CLOSE WINDOW

D1422
བོད་ཡིག

/de ni sbas pa zhes bya ba'i don to/ /rim pa dang rim pa las bzlog pa gnyis su mdor bstan pa la sogs pa de las gsungs pa de 'dir bstan pa'i phyir ro/ /mdor bstan zhes bya ba la sogs pa gsungs te/ mdor bstan pa zhes bya ba ni mdor bstan pa ste mdo'o//ji ltar bstan zhes bya ba ni ji lta ba bzhin du brjod pa ste/ bshad pa zhes bya ba ni ma lus par bstan pas 'brel pa'i rang gi ngo bo yin no/ /rgyas bshad ces bya ba ni rang gi ngo bo mi gsal ba gsal bar ston pa rgyas bshad ni 'grel bshad do/ /ma lus nyid ces pa ni 'di gsum mo//brda yi cho ga rgyas pa yin/ /zhes pa ni/ brda'i cho ga chos mang po zhes pa'i don to/ /phan yon gang yin zhe na/ gsungs pa/ gang zhig ces pa la sogs pa ste/ gang zhig ces pa ni kun du spyod pa'i cho ga'o/ /shes pa tsam gyis ni zhes pa ni bsgoms pa'i stobs kyi rim pas khyad par du shes pa tsam gyis mngon du byas par 'gyur ro//sgrub pa po ni bde mchog gi bdag nyid do/ /grub pa ni sangs rgyas nyid do/ /thob pa ni brnyes pa'o/ /da ni rgyud kyi don bstan pa'i phyir gsungs pa sum cu rtsa bdun zhes pa la sogs pa ste/ sum cu rtsa bdun rnal 'byor gyis zhes pa ni/bcom ldan 'das dang bcas pa'i lha sum cu rtsa bdun dang sbyar ro/ /byang chub phyogs zhes pa ni/ dran pa nye bar gzhag pa la sogs pa byang chub kyi phyogs kyi chos rnams so/ /'jig rten du ni bsgom byar bshad/ /ces pa ni thabs kyi ngo bo nyid yin pa'i phyir rab tu bsgom par bya ba yin par 'jig rten la rab tu grags par gyur pa'o//thabs nyid ji ltar yin zhe na/ 'dir gsungs pa/ he ru ka dpal 'gro ba'i mchog /ces pa ste/ dpal he ru ka zhes pa ni nye bar mtshon pa ste/ rab tu gtum mo la sogs pa gzhan yang rig par bya'o//gang gi phyir 'di rnams 'gro ba'i gtso bor gyur pa bsgom par bya ba yin pas na dpal he ru ka la sogs pa'o/ /dran pa nye bar gzhag pa la sogs pa ni byang chub kyi phyogs te/ de'i phyir thabs nyid yin no zhes dgongs so/ /da ni sgom pa'i rim pa bstan pa'i phyir gsungs pa de la thog mar zhes bya ba la sogs pa ste/thog mar zhes pa ni sgom pa rtsom pa'o/ /rnal 'byor gyi dbang phyug gis zhes bya ba ni/ skad cig gis lhag par mos pas dpal bde mchog gi rnal 'byor dang ldan pas so/ /phung po lnga la lha'i nga rgyal zhes bya ba ni bdag nyid kyi phung po lnga la lha'i nga rgyal du byed pa'o//gzugs kyi phung po la sogs pa ni go sla'o/ /khams zhes bya ba ni khams gsum thams cad lha'i rnam par bstan pa'o/ /sa'i khams zhes bya ba la sogs pa ni go sla'o/ /de ltar zhes bya ba la sogs pa ni mjug bsdu ba'o//'di ni nges par bstan pa dang po'o// //de nas zhes bya ba la sogs pa ni lha'i rnal 'byor gang gis byang chub kyi phyogs kyi chos dang sbyar bar bya ba de kun kyang gang zhe na zhes pa ni sbyar bar bya ba ste zhes pa la sogs pa'o/ /rdzu 'phrul skyed par byed pa zhes bya ba ni 'dis rdzu 'phrul bskyed pa ste/'dun pa nyid rdzu 'phrul rkang pa ste/ 'dun pa'i rdzu 'phrul rkang pa'o/ /de ltar gzhan la yang ngo / /de lta na zhes bya ba la sogs pa ni mjug bsdu ba'o/ /'di ni nges par bstan pa gnyis pa'o/ /de la de rnams kyi zhes bya ba la sogs pa ni/da ni 'di kun gyis dran pa nye bar gzhag pa la sogs pa lha'i ngo bo nyid du go bar bya'o/ /de kun ni go sla'o/ /'di ni nges par bstan pa gsum pa'o// //de nas zhes bya ba la sogs pa la/ dpa' bo gnyis med ces bya ba ni/ dpal bde mchog gi bdag nyid kyi rnal 'byor pa dpa' bo khaN+Da ka pA la la sogs pa rnams dang lhan cig gnyis med ni gcig pa'o//gnyis med pa nyid ji ltar yin zhe na/ he ru ka dpal zhes bya ba la sogs pa gsungs te/ sku yan lag ces bya ba ni mdor bstan pa'o/ /yan lag kun gyi cha shas gnas/ /zhes bya ba ni rgyas par bstan pa'o//so dang sen mo la ni zhes bya ba la sogs pa ni shin tu rgyas par bstan pa yin no/ /'di ni nges par bstan pa bzhi pa'o// //de nas gzhan yang bshad bya ba/ /zhes bya ba la sogs pa ni go sla'o/ /ji ltar nang gi bdag nyid ji lta ba de bzhin du phyi rol gyi dkyil 'khor shes par bya ba zhes sbyar ro//rnam dgod ji ltar sbyar ba ni/ /zhes bya ba ni/ de ma thag tu lha mo rnams kyi dgod pa gsungs pa ji lta ba de bzhin du gzhan yang shes par bya'o zhes pa'i don to/ /da ni lha rnams dgod pa la 'jug par bya ba'i phyir/ rten dang zhes bya ba la sogs pa gsungs te/rten dang brten pa'i tshul gyis 'khor lo ste/ der yi ge yaM yongs su gyur pa las rlung gi dkyil 'khor la sogs pa'i steng du gyur par bsam mo zhes dgongs so/ /shes pas zhes bya ba la sogs pa ni/ der dkyil 'khor bzhi rnam par bsgom par bya'o/ /gang zhig cho ga zhes bya ba ni gang cho ga bzhin no//bla ma brgyud rim ji bzhin du/ /zhes pa ni/ de dang de rnams bla ma'i gdams ngag gi rim pa ji lta ba bzhin du bsgom par bya'o zhes bya ba ni lhag ma'o/ /ri zhes bya ba la sogs pa ni de ma thag tu bstan pa'i rlung gi dkyil 'khor la sogs pa bzhi'i steng du yi ge suM yongs su gyur pa las ri rab kyi steng du yi ge paM yongs su gyur pa las sna tshogs pad+ma 'dab ma brgyad pa lte ba dang bcas pa la zhes pa'i don to//de yi dbus bzhugs dpa' bo ni/ /zhes pa ni de'i lte ba'i steng du A li kA li yongs su gyur pa las zla ba'i dkyil 'khor la gnas pa'i nam mkha'i phyogs na gnas pa'i nA da las skyes pa'i yi ge hUM yongs su gyur pa las dpa' bo'i dbang phyug gau rI dang /de'i bdag po g.yas brkyang bas mnan pa nyi ma'i dkyil 'khor la bzhugs pa zhes bya bar dgongs so/ /mkha' 'gro ma zhes bya ba la sogs pa'i tshigs su bcad pa 'dis shar la sogs pa'i phyogs dang 'dab ma rnams su mkha' 'gro ma la sogs pa rnams g.yon skor gyis dgod par bya'o zhes brjod do//phyag gnyis pa la zhal gcig pa ste/ de thams cad zhal gcig pa phyag gnyis par zhes bya ba'i don to/ / sna tshogs gzugs dang sgeg mo'i zhes pa ni gzugs sna tshogs pa dang sgeg pa'o/ /mtshams kyis zhes bya ba la sogs pa ni go sla'o/ /yi ge pu sogs yang dag sbyar/ /zhes pa ni/ pul+lI ra ma la ya la sogs pa blos dmigs par bya'o/ /yul dang yul du gnas pa yin/ / zhes bya ba ni pul+lI ra ma la ya la sogs pa de rnams su bzhugs pa'o/ /rab tu gtum mo la sogs pa dang lhan cig pa thod pa'i dum bu la sogs pa'o/ /spyan drangs zhes bya ba ni dgug pa'o/ /'khor lo'i dbus gnas zhes bya ba ni thugs kyi 'khor lo la sogs pa 'khor lo gsum gyi dbus su bzhugs par mdzad pa'o//mchod ces pa ni bsgom pa'o/ /rtag tu zhes pa ni thun mtshams so sor ro/ /pu zhes bya ba la sogs pa la/ pu la sogs pa zhes bya ba ni mdor bstan pa'o/ /pul+lI ra ma la ya zhes pa ni rgyas par bshad pa'o/ /de ltar kun la sbyar te/thams cad du go sla'o/ /phyogs su zhes pa ni phyogs kyi sgo rnams kyi phyogs su'o/ /mtshams zhes bya ba ni phyogs mtshams so/ /de ltar zhes bya ba la sogs pa ni da ltar ji bzhin bstan pa'i dkyil 'khor ro/ /phyi dang nang gi bdag nyid ces bya ba ni phyi rol dang nang gi bdag nyid do//dmigs zhes pa ni dmigs par bya'o/ /dus ji tsam du zhe na/ gsungs pa ji srid du nges par rtogs pa'i spyod yul du zhes pa ni ji srid mya ngan las 'das pa spyod yul du ma gyur gyi bar du zhes bya ba'i don to/ /'di ni nges par bshad pa lnga pa'o// //de nas zhes bya ba la sogs pa la/ bdag po sogs kun gyi mtshan ma phyag rgya'i tshogs rnams dang zhes pa ni lha thams cad kyi bdag po ni bcom ldan 'das so/ /sogs pa'i sgras rdo rje phag mo la sogs pa yongs su gzung ngo / /de rnams kyi phyag mtshan dang bcas pa'i phyag mtshan gyi tshogs nges par bya zhes pa gzhan du sbyar ro//brjod ces pa lhag ma'o/ /rang mdog phyag mtshan bzhugs tshul rnams/ /zhes pa ni lha thams cad kyi bdag po'i sku mdog la sogs pa yang ngo / /rgyud du sbas pa zhes bya ba ni rgyas pa'i rgyud du sbas pa 'dir brjod ces dgongs pa'o//dpal he ru ka zhes bya ba la sogs pa ni go sla'o/ /phyag gnyis yang dag 'khyud pa dang / /zhes bya ba ni 'khyud pa'i phyag gnyis kyis rdo rje dang dril bu bsnams so zhes pa lhag ma'o/ /g.yas kyi lhag mar zhes bya ba ni phyag g.yas kyi lhag ma rnams su phyag mtshan 'di rnams bsnams zhes pa'i don to//thod pa khrag gis bkang ba zhes bya ba ni/ khrag gis bkang ba'i thod pa'o/ /mgo bo ni tshangs pa'i mgo bo'o/ /g.yon gyi lhag mar zhes bya ba ni sngar gyi bzhin du phyag g.yon gyi lhag ma rnams kyi phyag mtshan rnams bshad do//bcu gnyis kyis ni brgyan pa yin/ /zhes bya ba ni phyag mtshan bcu gnyis po bsnams pa 'dis phyag bcu gnyis brgyan par grags pa'i bcom ldan 'das sgom mo zhes bya ba'i don to/ /thod pa'i phreng ba'i mchod phyir thogs/ /brgya phyed par ni shes par bya//zhes bya ba ni/ brgya phyed pa'i mgo bo'i phreng ba 'phyang pa'o/ /mchod phyir thogs zhes pa ni mchod phyir thogs 'chang ba'o/ /bcom ldan 'das yum ni mdun du bzhugs zhes pa ni/ bcom ldan 'das ma mdun na bzhugs pa la gzigs zhes pa lhag ma'o//'khyud pa