CLOSE WINDOW

D1356
བོད་ཡིག

/ /[]@##/ /rgya gar skad du/ shrI kA la tsakra tsa tur aM ga sAng+ha no pi kA nA ma/ bod skad du/ dpal dus kyi 'khor lo'i sgrub pa'i thabs yan lag bzhi pa zhes bya ba/ 'phags pa 'jam dpal la phyag 'tshal lo/ /'phags pa spyan ras gzigs dbang phyug la phyag 'tshal lo//mchog gi snying rje dag gis ni/ /'khor ba mi bzad sdug bsngal las/ /gdon phyir ye shes lam la ni/ /ston pa khyod ni nyid kyis bzhugs/ /khyod ni rgan yang gzhon nu ma/ /rgyal ba mtha' dag gi ni sras/ /dang po sangs rgyas kyi dang po//bud med sbyor la tshangs par spyod/ /mchog gi snying rje dag gis ni/ /'jig rten gnyen ni gshin rje'i dgra/ /khyod ni kho na'i rdo rje nyid/ /srid pa yis ni 'jigs sel ba/ /khyod ni rtag tu bdud kyi bdud/ /srid pa las ni rnam grol khyod/ /'gro ba smin pa'i don du ni/ /'jug pa yi ni gshin rje khyod//thub pa yis ni rigs 'dud pa/ /bram ze'i rigs kyi nyi ma bdag /zhabs kyi pad+ma la btud pa/ /sems can rnams ni grol don du/ /dus kyi 'khor lo mtha' dag ni/ /sa yi steng du gsal byed pa/ /snyigs ma can gyi rigs ni khyod/ /sa yi bdag pos phyag byas pa/ /ka lnga pa ru dpal grags pa//khyod kyi zhabs kyi pad+ma la/ /lag pa'i thal mo sbyar nas su/ /yan lag mchog la bzhag nas su/ /spyi bo yis ni phyag 'tshal nas/ /mtha' dag ma tshang med pa yi/ /sgrub pa'i thabs ni bshad par bya/ /skyed mos tshal dang ri brags dang / /rgyal ba dam pa yi ni gnas/ /khang stong lha yi gnas dang ni//grub pa'i gnas dang dur khrod dang / /mtsho yi gnas dang gab pa'i sa/ /gang du yid ni dga' bar ni/ /de ru bsgrub pa bya ba ru/ /'gyur ro mi yi bdag po kye/ /zab cing rgya che ba yi sems/ /bla ma'i nges pa la dga' zhing / /gtong ba'i sems dang yon tan shes/ /thar pa 'dod cing rgyud la dad//sems ni g.yo ba med pa dang / /de nyid rnyed pa dang gsang zhing / /gdug pa rnams kyi tshogs bral ba/ /dpal ldan dus 'khor dkyil 'khor du/ /dbang bskur rim pa bzhin thob gang / /'jam pa nyid kyis mal cha'am/ /stan bde ba la 'dug par bya/ /maN+Dal skyang nul mdzes byas nas//rdzas bcur ldan pa'i mchod pa bshams/ /phyag rgya bzang po'i rjes phye ba'i/ /dag pa rnam gsum dran par bya/ /rdo rje gsum gyi sa phyogs su/ /dang po kho nar chos skyong ba/ /gtor ma dag ni sbyin par bya/ /phyi nas rdo rje bzhi yis ni/ /phyogs dang mtshams su song ba ni/ /bdud kyi tshogs rnams nges par bsreg /dpal gyi rdo rje'i sa phyogs na/ /gnas pa yi ni bdud kyi tshogs/ /ma lus par ni nges par bsreg /phyi nas 'khor lo rtsibs bcu la/ /phyogs dang mtshams su song ba yi/ /khro bo'i tshogs ni bsgom par bya/ /sa yi mtshams kyi mthar thug par/ /ring po ru ni mthong gi par//rdo rje gsum gyi ra ba gsum/ /sa yi 'khor bar song ba ni/ /sa 'og gnas dang nam mkhar ro/ /rdo rje khang par brtsegs par ni/ /dbus su 'dab skyes nyi ma'i khru/ /lte ba dang ni gdan la ni/ /dus dang lag pa'i khrur gyur pa/ /de yi steng du bdag nyid ni/ /dri ma dang ni bral ba nyid//'khor lo'i dbus su khro dbang po/ /phyag ni rgyal ba gnyis lhag pa/ /dus kyi zhal te rdo rje shugs/ /rnal 'byor ma yis bsgom par bya'o/ /dang po snying ga'i zla dbus su/ /phyogs bcu ru ni sna tshogs la/ /de kho na yi 'od zer bsgom/ /kha la sogs pa dag byas te/ /slar la yang ni nam mkha' ru//'od zer spros pas rgyal ba dgug /mchod pa sna tshogs byas nas su/ /srid pa'i sdig pa mang po ni/ /bsags pa de ni bshags par bya/ /gsum la skyabs su 'gro ba dang / /lus dang ngag dag sems dag pas/ /sgrub pa po yis bya ba yin/ /rdzogs sangs rgyas dang byang chub sems//'phags pa'i dge 'dun gang mdzad pa'i/ /dge ba rnam pa mang po yi/ /ma lus de la rjes yi rang / /nyon mongs pa dang bral ba yi/ /byang chub spyod pa rjes su gnas/ /sangs rgyas chos dang dge 'dun te/ /srid pa yi ni 'jigs sel ba/ /byang chub thar par skyabs su mchi'o/ /rdzogs sangs rgyas su bdag gyur cig /ces pa'i smon lam 'debs pa yi/ /'di ni sems can don gyi phyir/ /'gro ba ma lus 'di dag ni/ /dngos po'i ngo bo'i rang bzhin no/ /dngos dang bral ba stong pa'o/ /de phyir sangs rgyas byang chub med/ /gzhan la phan pa'i snying rje yi/ /mtshan ma med par dam bcas pa'i//de ltar mtha' dag shes byas te/ /sku gsung thugs kyi rdo rje ni/ /byang chub sems dpa' bsgom par bya/ /dpag tu med pa'i yon tan ldan/ /dkyil 'khor la ni dkyil 'khor gtso/ /dang por 'di ni sdom brtson gyis/ /chu yis me ni 'jig pa ni/ /lus kyi dbus su bya