa'o//mar me'i rnam par dag pa gsungs pa/ shes rab ces bya ba la sogs pa la/ shes rab mar me zhes bya ba ni/ shes rab rnam par dag pa'i mar me ste/ de spar bar bya zhes bya ba lhag ma yin na/ khams gsum zhes bya ba la sogs pa ni shes rab kyi mar mes khams gsum gyi mun pa bcom nas ji ltar 'dod pa bzhin du de kho na nyid kyi lam gsal bar snang bar byed de/rnam par dag pa de dang sbyar ro zhes bya bar dgongs so/ /de dag gis ni bsam gtan rtsom pa na rnam par dag pa 'di dag gis sngon du dag par bya'o zhes bya bar ston te/bdag gis sgrub thabs kyi nang du gsal bar bshad zin to/ /gzhung nye bar bsdu ba bstan pa'i phyir sems kyis zhes bya ba la sogs pa smos te/ mi 'jigs pa'i sbyin pa la sogs pa de dag gis sems can thams cad bde ba la dgod par bya zhing mchod pa'i dus dang /gtor ma'i dus su rnam par dag pa de dag rab tu sbyar ro zhes bya ba'i don to/ /bsam gtan rtsom pa'i gnas phun sum tshogs pa gsungs pa/ yid du 'ong ba zhes bya ba la sogs pa ste go sla'o/ /de dag gis ni bsam gtan rtsom pa thams cad kyi thun mong gi bya ba bstan to//da ni gnyis su med pa'i rnal 'byor gyi rang bzhin lhan cig skyes pa'i ye shes bskyed par bya ba'i phyir thabs dang shes rab kyi sbyor ba gsungs pa/ bdag gi nyid ces bya ba la sogs pa la/bdag ces bya ba ni sgrub pa po'i rang gi lus so/ /rdo rje bskyed nas su zhes bya ba ni rdo rje las byung ba'i rdo rje sems dpar bskyed par bya ba ste/ sngar bstan pa'i gnas su 'dug nas rdo rje thal mo snying gar bcings te/ dag pa rnam gsum brjod nas stong pa nyid bsgoms la/ ri rab kyi rtse mo'i grong khyer du seng ge dang zla ba'i stan la bdag nyid hUM las byung ba'i rdo rjes bskyed par bya'o/ /shes rab dril bu zhes byar sprul/ /zhes bya ba la/ shes rab ni bu mo'o/ /dril bu zhes byar sprul zhes bya ba ni/ a las byung ba'i dril bu shes rab kyi pha rol tu phyin par bsgom mo//bar du khru gang bzhag nas ni/ /zhes bya ba la/ bar zhes bya ba ni bdag dang shes rab kyi bar du ste/ bdag gi mdun du khru gang tsam gyis bar chod par shes par bsgom par bya'o/ /mnyam nyid blta bas gnas par bya/ /zhes bya ba ni bdag dang shes rab gnyis phan tshun thad kar gnas pa la gcig la gcig gdong bltas pa'o//de nyid rgyas par bshad pa'i phyir/ /snying gar hUM ni bsgom byas la/ /zhes bya ba smos te/ snying gar hUM ni bsgom byas la/ /zhes bya ba ni mchod pa dang gsum la skyabs su 'gro ba la sogs pa byas pa'i 'og tu snying gar zla ba'i dkyil 'khor la yi ge hUM bsgom pa'o//de nas ci zhig bya zhe na/ thams cad rig pas kun stong zhes bya ba smos te/ hUM gi me lce'i 'od kyis reg pa tsam gyis khams gsum po ma lus pa rnams stong pa nyid du bsgom pa'o/ /de nyid bstan pa'i phyir khams gsum zhes bya ba smos te go sla'o//sngon bzhin zhes bya ba ni/ phung po la sogs pa stong pa nyid du sngar bstan pa'i tshul dran par byed pa'o/ /gzhal yas khang bstan par bya ba'i phyir/ mnyam nyid ces bya ba la sogs pa smos te/ pho brang zhes bya ba la sogs pa ni/gzhal yas khang ngo / /yangs pa ci 'dod par zhes pa ni rgya khyon ji snyed 'dod par ro/ /sngar zla ba'i dkyil 'khor gyi steng du bsgoms pa'i hUM las byung ba'i rdo rje'i mtshan nyid bstan par bya ba'i phyir/ lha ni zhes bya ba la sogs pa smos te/ 'di'i don ni rim par phye ba sngar thal ba las bstan pa'i lha nyi shu rtsa brgyad kyis byin gyis brlabs pa'i rdo rjer bsgom mo zhes bya ba 'di yin no//'od zer sna tshogs 'bar ba yi/ /zhes bya ba la sogs pas ni rdo rje'i sa bon hUM gi khyad par ston pa yin te/ 'dis kyang seng ge dang zla ba'i steng na gnas pa'i sa bon hUM gi thig le las 'od zer sna tshogs spros nas khams gsum pa la reg ste/slar de nyid du bsdus la rdo rjer bsgom par bya bar ston to/ /rdo rje sems dpa'i rang bzhin du/ /bdag gi lus ni sprul bar bya/ /zhes bya ba ni sa bon hUM gi lte bar mtshon cing lha nyi shu rtsa brgyad kyis byin gyis brlabs pa'i rdo rje yongs su gyur pa las bdag nyid rdo rje sems dpar bskyed pa'o//sku mdog la sogs pa ni 'og nas bshad par bya'o/ /yan lag brgyad kyi cho ga gsungs pa/ yi ge'i dgod pas bkod nas su/ / mkhas pas cho ga byas nas hUM/ /zhes bya ba la mkhas pa ni gnas dang sngags kyi dbye ba la mkhas pa ste/ rkan dang mig gnyis dang mgrin pa dang phrag pa gnyis dang lte ba dang gsang ba'i gnas su yi ge hUM dkar po bsgom pa'o/ /sangs rgyas lnga'i zhes bya ba la sogs pas ni/sa bon hUM gi kha dog bstan pa ste/ rdo rje sems dpa'i sku ni ma yin no/ /de'i kha dog ni 'og nas mi mthun par snang ba'i phyir ro/ /sangs rgyas lnga yis brgyan pa zhes bya ba ni yi ge hUM gi mtshan nyid do/ /yang na rdo rje sems dpa'i dbu la rigs lngas brgyan pa'o//phyag rgya chen po'i snying gar bcas/ /zhes bya ba ni/ rdo rje dang dril bu bsnams pa'i phyag rgya gnyis snying gar 'khyud pa'i tshul du byed pa'o/ /go 'phang mchog ni bsgom par bya/ /zhes bya ba la/ mchog ni bdag dang gzhan gyi don phun sum tshogs pa'o/ /go 'phang ni gsang gnas te de'i rten no//de nyid kyi phyir/ 'od zer sna tshogs 'bar ba las/ /zhes bya ba la sogs pa smos te go sla'o/ /dngos po bsgom pa bsgoms nas su/ /zhes bya ba ni/ bsgom pa shin tu goms pa'o/ /bzlas pa bstan pa'i phyir/hUM gi sgra yis dgang bar bya/ /zhes bya ba smos te/ hUM zhes bya ba'i sngags oM swA hA zhes bya ba dang spel nas tshig tu bzlas pa'o/ /ji snyed du bzlas par bya zhe na/ rang nyid ji ltar 'dod sems kyis/ /zhes bya ba smos te/ ji tsam nus par ro/ /de nyid bstan pa'i phyir/ye shes sa bon bzlas par bya/ /zhes bya ba smos so/ /kha dog bstan pa'i phyir/ btso ma'i gser ltar shin tu 'bar/ /sems can kun gyi don la chags/ /zhes bya ba smos te/ sems can kun zhes bya ba ni/ 'dir shes rab po/ / don ni bde ba'o/ /chags pa ni de la zhen pa'o/ /yang na thugs rje chen pos sems can thams cad kyi don mi 'dod pa spong ba dang / 'dod pa sgrub pa la chags pa ste/ des bcom ldan 'das chos kyi dbyings rnam par dag pa dung dang zla ba ltar dkar ba yin kyang chags pa dang 'dres pa'i phyir/btso ma gser ltar ser por snang ba yin no/ /da ni shes rab bskyed par bya ba gsungs pa/ de nas zhes bya ba la sogs pa la/ de nas stong pa'i mtshan nyid ni/ /sngar gyi mtshan nyid bdag nyid can/ /zhes bya ba ni bsgoms la zhes bya ba dang sbyar te/bdag dang gzhan gyi rgyud thams cad sngar bstan pa'i tshul gyis stong pa nyid du bsgoms nas lha mo bskyed par bya'o/ /de nyid gsungs pa/ zla ba'i dkyil 'khor zhes bya ba la sogs pa la/ sngar gyi mtshan nyid kun rig pas/ / nyi shu rtsa gsum lha rnams kyis/ /dril bu'i bdag nyid bsgom par bya/ /zhes bya ba ni/ zla ba'i dkyil 'khor gyi steng du sa bon AH las byung ba'i dril bu sa bon AH sa mtshan cing lha nyi shu rtsa gsum gyis byin gyis brlabs par bsgoms la/ lha mor bskyed par bya'o/ / lha mo'i khyad par gsungs pa/ 'od zer sna tshogs zhes bya ba la sogs pa la/ kha dog cung zad 'dres pa'i sku/ /zhes bya ba ni/ dkar po dang / dmar po 'dres pas bcom ldan 'das dang 'dra bar ser por snang ba'o/ /sangs rgyas lnga yis mngon par brgyan//zhes bya ba ni sangs rgyas lngas dbu la brgyan pa'o/ /yi ge brgyad kyi sngags rnams ni/ /yan lag brgyad du dgod par bya/ /zhes bya ba ni go cha bstan pa ste go sla'o/ /phyag gnyis phyag rgya chen po ste/ /go 'phang mchog ni bsgom par bya/ /zhes bya ba ni bcom ldan 'das kyi skabs su bshad pa ltar blta'o//A li kA li las byung ba'i/ /de yi sa bon bzlas par bya/ /zhes bya ba la/ de'i sa bon zhes bya ba ni yi ge a ste/ de yang thabs dang shes rab kyi rang bzhin yin pa'i phyir/ A li kA li las byung ba'o/ / yang na A li ni a'o/ /kA li ni ra'o/ /'byung ba ni btu ba ste/ sngar bstan pa'i sngags btu ba dran par byed pa'o/ /bzlas par bya zhes bya ba ni/ sngar bstan pa ltar/ oM AHswA hA zhes ci nus su bzlas pa'o/ /'dod chags sems kyi stobs kyis ni/ /btso ma gser gyi 'od dang bcas//zhes bya ba ni/ rgyu mtshan dang bcas pa'i kha dog bstan pa ste sngar bshad zin to/ /sems can bsgral phyir kun du 'khyud/ /nu ma 'khyud cing zhal gnyis 'jib/ /ces bya ba ni thabs dang shes rab gnyis ka'i sems can sgrol ba'i phrin las rnam par dag pa ston pa'o//rdo rje rtse mo zhes bya ba la sogs pas ni/ rim par phye ba snga ma las/ khro bo sor mo'i rtse mor ni/ /bdud rtsi'i yi ge bsam par bya/ /zhes bstan pa nye bar bshad pa'o/ /de nas ci zhig bya zhe na/ lha mo'i g.yon gyi cha ru ni/ /bstan pa'i rtse mor gzung bar bya//zhes bya ba smos te/ g.yon gyi cha ru bstan pa zhes bya ba ni khA ga mu kha'i rtsa'o/ /rtse mo zhes bya ba ni lcags kyu'i yi ge dang bcas pa'i sgo'o/ /gzung ba ni drud pa ste/ de nyid kyi phyir/ mdzub mo 'di yis bskyod pa yis/ /zhes bya ba smos te/ bdud rtsi chu zhes bya ba ni khu ba'o//lhag ma ni brda phrad par zad do/ /da ni bu mo de'i chags pa bskyod pa bstan pa'i phyir/ /gnyis kyis kun sprod btang nas su/ /zhes bya ba ni thabs dang shes rab kyi snyoms par 'jug pa'i gnas skabs yongs su bor ba'o/ /shar gyi phyogs su bskyod ces bya ba ni shar gyi phyogs su ka ra na bya ba'o//shar gyi phyogs su bltas nas su/ /zhes bya ba ni/ shes rab kyi kha shar du bstan pa ste/ shar gyi phyogs na gnas pa'i sems can rnams gdon zhing sbyang ba'i phyir shes rab kyi kha shar du bstan pa la/ shar du ka ra na bya ba'o/ / ka ra na gsungs pa/ rol pa'i stabs zhes bya ba la sogs pa la/ rol pa'i stabs zhes bya ba ni lha mo'i rkang pa g.yon pa chung zad bskum pa'o/ /rdo rje rkang pa'i stabs kyis mnan/ /zhes bya ba la/ rdo rje zhes bya ba ni rdo rje sems dpa' ste/ rdo rje sems dpa'i rkang pa g.yas pas lha mo'i rkang pa g.yon pa'i mthil gnon pa'o//'dir lha mo zhes bya ba ni/ lha mo'i rkang pa g.yon pa'i mthil du blta bar bya'o/ /dril bu g.yon gyi brlar brten la/ /zhes bya ba la/ g.yon pa'i brla zhes bya ba ni rdo rje zhes bya bar bsnyeg ste/ rdo rje sems dpa'i brla g.yon pa lha mo'i brla g.yas pa'i steng du bton pa'o//nu ma lag pa gnyis kyis gzer/ /zhes bya ba ni shes rab kyi nu ma gnyis rdo rje sems dpa'i lag pa gnyis kyis gzung ba'o/ /sgeg cing bzhad pa'i bzhin can te/ /zhes bya ba ni bzhad pa dang bcas pa'i sgeg pa'i bya ba byed pa'o/ /'og ma rnon pos btsir bar bya//zhes bya ba la/ 'og ma zhes bya ba ni ma mchu'o/ /rnon po ni so ste/ sos mchu btsir ba'o/ /de dag ni rdo rje sems dpa'i bya ba'o/ /shes rab kyis gsungs pa/ dril bu lag gnyis gsang bar sbyor/ /zhes bya ba la/ gsang ba zhes bya ba ni mgrin pa la bya bar man ngag las byung ste/shes rab kyi lag pa gnyis kyis rdo rje sems dpa'i mgrin par 'khyud pa'o/ /de bzhin sa bon gnyis med bzla/ /zhes bya ba la/ sa bon ni shes rab kyi snying po AHdang / thabs kyi snying po hUM ste/ de gnyis bzla ba'o/ /gnyis med ces bya ba ni thabs dang shes rab gnyis su med pa'i snying po ste/bsgom zhes bya ba lhag ma yin no/ /bskyod ces bya ba ni ka ra na'o/ /ci'i phyir zhe na/ shar phyogs zhes bya ba la sogs pa smos te/ de ltar na bskyod ces bya bas ni lus kyi las bstan to/ /sa bon bzlas zhes bya bas ni ngag gi las bstan to/ /gnyis med bsgom zhes bya bas ni sems kyi las bstan te/de ltar phrin las gsum mnyam par sbyor bas/ shar phyogs kyi sems can bsgral bar bya'o zhes bya bar dgongs so/ /da ni lho phyogs na gnas pa'i sems can bsgral ba'i phyir/ lha mo zhes bya ba la sogs pa gsungs te/ lho ru kha ni blta bar bya//zhes bya ba ni shes rab kyi kha lhor bstan pa ste/ rnal 'byor ma'i rgyud 'di la/ shes rab gtso bo yin pa'i phyir dang / dga' ba'i yul yin pa'i phyir kha blta ba rnams ni shes rab kyi yin par blta'o/ /lha mo'i g.yon pa bskyod nas su/ /zhes bya ba ni lha mo'i rkang pa g.yon pa brkyang ste/g.yas pa chung zad bskum pa'o/ /rdo rje yang ni bskyod nas su/ /zhes bya ba ni/ rdo rje sems dpa'i rkang pa g.yas pa brkyang ste g.yon pa chung zad bskum pa'o/ /rkang mthil gnyis ni de bzhin gzir/ /zhes bya ba ni thabs dang shes rab kyi g.yas g.yon gnyis kyis so sor phan tshun du rkang mthil btsir ba'o//dril bu'i lag pa gnyis kyis ni/ /rked pa bsdams te gzir bar bya/ /zhes bya ba ni/ shes rab kyi lag pa gnyis kyis/ thabs kyi mkhal ngos gnyis bsdams nas btsir ba'o/ /rdo rje g.yas kyi nu ma dang / /de bzhin gsang bar btsir bar bya//zhes bya ba ni rdo rje sems dpa'i lag pa g.yon pas/ gsang ba ste shes rab kyi mgrin pa nas gzung bar byas la/ lag pa g.yas pas nu ma nas bzung ba'o/ /rdo rje dril bu'i lus dag ni/ /yang dang yang du sprad par bya/ /zhes bya ba ni/ shes rab dang thabs gnyis phan tshun chags pa bskyed par bya ba'i phyir yang dang yang du 'o gdab pa'o//sa bon gnyis ni bzlas pa yis/ /lho phyogs sems can sgrol bar 'gyur/ /zhes bya ba ni/ sngar smos pa ltar bsgom pa dang bcas pa'i ka ra na dang bzlas pas lho phyogs na gnas pa'i sems can rnams bsgral bar bya ba'o//nub phyogs kyi ka ra na bstan pa'i phyir/ nub phyogs zhes bya ba la sogs pa smos te/ lha mo nub tu blta bar bya/ /zhes bya ba ni go sla'o/ /nub phyogs zhes bya ba ni/ nub kyi sems can bsgral ba'i phyir/ /zhes bya bar sbyar ro//mnyam pa'i rkang stabs ces bya ba ni lha mo'i rkang pa gnyis kyi bar du khru gang tsam yod pa gzhag pa'o/ /rdo rje yi ni gzhogs gcig gis/ /g.yas kyi brla ni mnan par bya/ /zhes bya ba la/ rdo rje ni rdo rje sems dpa'o/ /gzhogs gcig ni gzhogs gcig na gnas pa'o//g.yas kyi brla zhes bya ba ni/ lha mo'i g.yas kyi brla ste/ de thabs kyi lag pa g.yon pas mnan pa'o/ /mgrin pa rgyab nas gnyis 'khyud de/ /zhes bya ba ni/ thabs kyi lag pa g.yas pa pus mo la brten pas shes rab kyi mgrin pa nas 'khyud cing shes rab kyi gnyis kyis thabs kyi rked pa nas 'khyud pa'o//dril bu'i lce ni bsgril nas su/ /rdo rje'i lce la reg par bya/ /zhes bya ba ni 'o bya ba'i dus su shes rab kyi lces thabs kyi lce la reg cing bsgul ba'o/ /de bzhin sbyar nas gnyi ga bzlas//zhes bya ba la/ de bzhin zhes bya ba ni bsgom pa la bsnyeg par bya'o/ /sbyar zhes bya ba ni ka ra na'o/ /gnyi ga bzla zhes bya ba ni sngags bzlas pa ste las rnam pa gsum mo/ /da ni byang phyogs la gnas pa'i sems can rnams sgrol ba'i don gyi ka ra na bstan pa'i phyir/rdo rje zhes bya ba la sogs pa smos te/ rdo rje zhes bya ba ni rdo rje sems dpa'o/ /dbus zhes bya ba ni ltag 'og gi tshig gnyis dang sbyar te/ shes rab kyi lag pa gnyis kyi dbus su rdo rje sems dpa' mnyam par 'dug la/ shes rab kyi rked pa'i dbus nas rdo rje sems dpa'i lag pa gnyis kyis bsdams pa'o//dril bu'i lag pa gnyis kyis kyang / /rna ba'i drung bar gzugs par bya/ /zhes bya ba ni/ shes rab kyi lag pa gnyis kyis thabs kyi rna ba'i rtsa ba gnyis su sen mo btab pa ste/ des ni khu ba cung zad gnas par 'gyur ro//gnyi ga'i mchu ni kun sbyar nas/ /de yi bdud rtsi btung bar bya/ /zhes bya ba ni 'o byed pa'i dus su/ phan tshun gnyi ga'i mchu sbyar nas/ /phan tshun gzhibs pas steng gi bdud rtsi btung ba'am/ yang ni phan tshun mchu sbyar bas bdud rtsi ste byang chub kyi sems phab la/de'i bde ba'i ro myang ba'o/ /snga ma bzhin du sngags bzlas pa bstan pa'i phyir/ rnal 'byor pa yis zhes bya ba la sogs pa smos te/ rdo rje dril bus rol par bya/ /zhes bya ba ni thabs dang shes rab kyi bsgom pa dang / ka ra na bstan pa yin no/ / de ltar las rnam pa gsum las byung ba'i dge ba gang yin pa des sems can thams cad bde ba la dgod pa'i bsngo ba bstan pa'i phyir/ sems can thams cad ces bya ba la sogs pa smos te/ gang gi lam nas 'gro ba yi/ /sangs rgyas nyid du 'grub gyur cig /ces bya ba ni bde ba dang ldan zhing 'tshe ba med pa'i sems kyi de kho na nyid kyi lam nas song bas sangs rgyas nyid thob par gyur cig pa ste/kye sems can rnams sangs rgyas nyid du 'grub par 'gyur ba'i sems kyi de kho na nyid kyi lam nyams su long shig ces bya ba'i bar du'o/ /thabs dang shes rab snyoms par 'jug pa'i dus su skad cig ma'i tshul gyis lha'i rnal 'byor bya ba bstan pa'i phyir/skad cig tshul gyis rnal 'byor dang / /zhes bya ba la sogs pa smos te/ dril bu lha ru sbyor ba yis/ /zhes bya ba ni bdag nyid rdo rje sems dpa'i lhar sbyor ba dang / shes rab dril bu'i lha mor sbyor ba dag skad cig ma'i tshul gyis rnal 'byor gyis bskyed pa dang /skad cig ma'i tshul gyis sngags dang phyag rgya dang ldan par shes pa dang / thabs kyi cho ga la mkhas pa'i rnal 'byor pas bsgom zhing bsam par bya ba'o/ /bdag gi lus dang shes rab kyi lus gnyi ga la rnal 'byor ma'i rang bzhin gyi go cha dgod par bstan pa'i phyir/yi ge zhes bya ba la sogs pa smos te/ gnas rnams kun zhes bya ba ni rkan la sogs pa'i gnas rnams su'o/ /lha nyid de zhes bya ba ni lha mo brgyad kyi rang bzhin yin pa'i phyir ro/ /rang lus zhes bya ba ni rang gi lus rnams la'o//lha mo zhes bya ba ni lha mo'i lus la'o/ /bsam pa zhes bya ba ni go cha dgod pa'i sgo nas sems kyi de kho na nyid bsgom pa'o/ /slar yang de nyid rab tu bya/ /zhes bya ba ni go cha de nyid yang dang yang du dran par bya ba'o/ /yang na chags pa dang bral