CLOSE WINDOW

D1194
བོད་ཡིག

/lag pa'i ri mo dang / kha dog gi mtshan ma rnams ston te/ brda phrad sla bas ma bris so// @##/ /rgya gar skad du/ DA ki nI badzra ba ny+dza ra ma hA ta n+t+rarA dza s+ya pa tham pa tal mu kha ban+d+ha nA ma pany+dzi kA/ /bod skad du/ rgyud kyi rgyal po mkha' 'gro ma rdo rje gur gyi dka' 'grel zhal nas brgyud bzhes bya ba/ bcom ldan 'das rdo rje mkha' 'gro dang mkha' 'gro ma thams cad la phyag 'tshal lo/ /dpal kye'i rdo rje la phyag 'tshal lo/ /ring po shes rab kyis drangs kyang / /thugs rjes rnam par gzung ba gang / / de rnams kyis kyang gtso chen pa/ /rdo rje sems dpa' der phyag 'tshal/ /thar pa mchog rtsol 'byor ldan pa/ /slob dpon zhags la phyag 'tshal te/ /mkha' 'gro rdo rje gur gyi ni/ /drang ba'i phyir na cung zad bya'o/ /mkha' dang bems po zhes bya ba la sogs pa ni/ bsgrub par bya ba nyid kyi ston pa po bcom ldan 'das mkha' 'gro ma rdo rje gur gyi don dam pa'i bden pa rnam par dpyad du med par kun du gnas pa'i dang dngos po thams cad kyi don dam ba'i bden pa de ni kun rdzob kyi bden pa 'gro ba thams cad la khyab par gnas pa de snyed pa kun du rig cing gsal bar bya ba'i phyir/yang dag par sdud par byed pa'i rdo rje snying pos de bzhag pa ste/ /kye rdo rje las kyang brtan pa dang g.yo ba la khyab par gnas pa zhes bshad de/ grub pa'i mtha' gzhan la yang grags pa nyid kyi phyir na'o/ /'byung ba chen po lnga rnams ni bskyed pa'i rim pa dang 'brel pa ste//de rnams kyi bag chags de ni bdag po yin pas na/ de rnams dang por brjod par bya'o/ /de rnams kyi na ngan yang nam mkha' ni shin tu gsal ba ma yin pa'i phyir na/ /de nyid thog mar brjod par bya ste/ /mkhan ni sgrib pa med pa'o/ /bems po ni sra ba'i rang bzhin te sa'o//gsal ba ni 'dzag pa ste chu rnams so/ /go skabs med pa ni des bsregs pas na go skabs rab tu mi ster bste me'o/ /gsal byed ni/ /mig dang yul gyi rlung ste de rnams nyid ni spos byed ma la sogs pa rnams su 'gyur ro/ /de ltar yang gsungs pa ni spos byed mar bshad de/de bzhin chu khams ri khrod ma/ /mi ni grags 'dzin mar bshad de/ /rlung ni sme mor rab tu grags/ /zhes so/ /mkha' dang zhes pa ni bde ba'o/ /yang lha'i rnal 'byor 'dzin pa na/ /de rnams bskyed pa'i rim pa'i rten gyi dngos por blta bar bya ba gsungs pa/ sna tshogs rdo rje zhes pa la sogs pa ste/ /sna tshogs ni 'gro ba thams cad kyi khyab par byed pa'i phyir dang / stong pa'i rang bzhin gyis nam mkha' 'o/ /rdo rje bzhi ni sna tshogs rdo rje dang / /rdo rje sems dpa'i yang gnas te/ /dbang chen gyi dkyil 'khor ro/ /gnas khang ni de'i gnas khang ste/chu'i dkyil 'khor ro/ /sems can khams dang zhes pa ni/ /de'i 'og ma ste me'i dkyil 'khor ro/ /yid rol zhes pa ni/ yid dang lhan cig tu rol pa ste rlung ngo / /rten