CLOSE WINDOW

D1155
བོད་ཡིག

/ @##/ /rgya gar skad du/ gu Na a par+yan+ta sto traM/ bod skad du/ yon tan mtha' yas par bstod pa/ thams cad mkhyen pa la phyag 'tshal lo/ /rgyal ba'i yon tan mtha' mi 'tshal bas gal te khyod bsngags mi brjod na//'ga' yang khyod bstod mi bgyid khyod kyi 'byor ba 'gro bas rtogs ma mchis/ /gang slad 'gro 'dis khyod la bstod pa bgyis kyang nongs pa ma mchis pa/ /de slad don 'dir bdag ni blo gros rab tu chung yang brtson pa lags/ /srid gsum dag la phan brtson blo mnga' ngan song gnas na'ang bsngags par 'os//rang don smon pa'i blo gros can ni mya ngan 'das kyang ma lags zhes/ /de slad khyod ni 'khor ba'i 'jigs pas mi ldog brtan zhing mi g.yo bas/ /'jig rten skye zhing 'chi bas nyam thag yongs su bskyab par brtson pa lags/ / srid pa'i 'gro ba dag tu sdug bsngal rnams kyis smas pa'i sems can la/ /bdag gi blo gros rtsub pos sdug bsngal rnam mang de dang de bsgrubs pas/ /de phyir bdag gis de dag rnams la bde ba bskyed phyir bzod bya zhes/ /de slad khyod ni 'gro la zhi ba'i bde ba bskyed slad brtson pa lags//sems can gang dag ma rig ldongs pas bsam pa rgud pa'i blo gros can/ /pha dang bur gyur rnams kyis bdag la gnyen snyam byams pas phan btags pa/ /de dag btang nas gcig pu thar par byed pa bdag gi tshul min zhes/ /de slad khyod kyis 'gro ba mgon med nges thar bgyi slad smon lam btab//sngon chad 'khor bar sdug bsngal kun du myong gyur tshe na bdag la ni/ /gang dag yun ring ngo shes byams sems ldan pas lan brgyar grogs byas pa/ /bde ba thob tshe de dag bkol nas ji ltar yongs su spyad bya zhes/ /de slad khyod ni bdud rtsi 'ang sems can kun dang thun mong gsol bar brtson//mchog sbyin 'gro bar sems can rnams dang lhan cig longs spyod 'das dgongs nas/ /de dag nges par yongs su mi gtong bas na khyod kyi bstan pa ni/ /ji ltar khyod nyid ne tsor 'khrungs tshe ljon shing gzhon nu lags spyad pa'i//ljon shing rgas par gyur kyang yongs su mi gtong de ltar brtson pa lags/ /gang slad 'gro ba mya ngan ma 'das mya ngan khyod 'da' blo ma byung / /bde gshegs go 'phang brnyes par nus pa ma lags de mi mdzad/ /de slad khyod ni kun mkhyen yon tan gter dag brnyes mdzad slad du brtson//stobs bcu'i yon tan bdag gir mdzad pa las gzhan khyod la phra mi mnga'/ /gang su la la dag gis bde gshegs go 'phang brnyes pa de dag kyang / /'di bas shin tu smad pa'i gnas skabs dag tu lhung ba byung ngo zhes/ /de slad khyod kyis nyam ngar lhung ba'i tshe yang bdag nyid smad ma mdzad//bdag la smod pa mi rung skyes bu dar ba zhum par bgyid ma lags/ /gang slad gal te rang la rag las 'bad pas byang chub thob gyur na/ /sangs rgyas go 'phang rnyed dka' ma lags snyam du khyod kyi blo gros byung /de slad khyod kyis nyam nga'i dus su'ang kun mkhyen smon lam brtan bzlog pa/ /dman la dga' ba rnams kyi tshig dag khyod kyis khyad du bsad par mdzad/ /nyon mongs chu bo rab 'khrug pa dang ngan 'gro la dag rtag tu gdangs pa dang / /so so'i skye bo'i g.yo dang sdig pa'i grogs po rtag par rgyun du gnas pa dang //thub rnams rnyed par dka' zhes de ltar sems zhum 'gro ba gtong ba'i rgyu/ /gang lags de nyid khyod kyi thugs rje rtag tu skye ba'i rgyur yang gyur/ /ji ltar 'gro ba rnams la khyod blo shin tu