CLOSE WINDOW

D1352
བོད་ཡིག

@##/ /rgya gar skad du/ sa kod de sha Ti pya Ni/ bod skad du/ dbang mdor bstan pa'i mdor bshad/ dpal dus kyi 'khor lo la phyag 'tshal lo/ /rnam pa thams cad dri med stong pa'i rang bzhin yum dang ni/ /gnyis med bde ba'i ro yis gang ba'i sku ni khyab bdag ste//rgyal ba rnams kyi sku gang zhig gis bskyed gyur mngon skyed pa/ /lhan skyes rnal 'byor rnam dag zhi ba de la phyag 'tshal lo/ /dpal ldan bla ma'i zhabs pad la/ /phyag byas nas ni bdag dran phyir/ /dbang mdor bstan pa'i mdor bshad pa/ / de yi drin gyis bri bar bya/ /'dir nges par dpal 'bras spungs kyi mchod rten chen por/ sna tshogs pa'i rgyud kyi thos pa don du gnyer ba rnams kyis gsol ba btab par gyur pas/ bcom ldan 'das dpal shAkya seng ges sngags kyi theg pa chen po bstan par gyur to/ / der bcom ldan 'das la sa bcu'i dbang phyug byang chub sems dpa' chen po phyag na rdo rje'i sprul pa'i sku rgyal po zla ba bzang pos mchog gi dang po'i sangs rgyas stong phrag bcu gnyis pa'i rgyud chen po gsol ba btab par gyur pa yin te/ de skad du ni/ bcom ldan 'das kyis lung bstan pa//bya rgod phung po'i ri bo cher/ /byang chub chen po'i byang chub gnas/ /shes rab pha rol phyin tshul du/ /nges par ston pa'i gnas yin no/ /'jig rten khams sogs dag pa yis/ /sangs rgyas dus gsum 'jug rnams kyi/ gsang sngags tshul chen rab gsungs pa'i//gnas ni dpal ldan chos dbyings so/ /sems can mchog gi bsam pa yis/ /bye brag smra dang mdo sde pa/ /gzungs dang rtog pa ston pa gang / /de gnas du mar rgyal bas gsungs/ /bya rgod phung por byams pas kyang / / shes rab pha rol phyin tshul dang / /sangs rgyas sngags tshul dag pa ni/ /dpal ldan 'bras spungs su ston 'gyur/ /zhes pa'i gsung las na/ bcom ldan 'das kyis dpal 'bras spungs kho nar sngags kyi tshul bstan pa yin no/ /gnas gzhan rnams su slar yang /rgyud la mos pa'i skye bo gang yin pa de'i bsam pas sdud par byed pa po sa bcu'i dbang phyug byang chub sems dpa' chen po rnams kyis gzhan du'am/ de nyid du rgyud rgyas par ston par mdzad pa yin no/ /zla ba bzang po zhes pa la/ zla ba yang 'di yin la bzang po yang yin pa ni zla ba bzang po ste/spyi bor byang chub kyi sems kyi zla ba dri ma med pa thob pa nyid kyi phyir ro/ /dbang bskur zhes pa la sogs pa la/ chu la sogs pa bdun dang / bum pa la sogs pa gsum dang / bla na med ni 'jig rten las 'das pa shes rab chen po'i ye shes kyi dbang bskur ba ste bzhi pa'i don to//'jig rten 'das pa'i dngos grub phyir/ /zhes pa ni/ de la 'jig rten pa'i dngos grub ni/ brtags pa'i dkyil 'khor gyi 'khor lo bsgoms pa las 'og min gyi srid pa'i mthar thug pa'i bdag po nyid do//'das pa'i dngos grub ni/ rnam par ma brtags pa'i rnam pa thams cad kyi mchog dang ldan pa'i stong pa nyid dang / dmigs pa med pa'i snying rje dbyer med pa'i ting nge 'dzin bsgom pa las/ sa dang po nas brtsams te ji srid sa bcu gnyis kyi dbang phyug rdo rje 'chang chen po'i go 'phang thob pa'o//mdor bstan pa'i phyir mdor bsdus pa'o/ /dbang phyug la sogs pa'i yon tan 'byor ba'i phyir ram/ bdud bzhi bcom pa'i phyir na bcom ldan 'das so/ /dbang bskur don zhes pa la/ dbang bskur yang de yin la don yang de yin pa ni dbang bskur don te/de la chu la sogs pa sbyin par bya ba yin pa'i phyir na dbang bskur ba yin la lus la sogs pa dag par byed pa'i dgos pa'i don yin no/ /rtsa'i kun spyod ces pa ni/ la la nA dang ra sa nA dang a wa d+hU tI dang bshang ba dang gci ba dang khu ba 'bab pa'i steng dang 'og gi rtsa rnams su srog dang thur sel gyi rlung dag kun du spyod pa'o//yang na rtsa rnams kyi kun du spyod pa ste/ gnas ji lta ba rnam par gzhag pa'o/ /de skad du 'di nyid 'chad par 'gyur ba gsum po/ rtsa 'di rnams kyi kun spyod pa/ /zhes pa la sogs pa'o/ /rtsol ba zhes pa ni rtsa 'di rnams nyid du rlung 'jug pa 'gog pa ste/ya ma 'gog pa zhes pa'i byings 'di las sngon du aM dang g+ha nya'o/ /rtsol ba ni rtsol ba ste/ 'gog pa'o/ /de skad du yang dang po'i sangs rgyas las/ lam gnyis po ni bsgyel ba yis kyang srog rtsol du ni 'gyur te dbu mar srog ni zhugs pa'o//zhes so/ /nyon cig ces pa ni/ 'chad par 'gyur ba'i tshigs su bcad pas bstan pa'i gzhung gi don thams cad do/ /rgyas par bshad pa'i rgyud yin na/ ci ltar mdor bstan pa yis bshad/ /ces gsung zhes pa'i dogs pa bsal ba'i phyir/ mdor bstan pa la sogs pa drug po de rnams kyi mtshan nyid so sor rgyas par bshad par bya'o//bsdus pa dang rgyas pa'i rgyud thams cad nyid ni mdor bstan pa la sogs pa'i mtha' drug gis yongs su dag par 'gyur ro zhes rtogs par bya ba'i phyir du dang por mdor bstan pa dang rgyas par bshad pa dag gi rnam gsum po la/mdor bstan zhes bya ba la sogs pa gsungs te/ de la gzhan zhes pa ni rgyas bshad chen po'o/ /da ni mdor bstan pa la sogs pa rnams kyi so sor sbyar ba nyid gsungs pa/ mdor bstan nyid ni zhes bya ba la sogs pa ste/de la/ mdor bstan nyid ni rgyas bshad pa'i/ /rgyud ni yang dag bsdus par zhes pa ni bcom ldan 'das kyis rnal 'byor dang / rnal 'byor ma'i rgyud la sogs pa rnams yang dag par byung nas byang chub sems dpa' la sogs pa rnams kyis brjod pa ni yang dag bsdus pa'o//de ni rnam pa gnyis te/ mdor bstan pa dang / rgyas par bshad pa'i dbye bas so/ /de la gang rtsa ba'i rgyud mchog gi dang po'i sangs rgyas stong phrag bcu gnyis pa las/ bsdus pa'i rgyud kyi rgyal po dus kyi 'khor lo sum cu lhag pa'i stong phreng ba 'dzin pa'i br-it+tas bcom ldan 'das kyis bstan pa yang dag par brjod pa ni/mdor bstan yang dag bsdus pa'o/ /rtsa ba'i rgyud stong phrag bcu gnyis pa yang dag par brjod pa ni/ rgyas bshad yang dag bsdus pa'o/ /de bzhin du 'dus pa dang kye rdo rje dang sdom pa la sogs pa rnams la yang bsdus pa dang rgyas pa'i rgyud bstan pa'i dbye ba las mdor bstan pa dang rgyas par bshad pa yang dag par bsdus par shes par bya'o//rab tu mdor bstan dang rgyas bshad/ /ces pa la/ dang yig gis rab tu'i sgras ni rgyas bshad la yang ngo / /mdor bstan tshe dang rgyas bshad pa//zhes pa la/ dang yig gis chen po'i sgra ni rgyas bshad la yang ngo / /mngon shes thob rnams kyis ni/ sa bcu'i dbang phyug byang chub sems dpa' rnams kho nas te/ de ni zhes pa ni/ yang dag par bsdus pa'i dka' 'grel gnyis dang / rgyas 'grel rnam pa gnyis so//mkhas pa rnams kyis min nyid ni/ /sa ma thob pa rnams kyis so/ /da ni de ltar zhes bya ba sogs pa'i tshigs su bcad pa gnyis kyis rgyud la 'jug pa gsungs te/ de la mtha' drug rnams kyis zhes pa ni mdor bstan dang / rab tu mdor bstan pa dang /mdor bstan chen po dang / rgyas bshad dang / rab tu rgyas bshad dang / rgyas bshad chen po rnams kyis so/ /rdo rje'i rnal 'byor rnam pa bzhi ni/ sad dang rmi lam dang gnyid mthug dang bzhi pa'i gnas skabs rnams spangs pa dbyibs dang sngags dang