bcom ldan 'das de bzhin gshegs pa thams cad kyi sku dang / gsung dang / thugs kyi snying po rdo rje btsun mo'i b+ha ga la bzhugs so// de bzhin gshegs pa thams cad kyi sku dang / bsung dang / thugs kyi snying po rje btsun gsang ba las ches shin tu gsang ba'ang / de nas bcom ldan 'das kyis bka' stsal pa/ e ma'o byang chub sems dpa' sems dpa' chen po/ rdo rje snying po snying rje chen po legs so legs so/ / rdo rje sems dpa' dang / sems dpa' chen po dang / dam tshig sems dpa' chen po snying po kye'i rdo rje zhes bya ba nyon cig/ rdo rje snying pos gsol pa gang phyir rdo rje sems dpa' lags/ / ji ltar sems dpa' chen po lags// gang gis dam tshig sems dpa' lags// bcom ldan 'das kyis bdag la gsungs// bcom ldan 'das kyis bka' stsal pa/ / rdo rje mi phyed ces byar brjod// sems dpa' srid pa gsum gcig pa// 'dis ni shes rab rigs pa yis// rdo rje sems dpa' zhes byar brjod// ye shes chen po'i ros gang ba sems dpa' chen por brjod par bya/ / rtag tu dam tshig la spyod phyir// dam tshig sems dpar brjod par bya// rdo rje snying pos gsol pa/ ming bsdus pa ni ji lta bu// gang gis kye yi rngo rje lags/ / he yi rnam pas ci zhig bshad// badz+ra yis kyang de bzhin ci// bcom ldan 'das kyis bka' stsal pa// he ni snying rje chen po nyid// badz+ra'ang shes rab brjod par bya// thabs dang shes rab bdag nyid rgyud/ / de ni nga yis bshad kyis nyon// lta stangs dgug dang brda chen dang // don byed rnam mang brjod pa dang // rengs par byed dang skrod pa nyid// sde rengs byed dang mngon spyod dang / / ji ltar rigs par rnal 'byor ma'i// bskyed dang gnas dang byed rgyu dang // don byed ye shes rnam shes dang // lha rnams ji ltar 'byung ba'o// he ru ka ni bskyed pa'i rgyu// dang por gcig ni bsgom par bya/ / rdo rje snying po snying rje che// dngos po nyid kyis rnam grol zhing // dngos po'i 'ching bas 'ching bar 'gyur// de yongs shes pas grol ba yin// dngos po med pa'ang yongs shes pas// dngos po sgom 'gyur shes rab can// dngos po med pa yongs shes pas// de ltar he ru ka bsgom bya// lus la ye shes chen po gnas// rtog pa thams cad yang dag spangs/ / dngos po kun la khyab pa po// lus gnas lus las ma skyes pa'o// rdo rje snying pos gsol pa/ kye bcom ldan 'das rdo rje'i lus la rtsa du lags/ bcom ldan 'das kyis bka' stsal pa/ rtsa rnams ni sum cu rtsa gnyis te/ byang chub kyi sems sum cu rtsa gnyis 'bab pa bde ba chen po'i gnas su 'dzag pa'o// de rnams kyi nang nas rtsa rnam pa gsum ni gtso ma ste/ brkyang ma dang / ro ma dang / kun 'dar ma'o// brkyang ma shes rab rang bzhin gyis// thabs kyis ro ma yang dag gnas// kun 'dar ma ni dbus gnas su// gzung dang 'dzin pa rnam par spangs/ / brkyang ma mi bskyod 'bab pa ste// ro ma de bzhin khrag 'bab cing // shes rab zla ba 'bab bshad pa// de ni kun 'dar mar rab grags// mi phyed ma dang / 'phra gzugs ma dang / rtse ba ma dang / g.yon pa ma dang / zung ngu ma dang / rus