ba yin/ /phyis ni sa ni chu ru 'gyur//tshwa bzhin chu yi dbus su zhugs/ /rlung gis chu ni skams nas su/ /nam mkha' ru ni mi snang bar/ /myur du 'gro'o de nas ni/ /sems dang me ni mun pa'i mthar/ /yul dang rnam par bral ba ni/ /dbus kyis ru gzhag par bya/ /stong pa rlung dang me dang chu/ /sa dang rgya mtsho ri pad+ma//zla ba nyi ma dang ni me/ /khang pa brtsegs ma kun nas ni/ /dri med 'od zer 'phro ba yi/ /rdo rje las ni skyes pa'i gur/ /de nang rdo rje'i sa gzhi la/ /sna tshogs nor bu'i 'od lta bu/ /dkyil 'khor la ni rnam 'phro ba/ /oM gyi ye shes las skyes pa/ /rgyal ba dam pa'i pad+ma la/ /zla ba nyi ma dag gi gdan//nang du brgyad gnyis ka ba ni/ /rigs gtso yi ni rang bzhin te/ /rgyal pa'i longs spyod 'khor lo ni/ /rgyal po rig byed sgom rnams la/ /nor bu gser gyi rang bzhin gyi/ /rta babs dur khrod rnams kyis brgyan/ /a sogs ka sogs nyi ma zla/ /rigs kyi gtso dang lhan cig pa/ /me long lta bu la sogs pa'ang //dri ma med pa'i 'od 'phro ba/ /'od zer lnga ni 'byed mdzad pa/ /dus kyi 'khor lo bsgom par bya/ /rdo rje'i rgyan dang ldan pa'i lus/ /rgyal ba yi ni phyag pad+ma/ /nyi ma'i dpung pa dus kyi zhal/ /mgrin gsum nyi ma yi ni spyan/ /zhal gdangs mche ba gtsigs pa yi/ /dpal ldan oM las skyes pa'o//nor gyi pad+ma'i 'dab ma la/ /zla ba nyid ma me yi steng / /drag po 'dod lha gnyis kyi ni/ /snying gar shin tu rol ba'i zhabs/ /rgyal ba'i dbang po g.yas brkyang zhabs/ /mchog gi zhabs kyi 'og tu ni/ /bdud ni dmar po g.yas kyis te/ /drag po dkar po g.yon gyis so/ /mgrin pa dbus dang g.yon dang g.yas//dpung pa nyi ma zla ba'i mdog /de bzhin du ni brgyad gsum gyi/ /g.yas pa dang ni g.yon pa yi/ /phrag pa sdo dang dmar po dang / /ri bong 'dzin pa ltar dkar ba/ /g.yas dang g.yon du gnyis kyi zhabs/ /dpung pa rnams ni dkar min dang / /nyi ma'i mdog dang zla ba'i mdog /de bzhin du ni brgyad gsum gyis//mtshon cha rnams dang lhan cig tu/ /lag pa rnams ni rim pa bzhin/ /sor mo la ni tshigs gsum gsum/ /ri bong can lag pad+ma la/ /kha dog lnga ni 'phro ba'o/ /nag po dkar po dmar po yi/ /rab mchog lag pa'i mthil du ni/ /mtshon cha'i tshogs ni yang dag gnas/ /rdo rje ral gri rtse gsum dang //srid pa gsum ni 'jigs pa yi/ /gri gug dang ni me yi ma mda'/ /de nas rdo rje lcags kyu nyid/ /sgra dang bcas pa'i cang te'u/ /tho ba dang ni 'khor lo nyid/ /mdung dang dbyug pa dgra sta nyid/ /rdo rje can gyi g.yas pa yi/ /nyi ma'i phyag gis pad+ma la'o/ /dril bu phub dang kha T+wAM ga/ kha ni rnam par phye ba dang / /khrag gis gang ba'i thod pa dang / /gzhu dang zhags pa rin chen dang / /pad+ma dang ni chu la spyod/ /me long dang ni lcags sgrog dang / /tshangs pa rig byed gdong gis ni/ /mgo bo dang ni pad+ma ni/ /rgyal ba'i phyag ni g.yon pas 'dzin/ /dman pa'i gdong du byed pa yi/ /zhabs kyi 'og tu mnan pa ni//bdud dang drag po rang lha mo/ /rig byed zhal te gser lta bu/ /nor gyi phyag ni pad+ma yis/ /'khyud pa sna tshogs yum yin no/ /g.yas ni gri gug lcags kyu dang / /'khrol ba yi ni cang te'u/ /bgrang phreng rim pa bzhin du'o/ /g.yon na nya phyis zhags pa dang / /'dab ma brgya pa'i pad+ma dang //nor bu bzang po de bzhin te/ /g.yon brkyang ba la nyi ma'i spyan/ /rgyal ba'i bdag po'i cod pan can/ /phyag rgya rnams kyis rgyas btab bo/ /phyogs kyi pad+mar sangs rgyas bzhi/ /nges pa kho nar spyan ni dgu/ /de yi spyan dang dus kyi phyag /mtshams su sgrol ma sogs lha mo/ /gzhan yang slar yang 'di dag gi /mtshams brgyad du ni bum pa brgyad/ /nag po dmar po ser po dang / /ri bong 'dzin pa dkar po ni/ /lha dang lha mo rnams kyi'o/ /nag po dmar po zla ba ni/ /gzhan yang phyogs bral du song ba/ /dmar po ser po nyi ma'i ste/ /rtsig pa'i phyogs mtshams song ba la/ /nam mkha'i snying po la sogs dang / / reg bya'i rdo rje ma la sogs/ /shar gyi g.yas dang g.yon pa dang / /phyogs gzhan gyi ni pad+ma la/ /kun du bzang po de bzhin du/ /dpal ldan phyag na rdo rje dang / /sgra yi rdo rje nyid dang ni/ /chos kyi dbyings ni rim pa bzhin/ /lkugs dang rengs dang rgyal can/ /rab stobs zhes pa 'di dag ni/ /sgo skyong shar la sogs par ro//ri bong 'dzin pa'i pad+ma la/ /shes rab dang ni thabs byung ba/ /lha rnams dang ni lha mo rnams/ /phan tshun du ni 'khyud pa gnyis/ /rang gi lag pa chu skyes ni/ /rang rang mtshan ma rnams dang ldan/ /gang gi g.yas su mtshan ma gang / /dang po yi ni lag