CLOSE WINDOW

D1180
བོད་ཡིག

@##/ /rgya gar skad du/ he badzra piN+DA r+tha TI kA/ bod skad du/ kye'i rdo rje bsdus pa'i don gyi rgya cher 'grel pa/ dpal kye'i rdo rje la phyag 'tshal lo/ /'jig rten spyod pa rnam par spangs byas rgyal ba'i rang bzhin rtag tu byung zhing khyab//gnyis gnyis med cing dri bral dbang po min bde kun mkhyen e waM mchog zhi ba/ /thugs ni thugs min thugs de bems po ma yin kun du dbang po thams cad pa//sangs rgyas rnams kyi ngo bo nyid sku bdud rtsi la ni rtogs ched phyag 'tshal lo/ /yon tan brgyad po rab bcom las byung rnam par thar rnams gtso bo'i zhal brgyad rnams/ /stong pa nyid rnams bcu drug phyag dang thugs rje rnams kyang thod pa 'di rnams te//'gyur med lnga bcu rjod byed de nyid bkod pa phrag par mgo yi phreng ba can/ /cod pan la ni mi bskyod zla phyed rdo rje'i phreng ba thod pa'i bdag nyid mnga'/ /byams pa la sogs rnams dang rnam thar zhabs bzang rnams kyis bdud rnams mnan te bzhugs//nyon mongs shes bya bsdus dang sbyor ba brang 'gro phyag rgya stag gi pags pa yis/ /gang la bdud sogs sgrib rnams cha tsam lta bur sems can don du brgyan de la//btud nas 'di yi rgyud kyi gsang ba 'chad byed 'grel pa bdag gis bri bar bya/ /sems can kun la phan 'dod pa/ /sa bcu rnams kyi dbang phyug po/ /dpal ldan rdo rje snying po yis//rnal 'byor pa yi lam thob ched/ /'bum phrag lnga pa'i rgyud chen las/ /nyung ngu'i rgyud ni legs phyung ba'ang / /brgya phrag bdun ni phyed bcas pa/ /rdo rje'i tshig mang ldan pa 'dir/ /kye yi rdo rjes bskul bas na/ /gzhung ni stong phrag drug pa ste//rtsa ba'i rgyud kyi rjes 'brang gang / /de 'dis rgyud 'di gsal don du'o/ /snyigs ma lnga yi dus 'di ru/ /slob dpon gang rnams 'byung 'gyur ba/ /rnal 'byor spyod pa ston byed cing / /yang dag lam la gnas min la/ / 'grel pa med par nyung ngu'i rgyud/ /ston par byed pa tshul ngan pa/ /gzhan gyi bud med nor 'dod pas/ /dmyal bar 'gro bar ches brtson pa/ /mngon shes lnga sogs med par ni/ /kha cig 'grel pa byed par 'gyur/ /rtog ge'i bstan bcos nga rgyal gyis//rnal 'byor spyod la brnyas par byed/ /sangs rgyas rdo rje sems dpa' nyid/ /'bad pas dbang gis gzung nas so/ /bdag ni rdo rje 'dzin pa zhes/ /mi 'ga' mi la smra bar 'gyur/ /tshul khrims sdom pa 'dzin pa yi/ / dge slong kun la phyag mi byed/ /sa la rdo rje 'dzin rang nyid/ /gos dkar can bdag phyag 'os zer/ /sten byed tshong pa dmangs rigs dang / /gang rnams zhing pa'i las la dga'/ /rmongs pa dam chos 'tshong byed pa/ /spyad bya ma yin longs spyod pa/ /bdud kyi rigs gtogs de rnams ni/ /slob ma rnams kyi bla mar 'gyur//rnal 'byor spyod pa'i zol gyis ni/ /rang gi nyes byas sbed byed cing / /de rnams skyon rnams spang bya'i ched/ /nges par smra bar byed 'gyur te/ /slob dpon yon tan gzung bya yi/ /skyon ni slob mas nam yang min/ /skyon 'dzin 'dir ni dngos grub med/ /'di la nges par the tshom med/ / snying rje med cing khro la gdug /khengs shing chags la ma bsdams dang / /rang bstod bla mar slob ma ni/ /blo dang ldan pas mi bya'o/ /tshig 'di slob ma rnams la ni/ /rnam pa kun du smra mi byed/ /brtse med zhing las byed pa gang / /khro zhing gnad du snun par byed/ /gdug cing dge slong skye bor sdang rengs pa shes pa ngan pas khengs//'dod chen spyang bya min don gnyer/ /shin tu chang 'thung ma bsdams pa/ /rang la bstod pa 'dir brjod cing / /yon tan can la skyon 'byin byed/ /dbang bskur mchog thob rdo rje yi/ /slob dpon la ni de bzhin gshegs/ /phyogs bcu'i 'jig rten khams bzhugs pas//dus gsum byon nas phyag byed ces/ /dgongs te bshad pa mi shes shing / /ming tsam gyis ni rmongs pa rnams/ /rgyal ba'i dbang po rnams smad nas/ /ngu 'bod du ni 'gro bar 'gyur/ /rdo rje sems dpa' spyi bo nas/ /byang chub shing drung dbang bskur gang / /dbang bskur mchog thob gyur pa de//rdo rje slob dpon de bzhin gshegs/ /phyogs bcu'i byang chub sems dpa' yis/ /lus gang 'jig rten khams rnams te/ /der gnas phung po lnga rnams kyis/ /dus gsum byon nas phyag 'tshal lo/ /de nas cod pan rin po che/ /sna tshogs dngos rnams 'jig rten khams/ /der gnas sangs rgyas phyag byas gang //rnal 'byor rdo rje slob dpon de'o/ /ji ltar brda yis bshad pa la/ /rnam snang gci ba khu ba dang / /mi bskyod pa dang 'od dpag med/ /de ltar slob dpon rdo rje 'chang / /bshang gci khu ba phyag rgya rnams/ /ji ltar slob dpon ster byed bzhin/ /sku gsung thugs kyi dngos grub rnams//de ltar rdo rje 'dzin pas stsol/ /kun rdzob dang ni don dam pas/ /slob ma rnal 'byor pa rnams las/ /dkyil 'khor byang chub shing drung du/ /dbang bskur sngar dang phyis de bzhin/ /dgongs pas bshad dang dgongs min dang / /ji bzhin sgra dang ji bzhin min/ /de bzhin nges don drang don te//rgyud ni mtha' drug mtshan nyid can/ /slob dpon yon tan gang rnams 'dir/ /tha snyad kyis ni bstan de rnams/ /rdo rje sems dpa'i yon tan te/ /mngon shes drug sogs mtshan nyid rnams/ /brtan zhing dul la blo gros ldan/ /bzod ldan drang po g.yo sgyu med/ / sngags dang rgyud kyi sbyor ba shes/ /snying rje ldan zhing bstan bcos mkhas/ /de nyid bcu rnams yongs su shes/ /dkyil 'khor bri ba'i las la mkhas/ /dang ba'i bdag nyid dbang po thul/ /gsang sngags 'chang byed slob dpon no/ /yon tan bshad pa 'di rnams ldan/ /dge slong rdo rje 'dzin par 'gyur//dge tshul khyim pa min de dag /bcu rnams dge slong 'dir mtshungs min/ /bslab pa'i gzhi bcu ldan pa dang / /bslab pa'i gzhi lnga ldan pa dang / /bslab pa'i gzhi yi mtha' ldan pa/ /de gsum mtshungs pa min par bshad/ /ji ltar rtsa ba'i rgyud du gsungs/ /dge slong rdo rje 'dzin pa'i gnas//gang de cung zad bla ma ni/ /mnyes byed slob ma la brjod bya/ /bdag med mas zhus rdo rje can/ /ji lta'i rim pa bzhin du ni/ /bslab pa'i gzhi ni sbyin ched du/ /tshig ni 'di skad bka' stsal to/ /dang por bslab pa'i gzhi lnga rnams/ /gso sbyong sogs dang yang dag ldan/ /mi dge bcu po yongs spong ba//byin nas dge bsnyen nyid du bya/ /de nas bslab pa'i gzhi rnams ni/ /bcu po byin nas dge tshul bya/ /de nas bslab gzhi bye ba ni/ byin nas dge slong brtul zhugs bya/ /de nas so sor thar shes nas/ /de nas bye brag smra ba'i lugs/ /de nas mdo sde shes byas nas/ /rnam shes smra ba rang chos las//de nas shes rab pha rol phyin/ /dgongs pa dbu ma shes bya ste/ /de ltar rgyud gzhan mnyan nas ni/ /de nas kye'i rdor shes par bya/ /theg pa gsum gyi nges 'byung las/ /theg pa gcig gi 'bras bur gnas/ /nyan thos rang sangs rgyas dang 'dir/ /theg pa chen po gsum ba ste//sangs rgyas pa la bzhi pa dang / /lnga pa thub pa'i dgongs pa min/ /rnam pa thams cad mchog ldan pa'i/ /stong nyid dang por rgyu yin te/ /smon lam las ni snying rje phyis/ /'gro ba'i don byed 'bras bu'o/ /rang don byas nas gzhan don ni/ /byed pa gang de blo ldan yin/ /rang sdug bsngal can dbul po gang //de yis gzhan la ji ltar sbyin/ /bde ldan dbang phyug phun tshogs pa/ /sems can don la snying rjes brtson/ /rgyu dang 'bras bu don gnyer bas/ /ji srid rgyu mngon ma byas pa/ /de srid dang por rgyu med pa'i/ /'bras bu gang las 'byung bar 'gyur/ /theg pa che las theg pa gzhan//gnyis po 'di ru brjod pa ni/ /sbyin dang tshul khrims sogs nyams rnams/ /ngal so'i ched du'o de nyid min/ /chos rnams kun gyi stong pa nyid/ /nges 'byung byed par bdag gis bshad/ /nges 'byung byed pa'i rgyu de dang / /de nas smon lam dbang las ni/ /snying rje'i bdag nyid 'bras bu che//dmigs pa med par 'byung bar 'gyur/ /sems can chos dang dmigs pa med/ /snying rje 'di ni gsum du bshad/ /nyi tshe'i don byed cung zad pa/ /sems can chos la dmigs pa ste/ /grub pa byang chub sems dpa' rnams/ /sa bcu la gnas bdag nyid kyi'o//yan lag bcu gnyis 'gags gyur cing / /sa kun la gnas bdag nyid can/ /bde gshegs rnams kyi dmigs med de/ /'gro ba'i don rnams mdzad par bshad/ /rgyu ni gang 'dra gang 'dra ba/ /de 'dra de 'dra'i 'bras bu der/ /ko tra ba las 'ga' zhig tu'ang / /sA lu nyid ni skye mi 'gyur//sa bon de bzhin ljon de bzhin/ /ljon shing de bzhin 'bras de bzhin/ /thog ma bar dang tha mar yang / /thub pa'i bka' ni dge ba yin/ /dang por rtog bcas rgyu las ni/ /'bras bu rnam rtog bcas 'byung gis/ /sangs rgyas pa kun la rtog las/ /tha mar 'bras bu stong nyid min//dang por zhing rnams sbyang don du/ /ko tra ba rnams 'debs byed cing / /phyi nas sbyangs pa'i zhing la ni/ /sA lu'i sa bon 'debs pa bzhin/ /las kyi sar skyes mi rnams ni/ /ma dag zhing yin zhes bshad do/ /ma dag 'gro drug skyes pa ste/ /dge dang mi dge'i 'bras bur brjod//mi yi skye ba dag zhing la/ /dmigs med snying rje'i sa bon ni/ /btab pas gang zhig de yi phyir/ /stong nyid dpag bsam ljon shing 'byung / /stong nyid dpag bsam ljon shing las/ /dmigs med thugs rje'i 'bras bu ni/ /sems can kun gyis bsam byas nas//'byung ngo 'di la the tshom med/ /zab cing rgya che'i chos rnams la/ /skal ba bral ba'i bdag nyid la/ /phyag rgya dkyil 'khor sngags sogs gang / /yid 'ong bdag gis bstan pa yin/ /phyag rgya dkyil 'khor sngags sogs kyis/ /sangs rgyas rdo rje sems dpa' nyid/ /ston par byed pa ma 'ongs pa'i//slob dpon rnams ni bdud kyi rigs/ /de phyir dge slong theg chen la/ /ston byed rdo rje 'chang bshad de/ /theg pa gsum po yongs shes shing / /chos kyi bsdu ba ston byed pa'o/ /rig byed grub mtha' rnal 'byor rnams/ /dbang phyug sogs kyis byas pa dang / /sangs rgyas pa yi sngags rgyud la//stong pa nyid la khyad par yod/ /gang zhig mi shes rmongs bdag nyid/ /slob ma ma lus ltung bar byed/ /byed po med par las yod min/ /las dang bral na 'bras bu med/ /sgyu 'phrul chen po drag chen po/ /'byung dang sdud par byed pa po/ /rang nyid 'phrog po rang byed po//rang nyid rgyal po rang gtso bo/ /de ltar dbang phyug sgyu ma ni/ /dbang phyug gis kyang bshad pa ste/ /mu stegs zhi ba'i grub mthar ro/ /glu yi chos su khyab 'jug gis/ /gdul dka' 'dul bar byed pa de'ang / /de yang legs par rnam skyong byed/ /gang tshe gang tshe sa gzhi 'dir//chos ni nyam chung nyid gyur cing / /chos ma yin pa 'jug byed pa/ /de'i tshe nga ni bdag skyed de/ /legs pa rnams ni bsrung don dang / /nyes par byed rnams 'jig byed du'o/ /chos ni gnas pa'i don ched du/ /dus dang dus su bdag 'byung ngo / /phyin ci log tu chos ston pa/ / thams cad de ltar yongs mkhyen nas/ /bdag la kye yi rdo rje des/ /'grel pa bya ched nges par bskul/ /ngo bo nyid kyi sku mchog 'jig rten gsum gyis mchod pa dri ma med pa dang / /chos zhes bya ba bde dang sdug bsngal dngos spangs longs spyod rdzogs sku ston pa po/ /sprul pa mkha' la rdzu 'phrul sna tshogs bcas pa sgyu ma mig 'phrul mtshungs pa la//btud nas bsdus pa'i rgyud 'di gsang tshig nges don bdag gis nyung ngu bshad par bya/ /sangs rgyas rnams kyis kye yi rdo rje nyung ngu'i rgyud 'di ru dang ches cher gsal ba gang / /sngon du 'bum phrag lnga po rnams kyi dang po'i rgyud tshogs su dang tshigs bcad brgya phrag gcig /stong gis bsgyur ba rnams kyis mngon par brjod pa 'bum pa dang yang rgyud kyi rgyal po'i tshogs/ /gzhan du'ang mi rnams la ni rgyal bas bstan pa mdzad ni 'grel pa rnams kyis don rtogs so/ /gang zhig 'grel pa med par nyung rgyud nges par gtugs la gsang tshig ston byed pa//de ni long ba chu la sbrul zhugs yun rings lon pa'i rjes la blta ba bzhin/ /rgyal bas mtha' dag rgyud du nges don kho na ma yin drang ba'i don yang bstan/ /gal te drang don 'grel pas gsal bar byas na nges pa rtogs ched don med do/ /rgyal bas mtha' dag rgyud ni dgongs pas bshad dang dgongs ma ni bshad do gzhan pa ni//ji bzhin sgra dang ji bzhin sgra min nges pa'i don dang drang ba'i don yang bstan/ /phung po phyis la sogs dri ma bcas gang de rnams 'dir ni lha nyid min/ /lha yi zhal dang phyag rnams rdzogs sangs rgyas min rtog pas ched du kun brtags yin//bcom ldan 'das kyis mtha' drug gis bskor 'dus pa la sogs rgyud rnams gang gsungs pa/ /bstan bcos mkhas pa'i nga rgyal gcog byed de ni rtog ges rtogs bya ga la yin/ /me long la ni pra phab mtshungs pa dus rnams gsum po yang dag rig pa 'di/ /dngos dang dngos med rtog pa'i dra ba bral ba'i ye shes gang yin gnyis med nyid//bcom ldan 'das kyi bde ba chen por khu ba 'bab pa sum cu rtsa gnyis rtsa/ /gsungs te mgrin par son cing de bzhin snying ga lte ba gsang bar gang yin pa'ang / /ci zhig 'bab pa rkang lag tshigs dang lag pa'i sor mo'i tshigs su son pa ste//de rnams rgyal bas kye yi rdo rje snying pos bdag la gsungs pa'ang med/ /gtsug lag dge slong skye bo la gsungs gang de'ang ma ga d+hA skad gzhan pa min/ /sde snod gsum du bcom ldan 'das kyis gsungs gang de ni gnas brtan sde ba'i lugs su ste/ /nges par nad gzhan de la'ang sman gzhan 'di ste nad 'di gzhom pa'i ched du'o//thub pa'i don la sogs pa rton pa rnam bzhi 'di yin tshig 'bru sogs la min/ /gang zhig lha dang lha min klu dang gnod sbyin skad rnams dang ni gzhan gyis kyang / /chos rnams cig car ston mdzad 'jig rten dpe spangs ngo mtshar byed pa bcom ldan gyis//gsung dbyangs de 'di'ang legs sbyar mtshan nyid can gyis e baM ma yA zhes sogs kyis/ /gtsug lag bshad ces smra 'di skye bo mkhas pa rnams kyis mtshar bya cis ma yin/ /rnam pa thams cad mchog ldan mig 'phrul dang mtshungs sgyu ma lta bu mkha' 'gro ba'i//bcom ldan 'das kyi sku gang byis pa mkhas pa rnams kyis rtogs byed nges bshad de/ /sum cu rtsa gnyis mtshan rnams dang ni dpe byad bzang po brgyad cu rnams kyis spras/ /phung po khams dang dbang po rnams dang yul rnams bcas pa dkyil 'khor la bzhugs pa'o//blun po rnams ni rten cing 'brel pa skye zhing 'byung bar rig par rtag tu 'dod/ /'jig dang skye ba tshes grangs rgyu ba la sogs rtsis rnams rgyud gzhan du bstan to/ /skye bo byis 'ga' 'o ma med par zho 'dod pa med par ni 'o ma dang / /ba byung yang ste spyod bral 'dir ni shes med pa la skyon ci zhig / kye yi rdo rje yis ni bde mchog 'khor lo dang ni gdan bzhi shes par bya/ /kye yi rdo rje dang ni bde mchog 'khor lo nyung ngu 'di ni gdan bzhis shes par bya/ /mchog gi dang po'i sangs rgyas tshig dang bde mchog chen pos nges don shes par bya/ /de la sogs pa'i rgyud rnams ni/ /rgyud gzhan rnams kyis rtag tu ni//bstan dang rgyas bshad kyis shes bya/ /'grel pas lam 'dod rnams kyis so/ /zhes pa kye'i rdo rje'i 'grel pa stong phrag drug par 'dod pa'i lha la bstod cing rgyud la 'jug pa ste yongs su bcad pa dang po'o// //da ni rgyud bstan pa brjod par bya ste/ 'dir dang por re zhig brjod par bya ba dang / rjod par byed pa dang / 'brel pa dang / dgos pa dang / dgos pa'i dgos pa rnams mngon par yang dag par gzigs nas gdul bya'i skye bo nges pa dang bral ba rnams la rang gi sems kyi bsam pas skye ba 'di nyid la sangs rgyas nyid stsol bar mdzad pa ni/e waM gyi yi ge la bzhugs pa/ mkha' 'gro ma'i dra bas bskor ba/ kye'i rdo rje'i ting nge 'dzin la snyoms par zhugs pa/ rdo rje snying pos gsol ba btab pa/ bdag med mas kyang zhus pa/ kye'i rdo rje 'bum phrag lnga pa las/ nyung ngu'i rgyud gzhung phyed dang bcas pa'i bdun brgya pa 'di bcom ldan 'das rdo rje sems dpas bstan to//'dir brjod par bya ba ni bcom ldan 'das kye'i rdo rje bdag med ma dang bcas pa'o/ /'di rtogs par byed pa'i le'u'i tshogs kyi rgyud kyi rgyal po ni rjod par byed pa'o/ /brjod par bya ba dang rjod par byed pa de dag gi phan tshun brjod bya rjod byed kyi mtshan nyid ni 'brel pa'o//dkyil 'khor du 'jug pa la sogs pa'i dbang bskur ba byin pa ni dgos pa'o/ /dbang bskur nas de kho na nyid gsal bar byas pa ni dgos pa'i dgos pa'o zhes pa 'di rnams mngon par yang dag par gzigs nas te/ gdul bya'i skye bo nges pa dang bral ba rnams la zhes pa nyan thos kyi sdom pa dang bral ba rnams la'o//rang gi sems kyi bsam pas zhes pa 'dod pa lnga la nye bar longs spyod pa'i sems kyis so/ /skye ba 'di la sangs rgyas nyid rab tu ster ba zhes pa ni yang dang yang du mi'i skye ba la ste/ lha dang lha min la sogs pa la ni min no//e waM gyi yi ge la bzhugs pa zhes pa bde ba thams cad kyi gzhi la bzhugs pas so/ /mkha' 'gro ma'i dra bas yongs su bskor ba zhes pa phung po dang khams dang skye mched kyi mtshan nyid can gyis so/ /kye'i rdo rje'i ting nge 'dzin la snyoms par zhugs pa rdo rje snying pos gsol ba btab pa shes rab bdag med mas yongs su zhus pas/kye yi rdo rje'i rtsa ba'i rgyud 'bum phrag lnga pa brtag pa chen po sum cu rtsa gnyis pa las nyung ngu'i rgyud rdzogs par byang chub pa dang / sgyu 'phrul dra ba'i mtshan nyid can gyi brtag pa gnyis pa le'u nyi shu rtsa gnyis kyi bdag nyid can phyed dang bcas pa'i bdun brgya pa'i gzhung gi tshad kyis bsdus pa'i rgyud ni bcom ldan 'das rdo rje sems dpas yang dag par bstan te/'jig rten pa dang 'jig rten las 'das pa'i bden pa dag gis 'jig rten pa dang 'jig rten las 'das pa'i dngos grub kyi ched du bskyed pa dang rdzogs pa'i rim pa dag gis dkyil 'khor gyi 'khor lo bsgom pa dang /de kho na nyid bsgom pas so zhes pa'o/ /rgyud 'dir brjod par bya ba ni kye'i rdo rje yin la/ kye'i rdo rje'i rgyud ni rjod par byed pa'o/ /brjod par bya ba de yang rjod par byed pa'i ngo bo nyid kyis gnas pa ste/ dang po rdo rje rigs kyi le'u'i ngo bo nyid kyis gnas pa dang /de nas sngags kyi le'u'i ngo bo nyid kyis gnas pa dang / de nas lha'i le'u'i ngo bo nyid kyis gnas pa dang / de bzhin du lha dbang bskur ba'i le'u'i ngo bo nyid kyis gnas pa dang / de kho na nyid kyi le'u'i ngo bo nyid kyis gnas pa dang / /spyod pa'i le'u'i ngo bo nyid kyis gnas pa dang /brda dang gnas gtan la dbab pa'i le'u'i ngo bo nyid kyis gnas pa dang / rnal 'byor ma'i 'khor lo 'du ba'i le'u'i ngo bo nyid du gnas pa dang / rnam par dag pa'i le'u'i ngo bo nyid du gnas pa dang / mngon par dbang bskur ba'i le'u'i ngo bo nyid du gnas pa dang / mngon par rdzogs par byang chub pa'i brtag pa'i rgyal po'i le'u'i ngo bo nyid du gnas pa'o zhes pa yongs su bcad pa bcu gcig ni brtag pa dang po la'o//de nas sgyu ma'i dra ba'i brtag pa la/ sgyu ma zhes pa ni mkha' 'gro ma ste/ dra ba zhes pa ni tshogs pa'o/ /sdom pa ni 'dus pa ste he ru ka dang bcas pa zhes pa nges pa'o//'di nyid du dang po re zhig rab gnas dang sbyin sreg dang thab khung dang las rab 'byam dang / mchod pa'i le'u'i ngo bo nyid kyis bzhugs pa dang / de nas dngos grub gtan la dbab pa'i le'u'i ngo bo nyid kyis bzhugs pa dang / de bzhin du rgyud thams cad kyi gleng gzhi dang /dgongs pa'i skad kyi le'u'i ngo bo nyid kyis bzhugs pa dang / rgyud thams cad kyi phyag rgya bsdus pa'i don gyi le'u'i ngo bo nyid du bzhugs pa dang / kye'i rdo rje mngon par 'byung ba'i le'u'i ngo bo nyid du bzhugs pa dang / phyag rgya rnam par dag pa dang / bris sku dang glegs bam 'bri ba nges pa'i ngo bo nyid kyis bzhugs pa dang /bza' ba'i cho ga'i le'u'i ngo bo nyid kyis bzhugs pa dang / pad+ma can gyi mtshan nyid dang / slob ma 'dul ba'i le'u'i ngo bo nyid kyis bzhugs pa dang / lha rnam par dag pa dang / sngags btu ba'i le'u'i ngo bo nyid kyis bzhugs pa dang / sngags bzlas pa'i le'u'i ngo bo nyid kyis bzhugs pa dang /lhan cig skyes pa'i don gyis sbyor ba dang rjes su gnang ba'i gleng gzhi'i ngo bo nyid kyis bzhugs pa dang / de ltar le'u nyi shu rtsa gnyis kyi bdag nyid kyi rgyud kyi ngo bo nyid kyis bzhugs pa'o/ /bcom ldan 'das kye'i rdo rjes rdo rje snying po la bos par gyur te/der bcom ldan 'das kyis bka' stsal pa/ de bzhin gshegs pa thams cad kyi sku dang gsung dang thugs kyi snying po ni ye shes te bde ba chen po'o/ /de nyid rje btsun gsang ba las ches shin tu gsang ba ste rnam par rtog pa'i bsgom pa la dga' ba rnams la sba bar bya zhing shin tu sba bar bya ba'o//e ma rdo rje snying po snying rje chen po legs so legs so/ /rdo rje sems dpa' dang / byang chub sems dpa' dang sems dpa' chen po dang dam tshig sems dpa'i snying po kye'i rdo rje zhes bya ba nyon cig ces bya ba bcom ldan 'das kyis gsungs te/ bzhugs pa'i gnas kyi mthar brjod pa'o//de'i phyir sngags bzhugs pa'i gnas bcom ldan 'das kyis gsungs pa brjod par bya ste/ phyi nas bcom ldan 'das kyis bskul ba'i gsung ngag dang rdo rje snying pos gsol ba 'debs pa'o zhes pa'o/ /'di skad bdag gis thos pa dus gcig na/bcom ldan 'das de bzhin gshegs pa thams cad kyi sku dang gsung dang thugs rdo rje btsun mo'i b+ha ga rnams la bzhugs so zhes pa bzhugs pa'i tshig go/ /'o na 'di skad bdag gis thos pa dus gcig na zhes pa'i tshig gang yin pa de ci/ ston pa po thams cad mkhyen pa'i yin nam 'on te sdud par byed pa gsol ba 'debs pa po'i yin/gnyi ga ltar na drang ba'i don du skyon yod de/ 'dir gal te 'das pa'i dus su thos pa de nyid gsung bar byed na/ de'i tshe ma 'ongs pa'i dus la ye shes med de gzhan las thos nas yongs su mkhyen pa'i phyir ro/ /ci ste sdud par byed pa po'i yin na de'i tshe 'di skad kyi yi ge la sogs pa don med de//rdo rje sems dpas ma gsungs pa nyid kyi phyir ro/ /de'i phyir ngag 'di dgongs pa'i skad gzhan gyis nges pa'i don du rtogs par bya ba'o/ /'di yi nges pa'i don nyid ni/ /e yig cha byed bzang po gang / /dbus su waM gyis rnam brgyan pa//bde ba thams cad kyi ni gnas/ /sangs rgyas rin chen za ma tog /ces pa bde ba chen po rdo rje sems dpa'o/ /de nyid ni ston pa po nga ste bde ba chen po'o/ /thos pa ni mkhyen pa'o/ /bdag gis ni bdag nyid kyis so/ /dus gcig na ni skad cig gcig gis mngon par rdzogs par byang chub pa na'o//bcom ldan 'das ni bde ba chen po'o/ /de bzhin gshegs pa thams cad ni dgongs pa'i skad kyis phung po lnga rnams so/ /de rnams kyi sku dang gsung dang thugs rdo rje btsun mo zhes pa la sku dang gsung dang thugs kyi bya ba rdo rje btsun mo rnams ni yul gyi chos can nam mkha' la sogs pa'i khams rnams te/srog 'gro ba dang 'ong ba'i bye brag gis yon tan gcig dang gnyis dang gsum dang bzhi dang lnga'i bye brag gis gtsug tor dang dpral ba dang mgrin pa dang snying ga dang lte ba'i pad+ma rnams kyi b+ha ga rnams su dang /lte ba dang gsang ba dang rdo rje nor bur yon tan gsum gyi dbye bas gnas pa rnams te/ dga' ba la sogs pa'i dbye bas byang chub kyi sems de rnams su bzhugs so zhes pa'o/ /zlog pas ni de las bzlog pa yon tan zad pas rdo rje nor bu dang gsang bar dang / yul zad pas lte ba dang snying ga dang mgrin pa dang dpral ba dang gtsug tor te 'di rnams su bzhugs te/rgyu mthun pa la sogs pa'i dbye bas so zhes pa'o/ /de ltar khams dang phung po la sogs pa rnams sgrib pa med pa nyid kyis rdzogs par brjod par bya ste bde ba chen po'i las so/ /e yig ni spyan ma'o//waM yig ni mA ma kI'o/ /ma yig ni gos dkar mo'o/ /yA yig ni sgrol ma'o/ /shru yig ni rdo rje dbyings kyi dbang phyug ma'o/ /taM yig ni shes rab kyi pha rol tu phyin ma'o zhes pa'o/ /de nas phung po rnams te/ e yig ni rdo rje sems dpa'o/ /ka yig ni mi bskyod pa'o//smin yig ni don yod grub pa'o/ /sa yig ni rin chen dbang po'o/ /ma yig ni 'od dpag tu med pa'o/ /ye yig ni rnam par snang mdzad do/ /b+ha yig ni dri rdo rje ma'o/ /ga yig ni ro rdo rje ma'o/ /wAn yig ni gzugs rdo rje ma'o/ /sa yig ni reg bya rdo rje ma'o/ /rba yig ni sgra rdo rje ma'o//ta yig ni chos kyi dbyings kyi rdo rje ma'o/ /thA yig ni sgrib pa thams cad rnam par sel ba'o/ /ga yig ni 'jig rten dbang phyug go/ /ta yig ni sa'i snying po'o/ /kA yig ni nam mkha'i snying po'o/ /ya yig ni phyag na rdo rje'o/ /wAka yig ni kun du bzang po ste/ de ltar skye mched bcu gnyis rnams so/ /tsi yig ni rengs byed ma'o/ /t+ta yig ni nga rgyal ma'o/ /ba yig ni rmugs byed ma'o/ /dzra yig ni shin tu brtson 'grus ma'o/ /yo yig ni shin tu sngon mo'o/ /Shita yig ni drag spyan ma'o/ /b+ha yig ni gnong mdzes so/ /ga yig ni gtsug tor ro//Shu yig ni bgegs mthar byed do/ /bi yig ni shes rab mthar byed do/ /dza yig ni pad+ma mthar byed do/ /hA yig ni gshin rje mthar byed do/ /ra yig ni shes rab dang thabs kyi bdag nyid rdo rje sems dpa' gtso bo sum cu rtsa bdun pa'o/ /de ltar sum cu rtsa bdun byang chub kyi phyogs kyi chos rnams rim pa ji lta bar yongs su dag pa rnams te/khams drug rnams dang / phung po drug rnams dang / yul drug rnams dang / dbang po drug rnams dang / las kyi dbang po'i bya ba drug rnams dang / las kyi dbang po drug dang / bde ba chen po'o zhes pa ste bzhi pa zad pa las so//de'i phyir dran pa nye bar gzhag pa bzhi rnams dang / yang dag par spong ba bzhi rnams dang / rdzu 'phrul gyi rkang pa bzhi rnams dang / dbang po lnga rnams dang / stobs lnga rnams dang / 'phags pa'i lam yan lag brgyad dang / byang chub kyi yan lag bdun rnams so zhes pa'o//de ltar bde ba chen po las ngo bo nyid las chos kyi sku ste/ bzhi pa zad pa las gnyid stug po zad do/ /gnyid stug po zad pas rmi lam zad do/ /rmi lam zad pa las sad pa zad pa'o/ /de rnams zad pa las rim pa ji lta bar lhan cig skyes pa dang / chos dang longs spyod rdzogs pa dang /sprul pa'i sku rnams su rim pa ji lta bar 'gyur te/ ye shes dang / sems dang / ngag dang / lus sgrib pa med par 'gyur ro/ /de'i phyir/ thams cad nas ni phyag zhabs sogs/ /kun nas spyan dang dbu dang zhal/ /kun nas thos ldan 'jig rten du/ /thams cad g.yogs nas bzhugs pa'o//de'i phyir/ cha med kun 'gro khyab pa po/ /phra zhing zag med sa bon no/ /rdul med rdul bral dri ma med/ /nyes pa spangs pa skyon med pa/ /shin tu sad pa sad pa'i bdag /kun shes kun rig dam pa po/ /rnam par shes pa'i chos nyid 'das//ye shes gnyis med tshul 'chang ba/ /de ltar sgrib pa thams cad las rnam par grol ba sku bzhi'i bdag nyid can bcom ldan 'das kye'i rdo rjes bcu gnyis kyi dbang phyug ni ston pa'o/ /byang chub sems dpa' rdo rje snying pos bcu'i dbang phyug ni gsol ba 'debs pa po'o zhes pa kye'i rdo rje'i 'grel pa stong phrag drug par ston pa po dang /gsol ba 'debs pa po dang / rjod par byed pa dang / brjod par bya ba dang / 'brel par bya ba dang / bzhugs pa'i gnas nges pa ste yongs su bcad pa gnyis pa'o// //da ni rdo rje snying pos gsol ba 'debs pa dang bcom ldan 'das kyis lan gyi gsung gsal ba bya ba ste/rdo rje snying pos gsol ba/ ci yis zhes pa la sogs pa'o/ /ci yis rdo rje sems dpar 'gyur/ /ci ltar byang chub sems dpar 'gyur/ /ci phyir sems dpa' chen po lags/ /ji ltar dam tshig sems dpa' gtso/ /zhes pa rdo rje snying po'i gsol ba 'debs pa gsan nas/bcom ldan 'das kyis bka' stsal pa/ mi phyed rdo rje zhes par brjod/ /sems dpa' srid pa gsum gcig nyid/ /shes rab rigs pa 'di yis ni/ /rdo rje sems dpa' zhes par bshad/ /byang chub la gnas sems dpa' de/ /byang chub sems dpar brjod par bya//ye shes chen po'i ros gang ba/ /sems dpa' chen por brjod par bya/ /rtag tu dam tshig la gnas pas/ /dam tshig sems dpar mngon par brjod/ /ces mdor bstan pa'i rgyas par bshad pa ni 'bum phrag lnga par rab tu gsal te/ de'i phyir de nyid la 'jug par bya'o//der bcom ldan 'das kyis bka' stsal pa/ mi phyed rdo rje zhes bshad gang / waM gyi yi ger de rab grags/ /sku gsung thugs ni mi phyed pa/ /yi ge waM gyis mngon brjod bya/ /sems dpa' srid gsum gcig nyid ni/ /yi ge e yis brjod par bya/ /e yig shes rab dang lhan cig /waM yig rigs gsum bdag nyid can/ /lte ba'i dbus gnas dpa' bo ni/ /ze 'bru gsang ba'i spyod yul can/ /rang 'dra'i shes rab dang ldan te/ /rdo rje sems dpar rab brjod bya/ /phyag gnyis he ru ka ru bshad/ /de nyid 'jig rten gsum bskyod nyid/ /de nyid ngo bo nyid du brjod//sangs rgyas sku de bde ba che/ /de nyid ye shes rdo rjer 'gyur/ /de nyid lhan cig skyes dga' nyid/ /rgyu mthun par yang de nyid can/ /rdo rje rtse gcig pa ru brjod/ /de yang bzhi pa'i gnas skabs zad/ /rnam dag mchog tu mi 'gyur ba'o/ /byang chub la gnas gang yang ni//snying ga'i pad+ma'i dbus gnas par/ /hUM yig kho na sems dpar bshad/ /mi bskyod pa ni de kho na/ /thugs kyi rdo rjer de nyid brjod/ /khyab 'jug nyid de phyag bzhi pa/ /de nyid dz+wa la dz+wa la b+h+yo/ /de nyid chos kyi sku ru bshad/ /chos 'khor lo gnas rdo rje can/ / khyad dga'i dga' ba'i tshul 'chang ba/ /de nyid rnam smin du yang bshad/ /gnyid stug zad par byed pa'o/ /ye shes chen po'i ros gang ba/ /sems dpa' chen por de brjod bya/ /yi ge AHni yang dag brjod/ /mgrin par longs spyod 'khor lo'i dbang / /'od dpag med du mngon brjod bya//de nyid gsung gi rdo rjer bshad/ /pad+ma'i phyag can de bzhin gshegs/ /de nyid mchog tu dga' bar bshad/ /skyes bu byed par rab brjod bya/ /kun rdzob dang ni don dam gyi/ /de yang rmi lam gnas skabs zad/ /de nyid longs spyod rdzogs skur 'gyur/ /sangs rgyas rnams kyis chos ston mdzad//de nyid bde byed rab tu brjod/ /zhal gsum rnam pa phyag drug ste/ /ki Ti ki Ti rdo rje de/ /he ru ka nyid gsum par 'gyur/ /rtag tu dam tshig la gnas pas/ /gang zhig gnas pa de brjod bya/ /dam tshig ri bong 'dzin khu ba/ /bde ba chen po dpral bar gnas//bdud rtsir legs gnas sems dpa'o/ /oM gyi yi ger yongs bshad bya/ /de nyid rnam par snang mdzad brjod/ /sku yi rdo rje de kho na'o/ /tshangs pa sku yi rdo rje 'dzin/ /de nyid yongs su brjod par bya/ /dga' ba tshangs pa'i ngo bo ste/ /gzugs kyi sku ru de brjod bya/ /de nyid phyag na 'khor lor bshad//sku ni sprul pa'i mtshan nyid can/ /bzlog pas de yang dri ma med/ /de nyid sad pa zad pa nyid/ /de nyid pi tsu badzra 'gyur/ /zhal brgyad he ru ka ru brjod/ /dpa' bo chen po zhabs bzhi pa/ /bcu drug phyag dang yang dag ldan/ /de ltar sku yi dbye ba yis//he ru ka ni bzhi par bshad/ /ngo bo nyid can las chos 'gyur/ /chos las longs spyod rdzogs pa nyid/ /de las sprul pa'i skur 'gyur te/ /de ltar sku ni bzhi yin no/ /tshangs pa sku yi rdo rje 'dzin/ /gsung gi rdo rje dbang phyug che/ /khyab 'jug thugs kyi rdo rje 'dzin//rdo rje sems dpa' bde ba che/ /zhes so/ /rtsa ba'i rgyud du rgyas bshad pa/ /rigs ni gsum du brjod par bya/ /ngo bo nyid dang ldan pas ni/ /rigs bzhi zhes par bshad pa yin/ /mdzad pa bzhi yi dbye ba yis/ /rigs rnams kyi ni rnam gzhag de'o/ /sangs rgyas lam ni mngon 'dod pa'i//rnal 'byor ldan pas shes par bya/ /zhes pa'o/ /e waM gyi yi ge ni rdo rje sems dpa' ste/ hUM yig ni thugs rdo rje'o/ /AHyig ni gsung rdo rje'o/ /oM yig ni sku rdo rje'o/ /e waM ni hUM dang AHdang oM gyi yi ge re re'i ming 'di yis rtogs par bya ba'i don gzung bar bya ba'i yi ge dang ming gis ni ma yin no//'dir ming gi dngos por med de gal te yod na ni de'i tshe yid dang mig gis gzung bar bya bar 'gyur ba zhig na/ de ltar yang ma yin no/ /de'i phyir rna bas ming tsam gzung bar bya la/ 'di yis rtogs par bya ba'i don ni yid dang mig gis gzung bar bya ba'o//bum pa dang snam bu la sogs pa'i don ni 'jim pa dang / 'khor lo dang / dbyug pa dang / chu dang / skud pa dang / thags bzangs dang / gnas dang / snal ma la sogs pas grub pa ni ming gis bskyed par byas par 'gyur ba ma yin no/ /ming gi sgra tsam gyis te sa la sogs pa dri la sogs pa'i chos kyi rgyur gyur pa 'jim pa lta bu ni ma yin no zhes pa bcom ldan 'das kyi lan gyi gsung nges pa'o//da ni yang rdo rje snying pos gsol ba 'debs pa dang / bcom ldan 'das kyis lan bshad par bya ste/ rdo rje snying pos gsol ba/ ci yis kye yi rdo rje lags/ / mtshan bsdus pa ni 'di lta bu/ /he yig gis ni ci zhig bshad/ /rdo rje yis kyang ci brjod bya/ /bcom ldan 'das kyis bka' stsal pa/ /he yig gis ni snying rje che/ /rdo rje'ang shes rab brjod par bya/ /shes rab thabs kyi bdag nyid rgyud/ /de ni nga yis bshad kyis nyon/ / zhes mdor bstan pa 'di rgyas par bshad pa ni/ rtsa ba'i rgyud du ste/ de nyid la 'jug par bya'o/ /de ltar bcom ldan 'das kyis bka' stsal pa/ /sems can chos dang dmigs pa med/ /snying rje 'di ni rnam gsum bshad/ /chen po'i sgra las dmigs pa med/ /he yig gis ni mngon brjod bya//sku gsung thugs kyi sbyor ba yis/ /sngar gyi waM yig de nyid do/ /rdo rje'i sgras kyang e yig ste/ /rnam pa kun don stong pa nyid/ /gang zhig 'di dag snyoms 'jug pa/ /rnal 'byor sgra yis brjod par bya/ /shes rab thabs kyi bdag nyid rgyud/ / rnal 'byor rgyud du brjod par bya/ /rnal 'byor thabs kyi sgra yis min/ /shes rab kyes kyang 'gyur ba min/ /'di ni rnal 'byor rgyud ces bya/ /kye yi rdo rje gnyis med pa'o/ /'dus pa la sogs thams cad ni/ /shes rab thabs kyi bdag nyid des/ /thams cad rnal 'byor rgyud yin te//shes rab thabs kyi ming rnams kyis/ /gang du thabs ni legs gnas shing / /rnal 'byor ma rnams kun spyod pa/ /kun rdzob rnal 'byor ma rgyud du/ /byis pa rnams la bdag gis bstan/ /gang du thabs ni 'pho byed cing / /shes rab yang dag gnas 'gyur ba//thabs kyi rgyud nyid du ni bshad/ /ji ltar de ltar kun rdzob tu'o/ /phyag rgya dkyil 'khor bsgom pa rnams/ /ji lta ji ltar rnam dpyad pa/ /de lta de ltar rnam par gzhig /skye 'jig mtshan nyid can rnams so/ /shes rab thabs dag snyoms 'jug pa/ /dbyer med mtshan nyid rdo rje gsum//shes dang shes bya dag gcig pa/ /stong nyid snying rje gnyis med pa'o/ /stong nyid mtshan ma med pa dang / /de bzhin smon pa med pa dang / /mngon 'dus ma byas rnam par thar/ /rnam pa bzhi rnams yongs su grags/ /snying rje byams pa dga' ba dang //bzhi pa yang ni btang snyoms te/ /de rnams tshangs pa'i gnas bzhi ste/ /chos kun rnam par mi rtog las/ /sgrib pa med pa'i chos kyis ni/ /gnyis med de yis btags pa'o/ /shes rab thabs bdag de bzhin no/ /rdo rje'i sku rnams gnyis su med/ / phung po drug dang khams de bzhin/ /yul dang dbang po rnams kyang ste/ /bya ba las kyi dbang po rnams/ /de ltar gnyis med nyid du gnas/ /sangs rgyas kun gyi sdom pa ni/ /e waM yi ger rab tu gnas/ /phyi nas rigs gsum dbye ba yis/ /rigs lnga rnam par dbye ba las/ / rigs drug rnams kyi dbye ba yis/ /de bzhin brgyad du rnam dbye bas/ /shes rab thabs kyi bdag nyid rgyud/ /nga yis bstan par bya yis nyon/ /zhes pa bcom ldan 'das kyis lan gyi gsung nges par bstan pa ste/ de ltar rnal 'byor gyi rgyud du rab tu gzhag pa'i nges pa'o/ /da ni rnal 'byor ma rnams kyi skye ba dang gnas pa'i rgyu brjod par bya ste/rgyud 'dir rnal 'byor ma rnams ni phung po lnga rnams dang / khams bzhi rnams dang / skye mched drug rnams te zla ba'i cha bco lnga'i dbye bas bdag med ma la sogs pa rnams so/ /de rnams kyi skye ba dang gnas pa'i rgyu ni hUM yig ste/he ru ka ni gnyis pa'o/ /de'i phyir de rnams kyi don/ /mnyam nyid ye shes rnam shes dang / /lha rnams ji ltar 'byung bar 'gyur ba'o/ /de bzhin du/ lta stangs dgug dang brda chen dang / /nus pa rnam pa mang po rig /rengs par byed dang skrod pa nyid/ /sde rengs byed dang mngon spyod pa//la sogs pa gzhan yang bshad par bya yis/ kye'i rdo rje snying po khyod nyon cig ces pa lha skye ba dang gnas pa dag gi rgyu'i nges pa'o/ /da ni de'i yang bskyed pa'i rgyu brjod par bya ste/ dang po re zhig e waM 'gyur/ /zhes pa e waM gyi yi ge ni he ru ka'i dang po'i rgyu'o/ / hUM yig ni gnyis pa'i bskyed pa'i rgyu'o zhes pa nges pa'o/ /de las dngos po skye ba ni/ /gzung dang 'dzin pa'i dbye ba las/ /yul dang dbang po'i sbyor ba yis/ /rnam shes rnams kyi so so'o/ /dngos po'i 'ching bas 'ching bar 'gyur/ /dngos po'i 'ching ba de yis rnam par shes pa rnams dang mig la sogs pa rnams 'ching bar byed do//de yongs shes pas grol bar byed/ /yul dang dbang po rnams 'gog pas de yongs su shes pas zhes pa'o/ /de'i phyir dngos po nyid kyis rnam grol byed/ lha'i mig la sogs pa rnams kyis 'das pa dang ma 'ongs pa'i yul mthong bas rnam par shes pa drug rnams grol te/de ni rnam par shes pa gzhan no zhes pa bcom ldan 'das kyis gsungs pas so/ /de bzhin du de gzugs gzhan la sogs pa yang ste/ de'i phyir/ thams cad nas ni phyag zhabs sogs/ /kun nas spyan dang dbu dang zhal/ /kun nas thos ldan 'jig rten du//thams cad khyab par byas nas bzhugs/ /da ni sngar bshad pa'i shes rab dang thabs dag gis don dam pa'i bsgom pa brjod par bya ste/ dngos po bsgom byas zhes pa la sogs pas so/ /'dir nam mkha' la dngos po bsgom bya ni rmi lam lta bu'i ste rdul phra rab kyi chos nyid las 'das pa'o//de yongs shes pa ni dngos po med pa bsgom par bya ste/ rnam par rtog pa dang bral ba'i sems kyis snang brnyan mthong ba'o/ /rtog pa dang bral zhing ma 'khrul pa ni mngon sum zhes brjod par bya'o/ /de nyid rnam pa bzhi ste/ dbang po'i mngon sum dang yid kyi mngon sum dang /rnal 'byor gyi mngon sum dang / rang rig pa'i mngon sum zhes pa ste/ shes pa de nyid ni nye bar ston par byed pas 'jug par byed pa dang thob par byed pa dang / nyams su myong ba'i mtshan nyid can no zhes bya'o/ /snang brnyan de nyid dpe dgu rnams kyis bsgrubs te/'di lta ste mig yor dang / sprul pa'i grong khyer dang / sgra brnyan dang / rmi lam dang / sgyu ma'i 'khrul 'khor dang / smig rgyu dang / me long gi gzugs brnyan dang / chu zla dang / nam mkha' zhes pa'o/ /shes rab e yig tu 'gyur ro/ /de bzhin du he ru ka zhes pa dngos po med pa bsgom bya ste shes rab kyi ye shes so//he ru ka ni bde ba chen po ste/ shes rab ji lta bar thabs kyang de bzhin no/ /de yongs su shes pa dngos po med par bsgom par bya ba ste thabs su 'gyur ro/ /de bzhin nyid kyi sgra las rgyu ji ltar bar de ltar 'bras bu'o zhes pa'o/ /e waM gyi yi ge shes rab dang thabs kyi bdag nyid can gyi lus gnas te lte bar gnas pa'o//de ltar na lus gnas ye shes chen po ni/ /kun du rtog pa thams cad spangs par 'grub ste/ dkyil 'khor gyi 'khor lo dang las dang ye shes kyi phyag rgya'i rtog pa dang bral ba shes rab kyi pha rol tu phyin pa'i ye shes rtog pa'i dra ba dang bral bas zhes pa nges pa'o//de nyid rdo rje sems dpa' 'jig rten gsum kun du bskyod pa'i he ru ka ngo bo nyid kyi sku'o/ /dngos po kun la khyab pa po/ /zhes pa phung po drug dang / khams drug rnams dang / dbang po drug rnams dang / yul drug rnams dang /las kyi dbang po drug rnams dang / las kyi dbang po'i bya ba drug rnams te dngos po 'di rnams la khyab pa po ye shes kyi sku'o/ /lus la gnas kyang lus skyes min/ /zhes pa skye ba dang 'jig pa'i dngos po med pa'i phyir ro/ /'dir gang mkha' 'gro ma dra ba sdom pa brtag pa gnyis par dngos grub gtan la 'bebs pa'i le'ur 'chad par 'gyur ba rdo rje snying pos gsol ba btab pa dang /bcom ldan 'das kyi lan gyi gsung de ni kun rdzob tu byis pa'i skye bos rtogs pa'i don du bskyed pa'i tshul gyis dbang po gnyis kyi bde ba bstan pa'o zhes pa'o/ /'di lta ste/ rdo rje'i snying pos gsol ba btab pa/rdzogs pa'i rim pa'i rnal 'byor gyis/ /dam pa'i bde ba bde chen no/ /rdzogs pa bsgom pa med pa ste/ bskyed pa yi ni dgos pa ci/ /zhes pa la 'dir rdzogs pa'i rim pa zhes bya ba ni rtog pa dang dbang po gnyis kyi bde ba dang bral ba ste/ de nyid sangs rgyas nyid ster bar byed pa yin na de'i phyir rtog pas dkyil 'khor bskyed pa dang phyag rgya bskyed pas dgos pa ci yod ces pa'o//tshig 'di gsan nas bcom ldan 'das kye'i rdo rjes bka' stsal pa/ byang chub sems dpa' chen po 'di/ /e ma dad pa'i shugs kyis nyams/ /zhes pa kun rdzob tu ste/ lus kyi dngos med gang la bde//bde ba smra bar mi nus so/ /khyab bya khyab byed ngo bo yis/ /bde bas 'gro ba khyab pa po/ /ji ltar me tog la gnas dri/ /me tog dngos med las mi rtogs/ /de bzhin gzugs sogs dngos med pas/ /bde ba dmigs pa nyid mi 'gyur/ /zhes pa kun rdzob kyis so//de nyid du slar yang don dam par 'gog pa 'di lta ste/ dngos nga dngos po med pa nga / /zhes pa rnam pa thams cad pa'i shes rab po/ /dngos po rtogs phyir sangs rgyas nga / /zhes pa mngon par shes pa drug can thabs so/ /rmongs pa gang rnams nga mi shes/ /'di ltar gyur pa'i gang zhig le los bcom pas kyang ste de rnams ni dbang po gnyis kyi bde bas nye bar bcom pa rnams so zhes pa la sogs pas snga ma dang phyi ma drang ba dang nges pa'i don nyid de le'u de nyid du rgya cher bshad pa'o//'dir ni rigs kyi le'ur gsungs pa bshad par bya ste/ 'dir khams gsum pa rgyu ba dang bcas pa dang /mi rgyu ba 'das pa dang / ma 'ongs pa dang / da ltar byung ba la khyab par byed pa nyid kyi phyir/ gal te sangs rgyas kyi ye shes de lus las skyes pa yin na rten dang brten pa'i 'brel pas me tog gi dri ji lta ba bzhin du ste/ ji ltar me tog med par ni dri med pa bzhin du/ de med pa na 'jig mod/de ltar yang ma yin no/ /de'i phyir phyi dang lus la khyab pa nyid kyi phyir/ phyi ma la gnas pa dang / lus la gnas pa zhes brjod kyi/ gang gi phyir lus med pa na de med pa ni ma yin pa de'i phyir lus skyes min zhes pa nges pa'o/ /de skad du bshad pa/ ji ltar bum pa zhig gyur kyang //nam mkha' la ni 'jig pa med/ /de ltar lus ni zhig gyur kyang / /ye shes la ni 'jig pa med/ /ces so/ /kye'i rdo rje rgya cher 'grel pa stong phrag drug par shes rab dang thabs gnyis su med pa'i ye shes nges pa ste yongs su bcad pa gsum pa'o// //da ni rdo rje'i lus la rtsa rnams brjod par bya ste/'dir rdo rje'i snying pos gsol pa/ kye bcom ldan 'das rdo rje'i lus la rtsa du lags/ bcom ldan 'das kyis bka' stsal pa/ rtsa rnams ni sum cu rtsa gnyis te/ byang chub kyi sems sum cu rtsa gnyis 'bab pa bde ba chen po'i gnas su 'dzag pa rnams so zhes pa la/'dir bde ba chen po yang dag par myong bar byed pa'i phyir/ bde ba chen po zhes brjod par bya ste gsang ba'i 'khor lo rtsa sum cu gnyis kyi bdag nyid can ka yig la sogs pa sde pa drug gi gsal byed sum cu dang gzhom du med pa gnyis kyi mtshan nyid can rnams so//de la nam mkha' dang / rlung dang / me dang / chu dang / sa dang / ye shes kyi khams kyi chos kyi e waM gyi yi ge'i chos kyis so zhes pa'o/ /'di lta ste/ kA khA gA g+hA ngA zhes pa nam mkha'i khams rnams te/ a ku ha rnam par bcad pa rnams mgrin pa las gyur pa'o zhes pa ha yig gis shes par byed pa las so//de'i nang du lhung ba ni de smos pas gzung bar bya'o zhes pa'i yongs su bshad pas grub pa'o/ /kA'i sde pa ni nam mkha'i khams so zhes pa'o/ /de bzhin du/ tsA tshA dzA dz+hA nyA zhes pa i tsu ya sha rnams rkan las 'byung ngo zhes pa rlung gi khams te i yig gis shes par byed pa las so//de bzhin du/ TA ThA DA D+hA NA zhes pa r-iTu ra Sha rnams spyi bo las 'byung ba rnams so zhes pa me'i khams te re phas shes par byed pa las so/ /de bzhin du/ pA phA bA b+hA mA zhes pa u pu h+ya wa mchu can rnams mchu las skyes pa chu'i khams te wa yig gis shes par byed pa las so//de bzhin du/ tA thA dA d+hA nA zhes pa l-i tu la sa rnams so las byung ba sa'i khams te la yig gis shes par byed pa las so/ /'di rnams kyi nang na sA wA ShA shA th+kA zhes pas dang / chu dang / me dang / rlung dang / nam mkha'i rang bzhin can rnam pa lnga'i bdag nyid drug pa ye shes kyi khams so zhes pa'o//e waM gyi yi ge ni 'gyur med gnyis te e waM gyi yi ge la sogs pa rnams ni gang gis na byang chub kyi sems 'gugs pa de bas ni byang chub kyi sems 'bab pa rnams su gsungs so/ /bde ba chen po'i gnas su 'jig pa zhes pa ni gci ba dang bshang ba dang khu ba 'dzag pa rnams so//de rnams kyi dbus na 'og dang steng du rtsa gsum ni gtso mo rnams yin cing / 'og tu bshang ba 'dzag pa dang gci ba 'dzag pa dang khu ba 'dzag par byed pa ste lte ba las 'og tu'o/ /lte ba las steng du brkyang ma dang ro ma dang kun 'dar ma zhes pa'o/ /'di lta ste/ brkyang ma shes rab rang bzhin gyis/ /ro ma thabs kyis yang dag gnas/ /a wa d+hU tI dbus phyogs su/ /gzung dang 'dzin pa spangs pa nyid/ /ces pa la 'dir shes rab kyi sgra yis zla ba brjod de de'i rang bzhin sna bug g.yon par srog 'bab pa'o/ /des na zla ba'i rang bzhin gyis zhes ba srog 'bab pa brkyang ma gnas pa'o//thabs kyi sgra yis nyi ma brjod par bya zhing de'i sna bug g.yas par srog 'bab pa rang bzhin te/ rang bzhin des ro ma gnas so/ /de skad du gsungs pa/ nyin mo bcom ldan rdo rje can/ /mtshan mo shes rab rab tu grags/ /ji ltar nyi ma zhi bar brjod//zla ba nu ma de ltar bshad/ /ces so/ /rnam par shes pa dang / 'du byed dang / tshor ba dang / 'du shes dang / gzugs kyi dkyil 'khor lnga spro ba'i rim pas brkyang mar gnas so/ /sa dang / chu dang / me dang / rlung dang / nam mkha'i dkyil 'khor lnga sdud pa'i rim pas ro mar gnas so//dus sbyor bcu gnyis yongs su bskor bas mi mnyam pa dang mnyam pa'i dus sbyor rab tu rgyu bas dkyil 'khor sum cu longs spyod pa can brkyang ma dang ro ma'o/ /'dir chu srin gyi dus sbyor la sogs pa'i dkyil 'khor rnams rim pa ji lta bar/ 'di lta ste/ kA khA gA g+hA ngA zhes pa'o//de nas lugs las bzlog pas bum par yi ge thung ngu rnams spro ba'i rim pas rtsa g.yon par ro/ /'di lta ste/ nga g+ha ga kha ka zhes pa nam mkha' la sogs pa rnams dang rnam par shes pa la sogs pa rnams so/ /de bzhin du g.yas su yang gzugs la sogs pa rnams dang sa la sogs pa rnams te lus dang bsam pa'i dbye bas gzung ba dang 'dzin pa'i 'brel pas so zhes pa'o//de bzhin du nyi shar ba na tsA tshA dzA dz+hA nyA zhes pa g.yas par sdud pa'i rim pas so/ /de nas lug 'char ba na nya dz+ha dza tsha tsa zhes pa g.yon par spro ba'i rim pas so/ /de bzhin du glang 'char ba na TA ThA DA D+hA NA zhes pa'o//de bzhin du 'khrig pa 'char ba na Na D+ha Da Tha Ta zhes pa'o/ /de nas karka Ta 'char ba na pA phA bA b+hA mA zhes pa'o/ /de bzhin du ma b+ha ba pha pa zhes pa seng ge la'o/ /tA thA dA d+hA nA zhes pa bu mo la'o/ /na d+ha da tha ta zhes pa srang shar ba na'o/ /sA wA ShA shA th+kA zhes pa sdig pa 'char ba na'o//de nas th+ka sha Sha wa sa zhes pa gzhu'i dus sbyor 'char ba na'o/ /de ltar nyin mtshan gyi dkyil 'khor drug cu rnams so/ de bzhin du nang gi rtsa rnams la dkyil 'khor rgyu ba rnams te/ de rnams kyis shes par byed pa de rnams las skyes pa rnams ni lag pa dang rkang pa'i tshigs rnams la brjod par bya'o//g.yas pa'i phrag pa dang dpung pa'i tshigs la chu srin gyi dus sbyor te/ de'i dkyil 'khor so so'i bdag nyid sa la sogs pa'i dkyil 'khor ni mthe bo dang mdzub mo dang gung mo dang ming med dang mthe'u chung rnams kyi tshigs 'og ma rnams la rim pa ji lta bar ro zhes pa'o//de nas bum pa'i dus sbyor la g.yon pa'i phrag pa dang dpung pa'i tshigs la ste/ nam mkha' la sogs pa'i dkyil 'khor rnams ni rim pa ji lta bar mthe'u chung dang ming med dang gung mo dang mdzub mo dang mthe bo'i 'og gi tshigs kyi mtshams rnams la'o/ /de bzhin du g.yas pa'i dpung pa dang nye ba'i tshigs rnams la nya'i dus sbyor te/mthe bo la sogs pa'i tshigs gnyis pa'i mtshams rnams su dkyil 'khor rnams so/ /de bzhin du g.yon pa'i dpung pa dang nye ba'i dpung pa'i mtshams la lug gi dus sbyor te mthe'u chung la sogs pa'i tshigs kyi phreng ba gnyis pa'i mtshams rnams su dkyil 'khor rnams so//de nas g.yas pa'i lag pa dang lag ngar gyi mtshams la glang gi dus sbyor te/ mthe bo la sogs pa'i tshigs kyi phreng ba gsum pa'i mtshams la dkyil 'khor rnams so/ /de bzhin du g.yon pa'i lag pa dang lag ngar gyi mtshams su 'khrig pa'i dus sbyor te mthe'u chung la sogs pa tshigs kyi phreng ba gsum pa'i mtshams su dkyil 'khor rnams so//de ltar byang chub tu bgrod pa'i nges pa'o/ /de nas lhor bgrod pa la 'di lta ste/ g.yas pa'i rked pa dang brla'i tshigs la karka Ta'i dus sbyor te rkang pa g.yas pa'i mthe bo la sogs pa'i tshigs kyi phreng ba dang po'i mtshams su sa la sogs pa'i dkyil 'khor rnams rim pa ji lta bar ro//de nas g.yon pa'i rked pa dang brla'i mtshams su seng ge'i dus sbyor te rkang pa g.yon pa'i mthe'u chung la sogs pa'i tshigs kyi phreng ba dang po'i mtshams rnams la nam mkha' la sogs pa'i dkyil 'khor rnams rim pa ji lta bar ro zhes pa'o//de bzhin du g.yas pa'i pus mo dang brla'i mtshams su bu mo'i dus sbyor te/ rkang pa g.yas pa'i mthe bo la sogs pa'i tshigs kyi phreng ba gnyis pa'i mtshams rnams su dkyil 'khor rnams so//de bzhin du g.yon pa'i pus mo dang brla'i mtshams su srang gi dus sbyor te/ mthe'u chung la sogs pa'i tshigs kyi phreng ba gnyis pa'i mtshams rnams la dkyil 'khor rnams so/ /de bzhin du g.yas pa'i rkang pa dang pus mo'i mtshams su sdig pa'i dus sbyor te/ mthe bo la sogs pa'i tshigs kyi phreng ba gsum pa'i mtshams rnams la dkyil 'khor rnams so//de bzhin du g.yon pa'i rkang pa dang pus mo'i mtshams su gzhu'i dus sbyor te/ mthe'u chung la sogs pa'i tshigs kyi phreng ba gsum pa'i mtshams rnams su dkyil 'khor rnams rim pa ji lta bar ro/ /de ltar na dkyil 'khor drug cu rnams ni sprul pa'i 'khor lo la yin zhing bzhi ni stong pa'i gnas rnams te/e waM gyi yi ge'i rang bzhin rnams so zhes pa'o/ /de'i phyir sprul pa'i 'khor lo la pad+ma 'dab ma drug cu rtsa bzhi pa'o/ /'dab ma'i sgra yis dkyil 'khor drug cu 'bab pa'i rtsa rnams brjod do/bzhi ni stong pa 'bab pa rnams so zhes pa'o/ /de ltar dus sbyor so so'i rtsa la gnas lnga rnams te dbus su stong pa 'bab pa'i rtsa'o/ /shar du rlung 'bab pa'o/ /g.yas su me 'bab pa'o/ /byang du chu rgyu ba'i rtsa'o/ /nub tu sa rgyu ba'o/ /dbus su a wa d+hU tI ni ye shes kyi dkyil 'khor 'bab pa ste/gsungs pa yang / lte ba'i dbus su dpa' bo gnas/ /ze 'bru gsang ba'i spyod yul la'o/ /zhes so/ /de ltar dbyu gu drug cu rnams dkyil 'khor drug cu 'bab pa'i byed pa rnams so/ /bzhi ni stong pa 'bab pa'i byed pa ste/ ji ltar zla ba'i cha bcu drug pa skad cig tsam yin pa de ltar de ni dkyil 'khor yongs su rdzogs pa 'bab pa yang yin par shes par bya'o zhes pa sprul pa'i 'khor lo'o//mi mnyam pa'i dus sbyor zla ba'i rang bzhin gyi brkyang ma ste/ mnyam pa'i dus sbyor nyi ma'i rang bzhin gyi ro ma'o/ /a wa d+hU tI ni mnyam pa gzung ba dang 'dzin pa spangs pa dbus phyogs su ste/ye shes kyi dkyil 'khor la shes par bya'o zhes pa'o/ /de ltar sprul pa'i 'khor lo la dbyu gu'i 'pho ba rnams drug cu rtsa bzhi ste bzhi ni stong pa'o/ /de nas chos kyi 'khor lo la pad+ma 'dab ma brgyad pa ste der 'dab ma brgyad rnams la thun tshod kyi dbye bas 'pho ba brgyad rnams te/phyed dang bcas pa'i dus sbyor gyi bdag nyid can brkyang ma'i dang ro ma'i zhes pa'o/ /de nas mgrin pa longs spyod rdzogs pa'i 'khor lo la gsal byed thung ngu'i dbye bas rtsa sum cu rtsa gnyis rnams so/ /longs spyod rdzogs par ni pad+ma 'dab ma sum cu rtsa gnyis par bla ma'i man ngag las te/rgyud du ni lugs las bzlog pas gsungs so/ /de la yud tsam gyi dbye bas 'pho ba sum cu rtsa gnyis rnams so/ /dpral bar pad+ma 'dab ma bcu drug pa ste de la thun tshod phyed pa'i dbye bas 'pho ba bcu drug rnams so/ /gtsug tor du pad+ma 'dab ma bzhi pa ste/de la thun mtshams kyi dbye bas 'pho ba bzhi rnams so/ /'dir dbugs phyi rol du rgyu ba ni de las dbugs phyir 'byung ba'i dus su sprul pa'i 'khor lo la dbyu gu'i rtsa'i dkyil 'khor sna'i bu gar 'char bar 'gyur te/ sna'i bu ga gnyis su g.yon pa'am g.yas par dang po'i tha mar gang gi tshe nam mkha'i dkyil 'khor 'bab pa de'i tshe dbus su rgyu'o//gang gi tshe rlung gi dkyil 'khor 'bab pa de'i tshe sna'i bu gar steng du reg cing ngo / /gang gi tshe me'i dkyil 'khor 'bab pa de'i tshe sna'i bu ga la g.yas su reg cing ngo / /gang gi tshe chu'i dkyil 'khor 'bab pa de'i tshe g.yon du reg cing ste/ g.yon du'am g.yas su yang rung sna la mngon du phyogs par ro//gang gi tshe sa'i dkyil 'khor rgyu ba de'i tshe 'og tu reg cing ngo / /de ltar sna'i bu ga dag la gnas lnga rnams su rnal 'byor pas shes par bya ste/ g.yon du'am g.yas su mi mnyam pa dang mnyam pa'i dus sbyor 'char ba'i dbye bas so zhes pa'o/ /'dir kye'i rdo rje 'bum phrag lnga par gang 'di rgyas par bshad pa de ni mang ba nyid kyi phyir ma brjod de thos pa chung ba rnams mang po bshad pa la skrag par 'gyur ro zhes bcom ldan 'das kyi nges pa'o//dus sbyor bcu gnyis kyi bdag nyid can gyi khyim gyi 'khor lo la chu srin la sogs pa 'di ni gdan bzhir shes par bya ste 'chi ltas kyi mtshan nyid kyang ste rgyud ni rgyud gzhan gyis rtogs par bya'o zhes gsungs pa'i phyir ro//ro hi ta dang mo hi ta la sogs pa'i rtsa mi mnyam pa dang mnyam pa'i dus sbyor 'bab pa rnams so zhes pa dgongs pa'i skad gzhan gyis gsungs te/ rtsa de rnams kyis bzang ba dang ngan pa der gsungs shing 'chi ltas dang 'chi ba yang ngo zhes pa'o//rgyu de'i phyir/ brkyang ma mi bskyod 'bab pa ste/ /ro ma khrag ni rab 'bab cing / /shes rab zla ba 'bab bshang ba/ /a wa d+hU tI de rab grags/ /zhes pa ste 'di mi bskyod pa ni chu'i khams te chu'i khams rgyu ba ni sna bug g.yon pa brkyang ma'o/ /khrag ni me'i khams te/ g.yas par me'i khams 'bab pa ni ro ma'o//de ltar na g.yon par chu las skyes pa pad+ma dang / g.yas par me las skyes pa rin po che lhag pa'i lha'o/ /shes rab a wa d+hU tI ste zla ba ni thig le khu ba yin la/ de nyid ni lnga'i bdag nyid can stong pa chen po 'bab par byed do zhes pas stong pa 'bab cing dbus su rdo rje'i rigs lhag pa'i lha ste/a wa d+hU tI ru rab tu grags so/ /de bzhin du zla ba dang nyi ma dang sgra gcan 'bab ma brkyang ma dang ro ma dang a wa d+hU tI rim pa ji lta ba ste srog kun nas rgyu ba la'o/ /thur sel la ni bshang ba dang gci ba dang khu ba 'bab ma rnams te lte ba las 'og tu ste/ 'khor lo dang /ral gri dang / rdo rje rtse gcig pa rnams so/ /steng gi sgo rnams dang 'og gi sgo rnams so zhes pa'o/ /de ni 'og gi sgo can chu 'bab pa sum cu rtsa gnyis rnams bshad par bya ste mi phyed ma la sogs pa rnams so zhes pa'o/ /'dir dkar po'i phyogs la dbyangs bco lnga rnams te bcu drug pa thig le'o//rtsa de rnams kyang 'phyang ma la bskor nas gnas pa'o/ /'di lta ste/ a i r-i u l-i zhes pa rim pa ji lta bar tshes gcig dang / gnyis dang / gsum pa dang / bzhi pa dang lnga pa'o/ /de bzhin du yon tan rnams te/ ar e ar o al zhes pa drug po la sogs pa ste/rim pa ji lta bas so/ /de la yaN du bsgyur ba rnams ni ha ya ra wa la zhes pa ste/ rim pa ji lta bas bcu gcig pa la sogs pa rnams so/ /thig le'i dbus su 'phyang ma ni bcu drug pa ste de ltar rkan gyi steng du dpral bar khu ba'i cha'i rang bzhin gyi bdud rtsi 'dzag ste/ phyi rol du bsil ba dang nang du stu ka zhes pa'o//de bzhin du rtsa so so ste/ 'di lta ste/ mi phyed ma dang phra gzugs ma/ /mchog ma g.yon ma thung ngu ma/ /zhes pa tshes gcig la sogs pa lnga rnams so/ /de nas/ rus sbal skyes sgom dbang bskur ma/ /skyon ldan ma dang bshang ba ma/ / zhes pa drug pa la sogs pa rnams so/ /mtshan mo ma mo bsil sbyin ma/ /drod ma dang ni la la nA/ /zhes pa bcu gcig la sogs pa rnams te rim pa ji lta bas so/ /brkyang ma ni bco lnga'i bdag nyid de a wa d+hU tI ni bcu drug la'o/ /de nas nag po'i tshes gcig la sogs pa rnams ro ma la ste dbyangs ring po'i rang bzhin gyis tshes bco lnga rnams sdud pa'i rim pas so//'di lta ste/ lA wA rA yA hA zhes pa tshes gcig dang / gnyis dang / gsum pa dang / /bzhi pa dang lnga pa ste rim pa ji lta bas so/ /de nas yon tan 'phel ba'i dbye bas/ Al au Ar ai A zhes pas rim pa ji lta bas drug pa la sogs pa rnams so//de nas dbyangs ring po'i dbye bas/ l-I U r-I I A zhes pa bcu gcig pa la sogs pa rnams te rim pa ji lta bas so/ /lce'i rtse mor bcu drug pa rnam par bcad pa'o/ /'di rnams kyi dbus na zhes pa ro ma la sogs pa rnams so//'di lta ste/ ro ma dang 'jal ma dang mdog gnas ma dang spyi ma dang rgyu sbyin ma zhes pa tshes gcig la sogs pa rnams so/ /sbyor bral ma dang sdu gu ma dang grub ma dang 'tshed ma dang yid bzangs ma zhes pa drug pa la sogs pa rnams so/ /sum skor ma dang 'dod ma dang khyim ma dang gtum mo dang kA t+yA ya ni zhes pa bcu gcig la sogs pa rnams te/de ltar bco lnga rnams so/ /lce'i dbus su bdud 'dral ma skud pa nag po'i rang gzugs can lce'i rtse mo ji srid par langs pa/ 'phyang ma dang 'dzag pa thung zhing ro myong ba'o zhes pa'o//yang rdo rje'i snying pos gsol pa/ bcom ldan 'das rtsa 'di rnams ji lta bu lags/ bcom ldan 'das kyis bka' stsal pa/ srid gsum yongs gyur thams cad ni/ /zhes pa phung po dang dbang po dang las kyi dbang po yongs su gyur pa rnams zhes pa'o/ /gzung dang 'dzin pa rnam par spangs//zhes pa dbu mar rab tu zhugs par 'gyur ba'o/ /yang na thabs ni thams cad kyis/ /dngos po'i mtshan nyid du ni brtags/ /zhes pa khams dang yul dang bya ba rnams kyi rnam par shes pa'i dngos po'i mtshan nyid du brtags pa rnams so/ /kye'i rdo rje'i 'grel pa stong phrag drug par rdo rje'i lus la rtsa rnams gtan la dbab pa ste yongs su bcad pa bzhi pa'o// //da ni sdom pa'i dbye ba bshang bar bya ste/ 'dir lugs mthun dang lugs las bzlog pa dag gis gang gsungs pa de rim pa ji lta bar 'grel pas gsal bar bya ba'o//'dir sangs rgyas kun gyi sdom pa ni/ /e waM yi ger rab tu gnas/ /gsang ba'i pad+ma 'dab ma sum cu rtsa gnyis par dang / gtsug tor gyi 'dab ma bzhi pa la'o/ /lhag ma kun rdzob pas sprul pa dang chos dang longs spyod rdzogs pa dang / lhan cig skyes pa'i 'khor lo rnams su sdom pa ste 'du bar byed pa yin la 'dab ma drug cu rtsa bzhi pa dang 'dab ma brgyad pa dang 'dab ma sum cu rtsa gnyis pa dang 'dab ma bcu drug par te/lte ba dang / snying ga dang / mgrin pa dang / dpral ba rnams su'o/ /dpral bar A li'o/ /mgrin par kA li'o/ /snying gar shes rab bo//lte bar thabs so/ /lhan cig skyes pa'i sku ni lte bar ro/ /chos kyi sku ni snying gar ro/ /longs spyod rdzogs pa'i sku ni mgrin par ro/ /sprul pa'i sku ni dpral bar ro/ /lte bar bzhi pa'o/ /snying gar shin tu gnyid pa'o/ /mgrin par rmi lam mo/ /dpral bar sad pa'o/ / dpral bar sku rdo rje'o/ /mgrin par gsung rdo rje'o/ /snying gar thugs rdo rje'o/ /lte bar ye shes rdo rje'o/ /lte bar e yig go/ /snying gar waM yig go/ /mgrin par ma yig go/ /dpral bar yA yig go/ /lte bar spyan ma'o/ /snying gar mA ma kI'o/ /mgrin par gos dkar mo'o//dpral bar sgrol ma'o/ /dkyil 'khor bzhi rnams so zhes pa'o/ /skad cig ma bzhi rnams ni rnam pa sna tshogs pa ni dpral bar ro/ /rnam par smin pa ni mgrin par ro/ /rnam par nyed pa ni snying gar ro/ /mtshan nyid dang bral ba ni lte bar ro/ /de bzhin du dga' ba ni dbral bar ro//mchog dga' ni mgrin par ro/ /khyad dga'i dga' ba ni snying gar ro/ /lhan cig skyes pa'i dga' ba ni lte bar ro/ /de bzhin du sdug bsngal gyi bden pa ni dpral bar ro/ /kun 'byung gi bden pa ni mgrin par ro/ /'gog pa'i bden pa ni snying gar ro/ /lam gyi bden pa ni lte bar ro//de kho na nyid bzhi rnams te/ bdag gi de kho na nyid ni dpral bar ro/ /sngags kyi de kho na nyid ni mgrin par ro/ /lha'i de kho na nyid ni snying gar ro/ /ye shes kyi de kho na nyid ni lte ba la'o/ /dpral bar ngar byed pa'o/ /mgrin par sgra brjod pa'o/ /snying gar thams cad sems pa'o//lte bar bde ba myong ba'o/ /sde pa bzhi rnams ni/ gnas brtan pa lte bar ro/ /thams cad yod par smra ba snying ga na'o/ /mgrin par kun gyis bkur ba'o/ /dpral bar dge 'dun phal chen pa'o/ /zla ba ni dpral bar ro/ /nyi ma ni mgrin pa na'o//snying gar sgra gcan no/ /lte bar dus me'o/ /dpral bar 'pho ba bcu drug rnams so/ /mgrin par sum cu rtsa gnyis so/ /snying gar brgyad rnams so/ /lte bar 'pho ba drug cu rtsa bzhi rnams so/ /sngar bshad pa'i thun mtshams bzhi rnams te/ snga ma'i thun mtshams ni dpral bar ro//nyin gung gi thun mtshams ni mgrin par ro/ /nyin mo'i phyi ma'i thun mtshams ni snying gar ro/ /mtshan phyed kyi thun mtshams ni lte ba la'o/ /dpral bar ni longs spyod do/ /mgrin par ni dbang byed do/ /snying gar ni thim pa'o/ /lte bar ni bdag po nyid do/ /de ltar thams cad bzhi'o//byang chub kyi phyogs kyi chos sum cu rtsa drug rnams dang / khams sum cu rtsa drug rnams sngar bshad pa'i cha bzhir byas nas/ thams cad bzhi bzhir grangs ji lta bar rigs kyi dbye bas 'khor lo bzhi rnams la sbyar bar bya'o/ /ji lta bar rtsa ba'i rgyud kyi rjes su 'brangs nas rgyud ni rgyud gzhan du gsungs pa'i rnam pas rigs drug gi dbye bas 'khor lo drug tu sdom pa'o//rigs lnga'i dbye bas 'khor lo lnga rnams su sdom pa'o/ /rigs bzhi'i dbye bas 'khor lo bzhi rnams su sdom pa'o/ /rigs gsum gyi dbye bas 'khor lo gsum rnams su sdom pa'o zhes pa nges pa'o//rigs gsum dang ni rigs bzhi'i rgyud/ /de bzhin rigs lnga rigs drug ste/ /khyab bya khyab byed dbye ba yis/ /brten pa rten gyi bye brag las/ /'dir rten rigs gcig gi dbye bas brten pa zhal gcig pa'o/ /rten rigs gsum gyi dbye bas zhal gsum pa'o/ /rten rigs bzhi'i dbye bas zhal bzhi pa'o//rten rigs lnga'i dbye bas zhal lnga pa'o/ /rten rigs drug gi dbye bas zhal drug pa'o/ /rten rigs brgyad kyi dbye bas zhal brgyad pa'o/ /'dir dus me'i dbye bas zhal gcig par bshad pa'o/ /sgra gcan gyi dbye bas shes rab dang thabs kyi bdag nyid kyis zhal gnyis pa'o//sku dang gsung dang thugs zla ba dang / nyi ma dang sgra gcan gyi dbye bas zhal gsum pa'o/ /zla ba dang nyi ma dang sgra gcan dang dus me sku dang gsung dang thugs dang ye shes kyi dbye bas zhal bzhi pa'o/ /phung po lnga'i dbye bas zhal lnga pa'o/ /phung po drug gi dbye bas zhal drug pa'o//zla ba rnam pa gnyis dang / nyi ma gnyis dang / sgra gcan gnyis dang / dus me rnam pa gnyis te 'di rnams brgyad kyi dbye bas zhal brgyad pa'o/ /'dir zla ba'i dbye ba ni dpral ba dang 'phyang ma'i 'khor lo'o/ /nyi ma'i dbye ba ni lce dang mgrin pa'i 'khor lo'o//sgra gcan gyi dbye ba ni snying ga dang gtsug tor gyi 'khor lo'o/ /dus me'i dbye ba ni lte ba dang gsang ba'i 'khor lo zhes pa'o/ /de skad du gsungs pa/ sgra gcan steng du nyi ma gnas/ /nyi ma'i steng du zla ba'o/ /zla ba'i steng du sgra gcan te/ /de yis sna tshogs rab tu 'jug / de yis 'jug byed dus kyi me/ /lte ba gsang bar rnam gnyis gnas/ /de nyid rdo rje nyi mar brjod/ /gang du gtum mo gnas pa'o/ /bdud rtsi yang dag gnas gang du/ /haM yig gnas pa de ru'o/ /gtsug tor pad+mar char 'bab pa/ /rdo rje zla ba dri med 'od/ /ces pa sdom pa'i dbye ba'i nges pa'o//da ni gtum mo zhes pa la sogs pa gtum mo'i rnal 'byor brjod par bya'o/ /gtum mo lte bar 'bar ba yis/ /de bzhin gshegs pa lnga bsregs shing / /spyan la sogs pa rnam bsregs te/ /bsregs nas ri bong can haM 'dzag /ces pa mdor bstan pa'i tshig ste/mdor bstan pa 'di'i rgyas par bshad pa'i tshig ni rtsa ba'i rgyud la 'jug par bya ste/ der bcom ldan 'das kyis bka' stsal pa/ gsang ba las kyang ches gsang ba/ /rdo rje snying po nges bshad nyon/ /dngos grub thams cad rnams kyi rgyud/ /rnal 'byor pa la grol ba ster//rdo rje sems dpas gang gsungs pa/ /ye shes sku ste gnyis rtog med/ /rtsa gsum lte bar mgon po ni/ /lte ba gsang ba'i nang na gnas/ /de yi 'og dang steng son pa/ /glog gi dbyug pa mtshungs 'od can/ /rnam shes dbang po'i khams rnams ni//lus la gnas pa sad byed pa'o/ /sa yi dbang phyug ma de ni/ /lte bar rtse mo dbus mar gnas/ /gsang bar g.yas kyi rtse mo yang / /ltung bzhin pa ni glog dang 'dra/ /rang 'dra'i shes rab yin par brjod/ /de 'dir gtum mo yin par bshad/ /de ni thur du rtse gsum ste//de bzhin gyen du'ang gsum rnams so/ /tshangs pa'i rtse mo dbus na gnas/ /khyab 'jug rtse mo g.yon pa na/ /g.yas pa drag po'i rtse mo'o/ /bshang ba gci ba khu ba 'bab/ /sgra gcan rtse mo dbus na gnas/ /zla ba'i rtse mo g.yon pa na/ /g.yas par nyi ma'i rtse mo'o/ /chu dang me dang nam mkha' 'bab//brkyang ma g.yon du yang dag bshad/ /g.yas pa na ni ro mar brjod/ /dbu mar a wa d+hU tI gang / /de ni g.yung mor rab brjod bya/ /lte ba nas ni snying dbus su/ /lam gsum byas nas de nas 'gro/ /snying gnas ni mgrin dbus su/ /lam gsum byas nas slar yang son//dpral ba mgrin pa dag dbus su/ /lam gsum byas nas slar yang bgrod/ /dpral ba gtsug tor dag dbus su/ /lam gsum byas nas slar yang bgrod/ /gtsug tor nas ni sna bar du/ /lam gsum byas nas slar yang bgrod/ /sna yi bu ga g.yon par ni//brkyang mar yang dag rnam par gnas/ /g.yas su rtsa ni ro