yis ni thod pa dag /gdug pa'i bdud kyi khrag bkang bsnams/ /zhes pa ni 'khyud pa'i phyag rgya g.yon pa na gdug pa'i khrag dang rgyu mas bkang ba'i thod pa bsnams pa'o/ /g.yas pas rtag tu sdigs mdzub dang / /ma rungs pa yi gri gug bsnams//zhes bya ba ni phyag g.yas pa na gdug pa can la bsdigs pa'i sdigs mdzub dang bcas pa'i rdo rje rtag par kun du bsnams pa'o/ /thod dum brgyan pa'i ske rags can/ /zhes bya ba ni thod pa dum bur byas pa'i ske rags kyis rked pa'i phyogs brgyan pa'o/ /gnyis ka kha sbyar tshul gyis bzhugs//zhes bya ba ni bcom ldan 'das dang / bcom ldan 'das ma'i sku snyoms par zhugs shing kha sbyar ba zhes bya ba'i don to/ /mkha' 'gro ma sogs zhes bya ba ni mkha' 'gro ma la sogs pa'o/ /bzhi po zhes bya ba ni bzhi po rnams so/ /kha T+wAM ga snod ces bya ba ni thams cad kyi g.yon na kha T+wAM ga dang bcas pa'i thod pa 'chang ba'o//mtshon cha rnams zhes bya ba ni de bzhin du g.yas na gri gug go/ /sku la spyan gsum phyag rgya lnga/ /sogs zhes bya ba ni sku la ji ltar rigs pas phyag rgya lnga 'chang ba'o/ /sogs pa'i sgras dpung rgyan la sogs pa yongs su gzung ngo //skra grol bas ni rnam par brgyan/ /zhes bya ba ni skra grol bas mdzes pa'o/ /dpa' bo nyi shu rtsa bzhi ni/ /zhes bya ba ni dpa' bo nyi shu rtsa bzhi'o/ /phyag rgya lnga la sogs pas brgyan/ /zhes bya ba ni mgul rgyan la sogs pa'i phyag rgya lnga 'chang ba'o//sogs pa'i sgras dpung rgyan dang zhabs gdub la sogs pa gzung ngo / /phyag gnyis zhal gcig ces bya ba ni/ zhal gcig pa phyag gnyis pa'o/ /ral pa'i cod pan dar gyis bcings/ /zhes bya ba ni dang po'i mang po'i tshig go/ /rdo rje dril bus legs 'khyud cing / chags pa chen po rjes chags pas/ /zhes pa ni chags pa chen po ni lhan cig skyes pa'i dga' ba'o/ /de'i don du rjes su chags pa'o/ /chags pa chen pos de'i rjes su chags pa'i rgyu de'i phyir na 'khyud par bzhugs pa'i phyag gnyis na rdo rje dang dril bu bsnams pa yin no zhes dgongs pa'o//phyag rgya lnga la sogs pa ni spyi gtsug nor bu dang bcas pa'i phyag rgya lnga la sogs pa 'chang ba'o zhes bya ba'i don to/ /'og pag dag gis brgyan zhes bya ba ni rked pa'i cha la ste/ ska rags kyis brgyan pa'o/ /rnal 'byor snod dang bcas pas 'khyud//ces bya ba ni g.yon gyis thod pa bsnams pa'o/ /he ru ka dpal la sogs kun/ /zhes bya ba ni/ dpal he ru ka la sogs pa'o/ /kun zhes bya ba ni thams cad do/ /g.yas brkyang ba yi gnas pas bzhugs/ /zhes bya ba ni dang po'i mang po'i tshig go/ / dpal he ru ka'i khyad par gang zhe na gsungs pa/ mgur chu zhes pa la sogs pa'o/ /mchod phyir thogs dang thal ba ni/ /phyag rgya drug tu rab tu bshad/ /ces bya ba ni rim pa 'dis mchod phyir thogs dang thal ba ste/ gnyis po dang bcas pa'i mgur chu la sogs pa phyag rgya drug gis brgyan pa zhes bya ba'i don to//pha rol phyin drug rnam dag pas/ /phyag rgya drug gis brgyan pa yin/ /zhes bya ba ni pha rol tu phyin pa drug rnam par dag pa'i phyag rgya drug gis bcom ldan 'das kyi sku brgyan pa yin no zhes dgongs pa'o/ /sku gsung thugs kyi dbye ba yis/ / yi ge gsum gyi dngos grub kyi/ /zhes bya ba ni sku la sogs pa'i yi ge gsum gyi ngo bo ni de'i gzugs kyis bskyed pa'o/ /de las skyes pa'i ngo bo ni yi ge hUM gi rnam pa ste/ yi ge gsum gyi ngo bo'o/ /de bas na de'i phyir na bskyed pa zhes go bar bya'o/ /ngo bor bdag nyid bsgom bya zhing / / zhes bya ba ni dpal bde mchog gi ngo bor bdag nyid bsgom par bya'o/ /dngos grub 'dod pas gzhan mi bya/ /zhes bya ba ni sangs rgyas 'dod pa'i rnal 'byor pas dgos pa ci'i ched du dngos po gzhan dang gzhan sgom zhes che ba'i bdag nyid brjod do/ /phan yon gsungs pa de'i bsod nams zhes bya ba la sogs pa ste/'gyur ba ni 'gyur ba'o/ /de'i zhes bya ba ni bde mchog gi rnal 'byor pa'o/ /lce ni zhes bya ba ni mdor bstan pa'o/ /brgya stong zhes bya ba ni rgyas bshad de kha stong gis kyang zhes pa'i don to/ /brjod par bya zhes bya ba ni lhag ma'o/ /de'i bsod nams zhes bya ba ni de'i bsod nams so//sgrub pa'i zhes bya ba ni sgrub pa'o/ /yon tan rgya chen po zhes bya ba ni yon tan rgya chen por ro/ /khwa gdong la sogs rnam pa bzhi/ /zhes bya ba ni khwa gdong ma la sogs pa bzhi'o/ /thams cad kyang ni sgo skyong ste/ /zhes bya ba ni 'di dag thams cad sgo bzhi ka na bzhugs pa'o zhes bya ba'i don to//gshin rje brtan sogs zhes bya ba ni gshin rje brtan ma la sogs pa bzhi'o/ /mtshams bzhir zhes bya ba ni mtshams bzhi rnams so/ /de'i zhabs gnyis zhes bya ba ni g.yas brkyang bas so/ /gzugs gnyis ldan zhing yid 'phrog ma//zhes pa ni gshin rje brtan ma la sogs pa'i lha mo bzhi so so'i yid 'phrog pa'i gzugs gnyis gnyis so zhes pa'i don to/ /mkha' 'gro ma bskyed ji bzhin du/ /zhes pa ni mkha' 'gro ma la sogs pa'i mdog ji lta bar gnas pa zhes pa lhag ma'o//khwa gdong la sogs dbye ba nyid/ /ces bya ba ni de bzhin du khwa gdong ma la sogs pa'i sku'i bye brag kyang so sor gnas zhes pa'i don to/ /de ltar zhes bya ba la sogs pa ni mjug bsdu ba'o/ /ma lus 'khor lor gnas zhes bya ba ni ma lus par 'khor lo la gnas pa rnams so//mdog dbye'i cho ga'i rim bzhin no/ /zhes pa ni dang po'i don te/ 'di ni mtshon pa ste/ phyag gnyis kyang rig par bya'o/ /'di ni nges par bstan pa drug pa'o// //de nas go cha gnyis po ni/ /zhes bya ba la sogs pa ni/ bcom ldan 'das dang bcom ldan 'das ma'i go cha'i sngags drug tshan gnyis so//ji ltar zhe na/ gsungs pa/ rgyud du sbas pa nges bshad bya/ /zhes bya ba ni drug pa gnyis po des nges par brgyan pa ni rgyas pa'i rgyud du sbas pa ste/ gang gis de'i nges par gyur pa'i rgyud der sbas pa rgyud 'dir gsal bar bstan par bya ba'i don to//yan lag ces bya ba ni chos kyi brda ste/ yan lag thams cad do/ /sbyar zhes bya ba ni oM ha la sogs pas snying ga la sogs pa rnams su sbyar bar bya'o zhes dgongs so/ /dang po rdo rje sems dpa' ste/ /zhes bya ba ni snying gar rdo rje sems dpa' dngos su 'am lhag par mos pas blta bar bya'o zhes dgongs so//de ltar rnam par snang mdzad la sogs pa dang / rdo rje phag mo la sogs pa rjes thogs su yongs su bsam par rig par bya'o/ /yan lag ni zhes bya ba ni yan lag thams cad do/ /dpa' bo gnyis med rnal 'byor ma//zhes bya ba ni dpa' bo dang lhan cig gnyis su med pa'i ye shes kyi rnal 'byor gyis snyoms par 'jug pa'o/ /de gang la yod pa de la dpa' bo gnyis su med pa'i rnal 'byor ma zhes dgongs pa'o/ /'di ni nges par bstan pa bdun pa'o// //de nas zhes bya ba la sogs pa la go cha gnyis zhes pa ni bstan ma thag pa yis so//dam tshig ces bya ba ni dpal bde mchog bdag nyid rang gi sku'i gnas ji lta bar go ba go zhes pa lhag ma'o/ /ye shes 'khor lo rnam bsgoms nas/ /zhes bya ba ni snying ga'i sa bon gyi 'od zer rnams kyis ye shes kyi 'khor lo spyan drangs te/mdun du bsgom pa'o/ /gzhug bya zhes bya ba ni gzhug par bya'o/ /myur ba zhes bya ba ni mchod yon dang zhabs bsil la mi ltos pa'o/ /sngags dang phyag rgya zhes bya ba ni 'og nas 'chad par 'gyur ba'i sngags dang phyag rgya gnyis so/ /sbyor ba zhes bya ba ni rnal 'byor pas so//rkang pa mnan pa zhes bya ba ni rkang pa g.yon pas g.yas pa mnan pa'o/ /steng du blta zhes bya ba ni g.yon ngos kyis gyen du blta ba'o/ /steng du zhes bya ba la sogs pa ni kha nas pheM gyi sgra bsgrags la zhes bya ba ni yi ge pheM gyi sngags brjod pa'o/ / phyogs bcu'i 'jig rten khams gnas pa'i/ /dpa' bo rnal 'byor ma rnams dgug /ces pa ni sngags 'dis phyogs bcu'i 'jig rten gyi khams na bzhugs pa'i dpa' bo dang rnal 'byor ma rnams spyan drangs par 'gyur ro zhes pa'i don to/ /sngags kyis yang dag bskul ba dang / / zhes pa ni sngags 'di nyid kyis ye shes kyi 'khor lo bskul bar bya'o/ /skad cig de la spyan drang bya/ /zhes pa ni 'chad par 'gyur ba'i phyag rgyas skad cig gis spyan drang ngo zhes pa'i don to/ /bya zhes bya ba la sogs pa ste/ de ni zhes bya ba ni phyag rgya'o/ /dpral ba'i phyogs kyi dbus zhes pa ni dpral ba'i dkyil du'o//gcu zhing gcu zhing bskor ba zhes bya ba ni bsgyur zhing bsgyur zhing bskor ba'o/ /da ni snyoms par 'jug pa bstan pa ni/ sngags pas dpa' bo rnal 'byor ma byin brlab ces pa la sogs pa ste/ byin gyis brlab ces bya ba ni sngags sngon du 'gro bas so//dpa' bo rnal 'byor ma zhes bya ba ni dpral ba'i dkyil du'o/ /lha dang lha mo gnyis med ces bya ba ni snyoms par zhugs pa'i rgyu mtshan no/ /sna rtse zhes bya ba ni pad+ma'i sna rtser ro/ /mtshan gyi lte bar zhes bya ba ni rdo rje'i lte bar ro/ /sngags kyi tshogs dang bcas pas byin gyis brlab ces bya ba ni bcom ldan 'das dang bcom ldan 'das ma'i snying po dang nye ba'i snying po'i sngags brjod pa sngon du 'gro bas bcom ldan 'das kyis bcom ldan 'das ma'i lte ba la sogs pa rnams byin gyis brlab par bya'o zhes pa'i don