byams pa skye ba ltar/ /'jig rten 'di dag rang la'ang byams pa'i blo gros skye bar mi 'gyur la//'jig rten phongs pa'i gnas skabs gyur na bdag nyid dag kyang gtong bar bgyid/ /khyod ni shin tu nyam nga'i dus su'ang 'gro ba gtong ba bzhed ma mchis/ /gang zhig skye bo dman dang phongs pa re ba'i bsam ldan mthong na yang //brtse med 'bras bu 'dod pas smod gzhan yon tan dag dang ldan tshol ba/ /bsam brlag de ni sbyin pa byed kyang slong ba rnams dang mtshungs so zhes/ /de slad khyod ni thugs rjes slong ba rnams la sbyin par bzhed la zhugs/ /'ga' zhig rang nyid ma dul bzhin du rigs par ldan pa'i tshig smra yang //rang gi tshig dang 'gal bar spyod pas gzhan dag 'dul bar mi nus zhes/ /khyod kyis dgongs nas de slad 'gro ba mtha' dag thugs la bzhag mdzad nas/ /re zhig bdag nyid ma dul ba nyid dul bar mdzad phyir brtson pa lags/ /gang slad mkhas pa rnams kyi mi dge'i las kyang zhi ba'i bde bar 'gyur mod kyi//'on kyang 'phags pas mi dge ba dag kun du bsten 'os ma yin zhes/ /de slad khyod ni rtag tu rang bzhin yongs su dag pas sdig las log /ngan song 'jigs pas ma lags lha yi bde spyad bzhed pa'i phyir ma lags//gang dag 'gro la mi lta bdag nyid zhi bar 'gro bar bgyi slad spyod bgyid pa/ /des kyang ci ste brtson pa ma bsten slan chad bsam rdzogs mi 'gyur na/ /gang gis 'gro ba ma lus bsgral phyir brtson pa brtsams pas ci smon zhes/ /de slad khyod kyis rang gi bde la ma gzigs byang chub slad du brtson//khyod kyis 'byor ba chung ba'i tshe yang sbyin par bzhed pa ma spangs la/ /bdog pa chung yang slong ba rnams la zhum mi mnga' ba'i thugs kyis stsal/ /dbang phyug chen po mnga' yang tshul dang 'gal ba'i tha snyad mi mnga' la/ /na tshod lang tshor gyur kyang 'dod pa rnams la thugs ni chags mi mnga'//khyod kyis thos dang blo gros che ba'i tshe na'ang bdag bstod ma mdzad la/ /'gro ba yon tan chung ba gzhan rnams kyang ni mthon por bkur bar gyur/ /yon tan tshogs la gnas tshe nyid kyi spyod pa nyes pa chung ngu'ang bzung /'gro ba dmu rgod rnams la rtsol ba mi mnga' bde bar gnas pas bzhugs/ /khyod kyi thugs ni srid dang nyon mongs skyo bas zhi la dgyes gyur kyang / /thugs rje nyid kyis mdzad pa'i yon tan skye bo rnams dang rjes su mthun/ /byed pa ma gtogs gzhan gyis 'bras bu mi myong bar ni khyod mkhyen kyang //'on kyang sems can rnams kyi 'byor pa skyed slad bsod nams gter rnams bdar/ /khyod la shes rab la sogs yon tan gang dag rtag tu mnga' gyur pa/ /de dag khyod kyis 'gro ba dag gi don rnams nyid du nye bar spyad/ /de las khyod kyi bsod nams 'bras bu gzhan du mchis pa ma lags la//de dag 'gro ba'i 'byor slad yongs su bsngos kyang don ma mchis ma lags/ /khyod la gzhan la sman pa'i thabs dang 'bral ba'i dus 'ga'a'ang byung ma gyur/ /thabs chung ma gyur 'bras bu ma mchis ma lags 'bras bu chung ma lags//bsod nams chung ngu rtsom pa dag la khyod ni mngon dgyes ma lags la/ /bsod nams chu bo dag gis ngoms par ma gyur chab kyi rgya mtsho bzhin/ /mtshan mo ston ka'i zla ba nya ba'i mdangs kyis nyams dgar gyur pa dang / /rdzing bu ut+pal rgyas pa gnyid bral mig la rngom brjid byed rnams dang //ri bo ljon shing me tog rgyas pa brgya yis rtse mo dkrigs rnams kyis/ /gzhan la gcig tu sman dgyes khyod kyi