ma'o/ /smin dbus a wa d+hU tI'o/ /lte ba la sogs 'khor lo lnga/ /de rnams lam gsum lnga rnams nyid/ /lte ba nas ni lte dbus su/ /a wa d+hU tIs 'gro zhing 'ong / /'dab ma rnams nas 'dab ma la/ /brkyang ma ro ma dag bshad do//lte bar sgra gcan de nas nyid/ /zla ba zla bas mtshan pa yang / /phug nas gtsug tor du son pa/ /de ni a wa d+hU tI rtsa/ /gang tshe skyes bu 'dod myos pa'i/ /brkyang ma dang ni ro ma dang / /de dag sbyar ba'i sbyor ba yis/ /gtum mo nges par 'bab par byed/ /de ni lte ba'i 'khor lor 'bar//g.yung mo'i lam nas nges par 'byung / sgra gcan zla bas mtshan phug nas/ /de ni ha yig la reg byed/ /de yis reg pas haM yig de/ /de nas bdud rtsi dkar por 'ju/ /dkyil 'khor lnga rnams 'bab byed pa/ /phung po khams sogs bsregs pas na/yul dang dbang po 'gags pa na/ /dga' ba la sogs 'byung ba la/ /zla ba las ni thig le 'dzag /haM yig spyi bor yang dag gnas/ /dpral ba zla bar mgrin nyi mar/ /de nas sgra gcan du song ba/ /lte bar gtum mo zhugs pa ni/ /gsang ba'i 'khor lor de nas bgrod//gsang ba'i 'khor lor 'di lhung ba/ /'di ni phyugs chen du bshad do/ /'og tu rtse gsum rtsa rnams kyis/ /gang du spubs su rab tu bstan/ /skye ba bdun pa phyugs nyid ni/ /mkha' la spyod pa'i dngos grub ster/ /rgyal ba yis ni nad rnams 'phrog /phung po khams ni zhu ba yis//'khor los sgyur ba nyid sbyin byed/ /dbang po dang ni yul bsad pa/ /'di ni mkha' la spyod nyid ster/ /phra la sogs pa'i yon tan ldan/ /rjes su bzhu bas sad pa sogs/ /myur du sangs rgyas nyid ster byed/ /ji ltar phyi rol dngul chu bcings/ / de ltar ye shes bcud 'di yang / /sdug bsngal thams cad nges 'joms pa'i/ /dngos grub rgya chen ster bar byed/ /de bzhin tshangs pa khyab 'jug phyugs/ /gsang ba'i 'khor lor nges ltung ba/ /ji srid bsregs pa bdun gyi bar/ /tshe 'di yangs pa sbyin par byed/ / steng du sgra gcan phyugs su brjod/ /zla ba nyi ma phyugs chen po/ /tshangs pa'i bu gar lhung gyur pas/ /spyod dang grol ba'i 'bras bu ster/ /khrag dang chu rgyus de bzhin du/ /rkang mar 'bab pas ltung bar bya/ /'di rnams kyang ni phyugs zhes bya/ /phyi rol yul can gzhan phyugs min//skye ba bdun pa phyugs rnams ni/ /kun nas mchog gi dbang phyug go/ /lus la skye bdun ji lta bar/ /de ltar de ni bshad bya nyon/ /bza' dang btung ba'i ro rnams kun/ /zos dang 'thungs pa rnam drug po/ /smin pa las ni bcud 'gyur te/ /de de'i skye ba dang po'o//de nas khrag nyid du 'gyur te/ /gnyis par gsal bar 'gyur ba yin/ /gsum pa sha nyid du 'gyur ro/ /bzhi pa pags pa nyid du 'gro/ /lnga pa rtsa nyid 'gyur ba yin/ /drug pa rgyus pa nyid 'gyur ro/ /bdun par rkang nyid du 'gyur te/ /'di ni lan bdun par 'gyur ro//de nyid brten pa'i sbyor ba yis/ /mdzod drug rigs su brjod par bya/ /rigs ni lus zhes bshad pa ste/ /rigs las byung ba khu bar brjod/ /de yis nus ma rdul du brjod/ /lus ni skyed par byed pa'i rgyu/ /rnam shes khyab byed shes pa ni/ /de dag gi ni dbus su gnas//zla ba nyi ma la brten nas/ /srid gsum bdag nyid he ru ka /steng 'og gnas pa'i dpa' bo ni/ /mkha' 'gro ma yi 'khor lo'i gtso/ /rtsa ni rnam pa bzhi rnams kyis/ /spyi bor 'khor lo brjod par bya/ /dpral bar bcu drug rnams kyis te/ /mgrin par sum cu gnyis rnams kyis//snying gar 'khor lo brgyad rnams kyis/ /drug cu rtsa bzhi rnams nyid kyis/ /lte ba'i 'khor lor yang dag bshad/ /gsang bar sum cu gnyis rnams kyis/ /rtsa rnams 'khor lo'i rtsibs bshad pa'am/ /yang na pad+ma'i 'dab ma rnams/ /rnal 'byor ma rnams de brten pa//bya ba rnam pa du ma byed/ /yul dang dbang po'i rang bzhin gyis/ /rnam par shes pa rab bskul ba/ /gnas dang nye ba'i gnas sogs kun/ /de ni rtsa yi pad 'dab rnams/ /lha mo bzhi yi gtsug tor du'o/ /sgyu ma chen por brjod par bya/ /'di ni lte ba'i 'khor lo yi//dang po'i dkyil 'khor du ni 'char/ /dpral bar thig le rdo rje ni/ /rtsa rnams brgyad dang ldan par 'gyur/ /mig gnyis de bzhin rna ba dag /sna dang lce dang 'phyang ba'o/ /gau rI la sogs lha mo ni/ /gzugs sogs dang ni sa sogs rnams/ /zla ba'i cha dbyes bdag med ma//'di nyid du ni rab tu brjod/ /zhal gsum phyag drug mgrin par te/ /de ni sum cu gnyis kho nas/ /snying la'ang lha mo brgyad rnams dang / /phyag bzhi pa 'di yang dag bzhugs/ /sems kyi rdo rjer khyab 'jug che/ /mi bskyod pa yi rigs las byung / / 'jig rten gsum bskyod lte bar te/ /de ni drug cu bzhi nyid kyis/ /'di rnams mkha' 'gro lnga ru bshad/ /mkha' 'gro ma rnams khams lnga rnams/ /'di rnams 'khor lo lnga la gnas/ /drug pa gsang bar bdag po che/ /mkha' 'gro sum cu gnyis rnams dang / /lhan cig khams gsum dbang phyug go/'khor lo drug la lha mo rnams/ /lnga bcu rtsa drug lhag pa'i brgya'o/ /dus kyi 'khor lo zhes par bshad/ /rigs drug rnams kyis gcig bsdus pa'o/ /dpral ba spyi bor rtsa rnams gang / /nyi shu pad kan 'bab byed pa'o/ /mgrin ba snying ga'i bzhi bcu rnams//de bzhin mkhris pa 'bab byed pa'o/ /lte ba gsang bar bcu drug gang / /brgyad cu rlung ne 'bab byed pa'o/ /'dus pa'i rang bzhin la sogs pa'o/ /gsang ba'i 'khor lo'i rtsa bcu'o/ /steng 'og rtsa gsum gang yin rnams/ /'khor lo drug ni 'gog byed pa'o//nye ba'i rtsa rnams du ma ste/ /de las lus ni gang nas gnas/ /de rnams stong phrag bdun cu gnyis/ /lus la de snyed lha mo rnams/ /ba spu'i grangs kyi 'byung po ste/ /bye ba phrag gsum phyed bcas rnams/ /skra yi grangs kyis grub pa gnas/ / ji ltar phyi rol de bzhin lus/ /dbugs drug rnams kyi chu srang ste/ chu srang drug cus chu tshod do/ /chu tshod dag gis yud tsam cig /bzhi chas dman pa bzhi rnams kyis/ /thun tshod phyed pa de gcig 'gyur/ /lnga rnams kyis ni dus sbyor 'gyur/ /dus sbyor phyed gnyis thun tshod 'gyur//thun tshod gnyis ni thun mtshams gcig /de bzhi rnams kyis lus can gyi/ /nyin zhag tu ni rab tu brjod/ /de yang dus sbyor bcu gnyis kyis/ /dbugs rnams drug brgya lhag pa yi/ /stong phrag nyi shu rtsa gcig gis/ /nyi ma'i dbyu gu dang mnyam pas/ / zla phyed nyi shu rtsa bzhi dang / /de bzhin zla ba bcu gnyis kyis/ /dus tshigs drug gis ji bzhin bshad/ /sbyor ba'i dus ni mnyam pa bzhis/ /dus gsum gyis te bgrod gnyis kyis/ /de ltar lus la nyin zhag 'gyur/ /dbugs rnams dgu brgyas zla ba phyed/ /zla ba brgya phrag bco brgyad kyis//sum cu drug gis dus tshigs bshad/ /lnga stong bzhi brgyas sbyor ba'i dus/ /bdun stong nyis brgyas gsum can dus/ /bgrod pa brgyad brgyas lhag pa yi/ /stong phrag bcus so de bzhin du/ /gnyis kyis lo gcig brjod par bya/ /'pho ba la ni dbu ma'i dbugs//lnga bcu rtsa drug rkang par bcas/ /bdun cu rtsa lngas lhag pa yi/ /brgya phrag drug rnams bcu gnyis la'o/ /de rnams lo brgya'i dbugs rnams kyis/ /phyogs gsum dang ni lo gsum mo/ /a wa d+hU tI'i dus su 'gyur/ /srog chags rnams la 'chi ster byed//brkyang ma la ni nyin mtshan du/ /gal te rlung gis 'bab byed na/ /de las lo gsum na 'chi ste/ /zla ba'i 'chi ltas las 'gyur ro/ /gang tshe nyi mar nyin zhag lnga/ /lus can rnams kyi srog 'bab na/ /de las lo gsum na 'chi 'gyur/ /g.yas su nyi ma'i 'chi ltas kyis//gang tshe g.yon gyi rtsa la srog /'di ni nyin zhag gsum rgyu na/ /lte bar khyim gyi 'dab ma 'dor/ /lo gsum nas ni bgrod par zad/ /gnyis par nyin zhag drug de ltar/ /zla ba gsum la nges par 'bab/ /de ltar zla ba gsum gsum gyis/ /nyin zhag gsum gyi rnam 'phel las//'dab ma bcu gcig rnams ni 'di/ /lo gsum rim pas 'dor bar byed/ /sum cu rtsa gsum ji srid pas/ /nyin zhag g.yon nas bar med 'bab/ /yon tan gsum gyi dbye ba yis/ /de nas nyi mar yang dag 'jug /nyin zhag gnyis te de nas ni//dbus su lte bar yang dag 'jug /srog ni zhag gcig de nas ni/ /'chi ba las ni dbugs rnams 'dor/ /gang tshe rlung ni nyin zhag bcur/ /g.yas pa'i rtsa la 'bab byed de/ /khyim gyi 'dab ma gnyis pa la'o/ /de nas lo gnyis kyis 'chi 'gyur/ / khyim gyi 'dab ma gsum pa la/ /tshes zhes bya bas lo gcig na'o/ /bzhi par nyin zhag nyi shu ru/ /'bab pas zla ba drug na'o/ /'dab ma lnga par nyi shu lnga/ /'bab na tshe ni zla ba gsum/ /drug par nyin zhag nyi shu drug /'bab na tshe ni zla ba gnyis/ /bdun par nyin zhag nyi shu bdun//'bab na tshe ni zla ba gcig /nyin zhag sum cu rtsa gsum du/ /'di las bar med 'bab na 'di/ /'dab ma brgyad pa dgu pa dang / /bcu pa bcu gcig pa rim pas/ /tshes phyogs lnga dang yon tan gyis/ /zhag gcig 'dab ma de rnams 'dor/ /de nas g.yas kyi rtsa spangs nas//g.yon du rlung gis 'gro byed de/ /nyin zhag gnyis su'o de nas ni/ /dbu ma'i gnas su nyin gcig 'gro/ /de ltar dbugs rnams zad byas nas/ /'chi ba las ni 'di 'pho ba'o/ /'og tu khu ba zad par 'gyur/ /ma yi rdul ni gyen du 'gro/ / rang las bag chags kyis bcings pa'i/ /rnam shes rlung dang ldan pa ni/ /shi las slar yang 'byung bar 'gyur/ /de med par ni phyi ma min/ /mkhan po las ni rig pa dang / /mar mes mar me 'gyur ji bzhin/ /rgya las rgya gzhan ji bzhin dang / /gdong las me long la gdong dang //sgra las sgra brnyan 'byung ba dang / /ji ltar me shel las me ni/ /nyi mar nyi ma med mi 'byung / /skyur ba zos las lce 'dzag pa/ /skyur min skyur ba med mi 'byung / /sa bon las ni myu gu bzhin/ /de med par ni de mi 'byung / /'bras bu rgyu yi rang bzhin las//bdag las ma yin gzhan las min/ /gnyis las ma yin rgyu med min/ /dngos po gang rnams 'ga' na yang / /skye ba 'ga' yang yod ma yin/ /pha dang ma yi dkar dmar dang / /srog dang thur sel gnyis de bzhin/ /sems kyi rdo rje yang dag ldan//lus kyi skyed par byed pa'i rgyu/ /'od dpag med dang rin chen 'chad/ /srog dang thur sel rim ji bzhin/ /lus ngag yid dang chags pa rnams/ /sems kyi rdo rje can gyi sgo/ /khu ba las ni zla ba phyed/ /khrag las nyi ma yang dag 'byung / /srog las sgra gcan grub pa'o//dus kyi me ni thur sel las/ /khu ba las ni rtsa rnams skye/ /rus pa khu ba las byung ba'o/ /rdul las khrag ni yang dag 'byung / /khrag las sha ni kun du skye/ /sha las kyang ni pags pa skye/ /rus pa las ni rkang skye 'gyur/ /khu ba rdo rje rdul dril bu/ / rtsa ni pad+ma nor bu che/ /khrag go de bzhin 'khor lo rus/ /sha ni de bzhin ral grir bshad/ /ut+pal dang pad+ma dkar/ /lus can rnams kyi pags pa rkang / /brgyad po 'di rnams rang sems kyis/ /rim pa ji bzhin zhal rnams so/ /shar gyi zhal rnams rkang par 'gyur//zla ba nyi ma mun pa med/ /khrag las 'jim pa'i rang bzhin sa/ /sha yi khams su rab brjod bya/ /khu ba las ni sra ba sa/ /rdo ba rus pa'i rang bzhin de'o/ /zla ba las ni chu 'grub bo/ /me ni khrag las grub pa yin/ /sgra gcan las ni srog 'grub po//thur sel dus me las bshad do/ /lus can kun gyi lce dang ni/ /'phyang ma khu bcas bskyed pa yin/ /g.yon dang g.yas pa'i mig nyid ni/ /rdul gyis bskyed par byas pa yin/ /srog gis nges par bskyed pa ni/ /de bzhin sna yi bu ga gnyis/ /stong pa kho nas las bskyed pa//rna ba'i bu ga gnyis de bzhin/ /thur sel nyid kyis bskyed pa ni/ /'og gi rgyu gsum de bzhin no/ /sgra gcan gyis ni bskyed pa slar/ /nu ma'i bu ga gnyis de bzhin/ /thur du rgyu las sgo nga zung / /de ltar lus kyi khams rnams 'gyur/ /khu ba nyid kyis khams rnams gsum//rdul gyis kyang 'dir rnam pa gsum/ /mdzod drug pa zhes bshad pa yin/ /lus dang lus kyi dbang po gnyis/ /chu yis bskyed pa g.yon pa ste/ /g.yas pa me yis bskyed pa'o/ /srog nyid kyis ni bdud rtsir 'gyur/ /de las gyen du rtsa gsum bshad//rlung gis bskyed pa g.yon pa ste/ /sa yi 'og gi dbus ma'o/ /g.yas pa'i rtsa ni thur sel gyis/ /bskyed par 'dir ni the tshom med/ /dpral bar zla ba'i dkyil 'khor ni/ /yang dag rdzogs lnga sku gnas so/ /mgrin pa'i phyogs su gsung rdo rje/ /nyi ma'i dkyil 'khor gang ba la'o//sgra gcan dkyil 'khor dbus gnas par/ /lus can kun gyi rnam shes so/ /sgra gcan mjug ma sa la ni/ /rin chen legs gnas the tshom med/ /don yod dus me'i dkyil 'khor la/ /sna tshogs rdo rje'i steng na gnas/ /'khor lo pad+ma rdo rje dang //rin chen ral gri lnga pa ste/ /skyes bu'i rdo rje nor bu dang / /sangs rgyas dbu la drug par bshad/ /de ltar sangs rgyas thams cad kyi/ /rigs drug 'di rnams stobs chen yin/ /sa yis dri ni bskyed bya ste/ /ro ni me yis smin las 'gyur/ /chu las myu gu la sogs 'gyur//reg bya 'di ni rlung las 'gyur/ /srog gi rlung las sgra 'byung ste/ /thur sel las ni chos kyi khams/ /yid kyi dbang po de nyid la'o/ /lus can kun gyis shes par bya/ /gshin rje mthar byed rus pas bskyed/ /khrag las shes rab mthar byed bshad//pad+ma mthar byed rtsa rnams las/ /sha las bgegs mthar byed pa bshad/ /rkang las kyang ni mi g.yor brjod/ /Tak+ki rgyal po pags pa las/ /dbyug pa sngo 'gyur ba spu las/ /sen mo las kyang stobs po che/ /skra las gtsug tor 'khor lo can/ /'og gi skra las gnod mdzes rgyal//lag pa rkang pa'i tshigs rnams gang / /khyim rnams yin te sa sogs bzhi'o/ /yon tan gsum gyi dbye ba rnams/ /de rnams bcu gnyis su ni bshad/ /sor mo rnams kyi tshigs rnams ni/ /dus tshigs nyin zhag drug cu rnams/ / lus can rnams kyi steng 'og tu/ /gang gnas so rnams rgyu skar 'dir/ /d+h+ru ba khu bas spyi bor son/ /ri byi 'og tu son ba'i rdul/ /ji ltar phyi rol de bzhin du/ /lus la mngal nas nges par skye/ /bden don rnam pa bcu gnyis pa/ /bcu gnyis phyag gis he ru ka /yan lag bcu gnyis 'gog pas so//gnas skabs las ni zhal bzhi'o/ /phyag ni bcu drug zla ba'i cha/ /de nyid rnam pa bcu drug rig /bu ga brgyad po 'gog pa yis/ /dbang phyug dam pa zhal brgyad pa'o/ /zla ba nyi ma mun pa me/ /gang gi zhabs kyis 'gog mdzad pa/ /zla phyed rnams ni bkag mdzad nas//nyi shu rtsa bzhi'i phyag rnams kyis/ /zhal bzhi rnams kyis snga ma bzhin/ /dus kyi 'khor lo yang dag byung / /ka sogs gsal byed bkag pa las/ /sum cu rtsa bzhi'i phyag gis gzhan/ /dbyangs rnams bcu drug 'gog pa yis/ / bcu drug zhabs rnams bshad pa'o/ /sgo dgu rnams ni 'gog pa yis/ /rdo rje 'jigs byed zhal dgu pa/ /de lta bu sogs rgyud rnams ni/ /lus ngag sems rnams 'gog pa las/ /de dag sa las byis rnams la/ /rgyal ba'i dbang pos bstan pa yin/ / zhes so/ /rtsa ba'i rgyud las gzhan yang rgya cher gsungs te/ byis pa rnams kyis rtogs pa'i don du cung zad bshad pa yin no/ /rigs kyi le'u 'di nyid kyi rtsa'i kun du spyod pa ni/ 'khor lo bde mchog nyung ngu'i tshigs su bcad pa phyed dang bcu gsum gyis bsdus pa'i don gyi 'grel bar shes par bya'o zhes pa de bzhin gshegs pa'i nges pa ste//rgyud ni rgyud gzhan gyis rtogs par bya'o/ /de ltar tshigs bcad sum cu rnams kyis rtsa ba'i rgyud kyi nges pa kye'i rdo rje'i rigs kyi le'ur bcom ldan 'das kyis gsungs pa'o zhes pa kye'i rdo rje'i 'grel pa drug stong par gtum mo'i rnal 'byor sdud pa dang //bskyed pa'i rgyur gyur pa'i rigs kyi le'ur yongs su bcad pa lnga pa'o/ /rigs kyi le'u rdzogs so// //sna tshogs sgro rnams kyi ni don tsam bstan/ /longs spyod rdzogs skur spyi bos phyag 'tshal nas/ /theg pa 'di la gsang sngags 'di nyid ni//brda yis rigs sogs don 'dir bshad par bya/ /sangs rgyas rnams kyi sngags kyi brda/ /rgyud du rnam gnyis gsal mdzad de/ /de bzhin nyid kyi brda can gcig /tha snyad rab brjod gnyis pa'o/ /de bzhin nyid brda zhes bya ba/ /sems can kun gyi skad can tshig /chos kyi dung ste sgra chen ldan//chos kyi gaN+DI sgra bo che/ /mi gnas mya ngan 'das pa po/ /kun du 'gro ba'i ngag tu brjod/ /gang la tha snyad rab brjod sngags/ /brda yis don ni gsal byed pa'o/ /don ni rjes 'gro'i bzlas pa ni/ /rang bzhin med pa mdzes pa yis/ /yan lag dbye ba med pa'i sngags//ma ning go 'phang la gnas bzlas/ /srog ni rgyun mi 'chad 'gyur spro/ /a wa d+hU tI'i gnas son bzlas/ /stong phrag nyi shu rtsa gcig dang / /drug brgya nyin dang mtshan mo la'o/ /nyin zhag lnga yis 'bum phrag ste/ /stong phrag brgyad rnams lhag pa'o//nag po'i tshes gcig nas brtsams te/ /gang ba gsum byung bar du'o/ /dkar po'i tshes gcig nas brtsams nas/ /rdzogs pa gsum gyi bar du bzlas/ /skya rengs 'char ba'i dus su ni/ /zla ba nya la de 'grub bo/ /rdo rje sems dpar phyag byas nas/ /chos kyi 'khor lo rab skor byed//bzlas pa stong phrag brgyad rnams dang / /khri phrag bzhi dang de bzhin du/ /'bum phrag drug gis zla ba gcig /srog gi bzlas pa 'grub par byed/ /phreng bas ma yin brjod pa min/ /sbyin sreg sngags kyis mchod pa dang / /tshim par byed dang cho ga gzhan/ / gzhan dang gzhan rnams rnam par 'jig /bzlas pa 'di yis nus med gang / /byis pa'i blo can sngags pa rnams/ /de rnams la ni bgrang phreng gi /tha snyad rab brjod gsal bya ste/ /phyi rol longs spyod 'dod rnams la/ /sngags pas bsod nams thob byed du'o/ /nyin mtshan du ni dbu mar srog /zhugs pas nad rnams 'phrog par byed/ /tshes kyi nyin zhag srog bcings na/ /'dis ni mkha' spyod nyid ster byed/ /zla gcig srog bsang snying gar gnas/ /rnal 'byor pa rnams 'chi med 'gyur/ /lte ba'i zla drug bsregs na ni/ /'di yis thams cad mkhyen nyid ster//dpral ba mgrin pa'i 'khor lo dang / /snying ga lte bar go rims bzhin/ /mi rnams kyis ni brgyal dang bcings/ /bsad dang ji bzhin bsregs pas 'di'o/ /srog dang thur sel 'gog pa yi/ /'dod chags bral ba nyid 'dod do/ / bsad dang bsregs pa gnyis dag gis/ /sngags pa sangs rgyas nyid du 'gyur/ /srog dang thur sel zad pas 'dir/ /yan lag bcu gnyis zad par 'gyur/ /rgyu dang 'bras bu 'gog pa yis/ /sangs rgyas nyid du su mi 'gyur/ /ji srid srog chags rnams kyi srog /rgyu ba de srid yang srid pa'o//srog gi rgyu ba rnams zhig na/ /'chi ba med cing yang srid med/ /ces pa de ltar sngags kyi brda ma ning gi bzlas pa ste/ /de bzhin nyid kyi brda yis shes par bya'o/ /'dir bcom ldan 'das kyis bka' stsal pa/ de nas 'di las sngags kyi le'u bshad par bya'o//'di lta ste 'byung po thams cad pa'i gtor mi'i sngags zhes pa thams cad dang 'byung ba pa rnams ni 'byung po thams cad pa ste/ de'i dang de rnams kyi sngags grangs ji lta ba bzhin no/ /oM a kA ro mu khaM sarba d+ha r+m+mA NAM/ a d+ya nu t+pa n+na twA ta/ ces pa la 'dir a yig gi sgra yis gzhom du med pa'i sgra ste/a yig yig 'bru kun gyi mchog /don chen 'gyur med dam pa yin/ /srog chen po ni skye ba med/ /tshig tu brjod pa spangs pa ste/ /zhes pa la sogs pas sgyu 'phrul dra bar rig pa'o/ /thams cad ni thams cad mkhyen pa ste/ kun mkhyen kun rig dam pa ste//bdag rig gzhan rig thams cad pa'o/ /kun la phan pa'i gang zag mchog /'jig rten dpe las 'das pa ste/ /shes dang shes bya'i bdag po mchog /ces pa la sogs pa thams cad mkhyen pa'i sngags sems can thams cad kyi skad kyi gsung ngag ces pa nges pa'i don to//sa la sogs pa'i 'byung ba rnams las skyes pa ni 'byung ba pa rnams te/ phung po lnga'i ngo bo nyid kyi chos can rnams so/ /de rnams kyi sngags ni phung po lnga'i bdag nyid can gyi yig ge lnga rnams zhes pa ste/ oM yig gis de rnams kyi gzugs kyi phung po sku rdo rje'o//AHyig gis ni 'du shes kyi phung po ste gsung rdo rje'o/ /hUM yig gis rnam par shes pa'i phung po ste thugs rdo rje'o/ /swA yig gis tshor ba'i phung po'o/ /hA yig gis 'du byed kyi phung po'o/ /de rnams la gtor ma dbul ba ste/ mthar hUM yig gsum dang phaT yig gnyis kyis phyir btang ba'o zhes pa'o/ /de ltar oM yig gis sbyong ba'o/ /AHyig gis rgyas par byed pa'o/ /hUM yig gis sbar bar byed pa'o/ /swA yig gis bdud rtsir byed pa'o/ /hA yig gis 'gugs par byed pa'o/ /hUM yig gsum gyis dbul ba'o//phaT yig gnyis kyis phyir btang ba'o/ /lag pa g.yon pas sbyong ba ste/ lag pa g.yas pas rgyas par byed pa'o/ /thal mos bkab pas sbar ba'o/ /nam mkha' lding gi phyag rgyas bdud rtsir byed pa'o/ /khams gsum las rnam par rgyal ba'i phyag rgyas dgug pa'o//rdo rje'i phyag rgyas dbul ba'o/ /lag pa'i phyag rgyas se gol sbyar nas gshegs su gsol ba'o zhes pa'o/ /phyag rgya bcing ba 'di rgyud gzhan du shes par bya'o/ /de bzhin du de bzhin gshegs pa rnams kyi sa bon ni grangs ji lta ba bzhin du 'di lta ste/ b+h+rUM yig gis rnam par snang mdzad de spyi bor ro//AM yig gis rin chen 'byung ldan te lta bar ro/ /dzr-IM yig gis 'od dpag tu med pa ste mgrin par ro/ /khaM yig gis don yod grub pa ste gsang bar ro/ /hUM yig gis mi bskyod pa ste snying gar ro/ /de ltar pi tsu badzra'i sku la dgod pa byas nas rdo rje mkha' 'gro gzhan rnams kyi yang ngo zhes pa nges pa'o//de nas phyag bcu drug pa'i sngags ni/ oM de ba pi tsu badzra hUM hUM hUM phaT swA hA zhes pa ste 'dir nges pa'i don ni oM yig gis lha rnams kyi gdan yin pa ji lta ba de ltar sngags kyi yi ge dang pos lha 'grub pa'o/ /sa bon lhag ma rnams kyis yan lag dgod pa ste/mig la sogs pa la rim pa ji lta bas so/ /hUM yig gsum gyis ye shes sems dpa' 'gugs pa ste/ phaT yig gis gzhug cing swA yig gis dgyes par byed pa dang / hA yig gis ro mnyam par byed pa'o zhes pa kye'i rdo rje'i snying po'o//de ltar sngags rnams thams cad oM yig dang po can dang / swA hA'i mtha' can dang / hUM phaT spel ba'i dbus so zhes pa thams cad du nges pa'o/ /de ltar snga ma bzhin du/ oM ki Ti ki Ti badzra hUM hUM hUM phaT swA hA zhes pa phyag drug pa'i'o/ /de bzhin du phyag bzhi pa'i oM dz+wa la dz+wa la b+h+yo hUM hUM hUM phaT swA hA/de bzhin du phyag gnyis pa'i oM trai lo kyA k+She pa hUM hUM hUM phaT swA hA/ /'di sngags btu ba'i li'u la hUM yig dang phaT yig ni man ngag las shes par bya'o/ /thams cad kyi sku dang gsung dang thugs byin gyis brlabs pa'i sngags ni oM yig gis sku byin gyis brlab pa ste/rnam par snang mdzad zla ba'i dkyil 'khor la'o/ /AH yig gis gsung byin gyis brlab pa ste/ nyi ma la 'od dpag tu med pa'o/ /hUM yig gis thugs byin gyis brlab pa ste snying gar sgra gcan gyi dkyil 'khor la mi bskyod pa'o/ /'di drang ba'i don du bdag med ma la sogs pa dbyangs rnams sngags btu ba'i don du brjod par bya ste/a A/ i I/ u U/ r-i r-I/ l-i l-I/ e ai/ o au/ aM aH/ nges pa'i don gyis yang so sor bsdu ba'i klog pas gzung bar bya ste/ a i r-i u l-i ka /a e ar o al tsa/ha ya ra wa la Ta sa/ zhes pa'i sa bon rnams dkar po'i phyogs la zla ba'i cha rnams kyi'o/ /byis pa klog pa'i tshul gyis drang ba'i don gyis ni bcom ldan 'das kyis gsungs pa ma yin no zhes pa rtsa ba'i rgyud du nges pa'o/ /de bzhin du grong khyer bskyod pa'i sngags ni/oM a ka tsa Ta ta pa ya sha swA hA/ zhes pa drang ba'i don gyis so/ /nges pa'i don gyis ni a ku ha rnam par bcad bya rnams mgrin gyur ro/ /i tsu ya sha rnams rkan gyur ro/ /r-i Tu ra Sha rnams spyi bo las gyur pa'o/ /u pu wa dang mchu can rnams mchu gyur ro/ / l-i tu la sa rnams so gyur ro/ /oM a A ha hA nga nya Na ma na ng+ka swA hA/ zhes pa grong khyer dkrug pa'i sngags so/ /sngags btu ba'i le'u bla ma'i ngag las shes par bya'o/ /rtsa ba'i rgyud du nges pa'i don gyis man ngag ni A li zla ba'i cha'i dbye bas yud tsam sum cu rnams so/ /nyin zhag so so la nyi ma'i gsal byed drug cu rnams dbyu gu'i dbye bas bzlas par bya'o//a ka tsa Ta ta pa ya sha'i sgra yis A li dang kA li'i nges pa'i don gyis brjod de/ A li dang kA li'i bzlas pa 'bum phrag bzlas pas 'jig rten de gsum bskyod par byed na grong khyer gcig tsam lta ci smos zhes pa'o//A li dang kA li brjod par bya ste/ 'di lta ste/ /a A i I r-i r-I u U l-i l-I e ai ar Ar o au al Al ha hA ya yA ra rA wa wA la lA zhes pa spro ba'i rim pas A li'i bzlas pas dbugs 'jug pa'o/ /dbugs 'byung bas kA li ste/ / ka kA kha khA ga gA g+ha g+hA nga ngA/ tsa tsA tsha tshA dza dzA dz+ha dz+hA nya nyA/ Ta TA Tha ThA Da DA D+ha D+hA Na NA/ pa pA pha phA ba bA b+ha b+hA ma mA/ ta tA tha thA da dA d+ha d+hA na nA/ /sa sA wa wA Sha ShA sha shA ng+ka R+YA zhes pa ste/ dang po oM yig bskyed pa la'o/ /dgug pa la mthar bo ShaT sbyin par bya ste/ de ltar grong khyer bskyod pa'i sngags so//lha gcig gi bsam gtan dang me tog dmar po la bzlas pas dang / sbyin sreg gis so zhes pa 'chad par 'gyur ba la brjod par bya'o/ /de bzhin du ku ru kul+le'i sngags brjod par bya ste/ 'dir oM yig gi rten sku 'grub pa'o/ /hrIHyig gis lha mo'i ngag rdzogs pa'o//rlung gi rigs la ku ru kul+le 'od dpag tu med pas rgyas btab pa'o/ /dpral bar oM mo/ /lce la hrIH'o/ /mgrin pa la ku'o/ /snying gar ru'o/ /lte ba la ku'o/ /gsang bar l+le'o zhes pa yan lag dgod pa'o/ /dbugs rngubs pa bkang nas 'bum phrag gcig bzlas par bya zhing /dbugs 'byung ba'i dus su bgrang phreng bskyod par mi bya'o zhes pa ku ru kul+le'i sngags so/ /da ni bsrung ba'i sngags kyi nges pa'i don brjod par bya ste/ oM yig gis 'jam pa'i stan brjod do/ /dri bzang po'i sa gzhi can gyi gnas yid du 'ong ba zla ba lta bu yang ngo / /ra yig gis nyi ma bdun gyi nyi ma'i dkyil 'khor ro//k+Sha yig gis sna tshogs rdo rje'o/ /de'i 'og dang steng dang phyogs thams cad du rtsibs bcu pa'i 'khor lo byas nas de nas dbus su hUM yig las khro bo'i rgyal po'i dbang po'o/ /shar gyi rtsibs la gshin rje mthar byed do/ /lho'i rtsibs la shes rab mthar byed do//nub [(]gyi [,]kyi [)]rtsibs la pad+ma mthar byed do/ /byang gi rtsibs la bgegs mthar byed do/ /mer mi g.yo ba'o/ /bden bral gyi phyogs su 'dod pa'i rgyal po'o/ /rlung gi mtshams su dbyug pa sngon po'o/ /dbang ldan gyi mtshams su stobs po che'o/ /steng gi rtsibs la gtsug tor ro//'og tu gnod mdzes rgyal po'o/ /de nas gnyis pa brjod pas re ba'i nyi ma'i dkyil 'khor ro/ /k+Sha yig gis sna tshogs rdo rje ste de yis gcig tu 'dres par gyur pas rdo rje rab gsum mo/ /hUM yig gsum gyis rdo rje'i sa gzhi dang khang pa brtsegs pa dang rdo rje pad+ma'i gdan no zhes pa'o//phaT yig gis gdug pa can la phur bus 'debs pa'o/ /swA yig gis sangs rgyas dang byang chub sems dpa' rab tu spyan 'dren pa'o/ /hA yig gis ni mchod pa la sogs pa mtha' dag dang sdig pa bshags pa la sogs pa gsungs par 'gyur ro zhes pa sngags 'di'i nges pa'i don to//da ni rtsa ba'i rgyud du gsungs pa'i las nyi shu rtsa bzhi sgrub par byed pa rnams su 'gyur zhing sngags kyi tshig rnams brjod par bya'o/ /'dir nyung ngu'i rgyud du lugs dang mthun pa dang lugs las bzlog pa las thams cad gdug pa'i slob dpon yongs su mi shes pa rnams la sbas te/bla ma dam pa'i brgyud pa'i rim pa la sogs pas shes par bya yis/ glegs bam bklags pas ni ma yin no/ /gzhan du na rgyud gzhan bltas nas gang rigs pas 'thad pa rgyud mang por yang dag par rtogs par byas pa'i bcom ldan 'das kyi ngag de gzung bar bya'i/blun po'i dad pa nyid kyis ni ma yin no/ /de skad du bcom ldan 'das kyis gsungs pa/ nga'i gsung ni dang por dge ba/ bar du dge ba/ tha mar dge ba kho na ste/ dang por dge ba bar dang tha mar mi dge ba ni ma yin zhing dang po dang /bar du mi dge tha mar dge ba/ ji ltar byis pa'i skye bo rnams kyis kun tu brtags pa/ dang por rnam par rtog pa'i sgom pa dang / bar du dbang po gnyis kyi bde ba bsgom pa dang / tha mar rnam par mi rtog pa stong pa nyid bsgom pa bde ba chen po sgom pa'o zhes pa ma rungs pa'i tshig gi rgyu 'drar de las skye ba'i 'bras bu thams cad du mthong gis/ko tra ba yi sa bon las/ /sA lu'i 'bru ni 'byung ba med/ /rnam rtog sa bon las byung ba'i/ /'bras bu rnam rtog bcas par 'gyur/ /rnam par mi rtog las skyes pa'i/ /'bras bu rnam par mi rtog 'gyur/ / rgyu de'i phyir dang por dge ba/ bar du dge ba/ tha mar dge ba'o/ /ji ltar sa bon de bzhin ljon/ /ji ltar ljon shing de bzhin 'bras/ /'jig rten 'di kun du mthong ste/ /de ni rten cing 'byung ba nyid/ /gzhan gyi rigs kyi sngags gang yin/ /de ni las gzhan sgrub byed min/ /'jig rten du ni 'ga' zhig tu'ang //nyi mas tsha ba zhi byed min/ /kye yi rdo rje'i rtsa rgyud du/ /ji ltar bdag la gsal gsung bzhin/ /de nyid nyung rgyud 'di ru ni/ /rgyas bshad bdag gis brjod par bya/ /sa yi sa bon gyis rengs byed/ /rmongs dang phur bus gdab de bzhin/ /rtag tu zhi byed chu'i sa bon//de bzhin rgyas dang dug med pa'o/ /me yi sa bon cher 'gugs byed/ /dbang dang bskyod pa rtag tu'o/ /sdang byed bskrad pa rlung rnams kyi/ /de bzhin du ni dug 'phel ba'o/ /stong pa'i sa bon dug gcod byed/ /de bzhin gsod dang 'tshe ba'o/ /gso dang bslang dang dga' ba ni//ye shes sa bon gyis grub pa'o/ /lkugs pa nyid dang 'on nyid dang / /ma ning byed pa nyid kyang ni/ /thugs gsung sku yi sa bon gyis/ /rim pa ji bzhin sngags pas byed/ /sa chu me rlung stong pa dang / /ye shes dkyil 'khor sbyor ba las/ /rengs pa la sogs las rnams ni//sgrub po mchog gis sgrub par byed/ /ma ning byed dang lkugs nyid dang / /long ba dang ni sna 'gags dang / /'on pa nyid dang smyo ba nyid/ /snga ma'i sa bon rnams kyis bsgrub/ /ri bo ri khrod sman ljongs dang / /rgya mtsho chen po'i 'gram rnams dang / / gdod nas grub pa'i dur khrod de/ /gnas 'di rnams su bya ba yin/ /sngags bzlas de bzhin bsam gtan dang / /sbyin sreg dkyil 'khor bzhengs pa ni/ /so so'i las dang rjes mthun pas/ /gzhan du dngos grub sbyin mi 'gyur/ /skyes pa bud med gnas gzhan du/ / sngags dang lha ni sgrub pa min/ /de la sngags kyis rab bskul nas/ /lha ni las rnams byed par 'gyur/ /de phyir mkhas pa rnams kyis ni/ /ming dang sku yi bzlas bsgom bya/ /rtsa ba'i sngags ni sku ru 'gyur/ /snying po zhes bya mthu ldan gsung / /de bzhin nye ba'i snying po ni//thugs kyi sngags su brjod par 'gyur/ /ye shes sa bon zhes bshad par/ /ye shes sngags su de brjod bya/ /sa bon nye ba'i snying po dang / /snying po dang ni rtsa ba'i sngags/ /ye shes thugs dang gsung dang sku/ /rim bzhin bsgom bya bzlas bya ste/ /ji srid dngos grub gyur gyi bar//'bad pas bzlas bya mchod par bya/ /gzhan du cho ga nyams pas ni/ /sngags kyi dngos grub 'gyur ma yin/ /dad pas bzung ba 'di yis ni/ /lus ni nyon mongs 'ba' zhig go/ /ya ra la wa yi ge gang / /rlung me sa dang chu las skyes/ /shar dang lho dang nub dang ni//byang rnams su ni nges sbyar bya/ /ring po me dang bden bral dang / /rlung dang dbang ldan rim pa las/ /steng dang 'og tu haM ha sbyin/ /dbus su aM aHrab mchod bya/ /sangs rgyas kun dang bla ma dang / /dam pa'i chos ni klog pa yi/ /don du mdun du maN+Dal bya//gzhan pa rgyal ba mnga' bdag nyid/ /rlung gi dkyil 'khor chos kyis ni/ /zlum po shar gyi lus 'phags po/ /me yi dkyil 'khor ngo bo yis/ /'dzam bu gling ste zur gsum pa/ /gru bzhi nub kyi ba glang spyod/ /sa yi dkyil 'khor mtshan nyid can/ /chu yi dkyil 'khor chos can gyis//zla phyed byang gi sgra mi snyan/ /stong pa'i ngo bos zla ba yi/ /dkyil 'khor mtshan nyid tshangs sgo nga / /'og tu ye shes ngo bo yis/ /dus me nyi ma'i dkyil 'khor ro/ /dbus su thig le rnam bcad ni/ /steng 'og lha yi ri bor 'gyur/ /'di ltar maN+Dal byas nas ni//de nas sngags sogs bzlas par bya/ /sa la maN+Dal gzhan pa ni/ /rdul tshon dkyil 'khor bzhin du bya/ /phung po khams drug gzugs la sogs/ /sum cu drug gis rtag tu mchod/ /sa dang chu dang me dang rlung / /khu ba rdul ni de bzhin te/ /khams drug ces par bshad byas pa//lus can rnams kyi gzugs phung po/ /mgrin gyur rkan gyur spyi bor gyur/ /mchur gyur sor gyur sna ldan te/ /'du shes dang ni rnam drug bstan/ /dngos dang dngos med don gsal byed/ /mig dang rna ba sna dang lce/ /lus dang de bzhin yid dbang po/ /rnam shes phung por bshad pa ste//mig la sogs pa rnam pa drug /de bzhin gzugs dang sgra dang ni/ /dri rnams dang ni ro dang ni/ /reg bya dang ni chos kyi dbyings/ /myong phyir tshor ba rnams su bshad/ /de bzhin dbang po drug sgo nas/ /rnam shes rnams ni rab 'jug cing / /yul dang dbang bo rab 'jug byed/ /'du byed rnam drug rab tu bshad//rtag tu srog dang thur sel dag /steng dang 'og gi lam gsum po/ /rtsa drug rnams su 'bab byed pa/ /ye shes phung po'ang rnam pa drug /sum cu bdun pa sems chen po/ /dam pa sum cu rtsa drug gi /khams kyi bskor ba rnal 'byor pas/ /a sogs ka sogs kyis mchod bya//a sogs ka sogs rang bzhin gyis/ /khams rnams bdun cu rtsa gnyis te/ /de drug ha sogs yi ge rnams/ /thung ngu ring po'i rab dbye las/ /bdun cu rtsa gnyis 'dir bshad do/ /dbyangs de sum cu rtsa drug nyid/ /a sogs ka sogs yang dag ldan/ / yi ge brgya ni brgyad lhag pa/ /bgrang phreng du ni rab brjod bya/ /rnal 'byor pa yis sngags bzlas pa'o/ /gsal byed sum cu drug thung ba'i/ /bco brgyad dbyangs rnams dang ldan pa/ /brgyad lhag brgya yi phyed rnams kyis/ /bgrang phreng du ni der brjod bya/ /rgyu skar rkang pa'i dbye ba yis//gsum par yongs su brjod par bya/ /rgyu skar phyed kyi cha yis ni/ /bzhi pa de nyid gang phyir yin/ /sum cu drug gi dbyangs dbye bas/ /lnga par yongs su brjod par bya/ /rgyu skar longs spyod dbye ba yis/ /drug par yongs su brjod par bya/ /bco brgyad dbyangs kyi dbye ba yis//bdun par yongs su brjod par bya/ /slar yang sum cu rtsa drug gi /gsal byed dbye bas brgyad pa'o/ /dka' thub can gyi bgrang phreng gis/ /'di ltar rnam pa brgyad du bshad/ /shel gyi bco brgyad rnams kyis gcig /brtul zhugs can gyis zhi ba byed/ /mu tig sum cu drug dbyangs su//brjod pas mi rnams rgyas pa'o/ /nyi shu rtsa bdun rgyu skar gyi/ /mi sos gsod la bshad pa'o/ /de yi nyis 'gyur bong bu'i sos/ /sdang bar byed dang skrod la'o/ /gsal byed sum cu drug dag pas/ /dbang du byas sogs po te tses/ /dbyangs dang gsal byed yongs bsres pa//bzhi lhag pa yi lnga bcu yis/ /pad+ma zhes pa'am yang na ni/ /tsan+dan sa bon gyis dgug pa'o/ /rgyu skar phyed kyi rkang pa yis/ /rmongs par byed la lung thang bshad/ /dbyangs dang gsal byed rkang pas dag /rengs la ru drA k+Sha ru bshad/ /de ltar dag pa'i las la ni//dag pa rnam pa brgyad du bshad/ /'dres pa rnam pa sna tshogs pa'i/ /sa bon nam 'dir nor bus bya/ /khams kyi kha dog dbye ba yis/ /ji ltar rnyed pa de bzhin byos/ /de nas 'di las rnal 'byor pa'i/ /gang gis myur du 'grub byed 'gyur/ /rigs las skyes par gyur pa'i sngags//sngags kyi mtshan nyid bshad par bya/ /a ku ha rka mgrin byung gang / /dbyangs dang gsal byed mtshan nyid rnams/ /nam mkha'i khams las yang dag byung / /de rnams ha yig shes byed kyis/ /i tsu ya sha rkan las byung //dbyangs dang gsal byed mtshan nyid rnams/ /rlung gi khams las yang dag byung / /de rnams ya yig shes byed kyis/ /r-i Tu ra Sha spyi bo byung / /dbyangs dang gsal byed mtshan nyid rnams/ /me yi khams las yang dag byung / /ra yig shes byed kyis yin no/ /u pu wa wa mchur gyur gang //dbyangs dang gsal byed mtshan nyid rnams/ /chu yi khams las yang dag byung / /de rnams wa yig shes byed kyis/ /l-i tu la sa so skyes gang / /dbyangs dang gsal byed mtshan nyid rnams/ /sa yi khams las yang dag byung / /de rnams la yig las shes byed//rjes su nga ro rnam bcad kyang / /dbyangs dang gsal byed spangs pa ste/ /ye shes khams las yang dag byung / /de ltar khams drug rigs can te/ /sa dang chu dang sreg za rlung / /khu ba dang ni rdul gyi rigs/ /khams drug can du 'dir bshad de/ /skyes bu gang zag chen po'o//gtso bo a sogs ka sogs bdag /phung po khams kyi sngags bdag nyid/ /so sor sdud pa bde byed kyi/ /sgra grub pa yi don du bstan/ /sngags grub pa yang de kho na/ /thams cad mkhyen pa'ang de bzhin sngags/ /byis pa klog pa'i rim pas min/ / mgrin pa rkan dang mgrin pa mchu/ /'dres pa gsal byed dbyangs rnams gang / /gnas gnyis pa gang gzhan pa rnams/ /de rnams rang bzhin gcig skyes min/ /mgrin pa la sogs gnas gcig tu/ /rang bzhin dag pa las skyes dbyangs/ /sngags rnams rtag tu brjod byas pa//de ni gnas gnyis brjod pa min/ /a yig dbyangs dang yang dag ldan/ /gang zhig rang gi gnas mi 'dor/ /de ni rang bzhin gyis dag pa/ /gsal byed rnam bcad thig le can/ /e yig sogs dbyangs dang ldan pa/ /gnas gnyis pa ru gang 'jug pa/ /rang bzhin dag pa skyes de min//gsal byed nyis 'gyur du 'gyur ro/ /dbang chen dkyil 'khor ser po ste/ /laM yig yi ge las byung ba'o/ /chu yi dkyil 'khor dkar po ste/ /waM yig yi ge las byung ba'o/ /me yi dkyil 'khor dmar po ste/ /re ba'i yi ge las byung ba'o//rlung gi dkyil 'khor nag po ste/ /yaM yig yi ge las byung ba'o/ /nam mkha'i dkyil 'khor ljang gu ste/ /ha yig yi ge las byung ba'o/ /rnam bcad thig le las byung ba/ /ye shes kha dog kun las skyes/ /de bzhin ta sde l-i yig go/ /yi ge las skyes ser po ste//pa sde la sogs u yi ge /dbyangs las byung ba dkar por bshad/ /Ta sde las byung r-i yi ge /dbyangs las byung ba dmar po'o/ /tsa sde las skyes i yi ge /dbyangs las byung ba nag por bshad/ /ka sde la sogs a yi ge /dbyangs las byung ba ljang gur bshad//de bzhin sa yig las byung dang / /a la yig las byung ser po'o/ /dkar po [00]ba yig las byung dang / /o yig yon tan las byung ba'o/ /dmar po Sha yig las byung dang / /ar yig yon tan las byung ba'o/ /nag po sha yig las byung dang / /e yig yon tan las byung ba'o//ljang gu [0]th+ka yig las byung dang / /a yig yon tan las byung ba'o/ /a yi r-i u l-i zhes 'di/ /dag pa rang bzhin las skyes dbyangs/ /a e ar o al zhes 'di/ /yon tan rang bzhin gnyis las skyes/ /ha ya ra wa la zhes 'di/ /yaN du bsgyur ba de bzhin gnyis//phal pa gtso bos gnyis dbus su/ /gtso bo dkyil 'khor 'dren pa'o/ /slar yang sde pa so so la'ang / /rang bzhin rnam pa lnga ru bshad/ /nga nya Na ma na zhes 'di/ /stong pa'i khams las byung rnams so/ /g+ha dz+h+ha D+ha b+ha d+ha 'di rnams/ /rlung gi khams las yang dag byung //ga dza Dab da 'di rnams/ /me yi khams las yang dag byung / /kha tsha Tha pha tha zhes 'di/ /chu yi khams las byung ba rnams/ /ka tsa Ta ba ta 'di rnams/ /sa yi khams las byung ba rnams/ /rigs drug yi ge'i dbye ba yis/ /rang bzhin gtso bos dbye ba las//yi ge so so'i dbye ba yis/ /rigs ni rnam pa lnga ru 'gyur/ /ji ltar sa dang mjug ma ser/ /de ltar gzugs dang lus dbang po/ /chu dang zla ba ji ltar dkar/ /ji ltar 'du shes lce dbang po/ /me dang nyi ma ji ltar dmar/ /tshor ba mig ste de dag kyang //rlung dang sgra gcan ji ltar gnag /de ltar 'du byed dang ni sna'o/ /ji ltar nam mkha' d+h+ru ba ljang / /rnam shes rna ba de ltar ro/ /ye shes ri byi ji ltar sngo/ /de ltar ye shes yid bshad do/ /de bzhin dri dang kha dog dang / /ro dang reg bya kho na dang / /sgra dang chos kyi dbyings kyang ni//khams drug rigs te rim pa las/ /de bzhin bshang lam rkang pa dang / /lag pa ngag gi dbang de bzhin/ /b+ha ga mchog gi dbang po yang / /sa la sogs pa'i rigs las byung / /de bzhin brjod dang len pa dang / /'gro dang bshang ba 'dzag nyid dang / /khu ba 'pho ba'i bya ba ste//'di rnams sa sogs rigs las byung / /de ltar khams drug rab tu brjod/ /phung po drug dang dbang po drug /yul dang las kyi dbang po rnams/ /las kyi dbang po'i bya ba drug /phung po drug dang khams dbye bas/ /khams rnams sum cu rtsa drug rnams/ / sum cu bdun pa shes rab ste/ /chos kun stong nyid gcig pa'o/ /khams rnams phyi dang lus la yang / /ji ltar lus la de bzhin gzhan/ /dag pa'i sa yis rengs pa yin/ /dag pa'i chu yis zhi ba'o/ /dag pa'i me yis dbang du byed/ /dag pa'i rlung gis rnam sdang byed/ /dag pa'i stong pas 'tsho byed pa'o//dag pa'i ye shes kyis gsod pa'o/ /dag pa'i las rnams drug ces pa'o/ /rnam par bsres pa gzhan rnams te/ /sa dang chu ni bsres pa yis/ /lus can kun gyi rgyas pa'o/ /rlung dang me ni rnam bsres pas/ /lus can thams cad 'gugs pa'o//rlung dang chu ni rnam bsres pas/ /mi rnams kyi ni bskyod par 'gyur/ /sa dang stong pa bsres pa yis/ /lus can rnams kyi ltung bar 'gyur/ /sa dang ye shes bsres pa yis/ /ltung ba slar yang slong bar byed/ /chu dang me ni bsres pa yis/ /skyes pa bud med 'ju bar byed//sa dang rlung du bsres pa yis/ /rmongs dang phur bus 'debs par 'gyur/ /stong pa dang ni chu bsres pas/ /sems can rnams ni brta bar 'gyur/ /stong pa ye shes bsres pa yis/ /phyir yang 'tsho ba nyid yin no/ /me dang sa ni bsres pa yis/ /lus can thams cad gdung bar byed//me dang stong pa bsres pa yis/ /lus can rnams la rims su 'gyur/ /me dang ye shes bsres pa yis/ /lus can rnams la 'khrug par 'gyur/ /rlung dang stong pa bsres pa yis/ /sna tshogs nges par skrod par byed/ /rlung dang ye shes bsres pa yis/ / skad cig gis ni khams gsum 'ching / /stong pa ye shes bsres pa yis/ /lus can thams cad bskyod pa'o/ /ye shes gcig pus las rnams kun/ /ye shes smra ba rnams kyis byed/ /bzlas pa ma yin bgrang phreng min/ /sbyin sreg sngags dang mchod pas min/ / las rnams thams cad rnal 'byor pas/ /bsam gtan tsam gyis 'grub par byed/ /'di ltar sngags gang rigs gsum dang / /bzhi dang lnga yi rigs rnams kyang / /khams rnams kyi ni rang bzhin las/ /cho gas mtha' yas las rnams byed/ /ces pa de ltar rigs drug sngags//dag pa dang ni phan tshun bsres/ /de rnams grangs med sems dpa' che/ /lha yi dngos grub sgrub pa la/ /khams lnga yi ni rang bzhin las/ /sngags rnams mtshan nyid brjod par bya/ /dgra dang bshes dang btang snyoms la/ /sems can don phyir brjod par bya/ /a ku ha th+ka mgrin byung gang //dbyangs dang gsal byed mtshan nyid rnams/ /stong pa rlung sogs sngags rnams kyis/ /grogs po nyid kyis rtag tu gnas/ /i tsu ya sha rkan byung rnams/ /dbyangs dang gsal byed mtshan nyid rnams/ /rlung gi khams las yang dag byung / /chu las skyes pa rnams kyi dgra /r-i Tu ra Sha spyi bo skyes/ /dbyangs dang gsal byed mtshan nyid rnams/ /me yi khams las yang dag byung / /sa las skyes pa rnams kyi dgra /u pu wa pa mchu skyes gang / /dbyangs dang gsal byed mtshan nyid rnams/ /chu yi khams las yang dag byung //me las skyes pa rnams kyi dgra/ /l-i tu la sa so skyes gang / /dbyangs dang gsal byed mtshan nyid rnams/ /sa yi khams las yang dag byung / /rlung las skyes pa rnams kyi dgra /rtag tu stong pa rlung gi grogs/ /tha mal pa chu nus med phyir//me yi grogs po rtag tu rlung / /sa ni btang snyoms nus med phyir/ /chu yi grogs po sa yin te/ /tha mal pa ni me nyid do/ /sa yi grogs po chu yin te/ /me nyid kyang ni btang snyoms pa'o/ /oM gyi yi ge spangs nas ni/ /sngags kyi yi ge dang po rigs/ /de nyid sngags kyi thugs yin te//gzugs ni rdzogs pa'i rgyu yin no/ /gang tshe sngags kyi dang po yi/ /yi ge gsal byed gzhan brtsegs na/ /de dag las der dang po bzung / /dang por brjod pa'i rgyu yi phyir/ /dbyangs dang gsal byed dbye ba yis/ /de nyid rnams la gnyis su 'gyur/ /srog gi dgra dang grogs po dang //lus kyi yang ni brjod par bya/ /srog gi dgra dang grogs po'am/ /tha mal pa ni dbyangs rnams bshad/ /lus kyi dgra dang grogs po dang / /btang snyoms pa rnams gsal byed bshad/ /dbyangs kyi dgra yis sgrub pa po'i/ /srog 'phrog byed de the tshom med//lus kyi dgra bo gsal byed kyi/ /mtshan nyid can gyis nad sogs byed/ /sde pa gcig la'ang ka la sogs/ /sngags sgrub pa la shes par bya/ /nga nya Na ma na 'di rnams/ /gzhan rnams grogs po nyid du gnas/ /g+ha dz+ha D+ha b+ha d+ha 'di rnams/ /chu las skyes pa rnams kyi dgra//ga dza Da ba da 'di rnams/ /sa las skyes pa rnams kyi dgra /kha tsha Tha pha tha zhes 'di/ /me las skyes pa rnams kyi dgra/ /ka tsa Ta pa ta zhes 'di/ /rlung las skyes pa rnams kyi dgra /de ltar phan tshun grogs po dang / /tha mal snga ma bzhin shes bya/ /sngags kyi dang po yi ge gnas//rang gi sde pa'am gzhan rnams la'ang / /sgrub pa po yi yi ge gnyis/ /skye las skyes dang ming skyes 'gyur/ /de yang rnam gnyis yongs shes bya/ /dbyangs dang gsal byed mtshan nyid do/ /skye ba'i dus su'ang dus sbyor gang / /dbyu gu lnga yi bdag nyid gyur//skyes pa'am mo yi chu srin sogs/ /de yi gsal byed sbyang bar bya/ /chu srin la ni ka sogs lnga/ /dbyu gu'i dbye bas sbyang bar bya/ /bum pa la yang nga sogs lnga/ /stong pa sogs rim dbye ba las/ /nya la'ang tsa la sogs rnams lnga/ /lug la'ang nya sogs rim pa bzhin//glang la'ang Ta sogs lnga rnams so/ /'khrig la Na sogs de bzhin no/ /pa sogs ka rka Ta sbyor la/ /ma sogs seng ge'i dus sbyor la'o/ /bu mo la ni ta sogs lnga/ /srang la de bzhin na sogs rnams/ /sdig pa la ni sa sogs lnga/ /gzhu la th+ka la sogs rnams bshad/ / sdud dang spro ba'i dbye ba yis/ /yi ge drug cu nyin mtshan la'o/ /g.yas dang g.yon pa'i rgyu ba la/ /dkyil 'khor lnga po 'bab pa rnams/ /dus drug gis ni rab dbye bas/ /phyi rol de bzhin de lus la'o/ /dbyangs rnams zla ba'i cha dbus su/ /sum cu'i dbye bas rnam sbyang bya/ /yar ngo'i tshes gcig nas brtsams te//gnam stong mthar thug sum cu'i lha/ /a i r-i u l-i zhes 'di/ /tshes gcig la sogs rim ji bzhin/ /a e ar o al zhes 'di/ /drug pa la sogs yongs su grags/ /ha ya ra wa la zhes 'di/ /bcu gcig pa sogs rnams su bshad//la sogs lnga rnams rim bzlog pas/ /nag po'i tshes gcig sogs rnams so/ /a yig la sogs lnga rnams ni/ /nag po'i phyogs kyi drug pa sogs/ /l-i yig la sogs lnga rnams gang / /dbyangs rnams bcu gcig pa la sogs/ /gang ba'i mthar ni thig ler brjod//gnam stong mthar ni rnam bcad do/ /de rnams yud tsam rab dbye bas/ /zla ba so so'i cha ru bshad/ /cha gang la ni 'char ba'i dbyangs/ /gang yin gtso bor 'gro ba yin/ /gsal byed chos can lnga rnams gang / /de rnams sa la sogs pa'i rigs/ /yud tsam dang po la dbyangs de//de yis skyes pa'i dbyangs su 'gyur/ /de yi gnyis pa gnyis pa yi/ /de ltar thams cad rim bzhin du/ /yud tsam sum cu'i dbye ba yis/ /skyes pa'i dbyangs su brjod par bya/ /sngags kyi thog ma'i sgra yis ni/ /nges par dbyangs dang gsal byed kyis/ /sgrub pa po rnams srog zad dang //nad chen byed par the tshom med/ /skya ba'i dbyangs ni mi shes dang / /gsal byed rtog pa med pa na/ /ming gi dang po'i dbyangs gzung bya/ /gsal byed gnyis kyi dang po'o/ /sngags kyi dang po'i gsal byed dam/ /dbyangs rnams bsgrub pa'i ched du yang //bsnyen pa bzlas par byed pa la/ /'dir ni las rnams drug tu gsungs/ /dang po brdeg par bya ba ste/ /de bzhin dbab dang bsreg pa dang / /de nas sngags las brta ba dang / /de nas rgyas dang mnyes pa'o/ /rnam bcad byas pa'i stong pa yis/ /sngags kyi sngon la mnan pa 'di//mtshon gyi rgyal pos bsnun pa ste/ /brgyal ba'i gnas skabs thob par 'gyur/ /sngags kyi bzlas pa 'bum gyis ni/ /sngags kyi lha ni rgyal gyur pa/ /nga rgyal yongs su btang ba ni/ /sgrub pa po yi dbang du 'gyur/ /de bzhin rlung gis mnan pa ste/ /rnal 'byor pa la 'bab par 'gyur//me yis mnan pas sreg par byed/ /de nas chu yis brta bar byed/ /sa ni spyi bor gnas pa ni/ /bzlas pas lha ni rgyas pa'o/ /mgo bor thig le chas mnan pa/ /mnyes par gyur pa mchog ster 'gyur/ /de ltar drug 'bum bzlas pa yis/ / sngon du bsnyen par gsungs pa ste/ /rtsa rgyud kun du bde gshegs kyis/ /'dod pa'i dngos grub ched du'o/ /phaT yig de bzhin hUM bau ShaT/ /na maHswA hA wa ShaT rnams/ /las drug las ni grangs bzhin du/ /sngags mthar brtul zhugs can gyis bya/ /dang por rnam snang mdzad sbyin nas//slar yang bzlas pa brtsam par bya/ /de nas dbye ba bzlas bya ste/ /bcu yi cha yis sbyin sreg bya/ /rgyud gsungs cho gas thams cad bya/ /de nas lha ni 'grub 'gyur te/ /grub pa de yis sngags pa la/ /mchog ster gang zhig don gnyer ba'o/ /rigs gzhan dang ni bya ba gzhan//dus dang de bzhin sngags kyi rigs/ /gnas dang phyogs dang rten gzhan gyi/ /las rnams kun la 'bras bu med/ /glegs bam las ni bklags pa'i sngags/ /man ngag rnam par spangs rnams kyis/ /sgrub pa rab tu byed pa'i me/ /de rnams sa la nyon mongs so//gal te glegs bam las rnyed na/ /yang dag blangs pa des ci bya/ /ji ltar bris pa bklags pa yis/ /drang ba'i don gyis rab gsal byas/ /sngags kyi dam pa'i dngos spangs rnams/ /glegs bam las bklags sngags rnams kyis/ /lha la sogs rnams sgrub pa po//nam mkha' za bar 'dod par byed/ /rang sems brtan pa'i brtson 'grus sam/ /sngags kyi bzlas pa sgrub pa po/ /gzhan don gnyer ba rnams kyi ni/ /'dod pas 'jig rten dngos grub 'gyur/ /sngags bzlas de bzhin sbyin sreg dang / /gnas dang mchod pa'i chog rim gyis//bya ba nyams na mi 'grub ste/ /tshig 'di yang dag de bzhin no/ /ston pa byang chub sems dpa' dang / /lha yis bstan pa'i ngo ru ni/ /de phyir thams cad 'bad pa yis/ /de nyid mkhas pas gzung bar bya/ /zhes pa la sogs pas rtsa ba'i rgyud du thabs gzhan gyis sngags bsgrub pa gsungs te/rengs pa la sogs pa'i las bsgrub ba'i don du'o/ /nyung ngu'i rgyud 'dir ni dgongs pa'i skad gzhan gyis don rtogs pa ste/ de kho na brjod par bya'o/ /oM hUM swA hA rengs par byed pa'o zhes pa hUM yig gis rdo rje'i sa gzhi bsgrub par bya zhing des rengs pa bsgrub par bya'o//oM aM swA hA dbang du bya ba'o zhes pa aM yig gis me'i khams bsgrub par bya zhing des dbang du bya ba'o/ /oM khaM swA hA skrod par byed pa'o zhes pa khaM yig gis rlung gi khams bsgrub par bya zhing des bskrad par bya'o/ /oM dzr-IM swA hA sdang bar byed pa'o zhes pa dzr-IM yig gis me dang rlung 'dres pa'i khams dag bsgrub par bya zhing de dag gis sdang ba byed par bya'o//oM b+h+rUM swA hA mngon spyod do zhes pa b+h+rUM yig gis me dang chu dag bsgrub par bya zhing de dag gis mngon spyod bya'o/ /oM hUM swA hA 'gugs par byed pa'o zhes pa hUM yig gis rlung dang me dang nam mkha'i khams rnams bsgrub par bya zhing de rnams kyis dgug par bya'o//oM g+huHswA hA gsod par byed pa'o zhes pa g+huHyig gis rlung dang chu dag bsgrub par bya zhing de dag gis gsod par bya'o/ /'di ni dgongs pas bshad pa'o/ /dbang po rnams kyi mngon sum gang / / sems kyis brtags pa mngon sum ste/ /bskyed pa'i rim pa'i ye shes de/ /sangs rgyas byed pa'i mngon sum min/ /rnal 'byor pa yi mngon sum gang / /rang rig byed pa gang yin pa/ /rdzogs pa'i rim pa'i ye shes ni/ /sangs rgyas bya ba byed pa'i mchog / de nyid tha dad rnam pa lnga/ /thog ma bar dang tha mar ni/ /chos sdud pa la skyob pa yis/ /spyan lnga rnams ni gsungs pa yin/ /sha yi mig dang de nas lha'i/ /de nas sangs rgyas spyan du 'gyur/ /shes rab spyan dang de nas slar/ /ye shes spyan ni lnga pa'o/ /las dang po yi rnal 'byor pa'i//dang po sha yi spyan du 'gyur/ /de nas de yis lha yi spyan/ /lha yi ji lta de lta ba'o/ /de la sangs rgyas spyan du 'gyur/ /nyan thos ji lta de lta ba'o/ /de nas shes rab mig ji ltar/ /byang chub sems dpa' de lta ba'o/ /de nas ye shes rang bzhin spyan/ /bde gshegs rnams kyi ji lta ba'o//ye shes rnam pa bzhi yi spyan/ /gang la yod pa des na de'o/ /ye shes rnam shes dbye ba yis/ /dngos po gnyis su rab bstan te/ /skyob pa rnams la ye shes spyan/ /de nas ye shes spyan du brjod/ /sangs rgyas thog ma tha ma med/ /dang po'i sangs rgyas gnyis rtog med//ye shes mig gcig dri ma med/ /ye shes lus can de bzhin gshegs/ /de ltar 'jig rten pa'i kun rdzob kyis rten cing 'brel bar 'byung ba'i tshul gyis 'di thob nas 'di 'byung ste/ yung ba dang rdo thal gyi sbyor ba las dmar ba nyid bzhin du las thams cad bsgrub pa la rig par bya'o//rnal 'byor pa rnams kyis sangs rgyas so zhes pa'i nga rgyal gyis ni ma yin no zhes pa las sgrub pa'i nges pa'o zhes pa kye'i rdo rje'i 'grel pa drug stong par sngags kyi rigs kyi le'u las rab 'byam sgrub pa'i yongs su bcad pa ste drug pa'o// // kye'i rdo rje'i hUM la 'dud nas/ /sna tshogs sgrub pa bshad par bya/ /sems can rnams la rjes brtse bas/ /sa la char pa dbab ched du'o/ /a phuH'i yi ge gnyis kyis mtha' yas kyi gzugs brnyan byas la zhes pa 'dir mtha' yas kyi gzugs brnyan/ dri zhim po'i tsan+dan las byung ba byas te/lte ba yan chad skyes bu'i cha byad can 'og sbrul gyi mjug ma'i rnam pa can lag pa bzhi pa g.yon du bdud rtsi'i thod pa dang / pad+ma'i lag pa can/ g.yas par bdud rtsi'i 'bras bu dang rin po che'i lag pa can/ mgo bo'i steng du gdengs ka bdun pa can khor yug gi rnam pa can bya ste/de dang 'dra bar de'i g.yon du klu'i rgyal po aM yig gis so zhes pa'o/ /de bdud rtsi lngas bkru bar bya ste/ 'o ma dang / zho dang / sbrang rtsi dang / mar dang / ka ra rnams bdud rtsi lnga ste/ des bkru bar bya'o/ /de nas ut+pal sngon pos mchod par bya'o/ /klu 'dul ba'i khu bas lus la byug par bya ste/glang po che'i chang gis mgo bo byugs la/ kham phor gnyis kha sbyor du byas nas/ ba nag mo'i 'o mas dgang ste/ sor mo bzhis dpral ba dang / sna dang o sko'i mthar thug pa dang / phyed dang bcas pa'i sor bcu gnyis pa'i tshad can gzhag par bya'o/ / gzhon nu ma nag pos bkal ba rims kyis btsos pa'i skud pas phyogs brgyad rnams su dkri bar bya'o/ /de nas rdzing bu'i 'gram du rlung gi phyogs su dkyil 'khor bya ste/ rdzing bu'i dbus su klu'i rgyal po mtha' yas der gzhag par bya'o/ /rdul tshon gyi dkyil 'khor du ni mtha' yas mnan pa'i kye'i rdo rje rdul tshon gyis bri bar bya'o//'dir dkyil 'khor du tshon gdab pa brjod par bya ste/ dur khrod kyi sol bas rdul tshon nag po'o/ /mi'i rus pa'i phye mas dkar po dang / ba blas ser po dang / dur khrod kyi so phag gis dmar po dang / rkun ma'i lo ma mi'i rus pa cung zad bsres pas ljang gu ste/rdul tshon lnga po 'di rnams kyis dkyil 'khor bzhengs nas dang por dur khrod kyi srad bus zhes pa ro'i rgyus pa rnams kyis byas pa'i srad bus thig btab nas sor gsum lhag pa'i khru gsum pa smin ma'i dbus nas lte ba'i mthar thug pa'i tshad rnams kyis te 'gro ba 'ong ba rnams kyi zhes pa'o//dkyil 'khor gyi phyed kyis pad+ma 'dab ma brgyad pa byas nas cha gsum gyi lte ba cha gcig la nyi ma'i gdan no/ /de'i steng du mtha' yas dang / mtha' yas kyi rgyal po ste/ kye'i rdo rje'i g.yon pa dang g.yas pa'i zhabs dag gi mthil la rgyal ba dang rnam par rgyal ba bri'o//kye'i rdo rje zhal brgyad pa zhabs bzhi pa phyag bcu drug gis brgyan pa bdag med mas phrag pa la 'khril ba 'chad par 'gyur ba'i spyan nyi shu rtsa bzhis phyug pa'o/ /de nas pad+ma'i 'dab ma rnams la klu'i dbang po brgyad rnams te gdengs ka lnga dang /lhag ma mtha' yas kyi gzugs brnyan dang 'dra bar bri bar bya'o/ /'dab ma g.yon pa la mtha' yas so/ /g.yas pa la nor rgyas kyi bu'o/ /nub tu 'jog po'o/ /shar du ka rko Ta'o/ /me mtshams su pad+ma'o/ /rlung phyogs su pad+ma chen po'o/ /bden bral du dung skyong ngo / / dbang ldan du rigs ldan no/ /sa bon 'di rnams kyi lte dbus su a phu'o/ /g.yas dang g.yon pa la sogs pa'i 'dab ma rnams la phuHphuHphuHphuHphuHphuHphuHphuH'o/ /phuHyig brgyad po 'di rnams kyis klu brgyad yongs su rdzogs pa bya ste/ shar dang mer nag po'o/ /lho dang bden bral du dmar po'o//nub dang rlung phyogs su ser po'o/ /byang dang dbang ldan du dkar po ste/ thugs dang gsung dang ye shes dang / sku'i zhal gyi dbye bas so/ /gan rkyal du 'gyel ba'i mjug ma mnan par thams cad bri bar bya'o/ /de bzhin du shar gyi sa gzhi nag po'o/ /lho dmar po'o/ / nub tu ser po'o/ /byang dkar po ste re khA lnga'i mthar thug pa'o/ /dkyil 'khor gyi brgyad cha'i sgo ste de bzhin du 'gram dang sgo khyud rnams so/ /sgo'i phyed kyi stegs bu dang dra ba'i sa gzhi'o/ /stegs bu'i phyed kyis re khA lnga dang rin po che'i snam bu dang / ba ku li dang / kra ma shIR+Sha rnams so//sgo'i sum 'gyur rta babs te/ mtshams su sna tshogs rdo rje'o/ /phyi rol du rdo rje'i phreng ba 'bar ba dang bcas pa'o/ /de ltar dkyil 'khor bzhengs nas de nas sbyin sreg bya ste/ zlum po'i thab tu zhi ba'i don du'o/ /de nas dkyil 'khor rab gnas byas la/ 'chad par 'gyur ba'i gtor ma byin te/in da/ dza ma/ dza la/ dzak+Sha zhes pa la sogs pa'i sngags kyis so/ /phyi nas slob dpon gyis nang gi khro bo'i sems kyis sngags bzlas par bya'o/ /nang gi zhes pa cung zad spro ba dang bcas pa'i sems kyis so zhes pa'o/ /de nas dkyil 'khor du sgo srung rnams gzhag la bum pa bcu dgod cing steng du 'o mas gang ba'i kham phor rnams bzhag nas phyi rol du/phyogs bcu rnams su ba dan sngon po rnams byin te dben pa'i gnas su sngags 'di bzla bar bya'o/ /oM g+ha Ta g+ha Ta/ g+hu Tu g+hu Ta/ ma sha ma sha/ /g+ha Ta g+ha Ta/ g+ho Ta ya g+ho Ta ya a nan+ta k+Sho b+ha ka rA ya nA gA d+hi pa ta ye he he ru ru kaM sa b+ta pA tA la ga tA na nA ga na A kA R+Sha ya baR+Sha ya ga rdza ya ta rdza ya/phuHphuHphuHphuHphuHphuHphuHphuHhUM hUM hUM phaT phaT phaT swA hA/ 'di lta na char 'bab po/ /gal te char mi 'bab na bzlog nas sngags 'di bzlas te/ hA swA Ta phaT phaT pha hUM hUM hUM phuHphuHphuHphuHphuH phuHphuHphuH/ya rdza ta ya rdza ga ya R+Sha ba ya R+Sha ka A na gA nA tAM ga la tA pA p+ta sa kaM ru ru he he ye ta pa d+hi gA nA ya rA ka b+ha k+Sho n+ta na a yaT g+ho ya Ta g+ho Ta g+ha Ta g+ha sa ma sa ma/ Tu g+hu Tu g+hu Ta g+ha Ta g+ha oM zhes pa de ltar bzlas par gyur pa na gal te klu rnams char mi 'bebs na de'i tshe mgo bo ardza ka'i dog pa ltar 'gas so//a rdza ka zhes pa dbyug pa dkar po can mal+li ka nag po 'dra ba ste/ de'i dog pa ji ltar nyi ma'i 'od kyis 'gas pa de bzhin du zhes pa nges pa'o/ /char pa 'bebs su 'jug pa'i cho ga'o/ /sngags 'di'i sngon du bzlas pa 'bum phrag gcig ste/ bye ba bzlas pas sngags 'grub cing /gang gi tshe sbyin sreg 'bum phrag bcu byas na de'i tshe sgrub pa pos gtor ma byin pa tsam gyis klu rnams char 'bebs te/ de la dkyil 'khor gyi cho ga med do/ /dkyil 'khor gyi chog la sngon du bsnyen pa 'bum phrag gcig dang / sbyin sreg khri phrag gcig byas te de'i tshe klu rnams char 'bebs kyi rnam pa gzhan du ni ma yin no zhes rtsa ba'i rgyud du nges pa'o//da ni sprin dral ba brjod par bya ste/ 'dir gang gi tshe char ches par gyur na de'i tshe mtha' yas de dur khrod kyi thal bas kham phor bkang bar gzhag par bya ste/ sngags pas dur khrod kyi ras la nye bar 'dug nas sngags 'di bzlas par bya'o//oM A r+yA sha ma shA na pri yA ya hUM hUM hUM phaT phaT phaT ces pas dral bar bya'o/ /'di la yang snga ma bzhin du bsnyen pa dang sbyin sreg bzlas pa'o zhes pa sprin dral ba'i cho ga'o/ /da ni rdo rnge gri gug gi sgrub thabs brjod par bya ste/ 'dir gdul dka'i sems can rnams gdul ba'i don du rdo rje gri gug gi sngags bye ba bzlas pas bsgrub par bya zhing sbyin sreg 'bum phrag bcu yis kyang ngo //de nas thod lo kor gyi sgrub pa bya ste/ thod lo kor bdud rtsi lnga dang lhan cig btags la ku ThA ra tshi n+na dang bcas pa'i ril bu mig 'bras kyi tshad tsam bya'o/ / de nas he ru ka'i khang par song ste/ he ru ka'i zhal du bcu gnas sngags 'di ji srid du sku gzugs kyi zhal gyis ril bu de sgrub pa po la gtod pa'i bar du bzlas par bya'o/ /oM badzra karta ri he badzrA ya hUM hUM hUM phaT/ dngos grub kyi don du 'bum bzlas pa bya ste stan gcig pa'o/ /de nas 'grub par 'gyur ro//de bsgrubs nas ril bu'i mgrin pa la de'i ri mo bya'o/ /ri mo rgyal po 'khor dang bcas pa'i mgrin pa la mthong na gal te ril bu'i mgrin pa de bcad pa de'i tshe dgra rnams mgo bo med par 'gyur ro/ /rdo rje gri gug rdzogs so/ /da ni rdo rje dgra sta'i sgrub thabs brjod par bya ste/'dir mu stegs pa'i lha rnams 'gas par 'dod pas rdo rje dgra sta'i thig le bsgrub par bya'o/ /'dir yang sngags bsgrub pa snga ma bzhin du bya ste/ de nas rgyu skar rgyal gyis nya ba la/ tshangs pa'i shing gi sa bon blangs te/ tshangs pa'i shing ni pa la shar brjod par bya'o/ /de'i sa bon ku ThA ra tshi n+na dang bsres la cha mnyam pa mi bskyod pas btags par bya'o//btags nas dgra star bya zhing bskam par bya'o/ /nyi ma gzas bzung ba na rkang pas mnan te sngags bzlas par bya'o/ /oM badzra ku ThA ra pA Ta ya pA Ta ya hUM hUM hUM phaT swA hA/ 'di bye ba bzlas nas snga ma bzhin du nyi ma bzung ba na nyin mtshan du bsgrubs nas de bdar bas dgra sta'i rnam pa'i thig le bya'o//byas pa des lha gang la sgrub pa pos phyag 'tshal ba des 'gas par byed pa'o zhes pa lha dgas pa'i cho ga'o/ /da ni tsha ba'i rims kyi sgrub thabs brjod par bya ste/ snga ma bzhin du sngags bsgrubs la/de nas tsha ba'i rims byed par 'dod pas/ dug dang / ske tshe dang / tsi tra ka'i khu bas a rka'i 'dab ma la dgra bo'i ming bris shing de nas sa gzhi la sor brgyad du brko bar bya'o/ /steng du phub ma'i me gzhag ste khri bzlas par bya'o/ /oM he badzra dz+wa ra dz+wa ra sha trUM b+h+rUM hUM hUM hUM phaT swA hA/de nas bsgrub bya rims kyis 'debs par 'gyur ro/ /'dab ma phyung nas ba'i 'o mas bkrus na grol ba'o zhes pa tsha ba'i rims kyi cho ga'o/ /da ni chang skyug pa'i cho ga brjod par bya ste/ snga ma bzhin du chang skyug pa'i sngags bsgrubs nas/ de nas chang skyug par 'dod pas bsgrub bya'i lte bar yaM yig yongs su gyur pa'i rlung gi dkyil 'khor bsgom zhing /de'i steng du maM yig yongs su gyur pa'i chang gi lto ba can skra grol ba chang skyug pa bsgom par bya ste/ bsgrub bya chang skyug go/ /oM he badzra ma r+ya mung+gi rA ya maM hUM hUM hUM phaT swA hA zhes pa'i sngags brgyad lhag pa'i brgya bzlas par bya'o//chang skyug pa'i sgrub thabs so/ /da ni dbang du bya ba brjod par bya ste/ snga ma lta bu'i ku ru ku l+le'i sngags sngar bshad pa'i bye ba la sogs pa bzlas pa'i cho gas bsgrubs la/ de nas rab tu myos ma dbang du bya bar 'dod pas mya ngan med pa'i brgyad pa la mya ngan med pa'i 'og tu song ste gos dmar po gyon nas myos byed kyi 'bras bu za zhing /kA ma tsi kA'i khu bas thig le byas la sngags bzlas par bya'o/ /oM ku ru ku l+le hrIHa mu kAM me ba shI b+ha wa tu swA hA/ khri bzlas pas 'ong ngo zhes pa dbang du byed pa'o/ /da ni zla ba dang nyi ma 'dzin pa brjod par bya ste/sngon du bye ba phrag bdun bzlas te sngags pas sngags bsgrub par bya'o/ /de nas zla ba dang nyi ma 'dzin par 'dod pas sA lu btags pa las byung ba'i zla ba'am nyi ma byas nas rlangs pas btsos te/ kham phor sor bzhi par rdo rje'i chu la gzhug cing sngags bzlas so/ /oM badzrA rka na mA tsa la mA tsa la tiSh+Tha tiSh+Tha he badzrA ya hUM hUM hUM phaT swA hA/nyi ma rnam par 'dzin pa la'o/ /zla ba rnam par 'dzin pa la ni/ oM badzra tsan+d+ra zhes pa la sogs pa ste/ khri bzlas na zla ba'am nyi ma gnas so/ /gci ba las bton na grol ba'o/ /de ltar zla ba dang nyi ma rnam par 'dzin pa'i cho ga'o/ / da ni rdo rje skar rtsis la pra dbab pa la 'jug pa brjod par bya ste/ snga ma bzhin du sngags 'bum phrag bcu bzlas pa dang pad+ma dmar po rnams kyi sbyin sreg 'bum gyis sngags bsgrubs nas so/ /de la sngags ni oM na grA na grA ku mA ri ke di bya lo tsa ni swA hA zhes pa'i sngags 'dis dus ma yin pa'i dus su gzhon nu ma'i mig dag la brgyad lhag pa'i brgya mngon par bsngags te/me tog dang bdug spos la sogs pa nye bar spyod pa lnga yis mchod nas snyan gsan dbab pa'o/ /bcu bzhi pa'am brgyad pa la snga dro'i dus su bum pa bzhag nas de'i steng du/ 'o ma can gyi shing gi yal ga bkod cing 'bru mar zangs ma'i snod du gzhag ste/rgya skyegs kyi khu ba snod gzhan du'o/ /sngags snga mas brgyad lhag pa'i brgya mngon par bsngags te/ lag pa g.yon pa'i mthe bong rgya skyegs kyis bskus la til gyi til mar gyis bsku'o/ /de nas gzhon nu ma la bstan la sngags pas sngags zlos shing gzhan la 'dri bar byas te nga'i rdzas sus khyer smros shig /dgongs pa gzhan yang ci 'dra mthong zhes so/ /der des mthe bong mthong ste che ge mos rdzas khyer ro/ /dgos pa che ge mor 'gyur ro zhes smra bar byed do/ /rdo rje skar rtsis kyi ched du pra dbab pa la 'jug pa'i cho ga'o//da ni phyugs zlog pa'i ched du phyugs kyi snying po'i sngags brjod par bya'o/ /dang por oM yig byin te dbus su sngags kyi tshig rnams dang tha mar he badzrA ya swA hA zhes pa 'bum phrag bcus bsgrubs la/ de nas phyugs rnams la sbyar bar bya'o/ /be Tu yA be Tu yA zhes brjod na lag ldan 'bros par 'gyur ro//mam+mA mam+mA zhes brjod na stag 'bros par 'gyur ro/ /te l+li yA te l+li yA zhes brjod na bse 'bros par 'gyur ro/ /i li mi li phuHphuHzhes brjod na sbrul 'bros par 'gyur ro/ /nor skyong 'dul ba'i phyag rgyas khyi 'bros par 'gyur ro/ /oM shwA tiSh+Tha tiSh+Tha he badzrA ya swA hA zhes pa dud 'gro zlog pa'i cho ga'o//de ltar dom la sogs pa rnams la gang gi ming gang yin pa de dbus su bcug ste/ oM yig dang po dang tha mar he badzrA ya swA hA zhes pa de ltar sngags bzlas pa dang / sbyin sreg gi cho ga sgrub pa ni grub