ba rnams go cha bskon pa'i mthar yang dang yang du chags pa bskyed par bya ba'o//de nyid bstan pa'i phyir/ rang gis zhes bya ba la sogs pa smos te/ rang gis zhes bya ba ni shes rab kyis so/ /rjes su chags pa ni 'khyud pa la sogs pa'o/ /de nas zhes bya ba ni de'i 'og tu'o//rdo rje zhes bya ba ni rdo rje sems dpas so/ /de nas bdag nyid rdo rje ru/ /ka ra nar bcas bsam par bya/ /zhes bya ba ni ka ra na dang bcas pa'i gnyis su med pa'i bsgom pa bstan pa'o/ /de nyid kyi phyir/ rdo rje zhes bya ba la sogs pa smose te go sla'o/ /yang na 'di dag gis ni bzlog pa'i bya ba bstan te/de nas zhes bya ba ni ka ra na'i gnas skabs kyi mthar ro/ /rdo rje zhes bya ba ni rdo rje sems dpa'o/ /rang zhes bya ba ni rang gis te rdo rje sems dpa'i rang gis 'khyud pa la sogs pa bya ba'o/ /nam zhe na/ rjes su chags pa'i sems zhes bya ba smos te/tsit+ta na zhes bya ba la/ tsit+ta ni sems so/ /na ni dgag pa ste chags pa'i sems med pa'o/ /des 'di skad gang gi tshe ka ra na'i mthar shes rab rjes su chags pa'i sems dang bral ba de'i tshe/ rang nyid kyis 'khyud pa bya ba ston to/ /de nas zhes bya ba ni 'og tu'o//bdag nyid rdo rje ni rdo rje sems dpa'o/ /ka ra bcas bsam par bya/ /zhes bya ba la ka ra ni go sla'o/ /bsam pa ni sems pa'o/ /bya ba ni sems pa dang rjes su mthun pa'i bya ba ste de'i tshe bzlog ste/ 'og tu gnas nas bud med du bya ba la 'jug pa'o//de nyid bstan pa'i phyir/ rdo rje yi zhes bya ba la sogs pa smos te/ rdo rje sems dpa'i nga rgyal tsam la gnas pa yin gyis bya ba la ni ma yin no zhes bya ba'i don to/ /de ltar ka ra na bzhi bstan nas/ da ni khwa ga mu kha'i rtsa'i rang bzhin bstan pa'i phyir/ chu las byung ba zhes bya ba la sogs pa smos te/chu las byung ba'i me tog ces bya ba ni pad+ma ste chos 'byung ngo / /de ci zhig bya zhe na/ gsang ba'i nang gi mtshan nyid las/ /zhes bya ba smos te/ chos 'byung ba de'i mtshan ma'i nang gi gsang ba'i mtshan nyid de khA ga mu kha'i rtsa nyid do/ /de ci 'dra zhe na/rtsa ba myu gu me tog ste/ /ban+du ka ni rgyas pa 'dra/ /zhes bya ba la/ ji ltar myu gu dang me tog gi rtsa ba 'dra bar rtsa thams cad kyi myu gu dang / bde ba'i 'bras bu dang bcas pa'i me tog gi gnas su gyur bas rtsa ste khA ga mu kha'o/ /yang na ming dang gzugs kyi myu gu dang /skye mched drug gi me tog la sogs pa'i gnas su gyur pas na rtsa ba'o/ /da ni sngar bstan pa'i go cha'i gnas bstan pa'i sgo nas gsal bar bya ba'i phyir thong ka gnyis su zhes bya ba la sogs pa smos te/ thong ka gnyis kyi sa bon rnams/ /zhes bya ba la/ thong ka gnyis zhes bya ba ni phrag pa gnyis so//sa bon rnams zhes bya ba ni mang po'i tshig ste/ dgod par bya ba'i sa bon mang po nyid kyis na/ brtsegs pa'i yi ge dgod pa'i gnas kyang mgrin pa dang / snying ga dang lte ba'i rtsa ba'i bar du gzung bar ston pa yin gyi brtsegs pa'i yi ge tsam la mang por brjod pa ni ma yin no//de la phrag pa gnyis su ni h+m+r+yuM ni rna ba dang /sna dag la'o/ /'og ces bya ba ni lce ste/ 'og na gnas pa'i phyir ro/ /chu'i rang bzhin zhes bya ba ni der yi ge suM dgod pa'o/ /myu gu zhes bya ba ni myu gu lta bu ste/ steng na gnas pa'i rkan gyi nu ma'o/ /mo'i sa bon ni yi ge k+ShuM ngo / /da ni lha mo bskyed pa'i sa bon nyid pad+ma'i nang du dgod par bstan pa'i phyir/sde tshan zhes bya ba la sogs pa smos te/ 'di dag gi don ni yi ge as lha mo'i gzugs bskyed par ston te/ sngar bstan pa dran par byed pa yin no/ /de ltar dran par byas nas mtshams sbyar ba'i 'og tu ci bya ba bstan pa'i phyir//sa yi nang du thim par bya/ /zhes bya ba smos te de las zhes bya ba ni chos 'byung ba ste bde ba chen po'i gnas su bcu gnyis kyi rang bzhin yin pa'i phyir ro/ /thim pa ni dgod pa'o/ /de nas ci zhig bya zhe na/ dus me zhes bya ba la sogs pa smos te/de la dus kyi me zhes bya ba ni g.yas pa'o/ /yi dwags kyi me zhes bya ba ni g.yon pa ste/ dang por thabs kyi g.yas pas shes rab la 'khyud nas de'i 'og tu g.yon pas 'khyud par bya ba'o/ /shes rab kyis bzlog ste 'khyud pa bstan pa'i phyir/yi dwags zhes bya ba la sogs pa smos te/ shes rab kyi dang por g.yon pas thabs la 'khyud nas de'i 'og tu g.yas pa 'khyud pa'o/ /de ltar na de dag gis ni thabs kyi ni g.yas pa gtso la/ shes rab kyi ni g.yon pa gtso bor ston to/ /lag pa gnyis kyis kha sbyar ba//zhes bya ba ni bsrub pa ste/ de ltar lag pa gnyis 'khyud pa'o/ /ci 'dra bas she na/ mthe'u chung zhes bya ba la sogs pa smos te/ mthe'u chung mthe bos mnan nas su/ /zhes bya ba ni/ lag pa gnyis kyi mthe bo gnyis kyis mthe'u chung gnyis kyi tshigs gsum pa mnan pa'o//gsum pa rdo rje rtse mor brkyang / /zhes bya ba ni sor mo lhag ma gsum bsgreng ba'o/ /rdo rje zhes bya ba ni rdo rje rtse gsum gyi rnam pa ste/ rdo rje rtse gsum pa'i phyag rgya des bsdams pa'o/ /des gang du bsdam zhe na/ phyag rgya gnyis kyi glor btsugs nas//zhes bya ba smos te/ phyag rgya gnyis zhes bya ba ni g.yas pa dang g.yon pa'i rdo rje rtse gsum pa'i phyag rgya gnyis so/ /glor btsugs nas zhes bya ba ni phan tshun du thabs dang shes rab kyi rked pa ngos gnyis su bsdams pa'o/ /bdud rtsi bza' ba sems pa yis//rnon pos 'og ma btsir bar bya/ /zhes bya ba la sems pa zhes bya ba rnal 'byor pa'o/ /'og ma zhes bya ba ni mchu ste/ sbrang rtsi lta bu'i bdud rtsi'i gnas su gyur pa'i phyir ro/ /bza' zhes bya ba ni btung zhing myang ba ste bshad zin to/ /bcu dang brgyad kyi lam dag nas//dril bu'i bdud rtsi bskul bar bya/ /zhes bya ba ni gnas bco brgyad nas shes rab kyi khu ba phab pa ste/ sngar bstan pa dran par byed pa yin no/ /g.yon gyi cha na ban+du ka/ /zhes bya ba la/ g.yon gyi cha zhes bya ba ni chos 'byung ba'i g.yon phyogs so/ / ban+du ka zhes bya ba ni me tog gi ban+du ka lta bu ste/ khwa ga mu kha'i rtsa'o/ /ci 'dra zhe na chu 'dzag pa'i cha byad ces bya ba la sogs pa smos te/ chu 'dzag pa ni khu ba 'dzag pa'o/ /cha byad ni gsal bar byed pa'o/ /chu 'dzag bya mchu'i dbyibs lta bu/ /zhes bya ba la/ bya mchu zhes bya ba ni bya rnams kyi gdong pa ste/de'i dbyibs lta bu'o/ /der ni phyag rgya bskul bar bya/ /zhes bya ba la/ der zhes bya ba ni lcags kyu'i sa bon bkod pa'i rtsa der ro/ /phyag rgya zhes bya ba ni bdud rtsi'i yi ge bkod pa'i mdzub mo'o/ /yang na shin tu chags pa sra ba la glang po che'i sna'i lag gi phyag rgyas bskul ba'o//rdo rje g.yas kyi chu dag ni/ /zhes bya ba la/ chu zhes bya ba ni chu skyes te pad+ma'o/ /g.yas zhes bya ba ni g.yas ngos te/ g.yon pa yang gzung bar bya ba'o/ /'dis ni rdo rje'i g.yas kyi chas drud par bya la/ pad+ma'i ni g.yon gyis brud par bya bar ston to/ /de nyid kyi phyir/rang bzhin mnyam pa'i tshul du bya/ /zhes bya ba smos te/ phan tshun mtshungs par drud pa'o/ /thong ka la sogs gnas kun du/ /de nas sor mo gdab par bya/ /zhes bya ba la/ thong ka zhes bya ba ni nu ma gnyis so/ /gnas kun zhes bya ba ni de la sogs pa'i gnas bco brgyad po rnams so//sor mo gdab ces bya ba ni mdzub mo brud pa ste/ yan lag mchog la sogs pa'i gnas rnams su sor mos brud pas khu ba 'dzag par 'gyur ro zhes bya bar dgongs so/ /de nas rdo rje rtse mo ni/ /phyag rgya glo ru sbyar nas su/ /zhes bya ba la/ de nas zhes bya ba ni de'i phyir te/byang chub kyi sems bskul ba'i phyir ro/ /rdo rje rtse mo zhes bya ba la sogs pa ni sngar 'khyud pa'i skabs su bshad zin to/ /phan tshun brud pa gsal bar bstan pa'i phyir/ gnyi ga kun du sbyor ba yis/ /rdo rje pad+mo bskul bar bya/ /zhes bya ba smos te/ thabs dang shes rab gnyi ga'i rdo rje dang pad+ma'i g.yas dang g.yon gyi cha phan tshun du sbyar nas bskul ba ste brud par bya'o zhes bya ba'i don to//bzlas pa dran par bya ba'i phyir/ hUM gi zhes bya ba la sogs pa smos te/ ye shes kyi sa bon hUM bzlas pas/ rang gi lus kyi lha rnams bde bas tshim par bya'o zhes bya ba'i don to//dril bu'i bzlas pa bstan pa'i phyir/ dril bu ni zhes bya ba la sogs pa smos te go sla'o/ /ye shes sa bon rdo rje rtse/ /bdag nyid lha ni bsam par bya/ /zhes bya ba la/ ye shes kyi sa bon ni yi ge hUM ngo / /rdo rje rtse zhes bya ba ni rdo rje'i rtse mor te bsam mo zhes bya ba ni lhag ma yin no//'dis ni mnyam par sbyor ba'i dus su rdo rje'i rtse mor hUM bsgoms nas bdag gi lus tshim par bya'o zhes bya bar ston to/ /nye bar mtshon pa 'dis pad+ma la ni yi ge a dgod par shes par bya'o/ /rdo rje dril bu lus yin te/ /phyag rgya kha sbyor sbyar bar bya//zhes bya ba la/ rdo rje zhes bya ba ni rdo rje sems dpa'o/ /phyag rgya ni de dag gnyis kyi lus kha sbyor ba'o/ /de kho na nyid 'di rtogs pas phyi rol gyi rdo rje dang dril bu yang gzung bar bstan pa'i phyir/ rdo rje dril bu zhes bya ba la sogs pa smos te/ phyi rol gyi rdo rje dril bu'i phyag rgya yang rnam par dag pa 'dis rnal 'byor pas gzung ngo zhes bya ba'i don to//rdo rje de kho nas bskyod la/ /zhes bya ba ni/ hUM gi de kho na nyid bzlas nas rdo rjes brud par bya'o/ /dril bu rang dgar dkrol bar bya/ /zhes bya ba ni/ /de bzhin du shes rab kyis kyang yi ge a brjod nas pad+mas rdo rje brud par bya zhing gzhib par bya ba'o//rdo rje dril bu rab sbyor te/ /phyag rgya de nyid sbyor ba yin/ /zhes bya ba la sogs pa ni rdo rje dang dril bu mnyam par sbyor ba'i don dam pa'i ye shes kyis bdag nyid mnyes par byas pas lus la gnas pa'i lha thams cad tshim par 'gyur ro zhes bya ba ston to//gnyi ga yi ni bdag nyid sems/ /zhes bya ba ni gnyi ga sbyor ba la sogs pa'i byang chub kyi sems te/ gnyi ga las skyes pa'i khu ba'o/ /chu de byin gyis brlab par bya/ /zhes bya ba la/ chu ni khu ba'o/ /byin gyis brlab pa ni bza' ba ste/ gnyi gas gnyi ga'i khu ba bza' ba'o//sngar shes rab gtso bor gyur pa'i ka ra na bstan nas/ da ni thabs gtso bor gyur pa'i ka ra na bstan pa'i phyir/ sgeg cing zhes bya ba la sogs pa smos te/ bskyod pa'i zhes bya ba ni ka ra na'o/ /sgeg pa zhes bya ba ni bdag nyid gtso bor gyur pas 'gying ba dang bcas pa'o//bde ba'i stan la 'dug nas ni/ /zhes bya ba ni sgra ji bzhin no/ /gzhan dag ni rdo rje sems dpar bsgom mo zhes zer ro/ /de nas ci zhig bya zhe na/ rdo rje rol pa'i rkang pa ste/ /dril bu g.yon gyis brla yis rol/ /zhes bya ba smos te/rdo rje sems dpa'i rkang pa g.yon pa brkyang la/ g.yas pa cung zad bskum pa'i rol pa'i stabs la gnas pa dang / shes rab kyi g.yas brkyang la/ g.yon bskum pa'i stabs la gnas pa'o/ /lag g.yon 'khyud cing nu ma bzung / /zhes bya ba ni rdo rje sems dpa'i lag pa g.yon pas shes rab la 'khyud nas nu ma g.yon pa 'dzin pa'o//g.yas kyis rdo rje gsor bar bya/ /zhes bya ba ni lag pa g.yas kyis thabs kyi rdo rje pad+mor gzhug pa'o/ /yang dang yang du sprad par bya/ /zhes bya ba ni skad cig skad cig cing 'o gdab pa'o//bzhad cing zhes bya ba la sogs pa ni go sla'o/ /ka ra na gzhan gnyis pa bstan pa'i phyir/ dril bu zhes bya ba la sogs pa smos te/ dril bu bskyod pa'i tshul gyis ni/ /zhes bya ba ni thabs dang shes rab gnyis kyis rol pa'i stabs snga ma las go bzlog pa'o//brla yi stan la 'dug nas su/ /zhes bya ba ni thabs kyi brla g.yon pa'i steng du shes rab gzhag pa'o/ /rkang pa g.yas pas dkris nas ni/ /dku yi gnas su gzhag par bya/ /zhes bya ba ni thabs kyi rkang pa g.yas shes rab kyi rked pa la dkri [ ba'o//mgrin par gcig gis 'khyud nas ni/ /zhes bya ba ni/ thabs kyi lag pa g.yas pas shes rab kyi mgul pa 'khyud pa'o/ /g.yon pas dril bu gsil bar bya/ /zhes pa ni lag pa g.yon pas shes rab kyi pad+ma dbye ba'o/ /yang na bsgul zhing brud pa'o//lhag ma ni go sla'o/ /ka ra na gnyis dngos su smos pa 'dis lhag ma yang don gyis shes par bya'o/ /de nas rdo rje glu blang zhing / /sna tshogs hUM zhes bya bar 'dod/ /ces bya ba la/ de nas zhes bya ba ni ka ra na'i mthar ro/ /rdo rje glu zhes bya ba la/rdo rje ni gnyis su med pa'i gsang ba'o/ /de dang ldan pa'i glu ni rdo rje'i glu ste/ 'khor ba stong pa zhes bya ba la sogs pa'o/ /sna tshogs hUM zhes bya bar 'dod/ /ces bya ba ni glu'i tshig re re'i mthar te na hUM zhes bya ba la sogs pa gdon par bya'o/ /bdud rtsi'i chu ni bzung nas su//slar yang glu ni blang bar bya/ /zhes bya ba la/ slar zhes bya ba ni yang de'i 'og tu'o/ /bdud rtsi chu zhes bya ba chang ngo / /gzung ba ni btung bas te/ slar yang ngal gso ba'i phyir dang / shes rab mnyes par bya ba'i phyir gnyis kas chang btung zhing glu blang ba'o//rdo rje'i glu gsungs pa/ 'khor ba stong pa zhes bya ba la sogs pa la/ 'khor ba zhes bya ba ni phung po lnga'o/ /stong pa zhes bya ba ni gzung ba dang 'dzin pa dang bral ba'o/ /de nyid kyi phyir snying po med pa ste/ /chu shing lta bu'o/ /chu shing las 'bras bu ltar snying po med pa'i snying po bstan pa'i phyir/snying po dag ni shin tu bsags pa ste/ /zhes bya ba smos te/ snying po zhes bya ba ni mi gnas pa'i mya ngan las 'das pa'o/ /shin tu bsags pa zhes bya ba ni des chos thams cad bsgrubs pa ste/ 'di ltar phung po lnga po rang bzhin med pa'i lha'i bdag nyid du goms pas mi gnas pa'i mya ngan las 'das par bsgrubs pa'o//gal te chos rnams gzung ba la sogs pa dang bral ba yin na ni/ ji ltar mi gnas pa'i mya ngan las 'das par 'gyur zhe na/ dngos las rnam par grol ba rab tu 'grub/ /ces bya ba smos te/dngos po zhes bya ba ni gzung ba la sogs pa'i mtshan nyid de de las rnam par grol ba nyid mya ngan las 'das pa zhes bya ba'i don to/ /yang na yod pa dang med pa dang / rtag pa dang mi rtag pa la sogs pas bsgom pa'i sems gnyis su snang ba 'di dngos po ste de las grol ba'o//rab tu grub pa zhes bya ba ni de las mya ngan las 'das par 'grub pa ste/ 'dra bas 'dra ba bskyed pa'o/ /zhes bya ba'i don to/ /ming gi rnam grangs bstan pa'i phyir/ rnam par thar pa zhes bya ba la sogs pa smos te/ rnam par thar pa ni mi gnas pa'i mya ngan las 'das pa'i rnam grangs so//rab tu bsgral ba ste zhes bya ba ni des sems can thams cad bsgral ba'am der bsgral ba'o/ /de nyid bstan pa'i phyir/ phan tshun kun du 'khyud pa'i sbyor byas pa/ /de yis kun don yang dag byed par 'gyur/ /zhes pa smos te/ phan tshun kun du 'khyud pa'i sbyor ba zhes bya ba ni/stong pa nyid dang snying rje dbyer med pa'i lha'i rnal 'byor ro/ /kun zhes bya ba ni sems can thams cad kyi'o/ /don yang dag pa zhes bya ba ni mya ngan las 'das pa'i mthar thug pa'i dgos pa rnams so/ /'khor ba'i snying po dag ni med pa la/ /rnal 'byor ma yi dbus su snying por bsgrub//ces bya ba ni kun du 'khyud pa'i sbyor ba 'das ma thag pa de byang bar byas nas 'khor ba snying po med pa las 'khor ba'i dbus su bying ba'i rnal 'byor ma rnams kyi snying po ste/ mya ngan las 'das pa 'grub par 'gyur te/ /rang bzhin gyis rnam par dag pa'i phyir ro zhes bya bar dgongs so//rdo rje dril bu sgrar bcas pas/ /de nas de ltar glu blang bya/ /zhes bya ba ni dril bu'i sgra dang bcas par yang dang yang du glu blangs pa'o/ /de ltar rnal 'byor pa bsgom pa dang / bzlas par ldan pas dngos grub tu 'gyur ba bstan pa'i phyir/ mnyam gzhag ces bya ba la sogs pa smos so//'grub pa de nyid bstan pa'i phyir/ las ni zhes bya ba la sogs pa smos te go sla'o/ /da ni dbang du bya ba'i sbyor ba bstan pa'i phyir/ sman zhes bya ba la sogs pa smos te/ bskyod pa zhes bya ba ni 'dis rang gi dbang du byed/ 'gugs par byed pas na bskyod pa ste sman la sogs pa'o/ /sbyor ba ni de'i rab tu sbyor ba'o/ /ldan pa ni shes rab dang bcas pa'o/ /lhag ma ni go sla'o/ /sbyor ba'i gnas su gzung bar bya/ /zhes bya ba ni/ de dag thams cad cha mnyam pa'o/ /kha cig ni byang chub kyi sems la bya'o zhes zer ro//rdzas de dag ni bsgos nas su/ /zhes bya ba ni rdzas de dag la byang chub kyi sems kyis bsgo ba'o/ /lhag ma ni go sla'o/ /dbang po lag pa dang zhes bya ba la sogs pa la/ dbang po lag pa zhes bya ba ni rtsa'i khyad par gang dbang po'i lag pa dang 'dra ba de la de skad ces bya'o//rmongs byed ma zhes bya ba ni pa Ta par na ka'o/ /rengs byed ma zhes bya ba ni sa la par+Ni ka'o/ /bdag gi lnga dang yan lag lnga/ /zhes bya ba la/ bdag gi lnga zhes bya ba ni bdud rtsi lnga'o/ /yan lag lnga zhes bya ba ni mig dang rna ba dang sna dang lce dang rdo rje'i dri ma rnams so//thams cad cha ni bsnyams nas su/ /zhes bya ba ni/ dbang po lag pa la sogs pa cha mnyam pa ste/ gzhan dag ni ji snyed pa gzung ba'o/ /btung ba zhes bya ba ni chang ngo / /so rtsi zhes bya ba ni so rtsi za ba na dung gi thal ba dang sbyar ba'o//lhag ma ni go sla'o/ /khrag ni gtor ma'i sbyor ba yis/ /dbang la sogs pa'i las rnams 'grub/ /ces bya ba la/ khrag ni zla mtshan gyi khrag go/ /gtor ma'i sbyor ba ni lha'i sbyor ba kha dog dmar por bya ba'o/ /sbyor ba de nyid kyi bzlas pa bstan pa'i phyir/ sngags ni zhes bya ba la sogs pa smos so/ /ji ltar bya zhe na/ bdag gi lus las gshegs gsol ba/ /zhes bya ba smos te/ bdag gi lus las gshegs su gsol ba ni khu ba ste de dang bsres pa'o/ /bdag nyid ji ltar dga' bar bya/ /zhes bya ba ni gang la