to//rnal 'byor sangs rgyas mkha' 'gro ma/ /zhes pa ni rdo rje phag mo'o//lce zhes bya ba ni lce'o/ /a wa d+hU tI gnyis kyis zhes bya ba ni bcom ldan 'das kyi snying po dang nye ba'i snying po'i sngags rnams kyis so/ /dpa' byin brlab ces bya ba ni bcom ldan 'das kyis lte ba la sogs pa rnams su'o/ /rnal 'byor ma dang dpa' bo gnyis med yin/ /zhes bya ba ni/'di thams cad byas nas dpa' bo dang bcas pa'i rnal 'byor ma snyoms par 'jug pa bsgom mo zhes pa'i don to/ /snyoms par zhugs pa'i dgos pa gsungs pa/ /dga' ba zhes bya ba la sogs pa ste/ dpa' bo zhes pa ni dpa' bo lta bu'o/ /rnal 'byor ma zhes bya ba ni rnal 'byor ma lta bu'o//rab tu dga' ba'i ched du thabs dang shes rab gnyis med ces dgongs pa'o/ /ma lus nyid ces bya ba ni thams cad nyid do/ /'di gsungs pa yang zhes bya ba'i don to/ /de nyid gsungs pa bde ba'i zhes bya ba la sogs pa gsungs te/ bde zhes bya ba ni rab tu dga' ba'i dga' ba de'o//thabs zhes bya ba ni bskyod pa'i mtshan nyid kyis bya ba'o/ /kun rig ces bya ba ni kun rdzob byang chub kyi sems longs spyod rdzogs pa'i sku'i bdag nyid de/ lhan cig skyes pa spyis gsum char yang lhan cig skyes pa'i rang gi ngo bo'o zhes bya ba'i don to/ /lhan cig skyes pa'i che ba'i bdag nyid gsungs pa/sa stengs zhes bya ba la sogs pa gsungs te/ sa stengs nam mkha' ste gzugs dang gzugs med do/ /gzugs gcig ces bya ba ni gcig gi rang gi ngo bo'o/ /skad cig gis zhes pa ni lhan cig skyes pa'o/ /lhan cig skyes pa'i dga' ba'i stobs kyis sa stengs la sogs pa bde mchog gi rang bzhin du 'gyur ro zhes bya ba'i don to//sgom pa bdag gis bshad pa'i zhes bya ba ni sngags dang phyag rgya gnyis kyis ye shes kyi dkyil 'khor spyan drangs te sgom par bshad pa nyid do/ /bsdu ba zhes pa ni spyan drangs pa'i ye shes kyi 'khor lo bdag nyid la gzhug par bya'o//de gnyis bshad pa zhes bya ba ni rgyas pa'i rgyud du cho ga ji ltar bstan pa ste/ de ni bstan zhes bya ba ni lhag ma'o/ /bsdu ba nyid gsungs pa g.yon zhes pa la sogs pa ste/ bskor ba zhes bya ba ni bskor ba'o/ / mkha' 'gro ma yi bde ba de/ /zhes bya ba ni/ rnal 'byor ma rnams sngags dang phyag rgyas mnyes par bya'o/ /oM yo ga shud+d+haHsarba d+harmA yo ga shud+d+hauu0f85haM/ zhes pa'i sngags brjod pa sngon du 'gro ba'i phyag rgya 'dis ye shes kyi 'khor lo dam tshig gi 'khor lo la gzhug par bya zhes bya bar dgongs pa'o//'di ni nges par bstan pa brgyad pa'o// //de nas zhes bya ba la sogs pa la/ sprul par zhes pa ni/ spro ba dang bsdu bas 'gro ba'i don byed pa'i ched du lha'i sku'i bdag nyid ni sprul pa'i sku'i rang bzhin no/ /shes bya zhes bya ba ni lhag ma'o zhes bya ba dang / longs spyod rdzogs par 'dod pa nyon//zhes pa ni de nas 'og nas longs spyod rdzogs pa'i sku 'chad par 'gyur ba'i rim pa 'dis mnyes par bya ba nyon zhes par sbyar ro/ /theg pa chen po zhes bya ba ni theg pa ni der 'gro bas na theg pa'o/ /chen po yang yin la theg pa yang yin pas na theg pa chen po'o/ / phyag rgya zhes bya ba ni dpal bde mchog gi sku'o/ /rnal 'byor ma yi grub ster bshad/ /ces bya ba ni de bzhin du de lta bu'i skus rnal 'byor pa la sogs pa la gzhal yas khang du bzhugs te/ chos bstan pa'i sgo nas dngos grub ster zhes bya ba'i don to/ /de nyid kyis na chos la longs spyod pa'i sgo nas gzhal yas khang na gnas pa'i lha rnams kyis longs spyod bzhin pa nyid kyi phyir longs spyod rdzogs pa'i sku zhes brjod do//phyag rgya chen po zhes bya ba ni lha'i sku phyag rgya chen po'o/ /mchog gzhan med ni gzhan mchog tu gyur ba med do/ /ci'i phyir zhe na/ gsungs pa/rnal 'byor kun las mchog yin te/ /zhes bya ba ni gang gi phyir rnal 'byor kun gyi nang nas mchog gi rnal 'byor yin pa de'i phyir zhes bya ba'i don to/ /'di slar ji lta bu zhe na/ gsungs pa/ he ru ka dpal rgyal po che/ /rnal 'byor kun bdag dbang phyug yin/ /zhes pa ni thams cad go sla'o//kun las 'di ni dang po'i don gyi gnyis pa'o/ /nam mkha' dang mnyam las bsdus pa/ /zhes pa ni/ mchog de nyid nam mkha' dang mnyam pa'i ming can gyi rgyud las ston zhes pa'i don to/ /kun mkhyen ye shes de'i rang bzhin/ /zhes bya ba ni/ kun mkhyen yang dag par rdzogs pa'i sangs rgyas kyi ye shes bde ba chen por bstan pa de'i rang bzhin 'di yin no zhes dgongs pa'o//he ru ka dpal dpa' bo mchog /ces pa ni go sla'o/ /tshigs su bcad pa 'di'i nang du tshogs kyi ston mo'ang bstan to/ /'di nyid kyi rnal 'byor gyis rnal 'byor pa sems mtshungs pa rnams kyis lhan cig par zhi ba'i btung ba la sogs pa'i cho gas 'jig rten dang 'jig rten las 'das pa'i dngos grub sgrub pa'i phyir zhes bya ba'i don to//pu la sogs pa yang dag sbyar/ /zhes pa ni/ pul+lI ra ma la ya la sogs pa blos dmigs par bya'o//yul dang yul du rnam par gnas/ /zhes bya ba ni de dang de rnams kyi yul na gnas pa'i rab tu gtum mo la sogs pa'i lha mo'i tshogs so/ /he ru ka dpal bdag nyid ces pa ni/ /he ru ka'i bdag nyid kyi ngo bor bsgom zhes go bar bya'o/ /ji ltar bsgom par bya zhe na/gsungs pa bdag nyid dgod/ yi ge nyi shu rtsa bzhi ni/ /zhes pa ni/ pu la sogs pa'i yi ge nyi shu rtsa bzhi mgo la sogs pa rnams su dgod cing / der son pa'i rtsa rnams ni rab tu gtum mo la sogs pa'i gzugs kyi dngos por bsgom mo zhes dgongs pa'o/ / mjug bsdu ba gsungs pa/ longs spyod rdzogs par zhes bya ba la sogs pa ni rim pa 'dis na longs spyod rdzogs pa'i sku'o/ /bstan zhes pa ni bshad pa'o/ /rnal 'byor che la gnas pa yin/ /zhes pa ni/ rnal 'byor chen po'i ting nge 'dzin gyi dbang du bya ste rnam par gzhag go zhes bya ba'i don to//rab tu 'jug pa zhes bya ba ni rim pa 'dis dpal he ru ka bskyed do zhes bya ba'o/ /shes par bya zhes pa ni go bar bya ba'o/ /ldog pa'ang ji ltar bstan pa ni/ /zhes pa ni ji ltar de'i ldog pa ni 'gog pa ste/ chos kyi sku bsgom par brjod cing zhes pa'i don to//shrI ni gnyis med ye shes te/ /zhes bya ba la sogs pa ni go sla'o/ /de ni rang bzhin stong pa ste/ /zhes bya ba ni phyag dang zhabs la sogs pa de'i rang bzhin ni gzung ba dang 'dzin pa'i rnam pas stong pa rang bzhin med pa don dam pa bde ba chen po'i rang bzhin yin pa'i phyir de yang bde ba chen po'o//kun du 'gro zhing zhes pa ni 'gro ba thams cad la khyab pa'o/ /mi shigs pa zhes bya ba ni gzung ba la sogs pa'i rnam par rtog pas gzhom du med pa'o/ /sgom byed pa zhes pa ni go sla'o/ /byang chub phyogs ni sum cu bdun/ /der ni nges par bsgom par bya//zhes bya ba ni gang zhig byang chub kyi chos sum cu rtsa bdun dang lhan cig tu bsgom pa ste/ de las 'byung bar 'gyur ro zhes pa'i don to/ /'di ni nges par bstan pa dgu pa'o// //de nas zhes bya ba la sogs pa ni/ bsgoms pas skyo zhing dub gyur na/ /zhes bya ba ni gang zhig bsgoms pas skyo zhing ldang bar 'dod par gyur na bdag nyid la dkyil 'khor pa'i lha rnams bsdus te ldang bar bya'o zhes pa'i don to//langs nas ci bya zhe na gsungs pa/ spyod tshul zhes bya ba la sogs pa spyod tshul khyad par gyis zhes bya ba ni mnyam par ma bzhag pa'i spyod pa'o//sbyor dang bral bar mi bya zhes pa ni dpal bde mchog gi nga rgyal dang yongs su mi 'bral ba'o/ /'di yin zhes bya ba ni 'dis so/ /spyod pa'i rnal 'byor zhes pa ni/ mnyam par ma bzhag pa'i spyod ba dang ldan pas so/ /da ni gtor ma'i cho ga gsungs pa/ji skad ces bya ba la sogs pa ste/ ji skad ces bya ba ni phyin ci ma log pa'o/ /sngar bshad pa'i bsam gtan zhes pa ni sngags dang phyag rgyas sngar bstan pa'i 'khor lo mdun du spyan drangs te bsgom par bya'o/ /cho ga zhes bya ba ni rdo rje thal mo'i cho ga'o/ /rgyas byas la zhes bya ba ni sha dang chang la sogs pa ches mang ba'o//sbyin par bya zhes pa ni bdud rtsi myang ba'i cho ga rdzogs par bya ste sbyin par bya'o/ /las la zhes pa ni zhi ba la sogs pa'i las kyi don du'o/ /khyad par du zhes pa ni g.yas dang g.yon du bskor ba'i khyad par gyis so/ /mar ngo'i zhes bya ba la sogs pa ni go sla'o//ston mo bya ba'i 'khor lo spyan drangs pa gsungs pa/ rkang pa mnan pa zhes bya ba la sogs pa sngar bshad pa nyid do/ /de nyid gsal bar bya ba'i phyir gsungs pa/ sngar bshad ces bya ba la sogs pa la/ sngar bshad sngags dang rgya sbyar ba/ /zhes pa la rgya ni dra ba'i phyag rgya'o//sogs pa'i sgras rkang pa mnan pa sngon du 'gro bas steng du blta'o/ /sngags zhes pa ni yi ge pheM ngo / /sbyar zhes pa ni phyag rgya la sogs pa 'di rnams dang sbyar bar bya ste/ dkyil 'khor spyan drangs zhes pa ni lhag ma'o/ /cho ga bzhin du yang dag bsrung / /zhes pa ni bdag nyid cho ga ji lta bar dpal bde mchog gi skur rnam par bsgom zhing go cha gnyis kyis go bgo zhes pa'i don to//sngags gsungs pa oM zhes bya ba la sogs pa ste/ de ltar zhes pa ni sngags 'di'o/ /dam tshig sogs rdzas zhes pa ni/ gnas pas mngon bzla zhes gzhan dang sbyar ro//dam