CLOSE WINDOW

D1342
བོད་ཡིག

@##/ /rgya gar skad du/ rat+na pra b+ha nA ma/ bod skad du/ rin po che'i 'od ces bya ba/ rang snang rdo rje sems dpa' la phyag 'tshal lo/ /gsum gsal thugs rje rig pa'i dpal/ /sku gsum rig pa nyid ldan la/ /dang ba'i tshul gyis 'dud phyag 'tshal/ /thugs rje byin rlabs rna brgyud la//'phags pa'i gsung dang byin rlabs kyis/ /rang snang nyi ma lta bur gsal/ /gsal byed rin chen snang ba 'di/ /mtha' yas 'gro ba thams cad la/ /dbyer med tshul du ldan gyis kyang / /bdag 'dzin log pa'i sems kyis dkrugs/ /sa 'og bum pa ji bzhin pas//rin chen snang ba rang 'bar yin/ /'gro ba'i bla ma 'das gyur kyang / /'gro ba mun pa la gnas nas/ /mos pa'i rnal 'byor mig med la/ /snying po 'od kyi don du bshad/ /gting ltar mi gsal rin po che/ /skal ldan rnal 'byor mos 'jug gis/ /rtog med mthong ba'i lam rtogs dang //bgrod med 'bras bu rang snang yin/ /pad+ma gsum gyi dkyil 'khor nas/ /bde gshegs gsum gyi sku ldan pa/ /rnam grol 'bras bu rang gzhag yin/ /gzhi nas ma g.yos rang bzhin 'grub/ /chos nyid sku la 'gyur ba med/ /rang rig bde ba chen po nyid//rgyu la mi gnas mthar thug pa/ /theg chen rdzogs pa'i 'bras bu yin/ /rin chen gsung gis shes 'gyur te/ /bsam med brjod bya snying po'i don/ /kun gyi brjod pa sems kyi dbyings/ /rang rang mos pa'i shes pa rtogs/ /lam gyi rtsol bas 'bras bu tshol/ / rang mos bsam pa'i sa la gnas/ /sman pa'i 'dod pas re ba 'jog /snying po lam la 'dod pa bral/ /yid la mi byed rang bzhin gnas/ /rig pa'i gzer gyis 'da' ba med/ /sgom pa med la bya ba bral/ /lta ba med pa'i snying po ni/ /rang gzhag sems kyi rig pas shes/ /char yang dang ni thig le tshul//tshul tsam mchog dang gzhan mchog don/ /shes rab gsang bas na ro la/ /snyan khung brgyud pa bzhi yi gnas/ /rdo rje bka' ni rtogs pa'i lam/ /byed pa'i sgra la gnyer ba'i sems/ /tshul bzang rtsol la gang gnas pa/ /byed pa'i don dang phrad gyur nas//bya ba'i rang bzhin shes par bya/ /rgyal ba'i dgongs pa rig pa nyid/ /gsum gyi byed pa'i 'od kyis mthong / /gsum gyi 'od gsal gzhi yi lam/ /byed dang bral ba nyid la gnas/ /lam gyis lam gyi 'bras bu mthong / /'bras bu dgongs pa rgyal ba'i thugs/ / bsam med rang gzhag rig pa'i dang / /bde chen mi rtog rgyu ba bral/ /yid la mi byed snang ba dag /rim pa ma 'gags ye shes gsal/ /dbang po pad+ma rgyas pa'i sems/ /'gro ba kun la rang bzhin gnas/ /mthong ba log pa gzhan yod kyang / /sprul sku dang po gzhan las min//kun bzang rgyal ba'i dgongs pa nyid/ /snang ba'i dus ma bzung byas la/ /dran pa'i tshul gyis nyams su blangs/ /'phen pa dang po'i dus na'o/ /rin chen gsung gis brtags pa las/ /thabs kyi bye brag shes 'gyur na/ /thog ma pad+ma ji bzhin no/ /dkyil 'khor lnga yi ye shes 'phro//de ldan rgyal ba'i gral du gnas/ /thugs rjes kun ldan rnyog pas bslad/ /dngas ma dus gsum 'gyur ba med/ /gsang ba'i pad+ma sngags kyi sems/ /spyod pa bral ba'i dus na shes/ /btang gzhag rang bzhin ma tsha bral/ /'khor ba rnam par mi sems te/ /mya ngan 'das pa'i rgyu ba bral//rdzogs pa'i dgongs pa bya ba med/ /dus gsum ma yengs srog tu sems/ /blang dor mi mnga' lta ba med/ /rang bzhin rgyal ba'i lta ba yin/ /mi rtsol dbu ma dang po lam/ /gang gis ma bcos thugs kyi lam/ /snying ga pad+ma rin chen 'od/ /'od gsal rig pa'i dkyil 'khor lnga//chags pa la sogs nyon mongs lnga/ /mthar thug tha ma dus na mthong / /gang skyes dus na yul mi dpyad/ /mi 'gag ngo bo nyid la gzhag /gsang ba'i pad+ma chos kyi sku/ /ma bcos rang gsal gzung 'dzin bral/ /rdzogs pa'i longs spyod bde