sbyor bar 'dod pa de dag gis ni zla mtshan dang khu bar bsres la/lha'i rnal 'byor mdog dmar po la gnas nas de la sngags 'bum phrag bzlas te/ gang la byin pa de dbang du 'gyur bar ston to/ /da ni zhi ba la sogs pa'i las kyi dbye bas phyag rgya'i dbye ba bstan pa'i phyir/ brtul zhugs zhes bya ba la sogs pa smos te/ brtul zhugs ma zhes bya ba ni thod pa'i brtul zhugs can ma'o/ /nye du mo zhes bya ba ni mda' mkhan mo ste/ 'jig pa'i phyir ro/ /rgyal po ni rgyal rigs ma'o/ /bla ma zhes bya ba ni bram ze ma'o/ /gsang ba zhes bya ba ni gar mkhan ma'o//sha ba zhes bya ba ni sha 'tshong ba ste shan pa'o/ /nya pa ni nya bshor ba'o/ /lhag ma yang go bar zad do/ /de bas zhes bya ba la sogs pa la/ rnal 'byor zhes bya ba ni zhi ba la sogs pa'i las so/ /bstan bcos zhes bya ba ni sngags so/ /gzung ba zhes bya ba ni 'das ma thag pa'i phyag rgya'i tshogs so//'bad pa zhes bya ba ni nan tan du bsgrub pa'o/ /da ni rkang stabs bcings pa'i bye brag bstan pa'i phyir/ gzhan yang zhes bya ba la sogs pa smos te/ rkang stabs bcing ba ni/ bshad par bya zhes bya bar sbyar ro/ / sems can sgrol ba'i gnas yin te/ /zhes bya ba ni sems can sgrol bar byed pa'o/ /yang na gnas ni rkang stabs te/ sems can sgrol bar byed pa'i rkang stabs so/ /de nyid gsungs pa/ gnyis ni kun du 'dus nas bskyod/ /de nyid phyag rgya zhes bya bcing //zhes bya ba la/ gnyis zhes bya ba ni thabs dang shes rab bo/ /kun du 'dus pa mnyam par sbyor ba'o/ /de nyid ni bskyod pa ste/ kun du nyon mongs pa 'jig par byed pa'i phyir ro/ /de nyid ces bya ba la/ phyin ci ma log pa gnyis su med pa'i ye shes so/ de nyid phyag rgya ste yid mgu ba'i phyir ro/ /bcing ba ni gdab pa'o/ /kha cig ni mnyam pa'i rkang stabs kyi mtshan nyid yin no zhes zer te/ gnyis kun du 'dus nas zhes bya ba ni rkang pa gnyis phan tshun du 'dus pa'o/ /de nyid ni bskyod pa ste/ bgegs skyod par byed pa'i phyir ro//phyag rgya zhes bya ba ni mnyam pa'i stabs kyi phyag rgya'o zhes zer ro/ /mnyam pa'i stabs dang zhes bya ba la sogs pa la/ mnyam pa'i stabs zhes bya ba ni/ thabs dang shes rab gnyis rkang pa dag phan tshun sor mos sor mo reg pa'o/ /kha cig ni g.yas kyi sor mo'i rtse mor rkang pa g.yon pa'i rtse mos reg pa'o zhes zer ro//dbye ba'i stabs zhes bya ba ni de nyid las shes rab kyi rkang pa g.yon pa cung zad bskum pa'o/ /zlum po'i stabs zhes bya ba ni mnyam pa'i stabs las pus mo yangs par bskyed pa'o/ /gsum gnon pa'i stabs ni mnyam pa'i stabs de nyid las shes rab kyi g.yon pa gyen du bteg pa'o//rus sbal gyi stabs ni rkang pa g.yas pas g.yon pa mnan pa'o/ /g.yas brkyang pa ni g.yas brkyang nas g.yon pa cung zad bskum pa'o/ /g.yon brkyang ni de las bzlog pa'o//gnas gcig pa ni gcig gis gnas pa ste/ rkang pa gcig bteg nas ka ra na sna tshogs kyis snyoms par 'jug cing / rkang pa ya gcig gis 'khor lo ltar bskor ba'o/ /'dug pa zhes bya ba ni rol pa'i rkang stabs nyid de/ 'dis shes rab dang thabs kyi bde ba 'dug pa'i phyir ro//rkang pa'i 'phen pa zhes bya ba ni ji ltar bde bar 'dug pa'o/ /mchod sdong gi tshul zhes bya ba ni ngal ba bsal ba'i phyir/ thabs dang shes rab gnyis ka'i steng 'og gi byin pa bsrang ste snyoms par 'jug pa'o/ /pus mo btsir ba zhes bya ba ni tsog tsog por 'dug ste/pus mo'i steng du gru mo btsugs nas mgrin pa nas 'khyud pa'o/ /bsdu ba'i tshul zhes bya ba ni brla gnyis bsnol te/ shes rab kyi byin pa gnyis kyi dbus su zhugs pa'o/ /gzhan dag na re shes rab kyi pus mo gnyis thabs kyi mchan khung gnyis su bcug ste/lag pa gnyis kyis mgrin pa nas 'khyud pa 'di ni yang dag par bsdu ba'i tshul yin no zhes zer ro/ /mnyam du gnas pa zhes bya ba ni gnyis ka'i yang rkang pa gnyis ha cang mi ring bar brkyang ste 'dug pa'o/ /dus kyi me zhes bya ba ni shes rab kyi rkang pa g.yas pas bdag gi snying gar btsir ba'o//snying po zhes bya ba ni shes rab kyi rkang pa gnyis bdag gi rkang pa gnyis kyi bar du bcug ste/ rkang pa gnyis kyis so sor snying gnyed pa'o/ /dga' bas gnas pa zhes bya ba ni/ shes rab kyi brla steng gnyis su thabs kyi brla gnyis bsnol mar bkan te gnas pa'o//gcig tu bsdu ba zhes bya ba ni rkang pa gcig bskums te snyoms par 'jug pa'o/ /rkang stabs bskyod pa bco brgyad ni/ /mchod pa'i dus su sbyar bar bya/ /zhes bya ba ni/ rkang stabs bco brgyad po de dag gis snyoms par 'jug cing rol pa'o/ / yon tan thams cad 'byung ba'i gnas/ /rnal 'byor pa yis mchod par bya/ /zhes bya ba ni/ rnal 'byor pas shes rab gang zhig de thams cad nus pa dang ldan pa'i yon tan can de dag bzung nas sbyar bar bya'o/ /da ni tshul gyi bye brag bstan pa'i phyir/ snying gar 'tshir ba dang zhes bya ba smos te/lag pa gnyis kyis shes rab kyi rgyab nas 'khyud nas/ snying gas snying ga btsir zhing / /rol pa 'di ni snying ga btsir ba'o/ /shes rab kyi rkang pa gnyis rang gi snying gar gzhag ste rol pa 'di ni rkang pa sbyar ba'o/ /yang na shes rab kyi rkang pa dang bdag gi rkang par sbyar nas rol pa'o//me tog phreng ba'i tshul sngon du 'gro bas kun du 'khyud pa 'di ni phreng ba'i tshul lo/ /nu ma la reg pa ni nu ma'i tshul lo/ /shes rab kyi pad+ma la bldags pa dang / shes rab kyis kyang rdo rje gzhibs pa na gnyis ka sbyar ba de bza' ba'o/ / de yang steng dang 'og tu gnas nas sbyar bar blta ba'o/ /lus kyi gzhogs gcig gis phan tshun 'khyud pa ni phyed kyis 'khyud pa'o/ /lag pa 'og ma gnyis kyis phan tshun gsang ba la reg cing gong ma gnyis kyis 'khyud pa ni phyed kyis 'khyud nas gsang bar reg pa'o/ / lus kyis lus la reg pa ni lus mnye ba'o/ /yang na phan tshun rkang lag mnye ba'o/ /mdzub mo dang gung mo ko sko 'degs pa ni ko sko bstod pa'o/ /zhal ni bzhad cing sgeg pa dang / /zhes bya ba ni bzhad pa dang bcas sgeg pa dang bcas pa'i tshul zhes bya ba'i don to/ /mtshan nyid sna tshogs ldan pa yis//de yis las rnams bsgrub par bya/ /zhes bya ba ni tshul rnam pa bcu po der ma zad kyi/ 'o na ci zhe na/ so dang sen mo gdab pa la sogs pa'i mtshan nyid sna tshogs kyis bsgrub par bya'o zhes bya ba'i don to/ /da ni rdo rje dang dril bu nges par gzung bar bya ba'i mjug bsdu ba bstan pa'i phyir/rdo rje zhes bya ba la sogs pa gsungs te/ de kho na yis zhes bya ba ni ji skad bstan pa'i rnal 'byor la gus pas so/ /so so zhes bya ba ni nges par ro/ /da ni thabs dang shes rab phan tshun bral bas rnam pa thams cad du dngos grub med par bstan pa'i phyir/gsang ba'i zhes bya ba la sogs pa gsungs te/ gsang ba'i rdo rje ni thabs so/ /dril bu ni shes rab bo/ /de bzhin du rdo rje'ang dril bu dang bral ba ni shes rab kyis dben pa'o/ /'grub pa ring bar 'gyur zhes bya ba ni 'grub pa dang ring ba ste bral ba'o//de ltar ldog pa bstan nas rjes su 'gro ba bstan pa'i phyir/ rdo rje dril bu'i phyag rgya dag /dmigs na pha rol dgrol bar 'gyur/ /zhes bya ba smos te/ thabs dang shes rab 'dus na 'grub par 'gyur ro zhes bya ba'i don to/ /dpe bstan pa'i phyir/ mtshan mo zhes bya ba la sogs pa smos te/ mtshan mo zla ba med pa dang / /zhes bya ba ni zla ba med pa'i mtshan mo ste/ ci zhig nus zhes bya ba dang sbyar ro/ /'dis ni zla ba med pa'i mtshan mo 'od dang bral ba'i phyir/ bdag dang gzhan gyi don ci yang mi nus so zhes bya bar ston to/ / nyin mo'i zla bas ci zhig nus/ /zhes bya ba ni de bzhin du mtshan mo dang bral ba'i nyin mo'i zla ba yang 'od mdzes pa dang bral ba'i phyir bdag dang gzhan gyi don cung zad kyang mi nus so zhes bya ba'i don to/ /don la nye bar sbyar ba'i phyir/ /de bas zhes bya ba la sogs pa smos te/ ji ltar mtshan mo dang mtshan mo'i bdag po dus mtshungs par 'jug pas/rang dang gzhan gyi don nus pa ltar rdo rje dang dril bu yang mnyam pa ste/ snyoms par 'jug pas de kho na nyid gsal bar byed nus pa'o/ /de la de kho na nyid ces bya ba ni rang bzhin te/ de yang phyag rgya chen po dngos grub po//gsal bar byed ces bya ba ni gsal ba'i nus pa dang ldan pa ste sgrub thabs so/ /gzhung kha cig las ni/ mnyam pas thams cad gsal bar byed/ /ces 'byung ste/ der yang thams cad kyi sgras ni bsgrub bya bstan pa'o/ /A li kA li zhes bya ba la sogs pa la/A li kA li ni thabs dang shes rab kyi sbyor ba'o/ /mdun du bsgom pa ni dang por bsgom pa ste/ ji ltar zhe na/ rnal 'byor chen po sgrub pa pos/ /zhes bya ba smos te/ rnal 'byor chen po zhes bya ba sngar bstan pa ltar stong pa nyid sngon du 'gro ba'i sa bon dang mtshan ma'i rim gyis skur bskyed pa'o//sgrub pa po zhes bya ba ni/ rnal 'byor pa ste/ dgos pa thams cad bsgrub par bya/ /zhes pa dang 'brel to/ /A li dang kA li'i don gsungs pa/ A li zhes bya ba la sogs pa smos te go sla'o/ / sems can gyi don ma lus pa rnams kyang lha'i gzugs kyi thabs dang shes rab kyis 'grub par bstan pa'i phyir/ sems can zhes bya ba la sogs pa smos so/ /mya ngan las 'das pa yang thabs dang shes rab kyis 'grub pa'i phyir/ /phyi rol zhes bya ba la sogs pa smos te/phyi rol zhes bya ba ni 'das pa ste/ thabs dang shes rab las 'das shing bral bas so/ /yang phyi rol zhes bya ba ni pha rol tu phyin pa'i tshul bstan pa ste/ lha'i ting nge 'dzin gyi thabs dang shes rab ma gtogs par gang gis kyang 'khor ba'i pha rol tu sgrol bar byed pa yod pa ma yin no zhes bya ba'i don te//de nyid kyi phyir rmongs pa zhes bya ba la sogs pa smos te/ rmongs pa ni phyi rol 'ba' zhig gi sems dang ldan pa'o/ /de'i dam tshig ni de dang rjes su mthun pas na dam tshig ste phyi rol gyi lam mo/ /yang na a zhes bya ba ni dgag pa ste/de la mi bstan pa'o/ /ci zhig ce na/ dam tshig ste thabs dang shes rab kyi lha'i ting nge 'dzin to/ /de nyid kyi phyir gsang ba zhes bya ba la sogs pa smos te go sla'o/ /gang zhig lung ni shes gyur pa/ /zhes bya ba la shes gyur pa ni shes par 'dod pa dang /nus pa ste nang gi lam la gzhol ba'o/ /de yis rnal 'byor ba ru grags/ /zhes bya ba ni de kho na nyid la sbyor bar nus pa dang / dngos grub 'dzin pa po zhes bya ba'i bar du'o/ /de nyid kyi phyir shel ltar zhes bya ba la sogs pa smos te/ shel ltar dag pa zhes bya ba ni dang ba dang yid ches pa'i dad par ldan pa'o/ /de'i chos zhes bya ba ni thar pa la sogs pa'i dngos grub kyi lam ste/ lha'i rnal 'byor ro/ /gzhan du na skyon bstan pa'i phyir/ gal te zhes bya ba la sogs pa smos te/ the tshom zhes bya ba ni bla mas bstan pa'i lam la yid gnyis za ba'o//de'i tshe cir 'gyur zhe na/ skad cig gis zhes bya ba la sogs pa smos te go sla'o/ /'dod pa 'ba' zhig don du gnyer ba la chos bstan pa dgag pa'i phyir/ 'dod la dga' ba zhes bya ba la sogs pa smos so//sngar pha rol tu phyin pa'i theg pa'i tshul lam rmongs shing 'gro ba'i don lhur len pa rnams la/ sbyin par bstan pa'i phyir/ sems can don bya'i phyir du ni/ /rab tu 'bad pa de nyid dmigs/ /zhes bya ba smos te/ bstan par bya ba zhes bya ba lhag ma yin no//de nyid ces bya ba ni/ chos bdag med pa ste stong pa nyid kyi cha'o/ /dmigs pa ni khong du chud pa'o/ /rnal 'byor pa rnams kyi yul la spyod pa bskyang ba bstan par bya ba'i phyir gal te zhes bya ba smos te/ gal te zhes bya ba ni ji ste rnal 'byor pa gzhan gyi don du gnyer ba chags pa can yin na'o//'dod la dga' zhes bya ba ni 'dod pa la nye bar spyod par 'dod pa'o/ /de'i tshe thabs kyi mtshan nyid gcig yod de zhes bya bar sbyar te/ thabs zhes bya ba ni lam mo/ /gcig ces bya ba ni dam pa ste zla med pa'o/ /ji ltar zhe na rang dga' zhes bya ba la sogs pa smos te/rang dga' zhes bya ba ni/ bud med kyi yul lo/ /skad cig ces bya ba ni gnas skabs so/ /gang gi zhe na/ yang dag 'byung ba ste yul khyad par can rnyed pa'i tshe'o/ /thabs dngos bstan pa'i phyir/ rdo rje dril bu zhes bya ba la sogs pa smos te/rdo rje dril bu sbyor ba ni rdo rje pad+ma sbyor ba'o/ /de yang ji ltar sgrub ce na skad cig tshul gyis zhes bya ba la sogs pa ste/ skad cig gi tshul zhes bya ba ni yud tsam gyis rdzogs pa'o/ /de nyid kyi phyir/ bdag gi rnal 'byor bdag ces brjod/ / ces bya ba smos te/ bdag gi rnal 'byor ni rdo rje sems dpa'i ting nge 'dzin no/ /bdag ces brjod pa ni nga rgyal bskyed pa'o/ /gsang ba'i nang gi dbus gnas par/ /A li'i sa bon gzung bar bya/ /zhes bya ba ni khwa ga mu kha'i rtsa'i sgor sa bon a dgod pa dran par mdzad pa yin no//bdag nyid skad cig rnal 'byor ni/ /hUM zhes bya ba 'bad de bzlas/ /zhes bya ba la/ skad cig ces bya ba ni rdo rje ste mi brtan pa'i phyir ro/ /hUM zhes bya ba ni sa bon hUM ngo / /rnal 'byor zhes bya ba ni sbyar ba ste der bsgom pa'o/ /'bad de bzlas zhes bya ba ni gnyis ka'i bzlas pa dran par mdzad pa'o//de dag gis ni thabs dang shes rab kyi sbyor ba nye bar bsdu ba bstan pa yin no/ /gang yang cung zad lus dang ngag /lha yi sbyor bar thim par bya/ /zhes bya ba ni rnal 'byor pa'i phyir bya ba dgag pa yin te/ lus dang ngag ces bya ba ni lus dang ngag gi las te/mdo gdon pa dang / mchod rten la phyag bya ba la sogs pa'o/ /cung zad ces bya ba ni ma lus par bsdu ba'o/ /lha'i rnal 'byor zhes bya ba ni yid kyi las lha'i ting nge 'dzin to/ /thim par bya zhes bya ba ni lha'i ting nge 'dzin yun ring du gus par bsgom pa la phyi'i bya ba dag dgag pa'o//da ni de ltar chos bstan pa'i bdag nyid che ba gsal bar bya ba'i phyir/ /thal sbyar zhes bya ba la sogs pa smos te/ rnal 'byor rnal 'byor ma dbang phyug /ces bya ba ni/ phyag na rdo rje la sogs pa'i rnal 'byor pa'i dbang phyug rnams dang /rnal 'byor ma rnams te/ mkha' 'gro ma rnams kyis bcom ldan 'das kyis de ltar bka' stsal ba'i chos gsan cing thos nas/ thal mo sbyar te bstod do zhes bya bar sbyar ro/ /ci lta bus bstod ce na/ dgyes shing thugs ni tshim pa yi/ /zhes bya ba smos te/bcom ldan 'das thugs dgyes shing tshim par byed pa'o/ /gang zhe na/ e ma'o zhes bya ba la sogs pa la/ 'gro ba thar pa di ring thob/ /ces bya ba ni bcom ldan 'das kyi gsung rdo rje dril bu la sogs pa'i ting nge 'dzin gyi thabs de dag gis/ de ring ste tshe 'di nyid la 'gro ba rnams kyis thar pa thob pa ngo mtshar che ba'o//'gro ba rnams zhes bya ba ni rigs la sogs pa'i nges pa med par gzung ba'o/ /e ma'o chos kyi mchog gi lam/ /zhes bya ba la/ chos zhes bya ba ni rang bzhin gyis stong pa nyid do/ /mchog ces bya ba ni dam pa ste lha'i sku'o//e ma zhes bya ba ni ngo mtshar ba'o/ /e ma 'khor ba gcod pa po/ /zhes bya ba ni 'khor ba las grol ba'o/ /e ma rnal 'byor grol ba'i gnas/ /zhes bya ba ni thar pa'i lam du sbyar ba'o/ /e ma ngo mtshar rnal 'byor lam/ / zhes bya ba ni bde ba chen po'i grong khyer du 'gro ba'i phyir ro/ /lam des tshegs med par grub pa bstan pa'i phyir/ tshes grangs med cing zhes bya ba smos te go sla'o/ /yang las kyi cho ga bstan pa'i phyir las kyi 'khor lo zhes bya ba la sogs pa smos te/ las kyi 'khor lo zhes bya ba ni las kyi tshogs te/bshad par bya zhes bya bar sbyar ro/ /ci'i phyir zhe na/ sgrub pa po'i sna tshogs 'od/ /ces bya ba smos te/ sgrub pa po rnams kyi mos pa sna tshogs kyi dbang gis so/ /de nyid gsungs pa/ zla ba'i dkyil 'khor zhes bya ba la sogs pa ste go sla'o//bzlas pa'i sngags gsungs pa/ yi ge gnyis 'gyur zhes bya ba la sogs pa ste/ sngags 'di ni mkha' 'gro ma drag mo'i yin mod kyi 'og nas 'byung ba'i bsgrub bya la 'tsham pa'i phyir ro langs ma nyid kyis bzlas par bya'o/ /sgrub pa gsungs pa/ yi dwags gos zhes bya ba la sogs pa smos te/sogs pa'i sgras ni dpa' bo'i gos dang bu btsas pa'i dgab ma la sogs pa la gzung ngo / /lhag ma ni go sla'o/ /sa'i dbus zhes bya ba ni/ dur khrod kyi dbus su'o/ /tha mal me zhes bya ba ni shan pa'i khyim nas byung ba'i me'o//me 'bar dbus su zhes bya ba ni sbyin sreg bya zhes pa lhag ma yin no/ /zho can lnga zhes bya ba ni shing a shwat+tha la sogs pa rnam lnga'o/ /sbrang rtsi khrag la sbags pa dag /ces bya ba la/ sbrang rtsi ni mi'i rkang las byung ba ste mar nag chen po'o/ /de ltar na mar nag chen po dang khrag la sbags pa'i sha chen pos sbyin sreg bya ba'o//rtsa ba'i sngags zhes bya ba ni sbyin sreg gi sngags so/ /thams cad sngar bstan bzhin du bya/ /zhes bya ba ni/ sngar bshad pa'i sbyin sreg gi cho ga bzhin du bya ba'o/ /mtshan ma gsungs pa/ dang po zhes bya ba la sogs pa la/lnga par sgrub pa'i grogs po ni/ /seng ge'i tshul du babs nas su/ /zhes bya ba ni sgrub pa'i grogs la lha mo seng ge mo zhugs nas rang bzhin 'gyur te seng ge'i gzugs dang sgrar snang bar 'gyur ba'o/ /ji ltar 'dod bzhin gnas rnams dang / /stan ni bdag gir mdzad du gsol//zhes bya ba ni/ rang gi gzugs kyis nga'i mdun du 'dug shig pa'o/ /de nas lha mo'i dngos bstan nas/ /zhes bya ba ni slob ma'i lus las byung nas lha mo'i rang gi gzugs su ston pa'o/ /ci zhig bsgrub ces bya ba ni/ /dgos pa gang zhig bsgrub par bya//zhes bya ba'i bar du'o/ /dpa' bos zhes bya ba ni rang gi sngags dang phyag rgyas bsgyings pa ste/ 'jigs par mi bya ba'o/ /yi dwags bgrod pa zhes bya ba ni g.yon skor du 'gro'o/ /lhag ma ni go sla bas ma phye'o/ /stag mo