CLOSE WINDOW

D1242
བོད་ཡིག

/'byung po thams cad kyi gtor ma'i cho ga slob dpon mi thub zla bas mdzad pa rdzogs so// //rgya gar gyi mkhan po ga ya d+ha ra dang / lo tsA ba dge slong shAkya ye shes kyis bsgyur ba'o// @##/ /rgya gar skad du/ tat+t+wa tsa tu ra u pa de sha pra saM na dI paM nA ma/bod skad du/ de kho na nyid bzhi pa'i man ngag gsal ba'i sgron ma zhes bya ba/ dpal rdo rje sems dpa' la phyag 'tshal lo/ /gsang ba de nyid bzhi ni mkhas pas mi rtogs dbyings la mos pa rtogs/ /dgyes pa'i rdo rje'i dngos grub ring ste lus du ba smig rgyu snyegs pa 'dra//de bas bla ma'i rab mchog lung bstan u rgyan mkhan po'i gzhung / /de nyid bzhi pa mdo tsam shin tu mos pa dman la bshad par bya/ /de la bla ma'i rab mchog u rgyan gyi mkhan po'i gzhung gis dgyes pa rdo rje'i dngos grub thob par 'dod pas/ /de kho na nyid bzhi la brten nas bsgrub par bya'o//de bshad par bya'o/ /de la de kho na nyid bzhi ni phyag mtshan dbyibs kyi de kho na nyid dang / gnas pa 'khor lo bzhi'i de kho na nyid dang / bkod pa byang chub kyi sems dga' ba bzhi'i de kho na nyid dang / mthar thug pa bzhi pa'i de kho na nyid dang bzhi'o/ /de la dman pa phyag mtshan dbyibs kyi de kho na nyid ni gtso bo dang 'khor gyi sum cu rtsa gnyis dang /yum gyi gsum ste sum cu rtsa lnga'o/ /nang rtags ni phyi yin la/ phyi'i mtshan mas nang mtshon par byed pa'o/ /de yang thabs dang shes rab po/ /g.yas dang g.yon pa'i cha so sor phye bas shes rab dang thabs sum cu rtsa gnyis so//de la shes rab ni shes par byed/ rtogs par byed/ mtshon par byed pas na rig pa bcu drug go/ /thabs ni snying rjes bskyod par byed/ 'don par byed pas ni phan par byed pa bcu drug go/ /de la yang gtso bo'i g.yon gyi thod pa brgyad ni yul dang yul can te/chos nyid gnas pa dang / ye shes gsal ba'i rtags so/ /chos nyid gnas pa ni thod pa'o/ /ye shes gsal ba'i rtags ni lha brgyad kyis gsal bar byed/ rtogs par byed do/ /ci zhig ce na/ yul de nyid gsal bar byed pas na gsal bar byed pa'o//de gang la brten nas gsal bar byed ce na/ sa'i lha mo la brten par byed do/ /de ni phyag rgya'o/ /de yang rnam pa lnga ste/ dam tshig dang ye shes dang sngags dang / las dang / phyag rgya chen po'o/ /de dag dang rtag tu mi 'bral bas gzungs so/ / de bas na lha mo yang de dang de'i rtags so/ /sangs rgyas kun gyi dam tshig ni/ /phyag rgya lnga la rab tu gnas/ /zhes bshad pa'i rgyud las gsungs so/ /de ltar na sngags kyi phyag rgya la brten nas/ gol ba'i lam tshol bar byed pas na/ phyag rgya ni tsaN+Da lI'o/ /de ni me lha'o//me'i lhas yongs su grub par byed pa ni g.yo ba rlung yin la de ni rlung gi lha'o/ /des yongs su bskul bas gnas pa'i mtshan ma thams cad bsregs pas zla ba'i rang bzhin zhu bar gyur la/ zhu bas yongs su snang ba de ni zla ba'i lha yin la/ lus sems snying rjes brlan pa ni chu'i lha ste/gang gi tshe chus yongs su tshim pa'i gnas skabs na dro ba'i rtags shin tu gsal ba'i 'od snang ba ni nyi ma'i lha zhes bya'o/ /de lta bu des dgos pa rnyed par 'gyur ro/ /rnyed par gyur na gshin rjes phyi mthar byed/ /ces pa las de las thar te spro bar bya/ /de mthar phyin nas dgos pa yongs su grub pa'i nor 'grub par 'gyur ro//gal te yang dang yang du bsgrims kyang / /'dod pa'i don ma rnyed na steng gi sgos mi 'grub pas 'og gi sgo la bslab par