CLOSE WINDOW

D1539
བོད་ཡིག

/dpal ldan rin chen ri gnas te/ /sems can kun gyi don gyi rgyur/ /slob dpon dbu ba blo ldan pas/ /dkyil 'khor thabs 'di byas pa yin/ /'khor lo sdom pa'i dkyil 'khor gyi cho ga rdzogs so// @##/ /rgya gar skad du/ sa ha dzA maN+Dal tri A lo ka sa ha dza nA ma//bod skad du/ lhan cig skyes pa'i dkyil 'khor gsum gsal bar byed pa zhes bya ba/ dpal he ru ka la phyag 'tshal lo/ /byed rgyu la sogs rnam par spangs/ /skye 'jig tshogs bral mi gnas pa/ /gnyis med he ru ka dpal la/ /btud de lhan cig skyes pa bri//lus kyi dkyil 'khor zhes bya dang / /b+ha ga'i dkyil 'khor zhes bya dang / /byang chub sems kyi dkyil 'khor te/ /dkyil 'khor rnam pa gsum du bshad/ /ra ni me ru bstan pa ste/ /khrag dang mkhris pa yang dag 'byung / /bad kan gyis ni khyab nas su/ /rdul dang rgyus pa'ang 'byung ba yin//de dag gtso bo rlung yin te/ /ha ni kun du 'gro bar brjod/ /rus pa yi ni mtshams rnams su/ /sa bon lngas ni khyab pa yin/ /ra ni rkan la gnas pa ste/ /sa bon bzhi ni bla na med/ /re'u mig dang po'i gnas su ni/ /sa bon lnga las brgyan pa ste/ /ha ni dbyangs yig drug pa dang //lnga pa rnam par shes par grags/ /ha zhes bya ba kun nas ni/ /sangs rgyas thams cad 'dus pa ste/ /rdo rje pad+ma mnyam sbyor bas/ /dngos dang dngos med 'dres gyur te/ /bshang gci bad kan khrag dang ni/ /de bzhin lnga pa khu ba ste/ /bdud rtsi lnga yi rang bzhin lus/ /rus pa rkang dang khu ba ste//pha las skyes par bstan pa yin/ /sha dang khrag dang pags pa yin/ /ma las skyes par rab tu bshad/ /rnam pa gnyis la ril po gcig /gnyis byung las ni du ma'o/ /gcig dang du ma'i tshul las ni/ /rdo rje can du brjod pa yin/ /he ru ka sogs lha yi ni/ / lus kyi dkyil 'khor nyams dga' ba/ /ji skad gsungs pa'i sgo bzhir ldan/ /rang gi yan lag las byung ba'i/ /ka ba brgyad kyis brtan pa yin/ /dngos grub kun du mnyam pas na/ /gru bzhi par ni rab tu grags/ /sku gsung thugs kyi tshul gyis ni/ /gcig nyid 'khor lo gsum du brjod//bla ma brgyud pa'i rim pas ni/ /rdzogs pa'i dkyil 'khor nyid du gsal/ /b+hai ram la sogs tshul bzhin gnas/ /mgo bo'i pad+ma ri rab yin/ /rkang mthil gzhu yi dbyibs kyis ni/ /rlung gi dkyil 'khor nyid du gsal/ /gru gsum rked pa'i phyogs nyid na/ / me yi dkyil 'khor nyid du gnas/ /lto ba zlum po chu zhes brjod/ /snying ga gru bzhi sa zhes brjod/ /sgal tshigs ri rab lhun po'o/ /der ni mgo bo'i char gnas pa/ /sum cu rtsa gnyis 'dam skyes la/ /dbyangs dang gsal byed yang dag rdzogs/ /byang chub sems ni sum cu gnyis/ / mgo bo'i dbus nas glad pa zhes/ /bya bar grags pa de nyid ni/ /pad+ma'i dbus gyur gang yin pa/ /zla ba'i dkyil 'khor zhes byar brjod/ /de yi dbus na yi ge haM/ /mi shigs thig le'i gzugs can te/ /mi gsal gsal ba'i bdag nyid can/ /sa bon gzugs kyis yang dag gnas//de nyid brtan dang g.yor bcas pa'i/ /'gro ba kun gyi rtsa ba ste/ /lus can kun gyi gzugs rnams kyi/ /dang por de las skyes