chos dang rnam par dag pa'i rnal 'byor sgrib pa me pa'i sku dang gsung dang thugs dang ye shes kyi rang bzhin sprul pa dang longs spyod rdzogs pa dang chos dang bde ba chen po'i sku'i rang bzhin rnams so//rdzogs pa'i byang chub pa bzhi ni/ skad cig ma gcig dang rnam pa lnga dang rnam pa nyi shu dang sgyu 'phrul dra bas mngon par rdzogs par byang chub pa'o//phung khams skye mched rigs drug rnams/ /zhes pa la/ rnam par snang mdzad dang 'od dpag med dang rin chen 'byung ldan dang don yod grub pa dang mi bskyod pa dang rdo rje sems dpa' rnams rnam par dag pa las/ gzugs dang 'du shes dang tshor ba dang 'du byed dang rnam par shes pa dang ye shes te phung po drug dang /spyan ma dang mA ma kI dang gos dkar mo dang sgrol ma dang rdo rje dbyings kyi dbang phyug ma dang shes rab kyi pha rol tu phyin ma rnams rnam par dag pa las/ sa dang chu dang me dang rlung dang nam mkha' dang ye shes te/khams drug dang skye mched kyi sgras ni dbang po dang dbang po'i yul dang las kyi dbang po dang las kyi dbang po'i bya ba rnams bzung ste/ de la sgrib pa thams cad rnam par sel ba dang 'jig rten dbang phyug dang sa'i snying po dang nam mkha'i snying po dang phyag na rdo rje dang kun du bzang po rnams rnam par dag pa las/lus dang lce dang mig dang sna dang rna ba dang yid de dbang po drug dang / dri rdo rje ma dang gzugs rdo rje ma dang ro rdo rje ma dang reg bya rdo rje ma dang chos kyi dbyings kyi rdo rje ma dang sgra rdo rje ma rnams rnam par dag pa las/ dri dang gzugs dang ra dang reg bya dang chos kyi dbyings dang sgra ste yul drug dang /gshin rje mthar byed dang shes rab mthar byed dang pad+ma mthar byed dang bgegs mthar byed dang gtsug tor dang gnod mdzes rnams rnam par dag pa las/ bshang lam dang rkang pa dang lag pa dang ngag dang nyer gnas dang mchog gi dbang po ste las kyi dbang po drug dang / rengs byed ma dang rgyal ma dang rmugs byed ma dang shin tu brtson 'grus ma dang shin tu sngon mo dang drag spyan ma ste khro bo'i lha mo rnams rnam par dag pa las/ brjod pa dang len pa dang 'gro ba dang bshang ba 'dzag pa dang khu ba 'pho ba dang gci ba 'dzag pa ste las kyi dbang po'i bya ba drug rnams so//le'u lnga ni/ 'jig rten gyi khams dang nang dang mngon par dbang bskur ba dang sgrub pa'i thabs dang ye shes kyi le'u rnams so/ /mtha' drug la sogs pa 'di rnams kyis dag pa dang ldan zhing / kun rdzob dang don dam pa'i bden pa gnyis yongs su dag pa 'jig rten dang 'jig rten las 'das pa'i ye shes ma lus pa rtogs par byed pa/phyogs gnyis su mngon par zhen pa dang bral zhing thog ma dang tha ma med pa ni dang po'i sangs rgyas kyi rgyud do/ /kA yig las ni byed pa bzhi/ /la yig las kyang 'dir thim nyid/ /tsa yig las ni g.yo ba'i sems//kra yig rim pa bcings las so/ /zhes byas nas/ dus kyi 'khor lo mngon rjod byed do/ /chu dang zhes bya ba la sogs pa la dge bsnyen la sogs pa'i sdom pa byin pa'i de ma thag tu dkyil 'khor gyi shar gyi sgo'i phyi rol du so shing byin pa'i bar ma chad par de bzhin gshegs pa lnga'i rigs kyi mtshan mas mtshan pa'i rgyal ba'i bum pa'i steng du me tog dor ba'i de ma thag tu dkyil 'khor gyi byang dang lho dang shar gyi sgo rnams su rgyas 'grel dpal dri ma med pa'i 'od las gsungs pa'i tshul gyis chu la sogs pa'i mngon par dbang bskur ba gnyis gnyis so//nub kyi sgor ni rjes su gnang ba'i mngon par dbang bskur ba'o/ /gzhan pa zhes pa ni/ lus la sogs pa'i dag pa rnams las te/ khams dang phung po la sogs pa rnams kyi dag pa gzhan no/ /rdo rje dril bu ni/ rdo rje dril bu'i dbang bskur ba ste/ de la rdo rje ni mi 'gyur ba'i ye shes chen po rnam par dag pa yin la/dril bu ni rgyun mi 'chad pa'i sangs rgyas kyi skad rnam par dag pa ste/ gzhom du med pa'i sgra rnam dag pa zhes pa'i don to/ /nyi zla gcig nyid sbyong bar byed/ /ces pa ni/ rdo rje dang dril bu 'di dag nyid 'khyud pas thabs dang shes rab dbyer med pa nyid du ston par byed pa'i don to//'di rnams zhes pa la sogs pa ni/ mngon par dbang bskur ba bdun po ni/ rdul tshon gyi dkyil 'khor kho nar sbyin par bya ba yin gyi/ ras bris la sogs pa'i dkyil 'khor du ni ma yin te/ bcom ldan 'das kyis rgyud rnams su ma gsungs pa nyid kyi phyir ro//bum pa zhes bya ba la sogs pa mdor bstan pa'i tshig rnams ni/ shes rab nu mar yan lag ni/ /zhes bya ba la sogs pa rnams kyis bum pa la sogs pa'i dbang bskur ba gsum sbyin pa'i bya ba rgyas par bshad pa yin la/ slar yang zhes bya ba la sogs pa mdor bstan pa'i tshig ni phyag rgya chen po zhes bya ba la sogs pa rnams kyis 'jig rten las 'das pa bzhi pa'i don shes rab chen po'i ye shes kyi mngon par dbang bskur rgyas par bshad pa yin no//da ni 'bras bu bshad pa'i de ma thag tu 'di zhes bya ba la sogs pa rnams kyis de sgrub par byed pa'i lam gsungs te/'di zhes pa ni/ spros pa thams cad dang bral ba'i sku bzhi po gcig tu 'drem par gyur pa bla na med pa'i bde ba chen po'i rang bzhin gyi rdo rje sems dpa' 'o/ /shes rab gzugs brnyan ni/ rnam par mi rtog pa bla na med pa'i shes rab kyi rang bzhin shar ba'i rnam pa zla ba dang zla ba'i 'od bzhin du dbyer med pa rnams kyis so//du sogs zhes pa ni/ sgron ma'i mthar thug pa'i mtshan ma bzhin ni rnam par mi rtog pa la ste/ phug par bsam gyis mi khyab pa'i ye shes kyis rnal 'byor pas mthong bar 'gyur ro/ / gzhan 'bar ba la sogs pa nas thig le'i mthar thug pa mtshan ma drug ni/ bla gab med pa la mthong bar 'gyur ro/ /de nas rnam pa thams cad pa'i gzugs brnyan ni/ rnam par mi rtog cing rmi lam gyi snang ba ltar mthong bar 'gyur ro/ /da ni mig dag ma phye zhes bya ba la sogs pa'i tshigs su bcad pas sna tshogs gzugs brnyan bsgom pa'i rim pa gsungs te/de la rjes brtag min pa ni thog ma dang dbus dang mthar rnam par ma brtags pa'o/ /dngos med ces bya ba la sogs pa'i tshigs su bcad pas rnam par rtog par sems la yang dang yang du gtsubs pa'i mtshan nyid kyi bsgom pa dgag pa gsungs te/de la dngos med ni rang bzhin med pa ste/ don dam pa bsgom pa na rnam par rtog pa mtha' dag gi rnyog pas mtshon du med pa'i gzugs nyid yin pa'i phyir ro/ /'di nyid gsungs pa/ dngos po dngos med sems kyis min/ /gzugs brnyan ma brtags mthong phyir ro//zhes pa'o/ /ci ltar na der rnal 'byor pas sna tshogs pa'i gzugs brnyan mthong bar 'gyur zhe na/ de'i phyir dpe gsungs pa/ pra phab ces pa la sogs pa ste/ me long ral gri mthe bong sgrol ma zla ba nyi/ /chu dang mig ste pra 'bebs 'jug pa brgyad du bshad//de la 'dir me long gsungs te/ pra 'bebs pa na sgrub pa pos bsam pa ma yin pa'o/ /dgongs pa ni 'di yin te/ ji ltar me long la gzhon nu mas 'das pa dang ma 'ongs pa dang da ltar gyi rkun po la sogs pa'i rdzas rnam par ma brtags par snang ba de kho na bzhin du rnal 'byor pas