CLOSE WINDOW

D1512
བོད་ཡིག

/ #/ /dpal bde mchog 'khor lo'i mngon par rtogs pa'i dka' 'grel bzhugs/ @##/ /bcom ldan 'das dpal rdo rje mkha' 'gro ma la phyag 'tshal lo/ /oM/ gnas dang ldang ba nyid dang ni/ /'jug dang yongs su rdzogs pa dang //byin gyis brlab dang dbang bskur dang / /ting 'dzin mchod pa nye bar bsdu/ /de la gnas pa ni lnga ste/ tshad med pa'i rnal 'byor dang / /byin gyis brlab pa'i rnal 'byor dang / /srung ba'i rnal 'byor dang / tshogs bsags pa'i rnal 'byor dang / stong pa nyid kyi rnal 'byor ro//de la tshad med pa'i rnal 'byor ni dang po kho nar tshangs pa'i gnas bzhi bsgom par bya'o zhes bya ba la/ snying gar hrIHlas pad+ma 'dab ma brgyad pa/ de'i lte ba la a las zla ba/ de'i steng du hUM mthing ga bsams la/ de las 'od zer dkar po dang /ser po dang / dmar po dang / ljang gu ste/ de rnams 'gro ba la 'phros pa la sdug bsngal dang ldan pa rnams sdug bsngal dang bral ba dang / bde ba med pa rnams bde ba thob pa dang / bde ba dang bral du dogs pa rnams brtan par bya ba dang / bde ba de yang kun la cha snyoms par 'gyur ro//de kho na nyid ni ye shes bzhi'o/ /dgos pa ni drag po 'jigs byed 'dul ba'o/ /byin gyis brlab pa'i rnal 'byor ni/ /de nas phung po lnga'i nga rgyal bskyed par bya ste zhes bya ba la/ 'od zer tshur bsdus pas phung po lnga dang / dbang po drug dang 'byung ba lnga chu'i zla ba lta bur thol gyis gsal bas tha mal pa dag pa'o/ /de kho na nyid ni ye shes lnga ste stong pa nyid kyi rang bzhin no/ /dgos pa ni tha mal pa'i phung po dang khams spangs pa'o/ /srung ba'i rnal 'byor ni/ de nas rdo rje dra ba bsam par bya ste zhes bya ba la sogs pa ste/rang gi snying gar raM las nyi ma/ de'i steng du hUM las rdo rje/ de yongs su gyur pa las bdag nyid rdo rje hUM mdzad zhal gsum phyag drug pa/ sku mdog mthing ga zhal g.yas dkar g.yon dmar ba/ phyag dang po gnyis rdo rje hUM mdzad kyi phyag rgyas rdo rje dang dril bu bsnams pa/bar ma gnyis na mda' dang gzhu/ tha ma gnyis na ral gri dang zhags pa can du bsams la/ oM badzra pany+tsa ra Na hUM/ zhes brjod pas rdo rje dra ba bskyed la/ yang hUM zhes brjod pas khro bo bcu sprul te shar du dkar po/ lhor ser po/ nub tu dmar po/ byang du ljang gu/ steng du dkar po/ 'og tu nag po/ mtshams su phyed gzugs ma bzhi/ /kun kyang gtso bo dang mthun pa'i phyag mtshan bsnams pa'o/ /de nas oM sum+b+ha ni sum+b+ha zhes bya ba'i sngags brjod pas de rnams kyi 'od zer gyis phyogs skyong ba rnams bkug la gdan du gding bar bya'o//oM sha ra dza la traM saM traM zhes pas steng du mda'i dra ba dang / 'og tu yi ge hUM las sna tshogs rdo rje'i rang bzhin du bsams la/ oM me di nI badzrI ban+d+ha hUM/ zhes pas brtan par bya'o/ /oM badzra prA kA ra hUM baM hUM/ zhes pas rdo rje dra ba bya'o/ /oM bi dA na hUM khaM hUM/zhes steng du rdo rje'i bla re bya'o/ /oM badzra dz+wa lA na lA rka hUM/ zhes bya bas phyi rol du me'i 'od kyi phreng ba bsam par bya'o/ /de nas d+hi'i yi ge hUM las phur bu sum cu sprul la/ oM g+ha g+ha g+hA ta ya zhes pa'i sngags kyis bka' bsgo ba dang / oM badzra mud+ga ra A ko Ta ya badzra kI lA ya hUM phaT/ces pa'i sngags kyis dpral ba dang / lkog ma dang snying gar gdab par bya'o/ /tshogs bsags pa'i rnal 'byor ni/ de nas rang gi snying gar zhes bya ba la sogs pa la/ rang nyid skad cig mas lha'i skur bsams