ba'i sku//sprul sku gang la ngos gzung med/ /dbyer med rig pa gcig la gnas/ /'dzin dang bral ba'i mngon sum pa/ /chags dang bral ba'i bde ba che/ /tha snyad bral ba'i thabs kyis mtshon/ /rtsod dang bral ba'i spyod pas blang / /spro bsdu med pa'i dgongs par gnas/ /snang ba rgya mtsho chen po bzhin//rang bzhin rig pa de bzhin no/ /yon tan sna tshogs nam mkha' bzhin/ /dus gsum 'gyur med kun du bzang / /sangs rgyas sems can gnyis su med/ /'khor ba nyid na rang bzhin dag /rin chen dag pa ji bzhin no/ /ji ltar bcos kyang 'gyur ba med//rang bzhin chos nyid ngo bo la/ /sgro skur spros pa dang gis med/ /'dzin pa'i spyod pa log pas bslad/ /rang 'byung rig pa'i don ma rtogs/ /rang 'byung kun mkhyen rig pa'i thugs/ /'gyur med 'gro ba kun la gnas/ /mkha' 'dra ye shes lhun gyis grub/ /sgrub med dngos grub chen po la//bsrung med dam tshig rang gzhag ste/ /mtha' med dbus med rig par gsal/ /rgyal ba kun gyi ngo bo la/ /sems can kun gyi rang bzhin yin/ /ye shes rig pa rtogs gyur nas/ /thugs rje mdzad pa'i lam yang ston/ /sems kyi 'bras bu rang gzhag la//'dod pa'i rtsol bas sgrub mi byed/ /byang chub sems kyi lam chen ni/ /rnam dag ye shes dgongs pa'i lam/ /thun mong 'gro ba yongs la gnas/ /dus gsum sangs rgyas las byung ba/ /bgrod med rang rig ye shes lam/ /rang 'dod bltas pas grub pa med//rdzogs pa'i lam la gang gnas pa/ /bsam gyis mi khyab rang gzhag la/ /yid la mi byed yengs pa med/ /rnal 'byor rdzogs pa bcos med la/ /'dod rtsol thig le spro bsdu med/ /ye nas rdzogs pa'i rnam dag la/ /bsam gtan yan lag kun dang ldan//rlung gi 'jug pa rang bzhin zhi/ /ye shes brtsal med bde ba la/ /dga' ba bzhi yi bde ba gnas/ /gang spyod thabs la ma brten yang / /rin chen snang ba'i thabs kyis shes/ /brda sprod tshig la gnas 'gyur yang / /thig le rang byung nyid la 'chang / /rtog dpyod yan lag the tshom bral//sems kyi dga' bde rtsol ba med/ gnas brtse gcig g.yengs pa med/ bde mtshan nyid chos skur gnas/ ye shes gsang ba thabs chan gyis/ sems kyi bag chags thebs chen gyi/ /gyur ba gsum la de bzhin 'gyur/ /sems kyi ye shes gter kha dbye//rang byung ye shes 'od gsal la/ rgyu med rig pa gdod nas gnas/ ye shes rang gnas bde ba che/ /kun mkhyen me long lta bu nyid/ /ma lus snang ba'i rang bzhin dag /sems kyi chos nyid bde ba shes/ /kun bzang nyams cig cir ma mthong / /mthong med gsal ba'i me long nyid//dngos po med pa'i rig pa yin/ /'dra'am mi 'dra rgyu gang nyid/ /bdag gam gzhan nam de nyid gang / /grub bam ma grub ji ltar bskyed/ /de ltar grub na thug pa med/ /de ltar min na gang zhig ni/ /gnyis ka de med ri bong rwa/ /gang gzhan rgyu las grub pa ni/ /gcig dang du ma gang du 'grub//'jig rten rgyu 'bras chos bzhin na/ /yang dag ye shes brdzun nam ci/ /de ltar bdag lta log pa bzhin/ /spang bya nyid 'gyur yang dag min/ /mi mthun gnas pa'i chos yin na/ /zhen pa nyid 'gyur de nyid rig /de lta min na gang zhig 'thad/ /bskyed pa'i rim pa gang gnas par//rdzogs pa'i rim pa gang 'jug pa/ /gang gis gang zhig ji ltar gnas/ /rtsol ba'i bskyed pa de nyid dam/ /ye shes rig pa'i don la 'jug /de nyid yin na de lta mod/ /de lta min na gang zhig 'thad/ /thams cad thams cad grub pa'am/ /ma yin de la 'thad pa gang / /rjes mthun rgyu yis mi gnas na//de bzhin rjes mthun nyid du 'gyur/ /des na seng ge phru gu bzhin/ /sku gsum lhun grub bde ba'i lam/ /rtsol ba'i 'bras bu mthar phyung nas/ /'jig rten chos la'ang de bzhin no/ /sbyang bya 'bras bu yin pa na/ /khyod la dag pa'i ye shes gang / /de lta nyid na rtag par 