CLOSE WINDOW

D1543
བོད་ཡིག

/ //mkhas pa chen po a ba d+hU tI pa gnyis su med pa'i rdo rjes mdzad pa'o// //rgya gar kyi mkhan po badzra pA Ni'i zhal snga nas dang / lo tsA ba mtshur ston dbang nges bsgyur ba'o// //[]@/ /rdo rje rnal 'byor ma la mchod ba mdor bsdur pa bzhugs// // @##//rdo rje rnal 'byor ma la phyag 'tshal lo/ /bla ma rje btsun mnga' bdag ri khrod pa'i/ /zhabs kyi rdul la bdag gis phyag 'tshal te/ /rdo rje rnal 'byor ma ni mchod pa'i thabs/ /bla ma'i bka' ni ji bzhin dran nas bris/ /rnal 'byor pa yis dang por ni/ /gru bzhi la sogs dkyil 'khor bya//me tog lha yi grangs bzhin dgod/ /mchod sogs gtor ma ji bzhin bya/ /bdag nyid 'dod pa'i lha yi ni/ /skad cig nga rgyal gnas pa la/ /lag pa g.yon pas reg byas pas/ /dpa' bo drug gi go cha dang / /dpa' mo'i go cha de bzhin byas/ / oM ha ni snying gar ro/ /na maHhi ni mgo la'o/ /swA hA hu ni spyi gtsug tu'o/ /bau ShaT he ni phrag pa gnyis la'o/ /hUM hUM ho ni mig dag la'o/ /mtshon char phaT haM ni yan lag thams cad la'o/ /oM baM ni lte bar ro/ /haM yoM ni snying gar ro/ /hriM moM ni kha la'o/ /hreM hriM ni mgo la'o/ / hUM hUM ni spyi gtsug tu'o/ /mtshon cha phaT phaT yan lag thams cad la'o/ /de ltar na go cha gnyis bgos nas dang por sbyang bar bya ba ni/ yaM las rlung dang raM las me/ /de steng a la mgo gsum dang / /de yi steng du ka pA la/ /b+hU/ AM/ dzrIM/ khaM/ hUM/ de dag yongs su gyur pa las//bshang ba la sogs bdud rtsi lnga/ /de steng yi ge lnga nyid las/ /go ku da ha na la sogs rnam lngar gyur/ /oM gyis ye shes sbyang bar bya/ /AHyis ye shes rtogs par bya/ /hUM gis ye shes rab tu 'bar/ /haM gis ye shes bdud rtsir gyur/ /g.yon pa'i lag pas spyad par bya//g.yas pa'i lag pas rtog par bya/ /thal mo bkab pas 'bar bar byed/ /bya khyung phyag rgyas bdud rtsir bsgyur/ /zla ba bzhi ba'i rang bzhin te/ /de nas g.yon pa'i ming med kyis/ /chang gi thigs pa blangs nas su/ /sa la chos 'byung gru gsum bya/ /de yi dbus su zlum po ni//thig le yi ni gzugs su bya/ /dkyil 'khor 'khor lo bsam par bya/ /de nas thig le mchod par bya/ /rang gi mgrin par myang bar bya/ /oM AHhUM/ thabs dang shes rab tshim par byed pa ste thun mong ba'o/ /g.yon pa yi ni lag mthil la/ /pad+ma dmar po 'dab lnga bsgom/ / dbus su oM baM rdo rje phag /gshin rje yum brtsams 'dab ma la/ /haM oM dang ni ya mi ni/ /hriM moM dag ni rmongs byed ma/ /hreM hriM dag ni skyod byed ma'o/ /hUM hUM skrag byed ma ru shes/ /phaT phaT dag ni tsaN+Di kas/ /rgan po la ni rdo rje sems/ /mdzub mo la ni rnam snang mdzad//pad+ma gar dbang gung mo la/ /he ru ka dpal ming med la/ /rdo rje nyi ma mthe chung la/ /rta mchog rdo rje sen phreng la'o/ /de ltar yid kyis bsgoms pa ni/ /sngags kyi yi ge'i gzugs nyid dam/ /yang na kha dog dbyibs kyi gzugs/ /rang gi ming brjod me tog bcas//de dag gis ni dgod par bya/ /de la me tog spos kyis mchod/ /chang gis kyang ni tshim par bya/ /de nas maN+Dal steng du blugs/ /slar yang rang gi mgo la gzhag /phyi nas 'khor lo sdom pa mchod/ /dkyil 'khor 'khor lo rdzogs pa'am/ /yang