CLOSE WINDOW

D1373
བོད་ཡིག

/[]@##/ /rgya gar skad du/ shrI kA la tsa kro pa de sha yo ga Sha Dang+ga tan+t+ra pa ny+dzi kA nA ma/ bod skad du/ dpal dus kyi 'khor lo'i man ngag sbyor ba yan lag drug gi rgyud kyi dka' 'grel zhes bya ba/ dpal dus kyi 'khor lo la phyag 'tshal lo/ /yod min med min yod med min//gnyis ka'i bdag nyid med pa 'ang min/ /mu bzhi las ni rnam grol ba/ /bde chen sku la phyag 'tshal lo/ /dang po sangs rgyas rgyu med las/ /'jam pa'i rdo rjes phyung ba yis/ /sku rnams bzhi yi don bsdus pa/ /mtshan nyid de ni dgrol bar bya/ /shes rab thabs min zhes bya ba la sogs pa gsungs pa la/'dir shes rab ces bya ba ni cha bco lnga'i bdag nyid dkar po'i phyogs/ nag po'i phyogs ni zla ba'i cha zad pa'i phyir na thabs so/ /de ltar dkar po ni mtshan mo ste/ nag po ni nyin mo'i/ /de'i phyir lhan cig skyes pa'i sku ni shes rab las kyang ma yin no//thabs las skyes pa yang ma yin no/ /lhan cig skyes pa'i sku 'di lta bu zhes bya ba ni sangs rgyas rnams kyi yul lo/ /de ltar yod pa min te/ dkar po'i phyogs kyi bde ba zad pa'i phyir ro/ /med pa yang ni ma yin te/ skad cig ma dang po'i dga' ba'i cha'i dngos po ni nag po'i phyogs med pa yin no//yod med min te/ 'di dag gnyis ni phan tshun 'gal ba'i phyir/ /gcig tu 'dus shing lhan cig byed pa med do/ /gnyis ka'i bdag nyid med pa yang ma yin zhes bya ba ni dkar po'i phyogs yar ngo dang /nag po'i phyogs mar ngo 'di gnyis ka la yang char rtogs pa lhan cig skyes pa'i bde ba med do/ /de ltar/ mtha' bzhi yongs su rdzogs shing dag pa'i cha bcu drug ma ni stong pa nyid rnam par mi rtog pa spros pa dang bral ba gzung 'dzin med pa'i chos can de ni mu bzhi las grol ba skye/lhan cig skyes pa'i skur brjod do/ /bde chen sku zhes bya ba ni mchog tu mi 'gyur ba'i ting nge 'dzin su la yod pa de ni he ru ka yin te dus kyi 'khor lo zhes bya'o/ /phyag 'tshal lo zhes bya ba ni de lta bu su la yod pa de la ni lus kyis phyag 'tshal ba dang / ngag dang yid kyis phyag 'tshal ba zhes bya ba'i don to/ /des na shes rab kyi rgyu mthun pa'i mtshan nyid rnal 'byor pa rnams la bzhi pa zad pa'i phyir ro/ /de ltar na shes rab ma grub pa'o/ /'di ltar lhan cig skyes pa'i sku ni bdag gi don phun sum tshogs pa'o/ /gzhan gyi don phun sum tshogs pa chos kyi skur ni 'gyur ba ste/shin tu gnyid mthug po log pa sad pa'i phyir ro/ /de yang shes rab dang ni thabs kyi rang bzhin nges par mun pa dang bral zhing / ye shes dang rnam shes dbye ba nyid ces bya ba la 'dir ye shes bya ba ni rnal 'byor pa'i 'dzin pa'i sems so//rnam par shes pa ni gzhan gyi sems gzung bar bya ste/ de'i phyir shes bya'i mtshan nyid do/ /de ltar 'dzin pa'i sems ni shes rab ma ste/ rtog pa thams cad rnam par spangs pa'i phyir ro/ /rnal 'byor pa rnams kyi thabs kyi sems ni kun du brtags pa'i snying rje'i mtshan can no//de'i phyir 'dzin pa dang gzung ba'i dbye ba de yis shes rab dang thabs kyi rang bzhin ni gzhan gyi don mdzad pa'i chos sku ste/ de yang lhan cig skyes pa las byung ba'o/ /de ltar rgyu mthun bde ba ni lte bar lhan cig skyes pa'o/ /snying ga chos kyi 'khor lo ni rnam par smin pa yin te/der ni chos kyi sku'o/ /longs spyod rdzogs pa'i sku de ni zhes bya ba ni gzhan gyi don phun sum tshogs pa'o/ /sgra brnyan lta bur ni sems can du ma'i don mdzad pa zhes bya ba ni 'dir lha'i mig gis gang 'das pa dang / ma 'ongs pa'i gzugs brnyan gyi rnam pa lta bu'am/chu'i zla ba lta bu dang po'i gsal ba gang mthong ba de las sgra 'byung ba'i sgra brnyan de ni longs spyod rdzogs pa'i sku shes rab dang thabs kyi ngo bo lha'i snyan gyi rnam par shes pa ni 'dzin pa ste/ sgra brnyan ni gzung bya'i phyir ro/ /de'i phyir 'das pa dang ma 'ongs pa'i dus kyi grangs shes pa ni che ge mo'i rtog pa dang /che ge mo'i dus dang / che ge mo'i zla ba dang / che ge mo'i phyogs dang / che ge mo'i nyi ma la sogs pa la che ge mo 'dir 'gyur zhes zer ba ni/ de'i sems can so so'i skye bo rnams gdul bar bya ba yin te/ de ni rmi lam gyi gnas skabs zad cing med pa'i phyir ro//mgrin pa las skyes bu byed pa ni longs spyod rdzogs pa'i sku ste/ steng na gnas pa'i sa bon can rnams la yin gyi/ sa bon med pa rnams la ni ma yin no/ /sems can rnams ni smin par bya ba'i don du slar yang 'di ru 'gyur ba ni zhes bya ba la sogs pa gsungs pa la longs spyod rdzogs pa'i sku dang /sangs rgyas sprul pa'i sku ru 'gyur zhes pa ni thabs dang shes rab gnyis su med pa'i bdag nyid de/ gcig dang du ma sems can rnams kyi sprul pa du ma mthong ba'i phyir du ma'o/ /de ltar gcig dang du ma'i rnal 'byor ni don dam par ni thabs dang shes rab gnyis su med pa'o//kun rdzob tu ni gcig dang du ma 'gal ba yin te/ de yang sad pa'i gnas skabs zad pa'i phyir dpral ba dri ma med par sprul pa'i sku 'thob ste/ /de yang gzugs rnams thams cad la sna tshogs kun du bde ba ston pa'i phyir ro//de ni nor bu chen po rin chen tog ces bya'o/ /de ltar lhan cig skyes pa gcig pu la ngo bo nyid kyi sku dang / chos kyi sku dang / longs spyod rdzogs pa'i sku dang / sprul pa'i sku ste sku re re la yang bzhi bzhi'i bdag nyid can no/ /de nyid thams cad kyang sngon du brjod pa de nyid dpal rdo rje sems dpa' 'di gcig pu dus mtha'i sprin dang 'dra ba'i nyon mongs ba rnams dral zhing med par byas nas he ru kar gyur pa ste zhes bya ba ni mi 'pho ba'i chos kyis nyams su blangs pa'i rnam par shes par la de bzhin no//he ru ka zhes pa ni drag po rnams ni smin par mdzad pa'i dus rdo rje sems dpa' phyir spro ba'o//rdo rje sems dpa' de yang rmongs pa rnams smin par bya ba'am/ dgrol bar bya ba'i ster ram/ de'i don go bar bya ba'i phyir na/ de yang dam tshig rgyal sogs zhes bya ba ni rnam par snang mdzad gzugs kyi phung po gnas gyur pa ste de bzhin no//rin chen 'dzin pa de nyid sdug bsngal bar 'gyur ba rnams la sbyin pa'i don du rin chen 'byung ldan gnas gyur pa ste/ mi 'pho ba'i chos kyi thabs dang shes rab snyoms par 'jug pa'i sdug bsngal thams cad rab tu 'phro bar byed pa zad par byed pa'i tshor ba'i bde ba de gzhan ma'o//de yang pad+ma 'dzin pa chags pa'i rgyur zhes bya ba ni snang ba mtha' yas su 'gyur ro/ /de yang snang ba ni sems la bde ba snang ba'o/ /mi 'khor mi 'phro ba'i chos kyis gang 'phro ba'i bde ba ster ba'i 'du shes te don gzhan ma'o/ /de yang bgegs rnams gzhom pa'i don du ni/phyag rgya pad+ma ral gri 'dzin/ /don yod grub pa ru ni 'gyur/ /zhes bya ba ni mi 'phro ba'i chos kyi 'du byed rnams te/ gzhan lus dang ngag dang yid dang ye shes rnams gang sgrib pa med pa'i sems su byed pa'i phyir ro/ /bdud la sogs pa'i sgrib pa rnams gzhom par mdzad pa zhes bya ba ni rang gi rnam par shes pa la sogs pa phung po lnga dag pa'i sangs rgyas lnga'o//de ni bcom ldan 'das kyis rtsa ba'i rgyud stong phrag bcu gnyis par gsungs so/ /de yang bcom ldan 'das kyis rnal 'byor pa rnams kyi dngos grub rnam pa gnyis su gsungs te/dang po 'jig rten pa'i rnal 'byor gyi dngos grub bsgrub pa ni 'dod khams kyi lha drug tu skye ba dang / ral gri dang / mig sman dang / rkang mgyogs dang / ri lu la sogs pa rnal 'byor pa rnams kyis bsgrubs na 'grub bo/ /yang rnal 'byor pa rnams kyis rlung dang rtsa dang thig le dang nA da la sogs pa rtog pa can gyi rnal 'byor bsgoms pa yis ni gzugs khams kyi lha bcu bdun du skye bar 'gyur zhing longs spyod khyad par du 'phags pa thob cing thun mong gi dngos grub bsgrub pas 'grub pa de ni 'jig rten pa yin gyi/de rnams ni 'jig rten las 'das pa ni ma yin no zhes phyag na rdo rje'i bstod 'grel dang /dpal dus kyi 'khor lo'i sgrub thabs kyi le'ur bcom ldan 'das kyis nges pa'i don du gsungs so/ /drang ba'i don du bcom ldan 'das kyis rgyud kha cig tu bskyed pa'i rim pas sangs rgyas par 'gyur/ zhes gsungs te/ de ni bcom ldan 'das kyis byis pa rmongs pa mi shes pa rnams la drang ba'i don du gsungs pa yin te/ de yang bcom ldan 'das kyis dbang rab byed du dbang bdun po 'dis sa bdun po thob ces gsungs pa ni byis pa rnams 'jug pa'i phyir yin te/ nges pa'i don du bcom ldan 'das kyis ni ma gsungs te/de yang dpal mchog dang po'i rgyud ye shes kyi le'ur zad par sa la sogs pa bzhi bsgoms nas rtogs pa thob na bsam gtan bzhi pa'i lhar skye bar 'gyur zhes gsungs so/ /de rnams ni 'jig rten pa'i dngos grub sgrub pa'i thabs su bstan to// //da ni bcom ldan 'das kyis 'jig rten las 'das pa'i dngos grub sgrub pa'i phyir rnal 'byor pa rnams kyis sbyor ba yan lag drug bsgom par rgyud mtha' dag tu yang gsungs la/ byang chub sems dpa' phyag na rdo rjes mdzad pa'i stod 'grel du yang bshad do//yang byang chub sems dpa' pad+ma dkar pos 'grel pa dri ma med par grags par yang rgyas par bshad do/ /slob dpon zla grags kyis sgron ma gsal bar yang bshad de don go bar yang ma gsungs so/ /de yang 'grel pa dri ma med pa la ba rten nas sbyor ba yan lag drug rgyas par bshad par bya ste/de la dang po so sor spong ba zhes bya ba ni bcom ldan 'das kyis gsungs pa la so sor spong ba na mig gi dbang po yul rnams las log pa'o/ /rna ba'i dbang po sgra rnams las log pa'o/ /sna'i dbang po dri rnams las log pa'o//lce'i dbang po ro rnams las log pa'o/ /lus kyi dbang po reg bya 'jam rtsub rnams las log pa ni so sor spong ba'i mtshan nyid do/ /'dir so sor spong ba'i sgra ni dang po'i las can gyi rnal 'byor pa'am/ rnal 'byor ma rnams kyi spyod yul yin zhes bya ba'i don to//de yang rgyal ba'i dbang po zhes bya ba ni shes bya thams cad 'dzin par byed pa/ ye shes kyi phung po yin zhes brjod do/ /de yang ye shes kyi phung pa'i spyod yul du gyur pa'i mtshan ma'i dbye ba rnam pa bcu gcig gzung bar bya ste/ de yang dang por so sor spong ba'i dus su lta ba lta bu dang /gnyis pa smig rgyu lta bu dang / gsum pa nam mkha' gsal ba lta bu dang / bzhi pa mar me lta bu dang / lnga pa sprin med pa'i nam mkha' lta bu rnams ni gsang ba 'dus pa'i rgyud phyi mar gsungs te/ de lta ni so sor spong ba'i mtshan mo'i rnal 'byor gyi sbyor bas de rnams mthong bar 'gyur/de ni so sor spong ba dang po'i bshad pa'o/ /yang so sor spong ba gnyis pa ni nyin mo'i rnal 'byor gyi sbyor bas mtshan ma rnam pa drug 'byung ba nyid de/ dang po 'bar ba lta bu dang / de nas zla ba shar ba lta bu dang / de nas nyi ma'i dkyil 'khor shar ba lta bu dang /de nas 'ja' lta bu dang / de nas glog lta bu ste/ de la sgra gcan 'dzin lta bu dang zhes bya ba ni phyi rol sngo bsangs nam mkha'i mdog dang 'dra ba zlum pa'o/ /de'i nang du ngur ser du gnas pa'i 'od zer 'phro ba lta bu snang ba/ cha phra la 'tshor ba 'dar ba/ gzhig bar dka' ba'o//de'i nang na thig le lta bu zhes bya ba ni 'od zer 'phro ba lta bu snang ba ni 'od zer lnga'i tshogs gnas pa'i che chung skra'i rtse mo'i tshad tsam du rnal 'byor pas mthong ba ni thig le lta bu ste de ni so sor spong ba gnyis pa'i bshad pa'o/ /da ni bsam gtan bshad par bya ste/ de la bsam gtan zhes bya ba ni dmigs pa'i yul de nyid la sems mi g.yo zhing mi ldog par gnas pa ni bsam gtan dang po'o//yang bsam gtan gnyis pa ni de ltar bsgoms pa'i dbang gis de ltar yang mthong pa'i ba'i dbye bas brtags pa ma yin pa'i mthong ba ni ye shes kyi phung po zhes pa ni rnal 'byor ba'i lus 'di nyid kho nas mthong ba'o//de bzhin du bsam gtan mi bskyod pa zhes bya ba ni rnam par shes pa'i phung po rnam pa bcu yul dang yul can bcu po rnams gcig cing sems phyir mi 'phro bar nang du dbu mar zhugs pa nyid de/ sna tshogs pa'i sku ste bsam gtan gnyis pa zhes brjod do/ /da ni srog dang rtsol ba brjod par bya ste/de la srog ces bya ba ni dbugs phyir 'byung bas kun rdzob byang chub kyi sems zad par byed cing rtsa rnams stongs par byed/ rtsol zhes bya ba ni nang du 'byung ba ste mi shor bar byed pa'o/ /yang gi sgras ni rnal 'byor pa rnams kyi srog dang rtsol ba 'gog na tshe ring zhes bya'o//ral gri can zhes bya ba ni 'du byed kyi phung po ste/ de yang srog dang rtsol bas sna bug g.yon dang / sna bug g.yas pa nas rlung gi dkyil 'khor lnga lnga gcig tu mnyam par so sor ma 'dres par gyur cing sna bug g.yon pa nas oM dkar por gyur nas nang du 'jug cing lte ba'i hUM la thim pa ni rtsol ba zhes brjod do//hUM las phyir AHdmar por gyur nas sna bug