sbal skyes ma dang / sgom pa ma dang / dbang ma dang / skyon ma dang / 'jug ma dang / ma mo dang / mtshan mo dang / bsil sbyin ma dang tsha ba ma dang / brkyang ma dang / kun 'dar ma dang / ro ma dang / gzhol ma dang / rengs ma dang / shin tu gzugs can ma dang / spyi ma dang / rgyu sbyin ma dang / sbyor bral ma dang / sdug gu ma dang / grub ma dang / 'tshed ma dang / de bzhin du yid bzang ma dang / sum bskor ma dang / 'dod ma dang / khyim ma dang / gtum mo dang / bdud bral ma'o// rdo rje snying pos gsol pa/ bcom ldan 'das rtsa sum cu rtsa gnyis po 'di rnams ji lta bu lags/ bcom ldan 'das kyis bka' stsal pa// srid gsum yongs gyur thams cad ni// gzung dang 'dzin pa rnam par spangs// yang na thabs ni thams cad kyis// dngos po'i mtshan nyid du ni brtag/ sdom pa'i dbye ba'ang bshad par bya ste/ A li kA li ni zla ba dang / nyi ma dang / shes rab dang / thabs so// chos dang / longs spyod rdzogs pa dang / sprul pa ni sku dang / gsung dang / thugs so// e baM ma ya ni/ e yi rnam pa lha mo spyan// pagi rnam pa dag mar brjod/ ma ni lha mo gos dkar mo// ya yi rnam pa sgrol mar brjod// sprul pa'i 'jo lo la 'dab ma drug cu rtsa bzhi dang / chos kyi 'khor lo la 'dab ma brgyad dang / longs spyod rdzogs pa'i 'khor lo la 'dab ma bcu drug dang / bde ba chen po'i 'khor lo la 'dab ma sum cu rtsa gnyis so/ 'khor lo'i grangs kyi rim pas rnam par gzhag pa/ skad cig ma bzhi ni/ rnam pa sna tshogs dang / rnam par smin pa dang / rnam par nyed pa dang / mtshan nyid dang bral ba'o// 'phags pa'i bden pa bzhi ni/ sdug bsngal ba dang / kun 'byung ba dang / 'gog pa dang / lam mo// de kho na nyid bzhi ni/ bdag gi de kho na dang / sngags kyi de kho na dang / lha'i nga kho na dang / ye shes kyi de kho na nyid do// dga' ba bzhi ni/ dga' ba dang / mchog tu dga' ba dang / dga' bral gyi dga' ba dang / lhan cig skyes pa'i dga' ba'o// sde pa bzhi ni/ gnas brtan pa dang / thams cad yod par smra ba dang / kun gyis bkur ba dang / dge 'dun phal chen no// zla ba dang / nyi ma dang / A li dang / kA li dang / 'pho ba bcu drug dang / dbyug gu drug cu rtsa bzhi dang / chu tshod sum cu rtsa gnyis dang / thun tshod bzhi ste/ de ltar thams cad bzhi'o// lte bar gtum mo 'bar ba yis// de bzhin gshegs pa lnga bsregs shing // spyan la sogs pa yang bsregs te// bsregs pas ri bong can haM 'dzag/ rdo rje rigs kyi le'u ste dang po'o// / sngags kyi le'u bshad par bya'o// oM a kA ro mu khaM sar+b+ba d+har+m+ma NAM/ A d+ya nuta pan+d+hatA/ oM AHhUM phaT swA hA/ 'byung po thams cad kyi gtor ma'i sngags so/ / dz+ra oM hrI khaM hUM/ de bzhin gshegs pa rnams kyis bon no// oM de ba bi tsu badz+ra hUM hUM hUM phaT swA hA/ kye rdo rje'i snying po'o// sngags thams cad kyi rkang par dra bor oM gyi rnam pa dang / mthar ni swA hA dang / hUM laT kyi rnam pa ni nang du gzhug go// oM a ka tsa Ta ta pa ya sha swA hA/ grong khyer dkrug pa'i