tshig gi rdzas ni go ku da ha na la sogs pa'o/ /sogs pa'i sgras bza' ba dang tshod ma la sogs pa go bar bya'o/ /legs gnas zhes bya ba ni bdud rtsi myang ba'i cho gas legs par 'dus byas shing gzhag pa'o/ /gyen kha phye zhes pa ni gyen kha dbye ba'o//dpa' bo rnal 'byor ma zhes pa ni dpa' bo shes rab dang bcas pa dang / mkha' 'gro ma la sogs pa nas gshin rje 'joms ma la thug gi bar du rnal 'byor ma rnams la dbul zhes pa lhag ma'o/ /khaN+Da ka pA la la sogs pa ni dpa' bo yin no/ /'di rnams la yang oM ka ra ka ra zhes pa la sogs pa'i sngags lan cig brjod de dbul bar bya'o//oM kha kha khA hi khA hi zhes pa la sogs pa'i sngags 'dis lan gnyis brjod pas phyogs skyong rnams la sbyin par bya zhes dgongs so/ /lha'i rnal 'byor dang ldan pas gtor ma dbul zhes bstan pa'i phyir gsungs so//dpa' bo zhes bya ba la sogs pa la dpa' bo ni bcom ldan 'das so/ /de kho na nyid kyi yid kyis 'gro ba skyob pas na sngags so/ /sogs pa'i sgras rdo rje phag mo la sogs pa'i lha kun gzung ste/ de rnams kyi 'khor lo ni gzhal yas khang ngo //dur khrod la sogs kyis kyang brgyan/ /zhes pa ni dur khrod brgyad la sogs pa dang ldan pa'o/ /sogs pa'i sgras phyi rol gyi rdo rje ra ba'ang rig par bya'o/ /lho phyogs kha bltas zhes pa ni nye bar mtshon pa tsam gyis gcer bu skra grol zhes pa yang go bar bya'o/ / gnas ni mthon por zhes pa ni dur khrod dam ri'am gnas mthon por ro'i steng du nye bar 'dug pa'o/ /mchod ces pa ni sgom pa'o/ /bsgoms nas ci zhig bya zhe na/ gsungs pa dbul bar bya zhes bya ba la sogs la/ dbul zhes pa ni zhu ba'i rdzas la sogs pa lha rnams la nye bar dbul bar bya'o//bdag gis nus pas zhes pa ni ji lta bur nus pa ni 'byor pa dang rjes su mthun pa zhes dgongs pa'o/ /rim pa mtshon pa ji lta bar/ /zhes pa ni 'du bya ba'i ched du sgom pa'i rim pa las mi 'da' bar bsgoms la zhes pa'i don to/ /da ni tshogs kyi ston mo gsungs pa/dgun zla 'bring po la sogs pa'i zhes pa ste/ mchod ces pa ni rnal 'byor ma spyan drangs te/ yo byad las mchod pa'o/ /bde ba thams cad dbul bar bya/ /zhes pa ni bza' ba dang tshod ma la sogs pa yod pa kun bsgrub par bya'o/ /skye bo dam pa kun 'dus la//zhes pa ni tshogs kyi dkyil 'khor du'o/ /der ni zhes bya ba ni tshogs kyi dkyil 'khor du'o/ /lhag ma snod du zhes pa ni zhu ba'i rdzas chang dang / lhan cig tu snod gnyis su son pa bza' ba dang tshod ma la sogs pa gzhag par bya zhes pa ni bdud rtsi myang ba'i tshogs rdzogs pa'o//phan yon gsungs pa/ de'i zhes bya ba la sogs pa ste/ mchod ces pa ni rab po/ /'di ni nges par bstan pa bcu pa'o// //de nas zhes bya ba la sogs pa la pha rol phyin drug ces pa ni mgo rgyan la sogs pa rgyan drug go/ /dang por zhes pa ni dang por grub pa'o//pha rol phyin pa zhes pa ni pha rol tu phyin pa'i rang bzhin zhes bya ba'i don to/ /byang chub phyogs zhes bya ba la sogs pa la/ byang chub phyogs ni sum cu bdun/ /zhes pa ni/ che mchog lha yi bdag nyid can/ /zhes pa'i tshig 'di dang sbyar ro/ /che mchog ces pa ni yang dag pa'i ting nge 'dzin no//lha'i bdag nyid ces pa ni gang du dpal he ru ka la sogs pa'i lha'i sku ste/ yang dag pa'i ting nge 'dzin dang lhan cig tu byang chub kyi phyogs kyi chos sum cu rtsa bdun gyi rang bzhin zhes dgongs pa'o/ /gnas sogs sa ni bcu po rnams/ /zhes pa ni sgrub pa po 'dis gnas la sogs pa dang pul+lI ra ma la ya la sogs pa der rab tu dga' ba la sogs pas bcu'i rang bzhin zhes 'dis kun du go bar bya'o//'dir rgyan la sogs pa thams cad pha rol tu phyin pa la sogs pa'i ngo bor bsgom zhing rnam par dag par bsam par bya zhes pa'o//ji ltar 'di bsgoms pas gzhan bya bar nus sam zhe na/ gsungs pa/ dngos po gang dang gang dag gis/ /zhes bya ba la sogs pa ste/ dngos po zhes bya ba ni pha rol tu phyin pa la sogs pa'o/ /de'i rang bzhin zhes bya ba ni pha rol tu phyin pa la sogs pa'i rang bzhin no//sna tshogs gzugs can nor bu 'dra/ /zhes pa ni/ ji ltar shel rdo ras dang nye bar sngon po dang ser po la sogs pa'i dngos po bzhin du sngon po dang ser po la sogs par 'di la snang bar 'gyur ro/ /de bzhin du 'dir yang yid las snang bar 'gyur ro zhes pa'i don to//mjug bsdu ba la sogs pa gsungs pa/ de ltar zhes bya ba la sogs pa ste/ de ltar rim pa 'dis so/ /ji lta ji ltar gnas zhes pa ni/ gang dang gang pha rol tu phyin pa la sogs pa la 'jug par 'gyur ro/ /'jigs bcas pa'am 'jigs med pa/ /zhes pa ni gnas zhes pa lhag ma'o//bsam gtan zhes pa ni pha rol tu phyin pa la sogs pa nas/ sangs rgyas la thug par bsam gtan bya ba'o/ /sgom pa bdag gis zhes pa ni sangs rgyas nyid tshun chad du bsgom pa'o/ /las rnams thams cad rab sgrub byed/ /ces pa ni/rang dang gzhan dag gis de'i yid la gang cung zad ci 'dod pa de thams cad sgrub par byed ces pa'i don to/ /de nyid gsungs pa tshe 'di nyid la zhes bya ba la sogs pa'i tshe 'di zhes pa ni skye ba 'di la'o/ /spyod dang grol ba'i 'bras rab stsol/ /zhes pa ni sangs rgyas sam byang chub sems dpa' rang dang gzhan gyis mngon par 'dod pa'i 'bras bu stsol bar nus pa rab tu thob ces sngar bshad pa dang sbyar ro//bsgom pa zhes bya ba la sogs pa la/ gang yang zhes pa ni cung zad kyang ngo / /log pa'i shes pa zhes pa ni mi shes pa'i rgyur gyur pa'o/ /shes pa can zhes bya ba ni yongs su shes pa don du gnyer bar ro//gang gis zhes pa la sogs pa la/ de zhes pa ni de'o/ /skye ba bye ba stong phrag tu/ /zhes pa ni skye ba stong phrag bye bar yang ngo / /bdag gi ye shes kyis bskul ba/ /zhes pa ni yongs su shes pa de'i don bdag gis gnas par bya'o/ /skye ba stong phrag bye bar myur du'i sgras brjod par bya ba nyid du sgrub pa pos shes par bya'o//de ni de nyid kyis gsal bar byas pa zhes pa'i don to/ /rnal 'byor spyod tshul gnas pa yin/ /zhes pa ni gsum la ni sgom bzhin pa yang glen pa la sogs pa'i spyod yul du mi 'gyur bar gsungs pa/lkugs shing glen pa zhes bya ba la sogs pa ste/ thabs ngan ldan zhes pa ni thabs dang bral ba'o/ /byis pa'i shes pa'i shes pa can ni byis pa'i skye bo nyid kyi shes pa'o/ /shes pa zhes pa ni yongs su shes pa don du gnyer nas so/ /sems can yongs su ma smin dang / / zhes pa ni dang po'i don gyi drug pa'o/ /nga rgyal la sogs bdun sems ldan/ /zhes pa ni/ nga rgyal las kyang nga rgyal zhes bya ba la sogs pa'o/ /he ru ka dpal yang dag 'jug /ces pa ni/ dpal he ru ka'i rang gi ngo bo'o/ /slob dpon bdag nyid chen po yis/ / zhes pa ni bla ma shin tu chen po'i zhal snga nas rig par bya zhes go bar bya'o/ /phan yon gsungs pa kun spyod ces pa la sogs pa ste/ kun spyod cho ga zhes pa ni kun du spyod pa'i cho ga'o/ /cho ga'i bya ba bsten par bya/ /zhes pa ni cho ga ji lta bar bsten pa'o/ /de yang zhes pa ni de yang ngo //kun mkhyen zhes pa ni thams cad mkhyen pa'i che ba'i bdag de thob pa zhes pa lhag ma'o/ /srid pa gsum po ma lus na/ /zhes pa ni 'dir yang blta bar bya'o/ /mthong ba zhes bya ba la sogs pa ni 'dir thams cad du gsum pa'i don gyi dang po'o/ /des bcom ldan 'das mthong zhes pa'i don to//lha rnams bzlog ste dgod pa dang / /zhes pa ni mthar 'gyur ba'i brtson 'grus chen po mngon par brjod pa rgyas pa'i rgyud du dang por bstan pa'o/ /sngags kyi dbye ba bzlog pa dang / /zhes pa ni hA swA zhes pa la sogs pa phyin ci log gi sngags brjod do//bsgom pa gsang ba bzlog pa zhes pa ni bsgom pa'i rim pa shin tu dkrugs nas mngon par brjod pa'o/ /snying po thams cad sgrub pa yin/ /zhes pa ni 'di thams cad kun gyi snying po dpal bde mchog rab tu sgrub par byed pa yin no zhes pa'i don to/ /rgyud rnams kun gyi spyi yi ni//zhes pa ni bcom ldan 'das 'di gong na med pa'i ngo bo yin pa'i phyir rgyud gzhan thams cad kyi thun mong ngo / /sems ni yongs su smin pa dag /ces pa ni sems yongs su smin pa de yang rim gyis mthar sangs rgyas zhes pa ste/ de rnams kyi yang thun mong ba'o/ /'dir ni sbyor sogs sngags rnams kyi//dam tshig de ltar bstan pa yin/ /zhes pa ni bsgom bzhin pa nyid kyis rnal 'byor dang shin tu rnal 'byor la sogs pa'i ting nge 'dzin nang du chud pa'i phyir de rnams kyi rang gi ngo bo bstan no zhes pa'i don to/ /'dir bsod nams dang mi ldan pa'i spyod yul du mi 'gyur bar gsungs pa/gsungs pa zhes bya ba la sogs pa ste/ de bzhin gshegs pa'i dbugs dbyung zhes pa ni de bzhin gshegs pa nyid ni de bzhin gshegs pa ste/ de rnams kyis dbugs dbyung ba de'i phyir dbugs 'byung ba'i rgyu mtshan du zhes pa'i don to//ci ste bsod nams dang ldan pa nyid kyi yul yin na/ 'o na bsod nams dang bral ba'i ji ltar thabs su 'gyur zhes te/ de bzhin gshegs pa rnams thugs kyi bde bas bzhugs pa'o/ /de'i rjes las rdo rje de bzhin gshegs pa'i dbugs dbyung ba'i rgyur bcom ldan 'das kyis gsungs so//ji ltar gsungs she na/ gsungs pa/ dag pa'i lus zhes