kyang rnam par rtog pa thams cad kyi rdul dang bral ba'i nam mkha' dri ma med pa la rnam par mi rtog sna tshogs pa'i gzugs brnyan mthong ngo //'di nyid la gzhan du ni/ rnam pa thams cad kyi mchog dang ldan pa'i stong pa nyid ces brjod par bya'o/ /gzugs brnyan 'di nyid la don dam pa nyid du mngon par zhen pa dgag pa'i phyir/'di las zhes pa la sogs pa rnams kyis dpe gsungs te/ 'di las ni pra phab pa las so/ /dngos po snang bzhin pa nyid na sgyu ma bzhin du rang bzhin gyis ma skyes pa'i phyir dngos po ni dngos po med pa'o//ci ltar na bcom ldan 'das de rnam par mi rtog pa'i ye shes kyis gzhan gyi don mdzad par 'gyur zhes bya ba'i dogs pa dgag pa'i phyir/ med pa'i zhes bya ba la sogs pa rnams kyis dpe gsungs te/ ji ltar yid bzhin gyi nor bu rtog pas kyang stong la sems can gyi don yang byed pa de bzhin du bcom ldan 'das kyang rnam par rtog pa thams cad dang yang bral la/stobs bcu dang mi 'jigs pa la sogs pa mtha' yas pa'i yon tan brnyes pa sems can thams cad kyi don yang mdzad de mi 'gal lo/ /da ni pra phab la zhes bya ba la sogs pas ye shes kyi mi slu ba nyid gsungs te/'dir ji ltar gzhon nu mas me long du rnam par ma brtags par rkun po la sogs pa mthong bar 'gyur ro/ /de kho na bzhin du nyi tshe ba'i sems can rnams kyis kyang rkun po la sogs pa de rnams gzhon nu mas smras pa'i gnas rnams su song nas rnyed par 'gyur ba nyid do//de ltar de kho na nyid kyi rnal 'byor pas kyang rnam par ma brtags par khams gsum pa mthong ste sems can rnams kyi don byed par 'gyur ro/ /ci yang yul gyi rnam pas dngos po gang snang bar 'gyur ba de ci yod pa'am med pa las 'gyur zhes bya ba'i mngon par zhen pa bsal ba'i phyir/gal te zhes bya ba la sogs pa gsungs te/ gal te re zhig dngos po yod pa mthong bar 'gyur ba yin na/ de'i tshe me long la nye ba'i gzhon nu ma'i gdong pa yod bzhin pa nyid yin na/ ci ltar na mthong bar mi 'gyur ba yin/ med pas kyang mthong bar 'gyur ba ma yin te/shin tu med pa'i mtshan nyid ri bong gi rwa la sogs pa snang ba med pa nyid kyi phyir ro/ /yod pa dang med pa la sogs par mngon par zhen pa'i rnam par rtog pa dang bral ba sgyu ma la sogs pa'i dngos po mthong zhing don gyi bya ba yang byed par 'gyur ro zhes bya ba 'di gsungs par 'gyur ro//da ni mig la sogs pa'i dbang pos mthong bar mngon par zhen pa dgag par bya ba'i phyir/ gzhan gyi mig gis zhes bya ba la sogs pa gsungs te/ gzhan gyi mig dang dpral ba la sogs par yod pa dag gis mthong ba yin la/ rang gi mig gis kyang mthong ba ma yin te/mig ras kyis bkab pa nyid kyi phyir ro/ /dgongs pa ni 'di yin te/ rmi lam gyi mig gis mthong ba bzhin du mngon par zhen pa'i rtog pa dang bral ba dang / dngos po mthong ba mi 'gal lo/ /mthong ba ni zhes bya ba la sogs pas 'di nyid kyi dpe gsungs te/so sor sdud dang bsam gtan dang / /srog rtsol de bzhin 'dzin pa dang / /rjes su dran dang ting nge 'dzin/ /rnal 'byor yan lag drug tu 'dod/ /ces pa'i gsung las na/ 'di nyid kyi ni sgrub byed bya/ /zhes bya ba la sogs pa nas/ gzhon nu ma yi bu ji bzhin//zhes pa'i bar gyis rnam par ma brtags pa'i rnam pa thams cad pa'i gzugs brnyan mthong ba'i phyir/ don gyis go bas so sor sdud pa dang bsam gtan du bshad pa'i yan lag gnyis gsungs pa yin no/ /da ni srog rtsol dang 'dzin par bshad pa'i yan lag gnyis brjod par bya ste/gzugs brnyan mthong nas te/ /rnam par ma brtags pa'i rnam pa thams cad kyi gzugs brnyan mthong ba yod na'o/ /srog rtsol ni/ zla ba dang nyi ma'i lam du srog gi rlung 'jug pa bskyel nas dbu ma sgra gcan la rab tu 'jug pa'o/ / gang gi tshe a wa d+hU tI kho na'i srog lte ba la sogs pa'i 'khor lo rnams su rim gyis 'gog pa ni de bzhin du 'dzin par brjod par bya'o/ /rtsa rnams su ni/ la la nA dang ra sa nA dang a wa d+hU tI dang bshang ba dang gci ba dang khu ba 'bab ma rnams su'o/ /'gog pa'i phyir ni sgrib pa med par byed pa'i phyir ro//la la nA la sogs pa'i rtsa rnams kho na'i rang bzhin gyi khyad par zla ba zhes pa la sogs pa'i tshigs su bcad pa gnyis kyis grangs ji lta bar khong du chud par bya'o/ /rigs ni/ 'du shes la sogs pa'i phung po rnams kyi ste/ skye ba'i gnas nyid yin pa'i phyir ro//mun can ni dbu ma sgra gcan gyi rtsa'o/ /da ni/ zla ba thabs kyi zhes bya ba la sogs pa'i tshigs su bcad pa gsum gyis shes rab dang thabs dag gi sku dang gsung dang thugs kyi rigs kyi dbye bas de rnams nyid rigs drug tu rtogs par bya'o/ / de la thabs kyi zhes pa ni/ khu ba'i khams kyi'o/ /shes rab kyi zhes pa ni/ rdul gyi khams kyi'o/ /'chi ltas zhes pa ni/ 'chad par 'gyur ba'i 'chi ltas kyi mdor bstan pa'i tshig go/ /nyi ma ni srog gi nus pa'o/ /dus sbyor 'char ba'i mngon mtshams su/ /zhes pa ni/ la la nA dang ra sa nA dag gi dbus su mnyam pa ste/rkang pa dang bcas pa'i lnga bcu rtsa drug gi dbugs a wA d+hU tI gcig pu rab tu 'bab pa'o/ /'di rnams nyin dang mtshan mor bcu gnyis kyis rkang pas dman pa'i bdun brgya'i dbugs su 'gyur ro/ /'dis zhes pa ni/ rkang pas dman pa'i bdun brgya'i dbugs kyis so//phyogs gsum dang bcas zhes pa la sogs pa la/ lo brgya'i nyin zhag gi phung pos/ rkang pas dman pa'i bdun brgya'i dbugs kyi phung po bsgyur ba la drug brgya lhag pa'i stong phrag nyi shu rtsa gcig gi dbugs kyi chas thob pa ni nyin zhag so so'i tshad do/ /phung po de las kyang drug cu lhag pa'i sum brgya'i chas thob pa gsungs pa'i lhag ma'i nyin zhag dang bcas pa ni phyogs gsum dang bcas pa'i lo gsum ste dbu ma las byung ba'o//'dir rnams dang bral ba'i lo brgya ni la la nA dang ra sa nA dag las byung ba'o/ /steng du g.yon g.yas zhes pa la sogs pa la/lte ba las steng du g.yon pa gang yin pa ni zla ba ste/ la la nA dang i TI ming can no/ /g.yas pa gang yin pa ni nyi ma ste/ ser skya'i ming can no/ /gzhan zhes pa ni ra sa nA'i ming yang ngo / /da ni tshigs su bcad pa phyed dang gsum gyis chu la sogs pa'i khams yongs su dag pa ni la la nA la sogs pa rtsa rnams kyi de bzhin gshegs pa'i rigs dag par brjod par bya ste/de la pad+ma 'dzin la sogs pa ni 'od dpag med la sogs par shes par bya'o/ /dbus kyi rtsa zhes pa ni/ 'og gi char bshang ba 'bab ma'o/ /g.yon ni rdo rje'i rtsa bar g.yon du gnas pa'i gci ba 'bab ma'o//g.yas ni de nyid du g.yas su gnas pa'i khu ba 'bab ma'o/ /rdo rje 'dzin sgra gnyis pas ni/ drug pa rdo rje sems dpa'o/ /lte ba'i steng du gnas pa'i zla ba dang nyi ma dang sgra gcan gyi rtsa rnams kho na bshad pa la sogs pa 'bab pa'i bya ba dang sbyor ba'i phyir na/ bshang ba la sogs pa'i rtsa rnams su 'gyur ro zhes bya ba ni/zla ba'i lam gyis bshad pa'i rtsa/ /zhes bya ba la sogs pa'i tshigs su bcad pa las blta bar bya'o/ /lte ba'i steng du zhes bya ba la sogs pa'i tshigs su bcad pas ni/ khu ba 'bab ma'i mthar thug par a wa d+hU tI'i