/rgya gar skad du/ shrI pa ra mAr+tha se bA/ bod skad du/ dpal don dam pa'i bsnyen pa/ dpal dus kyi 'khor lo la phyag 'tshal lo/ /khams gsum la ni ye shes nyin mor byed pa yi/ /dpal ldan shAkya'i seng ge byams pa'i mgon po dang / /'jam dbyangs bcas pa yid bzhin nor dang grags pa dang / /rdo rje 'dzin pa rnams la spyi bos phyag 'tshal te/ /lta ba drug gi gzhung mang rtog ge la sogs kyis/ /blo dman rnams kyis gang zhig brtag par dka' bas te/ /mdor bsdus pas ni 'jig rten lugs ni spangs nas su/ /don dam bsnyen pa de ni bdag gis bshad par bya/ /'dod pa'i dngos grub slob dpon zhal gyi rjes 'brang bar/ /ma lus rdo rje theg par thams cad mkhyen pas gsungs/ /de phyir slob ma dam pa rnams kyis bla ma gser bzhin du/ /yongs su brtags na sdig pa cung zad yod ma yin/ /gang las khyab 'jug bde 'byung drag po zla ba dang / /nyi ma rgyu skar sgra gcan gza' sogs gyur pa yi/ /rdo rje sems dpa' yab de dag ni rnam spangs te/ / rmongs pas 'jig rten mes po'i lam la len par byed/ /'jig rten dag gi nges pa tshad mas dman pa ste/ /lta ba'i chos kyi dbye ba dag gi rnam pa mang / /rig byed rtogs par dka' zhing dran pa tha dad pas/ /'jig rten 'dir ni mkhas pa rnams kyis gang zhig 'dzin/ /thams cad mkhyen pa yis ni gsungs pa'i don gzhan la/ /lus mang po yis de ni gzhan du 'chad par byed/ /lta ba drug tu gnas pa bla mar rab grags pa/ /khams ni rab tu rgyas dang mnyam pa nyid log khams/ /bla ma'i zhal gyis dman pa dag gis rgyud thos zer/ /mngon par dbang bskur mi 'gyur lam ni ma thob par/ /rdo rje slob dpon go 'phang chen po 'dir byed de/ /skye bo rmongs pa 'di la ci zhig spyad pa'o/ /nor 'dod brkam pas mngon par dbang ni bskur bar byed/ /rang gi dkyil 'khor rdul tshon dag gis bri byed de/ /rdo yi rang bzhin 'dod pa'i rtags la mchod par byed/ /'bar ba'i thab khung du ni mar la sogs pa sreg / oM yig hUM yig ces ni 'dod pa'i sngags yin te/ /gzhan la phan pa ru ni 'di nyid brjod pa yin/ /blo gros nyams pa yis ni 'di dag mi shes te/ /gang gis sgra tsam dag ni de nyid sngags su 'gyur/ /ngang pa'i rgyal med mtsho yi pad+ma'i lte bar ni/ /g.yon can bya dkar dag ni shin tu mdzes par 'gyur/ /nya yi rigs la de ni gsod pas gab pa ltar/ /bla ma ngan pas 'gro ba rnams la de bzhin no/ /pad+ma'i snying po ltar ni mgrin pa bstungs nas su/ /g.yon can rkang pa ya gcig gis ni gnas pa ste/ /chu skyar 'dis ni nya rnams 'khrul pa byed pa ltar/ /bla ma ngan pas 'gro ba rnams la bya dkar bzhin/ /ji ltar zlos gar mkhan gyis gar gyi ngo bo bsgyur/ /'khor ba lha yi dbang po'i gzugs su byed pa ltar/ /lam dag med dang nor la 'dod cing brkam pa yis/ /de bzhin dbang la rgyal ba'i cod pan 'ching bar byed/ /'dod la lhag zhen chang gi dbang gis bag med cing / /khro ba'i sems dang bcas shing rdzas la mang du zhen/ /bden pa ma yin smra zhing bu rnams slu 'dod pa/ /bla ma de yis sdug bsngal ster ba ngo mtshar med/ / 'khor ba'i sdug bsngal me dag gis ni gdungs pa yis/ /rab rib mig gis bla ma dag gis gzung byas pa/ /shin tu gdung ba gzhom phyir lam chen gnas pa yi/ /gnyid log sbrul gyi dug gis 'khrul pa bzhin du'o/ /chos la zhen dang mya ngan 'das pa'i bde ba la/ /rab zhen sems ldan rmongs pa'i skye bo du ma la/ /yongs su brtags na dmyal ba'i me ni ster ba po/ /bla ma ngan pa ci yi phyir na sten par byed/ /'khor ba dang ni mya ngan 'das pa'i dngos nyams pa/ /shes dang nges zhugs snying rje la sogs tha mi dad/ /dbang po bral zhing rtog pa brtag pa ru ni dang / / gnyis su med cing kun 'gro nges par zhi ba nyid/ /de yang dang po'i sangs rgyas rdo rje sems dpa' dpal/ /de nyid 'jig rten mgon dang dpal ldan 'jam pa'i dbyangs/ /de ni thugs kyi rdo rje rdo rje mkha' 'gro dpal/ /de ni mi 'gyur 'gyur med rnal 'byor gyis ni bgrod/ /de ni dbang phyug khyab 'jug dag dang mes po ste/ /bdud sogs 'joms med bde gshegs rgyal dbang po/ /grags pa de ni thub pa shAkya seng ge dpal/ /de ni sangs rgyas thams cad dpal ldan dus 'khor lo/ /sprul pa 'di ltar zhi ba de ni bla ma dpal/ /rab tu sbas pa'i sangs rgyas bde ster sa gzhi la/ /bdud kyi dgra gcig skye 'gro yi ni rtsa lag gcig /bla ma dam pa bsten pa rnams la yid bzhin nor/ /srid pa gsum gyi bsam gtan chags mnyam sgom pa po/ /chags chen 'dod chags chen po la ni thugs bcings pa/ /dbang po gnyis bde sbyor zhing brtul zhugs chen po can/ /phyag rgya dag la sbyor yang chags pa nyams mi mnga'/ /nyi zla dag gi lam la rnal 'byor nyams pa dang / /shes rab me la rnal 'byor stobs kyis rab tu zhugs/ /dpag med bde ba'i bdud rtsi btung la chags pa ste/ /sdig 'phrog rdo rje 'dzin pa de ni bla ma dpal/ /bu bzang dag ni rnam par spangs nas tshol mi byed/ /bde bar 'ongs pa sbyin pa ru ni mi gtong ba/ /rnyed pa'i don la sogs pa ru ni 'dod ma yin/ /rnyed pa'i nor ni nye bar longs ni spyod mdzad pa/ /bla med rgyud kyi gsung ni yang dag ston pa'o/ /yon tan ldan pa'i sras rnams la ni 'khor ba 'joms/ /rang lus tshangs pa'i 'jig rten nas ni kun du ston/ /de ni bla ma'i dpal te bla ma dpal gzhan min/ /dpag med sangs rgyas kyis ni rtag tu de la mchod/ /phyogs bzhugs byang chub sems dpa' rtag tu de la 'dud/ /grub pa rnams kyis rdo rje'i glu mang de la len/ /srid pa'i dgon par lhung la lam ni ston pa'o/ /'dod pa phal par zhen pa bla ma dpal ma yin/ /legs 'ongs nor la zhen pa bla ma dpal ma yin/ /skyes bu mkhas pa smod byed dpal ldan bla ma min/ /sems can snying brtse rnam spangs dpal ldan bla ma min/ /dge 'dun dkor la rab spyod dpal ldan bla ma min/ /nor med slob ma 'dor ba dpal ldan bla ma min/ /bsgoms zin las rnams ster ba dpal ldan bla ma min/ /bu bzang kha sdom byed pa dpal ldan bla ma min/ /bu bzang de nyid sbed pa dpal ldan bla ma min/ /bu bzang slu bar 'dod pa dpal ldan bla ma min/ /bu bzang yun rings khro ba dpal ldan bla ma min/ /bu bzang spong bar 'dod pa dpal ldan bla ma min/ /ye shes dbang gis khengs bcas dpal ldan bla ma min/ /rdzas kyi dbang gis rab dga' dpal ldan bla ma min/ /phran tshegs khyim du bsti 'dod dpal ldan bla ma min/ /rgyal srid sde la rab zhugs dpal ldan bla ma min/ /rang gi mgrin par skad 'chang dpal ldan bla ma min/ /khyab 'jug dbyu gu 'chang ba dpal ldan bla ma min/ /thal bas lus la byugs pa dpal ldan bla ma min/ /ral pa 'chang dang skra bregs dpal ldan bla ma min/ /mgo bo'i thod pa 'chang ba dpal ldan bla ma min/ /gcer bu dang ni skra 'bal dpal ldan bla ma min/ /dben pa'i dbang gis rab dga' dpal ldan bla ma min/ /lus la dmar po'i gos gyon dpal ldan bla ma min/ /pus 'khyud rab tu 'ching ba dpal ldan bla ma min/ /sngags zlos bgrang phreng can ni dpal ldan bla ma min/ /chang gi dbang gis bag med dpal ldan bla ma min/ /srog chags rnams la sems sdang dpal ldan bla ma min/ /bde ba'i dbang gis rab dga' dpal ldan bla ma min/ /'gyur ba'i bde la chags pa dpal ldan bla ma min/ /sdug bsngal dbang gis gdungs pa dpal ldan bla ma min/ /thar pa'i lam la bag med dpal ldan bla ma min/ /lam las nyams pa'i sems ldan dpal ldan bla ma min/ /kun 'gro chos ni nyams pa dpal ldan bla ma min/ /rang dbang sdug bsngal byed pa dpal ldan bla ma min/ /'khar gsil lhung bzed lag 'chang dpal ldan bla ma min/ /bla gab med pa'i rnal 'byor dpal ldan bla ma min/ /shing gi drung na gnas pa dpal ldan bla ma min/ /sdug bsngal ster ba'i phyag dar dpal ldan bla ma min/ /dus su za ba'i dge slong dpal ldan bla ma min/ /skye bo med pa'i rdzong gnas dpal ldan bla ma min/ /brag phug rnams su rab zhugs dpal ldan bla ma min/ /gang zhig yon tan ring phung dpal ldan bla ma de/ /gang zhig srid pa'i skyon 'joms dpal ldan bla ma de/ /gang zhig snyan pa'i ngag smra dpal ldan bla ma de/ /gang zhig lam bzangs ston pa'i dpal ldan bla ma de/ /gang zhig dmyal ba'i me 'joms dpal ldan bla ma de/ /gang zhig srid pa'i phar sgrol dpal ldan bla ma de/ /gang zhig 'gro ba'i gnyen gcig dpal ldan bla ma de/ /gang zhig 'gro ba'i mig gcig dpal ldan bla ma de/ /gang zhig 'gro ba'i rje gcig dpal ldan bla ma de/ /gang zhig 'gro ba'i zla gcig dpal ldan bla ma de/ /gang zhig skye 'gro'i nyi gcig dpal ldan bla ma de/ /gang zhig bde gshegs rje rigs dpal ldan bla ma de/ /gang zhig mi zad lam ston dpal ldan bla ma de/ /gang zhig mgrin par thos 'dzin dpal ldan bla ma de/ /gang zhig mi 'gyur dbus 'dzin dpal ldan bla ma de/ /gang zhig yon tan rdul lus dpal ldan bla ma de/ /gang zhig rgyal po'i spyod 'ching dpal ldan bla ma de/ /gang zhig lus kyi mgo 'dzin dpal ldan bla ma de/ / gang zhig skra 'bal ba yi dpal ldan bla ma de/ /gang zhig srid gdug gcer bu dpal ldan bla ma de/ /gang zhig dus gos 'dzin pa'i dpal ldan bla ma de/ /gang zhig bdud rtsi'i 'thung chags dpal ldan bla ma de/ /gang zhig dam tshig la zhugs dpal ldan bla ma de/ /gang zhig lus srung 'dod pa'i dpal ldan bla ma de/ /gang zhig rlung gi phreng ldan dpal ldan bla ma de/ /gang zhig rgyal ba'i shing drung dpal ldan bla ma de/ /gang zhig brtul zhugs snod 'dzin dpal ldan bla ma de/ /gang zhig bde ba'i khrod 'dzin dpal ldan bla ma de/ /gang zhig mi zad dus za'i dpal ldan bla ma de/ /gang zhig nam mkha'i gnas zhugs dpal ldan bla ma de/ /gang zhig nam mkha'i phug zhugs dpal ldan bla ma de/ /gang zhig sems can mnyam sems dpal ldan bla ma de/ /'jigs med dag gsum ster ba bla ma dpal gang de/ /dpal ldan bla ma de ni ci phyir bsten mi bya/ /dpal ldan bla ma de ni ci phyir tshim mi bya/ /dpal ldan bla ma de ni ci phyir mchod mi bya/ /dpal ldan bla ma de la ci phyir phyag mi bya/ /mal stan bzhon pa bran khol zho shas 'tsho rnams dang / /yan lag bzang po bu mo mdzes ma rnams dang ni/ /chung ma snying sdug bu dang rtsa lag bcas pa dang / /ma lus pa yis kyang ni bde ba ster ba la'o/ /sA lu'i zan dang sha dang dri zhim mar dag dang / /bza' dang bca' ba sbyin pa yid 'ong mang po dang / /tam po la dang ga bur kha bshal bzang po dang / /gla rtsi la sogs pa yis bdud mang dgra la'o/ /rab tu 'chang ba'i do shal nor bu rna cha dang / /ske rags dang bcas rkang gdub yan lag srung dang ni/ /cod pan dang bcas dpung rgyan rke nor bzang sogs dang / /sna tshogs na bza' yis ni sdug bsngal mang 'joms la'o/ /byug pa dang ni gur gum tsan+dan la sogs pa/ /a ga ru nag sih+la la sogs spos dang ni/ /tsam pa ka mchog la sogs dri zhim me tog dang / /rin chen mar mes lam ni mi nyams la'o/ /rtsod ldan dbang gis bla ma skyon dang yon tan 'dres/ /rnam pa kun du sdig pa med pa yod ma yin/ /gang zhig yon tan lhag pa yang ni legs dpyad nas/ /bu rnams kyis ni de la brten par 'gyur ba'o/ /rdo dang shing gi rang bzhin sangs rgyas rnams kyis ni/ /skye ba 'bum phrag gis ni thar pa mi ster ro/ /skye ba 'di nyid du yang gang zhig brtag pa ni/ /bla ma bsten pa yis ni bde ba ster bar mdzad/ /spun dang chung ma snying sdug grogs po mgon po dang / /bla ma dag dang mtshungs pa'i pha ma yod ma yin/ /skye ba 'di nyid du yang sdug bsngal 'joms pa yi/ /rdo rje 'dzin pa'i dpal bzangs dag gis ster ba'o/ /shin tu rnam par dag pa'i blo yis bsten bya yi/ /ji ltar phyi dus sdug bsngal ster bar min pa'o/ /ma dag sems kyis bstan pas sdug bsngal 'gyur ba ste/ /dper na rims nad rgyas pa la ni mar gyi btung ba bzhin/ /ji ltar bde ba'i don du bla mas ma byas pas/ /nyams pa'i sems kyis sdug bsngal mang du ster bar byed/ /shing las ring du lhung ba'i sdug bsngal mchog min pas/ /'dod pa'i 'bras bu sngon du bor ba mchog yin no/ /ltos 'gro'i dug ni myur du khyab pa dag dang ni/ /gdong lnga pa dang nges par glang po che dang ni/ /khro bo chen po'i gshin rje kha ni mchog yin gyi/ /gdug pa'i slob mas bla ma la ni brten pa min/ /dpal ldan blo ma'i zhabs la brten par 'dod pa de/ /rab tu khros pas skye ba brgya ru mi 'dod pa'o/ /de phyir rang gi blo yis dpyad nas ni/ /bsten par bya yi khro ba ru ni mi bya'o/ /rdo ba dang ni shing gi rang bzhin gzugs brnyan gyi/ /de la pha rol zhen pas 'dir ni mchog byed cing / /gang zhig sems dang bcas pas yon tan rgya mtsho yi/ /bla ma chen po de ni yongs su sun 'don te/ /du ma'i bdud dang dmyal ba'i me ni bskyod pa dang / /bgegs dang log 'dren rnams kyis rtag tu de bzung ste/ /sems bcas gsal ba rgyal ba'i dbang po spangs nas ni/ /gang zhig sems med pa la rab tu mchod byed do/ /'jam pa'i dpal ni dang po'i sangs rgyas yin pa la/ /ston pa gzhan dag rnams la mchod pa mdzad pa ni/ /ci phyir zhe na sems can gdul ba'i don yin gyi/ /gzhan du thar pa la ni 'dod cing chags pas min/ /de bzhin bla mas 'dod pa'i rtags ni bkod nas su/ /mi shes 'jig rten rnams kyi bsod nams rgyu ru ni/ /phyag mang ba dang mchod pa dag kyang mdzad pa ste/ /'on kyang mya ngan 'das pa'i lam la chags pa min/ /chung ma bu dang rtsa lag mang po'i sde rnams dang / /so ba nor dang rgyal srid dgra med phyogs dang ni/ /grub pa nyid dang dbang po drang srong dang bcas pa/ /re zhig lus po 'di ni mi rtag pa nyid do/ /khams gsum rnam pa brtan pa dag dang g.yo ba ni/ /cung zhig mi bzad pa ni gal te 'dir mthong dang / /gang zhig dngos po'i gzugs ni mi shigs yod 'gyur na/ /'di rnams dag la gti mug ched du chags par gyis/ /ji srid 'chi bdag rab tu ma sang bar du ni/ /de srid du ni khyod kyis lus 'di bsrung bar gyis/ /'di ni rab tu sad na khyod kyis bsrungs na yang / /lus ni nges pa ru ni ce spyang rnams la ster/ /de bzhin du ni chung ma dang ni bu dang rtsa lag dang / /grogs dang mgon po dag la skyabs su song na yang / /'bar ba la sogs pa la dus kyis byin pas na/ /dbang po la sogs kyis ni bsrung bar nus ma yin/ /grub pa dang ni drang srong lha yi dbang po dang / /dpag med bgrang du med pa de yis zad par khrid/ /ye shes me ni ji srid mthong bar ma gyur par/ /rang gi las dag su zhig gis ni bzlog par 'gyur/ /'di dag thams cad mi rtag 'dod pa ma yin te/ /ye shes bdud rtsi bla ma'i zhal ni 'dod pa'o/ /gnyis po 'di las bde dang sdug bsngal rab tu skyed/ /nges par legs par brtags na ci zhig la ni len/ /'khor ba'i rdzong dag tu ni 'khyam pa'i rang bzhin can/ /ji srid rang gi lus la mchod par byed pa bas/ /mya ngan las 'das bde ba ma lus ster mdzad pa/ /de srid de ni bla mar ci yi phyir mi byed/ /rang gis bsags pa'i nor rnams kun kyang byin nas ni/ /dmyal ba'i me ster bud med dag ni len par byed/ /sangs rgyas yan lag bzang mo 'khyud pa ster mdzad gang / /ci phyir bzang mo de ni bla ma la mi 'bul/ /so ba dang ni nor rnams yid du 'ong ba dang / /yan lag bzang mo dag ni bsod nams stobs las 'gyur/ /sdig pa dag gi dbang gis yun rings bsags pa yi/ /rab tu 'bad de bsrung bar byas kyang nyams par 'gyur/ /de phyir khyad par 'phags shing yid du 'ong ba yi/ /skye ba du ma ru ni bde ba ster byed pa/ /gang la nges par phul bas rab tu 'gyur ba yi/ /nor rnams kun gyis bla ma'i zhal la dbul bar bya/ /byin pa'i nor rnams 'bras bu dag tu 'gyur ba yin/ /shin tu rnam dag sa la sa bon btab pa bzhin/ /de rnams rab tu ma byin 'bras bu med pa ni/ /dper na sa bzang dag la sa bon ma btab par/ /sa bon ma btab zhing la 'bru yi ched du ni/ /rmongs pa shin tu nyon mongs par ni byed pa ltar/ /bla ma la ni nor ma phul ba de bzhin du/ /'dzin par 'dod pa dag ni sa la 'khyam par byed/ /nor la 'dod cing brkam pas zhing gi las la ni/ /rten dang tshong dang rig pa dag ni 'dzin par byed/ /de ltar na yang bkren pa'i dus ni du ma ru/ /myur ba dag tu 'ongs nas sdig can la ni gnas/ /nyon mongs ma gtogs 'bru dang gser dang chung ma dang / /bsod nams mang byed pa la bsam mi khyab par 'gyur/ /grub pa nyid dang dbang po drang srong mchog rnams dang / /dgra med rgyal srid sa bzhi'i bde ba ster ba'o/ /khams gsum dag na gang dag bde ba cung zad ni/ /ma lus de ni bla ma dgyes pa'i stobs kyis so/ /bkres dang nad dang dmyal ba'i me yi sdug bsngal ni/ /mi bzad de ni mi dgyes pa las byung ba yin/ /bla ma'i drin gyis 'dod pa'i dngos grub 'gyur ba ni/ /de bzhin gshegs pa rnams kyis bla med rgyud gsungs pa/ /de ni ma dgyes pa yis dmyal bar 'jug pa yi/ /tshig 'di nyid ni de dang de yi rgyud la gnas/ /yon tan dam pas gang bar bla ma'i thugs shes nas/ /'khor ba'i rgyu ru gang rnams kyis ni dor bar byed/ /grangs med bskal par bde ba nyams pa de rnams ni/ / rdo rje me yis smin pa'i dmyal ba dag tu 'tsher/ /bla ma dam pa slu bar byed dang sdig sogs gang / /slob ma 'ba' zhig rnams ni de ru mi 'tshed kyi/ /de bzhin bla ma yang ni zhen pa'i dbang gis nyams/ /chags pa la sogs 'bar ba'i me la rab tu 'jug /bla ma dang ni slob ma nges par rnam par nyams/ /rang rang sdug bsngal 'di ni gnyis ka'i thun mong ngo / /de bas bla ma slob ma 'di ru nyams pa ni/ /rang gi blo yis ring du yongs su spang bar bya/ /smyon pa rdo rje'i sen mo gdong pa lnga pa dang / /rkang brgyad khro bo'i gdong la mche ba dang ldan dang / /shin tu khro ba'i gdengs ka 'dzin pa mchog yin gyi/ /lam nyams bla ma slob ma dag ni 'di ltar min/ /bla ma ltung ba las ni slob ma mi ltung ba/ /slob ma ltung ba yis ni bla ma yang mi nyams/ /shing gi yal ga mthon por 'dzeg pa dag las ni/ /gang zhig ltung bar gyur pa de ni 'chi bar 'gyur/ /bla na med pa'i rgyud las ltung ba bcu bzhis ni/ /rtsa ba dang bcas dngos grub dag ni 'phrog par byed/ /dpag med bskal pa ru ni bde ba rnam par nyams/ /las ngan la gnas dbang bskur slob ma rnams la gsung / /bla ma'i sems sun pa yis ltung ba gcig yin te/ /bka' ni yongs su spangs pa'i dbang las gnyis pa'o/ /spun la rab tu khros nas smra ba gsum pa ste/ /byams pa yongs su spangs pa'i dbang gis bzhi pa'o/ /dpal ldan byang chub sems spangs dbang gis mda' zhes bya/ /grub pa'i mtha' la skyon bzung bas ni drug pa ste/ /sngags pa min la phebs par smra bas ri zhes bya/ / phung po so sor nyon mongs byed pa brgyad pa yin/ /dag pa'i chos la ma dad pas ni gza' zhes bya/ /gdug pa dang bcas byams pa bzung bas phyogs zhes so/ /dam pa'i chos la kun rtog dbang gis drag po zhes/ /dag pa'i sems can sun 'byin pa yis nyi ma ste/ /dam tshig bsten par ma byas pa yis yan lag med/ /bud med rnams la bshung ba yis ni bcu bzhi yin/ /'di rnams dag ni yongs su spangs par byas nas ni/ /'dod pa'i blo yis bla ma la ni bsten par bya/ /'dod chags la sogs pa dang mi shes dbang gis ni/ /bag med slob ma rnams ni gal te ltung 'gyur na/ /slar yang rab tu gnas par bya phyir dbang nyid ni/ /phyir bzlog pa la 'di ni nges par