pa rnams su 'gyur gyi glegs bam bklags pa tsam gyis ni ma yin no zhes pa rtsa ba'i rgyud du bcom ldan 'das kyi nges pa'o//da ni rengs pa la sogs pa'i las rnams kyi lha'i rnal 'byor brjod par bya ste/ rdo rje ma dang zhes pa la sogs pas so/ /'dir rdo rje ma ni gzugs kyi phung po ste des rengs pa'o/ /gau rI ni tshor ba'i phung po ste des dbang du bya ba'o//chu yi rnal 'byor ma ni 'du shes kyi phung po ste des zhi bar byed pa'o/ /rdo rje mkha' 'gro ma ni 'du byed kyi phung po ste des skrod pa'o/ /bdag med ma ni rnam par shes pa'i phung po ste nges sdang bar byed pa'o/ /sa spyod ma ni reg bya rdo rje ma ste nges 'gugs pa'o/ /mkha' spyod ma ni chos kyi dbyings kyi rdo rje ma ste nges gsod par byed pa'o//de bzhin du puk+ka sI ser mos rengs pa'o/ /ri khrod ma zla ba nor bu'i 'od can gyis zhi ba'o/ /gtum mos dbang du bya ba'o/ /g.yung mos skrod pa'o/ /rdo rje dbyings kyi dbang phyug mas sdang bar byed pa'o/ /ye shes kyi khams kyis gsod pa grub pa'o//de ltar phyi dang nang du thams cad rnal 'byor pas shes par bya'o/ /ser po dang dkar po dang dmar po dang nag po dang ljang gu dang sngon po'i kha dog rnams kyis rengs pa la sogs pa rnams te lha'i rnal 'byor gyis sngags bzlas pa dang sbyin sreg dang gtor ma'i tshogs bsgrub par bya'o zhes pa rtsa ba'i rgyud du bcom ldan 'das kyi nges pa'o zhes pa kye'i rdo rje'i 'grel pa stong phrag drug par las rab 'byam sgrub par byed pa'i mdor bsdus chen mo ste yongs su bcad pa bdun pa'o//sngags kyi le'u ste gnyis pa rdzogs so// //drag po chags bcas mchog tu zhi ba'i gzugs//gang 'drar rgyal dbang gang gis bsgoms gyur pa/ /de 'drar de yis rang gi sems mthong ste/ /gzugs de thams cad smon pa'i sems yin no/ /'jug pa'i sems kyang sems gcig de yin te/ /thugs min thugs ni rnam thar gsum dag pa/ /dus gsum son pa kun nas rig pa po//rdo rje sems dpa' de la mgos btud nas/ /rtsa ba'i rgyud las rtogs pa yi/ /lha yi le'ur 'grel pa ni/ /sems can rnams kyis lam thob ched/ /rdo rje snying pos bri bar bya/ /bskyed pa'i rim pa gcig yin te/ sems can chos la dmigs pa'o/ / gnyis pa dmigs pa med pa ni/ /rdzogs pa'i rim pa sgrub byed pa'o/ /'dir nyung ngu'i rgyud du bcom ldan 'das kyis bka' stsal pa/ de nas 'di las lha'i le'u bshad par bya'o/ /dang po byams pa bsgom par bya/ /zhes pa la sogs pa'i tshig rnams kyis dang po'i tshig rnams rtsa pa'i rgyud la 'jug par bya ste/bar gyi tshig rnams dang / mtha'i tshig rnams kyang ngo zhes pa'o/ /der bcom ldan 'das kyis bka' stsal pa/ gang gis sngags dang phyag rgya yi/ /rnam dbyes rnal 'byor bdag nyid 'grub/ /lha yi sgrub thabs cho ga ni/ /rdo rje snying pos bshad par bya/ /tho rangs dus su sngags pa yis//bshang gci dag ni dor ba dang / /gtsang sbra la sogs byas rjes su/ /'jam pa'i stan la nyer 'dug nas/ /rdzas bcu'i rang bzhin ril bu ni/ /byas nas rang gi kha ru gzhug /bdud rtsi lnga bcas pa byung gis/ /mdun du maN+Dal byas nas ni/ /dri dang me tog la sogs pa//gau rI sogs la rim bzhin dbul/ /dbang dkar gshin rjer chom rkun ma/ /chu bdag phyogs su ro langs ma/ /nor sbyin lha mo mkha' 'gro ma/ /'og tu sa spyod ma gnas so/ /steng du mkha' spyod ma ru bshad/ /de la rim bzhin mchod par bya/ /dbang ldan lha mo puk+ka sI//mer ni de bzhin ri khrod ma/ /srin po'i mtshams su gtum mo ste/ /rlung du g.yung mo rim pa las/ /'khor lo'i dbus su kye'i rdo rje/ /bdag med ma dang lhan cig mchod/ /de slar sems can thams cad la/ /byams dang snying rje sogs dran bya/ /de rnams mchod nas de nas ni/ / de yi sa bon rang lus dgod/ /ming thog yi ge'i sa bon ni/ /a yig bcas shing thig ler bcas/ /gau rI gzugs kyi khams la son/ /sgra yi khams la chom rkun ma/ /dri yi khams la ro langs ma/ /ro yi khams la g+ha sma rI/ /reg bya'i khams las spyod ma/ /chos kyi khams la mkha' spyod ma//mig la lha mo puk+ka sI/ /rna ba dag la ri khrod 'dod/ /sna la lha mo gtum mo'o/ /lce la g.yung mor 'dod pa yin/ /lus kyi dbang po kye'i rdo rje/ /bdag med ma ni yid la gnas/ /zhes pa rtsa ba'i rgyud du dang po yan lag dgod pa'o/ /gaM tsaM baM g+haM b+haM khaM baM shaM tsaM DaM haM naM zhes pa'i sa bon rnams bshad pa'i khams rnams la dgod par bya'o//de nas gnas bsrung ba bsam par bya'o zhes pa 'di lta ste/ re phas nyi ma bdun du rnam bsgoms nas/ /nyi der hUM byung sna tshogs rdo rje ste/ /rdo rje de nyid kyi ni ra ba dang / /gur bcing ba yang rnam par bsgom par bya/ /zhes pa'o//'di nyid la rtsa ba'i rgyud du/ dang po re zhig srung ba'i 'khor lo gdug pa can zlog par byed pa dang / bgegs dang log par 'dren pa rnams phur bus 'debs pa sngags pas khro bo'i rgyal po'i sku yis bya ste/ phyi nas 'dod pa'i lha bsgrub par bya'o/ /shes rab dang thabs kyi bdag nyid kye'i rdo rje'i rgyud 'di ni rnal 'byor gyi rgyud de phyi nas bdag med ma'i sgrub thabs kyi ngo bor rnal 'byor ma'i kun du spyod pas rnal 'byor ma'i rgyud bshad par bya'o//de'i phyir rnal 'byor gyi rgyud kyi tshogs gshin rje gshed la sogs pa khro bo'i rgyal po'i dbang po rnams srung ba'i 'khor lo la bsgom par bya'o//'khor lo'i gtso bo ni rdo rje hUM mdzad de/ de yang kye'i rdo rje phyag drug pa'o/ /des na dang por de bas nyi ma'i dkyil 'khor mdun du bsams nas de'i dbus su hUM yig yongs su gyur pa'i sna tshogs rdo rje gdong bzhi pa'o/ /sna tshogs rdo rje de nyid dang / /nyi ma gcig tu 'dres par gyur pas phyogs thams cad dang steng dang 'og tu rdo rje ra ba dang /rdo rje gur dang / rdo rje gzhi bdud rnams thams cad kyis mi phyed pa dang / ra ba'i phyi rol dang 'og dang steng du mtshon cha sna tshogs 'jigs su rung ba rnams sngags pas bsgom par bya'o zhes pa'o/ /de las gzhan ni rtsa ba'i rgyud la 'jug par bya ste/der bcom ldan 'das kyis bka' stsal pa/ khro bo'i rgyal po rnams kyi gdan/ /rim pa bzhin du rab bshad bya/ /zhal dang sku mdog phyag dang mtshon/ /g.yon brkyang stabs kyis zhabs rnams kyang / /rdo rje gur gyi dbus su ni/ /b+h+rUM yig yongs su gyur pa yis/ /'khor lo rtsibs brgyad de las byung //gur gyi 'og dang steng du ni/ /rtsibs ni gnyis po yang bya'o/ /re ba bcu gcig po rnams kyis/ /nyi ma'i dkyil 'khor rim ji bzhin/ /nyi ma'i rkang pa bcu gcig rnams/ /nyi ma de rnams kho na'o/ /der ni nyi ma'i dkyil 'khor rnams/ /so so la ni hUM yig dgod/ hUM yig las byung nyi mar gnas//khro bo'i rgyal po rnams bsgom bya/ /dbus kyi nyi ma'i gdan la ni/ /rdo rje hUM mdzad 'dren pa bsam/ /sngon po zhal gsum phyag drug pa/ /g.yon brkyang stabs kyi zhabs kyis bzhugs/ /rtsa ba'i zhal ni sngon po ste/ /mche ba gtsigs shing drag 'jigs shing / / g.yon dang g.yas pa dkar dang dmar/ /ji ltar rtsa gsum gnas pa bzhin/ /rdo rje gri gug rtse gsum pa/ /g.yas pa'i phyag na rim pa bzhin/ /rdo rje dril bu thod pa dang / /kha T+wAM ga yang g.yon pa na/ /sna tshogs rdo rje ral pa can/ /mi bskyod pa dang zla phyed can/ /phrag par mgo yi phreng ba nas//dbu nyid la ni thod pa can/ /rus pa'i phyag rgya lnga rnams ldan/ /stag gi pags pas rked la dkris/ /spyan dgu pa ste ljags 'gyur zhing / /sbrul gyi rgyan gyis brgyan byas pa/ /rdo rje hUM mdzad 'di lta bu/ /'dren pa de phyir bsgom par bya/ /hUM yig nag po las byung ba//shar gyi nyi mar gzhag par bya/ /gshin rje mthar byed nag cing drag /g.yon brkyang gar stabs kyis gnas pa/ /nag dang dkar dang dmar ba'i zhal/ /gsus pa chen po spyan gsum pa/ /phyag rgya lnga dang thod pa'i phreng / /rked pa stag gi pags pa can/ /klu dbang sna tshogs rdo rjes mtshan//kun la cod pan la ni rigs/ /de rnams mdog mtshon tha dad pa/ /de bzhin du ni zhabs rnams bzhi/ /dbyug pa 'khor lo rdo rje ni/ /g.yas pa'i phyag na rim ji bzhin/ /thugs kar sdigs mdzub zhags pa dang / /dril bu dgra sta g.yon pa na/ /spyi bor sangs rgyas rnam snang mdzad//gzhan pa rdo rje cod pan yang / /hUM yig dkar po las byung ba/ /dkar dang gnag dang dmar ba'i zhal/ /shes rab mthar byed lhor nyi ma/ /dgod de rin chen cod pan can/ /rdo rje 'khor lo dbyug pa ni/ /phyag g.yas rnams su bsgom par bya/ /g.yon pa snying gar sdigs mdzub zhags//dril bu dang ni dgra sta'o/ /hUM yig dmar po las rdzogs pa/ /dmar dang sngo dang dmar ba'i zhal/ /nub tu nyi mar pad mthar byed/ /dgod de dpag med cod pan can/ /gtun shing rdo rje ral gri dag /phyag g.yas rnams su 'dzin par byed/ /thugs kar sdigs mdzub zhags pa dang //dril bu dgra sta'ang g.yon pa na/ /hUM yig sngon po las rdzogs pa/ /don yod grub pa'i cod pan can/ /zhal ni sngo dang dmar dang dkar/ /mche ba gtsigs shing rnam 'khor zhal/ /sna tshogs rdo rje 'khor lo dang / /de bzhin gtun shing g.yas pa na/ /dril bu sdigs mdzub zhags pa dang //dgra sta yang ni g.yon pa na/ /bgegs mthar byed pa nyi mar dgod/ /byang du bdud rtsi 'khyil pa'o/ /hUM yig sngon po las rdzogs pa/ /mig g.yo mer ni nyi mar dgod/ /zhal ni sngo dang dmar dang dkar/ /dpal ldan rnam snang cod pan can/ /ral gri rdo rje de bzhin du/ /'khor lo g.yas pa'i phyag na bsnams//thugs kar sdigs mdzub zhags pa dang / /dril bu dgra sta g.yon na'o/ /hUM yig sngon po las grub pa/ /sngo dang dmar dang dkar zhal can/ /Tak+ki rgyal po bden bral du/ /rin chen 'byung ldan cod pan can/ /khams gsum rnam rgyal phyag rgya ni/ /phyag gnyis kyis ni 'dzin pa ste//g.yas na rdo rje ral gri dang / /g.yon na sdigs mdzub lcags kyu'o/ /hUM yig sngon po las rdzogs pa/ /'od dpag med pa'i dbu rgyan can/ /rlung du nyi ma'i dkyil 'khor la/ /dbyug pa sngon po sngags pas dgod/ /rtsa ba g.yas dang cig shos zhal/ /drag cing sngo dang dmar dang dkar//dbyug pa 'khor lo de bzhin du/ /ral gri rim bzhin phyag g.yas na/ /g.yon par sdigs mdzub zhags pa dang / /pad+ma dgra sta nyid kyang ngo / /hUM yig sngon po las grub pa/ /don yod grub pa'i cod pan can/ /stobs po che ni mdog sngo ba/ /sngags pas dbang ldan nyi mar dgod//gnag dang dmar dang dkar ba'i zhal/ /gsus pa che zhing 'jigs su rung / /dbyug pa ral gri de bzhin du/ /'khor lo rin chen phyag g.yas na/ /thugs kar sdigs mdzub zhags pa dang / /rtse gsum dgra sta g.yon pa na/ /hUM yig ljang gu las grub cing / /mi bskyod pa yis thod du byas//zhal ni ljang dang dmar dang dkar/ /gtso bo spyan gsum gsus pa 'phyang / /g.yon dang g.yas pa'i phyag dag gis/ /gtsug tor spyi bor 'dzin par byed/ /rdo rje pad+ma g.yas dag gis/ /sdigs mdzub zhags pa g.yon na'o/ /nam mkhar nyi ma mnan byas pa/ /tshangs pa'i gnas su rnam par bsam//hUM yig nag po las rdzogs shing / /mi bskyod pa yis thod byas pa/ /'og tu nyi mar gnod mdzes rgyal/ /gnag dang dmar dang dkar ba'i zhal/ /rdo rje 'khor lo de bzhin du/ /rin chen rim bzhin phyag g.yas na/ /snying gar sdigs mdzub zhags pa dang / / pad+ma ral gri g.yon pa na/ /de ltar khro bo'i tshogs rnams ni/ /'jigs su rung ba bsgom byas nas/ /de nas sngags pas bsdus byas te/ /de ni rang gi lus la gzhug /gshin rje mthar byed dpung g.yon la/ /g.yas la shes rab mthar byed dgod/ /lag pa g.yon par pad mthar byed//g.yas par bgegs mthar byed pa dgod/ /g.yon pa'i brla la mi g.yo ba/ /g.yas par 'dod pa'i rgyal po'o/ /rkang pa g.yon par dbyug sngon can/ /rkang pa g.yas par stobs po che/ /mgo bo'i gnas su gtsug tor che/ /gnod mdzes rgyal po bshang lam dgod/ / snying gar rdo rje hUM mdzad de/ /rang ming dang po'i yi ge dgod/ /yaM praM paM baM aM TaM naM maM uM suM hUM/ 'di ltar bsrung ba'i cho ga ni/ /sngags pas rim pa bzhin byas nas/ /bdag nyid rdo rje hUM mdzad ni/ /khro bor bcas pa de nas bsgoms/ /bgegs kun rnams dang sdig pa rnams/ /gnod mdzes bka' bsgo phur bus gdab//oM g+ha g+ha g+hA ta ya g+hA ta ya/ sarba duSh+TA na phaT phaT/ kI la ya kI la ya sarba pA paM/ oM suM b+ha ni suM b+ha ni hUM hUM/ oM gr-i h+Na gr-i h+Na hUM hUM/ oM gr-i h+NA pa ya gr-i h+NA pa ya hUM hUM/ /oM A na ya ho/ /b+ha ga wA na bid+ya rA dzA ya hUM hUM phaT phaT/ khro bo'i gzugs 'di blo ldan pas/ /bgegs dang log 'dren rnams bkug nas//thams cad cho ga bzhin du ni/ /rnal 'byor 'di yis phur bus gdab/ /lte ba'i phyogs las 'og gi char/ /rtse gcig rnam par bsgom par bya/ /khro bo chen po bgegs mthar byed/ /steng du spyan gsum phyag drug pa/ /'og tu bgegs tshogs rnams bltas nas//de yi sngags ni brjod bya zhing / /bgegs kyi lus la rdo rje yi/ /phur bus g.yo ba med par bsnun/ /oM g+ha g+ha g+hA ta ya g+hA ta ya/ sarba du Sh+TA na phaT phaT/ kI la ya kI la ya/ sarba pA paM phaT phaT/ hUM hUM badzra kI la ya/ badzra d+ha ra A dz+nyA pa ya ti/ sarba bi g+h+naM kA ya wAka tsi t+taM/ kI la ya kI la ya hUM hUM phaT/phyag na rdo rje tho ba dang / /gnod mdzes rgyal po rnam bsgom bya/ /gsang sngags rig pas sngags 'di yis/ /rdo rje phur bu bsdigs par bya/ /oM badzra mud+ga rA A ko Ta ya A ko Ta ya/ tiSh+Tha tiSh+Tha/ phyogs bcur phur bus btab nas ni/ /da nas gdug pa rnams bskrad pa bya//kun nas rdo rje'i me lce ni/ /rnam par 'phro ba bsam bya ste/ /gdug pa can rnams bros pa ni/ /de yi lus ni bsregs bzhin pa'o/ /nyung ngu'i rgyud 'di ni srung ba'i 'khor lo 'khrags 'khrugs te/ de steng rnal 'byor pa gnas nas/ /zhes pa la sogs pa dang phur bus gdab pa'i mthar thug pa rnam par bsgom par bya'o//srung ba'i 'khor lo'i nges pa'o/ /tshigs bcad bzhi rnams kyis zhes pa'o/ /de nas dam pa'i don du srid pa gsum po rang bzhin med par bsgom par bya ste/ /dngos po med la sgom pa med/ /sgom pa sgom pa nyid ma yin/ /de ltar dngos po dngos 'gyur min/ / sgom pa dmigs su med pa'o/ /dang po stong nyid byang chub ste/ /gnyis pa la ni sa bon bsdu/ /gsum pa la ni gzugs brnyan rdzogs/ /bzhi pa yig 'bru dgod pa'o/ /de ltar srung ba'i 'khor lo rnal 'byor gyi rgyud kyi rjes su 'brang bar bya ste/ sngags pa de nas rang gi snying ga'i hUM yig gi 'od zer rnams kyis nam mkha'i mthil yongs su bkang nas mos pa ji lta ba bzhin du bla ma dang sangs rgyas dang byang chub sems dpa' dang bcas pa'i rje btsun gtso bo ma mo brgyad kyis yongs su bskor ba rang gi shes rab kyis 'khyud pa nam mkhar bsam par bya'o//de nas 'od zer de rnams slar log ste/rang gi snying gar zhugs shing hUM yig las lha mo brgyad bcom ldan 'das mchod par bya ba'i ched du dbyung bar bya'o/ /'dir yang lugs las zlog pas tshigs bcad gcig gis te/ rang gi lus las 'od zer 'phro/ /nam mkha'i dkyil 'khor khyab byed pa/ /bsdus te snying gar dgug par bya//rnal 'byor zhe sdang bdag nyid 'gyur/ /rdo rje skye ba snying rje che/ /rje btsun nam mkhar bltas nas ni/ /rgyan rnams thams cad 'dzin pa yi/ /lha mo brgyad po rnams kyis mchod/ /dkar mo ri dgas mtshan ma 'dzin/ /chom rkun bdud las rgyal ba'i snod/ /ro langs ma ni chu lag ma//g+ha sma rI ni sman 'dzin cing / /puk+ka sI ni rdo rje'i lag /de bzhin ri khrod ma ro 'dzin/ /gdol ba mo ni cang te'u brdung / /g.yung mo chags pas gar mdzad do/ /zla ba khu ba nyi ma rdul/ /chu ni gci bar brjod par bya/ /sman ni rkang dang sha yin no/ /rdo rje rnam par snang mdzad bshad//ro ni ro drug yin par brjod/ /go ku sogs stobs cang te'u/ /gar ni chang gi btung ba ste/ /'di rnams dam tshig brgyad du bshad/ /rnal 'byor pa yis 'di rnams kyis/ /kye rdor gtso bo 'khor bcas mchod/ /de nas de mdun sngags pa yis/ / dkon mchog gsum la skyabs su 'gro/ /sdig pa rnams ni bshags par bya/ /bsod nams rnams la yi rang ba'am/ /rang gi lus nyid dbul ba dang / lam la brtan pa nyid kyang ngo / /byang chub sems ni rab bskyed de/ /de nas sangs rgyas gshegs su gsol/ /stong pa nyid la dmigs don byed//slar yang 'di ltar rnam dpyad bya/ /rang bzhin med pas stong pa ste/ /rgyu med pa la mtshan ma med/ /rtag tu med las smon med cing / /mngon bar 'du byed spangs pa'o/ /skye dang 'gag pa med pa'i phyir/ /smon pa don ni med pa'o/ /sangs rgyas nyid med sems can med//chos dang chos can de nyid med/ /ji ltar sgyu ma rmi lam dang / /dri za'i grong khyer ji lta bar/ /de ltar sangs rgyas sems can rnams/ /de kho na nyid bsgoms pas blta/ /ji ltar sgra brnyan de bzhin du/ /sangs rgyas rnams kyis chos ston pa'o/ /de ltar rnam par dpyad nas ni/ / 'khor ba'i bar du srid pa ru/ /sems can rjes su gzung ba'i rgyur/ /byang chub sems dpa' gnas par mdzad/ /nyon mongs bdud dang snyoms 'jug dang / /shes bya'i sgrib pa nyid kyang ni/ /khro bo chen pos nges bsregs kyang / /cha shas tsam ni bsrung bar mdzad/ /byang chub sems dpa' dpa' po che//sems can kun la brtse rnams kyis/ /sangs rgyas byang chub sems dpa' nyid/ /thams cad yongs su rnam dpyad nas/ /stong pa nyid la dmigs bya zhing / /gsang sngags 'di ni brjod par bya/ /oM shU n+ya tA dz+nyA na badzra swa b+hA wa At+ma kou0f85haM zhes brjod la de nas smon lam d ran par bya ste/smon lam gyi sems des sngags pa rang gi sems kyis lha'i nga rgyal 'gro ba rnams rol par bya ba'i don du bsgom par bya'o/ /'dir 'chad par 'gyur ba'i dkyil 'khor gyi 'khor lo dur khrod brgyad kyis brgyan pa bsams shing / de'i dbus su pad+ma 'dab ma brgyad pa dang / nyi ma'i dkyil 'khor dang de nas chos kyi dbyings kyi bdag nyid can gyi ro nyi ma'i steng du bsgom par bya'o/ /sangs rgyas mtshan gyi rgyu las ni/ /zla bar dbyangs rnams sum cu gnyis/ /gsal byed brgyad cu nyi ma la'o/ /de dag dbus su hUM yig ste/ /de nyid sems dpa' zhes brjod do/ /lhan cig skyes dga'i rang bzhin te//me long mnyam nyid ye shes dang / /so sor rtog pa'i rim pa las/ /de rnams gcig nyid bya ba sgrub/ /gzugs ni yongs su rdzogs rgyu las/ /'di ni chos kyi dbyings bshad de/ /ye shes lnga pa mchog yin no/ /rnam lnga mngon par byang chub pa/ /kye yi rdo rje phyag gnyis bsgom//sngo dang skya rengs mtshungs pa'i mdog /ba n+du dmar po'i spyan dang ldan/ /thod pa mgo bo'i phreng ba dang / /mi bskyod ba yis thod du byas/ /'khor lo can dang rna cha can/ /mgul rgyan lag gdub ska rags nyid/ /sangs rgyas lnga ni rnam dag pas/ /phyag rgya lnga ni rab tu grags//'khor lo can la mi bskyod gnas/ /rna cha'i bdag nyid 'od dpag med/ /mgul gyi phreng ba rin chen dbang / /gdu bu rgyal ba rnam snang mdzad/ /ska rags la ni don yod gnas/ /de ltar sangs rgyas rnams rab bzhugs/ /lha mo gti mug rdo rje sogs/ /mig sogs skye mched rnams la'o//g.yon na rdo rje thod pa dang / /kha T+wAM ga yang g.yon pa na/ /g.yas na rdo rje nag po ste/ /hUM yig 'don pa'i bdag nyid can/ /dur khrod du ni mgon po rol/ /rnal 'byor ma yis yongs su bskor/ /dbugs rgyu zhes pa rig pa 'di/ /dur khrod ces par mngon par brjod//de ltar phyag gnyis pa'i sgrub thabs kyi nges pa'o/ /de bzhin du phyag bzhi pa'i sgrub thabs dang / phyag drug pa'i sgrub thabs lha'i le'u'i mthar thug pa go sla zhing / des na 'dir ma bris te khyad par med pa'i phyir ro zhes pa dpal kye'i rdo rje'i 'grel ba stong phrag drug par lha'i sgrub thabs bstan pa ste yongs su bcad pa brgyad pa'o//lha'i le'u rdzogs so// //me long mnyam nyid ye shes dang / /gsum pa so sor rtog pa ste/ /bya ba sgrub par byed pa gzhan/ /chos dbyings rnam par dag pa ste/ /gzugs dang tshor ba 'du shes dang / /'du byed rnam par shes pa nyid//sa dang chu dang me dang ni/ /rlung dang lnga po stong pa ste/ /ye shes lnga po rnam dag pa/ /mngon par byang chub rnam pa lnga/ /shes bcu rnam dag bdag nyid can/ /shes bcu rnam dag 'chang ba po/ /rnam dag chos dbyings zhes bshad pa/ /skyes bu gang zag chen po ste//de nyid lha yi gzugs can pa/ /'gro ba'i gtso bor phyag 'tshal nas/ /sems can kun la phan ched du/ /dbang bskur le'u'i 'grel pa ni/ /rtsa ba'i rgyud kyi rjes 'jug pa/ /rdo rje snying pos bri bar bya/ /'dir nyung ngu'i rgyud la dbang bskur ba'i le'u'i don ni rtsa ba'i rgyud kyi don gyi sgo nas rig par bya ste/de'i phyir de nyid la 'jug par bya'o/ /'dir lha'i gzugs rdzogs pa na sngags 'di brjod par bya ste/ oM su bi shud+d+ha d+harma d+hA tu swa b+hA wa At+ma kou0f85haM zhes pa lha'i gzugs rdzogs pa'o/ /de'i phyir rtsa ba'i rgyud du bcom ldan 'das kyis bka' stsal pa/ bskyed pa'i rim pa j i lta bar//bshad bya rdo rje snying po nyon/ /sgong skyes dang ni mngal skyes te/ /srid pa bskyed pa'i rim pa gnyis/ /tshangs pa'i sgo nga sgong skyes brjod/ /'jig rten khams ni yang dag byung / /bud med mngal nas skyes pa yang / /gnyis pa mngal las skyes pa'o/ /dang por stong nyid byang chub ni//'chi mthar 'pho ba la bde'o/ /ma yi mngal du khu ba rdul/ /gnyis pa sa bon bsdu ba'o/ /srog rlung rnam par shes pa nyid/ /lnga po rnams kyis lus rdzogs pa/ /gzugs brnyan rdzogs par brjod par bya/ /rnam lnga mngon par rdzogs byang chub/ /a wa d+hU tIr bde bas brgyal//phyi yi skye mched longs spyod che/ /bde ba chen po sad byed de/ /puk+ka sI dang ri khrod ma/ /gtum mo de bzhin g.yung mo ste/ /sa dang chu dang me rlung gi /rmi lam gnas skabs rang bzhin las/ /byis pa de rnams kyis bslang ba/ /ma yi mngal nas phyir byung ste/ /sad pa'i gnas skabs thob pa ni//mig la sogs pa byin brlabs pa/ /rnam shes drug pa rab sad las/ /yul lnga po rnams 'dzin par byed/ /rigs kyis byis pa rgyas gdab cing / /byis pas rigs la'ang rgyas gdab pa/ /pha yis bu ni rgyas btab cing / /bus kyang pha la de bzhin no/ /'bras bus rgyu la rgyas btab pa//rgyu yis 'bras bu rgyas btab cing / /'bras bu byed rgyu'i 'brel ba ni/ /rnam par dpyad las dmigs su med/ /'bras bu byed rgyu brtag pa 'di/ /de phyir bshad par bya yis nyon/ /sa bon sdong po'i rang bzhin gyis/ /rgyu la 'bras bu'i mtshan nyid du/ /byis pas thams cad kun du brtags//byed rgyu 'bras bur 'gyur ba ste/ /sa bon rgyu la ltos nas ni/ /'bras bu'i shing ljon 'gyur de bzhin/ /shing sdong byed rgyu la ltos nas/ /sa bon 'bras bur de bzhin 'gyur/ /de ltar rgyu la 'bras bur 'gyur/ /'bras bu la yang byed rgyur 'gyur/ /'bras dang byed rgyu gnyis dag 'gyur//de ltar de rnams bzhi nyid do/ /sa bon med par sdong po min/ /sdong po med par sa bon min/ /byed rgyu med par 'bras bu gang / /dam bca' bya ba don med 'gyur/ /sangs rgyas thams cad skyed pa po/ /sangs rgyas sras su slar yang 'gyur/ /bde ba gang gis phung por 'gyur//de yis slar yang bde bar 'gyur/ /rdo rje sems dpa' zhes byar 'gyur/ /phung po 'chi las bde ba'o/ /phung po de yis skyed byed 'gyur/ /'chi dang 'pho ba'i rgyu las so/ /bde ba med par phung po med/ /phung po med par bde ba'ang med/ /rgyu med pa yis 'bras bu med//'bras bu med pas rgyu yod min/ /rgyu dang 'bras bu gnyis gnyis 'gyur/ /de ltar de rnams bzhi nyid do/ /der ni bzhi yis rgyas 'debs pa/ /su yis rab tu brtag par nus/ /slar yang bzhi po bzhi rnams kyis/ /spro dang bsdu ba'i chos las so/ /rnam par gnas med thal 'gyur bas//'khor ba'i srid pa'i bar gnas pa'o/ /skye dang 'jig pa'i chos kyis ni/ /rgyu dang 'bras bu srid par gnas/ /'bras bu dang rgyu 'gog pa yis/ /de dag skye med 'jig pa med/ /rgyu dang 'bras bu 'gog pa yis/ /ji ltar sangs rgyas su mi 'gyur/ / skye dang 'jig pa las grol ba'i/ /rnal 'byor pa rnams thams cad gzigs/ /bur shing dbyug las slar dbyug pa/ /dbyug las slar yang dbyug par 'gyur/ /de bzhin bsod nams las bsod nams/ /sdig pa las slar sdig par 'gyur/ /'bu zhig zad las bung ba ltar/ /de bzhin sdig las bsod nams 'gyur//bsod nams zad las sdig par 'gyur/ /shi ba'i lus la srin bu bzhin/ /ji ltar dngul chu sbyor byed pa/ /dngul chu'i gnas skabs lngar brjod pa/ /de bzhin mkhas pas gnas skabs lngar/ /byang chub sems la shes par bya/ /du ba tsi ti tsi ti'i sgra//sbal pa mchong ba nyid dang ni/ /'dar dang 'dar ba med pa nyid/ /dngul chu'i gnas skabs lnga ru bshad/ /'gyur dang 'gyur dang de nas 'dzag /'dzag pa med dang dri med gzhan/ /bsam gtan pa yi byang chub sems/ /gnas skabs lnga ru 'gyur ba yin/ /ba lci'i rten gyi sbyor ba yi//ji ltar dngul chu 'dzin byed pa/ /thabs kyi rten gyi sbyor ba yis/ /byang chub sems ni de ltar bzung / /dngul chu 'dar ba med ma byas/ /sems ni dri med ma byas pa/ /lus ched thar pa'i ched ma yin/ /nor ched bde ba'i ched ma yin/ /ji ltar zangs ma dngul chus phug /slar yang zangs ma nyid 'gyur min//de ltar ye shes kyis phug lus/ /slar yang phyugs nyid 'gro ba min/ /sman mchog rnams kyi sbyor ba yis/ /ji ltar dngul chus lcags zos te/ /'dar ba med cing gyur pa phug /lcags rnams thams cad gser du byed/ /stong nyid gzugs brnyan sbyor ba yis//khams rnams ji ltar bder zos nas/ /dri med byang chub son pa ni/ /gzhan gyi sems rnams byin rlob byed/ /rgyal ba yis ni nad rnams 'phrog /bzhu ba yis ni dbul ba 'joms/ /bsgyur ba yis ni dngos grub ster/ /rjes su bsgyur bas 'chi med nyid/ /rgyu mthun pas ni rgas pa 'phrog /rnam par smin pas dpal ster byed/ /skyes bu byed 'dis dngos grub po/ /dri ma med pas 'chi med ster/ /'chi na ma rig pa 'jug cing / /de las 'du byed rnams skye'o/ /de nyid dang po'i mgon por bshad/ /zhal gsum rnam pa phyag drug pa/ /mi bskyod dang po 'jug pa gang //de las rnam par shes pa 'byung / /de las ming dang gzugs su 'gyur/ /de nas khams drug bdag nyid can/ /skye mched drug go 'di rnams las/ /gzugs rdo rje sogs nges par 'byung / /mig sogs rnams dang gzugs sogs rnams/ /lhan cig sbyor ba reg pa'o//de las tshor ba skye ba ste/ /de ni rin chen 'byung ldan nyid/ /srid pa longs spyod bdag nyid sred/ /de nyid las ni nye bar skye/ /de las nye bar len bar brjod/ /lag pa rkang pa rkyong ba'o/ /de las srid pa skye 'gyur te/ /byis pa'i dbugs ni phyir 'byung ba'o/ /de las skyed 'di 'du shes dang //byis pa rnam kyis rtag brjod pa'o/ /lus la sogs pa byin brlabs par/ /de 'di yongs su brtags pa ni/ /slar yang 'du byed shes par bya/ /so rnams lhung nas srid pa'o/ /byis pa skyes la ma rnams ni/ /chu yis 'khru ba'i dbang bskur byed/ /de yi gtsug phud rab 'jog pa//cod pan du ni yongs su brtags/ /de yis rna ba 'bigs pa sogs/ /dar dpyangs dbang bskur zhes par bshad/ /byis pa'i smra dang dgod pa ni/ /dril bu rdo rje'i dbang bskur ro/ /lnga pa longs spyod brtul zhugs yin/ /ming ni ming gi dbang bskur ro//klog pa la sogs rjes gnang la/ /pha dag gis ni rtag tu ster/ /de ltar rnam pa bdun gyis ni/ /dbang bskur bdun du rab tu grags/ /de yi bag ma len byed pa/ /dbang bskur gong mar brjod par bya/ /de yi shes rab stong pa ni/ /de yi lag pa 'dzin par brjod/ /shes rab thabs kyi snyoms 'jug pa//'chi ba las ni de bder 'gyur/ /lus bskyed pa ni bsnyen par 'gyur/ /srog 'byung ba ni bsgrub pa'o/ /gnyis skyes sogs rnams slar skye ba/ /nye bar bsgrub pa brjod par bya/ /shes rab thabs ni snyoms 'jug pas/ /sgrub pa chen po ta ma'o/ / zhes pa skye ba bskyed rim 'gyur/ /'chi ba sdud par brjod par bya/ /phung po mtshams sbyor 'pho ba med/ /ma rig 'pho ba'i chos can no/ /'du byed la sogs thams cad kyang / /spro ba dang ni sdud par 'gyur/ /zhes pa rtsa ba'i rgyud du'o/ /'di nyid du bcom ldan 'das kyis bka' stsal pa/ lha dbang bskur ba'i cho ga'i le'u bshad par bya'o/ /rang gi snying ga'i sa bon las/ /'od zer nges par phyung ste/ nag po dang sngon po'i 'od zer lcags kyu'i rnam pa can/ de rnams kyis khams gsum na bzhugs pa'i sangs rgyas rnams spyan drang zhing ma mo brgyad kyis yang dag par mchod de gsol ba gdab par bya'o//oM a b+hi Shiny+tsan+tu mAM sarba ta thA ga ta zhes pas so/ /de nas sangs rgyas de rnams he ru ka'i rnam pa'i gzugs kyis de bzhin gshegs pa lnga'i bdag nyid kyi bdud rtsi'i bum pa rnams kyis mngon par dbang bskur bar bya'o/ /dbang bskur bzhin pa na nam mkha' las me tog gi char 'bab par 'gyur ro//lha rnams kyis rnga bo che'i sgra rnams byed do/ /gur kum gyi char 'byung ngo / /gzugs rdo rje ma la sogs pa rnams kyis mchod pa byed do/ /spyan ma la sogs pa rnams kyis rdo rje'i glu rnams kyis glu len no/ /dbang bskur ba'i cod pan du rigs kyi bdag por 'gyur ro//'dis ni he ru ka rdzogs par 'gyur ro/ /de nas skul sogs pa'i byin gyis brlab pa'i sngags brjod par bya ste/ oM sarba ta thA ga ta kA ya wA ka tsi t+ta badzra swa b+hA ba At+ma kou0f85haM zhes pa'o/ /de ltar thun gsum du byin gyis brlabs pa'i s gom pa bsgoms nas langs te/dus thams cad du lha'i gzugs kyis gnas par bya'o/ /kye'i rdo rje'i 'grel pa stong phrag drug par lha dbang bskur ba'i le'u bstan pa ste yongs su bcad pa dgu pa'o/ /lha dbang bskur ba'i le'u rdzogs so// //thog ma tham med zhi ba//dngos dang dngos med zad khyab bdag /stong nyid snying rje dbyer med pa/ /byang chub sems zhes bshad pa ste/ /thog ma bar dang mthar dge ba/ /de nyid rin chen bde chen la/ /dngos po kun gyis phyag 'tshal te/ /le'u lnga pa'i 'grel pa ni/ /sangs rgyas de nyid ston byed pa//sems can kun la phan ched du/ /phyag rgya chen po'i 'bras thob ched/ /rdo rje snying pos bri bar bya/ /'dir bcom ldan 'das kyis bka' stsal pa/ de nas 'di las de kho na nyid kyi le'u bshad par bya'o/ /ngo bo zhes pa la sogs pa gsal bar bya ste/ ngo bo ni rang rig par byed pa/ de bzhin gshegs pa'i ye shes te/ ngo bo des 'dzin par byed pa dang / gzung ba dang 'dzin pa thams cad khams bco brgyad kyi rnam 'gyur dang bral bas/ rnal 'byor pa rnams kyi phyi rol gyi gzugs med/ mthong ba po med/ mig med/ mig gi rnam par shes pa med do/ /de bzhin du nyan pa po med/sgra med/ rna ba'i rnam par shes par shes pa med do/ /de bzhin du dri med/ snom pa po med/ sna'i rnam par shes pa med do/ /de bzhin du ro med/ myong ba po med/ lce'i rnam par shes pa med do/ /de bzhin du reg bya med/ reg pa po med/ lus kyi rnam par shes pa med do/ /de bzhin du chos kyi khams med/'dzin pa po med/ yid kyi rnam par shes pa med do/ /de ltar mig la sogs pa rnams kyang yod pa ma yin te/ de ltar khams bco brgyad dang bral ba'i de kho na nyid rin po che rnal 'byor pas bsgom par bya ste/ ma rig pa la sogs pa 'gog pas so/ /rtsa ba'i rgyud du bcom ldan 'das kyis gsungs pa/'gyur ba'i ma rig 'gog pa yis/ /'du byed nges par 'gog pa'o/ /'du byed nges par 'gog pa yis/ /rnam par shes pa 'gog pa'o/ /rnam par shes pa 'gog pa yis/ /ming dang gzugs ni 'gog par byed/ /ming dang gzugs ni 'gog pa yis//skye mched drug rnams 'gog pa'o/ /skye mched drug rnams 'gog pa yis/ /reg pa yang ni 'gog par byed/ /reg pa 'gog pa yis kyang ni/ /tshor ba nges par 'gog par byed/ /tshor ba nges par 'gog pa yis/ /sred pa yang ni 'gog par byed/ /sred pa nges par 'gog pa yis//nye bar len pa 'gog pa'o/ /nye bar len pa 'gog pa yis/ /srid pa yang ni 'gog pa'o/ /srid pa yang ni 'gog pa yis/ /skye ba nges par 'gog pa'o/ /skye ba 'gog pa yis kyang ni/ /rga shi nges par 'gog pa'o/ /phung po khams rnams nges 'gog pas//de nyid nye bar zhi bar bshad/ /de ltar lus ni 'gog pa yis/ /srog rlung yang ni 'gog pa'o/ /srog rlung nges par 'gog pa yis/ /byang chub sems ni 'gog pa'o/ /byang chub sems ni 'gog pa yis/ /'dzag pa nges par 'gog pa'o/ /'dzag pa'i skad cig 'gog pa yis//rnal 'byor pa kun sangs rgyas nyid/ /de bzhin nyon mongs rnams 'gog pa/ /las rnams kyang ni 'gog pa'o/ /las rnams kyang ni 'gog pa yis/ /sdug bsngal rnams kyang 'gog pa'o/ /sdug bsngal rnams kyang 'gog pa yis/ /de ni nyon mongs skye mi 'gyur/ / nyon mongs skye ba skye med par/ /las ni skye ba min pa nyid/ /de rnams skye ba med par ni/ /sdug bsngal rnams kyang 'byung ma yin/ /sdug med bde ldan rnal 'byor pa/ /rtag tu sems can don rnams byed/ /sdug pa dang ni mi sdug par/ /sems can rnams ni rnam rtog pa//de las nyon mongs pa rnams 'byung / /de las kyang ni las skye'o/ /las las sdug bsngal skye ba ste/ /bde ba med na de las slar/ /dge ba bcu ni yongs spangs las/ /bde ba gang las 'byung bar 'gyur/ /bde med sdug bsngal sems las ni/ /bsod nams tshogs ni ga las yin//lha dang sngags dang phyag rgya sogs/ /brtags pas byis pa rnal 'byor pa/ /bsod nams med par ye shes tshogs/ /gang la yang dag skye bar 'gyur/ /de dag med na sangs rgyas nyid/ /rdo rje sems dpa' mchog med do/ /de med na yang rang don dang / /gzhan don yang dag 'byung ba med//rnam dag chos dang longs spyod rdzogs/ /sprul pa de rnams spro bar byed/ /sad pa rmi lam gnyid stug po/ /bzhi pa'i gnas skabs bzhi po yis/ /rgyu 'bras gang tshe 'gags de'i tshe/ /sangs rgyas nyid du the tshom med/ /rdul med rdul bral dri ma med/ / nyes pa spangs pa skyon med pa/ /shin tu sad pa rnam sad bdag /kun mkhyen kun rig dam pa po/ /rgyu dang 'bras bu 'gog pa las/ /rgyal ba'i dbang po'i sku gzhan no/ /sku gsung thugs dang bde ba yang / /gzhan te phung po'i tshogs pa'ang gzhan/ /sa sogs khams rnams gzhan pa ste//yul dang dbang po rnams kyang ngo / /las kyi dbang po'i bya ba'ang gzhan/ /de bzhin las kyi dbang po yang / /thams cad nas ni phyag zhabs sogs/ /kun nas spyan dang dbu dang zhal/ /kun nas thos ldan 'jig rten du/ /thams cad khyab par byas te bzhugs/ /zhes pa rtsa ba'i rgyud du de kho na nyid kyi nges pa'o//da ni 'di sgrub pa'i ched du kun rdzob tu phyag rgya nyung ngu'i rgyud du gsungs pa 'di lta ste/ skyed byed ma dang sring mo dang / /bu mo sring mo'i bu mo ni/ /shes rab thabs kyi cho ga yis/ /rnal 'byor rig pas rtag tu mchod/ /rnal 'byor zhes pa gzung ba dang / 'dzin pa'i sems dag gcig pa nyid/ /brkyang ma dang ro ma dag gcig pa nyid dang / gtum mo dang khu ba dag gcig pa nyid do/ /de las nges par sgrub pa'i dbang phyug dang ldan pa ste/ tshangs par spyod pa mi 'gyur ba'i bde ba shes rab dang thabs snyoms par 'jug pas mchod par bya'o//phyi rol du ni yul dang rigs kyi tha snyad kyis ma la sogs pa rnams so zhes pa'o/ /de bzhin du/ gar ma tshos ma g.yung mo dang / /gtum mo de bzhin bram ze mo/ /rnal 'byor rig pas zhes sngar bshad pa'i chogs dang / shes rab thabs kyi cho ga yis/ /de nyid rig pas rtag tu mchod//dus thams cad du mi 'pho ba'i bde bas cho ga bsten par bya ste/ ji ltar bye bar mi 'gyur bar/ bye ba ni nges pa'i don gyi khu ba 'pho ba'o/ /drang ba'i don gyi phyi rol du skye bos smod pa'o/ /de'i phyir ma la sogs pa rnams rnal 'byor bas 'bad pas bsten par bya ba bcom ldan 'das kyi nges pa ste/gang gi tshe gsal por bsten par byas na de'i tshe rgyal po'i rigs la sogs pa rnams kyis byis pa'i rnal 'byor pa rnams la sdug bsngal ster bar byed do zhes pa'o/ /rigs lnga'i phyag rgya rnams zhes pa/ /thar pa'i rgyur ni brjod par bya/ /zhes pa ste/ 'dir thar pa'i rgyur phyag rgya zhes bya ba/de bzhin gshegs pa lnga'i rigs can yin la/ rdo rjes te/ byang chub sems 'dis rgyas gdab bya/ /zhes pa phyag rgya ste a wa d+hU tI'o/ /'dir rdo rje zhes pa la sogs pa ma la sogs pa'i phyag rgya rnams 'khrags 'khrugs su gsungs mod/ rim pa ji lta ba bzhin du gzung bar bya ste/'dir ma ni de bzhin gshegs pa'i rigs dang / bram ze mo dang / spyan ma ste lte ba'i pad+ma la'o/ /sring mo ni mA ma kI dang snying gar dang rdo rje'i rigs can ma dang g.yung mo'o/ /bu mo ni me'i khams dang / pad+ma'i rigs can ma dang / gar ma ste mgrin par ro/ / sring mo'i bu mo ni rlung gi khams dang / las kyi rigs can ma dang tshos ma ste dpral bar ro/ /chung ma ni rdo rje'i dbyings kyi dbang phyug ma dang / nam mkha'i khams dang gtum mo dang / rin po che'i rigs can ma ste/ gtsug tor du'o/ /mthar skyes ma ni ye shes kyi khams dang rdo rje sems dpa'i rigs can ma ste gsang ba'i pad+mar ro//de ltar lte ba las steng du phyag rgya'i rigs lnga po 'di/ mdor bsdus pa ni brjod par bya/ /rigs ni rnam pa drug rnams brjod/ /ces pa gtsug tor du nam mkha'i khams kyi rigs dang / dpral bar rlung gi khams kyi rigs dang /mgrin par me'i khams kyi rigs dang / snying gar chu'i khams kyi rigs dang / lte bar sa'i khams kyi rigs dang / gsang bar ye shes kyi khams kyi rigs so/ /de ltar nam mkha'i gtso bo'i yon tan ni chos kyi khams so/ /rlung gi yon tan gtso bo ni reg bya'o/ /me'i yon tan gtso bo ni ro'o//chu'i yon tan gtso bo ni gzugs so/ /sa'i yon tan gtso bo ni dri'o/ /ye shes kyi khams kyi yon tan gtso bo ni sgra'i khams so/ /de bzhin du rna ba'i dbang po dang / sna'i dbang po dang / mig gi dbang po dang / lce'i dbang po dang / lus kyi dbang po dang / yid kyi dbang po dang /de bzhin du b+ha ga'i dbang po dang / ngag gi dbang po dang / lag pa'i dbang po dang / rkang pa'i dbang po dang / rkub kyi dbang po dang / mchog gi dbang dang / de ltar phyag rgya rnam par dag pa ste/ bshang ba 'dzag pa dang / gci ba 'dzag pa dang / 'gro ba dang / len pa dang / smra ba dang / khu ba 'dzag pa ste/de ltar rigs sum cu rtsa drug rnams kyi rigs drug go/ /de ltar khams sum cu rtsa drug rnams su rig par bya'o/ /de bzhin du rnam par shes pa drug dang / 'du byed drug dang / tshor ba drug dang / 'du shes drug dang / gzugs drug dang / ye shes drug ste/ de ltar phung po dang khams rnams bdun cu rtsa gnyis so//de rnams kyang nyis 'gyur gyi mkha' 'gro ma'i dra ba sdom pa las lha rnams te/ dkyil 'khor sum cu rtsa drug rnams dang / sum cu rtsa bdun pa he ru ka rdo rje phag mo dang bcas pa'o/ /de'i rigs gsum ste/ sku dang gsung dang thugs kyi 'khor lo ni bde mchog ste/nyis 'gyur ni 'khor lo drug gi bde mchog go/ /kye'i rdo rje'i rgyud 'dir ni bcom ldan 'das kyis gsungs pa/ 'khor lo sdom pa'i tshig gnyis kyis gsal bar mdzad de/ de nas sngags pas nyis 'gyur mchod/ /mkha' 'gro ma yi dra ba sdom/ /zhes gsungs pa las so//'dab ma dang zhing la sogs pa nyis 'gyur te/ gnas bzhi rnams dang nye ba'i gnas bzhi rnams dang / zhing bzhi rnams dang nye ba'i zhing bzhi rnams dang tsha n+do ha bzhi dang / nye ba'i tsha n+do ha bzhi dang / 'du ba bzhi rnams dang / nye ba'i 'du ba bzhi rnams dang / 'thung gcod bzhi rnams dang / nye ba'i 'thung gcod bzhi rnams dang /dur khrod bzhi rnams dang / nye ba'i dur khrod bzhi rnams te/ de ltar sa bcu gnyis rnams so/ /re re la yang dpa' bo'i dbang phyug ma bzhi dpa' bo dang bcas pa rnams so/ /de ltar 'khor lo drug la rnal 'byor ma bzhi bcu rtsa brgyad rnams te/ nam mkha'i 'khor lo la rdo rje mkha' 'gro ma brgyad rnams dang /rlung gi 'khor lo la ral gri'i mkha' 'gro ma brgyad dang / me'i 'khor lo la rin po che'i mkha' 'gro ma brgyad dang / chu'i 'khor lo la pad+ma'i mkha' 'gro ma brgyad dang / sa'i 'khor lo la 'khor lo'i mkha' 'gro ma brgyad dang / ye shes kyi 'khor lo la gri gug gi mkha' 'gro ma brgyad do/ /rdo rje nor bur stong pa'i mkha' 'gro ma brgyad de rdo rje rtse gcig pa 'dzin pa rnams so/ /gzhan rnams ni dur khrod bcu drug na dga' ba bcu drug las skyes pa mkha' 'gro ma bcu drug rnams te/ rna ba gnyis la gnyis dag dang / sna'i bu ga na gnyis dang / mig dag na gnyis dang / lce dang 'phyang ma dag na gnyis dang / spyi gtsug gi bu ga dag na gnyis dang / bshang lam gyi sgo na gnyis dang / gci ba'i sgo na gnyis dang / khu ba 'pho ba'i sgo na gnyis te de ltar rnal 'byor ma bcu drug rnams so/ /de rnams kyi dbus na gtso bo lhan cig skyes pa'i dga' ba stong pa nyid kyis 'khyud pa bcom ldan 'das kye'i rdo rje phyag nyi shu rtsa bzhi pa ste 'khor lo sdom pa nyis 'gyur las so//dus kyi khyad par gyis bzhugs pa ste/ lo rnam par dag pa sku sngon po'o/ /bgrod pa rnam par dag pas dkar po dang dmar po'i zhabs so//dus gsum rnam par dag pas nag po dang / dmar po dang dkar po'i mgrin pa ste/ mgo can la sogs pa'i zla ba bzhi rnams dus gcig go/ /chu srin la sogs pa zla ba gsum gyi bdag nyid can gyi dus bzhi rnams te/ de rnam par dag pas nag po dang / dmar po dang /dkar po dang / ser po'i zhal bzhi'o/ /de bzhin du mgo can la sogs pa rnams zla ba gnyis kyi bdag nyid can gyi dus tshigs drug rnams te/ de rnam par dag pas phrag pa drug ste/ sngon po dang / dmar po dang / dkar po'i rang bzhin g.yas dang cig shos dag go//de bzhin du zla ba bzhi bzhi'i bdag nyid g.yas pa dang cig shos kyi nag po dang dmar po dang dkar po'i dpung pa bcu gnyis te zla ba bcu gnyis rnams la'o/ /de bzhin du phyogs kyi dbye bas phyag nyi shu rtsa bzhi pa'o/ /so sor tshes grangs so so'i dbye bas g.yon pa dang g.yas pa'i phyag gi tshigs kyi rtsa rnams so//sor mo'i tshigs drug cu lhag pa'i brgya phrag gsum ni lo'i tshes kyi dbye bas so zhes pa'o/ /de ltar rigs drug gi bdag nyid can gyi he ru ka dus kyi 'khor lo ste/ de kho na dang po'i sangs rgyas zhes kyang brjod par bya'o/ /'di'i zhal brgya yis mgo bo'i phreng ba ni rig byed kyi yan lag brgya yin la tshangs pa'i mgo bo bcad pa rnams kyi rdo rje thod pa can chen po bcom ldan 'das so zhes pa'o//nyis 'gyur gyi mkha' 'gro ma'i dra ba sdom pa ni rigs drug gi bdag nyid can no/ /rgyud gzhan dang gzhan du ni rigs lnga'i bdag nyid can no/ /de'i phyir/ rigs ni rnam pa drug bshad pa/ /mdor bsdus pas ni rnam pa lnga/ /sku gsung thugs kyi dbye ba yis/ /phyi nas rnam pa gsum nyid 'gyur/ /zhes pa'o/ /de ltar bshad pa'i rim pas/ rigs dang 'byung ba lnga rnams dang / /phung po lnga yi bdag nyid can/ /'di yis rig byed bgrangs byed pas//rigs zhes mngon par brjod par bya/ /zhes pa rigs drug dang / rigs lnga dang / rigs gsum gyi nges pa'o/ /da ni de bzhin gshegs pa'i mtshan nyid brjod par bya ste/ dpal ldan de bzhin nyid du gshegs/ /de bzhin nyid du'ang byon pa nyid/ /shes rab ldan pa 'di yis ni//de bzhin gshegs pa mngon brjod bya/ /zhes te/ 'dir shes rab stong pa nyid dang ldan pa de stong pa nyid kyi gzugs dang lhan cig pa'o/ /de bzhin nyid du ste/ gsang ba'i pad+mar rdo rje nor bu'i mthar thug par mi gnas pa'i mya ngan las 'das pa'i sa la gtsug tor nam mkha'i khams nas dpral ba dang /mgrin pa dang / snying ga dang / lte ba dang / gsang ba'i pad+ma rnams la rlung dang / sa dang / chu dang / me dang / ye shes kyi rang bzhin gyi rdo rje btsun mo'i b+ha ga rnams su bzhugs par gyur to zhes pa dpal ldan byang chub kyi sems rdo rje gshegs pa'o/ / de bzhin du yang byon pa nyid/ /ces pa ji ltar 'og gi char gshegs pa de ltar rdo rje nor bu las gsang ba'i pad+ma ye shes kyi khams las byon pa ste lte bar dang / snying gar dang / mgrin par dang / dpral bar dang / gtsug tor du gyen du khu ba yis so/ /de ltar na ji ltar gshegs pa de ltar byon pa grub ste/yan lag bcu gnyis 'gog pa zhes pas sa bcu gnyis thob pa'o/ /ji ltar 'jig rten pa'i kun rdzob kyi dga' ba dang / mchog dga' ba dang / khyad dga'i dga' ba dang / lhan cig skyes pa'i dbye bas dpral ba nas 'og tu byon pa de ltar bzlog pas rgyu mthun pa dang rnam par smin pa dang /skyes bu'i byed pa dang / dri ma med pa rnams kyi gsang ba nas dpral bar gshegs pa'o/ /de skad du yang gsungs pa/ lte bar rgyu mthun rab tu brjod/ /chos kyi 'khor lor rnam smin te/ /skyes bu byed pa longs spyod du/ /bde ba chen po dri ma med/ /ces pa nges pa ste/'chad par 'gyur ba la'o/ /de ltar na ji ltar tshes gcig la sogs pa cha bco lnga'i dbye bas kun rdzob tu gtsug tor nas gsang ba'i pad+mar cha rdzogs pa'i rang bzhin gyis 'og tu khu bas ye shes kyi sems song ba ste/ de ltar rdo rje nor bu las byung ba rnal 'byor gyi stobs kyis gsang ba'i pad+ma las bzlog pas tshes gcig la sogs pa'i cha'i dbye bas cha gang ba'i rang bzhin gyi steng du khu bas dpral ba'i pad+mar gshegs pa ste/gtsug tor du cha bcu drug pa'i rang bzhin gyis so/ /de ltar 'khor ba pa rnams kyi rdul gyi khams nag po'i tshes gcig la sogs pa'i dbye bas gsang ba nas gtsug tor du song ba gnam stong gi mthar cha bcu drug pa nyams pa'i dbye bas yin no//de kho na sangs rgyas rnams kyis bzlog pas gtsug tor nas nag po'i tshes gcig la sogs pa'i cha'i dbye bas gnam stong gi mthar zla ba'i cha bcu drug pa nyams pa'i bye brag gis gsang ba'i pad+mar son pa'o//de skad du yang kun rdzob pas dang po'i sangs rgyas su gsungs pa/ lus can thams cad 'chi ba na/ /zla ba bdud rtsi 'og tu 'gro/ /steng du nyi ma rdul sgra gcan/ /rnam shes dngos po'i mtshan nyid do/ /de phyir zla ba bdud rtsi ni/ / steng du 'gro bya mi bskyod pa/ /'og tu nyi ma rdul sgra gcan/ /rnam shes 'gyur med bde ba la'o/ /zhes so/ /don dam pas 'di nyid du 'chad par 'gyur ba/ /byang chub sems ni zla bar 'gyur/ /bco lnga'i cha yi bdag nyid can/ /bde ba chen po A li'i gzugs/ /rnal 'byor ma rnams de yi cha/ / zhes pa dga' ba bcu drug gi nges pa'o/ /de bzhin du rigs kyi le'ur bcom ldan 'das kyis gsungs pa/ ji ltar rigs par rnal 'byor ma'i/ /skye ba dang ni gnas pa'i rgyur/ /nus pa ye shes rnam shes dang / /lha rnams ji ltar 'byung ba'o/ /he ru ka ni bskyed pa'i rgyu/ /dang po re zhig e waM 'gyur/ /lhan cig skyes dga' bde ba che//e waM yi ge 'gyur med che/ /zhes pa nges pa'o/ /rnam par mi rtog pa'i yid la ni/ /sgom pa po med bsgom bya med/ /sngags med lha ni yod ma yin/ /spros pa med pa'i rang bzhin las/ /sngags dang lha dag yang dag gnas/ /de nyid kyis na lhan cig skyes pa'i dga' ba'i rang bzhin gyi rnam par rtog pa'i rnyog pa mtha' dag nub pa'i ngo bos so//da ni phung po drug po rnams kyi kun rdzob dang don dam pa'i dbye ba brjod par bya ste/ rnam snang zhes pa la sogs pas so/ /'dir rnam par snang mdzad ni sa'i 'khor lo la 'dren pa'o/ /mi bskyod pa ni nam mkha'i 'khor lo la 'dren pa'o/ /'od dpag med ni chu'i 'khor lo la 'dren pa'o//rin chen 'byung ldan ni me'i 'khor lo la 'dren pa'o/ /don yod grub pa ni rlung gi 'khor lo la 'dren pa'o/ /sems dpa' can ni ye shes kyi 'khor lo la 'dren pa'o/ /de rnams kyang grangs ji lta ba bzhin du/ tshangs pa khyab 'jug zhi ba dang / /thams cad rnams da de nyid brjod/ /ces pa kun rdzob tu sems can rnams 'og tu khu ba can rnams te/don dam pas sangs rgyas rnams steng du khu ba can rnams so/ /tshangs pa myang 'das sangs rgyas te/ /zhes pa bshang ba'i khams mi 'dzag pa nyid kyi phyir ro/ /'jug phyir khyab 'jug brjod par bya/ /gci ba'i khams rnams rang gi lus la 'jug pa nyid kyi phyir te/phyi rol du 'byung ba med pa'i phyir sangs rgyas khyab 'jug tu brjod par bya'o/ /rtag tu dge phyir zhi ba'o/ /zhes pa la dge ba'i tshul khrims ma nyams pa ste/ khu ba mi 'pho ba'i bde ba'i phyir sangs rgyas 'di ni zhi bar brjod par bya'o/ /thams cad kun bdag la gnas phyir/ /zhes pa thams cad ni rin chen 'byung ldan khrag gi khams te/de 'pho ba med pa la sdug bsngal med la/ de med pa'i phyir/ bde sdug sel ba mthar 'byung ba/ /chags bral lus ni zad pa po/ /zhes pa'o/ /kun bdag la gnas ni lha'i mig dang gzhan gyi sems shes pas thams cad la khyab par byed pa nyid kyi phyir/ /sangs rgyas ni thams cad ces par brjod par bya'o/ /rtogs pa med pas rnam sad do//zhes pa mig la sogs pa'i dbang pos rtogs pa med pas don yod grub pa ni sha'i khams te/ de zad pa nyid kyi phyir mig la sogs pa rnams 'du byed pa med la/ de med pa'i phyir rnam sad de/ bdag rig gzhan rig thams cad pa/ /kun la phan pa'i gang zag mchog /'jig rten dpe las 'das pa ste//shes dang shes bya'i bdag po mchog /ces pas sangs rgyas ni/ rtog pa med pas rnam sangs rgyas/ /zhes pa nges pa'o/ /dam pa'i bde bas de nyid 'gyur/ /zhes pa la dam pa'i bde ba ni zag pa med pa stong pa nyid dang / mtshan ma med pa dang / smon pa med pa dang / mngon par 'dus ma byas pa ste/ rnam par thar pa bzhi po gcig tu 'dres par gyur pa nyid snying rje dang byams pa dang dga' ba dang btang snyoms dmigs pa med pa'i rang bzhin gyis/dmigs pa shes rab dang thabs kyi bdag nyid can gyi de kho na nyid ni sangs rgyas yin no zhes brjod pa'o/ /de ltar na/ bden don rnam pa bcu gnyis pa/ /de nyid rnam pa bcu drug rig /rnam pa nyi shus byang chub pa//rnam dag mchog tu mi 'gyur rig /ces pa sangs rgyas bcom ldan 'das so/ /de ltar gsungs pa'i rim pa las/ /rigs gsum dang ni rigs lnga nyid/ /rang bzhin gcig pas rigs brgya'o zhes pa'o de skad du mtshan yang dag par brjod par/ khro bo'i rgyal po gdong drug 'jigs/ /mig drug lag drug stobs dang ldan/ /keng rus mche ba gtsigs pa po//ha la ha la gdong brgya pa/ /zhes pa dang ni de bzhin du/ /rdo rje 'bar ba mig mi bzang / /mgo skyes rdo rje 'bar ba ste/ /rdo rje 'bebs pa 'bebs pa che/ /mig brgya pa ste rdo rje'i mig /ces pa rigs brgya'i nges pa'o/ /de ltar kun rdzob dang don dam pa'i dbye bas 'jig rten pa dang 'jig rten las 'das pa'i de kho na nyid ni sgrib pa dang bcas pa dang /sgrib pa med pa dang / mtshan ma dang bcas pa dang / mtshan ma med pa dang / rnam par rtog pa dang bcas pa dang / rnam par rtog pa med pa dang / sgro btags pa dang sgro btags pa med pa dang / nga rgyal dang bcas pa dang nga rgyal med pa ste/ sems can rnams dang sangs rgyas rnams kyis rten cing 'brel bar 'byung ba'i yan lag bcu gnyis 'gog pas mi skye ba 'jug pa yang med pa'o zhes pa rgyud gzhan thams cad du sangs rgyas bcom ldan 'das kyi nges pa ste mkhas pa rnams kyis rig par bya'o//da ni yang kun rdzob kyi chos kyi lha la sogs pa brjod par bya ste lus la 'byung ngo zhes pa la sogs pas so/ /'dir gang gi phyir lus 'byung ba lnga'i bdag nyid la kun rdzob kyi bde ba yang dag par 'byung ba de'i phyir lha zhes bdag gis brjod par bya'o//sangs rgyas 'di la b+ha ga mnga'/ /des na bcom ldan 'das zhes brjod/ /b+ha ga rnam pa drug tu brjod/ /dbang phyug la sogs yon tan kun/ /dbang phyug dang ni phun tshogs dang / /ye shes grags pa dpal rnams dang / / skal ba bzang po yon tan nyid/ /b+ha ga'i sgra yis brjod par bya/ /yang na nyon mongs la sogs bdud/ /'joms phyir bcom ldan zhes pa'o/ /don dam pas so zhes pa thabs kyi nges pa'o/ /da ni shes rab brjod par bya/ /ma zhes pa la sogs pas so/ /'dir thabs ni pha ste khu ba'i khams so/ /shes rab ni ma ste rdul gyi khams so//bskyed pa ni las kyis byin gyis brlabs pa'i dri za'i sems can 'chi ba'i mthar gyur pa skye ba'i char gtogs pa'i kun gzhi'i rnam par shes pa ste/ de kho na 'gro ba'i sgras brjod par bya'o/ /bcom ldan 'das kyis/ kye rgyal ba'i sras rnams khams gsum po 'di ni sems tsam mo zhes gsungs pa'i phyir ro/ /'gro ba ni de kho na'o//'gro ba skyed par byed do zhes pa shes rab ma ru brjod par bya ste rdul gyi khams so/ /de bzhin du skal ba can gyi thabs te khu ba'i khams so/ /gang phyir rnam dbye ston pa'i phyir/ /shes rab de kho na sring mor brjod par bya/ khams kyi rnam 'gyur so so'i ba spu dang pags pa dang sha dang khrag gi'o/ /de bzhin du thabs ni spun zla ste/gang gi phyir rtsa dang rus pa dang rkang gi rnam par dbye ba ston pa de'i phyir khu ba'i khams so/ /yon tan 'jo phyir shes rab de kho na ni bu mor yang brjod par bya ste/ yon tan rnams ni sgra dang / reg bya dang / gzugs dang / ro dang / dri dang / chos kyi yul rnams te/ de rnams 'jo ba'i phyir na de 'dzin pa'i phyir ro zhes pa'o/ /de bzhin du thabs ni bu ste mig la sogs rnams rab tu 'jug pa nyid kyi phyir thabs kyi khams so//de bzhin du shes rab ni sring mo'i bu mo ste yul la rnam par shes pa rnams rab tu 'jug pa nyid kyi phyir ro/ /thabs ni spun zla'i bu ste mig la sogs pa rnams la rab tu 'jug pa nyid kyi phyir ro zhes pa'o de bzhin du 'pho ba'i bde ba la 'jug pa nyid kyi phyir shes rab ni chung mar brjod do//thabs kyang khyo bo ru brjod de phan tshun ltos pa nyid kyi phyir gnyis ka yang 'pho ba'i bde ba'i chos las so zhes pa'o/ /chags pa dang bral ba las shes rab ni reg min mthar skyes ma zhes brjod do/ /thabs kyang ngo zhes pa phyag rgya drug gi nges pa'o/ /khams kun rmongs par byed pa'i phyir/ /bram ze mo zhes brjod par bya/ /'tsheng byed shes rab tshos ma'o//khams g.yo byed phyir gar mkhan ma/ /sreg byed phyir nag tu ma mor bshad/ /reg min phyir na g.yung mor bshad/ /de bzhin du thabs kyang shes par bya ste/ bya ba lnga'i rang bzhin las so/ /de ltar thams cad phyi rol du de'i phyir mu stegs pa rnams kyis rig byed la sogs pa rnams kyis rab tu brtags pa ste/ /rang bzhin gyis bud med thams cad dang skyes pa thams cad mi'i rigs gcig tu yang dag par byung ba ste/de rnams la rigs gzhan yod pa ma yin no zhes pa rgyud gzhan thams cad du mngon par dgongs pa'o/ /da ni khams kyi rang bzhin gyis sngags bzlas pa la sogs pa brjod pa zhes pa la sogs pas bshad par bya'o/ /'dir sems can thams cad kyi brjod pa ni A li kA li dbyangs dang gsal byed dag gi brjod pa gang yin pa ste/de'i phyir/ brjod pa bzlas pa yin par bshad/ /de kho na nyid kyi rnal 'byor pa rnams kyi'o/ /de bzhin du/ rkang pa'i rjes ni dkyil 'khor 'gyur/ /rkang pa dag gis sa gzhi nyed pa'i phyir dkyil 'khor du brjod par bya'o/ /de bzhin du/ lag pa bsgyur ba phyag rgyar 'gyur/ /sor mo nyed pa gang yin pa//de bzhin du/ sems can rnams kyis gang sems pa/ /de kho na bsam bya ste/ pha rol gyi sems shes pas rnal 'byor pa rnams kyis zhes pa'o/ /gang phyir bsam bral bsam bya ba/ /zhes pa bsam bral zhes pa sems pa med pa ste/ rnal 'byor pa rnams kyi bsam bya gang yin pa'o/ /pha'i yul la 'chi ba'i mthar gyur pa skye ba'i char gtogs pa'i sems can gyi 'pho ba'i gnas skabs su thob pa'i bde ba gang yin pa'i bde ba de nyid ni lo bcu drug gi mtshams su skyes pas rang gi bza' bar bya ba'o//bud med kyis ni lo bcu gnyis kyi mtshams su longs spyad par bya'o/ /bde ba gang gis 'chi ba 'dir te/ 'khor ba pa rnams kyis 'khor bar skye ba dang gnas pa'i bde ba de kho na brtan par gyur pa ni rnal 'byor pa rnams kyi bsam gtan du brjod par bya'o//kye'i rdo rje'i snying po bdag gis 'di thams cad ni mdor bsdus pa'i kye'i rdo rje'i rgyud 'bum phrag lnga pa las/ 'bum phrag so so'i nang nas le'u so so las bsdus pa'i don bstan pa ste le'u lnga pa rnams su'o// //'di las phyi ma spyod pa'i le'u la sogs pa ni rgya cher rtogs par bya'o//rigs kyi le'u ru tshigs su bcad pa sum cu rnams kyis 'bum phrag dang po las bsdus pa'i don to// //sngags kyi le'u ru tshigs su bcad pa bzhi bcu rnams kyis 'bum phrag gnyis pa las so/ /lha'i le'u ru nyi shu rtsa bzhi rnams kyis 'bum phrag gsum pa las so/ /tshigs su bcad pa drug rnams kyis dbang bskur ba'i le'u ru 'bum phrag bzhi pa las so//tshigs su bcad pa nyi shu rnams kyis de kho na nyid kyi le'u 'bum phrag lnga pa las so/ /de ltar tshigs su bcad pa nyi shu lhag pa'i brgya rnams kyis bsdus pa'i don le'u lnga rnams su rnal 'byor pa rnams kyis rgya cher 'grel pa 'di yis rtogs par bya'o zhes pa'o/ /kye'i rdo rje'i 'grel pa stong phrag drug par de kho na nyid nges pa mdor bstan pa'i mdor bsdus chen po'o// //de ltar de kho na nyid kyi le'u rdzogs so/ /dpal kye'i rdo rje bsdus pa'i don gyi 'grel pa rdzogs so// //rje btsun byang chub sems dpa' sems dpa' chen po rdo rje snying pos mdzad pa'o/ /rgya gar gyi mkhan po dA na shI la dang / lo tsA ba 'bro seng dkar shAkya 'od kyis bsgyur ba/slad kyi rgya gar gyi mkhan po su b+hU ti shrI shAn+ti dang / lo tsA ba cog gru ting nge 'dzin bzang pos zhus so/ /yang slad kyi rgya gar gyi mkhan po rgyal po'i sras/ dpal 'jigs med lha'i zhal sngar lo tsA ba snyel cor dge slong pradz+nyA kI rtis yul dbus 'gyur gyi dpes gtan la phab pa/ slar yang dpal ldan shong ston rdo rje rgyal mtshan gyis legs par bshad pa la sogs pa'i mthu las/brda sprod pa'i tshul rig pa'i dpang lo tsA ba dpal ldan blo gros brtan pas/ byang chub sems dpa'i 'grel ba skor gsum gyi tshul la shin tu dad cing blo'i snang ba rgyas pa'i bshes gnyen ra lung pa chos grags dpal bzang pos/ slob dpon chen po zhi ba 'tsho'i zhabs dpon slob kyis mdzad pa'i/ dbu ma'i gzhung lugs chen po de kho na nyid bsdus pa rtsa 'grel gyi glegs bam bris te yon du gnang nas yang dang yang du bskul ba'i dor legs par bcos te bsgyur cing zhus nas gtan la phab pa'i yi ge pa ni mdzad ston kun dga' rgyal mtshan zhes bya'o// //'dis sems can mang po dpag tu med pa la phan par gyur cig/ // rdo rje snying po'i 'grel pa bzhugs/ @##/ /yan lag bcu gnyis srid rtsa bton/ /dag pa rnam pa bcu gnyis 'chang / /kye'i rdo rje la phyag 'tshal nas/ /spyod mchog le'u rgyas bshad 'di/ /'bum phrag lnga pa'i rjes 'brangs nas/ /'gro la snying rjes gdungs pa yis/ /rdo rje snying po ngas bshad bya//de la kye'i rdo rje'i dkyil 'khor du zhugs pa'i rnal 'byor pa sngon gyi dam bcas pa las mi 'dor ba la brtson pa dang ldan pas/ /sems can kun gyi don gyi phyir spyod pa la 'jug par bya ba yin pas/ de nas gzhan yang rab bshad bya/ /spyod pas pha rol phyin mchog nyid/ /kye yi rdo rje dngos grub rgyus//gang gis dngos grub mthar 'gro ba/ /zhes bya ba gsungs te/ de nas zhes bya ba ni de kho na nyid kyi le'u bshad pa'i rjes su bstan pa yin pas mtshams sbyar ba'i tshig go/ /kye'i rdo rje'i dngos grub kyi rgyu'i tshul gyis khams gsum po kye rdo rjer 'grub par bya ba'i phyir/ /spyod pa brtsams zhes bya ba'i don yin la/de las gzhan pa'i spyod pa ni ma bstan te dgos pa med pa'i phyir ro/ /spyod pa'i dgos pa ni dngos grub mthar 'gro ba zhes bya ba yin te/ bdag dang de las gzhan pa'i skye bo rnams phyag rgya chen po'i dngos grub kyi mthar 'gro ba'i spyod pa brtsams zhes bya ba'i don to/ /de'i don yang rtsa ba'i rgyud nyid la 'jug par bya ste/ji skad du/ cho ga yan lag kun ldan yang / /spyod pa ma brtsams dngos mi grub/ /de bas phyag rgya'i dngos grub rgyu/ /chags med spyod pa 'di yin no/ /snying rje rnam par chad tsam gyis/ /sems can don gyi spyod mi 'grub/ /de bas snying rje dang ldan zhing / /'bad pas spyod pa spyad par bya//zhes pa 'di'i don yang shes par bya'o/ /de la spyod pa byed par 'dod pa'i rnal 'byor pas/ phyi nang gi dbye bas phyag rgya rnams bcing bar bya ste/ rgyud 'di nyid las kyang / sgom pa po yis rnam 'dzin pa/ /rna ba dag la rna cha bzang / /spyi bor 'khor lo rnam par gzung / /lag pa gnyis la lag gdub gnyis//rked par ska rags nyis skor gzung / /rkang par de bzhin rkang gdub po/ /dpung pa la ni dpung rgyan nyid/ /mgrin par rus khreng mgul to ste/ /zhes bya ba gsungs te 'di'i don yang 'bum phrag lnga pa nyid na gsal bas de la 'jug par bya ste/ gal te spyod pa rtsom 'dod pas/ / sems can 'dun par bya ba'i phyir/ /mi bskyod 'khor lo'i gzugs nyid kyis/ /lus mchog la ni rnam brgyan te/ /srid pa gsum du 'khor lo bskor/ /lus mchog la gnas chu rgyun gyis/ /cig car chos kyi 'khor lo bskor/ /'gro ba'i don chen byed par 'gyur/ /dpag med rna cha'i gzugs nyid kyis//rna ba dag la rnam brgyan te/ /srid pa gsum la chags par bya/ /de 'dis 'gro ba'i don byed 'gyur/ /rin chen mgul rgyan gzugs nyid kyis/ /bdag gi mgul pa rnam brgyan te/ /'gro 'di ro yis btul byas nas/ /'gro ba chu bzhin 'ju bar 'gyur/ / rnam snang lag gdub gzugs nyid kyis/ /lag pa dag la rnam brgyan te/ /'gro ba'i don la 'jug byas na/ /skye bo sa ltar brtan par 'gyur/ /don yod ska rags gzugs kyis ni/ /rked pa la ni rnam brgyan pa/ /'gro 'di rlung gis btul byas na/ /thogs med rlung gis 'gro ba 'dul//byang chub sems kyi rang bzhin gyis/ /thal bas lus la rnam brgyan te/ /mchog gi spyod pa rab spyad na/ /bde ba'i yid kyis 'gro ba 'dul/ /zhes gsungs pas 'di'i don rgyas par khong du chud par byas te/ nges pa'i don dus dang / chu dang / me dang / rlung dang / nam mkha' dang ye shes zhes bya ba'i bdag nyid can 'khor lo drug la brten pa'i khu ba drug dang rlung drug phyir 'byung ba 'gags pas/spyod pa spyad par bya ba yin la/ des skye bo gdul bar dka' ba thul bar 'gyur te/ gzhan du ni ma yin no/ /de bas na de 'gags pa'i brdar bstan pa ni/ 'khor lo la sogs pa drug tu bstan te/spyod pa byed pa rnams kyis phyi'i gzugs rnams kyang bcang bar nges so/ /gzhan yang dpa' ba dang / bde ba'i zas dang / thabs dang shes rab la gnas pa dang / rigs lnga'i tshul du gnas pa dang / kha dog las ston pa dang / rigs gcig tu bsdu ba dang / kha dog dang rigs gzhan gyis mi rigs par byas la spyod pa spyad ces su sbyar te/de yang bsdus pa'i rgyud 'di nyid las/ ji skad du/ bgo ba stag gi pags pa nyid/ /bza' ba mi 'chi bcu phyed de/ /he ru ka sbyor skyes bu nyid/ /kha dog lnga la rnam gnas te/ /rigs lnga dag dang mnyam ldan pa/ /rigs gcig tu ni rnam par brtag /gang phyir bye brag mtshon mi bya/ /zhes bya ba ste/ nang gi phyag rgya drug 'gags pa las stobs dang gzi brjid 'di dag 'byung bar 'gyur te/ 'di ltar gnod sbyin gyi bdag po phyag na rdo rje lta bur cher drag la mi bzad pa rnams kyis kyang 'jigs shing skrag par mi 'gyur na/ 'jig rten pa phal pa lta bu rnams lta ci smos/de bas na phyi dang nang gi bdud ma rungs pa rnams las rgyal bar bya ba'i phyir yang phyi rol du stag gi pags pa gos su gyon pa dang / skye bo rnams 'dun par bya ba'i phyir lha'i yul nas bdud rtsi drang ba la sogs pa byas te bza' ba dang / gzhan yang sngags kyi tshul du zhugs pa'i skye bo la phyi'i dngos grub kyi ched du mgo zhes bya ba la sogs pa dang /gzhan yang byi zhes bya ba'i skra dang ldan pa'i mi 'chi bcu'i phyed po rnams sbyang ba la sogs pa bya ste/ rtog pa spangs la bdag bza' ba dang / gzhan la sbyin par yang bya ste/ las kyi dang por gtogs pa rnams kyis rtogs par bya ba'i ched du'o//bdud rtsi za ba 'di'i nges pa'i don yang rtsa ba'i rgyud chen po nyid na gsal bas de la 'jug par bya ste/ de yang ji skad du/ bza' ba mi 'chi bcu phyed rnams/ /skye bos rtogs par ma gyur la/ /mgo la sogs pa'i rigs dngos nyid/ /rnal 'byor dbang phyug spyod pa yis//gcig sogs phyi ru rgyu med pas/ /bsten cing de nyid thim pa ste/ /tshangs par spyod pa brtul zhugs mchog /dka' thub mthar phyin dka' thub che/ /zhes gsungs te/ de bzhin gshegs pa'i nges pa'o/ /gzhan yang rang nyid stong pa nyid dang / snying rje tha mi dad pa la gnas te he ru kar byas la/phyi rol gyi skye bo gdul ba'i ched du rdul tshon la sogs pa gang dag kha dog lngar gnas pa de dang de dag de bzhin gshegs pa lnga 'am drug gi yon tan dang ldan par bstan pas kyang gdul bar dka' ba'i skye bo 'dul la/ mos par 'gyur ba de bas rigs lnga dag dang mnyam par ldan pa bstan par bya ba dang /de bzhin du chos kyi dbyings kyi bdag nyid pas kha dog dkar po/ rigs dang tshon thams cad par bsdus te/ bstan par bya ba yin pas/ rigs gcig tu ni rnam par brtag /ces bya ba dang / de bzhin du de ltar bstan pa de dag kyang sngags kyi tshul gyis las kyi dang por gtogs pa las gzhan pa/nyan thos kyi lam la gnas pa dang / rang rgyal ba'i lam la gnas pa dang / mu stegs byed pa la gsang zhing sba bar bya ba yin te/ de bas na kha dog du ma nyid kyis ni/ gang phyir bye brag mtshon mi bya/ /zhes bya ba'i don to/ /gzhan yang spyod pa'i mchog byed pas/sems can rnams kyi don du nang gi ma rungs pa'i sems kyis dpa' bo he ru kar bsgrubs la/ kha dog ste rigs lnga'i bdag nyid du gnas par bya ste/ 'di ltar rgyal rigs dang / rje rigs dang / bram ze'i rigs dang / dmangs rigs dang / gdol pa la sogs pa ste/ de rnams kyi nang du de rnams dang mthun pa'i lus su bsgyur la/spyod pa bstan par bya ba dang / de rnams kyi nang du song ste/ rang rang gi rigs rnams sun phyung la rigs thams cad rdo rje'i rigs su rigs gcig par bsgrub par bya ba dang / de bzhin du rje'u rigs kyi nang du rigs bzhi po mtshon par bya ba sbas te/ de nyid dang mthun par zhugs te gdul ba'i chos bstan pa dang /de bzhin du rigs thams cad kyi nang du phan tshun mi rigs par bya zhing chos bstan pa dang / de bzhin du las kyi phyag rgya bsgrub par bya ba'i ched du yang 'jig rten pa'i kha na ma tho ba spang bar bya ba'i rgyus rigs gzhan gyi lus su bsgyur te las kyi phyag rgya bsgrub par nges so//de'i phyir/ /rigs ni du ma nyid dag gis/ /gang phyir bye brag mtshon mi bya/ /zhes bya ba gsungs so/ /'di rnams kyi nges pa'i don ni rtsa ba'i rgyud nyid na gsal te de bas na de la 'jug par bya'o/ /de yang ji skad du/ stong nyid he ru kar sbyor bas/ /sa chu me rlung nam mkha' zhes/ / khu ba rlung gnyis gnas pa la/ /mi phyed lam du bcug byas pa/ /dus mtha'i me yis thal bar byed/ /nam mkha' bzhin du mtshon du med/ /ces bya ba gsungs te/ gang du