CLOSE WINDOW

D1170
བོད་ཡིག

paN+Di ta de nyid dang / lo ts+tsha ba byams pa'i dpal gyis bsgyur// //slad kyi char yang sa skya lo tsA bas cung zad bcos shing bsgyur te gtan la phab pa'o// @##/ /rgya gar skad du/ yo ga tsa tu ra de wa sto tra nA ma/ bod skad du/ sbyor ba bzhi'i lha la bstod pa zhes bya ba/ bcom ldan 'das ma shes rab kyi pha rol tu phyin pa la phyag 'tshal lo/ /sten mtshon seng ge'i khri stengs na/ /sku drang dgongs pa shin tu gzhan/ /rdo rje skyil krung der bzhugs nas/ /gang du ting 'dzin yongs 'du ba'i/ /ting 'dzin rgyal po zhes bgyi la/ /mnyam par gzhag cing dgongs mkhyen pa'i//de bzhengs 'phrul gyi spyan gyis ni/ /sangs rgyas zhing gzigs khyod la 'dud/ /sku gnas nyi shu rtsa gnyis nas/ /'od zer bye ba khrag khrig ni/ /brgya stong drug cu drug cu ni/ /'byin pa'i sku de la phyag 'tshal/ /mi mjed phyogs bcu'i 'jig rten du/ /'od kyi snang bas khyab byed pa//'od des reg pa'i sems can rnams/ /rdzogs pa'i byang chub nges gyur pa'i/ /'phro ba 'dren la phyag 'tshal lo/ /ba spu'i 'od dang rang bzhin 'od/ /mi mjed phyogs bcu'i 'jig rten du/ /'od kyi snang bas khyab byed pa/ /'od kyis reg pa'i sems can rnams/ /rdzogs pa'i byang chub nges gyur pa//'gro mgon shAkya seng ger 'dud/ /ljags 'od bye ba khrag khrig ni/ /brgya stong rtse las pad 'dab stong / /de stong bde gshegs thugs mnga' bzhugs/ /phyogs bcu'i zhing du gshegs byon cing / /pha rol phyin drug chos ston mdzad/ /chos thos sems can byang chub nges//'gro mgon sprul pa'i sku la bstod/ /seng ge rnam grol ting 'dzin gyis/ /g.yo ldegs ltas chen bco brgyad kyis/ /mi mjed phyogs bcu'i ngan song kun/ /rgyun 'chad lha mi'i skal mnyam byas/ /tshe rabs dran zhing sangs rgyas 'dud/ /ngan song skyob la phyag 'tshal 'dud//mi mjed phyogs bcu'i 'jig rten khams/ /'od kyis zil mnan lham me ni/ /lhang nger bzhugs pa'i sku la bstod/ /rang bzhin sku brtan lha rnams kyis/ /mchod rdzas mchod de dbu stengs su/ /byin gyis me tog khang brtsegs gyur/ /rang 'od mi mdzad phyogs bcu'i zhing / /kun snang sems can mthong nas kyang //rang mdun 'dug ste chos ston snyam/ /sku gcig du mar snang la bstod/ /rang 'od phyogs bcu'i zhing khyab nas/ /sems can ji snyed 'khod pa yis/ /rang 'khor bcas pa snang byed pa'i/ /gser 'od shAkya seng ger 'dud/ /gzungs dang ting 'dzin rab thob pa'i//stong nyid mtshan med spyod yul can/ /rdol med pa yi smon lam ldan/ /chos mnyam gzung dang bzod rab thob/ /blo chen sems dpa' phyag 'tshal bstod/ /thogs med spobs ldan bstan pa ni/ /zad mi shes shing so so ni/ /yang dag rig pa khong du chud/ /mngon shes chen po rnam par rtse//mngon shes ma nyams phyag 'tshal bstod/ /snyan pos tshig snyan le lo med/ /brtson 'grus lus srog mi lta zhing / /tshul 'chos kha gsag grags pa