pa yin/ /nyin mtshan bdud rtsi 'dzag pas na/ /me ni mnyes par byed pa ste/ /de nyid kyis ni sgra yang phyed/ /des ni dkyil 'khor yongs rdzogs par//'gyur ba nyid du the tshom med/ /de nyid dkyil 'khor zhes bshad de/ /dngos po rnams kyi snying po mchog /de ni len cing 'dzin pas na/ /lus kyi dkyil 'khor nyid du 'dod/ /rtsa rnams su ni yang dag 'jug /de yi sgo ni rnam pa gnyis/ /de dag 'dus pa'i dus su ni//lha yi lus su dmigs par 'gyur/ /steng 'og sgo ni rnam gnyis te/ /'og sgor rnam par shes pa nyid/ /steng gi sgo ru khams rnams te/ /rnal 'byor pas ni rtsa rnams kun/ /'dus nas 'jug pa bsam par bya/ /lus la rtag tu steng sgor ni/ /rdo rje can ni rgyud du gnas//steng 'og 'khrul 'khor gsum la ni/ /sgo dgu yis ni yang dag sgor/ /sku gsung thugs kyi bye brag gis/ /rnam pa gsum du 'khrul pas na/ /mchog dang bar dang tha ma yi/ /'khrul 'khor gsum du yang dag gnas/ /ka ba gcig dang sgo dgu ste/ /rags pa lnga ni lhag pa'i lha//bu ga dgu yi lam dag ni/ /sgo dgu zhes ni bya bar grags/ /tha ma lus kyi sgo yin te/ /sbom po'i lha ni rnam par sprul/ /gang gis 'di shes sems ldan zhing / /skyes bu rnal 'byor pa zhes bya/ /dus rnams kun du rtag par ni/ /'gro dang 'ong ba'i khyad par gyis//rkang med rkang gnyis bzhi sogs la/ /rlung la sogs pa'i bye brag gis/ /dbugs ni rnam pa bzhir gnas la/ /sems gnas pa yi cho gas gnyis/ /thim dang 'jug pa'i cho ga'o/ /thim pa rtag tu gnas pa ste/ /'jug pa 'gro dang 'ong ba yin/ /de ltar gang gis mi shes pa//sems med skyes bu rnal 'byor min/ /me dang de bzhin rlung dang ni/ /dbang chen dang ni de bzhin chu/ /'khor lo sems kyi 'pho ba ste/ /steng dang logs dang thad kar sogs/ /gsum pa yid kyi sgo yin te/ /zla ba nyi ma'i bye brag gis/ /'jug dang 'byung ba'i sgo yi mchog /gtso bo steng dang 'og ces grags/ /'og sgor rnam par shes pa ste/ /steng gi sgo ru khams rnams su/ /rnam snang la sogs sangs rgyas rnams/ /steng gi sgo nas bskyod nas su/ /de rnams 'og tu yang dag gnas/ /'og tu spyan drangs steng gshegs gsol/ / spyan drang gshegs gsol tshul gyis ni/ /mkha' 'gro ma yi sbyor ba yis/ /dus gsum sangs rgyas rtag tu bzhugs/ /'jug pa dang ni 'byung ba yis/ /yon tan skyon ni 'phel 'gyur te/ /bde dang sdug bsngal rang bzhin nyid/ /lhan cig skyes pas grub ste gnas/ /'di ni bcom ldan rdo rje can//tshogs 'di dag gis sems can rnams/ /sangs rgyas nyid du the tshom med/ /zla ba bcus ni sa rnams pas/ /sems can sa bcu'i dbang phyug yin/ /snying gi dbus gyur pad+ma ni/ /'dab ma brgyad pa lte bar bcas/ /de yi dbus gyur dpa' bo ni/ /hUM gi sa bon mi shigs la//kha ba lta bu 'dzag pa ste/ /bA san+ta zhes bshad pa yin/ /lus can rnams kyi snying dga' byed/ /rgod ma'i kha ni me yi gzugs/ /bdag med ti la ka zhes brjod/ /lus kyi rlung gis bskyod nas su/ /lte ba'i dkyil 'khor nas 'bar te/ /bA san+ta dang 'dus pas na//bya ba dang ni byed pa'i dngos/ /'di ni ji ltar bde bar rol/ /btsun mo'i b+ha ga bde can du/ /khu ba'i gzugs kyis yang dag bzhugs/ /de ma rtogs par bde ba med/ /bde ba spangs na'ang de mi dmigs/ /nus med ltos dang bcas pa'i phyir/ /lha yi sbyor bas bde ba'o/ / de phyir sangs rgyas dngos min zhing / /dngos po med pa nyid kyang min/ /phyag dang zhabs sogs rnam spangs te/ /don dam bde ba gzugs yod min/ /des na 'gro kun lhan skyes dga'/ /lhan skyes zhes bya rnam par brjod/ /sems kyi rang bzhin rnam dag pas/ /rang bzhin gyis ni mya ngan 'das//dbyibs dang kha dog la sogs pas/ /'on kyang tha mal zhen par 'gyur/ /lha yi gzugs kyi sbyor ba yis/ /bskyed pa tsam du gnas pa yin/ /'di dag rnal 'byor ma rnams kyi/ /bstan pa bla na med pa yin/ /rtsa chen sum cu rtsa gnyis kyang / /byang chub sems ni rin po che'i//snying po len pas dkyil 'khor yin/ /de ni phyi nang sna tshogs kyi/ /khyab bya'i gzugs kyis yang dag gnas/ /phyi ni gzugs dang sgra sogs pa/ /dbang po thams cad 'jug pa'o/ /nang gi khu ba la sogs pa/ /sgrub pa'i rdzas su gnas pa ste/ / phyi dang nang gi de dag nyid/ /byang chub sems ni rdo rje can/ /sbom pa dang ni phra gzugs kyis/ /'gro ba sangs rgyas rang bzhin nyid/ /de ni sangs rgyas byang sems kyi/ /dam tshig don du gsungs pa ste/ /tshe 'di nyid du sangs rgyas ni/ /thob pa'ang dkyil 'khor las byung ste/ /nyan thos rang rgyal de bzhin du//tshangs sogs la yang dkyil 'khor skyes/ /'byung gnas sgra tshul nges 'byung rnams/ /dam tshig gcig pa'i spyod yul yin/ /'jig rten gsum na rnyed dka' ba/ /thog ma dbus mthar yang dag gnas/ /gtsub shing btsubs pa'i sbyor de bzhin/ /sngags bzlas bsam gtan la sogs ldan//kA li bung ba zhes bshad de/ /bung ba rdo rje 'jigs byed yin/ /kA li nam mkha'i mtha' klas pa'i/ /chos kyi dbyings kyi rang bzhin no/ /rgyu dang rgyu yi gsang 'dzin pa'i/ /lus ni ma lus de las byung / /phung po skye mched khams rnams dang / / dbang po kun gyi bdud rtsi dag /de dag kun las drangs nas su/ /rtsa ba dbus su thim par bya/ /'jigs byed rdo rje sgra yis ni/ /sbyor ba'i rdzas ni dbyung bar bya/ /haM ni char ba'i rgyun du brjod/ /dbyangs yig dang po'i sa bon ni/ /de yi dbus su gzung bar bya/ /kA li me tog tshul du shes//rdo rje can gyi lus me tog /'khor ba bskyed pa ma yin zhing / /thams cad kyi ni sa gzhi yin/ /ye shes chu yi rgya mtsho 'dir/ /shes rab chu srin nya la sogs/ /gnyis med 'dam gyi dbus nas ni/ /thabs kyi myu gu skyes pa yin/ /ban+du ka ni rgyas 'dra ba/ /sbrang rtsi bdud rtsi'i gnas yin no//kA li nyid kyang bdud rtsi ste/ /me tog chu ni 'dzin pa po/ /gnyis las skyes pa lus yin te/ /bdud rtsi chu yi cho ga mchog /dang po rdo rje bdud rtsi'i chu/ /rnam pa ltar ni 'byung ba yin/ /reg na dro ba me yin te/ /du bar snang ba rlung yin no/ /zhu bar gyur na chu yin te//gzugs su snang ba sa yin no/ /ye shes rdo rjes byin brlabs pa/ /rnam pa lngar ni rab tu skyes/ /sems can sangs rgyas nyid mod kyi/ /'on kyang glo bur dri mas