g.yon pa nas byung nas sor bcu bdun tshun chad du 'phros pa ni srog ces bya'o/ /yang srog ces bya ba ni byang chub kyi sems bde ba'i 'pho bar gyur pa na srog ces bya'o/ /rtsol ba zhes bya ba ni nang du 'jug pa la yang rnam pa bcur hUM la thim par gnas pa ni rtsol pa zhes brjod do//de yang srog dang rtsol ba yang rnam pa bcur rnal 'byor pa rnams kyis shes par bya'o/ /de ni srog dang rtsol ba'i bshad pa'o/ /de ni 'dzin pa bshad pa ni 'dzin pa bshad par bya ste/ de la 'dzin pa'i ngo bo brjod par bya ste/rin po che'i phyag rgya zhes bya ba ni tshor ba'i phung po nyams su myong ba'o/ /tshor ba ni bde ba de 'dzin pa ste/ mi 'gyur ba'am/ brtan pas na 'dzin pa ste/ sku'i thig le 'dzin pa dang / gsung gi thig le 'dzin pa dang / thugs kyi thig le 'dzin pa dang /ye shes kyi thig le 'dzin pa rnams bde ba chen po'i 'khor lo rnams dang / sprul ba'i 'khor lo dang / chos kyi 'khor lo dang / longs spyod kyi 'khor lo dang / dpral bar dbang byed kyi 'khor lo dang / gtsug tor gyi 'khor lo rnams su kun rdzob byang chub sems dbu ma nas 'gro ba dang /'ong ba'i rang bzhin mi 'pho bar gnas pa ni 'dzin pa'i dbye bas rlung rnam pa bcu 'gro ba dang 'ong ba ste/ de ni 'dzin pa'i yan lag tu brjod de/ des ni 'dzin pa bshad do/ /de ni rjes su dran pa bshad par bya ste/ de la dran pa zhes bya ba ni lte ba chos kyi 'byung gnas dkyil 'khor don dam pa byang chub kyi sems gzhom du med pa zhes bya ba gtum mo me'i rnam pa sor gcig pa/phra ba la kha dog dkar mo 'tsher ba 'dod chags kyi mes thams cad gdungs shing sreg pa/ lus kun la khyab par byed pa'i nus pa yod pa de las sems kyis rjes su dran pa ni dran pa zhes bya'o//yang shes rab kyi pad+mar byang chub kyi sems 'dzin pa'i dus su dmigs pa'i yul mi brjed pas na dran pa zhes bya ba ni 'du byed kyi phung po ste/ rlung rnam pa bcu gsang ba'i rdo rje dang pad+ma gnyis gnyis su med cing gcig par gyur ba'i shes rab kyi chags pas bzhu ba'i bde ba de la nyon mongs par mi rtog cing mi chags pa ni dran pa yin te/de yang g.yung mo rjes su dran pa'o/ /yang dran pa zhes pa ni rtsa dbu ma a ba d+hU tIr 'dod pa'i bde ba'i gnas skabs su rlung rnam pa bcu'i dbye bas 'gog nus shing bde ba la mi chags na yang rtsa rjes su dran pa'i dran pa zhes brjod do//rjes su dran pa bshad zin to/ /da ni ting nge 'dzin bshad par bya ste/ de la ting nge 'dzin ces bya ba brjod pa la/ dpal gyi ting nge 'dzin 'khor lo can zhes bya ba ni bcom ldan 'das rnam par snang mdzad kyi ting nge 'dzin te/ rlung rnam pa bcu gtsug tor gyi 'khor lor 'gog pas na ting nge 'dzin zhes bya bar brjod de/de lta na ni bcom ldan 'das ni mi gnas pa'i mya ngan las 'das pa zhes brjod do/ /de ci'i phyir na mya ngan las 'das pa zhes brjod ce na/ sangs rgyas rnams ni gtsug tor gyi 'khor lo nas gsang ba bde ba chen po'i 'khor lo'i par du kun rdzob byang chub kyi sems dang /don dam pa byang chub kyi sems gnyis gnyis su med par gyur cing / stong pa nyid dang snying rje tha mi dad pa las rlung rnam pa bcu rnams rdo rje'i nor bu'i rtse mor 'gog pa dang / gtsug tor tu rgyas par mdzad pa ni de rnams mi rung ba de la dgongs nas mi gnas par mya ngan las 'das pa zhes kyang brjod do//ting nge 'dzin bshad zin to/ /yang so sor spong ba'i las bshad par bya ste/ de la so sor spong ba'i las brjod par bya ba ni so sor zhes bya ba ni rnal 'byor pa'i lus la phyi'i yul dang / nang gi yul yul can rnam pa bcu rnams kyis 'brel pas rnam par shes pa la mi 'jug cing de nyid la brtan par gyur pa ni so sor spong ba'i las so//spong ba zhes bya ba ni don go bar ma gyur pas yul la mi 'jug pa'o/ /so sor spong ba'i mtshan nyid kyi sku'i yul rnams la mig lnga la sogs pa gzhan mngon par shes pa rnam pa lnga la 'jug pa'o//de ni so sor spong ba'i mtshan nyid do/ /da ni bsam gtan gyi las dang mtshan nyid brjod par bya ste/ de bzhin du yang so sor rtog pa'i shes rab kyis nang du bdag nyid lta bar bya'o/ /yang rtog pa zhes bya ba ni phyi dang nang du dngos po thams cad la 'dzin par byed/de la dpyod pa zhes bya ba ni de'i don nges par byas zhing de'i rang bzhin khong du chud par byed cing go bar gyur pa'o/ /dga' ba zhes bya ba ni stong pa nyid kyi sku mthong ba de nyid la zhen par 'gyur bar gnas pa ni dga' ba'o/ /de la mi g.yo ba'i bde ba zhes bya ba ni sku dang lhan cig tu sems 'dres par gyur nas//me nyams pa la gsal ba'i bdag nyid can gyis mi g.yo bar gyur pa'o/ /de ltar na gzung ba dang 'dzin pa'i dbye bas rlung rnams dang 'dres pa'i bsam gtan rnam pa bcu rnal 'byor pas shes par bya'o/ /de ni bsam gtan gyi mtshan nyid do/ /de ltar so sor spong ba'i mtshan nyid dang /bsam gtan gyi mtshan nyid bshad zin to/ /da ni srog dang rtsol ba'i las dang mtshan nyid bshad par bya ste/ de la srog ces bya ba ni sna bug g.yon pa dang g.yas pa gnyis nas gcig la gcig car du rgyun mi 'chad par rgyu ba ni srog gi las so/ /srog gi mtshan nyid ces bya ba ni rang bzhin gyis dbu mar dbugs bcu gcig dang bzhi cha rgyus nas bde ba bskyed pa ni srog gi mtshan nyid do//rtsol ba zhes bya ba ni g.yon pa dang g.yas pa'i sna bug nas nang du 'jug cing gnas pa ni rtsol ba'i las so/ /rtsol ba'i mtshan nyid ni g.yon pa dang g.yas pa'i sna bug nas rgyu ba'i srog 'gog cing dbus ma'i lam du 'jug pa'i rtsol ba'i mtshan nyid do//de ltar rlung rnam pa bcu ste/ nam mkha' dang sa la sogs pa'i dkyil 'khor rnam pa bcu rtsa dbus mar 'gog par byed/ des ni srog dang rtsol ba'i las dang mtshan nyid bshad zin to// //da ni thig le'i mtshan nyid brjod par bya ste/ 'dir thig ces bya ba ni shes bya'i dngos po gtan la 'bebs pa ste/ dngos po mi 'gyur bar byed pa'o/ /le zhes bya ba ni dpral ba'i dbus su phug rdugs kyi rtsa srog gi rlung bcug cing / bla ma'i man ngag ltar rnal 'byor pas bsgoms pas sngar rtsa ma nyams pa rnams rnal 'byor gyi stobs kyis rtsa stong phrag bdun cu rtsa gnyis su thig le rgyas shing thams cad khyab par byed pa ni thig le zhes brjod do//de ni thig le'i mtshan nyid bshad zin to/ /da ni dang gi sgras thig le bshad do/ /da ni yang 'dzin pa bshad par bye ste/gnyis ka'i 'gro ba rab tu 'jigs/ /zhes bya ba ni sna bug g.yon pa dang g.yas pa'i rlung rgyu ba ni byis pa so so'i skye bo rnams la ni 'jigs te/ de ci'i phyir zhe na/ 'pho ba'i bde ba la chags shing zhen pa dang bcas pa ni 'khor bar yang skye ba'i las rab tu bsags shing de'i dbang gis ngan song gsum du ltung zhing dmyal bar skye ba ni 'jigs pa'o//rnal 'byor pa rnams kyis ni dpral pa srid pa'i gnas su 'gro ba dang 'ong ba'i srog gi rlung bkag pas ni gtsug tor gyi 'khor lo na rtsa chen po bzhi gnas pa ni 'byung ba bzhi las grub pa dra ba'i dpe dang 'dra bar byas nas lus grub ces bya ste/rtsa lus thams cad la dra ba ltar khyab nas gnas pa'o/ /de ci'i phyir zhe na/ dra ba nas mar zhugs nas lus thams cad la bde bas khyab par byed cing bde bas mnyam pa'o/ /yang srog gi rlung gis kyang thams cad la khyab par gnas pa'o//de ci'i phyir zhe na/ thams cad la tshor ba mnyam du skye zhing rul ba dang skams pa med pa ni srog gi rlung thams cad la khyab par gnas so/ /de'i phyir rnal 'byor pa ni rtsa'i dra ba nas mar thig le bzhis lus thams cad la khyab par gnas shing lus bde ba dang bcas shing gsal ba mi rtog pa bsgoms pas ni srid pa'i rtse mo las gyen du skyod par byed cing thams cad man ngag khyad par can rnams 'dzin to//yang 'dzin pa'i mtshan nyid ni dpral bar srog 'gog pa dang / rdo rje nor bu'i rtse mor srog gi rlung 'gag pa dang / rdo rje'i rtsa bar sems rtse gcig par gyur pas byang chub kyi sems mi 'pho ba'i bde ba 'dzin par byed pas na 'dzin pa'i mtshan nyid ces brjod do//des na 'dzin pa'i las dang mtshan nyid bshad zin to/ /da ni yang rjes su dran pa'i las dang mtshan nyid brjod par bya ste/ de la gtum mo zhes bya ba ni mi srun pa'o//yang na shin tu kun la khro ba'i rang bzhin can ni gtum mo'o/ /dpe de lta bu'i rang bzhin ni shes rab kyi bya gdong ma la yon tan yod pas gtum mo zhes ming du btags so/ /yang nyon mongs pa rnams mi skye ba'i nus pa yod pas na gtum mo'o/ /yang shin tu myur ba'i yon tan nam//drag por gcod pa'i yon tan nam/ /myur du smin par byed pa'i rang bzhin nam/ /dngos po thams cad brjod pa'am/ /dmigs pa med par byed pas na gtum mo ste dran pa'i las so/ /dran pa'i mtshan nyid de ni 'jig rten gsum po thams cad du snang bar byed pa'o/ /srid pa gsum gyi nam mkha' la 'phags par byed cing mi g.yo bar gyur pas na gtum mo dug gsum sreg par byed pa'o//de rnams dran pas na dran pa zhes brjod do/ /des ni rjes su dran pa bcur bstan pa'o/ /da ni ting nge 'dzin gyi las dang mtshan nyid brjod par bya ste/ de la thabs dang shes rab kyi bdag nyid kyi zhes bya ba ni shes bya dang ye shes ro gcig tu 'dres par gyur pa'i yul thams cad 'gag par 'gyur ba/spros pa'i mtha' dang bral ba sems mchog tu mi 'gyur ba'i dbang gis chos kyi sku nam mkha' la sprin dang sa pa lta bu'i sems gsal ba rtogs par 'gyur ro//de ni ting nge 'dzin gyi las so/ /ting nge 'dzin gyi mtshan nyid ni ye shes kyi sku de ni ting nge 'dzin gyi stobs kyis rnyed par 'gyur ro/ /de yang srog gi rlung rnam pa bcu la sogs pa rnal 'byor pas 'gags pa'am/ med par gyur cing sems mi g.yo bar gyur pas mthong zhes pa ni rtsa ba'i rgyud stong phrag bcu gnyis par bcom ldan 'das kyis nges pa'i don du gsungs so//des ni ting nge 'dzin gyi las dang mtshan nyid bshad zin to/ /de yan chad sbyor ba yan lag drug gi dbye ba dang mtshan nyid dang las rnams bstan nas/ da ni yon tan brjod par bya ste/de ltar sbyor ba yan lag drug gsungs pa'i sgrub thabs te/ 'di ni chu sogs dbye ba yis/ /gsum du yang ni 'gyur ba yin/ /sna tshogs bdag po'i sgrub thabs ni/ /dus kyi 'khor lo de rig go/ /phyag rgya gsum dang tshad gsum gyi/ /rnam pa gsum gyi 'gro dbang gis//rnal 'byor rnams la thar ster ro/ /de la chu sogs dbye ba yis/ /zhes bya ba ni las kyi phyag rgya chos dang ldan pa lo bcu gnyis ma'am/ bcu drug ma'am/ nyi shu lon ba'o/ /ye shes kyi phyag rgya lha mo'am/ klu mo'am/ mi mo gang la mos pa'am/ ye shes kyi lha mo'am/mkha' 'gro ma'o/ /phyag rgya chen mo'o/ /gsum du yang ni 'gyur ba yin/ /zhes bya ba ni/ las kyi phyag rgya lo bcu gnyis ma la sogs pa la brten nas bde ba la sems gtad cing dmigs pa yis ni byang chub kyi sems 'dzag pas ni 'gro ba'i rnal 'byor ba'i bde ba tshad chung ngur 'gyur te/de'i dngos grub kyi 'bras bu ni las kyi phyag rgya la brten nas rnal 'byor pas bsgrubs pas 'dzag pa'i bde ba chung ngu chu'i yon tan zhes pa ni 'jig rten pa rnams dang dga' ba sum 'gyur du 'byung ba des ni 'dod khams kyi lha'i longs spyod dang rgyan dang 'khor khyad par can thob par gyur pa ni phan yon dang bo'o//yang ye shes kyi phyag rgya ni lha mo la sogs pa dmigs pa'i yul du byas nas sems bde ba la gtad nas bde ba skyed pa ni chu'i yon tan zhes pa ni bde ba 'jig rten pa dang bde ba bzhi 'gyur du 'byung ba ni rnal 'byor pa'i 'bab pa'i 'gro ba ni bde ba'i tshad 'bring por 'gyur te/des dngos grub kyi 'bras bu ni ye shes kyi phyag rgyal brten nas rnal 'byor pas bsgoms pa ni gzugs khams kyi lha bcu bdun gyi bde ba'am/ longs spyod dang rgyan dang 'khor khyad par can rnams skye ba gcig gis thob par 'gyur zhes dpal dus kyi 'khor lo'i sgrub thabs kyi le'ur gsungs te/de ni bsod nams kyi tshogs khyad par can yin gyis/ ye shes kyi tshogs khyad par can ni ma yin zhes de la 'byung ngo / /'di ni phan yon gnyis pa'o/ /phyag rgya chen po stong pa nyid dang snying rje dbyer mi phyed pa'i phyag rgya chen mo la dmigs pa'i bde ba bskyed pa ni mi 'bab pa'i bde ba chen po de ni rnal 'byor mchog gi yang mchog ces bya ste/sa'i yon tan zhes pa ni lnga 'gyur du 'byung ba'i bde ba des ni skad cig tsam yid la byas kyang srid pa las gyen du gshegs so zhes bcom ldan 'das kyis gsungs te/dper na nags chen po dpag tu med pa yod kyang gtsub shing las byung ba'i me shin tu chung yang nags de rnams me des thams cad sreg pa dang mtshungs te/ lus dang ngag dang yid dang ye shes kyi sgrib pa'am/ bag chags dpag tu med pa yod kyang /stong pa nyid rnam par mi rtog pa'i ting nge 'dzin la rtog pa thams cad spangs