sngags so// a A/ i I/ u U/ r-i r-I/ la lo// e e/ oM o/ aM/ rnal 'byor ma rnams kyis bon no// oM trai lo kyA k+She pa chu hu hu phaT swA hA/ phyag gnyis pa'i'o// oM dz+wa la dz+wa la b+h+yo h+ye hu hu phaT swA hA/ phyag bzhi pa'i'o// oM ka Ti ko Ti badz+ra/ huhuM hu phaT swA hA/ phyag drug pa'i'o// oM AHhUM/ sku dang / gsung dang / thugs byin gyis brlab pa'i sngags so// oM rak+Sha rak+Sha tsu hu~M hU~M phaT swA hA/ sa sbyang ba'i sngags so// oM hUM swA hA rengs par byed pa'i 'o/ / oM aM swA hA/ dbang du byed pa'i 'o// oM khaM swA hA/ skrod par byed pa'i 'o// oM dz+r-IM swA hA/ sdang bar byed pa'i 'o// oM buM swA hA/ mngon spyod kyi'o// oM hUM swA hA/ 'gugs par byed pa'i 'o// oM g+hu swA hA/ gsod par byed pa'i 'o// oM ku ru kul+le hrIHswA hA/ ku ru kul+le'i sngags so// a phuH'i rnam pas mtha' yas kyi gzugs brnyan byas la bdud rtsi lngan ni blugs/ me tog nag pos ni mchod/ klu 'dul bar byed pa'i khu bas ni byug/ glang po che'i chang gis ni mgo bo byug/ kham phor kha sbyar du ni gzhag/ ba nag mo'i 'o mas ni dgang / gzhon nu ma nag mos bkal ba'i skud pas ni dkri/ rlung gi phyogs su rdzing bu byas te mtha' yas der gzhag go// de'i 'gram du dkyil 'khor bzhengs par bya ste/ dur khrod kyi sol bas ni rdul tshon nag po skyes pa'i rus pa'i phye mas ni rdul tshon dkar po/ ldong ros kyis ni rdul tshon ser po/ dur khrod kyi so phag gis ni rdul tshon dmar po/ rkun ma'i lo ma dang / skyes pa'i rus pa'i phye ma dag gis ni rdul tshon ljang ku ste/ rdul tshon 'di rnams kyis dkyil 'khor bzhengs so// dur khrod kyi srad bus thig gdab cing dkyil 'khor khru gsum pa bya ste/ de'i dbus su mtha' yas mnan pa'i kye'i rdo rje zhal brgyad pa/ zhabs bzhi pa/ phyag bcu drug gis brgyan pa/ spyan nyi shu rtsa bzhis che ba/ 'jigs pa'ang 'jigs par mdzad pa bri'o// de nas slob dpon gyi nang gi ma / rungs pa'i sems kyis dben pa'i gnas su sngags bzla ste/ oM g+hu ru g+hu ru/ b+hu T+ya g+hu Du/ ma sa ma sa/ g+ha Ta g+ha Ta/ g+ho Ta ya g+ho Ta ya/ a nan+tak+Sho b+ha ka rA ya nA gA d+hi pa ta ye he he ru ru kaM sap+ta pA tA la ga tA na nA gA nA kaR+Sha ya baR+Sha ya/ gar+dz+dza ya tar+dz+dza ya/ phuHphuHphuHphuHphuHpuHphuHphuHhUM hUM hUM phaT swA hA/ gal te char mi 'bab na de'i tshe sngags 'di bzlog la bzla ste char 'bab bo// gal te mi 'bab na de'i tshe mgo ardza ka'i dog pa ltar 'gas so/ / char dbab pa zhes bya ba'i cho ga'o// sprin dral ba bshad de/ dur khrod kyi ras la nye bar 'dug nas sngags bzlas shing dral te/ oM AR+tha / yash+ma shA na pri yA ya hUM hUM hUM phaT swA hA/ sprin dral ba'i cho ga'o// pha rol gyi sde rnam par gzhig par bya ba'i phyir kha Ti ka'i sgrub pa bshad de/ kha Ti ka dang / bdud rtsi lnga dang / kuSh+ka ra ts+tshi n+da dang ldan/ cig btags la ril bu bya ste/ sngags ni oM badz+ra karta ri he badz+rA ya hUM hUM hUM phaT/ dngos grub kyi don du bye ba bzlas shing sngon du bsnyen pa 'bum