blo gros phrogs par rngo mi thogs/ /'jig rten sdug bsngal dag gis smad tshe khyod ni nyid la byams pa yis//yul gyi dga' ba ston nyams su blang bya min zhes thugs rje'i blos mkhyen nas/ /gling bzhi'i dbang phyug mnga' yang yul rnams kyis ni thugs kyang mi phrogs la/ /khyod kyis gzhan sman lhur bzhes mdzad pas dus dag shin tu 'das par bgyis/ / phyug cing 'byor ba slong ba rnams kyis legs par spyad par ma byas dang / /dur khrod ljon shing me tog rgyas pa'i ljid kyis g.yur za mtshungs so zhes/ /de slad bsod nams dman pa'i 'byor bdag la slong rnams mi spyod pas/ /khyod kyi dkor nor slong ba ma mchis pa ni thugs la gcags par gyur//gang zhig brtse med srid pas tshong ba bzhin du 'bras bu'i phyir btsal nas/ /de ni 'bras bu yang ni slang ba rnams la sbyin par spro ma mchis/ /gang gi slad du khyod kyi gtong ba rnams dus gzhan la sman gyur pa/ /de slad de yi 'bras bu'ang slong ba rnams kyis rang gi lag par bzung //ri ngos ljon shing 'bras bu smin pa dag tu bya rnams lta bu dang / /dgon pa'i rdzing bu bskyed shing bzang pos bskor bar ngal rnams ltar/ /'dzem med slong ba dgyes pa khyod la bag phebs 'byor ba 'tshal ba yi//slongs mo pa dag kun nas myur bar mngon du lhags nas sdod tsing mchis/ /dpal 'byor 'bangs dang btsun mo rang gi sha dang srog kyang gtong ba na/ /khyod kyis sras gzhon rab sdug ston zla tshes pa dri med gzugs ldan pa'ang / /slong ba rnams la gtong bar mdzad la brtson par gyur pa ji lta ba//de ltar gtong la goms pa khyod kyi thugs la brtan pa nyid kyang byung / /gang zhig thos par gyur na'ang 'jig rten 'di la gnod pa skye 'gyur dang / /gang yang khyod nyid kyis kyang yun ring sku nyams bzhes par mi spyod pa'i//spyod pa de dag khyod la goms pas dus su rang gi ngang nyid gyur/ /de slad yon tan dag ni yongs goms ma bgyis spel bar dka' ba lags/ /ji ltar sman pa gdon gyis zin la gdon rnams bsal bar bgyid slad du/ /rdeg cing tshig rtsub smra ba spyod kyang zin pa nyid la rdeg mi bgyid//de ltar khyod kyang nyon mongs nyid la brtse dang bral bas spyod mdzad kyi/ /'gro ba nyon mongs gyur pa la ni khyod nyid thugs rje mdzad pa lags/ /khyod kyis rtag tu yon tan nor lhag rnams la gus pas bsags pa mdzad/ /mnyam pa rnams la yon tan goms par bgyi slad byams pa'i thugs kyis spyad//dman la thugs rjes brtson pa mchog gis yon tan rnams bskrun te/ /'gro ba rnams la khyod kyis ji ltar rigs par legs par mdzad par zhugs/ /ji ltar ma ma rang lus sna tshogs thabs tshul mang po 'dzin bgyid kyang //gzhon nu'i nad bsal ched lags dga' bskyed ba byed ma lags lus phyir ma lags pa/ /de ltar khyod kyang brtson pa chen pos yon tan bdag nyid bskrun mdzad pa/ /'gro ba'i longs spyod ched lags grags dang gzhan dag zil mnan ched ma lags/ / khyod kyi blo gros gzhan la sman pa'i thabs mkhyen mdzad slad zhugs gyur pa/ /'di ltar khyod nyid thugs rjes rnam pa de dag nyid la zhugs lags gda'/ /khyod ni brtson 'grus 'phags pas brtsal ba che yang mnyel bar ma gyur pa/ /de gsum dag gis khyod kyis gzhan sman ma bsgrubs cung zad byung ma gyur//khyod ni 'bad rtsol chen po can gyi phrin las mnga' bar mi bzhed la/ /spyod pa shin tu rmad du byung ba gcig tu bsam yas 'di yang byung / /gang slad khyod kyi sems can ma