bya ba'o/ /dbang bdun bskur ba rnams la zlog pa yod pa ste/ /mi shes dbang gis gsang ba la ni brgya lam na/ /shes rab mngon par dbang bskur ba la ldog med de/ /dper na mi yi bdag po g.yul du shi bzhin no/ /lha mo re re'i rgyal ba'i sngags ni brjod pa las/ /stong phrag sum cu rtsa drug po ni nges bya zhing / /bzlas pa dag gi mtha' ru tshogs kyis tshim par bya/ /thun mong skyon gyis kyang ni chad pa 'di nyid yin/ /ji ltar rang gi nus pas bla ma la ni yon/ /phul nas rang gi rigs su thun mong pa ru 'gyur/ /de yi sems kyi rten dag shes par byas nas ni/ /lhag pa'am ni nyung bar bla mas nges par sbyin/ /tshogs dang bzlas pa'am ni mchod pa dag gis te/ /de rnams la ni bla ma dag par rab sbyin bya/ /shin tu ring ba'i shing las ring por lhung gyur pa'i/ /lus po la ni rkang pas brdeg par mi bya'o/ /de dag rnams kyi sems la skyon ni rjes gnas pa/ /'di rnams 'chad pa ci zhig sangs rgyas kyis mkhyen te/ /de lta na yang rmongs pas rab sad bya ba'i phyir/ /chad pa sbyin gyi 'di ni chad pa ma yin no/ /gang zhig sems la gnas pa'i ma lus mkhyen pa yi/ /rje mo dang bcas bde bar gshegs pas 'chad pa sol/ /dge dang mi dge las kyi 'bras bu de rnams la/ /chad pa gang ster bla ma 'dir ni gang zhig yin/ /dpyid zla 'bring po'i dkar po'i phyogs kyi cha la ni/ /dpal ldan dkyil 'khor de ni legs par bris nas su/ /bla mas mngon par dbang bskur rnam bdun sbyin bya zhing / /dpal ldan bstan pa'i don du 'khor lo mchod par bya/ /mchod pa med pas nges par dus kyi 'khor lo ni/ /bstan pa dag ni dag pa'i lo 'di ma yin no/ /gal te gang zhig skal ldan thos 'dod slob ma ni/ /'khor lo'i mchod pa bcu gnyis dag ni de yis bya/ /ji ltar bu bzangs kyis ni bag ma blang ba'i rgyur/ /rang gi pha la nam yang gsol ba mi 'debs te/ /yon tan dang bcas dus la bab pa'i bu la ni/ /pha nyid kyis ni bag ma'i bya ba shes par byed/ /de bzhin slob ma rnams kyis bla med dbang gi phyir/ /bla ma la ni nan gyis gsol ba mi gdab bo/ /bdag gi slob ma skal ba ldan nam mi ldan pa'i/ /rnam par dag pa'i de nyid de la de yis shes/ /rnam par dag pa'i slob ma nor ni med pa la/ /rdzogs pa'i byang chub rgyu ru dbang bskur rin po che/ /rang gi ngag gis kun nas rnam par dag pa 'di/ /mchod pa med na'ang bla ma yis ni sbyin par bya/ /chags pas mngon par khengs pa'i nga rgyal can dang ni/ /chags pas bag med g.yo can gyi ni mi la ni/ /gang zhig rgyal ba'i bka' yis thar pa'i 'bras bu ster/ /bla ma'i zhal gyis de nyid byin la ma byin pa'o/ /gang gi yid kyi rang bzhin gang gis shes na ni/ /ston pa de yis de la rang gi zhal sbyin no/ /gang zhig dag pa'i slob ma'i rang bzhin shes pa yi/ /mngon shes dang ldan bla ma gang yang yod ma yin/ /ma dag pa yi sems la bla ma'i 'dod pa'i zhal/ /rims nad rab rgyas rnams la mar gyi btung ba bzhin/ /byin nas rang gi lus la 'chi ba chen por byed/ /bde bas 'khrul pa bzhin du blo gros nyams pa la/ /gang zhig sangs rgyas gzugs brnyan mnyam pa'i bde ba'i rgyur/ /rang gi sems ni so sor snang ba tsam du bsgom/ /dmyal ba chen po'i sdug bsngal ster ba de nyid ni/ /rang gi sems kyi skyon gyis bdud du skye bar 'gyur/ /rdo rje dag gis sprul pa'i gzugs rnams du ma ni/ /sdig pa'i stobs kyis khyad par du ni rgud pa ste/ /gshin rje'i gnas ni gdug pa'i 'khor gyis yongs gang ba/ /gshin rje khros pas rdo rje'i me ni sbyin pa'o/ /de phyir bla ma dang ni rgyal ba'i dbang po'i gzugs/ /rnam par ma dag blo yis bsten par mi bya'o/ /dper na rgyal po'i dbyug pa 'dzin pa'i 'khor rnams kyis/ /dga' dang khro bas bde dang sdug bsngal ster ba bzhin/ /ma dag sems kyis 'di ni shi bar gyur pa na/ /gshin rje'i khro bo'i gdong pa rab tu gtum pa dang / /rdo rje me ni smin pa mi bzad mthong nas ni/ /nyon mongs kha yis ha ha'i sgra ni smra bar byed/ /sngon du bsags pa'i las kyi 'bras bu rab tu rgyas/ /khyod kyis 'dir ni nges par longs spyod pa ru gyis/ /bla ma la sogs 'gyod par byas dang bag med dang / /sdang ba khyod kyis nga yi bka' la ci zhig byed/ /'dod pa'i blo gros dpal ldan rdo rje can gyis ni/ /mi bzad dmyal ba'i sdug bsngal lung las ma gsungs sam/ /sdig pa'i stobs kyis rab tu khyab pa dag tu 'gyur/ /sdang ba khyod ni ci yi phyir na sdig pa byed/ /srid pa'i sdug bsngal gyis dman slob ma rnam dag pa/ /gang gi bka' yis thar pa'i go 'phang 'gro bar 'gyur/ /rab zhi rdo rje 'dzin pa'i dpal ldan bla ma de/ /'khor ba'i rgyu ru khyod kyis kyang ni 'dor byed dam/ /gshin rje'i bka' yis khro bo'i 'khor rnams kyis bzung ste/ /rab tu 'dar zhing gshin rje me rab gtum pa yi/ /smin par zhugs shing sog le dang ni rtse gsum gyis/ /blo gros rnam par nyams la gcod dang 'bigs par byed/ /slob ma dmus long de ni 'di ru ngo mtshar med/ /mig dang bcas pa'i bla ma long ba ngo mtshar che/ /rgyud rnams thos nas nor dang 'dod chags la zhen pa/ /de la yang ni nges par ston pa'i zhal med do/ /rgyal srid dpal ni ma lus rnam par spangs nas su/ /dpag med sangs rgyas rnams kyis byang chub yang dag bsten/ /skal ldan yon tan rnams kyis de ni nges par lhag /de bas rgyal ba rnams kyis nam yang mi 'dor ro/ /bde ba rnam par ma nyams thar pa'i dpal de ni/ /bor nas yan lag bzang po'i na chung dag la mos/ /sngon du bsags pa'i las ni nges par drag po ste/ /gang gis bdud rtsi bor nas dug ni 'thung bar byed/ /gzhan dag rnams ni bud med lus kyi 'dod chags zhen/ /lus po sbyin par byas nas nor ni 'dzin par byed/ /shin tu bsod pa'i zas la zhen pa'i nya bzhin du/ /skad cig bde ba'i rgyu yis rab tu nyams par 'gyur/ /bram ze gang gis rang gzugs pags pa'i rang bzhin gyi/ /dga' ma la ni so sor brten pa'i don dag tu/ /'jug ngogs dag tu song nas slar yang 'ongs nas ni/ /gzugs brnyan 'dod ma de ni mdzes ma mos pa med/ /de bzhin du ni rgyal ba'i sprul pa'i sku dag la/ /'jug ngogs la brten rang gi don 'dod du ma dang / /'khor ba'i bde ba so sor zhen cing chags pa can/ /bstan pa'i rtags la gus byed rnams kyis mchod mi byed/ /gzhan dag kyang ni 'dod pa'i dngos grub dag la zhen/ /pri ya gang dang n+ya gro d+ha 'og gangs kyi gnas/ /'jigs byed ri dang 'jug ngogs dang ni gzhan dag la/ /lam las rnam par nyams pa rnams ni ltung bar 'gyur/ /bram ze rnams la rang nor ma lus byin nas ni/ /nyi ma zla ba gza' yis zin pa lhung bar byed/ /thub par dka' ba'i bdud kyi tshogs kyis rnam par rmongs/ /'khor ba'i 'brog tu lam ni rnam par nyams pa yin/ /mi rnams gang zhig bla ma dam pa'i zhal dman pas/ /mi bzad 'khor ba'i sdug bsngal rnam par brnag bzod cing / /lam ngan yang dag 'dres pa'i dbang gis rnam nyams te/ /dper na dgon par zhugs pa'i ded dpon dang mtshungs so/ /des na bla ma thar pa'i lam ni ster ba po/ /slob ma yis ni shin tu gus pas bsten bya ste/ /chung ma dang ni bu dang g.yo ba ma lus dang / /lus dang ngag dang yid ni g.yo ba med pas so/ /thun mtshams gsum du shin tu rnam par dag pa yis/ /kha dang lag pa rkang pa dag ni khrus byas te/ /me tog yang dag blangs nas bla ma'i spyan sngar ni/ /rgyal ba rnams kyi dkyil 'khor shin tu zlum por bya/ /bla ma'i zhabs kyi chu skyes me tog gis mchod cing / /shin tu gus pas spyi bo lag pas phyag bya'o/ /bla ma'i zhal nas bka' ni rab tu thos nas su/ /sa la 'khod de rang gi khyim du 'gro bar bya/ /bla ma dag gi spyan sngar rkang pa brkyang ba dang / /gdug pa'i kha yis rab tu brjod pa dag dang ni/ /g.yan pa 'phrug dang tsug tsug dang ni bzhad gad dang / /skyes bu gzhan gyi skyon brjod gtam ni mi bya'o/ /lam bzangs shes pa sngon du 'gro bar mi bya ste/ /gnang ba blangs nas mi shes pa la 'gro bar bya/ /bla mas byin pa lag pa gnyis kyis blang bya zhing / /rang gis 'bul na spyi bo yis ni phyag bya'o/ /bla ma mgron nas byon 'dir shin tu gus pa yis/ /phrag dog yongs su spangs pa'i rgyu ru sdug ma ni/ /bde ba ster ba'i don du dga' bar byas nas ni/ /rang gi phyag rgya rab tu sbyangs te dbul bar bya/ /ji ltar rang gi sems ni skyo bar mi 'gyur bar/ /ma 'ongs pa ru de ni yongs su smin par bya/ /sems ni rab tu skyo bas dam tshig nyams pa nyid/ /nyams pa'i dbang gis dmyal ba dag tu rab tu 'jug /de bzhin bu yi chung ma bu mo sring mo dang / /sgyug mo la sogs dang ni rigs ldan khyo med ma/ /mnyam pa'i bde ba'i don du blo rgyas slob ma yis/ /rim gyis rim gyis de rnams yongs su sbyin par bya/ /dag cing bzhin ldan khyo med rnams dang rigs ldan ma/ /bla ma'i zhabs gnyis la ni ma lus dbul bya zhing / /dbang bdun gyis ni mngon par dbang ni bskur rnams la/ /ji ltar rjes su mthun la chags pa'i don du'o/ /de bzhin 'dir ni rigs ldan khyo med bsten bya ba/ /ji ltar chags pas mngal du 'dzin par mi 'gyur bya/ /mngal nas 'dod min skye bo'i kha na ma tho ba/ /skye bo'i kha na ma thos 'jig rten pha rol nyams/ /chags pa 'dod cing gti mug dbang du gyur pa la/ /de phyir khyo med rigs ldan dag ni sbyin mi bya/ /khro ba'i sems dang bcas shing chang mi 'thung ba dang / /ngang tshul mi shes pa dang nor ni med pa la/ /nor gyis rnyed sla 'gag pa med pa'i smad 'tshong ma/ /bsod nams mang po'i rgyu ru de rnams sbyin par bya/ /rtag pa'i dngos grub rgyu ru yang dag gsang ba ni/ /slob dpon chen po'i go 'phang gnas la dbul bar bya/ /bza' bca' yon tan brgyad 'gyur mar mes 'bras bu ster/ /mar me brgyad 'gyur shin tu rnam par dag pa'i chang / /chang gi brgyad 'gyur na chung ma la rab sbyor te/ /de phyir 'dod pa'i sbyin pa nges par khyad par 'phags/ /bza' bca' sha dang ldan pa phyag rgya bzang mo dang / /dkon pa rnyed pa rtag par bla ma la dbul bya/ /mal stan dag dang na bza' dang ni byug pa dang / /khyad par 'phags pa rang gi rje la dbul bar bya/ /dngos grub dag la chags pas bla ma'i spyan snga ru/ /blo gros rgyas pa rnams kyis ngan pa rang gis blang / /rang gi khyim na bzhugs pa'i phyag rgya med pa na/ /rang gi phyag rgya la ni brten par mi bya'o/ / shes rab dbang gis mngon par dbang ni bskur rnams la/ /dpal ldan ston pa ru ni yang dag gnas rnams kyis/ /chang rnams nges par shes rab rang bzhin yin pas na/ /shes rab rnam par dman pas 'dir ni btung ma bya/ /btung ba'i brtul zhugs don du dag rung ma dag rung / /rang gi 'khor lo la ni phyag rgya gzung bar 'gyur/ /rgyal ba mchog gis dbang bskur ting 'dzin don dag las/ /dbang gi don du shin tu rnam par dag pa'i sems/ /yan lag dkar zhing bcu gnyis lo lon gzhon nu ma/ /de bzhin gzhan dag skye bo'i lo ni nyi shu ma/ / dam tshig ldan zhing bu ma btsas pa gzung bya ste/ /dbang gi don du bla ma dag gis bka' stsal pa/ /sdang dang nad pa skal ba ngan dang ma dul dang / /khengs shing rdzas la brkam pa dang ni rtsod 'dod dang / /bla mar mi gus gzhan dag la ni sun 'don ma/ /'jigs pa ster ba mo de sbrul bzhin spang bar bya/ /ting 'dzin rgyu ru mnyam pa'i bde ba ster mdzad ma/ /dam tshig la zhugs rgan pa'i bud med mchog yin gyi/ /gang zhig sdug bsngal ster zhing mnyam pa'i bde 'joms ma/ /dam tshig rab dman bu mo gzhon nu ma nyid ma yin no/ /mkhris pa'i rims la mkhris pas zhi bar byed pa'o/ /rgun 'brum la sogs med pa'i sngon du mchog yin gyi/ /rab tu zhi ba'i mkhris pa skyed par byed pa'o/ /smin pa mngar ba dri zhim ta la ma yin no/ /slob mas rang gi phyag rgya bla mar phul ba ni/ /de ni ting nge 'dzin gyi rjes su chags byas la/ /slar yang bla mas slob ma la ni de sbyin bya/ /gzhan dag tu ni slob ma'i skye bos bsten bya min/ /gang yang slob ma'i yan lag bla mas ma gnang ba/ /rtag par slob ma rnams kyis spyi bos de la 'dud/ /rtag pa'i dngos grub 'dod pas bla ma'i bka' yis ni/ /mnyam pa'i bde ba ster mdzad bsten bya bsten mi bya/ /phyag rgya rab tu sbyor la rnam dag bde bas ni/ /dmyal ba'i sdug bsngal 'joms par byed pa thob 'gyur te/ /skye ba 'di ru rang gi lus kyi bdud 'joms par/ /'gyur ba de ni 'di ru shin tu ngo mtshar che/ /gang rnams drin gyis dngos grub bzang por 'gyur ba dang / /gang rnams drin gyis yang dag rdzu 'phrul 'gyur ba dang / /gang rnams drin gyis bde ba rab tu skye ba dang / /gang rnams drin gyis srid pa'i me las grol bar 'gyur/ /phyag rgya de rnams kun la rab tu mang du mchod/ /phyag rgya de rnams kun ni mang du bsten par bya/ /phyag rgya de rnams kun la mang du tshim par bya/ /phyag rgya de rnams kun la mang du phyag bya zhing / /phyag rgya de rnams kun ni rgyal ba'i yum yin te/ /phyag rgya de rnams kun ni thub pa'i lcam mo yin/ /phyag rgya de rnams kun ni rgyal ba'i sras mo ste/ /phyag rgya de rnams kun ni rgyal ba'i tsha mo'o/ /phyag rgya de rnams kun ni bde gshegs thugs sdud ma/ /phyag rgya de rnams kun ni bu rnams bde ster ma/ /phyag rgya de rnams kun ni dgra rnams 'jigs ster ma/ /phyag rgya de rnams kun ni rgyal ba'i rdo rje'i khyim/ /phyag rgya de rnams kun la rang gi bla ma bas/ /lhag par mchod cing spyi bo yis ni phyag bya zhing / / ji ltar rang gi nus pas 'dod pa gnas pas na/ /bu bzangs rnams kyis nam yang dor bar mi bya'o/ /'dod chags gang nyid kyis ni sems can ltung byed pa'i/ /de nyid kyis ni rnal 'byor pha rol 'gro bar 'gyur/ /gang zhig dug nyid kyis ni sems can 'chi byed de/ /dug sngags shes pas de nyid kyis ni nad 'joms byed/ /dpal ldan tshangs par spyod pa bud med la sbyor ba/ /bla na med pa'i rgyud las dor bar ma gsungs so/ /dug gi de nyid smra bas dug gis dbang po zos/ /'on te ma zos na ni grags par mi 'gyur ro/ /gnyid log pa dang sangs pa dug ni mi shes pa/ /dper na bu yi lus la sbrul gyi mche bas btab/ /de bzhin du ni yid bzhin nor bu byang chub sems/ /de nyid med la bud med b+ha ga'i sbrul gyis btab/ /sngags pa rnams la 'pho ba'i skad cig zhi byed min/ /skye ba du ma'i mtha' ru sdug bsngal ster ba'o/ /'chi med gdengs ka'i dug gi mche ba langs pa na/ /rab tu khros pas ji lta bur na zhi bar 'gyur/ /ji ltar rdo yi gos ni me yis gdungs pa na/ /zhu bar 'gyur gyi thal ba ru ni mi 'gyur ro/ /de bzhin chu skyes sbyor bas mchog gi byang chub sems/ /rtsol ldan rnams la 'di ni rang bzhin gyis dag 'gyur/ /me dang dngul chu dag ni rtag par dgra nyid do/ /me med pa yis kyang ni dngul chu mi 'ching ste/ /dngul chu ma bcings pa yis khams rnams 'bigs mi 'gyur/ /khams rnams ma phug pa yis gser du 'gyur ba min/ /gser du ma gyur pa las rdzas ni mi 'phel lo/ /nor gyis rnam par dman pas yul gyi longs spyod med/ /longs spyod ma rtogs sdug bsngal rgyun mi 'chad pa ru/ /bcud len smra ba rnams kyi lus la 'gyur ba'o/ /bud med skye gnas dang sbyor 'pho ba med pa yis/ /de bzhin gnyis po yang ni dgra chen nyid yin no/ /sbyor ba ma rtogs g.yo ba'i sems ni mi 'ching ste/ /sems ma bcings pa yis ni lus la 'bigs pa med/ /ma phug pa yis lus la dag pa'i spyod pa med/ /ma dag spyod pa yis ni bde ba mi ster ro/ /bde ba ma rtogs 'gro drug sdug bsngal mi bzad par/ /bag med pa yis sngags pa ngan pa rnams la 'gyur ba'o/ /bud med sbyor ba dman pas thar pa'i bde ba med/ /bud med sbyor ba dman kyang srid me'i sdug bsngal med/ /de bas rang gi blo yis legs par dpyad nas ni/ /sngags pas gang la mos pa yang ni blang bar bgyis/ / shing las me dang chu yang chu shel dag las so/ /zho las mar dang rdo ba las ni lcags kyi rigs/ /bud med skye gnas sbyor las bde ba ma nyams par/ /skal ldan thabs kyis sbyor bas de ni blang bar gyis/ /rgyud kyi thog ma dbus mtha' la gnas 'dod pa ni/ /dge bar gsungs pa bya mi yi ni zhal nyid do/ /sbas pa'i yid bzhin nor bu brtag par dka' ba ni/ /bla ma dam pa slu ba po yis zin mi 'gyur/ /rdo rje bslang ba dag ni dang por gsungs pa ste/ /rdo rje me la srog zhugs pas ni gnyis pa'o/ /dpal ldan mi 'gyur byang chub sems ni gsum pa yin/ /'di dag nyid ni dge ba'i brtul zhugs chen po'o/ /'di ltar nyams pa'i bde ba dge ba ma yin zhing / /'di ltar bstan bcos tshig ni dge ba ma yin no/ /'di ltar gtsug lag khang gnas dge ba ma yin te/ /'di ltar lus la sdug bsngal dge ba ma yin no/ /mya ngan 'das pa'i bde la rab tu chags pa rnams/ /gang zhig 'dod chags bral ba 'dir ni chags par 'gyur/ /'dod chags rab tu spangs pas de nas nges par ni/ /chags pa dang bral sbyor ba yang ni ring du 'gyur/ /thabs kyi lag tu yang ni rdo rje dril bu dang / /ci'i phyir shes rab lag tu rdo rje 'di zhe na/ /bdud rnams gzhom pa'i phyir dang bde ba bsten phyir te/ /tshul khrims 'dzin pas mtshan ma shes par mi 'gyur ro/ /rgyal po bcu bas lhag pa'i yon tan dge slong ste/ /dge slong bcu bas lhag pa'i yon tan bsngags pa bzang / /dpal ldan tshangs par spyod dang ting nge 'dzin dang ni/ /byams pa la sogs dang ni de nyid nges pas so/ /dpag med bskal par theg pa ngan pa'i blo gros kyis/ /sbyin pa la sogs byin zhing brtul zhugs spyad na yang / /bde gshegs rab 'khrungs sa 'dir rgyal po dge slong dag /gnas 'di la ni 'di ltar rab tu ma zhugs so/ /nyan thos theg pa nyid ni theg pa ma yin te/ /rang rgyal 'di ltar rgyal ba'i sa ni min par gsungs/ /dpal ldan rdo rje'i theg pa rgyal ba'i theg pa nyid/ /de yang gnyis las theg pa bar dang tha mar byed/ /de phyir bla na med pa'i theg pa bor nas ni/ /'dod pa'i bla med byang chub thob par mi 'gyur ro/ /dper na bug bcas gru yis rgya mtsho'i pha rol du/ /rin thang med pa'i nor bu'i phyir ni mi bgrod do/ /rang don la zhugs 'dod chags kyis ni bag med pa/ /slob mas rang gi chung ma ji srid ma phul ba/ /de srid rgyal ba'i phyag rgya bla mas stsol lam ci/ /rnam par nyams pa'i blo yis 'di dag mi shes so/ /rnon po yis ni gser dang shel gyi rin po che/ /smyug ma yis ni go shiR+Sha yi tsan+dan te/ /phran tshegs rang gi chung ma yis ni sangs rgyas yum/ /de yis rab tu rnyed na 'di ru ci zhig skyon/ / lam bzangs btang nas dgon pa dag tu 'jug byed cing / /bde ba bzang po btang nas sdug bsngal len par byed/ /e ma blo gros phyin ci log gi skye bo rnams/ /dbang po la sogs kyis kyang bsten par mi nus pa/ /dpag med bskal ba'i bar du mi 'gyur bde ba ni/ /bla ma dam pa bsten pa rnams kyis thob par 'gyur/ /yang na thob nas 'di ltar nyams par mi 'gyur te/ /nges par ma bsten lhag ma dang bcas rnam par nyams/ /sems kyi bag med dbang gis dmyal ba'i sdug bsngal te/ /sems kyi drin gyis kyang ni thar pa bde ba'o/ /rmi lam gzugs brnyan de ni su zhig gis byas te/ /bde ba dang ni sdug bsngal gang gi drin gyis thob/ /bdud ni rang gi sems te bdud gzhan yod ma yin/ /de bzhin gshegs pa de yang bde gshegs gzhan na med/ /bdud rnams bcom zhing rnam par rgyal ba'i thub pa ni/ /sems kyis sems dag so so ru ni sad pa