bya ba yin no/ /de yang tshul ji ltar bya zhe na/ lte ba'i gnas su rgyun gyis 'bab pas zla ba dang nyi ma'i lha las bsgrubs pa'i saM pu Ti bsams la/de'i dbus su byin du shin tu phra ba gzhag la/ de yang yi ge'i mtshan nyid kyis ba thag las su bkri zhing shin tu phra ba'i bu ga nas ba thag tshul du dbang phyug ma la gdags par bya'o/ /de lta bu de la rnal 'byor gyis chung ba dang che bar snang ba dang / 'bros par shes par byas la/ /rtsol bas ji srid 'dod pa'i don ma rnyed kyi bar du bslab par bya ba ni nyi ma dang zla ba'i las so/ /des kyang ma grub na de bzhin du gnas bzhi kar gong ma nyid ltar bslab par bya ba ni zla ba dang nyi ma la sogs pa'o/ /des kyang 'dod pa dang ma phrad na rtse mo'i reg pa la bslab par bya ste/de ni me dang chu'i las zhes bya'o/ /de lta bu'i thabs rnam pa brgyad kyis 'byung du ma btub na bdag la brten pa ste grol ba'i lam gyis ma rnyed pas chags pa'i lam ste/ gzhan la brten pa la bslab par bya'o/ /des na las kyi phyag rgya la brten par bya'o/ / 'di ni gshin rje'i las so/ /tshad dang ldan pa'i phyag rgya la dam tshig gnas par byas te/ de dang mi rtog pa'i ngo bo'i cha can nyams su myong ba de la bslab par bya ste/ de skad du dbang rim pa gsum pa las/ zhabs chags sor mos mnan byas pa/ /bu ga yod kyang 'dzag mi 'gyur/ / ji srid sor mo btang ba na/ /dgos pa chung yang 'byung ba bzhin/ /bla ma'i man ngag rgan po yis/ /nyi ma zla ba gzas zin tshe/ /bu ga yod kyang 'dzag mi 'gyur/ /gza' las thar na thig le 'gog /ro bzhi shes pas ro bzhi bya/ /'di ni rdo rje'i bzlas pa'o/ /zhes 'byung ba na/ ro bzhi la bslabs pas kyang dgos pa rnyed par 'gyur ro//gal te des kyang ma rnyed na grol ba dang smin pa la skal pa med pas 'phro bcad la/ /rang lhag par gnas pa'i lam la bslab par bya'o/ /rang lhag par gnas pa ni bdag dang gzhan gyi gnas las ni ye shes gsal ba'i ngo bor gyur la sems can gyi don gyi gnas skabs kyis shes rab zab mor gyur pa las lhag pa'i lam de la bslab par bya ba yin te/de ji lta bu zhe na/ 'di yang gshin rje ste/ ci'i phyir na 'chi bar byed pa'i phyir ro/ /bdag gi rnal 'byor rdzogs nas thugs ka'i 'od zer gyis thams cad bsdus te thugs nyid la gzhug par bya'o//de nas bdag nyid kyang snying la zhugs pa dang hUM du gyur to/ /hU~M yang rim gyis thim nas thig le la'o/ /de yang me'i rtse mo lta bu la gnas par bya'o/ /de skad du/ mar me rgyun du 'bar ba dang / /chu bo'i rgyun bzhin gnas par bya/ /zhes gsungs pas so/ /de'i dus su ji lta bur gnas par bya zhe na/zla ba dang nyi ma gzas zin pa yang ma yin/ ma zin pa yang ma yin/ /zhabs tshags kyang ma po la/ /thig le yang 'gog pa ma yin la/ /shin tu cha mnyam la shes pa rang snang du blta bar bya ba ma yin no/ /de lta bu la gnas na 'dod pa'i don rnyed par 'gyur ro//don rnyed par gyur na mi rtog pa 'ba' zhig la bslab par bya'o/ /de lta bu'i 'bad pas dgos pa yongs su grub pa ni bzhi pa'i yig 'bru yang dag par 'phel ba ste nor sbyin grub pa lta bu'o/ /gzhan yang sems can gyi lus la yang gnas te/ rgyu med pa'i 'bras bu ni mi srid pa'i phyir ro//ji skad du/ lus la ye shes chen po gnas/ /zhes pas na/ lus ni thod pa ste rus pa'i gzhal yas khang ngo / /de la gnas pa'i chos ni lha brgyad do/ /de bas nas ni gnas pa rtsa'o/ /brjod pa las 'das pa de'i dngas ma dar dkar gyi skud pa lta