CLOSE WINDOW

D1397
བོད་ཡིག

@##/ /rgya gar skad du/ Ar+ya many+dzu shrI nA ma saM gI ti byA khya naM/ bod skad du/ 'phags pa 'jam dpal gyi mtshan yang dag par brjod pa'i rnam par bshad pa/ 'phags pa 'jam dpal gzhon nur gyur pa la phyag 'tshal lo/ /bcom ldan 'das rdo rje sems dpa' la phyag 'tshal lo//sngar nyid don dam thugs su chud kyang 'gro ba'i don du mngal gnas pa yi dpal ldan dang / /gnas dang gnas pa'i tshul gyis bzhugs shing 'dod pa'i don grub brtson pa mchog /phyogs bcu rnams na 'tsho zhing gshegs pa sras dang bcas pa rnams kyi zhabs la dang ba yi//rab tu btud de ji bzhin sgra sogs snga ma dang mtshungs de yi bka' bzhin bri bar 'os/ /de la mtshan yang dag par brjod pa'i don ma lus par rtogs par bya ba'i phyir mi'i dbang po grags pa zhes bya bas don gsal bar bstan pa'i phyir gsungs pa//gzhi dang de rkyen shes bya dang / /drug gi rigs la gzigs pa dang / /sgyu 'phrul dra ba mngon byang chub/ /byang chub sems kyi rdo rje dang / /chos dbyings me long ye shes dang / /kun rtog mnyam nyid bya ba sgrub/ /bsdus pa rigs lnga bstod phan yon/ /sngags dang rjes su yi rang ba/ / mnga' bdag gsum gyi bdag nyid ni/ /gzhung don rtogs par sla ba dang / /blo yi spyod yul 'gyur pa'i phyir/ /bsdus pa yin par shes par bya/ /zhes bya ba 'di dag legs pa nyid du gnas pa'i phyir de'i don la 'jug par bya'o/ /de la rgyud 'di ni skal ba'i rgyud de/ /sgyu 'phrul dra ba las bton pa'i phyir ro zhes kha cig 'dod do//de'i gzhung tshig la ni phun sum tshogs pa yang 'dod de/ /rnal 'byor chen po'i rgyud khri drug stong bar 'di skad bdag gis thos pa la sogs pa gleng gzhi'i tshig gsungs pa'i phyir ro/ /de bas na 'di ni gzhan gyi mtha' dang ldan pa ste/ de nas zhes gsungs pa'i phyir ro//de nas kyi sgra ni lnga pa'i tshig ste/ sdud pa dang 'grel pa'i sgra las 'di ni sdud pa'i sgrar shes par bya'o/ /sdud pa yang rnam pa gnyis te/ dus sdud pa dang / dngos po sdud pa'o/ /de la 'di ni dus sdud pa ste/ bar ma chad par bsdu ba'i tshig go/ /de'i phyir/ dper na dpal ldan rdo rje 'chang / /zhes bya ba la sogs pa gsungs te/ /de la dpal ni gnyis su med pa'i ye shes so/ /rdo rje ni de'i mtshan nyid do/ /de bas na gnyis su med pa'i ye shes dang ldan zhing rdo rje'i mtshan nyid 'dzin pas na 'chang zhes bya'o/ /des ci byed snyam pa la/ gdul dka' 'dul ba rnams kyi mchog /ces gsungs te/ gdul bar dka' ba 'dul bar byed/ /ces so/ /'dir gdul bya yang rnam pa gnyis te/ zhi bas gdul bar bya ba dang / sdug bsngal myong bar byas te gdul ba'o/ /'dir sdug bsngal myong bar byas nas gdul bar bya ste/ nyon mongs pa rab tu che ba yang /bla na med pa'i byang chub kyi lam la dgod par bya'o zhes dgongs pa'o/ /nyon mongs pa rab tu che ba gdul ba la thabs rnam pa du ma zhig gsungs pa las/ 'di ni mchog tu mi 'gyur pa ste/ de'i phyir rnams zhes pa ni de rnams kyi nang nas 'di mchog tu gyur pa'o//de yang skus 'dul ba la ni khro bo'i rnam pa dang / gsung gis 'dul ba la ni rdo rje thig pa dang / thugs kyis 'dul ba la ni bde ba'i ye shes so/ /de skad du dpal sangs rgyas thams cad dang mnyam par sbyor ba bde mchog las/ shin tu khro zhing gtum pa la//zhi bas nye bar mi sbyor te/ /shes rab thabs kyi sbyor ba las/ /khro bor de bzhin gshegs kun mdzad/ /ces pa dang / khams gsum rnam par rgyal ba'i rgyud las kyang / de nas 'jam pa'i dbyangs kyis ni/ /khro bo'i ming ni gshin rje'i gshed/ /mtshon cha me lce 'bar bas 'khrigs//drag la mthu rtsal drag dang ldan/ /de mthong nas ni khro bo gzhan/ /thams cad kyi ni lag cha 'chor/ /zhes gsungs so/ /de bas na gdul bya ma rungs pa gdul bar bya ba'i phyir rdo rje 'chang de nyid kyi mtshan gyi khyad par gsungs pa/ /dpa' bo 'jig rten gsum las rgyal//zhes gsungs te/ 'di ltar 'dod pa'i khams dang / gzugs kyi khams dang / gzugs med pa'i khams ni 'jig rten gsum mo/ /rgyal ba ni khams de dag na mthu dang / stobs dang / longs spyod dang / rigs dang / gnas kyis sems khengs shing dregs par gyur pa ste/de dag drag shul gyi spyod pas btul nas rang gi 'khor du byas pa ni rgyal ba'o/ /dpa' bo zhes bya ba'i don yang de nyid do/ /de dag gis ni rdo rje 'chang gi bdag gi don phun sum tshogs pa dang / gzhan gyi don phun sum tshogs pa dang / brjod par bya ba dang brjod bya'i don dgos pa bstan pa'o//da ni rdo rje 'chang de'i che ba bstan pa'i phyir/ rdo rje dbang phyug gsang ba'i rgyal/ /zhes gsungs te/ rdo rje ni de bzhin gshegs pa thams cad kyi yang dag pa'i ye shes kyi mtshan nyid do/ /dbang phyug ni chos thams cad la dbang du sgyur pa nyid kyi phyir ro/ /thun mong ma yin pa'i ye shes dang ldan pa'i phyir gsang ba'i rgyal po ste/rdo rje 'chang gi yon tan de 'dra zhes pa'i don to/ /da ni sku khro bos 'dul ba'i rgyan dang cha lugs bstan pa'i phyir/ pad+ma dkar po zhes bya ba la sogs pa gsungs te/ dkar nag phyed pa dang rgyas pa ste/ zlum la 'dzum pa dang bcas pa pad+ma'i 'dab ma lta bu'o//lhag ma go sla'o/ /de ltar rdo rje 'dzin pa nyid kyi don bstan nas 'khor bstan pa'i phyir/ khro gnyer rim par ldan la sogs/ /zhes bya ba la sogs pa gsung te/ de la rang rang gi rigs kyi mtshan ma 'dzin cing / /lag na rdo rje zhes bya ba'i ming can grangs mtha' yas pas nye bar bskor nas gtso bo'i phrin las dang mthun par bya ba'i phyir de dag thams cad kyang khro bo'i gzugs dang ldan par ston te//de'i phyir khro bo'i gzugs de yang ji lta bu zhe na/ 'jigs su rung dang zhes bya ba la sogs pa gsungs te/ mche ba gtsigs pa dang / khro gnyer bsdus pa dang /yan lag rags pa dang / spyan zlum pa dang / dur khrod kyi rgyan dang ldan pa la sogs pa ste des rang gi sde pa nyan thos la sogs pa 'jigs shing skrag par byed pas na de skad ces bya'o/ /dpa' byad can zhes bya ba ni gang 'jig rten na dpa' bo zhes bya ba ni dgra'i dpung pham par byas te mgo bcad nas 'ong ba ltar 'dis kyang ma rungs pa rnams kyi mgo bcad nas phreng ba byas pa dang /mgo bcad nas dbyug pa la btsugs te lag cha byas pa dang / stag gi pags pas smad dkris byas pa'o/ /de ltar khro bo rnams kyi mtshan dang / grangs dang / cha byad bstan nas/de dag gi phrin las bstan pa'i phyir/ gdul dka' 'dul zhes bya ba gsungs te/ gdul bar dka' ba ni tshar gcad pa'i yul lo/ /de yang gdul bya'i snang ba la sku khro bo'i gzugs su bstan te/ rang gi rigs kyi gtso bo'i mtshan ma ye shes kyi rdo rje bzung nas gsor bar byed cing /rdo rje'i rtse mo la yang blta bar mi bzod par 'jigs shing dus kyi me ltar 'bar ba'o/ /rdo rje phra mo dang / 'khor lo dang / ral gri la sogs pa mtshon cha'i tshogs dpag tu med pa rab tu spros te/ gdul bya rnams sdug bsngal nyams su myong bar byas nas rang gi mgon skyabs med par shes nas rdo rje 'chang la skyabs su 'ong shing sems bskyed de bstan pa la 'jug par byed pa ni sangs rgyas phrin las byed pa zhes bya ba dang sbyar ro//de'i tshe la la dag 'di snyam du gang gi tshe gdul bya sdug bsngal bar gyur pa de'i tshe lag na rdo rje sdig pa'i bsam pa dang ldan no snyam pa la/ snying rje che dang shes rab dang / /zhes bya ba la sogs pa gsungs te/ snying rje ni gdul bya mnar med pa la sogs pa'i sdug bsngal dang bral bar bya ba'i bsam pa dang / des kun nas bslang ba'i khro bo chen po'i spyod pa'o/ /chen po ni sngar bstan pa'i mthu de lta bu dag gis rlom sems su mi byed pa sha stag ste/dmigs pa med pa'i snying rje chen po zhes bya ba'i don to/ /shes rab ni rnam par dpyod pa ste/ gdul bya ji ltar 'dul ba'i rnam pa sngon du song ba'i tha tshig go/ /dang zhes bya ba ni mtshungs pa bsdu ba ste don byed pa mtshungs pa'i phyir ro/ /gang zhe na/ thabs kyis 'gro don byed pa'i mchog /ces bya ba gsungs te/ gang snying rje dang / shes rab kyis kun nas bslang ba'i drag po spyod pa ni thabs su rig par bya ste/ 'gro ba ma rungs pa'i don byed pa'i phyir ro/ /de bas na mchog ste/ ma rungs pa rjes su 'dzin pa la thabs 'di las lhag pa med do zhes bya ba'i don to//de ltar gtso bos sems can gyi don byed kyang / 'khor gyis sems can gyi don mi byed pa'o/ /byed kyang gtso bos nan gyis byed du bcug pa'am snyam pa la/ dga' mgu rangs pa'i bsam pa can/ /zhes gsungs te/ dga' ba ni snying rje'i bsam pa can no//mgu ba ni shes rab dang ldan pa'o/ /yang na mgu ba ni sems can gyi don la yi rang ba'o/ /rangs pa ni 'gro ba'i don la 'jug pa ste/ khro bo'i skur bstan pa yang bsam pa'i khyad par 'di lta bu dang ldan pa'i phyir bsam pa can no/ /de bas na/ khro bo'i lus kyi gzugs ldan pa//sangs rgyas phrin las byed pa'i mgon/ /zhes gsungs so/ /de'i phyir lag na rdo rje dag lus khro bo'i gzugs dang ldan pa yang bsam pa dge ba dang ldan pa'i phyir sdig par mi 'gyur ro zhes dgongs so/ /'khor 'dus pa de dag kyang ston pa la ltos pa chen po nyid kyi phyir/ lus btud rnams dang zhes gsungs te/kun mtshungs par gus pa'i tshul gyis lus btud pa'o/ /lhan cig tu zhes pa'i sgra thabs cig pa ste/ 'di ltar lag na rdo rje rang gi rigs kyi mtshan ma 'dzin pa gang yin pa des bdag dang gzhan gyi don du gzhung gi don gsol ba gdab pa'i phyir lus btud pa rnams dang /lag na rdo rje gzhan dag gzhung gi don nyan par bya ba'i phyir/ yang dag par rdzogs pa'i sangs rgyas gzhan gyi don du gzhung gi don bstan par bzhed pa gnas gcig na lhan cig tu bzhugs pa de'i tshe 'di skad ces gsol to zhes 'brel lo/ /yang dag par rdzogs pa'i sangs rgyas nyid gang yin snyam pa las/de bzhin gshegs pa bcom ldan 'das/ /rdzogs sangs rgyas zhes bya ba gsungs te/ de bzhin du gshegs pa dang / de bzhin nyid mkhyen pa dang / ji lta ba bzhin mkhyen cing gsungs so zhes gzhan dang sbyar ro/ /bcom ldan 'das ni spangs pa phun sum tshogs pa dang / thob pa phun sum tshogs pa'i don to/ /tshig gi don ni gzhan las rgya cher gsungs pa'i phyir ro/ /rdzogs pa zhes bya ba'i don ni rgyu'i dus su tshogs gnyis rdzogs pa dang / 'bras bu'i dus su bdag dang gzhan gyi don yongs su rdzogs pa'i phyir ro/ /sangs rgyas zhes pa ni blo bye zhing rgyas pa'i phyir te/pad+ma legs par bye zhing rgyas pa bzhin no/ /yang na nyon mongs pa la sogs pa'i sgrib pa spangs pa'i phyir sangs rgyas te/ skyes bu gnyid legs par sad pa bzhin no/ /de lta bu'i sangs rgyas bcom ldan 'das la zhes bya ba'i don ni de lta bu'i mtshan nyid dang ldan pa'i ston pa la 'di skad ces gsol to zhes bya ba'i don to//ci nas gsol ba btab snyam pa la phyag 'tshal te/ thal mo sbyar nas gus pa'i tshul gyis spyan sngar 'dug ste zhes pa'o/ /de la phyag 'tshal ba ni lus ngag yid kyis rab tu btud pa ste/ gus pa'i tshul gyis thal mo sbyar ba ni brda phrad par zad do//spyan sngar 'dug ces pa ni gzigs pa'i yul du 'dug pa ste/ lkog tu gyur nas gsol ba ma btab ces pa'i don to/ /'di skad ces pa ni ji skad du 'og nas gsungs pa'i gzhung gi don dgos ched dang / brjod bya dang / gsungs pa'i tshul bdag nyid snod du rung ba dang /ma 'ongs pa'i dus su ji ltar sems can gyi don bya ba'i phyir de skad gsol ba btab na zhes pa dang sbyar ro/ /de dag gis ni sgra ji bzhin par bshad pa'i man ngag go/ /da ni bla ma'i zhal gyi man ngag sgra ji bzhin ma yin pa bri bar bya ste/ de la khyed ltar na rgyud 'di gzhan gyi mtha' dang yang dag par ldan pa yin te/de bzhin gshegs pa'i dgongs pa bsam gyis mi khyab pa'i phyir ro zhes gsungs so/ /de bas na 'di nyid du phun sum tshogs pa'i gleng gzhi'i tshig go bar bya'o/ /de yang tshig gi don ni bcom ldan 'das rdo rje 'chang / gdul bar dka' ba 'dul ba'i dus na 'khor lag na rdo rje zhes bya ba'i dpa' bo mtha' yas pa dang /khro gnyer can dang / sgrol ma la sogs pa lus btud pa rnams dang lhan cig tu pad+ma rgyas pa'i gdan la bzhugs so/ /de bas ston pa dang / gnas dang / dus dang / 'khor phun sum tshogs pa dang lhan cig tu bzhugs pa de'i tshe chos phun sum tshogs pa brjod par bya ba 'di skad ces bka' stsal to//gal te tshig gi don de ltar ston du zin kyang 'di skad bdag gis thos pa la sogs pa gleng gzhi tshig sgra ji bzhin du ston pa med pa'i phyir mi 'thad do zhe na/ de ltar rtogs par mi bya ste/sangs rgyas bcom ldan 'das ni tshig la mi dgyes shing don la dgyes par mdzad pas na bcom ldan 'das nyid kyis so sor rtog pa bzhi bka' stsal te/ tshig la rton par mi bya zhing don la rton par bya ba dang / gang zag la rton par mi bya zhing chos la rton par bya ba dang / drang ba'i don la rton par mi bya zhing nges pa'i don la rton par bya ba dang /rnam par shes pa la rton par mi bya zhing ye shes la rton par bya'o zhes gsungs so/ /de bas na don gyi dbang 'di la dgongs nas gzhan dag nas kyang sgra ji bzhin pa dang sbyar ba ma mdzad de/ nam mkha' bems bcas dang ba dang //go skabs 'byed dang zhes bya ba la sogs pa gsungs so/ /de bzhin du/ gsang ba mchog gi dgyes pa na/ /zhes pa la sogs pa dang / gzhan yang / ye shes dbang phyug stong pa can/ /gnas gtsang ma na bzhugs nas su/ /zhes bya ba la sogs pa gsungs te/'di dag kyang don gyi dbang 'di la dgongs nas gsungs par rig par bya'o/ /ji ltar gzhon nu ma mtshon pa la chung ngu dang / lang tsho dang / skra dang nu ma dang ldan pa zhes bya ba la sogs pa'i sgras mtshon pa'i tshig go/ /yang 'di skad du de lta mod kyi de nas zhes bya ba'i sgras bar ma chad par sdud par byed pa'i tshig ste/sngar sgyu 'phrul dra bar zhes bya ba'i tshig le'ur bshad pa de ma thag pa'i de nas glu'i le'u 'di zhu ba bshad do zhes mtshams sbyar ba'i phyir dang / ji skad du smos pa'i le'u khri drug stong par 'di skad bdag gis thos pa la sogs pa gleng gzhi'i tshig gsungs pas 'dir yang sbyar ba ni mi 'thad do zhe na/de lta ma yin te/ de nas zhes bya ba'i sgra ni gcig tu mtshams sbyor bar ma zad de/ de yang / yi ge oM dang de nas sgra/ /de dag gnyis ni sngon tshangs pa'i/ /mkhur ba phug nas byung bas na/ /de dag bkra shis sgra brjod do/ /zhes gsungs pa'i phyir ro//rgyud 'byung ba'i thog mar shis pa brjod pa yin pas na de nas zhes bya ba'i sgrar gsungs so/ /yang na/ de nas kyi sgra ni a tha ste/ /a ni a nut+pa ta zhes pa ste shes rab bo/ /tha ni pa ta yo ga ste thabs so/ /de lta bu'i sgra'i sgo nas ji lta bu yang sbyar du btub pas so/ / de bas na a tha e waM ste thabs shes rab bo/ /de dag gnyis su med pa ni dpal lo/ /de skad du yang / shrI ni gnyis med ye shes te/ /zhes gsungs pa'i phyir ro/ /tshig gi don du sbyar na shrI la I yod pas na thabs nye bar sbyar nas phyis te/ sha lar u ta'i rkyen byin pas shru ta'o/ de lta na thos pa'i sgra ste/ nyams su myong zhes bya ba'i tha tshig go/ /de'i bdag nyid ci 'dra zhe na/ rdo rje 'chang zhes gsungs te/ bdag gi ni de lta bu'o/ /da ma kai ni ai kai sgras te/ gdul bar dka' ba 'dul ba'i dus gcig na zhes pa'i don te dus kyi khyad par ro/ /bcom ldan 'das ni/ dpa' bo 'jig rten gsum las rgyal//zhes bya ba ste/ de yang 'jig rten gsum ni 'dod pa dang / gzugs dang / gzugs med pa'o/ /de rnams su bdud bzhi'i dpung pham par byas pa'am/ de gang gis bcom pa ni bcom ldan 'das te/ zag pa med pa'i shes rab bo/ /de skad du yang / 'di nyid las/ dpa' bo bdud dgra bdud 'dul ba/ /zhes bya ba dang / nyon mongs nye ba kun nyon mongs/ /bag chags bcas pa gtan spangs pa/ /zhes bya ba gsungs pa'i phyir ro/ /de nyid la 'jig rten las 'das pa dang 'jig rten pa'i dpal phun sum tshogs pa ni skal ba dang ldan pa ste dbang phyug la sogs pa drug gi yon tan yod pa'o//yang 'di nyid las/ yon tan ldan zhing yon tan shes/ /zhes gsungs pa dang / gzhan yang / mchog ldan mchog sbyin gtso bo ste/ /zhes gsungs pa'i phyir ro/ /de bas na mtshan nyid de dag dang ldan pa la bcom ldan 'das zhes pa'am/dpa' po zhes pa'am/ dpa' mo zhes pa'am/ rgyal ba zhes bya ba la sogs pa'i mtshan gyi rnam grangs su shes par bya'o/ /de gang na bzhugs snyam pa la/ rdo rje dbang phyug ces bya ba la sogs pa gsungs te/ de la rdo rje'i rigs ni rigs so/ /gang zhe na//rdo rje dang / rin po che dang / pad+ma dang / las dang / de bzhin gshegs pa rnams so/ /de rnams ni de bzhin nyid du gshegs pa'i phyir dang / de nyid las phye ba'i phyir de bzhin gshegs pa thams cad ces bya ba'i don to/ /de bzhin nyid kyis dbang bsgyur ba'i phyir dbang phyug ces bya'o//gsang ba'i rgyal zhes bya ba ni gsang ba ni de rnams kyi sku gsung thugs kyi gsang ba zhes bya ba'i don to/ /rgyal ba ni gtso bo ste snying po zhes bya ba'i tha tshig go/ /de dag kyang gdul ba'i snang ba tsam la btsun mo nyid du bstan pa'i phyir/ pad+ma dkar po rgyas 'dra'i spyan/ /zhes gsungs te/ pad+ma ni mo rtags kyi sgra yin pa'i phyir ro/ /rgyas pa ni kha bye ba ste/ 'di lta bu dag ni spyan zhes bya ba sangs rgyas spyan la sogs pa'i b+ha ga rnams so/ /pad+ma rgyas pa'i gdan la bzhugs/ /zhes pa ni pad+ma yang yin la gdan yang yin pas pad+ma rgyas pa'i gdan la ste/ de ltar bcom ldan 'das byang chub kyi sems kun da ltar dkar ba dbyer mi phyed pa'i ngo bos bzhugs te/bzhugs pa zhes bya ba ni gnas zhes pa'i don to/ /de yang bcom ldan 'das gdul bya rnams la spyod lam rnam pa bzhis bzhugs te/ gshegs dang bzhugs dang de bzhin du ni gzims pa dang ni 'chag pa'o//yang na sku'i spyod lam ni ma rungs pa 'dul ba'i phyir khro bo'i cha lugs kyis bzhugs so/ /de la tshigs su bcad pa phyed snga mas ni zhal dang spyan gyi dbyings bstan nas/ phyed phyi mas phyag mtshan dang phrin las bstan pa'i phyir/ rang gi lag gi rdo rje mchog /yang dang yang du gsor byed pa//zhes pa ste/ rang ni bcom ldan 'das so/ /de'i phyir phyag gi rdo rje ni rang gi rigs mtshon pa'i phyag rgya'o/ /mchog ces bya ba ni phyag rgya de'i khyad par ro/ /des ci byed ce na/ gsor bar byed pa zhes pa ste ma rungs pa tshar bcad pa'i phyir nam mkha'i khams su lan du mar 'phen zhing phyag de nyid kyis 'dzin zhes bya ba'i tha tshig go//gsung gi spyod lam ni 'khor rnams la rdo rje theg pa'i chos ston pa'o/ /thugs kyi spyod lam ni gnyis su med pa'i tshul gyis mnyam par gzhag pa'o/ /de dag gi ni chos dang / 'khor dang / dus dang / ston pa dang /gnas phun sum tshogs pa bstan pa ste/ thog mar dge ba gleng gzhi'i don bshad zin to/ /da ni 'dus pa phal po che de dag gi ming dang / grangs dang / mtshan nyid dang / byed pa bstan pa'i phyir/ khro gnyer rim par ldan la sogs/ /zhes bya ba la sogs pa gsungs te/ de dag gi ming nye bar bstan pa'i phyir/ 'di ltar khro gnyer can zhes bya ba'i mkha' 'gro ma dang / sgrol ma'i ming can la sogs pa'i mkha' 'gro ma mtha' yas pa dang / gzhan yang lag na rdo rje zhes bya ba'i ming can gyi dpa' bo grangs mtha' yas pa lus btud rnams dang lhan cig tu 'di skad ces gsol zhes pa ni bsdus pa'i don to//de la 'jigs su rung ba la sogs pa ni khro bo'i mtshan nyid do/ /snying rje che la sogs pa ni bsam pa'i khyad par ro/ /sangs rgyas phrin las byed pa ni las kyi khyad par ro/ /lus btud ces pa ni thal mo sbyar nas tsog pur 'dug pa'o//rnams zhes pa ni dpa' bo dang dpa' mo grangs mtha' yas pa rnams so/ /dang zhes pa ni mtshungs pa bsdu pas te/ kun kyang gnas der 'dus pas na lhan cig tu zhes pa'o/ /de dag gis ni gleng gzhi bshad zin to/ /da ni rgyud kyi don rnam pa gsum du bsdus nas gnas pa las rgyu'i rgyud kyi gleng gzhi bshad par bya ste/de yang rgyur rjes su 'gro zhing 'bras bu skyed pas na rgyud de sa bon zhes bya ba'i don to/ /sa bon ni thog ma dang tha ma med pa'i byang chub kyi sems 'od gsal ba'o/ /de nyams su blang bar bya ba'i phyir thabs thun mong ma yin pa ni a tha zhes gsungs te/a ni srub pa dang bsrub par bya ba ste/ shes rab bo/ /tha ni srub par byed pa ste/ thabs so/ /de ltar bsrub pa dang bsrubs pa las byung ba ni dpal ldan zhes gsungs te/ gnyis su med pa'i byang chub kyi sems zhes bya ba'i don to/ /de skad du yang / shrI ni gnyis med ye shes te//zhes gsungs so/ /gnyis su med pa de nyid ji lta bu zhe na/ rdo rje 'chang zhes gsungs te/ gnyis su med pa'i mtshan nyid ni rdo rje ltar gang gis kyang mi phyed pa'i mtshan nyid dang ldan pas na de 'chang ba'o/ /de skad du yang / rdo rje mi phyed ces byar brjod/ / ces bya ba la sogs pa rgya cher gsungs so/ /de lta bu'i mtshan nyid dang ldan pa'i byang chub kyi sems des ci bya zhe na/ gdul dka' 'dul ba rnams kyi mchog /ces gsungs te/ 'di ltar 'dul bar dka' ba ni thog ma med pa'i dus nas rtog pa'i gzung ba dang 'dzin pa'i tshogs te/ de 'dul bar byed pa ni gdul dka' 'dul ba'o/ /gang gis she na/ mos pa'i dbang du mdzad pa'i theg pa gsum gyis kyang de 'dul ba'i thabs yin gyi de rnams las mchog tu gyur pa ni gnyis su med pa'i byang chub kyi sems thabs gang gis skyed par byed pa ni mchog go/ /de yang thun mong ma yin pa'i thabs des gdul bar dka' ba rtsod pa'i dus kyi sems can 'dod chags la sogs pa nyon mongs pa che bas kyang myur du byang chub thob bo zhes dgongs pas so//gzhan yang yon tan gyi khyad par ci lta bu dang ldan snyam pa la/ dpa' bo 'jig rten gsum las rgyal/ / zhes gsungs te/ 'jig rten gsum ni lus ngag yid do/ /de rnams kyi tha mal pa'i rnam rtog bcom ste sku gsung thugs rdo rje 'dzin pa'i ngo bo nyid du ldan par bya bas na rgyal ba'o/ /tha mal pa'i rnam par rtog pa 'joms pa'i dus na rim gyis rgyal bar byed pa lta bu ni ma yin te/skad cig la 'joms par byed pa nyid kyi phyir dpa' bo zhes bya'o/ /lus ngag yid gsum gyi rigs kyi dbye ba spro ba dang bsdus te bstan pa'i phyir/ rdo rje dbang phyug gsang ba'i rgyal/ /zhes gsungs te/ rdo rje ni rigs kyi sgra'o/ /de bas na lus ngag yid gsum las rgyas par spro ba rigs lnga ste phung po lnga'o//de dag kyang nye bar bsdu na gcig kho na ste byang chub kyi sems so/ /des de rnams la khyab cing dbang sgyur pas na dbang phyug go/ /de ltar shin tu spros pa ni rigs brgya'i dbye ba la'ang rab tu 'jug go/ /de ltar rigs kyi dbye ba grangs dpag tu med pa dag tu rab tu phye ba yang gsum du bsdus pa nyid kyi phyir gsang ba'i rgyal po ste/sku gsung thugs zhes bya ba'i don to/ /rgyal po ni gtso bo ste/ gzhan du na snying po zhes bya ba'i tha tshig go/ /snying po de nyid shes rab kyi ngo bo de bzhin gshegs pa rnams skyed cing rten du bstan par bya ba'i phyir/pad+ma dkar po rgyas 'dra'i spyan/ /zhes gsungs te/ pad+ma ni mo rtags kyi bstan pa'o/ /spyan ni sangs rgyas spyan la sogs pa ste/ sa la sogs pa ni khams bzhi'i rang bzhin no/ /'dra zhes bya ba brten pa dang skyed par byed pa'i phyir ma dang 'dra zhes nye bar sbyar ba'i don to/ /rgyas pa ni byang chub kyi sems bde ba chen po bzhugs pa'i gnas te/bde ba rgyas pa'i phyir kha bye bar gnas so/ /de'i phyir gsungs pa/ pad+ma rgyas pa'i gdan la bzhugs/ /zhes gsungs te/ pad+ma rgyas pa yang yin la gdan yang yin pas pad+ma rgyas pa'i gdan no/ /na na'i don ni A sa na ste 'dir bzhugs par 'dod do//bzhugs zhes pa'i don ni shugs kyis ston pa'i sgra ste/ ji ltar rgyal po'i pho brang zhes smos na rgyal po bzhugs par rig par bya ste/ gzhung kha cig las bi dza hAr zhes kyang 'chad do/ /'dir zab mo'i tshul ltar na thabs kyis bskul ba'i shes rab kyi pad+ma rab tu rgyas pa la byang chub kyi sems kun da ltar dkar ba rgyu'i rgyud kyi ngo bos bzhugs so//de dag gi rigs bstan par bya ba'i phyir na rang ni rang gi pha'o/ /lag gi ni bskul ba'i phyir te ma lta bu'o/ /rdo rje ni de dag las byung pa'i byang chub kyi sems so/ /de khams gsum po skyed par byed pa'i phyir/yang nas yang du gsor byed pa/ /zhes gsungs te/ yang nas yang du zhes pa'i don ni srid pa'i rgya mtshor zhes pa'i don to/ /gsor zhes pa ni 'phen par byed pas te/ bya ba la ltos nas byed pa zhes gsungs so/ /de'i don ni rgyud khyad par can smin par ma byas pa las dang nyon mongs pa'i sa bon du gyur te/las dang 'bras bu la nye bar spyod par byed ces dgongs so/ /de skad du yang / pha dang ma yi bde shugs las/ skad cig de las khams gsum skyed/ /ces gsungs so/ /de dag gi rgyud la gnas pa'i 'gro ba dag nye bar bstan pa'i phyir/khro gnyer rim par ldan la sogs/ /zhes gsungs te/ nye bar mtshon pa'i khong khro ba la sogs pa'i nyon mongs pa rnams dang nye bar ldan zhes pa'i don to/ /lag na rdo rje mtha' yas pa/ /zhes pa nas gsor byed pa zhes pa'i bar gyi rgyud de la gnas pa'i rigs gdul dka' ba'i rigs byol song dang yi dags dang dmyal ba la sogs pa 'gro ba drug spro bar byed pa'i don te tshig gi don ni go bar zad do//de dag gis ni rgyu'i rgyud kyi gleng gzhi'i don mdor bsdus te bstan pa'o/ /da ni thabs kyi rgyud kyi gleng gzhi bstan par bya ste/de yang nye bar 'gro bas na thabs zhes bya ste/ rgyu de khyad par can du 'gro ba'i phyir te/ rgyun rgyas par byed pa'i phyir ro/ /de yang gang zhe na/ a tha zhes gsungs te/ a ni lte bar gnas pa'i a ste shes rab kyi ngo bo e'o/ /tha ni spyi bo na gnas pa'i baM ngo //a yongs su 'bar ba las rgyu'i rgyun la gnas pa'i bag chags bsregs te/ thabs kyi ngo bo baM yongs su zhu nas byang chub kyi sems kyis slar gso bar mdzad pa ni dpal ldan no/ /de'i bdag nyid dbyer mi phyed pas rdo rje'o/ /gdul bya yongs su gdul bar bya ba'i phyir gsungs pa/gdul dka' zhes bya ba la sogs pa gsungs te/ kun du rgyu ba spre'u dang 'dra ba rnam par shes pa'i tshogs so/ /de gdul bar byed pa bde ba chen po ste nang du dmigs pa'i ye shes so/ /de bas na mchog go/ /sgo gsum gyi dri ma yongs su dag par bya ba'i phyir gsungs pa/dpa' bo zhes bya ba la sogs pa gsungs te/ 'jig rten gsum ni 'das pa dang ma 'ongs pa dang da ltar gsum pa la spyod pa ste/ lhan cig skyes pa'i ye shes ni de gsum gyi mtshan nyid dang bral ba ste rgyal ba'o/ /lhan cig skyes pa'i mtshan nyid bstan par bya ba'i phyir/rdo rje zhes bya ba la sogs pa gsungs te/ rdo rje ni mi phyed pa'o/ /lus dang ngag dang yid gsum la dbang sgyur pas na dbang phyug ste/ thun mong ma yin pa'i ye shes kyi phyir gsang ba'i rgyal po'o/ /da ni de dag gi don gsal bar bya ba'i phyir/ pad+ma dkar po rgyas 'dra'i spyan//zhes pa la sogs pa gsungs te/ pad+ma rgyas 'dra ba ni pad+ma dang 'dra ba ste/ rtsa'i dbyibs pad+ma rgyas pa dang 'dra ba gang la yod pa de la'ang de skad ces bya'o/ /de yang bla ma dam pa'i man ngag gis rtsa'i dbyibs dang grangs brjod par bya ste/ gsang gnas ye shes kyi 'khor lo na pad+ma rgyas pa 'dra ba'i 'dab ma sum cu so gnyis so//de bzhin du lte ba sprul pa'i 'khor lo na drug cu rtsa bzhi'o/ /snying ga chos kyi 'khor lo na brgyad do/ /mgrin pa longs spyod kyi 'khor lo na 'dab ma bcu drug go/ /spyi bo bde ba chen po'i 'khor lo na 'dab ma sum cu rtsa gnyis so//gtsug tor gyi 'khor lo na 'dab ma brgyad do/ /de dag gi rnam par gzhag pas kyang ci bya snyam pa la/ gdan la bzhugs zhes bya ba gsungs te/ pad+ma ni mo rtags te b+ha ga'o/ /de rnams la bcom ldan 'das kun rdzob dang don dam pa'i bdag nyid can byang chub kyi sems su bzhugs zhes pa'o//de la gang zag tha mas ni lha'i skur bsgom mo/ /'bring pos ni yi ge dgod par bsgom pa'o/ /rab kyis ni byang chub kyi sems kyi thig le bkod par bzhugs so/ /de nas nyams su blangs pa'i rim pa bstan par bya ba'i phyir/ rang gi lag gi rdo rje mchog /yang dang yang du gsor byed pa/ /zhes gsungs te/ byed pa ni g.yo ba'am rtsol bar byed pa ste/ rlung gi dkyil 'khor ro/ /gsor byed pa ni spro bar byed pa ste tsaN+Da lI'o/ /des me ri'i mtshams kyi bar du sbar te lte ba sprul pa'i 'khor lor bton nas snying ga chos kyi 'khor lo'i rtog pa rnams bsregs te/mgrin pa longs spyod kyi 'khor lo las byung nas mdzod sbu nas phyogs bcur spros te/ de bzhin gshegs pa thams cad kyi thugs kar son pa'i dam tshig gi 'khor lor gyur pa dkrugs nas ye shes kyi bdud rtsi gnyis su med pa rdo rje mchog tu gyur pa rang gi lag gi rdo rje'i 'od kyis blangs te/mdzod sbur zhugs nas gtsug tor gyi 'khor lor dam tshig gi bdud rtsi dang gnyis su med par gyur te/ 'khor lo rnams rim gyis gang bar bya'o/ /de'i phyir gsungs pa/ khro gnyer rim par ldan la sogs/ /zhes gsungs te/khro gnyer rim par ni rim gyis 'gengs pa'i don te/ gang gi tshe bde ba chen po'i 'khor lo gang bar gyur pa de'i tshe rtags nam mkha' la zla ba shar ba lta bu dang / de nas rim gyis longs spyod kyi 'khor lo khengs par gyur pa de'i tshe rtags nyi ma shar ba lta bu dang / de nas snying ga chos kyi 'khor lo khengs par gyur pa de'i tshe sngar gyi bsregs pa rnams gsos te/rtags rnams smig rgyu lta bu dang / de dag rim gyis sprul pa'i 'khor lor son pa dang / de'i tshe gnyis su med pa'i ye shes kyi lus nyid du 'gyur te/ mun pa mun nag lta bu'i rtags 'byung ngo //de nas slar yang gsang gnas ye shes kyi 'khor lo nas bde ba bskyod de/ rim gyis steng gi sgor bskyod de de bzhin gshegs pa rnams kyi sku sran ma tsa na ka'i tshad tsam du bzhugs par snang ba thabs kyi rang bzhin g.yo zhing spros te slar bsdu ba'i dus su ji skad du sngar smos pa bzhin du thig le'i ngo bor rnam par rtog pa rim gyis 'og gi sgor skye bar 'gyur te/gang gi tshe lte ba sprul pa'i 'khor lor son pa de'i tshe dngos po dang mtshan ma las 'das pa'i ye shes skye bar 'gyur ro/ /gang gi tshe spro ba dang bsdu ba de'i tshe yon tan 'di dag dang ldan te/ phyi rol gyi sdug bsngal thams cad gcod pa dang /sdig pa'i dngos po ma lus pa thams cad sreg pa dang / gnyis su med pa'i ye shes kyi rdo rje me lta bu 'phro ba dang / chos kyi phung po brgyad khri bzhi stong gi gsung la dbang byed pa dang / de bzhin gshegs pa thams cad kyi shes rab dang ye shes kyi sku mngon du mdzad pa dang /ye shes kyi skus 'gro ba'i don mdzad pa dang ldan pa'o/ /sogs zhes bya ba'i sgras ni ye shes rnam pa lnga rim pa ji lta ba bzhin du skye ba'i don gzung ngo / /lag na rdo rje'i don ni bshad zin to/ /mtha' yas pa zhes pa ni dga' ba ste/ ji ltar 'khor lo bzhir dga' ba bzhi skye ba'i rim pa'o//de dag gis ci byed snyam pa la/ gdul dka' 'dul ba po zhes gsungs te/ rnam par rtog pa dang bcas pa'i tha mal pa'i shes pa ni gdul bar dka' ba'o/ /de lhan cig skyes pa'i ngang du nub pa ni 'dul ba'o/ /thabs ji lta bu snyam pa la/ 'jigs su rung dang dpa' byad can//zhes gsungs te/ chags bcas kyi lam 'di la gzhan skrag pa'i phyir 'jigs su rung ba dang / ji skad sngar smos pa'i tsaN+Da lIs ni de bzhin gshegs pa rnams kyang sreg pa'i phyir 'jigs su rung ba'o/ /dpa' ba'i cha byad can ni me lce'i bdag nyid can no//de'i mtshan nyid ji lta bu yin snyam pa la/ rdo rje zhes gsungs te/ gzhan gyis mi phyed pa'i rdo rje'i rtse mo'o/ /'phro ba zhes pa'i don ni bshad zin to/ /spro ba dang bsdu ba'i don dag thabs dang shes rab kyi ngo bo bstan pa'i phyir/ snying rje che dang shes rab dang / /thabs kyis 'gro don byed pa'i mchog /ces gsungs pa ste/ snying rje ni spro ba'i dus su thabs kyi sku ste skye ba'o/ /shes rab ni bsdu ba'i dus su stong pa nyid kyi ngo bo ste 'jig pa'o/ /de lta bu'i tshul gyis 'gro ba'i don byed pa ste/ 'gro ba zhes pa ni lam so so nas 'gro bas 'gro ba ste/ dbang po'i lam nas 'gro ba zhes bya ba'i tha tshig go//don byed pa ni dam pa'i man ngag gis nye bar brgyan nas dbang po dang don sbyar zhing gnyis su med pa'i nyams su myong bar 'byung ba'o/ /de bas na de mchog go/ /sngar smos pa'i dga' ba rnams gsal bar bstan pa'i phyir/ dga' mgu rangs pa'i bsam pa can//zhes bya ba gsungs te/ dga' ba ni dga' ba'o/ /mgu ba ni