CLOSE WINDOW

D1287
བོད་ཡིག

@##/ /rgya gar skad du/ shrI he badzra ba liM bi d+hi nA ma/ bod skad du/ dpal kye rdo rje'i gtor ma'i chog zhes bya ba/ dpal rdo rje sems dpa' la phyag 'tshal lo/ /shes rab thabs kyi bdag nyid can/ /yi ge gnyis las yang dag 'byung / /sku gsung thugs kyi dbang phyug gtso//he ru ka la phyag 'tshal lo/ /de nas dpal kye rdo rje'i dkyil 'khor dang / sbyin sreg dang / cho ga mchod pa dang / sgrub pa'i dus su rnal 'byor pas phan gdags pa dang / tshar gcad pa'i phyir 'di brtsams so/ /de la gtor ma'i dgos pa yang gang zhig ce na/ gzhung las/bgegs rnams zhi bar bya ba dang / /lha rnams dgod par bya ba dang / /dam tshig nyams pa bskang ba'i phyir/ /gtor ma'i las ni ci nus rtsom/ /zhes 'byung ngo / /yang rgyud las/ 'byung po kun la gtor ma 'di dag gis/ /rnal 'byor pa yis mchod pa legs byas na/ /dus kun rnyed pa bde bar gyur pa dang //lha rnams dga' zhing 'gro ba 'byor bar 'gyur/ /'byung po'i tshogs la gtor ma cig byin na/ dbang dang mngon spyod dgra yi sde 'joms shing / /dgar dang bsad dang lkugs par byed pa dang / /zhi zhing bde bar rgyas par byed pa yin/ /zhes 'byung ngo / / yang slob dpon kha cig gis/ /'jig rten 'jig rten las 'das pa'i/ /dngos grub mchog 'dod thams cad la/ /dpal ldan rdzogs pa'i sangs rgyas kyis/ /gtor ma'i las ni shin tu bsngags/ /zhes 'byung bas gtor ma'i las 'di shin tu phan yon che'o/ /de la thog mar sngags pas 'byung po nyi shu rtsa bzhi la gtor ma sbyin dgos te/lha chen brgyad po 'khor bcas dang / /klu chen brgyad dang phyogs skyong brgyad/ /'khor du gtogs pa brgyad rnams la/ /rgyun du'am yang na zla ba'am/ /de bzhin lo gcig khyud 'khor dang / /dkyil 'khor sbyin sreg bzlas pa dang //de bzhin gnod pa byung dus su/ /ji ltar 'os shing rigs pa dang / /rang gis ci 'byor rjes mthun par/ /nan tan du ni gtor ma sbyin/ /zhes 'byung ngo / /de la gtor ma'i rdzas kyang gang zhe na/ me tog bdug spos mar me byug pa dang / /sman rnams dang ni dri dang lha bshos dang //chang sbyar 'bru dang sna tshogs chang la sogs/ /u lo pi dang la du khur ba dang / /zan dron dang ni drug cu par byas pa/ /phye la sogs pa dang bcas bsres nas ni/ /'bras chan 'bras kyi phye ma 'bru bdun dang / /khrag dang sha 'dres nya sha la sogs pa/ /btsos dang rjen dang rnying dang bcas pa rnams//de bzhin bdud rtsi lnga dang bsres nas ni/ /de dag kun gyis snod ni bkang nas kyang / /bum pa chus bkang pa yi steng du gzhag /khur ba'am zas ngan mar me steng du bltam/ mtshan mo'i dus su de dag la yang dbul/ /zhes 'byung bas de dag gi steng du zhi ba'i gtor ma ni zho dang /bu ram dang / 'o thug la sogs pa bsre'o/ /drag po la ni bsgrub bya'i gzugs brnyan steng du gzhag go/ /de la rigs kyi bu dag tshe ring bar 'dod pa dang / nad nyung bar 'dod pa dang / gnod pa zhi bar 'dod pa dang / dpal dang grags pa 'phel bar 'dod pa dang /bu lon lan chags bral bar 'dod pa dang / dus ma yin par 'chi ba bzlog par 'dod pa dang / longs spyod 'byor pa 'phel bar 'dod pa dang / phas kyi rgol ba tshar gcad par 'dod pa dang / 'jig rten dang 'jig rten las 'das pa'i dngos grub thob par 'dod pa'i mkhas pas gtor ma'i las la brtson par bya'o//de la bdag nyid sku phyag rgya chen po gsal bar bsgoms la/ thog mar nam mkha' lta bu la yaM las rlung gi dkyil 'khor yaM gis mtshan pa/ raM las me'i dkyil 'khor raM gyis mtshan pa/ de las a/ a las thod pa'i nang du lcags kyu lnga dang / sa bon lnga las bdud rtsi lngar bskyed do//hUM las rdo rje a las zla ba de'i steng du/ oM gyis ye shes kyi bdud rtsir sbyang / AH sa gzi byin bskyed/ hUM gis ye shes kyi bdud rtsi dang / dam tshig gi bdud rtsi gnyis su med par bya'o/ /de nas gtor ma byin gyis brlabs te 'di brjod do/ /bdag gi bsod nams stobs dang ni//de bzhin gshegs pa'i byin rlabs dang / /gsang sngags rig sngags mthu dag dang / chos kyi dbyings kyi stobs kyis su/ /sems can kun la phan 'dod pas/ /don rnams yang dag bsam pa kun/ /sems can khams ni ma lus par//de dag thams cad ci rigs par/ /thog ma med par 'byung gyur cig /oM a kA ro mu khaM sarba d+harmA NAM Ad+ya nu t+pan+na twA ta oM AH hUM phaT swA hA/ lan gsum mam bdun brjod do/ /de ltar byin gyis brlabs nas/ gtor ma'i mgron spyan drang ba'i phyir/ he ru ka'i phyag rgyas yab yum bcings te sngags 'di brjod do//oM a ral+li hoHjaHhUM baM hoHbadzra dA ki nI sa ma ya s+t+waM dr-i sh+ya hoHoM AHhUM/ zhes lan gsum brjod la 'byung po nyi shu rtsa bzhi la sogs pa 'khor sde brgyad mdun du bsams te/ mchod pa lnga yang dbul/ lha chen brgyad po 'khor bcas dang / / klu chen brgyad po 'khor bcas dang / /'jig rten skyong ba brgyad po dang / gnod sbyin tshogs rnams ma lus dang / /srin po'i tshogs rnams ma lus dang / /'byung po'i tshogs rnams ma lus dang / /yi dags tshogs rnams ma lus dang / /sha za'i tshogs rnams ma lus dang / /smyo byed tshogs rnams ma lus dang //brjed byed tshogs rnams ma lus dang / /mkha' 'gro'i tshogs rnams ma lus dang / /de la sogs pa 'byung po'i tshogs/ /ma lus ji snyed yod pa rnams/ /'dir gshegs bdag la dgongs su gsol/ /mchod sbyin gtor ma 'di snoms la//bdag ming 'di zhes bya ba dang / nad med tshe dang dbang phyug rnams/ /dpal dang grags dang skal ba bzang / /longs spyod rgya chen kun thob cing / /zhi dang rgyas la sogs pa yi/ /las kyi dngos grub bdag la stsol/ /dam tshig can gyis bdag la srungs/ /dngos grub kun gyis stong grogs mdzod//dus min 'chi dang nad rnams dang / /gdon dang bgegs rnams zhi bar mdzod/ /rmi lam ngan dang mtshan ma ngan/ /bya byed ngan pa med par mdzod/ /'jig rten bde zhing lo legs dang / /'bru rnams 'phel zhing rgyas par shog /bde legs thams cad 'grub pa