byas te/ de bsgrubs la ril ba spyi blugs kyi mgrin par bskor zhing bskor nas bcag na dgra thams cad kyi mgo med par 'gyur ro/ / rdo rje gri gug gi cho ga'o// lha rnams dgas par 'dod pas thig le bsgrubs te/ tshangs pa'i sa bon rgyal la bsgrubs nas/ ku ShA ra ts+tshin+da dang bsres la nyi ma gzas zin pa na mi bskyod pa dang btag cing btags nas dgra sta byas te/ de rkang pas mnan nas sngags bzlas te/ oM badz+ra kuSh+Ta ra pA Da ya pA Da ya hUM hUM hUM phaT swA hA/ bye ba bzlas la thig le byas te gang la phyag byas pa de 'gas so// lha dgas pa'i cho ga'o// tsha bas gdung bar bya bar 'dod pas/ arka'i lo ma la phu dang / / ske tshe dang / tsau tra ka'i khu bas dgra bo'i ming bri zhing 'bras phub kyi me la gdungs te sngags khri bzlas so// oM he badz+ra dzA ra dzA ra sha hUM b+h+rUM hUM hUM hUM phaT swA hA/ tsha ba'i cho ga'o// khri bzlas pas 'grub bo// chang skyug par bya bar 'dod pas bsgrub bya'i lte bar yaM gi rnam pa sgom zhing / maM gi rnam par gyur pa las chang lte bar bsgoms te skyug par byed par bltas na chang skyug go// rab tu myos ma dbang du bya bar 'dod pas mya ngan med pa'i brgyad la mya ngan med pa'i 'og tu song ste gos dmar po bgos nas myos byed kyi 'bras bu bza' zhing / ka kA ma tsi ka'i khu bas thig la byas nas sngags bzlas te/ oM a mu kaM me hrIHba sI b+ha ba tu swA hA/ khri yis 'ong bar 'gyur ro// zla ba dang nyi ma dbang du bya bar 'dod pas sA lu btags pa'i 'gyur ba la zla ba dang nyi ma byas nas rdo rje'i chu la gzhug cing sngags bzlas te/ oM badz+ra arka mA tsa la mA tsa la tiSh+Tha tiSh+Tha he badz+ra ya hUM hUM hUM phaT swA hA/ bye ba phrag bdun bzlas te nyi ma dang zla ba yang dag par gnas shing nyin mtshan bye brag med par 'gyur ro// zla ba dang nyi ma rnam par 'dzin pa zhes bya ba'i cho ga'o// oM na grA na grA zhes bya ba'i sngags 'dis dus ma yin pa'i dus su don sgrub pa'i phyir gzhon nu ma'i mig dag la brgya rtsa brgyad mngon par bsngags nas/ me tog la sogs pa'i mchod pa lngas yang dag par mchod cing snyan gsan dbab bo// bcu bzhi pa'am brgyad pa'i snga ba'i dus su bum pa la sogs pa gzhag cing 'bru mar dang a lak+ta'i khu ba la sngags 'di nyid kyis lan brgya rtsa brgyad mngon par bsngag go/ / de nas mngon par bsngags pa'i a lak+Sha'i khu bas sngags pa'i mthe bong rgan po la bskus nas/ 'bru mar gyis kyang blugs la/ gzhon nu ma la bstan te/ nga'i rdzas sus khyer smros/ de la des smras pa/ che ge mo zhes bya bas khyer ro// rdo rje skar ma'o// be Du lA be Du yA zhes brjod na glang po che 'bros par 'gyur ro// Amra mAr+m+ma zhes brjod na stag 'bros par 'gyur ro/ / ti witAtil+li yA zhes brjod na bse 'bros par 'gyur ro// i li mi li phuHphuHzhes brjod na sbrul 'bros par 'gyur ro// nor skyong 'dul ba'i phyag gis lag pa rab tu bstan na khyi 'bros par 'gyur ro/ / rdo rje ma dang / dkar mo dang / chu ma dang / rdo rje mkha' 'gro ma dang / bdag med ma dang / sa