ming gsungs pa yin no/ /lte ba zhes bya ba la sogs pa'i tshigs su bcad pa gnyis kyis ni/a wa d+hU tI las khams lnga'i rang bzhin gyis 'byung ba dang 'jug pa dag bsdu ba dang spro ba'i rang bzhin nyid du gsungs pa yin no/ /de kho na bzhin du lte gsang zhes bya ba la sogs pa'i tshigs su bcad pa gnyis kyis ni/ /lus dang ngag dang sems kyi chos kyis dung can ma las 'bab pa'i rim pa gsungs pa yin no//'di rnams ni khu ba 'bab ma'o/ /shes rab thabs zhes bya ba la sogs pa'i tshigs su bcad pas ni/ la la nA la sogs pa rigs drug gi rtsa rnams kyi gzhan gyi rigs la 'khyud pa las shes rab dang thabs su gsungs pa yin no//rdul 'bab phyir de gtum mo ste/ /zhes pa la sogs pa la/ bud med rnams kyi dung can ma dang a wa d+hU tI dag ni rdul 'bab pa'i bde ba las re zhig gtum mo dang g.yung mo'i ming du 'gyur ro/ /skyes bu la yang rdul dang yang dag par sbyor ba kho na las lus skye ba'i phyir na/ nye bar brtags pa las ming gnyis su 'gyur ro//g.yon du rtag tu zhes bya ba la sogs pa'i tshigs su bcad pas ni/ g.yon dang g.yas kyi sna'i bu ga dag tu rnam par shes pa la sogs pa'i phung po dang / sa la sogs pa'i khams kyi dkyil 'khor gyi rab tu dbye ba dang / 'di dag gi dbus su a wa d+hU tI las drug pa ye shes kyi dkyil 'khor yang mtshon par bya'o//lte ba'i pad+ma'i 'dab ma la/ dkyil 'khor drug cu zhes pa la sogs pa ni/ nyin dang mtshan mo'i dkyil 'khor drug cu'i dbyu gu ste/ dkyil 'khor lnga lnga rnams kyis mi mnyam pa dang mnyam pa'i dbye bas lug la sogs pa dang glang la sogs pa'i dus sbyor so so'i srog 'pho ba las lte ba dang sna'i bu ga dag tu mnyam pa dang 'pho ba bcu gnyis su 'gyur ro zhes dgongs so//rtsa ba zhes pa la sogs pas ni srog sa la sogs pa'i rang bzhin gyis 'bab pa'i gnas gsungs te/ de la rtsa ba ni sna bug gnyis ka'i 'og gi cha'o//g.yon ni gnyis ka'i dbus kyi sna rgyud kyi phyogs so/ /de bzhin du phyi dang steng dang dbus kyi cha rnams ni g.yas la sogs pa yin par shes par bya'o/ /lus las zhes pa ni lte ba'i gnas las so/ /'dab ma'i dbus zhes pa la sogs pas/ sna bug g.yon par rnam par shes pa la sogs pa'i rang bzhin gyis dang por shes pa'i srog 'bab pa'i rim pa brjod par bya ste/shar ni steng dang gzhan ni 'og gi cha'o/ /nam mkha' zhes pa la sogs pa la/ rnam par shes pa la sogs pa'i phung po rnams ni nam mkha' la sogs pa'i khams rnams las 'byung ba nyid kyi phyir/nye bar brtags nas tha dad pa med par rab tu bstan pa yin no/ /sa la sogs pa 'di rnams nyid sna'i bu ga dag tu sngar gsungs pa ni g.yas pa sa la sogs pa'o/ /gzhan ni sna g.yas pa'i bug pa'i 'og gi cha'o/ /'dir sa la sogs pa dang por shar ba'i srog 'bab pa ni 'di nyid du shar la sogs pa ste/nyi ma 'char ba shar du 'gyur zhing ri dang mnyam par bgrod pa zhes pa'i gsung las so/ /sna bug g.yon par nam mkha' la srog gi rlung 'char ba'i phyir/ /ci ltar nam mkha' shar ba nyi ma yin zhe na/ ma yin te/ de bzhi po'i dbus su byas nas shar la sogs pa'i tha snyad sbyor ba'i phyir ro//'di nyid du yin gyi/ de la sna'i bug par ni steng la shar du brjod do/ /'byung ba zhes pa ni spro ba'o/ /da ni gzhan zhes pa la sogs pa'i tshigs su bcad pa bzhis sa dang rlung dag dang me dang chu dag dang nam mkha' dang ye shes kyi khams dag dang /mthe bong dang ming med la sogs pas tshim par byed pa la sogs pa'i phyag rgya'i shes par byed pas phan tshun thabs dang shes rab nyid du gsungs te/ de la mthe bong dang mdzub mo dang gung mo dang ming med dang mthe'u chung rnams ni/ sa dang chu dang me dang rlung dang nam mkha' yongs su dag pa nyid kyi phyir/phyag rgya bcing ba las shes rab dang thabs rnam par dag par shes par bya'o/ /mi 'gyur zhes pa ni ye shes kyi khams so/ /dkyil 'khor bcu po yang dag sbyor/ /zhes pa ni/ phung po dang khams dag gcig pa nyid do/ /rtse gcig ni rdo rje rtse gcig pa'o/ /gri gug dang bcas ni/shes rab dang bcas pa'i rdo rje sems dpa'i mtshan ma ste/ phung po dang khams dang rdo rje gsum po gcig tu 'dres par gyur pa'i rang bzhin du rtogs par byed pa'o/ /da ni srog rtsol dang 'dzin pa dag gi mtshan nyid brjod pa'i sgo nas nye bar bsdu ba'i don du zla ba zhes pa la sogs pa'i tshigs su bcad pa phyed kyis srog rtsol rgyas par bstan la/sgra gcan zhes pa la sogs pa'i tshigs su bcad pa phyed kyis ni 'dzin pa bshad pa yin no/ /'di rnams grol na zhes bya ba la sogs pa'i tshigs su bcad pa phyed kyis ldog pa'i skyon gsungs pa yin no/ /da ni sngar mdor bstan pa'i 'chi ltas g.yon pa zhes bya ba la sogs pa'i tshigs su bcad pas gnyis ka rgyas par bshad pa nyid do//lnga zhes bya ba la sogs pa'i tshigs su bcad pa gnyis kyis nyi ma'i 'chi ltas kyi mtshan nyid gsungs so/ /'dir dgongs pa ni 'di yin te/ /sems can rnams kyi khams mi mnyam pa nyid las/g.yas kyi sna'i bug par mnyam pa'i dus sbyor gyi gnas la gang gi tshe nyin mtshan lngar rnam par bar ma chad du rlung 'bab pa de'i tshe 'chi ltas skye ba yin te lo gsum du 'tsho ba mtshon par byed do/ /de nas nyin zhag sum cu lhag pa'i nyin zhag brgya phrag gsum du lte ba'i gnas kyi khyim bcu gnyis kyi bdag nyid kyi 'dab ma bcu gnyis rnams su dkyil 'khor bcu yang dag par rgyu ba la sogs pa ji ltar rigs par 'bab pas/lo gsum las dman par byas nas phyi nas nyin zhag nyi shu rtsa lnga lhag pa'i lo gnyis bzung ste/ 'dab ma gnyis pa la rlung yang dag par rgyu'o//de nas 'dab ma de nyid la g.yas kyi sna'i bug par nyin mtshan bcur rnam par ma chad par 'bab ste/ de nas nyin zhag sum cu rtsa lnga lhag pa'i brgya phrag gsum du ji ltar rigs par 'bab pas dman par byas nas nyin zhag bcu dang bcas pa'i zla bas lhag pa'i lo gcig bzung ste/'dab ma gsum pa la yang dag par rgyu'o/ /'dab ma 'di la nyin mtshan bco lnga 'chi ltas 'bab ste/ de nas nyin zhag lnga bcu rtsa lnga lhag pa'i nyin zhag brgyar ji ltar rigs par 'bab pas dman par byas nas nyin zhag nyi shu lhag pa'i zla ba bdun bzung ste/'dab ma bzhi pa la yang dag par rgyu'o/ /nyin zhag nyi shur 'chi ltas 'bab ste/ de nas nyin zhag gnyis lhag pa'i zla ba gnyis su ji ltar rigs par 'bab pas dman par byas nas nyin zhag nyi shu rtsa brgyad lhag pa'i zla ba bzhi gzung ste/ 'dab ma lnga pa la yang dag par rgyu'o//nyin zhag nyi shu rtsa lngar 'chi ltas 'bab ste/ de nas nyin zhag gnyis lhag pa'i zla ba gcig tu ji ltar rigs par 'bab pas dman par byas nas nyin zhag lhag pa'i zla ba gsum gzung ste/ 'dab ma drug pa la yang dag par rgyu'o/ /nyin zhag nyi shu rtsa drug tu 'chi ltas 'bab ste/ de nas nyin zhag gnyis ji ltar rigs par 'bab pas dman par byas nas nyin zhag gsum lhag pa'i zla ba gnyis gzung ste/'dab ma bdun pa la yang dag par rgyu'o/ /'di la nyin zhag nyi shu rtsa bdun du 'chi ltas 'bab pa'o/ /de nas 'dab ma brgyad pa dang dgu pa dang bcu pa dang bcu gcig