bu/rnga 'brum brgyar gshegs pa lta bu'i mdo ni a ba d+hU tI la ste g.yas pa sa'i lha'o/ /de la khrag gi dngas ma mtshal cog la ma lta bu des sdud par byed pas chu'i lha'o/ /de la dbugs kyi dngas ma gser gyi rlangs pa tsam gnas pa ni g.yo zhing skyod par byed pas rang gi lha'o//de la drod kyi dngas ma me long gi 'od bzhin gsal bar gnas pa ni smin cing rtag par byed pas me'i lha'o/ /de la kun gzhi rnam par shes pa'i dngos gzhi chu zla lta bu'am/ nyi ma 'char ka'i dkyil lta bur gsal lam bsgribs par gnas pa ni nyi ma dang / zla ba'i lha zhes bya ste/ de rtogs pa'i dus na rdo rje sems dpa' yab yum mo/ /tha mal pa'i dus na kun gzhi'i rnam par shes par snang ngo / /de nas yang de mi gsal zhing gsal bar gyur pa'i dus su/ sems kyi snang ba thob pa 'am/ rnam par shes pa dang dbang po rnams 'gags pa'i dus su srid pa bar ma do'i shes pa de ni rang lhag par gnas pa'o//de ni gshin rje'i las lta bu'o/ /de nas yang sku gsum gyi dus su skye ba'i rim pas mngon par byang chub pa ni mthar thug pa'i chos so/ /de lta bu ni nor sbyin lta bu zhes bya'o/ /ji skad bshad pa'i rgyud las/rang gi lus la sangs rgyas gnas/ /gzhan du gang yang yod ma yin/ /lus las gzhan du sangs rgyas 'dod/ /mi shes sgrib pas g.yogs tshul lo/ /'di yis phyogs gcig spangs phyir smra/ /zhes gsungs pas na tha mal pa'i lus la de ltar gnas pas na tha mal pa'i lam zhes bya ba'i rang bzhin du shes par bya'o//de la g.yas pa'i thod pa brgyad ni byams pa chen po ste/ byams pa'i rang bzhin mi 'gyur la/ /gzhir gyur pas thod par snang la/ /gnyis 'thung la sogs pa ni ye shes gong ma lta bu stobs su gyur pa'i dus na/ sdug bsngal rnam pa gsum gyis gdungs pa'i sems can rnams skyob par mdzad pas na/thabs kyi mdzad spyod dang / rol pa'i phrin las su shes par bya'o/ /de yang 'khor ba ma stongs kyi bar du 'gro ba'i don mdzad par bzhed do/ /gtso bo'i phyag mtshan bshad zin to/ /de nas 'khor gyi bshad par bya ste/de yang bdag dang gzhan gyi man ngag dang / las rnam pa gsum la brten par bya ba yin te/ de rnams kyang thabs dang shes rab la brten par bya ba yin pas thabs dang shes rab kyi kha sbyor yin la/ kha sbyor de cis mtshon par byed ce na/ phyag rgyas mtshon par byed do//rtags dang mtshan ma gang zhe na rus sbal lo/ /des na phyag rgya la brten nas 'thob par byed do/ /de ni dam tshig la sogs pa'o/ /bdag la brten pa ste grol ba'i skabs su/ 'khor lo rtsibs brgyad pa'i phyag rgya de ni sngags kyi'o/ /de las ji ltar shes par bya zhe na//'khor lo ni bzhi'o/ /de la 'dod pa'i don ma rnyed kyi bar du bsam par bya ba ni steng gi sgo'o/ /des 'dod pa'i don rnyed par gyur na rtags 'di rnams 'byung ngo / /g.yo ba dang 'phar ba dang dbugs dang 'dar ba dang rdul ba dang myos pa dang sgra 'byung ba dang mtshan ma du ba lta bu yang 'byung bar 'gyur ro//gang gi tshe 'dod pa'i rtog pa skyes pa de'i tshe/ phyi'i tsaN+Da lI'i mthar phyin pa yin te/ rtog pa snga ma nyid phyi ma'i dgra yin pas/ de'i tshe dgra de gri gug gis gsad par bya/ dgra gang la gnas na rdo rje dbyings kyi dbang phyug ma la gnas so/ /de nas 'og gi sgo'i gnas nor bu rin po che la gnas pa'o//theg le la zhabs chags kyi gdams ngag gis blta bar bya ba yin te/ de'i tshe Da ma ru lta bu'i sgras sam/ /kha sbyor gyis spro bar bya'o/ /spros pa slar langs te steng