mchog tu dga' ba'o/ /rangs pa ni lhan cig skyes pa'i dga' ba'o/ /bsam pa can ni dga' bral lo/ /nyon mongs pa ji ltar 'dul ba'i thabs su bstan pa'i phyir/ khro bo'i lus kyi gzugs ldan pa//sangs rgyas phrin las byed pa'i mgon/ /zhes gsungs te/ zhe sdang la sogs pa'i nyon mongs par rab tu grags pa yang lhan cig skyes pa'i gzugs kyis 'joms par byed ces pa'i don to/ /sangs rgyas phrin las de lta bus 'gro ba 'dren pa ni mgon no/ /da ni sems dang sems las byung ba thams cad lhan cig skyes pa'i rang bzhin du bstan par bya ba'i phyir/lus btud rnams dang lhan cig tu/ /zhes gsungs te/ btud ces pa'i sgras ni gzhol ba dang / 'bab pa dang / bab pa zhes bya ba'i tha tshig go/ /de dag gis ni thog mar dge ba'i gleng gzhi'i tshig bla ma'i man ngag bstan pa'o//da ni ston pa la gus pa'i tshul gyis gleng bslang ba'i phyir/ de bzhin gshegs pa bcom ldan 'das/ /zhes bya ba la sogs pa gsungs te/ de la de bzhin nyid ji lta ba bzhin mkhyen cing khong du chud nas ji lta ba bzhin gsungs pa ni de bzhin gshegs pa'o//bdud bzhi bcom pa'i mtshan nyid gong la yod pa de ni bcom ldan 'das te/ tshig gi don ni/ dpal dang grags dang la sogs pa gzhan dang sbyar ro/ /gzhan yang mtshan gyi khyad par gsungs pa/ rdzogs sangs rgyas zhes pa ste/ bdag dang gzhan gyi don phun sum tshogs pa gang la yod pa de la de skad ces bya'o//la zhes pa ni bdun pa'i don to/ /de ltar ston pa'i mtshan nyid khyad par dang ldan pa la yang dang yang du thal mo sbyar nas phyag 'tshal ba ni lus dang ngag dang yid gus pa'i tshul gyis yin par rig par bya'o/ /spyan sngar 'dug ste zhes pa ni/ bcom ldan 'das kyi spyan sngar gzigs pa'i yul na 'dug pa ste/lkog tu gyur pa ma yin par zhes pa'i tha tshig go/ /de ltar gus pa dang spyan sngar 'dug pa ci'i phyir zhe na/ 'di skad du gsol ba 'debs pa'i phyir ro/ /ji skad du snyam pa la/ khyab bdag ces pa la sogs pa gsungs te/ des gsol ba btab pa'o/ / de nas gang gi ched du gleng bslang ba bstan pa'i phyir/ bdag la sman pa dang zhes pa la sogs pa gsungs te/ bdag ni rang nyid do/ /sman pa ni bde ba'i rgyur 'gyur pa'i phyir ro/ /de rang nyid kyis thob pa ni bdag gi don to/ /de'i phyir bdag la thugs brtse bar dgongs te/ sgyu 'phrul dra ba zhes bya ba'i thabs kyi sgo nas phan pa'i don mngon par rdzogs par byang chub pa bdag gis thob par mdzod cig ces pa'o//de ltar bdag gi don du gsol ba btab nas/ da ni gzhan gyi don du gsol ba gdab pa'i phyir/ nyon mongs pas ni sems dkrugs shing / /zhes bya ba la sogs pa gsungs te/nyon mongs pa ni 'dod chags dang / khong khro dang / nga rgyal dang / ma rig pa dang / lta ba dang / the tshom zhes bya ba rtsa ba'i nyon mongs pa dang / khro ba dang / khon du 'dzin pa dang / 'chab pa dang / 'tshig pa dang / phrag dog dang / ser sna dang / sgyu dang / g.yo dang /rgyags pa dang / rnam par 'tshe ba dang / ngo tsha med pa dang / khrel med pa dang / rmugs pa dang / rgod pa dang / ma dad pa dang / le lo dang / bag med pa dang / brjed ngas pa dang / rnam par g.yeng ba dang / shes bzhin ma yin pa yid la byed pa zhes bya ba nye ba'i nyon mongs pa nyi shu'o//sems ni gnyis su med pa'i byang chub kyi sems rang bzhin gyis 'od gsal ba'o/ /dkrugs pa ni glo bur gyi dri mas bslad pa ste/ snga ma des so/ /ji ltar rlabs kyis bskyod pa'i mtsho lta bu'o/ /de bsal bar byed pa'i thabs dang bral ba bstan pa'i phyir/ mi shes 'dam du bying ba yi//zhes bya ba gsungs te/ ma rig pas kun nas bsgribs pas glo bur gyi dri ma bsal ba'i thabs mi shes pa'o/ /dper na 'dam gyi tshogs chen po'i nang du nub par gyur na thabs mi mkhas pa rnams ni rang gi rtsol ba tsam gyis thar bar sems pa ste/ de dag gis ni de'i rkyen gyis slar bying bar 'gyur ro//de gang zhe na/ sems can kun zhes bya ba la sogs pa la/ sems rnam par rtog pa'i tshogs kyis kun nas bslang ba'i sems dang gang ldan pa de ni sems can no/ /kun zhes pa ni 'gro ba drug tu gtogs pa'i sems can ma lus pa'o//sngar rang gi don du skabs su zhugs pa'i thabs ni sems can kun la phan pa'i phyir 'di yang zhus par rig par bya'o/ /sman pa ni mi shes pa shes par bya ba dang / 'khor ba'i 'dam du bying ba las gdon par bya'o/ /de nyid 'bras bu khyad par can la dgod par bya ba'i phyir/ bla med 'bras bu zhes gsungs te/bla med ces pa ni de'i bla'am gong na 'bras bu mchog tu gyur pa gzhan med pa ste/ rdo rje 'chang chen po'o/ /de thob par bya ba ni mngon du gyur pa'o/ /phyir zhes pa ni ched du bya ba'i don te/ de ci nas kyang thob par mdzod ces pa'i tha tshig go/ /ston pa'i khyad par gang dang ldan pa bstan pa'i phyir/rdzogs pa'i sangs rgyas zhes bya ba la sogs pa gsungs te/ rdzogs pa'i don ni sa mthar phyin pa'i don to/ /rdo rje 'dzin pa zhes bya ba'i tha tshig go/ /tshig gi don ni go bla'o/ /'gro ba'i bla ma zhes pa ni 'gro ba rnams dang chos mthun pa'i tshul yin te/'dir 'dod chags la sogs pa rnams kyi lam de nyid du 'dzud pa'i phyir snang ba mtha' yas la sogs pa'i de bzhin gshegs pa rnams so/ /de bas na ston pa po ni rdo rje 'chang nyid do/ /dam tshig kyang yin la chen po yang yin pas dam tshig chen po ste/ rigs dang nyon mongs pa la sogs pa'i dbye ba ji snyed du smos kyang rdo rje 'chang chen po las mi 'da' bas na de kho na nyid gcig tu mkhyen pa'i phyir chen po ste/de nyid mkhyen zhes pa'i don kyang de'o/ /de ltar don dam par de kho na nyid du mkhyen cing thugs su chud kyang kun rdzob kyi dbye bas ci zhe na/ dbang po bsam pa mkhyen mchog gis//zhes bya ba gsungs te/ dbang po mchog dang mchog ma yin pa'i mkhyen pa dang / bsam pa rgya che ba dang / chung ba dang / tshad mar gyur pa mkhyen te/ gdul bya'i snod kyi rim pa mkhyen pa zhes bya ba'i don to/ /de yang cig car du mkhyen pa nyid kyi phyir mchog go/ /gis zhes pa ni gsum pa'i tshig ste/zag pa dang bcas pa dang zag pa med par mkhyen pa khyod kyis shes pa'o/ /da ni brjod bya'i khyad par can ji lta bu zhu ba'i phyir gsungs pa/ bcom ldan 'das kyi ye shes sku/ /zhes bya ba la sogs pa gsungs te/ kyi zhes pa ni mang po'i tshig mi mngon par byas pa ste/'di ltar 'das pa dang ma byon pa dang da ltar gyi sangs rgyas bcom ldan 'das kyi ye shes kyi sku mkhyen pa mchog dang ldan pa khyed 'ba' zhig gis mkhyen gyis zhes tshig snga mar 'brel lo/ /de bas na ye shes kyi sku de ni thun mong du lta bar mi mngon pa'i phyir te/ ji ltar de bzhin gshegs pa'i dbu'i gtsug tor bzhin no//de'i phyir gsungs pa/ gtsug tor chen po zhes pa ste/ gtsug tor yang yin la chen po yang yin pas gtsug tor chen po ste/ de dag gis ni de bzhin gshegs pa thams cad kyi sku gsung thugs kyi gsang ba las kyang shin tu ches gsang ba brjod par bya ba thun mong ma yin pa bstan to//da ni brjod par byed pa gang yin pa dang / brjod bya'i rnam grangs yang yin pa phyin ci ma log par bstan pa'i phyir/ tshig gi bdag po zhes bya ba la sogs pa gsungs te/ tshig ni rjod par byed pa'o/ /de gang gis brjod pa ni bdag po ste/ rdo rje 'chang chen po nyid do//'dir tshig rnams la ma thob pas brjod bya thun mong ma yin pa brjod par mi nus so zhes dgongs so/ /de bas na brjod bya ye shes kyi sku ste/ dngos su rang byung zhes gsungs te/ 'dir rang byung ni rgyu dang rkyen la ma ltos pa'i ngo bo nyid ces slob dpon kha cig 'dod do/ /rang byung ni rang las byung bas na rang byung ste/brjod par bya ba thun mong ma yin par rang la sku dang ye shes kyi snang ba 'byung ba'o zhes gzhan dag zer ro/ /de nyid kyi mtshan nyid kyi rnam grangs gzhan du na/ 'jam dpal ye shes sems dpa' yi/ /zhes rtags so/ /de yang skye ba dang 'gag pa la sogs pa'i zug rngu dang bral ba nyid kyi phyir 'jam pa ste/don dam par rtogs par bya ba de zhes so/ /bdag dang gzhan gyi don phun sum tshogs pa 'byung bas na dpal te/ sku dang ye shes kyi snang bar 'byung bas na de yang snang ba tha dad par 'byung du zin kyang ye shes ro gcig pa nyid kyi phyir ye shes sems dpa'o//de'i ming gi rnam grangs du mar brjod du zin kyang don ji lta ba bzhin du khong du chud par byed pa ni yang dag par brjod pa ste/ de'i phyir gsungs pa/ ming ni yang dag brjod pa'i mchog /ces gsungs te/ mi zad pa dang rnam grangs gzhan la 'jug pa'i phyir ming ngo / /yang dag par brjod pa ni skyon med par brjod pa ste/rnam grangs phyin ci ma log par ston ces bya ba'i tha tshig go/ /de bas na mchog kyang yin la/ rjod byed kyang yin pas brjod pa'i mchog go/ /de dag gis ni brjod par bya ba dang rjod par byed pa yang bstan pa yin te/ de dag gi 'brel ba ni thabs dang thabs las byung bar rig par bya'o//brjod bya'i dgos pa ni bdag dang gzhan gyis bla na med pa'i 'bras bu thob pa'o/ /de dag gis ni ston pa la ji ltar zhes pa dang / zhus pa'i dgos ched dang / ston pa'i khyad par dang / dgos 'bral gyi don sgra ji bzhin pa bshad zin to//da ni de dag gi don bla ma dam pa'i man ngag dang nye bar sbyar bar bya ba'i phyir/ de bzhin gshegs pa bcom ldan 'das/ /zhes bya ba la sogs pa gsungs te/ de bzhin gshegs pa ni byang chub kyi sems bde ba chen po haM gi gnas nas gshegs shing e'i gnas su gnyis su med par gyur pa ste/slar rim gyis rang gi gnas su gshegs pa de ni de bzhin gshegs pa'o/ /de skad du yang / mgon po de bzhin nyid gshegs shing / /slar yang de bzhin gshegs pas na/ /de bzhin gshegs zhes brjod par bya/ /zhes gsungs so//de ltar gshegs pa dang byon pa'i tshe rags pa dang phra ba'i rtog pa bcom nas gnyis su med pa'i ye shes dang ldan pa ni bcom ldan 'das so/ /bcom ldan 'das de haM gi gnas dang / e'i gnas su bzhugs pa'i tshe rdzogs pa'i sangs rgyas te mthar phyin pa'i tha tshig go//phyag 'tshal ba ni 'dud pa ste/ yang dang yang du goms par byed pa'o/ /thal mo sbyar zhes pa ni kha sbyar ba zhes pa'i don to/ /ji ltar na lus la gnas pa'i phyir/ 'khor lo bzhi kha sbyar bar gyur pa'o/ /de yang ji ltar zhe na/ sprul pa'i 'khor lo dang / chos kyi 'khor lo thabs dang shes rab po/ /longs spyod kyi 'khor lo dang / bde ba chen po'i 'khor lo yang thabs dang shes rab kyi tshul du kha sbyar ba'o/ /nas ni zhes pa ni lnga pa'i don la gnyis pa sbyar ba'i tshig ste/ de kha sbyar ma thag tu gang zag gis nyams su myong ba 'byung ba'i don to//de yang spyan sngar 'dug ste zhes pa la/ spyan sngar ni mngon sum du nyams su myong zhes bya ba'i tha tshig go/ /de yang thabs dang shes rab kyi rtsa ba bstan pa'i phyir/ e waM a haM zhes gsungs te/ e ni shes rab bo/ /waM ni thabs so/ /de dag kyang gnas kyis phye na/e ni 'og sgo'o/ /waM ni steng sgo'o/ /a ni gnyis su med pa'i byang chub kyi sems so/ /ha ni de rtsol bar byed pa'i rlung ngo / /de lta bu'i don gyis thams cad du khyab par bstan pa'i phyir/ khyab bdag ces bya ba la sogs pa gsungs te/ ngo bo nyid kyis khyab pa'i phyir khyab bdag go//de yang gang la khyab ce na lus dang ngag dang yid la sogs pa rgyu ba dang mi rgyu ba thams cad la khyab pa'i phyir ro/ /de la kha cig ni ma rig pas kun nas bsgribs pas gnyis su lta zhing dpag tu 'dzin pa yod de/ de lta bu dag gis bdag gi bdag med par rtogs par bya ba'i phyir tshul 'di ltar nyams su len pa ni bdag la sman pa'o//de'i phyir gsungs pa/ bdag don bdag la thugs brtse'i phyir/ /zhes gsungs te/ bdag gi don ni phyin ci log gis brtag pa'i don bdag don thams cad rnam par lta'o/ /de dag la thugs brtse ba dang bdag med par rtogs par bya ba'i phyir thabs 'di gsungs so//de ltar bdag med pa khong du chud nas chos thams cad kyi mtshan nyid ci 'dra bar rtogs snyam pa la sgyu 'phrul dra bas zhes bya ba la sogs pa gsungs te/ phyi nang gi dngos po sgyu ma dang smig rgyu la sogs pa'i dpes nye bar mtshon pa'i bdag med par rtogs shing khong du chud par bya'o//des cir 'gyur snyam pa la mngon par rdzogs pa'i byang chub thob par byed pa'o/ /gang gis snyam pa la/ bdag gis byang chub ces pa'i tha tshig go/ /thabs ji ltar snyam pa la/ nyon mongs pa sel ba'i thabs te/ de'i phyir/ nyon mongs pas ni sems dkrugs shing //mi shes 'dam du bying ba yi/ /zhes pa la sogs pa gsungs te/ nyon mongs pa ni bdag tu lta ba la brten nas rtsa ba dang nye ba'i nyon mongs pa gang yin pa ste/ rnam par smin pa'i 'bras bu'o/ /pas zhes pa ni gsum pa'i tshig ste/ de rnams kyis rang gi ngo bo rnyogs shing mi gsal bar byed pa'o//sems ni chos nyid kyi rgyu mthun pa'o/ /de mi gsal bar byed pa ni dkrugs pa zhes pa'o/ /mi shes pa ni nyon mongs pas dkrugs pa gsal bar byed pa'i thabs mi shes pa ste/ thabs la rmongs pa zhes bya ba'i don to/ /de nyid 'dam du bying ba dang 'dra bar yun ring du 'khor bar gnas pa'i phyir bying ba'o//de yongs su 'don pa'i phyir/ sems can kun la sman pa dang / /bla med 'bras bu thob bya'i phyir/ /zhes gsungs te/ sems can ni yul dang dbang po la brten pa'i rnam par shes pa'i tshogs so/ / kun ces pa'i sgras ni brgyad po nye bar bsdu ba'i tshig go/ /sman pa ni ye shes la 'jug pa'i thabs te/ bla ma dam pa'i gdams ngag go/ /thabs des bla na med pa'i 'bras bu thob par byed pa ni tshe 'di nyid la'o/ /gang gi tshe 'bras bu thob pa'i mtshan nyid ci zhe na//rdzogs pa'i sangs rgyas bcom ldan 'das/ /'gro ba'i bla ma ston pa po/ /zhes bya ba la sogs pa gsungs te/ /rdzogs pa'i sangs rgyas kyi sgra ni phun sum tshogs pa'i don te/ bdag dang gzhan gyi don phun sum tshogs pa gang la yod pa de la de skad ces bya'o/ /de yang spangs pa phun sum tshogs pa bcom pa'i tshul gyis spangs pa dang /thob pa phun sum tshogs pa dang ldan pa'i tshul gyis thob pa'o/ /de yang gzhan don phun sum tshogs pa bstan pa'i phyir/ 'gro ba'i bla ma ston pa po/ /zhes gsungs te/ 'gro ba ni lam so so nas 'gro ba zhes bya ba'i don to//bla ma ni de rnams kyi gong ma ste/ de'i gong na gzhan med ces bya ba'i tha tshig go/ /ston pa po zhes pa ni gang dang gang gis 'dul bar 'gyur pa'i sku dang gsung dang thugs kyi snang ba ston cing 'bras bu khyad par can thob par byed pa'o/ /de ltar gzhan gyi don phun sum tshogs pa bstan nas/rang don phun sum tshogs pa de kho na nyid du mkhyen pa bstan pa'i phyir/ dam tshig chen po de nyid mkhyen/ /dbang po bsam pa mkhyen mchog gis/ /zhes gsungs te/ dam tshig kyang yin la chen po yang yin pas dam tshig chen po ste/ shes bya thams cad de kho na nyid du mkhyen pa'i phyir ro//de ltar de kho na nyid du mkhyen cing thugs su chud de ji lta ba bzhin du gsungs pa dang / gdul bar bya ba'i gang zag gi dbang po mchog dang mchog ma yin pa dang / bsam pa rgya che ba dang chung ba mkhyen pa ni mkhyen pa'i mchog ste/ ye shes phul du phyin pa brnyes pa zhes bya ba'i tha tshig go//yang na rdzogs pa'i sangs rgyas bcom ldan 'das ni sngar bstan pa'i rnam par shes pa'i tshogs tha mal pa 'di nyid la sangs rgyas bcom ldan 'das kyis ye shes kyi tshogs ston par byed pas na rdzogs pa'i sangs rgyas bcom ldan 'das te//lam so so nas 'gro ba'i yul dang dbang po la brten pa'i shes pa bla ma dam pa'i man ngag gis lhan cig skyes par ston pa ni ston pa'o/ /de nyid kyi phyir/ dam tshig chen po de nyid mkhyen/ /zhes bya ba la sogs pa gsungs te/ dam tshig ni brdar byas pa'o/ /de yang thabs dang shes rab kyi ngo bo nyid la bde ba'i phyir ma spangs shing de kho na nyid du rtogs pa zhes bya ba'i tha tshig go//dbang po ni mig la sogs pa drug go/ /des nye bar mtshon pa'i yul drug ste/ de gnyis su med pa las rang gi bde ba sngar gyi ye shes khong du chud pa ste/ mkhyen pa zhes pa ni de ltar rtogs zhes pa'i don to//de bas na mchog ste/ rab ces pa dang / gya nom pa zhes pa dang / bla na med pa zhes bya ba ni khyad par gyi ming gi rnam grangs so/ /rtogs pa'i don khyad par can de nyid la mtshan gyi rnam grangs gzhan gyis bstan par bya ba'i phyir/ bcom ldan 'das kyi ye shes sku//zhes bya ba la sogs pa gsungs te/ bcom ldan 'das ni 'das pa dang ma byon pa dang da ltar gyi de bzhin gshegs pa rnams so/ /de rnams kyi ye shes kyi sku gang yin pa de ni sngar rtogs pa'i don to/ /de thun mong ma yin par bstan par bya ba'i phyir/ gtsug tor chen po zhes bya ba la sogs pa gsungs te/ gang bdag gis thun mong du bltar mi mngon pa de la 'di skad ces gsungs so/ /de gang gis rtogs par nus snyam pa la/ tshig gi bdag ces bya ba la sogs pa gsungs te/ tshig gi bdag po bla ma dam pa'o//rtogs pa'i don de yang ci zhig gang nas 'byung snyam pa la/ ye shes sku ste rang byung ba/ /zhes bya ba la sogs pa gsungs te/ de'i don ni ye shes kyi sku'o/ /de yang rang las byung ba ste/ gzhan la ltos pa med pa'i phyir ro/ /de kho na nyid de de bzhin gshegs pa thams cad kyi sku ste/yang dag pa'i ye shes me long lta bu la sogs pa rnams ro gcig tu gyur pa la mtshan gyi sgras brjod par bya ba'i phyir/ ming ni yang dag brjod pa'i mchog /ces gsungs te/ ming phyin ci ma log par brjod nas/ don mchog dang phrad pa ni brjod pa'i mchog ste/ngag gi skyon thams cad spangs pa'i phyir ro/ /de dag gis ni ston pa la gus pa dang / gang gi ched du bsgom pa dang / khyad par gang dang ldan pa bsgom pa dang / ji ltar bsgom pa'i tshul bla ma dam pa'i gdams ngag rnams bshad zin to/ /de dag gis ni brjod bya'i khyad par ji ltar zhu ba gleng ba bstan nas/da ni rjod byed gang gi don du zhu ba gleng bslang ba bstan pa'i phyir/ don zab don ni rgya che zhing / /zhes bya ba la sogs pa gsungs te/ don zhes bya ba ni ye shes kyi sku rang byung yin la/ de ston par byed pa'i tshig zab pa ste/ theg pa thun mong bas rtogs par dka' ba'o//rgya che ba ni de ston par byed pa'i thabs mang ba'o/ /yang na sems can gyi don byed pa'i thabs mang ba'o/ /che ba ni bdag dang gzhan gyi don grub pa'o/ /mtshungs pa med pa ni theg pa gzhan dang 'gran du med pa'o/ /mi gnas pa'i mya ngan las 'das pa'i phyir rab tu zhi ba'o//de ston par byed pa'i tshig gang yin snyam pa la/ thog ma zhes pa la sogs pa gsungs te/ thog mar dge ba ni gleng gzhi'o/ /bar du dge ba ni gleng bslang ba'o/ /tha mar dge ba ni yongs su shes par bya'o/ /de yang ston pa 'di nyid kyis gsungs par ma zad de/ 'das pa'i sangs rgyas mar me mdzad la sogs pa'o//ma 'ongs pa ni byams pa la sogs pa'o/ /da ltar ni shAkya thub pa'o/ /rdzogs pa'i sangs rgyas ni bshad zin to/ /gsungs zhes pa ni de dag gis rnam grangs du mar gsungs kyang don ye shes kyi sku rang byung 'ba' zhig ston pa'o/ / yang dang yang du zhes pa ni dus gsum du gsungs pa'i phyir ro/ /gsungs pa'i chos gang snyam pa la/ /rgyud chen sgyu 'phrul dra ba las/ /zhes bya ba la sogs pa gsungs te/ rgyud kyi dbye ba la sogs pa ni sngar bshad do/ /rgyu dang lam dang 'bras bu gsum 'brel pas na dra ba'o/ /de'i ston pa ni rdo rje 'chang chen po'o//des 'khor rdo rje 'chang rnams la bstan pas gsang sngags kyi lam la brten nas 'bras bu rdo rje 'chang 'byung bas na 'chang ba'o/ /su la gsungs na/ dpag med rnams la ste/ 'khor de bzhin gshegs pa rnams la'o/ /dga' bzhin du zhes pa ni bcom ldan 'das dgyes pa dang bcas pa ste gsungs 'tshal zhes pa'o//yang na dka' thub dang / dka' spyad dang / dus tshod dang / tshes grangs la ni mi ltos pas dga' bzhin du'o/ /dgyes pa nyid gang snyam pa la/ glur blang zhes pa ste/ gzhan gyi rgyud tshim par byed pas so//bshad du gsol zhes pa ni brda phrad par zad do/ /da ni gzhung gi don bdag dang gzhan gyi don du gzung bar dam bca' ba bstan pa'i phyir/ mgon po zhes bya ba la sogs pa gsungs te/ mgon po zhes pa ni bdag dang gzhan gyi don du gyur pa ste/ rdo rje 'chang chen po'o/ /de la kye mgon po zhes bos nas rdzogs sangs rgyas ni bshad zin to//kun zhes pa ni bskal pa bzang po 'di'i sangs rgyas stong rtsa gcig go/ /gsang 'dzin zhes pa ni sku gsung thugs kyi gsang ba 'dzin pa lag na rdo rje'o/ /ci nas bdag 'gyur phyir zhes pa ni bskal pa bzang po'i sangs rgyas de dag gi tha chungs lag na rdo rje yin la/de sangs rgyas de dag gi gsung ngo cog gi gsang ba 'dzin pa ste/ sdud pa po byed par dam bca' ba'o/ /dus nam gyi bar du snyam pa la/ nges par 'byung ba ste/ bdag dang gzhan gyis bla na med pa'i byang chub ma tho ba kyi bar du'o/ / ci'i ched du na/ bdag gi don du'o/ /bsam pa ni thos pa dang bsam pa gnyis kyis so/ /brtan po ni ma nor ba'o/ /'on te bdag 'ba' zhig gi don du'am zhe na/ nyon mongs ma lus bsal ba dang / /zhes bya ba la sogs pa gsungs te/ sems can nyon mongs pa rnams kyis sems dkrugs pa bsal ba dang /mi shes pa ni nyon mongs pa bsal ba'i thabs mi shes pa dang / smin par byed pa dang / grol bar byed pa mi shes pa ste/ de spang ba'i phyir gzung bar bya'o/ /lam gnyis ni 'og nas ston to/ /'on te chos kyi ser snas chu srin gre bar mu tig song ba bzhin du slar mi 'byung ngam zhe na/bsam pa'i khyad par ji bzhin du/ /zhes bya ba la sogs pa gsungs te/ dbang po mchog dang mchog ma yin pa'i rim pas bskyed pa dang rdzogs pa'i rim pa la sbyor bar byed pas na/ sems can rnams la bshad par 'tshal/ / zhes pa'o/ /de dag gi mjug nye bar bsdu bar bya ba'i phyir/ gsang dbang zhes bya ba la sogs pa gsungs te/ gsang ba ni sku gsung thugs kyi gsang ba'o/ /dbang po ni bdag po ste/ gsang ba'i bdag po lag na rdo rje zhes bya ba'i sdud pa po yin la/ des de bzhin gshegs pa ni ji lta ba bzhin du mkhyen pa thugs su chud pa gsungs pa zhes bya ba ste//rdo rje 'chang chen po'o/ /de skad du zhes pa ni bdag dang sems can thams cad kyi nyon mongs pa ma lus pa de bsal ba'i thabs lam rnam pa gnyis su gsungs zhes gsol ba btab pa'o/ /thal mo sbyar zhes pa ni brda phrad par zad do//lus btud pa ni gus pa'i tshul gyis tsog pur 'dug pa'o/ /spyan sngar zhes pa ni gzigs pa'i yul de na 'dug pa'o/ /de ltar na/ gnas thun mong ma yin pa dag na/ ston pa rdo rje 'chang chen po'o/ /lag na rdo rje dang / kun du bzang po dang /chos kyi rdo rje dang / zla ba bzang po zhes bya ba'i ming can gyis sdud pa po dang / gzhan yang lag na rdo rje zhes bya ba'i ming can gyi dpa' bo mtha' yas pa dang / khro gnyer can dang / sgrol ma zhes bya ba la sogs pa'i dpa' mo mtha' yas pa dang thabs cig pa de'i tshe lag na rdo rje stan las langs te/bla gos phrag pa gcig la gzar te pus mo g.yas pa'i lha nga sa la btsugs te/ de nas bdag dang gzhan gyi don du lam sgyu 'phrul dra ba la brten nas/ bla na med pa'i byang chub thob par bya ba'i phyir/ 'dir sngar smos pa'i tshig gis gsol ba btab nas so//'dug ces pa ni sdud pa po sngar gnas pa bzhin du spyan sngar 'dug go zhes bya ba'i tha tshig go/ /de dag gis ni rkyen gleng bslang ba bshad zin to/ /da ni snod du rung bar bya ba'i phyir byin gyi rlabs kyi don rtags bstan par bya ste/ de'i phyir/ de nas bcom ldan shAkya thub//ces bya ba la sogs pa gsungs te/ de nas zhes bya ba ni bar gang gis kyang mchog de gsol ba btab pa'i de ma thag pa'o/ /bcom ldan 'das ni spang bar bya ba dang thob par bya ba'i las byas pa'o/ /shAkya thub pa ni rdo rje 'chang gi mtshan gyi rnam grangs te/bstan pa gcig la ston pa gnyis kyi mtshan gyis 'dogs pa'i phyir ro/ /rdzogs pa'i zhes pa ni sa dang dbang dang mtshan nyid yongs su rdzogs pa'i phyir ro/ /sangs rgyas kyi don ni bshad zin to/ /rkang pa ni 'gro ba'i don byed pa'i phyir te rkang pa dang 'dra ba'o/ /gnyis ni rigs lnga bde bar gshegs pa'i longs spyod rdzogs pa'i sku'o//de'i mchog ni drug pa rdo rje 'chang ngo / /nyid kyi zhes pa ni bcom ldan 'das rdo rje 'chang kho na'i zhal gyi dkyil 'khor nas ljags bzang po bkram pa ste 'dzum pa dang sbyar ro/ /ljags bzang ba nyid gang yin snyam pa la/ ring zhing yangs pa brkyang mdzad de/ /zhes gsungs te/ ring ba ni ljags kyis zhal gyi dkyil 'khor khebs pa'o/ /yangs pa ni srab pa'o/ /brkyang zhes pa ni 'od zer bkye bar mdzad pa'o/ /des ci byed snyam pa la/ 'jig rten gsum po snang byed cing / /zhes gsungs te/ 'jig rten gsum ni 'dod pa dang / gzugs dang / gzugs med pa'o/ /snang byed cing zhes pa ni sku gsung thugs snang bar byed pa ste/ de bzhin gshegs pa rnams so/ /snang ba ni 'od zer gyis de lta bur snang bar mdzad pa'o/ /snang bar mdzad pa des ci byed snyam pa la/bdud bzhi'i dgra rnams 'dul byed pa/ /zhes bya ba la sogs pa gsungs te/ 'od zer des mdzad pa rnam pa gsum mdzad de/ zhing khams snang bar mdzad pa dang / bdud bzhi 'dul bar mdzad pa dang / ngan song sbyong bar mdzad pa'o/ /de nyid gang zhe na/ 'jig rten gsum po snang bar byas nas sems can rnams kyi zhes pa rang gi de nyid ma rtogs par yun ring du 'khyams pa ni sems can no//rnams zhes pa ni 'gro ba rigs drug go/ /de dag gi rgyu'i rgyun la ngan song gsum gyi rgyu gnas pa sbyangs pas na bdud bzhi'i dgra 'dul bar byed pa ste/bdud kyang yin la dgra yang yin pas bdud bzhi'i dgra ste/ phung po'i bdud la sogs pa'o/ /dgra zhes pa ni thar pa'i srog gcod cing 'phags pa'i nor bdun phrogs pas so/ /de dag gi rgyu med pas ni dmyal ba la sogs pa'i 'bras bu mi 'byung ngo / /sbyor ba byed pa zhes pa ni sbyang bar bya ba de dag yin la/byed pa ni ston pa rdo rje 'chang des 'khor rnams la 'od zer bkye ba dang / gzigs pa dang 'dzum pa mdzad pas so/ /de ltar snod du rung bar mdzad nas/ tshul gang gis chos gsungs snyam pa la/ tshangs pa'i gsungs ni snyan pa yis//zhes bya ba la sogs pa gsungs te/ tshangs pa ni lha tshangs pa la/ gsung dbyangs yan lag drug cu dang ldan pas na de 'dra bar gsungs so/ /yang na tshangs pa ni/ bcom ldan rdo rje 'chang nyid de/ /tshangs pa mya ngan 'das sangs rgyas/ /zhes gsungs pas bcom ldan 'das kyi gsung dbyangs yan lag drug cu las 'di snyan pas bzung ngo //snyan pa zhes pa ni shin tu sdug bsngal can gyi rkyen 'phrog par byed pa'o/ /'jig rten gsum po kun bkang nas/ /zhes pa ni de bzhin gshegs pa'i gsung gi gsang ba ste/ sku gsung thugs kyi snang bas de bzhin gshegs pa rnams la khyab par chos gsungs pa'i phyir ro//yang na zab mo thun mong ma yin pa'i dbang du byas nas/ de nas bcom ldan shAkya thub/ /ces bya ba la sogs pa gsungs te bshad zin to/ /rdzogs pa'i sangs rgyas zhes pa ni rdzogs pa ni yongs su rdzogs pa'o//sangs rgyas ni bshad zin to/ /rkang gnyis ni rnam par snang mdzad la sogs pa'o/ /yang na sku gnyis so/ /mchog ni rdo rje 'chang chen po'o/ /nyid ni rdo rje 'chang kho na'o/ /zhal zhes pa ni brda don rnam par bshad pa ste/ gsang ba'i gnas so/ /ljags ni rdo rje'o/ /bzang pa ni bzang po 'byung ba'i rten yin pa ste/byang chub kyi sems so/ /ring ba ni rdo rje'o/ /yangs pa ni shes rab kyi b+ha ga'o/ /brkyang mdzad ces pa ni b+ha gar ling+ga brkyang ba ste/ snyoms par zhugs pa zhes bya ba'i tha tshig go/ /'jig rten gsum po snang byed cing / /zhes pa ni snyoms par zhugs pa las 'od zer gyis khams gsum du gtogs pa'i 'gro ba rnams dang /de bzhin gshegs pa rnams bkug ste bdag gi tshangs pa'i bu ga nas zhugs te/ gsang ba'i gzhal yas khang du 'khor lo gsum gyi lhar gyur par bya zhing / de dag kyang rim gyis dbang dang ldan par bya ste/phyir spros nas 'khor lo gsum gyi bdag nyid du gnas pa ni 'jig rten gsum mo/ /snang bar byed pa ni thabs kyi khyad par nges so/ /des ci byed snyam pa la/ bdud bzhi'i dgra rnams 'dul byed pa/ /zhes bya ba la sogs pa gsungs te/ bdud kyang yin la dgra yang yin pas bdud bzhi'i dgra ste/phung po'i bdud la sogs pa'o/ /yang na skye ba la sogs pa'i chu bo bzhi thabs des btul ba'o/ /sems can ni rang gi de nyid ma rtogs pas 'khor bar yun ring du 'khyams pa'o/ /rnams zhes pa ni mang po ste khams gsum pa'o/ /ngan song gsum zhes pa ni rgyu'i rgyun la gnas pa'i bag chags te/'dod chags la sogs pa'o/ /yang de rnams las rnam par smin pa dmyal ba la sogs pa ste/ rgyu dang 'bras bur bcas pa thabs gong mas sbyor bar byed ces pa'i tha tshig go/ /thabs gang gis snyam pa la/ de nyid gsal bar bshad pa'i phyir/ 'dzum bstan nas zhes gsungs te/ rang gi shes rab la blta ba dang / 'dzum pa dang / tsum+ba na dang / ang+gi ka dang / na ga pra ha ra dang / snyoms par 'jug pa la sogs pa sngar bstan pa'i don to/ /tshangs pa'i gsung ni snga ma bzhin no//'jig rten gsum ni sku gsung thugs kyi 'khor lo'o/ /kun bkang nas zhes pa ni kun la gsung gis ma khyab cing ma thob pa med pa dang / nas zhes pa ni gsung des 'og nas 'byung ba'i rgyud kyi dngos po rgyas par gsungs pa'o zhes bya ba'i tha tshig go/ /da ni bdag dang gzhan gyi don phyin ci ma log par zhus pa'i legs par gnang ba bstan par bya ba'i phyir/lag na rdo rje stobs po che/ /zhes bya ba la sogs pa gsungs te/ lag na rdo rje ni bshad zin to/ /stobs po che ni de'i mthu stobs gzhan gyis zil gyis mi gnon pa ste/ ji ltar sngon gyi dus su 'khor rnams la las kyi rnam par smin pa bstan par mdzad pa'i phyir zhabs la seng ldeng gi tshal pa zug par mdzad do//de nas 'khor rnams la bka' stsal pa/ nga'i seng ldeng gi tshal pa sus 'byin par nus zhes bka' stsal pa dang / rdzu 'phrul can gyi mchog la sogs pa gang gis kyang 'byin par ma nus so//de nas lha'i gnas su gshegs te sngar ji bzhin bka' stsal pas sus kyang 'byin par ma nus so/ /gzhan yang sa la gnas pa'i byang chub sems dpa' rnams la bka' stsal pas kyang 'byin par ma nus so//'on kyang de dag gis 'jig rten gyi khams 'di 'gul nus pa tsam byung ngo / /de'i tshe lag na rdo rje la khyod kyis 'di phyung zhig ces gsungs pa dang / lag na rdo rjes reg pa tsam gyis thon par gyur to/ /de nas 'khor rnams ngo mtshar du gyur te lag na rdo rje la 'di tsam gyi stobs yod pa zhes gcig la gcig smras so//de'i tshe bcom ldan 'das kyis lag na rdo rje la bka' stsal pa/ lag na rdo rje khyod kyi mthu stobs 'khor 'di dag la ston cig ces gsungs pa dang / lag na rdo rje rang gi srin lag gi rtse mo la rigs kyi mtshan ma shin tu chung ba'i rdo rje yod pa sa la bzhag ste/gang stobs dang ldan pa gcig gis 'di long cig ces gsungs pa dang / rdo rje gang rdzu 'phrul dang stobs kyis rlom pa dag gis ni bsgul bar yang ma nus so/ /de nas slar yang rang gi srin lag gis blangs te lan du mar nam mkha' la gsor zhing / klad la lan gsum du bskor nas nam mkha' la mtha' yod med brtags pa'i phyir 'phags nas da dung ma log go zhes snyan dngags las grags so//gsang dbang ni sku gsung thugs kyi gsang ba 'dzin pa'o/ /slar gsungs pa zhes pa de dag gis snod du rung bar byas pa de dag la'o/ /snying rje che dang ldan gyur pas//zhes pa ni snying rje chen pos kun nas bslang nas rang dang gzhan gyi don du zhus pa'o/ /'gro la zhes pa ni lam so so nas 'gro ba ste/ 'gro ba rigs drug go/ /phan pa'i don du zhes pa ni phan pa dang bde ba'i rgyur gyur pa'o/ /khyod ces pa ni khyod kyis zhes pa'o//ye shes lus can zhes pa ni ye shes ni chos kyi dbyings kyi ye shes so/ /lus zhes pa ni 'dus pa'i phyir te/ me long lta bu la sogs pa bzhi der 'dus pas so/ /'jam dpal zhes pa ni zug rngu dang bral ba gnyis su med pa ste/ ming gi khyad par 'byung zhes bya ba sngar bstan pa de dag tshig gi sgo nas bstan pa de'o//ming brjod pa zhes pa ni ming ngam tshig gi sgo nas bstan par bya ste/ don che ba zhes pa ste/ ming ngam tshig gi sgo nas ye shes kyi sku ston par byed pa ste/ de rtogs par bya'o zhes bya ba'i tha tshig go/ /tshig des don de rtogs pa la dgos pa ci yod snyam pa la/dag par byed cing zhes gsungs te/ shes bya'i sgrib pa bskyed pa'i rim pa dang / rdzogs pa'i rim pa'i tshul gyis dag par