pa la sogs pa ste go sla'o/ /'di ni nges par bstan pa bcu gcig pa'o// //de nas bsrung min zhes pa la sogs pa gsungs te/ sbyin sreg med ces pa yan chad go sla'o//gal te bsrung bar bya ba la sogs pa nye bar mkho ba ma yin na/ 'o na ci bsgom par bya zhe na/ gsungs pa/ mdor na zhes bya ba la sogs pa ste/ mdor bsdus pa'o/ /bsrung min zhes bya ba la sogs pas kun bsdus so/ /sems 'dus tshul can yin zhes pa ste/ sems ni bde ba chen po'i rang bzhin gnyis su med pa'i byang chub kyi sems so/ /de nyid 'dus pa ni tshogs pa ste/ chos thams cad ro gcig pa'i ngo bo yin pa'i phyir ro/ /de'i ngo bo ni bcom ldan 'das zhes pa lhag ma'o/ /gzung bya zhes bya ba la sogs pa la/ de la bcom ldan 'das ni gzung bya'o//rnam shes ye shes ni zhes pa ni/ rnam par rtog pa dang bcas pa dang / rnam par rtog pa med pa gnyis so/ /bla mas bstan la zhes pa ni bla mas bstan pa las slob mas mchog nyid do/ /phyi rol gyi ni zhes pa la sogs pa la/ lam zhes pa ni nyan thos pa la sogs pa'i'o//phyi rol gyi ni bstan bcos pa/ /lam de shin tu ring ba yin/ /zhes pa ni phyi rol gyi bstan bcos kyi rig pa yang ring bar 'gyur zhes pa'i don to/ /da ni ston pa'i rang gi ngo bo gsungs pa/ thabs kyis zhes bya ba la sogs pa ste/ thabs zhes pa ni bsnyen bkur gyi thabs kyis so//rnal 'byor pa rnams zhes pa ni rnal 'byor pa'o/ /bla ma'i bsnyen bkur la brtson pa zhes pa ni bla ma la bsnyen bkur mchog tu byed pa'o/ /ston pa'i mtshan nyid bstan pa dang / zhes pa ni bla ma'i spyan sngar gzhung gi sgo nas 'khyud don mi rigs pa'o//dpa' bos de nyid bstan pa yin/ /zhes pa ni dpa' bo bde mchog 'khor lo bdag nyid kyis 'di rab tu ston par 'gyur ro zhes pa'o/ /ji ltar ston zhe na/ skad cig ces pa la sogs pa ste/ skad cig rnam pa'i rnal 'byor bdag /ces pa ni/ phyag mtshan la sogs pa la mi ltos par bde mchog gi rnal 'byor dang ldan par ro//skad cig rnam pa'i phyag rgyar ldan/ /zhes pa ni/ bdag nyid dang dus mnyam pa nyid du shes rab dang ldan pa'o/ /kun nas kun du skad cig ste/ /zhes pa ni gzhal yas khang la sogs pa rnams de nyid kyi tshe rdzogs pa'o//skad cig gis ni gsang sngags brjod/ /ces pa ni/ oM AHhUM zhes bya ba la sogs pa'i sngags brjod par dgongs pa'o/ /sbas dang lta dang lag bcangs dang / /'khyud dang gnyis gnyis la sogs pa/ /zhes pa ni 'dir bdun pa'i don gyi dang po'o//gong nas gong du bsten zhes pa ni gzhan dang sbyar ro/ /bya ba'i rgyud la sogs pa 'di rnams las gong ma'i gong ma bcom ldan 'das nyid yin zhes pa'i don to/ /de bzhin gshegs pas dbugs 'byin gsungs/ /zhes pa ni bya ba la sogs pa'i rgyud du/ bcom ldan 'das kyis mngon par gsungs pa yongs su ma shes pas de bzhin gshegs pa rnams mngon sum bzhin du thugs mi bde ba skyes so//de lta bas na dbugs dbyung ba'i phyir bcom ldan 'das kyis gsungs so zhes dgongs pa'o/ /ci gsungs she na gsungs pa/ /thams cad 'dir ni bstan pa yin//zhes pa ni 'dir mngon par bstan cing brjod pa nyid kyi phyir de nas bde ba la dbugs zhes pa'i don to/ /gzhan dag snying po med rtswa 'dra/ /zhes pa ni rgyud 'di nyid kyi phyir na bya ba la sogs pa'i rgyud gzhan snying po med pa'i sog ma dang mtshungs pa'o/ / da ni che ba'i bdag nyid gsal bar gsungs pa/ de nyid srog chags rnams kyi srog /ces pa ste bde ba chen po gnyis su med pa'i rnam par shes pa de nyid 'gro ba'i srog tu gyur pa'o/ /de nyid mi 'gyur dam pa yin te/ thog ma dang tha ma med pa yin zhes pa ni de'i phyir bstan pa'i dngos po'i bye brag de las tha dad med pa'i phyir ro//lus kun la ni rnam par gnas/ /zhes pa ni/ de nyid g.yon pa'i yang ngo bo yin pa'i phyir ro/ /de nyid sangs rgyas ye shes te/ /zhes pa ni de nyid sangs rgyas rnams kyi ye shes so/ /he ru ka dpal yin par bshad//ces pa ni/ 'di nyid dpal he ru kar brjod do/ /phra ba'i snying po'ang 'dzin pa yin/ /zhes pa ni de nyid phra ba dang rags pa'i ngo bo dang 'jig rten las nges pa zhes pa'i don to/ /bstan bcos dag ni ma lus dang / /zhes pa ni/ rgyud ma lus pa thams cad do//rig byed ces bya ba ni phyi rol pa'i bstan bcos so/ /grub mtha' zhes pa ni grub pa ste/ yang srid pa mi 'grub par 'gyur ba brjod pa zhes pa nyan thos kyi sde snod la sogs pa'i grub pa'i mtha'o/ /legs par gnas zhes pa ni de'i phyir de thams cad du skyed par byed par legs par gnas so//mjug bsdu ba la sogs pa gsungs pa/ 'gro ba 'di kun sangs rgyas lnga'i bdag nyid/ ces bya ba la sogs pa ste/ sangs rgyas lnga'i bdag nyid ces pa ni rnam par snang mdzad la sogs pa de bzhin gshegs pa lnga'i rang bzhin no//'gro ba 'di kun zhes pa ni 'di thams cad de gzugs dang tshor ba la sogs pa'o/ /gang du zhes pa ni gang du yang ngo / /drug pa zhes pa ni drug pa rdo rje sems dpa' mtshan gzhan bde ba chen po'i sangs rgyas so zhes bya'o/ /gcig pu nyams ni du mas gar mdzad do//zhes bya ba ni/ de nyid gcig pu nyid du ma'i rnam par ston zhes pa'i don to/ /du ma nyid du bstan pa'i phyir/ /'dug dang zhes bya ba la sogs pa ste/ 'dug dang zhes pa ni gnas pa'o/ /ldang ba nyid ces pa ni ldang ba yang ngo / /'jug pa ni 'jug pa'o/ /rdzogs pa ni rdzogs pa'o//byin gyis brlabs zhes pa ni byin gyis brlabs pa'o/ /ting nge 'dzin zhes pa ni bsam gtan no/ /bsdus pa zhes pa ni bsdus pa'o/ /'di thams cad bde ba chen po'i mthus yin par dgongs pa'o/ /cho ga ming zhes bya ba ni/ gang cho ga'i ming de cho ga zhes pa'i don to//thabs dang shes rab kyi rang bzhin dag ni A li dang kA li dbyer med par dgongs pa'o/ /de nyid ces pa ni A li dang kA li'i ngo bo yin pa'i phyir ro/ /kun skyed ces bya ba ni A li dang kA li ni thabs dang shes rab kyi ngo bo yin pa'i phyir ro/ /'byin dang sdud par byed pa yin//zhes pa ni dpa' bo la sogs pa'o/ /gnyis su med par gsungs pa/ A li ni a la sogs pa'o/ 'di ni zhes pa ni bcom ldan 'das te/ A li ni bcom ldan 'das ma'i ngo bo yin pa'i phyir dang / bcom ldan 'das dpal bde mchog de nyid kA li'i ngo bo yin pa'i phyir ro//mchog nyid lhag par gnas pa yin/ /zhes pa ni 'di nyid kyi phyir na brjod pas lha la sogs pa lhag par gnas par 'gyur zhes pa'i don to/ /bskyed pa ni de nyid kyi sbyor ba thabs dang shes rab kyi bdag nyid du rdzogs pa'o/ /sngags rnams kyi ni rgyud nyid ces pas ni sngags rnams kyi phan yon gsungs pa/gang zhig 'di rtag ces bya ba la sogs pa ste go sla'o/ /der ni lag sogs rgyan yin te/ zhes pa ni mgo bo lnga bcu tham pa ni A li kA li'i ngo bo yin pa'i phyir ro/ /ska rags gnas rnams thams cad yin/ /zhes pa ni ska rags rig pas yongs su bskor zhing gnas pa'i phyir sgrub pa po kun gyi gnas so//mjug bsdu ba la sogs pa gsungs pa/ 'dzin byed pa zhes bya ba la sogs pa ste/ chos kun rtogs par byed pa yin/ /zhes pa ni chos thams cad khong du chud pa'o/ /'dis ni zhes pa ni/chos kun khong du chud par byed pa ste/ bstan bcos thams cad A li kA li'i rang bzhin yin par khong du chud pa'o zhes dgongs pa'o/ /rnal 'byor chen po'i ting nge 'dzin gsungs pa/ A li kA li zhes pa la sogs pa ste/ sgrub thabs kyi bshad sbyar las bla mas gsungs pa'i byin brlabs te go sla'o//'di ni nges par bstan pa bcu gnyis pa'o// //de nas gzhan yang zhes pa la sogs pa la/ dpa' bo rnal 'byor ma gnyis med/ /ces pa ni dpa' bo bde mchog dang rnal 'byor ma dag lhan cig gnyis su med par ro gcig pa'i ngo bo yin no//ji ltar gcig po gnyis su med pa yin zhe na/ gsungs pa/ he ru ka dpal zhes bya ba la sogs pa ste/ yi ge'i sa pa yin zhes pa ni/ pu la sogs pa'i yi ge las zhes dgongs pa'o/ /pul+lI ra ma la ya mgo la zhes pa ni yi ge pu yongs su gyur pa las pul+lI ra ma la ya'i rang bzhin mgo la rig par bya'o//de bzhin du gzhan la yang de dang de'i yi ge yongs su gyur pa las de dang de'i gzugs su go bar bya'o/ /de dang der son pa'i rtsa rnams ni lha'i ngo bo ste/ bcu bdun pa'i nges par bstan pa las bstan par bya'o//'gro ba zhes bya ba ni 'gro ba'i bya ba yang ngo / /gang yin der ni rnam bkod na/ /zhes pa ni de gang du gnas kyang yi ge pu la sogs pa las gnas ji lta bar bsgom par bya'o/ /'jig rten gsum gyis mi g.yos so/ /zhes pa ni/ de ltar rtag tu khyab 'jug dang bde byed la sogs pas zil gyis gnon par mi 'gyur ro zhes pa'i don to//mngon par brjod pa 'bum pa'i rgyud/ /ces pa ni 'dir lnga pa'i don gyi drug pa'o/ /de nas zhes pa ni phan yon chen po'i rgyu gang gis de nas zhes dgongs pa'o/ /bsdus nas bstan pa nyid gsungs pa/ nam mkha' dang ni mnyam pa'i rgyud/ /ces pa ni/ nam mkha' dang mnyam pa 'bum phrag gcig nas zhes pa ni de'i nang nas so/ /bshad ces pa ni bstan pa nyid do/ /snying po bsdus pa zhes pa ni snying po bsdus pa'i ngo bo ni snying po bsdus pa ste dpal he ru ka'i ngo bo'o/ /mdor bstan pa yi sprul pa yin//zhes pa ni mdor bstan cing bshad pa sprul ba'i sku'i bdag nyid bstan pa'o/ /rgyas