mchis pa 'di thugs su chud gyur kyang / /'di ltar sems can don gyi slad du grangs med dus su'ang srid par bzhugs//gang slad shes rab don dam bstan cing snying rje kun rdzob ston mdzad pa/ /de slad don bzhin dgongs mdzad khyod la sems can mchis pa ma lags kyang / /gang tshe khyod ni stobs bcu bskyed pa'i thugs rje dag dang ldan gyur pa//de tshe 'gro ba nyam thag rnams la khyod byams bu la pha byams bzhin/ /'gro ba gtugs dang nyon mongs bas pas byang chub mchog thob ma mchis la/ /nyon mongs phyogs pas rang las sman par bgyid pa'ang thob 'gyur ma lags pas/ / de slad khyod kyis byang chub brnyes slad brtson 'grus brtan pa mdzad pa na/ /nyon mongs nges par ma bsregs ran gyi dum bu bzhin du spang bar mdzad/ /khyod kyi nyon mongs dran dang mkhyen pas bzung bas yon tan sna tshogs 'grub/ /nyon mongs spang bar gyur pa byang chub rgyur yang nye bar 'gyur lags te//'di ltar de yis khyod blo shol gom yul can du yang ma bgyis la/ /'gro ba rnams su skye ba brgyud pa'ang yon tan rnams kyi zhing du mdzad/ /'gro ba nyon mongs gyur dang sdug bsngal brgya dag byung bas bcom pa yis/ /rtsol dang bral zhing mgon ma mchis pas grang dang gang du spyod bgyid pa//'gro ba de ni nyon mongs dgra thul khyod kyi thugs rjes spyod pa na/ /srid pa len dang stong dang gnas pa dag la mnga' dbang mchis pa lags/ /ci yang med pa'i skye mched kyi ni yul can phra rgyas rnams bcom nas//de dag spangs pa'i thabs tshul gang lags dam pa'i tshogs la yun ring bshad pa mdzad/ /sa gsum sman pa'i thabs mkhas mnga' ba khyod kyis phyir yang drangs nas ni/ /dud 'gro dag tu'ang smon pa mdzad nas skye ba brgya phrag rnams kyang mdzad/ /sngon gyi mi dge'i phrin las rnam par smin par ma nges gang lags pa//de dag dud 'gro'i 'gro bar gshegs la gzhol ba khyod la mnga' mchis pas/ /khyod kyis rnam smin ched du drangs te thugs la dgongs pa'i don bsgrubs pa/ /drang srong gis bshad gsang sngags zhi bas dug gi shugs dag bzlog pa bzhin//khyod kyis rtag tu mi dge'i chos dang g.yul dag spang bar gyur pa na/ /'gro ba dar mdzad mkhas pa khyod kyis 'gro ba de dang der spyod pa'i/ /tshul khrims ma 'bad brtul zhugs ldan pa bzhin du gyur pa ji lta ba/ /de ltar dam pa'i spyod lugs byang chub sgrub pa dag la goms par mdzad//ma bzhin res 'ga' 'ang thugs rje dag dang ma bral mgon ma mchis rnams kyis/ /sdug bsngal de dang de dag bsal slad 'gro ba sdug bsngal can dag tu/ /bsnyengs dang bral bar spyod pa mdzad pa khyod kyi thabs la mkhas pa ni//bsgrub par dga' dang brnyes par dka' ba 'ga' yang byung bar ma gyur lags/ /gang slad sna tshogs thabs kyis 'gro ba sdig pa bying 'dul khyod la ni/ /dud 'gro'i 'gro ba dag kyang bde 'gro bzhin du don chen kho nar gyur/ /ngan song dag tu 'khrungs na'ang legs par spyod pa nyams pa mi mnga' ba//de slad khyod kyi sdig pa'ang yon tan 'gyur bar dge ba nyid dang mtshungs/ /khyod la legs brten kha cig byang chub gsum la blo gros ci rigs zhugs/ /de bzhin gzhan dag bsam gtan gzugs med dag la go 'phang gzhag pa mdzad//kha cig gtong bar zhugs shing nges tshul mchid kyis 'tshal gyur pas/ /khyod kyis 'jig rten dag la sman yon tan ma btags pa ni 'ga' ma mchis/ /khyod kyis 'jig rten dag na 'gro ba gang rnams nges par thar 