byed pa ste/ mi shes pa shes par byas pa zhes pa'i don to/ /sdig sel ba zhes pa ni nyon mongs pa'i sgrib pa sel ba ste/ smin par byed pa'i lam gyis zhes pa'i don to//de lta bu de/ nga las nyan par brtson pa ni/ /zhes pa la/ nga zhes pa ni rdo rje 'chang ngo / /nyan par brtson pa zhes pa ni gsol ba btab nas le lo ma byas par dga' ba dang gus par byas pa zhes pa'o/ /legs so dpal ldan rdo rje 'chang / /zhes pa ni dpal ldan rdo rje 'chang ni bshad zin to//de la bos nas rang gi don du legs par nyan pa ni legs so zhes pa'o/ /lag na rdo rje khyod legs so/ /zhes pa ni gzhan gyi don du zhus shing legs par nyan pa ni legs so zhes bya ba gnyis pa gsungs te/ zhus pa'i don legs pa nyid du gnas pa'o//da ni gus pa dang bcas pas legs par nyon cig par gdams pa bstan par bya ba'i phyir gsang ba'i bdag po zhes bya ba la sogs pa gsungs te/ gsang ba ni dus gsum gyi de bzhin gshegs pa de dag thams cad kyi sku gsung thugs kyi gsang ba 'dzin pa ste/de la kye gsang ba'i bdag po zhes bos nas/ de'i phyir zhes pa ni 'jam dpal ye shes kyi sku de bstan cing rtogs pa la dgos pa de yod pa'i phyir zhes pa'o/ /khyod ces pa ni sdud pa po'o/ /shugs kyis 'khor rnams kyang bsdu bar bya'o/ /legs par zhes pa ni ma nor ba'o//bstan par bya zhes pa ni don de tshig gi sgo nas so zhes pa'o/ /khyod ces pa ni sdud pa po'o/ /rtse gcig pa'i yid kyis zhes pa ni the tshom med par zhes pa'i don to/ /yang na snod kha sbub pa dang / zhabs rdol dang / mi gtsang ba zhes bya ba'i snod kyi skyon gsum spangs te nyon cig pa'i tha tshig go//de ltar skyon rnams spangs te mnyan nas kyang legs pa nyid du zung shig ces gnang ba'o/ /bcom ldan de ni legs zhes gsol/ /zhes pa ni bcom ldan 'das kyi don ni bshad zin to/ /de lta bu de la bos nas bdag cag gis khyod la don dang tshigs su bcad pa zhus pas gnang bas sku drin che'o zhes pa'i tha tshig go//de dag gis ni rgyud kyi dngos po yongs su shes par bya ba'i phyir lan gnang ba bshad zin to/ /da ni rigs drug la gzigs pa bstan par bya ba'i phyir/ de nas bcom ldan shAkya thub/ /ces bya ba la sogs pa gsungs te/de nas zhes pa ni bar gang gis kyang ma chod ces pa'o/ /bcom ldan 'das zhes pa ni bshad zin to/ /shAkya thub ces pa ni bstan pa'i mnga' bdag yin pa'i phyir dang / bstan pa gcig la ston pa gnyis kyi mtshan mi gdags pa ste/ dngos su rdo rje 'chang chen po'o//de theg pa'i rigs mang zhig tu gnas na yang rigs gsum du gzigs nas gsungs te/ de gang snyam pa la/ gsang sngags rigs chen thams cad dang / /zhes bya ba gsungs te/ gsang sngags kyang yin la rigs chen po yang yin pas gsang sngags rigs chen te/ dbang po yang rab kyi spyod yul lo//de'i phyir theg pa yang rab bla na med pa'i theg pa'o/ /thams cad dang zhes pa ni ma lus pa'i sgra ste/ de gang snyam pa la/ gsang sngags zhes bya ba la sogs pa gsungs te/ 'di dag las khyad par ni gsum ste/ gsang ba dang / rig pa dang / gzungs so/ / de la gsang ba ni gnas b+ha ga/ ston pa rdo rje 'chang / bstan pa gsang sngags kyi theg pa/ dam tshig bza' ba'i dam tshig dang ldan pa ni gsang ba'o/ /rig pa ni nyon mongs pa'i dgra 'joms par byed pas so/ /'chang ba ni d+ha ra ste bzung bas so/ /da ni lam log pa las 'dzin pas na de skad ces bya'o//spyi'i mtshan nyid ni gsang sngags zhes bya ba ste/ yid skyob par byed pas so/ /de ltar na ni/ rigs gsum la ni rnam par gzigs/ /zhes gsungs te/ theg pa'i bye brag dpag tu med pas gnas kyang gsang sngags kyi theg pa ni gsum kho na'o zhes dgongs pa'o/ /rigs de gsum la gzigs nas 'di gsungs pa'o zhes pa'i tha tshig go//des ni theg pa'i rigs gsum bstan nas/ da ni gang zag gi rigs gsum bstan par bya ba'i phyir/ /'jig rten 'jig rten 'das pa'i rigs/ /zhes bya ba la sogs pa gsungs te/ 'jig rten pa'i rigs zhes pa ni 'jig rten 'di tsam don du gnyer ba ste/ji snyed du bsgrub kyang 'jig rten las mi 'da' ba ste/ phyi rol pa'o/ /'jig rten las 'das pa ni nyan thos dang rang rgyal ba ste/ rang gi don gyi mya ngan las 'das pa'i don du gnyer ba'o/ /'jig rten snang bar byed pa ni theg pa chen po ste/gzhan gyi don du mya ngan las 'das pa'i don du gnyer ba'o/ /rigs zhes pa ni rtags te/ de nyid la rang rang gang mos pa de ni rigs so/ /yang na 'jig rten pa ni bskyed pa'i rim pa 'ba' zhig gi ril bu dang mig sman la sogs pa don du gnyer ba'o/ /'jig rten las 'das pa ni rdzogs pa'i rim pa stong pa 'ba' zhig don du gnyer bar byed pa'o//'jig rten snang byed tsam pa ni de gnyis zung du 'jug pas bdag dang gzhan gyi don du gnyer bar byed pa'o/ /rigs ni rtags te de dang de la dga' ba'o/ /rigs chen zhes pa ni rigs kyang yin la chen po yang yin pas rigs chen po ste/gnyis su med pa la ched du byed pa'o/ /da ni rigs mchog gang la gzigs pa bstan par bya ba'i phyir/ phyag rgya chen po'i rigs mchog dang / /zhes pa la sogs pa gsungs te/ 'dir phyag rgya yang yin la chen po yang yin pas phyag rgya chen po ste/ mi 'da' ba'i phyir ro/ /de yang ji ltar rgyal po'i bka' rtags kyis btab pa bzhin no/ /rigs kyi khyad par gyi rtags dad pa dang / brtul zhugs che ba dang / rtog pa med pa dang / dbang dang ldan pa'o/ /mchog ces pa ni de rnams las 'di lta bu mchog go zhes pa'i tha tshig go/ / rigs chen zhes pa ni rigs de dag las mchog tu gyur pas ni rigs chen te/ gtsug tor dang 'dra ba'i phyir ro/ /yang na gtsug tor ni gnyis su med pa'i sku yin la/ rigs de lta bu dag 'di'i snod du gyur pas de la gzigs zhes pa'i don to/ /de ltar rigs drug la gzigs pa bstan nas/da ni sgyu 'phrul dra ba bstan par bya ba'i phyir/ tshig gi bdag po zhes bya ba la sogs pa gsungs te/ sngon byung gi tshig gi bdag po ni bcom ldan 'das so/ /da ltar ni a ste/ thams cad kyi srog yin pas so/ /da ltar na as mtshon pa'i dbyangs dang gsal byed las byung bas na tshig gi bdag po'o//de nyid las tshig lhug pa'am 'theng po'i sgo nas gsungs sam snyam pa la/ tshigs su bcad ces gsungs te/ tsheg par bdun par tshigs su bcad nas gsungs pa'o/ /de nyid gang snyam pa la/ gsang sngags rgyal po drug ldan zhing //zhes gsungs te/ gsang sngags ni 'og nas ston pa'i drug po nyid do/ /rgyal po zhes pa ni ji ltar 'khor los sgyur pa'i rgyal po ni de thams cad la khyab pa dang / thams cad de'i ngo bor 'dus pa ste/ de ltar 'di nyid kyis bskyed pa'i lha'i rnal 'byor dang /rdzogs pa'i chos nyid kyi rnal 'byor gnyis ka'i don ston cing 'dir 'dus pas na rgyal po'o/ /drug ldan zhing zhes pa ni badzra tI k+Sh+Na la sogs pa'i grangs rnams so/ /de gang las 'byung snyam pa la/ gnyis su med par 'byung ba dang / /zhes gsungs te/ sngags 'di dag thabs dang shes rab gnyis su med pa las 'byung ba'am btu bar bya'o//de'i don ni sa'i cha gru bzhi pa'i rnam pa lnga dang / tsan+dan la sogs pa dri'i khyad par can gyis nye bar byugs shing gzugs 'dzin du rung bar byas la/ de la shes rab dang ldan pas thod le kor gyis shes rab kyi rang bzhin e'i rnam par bri'o//der thabs kyi rnam pa waM gyi ngo bo zlum po re'u mig dgu dang ldan pa bris te/ dbus kyi re'u mig la sna tshogs pad+ma 'dab ma brgyad pa'i lte bar yi ge rnams kyi mchog bri bar bya'o/ /shar gyi re'u mig la pad+ma 'dab ma brgyad pa bris te/ de'i 'dab ma re re la yan lag gnyis gnyis bskor bar bya ste/rim pas/ a A i I u U r-i r-I l-i l-I e ai o au i aH/ zhes dgod do/ /re'u mig lhag ma rnams la pad+ma 'dab ma bzhi pa lte ba dang bcas pa la go rims kyis ka kha ga g+ha nga / tsa tsha dza dz+ha nya/ Ta Tha Da D+ha Na/ ta tha da d+ha na/ pa pha ba b+ha ma/ ya ra la wa/ sha Sha sa ha zhes dgod par bya'o/ /de'i phyir gra gsum la sngags bsdu bar bya'o/ /de ni gnyis su med pa las sngags drug 'byung ba zhes bya ba'i tha tshig go/ /yang na lus dang srog dang yan lag gnyis su med pa las 'di dag 'byung ba'o/ /da ni zhus pa'i skabs su/ye shes sku ste rang byung ba/ /zhes gsungs pa de bshad par bya ba'i phyir/ /mi skye chos can 'di gsungs pa/ /zhes pa ste/ ye shes kyi sku ni a'o/ /rang byung zhes pa ni a nut+pan+na ste skye ba med pa'o/ /yang na chos nyid skye ba med pa yin la chos can a'o/ /'di zhes pa 'chad pa la rag las pa ste 'og ma rnams so//gsungs pa zhes pa ni 'og ma rnams te go sla'o/ /sngags btu ba'i phyir le tshe la bkod pa'i yi ge gsungs pa ni a A la sogs pa'o/ /'dir ras chod can mgo rmongs par bya ba'i phyir r-i r-I l-i l-I dang / lus kyi yi ge go rims su ma bkod de/lus ni 'og ma nas/ tshig kun rab tu gsal bar byed/ /ces gsungs pa'o/ /sngar bshad pa'i ye shes kyi sku gang na bzhugs pa dang / tshul ji ltar bzhugs pa bstan par bya ba'i phyir/ s+thi to zhes bya ba la sogs pa gsungs te/ s+thi to ni ye shes kyi sku ste/ bzhugs zhes pa'o/ /gang na bzhugs na hr-i di ste thugs ka na'o/ /ci'i tshul du bzhugs na/ dz+nyA na mU rti ni ye shes kyi lus kyis so/ /de yang ma rtogs pa'i gnas skabs na ra haM bud+d+ho ste/ /nga'am bdag gi blor gnas la/ rtogs pa'i gnas skabs na bu d+d+hA nAM zhes pa ste/ sangs rgyas rnams kyi'o//sangs rgyas gcig gi'am zhe na/ t+r+ya d+h+wa brti nAM zhes pa ste/ dus gsum gyis sangs rgyas kyi thugs ka na zhugs zhes pa'i don to/ /de ltar dus gsum gyi sangs rgyas kyi thugs ka na ye shes kyi sku de bzhugs te/ rtogs pa'i gnas skabs so/ /ma rtogs na nga bdag gi blor gnas pa ste/de ci gnas kyang rtogs par bya'o/ /zhes bya ba'i don to/ /da ni 'khor los sgyur pa drug gi sngags bstan par bya ba'i phyir/ /de ltar dang por sngags bstan pa'i rim pas sngags kyi lus dang yan lag rdzogs par bya ba'i phyir sngags btu bar bya ste/dang por yi ge'i dbang phyug gzhag /lnga pa yi ni gsum pa dang / /gnyis pa yi ni gsum pa la/ /me yi sa bon sbyar bar bya/ /bzhi pa yi ni dang po la/ /nga ro bzhi pa ldan par bya/ /dang po'i dang po'i yi ge la/ /mthar gnas dang po ldan byas te/ / gsum pa'i mtha' dang ldan par bya/ /dbyangs mtha' nye bar sbyar bar bya'o/ /bzhi pa yi ni gsum pa la/ /dbyangs lngar ldan pa dbyangs mtha' sbyar/ /rjes su dang po'i gnyis pa sbyar/ /gnyis pa'i dang po la gnyis sbyar/ /nga ro bcu gcig dro ba'i gnyis pa yin pa la mthar gnas dang po zhes pa ni bris nor yi naM snyam mo/ ldan byas te/ /rjes su bzhi pa'i gsum legs sbyar byings sgrub ltar na 'dir rtags don si rnam dag mi sbyor zhing / lag len bris cha la yang med bzhin dbyangs mthar sbyar zhes byung ba 'og tu dgos rgyu 'dir bcug gam snyam mo/ / pa'o/ /lnga pa'i dang po me dang ldan/ /gnyis pa'i gsum pa de mthar gzhag /rlung dang sbyar ba'i yi ge la//nga ro gnyis ldan gnyis 'gyur bya/ /bzhi pa'i mtha' bcas lnga mtha' la/ /nga ro drug ldan me dang ldan/ /rjes su bzhi pa'i dang po la/ /rlung la nam mkha' rab tu sbyar/ /gnyis pa'i gsum pa de mthar ldan/ /rlung la nga ro gnyis ldan bya/ /de rjes bzhi pa'i mtha' bcas pa'o//dang po'i dang po gnyis par bcas/ /de ltar rlung ni gzhag par bya/ /lnga pa yi ni gsum pa dag /dbyangs yig gnyis pa sbyar nas ni/ /dang po'i gsum pa bzhi pas brgyan/ /mthar gnas chu dang bcas pa ste/ /de mthar me dang ldan pa'o/ / mi 'gyur me dang lnga dang po'o/ /rjes su gnyis pa'i dang po ste/ /bzhi pa'i lnga pa gnyis par ldan/ /yang ba nyid dang bzhi dang po/ /dbyangs bcu gcig gis mdzes par bya/ /de rjes bzhi dang lnga mtha' ste/ /'khor 'di yang dro bar brjod na 'thad snyam/ los sgyur rgyal gsang sngags che/ / dngos grub thams cad byed pa'o/ /zhes pas ni de dag bsdus pa ste/ /lhag pa dang chad pa'i nyes par mi 'gyur pa'o/ /des ci byed snyam pa la/ /badzra tIk+Sh+Na ni rnon po ste/ /'dir dbyangs mtha' sbyar dgos rgyu lam byung ba bris mkhan snga ma zhig gi skyon no/ /gnyis su med pa'i ye shes so/ /des duH kha ts+tshe da ste sdug bsngal gcod par byed pa'o//de yang rgyu'i rgyun las de'i rgyu gnas pa dang / 'bras bur bcas pa rgyun gcod pa'o/ /bcad pas ci 'gyur snyam pa la/ /pradz+nyA dz+nyA na mU rta ye zhes gsungs te/ shes rab ye shes kyi lus su gnas par 'gyur pa'o/ /de nyid slar gsungs pa dz+nyA na kA ya ste/thams cad kyi ye shes kyi sku ste thams cad kyi mchog go/ /des gzhan gyi don mdzad pa ni/ bA gI shwa ra ste don ye shes kyi sku ste/ tshig gi sgo nas ston par mdzad pas so/ /de ltar gnyis su med pa'i ye shes des sdug bsngal thams cad shes rab ye shes kyi skur gnas 'gyur pa'i ye shes kyi sku de dag gam tshig gi sgo nas bstan nas bsgoms pa las ci byed snyam pa la/a ra pa tsa nA ya te na maHzhes pa ni/ sdig pa thams cad sreg par byed pa'o zhes pa'i don to/ /de dag gis ni sgyu 'phrul dra bas mngon par byang chub pa bshad zin to/ /da ni don dam pa byang chub kyi sems bstan par bya ba'i phyir/'di ltar sangs rgyas bcom ldan 'das/ /zhes bya ba la sogs pa gsungs te/ 'di ltar zhes pa ni sngags btu ba 'di ltar ro/ /sangs rgyas bcom ldan 'das ni sngags dang lha la tha dad med pas na sngags kyi rgyal po drug ni sangs rgyas bcom ldan 'das drug go//rdzogs pa'i sangs rgyas ni sngags des bskyed pa'i lha drug ste/ rdo rje rnon po la sogs pa'o/ /yang na sangs rgyas ni don dam pa byang chub kyi sems a'i ngo bo yin la/ de las 'byung ba'o/ /de nas/ a ni yig 'bru kun gyi mchog /ces gsungs te/ mi 'gyur zhing mi zad pas na a de yi ge'o//'bru kun zhes pa ni yi ge yang yin la kun kyang yin pas na yi ge 'bru kun te dbyangs dang gsal byed do/ /mchog ces pa ni yi ge gang brjod kyang de kho na gtso bo'o/ /don yang yin la chen po yang yin pas/ don chen yi ge dam pa ste/ /zhes gsungs te/ bdag dang gzhan gyi don 'grub par byed pas na don chen po'o//yi ge zhes pa ni mi 'gyur pa ste/ yi ge a'i ngo bo ste/ mi slu bas na dam pa'o/ /srog chen po ste zhes pa ni yi ge gang brjod kyang de khong nas 'byung bas na de'i phyir/ skye ba med pa ste/ rgyu dang rkyen la ma ltos par byung bas rang byung zhes bya'o//de'i phyir/ tshig tu brjod pa spangs pa ste/ /zhes gsungs te/ nyams su myong bar bya'o zhes bya ba'o/ /da ni kun rdzob byang chub kyi sems bstan par bya ba'i phyir/ brjod pa kun gyi rgyu yi mchog /ces bya ba la sogs pa gsungs te/ gang rjod par byed pa thams cad kyi rgyu ni lus kyi yi ge dang yan lag dang srog ste/'dir gsal byed gtsor bzung bas na/ tshig kun rab tu gsal bar byed/ /ces gsungs te/ tshig kun zhes pa ni gang brjod kyang zhes pa'o/ /gsal ba ni tshig tu gyur pa ste/ a la sogs pa ma yin te/ na maH ak+Sho b+h+ya zhes pa la sogs pa gsal bar byed pa ste gsal byed rnams so//yang na/ brjod pa kun ni rgyu yi mchog /ces pa ni sngags kyi rgyal po drug la zhi ba la sogs pa'i mtha' dang ldan par bya ba'i don to/ /gzhan snga ma bzhin no/ /de nas byang chub kyi sems kyi dri ma nyon mongs pa bsal ba'i thabs bskyed pa'i rim pa bstan par bya ba'i phyir/mchod pa chen po zhes bya ba la sogs pa gsungs te/ 'di ltar mchod pa ni mnyes par byed pa ste/ 'di ltar nyon mongs pa chung ngu chen pos bcom nas gnas gyur pa de ltar gyur pa'i mnyes pa ste/ mchod pa'o zhes kun la gsal bar shes par bya'o/ /'dod chags che zhes pa ni gzugs la sogs pa la chags pa ste/ des 'dod par byed pa'o/ /'dod chags nyid kyis 'dod chags chung ngu de btul te 'od dpag tu med pa'i sgo nas so/ /'di ni chags bral las khyad par du byas pa'o//de'i phyir/ chags pa thams cad sel bar byed/ /ces gsungs te/ gang du 'dod chags dang ldan pa yang dga' bar byed pa dang / tha na glu dang gar la sogs pas kyang dga' bar byed pa'o/ /zhe sdang zhes pa ni nyon mongs pas kun nas bslang nas zhe sdang ba'o/ / che zhes pa ni phyi'i mthu dang stobs kyis dregs pa la sogs pa tshar gcod pa dang / nang du zhe sdang chung ngu dang / gsang sngags las gzhan pa'i sdug bsngal dang ldan pa'i lam du zhugs pa dag bcom ldan 'das mi bskyod pa sku mdog nag por gnas gyur pas na/ nyon mongs kun gyi dgra che ba//zhes gsungs te/ gti mug ces pa ni rgyu dang 'bras bu mi shes pa ste/ chad par lta ba ni rgyu'i dus so/ /'bras bu'i dus su nam mkha'i sprin dengs pa ltar sku dang ye shes 'gog pa ni gti mug gi blo ste/ rnam par snang mdzad sku mdog dkar por gyur te/ sku dang ye shes kyi snang bas 'joms pas gti mug chen po'o//khro ba che zhes pa ni gzhan gyi phun sum tshogs pa la phrag dog pa ste/ theg pa gzhan la zhugs shing lam gzhan la zhugs pa la phrag dog pa ni khro ba chen po ste/ nyi tshe ba'i lam la zhugs pa'i dgra chen po'o/ /de gnas gyur pa ni don yod grub pa'am rta mchog ces pa sku mdog ljang gu'o//chags pa che zhes pa ni rang gi don phun sum tshogs pa la chags nas gzhan la ser sna byed pa la sogs pa'am/ rang gi bde ba chung ngu tsam la chags nas nga rgyal byed pa'o/ /gnas gyur nas rdo rje nyi ma sku mdog ser por gyur pas 'joms pas na chags pa thams cad sel bar byed pa'o//de ltar gtso bo bskyed pa bstan nas/ da ni 'khor bskyed pa bstan par bya ste/ 'dod pa chen po zhes bya ba la sogs pa gsungs so/ /'dod pa chen po zhes pa ni 'dod par byed pa ste/ mig la sogs pa'o/ /gti mug rdo rje dang / zhe sdang rdo rje dang / ser sna rdo rje dang / 'dod chags rdo rje dang / phrag dog rdo rje dang / chos kyi dbyings kyi rdo rje'o/ /yang na 'dod pa zhes pa ni 'dod par bya ba'i yul te/ de dag ni gzugs rdo rje dang / sgra rdo rje dang / dri rdo rje dang / ro rdo rje dang / reg rdo rje dang / chos kyi dbyings kyi rdo rje'o/ /chen po zhes pa ni 'dod par byed pa dang 'dod par bya ba dag lhar byas pas bde ba chen po zhes pa'i don to//des cir 'gyur snyam pa la/ dga' ba chen po ni rang gi don to/ /mgu ba chen po ni gzhan don 'byung bas so/ /da ni rten gzhal yas khang bsgom pa bstan par bya ba'i phyir/ gzugs che lus kyang che ba ste/ /zhes bya ba la sogs pa gsungs te/gzugs kyang yin la lus kyang yin pas/ gzugs che lus kyang che ba ste/ baM ser po las skyes pa'i sa'i dkyil 'khor mdog ser po gru bzhi pa zur bzhir rdo rjes mtshan pa'o/ /de'i steng du suM las ri'i rgyal po ri rab rin po che las grub pa de'i steng du mtshan nyid thams cad dang ldan pa'i gzhal yas khang b+hUM las grub pa blta bar bya'o//de'i nang du sna tshogs pad+ma 'dab ma brgyad pa'i lte ba la nyi ma dang zla ba kha sbyar ba'i gdan dang ldan pa'o/ /de'i 'og tu/ kha dog che zhing lus bong che/ /zhes pa ni kha dog che ba ni dkar ba'o/ /lus bong che zhes pa ni rngams mthug pa'o//yang na sa bas che bar gyur pas so/ /de yang baM dkar po las byung ba kha dog dkar po bum pas mtshan pa zlum po can no/ /ming yang cha zhing rgya che ba/ /zhes pa ni ming yang zhes pa ni me la ming gi rnam grangs mang bas so/ /rgya che zhes pa ni chu bas che ba'o/ /de yang raM dmar po las byung ba 'bar ba bdun gyis mtshan pa b+ha ga'i dbyibs can no//dkyil 'khor chen po yangs pa yin/ /zhes pa ni dkyil 'khor zhes pa 'dis ni gong ma yang shes par bya ste/ kha dog dang dbyibs dang mtshan ma bstan to/ /yangs pa ni me'i dkyil 'khor bas rgya che bar gyur pa ste//ya~M sngon po las byung ba gzhu'i dbyibs can ba dan gyis mtshan pa bsgom par bya'o/ /da ni bsrung ba'i bka'i 'khor lo bsgom pa bstan par bya ste/ de'i phyir/ shes rab mtshon chen 'chang ba ste/ /zhes bya ba la sogs pa gsungs te/ gong du bsod nams dang ye shes kyi tshogs bsags pa'i rjes la ra~M las byung ba'i nyi ma'i steng du thugs kyi yi ge las mtshon pa ste/ral gri'i chang gzungs la hUM gis mtshon pa can no/ /de las hUM mdzad sku mdog sngo zhing zhal gcig pa phyag gnyis pa lta'o/ /de'i phyag mtshan gsungs pa/ shes rab mtshon chen 'chang ba ste//zhes bya ba la sogs pa gsungs te/ de'i mtshan nyid shes rab yin la mtshan pa ral gri ste/ de'i phyag g.yas par byin par bya'o/ /de'i phyag g.yon par/ nyon mongs lcags kyu che ba'i mchog /ces pas lcags kyu byin no/ /nyon mongs pa 'dren par byed pas so/ /de'i mdun du ra~M las byung ba'i nyi ma la hUM las byung ba'i gnod mdzes zhal gcig phyag gnyis pa lcags kyu dang zhags pa 'dzin pa can bskyed la/grags chen snyan grags chen po ste/ /zhes gsungs te/ grags chen ni hUM mdzad kyis gnod mdzes la bka' bsgo ba'o/ /gnod mdzes kyi sngags bzhi po brjod pas shar phyogs kyi khro bo la sogs pa bzhi bskyed de/des mtshams bzhir lhun gyis grub par bya'o/ /de yang / khro bo bzhi dang yang dag ldan/ /skad cig gis ni sku brgyad 'gyur/ /zhes pa lta bu'o/ /de nas khro bo de dag gis ni mi dge ba bcu las skyes pa'i phyogs skyong bcu bkug sta khro bo bcu'i mdun du gzhag go//snyan grags ni oM g+ha g+ha zhes pa la sogs pa'i sngags kyis bskul te/ phyogs skyong bcu la phur pa btab nas A ko Ta'i sngags kyis sku gsung thugs kyi phur bus btab pas lus ngag yid gsum gyi rtog pa dang bral bar byas te bstan pa'i grogs su byas pas so//yang na grags chen ni 'od zer phyogs bcur spros nas phyogs skyong bcu bkug ste btul ba'o/ /snyan grags ni mi dge ba bcu spangs te dge ba bcu la bkod pa'o/ /snang ba chen po zhes pa ni des gnod mdzes kyi mdun du nyi ma la yi ge raM bltas te zhabs kyis brdzis pas rdo rje sa gzhi dang ra ba dang gur dang mda'i dra ba bsam mo//gsal ba che zhes pa ni de'i phyi rol du me'i 'obs gsal bar bsgom mo/ /da ni bskyed pa'i rim pa'i mtshan nyid ji ltar bsgom pa bstan pa'i phyir/ mkhas pa sgyu 'phrul chen po 'chang / /zhes bya ba la sogs pa gsungs te/ sgyu 'phrul chen po 'chang zhes pa ni sgyu ma gnyis su med pa'i byang chub kyi sems yin pas de la 'phrul pa ni rten dang brten pa'i dkyil 'khor ro//yang na sgyu 'phrul ni ji ltar sgyu ma mkhan gyis rde'u dang shing bu la sogs pa la rta dang glang po dang khang bzangs la sogs pa mi bden pa'i dngos po snang ba ltar 'dir yang zhen pa med par rten dang brten pa'i dkyil 'khor sgom par byed pas na mkhas pa'o//dngos po la mngon par zhen pas bsgom pa ni mi mkhas pa'o zhes pa'i don to/ /'o na mi bden pa'i dngos po snang ba ni don dam pa ma yin pa snang ba ste de lta bu bsgoms pas don grub bam zhe na/ de'i phyir/sgyu 'phrul chen po don grub pa/ /zhes gsungs te/ sgyu 'phrul ni bshad zin to/ /don ni gnyis te/ bdag dang gzhan gyi don to/ /yang na dngos grub gnyis so/ /gzhan yang 'byung ba rim brtsegs kyis zad par dang zil gnon 'byung bas de skad ces bya'o/ /de nyid gsal bar bstan pa'i phyir/sgyu 'phrul chen po dga' bas dga'/ /zhes gsungs te/ dga' bas zhes pa ni bdag gi don to/ /dga' zhes pa ni gzhan gyi don 'byung ba ste/ sku dang ye shes kyi snang ba 'byung ba zhes bya ba'i don to/ /de nyid kyi ming gi rnam grangs bstan par bya ba'i phyir ro//sgyu 'phrul chen po mig 'phrul can/ /zhes gsungs te/ sgyu ma la sogs pa'i dpe bcu gnyis dang 'dra bar bstan par bya'o zhes pa'i don to/ /gal te de lta ma yin te zhe na/ de nyid dang bral bas bsod nams byas par 'gyur ro/ /dngos po dang zhen pa dang ma bral pas ni gnod sbyin byas par 'gyur ro//da ni mngon rtogs kyis sdom pha rol tu phyin pa bcu bstan par bya ba'i phyir/ sbyin bdag chen po gtso bo ste/ /zhes bya ba la sogs pa gsungs te/ sbyin pa zhes bya ba gzhan dag mgo gtong ba dang mig gtong ba la sogs pa yin la/ de yang sa dang po la sbyin pa'i pha rol tu phyin par rdzogs par 'dod pa la mi ltos te/'dir gnas khyad par can du stan bde ba la 'dug ste/ kun rdzob byang chub kyi sems sngon du song bas skad cig gis lha'i nga rgyal can du byas te snyi gar nyi ma la thugs kyi yi ge blta bar bya'o/ /de nas mdun du sna tshogs pad+ma'i steng du bla ma dang sangs rgyas sras dang bcas pa dgug pa'am de nyid du blta bar bya ste/de la dngos po kun gyi phyag bya ba dang / phyi dang nang la sogs pa'i mchod pas mnyes par bya ba dang / sdig pa bshags pa dang / bsod nams la rjes su yi rang ba dang / chos kyi 'khor lo bskor bar bskul ba dang /mya ngan las mi 'da' bar gsol ba gdab pa dang / gsum la skyabs su 'gro ba dang / longs spyod gtang ba dang / rang gi lus dbul ba ni lus gtang ba dang / de ltar dge ba'i rtsa ba bsngo ba ni dge ba'i rtsa ba gtang ba dang / de'i rjes la 'og nas ston pa'i tshangs pa'i gnas bzhi dran par bya ste/sngags sam/ rig pa dang / ting nge 'dzin gyis stong pa nyid du sgom par byed pa ni sbyin pa'o/ /bdag po ni rnal 'byor pa ste/ thun mong gi mtshan nyid pha rol tu phyin pa bcu'i mi mthun pa'i phyogs ser sna la sogs pa spangs pa/ khyad par gyi mtshan nyid dbang dang dam tshig dang ldan pa'o//chen po yang yin la gtso bo yang yin pas chen po'i gtso bo ste/ pha rol tu phyin pa'i theg pa las khyad par du gyur pa'o zhes pa'i don to/ /tshul khrims chen po 'chang ba'i mchog /ces pa ni tshul khrims la sogs pa 'di dag gzhi gcig tu bsdu ba ni kun la shes par bya'o//tshul khrims ni de'i mi mthun pa'i phyogs spong bar byed pa ste/ 'dir yang rnal 'byor pa'i mi mthun pa'i phyogs bar chad spong bar byed pa ste/ ji lta ba'i rim pa ni snga ma bzhin no/ /'chang ba'i mchog ni de ltar bsam gtan du byed pa de'o/ / bzod chen ni sdug bsngal dang du len pa ste/ bsrung ba'i khang pa'i nang der chos kyi dbyings kyi rang bzhin chos kyi 'byung gnas e las byung bar blta'o/ /der ya~M ra~M ba~M la~M rnams las 'byung ba bzhi ri rab dang bcas par lta zhing der gzhal yas khang mtshan nyid thams cad dang ldan pa sna tshogs pad+ma dang zla ba dang nyi ma'i dkyil 'khor dang ldan pa'i gdan can no//brten pa ni rten no/ /brtson 'grus ni le lo la mi gnas par lha'i skur ldang ba ste/ der dbyangs dang gsal byed las byung ba'i nyi ma dang zla ba kun nas kha sbyar ba'i bar du khams gsum pa'i ngo bo oM AH hUM/ zhes par bsams te/ de rnams gong bu gcig tu gyur pa las thugs kyi rang bzhin hUM dang ldan pa'i rdo rje'o//de las rdo rje 'chang rang gi shes rab dang gnyis su med par bzhengs pa'o/ /brtul pa yin zhes pa ni btang snyoms la mi bzhugs par bzhengs pa'o/ /bsam gtan chen po ni rtog pa dang dpyod pa las 'das te/dga' ba dang bde ba'i ngo bo gnas pa ste/ de yang khams gsum ma lus pa yi ge gsum du bsdus pa ste/ ho dmar po gnyis kyi bar na gnas pa nam mkha' la bltas te/ skar mda' 'phro ba'i rim pas bdag la thim pas yab yum chags pa'i me 'bar bas snyoms par zhugs te gnyis su med pa'i bde ba chen po thig le'i ngo bor zhu ba ni ting nge 'dzin du gnas pa'o//shes rab chen po'i lus 'chang ba ni de las lha mo bzhi chad de/ sngon gyi thugs dam ma brjed par stong pa la bzhugs par sems can gyi don la bzhengs zhes pa'i glus bskul bas zung du 'jug pa'i skur bzhengs pa'o//stobs po che zhes pa ni stobs dang ldan par bya ste/ de'i gnas gsum byin gyis brlab pa dang / ye shes sems dpa' dang gnyis su med par bya'o/ /thabs che ba zhes pa ni dbang dang ldan par bya ba ste/ 'di skad gsungs pa'i rim pas dbang bskur ba dang rigs kyi bdag pos rgyas btab pa'o//de'i rjes su mig la sogs pa'i mngon par shes pa dang ldan par bya ba'i phyir gti mug rdo rje la sogs pa dgod pa'o/ /smon lam zhes pa ni smon pa'i sgo nas sems can gyi don byed pa ste/ spro ba dang / bsdu ba dang / mchod pa dang / bstod pa dang / bdud rtsi myang ba dang / ngag gis bzlas pa bya ba rnams so/ /ye shes zhes pa ni thig le dang phra mo bsgom pa ste/ gzhal yas khang la rdo rje'i bsrung ba bsdus/ de 'khor gyi lha la'o/ /de yum la bsdus te bdag shes rab dang bcas pas zab mo'i don sgom par byed pa'o//gal te ldang bar 'dod na ji skad bshad pa'i gtor mas mnyes par bya ba ste/ yi ge brgya pas bzod par gsol bar bya ste/ de dag gsum gyi mthar bzhag pas gshegs par byas te spyod lam gar bde bas gnas par bya'o/ /da ni bsod nams kyi tshogs kyis rgyas gdab pa dang /tshad med bzhi ji ltar bsgom pa bstan par bya ba'i phyir/ byams chen zhes bya ba la sogs pa gsungs te/ byams pa yang yin la chen po yang yin pas byams pa chen po zhes bya ba ni bde ba'i rgyu dang sems can thams cad dang ldan par 'dod pa'o/ /rang bzhin zhes bya ba ni 'di bzhi char gyi rang bzhin te/dmigs pa dang / rnam pa'o/ /dpag tu med ces pa ni tshad med pa'i tshig bzung ngo / /snying rje chen po zhes pa ni snying rje yang yin la chen po yang yin pas snying rje chen po ste/ dmigs pa dang rnam pa'i sgo nas sdug bsngal dang de'i rgyu dang bral bar 'dod pas so//blo'i mchog ces pa ni de lta bu sgom pa po de ni shes rab chen po dang ldan pa zhes pa'i don to/ /de bzhin du dmigs pa dang rnam pa'i sgo nas dga' ba dang btang snyoms kyang shes par bya'o/ /'dis ni sgom bzhi shes par bya'o/ /yang na mchog ces pa ni nyan thos dang rang sangs rgyas las khyad par du byas pa'o//da ni rdo rje theg pa'i thabs kyi che ba'i khyad par bstan par bya ba'i phyir/ shes rab chen po blo yi mchog /ces bya ba la sogs pa gsungs te/ shes rab chen po zhes pa ni de ltar sgom pa'i gang zag de'i phyir 'di dang pha rol gnyis kar sems can gyi don byed pas na shes rab chen po'o//sku gsum lam du byed pa ni blo'i mchog ste gang zag gi che ba'o/ /mkhas pa chen po zhes bya ba ni dge ba'i bshes gnyen te/ dngos grub gnyis sgrub pa'i thabs la mkhas pa'o/ /thabs che ba zhes pa ni thabs mang ba'am/ yang na nyon mongs pa nyid lam du byed pa'i phyir te thabs che ba'o//rdzu 'phrul chen po'i stobs dang ldan/ /zhes pa ni rdzu 'phrul yang yin la chen po yang yin pas na rdzu 'phrul chen po ste/ de ltar bla ma dang slob ma'i nus pas nyon mongs pa skad cig la spong ba dang ye shes skad cig la skye bas na rdzu 'phrul chen po'o/ /yang na bskyed pa dang rdzogs pa sems kyi rnam par 'phrul pa la spyod pa dang /rdzu 'phrul chen pos sems can gyi don byed pas so/ /skad cig gis ni bdag dang gzhan 'khor ba las 'don pas stobs dang ldan pa'o/ /shugs chen mgyogs pa chen po ste/ /zhes pa ni shugs ni rtsal te nyon mongs pa gcod pa'o/ / mgyogs pa ni tshe gcig gis 'bras bu thob pa ste/ lam myur ba'i che ba'o/ /'bras bu'i che ba bstan pa'i phyir/ /rdzu 'phrul chen po cher grags pa/ /zhes gsungs te/ de lta bu'i lam khyad par can gyis 'bras bu myur bar 'byin pas na rdzu 'phrul chen po'o/ /grags pa zhes pa ni rang dang gzhan gyi grub mtha' la grags pa'o//stobs che zhes pa ni 'bras bu lha'i rnal 'byor gyi sems can rjes su 'dzin pa'o/ /de'i phyir pha rol tu phyin pa'i theg pa zil gyis gnon pa'o/ /ye shes stobs che bar bstan pa'i phyir/ srid pa'i ri bo chen po 'joms/ /zhes gsungs te/ srid pa ni srid pa gsum ste ri bo dang 'dra bas ri bo'o//ji ltar ri bo chen pos non pa rnams ni thar pa med pa'o/ /yang na srid pa ni chu bo bzhi ste/ zab pa dang / rgya che ba dang / rgyun mi 'chad pa dang / rgal bar dka' ba zhes bya ba'i don to/ /de 'joms pas na 'joms pa'o/ /dpe ji lta bu snyam pa la/ mkhregs shing zhes pa ni sra ba dang / brtan pa la sogs pa chos bdun dang ldan pa'o/ /de gang snyam pa la/ rdo rje chen po ste/ rdo rje yang yin la chen po yang yin pas na rdo rje chen po ste rdo rje theg pa'o/ /des na sra zhing mkhregs pa'i rdo rje theg pa des srid pa'i ri bo chen po 'joms pa'o//drag po zhes pa ni ru dra yin la/ chen po drag shul che zhes pa ni/ zhal bzhi phyag bcu gnyis pa la sogs pa'i sku'i khro bo phyag mtshan dang / bzhugs tshul shin tu mi bzad pa des 'joms pa'o/ /ji ltar me dang shing gi phung po bzhin no/ /'jigs chen zhes pa ni dmyal ba la sogs pa ste/de dag gi tshe'i tshad dang lus dang sdug bsngal dag thos pa'am bris pa dag mthong yang 'jigs par 'gyur na/ de nyid thob na ci'i phyir 'jigs par mi 'gyur la/ de'i phyir de'i rgyu dang 'bras bur bcas