bshad longs spyod rdzogs par 'dod/ /ces pa ni/ rgyas par bshad pa ni longs spyod rdzogs pa'i bdag nyid do/ /shin tu rgyas bstan ma lus nyid/ /mya ngan 'das pa'i de nyid bstan//zhes pa ni shin tu rgyas par bstan pa ma lus pa chos kyi sku la dbyer med pa'i don to/ /rnam pa gzhan gyis kyang sku gsum bstan pa gsungs pa/ sku gsum 'khor lo zhes pa la sogs pa ni chos dang longs spyod dang / sprul pa'i mtshan nyid kyis thugs kyi 'khor lo la sogs pa rim pa ji lta bar chos kyi sku la sogs pa'i rang bzhin zhes bya ba'i don te/bsod nams dang ye shes kyi tshogs kyis thob pa'o/ /bden pa gnyis la brten pa yin/ /zhes pa ni bden pa gnyis la brten par gyur ba ni bden pa gnyis kyi bdag nyid yin pa'i phyir ro//gang rnams kyis 'dir nus par 'gyur ba de nyid brtag pa'i phyir gsungs pa/ blo ngan zhes bya ba la sogs pa ste/ blo ngan zhes pa la blo ngan pa ni rang bzhin ma rungs pa'i blo ngan no/ /glen zhing zhes pa ni glen pa yang ngo / /shes rab dman zhes pa ni shes rab dman pa'o//log lta can zhes pa ni log par lta bar zhugs pa'o/ /phyi rol bstan bcos kyi 'chal pa/ /zhes pa ni phyi rol gyi bstan bcos ched du byed pa'o/ /bla ma'i lam ni sun 'byin zhes pa ni gang rnams bla ma'i zhal gyis bshad pa la tsher ma ltar gnod pa byed pa'o/ /de dag kun kyang rnam spangs te//gus kyang bshad par mi bya'o/ /zhes pa ni 'dir de thams cad ring du spangs nas gang zhig gzhan rnams las bshad na de rnams gus par 'gyur zhes pa'i don to/ /skal dang skal min zhes pa la sogs pa la/ skal pa ni thabs dang shes rab dag gis rnam pa'i cha dang ldan pa'o//skal med ces pa ni de'i cha thabs dang shes rab kyi bye brag med pa ste/ de nyid kyi khyad par des so/ /der zhes pa ni gnyis su med par 'dres pa'o/ /dbang gi lha mo mchod bya zhes pa ni/ de la rnal 'byor ma rnams gtso mor gyur ba'i phyir dbang gi lha mo rdo rje phag mo dang por mchod par 'os pa'o//bka' bsgo'i lha mo zhes pa ni/ bka' gnang ster ba'i lha'i bdag po bcom ldan 'das mchod par bya bar 'os so/ /de 'og ces pa ni gzhan dang sbyar ro/ /dpa' bo zhes pa ni dpa' bo'i gzugs kyis 'khrungs pa'o/ / ma lus kun spyod ces pa ni ma lus kun du spyod pa'i don to/ /'khor ba las grol zhes pa ni sems can 'khor ba las sgrol bar byed pa'o/ /gtso bo zhes pa ni khams gsum gyi bdag po'o/ /ma lus rig byed sprul pa ste/ /zhes pa ni rgyud la sogs pa ni thams cad kyang sprul pa'o//de gnyis su med pa de ji lta bur gyur pa zhes bya zhe na/ gsungs pa grub pa'i mtha' zhes pa ni sangs rgyas pa rnams kyis nges par bsgom par bya ba de nyid dam tshig go/ /de zhes pa ni gnyis su med pa'o/ /khyod kyis zhes pa ni khyod kyis so//sangs rgyas mu stegs zhes pa ni nyan thos la sogs pa rnams so/ /rnyed dka' ba nyid du bstan pa'i phyir/ /sgra dang sgra nyams zhes bya ba la sogs pa ste/ sgra dang sgra nyams pa'i yul gyis brda de nyid kyis don thob pa'i phyir na lam de'i rjes su 'brang ba'o/ / bsdus don zhes pa ni bsdus pa'i ngo bo dpal bde mchog mchod pa'o/ /blangs pa zhes pa ni bstan pa'o/ /yang dag ces pa ni phyin ci ma log pa'o/ /brda yi tshig ni rgyas pa yin/ /zhes bya ba ni brngar btags pa'i tshig nyid rgya che ba'o/ /gang gi phyir sgra dang sgra nyams gnyis kyis brjod pa de'i phyir rtogs dka' ba zhes pa'i don to//gang gis kun spyod mi shes par/ /zhes pa ni gang gis kun du spyod pa'i don mi shes par zhes pa'o/ /rnal 'byor pa zhes pa ni rnal 'byor pa'o/ /rnal 'byor ston zhes bya ba ni bdag nyid rnal 'byor par ston pa'o/ / de'i zhes pa ni de'i 'o/ /'bras bu'i de nyid ni zhes pa ni kun tu spyod pa'i don gyi 'bras bu'o/ /rnam pa gzhan gyis kyang rtogs dka' ba nyid bstan pa'i phyir gsungs pa/ gsungs zhes pa la sogs pa ste/ sngon zhes pa ni sngar ro/ /sems can dang po zhes pa ni dang po'i sems can la bde mchog gis so//gzhan du gsungs pa zhes pa ni tshig med pa'i brdas bstan pa'o/ /sgrub pa pos ni rab mnyam gzhag /ces pa ni thos pa dang bsam pa'i yul la mnyam par gzhag pa'i yid can gyi sgrub pa pos shes par bya zhes pa'i don to/ /da ni A li kA li'i mthu gsungs pa/rgyal bas zhes bya ba la sogs pa ste/ las kyi bya ba gang yang rung / /dge dang mi dge brtags te bya/ /zhes pa ni/ sgrub pa pos gang cung zad dge ba 'am/ mi dge ba sems pa de thams cad des bsgrub par bya zhes dgongs pa'o/ /yi ge mtha' dang dbus dag ces pa ni A li kA lis yongs su bskor ba'o//der ni zhes pa ni de'i gnas su'o/ /thams cad rab tu grub ces pa ni thams cad grub par 'gyur ro/ /'di ni nges par bstan pa bcu gsum pa'o// //de nas zhes bya ba la sogs pa la/ rgyud rnams thams cad du zhes pa ni bya ba la sogs pa'i rgyud rnams so//sangs rgyas bzhi yi gdan bzhugs pa/ /zhes pa ni bdag nyid kyi mdun gyi phyogs su ba'i lci ba la sogs pas rnam par spras pa'i sangs rgyas bzhi'i gdan rnam par dag pa dkyil 'khor gru bzhi par gyur pa ri rab kyi steng du gnas pa'i nyi ma'i dkyil 'khor gyi gdan la bzhugs pa'o//rdo rje dang po zhes pa la sogs pa ni dang po ni rdo rje sems dpa' ste rigs lngar mtshon pa'o/ /bde mchog la sogs gzhan gyi mtshan can no/ /mchod par bya zhes pa go sla'o/ /cir gyur pa zhe na/ gsungs pa/ rdo rje la sogs dpa' rnal 'byor/ /zhes bya ba la sogs pa la/ dpa' bo rnal 'byor zhes pa ni rdo rje phag mo dang mkha' 'gro ma la sogs pa bzhi'o/ /dpa' bo rnal 'byor dbang phyug gtso/ /zhes pa ni 'khor lo gsum la bzhugs pa'i dpa' bo thod pa'i dum bu la sogs pa dang rnal 'byor ma rnams dang /de bzhin du khwa gdong ma la sogs pa brgyad dang gtso bo'o/ /me long la sogs rnam pa bzhi/ /zhes pa ni mtshams rnams su me long dang sgra dang ro dang reg bya dang / chos rnams rnam par dag pa bdud rtsi lngas gang ba'i thod pa bzhi yang ngo //ji ltar mchod pa yin zhe na/ gsungs pa/ gnyis med gnyis su med sbyor nyid/ /ces pa la gnyis med ni dpal rdo rje phag mo dang ldan pa'i bcom ldan 'das so/ /de gnyis su med par sbyor ba dang tha mi dad pas nga rgyal lo/ /de nas bdag nyid 'khor lo gsum gyi gtso bor gyur pa'i bcom ldan 'das mchod par bya zhes pa'i don to//gnyis med ces pa ni sems tsam nyid kyis mchod par bya ba dang / mchod pa po dang / mchod pa rnams tha mi dad par blta bar bya'o/ /rdzas ni me tog sogs zhes pa ni zhu ba'i rdzas dang /me tog dang spos la sogs pa'o/ /de gnyis gsungs pa/ dbul bar bya zhes pa la sogs pa ste/ me tog ces pa ni me tog la sogs pa'o/ /re re nas zhes pa ni so sor lha rnams la dbul bar bya zhes pa'i don to/ /de ltar phyi rol gyi mchod pa bstan nas/lag pa'i mchod pa bstan pa'i phyir gsungs pa/ phyag rgya lnga sogs zhes bya ba la sogs pa ste/ phyag rgya lnga sogs mchog lus kyi/ /zhes pa ni dpal bde mchog gi nga rgyal sngon du 'gro bas sku la 'khor lo la sogs pa'i phyag rgya lnga 'chang ba'o/ /sogs pa'i sgras ni thal ba gzung ngo //pha rol phyin drug pha rol son/ /zhes pa ni pha rol tu phyin pa'i ngo bo phyag rgya rnams 'chang bas pha rol phyin drug pha rol son no/ /lag pa'i mchod sogs zhes bya ba la sogs pa ni/ lag pa'i mchod pa nyid dang por gyur pa nyid kyi phyir ro/ /dang po ye shes can zhes pa ni rdo rje sems dpa' la sogs pa mchod par 'os pa rnams yongs su shes pa dang ldan pa'i sgrub pos so//shes par bya zhes pa ni don gsal bar bya ba'o/ /blo ldan dpa' bos zhes pa ni rdo rje rnal 'byor ma dang ldan pa ste/ lag pa g.yon par mchod cing dpa' bo dang rnal 'byor ma rnams kyi sa bon gyi bdun nyid do//rdo rje sems sogs zhes pa ni/ /rdo rje rnal 'byor ma shes par bya zhes dgongs pa'o/ /lag pa'i lha gang zhe na/ gsungs pa/ rnal 'byor ma drug ces pa ni rdo rje phag mo la sogs pa'i rnal 'byor ma drug go/ /sngar ji ltar zhes pa ni ji ltar go ba'i skabs su bstan pa'i sa bon gyi bdun nyid do//rdo rje sems sogs zhes pa ni rdo rje sems dpa' la sogs pa drug go/ /bcu gnyis zhes pa ni dpa' mo drug dang dpa' bo drug ste lha bcu gnyis su 'gyur te/ lha gzhan dang gzhan ni rtsa ba'i rgyud du go bar bya'o//sbyar bya zhes pa ni de dag ces pa nyid do/ /dpa' bo chen po zhes pa ni dpa' bo chen po ni sgrub pa po'o/ /lnga po lnga dang yang dag bsre/ /zhes pa ni bdud rtsi rnam pa lnga dang / sgron ma lnga la sogs pa dang lhan cig tu me tog la sogs pa rnams dang bsre ba'o/ /'o ma dang yang bsre bar bya//zhes pa ni/ dngos po de dang ldan pa med na byang chub kyi sems tsam dang lhan cig tu zhes pa'i don to/ /mchod pa des ni zhes pa ni mchod pa yis so/ /legs gnas zhes pa ni yang dag pa'i gnas lag pa g.yon pa'o/ /spyod dang grol ba'i 'dod dang ldan//zhes pa ni de'i spyod pa dang grol ba'i mtshan nyid mngon par 'dod pa thob par 'gyur ro/ /bkren zhes pa ni dbul ba'o/ /lag pa'i mchod pas zhes pa ni lag pa'i mchod pas so/ /thob par 'gyur zhes pa ni don thob par 'gyur ba'o/ /mchod