'gyur//des na rang 'byung rdzogs pa'i lam/ /rgyu la mi gnas rtsol ba med/ /rang gnas ye shes gdod nas grub/ /grub pa'i rang bzhin bskyed mi dgos/ /ye gsal nam mkha'i rang bzhin pas/ /gsal byed rnam pa ji bzhin no/ /zla ba gzugs 'dra gang gis 'byung / / dbyings kyi 'bras bu bsam mi khyab/ /mi rtog 'bar ba'i dkyil 'khor nas/ /che ba'i sku gsum mu mtha' med/ /ye shes rig pa thug phrad du/ /rin chen snang bas gzhag par bya/ /brjod bral rig pa thog babs nyid/ /ma brtsal rang 'byung bde ba nyid/ /yi ge med pa'i gsum mchog ste//kun bzang rgyal ba'i dgongs pa ston/ /mi rtog don mjal goms shing rtogs/ /yi ge med dang rig pa'i gsung / /don gyi chos nyid mjal bar ston/ /gsang sngags gter gyi mdzad 'dzin cing / /rgyal ba'i grag sngags tha snyad bral/ /sngags tshig bral ba'i nus mthu ldan/ / las gzhi med pa'i don gyis 'grub/ /rgyu med 'bras bu mthar thug yin/ /rig pa mtha' bral dkyil 'khor 'dir/ /zhen med tshul gyis 'jug na bde/ /dang po rang sems tshul la brtag /rig pa bla ma'i gdams pa bzhin/ /drong dang ldan na brda don sprad/ /dkyil 'khor drug gi ye shes la//sgra yis mtha' la gzhag par bya/ /myong ba med pa'i rnam pa yin/ /tshor ba bral ba'i reg byas go/ /phyi rol tshul bzhin nges par 'gyur/ /tha mar dran bsams rgyu ba bral/ /dpa' rtul za byed sems lta bu/ /shes pa dang bzhag ma brtul ba/ /stag lta bu sems la ni//ye shes rol pa mi 'gag pas/ /rtsol med ye shes rig pa'i dang / /des na rang bzhin cog 'jog go/ /dngos po ji ltar snang ba yang / /rang gi shes pa nyid du mthong / /dus gsum sangs rgyas ma lus pa'i/ /thugs la 'jog pa'i man ngag bcud//rin chen shar bas rang la rdzogs/ /rtsol bral rig pa mi rtog pa/ /ma bcos rang snang bde ba'i klong / /ye shes lhun grub klong du shar/ /rang 'byung nam mkha' lta bur khyab/ /rang gsal rig pa'i dang la gnas/ /spros bral ye shes thig le che/ /rnam rtog bral ba'i rig pa gsal//rang gi cir yang mi rtog pa/ /ye shes rang gnas sems su gsal/ /ci yang mi rtog sems su smin/ /ci yang ma yin dmigs su med/ /rnam rtog sems kyi rgyu ba bral/ /rig pa'i ye shes 'dzin pa bral/ /rang snang rol pa byang chub sems/ /sgyu ma'i ye shes bde ba'i klong //rang rig ye shes 'dzin pa yin/ /rang 'byung sgyu mar mngon sum gsal/ /lhun grub ye shes ma bcos pa/ /bde ba'i sgyu ma rang rig nyid/ /thams cad ye shes sems su 'char/ /rig pa'i ye shes don gsal ba/ /thams cad ye shes nyid du mthong //ye shes ma yin gang yang med/ /khams gsum dngas ma ye shes nyid/ /ye shes rig pa'i thabs kyis shes/ /'khrul pa'i sa gnas brda bkrol te/ /ye shes rgyal ba'i gral du gzhag /ma bcos sku gsung thugs su gnas/ /rang rig sems kyi 'bar ba nyid//ye shes sems kyi phur pa thebs/ /rnam rtog bzhon pa rlung dang bral/ /dngos grub bde ba'i rang byung nyid/ /thar pa'i lam mchog byang chub sems/ /'bras bu mthar phyin rig pa nyid/ /rang byung sems kyi ji bzhin la/ /rnam pa'i rig pa thabs kyis gnas/ /bcos med dgongs pa bde chen 'di//mngon sum mthong la ngos gzung med/ /rang shar dngos por grub pa med/ /bde chen rig pa ma mthong ste/ /'di dang bral na rtog pa nyid/ /bka' yi dam dang de mi ldan/ /dmus long mdun du gzugs snang bzhin/ /'bras bu mthar phyin yod ma yin//kun bzang rgyal ba'i don dang 'gal/ /rang gsal dgongs pa'i thugs ma rig /'dzin pa'i cha la gang gnas kyang / /'khor ba'i 'bras bu nyid du 'gyur/ /rang 'dod don gyi mthar ma phyin/ /ye shes gsang ba bde ba'i sa/ /'dod pas mi 'grub thob pa med/ /'dod med rang bzhin nyid las byung //shes pa rang lugs so ma nyid/ /kun bzang rgyal