ce spyang 'ug pa mo/ / las de nyid kyis bsgrub par bya/ /zhes bya ba ni/ seng ge mo'i sgrub thabs kyis de dag bsgrub par bya ba ste/ 'on kyang stag mo'i sngags ni oM h+m+raM grub thams cad thabs dang shes rab kyi ting nge 'dzin gyis 'grub pa dran par bya ba'i tshul gyis gzhung gi mjug bsdu ba bstan pa'i phyir/rdo rje dril bu zhes bya ba la sogs pa smos te go sla'o/ /sbyor ba'i zhes bya ba la sogs pa la rab tu byed pa zhes bya ba ni gzhung 'dis thabs dang shes rab gnyis su med pa'i sbyor ba dang /ra ba la sogs pa rnam par dag pa dang / thabs dang shes rab lha'i gzugs kyis khwa ga mu kha bskul ba dang / bcing ba'i cho ga dang sman gyi sbyor bas dbang du bsdu ba dang / bsgom pa'i rjes su bstod pa dang seng ge mo la sogs pa'i sgrub thabs kyi las kyi tshogs gsal bar mdzad pas na rab tu byed pa'o//sman dang sngags la sogs pa'i sbyor ba'i gnas su gyur pas na sbyor ba'i gdan te/ rdzogs pa ni mthar gtugs pa'o/ /dpal gdan bzhi pa'i 'grel pa dran pa'i rgyu mtshan zhes bya ba las/sbyor ba'i gdan gyi rab tu byed pa rdzogs so// //da ni gsang ba'i gdan bstan pa'i phyir/ slob dpon dag ni zhes bya ba la sogs pa smos te/ slob dpon dag ni gzung bar bya/ /zhes bya ba ni dngos grub kyi thabs bslab par bya ba'i phyir gzung zhing shes par bya ba ste/nyon cig ces bya ba dang 'brel to/ /ci 'dra zhe na/ sngags dang phyag rgya sbyor sogs ldan/ /zhes bya ba smos te/ sngags zhes bya ba ni zhi bar byed pa la sogs pa'i sngags so/ /phyag rgya zhes bya ba ni lus la sogs pa'i phyag rgya ste/de la lus kyi phyag rgya ni lag pa'i phyag rgya'o/ /ngag gi phyag rgya ni ngag gi bya bas mtshon pa ste ngag gi brda'o/ /sems kyi phyag rgya ni bsgoms pas mtshon pa ste/ kha dog dang dbyibs dang zhal la sogs pa lha'i rnam pa gang sems kyis yid la byas pa ste sems kyi phyag rgya'o//sbyor ba zhes bya ba ni ting nge 'dzin to/ /sogs pa'i sgras ni dkyil 'khor gyi de kho na nyid la sogs pa gzung ste de dag dang ldan pa'o/ /ji bzhin lam gyis 'khor ba las/ /grol ba'i mtshan nyid rdo rjes nyon/ /zhes bya ba la 'dis dmigs shing shes par byed pas na lam ste bstan bcos so//ji bzhin ni de'i rim pa ji bzhin du'o/ /'dis 'khor ba las sgrol bar byed pas na 'khor ba las sgrol ba ste slob dpon no/ /mtshan nyid ni de'i rang bzhin no/ /phyag na rdo rjes slar gsol pa/slob dpon zhes bya ba la sogs pa la/ yon tan ci 'dra bar zhes bya ba ni blta bar bgyi zhes bya ba dang 'brel to/ /bla ma zhes bgyi ji ltar lags/ /zhes bya ba ni bla ma'i tha snyad du bgyi ba'i don ji lta bu zhes bya ba bzhin no/ /slob dpon ji ltar sbyor bar bgyi//zhes bya ba ni slob dpon du 'os pa'i mtshan nyid ji lta bu zhig lags zhes bya ba'o/ /ji ltar blta zhes bya ba ni ji ltar dmigs pa'o/ /lan gsungs pa/ thams cad ces bya ba la sogs pa la/ thams cad ces bya ba ni thams cad shes pa dang / lam shes pa dang / rnam pa thams cad mkhyen pa ste/ de rnams kyi mtshan nyid du 'dis shes shing mtshon par byed pas na/ mtshan nyid de slob dpon gyi ming gang yin pa'o/ /de yang de bzhin gshegs pa'i ming gis dbang bskur ba'o/ /byang chub ces bya ba ni shes par bya ba ste/de'i rang bzhin ni de kho na nyid do/ /lus ni sangs rgyas thams cad de/ /zhes bya ba la/ sangs rgyas thams cad kyi rang bzhin yin pas na/ sangs rgyas thams cad de rdo rje 'dzin pa'o/ /lus ni rdo rje slob dpon gyi lus te/ de de'i rang bzhin blta ba'o/ /cha shas byang chub yan lag gnas//zhes bya ba ni de'i lus kyi cha shas ji snyed pa rnams byang chub kyi yan lag bdun gyi rang bzhin no/ /dbu rgyan rigs ni lnga nyid de/ /zhes bya ba ni/ rigs brgya po mdor bsdus pa'i mi bskyod pa la sogs pa'i rigs lnga ni de'i dbu rgyan no//ba spu rnams ni dgra bcom mo/ /zhes bya ba ni de'i ba spu grangs med pa rnams 'phags pa dgra bcom pa bye ba 'bum phrag gi grangs dang ldan pa rnams kyi rang bzhin no/ /'jig rten pa ni zhabs kyi gdan/ /zhes bya ba la/ 'jig rten pa ni 'jig rten pa'i lha tshangs pa la sogs pa'o//zhabs kyi gdan ni zhabs kyi 'og ste/ rkang mthil zhes bya ba'i bar du'o/ /'od zer gnod sbyin gsang la sogs/ /zhes bya ba la/ gnod sbyin ni grags par zad do/ /gsang ba ni dri za'o/ /sogs pa'i sgras ni 'byung po la sogs gzung ngo / / de ltar yon tan ldan pa'i skur/ /rnal 'byor can ni rtag tu blta/ /zhes bya ba la/ rnal 'byor can zhes bya ba ni slob dpon no/ /slob dpon yon tan ji lta bu/ /zhes bya ba'i lan bshad pa'i phyir/ /ye shes can zhes bya ba la sogs pa gsungs te/ ye shes can zhes bya ba ni slob dpon no//mtshan nyid ces bya ba ni 'og nas 'byung ba'i rang bzhin no/ /de nyid gang yin zhe na/ shin tu zhes bya ba la sogs pa smos so/ /yang na yon tan ci 'dra zhing / /zhes bya ba dang / ji ltar blta bar bgyi zhes bya ba ni/ de ltar yon tan ldan pa'i sku//zhes bya ba'i bar gyis bshad zin to/ /'dir ni/ slob dpon ji ltar sbyar bgyi ba/ /zhes bya ba'i lan bstan pa yin te/ shin tu dul ba zhes bya ba ni dbang po dul ba'o/ /zhi ba'i gzugs zhes bya ba ni 'jig rten gyi cha byad bor ba'o//sngags dang rgyud kyi sbyor la mkhas/ /zhes bya ba la/ sngags ni zhi bar byed pa la sogs pa'i sngags so/ /rgyud ni zhi ba la sogs pa'i 'khor lo'o/ /de'i sbyor ba ni bzlas pa dang bri ba la sogs pa'i mtshan nyid de/ mkhas pa ni bya ba'o/ /rnal 'byor bzo dang bstan bcos rig /ces bya ba la/ rnal 'byor ni rlung la sogs pa'i bye brag go/ /bzo ni bri ba la sogs pa'i las so/ /bstan bcos ni gso ba'i bstan bcos dang byA ka ra Na la sogs pa ste/ gang gi rnal 'byor la sogs pa shes pa de la de skad ces bya'o/ / thams cad du ni snyan par smra/ /zhes bya ba ni 'jam por smra ba ste/ sems can kun la zhes bya ba dang sbyar ro/ /sems can kun la bu bzhin blta/ /zhes bya ba ni thams cad gces par 'dzin pa ste byams pa'o/ /sbyin pa la sogs rtag tu dga'/ /zhes bya ba ni sbyin pa dang tshul khrims dang bzod pa la sogs pa dang ldan pa'o//rnal 'byor bsam gtan mngon brtson pa/ /zhes bya ba la/ rnal 'byor ni thabs dang shes rab kyi sbyor ba'o/ /bsam gtan ni lha'i ting nge 'dzin to/ /snying rje zhes bya ba la sogs pa ni go sla'o/ /mnyam nyid sems ni bskyed pas na//zhes bya ba ni dgra dang mdza' bshes dang bar mar ngo snyoms pa'o/ /de nyid bcu ni yongs shes pa/ /zhes bya ba la/ de nyid bcu ni dkyil 'khor dang / rang gi ting nge 'dzin dang / phyag rgya dang / ka ra na dang / 'dug stangs dang / bzlas pa dang / sbyin sreg dang / mchod pa dang / las kyi sbyor ba dang / nye bar bsdu ba'o/ /de ni slob dpon zhes byar brjod/ /ces bya ba la/ de ni zhes bya ba ni shin tu dul ba nas de nyid bcu zhes pa'i bar gyis yon tan rnams te/ legs pa don du gnyer ba rnams kyis goms par bya bas na yon tan te de dag dang ldan pa'o//slob dpon zhes byar brjod ces bya ba ni/ slob dpon du brjod pa'o/ /de'i phyir bla ma'i tha snyad kyis kyang brjod de/ /yon tan de dag gis bskyod cing 'jug pa'o/ /de skad du yang / bdag nyid dam ni gzhan yang rung / / ji skad bstan pa bzhin brjod pas/ /slob dpon dang ni bla ma ru/ /mkhas pa rnams kyis kun du brjod/ /ces gsungs so/ /da ni slob ma'i bya ba bstan pa'i phyir/ gzhan yang zhes bya ba la sogs pa smos te/ slob mas spyad pa ni slob ma'i bya ba'o/ /de nyid gsungs pa/rnal 'byor ma zhes bya ba la sogs pa la/ rnal 'byor ma dang sbyor ba'i lha/ /slob dpon gsang ba smad mi bya/ /zhes bya ba dang 'brel to/ /de la rnal 'byor ma zhes bya ba ni ye shes mkha' 'gro ma la sogs pa'o/ /sbyor ba'i lha ni thabs dang shes rab dang ldan pa'i lha ste de'i rang bzhin gyi slob dpon no//dam tshig spyod pa'i lha nyid dang / /zhes bya ba la/ dam tshig ni bdud rtsi lnga dang lcags kyu lnga'o/ /de la spyod pas rnam par rol cing gsal bar byed pas na dam tshig spyod pa'i lha ste slob dpon no//gtor ma gsang ba la sogs ldan/ /zhes bya ba ni gtor ma dang sbyin sreg la sogs pa'i de kho na nyid de/ de dag dang ldan pa ni slob dpon no/ /gsang ba zhes bya ba ni rdo rje 'dzin pa chen po ste de'i rang bzhin gyi slob dpon mi smad pa'o/ /de yang gsungs pa/ byang chub kyi sems dang slob dpon ni gnyis su med cing tha dad du byar med do zhes pa ste/des na slob dpon nyid rdo rje 'dzin pa'o/ /smad na myur du mnar med 'gro/ /zhes bya ba ni/ shi ma thag ste bar mtshams med par ro/ /gzhung kha cig las ni/ rnal 'byor ma dang sbyor ba'i lha//lha yi dam tshig spyod pa dang / /rnal 'byor gsang ba'i gtor sogs dang / /slob dpon gsang ba smad mi bya/ /zhes 'byung ste/ der ni slob dpon 'ba' zhig tu ma zad kyi rnal 'byor ma la sogs pa smod pa yang mnar med par ltung ngo zhes bya bar sbyar ro/ /kun du dam tshig med pa dang //zhes bya ba ni/ ji ltar rnyed pa'i dam tshig rnams la sdang bas rgyab kyis phyogs pa ste/ der yang myur du mnar med 'gro/ /zhes bya ba snga ma dang sbyar ro/ /gdan dang zhes bya ba la sogs pa la gdan ni bzhugs gdan te stegs bu la sogs pa'o//mal stan dang lham ni go bar zad do/ /de dag la ci zhig ce na/ bgom zhing brdzi bar mi bya/ zhes bya ba dang sbyar te go sla'o/ /gdugs dang na bza' nyer spyod rnams/ /zhes bya ba ni/ bla mas nye bar spyod pa'i gdugs dang / na bza' la sogs pa'i yo byad rnams te/de dag /bdag gis spyad na mnar med 'gro/ /zhes bya bar sbyar ro/ /grib ma bgom zhing brdzi mi bya/ /zhes bya ba la grib ma ni slob dpon gyi grib ma ste/ grib ma la 'gro zhing grib ma la mchod ba'o/ /brdzi ba ni 'og tu gnon pa'o/ / bzlog dang gzir ba'i tshig brjod min/ /zhes bya ba la/ bzlog pa'i tshig ces bya ba ni slob dpon la bzhad gad tsam gyis kyang mtshang 'bru ba dang / slob dpon gyis bka' bsgo ba na med pa dang mi nus pa la sogs pa'i tshig gis slar bzlog pa dag go/ /gzir ba'i tshig ces bya ba ni rang gi bya ba rnams slob dpon gyis thabs ris su ma bab bzhin du nan gyis 'chol ba ste/tshig de dag brjod par mi bya'o/ /de thams cad kyang myur du mnar med 'gro zhes bya ba'i 'bras bu snga ma dang sbyar ro/ /tshe 'di'i skyon cir 'gyur zhe na/ 'das na zhes bya ba la sogs pa smos te/'tshe ba zhes bya ba ni/ sdug bsngal 'thob pa'o/ /de nyid bstan pa'i phyir/ don nyams dpal las ring du 'gyur/ /zhes bya ba smos te/ dpal zhes bya ba ni bsod nams dang ye shes kyi tshogs kyi mtshan nyid do/ / don zhes bya ba ni de dag gi 'bras bu'o/ /lhag ma ni go sla'o/ /de dag thams cad kyang ci'i phyir zhe na/ sngags dang phyag rgya'i sbyor la sogs/ /de yi lam gyis 'grub phyir ro/ /zhes bya ba smos te/ de'i lam gyis zhes bya ba ni/ bla mas bstan pa'i thabs kyis so//bslab pa sbyin pa sngon 'gro bas/ /de nas maN+Dal la sogs bya/ /zhes bya ba ni sngar bstan pa'i mtshan nyid dang ldan pa'i slob dpon gyis dang por dge bcu'i bslab pa sbyin pa dang / gsum la skyabs su 'gro ba sngon du 'gro bas sngar bstan pa'i mtshan nyid can gyi slob ma dkyil 'khor du gzhug pa la sogs pa byas la/dbang bskur bar bya'o/ zhes bya ba'i don to/ /dbu rgyan gyi dbang bskur ba gsungs pa/ sngar bstan yi ge gcig po yis/ /sangs rgyas lnga ni bstan par bya/ /zhes bya ba la sngar bstan yi ge zhes bya ba ni yi ge hUM ngo //gcig po zhes bya ba ni yi ge a'o/ /'dir oM swA hA zhes bya ba yang blta bar bya ste/ des na oM hUM a swA hA zhes bya ba'i sngags su 'gyur ro/ /sangs rgyas lnga zhes bya ba ni sangs rgyas lnga'i rang bzhin gyi cod pan gyi dbang ste de sngags des sbyin par bya ba'o//de'i rnal 'byor zhes bya ba la sogs pa la/ de'i rnal 'byor zhes bya ba ni dbu rgyan gyi dbang bskur ba'i rnal 'byor ro/ /'dod pa bzhin zhes bya ba ni gang 'dod pa dang ji ltar 'dod pa bzhin no/ /sngags kyi dbang bskur ldan pa yis/ /yi ge brgyad po bsgom par bya//zhes bya ba ni sngags kyi dbang bskur nas lus gnas brgyad du yi ge brgyad dgod pa'o/ /gnyis med gtor sbyin dbang bskur ba'i/ /de yi chos ni shes par bya/ /zhes bya ba ni gtor ma sbyin pa sngon du 'gro bas rdo rje dril bu'i dbang bskur ba bstan pa yin no//sbyor ba'i dbang bskur ldan pa la/ /ye shes rnam shes bstan par bya/ /zhes bya ba ni dbang bskur ba de dag dang ldan pa la ye shes la sogs pa bstan par bya ba'o/ /de nas ming gi dbang bskur nas slob dpon gyi dbang bskur ba sbyin par bya ste/ de nyid kyi phyir/slob dpon dbang ni bskur nas su/ /thams cad gsang ba la sogs bstan/ /zhes bya ba smos te/ thams cad ces bya ba'i sgra slob dpon gyi dbang bskur ba la/ rdo rje dang rdo rje dril bur ldan pa'i lag pas 'khyud pa bstan to/ /gsang ba zhes bya ba ni de'i 'og tu gsang ba'i dbang bskur ba'o//sogs pa'i sgras ni dbang bskur ba bzhi pa gzung ngo / /dbang bskur ba'i rim pa'o/ /de thams cad bstan pa'i phyir/ dang por zhes bya ba la sogs pa smos te/ dkyil 'khor rdzogs par byas nas dang por slob ma lhag par gnas par bya ste/bla gos phrag pa gcig tu gzar nas zhes bya ba la sogs pa ni slob ma'i bya ba'o/ /de ltar mdun du gnas pa la/ slob ma'i kha sgo dag par bya ba'i phyir/ oM a dzi hwa saM brta ni hUM phaT ces bya ba'i sngags lan bdun bzlas pa'i so shing dang chu byin la sdom pa sbyin par bya ba'o//bla ma ji lta bus sbyin par bya zhe na/ bla ma zhes bya ba la sogs pa smos te/ bla ma seng ge'i stan la 'dug cing rang gi lhar bsgom pas sbyin par bya'o/ /ci zhig byas la sbyin zhe na/ lag pas zhes bya ba la sogs pa smos te/slob ma'i thal mo snying gar sbyar ba byas nas slob dpon gyi lag pa g.yas pas bzung la sbyin pa'o/ /sdom pa dngos gang zhe na/ sangs rgyas zhes bya ba la sogs pa smos te/ sangs rgyas chos dang dge 'dun la/ /zhes bya ba nas/ bdag gis tshul khrims 'di bgyi'o/ /zhes bya ba'i bar du slob mas brjod par bya ba'o/ /nan tur brjod par bya zhe na/ de ltar lan gnyis lan gsum du/ /mnyam nyid brtan pa'i sems ldan brjod/ /ces bya ba smos te/ lus la sogs pa mnyam zhing rnam par dag pas lan gsum du brjod par bya'o//de nas shes rab kyi pha rol tu phyin pa la sogs pa'i chos zab mo bstan pa sngon du 'gro bas dkyil 'khor du gzhug par bya ste lhag par gnas pa'i cho ga'o/ /de nas dkyil 'khor mchod pa nyi shus mchod la rdo rje dril bu dkrol zhing glu yis bstod pa byas nas/dar gyis gdong g.yogs te/ snyim par me tog bzung la dkyil 'khor gyi mdun du slob ma gzhag la/ slar yang sdom pa byin te/ oM swa b+hA ba zhes bya ba la sogs pa'i dag pa rnam pa gsum brjod do/ /de nas yang / nga rgyal dang ni khro ba dang / / brlang dang tshig rtsub spang bar bya/ /zhes bya ba la sogs pas byams pa la sogs pa la rab tu bkod de/ oM pany+tsa DA ki nI zhes bya ba la sogs pa'i sngags tshig gsum gyis slob ma phyag lan gsum byad du bcug la/ sa ma ya s+t+waM/ sa ma ya ho zhes bya ba la sogs pa'i sngags brjod nas/ a ni yig 'bru kun gyi mchog /ces bya ba la sogs pa'i tshul gyis/ lus ngag yid gsum byin gyis brlabs la bdud rtsi lnga sbyin no/ /de nas dbab pa bya ste/ tiSh+Tha badzra sa ma ya ma nu pA la ya/ hUM hUM hUM ho ho ho swA hA zhes bya ba'i sngags kyis me tog dor la/ oM dz+nyA na tsak+Shu hUM swA hA zhes bya bas gdong g.yogs bkrol la dkyil 'khor bstan par bya'o//de nas slob ma shar sgor gnas te snying gar thal mo sbyar la/ oM badzra maN+Dal/ ma hA maN+Dal/ pra bisto haM yo ga maN+Dal/ ma hA maN+Dal/ pra daR+sha no hi/ gu h+ya maN+Dal ma hA maN+Dal d+ha k+Shi p+to haM sa ma yo haM zhes brjod du bcug la/ de'i yan lag la slob dpon gyis go cha bkod de/slob ma lha'i nga rgyal byed du bcug la chu la sogs pa'i dbang bskur bar bya'o/ /de la/ lus kyi las ni rnam gsum dang / /zhes bya ba la sogs pas ni slob ma la chos bshad pa ston pa yin te/ lus bsdams pas ni dam tshig bsrung / /zhes bya ba ni lus la sogs pa'i las yang dag par bsdams pas bsrung ba'i dam tshig rnams bsrung ba dang /gzhan yang dam tshig gi sgras bza' ba'i dam tshig lcags kyu lnga dang bdud rtsi lnga'i mtshan nyid rjes su skyong zhing mi 'gom par ston pa yin no/ /de nas lus la sogs pa mnyam par ldan pa la zab cing rgya che ba'i chos bshad pa'i phyir/sems ni zhes bya ba la sogs pa smos so/ /slob ma dkyil 'khor du gzhug pa'i phyir gdong g.yogs par bya ba gsungs pa/ de nas ras kyis mig bkab nas/ gtor ma'i gnas su gzhug par bya/ /zhes bya ba la/ gtor ma'i gnas zhes bya ba ni/ dkyil 'khor gyi sa gzhi'o//lag pas lag pa bzung nas su/ /slar yang bslang ba bstan par bya/ /zhes bya ba la/ slar yang zhes bya ba ni dkyil 'khor gyi sgo drung du khrid nas yang sdom pa sbyin pa ste/ sngar bstan pa'i sdom pa la ltos pa yin no/ /sdom pa gsungs pa/ sangs rgyas zhes bya ba la sogs pa ste/'dir yang sngar smos pa'i sdom pa rnams la brjod la/ de'i 'og tu sa bon 'di gdon pa'o/ /sbyor ba'i gdan zhes bya ba ni dkyil 'khor ro/ /shes rab ye shes kyi dbang bskur ba'i rjes la/ bzhi pa bstan par bya ba'i phyir/ don dam rtogs mchog ces bya ba la sogs pa smos te/don dam zhes bya ba ni don dam pa'i ye shes so/ /de nyid rtogs par bya bas na rtogs pa'o/ /phul du byung bas na mchog go/ /seng ge dang 'dra bas na seng ge ste bsgrub par bya ba'o/ /slob ma