CLOSE WINDOW

D1255
བོད་ཡིག

/ //rgya gar gyi mkhan po nag po'i zhal snga nas/ zhu chen gyi lo tsA ba 'gos lha btsas kyis bsgyur cing zhus te gtan la phab pa'o// @##/ /rgya gar skad du/ ho ma bi d+hi/ bod skad du/ sbyin sreg gi cho ga /bcom ldan 'das dpal he ru ka la phyag 'tshal lo/ /'jig dus chu 'dzin zhal brgyad pa/ /bsdu dngos bzhi yis zhabs ldan 'khyud/ /stong pa bcu drug phyag dang ldan/ /gar mdzad de la phyag 'tshal 'dud/ /shi ba rnams la phan don du/ / rgyud 'dir cho ga mi snang yang / /rtsa ba'i rgyud kyi rjes 'brangs nas/ /brtse bas bdag gis bri bar bya/ /slob dpon phyag rgya lnga dang ldan pas dang por ro khrus byas la/ bdud rtsi dang ldan pa'i dris byugs la/ /ro'i snying gar rang gi lha'i snying po gdags/ /lha med na snang ba mtha' yas sam//lha mo gtum mo'i snying po gdags/ /mgrin par snying po/ snying gar nye ba'i snying po/ spyi bor oM/ /mgrin par AH/ snying gar hUM/ lte bar swA/ rkang pa gnyis la hA gdags par bya'o/ /rtsa ba'i rgyud las/ sku gsung byin brlab rigs lnga gdags//rang gi lha'am gzhan yang rung / /snying po snying gar gdags par bya/ /khrus kyis dag bya bdud rtsis byug /ces gsungs so/ /de nas ro'i snying gar gzungs thag btags la/ sgrom du bcug la bdag nyid lha'i dkyil 'khor du bskyed la/gzungs thag nas bzung la bzlas pa byas/skabs su bdud rtsis byug /rtsa ba'i sngags dang ming du spel la til gyi sbyin sreg bya/ bzlas pas skyon mchod bstod bya/ /tha mar gshegs su gsol/ /sngon du bsnyen pa'o/ /de nas sa phyogs yid du 'ong bar sbyang ba dang / sa gzung ba dang gtor ma btang ba dang /sa'i lha mo mchod pa dang / bstod pa la sogs pa thams cad dkyil 'khor gyi cho ga las shes par bya'o/ /sa gzung ba'o/ /sa'i lha mo lhag par gnas nas/ lhag par gnas pa'i bar dkyil 'khor gyi chog dang 'dra'o/ /de nas sbyin sreg lhag par gnas pa dang /gtor ma gtang bar bya'o/ /ro lhag par gnas pa ni khrus bya/ dri zhim po dang ldan pa'i bdud rtsi lngas byugs la/ rnam shes dgug pa sngon du 'gro bas rang gis lhar bskyed la/ sdig pa bshags pa nas sems bskyed pa'i bar du bya'o/ /de nas dkyil 'khor gyi lha la mchod pa dang /bstod pa dang / snyan gsan dbab pa dang / smon lam gdab pa dang / bzod par gsol/ sta gon du gnas pa'i cho ga'o/ /de nas dkyil 'khor nam mkha' la bteg la/ bdud rtsi lngas byugs la/ thig gi cho ga ji lta ba bzhin du thig gdab/tshon gyi cho ga byas la bri bar bya ste/ thab kyi dbus su pad+ma brgyad bri/ /pad+ma'i lte ba la thod pa dang gri gug bri'o/ /'dab ma rnams la lha mo rnams kyi mtshan ma bri bar bya'o/ /kha khyer la rdo rje ra ba bya'o/ /kha khyer gyi phyi rol du gru chad btod par bya'o//de nas sgo dang rta babs la sogs pa ci rigs par bri bar bya'o/ /de nas dkyil 'khor bskyed de steng gi lha dang bsres la mchod bstod smon lam gdab po/ /de nas las thams cad ba'i chu las ku sha'i chun pos shing la gtor la bgegs bsal/ shing brtsegs pa ni