CLOSE WINDOW

D1364
བོད་ཡིག

/ @##/ /rgya gar skad du/ /Sha DaM g.yo ga nA ma/ bod skad du/ sbyor ba yan lag drug pa zhes bya ba/ gsang ba pa'i bdag po phyag na rdo rje la phyag 'tshal lo/ /de la 'dir thabs ni yan lag drug gi rnal 'byor te/ 'dir bar ma rim pa las bzlog pas bstan cing nang gi yan lag re re dor ba snga ma ma bstan pa'i yan lag phyi ma bstan pa'i shugs nyid kyis rtogs par bya ste/dper na 'di ni nyin spyod ces brjod pas gzhan mtshan spyod ces bya ba ma brjod kyang shugs nyid kyis nye bar dmigs par 'gyur ro/ /de bzhin du yang gang zhig phan tshun ltos pa'i chos ni ma bstan pa yang bstan pa'i chos kyis nye bar rtogs so//de'i phyir rgyud 'dir yan lag re re'i khongs su gtogs pa'i yan lag gsum bstan to/ /bar du bshad pa'i yan lag dang por bya ba ni 'dir bla ma'i man ngag ste/ gzhan du na gang gi tshe rgyud las gsungs pa'i rim pas gzung na ni de'i tshe bla ma'i man ngag ci zhig dgos//de'i phyir dgongs pas bshad pa la sogs pa thams cad bla ma'i man ngag las rtogs par bya ba 'am/ yang na byang chub sems dpa' rnams kyis mdzad pa'i 'grel pa las shes par bya ba yin gyi mkhas pa'i nga rgyal dang ldan pa rnams kyis byas pa de las ni ma yin no//des na bsam gtan zhes bya ba la sogs pas yan lag gzhan gsum shes par bya'o/ /rgyud gzhan du yan lag drug gsungs pa 'dir mdor byas pa'i don gyis yan lag gsum du rtogs par bya ba ste/ 'dir gsang ba 'dus pa'i rgyud phyi ma las/ so sor sdud dang bsam gtan dang / / srog dang rtsol dang 'dzin pa dang // rjes su dran dang ting 'dzin te/ /rnal 'byor yan lag drug tu 'dod/ /ces gsungs te/ des na bsam gtan gyi sngon du 'gro ba ni so sor sdud pa'o/ /sngags bzlas pa'i sngon du 'gro ba ni srog dang rtsol ba ste/ 'dir sngags bzlas pa'i sgras ni ma ning gi bzlas pa'am/rdo rje'i bzlas pa ste/ srog gi rlung 'dzin par brjod do/ /bde ba'i sngon du 'gro ba ni rjes su dran pa ste/ de la bde ba'i sgras ting nge 'dzin bstan to/ /de ltar na yan lag drug gi rnal 'byor ba nyid ni sangs rgyas nyid du drug 'grub par 'gyur ro/ /tha mal pa'i phyi'i 'jig rten pa'i rnal 'byor grub pa ni las dang po pa'i byis pa'i rnal 'byor pa rnams kyis sngags bzlas pa dang bsam gtan gyis te/dkyil 'khor gyi 'khor lo brtags pa'i bsgom pa'i sems dang bde ba ni las kyi phyag rgya dang ye shes kyi phyag rgya las byung ba'i 'jig rten pa'i bde ba dang / 'bab pa'i rang bzhin gyi bde ba 'jig rten pa'i bde bas ni 'og min gyi gnas kyi bar gyi 'jig rten pa'i 'bras bu'o//de ltar rim pa gnyis kyis 'jig rten pa dang 'jig rten las 'das pa'i rnal 'byor ba nyid 'grub par 'gyur ro/ /'dir 'jig rten las 'das pa'i rnal 'byor ba nyid mchog gi yan lag drug gi sbyor bas 'grub pa ji lta ba de bzhin du bstan par bya ste//'di so sor sdud pa ni phyi'i gzugs la sogs pa'i yul rnams la mig la sogs pa'i rnam par shes pa mi 'jug cing / nang gi yul rnams la lha'i mig la sogs pa'i dbang po rnams kyi rnam par shes pa 'jug pa ste/ /nang gi ni chos thams cad stong pa nyid kyi dmigs pa rnam par ma brtags par mthong ba ni dngos po thams cad mthong ba stong pa nyid kyis te/ji ltar bu mos gzugs brnyan mthong ba ltar khams gsum pa'i sangs rgyas kyi gzugs brnyan mthong ba ni so sor sdud pa zhes bya ba yan lag dang po'o/ /de nas bsam gtan ni dngos po yod pa thams cad