la rang gi snying gar yi ge hrIHlas pad+ma 'dab ma brgyad pa/a las zla ba'i dkyil 'khor de'i steng du yi ge hUM mthing ga 'od zer lnga 'phro ba bsams la/ rdo rje'i 'od zer gyis 'khor lo bde mchog sku dang / yon tan dang / thugs dang / gsung dang / phrin las kyi 'khor lo dkar po dang / ser po dang / mthing ga dang / dmar po dang / ljang gu dang lnga bsams la phyag 'tshal ba dang / 'od brgyad spros pa'i rtse mo brgyad las bdud rtsi lnga dang / Da ma ru'i sgra dang / ro thogs pa dang / 'khyud pa'i lha mo rnams kyis mchod par bya'o/ /de nas de bzhin gshegs pa'i 'od zer lnga rang gi lus la phog pas sdig pa dag par bsams pa dang /de la dga' ba skyes pas rjes su yi rang ba dang / 'od zer yang bsdus pas thugs kar thim par bsam pa ni lus dbul ba dang skyabs su 'gro ba'o/ /de nas yid kyis lha rnams gshegs su gsol bar bya'o//stong pa nyid kyi rnal 'byor ni dpral bar oM dkar po/ lkog mar AHdmar po/ snying gar hUM mthing ga bsams la/ 'gro ba rigs drug gi lus dang snod oM la thim pa dang / ngag AHla thim pa dang / sems hUM la thim pa dang / rang yang yi ge gsum la thim par bsams la/oM swa b+hA wa shud+d+haHzhes pa'i sngags brjod par bya'o/ /de'i don dran pa'i sgo nas stong pa nyid du bsam pa zhes bya ba ni/ oM AHla thim pa dang / AHhUM la/ hUM gi zhabs kyu ha la/ ha zla tshes la/ zla tshes thig le la/ thig le nA da la/ nA da nam mkha' stong pa la thim pa dang /oM shU n+ya tA zhes pa'i sngags brjod par bya'o/ /de nas ldang ba'i rnal 'byor ni/ b+hai raM ba la sogs pa rten dang brten pa'i tshul du gnas pa la zhes bya ba ni 'byung ba bzhi ri rab dang bcas pa bskyed pa la bya'o/ /'byung ba bzhi'i yi ge ni ming mtshan gyi yi ge dang po'o//dbyibs ni phrin las bzhi'i rtags so/ /kha dog bzhi ni ye shes bzhi'o/ /mtshan pa ni 'byung ba'i lha mo bzhi'i rtags so/ /ri rab kyi kha dog bzhi ni ye shes bzhi'i rtags so/ /rtse mo brgyad pa ni rnam par thar pa brgyad do/ /sna tshogs rdo rje ni phrin las sna tshogs kyis grub pa'o//sna tshogs pad+ma ni khams gsum gyi 'dod chags dang bral ba'i rtags so/ /de nas 'jug pa'i rnal 'byor ni/ A li kA li sbyor ba la/ /zhes bya ba la A li bcu drug las zla ba'o/ /kA li sum cu rtsa bzhi las nyi ma'o/ /de'i dbus su yi ge hUM sngon po 'od zer lnga dang ldan pa la rang gi sems gzhug par bya'o//nyi ma'i 'og tu oM/ bar du AH/ steng du hUM bsams la/ oM AHhUM sar+b+ba bI ra yo gi zhes bya ba la sogs pa'i sngags kyis byin gyis brlab par bya'o/ /de nas yongs su rdzogs pa'i rnal 'byor ni/ dpal rdo rje he ru ka nyi ma la bzhugs shing zhes bya ba la sogs pa yin te/de yang / bsgom pa'i 'khor lo bde mchog dang / /sprul pa'i 'khor lo bde mchog dang / /sems kyi 'khor lo bde mchog dang / /lus kyi 'khor lo bde mchog go/ /de la bsgom pa'i 'khor lo bde mchog ni de nyid bsgom pa'o//sprul pa'i 'khor lo bde mchog ni byin gyis brlabs nas rdzus skyes kyi 'khor lo sku mdog dang phyag mtshan dang ldan pa ste zhal bzhi ni mthar thug chos su ye shes bzhi/ gsang ba sngags su rlung bzhi/ dman pa dbyibs su rtsa bzhi'o/ /spyan gsum ni chos su sku gsum/sngags su rlung gsum/ dbyibs su rtsa gsum mo/ /phyag bcu gnyis ni chos su pha rol tu phyin pa bcu gnyis/ sngags su lkog ma'i rlung bcu gnyis/ dbyibs su rtsa bcu gnyis so/ de yang rdo rje dang dril bu ni shes rab bo/ /glang po che'i