CLOSE WINDOW

D1125
བོད་ཡིག

/ @##/ /rgya gar skad du/ satwa A ra dA na sta baM / bod skad du/ sems can mgu bar bya ba'i bstod pa/ 'jam dpal dbyangs la phyag 'tshal lo/ /nga la gus pa sems can don te gus pa gzhan dag min//gang gis snying rje ma btang de yis nga la gus pa ste/ /snying rje btang nas gnas par gyur pa lhung ba gang yin pa/ /de ni de las snying rjes bslang bar nus kyi gzhan gyis min/ /gang gis snying rje sems can la ni rjes su zhugs gyur pa/ /des ni nga yang mnyes byas des ni bstan pa'i khur yang bzung //tshul khrims thos pa snying rje dag dang blo dang gsal ba dag /gang la yod pa des ni rtag tu bde bar gshegs pa mchod/ /nga nyid sems can phan 'dogs gyur pas grub 'di brnyes pa ste/ /sems can kho na'i don du nga yis sku 'di yang dag bzung / /sems can rnams la yid kyis gnod par sems de gang gi phyir//nga la mi ltos pas na de'i don ston par mi 'gyur ro/ / sems can phan pa chung yang des ni mchod pa 'byung 'gyur te/ /gang gis yid ni mgu bar byed pa mchod pa yin pas so/ /gnod pa'i bdag nyid can nam gzhan la rnam par 'tshe ba'ang rung //legs par sbyar nas mchod par gyur kyang des ni mchod mi 'gyur/ /chung ma dag dang bu dang 'byor dang rgyal srid chen po dang / /sha rnams dang ni khrag dang tshil dang mig dang lus rnams kyang / /gang la brtse ba'i dbang du byas nas nga yis yongs btang ba/ /des na de la gnod pa byas na nga la gnod byas 'gyur//des na sems can phan pa byas na nga la mchod pa'i mchog /sems can gnod pa byas pa nga la shin tu gnod pa'i mchog /bde dang sdug bsngal nga dang sems can mtshungs par myong bas na/ /sems can rnams la 'tshe bar byed de nga yi slob ma ji ltar yin//sems can rnams la brten nas sangs rgyas mnyes dang dge ba byas/ /sems can mang po'i don la rab gnas pha rol phyin pa thob/ /sems can don la brtson pa'i yid kyis bdud kyi stobs kyang bcom/ /sems can rnams la de lta de ltar spyad pa des na nga sangs rgyas/ / skye ba skye bar gces par gyur pa'i gnyen 'dra srog chags med gyur na/ /dngos po gang la 'dir ni snying rje byams las dmigs pa nges par 'grub/ /btang snyoms dga' ba la sogs dngos po'i yul dang rnam par thar la sogs gang la/ /gang gi don du snying rje de la 'bad pa'i yid kyis bzod pa yun rings bsgoms//glang po la sogs 'gro ba sems can rnams nyid du ma nga yis sbyin pa byas/ /sems can rnams nyid snod nyid du yang nye bar gyur pas nga yis sbyin pas bsdus/ /sems can rnams nyid sna tshogs dngos por gyur pas nga yi snying rje 'phel bar gyur//gal te sems can rnams nyid bsrung ma byas na gang gi don du don 'di bsgrubs/ /gal te sems can med na 'khor bar nyon mongs mi bzad rab tu mang po las/ /skye ba brgyud par gnod pa mtshungs pa med las gang la brten nas phan 'di bsgrubs/ /bde bar gshegs kyi bdag nyid chen po ngo mtshar che ba 'khor ba'i rgyan gyur 'di//gal te nga la sems can rnams la brtse med gyur na gang gi don du nye bar bsgrubs/ /ji srid nga yi bstan pa 'gro ba rnams la phan pa 'dir ni 'bar gyur pa/ /de srid gzhan la mchog tu phan par 'dod pa khyed kyis gnas par gyis//thos pas nga yis legs par spyad pa sems can don la mi skyo thos bgyid la/ /skyo ba med par lus 'di las ni snying po dag ni blang bar gyis/ /byang chub sems dpa'i sde snod ba tshwa'i chu klung zhes bya ba'i lung las bcom ldan 'das kyis nyan thos chen po bcu drug la bka' stsal pa/ sems can mgu bar bya ba'i bstod pa slob dpon klu sgrub kyis tshigs su bcad pa'i sgo nas bsdus pa rdzogs so/ /rgya gar gyi mkhan po chen po dI paM ka ra shrI dz+nyA na dang / lo tsA ba dge slong tshul khrims rgyal bas bsgyur cing zhus te gtan la phab pa'o// //

CLOSE WINDOW