CLOSE WINDOW

D1535
བོད་ཡིག

@##/ /rgya gar skad du/ a b+hi She ka bid+hi kra ma nA ma/ bod skad du/ dbang gi cho ga'i rim pa zhes bya ba/ dpal rdo rje sems dpa' la phyag 'tshal lo/ /dbang gi bya ba 'dri bar bya'o/ /dang po slob mas lan gnyis lan gsum du gsol ba gdab pa dang / rdo rje slob dpon gyis slob ma la dbang gi yo byad thams cad 'byor pa yod dam zhes dri'o/ /bdag la thams cad yang dag par yod do zhes pa de la/ ji ltar de'i las kyi sgrib pa dang ldan pa de slob dpon gyis rab tu 'joms pa'i don ni/ /de'i snying gar kaM gi yi ge zhu ba las/ las kyi sgrib pa'i rang bzhin gdug pa can ma lus pa rnam par bsam mo/ /de bzhin du de'i lte ba'i gnas su rdo rje rtse lnga pa zhu ba las yongs su rdzogs pa'i rdo rje gnod sbyin phyag gnyis pa kha dog nag po mche ba gtsigs pa zhal gcig pa bsgoms te/ g.yas dang g.yon na rdo rje dang zhags pa bsnams pa'i khro bo//de nas yang na mche ba dang g.yon sdigs mdzub can/ bdag nyid kyis rdo rje gsor ba las song nas de'i snying gar rang gis byas pa'i las kyi sgrib pa zhu ba rnam par bsams pa la rdo rje bsnun pa la rdo rje gnod sbyin gyis kyang bsnun te/ oM badzra yak+Sha gro d+ha khA da khA da pA paM ya s+ya hUM phaT swA hA/sngags 'dis thal ba lta bur gyur par rnam par bsams pas sdig pa 'byang ngo / /de la bsrung ba bya ste/ gnod mdzes kyi sngags sam bdud rtsi 'khyil ba'i sngags kyis lag pa g.yas pa la skud pa bcing ngo / /de bzhin du spyi bo mgrin pa snying gar yi ge gsum bri ba'am bsgom par bya'o//lus ngag yid gsum byin gyis brlab pa'o/ /yongs su 'dzin pa rnam par dag pa 'di'i sngon du thams cad song ba ste/ bum pa lhag par gnas pa dang / lha lhag par gnas pa dang / dkyil 'khor de'i sgrub pa sngon du byas pa'o//de nas ku sha gnyis bdud rtsi 'khyil pa'i sngags kyis mngon par bsngags pa byin la/ slob ma seng ge'i nyal thabs su stan dang sngas su bya'o/ /nub gnyis pa la rmi lam yongs su brtag par bya'o/ /bzang ngan mthong ba dang / zhi ba'i bgegs bskrad pa dang /sbyin sreg de nas bya'o/ /de'i sngon dkyil 'khor bri ba dang bsgrub pa dang / mchod pa chen po dang gtor ma byin nas nam phyed lus na slob ma dkyil 'khor gyi sgo'i phyi rol du bzhag la/ me tog gi phreng ba 'dzin pa slob dpon gyis gsung gis gdong g.yogs bcing ngo //khyod gang la dga' ba yin ces pa dang / skal ba bzang po bdag bde ba chen po la dga' lags so zhes so/ /de nas slob ma'i lag pa nas bzung la dkyil 'khor gyi sar khrid la sngags 'di brjod do/ /oM shrI he ru ka bid ma he bid+yA rA dza ya d+hi ma he tan nu wI ri pra tso da ya swA hA/'di ni slob ma gzhug pa'o/ /slob ma de lho phyogs kyi sgo ru bzhag la phyag gsum btsal lo/ /gsang sngags 'dis/ oM na ma ste hUM/ na mA mi hUM/ na mo na ma hUM swA hA/ de nas shar phyogs sgor thal mo sbyar te lus thams cad kyis phyag bya'o//sngags 'dis dpa' bo dang rnal 'byor ma mchod pa'i bdag nyid can du bya'o/ /oM sarba bI ra yo gI n+ya At+ma DA ki nI ye tiSh+Tha mAM i de/ thal mo snying gar sbyar te byang gi sgor phyag bya ba gong ma bzhin no/ /sngags 'dis rnal 'byor ma rnams thams cad mchod pa'i dbang bskur ba'i bdag nyid can du bya'o//oM sarba ta thA ga ta bI ra yo gI nI At+ma na taM lA ma a b+hi Shany+tsi tu mAM/ de nas thal mo sbyar la oM rnal 'byor ma thams cad mchod pa'i bdag nyid can du bya'o/ /oM sarba ta thA ga ta bI ra yo gI nI At+ma khaN+Da ro ha s+ya pra brta ya to ma ma i de/des nub kyi skor ro/ /de nas lho phyogs kyi sgor thal mo yan lag thams cad la bskor zhing oM rnal 'byor ma thams cad la mchod pa'i las bya ba'i bdag nyid can du bya'o/ /oM sarba ta thA ga ta bI ra yo gI nI At+ma rU pi Ni karma ka ro to mAM i de/ rab tu 'dud pa'i phyag bzhi bya'o//de nas slob dpon gyis snang ba brtag par bya ste/ mig la snang ba dri bar bya'o/ /de nas snang ba'i rjes su 'jug pa'i las gang grub pa bstan par bya'o/ /de nas sor bcu gnyis pa'i rtse mo la me tog can rma med pa ma gas pa drang po mya ngan med pa la sogs pa'i so shing slob mas bza' zhing shar du bltas te maN+Dal pags pa'i tshad las ma brtags pa dor bar bya'o//byang du bltas na zhi ba'o/ /shar du bltas na rgyas pa'o/ /lhor bltas na mngon spyod do/ /nub tu bltas na dbang du bya ba'o/ /steng du bltas na rig pa 'dzin pa'i dngos grub bo//maN+Dal gyi phyi rol lhung na dngos grub chung ba'o/ /so shing sbyin pa'o/ /dam tshig gi chu sbyin pa brjod par bya'o/ /he ru ka dpal bu khyod kyi/ /snying la de ring yang dag zhugs/ /gal te tshul 'di smras 'gyur na/ /de ma thag tu dral nas 'gro//des na 'di ni dmyal ba'i chu/ /dam tshig 'das na sreg par byed/ /dam tshig bsrungs na dngos grub ni/ /rdo rje bdud rtsi chu 'dis 'grub/ /ces pas sbyin no/ /deng 'dir gang zhig kha cig rdo rje'i chus/ /thams cad byed pa rang nyid ma byed cig /ma bskyangs gyur na dmyal bar ltung 'di'o//sngags ni oM badzra a mr-i ta u da ka Tha hUM/ zhes pas khyor bar 'thung du gzhug go/ /ji ltar khyod dam tshig dang sdom pa la sogs pa 'di rtogs nas 'dzin par 'dod pa de ltar gzung ba de la dpal he ru ka'i ye shes bskyed par bya'i/ye shes des khyed de bzhin gshegs pa thams cad kyi dngos grub kyang thob par byed do/ /dngos grub gzhan lta smos kyang ci dgos zhes bstan nas mi phyed pa'i dkyil 'khor du me tog gi phreng ba ngor bas gang zhig la me tog phog pas de dag gi rigs te ming gi dbang bskur ba'i don to//de nas mig g.yogs dgrol ba'i sngags 'dis so/ /shrI he ru ka raM yaM tir+ya tsak+Sho rod ud+g+ha Ta na ta t+pa ra ung+g+ha Ta ya te sarba ak+Sho badzra ts+k+Shu u ta ri/ de bzhin du sngags ni oM badzra ne tra ya ha ra ha ra pa Ta laM hri/ 'di brjod par bya'o/ /dkyil 'khor 'di khyod mthong ba yis//rigs kyis skye ba'i rnal 'byor la/ /shin tu dad par khyod kyis byos/ /sngags dang phyag rgyas byin brlabs nas/ /de kho na nyid dbang bskur don/ /slob ma rje btsun byed rnams la/ /slob dpon khyed kyis bdag bzung bas/ /khyed kyi bstan pa dga' ba che//mgon po chen po bdag gis ni/ /'dod pa byang chub chen po ni/ /theg pa mi phyed ngo bo yi/ /dam tshig de nyid bdag la stsol/ /byang chub sems kyang bdag la gsol/ /sangs rgyas chos dang dge 'dun gyi/ /skyabs gsum dag kyang bdag la gsol//byang chub chen po'i grong mchog tu/ /mgon pos bdag ni gzhug tu gsol/ /des ni 'di dag gi gsol ba gdab pa'o/ /de nas slob dpon gyis de bzhin gshegs pa rigs lnga'i dam tshig sbyin no/ /sangs rgyas chos dang dge 'dun te/ dkon mchog gsum la skyabs su song //'di ni sangs rgyas rigs