pags pa ni bzod pa'o//Da ma ru ni smon lam mo/ /dgra sta ni tshul khrims so/ /gri gug ni ye shes so/ /mdung rtse gsum pa ni sbyin pa'o/ /kha T+wAM ga ni bsam gtan no/ /khrag gis gang ba'i thod pa ni thabs so/ /zhags pa ni brtson 'grus so/ / tshangs pa'i mgo bo ni stobs so/ /zhabs gnyis ni thabs dang shes rab bo/ /'jigs byed dang dus mtshan ni chos su srid pa dang zhi ba/ sngags su thur sel gyi rlung gnyis/ dbyibs su bshang gci gnyis kyi tsa ba'o/ /rol pa'i thor tshugs ni chos su sbrul ba 'byed pa/sngags su spyi gtsug gi rlung sum cu rtsa gnyis so/ /dbyibs su rtsa sum cu rtsa gnyis so/ /thod pa'i phreng ba'i thod pa ni chos su ye shes lnga/ sngags su spyi gtsug gi rlung lnga/ dbyibs su 'byung ba'i rtsa lnga'o/ /sgeg pa la sogs pa'i nyams dang ldan pa zhes bya ba ni/sku la tshor ba gsum nub pa'i rtags ni/ sgeg pa dpa' ba 'jigs su rung ba dang / /zhes bya ba yin te/ sgeg pa ni dbang phyug chen po'i nyams bcom nas rdo rje phag mo dang 'khyud pa'o/ /dpa' ba ni gzhon nu gdong drug gis lha ma yin ba su ta ka ra bsad nas ro'i steng du gar byas te dpa' bar sems pa'i nga rgyal bcom nas 'jigs byed dang dus mtshan zhabs kyis mnan pa'o//'jigs su rung ba ni khyab 'jug phag dang seng ge'i gdong gi nyams bcom nas zhal bzhi phyag bcu gnyis mnga' ba'o/ /gsung la tshor ba gsum nub pa'i rtags ni//dgod dang gshe dang rngam pa'o/ /zhes bya ba yin te/ /dgod pa ni lha tshangs pa'i dbyangs kyi nga rgyal bcom nas zhal g.yas pa bzhad pa'o/ /gshe ba ni tshogs bdag glang sna'i gshe ba'i nga rgyal bcom nas zhal rgyab ma mche ba gtsigs shing glang po che'i pags pa bsnams pa'o//rngam pa ni lha ma yin gyi rgyal po sgra gcan gyi rgyal po dang zla ba khar 'dzug pa'i nga rgyal bcom nas tshangs pa'i mgo bo zhal du stob pa'o/ /thugs la tshor ba gsum nub pa'i rtags ni/ snying rje zhi ba ngo mtshar che/ /zhes bya ba yin te/ snying rje ni brgya byin lag na rdo rje thogs nas sum cu rtsa gsum pa'i lha la bu gcig pa ltar sems pa'i nga rgyal bcom nas/rdo rje dang dril bu bsnams te khams gsum pa la bu gcig pa ltar dgongs pa'o/ /zhi ba ni me la stong gsum bskal pa'i mes 'jigs pa'i tshe dbus na mi tshig pa'i nga rgyal bcom nas thal ba'i rdul gyis lus la bsgos pa'o//ngo mtshar che ba ni klu se sha ga stong gsum g.yo ba'i nga rgyal bcom nas/ se sha nyid mgul du btags pa'am mi mgo lnga bcu brgyus pa'o/ /stag gi pags pa'i sham thabs ni chos su nyon mongs pa dang shes bya'i sgrib pa spangs pa'o//sngags su rlung gi 'khor lo/ dbyibs su 'og tu bsrub ba'i nyi ma dang zla ba'i rtsa'o/ /mi mgo rlon pa'i phreng ba ni chos su 'du byed lnga bcu rtsa gcig go/ /sngags su g.yas g.yon gyi rlung 'byung 'jug 'khor ba/ dbyibs su sa nA dang la nA'i rtsa'o/ /phyag rgya drug ni chos su pha rol tu phyin pa drug /sngags su dbang po drug gi rlung / dbyibs su dbang po drug gi rtsa'o/ /de'i spyan sngar bcom ldan 'das ma yum sku mdog dmar po zhes bya ba la/ dmar ba ni thugs rje chen pos sems can gyi don la chags pa'i rtags so/ /g.yon pa'i thod pa ni 'chi bdag gi bdud bcom pa'o//gri gug ni ye shes te nyon mongs pa'i bdud bcom pa'o/ /rus pa'i rgyan ni phung po'i bdud bcom pa'o/ /'jigs byed dang dus mtshan zhabs kyis mnan pa ni lha'i bu'i bdud bcom pa'o/ /phyag rgya lnga dang ldan pa ni shes rab kyi pha rol tu phyin pas sa bcu gcig