/ 'phags pa byams pas dam bcas pa zhes bya ba'i gzungs rdzogs so// / rgya gar skad du Ar+ya aSh+Ta maN+Dal ka nA ma ma hA yA na sU tra/ bod skad du/ 'phags pa dkyil 'khor brgyad pa zhes bya ba theg pa chen po'i mdo// sangs rgyas dang byang chub sems dpa' thams cad la phyag 'tshal lo// 'di skad bdag gis thos pa dus gcig na/ bcom ldan 'das ri gru 'dzin na/ 'phags pa spyan ras gzigs dbang phyug gi gnas na/ byang chub sems dpa' bye ba khrag khrig 'bum phrag du ma dang thabs cig tu bzhugs te/ de nas byang chub sems dpa' sems dpa' chen po rin chen snying po zla ba snang ba zhes bya ba/ byang chub sems dpa'i 'khor de nyid du 'dus par gyur nas 'dug pa de stan las langs nas// chos gos phrag pa gcig tu gzar te/ pus mo g.yas pa'i lha nga sa la btsugs nas/ bcom ldan 'das ga la ba der logs su thal mo sbyar ba btud de/ bcom ldan 'das la 'di skad ces gsol to// gal te zhus na zhu ba lung bstan pa'i slad du/ bcom ldan 'das kyis bdag la skabs phye na/ bcom ldan 'das de bzhin gshegs pa dgra bcom pa yang dag par rdzogs pa'i sangs rgyas la bdag phyogs 'ga' zhig zhu'o// de skad ces gsol pa dang / bcom ldan 'das kyis byang chub sems dpa' sems dpa' chen por ni chen snying po zla ba snang ba la 'di skad ces bka' stsal to/ / rin chen snying po zla ba snang ba khyod ci dang ci 'dod pa dris shig dang / ngas dris pa de dang de'i lung bstan pas khyod kyi sems rangs par bya'o/ / de skad ces bka' stsal pa dang / byang chub sems dpa' sems dpa' chen po rin chen snying po zla ba snang bas/ bcom ldan 'das la 'di skad ces gsol to// bcom ldan 'das rigs kyi bu'am/ rigs kyi bu mo gang la la zhig dkyil 'khor brgyad pa bgyid par 'tshal na/ des ji ltar bgyi/ bcom ldan 'das kyis bka' stsal pa/ rigs kyi bu khyod skye bo mang po la shin tu phan pa dang / skye bo mang po la bde ba dang / dus gsum du skyes pa'i sems can rnams kyi mtshungs pa med pa'i ye shes sgrub pa'i phyir/ rigs kyi bu khyod spobs pa skyes pa ni bzang ste legs so legs so/ / rigs kyi bu de'i phyir snying po gang brjod pa tsam gyis/ mtshams med pa lnga 'byang zhing / dngos grub thams cad kyang thob par 'gyur ba/ byang chub sems dpa' brgyad kyi snying po nyon cig/ oM mu ne hUM ma hA/ bI ra swA hA/ snying po 'dis ni dbus kyi bcom ldan 'das mchod do// oM hrI hU~M pad+ma pri ya swA hA/ 'phags pa spyan ras gzigs dbang phyug gi snying po'o// oM me ha ra Na swA hA/ byams pa'i snying po'o// oM a gar+b+ha ya swAH nam mkha'i snying po'i snying po'o/ / oM ma swa hi rA u0f7f la kA thA/ kun tu bzang po'i snying po'o// oM ku ru ba na ra ha swA hA/ lag na rdo rje'i snying po'o// oM shrI a ra ga swA hA/ 'jam dpal gzhon nur gyur pa'i snying po'o// oM ni mA ra ba swA hA/ sgrib pa thams cad rnam par sel ba'i snying po'o// oM k+Shi ti ha ra dza swA hA/ sa'i snying po'i snying po'o// byang chub sems dpa' brgyad kyi snying po'o// de bzhin gshegs pa dang ldan pa 'di rigs kyi bu 'am/ rigs kyi bu mo gang la la zhig gri dkyil 'khor gyi mdun du lan cig brjod na/ de'i don thams cad 'grub par 'gyur te/ myur du bla na med pa yang dag par rdzogs pa'i byang chub tu mngon par rdzogs par 'tshang rgya bar 'gyur ro// bcom ldan 'das kyis de skad ces bka' stsal nas/ byang chub sems dpa' sems dpa' chen po de dag yi rangs te/ bcom ldan 'das kyis gsungs pa la mngon par bstod do// 'phags pa dkyil 'khor brgyad pa zhes bya ba theg pa chen po'i mdo rdzogs so/ / / rgya gar gyi mkhan po dzi na mi tra dang / da na shI la dang / zhu chen gyi lo tsa ba ban d+he ye shes sdes bsgyur cing zhus te/ skad gsar bcad kyis kyang bcos nas gtan la phab pa/

CLOSE WINDOW