de rnams kyis spro ba dang bcas pa gsungs pa/ sa 'og ces pa la sogs pa ste/ /sa'i 'og dang sa'i steng dang /mtho ris dang par snang rnams so/ /de nas 'jig rten thams cad kun du gnas pa'i khyad par gsungs pa/ yid dang zhes pa la sogs pa gsungs te/ 'di rnams ni lha mo rnams su 'gyur te/ 'di ltar mkha' spyod thugs kyi rdo rje ste/ sa spyod gsung gi rdo rje ma/ / sku ni sa 'og gnas pa mo/ /oM AHhUM gis bcom ldan byas/ /zhes so/ /lus la sogs pa'i bya ba gsungs pa/ /gcig dang zhes pa la sogs pa ste/ /gcig ni gnyis su med pa'i rnam par shes pa'o/ /gnyis ni gzung ba dang 'dzin pa'o/ /mkha' bde ni dngos po dang dngos po med pa'i bde ba ste//de skad du yang ye shes chen po 'di nyid ni/ /lus kun la ni khyab par gnas/ /gnyis dang gnyis med rang bzhin can/ /mnga' bdag dngos dang dngos med bdag/ /ces so/ /da ni rigs drug po rnams rnam par dag par 'gyur bar gsungs pa/ drug dang zhes pa sto//drug ces pa ni/ /'di ltar rigs drug po rnams nges par brjod pa yin te/ /'dod chags zhe sdang gti mug dang / /de bzhin du ni dam tshig dang / /sems dpa' dang ni nor bu ste/ /rigs drug por gsungs de rnams ni/ /'dod pa thar pa rab bsgrub pa'o/ /zhes so/ /bye brag tu smra ba dang //mdo sde pa'i rjes su 'brangs pa yin na/ gang 'gro bde rnams kyis khyad par byed pa yin par blta ba ni/ /lnga dang zhes pa ste/ /lnga ni phung po lnga'o/ /de rnams kyang lha rnams yin te/ /'di lter/ /gzugs phung rdo rje mar 'gyur te/ /tshor ba la ni ser mor bshad/ /'du shes chu yi rnal 'byor ma//'du byed rdo rje mkha' 'gro ma/ /rnam shes phung po'i rang bzhin la/ /bdag med rnal 'byor ma bzhugs te/ /zhe sdang la sogs lnga por gsungs/ /zhes pas so/ /de rnams kyi rnam par dag pa yang lha mo rnams su 'gyur te/ /'di ltar/ zhe sdang rdo rje ma ru brjod//'dod chags chu yi rnal 'byor ma/ /phrag dog rdo rje mkha' 'gro ma/ /dregs pa de bzhin ser mo gsang / /gti mug rdo rje sogs bshad pa/ /zhe sdang sogs pa rnam dag pa'i/ /zhes so/ /gzugs kyi phung po spros pa dang bcas pa skye mched bcu gnyis su bzhag pa'i gnas skabs ni/drug gnyis zhes pa ste/ de rnams kyang lha mo rnams su rab tu phye ba yin te/ /'di ltar/ mig la gti mug rdo rje 'god/ /rna bar zhe sdang rdo rje ste/ /dregs dang chags dang de bzhin rig /bdag med mar yang bsgom par bya/ /de bzhin gzugs ni sor mor bshad//sgra ni chom rkun ma rab grags/ /dri yi chal ro langs ma/ /ro ni za phod ma rab grags/ /reg byas spyod mar bshad de/ /mkha' spyod ma ni chod kyi dbyings/ /zhes so/ /bye brag tu smra ba'i skye mched bcu gnyis kyi gzhung yang / 'byung ba dang 'byung ba las gyur pa'i bdag nyid ni gzugs kyi skye mched do//de la gzhan gyi lta ba'i rjes su 'brangs pas gnas pa'i 'gro ba 'di yang lha rnams nyid du gnas par 'gyur