stong pa zhes bya ba'i lam la gnas na ye shes kyi gzi brjid mched par 'gyur la/ gzi brjid des khu ba'i rigs rnam pa lnga dang /rlung gi rigs rnam pa lnga po ro mnyam zhing gcig tu 'dres par gyur pa nyid/ mtshon du med cing tha dad pa'i rang bzhin spangs pa las gsungs pa ni de bzhin gshegs pa'i nges pa'o/ /gzhan du na sems rtse gcig par mi gnas pas khu ba dang gci ba dang bshang ba la sogs pa ni/ rigs tha dad par gnas shing bye brag tha dad pa zhes bya'o//da ni sgrub pa po'i gnas kyi khyad par brjod par bya ba'i phyir/ bsdus pa'i rgyud 'di nyid las/ ji skad du/ shing gcig dang ni dur khrod dang / /ma mo'i khyim dang mtshan dus sam/ /yang na dben pa'am bas mtha' ru/ /de ru bsgom pa bzang bar brjod//zhes bya ba'i don ni phyi dang nang gi bye brag gis phye la shes par bya'o/ /de yang re zhig phyi'i ni las dang po pa'i sgrub pa po bdag yid nyams dga' zhing skye bo'i 'du 'dzis dben pa'i sa phyogs su bsgrubs na dngos grub kyi mtshan ma 'byung bar 'gyur la/ gnas de dag kyang mi ma yin pa gnas pa'i shing gcig skyes pa dang /ma mo'i khyim zhes bya ba gnod sbyin mo dang sha za mo gang na gnas pa dang / dben pa'am bas mtha' ste yang na de las gzhan pa'i mi ma yin pa gang du 'du ba'i gnas mi rgod la sogs pas dben ba'i gnas de ru rnal 'byor pa 'khod la sems can thams cad la snying rje chen po bskyed de/de na gnas pa'i mi ma yin pa rnams la gtor ma dus gsum du btang zhing / mi ma yin pa de dag la 'di skad ces kho bo 'di dang 'di lta bu zhig byed kyis/ de dang de khyed kyis bsgrub par rigs so zhes yang dang yang du bsgo ba na/ mi ma yin pa de dag gis kyang sgrub pa po la mngon par dga' bas las de sgrub par byed la de grub pas gdod 'gro ba'i don byed nus par 'gyur ro//gnas 'di'i nges pa'i don ji skad du/ rtsa ba'i rgyud las/ rang lus ri bo mchog yin te/ /de las skyes pa'i shing chen gang / /rtse mos lha rnams smin byed cing / /rtsa bas klu sogs smin par byed/ /yal ga de yis mi la sogs//yongs su smin byed shing de yin/ /de ru gnas par rab tu brjod/ /gang du dbugs ni mi rgyu ba/ /de ni dur khrod ces su bshad/ /ma mo'i khyim ni stong pa nyid/ /seng ge rnam rol phyag rgya'o/ /mtshan ma'i spras pas mi brdzi zhing / /rtogs par dka' bas mtshan mo yin/ /sa bon yi ge phyag mtshan dang //kha dog dbyibs dang rigs mi mnga'/ /phyag rgya sbyin sreg gtor mas dben/ /dben pa'am bas mtha' de yin la/ /bsgom pa bzang po'ang de nyid yin/ /zhes bya ba ni de bzhin gshegs pa'i nges pa'o/ /spyod par nus pa'i tshad bstan pa'i phyir/ cung zad drod ni thob pa na/ /gal te spyod pa byed 'dod pa//'on te 'grub 'gyur 'dod yod na/ /'dis ni spyod pa spyad pa nyid/ /ces gsungs te/ 'di'i don yang rtsa ba'i rgyud nyid la 'jug par bya ste/ de yang ji skad du/ gal te spyod pa byed 'dod pa/ /yan lag drug sbyor gang yin de/ /du ba smig rgyu la sogs pa'i/ /drod ni dang por bskyed par bya//zhes bya ba gsungs te/ 'di'i don ni yang rnal 'byor pas sems can gyi don du spyod pa byed par 'dod pa rnams kyis/ dang po du ba dang smig rgyu la sogs pa rnams kyis drod bskyed nas spyod pa la 'jug par bya'o/ /gzhan du na 'jig rten pa'i bzhad gad du 'gyur ro/ /des skyes bu 'dod chags can rnams gdul bar bya ba'i ched du/'pho ba med pa'i ye shes nyams su blangs la/ gdod/ shin tu bzhin bzangs mig yangs ma/ /rang gis dbang bskur snying rje can/ /btsun mo rdo rje'i rigs bzung la/ /spyod pa bya bar brtag par bya/ /rdo rje rigs kyi dngos med na/ / rang 'dod lha yi rigs kyis bya/ /zhes bya ba gsungs te/ 'di'i don yang gdol pa'i rigs las byung ba'i bu mo skyes bu gzhan gyis reg par bya ba ma yin pa'am/ yang na rigs gang yang rung ste gzugs dang lang tshos brgyan pa la byang chub kyi sa bon gyis sbyangs te zhes bya ba rang gi de la mi dad pa med par snyoms par 'jug pa'i las byas la/bde ba'i byang chub kyi sems des de'i sems sbyangs la/ de dang lhan cig kun du 'gro bar bya zhing rdo rje'i glu la sogs pas skyes bu 'dod chags can rnams gdul ba dang / don yod grub pa'i rigs las byung ba'i gar bya ba ste de ni rgyud bsdus pa 'di nyid las ji skad du/gal te dga' bas glu blangs te/ /de tshe rdo rje mchog dang ldan/ /gal te dga' ba skyes pa na/ /thar pa'i rgyus ni gar bya'o/ /de tshe rdo rje rkang pas gar/ /rnal 'byor mnyam par gzhag pas bya/ /zhes bya ba gsungs pa la/ 'di'i nges pa'i don yang 'bum phrag lnga pa las/ ji skad du/ stong nyid ma skyes zhi ba ni/ /bud med ces su de brjod cing / /rtsa yi mdud pa bcu drug nas/ /bde ba'i thig le bcu drug 'byung / /bcu drug lo yang de yin la/ /sems kyi sbyangs pa'ang de yin no/ /de bzhin du bde ba'i nga ro ni glu dang bde bas g.yo ba'i gar dang / bde ba'i rim pas 'gro ba'i rkang pa dang ldan pas gnas par bya ba ste/rnal 'byor mnyam par gzhag par bya/ /zhes bya ba ni nges pa'i don to/ /gzhan yang / 'khor lo'i gzugs kyis mi bskyod pa/ /zhes bya ba nas/ ska rags la ni don yod gnas/ /zhes bya ba'i don ni sngar bstan pa nyid do/ /de las gzhan pa'i don rnams ni 'di lta ste/kha T+wAM gzugs kyi shes rab dang / /thabs kyi gzugs kyi cang te'u nyid/ /ces bya ba gsungs te/ kha ni nam mkha'i gzugs can no/ /T+wAM ni dka' thub kyi gnas pa yin la/ /bsdus pa'i don gyis chos thams cad nam mkha'i rang bzhin du gnas zhes bya ba'i don te/ Dam ru'i sgra ni khams gsum du sems can thams cad la cig car du chos kyi 'khor lo bskor ba'i don to//de bas na kha T+wAM gdang cang te'u gzung ba nyid la nyon mongs pa lam zhe sdang skyed cing dbugs phyir rgyu ba dang nang du 'jug pa dang gnas pa gsum ni uli dang kA li nyid de/ de bas na de'i phyir/ glu ni rnam dag sngags su gsungs//gar ni bsgom par bya ba nyid/ /de yi phyir na glu dang gar/ /rnal 'byor pas ni rtag tu bya/ /zhes gsungs pa dang / de bzhin du/ sman ni rnam par bza' ba ste/ /chu ni rtag tu btung ba nyid/ /ces bya ba yang rnam pa gnyis su rtogs par bya ste/ phyir ni 'jig rten pa'i dngos grub kyi don du dri chen dang /dri chu rnams sbyang ba dang spel ba la sogs pa byas la/ rtog pa med pas bza' ba yin la de'i stobs kyis/ rga shis zil gyis mi non cing / /zhes gsungs so/ /nges pa'i don ni rtsa ba'i rgyud las/ ji skad du/ g.yon pa'i steng 'og shes rab thabs/ / 'byung 'jug bral ba zos pa yin/ /g.yas pa'i steng 'og shes rab thabs/ /'byung 'jug bral ba btung ba nyid/ /ces bya ba gsungs te/ des rga shis dril gyis mi non cing / /rtag tu bsrung bar 'gyur ba yin/ /zhes bya ba ni nges pa'i don yin la/ /gzhan du na phyi'i dri chen dang dri chu zos shing 'thungs pas ni rga shis zil gyis mi non par 'byung bar mi 'gyur te 'jig rten pa rnams kyis kyang dpya bar 'gyur ro zhes pa ni nges pa'o//gzhan yang rkun ma'i skra las cod pan byas la/ /de la hUM byung sbyar bar bya/ /sangs rgyas lnga yi thod pa rnams/ /rnal 'byor spyod pas rnam par 'dzin//thod pa sor lnga pa yi char/ /byas pas cod pan 'dzin par byed/ /thabs dang shes rab rang bzhin las/ /skra yi ska rags nyis skor nyid/ /thal ba skra yi mchod phyir thogs/ /rnal 'byor pa yi spyod pa 'dzin/ /zhes bya ba gsungs pas/ dge ba'i chos thams cad dbrog par bya ba'i phyir/rkun ma'i skra zhes bya ba'i rtsa las cod pan du brda bya ba dang / de ru hUM las yongs su byung ba'i rdo rje rgya gram yongs su bzung ba ste/ sems can gyi don sna tshogs pa byed pa'i phyir ro/ /mngon par rdzogs par byang chub pa rnam pa lnga dang / rnam pa nyi shu mngon par rdzogs par byang chub pa'i tshul gyis gang ba dang bzang po la sogs pa zla ba yar ngo'i lnga tshan rnams kyang yin la/de'i phyir a i r-i u l-i zhes bya bas dang / chu dang / me dang / rlung dang / nam mkha'i chos can du shes par bya ba'i phyir/ sangs rgyas lnga yi thod pa rnams/ /zhes bya ba la sogs pa dang / thod pa sor lnga pa'i cha zhes bya ba la sogs pa rgyas par gsungs so/ /de bzhin du 'jig rten pa'i lha nga rgyal can rnams gdul bar bya ba'i don du/ mi ro'i skra'i ska rags nyis skor dang / dbang phyug chen po'i brtul zhugs kyi ched du thal bas lus la byugs pa dang / tshangs pa'i brtul zhugs kyi ched du mi ro'i skra'i tshangs skud dang /lha rnams kyi dga' ba'i rtsed mo'i ched du cang te'u gzung ba dang / dbang phyug chen po'i rgyal mtshan gyi ched du kha T+wAM ga gzung ba dang / thod pa'i dum bus brtul zhugs kyi ched du rdo rje'i thod pa gzung bar bya ba ste/ 'di dag bzlas dang bsgom pa yin/ /zhes gsungs so/ / 'di'i nges pa'i don yang rtsa ba'i rgyud las/ ji skad du/ stong nyid snying rje mi 'chad phyir/ /skra yi ska rags brjod pa yin/ /thal ba byang chub sems su gsungs/ /khu ba mi 'bo tshangs spyod phyir/ /skra yi mchod phyir thogs pas brgyan/ /de bas tshangs spyod brtul zhugs mchog /cang te'u bde ba'i sgra yis ni//'jig rten gsum po dbugs 'byin cing / /stong pa'i rnam pas kha T+wAM ga /bde ba lus skyong thod par brjod/ /de bas de yi phyir 'di dag /bzlas pa dang ni bsgom pa yin/ /zhes gsungs so/ /gzhan yang spyod pa byed pa'i rnal 'byor pas ngo tsha ba dang dogs pa la sogs pa rnam par ma spangs pas spyod pa byed pa ni 'jig rten pa'i bzhad gad du 'gyur la/sems can gyi don du yang mi 'gyur ba/ /de'i phyir/ brkam dang rmongs dang 'jigs dang khro/ /ngo tsha'i 'bras bu rnam par spangs/ /zhes gsungs so/ /de bzhin du de nyid ji skad du/ nges par mngon du lha min gang //brgya byin lta bu yin na yang / /de la 'jigs par mi bya ste/ /seng ge'i gzugs kyis rnam par rgyu/ /zhes gsungs te/ de bas na dogs pa dang bag tsha ba mi bya'o/ /de ltar spyod pa byed pa'i rnal 'byor pas le lo la gnas par mi bya ste/ le lo dang ldan pa'i gnyid spangs la/gti mug chen po gnyid la gnas te spyod pa spyad do/ /de'i phyir/ bdag nyid kyis ni gnyid spangs nas/ /the tshom med par spyod pa bya/ /zhes pa dang / de bzhin du bde bar gshegs pas kyang dka' ba mdzad pa'i dus su rgyal srid kyi 'byor pa dang btsun mo'i 'khor dang nyid kyi sku lus kyi mthar thug pa sems can gyi don du btang ngo //spyod pa byed pa'i rnal 'byor pas kyang rang gi lus la ltos pa med par bya ba yin pas/ lus kyi sbyin pa byin nas ni/ /phyi nas spyod pa yang dag brtsams/ /zhes gsungs te/ de yang nam mkha' gos su gyon par bya'o/ /bya mi srun pa dang / khyi mi srun pa dang /byis pa'i skye bo ma rungs pa ngan du smra ba rnams ni chos ston pa'i bla mar brtag cing nyi ma'i tsha bas gdungs pa dang grang bas nyen pa dag bzod par bya ba'i gzhi yin no/ /de las gzhan pa'i bdog pa sbyin pa gtong ba na sbyin par bya ba'i gzhi'i khyad par du mi dbye ba ste/ mngon du ji ltar snang ba de la sbyin par bya ba nyid pas/skal dang skal min rnam dpyad pas/ /de phyir sbyin pa sbyin mi bya/ /zhes gsungs pa dang de bzhin du/ rtog pa med pa'i tshul gyis ni/ /bza' bca' de bzhin btung ba nyid/ /ji ltar rnyed pa rab tu bza'/ /yid 'ong mi 'ong mi rtog phyir/ /zhen pa tsam du mi bya'o/ /bza' dang bca' min spyod pa dang //de bzhin btung dang btung min nyid/ /'gro dang 'gro min sngags pa yis/ /rnam rtog nyid du mi bya'o/ /zhes gsungs te/ 'di'i don yang ro la chags pa tsam gyis bza' ba dang / btung ba dag la bye brag mi dbye ba la/ las kyi phyag rgya bsgrub par bya ba'i phyir rigs bzhi'i bud med la bgrod par bya ba ma yin zhes bye brag mi dbye ba'i don to//gzhan yang rdo rje slob dpon ni rang gi 'dod pa'i lha dang tha mi dad par bkur bar bya ba'i phyir/ bdag gis rig pa 'dzin pa'i sa la gnas pa yin yang dor bar mi bya ste/ dngos grub rnyed pa'i slob ma gang / /yang dag ye shes snang ba po//mnar med spang ba'i rgyu yi phyir/ /grub pas bla mar mngon phyag bya/ /zhes bya ba gsungs te/ la bzla ba'i tshig 'dis ni dus gsum gyi sangs rgyas rnams kyang dus gsum du nyid kyi 'dod pa'i bla ma la gus pa dang bcas pas 'dud na/ slob ma zhugs pa'i las dang po pa rnams kyis ci'i phyir spang zhes bya ba'i don to//'di'i nges pa'i don ni sngon du rgyas par bkrol ba nyid do/ /gzhan yang spyod pa pas bslab pa dang dbang bdun dang sbyin sreg dang mchod sbyin dang dka' thub dang sdom pa la sogs pa 'jig rten gyi tha snyad rnams la ched cher gzung bar mi bya ba nyid dam/ yang na phyi rol pa'i lha zhi ba la sogs pa'i bslab pa dang sbyin sreg la sogs pa la ched cher mi gzung ste/ de bas na de'i phyir/ bslab dang dbang las rnam par grol/ /de bzhin ngo tsha'i 'bras bu nyid/ /dngos po kun gyi rang bzhin 'di/ /rnal 'byor snying rje chen pos spyad/ /sbyin sreg mchod sbyin dka' spyod 'das//sngags dang bsam gtan rnam par spangs/ /dam tshig sdom las rnam grol te/ /rnal 'byor ldan pas spyod pa bya/ /zhes gsungs so/ /de bzhin du gzhan yang / sems can kun gyi don gyi phyir/ /snying rje rtag tu btung bya ste/ /rnal 'byor btung dga' rnal 'byor pas/ /btung ba gzhan gyis bzi mi bya//zhes bya ba smos te/ don 'di yang phyi dang nang gnyis su go bar byas la/ de yang 'jig rten pa'i mthun 'jug tu tshogs dang / dpa' bo'i bza' ba la sogs pa'i dus su ni/ 'bru la sogs pa'i chang rnams myos pa ma yin pa'i bar du btung ba yin la/ nges pa'i don du ni btung ba gzhan zhes bya ba 'jig rten pa rnams myos par byed cing bya ba ma yin pa byed pa'i rgun 'brum dang sA lu la sogs pa sbyor ba'i chang rnams skra'i rtse mos kyang btung bar mi bya'i/zla ba byang chub sems kyi chang gi rgyun gyi btung ba la rgyun ma chad par 'thungs pas/ bdag gi lus la sogs pa bde ba'i ros brlan par bya ba ni nges pa'i don du de bzhin gshegs pas gsungs so//kye'i rdo rje nges pa'i don gyi rgya cher bshad pa las spyod pa'i le'u'i rgya cher bshad pa ste drug pa'o// //bcu drug phyed phyed thig le can/ /ston pa longs spyod rdzogs sku la/ /phyag 'tshal nas ni ts+tsho ma yi//rgyas bshad rdo rje snying pos bri/ /de nas brda'i le'u bshad par bya'o/ /zhes gsungs pa la/ brda ni rnam pa gnyis su go bar bya ste/ de yang ji skad du/ rtsa ba'i rgyud nyid las/ he ru kar lhan rnal 'byor gyis/ /lus dang ngag gi brda la bslab/ /lus ngag brda yis mi smra na/ / sangs rgyas kyang ni nges par 'jig /ces gsungs te/ de bas na de'i phyir/ kye'i rdo rje'i rnal 'byor la gnas pa'i rnal 'byor pa dang rnal 'byor ma rnams kyis lus ngag gi brda'i man ngag 'bad pas yid la gzung ste/ phyi rol gyi skye bo mi srun pa rnams dang rigs gzhan gyi pho nya dang pho nya mo rnams tshogs pa'i nang du tha mal pa'i tha snyad kyis brjod par mi bya'i/bdag cag rnams kyi gsang chen gang yin pa de brdas brjod pa na skye bo ma rungs pa rnams dang / phyi rol gyi pho nya dang pho nya mo rnams rmongs par 'gyur ro/ /de nas gsang chen rnams brda yis mi smra ba gang yin pa de ni/ 'jig rten 'di dang 'jig rten gzhan gyi dngos grub gnyi ga nyams par byas nas mnar med par 'gro bar 'gyur ro/ /de la sngon du ni lus kyi brda dang phyi nas ni ngag gi brda ste le'u 'dir ni lus kyi brda 'ba' zhig ston la ngag gi brda ni le'u gzhan nas ston par 'gyur ro/ /de ltar na brda de dag gnyi ga yang nges pa dang drang ba'i don du shes par bya ste/de las bsdus pa'i rgyud 'di nyid nas ji skad du ston bzhin pa rnams ni drang ba'i don du shes par bya la/ nges pa'i don ni rtsa ba'i rgyud las shes par bya'o/ /de la re zhig /gang gis spun dang sring mo yang / /zhes bya ba la/ spun dang sring mo ni thabs dang shes rab kyi cha'i bye brag go//the tshom med par shes par bya/ /zhes pa ni/ drang ba dang nges pa'i don gyi thabs dang shes rab ji lta ba bzhin du shes pa'o/ /de la/ gang zhig sor mo gcig ston pa/ /zhes bya ba ni skyes pa'am bud med gang zhig gis glo bur du mdun du 'ongs pa la sor mo gcig ston pa de'i tshe/legs par 'ongs sam zhes dri ba'i don du rtogs par bya'o/ /de bzhin du/ gnyis kyis legs par 'ongs pa yin/ /zhes pa ni lan du sor mo gnyis brkyang bas bde bar 'ongs so zhes bstan par bya'o/ /gzhan yang / g.yon gyi mthe bong bcangs pas ni//bsnyun gyi phyag rgyar rnam par shes/ /zhes bya ste/ gang zhig la bsnyun 'dri ba'i brdar shes par bya ste/ lus ngag yid gsum bde 'am zhes bya ba'i don to/ /gang zhig srin lag ster ba la/ /zhes pa ni thabs kyi cha yin la/ de yi mthe chung rnam par sbyin/ /zhes bya ba ni/ shes rab kyi cha ste steng 'og gi bye brag gis rlung dang me ru rtogs par bya'o//gang zhig gung mo ston pa la/ /de yi mdzub mo rnam par sbyin/ /zhes pa ni de bzhin du steng 'og gi chas chu dang sa rtogs par byed pa yin la/ de bas de dag rnams kyang phyi dang nang gi stong pa dang snying rje'i bdag nyid yin no/ /gang de ni dpal mchog gi dang po'i sangs rgyas kyi rgyud ces bya ba las kyang ji skad du/shar dang nub tu sa dang rlung / /phan tshun thabs dang shes rab yin/ /lho dang byang du me dang chu/ /phan tshun thabs dang shes rab yin/ /zhes pa dang / de bzhin du/ zla ba'i lam gyi dri chen rtsa/ /nyi mas dri chu dbab pa'o//steng 'og sems kyi rtsa gnyis ni/ /sa bon 'bab dang mun can ma/ /zhes gsungs so/ /gang zhig ming med ston pa la/ /de yi mgrin pa rab tu bstan/ /zhes pa ni/ nam mkha' lta bu'i chos shes sam/ /zhes 'dri ba la/ de'i lan du mgrin pa bstan par bya ba ni ro drug la longs spyod pa'i lam mgrin pa'i 'khor lo yin te/de'i stobs kyis rtsa rnams rgyas par 'gyur la/ de nam mkha' lta bu'i chos ston par 'gyur zhes bya ba'i don to/ /gang zhig gos ni ston pa la/ /de yi rtse gsum rab tu bstan/ /zhes bya ba ni/ skyob pa mtshan nyid shes sam zhes 'dri ba la/lan du nga yis shes te lus ngag yid gsum gyi bdag nyid rtsa gsum gyi rang bzhin shes na'o zhes bya ba'i don to/ /gang zhig nu ma ston pa la/ /de yi mtshams ni rab tu bstan/ /zhes bya ba ni/ de nyid gar gyi bstan bcos kyis thob pa yin na/ de shes sam zhes 'dri ba la/ lan du nga yis shes te dbang po gnyis sprad pa'i bde ba las rtogs zhes bya ba'i don to//gang zhig so ni ston pa la/ /de yi kha ni rab tu bstan/ /zhes bya ba ni shes rab kyi rang bzhin shes sam zhes 'dri ba la/ lan du nga yis shes te thabs dang shes rab ldan na'o zhes pa'i don to/ /gang zhig khro gnyer ston pa la//gtsug phud dgrol ba bstan par bya/ /zhes pa ni/ 'o na khyod dang nga gnyis thabs dang shes rab kyi rang bzhin la brtsad do zhes zer ba la/ lan du/ 'jigs pa med de brtsad par bya'o/ /zhes bya ba'i don to/ /gang zhig dpral ba ston pa la/ /de yi rgyab ni rab tu bstan/ /zhes bya ba ni/gang mkha' 'gro ma rnams kyi gnas lus kyi mchog mgo la yod na de khyod kyis shes sam zhes 'dri ba la/ lan du nga yis shes te mgo bo las gzhan rgyab la sogs pa lus gzhan yang mkha' 'gro ma'i gnas yod ces bya ba'i don to/ /gang zhig rkang mthil ston pa la/ /lto yis rnam par rtse bar bya//zhes pa ni/ 'o na gnas de dag tu ji ltar bgrod par bya/ zhes 'dri ba la/ lan du gar gyi bstan bcos sngon du 'gro bas chags pa dang ldan pa'i sems kyis snyoms par zhugs nas gnas de rnams su phyin par 'gyur zhes pa'i don to/ /phyag rgya phyag rgya'i lan gyis ni/ / dam tshig gis ni rnam par dbye/ /zhes pa ni/ lus kyi phyag rgya'i brda shes pas/ /gsang chen thams cad rtogs par bya/ /zhes pa'i don to/ /de la rnal 'byor mas smras pa/ /e ma bu ni snying rje che/ /zhes bya ba ni/ e ma thabs chen po'i rang bzhin khyod kyis brda dang brda ma yin pa thams cad la goms par gyur to zhes bya ba'i don to//gal te phreng ba lag ston na/ /'du bar bya zhes smra ba yin/ /phreng ba mngon par btang byas nas/ /dam tshig la mnos brtul zhugs bzang / /zhes bya ba ni/ de ltar brda'i lan la rnal 'byor ma thams cad rang sa nas lag na phreng ba ston par byed cing /rigs kyi bu khyod dang nga gnyis bde ba'i phreng ba rgyun mi 'chad pa'i brtul zhugs la gnas par bya'o zhes ston la/ gzhan yang 'di skad ces/ de la phyi rol zhes 'du ba/ /bzang po'i spyod yul gnas pa ni/ /de la 'du ba'i rnal 'byor mas/ /gang smras de ltar thams cad bya/ /zhes bya ba ni/khyod ni skal ba dang ldan te phyi dang nang gi dgongs pa'i skad thams cad kyang shes pa de bas de'i phyir/ khyod dang bdag cag phyi'i gnas su 'dus la phyi dang nang gi bde ba'i ston mo la longs spyad par bya'o zhes bsgo ba na/ rnal 'byor pa des kyang thams cad dang du blang ngo zhes bya ba'i don to//kye bcom ldan 'das 'du ba'i gnas du lags zhes rdo rje snying po la sogs pa phyi dang nang gi gnas kyi khyad par zhus pa'o/ /bcom ldan 'das kyis bka' stsal pa/ gnas dang nye ba'i gnas dang ni/ /zhing dang nye ba'i zhing nyid dang / tsha n+do nye ba'i tsha n+do dang / /'du ba nye ba'i 'du ba dang //grong khyer nye ba'i grong khyer dang / /dur khrod nye ba'i dur khrod de/ /'di rnams sa ni bcu gnyis phyir/ /sa bcu'i dbang phyug mgon po nyid/ /de phyir gzhan du btsal mi bya/ /zhes bya ba gsungs te/ 'dis ni 'khor lo gsum gyi bdag nyid dang / 'khor lo drug gi bdag nyid dang //'khor lo bzhi'i bdag nyid la gnas ba rtsa'i rigs thams cad sa bcu gnyis nyid du ston te/ de yang 'khor lo gsum gyi bdag nyid ni sku dang / gsung dang / thugs kyi bye brag dang / sa 'og sa steng sa bla'i dbye bas bde mchog 'khor lo'i rgyud kyi don brjod do/ /'khor lo drug gi bdag nyid ni/sa dang / chu dang / me dang / rlung dang / nam mkha' dang / ye shes kyi dbye ba'am/ gzugs dang / tshor ba dang / 'du shes dang / 'du byed dang / rnam par shes pa dang / ye shes kyi dbye ba'am/ yi ge drug gi dbye bas phye ba yin te dang po mchog gi sangs rgyas kyi rgyud kyi don to//gang du bzhir bstan pa ni sprul pa drug cu rtsa bzhi dang / chos brgyad dang / longs spyod bcu drug dang / bde ba chen po sum cu rtsa gnyis la sogs pa ste/ de ltar 'khor lo bzhi'i dbye ba dang / sku bzhi dang / dbang bzhi dang / dga' ba bzhi dang / skad cig ma bzhi dang / 'bras bu bzhi la sogs pa'i bye brag gis kye'i rdo rje'i rgyud du bstan te/de ltar thams cad bzhi bzhi'o zhes gsungs pa'i phyir ro/ /de bas na phyi rol du ni sha dang khrag la rgyug par byed pa grong la brten pa'i lha mo rnams ni phyi'i gnas de dag na gnas pa yin la/ ji ltar phyi rol de bzhin nang / /zhes gsungs pa'i phyir nang gi gnas ni lus la rtsa'i gzugs kyis gnas par gsungs te de las gzhan du mi blta'o//de yang lus la ni dzA la n+d+ha ra zhes pa nas skyed tshal rab rdzing bu'i 'gram zhes pa yan chad 'di lta ste/ rtsa ba'i rgyud las ji skad du/ spyi bo dang ni spyi gtsug dang / /rna ba g.yas pa rtsib logs dang / / de bzhin sna tshogs smin dbus dang / /lag pa mchan khung dag dang ni/ /nu ma gnyis dang lte ba dang / /sna rtse dang ni kha yi lam/ /phrag gong gnyis dang pho mtshan dang / /rtags dang bshang lam brang gi gnas/ /byin pa dang ni sor mo dang / /rkang pa'i bol dang mthe bong dang / /pus mo rnams su go rims bzhin//gnas dang sa sogs blta bar bya/ /zhes gsungs so/ /de bas na de'i phyir sems can rnams la spyod pa dang grol ba'i 'bras bu ster ba'i lha mo dang gnas 'di rnams ni lus can thams cad kyi lus nyid la rtsa dang khu ba'i gzugs kyis gnas so/ /da ni nyi ma'i dus kyi khyad par brjod pa'i phyir/rnal 'byor ma rgyud kye rdo rjer/ /rnal 'byor ma yi legs 'du ba'i/ /sems can kun gyi don gyi phyir/ /nyin mo'i dus kyang rab bshad bya/ /zhes bya ba la 'dir nyi ma'i dus ni rnam pa gnyis te/ phyi dang nang gi'o/ /de la phyi'i zla ba mar gyi ngo'i bcu bzhi la sogs pa la grong gi lha mo rnams gong du brjod pa'i phyi'i gnas rnams su lus can thams cad kyi mdangs 'brog par bya ba'i phyir rgyu ba yin la/nang du ni khu ba dang rlung la sogs pa dbugs dang chu srang dang chu tshod la sogs pa'i khyad par gyi gnas su 'phro zhing 'du bar 'gyur ro/ /de bzhin du dngos grub gnyis la 'dun pa'i rnal 'byor pas kyang phyi dang nang gi bye brag shes par byas la/thun mong gi dngos grub kyi don du mar ngo'i bcu bzhi la sogs pa la mtshan mo dur khrod du song ste/ dpa' bo'i ston mo la sogs pa la 'du bar bya ba yin no/ /de ni 'di ltar kye bcom ldan 'das nyi ma gang lags zhes bya ba smos te phyi dang nang gi nyi ma'o//bcom ldan 'das kyis bka' stsal pa/ mar gyi ngo yi bcu bzhi dang / de bzhin du yang brgyad pa nyid/ /ces bya ba gsungs te/ mar ngo'i bcu bzhi ni nyi shu rtsa dgu'o/ /de bzhin du mar ngo'i brgyad ni nyi shu rtsa gsum mo/ /de yang nges pa'i don ni rtsa ba'i rgyud nyid la 'jug par bya ste/ji skad du/ byang chub sems kyi zla ba 'di/ /yar ngo mar ngo rab tu gnas/ /yar ngo yis ni skyed byed ma/ /mar ngo yis ni 'joms byed ma/ /mar ngo'i bcu bzhi la sogs kyis/ /byang chub sems kyi mkha' 'gro ma/ /bde chen 'khor los 'du bar mdzad/ /'di ni nges pa'i don du bshad//ces gsungs so/ /gzhan yang bza' ba gsungs pa ni/ rgyal mtshan dang ni mtshon bsnun nyid/ /lan bdun pa yang bza' bar bya/ /zhes bya ba la/ rgyal mtshan ni rgyal pos rkun po la sogs pa skyes pa'am bud med 'ga' zhig chad pas bcad de/ lus mtshon gyis dral nas ro shing la dpyangs te gzhag pa'o//lan bdun pa ni 'di na skyes pa'am bud med 'ga' zhig skye ba bdun du mi'i lus su brgyud pa yin la/ de'i mtshan nyid kyang grib ma bdun du 'byung ba dang / mig mi 'dzums pa dang / dpral ba la gnyer ma gsum yod pa dang / lus la dri zhim po 'byung ba la sogs pa nyid yin te de lta bu mthong na phyag tu me tog dag phul te bskor ba byas la 'di skad ces rnal 'byor gyi dbang phyug chen po da ni bdag cag lta bu'i don bgyi ba'i dus la bab po zhes brjod pa na de'i lus 'dor bar 'gyur ro//de dor nas kyang de'i sha las rgya shug gi tshig gu tsam gyi ri lur byas te/bdag cag thams cad kyis bza' bar bya zhing sems can thams cad la khyed tshad du bgo bar bya'o/ /des ni mkha' la spyod pa'i dngos grub ster ba yin no/ /de bzhin sha phal pa rgyal mtshan mtshon dang bsnun pa la sogs pa'i sha ni sbyang ba dang spel ba la sogs pa byas la ril bur byas te zos pas kyang gnyer ma dang skra dkar la sogs pa 'joms par nges so//'di dag gi nges pa'i don yang 'bum phrag lnga pa las/ ji skad du/ rtsa yi shing gzugs las sbyangs pa'i/ /lus kyi rgyal mtshan mchog 'di yis/ /byang chub sems kyi sha zos na/ / rnal 'byor dngos grub mchog tu 'gyur/ /zhes gsungs te/ lan bdun pa yi nges pa'i don ni ji skad du/ gang yang lus can thams cad kyi/ /lus 'di skye ba bdun yin te/ /ro drug ldan pa'i bza' btung dag /kun du zos shing 'thungs pa las/ /zhu zhing bcud ni rgyas pa de/ /skye ba dang por de brjod do//de nas de la khrag 'byung ba/ /skye ba gnyis par rab tu brjod/ /de las sha byung gsum pa ste/ /pags par gyur pa bzhi pa dang / /rtsa ru gyur pa lnga pa'o/ /de las rus pa drug pa ste/ /zhag dang rkang mar bdun pa'o/ /zhes sngon du brjod do/ /gzhan yang / 'bad pas snying rje bskyed pa yis//gsad par bya ba brjod pa nyid/ /snying rje med na mi 'grub pas/ /de phyir snying rje bskyed par bya/ /zhes bya ba ni/ phyi dang nang gi dbye bas re zhig gi phyir ni/ mtshams med lnga ni byed pa dang / /sangs rgyas bstan pa 'khrug byed pa/ /zhe sdang rigs ni ting 'dzin gyis/ / re zhig tsam zhig gsad bya yis/ /rnam pa kun du gzhom mi bya/ /de ste kun du gsang byas nas/ /rnal 'byor dam tshig las nyams phyir/ /grub pa nam yang yod mi srid/ /ces bya ba ste des ni gdug pa can thams cad thul bar 'gyur/ /de bas na gdug pa can thams cad gzhug pa ste zhes bya ba gsungs so//gzhan yang nges pa'i don ni rtsa ba'i rgyud las ji skad du/ steng dang 'og gi srog chen po/ /rnal 'byor chen pos gsad cing gso/ /de min srog chags mi gsod de/ /gdug pa de dag rtag par gsad/ /ces gsungs so/ /de ni nges pa'i don to/ /cho ga'i gtso bos dgag par bya//zhes bya ba ni/ phyi nang gi srog gnyis char la khyab pa yin te/ phyi ni bde stong rigs kyi ting nge 'dzin gyis dgag par byas la/ nang du stong pa chen pos dgag par bya'o/ /gzhan yang nyin mo dang mtshan mo'i dus thabs dang shes rab kyi char brtag par bya ste/ 'di ltar/ nyin mo bcom ldan rdo rje can//shes rab mtshan mor brtag par bya/ /zhes bya ba ste/ de ni/ gang zhig zhes rab dngos med de/ /dngos po thabs su brtag par bya/ /zhes bya ba'i don to/ /'di'i nges pa'i don yang rtsa ba'i rgyud las ji skad du/ g.yas g.yon nyi zla'i mtshan nyid can/ /bsil dang tsha bar byed pa de//gang de skyon yon gnyis kyang yin/ /de ni thabs dang shes rab bo/ /zhes gsungs so/ /de bzhin du/ mi bya cung zad yod ma yin/ /rtag tu mi bza' yod ma yin/ /'di la mi bsam pa yang med/ /bzang ngam ngan zhes mi smra med/ /ces bya ba ni/ rgyu ba dang mi rgyu ba 'di dag thams cad rang las yongs su byung ba'i phyir ro//de bas na/ ji ltar bdag nyid de ltar gzhan/ /de bzhin bdag dngos mchog yin te/ /zhes bya ba rang gi rang bzhin ji lta ba bzhin du shes pa na khams gsum gyi 'khor los sgyur ba gcig po yang yin no/ /'di nyid kyi phyir/ 'di ltar sems pa'i rnal 'byor pas//bza' dang btung ba la sogs spyad/ /yan lag ji snyed bsgyur ba dang / /tshig rnams rab tu nyed pa nyid/ /he ru ka dpal gnas bzhugs pas/ /de snyed sngags dang phyag rgyar brjod/ /ces gsungs te/ de yang ji skad du/ dkyil 'khor lha 'dir lus nyid yin//gzhan dag lha dang dkyil 'khor ni/ /btsal bas nam yang mi rnyed ces/ /'dren pa dpa' bos rab tu gsungs/ /shrI ni gnyis med ye shes te/ /zhes pa ni bdag dang gzhan gyi dpal gnyi ga'i char mi 'dzin pa'o/ /he ni rgyu sogs stong pa nyid/ /ces pa ni/ las dang ye shes dang phyag rgya bcing ba dang gtor ma la sogs pa'i rgyu dang bral ba'i ting nge 'dzin bde ba chen po'o//ru ni tshogs dang bral ba nyid/ /ces pa ni/ kun du brtags pa'i mtshan nyid las grol ba'i bde ba nyid de/ gang de ji ltar bsgrub snyam pa la/ ka ni gang du'ang mi gnas pa/ /zhes bya ba gsungs te/tshogs pa dang dmigs pa'i chos las bral ba phan tshun du ltos pa med pas bsgrub par gsungs so/ /de bas na he ru ka'o/ /gzhan yang / rdo rje thod pa'i rnal 'byor gyis/ /zhes pa ni/ lus skyong ba'i rnal 'byor gyis so/ /skye bo gang dang gang rnams kyi/ /sha ni mkhas pas bza' byas na//sems can de de dbang du 'gyur/ /zhes bya ba ni/ rnal 'byor pa bdag gis lus skyong ba'i rnal 'byor mngon du byas na/ sangs rgyas rnams kyang dbang du 'gyur na/ 'jig rten gsum na gnas pa'i skye bo phal pa rnams ji ltar bsgo ba bzhin byed pa smos kyang ci dgos/ / gzhan du na rnal 'byor pas bud med kyi skye bo rnams la 'jug pa na byang chub sems kyi sha phyi rol du mi gtang bar zos na rang gi lus la dbang du 'gyur te/ de ni rnal 'byor pa mkhas pa zhes brjod do/ /kye rdo rje'i nges pa'i don gyi rgya cher bshad pa las/ brda dang gnas gtan la phab pa'i le'u'i rgya cher bshad pa ste bdun pa'o// //byang chub sems ni zla bar 'gyur/ /cha shas bco lnga'i bdag nyid can/ /de 'gyur rnal 'byor bdag med ma/ /mi yi gzugs kyi tshul bsgyur nas/ /'jig rten gsum po dbang du mdzad/ /de la gus pas rab btud nas/ /bdag med dkyil 'khor rgyas bshad ni//rdo rje snying pos bri bar bya/ /de nas rnal 'byor ma'i 'khor lo bshad par bya'o zhes bya ba la sogs pa smos te/ rnal 'byor ma ni zla ba mar ngo'i chos can tshes bco lnga po mun pa'i rdul med par byed la/ snang ba'i rdul ni 'joms par byed cing 'khor ba'i byang chub kyi sems kha thur du bltas pa gang yin pa de la brjod par bya'o//de yang rtsa ba'i rgyud las ji skad du/ sku gsung thugs kyi dbye ba yis/ /dkyil 'khor rnam pa gsum du brtags/ /dang por dgyes pa'i rdo rje nyid/ /sku yi dkyil 'khor zhes su brjod/ /de rjes bdag med ma bshad pa/ / thugs kyi dkyil 'khor yin par gsungs/ /de rjes ku ru ku l+le bshad/ /gsung gi dkyil 'khor yin par 'dod/ /zhes gsungs pa'i phyir/ da ni rnal 'byor ma'i 'khor lo bshad par rigs so/ /nam mkha'i khams su b+ha ga bsam/ /dbus su rnam par bsgom pa ni/ /'khor lo sngon du ci rigs par//lha rnams ji ltar 'byung ba nyid/ /ces bya ba gsungs te/ 'di'i don yang sngon du 'gro ba'i srung ba'i 'khor lo la sogs pa ni he ru ka bskyed pa nyid kyi dus su bstan pa las shes pa nyid du bya'o/ /'dir ni gnad kyi gnas tsam zhig bstan par bya ba'i phyir nam mkha'i dbyings su zhes bya ba la sogs pa smos pa yin te/rang gi bdag po mchod pa sngon du 'gro bas/ oM shU n+ya tA dz+nyA na zhes pa la sogs pa'i tshul gyis snod dang bcud sbyang ba byas la/ chos thams cad nam mkha'i dkyil 'khor ltar mos par bya ste/ de'i rjes la de bzhin gshegs pa thams cad kyi sku dang /gsung dang / thugs mtshon par bya ba'i phyir nam mkha'i dbyings der yi ge e'i dbyibs lta bu dpag tshad rgya khyon dpag tu med par bsgoms la de'i nang du 'khor lo sngon du ci rigs par zhes bya ba'i don to/ /sa dang chu dang me dang rlung / /zhes bya ba'i dkyil 'khor rim gyis bskyed la/ de dag yongs su gyur pa las/ bcom ldan 'das ma'i dkyil 'khor gyi 'khor lo sgo bzhi dang rta babs dang ldan pa bsams te/ 'phar ma gnyis dag skyon med pa/ /zhes bya ba ni/ yul dang yul can gyi lha mo'i tshul gyis 'phar ma gnyis su bcad cing / ze 'bru las ni gcig 'gyur te//zhes bya ba ze 'bru dang nang gi 'phar ma la ni phung po lnga rnam par dag pa'i lha mo ste/ sngon du brjod pa'i stong pa chen po yi ge lnga'i chos can no/ /gang yang de ni rang bzhin chen po lnga zhes kyang brjod la 'phar ma phyi ma rnams ni phyi rol du 'gyur ba yin no/ /de'i phyir/ gru gsum la ni phyi ma brjod//ces gsungs so/ /de dbus ro ni bco lnga yi/ /gdan gyi bdag nyid rnam par bsam/ /zhes bya ba ni/ khams thams cad srog gi rlung la zhon nas rgyu ba'i phyir/ phyi rol du ro ru brtags so/ /de yi steng du zla ba yin/ /zla ba'i steng du sa bon nyid/ /ces bya ba ni ji skad du/ rtsa ba'i rgyud nyid las/ dang po khu ba pha las 'byung / /rnam shes rlung ldan der 'jug ste/ /de la ma yi khrag gis sbyar/ /don 'di yis ni bskyed rim bstan/ /zhes gsungs pas/ ro dang zla ba dang sa bon dang nyi ma'i dkyil 'khor gyis mnan par gsungs so/ /gnyis 'dus pa las bde chen po//zhes pa ni khu ba dang khrag gi rang bzhin dang srog 'byung 'jug gi rim pa dang / la la nA dang ra sa nA 'dom pa dang steng 'og gnyis 'dom pa'i phyir ro/ /A li zla ba'i gzugs kyis gnas/ /kA li'i gzugs kyis snang byed do/ /zhes bya ba ni/ phyi rol bskyed pa'i rim pa la/ /A li yongs su gyur pa'i zla ba'i dkyil 'khor srog 'ong ba'i tshul dang /kA lis nyi ma'i dkyil 'khor srog 'gro ba'i tshul du bsam pa ni drang ba dang nges pa'i don to/ /zla ba nyi ma 'dus pa las/ /zhes pa ni/ nyi zla'i rang bzhin dang rnam par shes pa gsum 'dus pa las so/ /dkar mo la sogs rab tu grags/ /zhes pa ni/phyi rol du ni bcud kyi srid pa skyed pa dang / nang du dam pa'i srid pa skyed pa zhes grags so/ /de ni dkar mo la sogs pa'i lha mo bco lnga'i bdag nyid thams cad tshul de ltar skye zhes bya ba'i don to/ /zla ba ye shes me long ldan/ /rta bdun pa ni mnyam nyid ldan/ /rang lha'i sa bon phyag mtshan ni/ / so sor rtog par brjod par bya/ /thams cad gcig gyur nan tan nyid/ /rdzogs pa chos dbyings dag pa'o/ /zhes bya ba ni/ rlung gis bskyod pa dang / me yis sbar ba dang / chu yis yongs su smin par byed pa dang / sa yis kun du 'dzin pa dang / nam mkha' kun du 'phel bar byed pa ste/ mgrin pa dang /rkan dang / spyi bo dang / mchu dang so'i chos can rnams ni ye shes lnga'i bdag nyid de byang chub pa rnam pa lnga'i don zhes bya'o/ /de bas/ mkhas pas cho ga gsungs pa yis/ /rnam pa lnga po bsgom par bya/ /zhes gsungs te/ drang ba dang nges pa'i don du rtogs par bya'o/ /A li kA li mnyam sbyar bas//rdo rje sems dpa' nyid kyi gdon/ /zhes bya ba ni byis pa rnams kyis rtogs par bya ba'i phyir/ phyi rol du A li dang kA li yongs su gyur pa'i nyi zla'i gdan du gsungs la/ yang dag par na/ yi ge las byung gong bu yi/ /hUM phaT yi ge mi 'dod de/ /sems dpa' gzugs brnyan las byung ba//dkyil 'khor bdag po rnam par bsgom/ /zhes bya ba gsungs la/ de lta bu'i tshul gyis bdag med pa'i 'khor lo bsgom pa ni nges pa'i don to/ /'di'i don ni mchog gi dang po'i sangs rgyas kyi rgyud ces bya ba las kyang / ji skad du/ A li kA li sbyor ba yis//hUM yig 'dod min rgyal po kye/ /zhes gsungs so/ /'jam pa'i rdo rjes bshad pa'i bsdus pa'i rgyud kyi le'u lnga pa las kyang / ji skad du/ a dang ka sogs gang gcig ri bong nyi ma'i gdan de rdo rje can la med/ /yi ge hU gyur mtshan ma med cing kha dog dbyibs la sogs pa 'dir mi bzhed//gzhan yang mi 'gyur las skyes 'gyur ba zad par 'gyur ba de ni bzang po'i dbang por ldan pa ste/ /rnam pa kun gyi mchog dang ldan zhing rgyal ba sgyu ma sna tshogs 'dzin/ /zhes gsungs so/ /bskyed pa'i rim pa'i tshul ni gong du bstan pa ltar/ phyag mtshan zhal sogs gong ma bzhin//zla ba chu shel nor bu'i 'od/ /ces bya ba gsungs so/ /skabs 'dir ni phyag mtshan dang gri gug dang thod par brtag cing zhal mdog thams cad ni nag po 'ba' zhig tu brtag ces pa'i don to/ /de ni 'di nyid las/ thabs dang shes rab rang bzhin gyis/ /'di ltar thams cad rdzogs pa nyid//zla ba nyi mar rab dbye ba/ /A li shes rab kA li thabs/ /'di ltar dkar mo la sogs pa/ /kha dog dbye bas tha dad yin/ /zhes bya bas gsal bar bstan te/ phyi nang gi byang chub pa rnam pa lnga la sogs pas bskyed pa'i tshul du ni gcig la kha dog tsam gyis bye brag tu byas zhes bya ba'i don to//gnas kyi bye brag bstan par bya ba'i phyir/ re zhig nang gi 'phar ma la/ /rnal 'byor ma lnga nges bzhugs pa/ /phung po lnga yi rang bzhin du/ /rnal 'byor rig pas rtag tu bsgom/ /zhes gsungs te/ tshes bcu drug nas nyi shu'i bar de sku'i rang bzhin zhes bya ba'i don to//dbang por rdo rje zhes pa ni dbang po'i phyogs su lha mo rdo rje ma dang / gshin rje'i phyogs su dkar mo dang / chu bdag gi phyogs su chu'i rnal 'byor ma dang / lus ngan gyi phyogs su rdo rje mkha' 'gro ma dang / dbus su bcom ldan 'das bdag med rnal 'byor ma zhes bya ba ste/ de rnams ni sku'i chos can gyis bsdus pas phung po lnga'i lha mo rnams so//da ni phyi rol gyi 'phar ma bshad par bya ba'i phyir/ phyi rol gyi ni 'phar ma la/ /zhes bya ba la sogs pa smos te/ dkar mo chom rkun ro langs ma/ /zhes bya ba dang / g+ha sma rI zhes bya ba bzhi ni/ phyi'i 'phar ma'i phyogs bzhir rim pa bzhin du dgod de/tshes nyi shu rtsa lnga'i bdag nyid gsung gi rang bzhin no/ /de bzhin du pu k+ka sI dang / ri khrod ma dang / gdol pa mo dang Dom+bi nI rnams ni mtshams rnams su dgod de/ tshes nyi shu drug nas sum cu'i bar du rnam par dag pa'i tshul gyis thugs kyi rang bzhin du brjod do/ / 'og ldan ma dang steng ldan nyid/ /mkha' spyod ma dang sa spyod brjod/ /ces bya ba ni/ 'og ldan ma ste/ gsung gi rang bzhin lnga tshan bar ma'o/ /mkha' spyod ma ste thugs kyi rang bzhin lnga tshan gsum pa'o/ /'di gnyis dag ni lus can thams cad kyi srog rnam pa gnyis yin te/ steng gi srog dang 'og gi srog go/ /'di gnyis nyid las gsang ba 'dus pa la sogs pa'i thabs kyi rgyud dang / dgyes pa'i rdo rje la sogs pa'i rnal 'byor ma'i rgyud rnams kyang byung ste/ de la ni steng nas ni thabs kyi rgyud do/ /'og nas ni shes rab kyi rgyud byung bar gyur to/ /de'i phyir/ srid dang zhi ba'i rang bzhin gyis/ /snying rje chen po 'di dag gnas/ /zhes bstan to/ /lha mo thams cad sku mdog gnag /ces pa ni/ shes rab stong pa nyid kyi brda ston pas sku mdog nag mo'o/ /drag cing phyag rgya lnga yis brgyan/ /zhes pa ni lha mo thams cad kyang tshes lnga tshan gyi rang bzhin dag pa las/'khor lo rna cha mgul rgyan dang / /phyag gdub ska rags rnam pa lnga/ /sangs rgyas lnga yang rnam dag cing / /'di lngas phyag rgya dag pa'o/ /zhes gsungs so/ /gzhan yang / zhal gcig spyan ni dmar ba rnams/ /phyag na gri gug thod pa 'phyar/ /zhes gsungs pa ni//srid pa dang zhi ba'i rang bzhin ston pa yin la bdag med ma ji lta ba de bzhin du lha mo bcu bzhi po rnams kyang de nyid du gcig cing tha mi dad do/ /'di ltar na/ ji ltar bdag med rnal 'byor ma/ /de ltar thams cad rnam bshad de/ /lag pa gcig ni thod pas brel/ /g.yas pa na ni gri gug bsnams//zhes bya ba la kha dog dang phyag mtshan dang zhal la sogs pa bdag med ma nyid las tha mi dad par bstan pa'i don to/ /g.yon pas kha T+wAM gnyid de/ /stag gi pags pas smad dkris shing / /ro la zhon zhing gzi brjid 'bar/ /zhes pa nges pa'i don ni gong du brjod par zad do/ /phyag gnyis skra ser gyen du 'bar//zhes pa ni ji srid gnyis su snang ba'i cha bstan pa'i phyir ro/ /ting nge 'dzin gyi stobs kyis khams thams cad gyen du 'bar ba'i phyir dbu skra gyen du brdzes pa'o/ /nga rgyal la sogs skyon drug rnams/ /zhes pa ni sa'i khams nas ye shes kyi khams kyi bar du drug po steng gi rgyu ba dang 'og gi rgyu ba phas bskyed pa gsum dang mas bskyed pa gsum ste drug lus can rnams la lugs su 'byung ba rnams so//gcod phyir gri gug rnam par gnas/ /zhes pa ni nges pa'i don du stong pa nyid las brjod de des skyon drug po gcod par gsungs so/ /dngos dang dngos min rnam rtog gi/ / bdud rnams rnam pa bzhi yi khrag /mgo bo'i pad+ma'i snod du ni/ /dngos grub phyir ni btung bar bya/ /zhes bya ba la 'di'i nges pa'i don ni ji skad du/ rtsa ba'i rgyud las/ rang gi lus mchog pad+ma nas/ /bsam gtan bzhi yis bsad pa yis/ /bdud bzhi'i sha dang khrag gnas pa/ /rnal 'byor rigs pas rtag par btung //skye rga zil gyis non par 'gyur/ /zhes gsungs te/ 'khor ba pa'i gnas skabs rnam pa bzhi ni bdud yin la/ bdud bzhi po de dag gi sprul par phung po'i bdud dang / snying gar 'chi bdag dang / mgrin par nyon mongs pa dang / spyi bor lha'i bu'i bdud de/zla ba cha bcu drug pa las ni cha bzhi bzhi gsod la srog nyi khri chig stong drug brgya'i nang nas srog lnga stong bzhi brgya bsad pas khrag 'thungs pa yin zhing dngos dang dngos min yin gyi rnam rtog bcom pa yang yin no/ /stong pa'i rnam pa kha T+wAM ga /thabs kyi ro ni rnam par brtag /ces pa ni sngon du rgyas par bstan to//'dis ni 'khor lo rnams bsgoms na/ /zhes pa ni/ phyi dang nang gi bdag nyid can drang ba dang nges pa'i don du shes nas bsgoms na dngos grub myur du thob par 'gyur zhes gsungs te nges pa'i don to/ /'di'i don yang rtsa ba'i rgyud las/ ji skad du/ rnam rtog rgya ru chud pa yi//'gro ba gsum po rnam gzigs nas/ /ji lta ji ltar grol 'gyur ba'i/ /de dang de yi thabs bstan to/ /rnam rtog bag chags kyis bcings la/ /thog mar rtog pa'i cho ga bstan/ /rnam rtog rang bzhin shes pa na/ /mi rtog pa la rnam 'jug bya/ /dkyil 'khor 'khor lo bsgom pa dang //lha rnams ji ltar bskyed pa dang / /ye shes dgug dang dbang bskur dang / /de bzhin 'khor lo rtsa dang ni/ /khu ba rlung rnams gang bstan te/ /byis pa rnams ni gzhug pa'i phyir/ /'jig rten mgon pos bstan pa yin/ /ma yin nges don gzhan du spyad/ /dkyil 'khor tshul dang lha dag dang //ye shes dgug dang dbang bskur dang / /khu ba rlung du su lta ba/ /kye yi rdo rje des mi shes/ /zhes gsungs so/ /da ni rgyud thams cad kyi bskyed pa dang rdzogs pa'i rnal 'byor ma'i drang ba dang / nges pa'i don gyi yan lag drug tu bsdu ba bstan te/ de la gang rdzogs pa'i rim pa'i gnas skabs su yan lag drug bstan pa de ni nges pa'i don yin la/bskyed pa'i rim par yan lag drug tu bstan pa de ni drang ba'i don du shes par bya'o/ /'di lta ste/ dang por nag po rab tu bsgom/ /gnyis par dmar po rnam par bsgom/ /gsum pa la ni ser por bsgom//bzhi par ljang gu de bzhin no/ /lnga par kha dog sngon po dang / /drug par dkar po'i lus can te/ /yan lag drug bsgom rnal 'byor pas/ /khyad par dga' mthar yang de bzhin/ /zhes bya ba gsungs te/ 'dir ni re zhig byis pa rnams kyis rtogs par bya ba'i phyir/ mi bskyod pa dang /dpag med 'od dang / don grub dang / rin chen 'byung ldan dang / rdo rje sems dpa' dang / rnam snang gtso bo ste yan lag drug go/ /'di ni sa dang / chu dang / me dang / rlung dang / nam mkha' dang ye shes su yang grub la gzhan yang kha dog gcig tu rtog pa spang bar bya ba'i phyir kha dog rnam pa drug kyang gsungs te/byis pa rnams kyis rtogs par bya ba'i don to/ /gzhan yang skye bo grangs can pa rnams gzhug par bya ba'i phyir/ khams drug yi ge'i chos kyis bstan la de yang bsdu ba'i yi ge ni rnam pa drug yin te/ 'di ltar a i r-i u l-i zhes bya ba lnga dang / de rnams kyi mthar thabs sam shes rab kyi yi ge gang rung cig bzhag pas drug go//de yang mtshan yang dag par brjod pa las/ thig le stong pa yi ge drug /ces bstan la drug po de gsal byed 'ba' zhig sum cur gnas pa la nye bar bsgyur bas brgya brgyad cur 'gyur zhing zla ba drug gi zhag tu 'gyur ro/ / yang de bzhin du thabs sam shes rab kyi yi ges mtha' brten pa rnams kyis sum cu po nye bar bsgyur bas brgya brgyad cu ste/ de ltar sum brgya drug cur grub bo/ /de yang 'di ltar gang du tsheg drag dang bcas pas bsgyur ba ni shes rab dang thig le dang bcas pas bsgyur ba thabs su rtogs par bya ste/ lo gcig gi chos su grub po/ /'di'i rgyas pa ni rtsa ba'i rgyud las khong du chud par bya'o/ /de bzhin du 'jig rten pa'i dngos grub 'dod pa'i byis pa rnams kyis gsad pa la sogs pa'i las kyi dbye bas dkyil 'khor la kha dog bye brag tu bsgom zhes pa ni 'di ltar gsang ba'i 'khor lo ljang gu dang / sprul pa ser po dang /chos nag po dang / longs spyod dmar po dang / dpal ba dkar po dang / gtsug tor sngon por bsgom par bya ste 'jig rten pa'i rdo rje'i tshig go/ /de ltar brjod pa de dag gis ni bskyed pa'i yan lag drug mdor bstan pa'o/ /dga' bral mtha' yang de bzhin no/ /zhes pa ni/ rdzogs pa'i rim pa'i yan lag drug bstan pa yin te/de ltar/ bskyed pa'i rim pa nyid dang ni/ /rdzogs pa yi yang rim pa nyid/ /rim pa gnyis las mnyam gnas nas/ /rdo rje can gyi chos 'chad do/ /zhes gsungs la/ rdzogs pa'i rim pa'i yan lag drug po de dag kyang dpal gsang ba 'dus pa'i le'u bco brgyad pa las/ji skad du/ so sor sdud dang bsam gtan dang / /srog rtsol de bzhin 'dzin pa dang / /rjes su dran dang ting 'dzin te/ /sbyor ba yan lag drug ces bya/ /zhes gsungs te/ don 'di ni dang po'i mchog gi sangs rgyas dang mtshan yang dag pa rang rjod pa las/rgyas par khong du chud par bya'o/ /gzhan yang rgyud 'di nyid las byis pa rnams gzud pa'i rjes la 'jig rten pa'i kun rdzob kyi skabs su bstan pa yan lag drug po 'di lta ste/ bskyed pa yi ni cha bshad do/ /zhes pa ni/ bskyed pa'i rim pa ste rtog pa'i rnal 'byor gyi yan lag drug bstan nas/snyoms par 'jug pa'i yan lag drug bstan par bya'o zhes bya ba'i don to/ /nam mkha'i khams ni pad+ma la/ /b+ha ga zhes bya'i ye shes brjod/ /bsgom pa zhes bya'i snyoms 'jug nyid/ /de yi bde ba 'khor lor brjod/ /ces bya ba gsungs te/ phyi nam mkha'i khams/ nang du pad+ma dang / phyi chos kyi 'byung gnas gru gsum/ nang du bde ba'i ye shes kyi khyad par nyams su myong ba'o/ /de nyid phyi rol du snod bcud kyi rim pas bsgom pa yin la/ nang du ni gnyis gnyis snyoms par 'jug pa yin no/ /phyi rol du ni dkyil 'khor gyi khong bu dang / nang du ni thig le bzhi'i bde ba 'khor lo'o//de nyid ni 'di ltar/ rim pa ji bzhin rang nyid rig /ces bya ba ste/ phyi'i dkyil 'khor gyi 'khor lo ni/ sa chu me rlung bzhi yongs su gyur pa yin la/ nang dus chu me rlung bzhi'i thig le 'pho ba'i rim pa skad cig ma bzhi'i rim pas phye bas rang gi rig pas phye'o/ /lha zhes bya ba byang chub sems//ji ltar 'byung ba khu ba yin/ /zhes bya ba gsungs te/ gzhal yas khang de'i nang du go rims bzhin rang gi rig pa'i khu ba byung ba'i bde ba rtogs pa ni lha yin te/ de ltar na snyoms par 'jug pa'i yan lag drug bstan to/ /da ni dga' ba bzhi'i rim pa bstan pa'i phyir/lhan cig skyes pa rnam pa gnyis/ /re zhig mi mo shes rab nyid/ /skyes bu thabs su brjod par bya/ /zhes bya ba gsungs te/ dbang po gnyis kyis snyoms par 'jug pas sangs rgyas par 'dod pa rnams la skyes pa dang bud med dag ni thabs dang shes rab kyi sgrar bstan te yang dag par ni ma yin no//yang dag par ni/ kun rdzob don dam dbye ba las/ /phyis ni de dag rnam gnyis so/ /zhes gsungs pa'i phyir dga' ba bzhi yin la/ de rnams kyang mtshon bya mtshon byed dbye bas kun rdzob kyi bde ba 'dzag pa'i bdag nyid ni thabs yin zhing / don dam pa'i bde ba mi 'gyur ba ni shes rab tu rtogs par bya'o//gzhan du na re zhig skyes bu rnam pa gnyis te/ khu ba dang ni de bde nyid/ /skyes bu bzhin du shes rab ste/ /khu ba dang ni bde ba nyid/ /de nyid phyir ni dga' ba ni/ /bzhi yi rab tu dbye ba yin/ /zhes gsungs te/ skyes pa dang bud med dag gi khu ba ni thabs yin la bde ba ni shes rab bo//de bzhin du/ rdzogs pa'i rim pa'i phyogs la'ang / /'di ltar lhan cig skyes rnam bzhi/ /zhes bya ba ni mtshon par byed pas yongs su dor te mtshon bya don dam pa'i phyogs la'ang / rlung dang chu yis bsdus pa'i ting 'dzin dang / /me dang sa yis bsdus pa'i ting nge 'dzin bzhi yin no//de ni 'dir ltar mtshan yang dag par brjod pa las kyang / bsam gtan bzhi pa'i rtse mo can/ /zhes gsungs so/ /dga' ba de dag kyang / dga' ba dang po dpa' bo nyid/ /mchog tu dga' ba rnal 'byor ma/ /shin tu bde dga' thams cad des/ / de bde thabs las thams cad rig /ces bya ba gsungs te/ lugs dang lugs las bzlog pa'i bye brag gis skyes bu rnams la ni dang po rlung gi khams 'khrug go/ /de nas ni me dang chu dang sa rim bzhin du 'khrug go/ /bud med rnams la ni go bzlog ste dang po sa nas 'khrug go/ / dga' ba de dag gi khyad par gsungs pa ni/ dga' ba bde ba cung zad de/ /mchog tu dga' ba de bas lhag /dga' bral dga' bas chags bral yin/ /lhag mas lhan cig skyes dga' nyid/ /ces bya ba gsungs te/ don 'di yang rdo rje'i tshig 'og ma 'di nyid kyis rtogs par bya'o/ /'di ltar/ dang po reg par 'dod pa dang //gnyis pa bde bar 'dod pa dang / /gsum pa 'dod chags 'jig pa nyid/ /des na bzhi pa bsgom par bya/ /zhes bya bas bstan te/ 'di ltar bum pa dang gsang ba dang shes rab ye shes rnams ni nyams shing 'jig par byed pa'i bdag nyid pas bsam gtan bzhi pa bsgom par nges so//de bzhin du mchog gi dang po'i sangs rgyas kyi rgyud las kyang / gsum po 'jig rten kun rdzob ste/ /bzhi pa dag ni don dam nyid/ /ces gsungs so/ /mchog tu dga' ba srid par brjod/ /dga' bral las ni mya ngan 'das/ /dbu ma dga' ba tsam nyid de//de phyir lhan cig skyes pas spangs/ /zhes gsungs te/ tshig 'di dag ni go rims bzlog par gzung bar bya ste/ dbu ma dga' ba tsam zhes pa ni dga' ba dang po'o/ /de nas mchog tu dga' ba'o/ /de nas khyad par gyi dga' ba ste/ stobs kyi sbyor bas khyad par bya ba'i phyir go bzlog nas gsungs te/bla ma'i zhal las shes par bya'o/ /de ltar brjod pa'i dga' ba gsum ni srid pa ste 'jig pa'i rang bzhin can yin zhing gtan tshigs 'dis na 'jig rten las 'das pa'i lhan cig skyes pa'i dbye bas sngon ma rnams shes rab kyi yan lag gis dor te/gnas phyi ma rnams la 'bad par bya'o/ /de las kyang shes rab chen po'i lhan cig skyes pa sngar gyi shes rab kyi yan lag thams cad kyis mtshon par bya ba 'di lta ste/ brjod pa'i yul las 'das pa nyid rnal 'byor pa rnams kyis phrag bar blang bar bya'o/ /'di ltar/ 'dod chags med cing chags bral med//dbu mar dmigs par mi 'gyur ro/ /'di la thabs dang shes rab med/ /yang dag de nyid snang ba po/ /gzhan gyis brjod min lhan cig skyes/ /zhes bya ba gsungs te/ yar ngo mar ngo 'dod chags dang chags pa dang bral ba yin zhing / dbu ma cha bcu drug pa yin zhing dngos su na nyi ma dang /zla ba dang sgra gcan zhe'am/ skyes pa dang / bud med dang / ma ning zhe'am/ oM dang / AHdang / hUM zhe'am/ cha shas dang / thig le dang / sgra zhes gang yang mtshon par mi 'gyur ro/ /de bas na de'i phyir mya ngan las 'das pa'i bde ba la zhen pa rnams kyis bla ma ma gtogs pa rnyed par mi 'gyur te/bla ma'i rjes su 'brang bar bstan to/ /'di ltar/ gang du yang ni mi rnyed de/ /bla ma'i dus thabs bstan pa yis/ /bdag gi bsod nams las shes bya/ /zhes bya ba ste/ mtshon par byed pa dang mtshon par bya ba dag bla ma rin po che'i mgur gyi bum pa las bdag gi bsod nams kyi tshogs kyi yan lag sngon du 'gro bas rig par bya'o//mtshon bya sngon du rnyed nas 'di ltar blta bar bya ste/ dman pa 'bring dang mchog rnams dang / /gzhan dang gang rnams de rnams kyang / /ro mnyam de nyid bsgoms pa yi/ /'di kun mnyam pa nyid du blta/ / zhes gsungs te/ mdor bstan pa'o/ /rdo rje'i tshig 'dis ni mtshon bya mngon du rnyed pa rnams kyis rgyu ba dang mi rgyu ba'i 'jig rten gsum po phra ba'i 'du shes dang rags pa'i 'du shes dang dbu ma'i 'du shes spangs te/ mtshon du med par mtshon par bya bar ston to/ /ji skad du rtsa ba'i rgyud las kyang /rig pa'i skyes bu blo ldan gyis/ /sgra dang thig le rnams spangs te/ /mtshon du med par mtshon byas nas/ /kye yi rdo rje'i skur 'dzin 'gyur/ /zhes gsungs te/ rgyas par bstan par bya ba'i phyir/ /dman pa rnams ni phra ba'i don/ /mchog gi dngos por brjod par bya/ / dbu ma gnyis kyis spangs pa nyid/ /ces bya ba gsungs te/ mi rgyu ba bstan pa'i dngos po rnams sam yang na 'dod pa dang / gzugs dang gzugs med pa rnams su lta ba'i shes pa'am/ yang na dngos po gang zhig mchog dang 'bring dang tha ma ste ting nge 'dzin gsum gyi tshul can spangs te lhan cig skyes pa'i ro mnyam par bsgom zhes bya ba'i don to//gzhan rnams zhes bya dbang po drug /gang rnams de rnams brtan dang g.yo/ /zhes bya bas ni/ brtan pa dang g.yo ba dag las g.yo ba rnams kyang dngos po gsum du gnas par mi brtag ste/ 'di ltar lhan cig skyes pa'i ror mnyam pa'i phyir ro//'di kun zhes bya ba nyid med/ /ces pa ni phyi dang nang gi chos can gyi 'jig rten gsum po 'di dag bdag dang gzhan gyis stong zhes bya ba'i don to/ /mnyam nyid mtshungs par 'dod pa ste/ /ro mnyam de nyid bsgom pa ni/ /mnyam zhes bya ba mtshungs par brjod/ / ro ni de yi 'khor lo yin/ /zhes bya ba la/ de ltar brjod pa'i rim pas 'jig rten gsum gyi srid pa'i 'khor lo yan lag bcu gnyis lugs su 'byung ba 'di nyid kho na las 'od gsal ba'i bde ba'i 'khor lo la 'byung bas gzhan du mi btsal zhes pa'i don to/ /gtan tshigs 'di nyid kyi phyir na//bsgom par ro gcig mnyam pa nyid/ /don 'di yis ni brjod pa yin/ /zhes gsungs te/ mnyam pa dang ro gcig par bya ba'i gzhi ni srid pa'i 'khor lo nyid de/ 'di las ma gtogs pa'i don gnyis pa ni 'ga' yang yod par ma mthong ngo / /de bas na de'i phyir/nga las 'gro ba thams cad 'byung / /nga las gnas gsum po yang 'byung / /nga yis 'di kun khyab pa ste/ /'gro ba'i rang bzhin gzhan ma mthong / /zhes bya ba smos te/ 'od gsal ba bde ba'i 'khor lo 'di nyid byis pa rnams la gnyid mthug po dang sad pa dang rmi lam dang gnyid kyi bde bas 'khor zhing gnas so//de ni chos kyi dbyings mngon par 'byung ba zhes bya ba theg pa chen po'i mdo las kyang / dam pa rnams la bde skye zhing / /byis pa rnams la 'jigs par ston/ /khyod ni mthong na grol 'gyur te/ /ma mthong na yang grol mi 'gyur/ /zhes gsungs so//de bas srid pa nyid sangs rgyas dang byang chub sems dpa' rnams kyi bzhugs gnas mchog tu shes par bya ba la gnas par bya'o/ /'di lta ste/ de ltar rnal 'byor pas shes nas/ /shin tu mnyam gzhag gang bsgoms pas/ /bsod nams chung ba'i mi yis kyang / /de ni 'grub par the tshom med//ces smos te/ don 'di rtsa ba'i rgyud las gsal bar gsungs te/ ji skad du/ srid pa'i 'khor lo 'di spangs nas/ /gnas mchog tshol 'dod skyes bu gang / /mtshams med lnga ni byed pa po'i/ /skyes bu tha shal de dag brlag /ces gsungs so/ /'di lta bu'i tshul la mi gnas par mnyam par 'jog pa'i rnal 'byor pas/kye'i rdo rje'i dngos grub myur du thob par 'gyur zhes pa'i don to/ /bza' dang btung dang blugs pa dang / /nyal dang log dang sems pa na'ang / /phyag rgya che la mngon zhen na/ /de yis mchog tu 'gro bar 'gyur/ /zhes gsungs te/don 'di yang rtsa ba'i rgyud nyid las/ ji skad du/ phyag rgya che la rab gnas na/ /'gro 'am 'chag dang nyal ba dang / /de bzhin mtshams med las byas na'ang / /grol 'gyur 'di la the tshom med/ /'di gnas bzhin du rnal 'byor gang / /btsun mo'i 'khor dang ldan na yang / /nga yis 'ching bar ma mthong ste//'di nyid da ltar kye'i rdo rje/ /zhes gsungs so/ /bsdus pa'i rgyud 'di nyid las rdo rje'i tshig 'dis gsal bar rab tu bstan pa yin te/ gang du yid kyis ma bsgoms na/ /'gro ba thams cad bsgoms 'gyur te/ /sgom pa med pa'i bsgom nyid kyis/ /chos rnams thams cad yongs shes bya//zhes bya bas gsal bar byed de/ tshig 'dis rgyud mtha' dag gi don gsal bar gsungs la/ dbugs 'byin pa rnam pa gnyis las kyang rdo rje 'dzin chen po'i dbugs 'byin pa yin no/ /shes rab chen po'i yan lag drug gi dang po so sor sdud pa zhes su dpal dang po'i sangs rgyas dang /gsang ba 'dus pa la sogs par tha snyad btags pa yin la/ 'bad pa thams cad yongs su 'dor bas 'grub/ /ces par dgongs so/ /'di kho na shes rab kyi pha rol tu phyin pa'o/ /'di nyid bdag med ma'o/ /'di nyid he ru ka'o/ /'di nyid dus gsum gyi sangs rgyas so//'di nyid srid pa'i rgya mtsho las thar bar sgrol ba'o/ /'di nyid yi ge med pa'i mdo yin no zhes pa ste/ nges pa'i don to/ /gzhan yang rdo rje 'dzin pa chen po'i dbugs 'byin pa'i 'di byis pa'i skye bo rnams la sna tshogs pa'i dngos por snang ste 'di lta ste/ tha snyad du mar 'dogs shing gnas pa ni/rgyu ba dang / mi rgyu ba dang / bdag dang / gzhan dang / srog dang / gso ba dang / gang zag dang / byed pa po dang / shed bdag dang / shed can dang / pha dang / ma dang / bla ma dang / 'jig rten gyi mes po dang / sa dang / chu dang / me dang / rlung dang / nam mkha' dang /ri bo dang / rgya mtsho dang / gling dang / nags ma dang / shing gel pa dang / lcug ma dang 'khri shing la sogs par gnas te/ 'di rnams kyang rang gi ngo bo las gzhan pa yod par dus gsum gyi mgon po rnams kyis yong ye ma gsungs la/ 'di rnams la mchog dang dam par lta ba'i skyes bu kho na kye'i rdo rje'i sku yin no//de'i phyir 'di lta ste/ bstan dang g.yo ba'i dngos po gang / /rtswa lcug 'khri shing la sogs pa/ /rang rang ngo bo'i rang bzhin las/ /dam pa'i de nyid nges bsgom bya/ /de rnams nyid las mchog gzhan med/ /ces gsungs te/'di dag gi ngo bo spang bas kyang ma yin la mi spang bas kyang ma yin zhes bya ba'i don to/ /'di ltar/ rang rig bde ba chen po nyid/ /rang rig las ni byang chub 'gyur/ /zhes bya ba la don 'di nyid rtsa ba'i rgyud nyid las ji skad du/ rdo rje snying po 'di lta ste/ /sdug bsngal gyi rang bzhin 'khor ba'i 'khor lo kho na ji lta ba nyid du gzhag gis dper na nam mkha'i dbyings chen po 'di tshon du mas kha dog tu bya ba la rtsol ba mi byed pa yin no//de bzhin du kye rdo rje la gnas par 'dod pa'i rnal 'byor bas kyang tshul de ltar bslab par bya'o zhes bya ba'i don to/ /rang rig phyir na bsgom pa nyid//rang gis rig pa'i 'gyur ba las/ /mnan pa las ni las skyes te/ /zhes bya bas ni mtshon par bya ba dang / mtshon par byed pa gnyis ka gsal bar ston pa yin la/ 'di ltar mtshon par byed pa'i dus su/ dga' bral dang po mchog mtha' can/ /zhes bya bas mtshon byed blos mngon du byas nas/rang gis rig pa bsgom par bya/ /zhes bya ba'i don to/ /de bas na mtshon byed de nyid mnan zhing dbang du byas pa las mngon par gsal bar 'gyur ro/ /de'i phyir ji skad du/ rang gis 'phrog cing rang gis byed/ /rang nyid rgyal po rang gtso bo/ /zhes gsungs pa'i tshig gis bye brag tha dad par gsungs te/mtshon par byed pa'i dus kyi rdo rje'i tshig go/ /de lta bu'i mtshon byed thog ma nyid du nan tan gyis btsal la/ phyis bsam gtan gyi khyad par gyis spangs te/ 'di ltar mtshan yang dag par brjod pa las/ srid pa'i 'dod chags sogs spangs pas//srid gsum dga' ba chen po pa/ /sprin dkar dag pa bzhin du dkar/ /'od bzang ston ka'i zla ba'i 'od/ /nyi ma 'char ka'i dkyil ltar mdzes/ /zhes gsungs pa'i phyir ro/ /de bas gang mtshon byed de ni srid pa'i 'dod chags te/ nyon mongs pa mtha' dag gi stobs kyis 'byung la/de dang mi mthun pa ni/ dper bya kun las 'das pa ste/ /zhes bya ba/ mtshon cha mngon du rnyed pa khyad par du 'phags pa yin no/ /de bas na bsdus pa'i rgyud 'di nyid las/ 'dod chags zhe sdang phrag dog dang / /de bzhin gti mug nga rgyal nyid/ /de kun de gnas nyams dga' bar//bcu drug char yang mi phod do/ /zhes gsungs so/ /de bzhin du/ chos 'byung las skyes ye shes ni/ /zhes pa ni skye gnas la brten pa'i bde ba'o/ /mkha' mnyam lhan cig thabs dang bcas/ /zhes pa ni zag pa med pa'i bde ba'i thabs kyis so/ /gzhan du yang /thabs dang shes rab rang bzhin las/ /'jig rten gsum po de las skyes/ /zhes bya ba gsungs te/ spros pa'i bde ba kho na las/ /'jig rten gsum po yang skyes shing / /mi 'gyur ba'i ye shes kyang de las skyes pa yin no/ /'di nyid kyi phyir pha dang ma'am thabs dang shes rab ces bya bar skabs kyi khyad par la ltos te tha snyad 'dogs par mdzad do//gsang chen 'di'i skabs ni/ rten dang brten las tha dad par byas te tha snyad 'dogs pa yin te/ /khu ba'i rnam pa bcom ldan yin/ /de yi bde ba 'dod mar brjod/ /ces gsungs pa khu ba ni pha yin la/bde ba ni mar rtogs par bya'o/ /ci'i phyir bde ba las shes rab brjod ce na/ 'di nyid kyis na med pa las/ /gang zhig dngos med shes rab de/ /dngos po thabs su brjod par bya/ /zhes kyang gsungs la/ de bzhin du bde ba kun du rtog pa'i dra bas gcod do/ /gcig dang du ma dang bral ba ste/skad cig gcig las mchog dga' ba/ /zhes bya ba rtogs te 'di ltar skad cig bzhi dang dga' ba bzhi'i cha shes kyi phye bas rig par 'gyur ro/ /ji lta bu zhig rig ce na/ /rang gi rig pa'i ye shes 'di/ /ngag gi las 'das spyod yul te/ /'di ni byin rlabs rim pa'i phyir//kun mkhyen ye shes de lta bu/ /sa dang chu dang rlung dang ni/ /me dang nam mkha' nyid dang ni/ /rang bzhin rig pa'i tshor ba yis/ /kun gyi skad cig kyang mi gnod/ /mtho ris mi yul sa 'og rnams/ /skad cig gis ni gzugs gcig 'gyur/ /zhes gsungs la/ 'di ltar phyi dang nang du phye bas dper bya ba las 'das pa'i bde ba'i bsam gtan gang la gnas na/ 'jig rten gsum gyi sa 'og sa steng sa blag sum du gnas pa rnams kyis kyang bdag la mi gnod de/ gang gis skad cig de la mi 'gyur ba'i bde ba'i ye shes su ma gyur pa gang yang med pa'i phyir ro//gzhan yang khams gsum 'di dag gi ni/ bdag dang / bdag gir 'dzin pa'i lcags sgrog gis bcings pas gnod par 'gyur la/ dbang phyug chen po 'di yi ni/ rang gzhan cha yi rnam rtog gis/ /gnod pa nyid du 'gyur ba min/ / zhes pa'i don to/ /'di na byis pa phal cher ni 'jig rten pa rnams kyi rig byed sde bzhi dang / grub pa'i mtha' du ma dang / 'jig rten lta bu'i grub pa brgyad la sogs pa shis pas grol bar 'dod de/ gang de ni mes po chen pos bkag ste/ 'di ltar/ thams cad rig byed grub mtha' dang //de bzhin las rgyas la sogs pas/ /srid par dag pa'i dngos grub min/ /slar zhing srid par skye bar 'gyur/ /zhes gsungs pa ste/ nges pa'i don to/ /'jig rten 'di dang pha rol du/ /de med pas na dngos grub med/ /ces bya ba ni 'di ltar brjod pa dang bral ba'i dngos grub kyis dman pa'i byis pa ni 'khyam zhing rnam par 'khyam par 'gyur la/de'i dbang gis sdug bsngal rgyun mi 'chad pa yang yin no/ /de bas na thar par bya ba'i phyir 'jig rten pa'i dbang phyug chen po brgyad la sogs pa la 'dod cing zhen pas gnas par mi bya'o/ /gang gis mi shes kye rdo rje//zhes bya ba ni gong du bstan pa de lta bu kye'i rdo rje mi shes pa'o/ /de ni ngal ba don med 'gyur/ /zhes bya ba ni/ gang gis spros pa'i mtshan ma mi mnga' ba'i kye'i rdo rje dang bral bas lus dang ngag dang yid kyi spyod pa bskal par bgrang ba las 'das par spyad kyang 'bras bu dang bral ba'o zhes bya'o//chu bo'i rgyun ltar rab 'bab pa/ /zhes pa ni nyan thos dang rang rgyal ba la sogs pa lam la gnas pa dag ni chu bo lta bu'o/ /gzhan du na byis pa rnams la nyin dang mtshan du chu bo gang+gA'i rgyun kha 'og tu bltas te 'bab pas/ mtshan ma'i rtog pa byung ba yin no/ /mar me'i rtse mo lta bur bcing //zhes pa ni de ltar lam gnyis la gnas pa'i rnal 'byor pa yang dmigs pa'i lam la gnas par 'gyur bas rang rang gi lam bcad pa yin no/ /de bzhin du kha