pa ni 'jigs pa ste/ de 'joms par byed pa'o/ /mgon po ni rdo rje theg pa ste/ gang gis de rig pa ni mchog chen po'o//yang na mgon po ni 'bras bu'o/ /rig pa ni rten gyi gang zag go/ /mchog ni rdo rje theg pa ste lam mo/ /chen po zhes pa ni de'i mthu ste/ des de spyad pas de 'byung ba zhes bya ba'i don to/ /de gang snyam pa la/ bla ma gsang sngags che ba'i mchog /ces gsungs te/ 'di'i gong na lam khyad par can gzhan med pas bla ma'o//de'i phyir gsang sngags che ba'i mchog go/ /yang na bla ma ni bla ma'o/ /de las rag las pa'i sgo nas 'byung bas na de skad ces bya'o/ /de ltar na pha rol tu phyin pa'i theg pa spang bya yin nam snyam pa la/ theg pa chen po'i tshul la gnas//zhes gsungs te/ gong du pha rol tu phyin pa bcu dang ming mi 'gal bar gsungs pas na'o/ /'on kyang 'di ni bgrod pa'i chos so/ /theg pa chen po'i tshul gyi mchog /ces pas ni pha rol tu phyin pa bcu gzhi gcig tu dus gcig la spyod pas na ldan pa'i chos te mchog ces bya'o//cig shos ltar bskal pa grangs med pa gsum la sogs pas ni ma yin no/ /de dag gis ni byang sems rdo rje bshad zin to/ /da ni de ltar thabs che bas 'bras bu gzugs kyi sku'i khyad par can bstan par bya ba'i phyir/ sangs rgyas rnam par snang mdzad che/ / zhes bya ba la sogs pa gsungs te/ nyon mongs pa la sogs pa mi mthun pa rnams ni spangs pa dang / chos kyi dbyings rnam par dag pa la sogs pa ye shes rnams rgyas pa'i phyir sangs rgyas so/ /ji skad bshad pa'i pha rol tu phyin pa'i theg par ni mtshan dang dpe byad dang ldan pa'i rnam par snang mdzad ye shes gang chen mtsho zhes bya ba'i ming can byang chub mchog gi phyag rgya can yin la/kho bo cag gi rnam par shes pa ni gsal ba ste/ 'od gsal chos kyi dbyings rnam par dag pa'i ye shes yin la/ snang byed ces pa ni der sku dang ye shes kyi snang ba 'char du rung ba ni chen po ste/ longs spyod rdzogs pa'i sku khyad par du gyur pa dbyer med pa'i sku dus gsum gyi de bzhin gshegs pa thams cad kyi sku'i rnam par snang mdzad pa'o/ /sprul pa'i sku'i khyad par ji lta bu snyam pa la/ thub pa chen po thub chen ldan/ /zhes gsungs te/ thub pa chen po zhes pa ni sprul pa'i skur grags pas chags bral gyi gzugs 'dzin pa 'dzam bu'i gling bye ba phrag brgyar sprul pa'i sku bye ba phrag brgya sprul nas sems can gyi don mdzad pa can no//'dir ni thub pa chen po ste/ sprul sku khyad par du gyur pa dregs pa can tshar gcad pa'i phyir rnam pa sku'i khro bo zhal bzhi phyag bcu gnyis pa la sogs pa rang gi shes rab dang gnyis su med pa sku mdog phyag mtshan dang bzhugs tshul la sogs pa gang gis kyang zil gyis mi non pa sprul pa gang+gA'i klung gi bye ma snyed sprul pa dag go//ngo bo ni zung du 'jug pa'i sku'o/ /gal te rdo rje theg pa'i gzhung 'dir thub pa dang thub pa chen po zhes gsungs su zin kyang /rang gi gzhung la de lta bu ma grags so zhe na/ shes rab kyi pha rol tu phyin pa yi ge nyung ngu las/ oM ta d+ya thA/ mu ne mu ne ma hA mu na ye swA hA/ zhes gsal po nyid du gsungs pa'i phyir ro/ /da ni lam gyi khyad par bstan pa'i phyir/ gsang sngags tshul chen las byung ba//zhes pa la sogs pa gsungs te/ gsang ba zhes pa ni gsang sngags su byed pa ste/ gnas dang ston pa dang chos dang rdzas la sogs pa skal ba dang mi ldan pa la gsang ba'i phyir ro/ /sngags zhes pa ni yid skyob pa ste/ de bas na de'i tshul lam lugs sam lam las de lta bu 'byung ba'i phyir chen po'o//las byung ba zhes pa ni gnyis su med pa las 'bras bu gnyis su med pa 'byung zhes pa'i don to/ /de'i phyir/ gsang sngags tshul chen bdag nyid can/ /zhes gsungs te/ lam dang 'bras bu gnyis su med pa las byung bas na bdag nyid can te bdag nyid gcig pa zhes bya ba'i tha tshig go//lhag ma ni snga ma bzhin no/ /da ni chos kyi dbyings rnam par dag pa'i sgra don rnam par bshad par bya ste/ de'i phyir/ pha rol phyin bcu thob pa ste/ /zhes bya ba la sogs pa gsungs so/ / pha rol phyin bcu ni 'di lta ste/ sbyin pa dang / tshul khrims dang / bzod pa dang / brtson 'grus dang / bsam gtan dang / shes rab dang / thabs dang / stobs dang / smon lam dang / ye shes so/ /thob pa zhes pa ni thob pa 'bras bu'i pha rol tu phyin pa bcu ste/ pha rol phyin pa kun rdzogs pa//zhes bya ba la sogs pa 'og nas ston to/ /pha rol phyin pa bcu la gnas/ /zhes pa ni brjod zin to/ /gnas pa zhes pa ni gnas pa lam ste/ sbyin bdag chen po gtso bo ste/ /zhes bya ba la sogs pa lam bskyed pa'i rim pa bstan te/ sngar bshad zin to/ /pha rol phyin bcu dag pa ste//zhes pa ni dag pa rang bzhin gyis pha rol tu phyin pa'o/ /dag pa de ji ltar snyam pa la/ ji skad bshad pa'i pha rol tu phyin par lam lnga dang sa bcu bgrod pas 'bras bu sku gsum zhes bshad pa de 'dir dag pa'am ldan pa ste/ rig pa'i pho nya mo 'am/ dbyangs kyi pho nya mo la brten nas dag pas te/sku gsum gyi ngo bo nyid kyis rang bzhin gyis 'khor lo bzhi'am drug lus la gnas te/ spyi bo gtsug tor gyi 'khor lor rtsa 'dab ma brgyad pa'o/ /bde ba chen po 'khor lor phyi'i 'dab ma sum cu rtsa gnyis pa nang 'dab ma brgyad do/ /longs spyod kyi 'khor lor phyi'i 'dab ma bcu drug pa nang 'dab ma brgyad pa'o//chos kyi 'khor lor phyi'i 'dab ma brgyad dang nang gi 'dab ma brgyad pa'o/ /sprul pa'i 'khor lor phyi 'dab ma drug cu rtsa bzhi nang 'dab ma brgyad pa'o/ /de la bla ma dam pa'i zhal gyi gdams ngag gis rig pa'i pho nya'i rim pa'am/dbyangs kyi pho nya'i rim pas byang chub kyi sems spel ba dang spro ba byas te/ slar bsdus te bde ba chen pos bkang nas sku gsum gyi ngo bo 'khor lo gsum gyi nang 'dab ma khengs par byed pa'i rim pas dag pa'am ldan pa'o/ /de'i rim pa ni 'di yin te/ longs spyod kyi 'khor lo'i nang gi shar dang byang khengs pas ni sbyin pa la sogs pa dag pa'o//nub dang lho gang bas ni tshul khrims la sogs pa'o/ /de nas chos kyi 'khor lo'i shar dang byang gang bas ni bzod pa la sogs pa'o/ /nub dang lho gang bas ni brtson 'grus la sogs pa'o/ /shar dang lho dang nub gang bas ni bsam gtan la sogs pa'o//nub dang shar dang byang gi ni shes rab la sogs pa'o/ /sprul pa'i 'khor lo'i shar dang byang gi ni stobs la sogs pa'o/ /lho dang nub ni thabs la sogs pa'o/ /shar dang lho dang nub kyi ni smon lam la sogs pa'o/ /nub dang byang dang shar gyi ni ye shes la sogs pa dag pa'am ldan pa'o//gzhan yang de'i nus pas lus rjes su dran pa dang / tshor ba rjes su dran pa dang / chos dang / sems dang / 'dun pa'i rdzu 'phrul gyi rkang pa dang / brtson 'grus dang / dpyod pa dang / sems dang / dge ba'i chos ma skyes pa skyed pa dang / skyes pa 'phel bar byed pa dang /mi dge ba'i chos skyes pa spong ba dang / ma skyes pa mi skyed pa rnams ni tshogs kyi lam mo/ /dad pa'i dbang po dang / brtson 'grus dang / dran pa dang / ting nge 'dzin dang / shes rab kyi dbang po dang / dad pa'i stobs dang / brtson 'grus dang / dran pa dang / ting nge 'dzin dang / shes rab kyi stobs rnams ni sbyor ba'i lam mo/ /ting nge 'dzin yang dag byang chub kyi yan lag dang / brtson 'grus dang / dga' ba dang / shin tu sbyangs pa dang / chos rnam par 'byed pa dang / dran pa dang / btang snyoms yang dag byang chub kyi yan lag rnams ni mthong ba'i lam mo/ / yang dag pa'i lta ba dang / rtog pa dang / brtson 'grus dang / las kyi mtha'/ 'tsho ba/ rtsol ba/ dran pa/ yang dag pa'i ting nge 'dzin rnams ni bsgom pa'i lam du bsdu'o/ /sku gsum ni mthar phyin pa'i lam la bsdu'o/ /de ltar na dag pa rang bzhin gyis pha rol tu phyin pa nyid do/ / pha rol phyin pa bcu yi tshul/ /zhes pa ni tshul man ngag gi pha rol tu phyin pa nyid do/ /mgon po sa bcu'i dbang phyug ni/ /byang chub kyi sems so/ /de gar gnas snyam pa la/ sa bcu la ni gnas pa po/ /zhes gsungs te/ sa bcu ni rab tu dga' ba dang / dri ma med pa dang / 'od byed pa dang / 'od 'phro ba dang / sbyang dka' ba dang / mngon du gyur pa dang / ring du song ba dang / mi g.yo ba dang / legs pa'i blo gros dang / chos kyi sprin zhes bya ba rnams so/ /gnas pa po zhes bya ba ni ji ltar 'khor lo'i rim pa ni sa bcu yin la/ bde ba chen po'i 'khor lor haM gi rnam par gnas pa ni gnas so//shes bcu zhes pa ni sdug bsngal shes pa dang / kun 'byung shes pa dang / lam dang / 'gog pa dang / zad pa dang / mi skye ba dang / chos dang / rjes su rtogs pa dang / kun rdzob dang / sgra ji bzhin ma yin pa shes pa rnams so/ /rnam dag ni byang chub sems 'gengs pa'i rim pas so//bdag nyid can ni byang chub kyi sems so/ /de ltar na shes bcu rnam par dag pa ni 'khor lo byang chub kyi sems kyis rgyas shing gang bas 'chang ba'am 'dzin pa'o/ /des na sa bcu ni bshad pa dang / 'chad pa'o/ /don bcu'i don ni de dag kun byang chub sems su dag pas don to//thub pa'i dbang po ni sangs rgyas bcom ldan 'das so/ /stobs bcu ni gnas dang gnas ma yin pa mkhyen pa'i stobs dang / las kyi rnam par smin pa mkhyen pa'i stobs dang / mos pa sna tshogs mkhyen pa dang / khams sna tshogs mkhyen pa dang / dbang po mchog dang mchog ma yin pa mkhyen pa dang /thams cad du 'gro ba'i lam mkhyen pa dang / bsam gtan dang bsam gtan ma yin pa mkhyen pa dang / sngon gyi gnas rjes su dran pa mkhyen pa dang / 'chi 'pho ba dang / skye ba'i gnas mkhyen pa dang / zag pa zad pa mkhyen pa'i stobs so/ /de dag mnga' ba de dag la yang byang chub kyi khyab pas na bdag nyid do//des ci byed snyam pa la/ kun gyi don ni ma lus byed/ /ces gsungs te/ kun zhes pa ni rnam pa de rnams so/ /don zhes pa ni byang chub kyi sems so/ /ma lus zhes pa ni bshad pa dang 'chad pa'i rnam pas so/ /byed pa ni gnyis su med par zhes pa'i don to//rnam bcu dbang ldan zhes pa ni tshe la dbang ba dang / sems la dbang ba dang / yo byad dang / las dang / skye ba dang / rdzu 'phrul dang / mos pa dang / smon lam dang / ye shes dang / chos la dbang ba rnams so/ /che ba zhes pa ni byang chub kyi sems kyi che ba bstan pa rnams so/ / de nas de dag gi ngo bo bstan pa'i phyir/ thog ma med pa zhes bya ba la sogs pa gsungs te/ thog ma ni snga ma ste rnam pa'o/ /de'i thog ma ni byang chub kyi sems so/ /de las thog mar gyur pa med pa'i phyir thog ma med pa'o/ /gal te yod na spros par 'gyur pas de'i phyir de la spros med bdag ces gsungs so//de bzhin nyid bdag ces pa ni snga ma bzhin te dag pa'o/ /bdag nyid ces pa ni rnam pa dang dag pa ni mar me dang snang ba lta bu yin pas na de skad ces bya'o/ /yang na thog ma tha ma med pa zhes pa ni skye ba 'gag pa gnas pa gsum med pas na de skad ces bya'o/ /yang na thog ma ni rgyu yin la de dag pa snang ba lha'i dkyil 'khor gyi bdag nyid do//da ni dag pa bsgom pa'i phan yon bstan pa'i phyir/ bden par smra zhes pa la sogs pa gsungs te/ dag pa khong du chud pa des lung ston pa na yang sdug bsngal med la/ gzhan dag gis kye ma khyod lus btang ba'i sdug bsngal 'dis 'gyod par ma gyur tam zhe na ma gyur ce'o//'o na khyod la tshad ma ci yod ce na/ de ltar na sdug bsngal bar 'gyur la/ gal te tshig don bden na ni de'i mthus snga ma bzhin du gyur cig ces brjod ma thag tu 'gyur pa'o/ /ji skad smras pa de bzhin byed/ /ces pa ni ji ltar shAn+tiM ku ru la sogs pas zhi ba la sogs par 'gyur ba ltar ro//gnyis med ces pa dag pa'i sgo nas gdul bya btul ba'o/ /gnyis su med par ston ces pa ni de dag kyang dag pa la 'dzud pa ste/ ji ltar brda la shed ma bye ba'i byis pa dag la brtse ba'i sems kyis pha mas bu ram sbyin par 'dod pas khar bu ram bcug kyang za bar mi byed la/ de'i ro myang bar bya ba'i phyir drag shul kyis 'jug par bya'o//des de'i ro myang nas de la rtsol ba ma byas par dpyod pa bzhin no/ /yang dag mtha' la rnam par gnas/ /zhes pa ni gnas nas phyir rgol ba rnams tshar gcod par byed nus zhes pa'o/ /yang na rang bzhin dag pa de khong du chud nas yang dag pa'i mtha' la gnas pa'o zhes bya ba'i don to//des ci byed snyam pa/ bdag med ces bya ba la sogs pa gsungs te/ gang zag dang chos kyi bdag med pa ni bdag med pa ste dag pa'o/ /de'i sgra bsgrags na bdag tu lta ba can mu stegs la sogs pa tshar gcod par byed cing de'i stobs kyis rang gi bstan pa la dgod pa'o//de'i mthun pa'i dpe bstan par bya ba'i phyir/ seng ge zhes bya ba la sogs te go sla'o/ /kun du 'gro ba'i don yod stobs/ /zhes pa ni phyogs kun du 'gro ba nyid do/ /don yod ces pa ni 'gro ba yang dag pa dang mi bral zhing de'i ngo bo nyid de/ /yang na dag pa dang ldan pa de lus dang ngag dang yid kun du 'gro ba yang 'gro la don med pa ma yin te/don yang yod pas na don yod stobs so/ /de bzhin gshegs pa'i yid ltar mgyogs/ /zhes pa ni stobs zhes pa goms pa'i 'gros te/ de bzhin gshegs pa'i mthu ltar mgyogs pa'o/ /de bzhin gshegs pa'i thugs ni mkhyen pa'i skad cig la kun mkhyen pas na mgyogs zhes pa'o//rgyal ba zhes pa ni dag pa des nyon mongs pa bcom pas so/ /rnam par rgyal zhes pa ni nyon mongs pa nyid lam du byas pa'o/ /de'i phyir dgra las rgyal zhes bya'o/ /de'i mthun dpe gsungs pa/ 'khor los sgyur pa stobs po che/ /zhes pa ni 'khor los sgyur pa'i rgyal pos gling bzhi po kun btul nas rang gi 'bangs su byas pas na stobs che ba'o/ /dpe'i rnam grangs gzhan bstan pa/ tshogs kyi slob dpon tshogs kyi mchog /ces gsungs te/ tshogs ni mi'i tshogs so/ /de'i slob dpon zhes pa ni de rnams btul nas rang gi slob mar byas pas na tshogs kyi mchog go//yang na tshogs ni snang ba'o/ /de'i slob dpon ni dag pa ste 'dul zhing 'joms pa'i phyir ro/ /des na tshogs kyi mchog go/ /tshogs rje tshogs bdag dbang dang ldan/ /zhes pa ni rje bo dang / bdag po dang /dbang phyug ni ming gi rnam grangs so/ /mthu chen gces pa 'dzin pa ste/ /zhes pa ni nyon mongs pa skad cig la 'joms pa na mthu che ba'o/ /gces pa ni dag pa ste gnod byed yin zhes pa'i don to/ /yang na rang la mi tshugs shing gzhan zil gyis gnon pas na mthu chen zhes bya'o//'dzin pa ni dag pa dang ldan pa'i rnal 'byor pa'o/ /de'i phyir/ tshul chen gzhan gyi dring mi 'jog /ces gsungs te/ rdo rje theg pa'i tshul 'dir dag pa dang ldan pa'i theg pa gzhan la rag mi lus pa ste/ tshul man ngag dang dag pa'i rang bzhin gyi pha rol tu phyin pa la gnas pa'i phyir bskal pa grangs med par sa dang lam bgrod pa mi dgos zhes bya ba'i tha tshig go//tshig rje tshig bdag smra mkhas pa/ /zhes bya ba ni tshig rnams kyi rje bo dang bdag po ni dag pa yin te/ de las byung ba'i phyir ro/ /smra mkhas pa ni dag pa ste smras pas sems can dbugs 'byin pa'o//tshig la dbang ba ni gang smras pa de 'gro ba gzhan nyan pa'o/ /tshig mtha' yas zhes pa ni gang la gang bstan par 'os pa'i tshig ste/ nyan thos la sogs pa la bden pa bzhi la sogs pa ston pa'o/ /tshig bden par smras pas don bden par gyur pa na tshig bden par smra'o/ / tshig mtha' yas zhes pa de nyid gang snyam pa la/ bden pa bzhi ni ston pa po/ /zhes bya ba gsungs te/ bden pa bzhi ni sdug bsngal dang / kun 'byung ba dang / 'gog pa dang / lam mo/ /ston pa po zhes pa ni dag pa dang ldan pa des nyan thos la sogs pa rnams la'o/ /des cir 'gyur na/ phyir mi ldog ces bya ba la sogs pa gsungs te/nyan thos kyi 'bras bu phyir 'ong ba dang / phyir mi 'ong ba dang / dgra bcom pa zhes bya ba'i 'bras bu 'byin pa'i phyir ro/ /de 'ba' zhig gam snyam pa la/ 'dren pa rang rgyal te/ 'og nas ston pa'i yan lag bcu gnyis bstan pas de'i 'bras bu bse ru lta bu dang /tshogs ni spyod pa 'byung ba'o/ /der ma zad de/ nges 'byung sna tshogs las byung ba/ /zhes gsungs te/ mdor na theg pa gsum gyis bsdus pa'i nges 'byung sna tshogs so/ /las byung ba zhes pa ni rnam par dag pa 'di las byung ba'o zhes bya ba'i don to/ /'byung ba chen po rgyu gcig po//zhes pa la/ 'byung ba yang yin la chen po yang yin pas 'byung ba chen po ste/ sa dang chu dang me dang rlung ngo / /rgyu gcig po zhes pa ni rnam par dag pa byang chub kyi sems so/ /dge slong dgra bcom zag pa zad/ /ces bya ba la/ dge slong zhes pa ni btags pa'i dge slong dang dam bcas pa'i dge slong dang /slong ba'i dge slong dang / don dam pa'i dge slong 'di ni don dam pa'i dge slong ste/ rnam par dag pa yin pa'i phyir ro/ /dgra bcom pa nyid nyon mongs pa'i dgra ste/ des 'phags pa'i nor bdun 'phrog pa'i phyir ro/ /zag pa ni yul dang dbang po la brtan pa'i rtog pa'o//zad pa ni yul dang dbang po lha dang lha mo gnyis su med par bsgom pa'o/ /yang na 'dod pa'i zag pa ni yul dang yul can du rtog pa dang srid pa'i zag pa ni skye rga na 'chi dang / ma rig pa'i zag pa ni 'khor bar 'khor bar byed pa'o/ /lta ba'i zag pa na bdag dang bdag gir 'dzin pa ste/de dag dge slong des zad par byas pa'o/ /zad pa de nyid gang zhe na/ 'dod chags bral bas dbang po thul/ /zhes gsungs te/ 'dod chags ni yul la 'dod cing chags pa ste/ de dang bral bas so/ /dbang po thul zhes pa ni lus lha'i dkyil 'khor du bsgom pa las so//yang na dbang po'i spyod lam dul ba'o/ /thul ba tsam mam zhe na/ de'i steng du/ bde ba rnyed ces gsungs te/ 'dod pa'i yon tan lnga la brten nas rnyed pa'o/ /'jigs med ces pa ni yul gang la spyod kyang 'jigs pa'am/ ya nga ba med pa'o//yang na yul gang la spyod kyang 'khor ba'i 'jigs pa dang bral ba'o/ /thob pa zhes pa ni de'i sgo nas de kho na nyid rnyed pa'o/ /mya ngan las 'das pa la'ang 'dod pa'i gdung ba med pas na bsil bar gyur pa'o/ /rnyog pa ni rtog pa'i rba rlabs med pas so/ /de lta bu gang gis rnyed snyam pa la/rig pa dang ni rkang par ldan/ /zhes bya ba la sogs pa gsungs te/ bla ma'i man ngag ni rig pa ste/ mig dang 'dra bas rtogs par bya zhing nyams su myong ba rkang pa dang 'dra bas bgrod par bya'o/ /yang na rig pa ni lta ba ste mig dang 'dra ba'o/ /de bla ma'i zhabs la gus par byas pas de thob par bya ste/yang spyod pa yang rkang pa dang 'dra bar spyad par bya'o/ /de la/ bde gshegs 'jig rten rig pa'i mchog /ces bya ba ste/ 'jig rten na gnas kyang bde bar gshegs par rig par bya'o/ /yang na 'jig rten ni gzugs la sogs pa yin la/ de rnam par dag pa gnyis su med par rig pa ni bde bar gshegs pa'i mchog go//rig pa de ci 'dra snyam pa la/ bdag gir mi 'dzin ngar mi 'dzin/ /zhes gsungs te/ bdag dang bdag gi zhe'am nga dang nga'i zhes par mi 'dzin pa'o/ /'on kyang / bden pa gnyis kyi tshul la gnas/ / zhes pa ni don dam pa dang kun rdzob gnyis kyi tshul gyis gnas te/ mngon sum rtogs pa med ces pa'i don to/ /de ni 'khor ba'i pha rol mthar son pa'o/ /bya ba byas pas skam sar gnas/ /zhes pa ste/ mi slob pa zhes bya ba'o/ /'on kyang las dang po pa la ni pha rol tu phyin pa bcu gong du bstan pa ltar 'jug pa'o//de'i phyir bya ba byas pa/ /byed pa byas pa/ khur bor ba zhes pa la sogs pa'i mtshan nyid can no/ /de lta bu ni ye shes 'ba' zhig nges bsal ba ste/ dper na rin po che'i gling du phyin na sa dang rdo la sogs pa'i ming yang mi grag pa bzhin du 'dir yang gzhan gyi go skabs gang yang mi 'byed do//des ni nyon mongs pa'i mgo ltung bar byed pas/ shes rab mtshon chas rnam 'joms pa/ /zhes bya ba'o/ /da ni rgyu dang lam dang 'bras bu gsum gyi chos bstan par bya ba'i phyir/ dam chos chos rgyal gsal bar ldan/ /zhes bya ba la sogs pa gsungs te/dam pa ni rnam pa thams cad mkhyen pa'i sangs rgyas yin la/ chos ni gsung rab yan lag bcu gnyis so/ /chos kyi rgyal po ni de las rnam par phye ba ste/ gsang ba bla na med pa'o/ /gsal ba zhes pa ni 'od gsal ba ste/ de ston pas na ldan pa'o/ / 'jig rten snang bar byed pa'i mchog /ces pa 'jig rten ni 'dod pa dang gzugs dang gzugs med pa ste/ de dag la gnas pa ni mun pa dang 'dra ba zhes pa'i don to/ /snang ba ni 'od gsal ba ste/ de snang bar byed pa ni 'od gsal chos kyi 'khor lo bskor ba zhes bya ba'i don to/ /chos kyi dbang phyug ni chos rnams la dbang sgyur pa'o//chos kyi rgyal po zhes bya ba ni gsang sngags so/ /yang na chos ni 'jig rten gyi chos brgyad yin la/ de las rgyal bas na rgyal ba'o/ /lam gyi chos bstan par bya ba'i phyir/ /legs pa'i lam ni ston pa po/ /zhes gsungs te/ legs pa ni sku bzhi yin la/de thob par byed pa'i lam pha rol tu phyin pa bcu bshad zin pa de dag ston pas ston pa'o/ /'bras bu'i chos bstan par bya ba'i phyir don grub ces bya ba la sogs pa gsungs te/ don ni zung du 'jug pa'i sku'o/ /grub pa ni mngon du byas pa'o/ /bsam pa grub ces pa ni bdag dang gzhan gyi bsam pa grub par byed pa'i phyir sku dang ye shes kyi snang ba ston par byed pa'o//de ltar ston pa la rlom sems yod pas sam zhe na/ kun du rtog pa thams cad spangs/ /zhes gsungs te/ kun du rtog pa zhes pa ni sre bar byed pa'i shes pa ste/ snga phyi bsre ba la sogs pa'o/ /thams cad ces pa ni ma lus pa'o//spangs zhes pa ni spangs pa'i phyir bdag dang gzhan gyi don grub kyang rlom sems med do zhes pa'i don to/ /da ni dbyings bstan par bya ba'i phyir/ rnam par mi rtog dbyings mi zad/ /ces bya ba la sogs pa gsungs te/ rnam par mi rtog pa ni rtog pa dang bral ba tsam mo/ / chos kyi dbyings mi zad pa zhes pa ni grangs can la sogs pas dpag par mi nus pa'o/ /yang na/ rnam par mi rtog dbyings mi zad/ /ces pa ni pha rol tu phyin pa'i theg pa'i lugs kyis sangs rgyas mya ngan las 'das pa dang / bstan pa nub par 'dod pa des gsal bar bya ba'i phyir de skad ces gsungs so//sngags kyi bzhed pas ni/ /sangs rgyas mya ngan mi 'da' la/ /chos kyang nub par mi 'gyur ro/ /zhes pa'o/ /de nyid kyi don gsal bar bstan pa'i phyir/ chos dbyings dam pa zad mi shes/ /zhes gsungs te/ chos dbyings ni 'od gsal ba'o/ /dam pa zhes pa ni chos dbyings de las sku gsung thugs kyi snang ba 'byung ste/de zad mi shes pa'o/ /de'i phyir gzhan dag ni chu shing gi 'bras bu bzhin no/ /'dir ni rgya mtsho chen po la mchil ma dor ba bzhin no/ /da ni ye shes kyi khyad par bstan pa'i phyir/ bsod nams ldan pas bsod nams tshogs//zhes bya ba la sogs pa gsungs te/ bsod nams ldan pa ni sngon gyi bsod nams yod pa'o/ /de'i bsod nams tshogs zhes pa ni bsod nams chung ngu ste/ tha na bskyed pa'i rim pa cig tsam byas kyang tshogs shin tu che bar 'gyur pa'o/ /de las cir 'gyur snyam pa la/ ye shes zhes bya ba la sogs pa gsungs te/ye shes ni chos kyi dbyings kyi ye shes so/ /ye shes khyad par zhes pa ni me long lta bu la sogs pa bzhi der 'dus pa'i phyir ro/ /de'i phyir/ ye shes ldan pa yod med shes/ /zhes bya ba gsungs te/ ye shes de lta bu dang ldan pa ni yod pa ste mngon sum pa dang /med pa ste lkog tu gyur pa mkhyen pa'o/ /de ci las byung na/ tshogs gnyis tshogs ni bsags pa po/ /zhes gsungs te/ tshogs gnyis las ni sku dang ye shes kyi snang ba ni dam pa zhes pa'i ming can zad mi shes pa 'byung bar 'gyur pa'o/ /de ltar chos kyi dbyings kyi sgra don bstan nas/ rnam par snang mdzad kyi sgra don bstan par bya ba'i phyir/ rtag pa kun rgyal rnal 'byor can/ /zhes bya ba la sogs pa gsungs te/ la la 'bras bu'i dus su gzugs sku ni mi 'dod de/ chos sku 'ba' zhig tu gnas so zhes 'dod la/ lam gyi dus su bsod nams kyi tshogs mi dgos so zhes chad par lta ba'i phyogs dang mthun pa'i gti mug can de bsal bar bya ba'i phyir rtag pa zhes kyang bya'o//rgyal ba kun zhes pa ni dus gsum gyi de bzhin gshegs pa ste/ de rnams kyi sku'i snang ba ni rnam par snang mdzad do/ /rnal 'byor can ni de lta bu nyams su blang bar bya ba'i don to/ /da ni bsam gtan du byed pa po bstan pa'i phyir/bsam gtan bsam bya blo ldan mchog /ces gsungs te/ de la bskyed pa lha'i rnal 'byor du bsam gtan du bya ba dang / rdzogs pa ye shes su bsam gtan du bya ba'o/ /bsam bya'i blo ldan zhes pa ni de ltar bsam par byed pa'i gang zag de ni blo dang ldan pa'i mchog ces bya'o//bsam gtan rang gi ngo bo bstan par bya ba'i phyir/ so so rang rig mi g.yo ba/ /zhes bya ba la sogs pa gsungs te/ bsam gtan de gzhan gyis rig par bya ba ma yin pas na rang rig go/ /de yang sems las gzhan du ma gyur pas na mi g.yo ba'o/ /de dag gi 'bras bu bstan par bya ba'i phyir/mchog gi dang po zhes bya ba la sogs pa rgyas par gsungs te/ mchog ni mchog gi dngos grub ste sku gsum yin la/ de'i dang po ni chos kyi sku'o/ /longs spyod rdzogs pa'i sku dang sprul ba'i sku bstan par bya ba'i phyir/ sangs rgyas sku lnga'i bdag nyid can//zhes gsungs te/ sangs rgyas kyang yin la sku yang yin pas sangs rgyas sku lnga ste/ 'di ltar rnam par snang mdzad kyi sku dang / mi bskyod pa'i sku dang / rin chen 'byung ldan gyi sku dang / 'od dpag med kyi sku dang / don thams cad yongs su grub pa'i sku rnams so//bdag nyid ces pa ni sangs rgyas dang sku de nyid gcig pa'o/ /khyab bdag ye shes lnga yi bdag /ces pa ni/ /ye shes lngas bdag dang gzhan gyi dngos po thams cad la khyab pas na khyab bdag go/ /ye shes lnga zhes pa ni/ 'di ltar me long lta bu'i ye shes dang / mnyam pa nyid kyi ye shes dang /so sor kun du rtog pa'i ye shes dang / bya ba grub pa'i ye shes dang / chos kyi dbyings kyi ye shes zhes bya'o/ /bdag ces pa ni bshad ma thag pa'i sku lnga dang / 'di nyid de nyid dang gzhan du brjod du med pas bdag nyid do/ /de'i phyir/ sangs rgyas lnga bdag cod pan can ste/de bzhin gshegs pa re re yang de bzhin gshegs pa lnga lnga'i cod pan can no/ /de dag ni ye shes yin la/ da ni dbyings bstan pa'i phyir/ spyan lnga chags pa med pa 'chang / /zhes gsungs te/ spyan zhes pa ni sangs rgyas spyan no/ /lnga zhes pa ni mA ma kI dang / gos dkar mo dang / sgrol ma dang / chos kyi dbyings kyi dbang phyug ma rnams so/ /des ci byed snyam pa la/ chags pa med pa 'chang zhes gsungs te/ chags pa med pa'i tshul gyis de dag dang snyoms par zhugs pa'o/ /de ni dbyings yin la des de bzhin gshegs pa rnams 'khrungs par mdzad ces bya ba'i don to//de nas skye gnas gtan la dbab pa bstan par bya ba'i phyir/ sangs rgyas thams cad skyed pa po/ /zhes bya ba la sogs pa gsungs te/ sangs rgyas thams cad ni dus dang phyogs dang rigs kyis bsdus pa ste/ sangs rgyas kyang yin la thams cad kyang yin pas so//skyed pa po zhes pa ni chos kyi dbyings kyi rang bzhin spyan lnga las so/ /bskyed pa nyid gang zhe na/ sangs rgyas sras po dam pa'i mchog /ces gsungs te/ sangs rgyas kyang yin la sras po yang yin pas sangs rgyas sras po'o/ /'di ltar sangs rgyas nyid sras po ste/ chos kyi dbyings las bltams pa'i phyir ro//de'i phyir dam pa dang mchog go/ /shes pa zhes pa ni tshig dbu ma mi mngon par byas pa ste/ shes rab po/ /de las skyes pa ni srid 'byung skye gnas med pa ste/ srid pa'i 'byung gnas sam skye gnas bzhi ste/ mngal dang / sgo nga dang / drod gsher dang / rdzus te skye bar byed pa'o/ /med ces pa ni de dag las skye ba med pa'o/ /yang de nyid gsal bar bstan pa'i phyir gsungs pa/ chos las 'byung ba srid pa sel/ /zhes pa ni chos zhes pa ni chos kyi dbyings so/ /de las 'byung ba skyed pa ste/ de'i phyir/ ye shes sku ste rang byung ba/ /zhes pa yang de nyid las dgongs pa'o//des srid pa sel te skye gnas bzhi las byung ba bsal lo/ /de'i phyir de ni/ gcig pu sra mkhregs rdo rje'i bdag /ces gsungs te/ gcig pu zhes pa ni rang byung gi sku de'o/ /gzhan gyis gzhig cing gzhom du med pa'i phyir rdo rje dang 'dra ba la de skad ces bya'o/ / skyes ma thag tu 'gro ba'i bdag /ces pa ni chos kyi dbyings las skyes ma thag tu skye gnas bzhis bsdus pa thams cad rjes su 'dzin cing dbang bsgyur bas na 'gro ba'i bdag po'o/ /yang na chags bral gyi sku ste/ skye gnas bzhi la skye bar mdzad pa de 'gro ba dang mthun par mdzad pas na/ skyes ma thag tu 'gro ba'i bdag /ces bya'o/ /nam mkha' las byung rang byung ba/ /zhes pa ni/ nam mkha' zhes pa ni nam mkha' dang chos mthun pa ste chos kyi dbyings so/ /de las byung ba ni rang byung ba'i sku zhes bya'o/ /de dag gis ni ye shes kyi sku rang byung ba zhes pa de'i dbang du byas pa'o/ /sprul pa'i sku ni skye gnas bzhi ka 'dul ba'i phyir/'gro ba dang mthun par bya ba'i don du de nyid kyang skye gnas bzhi ka las skye bar mdzad pa'o/ /da ni snang ba'i khyad par bstan par bya ba'i phyir/ shes rab ye shes me bo che/ /zhes bya ba la sogs pa gsungs te/ shes rab dang ye shes gnyis su med pa ni me dang 'dra ba ste/gsal ba dang sreg par byed pa ste nyon mongs pa'i tshogs so/ /'od gsal ba las sku dang ye shes kyi snang ba 'byung bas na 'od chen rnam par snang bar mdzad pa'o/ /rang bzhin gyis snang ba yin pas na ye shes snang ba'o/ /lam me ba zhes bya ba ni gsal ba'o/ / 'gro ba'i mar me ye shes sgron/ /zhes pa ni/ 'gro ba mun pa dang 'dra ba 'od gsal ba las sku dang me dang 'dra bas snang bar mdzad pa ste/ ye shes sgron ma'o/ /de nyid slar bshad pa/ gzi brjid chen po 'od gsal ba/ /zhes gsungs te/ g.yogs pa'am/ bar du chod pa lta bu ma yin pas na gzi brjid chen po'o//'khor ba dang mya ngan las 'das pa thams cad la khyab pas na 'od gsal ba'o/ /da ni mdzad pa'i khyad par bstan par bya ba'i phyir/ sngags mchog mnga' bdag rig sngags rgyal/ /zhes bya ba la sogs pa gsungs te/ de lta bu de yang sngags kyi lugs la yin gyi gzhan gyi lugs la ma yin pas na sngags mchog go//mnga' bdag rig sngags rgyal zhes pa ni de lta bu'i rdo rje 'chang yin pas so/ /yang na sngags mchog ni gnyis su med pa'i ye shes te/ yid skyob pas sngags so/ /de'i phyir mnga' bdag rig sngags rgyal po'o//sku dang ye shes kyi snang bas/ sems can gyi don mdzad pas/ gsang sngags rgyal po don chen byed/ /ces bya ba'o/ /gtsug tor chen po rmad byung gtsug /zhes bya ba la/ gtsug tor yang yin la chen po yang yin pas gtsug tor chen po ste/ chos kyi dbyings so//de las byung bar mdzad pas rmad du byung ba'i gtsug tor ro/ /de nyid gsal bar bstan par bya ba'i phyir/ nam mkha'i bdag po sna tshogs ston/ /zhes gsungs te/ nam mkha'i bdag po ni nam mkha' dang chos mthun pas bdag nyid do/ /sna tshogs ston ni de las skyes pa'i ye shes kyi sku'i snang ba las sku dang ye shes sna tshogs pa mi zad par 'byung bar mdzad pa'o//sangs rgyas kun zhes pa ni sangs rgyas kyang yin la kun kyang yin pas sangs rgyas kun te de dus gsum gyis bsdus pa'o/ /sku yi mchog ces pa ni dus gsum gyi sangs rgyas ji srid du 'byung ba de srid du sku'i snang ba mdzad pa'o//'gro kun zhes pa ni 'gro ba yang yin la kun kyang yin pas 'gro ba kun te ris drug go/ /dga' ba'i mig ces pa ni gang mos pa'i gzugs 'dzin pa ste/ 'gro ba kun gyi mig dga' bar byed ces bya ba'o/ /de nyid gsal bar bya ba'i phyir/ sna tshogs gzugs can skyed pa po//zhes gsungs te/ 'gro ba kun gang la mos pa de'i gzugs snang bar mdzad pas na skyed pa po zhes gsungs te/ de lta bu de la drang srong skye dgu zhes pa ni sems drang zhing ngag gsong por smra ba ste/ sangs rgyas bcom ldan 'das rnams so/ /mchod cing rjed pa zhes pa ni gnyis su med pa'i 'od gsal ba rnam par snang mdzad ces bya ba'i ming can de la bsngags pa mdzad pa'am che ba brjod pa'o//rigs gsum ni gsang sngags dang / rig sngags dang / gzungs sngags dang / yang na sku gsung thugs kyi rigs las rigs brgya la sogs pa 'byung bas 'chad pa'o//gsang sngags la 'chang ba 'di'i tshul yod kyi gzhan la ni ma yin no zhes pa'i don to/ /dam tshig chen po gsang sngags 'dzin/ /zhes pa la/ dam tshig kyang yin la chen po yang yin pas dam tshig chen po ste/ mi 'da' ba'i phyir ro/ /de yang dang po 'gro ba'i don byed pa'i sems bskyed pa'i phyir de skad ces bya ba'o//gsang sngags kyi tshul