nas thun gcig bsgoms nas dag par 'gyur ro zhes bcom ldan 'das kyis rtsa ba'i rgyud du gsungs te/ nges pa'i don to/ /de yang phyag rgya chen pos ni bsod nams dang ye shes kyi tshogs gnyis ga'i 'bras bu dang bde ba bskyed par 'gyur ro//de ltar phyag rgya gsum la rnal 'byor pas bsgoms pas dngos grub kyang gsum du de ltar 'byung bar 'gyur ro/ /sna tshogs brtan pa'i sgrub thabs ni dus kyi 'khor los de rig go zhes bya ba ni bcom ldan 'das kyis sbyor ba yan lag drug bsgom par bya zhes gsungs te/rnal 'byor bas sangs rgyas nyid thob par bya ba'i don du sbyor ba yan lag drug bsgom par bya ba ni de bzhin gshegs pa'i nges pa'o/ /phyag rgya gsum dang zhes bya ba ni las kyi phyag rgya dang / ye shes kyi phyag rgya dang / phyag rgya chen po dang gsum la brten nas bsgom pa'o//tshad gsum dang zhes bya ba ni skyes bu blo dman pa dang / skyes bu blo 'bring dang / skyes bu blo rtsal rab tu phyin pa rnams la phyag rgya gsum ci rigs par sbyin par bya'o/ /dang gi sgras ni phyag rgya gsum las mi 'pho bar nyams su long shig par bstan pa'o/ /rnam pa gsum gyis 'gro dbang gis//zhes bya ba ni phyag rgya gsum gyis snga ma'i sangs rgyas rnams dang / ma byon pa'i sangs rgyas rnams dang / da ltar gyi shAkya thub pa yang de la brten nas sangs rgyas so zhes bya ba'i don to/ /rnal 'byor rnams la thar ster ro/ /zhes bya ba ni de ltar phyag rgyas gsum la brten nas bsgrubs na zhi ba dang grol ba'i rgyur 'gyur zhing chos kyi skur 'gyur zhes bya ba'i don to//so sor spong ba la sogs pa'i phan yon bshad zin to/ /da ni so sor sdud pa'i 'bras bu bshad par bya ste/ de la 'dir so sor sdud pa zhes bya ba la sogs pa gsum ste/'dir rnal 'byor bas mtshan mo bsgoms pa'i dus su so sor sdud pa yang dag par 'gyur te/ stong pa nyid kyi sku la brtan par gyur pa de'i tshe/ rnal 'byor pa la sngags thams cad kyis byin gyis brlabs pas tshig gis mchog ster ba zhes bya ba ni ngag gi smra ba thams cad btsun pa dang /ci smras pa kun yang sems can rnams la snyan par 'gyur ro/ /longs spyod dang yo byad thams cad 'phel bar 'gyur ro/ /des ni so sor sdud pa'i 'bras bu brjod de bshad zin to/ /da ni bsam gtan gyi 'bras bu bshad par bya ste/ de la/ bsam gtan sbyor ba dag pa yis//mngon par shes pa lnga po ni/ /thob par 'gyur ro mi yi bdag /ces bya ba gsungs pa la/ de la/ bsam gtan sbyor ba dag pa yis/ /zhes bya ba ni 'dir gang gi tshe mig mi 'dzums par bgrad pa dang / lus mi 'gul bar bsrang bas a ba d+hU tIr yid btsud de/sems ma g.yengs par gnas pa de'i tshe bsam gtan dag pa'o/ /mngon par shes pa lnga po ni/ /thob par 'gyur ro zhes bya ba ni 'bras bu rnam par dag pa lha'i spyan la sogs pa lnga thob par 'gyur te/ sha'i spyan dang / lha'i spyan dang / shes rab kyi spyan dang / chos kyi spyan dang /ye shes kyi spyan la sogs pa thob par 'gyur ro/ /mi'i bdag ces pa ni 'phags pa 'jam dpal la bod pa'i tshig yin te/ de'i sgras rnal 'byor pa rnams kyis thob par 'gyur zhes bya ba'i don to/ /sogs kyi sgras ni de bzhin du lha'i snyan la sogs pa yang thob par 'gyur ro zhes bya ba'i don to//de nas bsam gtan gyi 'bras bu bshad zin to/ /da ni srog dang rtsol pa'i 'bras bu brjod par bya ste/ de la srog dang rtsol ba zhes bya ba ni rnal 'byor pas g.yon nas 'jug pa'i rlung rgyu ba chad pa dang / g.yas nas phyir 'byung ba'i rlung rgyu ba 'chad pas na/nyi ma dang zla ba'i lam dang bral bar gyur pa de'i tshe srog bkag pas rtag tu rtsa dbu ma nas rlung rgyu bar gyur pa de'i tshe/ srog dang rtsol ba dag pa las byang chub sems dpas mchod pa ste/ sku'i dam tshig bsrungs pa dang / gsung gi dam tshig bsrungs pa dang / thugs kyi dam tshig bsrungs pa dang /ye shes kyi dam tshig bsrungs pa zhes bya ba ni lus kyi thig le mi 'pho ba dang / ngag gi thig le mi 'pho ba dang / sems kyi thig le mi 'pho ba dang / ye shes kyi thig le mi 'pho ba ste/ rnal 'byor chen po'i rang bzhin sngags par 'gyur zhes bya ba'i don to//des ni srog dang rtsol ba'i 'bras bu bshad zin to/ /da ni 'dzin pa'i 'bras bu brjod pa ste/ nyon mongs la sogs bdud 'joms shing / /stobs bcu la ni 'jug par 'gyur/ /de la/ nyon mongs la sogs bdud 'joms shing / /zhes bya ba ni stong pa nyid kyi sku gzung ba la 'dzin pa'i sems 'jug cing mi g.yo bar 'gyur ba ni 'dod chags dang /zhe sdang dang / gti mug dang cha mnyam pa ste/ lha'i bu'i bdud dang / 'chi bdag gi bdud dang / phung po'i bdud dang / nyon mongs pa'i bdud ces pa ni lus kyi sgrib pa dang / ngag gi sgrib pa dang / yid kyi sgrib pa dang /ye shes kyi sgrib pa rnams mi 'byung ngo / /stobs bcu la ni 'jug par 'gyur/ /zhes pa ni 'dzin pa'i stobs kyis srog gi rlung 'gro ba dang / 'ong ba'i bye brag med par 'gyur/ zad par 'gyur/ 'gags par gyur pas ni lte ba'i gzhom du med pa la dbugs thim par gyur pas/kun rdzob byang chub kyi sems dang don dam pa byang chub kyi sems gcig tu 'dres pas dpral bar srog 'gog pa ni sa bcu thob pas stobs bcu 'byung ba ni 'dzin pa las thob par 'gyur ro/ /'dzin pa'i 'bras bu bshad zin to/ /da ni rjes su dran pa'i 'bras bu brjod par bya ste/ /de la rjes su dran pa zhes bya ba ni 'dir shes rab stong pa nyid kyi sku la thabs snying rje'i bdag nyid 'khyud pas rjes su dran pa ni sems kyi rnam par rtog pa thams cad dang bral ba'i de nyid dang gzhan nyid du brjod du med par sems bde ba la gnas pa ni dran pa'o//yang dran bas des gzung ba de'i phyir gang dag de'i tshe dri ma med pa'i 'od 'phro ba'i dkyil 'khor du bsam pa ni bdag gi bde ba 'dis sems can thams cad kyang bde ba 'di lta bu dang ldan par gyur la/bdag kyang dus 'di nas brtsams nas snying po byang chub la gtugs kyi bar du/ bde ba 'di dang mi 'bral bar gyur cig pa ni dran pa'o//yang bde ba de nyid ji ltar stong pa bzhin du khams gsum po dag 'di dag thams cad kyang skad cig ma'i so so la mi gnas pa'o zhes bsam pa yang dran pa'o/ /yang thig le gsum po rdzogs pa'i skad cig ma de nyid ni shes rab ye shes so zhes dran bas na dran pa'o//yang ye shes kyi thig le de nyid rdzogs pa'i bde ba de nyid ni dpe'i bzhi pa yin zhes bya bar dran pas na dran ba'o/ /yang thig le bzhi gsang ba'i pad+mar spros pas ni sku bzhi sprul pa bye ba phrag phyed dang bzhi bkye bas shes rab kyi skye gnas dang /skra dang so dang / sen mo la sogs pa thams cad gdul bya'o/ /'gro rnams 'dul bar bsams pa ni dran pa'o/ /yang rnal 'byor pa dang rnal 'byor ma gnyis kyi lus kyi ba spu'i bu ga bye ba phrag phyed dang bzhi nas bde ba'i 'od zer dang sprul pa dpag tu med par spros pas 'jig rten gyi khams gzhan na gnas pa'i 'gro ba rigs drug thams cad la phog pas de dag gis kyang lhan cig skyes pa'i bde ba rtogs par gyur te/'od zer dang sprul pa de dag slar log nas bdag nyid kyis byi bo nas lus thams cad la khyab pas bzhi pa stong gi char yang mi phod pa'i bde ba skyes par bsams pa ni dran pa'i 'bras bu'o//des ni dran pa'i 'bras bu bshad zin to/ /da ni ting nge 'dzin gyi 'bras bu brjod par bya ste/ ye shes sku la thig le bzhi 'byung ba/ /de ni stong pa nyid kyi sku las spros pa'o/ /zhes bya ba gsungs pa la ye shes kyi sku la thig le bzhi 'byung ba zhes bya ba ni thabs kyi gsang ba'i rdo rje nas sku'i thig le 'byung ba dang /gsung gi thig le 'byung ba dang / thugs kyi thig le 'byung ba dang / ye shes kyi thig le 'byung ba'i don to/ /de ni stong pa nyid kyi sku la spros pa'o zhes bya ba la shes rab kyi gsang ba'i pad+mar sku'i sprul pa spros pa dang /gsung gi sprul pa spros pa dang / thugs kyi sprul pa spros pa dang / ye shes kyi sprul pa rnams spros pas 'gro ba'i don mdzad ces bya ba'i don to/ /de'i phyir dag pa'i ting nge 'dzin gyis zhes bya ba ni 'dir stong pa nyid kyis sku la gzugs pa'i sems spangs pa dang / 'dzin pa'i sems spangs pas dag cing ro gcig pa'i de bzhin nyid kyis sems gang gi tshe mi 'gyur ba'i skad cig ma skyes pa'i don rtogs pa ni ting nge 'dzin du brjod do//de'i phyir ting nge 'dzin des dag pas na/ lus dri ma med par bya'o/ /ngag dri ma med par byas so/ /yid dri ma med par byas so//ye shes dri ma med par byas pa yin te/ rnal 'byor pa des nyin zhag gcig gam/ zla ba gcig gam/ zla ba gsum mam/ zla ba drug gam/ lo gcig gam/ tha na lo gsum dang / zla ba phyed dang gnyis kyi nyin mtshan gyis ye shes kyi lus grub ste/ mchog gi dngos grub ster bar gyur te/'bras bu sa bcu'i dbang phyug byang chub sems dpa' 'jam dpal dang mtshungs par 'gyur te/ sa bcu la sogs pas bsgrubs pa dang / de nas rnal 'byor pa des don khyad par can nyams su myong bas sa bcu gcig thun mong gi lam sa thob par gyur cing brnyes pas ye shes kyi/sgrib pa spangs pas bcu gnyis pa brnyes pas ni rdo rje 'chang gi sa zhes bya ba ste/ des na ting nge 'dzin gyi 'bras bu bshad zin to/ /so sor sdud pa la sogs sbyor ba yan lag drug gi nges pa dang / dbye ba dang / re re'i nges pa'i don bstan cing bsgrub pa'i yan lag bstan to//da ni sbyor ba yan lag drug gi sgrub pa'i thabs bstan par bya ste/ de la rnal 'byor pa rnams kyis btsan thabs kyi sbyor ba shes par bya ste/ 'dir gang gi tshe so sor sdud pa la sogs pa rnams kyi stong pa nyid kyi sku la sna tshogs kyi gzugs mthong ba na srog la rnal 'byor pas ma bsdams pas mi 'dzag pa'i bde ba skad cig ma mi skye na/de'i tshe rnal 'byor pas 'chad par 'gyur ba'i nA da la btsan thabs kyis goms par byas la nyams su blang bar bya ste/ de la rnal 'byor pas lus bsrang ste/ skyil mo krung bcas la/ dbugs sor gzhag cing sems ni yangs par gnas shing /lag pa g.yas pas rtse chung ngam gnyid log rtsa bags kyis mnan cing mi g.yo bar gnas par bya'o/ /de ltar yang nas yang du mi lci tsam grangs mang byas la ro stod dang spyi bo min pa de tsam du byas na/ rtsa dbu mar srog gi rlung rgyu ba nyid kyis shes rab kyi pad+mar gnas pa'i rdo rje nor bu'i nang du chud pa'i byang chub kyi sems kyi thig le bzhi mi 'pho ba'i 'gog pa'i bde bas brgya'i char yang mi phod pa'i rgyu mthun pa'i mi 'dzag pa'i skad cig ma'i bde ba lhan cig skyes pa'i sku'i don bsgrubs pas/mthong bar tshe 'di la 'gyur ro//de ni btsan thabs kyi sbyor ba dang po'o/ /btsan thabs kyi sbyor ba gnyis pa brjod par bya ste/ stong pa nyid kyi rang bzhin shes rab ma dang snyoms par zhugs shing / mnyam par 'jog pa'i dus na snying rje'i bdag nyid thabs kyi gsang ba'i gnas thur sel gyi sgo g.yas pa'am/lus ber ba langs pa'i dus nyid du rdo rje nor bu'i rtsa bar lag pa g.yas pas mnan cing lus mi g.yo bar sems bde ba la gtad cing yar drang ba dang / rgyu zhabs kyi she tshigs pa la sbyar ba dang / mig bgrad pa dang / rkang pa'i mthe bong nang du bskum pa dang /rting pa phyir brkyang pas shes rab dang thabs gnyis char yang mi g.yo mi 'grul bar bde ba la sems gtad cing gnas pa ni/ btsan thabs kyi sbyor ba gnyis pa'o/ /da ni stong pa nyid kyi sku bsgrub pa phyir lta ba brjod par bya ste/ de la bsnyen pa zhes bya ba la sogs pa gsungs te/'dir bsnyen pa zhes bya ba ni dang po'i rtags du ba nyin mtshan gcig la rnal 'byor pas bsgoms pas mthong bar 'gyur ro/ /phyi nang gi smig rgyu la sogs pa 'byung bar 'gyur ro/ /bsnyen pa de'i dang por sbyor ba yan lag drug bsgoms pas rtags du ba la sogs pa'i mtshan mar 'dzin pa'i sems spangs pa'i bdag nyid can gyi rnal 'byor pa'i sems kyis gsal la mi rtog pa bsgoms pa'i stobs kyis 'byung bar 'gyur ro//gzung 'dzin dang bcas pa'i sems kyis bsgoms pas ni 'byung bar 'gyur ba ma yin no/ /de yang rtags bcu gcig yin te/du ba ni dang po 'di rnams yid ches pa'i rgyur bstan pa yin la/ lhag ma bcus ni phyi nang brtan par byed pa'i sbyor ba yang dag par byed pa yin te/ de rnams kyang dngos por bzung ba las byung ba ni ma yin no/ /dngos po med pa la rtags de rnams byung bar 'gyur ro//de la so sor sdud pa dang po'i lta ba brjod par bya ste/ de la 'khor lo can zhes bya ba gsungs pa la/ 'khor lo can ni gtsug tor gyi 'khor lo'i 'dab ma bzhi la lta ba'o/ /can zhes pa ni thig le bzhi gnas pas na can no/ /lta ba zhes pa ni khro bo gtsug tor rgyal po'i lta ba ni steng du gtsug tor gyi 'khor lo'i 'dab ma bzhi la thig le bzhi 'byung ba bzhis bskyed cing bde ba de la dus thams cad du lta bar byed do//skad cig ma gcig tsam yang mi yengs