thur du bltas pa'i chu bo yang mar me'i rtse mo ltar dbyer med pa'i lam du bsgyur bar bya ste/ chu bran mdog dang ro dang dbyibs tha dad pa gang+gA si ta la sogs pa phyi'i dug can du chud pa na tha mi dad pa bzhin no//rtag tu de nyid rnal 'byor gyis/ /nyin dang mtshan du rnam par gzhag /ces bya ba ni dngos po rnams ro gcig pa'i de kho na nyid la spyod lam thams cad du gzhag ces bya ba'i don to/ /'dir mang smras pas ci zhig bya//blo yi yul du gang gyur pa/ /de dag ro mnyam bsgom par bya/ /mkha' ltar khyab pa'i dngos grub 'byung / /zhes pa'o/ /kye'i rdo rje nges pa'i don gyi rgya cher bshad pa las/ rnal 'byor ma'i 'khor lo'i rgya cher bshad pa ste brgyad pa'o// // dngos med ngo bo las byung ba/ /rdo rje can la phyag 'tshal nas/ /rnam dag le'u rgyas bshad ni/ /rdo rje snying pos bri bar bya/ /'di ltar ma sbyangs pa'i dug la sogs pa'i dngos po ni gsod par byed pa kho na bas/ skyes bu blo dang ldan pa rnams kyis de sbyang ba'i rigs so/ /de bas 'di ltar gsang chen rnam pa gsum gyi tshul gyis/lus dang ngag dang yid rnam pa gsum rnam par dag par bya'o/ /de la re zhig /de nas mchog tu rnam par dag pa'i le'u bshad par bya'o zhes bya ba ni rnal 'byor ma'i 'khor lo bshad pa'i rjes thogs su zhes bya ba'i don to/ /nges par dngos po thams cad kyi//zhes pa ni khams gsum pa'i dngos po thams cad do/ /dag pa de bzhin nyid du brjod/ /ces pa ni dngos po'i dug sel bar byed pa'i sman mi 'gyur ba'i de bzhin nyid kho na yin no/ /de yang re zhig byis pa rnams kyis rtogs par bya ba'i phyir/ phyi nas re rer dbye ba yis//lha rnams kyis ni brjod par bya/ /zhes bya ba la bskyed pa'i rim pa'i phyogs la/ oM shU n+ya tA zhes pa la sogs pas ni/ nges par dngos po thams cad sbyong ba yin la/ /de bzhin du gzhal yas khang dang lha la sogs pas brtags pa ni drang ba'i don to/ /de ni 'di 'di nyid de//phyi nas re rer dbya ba yis/ /lha rnams kyis ni brjod par bya/ /phung po lnga dang dbang po drug /skye mched drug dang 'byung chen lnga/ /rang bzhin gyis ni rnam par sbyang / /zhes bya ba ste/ mi rgyu ba'i khams rnams gzhal yas khang du brtag cang rgyu ba'i khams rnams lha ru brtag par ni re zhig rnam par sbyang ba'o//de las phung po lnga dang zhes bya ba ni/ gzugs nas rnam par shes pa'i bar du phung po lnga po rnam snang la sogs pa lnga ru sbyang ngo / /de bzhin du dbang po dang skye mched dang 'byung ba chen po la sogs pa rnams/ byang chub sems dpa' rnams dang /rig ma lnga rnams su sbyang ngo / /nyon mongs shes bya'i sgrib sbyang bya/ /rang rig bdag nyid dag pa nyid/ /dag pa gzhan gyis rnam grol min/ /zhes bya ba la sbyang bar bya ba'i dgos pa ni/ nyon mongs pa dang shes bya'i sgrib pa sbyang ba'i phyir ro/ /de la ji ltar dag par bya zhe na//rang rig bdag nyid ces bya ba smos te/ gzugs la sogs pa ngo bo nyid kyis skye ba med par shes pa gang yin pa ni/ dag pa zhes de la brjod de/ /de ma rtogs pa gzhan gyis dag par mi bya ba ni nges pa'i don to/ /de bas de'i phyir/ yul gyi dngos por dag pa'i phyir/ / rang gis rig pa'i bde ba'i mchog /gzugs la sogs pa'i yul rnams dang / /gzhan yang rnal 'byor bas mthong ba/ /dngos po de kun dag pa ste/ /'di ltar 'gro ba sangs rgyas bdag /ces bya ba la 'di ltar byis pa rnams kyis rtogs par bya ba'i phyir gzugs la sogs pa rnams ngo bo nyid kyis sangs rgyas gtso bo la sogs pa ste/'di ltar gzugs rnam par snang mdzad ces pa la sogs pa'i tshig gis so/ /de'i phyir dpag bsam gyi shing dang / bum pa bzang po dang / /yid bzhin gyi nor bu dang / ral gri la sogs par snang zhing don byed pa'i yul rnam par sbyang ste byis pa rnams la drang bar gsungs so//kye bcom ldan 'das rnam par ma dag pa gang lags zhes bya ba ni/ bcom ldan 'das la rdo rje snying pos gsol ba btab pa/ gong du bcom ldan 'das kyis gzugs la sogs pa'i yul dang / mig la sogs pa'i dbang po rnams ni gdod nas sangs rgyas lags na/de las gzhan pa'i dngos po gnyis pa bdag gis ma mthong zhes bya ba'i don to/ /bcom ldan 'das kyis bka' stsal pa zhes bya ba ni rdo rje snying po'i lan du'o/ /gzugs la sogs pa'o zhes bya ba ni gzugs la sogs pa 'di nyid byis pa rnams la rnam par ma dag pa yin te 'di ltar gsod pa'i phyir ro zhes pa'o//de ci'i slad du zhe na zhes pa ni rdo rje snying pos slar gsol pa'o/ /gzung ba dang 'dzin pa'i dngos po'i phyir ro zhes bya ba ni byis pa'i skye bo rnams bdag dang bdag gir 'dzin te/ 'di ltar skyes bu rang bzhin du 'dzin cing / de bzhin du 'gyur ba dang /de bzhin du sgra dang snyan dngags dang byed pa'i tshig la sogs par 'dzin pa'i phyir ro zhes dgongs so/ /kye bcom ldan 'das gzung ba dang 'dzin pa gang lags zhes bya ba ni/ gang gis gang la ji ltar 'dzin/ /zhes zhus pa'o/ /bcom ldan 'das kyis bka' stsal pa zhes pa ni lan du'o//mig gis gzugs la 'dzin par byed/ /sgra la rna bas nyan par byed/ /sna yis dri la snom par byed/ /lce yis rol myong bar byed/ /dngos po kun gyis reg par byed/ /ces gsungs te/ byis pa rnams ni yul dang yul can dang / bdag dang bdag gi dang bde ba dang sdug bsngal gyi tshul du yul rnams la 'jug pas rnam par ma dag pa yin la rnal 'byor pa mkhas pa ni/de nyid thabs gyis 'jug par byed de/ des rnam par dag go/ /'di ltar bde ba dang sdug bsngal thams cad ni/ gzod ma nas ngo bo nyid kyis stong zhing dben te/ gang gis de ltar shes pa de ni rnam par sbyangs pa ste nges pa'i don to/ /des na/ yid kyis bde sogs thob pa rnams/ /dag pas dug med byas nas ni/ /bsten bya 'di dag bsten par bya/ /zhes bya ba la rnal 'byor pa mkhas pa dang / byis pa'i rang bzhin can dag gis 'di ltar rim pa bzhin du bden pa gnyis la brten te/rnal 'byor pa mkhas pas kyang sgyu ma'i dpe bcu gnyis dang / dam tshig gi 'khor los kun rdzob kyi bden pa mi spang ste/ rang rang ji ltar 'dul ba bzhin du dkyil 'khor gyi 'khor lo bstan to/ /de bzhin du las dang po bdag gis ni bdag dang bdag gir 'dzin pa ni/'di lta ste/ rus dang rigs dang rgyu dang cho 'brang du 'dzin pa las bzlog ste/ rdo rje'i rigs zhes bya ba kun rdzob kyi mngon par dbang bskur ba bdun la gnas te/ gtsang ba dang mi gtsang ba'i rtog pa las rim gyis bzlog par bya ba'i phyir/ rigs bzhi po rnams nang phan tshun du go dang /ku la sogs pa'i bza' ba dag thun mong du bza' zhing / rigs dang rigs ma yin pa la bgrod par bya ste/ ma dang sring mo la sogs pa rnams dang lhan cig tu gnas par bya ba ste/ gang des tha mal pa'i rnam par rtog pa cher rags pa rnams las ldog go/ / de bas na rdo rje'i rigs ni mngon par dbang bskur ba bdun nyid kyis ming 'thob bo/ /des na bdag cag rnams kyis phung po dang / khams dang / skye mched dang / dbang po dang / 'byung ba dang / 'byung ba las gyur pa ji snyed pa dang / de bzhin du las dang las kyi dbang po'i bya ba rnams lha nyid du brtag gis/de las gzhan gyi tshul du mi brtag ste/ de ltar na dang po'i las can gyi rnal 'byor pa rnams kyis/ gzugs phung rdo rje ma yin te/ /tshor ba la yang dkar mor brjod/ /'du shes chu yi rnal 'byor ma/ /'du byed rdo rje mkha' 'gro ma/ /rnam shes phung po'i tshul gyis ni//bdag med rnal 'byor ma gnas so/ /rtag tu 'di dag rnam dag pas/ de nyid rnal 'byor pas 'grub 'gyur/ zhes gsungs te/ 'di ltar shel gyi nor bu'i nye 'khor du kha dog gang dang gang gzhag pa de dang de'i kha dog tu 'gyur ba bzhin no/ /rdo rje 'chang chen pos kyang byang chub sems dpa' rdo rje dbyings zhes bya ba la/rigs kyi bu sems de ni ji ltar sbyangs pa de ltar 'gyur ro zhes gsungs so/ /'di'i phyir ni phung po lnga lha mo lnga ru brtag par bya ste/ nang gi tshul du bstan pa ni rnal 'byor ma'i 'khor lor rgyas par bstan to/ /de ni nang gi 'phar ma ste phung po lnga dag pa'o//yul rnams lha ru brtag par bya ba'i phyir/ de nas phyi yi 'phar ma bshad/ /dbang ldan du ni pu k+ka sI/ /mer ni de bzhin ri khrod ma/ /bden bral gdol pa mo bzhag cing / /rlung du g.yung mo rnam par gzhag /ces pas ni 'byung ba bzhi'i lha mo bstan to/ /de bzhin du yul gzugs la sogs pa 'byung ba bzhi'i lha ru brtag pa ni 'di lta ste/dbang dkar gshin rjer chom rkun ma/ /chu yi phyogs su ro langs ma/ /lus ngan du ni g+ha sma rI/ /zhes pas bstan to/ /gzhan yang / 'og tu sa spyod ma zhes brjod/ /steng du mkha' spyod ma zhes bshad//ces pa ni phyi nang gi tshul gyis gong du rgyas par bstan to/ /bskyed pa'i rim pa nyid kyi phyogs zhes bya ba ni de ltar brjod pa'i rim pas las dang po pa rnams la bstan pa'o/ /srid dang zhi ba'i rang bzhin gyis/ /zhes bya ba la/ srid pa ni mkha' spyod ma yin la zhi ba ni sa spyod ma yin no//de yang rgyud gzhan las ji skad du/ srid pa ni dpral ba yin zhing mya ngan las 'das pa ni/ nor bu'i mgrin pa las zags par 'gyur ba'o zhes gsungs so/ /lha mo 'di gnyis rnam par gnas/ /zhes bya ba ni srid pa dang zhi ba'i rang bzhin du steng dang 'og gi lha mo gnyis shes par bya'o//bskyed pa'i rim pa la rnam par dag par bstan pa byis pa rnams kyis rtogs par bya ba 'di lta ste/ gzugs la dkar mor brtag par bshad/ /sgra la chom rkun ma ru grags/ /dri yi cha la ro langs ma/ /ro la g+ha sma rI ru grags/ /zhes bya ba gsungs te/byis pas brtags pa'i dngos po bzhi po rnams de ltar mos par byas te goms pa las kun rdzob tu gsad pa la sogs pa grub pa yang yin la/ las 'di bzhi'i nges pa'i don bstan pa ni/ rtsa ba'i rgyud las 'di lta ste/ rdo rje snying po lus can rnams kyi rang gi lus las 'byung ba'i byang chub kyi sems kyi chus nyon mongs pa'i gdung ba zhi bar byed pa ni zhi ba'o//snga na med pa'i bde ba gya nom pas lus dang ngag dang sems rgyas pa'i phyir rgyas pa'o/ /lus dang ngag dang yid sdug bsngal ba las bzlog ste bde bas dbang du byas pa'i phyir dbang ngo / /de stobs kyis srog nyi khri chig stong rgyu ba dang //byang chub sems kyi thig le kha thur du bltas pa'i rgyu ba gsod pa'i phyir mngon spyod do/ /de bzhin du/ zhi ba chu yi bsam gtan dpral bar bsam pa dang / /dbang me'i bsam gtan mgrin par bsam pa dang / /gsang ba rlung gi bsam gtan snying ga dang / / rgyas pa sa yi bsam gtan lte bar gnas/ /zhes gsungs so/ /reg pas spyod ma zhes bshad/ /chos kyi dbyings la mkha' spyod ma/ /zhes bya ba ni phyi dang nang gi tshul gyis rnam par shes pa nam mkha'i khams zhes bya ba srog gi rlung steng nas rgyu ba rnal 'byor gyi rgyud kyi de kho na nyid de 'dus pa la sogs pa'i de kho na nyid du bstan zhing pha'i sems zhes su bstan no//de bzhin du sa spyod ma zhes bya ba ni mchog tu mi 'gyur ba'i ye shes kyi khams zhes bya ba/ lus can rnams kyi khu ba'i thig le 'og tu 'dzag pa'i bde ba rnal 'byor ma'i rgyud kyi de kho na nyid de/kye'i rdo rje la sogs pa'i de kho na nyid du bstan cing ma'i sems su bstan to/ /de ni dang po'i sangs rgyas kyi rgyud ces bya ba las kyang ji skad du/ steng 'og sems kyi rtsa gnyis ni/ /sa bon 'bab dang mun pa can/ /thabs kyi thugs ni mun pa can/ /sa bon 'bab pa shes rab kyi/ zhes gsungs te/ rdo rje'i tshig 'dis don 'di khong du chud par bya'o/ /de bzhin du/ rtag tu 'di rnams rnam dag pas/ /de nyid rnal 'byor pas 'grub 'gyur/ /zhes bya ba ni drang ba dang nges pa'i don gyi dbang gis/ rim pa bzhin du yid la byas nas/ 'jig rten dang 'jig rten las 'das pa'i de kho na nyid rim bzhin du thob par 'gyur zhes bya ba'i don to//gzhan yang / phyag gi dag pa stong pa nyid/ /bdud rnams dag pas zhabs rnams te/ /rnam thar brgyad kyi zhal rnams yin/ /spyan gyi dag pas rdo rje gsum/ /zhes bya ba ni rim pa bzhin du zla ba mar ngo'i chos can stong pa nyid bcu drug dang /'jig rten pa'i sad pa la sogs pa'i chos can gnas skabs bzhi 'gags pa dang / chos kyi 'khor lo thun mtshams brgyad kyi mtshan nyid can dang / sku gsung thugs kyi mtshan nyid can oM AHhUM zhes pa dang / gzhan yang / sa ni pu k+ka sI zhes bshad/ / chu khams rngon pa ma zhes brjod/ /me ni gtum mor shes par bya/ /rlung ni g.yung mor rab tu grags/ /zhes pa ni las rnam pa bzhi'i tshul gyis phyi dang nang du rtogs par bya ste/ nges pa'i don ni 'di ltar rtsa ba'i rgyud nyid las/ ji skad du/ srog ni rdo rje'i rigs kyis bcad/ /don yod grub pas brdzun du smra//rin po che yis brku bar bya/ /dpag med 'od kyis mi tshangs spyad/ /ces gsungs te/ ji lta ba bzhin du shes pas ni/ dngos grub gnyis kyi rgyur dgongs so/ /de bzhin du gtso bo dang phal pa'i dbye bas/ zhe sdang zhes bshad rdo rje ma/ /'dod chags chu yi rnal 'byor ma//phrag dog rdo rje mkha' 'gro ma/ /ser sna gsang ba'i dkar mo nyid/ /de bzhin gti mug rdo rje ma/ /zhes bya ba ni rim pa bzhin du mi bskyod pa dang / rin chen 'byung ba dang / don yod grub pa dang / dpag med 'od dang / rnam snang mdzad la sogs pa rnams su rnal 'byor sde gnyis kyis rtogs par bya bar gsungs te/'on kyang skabs 'di las byis pa'i rnal 'byor pa rnams kyis rtogs par bya ba'i phyir gsungs pa yin te/ ci mngon zhe na/ zhe sdang la sogs rnam sbyong ba/ /bskyed pa'i rim pa'i phyogs la ni/ /'dis ni phung po sbyang bar bya/ /zhes gsungs pa'i phyir ro//de ltar brjod pa'i rim pas rnal 'byor pa mkhas pa rnams kyis kyang / bden pa gnyis dang rim pa gnyis kyi tshul la brten te/ byis pa rnams kyi sems gang gis grol bar 'gyur ba de ltar chos bstan par bya ba ni/ de bzhin gshegs pa'i nges pa'o/ /de bas de'i phyir rtsod pa rab tu rgyas pa'i dus 'dir yang /'dod chags kyis 'dul bar 'os pa rnams la/ 'dod chags kyi chos bstan par mdzad pa yin no/ /gang dang gang gis 'jig rten 'ching 'gyur ba/ /de dang des ni 'ching ba las grol te/ /de nyid mi shes 'jig rten mi grol zhing / /de nyid rnam spangs dngos grub rnyed mi 'gyur//zhes bya ba ni thugs rje chen po mnga' ba'i dpa' bo rnams kyi thabs de nyid mchog tu gzigs te bstan pa yin pa de'i phyir/ tshig dang yi ge 'dis re zhig byis pa rnams 'dren par mdzad de/ gzhan dag gis brnyes par mi bya'o/ /rgyud 'di nyid las kyang ji skad du/dper na rna bar chu zhugs la/ /chu gzhan gyis kyang gdon par bya/ /gzhan yang me yis tshig pa la/ /slar zhing me yis gdung bar bya/ /de bzhin 'dod chags mes tshig la/ /'dod chags nyid kyis gdung bar bya/ /zhes gsungs so/ /de'i phyir/ dri med sga med gzugs nyid med//ro dang sems kyi rnam par dag pa med/ /reg dang chos med thams cad rnam par dag /rang bzhin dag pa'i 'gro la 'gro bar shes/ /zhes bya ba gsungs te/ dang por nyon mongs pa rnams kyi rang bzhin thog mar bstan par byas nas/ phyis de nyid thabs kyis rim bzhin spang bar bya zhes bya ba ni/de bzhin gshegs pa'i gdams ngag yin la/ rtsa ba'i rgyud las kyang ji skad du/ gang gang sgra dang cha byad kyis/ /'gro ba rnams ni 'dul 'gyur ba/ /de de'i sgra dang cha byad kyis/ /rdo rje 'dzin rnams chos ston mdzad/ /ces gsungs pa dang /gzhan yang ji skad du/ tshangs dbang khyab 'jug 'dod lha dang / /drag po sred med bu la sogs/ /de rnams gzugs kyang re zhig bsngags/ /'di rnams 'jig rten dbugs 'byin yin/ /zhes gsungs so/ /gzhan yang / kye kye rigs kyi bu dag gnyis gnyis sprod pa la sogs pa'i nyon mongs pa rnams ni/ngo bo nyid kyis nyon mongs pa'i rang bzhin ma yin gyi/ skyes bu rnams kyi bsam pa'i bye brag las nyon mongs par bstan pa yin no zhes gsungs pas don de dag thams cad de ltar rtogs par bya'o/ /kye'i rdo rje'i nges pa'i don gyi rgya cher bshad pa las/rnam par dag pa'i le'u'i rgya cher bshad pa ste dgu pa'o// //ngo bo nyid chos longs spyod rdzogs/ /sprul pa'i sku ni mtshan nyid can/ /grub pa rnam bzhi ster mdzad pa/ /rdo rje mgon po bdag phyag 'tshal/ /sgrub po rnams la phan pa'i phyir/ / gang gis slob ma dbang bskur ba'i/ /rgyas bshad dri ma med pa dag /rdo rje snying pos legs par bstan/ /de nas ji ltar dkyil 'khor gyi/ /rim pa yang dag rab tu bshad/ /ces bya ba smos te/ de la rdo rje slob dpon gang gis slob ma gang zhig dkyil 'khor du gzhug par bya ba'i phyir/gdod ma nyid du rang dang slob ma gnyis kyi rnam par rtog pa las byung ba'i bgegs bsal bar bya'o/ /de yang 'di ltar gza' bzang ba dang / tshes bzang po dang / skar ma bzang po dang sbyor ba dang byed pa shis pa dag la cho ga brtsam par bya ba ni/ de bzhin gshegs pa'i nges pa ste/ 'jig rten dang 'jig rten las 'das pa'i dbang gi bye brag blo la legs par bsdoms la brtsams kyi gzhan du ma yin no zhes bya ba'i don to/ /gang gis slob ma dbang bskur ba'i/ /cho ga rab tu bshad par bya/ /zhes bya ba ni mdor bstan pa'i tshig go/ /de yang 'di ltar sngon du rdo rje slob dpon 'jug pa'i phyir/dang por lha yi dngos byas te/ /hUM las rdo rje 'bad byas pas/ /rnal 'byor can gyis sa sbyangs te/ /phyi nas dkyil 'khor bri bar bya/ /zhes bya ba la dang por rdo rje slob dpon nyid khams gsum las rnam par rgyal ba'i khro bo'i bdag nyid kye'i rdo rje zhal gcig phyag gnyis par hUM gi sa bon las bskyed de/bsrung ba'i 'khor lo la sogs pa bya zhing sa legs par sbyangs la/ ting nge 'dzin gyi dkyil 'khor du rang nyid 'jug par bya zhes bya ba nges pa'i don to/ /gnas kyi khyad par bstan par bya ba'i phyir/ skyed mos tshal dang dben gnas dang / /byang chub sems dpa'i khyim dag dang //khang stong dang ni lding khang du/ /dkyil 'khor mchog ni bri bar bya/ /zhes pas bstan te/ 'di ltar gnas 'di dag ni bkra shis pa dang / yid dga' ba dang / dngos grub myur du ster bar byed pa yin pas 'bad pas btsal bar bya ba yin no/ /gnas der sa'i dkyil 'khor gyi stegs bu ji tsam 'dod par brtsigs la//rgyud nas 'byung ba'i thig gis 'khrul ba med par thig btab la/ rdul tshon gtang bar bya'o/ /rdul tshon mchog gis bri ba'am/ /yang na bar par gyur ba ste/ /rin chen lnga yi phye ma dang / /yang na 'bras phye la sogs so/ /zhes bya ba la rdul tshon ni rnam pa gnyis te/byi ru la sogs pa rin po che lnga'i phye ma mchog tu bstan la/ de ma 'byor pas 'bras phye la sogs pa tshon gyis bsgyur bas kyang bri bar bya zhes bya ba'i don to/ /de la dkyil 'khor khru gsum dang sor mo gsum gyis lhag par bya zhes bya ba ni/ lus ngag yid gsum gyi dbye bas sam/yang na rdul dang mun pa snying stobs kyi tshul gyis tshad bstan pa'o/ /der ni rigs lnga las byung ba'i/ /rig ma bzang mo rnam par gzhug/ /ces bya ba ni de ltar dkyil 'khor cho ga bzhin du bris la/ sngags 'chang rang nyid chu zla lta bu'i bsam gtan dang ldan pas rdul tshon gyi dkyil 'khor byin gyis brlab cing rang nyid legs par zhugs la/de'i rjes su slob ma dag la bsnyen gnas kyi sdom pa dang / phyi'i dam tshig gi sdom pa byang chub mchog tu sems bskyed pa la sogs pa sngon du 'dzin du bcug la de'i rjes su 'jig rten pa'i dbang rnams bye brag bzhin sbyin par bya ste/de yang 'di ltar byis pa rnams drang bar bya ba'i phyir/ rdo rje slob dpon gyi dbang zhes bya ba yongs su rdzogs par bya'o/ /de nas byis pa rnams la 'dod chags kyi lam bstan par bya ba'i phyir/ 'og nas ston bzhin pa'i bu mo rigs lnga'i rtags can gsang ba'i theg pa la mchog tu gzhol ba sngon du legs par sbyangs la/dkyil 'khor du gzhug go/ /de yang ji ltar nyi ma'i lo dang ldan pa dang / rgyal po'i lo dang ldan pa dang / lo nyi shu dang ldan pa rnams sku gsung thugs kyi 'khor lo'i bye brag gis phye la/ dkyil 'khor du gzhug gis/ nyi ma'i lo dang ldan pa yod bzhin par rgyal po'i lo la sogs pa mi gzhug go//'on te nyi ma'i lo dang ldan pa med par gyur na/ rgyal po la sogs pa'i lo dang ldan par gzhug par bya ste/ 'di ltar/ yang na ji ltar gang rnyed de/ /de ltar bcu drug lon pa nyid/ /ces bya ba gsungs te/ 'di ltar bde ba dam pa ster ba'i nyi ma'i lo'i phyag rgya ni mchog tu bstan la/rgyal po'i lo ni 'bring po yin no/ /nyi shu'i lo ni tha ma yin par gsungs pa'i phyir ro/ /ji srid khu ba ldan gyur pa/ /de srid phyag rgya bsten par bya/ /zhes bya ba ni 'di ltar don gnyis su go bar bya ste/ bud med rnams kyi bde ba'i rgyur 'gyur ba ni nyi ma'i lo nas 'byung ba yin gyis/de las snga bar ni ma yin no/ /de bzhin du nyi shu 'das nas de nyid 'jig pa'i phyir dang / gzhan yang rig sngags 'chang dang / rdo rje slob ma dag gis 'gyur ba'i bde ba ji srid nyams su myong bar 'gyur ba de srid du bsten par bya ba yin pas/ de skad ces bya'o/ /phyag rgya'i gdong yang bcing ba dang / /thabs kyi gdong yang de bzhin te/ /zhes bya bas ni bu mo dang skyes bu dang dbang bskur ba dag phan tshun du gdong g.yogs par bya ba ni go cha'o/ /bstan pa de las gang 'byung ba/ /slob ma'i kha ru ltung bar bya/ /zhes bya ba ni rig sngags 'chang gi slob dpon gyis//yu ba ti la ji lta ba bzhin du brten par byas la/ gu h+ya ba ra ta ka na gnas pa'i sems kyis mtshal dang mnyam par bsres la slob ma'i kha'i lam nas longs spyod rdzogs par sbyar la gsung gi rang bzhin du bstan par bya ba nyid gsang ba zhes bsgrags so/ /ro mnyam slob ma'i spyod yul nyid//de nyid la yang bya bar bya/ /rang rig ye shes nyid du 'gyur/ zhes bya ba ni de ltar gsang ba zhes bya ba rtogs par byas la/ 'jig rten pa'i 'dod chags kyi de kho na nyid ji lta ba bzhin du bstan par byas la gang gi gnas su mtshon par 'gyur ba'i gnas su brtag pa'i rgyal po dang /thugs kyi bdag po dag gi mtshams phra ma gzhug par bya ba ste/ rdo rje 'chang gi bka' lung ngo / /des te phyis ni phra ma btang la/ tshogs kyi mchod pa chen po byas la/ 'dod chags kyi bstan bcos 'og nas 'byung ba ma lus pa byas la yang bla ma chen po rig sngags 'chang las de las gong du gyur pa'i 'o ma bsgrub pa'i rim pa/srog dang rtsol bas btsal bar bya'o/ /de nas gang du mtshon byed gsal ba kho na de la/ rang rig ye shes nyid du 'gyur/ /zhes gsungs te/ gang de ni shes rab ye shes kyi de kho na nyid de de lta bur ston cing gsal bar bya ba ni/ rig sngags 'chang gi las yin la/brtan par gnas shing bdud kyi yul spong ba ni slob ma'i las so/ /de ltar rgan po ltar yul ring bar gnas pa'i ye shes rang rig pa spangs te/ ye shes chen po la 'jug par bya'o/ /'di ni ji skad du/ rtsa ba'i rgyud las/ rang rig ye shes rnam spangs la//mtshon du med pa mtshon bya ste/ /sgra dang thig le rnam par spang / /yi ge las 'das mtshan nyid do/ /zhes gsungs la/ de bzhin du gzhan yang mtshan yang dag par brjod pa las kyang / ji skad du/ bdag rig gzhan rig thams cad pa/ /kun la phan pa'i gang zag mchog /dper bya kun las 'das pa ste/ /shes dang shes bya'i bdag po mchog /ces gsungs pa de bas na/ 'jig rten lta bu'i ye shes rang rig pa spangs la/ mi 'gyur ba'i bde ba chen po bsgom par nges so/ /de'i phyir/ rang gzhan yang dag rig pa spangs/ / mkha' mnyam rdul bral stong pa nyid/ /dngos dang dngos med bdag nyid mchog/ /thabs dang shes rab shin tu 'dres/ /chags dang chags bral rnam par 'dres/ /zhes bya bas bstan te/ 'di ltar 'jig rten pa'i 'dod chags gang yin pa ni/ 'jig pa dang / 'gyur ba dang / rang nyid 'ba' zhig rig pa dang / phyogs gcig pa dang / dngos po dang dngos po med pa'i bdag nyid tha dad pa dang / thabs dang shes rab ces yang dag pa ma yin par brdar bstan cing cher ma 'dres pa dang / chags pa dang chags pa bral ba'i phyogs ches tha dad pa'i phyir gang de spangs la mi 'gyur ba'i bde ba bzhi pa zhes bya ba bsgom par nges so//de bas na de'i phyir lhan cig skyes pa'i ye shes chen po 'di nyid lus can rnams la 'khor ba las 'don cing rig pa 'dzin pa'i gnas su 'khrid de/ dbugs cher 'byin pa yin te/ 'di ltar/ de nyid srog chags rnams kyi srog /de nyid mchog tu mi 'gyur ba/ /de nyid 'gro ba'i bdag nyid de/ /de nyid kun la khyab pa po/ /zhes gsungs te/ 'di ltar 'gyur ba med pa'i bde ba chen po gang yin pa de ni/ sangs rgyas thams cad kyi sku dang / gsung dang / thugs kyi mchog tu gsang ba ste/ 'jig rten phal pa'i bdag tu lta ba thams cad sun 'don cing ma rungs par byed pa yin no//de bzhin du 'khor ba pa rnams la lus la gnas pa'i khu bas rtogs par byed de/ khu ba med na rtogs par mi 'gyur te/ khu ba la brten te rtogs par bya ba ni 'dod chags kyi chos kyi tshul lo/ /de nas/ thams cad lus la rnam par gnas//zhes gsungs so/ /de bzhin du dngos po dang dngos po med pa rtogs par byed pa dag /byang chub sems kyi khu ba de nyid las 'byung ste/ 'di ltar khu ba thur du bltas pa las/ bdag dang bdag gir 'dzin pa'i gzhi 'byung la/ khu ba de nyid gyen du bltas shing rgyas pa las ni/chos thams cad kyi mdo dang rgyas pa rtogs par 'gyur ro/ /de lta bas na/ dngos dang dngos med de las 'byung / /gzhan dang gang rnams de rnams dang / /rnam par shes pa kun gyi tshul/ /skyes bu sngon rabs dbang phyug dang / /bdag dang gso ba sems can dang / /dus dang gang zag nyid dang ni//dngos po kun gyi rang bzhin 'di/ /sgyu ma'i gzugs kyis yang dag gnas/ /zhes gsungs te/ de ltar byang chub sems kyi khu ba thur du zags pa las grub pa'i mtha' dang / lta ba thams cad dang / snyan dngags dang lo rgyus kyi chos dang / phywa dang dbang phyug dang byed pa po la sogs pa du ma 'byung bar grags so//de lta bas na lus kyi rten 'bad pas bsrung bar bya zhing 'di ltar gnas pa rnams sgyu ma lta bur shes par bya zhes dgongs so/ /gang sgyu ma lta bu de nyid rtogs par bya ba'i phyir/ dang po dga' ba tsam nyid de/ /gnyis pa'i grangs las mchog dga' nyid//gsum pa la ni dga' bral nyid/ /bzhi pa lhan cig skyes par brjod/ /ces bya ba las 'di ltar lus la gnas pa'i khu ba nyid nang du dga' ba bzhi'i tshul du bsten pas sgyu ma'i gzugs 'thob par 'gyur ba ni/ 'dod chags kyi chos kyi tshul nyid du bstan te/ de bzhin gshegs pa'i bka' lung ngo / /de las gzhan yang rdo rje phreng ba zhes bya ba'i rgyud chen po las/ ji skad du/ rang lus 'gyur ba med pa de/ /mchog gcig gis ni shes bya ste/ /des ni dpe yis nyer mtshon nas/ /bla ma'i drin gyis shes par bya/ /zhes gsungs la/ de bzhin du sgyu 'phrul dra ba las kyang / bcu drug phyed phyed thig le can/ /yan lag med pa'i rtsis las 'das/ /bsam gtan bzhi pa'i rtse mo can/ /bsam gtan yan lag kun shes shing / /zhes bya ba la sogs pa rgya cher gsungs so/ /rdo rje snying po la sogs kun/ /mkhas pas de skad nges thos pas//mchog tu ngo mtshar gyur nas ni/ /brgyal zhing sa la 'gyel bar 'gyur/ /zhes bya ba ni/ bcom ldan 'das kye rdo rjes rdo rje snying po la sogs pa rnams la 'dod chags kyi tshul gyis chos 'di bstan pa'i tshe/ shin tu ya mtshan du gyur nas sa la 'gyel te/'di ltar bcom ldan 'das kyi gsung kha cig tu 'ching bar bstan pa de nyid kyis grol bar bstan cing rang rang gi lus nyid las gzhan du sangs rgyas btsal bar ma gsungs te/ lus 'di nyid la sangs rgyas yod do zhes gsungs na/ kho bo cag gis da dung rtogs par ma gyur grang zhes pa ste/'di ltar bcom ldan 'das kyis cho 'phrul bstan pa'o/ /'o na 'dod chags de nyid la rim pa ji lta bu'i tshul gyis bslab par bgyi zhing / ji ltar 'bad par bgyi zhes bcom ldan 'das kye'i rdo rje la zhus pa dang / bcom ldan 'das kyis lan du gsungs pa/dang por dga' ba 'gro ba'i gzugs/ /de bzhin mchog dga' 'gro ba nyid/ /dga' bral dga' ba'ang 'gro ba nyid/ /gsum pa lhan cig skyes pa med/ /bcom ldan bka' stsal kye'i rdo rje/ /sangs rgyas kun gyi sku gcig pa/ /rdo rje snying pos rtogs bya'i phyir/ /the tshom med par sel ba 'di//'dod chags med cing chags bral med/ /dbu mar dmigs par mi 'gyur ro/ /gsum po spangs pa nyid kyi phyir/ /lhan cig skyes pa byang chub brjod/ /ces gsungs te 'dod chags kyi tshul gyi chos de la/ byis pa rnams la skad cig rnam pa bzhis phye bas bde ba'i ro rdo rje slob dpon rig sngags 'chang las shes par 'gyur la/de yang 'di ltar rig sngags 'chang gi bka' bzhin du dga' ba gsum po ni/ srid pa gsum po bskyed pa na yongs su dor te/ bzhi pa bsgom par nges so/ /'di ltar dga' ba gsum gyi mtshan nyid can gyi bum pa dang gsang ba dang shes rab ye shes rnams ni 'jig rten lta bu'i bde ba ste/kun rdzob pa nyid yin pa'i phyir/ yongs su dor la yid nang du chud pa'i bde ba/ 'dod chags dang chags pa dang bral ba dang / dbu ma spangs pa'i bde ba nyid kyi spyod pa dang grol ba ster ba yin no/ /yang na de nyid thams cad bdag /yang na kun gyi rnam par spangs/ /zhes bya ba ni 'jig rten pa'i dga' ba bzhi char spangs la/ 'jig rten las 'das pa'i dga' ba bzhi po ma lus par bsgom zhes bya ba'i don to/ /'jig rten pa'i bzhi po las legs par mtshon par byed pa ni/ dga' ba bzhi po'i 'char ba thams cad kyis yongs su gang ba nyid dang du blang ngo zhes bstan pa'i phyir/de yang dga' bral dang por mtshon/ /dga' ba gsum po rnam par spangs/ /zhes gsungs so/ /'di ltar 'jig rten lta bu'i bde ba dag spangs nas/ gang gi dus su lhan cig skyes pa chen po la gnas pa de ni/las dang po pa'i sa las 'das te/ dang po sprin dang 'dra ba yin/ /grub pa sgyu ma lta bur 'gyur/ /zhes bya ba smos te/ dang por bde ba'i ting nge 'dzin gsal ba dang mi gsal ba'i bye brag 'dren mar 'gyur ro/ /de'i phyi nas ni bde ba'i ting nge 'dzin gsal ba'i phyir phyogs shas che bar 'gyur la/mi gsal ba zil gyis non par 'gyur ro/ /de bzhin du/ nyal dang log pa'i khyad par las/ /rtag tu rmi lam 'dra bar 'gyur/ /zhes bya ba ni/ de dag gi rjes la dus rtag tu gnyid log pa dang sad pa'i gnas skabs kun la chos thams cad sgyu ma ltar gnas shing rnam par rtog pa'i mtshan ma'i go skabs rnam pa kun du mi byed pa 'di ni brtan par gyur pa'i mtshan ma'o//de bzhin du rtsa ba'i rgyud chen po las kyang / ji skad du/ dang po'i sa las 'das pa yi/ /rnal 'byor ting 'dzin gang la gnas/ /ting 'dzin de yi mtshan ma ni/ /rnam pa gsum du rig par bya//zhes gsungs so/ /de ltar mtshan ma rnam pa gsum po de dag ni byang chub la nye bar gzhol bar byed pa'i rtags yin no/ /de bas na/ dngos grub mtshan nyid dbyer med pa'i/ /phyag rgya rnal 'byor pa yis 'grub/ /zhes gsungs so/ /da ni sngon du brjod pa'i phyir dkyil 'khor gyi mtshan nyid dang /dbyibs la sogs pa dang / thig skud kyi mtshan nyid dang / rdul tshon gyi mtshan nyid dang / bum pa dang rdzas la sogs pa bstan pa'i phyir/ ston pas dkyil 'khor 'di skad gsungs/ /gru bzhi yang dag 'bar ba nyid/ /sgo bzhi gzi brjid chen po ste/ /do shal do shal phyed pas brgyan//phreng ba sna tshogs rnga yab ldan/ /ka ba brgyad kyis rnam par mdzes/ /rdo rje srad bus mnyam par ldan/ /zhes bya ba ni/ sgra ji bzhin pa de rtogs par sla'o/ /gzhan yang / me tog sna tshogs nye bar brgyan/ /bdug pa mar me de bzhin dri/ /bum pa brgyad la sogs par ldan//de yang yal ga la sogs bcas/ /mgrin pa gos kyis dgab par bya/ /rin chen lnga na yongs su gzhug/ /ces bya ba la sogs pa rnams ni dkyil 'khor gyi yo byad bstan pa ste rtogs sla'o/ /rnam par rgyal ba shar du sbyin/ /zhes bya ba ni las thams cad pa'i bum par byin gyis brlabs la/khro bo bgegs kyi dgra'i sngags kyis byin gyis brlabs pa ni chu nang du blugs la/ dkyil 'khor gyi khang pa'i shar du dgod ces bya ba'i don to/ /rang 'dod lha yi gzugs kyis ni/ /zhes bya ba ni/ zhal gcig phyag gnyis pa'i rnal 'byor gyis so//gsar pa legs par bsgrims pa dang / /shin tu tshad mar mdzes pa yi/ /srad bus shes rab can gyis gdab/ ces bya ba ni ras bal dkar po dri ma med pa la/ blo dang ldan pa'i sngags pas lnga sgril du bya ste/ de yang de bzhin gshegs pa lnga'i kha dog dang ldan pa'i tshon gyis so sor bsgyur la/cho ga bzhin rgyal ba rigs lngar byin gyis brlabs la/ phyogs cha ma nor bar thig gdab ces pa'i don to/ /de bzhin du dkyil 'khor gyi lha bsnyen par bya ba ni/ 'khor lo'i bdag po'i bzlas pa 'bum/ /dkyil 'khor can gyi de bzhin khri/ /zhes bya ba ni rig sngags 'chang gi slob dpon gyis dkyil 'khor bsten par bya ba'i don du/gtso bo'i rtsa ba'i sngags sngon du 'bum bzlas shing de bzhin dkyil 'khor pa rnams kyi ni khri khri yongs su bzlas te mnyes par bya'o/ /phyogs skyong la dus gsum du gtor ma yang sbyin no/ /de'i rjes lag dong sa'i mtshan nyid legs par brtags te/'di ltar dkyil 'khor chen po'i cho ga'i tshul du sa sbyang bar bya ste/ 'di ltar/ gong du gsungs pa'i sngags nyid kyis/ /mkhas pas sa ni rnam par sbyang / /gong gi a sogs sngags nyid kyis/ /de la gtor ma rnam par sbyin/ /zhes bya ba ni/ji ltar gtso bo'i dkyil 'khor sngon du bstan pa'i skabs su gsungs pa ltar skabs 'dir yang de ltar khong du chud par bya'o/ /de bzhin du srung ba'i 'khor lo dang / rang gi lha'i nga rgyal gang dang gang yin pa de dang de'i rnam par sbyang ba dang / de bzhin du dbang gi bye brag dang mchod pa dang gsol ba gdab pa thams cad sngon bzhin du bya'o//khyad par du/ bdag med ma yi dkyil 'khor ni/ /'phar ma gnyis bzang rnam bris nas/ /zhes bya ba tsam gyi bye brag tu byas pa yin gyis khyad par gzhan ni med do/ /de bzhin du lha'i mtshan ma gzhag pa ni/ sngon gyi gtso bo'i dkyil 'khor la g.yas kyi phyag mtshan thams cad dgod pa yin la/'dir yang gri gug 'ba' zhig tu dgod par bya'o/ /de bas na de'i phyir/ myur du dkar mo la sogs bri/ /shar du gri gug rnam bris te/ /lho dang nub tu de bzhin no/ /byang dang me yi mtshams dang ni//bden bral rlung du de bzhin no/ /zhes bya ba ni lha mo'i mtshan ma dgod pa'i tshul te/ 'phar ma rnam pa gnyis la rim pa bzhin du yul dang yul can gyi lha mo rnams kyi phyag mtshan dgod ces bya ba'i don to/ /de bzhin du/ dbang ldan du ni ci gsungs pa/ /de lta de ltar 'og dang steng / / zhes bya bas ni lha mo'i dkyil 'khor gyi mtshan ma la sogs pa legs par bstan pa yin no/ /da ni slob dpon rig sngags 'chang ba bdag nyid dkyil 'khor du 'jug pa ston te/ 'di ltar/ rdo rje sems dpa' bsnyems byas nas/ /rkang pa g.yas pa brkyang bya ste/ /phyag gnyis kye'i rdo rjer sbyor bas//snying rje'i gar thabs dang ldan pa/ /slob dpon dkyil 'khor 'jug par bya/ ces bya bas ston te 'di ltar rig sngags 'chang thabs dang shes rab gnyis su med pa'i sbyor bas sems can thams cad la mnyam pa'i snying rje bskyed de/ snying rje'i gar stabs dang ldan pas dkyil 'khor du 'jug ces pa'i don to//gzhan yang / khrus dang gtsang sbra dri zhim lus/ /sna tshogs rgyan gyis rnam par brgyan/ /zhes bya ba yang tshul bzhin du byas la/ rnam par rtog pa'i bgegs gzhil bar bya ba'i phyir/ hUM hUM bsnyems pa byas nas ni/ /hA+e hA+e rnam par 'jigs par byed//ces bya ba zhal nas brjod cing dkyil 'khor du 'jug pa la sogs pa'i las bya ba ni/ de bzhin gshegs pa'i nges pa'o/ /de nas slob ma 'jug pa'i man ngag bshad par bya ste/ /phyi nas de nyid yang dag bshad/ /rnam dag ye shes gzugs can dang / /'khor ba rnam par rtog pa'i bdag /khyad par cung zad yod ma yin/ /zhes bya bas bstan te/ rdo rje slob dpon rig sngags 'chang gis/ gdod ma nyid nas chos thams cad rmi lam lta bu dang / chu zla lta bu la nye bar gnas te/ slob ma dkyil 'khor du gzhug pa dang / las rgyas pa thams cad bya ba'i skad cig de la ni ma yin no//de ci'i phyir zhe na/ chos thams cad gzod ma nyid nas ngo bo nyid kyis dben pa'i phyir ro/ /de ste gang la 'du shes 'di dag gis dben pa'i skye bo las 'di dag la 'jug cing slob ma sdud pa dag ni/ glang po che smyon pa dang mtshungs te/ rang gi sde brlag par byas nas pha rol gyi sde phung bar byed pa yin no//de ltar brjod pa'i tshig gi don gyi khyad par kyis rnal 'byor gyi rgyud dang bya ba'i rgyud la 'jug pa'i sngags 'chang rnams kyi khyad par gyi chos kyang 'dir bstan la/ 'dir rnal 'byor chen po la khyad par du lhan cig skyes pa'i ting nge 'dzin gyis khyad par du 'phags par bstan te/'di ltar gang du lhan cig skyes pa zhes pa de ltar sgra gnyis su go bar byas te/ gang zhe na dang por byis pa rnams kyis rtogs par bya ba'i phyir dbang po gnyis kyi bde ba'i skad cig la bstan pa dang / gang dang dbang po gnyis kyi bde ba'i skad cig spangs te lhan cig skyes pa chen por gang gnas par 'di ni rig sngags 'chang gi slob dpon chen po yin no//de la dgongs nas/ mchog dgar sgom pa med cing sgom pa po yang med/ /lus kyang med cing gzung ba med dang 'dzin pa po yang med/ /sha dang khrag kyang med cing bshang ba dang ni gci ba med//skyug bro rmongs med gtsang sbra mchod phyir thogs med dang / /chags med sdang ba med dang rmongs med phrag dog med/ /ser sna med cing nga rgyal med la mthong bya med/ /bsgom dang sgom pa po med bshes dang dgra med cing / /rlom sems med pa'i lhan cig skyes pa sna tshogs nyid//ces bya ba gsungs so/ /rnal 'byor chen po'i don gyi khyad par bstan pa'i tshig 'dis ni 'di skad ston to/ /mchog la sogs pa'i mtshan nyid can gyi ting nge 'dzin rdo rje nor bur son pa'i khu ba'i bde ba 'ba' zhig lhan cig skyes pa ma yin te/ gang yang de ni byis pa'i skye bo rnams kyis rtogs par bya ba'i phyir gsungs pa yin la/rig sngags 'chang gi gnas ni gang gi tshe rnal 'byor pa la lus la sogs pa'i 'du shes gzung bar bya ba dang 'dzin par byed pa las log pa dang / de bzhin du gang du rdzas kyi rdo rje la sogs pas phug cing dral na yang sha dang khrag gi gnod pas mi brdzi ba dang /gang la bshad pa dang gci ba 'byung ba med pa dang / gang la skyugs pa dang / zhag dang / chu ser dang / dar snabs dang / bad kan med de mi 'byung ba dang / gang la'ang mi thogs par 'gro zhing brjod pa dang / chags pa la sogs pa'i rigs can gyi rgyal ba drug tu rtog pa gang la yang mi 'jug pa de nyid rig sngags 'chang gi khyad par yin par nges pa'i don du bstan to//gang de nyid rlom sems thams cad dang bral ba'i lhan cig skyes par yang bstan to/ /gzhan yang sngags 'chang gis slob ma mchog rnams kyi rna ba'i bug par yang 'di nyid blugs so/ /de ci'i phyir zhe na/ngo bo nyid kyis gnas pa'i rang bzhin yin pa'i phyir ro/ /gang ngo bo nyid kyis gnas pa'i chos ni de bzhin gshegs pa rnams kyis kyang / bcos shing bsgyur bar yang mi spyod pa de'i phyir ro/ /rdo rje snying pos 'di skad gsol/ /gzod nas rang bzhin med pa yi/ /lus kyi rang bzhin dag pa la//ci slad 'byung ba'i bdag nyid lags/ /zhes bya ba ni/ 'di ltar phung po dang / khams la sogs pa gzod ma nas rang bzhin gyis dag pa lags na ci'i slad du 'byung ba dang / 'byung ba las gyur pa'i lha dang / las dang las kyi dbang po'i bya bar brtag ste/ 'di ni chos nyid kyi tshul dang mi mthun zhes pa'i don to//de bzhin du rnam par 'phrul pa byin gyis brlab pa'i rgyud ces bya ba las kyang ji skad du/ sangs rgyas mtshan ma mi mnga' zhing / /chos kyi sku la rnam par bzhugs/ /mtshan med 'dus ma byas pa yi/ /mtshungs pa mi mnga' chos gsungs na//dpa' bo chen po ci slad du/ /mtshan mar bcas pa'i cho ga 'di/ /gsang sngags spyod pa ston par mdzad/ /'di ni chos nyid tshul ma lags/ /de skad gsol nas bcom ldan 'das/ /rnam par snang mdzad chen po yis/ /de tshe lag na rdo rje la/ /chos kyi mtshan nyid 'di nyon gsungs//chos 'di rtog dang bral ba ste/ /kun rtog thams cad spangs pa yin/ /de la sems dang sems byung gi/ /rtog par rab tu spang bar 'gyur/ /nga yis chos sngon sangs rgyas pa/ /de ni mkhas las byung ba ste/ /log par rtog pa'i spyod yul ba/ /byis pa rnams kyis mi shes so//yul dus mtshan ma la sogs pa/ /mun gyis bsgribs pa rnams 'dod do/ /de dag gzung bar bya ba'i phyir/ /cho ga 'di yang brjod pa yin/ /yul med dus kyang med pa ste/ /bya ba med cing byed pa yang / /chos rnams kun la yod med de//chos rnams nyi tshe 'ba' zhig go/ /zhes gsungs te/ 'di ltar tshul ma lags zhes pa yan chad zhu ba'i lung yin la/ de skad gsol nas zhes pa la sogs pa ni lan gyi lung du rtogs par bya'o/ /de nas bcom ldan rdo rje can/ /mkha' 'gro bde ba ster bas gsungs/ / zhes bya ba ni rdo rje snying po la lan gsungs pa'o/ /rlom sems med pa'i rang bzhin dag /thams cad lus la rnam par gnas/ /zhes bya ba la 'di ltar kye rdo rje snying po gang byis pa rnams la ngas khu ba'i gzugs dang de'i lam dang rlung dang de'i lam dag spros te bstan pa de nyid kho na rig sngags 'chang gi slob dpon mkhas pa rnams la gzod ma nas rnam par dag pa kho nas gnas la/'on kyang byis pa so so'i skye bo rnams mtshan ma'i 'du shes kho nas bcings te gnas zhes pa'i don to/ /kye bcom ldan 'das ci'i slad du 'byung ba chen po'i phung po lags zhes bya ba ni gong du brjod pa nyid de/kye bcom ldan 'das chos thams cad gzod ma nas dag bzhin pa las gsang sngags spyod pa rnams las 'byung ba chen por bstan pa'i dgos pa ci lags zhes pa'i don to/ /bcom ldan 'das kyis bka' stsal pa/ bo la ka k+ko la sbyor las/ /reg pa'i sra ba chos kyi ni//sa ni de las 'byung bar 'gyur/ /byang chub sems ni khu ba'i phyir/ /chu yi khams ni 'byung bar 'gyur/ /bskyod pa las ni drod skye ste/ /g.yo phyir rlung du rab tu grags/ /bde ba'i phyir na nam mkha'i khams/ /zhes bya ba la/ kye rdo rje snying po chos thams cad de ltar gzod ma nas dag pa yin gyis kyang 'on kyang /kun rdzob kyi dngos por rgyu dang 'bras bur mi slu ba'i chos su gnas te/ byis pa'i skye bo rnams gang du gzud par bstan pa de gnyis sprad pa na/ 'di lta ste/ lus dang lus su phrad pa la sogs pa na mkhrang bar gnas pa sa dang sa las chu skye ste/ 'di ltar byang chub kyi sems de nyid chu yin pa'i phyir ro/ /bskyod cing g.yos pa las dro ba 'byung ba'i phyir me'o/ /me dang khu ba g.yo ba'i phyir rlung ngo / /gang du rtog pas dben pa'i bde ba skye ba de'i phyir nam mkha'o zhes pa'i tha tshig go/ /lnga po rnams su rab tu gnas/ /zhes pa ni sprod pa la sogs pa'i dus su de ltar 'byung ba lnga'i rang bzhin du 'byung ba'i phyir 'byung ba chen po yin zhes pa'i don to//gang phyir 'byung ba che bde ba/ /de phyir bde ba de nyid min/ /zhes bya ba ni 'di ltar rtsol ba'i shugs kyis 'byung ba chen po lnga rim par 'byung la de'i dbang gis bde ba de'i phyir 'di ni 'jig rten pa'i kun rdzob ste yang dag pa'i lhan cig skyes pa ma yin zhes pa'i don to//'o na ci zhe na/ lhan cig skyes pas gang skyes pa/ /lhan cig skyes par de brjod bya/ /rang bzhin lhan cig skyes zhes brjod/ /ces bya ba smos te/ 'di ltar bya ba dang spyod pa kun las 'das pa dang /rang bzhin du gnas pa nam mkha'i mtshan nyid can kho na lhan cig skyes pa ste/ dka' thub dka' spyod kun las 'das shing rang bzhin du gnas pa nyid kyi phyir zhes pa'i don to/ /rtsa ba'i rgyud las kyang ji skad du/ ngo bo nyid du gang gnas pa/ /de nyid lhan cig skyes pa ste//yi ge las 'das mtshan nyid can/ /ngag gis brjod pa'i lam las 'das/ /zhes bya ba gsungs so/ /rnam pa thams cad sdom gcig pa/ /phyag rgya byed pa spang ba'i phyir/ /rnal 'byor snying rje thabs su 'gyur/ /stong nyid snying rje mi phyed pa/ /byang chub sems zhes brjod par bya//zhes bya ba la/ sangs rgyas thams cad kyi sdom pa'i bdag nyid gcig pa dang / las dang ye shes kyi rgyu'i byed pa dang bral ba dang / rnal 'byor ba la snying rje ste thabs kyi bdag nyid kyi byang chub sems kyi bde ba rgyun ma chad par rgyu ba dang / nor bu'i stong pa dang bral ba'i snying rje tha mi dad pa dang /dbyer med pa'i tshul zab mo gang la/ don dam byang chub kyi sems zhes bya ba lhan cig skyes pa'i ye shes chen por yang brjod par bya'o zhes bya ba'i don to/ /ci mngon zhe na/ sngags bzlas med cing dka' thub med la sreg blugs med/ /dkyil 'khor pa yang yod min dkyil 'khor yang ni med//de ni sngags bzlas dka' thub dang ni sbyin sreg de/ /de nyid dkyil 'khor pa yin de nyid dkyil 'khor nyid/ /mdo ru bsdus na sems ni 'dus pa'i tshul can no/ /zhes gsungs te/ gang la sangs rgyas thams cad kyi de kho na nyid la skad cig thams cad zad par bgrang ba'i phyir bzlas pa'o//'jig rten pa'i chos brgyad la sogs pa la mngon par zhen pa med par spang ba med pa'i tshul du spong ba'i phyir dka' thub po/ /tshig dang yi ge dang sems kyi rgyu ba la sogs pa bsreg pa'i phyir sbyin sreg go/ /rgyu ba dang ni mi rgyu ba mtha' dag gi snying po la gnas pa'i phyir dkyil 'khor pa dang dkyil 'khor ro//de ltar na sems nyid gcig tu bsdus te spyod pa 'di ni lhan cig skyes pa zhes bstan to/ /kye'i rdo rje'i nges pa'i don gyi rgya cher bshad pa las/ dbang gi le'u rgya cher bshad pa ste bcu pa'o// //khams gsum rnam rgyal rang bzhin pa//zhal gcig phyag gnyis la btud de/ /lta stangs le'u'i rgyas bshad ni/ /rdo rje snying pos bshad par bya/ /rtsod pa rab tu rgyas pa'i dus 'di na 'gro ba dam pa ma yin pa mang po rnams 'byung bar 'gyur bas/ de rnams la khro bo'i cha lugs dang sdang ba lta bus 'dul gyi gzhan du 'jug pa ma gzigs pas zhal gcig phyag gnyis pa lta bu dang /khams gsum rnam par rgyal ba lta bu dang / ha la ha la lta bu dang / rta mgrin lta bu dang / gshin rje'i gshed po lta bur sprul par mdzad pa yin no/ /de'i phyir lta stangs la sogs pa'i khyad par dang / dbugs kyi khyad par dang / 'dug stangs dang / phreng ba dang / me thab dang / bsreg rdzas dang / nam phyed la sogs pa'i dus kyi khyad par gsungs la/ de las kyang 'dir ni lta stangs dang / rlung gi khyad par bstan te/ dus dang me thab la sogs pa'i khyad par rnams ni sbyin sreg gi skabs dang / rgyud rgyas pa gzhan du shes par bya'o//mnyam par ma rungs dpral ba can/ /rtag tu ltung bar byed par brjod/ /ces bya ba la sogs pa 'dir rten cing 'brel te 'byung ba ni chos rnams kyi mtshan nyid de/ de bzhin gshegs pa rnams kyis kyang rgyud de dang der gsungs so/ /de bas na gdug pa gang zhig 'dul ba'i sbyor ba la brtson pa'i rnal 'byor pas mi bskyod pa lta bu'i sku mdog tu rang nyid lhag pa'i ltar bsgyur la/mig gnyis dus gcig tu dpral ba'i phyogs su blta bzhin du bsgom pa dang bzlas pa dang sbyin sreg byas pas ltung bar 'gyur te/ steng na zhe sdang gi rigs can gyi sku bzhugs pa'i phyir ro/ / dbang gi lta stangs g.yon na gnas/ /g.yon pa na ni gzugs brnyan gnyis/ /zhes bya ba la sbyor ba gang zhig gis 'jig rten gsum po dbang du byed pa la brtson pa'i rnal 'byor pas/ rang nyid pad+ma rA ga lta bur bsgyur la mig gnyis dus mnyam du g.yon gyi phyogs su blta bzhin du bsgom pa la sogs pa byas pas 'gro ba dbang du 'gyur te//g.yon gyi phyogs na pad+ma rA ga lta bu'i sku bzhugs pa'i phyir ro/ /g.yas pa'i cha la dgug pa nyid/ /steng nas kyang ni gzugs brnyan gnyis/ /zhes bya ba la de bzhin du 'gro ba gsum po 'gugs pa la brtson pa'i rnal 'byor pas//rang nyid nyi ma 'char ka lta bu'i skur bsgyur la mig gnyis dus mnyam du g.yas kyi steng phyogs su cung zad blta bzhin du bsgom pa la sogs pa byas pas 'gro ba gsum po 'gugs par 'gyur te/ g.yas phyogs na nyi ma 'char ka lta bu'i sku bzhugs pa'i phyir ro//dbus ma rengs pa'i lta stangs nyid/ /sna yi rtse mo'i dbus su gnyis/ /zhes bya ba la de bzhin du 'jig rten gsum po rengs pa la brtson pa'i rnal 'byor pas/ rang nyid gser bcom lta bu'i skur bsgyur la mig gnyis dus mnyam du sna'i rtse mo'i dbus su blta bzhin du bsgom pa la sogs pa byas pas 'jig rten gsum po rengs par 'gyur te/dbang chen gyi sku gser gyi mdog lta bu dbu ma na bzhugs pa'i phyir ro/ /da ni lta stangs bzhi'i dus su bsgrub par bya ba'i rlung bstan par bya ba'i phyir/ 'byung ba nyid kyis ltung bar byed/ /ces bya ba la lta stangs de nyid kyi dus su rang gi srog 'byung ba ste rlung phyir 'byung ba bzhin du sbyor ba la brtson par bya ste/rlung phyir phyung nas lus can thams cad tshe'i dus byed pa'i phyir ro/ /rngub pa yis ni dbang du byed/ /ces bya ba ni lta stangs de nyid kyi dus su rang gi srog rlung nang du rngub bzhin du sbyor ba la brtson par bya ste/ srog gi rlung nang du gnas pas thams cad dbang du 'dus pa'i phyir ro/ /dgang ba yis ni 'gugs par byed/ /ces bya ba la lta stangs de nyid kyi dus su rang gi srog rlung phyir ma btang bar bum pa can gyi sbyor bas nang du legs par bkang zhing bzung bas sbyor ba la brtson par bya ste/rlung nang du gnas shing phyir 'byung ba med pas lus can kun gyi bdud rtsi'i rgyun zla ba lta bu 'gugs pa'i phyir ro/ /zhi ba yis ni rengs par byed/ /ces bya ba la lta stangs de nyid kyi dus su rang gi srog gi rlung phyi nang du spro ba dang / rngub pa ma yin pas ji lta ba bzhin du gzhag la sbyor ba la brtson par byas te/'gro ba kun gyi srog rlung g.yo ba dang bral bas rengs par gyur pa'i phyir ro/ /da ni rnal 'byor gyi tshad bstan par bya ba'i phyir/ rlon pa'i shing la ltung byed nyid/ /ces bya ba la sogs pa smos te/ lta stangs bzhi po rnams bsgrub par bya ba'i phyir bsgom pa dang bzlas pa dang sbyin sreg la sogs pa cho ga bzhin bsgrubs nas/re zhig bems po'i rdzas kyi dngos po rnams la nyams sad pa dang / ting nge 'dzin brtan par gsungs so/ /de bas de'i phyir/ rlon pa'i shing la ltung byed cing / /zhes bya ba la sogs pa smos te/ de las khyad par du gsod pa'i sbyor ba goms pas thog mar re zhig /shing ljon pa yal ga dang lo mar ldan pa rlon par 'dug pa gang zhig la rnal 'byor pas rlung 'byung bzhin du gsad pa'i lta bas bltas pa'i tshe skam par 'gyur ba'i dus de tsam na ma rungs pa la yang sbyar bar bya'o zhes bya ba'i don to/ /dbang ni me tog rab tu grags//zhes bya ba ni de bzhin du lta stangs dang rlung gang dag dang ldan pas me tog gang la bltas pas skam pa de ni sbyar bar bya zhes bya ba'i don to/ /rdo rje'i shing la 'gugs pa nyid/ /ces bya ba ni de bzhin du lta stangs dang / rlung gang dang ldan pas/ badzra la ta zhes pa'i shing shin tu mkhrang zhing rtsub pa la rnal 'byor pas bltas pa na/'bras kyi snye ma legs par smin pa ltar dgu bar gyur pa na sbyar bar bya zhes pa'i don to/ /g.yo bcas rtsal rengs byed nyid/ /ces pa ni 'di ltang lta stangs dang rlung gang dag dang ldan pas sgang bu mthon po dang / ri bo la sogs pa'i rtse mo gang dag ni skyes pa'i rtswa phra mo shin tu mnyen pa/rta'i rnga ma'i nyag ma tsam la rlung gis bskyod na cher g.yo ba'i bdag nyid can la rnal 'byor pas bltas pa na rlung la sogs pas mi bsgul ba na sbyar bar bya'o zhes bya ba'i don to/ /'di'i des pa ni rtsa ba'i rgyud las ji skad du/ srog rlung byang chub kyi sems dang ldan pa rnal 'byor rang gi lus la gsod par nus pa dang /de bzhin du srog gnyis po rang la dbang du gyur pa dang / rang gi byang chub kyi sems ji lta ba bzhin du 'gugs nus pa dang / de bzhin du srog gnyis po rengs par byas te mi g.yo ba na phyi nang gi bdag nyid can la 'khor lo ltar bskor gyi gzhan du 'jig rten pa'i bzhad gad du 'gyur bas mi bya ba ni nges pa'o//da ni sbyor ba bsgrub pa'i dus bstan pa'i phyir gsungs pa/ zla drug goms pa'i sbyor ba yis/ /'grub 'gyur 'di la the tshom med/ /'di la 'khrul par mi bya ste/ /sangs rgyas rdzu 'phrul bsam mi khyab/ /ces bya ba gsungs te/zla ba drug tu rgyun ma chad par gnas pas mthar 'khod de yan lag drug gis bla ma'i bka' ltar byas na 'grub par 'gyur ba'o/ /zla ba drug ces bya ba'i sgra 'di ni rgyud thams cad kyi thun mong gi chos su gsungs so/ /de lta bas na gang gis dang por rang gi lus la rnam pa bzhi po bsgrubs nas sems can gdul bar bya ba dag ni de bzhin gshegs pa'i nges pa yin pas 'di la 'khrul pa dang dogs pa spang ngo zhes bya ba'i don to//lta stangs bzhi rnams bsgrubs nas ni/ /mkhas pas sems can gzud par bya/ /'di dag gsad par mi bya ste/ /dam tshig nges par nyams par 'gyur//zhes bya ba ni 'di ltar gsad pa la sogs pa'i las gang dag gsungs pa de dag sems can gdul ba'i phyir re zhig skrag par bya ba yin la des 'jug par yang 'gyur te/ gzhan du na nges par gtan du gsad na phyag rgya chen po'i dam tshig nyams te mnar med par 'gro bar 'gyur ro//de bas na nges pa'i don du las rnam pa bzhi po rang gi lus la bsgrub par gsungs so/ /de yang 'di ltar/ sems can slu ba spangs nas ni/ /bya ba ma yin thams cad bya/ /sems can gnod pa tsam gyis ni/ /phyag rgya'i dngos grub rnyed mi 'gyur/ /zhes gsungs te/ 'di ltar gsad pa la sogs pa'i las lta ci smos kyi gang la bslu bar bya ba'i thabs nye bar gzung ste gnas pa tsam gyis sems can thams cad bslus pa yang yin la/ des dam tshig nyams te rnam pa kun gyi mchog dang ldan pa'i phyag rgya'i grub pa las nyams par 'gyur ro zhes pa'i don to//da ni sgrub pa po rnams la bza' ba dang bsrung ba la sogs pa'i dam tshig bstan par bya ba'i phyir/ de ru dam tshig bza' bya ba/ /na dang ga ha dang po dang / /mtha' ma'i shwa dang dang po'i shwa/ /kye yi rdo rje'i dngos grub phyir/ /bdud rtsi lnga yang de bzhin bza'/ /zhes bya ba la kye'i rdo rje'i dam tshig la gnas pa rnams kyis phyi nang gi bye brag gis phye la bza' ba dang bsrung ba bya'o//de la skyes bu'i ming gi dang po'i yi ge na'o/ /gang gi ba lang gi ming gi dang po'i yi ge ga'o/ /ha ni glang po che'i ming gi dang po'i yi ge'o/ /shwa ni rta'i mtha' ma'i ming gi yi ge'o//de bzhin du shwa ni khyi'i ming gi dang po'i yi ge'o/ /rdzas 'di rnams mnyam par byas la mthe bo'i tshigs mdud tsam gyi ril bu byas te sbyang ba dang / spel ba dang / sbar ba dang bdud rtsir byas te zos pas phyi'i dngos grub tu 'gyur la/ de bzhin du nang du ni mgo la sogs pa'i ming can mig la sogs pa'i dbang po rnams yul las bzlog ste gnas par gsungs pas mchog gi grub par 'gyur ro//de bzhin du bdud rtsi lnga ste/ bi dang / mu dang / ma dang / ra dang shu rnams kyang phyi nang gis phyi la spyad par bya ba de bzhin gshegs pa'i bka' lung ngo / /kye rdor las gsungs mtshan nyid ldan//skye ba bdun pa de nas mtshon/ /khyad par dga' ba la smod pa/ /lan bdun pa ni 'grub par 'gyur/ /zhes bya ba'i drang ba dang nges pa rnams mngon du bstan pa yin la/ 'on kyang ji lta ba'i skye ba bdun pa'i mtshan nyid ma bstan pa gsal bar bstan par bya ba'i phyir/ skad snyan mig ni sdug pa dang / /lus la dri ldan gzi brjid che/ /de yi grib ma bdun du 'gyur/ /mthong nas rnal 'byor pa yis mtshon/ /zhes bya ba gsungs te/ gang zhig mi mo la la dag /skad kyi nga ro mdzes pa dang / /mig dkyus ring la dkar nag 'byes pa dang / lus la gla rtsi lta bu dang /ga bur lta bu'i dri dang ldan pa dang / de bzhin du gzi brjid che ba dang / grib ma bdun gyur gang la yod pa de ni skye ba bdun par mtshon cing rtogs par byas la/ de lta bu rnyed nas rnal 'byor pas rgya shug gi tshi gu tsam gyi ril bu byas te zos pas mkha' la spyod par 'gyur zhing bskal pa dpag tu med par 'tshol de lta bu'i rnam par smin pa'i lus kyis ni/gang dag mtshams med pa byas pa dang / gang gis chos kyi dbyings kyi bde ba khyad par du gyur pa las bshung ba yang lus de nyid kyis 'dag par gsungs so/ /de bas na/ de ni zos pa tsam gyis kyang / / skad cig la ni mkha' spyod 'gyur/ /zhes gsungs pa yin no/ /da ni rigs su mdzad pa'i lha mo'i sgrub pa brjod par bya ba'i phyir/ ku ru kul+le'i sgrub thabs bshad par bya ste zhes bya ba la sogs pa la 'di yang rtsa ba'i rgyud las/ ji skad du/ srid pa gsum po chags pas rmongs/ / de dag gzud par bya ba'i phyir/ /bcom ldan kye yi rdo rje yis/ /mo gzugs 'jig rten dbang du mdzad/ /ces gsungs la/ bcom ldan 'das nyid sku mdog chags pa dmar po'i tshul du bstan nas 'gro ba bcug pa yin no/ /gang du brtag pa bcu gnyis las/ /rgyas par gsungs pa mdo ru bsdu//zhes bya ba la srung ba'i 'khor lo dang / gzhal yas khang dang / bdun po 'phyang ba dang / ye shes lngas bskyed pa la sogs pa rnams/ sngon du kye'i rdo rje nyid sgrub pa'i dus su ji skad bstan pa bzhin bsgrubs pa la gnas pa yin la/ 'dir ni lha mo'i sa bon dang /mdog dang / phyag mtshan dang / gdan gyi gnas tsam zhig bstan par shes par bya'o/ /lha mo hrIHyig las byung ba/ /kha dog dmar zhing phyag bzhi ma/ /phyag na bsnams pa mda' dang gzhu/ /de bzhin ut+pal lcags kyu 'dzin/ /'di ni bsgoms pa tsam gyis ni/ /'jig rten gsum po dbang du byed//ces bya ba la khyad par du kye'i rdo rje bskyed pa'i sa bon ni hUM yin la/ de bzhin du bdag med ma la sogs pa bskyed pa oM gyi yi ge yin te/ 'dir ni hrIHlas bskyed cing zhal nas hrIH'i sgra sgrogs pa'i bdag nyid de/ dang po hrIHyig yongs su gyur pa las/ ut+pal dang / der de bzhin gshegs pa rnams bstim pa las/ lha mo dmar mo phyed krung can phyag bzhi'i dang po gnyis na ut+pala'i gzhu dang mda' bsnams shing / ut+pal dang lcags kyu 'dzin pa/ sku la mi mgo brgya phyed kyi do shal dang / dbu rgyan la dum bu lnga dang thor tshugs zla ba phyed pa dang /dbu skra dmar po gyen du 'greng ba dang ldan pa ste/ 'di lta bur mos pas/ oM ku ru ku l+le hrIHswA hA zhes bzlas pa dang ldan pa'i yid la byed pas zla ba drug gis 'grub par 'gyur ro/ /de la yi ge'i grangs kyi 'bum gyis chog bzhin du bzlas na thar pa nges par skyed par byed de sbyin sreg bcu char bya'o//de la phal pa'i dbang du byas pa ni 'di lta ste/ 'bum phrag gcig gis rgyal po rnams/ /khri yis 'jig rten phal pa nyid/ /bye bas phyugs dang gnod sbyin sogs/ /bdun 'bum gyis ni lha min rnams/ /'bum phrag gnyis kyis lha rnams nyid//brgya phrag gcig gis sngags 'chang rnams/ /zhes pa ni dbang du byed ces tshig tu sbyar te thams cad du sbyin sreg bzlas pa'i grangs kyi bcu char bya zhing / lta stangs dang srog gi kun du spyod pa dang ldan par bsgrubs na 'grub la gzhan du na 'jig rten pa'i bzhad gang du 'gyur ro//de la ku ni bde ba chen po'o/ /ru ni longs spyod rdzogs pa'o/ /ku ni chos so/ /l+les ni sprul pa yin par shes par bya'o/ /de ltar bstan pa'i rim pas 'gro ba 'dul bar 'gyur ro/ /de ni ji skad du pad+ma rigs kyi mngon par shes pa'i ye shes kyi dngos grub kyi rgyud ces bya ba las kyang /'dod chags mngon shes bskyed nas kyang / /rab mnyam gzhag pas bsgoms nas su/ /mngon shes lngar ni bdag 'gyur nas/ /dag pa'i dngos grub thob 'gyur zhes/ /bcom ldan rdo rje can gyis gsungs/ /zhes gsungs la/ de bzhin du pad+ma rigs kyi byang chub chen po'i ye shes kyi dngos grub kyi rgyud ces bya ba las kyang ji skad du/'jig rten dbang phyug ting 'dzin gnas/ /de bzhin chos kyi phyag rgya las/ /byang chub chen po'i ye shes 'di/ /bsgoms na dngos grub thob 'gyur zhes/ /bcom ldan spyan ras gzigs kyis gsungs/ /zhes gsungs pa'i phyir/ 'gro ba 'dul ba la brtson pa'i rnal 'byor pa rnams kyis lha mo 'di la bsgrub par bya'o/ /kye'i rdo rje mkha' 'gro ma dra ba'i sdom pa zhes bya ba la kye dang rdo rje zhes bya ba ni gong du rgyas par bstan la/ mkha' 'gro ma zhes bya ba ni nam mkha' lta bu'i ting nge 'dzin gang la yod pa de la de skad ces bya'o/ /dra ba ni tshogs te de rnams mang ba la bya'o//rdo rje snying po mngon par byang chub pa'i brtag pa zhes bya ba kye'i rdo rje rtsa ba'i rgyud 'bum phrag lnga yang brtag pa gnyis su gnas te dang por rdo rje snying pos zhus pa'i brtag pa dang / phyi nas bdag med mas zhus pa'i brtag pa yin la/ bsdus pa'i rgyud 'dir yang de ltar khong du chud par bya ste/de yan chad phal cher rdo rje snying pos zhus pa la dgongs pa yin gyi dngos su ni rdo rje snying po la brten pa ma yin te/ 'di ltar rdo rje snying po ni dus gsum gyi de bzhin gshegs pa thams cad kyi gsang chen sdud par snang zhing zhub po dang / gsang ba'i bdag po zhes kyang bstan cing lung bstan te/de bas 'di'i tshig ni phal che ba la dgongs pa'o/ /brtag pa gnyis pa la yang ma zhus pa ni med do/ /kye'i rdo rje'i nges pa'i don gyi rgya cher bshad pa las/ lta stangs dang / ku ru ku l+le'i sgrub pa'i bshad pa ste le'u bcu gcig pa'i bshad pa dang / rgyas par rdo rje snying po mngon par byang chub pa zhes bya ba'i brtag pa dang po'i rgya cher bshad pa ma lus pa rdzogs par bstan pa'o// //khong stong sku ni mi mnga' la/ /rdo rje lta bu'i sku lus can/ /kye yi rdo rje khyod phyag 'tshal/ /ma rig thibs pos non pa yi/ /'jig rten gsum po 'di mthong nas/ / bdag gi snying ni 'dzag par 'gyur/ /de phyir rab gnas le'u yi/ /rgyas bshad rdo rje snying pos bri/ /da ni brtag pa gnyis pa'i rgya cher bshad pa bstan par bya ba yin la/ de las kyang dang por rab gnas thams cad kyi spyi'i mtshan nyid legs par bstan par bya ba'i phyir/ rdo rje snying pos gsol pa zhes bya ba la sogs pa smos te/bcom ldan 'das zhes pa ni/ bcom ldan 'das la bod pa'o/ /rdo rje snying po bdag /sangs rgyas thams cad gcig bsdus pa/ /zhes bya ba ni sangs rgyas thams cad kyi gsung gcig tu bsdus pa'i bdag nyid kyi rdo rje snying po bdag ste/ dngos su na dus gsum gyi de bzhin gshegs pas gnang zhing bstod pa gsang ba'i bdag po yin zhes pa'i don to//rab gnas mtshan nyid bzang po nyid/ /rim pa ji bzhin bshad du gsol/ /zhes bya ba ni sngon du bcom ldan 'das kyis slob ma dkyil 'khor du gzhug pa'i don du dkyil 'khor gsungs pa'i rab tu gnas pa ji ltar bgyi zhes pa'i don to//bcom ldan 'das kyis bka' stsal pa/ ci gsungs sbyin sreg byas nas ni/ /dkyil 'khor dam pa bzhengs pa dang / /zhes bya ba la rig sngags 'chang gi slob dpon gyi slob ma'i don dang / de las gzhan pa'i glegs bam dang /sku gdung dang / ras kyi gzugs la rab tu gnas par byed 'dod pas/ sngon du rgyas pa la sogs pa'i sbyin sreg byas la/ de nas rigs dang mthun pa'i rdul tshon bri'o/ /de nas sta gon la gnas par bya'o/ /nam mkha'i khams la bzhugs pa'i sangs rgyas rnams rab gnas kyi gzhi la bstim par byas la/rab tu gnas pa'i gzhi de sbyang ste/ de nas snga bar sku gzugs sbyang bar bya'o/ /sta gon la gnas byas nas ni/ /nam mkhar bzhugs pa'i sangs rgyas kun/ /sku gzugs snying gar rab tu gzhug/ /ces gsungs te/ 'di'i nges pa'i don ni rtsa ba'i rgyud las ji skad du/bla mas gnang ba'i sta gon la/ /lus kyi dkyil 'khor dbus gnas te/ /bdag gi lnga phung sbyin sreg nas/ /khu ba'i gzugs kyis sangs rgyas bstim/ /bdag gi lnga phung lha gzugs sbyangs/ /rab tu gnas la byin brlabs mchog /yun du gnas shing byin rlabs che//mchog gi rab tu gnas pa'o/ /zhes gsungs te nges pa'i don to/ /rang 'dod lha mnyam rnal 'byor pa/ /rab mthong sngags kyi pha rol son/ /zhes bya ba ni tshul ji ltar rab tu gnas pa byas nas rang gi 'dod pa'i lha kye'i rdo rje dang mnyam la/ sngags thams cad kyi pha rol du son pa'i rnal 'byor pa yin zhes bya ba'i don to//oM badzra pu Sh+pe AHhUM swA hA zhes pa ni me tog gi'o/ /oM badzra d+hU pe AHhUM swA hA/ spos kyi'o/ /oM badzra dI pe AHhUM swA hA/ mar me'i 'o/ /oM badzra gan+d+he AH hUM swA hA/ dri'i 'o/ /oM badzra nai be d+ye AH hUM swA hA/ zhal zas kyi'o/ /sna tshogs hUM las rdzogs pa dang //me tog la sogs dbul ba nyid/ /gong ma'i rgyud kyi cho ga'i rim/ /mchod yon zhal bsil gong bzhin dbul/ /zhes bya ba la rang rang gi sngags kyis byin gyis brlabs shing dbul bar bya ba de bzhin gshegs pa de yin la/ nges pa'i don ni ji skad du rtsa ba'i rgyud las/ yid 'ong nyi zla'i me tog dang / /ral pa med pa'i tshul khrims spos/ /bde ba gsal bas mar me yin/ /bde bas tshim pas dri yi mchog /lus ngag yid gsum bde rgyas pa/ /ting 'dzin zas te zhal zas mchog /'jam zhing snyan par smra ba dang / /rang srog sgra ni sil snyan sgra//zhes gsungs pa ni nges pa'i don to/ /de bzhin du byang chub kyi sems ma shor ba bsten pa'i bde ba'i khrus dang / de nyid kyi bde ba'i gnas su khrid pa'i phyir zhabs bsil ba yin no/ /da ni sbyin sreg bstan pa'i phyir/ /zhi bar thab khung zlum po nyid/ /dpral bar chu yi dkyil 'khor ro//rgyas pa nyid kyi gru bzhi ni/ /lte bar sa yi dkyil 'khor ro/ /gsad pa la ni gru gsum nyid/ /gtsug gi 'khor lo nam mkha'i rang bzhin no/ /'di nyid la ni lhag ma bsgrubs/ /zhes pa ni/ dbang la mgrin pa me'i rigs la'o/ /khru gang dang ni khru phyed nyid/ /zhi ba'i steng dang 'og tu yin//zhes pa nas/ gsad pa'i steng dang 'og tu'o/ /zhes pa ni sgra ji bzhin du bstan pa ste nges pa'i don yod par ma gsungs so/ /da ni kha dog gi bye brag bstan par bya ba'i phyir/ zhi bar kha dog dkar por 'gyur/ /rgyas la ser po de bzhin no/ /gsad pa la ni kha dog gnag /dbang la dmar por rab tu grags/ /zhes bya ba la phyir ni las kyi bye brag las kha dog bye brag tu bya zhes kyang gsungs la/ de bas na skabs 'dir me thab thams cad kha dog de ltar bsgyur bar bya'o/ /de bas na 'khor lo bzhi'i bye brag las kha dog tha dad par bya'o/ /de bas na zhi ba dkar po chu'i bsam gtan dpral bar ro//rgyas pa ser po sa'i bsam gtan lte bar ro/ /gsad pa nag po nam mkha'i bsam