pa zhes pa ni mchod pas so//dpa' bo 'di ni dpa' chen po/ /zhes pa ni/ 'dir rdo rje sems dpa' la sogs pa'i dpa' bo'i bdag nyid dpal bde mchog go/ /rnyed dka' zhes pa ni rnyed par dka' ba'o/ /spyod brtul zhugs zhes bya ba la sogs pa ni/ 'dod pa'i 'bras bu kun rab ster/ /zhes gzhan dang sbyar bar bya'o//'dis zhes bya ba ni lag pa'i mchod pa bstan pa'i rjes thogs su'o/ /rang mchod ces bya ba bdag nyid kyis bya ba'o/ /'dod pa'i 'bras bu kun rab ster/ /zhes bya ba ni de'i mngon par 'dod pa'i 'bras bu thams cad ster nus pa'i bde mchog gi skur 'gyur ro zhes pa'i don to//spyod brtul zhugs zhes pa ni 'og nas 'chad par 'gyur ba'i spyod pa'i cho ga yang thob par 'gyur ro zhes go bar bya'o/ /rnal 'byor ba'i zhes bya ba ni rnal 'byor pa'o/ /rnal 'byor dbang phyug kun gyi gtso/ /zhes pa ni rnal 'byor gzhan thams cad kyi bdag por 'gyur ro zhes dgongs pa'o//'di ni nges par bstan pa bcu bzhi pa'o// //de nas spyod pa'i cho ga zhes bya ba la sogs pa la/ dpa' bo zhes pa ni bde mchog gi bdag nyid kyi sgrub pa po'o/ /gnyis med rnal 'byor ma zhes pa ni rigs dang thabs cig dang gnyis su med pa'i rnal 'byor dang ldan pa ste/shes rab dang bcas pa zhes bya ba'i don to/ /nus pa zhes pa ni cung zad rnal 'byor pa'i nus pa'o/ /brtul zhugs spyod ces pa ni spyod pa'i brtul zhugs so/ /yid la 'dod pa zhes pa ni spyod pa gsum la sogs pa gang rung ngo / /dpa' bo chen po zhes pa ni sgrub pa po'o//srog chags yan lag gos bgos pa/ /zhes pa ni stag gi pags pas g.yogs te bgos pa'o/ /bde ba don gnyer bskyed par bya/ /zhes pa ni snyoms 'jug gi bde ba don du gnyer bar gyur na de'i bde ba skye bar 'gyur ro zhes pa'i don to//mchod phyir thogs zhes bya ba la sogs pa ni rig byed dang drang srong gis byas pa'i mchod phyir thogs yongs su spangs nas gtsang sbra gzhan gyis lus dag par bya'o zhes dgongs pa'o/ /'dod ces pa ni yid la 'dod pa'o/ /rnal 'byor ma kun zhes pa ni rigs lnga dang 'brel pa'i rnal 'byor ma thams cad do//'dod pa zhes pa ni yid la 'dod par gyur pa'o/ /spyod grol don gnyer zhes pa ni spyod pa dang grol ba'i 'bras bu don du gnyer bar byed pa'o/ /da ni sngags kyis gzugs la sogs pa rnam par dag pa gsungs pa/ rtsa ba'i sngags zhes pa la sogs pa ste/rtsa ba'i sngags zhes pa ni phreng ba'i sngags so/ /dpa' bo gang zhes pa ni dpa' bo gang gi'o/ /tshangs pa'i skud pa zhes bya ba la sogs pa ni thog ma nas kun du bsgrubs pa'i tshangs pa'i skud pa'o/ /brgya phyed phreng bas brgyan pa yin/ /zhes pa ni mgo bo lnga bcu'i phreng ba'o//go cha drug ces pa ni go cha'i sngags drug gis so/ /dpa' bo zhes pa ni dpa' bo'i'o/ /rgya 'dis lus ni mdzes pa yin/ /zhes pa ni sku la phyag rgya drug gis brgyan pa'o/ /rdo rje phag mo'i sngags gang yin/ /zhes pa ni rtsa ba'i sngags so/ /mgur chus skye ba zhes pa ni mgrin pa la sogs pa'i mgul rgyan no//mdzes zhes pa ni mdzes par ro/ /sangs rgyas kun gyi mkha' 'gro ma/ /zhes pa ni oM sarba bud+d+ha DA ki nI ye zhes bya ba la sogs pa snying po'i sngags so/ /pags pa'i gos ni 'dzin pa'i mchog /ces pa ni stag gi pags pa'i na bza'i mchog sham thabs su byas pa'o//lha'i sku zhes pa ni bde mchog gi sku'o/ /shes rab DA ma ru zhes pa ni phag mo'i cang te'u'o/ /khams su brtag ces pa ni so dang sen mo la sogs pa'i gzugs kyi rnam par gzhag pa'o/ /yi ge bdun gyi gsang sngags kyi//zhes pa ni nye ba'i snying po'i sngags so/ /rnal 'byor ma drug gsang sngags gang / /zhes pa ni rnal 'byor ma drug gi go cha'i sngags so/ /'khor lo kun gyi rnal 'byor ma'i/ /zhes pa ni 'khor lo gsum la sogs pa'i rnal 'byor ma'i sngags so/ /sngags ni btung ba'i thong pa yin//zhes pa ni ye shes kyi bdud rtsi'i snod do/ /rnam par snang mdzad yum sngags dang / /zhes pa ni lha mo'i nye ba'i snying po'i sngags so/ /de ltar bdag nyid rnams bsams nas/ /zhes pa ni de ltar bstan pa'i rim pas bdag nyid go bgo ba'o/ /tsham ngam sngags kyis legs par bsrung //zhes pa ni zhal bzhi pa'i sngags kyis yang nas yang rgyun du brjod cing bsrung bar bya ba'o/ /tshangs par spyod pa zhes pa ni tshangs pa ni bde mchog gi bdag nyid do/ /spyad pa spyod cing bsgom par blta bar bya'o/ /rtag tu bsam zhes pa ni rgyun du byed pa'o/ / rkang pa brgyad pa'i sngags kyis mchod/ /ces pa ni rkang pa brgyad pa'i sngags kyis rang dang gzhan dang bla ma dang sangs rgyas la sogs pa rnams mchod par bya'o/ /nyin mo zhes bya ba la sogs pa ni go sla'o/ /bdag nyid ji bzhin zhes pa ni bdag nyid nga rgyal byed pa ji lta bar ro/ /'gro de bzhin zhes pa ni sems can rnams so//bdag de bzhin zhes pa ni ji ltar gzhan 'dod pa'i nga rgyal byed pa de bzhin du bdag kyang ngo / /nga rgyal mchog ces pa ni nga rgyal gyi mchog bde mchog ces pa'i don to/ /he ru ka dpal go 'phang gnas/ /zhes pa ni dpal he ru ka'i go 'phang la rnal 'byor pa gnas so zhes dgongs pa'o//rigs lnga'i zhes bya ba la sogs pa ni rigs kyi dngos po gcig nyid la sna tshogs lngar brtags te/ de dang der spyod pa la 'gal ba med do zhes bya ba'i don to/ /spyod pa'i 'bras bu gsungs pa/ de ltar zhes bya ba la sogs pa la de ltar ni spyod pa'i sems can no//go 'phang mchog tu 'gro bar 'gyur/ /zhes pa ni dpal bde mchog la nye bar gnas pa'o/ /gnyis med ye shes sems ldan la/ /zhes pa ni dpal bde mchog gi nga rgyal gyis so/ /'di ni nges par bstan pa bco lnga pa'o/ / gzhan yang phyi ma'i dus kyi tshe/ /zhes bya ba la sogs pa la/ phyi ma'i dus kyi tshe zhes bya ba ni rtsod pa'i dus so/ /dus mthar zhes pa ni nyon mongs pas shin tu 'khrugs pas so/ /dngos grub mi thob ste zhes pa ni skye ba 'di la zhes rig par bya'o/ /skye ba zhes pa tshe 'di nyid do//gzhan du zhes pa ni gzhan du'o/ /ci rnam pa thams cad du mi 'grub bam zhe na/ gsungs pa/ gzhan du sangs rgyas ming can gyi/ /zhes pa ni dpal bde mchog las gzhan gyi sangs rgyas kyi ming can gyis 'grub par mi 'gyur ro zhes bya bar dgongs pa'o//phyag rgya zhes bya ba la sogs pa ni ngo mtshar drug gam yul yang ngo / /mi 'gyur zhes pa ni 'dir 'gro bas zhes pas gzhan dang sbyar ro/ /ji lta bu zhe na/ gsungs pa bde bar mi 'gyur zhes pa la sogs pa ste/ ji ltar nad kyi dbang gis skom 'thungs pa dang zas zos pas bde bar mi 'gyur ro//de ltar med pa zhes pa sngar gyi dang sbyar te/ de bzhin du zhes pa'i don to/ /'dod pa zhes pa ni yid la 'dod par gyur pa'o/ /'bang pas zhes pa ni gus pas so/ /bdag ces pa ni sgrub pa po'o/ /de nyid ces pa ni gzugs kyis so/ /rnal 'byor pa zhes pa ni 'khor lo sdom pa'i rnal 'byor pa'o//ji ltar he ru ka'i ye shes zhes pa ni ji lta ba bzhin du dpal he ru ka'i rnam par dag pa ji lta ba bzhin du shes pa'o/ /yongs su rgyu ba zhes pa ni 'khyam pa'o/ /ji ltar 'dod par zhes pa ni gnas la sogs par ro/ /yongs su rgyu ba'i 'bras bu gsungs pa/ring gnas zhes pa la sogs pa ste/ rnal 'byor ba'i bka' drin gyis thag ring po yang nye ba bzhin du thos par 'gyur ro/ /mig gis skad cig gis mthong zhes pa ni gzugs phra mo yang nye ba ltar mthong bar 'gyur ro/ /de ltar shes pa gzhan dri ro reg bya gsum pa la yang rig par bya'o//de ltar chos 'di shes nas ni/ /zhes bya ba ni de ltar bstan pa'i rim pas 'dir phan yon du rig par bya ba nyid do/ /bsam pa thams cad rdzogs byed yin/ /zhes pa ni mang bo'i tshig go/ /gnyis med ye shes brtul zhugs bzang / /zhes pa ni gnyis su med pa'i ye shes thob par byed pa'i thabs yin no zhes bya ba'i don to//'gro ba thabs dang shes rab kyi ngo bor rig par bya ba'i phyir gsungs pa/ A li kA li zhes bya ba la sogs pa ste/ A li kA li ma gtogs pa zhes pa ni dbyer med pa'i thabs dang shes rab dang bral ba'o/ / chos 'dis zhes pa ni phyi dang nang gi'o/ /gal te chos 'di 'dod na ni/ /zhes pa ni skye bo gal te gzhan yin na zhes par go bar bya'o/ /de yi dal ba don med de/ /'bras bu thob par mi 'gyur ro/ /zhes pa ni go sla'o/ /mdo la sogs pa rnams su yang 'di nyid sangs rgyas kyis phan pa'i don kun rab tu bstan pa bsdus pa'i don to//yang ci thabs dang shes rab kyi ngo bo gang zhe na/ gsungs pa 'jug par shes pa ni dpal bde mchog tu bskyed pa'o/ /ji ltar bstan pa zhes pa ni sngar ji ltar bstan pa'o/ /tshogs gnyis zhes pa ni tshogs gnyis thob pa'o/ /gnyis su med pa zhes pa ni rim pa dang lhan cig tha mi dad par ro//de ltar kun rdzob kyi bden pa bstan nas/ don dam pa'i bden pa brjod cing gsungs pa/ de nyid chos kyi rang bzhin shes/ /zhes pa ni/ drug pa'i don gyi dang po'o/ /de nyid ces pa ni mdor bstan pa'o/ /chos zhes pa ni rgyas par bshad pa'o//rang bzhin shes zhes pa ni shin tu rgyas par bshad pa'o/ /'ba' zhig ces pa ni/ shrI ni gnyis med ye shes te/ /zhes pa la sogs pa ste/ bzlog pa rdzogs rim ni don dam pa'i bden pa'o/ /'dod ces pa ni bstan pa'o/ /mjug bsdu ba la sogs pa gsungs