gi sgo la zhugs nas 'od kyi gong bu gang du bsam par bya zhe na/ yang gong gi de nyid du nyi zla yang gzas zin zhabs tshags kyang ma po bar/ kun nas sbrul nyal ba bzhin du rgyas pa dang reg bya 'gags pa snyam byed par 'gyur ro/ /de ltar gyur na gang du 'gro ba de ru drang zhing bslab pa mthar phyin par bya'o/ /de ltar mthar phyin pa dang rlung 'gag par 'gyur ro//rlung gi 'gags pa mtshan nyid kyang rim pa gsum las shes par bya'o/ /de lta bu'i man ngag des 'dod pa'i don ma rnyed na chags pa'i lam ste/ las kyi phyag rgya la brten te bslab par bya'o/ /de ci'i phyir zhe na/ dge slong ste sa bon mi gzhol bar yongs su bde ba de la bslab par bya'o//de nas stobs su gyur to/ /bag tsha ba med par gyur na gdod seng ge lta bu yin pas mi rtog pa la bslab par bya'o/ /de ci'i phyir zhe na/ dbang po gnyis snyoms par 'jug pa'i sgo nas kyang dngos po thams cad rang bzhin med par byed pa'i phyir ro//de lta bu'i bsgom pas mngon par shes pa rim gyis skye'o/ /de ni dang por shes rab zag bcas skyes pa yin la/ de la brten te phyis mthar phyin pa'i gnas skabs na ye shes lnga mngon sum du gyur pas rdo rje'o/ /de mngon sum du gyur pa'i tshe bdud btul bar gyur pas bsdigs pa'i mdzub mo'o//de nas grol ba dang chags pa gnyi gas 'byung du ma btub ste 'dod pa ma rnyed na/ rang lhag par gnas pa la bslab par bya'o/ /rtags ces she na/ brtags pa'i ngo bo sdom pa'i gzugs lta bu'i mar me 'bar ba lta bu ste/ shin tu bag tsha ba med pas seng ge lta bu'o//de ci'i phyir zhe na/ 'thor rlung gi tshogs kyis mi sod pa'i phyir ro/ /de lta bu'i lam gyis kyang bsgom pa'i lam rnyed par 'gyur ro/ /de ltar mthar phyin nas sems can gyi don yongs su smin pa dang / sna tshogs pa'i skus don mdzad pa yang ro hi ta lta bu dang /bsil byed lta bu dang phag lta bu dang sta re lta bu dang thod pa lta bu dang / sdigs mdzub lta bu'o/ /de ltar sems can gyi don bsam gyis mi khyab par mdzad kyang / skyon gyis kyang ma gos la thugs mi rtog pa las ma g.yos pas thod pa gnyis so/ /de la yum gyi gsum ni dgos pa yongs su grub pa'i dus na gri gug ni dmigs pa med pa'i yum mo//thod pa khrag gis bkang ba ni dmigs pa dang bcas pa'i yum mo/ /de nyid kyis dbugs 'byin te/ chos kyi sku mngon sum du grub nas kyang / sku nyid rnam pa thams cad kyi mchog dang ldan pas ston pa longs spyod rdzogs pa'i sku ru bzhugs pa ni bsgrub par bya ba'i yan lag bdun dang ldan pa 'dod pa kha T+wAM ga'o//de lta bu'i phyag mtshan dman pa'i dbyibs de kho na nyid bshad nas/ da ni lus la ye shes chen po'i gnas shes pas/ lus med na 'khor lo mi dmigs pas 'khor lo bzhi'i de kho na nyid bshad par bya ste/'khor lo ni rtsa'i 'khor lo'i 'khor lo'o/ /de yang rgyu med par lus la rang rgyud kyis gnas sam zhe na/ rten dang rten can gyi tshul du gnas so/ /de la rten gang zhe na rtsa'o/ /de yang grangs du zhe na gtso bo stong phrag bdun cu rtsa gnyis so/ / de las brgya drug cu'o/ /de las brgya nyi shu'o/ /de las sum cu rtsa gnyis so/ /de las gsum mo/ /de ni gtso bo'o/ /de la brgya nyi shu ni 'khor lo bzhi'o/ /de'i gnas gang dang gang zhe na/ lte ba dang snying ga dang mgrin pa dang spyi bo la'o/ /grangs ji ltar gnas she na/ lte ba la drug cu rtsa bzhi'o//snying ga la brgyad do/ /mgrin pa la bcu drug go/ /spyi bo la sum cu rtsa gnyis so/ /dbyibs ji