med/ /khe dang bkur sti'i sems med pas/ /zang zing med par chos ston pa/ /chos zab bzod pa dam pa rtogs//mi 'jigs thob la phyag 'tshal bstod/ /zhum med bdud kyi las las 'das/ /las dang nyon mongs phyir rgol bcom/ /phas kyi rgol bas zil mi non/ /nyan thos rang rgyal rtogs dka' ba/ /las sgrib rgyun chad phyag 'tshal bstod/ /rnam par dbye zhing bstan la mkhas/ / bskal pa grangs med smon lam rtsis/ /bzhin 'dzum thog ma khro gnyer med/ /snyan cing 'jam pa'i tshig dang ldan/ /chos rab rtogs la phyag 'tshal lo/ /pha rol tshigs bcad dbyangs brjod mkhas/ /spobs pa mi chod 'khor mtha' yas/ /zil gyis mnan pa mi 'jigs ldan/ /bskal pa bye ba mtha' yas par//bstan pa ye shes 'byung mkhas bstod/ /chos rnams sgyu ma smig rgyu dang / /chu zla rmi lam sgra brnyan dang / /mig yor nam mkha' dri za'i grong / /sprul dang gzugs brnyan khong chud pa'i/ /sems zhum med la phyag 'tshal bstod/ /sems can sems rgyu shes pa phra//spyod mkhas khong chud byas la mkhas/ /sdang med bzod rlabs chos mnyam rtogs/ /chos zab ldan zhing gting dpag dka'/ /sems chos dbang thob las nyon mongs/ /lta sgrib la sgrol phyag 'tshal bstod/ /rten pa rtogs pa bstan la mkhas/ /rten 'brel tshul mi zad shes zhugs//lta dang bag nyal kun sbyor spongs/ /las dang nyon mongs zhi la mkhas/ /kun ldang bral la phyag 'tshal lo/ /bden pa rab rtogs ye shes mkhas/ /chos rnams sgra brnyan lta bur mos/ /chos bstan tshad med 'jigs dang bral/ /bdag nyid ji ltar khong chud mkhas/ /zhing khams rnams dgongs rmi lam zin//grangs med sangs rgyas dran la bstod/ /sangs rgyas 'byung ba nyer 'gro mkhas/ /sangs rgyas dpag med gsol btab mkhas/ /sems lta nyon mongs zhi la mkhas/ /ting 'dzin brgya stong mngon par sgrub/ /rnam rtse ye shes rtogs la bstod//bzang skyong rin chen 'byung la sogs/ /khyed kyi yon tan bskal par ni/ /mtha' yas brjod kyang mi lang ste/ /de sogs sems dpa'i tshogs la bstod/ /dgra bcom zag zad nyon mongs med/ /dbang gyur sems ni rnam par grol/ /shes rab shin tu rnam par grol/ /cang shes glang chen bya ba byas//byed pa byas shing khur bor ba/ /rang gi don ni rab thob pa/ /srid pa kun sbyor yongs su zad/ /yang dag pa yi bka' yis ni/ /sems ni shin tu rnam par grol/ /sems dbang pha rol mchog thob pa'i/ /nyan thos dge slong tshogs la bstod/ /dge bsnyen pha dang dge bsnyen ma//chos mthong ba yi tshogs la bstod// @##/ /chos sku'i dkyil 'khor gyi lha la bstod pa/ /smra bsam brjod med shes rab pha rol phyin/ /ma skyes mi 'gag nam mkha'i ngo bo nyid/ /so so rang rig ye shes spyod yul ba/ /dus gsum rgyal ba'i yum la phyag 'tshal bstod//stong pa bco brgyad chos kyi sdong po la/ /pha rol phyin bcu mdzes pa'i rgyan gyis brgyan/ /tshad med bzhi yi lo 'dab rgyas pa la/ /skye 'gag med pa'i 'bras bu so sor