na bcu gsum bdag nyid sogs//rang gi snying ga'i sa bon las/ /dam tshig 'khor lo spro bar bya/ /ye shes 'khor lo de la gzhug /me tog la sogs re re yang / /snying po'i sngags sam nye snying gis/ /rdo rje phag mo mchod par bya/ /mkha' 'gro ma sogs lha mo rnams/ /rang gi ming brjod sngags la ni//oM ni thog mar huM hUM mthar/ /sbyor ba yis ni mchod par bya/ /phyogs rnams dag ni g.yon skor te/ /mtshams rnams de bzhin g.yas skor du/ /rkang pa brgyad pa'i bstod pas mchod/ /de ltar mchod pa rdzogs pa dang / /snod gzhan dag ni byin brlabs la/ /snod gnyis gcig tu bsre bar bya//cA ru'i bza' ba de la bshad/ /de nas gtor ma byin brlabs la/ /dang po sngags kyis snyan gsan dbab/ /a ral+li sogs sngags kyis ni/ /gtor ma rjes su dbul bar bya/ /de nas rnal 'byor tshul bzhin bya/ /'dod pa'i longs spyod rnams la gnas//glu dang gar sogs thams cad bya/ /badzra maN+Dal muHzhes pa'i/ /sngags kyi mthar ni gshegs su gsol/ /lhag ma dag ni sngon bzhin du/ /gtor ma byin gyis brlab par bya/ /zos shing 'thungs pa'i lhag ma rnams/ /sor mo lngas ni bdud rtsi'i rgyun/ /'bab par bsams nas yi dags kyi//tshogs rnams dag la sbyin par bya/ /de dag ni tshogs kyi 'khor lo dang thun mong ba'i cho ga'o/ /tshes bcu la sogs dus dag tu/ /gzhan yang bla ma'i man ngag dus/ /gong bzhin maN+Dal byas pa la/ /rnal 'byor ma yi mtshan ma yi/ /g.yung drung 'khyil pa bri bar bya//mtshams su chang gi thig le bya/ /de yi dbus su mchod bya ba/ /slar yang de bzhin dri med phyir/ /snod du mdzes mas legs par btsags/ /chos 'byung kha sbyor tsa kra'i dbus/ /gsang sngags ma smad pa zhes 'di/ /cho ga bzhin du dben par bri/ /'khor lo'i mtshams su phag mo sogs//cho ga'i lha mo mtshan ma drug /g.yung drung 'khyil pa'i mtshan ma bri/ /me tog dri zhim phreng bas bskor/ /'bras bu bzhi dang khur sna bzhi dag dang / /khyad par can gyi mchod pa dri zhim me tog dang / /mchod pa rnam pa du mas 'khor lo legs par mchod//grong khyer 'jig par 'gyur ba 'di ni mchog yin no/ /'di ltar lha mo'i snying po dang / /nye ba'i snying po'i sngags rgyun mi 'chad par bzlas pa la brtson pa na 'gro ba'i don byed pa la dka' ba yod pa ma yin zhing chos don 'dod pa thams cad 'grub par 'gyur te/ de ni thun mong ma yin pa'i cho ga'o// //rnal 'byor pa yis rtag tu ni/ /gang de yi dam du byed na/ /de nas snga dro'i dus dag tu/ /chog bzhin du maN+Dal bya/ /rang 'dod lha yi grangs bzhin du/ /me tog dag ni dgram par bya/ /rang gi snying ga'i sa bon las/ /spros la dam tshig sems dpa' gzhug /ye shes sems dpa' de la gzhug /de nas me tog la sogs pa/ /snying po'i sngags dang nye snying sngags/ /rkang pa brgyad pa'i sngags kyis mchod/ /mkha' 'gro ma sogs thams cad la/ /rang gi ming brjod sngags la ni/ /thog mar oM dang hUM phaT mthar//sbyar ba'i sngags kyis mchod pa bya/ /de lta bur ni rgyas par bshad/ /phyag rgya chen po la gzhol zhing / /de lha'i lam la zhugs pa dag/ /gol ba'i lam du mi 'gro zhes/ /bdag gi bla ma de skad gsungs/ /rdo rje rnal 'byor ma mchod pa la sogs pa mdor bsdus pa rdzogs so/

CLOSE WINDOW