ba'i dgongs pa'o/ /tha mal shes pa 'di nyid la/ /bsams pa'i sems med rang gzhag yin/ /nges pa'i gzhi ni don la gnas/ /yid ches bla ma nyid la gus/ /rin chen gdams ngag gter du 'chang / /lung gi dgongs pa'i don gsal te//rig pa rang gsal gtan la phebs/ /mi 'gyur rdo rje sems dpa' 'chang / /ston pa rang rig nyid yin pas/ /drang ba'i don la sems mi 'jug /phyi rol 'dod rtsol sems dang bral/ /rdzogs pa'i bka' la yid mi 'gyur/ /bla ma rin chen srog tu 'dzin//mos pa rang gi 'dod pa gtong / /rin chen gter gyi ngo bo 'di/ /srog dang bral ba'i kha bzhin bsdam/ /rang sems byang chub sems 'di la/ /ye shes ma rig tha dad med/ /'khrul dang ma 'khrul rig par gcig /zhen rtog brtags pa sna tshogs dang / /ye shes 'od gsal ngo bo nyid//'od gsal rang 'byung sems su gcig /byang chub sems la ngo bo bral/ /don ldan ye shes nyid du mthong / /bsam pas brtags pa sna tshogs pa/ /bag chags log pa'i rkyen gyis mthong / /rang rig ye shes 'jug pa dang / /rtog pa'i bag chags dang po ni//sgrib pa ma lus bzhin grub cing / /byang chub sems kyi mtshan nyid la/ /thog ma dang bral tha ma med/ /thog med 'khor ba'i rang bzhin 'di/ /byang chub sems la ye nas dag /sems nyid nam mkha' lta bu la/ /blo bur gzugs brnyan sprin gyis bsgribs/ /ngo bo ma yin rkyen gyis snang //me dang lcags kyi rang bzhin 'dra/ /rang bzhin bral ba ma yin te/ /dus gsum ma yin nam mkha' bzhin/ /chos sku rang bzhin ye nas dag /longs spyod rang gi bde ba nyid/ /sprul pa chu zla lta bur snang / /dbyer med rig pa gcig gi dang / blang dor gnyis bral mnyam pa nyid//byang chub sems kyi ye shes la/ /snying po mnyam nyid yi sangs rgyas/ /snying po don la rtsol ba med/ /don gyi rang 'byung gnyis su med/ /sems kyi rang rig rtog pa nyid/ /rnam rtog ye shes nyid du 'bar/ /brtsal med 'bras bu mthar thug nyid/ /bka' yi bcud 'dus snying po 'di//rgya mtsho bzhin du bdud rtsi 'dus/ /snying po'i don 'di gsang ba'i bcud/ /gsal ba'i sgron ma snying po 'di/ /ma lus 'dus pa'i 'khor lo yin/ /snying po gsung gis rtogs bya ba/ /sems nyid rang 'byung snying po nyid/ /phyi nang gsang ba'i dkyil 'khor 'dus//'byung 'jug mi mnga' snying por gsal/ /rang 'byung rdzogs pa'i dgongs par gnas/ /ye shes snying po mkha' 'dra ba/ /mtha' dbus mi mnga' blang dor med/ /mi len snying po bdag med gsal/ /bka' yi bcud 'dus snying po 'di/ /rang bzhin snying po sman chen rtogs//'khor ba'i zug rngu 'byin pa'i mchog /byang chub sems kyi sman med na/ /rtsol ba'i 'jug pa mtho ris rgyu/ /sman chen rang la gnas bzhin du/ /mi rtog gzhan nas tshol bar byed/ /rnyed pas rang sems sman du mthong / /rtogs pas gzhan nas ma 'ongs te/ /rang 'byung snying po thog ma med//spros bral nam mkha' lta bur gnas/ /rgyal ba'i sku dang rang bzhin ldan/ /gzung 'dzin bral ba'i dang la bzhugs/ /bde ba'i don la ma chags rol/ /snang ba ye shes rig par gnas/ /byang chub sems kyi sman chen 'di/ /ye shes rgyal ba'i dgongs pa ste//dus gsum sangs rgyas lam du bde/ /bsam gyis mi khyab dgongs pa ni/ /shes pa rang gzhag so ma nyid/ /snying po don rtogs bya ba bral/ /rang gsal rig pa'i ngang la bzhugs/ /bcos med 'dzin bral 'phro 'du med/ /byang chub rgyu ba snying po bral/ /kun 'byung rig pa 'pho 'gyur med//thugs rje rang 'byung ye shes nyid/ /rtsol bral rang snang byin rlabs 'byung / /phyogs ris mi mnga' kun la khyab/ /snying po nyid du kun sgrol mdzad/ /byams pa chos nyid ngang du skyabs/ /dga' ba rang rig mi 'bral ba/ /blang dor gnyis med pa btod snyoms che/ / rang 'byung snying po 'khor lo la/ /rtogs bral 