dag pa'i/ /sdom pa'i ngo bo mi phyed pa/ /rdo rje dril bu phyag rgya dag /blo chen khyod kyis gzung bar gyis/ /byang chub sems gang de rdo rje/ /shes rab dril bu rjes su dran/ /slob dpon dag kyang gzung bar gyis//bla ma sangs rgyas kun dang mnyam/ /'di ni rdo rje rigs dag pa'i/ /dam tshig sdom pa yin par gsungs/ /nyin dang mtshan mo lan gsum du/ /zang zing mi 'jigs chos dang byams/ /sbyin pa rnam bzhi rtag tu sbyin/ /rin chen rigs mchog chen po'o//phyi dang gsang ba'i theg pa gsum/ /dam pa'i chos ni ma lus bzung / /'di ni pad+ma'i rigs dag pa'i/ /dam tshig sdom pa yin par gsungs/ /sdom pa thams cad ldan par ni/ /yang dag nyid du gzung bar bgyi/ mchod pa'i las kyang ci nus kyis/ / las kyi rigs mchog chen po'o/ /srog chags gsad par mi bya zhing / /ma byin par yang mi blang ngo / /'dod log spyad pa mi bya zhing / /brdzun gyi tshig kyang mi bya'o/ /nyes pa kun gyi rtsa ba yi/ /myos par 'gyur ba spang bar bya/ /sems can 'dul ba ma gtogs pa//bya ba ngan pa thams cad spang / /dam pa nye bar bsten par bya/ /rnal 'byor can la bsten par bya/ /lus kyi las ni rnam pa bzhi dag dang / /yid kyi byed pa gsum dag ni/ /ci nus par ni rjes su bsrung / /sems can gnod pa mi phyogs dang //theg pa dman la 'dod mi bya/ /'khor ba dag kyang mi spang zhing / /rtag tu mya ngan 'das mi chags/ /lha dang lha min gsang pa la/ /de la bsnyen bkur mi bya zhing / /phyag rgya bzhon pa phyag mtshan sogs/ /de la 'gom par mi bya'o/ / 'di ltar dam tshig bsdus pa rnams/ /khyod kyis rtag tu bsrung bar gyis/ /de nas slob ma des rang gi ngag gis gzung ngo / /dkon mchog gsum la skyabs su mchi/ /sdig pa thams cad so sor bshags/ /'gro ba'i dge la rjes yi rang / /sangs rgyas byang chub yid kyis gzung //byang chub sems ni bla med pa/ /dam pa dag gis bskyed par bgyi/ /ji ltar dus gsum mgon po rnams/ /byang chub tu ni nges mdzad pa/ /tshul khrims gsum gyi cho ga 'di/ /sdom pa'i tshul khrims bsrung ba dang / /dge ba'i chos ni sdud pa dang //sems can don byed tshul khrims gsum/ /bdag gis so sor brtan por gzung / /sangs rgyas chos dang dge 'dun te/ /bla na med pa'i dkon mchog gsum/ /sangs rgyas rnal 'byor las skyes pa'i/ /sdom pa mchog tu gzung bar bgyi/ /rdo rje dril bu phyag rgya 'di//so sor yang dag nyid du gzung / /slob dpon dag kyang gzung bar gyi/ /rdo rje rigs mchog chen po la/ /nyin dang mtshan mo dus drug tu/ /sbyin pa rnam bzhi rtag tu sbyin/ /rin chen rigs mchog rnal 'byor gyi/ /dam tshig yid du 'ong ba'o/ /phyi nang gsang ba theg pa gsum//dam tshig so sor gzung bar bgyi/ /byang chub chen po las byung ba'i/ /pad+ma'i rigs chen dag pa'o/ /sdom pa thams cad ldan par ni/ /so sor yang dag nyid du gzung / /mchod pa'i las kyang ci nus bgyi/ /las kyi rigs mchog chen po'o//byang chub sems ni bla med pa'i/ /dam pa bdag gis bskyed par bgyi/ /sems can kun gyi don gyi phyir/ /bdag gis sdom pa ma lus gzung / /ma bsgral ba rnams bsgral bar bgyi/ /ma grol ba rnams grol bar bgyi/ /dbugs ma phyin pa dbugs dbyung zhing //mya ngan 'das la dgod par bgyi/ /lus dang ngag dang yid kyi las/ /mi dge ba ni bcu po dang / /bag med pa yi gnas gyur pa'i/ /chang ni yongs su spang bar bya/ /theg pa dman la 'dod mi