CLOSE WINDOW

D1118
བོད་ཡིག

/bdud btul ba la bstod pa/ rab dga'i lha'i zhal snga nas mdzad pa rdzogs so// @##/ /rgya gar skad du/ d+harma d+hA tu sta baM / bod skad du/ chos kyi dbyings su bstod pa/ 'phags pa 'jam dpal gzhon nur gyur pa la phyag 'tshal lo//gang zhig kun du ma shes na/ /srid pa gsum du rnam 'khor ba/ /sems can kun la nges gnas pa'i/ /chos kyi dbyings la phyag 'tshal 'dud / /gang zhig 'khor ba'i rgyur gyur pa/ /de nyid sbyang ba byas pa las/ /dag pa de nyid mya ngan 'das/ /chos kyi sku yang de nyid do/ / ji ltar 'o ma dang 'dres pas/ /mar gyi snying po mi snang ba/ /de bzhin nyon mongs dang 'dres pas/ /chos kyi dbyings kyang mi mthong ngo / /ji ltar 'o ma rnam sbyangs pas/ /mar gyi snying po dri med 'gyur/ /de bzhin nyon mongs rnam sbyangs pas/ /chos dbyings shin tu dri med 'gyur/ / ji ltar mar me bum nang gnas/ /cung zhig snang bar mi 'gyur ba/ /de bzhin nyon mongs bum nang gnas/ /chos kyi dbyings kyang mi mthong ngo / /phyogs ni gang dang gang dag nas/ /bum pa bu ga btod gyur pa/ /de dang de yi phyogs nyid nas/ /'od kyi rang bzhin 'byung bar 'gyur//gang tshe ting 'dzin rdo rje yis/ /bum pa de ni bcag gyur pa/ /de tshe de ni nam mkha' yi/ /mthar thug bar du snang bar byed/ /chos kyi dbyings ni skye ma yin/ /nam yang 'gag par 'gyur ba med/ /dus rnams kun du nyon mongs med/ /thog ma bar mthar dri ma bral/ / ji ltar rin chen baiDUr+ya/ /dus rnams kun du 'od gsal yang / /rdo yi nang na gnas gyur na/ /de yi 'od ni gsal ma yin/ /de bzhin nyon mongs kyis bsgribs pa'i/ /chos dbyings shin tu dri med pa'ang / /'khor bar 'od ni gsal ma yin/ /mya ngan 'das na 'od gsal 'gyur//khams yod na ni las byas pas/ /sa le sbram dag mthong bar 'gyur/ /khams med na ni las byas na / /nyon mongs 'ba' zhig bskyed par zad/ /ji ltar sbun pas g.yogs gyur pas/ /so ba 'bras bur mi 'dod ltar/ /de bzhin nyon mongs kyis g.yogs pas//de ni sangs rgyas zhes mi brtag /ji ltar sbun pa las grol na/ /'bras nyid snang bar 'gyur ba ltar/ /de bzhin nyon mongs las grol na/ /chos kyi sku nyid rab tu gsal/ /chu shing snying po med do zhes/ /'jig rten na ni dper byed kyang / /de yi 'bras bu snying po nyid//mngar po za bar byed pa ltar/ /snying po med pa'i 'khor ba las/ /nyon mongs gzeb dang bral gyur na/ /de yi 'bras bu sangs rgyas nyid/ /lus can kun gyi bdud rtsir 'gyur/ /de bzhin sa bon thams cad las/ /rgyu dang 'dra ba'i 'bras bu 'byung / /sa bon med par 'bras yod par//shes ldan gang gis sgrub par nus/ /sa bon gyur pa khams de nyid/ /chos rnams kun gyi rten du 'dod/ /rim gyis sbyangs par gyur pa las/ /sangs rgyas go 'phang thob par 'gyur/ /dri med nyi ma zla ba yang / /sprin dang khug rna du ba dang / /sgra gcan gdong dang rdul la sogs//sgrib pa lnga yis bsgribs par gyur / /de bzhin 'od gsal ba yi sems/ /'dod dang gnod sems le lo dang / /rgod pa dang ni the tshom ste/ /sgrib pa lnga yis bsgribs