pa rnams su nyin zhag bco lnga dang bcu dang lnga dang gsum du 'chi ltas med par 'bab ste/bdun pa la sogs pa 'dab ma lnga 'dor ba na/ ji ltar rigs par 'bab pa ni med do/ /de nas 'dab ma bcu gnyis pa la g.yon gyi sna'i bug par nyin zhag gnyis 'bab po/ /nyin zhag gcig gi ze'u 'brul la'o/ /gang yang 'chi ltas kyis nye bar mtshon pa'i lo gsum gyi nyin zhag tshogs brgyad cu lhag pa'i stong phrag la nyin zhag sum cu rtsa lnga pa'i brgya phrag gsum la sogs pa 'dab ma so so 'dor ba'i rim pa las/dang po la sogs pa'i 'dab ma drug po rnams la 'chi ltas kyi nyin zhag lnga la sogs pa ni dang po kho nar 'bar ba yin no//phyi nas nyin zhag 'di rnams kyi 'bab pa gzhan du gsungs te/ nyin zhag sum cu lhag pa'i brgya phrag gsum la sogs pa rnams kyi ji ltar rigs par 'bab par shes par bya'o/ /de skad du yang dpal dang po'i sangs rgyas su/ 'chi ltas kyi nyin zhag dang bcas pa'i 'dab ma so so la chos nyin zhag 'dor ba'i rnam par bshad pa tshigs su bcad pa/nyi ma'i lo gsum dag las dang por nyin zhag tshogs ni mda' dang me dang 'jig rten 'dor bar byed/ /de las rgyu ba dang bcas nges par mda' dus rtse mo can dang mkha' ri zla ba gsum pa la'o/ / mig dang klu dang ri dang mda' ste nor dang lag pa bzhin du 'bab pa la ni rgyu ba yang / /de las tshes la sogs pa'i nyin zhag tshogs rnams thams cad kyang ni gang zhig ze'u 'bru ji srid nyid/ /ces pa'o/ /gang yang gsum gnyis gcig la zhes pa la sogs pas gang gsungs pa'i tshe'i lo dang zla ba la sogs pa de ni rigs pa'i tshad yin no//gsungs pa'i rnam par bshad pa las slar yang de'i phra mo'i dbye ba shes par bya'o/ /nyi ma'i 'chi ltas kyi bshad pa'o/ /da ni rtsa ba zhes pa la sogs pa phyed dang bcas pa'i tshigs su bcad pas zla ba'i 'chi ltas gsungs te/ de la sna bug g.yon par mi mnyam pa'i dus sbyor gyis gnas la gang gi tshe nyin mtshan du rnam par ma chad par rlung 'bab pa de'i tshe zla ba'i 'chi ltas skyes pa yin te/lo gsum du 'tsho ba mtshon par byed do/ /de nas 'chi ltas kyi nyin zhag gis dman pa'i zla ba dang po gnyis pa la ji ltar rigs par dkyil 'khor bcu yang dag par rgyu bas 'bab pa'o//de nas zla ba gsum pa la 'jug pa na 'chi ltas nyin zhag gnyis 'bab po/ /de nas nyin zhag gnyis kyis dman ba'i zla ba gsum pa dang bzhi pa la ji ltar rigs par 'bab po/ /de nas zla ba lnga pa la 'jug pa nas 'chi ltas nyin zhag gsum 'bab po//de nas nyin zhag gsum gyis dman pa'i zla ba lnga pa dang drug pa la ji ltar rigs par 'bab po/ /lte ba'i gnas kyi khyim bcu gnyis kyi bdag nyid kyi 'dab ma bcu gnyis las 'dab ma dang po 'dor bar byed do/ /lo gsum las zla ba drug dor nas gzhan zla ba sum cu po rnams gzung nas 'dab ma gnyis pa la yang dag par rgyu'o//zla ba bdun pa dang brgyad pa dang dgu pa la 'jug pa'i dang por rim pas 'chi ltas nyin zhag bzhi dang lnga dang drug 'bab po/ /de nas so so'i zla ba'i dang po las 'chi ltas kyi nyin zhag gis dman pa'i zla ba gsum ji ltar rigs par 'bab pas dman par byas nas zla ba nyi shu rtsa bdun rnams gzung ste/'dab ma gsum pa la yang dag par rgyu'o/ /'chi ltas nyin zhag gsum 'phel ba'i rim pa'i nyid kyis zla ba gsum dman par byas nas 'chi ltas kyi nyin zhag nyi shu rtsa gcig rnams kyi 'dab ma bdun pa'i mthar thug par 'dod par byed do//de la dor bya'i zla ba gsum la 'jug pa'i dang por 'chi ltas kyi nyin zhag nyi shu rtsa bzhi dang nyi shu rtsa bdun dang sum cu dang sum cu rtsa gsum gyis dman pa'i zla ba gsum gsum du ji ltar rigs par 'bab par byas nas 'dab ma brgyad pa dang dgu pa dang bcu pa dang bcu gcig pa rnams 'dor bar byed do//de nas 'dab ma dang po 'dor ba'i zla ba drug dang 'brel par 'bab pa'i nyin zhag gsum la 'chi ltas kyi nyin zhag gnyis ni 'dab ma bcu gnyis pa la g.yas sna bug tu 'bab pa'o//nyin zhag gcig ni ze'u 'bru la ste/ rlung thams cad rnam par gcod par 'gyur ro/ /rnam par shes pa ni 'jig rten gzhan du 'gro ste/ zla ba'i 'chi ltas kyi bshad pa'o/ /dbu ma zhes pa la sogs pa tshigs su bcad pa phyed dang gsum gyis dbu ma'i dus su 'chi ba gsungs te/de la zla ba dang nyi ma dang 'brel ba'i zla phyed dang bcu gcig lhag pa'i lo dgu bcu rtsa drug gi steng nas sna bug g.yon pa la nyi ma gcig rnam par ma chad par dus kyis byin gyis brlabs pa'i dus 'bab bo//de nas dkyil 'khor bcu yang dag par rgyu bas ji ltar rigs par 'bab pas nyin zhag gcig 'bab po/ /de nas g.yas kyi sna bug tu nyin zhag gnyis rnam par ma chad par 'bab bo/ /de bzhin du slar yang nyin zhag gnyis rnam par ma chad par 'bab bo//de ltar g.yon dang g.yas kyi sna bug gi gnas su g.yon dang g.yas dag gi mi mnyam pa dang mnyam pa'i dbye ba las nyin zhag gsum dang bzhi dang lnga dang drug 'bab ste/ g.yon dang g.yas dag gi nam mkha' dang sa'i dkyil 'khor 'dor bar byed do/ / bshad pa'i rim pa de nyid kyis g.yon dang g.yas su yang dag par rgyu ba la nyin zhag bdun dang brgyad dang dgu dang bcu dang gcig dang gnyis 'bab ste/ de nas rlung dang chu'i dkyil 'khor 'dor bar byed do/ /de kho na bzhin du zhag bcu gsum dang bcu bzhi dang bco lnga dang bcu drug dang bcu bdun dang bco brgyad kyang ste/me dang me'i dkyil 'khor 'dor bar byed do/ /de bzhin du nyin zhag bcu dgu dang nyi shu dang nyi shu rtsa gcig dang nyi shu rtsa gnyis dang nyi shu rtsa gsum dang nyi shu rtsa bzhi yang ste/ chu dang rlung gi dkyil 'khor 'dor bar byed do/ /de kho na bzhin du nyin zhag nyi shu rtsa lnga dang nyi shu rtsa drug dang nyi shu rtsa bdun dang nyi shu rtsa brgyad dang nyi shu rtsa dgu dang sum cu 'bab pas sa dang nam mkha'i dkyil 'khor 'dor bar byed do//de bzhin du nyin zhag sum cu rtsa gcig dang sum cu rtsa gnyis dang sum cu rtsa gsum 'bab pas ye shes kyi dkyil 'khor 'dor bar byed do//de nas g.yas kyi sna bug la rnam par ma chad par nyin zhag sum cu gsum 'bab la/ nyin zhag gcig ni ze'u 'bru la ste/ de nas khams thams cad rnam par chad par 'gyur ro/ /nyin zhag sum cu rtsa gsum gyi mthar thug pas dge ba dang mi dge ba 'bab pa'i nyin zhag gi phung po nyi shu rtsa gnyis lhag pa'i brgya phrag bcu gcig tu 'gyur ro//g.yas kyi sna bug la rnam par ma chad pa'i nyin zhag sum cu rtsa gsum dang / ze'u 'bru'i nyin zhag dang bcas pa ni/ nyin zhag lnga bcu rtsa drug lhag pa'i brgya phrag bcu gcig tu 'gyur ro//dbu ma las dus su 'chi ba'i rnam par bshad pa'o/ /'chi ltas mtshan nyid shes nas ni/ /zhes bya ba la sogs pa'i tshigs su bcad pas 'chi ltas slu ba'i man ngag gsungs te/ man ngag de yang bla ma'i zhal kho na las shes par bya'o//'di las ni de'i khyad par rtogs par byas pa yin no/ /rnal 'byor pa'i/ 'di ni dga' ba rnams kyis 'gyur/ /zhes smras na dga' ba de gang yin zhes 'dri na/ mdzod spu'i pad+mar zhes bya ba la sogs pa rnams kyis dga' ba rnams kyi rnam par gzhag pa gsungs te/tshigs su