la yod pa'i yid skyob par byed cing gnyis su med par zung 'jug gi sku 'dzin pa'o/ /gtso bo dkon mchog gsum 'dzin pa/ /zhes pa la/ gtso bo zhes pa ni gnyis su med pa yin la/ de bzung bas na dkon mchog gsum 'dzin pa'o//de yang / stong nyid snying rje dbyer med pa/ /gang du yid ni sgom byed na/ /de ni sangs rgyas dang ni chos/ /dge 'dun nyid du de bstan no/ /zhes pa de lta bu'o/ /theg pa mchog gsum ston pa po/ /zhes pa ni theg pa yang yin la mchog kyang yin pas theg pa mchog ste rdo rje theg pa'o//gsum ni gsang sngags dang / rig sngags dang / gzungs sngags te/ de ston pa ni ye shes kyi sku'o/ /de'i ming ni/ don yod zhags pa rnam par rgyal/ /zhes pa la sogs pa rnams gsungs te/ rlung ngam nam mkha' la 'debs pa bzhin don med pa ma yin nam snyam pa la/don yod pa ste/ 'gro ba rnams rjes su 'dzin pas na zhags pa'o/ /gang gi zhags pa yin na rdo rje theg pa'i yin pas so/ /des nyon mongs pa las rnam par rgyal ba'o/ /'dzin pa yang yin la chen po rdo rje zhags pa yang yin pas 'dzin pa chen po rdo rje zhags pa ste/ theg pa gzhan gyi lam du mi gtong bas na 'dzin pa chen po'o//rdo rje ni stong pa dang snying rje dbyer med pas sems can rjes su 'dzin pas zhags pa'o/ /rdo rje lcags kyu zhags pa che/ /zhes pa ni zhags pa dang lcags kyu yin la/ de'i mtshan nyid rdo rje yin pa las rdo rje lcags kyu zhags pa ste 'dren pa'i rnam grangs so//de dag gis ni chos kyi dbyings kyi ye shes bshad zin to/ /da ni long lta bu'i ye shes bstan par bya ba'i phyir/ rdo rje 'jigs byed 'jigs par byed/ /ces bya ba la sogs pa gsungs te/ 'dir chos kyi dbyings kyi ye shes ni mnyam gzhag yin la/me long lta bu'i ye shes ni rjes thob ste/ rjes la sku khro bo'i rnam par bstan pa ni mi bskyod pa zhes bya ba'i ming can no/ /'dir gdul bya zhe sdang can rnams ni sku khro bo ma yin pas mi 'dul bas/ de'i phyir sku mdog dang phyag mtshan dang rgyan dang cha lugs la sogs pa rnam pa dang mtshan nyid gnyis su rtogs par bya'o//mtshan nyid ni rdo rje'o/ /yang bshad par bya ba lnga yin kyang gcig gi yon tan gyi bye brag tu rtogs par bya'o/ /de'i phyir dang po mdzad pa'o/ /phrin las kyis mi bskyod pa bstan te/ rdo rje ni gnyis su med pa'i ye shes so/ /des 'jigs byed ces pa ni 'gro ba rnams 'jigs par byed pa bdud bzhi'am nyon mongs pa rnam par 'joms par byed pas 'jigs par byed pa'o//de gang gi snyam pa la/ khro bo'i rgyal po gdong drug 'jigs/ /zhes gsungs te/ sku'i rnam pa khro bo ste mche ba gtsigs pa la sogs pa'i mtshan nyid can 'chad par 'gyur pa'o//rgyal po ni 'jig rten las 'das pa khyad par du gyur pa'o/ /gdong drug ni rtogs par bla'o/ /mig drug ni mi mnyam pa'i spyan mnga' bas so/ /yang na rig par byed pas na mig ste gsum gzung ngo / /lag drug ni g.yas pa mtshon cha ste/g.yon pa zhar la 'chang ba'o/ /stobs dang ldan zhes pa ni ma rungs pa 'dul ba'i stobs yod pa'o/ /keng rus mche ba ni keng rus shin tu dkar po dang 'dra ba'i mche ba dkar po bzhi'o/ /gtsigs pa ni gzhan dag gis gsal bar mthong ba ste/ 'dir ni smin ma nag po char sprin lta bu las 'od glog lta bu 'phro ba dang /shangs nas hUM zhes brjod pa 'brug gi sgra lta bu dang / mche ba bzhi rtse sprad pa'i bar nas ljags 'dril ba las rdo rje phra mo thog dang ser ba ltar 'dril ba'o zhes pa'i don to/ /cha lugs der ma zad de/ ha ha la gdong brgya pa/ /zhes pa ni drug yin la/ sems can rjes su gzung bar bya ba'i phyir zhal brgyar sprul nas de gsol bar byed pas de skad ces bya'o//de'i mtshan nyid bstan par bya ba'i phyir gshin rje'i gshed po zhes gsungs te/ gshin rje ni nyon mongs pa 'bras bu dang bcas pa yin la/ gshed ni 'joms par byed pa ste de nyid do/ / bgegs ni bi nA ya ka'o/ /yang na lam log par 'dren pas na bgegs te/ mi dge ba'i bshes gnyen la sogs pa'o/ /rgyal ba ni de las rgyal bar byed pa ste/ gong ma nyid do/ /de lta bu'i stobs ci snyam pa la/ rdo rje shugs can no/ /rdo rje lta bu'i shugs thog lta bu'o/ /des 'jigs par byed pas na 'jigs byed do//da ni rang bzhin thugs kyi mi bskyod pa bstan par bya ba'i phyir/ rdo rje grags pa rdo rje snying / /zhes pa la sogs pa gsungs te/ rdo rje ni sra ba brtan pa zhes bya ba la sogs pa chos bdun dang ldan par rang dang gzhan gyi grub mtha' las grags pas de'i thugs rdo rje ltar gnyis su med pa ste/rdo rje mi phyed ces bya'o zhes pa lta bu'o/ /sgyu 'phrul rdo rje gsus po che/ /zhes pa ni 'gro ba 'dul ba'i don du 'di lta bur mdzad pa'o/ /srid pa gsum yang de'i lto ba na yod pas gsus po che'o/ /da ni yon tan sprul pa'i mi bskyod pa bstan par bya ba'i phyir/ rdo rje las skyes rdo rje'i bdag /ces bya ba la sogs pa gsungs te/ rdo rje las skyes zhes pa ni rdo rje ni stong pa'o/ /de las skyes pa'i phyir sku de lta bu de yang rdo rje'i bdag nyid do/ /rdo rje'i snying po mkha' 'dra ba/ zhes pa ni/ snying po ni gnyis su med pa ste rdo rje'o/ /mkha' 'dra zhes pa ni rdo rje snying po chos kyi dbyings gnyis su med pa nam mkha' dang 'dra ba kun la khyab cing kun de'i khongs su gtogs pa'o//mi g.yo ral pa gcig gis bsgyings/ /zhes pa ni gong du bstan pa de dag mi g.yo ba ni mi bskyod pa ste/ de las ma g.yos par bstan to/ /ral pa gcig gis bsgyings zhes pa ni ji ltar ral pa'am/skra mang po yod kyang dar gcig gis gcig tu bcings pa ltar snang ba'i bye brag mang po yod kyang gnyis su med pa mi bskyod par bsdams pa'o/ /yang na rigs kyi dbye ba mang por phye yang mi bskyod pa'am/ rdo rje'i rigs su bsdus pa'o/ glang chen ko rlon gos su gyon/ /zhes pa ni shin tu gdul bar dka' ba'i gdug pa can btul nas de'i pags pa gyon pa zhes pa'am/ yang na gti mug can gdul ba'i rtags su/ na bza' de mnabs pa'o/ /de ni nye bar mtshon pa ste/ dur khrod kyi rgyan gzhan gyis kyang brgyan pa'o/ / da ni gdul bya gsung gi mi bskyod pa bstan par bya ba'i phyir/ drag chen hA hA zhes sgrogs pa/ /zhes pa la sogs pa gsungs te/ gsung gi sgo nas gdul bya skrag cing tshar gcad par bya ba'i phyir/ ma rungs pa'i gad mo shin tu drag la che bar ha ha zhes dgod pa'o/ /de yang bzhin khros pa dang bcas pas bgad pa ni ma rungs pa'i gad mo ste/tshar gcad par bya ba'i phyir ro/ /bzhin mdangs phyung nas dgod pa ni/ rangs pa'i dgod pa ste/ gdul bya rjes su gzung ba'o/ /hI hI zhes sgrogs 'jigs par byed/ /ces pa ni hI hI zhes sgrogs pa'i tshe gnas dang mthu la sogs pa dregs par byed pa'i ma rungs pa rnams 'jigs par mdzad pa'o//don chen po dang ldan pa'i phyir gad mo chen po'o/ /gad rgyangs ni lte ba nas yongs su bskyod pa'o/ /rdo rje gad mo cher sgrogs pa/ /zhes pa ni rdo rje ltar thogs pa med pa'i gsung gi sgo nas gdul bya 'dul bar mdzad pas na de skad ces bya'o//'o na de ltar mi bskyod pa des gdul bya nye bar 'dul ba de rlom sems kyi ma yin nam snyam pa la de'i phyir/ rdo rje sems dpa' sems dpa' che/ /zhes bya ba la sogs pa gsungs te/ de ltar sku gsung thugs kyi mdzad pa mang du mdzad kyang gnyis su med pa gnyug ma chos kyi dbyings las ma g.yos pa'i phyir gang ltar nang dang phyi rol tsha zhes pa la sogs pa'i don te/de'i phyir de la de skad ces bya'o/ /rdo rje rgyal po bde ba che/ /zhes pa mang na yang gnyis su med pa'i rdo rje 'di thams cad kyi nang na rgyal po yin pas de skad ces bya'o/ /de nyid bde ba chen po ste/ de ltar na gdul bya rnams btul nas bde ba chen po la 'god par byed pa de la de skad ces bya'o//rdo rje drag po dga' ba che/ /zhes pa ni rdo rje ni gsung des gdul bya rnams dga' ba chen po ste/ gnyis su med pa'i lam la 'jog pa'o/ /rdo rje hUM ste hUM zhes sgrogs/ /zhes pa ni rdo rje ni rang gi rigs yin la/de skyed par byed pa rigs kyi sa bon hUM ste de 'don cing sgrogs pa'o/ /de'i phyir bskyed pa'i rim pa yang cho ga yan lag gsum gyis bskyed pa'o/ /da ni drag po sku'i mi bskyod pa bstan par bya ba'i phyir/ mtshon du rdo rje mda' thogs pa/ /zhes bya ba la sogs pa gsungs te/ gong du phyag drug smos pa'i phyag mtshan bstan pa ste/ rdo rje'i mda' ni thogs pa med par 'bigs par byed pa'i mda'o/ /'di dag la rnam pa dang mtshan nyid gnyis gnyis su shes par bya'o/ /rdo rje ral gri zhes pa ni rdo rje ltar thogs pa med par gcod pa'i ral gri ste/ shes rab chen po'o//gcod pa ni nyon mongs pa mngon du rgyu dang bag la nyal ba ma lus pa sel bar byed pa'o/ /des ni 'jam pa'i rdo rje'i phyag g.yas gnyis smos pa ste/ g.yon gnyis na ut+pal dang / gzhu 'dzin pa'o/ /rdo rje kun 'chang rdo rje can/ /zhes pa ni sna tshogs rdo rje'o/ /'chang ba ni 'dzin pa'o//rdo rje gcig pu ni rdo rje rtse gcig pa ste/ rnam pa thams cad kyang mtshan nyid rdo rje'i rigs su gcig pas de skad ces bya'o/ /g.yul ni nyon mongs dang g.yul 'gyed pa'i tshe des sel ba'o/ /de dag gi phyag mtshan bstan nas/ da ni spyan la sogs pa'i mtshan nyid bstan par bya ste/ de'i phyir/rdo rje 'bar ba mig mi bzad/ /ces bya ba la sogs pa gsungs te/ 'bar ba zhes pa ni me ste/ reg bya tsha ba dang kha dog dmar ba'i mtshan nyid dang ldan pas gdul bya ma rungs pa rnams gzigs pas/ rdo rje ltar thogs pa med par sreg pa'o/ /skra yang rdo rje 'bar ba ste/ /zhes pa ni skra'i kha dog me 'bar ba ltar gyen la 'greng ba dang /mdog dmar ser gyi me lta bu des nam mkha' 'am steng gi phyogs na gnas pa'i gdug pa can rdo rje ltar thogs pa med par 'dul bar byed pa'o/ /rdo rje 'bebs pa zhes pa ni sku dbyar gyi char sprin ltar smin ma'i bar nas glog lta bu'i 'od 'byung ba dang /mche ba gtsigs pa'i bar nas ljags 'dril bas zhal dang tshems kyi bar nas rdo rje'i thog 'bebs pa'o/ /'bebs pa che zhes pa de dag gi ba spu nas kyang rdo rje ltar thogs pa med par rdo rje phra mo'i tshogs 'bebs pa'o/ /mig brgya pa zhes pa ni gdong pa brgya la mi mnyam pa'i mig brgya yod pa'o//rdo rje'i mig ces pa ni/ reg bya tsha zhing kha dog dmar ba'i mig gis gdul bya rnams la bltas pas rdo rje ltar thogs pa med par sreg pa'o/ /lus ni rdo rje'i ba spu can/ /zhes pa ni ba spu gsum rtse mo 'dus pa'i rdo rje rtse mo can no/ /rdo rje'i sbu ni gcig pu'i lus/ / zhes pa ste/ shin tu rnyi zhing cha phra ba'i lus kyang rdo rje ltar thogs pa med par gdul bya 'dul bar byed pas lus khyab pas na lus so/ /sen mo skyes pa rdo rje'i rtse/ /zhes pa ni sen mo'i rtse rdo rje ltar rno bas gdul bya rnams kyi pags pa phug nas me 'bar bar byed pa'o/ /rdo rje snying po zhes pa ni thugs rdo rje ste thogs pa med pa'o//de la g.yos pa'i pags pa yang rdo rje dang 'dra ba ste/ de'i phyir rdo rje go bgo ba zhes bya ba'o/ /mkhregs zhes pa ni mtshon pa ste/ rdo rje'i chos bdun dang ldan pa'o/ /rdo rje'i phreng thogs dpal dang ldan/ /zhes pa ni rdo rje'i mtshan nyid dang ldan pa'i thod pa'i phreng bas ye shes lnga'i rang bzhin can gyi do shal can no//rdo rje'i rgyan gyis brgyan pa ste/ /zhes pa ni rus pa la rdo rje'i rnam pa ltar byas pa'am/ de ltar sra ba'i rgyan cha bdun dang ldan pa'o/ /da ni gsung gi rnam pa bstan par bya ba'i phyir ro/ /gad rgyangs hA hA nges par sgrogs/ /zhes bya ba la sogs pa gsungs te/zhum pa med pa'i sems kyis hA hA zhes sgrogs pas rang las gzhan pa rnams shin tu skrag par mdzad pa'o/ /yi ge drug pa rdo rje'i sgra/ /zhes pa ni gzhan dag gi /oM wA gI shwa ri muM zhes pa la bzhed do/ /la la yi ge drug pa ni 'khor los sgyur pa drug gi sngags so zhes bzhed do//'dir/ zhal drug dril bu'i sgra dang ldan/ /zhes gsungs te/ zhal nas shin tu myur bar hUM drug brjod pa'am/ gdul byar bsgrag par bya ba'i phyir a la la la la la zhes brjod pa'o/ /phyir ji ltar bsgrags kyang nang du gnyis su med pa'i ngang las ma g.yos pas na 'jam dbyangs chen po'i sgra che ba'o//'jig rten gsum na sgra gcig pa/ /zhes pa ni 'jig rten gsum ni 'dod pa dang / gzugs dang / gzugs med pa'i khams so/ /de ni zin pa dang ma zin pa'i sgra ji snyed du grags kyang gnyis su med pa'i 'jam dbyangs kyi sgra gcig pu 'di mchog go/ /yang na lus ngag yid gsum dbyer med gcig gi sgra sgrogs pa'o//ji tsam du khyab snyam pa la/ nam mkha'i mtha' klas sgra sgrogs pa/ /zhes pa 'dis ni bzlas pa'i phan yon kyang bshad pa'o/ /sgra dang ldan pa rnams kyi mchog /ces pa ni sgra ni zin pa dang ma zin pa'i sgra rnams las 'dir mchog go/phul lo/ /gya nom pa'o zhes bya ba la sogs pa'i don to/ /de dag gis ni me long lta bu'i ye shes bshad zin to/ /da ni so sor kun du rtog pa'i ye shes bstan par bya ste/ yang dag bdag med de bzhin nyid/ /ces bya ba la sogs pa gsungs te/ yang dag pa ni ma nor ba'o/ /de ni mi slu ba'o//de ni yid kyis phrad par 'dod pa'o/ /phrad pa ni yod na phrad cing med na de ltar ma yin ste/ gnyis su med pa'i byang chub kyi sems zhes bya ba'i tha tshig go/ /de ni yid la phrad par gyur pa ste/ de la mi phrad pa ni ri bong gi rwa lta bu ma yin pa'o/ /bdag med pa ni chos dang gang zag gi bdag gis dben pa'o//de'i mtshan nyid ni de bzhin nyid dang / yang dag pa'i mtha' dang / bsam gyis mi khyab pa'i dbyings dang / chos nyid dang zhes pa la sogs pa rnam grangs so/ /yi ge med ces pa ni rtog ge pa rnams kyi spyod yul ma yin te/ bla ma dam pa'i zhabs kyi pad+ma la gus pa'i spyod yul lo zhes pa'i don to//des ni thugs kyi snang ba sgro 'dogs dang bral bas bstan pa'o/ /da ni gsung gi snang ba so sor dbye ba bstan par bya ba'i phyir/ stong nyid smra ba'i khyu mchog ste/ /zhes bya ba la sogs pa gsungs te/ gang ba lang rnams kyi nang na khyu mchog mchog tu gyur pa yin la/ 'di yang stong pa nyid dang / yang dag pa'i mtha' zhes pa la sogs pa de smra ba mchog ste/ gzhan gyis zil gyis mi non pa'i phyir ro/ /zab cing rgya che sgra sgrogs pa/ /zhes pa ni zab pa ni bshad ma thag pa yin la/ de ston par byed pa'i sgra sgrogs par byed pa de la yang de skad ces bya'o/ /rgya che ba ni thabs mang ba dang /thabs che ba'i sgo nas so/ /da ni brjod pa'i sngags so/ /chos kyi dung ste zhes pa la sogs pa gsum ni ston par byed pa'i brda yin pas brda'i sngags so/ /dngos po 'di gsum gyi sgo nas yang dag pa'i mtha' ston par byed pa'o/ /mi gnas mya ngan 'das pa po//zhes pa ni 'khor ba dang mya ngan las 'das pa las mi gnas pa ste/ ye shes kyi sku zhes bya ba'i don to/ /de'i phyir 'di lta bu'i lam la skul bar byed do zhes pa'o/ /da ni sku'i snang ba mchog tu bstan par bya ba'i phyir/ gzugs med gzugs bzang dam pa ste//zhes bya ba la sogs pa gsungs te/ gzugs med ces pa ni yul dpyad pas gzugs su yod pa dang / reg pas gzugs su yod pa zhes bya ba la sogs pa med pa'o/ /gzugs bzang zhes pa ni chu'i nang du skyes pa'i grib ma snang ba lta bur snang du rung ba'i phyir ro/ /dam pa ste zhes pa ni tshogs gnyis las byung ba'i phyir ro//sna tshogs gzugs can yid las skyes/ /zhes pa ni phyogs gcig la gsal ba yin/ kha dog sna tshogs dang / gzugs sna tshogs dang / reg pa sna tshogs pa'i gzugs su snang ba can no/ /yid las skyes pa ni 'gro ba rnams kyi yid sbyang bar bya ba'i phyir ro//yid dga' bar byed pa dang / yid tshim par byed pa dang / yid 'phrog par byed pa de skad ces bya ba'o/ /gzugs rnams thams cad snang ba'i dpal/ /zhes pa ni sku'i mtshan nyid thams cad du snang ba ste/ gang la gang gis 'dul ba'i sku'o/ /dpal zhes pa ni bdag dang gzhan gyi don 'byung bas so//gzugs brnyan ma lus 'chang ba po/ /zhes pa la/ gzugs zhes pa ni snang du rung ba'o/ /brnyan zhes pa ni dngos po ma yin te/ chu'i gzugs brnyan lta bu'o/ /ma lus zhes pa ni che ba dang chung ba dang mang ba dang nyung ba la sogs pa ste/ 'chang ba ni de lta bu'i gzugs 'dzin pa'o//yang na gzugs ni gsum ste/ 'ja' tshon lta bu dang / pad+ma lta bu dang / rnam par smin pa las byung ba'o/ /tshugs pa med cing che bar grags/ /zhes pa la/ 'ja' tshon lta bu'i sems de la 'byung ba bzhi'i gnod pas mi tshugs pas de skad ces bya'o//de lta bu la sku chen po zhes rang dang gzhan gyi grub pa'i mtha' las grags so/ /khams gsum dbang phyug chen po ste/ /zhes pa ni 'dod pa dang / gzugs dang gzugs med pa ni khams gsum mo/ /de la dbang sgyur pa ni dbang phyug ste/ tshangs pa dang / khyab 'jug dang / dbang phyug chen po yin la/de rnams kyi yang chen po ni gnyis su med pa'i sku'o/ /'phags lam shin tu mtho la gnas/ /zhes pa ni lam rnams las khyad par 'phags pa ste rdo rje'i theg pa'o/ /lam shin tu mtho ba ni rnam pa gnyis te/ de las bskrun pa'i ye shes kyi sku'o/ /dar ba chen po chos kyi tog /ces pa ni chos dar la khyad pa'i snga ltas su brtags te/ sku 'di lta bu 'byung ba'o zhes gsungs so/ /'jig rten gsum na gzhon lus gcig /ces pa ni 'jig rten gsum ni 'dod pa dang / gzugs dang gzugs med pa'o/ /gzhon lus gcig ces pa ni der gnas pa'i sems can 'gro ba rnams kyi don mdzad kyang de dag gi nyes pas ma gos pas na de skad ces bya'o//yang na zab mo ltar na 'jig rten gsum ni dga' ba dang / mchog tu dga' ba dang / dga' bral lo/ /gzhon lus gcig ni lhan cig skyes pa ste/ des dga' ba gsum la rgyas 'debs pas na de skad ces bya'o//gnas brtan rgan po zhes pa ni gdod ma nas lhun gyis grub pas na rgan po'o/ /skye dgu'i bdag ni skyes so cog gi don mdzad pa ste/ dag pa dang ma dag pa bsdus pa'o/ /sum cu rtsa gnyis mtshan 'chang ba/ /zhes pa ni mtshan dang dpe byad dang ldan pa'o//sdu gu 'jig rten gsum na mdzes/ /zhes pa ni lta bas chog mi shes pa'i sku zhes bya'o/ /yang na zab mo ltar sum cu rtsa gnyis ni rtsa'o/ /mtshan zhes pa ni byang chub kyi sems des khyab pa'o/ /'chang zhes pa ni bde ba dang ldan pa'o/ /sdu gu zhes pa ni blta bas chog mi shes pa'i mtshan nyid thams cad dang ldan pa'i pho nya'o//'jig rten gsum ni de dang gnyis su med pa las byung ba'i dga' ba gsum mo/ /mdzes zhes pa ni de dag gi nang na lhan cig skyes pa mchog go zhes pa'o/ /da ni rdo rje slob dpon gyi mtshan nyid bstan par bya ba'i phyir/ 'jig rten shes legs slob dpon te//zhes pa la sogs pa gsungs te/ 'jig rten zhes pa tshu rol mthong ba rnams kyis sngar bshad pa'i sangs rgyas snang ba mtha' yas zhes bya ba sku mtshan dang dpe byad kyis spras pa de lta bu mthong ba'i skal ba med pa la rdo rje 'chang gnyis pa la 'jig rten 'di na bzhugs pa des shes pa ste/phyin ci ma log pa'i lam ston pa dang legs pa ste/ byang chub gsum la sbyor bar byed pa'i lam ston par byed pa'i phyir slob dpon te/ de kho na nyid bcu dang / tshul bdun la sogs pa dang ldan pa'o/ /de lta bu de ni 'jig rten na bzhugs kyang 'jigs pa med de/chu bo bzhi dang ngan song gsum gyi rgyu dang 'bras bu las grol bar mdzad pa'i phyir slob dpon du 'os pas na/ 'jig rten slob dpon 'jigs pa med/ /ces bya'o/ /mgon skyob 'jig rten yid gcugs pa/ /zhes bya ba la/ bla ma de ni slob ma rnams kyi mgon yin/ skyob pa yin te 'khor ba las so/ /'jig rten ni 'jig rten pa'i slob pa rnams so/ /yid gcugs pa zhes pa ni slob ma rnams kyis sems brtse zhing mthun par bya bar 'os pa'o/ /skyabs dang skyob pa bla na med/ /ces bya ba ni sems can gyi skyabs dang dpung gnyen du gyur pa ste/ dkon mchog gsum gyi ngo bo'o/ /de lta bu'i mtshan nyid dang ldan pa la bsnyen bkur sngon du 'gro bas gsol ba gdab par bya'o/ /de nas bla mas gnas dang yo byad ji lta bu rnams tshogs shing 'byor ram zhes dri bar bya'o/ /de'i tshe khas len na de nas bsnyen pa la 'jug par bya ste/grangs dang dus dang mtshan ma'o/ /bsnyen pa'i las ni dang por bshad/ /ces bya'o/ /de nas dang po sa brtag pa la sogs pa'i cho ga rdzogs par bya'o/ /de nas sa'i lha mo dang / lhag pa'i lha dang / bum pa dang / slob ma rnams sta gon du bya'o/ /de nas thig dang tshon gyi man ngag shes par byas te/dkyil 'khor bris la sku gsung thugs kyi rten dgod pa dang / phyi nang gi rgyan dang / mchod pa dgram pa dang / dkyil 'khor slar bshad pa'i cho gas dkyil 'khor bskyed pa dang / mnyes par bya ba'i khyad par rnams kyis dkyil 'khor mchod pa byas te/slob ma gzhug par bya ba'i phyir khrus dang / gdong ras bcing ba dang / me tog gtong ba dang / 'dod pa dri ba dang / bgegs bskrad pa dang / dam tshig bsgrags pa dang / yol ba bsal ba dang / phyag bzhi bya ba dang / gral la dgod pa dang / dam tshig bsgrag pa dang / ye shes dbab pa dang / snang ba brtag pa dang / me tog dor ba dang / me tog mgo la gdags pa dang / gdong g.yogs blang zhing mig dbye ba dang / lha dang dkyil 'khor bstan pa rnams ni 'jug pa'i cho ga'o/ /de'i phyir/ nam mkha'i mtha' la longs spyod pa/ /zhes pa'i tshig gnyis po 'di bshad pa dang 'chad par 'gyur pa gnyis ka'i don ston par byed pa'o//de la bshad pa'i dbang du byas nas bla ma'i mkhyen pa'i yon tan dang / sems can rjes su bzung ba'i thabs nam mkha'i mtha' dang mnyam par mkhyen pa'o/ /thams cad mkhyen pa'i ye shes mtsho/ /zhes pa ni ji ltar rgya mtsho las nor bu 'byung ba ltar thams cad mkhyen pa yang bla ma las 'byung ba'o//'chad pa ltar na dbang yongs su rdzogs pa la nam mkha' ni chos kyi sku'o/ /longs spyod pa ni gzugs sku gnyis kyis sems can rjes su 'dzin pa'o/ /thams cad mkhyen pa'i ye shes ni sku gsum mo/ /mtsho zhes pa ni rin po che 'byung bar byed pa ste/dbang bskur ba las bdag dang gzhan gyi don 'byung ba'i phyir ro/ /da ni ma rig pa rig par bya ba'i phyir rig pa'i dbang bskur ba bstan par bya ba'i phyir/ ma rig sgo nga'i sbubs 'byed pa/ /zhes bya ba la sogs pa gsungs te/ ma rig pa zhes pa ni khams du ma 'dus pa la bdag tu 'dzin pas na ma rig pas yin la/de'i sbubs sam shubs zhes bya ste/ sgo nga dang 'dra ba rig pa'i srubs med pa'o/ /de gang gis 'byed na sngar bshad pa'i bla mas so/ /thabs gang gis na/ dbang gsum pas so/ /yang na ma rig pa ni rig pa'i ye shes la kun nas sgrib par byed pa ste/dper na sbubs sam sgo nga dang 'dra bas so/ /de 'byed pas na bla mas so/ /thabs gang zhe na/ rig pa'i dbang lnga ste/ de'i don ni rig pa'i dbang lngas gzugs la sogs pa lnga rnam par snang mdzad la sogs pa lnga dang / chos kyi dbyings la sogs pa'i ye shes lnga'i rang bzhin can bya ste/ gti mug la sogs pa ni ye shes lnga'i rang bzhin dang / gzhan yang khams dang skye mched rnams kyang lhar byin gyis brlab po/ /des ci byed snyam pa la/ srid pa'i dra ba 'joms pa po/ /zhes bya ba gsungs te/ srid pa na 'khor ba nyon mongs pa dang bcas pa'o/ /de 'dra ba'am rgya dang 'dra ba'o//'joms pa ni dbang gis te/ chu dang zhe sdang ni mi bskyod pa la sogs pa'i don to/ /nyon mongs ma lus zhi byed pa/ /zhes pa ni de nyid do/ /'khor ba'i rgya mtsho'i pha rol phyin/ /zhes pa ni 'khor ba ni 'khor bar byed pa ste/ skye ba la sogs pa'o/ /rgya mtsho ni mtsho dang 'dra ba'o/ / pha rol tu phyin pa ni ji ltar gzings dang mnyan pa dang / skye ba'i sgo nas phyin par byed pa ste/ bla ma dang dbang gi man ngag gis shes par bya ste/ pha rol tu phyin pa ni 'bras bu mngon du byas pa'o/ /yang na lung bstan pa dang dbugs dbyung ba bsdus pa'o/ /ye shes dbang bskur zhes pa ni ye shes lnga'i rang bzhin rigs lnga'i rdzas kyi dbang bskur ba'o//cod pan can zhes pa ni phung po la sogs pa'i rtog pa gsal bar bya ba'i phyir lhar byas la/ de nyid kyi rtog pa gsal bar bya ba'i phyir cod pan la rigs lngas rgyas gdab po/ /yang na cod pan zhes pas ni cod pan nyid bzung la/ des ni dbang gi rdzas bzhi po yang gzung ngo //rdzogs pa'i sangs rgyas rgyan du thogs/ /zhes pa ni bshad ma thag pa de nyid do/ /yang na me tog gang la 'bab pa de nyid de la sbyin par bya ste/ mi 'bral bar bsgom par bya'o zhes pa'i don to/ /da ni rig pa grol bar bya ba'i dbang bstan par bya ba'i phyir/ sdug bsngal gsum gyi sdug bsngal zhi//zhes bya ba la sogs pa gsungs te/ sdug bsngal gsum ni rig pa'i dbang gi ltar na 'gyur pa la sogs pa'i sdug bsngal gsum mam/ lus ngag yid gsum du gtogs pa'i sdug bsngal zhi ba'am bsal ba'o/ /gsum pa ltar na sdug bsngal ni dga' ba dang po gsum ste/rtog pa dang bcas pa'i phyir ro/ /de'i phyir sdug bsngal bsal nas zhi ba zhes pa lhan cig skyes pa'i ye shes gzung ngo / /de nyid slar bshad pa dang / gsum sel zhes pa ste/ rtog pa dang bcas pa'i dga' ba gsum mi 'dzin pas so/ /gsum gang zhe na/ mtha' yas zhes pa ste/mtha' yas pa ni a nan+ta ste dga' ba'o/ /'grol ba ni lhan cig skyes pa mngon du byas pa'o/ /gsum thob ces pa ni sku gsum thob pa'o/ /sgrib pa kun zhes pa ni mtshan nyid dang bral ba'i skad cig ma rtogs pa rnams so/ /nges pa ni gdon mi za bar 'grol ba'o/ /mkha' ltar mnyam zhes pa ni gnyis 'das nas ni gnyis mnyam pa zhes pa ste/lhan cig skyes pa'i mtshan nyid do/ /chags pa ni bcas pa'i mtshan nyid des slar nyon mongs par mi 'gyur ram snyam pa la/ nyon mongs dri ma kun las 'das/ /zhes pa ste/ nyon mongs pa yang yin la dri ma yang yin pas nyon mongs pa dri ma ste dga' ba gsum mo//'das pa ni de las 'das pa ste/ lhan cig skyes pa'o/ /dus gsum ni skad cig ma gsum mo/ /dus med ces pa ni gnyis su med pa ste/ mtshan nyid dang bral ba'o/ /rtogs pa ni rtogs par bya'o zhes pa'i don to/ /da ni de dag gi phan yon mdor bsdus pa ste bstan par bya ba'i phyir/sems can kun gyi gtso bo ste/ /zhes bya ba la sogs pa gsungs te/ sems can kun gyis de ltar dbang thob pa de dag go/ /gtso bo ni sems can gzhan gyi gtso bor gyur pa zhes pa'i don to/ /yon tan ni de bzhin gshegs pa'i yon tan thams cad do//de nyid bkur bar 'os pas thod do/ /rnams kyi thod ces pa ni de bas kyang ches bla ma'i man ngag gus par gzung bar bya'o/ /lus kun las ni rnam grol ba/ /zhes pa ni bsgom par bya ba ston pa ste/ rig pa'i dbang dang ldan nas phung po lnga la sogs pa rigs lnga la sogs par bsgom pa'o//gnyis pas ni skur 'dzin pa las grol te/ 'khor lo drug la bkod pa'i yig 'bru bsgom pa'o/ /gsum pa ni yig 'bru bsgom pa'i rtog pa las grol te/ thig le byang chub sems su bsgom pa'o/ /bzhi pa ni de dag thams cad gnyis su med par bsgom pa'o//yang na lus kun zhes pa ni gsum ste/ las kyi lus dang / rnam par smin pa'i lus dang / bag chags kyi lus so/ /de dbang gsum gyis sbyor bar byed pa ste/ ye shes kyi lus su gyur pas/ nam mkha'i lam la rab gnas pa/ /zhes gsungs te/ nam mkha' ni 'dus ma byas te/chos kyi sku mngon du byed pa'o/ /gnas pa ni longs spyod pa dang / sprul pa ste/ des sems can rjes su 'dzin par mdzad pas so/ /yang na nam mkha' ni go bla'o/ /de la gnas pa ni mkha' 'gro ma rnams te/ de dag dang mi gnyis par mkha' spyod du 'gyur pa'o//da ni rlom sems med par dpe gsum gyi sgo nas sems can gyi don bya ba bstan pa'i phyir/ yid bzhin nor bu chen po 'chang / /zhes pa la sogs pa gsungs te/ de ltar nam mkha'i lam la gnas nas sems can rjes su 'dzin pa ni yid bzhin nor bu ltar rtog pa med pa 'jug pa'o//khyab bdag rin chen kun gyi mchog ni/ btang snyoms su byed pas de skad ces bya'o/ /mchog ni mchog gi dngos grub stsol bar mdzad pa'o/ /dpag bsam shing chen rgyas pa ste/ /zhes pa ni dpag bsam gyi shing las dgos pa 'byung ba ni shing gi lcug ma'am shing gas pa las mi 'byung la/rgyas pa kho na las 'byung gi ma rgyas pa las ma yin pa ltar sku gsum char las sems can gyi don 'byung gi chos su 'ba' zhig las ma yin/ yang na dga' ba dang mchog dga' ni myu gu ste de las ma yin la/ dga' bral ni skams pa lta bu yin pas de las ma yin gyi/ lhan cig skyes pa ni rgyas pa yin la de las 'bras bu sku gsum 'byung ba'o//bum pa bzang po che ba'i mchog /ces pa ni grub pa'i bum pa las dgos pa 'byung ba ltar 'dir yang sems can rjes su gzung bar nus pa'o/ /che ba'i mchog ces pa ni mchog gis dngos grub stsol ba'o/ /byed pa sems can kun don byed//ces pa ni snyoms par sems can gyi don byed pa ste/ de nyid gang zhe na/ phan 'dogs sems can mnyes gshin pa/ /zhes gsungs te/ don du gnyer bar bya bas na phan 'dogs pa ste/ sems can rnams ni gru zhig pa'am g.yang sa chen po'i kha na 'dug pa'am/gsal shing la bskyon pa lta bu'am/ ngan skyugs kyi nang du gang ba de dag la snyoms par bde ba'i rgyu dang 'bras bu la bkod pa de skad ces bya'o/ /mnyes gshin pa zhes pa ni rtag tu mi brjed par byed pa'o/ /da ni shes rab khyad par can gyi sgo nas sems can gyi don bya ba bstan par bya ba'i phyir/bzang ngan shes shing dus shes la/ /zhes gsungs te/ bzang po'i dus shes pa dang / ngan pa'i dus shes par bya ba'i phyir nang gi sgo nas sems can rjes su 'dzin pa'o/ /nang gi dbang du byas nas rlung gi rgyu ba so sor rtogs par byed la/ phyi'i dbang du byas nas dus sbyor bcu gnyis kyis so sor rtogs par byed de/des na rnal 'byor gyi gtsug lag la mkhas par bya'o/ /khyab bdag ces pa ni 'khor ba dang mya ngan las 'das pa gnyis ka la khyab pa'o/ /dam shes zhes pa ni mi slu ba ste/ rnal 'byor gyi gtsug lag gis mi slu ba'o/ /dam tshig ldan zhes pa ni dam tshig dang ldan pas sems can gyi don la 'jug pa'o//de lta bu'i rtsis kyis bzang ba dang ngan pa dang skye ba dang 'chi ba la sogs pa shes pa ni dus shes pa'o/ /dbang po zhes pa ni mchog dang mchog ma yin pa shes pa'o/ /rnam grol gsum la mkhas pa po/ /zhes bya ba la/rnam grol ni grol bar byed pa ste theg pa'o/ /gsum ni nyan thos dang / rang rgyal dang / theg pa chen po'o/ /mkhas pa po ni bshad ma thag pa'i dbang po mchog dang mchog ma yin pa la ci rigs par ston pa la de skad ces bya'o/ /yon tan ldan zhing yon tan shes/ /zhes bya ba la/ de ltar gtsug lag gi sgo nas yon tan dang ldan pa dang mi ldan pa yang shes par bya'o/ /yang na gtsug lag ni rang gi don yon tan shes pa yin la/ de'i sgo nas gzhan don yon tan dang ldan par shes par bya'o/ /chos shes bkra shis bkra shis 'byung / /zhes bya ba la/ chos shes pa ni rtsis so//des bzang na ni bkra shis pa/ ngan na ni bkra mi shis pa ste/ bzlog par bya'o/ /yang na rtsis de shes pas bya ba ci byas kyang bkra shis pa'o/ /bkra shis kun gyi bkra shis pa/ /zhes bya ba ni 'jig rten las 'das pa'i bkra shis pa'o/ /de nyid bshad pa/ grags pa'i bkra shis snyan grags dge//zhes gsungs te/ bkra shis pa nyid du snyan grags pa'o/ /dbugs 'byin ni lta ba log pa mngon par shes pa can yang rtsis 'di'i sgo nas dbugs 'byin par byed pa'o/ /chen po ni de ltar dbang thob pas dbugs 'byin cing ngal sos pa'o/ /dga' ba dang bde ba chen pos tshim par byed pas dga' ston che zhes pa'o//dga' chen rol mo chen po ste/ /zhes pa ni thams cad phyag rgya chen po la bkod pas so/ /bkur sti rim gro phun sum tshogs/ /zhes bya ba lha dang mi'i phun sum tshogs pa'i gzhi yin pas dbang la 'jug par bya'o zhes pa'i don to//mchog tu dga' ba grags bdag dpal/ /zhes bya ba la/ mchog tu dga' ba gnyis su med pa'o/ /de gang la yod pa na grags bdag dpal te/ 'jig rten pa'i dpal bdag gi don to/ /mchog ldan mchog sbyin gtso bo ste/ /zhes pa ni rang mchog dang ldan pas gzhan la mchog sbyin par nus pa de ni gtso bo rab phul gya nom pa zhes bya ba ste/de'i phyir/ skyabs kyi dam pa skyabs su 'os/ /zhes pa ste/ 'di dang pha rol gyi 'jigs pa can rnams kyi skyabs su gyur pa'o/ /da ni brtul zhugs kyi cha lugs bzung nas sems can gyi don byed pa'i phan yon bstan par bya ba'i phyir/'jigs chen dgra ste rab kyi mchog /ces bya ba la sogs pa gsungs te/ 'jigs chen yang yin la dgra yang yin pas 'jigs chen dgra ste/ chu bo bzhi dang / bdud bzhi dang / ngan song gsum dang / gnyis su 'dzin pa'i rtog pa ste/ de'i dgra ni brtul zhugs so//de dag las grol bas na rab dang mchog dang gtso bo zhes bya'o/ /'jigs pa ma lus sel ba po/ /zhes