kyi stong pa shes rab tu 'dus pa la sems kyi 'jug pa'o//rtog pa zhes bya ba ni sems kyi dngos po'i don 'dzin pa'o/ /dpyod pa zhes bya ba ni dngos po'i khyad par 'dzin pa'o/ /dga' ba zhes bya ba ni dngos po thams cad la sems gnas pa'o/ /bde ba ni dngos po thams cad kyi mi g.yo ba'i phud sum tshogs pa'o//de ltar bsam gtan gyi yan lag lnga bstan to/ /de nas srog dang rtsol ba zhes bya ba ni la la nA dang / ra sa nA ste g.yas pa dang g.yon pa 'gags shing a ba d+hU tI ra thim ste dbus kyi lam du srog gi rlung rtag tu 'jug pa'o/ /rngub pa dang / gnas pa dang / 'byung ba'i sbyor bas a ba d+hU tIr oM gyis 'jug pa dang /hUM gis 'gog pa dang / aHsa 'byung ba dang / zla ba dang / sgra gcan dang / nyi ma'i rang bzhin gyis goms par byed pa ni srog dang rtsol ba'i rang bzhin du bstan to/ /de nas 'dzin pa zhes bya ba ni srog gi rlung lte ba dang / snying ga dang / lkog ma dang / dpral ba'i dbang chen dang /chu dang / me dang / rlung gi dkyil 'khor rnams su 'jug pas thig le la srog gnas shing phyir mi 'byung ba ni 'dzin pa'i yan lag tu bstan to/ /de nas rjes su dran pa zhes bya ba ni rang dad pa'i lha'i gzugs brnyan mthong bas rnam par rtog pa spang ba'o/ /de las 'od zer du ma 'phro ba'i gzugs can rab tu snang ba'i dkyil 'khor sna tshogs kyi tshul can khams gsum du spro ba de rjes su dran pa'i yan lag go//ting nge 'dzin zhes bya ba ni rang dad pa'i lha la rjes su chags shing mi 'jigs pa'i bde ba/ gzung ba dang 'dzin pa med par sems rtse gcig pa yin no zhes ting nge 'dzin gyi yan lag de bzhin gshegs pas gsungs so//'dir yan lag drug ni rnal 'byor mdor gsungs pa ste rgyas par ni 'bum sde'am/ dpal mchog dang po'am/ bla ma'i man ngag las phyag rgya chen po'i dngos grub 'dod pa'i rnal 'byor pas khong du chud par bya'o/ /'dir yan lag drug gi rnal 'byor dang po'i lam du bsgom pa'i man ngag bstan pa rgyud gzhan rnams su gsungs pa ni gsang ba 'dus pa'i rgyud phyi ma las bsnyen pa dang /nye bar sgrub pa dang / sgrub pa dang / sgrub pa chen po rnams te/ ji skad du/ bsnyen dus gtsug tor chen po yi/ /gzugs su 'bad pas bsgom par bya/ /nye sgrub dus su de bzhin du/ / bdud rtsi 'khyil pa'i gzugs bsgom bya/ /sgrub pa la ni lha yi gzugs/ /rnal 'byor brtson pas bsgom par bya/ /sangs rgyas mnga' bdag gzugs nyid ni/ /sgrub pa che la rnam par brtag /ces gsungs te/ 'dir dgongs pa'i tshig gzhan gyis gtsug tor chen po'i gzugs ni khams gsum ma lus pa'i sangs rgyas kyi sku nam mkha' chos 'byung bar thugs rje rab tu gzhag cing bsnyen pa'i dus dang por so sor sdud pas sgom zhing bsam gtan gyi yan lag gis kyang brtan par bya'o//de la bcom ldan 'das kyis dam bca' ba ni/ rtog pa thams cad rnam spangs te/ / nyin zhag gcig la rnam par brtag /gal te rtags ni ma byung na/ /de tshe nga yi tshig brdzun yin/ /de la rtags ni du ba la sogs pa'i mtshan ma'o/ /gzhan du sngags la sogs pas ma yin no/ /zhag gcig la sgrub pa gang gis sngags pa la rtags 'byung ste/ de'i phyir sngags pas yod pa dang med pa'i blo spangs nas ltos pa med par byas la zab cing mi dmigs pa'i stong pa nyid las du ba la sogs pa'i rtags rnams 'byung ba de dag bsgom zhes bya ba ni de bzhin gshegs pa'i nges pa'o//byed dang bcings pa'i sbyor ba yis/ /sa gsum po ni bsgrub par bya/ /zhes bya ba las gsum pa'i