gtan ni gtsug tor du'o/ /dbang dmar po me'i bsam gtan ni mgrin par ro/ /de ltar na dbang bzhin du dgug pa dang gsad pa bzhin du sdang ba la sogs la thab kyi kha dog dang dbyibs tha mi dad par bya'o zhes pa'i don to//da ni bsreg rdzas kyi bye brag bstan par bya ba'i phyir/ zhi la til dang rgyas la zho/ /gsad la tsher ma de bzhin no/ /sdang la sogs pa'ang tsher ma yin/ /dbang dang dgug pa ut+pal/ /zhes bya ba la de yang rim pa bzhin/ /zhi ba la dang po til bsreg go//rgyas pa la dang por zho/ gsad pa la dang por tsher ma can gyi shing bsreg go/ /de bzhin du sdang ba la sogs pa la dang por tsher ma can no/ /dbang dang dgug pa la dang por ut+pal bsreg go/ /lhag ma ni gzhan dang mthun no/ /oM asna ye ma hA te dzaH/ sar+b+ba kA mA r+tha sA d+ha kaH/kA ru Na kr-i twA sa twA r+tha/ a smin sa n+ni hi to b+ha ba zhes bya ba ni 'jig rten dang 'jig rten las 'das pa'i me lha spyan drang ba'i sngags so/ /nang du ni lte ba nas spyan drang ba'o/ /ma ma rin chen sna tshogs 'dzin/ /kye yi rdo rje khros mchod pa'i/ /lha mo khyod ni dbang du 'gyur/ /che ge mo bdag dkyil 'khor bri//zhes bya ba ni thog mar sbyin sreg gis btsal ba'i dus su sa nad med pa rnyed pa dang sa'i lha mo la gzu dang dpang du gsol pa'i tshig go/ /swA r+thany+tse ba/ pa ra a r+thany+tsa/ sa d+hi d+haM ga tsha ha bya b+hu ka /A ga mi sha ya si/ ya thA kA le/ sarba sid+d+hi ku ru ShA me/ zhes pa ni bdag dang gzhan gnyis ka'i don sgrub pa'i sgo nas mi dgyes par bya ba'i bstod pa'o//dzaH hUM baM hoH/ a kha raM/ oM ni ri hUM khaM/ oM d+h+h+waM d+h+h+waM/ zhes pa la sogs pa'i sngags rnams ni rim pa bzhin/ mchod yon dang / zhabs bsil dang / zhal zas rnams kyi yin te phyi dang nang gis dbye bar bya'o/ /kye'i rdo rje mkha' 'gro ma dra ba sdom pa'i nges pa'i don ni sngon du bshad zin to//kye'i rdo rje'i nges pa'i don gyi rgya cher bshad pa las brtag pa gnyis pa'i rab gnas kyi le'u'i rgya cher bshad pa ste dang po'o// //'dod chags zhe sdang gti mug dang / /sred dang phrag dog 'joms mdzad pa'i/ /thub pa skyes mchog la btud nas//dngos grub gtan la 'bebs pa yi/ /le'u gang gis rgyas par bshad/ /sems can sdug bsngal mun 'thoms la/ /de yi rgya cher bshad pa ni/ /rdo rje snying pos bri bar bya/ /da ni 'jig rten dang 'jig rten las 'das pa'i dngos grub le'u gang gis legs par ston pa de bshad par bya'o//rdo rje snying pos gsol pa/ nam mkha' lta bu'i chos rnams las/ /rgya mtsho'i ku ba ji bzhin du/ /rang 'dod lha yi gzugs las ni/ /sems can ji ltar 'grub par 'gyur/ /zhes bya ba la/ kye bcom ldan 'das kyis thog ma dang / tha ma dang / bar thams cad du chos rnams nam mkha' lta bu'o zhes yang dang yang du gsungs la/bdag gis khong du chud lags na/ /'gro ba 'di dag ni rang gi rnam par rtog pas bskyed de/ dper na rgya mtsho chen po la ku ba stong pa dag skyes bu 'ga' zhig gis dor nas sa phyogs gcig tu mi gnas par 'phyo ba ltar/rang rang gi rnam par rtog pas bskyod de gnas pa 'di dag gis ji ltar bsgrubs na 'grub par 'gyur zhes zhus pas so/ /bcom ldan 'das kyis bka' stsal pa/ bdag med rnal 'byor ldan pa'am/ /yang na he ru ka dpal brtson/ /gzhan gyi sems kyis skad cig kyang / dngos grub 'dod pas mi gnas so/ /zhes bya ba gsungs te/ kye rdo rje snying po de ltar yin gyis kyang / las kyi dang po la gnas pa'i rnal 'byor pas gang du bstan pa'i dkyil 'khor du zhugs la/ bskyed pa lha'i nga rgyal gyi dus dang / de yongs su rdzogs nas bdag med ma'i rnal 'byor la gnas par byas na nges par kye'i rdo rjer 'gyur ro//de'i phyir dngos grub 'dod pas rim pa gnyis la brten pa ma gtogs pa gzhan gyi sems kyis skad cig kyang mi gnas so zhes bya ba gsungs so/ /de yang las dang po pas thog mar re zhig kha dog dang dbyibs kyi bdag nyid la mngon par zhen pas gnas pa/de mthar gyur pa na bdag med ma'i rnal 'byor la bslab par bya'o/ /bdag med ma de yang ji lta bu zhig snyam pa la/ ji ltar nam mkha'i phyogs rnams kyi/ /kun la'ang rtag par mi gnas pa/ /de bzhin chos rnams thams cad la/ /gsang sngags mgon po mi gnas so//ji ltar dngos rnams nam mkha' la/ /gnas shing rtag tu rnam snang yang / /de ni gnas su mi 'gyur ba/ /gsang sngags mgon po'ang de bzhin no/ /nam mkha' dus gsum la sogs dang / /ji ltar 'bral bar 'dod pa bzhin/ /de ltar gsang sngags mgon po yang //dus gsum med kyang rnam par snang / /ming tsam du ni gdags pa'i gnas/ /byed pa po la sogs dang 'bral/ /nam mkha' la ni tha snyad du/ /mkhas pa rnams ni 'dogs par byed/ /ming ma gtogs par cung zad kyang / /yod pa ma yin nam mkha' bzhin//de bzhin gsang sngags dbang phyug kyang / /tha snyad tsam du snang bar zad/ /me dang chu dang rlung ma yin/ /sa dang nyi ma'ang ma yin zhing / /zla ba la sogs gza' kun min/ /nyin par dang ni mtshan mo'ang min/ /skye ba dang ni rga ba'ang min/ /'chi ba dang ni rgud pa'ang min/ / skad cig ma yin yud tsam min/ /lo la sogs pa yang ma yin/ /'jig pa dang ni 'chags pa dang / /bskal pa'i grangs kyang yod ma yin/ /dge dang mi dge las byung ba'i/ /'bras bu'ang yod pa ma yin no/ /kun mkhyen go 'phang 'dod pa yis/ /rtog pa rnam pa sna tshogs la/ / de kun gang la med 'gyur ba/ /de la rtag tu brtson par bya/ /zhes gsungs so/ /de bas na bdag med ma'i rnal 'byor 'di lta bu la dus rtag tu gnas par nus pa rnams kyis dus rtag par kye'i rdo rje mthong ba yin no/ /dang por goms par byed dus kyi/ /gnas ni gang du bsngags pa'i sems/ / gcig tu mnyam bzhag 'grub 'gyur ba'i/ /gnas ni bzang por nges par bstan/ /zhes bya ba ni/ las kyi dang po pas/ dang por rgyal po dang rkun po dang dgra la sogs pas bar du gcod par 'gyur ba de'i phyir/ gnas dben pa btsal bar byas la der rtse gcig pa ni/ de bzhin gshegs pa'i nges pa'o//rang gi khyim du mtshan dus su/ /bdag nyid grub pa'i sems kyis ni/ /rnal 'byor ma bsgom shes rab can/ /yang na he ru ka dpal gzugs/ /zhes bya ba la mtshan mo ltar rnam par rtog pas zab pa bskyed pa'i rang gi sdug ma'ang rung bsgom pa'i gnas su khrid la gnas par bya ba'am/yang na he ru dpa' bo'i tshul du rang las byung ba'i bdag med ma dang gnas par bya zhes pa'i don to/ /de ltar na mdor bsdu ba'i tshul du gsungs pa 'di lta ste/ rkang pa 'khrud dang za ba dang / /zhes pa nas/ shes rab brtul zhugs can nyid kyis//zhes bya ba'i bar gyis gsungs so/ /mdor na/ gang gang nye bar dmigs pa ni/ /de de kye yi rdo rjer bya/ /de las gzhan pa'i tshul gyis ni/ /yud tsam yang ni gnas mi bya/ /zhes bya'o/ /rnal 'byor ma ni rnam par bsgom/ /zhes bya ba ni gong du bstan pa'i shes rab rnal 'byor ma'o//ci'i phyir stong pa'i bdag nyid la shes rab ces gdags she na/ ji skad du/ shes rab nges 'byin zhes bya ba/ /ting nge 'dzin zhes grags pa ste/ /des ni phyag rgya myur 'grub par/ /bsgoms na myur du 'grub par 'gyur/ /zhes gsungs so/ /des na/ tshul gzhan gyis ni skad cig kyang //gdug pa'i sems ni ma rig pas/ /dngos grub 'dod pas dngos grub phyir/ /mkhas pas 'bad de mi gnas so/ /zhes gsungs pas go bar bya ste/ 'dis ni sangs rgyas kyi chos thams cad brtson 'grus la rag las par bstan to/ /de la skal ba dang ldan pa gang lags/bskyed pa'i rnal 'byor rdzogs te/ yang dag pa'i shes rab kyi me yan lag drug gi dang po so sor sdud pas bsdus te/ goms par byed pa na mtshan ma 'di dag 'byung bar 'gyur la/ gal te yang dag pa'i lam mi 'dod de/ 'on kyang ltad mo'i phyir yang zla ba phyed dam/ yang na nyin mtshan gcig tu dmigs pa rtse gcig tu zhog la ltos zhes gsungs te/ 'di ltar/ bsam gtan nyon mongs 'jig byed pa/ /rdo rje snying po nga yis bshad/ /brtse bas dngos grub don du yang / /zla ba phyed du yongs su rtogs/ /zhes pa la/ bag la nyal ba'i mda'i dug mtha' dag 'jig pa'i bdag med pa'i bsam gtan 'dings bstan te/kye brtse ba'i bdag nyid can gyi rdo rje snying po ltad mo'i phyir yang zla ba phyed du rtogs zhes pa'i don to/ /de ste zla ba phyed du 'bad pa mi byed pa de lta na yang / bsam pa thams cad yongs spangs te/ /lha yi gzugs su sems pa yis//rgyun mi 'chad par nyin mtshan gcig /bsgom pas yongs su brtag par gyis/ /zhes gsungs te/ bdag med ma'i rnal 'byor 'di la zla ba phyed du 'bad pa'i skal ba med pa rnams kyis nyin mtshan gcig tsam du yang dmigs pa gzhan la rtsol ba yongs su btang ste/ stong pa nyid gang la sems rtse gcig par bzhag na yid ches pa'i lam gyi rtags 'byung bar 'gyur te/ so sor sdud pas bsdus pa rnams la yin gyi gzhan du na de bzhin gshegs pa'i bka' la byis pa shes rab 'chal ba dag brnyas par 'gyur ro/ /de bas na so sor sdud pa'i ting nge 'dzin las gzhan pas bsam pa thams cad spangs pas nyin mtshan gcig bsgoms pas yid ches pa 'byung ba med do//rang gzhan don ni rab bsgrub phyir/ /'khor ba thabs gzhan yod ma yin/ /zhes bya ba ni/ nges pa'i don du ting nge 'dzin 'di las gzhan pas bdag dang gzhan gyi don mi 'grub ces pa'i don to//rig ma lan cig goms byas la/ /'phral du yid ches byed pa nyid/ /ces bya bas ni de lta bu'i ting nge 'dzin nyon mongs pa thams cad 'jig par byed pa yang / bla ma'i bka' drin gyis mi mo la re zhig shes rab kyi ming du btags pa las mtshon par 'gyur gyi/gzhan du rnyed pa'i skal ba med/ /ces pa'i don to/ /de ltar mngon du rnyed de phyis yongs su dor nas lha'i gzugs su dmigs pa'i mi dag la 'di lta ste/ 'jigs smyo de bzhin sdug bsngal dang / /mya ngan gdungs pas gtses pa dang / /'dod chags zhe sdang gti mug ches//sgrub pa po la nyon mongs min/ /zhes gsungs te/ 'jig rten pa'i chos kyis kun nas mnar bar mi 'gyur ba'o/ /gzhan yang de bzhin du/ phan dang gnod pa'i 'bras 'byung bar/ /da ltar nges par shes pa'i phyir/ /rnal 'byor pa rnams ngu 'bod du//skad cig gcig kyang ci phyir gnas/ /zhes gsungs te/ rang bzhin gyis dag pa'i chos su rtogs pa la ngu 'bod dang mnar med par ji ltar 'gro bar 'gyur te/ de ni gnas ma yin zhing go skabs med do zhes pa'i don to/ /de bzhin gzhan yang chos gang la gnas na/ mtshams med ldan byed pa dang //srog chags gsod la gang dga' dang / /gzhan yang skye ba dman pa dang / /rmongs dang ma rungs las byed dang / /gzugs don yan lag ma tshang ba/ /bsams na de dag 'grub par 'gyur/ /zhes gsungs te/ mi de dag rnams kyis kyang bdag med ma bsgoms na nges pa kho nar kye'i rdo rje'i dngos grub 'thob par 'gyur ba ni de bzhin gshegs pa'i nges pa'o//gzhan dag las kyang 'di lta ste/ /gdol pa smyig ma mkhan la sogs/ /mtshams med lnga ni byed pa po/ /sngags kyi spyod pa rjes spyad nas/ /skye ba 'di nyid sangs rgyas 'gyur//zhes gsungs pa yin no/ /de yang las kyi dang por gtogs pa rnams kyis dang por bla ma'i rjes su 'jug pa'i dus su/ dge ba bcu la goms pa dang / /bla ma la gus dbang po dul/ /nga rgyal khro las rnam par grol/ /de ni re zhig nges 'grub 'gyur/ /zhes bya bas bstan te 'di ltar dang por gso sbyong bstan par bya zhes pa la sogs pas 'jig pa'i dus go bar bya zhing /bla ma'i rjes su 'jug pa dag rgyud las gsungs pa ltar sgrub pa dang / rtsa ba'i ltung ba mi 'byung ba la nges par 'gyur zhing snod dang ldan pa yin no zhes gsungs pas/ thog mar de dag re zhig bslab par bya'o//de'i rjes la 'jig rten pa'i byis pa rnams gzud par zhes bya ba la bslabs te gnas la/ yang phyi nas rdo rje slob dpon gyis yongs su brtags pa'am yang na lhas lung bstan pa'i las kyi phyag rgya gzung bar bya ste/ byis pa gzud pa'i dus su/rtag tu goms pa'i rnal 'byor gyis/ /mnyam par gzhag pas dngos grub thob/ /zla ba gcig tu gsang la spyad/ /ji srid phyag rgya ma rnyed par/ /zhes bya ba gsungs te/ phyag rgya'i gnang ba ma rnyed pa de srid du gong du bstan pa rnams mnyam par bzhag pas gsang la bsgrub po zhes gsungs la/de yang zla ba'am/ lo la sogs pa'i bar du ste tha ma yang zla ba gcig gi bar du bslab par bya ba ni nges pa'o/ /gnang ba rnyed 'gyur sngags pa la/ /rnal 'byor ma yis bstan par bya/ /phyag rgya che ge mo khyer la/ /sems can don gyi rdo rje 'dzin/ /zhes bya ba la sogs pa la gal te rmi lam du bstan pa'am/yang na slob dpon gyis legs par brtags pa bzung la 'jug par bya'o/ /des sems can gyi don du 'gyur ba ni de bzhin gshegs pa'i nges pa'o/ /rnyed pa de yang mig yangs ma/ /gzugs dang lang tshos rnam par brgyan/ / si h+la ga pur yang dag ldan/ /byang chub sems kyis rnam par sbyangs/ /zhes gsungs te/ phyag rgya'i mtshan nyid bstan pa yin te/ 'di ltar mig dkar dmar 'byes pa la cung zad yangs pa/ rked pa rdo rje ltar 'dug la lo bcu gnyis sam/ yang na bcu drug lon pa khrag 'byung ba'i dus la bab pa byang chub sems kyi bde ba la dga' ba/de bzhin du phyag rgya de yang sbyang bar bya ste/ byang chub kyi sems bcug pas sbyang ba ni phyi nas yin la/ sngon du ni/ dge ba bcu las brtsams nas ni/ /de la chos ni rab tu bstan/ /lha yi gzugs su bsam pa dang //dam tshig sems kyang gcig pa nyid/ /ces bya ba gsungs te/ 'di lta ste/ mi mo gang zhig ma sbyangs par/ /kye yi rdo rje la sbyor ba/ /dam tshig nyams te brlag 'gyur bas/ /de dag sbyang phyir chos bstan bya/ /zhes gsungs so/ /de bas mi mo legs par bslabs te/bdag med mar bsams la/ dben pa'i gnas su khrid de/ /'jig pa'i bde ba la bslab pa ni zla ba gcig gi mthar ro/ /de bas/ rtog pa thams cad spangs pa yi/ /gang zhig mi mo mchog rnyed na/ /zla ba gcig gis skal ldan par/ /'gyur ba 'dir ni the tshom med//ces bya ba la/ 'di 'dra'i mi mo legs rnyed nas/ /bas mtha' dag tu gnas byas la/ /bza' btung rnam mang sta gon byas/ /glu dang sil snyan gar dang ni/ /lus la rgyan legs gdags pa dang / /me tog dag dang dri dang ni/ /bzang po'i gnas pas legs bkod la//yang dag ye shes snang bar bya/ /zhes bya'o/ /yang na bdag gi nus pa yis/ /lha dang lha min mi rnams dang / /gnod sbyin mi 'am ci las kyang / /phyag rgya bkug la brtag par bya/ /zhes bya ba gsungs te/ phyag rgya'i grub pa bsgrub pa'i phyir/ /lha mo lha min bu mo rnams//mi yi bu mo rnam pa bzhi/ /sngags kyis kun nas bkug nas ni/ /sa yi dkyil 'khor kun du spyad/ /de yis skal ldan rnal 'byor pa/ /phyag rgya grub par gdon mi za/ /mi gtsang rul pa dri ma pa'i/ /mi mo'i lus ni yang ma yin/ /zhes bya ba'i tha tshig go/ /de yang khyer la spyod pa bya//bdag gi dal ba mngon du byas/ /gang bshad 'jigs pa'i gzugs can gyis/ /spyod pa longs spyod phyir mi gsungs/ /yid ni brtan nam g.yo 'am ci/ /rang gi sems la so sor brtag /ces bya ba la/ 'di ni byis pa brkam chags can/ /chang la bag med du spyod pa/ /bdud rtsi'i btung ba rnam par spong //'gyur ba'i bde la rab tu zhen/ /sngags dang phyag rgyas 'tsho ba sgrub/ /de dag tshul min spyod pa 'di/ /dbang dang kun du spyod pa dag /rang sems brten pa'i rgyu ru gsungs/ /gang dag tha snyad tsam cig la/ /brten te mi dge'i las bcu spyod/ /de dag 'gro ba ci 'dra ba//'dren pa yis kyang ga la rtogs/ /zhes pa'i don to/ /da ni ma 'ongs pa'i byis pa rnams la dbang po gnyis kyis 'gyur bas sangs rgyas par bstan pa la/ bud med rnams kyis dbang dang spyod pa spyad par bya ba ste/ ji ltar na phyag rgya nang gi phyag rgya'i dngos grub dang spyod pa bstan par bya ba'i phyir smos pa/rdo rje snying pos gsol pa/ bdag med rnal 'byor ldan pa yis/ /phyag rgya nyid ces ji ltar brjod/ /phyag rgya phyag rgya gnyis dag gis/ /phyag rgya'i dngos grub ji ltar 'gyur/ /zhes bya ba ni mi mo gang zhig bdag med ma'i rnal 'byor dang ldan pa des phyag rgya'i bde ba ji lta ba'i tshul gyis bsgrub par bgyi/'on te mi mo kho na las 'byung ba lta na ni thabs kyi dngos grub ma mchis par yang 'gyur ro zhes zhus pa dang / bcom ldan 'das kyis bka' stsal pa/ bud med gzugs ni spangs nas gzhan/ /bcom ldan 'das kyi gzugs su bya/ /zhes bya ba gsungs te/las dang po pa'i mi mo rnams kyis mi mo'i rtog pa yongs su btang ste/ kye'i rdo rje dngos su mos par bya zhes pa dang / de bzhin du yang / nu ma spangs te bo lar 'gyur/ /kak+ko la dbus yang dag dgod/ /'gram gnyis dril bu dag tu 'gyur/ /zhes bya ba gsungs te/ bud med gang bde ba'i dbang la 'jug pa des/ bdag skyes bu kye'i rdo rje lta bur bsgyur la dkar 'dzin dor la bo lar bsgyur te yid kyis mos pa'o/ /de ltar na bde ba'i dus su skyes bu'i gzugs can gang de ni kak+ko la dang ldan pa dang / de bzhin du gzhon nu ma bdag gi skye gnas kyi 'gram gnyis dril bu'i mos par bsgyur ba dang //de bzhin du/ ze 'bru bo la can du bsgyur/ /zhes gsungs te/ pad+ma gang gi dbus na gnas pa'i dngos po de nyid gsang ba'i char bskyed la brtag par bya ba'i nges pa'o/ /de bas na/ lhag ma bdag nyid chen po nyid/ /dga' chen he ru ka yi gzugs//he ru ka sbyor skyes bu nyid/ /ces bya ba la/ khams dang skye mched lhag ma sogs/ /phan tshun ro mnyam mtshungs pa'i phyir/ /bsgyur mi dgos par skyes bu nyid/ /he ru ka ste tha dad med/ /de ltar mos pas bsgyur ba las/ /phyag rgya'i dngos grub mchog tu dag /mi mo rnams la 'gyur ro zhes/ /bdag nyid chen po nyid kyis gsungs/ /'bad mi dgos par skyes bur 'gyur/ /gsal bar nus pa'i rnal 'byor pas/ /de nas phyag rgya'i dngos grub 'gyur/ /zhes bya ba yang gsungs te/ rnal 'byor ma gang de ltar sbyor/ /bud med las ni yongs brjes nas//skyes bu gzugs bzang phun sum tshogs/ /tshe 'di kho nas thob kyang srid/ /gzhan yang dge slong rdo rje 'dzin pa dag gis 'jig rten pa'i kha na ma tho ba spang bar bya ba'i phyir/ gzhon nu ma 'ga' skyes bur bsgyur ba spyod pa'i grogs bya ba ni de bzhin gshegs pa'i nges pa ste/de ltar phyag rgya'i dngos grub mchog tu 'gyur ba'o/ /chags dang 'jig pa dag gis kyang / /thabs dang shes rab la mi gnod/ /gang las thabs ni 'byung ba nyid/ /'jig pa shes rab srid mthar byed/ /des na rab 'jig yod ma yin/ /zhes bya ba la/ de lta bu'i rim pas/shes rab thabs bdag gnyis min par/ /gsal bar 'jog pa'i rnal 'byor gang / /me dang chu sogs 'jig pa'i tshe/ /de la gnod pa yod mi nus/ /'jig dang 'chags pa'i bag chags 'di/ /rang gi kun du brtags pa ste/ /rang gzhan cha yi rtog pa 'di//'jig rten gsum po dkrugs pa yin/ /'di gsal 'khrug par 'gyur ma yin/ /byang chub sems kyi 'jig rten khams/ /'chags dang 'jig pa rab bsrungs na/ /cis kyang mi 'jig rnal 'byor che/ /'khor los sgyur ltar kun du rgyu/ /de nyid la ni chags pa med/ /la la 'jig pas 'jig par 'gyur//'jig pa'i dngos med zad pa med/ /ces bya ba ni byang chub sems kyi rgyun 'jig pa na 'jig pa thams cad 'byung zhes pa'i don to/ /bskyed pa'i rim pa'i rnal 'byor las/ /brtul zhugs can gyi spros pa bsgom/ /spros pa rmi lam ltar byas nas/ / spros pa nyid ni spros med bya/ /zhes bya ba la gang du lha gcig nas bzung nas/ 'bum gyi bar du rgyud gang dang gang las ji skad gsungs pa'i tshul de dang de ltar bslab cing 'bad la yid ches par bya'o/ /de yang ji skad du/ gang gis kha dog gang gsungs pa/ /de nyid de yi dkyil 'khor te//lha yi gzugs ni de lta bur/ /sngon gyi sangs rgyas rnams kyis bstan/ /zhes gsungs pa'i phyir/ thog ma nyid du spros pa'i rnal 'byor la 'bad par bya'o/ /de yang ji skad du/ sems can rnams ni blo dman zhing / /bya ba tsam gyis rmongs pa rnams/ / dngos po'i don la chags dga' ba/ /ma 'ongs dus na 'byung bar 'gyur/ /'di lta'i tshul ni mi shes pas/ /yul dang dus dang bya ba las/ /dge dang mi dge'i mtshan ma yis/ /rmongs pa 'bras bu 'dod byed de/ /sems dpa' chen pos de dag phyir/ /cho ga 'di ni brjod pa yin//zhes so/ /dper na char gyi rgyun 'bab na/ /chu yi chu bur rnams 'byung ba/ /de bzhin gsang sngags 'grub pa yi/ /sprul ba rnam pa sna tshogs pa/ /sems can med cing srog dang ni/ /byed pa po yang med pa ste/ /dngos po thams cad stong pa la/ /'khrul ba kho na snang bar zad//ces pas rdzogs pa'i rim pa rtogs par bya'o/ /ji ltar sgyu ma rmi lam dang / /bar do'i srid pa gang yin ltar/ /rtag tu goms par sbyor ba las/ /dkyil 'khor nyid ni de bzhin 'dod/ /ces bya ba la rdzogs pa 'di ni rang gi lha'i dkyil 'khor 'di nyid/ sgyu ma dang rmi lam dang srid pa bar ma do'i skye bo ltar/chags pa dang thogs pa dang bral bar bsgom pa nyid rdzogs pa zhes 'dod de/ /'dod pa so sor spong ba'i phyir/ /so sor spang ba zhes bshad do/ /zhes bya ba la sogs pa rgya cher gsungs pa'i phyir ro/ /phyag rgya chen po'i dbang bskur bas//ji ltar shes pa'i bde chen po/ /de yi 'di ni byin rlabs yin/ /gzhan las dkyil 'khor 'byung ba med/ /ces pa ste ji ltar sgyu ma rmi lam la sogs par shes pa kho na phyag rgya chen po dang / 'jig rten pa'i spyod pa las 'grol ba'i dbang dang /yum sgyu 'phrul chen mo dang / shes rab kyi pha rol tu phyin pa zhes bya ba yin no/ /de'i phyir/ 'di nyid shes par bya ba'i phyir/ /bde ba gnag cing bde ba ser/ /bde ba dmar po bde ba dkar/ /bde ba ljang gu bde bsngo/ /bde ba rgyu dang mi rgyu kun/ /bde ba shes rab bde ba thabs//zhes bya ba la sogs pa smos te/ drang dang nges pa'i bye brag las/ /bskyed de spros la zhen spang phyir/ /dkyil 'khor kha dog yang yang bsgyur/ /las la sogs pa'ang 'grub 'gyur la/ /rdo rje 'chang chen drug kyang yin/ /gzhan du/ shes rab ye shes me bo che//zhes bya ba la sogs pas du ba la sogs pa'i lam gyi mtshan mar gsungs te/ so sor sdud pa'i bde ba nyid de ltar snang ba'i phyir ro/ /bde bzhin du sa bon gyi bde ba de nyid kyi dus su gang cung zad dmigs pa'i gzugs dang kha dog dang rgyu ba dang mi rgyu ba rnams bde ba las gzhan par ma mthong ba'i phyir ro//de bzhin kun du ru skyes bde/ /bde ba dngos dang dngos med bde/ /bde ba rdo rje sems dpar brjod/ /ces gsungs te/ de bas 'dod chags kyi mes tshig pa rnams la kun du ru'i bde ba nyid mchog tu bshad de/ dngos dang dngos min gyi rang bzhin gyis rdo rje sems dpa'i bde ba 'thob par byed pa'i phyir la mi 'gyur ba rnams la ji bzhin pa'i rdo rje sems dpa'i bde ba'o//da ni/ spros pa rmi lam lta bu dang / /zhes pas/ /rdzogs pa'i rim pa shes par bya/ /zhes pa'i gsung gi dgongs pa dgrol ba'i phyir/ rdo rje snying pos gsol pa/ rdzogs pa'i rim pa'i rnal 'byor 'di/de yi bde ba bde chen brjod/ /rdzogs pa bsgom pa med pa ste/ /bskyed pa yis ni ci zhig 'tshal/ /zhes bya ba la/ kye bcom ldan 'das dbang po gnyis kyi bde ba nyid kyis sangs rgya pa lags na/ rdzogs pa'i bsgom pa gzhan ma mchis te/ de las gzhan pa'i dkyil 'khor dang //phyag rgya bcings pas ci zhig 'tshal/ /zhes pa'i don to/ /bcom ldan 'das kye'i rdo rje chen pos tshig de dag gsan nas/ e ma'o byang chub sems dpa' che/ /dad pa'i shugs kyis rab tu nyon/ /zhes gsungs te/ kun rdzob kyi lus kyi dngos po nyid med na/bde ba chen po zhes bya ba bstan pa'i nus pa med pa'i phyir/ lus kyi dngos med gang las bde/ /zhes pa la sogs pa smos te/ rmongs pa gang gis nga mi shes/ /zhes bya ba la sogs pa'i tshig gi don rnams ni thabs dang shes rab des par gtan la phab pa'i le'ur rgyas par bstan te//de ltar na lus nyid med par 'gyur na de la brten pa'i bde ba yang med do/ /de lta bas na/ rdo rje btsun mo'i b+ha ga ni/ /e yi rnam pa'i cha byad gzugs/ /sangs rgyas rin chen za ma tog /bde ba can la rtag par zhugs/ /zhes pa ste/ btsun mo mi rigs bzhi sogs las//skyes pa'i bu mo mtshar mo ste/ /b+ha ga skye gnas e gzugs la/ /skyes bu'i ling+ga waM gyi dbyibs/ /kha sbyor gab tse zhes su dran/ /de yi dbus gnas khu ba la/ /sangs rgyas zhes su 'dren pas gsungs/ /zhes pa ste/ de ltar skyes pa dang bud med kyi lus yod na bde ba chen po yod do//'chad pa po nga chos kyang nga / /rang gi tshogs ldan nyan pa nga / /'jig rten ston pa bsgrub bya nga / /'jig rten 'jig rten 'das pa nga / /zhes bya ba ni byis pa'i skye bo gang dag sangs rgyas la btsun mo dang / dbang po'i bde ba dang / 'khor 'dus pa dang /chos bsten pa dang / ston pa dang / nyan pa la sogs pa dang / 'dod chags kyi bstan pa nges par yod ces sems pa dag bkag pa yin te/ 'di ltar ma 'ongs pa'i skye bo rnams kyis rtogs par bya ba'i phyir/ sangs rgyas kyi rol pa bstan pa yin la/ yang dag par na sangs rgyas ni rdo rje lta bu'i sku dang /glang po ltar mi g.yo ba yin par shes par bya'o/ /de ltar na yang rang gi lus po las sangs rgyas 'byung bar bstan te/ mtshan dang dpe byad dang ldan pa'i rdo rje lta bu'i sku yang khu ba la brten te 'khrungs pa'i phyir ro/ /lhan cig skyes dga'i rang bzhin nga //dga' bral dang po'i mchog mtha' can/ /mun rum la ni mar me ltar/ /de bzhin bus kyang yid ches kyis/ /zhes gsungs te/ thabs dam pa 'di yang btsun mo mchog dang sbyor ba na bla ma'i bka' la brten te/ chags pa dang bral ba'i dang po mchog gi dga' ba'i tha mar mun pa smag tu gyur pa la mar mes gsal ba ltar mtshon par byas na 'di ltar/btsun mo'i b+ha ga bde ba can/ /ston pa sum cu rtsa gnyis mtshan/ /mnga' bdag dpe byad brgyad cur ldan/ /khu ba zhes bya'i rnam pas gnas/ /zhes gsungs te/ nges pa'i don yang rtsa ba'i rgyud las 'di lta ste/ dpe byad brgyad cu sogs spras pa'i/ /mnga' bdag khu ba yin zhes pa/ /bde ba 'dzag med brtan pa yis/ /tshul khrims ral pa med pa ru/ /bsam gtan bzhi yi mtha' gzung ste/ /yid kyi me tog mdangs can 'di/ /rlung gis yongs su mi 'da' bar//bcings pas dpe byad ldan par 'gyur/ /zhes nges pa'i don du gsungs so/ /de ltar lus med na khu ba med la/ khu ba med na bde ba dmigs par yang ga la 'gyur/ de bas na sangs rgyas zhes bya ba yang med par 'gyur ro/ /de ltar na/ de med pas na bde med 'gyur//bde ba med na de med 'gyur/ /nus pa med phyir ltos dang bcas/ /zhes gsungs te/ nges par de bzhin gshegs pas bstan pa'o/ /de bas na yang dag par sangs rgyas zhes bya ba dngos po dang dngos po ma yin pa'i tha snyad thams cad las grol ba/ bzhin dang mdog la sogs pa ma yin pa/bde ba'i rnam pa ma yin pa ste/ dga' ba bzhi dang / 'khor lo bzhi dang / skad cig ma bzhi dang / 'bras bu bzhi dang / dbang bzhi dang / gnas skabs bzhi la sogs pa dang / skyes pa dang / mi mo'i bde ba dang / rtsa dang / rlung dang / thig le dang / zla ba'i dum bu dang / sgra dang tshig la sogs pa rnams sangs rgyas ma yin te/ gang de ltar bstan pa rnams gdul bar dka' ba'i skye bo la bstan pa ste/ de'i phyir dbang po gnyis kyi bde ba yang bstan la/ sangs rgyas lhan cig skyes pa'i rang bzhin zhes pa yang khu ba'i lhan cig skyes pa ma yin te/rang bzhin du gnas pa'i lhan cig skyes pa la sangs rgyas zhes gsungs so/ /lha yi rnal 'byor las bde ba/ /de phyir sangs rgyas dngos po min/ /de nyid dngos med tshul yang min/ /zhal phyag rnam pa'i gzugs can nyid/ /mchog tu bde ba gzugs med pa/ / de bzhin 'gro kun lhan cig skyes/ /zhes gsungs te/ bde bas kun la khyab pa'i phyir dang / rang bzhin lhan cig skyes pas kun la khyab pa'i phyir de skad ces gsungs te/ rnam pa 'di dag rtogs par bya ba'i phyir/ thabs gzhan yod par ma gzigs pas/ kun rdzob kyi gzugs 'di nyid mchog tu bsngags pa mdzad do//de bas na rtsol ba las byung ba'i bde ba lhan cig skyes pa ma yin te/ glo bur ma yin pa'i phyir/ ston ka'i me tog la sogs pa dang 'dra'o/ /de'i phyir yang / rang bzhin lhan cig skyes par brjod/ /ces gsungs so/ /de las gzhan pa ni 'dra ba'i dpe ste byis pa rnams gzhug pa'i don to//rnam dag rnam pa'i sems kyis ni/ /rang bzhin mya ngan 'das pa nyid/ /ces bya ba ni/ bskyed pa'i rim pa nyid gzod ma nas rang bzhin gyis dag pa'i phyir ro/ /'o na bskyed pa'i rim pa'i ting nge 'dzin gyi rnam pa ci zhig bya zhe na/lha yi rnam pa'i gzugs dag tu/ /bzhin lag kha dog gnas pa ni/ /bskyed pa tsam gyis rnam par gnas/ /'on kyang bag chags phal pas so/ /zhes bya ba smos te/ de ltar gzod ma nas ngo bo nyid kyis 'bral ba yin gyis kyang byis pa rnams kyis rtogs pa'i skal ba med pa'i phyir/bag chags phal pas bzhin lag dang kha dog gi lha ru bstan pas byis pa rnams grol bar 'gyur gyis/ gzhan du ni ma yin no/ /de bzhin du 'jig rten na yang dpe mngon du snang ste/ 'di ltar/ dug gi dum bu gang nyid kyis/ /skye bo thams cad 'chi bar 'gyur/ /zhes bya ba ni 'jig rten pa la mngon sum du grub bo//de bzhin du/ dug gi de nyid shes pa des/ /dug gis dug ni 'joms par byed/ /ces bya ba yang 'jig rten pa la mngon du grub ste/ 'di ltar skyes bu dug gi sngags dang sman shes pa 'ga' zhig gis dug gi dum bu 'ga' la byin gyis brlabs te zos na gnod par mi 'gyur la/slar bzhin nad kyi gzhi 'ga' la phan 'dogs pa'i gzhir 'gyur ro/ /de bzhin du gzhan yang nus pa mngon du snang ste/ 'di ltar/ dper na rlung nad ldang ba la/ /mon sran sde'u'i bza' ba bzhin/ /bzlog pa'i sman ni brtags pa las//rlung gis rlung la snun par byed/ /ces bya ba gsungs te/ 'di ltar skyes bu rlung nad kyis btab pa 'ga' la/ mon sran sde'u'i tshod ma bza' btung du byin na/ re zhig nad de rgyas par 'gyur la/ phyis de nyid 'joms par byed pa'i sman pas mar la sogs pa lan bdun du gdus la 'bras bu gsum gyi phye ma dang sbyar ba'i bza' ba byin pas rlung nad de rtsad nas 'joms par byed do//dpe de bzhin du/ rnam rtog gis ni rnam rtog dang / /srid pa nyid kyis srid pa dag /ces bya ba gsungs te/ 'di ltar bskyed pa'i ting nge 'dzin rnam par rtog pa'i bdag nyid can/ lag pa'i phyag rgya bcing ba dang /'dug stangs dang / lta stangs dang / phreng ba'i khyad par la sogs pas thog ma nyid du 'jig rten pa'i tha snyad khyad par can du byas la phyis phyi ma'i yon tan gyis/ sngon ma rnams spang bar bya ba ni rgyud de dang de'i nges pa'o/ /de bzhin du bsdus pa'i rgyud 'di nyid las kyang ji skad du/dga' bral dga' ba srid pa ste/ /de bas lhan cig skyes pa bsgom/ /zhes gsungs so/ /de ltar yang / dper na rna bar chu zhugs pa/ /chu gzhan gyis ni gdon par bya/ /zhes bya ba gsungs te/ rna ba'i bu ga'i gting na chu'i thigs pa 'ga' zhig yod na/chu gzhan slar bzhin blugs pas phyir 'byung ba ni 'jig rten pa la mngon du grub bo/ /dpe de bzhin du/ de bzhin dngos po'i rnam rtog kyang / /rnam rtog yid kyis sbyang bar bya/ /zhes bya ba ste/ spros pa'i ting nge 'dzin dang brtags pa'i chos lus dang lus kyi cha shas lha'i rnam par brtags pa srid pa'i mtshan nyid can ma gtogs par grol bar 'gyur ba'i thabs med par 'gyur ro//de bzhin du yang 'jig rten na mngon sum du snang ba'i dpe ni 'di lta ste/ dper na me yis tshig pa la/ /slar bzhin me yis gdung bar bya/ /zhes bya ba yang 'ga' zhig gi yan lag mes tshig pa'i skad cig la byis pa mi mkhas pa kha cig ni/mi mthun pa'i dngos po chu'i nang du reg par byed de/ slar zhing gnod par byed do/ /de bzhin du/ de ltar 'dod chags mes tshig pa/ /'dod chags me yis slar la gdung / /skye bo mi bzad pa yi las/ / gang dang gang gis 'ching 'gyur ba/ /thabs dang bcas nas de nyid kyis/ /srid pa'i 'ching ba las grol 'gyur/ /zhes bya ba gsungs te/ 'di'i don yang rtsa ba'i rgyud las ji skad du/ 'dod chags la sogs nyon mongs rnams/ /mi rnams kun du 'ching 'gyur zhes/ /'dren pa dpa' bos gsungs pa ni//thabs dang mi ldan mi la gsungs/ /gang zhig thabs ldan skyes bu la/ /de nyid kyis ni grol 'gyur zhes/ /slar yang mngar bdag chen pos gsungs/ /de yi thabs ni 'di dag go/ /'di lta ste/ gang 'jig rten gsum gyi skyes bu chags pa can rnams 'di ltar bdag gi bdog pa phun sum tshogs pa yang 'dod chags nyid kyis ma rungs par byed la/'khor bar gnas par byed pa yang 'di nyid de/ 'di ltar de kho na nyid med pa'i phyir/ glang po che smyon pa gang zhig gi steng du/ /lcags kyu 'dzin pa'i kha lo ba med par zhon pa dang mtshungs so//de lta bas na/ chags pas 'jig rten 'ching 'gyur ba/ /'dod chags nyid kyis rnam grol 'gyur/ /zhes bya ba gsungs te/ 'dzag pas ni 'ching bar 'gyur la/ 'dzag pa med pa mi zad pa'i bde bas ni grol bar 'gyur ro/ /de ltar na de bzhin gshegs pas gnas gang du smad par gsungs pa de ni 'dzag pa la dgongs pa yin la/gang du bsngags pa mdzad pa ni/ mi 'gyur ba'i bde ba 'di lta bu nyid la dgongs pa yin no/ /de ltar chags pa de nyid mi 'gyur ba 'di ni/ byis pa'i rnal 'byor gyi yul ma yin te/ / zlog pa'i bsgom pa 'di nyid ni/ /sangs rgyas mu stegs kyis mi shes/ /zhes bya ba gsungs te/ de ci'i phyir zhe na/ gang gis skad cig la de bzhin gshegs pa'i rang bzhin du 'gyur ba'i phyir ro/ /'di skad du/ 'byung ba lnga yi rang bzhin phyir/ /zhes bya ba gsungs te/ 'dod chags gang gi skad cig la 'byung ba lnga'i rang bzhin du 'gyur ba de'i phyir ro/ /gang yin zhe na/ kun du ru la lnga ru 'gyur/ /zhes pa ste snyoms par 'jug pa'i dus so/ /dga' ba chen po gcig nyid las/ /dbye ba lnga ru 'gro bar 'gyur/ /zhes bya ba smos te/nam mkha' lta bu'i 'od gsal ba'i dga' ba chen po gcig po nyid kyi dus su 'jig rten kun rdzob tu gnas skabs tha dad pa lnga 'byung ste/ 'di ltar/ bo la ka k+ko la sbyor bas/ /zhes bya ba rdo rje dang pad+ma sbyor ba'i dus su'o/ /gang du/ rig pas sra ba'i bag chags nyid/ / sra ba gti mug chos kyi phyir/ /gti mug rnam par snang mdzad brjod/ /ces bya ba gsungs te/ gang gis skad cig la mkhrang ba dang / sra ba sa'i khams yin la/ de'i phyir skad cig de ni rnam par snang mdzad du brjod do/ /de bzhin du/ byang chub sems ni gsher ba yi/ /chu yi khams su rab brjod do//zhe sdang 'dren pa mi bskyod pa/ /bya ba yin la mi bskyod pa gsher ba'i mtshan nyid de ni chu'i khams yin no/ /de bzhin du gnyis sprad pa'i dus su drod skyes pa dpag med 'od yin te/ 'dod chags drod las 'byung ba'i phyir/ /'dod chags kyi drod de ni me'i khams yin no/ /de bzhin du ka k+ko lar ni gang zhig sems//de na rlung gi rang bzhin can/ /phrag dog don yod grub pa yin/ /don yod rlung las 'byung ba nyid/ /ces bya ba gsungs te/ dus dar thig le g.yo zhing ltung ba rlung gi byed pa po yin la/ don thams cad rlung gis sgrub pa'i phyir de skad ces bya'o/ /bde ba'i 'dod chags khrag tu 'gyur//dga' ba nam mkha'i mtshan nyid do/ /nam mkha' ser sna rdo rjer 'gyur/ /ser sna nam mkha' las byung nyid/ /ces bya ba la skad cig gang la khrag la brten te 'byung ba'i bde bde ni/ rin chen 'byung ldan gyi mtshan nyid do/ /rin po che nam mkha'i yon tan to//de ltar na bde ba'i sems chen po gang na gcig yod pa de na lnga'i gzugs kyis nges par gnas te/ rigs lnga'i rang bzhin can 'byung bar 'gyur ba de nyid kyi phyir/ sangs rgyas pa dang / mu stegs rnams kyis rigs par mi 'gyur te/ slar bzhin skrag par 'gyur ro//de ltar na/ rigs ni lnga po de nyid las/ /stong phrag du ma skyes pa nyid/ /ces bya ba gsungs te/ rigs kyi gtso bo rnam pa lnga po de las rigs phal pa bgrang ba las 'das pa 'byung bar 'gyur ro/ /de'i phyir na 'dod pa'i 'dod chags kyang dpag tu med par rig par bya'o//rigs lnga po de dag kyang mgrin pa dang rkan dang spyi bo dang mchu dang so'i chos can bstan par bya'o/ /'di lta ste/ a i r-i u l-i zhes bya ba rnams gnas lnga nas 'byung ba rigs lngar 'dod cing de dag rnams la yon tan dang 'phel ba dang ya Na'i rkyen gyis bsgyur bas ring thung du phye ste bsgyur na/dpag tu med par 'gyur du rung ngo / /mdo tsam zhig bstan pa 'di lta ste/ dngos po 'di dag thabs dang shes rab kyi char gnas la/ de yang A li dang kA li kho nar 'dus so/ /A li ni lnga yin te gnas lnga nas 'byung ba'i yi ge lngar bstan te/ gong du brjod pa nyid do//lnga po de nyid rnams la thig les mnan pas thabs kyi cha ston par byed pa ste/ drug dang de bzhin du lnga po de las rnam par gcad par bya bas bsnan pas yang drug ste shes rab kyi char ston par byed pa yin no/ /de bzhin du gsal byed 'ga' zhig gi ni sum cu'o/ /de ltar na gsal byed sum cu po la thabs kyi yi ge drug gis nye bar bsgyur na brgya brgyad cur 'gyur te bgrod pa gcig gis so//yang de bzhin du sum cu po shes rab kyi yi ge drug gis nye bar bsgyur bas brgya brgyad cu ste/ sngon dang mtshungs te de ltar bgrod pa gnyis su 'grub bo/ /brgya brgyad cu gnyis thabs dang shes rab gnyis su med pa'i tshul du bsres pas sum brgya drug cu'o//de ni nang du 'byung ba gcig gi rlung yin la/ phyir ni lo gcig gi zhag yin no/ /sum brgya drug cu la 'byung ba lngas bsgyur bas stong brgyad brgya yin la/ yang de la 'pho ba bcu gnyis te zla ba bcu gnyis kyis khyim bcu gnyis kyi nye bar bsgyur na nyi khri chig stong drug brgya zhes bya bar gnas te/de ltar na rigs thams cad rigs lnga las 'byung bar 'gyur ro/ /de ltar na lo bcu gnyis dang po drug cu dag ni zla ba dang / zhag dang / chu tshod dang / chu srang dang / dbugs rnams la 'byung ba rnam pa lngas bsgyur na/bgrang ba las 'das pa'i rigs su shes par bya'o/ /de ltar na/ de'i phyir 'di dag rang bzhin gcig /bde chen mchog tu phan pa nyid/ /'dod chags la sogs sems lnga yis/ /dbye bas lnga ru 'gro bar 'gyur/ /gang+gA'i klung bcu'i bye snyed nyid//rigs gcig la ni de bzhin gshegs pa'i tshogs/ /rigs kyi tshogs la rigs ni du ma rnams/ /de rnams rigs la rigs ni rnam pa brgya/ /de rnams la yang 'bum phrag rigs chen rnams/ /bye ba'i rigs la grangs ni med par 'gyur/ /de la rigs la grangs med rigs rnams nyid//mchog tu dga' ba'i rigs las 'byung ba rnams/ /zhes bya ba gsungs te/ bde ba chen po nam mkha'i rigs lus can thams cad la mchog tu phan pa bskyed pa/ ma bcos pa'i lhan cig skyes pa 'di ni/ /dbang po gnyis snyoms par 'jug pa'i bde ba ma gtogs pa gzhan du shes pa'i thabs med pa'i phyir/nyan thos dang rang rgyal ba dang mu stegs byed rnams la gsang bar nges so/ /kye'i rdo rje nges pa'i don gyi rgya cher bshad pa las/ dngos grub gtan la phab pa zhes bya ba'i le'u'i rgya cher bshad pa ste gnyis pa'o// // gang zhig dga' ba bzhi rgyun can/ /e waM yi ger phyag 'tshal te/ /rgyud kyi gleng gzhi gsang ba'i skad/ /rgyas bshad rdo rje snying pos bri/ /de nas rdo rje can gyi rnal 'byor ma rnams la rgyud thams cad kyi gleng gzhi zhes bya ba'i thabs bka' stsal pa zhes bya ba la sogs pa smos te/ de la rgyud ni rnam pa bzhi ste//slob dpon dang / gsang ba dang / shes rab ye shes dang bzhi ste/ rnam pa bzhi ni rgyud do/ /gleng gzhi ni lo rgyus dang / gnas dang / spyod pa dang mi 'bral ba la bya'o/ /thabs de dag bcom ldan 'das kyis bka' stsal pa zhes sbyar ro/ /de bzhin du gzhan yang /sdom pa dang ni dbang dang yang / /de bzhin brda yi skad nyid dang / /dga' dang skad cig dbye ba dang / /gzhan yang bza' ba la sogs pa/ /de la sdom pa gsungs pa ni/ /zhes bya ba smos te/ 'di ltar kye'i rdo rje ni mtshon pa yin la/ de bzhin du gtsug lag gi rgyud thams cad kyi sdom pa ni gang /dbang ni gang / dga' ba ni du/ skad cig gi dbye ba ni gang / rnal 'byor gyi bza' ba ni ji lta bu yin pa ma 'ongs pa'i skye bo rnams la phan pa'i phyir/ bcom ldan 'das kyis gsungs zhes sbyar ro/ /de la/ sangs rgyas kun gyi sdom pa ni/ /e waM rnam par rab tu gnas//e waM rnam pa'i bde chen po/ /dbang las yang dag shes par 'gyur/ /zhes bya ba la don 'di yang rtsa ba'i rgyud nyid las/ nga ni mya ngan 'das rjes su/ /nyan thos byis pas rtogs bya'i phyir/ /lag na rdo rje la sogs la/ /chos kyi thog mar e waM skad//'khod cig ces pa drang ba'i don/ /nga ni mya ngan 'da' ba med/ /nga ni rdo rje lta bu'i sku/ /dus rnams kun du nga 'dug ste/ /byis pa rnams la 'pho bar bstan/ /de lta bu ni drang ba'i don gyi gleng gzhi'o/ /nges pa'i don du ni/ e waM zhes pa pha dang ma/ /e waM nyi zlar rab tu bstan//e waM khrag dang khu ba dngos/ /e waM g.yas dang g.yon pa yin/ /e waM ling+ga skye gnas brjod/ /e waM thabs dang shes rab ste/ /e waM bde sdug kun gyi gzhi/ /e ni lte ba spyi bo waM/ /zhes bya ba gsungs te/ nges pa'i don to/ /de nas rnal 'byor ma rnams kyis bcom ldan 'das rdo rje sems dpa' la 'di skad ces gsol to zhes bya ba ni sgra ji bzhin par bstan pa'o//bcom ldan ston pa 'gro ba'i bla/ /mkha' 'gro ma yi sdom pa nyid/ /e waM rnam pa ci zhig lags/ /rim pa ji ltar bshad du gsol/ /zhes bya ba ni mkha' 'gro ma rnams kyis bcom ldan 'das kye'i rdo rje/rdo rje sems dpa'i rang bzhin la mngon du bos nas mkha' 'gro ma'i bde ba'i sdom pa dang / yi ge e waM gyi don ji ltar lags pa kho mo cag gis mi 'tshal gyis/ de bshad du gsol zhes pa'i don to/ /de'i lan du gsung bar bzhed nas/ bcom ldan 'das kyis bka' stsal pa/e yi cha byad bzang po gang / /zhes bya ba la sogs pa gsungs te/ 'di ltar bdag med ma dang ri khrod lo ma can la sogs pa'i rnal 'byor ma khyed rnams nyon cig /'di ltar e zhes bya ba sangs rgyas thams cad kyi gsang chen yin la/ de nyid rnal 'byor ma khyed rnams nyid kyi lus kyi dbus na/gru gsum 'bar ba'i cha byad du gnas shing / de nyid kyi dbus na srid pa gsum gyi bde ba thams cad 'dren par byed pa bum pa bzang po la dpag bsam gyi shing gi kha rgyan gyis brgyan pa/ dri ma med pa'i chu yis bkang ba lta bu gnas pa yin te/rigs kyi bu mo dag 'di ni/ /e yi cha byad bzang po gang / /dbus su waM gyi rnam pas brgyan/ /bde ba thams cad kyi ni gnas/ /sangs rgyas rin chen za ma tog /ces bya ba yin te/ 'di ltar 'di nyid ni 'jig rten gsum gyi bde ba thams cad kyi gzhi rten dang /rnal 'byor ma rnams kyi bde ba'i sdom pa'i gnas dang / dka' thub can rnams kyi tshul khrims bsrung bar bya ba'i gzhi yin la/ sangs rgyas rnams kyi bde ba rin po che'i gzhal yas khang pa zhes kyang btags so/ /de bas na las kyi dang por gtogs pa gnyis sprod pa'i bde bas sangs rgyas par 'dod pa rnams kyis kyang /gzhi 'di la brten te/ skad cig ma bzhis phye ste bla ma'i lung bzhin du 'jug par byas na tshe 'di nyid kyis rdo rje 'chang chen po'i go 'phang 'thob ces gsungs so/ /de la dgongs nas bcom ldan 'das kyis kyang / skad cig dbye bas phye ba la/ /dga' ba de las skye bar 'gyur/ /skad cig shes nas bde shes pa/ /e waM rnam par rab tu gnas/ /zhes gsungs te/ gleng gzhi dang sdom pa bstan pa'o/ /da ni skad cig bzhi dang dga' ba bzhi la sogs pa bstan par bya ba'i phyir/ sna tshogs dang ni rnam smin dang //rnam nyed de bzhin mtshan nyid bral/ /zhes bya ba ste/ de yang ji skad du/ rtsa ba'i rgyud las/ lugs dang lugs bzlog khyad par las/ /sna tshogs sum cu rtsa gnyis gnas/ /rnam par smin pa bcu drug na/ /brgyad kyi gnas nas rnam nyed nyid/ / bcu drug bzhi gnas mtshan nyid bral/ /sa dang chu dang me dang rlung / /rim pa bzhin du shes par bya/ /lugs 'byung rim pa 'di lta ste/ /g.yon na rgyu bar shes par bya/ /lugs bzlog de las bzlog yin te/ /sum cu gnyis gnas mtshan nyid bral/ /g.yas na rgyu bar shes par bya//rten 'brel lugs 'byung lugs las bzlog /dge slong dgra bcom brag pa zad/ /'dod chags dbral bas dbang po thul/ /zhes gsungs so/ /de lta na yang / skad cig bzhi ni rab shes na/ /de nyid rnal 'byor pas shes 'gyur/ /zhes pa ste/ skad cig bzhi'i bye brag ma shes par de kho na nyid du mi 'gyur te/ji ltar phyi yin de bzhin nang / /zhes gsungs pa'i phyir ro/ /'khyud dang 'o byed la sogs pa/ /sna tshogs rnam pa sna tshogs bshad/ /ces bya ba ni 'khyud pa'i skad cig ma ni sna tshogs pa'o/ /de bzhin du'o byed pa dang /'dzum pa la sogs pa dang / na kham rda na la sogs pa thams cad sna tshogs kyi mtshan nyid yin la/ rnam par smin pa ni tha ltag tu 'byung ste/ de'i gong du ni/ rnam par nyid pa bde ba'i ye shes za ba nyid 'byung ste/ bde ba zos pas ni/ rnam par smin pa zhes bya zhing / / rnam par nyed pa'i skad cig gros/ /zhes kyang brjod do/ /mtshan nyid dang bral ba ni gsum las tha dad de/ za ba dang zos pa dang gros la sogs pa dang bral ba'o/ /'di ni bla ma med par rang dgar 'jug pa spang ba'i phyir rgyud du dkrugs te bstan to/ /des na/ rnam par smin pa de las bzlog /bde ba'i ye shes za ba nyid/ /bdag gis bde ba zos pa'o/ /gros ni rnam par nyed par brjod/ /mtshan nyid bral bas gsum las gzhan/ /chags dang chags bral rnam par spangs/ /zhes go bzlog ste rdo rje'i tshig tu gsungs so/ /da ni dga' ba bzhi skad cig ma bzhi dang ldan pa bshad de/sna tshogs dang po'i dga' ba nyid/ /dpral ba'i 'khor lor rab tu bstan/ /smin ma la ni mchog dga' nyid/ /mgrin pa'i 'khor lor rab tu bstan/ /rnam nyed khyad par dga' ba nyid/ /snying ga'i 'khor lor rab tu brjod/ /mtshan bral lhan cig skyes dga' nyid//lte ba'i 'khor lor rab tu bstan/ /rgyun las bzlog pa sngon bzhin du/ /mtshan nyid bral bas bde chen nyid/ /slob dpon gsang ba shes rab dang / /bzhi pa slar yang de bzhin no/ /zhes bya ba ste/ chu sogs bum pa'i mtha' ma can/ /byis pa gzhug phyir slob dpon dbang //gsang ba thob pas dga' ba ni/ /gsang ba'i dbang du yang dag brjod/ /shes rab la reg shes rab dbang / /gsum las gzhan pa bzhi pa ste/ /de bzhin slar yang de bzhin zhes/ /gsungs pa'i phyir na bzhi pa ni/ /gsum pa ma yin gzhan du dpyad//ces pa ni nges pa'i don du rdo rje slob dpon gyi dbang du bshad do/ /de ltar na dbang rnam pa bzhi po drang ba dang nges pa'i don gyi 'jig rten dang 'jig rten las 'das pa zhes bya bar rnam par bzhag go/ /dbang ni bzhi yi grangs kyis ni/ /dga' ba la sogs rim shes bya//zhes gsungs te/ lugs dang lugs las bzlog pa'i khyad par gyis sngon bzhin du khong du chud par bya'o/ /dgod pas dga' ba thob pa ni/ /dgod pa dag la slob dpon nyid/ /lta bas dga' ba thob pa ni/ /lta ba gsang ba de bzhin no/ /lag bcangs dga' ba thob pa ni//lag bcangs la ni shes rab nyid/ /gnyis gnyis sprad las bde thob pa/ /gnyis gnyis 'khyud pa de bzhin nyid/ /de ltar dbang ni rnam pa bzhi/ /phyi dang nang gi dbye ba yis/ /rdo rje slob dpon blo ldan pas/ /slob ma skye bo mchog la bstan/ /sems can rnams kyi dngos grub phyir//dbang ni rnam pa bzhi ru bshad/ /gtor dang blugs pa zhes bya 'dis/ /de ni dbang zhes brjod par bya/ /zhes bya ba ni dag pa dang 'khru bar byed pa'i phyir dbang yin te/ nyon mongs pa'i gdung ba'i dri ma 'khru ba'i phyir ro/ /da ni nang gi slob dpon gyi dbang bstan par bya ba'i phyir/shes rab bcu drug lon pa la/ /lag pa dag gis yang dag 'khrud/ /rdo rje dril bu mnyam sbyor bas/ /slob dpon dbang du rab tu brjod/ /ces bya ba bstan te/ shes rab zla ba 'byung ba yi/ /cha shas bcu drug lo ldan la/ /rang gi rdo rje dag dang ni/ /de yi dril bu sbyor ba yis//bde ba nges par slob dpon dbang / /de bzhin du/ shin tu bzhin bzangs mig yangs ma/ /gzugs dang lang tshos rnam par brgyan/ /mthe bo srin lag dag gis ni/ /slob ma'i kha ru ltung bar bya/ /zhes bya ba ni de ltar bsten pa las byung ba'i rdzas slob ma'i ngag gi lam sbyangs pa gsang ba yin no//de'i rjes la rdo rje slob dpon gyis shes rab de bza' btung la sogs tshim par mchod la slob ma la 'di skad ces bya bas gtad par bya ste/ sems dpa' chen po khyod kyis ni/ /phyag rgya bde dang ldan pa khyer/ /phrag dog khro ba rnam spangs pa'i/ /slob ma cher 'gyur shes nas ni//ston pas de la gnang ba sbyin/ /zhes bya ba ste/ 'di ltar sa dang / chu dang / me dang / rlung gi bde ba 'byung ba'i phyag rgya 'di rigs kyi bu khyod kyis khyer la mchod par gyis shig /ces bya bar bsgo ba'o/ /gzhan yang / kun du ru gyis rdo rje 'dzin/ /zhes pas kun du ru'i sbyor ba'i khyad par yang slob ma de la legs par bstan par bya'o//de bzhin du 'di skad du/ slob mas kyang / bla ma phyag rgyar ldan mthong la/ /bstod dang mchod pa tshul bzhin bya/ /'di lta ste/ bcom ldan zhi ba chen po kye/ /rdo rje rnal 'byor ci bzhed pa/ /mi phyed phyag rgya sgrub pa po//rdo rje rnal 'byor las 'byung ba/ /ji ltar khyed kyi bdag nyid che/ /mnga' bdag bdag la'ang de ltar mdzod/ /'khor ba'i 'dam gyi tshogs dag tu/ /bying ba skyabs med bdag la skyobs/ /zhes bya ba bla ma rdo rje 'dzin pa la slob ma blo dang ldan pas gsol ba btab par byas la//bza' btung gi mchog ba lang dang / med na la sogs pa dang / de bzhin du bdug pa dang / zhal zas dang / phreng ba dang / dril bu dang / rgyal mtshan dang / byug pa la sogs pa'i mchod pa'i rdzas rnams kyis/ rdo rje slob dpon yang dag par mchod par bya'o/ / de'i rjes la bla ma dgyes par gyur pas sna tshogs pa la sogs pa'i skad cig spangs pa'i rjes thogs su slob dpon gyis slob ma de la slar bzhin 'di skad ces/ ston pas smras pa sems dpa' che/ /bde ba chen po rnam par gzung / /ji srid byang chub bar du ni/ /sems can don gyis rdo rje 'dzin//zhes bya bas gang gi gnad kyi gnas srid pa'i bdag nyid can yongs su spangs pa'i srid pa nyid kyi gnas bstan par bya ba ni de kho na nyid do/ /de'i rjes la yang slob ma'i sems kyi kun du rtog pa spang bar bya ba'i phyir 'di skad ces slob dpon gyis brjod par bya'o/ / 'di nyid ye shes chen po nyid/ /thams cad lus la rnam par gnas/ /gnyis dang gnyis su med pa'i tshul/ /dngos dang dngos med bdag nyid gtso/ /brtan dang g.yo ba khyab nas gnas/ /zhes bya ba ste/ 'di lta ste/ rigs kyi bu dus gsum gyi sangs rgyas thams cad kyis rjes su spyad cing kun du gsang la rgyas btab pa 'di ni/khyod kyis rang gi lus kho na la yod par shes par gyis la/ gzhan du som nyi dang dogs pa ma byed cig /de ci'i phyir zhe na/ 'di ltar rdo rje phreng ba zhes bya ba'i rgyud las kyang ji skad du/ rang lus 'gyur ba med pa 'di//mchog gcig gis ni shes bya ste/ /de ni dpe yis nyer mtshon nas/ /bla ma'i kha las rtogs par bya/ /zhes gsungs pa'i phyir/ rigs kyi bu 'di lta ste/ lus can rnams la khu ba'i gzugs kyis gnas so zhes bsgo bar bya'o/ /de bzhin du khu ba de nyid yang dag par 'dod pa dgag cing ring nas mtshon par bya ba'i tshul du bstan par bya ste/slar bzhin 'di skad ces/ sgyu ma'i gzugs can nyid du 'dod/ /dkyil 'khor 'khor lo'i thabs kyis ni/ /rtag tu nges par grol bar 'gyur/ /zhes bya bas bsgo bar bya'o/ /'di ltar rigs kyi bu dag rang gi lus la khu ba gnas par 'di yang sems can thams cad dang bde ba thun mong ma yin pa'i phyir/dngos su 'dis grol ba ni yod pa ma yin no/ /gal te dngos su grol ba lta na ni/ mngon sum nyid du 'gal ba'i phyir thabs dam pa'i tshul du thog mar re zhig rdul tshon gyi gzhal yas khang dang /lag pa'i phyag rgya bcings pa dang / sdom pa bzung ba la sogs pa sngon du 'gro bar bya zhing brtags pa'i rnal 'byor goms pa dang / dus ji srid lon pa na/ lus kyi dkyil 'khor yongs su shes par byas nas snying po'i ro myangs te tshul ltar bstan te grol bar 'gyur ro zhes bstan par bya'o//de yang tshig gong ma 'di dag nyid kyis gsal bar ston te/ de nas rdo rje snying pos/ rang dang lhan cig tu gnas pa'i bar na/ ri khrod lo ma can la sogs pa'i rnal 'byor ma rnams la bzod par gsol nas/ bcom ldan 'das la 'di skad ces gsol to zhes pa nas/rim pa ji ltar bshad du gsol/ /zhes pa yan chad kyis ni rdo rje snying pos zhus pa bstan la/ de'i rjes su bcom ldan 'das kyis lan gsungs pa 'di lta ste/ dkyil 'khor snying po zhes brjod de/ /byang chub sems ni bde chen po/ / zhes bya bas bstan te/ snying po ni bcud len cing 'dzin la rtogs par byed pa'i phyir dang de bzhin du sa dang chu la sogs pa'i tshul gyis srog dang thig le 'khor ba'i phyir 'khor lo zhes gsungs pa 'di lta ste/ 'khor ba'i snying po zhes brjod de/ /byang chub sems ni bde chen po/ / zhes bya bas bstan te/ snying po'i bcud len cing 'dzin la rtogs par byed pa'i phyir dang / de bzhin du sa dang chu la sogs pa'i tshul gyis srog dang thig le 'khor ba'i phyir 'khor lo zhes brjod do/ /'di ltar/ dang po mthar byed ces bya ba/ /'dus pa'i dkyil 'khor nyid du brjod/ / ces bya ba gsungs te/ gnas gang du srog gi rlung dang khu ba'i thig le dag 'dus pa'i gnas de ni snying po zhes su brjod de/ de ltar yang / 'khor lo zhes bya nam mkha'i khams/ /yul la sogs pa rnam par sbyang / /zhes pa ste/ de nyid shes par 'gyur ba'i mthun pa'i dpe ston pa ste/gnas kyi pad+ma nam mkha'i khams/ /zhes bya ba la/ skyes bu rnams kyi ling+ga dang / /phan tshun sprad pa'i dus las mtshon par 'gyur te/ de'i phyir/ bo la ka k+ko la sbyor bas/ /de yi bde ba shes par 'gyur/ /zhes gsungs pa'i phyir ro/ /de bzhin du yang slar bcom ldan 'das la rdo rje snying pos kye'i rdo rjer gnas pa rnams la sdom pa dang dam tshig ji ltar gnas par bgyi ba bcom ldan 'das la zhus pa dang /bcom ldan 'das kyis bka' stsal pa/ khyod kyis srog chags gsad par bya/ /gang phyir srog ni sems su brjod//sems ni rlung dang khu ba yin/ /sems gcig srog chags gsod pa nyid/ /gzhan du ma yin gnas de ru/ /brdzun gyi tshig kyang smra bar bya/ /'jig rten bsgral ba zhes bya ba/ /brdzun gyi tshig tu rab bsgrags te/ /de yang ma yin gzhan du spyad/ / bdag gi srog rlung thos pas na/ /cig car 'gro kun skad kyis ni/ /gang dang gang la de dang de/ /mthun pa'i chos ston brdzun gyi tshig /khyod kyis ma byin par yang blang / /btsun mo'i khu ba ma byin pa/ /rang la yod pa'i bud med mchog /ma byin blang gi gzhan du min//pha rol bud med bsten par bya/ /rdo rje sems sogs gzhan bud med/ /mchog tu bsten gyis gzhan du na/ /dri ma rab ldan mi mo min/ /zhes bya bas nges pa'i don gyi sdom pa bstan to/ /de nas yul dang yul can phung po dang / khams dang skye mched dang gzugs sgra dri ro reg bya la sogs pa thams cad phan tshun 'dus pa nyid dkyil 'khor gyi 'khor lor gsungs pa la/rnal 'byor ma rnams kyi phung po dang khams dang skye mched la sogs pa yul dang yul can rnam pa nyid ma 'tshal nas bcom ldan 'das la zhus pa/ yul de rnams kyang ci lags zhes pa nas/'di rnams kyi rang bzhin ci lags zhes pas bstan la/ de la bcom ldan 'das kyis bka' stsal pa/ 'di lta ste/ yul drug ni/ gzugs sgra de bzhin dri dang ni/ /ro dang de bzhin reg dang / /chos kyi khams kyi rang bzhin nyid/ /'di rnams yul ni drug tu brjod//ces bya ba smos te/ yul gzugs las u zhes pa ste mchu las 'byung ba dang / sgra la aHzhes pa ste gre ba las 'byung ba dang / dri la a la zhes pa ste so las 'byung ba dang / ro la ar zhes pa ste spyi bo nas 'byung ba dang / rig pa e zhes pa ste rkan las 'byung ba dang /chos kyi khams las A zhes pa ste gre ba las 'byung ba dang drug po rnams yul drug gi rang bzhin yin te/ a i r-i u laM aM zhes pa drug ni mtshan nyid can dang / de bzhin du a i r-i u l-i aHzhes pa rnams thabs dang shes rab kyi tshul can dag ni phyi dang lus dang gzhan thams cad la grub pa'i phyir dbang po drug dang /khams drug dang / phung po drug po la sogs pa gang du bstan pa rnams ni rang bzhin de lta bu yin te/ de ltar yang yul drug dang dbang po drug ni skye mched bcu gnyis su 'gyur zhing / de bzhin du khams kyi phye bas ni khams bco brgyad du rnam par gzhag go//de ltar bstan pa rnams ni rnal 'byor ma khyed rnams kyis go bar bya ba'i ched du kun rdzob kyi dngos por bstan zhes bya ba'i don to/ /de rnams kyi rang bzhin ji ltar yin zhe na/ rang bzhin gdod nas ma skyes pa/ /brdzun min bden min de bzhin du//thams cad chu zla lta bur ni/ /gdod nas rnal 'byor mas shes kyis/ /zhes bya ba la 'di ltar yul dang dbang po la sogs pa de rnams thog ma ni ji ltar su yis gang nas bskyed/ mtha' mar ni su yis ji ltar gang du brlag ce na 'di ltar skyed par byed pa dang / rlag par byed pa dag ni yod pa ma yin te/gdod nas rang bzhin gyis dag pa'i phyir/ khyed kyis kyang de ltar shes par gyis shig ces pa'i tha tshig go/ /'di lta ste dper na/ gtsub shing dang gtsub stan dang skyes bu'i lag pa'i rtsol ba las glo bur du me 'byung bar 'gyur te/ me de ni gtsub shing la yang mi gnas/gtsub stan la yang mi gnas/ skyes bu'i lag pa la yang mi gnas te/ rnam pa thams cad du yongs su btsal na gcig la mi gnas pa'i phyir/ me de bden pa yang ma yin/ brdzun pa yang ma yin pa de ltar chos thams cad rnal 'byor ma rnams kyis yid la gyis shig ces bya ba ste/de ltar na de bzhin nyid gang yin pa de ni phung po dang / khams dang / skye mched dang / yul rnams kyang ma yin la de las gzhan du yang btsal bar mi bya zhes pa'i don to/ /de nas rnal 'byor ma bdag med ma la sogs pa rdo rje mkha' 'gro ma thams cad bdud rtsi lnga thogs shing /dam tshig gi rdzas thogs nas bcom ldan 'das rdo rje sems dpa' la mchod pa byed cing kun du ru'i sbyor bas rjes su chags par byed/ bdud rtsi lnga'i ro yang 'thung bar byed do zhes pa ni chos thams cad kyi de bzhin nyid dngos po rnams la gnas pa yang ma yin/mi gnas pa yang ma yin zhes bya ba la sogs pa'i rdo rje'i tshig bcom ldan 'das kyis gsungs pa'i don rtogs shing khong du chud nas/ bcom ldan 'das la yul rnams kyis mchod cing bdag cag rnams kyang yul rnam pa za bar byed ces bya ba'i don to/ /de nas bcom ldan 'das dgyes nas rang byin gyis brlabs pa bstan pa/ kye kye rdo rje mkha' 'gro ma/ /sangs rgyas kun gyis phyag mdzad ma/ /de nyid bdag gis gsang mdzad pa/ /rdo rje mchod pa'i byin rlabs kyis/ /bshad kyis 'dod pas rab tu nyon/ / zhes bya ba ni/ de ltar bden pa gnyis kyis chos kyi tshul zab mo 'di rnal 'byor ma rnams la bstan pa khong du chud pas/ bcom ldan 'das dgyes te slar bzhin spyod pa'i khyad par bstan par bzhed nas tshig de dag gsungs zhes bya ba'i don to/ /spyod pa'i khyad par yang 'di lta ste//bza' btung ji ltar rnyed pa dang / /'gro dang 'gro min mi spang zhing / /khrus dang gtsang sbra mi bya ste/ /grong gi chos ni rab tu spang / /blo ldan sngags ni mi bzla zhing / /bsam gtan nyid ni dmigs mi bya/ /zhes bya ba nas/ byang chub sems kyis rab tu bza'/ /zhes bya ba yan chad kyis bstan te/rtog pa las de bzhin nyid mi skye bas/ rtog pa thams cad rab tu spangs la gang ci dgar gnas par bya'o/ /de ci'i phyir zhe na/ gang zhig nye bar dmigs pa de thams cad rang bzhin gyis dag pa'i snying po yin pa'i phyir ro/ /de nyid kyi phyir gnyis su med pa'i ye shes kyi sems dang ldan pa la mi bza' ba dang /mi btung ba dang / mi dpyad pa dang / mi lta ba dang / mi myang ba gang yang yod pa ma yin pa'i phyir ro/ /de bzhin du/ rang byung me tog rnyed nas ni/ /pad+ma'i snod du bzhag pa dang / /zhes bya ba bud med kyi skye gnas las byung ba'i khrag thod pa'i nang du bzung la/lud pa dang ni snabs dag gis/ /bsres nas brtul zhugs can gyis btung / /zhes bya ba ni 'jig rten pas smad pa'i lud pa dang snabs la sogs pa gong gi khrag dang bsres la byis pa'i skye bo dam tshig can rnams la yang bza' ru gzhug ste/ skra dkar dang gnyer ma la sogs pa yang sel bar byed do//des ni rnal 'byor pa byis pa'i rang bzhin can rnams 'dren par 'gyur la/ gzhan yul dang yul can gcig tu gyur pa las khams rnams phyir mi 'byung zhing nyi ma'i cha 'og tu 'gro ba ni nges pa'i don to/ /smad g.yogs kha dog sna tshogs dang //zhes bya ba la sogs pa'i tshig dag ni spyod pa'i le'u dag tu rgyas par bstan to/ /gzhan yang dbang po drug gi grangs gang gi rigs gang yin pa ma bstan cing rnam par dag pa med pas/ thams cad yul gyi rnam dag pas/ /bcom ldan 'das kyis sngar gsungs na/ / nges par dbang po drug gi grangs/ /rnam par dag par ma mdzad pa/ /zhes bya ba ni rdo rje snying pos zhus pa la slar bcom ldan 'das kyis lan gsungs pa ni/ mig la gti mug rdo rje ma/ /zhes bya ba la sogs pa smos te/ don 'di yang rtsa ba'i rgyud las ji skad du/ mig la gti mug rdo rje ma//yi ge ar ni rab tu bstan/ /rna bar zhe sdang rdo rje ma/ /yi ge aM gis rab tu bstan/ /sna la ser sna ma zhes bshad/ /yi ge e yis rab tu bstan/ /kha la 'dod chags rdo rje ma/ /yi ge u yis rab tu bstan/ /lus la phrag dog rdo rje ma/ /yi ge l-i yis rab tu bstan//yid la bdag med rnal 'byor ma/ /yi ge a yis rab tu bstan/ /dbang bo rnams ni dag pa'i phyir/ /'dis ni go cha sems dpa' che/ /zhes bya ba gsungs pas rtogs par bya'o/ /rdo rje snying pos gsol pa/ dgongs pa'i skad ni ci zhes bgyi/ /rnal 'byor ma yi dam tshig che//nyan thos la sogs mi shes pa/ /zhes bya ba la/ kye bcom ldan 'das kye'i rdo rje la gnas pa'i rnal 'byor pa rnams kyis nyan thos dang rang rgyal dang / mu stegs la sogs pa'i byis pa'i skye bo rnams kyi nang du mchis pa'i tshe/ gsang ba'i brjod pa la sogs pa ji ltar bgyi zhes zhus pa'o//de bzhin du/ dgod dang lta ba dag dang ni/ /'khyud pa de bzhin gnyis gnyis dang / /rgyud kyang de bzhin rnam pa bzhir/ /dgongs pa'i skad ni ma bsgrags pa/ /bcom ldan nges par gsung du gsol/ /zhes bya ba yang / de bzhin du gang du 'dod chags kyi gnas der dgod pa'i bde ba dang /lta ba'i bde ba dang / 'khyud pa'i bde ba dang / gnyis kyis gnyis sprod pa la sogs pa'i bde ba'i brda dag kyang bshad du gsol zhes ba'i don to/ /lan bcom ldan 'das kyis gsungs pa 'di lta ste/ rdo rje snying po khyod nyon cig /ces gsungs nas brda 'di dag gsungs so//de yang rtsa ba'i rgyud nyid la 'jug par bya'o/ /ma dan chang ba la sha/ /phyi dang nang gi bye brag gis/ /tshig 'di kun la rab tu sbyar/ /khu ba'i bde ba myos byed chang / /sngon du bshad pa'i dbang po rnams/ /phyi ru mi 'gro sha ru brjod//'du ba ma la ya dzar brjod/ /rigs dang rigs min las byung ba/ /'khor lo bzhi yi bdag nyid can/ /rang rang gnas su 'du ba'i phyir/ /ma la ya dza zhes su brjod/ /'gro ba khe Ta ro zhes pa/ /dus kyi me yis gnas gang nas/ /mun pa'i gnas su 'gro ba ste/ /'od zer glog stong 'khyug pa 'dra//de la khe Ta ro zhes zer/ /rus pa'i rgyan ni ni raM shu/ /cha shas med cing brjod pa spangs/ /tshig gi yul las rnam par 'das/ /khu ba'i bde ba gang yin pa/ /de la ni raM shu zhes grags/ /'ong ba phreM kha Na ru brjod/ /zla ba'i lam ni g.yon phyogs nas//gang gis bskul te 'ong ba ste/ /lha dang mi sogs smin par mdzad/ /phre kha Na zhes de la grags/ /cang te'u kr-i bI ta ru brjod/ /srog gi rlung ni cang te'u'i sgra/ /mi shigs lam la rab tu gnas/ /rnal 'byor gang gis thos 'gyub ba/ /kr-i bI ta zhes rnam par bshad/ /skal med du du ra zhes brjod//rnal 'byor brtse ba rab dman pa/ /bcu drug cha gang 'phro bar byed/ /de ni snying rjes dman pa ste/ /du du ra zhes brjod par bya/ /skal ldan kA li ny+dzar ra brjod/ /bdag gi thod pa'i bde ba gang / /tshangs dbang khyab 'jug 'dod lhas kyang / /kun du 'phrog par mi 'gyur la/ / dam par 'dzin te kA li ny+dzA/ /reg min Di N+Di ma zhes brjod/ /bdag med ma sogs rnal 'byor ma'i/ /rang bzhin cha shas bcu drug can/ /bdag tu mi 'dzin bsdigs par byed/ /Di N+Di ma zhes rab tu bsgrogs/ /thod pa pad+ma b+ha dza naM/ /gang gis rgyun gyis lus skyong byed/ /de med de ni yod mi 'gyur/ /'jig rten gsum gyi mnga' bdag gang / / de ni pad+ma b+ha dza naM/ /bzang ba tr-i p+ti ka zhes bya/ /sngar bshad yul gyi dngos po rnams/ /lce yis ma yin kun du za/ /bsam gtan zas kyi ro mchog ni/ /tr-i p+ti ka zhes kun du grags/ /tshod ma la ni tI n+d+hi naM/ /nyi ma zla ba sgra gcan dang / /lug dang ser skya kun spangs ma/ /lam 'dis grub pa rab tu gsal/ /tI n+d+hi naM zhes kun du grags/ / bshang ba tsa tu s+sa mar brjod/ /nyi zla sgra gcan dus kyi me/ /gang du mnyam par tshogs pa na/ /bsam gtan bzhi ni mnyam pa'i phyir/ /bzhi mnyam zhes ni rab tu dran/ /gci ba kha stu ri zhes brjod/ /lus la grub pa'i skyes bu ltar/ /gang la brten te ri dgas kyi/ /lte ba'i dri dang mtshungs pa ni/ /gastu ri zhes brjod par bya/ / rang byung si h+lar shes par bya/ /mi mo gang gi skye gnas khrag /rnal 'byor mkhas pa blo ldan pas/ /tsan+dan dang ni si h+la ltar/ /skyed byed si h+la yin par shes/ /khu ba ka r+pU ra zhes brjod/ /shes rab me chen gang gis su/ /grong khyer rnams ni rab dkrugs nas/ /ga bur kha dog dri ston pa/ / de bzhin ka r+pU ra zhes brjod/ /sha chen sA li dzaM zhes brjod/ /tshul khrims chen po 'chang ba'i mchog /rdo rje lta bu'i lus ldan zhing / /'on te gzhan dag 'dod mos nas/ /mkha' spyod lter ba sA li dzaM/ /dbang po gnyis sbyor kun du ru/ /gtsang ma'i gnas na dbang phyug che/ /bsreg bya zhes pas spyan drangs pas//de gnyis mnyam par 'byor pa la/ /kun du ru zhes de la brjod/ /rdo rje bo l+la zhes bshad de/ /de la brten pa'i ting 'dzin chus/ /ye shes sku ni rab skye zhing / /stobs dang gzi brjid mtshungs med che/ /bo l+la zhes su rnam par bshad/ /pad+ma ka k+ko la zhes zer/ / pad+ma la brten 'jig rten gsum/ /bde ba'i ngang tshul rab tu ldan/ /rdo rje'i sku lus thob mdzad phyir/ /ka k+ko la zhes rab tu bsgrags/ /zhes gsungs pas 'di'i don rtogs par bya'o/ /de ltar brjod pa'i rim pas bsdus pa'i rgyud la ji ltar gnas