'khor ba rang bzhin dag /thugs rjes sems can don mi mdzad/ /dngos po mi mnga' rang 'byung sems/ /'od gsal snying po rdzogs pa 'di/ /rin chen gsung gis brtags pas shes/ /'gro drug sems can thams cad la/ /rang gnas ye shes nyid ldan pa//brtags pa gsum gyis shes par 'gyur/ /ming dang sems la ye shes tshol/ /dngos po gang yang rung ba la/ /brtags pas rang log shes par 'byung / /yid bzhin rin chen nor bu bzhin/ /'gyur ba med pa'i gnas lugs dang / /thun mong dam tshig gsum ldan pa'o//lce mnan nang yig sgra la sogs/ /de bzhin gnas skabs gzhan du yang / /snying po ye shes gzung bar bya/ /snying po gsung 'di don dang 'brel/ /skal ldan rin chen lta bu yis/ /grub mtha' ngan la gnas dus su/ /'di yis don kun rig par gyis//'di yis rang sems ma rig na/ /sgra'am tshad ma gang gis kyang / /rig pa'i ye shes rnyed mi 'gyur/ /gzhi nyid rang 'byung 'gyur pa med/ /rtog pa rang 'byung sems kyi lam/ /ma yengs byang chub sems su gsal/ /rang 'byung 'bras bu mthar phyin pa/ /'gro don mdzad la rtog pa grol//'od gsal dbyer med gcig gi ngang / /byang chub sems kyi rang rig 'di/ /bag chags 'khrul pa'i dbang gis na/ /brtags pas sna tshogs med bzhin grub/ /sems kyi bag chags phyir snang yang / /rig pa 'od gsal 'gyur ba med/ /sna tshogs snang ba'i rang bzhin 'di//snying po gsung gis brjod bya ste/ /'khrul pa ma yin log snang bas/ /rang rig byang chub sems su brjod/ /rtog pa'i rtsa ba byang chub sems/ /rang rig sems la rtog par 'khrul/ /thog ma med dus bag chags dang / /rin chen gdams ngag rkyen med pas/ /rtog med snying po sems ma goms//thag pa sbrul min snang ba bzhin/ /lus ngag sems dbyen sgyu ma'i lus/ /sna tshogs snang ba'i rang bzhin 'di/ /chos nyid yin par dbyer med pas/ /zung du 'jug pa gang dgongs pa/ /gsal ba'i sems de nyid la ni/ /chos nyid ma yin bag mi snang //thams cad snang ba'i ngo bo 'di/ /ye shes snying po nyid du mthong / /ngo bo nyid la brjod pa bral/ /rang bzhin rnam dag rig pa la/ /brjod med don du ma brjod na/ /rig pa'i don la mjal ba med/ /brjod pa'i sbra la sems drangs pas/ /ma bcos rang 'byung chos nyid mthong //rang rig sems la don rtogs nas/ /'jug thabs mi gnyis tshul gyis gnas/ /cig car rdzogs pa bde ba che/ /phyogs su ma lhung gzung ba'i sems/ /rdzogs pa'i ye shes snying po la/ /rim pa'i lam med mthar phyin nas/ /rang 'byung rtogs pa'i 'jug pa la/ / de nyid snying po don ldan pas/ /'dod pa'i tshogs la yid mi 'jug /de bzhin pha rol phyin pa drug /rang 'byung rdzogs pa'i sems la gnas/ /bsam bral mi rtog dgongs pa la/ /de nyid pha rol phyin drug ldan/ /mi rtog 'dzin med tshul la gnas/ /ma yengs rig pa rgyun mi 'chad/ / dmigs med shes pa pha rol phyin/ /sems nyid stong pa'i dngos med la/ /chos dang chos can mi gnas pas/ /dbyer med bden pa bzhi po don/ /dngos po ye shes 'gags ma yin/ /bden brdzun nyid kyi mthar mi 'dzin/ /snying po'i don la 'dod pa bral/ /kun bzang ye shes 'od gsal la//bsam bral ye shes nam mkha' 'dra/ /rdzogs pa ye shes ma bcos pa/ /mi 'gyur chos nyid dbyings kyi thugs/ /mi 'gag ye shes rig pa'i gsung / /dbyer med chos sku gzung 'dzin bral/ /sku gsung thugs bral sku gsung thugs/ /phyi nang mi mnga' rang gsal nyid//'byung 'jug mi mnga' rang bzhin gnas/ /dbang po ngo la snang ba'i rnams/ /chos nyid byang chub sems su mthong / /nyon mongs lnga po ye shes lam/ /thams cad byang chub sems kyi gzhi/ /sangs rgyas nyid las gzhan ma yin/ /dag pa'i sems la brtsal med de//brtsal ba'i kun rdzob grub ma yin/ /dam pa'i don la gang 'jug pas/ /gsang ba rdzogs