spyod ma dang / mkha' spyod ma'i rnal 'byor las rengs par byed pa la sogs pa brtul zhugs can gyis byed do/ / sngags kyi le'u ste gnyis pa'o// / de nas lha'i le'u bshad par bya'o// dang por byams pa bsgom par bya/ / gnyis par snying rje rnam bsgom zhing // gsum par dga' ba bsgom pa dang // kun gyi mthar ni btang snyoms so// yang ni stong pa'i byang chub ste// gnyis pa la ni sa bon bsdu// gsum pa la ni gzugs brnyan rdzogs// bzhi pa la ni yig 'bru dgod// re phas nyi ma sngon du rnam bsgoms nas// nyi der hUM byung sna tshogs rdo rje ste// rdo rje de nyid kyis ni ra ba dang // gur bcing ba yang rnam par bsgom pa nyid/ / dang por ro ni rnam bsgom pa// chos kyi dbyings kyi bdag nyid brjod// de stengs rnal 'byor pa gnas nas// he ru ka nyid rnam par bsgom// rang gi snying khar re pha bsgom/ / de las byung ba'i nyi dkyil 'khor// der ni hUM gi rnam pa nyid// thabs dang shes rab rang bzhin can// hUM las byung ba'i rdo rje ni// kha dog nag po 'jigs chen po// rdo rje lte ba'i dbus gnas par/ / yang ni hUM gi de nyid bsgom// hUM gi rnam par gyur bltas nas// zhe sdang bdag nyid rnam par bsgom// rdo rje skye ba nag po che// 'dam skyes sngon po 'dra ba'i mdog/ yang na sngo dang nyi ma'i mdog/ dad pas nges par rnam par bsgom// nam mkhar rje btsun bltas nas ni// rdo rje skye ba snying rje che// rgyan rnams thams cad 'dzin pa yi// lha mo brgyad po rnams kyis mchod/ dkar mo ri dgas mtshan ma 'dzin// chom rkun bdud las rgyal ba'i snod// ro langs ma ni chu lag ma// g+hasma rI ni sman 'dzin cing // puk+ka sI ni rdo rje'i lag/ de bzhin ri khrod ma ro 'dzin/ / gdol pa mo ni cing te'u rdung // 'di rnams kyis ni gtso bo mchod// 'dod chags chen po'i rjes chags pas// g.yung mos sku la 'khyud pa nyid// A li zla ba kA li nyi/ / sa bon nang du son gyur pa// de nyid sems dpa' zhes byar brjod// mchog tu dga' ba'i rang bzhin can// nam mkha'i dkyil 'khor khyab pa yi// rang gi lus mtshungs rnam par spro// / bsdus nas snying kar bkug pa na// yo gi zhe sdang bdag nyid 'gyur// sngo dang nyi ma mtshungs pa'i mdog/ ban du dmar po'i spyan dang ldan// skra ser gyen du 'khyil ba dang // phyag rgya lngas ni rnam par brgyan/ / 'khor lo rna cha nor bu dang // lag gdub dang ni ska rags nyid// sangs rgyas lnga ni rnam dag pa// 'di rnams phyag rgyar rab tu grags// sdang mig brgyad gnyis lo yi tshul// g.yon na rdo rje thod pa dang // g.yon pa nas kyang kha T+wAM ga/ g.yas na rdo rje nag po nyid// hUM gi yi ge 'don pa'i bdag/ rnal 'byor ma brgyad yongs bskor nas// dur khrod du ni mgon po rol// dbugs rgyu zhes bya'i rigs pa 'dis// dur khrod ces ni mngon par brjod// phyag bzhi ni bdud bzhi las rnam par rgyal ba rnam par dag pa ste/ gong du brjod pa'i gzugs dang / sku mdog dang / hUM las byung ba'o// phyag g.yon gyi dang po na skyes pa'i thod pa lha dang lha ma yin gyi khrag gis bkang ba/ de bzhin du g.yas kyi phyag na