bas gsungs pa nyid do/ /mdo sdo pa'i gzhung na 'byung ba rnam gnyis bden pa ma yin pa la/ /gzugs dang reg bya la sogs pa ni bzhi po zhes te//gzugs dang / dri dang / ro dang / rig bya rnams ni bden pa'o/ de rnams nyid ni phung po dang khams dang skye mched do/ /'dod pa'i khams la sogs pa ni gnas pa'i rang bzhin gsungs pa/ 'gro rnams zhes pa ste/ de yang bzhi zhes par 'jug go/ /de la 'dod pa'i khams dang gzugs kyi khams dang gzugs med pa'i khams te/'gro ba rnam pa gsum po dang / /'og min rnams su rdo rje sems dpa' la sogs pa bzhi po sbyar ro/ /gzugs kyi rdo rje la sogs pa spros pa dang bcas pa yang gsungs pa/ de la/ nyi shur gcig gis mtshang dang //zhes pa ste/ khams bco brgyad dang / /de rnams nyid kyi skye ba med pa'i rang bzhin dang 'di dag bcu dgu ste/ /'di ltar dbang po dang ni yul nyid dang / /dbang po'i rnam par shes rnams nyid/ /bco brgyad khams su bshad pa ste/ /rnal 'byor ma rnams go bar gyis//rang bzhin rnams nyid skye med pa/ /bden pa ma yin brdzun min pa/ /chu yi zla ba lta bu ni/ /rnal 'byor ma kun shes par 'dod/ /ces pa ni khams bco brgyad rnam par dag pa dang / phung po dang skye mched rnams rnam par dag par khong du chud par bya'o/ /skye ba med pa'i rang bzhin ni rang bzhin gyis dag pa nyid de/'di nyid kyis gzhan ji snyed pa nges par sbyor bar nges pa'o/ /rnam par dag pa de yis ni/ /de'i khyad par du nye bar mthong bas gsungs so/ /khams gsum pa zhes pa la sogs pa ste/ de la 'dod pa'i khams na ni gnyis gnyis 'khyud pa dang /lag par 'chang pa dang / dgod pa dang / lta ba la sogs pa'i rgyu mang pos sems can rnams 'ching ba de ltar/ pha dang bu dang mar gnas gsungs pa/ pha dang zhes pa la sogs pa'o/ /gzugs kyi khams la gsungs pa/ phyi rol don zhes pa ste/ /phyi rol gyi don gyi dngos po 'dod pa nye bar spyod cing /kun du spyod pa'i gzugs por ba'o/ /nang gi sems ni gzugs med pa'i khams te/ gnyis su med pa'i sems tsam mo/ /btsun mo kun dang zhes pa ni/ /'jig rten las 'das pa'i lha rnams kyi 'khor lo'o/ /chos ni bden pa'i tshogs rnams so//thams cad las zhes pa ni/ /der brkyang ba dang / /bskum pa la sogs pa'i bya ba rnams kyi dngos por 'dod pa ste/ /de tshad mas shin tu ma grub pa na 'dir mi brjod do/ /de rnams kyi rang bzhin gzhan du yang gsungs pa/ bdag med ces pa dang / /bdag med pa ni gang zag la bdag med pa 'dis ni bdag med pa'i dngos por yang ngo //dgra bcom pa'i rang bzhin bya ba tsam byed pa'i dngos po la gnas pa'i gzhung gsungs pa/ /'bras bu zhes pa la sogs pa ste/ /'bras bu ni rgyun du zhugs pa'i 'bras bu la sogs pa yin te/ /bsgrub par bya ba nyid kyi phyir na'o//rgyu ni bdag med pa bsgom pa la sogs pa ste/ /skyed par byed pa'i phyir na'o/ /byed pa nyid kyang rgyu 'ba' zhig ma yin te/ /bya