pa'i don nyid la/ /chos nyid gsang ba 'di dmigs na/ /nges pa'i gdams ngag zab mo yis/ /brtsal med rang gzhag brtsal ba dang / /mi bsgom rang lugs bsgom pa dang //mi gnas tshul la 'dug pa dang / /gzhag med mnyam gzhag rang 'byung ba de/ /mi rtog don la gyi na ba/ /dge mi dge yi rnam rtog bral/ /byang chub sems kyi mtshan nyid do/ /rang 'byung byang chub brtsal ba min/ /byang chub 'dod la byang chub sems/ /yang dag don gyi snying po 'di//btsal bas rnyed par mi 'gyur te/ /zhen sems nyid la 'byung mi 'gyur/ /nyal ba'i bsam gtan 'khor lo bde/ /ma lus byang chub sems kyi dang / /chos nyid byang chub mnyam gzhag na/ /dngos med byang chub rang 'byung dang / /'dus ma byas pas bde ba'i klong / / sems nyid bsam med brjod las 'das/ /ye nas rnam dag bsam du med/ /rdzogs pa'i rnal 'byor rig pa yis/ /de la ma brtsal gnas na bsgoms/ /rig pa dbyings la yan bzhag na/ /brtsal ba'i nad bral bsgom pa yin/ /bde bas snying po dri ma med/ /rig pa 'od gsal nyid du bsgom//'od gsal sems la gnas gyur na/ /rnam rtog mtshan ma rang bzhin zhi/ /skye ba med pa'i phyag rgya yis/ /rang snang kun bzang rol pa 'grub/ /dngos med dngos la mi dmigs shing / /dbu ma'i sems bral rgyu ba bral/ /sems kyi rgyu ba med pas na//thams cad rang 'byung stong pa nyid/ /sems nyid rig pa rang 'byung ba/ /'gyur med skyod med gsal bas na/ /yi ge med pa'i snying po gsung / /dam pa byang chub sems la gnas/ /rgyal po'i dam tshig ma bcos pa/ /bsrung ba med pa'i tshul gyis bsrung / /'gyur ba med pa'i phyag rgya la//'gyur ba med pa'i don gyis 'debs/ /mtha' dbus med pa'i dkyil 'khor la/ /ye shes 'phro 'du med par gsal/ /bsam bral rang bzhin rgyal ba'i thugs/ /byang chub sems la 'da' ba med/ /sa 'dzin rnam pa'i sems bzhin du/ gzhan nas rnyed par mi 'gyur te//brtags na rang sems nyid la thug/ /gzhi la rang gzhag gzhan 'dod bral/ /rang sems rig pa 'gyur ba med/ /ji bzhin mi rtog chos kyi sku/ /bya bral lhun grub ji bzhin gnas/ /rang 'byung 'od gsal ye nas dag /cir yang mi dgongs bsam mi khyab//shes rab snying rje ldan pas 'grub/ /snying po byang chub rang bzhin la/ /bsam med rang gzhag thugs su bde/ /'khor lo'am rig pa bde ba yis/ /rang gnas rig pa tshol ba nyid/ /rnam rtog yin te don la med/ /blon rigs gsum las dmangs kyi yang //chags pa'i 'du shes drang ba'i don/ /nges par spros bral rang 'byung sems/ /chags pa'i lam gyis shes mi 'gyur/ /blang dor med pa'i brtul zhugs kyang / /nges par brtags na blang dor nyid/ /rang rig bsam bral gzhag pa ste/ /don dngos 'dzin pa zhen par gnas//rang 'byung 'od gsal snying po 'di/ /mtshan ma med pa'i rang bzhin pas/ /shes rab thabs kyi chags pa bral/ /thig le 'dod rtsol spro bsdu med/ /rang rig rtsol bral bde ba'i gnas/ /shes rab thabs la snyoms 'jug pas/ /bde ba'i bsam gtan chen po yin/ / sgyu ma'i ro la ma chags pas/ /chags med ye shes rdzogs pa'i lam/ /byang chub sems kyi rang gsal 'di/ /dngos med shes rab thabs kyis 'grub/ /snang gsal 'khor lo rig pa 'di/ /ngo bo ma grub me shel 'dra/ /dngos med ye shes mthong ba grol/ /gzugs sogs snang ba brtags pa yin//dngos po rang bzhin thams cad ni/ /chos nyid dbyings kyi thig le yin/ /de nyid sgrub pa'i thabs su ni/ /snying po rig pa nyid shar bas/ /mtha' yi mun pa ngang gis dag /sgrub med rang 'byung sgrub pa 'dis/ /khams gsum 'od gsal thugs su sgrub/ /rang sems rig pa'i spyod pa bde//ye shes spyod pa rang gzhag nyid/ /bsal nas 'dod pa'i mtha' mi 'gegs/ /thugs rje tshogs kyi bsod nams 'dir/ /rang 'byung rig pa rtogs gyur nas/ /'gro ba