lta bu zhe na/ pad+ma'i 'dab ma nyi ma'i 'od dang 'phrod pa lta bu rgyas pa bkrag dang ldan pa'o/ /kha dog ni nyi ma dang zla ba'i rgyu las byung bas zla ba'i nor bu lta bu la bzhon mar gyi zol song ba lta bu'o//tshul ji ltar zhe na/ thabs dang shes rab sbyar bas na kha sbyor gyi gnas pas so/ /de la rten can gyi mngon par byang chub pa las byung bas 'bras bu mtshan dang dpe byad kyi yi ges brgyan pa zhes bya ba'i tha tshig go/ /grangs su ji ltar gzhag na sprul pa las A li dang kA lis so//chos la mtshon bya'i yi ge'i rim pa yab yum dgu'o/ /longs spyod la oM dang / yar wa la lnga'o/ /bde ba chen po la A li nyis 'gyur ro/ /bzhi po de la grangs kyi nges pa ji ltar gzhag ce na/ 'jig rten pa'i dus kyi cha'i grangs kyis 'khor lo'i grangs su gzhag go//dus kyi cha ni gang zhe na/ thun tshod dang 'pho ba dang / chu tshod dang dbyu gu'i grangs dang mthun no/ /de la thun ni brgyad do/ /'pho ba ni bcu drug go/ /chu tshod ni sum cu rtsa gnyis so/ /dbyu gu ni drug cu'o/ /de bas de lta bu de yang 'khor lo nyid do/ /'o na 'khor lo bzhi po de la sprul pa dang /chos dang longs spyod dang bde ba chen po zhes ci'i phyir bya zhe na/ lte ba gsang ba ni thams cad kyi 'byung gnas yin pas sprul pa 'byung ba'i gnas pas so/ /snying ga ni shes pa'i gnas pas chos kyi sku'o/ /mgrin pa ni ro drug myong zhing longs spyod pas so//spyi bo ni bde ba chen po'i gnas sam rgyur gyur pas so/ /skad cig mas kyang rim par gzhag go/ /rnam pa sna tshogs dang / rnam par smin pa dang rnam par shes pa dang / mtshan nyid dang bral ba'i rim pas so/ /bden pa bzhi ni sdug bsngal dang / kun 'byung dang / 'gog pa dang /lam mo/ /de kho na nyid bzhi ni bdag gi de kho na dang / sngags dang / lha dang ye shes kyi de kho na nyid do/ /dga' ba bzhi ni dga' ba dang mchog tu dga' ba dang / chad pa'i dga' ba dang / lhan cig skyes pa'i dga' ba'o/ /sde pa bzhi ni gnas brtan pa dang / thams cad yod par smra ba dang /mang pos bkur ba dang / dge 'dun phal chen no/ /de lta bu'i rim pas na sprul pa la sogs pa'i ming du grags so/ /'o na 'khor lo bzhi po de gang gi ngo bo yin zhe na/ sku dang gsung dang thugs kyi ngo bo'o/ /e waM ma ya yin te/ e ni lha mo spyan no/ /waM ni mA ma kIr brjod do//ma ni gos dmar mo zhes bya/ ya ni sgrol mar brjod pas so/ /de la tshul ji ltar bzhugs she na/ /sprul pa ni shes rab ste chos kyi 'byung gnas so/ /snying gi pad+ma ni dam tshig gi 'khor lo zhes bya ste/ rtag tu chos kyi dbyings ma la bltas pas na kha sbyor ro/ /'o na chos kyi dbyings mtshul ci 'dra ba zhe na/rtag tu de bzhin gshegs pa lnga'i longs spyod du gyur pas longs spyod do/ /de ji ltar rdzogs she na/ lo bcu drug gi rnam pa lta bu bas gzhon nu'i mdangs dang ldan pa gdu bu gsum gyis brgyan pas sgeg pa la sogs pa'i nyams dang ldan pa 'byung ba'i yi ge lngas brgyan pas b+ha ga shin tu rgyas pa'o//ji ltar rgyas shin rtsa lnga ni ro bzhi'i gnas so/ /ro bzhi ni bde ba'i ro'o/ /de'i gnas su gyur pas rgyas pa'o/ /longs spyod du ji ltar 'gyur na/ bde ba nam mkha' lta bu'i gnas su gyur pas longs spyod rdzogs pa'o/ / de la rtag tu dmigs shing 'dzag pas na bde ba chen po'o/ /ji lta bu'i bde ba chen po zhe na/ lus dang yid las khyad par du byas pa'i ting nge 'dzin las byung ba khyad par lnga dang ldan pa'i bde ba chen po'o/ /las gang zhe na dril bu las rgyun mi 'chad par 'bab pas na 'bras bu yang bde ba chen por gyur pa'o//de yang kha sbyor gyi ngo bo bas thabs dang shes rab bo/ /de lta bu'i 'khor lo las ye shes bde ba chen po ji ltar thob par bya zhe na/ yongs su bskor pas rnyed par 'gyur ro/ /bskor ba ni ji ltar bskor zhe na/ bla ma'i man ngag las/ rlung ma dang / gnyid ma gnyis gtso bo sprad par bya'o//des rlung bskyed do/ /des tsaN+Da lI rab tu 'bar ro/ /des sprul pa rab tu 'bar ro/ /des dam tshig gi rtog pa rab tu bsregs so/ /de nas na chung la rab tu bskor nas g.yas nas phyung nas phyir mchod pa'i don byas te g.yon du zhugs so/ / de nas bde ba chen po'i dkyil 'khor la g.yon du bskor te gnad kyi sgo phye ste/ phyogs bcu'i sangs rgyas rnams kyi thugs kar zhugs nas/ ye shes kyi bdud rtsir gyur te/ slar bdud rtsi khyer nas dzA lan+d+ha ra zhes bya bar thim par gyur to/ /des longs spyod kyang khengs/ g.yon gyi rtsa nas zhugs te sprul pa yang gsos/ de nas g.yas su zhugs te/ phyir longs spyod la thim nas gdod dam tshig gi dkyil 'khor yongs su gsos so/ /de nas yang sprul pa la thim pas cher 'bar te/ yang sngon bzhin du bskor ba yang skra'i rtse mo brgyar gshags pa'i tshad tsam du yar 'gro ba dang mar 'gro ba yang mi mthong ngo //de ltar byas pas 'dod pa'i don rnyed par 'gyur ro/ /de ltar yang dang yang byas kyang ma rnyed na 'khor lo bzhi la thig le bzhi byas te bslab par bya'o/ /des kyang ma rnyed na/ aM haM gnyis las bslab par bya'o//des kyang ma rnyed na aM dang hU~M las bslab par bya'o/ /de ltar byas pas 'dod pa'i don rnyed par 'gyur ro/ /rnyed pa de'i tshe ro brgyad skye la/ skyes pa de'i tshe gri gug gis lha'i bdud bsad do/ /de nas yongs su thim par bya ba yin la/ de ni sbrul 'khyil ba dang 'dra'o//de ltar gyur pas seng ge phrug gu gso'o/ /de lta bu'i ngo bo de la 'khor lo bzhi las mthar phyin pa zhes bya ba bshad zin to/ /de nas ci bcom ldan 'das/ /bsgrub pa bya ba la 'khor lo kho na yin nam snyam pa la/ sdom pa bshad pa yin pas so/ /byang chub kyi sems dga' ba bzhi la bslab par bya'o//de la dga' ba bzhi ni rgyun cha la dga' ba dang / mchog tu dga' ba dang / dga' bral gyi dga' ba dang / lhan cig skyes pa'i dga' ba'o/ /ji lta bu'i dga' ba la dga' ba bzhi zhe na/ tshogs pa dang tshogs can las skyes pa'i 'bras bu myong ba'i rnam grangs la ni dga' ba zhes bya'o//de yang ji ltar myong zhe na/ dam tshig gi dus su myong ba'i dga' ba de bshad par bya'o/ /de ci'i phyir rgyun cha'i dga' ba zhe na/ 'dod chags kyi bstan bcos las skyes pa pad+ma dang / rdo rje kun nas reg pa la ni rnam pa sna tshogs pa'i skad cig ma zhes bya ste/de la yul du byas pa'i shes rab ye shes zhes bya'o/ /de nas bskyod pa'i rkyen gyis yongs su smin par gyur pa'i rdo rje'i rked pa la gnas pa la ni mchog tu dga' ba zhes bya'o/ /de nas shes rab kyi mdzod kha kha mu kha dang / nor bu kun reg par gyur te rnam par nyed pa'i dus su rtog pa thams cad dang bral bar gyur pas na dga' bral gyi dga' ba zhes bya'o//de la gnas su thob pa'i shes rab ye shes zhes bya'o/ /de lta bu'i reg bya las skyes pa'i dga' bas bdag po'i rkyen byas nas/ skad cig ma phyi ma la nor bu'i rtse mor mtshan nyid thams cad dang bral ba'i ngo bo mi rtog pa cha can dmigs pa thams cad dang bral ba skyes pa de la lhan cig skyes