ba yang ye shes skyed ba'i phyir na yin par gsungs pa/ /rgyu dang zhes pa la sogs pa'o/ /bya ba zhes ba ni ming ngo / /gnyis pa 'di dag so sor bsgrub par bya ba dang /sgrub par byed pa'i phyir na/ 'dir bsgrub par gsungs pa/ bsgrub bya sgrub pa rdo rje ldan/ /zhes pa ste/ /'di ltar rgyun du zhugs pa'i 'bras bu la sogs pa ni bdag med pa bsgoms pas bskyed par bya ba ya ni pa'i phyir na bsgrub par bya'o/ /de sgrub pa yang yin te/bdag med pa bsgom pa'i shes byed yin pa nyid kyi phyir na 'o/ /bdag med bsgom pa la sogs pa ni rgyu ma yin pa'i sgrub par bya ba yin te/ rgyun du zhugs pa la sogs pa rnams kyi shes bya yin pa nyid kyi phyir na'o/ /sgrub pa ni rgyun du zhugs pa'i 'bras bu la sogs pa'i skye bar byed pa po yin pa'i phyir ro//des na rnal 'byor spyod pa'i gzhung gis 'gro ba rnams kyis gnas pa'i tshul yang gsungs te/ 'bras bu dang rgyu'i dngos pos 'dir yang blta bar bya'o/ /kun gzhi rnam par shes pa zhes pa ni/ don dang sems can gyi bag chags ma lus pa kun gyi gzhi bor gyur ba ni kun gzhi'o//chos kyi dbyings zhes pa ni/ /chos rnams kyi bdag la sogs par 'dzin pa skyed pa po'i nyon mongs pa can gyi yid kyi rnam par shes pa dang bcas pa'o/ /ma skyes dngos zhes pa ni/ shes bya rnams kyi rang bzhin ni mi phyed pa'i phyir na/so so'i rgyu dang bral ba'i 'jug pa'i rnam par shes pa rnams la 'khor ba dang bdag yod pa ma yin pa'o/ /dgra bcom pa'i gnas skabs kyi 'bras bu dang / /rgyu tsam gong ma nyid kyis kyang gsungs te/ rgyu dang zhes pa la sogs pas rgyu dang 'bras bu'i rnam par bshad pa gsungs la/'bras bu dang bya ba ni du ba la sogs pa dang / me la sogs pas bya ba'i phyir dang / sgrub pa dang rgyu yang me dang du ba la sogs pas shes par byed pa'i phyir na'o/ /'di dag ni gnyis su bsgrub par bya ste/ 'di ltar du ba la sogs pa ni sgrub pa ste shes par bya ba'i phyir na'o/ / me la sogs pa yang sgrub pa yin te/ byed pa po'i phyir na'o/ /sangs rgyas bdag nyid cha yi rnam med kyang / /lta ba phyin ci log tu gyur rnams kyis/ /gzung dang 'dzin par kun du rig pa ste/ /dbye dang ldan pa lta bur rnam par brtags/ /zhes pa nas/ /'gro ba 'di dag la sogs pa ni 'dir tshig tsam nyid yin no//sems can zhes pa la sogs pa la/ /sems can ni snod kyi 'jig rten gyi gzhi'o/ /kun gzhi rnam par shes pa ste/ gnas de nyid gcig pu nyid gyi phyir ro/ /'tsho ba'i 'jig rten yang de'i nang las ma gtogs par so so'i bar gzung ba med par ha cang yang chos te/de ni chos la bdag med par zhes bya bar gsungs so/ /bdag gi 'du shes zhes bya ba ni/ 'dir 'du shes tsam nyid do zhes bya bar dgongs so/ /'dir yang don ni 'di ltar 'dod de/ sems can gyi khams dang nam mkha'i khams gang yin pa la gzhan rnams kyi bdag tu 'du shes pa'i khyad par gsungs pa/bdag med bdag