pa la/ /de phyir phyag rgya dang bral ba'o/ /shes rab thabs kyi 'khor lo yis//mchog tu bde ba yi ni gnas/ /pad+ma rdo rje'i gdan la sogs/ /nag po rnams kyis ral gri gug /gnas rnams 'jigs par byed pa dang / /g.yas kyi lag na rtse gsum mo/ /g.yon na phub dang thod pa dang / /kha T+wAM ga ni dkar po ni/ /lag pa'i mthil na yod gyur te//dmar po rnams kyi de bzhin du/ /mda' dang rdo rje lcags kyu dang / /sgra dang bcas pa'i cang te'u/ /g.yas kyi phyag na rim pa bzhin/ /g.yon ni gzhu dang zhags pa dang / /nor bu dri ma med 'phro ba/ /ser po rnams kyi 'khor lo dbyug /'jigs par byed pa'i rdo rje ni/ /g.yas kyi lag par rim pa bzhin//g.yon na dpal ldan lu gu rgyud/ /dril bu'i sgra dang bcas par 'gyur/ /ri bong 'dzin pa dkar rnams kyi/ /g.yas na dpal gyi thob dang / /mdung dang rtse gsum pa ni nyid/ /g.yon na pad+ma dkar po nyid/ /'dab ma brgyad dang bcas pa dang / /me long dang ni bgrang phreng ngo / /ljang gu rnams kyi g.yas pa la//rdo rje gri gug dgra sta ni/ /rim pa bzhin du 'gyur ba yin/ /g.yon na dril bu thod pa dang / /yon tan mtha' dag gi ni gter/ /ut+pal ni de bzhin nyid/ /so so'i yon tan dbang gis na/ /sngon po rnams kyis rig par bya/ /lha mo rnams ni de bzhin du/ /nag po dmar po dkar po dang //gser ni zhun ma 'dra ba dang / /shar gyi lha sogs lha mo'o/ /de ltar rdo rje can gyi yang / /srid pa gsum ni ma lus pa/ /dkyil 'khor gyi ni rnam par gsungs/ /phyi dang lus dang gzhan la ni/ /spros pa'i rang bzhin med pa ni/ /dngos po'i skye ba yang dag gnas/ /de la rtag par mkha' rdo rje/ / srid pa rnam pa gsum song ba/ /mi rtag par ni 'gro ba'o/ /'byung po'i tshogs ni rtag pa min/ /mig 'phrul dag ni ji bzhin no/ /rtag dang mi rtag par blta ba/ /de yang bems po'i blo can gyi/ /sems dag pa yi don gyi phyir/ /sgrub thabs nyid ni brjod par bya'o/ /kha las snying du song ba yi/ /bsgrub par nus pa nyid ma yin//rdo rje can gyi sgrub pa'i thabs/ /sgrub pos bsgrub par bya ba gang / /ma lus ba ni 'khrul ba'o/ /de phyir rgyal po rang gi sems/ /nyon mongs pa dang bral ba ni/ /dkyil 'khor nyid du bsgrub par bya/ /ho yig thog ma tha ma'i dbus/ /yang dag bde ba'i 'bras ster ba/ /sku gsung thugs kyi rdo rje ni//shes rab chags pas de zhu ba/ /ri bong can nyid lta bu ru/ /rdo rje can yang zhu mthong nas/ /lha mo rnams ni glu len byed/ /bcom ldan 'das ni rdo rje can/ /sum cu pa dang mi'i bla ma/ /sems can kun la bde mdzad pa/ /khyod kyis 'dod pa'i don gnyer ba/ /bdag cag rnams ni bsrung bar mdzad/ / glu de rdo rje can son nas/ /srid pa gsum ni ma lus pa/ /mig 'phrul lta bu nyid du ni/ /gzigs nas bskyed pa ru mdzad de/ /'od zer dri ma med pa 'phro/ /mtshan ma bcas pa spro bar mdzad/ /rdo rje can ni rgyan dang ldan/ /rgyal ba'i bdag po'i cod pan can/ /shes rab kyis ni 'khyud pa nyid/ /rgyal po shes rab thabs kyis te//slar la yang ni dkyil 'khor ba/ /ma lus pa rnams 'byung bar bya/ /sngon po'i 'od 'phro 'jigs pa'i gzugs/ /rab tu bzhad pa yi ni zhal/ /zla ba phyed pa'i mche gtsigs pa/ /sgra ni sgrogs pa me yi spyan/ /gnyis lhag pa yi rgyal ba'i phyag /rig byed rgyal la zhabs gnyis pa/ / shes rab thabs kyi yan lag can/ /mtshon cha rnams kyis yang dag mtshan/ /rdo rje shugs kyis gzhug par bya/ /rkang pa brgyad pa'i shing rta nas/ /rgyal ba'i dgra ni 'jigs byed de/ /ye shes 'khor lo'i rgyu du'o/ /mdun du ye shes de mthong nas/ /rnam pa bcu yi mchod pa dang / /sngags rnams kun dang bstod pa bya//lte bar lcags kyu yis btab nas/ /dri med pa yi 'od 'phro ba/ /ye shes 'khor lo'i dbang phyug nyid/ /rigs gtso zhes pa'i gdong can gyi/ /zhags pa de nyid rab tu bcing / /mtshon cha rnams kyis 'jigs byas te/ /ma lus pa ni bsgrubs byas nas/ /slar la yang ni log nas ni/ / rang gi 'khor lo bskor byas te/ /gzhug dang bcing dang dgyes pa dang / /ro dag mnyam par byed pa ni/ /'gugs byed la sogs pa yis so/ /sems nyid rnal 'byor bskyed pa ni/ /nang gi pad+ma'i nyi stengs su/ /nam mkha' dang ni bcas pa'o/ /shar du 'du byed dang ni sa/ /lho ru tshor ba dang ni chu/ /byang du 'du shes me ru 'gyur//nub tu gzugs ni gzhan nyid do/ /me ru rlung dang gzugs su 'gyur/ /bden bral me dang 'du shes gnyis/ /dbang ldan chu dang tshor ba gnyis/ /rlung du sa dang 'du byed ldan/ /sangs rgyas lha mo'i bar stong la/ /mtshan gyi phyogs su bdud rtsi'o/ /ro yis ba'i bum pa brgyad/ / yang ni rim pa gzhan ma yin/ /steng du sna dang drir 'gyur te/ /lho ru mig dang gzugs dgod do/ /g.yon du lce dang ror 'gyur zhing / /nub tu lus dang reg bya ni/ /de bzhin du ni 'gyur ba yin/ /lho yi sgo yi g.yon du ste/ /'og tu rna ba dang ni sgrar/ /rigs kyi dbang gis 'gyur ba yin/ / shar gyi sgo yi byang du ste/ /nam mkha' ru ni yid gnyis dang / /chos kyi khams su 'gyur ba yin/ /dang po thabs ni rnam pa drug /dkyil 'khor gyi ni lhag pa'i lha/ /rigs kyi dbang gis 'gyur ba yin/ /phyi nas shes rab la sogs drug /rang rang pad+ma'i gdan la ni/ /gsal ba nyid du 'gyur ba yin/ /shar gyi sgo ru stobs po che//rab gtum ral gri 'dzin pa'o/ /de yi shes rab rengs byed ma/ /lho ru lkugs byed nga rgyal mar/ /gyur te nor sbyin gyi phyogs su/ /nga rgyal byed ma rmugs ma'o/ /rengs byed brtson 'grus dpag med pa/ /chu lha ru ni gnas gyur pa/ /sgo yi dbus na pad+mar gnas/ /lha rnams 'di dag g.yon brkyang ste//rdo rje can gyi a thung du/ /ral gri can gyi e thung du/ /rin chen phyag rgya r-i nyid 'gyur/ /'od dpag med pa u thung ngu / /'gyur te slar yang l-i yig ni/ /'di ni rnam par snang mdzad kyi/ /ring po'i dngos po'i dbye ba yis/ /dbyangs kyi tshogs ni ma lus pa/ /rigs drug rnams kyi rim pas so//dpal yum gyi ni mi shigs brjod/ /a las skyes pa nam mkha'i khams/ /I r-I U l-I rim pa las/ /rlung dang me dang chu dang sa/ /thams cad 'byung ba ru ni 'gyur/ /rgyal ba dam pa'i bdag po dang / /sna tshogs yum gyi bde don du/ /lus kyi dngos po phan tshun du/ /mi bskyod pa ni stong pa'i khams//phyag gi pad+mar la gri can/ /spyan ma rnams kyi dngos po'o/ /rin chen bdag mo mA ma kI/ /gzhan yang pad+ma 'dzin pa dang / /gos dkar mo ni lus kyi dngos/ /de bzhin 'khor lo can sgrol ma/ /rang bzhin yon tan dbang gis ni/ /thung dang ring ba'i dbyangs rnams kyis/ /aM ni kun du bzang po la//gyur te lus kyi dbang gis na/ /phyag na rdo rje yi ni a/ /nam mkha'i snying po e thung du/ /gyur te gzhan yang de bzhin du/ /sa yi snying por ar ro ste/ /oM ni 'jig rten mgon po ste/ /de bzhin a la du gyur pa ste/ /de ni sgrib pa rnam sel lus/ /a ni chos kyi dbyings nyid du/ /de bzhin du ni nges par 'gyur/ /a las skyes pa sgra rdo rje//e las skyes pa reg rdo rje/ /ro yi rigs kyi gtso bo nyid/ /a las skyes pas lus dbye bas/ /o las skyes pa gzugs rdo rje/ /gyur te de bzhin mi bdag po/ /a las skyes pa dri rdo rje/ /dpal gyi bzang mo chos kyi dbyings/ /sgra yi rigs kyi gtso mo dang / /phyag na rdo rje yi ni gzugs//nam mkha'i snying po dri rdo rje/ /ro yi mchog gi rigs gtso dang / /'jig rten mgon po yang ni zung / /sa yi snying po gzugs rdo rje/ /reg bya sgrib pa rnam sel dag /zung du yang ni 'gyur ba'o/ /de ltar rigs ni drug po dag /rigs rnams yon tan dbang gis ni/ /yang dag par ni rig par bya//ya la zung gi rim pa yis/ /stobs dang gnod mdzes ma ni zung / /gsal ba nyid du 'gyur ba yin/ /ra wa lkugs dang nga rgyal ma/ /rigs kyi dbang gis 'gyur ba yin/ /wa dang ra ni 'di nyid las/ /nga rgyal byed pa lkugs byed ma/ /laM yang gnod mdzes brtson 'grus ma/ /rigs kyi dbang gis 'gyur ba yin//shes rab thabs ni yan lag dngos/ /rigs kyi dbang gis 'gyur ba yin/ /gang zhig gang la khas phyogs pa'i/ /rdo rje 'chang dpal kun du bzang / /rigs kyi dbang gis 'gyur ba yin/ /mi bskyod phyag na rdo rje dang / /don yod grub pa mkha' snying po/ /dri med nor bu byed pa dang //yang dag par nas snying po/ /'khor lo'i phyag dang sgrib sel ba/ /rigs kyi dbang gis 'gyur ba yin/ /'od dpag med dang 'jig rten mgon/ /rigs kyi dbang gis 'gyur ba yin/ /dpal gyi yum dang chos kyi dbyings/ /rdo rje dbyings dang sgra rdo rje/ /rigs kyi dbang gis 'gyur ba yin//dpal gyi sgrol ma reg rdo rje/ /gos dkar mo yi rigs dbye bas/ /ro yi rdo rje ma nyid do/ /mA ma kI dang gzugs rdo rje/ /rigs kyi dbang gis 'gyur ba yin/ /spyan ma dri yi rdo rje ma/ /slar la yang ni stobs po che/ /don yod grub pa'i rigs las byung / /rin chen phyag las lkugs pa nyid/ /rigs kyi dbang gis 'gyur ba yin//'od dpag med dang rlom byed ma/ /rengs pa nyid dang rnam snang mdzad/ /rlung dang me dang chu sa las/ /brtson 'grus lag med lkugs ma dang / /nga rgyal can ma rim pa bzhin/ /nges pa kho nar gsal ba ni/ /gnod ma ru ni rab tu grags/ /dkyil 'khor gyi ni nang dbus su/ /ston pa lha mo sogs bum pa//lhan cig rgyal ba yi ni sku/ /sangs rgyas la sogs chos kyi sku/ /sgra rdor la sogs byang chub sems/ /longs spyod rdzogs pa yi ni sku/ /khro bo rnams ni sprul pa'i sku/ /yon tan gyi ni dbang gis 'gyur/ /thugs kyi dkyil 'khor gnas pa yi/ /sems can kun gyi don byed pa//sku yi rdo rje zung du 'gyur/ /rgyal ba'i sku dang lhan cig tu/ /sku rdzogs pa yi rgyu ru'o/ /gsung gi rdo rje chos kyi sku/ /zung du yang ni 'gyur ba yin/ /chos rnams ston par byed pa yi/ /sems dang longs spyod rdzogs pa yi/ /zung du yang ni 'gyur ba yin/ /sems can kun gyi don byed pa'o//ye shes dang ni sprul pa'i sku/ /srog chags rnams la thar pa ster/ /zung du yang ni 'gyur ba yin/ /shes rab thabs kyi yan lag dngos/ /mthun dang mi mthun pa yi rigs/ /nyi zla a ka la sogs pa/ /srid pa rnam pa gsum song ba/ /ye shes rnam shes dbye ba ni/ /rnal 'byor pa yis rig par bya//rdo rje gsum po swA hA ra ldan/ /spyi bo mgrin pa snying ga dang / /lte ba gsang ba spyi bo ru/ /'di rnams kyis ni lus byin brlab/ /mchog gi rgyal ba'i bdag po ni/ /lha mo rnams kyis bkru bar bya/ /rdo rje phan tshun rdo rje nyid/ /cod pan du ni 'gyur ba yin/ /res 'ga' sangs rgyas lnga yis ni/ /gzugs kyi steng du mi bskyod pa//g.yas pa ru ni pad mtshan gyi/ /rnam par snang mdzad nyid du 'gyur/ /rin chen lce yi pad+ma 'dzin/ /rab mchog nor bu byed pa ni/ /don yod grub pa'i dbu rgyan no/ /drug gi cod pan ral pa mdzod/ /yon tan gyi ni dbang gis 'gyur/ /lhag ma 'khor lo gzhan dag go/ / stong pa nyid dang chos kyi dbyings/ /rigs gsum gyis ni dam tshig dang / /ye shes mchod pa rjes chags dang / /gsum la skyabs su 'gro ba yi/ /de yi rang bzhin bdag nyid ni/ /sgrub pa po yis mchod par bya/ /du ba la sogs bum pa rnams/ /snying ga chos kyi 'khor lo yi/ /rtsa brgyad rnams kyis dag pa yin//rig ma rnams dang sangs rgyas rnams/ /spyi bo yi ni lhan cig skyes/ /rtsibs ni bcu drug pa ru grags/ /mgrin pa longs spyod 'khor lo yi/ /mi yi bdag po nyis 'gyur ni/ /byang chub sems sogs dag pa'o/ /lte ba sprul pa'i 'khor lo yi/ /nor bu gdengs can gyis bsgres pa'i//'jigs pa la sogs dag tu'o/ /lag pa rkang pa dag gi tshigs/ /stong pa drug dang me yi grangs/ /las kyi 'khor lo'i lha rnams dag /klu dang gtum mo'i bcu drug rnams/ /sor mo rnams kyi tshigs kyi mtshams/ /bya ba'i 'khor lo dag par 'gyur/ /rdo rje can dpal dus dag par//mi yi bdag por 'gyur ba ni/ /lo dang zla sogs dbye bas so/ /sems ni snang ba snang ba med/ /nyi ma so so'i dbang gis ni/ /sna tshogs yul ni rnam dag pa/ /du ba la sogs rlung dag pa/ /rang gi snying ga'i pad+ma ni/ /rtsa yi 'khor lor gnas pa'o/ /drag po chung ma bcas mnan pa//nyon mongs la yi bdud bcom mo/ /khyab bdag zhabs kyi mthil gyis ni/ /bdud mnan bdud tshogs bcom pa'o/ /dung dang gaN+DI nor bu dang / /ljon shing zhes pa de bzhin du/ /sku yi rdo rje la sogs bzhin/ /bum brgyad lus ni bdud rtsi brgyad/ /rgyal ba rnam par rgyal bum pa//byang chub sems dang rdul bstan pa'o/ /'du byed don yod grub pa ste/ /tshor ba rin chen 'byung ldan dang / /'du shes 'od dpag med pa'o/ /gzugs ni rnam par snang mdzad de/ /khu ba rkang dang khrag dang ni/ /dri chu dri chen rnam dag pa'i/ /khams drug rnam dag lha mo drug /yul dang yul can rnam dag pa//byang chub sems dpa' phyag rgyar bcas/ /khro bo lnga ni stobs lnga nyid/ /gzhan ni dbang po lnga yin no/ /rgan byad la sogs brgyad dang 'khor/ /pad+ma'i 'dab mar song ba rnams/ /nyi dus chu tshod rnam dag pa'o/ /bden bral la sogs zla bcu gnyis/ /pad+ma'i 'dab mar song ba rnams//chu tshod kyi ni dbugs grangs tshad/ /klu dang gtum mo rnams gsang ba/ /mi yi bdag po nyis 'gyur ro/ /rtsa rnams kyi ni dag pa'o/ /de bzhin spyan ma la sogs pa/ /rang bzhin yon tan dbang gis ni/ /lus kyi bya ba dag pa'o/ /skra rnams grub pa ma lus pa/ /ba spu rnams ni 'byung ba'i tshogs//sa yi steng na gnas rnams so/ /de nyid rnams ni gtso mtshon cha/ /rang bzhin yon tan dbang gis ni/ /khams rnams dag pa'i phyag rgya'o/ /rdo rje rnams ni nang phyag rgya/ /gtso bo yi ni snying du ni/ /zla steng yang dag gnas pa'o/ /rdo rje can dpal sna tshogs yum/ /srid pa rnam pa gsum song ba//dus gsum ye shes sbyar bas so/ /dpal dag pa las chos kyi sku/ /chos las longs spyod rdzogs skur 'gyur/ /longs spyod rdzogs las sprul pa'i skur/ /gyur te rgyal ba'i bdag por ni/ /sems can gyi ni don gyi phyir/ /bzhi pa gnas ni nyal ba dang //slar la yang ni gzhan ma gnyis/ /lus kyi dbye bas sad pa'o/ /de ltar lus kyi dbye ba yis/ /srog