ci rigs par shes par bya'o//thab kyi nang du stan bting ste ro dang / rnam par shes pa dgug pa sngon du 'gro bas lhar bskyed la/ sdig pa bshags pa la sogs pa bya/ gtor ma btang / de nas rlung yab kyis me sbar la/ gson cig dgongs shig rigs kyi bu/ phung po lnga yi bud shing la/ /rgyal ba rigs lnga'i me sbar ro/ /nyon mongs lnga yi bud shing la/ /mkha' 'gro lnga yi me sbar ro/ /rnam shes lnga yi bud shing la/ /ye shes lnga yi me sbar ro/ /'byung ba bzhi yi bud shing la/ /lha mo bzhi yi me sbar ro/ /zhes me sbar la/sreg blugs gsum me la blugs/ me bsangs la me lha raM las bskyed/ de nas ye shes kyi me lha spyan drangs te/ tshur gshegs tshur spyon me lha'i mchog /drang srong bram ze spyan gsum pa/ /sreg blugs zhal zas bzhes nas kyang / 'bar ba'i gdan la bzhugs su gsol//zhes brjod la/ oM e h+ye ma hA b+hU ta de ba r-i Shi a gan ye swA hA/ dzaHhUM boM hoH/ /zhes spyan drangs la 'thor 'thung phul te/ gnyis su med par bsres la mchod pa brgyad kyis mchod/ de nas dgang gzar dang blugs gzar dang ldan pas sbyin sreg bya/dgang blugs gsum me la phul la/ de nas rim bzhin du phul te/ oM badzra a gan ya swA hA/ zhes bya bas yam shing 'od la dbul lo/ /oM a gan ye swA hA/ mar khu zhal du dbul lo/ /oM sarba pA baM da ha na badzrA ya swA hA/ til dang yungs kar phyag tu'o//oM sarba saM pa de swA hA/ zho dang 'bras chan phyag tu'o/ /oM a pra ti ha ta badzrA ya swA hA/ ku sha dbu'i gtsug tu'o/ /oM badzra A yu she swA hA/ dUr ba dbu gtsug tu'o/ /oM ma hA be+e gA ya swA hA/ nas zhal du'o/ /oM ma hA g+ha sma ri swA hA/ gro zhal du'o/ /oM badzra bi dzA ya swA hA/nas so ba zhal du'o/ /oM ma hA ba lA ya swA hA/ sran ma ma sha zhal du'o/ /oM badzra puSh+Ta ye swA hA/ 'bras so ba zhal du'o/ /oM ma hA sri la a byi to swA hA/ zhes bya bas dzA ti pha la dang / ta ra ka dang bil pa rnams zhal du dbul lo/ /zhu ba'i rdzas dang bsreg rdzas lhag ma rnams ni me lha rang gi rig sngags kyis bsreg par bya'o//zhu ba'i rdzas thams cad zhal du'o/ /u dum wA ra la sogs pa'i shing thams cad ni oM dang swA hA/ zhes bya ba'i bar du rang rang gi ming bcug la bsreg pa'o/ /de la dri ni thugs kar ro/ /me tog ni dbu la'o//spos ni 'od 'bar ba la'o/ /mar me ni mdun du'o/ /bshos ni zhal du'o/ /zhal bsil ni zhal du'o/ /mchod yon dang 'thor 'thung ni phyag tu dbul bar bya'o/ /yang na bsreg rdzas thams cad ni spyi'i sngags 'dis dbul lo/ /oM badzra a na la ma hA b+hU ta dz+wa la sarba b+ha smiM ku ru sarba bi g+h+nAM hUM phaT che ge mo shAn+tiM ku ru swA hA/de nas me lha la mchod pa rnams kyis mchod la bstod de/ 'jig rten dbang phyug tshangs dbang mchog gi sras/ /me lha'i rgyal po Tak+ki sa dbang bskur ba/ /ye shes mchog gis nyon mongs thams cad bsreg /'jigs byed me lha nyid la phyag 'tshal bstod//gzi brjid chen po me yi lha/ /'dod pa thams cad rab stsol ba/ /bdag gzhan don brtson sa la bzhugs/ /tshangs sras mchog