rnams shes nas zhes bya ba ni/ don dam pa'i rang bzhin zab mo la slob ma mos par shes nas/de nyid rgyal po de la bstan par bya zhes bya bar sbyar ro/ /gzhan yang slob ma de ci 'dra zhe na/ rnal 'byor ldan pas sgrib g.yogs snam bu dral ba'i phyir/ /zhes bya ba smos te/ rnal 'byor ldan pa zhes bya ba ni rnal 'byor la dga' ba'o/ /ci'i don du zhe na/sgrib g.yogs snam bu dral ba'i phyir te/ rmongs pa gcad pa'i phyir ro/ /de nyid rgyal po ci lta bu zhig bstan zhe na/ srid pa'i nyes dmigs zhes bya ba la sogs pa smos te/ srid pa ni phung po lnga'o/ /de nyid ni sdug bsngal bas na nyes dmigs so/ /bskyed pa zhes bya ba ni sdug bsngal skye ba'i sa gzhi ste 'dod chags la sogs pa'i nyon mongs pa rnams so//bcom nas su zhes bya ba ni spangs pas so/ /de bcom nas ci zhig byed ce na/ /rnal 'byor don dam 'grub byed pa/ /zhes bya ba smos te/ rnal 'byor don dam ni phyag rgya chen po'i dngos grub ste/de sgrub par byed pa'o/ /de nyid rgyal po zhes bya ba ni gnyis su med pa'i ye shes te/ de nyid bla mas ji ltar bstan pa las/ gzhan du mi 'gyur bar gsal bas de nyid rgyal po'o/ /a ni zhes bya ba la sogs pa ni go sla'o/ /bdud rtsi lnga dang ldan pa la/ /zhes bya ba la sogs pa ni bdud rtsi lnga sbyin pa'o//bla ma'i zhabs kyi drung du ni/ /zhes bya ba la sogs pa ni phyag bya ba'o/ /rdo rje phyag rgyar ldan pa yis/ zhes bya ba la sogs pa ni lus la go cha bkon pa ste/ tshig gi don ni go sla'o/ /gzhan yang zhes bya ba la sogs pa ni lung bstan pa ste/rdzogs pa'i byang chub ces bya ba ni byang chub chen po'o/ /chos rnams thams cad kyi zhes bya ba ni thams cad kyi dam pa dang gtso bo zhes bya bar sbyar ro/ /de nas zhes bya ba la sogs pa ni go sla'o/ /dbang bskur ba'i mthar yang bslab pa sbyin pa bstan pa'i phyir/ chos rnams zhes bya ba la sogs pa smos te/chos rnams rang bzhin dag pa nyid/ /ces bya ba ni/ gzung ba la sogs pa'i rang bzhin dang bral bas rnam par dag pa'i ngo bo nyid du 'dzin pa'o/ /des cir 'gyur zhe na/ dngos po'i rang bzhin nyid ces bya ba la sogs pa smos te/ stong pa nyid la mngon par zhen pa yin pa'i phyir ro//de bzlog pa'i phyir/ dngos po'i rang bzhin med pa ru/ /rdzogs pa'i byang chub rim pa bstan/ /zhes bya ba smos te/ de la byang chub ni de kho na nyid rtogs pa'o/ /rang bzhin med pa ni ngo bo nyid med pa ste/ don dam par rtogs pa po dang / rtogs par bya ba dang / rtogs pa gsum ni mi dmigs pa'o//de mi dmigs pas su la ci zhig gis bstan te/ bstan du med par bstan pa'o/ /'dis ni bdag med pa'i blo la gnas nas mi dge ba las bzlog cing dge ba la 'jug pa ston to/ /de nyid gsungs pa/ sngon du zhes pa la sogs pa la/ chos zhes bya ba ni dge ba rnams so//sngon du zhes bya ba ni dang por 'gro ba ste rtsa ba'o/ /ci zhig ce na/ bzod pa zhes bya ba smos so/ /de nyid ni/ sems can rnams la gzir mi bya/ /zhes bya bas ston te/ gzhan du na rang gi nyon mongs pa la ni bzod par mi bya'o/ /gzhan la tshig rtsub smra mi bya ba ni/ gzhan gyi 'tshang 'bru bas zhe 'gras par gyur pa'i tshig ni tshig rtsub ste/ de smra bas thams cad mi dga' zhing gdung ba skye bar 'gyur bas na de las bzlog par bya ba'o/ /gzhan du na bdag gi skyon gyi nyes pa rnams mtshang 'bru bar bya ba ni ma gtogs so/ /tshul khrims gsungs pa/ tshul khrims zhes bya ba la sogs pa ste go sla'o//gzhan du na sems can du 'dzin pa la sogs pa'i bdag tu lta bas ni gsad par bya'o/ /ma byin par len pa spang ba gsungs pa/ rab tu 'bar me zhes bya ba la sogs pa la 'dir yang gzhan du na/ shes rab kyi chu skyes las byang chub kyi sems kyi rdzas ma byin par blang bar mi bya'o/ / brdzun smra ba spang ba gsungs pa/ rags dang zhes bya ba la sogs pa la/ rags pa ni rin po che la sogs pa'o/ /phra mo ni rdul la sogs pa'o/ /ji ltar bsrung zhe na/ rnal 'byor spyod pa'i rnal 'byor pa/ de la brdzun smra yod ma yin/ /zhes bya ba smos te/ rnal 'byor ni ting nge 'dzin to//spyod pa ni shin tu mnyam par gzhag pas bsgom pa'o/ /gang dus rtag tu shin tu mnyam par bzhag pas brdzun bsrung bar bya ste/ brdzun ni mnyam par ma bzhag pa las byung ba'i phyir ro/ /'di yang chos thams cad brdzun pa nyid du bstan pa ni ma gtogs so/ /dngos grub thams cad kyi rgyu mtshan ni/yang dag par sdom pa thams cad dang / sems can bstan pa yin par bstan pa'i phyir/ spyod pa legs par bsdam pa dang / /zhes bya ba la sogs pa smos so/ /dbugs dbyung ba bstan pa'i phyir/ gang zhig kun shes slob ma la/ /zhes bya ba la sogs pa smos so//lhag ma ni go sla'o/ /dman par dmigs pa'i sbyin pa thar pa'i bgegs kyi gtso bo nyid yin pas/ de dgag pa'i phyir/ sems can zhes bya ba la sogs pa smos te/ srid pa zhes bya ba ni longs spyod la dmigs pa ste sa gzhi lta bu'o/ /de nyid kyis ni tshong byed ces bya ba ste/rdzas don du gnyer ba'o/ /myu gu 'phel zhes bya ba ni sbyin pa'i sa bon gyis bskyed pa'i longs spyod kyi ljon shing gi myu gu'o/ /des cir 'gyur zhe na/ 'gro ba'i 'bras bu lam 'gog pa/ /zhes bya ba smos te/ 'gro ba ni 'gro ba ris drug go/ /'bras bu ni der longs spyod thob pa'o/ /sbyin pas ngan 'gro'ang longs spyod thob//ces smos pas na sbyin pas ngan 'gro'i gnas su yang longs spyod 'thob pa'o/ /lam 'gog pa zhes bya ba ni 'bras bu des sangs rgyas nyid kyi lam 'gog par 'gyur te/ longs spyod la chags pa'i phyir dang / gzhi des ltung ba 'byung ba'i phyir ro/ /gzhan du na mi dmigs pa dang ldan pa'i byang chub chen por bsngo ba ni ma gtogs so//de nyid bstan pa'i phyir/ mtho ris zhes bya ba la sogs pa smos te/ lus can zhes bya ba ni rnam par shes pa'o/ /byas pa zhes bya ba ni longs spyod dang ldan par bya ba'o/ /dga' zhing rtse ba'i longs spyod kyis/ /zhes bya ba ni ma rig pa'i dbang gis yang dang yang du bsten pas so//srid par ltung bar 'gyur zhes bya ba ni mi khom par skye ba'o/ /bsgom pa la gus pa'i rnal 'byor pa rnams kyis mchod rten gyi las la sogs pa spang bar bya ba'i phyir/ mchod rten zhes bya ba la sogs pa gsungs te/ lag pa'i phyag rgya mi bcing zhing //zhes bya ba ni 'dir kha sbyar sbyor ba'i phyag rgya bcing ngo zhes bya ba'i don to/ /gzhan du na 'di dag rnal 'byor la zhen pa med pa rnams kyis dgag par bya ba ni ma yin no/ /bstan bcos dag ni rnyed sla ste/ /de yi sbyor ba rnyed par dka'/ /zhes bya ba la/ bstan bcos zhes bya ba ni bstan bcos nyan pa dang /klog pa la sogs pa'o/ /rnyed sla zhes bya ba ni thams cad kyis bgrod pa'i phyir ro/ /'on kyang des 'bras bu bsgrub par nus pa ma yin te/ ji skad du/ sman pa'i ngag ma mnyan par sman dag gis/ /bcos dgos nad pa sos par ga la 'gyur//sman spyad bklags pa tsam gyis ni/ /nad pa la ni de phan nam/ /zhes gsungs so/ /yang na rnyed sla zhes bya ba ni mnyan pa dang bklag pa nyams su blang sla ba ste/ 'di na mkhas min 'ga' yang med/ /ces bya ba lta bu'o/ /de'i sbyor ba zhes bya ba ni/ shes rab gsum sngon du 'gro bas mngon par rtogs pa'o//rnyed par dka' ba ni nyams su blang dka' ba nyid dang / thos pa dang bklags pa tsam la sogs pas mngon sum du mi 'gyur ba'i phyir te/ shin tu 'bad pas nyams su blangs pa las gyur ba'i phyir ro/ /gzhan dag na re/ bstan bcos ni phyi'i bstan bcos so/ /sbyor ba ni rnal 'byor chen po'i gtsug lag go zhes zer ro/ /slob dpon dag gi lam gyis ni/ /mkhas pa yis ni blta bar bya/ /zhes bya ba la slob dpon gyi lam zhes bya ba ni/ mnyan pa la sogs pa gang rnyed sla ba yin te/ de sngon du 'gro bas bdag nyid kyis nyams su blangs pas blta bar bya ba'i thos pa dang /bklags pa tsam gyis mngon sum du bya ba ma yin no zhes bya ba de ltar ston pa yin no/ /blta bar bya zhes bya ba ni yun ring du gus par nyams su blangs pas sbyor ba blta bar bya ba ste de nyid kyi phyir mkhas pa zhes bya ba smos so//de yang ji skad du/ /de bzhin gshegs pa ston mdzad yin/ /khyed rnams kyis ni de ltar byos/ /zhes gsungs pa'o/ /goms par bya ba de yang rang gi sems las bsgrub pa bstan pa'i phyir/ bdag gi lha dang lha gzhan las/ / bdag gi lha ni lha yi mchog /ces bya ba smos te/ bdag gi lha zhes bya ba ni/ bdag nyid lhar bya ba'o/ /lha gzhan zhes bya ba ni/ lugs ma dang / brdungs ma la sogs pa'i lha ste/ ji ltar phyi rol gyi lha phyi rol gyi rdzas las phyi'i bya bas lhar bcos pa ltar rang gi lha yang sems kho na las nang gi yid la byed pas byas pa yin no//de gnyis las 'dir gang zhig bsod nams sog par 'gyur zhe na/ bdag gi lha ni lha yi mchog /ces bya ba smos te/ rang gi sems las lha'i skur byas pa'i ye shes dang / rmongs pa bdag tu 'dzin pa rnams kyi phyi rol gyi bems po'i lha gnyis rgya mtsho dang glang rjes ltar bsod nams bskrun du ga la rung ste/rgyu'i khyad par gyis 'bras bu khyad par can du 'gyur ro zhes bya bar dgongs so/ /gal te de ltar na/ des ci zhig bya zhe na/ bdag gi gzugs su mi nus pas/ / gzugs brnyan la sogs bri bar bya/ /zhes bya ba smos te/ phyi rol gyi mngon par zhen pa can rnams kyis phyi rol gyi lha bsten pas/ de dag la de dang rjes su mthun pa'i bsod nams byed de/ 'gal ba med do zhes bya bar dgongs so/ /gsang ba'i gdan zhes bya ba la sogs pa la/rab tu byed pa zhes bya ba ni gzhung 'dis slob dpon gyi mtshan nyid dang / slob ma'i bya ba dang / slob ma dbang bskur ba la sogs pa rnams gsal bar byed pas na rab tu byed pa'o/ /dpal gdan bzhi pa'i 'grel pa dran pa'i rgyu mtshan zhes bya ba las gsang ba'i gdan gyi rim par phye ba dang po'o// //dngos grub kyi thabs yang dag par bsdus pa'i rim par phye ba bstan pa'i phyir/ der ni zhes bya ba la sogs pa gsungs te/ sbyor ba zhes bya ba ni de kho na nyid kyi man ngag go/ /der ni zhes bya ba ni bstan bcos la ste/ bstan bcos las rnyed par dka' ba'o//rdo rje rgyal po gtso bo zhes bya ba ni phyag na rdo rje la bod pa ste/ rdo rje zhes bya ba ni gnod sbyin gsang ba ba'o/ /de rnams kyi bdag por gyur pa dang / dga' bar byed pas rgyal po gtso bo'o/ /de kho na nyid kyi man ngag mi shes na/ nyes pa cir 'gyur snyam pa la/de nyid med pa'i sngags pa rnams/ srid pa'i 'phel byed 'og tu lhung / zhes bya ba smos te/ 'og tu ltung zhes bya ba ni/ 'khor bar rgyu zhing gnas pa'o/ /de nyid kyi phyir srid pa 'phel byad ces bya ba smos so/ /bcom ldan 'das kyi gsung gis skabs phye bar rig nas/phyag na rdo rjes gsol pa/ lus la ngo mtshar skyes gyur pas/ /zhes bya ba la sogs pa smos te/ de nyid chos zhes bya ba ni/ lus kyi de kho na nyid kyi chos sam/ lus kyi chos kyi de kho na nyid do/ /mdor bstan pa de nyid yang gsungs pa/ rnal 'byor gyi ni zhes bya ba la sogs pa la/rnal 'byor ni de kho na nyid kyi ting nge 'dzin to/ /tshad ma ni rang bzhin no/ /sngags dang phyag rgya ci lta bu/ /zhes bya ba ni/ sngags dang phyag rgya'i rang bzhin ci 'dra zhes bya ba'i don to/ /lus kyi tshad ces bya ba ni 'byung ba'i lus kyi rang bzhin no/ rnal 'byor ba yi gtor ma'i las/ /rab tu sbyor ba'i tshad ma gang / /zhes bya ba ni/ ra sa ya na'i rang bzhin no/ /gang gis 'gro ba bsgrub pa yis/ /mtshan nyid tshad ma ji ltar lags/ /zhes bya ba la/ gang gis zhes bya ba ni rgyu'o/ /'gro ba ni lha la sogs pa'i 'gro ba ste/'gro ba rnams kyi rgyu'i mtshan nyid ni ci zhig lags/ 'gro ba rnams kyi tshad ma ste/ ngo bo nyid ni ci'i mthar thug ces bya ba'i don to/ /lan gsungs pa/ mtshon bya zhes bya ba la sogs pa la/ mtshon bya zhes bya ba ni shes par bya ba ste/ ji ltar grags pa'i lus so//sems kyi tshad ces pa ni/ sems kyi rang bzhin te/ lus kyi sems kyi rang bzhin te/ lus ni sems kyi rang bzhin yin/ /zhes bya ba'i bar du'o/ /dmigs su med pa'i sems kyi ting nge 'dzin bstan pa'i phyir mtshan ma dang bcas pa'i bya ba bzlog par bya ba'i phyir/bdag gi khams na zhes bya ba la sogs pa smos te/ bdag gi khams ni mi brtan pas/ /zhes bya ba ni/ rang lus kyi khams dang / chu dang / me dang rlung rnams mi rtag ces bya ba'i don to/ /bdag tu 'dzin pa'i ting nge 'dzin te/ mtshan ma la dmigs shing 'gyur ba dmigs pa'i phyir ro//gtor ma'i las dang bzlas pa dang / /dkyil 'khor me dang chu yi las/ /phyag rgya bdug sogs mchod pa yi/ /'bras bu thob pa'i rnal 'byor pa'ang / /srid pa'i rgya mtshor ltung bar 'gyur/ /zhes bya ba ni/ mtshan ma dang bcas pa'i dge ba'i 'bras bu'ang mi brtan pa nyid du bstan pa yin te/gtor ma la sogs pa'i mtho ris kyi 'bras bu dus cung zad cig tu longs spyod nas/ yang de las nyams shing ltung bar 'gyur ba'i phyir ro/ /de la bzlas pa zhes bya ba ni sngags bzlas pa'o/ /dkyil 'khor zhes bya ba ni lha'i dkyil 'khor gyi ting nge 'dzin to//me dang zhes bya ba ni me'i sbyin sreg go/ /chu'i las zhes bya ba ni chu'i sbyin sreg go/ /phyag rgya zhes bya ba ni lag pa'i phyag rgya bcing ba'o/ /bdug sogs mchod pa zhes bya ba ni me tog dang spos dang dri dang mar me dang lha bshos la sogs pa'i phyi'i mchod pa ste/'di dag thams cad mi rtag go zhes bya bar dgongs so/ /'bras bu thob pa med ces bya ba ni 'di la sogs par mngon par zhen pa'i rnal 'byor pas 'jug na de'i tshe srid pa'i rgya mtsho ltung bar dgongs shing gtor ma'i las la sogs pa la mngon par zhen pas 'khor ba'i 'bras bu thob par gyur te/mtho ris kyi 'bras bu dus cung zhig longs spyod nas nyams shing ltung bar 'gyur ba'i phyir ro/ /srid pa'i rgya mtsho zhes bya ba ni de nyid las brtsams nas/ gang gis 'gro ba'i bsgrub pa'i mtshan nyid tshad ma ji ltar lags//zhes bya ba de nyid zur phyin par gsol ba gdab pa'i phyir/ srid pa zhes bya ba la sogs pa smos te/ srid pa so sor 'byung ba rnams/ /zhes bya ba ni 'dod pa dang gzugs dang gzugs med pa'i khams su so sor skye ba len pa'o/ /gang gis de yi tshad ma ste/ / zhes bya ba ni skye ba blangs pa gang yin pa de dag de'i zhes bya ba sems kyi rang bzhin yin te/ sems kyis blangs pa'o/ /sems ni ji ltar blta bar bgyi/ /zhes bya ba ni/ sems ci lta bu zhig gis lus ci 'dra ba dag cig blangs pa lags zhes bya ba'i don to/ /lan gsungs pa/'khor ba zhes bya ba la sogs pa ste/ 'khor ba khyod kyis dris pa yi/ /zhes bya ba ni/ sems kyis srid pa len pa khyod kyis dris pa nyon cig pa'o/ /sems ci lta bus she na/ sems ni yid gnyis bkrus nas su/ /zhes bya ba smos te/ the tshom gyi dri ma dang bral ba'i sems kyis so//yang na yid gnyis ni sems kyi rgyu ba mang po ste/ de dang bral zhing mnyam par gzhag pas so/ /rang dga'i ye shes zhes bya ba la sogs pa la/ rang dga' zhes bya ba ni 'grub par 'gyur zhes bya ba dang 'brel te/ rang gi bya ba'i las dang nyon mongs pa'i dbang gis 'grub pas na/rang dgas so/ /ci zhig 'grub ce na/ ye shes dngos po med pa ste/ rang bzhin gyis rnam par dag pa'i sems nyid de dag tu 'grub par 'gyur ba'o/ /yang na rang dga'i ye shes ni rang rig pa'i ye shes so/ /ci 'dra zhe na/ mkha' 'gro rlung ni bskyod pa bzhin//zhes pa ste/ nam mkha' la rlung rgyu ba ltar skye ba len pa'o/ /yang na mkha' 'gro rlung ni bskyed pa zhes bya ba ni/ pha'i sa bon phyung ba'i dus su ste/ de'i tshe'o/ /gzhung kha cig las/ mkha' 'gro rlung gis bcings pa yis/ /zhes bya bar 'byung ste/de'i tshe mkha' 'gro ni las dang nyon mongs pa ste/ lus med par rgyu ba'i phyir ro/ /rlung ni go bar zad do/ /bcings pa ni de nyid kyis ye shes kyi lus bcings pa ste/ des skye ba 'grub pa'o/ /gzugs med ces bya ba ni nam mkha' mtha' yas skye mched dang / rnam shes mtha' yas skye mched dang / ci yang med pa'i skye mched dang / yod min med min gyi skye mched kyi lha'o/ /gzugs zhes bya ba ni gzugs khams te/ de yang tshangs ris dang / tshangs pa'i mdun na 'don dang / tshangs pa chen po'o/ /dge chung dang / tshad med dge dang / dge rgyas dang / 'od chung dang / tshad med 'od dang / 'od gsal dang / sprin med dang / bsod nams skyes dang / 'bras bu che dang gnas gtsang ma'i phyogs gcig gi lha rnams so/ /bsam gtan dmigs pas 'grub par 'gyur//zhes bya ba ni/ bsam gtan la sogs pa la snyoms par 'jug pa'i las kyis grub pa'o/ /'dod lha zhes bya ba ni/ rgyal chen rigs bzhi dang / sum cu rtsa gsum dang / 'thab bral dang / dga' ldan dang / 'phrul dga' dang / gzhan 'phrul dbang byed kyi lha rnams so//sogs pa'i sgras ni mi'i 'gro ba la sogs pa gzung ste 'dzam bu'i gling dang / shar gyi lus 'phags dang / byang gi sgra mi snyan dang / nub kyi ba glang spyod pa'i mi rnams dang / yi dwags dang / byol song dang / yang sos dang / thig nag dang / bsdus 'joms dang /ngu 'bod dang / ngu 'bod chen po dang / tsha ba dang / rab tu tsha ba dang / mnar med pa rnams dang / grang ba'i dmyal ba brgyad dang bcas pa ni dmyal ba chen po brgyad ces bya ba ste/ de ltar gnas nyi shu ni/ 'dod can rnams zhes bya ba'o/ /rtag tu 'dod bzhin spyod pa ste//zhes bya ba ni/ de dag tu rnam par shes pas lus blangs nas ji ltar byas pa'i las bzhin du 'bras bu la longs spyod pa'o/ /de ltar zhes bya ba ni srid pa gsum du skye ba blangs pa'o/ /mi zhes bya ba ni mi la sogs pa'o/ /rang 'dod pa la sogs pa 'grub ces bya ba ni/ las kyi dbang gis rnam par shes pas gnas tha dad pa'i lus blangs pa'o/ /de las sgrol