par de nyid la yang dang yang du lta bar byed do/ /de'i spyod lam ni mig dag mi 'dzums ba dang /kha gdangs shing dbugs sor gzhag pa dang / dngos por 'dzin pas gzung ba dang / 'dzin pa'i yul dang bral ba dang / dbugs smin mtshams su phug rdugs kyi rtsa la rang bzhin du zhugs shing gnas pa ni khro bo de'i spyod lam yin no/ /de bzhin du rnal 'byor pa sgrub pa nyams du len pa rnams kyis kyang de bzhin spyod lam bya ste/rnal 'byor pas mtshan mo'i sbyor ba la rtags lnga 'byung bar 'gyur ro/ /nyin mo'i sbyor ba la rtags rnam pa drug 'byung bar 'gyur ro/ /nyin mo'i sbyor ba zhes bya ba ni snga dro nyi ma shar ma thag nas sprin med pa'i nam mkha'i khams dngas pa la nyi ma la rgyab kyis phyogs la nub tu kha bltas la gzung ba dang 'dzin pa'i sems gnyis spangs nas/sprin med nam mkha' ji ltar dngas shing gsal ba de bzhin du dngos po thams cad kyang nam mkha' bzhin du dngas shing gsal ba'i rang bzhin no zhes rnal 'byor pa'i bsam pa'i yul sngon du de ltar yin no//phyi nas blos de ltar mi dpyad par sor gzhag par bya'o/ /nyi ma gung la bab pa'i dus su ni khas gsang zhing / dmigs par mi bya'o/ /de ci'i phyir zhe na/ mig la nyi mas phog pas ni mig rab rib can du 'gyur zhing skyon can du gyur nas/dmigs pa mi gsal bar 'gyur zhing / /dge ba'i bar chod du 'gyur ro/ /phyi dro nyi ma yol bar gyur pa dang nyi ma la rgyab kyis phyogs nas kha shar phyogs su bltas la snga ma ltar nam mkha' de nyid la dmigs par bya'o/ /srod dang tho rangs rnams su ni ci bde bar gnas shing kha ton dang bzlas pa dang dmigs pa la sogs pa bya ba thams cad spangs nas rnal 'byor chen po'i nga rgyal gyis gnas par bya'o//de ltar bsgoms na de nas sku stong pa nyid rnam par mi rtog pa rtogs shing 'grub par 'gyur ro/ /sku'i mthar ni bsnyen pa'i yan lag tu 'gyur te/de ni so sor sdud pa dang / bsam gtan gyis de rnams 'grub par 'gyur ro/ /da ni nye bar sgrub pa bshad par bya ste/ /de la/ bgegs mthar byed kyi lta ba ni/ /zhes bya ba de la/ bgegs mthar byed ni khro bo bdud rtsi 'khyil pa'o/ /de'i lta ba ni bdud rtsi'i gnas su song ba ste/bdud rtsi'i gnas zhes bya ba ni dpral ba nas kun rdzob byang chub kyi sems gnas pa'o/ /srid pa'i gnas zhes bya ba ni de nas lus thams cad la khyab par byed pa'i kun rdzob byang chub kyi sems 'dzag pa'i gzhi de ni gnas pa'o/ /bgegs mthar byed de'i lta ba ni bdud rtsi'i lam zhes bya ba ni lu gu rgyud du bcings pa'i rtsa lam du dbu ma a wa d+hU tIr byang chub kyi sems dang kun gzhi'i rnam par shes pa gcig tu 'dres nas rdo rje rtse gcig pa lta bur gyur pa ni yan lag drug gi nye bar sgrub pa'o//nye ba'i sgrub pa bshad nas/ yang gi sgras ni srog dang rtsol ba dang /'dzin pa zhar la brjod par bya ste/ stong pa nyid bsgoms pa las sku mthong nas rnal 'byor pa bdag nyid kyi lte bar hUM mthing nag sor gcig pa bsams nas sna bug g.yon pa nas dang po sor bcu bdun nas bzlog ste/ oM dkar po gcig dbugs dang 'grogs nas nang du zhugs pas lte ba'i hUM la thim par bsams nas ji tsam bde ba tsam du gzhag go//de mi bde ba'am/ gang ba snyam byed na/ de nas hUM las dbugs byung ba yang sna bug g.yas pa nas byung ba AHdmar po dang 'grogs nas phyir sor bcu bdun tshun chad 'phros pas yang dang yang du rnal 'byor pas bsgom pa ni srog dang rtsol ba'i rnal 'byor ro//de la brtan pa thob na ni bde ba khyad par can skye zhing sems shin tu yang brtan par gyur nas dngos po thams cad 'gags pa dang / dbugs yang ring bar 'gyur te/ hUM las dbugs ji ring ji ring du byas la/oM nang du je thung du bya zhing / AHyang phyir 'byung ba oM dang mnyam par je thung je thung du bsam mo/ /phyi nas sna bug gnyis 'dom pa'i mtshams su sor bzhi'i nang nas thig le gsum gnas par bsams la/ des dbugs la phog pas dbugs slar log nas hUM la thim par gyur pas bde ba dang bcas par de yar 'ong ba dang /mar 'gro bas sna bug gi sum mdor thig le gsum ni kha dang sna bug gnyis su re re gnas pas srog gi rlung la phog pas srog gi rlung phyir log pas kun gzhi rnam par shes pa dang 'dres nas don dam pa byang chub kyi sems sor gcig pa la hUM dang dbugs su bcas pa thim par gyur pa ni srog nye bar sgrub pa'o//nye bar sgrub pa bshad zin to/ /da ni sgrub pa brjod par bya ste/ shes rab las spros zla ba'i thig le zhes bya ba ni 'dir shes rab kyi chags pas zhu ba'i rnal 'byor pa'i thig le de ni spros pa'i zla ba'i thig le zhes bya'o//de yang shes rab las spros pa'i byang chub kyi sems kyi thig le de yang rnal 'byor pa'i rdo rje nor bu'i nang du son pa'i bde ba gang yin pa de ni yi ge bzhi'i bdag nyid de/ gsang ba bde ba chen po'i 'khor lor ye shes kyi rang bzhin gyi yi ge ho dmar po dang /lte ba sprul pa'i 'khor lor AHdmar skya dang / snying ga chos kyi 'khor lor yi ge hUM dkar po dang / longs spyod kyi 'khor lor oM rnams kha sbyor du thabs dang shes rab gnyis su med par sgrub pa ni de sgrub par 'gyur te/ 'di ni sgrub pa'i yan lag gsum par 'gyur ro/ / des ni sgrub pa bshad zin to/ /da ni sgrub pa chen po brjod par bya ste/ bde ba ma nyams gcig zhi ba/ /zhes bya ni las kyi phyag rgya nu ma dang skra dang ldan pa lo bcu gnyis ma la sogs pa yang rung / ye shes kyi phyag rgya gang la dmigs pa de brtan por gyur pa yang rung / phyag rgya chen po stong pa nyid la dmigs pa brtan por gyur kyang rung ste/byang chub kyi sems kyi bde ba mi nyams pa'i skad cig ma gcig gi mtshan nyid de ni lus zhi ba dang / ngag zhi ba dang / yid zhi ba dang / ye shes zhi ba zhes brjod do/ /de ni lhan cig skyes pa yin zhes bcom ldan 'das kyis rtsa ba'i rgyud dpal mchog gi dang po zhes bya ba stong phrag bcu gnyis pa'i ye shes kyi le'ur gsungs so//sgrub chen ye shes sbyor ba'o/ /zhes bya ba ni don dam pa byang chub kyi sems de la rnal 'byor pas dus thams cad du byang chub kyi sems mi 'dzag pa'i bde ba'i rgyun gnas shing /rtog pa can gyi bde ba'i rgyun med do snyam pa'i shes pa dang lhan cig tu rnal 'byor pas gcig par bsgom pa ni sgrub pa chen po'i yan lag ste bzhi pa'o/ /de ltar ye shes kyi yan lag bzhi pa sgrub pa chen po bshad zin to/ /da ni rdzogs pa'i rang bzhin dbu ma chen po brjod par bya ste/lha la sogs pa sgrub pa sngar bshad pa'i bskyed pa'i rim pa ni 'jig rten pa'i dngos grub thob pa'o/ /rdzogs pa'i rim pa de kho na nyid sgrub pa ni 'jig rten las 'das pa'i dngos grub thob pa'o/ /bcom ldan 'das kyis de skad ces bka' stsal to/ /sangs rgyas rnams kyis chos bstan la//bden pa gnyis la yang dag brten/ /'jig rten kun rdzob brten pa dang / /don dam pa yi bden pas 'grub/ /ces bcom ldan 'das kyi bka' nges pa'i don to/ /yang bcom ldan 'das kyi bka' las/ rim pa gnyis pa yang dag brten/ /rdo rje can gyis bdag la bstan//bskyed pa'i rim pa gcig yin te/ /gzhan ni rdzogs pa'i rim pa'o/ /zhes bka' nas 'byung ngo / /de'i phyir na de ltar lha sgrub pa la ni rnam par rtog pa can gyi bskyed pa'i rim pa rnal 'byor bsgom pa rnams kyis thams cad bsgrubs pas 'grub par mi 'gyur ro/ /de kho na nyid kyi rang bzhin chos kyi sku sgrub pa la ni rnam par rtog pa dkar po dang /dmar po dang / ser po dang / sngon po dang / nag po dang / ring ba dang / thung ba dang / sbom pa dang / phra ba dang / chag pa dang / ma chag pa dang / zla gam dang / zlum po dang / sog ka dang / gru bzhi dang / yan lag dang / nying lag dang / ri dang / nags tshal dang / 'khri shing dang / gel pa dang / kha dog dang / dbyibs kyi tha snyad thams cad dang bral ba'i yan lag bzhi rdzogs pa ngang gis 'grub pa'o zhes bya ba ni rang gi rigs pas 'grub pa'o/ /dbu ma chen po'i don bshad zin to/ / da ni srog dang rtsol ba'i yon tan dang skyon gnyis yi mtshan nyid brjod par bya ste/ srog ces bya ba la sogs pa gsungs te/ 'di ltar rnal 'byor pas rnam par mi rtog pa bsgoms pa las sku mthong nas rnal 'byor pas rdo rje dril bu'i rtse mo nas brtsams nas gtsug tor gyi 'khor lo'i bar du sems gtad cing dbugs sum stong drug brgya'i bar du 'gog cing bde ba nyams su myong bar bya ba ni yon tan du 'gyur ro//skyon du 'gyur ba ni rnal 'byor pas dbugs shin tu gsang bas sna rtser ram/ lte ba sprul pa'i 'khor lor cig car bsdams shing mi rgyu bar byas na ni srog gi rlung yan man du 'gro sa med de lte bar brgyal bas srog gzhan du mi 'gyur bar a wa d+hU tIr zhugs nas tshangs pa'i bu ga nas byung nas/rnal 'byor pa'i lus dor nas mgo bkas te 'chi ba'i dus byed par 'gyur ro/ /de ni skyon bstan pa'o/ /rnal 'byor pas mgo na bar mi byed pa de srid du rnal 'byor du bya'o//de ltar byas na rnal 'byor pa rnams la mnyam pa'i bde ba phung po nyon mongs pa'i 'bras bu ster bar 'gyur ro/ /de la steng du zhes pa ni mgo po de srid na mi 'dod pa yin te/ rnal 'byor pas dmigs pa mi bya'o/ /byas na ni 'chi ba'i 'jigs pa ster bar 'gyur te/phung po 'jig par 'gyur ro/ /'on te rnal 'byor gyi stobs kyis gtsug tor gyi 'khor lo'i sgo phug nas srog gi rlung 'gro ba'i rnal 'byor pa ni mchog tu mi 'gyur ba'i bde ba go 'phang stong pa nyid kyi sku la gcig tu sbyor ba'i ting nge 'dzin de la sems rtse gcig pa'i yon tan gyis ni de ltar rnal 'byor pa de'i phung po med par gyur kyang /med pa ni ma yin te/ yod ces bya ba'i don to/ /de ji ltar yod ce na/ rnal 'byor pa ni ma nyams pa'i bde ba mchog tu mi 'gyur ba'i ting nge 'dzin du 'gro bar 'gyur zhes bya ba ni sangs rgyas bcom ldan 'das gang du yang ma grub pa'i chos kyi skur 'gyur zhes bya ba'i don to//'on te rnal 'byor pa chos kyi skur 'gyur ram/ gzhan zhig tu 'gyur snyam pa la/ de ltar mi 'gyur ro/ /rnal 'byor pa ni ma yin no/ /rnal 'byor pa zhes bya ba ni rnal 'byor pa'i sems nyid chos kyi skur 'gyur ba la/rnal 'byor pa 'gro zhes brjod par zad kyis/ rnal 'byor pa'i lus po 'gro ba ni ma yin no/ /'on kyang 'jig rten pa rnams la grags pa med ces bya ba ni rnal 'byor pa 'di ni shi bar gyur to zhes grags par 'gyur te/ shi ba ma yin no zhes bya ba ni grub mtha' 'dzin pa rnams la rigs pa grub pa'o//srog dang rtsol ba'i skyon dang yon tan bstan pa sgrub thabs kyi le'ur bcom ldan 'das kyis gsungs pa nges pa'i don to/ /skyon dang yon tan gnyis bshad zin to/ /'bras bu srog ces pa la sogs pa ni go sla'o/ /da ni rtsa'i kun du spyod pa'i gnas thabs brjod par bya ste/thig le zhes pa ni dpral bar sku'i thig le gnyid sad pa'i gnas skabs skyed par byed pa'o/ /ma zhes pa ni mgrin par gsung gi thig le rmi lam rmis pa lta bu'i gnas skabs byed par byed pa'o/ /sgra zhes bya ba ni snying gar sems kyi thig le shin tu gnyid log pa lta bu skyed par byed pa'o//ye shes zhes pa ni lte bar ye shes kyi thig le bzhi pa'i gnas skabs skyed par byed pa'o/ /bdud rtsi'i gnas su song ba ni lu gu rgyud du bcings pa'i rtsa de la yang bdud rtsi'i gnas su zhes bya ba ni dpral ba'i dkyil 'khor ni thig le bzhi 'dzag pa'o//song ba ni zhes pa ni de ru'o/ /dus kyi me zhes pa ni ye shes kyi rtsar song ba ni bdud rtsi'i gnas su song ba'o/ /lu gu rgyud ces bya ba ni g.yon gyi rtsa la la nA dang / g.yas pa'i rtsa ra sa nA'o/ /bcings pa'i rtsa zhes bya ba ni dbus kyi rtsa a ba d+hU tIr dang /de'i nang gi ye shes kyi rtsar me kha dog dmar por gnas pa ni bcings pa'o/ /de ci ltar bcings she na/ de ni 'di ltar bcings so/ /lus kyi sgrib pa dang / ngag gi sgrib pa dang / yid kyi sgrib pa dang / ye shes kyi sgrib pa rnams kyis lus gsal ba dang / ngag gsal ba dang /yid gsal ba dang / ye shes gsal bar gyur pa shel sgong phyis pa ltar gsal ba'i bdag nyid de/ dar gyi srin bus bdag nyid kun nas dkris shing mi thar ba de bzhin du/ 'gro ba rnams kyang sgrib pa bzhis mi gsal bar byas so/ /rnal 'byor pa rnams kyis de rtogs par byas shing /lu gu rgyud du bcings pa'i rtsa ni lus dang / ngag dang / yid gsum yin te/ de yang 'dod chags dang / zhe sdang dang gti mug rnams yin pas/ ye shes dkris shing mi gsal bar byas so/ /des dkris pa ni lte ba dang / snying ga'i bar du lan gsum du dkris so//de nas yang a ba d+hU tI ni snying gi ze'u 'bru'i dbus nas byung nas 'gro zhing srog gi rlung rgyu bar byed do/ /la la nA ni g.yon nas 'gro'o/ /ra sa nA ni g.yas nas snying ga'i pad+ma'i 'dab ma'i g.yas nas 'gro bar 'gyur ro/ /de nas snying ga dang / mgrin pa'i pad+ma'i 'dab ma'i bar du lan gsum du 