pa'i tha snyad kyis brda rnams ji lta ba bzhin du blo la gnas par bya ste//don gyi skabs kyis phan tshun du brjod par bya ba yin la/ nges pa'i don gong du brjod pa dag ni blo yis shes par bya ba tsam du zad kyi ji lta ba bzhin du brjod par bya ba ni ma yin no/ /kha dog dbye bas phye ba las/ /rigs ni rnam pa lnga ru bshad/ /'di ni gsang ba'i skad yin no//zhes bya ba ni de ltar bstan pa'i dgongs pa'i skad don chen po dang ldan pa kun rdzob dang don dam du phye ba las yi ge lnga'i dgongs pa las med ces pa'i don te/ /de'i phyir na/ phyag rgya lnga ni bsdus pa nyid/ /ces gsungs pa'i phyir ro/ /rigs de rnams kyang 'di lta ste/ g.yung mo rdo rje'i rigs su bshad//mi bskyod pa zhes nam mkha'i khams/ /gar ma de bzhin pad+ma'i rigs/ /'od dpag med de me yi khams/ /rang 'tshed ma ni rin chen rigs/ /rin chen 'byung ldan chu yi khams/ /skye gnyis de bzhin gshegs par brjod/ /rnam snang mdzad chen sa yi khams//tshos ma las kyi rigs nyid de/ /don yod grub pa rlung gi khams/ /'di rnams phyag rgya'i dngos grub ster/ /'di rnams khu ba rdo rjer 'gyur/ /brtul zhugs can gyis mchod nas btung / /zhes bya ba la drang ba dang nges pa'i bye brag gis rigs 'di rnams las byung ba'i bu mo rnams yongs su shes par bya ste/legs par sbyangs la bde ba'i kun du spyod pas byang chub kyi sems phyung la btung ba la sogs pa byas pas lus rdo rje ltar sra bar 'gyur ro/ /nges pa'i don du phyi dang nang gi rigs gang yang rung ste/ sa bon mi 'bod pa'i ting nge 'dzin gyi brtul ba drag pos ni lus rdo rje ltar 'gyur ba ni de bzhin gshegs pa'i nges pa'o//rdo rje snying po sems dpa' che/ /gsang ba'i skad ni ngo mtshar can/ /nga yis khyod la gang bshad ba/ /de rnams thams cad gus pas gzung / /zhes bya ba ni nan tan bsgrags pa'i tshul du gsungs nas/ gzhan yang la dor ba'i gsung 'di dag bka' stsal te/'di lta ste/ kye yi rdo rje dbang bskur gang / /gsang ba'i skad kyis mi smra na/ /de yi dam tshig nyams par ni/ /'gyur ba 'di la the tshom med/ /de bzhin du dam tshig nyams pa'i rtags su ji ltar 'byung zhe na/ 'che ba dang ni rkun ma dang / /gdon dang rims dang dug dag gis//gal te sangs rgyas gsang ba'i skad/ /mi gsung na yang 'grongs par 'gyur/ /zhes bya ba ni de bzhin du las dang po pa'i rnal 'byor pa rnams kyis skad 'di bsgrags par nges so/ /rang gi dam tshig rigs rnyed na/ /gal te tshig 'di mi smra ba/ /gnas bzhi las 'khrungs rnal 'byor ma//de yi tshe na khro bar byed/ /ces bya ba ni drang ba dang nges pa'i don du rig par bya'o/ /kye'i rdo rje nges pa'i don gyi rgya cher bshad pa las rgyud thams cad kyi gleng gzhi dang gsang ba'i skad kyi le'u'i rgya cher bshad pa ste gsum pa'o// //smra ba'i skyes mchog smra ba'i rgyal//smra ba'i seng ge tshugs pa med/ /mu stegs can rnams skrag mdzad pa/ /bcom ldan kye la bdag phyag 'tshal/ /phyag rgya bsdus pa'i rgya cher 'grel/ /sems can sdug bsngal mun 'thoms la/ /sgron mas gsal bar bya ba'i phyir/ /rgya cher 'grel pa bdag gis bris//de nas rdo rje snying po la sogs pa dang mkha' 'gro ma rnams the tshom du gyur zhes bya ba la sogs pa la gang spyod pa'i le'u las glu gar rnal 'byor pas byas pas dngos grub ster ba'i glu gar dang / lha'i le'u las bshad pa'i zhe sdang la sogs pa'i phyag rgyas gang la gang gis ji ltar gdab pa dang /bdag med ma'i 'khor lor gsungs pa'i sngags kyi yi ge la sogs pa gang lags pa dang / rigs kyi le'u las gsungs pa'i rtsa sum cu rtsa gnyis su gsungs pa'i dgongs pa rnams la/ bcom ldan bdag ni 'khrul gyur pas/ /de rnams rnam dag bshad du gsol//zhes zhus pa dang / bcom ldan 'das kyis bka' stsal pa/ kol+la i riT+Thi zhes bya ba la sogs pa'i glu gsungs te/ de la don 'dir rtogs par bya ste/ /kol+la i riT+Thi a bo lA/ /zhes pas ni gnas dang nye ba'i gnas su bstan to/ /mu m+mu Ni re ka k+ko lA/ / zhes pa ni zhing dang nye ba'i zhing du bstan to/ /g+ha Ne kr-i pi Ta ho bA dz+dza i kA ru Ne ki a i na ro lA zhes pas ni/ tsha n+do dag tu rab tu bstan to/ /ta hiM ba la khAdz+dza i gA D+heM ma a NA bidz+dza a i zhes nye ba'i tsha n+dor bstan to/ /ha le kA li ny+dzar pa Ni a i du n+dur bAdz+dze a i zhes pas ni 'du ba'i sa bstan to//tsa u sa ma ka ts+tshu rI sih+la kAspu ra lA i a i zhes pas ni/ nye ba'i 'du ba'i sa bstan to/ /mA la in+d+ha Na sA liny+dza ta hi b+ha ru khA i a i zhes pas dur khrod bstan to/ /ni raM su aM ga tsA Da wi ta hiM dza sa rA wa pa Ni a i zhes pas ni nye ba'i dur khrod bstan to/ /preM kha Na khe Ta ka ra n+te shu d+d+hA shud+d+ha na mu Ni a i zhes pas ni pI la ba bstan pa'o//ma la ya jo kun+du ru pA Ta i Di N+Di ma ta hin+na bAdz+dzi a i zhes pas ni nye ba'i pI la ba bstan to/ /de ltar brjod pa'i rim pas/ 'di dag sa ni bcu ru bstan/ /'di ltar shes bzhin glu len gang / /de ni dngos grub rgyas 'gyur te/ /he ru ka ni ji bzhin no//zhes rtsa ba'i rgyud las gsungs pas don rtogs par bya'o/ /da ni gar bstan par bya ba'i phyir/ /dran pa mi 'phrogs rnal 'byor pas/ /he ru ka yi gzugs kyis gar/ /chags bral mi gos sems kyis ni/ /'dod chags sems kyis bsgom pa nyid//ces bya ba chags pa'i bde ba la sems gzhan du mi 'phrogs shing snying rje chen po g.yo ba ni gar yin te/ de yang ji skad du/ he ni rgyu sogs rnam spangs pa/ /ru ni tshogs dang bral ba nyid/ /ka ni gang du'ang mi gnas pa/ /he ru ka zhes rab tu grags/ /zhes gsungs pa'i phyir ro//de ltar na chags pa dang bral ba'i skyon gyis mi gos par bdag gzhan gyi don du snying rje chen po g.yo bar bya zhes bya ba'i don to/ /rdo rje chos dang sangs rgyas dang / /zhes bya ba la rdo rje chos ni gsung gi rang bzhin no/ /sangs rgyas ni sku'i rang bzhin te/ de'i shugs kyis thugs kyang shes par bya'o//de ni sku gsung thugs gcig tu bya ba bstan to/ /rnal 'byor ma mo rnams kyis ni/ /glu dang gar ni 'di dag gis/ /legs par glu blangs gar yang bya/ /'di nyid kyis ni dam tshig bsrung / /de bzhin bdag kyang bsrung ba nyid/ /'dis ni 'jig rten dbang du byed//ces bya ba la/ de ltar brjod pa'i glu dang gar de dag gis ni phyi dang nang gi dam tshig dang dngos grub rgyas pa thams cad kyang gsal bar bstan pa yin te/ 'di dag gi rang bzhin ji lta ba bzhin du khong du chud pas 'jig rten gsum yang dbang du byed la sngags kyi bzlas pa yang 'di kho na yin par khong du chud par bya'o//gang du gus pas glu len dang / /gang du gus pas gar byed pa/ /tshogs kyi bdag pos sngar byas nas/ /zhes bya ba'am/ rgyal po'i bka' thob pa'i tshogs kyi 'khor lo chen po yang rung tshogs kyi 'khor lo tha mal pa yang rung / de dag las gzhan pa'i dpa' bo'i ston mo'i dus kyang rung ste/dang por tshogs kyi gtso bos glu blangs la de'i rjes su gzhan dag gis ci bder blang zhes bya ba'i don to/ /tshogs dang dpa' bo'i ston mo de dag gi dus su glu dang gar gyi byin rlabs kyis mtshan ma dang por rnam pa gsum sgog pa'i dri lta bu dang / bar du bya rgod kyi dri lta bu dang / tha ma ga pur gyi dri lta bu 'byung bar 'gyur te/ rdo rje slob dpon gyis mtshon par bya'o/ /de bzhin du glu'i mtshan nyid kyis ngag gi gdangs thog ma dang tha ma gnyis su ngang pa'i rgyal po dang / bung ba'i rgyal po lta bu'i sgras sna drang zhing mtha' brten to/ /bar du ni khyu mchog lta bu'i sgra ste/ra'i sgra lta bu'i rgyas par bya ba'i don te skad cig de nyid la dkyil 'khor ba'i nye 'khor du yang rtags de dag 'byung bar 'gyur ro/ /de lta bas na/ ngang pa dang ni bung ba'i sgra/ /ba lang gtse yi sgra lta bu/ /glu yi mtha' nas mnyan par bya/ /glu yi byin rlabs mtshan nyid kyis//phyi rol mtshal du'ang mtshon par 'gyur/ /zhes gsungs so/ /da ni phyag rgya'i mtshan nyid brjod par bya ste/ ci'i phyir zhe na/ rtags dang rigs dang rgyud dang cho 'brang rnams yongs su dag par ma byas pas/ 'jig rten pa'i bag ma'i bya ba la sogs pa mi byed pa'i phyir te/ gal te yongs su ma sbyangs par 'jig rten pa'i bya ba la 'jug pa de lta na ni 'jig rten pa'i tha snyad kyang med de kla klo yongs su dar bar 'gyur ro/ /de lta bas na rgyud de dang de las kyang / ji ltar phyi rol de bzhin nang / /zhes gsungs pa'i phyir ro/ /de bas/ phyag rgya rtags dang mtshan ma ste/ / 'di yi rigs ni mtshon par bya/ /rigs 'chal bsgom pa'i sbyor ba las/ /sgrub pa po la dngos grub med/ /ces bya ba la sogs pa gsungs te/ gang gi rigs gang yin pa de dang de'i rigs kyi phyag rgyas gdab pa ni de bzhin gshegs pa'i nges pa'o/ /'di'i don yang rtsa ba'i rgyud las ji skad du/zhe sdang phyag rgyas bdag med ma/ /mgon po mi bskyod zhe sdang rigs/ /gti mug phyag rgyas rdo rje ma/ /mgon po snang mdzad gti mug rigs/ /ser sna'i phyag rgyas dkar mo nyid/ /ser sna mgon po rin chen 'byung / /chags pas chu ma phyag rgyas gdab/ /chags pa'i mgon po dpag med rigs//phrag dog phyag rgyas mkha' 'gro ma/ /phrag dog don yod grub pa'i rigs/ /de bzhin mtshams sogs lha mo yang / /sa dang chu dang me rlung phyir/ /rim pa bzhin du phyag rgyas gdab/ /ces gsungs pas don khong du chud par bya'o/ /de bzhin du/yang ni dkar mo zhe sdang gis/ /zhes pa nas/ 'dod chags phyag rgyas mkha' spyod ma/ /'dod pas phyag rgya shes par bya/ /zhes bya ba yan chad kyang gong bzhin rtogs par bya ste/ yul dang yul can gyis phye ba tsam du zad do/ /da ni bdag med ma la sogs pa lha mo bco lnga'i sa bon bstan par bya ba'i phyir/A li dang po bdag med ma/ /zhes bya ba la sogs pa smos te/ bdag med ma'i sa bon ni a'o/ /A li gnyis po rdo rje ma'i sa bon ni A'o/ /a li gsum pa dkar mo'i sa bon ni i/ bzhi pa bcu'i rnal 'byor ma'i sa bon ni I/ lnga pa rdo rje mkha' 'gro ma'i sa bon ni u/ de ni nang gi 'phar ma'o/ /phyi'i 'phar ma bshad par bya ste/ drug pa pu k+ka sI'i sa bon ni U/ bdun pa ri khrod lo ma'i sa bon ni r-i/ brgyad pa sme sha can gyi sa bon ni r-I/ dgu pa g.yung mo'i sa bon ni l-i/ /yang ni lnga gnyis dkar mo nyid//ces gsungs so/ /bcu pa dkar mo'i sa bon ni l-I/ bcu gcig pa chom rkun ma'i sa bon ni e/ bcu gnyis pa ro langs ma'i sa bon ni ai/ bcu gsum pa g+ha sma rI'i sa bon ni o/ /bcu bzhi pas spyod ma'i sa bon ni au/ /bco lnga pa mkha' spyod ma'i sa bon ni aM ngo / / rnal 'byor ma yi sa bon nyid/ /ces bya ba ni de ltar brjod pa'i sa bon rnams bdag med ma la sogs pa'i lha mo bco lnga'i sa bon yin zhes bya ba'i don to/ /rigs kyi le'u las rtsa rnams gang / /bcu drug gnyis kyis bdag nyid gsungs/ /rtsa ni gnyis gnyis rnal 'byor ma/ /re re rnam pa gsum du brjod//ces gsungs te/ 'di ltar rtsa gsum cu rtsa gnyis kyis rigs kyi le'ur bstan pa gang yin pa de ni srog dang sems mnyam du rgyu ba'i phyir/ thabs dang shes rab kyi dbye bas rtsa gnyis gnyis shing rnal 'byor ma re re ste lha mo bco lnga'i bdag nyid yin la/ /brkyang ma ro ma kun 'dar ma//bdag med rnal 'byor ma zhes brjod/ /ces gsungs pa'i phyir sum cu rtsa gnyis pa ni phyi dang nang kun du bya bas yongs su gtong ba yin pa'i phyir kun du spang bar bya ste/ bdag med ma la dbul bar bya'o/ /de yang / gang phyir bcu drug cha med pas/ /'bad pas kun gyi lhag ma spang //zhes gsungs te/ tshes bcu drug pa med pa'i phyir/ de skad ces bya ba la/ gang yang bcu drug ces grags pa ni mar ngo'i tshes gcig yin pa'i phyir ro/ /de ci'i slad du zhe na/ don gyi bya ba mi byed phyir/ /zhes bya bas gsal bar rab tu bstan pa yin no/ /de yang bsdus pa'i rgyud 'di nyid las//cha shas bco lnga'i bdag nyid can/ /byang chub sems rnams zla bar 'gyur/ /rnal 'byor ma rnams de yi cha/ /bde ba chen po A li'i gzugs/ /zhes gsungs so/ /de bzhin du/ stong pa chen po yi ge lnga/ /zhes pa'i dus su yi ge lnga po'i dbyibs lta bur gnas pa thig le dang rnam par gcad par bya ba dag gis kun du mdzes par 'gyur ba'i phyir ro//rnal 'byor byis pa'i blo can dag 'di skad ces ci ste/ A li yang bcu drug tu gsungs la thig le dang dga' ba 'pho ba yang bcu drug tu gsungs pa ma yin nam/ de ci'i phyir zhe na/bcu drug pa dang sum cu rtsa gnyis pa spang zhes sems pa de ni ma yin te/ 'di ltar de bzhin gshegs pas byis pa'i skye bo rnams la dgongs nas/ sku gsung thugs ye shes kyi dbye bas phye ste/ ngo bo nyid dang / chos dang longs spyod rdzogs pa dang sprul pa'i sku ste/ sku bzhi rnams la dgongs nas dga' ba bcu drug tu gsungs so//de bzhin du A li bcu drug dang / thig le bcu drug dag ni dngos su yod pa ma yin te/ cha gnyis gsal bar byed pa'i phyir sgra gcan nam/ ma ning lta bu yin no/ /de bas na sum cu rtsa gnyis dang / bcu drug pa'i 'khrul pa spang ste/gzhan du na dogs pa mi bya'o/ /rdo rje snying pos gsol pa/ rnal 'byor ma kun las byung ba/ /lhan cig skyes dga'i rang bzhin can/ /'grib med btung mchog nam mkha' nyid/ /ga pur nges par cis mi spang / /zhes bya ba gsol te/ /de lta bas na rnal 'byor ma bco lnga'i bdag nyid can gyi khu ba byang chub kyi sems btung ba'i mchog nam mkha' lta bu'i bde ba rgyun mi 'chad pa lus ngag yid gsum bsil bar byed pa'i slad du ga pur lta bu 'di cis kyang mi spang bar bsgrub par bgyi'o zhes bya ba'i don to//bcom ldan 'das kyis tshul dang mthun pa'i lan gyis ji skad smras pa de bzhin no zhes gsungs so//rdo rje snying pos gsol pa/ thabs gang gis byang chub tu sems bskyed par bgyi zhes bya ba ni 'di lta bu'i byang chub kyi lam la 'jug pa'i go rims ji ltar bslab par bgyi zhes bya ba'i don to/ /bcom ldan 'das kyis bka' stsal pa/dkyil 'khor 'khor lo'i thabs dang ni/ /rang byin brlab pa'i rim pas kyang / /kun rdzob don dam gzugs can gyi/ /byang chub sems ni rab tu bskyed/ /ces bya ba slar gsungs pa/ sngon du thun mong gi sdom pa gzung ba dang / rdul tshon gyi nang du drang ba dang /bla mas rdo rje slob dpon gyi dbang zhes bya ba rnam pa bdun gyis byin gyis brlabs la gdod kun rdzob dkar po dang / de las 'byung ba'i bde bas sems bskyed par bya zhes bya ba'i don to/ /de yang 'di ltar/ kun rdzob kun+da lta bu nyid/ /don dam bde ba'i gzugs can no/ /zhes bya ba la re zhig kun rdzob nyid du khu ba ni kun rdzob byang chub kyi sems yin la/de la brten pa'i bde ba don dam pa zhes su tha snyad gdags so/ /phyi nas 'chor ba med pa'i bde ba las byung ba'i de kho na nyid la don dam pa'i gzugs can te/ nges pa'i don to/ /bud med ko la bde ba can/ /e waM rnam pa'i rang bzhin du//bde ba bsrungs pa kho na las/ /bde ba can zhes rab tu bsgrags/ /zhes bya ba la kun rdzob tu mi mo'i chu skyes dang skyes bu'i ling+ga dag phan tshun du gtsubs pa las/ bde ba 'byung ba'i phyir bde ba can zhes bsgrags par bya'o/ /bde ba de nyid de kho na nyid kyi lcags sgrog gis bsdams pa las rdo rje lta bu'i sku thob pa ni nges pa'i don to//bsdus pa'i rgyud 'di nyid las/ sangs rgyas byang chub sems dpa' dang / /rdo rje 'dzin pa rnams kyi gnas/ /'di nyid 'khor ba zhes bya ste/ /'di nyid mya ngan 'das pa nyid/ /'khor ba spangs nas gzhan du ni/ /mya ngan 'das pa rtogs mi 'gyur//zhes gsungs te/ gong du brjod pa'i kun+da lta bu khye'u dang bu mo'i rten bskyed pas ni/ 'khor ba gzugs dang sgra la sogs/ /'khor ba tshor ba la sogs pa/ /'khor ba dbang po rnam nyid de/ /'khor ba zhe sdang la sogs pa/ /zhes bya ba yin la/ ku n+da lta bu khye'u dang bu mo'i rten rab tu bcad de/bsrungs pa las/ 'di rnams chos ni mya ngan 'das/ /zhes bya ba min zhing / 'khor ba spangs nas gzhan du ni/ /mya ngan 'das pa rtogs mi 'gyur/ /zhes pa ni nges pa'i don nyid do/ /de bas na de'i phyir/ rmongs phyir 'khor ba'i gzugs can nyid//ces bya ba rmongs pa rnams la dus kyi pho nya mos 'dzin pa'i phyir dang / dus kyi me 'bar bas kun+da lta bu kha thur du bltas pas gsod par byed pa nyid do/ /rmongs med 'khor ba dag bas ni/ /'khor ba mya ngan 'das par 'gyur/ /zhes bya ba la/ gang kun+da lta bu ste rgyu ba 'gags pa ni rmongs pa med pa ste/lte ba dang / snying ga dang / mgrin pa dang / dpral ba rnams su rten 'brel lugs las bzlog ste/ gnas dang gnas su thim pa na/ /'khor ba mya ngan las 'das pa/ /zhes brjod do/ /de'i phyir na yang / byang chub sems ni mya ngan 'das/ / kun rdzob don dam tshul can no/ /zhes gsungs so/ /gzugs dang lang tshos rnam par brgyan/ /sngo bsangs dal la rigs bzangs ma/ /si h+la ga pur 'byung ba'i gnas/ /rang gis dbang bskur kye'i rdo rje/ /zhes bya ba la sogs pa ni/ kun rdzob kyi tshul can ma bde ba rtogs par byed pa'i phyag rgya zhes tha snyad gdags te sngon du rgyas bar bstan to//de bzhin du de'i chang ni lhan cig skyes pa ste/ bdag dang gzhan gyi don du btung bar bya ba nyid de mdor bstan pa'o/ /btung ba ni drang ba dang nges pa'i don gyi dbyangs rnam pa gnyis te/ drang ba'i don du ni dngos su ro ldan gyis blang ba yin la/nges pa'i don du ni ling+ga'i ro ldan gyis blang ba ni nges pa'o/ /de'i phyir/ bo la ka k+kol ra bkod nas/ /kun du ru bya brtul zhugs can/ /de ru sbyor ba las byung ba/ /ga bur mkhas pas mi spang ste/ /de phyir lag tu mi blang zhing / /nya phyis dung chos nyid du min/ /nges par blo dang stobs kyi phyir//'chi med lce yis blang bar bya/ /zhes bstan to/ /ga bur nyid ni bdag med ma/ /bde ba bdag med tshul can nyid/ /de yi bde ba phyag rgya che/ /zhes bya ba la thig le'i ga bur bco lnga po la brten nas phyag rgya chen po bdag med ma'i mtha' rtogs pa'i phyir/ bdag med ma zhes gdags so/ /lus can rnams kyi lte ba'i dkyil 'khor na dbyangs kyi yi ge dang po nyid a'i tshul du gnas la/ de las sbyor ba gang gi dus su dus kyi me 'bar bar byed cing khams gsum po thams cad sreg par byed de/ phyogs bcu na bzhugs pa'i sangs rgyas thams cad kyang bsregs nas/rang gi gnas su 'ong bar byed pa 'di ni thams cad kyi rgyu can no/ /de'i phyir na yang / lte ba'i dkyil 'khor dag tu gnas/ /dbyangs yig dang po'i rang bzhin te/ /blo zhes sangs rgyas rnams kyis brtags/ /zhes bya ba gsungs la/rtsa ba'i rgyud las kyang ji skad du/ lus can thams cad 'khrig pa na/ /'gro dang 'ong ba'i byed pa dang / /bde dang sdug bsngal ma lus pa/ /'di nyid kyis ni byed par brjod/ /ces gsungs te thun mong gi chos so/ /de las blo zhes pa ni shes rab kyi ming gi khyad par yin la/des so sor 'bigs shing gcod pa'i las byed pa'i phyir/ shes rab ces sangs rgyas rnams kyis gsungs so/ /rdzogs pa'i rim pa'i rnal 'byor las/ /de nyid bcom ldan shes rab ma/ /zhes bya ba la gang du 'jig rten lta bu las 'das te/ yid nang du chud pa'i dus de na 'pho ba med pa'i gnas te/de nas 'bar te mtshan mar rtogs pa thams cad sreg par byed do/ /de ni ji skad du/ shes rab nges 'bigs zhes bya ba/ /ting nge 'dzin zhes grags pa ste/ /des ni phyag rgya 'grub 'gyur bas/ /bsgoms na myur du 'grub bo zhes/ /bcom ldan shes rab mchog gis gsungs//zhes gsungs pa dang / de ltar na thog ma dang / tha ma dang / dbus rnams su mtshan ma'i spros pa las grol ba ni bdag med ma yin te/ de ni ring min thung ba min/ /gru bzhi ma yin zlum po min/ /dri dang ro dang mya ngan 'das/ /lhan cig skyes dga'i byed pa can//zhes smos te/ de ni zhes bya ba/ dang po'i dbyangs yig rang bzhin te/ /zhes bya ba dang sbyar te 'jig rten dang 'jig rten las 'das pa thams cad kyi byed pa po yin zhes pa'i tha tshig go/ /de bzhin du rang bzhin dang skyes bu la sogs pa du mar rtogs pa'i byed pa po yang yin te/ 'di ltar mu stegs shes rab 'chal ba can rnams ji skad du/ sa chu me rlung nam mkha' dang / /dus dang phyogs dang bdag dang yid/ /rdzas ni dgu yi bdag nyid de/ /dngos kun 'di yi rang bzhin yin/ /zhes pa dang / de bzhin du/ rdzas dang yon tan las dang ni/ /spyi dang khyad par cha shas rnams//tshig gi don ni drug yin te/ /de dag las ni 'di 'byung ngo / /zhes tha snyad du mar 'dogs so/ /de las skyes pa'i rnal 'byor ma/ /de yi bde ba za ba nyid/ /de dang lhan cig phyag rgya che/ /bde ba ster ba'i dngos grub 'gyur/ /zhes bya ba la dang po'i dbyangs yig gis bskyed pa'i bde ba za ba'i phyir dang /dbyangs yig de dang de las 'byung ba'i bde ba phyag rgya chen po rtogs shing de'i tshul gzhan la yang ster ba'i phyir 'di skad ces bya'o/ /ji ltar sbyin par bya zhe na/ gzugs sgra de bzhin dri dang ni/ /ro dang de bzhin reg bya nyid/ /chos kyi dbyings kyi rang bzhin yang //shes rab nyid kyis dpyad par bya/ /zhes pas byin te/ phyi dang nang gi dbye bas phye la phyir ni mi mo'i bde bar bsdu ba'i tshul du sbyin no/ /nang du A li kA li 'byor pa'i bdag nyid kyis sbyin par bya'o/ /de yang 'di nyid las/ ji skad du/ A li kA li sbyor ba las/ / phyi rol gyis ni gnyis gnyis bkag /ces gsungs pa'i phyir ro/ /de nyid lhan cig skyes pa'i gzugs/ /bde chen bzang po'i rnal 'byor ma/ /zhes bya ba la sogs pa dang / chos kyi dbyings kyi rang bzhin can/ /zhes bya ba la sogs pas ni 'jig rten dang 'jig rten las 'das pa'i tha snyad du tha snyad can gyi dkyil 'khor gyi 'khor lo dang me thab dang phyag rgya bcing ba la sogs pa thams cad kyang lha dang /lha ma yin dang / yi dags dang / dmyal ba dang / 'bu srin dang / phye ma leb la sogs pa thams cad kyi gzhi gang de nyid yin zhes pa'i don to/ /da ni phyi dang nang gi sdom pa dag las phyi'i sdom pa rnams sngon du rgyas par bstan nas/nang gi bde ba'i sdom pa khyad par can bstan par bya ba'i phyir/ /rdo rje snying pos bcom ldan 'das la 'khor lo bsgom pa'i lam dang / phyi nang gi lha thams cad ji ltar 'byung ba thams cad khong du chud de/ sdom pa'ang bdag la bshad du gsol//zhes nang gi bde ba'i sdom pa phyi rol gyi khrims kyi bya ba yongs su gtang bar zhus pa'i don to/ /bcom ldan 'das kyis bka' stsal pa/ rnal 'byor ma yi lus dbus na/ /sdom pa a yi rnam par gnas/ /ji ltar phyi rol de bzhin nang / / sdom pa de nyid rab tu bstan/ /zhes gsungs so/ /de la 'di'i don ni 'di yin te phyi rol gyi ras dang / shan la sogs pa snyigs ma can gyi tshos kyis legs par bsgyur te lus la bcang ba dang / de bzhin du phas pham pa bzhi dang / dge 'dun la rag lus pa'i tshig can gyi lhag ma'i chos bcu gsum dang /ma nges pa'i chos zhes bya ba la sogs pa ji snyed cig bstan pa de dag ni byis pa'i skye bo rnams drang ba'i phyir gsungs so/ /de las gzhan pa gsang sngags kyi lam nyid du spyad pa spyod pa nyid la yang drang ba dang nges pa'i don rgya cher bstan te/ de las/ gang phyir sprul pa gnas brtan nyid//ces pa nas/ skye gnas 'dod chags bral 'gyur dang / /mngal gyi phru ma chos gos nyid/ /ces pa la sogs pa dang / gcer bu skra dang kha spu bregs/ /sngags 'don skyes pa dge slong nyid/ /ces pa la sogs pa rnams phyi rol nyan thos byed pa'i khrims kyi bya ba las/gsang sngags kyi sgo'i spyad pa spyod pa las kyi dang por gtogs pa/ rnal 'byor pa byis pa'i blo can rnams la nges pa'i don du bstan to/ /de yang rnal 'byor pa mkhas pa blo dang ldan pa rnams la/ gang phyir sprul pa gnas brtan pa/ /zhes pa la sogs pa drang ba'i don du bstan la/rnal 'byor ma yi lus dbus na/ /sdom pa A yi rnam par gnas/ /zhes bya ba la sogs pa ni nges pa'i don du bstan to/ /de yang phyi rol du ni phas pham pa la sogs pa'i chos mi byed pa sdom pa yin la/ nang du bde ba'i sdom pa gang la gnas te byang chub sems kyi srog mi gcod pa'i phyir/srog mi gcod pa'i sdom pa dang / de ltar bde ba phyir ma shor bas mi tshangs par spyod pa las log pa'i sdom pa la sogs pa bsrung ba nges pa'i don du bstan te/ mtshan yang dag par brjod pa las kyang / dka' thub mthar phyin dka' thub che//gtsang gnas nam pa gau ta ma/ /zhes pa dang / de bzhin du/ tshul khrims chen po 'chang ba mchog /bzod chen 'chang ba brtan pa po/ /zhes pa la sogs pa nges pa'i don gyi sdom pa rgyas par bstan to/ /de ltar na/ bo la'i bde ba phyag rgya che/ /rdo rje skye mched thams cad nyid//ces bya ba la/ nyi zla'i lam mi shigs pa'i lam du gtogs pa'i dus na/ phyi'i las dang ye shes kyi phyag rgya la sogs pa dag rnam par spangs pa'i phyir bde ba'i sdom pa po la rab tu rgyas par byed pa rtsa thams cad rdo rje ltar 'gyur ba 'di ni gsang ba'i snyoms par 'jug pa'i bdag nyid do//de bas na/ gsang ba'i snyoms par 'jug pa 'dis/ /phyi rol gyis ni gnyis gnyis bkag /zhes gsungs so/ /gzhan yang byis pa phal cher sku gsum zhes bya ba gzhan du 'dod pa dgag pa'i phyir/ sku gsum lus kyi nang du ni/ /'khor lo'i gzugs kyi yang dag bshad//ces bya ba la sogs pa gsungs te/ 'di ltar bde ba chen po la sogs pa'i 'khor lo na/ chos dang longs spyod rdzogs pa dang / sprul pa'i gzugs can rtsa gsum gyis kun du khyab pa yongs su shes pa sku gsum du bstan to/ /ci'i phyir zhe na/la la nA ni sku zhes bya/ /ro ldan ma ni gsung yin te/ /a wa d+hU tI dbus gnas na/ /gzung 'dzin bral ba chos kyi sku/ /zhes gsungs pa'i phyir ro/ /de bzhin du bde ba chen po kun la khyab pa'i phyir ro/ /gzhan yang / ma lus pa yi sems can gyis/ /skye ba gang nas rjod byed pa//gang phyir sprul pa gnas brtan pa/ /de phyir sprul pa'i sku nyid yin/ /zhes bya ba la 'di ltar skye bo thams cad kyi lus chags pa na lte ba nas sngon du chags pa dang / srog gi rlung la sogs pa yang de nas sprul pa'i phyir/ gnas brtan pa dang / lte ba sprul pa'i 'khor lo'o//ci'i phyir zhe na/ gang gis skyed dang sprul byed pa'i/ /sku ni sprul pa can zhes brjod/ /ces gsungs pa'i phyir ro/ /sems kyi rang bzhin chos yin te/ /chos kyi sku yang snying gar yin/ /zhes bya ba ni/ bde sdug thams cad 'dzin pa dang / /mtshan las mtshan ma med par 'gyur//mtshan med 'dus ma byas pa yi/ /chos sku snying ga'i gnas na bzhugs/ /zhes gsungs pa'i don khong du chud par bya'o/ /ro rnams drug gi gzugs can gyi/ /bza' ba nges par longs spyod brjod/ /ces bya ba la/ ro drug la sogs pa'i bza' ba dang btung ba phun sum tshogs pa'i lam dang /ro la sogs pa 'dzin par byed pa'i rtsa mgrin par gnas pa'i phyir ro/ /de'i phyir na/ mgrin par longs spyod 'khor lo dang / /zhes gsungs so/ /spyi bor bde ba chen po gnas/ /zhes pa ni bde ba'i gzhi la gnas pa'i phyir ro//da ni 'bras bu brjod pa'i phyir/ /e waM rnam pa rgyu mthun nyid/ /ji ltar byas pa de bzhin spyod/ /rgyu mthun zhes ni rab tu bsgrags/ /zhes pa ni lte ba'i dkyil 'khor e waM gyi gnas su dus kyi me 'bar ba g.yas kyi lam nas bde ba'i gnas su son pa dang / gang gi rgyun bkug ste de nyid kyi gnas su spyod pa'i phyir ro//rnam smin chos kyi 'khor lo las/ /las chung 'bras bu che ba'i phyir/ /rnam par smin pa de las bzlog /ces pa ste mes smin par bya ba'i 'bras bu chu'i lam nas 'ong ba'i phyir ro/ /longs spyod skyes bu byed pa nyid/ /bskyed pas skyes bu byed pa'o//zhes pa ni de lta bu'i rgyu dang 'bras bu'i byed pa can yang / skyes bu'i rtsol ba la rag las pa'i phyir/ bde chen 'khor lo dri med nyid/ /rnal 'byor dag cing dri ma med/ /ces pa ni gang gis/ rgyun gyis dri ma med pa'i gnas/ /zhes bya bar byin pa'i phyir ro/ /de'i phyir na/ rgyu mthun sogs pas rab phye ba'i//'bras bu rnam pa bzhi zhes brjod/ /las kyi rlung gis bskul ba yis/ /las la bcom ldan shes rab spyod/ /ces bya ba la lte ba'i dkyil 'khor na rang bzhin gyis gnas pa'i las kyi rlung la shes rab ma zhes brjod de/ las kyi rlung des ni dus kyi me spor zhing 'jig rten gyi khams thams cad sreg par byed pa yin no//da ni sde pa chen po bzhi'i nges pa'i tshig bstan par bya ste/ gang phyir sprul pa gnas brtan nyid/ /ces pa ni/ gang du gnas nas srog 'gro ba dang / 'ong ba'i gzhi brtan par byed pa'i phyir ro/ /chos ni smra ba 'byung ba'i phyir/ chos kyi 'khor lo thams cad yod/ ces bya ba ni snying ga'i srog rlung gi sgras brjod pa thams cad gsal bar byed pa'i phyir ro/ /gang phyir mgrin par kun bkur phyir/ /longs spyod 'khor lo kun gyis bkur/ /zhes bya ba las rtsa thams cad rgyas par byed pa'i bza' ba dang / /btung ba'i ro thams cad mgrin pa nas rgyu la//de'i phyir rtsa thams cad kyis bkur ba'i phyir de skad cas bya'o/ /gang phyir bde chen mgor gnas pa/ /bde pa'i 'khor lor dge 'dun che/ /zhes pa ni byang chub kyi sems kun+da lta bu phal cher bde ba'i 'khor lon gnas pa'i phyir ro/ /sde ba zhes bya lus su brjod//lto ba gnas su brjod par bya/ /zhes bya ba la/ /sde par co brgyad ni thun mong du lus spyi la brjod do/ /ma'i lto ba ni gtsug lag khang du brjod do/ /de bzhin du/ /sngags kyi bzlas pa a dang ha~M/ /skye gnas 'khor lo'i rnam pa a/ /bde chen gyi yang rnam pa ha~M/ / zhes bya ba la lte ba'i 'khor lo nas aM zhes pa'i srog gi rlung sum cu rtsa gnyis kyi 'khor lo'i haM la gtugs pa'i phyir de skad ces bya'o/ /de'i phyir a haM zhes ba gzod ma nas bde ba chen po'i sku'i rang bzhin nga yin no zhes pa'i don to/ /'di dag rkyen gyis sems can rnams/ /sangs rgyas nyid du the tshom med//zla ba bcu yang sa rnams nyid/ /sems can sa bcu'i dbang phyug go/ /zhes bya ba la/ drang ba dang nges pa'i don gyi rtsa ba dang yan lag gi rlung bcu po bag la zha ba ni nges pa'i don gyis bcu'o/ /de nas rnal 'byor ma bdag med ma la sogs pa'i lha mo thams cad ces pa nas sa la 'gyel ba dang 'dar bar gyur to zhes pa yan chad kyis ni 'di ltar sems cad thams cad gzod ma nas sa bcu'i rang bzhin gyi byung chub sems dpa' rdo rje lta bu'i sku can yin no zhes bcom ldan 'das kyis gsungs pa la ci'i phyir sems can rnams nyon mongs pa /nyam nga ba'i gnas su glo bur du lhung ba ni ma la ci zhig ltar skye ste zhes brgyal ba'i don to/ /yang rdo rje can gyis lha mo de dag gzigs nas bslad ba'i phyir zhes pa nas/ de nyid nga yis spro yis nyon/ zhes pa yan chad ni/ lha mo de dag la bcom ldan 'das kyis spro ba bskyed pa'i dbyangs kyi nga ro bstan pa ste/bcom ldan 'das kyi gsung rmi lam lta bur nye bar thos nas lha mo de rnams thams cad srog rnyed par gyur to zhes pa'i tha tshig go/ /bcom ldan 'das kyis bka' stsal pa/ sems can rnams ni sangs rgyas nyid/ /'on kyang glo bur dri mas bsgribs//de nyid bsal na sangs rgyas nyid/ /ces pa ni gzod ma nas sems can thams cad lhan cig skyes pa'i rang bzhin yin pa'i phyir sangs rgyas so/ /glo bur gyi dri ma ni 'dzag pa yin la de'i rgyu ba chad pa ni sangs rgyas zhes bya ba'i don to/ /lha mo rnams kyis gsol pa//bcom ldan 'das de de bzhin te/ bden pa ma mchis shing brdzun pa ma mchis so zhes bya ba ni 'dzag pa dri ma yin la/ mi 'dzag pa sangs rgyas yin no zhes gsungs pa gang yin pa de dag ni/ de de bzhin te/ de de bzhin no zhes bya ba'i don to/ / de yang bcom ldan 'das nyid kyis dpe 'di ltar gsungs te/ gang zhig mi shes 'jig rten pa/ /btsan dug zos pas brgyal bar 'gyur/ /rmongs spangs de nyid yid kyis ni/ /de yi de nyid yongs su gcod/ /ces bya ba gsungs te/ dper na skyes bu rmongs pa 'ga' zhig dug log par 'gyur ba'i thabs gyis dman pas dug za ba gang yin pa de ni tshe'i dus byed par 'gyur ro//'on te dug gi de kho na nyid yongs su shes pas za bzhin pa ni dug bdud rtsi dang mtshungs par 'gyur ro/ /dpe de ltar na/ de bzhin zhi ba'i thabs shes shing / /kye yi rdo rjer dbugs bton na//ma rig sogs pas mi 'dzin cing / /gti mug la sogs kyis mi 'ching / /zhes bya ba srog gi kun du spyod pa'i rlung 'gro ba dang 'ong ba las rnam par grol zhing kun+da lta bu'i thig le 'byung ba dang / 'jug pa yongs su mnan pa na kye'i rdo rjer dbugs bton pa yin zhing /ma rig pa la sogs pa'i nyon mongs pa mtha' dag gis rnam par 'ching bar mi 'gyur ro zhes pa ni nges pa'i don to/ /rang dang rang gi rtogs pa las/ /sangs rgyas ma yin sems can ni/ /gcig kyang yod pa ma yin no/ /dmyal ba yi dags byol song dang //lha dang lha min mi rnams dang / /bshang ba'i srin bu la sogs pa/ /rtag tu bde ba'i rang bzhin can/ /zhes bya ba la srog chags thams cad kyi bde ba thun mong pa ka rka Ta dang chu srin zhes bya ba srog gi kun du spyod pa la brten pa'i thig le'i bde bar rang rang gi ji lta ba bzhin du rtogs pa na/sangs rgyas dang byang chub sems dpa' de nyid nga yin gyi/ gzhan ma yin zhes bya ba'i don to/ /lha dang lha ma yin gyi yang / /bde ba gang phyir mi shes pas/ /zhes bya ba ni/ mi shes pa de'i phyir 'khor bar bcings zhes sbyar ro/ /rtag tu rang bzhin bde ba can/ /'jig rten khams ni gang du yang //gzhan du sangs rgyas rnyed mi 'gyur/ /zhes pa ni rang rig pa'i bde ba bor nas gzhan du sangs rgyas mi rnyed ces sbyar ro/ /don bsdus pa'i tshul gyis gsungs pa ni/ sems ni rdzogs pa'i sangs rgyas nyid/ /ces pa nas/ gsod pa don du gnyer ba rnams//kye yi rdo rje de shes nas/ /'grub 'gyur 'di la the tshom med/ /ces pa la sogs pa ste/ rang gis rang gi sems rig pa stong pa dang snying rje dbyer med pa'i bdag nyid kyi kye'i rdo rje shes na 'grub par 'gyur ba ni nges pa'o/ /byis pa mi shes pas bsgribs pas/ /'di yi 'gro ba mi shes pa//zhes pa ni/ stong pa nyid dang snying rje dbyer med pa'i bde ba las babs pas bde ba'i 'gro ba 'di mi shes te 'gro ba drug ces bya ba/ chu srin nam ka rka Ta'i 'gro ba drug gi mthar 'khor bar 'gyur te/ rmongs par 'gyur ro/ /rdo rje snying po snying rje che/ /kye yi rdo rje'i thabs rnyed nas//gang zhig yul rnams rnam sbyong ba/ /des ni bla med rnyed par 'gyur/ /zhes bya ba ni bla ma'i lung phog pa thob pa'i stobs las thabs rnyed de bla ma'i lung ltar yul rnams rim pa ji lta ba bzhin du sbyangs na bla na med pa rnyed par 'gyur te/ 'di ltar srog nyi khri chig stong drug brgya 'khor lo bzhi'i gnas su lnga stong bzhi brgya lnga stong bzhi brgya gsad pa las/lugs dang lugs su 'byung ba'i rim par dga' ba dang / mchog dga' dang / khyad par dang / lhan cig skyes pa rnams rim pa bzhin brtsi bar bya'o/ /de bzhin du drug cu rtsa bzhi'i gnas nyid du rlung brgyad cu rtsa bzhi dang rkang pa re re gsad par bya'o//de las kyang rtsa bcu drug bcu drug gi rlung gsad pa na dga' ba bzhi bzhir slar bzhin sbyar ro/ /de bzhin du chos kyi gnas su drug brgya bdun cu rtsa lnga drug brgya bdun cu rtsa lnga gsad par bya'o/ /de las rtsa gnyis gnyis kyis stong sum brgya lnga bcu stong sum brgya lnga bcu gsang pa na dga' ba bzhi bzhir sbyar ro//de bzhin du longs spyod kyi gnas su sum cu so bdun gyis lhag pa'i rkang pa dang bcas pa sum brgya gsad par bya'o/ /de las cha bzhi bzhi gsad pa na gong ma ltar dga' ba bzhi bzhi dang sbyar bar bya'o//de nas sum cu rtsa gnyis kyi gnas su drug cu rtsa brgyad kyis lhag pa'i rkang pa dang bcas pa'i brgya phrag re re gsad par bya'o/ /de las cha bzhi bzhi gsad pa na gong bzhin du dga' ba bzhi bzhi dang sbyar ro/ /de ltar brjod pa de rnams ni bla ma'i lung ltar sbyangs pa'o/ /da ni gang gi phyag rgyas gang la gdab pa'i rigs pa bshad par bya ste/rdo rje snying pos gsol pa/ sa ni puk+ka sIr bshad pa/ /gang yang gti mug srab pa'i phyir/ /sku ni rnam snang nyid gsungs na/ /ji ltar mi bskyod phyag rgya lags/ /zhes pa la sogs pa'i the tshom rnams bcom ldan 'das la zhus pa dang /bcom ldan 'das kyis lan 'di skad gsungs so/ /lus spangs nas ni sems kyis ni/ /mdzes pa gzhan du mi 'gyur ro/ /de phyir sems kyi rnam snang mdzad/ /sku la thugs kyi phyag rgyas gdab/ /ces bya ba gsungs te/ thabs dang mi ldan pa'i shes rab dang / shes rab dang mi ldan pa'i thabs dag gis kyang bya ba yongs su mi rdzogs pa ltar/ sku dang thugs tha dad pa'i sku yis bya ba yongs su mi rdzogs pa'i phyir/ sku la thugs kyi phyag rgyas gdab bo/ /de bzhin du/ chu khams ri khrod mar bshad do/ /mi bskyod khu ba'i gzugs can nyid/ / gtso bo mi bskyod phyag rgyas ni/ /ri khrod ma la gdab pa'i rigs/ /zhes bya ba ni/ chu'i khams la thabs chu'i khams mi bskyod pas rgyas gdab par rigs pa ma 'gags sam zhes zhus pa dang / slar bcom ldan 'das kyis gsungs pa/ sems spangs nas ni lus kyi ni/ /gnas pa gzhan du mthong mi 'gyur//de ste sems ni gti mug 'gyur/ /zhes pa la/ gong bzhin du phan tshun du 'gal ba'i skyon gyis 'dir yang rtogs par bya ste/ de'i phyir thugs kyi rigs la sku'i rigs kyis rgyas btab na mdzes par 'gyur zhes pa'i don to/ /de bzhin du/ me ni gdol pa mor bshad pa//'dod chags phyag rgyas gdol pa mo/ /rigs de phyag rgya gzhan min na/ /ji ltar rin chen phyag rgya lags/ /zhes bya ba ni me'i khams gdol pa mo la 'dod chags kyi phyag rgya dpag med 'od kyis gdab par rigs pa ma lags sam/ ci'i slad du/ rin chen 'byung ldan gyis me'i rigs la phyag rgyas gdab ces zhus pa dang /bcom ldan 'das kyis 'di skad ces gsungs so/ /gang phyir 'dod chags khrag bshad pa/ /khrag ni rin chen 'byung ldan nyid/ /drod ni khrag gi rang bzhin phyir/ /'dod chags ser sna'i phyag rgyas gdab/ /ces bya ba gsungs te/'di ltar drod me'i rang bzhin ni khrag gi yon tan yin la/ khrag ma gtogs par drod mi 'byung ste de bas na/ ser sna'i rigs ni rin chen 'byung ldan gyis rgyas gdab par gsungs so/ /gzhan yang / gang phyir g.yung mo rlung nyid de/ /don yod rlung gi gzugs can nyid//don yod phyag rgyas g.yung mo la/ /gtso mo phyag rgyas rigs par 'gyur/ /zhes pa ni/ g.yung mo rlung du bshad pa la/ /don yod grub pa rlung nyid kyi/ /phyag rgya rigs pa ma lags sam/ /ci'i slad du/ 'dod chags kyi rigs 'od dpag med kyis rgyas btab ces zhus pa dang /bcom ldan 'das kyis 'di skad ces gsungs so/ /'dod chags ma gtogs phrag dog ni/ /gzhan du 'byung ba ma yin te/ /de phyir 'dod chags phyag rgya yis/ /mkhas pas g.yung mo phyag rgyas gdab/ /ces bya ba gsungs so/ /'di ltar phrag dog thams cad ni 'dod chags las 'byung la/'dod pa'i 'dod chags las gzhan du/ phrag dog ma mthong ba de'i phyir/ /dpag med 'od 'dod chags kyi rigs kyis rlung gi rigs la rgyas gdab ces bya ba gsungs so/ /de ltar brjod pa'i rigs pa rnams ni 'byung ba bzhi'i lha mo rnams la rgyas gdab pa'i rigs pa yin la/phyogs kyi lha mo phung po'i rang bzhin rnams kyang don de ltar khong du chud par bya'o zhes gsungs te/ de'i phyir na/ gang phyir gzugs ni sra ba nyid/ /ces pa nas/ ma log pa las phyag rgya'o/ /zhes pa la sogs pa rgya cher gsungs pas rim pa bzhin shes par bya'o//da ni gtor ma'i de kho na nyid bstan par bya ste/ kye yi rdo rje rdo rje 'dzin/ /snyoms 'jug pa yi lha nyid la/ /sems can don phyir gtor ma che/ /de la bdag med mas zhus pa/ /zhes pa la stong pa nyid dang snying rje tha mi dad pa'i bde ba la bzhugs pa'i bcom ldan 'das la/phyi dang nang gi gtor ma de kho na nyid bdag med mas zhus pa zhes pa'i don to/ /e waM rnam par bzhugs nas ni/ /bgegs dang log par 'dren pa las/ /sems can rnams kyi srog bsrung phyir/ /rdo rje sems dpas gtor ma bstan//zhes bya ba la de ltar bdag med mas zhus pa'i rjes la/ phyi nang gi 'byung bo thams cad la phan gdags par dgongs nas/ gtor ma'i de kho na nyid 'di skad gsungs zhes sbyar bar bya'o/ /de la oMin+da/ ya ma/ dza la/ dza kh+kha/ b+hU ta/ ba hi/ bA yu/ rA k+Sha/ tsa n+da/ su dz+dza/ mA ta/ ba b+ba/ tA la/ pA tA laM/ a Ta/ sab+ba swA hA/ zhes pa la sogs pa gsungs te/ 'di'i don yang rtsa ba'i rgyud las ji skad du/ bdag dang rnal 'byor gnas bsrung ba/ /dkyil 'khor khang pa dang bcas pa/ /kye yi rdo rjer bdag bskyed la/ /gtor ma'i cho ga bya ba nyid/ /de bzhin gzhal yas khang la sogs//go rims ji bzhin bskyed pa la/ /dbus kyi gru gsum nam mkha' la/ /kye rdor rang bzhin 'byung po dgod/ /sku gsung thugs kyi rang bzhin phyir/ /oM dang AHdang hUM las ni/ /mgron rnams kun yang bsam byas la/ /sku gsung thugs su dmigs par bya//de la rigs par go ku sogs/ /sbyang spel sbar dang bdud rtsi yis/ /yi ge bzhi dang ldan byas la/ /de dag tshogs la dbul bar bya/ /zhes gsungs pa'i don khong du chud par byas la bdag dang gzhan gyi srog bsrung bar bya'o/ /de bzhin du nges pa'i don yang / /'byung po rang rang gi snying ga'i rtsa 'dab brgyad po brgya byin la sogs pa thun brgyad yin la/steng gi sgra gcan dang 'og gi dus kyi me ni nyi ma dang zla ba yin no/ /tA la pA tA la ni lte ba'i steng dang 'og go/ /de rnams tshim par byin gyis brlabs pa'i sngags a kA ro mu khaM zhes pa la sogs pa ste/ nges pa'i don du na a'i yi ge ni chos thams cad kyi sgo ste/gzod ma nas ma skyes pa'i phyir ro zhes pas byin gyis brlabs pa'o/ /'di ltar a zhes pa ni tshig gi brjod pa kun las 'das pa/ mi shigs pa'i sgrar gnas pa la bya'o/ /'di ltar mi shigs pa'i sgrar gnas pa 'di ni srog chen po ste/gtor ma 'dis srog bsrung ba ni nges pa yin la/ tshul gzhan du bskal ba dpag tu med par gtor ma sbyin yang srog bsrungs par mi 'gyur ro zhes pa ni/ de bzhin gshegs pa'i bka' lung ngo / /nges pa'i don gzhan ni sngags kyi le'u'i rgya cher bshad par legs par gtan la phab pa'i phyir/'dir gsal bar ma bstan to/ /gal te gtor ma 'dis 'byung po thams cad mchod par byed na/ rnal 'byor ba rnams legs par 'gyur te zhes bya ba la sogs pa la/ 'di ltar drang ba dang nges pa'i don gyis dbye ste/ de la gang drang ba'i don de ni phyi rol du ji ltar bstan pa rnams yin la/nges pa ni 'di lta ste/ Ad+ya nut+pa n+na twA ta ces pa la mi shigs par gtogs pa'i srog gi rlung gang gis 'dzag pa med pa'i bde ba de ni bde ba dri ma med pa'o/ /de bzhin du dus mtha'i me'i nyi ma'i rtsa'i cha rnams bsreg pa'i phyir/ lha mo rnams dang 'gro ba rab tu 'byor ba rnams dga' bar 'gyur ro zhes pa'i don to/ /gal te 'dir 'byung po'i tshogs kyi phyir rtag tu gtor ma ster na zhes bya ba la mi shigs pa'i srog gi rlung gis gtor ma byin na zhes bya ba'i tha tshig go/ /bde ba dbang du bsdus pas dbang ngo / / 'dzag pa'i nyon mongs pa 'jig pa'i phyir mngon spyod dang dgra'i sde 'jig pa dang / bskrad pa dang / gsad pa zhes pa'i don to/ /bde ba 'gugs shing des nyon mongs pa'i gdung ba zhi zhing bde ba'i ye shes rgyas par byed pa'i phyir zhi ba dang rgyas par 'gyur ba'o/ /da ni sku gsung thugs kyi phyag rgya las rgyas gdab pa'i rigs pa bstan par bya'o//rdo rje snying pos gsol pa/ phyag rgya gang gis mkha' spyod ma/ /gang gi phyag rgyas sa spyod ma/ /gtso bo bdag gis sngar ma 'tshal/ /zhes bya ba la mkha' spyod ma dang sa spyod ma dag la/ phyag rgya gang gis gdab par bgyi zhes pa'i don to//bcom ldan 'das kye'i rdo rjes slar gsungs pa/ gsang gsum 'khor lo'i dbus su ni/ /sku gsung thugs su dbye ba las/ /steng dang 'og dang dbus gnas kyi/ /'khor lo'i dbus su rnam par gnas/ /zhes bya ba la/ gsang ba gsum gyi 'khor lo ni/ /sa 'og sa steng sa bla rnams/ /rnam pa gsum du phye ba ste/ /bde mchog 'khor lor rab tu bsgrags/ /sa spyod sku yi phyag rgya can/ /steng zhal sku yi phyag rgya ma/ /gti mug sku yi rigs can te/ /rnam snang mdzad du rab tu bsgrags/ / mkha' spyod 'dod chags phyag rgya can/ /'og zhal gsung gi rdo rje ma/ /'dod chags gsung gi rigs can te/ /dpag med 'od du rab tu bsgrags/ /thugs kyi rdo rje bdag med ma/ /sems ni dpag med tshul can nyid/ /sems ni dbus kyi gnas su ste/ /de phyir bdag med dbus su 'khrungs//sems ni nam mkha'i rigs can nyid/ /mgon po mi bskyod sems su bsgrags/ /'di gsum dbus kyi rtsa yi gzugs/ /lo gsum zla ba phyed dang gnyis/ /'di yi chos su rab bstan te/ /'dus pa la sogs rgyud chen rnams/ /'di nyid las ni 'byung bar bshad//de bas sku gsung thugs kyi rigs/ /zhal gsum par ni rab tu brjod/ /rgyas par rab tu phye ba las/ /rigs ni rnam pa drug tu brjod/ /sa dang chu dang me dang ni/ /rlung dang nam mkha'i khams dag dang / /ye shes khams dang drug tu brjod/ /rnam gsum nyi ma zla ba me//rnam lnga mun can sgra gcan 'dzin/ /gsum la gnyis kyis bsnan pas lnga/ /khro bo'i rgyal po gdong drug 'jigs/ /'jam pa'i rdo rje zhal lnga pa/ /zhes bya ba'i don to/ /gzhan yang rnal 'byor gyi rgyud du/ phyi'i skye bo rnams 'jug par bya ba'i phyir bshad pa 'di lta ste/mi bskyod rnam snang rin chen 'byung / /dpag med phrag dog rdo rje sems/ /rigs ni rnam pa drug bshad pa/ /nyon mongs rnam drug rnam par sbyong / /zhe sdang gti mug ser sna dang / /'dod chags phrag dog bde ba dag /nyon mongs drug tu rab tu bsgrags/ /'dis ni rim par bsgom pa nyid//rdo rje sems dpa' spangs nas ni/ /phyi nas rigs ni rnam pa lnga/ /zhes bya bas ni 'khrigs pa'i 'dod chags spangs nas rigs rnam pa lngar 'gyur te/ mchog tu mi 'gyur ba'i ye shes spangs nas zhes pa'i don to/ /ci'i phyir zhe na/ ye shes kyi rigs kyis kun la khyab pa'i phyir ro//de bzhin du rdul dang mun pa dang snying stobs kyi dbye ba'am/ nyi zla sgra gcan 'dzin gyi dbye bas/ 'dod chags zhe sdang gti mug gis/ /rdo rje rnam pa gsum du 'gyur/ /zhes bya ba'i don to/ de bzhin du rnam par shes pa nam mkha'i khams 'di yin te/rigs thams cad pa'am/ rigs gcig nyid kyi ngo bo nyid yin te/ nam mkha' gcig gis gzugs tha mi dad pa'i gzugs kyis gnas pa'i phyir/ mi bskyod zhe sdang gzugs can gyi/ /thugs kyi bdag po'i ro gcig nyid/ /ces bya ba gsungs so/ /de bas na thugs kyi rigs 'di nyid las rigs lnga dang rigs drug la sogs pa nas/dpag tu med pa'i rigs rnams 'byung ba'i phyir/ /zhe sdang rdo rje'i byin brlabs 'di/ /rigs ni lnga dang drug tu brjod/ /ces gsungs pa yin no/ /kye'i rdo rje'i nges pa'i don gyi rgya cher bshad pa las/ rgyud thams cad kyi phyag rgya bsdus pa'i rgya cher bshad pa ste le'u bzhi pa'o// //zhal brgyad phyag ni bcu drug pa/ /dpa' bo thod phreng can btud nas/ /kye'i rdor mngon par 'byung ba yi/ /rgyas bshad rdo rje snying pos bri/ /phyag ni bcu drug zhal brgyad pa/ /zhabs bzhi pa dang 'jigs pa po//dpa' bo thod pa'i phreng ba can/ /bdag med mas ni sku la 'khyud/ /ces bya ba gsungs te/ stong pa bcu drug gis mtshan pa'i phyag bcu drug dang / rnam par thar pa brgyad dag pa zhal brgyad dang / don mthun pa la sogs pa bsdu ba'i dngos po bzhi dag pa'i zhabs bzhi dang /ngang gis khro ba dang / shugs kyis khro ba dang / khro bar bcas pa dang / khro bar bcos pa la sogs pa khro bo'i mtshan ma dang ldan pa dang / rjod byed lnga bcu dag pa'i mgo bo'i phreng ba'i do shal 'dzin pa stong pa nyid kyi bdag nyid yum chen mos la khyud pa'i sku can/yi ge lnga dag pa'i phyag rgya lnga 'dzin pa'i bcom ldan 'das he ru ka la bdag med mas zhus pa/ bco lngas yongs su bskor ba nyid/ /bdag gi 'khor lo khyod bshad na/ /khyod kyi dkyil 'khor ji ltar lags/ /gtso bo bdag gis sngar ma 'tshal/ /zhes bya ba zhus te/ 'di ltar byang chub kyi sems kyi zla ba cha shas bco lnga'i bdag nyid can/mngon par rdzogs pa rnam pa lnga dang / rnam pa nyi shus byang chub pa'i mtshan nyid can/ bdag gi dkyil 'khor lha mo lnga gsum gyi bdag nyid legs par gsungs lags na/ gtso bo khyod kyi dkyil 'khor ji ltar lags/sngar ma gsungs pa gsung bar rigs so zhes pa'i don to/ /bdag med ma la'o mdzad nas/ /rdo rje thod par stsal nas ni/ /lha mo'i nu ma mnye mdzad de/ /dkyil 'khor yang dag rab tu bstan/ /zhes bya ba ni bdag med ma la nyid kyi dkyil 'khor bstan par mdzad pa'i ched du/sngon du 'dod chags kyi chos rab tu bstan par mdzad nas/ bshad par zhal gyis bzhes pa'o/ /'khor lo ji ltar sngar brjod pa/ /zhes pa nas/ rdo rje thig gis yang dag brgyan/ /zhes bya ba la sogs pa gsungs te/ dkyil 'khor gyi khang bu'i mtshan nyid phyi nang du phye ba las/bskyed pa'i rang bzhin ni khyod nyid kyi khang bu brtsegs pa dang mtshungs so zhes bya ba'i don to/ /'dod chags chen po'i rjes chags pas/ /lhan cig skyes dga'i rang bzhin las/ /khyod dang lhan cig bzhin bzangs ma/ /de la dbus su nga yod de/ /zhes bya ba la/kye lha mo khyod kyi dkyil 'khor ni/ /khyod nyid dang por byas pa'i bco lnga'i bdag nyid yin la/ 'dir ni bco lnga yongs su spangs pa'i bdag nyid khyod dang nga gnyis yongs su 'khrigs pa las/ lhan cig skyes pa'i rang bzhin can khyod kyi lha mo brgyad kyis yongs su bskor ba'o zhes pa'i don to//zhal brgyad pa la zhes pa nas/ sna tshogs rdo rjes spyi bor mtshan/ /zhes pa dang / grong khyer nyams dgar khyod dang nga / /zhes pa yan chad kyis ni/ bcom ldan 'das gtso bo chen po nyid kyi sku brtse ba'i rang bzhin bdag med ma la gsal bar yongs su bstan pa ste/byis pa'i skye bo rnams gzhug pa'i phyir/ sku mtshan phun sum tshogs pa yon tan thams cad kyis rab tu spras pa brjid bag thams cad dang ldan pa bstan par mdzad pa'i don to/ /grong khyer nyams dgar khyod dang nga / /dga' bas shin tu rol pa las/ /zhes bya ba ni dkyil 'khor gyi khang bu chos kyi dbyings kyi bdag nyid can/dpe med pa'i yul gyi yon tan gyis spras pa'i nang du/ lhan cig skyes pa'i dga' bas rol cing gnas so zhes bya ba'i don to/ /dkar mo dbang po'i phyogs phyung nas/ /shar gyi sgo ru yang dag gnas/ / zhes pa nas/ rlung gi phyogs su g.yung mo nyid/ /ces bya ba la sogs pa yan chad kyis ni/ de ltar lhan cig skyes pa'i bde ba'i rol pa las/ lha mo brgyad 'byung bar ston pa'i rdo rje'i tshig go/ /des ni 'jig rten pa'i srid pa'i skyed par byed pa'i chos pha dang ma yis bu tsha bskyed pa'i bya ba bstan to//de nyid lus can rnams kyi srog 'gro ba dang 'ong ba'i khyad par gyis/ g.yas kyi srog bzhi dang / g.yon gyi srog bzhi dang / thun tshod dang thun mtshams bzhi bzhi ste brgyad kyis bcu drug phyed kyi khu ba'i thig le 'khrid par byed de/ nyin mtshan gyi chos rab tu bstan la/gang bdag med ma dang / gtso bo nyid kyis ni mtshams kyi me'i ri mo can du 'jug pa'i rlung bstan to/ /de nas rdo rje chags chen las/ /rig mar bcas pa khu bar gyur/ /zhes pa ni pha dang ma'i bya ba yongs su rdzogs nas/ 'khogs par yongs su bstan la/gzhan du na srog gi rtsa la brten pa'i khams thams cad nang du thim ste rgyu ba med par bstan to/ /de bzhin du bskul ba'i sa la bzhengs pa dang / lam gnyis kyis byang chub bdag pa ston te zhes pa'i tha tshig go/ /sna tshogs glu yi mchod pa las/ /de nas lha mo rnams kyis bskul//rje btsun snying rje'i yid bzhengs shig /zhes pa nas/ thugs rje rgyun chad ma mdzad cig /ces pa la sogs pa'i rdo rje'i glu'i tshig rnams kyi ni/ 'di ltar 'jig rten na pha ma dag yongs su 'khogs te/ 'jig rten pha rol du song ba la bu dang bu mo la sogs pa smre sngags 'don cing cho nges 'debs la/'di skad ces mgon po kho bo cag la mgon dang skyabs ma mchis kyis/ kyi hud kyi hud bskyab tu gsol zhes zer zhing mtshun la 'thor bar byed do/ /de bzhin du nyan thos kyi skye po rnams la grong khyer rtswa mchog gi phyogs su mya ngan las 'da' ba nye bar ston cing /nyan thos chen po rnams smre sngags 'don cing cho nges 'debs te/ klu'i rgyal po rnams kyang mya ngan byed ce'o/ /de nyid gzhan gyi srog gi rlung thams cad nang du zhugs te/ bde ba chen po'i khams la gnas pa las/ sems can thams cad kyi don du sa dang chu dang me dang rlung rnams kyi khams kyis sad par byas te/'gro ba'i don la 'jug pa ni nges pa'i don to/ /glong po rta bong glang rnga mo/ /mi dang sha ra b+ha byi la/ /g.yas pa'i thod pa brgyad po la/ /glang po la sogs rim shes bya/ /zhes bya ba ni g.yas pa'i phyag gi mtshan ma brgyad ston pa'o//de bzhin du/ sa dang chu dang rlung dang ni/ /me dang zla ba nyi ma nyid/ /mthar byed dang ni nor 'dzin te/ /g.yon pa'i thod pa brgyad na'o/ /zhes pa ni/ phyag g.yon gyi mtshan ma brgyad de/ /'di rnams kyi dag pa ni glo dang dbugs dang zhes pa nas/phyug po thams cad rab bsgrub pa'o/ /zhes gsungs pas rtogs par bya'o/ /de bzhin du gtso bo chen po gar gyi ro dgu dang ldan par ston to/ /'di ltar rin chen sna bdun te/ /de la dmag dpon rin chen zhes/ /bde bar gshegs pas rab gsungs pa/ /tshul dgu rab ldan dmag dpon yin//sgeg pas 'gro ba shes rab bskyed/ /mdzad spyod nyam nga med pa'o/ /gdug rtsub rab ldan 'jigs pa po/ /log lta zhe gcod gshe ba'i tshul/ /rdo rje sems dpa' bteg pa la/ /dba' la dpa' bo'i de bzhin gshegs/ /rdo rje 'dzin pa snying rje la/ / rgod la 'jig rten dbang phyug mchog /rdo rje nyi ma khro ba che/ /rdo rje drag po 'jigs pa la/ /shAkya thub pa mi sdug la/ /ngo mtshar la ni a ra l+li/ /rmad byung chos sgrogs bzhad par snang / /gdul dka' khro ba snying rjer ston/ /nyon mongs grub mdzad ngo mtshar tshul/ /khro drag mi g.yo zhi ba'i tshul//zhes pa la sogs pa ni gar stabs dgu'i don to/ /de lta bu'i gar stabs dgu dang ldan pa'i dpa' bo bzhengs pa ni/ oM dang hUM gis rdo rje che/ /khu ba'i gzugs las bzhengs nas ni/ /zhabs rnams sa la brdegs pa dang / /lha dang lha min bsdigs par mdzad/ / ces bya ba ni/ sngon gyi sa bon gyi gzugs las/ yi ge aM hUM gnyis las thod pa gri gug lta bur gyur cing / de las gzugs bzhengs pa'i don to/ /bdag med ma dang gtso bo'i sku yongs su rdzogs pa ste/ bcu drug dang bcu gnyis nyi ma dang zla ba rab tu gsal zhing dri ma med par gyur pa'i don to//des 'gro ba'i don byed pa ni nges pa'i don to/ /gaM tsaM baM g+haM paM shaM laM DaM zhes pa ni thig le'i gzugs can ming gi dang po'i yi ge brgyad do/ /'di yis sa bon dbyung ba dang / /zhes pa ni lha mo brgyad bskyed pa'i dus su sbyar bar bya'o/ /de bzhin du/ bdag po yi ni sa bon dag /aM hUM sngon po 'bar 'jigs pas/ /zhes pa nas/ gtso bo 'di ltar bsgom pa nyid/ /ces pa yan chad kyis ni/ gtso bo bskyed pa'i rang bzhin gsal bar bstan te/ gong du bstan pa nyid do/ /da ni lha mo brgyad kyi phyag g.yas g.yon gyi phyag mtshan rnams bstan pa'i phyir/dkar mo'i g.yas na gri gug ste/ /zhes bya ba nas/ g.yon nas sdigs mdzub de bzhin no/ /zhes pa yan chad kyis bstan te/ 'di ltar rang rang gi gdan gyi steng du nyi zla kha sbyar ba'i nang na/ sngon gyi yi ge rnams gnas par bsam zhing / de dag yongs su gyur pa las/ g.yas pa'i phyag mtshan brgyad du bsams pa dang / de yongs su gyur pa las kyang lha mo brgyad yongs su rdzogs par bya'o/ /ci'i phyir g.yas pa'i mtshan ma las yongs su rdzogs par bya zhe na/ rtsa ba'i rgyud las ji skad du/ lus can lag pa g.yas pa yis/ /bya ba thams cad rdzogs par byed//stong nyid shes rab g.yas pa ni/ /de bzhin bya ba thams cad byed/ /sems can don la brtson pa las/ /skyil krung phyed pa'i gar gyis ni/ /gau rI la sogs lha mo rnams/ /kun du legs par gnas par 'dod/ /ces gsungs so//de bzhin du nyon mongs pa gcod par mdzad pa dang / stong pa nyid kyi sgra sgrogs pa dang / mi g.yo ba'i bde ba dang / zhe sdang la sogs pa de kho na nyid kyis rgyan du bcing ba/ bya ba thams cad la the tshom med par bya ba dang / dgra bcom pa brten pa dang / chos kyi 'khor lo bskor ba dang /nyon mongs pa gzhom pa'i phyir/ g.yas na gri gug la sogs pa'i phyag mtshan brgyad rim pa bzhin sbyar ro/ /de bzhin du g.yon pa'i brgyad ni/ 'di ltar reg na bde ba dang / gti mug sad par bya ba dang / bde ba bskyang ba dang / ye shes blangs pa dang / nyon mongs pa tshar gcod pa dang / bde ba mtshon pa dang / nyon mongs pa med pa dang / dri ma med pa'i gnas mtshon pa ste/ rim pa bzhin du sbyar bar bya'o/ /dkar mo la sogs phyag gnyis brjod/ /spyan gsum dbu skra gyen du brjes/ /phyag rgya lngas ni rnam par brgyan/ / zhes pa la sogs pa ni lha mo thams cad stong pa nyid dang snying rje mi phyed pa dang / sku gsung thugs kyi de kho na nyid dang / bde ba'i ye shes kyi de kho na nyid dang / nam mkha' la sogs pa'i phyag rgya lnga dang ldan par mtshungs par ston pa'o/ /gau rI kha dog nag mor 'gyur/ /zhes pa nas/g.yung mo sna tshogs ma zhes brjod/ /ces pa yan chad kyis ni/ sa dang / chu dang / me dang / rlung la sogs pa rnams kyi rang bzhin gyi yon tan gyi dbang gis/ phyogs mtshams kyi lha mo brgyad kyi sku mdog rim pa bzhin rtogs par bya'o zhes pa'i don to/ /de bzhin du/ gshin rje dang ni nor bdag dang / /bden bral dang ni thags bzangs ris/ /tshangs pa dbang po nye dbang drag /gau rI la sogs pa yi gdan/ /zhes bya ba rnams ni phyogs skyong brgyad po rang bzhin yon tan gyi dbang gi rim pa bzhin gdan du bsams la/ gzhan yang 'jig rten pa'i lha nga rgyal can rnam pa brgyad gan rkyal du bsgyel te btul nas/gtogs 'dod ma la sogs pa dbang bskur zhing ming smos te/ 'jig rten pa'i dkyil 'khor du bkod ces pa'i don to/ /de dag kyang 'di lta ste/ dka' thub zlog ma ni/ khro mo rdo rje ma dang / gser ldan ma ni rdo rje gser ma zhes bya ba dang /shir sh+ya ni rdo rje gzhon nu ma zhes bya bar ming btags so/ /tshangs ma ni rdo rje zhi ba mor ming btags so/ /dbang mo ni rdo rje khu tshur mar ming btags so/ /de rnams ni rdo rje rgyal mor dbang bskur ro/ /de nas bar snang la spyod pa'i btsun mo thams cad la byin pa ni 'di lta ste/mi 'chi ba ni rdo rje mi 'chi bar ming btags so/ /ro ha na ni rdo rje mdangs mar ming btags so/ /dbyug 'dzin ma ni rdo rje dbyug mchog mar ming btags so/ /skye bo 'phrog ma ni rdo rje rked bcings mar ming btags te/ de la sogs pa khro mo'i rdo rjer dbang bskur ro//de nas nam mkha' la spyod pa'i btsun mo thams cad la byin pa ni 'di lta ste/ gsod ma ni rdo rje 'ju mar ming btags so/ /za ba ni rdo rje za ba mor ming btags so/ /go ba ni rdo rje go ba mor ming btags so/ /dga' ba ni rdo rje dga' ba mor ming btags so//de la sogs pa rdo rje pho nya mor dbang bskur ro/ /de nas sa la spyod pa'i btsun mo thams cad la byin pa 'di lta ste/ zhi ba mo ni rdo rje pho nya mor ming btags so/ /rlung ni rdo rje mgyogs mar ming btags so/ /me ni rdo rje 'bar mar ming btags so/ /ku be ra ma ni rdo rje 'khor mar ming btags so//de la sogs pa ni rdo rje pho nya mor dbang bskur ro/ /de nas sa 'og na gnas pa'i btsun mo thams cad la byin pa 'di lta ste/ phag mo ni rdo rje khar ming btags so/ /tsa mu N+DI ni rdo rje dus mar ming btags so/ /sna chad ma ni rdo rje rul mar ming btags so//chu lha ma ni rdo rje chu srin mar ming btags so/ /rdo rje bran mor dbang bskur ro/ /de bzhin du 'di lta ste/ dbang phyug chen mo ni rdo rje khro mor ming btags so/ /mthu bo che ni sgyu ma'i rdo rjer ming btags so/ /sgra gzhon nu ni rdo rje dril bur ming btags so/ /tshangs pa ni thub pa'i rdo rjer ming btags so//dbang mo ni rdo rje mtshon char ming btags so/ /rig pa'i rgyal po rnams su dbang bskur ba'o/ /de nas bar snang la spyod pa rnams la byin pa 'di lta ste/ nyi ma ni bdud rtsi 'khyil par ming btags so/ /zla ba ni rdo rje 'od du ming btags so//dbyig pa chen po ni rdo rje dbyig par ming btags so/ /ser smug ni rdo rje ser smug tu ming btags te/ de la sogs pa rdo rje khro bor dbang bskur ro/ /de nas nam mkha' la spyod pa'i lha thams cad la byin pa ni 'di lta ste/ sbrang rtsi myos pa ni rdo rje glang po snar ming btags so//sbrang rtsi byed pa ni rdo rje phreng bar ming btags so/ /rgyal ba ni rdo rje dbang du ming btags so/ /rgyal bar byed pa ni rdo rje rnam par rgyal ba'i rdo rjer ming btags to/ /de la sogs pa tshogs kyi gtso bor dbang bskur ro/ /de nas sa bla'i dbang po thams cad la byin pa 'di lta ste/mdzod skyong ni rdo rje tho bar ming btags so/ /me ni rdo rje mer ming btags so/ /rlung ni rdo rje rlung du ming btags so/ /ku be+e ra ni rdo rje 'jigs par ming du btags te/ de la sogs pa ni rdo rje pho nyar dbang bskur ro/ /de nas sa 'og gi dbang po'i lha thams cad la byin pa ni 'di lta ste/phag ni rdo rje lcags kyur ming btags so/ /gshin rje ni rdo rje dus su ming btags so/ /gtsug phud sa ni rdo rje bgegs kyi gtso bor ming btags so/ /ba ru Na ni klu rdo rjer ming btags te/ de la sogs pa ni rdo rje bran zhes bya bar dbang bskur ro/ /de la sogs pa 'jig rten gyi nga rgyal can thams cad btul ba'i don to//bo la gzhibs par mdzad nas ni/ /dam du 'khyud cing 'o mdzad nas/ /bcom ldan gus par mchod nas ni/ /bdag med ma yis sngags zhus so/ /zhes bya ba la bdag med mas bde ba'i ros/ bdag po yongs su mchod de/kye'i rdo rje'i sngags zhus zhes pa'i don to/ /de bzhin du/ bud med rnams kyi dbang byed sngags/ /de bzhin gdug pa bsdigs pa dang / /klu rnams bsdigs par byed pa dang / /lha dang lha min bsnun pa ni/ /de ni nga yis bshad bya yis/ /lha mo bde ba sbyin pa nyon/ / zhes bya ba ni rtsa ba'i sngags kyi yon tan te/ 'di ltar sngags gang gi yon tan ni/ gang zhig bzlas pa tsam gyis mi mo rnams dbang du 'gyur ba dang / gdug pa tshar gcad pa dang / klu rnams dbang du bya ba dang / lha dang lha ma yin rnams 'dul bar 'gyur ba de bshad par bya'o zhes pa'i don to//sangs rgyas byang chub sems dpa' la/ /bdag gis gzhan du ma bstan to/ /'di yi sngags kyis gang 'byung zhing / /rdo rje sems dpa' gang mdzad pa/ /lha mo shin tu 'jigs pa ste/ /ngo mi chogs pas khyod la bshad/ /ces bya ba ni sngags gang gi yon tan bskal pa bgrangs pa las 'das pas kyang /yon tan brjod par mi nus pa nyan thos dang / rang rgyal ba rnams dang / smon pa byang chub tu sems bskyed pa rnams la yang / gsang ba khyod kyi ngor bshad do/ /zhes bya ba'i don to/ /'bar ba'i phreng bas 'khrugs pa yi/ / dkyil 'khor rab tu bzhengs nas su/ /rdo rje snying po dbang sbyin phyir/ /thig le mchog ma dgug par bya/ /zhes bya ba ni/ /kye'i rdo rje'i dkyil 'khor 'jigs pa rnams kyang / cher 'jigs par byed pa bzhengs te/ rdo rje bla ma las dkyil 'khor gyi de nyid shes par bya ste/ yi ge'i grangs kyis 'bum bzlas nas/ /sbyin sreg bcu chas sbyin sreg bya ste/ sngon du bsnyen te bzlas pa khri yis las la sbyar na/ lha mo thig le mchog ma lta bu'ang / /'gugs par byed na/ mi mo phran tshegs lta bu lta smos kyang ci dgos zhes pa'i don te sngags kyi yon tan no/ / gzhan du na bde ba chen po'i 'khor lo nas/ thig le'i mchog srog gi rlung gang gsad pas 'gugs pa ni nges pa'i don to/ /de nyid rdo rje snying po'i dbang yang yin no/ /sgra ring ba dang bzang ba yis/ /kye yi rdo rje sbyor ldan pas/ /btsun mo thams cad dgug par bya/ /dogs pa med pa'i sems kyis ni//bzlas pa 'bum gyis rnal 'byor bdag /kye yi rdo rje'i rnal 'byor gyis/ /'di yi las rnams thams cad byed/ /ces bya ba la nges pa'i don du stong pa nyid dang / snying rje'i bdag nyid kyi rang bzhin 'byor pa las srog gi rlung 'bum phrag gcig bkag na/las thams cad byed par 'gyur ba ni nges pa'o/ /de la/ rig byed rnams kyi dang po sbyin/ /zla phyed thig les rnam par brgyan/ /zhes bya ba la rig byed kyi dang po ni a la/ zla phyed ni zla ba tshes pa lta bu ste/ a'i klad pa la brgyan par bya'o/ /de'i steng du slar zhing thig les brgyan zhes pa'i don to//oM aSh+TA na nA ya/ piM ga lo j+h+ra ke sha ba r+t+ma ne/ tsa tu rbiM sha ti nai trA ya/ Sho Da sha b+hu dzA ya/ kr-i Sh+Na dzI mU ta wa pu She/ ka pA la mA lA ne kaM d+hA ri Ne/ ad+h+ma ta krUr tsi t+tA ya/ ad+d+hen+du baM Sh+TI Ni/ oM mA ra ya mA ra ya/ kA ra ya kA ra ya/ gardza ya gardza ya/ tardza ya tardza ya/ sho Sha ya sho Sha ya/ sa p+ta sA ga rA na/ ban+d+ha ban+d+na/ nA gA Sh+Ta kA na/ gr-i h+Na gr-i h+Na/ sarba ShathU na/ ha hA hi hI hu hU he hai ho ho haM haHphaT swA hA/ zhes bya ba rnams ni rtsa ba'i sngags chen po yon tan thams cad 'byung ba'i sngags kyi rkang pa rnams so/ / de nas lha mo de dgyes nas/ /bsrubs dang bsrub pa'i sbyor ba las/ /zhes pa nas/ nyid kyi dkyil 'khor bri bar mdzad/ /ces pa yan chad kyis ni/ bdag med mas bcom ldan 'das la dkyil 'khor zhus pa dang / bcom ldan 'das nyid kyis dkyil 'khor gsungs pa'o zhes pa'i don to//'phar ma gcig dang sgo bzhi pa/ /zhes pa nas/ re khA lnga dang yang dag ldan/ /zhes pa yan chad kyis ni/ rdul tshon gyi dkyil 'khor gyi mtshan nyid bstan par shes par bya'o/ /de bzhin du/ de nas bum pa brgyad po bri/ /zhes pa ni sgo dang mtshams su bri ba'o//rin chen lnga yi phye ma'am/ /yang na 'bras sogs phye ma yis/ /min na dur khrod so phag gam/ /de bzhin dur khrod sol ba yis/ /zhes pa la sogs pa ni/ gang rdul tshon gyi dkyil 'khor bri bar 'dod pa des/ rnyed na gser dang dngul la sogs pa'i phye mas bris pa'am/de ma 'byor na 'bras kyi phye ma yung ba la sogs pas kha dog bsgyur bas kyang bris la/ min na dur khrod kyi so phag gis rdul tshon dmar po dang / de nyid kyi sol bas nag po dang / mi rus kyis dkar po byas la bri ba ni nges pa'o/ /de dbus pad+ma 'dab ma ni//brgyad pa ze 'bru bcas pa bri/ /dbus su skyes bu thod pa nyid/ /mdog dkar cha ni gsum pa bri/ /zhes bya ba la/ pad+ma 'dab ma brgyad la ze 'bru dang ge sar du bcas pa'i dbus su skyes bu'i thod pa dum bu gsum pa