par gyur / /ji ltar me yis dag pa'i gos/ /sna tshogs dri mas dri ma can//ji ltar me yi nang bcug na/ /dri ma tshig 'gyur gos min ltar/ /de bzhin 'od gsal ba yi sems/ /'dod chags la sogs dri ma can/ /ye shes me yis nyon mongs bsreg /de nyid 'od gsal ma yin no/ /stong pa nyid ni ston pa'i mdo/ /rgyal bas ji snyed gsungs pa gang //de dag kun gyis nyon mongs ldog /khams de nyams par byed ma yin/ /sa yi dkyil na yod pa'i chu/ /dri ma med par gnas pa ltar/ /nyon mongs nang na ye shes kyang / /de bzhin dri ma med par gnas/ /chos dbyings gang phyir bdag ma yin//bud med ma yin skyes pa'ang min/ /gzung ba kun las rnam grol ba/ /ji ltar bdag ces brtag par bya/ /chags pa med pa'i chos kun la/ /bud med skyes pa dmigs ma yin/ /'dod chags kyis ldongs gdul bya'i phyir/ /bud med skyes pa zhes rab bstan/ / mi rtag sdug bsngal stong pa zhes/ /bya ba gsum pos sems sbyong byed/ /mchog tu sems ni sbyong byed pa'i/ /chos ni rang bzhin med pa yin/ /ji ltar sbrum ma'i lto na bu/ /yod kyang mthong ba ma yin pa/ /de bzhin nyon mongs kyis g.yogs pa'i/ /chos kyi dbyings kyang mthong ma yin//bdag dang bdag gi rnam rtog dang / /ming gi 'du shes rgyu mtshan gyis/ /rnam rtog bzhi po 'byung ba yang / /'byung dang 'byung las gyur pas so/ /sangs rgyas rnams kyi smon lam yang / /snang ba med cing mtshan nyid med/ /so sor rang rig sbyor ldan nyid/ / sangs rgyas rtag pa'i chos nyid can/ /ji ltar ri bong mgo yi rwa/ /brtags pa nyid de med pa ltar/ /de bzhin chos rnams thams cad kyang / /brtags pa nyid de yod ma yin/ /phra rab rdul gyi ngo bo yis/ /glang gi rwa yang dmigs ma yin/ /ji ltar sngon bzhin phyis de bzhin/ /de la ci zhig brtag par bya//brten nas 'byung bar gyur pa dang / /brten nas 'gag par 'gyur bas na/ /gcig kyang yod pa ma yin na / /byis pa ji ltar rtog par byed/ /ri bong ba glang rwa yi dpes/ /ji ltar bde gshegs chos rnams nyid/ /dbu ma nyid du sgrub par byed//ji ltar nyi zla skar ma'i gzugs/ /dang ba'i snod kyi chu nang du/ /gzugs brnyan mthong bar gyur pa ltar/ /mtshan nyid rdzogs pa'ang de dang 'dra/ /thog ma bar dang mthar dge ba/ /bslu ba med cing brtan pa yi/ /gang zhig de ltar bdag med pa'ang / /ji ltar bdag dang bdag gir brtag /ji ltar so ga'i dus su chu/ /dro'o zhes ni rjod par byed/ /de nyid grang ba'i dus su ni/ /grang ngo zhes ni brjod pa yin/ /nyon mongs drwa bas g.yogs pa ni / /sems can zhes ni brjod par bya/ /de nyid nyon mongs bral gyur na/ /sangs rgyas zhes ni brjod par bya//mig dang gzugs la brten nas ni/ /dri ma med pa'i snang ba 'byung / /skye med 'gag pa med nyid las/ /chos kyi dbyings ni rab tu shes/ /sgra dang rna ba la brten nas/ /rnam par dag pa'i shes pa gsum/ /mtshan nyid med pa'i chos kyi dbyings/ /rtog dang bcas pas thos par 'gyur//sna dang dri la brten nas snom/ /de ni gzugs su med pa'i dpes / /de bzhin sna yi rnam shes kyis/ /chos kyi dbyings la rtog par byed/ /lce yi rang bzhin stong pa nyid/ /ro yi khams kyang dben pa ste/ /chos kyi dbyings kyi ngo bo yin / /rnam par shes pa gnas med pa//dag pa'i lus kyi ngo bo dang / /reg bya'i rkyen gyi mtshan nyid dang / /rkyen dag las ni grol gyur pa/ /chos kyi dbyings zhes brjod par bya/ /yid gtsor gyur pa'i chos rnams la/ /rtog dang brtag pa rnam spangs nas/ /chos rnams rang bzhin med pa nyid/ / chos kyi dbyings su bsgom par bya/ /mthong dang thos dang bsnams pa dang / /myangs dang reg par gyur pa dang / /chos rnams de ltar rnal 'byor pas/ /shes na mtshan nyid rdzogs pa yin/ /mig dang rna ba sna dag dang / /lce dang lus dang de bzhin yid/ /skye mched drug po rnam dag pa//'di nyid de nyid mtshan nyid do/ /sems nyid rnam pa gnyis su mthong / /ji ltar 'jig rten 'jig rten 'das/ /bdag tu 'dzin las 'khor ba ste/ /so sor rig na de nyid do/ /'dod chags zad pas mya ngan 'das/ /zhe sdang gti mug zad pa dang / /de dag 'gags pa sangs rgyas nyid//lus can kun gyi skyabs nyid do/ /shes dang mi shes pa dag las/ /lus 'di nyid la thams cad de/ /rang gi rnam par rtog pas bcings/ /bdag nyid shes na grol bar 'gyur/ /byang chub ring min nye ba min/ /'gro min 'ong ba ma yin zhing / / nyon mongs gzeb gyur 'di nyid la/ /mthong ba dang ni ma mthong yin/ /shes rab mar me la gnas nas/ /mchog tu zhi bar gyur pa yis/ /bdag la brtags pas gnas bya zhes/ /mdo sde'i tshogs las gsungs pa lags/ /stobs bcu'i stobs kyis byis pa rnams/ / byin rlabs zla ba tshes pa bzhin/ /nyon mongs can gyi sems can gyis/ /de bzhin gshegs pa mi mthong ngo / /ji ltar yi [(]dgas [,]dwags [)]rnams kyis ni/ /rgya mtsho skams par mthong ba ltar/ /de bzhin mi shes pas bsgribs pas/ /sangs rgyas rnams ni med par brtags / /dman dang bsod nams dman pa la//bcom ldan 'das kyis ci bgyir mchis/ /ji ltar dmus long lag pa ru/ /rin chen mchog ni bzhag pa 'dra/ /sems can bsod nams byas rnams la/ /'od kyis gsal zhing dpal ldan pa'i/ /sum cu rtsa gnyis mtshan 'bar ba/ / sangs rgyas de yi mdun na gnas/ /mgon po de yi gzugs kyi skus / /bskal pa mang por bzhugs nas kyang / /gdul bya rnams ni gdul ba'i phyir/ /dbyings nyid tha dad gyur pa lags/ /sems kyi yul ni nges rtogs nas/ /der ni shes pa 'jug par gyur/ /so so rang rig rnam dag na//sa rnams de yi bdag nyid gnas/ /dbang phyug chen po'i gnas mchog dang / /'og min nyid de rnam mdzes pa/ /shes pa gsum po gcig nyid du/ /'dres par gyur la bdag smra'o/ /byis pa'i nang na yongs mkhyen dang / /'phags pa'i nang na sna tshogs nyid/ / dbang phyug chen po tshe dpag med/ /bskal pa'i tshe yi rgyu gang yin/ /phyi rol sems can khams kyi yang / /dpag tu med pa'i bskal par ni/ /tshe yang gang gis bsrungs gyur cing / /srog chags rnams kyi srog gnas pa'i/ /rgyu gang mi zad pa de nyid/ / gang gi 'bras bu mi zad gang / /snang ba med pa'i bye brag gis/ /shes rab don du rab tu 'jug /byang chub ring bar mi bsam zhing / /nye bar