CLOSE WINDOW

D1167
བོད་ཡིག

/shAkya'i rgyal po de la phyag 'tshal lo/ /de bzhin gshegs pa brgyad la bstod pa slob dpon zhi ba 'tshos mdzad pa rdzogs so// @#/ /rgya gar skad du/ su pra b+ha ta pra b+ha ta sto traM/ bod skad du / rab tu snga bar nam langs pa'i bstod pa/'jig rten gsum gyi mnga' bdag la phyag 'tshal lo/ /lha yi tshogs dang grub pa dri za'i gtso dang sdom brtson dbang rnams kyis/ /bstod tshig sna tshogs dag gis lha yul sa stengs rnams su bstod mod kyi/ /bdag kyang ji ltar nus pas 'phags pa rdzogs pa'i sangs rgyas bstod bgyi ste//nam mkha' la ni mkha' lding 'phur zhes bung ba rnams ni cis mi 'phur/ /mi mthun phyogs spangs gyur pa lus pa med pa'i skyon ni zad gyur la/ /btso ma gser gyi mdog can pad+ma rgyas pa lta bur yangs pa'i spyan/ /dpal ldan mdzes pa'i 'od kyi dkyil 'khor lha yi tshogs kyis yongs bskor ba'i//stobs bcu mnga' ba khyod ni rtag tu rab tu snga bar nam langs pa'o/ /bdud kyi dpung las rnam par rgyal ba nyam nga'i lam ni gcod mdzad pa/ /sa gsum phan par mdzad pa 'khri shing dra ba gsum po dral mdzad pa/ /zhi ba'i bde ba rtsol bar mdzad pa mi shes ri bo 'jig mdzad pa//stobs bcu mnga' ba khyod ni rtag tu rab tu snga bar nam langs pa'o/ /gang zhig lha min mi dang lha rnams kyi yang sngon du bde ba'i gnas thob pa/ /ma lus pa yi sa yi khams su 'jig rten bdun bsdus dbyangs gsangs mthon po sgrogs/ /shed las skyes pa bsgo byed rang byung pad+ma'i skye gnas can ni gnyid log gyur//stobs bcu mnga' ba khyod ni rtag tu rab tu snga bar nam langs pa'o/ /shar gyi ri bo'i rtse yi ngos la gnas shing dmar pa'i 'od kyis rnam gnon pa/ /mun pa'i tshogs rnams 'joms par byed pa skye dgu rnams kyi mig gcig pu/ /nyi ma de yang myos pas 'phyan zhing rnam pa kun du gnyid log gyur//stobs bcu mnga' ba khyod ni rtag tu rab tu snga bar sad pa'o/ /glang po'i mche ltar dkar bsil gsal ba'i zer can ri bong mtshan/ /mtshan mo thig le lta bur mdzes pa kun gyi gtsug gi nor bu gang / /dman pa'i mdangs dang bral ba de yang rnam pa kun du gnyid log gyur//stobs bcu mnga' ba khyod ni rtag tu rab tu snga bar sad pa'o/ /rab mchog lag pa bzhi pa bcu drug phyed phyed phyogs kyi gdong pa can/ /bzlas dang nyes pa'i chog shes shing nges brjod rig byed 'don pa po/ /dri med pad+ma'i skye gnas tshangs pa de yang rab tu gnyid log 'gyur/ / stobs bcu mnga' ba khyod ni rtag tu rab tu snga bar sad pa'o/ /gangs kyi ri bo'i rtse la gnas shing sbrul gyi mchod phyir thogs pa 'chang / /grong khyer sum brtsegs bsregs par nus gang stag gi pags pa'i gos gyon pa/ /rtse gsum can rtags ri mchog bu mo dang ni lhan cig gnyid log gyur/ /stobs bcu mnga' ba khyod ni rtag tu rab tu snga bar sad pa'o//'bar ba'i rdo rje lag na thogs shing lha min rnams kyis thub dka' ba/ /lha yi gtso bo bde sogs bdag po rmongs pa'i bsam pas rnam par 'khor/ /mtshan mo min dang mtshan mo gnyid log 'dod pa'i 'dam du nges par bying / /stobs bcu mnga' ba khyod ni rtag tu rab tu snga bar sad pa'o//u t+pal sngon po'i 'dab ma ltar sngo pad+mo ltar dkar yangs pa'i mig/ /lha min gtso bo thams cad bcom gyur thams cad byed po sna tshogs gzugs/ /khyab 'jug kyang ni yun ring gnyid log mngal gyi gnas las thar ma gyur/ /stobs bcu mnga' ba khyod ni rtag tu rab tu snga