chags rnams kyi lus la yid/ /rnam pa bzhi ni gnas pa yin/ /sprul pa longs spyod rnams la yid/ /lus dang dbang gi rjes byed pa'o/ /longs spyod rdzogs pa'i sems lta ba//rigs kyi dbang gis gyur ba yin/ /chos kyi sku yi gnyid log pa/ /dag pa'i bde bar gyur pa ste/ /'di ni nyin dang mtshan dag gis/ /thig le gsum gyi grol ba'i mthar/ /de yis phyir ni mi 'dzag don/ /nyin dang mtshan gyi dus su ni/ /rnal 'byor pa yis bsgom par bya/ /g.yon du srog ni rgyas 'gyur zhing //de bzhin g.yas su rdul ba dang / /de ni g.yon brkyang gnas pa'o/ /gtum mo lte ba'i 'khor lo'o/ /dgu pa lag 'gro yis bsnun pa/ /rgan byad la sogs pa yi lha/ /snying po ha yi ye shes ni/ /skad cig ma ru snang ba ste/ /ye shes gzi brjid sad pa'o/ / lte ba la ni rnam snang sogs/ /bsreg cing spyan ma mig la sogs/ /thams cad bsregs nas spyi bor gang / /zla ba bzang las 'dzag pa ni/ /thig le de ni rdo rje can/ /shes rab chos 'byung la gnas pa/ /slar yang thig le nyid las ni/ /ma lus par ni spros pa dag /sna tshogs pa yi rgyan dang ldan//me long nang song lta bu'o/ /ye shes 'khor lo rab 'byung pa/ /'dod pa'i gzugs dang gzugs med par/ /srid pa rnam pa gsum zhe na/ /rim pa yis ni sbyangs nas su/ /phyi nang ye shes mchod pa ni/ /srid pa gsum ni ma lus pa/ /skad cig gcig gis dgug par bya/ /zla nyi a dang ka la sogs//rnam pa gsum du 'gro 'ong ba/ /sku yi rdo rje sogs bzlas pa/ /so sor sdud pa la sogs drug /gser ni btso ma'i 'dab ma la/ /sku dang gsung thugs sbyor ba yis/ /rdo rje pad+ma dga' la sogs/ /ro ni mnyam par 'gyur ba yi/ /rdo rje gsum ni bsgom par bya/ / shes rab pad+mar sems thig le/ /lhan cig skyes la bde dbang gis/ /mi shigs par ni bsgom par 'gyur/ /bsnyen pa bdud rtsi lnga la sogs/ /rigs kyi gtso mo bzhi yi ni/ /sngags kyi bzlas pa la sogs pa/ /so sor sdud pa la sogs 'gyur/ /rdo rje pad+ma las skyes pa'i/ /bdud rtsi nye bar bskul ba'o//dga' ba la sogs rdo rje gsum/ /pad+ma ro ni mnyam song ba/ /bsgom pa bsgrub par 'gyur ba'o/ /shes rab sbyor ba mi 'dzag gang / /sgrub pa chen po nyid 'gyur ro/ /phra mo yi ni sbyor bas so/ /dang po stong pa'i byang chub nyid/ /de nas thig le la 'dus pa/ /de nas sku ni bskyed pa nyid//rab mchog ro yi rigs kyis ni/ /yi ge rnams ni dgod pa nyid/ /'di rnams thun mong bsnyen pa ste/ /rdo rje rnam pa bzhi dang ni/ /dbu ma yi ni sgrub pa'o/ /'di ru thabs ni rnam pa bzhir/ /'gyur te chung ngu brtan pa yi/ /bsgrub pa'i yan lag de bzhin no/ /so sor sdud pa rnam pa bcu//rgyal ba yi ni dbang por 'gyur/ /de bzhin bsam gtan mi bskyod pa/ /srog dang rtsol ba ral gri can/ /slar la yang ni rnam pa bcu/ /gzung ba rin chen phyag rgya can/ /g.yung mo rjes su dran pa ni/ /pad+ma 'dzin pa ru ni 'gyur/ /dpal gyi ting 'dzin 'khor lo can//re re yang ni lnga ru dbye/ /slar la yang ni gang dbye ba/ /a la sogs dang ka la sogs/ /so sor sdud pa yul can ni/ /yul can rnam pa bcu po rnams/ /yul la 'jug pa med pa'o/ /shes rab rtog pa dpyod pa rnams/ /dga' ba mi g.yo bde ba dang / /bsam gtan sems ni gcig pa'o//gtum mo 'di ni snang bdag /lus la nges par gsal bar 'gyur/ /nam mkha' de ni rjes dran 'gyur/ /srog dang rtsol ba gnyis kyi lam/ /mi 'khrug pa ru 'gyur ba ni/ /dbu mar srog ni 'jug pa'o/ /thig le ru ni srog 'jug cing / /gnyis kar 'gro dang 'ong ba dang / / gzung ba nyid ni sems gcig pa/ /shes rab thabs kyi bdag nyid kyi/ /lhan cig skyes pa de dbang gis/ /ye shes sku ni ting 'dzin pas/ /'di ni chu sogs dbye ba yis/ /gsum du yang ni 'gyur ba yin/ /sna tshogs bdag po'i sgrub thabs so/ /phyag rgya gsum dang tshad ni gsum/ /rnam pa gsum ni srid dbang gis//las dang kun rtogs bzang mo yis/ /so sor sdud pa'i rnal 'byor pa/ /yul dang rnam par bral ba dang / /sngags rnams kyis ni byin brlabs nas/ /bsam gtan sbyor ba dag pa yis/ /mngon shes lnga ni thob par 'gyur/ /srog dang rtsol bdag pas na//zla ba nyi ma dag par bral/ /byang chub sems dpas mchod par 'gyur/ /gzung ba yi ni stobs kyis ni/ /nyon mongs la sogs bdud bcom zhing / /stobs bcu la ni 'jug par 'gyur/ /rjes dran gyis ni dag par 'gyur/ /dri med 'od 'phro'i dkyil 'khor te/ /gzhan yang ye shes sku las so//de phyir dag pa'i ting 'dzin gyis/ /nyi ma cung zad tsam gyis ni/ /ye shes sku ni 'grub par 'gyur/ /so sor sdud la sogs pa yis/ /gal te gzir bar ma gyur na/ /sngags pa rnams kyis 'dod mi 'grub/ /sgra la sogs pa'i yan lag ma'i/ /pad+ma rdo rje nor bu ru/ / thig le gzung bar bsgrub par bya/ /bsnyen pa dang po'i sbyor ba ni/ /nam mkha' ru ni rnam pa bcu/ /'khor lo can 'gro ba lta ba'o/ /bgegs ni mthar byed kyang blta ba/ /bdud rtsi'i lam du song ba yang / /nye ba'i bsnyen pa yan lag drug /shes rab la sbyor zla thig le/ /gzhan yang rdo rje nor bu ste/ / yi ge gsum ni 'grub par 'gyur/ /bde ba ma nyams gcig zhi ba/ /lhan cig skyes pa ru ni 'gyur/ /bsgrub chen ye shes sbyor bas so/ /srog dang rtsol ba kun nas ni/ /mgo bo'i bar ni phan pa ste/ /mnyam pa'i bde ba 'bras ster ba/ /de las steng ni mi phan pa/ /'chi ba'i 'jigs pa byed pa'o/ / sems can nyes pas bzlog pa'i rgyu/ /gtsug tor sgo ni phug nas su/ /mchog tu bde ba'i go 'phang du/ /'di ni sbyar bar bya ba nyid/ /phung po med pa'i rnal 'byor pa/ /mnyam pa'i bde ba la 'jug mod/ /'on kyang 'jig rten grags pa med/ /dbus su srog dang 'jug pa ni/ /yul dang rnam par bral ba nyid//sna tshogs yum gyis 'khyud pa'o/ /pad+mar bcug pa'i rang rdo rje/ /spros pa las ni de bzhin te/ /rdo rje'i dbus su zhugs par bya/ /sa lam lhung ba bde ba/ /shin tu chags pa'i chags par song / /rnal 'byor pa yi sbyor ba 'di/ /phyag rgya dngos grub don gyi phyir/ /mchog tu yang ni khyab pa'i bdag /dpal ni gsang las gsang ba yis/ /de ltar yan lag rnam pa bzhis/ /gal te bsgom pas skyo na ni/ /de nas sngags kyi bzlas pa bya/ /oM kA la tsa krA ya huM hUM swA hA/ oM hraM hriM hraM hUM hraH swA hA/ oM badzra d+hA twI shwa re hUM ho swA hA/ oM a mog+ha sid+d+ha ya swA hA/ oM rat+na saM b+ha bA ya swA hA/oM a mi ta b+hA ya swA hA/ oM bai ro tsa nA ya swA hA/ oM lo tsa nA yai swA hA/ oM mA ma kI yai swA hA/ oM paN+Da rA yai swA hA/ oM tA rA yai swA hA/ oM badzra pA Na ye swA hA/ oM kha gar+b+ha ya swA hA/ oM k+Shiti gar+b+hA ya swA hA/ oM lo ka shwa rA ya swA hA/ oM sarba ni bar bi skaM bi na swAhA/ oM sa man+ta b+ha drA ya swA hA/oM gan+d+ha badzrA yai swA hA/ oM rU pa badzrA yai swA hA/ oM ra sa badzra yai swA hA/ oM paR+sha badz+ya yai swA hA/ oM shap+da badzrA yai swA hA/ oM d+ha rmA d+hA tu badzra ye swA hA/ oM big+h+nA n+ta kA ya swA hA/ oM pradz+nyA t+na kA ya swA hA/ oM pad+ma n+ta kA ya swA hA/ oM ya mA n+ta kA ya swA hA/ de nas bzlas pas skye ba na/ /mchod pa bcu dang sgeg sogs dang //chang dang bdud rtsis mchod nas ni/ /de nas bdud rnams tshar gcod pa'i/ /phreng ba'i sngags kyis bstod par bya/ /oM na mo badzra sa twA ya/ na mo bud+d+ho bad+hi sa twa b+h+yaH/ na mo badzra kro d+hen+d+ra rA dze b+h+yaH/ na mo bi shwa mA tri/ na mo bud+d+ha bo d+hi sa twa de bI b+h+yaH/ na mo badzra DA ki nI b+h+yaH/ na mo b+ha ga wa te kA la tsa krA ya//badzra b+ha ra wa b+hi kA rA ya/ ma hen+d+ra nI la bar+Na sha rI rA ya/ ma ra kle sha hr-i dA ya/ krA n+ta shi ta rak+ta tsa ra NA ya/ kr-i Sh+NA ra k+ta si ta ka N+tA ya/ nI la si ta pI ta rak+ta/ daM Sh+TA ka ra lo gra b+hI Sha Na mu khA ya/ kr-iSh+NA rak+ta shi ta sa bye ta ra skan d+hA ya/ dwA da sha b+hu dzA ya/ Sha Ta b-i+i sha ti ka rA ya/ badzra khaD+ga trishU la kA rti kA bA Na oM ku sha Da ma ru ka mud+ga ma ru kamud+ga ra tsakra kun+ta da N+Da pa ra shu badzra g+haN+Ta khe Ta kha twAM ga ka pra la tsA pa pA sha rat+na ka mA la shaM kha mA la shaM kha A daR+sha//shriM kha lA brah+ma shi ro ga dza tsa rma d+h+r-i ka ka rA yi/ bya g+h+ra tsarma Ni ba sa nA ya/ skan+d+he muN+Da mA lA ba laM bi ne/ shi ris badzra paT+Ta mu ku Te badzra ka pA la mA la a r+d+ha tsan+d+ra d+ha rA ya/ kuN+Da la ru tsa ka kaN+Thi kA me kha lA nU pU ra b+ha sma yadz+nyo pa bI ta shi ro ma Ni ma hA mu dra nA gen+d+ra bi b+hU Sha NA ya/badzra DA ki nI san+to Sha T-i hra da yA ya/ in+d+ra a g+ni ya ma nai r+r-i t+ya ba ru Na bA yu/ ku be ra A ShA na brah+ma/ bi sh+Nu bi nA ya ka kA rti ka yan n+di ma hA kA la gra ha ne k+Sha tra k+She tra pA la/ su ran+d+rA su ran+d+rA phe Ne n+d+ra b+hU ta n+d+ra na ren+d+ra saM stu ta tsa ra NA ya/rigs drug bkod pa'i bstod pa dang / /mchog sbyin rdo rje'i bstod pas bstod/ /de nas mtshan phyed gtor ma sbyin/ /oM oM badzra tsan+d+ra sarba d+harma su bi shud+d+ha sarba d+ha rmA su bi shod+ha nA ya swA hA/ oM AH badzra sU R+Ya sarba d+harma bra bod+d+ha ka sarba d+harma bra bod+hA ya swA hA/ oM hUM badzra a na la sarba d+harma pra dI pa ka sarba d+harma pra dI pA ya swA hA/oM ho sarba d+harma badzra