gi 'du shes dang / /zhes pa'o/ /dbu ma'i gzhung gis skye bo rnams kyi rten gang yin gsungs pa/ /dngos dang bral yang zhes ba ste/ /dngos dang bral ba ni don dam pa'i bden pa yin te/ kun rdzob kyi bden pa ni dngos po dang bral ba ma yin pa'i phyir ro//nye bar dmigs pa'i gnas kyi khyad par gsungs pa/ bde ba can te zhes pa la sogs pa ste/ /de dag gis ni 'khor ba'i skyon rnams spong ba po rnal 'byor pa'i gnas skabs rnams bshad do/ /rdul med ces pa ni/ /yi ge ya la sogs pa bskyed pa'i zla ba'i dkyil 'khor ro//skyon bral zhes pa ni/ /yi ge ka la sogs pas bskyed pa'i nyi ma'i dkyil 'khor ro/ /rdul bral zhes pa ni rdo rje'o/ /sdig bcom zhes pa ni rdo rje nga rgyal bya'o/ /dba' rlabs med ces pa ni ting nge 'dzin to/ /kun du bzang po'i dngos po lha'i rnal 'byor la gnas pa gsungs pa/nang gi bde ba bde rigs dang / /zhes pa'o/ /lha'i rnal 'byor de nyid spros te gsungs pa/ gsang dang zhes pa la sogs pa'o/ /de la gsang ba ni chos kyi dbyibs shin tu rnam par dag pa'i rang bzhin he ru ka'i dkyil 'khor bsgrub par bya ba 'di'o/ /de bzhin du mchog ni so sor rtog pa'i ye shes te//pad+ma gar gyi dbang phyug gi dkyil 'khor ro/ /de bzhin du dgyes pa ni mnyam pa nyid kyi ye shes te rdo rje nyi ma'o/ /rtag tu bzhugs zhes pa ni me long lta bu'i ye shes te rtag pa'i 'o/ /thams cad bdag nyid ces pa ni/ /brtson 'grus kyi pha rol tu phyin pas/pha rol tu phyin pa'i mtshan nyid can dpa' bo rta mchog gi'o/ /sangs rgyas kun dngos sems dpa' ste/ /zhes pa ni bya ba nan tan gyi ye shes te/ /skyes bu'i khyad par rab mchog por byas pa'i lha'o/ /skyes bu'i khyad par ni/ /lhag pa'i lha nyid gcig pu zhes pa'o/ /bsdus te bstan pa de rgyas par bstan pa gsungs pa//'bum phrag lnga zhes pa la sogs pa ste/ /bsdus pa ni go rims tsam mo/ /rgyas pa ni he ru ka'i dkyil 'khor gyi lha rnams go rims bzhin tu gsal bar byed pa'o/ /ser mo zhes pa la sogs pa ni/ /rim pa gcig pa'i dkyil 'khor grub bzhi par ser mo la sogs pa'i lha mo bzhi po rnams ni shar la sogs pa'i sgo rnams skyod pa'o//spos byed ma la sogs pa rnams ni/ /dbang ldan la sogs pa'i mtshams rnams na gnas pa ste/ /dkyil 'khor dgu'i bdag nyid do/ /de bzhin du skam pa mo la sogs pa rnams ni sgo skyong ma rnams so//me tog ma la sogs pa rnams ni grwa'i cha rnams su'o/ /de bzhin du nyi phyag ma la sogs pa rnams ni sgo rnams su'i/ /de bzhin du sgeg mo dang / /phreng ba mo dang / /gar mkhan mo dang / /glu mkhan mo dang / /de rnams ni mtshams rnams su'o/ / de bzhin du pad+mo la sogs pa rnams ni sgo rnams su'o/ /gling bu ma dang / bi lbang ma dang / rdza rnga ma dang / /rde'u chung ma rnams ni grwa rnams su 'gro ba'o/ /de bzhin du rdo rje lcags sgrog ma la sogs pa rnams ni sgo rnams su gnas so/ /spyan ma dang / /mA