bcad pa gnyis po 'dis kyang dga' ba'i mtshan nyid brjod pa las rjes su dran pa'i yan lag gsal bar mdzad do/ /rab tu mi gnas mya ngan 'das/ /zhes pa la sogs pa tshigs su bcad pa phyed kyis ni/ ting nge 'dzin gyi yan lag gsal bar mdzad do//rab tu mi gnas pa'i mya ngan las 'das pa ni/ dpral bar rab tu gnas pa ma yin zhing rdo rje las phyir 'gro ba ma yin pa rdo rje gsum gcig tu 'dres par gyur pa lhan cig skyes pa'i dga' ba bde ba chen po'o/ /'di las phyi mar tshigs su bcad pa du ma rnams kyis rjes su dran pa dang ting nge 'dzin dag kho na'i khyad par de dang de rjod par byed do//khu ba zla 'char zhes pa la sogs pa la/ don ni 'di yin te/ 'dir ji ltar phyi rol du tshes gcig la sogs pa tshes kyi cha 'phel ba'i dbye bas shar ba'i zla ba'i lnga pa dang bcu pa dang bco lnga pa ste rdzogs pa gsum yin no//cha bcu drug pa yang / dkar po'i phyogs kyi mtha' dang nag po'i phyogs kyi dang por dbus su 'jug pa ste/ bcu drug pa ni cha med pa gang yin pa'o/ /de bzhin du gsung las so/ /de bzhin du nang du gtsug tor du shar ba'i byang chub kyi sems kyi zla ba'i dga' ba la sogs pa'i dbye bas dpral ba dang snying ga dang gsang ba'i pad+ma la rim gyis lnga pa dang bcu pa dang bco lnga pa ste rdzogs pa gsum mo//cha bcu drug pa ni chags pa'i mtha' dang chags bral gyi dang por dbus su 'jug pa/ rdo rje las steng du 'gro bas na rab tu mi gnas mya ngan las 'das pa'i mtshan nyid lhan cig skyes pa'i dga' ba'i sgras brjod par bya ba yin no//de skad du yang kye rdo rjer gsungs pa/ byang chub sems ni zla bar 'gyur/ /bco lnga cha yi bdag nyid can/ /bde chen nyid ni A li'i gzugs/ /rnal 'byor ma rnams de'i cha nyid/ / ces pa'o/ /nyi ma zhes pa ni rdul gyi khams so/ /mdzod spu'i gnas ni dpral ba'i pad+ma'o/ /de'i zhes pa nyi ma rdul gyi'o/ /ji ltar sems can rnams 'khrig pa na/ gnas skabs kyi khyad par las 'gyur ba de bzhin du 'chi ba'i dus su yang yin te/ zla ba bdud rtsi 'og tu zhes pa la sogs pas bstan to//srid pa'i mtshan nyid ni/ las kyi bag chags kyi dbang gis byung ba'i mtshan nyid do/ /de phyir zhes bya ba la sogs pa'i tshigs su bcad pas ni/ de las bzlog pa bstan to/ /de dag gi zhes bya ba ni/ byang chub kyi sems zla ba dang nyi ma rdul dag gi'o//don de nyid dpal 'jig rten dbang phyug zhabs kyis phyag gi sgo nas gsungs pa/ zhabs gcig rdo rje nor bur rdul dang nyi ma dang / /gnyis pa gtsug tor khu ba ri bong can la ni/ /rtag tu mi chos dbyer med 'dod pa bkod gyur pa/ /'jig rten gsum gyis mchod pa'i gtso la spyi bos 'dud//ces so/ /rab tu mi gnas myang 'das las/ /zhes pa ni rnam par mi rtog pa 'dzag pa med pa'i bde ba chen po las so/ /phyin ci log tu 'gyur zhes pa la sogs pa ni/ phung po dang khams dang skye mched rnams te/ rnam par mi rtog cing sgrib pa med pa rnam pa thams cad pa nyid du 'gro'o zhes pa'i don te//gzugs gzhan de ni zhes gsungs pa'i phyir ro/ /da ni nor bur thugs dang zhes bya ba la sogs pa rkang pa dang bcas pa'i tshigs su bcad pas/ ye shes rdo rje rnam par dag pa bde ba chen po'i sku las thugs dang gsung dang sku rdo rje rnam par dag pa thabs dang 'brel pa'i chos dang longs spyod rdzogs pa dang sprul pa'i sku rnams lte ba'i 'og tu spro ba gsungs te/de la thabs kyi ni/ pha dang 'brel ba'i byang chub sems kyi'o/ /de kho na bzhin du/ shes rab kyi zhes bya ba la sogs pa rnams kyis sku rdo rje yongs su dag pa sprul pa'i sku las lte ba'i steng du gsung rdo rje la sogs pa yongs su dag pa longs spyod rdzogs pa la sogs pa'i sku rnams kyi spro ba gsungs te/shes rab kyis ni/ ma dang 'brel pa'i rdul gyi khams kyi'o/ /dmigs pa med pa'i snying rje thabs kyi bdag nyid bde ba chen po'i ye shes kyi dang /rnam pa thams cad kyi mchog dang ldan pa'i stong pa nyid shes rab kyi ye shes kyi yang rang gi gtso bo'i yon tan las grangs bzhin du lhan cig skyes pa la sogs pa dang / sprul pa la sogs pa'i so sor spro ba gsungs kyi/sku la sogs pa rnams don dam par so so tha dad par 'gyur ba ni ma yin no/ /las kyi phyag rgya zhes bya ba la sogs pa'i tshigs su bcad pas ni/ phyag rgya chen mo bsgoms pa las skyes pa'i rnam par mi rtog pa bde ba chen po'i ye shes 'phel bar 'gyur ba'i thabs gsungs pa yin no//yang na phyag rgya gsum dang 'bras bu gsum yang rgyas par bshad pa yin te/ de skad du yang dpal dri ma med pa'i 'od las gsungs pa/ las kyi phyag rgya'i rgyu las skyes pa'i 'bras bu ni/ / 'dod pa na spyod pa'i dngos grub bo/ /ye shes kyi phyag rgya'i rgyu las skyes pa'i 'bras bu ni gzugs na spyod pa'i dngos grub po/ /rnam par mi rtog pa rnam pa thams cad kyi mchog dang ldan pa'i stong pa nyid phyag rgya chen mo'i rgyu las skyes pa'i 'bras bu ni/ rnam par mi rtog cing thams cad mkhyen pa'o//'di kho na yin gyi rnam par rtog pa dang bcas pa'i rgyu nyid ni/ rnam par mi rtog pa bde ba chen po'i ye shes su 'gyur ba yin no/ /las kyi phyag rgya dang ye shes kyi phyag rgya dag gi 'dod chags chen po la brten nas bsgom pa'i thabs la mkhas pa tsam bstan pa yin gyi de dag rnam par mi rtog pa'i ye shes kyi skye bar byed pa po nyid ni ma yin no//mi 'gyur ba de zhes pa ni/ sku bzhi po gcig tu 'dres par gyur pa rnam par mi rtog pa bde ba chen po'i ye shes so/ /de la ci 'di 'phel ba'i rang bzhin 'phel bar 'gyur ram/mi 'phel ba'i rang bzhin 'phel bar 'gyur/ gnyis ka ltar yang mi rigs te/ de ltar ni/ 'phel ba'i rang bzhin gyi 'phel ba ni don med pa'i phyir dang / mi 'phel ba'i rang bzhin gyi nus pa dang mi 'byor pa'i phyir ro zhes rgol na/ don dam pa'i bden pa la brten nas rtsod par bya ba ma yin no zhes rtogs par bya ba'i phyir du/ 'phel ba'i zhes bya ba la sogs pa tshigs su bcad pa gsum gsungs pa yin no/ /gal te de ltar na skye ba dang 'gag par ci ltar 'gyur zhe na/ rang bzhin zhes bya ba la sogs pa gsungs te/rang bzhin med pa'i chos gang yin pa de rnams kyi skye ba dang 'jig pa dag ni sgyu ma bzhin du rig par bya'o zhes pa sgyu ma'i dpe las kun rdzob kyi bden par thams cad mi 'gal lo/ /ma skyes pa dang ma 'gags pa dang dngos po dang dngos po med pa sna tshogs la mtha' gcig tu phyogs su mngon par zhen pa dum bur bya ba'i phyir/'byung rnams zhes bya ba la sogs pa gsungs so/ /dngos dang dngos med mtshan nyid gcig /ces pa ni/ dngos po'i rnam pa thams cad dang dngos po med pa ni/ stong pa nyid dang 'od gsal ba zhes pa'i don to//de'i phyir na gcig pa ste tha mi dad pa'i mtshan nyid de rang bzhin gang gi yin pa de la de skad ces bya'o/ /de ltar yang 'phags pa klu sgrub zhabs kyis/ dngos las stong nyid gzhan min te/ /de dor nas kyang dngos yod min/ /de phyir rkyen las skyes dngos rnams//stong par khyod kyis rab tu bstan/ /zhes gsungs so/ /rang gi shes rab ces pa la sogs pa ni/ las dang ye shes dang phyag rgya chen mo la ltos