thob pa'o//zhal nas khrag gi rgyun 'dzag pa ni gsung rab yan lag bcu gnyis 'chad pa'o/ /mkha' 'gro de bzhin mdzes ma dang / /zhes bya ba la sogs pa la/ mkha' 'gro ma la sogs pa yum gyi phyag rgya bzhi ni tshad med pa ste/ kha T+wAM ga dang Da ma ru ni zhi gnas dang lhag mthong ngo //gri gug dang ka pA la ni snying rje dang shes rab bo/ /sngags dang dbyibs ni snga ma bzhin no/ /mtshams rnams su ni byang chub kyi sems la sogs pa'i snod bzhi dgod pa zhes bya ba la bum pa bzhi ni rigs bzhi'i rang bzhin no/ /thod pa bzhi ni bdud rtsi'i snod de bdud bzhi bcom pa'o//dang po thugs kyi 'khor lo ni rtsibs brgyad pa ste mdog sngo nag /rdo rje phreng bas rab brgyan pa/ zhes bya ba la nag po ni mi bskyod pa'i rigs so/ /rtsibs brgyad ni rnam par thar pa brgyad do/ /rdo rje phreng ba ni thugs kyi rtags so//pul+lI ra mA la ya sogs 'khor lo'i rtsibs rnams kyi ming ni sngon grub pa 'dzam bu'i gling gi gnas so/ /de yang gnas bzhi ni lha'o/ /nye ba'i gnas ni dri za'o/ /thod pa'i dum bu dang / rab tu gtum mo la sogs pa'i dpa' mo dang / dpa' bo'i ming ni drag po 'jigs byed kyi ming btags pa'o//gnyis pa gsung gi 'khor lo ni/ /zhes bya ba la dmar po ni pad+ma'i rigs so/ /rtsibs brgyad pa ni snga ma bzhin no/ /pad+ma'i phreng ba ni gsung gi rtags so/ /zhing dang nye ba'i zhing ni gnod sbyin gyi skad/ tshan+do dang nye ba'i tshan+do ni srin po'i skad do//gsum pa sku yi 'khor lo ni/ /zhes bya ba la dkar po ni de bzhin gshegs pa'i rigs so/ /rtsibs brgyad ni snga ma bzhin no/ /'khor lo'i phreng ba ni sku'i rtags so/ /'dus pa dang nye ba'i 'dus pa ni klu'i skad/ dur khrod dang nye ba'i dur khrod ni lha ma yin gyi skad do//gnod sbyin gyi skad dang srin po'i skad dang lha ma yin dang / klu rdo rje'i rigs gnyis gnyis yod pa las zhing dang nye ba'i zhing la sogs par mi'am ci gdul ba'i phyir sgom dang mtshams ma brgyad/ phyag mtshan ni mkha' 'gro ma la sogs pa bzhin no/ / sgo ma rnams ni rigs kyi kha dog go/ /phyed gzugs ma ni yid 'phrog pa'o/ /dpral ba'i rdo rje phreng ba ni dbang bskur ba'i rtags so/ /gzhal yas khang ni ye shes lnga'o/ /zur bzhi ni mnyam pa nyid bzhi'o/ /sgo bzhi ni rnam par thar pa bzhi'o/ /rta babs bzhi ni bsam gtan bzhi'o//dur khrod brgyad ni bde bar gshegs pa'i gnas brgyad do/ /shing brgyad ni byang chub kyi shing brgyad do/ /zhing skyong brgyad ni rnam par gzigs pa la sogs pa'i de bzhin gshegs pa'o/ /klu brgyad ni 'khor los sgyur ba'i yon bdag brgyad do/ / sprin brgyad ni rang rgyal ba brgyad do/ /pho nya brgyad ni nyan thos chen po brgyad do/ /'dzam bu gling gi phyogs brgyad ni gnyis ldan gyi dus rang bzhin gyis byung ba'o/ /rdo rje ra ba ni theg pa chen po'i chos kyi 'khor lo'o/ /me 'od ni khams gsum gyi gnyen po ye shes kyi me'o//sems kyi 'khor lo bde mchog bstan pa'i phyir/ de nas gzhan yang byang chub kyi phyogs kyi chos sum cu rtsa bdun lha'i sbyor bas sbyar bar bya ste zhes bya ba la sogs pa smos te/ gzugs med gzugs dang sbyar ba dang rgyu gzugs can 'bras bu ye shes dang sbyar ba ni mtshon bya mtshon byed do//dran pa nye bar gzhag pa bzhi rgyu/ yang dag par spong ba bzhi rkyen/ gzhan ni 'bras bu'o/ /yum rdo rje phag mo chos kyi dbyings kyi rang bzhin dpal he ru ka yang dag pa'i ting nge 'dzin thabs de'i cha'o/ /dpa' bo nyi shu rtsa bzhi ni sgyu ma lta