bya/ /lha dang lha min gsang ba la/ /de rnams bsnyen par mi bya'o//phyag mtshan 'gom pa la sogs rnams/ /dus 'di nas ni bzung nas ni/ /ji srid byang chub snying po'i bar/ /bdag gis rab tu spang bar bgyi/ /zhes pa'o/ /de nyid bzung ba la rig pa'i dbang gis sdom pa'i slob ma'i dbang sbyin te/ de la sgom zhing slob dpon gyis chu'i dbang sbyin no//sngags ni oM badzra a b+hi Shiny+tsa mi/ de thob pa'i slob ma la me long lta bu'i ye shes kyi ngo bo/ zhe sdang rnam par dag pa mngon spyod kyi las grub pa/ rnam par shes pa'i phung po rnam par dag pa'o/ /'dis ni mi bskyod pa'i rang bzhin gyi ngo bo chu'i dbang ngo //de nas rin chen 'byung ldan gyi rang bzhin gyi ngo bo cod pan rnam par bsams la slob ma'i dbang sngags 'dis so/ /oM badzra bai ro tsa nI ye huM hUM phaT swA hA/ cod pan gyi dbang thob pas mnyam pa nyid kyi ye shes kyi ngo bo/ tshor ba'i phung po rnam par dag pa rgyas pa 'grub pas nga rgyal rnam par dag pa'o//de nas snang ba mtha' yas kyi rang bzhin gyi ngo bo rdo rje'i dbang bskur sbyin te/ sngags 'dis oM ang+ya b+hi Shik+ta s+t+wam pi/ bI re yoHshrI he ru ke b+h+yaHi daM tat+sa rba bud+d+ha twaM/ gr-ih+Na badzra su sid+d+hA ya/ rdo rje'i dbang bskur thob pas so sor kun du rtog pa'i ye shes kyi ngo bo 'du shes kyi phung po rnam par dag pa/'dod chags rnam par dag pa dbang du bya ba 'grub pa'o/ /de nas don yod grub pa'i rang bzhin gyi ngo bo dril bu'i dbang sbyin te/ i yaM sA sarba bud+d+hA nAM/ pra dz+nyA g+ho ShA nu gA smr-i tA/ twa yA pi hi sa dA d+hA R+Ya/bo d+hI rag grA dzi nai ma ta/ rang bzhin gyi ngo bo nyid kyis dag pa'i bcom ldan 'das 'di dang dril bu'i dbang thob pas bya ba grub pa'i ye shes kyi ngo bo 'du byed kyi phung po rnam par dag pas/ las thams cad grub pa phrag dog gi nyon mongs pa spangs par bsam mo//de nas ming gi dbang bskur te shrI hai ru ka de bA di tra a b+hi Shiny+tsa mi shrI he ru ka ti te nA maHkye che ge mo rdo rje zhes bya ba rnam par snang mdzad kyi rang bzhin gyi ngo bo ming gi dbang bskur thob pas/ chos kyi dbyings kyi ye shes kyi ngo bo nyon mongs pa gti mug rnam par dag pa/ zhi ba'i las 'grub pa gzugs kyi phung po rnam par dag pa'o//de nas sngags kyi dbang bskur ba sbyin te oM shrI he he ru ru ka 'di la sogs pa'o/ /de nas brtul zhugs 'di nyid sangs rgyas kyi/ /he ru ka yi lag na gnas/ /khyod kyis rtag tu 'dzin par gyis/ /brtul zhugs mi phyed he ru ka /zhes brjod la sngags ni/ oM sarba ta thA ga ta sid+d+ha badzra sa ma ya tiSh+Tha e Sha twAM d+ha ra yA mi hUM ha ha ho ho/ /de nyid 'dzin pa la dpa' bo chen po'i lhag pa'i bsam pas kha T+wAM ga dang Da ma ru he ru ka'i yan lag gi yan lag go/ /rnal 'byor ma'i kha T+wAM ga dang Da ma ru ste thams cad kyis rdo rje dang dril bu dang Da ma ru'i sgra dbyangs dang /tshangs pa'i skud pa dang / rnal 'byor ma'i bdag nyid kha T+wAM ga dang rnal 'byor gyi lhung bzed do/ /'dis ni kha T+wAM ga dang Da ma ru'i brtul zhugs kyi dbang ngo / /de nyid kyi dus su sangs rgyas dang dpa' bo dang rnal 'byor ma dpag tu med pa la shes rab dang /bde ba 'byung ba'i sgeg pa'i gar gyis mchod pa'o/ /sgeg pas phreng ba 'phang ba 'dis/ /sangs rgyas kun sogs rnal 'byor mas/ /lhag par mos pa 