'tshal ba/ /bde 'gror nye bar drangs shing dge ba yongs su smin pa nyid du mdzad//khyod kyis 'gro ba zhi mdzad slad du 'gro ba rnams su spyod pa na/ /drang srong chen po gzhan dag dus bzhin byung bas zhi bar mdzad pa bzhin/ /gang slad khyod ni 'gro ba'i skye ba bcad dang rdzogs sangs rgyas mdzad ma gtogs par/ /gzhan gyis skye ba zhi bar mi 'gyur snyam du blo gros nges gyur pa//de slad byung chub gzhol ba'i thugs mnga' khyod kyis srid rtse man chad kyi/ /lam rnams tshul bzhin ston par mdzad pas dus dag 'das par gyur pa lags/ /gang zhig rtogs par ma gyur pa yis 'jig rten ma rig ldongs gyur la//'gro ba sdug bsngal mang por rgyu zhing 'chi bdag mtshams las mi 'da' ba'i/ /'phags lam 'jigs med sngon gyi drang srong che rnams rjes gshegs gang lags pa/ /de ni khyod kyis 'gro ba'i sdug bsngal mthar gtugs slad du nyid kyis mkhyen/ /ji ltar dus mtha'i tshe na nyi ma du mas chab bskams 'jig rten 'di//zhugs chen mched pa khros pa lta bus thal ba dag kyang sreg bgyid pa/ /de ltar dregs bral khyod kyis nyon mongs bsrabs par gyur pa'i bag chags kyang / /ye shes zhugs chen 'ang ra ba dag gis nges par bsregs par gyur pa lags//gang dag sa gsum bla ma rnams la nges par gnas par 'tshal ba dag /mun pa chung ngu dang yang lhan cig gnas par 'gal ba gang lags pa'i/ /yon tan mtha' yas de dag mngon par sangs rgyas tshe na dus gcig tu/ /shing la bya rnams gnas 'cha' bzhin du gyur pa khyod kyis gang las brnyes//nyi ma 'od zer gsal ba stong ldan zla ba sprin dang bral gyur pa/ /lhag par dga' bar bgyid pa nam mkha'i dkyil na nges par gnas gyur kyang / /gang gis khebs pa'i 'gro ba srid pa'i dgon pa thibs por 'khyam bgyid pa'i//ma rig mun nag de dag rab tu zhi ba'i thabs tshul khyod kyis bstan/ /sdug bsngal khyab pa 'di yin de rab skye bar 'gyur ba'i kun 'byung 'di/ /de mthar gtugs pa 'di yin de rtogs gyur la gzhol ba'i thabs 'di zhes/ /de ltar tshangs pa khyod kyis dag pa zla 'od gtsang ma dag kyang bstan//de dag rtogs bgyis skye ba dman yang tshangs pa'i go 'phang thob par 'gyur/ /ji srid nyi ma'i snang ba gang lags de ni nub kyi ri dbang gis/ /nyi ma nub par ma bgyis de srid rab rib rab tu zhi bar bgyid/ /khyod kyis skye shi mthar gtugs bgyi slad thabs tshul bstan pa gang lags pa//de ni khyod nyid zhi bar gshegs kyang snying gi mun nag zhi mdzad lags/ /de ltar tshangs pa'i gtso bo lha yi bla mar gyur pa tshangs gter gyis/ /bstod bgyis bstod par 'os pa bde gshegs mngon sum bzhugs bzhin bstod bgyis pas//bdag gi bsod nams gter dag bsags pa gang lags de yis 'gro ba rnams/ /drang srong chen po rnams kyis dgongs pa'i legs pa gang lags der gyur cig /yon tan mtha' yas par bstod pa slob dpon dkon mchog 'bangs kyis mdzad pa rdzogs so// //rgya gar gyi mkhan po sarbadz+nya de ba dang / lo tsA ba ban+de rin chen mchog gis bsgyur/ zhu chen gyi lo tsA ba ban+de dpal brtsegs kyis zhus te gtan la phab pa// @##/ /rgya gar skad du/ gu Na a par+yan+ta sto tra TI kA/bod skad du/ yon tan mtha' yas par bstod pa'i 'grel pa/ 'phags pa 'jam dpal la phyag 'tshal lo/ /rgyal ba'i yon tan mtha' mi 'tshal zhes bya ba gleng bslang ba'i tshigs su bcad pa 'dis ni bsdus pa'i don bzhi po 'di lta ste/ yon tan yongs su mi shes pa