ba'i dngos po rnams/ /zhes bya ba ni 'khor ba de las sgrol ba'i thabs so/ /rnal 'byor can gyis rnam shes dang / /lhan cig 'gro bas 'gro ba 'grub/ /ces bya ba la/ rnam shes dang zhes bya ba ni kun gzhi rnam par shes pa'o//lhan cig ces bya ba ni lhan cig byed pa'i rkyen te/ las kyis nye bar len pa'i rgyu dang nyon mongs pa'i lhan cig byed pa'i rkyen gyis 'gro ba 'grub ste/ snga ma'i rnam par smin pa zad nas rnam par shes pa 'gro ba gzhan dang gzhan du rnam par smin pa'i lus len pa'o//de yang rab tu byed pa sum cu pa las/ len pa'i bag chags 'dzin gnyis kyi/ /bag chags bcas pa snga ma yi/ /rnam par smin pa zad nas gzhan/ /rnam par smin pa bskyed pa yin/ /zhes gsungs te/ der yang 'dzin pa gnyis zhes bya ba ni/ gzung bar 'dzin pa dang /'dzin pa por 'dzin pa'o/ /rnam par smin pa zhes bya ba ni kun gzhi rnam par shes pa'o/ /de ltar tha mal pa'i 'gro ba 'grub pa'i rgyu mtshan bshad nas/ rnal 'byor pa'i bstan pa'i phyir/ rnal 'byor can gyis zhes bya ba la sogs pa gsungs te/ rnal 'byor can ni thabs dang shes rab mnyam par sbyor ba'i lha'i ting nge 'dzin dang ldan pa'o//rnam shes zhes bya ba ni lhan cig skyes pa'i ye shes te dri ma med pa'o/ /lhan cig 'gro bas zhes bya ba ni 'das ma thag pa'i lha'i rnal 'byor dang lhan cig tu ste des bsgoms pas so/ / 'gro ba 'grub ces bya ba ni/ rang dga'i 'gro ba ste/ thams cad mkhyen pa'i bar du ji ltar 'dod pa bzhin du 'gro ba'o/ /sdud par byed pas lam de nyid gsal bar bya ba'i phyir/ slar gsol pa/ sems kyi ngo bo the tshom pas/ /bcom ldan de yang bshad du gsol/ / zhes bya ba la sogs pa 'byung ba la bshad du gsol zhes bya ba ni/ the tshom dang bral bar mdzod cig pa'o/ /de yang zhes bya ba ni gzhan la ltos pa'o/ /shes rab rnam shes dngos rang bzhin/ /zhes bya ba la sogs pa la/ shes rab ces bya ba ni ye shes ci ltar lags zhes bya ba dang 'brel to//de la shes rab ces bya ba ni rab tu shes pas na shes rab ste lhan cig skyes pa'i ye shes so/ /ci zhig rab tu shes she na/ rnam shes dngos rang bzhin te/ dngos po gzugs la sogs pa rnams nyid shes par bya bas na/ rnam shes te de rnams kyi rang bzhin no//ji ltar shes she na/ mi shes zhes bya ba smos te/ gzung ba dang 'dzin pa'i rang bzhin du mi shes pas na mi shes pa'o/ /de nyid kyi phyir/ rnam shes zhes bya ba la sogs pa smos te/ bi zhes bya ba ni yul rnams so/ /de'i de kho na nyid shes pas na rnam shes te shes rab po//so so rang gis rig pas na ye shes te/ mtshan nyid ni de'i rang bzhin no/ /gzhung kha cig las ni/ gang gis rnam shes srid pa'i dngos/ /zhes bya bar 'byung ste/ rnam par shes pa srid pa'i dngos te/ dus rtag tu gnyis su 'byung ba las rnal 'byor pas gnyis su med pa'i ye shes kyi mtshan nyid ji ltar blta bar bgyi zhes bya bar sbyar ro//lan gsungs pa/ shel dang zhes bya ba la sogs pa la/ shel dang mtshungs pa zhes bya ba ni rang bzhin gyis rnam par dag pa ste/ rnam pa du mar snang ba'i phyir ro//ci rnam pa de dag yongs su yod dam zhe na/ sems la skyon dang yon tan med/ /ces bya ba smos te/ gzung ba dang 'dzin pa'i rang bzhin dang bral lo/ /yang na mi mthun pa dang gnyen po'i rnam pa dag dngos por ma grub pa'o/ /'o na ji ltar snang zhe na/yul rnams dang ni phrad pa yis/ /srid pa'i skyon gyis gos pa yin/ /zhes bya ba gsungs te/ yul rnams dang phrad pa zhes bya ba ni gnyis su snang ba'o/ /srid pa zhes bya ba ni dngos por 'dzin pa'i bag chags te/ 'di las gnyis su snang ba srid cing skye ba'i phyir ro//skyon zhes bya ba ni nyon mongs pa la sogs pa'i kun nas nyon mongs pa ste/ 'dis sems sun 'byin par byed cing rnam par 'phrul bar byed pa'i phyir ro/ /gzhung kha cig las ni/ yul la 'jug cing phrad pa yis/ /srid pa'i skyon gyis gos pa yin//zhes 'byung ste/ yul ni gzugs la sogs pa'o/ /'jug pa ni mig gi rnam par shes pa la sogs pa'o/ /phrad pa ni mig gi dbang po la sogs pa ste/ rnam pa de dag gis gos pa yin zhes bya bar 'brel to/ /gang gi dbang gis she na/srid pa'i skyon gyis zhes bya ba smos te/ spros pa'i bag chags kyi dbang gis so/ /gal te de ltar na mya ngan las 'das par ci ltar 'gyur zhe na/ gang gis zhes bya ba la sogs pa smos te/ gang gis zhes bya ba ni ye shes gang gis so/ / srid pa'i dngos zhes bya ba ni/ 'khor ba'i rang bzhin no/ /zhi ba zhes bya ba ni mya ngan las 'das pa ste/ 'khor ba dang mya ngan las 'das pa gnyis dbyer med pa'o/ /yul la gnas pa zhes bya ba ni gzung ba dang 'dzin pa'i 'jug pa'o/ /de nyid bstan pa'i phyir/ ji ltar gnas pa bzhin sbyor ba/ /zhes bya ba smos te/ yul gzugs la sogs pa rnams dang / mig la sogs pa'i dbang po rnams la brten nas rnam par shes pa'i khams rnams 'jug pa ste/ yul dang yul can ji ltar snang ba bzhin du gzung ba dang 'dzin par sbyor ba'i khams bco brgyad po bstan to//bu dang slob ma bzhin du gzir/ /zhes bya ba ni bu dang slob ma gnas ma yin pa las bzlog nas/ shes bya'i gnas la 'dzud cing 'dzin pa ltar bzung ba'o/ /de dag gis ni ye shes gang gis 'khor ba'i rang bzhin gzung ba la sogs par mngon par zhen pa bzlog nas 'od gsal ba'i de kho na nyid la gzud bas 'khor ba'i de kho na nyid ji lta ba bzhin du shes pas/sems de nyid mya ngan las 'das pa'i ngo bor ston to/ /de ltar yang / 'khor ba dag ni ma gtogs par/ /mya ngan 'das pa gzhan yod min//zhes gsungs pa dang / gzhan las kyang / 'khor ba'i mtha' ni gang yin pa/ /de ni mya ngan 'das mtha' yin/ /zhes bya ba dang / slob dpon nA gA rdzu nas kyang / 'khor ba dang ni mya ngan 'das/ /gnyis su yod pa ma yin te/ /srid pa yongs su shes pa ni//mya ngan 'das zhes brjod pa yin/ /zhes gsungs pas so/ /gzhung kha cig las ni/ yul la gnas pa bzlog nas su/ /ji bzhin gnas su sbyar byas te/ /bu yi sgo ru gzir bar bya/ /zhes 'byung ste/ de'i tshe yul la gnas pa bzlog pa ni/ gzung ba la sogs par zhen pa bzlog pa'o/ /ji bzhin gnas su sbyar bar bya/ /zhes bya ba ni lhan cig skyes pa'i gnas su'o/ /de nyid bstan pa'i phyir/ bu ga'i sgo ru zhes bya ba smos te/ rdo rje nor bu'i nang du byang chub kyi sems gzung bar bya ba'o/ /de nas ci zhig bya zhe na/ de'i dbus su zhes bya ba la sogs pa smos te/ dbus zhes bya ba ni 'dod chags dang chags bral gyi dbu ma ste/ 'dod chags yang ma yin chags bral kyang ma yin pa'i dbus su'o/ /yang na rtag pa dang chad pa'i mtha' dang bral ba ste/ skye ba dang 'gag pa med pa'i dbus su'o//ci zhig shes par bya zhe na/ rnam shes zhes bya ba smos te/ sems kyi rang bzhin no/ /ji ltar zhe na/ nam mkha' bzhin no/ /yang na ci zhes bya ba ni thun mong ma yin zhing khyad par du 'gyur ba'o/ /dz+nyA na zhes bya ba ni rang rig pa'o/ /de nyid bstan pa'i phyir/kha dog med cing zhes bya ba la sogs pa smos te/ dkar po dang ser po la sogs pa'i kha dog dang bral ba'o/ /thams cad 'tshod ces bya ba ni kha dog thams cad du snang ba'o/ /yang na a zhes bya ba ni dgag pa ste/ chags pa thams cad glo bur ba yin pa'i phyir ro//mi ldan zhes bya ba ni gang gis kyang sbyar du med pa'i phyir ro/ /lus can ldan pa ste zhes bya ba ni dngos po thams cad du song ba'i phyir ro/ /yang na mi ldan zhes bya ba ni chos gang gis kyang sgrib par mi nus pa'i phyir ro/ /ldan zhes bya ba ni lus can thams cad la 'dis 'gegs par byed pa'i phyir ro//gzugs med ces bya ba ni gang gis kyang gnod cing 'tshe ba med pa'i phyir ro/ /yang na 'gyur ba med pa'i phyir gzugs med do/ /kun gyi gzugs zhes bya ba ni 'dis thams cad bcings pa'i phyir ro/ /de bzhin thung ngu ring po min//zhes bya ba ni gzugs med pa'i khyad par bstan pa ste/ de dag gis ni chu la chu blugs pa ltar shel dang mtshungs pa'i sems kyi de kho na nyid ji lta ba bzhin du shes pa shes rab kyi ye shes bstan pa'o/ /gal te de ltar na ni rdzu 'phrul la sogs par ji ltar 'gyur zhe na/sems kyi zhes bya ba la sogs pa smos te/ de kho na nyid ces bya ba ni bcos ma ma yin pa'o/ /des ni lhan cig skyes pa'i ye shes nyid rdzu 'phrul la sogs par 'byung bar ston to/ /rdzu 'phrul de kho na nyid yod dam ci zhe na/ dngos med ces bya ba smos te/ don dam par sems kyi rang bzhin zhes bya ba'i bar du'o//ci sems de kho na nyid yod dam zhe na/ mtshan nyid med pa zhes bya ba smos te/ mtshan nyid med na dngos po'ang med do snyam du dngos so/ /mtshan nyid thams cad ster ba'o/ /zhes bya ba ni mtshan nyid thams cad dag par byed pa zhes bya ba'i bar du'o//mtshan nyid med pa'i sems kyis lha'i ting nge 'dzin bsgom pa bstan pa'i phyir/ dngos po med par bsgom pa yis/ /bsgom pa dag ni mtshon par bya/ /zhes bya ba smos te/ bsgom pa dag ces bya ba ni lha'i ting nge 'dzin to/ /dngos po med par bsgom pa zhes bya ba ni//bdag med par zin pa'o/ /mtshon par bya zhes bya ba ni goms par bya'o/ /de nyid bstan pa'i phyir/ gzugs dang zhes bya ba la sogs pa smos te go sla'o/ /thams cad ces bya ba la sogs pa la thams cad ces bya ba ni lha'i rnam pa'o/ / kun nas dmigs pa ni bdag med par dmigs pa'o/ /rnal 'byor gyi lus ni stong pa nyid dang snying rje dbyer med pa'i sku'o/ /skyon med pa ni nyon mongs pa med pa'o/ /yang gsungs pa/ gsang las zhes bya ba la sogs pa ste/ gsang ba zhes bya ba ni ye shes so/ /gsang ba zhes bya ba ni dbang po rnams kyi rang bzhin dang bral ba'o//gsang chen po zhes bya ba ni yul gyi rang bzhin dang bral ba ste yul las 'das pa'o/ /rnam shes gsang ba dag ces bya ba ni/ rnam par shes pa'i rang bzhin las 'das pa ste ye shes so/ /de dag gis ni rang rig pa'i ye shes tsam ste/don dam par dbang po la sogs pa'i sbyor ba dang bral bar ston to/ /bstan bcos klog la sogs sbas shing / /yul gyi mtshan nyid las kyang ring / /zhes bya ba ni/ bstan bcos klog pa dang / nyan pa la sogs pa'i yul du mi 'gyur te/ de nyid kyis na sbas pa yin no//yang na phyi'i bstan bcos kyi nang du gab pa'o/ /de lta bu'i ye shes gang las shes shing blang bar bya zhe na/ mtshon bya zhes bya ba la sogs pa smos te/ ye shes kyi mtshan nyid bla ma'i lam nas ston par 'gyur ba'o/ /sems dang lus su bcas mnyam zhing //zhes bya ba ni/ lus dang sems gnyis ka bde ba ste/ 'di la bde ba ni blang bar bya ba yin la/ sdug bsngal ni spang bar bya ba yin pa'i phyir ro/ /de nyid kyi phyir/ lus ni gdung bar mi bya ste/ /sems kyang gdung bar mi bya'o/ /zhes gsungs so//des ni sgrub pa'i thabs bstan to/ /yang bsgrub par bya ba'i thabs gzhan gsungs pa/ yid du 'ong ba'i sa phyogs su/ /zhes bya ba la sogs pa gsungs te/ sa phyogs yid du 'ong bar lus dang sems bde bas/ bde ba dang bde ba'i stan la sems dpa'i skyil krung du gnas nas mig sna rtser phab ste/lag pa g.yas kyi skyil mo krung gi steng du bzhag la/ de'i steng g.yon pa gzhag ste/ nang du 'jug pa'i dbugs kyis lte ba'i bar du bkang la/ rked pa bsrang ste nam mtshang 'phel ka bskyed la/ swa b+hA wa shud+d+ha zhes bya ba la sogs pas mnyam pa nyid kyi sems bskyed nas/yid kyis dri la sogs pas mchod de/ bdud rtsi drang bar bya'o zhes par sbyar ro/ /yid kyi dri zhes bya ba la sogs pa la yid rang bzhin gyis rnam par dag cing mnyam pa nyid kho na dri la sogs pa'i sgrar brjod do//bdud rtsi gtor ma zhes bya ba la sogs pa la/ bdud rtsi nyid lus stobs can du byed pas na gtor ma'o/ /kun nas drangs te bza' bar bya/ /zhes bya ba ni/ lus kyi steng 'og gi gnas kun nas 'og nas 'byung ba'i cho gas drangs nas bza' ba ste btung bar bya'o//sgo dgu po rnams su sngags dgod pa gsungs pa/ kha dog ser po zhes bya ba la sogs pa'o/ /dril bu chu yi yi ge ste/ /zhes bya ba la/ dril bu'i yi ge zhes bya ba ni yi ge hUM ste/ zhabs skyed 'dogs pa'i rtse mo la dril bu zhes zer ba'i phyir ro/ /chu zhes bya ba ni mig ste/mig tu dgod pa'o/ /lhag ma ni go sla'o/ /bdud rtsi drang ba'i cho ga gsungs pa/ steng gi mche ba zhes bya ba la sogs pa la/ 'jug pas brlabs pa zhes bya ba ni/ dbugs 'jug pa dang 'byung bas brlabs pa'o/ /mdog lta bu zhes bya ba ni 'o ma'i chu zhes bya ba dang sbyar ro/ / lce yis bsten pa'i bdud rtsi chu/ /zhes bya ba ni mche ba gnyis dang / lce'i mtshams nas 'bab pa'i bdud rtsi'o/ /de nyid bstan pa'i phyir/ lce chung rtsa ba zhes bya ba smos so/ /yang na lce yis bstan pa zhes bya ba ni/ lce rkan la bzlog ste bzhar ba'o/ /bdud rtsi de gang du dbab ce na/lce'u chung rtsa ba'i nang du dbab/ /ces bya ba smos te/ ba'i nu ma'i nang du dbab pa'o/ /gang nas dbab ce na/ dpral ba zhes bya ba la sogs pa smos te/ 'di dag ni steng gi gnas rnams so/ /'og gi gnas ni/ chu ni 'jug ste zhes bya ba la sogs pa'i 'og nas ston to//mchod rten sgo ru zhes bya ba la/ sgo zhes bya ba ni bu ga ste/ ba'i nu ma'i nang du'o/ /ci zhig ce na/ yi ge hUM ste/ sangs rgyas lnga'i gnas yin pas na mchod rten no/ /ji ltar drang zhe na/ 'og tu rlung gi sa bon gyis/ /zhes bya ba la sogs pa smos te/ steng du 'gro ba dang / 'og tu 'gro ba'i rlung dang lhan cig tu sa bon hUM gi 'od zer gyis 'khrul 'khor lta bu zhes bya ba la/ til 'bru las mar 'tshir ba ltar steng 'og gi gnas kun nas drang ba'o/ /des gang du bkru zhe na/ ba lang rmig pa'i zhes bya ba smos te/ glo ba'i sgong snying ga'i nang du'o//mthar gang du bzhag ce na/ sgo gcig nas ni sgo dgur gzhag /ces bya ba smos te/ ba lang rmig pa'i sgo nas tshangs pa'i sgo la sogs pa thams cad du thim par sbyar bar bya ba'o/ /rnal 'byor bstan par bya ba'i phyir/ snying dbus zhes bya ba la sogs pa smos te/'o ma'i rgyun zhes bya ba ni yi ge hUM ngo / /dbyangs kyi yi ge thams cad kyis/ /zla ba'i dkyil 'khor ngos rnams kyi/ /gnas rnams kun du bskor bar bya/ /zhes bya ba ni/ dbyangs kyi yi ge bcu gnyis kyis bskor ba ste/ 'di dag gi don ni snying gar yi ge saM gi steng du zla ba'i dkyil 'khor de'i steng du yi ge hUM/tha ma dbyangs kyi yi ge bcu gnyis kyis bskor bar ston to/ /ba lang rmig pa zhes bya ba la sogs pa la/ 'dir ni ba lang gi rmig pa smin ma'i dbus nas rkan gyi nang du'o/ /gzugs dang zhes bya ba la sogs pas ni bdud rtsi drang pa'i dus su rdo rje sems dpa' bsgom ste/'og nas rgyas par 'chad do/ /bzlas pa gsungs pa/ 'o ma zhes bya ba la sogs pa la/ 'o ma zla ba'i sa bon ni yi ge hUM ste/ bdud rtsi'i rgyun 'dzag pa'i phyir ro/ /'dir bsdus pas/ oM hUM a swA hA zhes bya bar 'gyur te a zhes bya ba ni 'og nas ston par 'gyur ro//rdo rje sems dpa' bskyed pa gsal bar bya ba'i phyir/ bdud rtsi'i rtsa ba zhes bya ba la sogs pa smos te/ bdud rtsi'i rtsa ba ni yi ge a'o/ /myu gu zhes bya ba ni rdo rje sems dpa'i sku ste/ a las bskyed pa'i rdo rje sems dpa'i skur bsgom pa'o//des cir 'gyur zhe na/ de dang de ni zhes bya ba la sogs pa smos te/ 'bras bu lus dang shes rab 'phel bar 'gyur ba'o/ /de'i rnal 'byor rnams kyi gnas/ /stong pa'i brag la sogs par brtan/ /zhes bya ba la sogs par rnal 'byor 'di bsgrub par bya'o zhes dgongs so//de nyid gsal bar bya ba'i phyir phyag na rdo rjes gsol pa/ ji ltar zhes bya ba la sogs pa'o/ /lan gsungs pa/ gnyis med ces bya ba la sogs pa ste/ 'di dag gi don ni/ stong pa nyid kyi ye shes kyi chus sems kyi snam bu bkrus la/yi ge a las bskyed pa'i rdo rje sems dpa'i tshon rtsis btsos so zhes bya ba yin no/ /nyes byas legs byas zhes bya ba ni/ dge ba dang / sdig pa'i dngos po'o/ /gang gis rang bzhin las rgyal bas/ /ye shes kyis ni snang bar bya/ /zhes bya ba ni/ shes rab kyi tshon gyis 'od gsal bar bya ba'o/ /lhag ma ni go sla'o/ /rdo rje sems dpa'i 'od kyi snang ba gsungs pa/ 'og min zhes bya ba la sogs pa'o/ /de nas 'og min zhes bya ba ni/ smin ma'i dbus su'o/ /sogs pa'i sgras ni snying gar gzung bar bya'o/ /sa 'og rim pa bdun zhes bya ba ni/lte ba'i dbus te/ skud pa bdun gyis bskor ba'i phyir ro/ /bsgom par bya zhes bya ba ni de dag tu rim gyis bdud rtsi dbab po zhes bya ba'i don to/ /sbyor ba gzhan bstan pa'i phyir/ snying ga zhes bya ba la sogs pa gsungs te/ de dag gis ni snying gar zla ba la gnas pa'i hUM gis thams cad stong par bsgoms nas/rlung gi dkyil 'khor gyi steng du zla ba la sa bon hUM gis bskyed pa'i ye shes mkha' 'gro ma sngar smos pa lta bu bsgoms la/ snying gar zla ba la yi ge hUM bsgoms nas sngar ji skad bstan pa'i yon tan du 'gyur ro zhes ston to//rdo rje sems dpa'i sbyor ba gzhan gsungs pa/ pha rol zhes bya ba la sogs pa la/ 'di dag gis kyang bdag nyid zla ba la gnas pa'i rdo rje sems dpar bsams la/ snying gar pad+ma dang zla ba'i steng du rnam shes zhes bya ba ni snying gar yi ge hUM bsgoms nas/pha rol yang dmar por bsams te/ rang gi snying ga nas 'od spros la/ de'i zhes bya ba bsgrub bya'i snying gar bcug nas slar bkug ste/ rang gi snying gar bsgoms la brgyad du zhes bya ba ni yi ge hUM gi sngags brgyad brgya bzlas na/ nges par gzhan gyi sems shes par 'gyur ro zhes ston to//da ni gsang ba'i sbyin sreg bstan pa'i phyir/ de nas zhes bya ba la sogs pa gsungs te/ phal cher go sla'o/ /mdud pa'i lta ba'i dbus nyid kyi/ /ngos su sor ni bdun pa ste/ /zhes bya ba la mdud pa'i lte ba zhes bya ba ni lte ba'i mdud pa ste/de yang