rdo rje// phyag lhag ma ngag gis shes rab la 'khyud pa/ shes rab rdo rje phag mo ni/ bcom ldan 'das kyi gzugs can no// phyag drug pa/ zhal gsum pa/ g.yon dmar ba/ g.yas zla ba dang nyi ma lta bu/ dang po sngon po'o// gcer bu gong du brjod pa'i sku mdog dang gzugs can/ phyag rnams ni pha rol tu phyin pa rnam par dag pa'o// phyag g.yon gyi dang po na rtse gsum pa/ phyag g.yas kyi dang po na rdo rje/ phyag g.yon gyi gnyis pa na dril bu/ phyag g.yas kyi gnyis pa na gri gug/ phyag lhag ma dag gis rdo rje lu gu rgyud ma la snyoms par 'jug pa/ bcom ldan 'das ji lta ba de ltar shes rab ste/ g.yas pa dang g.yon pa na gri gug dang thod pa/ khams gsum gyi bdag nyid can gyi ro mnan pa'o// lha'i le'u ste gsum pa'o// // de nas lha dbang bskur ba'i le'u bshad par bya'o// rang gi snying khar sa bon bsam mo/ / sa bon las 'od zer nag po lcags kyu'i rnam pa'i gzugs kyis phyung nas/ des khams gsum du bzhugs pa'i sangs rgyas thams cad spyan drangs la/ ma mo brgyad kyis yang dag par mchod nas gsol ba gdab par bya'o// oM a b+hi Shiny+tsan+tu mAM sarba ta thA ga ha zhes sangs rgyas de rnams he ru ka'i rnam pa'i gzugs kyis de bzhin gshegs pa lnga'i bdag nyid kyi bdud rtsi lngas gang ba'i bum pas dbang bskur bar bya'o/ / dbang bskur ba na me tog gi char 'bab par 'gyur ro// rnga'i sgra 'byung bar 'gyur ro// gur kun gyi char 'bab par 'gyur ro/ / gzugs kyi rdo rje ma la sogs pa rnams kyis mchod par bya'o// rdo rje'i glu spyan la sogs pa rnams kyis blang bar bya'o// dbang bskur nas spyi bor rang gi rigs kyi bdag por 'gyur ro/ / 'dis ni he ru ka rdzogs pa nyid do// thun gsum du byin gyis brlabs pa'i sgom pa rnam par bsgoms nas langs te lha'i gzugs su gzhag go// dbang gi le'u ste bzhi pa'o// / de nas de kho na nyid kyi le'u bshad par bya'o// ngo bos gzugs med mthong ba po// sgra med thos pa po yang med// dri med snom pa po yang med// ro mong myong ba po yang med/ / reg med reg pa po yang med// sems med sems las byung ba'ang med// skyed byed ma dang sring mo nyid// rnal 'byor rig pas rtag tu mchod// gar ma chos ma rdo rje ma gdol ma de bzhin bram ze mo/ / thabs dang shes rab cho ga yis// de nyid rigs pas rtag tu mchod// ji ltar bye bar mi 'gyur bar// rab tu 'bad pas bsten pa nyid// ma gsang sprul dang chom rkun dang / / sa spyod me yis sdug bsngal byed// rigs lnga'i phyag rgya zhes bya ba// thar pa'i rgyur ni brjod par bya// rdo rje 'dis ni gdab pa nyid// des na phyag rgyar brjod par bya// rdo rje pad+ma de bzhin las// de bzhin gshegs dang rin chen nyid// snying rje chen po dam pa yi// rigs ni rnam pa lnga ru brjod// rdo rje'i phyag rgya g.yung mo nyid// de bzhin pad+ma'i gar ma nyid// las ni chos mar rab tu bshad// de bzhin gshegs pa'i bram ze mo// rin chen gdol mar shes par bya// phyag rgya lngar ni rnam par nges// 'di rnams de bzhin gshegs pa'i rigs// mdor bsdus pas ni brjod par bya// dpal ldan