bu/dpa' mo sum cu rtsa drug ni chos kyi rang bzhin te byin gyi brlabs la lus kyi khams nyi shu rtsa bzhi pa'o/ /rtsa nyi shu rtsa bzhi dpa' mor bsgom mo/ /gsang ba'i gnas ma gtogs pa bu ga brgyad la khwa gdong ma la sogs pa brgyad/ snying ga chos kyi 'khor lo'i rtsa bzhi la mkha' 'gro ma la sogs pa bzhi dang bum pa bzhi bsgom mo//bsgom pa'i 'khor lo bde mchog lus kyi skabs su sbyar ba ni/ sku gsung thugs kyi dbye ba yis/ /yi ge gsum gyi ngo bo nyid/ /ces pa ste bskyed pa'i dus su nyi zla kha sbyar gyi steng 'og tu bkod pa'i yi ge'o//mtho ris mi yul sa 'og tu/ /zhes pa ni go rims bzhin du 'khor lo gsum gyi dbye bas so/ /skad cig gcig gis sku gcig 'gyur/ /zhes pa ni rdzus skyes so/ /skad cig tsam gyis rnal 'byor bdag /ces pa ni thabs dang shes rab 'khyud pa'o/ / skad cig gis ni sku 'char zhing / /zhes pa ni dpa' bo dang dpa' mo phyag mtshan dang bcas pa'o/ /kun nas kun du skad cig ste/ /zhes pa ni rten dang brten pa'i dkyil 'khor dus gcig tu bskyed pa'o/ /skad cig gcig ni gsang sngags 'don/ /zhes pa ni kun kyang yi ge hUM 'don pa'o//oM AHhUM la sogs pa ni gang gi nyi zla kha sbyor byin gyis brlab pa'i sngags so/ /byin gyis brlab pa'i rnal 'byor ni/ /des ni go cha gnyis shes nas/ /zhes bya ba las/ oM ha las snying gar rdo rje sems dpa' dkar po rdo rje dang dril bu bsnams pa'o//na maHhi las rdo rje mgo bo rnam par snang mdzad ser po 'khor lo dang dril bu bsnams pa'o/ /swA hA hu las spyi gtsug tu pad+ma gar gyi dbang phyug dmar po pad+ma dang dril bu bsnams pa'o/ /bau Sha Ta he las phrag pa gnyis su dpal he ru ka nag po kha T+wAM ga dang dril bu bsnams pa'o//hUM hUM ho las mig gnyis su rdo rje nyi ma ser po rin po che dang dril bu bsnams pa'o/ /phaT hi las tshigs mgo drug tu rta mchog /sku mdog ljang gu sna tshogs rdo rje dang dril bu bsnams pa'o/ /yum gyi lte par oM paM las bA rA hI dmar mo gri gug dang ka pA la bsnams pa'o//snying gar haM yoM las gshin rje ma nag mo'o/ /khar hiM maM las rmongs byed ma dmar mo/ mgo la hriM hriM las skyod byed ma nag mo'o/ /spyi gtsug tu hUM hUM las skrag byed ma sngon mo'o/ /yan lag thams cad la phaT haM las tsaN+Di ka dmar mo ste kun kyang zhal gcig phyag gnyis pa'o//lag pa g.yas pa dang g.yon pa la lha bkod la gnas su reg pas rgya dang rgya'i 'bur bzhin du shes par bya'o/ /de nas ye shes sems dpa' spyan drang ba ni/ snying ga'i yi ge hUM gi 'od zer dang mdzub mo mdud byas zhes bya ba'i phyag rgyas spyan drangs te mchod pa byas la/snying po'i phyag rgyas rang gi spyi bo nas gzhug par bya'o/ /rdo rje'i tshig 'di la bshad pa gsum du 'gyur te/ chags lam dang / grol lam dang / rang lhag par gnas pa'i lam mo/ /de la chags lam gyi dbang du byas nas mdzub mo mdud byas zhes bya ba ni skyes pa dang bud med 'khyud pa'o//gung mo nges par sbyar zhes bya ba ni rtsa dbu ma gnyis kha sprad pa'o/ /mthe bo rdo rje rab tu sbyar/ /zhes bya ba ni gsang ba'i rdo rje'o/ /de ni dpral ba'i dbus su rab bzhag nas//zhes bya ba ni pad+ma'i dbus su'o/ /bskor zhing bskor bas kun du bskyod par bya/ /zhes bya ba ni hUM phaT kyi sbyor bas so/ /rkang pa mnan cing zhes bya ba ni nyi ma dang zla ba'i rtsa bkag pa'o/ /steng du blta zhes bya ba ni 'khor lo bzhi la dmigs pa'o/ /gyen du pheM gyi sgra sgrogs shing //zhes bya ba ni gtum mo'i drod spar ba'o/ /phyogs