a mr-i ta ka ra sarba d+harma badzra a mr-i taM ku ru ku ru swA hA/ de ltar sngags dang phyag rgya yis/ /gtor ma byin brlab zin nas ni/ /phyag rgya sngags kyis spyan drangs bya/ /oM ha hA hi hI badzra b+hai ra ba A ka R+Sha ya yA ka R+Sha ya/ bra be sha ya pra be sha ya/ ban+d+ha ya ban+d+ha ya/to Sha ya/ to Sha ya/ dzaH hUM boM hoH/ sarba DA ki nI naM hr-i da yaM hUM hUM phreM phreM phaT/ de rjes mgron rnams byon pa dang / /lhar bskyed dbang bskur byin brlabs pa'i/ /cho ga'i rim pas rdzogs par bya/ /mchod pa rnams dang gtor ma bsngo/ /oM brah+ma/ biSh+Nu/ ne r+r-i t+ya/ bA yu/ ya ma/ ag+ni/ sa mu dra i shor/in+d+ra ya k+She b+h+yaH/ sa pa ri bA re b+h+yaH/ i daM ba liM/ gan+d+haM/ pu Sh+paM/ d+hU paM dI paM a k+Sha taM da da ma he he tsa e ka t+ya sa ba ri bA rA shI g+h+raM i daM ba liM gr-i h+na tu kha dan+tu pi ban+tu/ dzaH hUM baM hoH/ sa na tr-i p+ta/ sarba satwA nAM shAn+tiM puSh+TiM rak+ShA pa ra na gub+tiM kurba n+tu hUM hUM phaT/ badzra d+har A dz+nyA pa ya ti swA hA/ slar yang mchod cing bstod pa dang /yi ge brgyas phrin las so sor bshags/ /gtsug tor du ni rtse lnga pa'i/ /rdo rje ru ni gyur pa yin/ /phyi nas rtse mo nyis 'gyur du/ /gyur pa chos kyi 'khor lo'o/ /de ni nyis 'gyur du bsgres pa/ /lhan cig skyes par 'gyur ba dang / /de yi yang ni gzhan nyis 'gyur/ /longs spyod rdzogs pa'i 'khor lo dang //sprul pa yi ni 'khor lo'o/ /de yi nang du rtse gcig go/ /mnyam pa'i bde ba'i 'bras ster ba/ /gsang ba'i pad+ma la gnas pa/ /phyag rgya bsgom pa'i don du gsungs/ /nyin dang mtshan mo'i dus su ni/ /'dod chags zad don nyid du ni/ /gsung gi rdo rje myang don du/ / sngags pa rnams la gsungs pa nyid/ /nyes par bya ba kho na min/ /nyi ma so so'i dus su ni/ /zas kun bde ba'i don du ste/ /mi 'jug pa yi rgyu ru ni/ /dpal gyi spyod pa dngos grub sgyur/ /ro bsregs gnas su mtshan mo ni/ /'gro la brtse ba'i don du min/ /rnal 'byor pa gang srog gcod pa'i/ / nyin dang mtshan du byed pa ni/ /de ni srog 'jig pa ru gsungs/ /sgra gang kha dang bral ba ni/ /snying la yod par rab gyur pa/ /de ni brdzun du smra ba nyid/ /kun mkhyen gyi ni ye shes sar/ /'dzin pa yang ni byed pa gang / /rnal 'byor bar yang de gsungs so/ /bde ba'i thig le ma ltung ba/ /gzhan gyi bud med du ni 'gyur//bsten pa chags bral min pa'o/ /srog dang rtsol ba'i me yis ni/ /ri bong can yang zhu ba'o/ /btung ba chang gi btung ba'o/ /mthe bong tshigs nas gtsug tor du/ /tshes kyi dbang gis 'gro ba ni/ /nya mthar thug pa rang gi sems/ /gtsug tor nas ni rang gi sems/ /yang ni 'di ni 'gro 'gyur ba//nag po'i phyogs kyi mthar thug par/ /rnal 'byor pa yi spyod pa des/ /nyi ma re re'i dus su ni/ /'dod pa'i dngos grub rab tu ster/ /spyod dang 'dod pa lus tshad pa/ /mchog gi kha yi pad+ma las/ /tshig mi 'byung zhing gnyid log pa'o/ /'di ni 'khrul dang rgyal ba ni/ /du ba la sogs rdo rje can//de rnams gsal ba rnam pa bcu/ /srog can lus kyi gnas skabs so/ /'jig rten 'dod pa'i gnas skabs ni/ /nges pa kho nar gsal ba las/ /su zhig rgyal bar su 'dod pa/ /thig le dkar po'i rgyun ni gang / /nyin dang mtshan mo'i ltung ba ni/ /mA ma kI ni de chang nge / /go ku la sogs mig la sogs//nyi ma re re bzhin spros pa/ /bdud rtsi lnga rnams bsten pa ni/ /rang gi rigs kyi sar song ba/ /lha rnams dag pa'i lus la'o/ /stong pa'i sems de brtson pa yis/ /lhan cig skyes pa khyab bde ba/ /de ni skye gnas 'khrig pa min/ /nor gyi sbyin pa btang ba dang / /bud med sbyor ba yid kyis ni//mi 'dzag pa ni tshul khrims so/ /bzod pa sgra sogs mi 'jug pa/ /gnyis kar song ba'i le lo ni/ /rnam par 'jig pa brtson 'grus so/ /bsam gtan shes rab sems dang ni/ /bde ba lhan cig par song kun/ /'gro ba thams cad brjod pa'o/ /sems can don du de rdzu 'phrul//srid pa'i don ni mi byed pa/ /thob pa gzhan ni bzhin pa'o/ /dri med blo gros 'od zer gyis ni mun pa thams cad spong bar byed pa rnams/ /skye bos bla ma'i 'dod pa gang zhig dang po de ni gzung bar byas nas su/ /bcings las grol 'dod de ni bdag gis nges grol byas pa'o/ /de ltar dag pa dri med gang yin de yis rtag tu 'gro ba'i yid//dus 'khor zhabs zhes de la gnas pa'i go 'phang rtag tu bsam gyur cig /dus kyi 'khor lo'i yan lag bzhi pa'i sgrub thabs dus kyi zhabs chen pos mdzad pa rdzogs so// //paN+Di ta bi shwa shra'i dang / lo tsA ba gyi jo zla ba'i 'od zer gyis bsgyur ba'o/ /

CLOSE WINDOW