ma kI dang / /gos dkar mo dang / sgrol ma rnams ni grwa rnams su'o/ /de la bshad pa/ /rdo rje can gyi zla gam mtshungs/ /shar gyi phyed kyi gnas su ni/ /rtag pa'i dkyil 'khor zlum po'o/ /rdo rje chos kyi pad+ma mtshungs/ /nyi ma yid bzhin nor bu'i 'od/ /rnam pa kun du gru gsum pa/ /rta mchog de la shes par bya/ /zhes pa de nas rim pa gnyis po de rnams la yang gnas pa yin no//de rnams kyi rim pa/ /dbu ma 'di yi dgongs pa ni/ /skye 'gro mi zad mgron gnyer phyir/ /zhes pa ste/ /mi zad ces pa ni zad pa med pa'i thar pa'o/ /mgron gnyer zhes pa ni/ /mgron du gnyer ba'i phyir te/ /thar pa zad pa med pa des skye 'gro rnams bsnyen bkur dang bcas pas rten par mdzad pa'o//shin tu stong pa zhes pa ni/ /thams cad du thabs su brjod pa'i kun rdzob pa yang rnam par spangs pa'i mtshan nyid dngos po med pa'i stong pa nyid de/ /de thabs su 'dod cing bden pa ma yin pa'i lus su bskyed pa'i kun rdzob pa yang mi sbyor bas na'o//bdag tu 'dzin pa bzlog pa'i phyir/ /zhes pa ni/ /bdag la mchog tu 'dzin pa dang / /chos kyi rang bzhin rnams la 'dzin pa rnams kyi snang ba med par bya ba'i phyir te/ /kye kun rdzob pa thams cad rnam par gsal bar bya'o zhes par dgongs so/ / de ltar 'di nyid las bshad pa/ /sangs rgyas nga rgyal du dmigs nas/ /chos dbyings 'od gsal bsgom par bya/ /zhes so/ /le'u dang po'i zhal nas brgyud pa'o// //mchod pa'i khyad par gsungs pa/ /de nas rdo rje zhes pa la sogs pa ste/ dag pa'i gnas zhes pa ni bde ba chen po'i 'khor lo'o//gnas chen po zhes pa ni longs spyod kyi 'khor lo'o/ /sangs rgyas kun gyis rab gang ba/ /zhes pa ni/ /chos kyi 'khor lo'o/ /dag pa'i grong khyer yid 'ong ba/ /zhes pa ni/ /sku'i 'khor lo ste lus so/ /ngag dang sems kyang de bzhin du dngos por 'byung pa med pa'i rang bzhin du bstan pa'o//rdo rje lu gu rgyud ces pa la sogs pa ni/ phyi dang nang gi sangs rgyas thams cad kyi ngo bo chen po ste/ /phyi'i bdag nyid kyi bsnyen pa'o/ /de bzhin du/ /rdo rje lcags sgrog gis bcings nas/ /zhes pa ni/ nye ba'i bsnyen pa'o/ /mnyes dang ldan par g.yo 'gyur te/ zhes pa ni sgrub pa'o/ /sangs rgyas rnams zhes pa ni/ sangs rgyas rnams su gyur to zhes pa ste/ sgrub pa chen po'o/ /de lta bu'i 'bras bu thob pa ni/ /'dod bya chen po thob pa'o/ /zhes dgongs so/ /'di lta bus gnas yang / /byang chub sems dpa' bla na med par gnas pa yin par gsungs pa/rgyal ba mgon po byams pa ni/ /zhes pa la sogs pa'o/ /tshar bcad pa'i sgrub pa gsungs pa/ /rdo rje lu gu rgyud bcings pas/ /zhes pa la sogs pa'o/ /'bum phrag lnga po nges bsdus pa/ /zhes pa ni/ rdo rje snying po mngon par byang chub pa'i brtag pa sum cu tham pa la sogs pa'o//gar dang bcas pa'i khyad par gsungs pa/ /chos 'byung grong khyer zhes pa la sogs pa ste/ /rdo rje