'phags pa 'jam dpal gyis dris pa zhes bya ba theg pa chen po'i mdo rdzogs so// @rgya gar skad du/ nan da pra b+ha dzA r+dz+dza trA/ bod skad du/ dga' ba rab tu 'byung ba'i mdo/ thams cad mkhyen pa la phyag 'tshal lo// 'di skad bdag gis thos pa dus gcig na/ bcom ldan 'das ser skya'i gnas kyi n+ya gro da'i kun dga' ra ba na bzhugs so/ / de nas bcom ldan 'das snga dro chos gos dang / sham thabs bsgrubs te/ lhung bzed bsnams nas/ phyi bzhin 'brang ba'i dge slong tshe dang ldan pa kun dga' bo dang / ser skya gnas su bsod snyoms la gshegs so/ / de nas bco ldan 'das rigs kyi bu dga' bo'i khyim ga la ba der gshegs pa dang / rigs kyi bu dga' bos/ bcom ldan 'das rgyang ring po nas gshegs pa mthong ngo / / mthong nas kyang rings pa rings par bcom ldan 'das kyi ched du gdan bshams nas 'di skad ces gsol to// bcom ldan 'das tshur gshegs/ bcom ldan 'das gshegs pa legs so// bcom ldan 'das gdan bshams pa la bzhugs su gsol/ bcom ldan 'das bzhugs so// de nas rigs kyi bu dga' bo bcom ldan 'das kyi zhabs gnyis la phyag 'tshal te/ bcom ldan 'das kyi spyan sngar 'dug go// de nas bcom ldan 'das kyis rigs kyi bu dga' bo la 'di skad ces bka' stsal to// dga' bo ci'i phyir rab tu mi 'byung / dga' bos gsol pa/ bcom ldan 'das rab tu 'byung ba zhes bya ba'i tshig don ci lags/ bcom ldan 'das kyis bka' stsal pa/ sdig pa thams cad yongs su spong ba yin no/ / 'dod chags dang / zhe sdang dang / gti mug rab tu sel ba yin no// 'thab pa dang 'thab mo dang / 'tshang 'dru ba dang / rtsod pa dang / 'gyed pa dang / sgyu dang / g.yo'i mun pas bsdus pa'i dri ma thams cad 'khru ba yin no/ / lo tog thams cad kyis gzhi lta bur yon tan thams cad kyi gzhi yin no// rin po che thams cad kyi 'byung gnas yin no// bde ba thams cad kyi yid bzhin gyi nor bu yin / / yon tan thams cad kyi go 'phang gi gnas yin no// sems can thams cad dbugs 'byin pa yin no// 'byung po thams cad kyi yid brtan pa yin no// srog chags thams cad la mi 'jigs pa sbyin pa yin no/ / sems can dbul po thams cad kyi bum pa yin no// skyabs med pa rnams kyi dpung gnyen yin no// kun tu tshol bas 'phongs pa dang / sdug bsngal gyis nyam thag pa rnams kyi bsti sa yin no/ / sangs rgyas thams cad kyis ma 'dres pa yin no// sems can thams cad kyis mchod par bya ba yin no// mkhas pa rnams kyis bsngags pa yin no// thar par 'gro ba rnams kyi lam yin no/ / sems can dag pa rnams kyis bsnyen par bya ba yin no// snod du 'gyur ba rnams kyis bsten par bya ba yin no// ngan song gi sgo gcod pa yin no// mtho ris dang thar pa'i sgo 'byed pa yin no// lha'i 'gro ba rnams kun tu 'gengs pa yin no// sdug bsngal thams cad kun tu gcod pa yin no// sred pa'i bcing bas bcings pa rnams rnam par grol bar byed pa yin te/ dga' bo de ni rab tu byung ba zhes bya'o// yang dag pa'i lta ba'i khyim yin no// thar pa'i yang dag pa'i sdom pa yin no// mya ngan las 'das pa la bsnyen pa yin no// rgyun nye bar gcod pa yin no// nyon mongs pa rnams sreg pa yin no// phra rgyas rnams 'byin pa no/ / lta ba ngan pa'i dra ba rnams 'jigs par byed pa yin no// bdud kyi rgyal mtshan sgrol ba yin no// bzod pa smra ba bsgreng ba yin no// 'khor ba'i 'khor lo ldog par byed pa yin no// chos kyi/ 'khor lo bskor bar byed pa yin no// nu zho'i rgya mtsho'i skems pa yin no// rus