'byung ba yi/ /phreng ba de dag gis brgyan yin/ /zhes pa phreng ba'i'o/ /chos kyi rnam pa thams cad kyi/ /lus can kun gyis yang dag pa'i//rnal 'byor ma rnams bde ba yi/ /rjes su byed pa'i glu blang ngo / /dri dbul rgyal ba rnams nyid la/ /tshul khrims bsam gtan shes rab dang / /sangs rgyas kun nas dri mchog go/ /spos phul yang dag sangs rgyas la/ /brtul zhugs bzang pos dga' ba yid//lus can bde gshegs dpag med kyi/ /ye shes dga' ba 'byung ba'o/ /chos kyi spyan ni bla med 'bar/ /pad+ma'i dbang phyug 'byung ba yi/ /ma rig mun pas byed pa kun/ /ye shes snang bas mar me'o/ /ji ltar mig sman skyes bu yi/ /'jig rten ling tog sel ba ltar//bu khyod kyi ni ma rig pa'i/ /ling tog rgyal ba rnams kyis bsal/ /oM badzra nai tra a pa ha ra pa Ta laM hrIH /spyan dbye ba'o/ /chos rnams gzugs brnyan lta bu yi/ /gsal zhing dag la rnyog pa med/ /gzung du med cing brjod du med/ /rgyu dang las las 'byung bar ldan//rang bzhin dag cing bdag med pa/ /de ltar chos rnams shes par gyis/ /sems can don ni dpag med kyis/ /'on kyang nang du rnal 'byor skyes/ /sems can kun la phan pa'i don/ /'jig rten thams cad yang dag 'phags/ /bya spyod gsang ba'i theg pa yi/ / chos kyi 'khor lo rab tu bskor/ /khyod kyis the tshom dogs med par/ /yid gnyis med pa'i sems kyis ni/ /chos kyi dung ni bla med pa/ /dri med kun du gang bar gyis/ /de nas mda' gzhu'i dbang bskur sbyin no/ /slob ma'i lag tu mda' gzhu gtad la/ phyogs bzhir 'gengs su gzhug go//bdud bzhi las rnam par rgyal ba bskor ro/ /de bzhin sbyin pa'i pha rol tu phyin pa'i ngo bo de mda' yis thob pa'i gtam brjod do/ /de'i gsung gis zhi ba/ rgyas pa/dbang / dgug pa/ zhe sdang / bcing ba la sogs pa bsad pa dang / bskrad pa thams cad de bzhin du bsgrub pa'o//ral gri mig sman sa 'og rkang mgyogs ri lu rnal 'byor pa'i dngos grub/ de rnams 'dis rab tu bsgrub pa'o/ /sngar langs te rnal 'byor bdag gis bya ba thams cad bya ste/ /sdom pa'i bdag nyid bsrung ba'o/ /lus srog nges par btang snyoms su bskyangs pa'i dam tshig dang sdom pa 'di dag gsungs pa'o//de nyid lung bstan pa ni/ chos gos gsol te 'di ltar bdag gis lung bstan par bya'o/ /he ru ka tshul de bzhin gshegs/ /srid dang ngan 'gro rnams las bton/ /yang dag dngos grub he ru ka /zhes bya'i de bzhin gshegs par 'gyur//b+hur b+hu ba swaHde nas dbugs dbyung ba ni/ khams gsum gyi ni rgyal po che/ /rgyal por gyur nas brtan par gnas/ /di ring bdud las rgyal bar gnas/ /rab tu gnas pas mchog gi gnas/ /di ring sangs rgyas nyid thob par/ / 'gyur ba nyid du the tshom med/ /'di ni dbugs dbyung ba'o/ /de nas phyir mi ldog pa'i 'khor lo'i don ni slob mas bla ma la gsol ba gdab pa/ phyir mi ldog pa'i 'khor lo'i dbang / /mgon po nyid gsung gis byin pa/ /'khor lo lha yi de kho na/ /slob dpon mchog gi las dang ni//sangs rgyas kun gyi dam tshig gi /gsang ba'i sdom pa bla na med/ /slob dpon bdag ni dus rtag tu/ /sems can kun gyi don byed pa'o/ /byang chub rdo rje sangs rgyas la/ /ji ltar sbyin pa mchod pa'i bdag /bdag kyang rab tu bsgral ba'i don/ /nam mkha'i rdo rje bdag la gsol//'dis gsol ba gdab pa dang / yang phyir mi ldog pa'i dbang bskur ba'i dam tshig dang sdom pa sbyin no/ /slob dpon dag la smod pa