smin/ /sa bcu chos kyi sku la phyag 'tshal lo/ /zhing khams thams cad gser gyi sa gzhi la//rin chen rnam pa mang po gcal du bkram/ /me tog puN+Da rI ka char bzhin 'bab/ /yum gyur dge ma khyod la phyag 'tshal bstod/ /gnas med ji ltar nam mkha' bzhin/ /spros pa med cing snang ba med/ /khyod kyi thugs ni nam mkha' 'dra/ /nam mkha' mtha' dang dbus med pa//sangs rgyas rnams kyi chos nyid de/ /dus gsum las ni shin tu 'das/ /dmigs med chos sku phyag 'tshal bstod/ /bla ma bsu skyel chos snyan bstod/ /gtsug lag mchod rten rjes bsgrubs shing / /phud byas phyag zhabs 'khor los mtshan/ / 'khor mangs khyod la phyag 'tshal bstod/ /yi dam brtan g.yas zhabs gnas te/ /mi g.yo brtan la phyag 'tshal lo/ /bsdu ba bzhi ni goms byas pas/ /phyag dang zhabs gnyis dra bas 'brel/ /myur 'du'i snga ltas phyag 'tshal lo/ /bza' bca' btung zhim byin rtags su/ / phyag zhabs 'jam zhing gzhon sha chags/ /sku bdun shin tu mtho ba ste/ /btud zhing nyams bde'i snga ltas bstod/ /srog gcod spangs sogs yon tan gyis/ /rting yangs sku che drar ba ste/ /sku che ring ba khyed la bstod/ /dge ba'i tshogs sogs blang byas pas/ /zhabs gong mtho zhing spu gyen 'khyil//mi mnyam chos ltas phyag 'tshal lo/ /rig bzo rim gro gzhan byin sogs/ /e na'i byin pa lta bu ste/ /myur 'dzin snga ltas phyag 'tshal lo/ /bdog pa thams cad btang byas pas/ /phyag ni brla steng slebs pa ste/ /dul ba'i snga ltas phyag 'tshal lo/ / tshangs spyod la sogs yon tan gyis/ /gsang gnas sbubs su nub pa ste/ /bu mang snga ltas phyag 'tshal lo/ /stan sogs gzhal med khang byin pas/ /gser gyi kha dog mdog 'jam pa/ /gnas sogs bzang po thob phyag 'tshal/ /slob dpon la sogs rim gro byas/ /sku rabs g.yas 'khyil mdzod spus brgyan//mnyam pa'i snga ltas phyag 'tshal lo/ /mi snyan mi spyod yon tan sogs/ /seng ge'i ro stod spyan zlum mdzes/ /thub med snga ltas phyag 'tshal lo/ /nad pa rnams la sman sogs byin/ /phyag sor rgyas shing ro mchog ldan/ /nad nyung snga ltas can la bstod//zas stegs la sogs byas pa yis/ /chu zhing gab cing spyi gtsug ldan/ /mnga' chen mnga' la phyag 'tshal lo/ /yun ring tshig snyan nyams bde smras/ /ljags yang srab pa tshangs pa'i dbyangs/ /yan lag lnga ldan gsung mnga' bstod/ /yun ring tshig 'khyal spangs pa yi//seng ge'i 'gram pa lta bu ste/ /tshig mnyam snga ltas phyag 'tshal lo/ /rim gro mnyam med 'tsho dag pas/ /tshems mnyam shin tu dkar ba ste/ /'khor ba snga nas bsags ltas can/ /bden zhing phra ma med tshig gis/ /tshems thags bzang zhing bzhi bcu tshang / / 'khor ba dbyer mi phyed la bstod/ /ma chags mi ldan blta byas pas/ /brdzi spyan gyi dkar nag dbye ma/ /kun nas mdzes pa'i snga ltas can/ /sum cu rtsa gnyis mtshan ldan bstod/ /'du dben sen mo zangs mdog 'dra/ /sems can phan sems