pa ni 'jigs pa brgyad do/ /ma lus pa ni 'jigs pa'i bye brag ste/ cung zad tsam yang ma lus par brtul zhugs kyis sel ba'o/ /da ni brtul zhugs kyi cha lugs dngos po bstan par bya ba'i phyir/gtsug phud phud bu lcang lo can/ /zhes bya ba la sogs pa gsungs te/ 'dir mnyam par gzhag pa'i dus su ni he ru ka'i rgyan dang cha lugs 'di 'dra bar bsgoms la/ rjes la thob pa'am bskyed rdzogs la nus pa thob nas spyod pa byed pa'am/ yul nyi shu rtsa bzhir rigs ldan tshol ba'i dus su 'di dag bya ba ste//rgyal tshab he ru ka'i spyod pa zhes bya'o/ /de'i phyir gtsug phud ni thod pa'i dum bu sor lnga pa'i tshad la 'khor lo'i gzugs su bris te/ de'i bug pa nas skra rnams drangs te spyi khab bya ba'i gtsug phud do/ /'khor lo'i steng du rus pa'i zla ba phyed pa dang /sna tshogs rdo rje byas pa ni phud bu'o/ /lcang lo ni rkun ma'am dpa' bo bsad pa'i skra las byas pa'i lan bu phra mo gnyis ldan pa g.yas g.yon du 'phyang ba'o/ /ral pa muny+dza cod pan thogs ni/ skra gyen du brdzes nas dar gyis bcings nas ral pa'i tshogs thur du 'dzag pa'o//muny+dza ni skra'am rtsa las lhas ma legs par byas pa'i mchod phyir thogs 'chang ba'o/ /gdong lnga ni rus pa'am ba so las thod pa skam po'i dbyibs byas pa lnga mgo la 'jog pa'o/ /de'i kha nas rus pa las byas pa'i mu tig ha ra'i gzugs che chung du byas pa las ring thung byas pa'i rim pa gsum dang ldan pas/zur phud lnga pa me tog thod/ /ces bya ba'o/ /gtsug phud lnga dang ldan zhes pa ni gdong lnga po re re'i steng du rus pa las byas pa'i rdo rje re re phreng ba'o/ /mgo zlum ni skra brdzes pas 'dzum par snang ba'o/ /brtul zhugs chen po 'chang zhes pa ni lag pa la sogs pa yang rus pa'i rgyan gyis rdzogs par byas te/g.yon pa'i gru mos rnal 'byor gyi lhung bzed gzung / lag pas kha T+wAM ga gzung / lag pa g.yas pa Da ma ru dang ldan par byas pa/ lhung bzed dang kha T+wAM ga dur khrod kyi ras kyis g.yogs nas spyod pa'o/ /tshangs par spyod pa ni phyi nang gi byang chub kyi sems lhung bar mi bya'o//de lta bu'i brtul zhugs ni brtul zhugs rnams kyi nang na mchog go/ /de ni dka' thub mthar phyin pa ste tha mal ba'i rtog pa bcom pa'o/ /dka' thub che zhes pa ni de lta bu'i dka' thub kyis mchog gi dngos grub sgrub pa'o/ /de lta bu'i spyod pas ni nang gi dri ma bkrus pas na gtsang gnas te gtsang sbra can no//gau ta ma ni skad sor bzhag pa ste/ dam pa zhes pa'am mchog ces pa'o/ /gtsang sbra de yod pa ni nang gi bram ze'o/ /tshangs pa tshangs pa shes pa ni dri ma dag pa ste/ mi gnas pa'i mya ngan las 'das pa'o/ /de nyid bstan par bya ba'i phyir/ mya ngan las 'das pa zhes pa ni thob pa'o zhes pa'o//grol ba ni rtogs pa las so/ /thar pa ni bcings pa las so/ /de'i lus gnyis pa thams cad las rnam par grol ba'o/ /rnam grol zhi ba ni nyan thos kyi chags bral gyi lus so/ /zhi ba nyid ni chags bcas kyi lus te rdo rje 'chang gi sku'o/ /yang na rnam grol zhi ba ni 'khor ba la mi gnas pa'o//zhi ba nyid ni mya ngan las 'das pa la mi gnas pa'o/ /de nyid bstan par bya ba'i phyir/ /mya ngan 'das zhi mya ngan 'das/ /zhes pa'o/ /legs par mya ngan 'das pa ni mi gnas pa'i mya ngan las 'das pa ste/ gzhan ni ma legs pa'i'o/ / da ni shes rab ye shes kyi dbang gi mtshan nyid gtan la dbab pa bstan par bya ba'i phyir/ bde sdug sel ba mthar gyur pa/ /zhes bya ba la sogs pa gsungs te/ bde ba ni dga' ba dang mchog dga' ste bde ba nyid kyi phyir ro/ /sdug pa ni dga' bral ste/ 'dod pa'i phyir ro/ /sel ba ni log par rtog pa sel pa ste/gnas la sogs pa'o/ /mthar gyur pa ni lhan cig skyes pa ste/ mchog mtha' zhes gsungs pa'i phyir ro/ /mthar gyur pa zhes pas dga' bral du log par rtog pa bsal pa'i phyir ro/ /chags bral lus las 'das pa'o/ /zhes gsungs te/ chags bral ni nyan thos kyi mya ngan las 'das pa ste/de dang mthun pa'i dga' bral las 'das pa ste/ thub pa med pa dpe med pa/ /zhes pa ni dga' ba gsum gyis mi thub pa'o/ /dpe med pa de skar ma dang zla ba lta bu'o/ /mi mngon pa ni dbang po'i spyod yul ma yin pa'o/ /ci'i phyir zhe na/ mi snang ba ni spyod yul ma yin pa'o/ /gsal byed min pa ni gsal byed gzhan la mi ltos pa'o/ /mi 'gyur pa ni rtag pa'i phyir ro/ /gal te mi rtag na sangs rgyas kyi ye shes ma yin par 'gyur pa'i phyir ro/ /kun 'gro zhes pa ni phyogs cha med pa'i phyir ro/ /khyab pa po zhes pa ni gzugs can ma yin pa'i phyir te/nam mkha' bzhin no/ /khyab dang rdo rje bdag nyid dang / /'gyur med dus ni thams cad pa'o/ /zhes gsungs te/ shin tu legs pa nyid du 'gyur ro/ /yang na chos kyi sku ro gcig pa'i phyir mi 'gyur ro/ /de'i ming kun 'gro zhes bya ba ste/ khyab pa'i phyir ro/ / khyab pa ni khams gsum mam dbang po drug pa'o/ /ji ltar 'byung ba bzhi la nam mkha' khyab pa bzhin no/ /phra ba ni rtogs par dka' ba'o/ /zag pa med pa ni yul dang yul ma yin pas srid par mi 'khor ba'i phyir ro/ /sa bon bral zhes pa ni rgyu 'bras tha mi dad pa'i phyir zag bcas kyi sa bon dang bral ba'o//yang na zag bcas kyi sa bon dang bral bas zag pa med pa'o/ /rdul med ces pa ni rdul ni dri ma yin la/ de ni dga' ba gsum gyi dri ma dang bral bas so/ /dri ma med pa ni lhan cig skyes pa'o/ /nyes pa spangs pa skyon med pa/ /zhes pa ni lhan cig skyes pa'i skyon du 'gyur pa kun zhes pa'o//shin tu sad pa'i bdag /ces pa ni nyams su myong ba'i dus su gnyid sad pa lta bu ste/ sangs zhes pa'i don te sangs rgyas zhes pa'o/ /kun zhes pa ni kun mkhyen pa ste/ 'khor 'das kun gnyis su med par shes shing rig pa ste/ mi slu bas na dam pa'o//rnam par shes pa'i chos nyid 'das/ /zhes pa ni shes pa dang shes bya las 'das pa'o/ /de'i mtshan nyid ji lta bu snyam pa la/ ye shes gnyis med tshul 'chang ba/ /zhes gsungs te/ shes pa dang shes bya gnyis su med pa'i tshul 'chang ba'o/ /des sems can gyi don mdzad pa'i tshul gsungs pa/ rnam par rtog med lhun gyis grub/ /ces pa ste/ sngon gyi smon lam gyis mdzad pa lhun gyis grub pa'o/ /des ci byed snyam pa la/ dus gsum sangs rgyas las byed pa/ zhes gsungs so/ /dus gsum gyi sangs rgyas ji lta bu zhe na/ sangs rgyas thog ma tha ma med/ /ces gsungs te/ thog ma zhes pa ni sngon du 'gro ba ste rgyu'o//tha ma zhes pa ni 'gag pa ste rkyen gyis mi 'jig pa'o/ /med ces pa ni skye ba'i rgyu dang 'gag pa'i rkyen te/ rang byung ba zhes pa'i don to/ /de nyid gsungs pa/ dang po sangs rgyas rgyu med pa/ /zhes gsungs te/ nyan thos rdul phra rab rgyur 'dod pa de med pa'o/ /des na rgyu ni sngon du 'gro ba yin la/de yang bdag gi bya ba la sogs pa'o/ /'bras bu sngon du rgyu ba'i tshe rgyu de dang 'bras bu bdag nyid gcig la sogs pa yod dam/ 'on te med/ yod do zhe na/ rgyu 'gags pa las 'bras bu 'byung ngam/ 'on te ma 'gags pa las 'byung / 'gags pa las 'byung ngo zhe na/ 'gags pa'i phyir 'bras bu gang las 'byung /ma 'gags na rgyu dang 'bras bu dus gcig par 'gyur pas na 'di ni bdag med pa'o/ /de gang gis mthong snyam pa la/ ye shes mig gcig dri ma med/ /ces gsungs te/ ye shes ni shes rab ye shes so/ /mig gcig dri ma med pa ni mig dang 'dra bas so/ /ye shes lus can de bzhin gshegs//zhes pa ni de lta bu gang gis mthong ba de ye shes kyi sku zhes bya ste/ de bzhin gshegs pa zhes bya'o/ /da ni dbang bzhi pa'i mtshan nyid gtan la dbab pa'i phyir/ tshig gi dbang phyug ces bya ba la sogs pa gsungs te/ 'di thob par byed pa bla ma la ltos dgos pas dang po bla ma mnyes par bya ba'i phyir maN+Dal dang tshogs kyi mchod pa sngon du 'gro bas tshig 'dis bstod par bya ste/gsum par ngos bzung ba de/ 'dis nyams su blang bar bya'o/ /tshig dbang thob pas na tshig gi dbang phyug ste/ snang ba mtha' yas zhes bya'o/ /smra ba che zhes pa ni smra ba rnams kyi nang na bzhi pa mchog yin pas so//smra ba'i skyes mchog ni bzhi pa smra bas so/ /smra ba'i rgyal po ni gzhan klan ka tshol bas zil gyis mi non pas so/ /smra ba'i dam pa ni 'di'i sgo nas gzhan rtogs pas so/ /mchog gi gnas ni dngos grub kyi gnas so/ /smra ba'i seng ge ni lta ba ngan pa tshar gcod pas so//tshugs pa med pa ni gzhan gyi klan kas so/ /de ltar na kye zhes sngon du song bas phyag 'tshal bstod ces bya'o/ /da ni bzhi pa'i mtshan nyid gtan la dbab pa bstan par bya ba'i phyir/ kun du lta ba zhes bya ba la sogs pa gsungs te/ 'dir rten dang bcas pa dang /rten med pa gnyis te/ rten bcas kyi dbang du byas te/ kun zhes pa ni rgyal rigs la sogs pa'o/ /lta ba ni las rgya la ye shes kyis rgyas btab pa ste/ sangs rgyas spyan la sogs pa'i rang bzhin gnas lngar yi ge dgod pa'o/ /de la brten nas mchog tu dga' ba ste/ phyag rgya chen po 'byung bas de skad ces bya ba'o//gzi brjid phreng ba ni 'od zer te/ spyan la sogs pa bkug nas bstims te der bya ba'o/ /blta na sdug pa zhes ni ltar blta na sdug pa byas nas de skad ces bya'o/ /'od bzang 'bar ba dpal gyi be'u/ /zhes pa ni snying gar nyams su myong ba'o/ /lag na 'od 'bar snang ba po/ /zhes pa ni lag pas rdzas la sogs pa len pa ltar pho nya 'dis kyang gnyis su med pa len par byed pa'o//sman pa che mchog gtso bo ste/ /zhes pa ni thabs kyis zug rngu 'byin pa'o/ /de nyid bshad pa/ zug rngu 'byin pa bla na med pa ste/ chung yang sdug bsngal skyed par byed pas so/ /yang na ye shes kyi phyag rgya'i dbang du byas nas kun zhes pa yul lnga gzugs rdo rje ma la sogs par lta'o//ye shes la las kyi phyag rgya gdab pa ste/ bde ba skye ba'i rten rung bar lta ste/ tsum+ba na dang / A ling+ga dang / na kha pra ha ra la sogs pa bya'o/ /gzi brjid phreng ba blta na sdug /ces pa ni 'od zer gyi phreng bas reg rdo rje ma la sogs pa spyan drang ba dang der bya ba ste/blta na sdug pa ni las dang 'dra bar ro/ /lhag ma ni gong ma bzhin no/ /sman pa ni nyon mongs pa'i nad gso ste zug rngu zhes bya'o/ /chos kyi phyag rgya ltar na kun du zhes pa lus kun du ste/ spyi bo la sogs pa'o/ /blta na sdug ces pa ni gnas der 'khor lo lta ba ste/ bde ba chen po la sogs pa'o/ /gzi brjid ni gtum mo'o/ /phreng ni 'khor lo bzhi rim pas bsreg pa ste/ lte ba'i a'o/ /dpal be'u ni snying gar bag chags bsreg pa'o/ /lag na 'od 'bar ni des ye shes kyi bdud rtsi blangs pa'o/ /sman pa ni sngar bsregs pa gso bar byed pa'o/ /zug rngu ni bdag tu lta ba'o//da ni de dag gi mthun pa'i dpe bstan par bya ba'i phyir/ sman rnams ma lus ljon pa'i shing / /zhes pa la/ sman gyi ljon pa'i shing ni sdong bu dang me tog dang yal ga dang lo ma la sogs pa thams cad sman du 'gyur pa ltar pho nya de dag la bltas pa dang mthong ba la sogs pas gnyis su med pa'i grogs su 'gyur pas so//nad do cog gi dgra che ba/ /zhes pa ni nyon mongs pa'i nad rnams rtsad nas gcod pas na nad kyi dgra bo chen po'o/ /sdu gu zhes pa ni de ltar byin gyis brlabs pa de'o/ /'jig rten gsum gyi mchog ni gnyis su med pa rtogs par byed pa'i thabs mchog tu gyur pa gzhan med pas de skad ces bya'o//dpal ldan zhes pa ni bdag dang gzhan gyi don 'byung bas so/ /rgyu skar dkyil 'khor can ni ye shes des nyon mongs pa zil gyis non pa ste/ ji ltar zla ba'i dkyil 'khor gyis skar ma'i tshogs zil gyis gnon pa bzhin no/ /de ji tsam du snyam pa la/ phyogs bcu nam mkha'i mthar thug par//chos kyi rgyal mtshan legs par 'dzugs/ /zhes gsungs te/ phyogs bcu ni yul dang dbang po'o/ /chos kyi rgyal mtshan ni ye shes so/ /'dzugs pa ni bstan pa ste gsum pa'i ye shes so/ /'gro na gdugs gcig yangs pa ste/ /zhes pa ni 'gro ba drug go/ / gdugs ni gdugs dang 'dra ba ste tsha ba'i gdung ba sel par byed cing skyob pa'i phyir ro/ /yangs pa ni khyab pa'o/ /gang gi gdugs she na/ byams dang snying rje dkyil 'khor can/ /zhes gsungs te/ rgyu byams pa dang snying rje yin la/ rnam pa lha'i dkyil 'khor gyi snang ba sems can rjes su 'dzin par mdzad par gdugs so//mtshan nyid gang zhe na/ /dpal ldan pad+ma gar gyi bdag /ces gsungs te/ gar mkhan dang glu mkhan la sogs pa shin tu dman pa'i 'gro ba yang dag par 'dzin pas na gar gyi dbang phyug go zhes bya'o/ /de ltar na rlom sems mnga' 'am zhe na/khyab bdag chen po zhes gsungs te/ byams pa dang snying rjes mchog dang dman pa'i don mdzad pa'i phyir ro/ /'dod pa 'byung ba'i phyir ram/ lha'i dkyil 'khor gyis gdul bya rjes su 'dzin pas na rin chen gdugs so/ /de ltar dbang bskur bas sangs rgyas thams cad kyi gtso bor gyur pa la sogs pa'i phan yon rgyas par bstan par bya ba'i phyir/sangs rgyas kun gyi gzi brjid che/ /zhes bya ba la sogs pa gsungs te/ 'di dag thams cad sangs rgyas kun zhes gzhi gcig la bsdu bar shes par bya'o/ /de ltar dbang thob pa'i gang zag ste/ sangs rgyas kun ni rigs lnga'i de bzhin gshegs pa'o//de'i gzi brjid dam pa mchog tu gyur pa rdo rje 'chang chen po ste de ltar 'gyur pa'o/ /sangs rgyas kun gyi sku 'chang ba/ /zhes pa ni dus gsum gyi sangs rgyas thams cad kyi sku dang mi gnyis par 'gyur pa'o/ /sangs rgyas kun gyi rnal 'byor che/ /zhes pa ni sangs rgyas thams cad kyi sku de nyams su bzhes pa ste/de dang ldan pa de yang de ltar 'gyur ro zhes bya'o/ /sangs rgyas kun gyi bstan pa gcig /ces pa ni bstan pa'i ngo bo phyag rgya chen po ste de nyid du 'gyur pa'o/ /de gang gi mthu yin snyam pa la/ rdo rje rin chen dbang bskur dpal/ /zhes gsungs te/rdo rje ni bum pa ltar na rdo rje dngos so/ /des mtshon pa'i dril bu'i yang ngo / /rin chen ni cod pan no/ /de bzhin du chu dang / ming yang gzung ngo / /dbang bskur ba ni bshad pa ltar ro/ /dpal ni bshad pa rnams 'jig rten las 'das pa'i phun sum tshogs pa ste che ba'o/ /gsang ba ltar na rdo rje ni bla ma'o//rin chen ni pho nya'o/ /dbang bskur ba ni de las byung ba'i byang chub kyi sems kyis slob ma'i lce la 'jog pa'o/ /dpal ni des de'i ngag gi sgrib pa zad par byed pa'o/ /gsum pa ltar na rdo rje ni slob ma'o/ /rin po che ni de la byin pa'i phyag rgya'o/ /dbang bskur ba ni bla ma'i man ngag gis lhan cig skyes pa bstan pa'o//dpal ni de'i yid kyi sgrib pa zad pa'o/ /bzhi pa ltar na rdo rje ni slob dpon no/ /rin po che ni slob ma'o/ /de la des tshig dbang rin po che sbyin pa'o/ /dpal ni ye shes kyi sgrib pa zad par byed pa'o/ /da ni 'jig rten pa'i phun sum tshogs pa bstan par bya ba'i phyir/ rin chen kun bdag dbang phyug ste//zhes bya ba la sogs pa gsungs te/ ji ltar rin chen kun zhes pa ni gser la sogs pa'o/ /dbang phyug ni yid bzhin gyi nor bu'o/ /de ltar dang po dang gnyis pa ni rin po che'o/ /gsum pa ni yid bzhin gyi nor bu'o/ /'jig rten dbang phyug ni 'khor los sgyur pa'i rgyal po'o/ /bye brag ni shar gyi yul 'khor skyong la sogs pa ste/bdag ces pa ni de rnams kyi bdag po dbang dang ldan par de 'gyur ro/ /yang na 'jig rten dbang phyug la sogs pa de dag gis bsrung ba dang sbed pa la sogs par 'gyur pa ste/ phan yon las kyang gsal bar bstan to/ /rdo rje 'chang ba kun gyi rje/ /zhes pa la rdo rje 'chang ba ni byang chub sems dpa'o//yang na gnod sbyin lag na rdo rje'o/ /rje zhes pa ni de rnams la dbang byed par de 'gyur pa'o/ /da ni dbang dang ldan pa des sangs rgyas kyi sku gsung thugs kyi gsang bar 'gyur pa bstan par bya ba'i phyir/ sangs rgyas kun gyi thugs che ba/ /zhes bya ba la sogs pa gsungs te/gsang ba gsum po 'di grangs can la sogs pa'i rtog ge ba dang / byang chub sems dpa' rnams dang / chags bral gyi de bzhin gshegs pas rtog par dka' ba'o/ /de ltar gsang ba gsum dang / dbang dang ldan pa de'i lus ngag yid gsum dbyer med par 'gyur pa'o/ /sangs rgyas kun ni rigs lnga'o//thugs ni thugs kyi gsang ba'o/ /de'i lhag ma ni go sla'o/ /da ni bskyed pa'i rim pa mdor bsdus te nyams su blang pa bstan par bya ba'i phyir/ rdo rje nyi ma snang ba che/ /zhes bya ba la sogs pa gsungs te/ 'di dag ni skad cig mas skyed par byed pa'o/ /rdo rje nyi ma ni chos mthun pa ste/mdog dmar ba dang sdug bsngal skyed pa dang / reg bya tsha ba'i phyir khrag go/ /rdo rje zla ba dri med 'od/ /ces pa ni kha dog dkar ba dang / bde ba skyed pa dang / bsil ba ste byang chub kyi sems so/ /chags bral la sogs chags pa che/ /zhes pa ni gnas skabs lnga'i rang bzhin te/yi ge dang / phyag mtshan no/ /kha dog sna tshogs 'bar ba'i 'od/ /ces pa ni 'od zer spro ba dang bsdu ba'o/ /rdo rje skyil krung rdzogs sangs rgyas/ /zhes pa ni bu skyes pa ste/ mngal nas skyed pa'i don to/ /byang chub pa lnga'i dbang du byas pa/ rdo rje nyi ma snang ba che/ /zhes pa ni tshogs gnyis sngon du song bas bsrung ba rdo rje ra ba dang /der chos kyi 'byung gnas dang / gzhal yas khang gdan dang bcas pa'i nang du kA li tshar gnyis las grub pa'i nyi ma'i dkyil 'khor la yang kA lis brgyan pa ste/ ji ltar byi ru la mu men gyi 'phra bkod pa lta bur bsgom pa ni mnyam pa nyid kyi ye shes kyi rang bzhin no//rdo rje zla ba dri med 'od/ /ces pa ni A li zung las byung ba'i zla ba'i dkyil 'khor rgyas pa la dbyangs kyis brgyan pa ni ji ltar dung la mu tig bkod pa lta bu ste me long lta bu'i ye shes kyi ngo bo'o/ /der yi ge hUM nag po bsam pa ni so sor rtog pa'i ye shes kyi ngo bo'o//de gnyis las 'od zer phar spro zhing bsdus pa las rdo rje hUM dang ldan pa ni bya ba nan tan gyi rang bzhin no/ /chags bral zhes pa ni sprul ba'i sku ste/ yum med pa'i yab bam/ /yab med pa'i yum bsgom pa ste khro bo'o/ /yang na 'jam pa'i rdo rje zhal gcig phyag bzhi pa g.yas na ral gri dang /mda'/ g.yon ut+pal dang gzhu 'dzin pa'o/ /sogs zhes pa ni longs spyod pa'i sku ste/ chags pa che zhes pa ni yab yum kha sbyor khro bo rnam par bsgom pa'o/ /kha dog sna tshogs zhes pa ni dkar po la sogs pa gang 'dod pa'o/ /'bar ba'i 'od ces pa ni dkar po yang shin tu dkar ba zhes bya ba la sogs pa'o//rdo rje skyil krung rdzogs sangs rgyas/ /zhes pa ni bzhugs stabs te ji lta bu'i yang zhes pa'i don to/ /de dag ni bsdus pa la dga' ba'i dbang du mdzad nas bskyed pa'i rim pa gsungs pa'o/ /yang na klog pa'i dbang du byas nas tshogs sogs pa sngon du song bas seng ge'i gdan gyi steng du zla ba la muM blta ste/de las byung ba'i bcom ldan 'das shAkya thub pa chags bral gyi sku bsams te/ sems can snod kyi dbang gi snod du rung bar byas la/ de dag la dkyil 'khor drug la bstod pa'i rim pas klog pa ni klog pa'i man ngag go/ /da ni 'gro ba dang mthun par skyes pas kyang 'gro ba'i nyes pa'i skyon gyis ma gos par bstan par bya ba'i phyir/sangs rgyas 'gro ba'i chos 'dzin pa/ /la sogs pa gsungs te/ 'gro ba'i chos ni pha mas bu skyes pa ltar na khrag dang khu ba dang gnas skabs lnga'i tshul lo/ /'dzin pa ni mthun pa ste/ de ltar na yang de'i nyes pas mi gos par bstan par bya ba'i phyir/dpal ldan sangs rgyas pad+ma skyes/ /zhes gsungs te/ bdag dang gzhan gyi don 'byung ba ni dpal ldan no/ /sangs rgyas ni de ltar bskyed pa'o/ /pad+ma zhes pa ni ji ltar pad+ma 'dam las byung yang 'dam gyis ma gos pa ltar/ 'dir yang 'gro ba dang chos mthun yang de'i nyes pas gos pa ni ma yin no//da ni lam gyi che ba mdor bsdus te bstan par bya ba'i phyir/ kun mkhyen ye shes mdzod 'dzin pa/ /zhes bya ba la sogs pa gsungs te/ kun zhes pa ni yod pa dang med pa'i dngos po ste/ de mkhyen pa ni kun mkhyen no/ / ye shes mdzod 'dzin zhes pa ni sku gsung thugs kyi gsang ba 'dzin pa'o/ /de gang gi mthu yin zhe na/ rgyal po sgyu 'phrul sna tshogs 'chang / /zhes pa ste/ rgyal po ni rdo rje 'chang ngo / /sgyu 'phrul zhes pa ni sgyu 'phrul dang 'dra ba ste/ sku che ba dang chung ba dang / mang ba dang nyung ba dang / chags pa dang bral ba dang bcas pa'i sku sna tshogs par bskyed cing sprul pa'o//de ltar na yang rlom sems yod dam zhe na/ sgyu 'phrul sna tshogs 'chang zhes kyang gsungs te/ dper na sgyu ma mkhan gyis rin po che las grub pa'i gzhal yas khang du de bzhin gshegs pa 'khor rnam bzhi dang bcas pa sprul zhing /de yang de dag la chos gsung bar mdzad pa sprul ba yang de dang de dag la rlom sems su mi byed do/ /de bzhin du che ba sangs rgyas rig sngags rgyal/ /zhes gsungs te/ 'bras bu'i dus su sangs rgyas kyi mthu mi nyams par 'gyur pa ni bskyed pa'i rim pa dang / sngags bzlas pa dang /'od zer spro bsdu la sogs pa'i mthu ste/ rig sngags rgyal zhes pa rdo rje theg pa'i lugs las byung ba ste de'i che ba'o/ /da ni rdzogs pa'i rim pa mdor bsdus las/ yi ge rab mchog gi rnal 'byor pa las dang pha rol tu phyin pa rdzogs par bstan par bya ba'i phyir/ rdo rje rnon po ral gri che/ /zhes pa la sogs pa gsungs te/ rang 'dod pa'i lhar bskyed pa sngon du song ba'i lus la 'khor lo bltas pa'i sprul par rdo rje dang ldan pa'i ral gri bsam pa ste/ rnam pa ni rdo rje'o/ /mtshan nyid ni rnon po'o/ /mthun pa'i dpe ral gri zhes bya ba ni de'i rtse mo la yi ge a bsam pa yin pas de skad ces bya'o//de nyid gsal bar bstan par bya ba'i phyir/ yi ge mchog ste rnam par dag /ces gsungs te/ yi ge rnams kyi nang nas mchog tu gyur pa ni/ a ste ral gri'i rtse mor blta'o/ /rnam par dag ces pa ni 'og nas rig par bya'o/ /theg pa chen po sdug bsngal gcod//ces pa ni theg pa chen po ni rdo rje'i theg pa chen po'o/ /de'i lugs des rdo rjes sdug bsngal gcod pa ste/ snying ga chos kyi 'khor lo la nyon mongs pa can gyi yid kyi ngo bo phung po lnga dang 'byung ba lnga'i rang bzhin gyi yi ge gnas pa de gcod pa dang chos mthun par sreg pa'o/ /mtshon cha chen po rdo rje chos//zhes pa ni de ltar nyon mongs pa gcod pas mtshon cha ste ral gri'o/ /chos zhes pa ni longs spyod kyi 'khor lo ste/ de nas laM byung nas haM gnas su 'gro ba zhes bya ba'i don to/ /de la yi ge a gnas pa ni rdo rje chos so/ /rdo rje zab mo dzi na dzika / ces pa'i zab mo ni byang chub kyi sems gnyis su med pa'o//dzi na dzika ni rgyal ba 'dzin pa ste/ rgyal ba ni bde ba chen po'o/ /des bzung ba ni haM ngo / /de ltar bsgom pa'i sgrub pa po ni rdo rje blo gros can no/ /don bzhin rig ces pa ni bde ba chen po nas rna ba g.yas nas phyir byung smin ma'i dbus nas zhugs te tshangs pa'i bu ga nas song ste/de bzhin gshegs pa rnams kyi thugs ka na gnas pa'i dam tshig gi 'khor lo dkrugs te/ de byang chub kyi sems bkug ste spyi bo nas zhugs te sngar bsregs pa rnams gsos nas 'gengs pa rim gyis 'chad la/ rig pa rnams rnam par dag pa ni don bzhin rig pa ste bsgom pa'o//pha rol phyin pa kun rdzogs pa/ /zhes bya ba la sogs pa ni sngar bstan par zad do/ /sa rnams kun gyi rgyan dang ldan/ /zhes pa ni rang gi lus la sogs pa rnams rgyan dang 'dra bas gnas pas de skad ces bya'o/ /rnam par dag pa bdag med chos/ / zhes pa ni rnam par shes pa ni pha rol tu phyin pa la sogs pa'o/ /dag pa ni ro gcig pa ste byang chub kyi sems kyi las so/ /bdag med ces pa ni bshad ma thag pa ste/ de nyams su blang bar bya ba'i chos so/ /da ni rtsa dang thig le sgyu 'phrul dra ba'i tshul du bsgom pa bstan par bya ba'i phyir/ yang dag ye shes zla 'od bzang //zhes bya ba la sogs pas bstan te/ yang dag ces pa ni don phyin ci ma log pa ste/ don dam pa byang chub kyi sems so/ /zla ba 'od bzang zhes pa ni/ kun rdzob byang chub kyi sems zla ba lta bu la brten nas/ ye shes skye bas na bzang po zhes bya'o/ / de nyid thabs gang yin snyam pa la/ brtson chen sgyu 'phrul dra ba ste/ /zhes bya ba la sogs pa gsungs te/ brtson chen ni rlung ngo / /sgyu 'phrul zhes pa ni/ sngar bstan pa'i byang chub kyi sems de bsrub cing srub pa'i sbyor bas zhu ste/ 'khor ba dang mya ngan las 'das pa 'phrul par byed pas de skad ces bya'o//dra ba zhes pa ni rtsa ste/ sprul pa'i 'khor lo la sogs par byang chub kyi sems 'dzin pa'o/ /rgyud ces pa ni rgyu'i rgyud la gnas pa ste sa bon zhes pa'o/ /kun zhes pa ni 'khor ba dang mya ngan las 'das pa ma lus pa'i sa bon no/ / bdag po mchog ces pa ni rgyu las gzhan med pa'i phyir ro/ /rdo rje gdan ni ma lus ldan/ /zhes pa ni de bzhin gshegs pa bzhugs pa'i gnas rdo rje gdan yin pa ltar don dam pa dang kun rdzob gnyis su med pa ni de bzhin gshegs pa 'byung ba'i gnas so/ /ye shes sku ni gnyis su med pa'o/ /rnams zhes pa ni rnam par snang mdzad la sogs pa'o//ma lus 'chang zhes pa ni rdo rje'i gdan de la bzhugs zhes pa'i don to/ /kun du bzang po blo gros bzang / /sa'i snying po 'gro ba 'dzin/ /zhes gsungs te/ ye shes kyi sku can gyi de bzhin gshegs pa rnams rdo rje'i gdan la bzhugs par ma zad kyi byang chub sems dpa' rnams kyang bzhugs zhes bstan pa'i phyir rtogs pa phul du phyin pas na kun du bzang po'o//sa'i snying po 'gro ba 'dzin/ /zhes pa ni yon tan thams cad bskyed pas so/ /snying po ni de rnams kyi snying po ste sku gsum mo/ /des ci byed snyam pa la/ 'gro ba 'dzin zhes gsungs te/ dag pa dang ma dag pa'i 'gro ba rjes su 'dzin pa'o/ /sangs rgyas kun gyi snying po che/ /zhes pa ni don dam pa dang kun rdzob kyi byang chub kyi sems de ni sangs rgyas thams cad kyi snying po ste rgyu'o/ /da ni sprul pa'i 'khor lo la chos thams cad ro gcig par bya ba'i phyir/ sprul pa'i 'khor lo zhes bya ba la sogs pa gsungs te/ sprul pa'i 'khor lo la yi ge sde tshan re re la yang kha dog lnga lngar bkod pa ni sna tshogs 'chang zhes zer ro/ /yang na sna tshogs ni las dge ba dang mi dge ba las grub pa'i 'khor ba sna tshogs sprul pa'i a las 'byung ba'o zhes zer ro/ / 'dir rang gi 'dod pa nyams su blang ba'i rim pa'o/ /sprul pa'i 'khor lo nyid sna tshogs te/ 'di ltar 'khor ba dang mya ngan las 'das pa'o/ /de nyid bstan pa/ dngos po kun gyi rang bzhin mchog /ces gsungs te/ dngos po yang yin la kun kyang yin pas dngos po kun te/ phung po dang khams dang skye mched las 'byung zhing 'jig pa dang don byed nus pa'i chos rnams so//rang bzhin mchog ni de dag yin pas so/ /dngos po ni snga ma bzhin no/ /rang bzhin 'dzin ces pa ni snang ba dang stong pa tha mi dad pa'i rang bzhin 'dzin pa'o/ /skye med chos de sna tshogs don/ /zhes pa ni sna tshogs pa'i don skye ba med pa zhes bya'o//de bas na/ chos kun ngo bo nyid 'chang ba/ /zhes bya'o/ /shes rab chen pos skad cig la/ /chos kun khong du chud pa 'chang / /zhes pa ni de ltar na lam de khong du chud pa ni shes rab chen po ste/ skad cig gis chos thams cad ro gcig par khong du chud pa ste/lam myur pa zhes bya'o/ /de ltar na skad cig gis chos thams cad de kho na nyid du rtogs la/ tshe gcig gis rdo rje 'chang 'thob pa ni gsang sngags kyi lam che ba'i khyad par ro/ /de ltar na tshe gcig gis chos kun skad cig gcig la mngon par rtogs pa ste/ des na/ thub pa blo mchog yang dag mtha'/ /zhes gsungs te/ 'khor ba zlog pa thub pa ste rdo rje 'chang zhes bya'o/ /de bzhin du sangs rgyas bcom ldan 'das dang / bde bar gshegs pa dang / rgyal ba zhes bya'o/ /yang na de ltar rtogs pa ste thub pa'i blo dang mnyam pa ste/ yang dag pa'i mthar thug pa zhes bya'o//mi g.yo rab tu dang ba'i bdag /ces bya ba la/ mi g.yo ba ni the tshom mi za'o/ /rab tu dang ba ni 'od gsal chos kyi sku mngon du byas par 'gyur pa'i bdag nyid do/ /rdzogs pa'i sangs rgyas ni dus gsum gyi'o/ /byang chub ni gnyis su med pa ste de tsam gcig tu zad do/ / sangs rgyas kun zhes pa ni dus gsum gyi'o/ /mngon sum zhes pa ni sangs rgyas kun gyi mngon sum du mdzad cing phyag bya ba dang / de ltar bdag gis mngon sum du byas so zhes pa'i don to/ /ye shes me lce 'od rab gsal/ /zhes pa ni nyon mongs pa ma lus par bsreg nas 'od gsal bar gnas so zhes bya ba'i don to//de dag gis ni so sor rtog pa'i ye shes bshad zin to/ /da ni chags bcas lam gyi spyod pa la 'jug pa'i phan yon bstan par bya ba'i phyir/ 'dod pa'i don grub dam pa ste/ /zhes bya ba la sogs pa gsungs te/ 'dir 'dod pa'i sgo nas don grub pa ni gnyis te/ngan song sbyong ba dang / grol bar byed pa'o/ /de gang gis 'grub par byed snyam pa la/ 'dod pa zhes gsungs te/ 'dod pa ni gzugs la sogs pa lnga'o/ /des gzugs rdo rje la sogs pa dkyil 'khor gyi lha'i bdag nyid kyi don grub pa de gang zhe na/ ngan song thams cad rnam sbyong ba/ / zhes bya ba la sogs pa gsungs so/ /gzhan dag ni 'dod pa'i yon tan gyis ngan song gsum du 'gro bar 'gyur ro zhes zer te/ 'dir de nyid kyis sbyong ba'o/ /mgon po zhes pa ni de nyid la bya'o/ /sems can kun gyi mchog ces pa ste/ de lta bu'i gang zag de/ las dang po pa'i sa pa yin na yang theg pa gsum gyi gang zag gi nang nas de mchog go//sems can thams cad rab grol byed/ /ces pa ni lam 'di'i sgo nas bcings pa las mnyam snyam du grol bar byed ces pa'i don to/ /yang na 'dod pa ni thabs khyad par can tshogs kyi mchod pa la brten nas don gnyis su med pa yin la/de nyid la 'go nas 'byung ba'i pho nya dang snyoms par 'jug pas ni de skad ces bya'o/ /des cir 'gyur zhe na/ ngan song thams cad rnam sbyong ba/ /zhes gsungs te snga ma bzhin no/ /da ni dpa' bo dang rten gyi gang zag gi sgra 'jug pa'i rgyu mtshan bstan par bya ba'i phyir/nyon mongs g.yul du gcig dpa' ba/ /zhes bya ba la sogs pa gsungs te/ 'dir khyad par rnam pa bzhir 'gyur te/ nyon mongs pa dang g.yul 'gyed pa'i tshe dpa' ba ste/ nyon mongs pa rtsad nas gcod pa'i bsam pa gcig pu yod pa ste dang po'o/ / mi shes pa ni nyon mongs pa bsal ba'i thabs mi shes pa nyid dgra yin pas de shes par byed pa ni 'joms pa ste gnyis pa'o/ /blo ldan ni dpa' bo'i blo ste sngar gyi blo dang ldan pa'o/ /sgeg 'chang zhes pa ni lus cha gsum du 'khyog pa'am grim zhes ston pa'o/ /dpal dang ldan zhes pa ni bdag dang gzhan don 'byung bar bya ba'i bsam pa can te gsum pa'o//brtan po ni nyon mongs pa las rgyal bar byed pa'i dus su blo brtan pa ste/ theg pa gzhan la 'dod pa dang bral ba ste bzhi pa'o/ /da ni de'i cha lugs bstan par bya ba'i phyir/ mi sdug gzugs 'chang ba zhes bya ba la sogs pa gsungs te/mi sdug pa ni lus dang rgyan te/ lus ni nam mkha'i gos gyon pas so/ /rgyan mi sdug pa ni rus pa'i rgyan 'chang ba'i phyir/ lag pa brgya po zhes pa ni gar byed pa dang 'brel te/ gar gyi rigs brgya byed pa'o/ /kun bskyod cing zhes pa ni gom pa'i stabs zhes bya ba dang 'brel te/rdo rje dril bu dang ldan pa'i lag pas g.yas dang g.yon dang dbus dag tu gar byed cing lag pa gnyis dkur gnas te/ rkang pas sa la chos kyi 'byung gnas mthe bong gis bri bar bya'o/ /de bzhin du lag pas gar byed cing gru gsum du byas te rkang pas sna tshogs rdo rje bri bar bya'o//de gnas gcig cig gi nang du gcig byas te/ de nas zil gyis gnon pa dang / mchod pa dang rigs mtshon par byed pa'i gar rnams byed pa ni/ dpal ldan lag pa brgyas gang la/ /nam mkha' khyab par gar byed pa/ /zhes pa'i don to/ /da ni sbyor thabs brdas bstan pa bshad par bya ba'i phyir/sa yi dkyil 'khor gzhi'i khyon/ /zhes bya ba la sogs pa gsungs te/ de la tshogs kyi 'khor lo'i gnas skabs 'dir gnas khyad par can du steng 'og skyang nul byas te dkyil 'khor gyi thig btab la/ der dkyil 'khor gcig pa'i dpa' bo dang / rigs ldan dgug pa dang /brda 'dri ba dang / dbye bsal byas te dkyil 'khor gyi rim pas gral la bkod de/ 'dod pa'i yon tan lngas tshul ji lta bar mchod de/ reg rdo rje'i gnas skabs 'dir ni ji ltar sa las khri shing dang lo ma dang me tog la sogs pa 'byung ba ltar/ 'dis kyang gnyis su med pa'i ye shes kyi sku 'byung bar byed pas de skad ces bya'o//dkyil 'khor zhes pa ni de'i lus lha'i dkyil 'khor du byin gyis rlabs shing de las snying po len pas so/ /rkang pa ya gcig ces pa ni dpa' bo'i'o/ /mthil gyis gnon zhes pa ni