'khyil nas yang 'gro bar 'gyur ro//de bzhin du yang mgrin pa dang / /dpral ba'i dbus su lan gsum du 'khyil nas gnas pa'o/ /dpral ba nas gtsug tor gyi bar du lan gsum du 'khyil nas gnas te/ lus dang / ngag dang / yid gsum dkris te/de la rdul dang / mun pa dang / snying stobs gsum gyi rang bzhin gyis de ltar lan gsum pa bzhir byas nas/ lus kyi rtsi'i ra sa nA g.yas kyi rtsa sna bu gnas phyir byung ba ni/ bcu gnyis mtha' nas cha yi mthar/ /zhes pa ni sa'i khams kyi rlung sor bcu gsum du rgyu'o/ / chu'i khams kyi rlung sor bcu bzhir rgyu'o/ /me'i khams kyi rlung sor bco lngar rgyu'o/ /rlung gi khams kyi rlung sor bcu drug tu rgyu'o/ /nam mkha'i khams kyi rlung sor bcu bdun du rgyu'o zhes ni nang gi le'ur gsungs so/ /sku'i g.yon gyi rtsa la la nA ni sor bcu bdun nas rgyu'o/ / ngag gi rtsa ra sa nA ni g.yas nas sor bcu gsum tshun chad du 'gro'o/ /yid kyi rtsa a ba d+hU tI cig car dbus ma nas sna bug gnyis 'dom pa nas sor bco lnga tshun chad du 'gro'o/ /de bzhin du 'og tu lte ba dang / gsang ba'i gnas kyi bar du yang lan gsum du 'khyil bar byas nas/bshang ba'i rtsa ni g.yas nas 'gro'o/ /gci ba'i rtsa ni g.yon nas 'gro'o/ /dung can ma ni dbus ma nas gsang ba'i rdo rje'i nang nas shes rab kyi pad+ma'i bya gdong mar 'gro'o/ /gsang ba'i pad+ma'i 'og tu bshad pa'i rtsa dbus su 'gro'o/ /gsang ba'i rdo rje dang shes rab kyi pad+ma'i g.yon nas gci ba'i rtsa 'gro'o//g.yas kyi rtsa ra sa nA na sa kun rdzob byang chub kyi sems kyi khu ba 'gro'o zhes pa ni rtsi'i kun du spyod pa yin te/ bcom ldan 'das kyis zhib mor ni nang gi le'ur gsungs te 'dir ma bshad do/ /'di ni de bzhin gshegs pa'i bka'i nges pa'o//rtsa'i kun du spyod pa bshad zin to/ /da ni rlung gnyis rgyu ba brjod par bya ste/ srog dang thur sel lan gsum rgyu/ /zhes bya ba ni steng du lus dang / ngag dang yid gsum gyi rang bzhin g.yon dang / g.yas pa dang / dbus ma nas gyen du rgyu ba srog gi rlung ngo //'og tu rgyu ba'i rdul dang / mun pa dang / snying stobs kyi rang bzhin bshad pa dang / gci ba dang / khu ba'i rtsa'i lam nas rgyu bar byed pa'i rlung ni thur du sel ba'o/ /rdo rjer bcas pa'i pad+ma ni shes rab rnams kyi skye gnas te/ 'bab pa'i bde ba ster ba'i phyir ro//nor bu dang bcas pa'i rdo rje ni 'dzin pa'i bde ba ster ba'i phyir ro/ /bud med kyi pad+ma dang ldan pa nyid do/ /pad+ma'i ze 'bru 'byed pa nyid yin no/ /dbus su rlung dang phrad pa ni lte ba'i dbus su gyen du rgyu ba'i srog gi rlung dang thur du sel ba'i rlung dag phrad pa'o/ /bya gdong ma dang dung can ma gnyis phan tshun du mi g.yo bar phrad de/byang chub kyi sems kyi rtsa gnyis rdo rje sbu gu'i nang du pad+ma'i ge sar zhugs pas mi 'pho ba'o/ /yul zhes pa ni shes rab ma'i pad+ma'o/ /yul can zhes pa ni thabs kyi rdo rje'i nor bu'o/ /rnam par dbye ba med ces pa ni thabs dang shes rab dbyer med cing mi phyed pa'o//yul rnam la yul can rnams te mig la sogs pa'i dbang po'i sgo mi 'jug pa ste/ dbu mar rlung rgyu ba'o/ /'jug pa zhes pa ni lte ba'i pad+ma'i srog gi rlung 'jug pa'o/ /sems mi g.yo ba de ni sngar bshad zin to/ /du ba la sogs pa'i mtshan ma rnams ni a ba d+hU tIr srog gi rlung chung ba'i sgo nas 'dzin pa'o//yang gi sgras ni srog de nyid lte bar gzhom du med pa la thim par gyur pa'o/ /'di dag thams cad byis pa'i rang bzhin can rnal 'byor pa'am/ rnal 'byor ma rnams la gsang zhes pa ni byis pa so so'i skye bo rnam par mi shes pa rmongs pa rnams dang /dad pa shas chung zhing nyon mongs pa shas che ba rnams la gsang ba zhes bya ba ni sba bar bya'o/ /de rnams la ma sbas pa yin na rang yang dmyal bar ltung la/ gzhan la yang de la brten nas dmyal bar 'gro zhes pa ni bcom ldan 'das kyi bka' nges pa'o//rlung gnyis kyi rgyu ba bshad zin to/ /da ni dkyil 'khor lnga'i zad pa brjod par bya ste/ sa zhes bya ba la sogs pa la/ 'dir gal te khro bo'i lta bas stong pa la sems gzhag pa'i rnal 'byor pa mig ma btsums par gyur pa de lta na ni g.yon pa'am/g.yas par te sa zhes pa ni nye bar mtshon pa'o/ /gal te g.yas par sa'i dkyil 'khor 'bab pa'i dus su rnal 'byor pa sgom par byed pa de lta na ni/ cho ga 'di yin gyi g.yon gyi rtsar 'bab pa'i dus su ni ma yin te/ nam mkha'i dkyil 'khor la sogs pa la rgyu ba'i phyir ro//de'i phyir g.yon pa'am g.yas par/ gang srog gi dkyil 'khor 'bab pa de'i chos can gyi phyir de nyid dkyil 'khor du brjod do/ /de'i phyir g.yas kyi rtsa'i sa'i dkyil 'khor las srog gi chu'i dkyil 'khor du 'gro ste/ de ltar ye shes kyi dkyil 'khor gyi bar du'o//g.yon gyi rtsa las ni nam mkha' la sogs par 'gro ste/ de ltar stong par 'gro'o/ /mtshan ma rnam pa bcu ru 'gyur/ /zhes pa ni du ba la sogs pa'i mtshan ma rnam pa kun ldan gyi stong gzugs su 'gyur ro/ /gzugs las mi 'gyur ba'i bde bar 'gyur ro//shes rab kyi pha rol tu phyin pa'i ye shes de nyid do/ /ye shes las rdzu 'phrul zhes pa ni nam mkha' la 'gro ba la sogs pa'o/ /dngos grub ces pa ni khams gsum gyi dbang phyug tu 'gyur te/ mi rnams skye ba 'di nyid la/ /thob par 'gyur ro mi bdag kye//zhes bya ba ste lam du zhugs pa'i nges pa'o/ /da ni rang gi sems 'di snang ba la 'jug pa brjod par bya ste/ nam mkha' zhes bya ba la sogs pa bcom ldan 'das kyis gsungs te/ 'di ltar bka' gsang sngags rdo rje'i theg pa dang / shes rab kyi pha rol tu phyin pa'i theg par ni bcom ldan 'das kyis ni rnal 'byor pa rnam pa gnyis la goms par bya zhes gsungs te/rnal 'byor pa 'di ni yum shes rab kyi pha rol tu phyin pa brgyad stong par yang brgya byin gyi le'ur gsungs te/ lha'i dbang po brgya byin gyis tshe dang ldan pa rab 'byor la 'di skad ces smras so//'phags pa rab 'byor shes rab kyi pha rol tu phyin pa 'di la rnal 'byor du byed par 'dod pas gang la rnal 'byor du byed/ /rnal 'byor pas rnal 'byor ji ltar rnyed par 'gyur/ /de skad ces smras pa dang / tshe dang ldan pa rab 'byor gyis 'di skad ces smras so//lha'i dbang po brgya byin la kau shi ka gang shes rab kyi pha rol tu phyin pa la rnal 'byor du byed par 'dod pas/ nam mkha' la rnal 'byor du bya'o/ /kau shi ka gang shes rab kyi pha rol tu phyin pa la rnal 'byor du byed par 'dod pas/ bla gab med pa la rnal 'byor du bslab par bya'o zhes bcom ldan 'das kyis gsungs so//de la nam mkha' bla gab yod pa la/ rnal 'byor pas rnam par mi rtog pa goms par bya ba dang / kau shi ka yang nam mkha' bla gab med pa la rnal 'byor pas rnam par mi rtog pa goms par bya'o/ /de la gang zhig nam mkha' la rnal 'byor du byed par 'dod pa'i rnal 'byor pa'i spyod lam ni sngar gong du bstan zin to//bla gab yod pa'i rnal 'byor brjod par bya ste/ de la rnal 'byor pa dang po khyim chen po dpangs mtho ba'i phyogs thams cad zhal zhal byas pa/ bu ga rta rnga yang mi shong bar tshags bsdams la khyim chen po'i nang du mun pa'i nam mkha' la dngos po thams cad la zhen pa'i sems cha phra mo tsam yang med par yongs su spangs bas/mun pa la kun nas dang bas yongs su brtags pas ni rnal 'byor pa de la dang po du ba la sogs pa'i rtags lnga mtshan mo'i sbyor bas mthong bar 'gyur ro//rtog pa thams cad yongs spangs shing / /nyin zhag gcig la rnam par brtag /de la rtags ni ma byung na/ /de tshe nga yi brdzun tshig yin/ /zhes bcom ldan 'das kyi bka' dam pa'o/ /mig dag mi 'dzums pa ni mig gtsug tor la bltas te/smin ma bteg la kha gdangs pa'am/ yang na btsums kyang rung ste/ lus mi 'gul/ mi brkyang bar byas la rnal 'byor du bya'o/ /rdo rje'i lam du zhugs pa yis/ /zhes pa ni 'dir srog gi rlung rtsa dbus ma a ba d+hU tIr dbang med du bla ma'i man ngag gis zhugs pa ni stong pa nyid rnam par mi rtog pa las dbus mar zhugs pa'o//nam mkha' la zhen pa'i sems kyis zhes bya ba ni bla gab yod pa la rnal 'byor pas mig btsums pa dang / rdo rje'i lam du zhugs pas stong pa las rtags du ba lta bu dang /smig rgyu dang / rab gsal dang / mar me dang / dri ma med pa'i nam mkhar snang ba rnams ni mtshan mo'i sbyor bas mthong bar 'gyur ro/ /de ni khro bo gtsug tor rgyal po'i lta bas bsgom par bya'o/ /nyin mo'i rnal 'byor zhes pa ni bla gab med pa'i nam mkha' sprin med pa'i dngas pa la rnal 'byor byed pa ni rgyal po'i lta stangs zhes bya ba ni dper na rgyal po 'khor mi rnams kyi nang na 'dug kyang //'khor mi rnams kyis rgyal po la rgol ba la sogs pa mi nus te/ rgyal po de yang 'khor rnams la 'jigs pa'am/ bag 'khum pa'am/ spu zing zhes byed par mi 'gyur te/rgyal po de'ang 'khor mi rnams kyi yid du 'ong ba dang / mthong na dga' bar 'gyur ro/ /rgyal po des kyang 'khor mi thams cad kyi rten dang stegs byed cing / rgyal po'i bya ba byed la rgyal srid sus kyang mi 'phrogs pa de bzhin du nyin mo'i rnal 'byor byed pa'i rnal 'byor ba yang rgyal po dang 'dra ste/nyon mongs pa 'dod chags dang / zhe sdang dang / gti mug dang / nga rgyal dang / phrag dog dang / ser sna dang / g.yo sgyu dang / bdud la sogs pa rnams kyis glags mi rnyed de gtan 'byung bar mi 'gyur ro//des na rgyal po'i 'dug stangs dang khengs pa'i 'dug stangs zhes bya'o/ /sangs rgyas lnga bdag gzugs nyid ni/ /sgrub pa che la rnam par brtag /ces phyag na rdo rje'i stod 'grel las 'byung ngo / /des ni nyin mo dang mtshan mo'i rnal 'byor bshad zin to/ /da ni bdud rtsi 'khyil pa'i lta stangs brjod par bya ste/bdud rtsi 'khyil pa'i lta stangs zhes pa ni mig drang por blta ba ste/ drang por bltas pas ni snying ga na gnyid log pa lta bu'i bdud rtsi gnas pa'o/ /rnal 'byor pa'i spyod lam ni mdun drang por mig mi 'dzums par rnal 'byor pas cir yang mi dmigs shing /cir yang mi rtog par dngos po thams cad yongs su spangs nas de nyid dang gzhan nyid du khams gang du yang mi len par brjod pa thams cad kyi yul las 'das pas gnas pa'o/ /des ni bdud rtsi 'khyil pa'i lta stangs bshad zin to/ / da ni zhi ba lha'i 'dug stangs bshad par bya ste/ lha'i gzugs su bsgom par bya/ /zhes pa ni rnal 'byor pa bdag nyid kyi lte bar a dmar po gcig gsal bar bsgoms shing bsams pa de la/ gsang ba ye shes kyi me 'bar bar gyur bas lte ba'i a la phog pas a dro bar gyur pa dang /dro ba las kyang me 'bar bar gyur te/ stong pa nyid kyi rtsa a ba d+hU tI nas yar zhugs nas rang gi phung po dang / khams dang / skye mched dang / dbang po lnga rnams bsregs pas thig le bzhir gyur to/ /thig le bzhi ni gzugs zhu bar gyur pa dang / khams zhu par gyur pa dang /skye mched zhu par gyur pa dang / dbang po zhu bar gyur pa'i thig le rnams so/ /lte ba las 'bar tsaN+Da lI/ /bde gshegs lnga ni bsregs nas su/ /spyan ma la sogs lnga bsregs te/ /haM bsregs ri bong can las kyang / /bzhugs lte bar thim par 'gyur//lte ba zhes bya ba ni bde ba chen po'i 'khor lo yin te gzhom du med pa'o/ /las zhes bya ba ni mchog tu mi 'gyur ba'i bde bskyed pa'o/ /'bar zhes pa ni 'dod chags kyi me/ shes rab kyi chags pas rab tu 'bar bas dug gsum bsreg pa'o/ /tsaN+Da lI zhes bya ba ni bde ba myur du 'gugs par byed pas na gtum mo'o//bde gshegs lnga zhes pa ni gzugs kyi phung po dang / tshor ba'i phung po dang / 'du shes kyi phung po dang / 'du byed kyi phung po dang / rnam par shes pa'i phung po'o/ /de lnga ni de bzhin gshegs pa lnga'i rang bzhin te/bag chags kyi lus yin pas ni bsregs pa kho na'o/ /spyan ma la sogs shes pa ni sa'i khams ni Da ki na'i'o/ /chu'i khams lA ma'o/ /me khams ni khaN+Da ro ha'o/ /rlung gi khams ni rU bi ni'o/ /nam mkha'i khams ni chos kyi dbyings kyi dbang phyug ma'o//de rnams ni khams lnga yin te/ lus bskyed pas so/ /bsreg pa ni spyan la sogs pa lha mo rnams so/ /lnga zhes pa ni skye mched lnga yin te/ mig gi skye mched dang / rna ba'i skye mched dang / sna'i skye mched dang / lce'i skye mched dang / lus kyi skye mched dang lnga bsregs pa'o//bsregs pa'i sgras ni mig gi dbang po dang / rna ba'i dbang po dang / sna'i dbang po dang / lce'i dbang po dang / lus kyi dbang po dang / yid kyi dbang po ste de rnams bsregs shing med par byas/ rnal 'byor ba'i nyon mongs pa dang / bag chags ngan ba zhen pa dang bcas pa'i dngos po rnams la chags par byed pa 'dir bsregs pa zhes pa ni rnal 'byor ba'i sems kyi snang ba'o//yang dag par ni bsregs pa dang mi bsreg pa gang yang yod pa ni ma yin no zhes bka' nas 'byung ngo / /ste