dang //yid la 'dod pa kun grub shog /de nas pad+ma'i lag pa gyen du kha phye ste/ gtor ma la gtad de/ sngags 'dis bsngo'o/ /oM in+da/ dza ma/ dza la/ dza k+kha/ b+hU ta/ bi h+ni/ bA u/ rak+Sha/ tsan+da/ sudz+dza/ mA da/ pa p+pa/ ta la pA tA le/ aT+Ta/ sa p+pa swA hA/ dgra bgegs mA ra ya phaT/i daM ba liM/ b+huny+dza/ dzi g+ha/ phu l+la/ d+hU p+pa/ mAM sa/ piM g+ha/ aM b+ha/ sap+pa/ kadz+dza/ sA da/ khin+ta/ khu Ni/ phe Da/ gA da/ oM a kA ro mu khaM sarba d+harmA NAM Ad+ya nut+pan+na twAta oM AH hUM phaT swA hA/ zhes pa brjod do/ /rigs lnga la bstod pa bya/ yi ge brgya pa bzlas/ phyin las gzhol/smon lam gdab/ phan gdags pa'i gtor ma'o/ /sngags pa gang zhig dgra dang bgegs la sogs pa tshar gcod pa'i las byed pa rnams kyis gong du smos pa'i gtor ma'i rdzas mdun du bzhag ste/ dgra bgegs gang yin pa'i rU pa yang gtor ma'i nang du dmigs la/ 'byung po nyi shu rtsa bzhi la sogs pa spyan drangs la gtor ma gtang / las gzhol ba ni/ lha chen brgyad po zhes pa nas/ mkha' 'gro tshogs rnams ma lus kun/ /de la sogs pa gnod sbyin tshogs/ /drag cing gtum pa'i 'byung po spyon/ /ma rungs sems can 'di dag la//drag cing snying rje med pa yi/ /rnal 'byor ma dang ma mo dang / /mkha' 'gro gnod sbyin sha za dang / lto 'phye dang ni srin po dang / /gzhan yang sha za khrag za ba'i/ /khyi dang khra dang kang ka dang / /'ol ba bya rgod la sogs pa'i/ /gzugs can thams cad 'dir spyon cig /bdag ming 'di zhes bya ba la/gnod par byed pa'i dgra bgegs kyi/ /chung ma nor dang srog dang ni/ /gnod pa rnams ni phrogs par mdzod/ /rang gi yul nas dbyung ba dang / /dgar ba dang ni bskrad par gyis/ /bdag gi dpung ni stobs med la/ /dgra bgegs stobs ldan kho na ste/ /'di ni khyod kyis bza' ba'i phyir//sha dang khrag dang zhag dang rkang / /bza' ba btung dang bcas par mdzod/ /gnod byed gsol la de mdangs phrog /rang gi rnal 'byor ci rigs par/ /long la bza' ba nyid du gyis/ /thams cad tshim par bzhes par mdzod/ /gang gis bdag la mi tshugs shing / / dgra bgegs thams cad choms par mdzod/ /bdag la las kyi dngos grub ni/ /rgya chen yongs su stsal nas kyang / /nyid kyi gnas dang yul du gshegs/ /ci nus 'byor pa'i mchod pa 'di bzhes la/ /bdag gi las kyi 'bras bu mchis par mdzod/ /pus mo'i lha pas la btsugs nas su//thal mo sbyar nas khyod la gsol ba ni/ /btsun mo dang ni sras dang g.yog tu bcas/ /gsan zhing 'dir gshegs bdag la bka' drin skyobs/ /yang gtor ma'i sngags brjod/ de nas dgra bgegs kyi sha khrag dang / /snying la sogs pa dang / gtor ma'i zas rnams gcig tu bsdus nas/gnod sbyin la sogs pa mi sdug pa'i gzugs can/ grangs med pas zos shing 'thungs par bsams la gtang / gtong ba'i dus su rol mo dang dril bu dang rnge chung gi sgra dkrol zhing gtang ngo / /de nas nang du zhugs la rang ci 'dod pa'i bzlas pa bya/

CLOSE WINDOW