sgrub pa'i dam tshig ni pad+ma dang de las byung ba ste/ rdo rje go 'phang nyid dang / /glu de rnams kyis lha mo bsten par byas nas bya ba yin te/ /grol bar 'gro ba'i thabs nyid kyi phyir na'o/rdza rnga sgeg sogs tha mar te/ /zhes pa ni/ /gzhug tu rdza rnga la sogs pas kyang rol par bya'o/ /bdun po rnam par dag par bya/ zhes pa ni/ /sangs rgyas gnas bzhi rnam rdzogs par/ /rnam pa lnga po bsgom byas la/ /kun du bzang po las byung ba'i//rang lhag lha yi sgrub pa'i thabs/ /dkyil 'khor de bzhin dgod par bya/ /mchod bstod bdud rtsi myang la sogs/ /rim pa yis ni bsgom bya ste/ /yan lag drub tu sbyor bar bya/ /zhes pa yin no/ /brgyad pa ni rang byin gyis brlab pa'i rim pa ste/ /de ni phra mo'i rnal 'byor te bshad zin to//rang byin gyis brlab pa'i rim pa gzhan gsungs pa/ /mgul zhes pa la sogs pa ste/ lan cig gis bton na zhes pa ni/ /steng du 'thon par byed pa'o/ /de'i khyad par gsungs pa/ /'phral du zhes pa la sogs pa'o/ /sa spyod ma dang zhes pa la sogs pa la//'o na sa spyod ma ni gsung gi rdo rje'i phyir dang / sa 'og na gnas pa ni sku'i rdo rjer bshad pa'i phyir na/ 'dir sngar bshad pa las gzhan du smra pa 'di mi 'gal zhes zer na/ ma yin te sa spyod ma dang sku'i rdo rjer yang 'brel pa med la/ sa 'og na gnas pa dang gsung gi rdo rje yang 'brel pa ma yin te/nye ba ma yin pa mthong ba'i phyir na'o/ /'byung ba bzhi po rnams kyi rang bzhin mtshams kyi lha mo rnams kyis gsungs pa/ byang chub ces pa la sogs pa ste/ /byang chub sems te bum pa zhes pa ni/ /chu'i khams kyi rang bzhin ni ri khrod ma'o/ /ri zhes pa ni sa'i khams kyi rang bzhin te//spos byed ma'o/ /me thab ces pa ni/ /me'i khams rnam par dag pa ste drag 'dzin ma'o/ /rgyal mtshan che zhes pa ni/ rlung gi rang gi ngo bo ste/ sme ma'o/ /dkyil 'khor gyi go rims bstan pa yang / drag 'dzin ma dang / /sbos byed ma dag gis skul bar byed pa dang //byams pa dang snying rje'i dngos por yang nye bar bstan pa'o/ /'dis ni don 'dir yang brjod par bya ste/ /byang chub sems zhes pa ni 'dzag pa'o/ /ri zhes pa ni pad+ma'o/ /me thab rgyal mtshan che zhes pa ni 'ju bar byed pa'i phyir ni rdo rje'o/ /le'u gsum pa la ni zhal nas brgyud rgyu med pas na ma bkod do//de dag ni le'u bzhi pa'i zhal nas brgyud pa'o// //le'u lnga pa'i zhal nas brgyud pa gsungs pa/ /de nas zhes pa la sogs pa ste/ dkyil 'khor rnams kyi 'byung gnas yin/ /zhes pa ni/ lha rnams kyi sku'i dkyil 'khor bsdus pa rnams so//de bshad pa gsungs pa/ brgyad brgyad kyi ni dbus bzhugs sam/ /zhes pa ste/ /brgyad brgyad pa'i lha mo rnams gang yin pa'i so so re re'i gtso bo rnams kyis byin gyis brlabs pa'i brgyad brgyad po rnams so/ /de rnams kyi dbus na gnas pa'i dkyil 'khor gzhan pa yang bsgom bar bya'o zhes pa'i don