rim gyis dbang ba'o/ / rkang mtheb ces pa ni rkang pa'i bye brag ste/ e ka aM gu li ste sor mo gcig mtshon pa nor bu'o/ /sen mo ni de las byung ba ste byang chub kyi sems so/ /khyon zhes pa ni de'i nus pa'o/ /tshangs pa zhes pa ni haM gi gnas so/ /de nas byang chub kyi sems spyan drang zhing gshegs su gsol ba ni du ma'i grangs su bya zhing mya ngan las mi 'da' bar bya ba'i phyir rtse nas gnon zhes gsungs te/nor bu'i rtsa nas bzlog ste gshegs par bya'o/ /da ni gnyis su med pa'i don gtan la dbab pa bstan par bya ba'i phyir/ don gcig gnyis med ces gsungs te/ des cir 'gyur snyam pa la/don zhes pa ni gnyis su med pa yin la/ de yang kun rdzob kyi kun+da dung lta bu dang / nyi ma dang / de'i bde ba tha mi dad par dpa' bo dang pho nyas nyams su myong ba'o/ /da ni chos kyi don gtan la dbab pa bstan par bya ba'i phyir/ chos kyi don zhes gsungs te/ chos kyi zhes pa ni phung po dang /khams dang / skye mched do/ /de'i don ni gnyis su med pa/ 'dod par bya ba ni bslu ba/ phrad par gyur pa zhes bya ba'i tha tshig go/ /da ni dam pa'i don gtan la dbab pa bstan par bya ba'i phyir/ dam pa'i don de 'jigs pa med/ /ces gsungs te/ de la 'dod par bya ba ni don dam pa ste/ mi slu ba'i phyir ro/ /'jigs pa med ces pa ni 'jigs pa can ni nyan thos la sogs pa yin la/ 'dir thabs de lta bu la 'jigs par mi bya'o zhes bya ba'i tha tshig go/ /da ni rnam par rig pa'i don gtan la dbab pa bstan par bya ba'i phyir/rnam rig sna tshogs gzugs don can/ /zhes bya ba la sogs pa gsungs te/ don dam pa de rnam par shes pa'i tshogs brgyad du snang ba ste/ de dag gnas gyur pa ni ye shes lnga'o/ /des na de la rnam rig ces pa ni yid kyi rnam par shes pa'o/ /sna tshogs zhes pa ni sgo lnga'i rnam par shes pa'o//gzugs don can zhes pa ni nyon mongs pa can gyi yid do/ /sems dang zhes pa ni yid kyi rnam par shes pa'o/ /rnam shes rgyu dang ldan zhes pa ni kun gzhi rnam par shes pa ste/ 'dir bi dz+nyA na ni bi dza ste sa bon zhes bya ste/ de rgyas pa ni rgyun yin te/ de'i rigs 'dzin pa ste/ ye shes sku'i ming can ye shes lnga gnyis su med pa'i byang chub kyi sems so/ /da ni dngos po ma lus pa'i don gtan la dbab pa bstan par bya ba'i phyir/ dngos don ma lus rnams la dga'/ /zhes bya ba la sogs pa gsungs te/ thabs khyad par can gyi sgo nas dngos po rnams la dga' ba dang bde ba la bstan te don dam pa de rtogs pa'o//yang na dngos don ma lus rnams la dga' bar bya'i spang bar mi bya'o/ /stong pa nyid dga' 'dod chags blo/ /zhes pa ni stong pa nyid kyi rang bzhin pho nya dang de kho na la dga' ba dang / sems can gyi don la 'dod cing chags par byed pa de la de skad ces bya'o//de lta na 'dod chags kyis nyes par mi 'gyur zhe na/ de'i phyir/ /srid pa'i 'dod chags rnam spangs pa/ /zhes gsungs te/ srid pa gsum gyi tha mal pa'i 'dod chags la sogs pa'i skyon lnga spangs pa'o/ /srid gsum dga' ba chen po pa/ /zhes pa ni gong du smos pa de dag lus ngag yid gsum gyi de kho na nyid du bsgyur ba'o//da ni kun rdzob byang chub kyi sems su gtan la dbab pa bstan par bya ba'i phyir/ sprin dkar dag pa bzhin du dkar/ /zhes bya ba la/ srid pa'i skyon gyis ma gos pa dang / de'i mdog bstan pa'o/ /'od bzang ston ka'i zla ba'i 'od/ / ces pa ni reg bya bsil ba dang / mdog dkar ba dang / bde bar bskyed par chos mthun te/ thabs kyi byang chub kyi sems so/ /shes rab kyi byang chub kyi sems bstan par bya ba ni/ nyi ma 'char ka'i dkyil ltar mdzes/ /zhes gsungs te/ mdog dmar ba dang / reg bya tsha ba dang / sdug bsngal bskyed par mthun pa'o//sen mo'i 'od ni shas cher dmar/ /zhes pa ni byang chub kyi sems ltung bar byed pa'i gnas rtsa gsum 'dus pa ste/ de'i mdog kyang de 'dra'o/ /da ni dpa' mo'i lus dang yan lag gi mtshan nyid bstan par bya ste/ cod pan bzang po mthon ka'i rtse/ /zhes pa la sogs pa gsungs te/'dir gzugs dang lang tsho'i mtshan nyid ston pa ste/ lo'i grangs ni yan lag bcu gnyis zhes 'og na gsal ba'o/ /yang na/ bden don rnam pa bcu gnyis ldan/ /de nyid rnam pa bcu drug rig /rnam pa nyi shus byang chub pa/ /zhes pas bstan to/ /cod pan ni skra bcings pa'i dar dpyangs so//mthon ka ni nag po'o/ /de'i rtse mo ni li ba'o/ /de'i skra mchog tu mthug pa dang / gnag pa dang li ba'o/ /mthon ka chen po 'chang / /zhes pa ni skra'i mdog go/ /nor bu chen po 'od chags dpal/ /zhes pa ni byang chub kyi sems ltung ba'i gnas so/ /'od chags dpal zhes pa ni pad+ma rA ga'i mdog can no//da ni de'i rgyan dang cha lugs bstan par bya ba'i phyir/ sangs rgyas sprul pa'i rgyan dang ldan/ /zhes bya ba la sogs pa gsungs so/ /sangs rgyas ni longs spyod rdzogs pa'i sku ste/ de la dbu rgyan dang snyan cha la sogs pa mnga' ba ltar 'di la yang de ltar brgyan par bya'o/ / sprul pa zhes pa ni chags bral te de la rang bzhin gyi rgyan shangs kyi dbyibs mtho ba dang / spyan yangs pa dang / tshems dkar ba dang / tshags dam pa dang / ma gas pa dang ldan pa'o/ /'jig rten khams brgya kun bskyod pa/ /zhes pa ni 'jig rten gyi khams na gnas pa'i dpa' bo brgya'i sems dus gcig tu bskyod par nus pa'am/yang na rtsa rnams kyi byang chub kyi sems kun bsdus pa'i nus pa de smin pa'o/ /de nas tshogs kyi 'khor lo'i gnas skabs 'dir byang chub kyi phyogs kyi chos sum cu rtsa bdun 'dus par bya ste/ de la tshogs kyi lam gyi chos bcu gnyis bstan par bya ba'i phyir/rdzu 'phrul rkang pa'i stobs chen ldan/ /zhes bya ba la sogs pa gsungs te/ mgyogs par bskyod pas na rdzu 'phrul gyi rkang pa ste/ chags bcas kyi lam myur ba zhes bya ba'i don to/ /de yang bzhi ste/ sems kyi rdzu 'phrul gyi rkang pa dang / brtson 'grus kyi dang /'dun pa'i dang / dpyod pa'i ting nge 'dzin gyi rdzu 'phrul gyi rkang pa'o/ /sems kyi rdzu 'phrul gyi rkang pa ni sems pa ste/ dogs pa med pa'i sems kyis skad cig gis rdo rje 'chang thob par 'dod pa'o/ /brtson 'grus kyi rdzu 'phrul gyi rkang pa ni le lo la mi gnas par bdag dang gzhan gyis skad cig gis sangs rgyas kyi ye shes 'dod pa ste/pho nya'i lus spyan ma la sogs pa'i rang bzhin du sgom pa'o/ /'dun pa'i rdzu 'phrul gyi rkang pa ni skad cig gis de kho na nyid khong du chud par 'dod pa'o/ /dpyod pa'i rdzu 'phrul gyi rkang pa ni bla ma'i man ngag la the tshom mi za bar 'jug pas rtogs par bya'o//stobs ni 'gro ba ste/ gong nas gong du 'gro bas na chen po'o/ /de nyid ces pa ni bshad ma thag pa'o/ /de nyid dran pa chen po 'chang / /zhes pa ni de lta bu'i man ngag mi brjed par bya ba'o/ /yang na dran pa ni dran pa nye bar gzhag pa bzhi ste/ dran pa bzhi po ting 'dzin rgyal//zhes pa la/ lus dran pa nye bar gzhag pa ni lhar lta ba ste phung po la sogs pa'o/ /tshor ba dran pa nye bar gzhag pa ni de la brten nas skye ba'i phyir bde ba chen por lta'o/ /chos dran pa nye bar gzhag pa ni bla ma'i man ngag ste/ chos thams cad skye ba med par ro gcig par lta'o/ /sems dran pa nye bar gzhag pa ni sems phyag rgya chen po'i ngo bor gcig tu dran par bya'o//de dag bsgom bya yin pas ting nge 'dzin ces bya'o/ /'dir yang dag par spong ba bzhi blta bar bya ste/ dge ba'i chos ma skyes pa skyed pa ni gsum pa'o/ /skyes pa 'phel ba ni bzhi pa rin po che tshig dbang ngo / / mi dge ba'i chos ma skyes pa mi skyed pa ni dam tshig go/ /skyes pa spong ba ni de spong ba ste/ de dag kyang gsal bar byas so/ /de dag ni tshogs kyi lam gyi chos so/ /da ni sbyor ba'i lam bstan par bya ste/ /dad pa'i dbang po ni rdo rje theg pa la mos pa'o/ /brtson 'grus kyi dbang po ni bla ma'i man ngag len pa la brtson pa'o//dran pa'i dbang po ni de la shes bzhin du byed pa'o/ /ting nge 'dzin gyi dbang po ni de goms par byed pa ste bsgom pa'o/ /shes rab kyi dbang po ni de dag gi gnas yin pa'i phyir/ rigs ldan bsten par bya ba'o/ /de dag khyad par du bya ba'i stobs lnga ste/ 'di ltar 'dod pa'i stobs dang / brtson 'grus kyi stobs dang /ting nge 'dzin gyi stobs dang / dran pa'i stobs dang / shes rab kyi stobs zhes bya'o/ /da ni mthong ba'i lam gyi chos bstan par bya ste/ byang chub yan lag me tog spos/ /zhes gsungs te/ byang chub thob par byed pa'i yan lag bdun no/ /de yang longs spyod du bya ba dang rgyan du bya ba'o/ /longs spyod du bya ba ni/me tog spos zhes pa ste spos dngos so/ /yon chab dang / mar me dang / dri dang / zhal zas dang / sgra zhes pa bdun no/ /rgyan du bya ba ni me tog gi rgyan nam rin po che'i rgyan te mgul rgyan dang / rna rgyan dang / dpung rgyan dang / lag gdub dang / do shal dang / ske rags dang / rkang gdub bo/ /spos zhes pa ni de'i lus la ga pur la sogs pa bcang bar bya'o//de bzhin gshegs pa'i yon tan mtsho/ /zhes pa ni mthar phyin pa'i lam ste/ de bzhin gshegs pa ni rigs lnga'o/ /yon tan ni stobs dang mi 'jigs pa dang / gzungs dang / ting nge 'dzin la sogs pa'o/ /mtsho zhes pa ni yon tan 'byung ba'i phyir ro//yang na de bzhin gshegs pa'i yon tan ni 'dod pa'i yon tan lnga ste yum mo/ /lam gyi yan lag brgyad tshul rig /ces pa ni lam ni 'phags pa'i bden pa'o/ /yan lag ni yang dag pa'i lta ba la sogs pa brgyad do/ /tshul zhes pa ni theg pa chen por gsungs pa dang / ming dang grangs mthun pas de skad ces bya'o//rig ces pa ni rdo rje theg pas de'i don ston pa'i phyir yang dag pa'i lta ba ni rang gi lha'i rnal 'byor ro/ /yang dag pa'i rtog pa ni de nyid la nges par rtog pa'o/ /yang dag pa'i ngag ni rdo rje'i bzlas pa la sogs pa'o/ /yang dag pa'i dran pa ni lus ltar dran pa dang / tshor ba bde bar dran pa dang /chos skyon med par dran pa dang / sems phyag rgya chen por dran pa'o/ /yang dag pa'i ting nge 'dzin ni lhan cig skyes pa la dmigs pa'o/ /yang dag pa'i las kyi mtha' ni sems can gyi don byed pa'o/ /yang dag pa'i rtsol ba ni rdo rje'i theg pa la rtsol bar byed pa'o/ /yang dag pa'i tshor ba ni sha lnga bdud rtsi lngas 'tsho ba'o//yang dag sangs rgyas lam rig pa/ /zhes pa la yang dag pa ni mi slu ba'o/ /gang gis na sangs rgyas te/ yang dag pa'i rdzogs pa'i sangs rgyas dus gsum du bzhugs pa'o/ /de dag skyed par byed pa ste pho nya'o/ /lam rig pa zhes pa ni pho nya la brten nas de ltar rig pa ste bsgom pa'i lam gyi chos so//da ni chags bcas kyi lam gyi phan yon rgyas par bshad par bya ba'i phyir/ sems can kun la shas cher chags/ /zhes bya ba la sogs pa gsungs te/ sems can kyang yin la kun kyang yin pas sems can kun te 'gro ba drug go//shas cher chags pa ni gnyis te/ nyon mongs pa lhag par che ba la chags pa dang / snying rje'i sgo nas chags pa las 'di ni nyon mongs pa lhag par che ba la chags pa ste/ 'dod chags can rjes su bzung nas snang ba mtha' yas 'dzud pa la sogs pa'o/ /snying rje'i sgo nas chags pa ni nyan thos kyi rigs can la bden pa bzhi ston pa la sogs pa'o//yang na rgyu'i gnas skabs na pho nya la sogs pa la chags pa ni sems can kun la shas cher chags pa'o/ /'bras bu'i dus na sems can gyi don la chags pas de skad ces bya'o/ /de ltar na de gnyis ka nyon mongs pa can du mi 'gyur ram snyam pa la/gsungs pa/ nam mkha' lta bur chags pa med/ ces gsungs te/ de ltar chags kyang de skyon gyis mi gos te/ nam mkha' dang / bum pa dang / yid bzhin gyi nor bu la sogs pa bzhin du'o/ /de ltar na sems can gyi don ji lta bu snyam pa la/ sems can kun gyi yid la 'jug /ces gsungs te/ sems can kyang yin la kun kyang yin pas sems can kun te 'gro ba drug go/ /yid la 'jug ces pa ni yid dang ji ltar mthun pa'o/ /yang na sems can kun ni slob ma'o/ /yid la 'jug pa ni gnyis te/ bla ma'i byin rlabs dang / slob ma'i rtsol ba dang / de'i sgo nas gnyis su med pa'i ye shes la 'jug pa ste/ bla ma'i ngag las so/ /sems can kun gyi yid ltar mgyogs/ /zhes pa ni rim gyis ma yin te/ /skad cig gis mdzad pas de skad ces bya'o/ /lung las kyang / mkhyen pa'i skad cig gcig gis kyang / /shes bya'i dkyil 'khor kun khyab can//zhes pa lta bu'o/ /de lta bu yang rigs ldan des ster ba'o/ /da ni ye shes kyi phan yon bstan par bya ba'i phyir/ sems can kun gyi dbang don shes/ /zhes bya ba la sogs pa gsungs te/ dbang po shes pa ni mchog dang mchog ma yin pa'o/ /don shes pa ni gzugs rdo rje ma la sogs pa yin par shes par 'gyur ro//sems can kun gyi yid 'phrog pa/ /zhes pa ni spyi dang bye brag tu 'phrog pa'o/ /chags bcas kyi lam gyis spyir rtog pa dang bcas pa dang / rtog med du 'phrog pa'o/ /bye brag tu 'phrog pa ni rnal 'byor pa'i yid gnyis su med pa ste a wa d+hU tIr 'phrog pa'o/ / phung po lnga don de nyid shes/ /zhes bya ba la/ phung po lnga ni gzugs la sogs pa'o/ /de'i don shes pa ni ye shes lnga gnyis su med par shes pa'o/ /rnam dag phung po lnga 'chang ba/ /zhes bya ba la/ rnam par dag pa ni khams dang skye mched de rnams gti mug rdo rje la sogs pa dang / gzugs rdo rje ma la sogs pa'o//phung po lnga ye shes lnga'i rang bzhin bde bar gshegs pa lnga'o/ /nges 'byung kun gyi mtha' la gnas/ /zhes bya ba la/ nges 'byung kyang yin la kun kyang yin pas nges 'byung kun te/ 'bras bu nges par 'byung ba'i thabs te theg pa gsum mo/ /mtha' zhes pa ni de rnams kyi mthar thug pa chags bcas kyi lam mo//nges par 'byung ba kun la mkhas/ /zhes pa ni chags bcas kyi lam 'dir rtogs par bya ba'o/ /gzhan yang dran par bya ba'i phyir/ nges 'byung kun gyi lam la gnas/ /nges par 'byung ba kun ston pa/ /zhes pa ni chags bcas kyi lam 'dir ldan par ston pa'o//da ni rnam pa thams cad kyi mchog dang ldan pa'i phan yon bstan par bya ba'i phyir/ yan lag bcu gnyis srid rtsa bton/ /zhes pa la sogs pa gsungs te/ yan lag kyang yin la bcu gnyis kyang yin pas yan lag bcu gnyis te/ 'di ltar ma rig pa dang / 'du byed dang / rnam par shes pa dang /ming dang gzugs dang / skye mched drug dang / reg pa dang / tshor ba dang / sred pa dang / len pa dang / srid pa dang / skye ba dang / rga shi zhes bya ba rnams so/ /de rnams ni srid pa'i yan lag dang rtsa ba'o/ /bton zhes pa ni 'di rnams shes pas srid pa'i rtsa ba'o zhes bya'o/ /de la 'di rnams shes par byed pa'i tshul kyang gnyis te/rgya che ba dang / zab pa'i lugs gnyis so/ /de la rgya che ba ni lugs dang mthun pa dang / lugs las bzlog pa ste/ de shes pas srid pa'i rtsa ba bton pa'o/ /zab pa ni rdo rje theg pa'i tshul zhes bya'o/ /de yang gnyis te/ bskyed pa'i rim pa dang /rdzogs pa'i rim pa'o/ /de la bskyed pa'i rim pas srid pa'i rtsa ba 'joms pa ni 'di lta ste/ ma rig pa zhes pa ni bdag tu 'dzin pa la bya ste/ 'di ltar khams drug 'dus pa las bdag dang / bdag gir 'dzin pa 'byung ba'o/ /de la khams drug ni sa dang chu dang me dang rlung dang nam mkha' dang rnam par shes pa'i khams so//de rnams 'dus pa ni tshogs pa gcig gi bdag nyid do/ /de rnams kyi nus pa'i rtsal gyi phung po dang skye mched dang khams rnams bskyed pa'o/ /de nas gcig la bdag tu bzung bas lhag ma la bdag gir 'dzin pa'o/ /de'i phyir ma rig pa zhes bya'o/ / de yongs su dag par bya ba'i phyir sems sbyong ste/ 'di ltar dam pa'i bka' drin gyis 'brel ba'i skyes bu gnas dben par mchod pa'i rten dang yo byad lta gon bya zhing lus dang ngag gi bya ba bya zhing tshogs bsags nas phyi dang nang gi rten 'brel gyi chos thams cad stong pa nyid du bsam zhing / oM swa b+hA wa shud+d+ho zhes bya bas stong pa nyid du bsgom zhing /ar na a tsit+ta ni a nu ta pa ta ste/ a kA ro la sogs pa'i sngags kyis so/ /de'i phyir ma rig pa skye ba med par yongs su dag pa'o/ /de la sgra mthar bsam zhing yongs su bsrung bar bya'o/ /ra ba dang gur gyi nang du nam mkha'i khams rnam par dag pa'i chos 'byung ba bskyed de/de'i nang du yaM las byung ba'i rlung gi khams gzhu lta bu'o/ /baM las byung ba'i chu'i khams zlum po'o/ /der raM las byung ba'i me'i khams gru gsum mo/ /der laM las byung ba'i sa'i khams rnam par dag pa gru bzhi pa'o/ /de rnams kyi sa bon ni yid kyi rnam par shes pa'i khams rnam par dag pa ste/de ltar na khams drug po yang phyi rol gyi don gyis bskyed pa ni ma yin gyi/ rang gi rnam par shes pa las byung ba ste/ gzung 'dzin gyis stong pa'i sems tsam du shes par bya'o/ /de nas de dag gi khyad par 'dus pa las yi ge oM du bsam zhing rnam par snang mdzad kyi rnam par gyur pa las gzhal yas khang ngo //de yang rang gi sems kyi snang ba tsam ste/ de lta bas na sems gzung 'dzin gyis stong pa nyid ma rig pa rig par byed pa ste/ bdag dang bdag gir 'dzin pa las grol ba'o/ /'du byed rnam par dag pa ni 'di lta ste/ de yang ma rig pa'i rkyen gyis 'du byed 'byung ba ste/de ci'i phyir zhe na/ khams drug po nyid las bdag tu bzung nas bdag ni skyes pa'o/ /bdag ni bud med do snyam du bdag dang gzhan du rtog pa'o/ /de'i dbang gis gcig la gcig lhag par chags te/ mngon par 'du byed pa'o/ /'dir khams drug po nyid skyes pa dang / bud med ma yin te/ sems ni pho mor ma grub ste rig pa tsam mo/ /rig pa de nyid yi ge'i ngo bo ste A li dang kA li'o/ /de las zla ba dang nyi ma'o/ /de dag ni mngon par 'du bya ba yin te 'du byed do/ /'du byed de nyid kyi rkyen gyis rnam par shes pa ste/ rang gi lha'i phyag rgya dang sa bon no/ /yid kyi rnam par shes pa de nyid kyi rkyen gyis ming dang gzugs zhes bya ste/rang gi lha'i sku 'od kyi gong bu'o/ /rnam par shes pa'i rkyen gyis skye mched drug ste/ de las sku yongs su rdzogs pa ni skye mched drug go/ /de ltar skye mched drug gi rkyen gyis reg pa zhes bya ste/ 'dod chags chen pos rjes su chags shing yab yum gnyis reg pa las zhu ba'i ngo bo nyid la gnas te/reg pa'i rkyen gyis tshor ba zhes bya ba ni bde ba zhes bya'o/ /tshor ba bde ba'i rkyen gyis sred pa ni yab yum kha sbyor du bzhengs pa'o/ /sred pa'i rkyen gyis len pa ni sku gsung thugs byin gyis brlab pa dang / ye shes sems dpa' bstim pa dang /dbang blang ba dang / skye mched byin gyis brlab pa dang / mchod pa dang / bstod pa dang / bdud rtsi myang ba dang / sngags bzlas pa ni gzhan la rag las pa'i tshul gyis len pa'o/ /len pa'i rkyen gyis srid pa ni sku spro ba dang bsdu ba mngon du mdzad pa'o/ /srid pa'i rkyen gyis skye ba nyid ni lha'i 'khor lo thun mong ba rnams so//skye ba'i rkyen gyis rga shi ni dkyil 'khor bsdu zhing mi dmigs par spyan drang zhing gshegs su gsol ba'o/ /de ni bskyed pa'i rim pa'i tshul gyi gdams ngag go/ /rdzogs pa'i rim pa'i tshul ni bla ma dam pa'i zhal la ltos par bya'o/ /yang na yan lag bcu gnyis ni pho nya'i lo grangs su shes par bya'o//de ltar na dag pa rnam pa bcu gnyis 'chang ba'o/ /bden bzhi'i tshul gyi rnam pa can/ /zhes pa ni ji skad du bshad pa'i theg pa chen por bden pa bzhi ni sdug bsngal shes par byed pa dang / kun 'byung spang par bya ba dang / lam rgyud la brten par bya ba dang / 'gog pa ni 'bras bu mngon du bya bar 'dod pa'o//'dir ni rnam pa de dag mi 'dod de/ ming dang grangs mthun la don ni dga' ba bzhi rtogs par bya ba'o/ /shes pa brgyad po zhes pa ni rnam par shes pa'i tshogs brgyad de/ kun gzhi rnam par shes pa dang / nyon mongs pa can gyi yid dang / sgo lnga'i rnam par shes pa dang /yid kyi rnam par shes pa ste brgyad do/ /rtogs pa 'chang zhes pa ni kun gzhi gnas gyur pa sprul pa'i sku/ nyon mongs pa can gyi yid gnas gyur pa chos kyi sku/ sgo lnga'i rnam shes gnas gyur pa longs spyod rdzogs pa'i sku/ yid kyi rnam par shes pa gnas gyur pa sku gsum ngo bo nyid kyi sku ste/des na de skad ces bya'o/ /bden don rnam pa bcu gnyis ldan/ /zhes pa ste bden pa ni mi slu ba ste/ don rnam pa bcu gnyis ldan pa ste/ gang zhe na/ dang po dbang bzhi las skad cig ma bzhi dang / de la brten nas dga' ba bzhi skye bas de skad ces bya'o/ /de nyid rnam pa bcu drug rig /ces pa ni rgyu mthun pa dang / rnam par smin pa dang / skyes bu byed pa dang / dri ma med pa dang / 'bras bu bzhi ste bcu drug go/ /rnam pa nyi shus byang chub pa/ /zhes pa ste/ rnam pa ni sngar bsgrags pa de nyid dang / nyi shu ni der chos kyi sku dang / longs spyod rdzogs pa'i sku dang / sprul pa'i sku dang /ngo bo nyid kyi sku ste/ bzhi bsnan pas de skad ces bya'o/ /de dag rig pas/ rnam pa sangs rgyas kun rig mchog /ces sbyar ro/ /byang chub pa zhes pa ni chags bcas kyi lam de lta bu la brten nas byang chub thob pa'o zhes pa'i don to/ /rnam par sangs rgyas kun rig mchog / ces bya ba la/ rnam pa ni sngar bshad pa nyi shu po ste lam mo/ /sangs rgyas ni 'bras bu'o/ /thabs gang snyam pa la/ kun rig mchog ste snga ma de dag rig pa ni thabs kyi mchog go/ /de ltar na ji skad du bshad pa'i theg pa chen por ni bgrod pa'i lam du gsungs la/ 'dir ni ldan pa'i chos so zhes gsungs so//da ni thun mong ma yin pa'i 'bras bu bstan par bya ba'i phyir/ sangs rgyas kun gyi sprul pa'i sku/ /zhes bya ba la sogs pa gsungs te/ sangs rgyas kyang yin la kun kyang yin pas sangs rgyas kun te/ de dag skyed par byed pa ni yum shes rab kyi pha rol tu phyin pa'i rang bzhin pho nya'o/ / de'i phyir pho nya'i che ba yin par rig par bya'o/ /de'i grangs ji tsam snyam pa la/ bye ba dpag med 'gyed pa po/ /zhes gsungs te/ theg pa chen por longs spyod rdzogs pa'i sku las sprul zhing grangs bye ba brgyar 'gyed par 'dod la/ 'dir ni gnyis su med pa'i 'od gsal ba las 'byung zhing sku khro bo'i rnam pa dpag tu med par sprul nas sems can gyi don mdzad pa ste/'dir ni ji skad du bshad pa'o/ thub pa chen po thub chen ldan/ /zhes pa'i don gsal bar bstan pa'o/ /da ni lam nye bar rtogs pa'i phan yon bstan par bya ba'i phyir/ skad cig thams cad mngon par rtogs/ /zhes bya ba la sogs pa gsungs te/'dir skad cig ma ni bzhi ste/ chos thams cad mngon par rtogs pa'i skad cig ma dang / sems can gyi don rig pa'i skad cig ma dang / bye brag 'byed pa'i skad cig ma dang / mngon par rdzogs par sangs rgyas pa'i skad cig ma dang / gzhan du ni mtshan nyid dang bral ba dang / rnam par smin pa dang /rnam pa sna tshogs pa dang / rnam par nyed pa zhes bya ba'i ming can te/ lam myur ba dang / thob bya dga' ba bzhi yun thung bas skad cig ma zhes bya'o/ /thams cad ces pa ni phung po dang khams dang skye mched kyis bsdus pa'i chos so/ /mngon par rtogs pa zhes bya ba ni gnyis su med par mngon sum du rtogs pa'o//des na rtogs par bya ba 'jig rten pa dang / 'jig rten las 'das pa'i chos thams cad dus dang mtshan nyid dang bral ba'i skad cig ma rtogs pa'o/ /yang na dus gang gis na skad cig gcig la/ gang rtogs na chos thams cad tshul ji ltar rtogs pa mngon sum du lhan cig skyes pa'o//sems kyi skad cig don kun rig /ces pa ni sems kyi zhes pa ni mchog dga' ste/ gzung ba dang 'dzin pas ston ka'i nyi ma phyed kyi nam mkha' lta bur rig pa ste/ sems tsam du rig pa'o/ /'dir byang chub ni dge ba'i bshes gnyen la rag las pa yin la/ rang dgar 'jug pa rnams blo bgam par bya ba'i phyir 'di dang phyi mar dkrugs te bstan pa'o/ /de'i phyir skad cig la rtogs shing tshe gcig gis sangs rgyas par byed pa'i lam ni rdo rje theg pa'o/ /de lta na sems can thams cad la lam 'di ma bstan pa ci'i phyir zhe na/ theg pa sna tshogs thabs kyi tshul/ /zhes bya ba la sogs pa gsungs so/ /theg pa ni gsum ste nyan thos la sogs pa'o/ /sna tshogs thabs kyi tshul zhes pa ni thabs sna tshogs gsum bstan pa ste/ de yang skad cig ma rtogs par byed pa'i thabs su rig par bya ste/ 'dir ni re zhig bsti gnas tsam du rig par bya'o//'gro ba'i don la rtogs pa po/ /zhes bya ba ni las dang po pa la 'gro ba drang ba'i don la dgongs nas gsungs pa ste/ de'i phyir/ theg pa gsum gyi nges 'byung la/ /zhes bya ba ni theg pa gsum ni go bla'o/ /nges par 'byung ba ni 'bras bu ste/ dgra bcom pa la sogs pa yin la de'i lam ni de dag go//theg pa gcig gi 'bras bur gnas/ /zhes pa ni bzhi pa rdo rje'i theg pa'o/ /'bras bur gnas zhes pa ni 'bras bu sku gsum lam du byed pa ste/ 'khor lo gsum du nyams su myong ba'o/ /de yang mgrin par longs spyod rdzogs pa'o/ /snying gar chos kyi'o//lte bar sprul pa'i sku'o/ /de bzhin du me long lta bu dang / mnyam pa nyid dang / so sor rtog pa rnams ni longs spyod rdzogs pa'o/ /bya ba nan tan ni sprul pa'o/ /chos kyi dbyings rnam par dag pa ni chos kyi sku'o/ /de bzhin du yang rgyu mthun pa ni sprul pa'o/ /rnam par smin pa ni chos so/ / skyes bu byed pa ni longs spyod do/ /dri ma med pa ni bde ba chen po'i tshul gyis gnas pas na de skad ces bya'o/ /da ni spang bya spangs pa'i phan yon bstan par bya ba'i phyir/ nyon mongs khams rnams dag pa'i bdag /ces bya ba la sogs pa gsungs te/ nyon mongs khams ni rtsa ba dang nye ba'i nyon mongs pa'o//rnams zhes pa ni khams gsum gyi nyon mongs pa'o/ /dag pa ni 'dir skad cig gis so/ /gzhan ni bskal pa grangs med pa gsum la sogs pa'o/ /las kyi khams rnams zad byed pa/ /zhes bya ba la/ dge ba dang mi dge ba'i las las skyes pa'i khams gsum gyi bag chags rnams skad cig gis zad par byed pa'o//chu bo rgya mtsho kun las rgal/ zhes pa ni gang+gA dang / sin+d+hu la sogs pa ni chu bo yin la/ /de rnams gcig tu 'dus pa ni rgya mtsho'o/ /de bzhin du skye ba la sogs pa ni rgyun mi 'chad pa'i phyir chu bo yin la/ de rnams gcig tu 'dus pa ni rgya mtsho ste/srid pa'i rgya mtsho de las kyang skad cig gis so/ /de bzhin du/ sbyor ba'i dgon pa las byung ba/ /zhes bya ba la/ 'dir mu ge'i dgon pa dang / gcan gzan gyi dgon pa dang / lam ring zhing yang ba'i dgon pa de na chu dug can la sogs pa'i dgon pa yod pa'i phyir ro/ / de bzhin du 'khor ba'i dgon pa 'di na yang skye ba la sogs pa'i sdug bsngal yang ba las 'byung bar byed pa ni chags bcas kyi lam 'di'i phan yon no/ /nyon mongs nye ba kun nyon mongs/ /zhes bya ba la/ 'dod chags dang khong khro ba la sogs pa drug rtsa ba'i nyon mongs pa dang / khro ba dang khon du 'dzin pa la sogs pa nye ba'i nyon mongs pa dang /zhe sdang la sogs pa kun nas nyon mongs pa dang / bag chags bcas pa gtan spangs pa/ /zhes bya ba la/ bag chags sa bon tsam yang ma lus par spangs te/ gang gis she na/ lam gong ma des so/ /da ni thob bya thob pa'i phan yon bstan par bya ba'i phyir/snying rje chen po shes rab thabs/ /zhes bya ba la sogs pa gsungs te/ rgyu snying rje chen po ni rgyu'i gnas skabs su dmigs pa med pa'i snying rje dang / shes rab ces bya ba gnyis su med pa rdzogs pa'i rim pa dang / thabs zhes bya ba bsod nams kyi tshogs dang / bskyed pa'i rim pa bsgom pa'o//don yod 'gro ba'i don byed pa/ /zhes bya ba la/ sngar bsod nams kyi tshogs bsags pa don yod kyang yod la byed kyang byed pa ste sku gnyis pa'o/ /gang gi don byed snyam pa la/ 'gro ba ste/ de dag gis bsdus pa rnams so/ /'gro ba rnams kyi don byed pa'i dus na rlom sems yod dam snyam pa la/'du shes kun gyi don spangs shing / /zhes bya ba la/ 'du shes ni yul la mtshan mar 'dzin pa ste/ rtag pa dang ldan pa ni skyes pa zhes pa la sogs pa'o/ /don spangs zhes pa ni da ni bdag gis lha la sogs pa thabs 'di'i sgo nas 'di bya'o snyam pa gang yin pa de la de skad ces bya'o//rnam shes don ni 'gag par byed/ /ces bya ba la/ 'dir shes pa dang shes bya gnyis med ces bya'o/ /de'i phyir/ sems can kun yid yul dang ldan/ /zhes gsungs te/ sems can yang yin la yul yang yin pas sems can kun yid yul te dag pa dang ma dag pa'o//yid ni yul gyi dbang po mchog dang mchog ma yin pa'i bye brag gis rdo rje 'chang dang / chos kyi sku dang / longs spyod rdzogs pa dang / sprul pa'i sku'i bye brag gis rjes su 'dzin cing snang ba'o/ /sems can kun gyi yid rig pa/ /zhes pa ni de dag gis dbang po mchog dang mchog ma yin pa'o//mkhyen pa des ci mdzad snyam pa la/ sems can kun gyi yid la gnas/ /zhes gsungs te/ ji ltar mos pa bzhin don sgrub pa'o/ /de dag sems dang mthun par 'jug /ces bya ba la/ de dag ces bya ba ni sems can de dag go/ / de dag gi sems dang rjes su mthun par 'jug pa ste/ ji ltar chus rjes su bkang pa'i snod shin tu mang por zla ba shar ba na zla ba mang po ma yin pa ltar 'dir yang gang la gang mos par 'jug pa'o/ /zhugs nas ci byed snyam pa la/ sems can kun yid tshim par byed/ /ces bya ba gsungs te/de dag ni rang rang gi dga' ba dang bde bas tshim par byed pa'o/ /de nyid gsal bar bstan par bya ba'i phyir/ sems can kun gyi yid dga' ba/ /zhes gsungs te/ de dag chos la zhugs nas kyang spyod par byed pa'o zhes pa'i tha tshig go/ /grub pa mthar phyin 'khrul pa med/ / ces bya ba la/ 'khrul pa med pa ni rgyu rten gyi gang zag dang lam 'khrul pa med pas sgrub pa mthar phyin pa ste/ byas pa don yod pa'o/ /de ci las byung zhe na/ nor ba thams cad rnam par spangs/ /zhes gsungs te/ nor ba ni lta ba dang spyod pa zung du ma 'brel pa'o/ /ji ltar bskyed pa'i rim pa dang rdzogs pa'i rim pa res 'jog tu bsgom pa lta bu'o//don gsum the tshom med pa'i blo/ /zhes pa ni rgyu dang las dang 'bras bu la the tshom dang bral ba'o/ /des ci 'gyur snyam pa la/ kun don yon tan gsum gyi bdag /ces gsungs te/ kun zhes pa ni 'gro ba dag pa dang ma dag pa'o//yon tan gsum ni sku gsum ste/ de'i bdag nyid du 'gyur ro zhes pa'o/ /phung po lnga zhes pa ni dpa' bo dang dpa' mo'o/ /de'i don ni phung po lnga la sogs pa lha dang lha mor bskyed pa'o/ /dus gsum zhes pa ni skye ba'i dus dang / gnas pa'i dus dang / 'gag pa'i dus so//skye ba'i dus ni byang chub pa lnga'i don te/ kun+da lta bu dang / rang byung ste/ nyi zla zhes bya ba'i ming can la sogs pa mngal nas skye ba'o/ /gnas pa'i dus ni skyes zin nas sems can gyi don la sku spro ba dang bsdu ba mngon par mdzad pa'o/ /'gag pa'i dus ni gtso 'khor gnyis su med par bsdu ba'o//de nas 'bras bu'i dus su yang sku dang ye shes kyi snang bas sems can gyi don mdzad pa'o/ /sngar bstan pa'i skad cig ma gnyis kyi 'phror gyur pa bstan par bya ba'i phyir/ skad cig thams cad bye brag phyed/ /ces gsungs te/ skad cig ni sngar bshad zin to/ /thams cad ces bya ba ni bya ba mang ba ste/lta ba dang / 'dzum pa dang / A ling ga dang / tsum+ba na dang / na kha pra ha ra la sogs pa'o/ /bye brag phyed ces bya ba ni dga' ba bzhi'i bye brag shes par bya ba'i tha tshig go/ /skad cig gcig gis rdzogs sangs rgyas/ /zhes bya ba ni rdzogs pa ni kun thob par rdzogs pa'o//sangs rgyas ni bzhi pa'i dus su 'di gzung bar bya'o/ /sangs rgyas kun gyi rang bzhin 'chang / /zhes bya ba la/ sngar gyi de nyid gsal bar ston pa ste/ sangs rgyas kyang yin la kun kyang yin pas sangs rgyas kun te/ phung po lnga po gnas gyur pa'i de bzhin gshegs pa lnga'o//de yang rgyu'i gnas skabs su phung po dang khams dang skye mched de bzhin gshegs pa sras dang bcas par bskyed cing spro ba dang bsdu ba'i sku mngon du byas pas 'bras bu'i dus su sems can gyi don du sku dang ye shes kyi snang bar mdzad pa la de skad ces bya'o/ /lus med lus te lus kyi mchog /ces bya ba la/ ting nge 'dzin las byung ba'i lus ye shes kyi sku yin pas lus med pa'o/ /lus te zhes pa ni snga ma bzhin no/ /lus kyi mchog ces bya ba ni ye shes kyi snang bar ma 'gags par rgyu la snang bas lus kyi mchog go/ /lus kyi mtha' ni rtogs pa po/ /zhes bya ba la/lus can thams cad kyi nang na mthar thug pa'i lus 'di yin pas rtogs pa'am/ sangs rgyas pa'o/ /'o na de gzhan la snang bar mi 'gyur ram zhe na/ gzugs rnams sna tshogs kun du ston/ /zhes gsungs te/ ji ltar nor bu dag ras kyis 'gyur pa ltar 'dir sems can gyi dbang po'i bye brag gis sku