bar nam langs pa'o//gang zhig ral pa ser skya'i tshogs ldan dmar po zangs mdog khrag gi mig /phyugs bdag dga' ba'i dus su gcig tu chags pa 'joms par nus pa po/ /'dod pa'i lha yi mnga' sreg lus can me lha de yang gnyid log gyur//stobs bcu mnga' ba khyod ni rtag tu rab tu snga bar sad pa'o/ /zla ba kha ba ku mu ta mtshungs chang 'thungs mig ni dmar gyur la/ /'dod pa brtan sra sgeg po thong gshol lag na 'dzin par brtson/ /stobs can de ni nam gru'i mgul nas 'khyud cing 'di na nyal bar gyur//stobs bcu mnga' ba khyod ni rtag tu rab tu snga bar sad pa'o/ /glang chen gdong can mche ba gtsigs pa rnam pa kun du bgegs byed pa/ /'gram pa'i ngos gnyis myos chu rab 'bab bung bsgrags sangs mthon po sgrogs pa yi/ /tshogs kyi bdag po yang ni chang gi btung bas rab tu myos par gyur /stobs bcu mnga' ba khyod ni rtag tu rab tu snga bar sad pa'o/ /zar ma'i me tog ltar sngo gang gi lag pa mchog na mdung thung thogs/ /pad+mo gsar pa lta bu'i lus can gdong drug lha min khrung khrung gsod/ /mig gsum ldan pa gzhon nu'i tshul can de yang gnyid mthug log par gyur//stobs bcu mnga' ba khyod ni rtag tu rab tu snga bar sad pa'o/ /zas la rab chags dman lus rtag par rnal 'byor rjes su dga' gyur pa/ /gnod pa sna tshogs rnam mang dang ldan yi dags lta bur tshig pa'i lus/ /zla dpung 'gro ba rnam bral ba gang yin gcer bu de rnams kyang gnyid log /stobs bcu mnga' ba khyod ni rtag tu rab tu snga bar sad pa'o/ /bas mtha'i gnas chen 'di na drang srong ngan spong aM gi ra sa dang / /kun du rgyu sogs gnas 'jog rgyas pa grog mkhar ba dang dga' byed rnams/ /gzhon nu ma yi skye gnas chags shing rmongs pa rnams kyang gnyid log gyur//stobs bcu mnga' ba khyod ni rtag tu rab tu snga bar sad pa'o/ /gshin rje chu lha lus ngan gnod sbyin 'dre dang lto 'phye'i dbang po dang / /de bzhin 'jig rten skyong gzhan lha yu las stengs nam mkha' la gnas pa/ /gzhon nu ma la rab chags zur gyis lta de rnams kyang gnyid log gyur//stobs bcu mnga' ba khyod ni rtag tu rab tu snga bar sad pa'o/ /srid pa'i rgya mtshor bying gyur gti mug dra bas khebs pa'i lus/ /thub pa ser skya gzeg zan kun du 'khor zhing blun po'i bsam pa can/ /zhi ba'i bde ba yongs su nyams de rnams kyang gnyid log gyur/ /stobs bcu mnga' ba khyod ni rtag tu rab tu snga bar sad pa'o//mi shes mtshan mo mun par sred pa'i mal cha mthug gyon cing / /yul gyi sngas rten la ni rab mthug gnyid log gyur pa'i tshe/ /dge dang mi dge'i 'bras bu yongs su 'gre ldog byed pa na/ /rtag pa gnyid du gnyid sad gang yin de la phyag 'tshal lo//chu 'gram dag tu ba lang rigs brgya rnams kyis chu 'thungs te/ /ngoms nas 'gro bar gyur na'ang chu la bri bar mngon pa med/ /de bzhin thub pa snyan ngag mkhan brgyas yang dag bstod gyur kyang / /yon tan rgya mtsho legs pa'i gter chen zad par 'gyur ma yin/ /rab tu nam langs khyod gcig pu yi ye shes spyan phye bstod gyur pas//'jig rten gsum mgon rta bdun 'od kyis 'gro 'di rtag tu snang byas te/ /sna tshogs lam thob lam ngan las bzlog 'byor ldan dpal gyi bya ba dag /dogs med rang dgar bde blag dngos grub rnam pa kun du spyod gyur cig /rab tu snga bar nam langs pa'i yang dag par rdzogs pa'i sangs rgyas la kha che'i rgyal po shrI ha ri sha de bas bstod pa rdzogs so/

CLOSE WINDOW