to//mkha' 'gro ma rdo rje gur gyi dkyil 'khor rnams ji lta ba bzhin du bris te/ yang de rnams kyi dbus su yang mkha' 'gro ma rdo rje gur gyi dkyil 'khor pa dgu'i bdag nyid du'o/ /dkyil 'khor dbus ma'i shar la sogs pa'i phyogs rnams su rnam par snang mdzad dang //rin chen 'byung gnas dang / /pad+ma gar gyi dbang phyug dang / rta mchog gi dkyil 'khor rnams dgu dgu'i bdag nyid can no/ /de lta bur gang dang gang gi bdag po de dang de'i rnam par 'dod do/ /de lta bur bris pa'i dkyil 'khor de rnams kyi dbus ma'i dkyil 'khor de nyid kyi shar la sogs pa'i phyogs rnams su bri bar bya'o//yang na 'byung ba lnga rnams su/ /zhes pa ni/ gang gi tshe rim pa gnyis pa rnams dang ldan pa'i dkyil 'khor rnams nyid la 'dod pa'i tshe/ rim pa gnyis rnams dang ldan par bris te/ de'i dbus kyi rim pa de lnga'i bdag nyid dang ldan pa nyid du bya'o//dbus ma de'i shar la sogs pa'i phyogs rnams su yang 'di rnams kyis rim pa dbus ma'i yang lnga lnga'i bdag nyid du so sor byas pas/ nyi shu rtsa lngar gnas pa'i lha'i dkyil 'khor du bya'o/ /gzhan gnyis po yang dpal he ru ka'i dkyil 'khor dgu dgu'i bdag nyid can du 'gyur ba dang /bdag med ma'i dkyil 'khor bcu gsum pa'i bdag nyid du brjod de/ de nyid char yang bsdus pa'i dkyil 'khor yin no/ /dkyil 'khor gnyis po'i sgo skyong ma rnams kyis bstan pa'i dkyil 'khor gsungs pa//sgo skyong rnams zhes pa la sogs pa ste/ /sgeg mo dang / /gar mkhan ma la sogs pa rnams dgod do/ /glang po la sogs rab tu grags/ /zhes pa ni/ /gong du bshad pa'i he ru ka'i phyag mtshan rnams so/ /rnam mkha'i dbyings zhes pa ni chos kyi 'byung gnas so//de'i mkha' ni nam mkha' nyid de/ /de'i rang gi ngo bo ni mchog tu grol ba'i gnas so/ /de dag ni le'u lnga pa'i zhal nas brgyud pa'o/ /drug pa ni ma bshad do/ /khrag dang khu ba las byung lus/ /zhes pa ni/ nye bar mtshon pa tsam ste/ /skyon gyi khams kyi dri ma 'di rnams su yang 'byung bar 'gyur te//der 'gyur pa ji ltar gzugs dang / gzugs med pa'i khams su 'byung ba ni ma yin no/ /gang gi tsho khams gsum pa rnams su skye bar 'gyur ba ni/ sa 'og dang steng dang / mtho ris las bzhi pa yod pa ma yin la/ /de na gnas pa rnams kyi skye ba'i rgyu ni de yin par smra ba de'i tshe na rnam par myos pa'i sems kyis smras ba ji bzhin du//'di ni 'jig rten pa'i grags pa la ltos nas smras pa yin gyi/ /bstan bcos las grags pa ni ma yin no/ /bzhin mdzes zhes pa la sogs pa dang / /pad+ma me tog gis rab ldan//zhes pa ni/ /gsang ba'i dbang bskur ba cung zad smras pa'o/ /pad+ma dmar pos zhes bya ba ni/ shes rab ye shes su gsungs pa'o/ /de dag ni zhal nas brgyud pa'i de kho na nyid kyi bshad pa zhes bya ba rgyud kyi rgyal po mkha' 'gro ma rdo rje gur gyi stod na gang dka' pa rnams bkrol pa'o/

CLOSE WINDOW