sangs rgyas kyi sku mig la sogs pa'i byed pa rnams kyis bsgrub par bya'o//de nyid kyi man ngag ni/ zhal las khong du chud par bya'o/ /de la bla ma'i man ngag gis rnal 'byor bas dang por nam mkha' la du ba lta bu mthong ste smig rgyu ni ma yin zhes rang gis nyams su myong bar shes par bya'o/ /de nas smig rgyu lta bu ste/du ba la sogs pa de nyid rtog pa med par gzugs brnyan bzhin du'o/ /dang po du ba lta bu dang / gnyis pa smig rgyu lta bu dang / gsum pa nam mkha' lta bu dang / bzhi pa mar me lta bu dang / lnga pa sprin med pa'i nam mkha' lta bu'i rtags gsang ba 'dus pa dang / mkha' 'gro ma'i dra ba las gsungs so//gzhan yang mkha' 'gro ma rdo rje dra ba las/ bcom ldan 'das kyis/ sgyu ma lta bu'i rnam pa dang / /skad cig rmi lam lta bu'i rjes/ /de ni kun mkhyen rgyu yin te/ /dngos grub nye bar ster byed pa'o/ /zhes gsungs te/ des na bcom ldan 'das kyi bka' las dang po du ba lta bu la sogs pa'i mtshan ma ni bsgom pa'i rtags su 'gyur ro//kha cig ni grub pa'i dus su zhes smra ste/ de rnams ni de bzhin gshegs pa'i dam bca' ma nyams par byed pa ste/ rtog pa thams cad yongs spang ste/ /nyin zhag gcig la brtag par bya/ /zhes bya ba'i bcom ldan 'das kyi bka' sun 'byin par 'gyur ro//grub pa'i dus su 'jig rten pa'i du ba la sogs pa dang / sgyu ma la sogs pa gang yin pa de rtags su mi 'gyur te/ dngos su du ba dang / 'bar ba dang / sreg pa'i bya ba nus pa'i phyir ro/ /dper na gur gum dang / me tog dang / rin po che dang / gser la sogs pa'i char gyis kyang ngo //de'i phyir yan lag drug gi rnal 'byor gyi rtags su du ba la sogs par 'gyur ba ni bcom ldan 'das kyis nges pa'o/ /de ltar mkha' 'gro ma'i rdo rje dra ba'i rgyud las kyang / yan lag drug bsgoms de nas ni/ /slar yang bdag byin brlab par bya/ /de nas go rims ji lta ba'i//chogs mtshan ma rtogs par bya/ /zhes gsungs te/ de la bdag byin gyis brlab pa ni kun rdzob kyi stong pa nyid mthong ba'o/ /so sor sdud pa'i mtshan ma ni sprin dang du ba la sogs pa lta bur snang ba ste/ de yang mar me'i mtha'/ de nas sprin med pa'i nam mkha' dri ma med pa'i par du'o//rgyud gzhan rnams su dang po 'bar ba nas thig le mtha'i bar du ste/ sgyu 'phrul dra ba'i ting nge 'dzin gyi le'u las kyang / bcom ldan 'das kyis gsungs pa 'di lta ste/ nam mkha' las byung rang byung ba/ /shes rab ye shes me bo che/ /'od chen rnam par snang bar mdzad/ / ye shes snang ba lam me ba/ /'gro ba'i mar me ye shes sgron/ /gzi brjid chen po 'od gsal ba/ /sngags drag mnga' bdag rig sngags rgyal/ /gsang sngags rgyal po don chen byed/ /ces bya ba'i tshigs su bcas pa gnyis kyis sgyu 'phrul dra par rtags gzhan yang bcom ldan 'das kyis dgongs pa'i tshig gis gsungs so//sprin med pa'i nam mkha' las byung ba gang yin pa de ni nam mkha' las byung rang byung ba ste/ /rnam par rtog pa thams cad spangs pa'i phyir ro/ /shes rab ye shes me bo che/ /zhes bya ba ni 'bar ba ltar snang ba'o/ /'od chen rnam par snang bar mdzad/ / ces bya ba ni zla ba ltar snang ba ste/ de nyid kho nar ye shes snang ba lam me ba'o/ /'gro ba'i mar me zhes bya ba ni nyi ma'i snang ba'o/ /ye shes sgron zhes bya ba ni sga gcan ltar snang ba'o/ /gzi brjid chen po 'od gsal ba ni glog ltar snang ba'o/ /sngags drag mnga' bdag rig sngags rgyal/ / zhes bya ba ni thig le