nyid/ /sems la cung zad srid pa gang zhig len pa min/ /dor ba ma yin 'phel zhing 'grib pa yang ma yin/ /sems la sems nyid so sor snang ba tsam du ni/ /khams gsum pa ni dngos po stong pas gnas par 'gyur/ /ngo bo med pas stong par ngo bo nyid kyis stong / /'khor ba mya ngan 'das pa'i gnas la rab tu zhugs/ /shes rab lus ldan snying rje dang ni tha mi dad/ /byang chub sems nyid de ni yongs su bsgom par bya/ /shes rab yan lag bral zhing snying rjes tha dad na/ /mya ngan 'das pa'i gnas la nam yang 'gro ba min/ /shes rab la zhugs snying rje rnam par spangs pa ni/ /rin chen sems ni rtag pa la ni rab mi gnas/ /shes rab rnam thar yin la thabs ni snying rje'o/ /de gnyis dbus su gnyis su med pa gsungs pa ste/ /rgyal ba'i bzhugs gnas bde ba dam pa dpag med pa/ /'khor ba las ni grol 'gyur smon lam tsam yin no/ /'jug pa'i sems dang smon pa yi ni sems nyid dag /dbye ba cung zhig dag ni de gnyis dag la yod/ /'gro bar gnas pa dang ni 'gro ba nyid yin te/ /gang yang bye brag dag ni sems kyi dbang nyid do/ /'khor ba'i bde ba smon pa yi ni sems yin te/ /dpag med bskal pa ru ni gzhan gyi don gyi phyir/ /ma nyams bde ba 'jug pa yi ni sems yin la/ /mya ngan 'das pa'i mthar thug de bzhin bdag gi don/ /dpag med rgyu ru dge slong gis ni gang zhig bsrung / /bde ba 'dod pa bde phyir gang zhig tshol bar byed/ /de gnyis dbus su gnyis med sbyor ba rin po che/ /gang zhig len pa de ni mi zad yang dag zhugs/ /sems can bsam pa'i dbang gis bsdus rgyud las gsungs pa'i/ /lag pa'i phyag rgya bcing bar mi bya zhes su grags/ /de nyid myang 'das 'bras bu rab tu ster mdzad ma/ /shes rab la sogs rgyud las rgyal ba rnams kyis gsungs/ /'dod lus ma la chags par zhen pa 'dod can dang / /dge slong sgyid lug can ni gtsug lag khang gnas pa/ /bde ba yi ni don du gang zhig las byed pa/ /de la rigs pas rgyal ba rnams kyi rdo rje'i tshig /skyon dang bcas pa'i phyag rgya de ni yongs spangs la/ /phyag rgya bzang mo bde ba'i don du gzung bar bya/ /de med na ni lag pa'i sbyor ba'i phyag rgya ste/ /skye bo rnams la rang dbang yid bzhin nor bu mtshungs/ /gang zhig sems la rjes gnas mnyam pa'i bde ster dang / /nyes skyon dang bral srid pa sdug bsngal 'joms byed ma/ /du ma'i rnam pa'i yul gyi tha dad ma yin pa/ /de 'dir skye bo mkhas pas ci phyir 'dor bar byed/ /gang dag su zhig 'dod pa'i na chung bzang mo ni/ /dga' bas rgyal ba'i rdo rje mchod par ster byed ma/ /bde ba ma nyams de la byang chub bar du ni/ /rdo rje 'dzin pa du ma yang dag mchod par bya/ /phyogs gcig tu ni dam tshig dag la rab zhugs ma/ /skal ldan bdag go zhes ni skul zhing smra byed de/ /'dod pa'i dngos grub rgyu ru rdo rje mchod mi byed/ /nyams pa'i sems de dmyal ba ru ni rab tu 'gro/ /lo ni bcu gnyis lon pa'i bu mo dkar mo nyid/ /shin tu rnam dag sems ldan slob mas rnyed nas ni/ /shin tu gus pas legs par mchod pa nyid byas la/ /bla med dbang phyir bla ma la ni dbul bar bya/ /ston pa de yis de dang lhan cig dbang ster te/ /slob ma la ni bla med byang chub rgyu ru de/ /shes rab dbang bskur bla ma'i zhal dang ldan pa yi/ /bzhi pa gzhan yang de dgyes pa yis ster ba mdzad/ /bla ma'i drin dag gis ni smig rgyu la sogs pa'i/ /khyad par 'phags pa'i lam la rab tu 'jug par 'gyur/ /yan lag drug gi sbyor bas rgyal dbang gzugs brnyan dang / /phyag rgya rab tu sbyor bas rnam dag bde ba la/ /yan lag bzang mo chags pa la ni rab tu zhe na/ /gtso bo bsgrub par bya phyir de ni btsal bar bya/ /phyogs gcig gnas la rnam pa sna tshogs du ma yis/ /dngos grub ster ma de ni mang du mchod par bya/ /gtsang la rnam par dben pa'i sa yi phyogs dag dang / /rgyal ba'am ni zhi ba'i bde 'byung gnas dag tu/ /rtag par rgyal ba mchod phyir dri chen dri chu dang / /chu la sogs pa rnams kyis byug pa byas nas ni/ /snying ga lte mgrin dpral ba spyi gtsug gsang ba la/ /rigs kyi lha mo rnams ni rab tu dgod par bya/ / de bzhin mig la sogs pa rigs ni drug pa ste/ /stong pa la sogs sa bon sna tshogs rim pas so/ /de bzhin mchod pa lnga sogs rnams kyis mchod byas la/ /de nas chu skyes su ni rdo rje rab tu gzhug /yan lag drug gi sbyor bas smig rgyu la sogs pa/ /ye shes dag gi me ni rab tu bzhengs par bya/ /rim gyis rnal 'byor stobs kyis khyad par 'phags pa yi/ /rgyal ba rnams ni shes rab me yis rab tu bsreg /de rnams rab bsregs zla ba'i gzugs ni bzhu ba las/ /bdud rtsi bzang po gang 'dzag de ni rdo rje can/ /de ni dbang gi dus su shin tu rnam dag blos/ / thig le gsum gyi mtha' ru skad cig gcig la nyid/ /shes rab med kyang 'di ltar ri bong can bzhu las/ /gsum pa khyad par dga' ba'i mtha' ru kun nas btsal bar bya/ /'gro ba'i mgon gcig ston pa gzhan ni yod ma yin/ /khams gsum dag na bde ba khyad 'phags gzhan ni med/ /bde ba mnyam ster dngos grub gzhan ni yod ma yin/ /lus bsrung don du srung ba gzhan ni yod ma yin/ /'dir ni dkyil 'khor dag dang sku gzugs ting 'dzin med/ /lag pa'i phyag rgya bya ba dang ni gdan rnams med/ /sngags dang gtor ma sbyin sreg cho ga rab gnas dang / /gshegs su gsol ba rnam par dag pa'i chos la med/ /rang bzhin gyis dag 'gro ba yi ni rje dpon gcig /shes rab me yis gal te rab tu bslangs pas na/ /de yi phyi nas rang gi lus po la ni bdud stobs bzhi/ /de nyid gcig pu yis ni nyams par mdzad pa yin/ / ji srid de ma bzhengs par bde ba ster ba med/ /rab tu bzhengs pas 'dod chags bral nyid 'gyur ba yin/ /gnyis su med pa'i lam gcig 'di ni dka' ba ste/ /ma lus sems can rnams ni lam gnyis dag pas 'gro/ /ma bsdams dbang gis brgya la zin par ma gyur na/ /chu skyes snying por dpal ldan byang chub sems lhung 'gyur/ /phyag rgya'i sems ni shin tu rnam dag shes byas nas/ /de nas chu skyes phyi rol rang gi khas gzung bya/ /ma dag phyag rgya'i chu skyes la gnas rang gi sems/ /ma nyams rnams kyis ma tshor ming med kyis gzung bya/ /myang ba'i don du rnam par nyams pa'i bdud rtsi gang / /dpal ldan sngags pa rnams la 'chi ba nyams par byed/ /bud med skye gnas sbyor ba'i dbang gis rang gi sems/ /gang zhig skyes bu rnams kyi 'gyur ba mi 'gyur la/ /rgyal bas mchod pa thugs rje che ldan de rnams kyi/ /zhabs gnyis dag la mgo bo yis ni phyag bgyi'o/ /na chung ma la sbyor bas dpal ldan byang chub sems/ /gang zhig bdag dang gzhan gyi don du bsrung mdzad cing / /nyin dang mtshan du bdag dang gzhan gyi don mdzad pa'i/ /de rnams zhabs kyi pad+ma la ni phyag bgyi'o/ /sangs rgyas nyid kyi bde ba dpag med thob na yang / /sems can rnams kyi don phyir 'dor bar mdzad gyur cing / /'khor ba'i nang du rab tu 'jug pa'i dpa' bo ste/ /de rnams zhabs kyi pad mar spyi bos phyag 'tshal lo/ /nyin dang mtshan du bsam gtan stobs kyi rim pa yis/ /gang rnams rang gi sems ni rtsa dbus gnas par 'gyur/ /mtha' yas gzugs las shin tu rnam par dag pa'i sku/ /de ni rgyal ba rnams kyi rdo rje rtse gcig pa'o/ /thar pa'i bde rgyu dang po yis ni sangs rgyas la/ /gnyis med de ni dpal ldan bla ma'i zhal nyid do/ /mnga' bdag dus kyi 'khor lo khams gsum la gnas pa/ /mi 'gyur thig le sbyor bas yang dag thob par 'gyur/ /ji ltar gzhon nu ma yi me long nang du ni/ /ma mthong mthong lta'i bra ti se na'i don lta byed/ /de bzhin 'das dang ma 'ongs da ltar byung ba ni/ /de nyid rig pa'i rnal 'byor pa yis nam mkhar mthong / /mngon sum dag tu gzugs ni dngos po stong pa'i phyir/ /dngos po dang ni dngos med de ru med pa yin/ /sgyu ma dang ni rmi lam rdzu 'phrul mtshungs pa ni/ /de la 'bras bu yod cing dngos po med pa'o/ /rgyu dang 'bras bu rjes su mtshungs pa'i 'bras bu ni/ /ma skyes chos rnams la ni skyes pa mthong bar 'gyur/ /rnam pa kun ldan kun nas rnam par dag pa dang / /dbang po thams cad dang ldan kun gyi snying gar gnas/ /ji ltar yid bzhin nor bu dpag bsam shing dag gis/ /sems can bsam pa'i dbang gis kun nas 'dod rdzogs byed/ /de bzhin bsam pa'i dbang gis rdzogs pa de nyid ni/ /shin tu rnam par dag pa'i chos las skye bar 'gyur/ /stong pa yis ni rgyu la gsal bar rgyu yis ni/ /rang gi stong pa la ni nges par rgyas gdab ste/ /phyi dang lus po dag dang gzhan rnams gcig tu ste/ /lta ba drug la gnas dang gzhan rnams slu bar byed/ /mi 'gyur lam nyams rang gi don la gnas pa yi/ /mkhas pa rnams kyis de nyid du ma'i gzhung gis brtags/ /tshangs pa'am ni seng ge mchog gi dbang phyug gam/ /de bzhin byed po yis ni chos ni gang smras pa/ /rig byed mtha' dag grub mtha'i gzhung dang nges tshig gis/ /mdor bsdus de nyid 'di ru rnam par dpyad par bgyi/ /gal te skye dgu rnams la skyed byed gcig nyid 'dir/ /ji ltar rigs dag 'di ni rnam pa bzhi ru 'gyur/ /tshad ma dang ni dpe dang tshul gyi dbye ba yis/ /yongs su brtags na rnam par mthun par mi 'gyur ro/ /pha gcig dag la nges par bu ni bzhir gyur na/ /bu de rnams la nges par rigs ni gcig yin no/ /de ltar mchog tu 'dod las skyes pa'i mi rnams kyi/ /rigs kyi rnam pa bzhi ru rigs pa yod ma yin/ /ji ltar u dum wA ra'i shing las skyes pa'i 'bras bu ni/ /rtsa ba dbus dang rtse mo las byung gang zhig rnams/ /gzugs dang rnam par reg bya ro rnams 'dra ba ste/ /de bzhin kha nyid la sogs gnas ni gcig tu 'gyur/ /kha las skyes pa ri bong 'od zer dkar ma