bcu'i 'jig rten khams bzhugs pa'i/ /zhes bya ba ni bde ba chen po'i 'khor lo'i rtsa sum cu rtsa gnyis so/ /dpa' bo rnal 'byor ma rnams 'gugs/ /zhes bya ba ni byang chub kyi sems so/ /grol lam gyi dbang du byas na mdzub mo mdud byas te zhes bya ba ni g.yas g.yon gyi rlung bkag pa'o//gung mo nges par sbyar zhes bya ba ni rlung rtsa dbu mar bcug pa'o/ /mthe bo rdo rje brtan por rab tu sbyar/ /zhes bya ba ni 'khor lo bzhi'i dang po sprul pa'i 'khor lo'o/ /de ni dpral pa'i dbus su rab bzhag nas//zhes bya ba ni rtsa gsum gyi dbu ma'o/ /bskor zhing bskor bas kun du bskyod par bya/ /zhes bya ba ni/ g.yas g.yon gyi rlung bsrub pa'o/ /lhag ma ni snga ma bzhin no/ /rang lhag par gnas pa'i lam gyi dbang du byas nas/ mdzub mo mdud byas zhes bya ba ni rtag chad kyi mtha' bkag pa'o//gung mo nges par sbyar zhes bya ba ni dbu ma'i lam mo/ /mthe bo rdo rje brtan po rab tu sbyar/ /zhes bya ba ni so sor rtog pa'i shes rab bo/ /de ni dpral ba'i dbus su rab bzhag nas/ /zhes bya ba ni chos kyi dbyings la dmigs pa'o//bskor zhing bskor bas kun du bskyod par bya/ /zhes bya ba ni/ shes rab rnam pa gsum la sbyangs pa'o/ /rkang pa mnan zhes bya ba ni/ 'khor ba spangs pa'o/ /steng du blta zhes bya ba ni/ gsung rab yan lag bcu gnyis sam lam rnam pa lnga la dmigs pa'o//gyen du pheM gyi sgra sgrogs shing / zhes bya ba ni/ so sor rtog pa'i shes rab kyis yang dang yang du bsgom pa'o/ /phyogs bcu'i 'jig rten khams bzhugs pa'i/ /zhes bya ba ni/ sa bcu gcig pa'i de bzhin gshegs pa'o/ /dpa' bo rnal 'byor ma rnams 'gugs/zhes bya ba ni/ ye shes kyi rang bzhin rgyud la skyes pa'o/ /oM yo ga shud+d+haH/ zhes bya ba'i sngags ni/ ye shes sems dpa' lus la gzhug pa'o/ /lag pa g.yas pa dang g.yon pa bskor ba ni rtsa g.yas g.yon gnyis bkag nas rlung rtsa dbu mar chud pa'o/ / mkha' 'gro ma'i bde ba dam pa ni byang chub kyi sems so/ /dbang bskur ba'i rnal 'byor gyi snying ga'i yi ge hUM las 'od zer spros pas dbang bskur pa'i dkyil 'khor lnga spyan drangs la/ dpa' bo dang dpa' mo'i sngags kyis bkod de/ rkang pa brgyad pas mchod par bya'o/ / de la yab yum gnyis kyi snying po dang nye ba'i snying po ni zhar las byung ba'o/ /oM shrI badzra ni sku'i sku gsung thugs so/ /he he ru ru kaM ni gsung gi sku gsung thugs so/ /hUM hUM phaT ni thugs kyi sku gsung thugs so/ /DA ki ni dzA la sam+bar ni yon tan gyi rgyu dang ldan pa'i mkha' 'gro ma'o//nye ba'i snying po ni byang chub kyi yan lag bdun no/ /yum gyi snying po ni lha mo gos dkar mo'i rang bzhin 'od zer rnam par snang byed do/ /nye ba'i snying po ni/ /sangs rgyas kun gyi mkha' 'gro ma/ /rgyud bla ma nas gsungs so/ /dpa' bo rnams kyi snying po ni bcom ldan gyi sngags so//cha nyi shu rtsa bzhi ni srog gi snying po bgos pa'o/ /dpa' mo rnams kyi ni rang gi ming ngo / /de yang thog ma'i ming ni sku/ bar gyi hUM gnyis ni thabs dang shes rab ste thugs so/ /phaT ni gdug pa 'dul ba ste gsung ngo / / bstod pa'i rjes la dbang bskur ba ni rang gi lus la 'gro ba drug gi sa bon dgod pa ste mgo bo la lha'i sa bon suM/ dpral bar lha ma yin gyi sa bon a/ lkog mar mi'i sa bon Ni/ snying gar yi dags kyi sa bon pre/ lte bar dud 'gro'i sa bon tra/ rkang mthil du dmyal ba'i sa bon duHbkod la/yum lnga'i thugs ka nas lha mo lnga lag na bdud rtsi'i bum pa thogs te/ gur kum dang me tog