ltar snang ba ste zla ba'i dkyil 'khor kha dog sngon po'i rnam pa'o/ /gsang sngags rgyal po don chen mdzad/ /ces bya ba ni rnam pa thams cad kyi khams gsum gyi dngos po'i snang ba sgyu ma dang rmi lam dang mtshungs pa so sor sdud pa'i sbyor bas mthong ba'o/ /mig gi dbang po'i byed pa dang /de nas srog dang rtsol ba'i bcing ba ste/ byed pa 'di rnams dang bcings pa'i sbyor bas sa gsum po ni bsgrub par bya ste/ 'dod pa dang / gzugs dang / gzugs med pa'i mtshan nyid brtan pa dang g.yo ba'i bdag nyid can no zhes bya ba'i don to/ /de bzhin du rdo rje mkha' 'gro ma'i dra ba las kyang /'gro dang mi 'gro khams gsum ni/ /ji srid 'jig rten khams rnams dang / /rdo rje'i lus ldan ji srid par/ /ma lus lus pa med pa 'grub/ /ces yan lag drug gis so zhes bya ba bcom ldan 'das kyis nges pa'o/ /de bzhin du gsang ba 'dus pa las kyang / dngos po med cing sgom pa med//bsgom par bya ba bsgom pa min/ /de ltar dngos po dngos med pas/ /bsgom pa dmigs su med pa'o/ /zhes gsungs te/ 'dir dngos po med pa ni sprin med pa'i nam mkha'o/ /sgom pa ni so sor sdud pa'o/ /de nyid ni/ dngos po med pa bsgom pa min/ /zhes bya ba'o/ /'dir so sor sdud pa'i bsgom pa'i yul ni sprin med pa'i nam mkha' yin pas bsgom pa yang yod pa ma yin te/rnam par rtog pa'i sgom pa dang bral ba'i phyir ro/ /de ltar dngos po ni so sor sdud pas mthong ba de yang dngos po ma yin te ma brtags par 'das pa dang / ma 'ongs pa dang da ltar byung ba'i dngos po rnams dngos po med par mthong ba'o//de nas so sor sdud pa bsgom pa'i phyir rnam par rtog pa bsgom pa mi dmigs so zhes bcom ldan 'das kyis gsungs so/ /bsgom pa 'di ni bcom ldan 'das kyis shes rab kyi pha rol tu phyin pa las kyang 'di lta ste/ de nas lha'i dbang po brgya byin gyis tshe dang ldan pa rab 'byor la 'di skad ces smras so//'phags pa rab 'byor shes rab kyi pha rol tu phyin pa la sbyor ba ji ltar rnyed par 'gyur/ rab 'byor gyis smras pa/ kau shi ka nam mkha' la sbyor bar 'dod pas shes rab kyi pha rol tu phyin pa la bslab par bya'o zhes gsungs so/ /de bzhin du phyag rgya chen po bsgom pa ni gzugs brnyan dang sgyu ma dang mtshungs pa dang /sprin med pa'i nam mkha' ltar bcom ldan 'das kyis bstan to/ /de ltar so sor sdud pa dang / bsam gtan gyis bsnyen pa'i yan lag bstan to/ /de nas bdud rtsi 'khyil pa'i gzugs dgongs pas rlung du bshad do/ / de'ang rnam pa gnyis te/ gsang ba 'dus pa'i rgyud phyi ma las bcom ldan 'das kyis/ rin chen lnga yi rang bzhin dbugs/ /sangs rgyas lnga yi byin gyis brlabs/ /gong bu'i gzugs kyis phyung nas ni/ /sna yi rtse mor rnam par bsgom/ /zhes gsungs pa la/ 'dir rin chen lnga'i sgras ni ra sa nA la dkyil 'khor lnga'i chos can sa la sogs pa'i khams lnga'o//de'i bdag nyid kyi dbugs ni rin po che lnga'i rang bzhin sna bug g.yas pa la'o/ /de bzhin du sangs rgyas lnga ni la nA la dkyil 'khor lnga'i chos can rnam par shes pa la sogs pa'i phung po lnga ste/ de rnams kyis byin gyis brlabs pa sna khung g.yon pa la'o//gong bu'i gzugs kyis phyung ba ni 'dir gong bu'i g.yas pa dang g.yon pa'i dkyil 'khor rnams kyi srog gi rlung dbus ma a ba d+hU tIr gcig tu gyur pa'i/ /srog gi rlung de yang gong bu'i gzugs kyis phyung nas sna'i rtse mor sgom pa ste/ de la sna'i rtse mo'i sgras lte ba dang /snying ga dang / lkog