dang /sgro 'dogs pa med par bya ba dang / nga rgyal med par bya ba dang / 'dod pa'i don bsgrub par bya ba rnams bstan to/ /de la dang pos ni yon tan yongs su mi shes pa bstan to/ /gang slad 'gro 'dis khyod la bstod pa bgyis kyang zhes bya ba 'dis ni sgro 'dogs pa med pa nyid do//rab tu chung yang zhes bya ba 'dis ni nga rgyal med pa nyid do/ /don 'dir bdag ni blo gros rab tu chung yang brtson pa lags/ zhes bya ba 'dis ni 'dod pa'i don bsgrub par bya ba bstan to/ /de la ngan song gnas na'ang zhes bya ba la sogs pa'i tshigs su bcad pa lnga bcus bstod pa rtsom par byed do//de la bstod pa ni thun mong ma yin pa'i yon tan rjod par byed pa'o/ /de yang gnas skabs gsum po rgyu'i gnas skabs dang / 'bras bu'i gnas skabs dang / sems can gyi don byed pa'i gnas skabs rnams dang ldan pa yin no/ /de la rgyu'i gnas skabs ni sems bskyed pa la sogs pa nas byang chub kyi snying po la 'dug pa'i bar dag yin no//'bras bu'i gnas skabs ni yang dag par rdzogs par byang chub pa'i ye shes bskyed pa dang / skyon dang yon tan thams cad spangs shing brnyes pa'i gnas skabs yin no//sems can gyi don bya ba'i gnas skabs ni chos kyi 'khor lo bskor ba la sogs pa bstan pa nas nub pa la thug pa'i bar dag yin no/ /de la rgyu'i gnas skabs ni bsam pa'i gnas skabs dang / sbyor ba'i gnas skabs dang / dbang mdzad pa'i gnas skabs rnams so//bsam pa'i gnas skabs ni gzhan gyi don la 'jug par 'gyur ba'i smon lam gang yin pa'o/ /de'i nye bar bstan pa yang bzhi ste/ sdug bsngal bskyed pa la so sor rtog pa dang / phan btags pa la so sor rtog pa dang / grogs byas pa la so sor rtog pa dang yang dag par longs spyad pa la so sor rtog pa'o//byang chub kyi smon lam de'i rgyu bzhi ste/ rigs dang dge bshes snying rje dang / /sdug bsngal rnams kyis mi ldog pa/ /rgyu bzhi rkyen ni 'di dag gis/ /byang chub sems ni rab tu 'jug / ces gsungs pa dag ste/ de ltar na don bcus ni bsam pa bstan to/ /de la ngan song gnas na'ang zhes bya ba 'dis ni gzhan gyi don la 'gyur ba'i smon lam bstan to/ /de'i nye bar rtog pa bzhi ste/ re zhig de la sdug bsngal rnams kyis smas pa'i sems can la zhes bya ba 'di dag ni sdug bsngal bskyed pa la so sor rtog pa'o//ma rig ldongs pas zhes bya ba 'di dag ni phan btags pa la so sor rtog pa'o/ /sngon chad 'khor bar zhes bya ba 'di dag ni grogs byas pa la so sor rtog pa'o/ /longs spyad 'das dgongs zhes bya ba 'di dag ni yang dag par longs spyad pa la so sor rtog pa'o//gang slad 'gro ba mya ngan ma 'das zhes bya ba 'di dag ni byang chub kyi smon lam yin no/ /de'i rgyu yang rnam pa bzhi ste/ de la re zhig smad pa'i gnas skabs dag tu zhes bya ba 'di dag ni rigs yod pa nyid yin no/ /gang slad gal te rang la rag las zhes bya ba 'di dag ni dge ba'i bshes gnyen la brten pa'o//nyon mongs chu bo rab 'khrug ces bya ba 'di dag ni snying rje yin no/ /'jig rten 'di dag rang la'ang zhes bya ba 'di dag ni sdug bsngal gyis mi ldog pa yin te/ de ltar tshigs su bcad pa bcus don bcu bstan pa yin no//bsam pa'i gnas skabs kyi le'u ste dang po'o// //sbyor ba'i gnas skabs zhes bya ba yang pha rol tu phyin pa ston pa ji snyed pa yin no/ /de yang rnam pa gnyis te/ mos pas spyod pa rnams kyi dang / sa thob pa rnams kyi'o/

CLOSE WINDOW