bri ba'i don yin la/ de bzhin du/ dbang ldan du ni sha ra b+ha//zhes pa nas/ sA lu skyes pas yongs bkang gzhag /ces pa la sogs pa g.yas kyi mtshan ma brgyad po bri bar bya ste/ sngon du brjod pas khong du chud par bya'o/ /de dag kyang rang bzhin yon tan gyi dbang gis so so'i mtshan ma rnams lha mo'i kha dog dang mtshungs par bri bar bya'o//gzhan yang dkyil 'khor gyi cho ga rgyas pa rnams saM gra ha zhes pa'i rgyud chen po las khong du chud par bya ste/ 'dir ni gnad kyi gnas tsam zhig bstan par byas zhes pa'i don to/ /'di ltar 'dir mang smos pas ci zhig bya/ ji ltar de nyid bsdus pa yis//dkyil 'khor cho ga de bzhin bya/ /zhes bya bas bstan pa yin no/ /de bzhin du bde ba chen po'i rig ma'i lo'i tshad gsungs pa 'di lta ste/ bcu gnyis brgyad gnyis lon pa yi/ /rig ma bde chen brgyad po nyid/ /do shal rkang gdub kyis brgyan nas/ /dkyil 'khor du ni rab tu gzhug /ces bya ba ni/ bcu gnyis lo ni rnam dag pas/ /rdo rje nyi ma snang ba che/ /bcu drug lo ni rnam dag pas/ /zla ba bcu drug pa yi cha/ /rdo rje zla ba dri med 'od/ /chags bral dang po chags pa che/ /bcu drug phyed phyed rigs pa 'dis/ /rig ma brgyad du rnam par bshad//bde ba'i thig les rab brgyan pas/ /do shal rkang gdub rnams su grags/ /ma dang sring mo nyid dang yang / /zhes bya ba nas/ de bzhin pha yi sring mo nyid/ /rig ma brgyad du rnam par grags/ /zhes pa la thug pa rnams ni/ rnal 'byor ma rnam pa brgyad phyi dang nang du phye nas bstan pa ste/phyi'i skye bo rnams kyi bdag tu 'dzin pa'i rtog pa spang ba'i phyir/ rgyud du ji ltar gsungs pa rnams dngos su nyams su blang zhes bstan pa/ nges pa'i don du na snying ga'i thig le rig ma brgyad kyi rang bzhin kha gyen du bltas pa'i thig le brgyad ni nges pa'o//dam du 'khyud dang 'o byas pas/ /'di rnams rnal 'byor pa yis mchod/ /de nas ga bur btung ba nyid/ /des ni dkyil 'khor bsang gtor bya/ /de nas rnal 'byor pa yis btung / /dngos grub myur du thob par 'gyur/ /zhes bya ba la rig ma rnams dkyil 'khor du bcug ste/'jig rten dang 'jig rten las 'das pa'i bye brag gis phye nas byang chub kyi sems btung bas rnal 'byor ba bdag cag tshim par bya ba dang / des dkyil 'khor bsang gtor byas pas/ thun mong gi dngos grub thob pa ni drang ba'i don yin la/nges pa'i don du na/ srog gi rlung brgyad pos g.yas kyi lam nas bgrod de/ ye shes kyi bdud rtsi bkug pas lus kyi dkyil 'khor bsang gtor bya bar nges pa ni/ nges pa kho nar dngos grub thob par 'gyur ba ni de bzhin gshegs pa'i gdams ngag go/ /de la yang chang ni btung ba sbyin pa dang //sha dang sA lu skyes pa bza'/ /zhes bya ba ni slob dpon gyi sngon du las su bya ba'i cho ga yin no/ /de bzhin du/ de yang gos dang bral byas nas/ /zhes bya ba la sogs pa dang / de la rtsed mo rtse bar bya/ /zhes bya ba la thug pas ni/ 'dod chags kyi dbang du gyur pa'i byis pa rnams kyis rtogs par bya ba'i phyir/bu le'i bstan bcos las brjod pa ltar/ na kha dang dan+ta dang dkar 'dzin la sogs pa la rtse ba lta bu 'khrig thabs kyi ro dpag tu med pa'i sbyor ba nyams su myang bar bya zhes pa'i don to/ /de nas thun tshod gnyis pa la/ gos kyis mig ni bkab nas su/ /der ni slob ma gzhug pa nyid/ /ces bya ba thun tshod drug lus pa'i rjes su kye'i rdo rje'i dkyil 'khor mi bzad pa chos kyi 'byung gnas kyi rang bzhin bde ba thams cad bskyed pa mtshon par byed pa'i dkyil 'khor du bcug la/ rang gi lhag pa'i lha yang bstan par bya//zhes pa'i don to/ /go rims ni 'di lta ste/ mtshan mo skye bo med khyim du/ /slob dpon la sogs rab phye bas/ /dbang ni ji ltar gsungs pa nyid/ /de la mngon par dbang bskur bya/ /zhes bya ba la/ rdo rje slob dpon blo dang ldan pas/ /dbang la 'chol ba'i skyon spangs la/dbang bzhi go rims bzhin bskur bar bya ste/ 'di ltar/ slob dpon la sogs rab phye bas/ /zhes smos pa'i shugs kyis bzhi ru nges te/ rgyud 'di nyid las kyang / de ltar thams cad bzhi bzhi'o/ /zhes gsungs pa'i phyir dang / 'di nyid kyi bshad pa'i rgyud mkha' 'gro ma rdo rje gur las kyang ji skad du//dang po ru ni bum pa'i dbang / /gnyis pa gsang ba zhes su brjod/ /gsum pa shes rab ye shes te/ /bzhi pa slar yang de bzhin no/ /zhes gsungs pa'i phyir ro/ /slob dpon gyi dbang ni drang ba'i don du bum pa yin la/ nges pa'i don du ni bzhi pa la sogs pa yongs su rdzogs pa kho na slob dpon zhes brjod kyis/bum pa tsam ni ma yin no/ /ci'i phyir zhe na/ slob dpon gyi nges tshig dang mi ldan pa'i phyir ro/ /de bas na/ gnyis dang gnyis kyis phye ba yis/ /bum sogs dang po bzhi mtha' can/ /'jig rten 'jig rten 'das dbye bas//dbang bskur rdzogs par shes par bya/ /zhes bya ba'i tha tshig ste/ rtsa ba'i rgyud 'bum phrag lnga pa dang / /rgyud 'bum pa'i mngon par brjod pa zhes bya ba dang / dang po'i sangs rgyas zhes bya ba rtsa ba'i rgyud chen po rnams las rgyas par khong du chud par bya'i/'dir ni mdor bsdus te bstan pa tsam mo/ /ji ltar mchod dang bstod bshad pa/ /slob ma bzang pos sngar shes bya/ /zhes bya bas slob ma blo dang ldan pas sngon du bla ma mchod la rgyud nas ji ltar gsungs pa'i bstod pa/ khong stong khyod kyi sku la med/ /ces pa la sogs pas bstod pa bya zhes pa'i don to//de nyid de la bstan pa ni/ /dga' bral dang po mchog mtha' can/ /thams cad rgyud du sbas pa ste/ /mtha' yi mtha' yis phye ba nyid/ /ces bya ba la gnas snga ma snga ma'i dbang gis byis pa rnams kyis re zhig rtogs par bya ba'i phyir/ mar ngo'i thog mar yar ngo'i mtha' ma can gang zhig rgyud thams cad du sbas pa/de slob ma'i skye bo mchog la bstan par bya zhes pa'i don to/ /de ni ji skad du sgyu 'phrul dra ba las kyang / chags bral dang po chags pa che/ /zhes pa dang / de bzhin du dang po'i mchog gi sangs rgyas zhes bya ba'i rgyud las kyang ji skad du/phyogs gnyis po yi bag chags kyis/ /yongs su gang ba ma 'dres pa/ /zhes gsungs pa'i phyir/ de kho na nyid de rgyud thams cad dang mi 'gal bar bstan par bya zhes pa'i tha tshig go/ /rdo rje mchod par rab sbyar nas//de la lha mo des zhus pa/ /lha de'i skad cig ji ltar lags/ /gtso bo chen pos bshad du gsol/ /zhes bya ba ni/ bdag med mas bcom ldan 'das la lha bde ba'i skad cig gang gis gnas par bgyi zhing ji ltar rtogs par bgyi zhes zhus pa dang /bcom ldan 'das kyis slar gsungs pa/ der ni thog ma dbus mtha' med/ /srid min mya ngan 'das min pa/ /'di ni mchog tu bde chen nyid/ /bdag min gzhan yang min pa nyid/ /ces bya ba gsungs te/ lha mo de'i skad cig ni srid pa ste/ sum cu rtsa gnyis kyi gnas nas 'phos pa dang /mya ngan 'das min te gang gi sgo nas ma 'das pa nyid/ /thog ma tha ma dbus min zhes pa yang yin la/ bdag min gzhan yang min pa nyid/ /ces bya ba yang yin la/ mtshan nyid dang bral ba'i skad cig kyang yin zhes pa'i don to/ / de ni ji skad du/ sangs rgyas thams cad mnyam par 'dus pa'i rgyud las kyang / thog ma tha ma med zhi ba/ /gtso bo dngos dang dngos mi mnga'/ /stong pa snying rje dbyer med pa/ /byang chub sems zhes brjod pa yin/ /zhes gsungs so/ /de lta bas na rdo rje'i tshig 'di'i don ni/'di ltar rtogs shing khong du chud par bya'o/ /longs spyod kyi ni rlabs gnyis las/ /rang lag g.yas dang g.yon pa yis/ /mthe bong dang ni srin lag gis/ /da ni rnal 'byor ba yis bcir/ /zhes bya ba la rdo rje slob dpon mkhas pa gang gis rang gi rgyal mtshan gyi ngos gnyis na gnas pa'i chu bo 'bab pa'i rgyun gyi slob ma la gsang bas gsang bar bya'o zhes bya ba dang /de bzhin du ting nge 'dzin gang gi rtsal gyis btsir bar gyur pa des na g.yas nas 'gro zhing / g.yon nas 'ong ba zhes bya ba'i don dang / de bzhin du rnam par rtog pas kun nas bcings pa'i skye bo 'ga' la dngos su longs spyod rdzogs pa'i 'khor lo'i gnas kyi g.yas g.yon du slob dpon gyi lag pa g.yas g.yon gyis bcir bar gyur na/de las ye shes skye 'gyur te/ /de la ci zhig skye zhe na/ /gzhon nu'i dga' ba ji lta ba'am/ / lkugs pa'i rmi lam lta bu'o/ /zhes bya ba la/ de lta bu'i gnas skabs gsum gyi khyad par gyis/ khyad par du byas pa na brjod pa'i yul las tha dad pa dper na dge slong gang gis bsam gtan bzhi pa'i rtse mo'i ting nge 'dzin thob pa'i bde ba las kyang khyad par du 'phags pa 'byung zhes pa'i tha tshig go//don 'di ni mchog gi dang po zhes bya ba'i rtsa ba'i rgyud las kyang ji skad du/ lang tsho yis ni bde thob pa/ /bde chen rang gi rig pa ste/ /de bzhin ting 'dzin bral ba yis/ /bde ba smra bar mi nus so/ /zhes gsungs pas/ don ni rgyas par khong du chud par bya'o//mchog ni mtha' dang dga' bral dbus/ /zhes bya ba ni gong du rgyas par bstan la/ stong dang stong min he ru ka /zhes bya ba ni/ rtogs par 'gyur zhes tha tshig rnam par sbyar bar byas la/ stong pa ni gang gi sgo nas brgal ba dang / stong min ni srid pa ste/sum cu rtsa gnyis kyi dkyil 'khor la mi gnas pa zhes bya ba'i don to/ /kye'i rdo rje nges pa'i don gyi rgya cher bshad pa las/ kye'i rdo rje mngon par 'byung ba'i le'u'i rgya cher bshad pa ste lnga pa'o// //sems can rnams ni gdul ba'i phyir/ /rmad 'byung ngo mtshar gzugs can la//phyag 'tshal nas ni bu lon gyi/ /rim pa rdo rje snying pos bri/ /da ni byis pa'i skye bo rnams gzhug par bya ba'i phyir/ ji bzhin pa'i dkyil 'khor las/ ras la sogs pa la bcos ma'i dkyil 'khor bstan par bya ba'i phyir/ sngon du lha mo la ni dam 'khyud cing //mnyam sbyar bde ba myong mdzad nas/ /zhes bya ba la sogs pa smos te/ gar thabs kyi bstan bcos dpag tu med pa tshar byung bar mdzad nas cho ga gsungs zhes bya bar sbyar bar bya'o/ /de la re zhig spyod pa'i le'u las gsungs pa'i phyag rgya lnga'i don spyod pa'i rnal 'byor la gnas pa rnams kyis/phyi dang nang du phye la bcang bar bya'o zhes skabs de nyid du legs par bstan pa/ bu lon bri ba'i skabs 'dir ni rang gi dam tshig rnam pa lnga las slob dpon mi smad cing / kun nas kun du bsten par bya'o zhes bstan par bya ba'i phyir/ dang por phyag rgya lnga ni rab phye bas//bla ma slob dpon 'dod lha la/ /phyag 'tshal don du 'khor lo gsungs/ /zhes pa nas/ /phyag rgya bsten phyir ska rags nyid/ /ces bya ba la sogs pas gsungs te/ phyi dang nang du phye ba las/ /phyi ni sgra ji bzhin pa rgyud nas gsungs pa kho na yin la/ nges pa'i don ni rtsa ba'i rgyud nyid las ji skad gsungs te/bla ma slob dpon 'dod lha zhes pa sum cu rtsa gnyis kyi dkyil 'khor na yon tan lci ba'i 'byung gnas rab tu gnas pa rtogs par bya ba la btud pa'i don du 'khor los mtshan to/ /de nyid la skye bo ma rungs pa dag smod pa slar gzhug par bya zhing /rang gnas de las mi nyams par bya ba'i phyir rna chas mtshan to/ /srog gi rlung mi shigs par gnas pa la 'bad pa'i phyir mgul rgyan gyis mtshan to/ /byang chub sems kyi srog mi gcad pa'i phyir lag gdub kyis mtshan to/ /bde ba'i gzhi drug cu rtsa bzhi'i dkyil 'khor las mi 'da' ba'i phyir ska rags kyis mtshan to zhes so//de bas na/ sangs rgyas lnga yi phyag rgyas ni/ /rtag tu lus la phyag rgyas gdab/ /ces gsungs te/ don du na lus can thams cad kyi srog gi rlung gnas lnga ru bag la zha ba gang yin pa de/ rtag tu lus la phyag rgyas gdab/ /ces su rtogs par bya'o//de nas rab tu bzhad mdzad nas/ /zhes pa nas/ kye yi rdo rje'i bris sku nyid/ /bgyi lugs bde ba chen pos gsungs/ /zhes pa la sogs pas ni/ bu don ji ltar bri ba'i lugs/ /bdag med mas zhus zhes sbyar ro/ /lan gsungs pa ni/ 'dir ni 'bri mkhan dam tshig can/ / sgrub pa po yang dam tshig can gyis ni/ /bris sku yang ni 'jigs pa bri ba nyid/ /ces pa la sogs pas bstan te/ 'di ltar sgrub pa po dang 'bri mkhan la sogs pa dang / ri mo'i don la 'jug pa gang dang gang yin pa de dang de thams cad stong pa nyid dang snying rje mi phyed pa'i lam la phal cher gnas pa gsang sngags kyi tshul la mchog tu dad pa rnams kyis bya zhes sbyar ro//yan lag gi don bstan pa/ skyes pa'i thod gnas kha dog lnga/ /ro yi skra yi pir nyid kyis/ /bris sku bla med bri ba nyid/ /ces pa ste tshon sna lnga skyes bu'i thod pa'i snod du sbyar la mi shi ba'i skras bir bya ste tshon lnga po rang bzhin yon tan gyi dbang las skyes bu de dang de'i thod par gzhag ces pa'i don to//de bzhin du/ dam tshig byin brlabs rnal 'byor las/ /zla ba zla ba'i mar ngo yi/ /bcu bzhi pa la khyim dben par/ /phyed nas ma rungs sems kyis ni/ /zhes bya ba la sogs pa smos te/dngos po nye bar dgos pa gang dang gang du sgrub pa po'i dbang phyug gis bla ma'i man ngag ltar byin gyis brlabs la sbyar bar bya zhing / zla ba 'ong ngo cog gi nag po'i bcu bzhi pa la gnas dben par tshogs kyis longs spyad par bya zhing ri mo mkhan dang sgrub pa po bdag nyid kyi lus gcer bur byung zhing rus pas brgyan la 'bags pa dang /mi gtsang ba'i dam tshig rnams za bzhin du bri bar bya ste/ de bzhin du gzhan yang / bzhin bzangs snying rjer ldan pa dang / gzugs dang lang tshos skal bzangs ma/ /me tog bcas shing sgrub po dga'/ /rang gi phyag rgya g.yon du bzhag /ces bya ba sgrub pa po'am ri mo mkhan gyis rang dang mtshungs pa'i btsun mo bdag med ma lta bu g.yon du bzhag la/ mi phyed pa'i lam la gnas bzhin pas bu don bri ba ni rdo rje 'dzin pa'i nges pa'o/ /kye yi rdo rje'i nges pa'i don gyi rgya cher bshad pa las/ bu don bri ba'i le'u'i rgya cher bshad pa ste drug pa'o// //rags dang phra mo dngos ston pa/ /kye yi rdo rje la phyag 'tshal/ /glegs bam tshogs dang legs 'dul gyis/ /rgyas bshad rdo rje snying pos bri/ /da ni kye'i rdo rje'i glegs bam bri ba'i rim pa dang / dbang bskur ba'i le'u ru bstan pa'i tshogs kyi ston mo dang /byis pa rnams kyis rtogs par bya ba'i theg pa'i rim pa'i tshul bstan par bya ba'i phyir/ de nas de la lha mos zhus pa zhes bya ba la sogs pa smos te/ bu don gyi bstan bcos kyi rjes su tshim par mdzad nas/ glegs bam nga yis bshad bya yis/ /lha mo skal pa chen mo nyon//zhes gsungs pa ste/ kye lha mo chen mo sbrang chen gyi snag tsha dang mi rus kyi smyu gus gro ga la 'bri mkhan dam tshig can gyis glegs bam sor bcu gnyis par bri zhes pa'i don te/ 'di ltar nyi ma dang zla ba rnam par sbyangs pa'i ros snag tsha la bsres pa dang /rten 'brel bcu gnyis dag pa'i glegs bam sor bcu gnyis su bsgrubs pas byas pa rnams dga' ba'i dngos grub rang bzhin yon tan gyi dbang gis ster ba ni nges pa'o/ /glegs bam dang ni bris sku nyid/ /gal te skal med kyis mthong na/ /skye ba 'dir yang sgrub med la//'jig rten gzhan du'ang spyod yul min/ /zhes bya la de ltar bla ma'i zhal gyi lung dang bdag gi byin gyi rlabs kyis kha na ma tho ba med par bsgrubs pa'i glegs bam dang ras ris skal ba med pa'i byes pa'i skye bo la lan cig tsam bstan na yang grub pa rnam pa gnyis nyams par 'gyur te/de bas de'i phyir/ 'bad pas kun du bsrung bar bya/ /zhes pa'i don to/ /yang dag dad dang ldan pa la/ /res 'ga' tsam zhig bstan pa nyid/ /ces bya ba ni dad cing mos pa dang ldan pa'i skyes bu la skad cig tsam bstan par bya ba ste/ mchod pa dang gus pa la sogs pa sngon du 'gro bas bstan pa la skyon gyi dri mas mi gos zhes pa'i don to//glegs bam lam gyi spyod yul du/ /skra dang mchan khung gnyis su sba/ /zhes bya ba ni lam dang yul gzhan du bgrod pa'i dus su glegs bam ni skra'i gseb tu sba bar byas la/ ri mo gang yin pa de ni 'od ma'i sdong bu 'jam zhing mdzes pa'i nang du bcug ste/mchan khung g.yon par bcang zhes pa'i don to/ /da ni tshogs kyi mchod pa'i khyad par bstan par bya ba'i phyir/ /b+ha gar ling+ga rab bkod nas/ yang dang yang du'o mdzad nas/ /zhes bya ba la sogs pa smos te/ gang gi mthu yis yams dang skra dkar dang gnyer ma la sogs pa 'joms par byed cing / byis pa'i skye bo rnams dga' bar byed la sha dang khrag gis gzi mdangs skyed par byed pa de bshad par bya zhes bya ba'i don to/ /de bas na de'i phyir/ tshogs kyi 'khor lo'i bza' ba ni/ /nyon cig lha mo mig yangs ma//gang du zos pas 'dod don kun/ /sgrub pa can gyi dngos grub 'gyur/ /zhes bya ba gsungs te/ rdo rje'i tshig 'di'i don yang nges pa dang drang ba'i don gnyis su go bar bya'o/ /de la re zhig phyi'i tshogs kyi bza' ba'i gnas su/ dur khrod ri yi bya skyibs dang //de bzhin mi med grong khyer dang / /yang na dben pa'am rgya mtsho'i mthar/ /zhes bya bas bstan te/ gnas gang gi phyi rol du mu stegs byed pa la sogs pa dang / byis pa'i skye bo ma rungs pa gang dag yong ye mi gnas pa der brtsam zhes pa'i don to/ /re zhig phyi rol gyi gnas 'di rnams su chang dang go la sogs pa'i sha bza' ba dang /bud med kyi skye gnas la 'khrigs thabs sbyar bas 'dod pa'i dngos grub 'grub pa ni med de/ de ltar gang de rnams kyi 'dod pa'i dngos grub tu 'gyur ba de lta na ni/ chos kyi phung po brgyad khri bzhi stong yang don med par 'gyur la/rnal 'byor pa'i 'bad pa phun sum tshogs pa 'jig par 'gyur ro/ /de bas na de'i phyir bza' ba dang btung ba la sogs pa'i tshogs kyis mchod pas 'dod pa'i dngos grub thob ces gsungs pa ni/ byis pa'i skye bo rnams drang bar zad do/ /nges pa'i don du kun du rtog pas kun nas mi gos pa'i gnas 'ga' zhig la brten te/srog gi mes bsreg cing bcos pa'i bcud gang yin pa des myos par bya ba dang / tshim par zos te gnas pas tshe 'phel bar byed pas rdo rje 'chang gi gzi mdangs lta bu ster bar 'gyur te nges pa'i don to/ /bza' ba 'di ni rab tu bza'//de la gdan du brtag pa ni/ /ro yi gzugs can dgu dang ni/ /yang na stag gi bags pa dang / /dur khrod ras ni de bzhin no/ /zhes bya ba la/ gang zhig tshogs kyi 'khor lo 'di byed par 'dod pas/ dge slong dang dge slong ma dang khyim pa'i rnal 'byor pa rgan rabs la sogs pa rnams//rang rang gi gral tha dad par bya zhing mi srun pa'i skye bo 'bad pas bsrung bar bya'o/ /de bzhin du rnal 'byor ma gau rI la sogs pa'i rigs can ma spyan drangs la/ gcig ni gtso bo'i g.yon du bzhag la/ lhag ma brgyad po 'dab ma'i phyogs dang phyogs bral la rim pa bzhin du bzhugs su gsol lo//de rnams la mi lpags khru re la rang rang gi gzugs bris la gdan du dbul bar bya'o/ /gtso bo la stag gam/ glang po che'am/ ba lang gi pags pas gdan du dbul lo/ /yang na thams cad la mi lpags 'ba' zhig gam/ stag gi pags pa 'ba' zhig gam/glang po'i pags pa 'ba' zhig gam/ ba glang gi pags pa 'ba' zhig gam/ dur khrod kyi ras 'ba' zhig kun la ji ltar rnyed pa de ltar dbul bar bya'o/ /de'i phyir/ dbus su kye yi rdo rje'i gzugs/ /ji ltar sngar bzhin gnas shes nas/ /phyogs dang phyogs bral rnams su yang //de nas rnal 'byor ma rnams dgod/ /ces rgyas par gsungs pa yin no/ /de bzhin du bza' ba thams cad kyang stag la sogs pa'i pags pa'i steng du bza' ba ji lta ba rnams drang bar bya'o/ /de bzhin du/ der ni yang yang zos nas kyang / /de ru ma mo mchod par bya//zhes gsungs te/ phyi'i bza' ba dang btung ba rnams sbyang ba dang rtogs pa dang / sbar ba dang bdud rtsir byas te zos la/ lha mo rnams dang yang dang yang du me thu na'i sbyor bas bde ba rtogs par bya'o/ /rnal 'byor ma rnams kyang sa dang / chu dang / me dang / rlung la sogs pa dag bas sring mo dang /bu mo dang / sgyug mo dang / tsha mo dang / chung ma la sogs pa sngon du legs par sbyangs la mchod pa bya ba ni nges pa'o/ /de bzhin du/ de rnams rtag tu legs mchod nas/ /tshogs kyi dkyil 'khor 'grub par 'gyur/ /zhes gsungs pa legs par mchod pa ni/phyi rol gyi skye bo rnams kyis ma mthong ma rig par ma sring la sogs pa rnams la/ phyir mi 'byung ba'i byang chub sems kyis mchod na/ legs par mchod pa yin zhing / tshogs kyi dkyil 'khor 'grub par 'gyur ba ni ngas pa'o/ /de bzhin du btung ba'i snod rnams skyes bu'i thod pa'i dum bu gcig par rgun chang la sogs pa rnams bkang ste drang bar bya'o//bla ma la dbul skal chen ma/ /phyag 'tshal nas ni rang yang btung / /pad+ma'i lag pas blangs pa dang / /de nyid kyis ni lag pas dbul/ /yang nas yang du rab 'dud pa/ /der ni sgrub pa po yis bya//zhes bya ba rnal 'byor ma rnams dang / gtso bo dang bcas pa'i rnal 'byor pa rnams kyis legs par longs spyad par bya ba 'di lta ste/ kun gyis spyi bor thal mo sbyar ba sngon du 'gro bas slob dpon la phyag 'tshal te/ pad+ma'i lag pas phul la gdod ci bder longs spyad par bya'o//de bzhin du 'khor lo kun du pad+ma'i lag pas drang bar bya zhing slar yang de nyid kyis blang ngo / /nges pa'i don du na bdud rtsi lta bu'i btung ba bde ba'i 'khor lo nas/ rgyal mtshan gyi rtse mor rgyun drang zhing / slar de nyid kyi gnas su 'phang ba'i tshul gyis drang zhing /blang bas tshim par bya ba ste/ de bzhin gshegs pa'i bka' lung ngo / /kye'i rdo rje'i nges pa'i don gyi rgya cher bshad pa las/ glegs bam bri ba dang / tshogs kyi bza' ba'i le'u'i rgya cher bshad pa ste bdun pa'o// //de nas rnal 'byor mas zhus pa/ /phyag rgya chen po ji lta bu//kun rdzob rnam pa'i gzugs kyis ni/ /bde ba la sogs bshad du gsol/ /zhes bya ba la sogs pa rnal 'byor ma rnams kyis bcom ldan 'das bde ba chen po la gsol pa ni kye'i rdo rje la zhus pa ste/ 'di ltar kye'i bcom ldan 'das phyag rgya chen po'i rang gi ngo bo ni gang la 'ang mi gnas pa/brjod du ma mchis pa/ brten pa ma mchis pa/ dmigs pa ma mchis pa/ gang la'ang mi gnas pa/ legs par ni som nyi ma mchis na/ bdag dang bdag gi dri mas g.yogs pa rnams kyis tshul ji ltar rtogs par bgyi zhes zhus pa'i don to//bcom ldan 'das kyis slar gsungs pa/ shin tu ring min thung ba min/ /gnag pa ma yin dkar ba min/ /pad+ma'i 'dab ma'i rnam pa 'dra/ /zhes pa la sogs pa gsungs te/ 'di ltar rigs bzhi las 'byung ba'i btsun mo skye ba'i lo bcu gnyis nas nyi shu la thug pa dag la brten te/mtshon par 'gyur gyis gzhan du ma yin zhes bya ba'i don dang / de bzhin du btsun mo de dag gi mtshan nyid ni 'di lta ste/ gzugs shin tu ring ba'ang ma yin pa dang / ha cang thung ba'ang ma yin pa dang / mig sman ltar cher gnag pa ma yin pa dang / rdo thal ltar ha cang dkar ba ma yin pa ni mdog gi khyad par te/ de dag gi kha dog gi khyad par rnams spang bar bya ba'o/ /'o na ji lta zhe na/ cung zad sngo ba sangs su gnas pa gzung zhes bya ba dang / de bzhin du mig pad+ma'i 'dab ma ltar dkar dmar 'byes pa cung zad ring ba dang kha'i dbugs mchog tu dri zhim pa dang /zla mtshan gyi khrag gla rtsi ltar dri zhim pa dang / skye gnas kyi pad+ma la dus dus su sardza ra dza lta bu'i dri 'byung zhing res 'ga' pad+ma lta bu'i dri 'byung ba dang / dus dus su ut+pala'i dri dang / a ka ru nag po'i dri dang mtshungs pa 'byung ba rnams ni mkhas pas dri bzang por mtshon par byas la gzung bar bya ba dang /de bzhin du rang bzhin du gnas pa'i mtshan ma 'di lta ste/ spyod lam dal zhing rtsa ba hral med pa nyid dang / smra ba nyan cing gsong por smra la dal gyis smra ba dang / skra gnag cing 'jam la mtshams stug cing ring ba dang /dpral ba'i dbus na rang bzhin du gnas pa'i ri mo gsum yod pa gang yin pa de lta bu ni bde bar gshegs pa rnams kyis rab tu bsngags pa yin te/ yan lag gsang ma zhes kyang gsungs pas/ /de la 'bad pa kun gyis bla ma'i bka' ltar bsgrubs na/gdon mi za bar phyag rgya chen po'i grub pa 'thob par 'gyur ro zhes bya ba yin la/ gzhan yang de lta bu'i btsun mo la/ 'jig rten pa phal bas mi shes pa gang dag gis mi mo'i skye gnas phal ba can du rtogs par byed de/ de ni de lta bu ma yin te/ lhan cig skyes pa'i gzugs can ma//zhes gsungs so/ /de rnyed nas ni dngos grub 'gyur/ /zhes bya ba ni yon tan phun sum tshogs pa de lta bu'i btsun mo rnyed na/ btsun mo de la brten te bla ma'i lung ltar bsgrubs na/ phyag rgya chen po'i dngos grub tu 'gyur ba ni de bzhin gshegs pa'i nges pa ste/ btsun mo de lta bu ni kun rdzob kyi gzugs can gyi phyag rgya chen po zhes bshad do zhes pa'i don to/ /de nas rnal 'byor ma bdag med mas gsol ba/ bcom ldan 'das smon lam ji ltar gdab par bgyi zhes bya ba la/ bdag med mas 'di skad ces/ kye bcom ldan 'das kye'i rdo rje'i gsang chen 'di la gnas pa rnams kyis smon lam gyi tshul ji ltar gdab par bgyi zhes zhus pa dang /bcom ldan 'das kyis slar 'di skad ces gsungs so/ /smyo med rags su skye ba dang / /dam ldan kye yi rdo rje ston/ /snying rjer ldan zhing bla mar gus/ /skye zhing skye bar 'gyur bar shog//lag pas rdo rje dril sgrogs shing / /zab mo'i chos ni ston pa dang / /btsun mo'i khu ba mnyam zas can/ /za ba'i skye bar 'gyur bar shog /ces gsungs te 'dzag pa'i bde ba'i chang gis myos pa ni smyon pa yin la/ de bas 'dzag pa med pa'i btung ba'i bde ba can ni smyo ba dang 'bral ba yin no//de bas na de'i phyir smyo ba med pa'i dam tshig gi bdud rtsi 'thung ba'i rigs can du skye bar gyur cig ces bya ba dang / snying rje bcu drug gi dam tshig dang mi 'bral bar de nyid kyi tshul gyis sems can thams cad la kye'i zhes bya ba dang / rdo rje zhes bya ba'i brda yis chos ston par gyur cig ces bya ba dang /sems can thams cad la mi phyed pa'i snying rje dang / de bzhin du sems can thams cad la dmigs pa dang / chos la dmigs pa dang dmigs pa med pa zhes bya ba yar ngo'i chos can gang yin pa de dang ldan par gyur cig ces bya ba dang /rdo rje 'chang chen po'i gnas thob par byed pa'i rgyu bla ma rje btsun gyi zhal gyi bum pa las 'byung ba'i phyir dus rtag par bla ma las gus pa byed par gyur cig ces bya ba dang / stong pa nyid dang snying rje tha mi dad pa nyi zla'i lam gcig tu rnam par dag pa'i chos can rdo rje dang dril bu lag tu bzung ste 'khrol bar gyur cig ces bya ba dang /de nyid kyi don ston par byed pa kye'i rdo rje'i glegs bam nyid dus rtag par klog pa dang ldan te/ A li dang kA li'i sgo yis srog gi rlung gi bzlas pa ni zab mo'i chos klog pa yin pas/ de lta bu'i chos klog par gyur cig ces pa dang /yul la sogs pa'i btsun mo gzugs rdo rje ma dang / nam mkha' dbyings kyi dbang phyug ma zhes bya ba la sogs pa'i btsun mo rnams kyi bde ba'i khu ba'i dngos po rnams kun nas mnyam par byed pa/ skye ba nas skye ba'i mthar za bar gyur cig ces bya bas smon lam gdab par bya'o zhes pa'i don to//de nas lha mo de dgyes nas/ /tshig ni 'di nyid yang zhus pa/ /skal med sems can gdul dka' rnams/ /gang gis 'dul bar gyur ba lags/ /zhes bya ba slar zhing bdag med mas/ bcom ldan 'das la zhus pa/ bcom ldan 'das slad ma'i dus rtsod pa rab tu rgyas pa na/ gdul bar dka' ba'i skye bo ma rungs pa rnams thabs gang gis kye'i rdo rjer gzhug par bgyi lags zhes pa dang / slar bcom ldan 'das kyis gsungs pa/ dang por gso sbyong sbyin par bya/ /de rjes bslab pa'i gnas bcu nyid//de la bye brag smra ba bstan/ /mdo sde pa yang de bzhin no/ /de nas rnal 'byor spyod pa nyid/ /de yi rjes su dbu ma bstan/ /zhes bya ba gsungs te/ skye bo gdul bar dka' ba kye'i rdo rje la dgod pa na sngon du gso sbyong legs par bstan cing bslabs la/ dge ba bcu dang du len par bsgom zhing mi dge ba bcu yongs su bcad de/gnas pa'i skye bo de la/ de'i rjes su grub pa'i mtha' so so'i chos bstan par bya ste/ 'di ltar nam mkha' dang / so sor brtags pa dang / brtags pa ma yin pa'i 'gog pa ste gsum ni 'dus ma byas yin la/ de las gzhan pa ji snyed pa rnams skad cig ma'i rang bzhin can te/ ngo bo nyid kyis stong gis byed pa po 'ga' yang yod pa ma yin no/ /rnam pa med pa'i dbang po la brten pa'i blos rdul phra rab bsags pa 'di rnams mngon sum du rig par 'gyur ro zhes kha che bye brag tu smra ba rnams 'dod do zhes bstan par bya'o//de bzhin du bye brag tu smra ba ltar rnam pa dang bcas pa'i shes pa skye bar 'dod pa ni snang ba rnams dbang po'i spyod yul ma yin te/ nam mkha'i me tog gam/ mo gsham gyi bu dang mtshungs la/ 'gog pa rnams ni nam mkha' lta bu yin no/ /dus gsum po yang rjes su rgyug pa med pa thogs par byed pa'i reg bya dang bral ba'i gzugs kyang yod pa ma yin no zhes bya ba mdo sde bar smra ba rnams 'dod do zhes bstan par bya'o//de bzhin du rdul phra rab tshogs pa'i yan lag can gyi rdzas ni med do/ /rdul phra rab med pa'i so sor snang ba dmigs su med de/dper na rmi lam nyams su myong ba dang mtshungs so/ /gzung ba dang 'dzin pa'i dri ma dang bral ba shel sgong dag pa lta bu'i rnam par shes pa rang rig pa don dam par yod pa rnal 'byor spyod pa rnams smra'o zhes bstan par bya'o/ /rnam par shes pa don dam par yod do zhes mkhas pa rnams mi 'dod de/gcig dang du ma'i rang bzhin gyi gtan tshigs dang bral ba'i phyir nam mkha'i me tog dang mtshungs te/ 'di ltar blo dang sgra 'di dag yod pa yang ma yin/ med pa yang ma yin/ yod med gnyis las 'das pa la sogs pa'i mu bzhi las rnam par grol ba'i de kho na nyid rnal 'byor chen po dbu ma par smra ba rnams bzhed pa yin no zhes grub pa'i mtha' thams cad bstan nas/de'i rjes su kye'i rdo rjer bcug par gyur na nges par 'grub bo zhes pa'i don to/ /slob mas gus par blangs nas ni/ /'grub 'gyur 'di la the tshom med//ces gsungs te skal ba med pa'i sems can rnams rim pa de ltar 'jug par bya'i gzhan du ma yin zhes pa'i don to/ /de bzhin du sgyu 'phrul dra ba las kyang ji skad du/ theg pa gsum gyis nges 'byung la/ /theg pa gcig gis 'bras bur gnas/ /zhes gsungs so//kye'i rdo rje'i nges pa'i don gyi rgya cher bshad pa las/ 'dul ba'i le'u'i rgya cher bshad pa ste brgyad pa'o// //longs spyod rdzogs sku sprul pa'i rgyal/ /mnga' bdag che la phyag 'tshal nas/ /sngags btu ba yi rgyas bshad ni/ /rdo rje snying pos bri bar bya/ /de nas kha sbyar 'byed pa yi//mtshan nyid yang dag rab tu bshad/ /ces bya ba la sogs pa smos te/ A li dang kA li'i sngags kyi rang bzhin ji lta ba bzhin du shes na/ 'jig rten dang 'jig rten las 'das pa'i 'dod pa'i dngos grub thams cad lag mthil na yod par 'gyur ro/ /de la gang gi rnam par shes tsam gyis//sgrub po dngos grub thob 'gyur ba/ /bsgrub bya'i lte ba'i rtsa ba la/ /brtul zhugs can gyi lag pas gdon/ /zhes bya ba gsungs te/ sangs rgyas kyi bstan pa la gnod par byed pa dang / sangs rgyas dang bla ma la sogs pa'i gzugs 'jig pa gang yin pa de/bla ma thub pa la zhus te/ snying rje chen pos gsad par bya ba yin gyi gzhan du ma yin no/ /de bzhin du bsgrub par bya ba'i dngos grub drug cu rtsa bzhi'i dkyil 'khor gyi dbus na/ lhan cig skyes pa'i lha sgrub pa po'i ting nge 'dzin gyi lag pas gshegs su gsol la sgrub pa po bdag nyid/he ru ka mnyam rnal 'byor gyis/ /nang gi ma rungs sems kyis ni/ /zhes bya ba la he ru ka'i dkyil 'khor bdag med ma dang bcas pa/ las kyi bye brag las kha dog bye brag tu bya ste zhes pa'i rdo rje'i tshig gis dkyil 'khor ba thams cad kha dog nag po zhe sdang gi rigs su bskyed de gsad par byas na sangs rgyas nyid kyang gdon mi za bar 'jig par 'gyur ro//ji ltar phyugs kyi gzugs mthong nas/ /khrag ni skyug pa nyid dang yang / /'dar zhing mgo skyes grol ba dang / /kha ni 'og tu rnam par bsgom/ /zhes bya ba la skye bo phyugs kyi gzugs dang 'dra ba mthong nas/kha nas khrag skyug cing lus po 'dar bzhin du skra grol te spyi'u tshugs su bdag gi mdun du 'dug par bsam zhing / de bzhin du de'i 'og gi sgo nas khab me ltar 'bar ba'i gzugs can du ma 'jug pa dang / de'i snying gar me'i dkyil 'khor yi ge ra~M` bsams na/nges pa kho nar skad cig de la 'jig par 'gyur zhes gsungs so/ /'di'i nges pa'i don ni rtsa ba'i rgyud las ji skad du/ byin za me lha rlung gis bskyod/ /byang sems haM kha thur du bltas/ /gang zhig bde bas myos pa na/ /'dar zhing kha ni thur du lta/ / zhes gsungs pas don khong du chud par bya'o/ /rgyud 'di la ni sreg blugs med/ /phyag rgya bcing dang bya ba med/ /rgyud chen bklags pas 'grub pa nyid/ /bsam gtan tsam gyis 'grub par 'gyur/ /zhes bya ba ni 'di ltar phyi'i sreg blugs dang lag pa'i phyag rgya bcing ba dang / tshig gi rgyud bklag pa dang /lha'i rnal 'byor tsam gyis 'grub pa ma yin gyi/ 'di ni khro ba med pa'i me la seng ge rnam par rtse ba'i phyag rgya bcings te/ rang gi rgyud srog gi rlung gis 'don zlos byed cing nam mkha' lta bu'i bsam gtan gyis 'grub par 'gyur zhes bstan to/ /rtog med dngos grub ster ba po//srid pa sbyor ba nyams dga' ba/ /gsang ba mchog gi bshad bya yis/ /nyon cig lha mo bzhin bzangs ma/ /zhes bya ba bcom ldan 'das rdo rje 'chang gis srid pa nyid shin tu dag par byed pa'i thabs sangs rgyas kun gyi gsang chen lha mo khyod la bshad par bya zhes pa'i don to//rin chen gzi brjid 'bar ba yi/ /phreng ba 'khrug pa lha mo ltos/ /ma phug pas ni sbyor bral 'gyur/ /phug pas dga' ba ster ba po/ /zhes bya ba ni dpe gsungs pa ste/ dper na rin po che'i phreng ba rab tu 'od 'bar ba nyams dga' ba phreng ba ma brgyus pas ni bya ba mi byed la/phreng bar brgyus na bya ba thams cad rdzogs par byed pa ltar/ de ltar 'khor ba 'dod pa yis/ /yon tan lnga ldan rin chen nyid/ /ma dag pas ni dug tu 'gyur/ /dag pas bdud rtsi lta bur 'gyur/ /zhes bya ba gsungs te/ 'khor ba'i rang bzhin rnams ni dag pa'ang ma yin/ma dag pa'ang ma yin te/ sgrub pa po rnams kyis bsam pa'i khyad par gyis/ dug dang bdud rtsi lta bur gnas te/ de lta bas na 'khor ba dug lta bu nyid bla ma'i bka' lung gis bdud rtsi lta bur mos pa byas na/ 'khor ba'i rnam pa he ru ka/ /'gro ba sgrol ba'i gtso bo nyid//gang gis gzugs kyis gyur pa nyid/ /ces bya ba gsungs te/ srid pa nyid mya ngan las 'das pa'i rgyu yin zhes pa'i don to/ /gzhan yang 'di ltar mos par bya ste/ snying rje'i spyan ni dmar po la/ /byams pa'i thugs las yan lag gnag/ /ces bya ba la sogs pa'i rtags rnams rnal 'byor bas mos par bya zhing gzhan dag la'ang bstan par bya zhes bya ba yin te/'di ltar/ rus pa bden pa bzhi po nyid/ /ces bya ba la sogs pa la thug pas bstan pa yin te/ rang bzhin yon tan gyi dbang las pha dang ma'i phyogs kyis bsdus pa yin par drang ba dang nges pa'i don du rig par bya'o//da ni sngags btu ba'i lugs ji lta ba rim par bdag med mas kye'i rdo rje la zhus pa/ sngags btu ba ni ji ltar 'gyur/ /zhes bya ba la sogs pa zhus pa dang / bcom ldan 'das kyis slar gsungs pa/ sngags ni khyod la ngas bshad kyis//lha mo shes rab chen mo nyon/ /zhes bya ba la 'di'i don rgyas pa ni/ rtsa ba'i rgyud 'bum phrag lnga pa nyid du rgyas par bstan pas/ de las 'jug par bya'o/ /sngags rnams ji bzhin shes 'dod pas/ /slob dpon la ni phyag byas la//mchog tu dad pas gus btud de/ /sngags kyi de nyid gnang zhes zhu/ /de la bla ma skal chen pos/ /phyi rol skye bo med pa'i sar/ /lci ba gtsang mas legs byugs la/ /'dab brgyad dang ldan ge sar bcas/ /sgo bzhi rta babs bzhis brgyan pa/ /ka ba brgyad dang yang dag ldan//kye yi rdo rje dkyil 'khor mchog /rdo rgyus kyis ni legs bris la/ /de rjes sde tshan gnyis po dgod/ /dbus su kye rdor bdag med ldan/ /thod pa gri gug gzugs su bri/ /de yi 'dab ma dang po la/ /A li bcu drug mkhas pas bri/ /'dab ma gnyis par ka sogs lnga//gsum par tsa sogs blo ldan pas/ /bzhi par Ta la sogs lnga bri/ de bzhin lnga par ta sde lnga/ /'dab ma drug par chu yi tshogs/ /bdun par mthar gnas bri bya zhing / /brgyad par dro ba'i sde pa bri/ /sgo bzhi po ru lcags kyu sogs/ /zhags pa la sogs bri bar bya//lha mo brgyad du legs bsam zhing / /slob dpon rig ma g.yon du gzhag /mchod pa'i bye brag sna tshogs kyis/ /legs par mchod la gsang sngags btu/ /de nas slob ma'i skye bo mchog /shin tu gus pas len du gzhug /gzhan du rang dgas len pa gang //'bras bu med cing de brlag 'gyur/ /dang por rnam par snang mdzad sbyin/ /zhes bya ba ni oM mo/ /uSh+ma rnams kyi bzhi pa zhes pa ni ha'o/ /pu k+ka sI sa brgyan zhes pa ni u yis brgyan pa'o/ /stong pas mnan zhes pa ni de'i spyi bor thig les brgyan pa'o/ / mdog dkar mthar ni swA hA sbyar/ /'dis ni bzlas pa 'bum gyis ni/ /'gro ba rtag tu rengs par byed/ /ces bya ba ni sngon du bzlas pa yi ge grangs kyi 'bum/ bla ma'i man ngag ltar bzlas la sbyin sreg bcu chas sngon du bsnyen pa byas na/ 'jig rten gsum po rengs par byed do/ /dang por yi ge'i bdag po gzhag /ces pa ni oM mo/ /de rjes mkha' spyod ma zhes pa ni aM ngo / /mthar ni swA hA sbyar byas nas/ /sangs rgyas rnams kyang dbang du byed/ /ces pa ni man ngag gong ltar bzlas pas/ sangs rgyas kyang dbang du byed na/ skye 'gro phra mo rnams lta ci smos zhes bya'o//rig byed rnams kyi dang po sbyin/ /zhes bya ba ni oM mo/ /dang po yi ni gnyis pa zhes pa ni kha'o/ /stong bcas zhes pa ni thig les brgyan pa'o/ /mthar ni swA hA dang sbyar ba/ /sangs rgyas kyang skrod shes rab can/ /zhes pa ni skrod par byed pa'i sngags btu ba ste snga ma bzhin no//dang por rnam par snang mdzad sbyin/ /zhes bya ba ni oM mo/ /gnyis pa yi ni gsum pa la/ /zhes pa ni dza'o/ /ra dang ldan zhing zhes pa ni dza la ra yis brgyan pa'o/ /chu mas brgyan pa zhes pa ni i yis brgyan pa'o/ /stong bcas zhes pa ni de'i steng du thig les brgyan pa'o//swA hA ra yang dag ldan/ mi rnams kun la sdang bar byed/ /ces pa ni sdang bar byed pa'i sngags btu ba'o/ /dang por yi ge'i dbang phyug bzhag /ces pa ni oM mo/ /lnga pa nyid kyi gsum pa zhes pa ni ba'o/ /stong bcas zhes pa ni de la thig les brgyan pa'o/ / mkha' 'gro ma dang ldan zhes pa ni de'i mthar u btags pa'o/ /mthar ni swA hA mngon spyod che/ /zhes pa ni mngon spyod kyi yi ge'i btu ba'o/ /yang ni yi ge'i thu bo sbyin/ /zhes pa ni oM mo/ /hUM ni khrag dang 'dra ba yi/ /zhes pa ni de'i rjes su hUM gzhag pa'o/ /mthar ni swA hA zhes pa ni/de'i rjes su swA hA sbyar bar bya ste bzlas na thig le mchog /dga' bzangs ma sogs rtag tu 'gugs/ /zhes gsungs te 'gugs byed kyi yi ge btu ba ste/ de cho ga bzhin du bzlas na/ lha'i bu mo thig le mchog ma lta bu'ang 'gugs par byed na mi mo gzhan lta smos kyang ci dgos/gti mug rigs ni dang por sbyin/ /zhes pa ni oM mo/ /g+huHni yang dag rab tu sbyar/ /zhes pa ni oM gyi rjes su g+huHgzhag pa'o/ /mthar ni swA hA yang dag ldan/ /lha dang mi rnams gsod par byed/ /ces pa ni g+hu'i mthar swA hA dang ldan par byas pa ni gsod par byed pa'i yi ge btu ba ste/cho ga bzhin bzlas na sangs rgyas lta bu yang bkrongs par nus na/ 'jig rten gsum gyi lha dang mi phran tshegs gsod par 'gyur blta smos kyang ci dgos/ dang por rnam par snang mdzad gzhag /ces pa ni oM mo/ /dang po nyid kyi dang po zhes pa ni ka'o//rdo rje mkha' 'gro ma dang sbyar/ /zhes pa ni ka de la 'og tu u btags pa'o/ /mthar gnas pa yi gnyis pa la/ /zhes pa ni ra'o/ /rdo rje mkha' 'gro ma dang ldan/ /zhes pa ni ra de la u btags pa'o/ /yang ni dang po'i rtse mo la/ /zhes pa ni ka'o/ / rdo rje mkha' 'gro ma dang ldan/ /zhes pa ni de la u yig gdags pa'o/ /mthar gnas pa yi gsum pa la/ /zhes pa ni la'o/ /yang ni de nyid yang dag ldan/ /zhes pa ni de la de nyid slar gdags pa'o/ /steng du chom rkun ma yis brgyan/ /zhes pa ni de la e sa steng du brgyan par bya ba'o/ / de rjes hrIHyis rnam par brgyan/ /zhes pa ni sngags de rnams kyi mthar hrIHgzhag pa'o/ /mthar yang swA hA spyad pa nyid/ /ces pa ni ku ru kul+le'i sngags btu ba'o/ /oM ni dang po bzhi pa yi/ gsum pa zhes bya ba ni da'o/ /chom rkun ma yis brgyan zhes pa ni de la e yis brgyan pa'o/ / mthar gnas pa yi bzhi pa la/ /zhes pa ni wa'o/ /bi tsu badzra sbyar bar bya/ /zhes pa ni wa'i rjes su pi tsu badzra gdags pa'o/ /uSh+ma rnams kyi bzhi pa la/ /zhes pa ni ha'o/ /puk+kasI sa ni rnam par brgyan/ /zhes pa ni ha de la u yis brgyan par bya ba'o/ /stong pas mnan cing sum 'gyur nyid//ces pa ni ha de'i klad la thig les brgyan la de ltar brgyan pa'i hUM de nyid sum 'gyur du dgod pa'o/ /lnga pa yi ni gnyis pa dang / /zhes pa ni pha'o/ /gsum pa'i dang po ni Ta'o/ /mthar swA hA zhes pa ni sngags kyi rkang pa de rnams kyi mthar swA hA sbyar bar bya zhes pa ste kye'i rdo rje'i snying po'i sngags btu ba'o//snang mdzad dang por dz+wa la gnyis/ /zhes bya ba ni dang por oM bkod la de'i rjes su dz+wa la gnyis sbyar bar bya ba'o/ /lnga pa'i bzhi pa la zhes pa ni b+ha'o/ /mthar gnas rnams kyi dang pos ldan/ zhes pa ni b+ha de la ya gdags pa'o/ /g+hasma rI yis rnam par brgyan//zhes pa ni de nyid la os brgyan par bya'o/ /uSh+ma rnams kyi bzhi pa la/ /zhes pa ni ha'o/ /rdo rje mkha' 'gro ma yis brgyan/ /zhes pa ni/ uSh+ma'i zhabs su gdags pa'o/ /stong pas mnan cing zhes pa ni/ /de'i steng du thig les mnan pa'o/ /sum 'gyur nyid ces bya ba ni//yi ge de nyid gsum du dgod pa'o/ /lnga pa yi ni gnyis pa dang / /zhes pa ni pha'o/ /gsum pa'i dang po zhes pa ni Ta'o/ /mthar swA hA zhes pa ni/ de ltar brjod pa'i sngags kyi rkang pa de rnams kyi mthar swA hA sbyar bar bya ba ste/ phyag bzhi pa'i sngags btu ba'o//dang po rnam snang zhes pa ni oM mo/ /dang po'i dang po zhes pa ni ka'o/ /nang gi dkar mos brgyan zhes pa ni i yis brgyan pa'o/ /gsum pa yi ni dang po la/ /zhes pa ni Ta yin la/ nang gi dkar mos rnam par brgyan/ /zhes pa ni i yis de la brgyan pa'o/ /nyis 'gyur zhes pa ni de lta bu nyid lan gnyis su bzlas pa'o//lnga pa yi ni gsum pa dang / /zhes pa ni ba'o/ /gnyis pa yi ni gsum pa zhes pa ni dza'o/ /me yis brgyan pa zhes pa ni dza de la ra gdags pa'o/ /hUM ni rnam pa gsum sbyar nas/ /zhes pa ni sngags kyi rkang pa de dag gi 'og tu hUM rnam pa gsum sbyar bar bya ba'o//lnga pa nyid kyi gnyis pa dang / /zhes pa ni pha'o/ /gsum pa'i dang po zhes pa ni Ta'o/ /mthar swA hA zhes pa ni sngags kyi tshig de dag gi mthar swA hA sbyar bar bya ba ste/ phyag drug pa'i sngags btu ba'o/ /dang por rnam snang zhes pa ni/ oM mo/ /bzhi pa'i dang po zhes bya ba ni ta'o/ /byin za yang dag ldan zhes pa ni ta de la ra yis gdags pa'o/ /ro langs ma yis rnam par brgyan/ /zhes pa ni ta de nyid kyi steng du e yis brgyan par bya'o/ /mthar gnas rnams kyi gsum pa la/ /zhes pa ni la'o/ /g+hasma rI yis rnam par brgyan//zhes pa ni/ de yi rtse mor o yis brgyan pa'o/ /dang po yi ni dang po la/ /zhes pa ni ka'o/ /mthar gnas pa yi dang po dang / /zhas pa ni ka la ya gdags pa'o/ /rdo rje ma yis rnam brgyan la/ /zhes pa ni de la a gdags pa'o/ /k+Sha ni chom rkun ma yis brgyan/ /zhes pa ni yi ge de la es brgyan pa'o//lnga pa nyid kyi dang po dang / /zhes pa ni pa'o/ /uSh+ma rnams kyi bzhi pa la/ /zhes pa ni ha'o/ /rdo rje mkha' 'gro ma yis brgyan/ /zhes pa ni ha la u gdags pa'o/ /stong pas mnan cing zhes pa ni/ /de la steng du thig les brgyan pa'o//sum 'gyur de zhes pa ni yi ge de nyid gsum du dgod pa'o/ /phaT dang mthar ni swA hA nyid/ /ces pa ni sngags rkang de dag gi mthar phaT dang swA hA sbyar bar bya ba ste/ phyag gnyis pa'i sngags btu ba'o/ /bdag med ma zhes pa ni a'o/ /dang po'i dang po zhes pa ni ka'o//gnyis pa nyid kyi dang po dang / /zhes pa ni tsa'o/ /gsum pa nyid kyi dang po dang / /zhes pa ni Ta'o/ /bzhi pa yi ni dang po dang / /zhes pa ni ta'o/ /lnga pa yi ni dang po dang / /zhes pa ni pa'o/ /mthar gnas rnams kyi dang po dang / /zhes pa ni ya'o/ /uSh+ma rnams kyi dang po nyid//ces pa ni sha'o/ /dang po rnam snang mthar swA hA/ /zhes pa ni sngags kyi rkang pa de dag gi dang por oM sbyin pa dang / mthar swA hA sbyar te yi ge'i grangs kyis 'bum bzlas shing / sbyin sreg de la bcur dgos pa'i chas bsregs te/ sngon du bsnyen pa byas na/stug po bkod pa'i grong khyer sangs rgyas rnams kyi bzhugs gnas lta bu'ang 'khrug par byed na/ 'jig rten gsum gyi skye bo phal pa rnams kyi grong khyer 'khrug par 'gyur ba lta smos kyang ci dgos/ mthar gnas rnams kyi gnyis pa dang / /zhes pa ni ra'o/ /k+Sha ye rkang pa nyis 'gyur nyid//ces pa ni yi ge de nyid gnyis su dgod pa'o/ /hUM gi rnam pa gsum dang ldan/ /zhes pa ni de'i rjes su hUM gsum sbyar bar bya'o/ /dang por rnam snang phaT nyid kyi/ /rnam par nang bcug mthar swA hA/ /zhes bya ba ni gong gi sngags kyi rkang pa de dag gi dang por oM sbyin zhing mtha' mar swA hA sbyar la/de'i 'og tu phaT kyis ldan pas ni sa sbyang ba'i sngags btu ba'o/ /dang por rnam snang zhes pa ni oM mo/ /de rjes su rdo rje ma'i zhes pa ni AH'o/ /mtha' ru hUM zhes pa ni de'i rjes su hUM nyid sbyar ba'o/ /bza' btung byin gyis brlab pa'i zhes ni sku gsung thugs kyi yi ge gsum gyis bza' ba dang btung ba la byin gyis brlab par bya ba ste/drang ba dang nges pa'i don gnyis su go bar bya'o/ /dang por rnam par snang mdzad nyid/ /ces pa ni dang po oM dgod pa'o/ /de rjes a kA ro mu khaM zhes pa ni de rnams de'i rjes su sbyar bar bya'o//uSh+ma rnams kyi gsum pa dang / /zhes pa ni sa'o/ /mthar gnas rnams kyi bzhi pa ni/ /zhes pa ni wa'o/ /steng du me yi rnam par brgyan/ /zhes pa ni/ de'i steng du ra yis mnan pa'o/ /d+harmA NaM rjes rdo rje ma/ /byin la zhes pa ni de'i rjes su d+harmA NAM sbyar la/ de nas A sbyin zhing d+ya nu t+pan na twAta ces pa ni yang yi ge de rnams byin la/de'i rjes su yang oM AHhUM phaT swA hA zhes pa ni 'byung po thams cad pa'i gtor ma'i sngags btu ba'o/ /de ltar na cho ga de lta bu dang ldan pas sngags btus te bzlas pa byas na/ rgyud las gsungs pa bzhin dngos grub thob par 'gyur gyi gzhan du ma yin zhes bya ba'i don to//kye'i rdo rje'i nges pa'i don gyi rgya cher bshad pa las/ sngags btu ba'i le'u'i rgya cher bshad pa ste dgu pa'o// //brgya byin mtshon cha dang mtshungs pa'i/ /rdo rje can la gus btud nas/ /sems can rnams kyi lam blang phyir//bgrang phreng dbye ba rgyas par bstan/ /de nas chos kun sdom gcig pa/ /rdo rje sems dpa' zhes byas gsungs/ /bdag med ma la zhal sbyar nas/ /bzlas pa'i yul ni rab tu phye/ /zhes bya ba la kun rdzob tu rang bzhin ni yon tan gyi dbang gis rdo dang lcags 'thab pa'am/shing gis shing la 'drud pa'am/ chu shel zla ba'i 'od la bstan pa'am/ me shel nyi ma'i 'od la bstan pas/ me 'byung ba la sogs pa ltar 'jig rten lta bu'i grub pa rnams ni/ rten cing 'brel par 'byung ba las 'byung ngo zhes gsungs pas/ 'dir yang rgyud de ltar shes par bya'o//shel gyis rengs pa'i bzlas pa nyid/ /dbang la tsan+dan na dmar po nyid/ /lung tang gis ni mngon spyod dang / /ni raM sus ni sdang ba la/ /zhes bya ba gsungs te/ skyes bu gang zhig gis rengs pa'i las bsgrub par 'dod pa des shel gyi bgrang phang gis bzla bar bya zhing lte ba'i dkyil 'khor du zad par sa bsgoms pa rnams kyis 'grub par 'gyur ro//skyes bu gang zhig dbang du byed par 'dod pa'i rnal 'byor la brtson pa das/ tsan+dan dmar po'i bgrang phreng gis bzla bar bya zhing mgrin pa'i dkyil 'khor du zad par me'i ting nge 'dzin dang ldan pa rnams 'grub par 'gyur ro//de bzhin du mngon spyod kyi las la brtson par 'dod pas lung tang gis bzla bar bya zhing / zad par sa nyid kyi ting nge 'dzin dang ldan par bya'o/ /sdang ba'i sbyor ba la brtson pa'i rnal 'byor pas mi rus kyi phreng bas bzla bar bya zhing / de bzhin du zad par sa nyid kyi ting nge 'dzin dang ldan par bya'o//skrod pa'i sbyor ba la brtson par 'dod pas rta'i rus pas bzla bar bya zhing / snying ga'i gnas su zad par rlung gi ting nge 'dzin dang ldan par bya'o/ /dgug pa'i sbyor ba la brtson par 'dod pas bram ze'i rus pas bzla bar bya zhing / dpral bar zad par chu'i ting nge 'dzin dang ldan par bya'o//char dbab pa'i sbyor ba la brtson par 'dod pas glang po'i rus pas bzla bar bya zhing / dpral bar zad par chu'i ting nge 'dzin dang ldan par bya'o/ /gsod pa'i sbyor ba la brtson par 'dod pas ma he'i rus pas bzla bar bya zhing / gtsug tor gyi gnas su zad par nam mkha'i ting nge 'dzin dang ldan par bya'o//de bzhin du rengs pa'i sbyor ba la lus mkhrang ba nyid kyi phyir 'o mas spyad par bya'o/ /dbang la rang gi 'dun pas spyad/ /ces gsungs so/ /'o ma la sogs pa gang ci yang rung ba dang / ji ltar 'dod pa bzhin du spyad par bya'o//gsad pa la ni sih+la nyid/ /ces gsungs te/ gsad pa'i sbyor ba la sih+la 'am khrag spyad par bya'o/ /de bzhin du dgug pa la bzhi mnyam zhes bya ba dang / /de bzhin du sdang ba la sA li dza zhes bya ba dang / bskrad pa la ri dgas kyi lte ba zhes spyad par bya'o/ /yang na mtha'i sha zhes bya ba rta'i sha dang /dang po'i sha zhes bya ba khyi sha dang / na dang po dang zhes bya ba mi sha dang / ga dang po dang zhes bya ba ba lang gi sha dang / ha dang po nyid kyang zhes bya ba glang po che'i sha la sogs pa ci rigs par spyad ces pa'i don to/ /kye'i rdo rje nges pa'i don gyi rgya cher bshad pa las bzlas pa'i yul gyi le'u'i rgya cher bshad pa ste bcu pa'o// //sems can thams cad phan pa'i phyir/ /sangs rgyas don la sbyor mdzad na/ /kye'i rdo rje la phyag 'tshal nas/ /lhan cig skyes sbyor rgyas bshad bri/ /kye rdo rje la dam 'khyud cing / /chems kyis ma mchu bcir nas ni//lus can rnams kyi rigs kyi gzugs/ /de la bdag med mas zhus pas/ /zhes bya ba la sogs pa la bdag med mas bcom ldan 'das kye'i rdo rje la/ bde ba chen po'i phul du phyin pa'i mchod pas legs par mchod de/ kun rdzob tu rang bzhin yon tan gyi dbang gis/lus can rnams kyi rigs kyi mtshan ma ji ltar mtshon par bgyi zhes zhus pa'i don te/ de la slar zhing bdag med ma la bka' stsal pa/ b+ha gar ling+ga bzhag nas ni/ /'khor lo'i gtso bos 'di skad gsungs/ /zhes bya ba sogs pa gsungs te/ 'di ltar lus can rang gi rigs bshad kyis//shes rab pha rol phyin ma nyon/ /zhes bya ba gsungs te/ kun rdzob tu rang bzhin dang yon tan gyi dbang gis/ gang gi rigs kyi mtshan ma gang yin pa de/ lha mo khyod la bshad kyis/ kye lha mo gus pas legs par nyon cig ces pa'i don to/ / bud med dam ni skyes pa yi/ /gang gi srin lag rtsa ba la/ /rdo rje rtse dgu par 'gyur ba/ /mi bskyod pa yi rigs mchog nyid/ /ces bya ba la skyes bu'am bud med gang gi srin lag gi rtsa ba'i tshigs na re khA gnas pa ni rdo rje rtse dgu pa lta bu yod pa ni mi bskyod pa'i rigs su byin gyis brlab ste/rang bzhin yon tan gyi dbang gis mi de'i mdog kyang nag por gnas pa ste/ gsad pa 'grub bo/ /rnam snang mdzad kyi 'khor lor 'gyur/ /zhes bya ba ni de bzhin du gang la 'khor lo dkar po rtsibs brgyad pa lta bu'i re khA gnas pa ni/ rnam par snang mdzad kyi byin gyis brlabs pa ste/rang bzhin gyi yon tan dbang gis mi de'i mdog kyang dkar por gnas pa ste/ zhi ba 'grub bo/ dpag med 'od kyi 'dom skyes nyid/ /ces bya ba ni de bzhin du gang la pad+ma dmar po 'dab ma brgyad pa lta bu'i re khA gnas pa ni 'od dpag tu med pas byin gyis brlabs pa ste/ rang bzhin yon tan dbang gis mi de'i mdog kyang dkar dmar du gnas te 'gugs pa 'grub bo//rin chen 'byung gi rin chen nyid/ /ces pa ni de bzhin du gang la rin po che zur brgyad pa ser po'i re khA lta bur gnas pa ni/ rin chen 'byung ldan gyis byin gyis brlabs pa ste/ rang bzhin yon tan dbang gis mi de'i mdog ser por gnas te/rengs pa la sogs pa'i las 'grub po/ /las kyi rigs kyi ral gri nyid/ /ces pa ni de bzhin du gang la ral gri lta bu'i re khA sngo bsangs gnas pa ni/ don yod grub pas byin gyis brlabs pa ste/ rang bzhin yon tan dbang gis mi de'i mdog kyang sngo bsangs su gnas te/bskrad pa la sogs pa'i las grub po/ /rnal 'byor pa gang dkar dang ser/ /de ni sems dpa'i rigs su 'gyur/ /zhes bya ba ni de bzhin du gang la mdog dkar ser ni rdo rje sems dpas byin gyis brlabs pa ste/ las thams cad 'grub par 'gyur ro//skye bo rnal 'byor mthar phyin pas/ /nga rgyal mi bcag mtho mi btsams/ /kun rdzob gzugs su gnas nas ni/ /de rnams bde gshegs rigs su 'gyur/ /zhes bya ba ni tshul de ltar na skyes bu dang mi mo 'di dag thams cad kyang rgyal ba rigs lnga dang drug la sogs pas byin gyis brlabs pa yin pa'i phyir/phan tshun du zhe 'gras pa dang / sdang bar mi bya ste/ thams cad dpa' bo rnams kyi rang bzhin gyi yon tan dang ldan par the tshom med pa'o/ /bsdus pa'i rgyud 'di nyid las kyang ji skad du/ sems can gnod pa tsam gyis ni/ /phyag rgya'i dngos grub thob mi 'gyur//zhes bya ba gsungs so/ /gzhan yang / rdo rje'i rigs ni gtsug tor ro/ /dpag med rigs ni dpral bar ro/ /rin chen rigs ni mgrin par ro/ /don yod rigs ni snying ga'o/ /rnam snang rigs ni lte ba'o/ /sems dpa'i rigs ni gsang ba'o/ / de bzhin du snying ga'i pad+ma 'dab ma brgyad las/ shar ni don yod rigs so/ /lhor ni rin chen rigs so/ /nub tu ni rnam snang rigs so/ /byang du ni dpag med rigs so/ /dbus su ni mi bskyod rigs so/ /de bzhin du a ni dbus su'o/ /i ni shar du'o/ /r-i ni lhor ro/ /l-i ni nub tu'o/ / u ni byang du'o/ /gzhan yang rlung ni shar du'o/ /me ni lho'o/ /sa ni nub bo/ /chu ni byang ngo / /nam mkha'i dbus su rig par bya'o/ /bud med rnams kyi mtshan nyid 'di/ /ji ltar skyes pa de bzhin no/ /zhes bya ba la/ ji ltar skyes pa rnams la ltos nas dpa' bo rnams kyi mtshan ma dang kha dog ji lta ba de lta bur bud med rnams la bstan par bya'o//de bas de'i phyir skyes pa'am bud med gang la las kyi phyag rgya dngos grub 'dod pa rnam pa dang rtags dang mtshan ma gang bstan pa de dag rig par byas la gzung bar bya ba ni de bzhin gshegs pa'i gdams dag go/ /kun rdzob tha snyad tshul las ni//de yi rigs su 'ang de 'gyur ro/ /zhes pa ni kun rdzob tu rang bzhin dang yon tan gyi dbang gis gang dang gang la de dang de'i rigs gzung bas 'grub par 'gyur ro/ /b+ha gar ling+ga'o mdzad nas/ /de la rdo rje che mnyes nas/ /bdag med ma yis go mdzad pa/ / lha mo rab tu mchod pa nyon/ /zhes bya ba ni gong du bstan pa'i phan tshun gyi rigs de 'dra ba gcig gis gcig rtogs par byas la phyag rgya chen po'i gnas mchog btsal bar bya ba bstan par bya'i nyon cig ces bya ba'i don to/ /lha mo 'dod pa'i dngos grub thams cad b+ha ga dang ling+ga mnyam par sbyar ba'i cho ga las 'byung bas b+ha ga dang ling+ga'i thabs kyis sbyor ba la mkhas par bya'o zhes rtsa ba'i rgyud las kyang gsungs so//gzhan yang de nyid las ji skad du/ sems can rnams kyi rang bzhin ni/ /ji lta ji ltar 'dul 'gyur ba/ /de lta de ltar sems can don/ /'dod chags la sogs rnam dag bya//zhes pa dang gzhan yang / sems can rnams la phan phyir dang / /sangs rgyas rnams kyi bstan pa'i phyir/ /sems can thams cad gsang kyang ni/ /sdig gis gos par mi 'gyur ro/ /zhes pa dang / 'dod chags 'dra ba'i bde ba med/ /rgyal ba la ni de phul la//gzhan gyi chung ma sems can phyir/ /bsten pas bsod nams thob par 'gyur/ /zhes bya ba la sogs pa rgya cher gsungs so/ /de bas na rigs dang ldan pa'i btsun mo la lhan cig skyes pa'i ye shes btsal bar bya ba'i phyir 'khrigs thabs kyi sbyor ba rnams kyang bya ste/ tshal dang skye bo mi gnas dang //bdag gi khyim gyi nang du yang / /gcer bu phyag rgya che byas nas/ /rnal 'byor rig pas rtag tu mchod/ /ces bya ba ste gnas 'di rnams su bsten la/ nam ye shes ma skyes pa de srid du bsten par bya ste spros pa dang bcas pa'i spyod pas so//gzhan du na/ dri ma dang ldan rgya spangs la/ /zas dang gos sogs ltos med par/ /rang gi khyim mam gzhan pa ru/ /ye shes 'di ni rtag par dmigs/ /zhes bya ba rtsa ba'i rgyud las gsungs pa don khong du chud par bya'o/ /gzhan yang /chags pa'i bstan bcos kyi mtshan nyid/ /'o dang 'khyud par byas nas ni/ /zhes pa nas/ steng dang 'og tu blta ba nyid/ /ces pa la sogs pa tshigs su bcad pa phyed dang gsum gyi don rgyas pa 'dod pa'i bstan bcos bu le'i tshul du bya ba yin la/ /mthar thug pa med pas 'dir ma spros so//dpa' bo dpa' mo'i dbang phyug ma rnams la bzod par gsol lo/ /dngos grub rgyas pa thob pa ste/ /sangs rgyas kun dang mnyam par 'gyur/ /de ru ga bur btung bar bya/ /zhes bya ba ni rdo rje'i rigs la sogs pa'i btsun mo gang yin pa de rnams la brten pas dri ma med pa'i ga bur btung bar bya'i/dri ma dang bcas pas ma yin te/ des dngos grub med do zhes bya ba'i don to/ /de la ga bur rgyu yi phyir/ /sha ni bza' ba nyid du bya/ /khyad par du yang chang nyid do/ /zhes bya ba ni dri ma med pa'i ga bur kun du bskyed par bya ba'i phyir sha thams cad dang /chang thams cad dang / sbyang ba dang / rtogs par bya ba dang / sbar ba dang / bdud rtsir byas la spyad de/ des ga bur rgyas par 'gyur zhes pa'i don to/ /kye'i rdo rje'i nges pa'i don gyi rgya cher bshad pa las/ lhan cig skyes pa'i le'u'i rgya cher bshad pa ste bcu gcig pa'o// //yod min med min yod med min/ /mu bzhi las grol bdag phyag 'tshal/ /bzhi po'i rgyas par bshad pa ni/ /rdo rje snying pos 'bad de bri/ /de nas rdo rje can gyi dbang / /bzhi yi don nyid bka' stsal pa/ /zhes bya ba la sogs pa gsungs te/don 'di yang rtsa ba'i rgyud 'bum phrag lnga pa nyid na gsal bas de la 'jug par bya'o/ /'jig rten 'jig rten 'das dbye bas/ /dbang ni rnam pa gnyis su brjod/ /'dod pa'i 'bras bu rnam pa gnyis/ /gzhi 'di las ni 'byung bar bshad/ / sku gsung thugs su phye ba las/ /bum pa gsang ba zhes bya dang / /shes rab ye shes zhes bya ba/ /mngon par dbang bskur gsum du bstan/ /sku gsung thugs dang ye shes phyir/ /mngon par dbang bskur rnam pa bzhi/ /bum pa gsang ba shes rab dang / /ye shes dbang dang bzhi ru bshad//ces gsungs so/ /de bas na/ bdun dang bcu dang bcu gcig sogs/ /dang po'i sangs rgyas rgyud chen dang / /'bum phrag lnga sogs rgyud chen rnams/ /gang yin der bstan 'dir bsdus tsam/ /de bas na dbang bzhi dang bcu gcig la sogs pa'i go rims dang dgos pa dang rnam par dag pa rnams rgyud chen po de dag gsal la/'dir ni don mdor bsdus te bstan pa tsam yin pas de dag rtogs par bya'o/ /de la bzhi pa zhes bya ba ni drang ba dang nges pas 'jig rten dang 'jig rten las 'das pa gnyis ka la yod la/ gsung 'di ni nges pa'i don 'jig rten las 'das pa'i dbang bcu gcig pa la bzhi pa zhes gsungs te/ rgyud 'di nyid las de ltar thams cad bzhi bzhi'o zhes gsungs pa'i phyir ro/ /rdo rje rab gnas rdo rje nyid/ /ched da dril bu chen po zung / /de ring rdo rje slob dpon 'gyur/ /slob ma bsdu ba nyid du gyis//zhes bya ba ni rtsa ba'i rgyud na gsal bas de la 'jug par bya'o/ /ji skad du/ stong nyid snying rjer khyod byin brlabs/ /stong pa snying rje rgyun mi 'chad/ /rdo rje dril bu mtshan mar zung / /ji ltar de ltar gzhan la ston/ /khyod ni yongs rdzogs slob dpon te/ / gnas brtan rgan po'ang khyod nyid yin/ /khyod ni bsil 'gyur rnyog pa med/ /dge slong dgra bcom zag pa zad/ /'dzag pa'i 'dod chags rab spangs pas/ /khyod kyis zug rngu ma lus bton/ /gzhan la pan pa'i gang zag mchog /khyod ni mngon sum sangs rgyas sras/ /zhes gsungs pa las/don rtogs par bya'o/ /ji ltar 'das pa'i sangs rgyas kyis/ /byang chub sras rnams dbang bskur ltar/ /bdag gis gsang chen dbang gis ni/ /khyod kyi sems rgyun dbang bskur ro/ /zhes bya ba ni/ ji ltar 'das pa'i sangs rgyas thams cad kyi sras byang chub sems dpa' rnams la/sangs rgyas kyi gsang chen bzhi pas dbang bskur ba ltar/ bu khyod kyi sems kyi rgyud rdo rje lta bur dbang bskur ro zhes bya ba'i don to/ /lha mo dga' ster gnas ster ma/ /sna tshogs gzugs can yid 'ong ma/ / khyer cig khyer cig sems dpa' che/ /khyer la mchod pa dag tu byos/ /zhes bya ba la dga' ster gnas ster ni rang gi rig pa'i stong pa nyid do/ /sna tshogs ni stong pa nyid kyi rdo rje'i lam 'di la gnas nas gzugs sna tshogs dang / sgra skad sna tshogs pa yid du 'ong bas chos ston pas so//khyer cig ces pa ni de yid la zung shig pa'o/ /mchod pa gyis zhes pa ni de'i dbang gis bdag med rigs ldan ma dri chen dri chu la sogs pa 'byung ba med pas mchod pa'o/ /ye shes 'di ni ches phra zhes pa ni byis pa'i skye bo dbang po gnyis kyi bde ba 'ba' zhig la chags pa rnams kyis rtogs par dka' ste/dper na/ rdo rje nam mkha'i dkyil dang mtshungs/ /zhes bya ba nam mkha' dbyibs dang rdzas dang bral ba rtogs par dka' ba bzhin no/ /'dzag pa la sogs pa'i nyon mongs pa'i dri ma'i rdul bsal te zhi ba'i go 'phang stsol bas//rdul bral mthar phyin zhi ba nyid do/ /rang gis rang gi sems so sor rtogs pa'i mtha' las byung bas na/ khyod nyid kyang ni de yi pha/ /zhes bya'o/ /rdo rje dang pad+ma byin gyis brlab pa ni/ tha mal ba'i b+ha ga dang ling+ga dag mi shigs pa'i rang bzhin du byin gyis brlab pa ste/rkyang ma dang ro ma dag mi shigs pa kun spangs pa'i lam du byin gyis brlab pa'o/ /oM ni dbugs sdud pa'o/ /pad+ma su kha d+hA ra ma hA rA ga su kha daN+ta/ zhes pa ni 'dzag pa'i rang bzhin gyis mi gos pa ster ba'i phyir ro/ /tsa tu ra A nan+da bA ga bi shwa hUM hUM hUM kAR+YaM ku ru ShA me/dri ma med pa'i dga' ba bzhi'i dbang gis 'gro ba thams cad la rag sna tshogs pa'i chos kyi 'khor lo ston nus pa'i phyir ro/ /oM badzra ma hA dwe Sha tsa tu ra A na n+da dA ya ka zhes pa ni/ tha mal pa'i zhe sdang bcom nas zhe sdang rdo rje chen por dga' ba bzhi'i don ston pas so//kha ga mu khai kA rA so nA tha hUM hUM hUM kAR+YaM ku ru ShA me zhes pa ni/ gang ba thams cad kyi dga' ba nam mkha' la 'gro ba'i gdong can 'dus shing ro gcig pas/ srid pa gsum gyi mgon dang skyabs su 'gyur ba'i phyir/ bdag la bya ba mdzod ces bya ba'i phyir ro/ / spyi bor oM gyi rnam pa zhes pa ni/ sku'i rdo rje ste zla ba rgyu ba'i rtsa'o/ /snying gar hUM gi rnam pa zhes pa ni/ thugs kyi rdo rje ste sgra gcan 'dzin rgyu ba'i rtsa'o/ /ze 'bru la aH'i rnam pa zhes pa ni/ gsung gi rdo rje nyi ma rgyu ba'i rtsa'o/ /de ltar thams cad sku gsung thugs su bsdu ba'i phyir gzhan pa las don btsal bar mi byed par ston pa'o//rig byed chu dang me tog dUr ba'i rtsa/ /bram zes spyi blugs sangs rgyas pas mi gzung / /dbang bskur sngags sogs nyams kyis 'jig dogs pas/ /gnas ngan la sogs rigs la'ang btung mi bya/ /kye'i rdor 'bum lnga'i bdag nyid dang //mchog gi dang po rgyud chen dang / /rgyud 'bum mngon brjod la sogs pa'i/ /don bshad rdo rje snying pos bri/ /'dir bshad phal cher rtsa ba yi/ /so sor bshad pas rgyud 'di yang / /rtag par gang dang gang bstan pa/ /de dang de yis gsal bar bstan/ /nyan thos skye bo rnams la ngas 'di yongs ma bstan//de bzhin rang rgyal phyir min mu stegs can la'ang min/ /ma rungs rgyal po ngan dang gsang chen smod la'ang min/ /rgyal sras bla ma smod la 'di ma bstan/ /gsang ba mchog la rab mos shing / /mnga' bdag bla ma la gus la/ / rang gi de nyid sbas shes na/ /gang yin de la bdag gis bstan/ /sa bcu pa yi dbang phyug mchog /dpal ldan rdo rje snying po nga / /dpa' bo dpa' mos legs bskul nas/ /rnal 'byor lam blang phyir 'di bshad/ /rnyed dka' dpal ldan kye yi rdo rje rin po che/ / 'bum phrag lnga pa rtsa rgyud las 'di legs par bsdus/ /de 'brel nges don rgya cher bshad pa zhes bya ba/ /legs bris dge ba dri med gang thob de yis ni/ /kye rdor gsang ba legs rtogs dam tshig yongs ldan zhing / /'di ston bla ma'i rjes 'brangs rdo rje spun la sogs//phan tshun legs par smra zhing khon du mi 'dzin dang / /dam tshig rdo rjes gleng slong dal gyis gnas par shog /ma rungs dam 'dral ngan pa'i las byed cing / /rnal 'byor ched du mi gnyer skye bo gang / /de dag mi 'grogs de yis mi mthong dang / / rang sdug bla ma rdo rje mchod par shog /rtsod ldan dus su gsang chen ston byed dang / /mu stegs skye bo ngan pa'i lta 'joms shing / /gang de'i lta ba phyi nas 'don byed pa'i/ /de dag 'dul ba'i ded dpon des byed shog /rnam par bshad pa 'di las gzhan pa'i bshad pa de kho na ma mthong ba'i skye bo 'dod rgyal rnams kyis byas pa la yid brtan par mi bya'i 'di dang 'di lta bu'i 'grel pa rtsa ba'i rgyud mtha' dag gi nges pa dang /drang ba legs par gtan la 'bebs pa la yid brtan te gnas par bya'o/ /kye'i rdo rje'i nges pa'i don gyi rgya cher bshad pa sa bcu'i dbang phyug chen po byang chub sems dpa' rdo rje snying pos mdzad pa rdzogs so// //rgya gar gyi mkhan po bla ma chen po mai tri zhabs la/ bod kyi lo tsA ba 'bro dge slong shes rab grags pas mang du gsol ba btab nas/ legs par mnyan te bsgyur ba'o// //kye'i rdo rje'i bsdus pa'i rgyud kyi rgya cher bshad pa/ byang chub sems dpa' rdo rje snying pos mdzad pa/ rnyed par dka' ba 'di sngon de kho na nyid kyi le'u yan chad kyi 'grel pa las ma 'gyur ba las/ slad kyi bal po'i yul gyi grong khyer chen po rol pa zhes bya ba nas/

CLOSE WINDOW