yin/ /dpung pa las skyes nyin byed shar dang 'dra ba min/ /brla nas skyes pa ldong ros kha dog dang 'dra min/ /rkang pa las skyes mig sman chen po gnag 'dra min/ /gnyis skyes thams cad ye shes rigs min rgyal rigs ni/ /rgyal po'i rigs las skyes pas dpa' bo rnams ma yin/ /rje'u rigs thams cad phun sum tshogs dang ldan pa yin/ /'jig rten du ni dmangs rigs las chen mi byed do/ /khams kyi dbye bas bde dang sdug bsngal dngos po dang / /lung dang rigs pas bsod nams tshogs dang sdig pa dang / /skye dang 'jig rten mnyam pa nyams su myong ba ste/ /mi rigs rnam pa bzhi ni de ltar 'gyur ba'o/ /rdzogs ldan dus su rigs kyi dbye ba yod ma yin/ /gsum ldan 'jug pa gtso bo dang ni 'khor 'gyur ro/ /dus gnyis la ni dngos po nyams par mi 'gyur te/ /gang zhig gnyis ldan dus su rigs dang rigs min nyid/ /de dang ser sna rgyu dang dregs pa nga rgyal dang / /chags pa zhe sdang gis ni rigs ni ldog par 'gyur/ /rigs rnams byas nas rnam pa sna tshogs 'gyur ba ste/ /gzhan na rigs dang rigs min sde 'byung kha dog med/ /byed pa po yi rang lus rim pa ji lta ba/ /kha nyid dang ni dpung pa brla dang rkang pa las/ /bram ze rgyal rigs rje'u dang dmangs rigs skyes gyur na/ /phyugs dang tha ma las skyes de yi gang nas byung / / tshangs pa'i kha nyid las skyes bram ze grags pa na/ /bram ze mo yang gnas de nyid las yin nam ci/ /gal te 'di dag skye gnas gcig las skyes gyur na/ /ming po dang ni sring mo bag mar rigs ma yin/ /gal te yin na kla klo'i skye bo 'jug par 'gyur/ /kla klo 'jug par gyur na rigs ni nyams pas te/ /rigs zad na ni dmyal bar sdug bsngal mi bzad pa/ /rang gi rigs ni 'dzin phyir de dag la 'gyur ro/ /de ltar dpung brla rkang pa las byung rnams la ni/ /gang zhig rang gi rigs ni 'dzin phyir ldog par 'gyur/ /de phyir drang srong rigs ni bag ma'i dus dag tu/ / 'jig rten pha rol 'jigs pas brtag par byed pa'o/ /du ma sna tshogs rigs dang rnam pa stong phrag pa/ /bag ma len pa'i dus su rnam par brtag par byed/ /gang phyir drang srong rigs ni brtag par byed par 'gyur/ /de phyir mchod 'dod lus las rigs ni ma yin no/ /ye shes kyis ni rigs dang rdzu 'phrul dngos grub dang / /de bzhin khyad par dbang phyug nyid du 'gyur ba ste/ /de phyir ye shes che 'di rnam par dag pa yin/ /gzhan du na ni rang gi rigs kyis rigs 'gyur min/ /tshangs min skye ba'i gnas ni drang srong rgyas sogs pa/ /skye gnas tshangs pa'i go 'phang rab tu zhugs par 'gyur/ /de phyir dka' thub bzang po dor nas rigs kyis ni/ /rnam par dag pa'i lam ni ster bar mi 'gyur ro/ /pad+ma dang ni rin po che dang mu tig dang / /'dam dang ri bo dang ni thod pa'i sbyor las 'byung / /de nyid rnams ni ma lus 'jig rten mchod gnas 'gyur/ /de rnams sngon gyi skye gnas las ni ma yin no/ /kha las chos ni ston par byed cing sgrogs byed pas/ /de phyir bram ze rnams ni kha las skye bar 'gyur/ /rgyal rigs rnams ni dpung pas 'khrugs par byed pa ste/ /dpung pa de dag las ni de rnams skye bar 'gyur/ /brla yi stobs kyis rje rigs skye bo 'gron por byed/ /de phyir de rnams de las skyes par gyur pa'o/ /rkang pa'i rtsa bar brten par byed par grags pa yis/ /de phyir rkang pa las ni dmangs rigs skye bar 'gyur/ /de phyir gzhan rnams rigs kyi dbye ba bco brgyad yin/ / rang gi las kyi rang bzhin las kyi ngo bor skyes/ /'jig rten gsum du las kyi mthu ni stobs dang ldan/ /gang phyir bram ze yang ni dmangs rigs nyid du 'gyur/ /sgog skya dag dang btsong dang bza' min zos pa dang / /chang 'thungs nas ni dmangs rigs gnas su 'gyur ba ste/ / dka' thub byas nas slar yang bram ze de nyid du/ /'gyur de de phyir dka' thub khyad par can yin no/ /grog ma dang ni ra ri dag dang sna mtshan dang / /rgyas ba la sogs drang srong gzhan rnams rab grags pa/ /tshangs pa'i skye gnas min las kyang ni de rnams skyes/ /dka' thub khyad par dag gi drang srong rnams su 'gyur/ /de phyir rang gi rigs kyi dag dang ma dag pa/ /don dam pa yi rgyu yis gang yang med par 'gyur/ /zhe sdang dbang gis rigs 'di rab tu 'byung ba ste/ /rang don 'dod pa'i bram zes nor gyi don du byas/ /dag pa'i bram ze mo gang bdag po'i brtul zhugs can/ /skyes bu gzhan ma la ni de yis rten par byed/ /de yi bu ni 'di ru bram zer gyur pa ste/ /de phyir rigs ni ji ltar rim pas ma yin no/ ! /lus 'di'i snga ma'i rigs kyi thal ba gzhan yin la/ /las kyi dbang las pha yi srog kyang gzhan yin te/ /gzhan du lus dang srog dag gi ni rigs dag kyang / /bu dang bcas pa su zhig gis ni 'byin par byed/ /gzhan du rigs kyang gal te pha yi yin na ni/ /pha yi pha gang de ni mes po'i yin par 'gyur/ /de ltar 'gro ba 'di dag thams cad rang gi rigs/ /gnyis skyes rnams la drang srong rigs gzhan yod ma yin/ /rngon pa bdun yang ri dgas dag dang ngur pa dang / /ngang pa de rnams gnyis skyes su yang slar byung 'gyur/ /gang phyir skye ba gzhan du srog ni las dbang gis/ /yin pa de phyir nang na drang srong rigs med do/ /gnyis skyes tshim nas nam mkha' dang ni sa yi gnas/ /gang yin der ni shi ba tshim par mngon par 'dod/ /zos pa dag kyang ma zhu'i dbang las bag med pa/ /pha yi bag med du 'gyur 'di ni ngo mtshar ro/ /sh+loka bzhi po 'di lnga 'gyur la med pa/ chos rje yid bzang rtse pas pan chen rin po che'i phyag dpe gnyis gtugs nas 'gyur bcos mdzad pa na yod pas bar 'dir 'jug go/ ! / gal te gnyis skyes dang ni pho rog gis zan zos/ /shi ba'i pha ni pha rol tu ni tshim par byed/ /dge ba dang ni mi dge ba yi rgyu mtshan des/ /pha de nyid kyi sngon du bsags pa nyams par 'gyur/ /rang gis byin pa rang nyid kyis ni thob 'gyur te/ /gzhan ma rnams kyi sbyin pa bsngos pa'i blo yis min/ /bde bar gshegs pas rang gi don du rang sha ni/ /sbyin min de bzhin du yang de rnams nges grol phyir/ /thams cad mkhyen pa rnams kyis gzhung kun rnams las ni/ /srog gcod kyis ni grol ba yod pa ma yin no/ /mchod sbyin la ni srog gcod de bzhin smra byed pa/ /e ma gnyis skyes rnams kyis mi shes gnas yin no/ /mchod sbyin la ni gsad cing gsod pa gang yang med/ /'jig rten gsad bya lha ru nges par 'gro med de/ /snying rje dang ni nges par zhi ba dang bral ba'i/ /gnyis skyes skyon can rnams kyi tshig 'di yin par 'gyur/ /dbul po'i sdug bsngal dang ni 'dod pa dang bral nas/ /rang gi rtsa lag grogs po yid 'ong bu dang tsha/ /de rnams bde bar 'dod dang bde 'gro 'dod pa na/ /gal te tshig 'di bden yin de rnams sreg par byed/ /bu dang rtsa lag stobs med la sogs shi gyur na/ /ngu 'bod nas ni dur khrod dag tu phyin pa dang / /shi ba rnams la gang gis chu dang zan sbyin na/ /rmongs pa de yis ji ltar ma skyes la sogs gsod/ /a shwat+tha la brten dang til snod sbyin pa dang / /ba la reg pa dang ni bram ze tshim pa dang / /gang+gA'i chu dang b+ha ra ta ni thos pa ste/ /'di rnams kyis ni gal te sdig nyams byed 'gyur na/ /mkha' 'gro yis ni a shwat+tha la brten par byed/ /til mkhan gyis ni til gyi snod ni sbyin pa ste/ /ba skyob ke'u yis ba la reg par byed pa dang / /mkhas min dag kyang gnyis skyes rnams la ston mo ster/ /gang+gA'i chu ni rus sbal dang ni nya yis 'thungs/ /ma skyes pa yis b+ha ra ta yi grags pa thos/ /de rnams la ni sngon bsags las kyi 'bras bu med/ /dran pa'i tshad ma yis ni dka' thub nyams 'gyur min/ /a shwat+tha la brten dang til snod sbyin pa gang / /ba la reg dang gnyis skyes tshim pa ci yin dang / /gang+gA'i chu dang b+ha ra ta ni thos pa ci/ / lam ni nyams par gyur pas 'di nyid mi shes so/ /yon tan 'phel ba yul gyis rgyas par 'gyur ba yi/ /gang la steng dang 'og tu lcug ma rgyas par 'gyur/ /mi yi 'jig rten du ni las kyis bcings pa yi/ /'og tu rtsa ba rnams ni tshugs par 'gyur ba ste/ /de bzhin gzugs med gang la nye bar thob pa med/ /thog ma med la tha ma med cing rab gnas med/ /a shwat+tha shing de la nges par brten pa ni/ /klu don 'bras bu las ni rgyas par bshad pa'o/ /til ni sems can yin zhing snod nyid snod yin te/ /shing rnams rab tu sbyin pa til snod sbyin pa'o/ /ba ni lha yi mig yin reg pa snang ba ste/ /ba la reg pa 'di nyid nges par brjod par 'gyur/ /gnyis skyes me ste srog chags tshogs kyi lus la ni/ /tshim par byed pa de ni gnyis skyes tshim pa'o/ /gang+gA'i chu nyid zla ba'i bdud rtsi btung ba ste/ /ser sna zad pa b+ha ra ta ni thos pa'o/ /phyi ma'i tshe yi rgyu ru sgra mkhan gyis kyang ni/ /rig byed ma lus yi ge kha ton byed par 'gyur/ /dran pa dang ni rig byed gzhung gi sna tshogs pa/ /mi shes dbang gis 'bras med mgrin pa skams par byed/ /rig byed tshad ma dang ni dran pa tshad ma ste/ /'di nyid tshig ni shin tu 'gal ba'i phyogs yin no/ /dam pa'i chos las gsungs pa'i tshig ni tshad ma ste/ /rgyal ba'i gsung ni 'di nyid rnam par dag pa'o/ /nub phyogs sin+d+hu'i yul du gnyis skyes rnams kyis ni/ /thod pa can dang dmangs rigs dag gi zan za ru/ /ri bcas yul du ba lang sha dang ma he dang / /de bzhin du yang chang ni gtsang mar bsten pa yin/ /gau ta ma la sogs yul du ma he'i sha gtsang bar/ /ma ga la sogs yul du rta sha la sogs bsten/ /in+d+ra la sogs dang ni ma gsog yul du/ /ma he'i sha dang phag sha bza' bar mi rung ngo / /mgul kha la sogs yul du ma sogs bzung ba ni/ /bu la sogs pa rnams la