dang / /bde gshegs bka' las 'das pa dang / /rdo rje spun la brnyas pa dang / /byams pa chen po spong ba dang / /byang chub sems ni spong ba dang //theg pa gsum la smod pa dang / /skal min gsang ba ston pa dang / /bdag nyid rgyal ba phung po smod/ /dam pa'i chos la yid gnyis dang / /gdul bya byams dang chags bral dang / /chos la mtha' gnyis tshul byed pa/ /dad pa'i sems ni bzlog pa dang //ji ltar dam tshig bsten pa nyams/ /rtsa ba'i ltung ba'o/ /dam tshig dang ni mi ldan pa'i/ /rig ma bsten par dga' ba dang / /tshogs kyi 'khor lor rtsod pa dang / /gsang ba'i chos ni ston pa dang / /sems can dad dang ldan pa la/ /dam chos gzhan du ston pa dang / sbyor ba nges par ma byas par//skal min gsang ba ston pa dang / /gang zhig phyag rgya mi mkhas la/ /lus kyi phyag rgya ston pa rnams/ /kha na ma tho sbom por 'gyur/ /de nyid mi ldog pa'i 'khor lo'i dbang bskur ba'i sdom pa'o/ /slob ma la phyir mi ldog pa'i dbang bskur sbyin pa'i rim pa 'di'o//rtsa ba'i dkyil 'khor gyi phyi rol du kha dog gcig pa'i dkyil 'khor la slob ma bzhag la/ ye shes sems dpa'i snying ga'i sa bon las 'od zer spros pas lha dang dpa' bo bkug la/ mchod pa dpag tu med pa la sogs pa bya ste/ de bzhin du ye shes kyi chus gang ba'i bum pa phyag na thogs pa'i de bzhin gshegs pa rdo rje 'dzin pas dbang bskur bar bsam mo//sangs rgyas rnams ni thams cad kyis/ /gsang gsum gnas las byung ba yi/ /khams gsum kun gyis phyag byas la/ /rdo rje'i dbang bskur chen po sbyin/ /de nas mi bskyod pas cod pan byas pa'i dpa' bo'i lha rnams kyis dbang bskur ba'o//oM su pra tiSh+Tha badzra swA hA/ sngags 'di brjod par bya'o/ /dril bu'i sgra sngon du song bas me tog la sogs pa'i mchod pa sbyin par bya'o/ /de nas dkyil 'khor gyi de kho na nyid bcas pa'i gtam bya'o/ /de nas dkyil 'khor gyi de kho na nyid ni/sa gzhi ni spyan ma'o/ /thig ni rnam par snang mdzad dran pa'o/ /kha dog ni rigs sna tshogs pa'i rtogs pa'o/ /mchod pa sna tshogs pa byed pa bzhin du'o/ /dzA lan+d+ha ra ni thugs kyi 'khor lo'o/ /o D+ya na ni gsung gi 'khor lo'o/ /a rbu da ni sku'i 'khor lo'o/ /go dA ba ri ni gru bzhi pa/rA me shwa ra ni me'i mtshams so/ /de bI ko kri ni bden bral gyi mtshams so/ /kA ma ru pa ni dbang ldan gyi mtshams bzhi rnam par dag pa'o/ /o tre ni shar phyogs kyi sgo'o/ /tri sha ku ne ni de bzhin lho/ /ko sa la ni nub sgo'o/ /ka liM ga ni de bzhin byang gi'o/ /laM pA ka ni shar gyi rta babs so//kA ny+tsi ni lho'i rta babs so/ /hi mA la ya ni nub kyi'o/ /pri ta pu ri ni byang gi'o/ /gri ha de ba ni lha snam mo/ /sau rASh+Ta ni rin po che'i brang rten no/ /su bar+N+Na dwI pa ni dra ba dang dra ba phyed pa'i sa de bzhin no/ /na ga ra ni rnga yab dril bu rgyal mtshan gdugs ba dan rnams so//sin+d+hu ni rdo rje'i thog dang zlum po'o/ /ma ru dang ka liM ga ni rdo rje rin chen gyi thig [(]gyi [,]gi [)]dkyil 'khor shin tu chen po'o/ /'khor lo lnga ni de bzhin gshegs pa lnga'i rang bzhin no/ /ri mo nyi shu ni sa gzhi rnam par dag pa'o/ /nyi shu rtsa bzhi dpa' bo'i ngo bo'o/ /'di ni dkyil 'khor gyi de kho na nyid do//lha'i de kho na nyid ni byang chub kyi phyogs kyi chos sum cu rtsa bdun gyi chos kyi ngo bo nyid do/ /dkyil 'khor gyi