nas gsungs pa yin te/ de la las kyi phyag rgya dang ye shes kyi phyag rgya brtags shing bsgoms pa las skyes pa'i byang chub kyi sems kyi thig le dang zhing zhu ba rdo rje'i rtse mor son pa gang yin pa de nyid kyi 'dzag pa ni/don dam pa'i bden pa bsgoms pa las 'dzag pa med par 'gyur ro/ /lus zhes bya ba la sogs pa rnams kyis ni/ lus dang ngag dang sems kyi rang gi rten gyi rtsa rnams su sku la sogs pa so sor bsgom pa'i yongs su dag pa bstan te/gang gi tshe slar yang dung can mar lhan cig skyes pa'i ye shes bsgom pa de'i tshe/ 'di nyid du sku rdo rje la sogs pa rnams lhan cig skyes pa dang gcig tu 'dres par gyur pa nyid du 'gyur ro//mgo bo ni dpral ba las te/ rdzogs pa'i gnas su ni gsang ba'i pad+mar ro/ /bcing ba ni brtan pa'i dngos po ste/ don dam pa las ni/ phyag rgya chen mo'i de kho na nyid bsgoms pa las so/ /rdzogs pa gang zhes pa ni/ cha bcu drug pa lhan cig skyes pa'i dga' ba'i mtshan nyid do//de la skad cig thams cad rdzogs/ /zhes pa ni skad cig ma phyi ma rnams dang / rnam par ma brtags pa'i lhan cig skyes pa'i skad cig ma thog ma rang bzhin gcig pa nyid kyi phyir te/ de skad du yang / gang gis de nyid las ni dngos gcig mthong //de yis dngos kun de nyid las mthong ngo / /zhes bya ba la sogs pa gsungs pa yin no/ /skad cig ni/ 'dir dbugs 'byung ba dang rngub pa'i mtshan nyid de/ de yang drug brgya lhag pa'i stong phrag nyi shu rtsa gcig gi grangs ni skad cig thams cad du brjod do//de la dbugs brgya phrag bco brgyad 'gog pa las/ mtshan ma dang lhan cig skyes pa'i ye shes gcig tu 'dres par gyur pa'i rang bzhin rnams kyis sa gcig thob la/ de bzhin du rim gyis sa bcu gnyis so sor thob pa las skad cig thams cad yongs su rdzogs par byed do//'di'i zhes pa ni/ cha bcu drug pa'i rang bzhin gang yin pa lhan cig skyes pa'i ye shes kyi'o/ /cha nyams pa zhes pa ni/ cha bco lnga kho na dor ba yin gyi cha bcu drug pa'i ni ma yin te/ de ni 'chi ba'i dus kho nar 'byung bar 'gyur ba yin no//nyams pa'i zhes pa ni/ rdul gyi khams kyi'o/ /ye shes nyams pa min zhes pa ni/ cha bcu drug pa yongs su dor ba min pa'o/ /'di'i zhes pa ni/ lhan cig skyes pa'i dga' ba'i bdag nyid kyi ye shes kyi'o/ /dngos po bar ma gzhan zhes pa ni/ chags pa dang / chags bral dang / dkar po dang / nag po dang / dngos po dang dngos po med pa'i phyogs kyi mtshan nyid do/ /phyogs gnyis zhes pa ni/ chags pa dang chags bral la sogs pa'o/ /ji ltar chu bo'i chu zhes bya ba la sogs pa'i dpes/ bde ba chen po'i ye shes la zhugs pa na dngos po thams cad lhan cig skyes pa dang ro mnyam pa nyid du gsungs te/dang por mngon du byas pa'i rnal 'byor pa ni rnam par mi rtog pa so so rang rig pa'i bsam gtan las langs pa na/ bdag la bde ba 'di byung ngo zhes ji lta ba'i gtam byed do//kun nas rdzogs pa'i gnas skabs thob pa'i rnal 'byor pa ni/ de lta bu ma yin te/ de ni rnam pa thams cad du bde ba'i rang bzhin nyid kyi phyir ro/ /'di rnams nyid rtogs par bya ba'i phyir/ mche rma'i zhes bya ba la sogs pas dpe dang dpe can gsungs te/de la rdzogs pa'i gnas skabs ni gtsug tor gyi gnas su'o/ /sems ni rnam par mi rtog pa'i byang chub kyi sems su'o/ /rdzogs nas zhes pa ni 'dzag pa med pa la sogs pa'i dbye bas ji srid cha bcu drug pa yongs su rdzogs pa nyid thob pa na'o//ji ltar zhes pa la sogs pa'i tshigs su bcad pa gnyis kyis ro'i dpes rnam par mi rtog pa phyag rgya chen mo las skyes pa'i ye shes rab tu thob par bya ba'i phyir las kyi phyag rgya bsgom pas na/ thabs la mkhas pa yin no zhes gsungs te/ gang gi tshe kun rdzob kyi bden par yang /ro'i reg pa la sogs pas 'bugs pa'i nus pa 'jig rten pas gzung bar mi nus pa de'i tshe/ don dam par mtha' yas pa'i yon tan gyi ye shes kyis ci zhig ces pa'o/ /'di las gsungs pa/ ci 'dir zhes pa la sogs pa'o//dri ma rang bzhin du lhag par gnas na/ grub par 'gyur ba ma yin no zhes rtogs par bya ba'i phyir/ sems la zhes bya ba la sogs pa'i tshigs su bcad pas ni dam bca' ba bzhi nye bar bstan la/ gal te zhes bya ba la sogs pa'i tshigs su bcad pa gnyis kyis ni/de nyid sgrub par byed do/ /ye shes stong pa nyid dang sbyor ba las/ ci de rang bzhin chad pa'am rtag par 'gyur zhes dogs pa bsal ba'i phyir/ ji ltar zangs kyi zhes bya ba la sogs pa'i tshigs su bcad pa gnyis kyis dpe dang dpe can gyi dbye bas ngo mtshar ba nyid gsungs so//dgongs pa ni 'di yin te/ dri ma de zangs kyi yin na/ de las tha mi dad pa'am tha dad pa yin/ gal te tha mi dad na/ ro'i sbyor bas dri ma nyams pa na/ zangs nyams par 'gyur te/ de'i bdag nyid yin pa nyid kyi phyir ro/ /tha dad pa yin na yang /zangs kyi'o zhes ci ltar thob ste/ de dang 'brel pa med pa nyid kyi phyir ro/ /des na yang ji ltar tha dad pa dang / tha mi dad par brjod par bya ste/ dri ma nyams pa las gser du snang ba ni bsam gyis mi khyab pa'o/ /de kho na bzhin du stong pa nyid kyi sbyor bas mi shes pa'i dri ma dor ba las/mtha' yas pa'i yon tan gyi tshogs kyi gnas/ 'khor ba dang mya ngan las 'das pa la rab tu mi gnas pa/ rmi lam dang mtshungs pa/ rnam par mi rtog pa rnam pa thams cad pa'i ye shes so/ / de ltar yang sa ra ha'i zhabs kyis/ rtog pa nyams pa blo nyams pa'i/ /blo ngan rjes su rtog byed lo/ /blo bzang rnams la 'di nyid las/ /mkha' las lhag par ci yang 'char/ /zhes so/ /'gyur med bde ba zhes pa ni/ rnam par mi rtog pa'i bde ba chen po la'o//chags bral zhes pa ni/ 'khor bar chags pa'i bag chags kyis 'pho ba la mngon par zhen pa'o/ /mi bya zhes pa ni/ rjes su gnas par mi bya ba ste/ ci'i phyir na/ chags pa'i bag chags kyis 'pho ba ni/ 'khor ba 'phel ba'i rtsa ba yin pa nyid kyi phyir ro//'di ni 'phos pa las ni zhes pa la sogs pas gsungs so/ /bde ba don du gnyer ba'i 'jig rten pas kyang 'pho ba'i bde ba 'dod cing re bar bya ba ma yin na/ de ci ltar na/ de kho na nyid kyi rnal 'byor pas 'dod par bya ba yin zhes bya ba 'di ni chags can zhes bya ba la sogs pas gsungs pa yin no//de'i phyir rnam par mi rtog pa'i byang chub kyi sems 'gyur ba med pa'i rnal 'byor kho na las/ ma brtags pa mchog tu mi 'gyur ba'i bde ba chen po bsgrub par bya ba yin gyi/brtags pa'i hUM dang / phaT la sogs pa'i yi ge 'gyur ba'i rnal 'byor las ni ma yin te/ 'di ni khu ba zhes bya ba la sogs pas gsungs pa yin no/ /don dam pa'i bden pa las ni/ sgrub par byed pa dang bsgrub par bya ba'i rtog pa yang yod pa ma yin te/'di ni sems zhes bya ba la sogs pas gsungs pa yin no/ /'di nyid ni rnam par mi rtog pa 'gyur ba med pa'i ye shes las skyes pa'i sku'i hUM yig la sogs pa brtag cing 'gyur ba'i sa bon las skyes pa ni de kho na nyid yin pa 'gog pa gsal bar byed pa bcom ldan 'das kyis/'gyur med ces bya ba la sogs pa gsungs pa yin no/ /da ni stong pa zhes bya ba la sogs pas/ rnam par