gtsang mar bshad pa yin/ /gang gi yul de dag tu 'dod pa'i dngos grub ni/ /de nyid byas na mi rnams la ni skyon med do/ /gal te gnyis skyes rnams ni dran pa'i tshig dag gis/ /ltung 'gyur de lta na ni de rnams rang yul du/ /dran tshig skyon gyis char than du ni ji ltar 'gyur/ /de ltar de ru gnyis skyes tshe la dran pa ni/ /yul gyi tha snyad kyis ni tshad ma ma yin no/ /thub pa rnams kyis lo rgyus tshogs kyang gang bstan pa/ /de ni bden nam brdzun pa rnam par dpyad par bgyi/ /rab brtan dag dang sa srung dang ni g.yung drung dang / /me tog sogs dang lha mo dang ni dpal mo dang / /zla ba bdud rtsi 'o ma'i rgya mtsho bsrubs pa las/ /'di rnams 'byung zhes lo rgyus kyi ni tshig yin no/ /gal te stobs ldan rgyal srid du ni zla ba 'di/ /byung na long ba'i 'thab mo'i dus su yod ma yin/ /zla ba med na sa gzhi la ni zla tshes dang / /tshes la zla ba'i cha lnga ji ltar yin te 'dir/ /sngon du zla dang ral pa 'dzin pa'i dbang phyug gis/ /zla ba la ni zhen pas long ba gsad pa yin/ /phyi nas dus kyi dbang gis stobs ldan bskyed pa ste/ /de nas lha dbang rnams kyis rgya mtsho bsrubs pa yin/ /gal te brdzun gyi lo rgyus kyi ni tshig rnams kyis/ /chos sgyur de lta na ni bden tshig ci zhig bya/ /srog gcod mthu yis gal te mtho ris 'gyur na ni/ /gzhan la phan pas de ltar dmyal bar 'gyur ba yin/ /lo rgyus chos rnams dang ni dran pa mkhas rnams kyis/ /rnam par dpyad par byas nas brdzun du gyur pa ste/ /de phyir chos de mi shes byis pa bram zes byas/ /rang gi phyi sa bzhin du rnam par mi dpyad do/ /gal te rig byed 'di ni mkha' bzhin ma byas pa/ /ji ltar 'di ni kha las 'don par byed pa yin/ /nor dang chags pa zhen pa'i bram ze rnams kyis ni/ /mgrin pa mchu dang rkan sogs kyis ni nan tan byed/ /gal te rig byed snga ma yin na yul skad med/ /sngon du yul skad yin na rig byed thog mar med/ /gal te rang byung yin na kha las ma skyes te/ /gal te thams cad khyab na kun gyis 'don par 'gyur/ /an+d+ha'i shing dang sna tshogs 'bru dang mar dang zan/ /bde ba'i don du 'bar ba'i thab tu sreg par byed/ /sha za ba yi mi ni shin tu skrag par byed/ /me lha 'di dag la sogs mi 'dod tshig yin no/ /bud med pas ni mtho ris gnas su mi 'gro na/ /'jig rten grags pa'i tshad ma gal te 'dir 'gyur te/ /ne tso la sogs gzhan yang gzhon nu'i dus su ni/ /dka' thub byas nas tshangs pa'i gnas su zhugs par gyur/ /rig byed las ni gzhan bshad dran pa'i tshig ni gzhan/ /rnal 'byor rig pa yis ni gcig nyid mi 'gyur ro/ /rig byed tshog ni rnal 'byor gyis bsten thar pa ste/ /'khor ba'i 'bras bu nges par dran pas ster ba ni/ /'khor bas bcings pa'i 'khyam pa 'jug par gyur pa ste/ /de phyir dran pa'i sems ni 'di nyid 'dod ma yin/ /sdug bsngal 'phrog byed thar pa'i go 'phang zhugs par 'gyur/ /ye shes bdud rtsi dpal ldan bla ma'i zhal 'dod do/ /de ltar dpal ldan bla ma'i zhal dman blo ngan ni/ /gnyis skyes rnams la kun nas lam ni nyams par 'gyur/ /mi shes pa yi dbang gis srog gcod byas nas ni/ /rang rig nga rgyal dbang gis dmyal bar zhugs par 'gyur/ /tshangs pa dang ni dbang phyug khyab 'jug gzugs gcig 'dir/ /drag pos ci yi phyir na tshangs pa'i mgo bo gcod/ /gal te drag po sdig med 'jig rten grags pas na/ /ci phyir thod pa bor nas de ni dag par 'gyur/ /drag po phyag dar 'di ni gtsang ma ma yin la/ /gal te bsod nams rgyu ru rig par mi byed cing / /de nyid spyi bo nas ni lhung 'gyur gtsang ba na/ /gang+gA'i chu yis ci yi phyir na khrus 'di byed/ /yan lag sna tshogs pa ni khrus la sbyar ba yis/ /nam mkha' las ni 'gro ba sa la ltung bar 'gyur/ /'dod pa'i rgyu ru gang+gA'i chu la gang zhugs pa/ /rmangs pa de ni de ru 'gro ba gang na rigs/ /khyab 'jug lus la dpal mo rang dbang gal te 'gyur/ /rA mas ci phyir de ru sdug bsngal thob par 'gyur/ /kun mkhyen khyab 'jug gal te 'jig rten grags pa na/ /bud med bral ba'i dbang gis ci phyir phyugs rnams 'gro/ /gang gis sa la rkang pa gsum du byas pa na/ /chu la de yis ci phyir zam pa bcing bar byed/ /gang gi lto ba na gnas ma lus srid gsum na/ /de yi rang gi chung ma ci phyir 'phrog par 'gyur/ /'di dag la sogs du ma rnam pa stong phrag gis/ /tshig rnams kyis ni mi rnams sdug bsngal ster bar byed/ /rnam par dpyad na don kun med par gyur pa'o/ /gnyis skyes rigs kyi nga rgyal dbang gis yang dag bstan/ /dang po phas ni rab tu skye bar byed pa dang / /phyi nas mas ni mngal gyi dbang gis grags par 'gyur/ /de ltar mngal nas skyes pa'i nges pas gnyis skyes 'gyur/ /gzhan du na ni dmangs rigs dbang gis mi ma yin/ /mngal nas skyes pas byis pa dang ni lhan cig tu/ /mngal gyi nang nas tshangs pa'i skud pa byung ba min/ /de rnams la ni cho ga 'di nyid byas nas su/ /gnyis skyes ming gi rgyu ru mgrin par rab tu min/ /gnyis skyes nyin gcig lhan cig skyes pa'i rang bzhin can/ /cho ga byas pa'i skud pas gzhan mar gyur pa ni/ /gnyis skyes ma lus rnams la co 'dri'i don du ste/ /rmongs pa'i bsam pa sna tshogs e ma ngo mtshar che/ /khyab 'jug de nyid blo yis rab tu 'jug pa gzhan/ /shing las skyes pa'i dbyug pa 'dzin par byed pa yis/ /dgun la sogs pa'i dus kyi mtshan mo'i mtha' ru ni/ /'dar ba dang ldan chu yis khrus ni byed pa ste/ /grang bas 'dzin dang rab tu 'dar ba'i lus la ni/ /bsam gtan dang ni sngags bzlas bzang po de ru gang / /dper na gdug pa'i sbrul ni khyim du zhugs pa yi/ /mun pas bkab pa de ru bsam pa med pa ltar/ /lus dang ngag dang sems ni dbyug pa gsum yin te/ /sems ni 'dus par bya ba dbyug pa gcig yin no/ /dpal ldan tshangs pa'i gzugs ni mtha' med gcig pu ste/ /chu la zhugs pa'i dbyug pa can gyis mi 'dzin no/ /zhi ba bas kyang thal bas lus po byug par byed/ /khrus kyi mtha' ru so gnyis dbang po blo yin te/ /bde ba'i don du ral ba'i khu tshur rtag tu 'dzin/ /'dod pa'i me tog rnams kyis rdo nyid mchod par byed/ /gzhan ma thod pa rnams dang mgo bo 'dzin pa dang / /lus la mi yi rus pas rgyan rnams byed pa ste/ /dpal ldan dngos grub rgyu ru dur khrod 'khor bar byed/ /mi shes dbang gis blo ngan la ni dngos grub gang / /gdong nag dang ni de bzhin phyugs bdag gzhan ma yin/ /gcer bu dang ni ral pa ring po skra bregs pa/ /slob pa 'khor nas zhi bar rab tu 'gro bar 'dod/ /thar pa'i go 'phang grub nas 'gro bar 'gyur min no/ /gzhan ma rnams kyang gcer bu dang ni skra phyung dang / /so dang bcas pa yan lag thams cad dri mas byugs/ /bkres dang skom pas 'dzin pas blong na 'ching par 'gyur/ /thar pa'i lam las nam yang 'gro bar mi 'gyur ro/ /gzhan ma rnams kyis dbyar gyi dus su shing drung pa/ /sos ka dang ni dpyid kyi dus su tshang ba can/ /dgun gyi dus su bla gab med pa'i rnal 'byor pa/ /don dam pa yi rgyu ru sdug bsngal chen po byed/ /gcer bu pa la kun nas seng ge'i khri dang ni/ /mgo bo'i skra rnams phyung ba la ni gdugs gsum dang / /dri mas byugs la sngon du mya ngan med shing las/ /lha yi me tog 'bab pa rigs pa ma yin no/ /gzhan ma yang ni mgo spu bregs pa'i dge slong nyid/ /ngur smrig 'dzin cing 'dod pa'i lha gang gnas par byed/ /ting nge 'dzin gyis dman pa nor ni sogs par 'dod/ /ta la steng nas bcad bzhin zad par 'gyur ba'o/ /gzhan ma rnams kyang rigs kyi gnas su rab zhugs nas/ /bdud rtsi lnga la sogs pa mang po za bar byed/ /snying rje dang bral mnyam pa'i bde bas dman pa dang / /'jig rten 'gal ba rnams la yang dag spyod par byed/ /skye ba bdun pa'i mi ni nges par phyugs yin te/ /de yi bdud rtsis mi la dngos grub myur bar ster/ /rigs kyi lung las rul ba'i dri ni gtsang ba ste/ /'jigs par byed pa rnams la bstan par mi bya'o/ /gzhan yang zhi ba'i rgyu ru rnam pa sna tshogs pas/ / dgod pa dang bcas rnal 'byor 'dzin par byed pa ste/ /rab mchog yan lag dang ldan rnams la zhe sdang dang / /chags pa dang ldan rgyu ru dpal ldan tshangs spyod byed/ /rmi lam du yang gang zhig bud med sbyor la zhen/ /dpal ldan tshangs pa'i dka' thub can de ji ltar na/ /dper na mar gyi gong bu 'bar ba'i me yis ni/ /skad cig tsam gyis zhu ba nyid du 'gyur bzhin no/ /de ltar bla ma dam pa'i zhal dman glen pa yis/ /sdug bsngal mang po ster ba'i lam ni 'dzin par byed/ /bde ba'i rgyu ru yang ni bsod nams kyis dman pa/ /dmyal ba rnams kyi me la nyal sa tshol bar byed/ / rang gi sems la sdug bsngal 'di ni 'phel 'gyur na/ /skye ba du ma brgya yis bde ba ster mi 'gyur/ /zhing rnams la ni ci tshe'i sa bon btab pa las/ /sA lu'i sa bon khyad par can du mi 'gyur ro/ /tshangs pa'i shing las chu shing 'bras bu 'gyur ba min/ /smyug ma bu ram shing dang chu las mar nyid min/ /dug las bcud len khyad par can du 'gyur ba med/ /rang gi sems las sdug bsngal las ni bde 'gyur min/ /sems la sdug bsngal sa bon yang dag btab pa na/ /skye ba du ma rnams la 'phel bar 'gyur ba yis/ /de phyir rnam dag rnams kyis rnam par dpyad nas ni/ /mnyam pa'i bde ba nyams pa yongs su don bya zhing / /srog nyid shi nas phyi nas skye ba med pa ni/ /rigs can gzhan rnams nyams par gyur pas ston byed cing / /gal te de ltar yin na ci phyir drag po yis/ /'chi bar gyur pa rnams kyis zhi gnas 'jug par byed/ /gzhan rnams kyis kyang mtho ris bde ba'i rgyu ru ni/ /rang gi ling+gA'i rtse mo'i pags pa gcod par byed/ /nyin mo'i mtha' dang mtshan mo'i steng du bza' ba ni/ /nges par stag gzig rnams kyis byed par 'gyur ba'o/ /rang gi las kyis shi bar gyur pa'i phyugs rnams kyis/ /de yi sha ni nye bar spyod par mi byed do/ /srog bcad rab tu byas nas de nyid za byed de/ /gzhan du na ni mi rnams mtho ris 'gro ba med/ /'di la sogs pa 'gal ba du ma mu stegs pa/ /ngan pa rnams kyi sems la sdug bsngal shing rnams kyi/ /rtsa ba bskal pa du ma rnams su bcings pa ni/ /sangs rgyas kyis kyang dbyung bar nus pa ma yin no/ /thog med gtso bo yon tan bdag nyid rang bzhin dang / /nga rgyal dang ni blo gros yid bcas 'byung ba dang / /las kyi dbang yod na ni dpal ldan yul dbang po/ /'di dag gzhan ma rnams kyis yongs su brtag par byed/ /lta ba rnams la brten pa'i du ma'i gzhung rnams dang / /ming gi rab tu dbye bas mkhas pa mang rnams kyis/ /gang zhig rig byed mtha' dang grub mtha' gzhan rnams ni/ /nor 'dod rgyu ru de nyid rnams ni rjod par byed/ /oM b+hur b+huH swa ni 'di ru gang yin dang / /sa we tor wa re N+ye dang b+ha ra go de ba dang / /swa d+hi ma hi gang yin d+he ya yo na dang / /pra tso ta ya gang yin nges par rig byed tshig /oM yig sngags ni mchog tu lho yi me yin te/ /b+hu ni nges par sa yig b+ha wa 'jig rten gsum/ /sa yig thar pa yin te sa ni drag po yin/ /we te zhes ni tshangs pa wa re N+ya ni lha min dgra/ /b+har go zhes ni chu yin de ba 'dir ni dbang por brjod/ /swa d+hi zhes ni bdag yin ma hi srog gi rlung / /d+he ya zhes ni de bzhin bdag gi go 'phang brjod/ /yo na zhes ni rtag par rgyu ba chen po'o/ /pra tso ta ya zhes ni de nyid rab tu bskul/ /sa be tri ni nyams pas 'jig rten pha rol 'gyur/ /ga ya tri ni ma nyams srid pa 'byung bar 'gyur/ /de ltar phyir gyur nang gi gnas su de bzhin no/ /a po 'dod pa chen po srid las 'byung gnas ston/ /'di dag la sogs pa yis nang gi thun mtshams 'gyur/ /zla dang nyi ma'i dbus su nyin dang mtshan mo ni/ /srog dang thur sel la gnas dbus su yin pa ste/ /'khor ba'i sdug bsngal 'phrog byed dag pa'i thun mtshams te/ /nyi ma nub dang de bzhin shar las gzhan ma yin/ /phyi rol glen pa rnams la gsang ba'i don du ni/ /sems can bsam pa'i dbang gis mes pos bshad pa'o/ /oM yig sa bon zhes ni nges par sku rdo rje/ /b+hu ni gsung gi rang bzhin b+ha ba thugs nyid do/ /don dam pa yi rgyu phyir swa yig ye shes te/ /'jig rten gsum po de nyid thub pa bzang po'i gzhung / /drag po snang ba mtha' yas mes po gang zhig ni/ /rnam par snang mdzad de yis khyab 'jug rdo rje can/ /chu zhes pa ni rin chen 'dzin pa'i sangs rgyas te/ /dbang po rnams dag ral gri chen po 'dzin pa'o/ /swa d+hi zhes ni gos dkar mo ni chen mo ste/ /ma hI zhes ni rgyal ba'i spyan mar rab tu grags/ /de bzhin d+he ya zhes ni mchog tu mA ma kI/ /yo na zhes ni rgyal ba rnams kyi sgrol mar gsungs/ /pra tso da ya zhes ni pha rol phyin par grags/ /a po 'dod chen zhes ni 'gro ba'i thabs yin no/ /de dag snyoms par zhugs pa thun mtshams tha dad min/ /rdo rje pad+ma'i dbus su so sor phyag 'tshal 'gyur/ /chos kyi 'byung gnas zhes ni 'o ma'i rgya mtshor gsungs/ /de yi dbus su pad+ma chu skyes de nyid do/ /gang zhig zla ba'i gdan ni gnam lding de nyid do/ /gang zhig thugs kyi rdo rje khyab 'jug de nyid do/ /yang dag dgug pa rgyal ka gti mug rdo rje ste/ /so sor snang ba dag pa 'dod chags rdo rje'o/ /gang zhig mi 'dus zhes ni nga rgyal rdo rje ste/ /mi 'gag chen po zhes ni phrag dog rdo rje'o/ /grags ma zhes ni rlung yin 'bar ma dpal mo ste/ / rgyal ma chu yin rnam par rgyal ma 'dzin pa'o/ /mtha' med dpal mo zhes ni rdo rje dbyings mchog yin/ /yan lag drug po 'dir ni dbang po rnams la dgod/ /chos kyi 'byung gnas la gnas pad+ma'i dbus su ste/ /gang zhig zla ba'i gdan ni khyu mchog de nyid do/ /dbang phyug gdong pa lnga ni rdo rje sems dpa' ste/ /chu skyes lte ba la ni gzhan dag gnas pa'o/ /chos dang de bzhin 'dod ma ye shes gsum pa ste/ /chags pa dang bral dbang phyug nyid ni 'di ltar lnga/ /dbus dang mtshams rnams dag la stong pa'i tshul gyis ni/ /gzhan dag gnas shing ge sar rtse mo gzhan ma'o/ / g.yo ba mo dang phra mo gzhan yang drag mo dang / /dge ma la sogs gzhan ma bde 'byung nus pa gang / /du ba la sogs ma lus pha rol phyin pa ste/ /de bzhin gzhan ni pad+ma'i 'dab dang dbus su'o/ /dbus su dbang phyug che dang shar du skyes bu ste/ /g.yas su zad min me dang gnod sbyin nyid ni g.yon du'o/ /nub tu de ma thag ste phung lnga rnams dag yin/ /rnam par shes pa mngon du nges par rig par bya/ /sa ni ldog ma yin te chu ni rab gnas ma/ /me ni rig ma yin te rlung ni zhi ma ste/ /mtshams kyi 'dab ma rnams la mchod par bya bar 'gyur/ / nam mkha'i khams ni nges par bde bar gnas ma'o/ /de ltar gzhan ma rnams kyang sna tshogs rnam pa yis/ /lus dang dbang po la sogs gzhan dag mchod par 'gyur/ /ming gi rab tu dbye bas de nyid dngos po mang / /phyi dang lus po dang ni gang zhig gzhan du gnas/ /khams sogs de nyid rnams kyis so sor mchod par bya/ /tshangs pa mo ni sa yin chu ni drag mo ste/ /me ni gzhon nu mar 'gyur rlung ni nag mo'o/ /stong pa phag mo yin zhing zla dang nyi ma me/ /dbang po lha min pad+ma 'dzin dang pad+ma'o/ /ye shes zhes ni 'jigs byed zhi ba nyid yin no/ /rnam shes spyan ni 'jigs byed ma ste nges par yin/ /'bar ba dang ni phra mo rnam par rgyal ma dang / /bzang dang phun sum dri med gzhan dang don yod ma/ /glog gi 'od zer dang ni bde kun nyi ma ni/ /sngon du rab tu dbye ba yis kyang rig par bya/ /dbang po rnams la dbang po drug po dgod pa 'dir/ /don dam pa yi rgyu yis mchod par 'gyur ba'o/ /sa dang chu me rlung dang stong pa zla ba dang / /nyi ma dang ni bdag nyid zhi ba'i rnam brgyad yin/ /rnam pa du ma las kyang rnam pa brgyad po ni/ /mi shes dbang gis glen pa rnams kyis rab tu brtags/ /'di dag la sogs thams cad rnam pa sna tshogs ni/ /rnal 'byor ga 'phang mi shes pa yis byas pa'o/ /de shes gang gis nus pa'i b+ha ga zhes byar bstan/ /rnam pa gsum du 'dod cing yig gsum rtsa gsum la/ /a dza pu ka zhes bya bzhi po de nyid de/ /de ltar de ni shin tu thim pa'i yul gcig go/ /de dbus ling+ga gnas shing thog ma'i gzugs yin te/ /thig le nA da de yi snying dbus yang dag gnas/ /dga' ba'i tshul du dri med shin tu zhi ba ste/ /de yi steng du thog ma 'khrig pa dang po'o/ /yang dag lhung ba'i tshul gyis 'dod pa rnams kyang byed/ /skal ldan b+ha ga zhes bya de la phyag 'tshal lo/ /de la bzhi po dag dang gzhan yang lnga po dang / /de bzhin du ni drug dang bzhi dang lnga po dang / /gsum po phyi rol dang ni lus kyi dbus su ste/ /rigs kyi rdzogs pa ma lus pa ni 'di yin no/ /phyi rol rigs kyi tshad du bzhi po dus kyi me/ /nyi ma dag dang sgra gcan dang ni zla bar bshad/ /sa la sogs pa lnga po yin te drug po ni/ /bkra shis la sogs yin te de bzhin bzhi po ni/ / sa la rab tu dbye bas bzhi po bshad pa'o/ /gzugs la sogs pa lnga po 'di nyid brjod pa yin/ /bar du gsum po dag ni yon tan gsum yin te/ /b+ha ga'i dkyil du phyi mo ma lus don yin no/ /rigs ni yang dag skye phyir thog mar bzhi po ni/ /dga' ba dang ni rnam shes rdul dang sa bon no/ /rus pa la sogs 'byung ba las skyes lnga po yin/ /drug po mig la sogs te de nas bzhi po ni/ /lag pa dang ni rkang pa bzung ste lnga po ni/ /sor mo lnga nyid rnams te gsum po gang zhig ni/ /rkang pa dang ni lag pa'i sor mo'i tshigs gsum mo/ /rab tu dbye ba 'di ni rigs kyi skye mdo las/ /bzhi po dbye ba 'di ru brgyad po gnyis yin te/ /lnga po mchog gi de rnams nyi shu lnga yin no/ /drug po la ni sum cu rtsa drug zhes su grags/ /gzhan yang bcu gnyis de rnams bzhi po'i dbye bas so/ /lnga po dbye ba 'di ru nyi shu yin pa ste/ /gsum pa la ni dbye ba drug cur bshad pa'o/ /rigs kyi rim pa gcig gis nyung ba bdun cu brgyad/ /de nyid bsdus pa ru ni nyi shu rtsa bdun te/ /phyi dang lus po las ni rnam par dpyad nas ni/ /rigs kyi lam la gnas pa rigs ni blang bar gyis/ /'di dag la sogs thams cad rnam pa sna tshogs ni/ /rnal 'byor go 'phang mi shes rtag par gnas pa dang / / longs spyod du ma la ni 'dod pa can rnams kyis/ /bsod nams rgyu ru yang ni yang dag ston par byed/ /bsod nams mtha' ru slar yang sdig pa nyid yin te/ /sdig pa'i mtha' ru yang ni bsod nams nyid yin no/ /tha ma pa yis dus su 'khor lo 'dir bskor te/ /sa la nyin mo dang ni mtshan mo bzhin du'o/ / yul las byung ba'i sdig dang bsod nams gang zhig ni/ /gang gis rab tu spangs na skad cig gis sreg byed/ /de phyir ye shes chen po'i me ni ma nyams pa/ /mnyam pa'i bde ba'i rgyu ru bsten par bya ba'o/ /thams cad mkhyen pa gcig yin bla ma gcig yin te/ /de bzhin ye shes gcig yin srid dang thar pa gcig / gcig min rgyu ru yang ni rnal 'byor nyams pa yis/ /rang dang gzhan gyi don nyams byed pa'am 'khrug par byed/ /ji ltar sangs rgyas mthu yis bdag gi lta ba ni/ /zhi 'gyur de bzhin mi rnams la ni 'gyur bar shog /thams cad du ni du ma'i lam la brten pa yis/ /sems ni rgyal ba'i thugs rje chen por 'gyur bar shog /dpal 'jig rten dbang phyug gi sprul pa'i sku pad+ma dkar pos mdzad pa rdzogs so// //kha che'i paN+Di ta zla ba'i mgon pos bsgyur nas gtan la phab pa'o/ /

CLOSE WINDOW