zhes pa ni bla ma dam pa'i gdams ngag gis zin pa'i rnal 'byor ba rnams kyis gyis shig pa'o//haM zhes pa ni sprul pa'i 'khor lo nas brtsams te/ gtsug tor gyi 'khor lo'i bar du thug pa'i yi ge A li dang kA li rnams bsregs shing / stong phrag bdun cu rtsa gnyis dang / pad+ma'i 'dab ma brgya lnga bcu rtsa drug bo thams cad bsregs shing med par byas pa'o//ri bong zhes pa ni gtsug tor gyi 'khor lo la gnas pa'i thig le bzhi haM dang bcas pa'i tshes bcu gcig gi zla ba lta bu'i rang bzhin du bzhu nas/ lte ba gzhom du med par thim par gyur cing 'dres pa'i bde ba dang bcas par gnas pa'o//can zhes pa ni gtsug tor gyi 'khor lo dus thams cad du gnas zhes pa'i don to/ /kyang zhes pa ni thams cad bzhu nas gzhom du med pa la thim pa'o/ /gzhom du med pa de nyid kyang zhu bar 'gyur pas shin tu cha phra bar gyur cing /skra'i rtse mo brgya stong du gshags pa'i tshad du yang mi dmigs shing ma zhe na pa ni zhi ba lha'i gzugs su bsgom par bya zhes bya ba'i don to/ /des ni lha'i gzugs kyi bsgom pa bshad zin to/ /yang lha'i gzugs kyi bsgom pa brjod par bya ste/rnal 'byor bas shes rab kyi pad+ma'i dbus su chos kyi 'byung gnas gru gsum pa bsam nas/ dngos po thams cad rjod par byed pa'i nus pa 'di la yod pas/ bdag nyid kyis kyang nus pa de btsal par byed pa'i don 'di la nus pa yod do bsams nas/chos kyi 'byung gnas kyi dbus na gnas pa'i ge sar yi ge ra'i rnam pa lta bu'am/ yi ge I rnam pa lta bu de thabs kyi gsang ba'i rdo rje'i nang du btsud pas chos kyi 'byung gnas kyi a de rdo rjes phyed mar bcad pas/ /g.yon pa raM du gyur nas drod skyed par bsam mo//g.yas pa yaM du gyur nas rlung gi rang bzhin du gyur te/ phan tshun du 'grogs nas/ rlung gis ra~M` la phog pas dro bar gyur nas dro ba las kyang me'i rang bzhin dro bar gyur te/ chos kyi 'byung gnas kyi rang bzhin a dros nas me 'bar bas/ gsang ba'i rdo rje nor bu'i sbu gu'i nang na yar tsaN+Da lI zhugs nas 'khor lo drug dang bcas pa'i rtsa stong phrag bdun cu rtsa gnyis dang /phung po dang / khams dang / skye mched dang / dbang po dang / las kyi dbang po dang / lam gyi dbang po'i bya ba la sogs pa thams cad ba sregs shing / med par byas nas bde ba dang bcas pa rang bzhin med par bsgom par bya'o/ /yang shes rab mas bsam pa ni/ /thabs kyi gsang ba rdo rje dung can ma nas pad+ma'i bya gdong ma'i dbus su zhugs nas yar zla ba'i rang bzhin bsil ba'i rlung a ba d+hU tI nas 'thon nas 'khor lo drug la sogs pa bsregs shing med par byas pa ni snga ma dang mthun no//de ltar thabs dang shes rab gnyis/ /gnyis su med pa'i bde ba de nyid la/ /dmigs shing sems gzung 'dzin gnyis dang bral nas/ bde ba de nyid la brten cing stong pa nyid dang snying rje dbyer mi phyed par gnyis su med par rnal 'byor pas bsgom pa ni chags pa'i lam pa'i zhi ba/lha'i gzugs su bsgom pa'o/ /chags pa'i lam pa'i rnal 'byor bshad zin to/ /da ni rtags rnams brjod par bya ste/ nyin mo'i rnal 'byor gyi rtags rnam pa drug ni gsang ba'i gsang ba yin te/bcom ldan 'das kyis ni sgyu 'phrul dra ba 'jam dpal glu'i le'ur gsungs so/ /de yang / nam mkha' las byung rang byung ba/ /shes rab ye shes me bo che/ /'od chen rnam par snang mdzad pa/ /ye shes 'od zer lha ma me ba/ / 'gro ba'i mar me ye shes sgron/ /gzi brjid chen po 'od gsal ba/ /rig pa'i rgyal po gsang sngags mchog /gsang sngags rgyal po don chen byed/ /ces gsungs so/ /nam mkha' las byung rang byung ba/ /shes rab ye shes me bo che/ /zhes pa ni sprin med pa'i nam mkha' la rnal 'byor pas bsgoms pas 'bar ba lta bur rnal 'byor pas mthong ba'o//'od chen rnam par snang mdzad pa/ /ye shes 'od zer lham me ba/ /zhes pa ni zla ba'i dkyil 'khor shar ba lta bur rnal 'byor pa rnams kyis mthong ba'o/ /'gro ba'i mar me zhes pa ni nyin mo'i dkyil 'khor ni 'gro ba rnams la mar me dang 'dra bas 'gro ba'i mar me'o//nyi ma'i dkyil 'khor shar ba lta bur rnal 'byor bas mthong ba'o/ /ye shes sgron zhes pa ni rdo rje'i sgra gcan sems rang gis rtogs pa ni rang gi ye shes snang bas na rang la sgron ma dang 'dra ste ye shes sgron ma dang /rnal 'byor pa rnams kyis 'ja' tshon lta bur mthong ba'o/ /gzi brjid chen po 'od gsal ba/ /zhes bya ba ni mchog gi cha ste glog lta bu yin te/ kha dog dmar po 'khyug pa myur bar snang zhing mi rtag par mthong ba'o//rig pa'i rgyal po gsang sngags mchog /ces pa ni thig le kha dog rnam lngar snang zhing shin tu cha phra bar rnal 'byor bas mthong ba'o/ /de ltar rtags dang mtshan ma bcu gcig rnal 'byor pas mthong ba ni bcu gcig slob dpon las thob cing / bzhi pa rnal 'byor pas nyams su myong zhing /nyams su blangs pas tshe 'di la 'bras bu sa bcu gcig thob par 'gyur zhes pa ni bcom ldan 'das kyis rgyud thams cad las kyang gsungs la/ dpal mchog gi dang po'i rgyud stong phrag bcu gnyis par bcom ldan 'das kyis 'di skad ces gsungs te/bum pa'i dbang bskur sa brgyad yin/ /gsang ba'i dbang bskur sa dgu pa/ /shes rab ye shes bcu yin te/ /bzhi pa bcu gcig sa par bshad/ /ces 'byung ngo / /de bzhin du yang dpal gsang ba 'dus pa'i rgyud phyi ma'i yang phyi mar ni/bcom ldan 'das kyis mtshan mo'i rnal 'byor gyi rtags lnga gsungs so/ /sgyu 'phrul dra ba 'jam dpal rdo rje'i glu'i le'ur ni/ bcom ldan 'das kyis nyin mo'i rnal 'byor rtags rnam pa drug gsungs so/ /gsang sngags rgyal po don chen byed/ /ces ba ni bum pa dang /snam bu dang / re lde la sogs pa thams cad kyi gzugs rnal 'byor ba'i yid kyi shes pa la mthong ba'o/ /de'i dbus su zhes pa ni thig le'i dbus su sangs rgyas kyi sku mtshan sum cu rtsa gnyis dang / dpe byad brgyad cus brgyan pa'i sku mthong ba de ni rnal 'byor ba des yid kyis yin gyi mig gis ni ma yin no//phyi nas mig gis kyang mthong la/ yid kyis kyang mthong bar 'gyur ro/ /yul dang rnam par bral zhes pa ni rdzas su med pas gzung zhing dpyad du med pa/ brtags ma yin pa'i longs spyod rdzogs pa'i sku dum rnal 'byor ba bdag nyid kyis zhal mthong bar 'gyur ro//des na rnal 'byor ba des sku'i sbyor bas mi shigs pa'i sgra dang nam mkha' la bdag nyid kyi rna bas chos kyi sgra thos par 'gyur ro/ /yang nam mkha'i dkyil na de bzhin gshegs pa rnams chos 'chad cing bzhugs pa'i sgra thos shing /mig gis kyang mthong bar 'gyur ro/ /de bzhin gshegs pa rnams nam mkha'i dkyil na nyan thos kyi 'khor bye ba brgya stong dang lhan cig tu 'gro ba'i don mdzad pa'i yul rnams mthong bar 'gyur ro//de ltar rnal 'byor bas gzugs su snang ba mthong ba ni rnal 'byor ba la sprul pa'i skur snang ba'o/ /sgrar rnal 'byor pa la snang ba ni longs spyod rdzogs pa'i skur 'gyur zhes bya ba'i don to/ /mig gis mthong ba ni chos kyi sku yin zhes bya ba'i don to/ /des ni phyi'i rtags bshad pa'o//da ni nang gi rtags brjod par bya ste/ 'dir ni nyin mo'i sbyor ba yis/ /chu 'dzin dang ni bral ba yi/ /nam mkha' brtan por ba lta ba yis/ /rnal 'byor pa yis 'grub par 'gyur/ /snga dro dang ni phyi dro yang / /thun gnyis su ni bsgom par bya/ /snga dro nyi ma rgyab phyogs te//phyi dro yang ni de bzhin no/ /dmigs pa brtan par rab bya zhing / /gzhan du na ni nyi ma yis/ /rab rib can du 'gyur bar bshad/ /de yi gnod pa bsal byas te/ /nyin zhag so sor lta ba'o/ /ji srid thig le'i nang du ni/ /ri mo nag po skra yi tshad//dri ma med pa'i 'od 'phro ba/ /dus kyi rdzas ni mthong ba yin/ /de mthong 'od gsal go 'phangs ni/ /rnal 'byor pa yis mthong bar 'gyur/ /de la tshig bcu gnyis ni sngar bstan pas go sla'o/ /ji srid thig le'i nang du ni/ /zhes bya ba ni lte bar zhu ba'i thig le'o//ri mo nag po zhes pa ni lte ba'i 'og sbun gu'i mtshams na/ don dam par byang chub kyi sems kha dog gnag pa mthong ba'o/ /skra'i tshad ces pa ni shin tu phra ba/ chos kyi dbyings kyi bdag nyid yin pas shin tu gnag pa'o/ /skra'i tshad tsam la sor gcig par gnas pa mthong bar 'gyur ro//ba thag brkyang ba lta bu'am/ dar dkar gyi skud pa brkyang ba lta bu mthong ba'o/ /dri ma med pa zhes pa ni lus dri ma med pa dang / ngag dri ma med pa dang / yid dri ma med pa dang / ye shes dri ma med par gyur bas na dri ma med pa'o//'od 'phro ba zhes pa ni shes pa shel sgong phyis pa ltar dngas shing gsal ba ni 'od 'phro ba'o/ /dus kyi zhes pa ni don dam pa byang chub kyi sems dang kun gzhi 'grogs nas chos kyi skur gyur pa'o/ /rdzas ni zhes pa ni kun rdzob byang chub kyi sems don dam pa la thim pa'o//mthong ba ni zhes pa ni don dam pa'i byang chub kyi sems 'byung ba bzhis ma bskyed pa'i gzhom du med pa lte ba'i 'og tu mthong ba'o/ /'og tu mthong ba'i sgras ni kun rdzob byang chub kyi sems smin mtshams su kha dog dkar po'i rnam par mthong ba'o/ /de mthong bas 'od gsal go 'phang ni//rnal 'byor ba yis mthong gyur ba'o/ /zhes bya ste/ de yang dbu ma'i rtsa a ba d+hU tIr yid chud pa'i rnal 'byor bas mthong ba yin te/ yid ma chud pa rnams kyis ni ma yin no/ /de ltar mthong ba'i rnal 'byor ba de ni rnam pa thams cad mkhyen pa'i sku des ni khams gsum ma lus pa skyu ru ra lag mthil du bzhag pa bzhin du thams cad sa ler mkhyen pa'o//chu nang nyi ltar rab snang ba/ /dri ma med pa'i sna tshogs mdog /rnam pa kun du rang gi sems/ /gzhan gyi sems min rang gi sems/ /rang gi sems yin bde pa nyid//gzhan gyi sems min bde ba yin/ /yul dang rnam par bral ba yin/ /rang bde yid kyi nyams myong ba/ /gzhan gyi sems bde chen po'i phyir/ /bde ba bstan du mi btub bo/ /zhes 'byung ngo / /'dir dang po rang gi sems kyi snang ba'i de bzhin gshegs pa'i sha'i mig gis dpag tshad stong mthong bar 'gyur ro//lha'i mig gis dpag tshad nyis stong mthong bar 'gyur ro/ /de bzhin du sangs rgyas kyi spyan rnam par dag pas dpag tshad stong mthong bar 'gyur ro/ /de bzhin du chos yang dag par sdud par spyan lnga bcom ldan 'das kyis gsungs so/ /de rnams kyang 'di lta ste/rim pa bzhin du sha'i spyan dang / lha'i spyan dang / sangs rgyas kyi spyan dang / shes rab kyi spyan dang / ye shes kyi spyan rnams rnal 'byor bas sems a ba d+hU tIr btsud cing bsgoms pa'i stobs kyis 'byung bar 'gyur ro/ /de nas thams cad mkhyen pas ma gzigs pa dang /ma mkhyen pa cung zad kyang med do/ /de ltar rnal 'byor bas srog gi rlung zhes pa ni dbugs nyi khri chig stong drug brgya bdun cu rtsa lnga dbu mar tshud nas/ sna bug g.yon pa dang g.yas pa la rnal 'byor ba rnams la mi rgyun/ phyag rgya chen po'i rnal 'byor ba bsgoms pa'i stobs kyis dbugs brgyad brgya rnal 'byor bas 'gog par 'gyur ro//de ltar rnal 'byor bas 'gog na ni sa dang po thob par 'gyur ro/ /de la ye shes dang 'bras bu ni sha'i spyan rnam par dag pa thob/ mthong ba ni phyogs bcu'i 'jig rten gyi khams gcig mthong bar 'gyur ro//'pho ba gnyis pa 'gog pas sa gnyis pa thob ste/ phyogs bcu'i 'jigs rten gyi khams gnyis tshun chad mthong bar 'gyur ro/ /'pho ba gsum pa 'gog pas sa gsum lha'i spyan rnam par dag pa mi las 'das pa sa gsum pa thob par 'gyur te/ phyogs bcu'i 'jig rten gyi khams gsum mthong bar 'gyur ro/ /'pho ba bzhi pa 'gog pas sa bzhi pa thob par 'gyur te/ phyogs bcu'i 'jig rten gyi khams brgyad tshun chad mthong bar 'gyur ro/ /'pho ba lnga pa 'gog pas sa lnga pa sangs rgyas kyi spyan rnam par dag pa mi las 'das pa thob par 'gyur te/phyogs bcu'i 'jig rten gyi khams bcu drug mthong bar 'gyur ro/ /'pho ba drug pa srog gi rlung khri brgyad brgya sum cu rtsa phyed dang brgyad 'gog par 'gyur na ni/ sa drug pa thob pas phyogs bcu'i 'jig rten gyi khams sum cu rtsa gnyis mthong bar 'gyur ro//'pho ba bdun pa'i srog gi rlung 'grogs pas ni sa bdun pa thob par 'gyur ro/ /phyogs bcu'i 'jig rten gyi khams drug cu rtsa bzhi'i tshun chad mthong bar 'gyur te/ sa de rnams thob ces pa ni byis pa rnams gzhug pa'i phyir ro/ /dbang thob yang byis pa so so'i skye bo rnams gzhug pa'i phyir yin no//yang dag pa'i don ni ma yin no/ /de yang bshad na chu dang cod pan gnyis kyis sku'i zhal nas dbang bskur bas lus kyi sgrib pa dag par byas nas sa gnyis par lung bstan to/ /dar dpyangs dang rdo rje dril bu gnyis kyis gsung gi zhal nas dbang bskur bas ngag gi sgrib pa dag par byas nas sa bzhi pa thob par 'gyur ro//brtul zhugs dad ming gi dbang thugs kyi zhal nas bskur bas ni yid kyi sgrib pa dag par byas nas sa drug pa thob par 'gyur