drang phyir rgyun mi bcad/ /snying po sems kyi don rig na/ /ye shes mthar phyin 'bras bur gnas//mtshan dang dpe byad rang bzhin grub/ /sprul pa rang 'dod cir yang 'byung / /chu gsal ri bong can bzhin no/ /ye shes lus can de bzhin gshegs/ /me shel gzugs ltar 'gro ba sgrol/ /ye shes rang byung de bzhin gshegs/ /yan lag mi mnga' rtsis las 'das//mthar phyin dga' ba rig par gsal/ /dgongs pa rang gzhag ye sangs rgyas/ /rig pa rang gsal chos rnams la/ /gang yang bsam du med par gnas/ /de ltar byang chub sems nyid la/ /ma rig med pas 'khor ba med/ /sems can skye ba'i rgyu ma gnas/ /rang 'byung sems la rtag par gzhug /srid pa'i chos la rgyu med pas/ /mya ngan 'das pa'i lam dang bral/ /ma skyes pa yi chos rnams la/ /nam yang skye bar mi 'gyur te/ /sangs rgyas sems can rang bzhin gcig /sems kyi ye shes gsang ba 'di/ /snying po don las rmad du byung / /rang 'byung che ba bdag nyid sku//rang rig bde ba rdzogs pa che/ /thugs rje snang ba sprul pa'i sku/ /ngo bo ma grub gsang ba'i sems/ /snang dang mi snang dbyer med do/ /yod dang med pa byang chub sems/ /snang ba rang rig tha dad pa/ /don dang rtags la sogs pa'i rnams/ /rnam pa tha dad bag chags snang //yang dag ma yin 'khrul pa'i sems/ /bsam pa'i dbang gis der 'gyur ro/ /bde gshegs ye shes gsang ba de/ /ma mthong rnam rtog spros 'chal pas/ /stong nyid rig pa'i man ngag yin/ /dran rtog rlung gi rgyu ba bral/ /mtha' ru ma skyes bsam gtan bya//chos dang chos nyid gang yang min/ /nam mkha' lta bu bdag med pa/ /ye shes stong pa'i ngo bo'o/ /rang bzhin stong pa mtshan ma med/ /rnam thar gsum ldan bde ba che/ /chags med gzhi yi lam nas 'jug /mtshan med ngang la gnas pa na/ /rang 'byung 'bras bu dang gis 'char/ / yon tan nam mkha' mtha' dang mnyam/ /rang gi ye shes snang ba la/ /'bar ba'i dkyil 'khor rang bzhin gsal/ /rgyun gyi 'khor lo sku yi dang / /chags bral dag pa rig pa'i rgyan/ /rang rig gsal ba ting 'dzin nyid/ /mi zad 'khor lo bsam du med//sgro bral stong nyid zhi gnas la/ /'du shes 'jug med mnyam gzhag la/ /mtshan med zhi gnas lhag mthong 'brel/ /mos 'jug lam la gang gnas nas/ /mi rtog gsal ba'i don gyis go/ /bsam dang bral ba'i ye shes ni/ /snying po don la rtog pas 'jug /thabs bral rig pa rtsol bas tshol/ /ra gan gser 'dod de bzhin no/ /'dod pa'i sems dang ma bral na/ /snying po don la bdag 'dzin byed/ /bde ba'i sems la re ba na/ /rtog pa'i rjes 'jug zhi gnas yin/ /rang lus sems sum rtogs par//'dra 'bag lha yi rnam pa gzung / /lus kyi dben pas chos nyid tshol/ /rang lus sems su shes pas na/ /gang na gnas kyang sems nyid dben/ /snang srid sems su shes pas na/ /dbang po yan lag ye shes gsal/ /snying po don gyi rang bzhin la/ /ci yang mi bsgom gang yang min//khyu mchog sems ltar ma bcos pa/ /rang gzhag rig pa'i 'khor lo nyid/ /dus gsum du yang btang gzhag med/ /gang yang mi 'dzin dgag pa med/ /snying po don gyi rang bzhin la/ /skyon dang yon tan gnyis med pas/ /rdzogs pa'i lta ba blang dor med//'jug med ting 'dzin ma yengs pa/ /'od gsal rgyal ba'i sems nyid yin/ /rang 'byung thugs kyis ma bcos pa/ /rnam dag rgyal ba'i sku gsung thugs/ /brtsal med snying po don las 'byung / /byang chub sems kyi don nyid la/ /nges pa'i theg gcig snying po'i don//phyag rgya rim bzhi sbyor ba drug /bsam pa'i theg pa sna tshogs pa/ /drang ba nyid 'gyur nges pa min/ /ngo bo nyid la mthon dman med/ /mos 'jug bsam pa'i rtog par zad/ /sems nyid nyag gcig phyogs bral ba/ /du ma'i 'bras med lam du min/ /ma bcos rnal 'byor rdzogs pa'i lam//mi