pa'i dga' ba zhes bya ste/de la nyams su myong ba'i shes rab ye shes zhes bya'o/ /de lta bu'i dga' ba bzhi la rnam pa gnyis te/sh+lo ka'i dga' ba dang / byung rim gnyis so/ /de la ci'i phyir sh+lo ka zhe na/ shes rab dang ye shes te/ shes rab ni mya ngan las 'das par bzhed la/ ye shes ni 'khor ba'o/ /gnyis pa mi gnas pa ni dbu ma pas ni mchog go/ /de las 'das pas sa ha dza'o/ /de ni dgyes pa'i rdo rje'o//de bas na lhan cig skyes pa'i dga' ba ni tha mar bzhed do/ /sku gsung thugs su 'dod pa dag ni/ chad pa ni song ba la 'dzin par 'dod do/ /de skad du/ ji ltar 'byung ba khu ba yin/ /lhan cig skyes pa rnam pa gnyis/ /dang po bud med shes rab yin/ /thabs ni skyes bu brjod pa'o//de nas 'di dag rnam pa gnyis/ /don dam kun rdzob de dbye bya'o/ /dang po skyes bu rnam pa gnyis te/ khu ba 'am ni de bde ba'o/ /skyes bu ji ltar shes rab kyang / khu ba 'am de yi bde ba'o/ /de yi phyir na dga' ba ni/ /bzhir ni rab tu dbye ba'o/ /gang phyir lhan cig skyes rnam bzhi//rdzogs pa'i rim pa yi ni phyogs/ /mchog tu dga' ba rnal 'byor ma/ /dga' bral dga' ba thams cad ni/ /de bde thabs kyi thams cad rig /bde ba cung zad dga' ba ste/ /mchog tu dga' ba de bas lhag /dga' bral dga' ba chags bral yin/ /lhan cig skyes dga' tha ma'o//dang por reg par 'dod pa ste/ /gnyis pa bde bar 'dod pa'o/ /gsum pa 'dod chags 'dzin pa yin/ /de phyir bzhi pa bsgom par bya/ /mchog tu dga' ba srid par brjod/ /'dod chags bral phyir mya ngan 'das/ /dman pa dga' ba tsam nyid do/ / de dag rnam spangs sa ha dza/ /'dod chags med cing chags bral med/ /dbu mar yang ni mi dmigs la/ /'di la thabs dang shes rab med/ /yang dag de nyid rtogs pa'o/ /gzhan gyis mi bskyed lhan cig skyes/ /gang nas kyang ni mi rnyed de/ /bla ma'i dus thabs bstan pa dang / / bsod nams kyis ni bdag gis shes/ /zhes gsungs so/ /de la dga' ba de lta bu la bslab pa ni nor bu'i dkyil du bde ba phab la/ 'khor lo re re la cha bzhi bzhir brtsis pas/ de lta bu'i dga' ba re re la bzhi bzhir brtsis pas rnal 'byor gyi 'pho ba bcu drug go/ /byang chub kyi sems dga' bzhi'i de kho na nyid bshad nas/de nas bzhi pa'i de kho na nyid bshad par bya ste/ ji lta bu'i bzhi pa zhe na/ gsum pa la bltas te bsgoms nas thob pa de la bzhi pa zhes bya'o/ /de lta bu'i ngo bo yang ji lta bu zhig tu 'gyur grang na/ yul du mtshon pa'i bzhi pa dang 'dra bar mtshon pa'i bzhi pa ni bzhi pa zhes bya'o//de la mthar thug pa'i chos zhes bya'o/ /chos ni yang dag pa'i mtha'o/ /mthar thug pa ni zab mo'o/ /de yang ji lta bu'i ming can zhe na/ chos nyid gnas pa'i ngo bo dang ye shes gsal ba'i ngo bo'o/ /de ni chos nyid ji bzhin pa dang /sems nyid ji bzhin pa'i ngo bo'o/ /de tha mi dad pa ni rdo rje sems dpa' ste ngo bo nyid dag pa'i sku'o/ /de la sems kyi dkyil 'khor 'od gsal ba ni gsang sngags kyi de kho na nyid do/ /de lta bu'i yul don dam pa'i bden pa de ni/ yul du mtshon pa'i bzhi pa ste/ de ni mthar thug pa'i zhes bya'o//'o na ci 'dra bar mtshon zhe na/ shes rab ye shes rtog pa'i dga' ba des mtshon te/ bsgom pas gtan la phab nas mngon sum du gyur pa'i yan lag bdun dang ldan par gyur pa'i bsgrub par bya ba mthar thug pa de thog ma'i chos nyid yul du byas pa dang /rtsa ba'i rnam par shes pa gnas su dag pa'i me long lta bu'i ye shes gsal ba'i ngo bo de dang