zhags pa lta bu'i ri mo gnyis phan tshun du mdud nas/ steng dang 'og tu 'gro ba ste/ lte ba'i dbus su blta bar bya'o/ /ngos su sor ni bdun pa ste/ /zhes bya ba ni lte ba'i mdud pa'i dbus su/ aM gi thig le las byung ba'i ri mos lan bdun du bskor ba ste/sor mo zhes bya ba ni ri mo'i sgrar blta'o/ /ngos su zhes bya ba ni lte ba'i mdud pa'i ngos rnams su'o/ /lte ba'i mdud pa de nyid me thab yin pas na/ me thab ces bye ba smos so/ /de nyid kyi khyad par bstan pa'i phyir/ klu dbang zhes bya ba la sogs pa smos te/ lte ba'i dbus su mdud pa'i ri mo ste/ sbrul gyi gzugs 'khyil pa lta bur gnas so zhes bya ba'i don to/ /yi ge thams cad 'bar bar bya/ /zhes bya ba ni/ thab khung de'i dbus na gnas pa'i yi ge aM ni me'i rang bzhin te/ de yang 'og tu rlung gi dkyil 'khor gyis sbar bas aM las byung ba'i ri mo bdun me'i 'od 'bar ba'i rang bzhin du byas te/yi ge thams cad ces bya ba ni/ ri mo bdun po de dag A li kA li'i rang bzhin du blta bar bya ba'o/ /de dbus pad+ma rig pa yi/ /zhes bya ba ni lte ba'i mdud pa'i steng du pad+ma bsgom par bya'o//nyi ma'i dkyil 'khor dbus gnas par/ /ye shes lus ni 'bar bar gzung / /zhes bya ba ni/ pad+ma'i lte ba la nyi ma'i steng du/ ye shes mkha' 'gro ma'i sku'am/ sa bon dgod pa'o/ /mdud pa'i me la dkar po ru//rdo rje mkha' 'gro thim par bya/ /zhes bya ba la/ mdud pa'i me ni mdud pa'i me thab las 'bar ba'i me'i dbus na gnas pa'i pad+ma'i shar gyi 'dab ma la/ rdo rje mkha' 'gro ma sku mdog dkar mo'am de'i sa bon no/ /g.yas su ni drag mo ser mo'am de'i sa bon no/ / nub tu ni ro langs ma dmar mo'am de'i sa bon no/ /g.yon du ni gtum mo'am de'i sa bon no/ /me ni lnga pa'i bdag nyid de/ /zhes bya ba ni/ rdo rje mkha' 'gro ma'o/ /gzhung kha cig las ni lnga zhes 'byung ste/ der ni lnga char gzung bar bya'o/ /lhag ma ni go sla'o/ /chu dang zhes bya ba la sogs pa la/chu ni shar phyogs su'o/ /me ni lho phyogs su'o/ /rlung ni nub phyogs su'o/ /sa ni byang phyogs su'o/ /nam mkha' dang rnam par shes pa rnam par dag pa ni dbus su'o/ /lha mo lnga yi bdag nyid la/ /zhes bya ba la sogs pas ni/ lte ba'i mdud par me'i lha mo rnams bsgoms nas hUM gi bdud rtsi'i chu rgyun gyis sbyin sreg bya'o zhes bya ba'i don to//dbus su bdud rtsi dmigs par bya/ /zhes bya ba ni gnas bco brgyad nas drangs pa'i bdud rtsi bsgoms nas/ skad cig re re zhing me'i nang du bdud rtsi dbab po zhes bya ba'i don to/ / de nyid gsungs pa/ ba lang rmig pa zhes bya ba la sogs pa la/ ba lang rmig pa zhes bya ba ni/ smin ma'i dbus su'o/ /de'i dbus nas 'dzag pa zhes bya ba ni der gnas pa'i hUM gi bdud rtsi'i rgyun no/ /me yi dbus su sreg pa'i gzhi/ /zhes bya ba la sogs pas ni me'i rang bzhin gyi yi ge aM ston pa yin te/de yang g.yo ba'i rlung gis bskyod pa'i 'od kyis hUM gi thig le la reg pas de las 'dzags pas bdud rtsi'i sbyin sreg bya'o zhes bya ba'i don to/ /bdag nyid rgyas phyir bsreg par bya/ /zhes bya ba ni/ de ltar bsgoms pas ra sa ya nar 'gyur ro zhes bya ba'i don to//gang las she na/ cung zad bza' dang btung la sogs/ /zhes bya ba smos te/ rung bar byas nas zhes bya ba ni dag par byas nas so/ /'di ltar spyod pa zhes bya ba la sogs pa rim pa de ltar zas la longs spyod pa'i rnal 'byor ba gang yin pa de la bu lon du mi 'gyur ba ste/yon bdag gi bu lon du mi 'gyur ro zhes bya ba'i don to/ /gsang ba'i gdan zhes bya ba la sogs pa/ rab tu byed pa zhes bya ba ni gzhung 'dis bdud rtsi'i bsgom pa nas bzung ste/ gsang ba'i sbyin sreg gi bar du ston cing gsal bar byed pas na rab tu byed pa'o//dpal gdan bzhi pa'i 'grel pa dran pa'i rgyu mtshan zhes bya ba las/ gsang ba'i gdan gyi rim par phye ba gnyis pa'o// //de ni rlung la goms par bya ba dang / 'byung ba'i khyad par rnams kyi tshad ma la sogs pa shes par bya ba'i phyir/ spre'u dang zhes bya ba la sogs pa gsungs te/spre'u dang 'dra bar mi gnas pa zhes bya ba ni rlung dang sems te/ rtag tu g.yo ba'i rang bzhin can yin pa'i phyir ro/ /mnyam nyid ces bya ba ni brtan par gnas pa'o/ /gang gis zhes bya ba ni ting nge 'dzin gang gis so/ /lus kyi sbyor ba'i mtshan nyid rnams//zhes bya ba ni lus kyi rlung dang / sems mnyam par gcig tu sbyor ba'i mtshan nyid do/ /yang na rim par phye ba lnga pa las/ chu dang me dang rlung rnams kyi/ /lus kyi tshad ma ci zhig lags/ /zhes gsol ba btab pa/ de nyid bcom ldan 'das la dran pa bslang ba'i phyir/lus kyi sbyor ba zhes bya ba la sogs pa gsol ba yin no/ /lan gsungs pa/ 'byung ba yi ni khyad par dang / /gsang ba rdo rje chen pos nyon/ /zhes bya ba la sogs pa ste/ 'byung ba'i khyad par zhes bya ba ni rlung phyir rgyu ba'o/ / gsang ba zhes bya ba ni rlung nang du 'jug pa'o/ /sems dang gnyis su med pa nyon cig ces bya ba'i don to/ /sems ni mnyam par gnas pa ste/ /zhes bya ba ni sems dang gnyis su med pas gnas pa'o/ /ji ltar zhe na/ nye bar zhi nas kA lir 'jug / ces bya ba smos te/ nye bar zhi zhes bya ba ni rlung phyir 'byung ba'o/ /kA li zhes bya ba ni shes rab bo/ /'jug pa ni de'i rang bzhin du gnas pa ste/ /rlung phyir 'byung ba shes rab kyi rang bzhin no zhes bya ba'i bar du'o/ /de bzhin du rlung nang du 'jug pa ni thabs kyi rang bzhin du shes par bya'o//de dag gis ni 'di skad du sems nyid rlung la zhon te/ 'byung ba dang 'jug pas na rlung nyid rnam par shes pa ste/ dbyer mi phyed pa yin la/ des na rlung gi gzugs kyis phyir phyung ste/ phyogs bcu'i bdud rtsi bzung nas slar 'ongs te/ zhugs nas snying gar sems nyid du gnas shing / de bzhin du yang dang yang du 'byung ba dang 'jug pa bsgoms nas sems kyi sems dga' bar bya ste/ shes rab dang thabs kyi sbyor bas gsang ba'i gnas su gzung bar ston to/ /de skad du yang / rtag tu shes rab thabs kyis ni//dga' dang bde bas 'grub par 'gyur/ /zhes gsungs pa'o/ /de bas na gang gi tshe goms pa'i mthar thug pa na/ stobs bcu la sogs pa dang ldan par 'gyur ro zhes bla ma'i man ngag las gsungs so/ /da ni chu la sogs pa'i tshad ma bstan pa'i phyir/lus las zhes bya ba smos te/ spu rnams skye ba zhes bya ba ni skra la sogs pa'i spu rnams skye ba ste/ chu'i tshad ma zhes bya ba chu'i rtags so/ /kun du zhes bya ba ni lus kun du chus khyab par bsgrub pa'i rtags te/ skra la sogs pa'i spu'i myu gu ni snum zhing gsher ba'i 'bras bu yin pa'i phyir ro//chu la lus ni ma yin te/ /zhes bya ba ni chu la lus su sgrub pa'i tshad ma ni ma yin te/ 'o na ci zhe na/ lus la chu yi tshad ma yin/ /zhes bya ba la sogs pa smos te/ lus thams cad la chu yis khyab nas yod par sgrub pa'o//lhag ma ni go sla'o/ /chu de yang rdo rje ma'i rang bzhin yin par bstan pa'i phyir/ blo dang ldan pa zhes bya ba la sogs pa smos te/ tshad ma zhes bya ba ni chu'i rang bzhin no/ /yang tshad mas grub pas na tshad ma'o/ /lus kyi yan lag ces bya ba la sogs pa la/kha zas smin pa zhes bya ba ni kha zas zhu ba ste/ de nyid kyi lus la dro ba'i rang bzhin gyis me yod pa'i rtags so/ /bu ga zhes bya ba la sogs pa la bu ga sna'i sgo la sogs pa'o/ /rlangs pa 'dra ba zhes bya ba ni dbugs kyi rgyu ba ste/ de nyid ni lus thams cad la rlung gis khyab pa'i tshad ma'o//sa ni zhes bya ba la sogs pa la/ kun gyi gnas yin te zhes bya ba ni chu la sogs pa'i dngos po thams cad kyi rten dang gnas su gyur pa ste/ gzhan du na chu la sogs pa lus la mi dmigs par thal bar 'gyur ro//'di la dgongs nas rim par phye ba lnga pa las/ 'byung ba gsum gyi dngos su dris pa yin no/ /gzugs sogs dbang po yon tan ldan/ /zhes bya ba ni/ yul dang dbang po rnams sa'i yon tan de sa la brten pa'o/ /yon tan de dag gis brgyan cing spras pas na/gtso bo zhes bya ba'i bar du'o/ /tshad ma nye bar bsdu ba'i phyir/ gzugs la sogs pa snang bas na/ /zhes bya ba smos te/ brten pa'i rang bzhin gzugs la sogs pa dang / chu la sogs pa dang / dbang po rnams lus la snang zhing dmigs pa'i phyir rten sa'i rang bzhin yod par shes par bya'o//de nyid kyi phyir/ sa ni tshad ma'i gnas yin no/ /zhes smos te/ gtan tshigs rnams kyi rten du ston pa yin no/ /yon tan ldan pa de yi phyir/ /mdzes ma zhes byar rab tu grags//zhes bya ba ni sgra bsgrags pa'o/ /yid ni zhes bya ba la sogs pa la/ the tshom gcod pa zhes pa ni sa la sogs pa'i mtshan nyid shes par byed pa'i phyir ro/ /byed po sdud po za bo'ang yin/ /zhes bya ba ni lus la sogs pa'i las dge ba dang mi dge ba dang 'dren ma rnams kyi byed pa po yang yin te/des de dag byed pa'i phyir ro/ /sdud pa po'ang yin te des de dag las bzlog pa'i phyir ro/ /za ba po yang yin te/ des de dag gi 'bras bu spyad pa'i phyir ro/ /'di ni tshad ma de dag gis lus la yid yod par dpog par byed do//gzhan du na/ las dge ba dang sdig pa la sogs pa la 'jug pa la sogs pa lus la mi snang bar thal bar 'gyur ro/ /gtan tshigs gnyis pa bstan pa'i phyir/ dbang po zhes bya ba la sogs pa smos te/dbang po kun gyi sems rnams zhes bya ba ni/ rnam par shes pa rnams so/ /mtshan gzhi zhes bya ba ni yul rnams so/ /mtshan nyid shes par bya zhes bya ba ni rnam par shes pas yul rnams khong du chud pa ste/ gtan tshigs de'i phyir ro//de nyid gsal bar bya ba'i phyir dang / dbang po'i rgyal po zhes bya ba'i sgra bsgrub pa'i phyir/ dbang rgyal nyer spyod longs spyod pa/ /zhes bya ba la sogs pa smos te/ gang la longs spyod ce na/ bde ba rnams te/ bde ba la sogs pa rnams la'o//de ci'i phyir zhe na/ yul la sogs pa'i nyer spyod kyis te yul dang dbang po nye bar spyod pa'i bde ba la sogs pa rnams nyams su myong ba'i phyir/ lus la ye shes bsten par bya/ /zhes bya ba yod par rjes su dpag pa la dbang po'i rgyal po zhes kyang bya'o zhes bya bar dgongs so//da ni de dag thams cad rnam par shes pa nyid du 'du ba'i tshad ma bstan pa'i phyir/ sems ni zhes bya ba la sogs pa smos te/ gal te chu ni gzhan yin na/ /zhes bya ba ni rnam par shes pa las tha dad pa'o/ / ci phyir shi na chu mi 'byung / /zhes bya ba ni/ gnod pa can gyi tshad ma bstan pa ste/ shi na zhes bya ba ni shi ba'i lus la'o/ /chu mi 'byung zhes bya ba ni mi dmigs pa'o/ /ci'i phyir zhes bya ba ni rnam par rtog pa'i tshig ste/ dmigs pa kho nar thal bar 'gyur ro zhes bya bar dgongs so//ye shes bral ba'i lus la ni/ /zhes bya ba ni shi ba'i lus la'o/ /sems kyi dbugs ni rgyu ba med/ /ces bya ba ni rnam par shes pa g.yo bar byed pa'i rlung gi rgyu ba mi dmigs pa'o/ /chu yi nang du 'bying mi 'gyur/ /zhes bya ba ni shi ba'i lus la sa'i mtshan nyid lci ba nyid med par bsgrub pa'i gtan tshigs so//nye bar bsdu ba bstan pa'i phyir/ /lus la tshad ma lnga yod pas/ /zhes bya ba la sogs pa smos te/ sems dang bcas pa'i lus la tshad ma lnga snang ba'i phyir/ rnam par shes pa'i rtsa bar 'dus pa'o zhes bya ba'i don to//mtshan nyid gcig tu shes byas nas/ /rnal 'byor ba yis 'gro ba brtag /ces bya ba la sogs pa'i don chos thams cad rnam par shes pa'i rang bzhin du shes par byas la/ de'i rang bzhin shes par bya ba'i phyir/ dge ba'i bshes gnyen bsten par bya'o zhes bya ba yin no//yul dang dbang po'i ye shes ni/ /gzir dang bcas pas sdom par 'gyur/ /zhes bya ba ni 'khor bar 'ching ba'i rnam par shes pa 'gro ba brtag pa yin te/ yul rnams la/ dbang po dang shes pa'i 'jug pa gzir ba dang bcas pas bsdams nas 'khor bar 'ching ngo zhes bya ba'i don to//gzir ba zhes bya ba ni brtul zhugs dang dka' thub la sogs pas lus dang sems la gdung ba'o/ /'o na bsdams pa gang gis 'khor ba las rgyal bar 'gyur zhe na/ sgong skyes zhes bya ba la sogs pa smos te/ dbus su gnas pa zhes bya ba ni/ rnam par shes pa ste snying ga na gnas pa'i phyir ro/ /sgong skyes zhes bya ba ni de'i gnas sgo nga ste/ sgo nga 'dra ba'i snying khrag gi gnas su bcing ba'o/ /bsdam pa'i sbyor ba gsungs pa/'byung dang 'byung min sems kyis ni/ /g.yo ba'i dngos po bskor bar bya/ /zhes bya ba la/ 'byung dang 'byung min zhes bya ba ni/ dbugs 'byung ba dang 'jug pa'o/ /sems zhes bya ba ni sems dang bcas pa'o/ /g.yo ba'i dngos zhes bya ba ni/ rlung dang rnam par shes pa ni mi brtan pa ste/bcing bar bya zhes bya ba dang sbyar ro/ /cis she na/ bskor ba ste/ 'byung ba dang / 'byung min gyi rlung la goms pas so/ /bcing ba zhes bya ba la sogs pa la/ pad+ma'i stan zhes bya ba ni bde ba'i stan te/ snying ga'i pad+ma dang chos 'byung ba'i pad+ma la'o//de'i phyir zhes bya ba ni de'i rgyu mtshan te/ stong pa nyid la sogs pa sngon du 'gro ba'i ting nge 'dzin to/ /rnam shes rang bzhin mtshon par bya ba ni thams cad sems kyi snang ba tsam du shes par bya'o/ /lha'i rnal 'byor du ji ltar 'gyur zhe na/ rang bzhin zhes bya ba'i dngos po zhes bya ba smos te/thabs dang shes rab 'brel pas lha'i rnal 'byor dngos por 'gyur ro zhes bya ba'i don to/ /da ni rlung 'byung 'jug la goms par bya ba'i cho ga gsungs pa/ lte bar zhes bya ba la sogs pa ste/ lte bar chu shing me tog ni/ / zhes bya ba ni bsgom par bya zhes bya ba lhag ma yin no/ /de nas ni lte bar chu shing gi me tog lta bu'i pad+ma la/ yi ge a bsgom mo zhes bya bar ston to/ /snying gar yang ni bsgreng ste gnas/ /zhes bya ba ni de'i steng snying gar yang kha 'og tu bltas pa'i pad+ma 'dab ma brgyad pa lta bu'o/ / rtag tu stong pa'i sgo yin te/ /zhes bya ba ni pad+ma'i kha cung zad bye ba'o/ /mkhas pas rtag tu bzlog par bya/ /zhes bya ba ni kha 'og tu bltas par ston pa'o/ /lhag ma ni go sla'o/ /ye shes rnam shes sbyor ba ste/ zhes bya ba ni steng gi pad+ma de'i gnas su hUM bri ba'o/ / sbyor ba yi ni shar phyogs char/ /de dang mthun pa'i sor drug pa/ /zhes bya ba la/ sbyor ba zhes bya ba ni lte ba'i pad+ma'o/ /shar phyogs zhes bya ba ni de'i steng gi char ro/ /sor drug pa zhes bya ba ni me'i 'od zer zhes bya ba lhag ma yin te/ me'i 'od zer steng du sor drug tu 'bar ba'o//de dang mthun pa zhes bya ba ni snying ga'i pad+ma la phan pa'o/ /mdud pa yi ni nub phyogs char/ /zhes bya ba ni/ lte ba'i mdud pa'i 'og tu'o/ /sor lnga pa ni snga ma bzhin no/ /zhing de la ni sa bon dang / /'od zer tshogs kyis myu gu 'bar/ /zhes bya ba ni/ ji ltar sa gzhi la sa bon dang myu gu skye ba ltar lte ba'i mdud pa'i sa gzhi las yi ge aM gi sa bon gyi me'i myu gu sor drug la sogs par 'bar ba'o/ /sa bon de yi 'od zer gyis/ /chu shing lta bur bskor bar bya/ /zhes bya ba ni steng gi pad+ma'i sa bon gyi yi ge hUM yang 'od zer dang bcas pa bsgom pa'o//kha cig na re/ lte bar chu shing me tog gnas/ /zhes bya ba ni snying ga'i pad+ma ste/ de yang chu shing gi me tog sngar kha cung zad phye zhing / kha 'og tu bltas la lte ba'i steng du lte ba dang nye bar gnas pa na/ lte bar gnas pa zhes bya'o//ge sar dang ni ldan pa ste/ de yang 'dab ma brgyad pa yin la de'i dbus su gnas pa'i yi ge aM gi 'od zer gyis snying ga'i pad+ma kha cung zad phye ba yin no/ /lhag ma ni sngar bshad pa yin no zhes zer ro/ /yi ge aM gi 'od zer phra mos snying ga'i pad+mar gnas pa'i yi ge hUM la bskul ba bstan pa'i phyir/rgyas pa lnga yi sa bon la/ /lto ba'i 'og nas dgas par bya/ /zhes bya ba smos te/ rgyas pa lnga'i sa bon ni yi ge hUM ngo / /lto ba'i 'og ces bya ba ni lte ba na gnas pa'o/ /bkas pa zhes bya ba ni pad+ma cung zad kha phye zhing hUM la bskul ba'o//'dab ma brgyad kyis rnam par brgyan/ /zhes bya ba ni/ pad+ma gnyi ga'i 'dab ma brgyad pa'o/ /de la 'og gi pad+ma'i shar la sogs pa'i 'dab ma rnams la g.yon skor gyis rim bzhin suM k+ShuM yuM hUM zhes bya ba bzhi bri'o/ /dbus su ni aM ngo / /dbang ldan la sogs pa'i mtshams su y+m+raM h+m+raM smraM k+Sh+maM 'og gi lus thams cad bkru bar bstan pa'i phyir/ba lang rmig pa zhes bya ba la sogs pa smos te/ ba lang rmig pa zhes bya ba ni lus so/ /sgo dgu ru ni zhes bya ba ni sgo dgu po thams cad dgang ba'o/ /'od 'bar spu yi khong nas 'phro/ /zhes bya ba ni/ ye shes rnam shes sa bon ni hUM ngo //de nas ba spu'i bu ga nas bdud rtsi chu rgyun phyung la/ lus thams cad bkru ba'o/ /bzlas pa bstan pa'i phyir/ ye shes zhes bya ba la sogs pa smos te/ ye shes rnam shes sa bon ni hUM ngo / /de la gang gi tshe rlung phyir 'gro ba'i tshe aM gi 'od zer gyis hUM la bskul zhing rlung nang du 'jug pa'i tshe/hUM gi chu rgyun gyis lus thams cad bkang la/ dbugs 'byung ba dang / 'jug pa'i dus der shes rab dang thabs kyi rang bzhin gyi aM hUM gnyis bzlas par bya'o/ /de ltar dus rtag tu gnas skabs kun du goms par bya ba bstan par bya ba'i phyir/'gro dang zhes bya ba la sogs pa smos te zas la nye bar spyod pa na yang mi 'dor ro zhes bya ba'i don to/ /lhag ma ni go sla'o/ /da ni gong du 'pho ba bstan pa'i phyir/ gong du 'pho ba zhes bya ba la sogs pa gsungs te/thig le zhes bya ba ni smin ma'i dbus su'o/ /chu zhes bya ba ni rdo rje'i sgo'o/ /chu min zhes bya ba ni bshang ba'i sgo'o/ /lte ba 'dod can mtho ris te/ zhes bya ba ni gal te lte ba'i lam nas rnam par shes pa 'gro na de'i tshe 'dod pa'i khams kyi lhar 'gyur ba'o/ / thig le'i gzugs kyi lus can zhes