gi char 'bebs shing / ji ltar bltams pa tsam gyis ni/ /zhes bya ba la sogs pa'i tshigs su bcad pa dang / oM sarba ta thA ga ta/ zhes bya ba'i sngags brjod cing dbang bskur bas/thams cad kyi spyi bor rdo rje rtse lnga pa bsam pa ni dbang rtags so/ /yab yum gyi mkha' las byang chub sems dpa' dkar dmar 'dzags nas/ lce la phog pas rdo rje la bde ba skyes pa ni gsang ba'i dbang ste/ smin mtshams kyi mdzod spu ru 'bar ba ni dbang rtags so//dbang bskur ba'i yum rang gi yum la thim nas snyoms par zhugs pa ni shes rab ye shes kyi dbang ste mdoms kyi sba ba sbubs su nub pa dang / dbu gtsug tor gyen du 'bur ba ni dbang rtags so/ /de nas dbang bskur bar byed pa'i lha rnams gshegs su gsol lo//ting nge 'dzin gyi dkyil 'khor ni de ltar ci nus kyis yang dang yang du gsal bar bsgom pa dang / sku yongs su rdzogs pa'am yan lag gi cha shas ji srid mi skyo'i bar du bsgom pa dang rdzogs pa'i rim pa'i rnal 'byor bsgom pa dang /bsgom pas skyon bzlas pa ji srid 'dod kyi bar du bya ba ni bsgom pa dang bzlas pa'o/ /de nas phyi nang gi mchod pas mchod pa dang bstod pa dang bdud rtsi myong ba dang / gtor ma dbul ba la sogs pa ni mchod pa'i rnal 'byor ro/ /nye bar bsdu ba'i rnal 'byor ni/sprul pa'i 'khor lo lus la bsdu ba ste/ sen mo dang so dag la ni thod pa'i dum bu'o zhes bya ba la sogs pa smos te/ snying po'i phyag rgya dang sngags kyis rang gi lus la gzhug pa'o/ /de yang dpa' bo khams la/ dpa' mo rtsa la'o/ /sgo mtshams ma brgyad bu ga brgyad la/ye shes kyi 'khor lo snying ga'i rtsa brgyad la/ gzhal yas khang lus la/ rdo rje'i ra ba pags pa la/ me 'od kyi phreng ba ni ba spu la bsdu/ de nas rang gi snying gar zla ba'i dkyil 'khor gyi dbus su yi ge hUM bkod la yab kyi snying po dang / nye ba'i snying po dang /yum gyi snying po dang / nye ba'i snying po dang / dpa' bo dang / dpa' mo'i sngags dang / go cha'i sngags gnyis dang / yab yum gyi rkang pa brgyad pa'i sngags rnams kyis rim pa du ma mgal me'i 'khor lo ltar bskor la/ dpa' bo'i snying po'i nang du mchod phyir thogs la gzhug pa dang /go cha'i sngags la go cha drug gzhug pa dang / yum gyi rkang pa brgyad pa la mgul to gzhug pa dang / yab kyi snying po la mi mgo lnga bcu'i do shal gzhug pa dang / nye ba'i snying po la rgyan gzhug pa dang / yum gyi snying po la glang po che'i pags pa gzhug pa dang /dpa' bo'i go cha'i sngags la ske rags gzhug pa dang / dpa' mo'i sngags la rdo rje dang dril bu ma gtogs pa'i phyag mtshan gzhug pa dang / yum gyi nye ba'i snying po la zhal lhag ma gsum dang cod pan gzhug pa'o/ /de nas rkang pa brgyad pa'i sngags kyis mchod la ldang bar bya'o//tsham dam sngags kyis shin tu bsrung / /zhes bya ba ni ldang ba'i tshe spyi bor khaM las khrab bskyed/ rkang par haM las rgyun bskyed la rgyun gyis khrab tu sil gyis brgyus pa la/ oM sum+b+ha ni zhes pa'i sngags kyis mdun du khro bo dkar po/oM gr-ih+Na zhes pas g.yas su khro bo ser po/ oM gr-ih+NA pa ya zhes pas rgyab tu khro bo dmar po/ oM A na ya ho zhes pas g.yon du khro bo ljang gu ste/ /kun kyang phyag g.yas na rdo rje g.yon na sdigs mdzub mdzad pa thams cad rdzogs par bskyed la ldang bar bya'o//de ltar tsham dam sngags kyis bsrungs nas phar spro ba dang tshur bsdu ba shes pa ni tshangs par spyod pa'i rtags brgyad do/ /de nas spyod pa bstan pa ni/ /'jigs