bsgribs/ /de spangs pa ni sangs rgyas nyid/ /'jig rten de nyid mi shes gang / /dug zos pas ni brgyal bar 'gyur/ / de nyid shes pas spong 'gyur ltar/ /gti mug spang na mya ngan 'da'/ /dug gi dum bu gang nyid kyis/ /skye bo thams cad 'chi 'gyur ba/ /dug gi de nyid shes pa yis/ /dug gis dug ni sel bar 'gyur/ /ji ltar rlung nad ldan pa la/ /sran ma'i bza' ba sbyin par bya/ /bzlog pas sman du brtag par bya//srid pa srid pa nyid kyis sbyong / /rnam rtog yang dag rtog spangs te/ /ji ltar rna bar chu zhugs pa/ /slar blugs pa yis 'byung bar 'gyur/ /de bzhin dngos por rtog pa yang / /de yi tshul gyis dag par 'gyur/ /dper na me yis tshig pa dag /slar la me la bsro bar bya//de bzhin 'dod chags mes tshig pa/ /'dod chags me nyid bsten par bya/ /skye bo mi bzad pa yi las/ /gang dang gang gis bcings gyur pa/ /thabs dang bcas na de nyid kyis/ /srid pa'i 'ching las grol bar 'gyur/ /skye bo 'dod chags kyis bcings te/ /'dod chags nyid kyis grol bar 'gyur//slar bzlog pa yi sgom pa yi/ /nang gi mu stegs can gyis min/ /mi shes rmongs pa'i sems can rnams/ /ji srid ye shes rnams spangs te/ /phyi rol dngos po la gnas shing / /rtog pa'i dra bas dkris pa'i tshe/ /bsod nams dang ni sdig pa yi/ /phung po gnyis su brtags pa yin//chos ni rang bzhin rnam dag ste/ /skye ba med cing gnas med las/ /mi shes bsgribs pa'i skye bo la/ /sdig dang bsod nams sangs rgyas gsungs/ /drang ba'i thabs su mdzad pas na/ /sdig dang bsod nams gnyis ka yang / /dper na chu yis gang ba'i klung / /rgal 'dod skye bos shing drung ni//rtswa sogs bsdus te 'jus nas su/ /rgal te pha rol rgal ba dang / /dor nas bde bar 'gro bar 'gyur/ /de bzhin chos dang chos min la/ /brten nas 'khor ba'i pha rol 'gro/ /bde ba'i byang chub thob 'gyur nas/ /chos dang chos min rab tu spong / /de bas rtog pa'i tshig btang ste//zab mo'i chos la 'jug par bya/ /de bzhin gshegs pas gsungs pa'i lam/ /lam rig pa ni rtog mi 'gyur/ /rnam rtog rmongs pa chen po ste/ /'khor ba'i rgya mtshor ltung byed yin/ /mi rtog ting 'dzin la gnas nas/ /mkha' bzhin dri ma med par 'gyur//dbang po gnyis ni snyoms zhugs las/ /sku gsung thugs 'dus ye shes kyis/ /ye shes can ni tshe 'di la/ /nga rgyal gyis ni rnam pa kun/ /spangs nas rgyal ba'i gzugs rdzogs 'gyur/ /mi shes pa yi sprul pa yi/ /sna tshogs las las yang dag skyes/ /skyes pa bud med gzugs mi smad//sku yi rdo rje dam tshig yin/ /sems kyi rdo rje smad mi bya/ /ngan rtog dra bas bcings pa yi/ /sems can sna tshogs bskyab pa ni/ /thugs kyi rdo rje'i dam tshig yin/ /brlang dang rtsub dang mi mnyan pa'i/ /tshig dag smra bar mi byed cing / /mnyan na bde bar smra byed pa//gsung gi rdo rje'i dam tshig yin/ /ji ltar bud med byis gtam rjes yi rang / /chags pa'i gtam ni rnam pa du ma smra/ /de bzhin rnal 'byor lam ngan ston pa dag /lam yang ma bshad 'ching ba'i rgyur 'gyur ro/ /de nas gang gi tshe rig pa grub pa'i sgrub pa por