ro/ /slob dpon du gnang ba ni ye shes kyi zhal nas dbang bskur bas ni ye shes kyi sgrib pa dag par byas nas sa bdun par lung bstan zhing thob par 'gyur zhes bya ba ni 'jig rten kun rdzob tu byis pa rnams gzhug pa'i phyir yin no//'pho ba brgyad pa'i srog gi rlung 'gog pas kyang sa brgyad pa thob la/ bum pa'i dbang bskur ba thob pas kyang sa brgyad pa thob par 'gyur ro//sa brgyad pa thob pa'i mngon par shes pa ni shes rab kyi spyan gyi rnam par dag pa mi'i las 'das pa phyir mi ldog pa'i sa thob pas ni phyogs bcu'i 'jigs rten gyi khams brgya nyi shu rtsa brgyad kyi mtha' tshun chad 'thob par 'gyur ro//'pho ba dgu pa'i srog gi rlung rgyu ba 'gog pas sa dgu pa thob la/ gsang ba'i dbang bskur ba thob pas kyang sa dgu pa thob par 'gyur ro/ /mngon par shes pa las ni shes rab kyi spyan rnam par dag pa thob pas/ phyogs bcu'i 'jig rten gyi khams nyis brgya lnga bcu rtsa drug gi mtha' tshun chad mthong bar 'gyur ro//'pho ba bcu pa'i srog gi rlung rgyu ba 'gog pas sa bcu pa thob cing / shes rab ye shes kyi dbang bskur ba thob pas kyang sa bcu pa ni 'jam pa'i rdo rje dang mtshungs te/ mngon par shes pa ni ye shes kyi spyan rnam par dag pa mi las 'das pa thob ste/phyogs bcu'i 'jig rten gyi khams lnga brgya dang bcu gnyis kyi mtha' tshun chad mthong bar 'gyur ro/ /'pho ba bcu gcig pa'i srog gi rlung rgyu ba 'gog pas bcu gcig pa thob la/ dbang bzhi pa 'jig rten las 'das pa'i dbang thob pas kyang sa bcu gcig sangs rgyas kyis ste sgrib pa gsum spangs pa'o//mngon par shes pa las ye shes kyi spyan lnga thob la/ phyogs bcu'i 'jig rten gyi khams stong phrag gcig dang / nyi shu rtsa bzhi'i mtha' tshun chad mthong bar 'gyur ro/ /'pho bcu gnyis pa srog gi rlung rgyu ba nyi khri chig stong chen po'i 'jig rten drug brgya bdun cu rtsa lnga'i srog gi rlung gtsug tor gyi 'khor lo 'gog na ni/sa bcu gsum pa tshe 'di nyid kho nar dngos su brnyes te rdo rje 'chang gis thob pa ni de bzhin du stong spyi phud kyi 'jig rten gyi khams dang / stong gnyis pa bar ma'i 'jig rten gyi khams dang / stong gsum gyi stong chen po'i 'jig rten gyi khams dang gzhan yang 'jig rten gyi khams gang gA'i klung gi bye ma snyed kyi grangs dpag tu med pa dang /brjod kyis mi lang ba rnams mthong ba ni ye shes kyi spyan mnga' bas mthong bar 'gyur ro/ /stong chung ngu zhes pa ni 'jig rten gyi khams chen po'i khongs su chud pas ni/'dir bshad kyang grub pa las la sgrub pa'i skyon du 'gyur bas 'dir ma smos so/ /des ni nang gi rtags rnams bshad zin to/ /da ni sna tshogs gzugs kyi mtshan nyid brjod par bya ste/ sa zhes bya ba la sogs pa la 'dir stong pa nyid kyi snang ba ni sa'i rnam par mthong yang sra ba ni ma yin te/rdzas su med pa'i phyir/ zhu ba chu'i lus su snang ba yin yang chu min te/ 'jug pa med pa'i phyir/ smig rgyu'i chu bzhin no/ /de ltar me'i rnam par snang yang me ma yin te/ sreg pa med pa'i phyir ro/ /g.yo ba rlung gi lus 'dra yang rlung ni min no/ / gang g.yo ba'i rdzas su med pa'i phyir ro/ /rdzas su med pa'i phyir stong pa'i rnam pa yin yang mthong ste zhes pa ni sgyu ma'i grong khyer bzhin du'o/ /dkar po la sogs pa'i kha dog dang ldan yang kha dog kyang ma yin te/ rdzas su med pa'i phyir ro/ /rnam pa kun du ldan yang thams cad du byis pa rnams kyis ma mthong ngo //de gang gi phyir zhe na/ nyon mongs bdud kyi stobs kyi mthus zhes pa ni g.yon pa dang g.yas pa'i rtsar srog kun du spyod pa'i phyir nges pa'o/ /da ni mthar thug pa'i don brjod par bya ste/ sku mthong ni nyin mtshan re/ /dus su srog gi rlung dag ni/ /rnal 'byor thar pa 'dod pa yis//'gag pa ru ni rab tu bya/ /zhes pa ni bum pa can no/ /sku mthong nas ni zhes pa ni stong pa nyid rnam par mi rtog pa dngos po thams cad spangs pa bsgoms pa'i longs spyod rdzogs pa'i sku mthong ngo / /nyin mtshan re zhes pa ni rnal 'byor bas bya ba thams cad spangs nas rnal 'byor bsgom pa'o//dus su zhes pa ni thun brgyad du byas pa'i dus ma yol ba'o/ /srog gi rlung zhes bya ba ni g.yon pa dang g.yas pa la mi rgyu bar srog dbu ma la rgyu ba'o/ /dag ni zhes pa ni a ba d+hU tI ni dag pa'i rang bzhin can no/ /'gag pa ru ni zhes pa ni lte ba'i 'og tu rtsa gsum 'dom pa'i gnas gsang ba bde ba bskyed pa'i nus pa yod pa can du/yi ge k+Sha'am a shad lta bus kun rdzob byang chub kyi sems dang shes pa thur du 'gror mi ster bar 'gag go/ /gtsug tor gyi 'khor lo'i dbus su ni nam mkha'i gdong can ma'i khar ni yi ge haM mgo thur du bstan pas 'gag cing / /dbus ma'i rtsa a ba d+hU tI nag por gnas pa'i nang du ye shes kyi dar dmar po'i rgyun dang 'dra ba'i bdag nyid de dang /kun gzhi'i rnam par shes pa 'dres nas yar 'gro ba ni yi ge haM gis 'gog par byed cing phyir mi 'byin to/ /haM zhu bas 'gog pa yin te/ ma zhu bas ma yin la/ haM bri ba yang med/ 'phel ba yang med do/ /de bzhin du 'og tu 'gro ba ni yi ge k+Sha sa 'gog pa'i phyir mi thar bar yar breng mar breng gnas pa ni khams bde ba'i rtsa lta bu'am/pi wang gi rgyud sbreng ba lta bur gnas byed par bsam pa ni dbu mar yid gzung ba'i bla ma'i gdams ngag go/ /rab tu bya zhes pa ni rnal 'byor bas yang nas yang 'bad pas bya zhes pa'i don to zhes bya ba ni rnal 'byor ba'i don to//bum pa zhes bya ba ni gsang ba'i pad+ma'i sna rtse dang / bya gdong ma dang / lte ba'i AHdang / snying ga'i hUM dang / lkog ma'i oM dang / dpral ba'i ho dang / gtsug tor gyi 'khor lo'i haM rnams ni bum pa'o/ /can zhes pa ni kun rdzob byang chub kyi sems thig le'i rang bzhin gyi dga' ba dang /mchog gi dga' ba dang / sna tshogs kyi dga' ba dang / lhan cig skyes pa'i dga' bas 'khor lo drug tu khyab cing bde bas lus thams cad tshim par byed pa can no/ /ji srid du ni 'khor bzhin ma/ /rang gi lus la yongs bskor ba/ /'od zer 'khor los mthong 'gyur ba/ /sngon gsungs sku la rang gi yin//des ni zla drug reg spangs bde/ /thabs dang shes rab snyoms 'jug bral ba'o/ /zhes 'byung ba'o/ /ji srid ces ni sgom pa'i dus su rnal 'byor ba la 'byung ba'o/ /'khor bzhin ma zhes pa ni 'khor lo ltar 'khor bar snang ba'o/ /rang gi lus la zhes pa ni rnal 'byor pa bdag nyid mnyam par gzhag pa'i dus su yang khyad par can du 'gyur par/yongs 'khor ba zhes pa ni lus thams cad la gnas phyogs nas bskor bar mthong ba'o/ /'od zer 'khor lo mthong 'gyur ba/ /zhes pa ni 'od dkar po skya rengs shar ba lta bus bdag nyid la bskor ba mthong ba'o/ /sngon gsungs pa'i sku la zhes pa ni sna tshogs kyis dus su mthong ba'i sku'o//des ni zla ba drug reg ces pa ni srog gi rlung zla ba drug gi bar du gnyis log rtsa lag pas mi drag pa tsam du mnan cing bkag na/ mi 'pho ba'i bde ba'i dbang bo gnyis kyi spros pa las byung ba'i bde ba bcu drug char yang mi phod pa'i bde ba skye bar 'gyur zhes bya ba'i don to/ / spangs shing bde zhes pa ni las kyi phyag rgya dang / ye shes kyi phyag rgya spangs pa'i phyag rgya chen po bsgom pa'i bde ba yin zhes pa'i don to/ /spangs zhes pa ni sdug bsngal dang bcas pa'i bsrub pa dang / g.yo ba la sogs pa'i bde ba spangs pa'o/ /bde bar 'gyur zhes pa ni phan tshun du thabs dang shes rab gnyis mi 'pho ba'i bde ba ni mi 'dzag pa'i bde ba 'khor bar skye ba'i rgyu med pas ni mi 'dzag pa'i bde ba'i zhes pa ni de bzhin gshegs pas gsungs so//da ni rnal 'byor nye bar sdud pa brjod par bya ste/ dbus su srog ces pa la sogs pa la/ 'dir dang por rnal 'byor ba yis dbus su zhes pa ni a ba d+hU tI la srog ni bcug par byas na mtshan ma gang zhig mthong bar 'gyur ro//dpal ldan bla ma zhes pa ni sangs rgyas kyi rang gi sku'i rdo rje gcig pur brjod do/ /de nas nyi mar bcas song ba/ /zhes pa ni g.yas par bgrod pa dang bcas pa'o/ /zla bar bcas song ba zhes pa ni g.yon pa'i rtsar 'gro ba'o/ /g.yas dang g.yon ni bcing bar bya/ /zhes pa ni g.yas pa dang g.yon par srog 'gro ba dbus mar bcing bar bya ba'i nges pa yin zhing /srog sdud pa na gnyis pa gsung gi rdo rje'o/ /phyag rgya la ni sbyor ba'i sems/ /zhes pa ni gzugs la rjes su chags pa'i byang chub kyi sems zhu ba ste/ gsum pa thugs kyi rdo rje'o/ /mchog gi bde ba gnas pa dang / /rdo rje kun du blang ba'o zhes bya'o//de nas gzugs kyi sgo yis dga' bar ma gyur pa de lta na ni pad+mar rdo rje'i sgra yang bya zhes ni skad cig gis bya'o/ /de yang shes rab ma rnyed pa de lta na ni rang gi lag pa chu skyes te/ bde ba'i rgyu ru gsor bar bya zhes pa ni bde bar 'phel ba'i don du bya yis ltung ba'i phyir ni ma yin no//de ltar/ sa bon mi gtong ba bde ba/ /'chi ba yi ni 'jigs 'joms pa/ /'di ni dpal ldan bla ma'i zhal/ /zhes pa ni bzhi pa ye shes kyi rdo rje de nyid do zhes bya ba ste rnal 'byor goms pa'i nges pa'o/ /da ni sdom brtson 'bras bu brjod par bya ste/ lam gyi sems shes pa ni thabs dang shes rab gnyis su med pa'i lam ni sems shes pa'o//stong pa nyid kyi gzugs kyi zhes pa ni thabs dang shes rab gnyis gcig phan tshun stong pa nyid du bsgom pa ni stong pa nyid kyi gzugs su bsgom pa'o/ /sdom brtson zhes pa las dang po pa'i dge slong rdo rje 'dzin pa dang / dge tshul rdo rje 'dzin pa dang / dge slong ma rdo rje 'dzin pa dang / dge tshul ma rdo rje 'dzin pa rnams ni sdom brtson no//de'i phyir tshangs par spyod pa la gnas pa rnams kyis bya ba thams cad gsang nas bya zhes bya ba'i don to/ /rnams kyi shes pa ni tshangs par spyod pa'i dge bsnyen dang / dge bsnyen ma dang / bsnyen gnas yan lag brgyad la gnas pa'i dge bsnyen pho mo rnams la ni dam tshig 'di rnams sbyin par bya'o//so so'i skye bo khyim pa rnams la ni sbyin par bya ba ma yin te/ de ci'i phyir zhe na/ khyim pa rnams ni bya ba mang bas sgrub par byed pa'i gus pa dang mi ldan te/ des na dam pa'i chos la mi gus pa'i rgyur gyur zhing dam pa'i chos spong ba'i rgyu bsags pas sems can dmyal bar ltung bar 'gyur ba'i las sogs so//des na khyim pa rnams la ni mi bstan zhes 'byung ngo / /de la dge slong la sogs pa tshangs par spyod pa la gnas pa rnams ni 'jig rten pa'i bya ba kha na ma thob pa'i las kyi bya ba zhing las dang nyo tshong ba la sogs pa spangs shing / dam pa'i chos lhur len par byed pa dang / de bzhin gshegs pa'i bka' la yid ches pas bka' sun mi 'byin pa dang /dge slong la sogs pa tshangs par spyod pa la gnas pa rnams la bstan par bya'o/ /mtshan yang dag par brjod pa'i chos kyi dbyings kyi bstod par bcom ldan 'das kyis gsungs pa/ gnas brtan rgan po skye dgu'i bdag /sum cu rtsa gnyis mtshan 'chang ba//sdu gu 'jig rten gsum na mdzes/ /zhes gsungs so/ /yang de nyid las/ phyir mi ldog pa phyir mi 'ong / /'dren pa rang rgyal ba se ru'i tshul/ /nges 'byung sna tshogs las byung ba/ /'byung ba chen po rgyu gcig po/ /dge slong dgra bcom zag pa zad/ /'dod chags bral pas dbang po thul/ /bde ba rnyed pas 'jig med thob//bsil bar gyur pas rnyog pa med/ /ces 'byung ngo / /me long lta bu'i bstod pa las/ /mgo zlum brtul zhugs chen po pa/ /tshangs par spyod pa brtul zhugs mchog /dka' thub mthar phyin dka' thub che/ /gtsang gnas dam pa gau ta ma/ /bram ze tshangs pa tshangs pa shes/ /mya ngan 'das pa tshangs pa thob/ /grol pa thar pa rnam grol lus//rnam grol zhi ba zhi ba nyid/ /ces bya ba ste slob dpon gyi dbang gi dus su bya'o/ /yang de nyid las/ chags bral lus las 'das pa'o/ /thub pa med pa dpe med pa/ /mi mngon mi snang gsal byed min/ /mi 'gyur kun 'gro khyab pa po/ /sa bon bral zhing zag pa med/ /rdul med rdul bral dri ma med//nyes pa spangs pa skyon med pa/ /shin tu sad pa sad pa'i bdag /kun shes kun rig dam pa po/ /rnam par shes pa chos nyid 'das/ /ye shes gnyis med tshul 'chang ba/ /rnam par rtog med lhun gyis grub/ /ces 'byung ngo / /de nas dge slong la sogs pa sdom brtson rnams kho na la shes rab ye shes kyi dbang bskur ba yin/khyim pa rnams la ni ma yin no/ /de'ang bshad par bya ste/ yon tan yar ldan gyi dbang du byas nas ni sdom pa brtson zhes pa ni so sor thar pa'i sdom pa dang ldan pa ni sdom brtson zhes bya'o/ /so sor thar pa'i sdom pa ni byang chub tu sems bskyed pa'i dus su byang chub sems dpa'i sdom par 'gyur ro/ /byang chub sems dpa'i sdom pa ni gsang sngags kyi dam tshig tu 'gyur ro//gsang sngags kyi dam tshig ni de bzhin gshegs pa'i dam tshig tu 'gyur ro/ /de