lha 'di dag gis phyir mi ldog pa'i 'khor lo'i dbang bskur mdor bsdus pa ste/ slob dpon gyis dbang bskur ba'i ngo bo 'di'o/ / de nas slob mas bla ma la gsang ba'i dbang bskur blang bar bya'o/ /rdo rje sems khyod bde ba 'grub pa ste/ /sangs rgyas byang chub sems dpa' thams cad yang dag lus/ /ma chags dga' ba'i yid kyis bde chen po/ /stong nyid bsgoms pas kun nas yun ring gdungs/ /kye ma 'dod chags dri med byang chub kun bzang gi /spyod pa 'dod chags dag pa rdo rje dam tshig las/ /phye mdzad dga' ba drug pos yang dag brtan/ /'dod pa'i bde ba byang sems rin chen 'bar/ /rdo rje'i chu phyung dri med rin chen char/ /rgyal ba kun gyis spyi bor dbang bskur mdzod/ / sna tshogs sems kyis sems can brlag gyur pa/ /rdo rje ye shes rab lhung pad gnas su/ /sbyor ba gzhan med ma thogs gsung du gsol/ /mnyam dang mi mnyam 'dod chags rnam dag pas/ /rdo rje sems khyod bde ba'i dbang phyug gnas/ /yang dag 'dod chags rang gi bde ba'i grogs//rdo rje pad+ma las byung bde bsgrub pa'i/ /spros pas gzugs ston rgyal ba'i dngos grub kun/ /sbyin pas kha ru sna tshogs 'bras bu gsol/ /'di ni gsang ba'i gsol ba gdab pa'o/ /de nas slob dpon gyis slob ma rnam par snang mdzad kyi gzugs su rdzogs pa la/ye shes sems dpa' dgug pa dang / /gzhug pa dang / bcing ba dang / dbang du bya ba ste/ de la las kyi phyag rgya ma rigs lnga'i tshul du dmigs te/ de dang snyoms par 'jug pa byas pas/ de nas de bzhin gshegs pa thams cad kyi spyi bo'i sgo nas zhugs te/ de la bskyed pa thams cad kyis slob ma la dbang bskur bar bya'o/ /de bzhin gshegs pa thams cad dang lhan cig pa'i shes rab slob ma bdag gis a ho ma hA su kha ho zhes pas ngag gi lam du btung bar bya'o/ /tshim pa de'i dus su kha dog dang dbyibs kyi bsam pa med par rnam par mi rtog pa'i sku'i tshul du bsam du med pa'i tshul bsam gtan gyi sdom pa des bsdams pa de la gsang ba'i dbang bskur ba'i cho ga'o//de nas don dam pa'i tshul gyi chos kyi sku rtogs par byed pa'i chos kyi dbyings rdo rje rang 'byung ba'i byin gyis brlab pa sbyin par bya'o/ /chos kyi dbyings rnam par dag pa'i slob ma la dam tshig dang sdom pa brjod par bya ste/ci khyod ji ltar spro ba smros/ /bshang gci la sogs za ba dang / /khrag dang khu ba de bzhin sha /bud med rnams la rtag gus sam/ /b+ha ga'i pad+mar 'o byed dam/ /dbang bskur ba gnyis par gsang ba dang shes rab ye shes kyi sdom pa sngon du song ba'i slob mas 'di skad brjod de/ci phyir lha mo bdag mi spro/ /bshang gci la sogs za ba dang / /bud med rnams la gus par bgyid/ /b+ha ga'i pad+mar 'o bgyid do/ /lha mo des gos med par phye la/ bdag gi pad+mas de nyid mthong / /e ma ho bdag gi pad+ma 'di//bde ba kun dang yang dag ldan/ /ji ltar cho ga bzhin bsten na/ /de la bdag ni dang por gnas/ /chos kyi dbyings kyi bdag nyid kyis/ /dag pas sems can khams grol byed/ /rang 'byung rgyal po bde ba che/ /thams cad ngo bo nyid kyis gnas/ /de nyid lhag pa'i bdag nyid kyis//rtsa yi 'khor lo rab tu mthong / /b+ha ga'i dbus na ji ltar mkha'/ /nam mkha' lnga yis rnam par brgyan/ /lte ba'i ge sar ldan pa yi/ /'dab ma brgyad pas brgyan pa yin/ /de nyid bdud rtsi'i rnam pa dkar po rtag tu 'bab pa de'i sbyor ba bsgoms pas b+hany+dza