sen mdog snum/ /rigs rgyud mtho phyir sen mo mtho//sor zlum kha na ma tho med/ /dge ba'i tshogs rdzogs sen mo rgyas/ /dge ba rtsa grub sor mo gzhol/ /'tsho bas dben pa rtsa mi mngon/ /nyon mongs mdud grol rtsa mdud med/ /long bu mi mngon dbyen chos mnga'/ /mi mnyam sgrol bas zhal mnyam yin/ / seng ge'i seng ge'i 'gros bzhud bstod/ /glang po glang po'i 'gros bzhud bstod/ /dang pa ngang pa'i stabs bzhud bstod/ /khyu mchog khyu mchog 'gros bzhud bstod/ /mthun pa'i lam lnga g.yas phyogs bzhud/ /lta mdzes mdzes par bzhud la bstod/ /thugs g.yo mi mnga' mi g.yo bzhud//sku legs yon tan ston pa ste/ /sku sbyangs sdig pa sbyangs pa yin/ /chos ston sku rim gzhol la bstod/ /sku gsung thugs gtsang sku 'jam pa/ /rnam dag sku mnga' sku rnam dag /chos 'dul mdzes pas yo byad rdzogs/ /yon tan yangs bzang sku che mdzes/ / mnyam pa'i thugs mnga' sku mnyam bstod/ /'jam pa'i chos ston sku ni gzhon/ /mi zhum thugs mnga' sku zhum med/ /mi dge spangs pas sku rnam rgyal/ /'byung zad sku mkhregs khyod la bstod/ /yan lag rnam mdzes gzigs pa dag /nga rgyal de'u bcom sogs kyis/ /phyal zlum phyal phyal khyal ma zhom//chos zad yang dag bzlog pas ni/ /phyal ni phyal le bzhugs la bstod/ /chos zab thugs chud yon tan rdzogs/ /lte zab lte bag yas phyogs 'khyil/ /'khor mdzes la sogs yon tan gyis/ /mdzes gtsang sku la rme ba med/ /yang zhing byams pa'i yon tan sogs//phyag 'jam phyag ris zab cing snum/ /bzo dang bslabs pa'i yon tan sogs/ /phyag ris ring zhing zhal mi ring / /gzugs skyes gzugs brnyan snang la bstod/ /'jam pa sngon btang yon tan rdzogs/ /ljags 'jam ljags srab ljags dmar/ pa/ bsnyengs pa mi mnga' yon tan rdzogs/ /glang chen 'brug sgra nyams che'i gsung / /srid sbyor 'das sogs yon tan gyis/ /tshems kyi mche ba zlum zhing rno/ /tshems mnyam rim gyis gzhol la bstod/ /shes rab ri la bzhugs sogs kyis/ /shangs mtho shangs gtsang ldan la 'dud /gzigs pa rnam dag yon tan rdzogs/ /spyan ring spyan dang rdzi ma stug /smin 'jam smin ring dkar nag phyed/ /smin snum smin mnyam khyod la bstod/ /chos mchog yangs shing don ldan rdzogs/ /snyan ring snyan 'jam snyam ma nyams/ /phas kyi rgol ba'i bdud sogs kyis/ / dpral yangs dpral ba legs par grub/ /smon lam shin tu rdzogs rtags su/ /dbu rgyas dbu skra bung ba ltar/ /gnag pa khyed la phyag 'tshal bstod/ /thugs 'jam mi gsung mi gsung brlang gsung bral/ /bsgom spang bag nyal spangs sogs kyis/ /dbu stug dbu 'jam dbu mi stug / dri zhim dbu mi rtsub la bstod/ /phyag zhabs dpal be'u bkra shis 'khyil/ /dpe byad bzang po brgyad cu yis/ /brgyan pa khyod la phyag 'tshal bstod/ /sbyor ba bzhi'i lha la bstod pa zhes bya ba paN+Di ta chen po rat+na kIrtis mdzad pa rdzogs so// //bal po ma hA pa na'i rang 'gyur// //

CLOSE WINDOW