gnas rang bzhin sems su gcig /ma bgrod mthar phyin 'bras bu'am/ /rgyu rkyen bral ba skye 'jig med/ /gdod nas rang 'byung snying por gsal/ /rig drug ji ltar snang ba dang / /mya ngan 'das pa'i rang bzhin la/ /dbyer med rang 'byung sems su gcig /ris drug sems kyi rtog pa dang / /ye shes rang gsal rig pa nyid/ /khyad par med de snying por gcig /khams gsum 'khor ba snang ba dang / /mya ngan 'das pa'i ye shes nyid/ /rtogs ma rtogs kyis gnyis su byung / /rtogs pas rang sems nyid la thugs//gzhan 'dod re ba rtsol ba bral/ /rang sems rnam dag ye sangs rgyas/ /kun bzang rgyal ba'i sems nyid bde/ /mtha' yas 'gro ba thams cad la/ /rgyal ba'i ye shes rang chas ldan/ /bsam bral rang lugs cir mi dgongs/ /ye shes nam mkha'i mkha' dang mnyam//yid la mi byed bya ba btang / /'khor ba mya ngan 'das pa yi/ /rnam pa phra rags cir snang yang / /rang gzhag bsam bral nyid du bde/ /chu yi snang ba de bzhin du/ /phra rags rnam rtog ye shes nyid/ /rang rig gnyug ma pad+ma ltar/ /'khor bar gnas kyang gdod nas dag /mtshan ma'i rnam pa ci 'byung yang / /chu shing lta bur snying po med/ /ma rig 'thibs pa'i 'khor ba na/ /rig pa mar me lta bur gsal/ /rnam par rtog pa cir 'gyur yang / /rang rig gnyug ma'i rgyun mi bcad/ /nam langs sems dang nub kha bzhin/ /ye shes don gsal de bzhin no//ma bsgrubs rang gsal ngang gis 'byung / /skal ldan ma bcos rnal 'byor pas/ /sems nyid steng kha ltar gnas na/ /lus ngag rtsol ba ngang gis zhi/ /bde ba'i ye shes mi rtog pa/ /shes rab gsal ba'i snying por phyin/ /mthar phyin rang 'byung mi rtog pa/ /dri med rgyal ba'i ye shes gsal//rang gnas 'gro ba yongs la khyab/ /nam mkha' lta bur dbyer med pa/ /'gro ba'i sems las gzhan la med/ /rtog med ngang la rang shar ba'i/ /rig pa bde ba'i mtshan nyid can/ /'dzin pa dag byed ye shes ni/ /ma bcos ngang gis rang rig gsal/ /ye shes thig le'i don 'di ni//shes rab gsal bas bdag la bstan/ /bde ba'i rang rig rtog pa bral/ /rang gnas ye shes 'od gsal sems/ /mthong bas the tshom rgyu ba bral/ /ye shes ngang gnas sgrib pa med/ /thams cad ye shes gsal mthong bas/ /snying po don la gos pa med/ /rnam dag rig pa'i 'khor lo 'di//rtsol bral rang 'byung ye shes yin/ /rang 'byung ye shes kun gyi bdag /lus dang bral ba yan lag med/ /sgro skur bral ba'i dngos gzhi can/ /snying po kun bral kun gyi bdag /ma bcos rig pa'i ting 'dzin gsal/ /bya ba med bzhin don kun rdzogs/ rang 'byung gnyug ma kun gyi gzhi/ /bgrod med rnal 'byor lhun grub lam/ /ji bzhin kun rdzogs 'bras bu nyid/ /thig le dbyer med gcig gi ngang / /sems nyid bya bral rdzogs pa'i gter/ /bde ba'i ye shes mi rtog thugs/ /skal ldan dang po nyid nas rdzogs/ /'gro drug 'khor ba'i rtog pa dang //rgyal ba'i ye shes mya ngan 'das/ /bde chen rig pa gcig gi ngang / /rang 'byung ji bzhin ma bcos pa/ /lhun rdzogs spros pa med pa'i ngang / /bsam du med pa'i ye shes 'di/ /rnam par rtog pa'i rgyu ba bral/ /dus gsum mi mnga' rgyun mi 'chad/ /sems nyid grub pa'i lam mchog 'di//dbyer med kun la ldan bzhin du/ /snang ba'i lam med 'khor bar 'khyam/ /sdug bsngal rtsol ba'i nad kyis gdungs/ /des na snying po sgron ma 'di/ /phyi rabs rnal 'byor rnams don du/ /bla ma 'phags pa'i byin rlabs dang / /mos pa'i mthu ldan bdag gis rtogs//snying rjes kun bslang yongs la bsngo/ /snying po de kho na nyid kyi sgrub thabs/ yang dag pa'i sa la gnas pa/ slob dpon na ro pas mdzad pa rdzogs so// //rgya gar gyi paN+Di ta badzra gu na b+ha dra dang lo tsA ba rin chen rgyal mtshan gyis bsgyur ro// //

CLOSE WINDOW