mok+Sha ho//de nyid sngags pas gong gi dbyings kyi dbang phyug ma'i rtsa b+ha ga'i dbus na rnam par bzhugs pa'o/ /thob par dka' bas na bla ma'i gsung las thob pa'o/ /sor mo brud pas rtsa'i rnam pa las/ mchog tu dga' ba 'bab pa kha cig gi lce la bzhag pa'o/ /pha rol tu phyin pa bcu'i gnas stobs bcu'i dbang du byas pa'o//sa bcu'i steng du byas pa'o/ /rtags gsor ba'i ngo bo'o/ /de la bsgo bas sgrub pa dang nye bar sgrub pa'i rim pas rtogs par bya'o/ /rang byung gi slob dpon gyis nam mkha' rdo rje'i ting nge 'dzin gyi gnas yang dag pa'i rnal 'byor gyis rang rig pa'i bde ba chen po bskyed pa gang yin pa des mchog tu dga' bar byas pa ste/dga' bral gyi dga' ba'i dbus na bsam gtan gyi mtshan ma mi phyed pa bya'o/ /de la bsgrims te rdo rje skyil krung gis mtshan nyid kyi nang du song ba'i bsam gtan bya'o/ /gang gis bskyed pa'i bsam gtan shes rab bo//ye shes de ni rnam pa brjod du med pa'o/ /chags med chags pa med pa min/ /rnal 'byor ye shes brtan pa thob/ /'di skad des ni kun byed brjod/ /skad cig thun gcig lo gcig gam/ /zla ba phyed dam zla ba gcig /lo gcig bskal pa stong du yang //ye shes rnal 'byor pas bgyi'o/ /de la slob dpon gyis gsang ba'i dbang bskur/ /rang byung mthong ba 'di dag las/ /shes rab ye shes kyi chogs slob ma la slob dpon gyi ngag gis so/ /gang 'di khyod la rnal 'byor ma dang lhan cig bde ba chen po rjes su 'byung ba'o/ / de nas bzhi pa'i rang bzhin gyi ngo bo rtog pa dang bral bar bya'o/ /'di ni bde ba'i ngo bo'i man ngag go/ /de nyid rig pa mthong ba'i slob ma'i spyi bor lag pa byin la rdo rje slob dpon des ni slob ma la/ rig pa gzhan gyis sangs rgyas nyid mi thob/ /de nas rig pa'i mchog 'di gnyis su med//snang ba'i chos rnams kun gyi ngo bo nyid/ /gnyis kyis mtshan ma'i ngo bo med pa'o/ /de nas/ 'di de sangs rgyas thams cad/ /rig pa'i brtul zhugs kyis 'khor ba spangs te rjes su grol ba'o/ /shin tu rig pa 'di'i dngos grub rmongs pa rnams kyis mi rnyed do/ /de'i sngags kyi spyod pa spyad pa la sogs pa'i tshul khrims dang sdom pas kun du bzang po'i spyod pa'i sdom pa shin tu rnam par grol ba'o//thabs kyi spyod pa spyad pas lhag pa'i sems kyi sdom pa brjod par bya'o/ /de bzhin du ma/ raM/ baM/ shaM/ muM/ go/ kuM/ daM/ ha/ na bza' bar bya'o/ /ji lta ji ltar 'dul ba'i sems can gyi rang bzhin de/de lta de ltar 'dod chags la sogs pa rnam par dag pa'i sems can gyi don bya'o/ /de nas sems can thams cad la phan pa'i don la/ gang kha cig dman pa de sngags dang phyag rgya'i ting nge 'dzin gyi sgo nas las rnams bya'o/ /thams cad kyi rjes la gtor ma bcu sbyin no//bla ma la yon dbul ba/ yul/ glang po che dang / rta rin po che dang / gser la sogs pa dang gang gces pa rnams dbul lo/ /de nas gos la sogs pa dbul te slob mas smon lam gdab par bya'o/ /'di ni dbang bskur ba'i cho ga cung zad tsam mo//dpal ldan rnam par 'dren pa yi/ /bla ma'i gsung las bde rgyal pos/ /bris pa'i bsod nams gang thob pas/ /thams cad mkhyen pa thob par shog /dbang bskur gyi rim pa'i cho ga kha che'i paN+Di ta rat+na shrI'i zhabs kyi pad+mo la gtugs pa paN+Di ta shrI pa ra he ta dang / bod kyi lo tsA ba dge slong shes rab rgyal mtshan gyis bsgyur ba rdzogs so/

CLOSE WINDOW