la phyag 'tshal 'dud/ /ces bstod la/ de nas phrin las bcol te/ drang srong chen po me lha yis/ /sngon gyi dam bcas mna' bor ba/lha rnams zhal ni me yin te/ /sbyin sreg de ni me la gnas/ zhes phrin las bcol la/ /me 'bar ba'i rnam par bstim mo/ /de nas he ru ka zhal gcig phyag gnyis pa'i rnal 'byor dang ldan pas/ ye shes kyi dkyil 'khor spyan drangs la/ phyi dang nang gis mchod do/ de nyid lnga pas bstod de gnyis su med par bsres la/ mchod de bstod nas de nas bzlas pa bya'o/ /de'i rjes la chogs byin gyis brlabs la/ lha rnams la yang dbul lo/ /rnal 'byor pa rnams snying ga'i hUM la bsreg par bya ste/ 'di ni nang gi sbyin sreg go/ /de nas sbyin sreg rnams ji lta ba bzhin du dbul lo//de'i rjes la rang gi lha'i snying po'am rtsa ba'i sngags nyid kyis sdig pa sbyang ngo / /yang na oM AH hUM sarba pA paM da ha na badzra ya che ge mo shAn+tiM ku ru swA hA/ zhes pa brgya'am/ stong ngam khri'am ji srid nus kyi bar du'o/ /lhag par gnas par mi byed pa rnams kyis kyang lha'i dkyil 'khor bskyed la/cho ga rnams ni snga ma bzhin du bya'o/ /gal te gshin po lha ru mi byed na/ 'di ltar byas te/ dgyes pa rdo rje 'di nyid las bza' ba thams cad shar du rdul zhes 'byung bas mgo bo dang / /snying dang dbang po rnams ni he ru ka la dbul lo//glad pa ni gau rI la'o/ /mcher ba dang mchin pa tsau rI ma la'o/ /dri chu dang lgang pa dang g.yon gyi rtsa ni betA lI la'o/ /bshang ba dang grod pa dang / gnye ma ni g+ha sma rI la'o/ /sha ni puk+ka sI la'o/ /khrag dang g.yas kyi rtsa ni sha ba rI la'o/ /khu ba dang gzhungs pa dang dbus kyi rtsa ni tsan+Da lI la'o//rkang mar dang tshil bu ni Dom+bi nI la'o/ /pags pa byang chub kyi yan lag bla rer ro/ /rus pas ni bden pa bzhi ste/ bud shing yam shing du'o/ /mkhal ma rnams ni spyan gzigs dang rgyun du dbul bar bya'o/ /yang na dri chu ni zhal bsil dang 'thor 'thung ngo //khrag ni yon chab tu'o/ /dri chen ni spos su'o/ /nang grol dang dbang po rnams ni me tog tu'o/ /glad pa dang gzhungs pa ni byug par ro/ /tshil chen ni snang bar ro/ /sha ni zhal zas su'o/ /pags pa ni bla rer ro/ / rkang brgyad ni gling bu la sogs pa rol mor ro/ /rus pa rnams ni phyag rgya lngar ro/ /skra dang spu la sogs pa ni gzhal yas khang gi rgyan du dbul lo/ /de nas thams cad rtsa ba'i sngags sam/ rang gi sngags kyis byin gyis brlabs la dbul bar bya'o/ /de yang gsungs pa/mchod pa'i gzugs sam rnam dag ni/ /rang rang ngo bor dbul bar bya'o/ /zhes gsungs so de nas phyi nang gi mchod pas mchod/ /bstod pa rnams kyis bstod la lam sbyang ste/ /tshogs lam smig rgyu lta bu ste/ /gnyis pa du ba lta bu ste/ /gsum pa glog tu khyod kyis mthong //bzhi pa mar me lta bu ste/ /lnga pa thams cad stong pa ni/ /sangs rgyas sa ni 'di nyid do/ /srid pa bar do 'di nyid du/ /khyod kyis lam lnga mthar phyin shog/ /ces sbyangs la/ lam bstan pa ni/ khyod kyis lam lnga mthar phyin pas/ /phung po lnga