yang ni bsam mi bya/ /yul drug snang ba med par ni/ /yang dag ji bzhin rig gyur pa'o/ /ji ltar 'o ma dang 'dres chu/ /snod gcig na ni gnas pa las//ngang pa 'o ma 'thung byed cing / /chu ni ma yin de bzhin gnas/ /de bzhin nyon mongs kyis g.yogs nas/ /ye shes lus 'dir gcig gnas kyang / /rnal 'byor pa yis ye shes len/ /mi shes pa ni 'dor bar byed/ /bdag dang bdag gi zhes 'dzin pas/ / ji srid phyi rol rnam brtags pa/ /bdag med rnam pa gnyis mthong na/ /srid pa'i sa bon 'gag par 'gyur/ /gang phyir sangs rgyas mya ngan 'das/ /gtsang ba rtag pa dge ba'i gzhi/ /gang phyir gnyis ni byis pas brtags / /de yi gnyis med rnal 'byor gnas/ /dka' spyod sna tshogs sbyin pa dang //tshul khrims sems can don sdud dang / /sems can phan byed bzod pa ste/ /gsum po 'dis ni khams rgyas 'gyur/ /chos rnams kun la brtson 'grus dang / /bsam gtan la sems 'jug pa dang / /rtag tu shes rab bsten pa ste/ /'di yang byang chub rgyas byed yin//thabs dang bcas pa'i shes rab dang / /smon lam rnam par sbyangs pa dang / /stobs la nges nas ye shes te/ /khams rgyas byed pa'i chos bzhi'o / /byang chub sems phyag mi bya zhes/ /smra ba ngan par smra ba ste/ /byang chub sems dpa' ma byung bar/ /chos kyi sku ni 'byung ma yin//bur shing sa bon la sdang gang / /kha ra spyad par 'dod pa des / /bur shing sa bon med par ni/ /kha ra 'byung bar 'gyur ma yin/ /bur shing sa bon gang bsrungs nas/ /nye bar gnas shing bsgrubs pa las/ /bu ram kha ra hwags rnams ni/ /de las 'byung bar 'gyur ba ltar//byang chub sems ni rab bsrungs nas/ /nye bar gnas shing bsgrubs pa las/ /dgra bcom rkyen rtogs sangs rgyas rnams/ /de las skye zhing 'byung bar 'gyur/ /ji ltar sA lu'i sa bon sogs/ /zhing pas srung bar byed pa ltar/ /de bzhin theg mchog mos rnams la'ang //'dren pa rnams kyis srung bar mdzad/ /ji ltar mar ngo'i bcu bzhi la/ /zla ba cung zad mthong ba ltar/ /de bzhin theg mchog mos rnams la'ang / /sangs rgyas sku ni cung zad mthong / /ji ltar tshes pa'i zla ba la/ /skad cig skad cig rgyas par mthong / /de bzhin sa la zhugs rnams kyang //rim gyis rim gyis 'phel bar mthong / /ji ltar yar ngo'i bco lnga la/ /zla ba rdzogs par 'gyur ba ltar/ /de bzhin sa yi mthar thug na/ /chos kyi sku yang rdzogs shing gsal/ /sangs rgyas chos dang dge 'dun la/ /rtag tu mos pa brtan po yis/ /sems de yang dag skyed byas nas//phyir mi ldog par yang yang 'byung / /nag po'i gzhi ni yongs spangs nas/ /dkar po'i gzhi ni rab bzung bas/ /de tshe de ni nges rtogs pa/ /dga' ba zhes ni mngon par brjod/ /'dod chags la sogs sna tshogs pa'i/ /dri mas rtag tu dri ma can//dri ma med par gang dag pa/ /dri ma med ces brjod pa yin/ /nyon mongs drwa ba rab 'gags nas/ /dri med shes rab rab gsal bas/ /tshad med pa yi mun pa dag /sel bar byed pas 'od byed pa'o/ /rtag tu dag pa'i 'od kyis gsal/ /'du 'dzi rnam par spangs pa yi/ / ye shes 'od kyis rab bskor bas/ /sa de 'od 'phro can