CLOSE WINDOW

D1553
བོད་ཡིག

/ //bal po'i A tsAr+ya b+ha ren+d+ra ru tsi dang / lo tsA ba blo ldan shes rab kyis bsgyur ba'o// @##/ /rgya gar skad du/ dz+nyA nA be sha nA ma/ bod skad du/ ye shes 'pho ba zhes bya ba/ rdo rje rnal 'byor ma la phyag 'tshal lo/ /mu tig gis spras byi ru'i chun po ltar gsal skar bcas dgongs ka'i thun mtshams 'dra//me stag rab 'phro 'jigs byed me 'bar lta bur phyogs dang nam mkha' gsal byed cing / me tog dkar po dang ldan gyi shu ka yi me tog 'bar ba'i tshogs 'dra ba/ /gzi brjid du mas rnam brgyan dmar ba'i sku mnga' rdo rje phag mo khyed la bsrungs//nyes mtsho'i chu rnams ma lus pa las rgal gyur ye shes dam pas yang dag brgyan/ /gzhan don la brtson bcom ldan 'das ma rdo rje phag mo 'jigs ma la btud nas/ /shin tu gting zab dpal ldan 'khor lo sdom pa'i rgyud las yang dag blangs gyur pa/ /ye shes dbab pa'i cho gas gsang ba yid ches skyed byed tshul bzhin brjod par bya//bsam gtan khang pa yid 'ong skye bo dang bral dri zhim chus brlan sar zhugs te/ /shin tu 'jam zhing mtho ba'i stan la 'dug nas phyir la 'jigs pa sel byed pa'i/ /gsang sngags brjod nas de 'og mdun du me tog gis ni byugs gyur dkyil 'khor dag /cho ga bzang po byas nas bzlas pa byas pa'i rdo rje'i chu yis khrus byas te/ /'byung po'i tshogs la gtan pa'i gtor ma btang nas 'bad pa dam pas thang ka dag /mdun du bkram nas spos kyis bdugs shing mchod nas blo bzangs kyis ni bsam gtan bya/ /sprul pa'i 'khor lor nyi ma'i sa bon las gyur me gzugs dmar po gru gsum la//chu skyes dmar po dus kyi 'dab ma dang ldan rab tu 'bar zhing rgyas pa bsgom/ /der ni ro yi snying gar 'od drod can steng shin tu g.yon brkyang zhabs bzhugs pa/ /bcom ldan 'das ma rdo rje phag mo phag pa'i zhal mnga' rab tu khro mo ni//phyag rgya lnga pos brgyan cing spyan gsum dang ldan rgyas shing gsus pa shin tu grims/ /khro gnyer rab tu bsnyer zhing ljags g.yug hrIHyi sgra yis zhal ni gang gyur cing / /'jigs ma 'od tshogs 'phro ba las skyes rgyal bas sems can don rnams mdzad/ /gcer bu thod phreng rdo rjes brgyus pas dbu skra kham pa gyen brdzes ma//rdo rje lcags kyu rgyal mtshan thod bcas sdigs mdzub bcas pa'i zhags pa dag /rig byed tshad kyis phyag mchog rnams kyis bsnams shing spyang mo 'gying bag dang ldan ma/ /rgya skyegs ki shu ban+du dzi ba ka dang ki li'i me tog ltar dmar ba/ / skul mgo phreng las byas do shal gyis brgyan rgyas shing mkhregs pa'i nu 'bur can/ /'od bdun pa dang dpal mo zla tshes mkha' bcas sa mtha' las skyes mchog gyur ma/ /kun dga' dang bcas thugs rje'i chus brlan thugs can ye shes mngon rtogs skyed mdzad blta/ /de nas ye shes 'bar ba dam tshig chud cing lus la drug po bkod byas nas//de la sems las byung ba'i cho ga dag dang phyi nang shin tu gsang rnams dang / /bstod pa sna tshogs dag dang glu dbyangs mchog rnams kyis ni rab tu mchod bya zhing / /thal mo sbyar nas gus dang bcas pa'i sems kyis de la mgo bos phyag bya'o//de la sprul 'khor la gnas rgyal ba'i pho brang le brgan rtsi ltar dmar ba la/ /steng zur 'og tu rig byed sgo dang drag po nyi ma lta bu dag dang ni/ /'og zur steng du bsil zer can dang mkha' ldan yi ge tha ma'i gong ma dang / /dbus su 'od zer dmar po mtha' yas rnams kyis phyogs mthar snang byed sa bon bsgom//de nas rgyal ba'i bzhugs gnas rab mdzes 'khor lo lta bur 'khor bar bsgoms nas ni/ /sngags kyang bzlas te stobs bzangs las byas bdug pa sngags ldan blo dang ldan pas bsregs/ /ma lus rgyal ba'i sku ldan lha mo 'bod pa'i de ma thag tu A be+e sha ya dang / / de nas skul byed de rjes rang gi sa bon de 'og me yi btsun mo yin/ /sku dang cha kun tha ma'i rjes la mchog gi sa bon de nas glang po ste/ /de rjes dran yig brten pa'i k+Sha ltag nam mkha' zur ldan rjes la'ang de nyid yin/ /oM hrIM haM dang yi rjes la'ang bde ba'i yi ge gsum dang ni/ /hi hi pheM gsum de dag rim bzhin bzlas dang bsreg dang mtshan mo'i gtor ma'i yin//nag po'i phyogs kyi bcu pa nas brtsams nyi ma so sor cho ga yi/ /bzlas pa gtor ma mchod par ldan pa'i bsam gtan dam pa bsgrubs byas na/ /shin tu rgya chen mi mnyam mnyam pa'i rang bzhin dngos grub blang ba yis/ /thod pa 'di la legs pa la ston blo chen rnams kyis 'khrul mi bya//ye shes dbab pa'i cho ga las bsgom pa'i cho ga'o// //slob ma gus ldan zhabs pad la btung rnams kyis gsol ba btab gyur bla ma yis/ /nag po'i tshes mchog ji skad brjod pa de dag legs pa kho nar yang dag gzung / /de 'og 'khor lor cho ga bzang pos ji skad brjod pa'i lha mo mchog bsgoms nas//de yi rtsi bas ldan 'og mar sngar bzhin 'khor lo mdzes pa 'khor bar bsgoms nas ni/ /de 'og lag nas rdor 'dzin phul te ji srid mgo la mgon ldan me tog can/ /de dag ma lus shin tu babs gyur bar du yang dag bdug cing gsang sngags brjod//phebs par gyur tshe grang dang tshad pa chen po la gnas lta bur spu ldang zhing / /mig nas mchi ma 'dzag cing 'dar la 'gyel zhing ye shes dag ni skye bar 'gyur/ /de dag rnam gnas gyur pa rnams la rnal 'byor chen po mchod pa'i cho ga dang / / bsgom bya bzlas bya bdug par ldan pa'i gsang sngags don kun sgrub byed rnams kyang brjod/ /gang dag dang dang bral ba'i sems ldan blun zhing sdig pa'i las la brtson gyur pa/ /gus pas bkur sti byed pa'i ngor ni mi de rnams la 'di ni brjod mi bya/ /ye shes dbab pa'i cho ga las slob ma rjes su 'dzin pa'i cho ga'o// //yang dag grub dang slob ma bzang 'dzin byed pas phyi rol mchod pa byed gyur pas/ /mdun du khu ba dmar pos me tog dmar po dang ldan maN+Dal byas nas ni/ /rdo rjes mtshan pa'i 'khar snod la brten snod chen mnyam pa de la lag g.yon gyis/ /'khor lo zur gsum mdzes pa sna tshogs rdo rje dang bcas mngon par bris nas ni//de la sngar bshad yi ge bzhi po bgegs bdag dbang po'i mgo rgyan phye ba yis/ /nub tu kha bltas gsang sngags rig pas lag pa g.yon gyis snga ma bzhin du bri/ /de nas cho ga'i rim pas ye shes bkug nas myur du dam tshig la gzhug bya/ / de la dri dang spos mchog me tog dri zhim mar me lha bshos rnams dang ni/ /'dod pa lnga dang mchog gyur bdud rtsi stobs dang thug pa gzhib pa bzang po dang / /bcas dang bza' ba bde gshegs drug pa dang ni khar ba'i sil khrol bcas glu dang / /pi wang gling bu'i rnga rim rdza rnga pa Ta ha rnams dang ni dung dag dang //zangs dung rnams kyi sgra snyan gar bcas dge legs kyis ni mchod cing bstod pa ste/ /mchod pa'i tshul mchog legs pa sna tshogs rnams kyis rnam pa kun du mchod bya zhing / /gus pas thal sbyar zhes bcas pas dpe med phyag ni rab tu btsal bar bya/ /sngags rnam so sor cho ga bzang pos bzlas pa yis ni 'bum du longs byas te//rdo rje la sogs dbye bas 'dis ni bzlas na gsum du nges par 'gyur ba yin/ /gang tshe lta bar 'dod pa skyes na de tshe yi ge dang bcas pa'i/ /'khor lo mdzes pa de dag bzhugs pa'i bla ma la yang rab btud nas/ /muHyig bcas sngags cho ga ldan par 'dug pa rab tu brjod nas ni//skyes bu don mchog la brtson blo yis bsam gtan las ni yang dag ldang / /ye shes dbab pa'i cho ga las ni phyi rol mchod pa'i cho ga'o/ /gang zhig bshad zin cho ga mchog gis nyin re bzhin du 'khor lo mchod byed cing / /cho ga ji bzhin thang ka'i mdun du lha mo'i sngags kyi bzlas pa yang byed pa//des ni 'gro don sna tshogs skyed pa'i yang dag grub pa nges par thob 'gyur zhing / /'jig rten dag na mdangs 'bar lha mo lta bur shin tu mchod pa nyid du 'gyur/ /rjes chags snying ldan gos dmar can gyi bsgrub bya gang yin mdun du bltas byas nas/ /rdo rje zhags pas mgul nas legs par bcings shing brang nas lcags kyus phug nas ni//thal sbyar gcer bur drangs nas rang gi rkang gnyis la ni 'gyel bar gar byed pa/ /Do ma bis ra Da'i skye bo lta bur des ni shin tu byed par 'gyur/ /gang gi mgo la rdo rje'i rtse mos bsnun cing thod gnas khrag gis mig bkang ba//de ni rdo rje'i lus can yin du zin kyang myur bar gshin rje'i gnas su 'gro/ /sa bon 'od zer bdud rtsi'i rang bzhin tshogs kyis shi ba gang gi rma bkrus shing / /kha T+wAM la gnas sgra dang bcas pa'i dril bus des ni yang dag 'tsho bar 'gyur/ /ye shes dbab pa'i cho ga las phan yon sbyor ba dang bcas pa'i cho ga'o// //ye shes dbab pa'i cho ga tshul bzhin brjod pas bsod nams zla ba nya ba yi/ /'od ltar dkar zhing nyes pa ma lus sel ba bdag gis bsgrubs gyur gang yin pa/ /des ni 'gro rnams nyon mongs ma lus dang bral yon tan rnams kyi gter gyur pa/ /bcom ldan 'das ma rdo rje phag mo'i ye shes snang bas rab tu 'bar bar 'gyur//ye shes dbab pa zhes bya ba rnal 'byor gyi cho ga'i mchog dpal stong nyid ting 'dzin gyis mdzad pa rdzogs so// //bal po'i A tsAr+ya b+ha ren+d+ra ru tsi dang / lo tsA ba blo ldan shes rab kyis bsgyur ba'o// //

CLOSE WINDOW