nyid sangs rgyas lnga/ /nyon mongs lnga ni mkha' 'gro lnga//rnam shes brgyad ni ye shes bzhi/ /'byung ba bzhi ni lha mo bzhi/ /srid pa'i 'khor lo rgyun bcad nas/ /chos kyi 'khor lo yongs bskor te/ /'khor ba bya ba'i ming yang med/ /ces lam bstan to/ /smon lam ni bdag cag gis dgyes pa rdo rje 'khor dang bcas pa la/ci 'byor ba'i mchod pa dang / sbyin sreg rnams kyis mchod pas/ bdag dang yon bdag dang tshe 'das pa dang sems can thams cad sgrib pa rnam pa gnyis byang / tshogs gnyis rdzogs te/ 'di nyid du bla na med pa'i byang chub chen po thob par gyur cig ces smon lam btab la/'dod pa'i don la gsol ba gdab bo/ /dpal dgyes pa rdo rje 'khor dang bcas pa la phrin las su gsol ba ni bdag cag dang / yon gyi bdag po rnams la nad kyi rigs su gyur pa rlung dang / mkhris pa dang / bad kan dang / 'dus pa las gyur pa thams cad zhi bar mdzod cig /gdon gyi rigs su gyur pa gdon stong phrag brgyad cu las thar bar mdzod cig /'phral gyi rkyen las gyur pa thams cad zhi bar mdzad du gsol/ /de nas bzod par gsol to/ /bdag dus snyigs ma'i sems can du gyur pas yo byad ma tshogs pa dang /bdag las dang po par gyur pas sems la dbang ma thob ste/ bying ba dang rgod pa'i dbang gis mi gsal ba dang / cho ga nyams shing lhag chad du gyur pa thams cad bzod pa chen por mdzad du gsol/ /de nas gshegs su gsol lo//de nas me lha la ci 'byor ba'i mchod pa dang / bsreg rdzas lhag ma rnams phul te/ 'jig rten dbang phyug zhes bya ba la sogs pas bstod la/ 'dod pa'i don la gsol ba gdab/ /drang srong chen po khyod la bdag gis ci 'byor ba'i mchod pa dang / sbyin sreg rnams kyis mchod pas bdag cag gi mi mthun pa'i phyogs nad kyi rigs su gyur pa dang / gdon thams cad dang / 'phral gyi rkyen thams cad zhi bar mdzad du gsol lo/ /'jig rten 'di'i tshe ring ba dang / bsod nams dang / dpal dang 'byor pa dang gzi brjid rnams ni zla ba yar gyi ngo bzhin 'phel bar mdzad du gsol lo//bzod par gsol te/ bdag gis yo byad ma 'byor pa dang cho ga nyams shing 'khrul ba ci mchis pa rnams ni bzod pa chen po mdzad du gsol lo zhes brjod la gshegs su gsol lo/ /dkyil 'khor phyags la chu bo chen por dor bar bya'o//de nas rus ba bsdus nas sa tsha gdab par bya'o/ /de nas rus pa'am gos sam ming byang la/ sa tsha gdab cing dbang bskur bya/ zhes 'byung bas sa tsha'i cho ga ji lta ba bzhin btab pa la dkyil 'khor du dbang bskur te/ rnam par shes pa dgug pa sngon du 'gro bas/ rang gi lhar byas la sdig pa bshags pa la sogs pa byas te/ rig pa'i dbang lnga brtul zhugs dang drug bskur ro/ /sdom pa 'bogs par mi bya ste/ shes pa kun du zin kyang dbang po med pa'i phyir ro/ /ro sreg cho ga bdag gis ni//byas pa'i dge ba gang bsags pa/ /des ni 'jig rten thams cad kyis/ /dri med ye shes thob bar shog /ro sreg pa'i cho ga slob dpon nag pos mdzad pa rdzogs so// //rgya gar gyi mkhan po nag po dang / 'gos lhas btsas kyis bsgyur ba'o/

CLOSE WINDOW