du 'dod/ /rig dang sgyu rtsal bzo gnas kun/ /bsam gtan rnam pa sna tshogs nyid/ /nyon mongs shin tu sbyang dka' las/ /rnam par rgyal bas sbyang dkar 'dod/ /byang chub rnam pa gsum po dang / /phun sum tshogs kun bsdu ba dang //skye dang 'jig pa zad pa la/ /sa de mngon du 'gyur bar 'dod/ /'khor lo'i bkod pa rnam kun du/ /'od kyi dra bas rtse ba dang / /'khor ba'i mtsho yi 'dam rgal bas/ /de la ring du song zhes bya/ /sangs rgyas kyis nges 'di bzung zhing / /ye shes rgya mtshor zhugs pa dang //'bad med lhun gyis grub gyur pa / /bdud kyi 'khor gyis mi g.yos pa'o / /so so yang dag rig kun la/ /chos ston pa yi 'bel ba'i gtam/ /rnal 'byor pa de mthar son pas/ /sa de legs pa'i blo gros 'dod/ /ye shes rang bzhin 'di yi sku//dri med nam mkha' dang mnyam pa/ /sangs rgyas rnams kyi 'dzin pa las/ /chos kyi sprin ni kun du 'byung / /sangs rgyas rnams kyi chos kyi gnas/ /spyod pa'i 'bras bu yongs 'dzin pa / /gnas ni yongs su gyur pa de/ /chos kyi sku zhes brjod pa yin//bag chags las grol bsam mi khyab/ /'khor ba'i bag chags bsam du yod/ /khyod ni kun du bsam mi khyab/ /gang gis khyod ni shes par nus/ /ngag gi spyod yul kun las 'das/ /dbang po kun gyi spyod yul min/ /yid kyi shes pas rtogs bya ba/ /gang yang rung la phyag 'tshal bstod//rim gyis 'jug pa'i lugs nyid kyis/ /sangs rgyas sras po grags chen rnams/ /chos kyi sprin gyi ye shes kyis/ /chos nyid stong pa mthong gyur nas/ /gang tshe sems ni rab bkrus pas/ /'khor ba'i gzeb las 'das gyur nas/ /pad+ma chen po'i rang bzhin gyi//stan la de ni rab gnas 'gyur/ /'dab ma rin chen du ma'i 'od/ /'dod par bya ba'i ze 'bru can/ /pad+ma bye ba du ma yis/ /rnam pa kun du yongs su bskor/ /stobs bcu po yis yongs su gang / /mi 'jigs pa yis gang dag ngoms/ /bsam mi khyab pa'i sangs rgyas chos//spros med rnams las nyams mi mnga'/ /legs par spyad pa'i lam kun gyis/ /bsod nams ye shes rab bsags pa'i/ /zla ba nya la skar ma yis/ /'khor du rnam pa kun gyis bskor/ /sangs rgyas phyag gi nyi ma der/ /dri med rin chen 'bar gyur te/ /sras kyi thu bor dbang bskur bas//dbang bskur ba ni kun du stsol/ /rnal 'byor chen po der gnas nas/ /rmongs pas dman pa'i 'jig rten rnams/ /sdug bsngal gyis g.yengs 'jigs pa la/ /lha yi spyan gyis gzigs gyur nas/ /de yi sku las 'od zer rnams/ /'bad pa med par 'byung 'gyur te//rmongs pa'i mun par zhugs de yi/ /sgo rnams 'byed par mdzad pa yin/ /lhag bcas mya ngan 'das pa rnams/ /lhag med mya ngan 'das par 'dod/ /'dir ni mya ngan 'das pa nyid/ /dri ma med par sems gyur pa'o/ /sems can kun gyi dngos med pa'i/ /ngo bo de yang de spyod yul//de mthong byang chub sems dbang po / /shin tu dri med chos kyi sku/ /dri ma med pa'i chos sku la/ /ye shes rgya mtsho gnas gyur nas/ /sna tshogs nor bu ji bzhin du/ /de las sems can don rab mdzad/ /chos kyi dbyings su bstod pa slob dpon chen po klu sgrub kyis mdzad pa rdzogs so/

CLOSE WINDOW