pa'i ri 'jigs par byed pa yin no// skye ba dang / rga ba dang / na ba dang / 'chi ba'i mtha' yin no// phung po'i khur 'jogs pa yin no/ / nyon mongs pa'i 'dam du bying ba rnams 'byin pa yin no// khyim gzeb tu bcings pa rnams rnam par grol bar byed pa yin no// gnod pa'i tshor ba rnams zad par byed par yin no/ / the tsom rnams dang / nyon mongs pa'i dri ma brtan por gyur pa rnams gcod pa yin no// rga shi 'jigs pa rnams dbugs 'byin pa yin no// sdug pa dang bral bar byed pa yin no// 'khor ba'i sdug bsngal gyis gtses pa rnams kyi bde ba dang / mi 'jigs pa'i 'gram yin no// 'dod pa'i khams las pa rgal bar byed pa yin no// gzugs kyi khams las yang dag par brgal bar byed pa yin no/ / gzugs med pa'i khams las yang rnam par brgal bar byed pa yin no// don dam par mya ngan las 'das pa mchog thog par byed pa yin te/ dga' bo de ni rab tu byung ba zhes bya'o// 'jig rten thams cad kyi mig lta bu yin no// gti mug gi mun pa'i sgron ma yin no// rgyud dag par byed pa yin no// nyon mongs pa'i nad thams cad rab tu zhi bar byed pa yin no// lam stor ba rnams la lam kun du ston pa yin no/ / chos thams cad kyi de kho na ston pa yin no// mdud pa thams cad rnam par 'grol bar byed pa yin no// ma rig pa'i mun pa thams cad sel bar byed pa yin no// mi shes pa'i rab rib kyi sgrib pa'i mun pa rnams 'dral bar byed pa yin no/ / le lo can rnams brtson 'grus la rtsom par byed pa yin no// tshul khrims la ltung ba rnams skyo bar byed pa yin no// tshul khrims phun sum tshogs pa rnams rab tu dga' bar byed pa yin no/ / brtson 'grus brtsams pa rnams mchog tu dga' ba yin no// nang du yang dag 'jog la mngon par dga' ba rnams rab tu dga' ba yin no// rnal 'byor spyod pa rnams mchog tu chog shes par byed pa yin no// nyon mongs pa'i dgra 'joms par byed pa rnams kyi mtshon cha yin no// phyir mi 'ong ba rnams mchog tu rgyal bar byed pa yin no// gnas med pa rnams kyi gnas so// skyob pa med pa rnams kyi skyob pa yin no// 'jigs pas 'brel pa rnams kyi mi 'jigs par byed pa yin no// skyabs med pa rnams kyi skyabs yin no// sdug bsngal rnams kyi bde ba'i yo byad yin no/ / 'khor ba'i bcing bas bcings pa rnams 'grol bar byed pa yin te/ dga' bo de ni rab tu byung ba zhes bya'o// lha dang mi rnams kyis bkur sti byas pa yin no/ / mi'i dbang po rnams kyi mchod pa yin no// sangs rgyas thams cad kyis dgongs pa yin no// khyim gyi gnas yongs su gtong ba yin no// mya ngan las 'das pa'i lam 'dren pa yin no// gla'i khur 'dreg pa yin no/ / gos ngur smrig ni 'dod chags dang bral ba'i rtags yin no// rigs pa la brtson 'grus kyi zhing yin no// 'di ni drang srong rnams kyi rgyal mtshan yin no// 'dud sdig to can rnams kyi grags pa 'joms pa yin no/ / lha dang mi rnams rab tu dga' bar byed pa yin te/ dka' bo rab tu byung ba ni de lta bu yin na/ ci'i phyir rab tu mi 'byung / dga' bo rab tu byung ba ni 'khor lo bsgyur ba'i rgyal srid bde ba bas kyang ches khyad par du 'phags pa bde ba yin na/ dga' bo gzhan yang dal ba tshogs pa ni bskal pa brgyar yang shin tu rnyed par bka' ba yin no// sangs rgyas 'byung ba ni de bas kyang ches rnyed par dka' ba yin no// dga' bo thar pa 'dod pa rgyal po'i drang srong rnams dang / gzhan yang 'khor los bsgyur ba'i rgyal po rin po che sna bdun dang ldan pa rnams kyang