pa/ngas ni sngon bshad ces gsungs te/ /ci bshad ce na/ gsungs pa/ bden pa gnyis la brten nas zhes pa ni 'dir zhes bya ba la sogs pa go bar bya'o/ /rnal 'byor pa zhes pa ni rnal 'byor pa'o/ /spros pa kun la zhes pa ni lha dang lha mo'i sku'o/ /dmigs nas zhes pa ni dmigs par bya'o//ji srid bzlog pa'i spyod yul du shes pa ni rnam par dag pa la thug par bya'o/ /rgyud thams cad kyi don dam pa'i bden pa bstan pa'i phyir ro/ /gsungs pa rgyud rnams kun du zhes pa la sogs pa ni bya ba'i rgyud la sogs pa rnams su gang zhig gsang ba'i mya ngan las 'das pa de 'dir yang bstan zhes pa'i don to//bden pa gnyis la yang dag brten/ /zhes pa ni 'dir yang zhes rig par bya'o/ /sems rnams thams cad bsal nas ni/ /zhes pa ni sems gzhan thams cad yongs su spangs pa'o//rnam par spyod ces pa ni ting nge 'dzin la spyod cig pa'o/ /'khor lo sdom pa mchog ces pa ni 'khor lo sdom pa kun rdzob tu gnas dang nye ba'i gnas la sogs pa'o/ /ci byas nas she na/ gsungs pa/ rnal 'byor ma'i zhes bya ba la sogs pa ste/ rnal 'byor ma zhes pa ni mkha' 'gro ma'i rigs rnal 'byor ma'i'o//gzugs dang brda dang tha snyad dag /ces pa ni rig par bya zhes pa lhag ma'o/ /khyim lnga la sogs grong zhes pa ni khyim lnga pos khyad par du byas pa'i grong la sogs pa rnams so/ /gnas zhes pa ni gnas pa nyid do/ /bsgrub par bya ba ni zhes pa ni 'dod pa'o//kun du zhes pa ni rgyu de'i phyir de thams cad bsgrub par bya ba'i gnas zhes pa'i don to/ /g.yon nas bskor ba la rab brtson/ /zhes pa ni g.yon gyis spyod pa'i rnal 'byor pa'o/ /sngar bshad 'khor lo'i zhes pa ni gnyis pa'i don gyi drug pa'o//bri bar bya zhes pa ni rnam par bsgom pa'o/ /da ni he ru ka'i mdzad pa gsungs pa/ dpa' bo'i sngags sogs zhes bya ba la sogs pa gsungs te/ dpa' bo'i sngags sogs rnal 'byor ma/ /zhes pa ni dpa' bo la sogs pa rnal 'byor ma'i sngags so/ /dgod par bya zhes pa ni gnas ji lta bar bsgom par bya'o//yid la 'dod pa zhes pa ni yid la mngon par 'dod pa'i bong bu'i rnam pa la sogs pa'o/ /shar gyi 'dab mar zhes pa ni shar la sogs pa'i 'dab ma rnams su'o/ /mkha' 'gro ma zhes bya ba ni mkha' 'gro ma la sogs pa'o/ /bong bu'i rnam par bsgom par bya//zhes pa ni bong bu'i rnam par bsgom par bya'o/ /he ru ka dpal zhes bya ba/ /zhes pa ni dpal he ru ka'i skur bsgyur la bsgom mo zhes pa'i don to/ /las rnams thams cad ces pa ni las thams cad dang nye bar ldan pa'o/ /lus ngag yid kyi las rnams zhes pa ni lus dang ngag dang yid kyi bya ba'o//bstan dang ma bstan zhes pa ni bshad dang ma bshad pa'o/ /gang bsams zhes pa ni bya ba la mngon par zhen pa'o/ /he ru ka dpal go 'phang gnas/ /zhes bya ba ni dpa' bo bong bu'i rnam pa'i rnal 'byor gyis gnas pa'o//'di ni nges par bstan pa bcu drug pa'o// //de nas zhes pa la sogs pa la/ dpal he ru ka zhes pa ni dpal he ru ka'o/ /drug pa zhes pa ni drug pa rdo rje sems dpa'o/ /sems kyi sprul pa zhes pa ni sems kyi rang bzhin no/ /dag pa'i chos zhes pa ni thams cad stong pa nyid do//de nyid ces pa ni de las lha'i sku gnyis so/ /bsrub bya bsrubs pa'i sbyor ba las/ /zhes pa ni mngal nas skye bar dkyil 'khor bsgom pa'i phyogs so/ /me long la sogs rnam pa bzhi/ /zhes pa ni me long la sogs pa rnam par dag pa thod pa bzhi po mtshams bzhir ro//mchod pa bzhi ru brjod ces pa ni 'dir de nyid mchod pa bzhir brjod pa'o/ /mkha' 'gro ma bzhi 'dab mar gnas/ /zhes pa ni pad+ma'i 'dab ma bzhi la mkha' 'gro ma bzhi'o/ /mA ma kI sogs bzang mo yin/ /zhes pa ni mkha' 'gro ma la sogs pa bzhi po de nyid ji ltar rigs par mA ma kI la sogs pa'i rang bzhin no zhes pa'i don to//'khor lor gnas zhes pa ni 'khor lo gsum la gnas pa'o/ /gnyis med ces pa ni rnal 'byor ma dang snyoms par 'jug pa'o/ /sems can 'khor ba las grol ba//zhes pa ni sems can rnams 'khor ba las grol bar byed pa'o/ /khro bo rnam rgyal la sogs zhes pa ni khro bo rnam par rgyal ba la sogs pa dang / /khwa gdong ma la sogs pa'o/ /sgo dang mtha'i mtshams zhes pa ni sgo rnams dang mtshams rnams su'o/ /bar du brgyad ces pa ni ji srid du brgyad du gyur pa'o//rnal 'byor ba'i 'chi ba ni sems ngal sos pa tsam yin no zhes bstan pa'i phyir gsungs pa/ sna tshogs zhes bya ba la sogs pa ste/ sna tshogs 'dul ba'i thabs zhes pa ni rnam pa sna tshogs kyis 'dul ba'i sems can la de dang de'i thabs kyis so//sems can don la brtson par mdzad/ /ces pa ni drug pa'i don gyi dang po'o/ /sba bar bya zhes pa ni gsang bar bya ba'o/ /gsang ba'i gnas zhes pa ni shin tu yang gsang ba'i chos yin pas gsang ba'o/ /ngal so zhes pa ni sems ngal sos pa tsam mo//'di nyid ni/ sems ni ngal sos rnal 'byor pa/ /mya ngan 'das pa mi ston pa/ /zhes bya bar sbyar ro/ /rnal 'byor pa zhes pa ni sgrub pa'i rnal 'byor pa'o/ /mya ngan 'das pa ni 'chi ba'o/ /rnal 'byor ma sogs dpa' bo dang / ji srid dngos grub 'dod kyi bar//zhes pa ni rnal 'byor ma la sogs pa dang / dpa' bo rnams bsgom pa ji srid kyi bar du zhes pa'i don to/ /'bras bu thob pa zhes pa ni 'bras bu cung zad thob kyang ngo / /rnal 'byor zhes pa ni rnal 'byor byed pa'o/ /'khor ba zhes pa ni 'khor ba'o/ /slob ma la phan phyir zhes pa ni slob ma la phan pa'i ched du'o//de ltar spyod pa'i zhes pa ni go sla'o/ /ji ltar sngar bshad sdig pa rnams/ /zhes pa ni gsum pa'i don to/ /rnal 'byor pa zhes pa ni rnal 'byor pa'o/ /dpal ldan he ru ka la sogs/ /zhes pa ni gzhan kun la yang gsum par rig par bya'o//dpa' bo dang ni zhes pa ni lha chen po'i dpa' bo'o/ /rnal 'byor ma zhes pa ni lha mo rnams dang ngo / /dkon zhes pa ni rnyed par dka' ba'o/ /ji ltar bud med byis gtam rjes yi rang / /zhes pa ni ji ltar chags pa can skyes pa dang bud med kyi gtam brjod pas dga' ba skye ba'o//kun smra bsten pa'i gtam yang rjod par byed/ /ces pa ni ji ltar dga' ba'i don du skyes pa dang bud med dag dus 'debs pa'i gtam la sogs pa brjod pa'o/ /lam yang bshad cing 'chi bar 'gyur ba yin/ /zhes pa ni/de ltar lam dang 'chi ba'i dngos po med par brjod pa ste 'tshang rgya zhes pa lhag ma'o/ /ji ltar rigs pa rnal 'byor lam ni bstan/ /zhes pa ni de ltar rig pa'i sgrub pa po'i bya ba lha dang lha mo'i rnal 'byor gyi mtshan nyid kyi lam zhes pa'i don to/ /gnas sogs rnal 'byor ma yi gnas//zhes pa ni/ gnas la sogs pa'i gnas rnams su/ /rnal 'byor ma rnams su bstan zhes pa'i don to/ /dpa' bo gnyis med rnal 'byor ma/ /zhes pa ni dpa' bo dang snyoms par zhugs nas gnas zhes pa'i don to/ /pul+lI ra ma lar rab gtum//zhes pa la sogs pa ni go sla'o/ /dpa' bo gnyis med rnal 'byor ma'o/ /zhes pa ni/ dpa' bo dang gnyis su med pa lhan cig tu gnyis med kyi sbyor ba la snyoms par zhugs pa'i don to/ /g.yon pa'i sgrub byed thabs kyis ni/ /zhes pa ni rnal 'byor ba sgrub pa'i thabs zhes pa'i don te/thabs zhes pa ni bshes pa'i don du thabs dang lhan cig gis so/ /rgal nas zhes pa ni pha rol du rgal ba'o/ /sgom pa'i rim pa ltar gsungs pa/ /mgur chu zhes bya ba la sogs pa ni go sla'o/ /dril zhes bya ba la sogs pa ni/ dril phyis kyis dri zhim par bya ba'o//chus zhes pa ni mi bskyod pas so/ /dri zhes pa ni rnam par snang mdzad do/ /kha dog la sogs pa'i gzugs zhes pa ni kha dog dkar po la sogs pa'i gzugs su bya ba'o/ /dbyangs kyi yi ge yongs bsgyur ba/ /zhes pa ni dbyangs kyi khro bo'i tshig yi ge hUM gis te/de las bdag nyid rdzogs par bsgom par bya'o/ /spyod pa'i brtul zhugs la zhugs par/ /zhes pa ni spros pa dang bcas pa'i spyod pa'o/ /rnal 'byor la legs gnas zhes pa ni yang dag pa'i rnal 'byor gyi don la gnas pa'o/ /dpa' chen zhes pa ni dpa' bo dang /'jigs su rung ba la sogs pa gar dgu'i nyams so/ /skal ba bzang po'i gar zhes bya ba ni/ gar byas pas rnal 'byor ma shin tu phul du byung bar brtson par 'gyur ro zhes pa'i don to/ /kun du dbug dang zhes pa ni mdor bstan pa'o/ /gzhan ni rgyas par bshad pa'o//srad bu'i phreng ba gcig gyur yin/ /zhes pa ni tshangs pa'i skud pas se ral ka byas pa'o/ /'og pag brgyad kyi phreng ba zhes pa ni brgyad kyi phreng gcig dang ldan pa'o/ /ske rags bcu drug shes par bya/ /zhes pa la ske rags ni ske rags kyi khyad par te/bcu drug po de yang phreng gcig dang ldan par rig par bya'o/ /phreng ba nyi shu rtsa lnga yin/ /zhes pa ni mgo bo'i phreng ba nyi shu rtsa lngas mgo la brgyan pa'o/ /yang na phreng ba zhes pa ni mgul rgyan byas pa ste/ de yang ri lu nyi shu rtsa lngar rig par bya'o/ / 'di ni nges par bstan pa bcu bdun pa'o// //bdag gis kun spyod rgyud 'di gsal bar byas pa yi/ /gang zhig zla ba 'dra ba'i bsod nams mkha' khyab pa/ /de yis 'gro ba kun la phan pa'i phyir/ /dka' ba med par byang chub myur thob shog /rnal 'byor ma kun du spyod pa'i bshad sbyar slob dpon ta thA ga ta rak+Shi tas mdzad pa rdzogs so/

CLOSE WINDOW