dbyer med par gyur pa la ni 'dra bar mtshon pa'i bzhi pa zhes bya'o/ /de lta bu'i bzhi pa de yang dga' ba'i ngo bo des mtshon par byed cing shes par byed pas na mtshon byed do/ / des ji ltar mtshon par byed ce na/ rgyud las/ dman pa 'bring po mchog dang ni/ /gzhan dang gang dang de yang ni/ /de dag thams cad mnyam nyid du/ /de nyid bsgoms pas blta bar bya/ /dman pa dngos po phra ba'i don/ /mchog gi dngos por brjod pa ste/ /dbu mas gnyis ni spangs pa'o//zhes pa la sogs pa'o/ /de skad du bshad pa'i rgyud las kyang / /stong pa bsgom par mi bya ste/ /mi stong pa yang mi bsgom mo/ /rnal 'byor stong pa spang mi bya/ /stong pa min yang mi spang ngo / /stong dang mi stong gnyis bzung na/ /rtog pa mang po rab tu skye/ /yongs su spangs na yang dag rtogs//de phyir de gnyis spang bar bya/ /gnyis por zhen pa yongs spangs nas/ /rnam par grol bar nges par gnas/ /bdag tu yang dag rtogs pa 'di/ /de phyir de yang dngos spang bya/ /zhes gsungs pas/ de mtha' gsum la mi rig pa ni de kho na nyid bsgom par bcom ldan 'das kyis nye bar bstan te/de skad du yang / gang la bsgom pa po med cing / /mi sgom pa yang yod ma yin/ /bsgom pa yang ni nges pa med/ /de ni de nyid bsgom par brjod/ /'di ltar sa ha dza'i de kho na nyid khong du chud cing rnam par rtogs nas/ dngos po tha dad pa med par mthong ba rang rang gi rang bzhin du chos thams cad rnam par bsgom par brjod do//de skad du/ 'gro ba thams cad bsgom pa ni/ /gang phyir yid kyis ma bsgoms pa'o/ /thams cad chos ni yongs shes na/ /bsgom pa nyid ni sgom pa min/ /dngos gang g.yo dang mi g.yo ba//rtswa lcug 'khril shing yal ga sogs/ /dam pa de nyid nges par bsgom/ /rang gi dngos po rang bzhin du/ /de yi dam pa gcig yod min/ /yang dag rang rig bsgom pa ste/ /rang gi rig pa'i rang bzhin las/ /mi mthun pa las skyes pa'o/ /zhes pas so/ /de lta bu'i shaM pra ti'i bsgom pa la gnas pas mi rtog pa rgyun mi 'chad par skyes pa de'i tshe sa bcu thob pa yang yin la/gang gi tshe rtog pa med pa'i shes pa rgyun mi 'chad par skyes pa de'i tshe lung ston pa'i bka' lung 'byung la/ de nas a ba d+hU tI'i spyod pa la gnas par 'gyur ro/ /spyod pa de la gnas nas bskal pa grangs med par sems can gyi don mdzad la/yang de'i tshe nyid na rnal 'byor ma rigs can dang yang dag pa'i mtha' la sbyor bar mdzad do/ /de ltar phyag rgya chen po'i dngos grub brnyes pa ni dgos pa yongs su grub pa ste/ yan lag bdun dang ldan pa'i rnal 'byor du gyur pa la ni 'dra ba mtshon pa'i bzhi pa zhes bya'o//gang gis dgos pa yongs su grub pa de'i tshe ston pa'i bzhugs tshul ji ltar yin pa yang shes par bya'o/ /de lta bu'i man ngag la ni bzhi pa'i de kho na nyid ces bya'o/ /de nyid bzhi ni/ rgyu 'bras tshul du kha sbyor mi phyed pas//dngos dang dngos med bde dang sdug bsngal bral/ /gang yang mi dmigs tshul dang ldan pa 'di/ /chos phyir 'brengs pa rnams dang phrad gyur cig /de nyid bzhi rtogs dgyes pa'i rdo rje myur thob nas/ /khams gsum skye bo nad pa'i tshogs rnams sos gyur cig /de kho na nyid bzhi pa'i man ngag gsal ba'i sgron ma zhes bya ba dpal u rgyan gyi yul gyi dngos grub grub pa'i slob dpon chen po til+li pa'i zhal snga nas mdzad pa rdzogs so// //rgya gar gyi mkhan po rat+na shrI nyid kyi zhal snga nas bsgyur cing bshad nas gtan la phab pa'o/

CLOSE WINDOW