gyur pa'i tshe rtags 'di dag 'byung ste//sa chen po g.yo zhing yid du 'ong ba'i sgra grags pa dang / /phyogs thams cad du 'od chen po bskal ba'i me lta bu 'byung ba dang / /bdud kyi gnas rnams su cha lang lta bu'i sgra grags pas skar mda' gtong zhing rgya mtsho chen po 'khrug pa dang / /rdo char 'bab pa dang / phyag rgya'i snying po can gyi ye shes kyi me 'bar bas bsgyings shing khams gsum po snang bar mdzad de/ /tshangs pa la sogs pa phyogs skyong chen po rnams dang rig pa 'dzin pa dang / /mtsho sman la sogs pa dang / sum cu rtsa gsum gyi lha rnams lhags te me tog dang rol mo sna tshogs pa'i sgra rnams kyis nam mkha' la gnas te mchod cing //mtsho sman dang rig pa 'dzin pa'i bu mo rnams glu len cing gar byed la/ mi'am ci la sogs pa rnams dga' zhing rtse la rgyal bar gyur cig pa'i sgra 'byin to/ /lha rnams kyi legs pa'i sbyin pa dang / dga' ldan nas 'og min gyi bar gyi lha rnams gus par phyag dang me tog gi char 'bebs so//mdor na sgrub pa po de la khams gsum na yod pa'i mchod pa rnams kyis mchod par byed do/ /rig pa'i skyes bu grub pa dang / /gar yang mi 'gro gar mi gnas/ /thog ma dbus mtha' rnam par spangs/ /gnyis med srid gsum snang ba po/ /'gro kun thams cad shes pa po//kun don kun gyi sems kun nas/ /sdig pa kun las rnam par grol/ /yon tan kun gyis rgyan du byas/ /kun phan zhi ba mtshungs med pa/ /rtag 'char mgon skyob rnam rtog spangs/ /dbyibs dang kha dog las 'das pa/ /rgyal po rgyal ba'i spyod yul yin/ / bshig dka' bas na rdo rje ste/ /nyon mongs gdung sel zla ba yin/ /'jigs pa med pas seng ge ste/ /'jug par dka' bas rgya mtsho yin/ /de la sogs pa sna tshogs 'dus/ /rnal 'byor pa ni de nyid 'gyur/ /rtog pa kun las rnam grol yang / /de nyid gcig tu 'gro don mdzad/ / mdzad pa rnam pa bcu gnyis ston/ /de ltar khyab par sna tshogs pas/ /rmi lam lta bur gar mdzad de/ /sgrub pas sgyu ma'i skyes bu bzhin/ /'gro ba'i don ni rab tu mdzad/ /grub dang lung bstan ma thob kyang / /rgyud dang bla ma'i man ngag la/ /brten nas gzhan la phan blos byas/ /'di las bsod nams gang bsags pas//sa gsum skye bo ma lus pa/ /lam la rmongs pa dag gyur nas/ /rnal ma'i lam dang phrad gyur te/ /log lta skye bar ma gyur cig /bskal ba'i snyigs ma rtsod dus su/ /tshul chen rgya mtsho lta bur byung gyur yang / /mig bral long ba rnams ni kha phyir bltas//de bas de la phan phyir brtsams pa yin/ /rnyed dang phrad par dga' bas skye bo rnams/ /dam pa brten la lam la 'bad pa gyis/ /dka' bas 'jug cing gzhan nas rtsol mi dgos/ /lhan cig skyes pas mtshon bya mtshon byed rnams/ /rang la gdod nas grub pa gnas pa yin//de nas mthun pa'i grogs dang lhan cig tu/ /ma yengs brtson pas goms par bya bar 'os/ /lhan cig skyes pa'i dkyil 'khor gsum gsal bar byed pa zhes bya ba mkhas pa chen po dz+nyA na shrIs mdzad pa rdzogs so/ /bod kyi rgyal po pho brang zhi ba 'od kyis gsol ba btab nas bsgyur pa'o// //

CLOSE WINDOW