mdog sna tshogs pa dang /phyag mtshan dang / bzhugs tshul dang / zhi ba dang / khro bo la sogs par snang ba'i phyir de skad ces bya'o/ /de'i phyir/ nor bu chen po rin chen tog /nor bu chen po zhes pa ni nor bu'i kha dog ras kyis 'gyur pa'am/ de las 'dod dgu 'byung bar byed pas so//de'i mtshan nyid ci snyam pa la/ rin chen tog ces bya ba ste/ rin chen 'byung ldan zhes bya ba'o/ /de dag gis mnyam pa nyid kyi ye shes bshad zin to/ /de ltar mnyam pa nyid kyi ye shes bshad nas/ da ni bya ba grub pa'i ye shes bstan par bya ba'i phyir/ /sangs rgyas kun gyis rtogs bya ba//zhes gsungs so/ /sangs rgyas kyang yin la kun kyang yin pas sangs rgyas kun te dus gsum gyi'o/ /rtogs par bya ba ni rdo rje 'chang ngo / /des ni bya ba grub pa'o/ /da ni gsang sngags kyi don thams cad bskyed par bstan par bya ba'i phyir/ sangs rgyas byang chub bla na med//ces bya ba la sogs pa gsungs te/ sangs rgyas zhes bya ba ni dus gsum gyi sangs rgyas so/ /de'i byang chub ni thob par bya ba'i phyir rdo rje 'chang chen po'o/ /des na mchog go/ /gang gis grub na/ gsang sngags las byung yi ge med/ /ces gsungs te/ yi ge med pa ni 'og nas 'chad par byed do//gsang sngags chen po rigs gsum pa/ /zhes bya ba la gsang sngags chen po ni rdo rje 'chang ngo / /de las phye ba ni rigs gsum ste sku gsung thugs so/ /yang na rig sngags gsang sngags gzungs sngags la de skad ces bya'o/ /gsang sngags don kun bskyed pa po//zhes bya ba la/ gsang sngags kyi don kun ni dngos grub gnyis so/ /skyed par byed pa ni grub par byed pa ste/ de'i don grub pa zhes bya'o/ /da ni thob par byed pa'i thabs khyad par can bstan par bya ba'i phyir/ thig le chen po yi ge med/ /ces bya ba la sogs pa gsungs te/ sngar gyi yi ge med ces gsungs pa de gsal bar ston pa ste/ thig le chen po ni phyag rgya chen po ste/ de la gnyis kyi rtogs pa thams cad spangs nas yi ge med pa'o/ /de la ming ngam tha snyad 'dogs na stong pa zhes bya ba ste/ de nyid gsum ye shes lnga'i snang bas sems can gyi don byed pas na chen po yi ge lnga zhes bya'o//yang na reg pa sra ba/ bskyod pa rlung / dro ba me/ byang chub kyi sems chu ste/ 'byung ba bzhi las grub pa'i lus te/ phung po dang / khams dang / skye mched la sogs pa chags pa'o/ /de las rtsa dang rlung dang thig le'i dbye bas gnas pa ni bshad pa dang 'chad pa'i don to//thig le stong pa yi ge brgya/ /zhes bya ba la/ phung po dang / khams dang / rigs dang / ye shes lnga las bye brag re re la yang lnga lngar phye bas rigs brgyar 'gyur pa de skad ces bya'o/ /rnam pa kun ldan rnam pa med/ /ces bya ba ni rigs kyis dbye ba de rnams 'grib par bsdus pas ni rnam pa med pa ste/gnyis su med par thams cad dang bral bar zhes bya'o/ /yang na kun rdzob bam tha snyad tsam du rnam pa de dag dang ldan la/ don dam par rnam pa med pa zhes bya'o/ /de tshul ji ltar shes par bya snyam pa la/ bcu drug phyed phyed thig le can/ / zhes gsungs so/ /rdo rje dang pad+ma gnyis mnyam pa la gnyis/ kun rdzob kun+da dang / don dam pa bden pa gnyis te/ gzhir gnas pa la de skad ces bya'o/ /de ltar gnyis 'das nas gnyis mnyam pa'i lhan cig skyes pa'i bde ba ci 'dra snyam pa la/ yan lag med pa'i rtsis las 'das//zhes gsungs te/ 'dir ni lhan cig skyes pa'i mtshan nyid de/ yan lag ces pa ni spros pa ste de med pa'o/ /rtsis las 'das zhes pa ni bcu drug phyed phyed la sogs pa'i grangs las 'das pa'o/ /bsam gtan bzhi'i rtse mo can/ /zhes bya ba la/ dga' ba dang / bde ba dang / rtog pa dang / dpyod pa ni bsam gtan bzhi pa'o/ /de dang grangs mthun pa ni bsam gtan bzhi ste dga' ba bzhi'o/ /rtse mo zhes pa ni mdzes pa'i spyi bo can zhes pa ni bdag med pa'i cha ste/ gnyis kyi bar gyi cha la gnas pa ste/ dpyod pa ni bsam gtan bzhi lhan cig skyes pa'o//de'i dang po ni dbang gi dus so/ /gnyis pa ni rtse mo gsum gyi rtse mo nyid yin pa'i phyir ro/ /bsam gtan yan lag kun shes shing / /zhes pa ni phyag rgya bzhi dang / skad cig ma bzhi dang / dga' ba bzhi ni bsam gtan gyi yan lag gam thabs bya ste/ des nges par shes par bya'o zhes bya ba'i don to/ /da ni thabs khyad par can gyi de'i sgo nas longs spyod rdzogs pa'i sku sgrub pa bstan par bya ste/ de'i phyir/ ting 'dzin rig dang rgyud rig pa/ /zhes bya ba la sogs pa gsungs te/ longs spyod rdzogs pa'i sku'i rgyu ting nge 'dzin yin la/ de nyid rig zhes bya ste/ting nge 'dzin las byung ba'i sku zhes bya ba'i don to/ /rgyud ces bya ba ni rgyun yin la de nyid kun rdzob dang don dam pa rang bzhin can ni byang chub kyi sems so/ /de nyid gsal bar bstan par bya ba'i phyir/ ting 'dzin lus can lus kyi mchog /ces gsungs so/ /ting 'dzin lus ni de las byung ba'o//lus can rnams las mchog tu gyur pa yin pas lus kyi mchog ste/ chu nang gi gzugs brnyan lta bu'o/ /de gang gi lus yin zhe na/ longs spyod rdzogs sku kun gyi rgyal/ /zhes gsungs te/ sku de ni theg pa chen po yang 'dod pas/ de'i khyad par bstan pa ni kun gyi rgyal zhes gsungs so//de ni gzhan don du sku de lta bu'i rnam par snang ba'o/ /yang na rdo rje nor bu'i cha la gnas pa'i bde ba'i longs spyod pa ste/ rnam pa thams cad kyi mchog dang ldan pa zhes bya'o/ /da ni sprul pa'i sku'i bye brag bstan par bya ba'i phyir/ sprul pa'i sku ste zhes bya ba la sogs pa gsungs so/ /de ni gcig tu ma nges te/gdul bya'i snod kyi rim pa la de dang der ston pa zhes gzhan dag 'dod pa la de skad ces bya'o/ /'dir ni sku'i mchog ste/ khyad par du gyur pa chags bcas khro bo'i skur snang bar mdzad cing skur yang ston pas de dag ces bya'o/ /sangs rgyas sprul pa'i rgyud 'chang ba/ /zhes pa la/ rgyud ni rdo rje 'chang ste/de'i rgyud ni de ltar snang bar 'gyur pa'o/ /yang na rgyud ni rgyun te/ rgyun mi 'chad par gdul bya rjes su 'dzin par mdzad pa'o/ /phyogs bcur sprul pa sna tshogs 'gyed/ /ces bya ba la/ ji ltar nags la me mched na la lar ni bdo ba'o/ /la lar ni bdo yol lo/ /la lar ni mgo zug go/ /la lar ni du ba 'thul lo//la lar ni shi ba'o/ /de bzhin du phyogs la lar ni yum gyi lhums su zhugs pa'o/ /la lar ni bltam mo/ /la lar ni rol rtsed mdzad do/ /la lar ni khab bzhes so/ /la lar ni rab tu 'byung ngo / /la lar ni dka' thub mdzad do/ /la lar ni bsod snyoms mdzad do/ /la lar ni bdud 'dul bar mdzad do//la lar ni mngon par sangs rgyas so/ /la lar ni chos kyi 'khor lo bskor ro/ /la lar ni mya ngan las 'das par mdzad de des na de skad ces bya'o/ /de lta bur sprul nas kyang ci mdzad ce na/ ji bzhin 'gro ba'i don mdzad pa/ /zhes bya ba la/ gang la gang gis 'dul ba'i gzugs dang kha dog dang spyod pa rnams dang cha mthun par mdzad pa ste/ji ltar sngon gyi dus na khyim bdag ku su li zhes bya ba lus bong mtshon gang ba cig yod par gyur pa la/ de la khang pa dpangs sor lnga pa'i tshad tsam cig te/ der bcom ldan 'das 'khor rnam bzhi dang bcas pa gdugs tshod la byon par zhus so//de'i tshe bcom ldan 'das 'dzum pa mdzad do/ /de'i tshe kun dga' bos bcom ldan 'das la 'dzum pa mdzad pa'i rgyu dang rkyen zhus so/ /bcom ldan 'das khyim bdag 'di la khang pa sor lnga pa las med pa 'dir bcom ldan 'das 'khor rnam bzhi dang bcas spyan drang ba la ci'i phyir 'dzum pa mdzad ce na/bka' stsal pa khyim bdag 'di'i khang par ni da ltar nga spyan 'dren cing 'gro bar ma zad de/ 'das pa'i sangs rgyas grangs med pa rnams kyang spyan drangs shing byon la bsod snyoms kyang gsol bar mdzad do/ /phyis kyang mdzad par 'gyur ro zhes gsungs te/ bcom ldan 'das 'khor dang bcas pa yang sku chung bar mdzad pa ma yin par der gshegs shing bsod snyoms kyang gsol lo/ /de dag der bzhugs pa de'i tshe shin tu yangs par bzhugs par mdzad pas de'i tshe kun dga' bo la sogs pa ngo mtshar du gyur pa la bcom ldan 'das kyis bka' stsal pa/'di la ngo mtshar du byar med de/ rdul phra mo gcig gi steng na sangs rgyas bcom ldan 'das rdul snyed kyi drangs kyis kyang bzhugs par mdzad do zhes bka' stsal pas/ kun dga' bo la sogs pa'i 'khor thams cad yi rang bar gyur to/ /de'i phyir gsungs pa dang / lha dang lha dbang lha yi lha/ /zhes gsungs te/ lha dang zhes pa ni 'khor la/ lha dbang zhes pa ni gtso bo ste brgya byin no/ /de'i phyir lha'i lha ni brgya byin de nyid do/ /des na lha'i bdag po'o/ /lha min bdag ces pa ni lha min gyi gtso bo'o/ /'chi med dbang po lha yi bla/ /zhes bya ba la/ 'chi med dbang po ni lha ma yin gyi rgyal po'i bye brag gi ming ngo //lha'i bla zhes pa ni lha ma yin rnams kyi bla mar gyur pa ste/ gtso bo zhes bya'o/ /de bzhin du mi la sogs pa la sbyar ro/ /'joms byed 'joms byed dbang phyug po/ /zhes bya ba la/ 'jig rten pa rnams kyi 'joms byed ni bdud bzhi dang / chu bo bzhi yin la/ de 'joms byed 'joms byed dbang phyug ni sku'i khro bo rnam par snang ba'o/ /srid pa'i dgon pa las rgal ba/ /zhes bya ba la/ srid pa gsum ni dgon pa ste/ ji ltar 'brog dgon par mu ge dang / gcan gzan dang / lam nyam nga ba la sogs pa yod pa ltar/ 'dir yang skye ba la sogs pa'i chu bo dang / 'dod chags la sogs pa mang pa'i phyir de skad ces bya'o/ /las rgal ba zhes pa ni de las rgal bar gyur pas na rgal ba zhes bya'o/ /ston pa gcig pu 'gro ba'i bla/ /zhes bya ba la/ 'gro ba ni drug go/ /de rnams kyi ston pa ni sprul pa'i sku ste/ brgya byin la sogs pa re re ni gcig pu'o/ /de'i phyir 'gro ba rnams kyi bla ma'o//da ni che ba bstan par bya ba'i phyir/ 'jig rten phyogs bcur rab grags pa/ /zhes bya ba la sogs pa gsungs te/ 'jig rten ni gsum ste/ de phyogs bcu'i lha'i skad dang klu dang gnod sbyin gyi skad la sogs par chos sgrogs par byed pa'am/ yang na sprul pa'i skur grags pa'o//chos kyi sbyin bdag che ba po/ /zhes bya ba la/ sems can rnams la chos kyi char chen po 'bebs pas na chos kyi sbyin bdag go/ /chos kyi sbyin pa ni mtshon pa ste/ zang zing la sogs pa yang ngo / /byams pa'i go cha chas pa ste/ /snying rje yi ni ya lad bgos/ / zhes bya ba la/ rgyu byams pa dang snying rje las byung ba'i go cha'am/ de nyid goms pa ni go cha dang 'dra ba'o/ /shes rab ral gri mda' gzhu thogs/ /zhes bya ba la/ shes rab gsum ni ral gri dang 'dra'o/ /mda' ni snying rje'o/ /gzhu ni stong pa nyid do/ /de ltar na sems can gyi don gyi gnas skabs 'dir rlom sems kyi don gyis rnam par dben pa'o//yang na sngar/ chags bral la sogs chags pa che/ /zhes gsungs pa'i phyir phyag mtshan du rig par bya ste/ g.yas ral gri dang mda'/ g.yon ut+pal dang gzhu 'dzin pa'i 'jam pa'i rdo rje bsgom par bya'o/ /des ci byed ce na/ nyon mongs mi shes g.yul ngo sel/ /zhes gsungs te/ shes rab chen po mi shes pa'i g.yul las rgyal bar byed cing nyon mongs pa'i mgo lhung bar byed pa'o/ /de'i phyir/ dpa' bo bdud dgra bdud 'dul ba/ /zhes gsungs so/ /'dir 'gro ba'i bdud kyang yin la dgra yang yin pas bdud dgra ste/nyon mongs pa rnams so/ /de sel cing de las rgyal bar byed pa ni sprul pa'i sku ste/ dpa' bo zhes bya'o/ /bdud nyid gang zhe na/ bdud bzhi'i 'jigs pa gang zhes gsungs te/ lha'i bu dang / 'chi bdag dang / nyon mongs pa dang / phung po'i bdud do/ /yang na bdud ni chu bo chen po bzhi'o//de sel bar byed pa ni ji ltar gru zhig pa lta bu'am/ g.yang kha la 'dug pa lta bu'i sems can skyabs dang dpung gnyen med pa dag 'don par byed pa'o/ /bdud kyi dpung rnams pham byed pa/ /zhes bya ba la/ de'i 'khor bzhi dang / de'i dmag gi dpung rnams pham par byed pa'o//de dag gis pham par byed ce na/ rdzogs pa'i sangs rgyas 'jig rten 'dren/ /zhes gsungs so/ /thabs dang shes rab rdzogs pa'am gnyis su med pa las byung ba ni sangs rgyas te sprul pa'i sku'o/ /des 'jig rten gyi 'gro ba 'dren par mdzad pa ste/ 'jig rten 'dren pa'i rdzogs pa'i sangs rgyas sprul pa'i sku de la drin lan lan gyis blan par bya bar 'os pa ste/de'i phyir/ mchod 'os zhes bya ba la sogs pa gsungs te/ drin che bas na mchod par 'os pa'o/ /dga' ba'am yi rang bas bstod pa la 'os pa'o/ /gus par bya bas na phyag gi gnas so//rtag tu bsten par bya bas ni ri mor bya bar 'os pa'o/ /de nyid rgyal po dang 'dra bas na bkur bar 'os pa'o/ /de'i gong na gzhan med pas 'di 'ba' zhig bsams pas gzhan brjod pas na de skad ces bya'o/ /bla ma dang 'dra ba'i phyir phyag bya bar 'os pa'o//bla ma zhes bya ba ni de'i gong na gzhan med pa'o/ /rab ces pa ni mtshon pa ste phul lo/ /gya nom pa'i mchog go zhes bya ba'i tha tshig go/ /de'i khyad par gzhan gsungs pa/ 'jig rten gsum po gom gcig bgrod/ /ces bya ba la/ 'jig rten gsum ni sngar bstan par zad do//de ni rgya mtsho dang 'dra ba ste/ gom pa gcig ni tshe gcig gis bgrod par byed pa'o/ /de'i che ba'i khyad par gzhan gsungs pa/ /mkha' ltar mtha' med rnam par gnon/ /zhes gsungs so/ /'dir gnyis su med pa'i ye shes nam mkha' dang 'dra ba rtog ge pa dang /grangs can la sogs pa dang / nyan thos dang / rang sangs rgyas dang byang chub sems dpa' la sogs pa rnams kyis rtogs par mi nus pa yang tshe gcig gis rtogs par byed pa'o/ /yang na 'jig rten gyi khams thams cad gom pa gcig gis bgrod par byed pa'o/ /gsum rig gtsang ma dag pa ste//zhes pa la/ ye shes sgrib pa mi mnga' bas dus gsum rig pa ste/ gtsang ma dag pa zhes bya ba 'od gsal du rig pa'o/ /yang na skad cig tsam gyis sgrib pa gnyis dag par byed pa'o/ /mngon shes drug ldan rjes dran drug /ces bya ba la/ rim pa dang po'i gnas skabs su skye mched byin gyis brlabs pas mngon shes drug dang ldan pa'i byang chub sems dpa' sems dpa' chen po sa'i snying po'am/gti mug rdo rje zhes bya ba la sogs pa'i ming can du gyur pa'o/ /rjes dran drug ces pa ni pha rol tu phyin pa drug dag pa'i rang bzhin spyi gtsug la sogs pa drug rnam par dag pa ste/'khor lo'i gzugs kyis mi bskyod pa zhes pa la sogs par 'gyur ro/ /rdzu 'phrul chen po 'jig rten 'das/ /zhes bya ba la/ 'dir rdzu 'phrul ni gnyis te/ 'jig rten pa dang / 'jig rten las 'das pa'o/ /de la 'jig rten las 'das pa'i rdzu 'phrul ni sngon sems dang chu la sogs par bskyed pas 'bras bu'i gnas skabs su nam mkha' dang chu la yang sa la bya ba bzhin du 'gyur pa la sogs pa ni zad pa dang /'dir dkar po la sogs pa'i kha dog lnga zil gyis gnon par byed pa'o/ /'jig rten pa'i rdzu 'phrul yang 'jig rten rten 'dir stobs dang mthu dang ldan yang zil gyis gnon pa dang /nyi zla lag gis len pa dang / stod nas me 'bar zhing smad nas chu 'bab pa la sogs pa 'byung bar nus pa'o/ /shes rab pha rol phyin pa'i mtha'/ /zhes bya ba la/ lam dang gzhung dang 'bras bu gsum dang ldan pa ni/shes rab kyi pha rol tu phyin pa yin la/ de mthar thug pa ni mi'i gzugs la sogs par gnas pa'i pho nyas shes pa'o/ /des ci 'gyur zhe na/ shes rab kyis ni de nyid thob/ /ces bya ba gsungs te/ de la yang de kho na nyid thob ste/ bde ba chen po'i mchog 'di la/ /bdag dang gzhan yang yod ma yin//zhes gsungs pa lta bu'o/ /bdag rig gzhan rig thams cad pa/ /zhes pa ni/ bdag rig pa zhes pa bdag gi don rig pa'o/ /gzhan rig pa zhes pa ni/ gzhan don lhun gyis grub pa ste/ de'i phyir don yod grub pa zhes bya'o/ /bdag dang gzhan gyi don grub pas ci bya snyam pa la/kun la phan pa'i gang zag mchog /ces bya ba gsungs te/ kun zhes pa ni sa ma pa tha ste/ mnyam par byed pa zhes bya'o/ /de lta bu de ni gang zag rnams kyi nang na mchog tu 'gyur pa'o/ /dper bya kun las 'das pa ste/ /zhes bya ba la/pho nya las thob pa'i de kho na nyid de ni dper bya ba thams cad las 'das pa'o/ /shes dang shes bya'i bdag po mchog /ces bya ba la/ yul dang yul can du gyur pa thams cad de las byung ba'am/ de'i bdag nyid yin pa'am/ bdag po'o/ /mchog ces pa ni gnyis su med pa zhes bya ba'i tha tshig go//gtso bo chos kyi sbyin bdag ste/ /zhes pa la/ gtso bo zhes bya ba ni 'bras bu'o/ /chos shes pa ni lam ste/ lam dang 'bras bu gnyis su med par ston pas na chos kyi sbyin bdag go/ /de nyid gang zhe na/ phyag rgya bzhi yi don ston pa/ /zhes gsungs so//rdo rje theg pa'i lam ni phyag rgya bzhi'i don du bsdus pa'o/ /phyag rgya bzhi ni las kyi phyag rgya dang / chos kyi phyag rgya dang / phyag rgya chen po dang / dam tshig gi phyag rgya'o/ /de'i don ni skad cig ma bzhi ste/ sngar bstan pa bzhin no/ /de'i phyir 'di la 'gro ba rnams kyi bsnyen bkur bya bar 'os pa ste 'chad par 'gyur ro//da ni don rnam par dag pa des gzhan gyi don byed par bstan par bya ba'i phyir/ 'gro ba'i bsnyen bkur gnas kyi mchog /ces bya ba la sogs pa gsungs te/ phyag rgya'i don ston par byed pa de 'gro ba rnams kyis bsnyen bkur bya ba'i gnas su gyur pas mchog go//nges 'byung gsum po bgrod rnams kyi/ /don gyi dam pa zhes bya ba la/ nges par 'byung ba ni 'bras bu ste/ nyan thos dang / rang rgyal ba dang / byang chub sems dpa'o/ /bgrod par bya ba ni lam yin la/ de dag rnams kyi gtso bor don gyi dam pa 'di gzung bar bya'o//de ci'i phyir zhe na/ rnam dag dpal zhes gsungs te/ rnam par dag pa ni 'di la de dag ldan pa ste/ de'i phyir dpal zhes bya'o/ /dpal zhes pa ni gnyis su med pa bdag dang gzhan gyi don thams cad 'byung ba'o//'jig rten gsum na skal bzang che/ /zhes pa ni lha dang mi rnams kyi phun sum tshogs pa 'di las lhag pa med pas skal ba bzang po'o/ /dpal ldan 'byor pa kun byed pa/ /zhes bya ba ni 'dis bdag dang gzhan gyi don phun sum tshogs pa 'grub par byed pa de skad ces bya'o//de gang zhe na/ 'jam dpal dpal dang ldan pa'i mchog /ces bya ba gsungs te/ gnyis pa thams cad kyi zug rngu med pas 'jam pa'o/ /bdag dang gzhan gyi don thams cad 'byung bas dpal dang ldan pa'i mchog ces bya'o/ /bya ba grub pa'i ye shes bshad zin to//de bzhin gshegs pa mi bskyod pa chos kyi dbyings kyi ye shes kyi sgo nas bstod par bstan par bya ste/ de ci'i phyir/ mchog sbyin rdo rje mchog khyod 'dud/ /ces bya ba la sogs pa gsungs te/ mchog ni rdo rje'i mtshan gyi rnam grangs ye shes kyi sku/ rang byung 'jam dpal/ ye shes sems dpa'/ dpal dang ldan pa'i mchog ces bya ba'i ming can te/ rang yang mchog dang ldan pa/ gzhan la yang mchog dang ldan pa sbyin par byed pa rdo rje ltar brtan la sra ba gnyis su med pa de gus pas nyams su blang bar bya ba la/ de skad ces bya'o/ /yang dag mthar gyur ces pa la/ yang dag pa ni theg pa gsum mo/ /mthar gyur pa ni rdo rje theg pa'o/ /yang na de dag gnyis su med pa'i rdo rje 'chang ba chen po'o/ /stong nyid las byung zhes bya ba la/ /stong nyid ni gnyis su med pa ste/de las byung ba'i ye shes kyi sku'o/ /yang na stong nyid ni pho nya'o/ /de las byung ba ni gnyis su med pa'i ye shes so/ /sangs rgyas byang chub ces pa ni/ dus gsum gyi sangs rgyas thams cad kyi rtogs par bya ba yin pas byang chub bo/ /yang na sangs rgyas ni sgrub pa po'i phung po la sogs pa'o//byang chub ni rtogs par bya ba ste/ 'dud ces pa ni rtogs nas nyams su blang bar bya'o/ /da ni rnam par snang mdzad la me long lta bu'i ye shes kyi sgo nas bstod pa bstan par bya ste/ de'i phyir/ sangs rgyas chags pa khyod la 'dud/ /ces bya ba la sogs pa gsungs te/sangs rgyas ni dus gsum dang phyogs kyis bsdus pa'o/ /chags pa ni sems can gyi don la chags pa'o/ /yang na dman pa'i 'gro ba gar mkhan lta bu yang rjes su 'dzin pa'o/ /sangs rgyas 'dod la phyag 'tshal 'dud/ /ces pa ni sems can rnams sangs rgyas rnams thob par 'dod pa'i phyir/sangs rgyas dgyes pa ni sangs rgyas par 'dod pa'i rigs kyi bu la dgyes pa'am/ yang na sems can gyi don la dgyes par mdzad do/ /sangs rgyas rol la ni sems can gyi don mdzad pa bcu gnyis kyis rol pa ston pa'o/ /yang na pho nya'i b+ha gar ling+ga gzhag pa'o//de lta bu la phyag 'tshal ba ni gus pa'i tshul gyis so/ /da ni snang ba mtha' yas la so sor kun du rtog pa'i sgo nas bstod par bya ba'i phyir/ sangs rgyas 'dzum pa zhes bya ba la sogs pa gsungs te/ sems can gyi don du chos gsungs pa la 'dzum mdangs phyung nas tshems mche ba mngon par 'dzum pa mdzad pa'o//sangs rgyas bzhad la zhes pa ni 'di'i gsung snang ba mtha' yas yin la/ sems can la gsung gis chos bstan pas rjes su 'dzin pas so/ /sangs rgyas gsung nyid ces pa ni chos rnam pa gsum gyi char 'bebs pa'o//sangs rgyas thugs zhes pa ni gnyis su med pa las mi bskyod pas na thugs rnam par mi rtog pa la mnyam par gzhag pa'o/ /da ni rin chen 'byung ldan la mnyam pa nyid kyi ye shes kyi sgo nas bstod pa bstan par bya ba'i phyir/ med pa las byung zhes bya ba la sogs pa gsungs te/ bdag med pa las byung zhing sgyu ma'i dpe bcu gnyis dang 'dra bas sems can gyi don mdzad pa'am/ yang na sangs rgyas kyi yon tan thams cad 'byung bas rin chen 'byung ldan te/ yid bzhin gyi nor bu lta bu'o/ /sangs rgyas 'byung ba zhes pa ni sku dang ye shes kyi snang ba zad mi shes pa 'byung ba ste/sangs rgyas kyi yon tan no/ /nam mkha' las byung zhes pa ni skye gnas kyi chos kyis ma gos pa'o/ /ye shes las byung zhes pa ni mnyam pa nyid kyi ming can ye shes lnga gcig tu gyur pa ste/ rin chen 'byung ldan zhes bya'o//da ni don yod grub pa la bya ba nan tan gyi ye shes kyi sgo nas bstod pa bstan par bya ba'i phyir/ sgyu 'phrul dra ba zhes gsungs te/ sems can gyi don mdzad pa'i dus su dkyil 'khor gyi 'khor lo sgyu 'phrul dra ba mdzad pa ste/ rlom sems med pas zhes bya ba'i tha tshig go//sgyu 'phrul dra ba de nyid ji lta bu snyam pa la/ sangs rgyas rol ston te/ sems can rnams la mdzad pa bcu gnyis kyi tshul du ston par mdzad pa'o/ /thams cad thams cad ces pa ni 'khor ba thams cad dang sgyu 'phrul dra ba lta bur khyod las byung zhing mkhyen pa ste/ mdor na rigs lngar ma zad par sgom dang mtshams ma yan chad la bstod pa'o//ye shes sku nyid ces pa ni zhus pa'i skabs su/ ye shes sku ste rang byung ba zhes pa'i lan gsungs pa dang / gzhung gi brjod bya la bstod pa'o/ /ye shes kyi sku rnam 'phrul du 'byung pa'i sku ste/ rang byung / dpal/ ye shes sems dpa'/ rdo rje 'chang chen po zhes bya ba'i ming can de la gus pa'i tshul gyis phyag bya bar 'os pa bstod par 'os pas de skad ces bya'o/ /rigs lnga la bstod pa bshad zin to/ /da ni chos thams cad rnam par dag pa'i sngags bstan par bya ba'i phyir/ oM zhes bya ba la sogs pa gsungs te/oM ni shis pa brjod par bya/ sarba d+harmA zhes bya ba ni phung po dang khams dang skye mched kyis bsdus pa'i chos thams cad do/ /de rnam par dag pa'i rang bzhin te/ ji lta bu zhes na/ a b+hA wa ste dngos po med pa chu'i zla ba lta bur snang ba'o//de'i glo bur du ma yin te/ swa b+hA wa ni rang bzhin gyis dag pa ste/ bi shud+d+ha zhes pa dang 'brel lo/ /rang bzhin dag pa de dag gang gis mthong zhing rtogs snyam pa la/ badzra tsa k+Shu zhes gsungs te/ snang ba dang stong pa dbyer med pa'i rdo rje de skad du bshad pa'i sangs rgyas spyan/ la sogs pa'i thabs kyi byed par gyis mthong ba'am rtogs pa'o/ /tshul ji ltar snyam pa la/ a zhes pa thabs dang / A zhes pa shes rab gnyis las byung ba'i aM ste thig le kun rdzob kyi ngo bo dang / aHzhes pa don dam pa skye ba med pa bde ba'i rnam par rtogs pa ste/ mdor na chos thams cad rang bzhin gyis rnam par dag pa dngos po med pa ste/thabs kyi khyad par gyis gnyis su med pa'i bde bar rtogs shing khong du chud par 'gyur ro zhes bya ba'i don to/ /da ni rang bzhin rnam par dag pa'i sngags bstan par bya ba'i phyir/ pra kr-i ti zhes bya ba la sogs pa gsungs so//de ni rang bzhin rnams bcos pa'o/ /pa ri shud+d+hAH zhes pa ni yongs su dag pa'o/ /rang bzhin gyis yongs su dag pa ste/ yang gzhan du mi lta ste/ 'khor ba 'di nyid dag pa ste/ de gang zhe na/ sarba d+harmA ste/ 'khor ba'i chos thams cad do//de yang res 'ga' ba yin nam zhe na/ yang du lta ste/ ji srid du dag pa de yang gzugs la sogs pa'o/ /de nyid gsal bar bstan par bya ba'i phyir/ sarba ta thA ga te zhes gsungs te/ de bzhin gshegs pa thams cad kyi dz+nyA na kA ya te/ye shes kyi sku'o/ /many+dzu shrI ni 'jam dpal lo/ /pa ri shud+d+hI tA ni yongs su dag pa'o/ /mu pA ni lus so/ /dA ye ti a zhes pa ni go 'phang ngo / /a ni thabs la/ aH ni shes rab bo/ /de'i don ni ji srid du chos thams cad yongs su dag pa ma bcos pa gang la yod pa de bzhin gshegs pa thams cad kyi ye shes kyi sku/yongs su dag pa 'jam dpal gyi ming can de'i go 'phang thob par 'gyur ro zhes bya ba'i tha tshig go/ /da ni de bzhin gshegs pa thams cad kyi snying po bstan par bya ba'i phyir/ oM sarba ta thA ga ta zhes bya ba la sogs pa gsungs te/'di ni rgyun du bgrang bar bya ba'i snying por shes par bya'o/ /sarba ta thA ga ta ni de bzhin gshegs pa thams cad do/ /hr-i da ya ni snying po ste ye shes kyi sku'o/ /des na ye shes kyi sku de de bzhin gshegs pa thams cad kyi thugs ka na gnas pa de rtogs pas ci byed ce na/ha ra ha ra ste tha mal pa'i lus dang / ngag dang / yid kyi nyon mongs pa thams cad 'phrog par byed pa'o/ /'phrog pas cir 'gyur zhe na/ de gang gi snying po na/ sku gsung thugs kyi snying po'o/ /des las ci byed na/ khams gsum gyi rtogs pa 'phrog cing 'joms par byed pa'o//oM hUM hrI/ zhes gsungs te/ sku gsung thugs su 'gyur pa'o/ /gang gi yin na/ b+ha ga wAn te bcom ldan 'das kyi'o/ /mtshan gyi khyad par gsungs pa/ dz+nyA na mUrti zhes gsungs te/ ye shes kyi lus zhes bya bar 'gyur ro//de tshig gi sgo nas ston par byed pas na/ wA gI shwa ra ste/ ngag la dbang byed pas na ngag gi dbang phyug go/ /tshig gi sgo nas bstan pas cir 'gyur snyam pa la/ ma hA wA tsa zhes bya ba gsungs te/ chos thams cad gnyis su med pa'i ye shes kyi skur 'tshed cing kha dog sgyur bar byed do//gang na/ sarba d+harmA ste chos thams cad do/ /ci dang ci 'dra bar na/ ga ga na ste nam mkha' dang 'dra bar ro/ /a ma la ni dri ma med pa'o/ /de nyid gsal bar bstan par bya ba'i phyir/ su pa ri shud+d+hA ste shin tu yongs su dag pa'o//de thams cad gar bsdu na/ d+harma d+hA tu ste chos kyi dbyings dang / dz+nyA na gar+b+ha ste ye shes kyi snying po/ aHste skye ba med par thim pa'o/ /de'i don ni de bzhin gshegs pa thams cad kyi thugs ka na bzhugs pa'i bcom ldan 'das ye shes kyi sku de tshig gi sgo nas bstan pas/khams gsum gyi lus ngag yid kyi nyon mongs pa 'phrog par byed pa'o/ /de'i mtshan nyid kyi khyad par bstan pa ni/ chos thams cad nam mkha' dang 'dra bar dri ma med par chos kyi dbyings rnam par dag pa'i ye shes so/ /des rnam par rtog pa thams cad de nyid du 'gyur par byed pa zhes bya ba'i tha tshig go//de dag gis rgyud kyi dngos po yongs su shes par bya ba'i phyir/ lan gnang ba bshad zin pa ste rdzogs zhes bya ba'i tha tshig go/ /da ni bcom ldan 'das kyis gsungs pa'i don la rjes su yi rang ba'i tshul gyis gus pa bstan par bya ba'i phyir/de nas dpal ldan rdo rje 'chang / /zhes bya ba la sogs pa gsungs te/ de nas zhes bya ba ni bar gang gis kyang ma chod pa ste/ zhus pa'i lan gsungs pa'i de ma thag pa'o/ /dpal ldan rdo rje 'chang ni sdud pa po ste/ tshig gi don bshad zin to/ / dga' zhing mgu nas thal mo sbyar/ /zhes bya ba la/ sdud pa po chos thos pas dga' ba ste mdangs phyung zhes pa'o/ /mgu ni rjes su yi rang ba'o/ /thal mo sbyar ba ni gus pa'i don to/ /yang na dga' zhing mgu ba ni/ bde ba rgyas pa'o/ /mgon po bcom ldan de bzhin gshegs/ / zhes pa ni bdag dang gzhan gyi mgon mdzad pa la de skad ces bya'o/ /de ni bcom ldan 'das de bzhin gshegs pa rdo rje 'chang ste/ ming gzhan shAkya thub pa zhes bya'o/ /rdzogs sangs rgyas la phyag 'tshal nas/ /zhes pa ni rang gi ston pa'i zhabs la spyi bos gtugs pa'o/ /de ni zhes pa ni rdo rje 'chang ngo //bdag dang gzhan gyi mgon du gyur pas so/ /gsang ba'i bdag po lag na rdo rje khro bo'i rgyal zhes pa la/ sku gsung thugs kyi gsang ba 'dzin pa ste bshad zin to/ /lag na rdo rje khro bo'i rgyal/ /zhes pa ni de'i ming can gyi 'khor rnams so/ /sna tshogs gzhan dang lhan cig tu//zhes bya ba la/ sgrol ma dang khro gnyer can la sogs pa'i dpa' mo rnams ni sna tshogs pa'o/ /gzhan zhes pa ni sdud pa po las gzhan du gyur pa'i 'khor rnams so/ /lhan cig ces pa ni de rnams dang mnyam por zhes pa'i don to/ /gsang bstod nas ni tshig 'di gsol//zhes bya ba la/ skad gsang la che bas 'og nas 'byung ba rnams gsol ba'o/ /da ni don chen po'i phyir rjes su yi rang ba bstan par bya ba'i phyir/ mgon po zhes bya ba la sogs pa gsungs so/ /kye mgon po zhes bos nas bdag cag ces pa ni 'khor rnams so//yi rang ba ni mgu ba'o/ /legs so zhes bya ba ni bdag gi don du chos snang ba'o/ /yang legs so zhes bya ba ni gzhan don du'o/ /yang na lhag ma ma lus pa'o/ /legs par gsungs zhes bya ba ni sgra la skyon med de/ thog ma dang / bar dang /mthar dge bar gsungs pa'o/ /rnam par grol ba'i 'bras bu ni mi gnas pa'i mya ngan las 'das pa thob pa'i don du'o/ /'gro ba mgon med rnams dang ni/ /bdag cag ces bya ba ni ji ltar rgya mtsho gru bzhi pa la sogs pa lta bu'o/ /byang chub thob pa'i don chen mdzad/ /ces pa ni nyan thos dang /rang rgyal ba la sogs pa'i lam la ma bkod par bla na med pa yang dag par rdzogs pa'i byang chub la bkod par mdzad pa bka' drin che zhes pa'i don to/ /thabs gang gi sgo nas she na/ sgyu 'phrul dra ba'i tshul bstan pa/ /zhes gsungs te/ bskyed pa lha'i rnal 'byor dang /rdzogs pa ye shes kyi rnal 'byor ni sgyu 'phrul dra ba ste/ de'i lam gyi sgo nas shes pa'o/ /'di ni rnam dag legs pa'i lam/ /zhes bya ba la/ bshad ma thag pa'i lam 'di ni bde bas bde bar sgrub pa'i phyir/ rnam par dag pa legs pa'i lam ste/dus gsum gyi bde bar gshegs pa'i gshegs shul 'di bkod pa la rjes su yi rang ngo zhes bya ba'i tha tshig go/ /da ni zab mo sangs rgyas kyis gsungs pa la rjes su yi rang ba bstan par bya ba'i phyir/ zab cing yangs la rgya che ste/ /zhes bya ba la sogs pa gsungs te/rdo rje theg pa ni zab ste/ rtogs par dka' pa'i phyir ro/ /yangs pa ni 'dir kun shang pa'o/ /rgya che ba ni 'dir kun 'dus la theg pa gzhan du 'di ma 'dus pa'i phyir ro/ /don che ba ni bdag gi'o/ /'gro ba'i don ni gzhan don te/ de byed pa la de skad ces bya'o//sangs rgyas rnams kyi yul 'di ni/ /zhes bya ba la/ 'di ni nyan thos dang / rang rgyal dang / byang chub sems dpa' dang / sangs rgyas rnams kyi spyod yul ma yin te/ rdo rje 'chang chen po 'ba' zhig gi yul yin no zhes pa'i don to/ /de'i phyir/ rdzogs pa'i sangs rgyas kun gyis bshad//ces pa ni/ de dag gi phyir rjes su yi rang ngo zhes bya'o/ /de ltar bdag cag rnams kyang yi rang ba'o zhes bya ba'i don to/ /bcom ldan 'das kyi bka' la rjes su yi rang ba bshad zin to/ /thog ma bar mtha' sgra'i gtso bo dang ldan rgyud kyi rgyal po 'gro ba'i don mdzad gsang ba zab mo'i don//zab cing rgya cher gyur pas 'di don legs par shes pa'i skye bos sbrang rtsi 'thung ba shin tu dkon/ /yi ge rig byed pa yi ming can de yis nye bar bzung zhing 'chi med mang 'thungs sgra ngan chen po de'i/ gdams pa la brten bdag gi khe dang grags pa la sogs don gnyer min zhing rang gi blo gros rlom pas min//de yis gsungs pa glo rdol bum pa lta bur gyur pas 'jigs shing bdag dang gzhan don grub pa min pas de bzhin du/ 'di bris pa las bsod nams ci yod des ni nyon mongs ma lus spangs dang de yi thabs la mkhas par shog /'phags pa 'jam dpal gyi mtshan yang dag par brjod pa'i 'grel pa 'jam dpal gyi sprul pa mi'i dbang po grags pas mdzad pa/ byang chub sems dpa' spyan ras gzigs kyi bka' brgyud pa rdzogs so/

CLOSE WINDOW