mi rtog pa gnyis su med pa'i ye shes kyi kun rdzob kyi bden pas rgyu dang 'bras bu'i dngos po gsungs te/ stong pa las byung ni/rang bzhin med pa las skyes pa rnam pa thams cad pa'i gzugs so/ /'gyur med las skyes ni/ rnam par mi rtog pa rnam pa thams cad pa phyag rgya chen mo'i ye shes las skyes pa'o/ /snying nyid ces bya ba la sogs pas gsungs pa kho na'i don te/ ming gzhan gyis gsal bar byed pa'o/ /stong pa nyid kyi gzugs brnyan dang / mi 'gyur ba'i ye shes dag la chad pa dang rtag pa nyid du dogs pa ni/ mya ngan las 'das pa bral ba'i zhes bya ba la sogs pas sel bar byed do/ /ci ltar na chad pa dang rtag pa'i skyon du mi 'gyur zhes bya ba'i lan ni/dngos med ces bya ba la sogs pas gsungs te/ de la/ dngos med las byung mtshan nyid phyir/ /zhes pa ni/ rnal 'byor pa so so rang gis rig pa rang bzhin med pa las byung ba rnam pa thams cad pa snang bzhin pa yin pa nyid kyi phyir ro//dngos po las byung mtshan nyid phyir/ /zhes pa ni/ gdod ma nas ma skyes pa rnam pa thams cad pa las byung ba nyid kyi phyir ro/ /'di nyid ni/ dngos med ces bya ba la sogs pas gsungs pa yin no/ /gzugs dang gzugs min rnam des grol/ /zhes pa ni/rtag pa dang chad pa dang dngos po dang dngos po med pa la sogs par 'dzin pa dang bral ba'o/ /da ni/ shes rab ces pa la sogs pas sngar gsungs pa'i rgyu dang 'bras bu dag ma brtags shing gnyis su med pa'i gzugs nyid du gsungs te/ shes rab ni rnam pa thams cad kyi mchog dang ldan pa'i stong pa nyid do//rgyu yid do/ /rgyu'i ni/ yod pa dang med pa dang gnyis ka dang gnyis ka ma yin pa'i mtshan nyid kyi phyir ro/ /'bras bu zhes pa ni/ dmigs pa med pa'i snying rje'i bdag nyid sangs rgyas nyid de//'gro ba'i don byed pa po'o/ /de ltar yang 'bum phrag lnga pa'i kye rdo rje las/ rnam pa kun gyi mchog ldan pa'i/ /stong nyid rgyu ni dang por te/ /phyi nas dmigs med snying rje yis/ /'gro ba'i don byed 'bras bu'o/ /zhes so/ /de'i phyir rang bzhin gyis ma grub pa'i rgyu'i 'bras bu ni/rgyu las skyes par mi 'gyur ro/ /'bras bu zhes bya ba la sogs pas/ rgyu dang 'bras bu yod na rgyas gdab par bya ba dang rgyas 'debs pa por 'gyur na/ gang gi tshe de dag nyid kyi rang bzhin ma grub pa de'i tshe ci ltar na der 'gyur zhes bya ba la sogs pa gsungs so//de la ci/ rnam pa thams cad nyid du rgyu dang 'bras bu'i dngos po med pa yin nam zhe na/ 'dir smras pa/ rgyu zhes pa la sogs pa ste/ 'di'i dgongs pa ni/ rten cing 'brel par 'byung ba'i mtshan nyid kyi rgyu dang 'bras bu'i dngos po sgyu ma la sogs pa'i bden par bsgrub pa kun rdzob kyi bden par yod pa kho na'o//de'i phyir rgyu dang 'bras bu la sogs par rtog pa dang bral ba/ shes rab dang thabs kyi bdag nyid zung du 'jug pa'i gzugs/ bde ba chen po'i yo shes dus thams cad du shar bar gyur pa'o//'di nyid ni/ phan tshun zhes bya ba la sogs pa rnams kyis gsungs pa yin no/ /de ltar yang sa ra ha'i zhabs kyis gsungs pa/ byed pa dang bral 'gro la rtag tu shar/ /gang zhig dus su nges par gsungs pa na//thams cad mkhyen pa'ang tshig gis dbul 'gyur ba/ /bde ba'i rgyal po gcig pu rgyal gyur cig /ces pa'o/ /gal te re zhig chos rnams ma skyes shing ma 'gags pa yin na/ de la ci ltar na/ shes bya dang shes pa'i rnam pas tha snyad du grub par 'gyur zhe na/de'i phyir/ de ni rang sems zhes bya ba la sogs pa gsungs te/ rmi lam lta bu'i rang bzhin ma skyes pa'i shes bya mthong ba yang 'di lta bu'o/ /de ltar na/ rnam par shes pa smra ba'i don dam par yod pa'i mtshan nyid do zhe na/ de'i phyir bdag gis bdag nyid la zhes bya ba la sogs pas/rnam par shes par yod pa yang 'gog par byed bzhin du gsungs so/ /mo gsham zhes bya ba la sogs pas ni/ rnam par ma brtags pa rnam pa thams cad pa'i gzugs brnyan las skyes pa'i bde ba chen po'i ye shes kyi gzugs dpe dang bcas pa gsungs pa'o//dgongs pa ni 'di yin te/ ji ltar rmi lam du rang bzhin gyis ma skyes pa'i snang ba'i mo gsham gyi bu mo dang 'grogs pas/ sems can ci yang rung bas bde ba myong bar 'gyur ro/ /de bzhin du de kho na nyid kyi rnal 'byor pas/rang bzhin gyis ma skyes shing rnam par mi rtog pa rnam pa thams cad pa'i gzugs brnyan dang gcig tu 'dres par gyur pa/ ma brtags pa'i bde ba chen po myong bar 'gyur ro/ /da ni shes rab ma yin zhes bya ba la sogs pas rnam par mi rtog pa'i bde ba chen po'i ye shes 'di nyid kyi khyad par de dang de gsungs so//da ni rang byung zhes pa la sogs pa'i tshigs su bcad pa gsum gyis/ sems can gyi bsam pas/ rgyud gzhan du gsungs pa'i bde ba chen po'i ye shes 'di nyid kyi mthar thug pa thob pa'i sna tshogs pa'i ming mdor bstan pa'i tshig gsungs nas/rdo rje mi phyed ces bya ba la sogs pa rnams kyis ni mdor bstan pa'i tshig 'di rgyas par bshad pa gsungs so/ /'dir bsdus pa'i don ni/ rnam par mi rtog pa'i ye shes dang thugs dang gsung dang sku yongs su dag pa/rgyu mthun pa dang rnam par smin pa dang skyes bu byad pa dang dri ma dang bral ba nyid kyi bdag nyid can/ lhan cig skyes pa dang chos dang longs spyod rdzogs pa dang sprul pa'i sku'i rang bzhin rigs bzhi yongs su dag pa/ rdo rje sems dpa' dang byang chub sems dpa' dang sems dpa' chen po rnams dam tshig sems dpa'i rang bzhin du gsungs so//rigs bzhi po 'di nyid kyis rgyud gzhan du sna tshogs pa rigs bzhir sdom pa'i dbye ba shes par bya'o/ /de bzhin du rnam par mi rtog pa'i ye shes dang me dang nam mkha' dang sa dang rlung dang chu'i khams yongs su dag pa/ye shes dang tshor ba dang rnam par shes pa dang gzugs dang 'du byed dang 'du shes kyi phung po'i bdag nyid can/ ser sna chen po dang / 'dod chags chen po dang / zhe sdang chen po dang /gti mug chen po dang / khro ba chen po dang / 'dod pa chen po yongs su dag pa'i rdo rje sems dpa' dang / rin chen 'byung ldan dang / mi bskyod pa dang / rnam par snang mdzad dang / don yod grub pa dang / 'od dpag med de/ de bzhin gshegs pa drug rnam par dag pa rigs drug tu gsungs so//rigs bzhi dang rigs drug 'di nyid kyi rnal 'byor dang rnal 'byor ma'i rgyud thams cad la khyab pa ste/ rigs bzhi dang rigs drug gi dbye ba kho na bshad pa yin no/ /sku zhes pa la sogs pa rnams kyis ni dkyil 'khor gsum gsungs so//gsang ba'i dbang po ni gsung rdo rje'o/ /zla ba zhes pa ni/ zla ba bzang po la bod pa'o/ /dbang mdor bstan pa'i mdor bshad pa/ /bdag gis bris las dge ba gang / /thob des rdo rje sems dpa' yi/ /go 'phang skye bos thob par shog /sA hU pu tra dpal 'dzin dga' bas mdzad pa'i dbang mdor bstan pa'i mdor bshad rdzogs so// //rgya gar shar phyogs kyi paN+Di ta chen po gnas brtan byang chub sems dpa' nags kyi rin chen gyi zhal snga nas dang / lo tsA ba'i cha shas su gyur pa gzhon nu dpal gyis/chos 'khor dpal bsam yas kyi dben gnas dam pa mchims phu'i dben gnas su bsgyur ba'o/ /

CLOSE WINDOW