bya ba ni gzugs khams kyi lhar skye ba'o/ /steng nas zhes bya ba ni/ gser gyi sgo nas so/ /steng gi gnas zhes bya ba ni bla ma'i gnas su ste/ 'dir yang dmyal ba dang 'dra bar myur bar skye bar shes par bya'o/ /srid pa'i skye sgo zhes bya ba ni kha'o//sgo rnams kyi ni bye brag las/ /zhes bya ba la sogs pa'i don ni sgo'i bye brag gis 'gro ba'i bye brag gis gya nom pa ma yin par phye ba de bas na/ rnal 'byor pas gong du 'pho ba'i ting nge 'dzin goms par byas la/ gang gi tshe nus shing dus la bab pa na lam bzang po nas rnam par shes pa btang ngo zhes bya ba yin no//rims la sogs pas ma phog par/ /zhes bya ba ni/ rims la sogs pas phog pa na/ gong du 'pho ba'i sbyor ba mi nus pa'i phyir dang / 'jig rten pas brnyas pa'i phyir dus zad pa las zla ba drug gi gong rol du ston to/ / sngon du bum pa brtsams pa yis/ /zhes bya ba ni/ sngon du dbugs bum pa can la goms par bya ba'o/ /rgyas pa la zhes bya ba ni/ yi ge hUM ser po'o/ /mchod rten gyi sgo zhes bya ba ni smin ma'i dbus su'o/ /'og gi sgo zhes bya ba ni/ de'i 'og tu'o/ /chu'i sa bon zhes bya ba ni yi ge suM ngo //chu dang chu min sgo zhes bya ba ni bshad zin to/ me'i sa bon zhes bya ba ni k+ShuM ngo / /sgo rnams thams cad kyi sgras ni gzhan yang gser gyi sgo ni k+ShuM ngo / /mig gnyis su ni hUM sngon po'o/ /rna ba dang sna dag la ni yuM dmar po'o/ /khar ni suM dkar po'o/ /lus ni rlung gi mdog tu ste//zhes bya ba ni mdog sngon por bya'o/ /sems ni rlung gi dkyil 'khor la/ /zhes bya ba ni snying gar rlung gi dkyil 'khor gyi steng du hUM bsgom pa'o/ /rtsa bar rlung gi sa bon ni/ /zhes bya ba la sogs pa'i don ni/ rlung gi dkyil 'khor gyi steng 'og gnyis su yi ge yuM gnyis bri ba'o//rdo rje'i sa bon zhes bya ba ni suM ngo / /drag mo'i sa bon zhes bya ba ni k+ShuM ngo / /lcags kyu la sogs zhes bya ba ni sa bon hi ka ste/ sbyar bar bya zhes bya ba la/ sa bon hi ni sa bon yuM 'og tu bri ba'o/ /ka ni yuM gong ma'i 'og tu'o/ /nyi shu rtsa gcig dbugs rnams zhes bya ba ni goms kyi 'og tu lan nyi shu rtsa gcig sbyar ba ste/des 'pho bar 'gyur ro/ /gnas nas drag mos drang bar bya/ /zhes bya ba la/ drag mo zhes bya ba ni yi ge aM ste/ gnas nas drangs zhes bya ba ni de'i 'od zer gyis snying ga'i rlung dang sems gyen du 'phul ba'o/ / gnas dang gnas nas zhes bya ba ni snying ga dang / mgrin pa la sogs pa steng du phul ba'o/ /yang na gnas na gnas pa zhes bya ba ste/ yan lag kun la gnas pa'o/ /steng gi sa bon smin pa la/ /zhes bya ba ni skra dkar bcing ba ste/ 'og nas bshad par bya'o/ /yi ge phyed dang gnyis kyis sbyang //zhes bya ba ni/ sa bon hi ka bzlas pa'o/ /kha cig ni sa bon a dang hUM yin no zhes zer ro/ /drag mo'i nga ro brjod pa ste/ /zhes bya ba ni/ 'og nas rlung gis bskyod pa'i sa bon aM gi 'od zer gyis snying ga'i hUM la bsnun pa'o/ /brgyad kyi mtha' zhes bya ba ni ha'o/ /sde tshan dang po'i dang po zhes bya ba ni ka'o//nga ro drag mo zhes bya ba ni i'o/ /gnyis pa ltar na nga ro drag mo ni bshad zin to/ /de nyid sde tshan dang po'i dang po'o/ /brgyad kyi mtha' zhes bya ba ni hUM ngo / /lhag ma ni bshad zin to/ /de la dang por stong pa nyid bsgom pa la sogs pa sngon du 'gro bas 'og nas 'byung ba'i lha'i rnal 'byor byas la hUM la sogs pas sgo dgu po bcings te/sngar smos pa ltar yi ge rnams rim gyis bkod la/ rlung steng du 'gro ba'i tshe rlung gis bskyod pa'i lte ba la gnas pa'i sa bon aM gi 'od kyis snying ga'i hUM la bsnun te/ rlung dang bcas pa mgrin pa nas mgo'i bar du phul la/rlung 'og tu 'jug pa'i tshe ni slar 'ongs par bsam mo/ /khyad par du rlung 'og tu 'jug pa'i tshe/ sa bon hi ka'i gnas snga ma las bzlog par bya'o/ /bzlas brjod kyang sa bon hi ka nyid bzlas par bya ste/ de ltar lan nyi shu rtsa gcig tu goms par byas na nges par 'pho bar 'gyur te/sgo gang nas 'dod pa nas rnam par shes pa 'pho bar 'gyur ro/ /skra dkar bcing ba'i cho ga bshad pa'i phyir/ gong nas de bzhin steng gzhan du/ /zhes bya ba la sogs pa smos te/ gong zhes bya ba mgo'i nang gi pad+ma 'dab ma sum cu rtsa gnyis pa'o//steng gzhan zhes bya ba ni der yi ge haM sngon po kha thur du bltas pa bri ba'o/ /de bzhin zhes bya ba ni/ lte bar bsgoms pa'i yi ge aM gi 'od zer gyis/ haM la bskul nas bdud rtsi'i chu rgyun dbab pa ste/ 'dis nges par skra dkar bcings par 'gyur ro/ /steng gi rtsa ba bza' bar bya//zhes pas ni/ phyi rol gyi sbyor ba bstan pa yin te/ lud skam dang / zla mtshan dang / khu bar bcas pa zos na 'dis skra dkar bcing bar 'gyur ro/ /lhag ma ni go sla'o/ /ji ltar 'dam nas skyes pa yi/ /pad+ma dri med yid 'ong ba/ /zhes bya ba ni/ pad+ma la chu dang 'dam dang nya lcibs la sogs pas ma gos pa ltar ye shes kyi lus kyang de bzhin no zhes bya ba'i don to//lhag ma ni go sla'o/ /rnal 'byor bsgrub pa'i khyad par gyis/ /zhes bya ba la sogs pas ni/ lha'i rnal 'byor bstan te/ de dag gi don yang go bar zad do/ /'pho ba'i rnam pa gzhan bstan pa'i phyir/de nas phyi rol zhes bya ba la sogs pa smos te/ phyi rol zhes bya ba ni gzhan te/ sngar bstan pa las gzhan pa'o/ /gnas gnyis zhes bya ba na/ lte ba dang snying ga'i gnas gnyis te/ bsam par bya ba ni 'og nas 'byung ba ltar bsam pa'o/ /de nyid gsungs pa/ rlung gi dkyil 'khor zhes bya ba la sogs pa ste/ A li kA li zhes bya ba ni snying ga'i yi ge hUM ngo / /de yi sa bon dmar por dgod/ /ces bya ba ni/ lte ba'i sa bon aM dmar po'o/ /'byung ba 'byung min zhes bya ba ni dbugs 'byung ba la rnam par shes pa'i sa bon mgo'i nang du gzhug pa'o//'jug pa 'jug pa min pas bzlas/ /zhes bya ba ni dbugs 'jug pa la slar bzlog pa'o/ /bzlas pa ni goms par bya ba'o/ /yang na 'byung ba dang 'jug pa la de las bzlog pa'i sa bon hi ka mgrin pa'i mtshams su bzla ba'o/ /de dag gis ni 'di skad du/ lte bar rlung gi dkyil 'khor gyi steng du me'i dkyil 'khor/de'i steng du aM dmar po nyi ma'i mdog lta bu bsams la/ snying ga'i pad+ma la hUM sngon po kha thur du bltas pa bsgoms la/ rlung 'byung ba'i tshe/ chu shing gi me tog rlung gis bskyod pa ltar/ pad+ma dang bcas pa'i yi ge hUM kha gyen kar bltas te/mgo'i nang du phul la/ rlung 'jug pa'i tshe slar dgug phar bya'o/ /de ltar yang dang yang du goms par byas pa las tshegs med par 'pho zhes bstan par 'gyur ro/ /da ni nang gi las kyi sbyor ba bstan pa'i phyir/ de nas zhes bya ba la sogs pa smos te/phyi rol zhes bya ba ni sngar bshad pa bzhin no/ /sgrub pa po yis rnam par sprul/ /zhes bya ba ni/ sgrub pa po'i phyir sprul pa'o/ /gang zhe na/ pha rol sems dang rjes mthun par/ /zhes bya ba smos te/ 'di dag gi don ni rang gi lte bar yi ge aM dmar po me dang rlung la gnas pa bsams nas bsgrub bya'i snying gar hUM dmar po bsgoms la/aM gi 'od zer rang gi sna bug g.yas nas phyung la/ bsgrub bya'i sna sgo g.yon par zhugs la snying gi rnam shes bzung la/ de'i sna sgo g.yas nas byung nas/ bdag gi sna sgo g.yon nas zhugs te/ me'i nang du bsreg par bsgom mo/ /de ltar yang dang yang bzlas pas pha rol gyi sems shes par yang 'gyur la/ji srid ma shi'i bar du lkugs te gnas par 'gyur ro zhes bya ba 'di yin no/ /lhag ma ni go sla'o/ /gsang ba'i gdan zhes bya ba la sogs pa la/ gzhung 'dis rlung la goms par bya ba dang chu la sogs pa lus la gnas par rjes su dpog pa la sogs pa gsal bar ston par byed pas na rab tu byed pa'o//dpal gdan bzhi pa'i 'grel pa dran pa'i rgyu mtshan zhes bya ba las/ gsang ba'i gdan gyi rim par phye ba gsum pa'o// //da ni gsang ba las kyang gsang ba bstan pa'i phyir/gsang ba'i gdan gyi zhes bya ba la sogs pa smos te/ phal cher go sla'o/ /rnam par shes pa gzung ba'i rnam pa gzhan bstan pa'i phyir/ yid du 'ong ba'i zhes bya ba la sogs pa smos te/ zla ba'i dkyil 'khor zhes bya ba la sogs pas ni ye shes mkha' 'gro ma'i rnal 'byor bstan to/ / dbus su bsgom bya zhu ba'i gtso/ /zhes bya ba la/ 'jig pas na zhu ba ste yi ge hUM ngo / /mi bskyod pa'i sa bon zhes bya ba ni aM ngo / /rin chen sa bon zhes bya ba ni AM ngo / /'od dpag med pa'i sa bon ni eM ngo / /don yod grub pa'i sa bon ni khaM ngo / /de nyid bstan pa'i phyir/ dbyangs yig thog ma zhes bya ba la sogs pa smos so//yang na bzhi zhes bya ba ni rkyen mi mngon pa ste 'dir bzhi pa zhes bya bar sbyar te/ des ni lte ba'i pad+ma'i dbus su yi ge aM bri bar ston to/ /de'i tshe mi bskyod pa la sogs pa'i sa bon ni hUM dang AM dang dzr-IM dang khaM rnams yin no/ /phyogs mtshams zhes bya ba la sogs pa ni gnyi ga'i'o//lhag ma ni go sla'o/ /stong pa'i zhes bya ba la sogs pa la/ gal te thams cad stong pa yin na/ ci zhig snying por 'gyur zhe na/ chu shing zhes bya ba la sogs pa gsungs te/ ji ltar chu shing snying po med pa las/ bdud rtsi'i snying po 'byung ba ltar/ snying po med pa'i sa bon la sogs pa bsgoms pa las/stong pa nyid kyi ye shes kyi sku'i 'bras bu smin par 'gyur ro/ /gang gis zhes bya ba la sogs pa la/ gang gi mtshan nyid shes byas nas/ /zhes bya ba ni rnam pa thams cad kyi rang bzhin thos pa dang bsam pas khong du chud nas so/ /myur ba zhes bya ba ni tshe 'di nyid la'o/ /bdud rtsi dgug pa'i ting nge 'dzin gyi rnam pa gzhan bstan pa'i phyir/rgyas pa lnga'i zhes bya ba la sogs pa smos te/ bdud rtsi'i sa bon zhes bya ba ni soM mo/ /'dis ni yi ge soM gyi steng du zla ba'i dkyil 'khor la yi ge hUM bsgom par bstan to/ /thigs pa'i dbus su zhes bya ba ni smin ma'i dbus su ste/ der yang sa bon hUM ngo //mthe bo tsam gyis zlum por bya/ /zhes pa ni zla ba'i dkyil 'khor gyi gzugs can gyi yi ge tha ste/ de'i dbus su gong du thal ba'i hUM bri ba'o/ /de yi dbus kyi sa bon ni/ /zhes bya ba ni lte ba'i dbus su ste/ der A li kA li sa bon yi ge aM bri ba'o/ /skra'i rtse mo zhes bya ba la sogs pa ni aM gi 'od zer gyis rim gyis bskul ba bstan to//de nyid bstan pa'i phyir/ thig le zhes bya ba la sogs pa smos te/ thig le gnas kyi go 'phang lta/ /zhes bya ba ni/ lte ba'i pad+ma'i thig le bstan to/ /snying dang tshangs pa'i sgo dang ni/ /thigs pa'i lam gyi sgo dag tu/ /zhes bya ba ni/ ye shes rnam shes gzung bar bya/ /zhes bya ba dang 'brel ba ste/ snying ga dang / smin par dang / gser gyi sgo dag tu yi ge hUM bri ba'o/ /gzhan dag na re/ thig le'i gnas ni lte ba'o/ /go 'phang ni mgrin pa'o/ /tshangs pa'i sgo nyid thig le'i lam ste spyi gtsug go/ /ye shes rnam shes gzung bar bya//zhes bya ba ni gnas de dag tu bdud rtsi myang zhing lta ba'o/ /ji ltar zhe na/ zla ba'i dbus su sa bon ni/ /mthe bo tsam gyis zlum por bya/ /de yi dbus kyi sa bon ni/ /A li kA li dag las btu/ /zhes bya ba snga ma dang sbyar te aM hUM eM haM rnams su shes par bya'o zhes zer ro/ /'dir bzlas pa gsungs pa/gzugs sogs srid pa'i longs spyod la/ /zhes bya ba la sogs pa gsungs te/ 'dod pa dang gzugs dang gzugs med pa'i longs spyod de don du gnyer ba'o/ /yang na gzugs sgra la sogs pa'i sbyang ba la'o/ /kun nas kun du 'jug pa dang / /zhes bya ba ni thig le dang zla tshes so//mgo dang mgo min zhes bya ba ni ha dang u'o/ /rtsa bar rtag tu gzer bar bya/ /zhes bya ba ni ha'i rtsa bar u sbyar ba ste/ bsdus pas hUM zhes bya bar 'gyur ro/ /de nyid kyi phyir ye shes zhes bya ba la sogs pa smos te go sla'o/ /gzhan dag ni mgo dang mgo min zhes bya ba ni a dang ha ste/yi ge thams cad kyi thog mtha' yin pa'i phyir ro/ /kun nas kun du 'jug pa ni zla tshes dang thig le'o/ /bsdus pas aM haM zhes bya bar 'gyur ro/ /de nyid kyi phyir/ /ye shes zhes bya ba la sogs pa smos te/ aM haM zhes bya ba ba'i sa bon no/ /mtshan ma rnam pa lnga gsungs pa/mar me lta bu zhes bya ba la sogs pa smos te go sla'o/ /mchod rten gyi de kho na nyid bstan pa'i phyir/ mchod rten zhes bya ba la sogs pa smos so/ /snying gar zhes bya ba'i don ni/ snying gar zla ba la yi ge hUM bsgoms nas de'i 'od zer gyis dngos po thams cad bsregs te/thal ba'i 'od zer las yi ge hUM gis mchod rten gyi gzugs su bskyed pa 'di yin no/ /lha'i rnam par dag pa gsungs pa/ gya gyu zhes bya ba la sogs pa la/ gya gyu zhes bya ba ni bang rim mo/ /sa zhes bya ba ni sa'i dkyil 'khor ro/ /phyogs brgyad dag gi khams yin no//zhes bya ba ni sa'i dkyil 'khor la gnas pa'i 'jig rten dang / 'jig rten las 'das pa phyogs brgyad kyi lha rnams kyi rang bzhin du lhag par mos pa'o/ /yang nas zhes bya ba ni sa'i snying po la sogs pa byang chub sems dpa' brgyad do/ /gzugs can bcu dang brgyad po zhes bya ba ni dbang phyug chen po'i gnas bstan nas rnam pa bco brgyad du bya ba'o//kha cig ni hUM nyid mchod rten gyi gzugs so zhes zer ro/ /sbyin dang tshul khrims zhes bya ba la sogs pa ni sngar bshad zin to/ /bdud rtsi zhes bya ba ni mnyam pa nyid kyi bdud rtsi'o/ / chos kyi dbyings kyi rnal 'byor ro/ /zhes bya ba la/ chos ni phung po la sogs pa'o/ /dbyings ni brten pa ste lus so/ /de'i rnal 'byor ni stong pa nyid kyi rnal 'byor ro/ /yang na chos kyi dbyings ni stong pa nyid do/ /rnal 'byor ni de'i lus mchod rten no/ /yang sbyor ba gzhan gsungs pa/gsang chen zhes bya ba la sogs pa la/ rgyas pa lnga zhes bya ba la sogs pa ni gang du 'pho ba'i skabs su bshad zin to/ /de yi dbus kyi sgo der ni/ /dung dang zla ba ltar dkar ba/ /zhes bya ba ni yi ge hUM ngo / /phyogs bzhir khams ni bzhi po yi/ /zhes bya ba sngar smos pa ltar hUM dang suM la sogs pa'o//phyogs mtshams sa bon brtsegs pa bzhi/ /zhes bya ba ni/[ []h+m+raM [ z hes bya ba la sogs pa smos te go sla'o//A li kA li sa bon zhes bya ba ni aM dang hUM ngo / /yul 'khor zhes bya ba ni lus so/ /rgyun du zhugs pa'i 'bras bu zhes bya ba ni bdud rtsi btung ba'i 'bras bu ste/ 'khor ba sgrol ba zhes bya ba dang sbyar ro/ /gnas phun sum tshogs pa gsungs pa/sgrub po 'du 'dzi med pa dang / /zhes bya ba la sogs pa'o/ /der ci zhig gis 'tsho bar bya zhe na na ga mU la zhes bya ba la sogs pa smos te/ na ga zhes bya ba ni glang po che'i stobs te/ gang gi ming ba lang rdzi'i 'bras bu zhes bya bar grags pa ste de'i rtsa ba gzung ngo / /ba la sha'i ni me tog gzung ngo //ru rta ni go bar zad ngo / /cha gsum zhes bya ba ni so sor re re zhing srang gsum gsum bzung ba'o/ /ma ga d+ha dang zhes bya ba ni pi bi ling ste srang gcig gzung ngo / /cha bsnyams zhes bya ba ni de dag gi phye ma bsre ba'o/ /bzhi cha zhes bya ba ni srang gi bzhi cha ste zho gnyis gnyis bza' ba'o//'dul ba bsrung ba zhes bya ba ni sman bsten pas phyi rol gyi bza' ba la sogs pa bzlog pa'o/ /yang na sman bsten pas dbang po bsdam zhing bsrung ste mtshams kyi bya ba dang ldan par bstan pa'o/ /sngags dang phyag rgya dang lha la sogs pa la yid ches pa bskyed pa'i phyir/bsgom pa dang bzlas pa la sogs pa ji srid mngon du gyur pa nyams su blang ba bstan pa'i phyir/ ji ltar zhes bya ba la sogs pa smos te/ tshigs su bcad pa phyed gong ma'i don ni/ bu mo gzhon nu rnams byis pa gzhon nu'i gtam bsgugs shing /de'i gtam thos nas kyang / dga' ba nyams su myong ba dang bcas pa'i rjes su yi rangs te/ de dag dang lhan cig tu nyal ba la sogs pa'i gtam brjod kyi nyal po dngos byed pa ni ma yin no zhes bya ba yin no/ /de ltar lam bshad ces bya ba la sogs pas ni de dang 'dra ba'i lam bshad na/'ching bar mi 'gyur ro zhes bya ston to/ /rnal 'byor zhes bya ba ni cho ga'o/ /de nyid kyi phyir/ lam ngan de ltar bstan pa min/ /zhes bya ba smos so/ /yang na bud med dang byis pa la sogs pa sgrung la sogs pa'i gtam la dga' ba rnams la/rgyud 'di'i lam bstan na kun du 'ching bar 'gyur te/ a zhes bya ba ni kun du zhes bya bar sbyar ro/ /des na de la lam ngan par 'gyur ro/ /rig byed ces bya ba la sogs pa ni go sla'o/ /gnas ngan lha zhes bya ba ni mu stegs kyi lha'o//ci'i phyir de de dag mi bya zhe na/ dbang bskur zhes bya ba la sogs pa smos te go sla'o/ /te na hUM zhes bya ba la sogs pa smos pa la/ te zhes bya ba ni sku dang gsung dang thugs kyi bdag nyid phung po dang khams dang skye mched kyi dngos po rnams so/ / na zhes bya ba ni dgag pa ste/ gzung ba la sogs pa'i dngos po med pa'o/ /'o na ci zhig ce na/ hUM zhes bya ba smos te/ sems kyi snang ba tsam mo zhes bya ba'i bar du'o/ /sku la sogs pa sbyang ba'i phyir/ sngags ni lan gsum du brjod par bya'o/ /lhag ma ni bshad zin to//rgyud kyi bsod nams kyi bdag nyid chen po bstan pa'i phyir/ yi ge'am zhes bya ba la sogs pa smos so/ /gsang ba'i gdan zhes bya ba la/ gsang ba ni 'dir bstan pa rnams te/ shin tu sba bar bya ba'i phyir ro/ /gnas ni de'i gzhi'o/ lhag ma ni go sla'o//gdan bzhi'i 'grel ba 'di la bdag gis rab 'bad pas/ /byas las byung ba'i bsod nams gang yin de yis ni/ /ston ka'i mtshan mo'i zla zer dri ma med pa ltar/ /'gro ba rnams kyis don mchog rtogs nas gnas par shog /rgyud kyi rgyal po dpal gdan bzhi pa'i 'grel pa dran pa'i rgyu mtshan zhes bya ba// //rgya gar gyi paN+Di ta ga ya d+ha ra dang / bod kyi zhu chen gyi lo tsA ba 'gos lhas btsas kyis gtan la phab ste bsgyur pa'o// //

CLOSE WINDOW