btsun mo'i 'khor dang bcas te bor nas rab tu byung ngo / / de bzhin du khyim bdag dang / bram ze'i tshogs gzhan rnams kyang khyim rnams bor nas rab tu byung ngo // de nas bcom ldan 'das la rigs kyi bu dga' bos 'di skad ces gsol to// btsun pa bdag ni khyim par mchis la/ sbyin pa dag stsal/ bsod nams dag bgyi zhing / bcom ldan 'das nyan thos kyi dge 'dun dang bcas pa la yang bsnyen bkur bgyi zhing chos gos dang / bsod snyoms dang / gzims cha dang / snyun gyi gsos sman dang / yo byad rnams kyang bsgrubs par bgyi'o// bcom 'das kyis bka' stsal pa/ de bzhin gshegs pa dgra bcom pa yang dag par rdzogs pa'i sangs rgyas rnams kyis khams gsum pa gang dag yin pa'i 'jig rten gang bar 'gyur la/ rig kyi bu 'am/ rigs kyi bu mo dad pa can la las lo brgyar 'di lta ste/ chos gos dang / bsod snyoms dang / mal stan dang / nad kyi gsos sman dang / yo byad rnams kyis bsnyen bkur byed na/ dga' bo de ni byung bar nges par byung ba'i sems kyi bcu drug gi char yang mi phod do/ / dga' bo khyod kyis rab tu byung // dal ba shin du rnyed dka' ste/ dga' bo ston pa mngon gyur pa// nga la mi mnyes ma byed cig/ dga' bo dper na sa chen po 'di chu gcig pur rgya mtshor gyur la/ de na ru sbal zhar ba gcig kyang yod/ de na gnya' shing bu ga gcig pa gcig kyang rgyu la/ ru sbal zhar ba de 'di snyam du/ gnya' shing gi bug der mgrin pa tshud par bya'o snyam du sems skye zhing / gnya' shing bu ga can de yang rlung gis bskyod nas/ phyogs phyogs su rgyug par byed pa na/ dga' bo brgya la rkyen zhig gis ru sbal zhar ba de'i mgrin pa gnya' shing gi bu ga der 'jug par 'gyur gyi/ dga' bo mi nyid thob pa ni ma yin no// ngal ba phun sum tshogs pa de bzhin no// dga' bo khyod kyis mi nyid shin tu rnyed par dka' ba dang / de bzhin du dal ba phun sum tshogs pa yang rnyed na/ dga' bo khyod kyis rab byung / dal ba shin tu rnyed dka' rnyed// dga' bo ston pa mngon gyur pa// nga la mi mnyes ma byed cig/ dper na 'ga' zhig gis khab kyi mig gnam du bstan te/ nyungs dkar gyi 'bru rnams 'thor bar byed/ dga' bo brgya la rkyen zhig gis der yungs kar gyi 'bru gang yin pa gcig chud par 'gyur gyi/ dga' bo mo nyid rnyed pa ni ma yin no/ / dal ba phum sum tshogs pa yang de bzhin no// dga' bo mi nyid shin tu rnyed par dka' ba dang / de bzhin du ngal ba phun sum tshogs pa yang rnyed na/ dga' bo khyod kyis rab tu byung dal pa shin tu rnyed dka' rnyed/ / dga' bo ston pa mngon gyur pa// ngal mi mnyes ma byed cig/ de ci'i phyir zhe na/ bskal pa bye ba stong dang ni// brgya dang khrag khrig das yang / nga sangs rgyas sman mo thos na// sangs rgyas mthong ba kal zh-ig/ u du pA ra'i me tog na// shing las shin tu med dka' sgyur// de bzhin sangs rgyas nang dkar ste// khyo kyis nga ni rnyed 'gyur na/ / dka' bo khyod kyis rab tu byung // dal pa shin tu rnyed dka' ste// dka' bo ston pa mngon gyur pa// ngal mi mnyes ma byed cigade nas rigs kyi bu dga' bo kha spu bregs te/ gos ngur smrig bgos te/ rgyal ba'i bstan pa la yang dag par dad pa kho nas khyim nas khyim med par rab tu byung ngo // bcom ldan 'das kyis de skad ces bka' stsal pa dang / tshe dang ldan pa kun dga' bo dang / rigs kyi bu dga' bo// bcom ldan 'das kyis gsungs pa la mngon par bstod do// dga' bo rab tu byung ba'i mdo rdzogs so// /

CLOSE WINDOW