bzhin gshegs pa'i dam tshig ni zag pa med pa ste/ 'pho ba med pa'o/ /des na 'pho ba med pa'i ting nge 'dzin de bzhin gshegs pa dang khyad par med do/ /de ci'i phyir zhe na/ /dngos po la reg pa med pas nyes par mi 'gyur ro//zhig ce na mi 'pho ba'i phyir ro/ /de yang skad cig ma gcig mngon par rdzogs par byang chub pa'i rnal 'byor gyi mtshan nyid kyis rang bzhin gyis rtog pa'i skad cig ma la/ chags bral dang po chags pa che/ /zhes 'byung ste/ chags bral thog ma mtha'/ /zhes 'byung ba ni skad cig ma bco lnga dang /bcu drug ma byung ba'i bar ni skad cig ma'o/ /chags pa zhes pa ni dkar po'i phyogs tshes gcig nas brtsams pa'i nya'o/ /de'i mthar song ba ni bcu drug pa'i dbang po skad cig ma'i cha'i mtshan nyid zhugs pa'o/ /chags bral zhes pa ni nag po'i phyogs kyi skad cig ma gnyis pa la zhugs pa'o//de'i chags bral dang por song ba ni nag po'i phyogs la ma zhugs pa de ni mngon par rdzogs par byang chub pa'i mtshan nyid kun dang mnyam par sbyor ba'i gsal ba rang la skyes pa shes pa ma bcos pa'i dad la gnas pa'i dpe bzhi pas mtshon pa'i dus kyi mtshan nyid kyi skad cig ma ni de nyid las dbugs kyi grangs 'phel bar 'gyur ba ni nyi khri chig stong drug brgya bdun cu rtsa lnga'i grangs so//de yang gsang ba'i rdo rje'i nor bu'i rtse mo nas gsang ba'i gnas su dbugs sum stong drug brgya'i skad cig ma'i bde ba la sems gtad cing yar 'thon nas bde ba 'phel bar byed pa ni de'i grangs kyis srog gi rlung bkag pas gsang ba'i gnas byang chub kyi sems kyis gang ba ni sa dang po'o//gsang ba'i pad+mar thig le bzhi phyin nas rnal 'byor des ni sa gnyis pa thob par 'gyur ro/ /de bzhin du shes rab kyi chags pas bzhu ba'i bde ba de la brten nas/ lte bar srog gi rlung su ma stong drug brgya'i skad cig ma la sems gtad cing yar 'then nas bde ba 'phel bar byed pas ni sa bzhi pa thob par 'gyur ro//yang snying gar shes rab kyi chags pas zhu ba'i bde ba de la sems gtad cing brten nas/ srog gi rlung grangs sum stong drug brgya'i skad cig ma la dmigs shing yar 'then nas bde ba 'phel bar byas te/ shes rab kyi pad+mar 'phros pas ni sa drug pa thob par 'gyur ro//de bzhin du yang mgrin par srog gi rlung sum stong drug brgya'i skad cig ma'i bde ba 'phel bar byed cing / yar 'then nas shes rab kyi pad+mar phyir 'phro bar byed pas ni sa brgyad pa thob par 'gyur ro/ /yang de bzhin du dpral bar srog gi rlung sum stong drug brgya'i skad cig ma la sems gtad cing /bde ba 'phel bar byed pa nis bcu ba thob par 'gyur ro/ /de bzhin du gtsug tor gyi 'khor lo'i 'dab ma bzhi'i thig le rnams la sems gtad cing srog gi rlung nyi khri chig stong drug brgya'i dbugs rnams thams cad der 'gog cing bde ba thams cad de ru bskyed cing rtsa stong phrag bdun cu rtsa gnyis bde ba'i ros rgyas shing bde ba 'phel bar byed pas ni sa bcu gnyis thob par 'gyur ro//de ni mdoms kyi sba ba sbubs su nub pa zhes bya ba yin te/ gtsug tor bltar mi snang ba zhes pa ni/ bde ba thams cad der bskyed cing des rgyas pas na gtsug tor bltar mi snang ba zhes bya'o/ /steng nas 'bar ba'i bar du ni shes pa la de yang bcom ldan 'das kyis bka' stsal pa/oM D+DA nas ni 'bar ba'i bar/ /thig le bzhi ni bzhu pa yis/ /gsang ba'i bar du 'ongs pa ste/ /bzhi pa de bzhin skyed pa yin/ /zhes rgyud las 'byung ngo / /oM D+DA zhes pa ni gtsug tor gyi 'khor lo'i 'dab ma bzhi pa'o/ /nas ni zhes pa ni dpral ba nas snying gar brgyud cing bde ba skyed par byed pa'o//'bar ba'i bar zhes pa ni lte ba'i a dmar po la bde ba skyed pa'i thig le bzhi zhes pa ni lus kyi thig le dang ngag gi thig le dang / yid kyi thig le dang / ye shes kyi thig le gnas pa'i/ /bzhu ba zhes pa ni shes rab kyi chags pas bzhu ba yis pad+ma nas 'bar bas lus bzhu pa dang / ngag bzhu ba dang /yid bzhu ba dang / ye shes bzhu ba'o/ /ye shes pa ni thabs dang shes rab gnyis snyoms par 'jug pa'i dus su dmigs pa'i yul khyad par can gyi rnal 'byor pa dang / rnal 'byor ma rnams kyis bsgoms pa'i stobs kyis so/ /gsang ba'i zhes pa ni rtsa gsum 'dus pa'i sum mdor a ba d+hU tI'i rtse mor ro//'ongs zhes pa ni sku'i thig le longs spyod pas bde ba skyed pa dang / gsung gi thig le 'ongs pas bde ba khyad par can skyed pa dang / yid kyi thig le 'ongs pas rtsa thams cad rgyas nas bde ba skyed pa dang / ye shes kyi thig le 'ongs nas lus thams cad bde ba byed cing ba spu'i gseb thams cad sim par byed cing bde ba skyed pa'o//bzhi pa zhes pa ni sems gang du yang mi g.yo ba'i ting nge 'dzin bya btsal thams cad dang bral ba'i sems gnyug mar gnas pa shes pa gang gis kyang ma bcing ba/ rkyen dang ma phrad pa dang gsal bar gnas pa de ni dpe'i bzhi pas mtshon pa'i yang dag pa'i bzhi pa ste/ sangs rgyas nyag gcig gi spyod yul du gyur pa'o//rnal 'byor ba rnams ni dpes mtshon nas bzhi pa rnyed pa'o/ /de bzhin zhes pa ni rnal 'byor pa bla ma'i man ngag rnyed pa rnams ni grol ba'i rgyur 'gyur zhing ting nge 'dzin brtan par 'gyur ro/ /bla ma'i man ngag gis ma zin pa rnams ni ting nge 'dzin gyi rgyur mi 'gyur la/ dug gsum slar bskyed de ngan song du lhung zhing 'khor ba'i rgyu bsags nas 'bras bu sems can dmyal bar 'gro bar 'gyur ro//gal te 'dod chags la sogs pa la longs spyod nas grol ba la sogs pa'i rgyur 'gyur zhing bla na med pa'i byang chub mthong ni/ dud 'gro'i rigs khyi dang / phag dang / bong bu la sogs pa dang / 'phyon ma rnams kyis kyang 'dod chags la longs spyod pas grol nas byang chub thob cing sangs rgyas par rigs te/de rnams kyis ni 'grol ba'i rgyur mi'i 'gyur te 'ching ba'i rgyur 'gyur zhing 'bras bu sems can dmyal bar lhung zhing sreg pa dang / 'tshed pa'i sdug bsngal myong bar 'gyur ro/ /de nas bla ma'i gdams ngag la shin tu yang gal che ste btsal bar bya'o//de yang 'di skad ces 'byung ste/ slob dpon gyis ni sdug bsngal gyi/ /rgya mtsho che las pha rol sgrol/ /yang na shin tu khyad par can/ /de dag de ni bla mar dbul/ /des na bla ma mnyes bya ste/ /zhes 'byung ngo / /bskyed pa zhes pa ni bla ma'i man ngag ji lta ba bzhin du gtum mo me'i rnam pa gsang ba'i dkyil 'khor nas bskyed nas phung po dang /khams dang skye mched dang dbang po dang las dang / las kyi dbang po'i bya ba ste/ drug drug gsum cu rtsa drug la sogs pa lus dang ngag dang yid dang ye shes kyi rang bzhin du ming du btags pa thabs shes rab kyi chags pas spros pa'i mes bsregs pas na bskyed pa'o//yis zhes pa ni rnal 'byor pa dang / rnal 'byor ma rtags rnams kyis gyis shig dang / ting nge 'dzin rtogs par 'gyur zhes bya ba'i don to/ /'byung zhes pa ni dga' ba'i dga' ba dang / dga' ba'i mchog gi dga' ba dang / dga' ba'i sna tshogs dga' ba dang / dga' ba'i lhan cig skyes pa'i dga' ba ni longs spyod kyi 'khor lor yongs su rdzogs so//de'i gnyen po 'byung ba ni sku'i sku dang / sku'i gsung dang / sku'i thugs dang / sku'i ye shes rnams so/ /mchog gi dga' ba zhes pa ni longs spyod kyi 'khor lo nas snying ga chos kyi 'khor lo'i bar du mchog gi dga' ba'i dga' ba dang / mchog gi dga' ba'i mchog dga' dang /mchog gi sna tshogs dga' ba dang / mchog gi lhan cig skyes pa'i dga' ba rnams ni der bde ba bskyed pa'o/ /de'i gnyen po ni gsung gi sku dang / gsung gi gsung dang / gsung gi thugs dang / gsung gi ye shes rnams so/ /chos kyi 'khor lo nas sprul pa'i 'khor lo'i lte bar ni sna tshogs dga' ba dang / sna tshogs dga' ba'i mchog dga' dang /sna tshogs dga' ba'i dag 'bral dang / sna tshogs dga' ba'i lhan cig skyes pa'i dga' bas bde ba bskyed pa'o/ /de'i gnyen po ni thugs kyi sku dang // thugs kyi thugs dang / thugs kyi ye shes rnams so/ /lte ba nas rdo rje nor bu'i rtse mor ni lhan cig skyes pa'i dga' ba'i dga' ba dang lhan cig skyes ba'i mchog dga' dang /lhan cig skyes pa'i sna tshogs dga' ba dang / lhan cig skyes pa'i dga' bas bde ba bskyed pa'o/ /de'i gnyen po ni ye shes kyi sku dang / ye shes kyi gsung dang / ye shes kyi thugs dang / ye shes kyi ye shes kyi rnams so/ /de ni zhes pa ni gtsug tor gyi 'khor lo nas lus dang ngag yid dang ye shes kyi rang bzhin sa dang chu dang me dang rlung bzhis bskyed pa'i thig le bzhi dra ba'i nang nas 'og tu rtsa bzhi nas mar la 'bab par 'gyur ro//yang gi sgras ni dga' ba re re la yang dga' ba bcu drug 'byung ba ni 'khor lo drug gi rtsa rnams gtso bor byas nas rtsa stong phrag bdun cu rtsa gnyis dang / ba spu'i bu ga dang so dang sen mo dang / skra'i gnas thams cad la yang dga' ba re re skyes pas kyang de dag thams cad du longs spyod cing bde ba bskyed ces bya ba'i don to//mi 'pho zhes pa ni rdo rje nor bu'i rtse mo nas phyir log pa'i bde ba mi 'bab pa ni lhan cig skyes pa'i mi 'pho ba zhes brjod do/ /de ltar 'khor lo drug tu longs spyod cing bde ba de la mi chags shing mi zhen pa'i sdom brtson rnams ni dge slong rdo rje 'dzin pa la sogs pas brtul zhugs 'di 'dzin cing bsgrub par bya'o//sdom brtson bshad zin to/ /thabs dang shes rab gnyis dag ni/ /gnyis su med pas snyoms 'jug pas/ /bde ba 'phel bar zhes pa ni lus kyi bde ba dang / ngag gi bde ba dang / sems kyi bde ba dang / ye shes kyi bde ba'i thig le'i gzugs kyi dpral ba nas 'ongs pa bde ba de nyams su myong ba dang /kun rdzob byang chub kyi sems so/ /rab tu bya zhes pa ni steng du bzlog pas 'gro ba'o/ /bla ma'i nges pa'i gdams ngag gi dbang gis shes pa ni sngar brjod pa'i srog gi rlung bkag pa las mchog tu dga' ba dang / lhan cig skyes dbus shes pa ni lus thams cad la ber ba langs pa'am/bshang ba'i lam g.ya' ba'am/ shes rab thams cad rmongs pa'am/ myos pa'i dus der ni lte bar bde bskyed pa'o/ /rmi lam dang ni brgyal ba'i mtshams zhes pa ni gnyid log pa dang / brgyal ba lta bu'i bde ba skyes pa ni snying gar bde ba skyes pa'o/ /ye shes dang ni rnam shes dbus su yang zhes pa ni mgrin par bde ba skyes pa'o//rnal 'byor pa rnams dpral ba'i bar du bde ba skyes par byed pa ni 'dir ni ngo mtshar gzhan med/ /de bzhin du yang brjod pa/ nyon mongs bdud rnams bcom nas ni/ /rgyal ba'i bdag po rnams 'jug ni/ /g.yon dang g.yas su song ba yi/ /srog rnams dang du bkag nas ni/ /stong nyid sku la ye shes rab 'jug pa/ / a ba d+hU tIr btsud nas de bde ba/ /rnal 'byor rnams kyi mchog gi 'khor lo'i sbyor bas so/ /de nas rnal 'byor pas bum pa can gyis bde ba can gyis bde ba chen po'i skad cig ma'i bde bskyed cing dmigs pa dang / de nas bde ba 'phel bar yang na yang du rnal 'byor pa'am/ rnal 'byor ma rtags kyis bya zhes pa ni rgyud thams cad kyi bka'i don yang de yin la/ dpal mchog gi dang po'i 'grel ba dri ma med pa'i 'od du yang byang chub sems dpa'i pad+ma dkar pos kyang de skad bshad do//bcom ldan 'das kyi bka' ni thog mar yang dge ba'o/ /bar du yang dge ba'o/ /tha mar yang dge ba'o/ /thog mar yang dge ba zhes pa gzhom du med pa dang kun gzhi rnam par shes pa gnyis lhan cig mnyam du bud med rnams kyi skye gnas su zhugs pas na lhan cig skyes pa'o//de ni thog mar yang dge ba'o/ /bar du yang dge zhes pa ni ji srid gnas pa de srid du kun gzhi rnam par shes pa dang / bde ba gnyis mnyam du gnas shing mi phyed pas na lhan cig skyes par brjod de/ de ni bar du yang dge ba'o/ /tha mar yang dge ba zhes pa ni rnal 'byor pa rnams 'chi ba'i dus kyi tshe na yang kun gzhi rnam par shes pa dang /don dam pa byang chub kyi sems gzhom du med pa gnyis lhan cig tu 'grogs nas rtsa dbu ma nas yar zhugs nas tshangs pa'i bu ga nas phyir rdo rje sems dpa' bsam zhing des dbang bskur nas chos kyi skur gyur pa yang lhan cig skyes pa'o// /de ni tha mar yang dge ba'o/ /de nas bcom ldan 'das kyi bka' la spyad par gyis shig pa'o zhes bya ba'i don to//rnal 'byor a ba d+hU tI bdag gi sa ni/ /rgyal 'grel di ma med pa la brten nas/ /sbas pa'i mig 'byed 'grel pa 'di byas la/ /'gro ba dmus long mig dang ldan par shog /mi ldan nas thob bcu drug pa de ldan shig /sa thong chos dang longs spyod sku thob shog /bsod nams dri med bdag gis gang thob des//bdag nyid mi 'gyur ting nge 'dzin thob par shog /sbyor ba yan lag drug gi 'grel pa sbas pa'i mig 'byed ces bya ba slob dpon A ba d+hU tI pas mdzad ba rdzogs so/ /rgya gar gyi mkhan po dge slong zla ba grags pas bsgyur zhing zhus te gtan la phab pa'o// //

CLOSE WINDOW