ma dang / dpral ba dang / gtsug tor gyi pad+ma'i lte ba bstan te de'i rtse mor bsgom par bya'o/ /sna'i rtse mor bsgom pa ni g.yas pa dang g.yon pa'i dbus kyi pad+ma'i lte bar ro/ /de ltar thig le'i gnas su gong bu'i tshul can srog 'dzin pas na de nyid 'dzin par bstan to//de bzhin du yan lag gnyis nye bar bsgrub pa ni bdud rtsi'i khyil pa'i gzugs te/ nye bar bsgrub pa de nyid rdo rje bzlas par yang bstan te yan lag ma nyams pa'i bzlas pa ni g.yas pa dang g.yon pa'i rtsa la mi rgyu ba'o/ /gtsug tor gyi gzugs mthong nas/ phyi nas sngags pas srog dang rtsol ba la bya ba ste/bla ma'i man ngag dang dgongs pa'i tshig las rtogs par bya'o zhes bya ba ni srog dang rtsol ba dang 'dzin pa de'ang nye bar bsgrub pa'o/ /de nas/ bsgrub pa la ni lha yi gzugs/ zhes gsungs pa la/ 'dir 'dzin pa'i stobs kyis lte bar gnas pa'i tsaN+Da lI 'bar bar rnal 'byor pas mthong ba ste/sgrib pa thams cad dang bral bas gzugs brnyan lta bu'i phyag rgya chen po 'bar zhing sangs rgyas kyi sprin mtha' yas pa'i 'od zer gyi sprin 'phro ba'i 'od kyi dkyil 'khor gyis rnam par mdzes pa can te rjes su dran pas ni sgrub pa bstan to/ / 'dzin pa'i mthar tsaN+Da lI'i sbyor bsgom pa 'di ni nges pa'o/ /de nas de'i ye shes kyi 'od kyis phung po dang / khams dang skye mched rnams bsregs nas ro gcig par bya zhing g.yas pa dang g.yon pa'i rtsa la gnas pa'i rnam par shes pa la sogs pa dang / sa la sogs pa'i dkyil 'khor rnams kyi rang bzhin dpral bar zla ba'i dkyil 'khor du zhugs pa dang /de nas tsaN+Da lI'i ye shes kyi me'i 'od kyis zla ba zhu ba'i byang chub kyi sems thig le'i rnam pas 'og tu bab ste/ lkog ma dang / snying ga dang / lte ba dang / gsang ba'i pad+mar dga' ba dang / mchog tu dga' ba dang / sna tshogs pa'i dga' ba'i rang bzhin gyis/de nas rdo rje nor bu'i mthar lhan cig skyes pa'i dga' ba'i ngo bo nyid dam/ yang na rnam pa sna tshogs pa dang / rnam par smin pa dang / rnam par 'joms pa dang / mtshan nyid bral ba'i rang bzhin gyis te/ de ltar bcu drug gi cha yongs su rdzogs shing bsgoms pa'i stobs kyis nor bu'i nang du chud pa'i bde ba gang gi tshe 'byung ba de'i tshe tshig gi bde ba lta bu dpe tsam te/ngo bo nyid ni dbang po gnyis las byung ba'i 'jig rten pa'i bde ba des ni mchog tu mi 'jig pa'i bde ba'i bye ba phrag stong gi char yang mi phod do/ /'dir mi 'jig pa'i bde ba lhan cig skyes pa'i dga' ba'i rang bzhin gyi gnas skabs ni tshig gi yul ma yin pa byis pa'i rnal 'byor pa rnams kyis rnam par mi shes pa byang chub sems dpa' rnams kyi stong pa nyid kyi ting nge 'dzin zhes bstan te/'jig rten la grags pa'i med pa nyid kyi don du lhung bar byed pa ni ma yin no zhes dgongs pa'o/ /de lta na yan lag drug gi rnal 'byor/sngags bzlas pa dang / bsam gtan dang / bde bas rnal 'byor pa nyid sangs rgyas nyid de/ dag byed sdig pa 'jig par byed pa'i mchog rnal 'byor pas tshe 'di la bsgrub ces bsgrub par bya ba dang / sgrub pa'i nges pa bcom ldan 'das kyis bstan to/ /sbyor ba yan lag drug ces bya ba gsang ba pa'i bdag po sa bcu'i dbang phyug byang chub sems dpa' phyag na rdo rjes mdzad pa rdzogs so// //rgya gar gyi mkhan po chen po dpal rab 'byor zhi ba'i zhal snga nas lo tsA ba cog ro dge slong ting 'dzin bzang pos bsgyur cing zhus te gtan la phab bo/ /

CLOSE WINDOW