pa thams cad rnam spangs te/ /de ltar rnal 'byor bdag nyid bsam/ /zhes bya ba ni/ bag tsha ba med pa'i spyod pa ste dang po'o//'khor lo bde mchog bde ba'i mchog /ces bya ba nas/ rigs gcig tu ni rnam par brtag /ces bya ba'i bar gyis ni rigs mnyam pa nyid du spyod pa bstan pa ste gnyis pa'o/ /rnam par mi rtog bdag nyid sems/ /zhes bya ba nas/ dpa' bo seng ge bzhin du spyod//ces bya ba'i bar gyis ni rnam par mi rtog pa la spyod pa bstan te gsum pa'o/ /de nas rdzogs pa'i rim pa bstan pa'i phyir/ /A li kA li zhes bya ba la sogs pa gsungs te/ de yang rnam pa bzhi ste bsgom pa dngos dang spyod pa dang gzhan don dang 'bras bu phan yon no//de nas A li kA li mdun bsams nas/ /zhes bya ba ni/ chags lam la skyes pa dang bud med do/ /grol lam la snying ga dang lte ba'i thig le'o/ /rnal 'byor chen po ngal bso ste/ /zhes bya ba ni/ chags lam la byang chub kyi sems so/ /grol lam la thig le bsgom pa'o//zla ba'i dkyil 'khor rdzogs pa'o/ /zhes pa ni/ chags lam la 'khor lo bzhi byang chub kyi sems kyis gang ba'o/ /grol lam la sprul pa'i 'khor lo'i gnas su byang chub kyi sems kyi thig le kha sbyar bsgom pa'o/ /lte ba'i rtsa bar gnas par bsgom//zhes bya ba ni/ chags lam la gsang ba'i rdo rje'i nor bur gzung ba'o/ /grol lam la gtum mo'i gnas su'o/ /yi ge gnas kyi mchog gyur pa/ /zhes bya ba ni/ chags lam la mi 'gyur ba'i byang chub kyi sems ak+Sha ra zhes bya'o/ /grol lam la lte ba'i hUM 'khyil pa'o//de ni dbus su rnam par bsam/ /zhes bya ba ni/ chags lam la gsang ba'i rdo rje'i dbus su'o/ /grol lam la lte ba'i dbus su'o/ /sku gsung thugs kyi rdo rje can/ /lha yi sku ni bsgom par bya/ /zhes bya ba ni/ chags lam la dga' bral spangs pa'i dga' ba gsum po'o//grol lam la byang chub kyi sems khrag dang rlung ro gcig pa'o/ /lte ba'i rlung dang thig le nyid la lha'i sku zhes bya'o/ /rang lhag par gnas pa'i lam ni/ de ni gzugs las 'das gyur kyang / /zhes bya ba ni/ gzung ba bkag nas rnam par snang mdzad kyis rgyas btab pa'o//sems nyid 'byung ba ma yin nyid/ /de yang bsam gyis mi khyab bsam/ /zhes bya ba ni/ 'dzin pa bkag nas mi bskyod pas rgyas btab pa'o/ /sems nyid brtag par mi bya'o/ /bsam gyis mi khyab de bsam na/ /zhes bya ba ni/rdo rje sems dpas rgyas btab pa'o/ /de nas 'dzin pa thob par 'gyur/ /zhes bya ba ni/ sku gsung thugs kyi rang bzhin thob pa'o/ /kha T+wAM ga ni lha yi sku/ /zhes bya ba nas/ rnal 'byor ma ni mtshan mor bshad/ /ces bya ba'i bar gyis rdzogs pa'i rim pa'i spyod pa bstan pa'o//sprul pa las byung dpa' bo rnams/ /yan lag drug cu sems kyis sprul/ /zhes pa ni/ thun bzhir dkyil 'khor sems kyis sprul pa'o/ /de yang thun phyi ma la dkyil 'khor sprul tsam na/ hUM gi sgras phyi rol du skad cig la rten dang brten pa'i dkyil 'khor thams cad rdzogs par bsgom pas na/sgra yi tshul la nges 'byung rnams/ /dam tshig spyad pa'i spyod tshul yin/ /zhes gsungs so/ /shrI ni gnyis med ye shes te/ /zhes pa nas/ mya ngan 'das pa mi ston to/ /zhes bya ba'i bar gyis he ru ka rtogs pa'i 'bras bu'o/ / 'pho ba'i tshe na rnal 'byor pa/ /zhes bya ba ni/ 'chi ba'i tshe rnal 'byor pas phaT pheM zhes pa'i sngags dang phyag rgyas ye shes sems dpa' spyan drangs la/ snying po'i phyag rgyas de'i thugs kar zhugs nas lus 'dir gnas kyang / sems mkha' spyod kyi gnas su 'khrid par byed do/

CLOSE WINDOW