de bzhin nyid gshegs shing // de bzhin slar yang gshegs pa nyid// 'dis ni shes rab rigs pa yis// de bzhin gshegs zhes brjod par bya rigs ni rnam pa drug brjod cing / / mdor bsdus pas ni rnam pa lnga// sku gsung thugs kyi dbye ba yis// phyi nas rnam pa gsum du 'gyur// rigs dang 'byung ba lnga rnams dang // phung po lnga yi rang bzhin gyis/ / rigs dang bgrang bya 'di yis ni// rigs zhes mngon par brjod par bya// sgom pa po med sgom pa'ang med// lha med sngags kyang yod ma yin// spros pa med pa'i rang bzhin las/ / sngags dang lha ni yang dag gnas// rnam snang mi bskyod don yod dang // rin chen dpag med sems dpa' bo// tshangs pa khyab 'jug zhi ba dang // thams cad sangs rgyas de nyid brjod/ / tshangs pa sgrib bral sangs rgyas nyid// 'jug phyir khyab 'jug brjod par bya// rtag tu dge bas zhi ba nyid// thams cad kun gyi bdag nyid gnas// dam pa'i bde bas de nyid de/ bde ba rtogs phyir rnam sangs rgyas// gang phyir lus las byung ba nyid// lha zhes mngon par brjod par bya// sangs rgyas 'di la b+ha ga mnga'// bcom ldan 'das zhes brjod/ par bya// b+ha ga rnam pa drug tu brjod// dbang phyug la sogs yon tan kun// yang na nyon mongs la sogs bdud// bcom phyir bcom ldan 'das zhes bya// gang phyir skye 'gro skyed pa yi// shes rab ma zhes brjod par bya// gang phyir skal ba ston pa yi// shes rab sring mo zhes bya nyid// btso blag ma dang bu mo dang // gar mkhan ma yang brjod par bya// sems can thams cad 'tshed pa'i phyir/ / btso blag ma zhes de bzhin brjod// yon tan 'jo phyir shes rab ni// bu mo zhes ni brjod par bya// snying rje chen po g.yo ba'i phyir// shes rab gar mar brjod par bya// gang phyir bcom ldan mi reg pa// de phyir g.yung mor brjod par bya// A li kA li rab brtags pas// brjod pa bzlas par yang dag bshad// rkang pa'i rjes ni dkyil 'khor nyid// nyed phyir dkyil 'khor brjod par bya/ / lag pa bsgyur ba phyag rgya yin// sor mo nyid pa'ang de bzhin no// gang phyir rnam sems bsam gtan ni// gang bsams de ni bsam gtan no// ji ltar pha las bde thob pa/ / de yi bde ba rang gis bza'// bde ba gang gis 'chi ba 'di// de yi bde ba bsam gtan brjod// de kho na nyid kyi le'u ste lnga pa'o// de nas gzhan yang rab bshad bya/ / spyod pa pha rol phyin mchog nyid// gang gis dngos grub mthar 'gro ba// kye yi rdo rje'i dngos grub brgyus// sgom pa po yis rnam 'dzin pa// rna ba dag la rna cha bzang // spyi bor 'khor lo rnam par 'dzin/ / lag pa dag la lag gdub nyid// rked pa la yang ska rags nyid// rkang par de bzhin rkang gdub bo// lag pa'i rtsa bar dpung rgyan nyid// mgrin par rus pa'i 'phreng ba ste/ / bgo ba stag gi pags pa nyid// bza' ba mi 'chi bcu phyed de// he ru ka sbyor skyes bu nyid// kha dog lnga la rnam par gnas// rigs lnga dag dang mnyam ldan pa// rigs ni gcig tu rnam par brtag/ kha dog du ma nyid kyis ni// gang phyir dbye ba mtshon mi bya// shing gcig dang ni dur khrod dang // ma mo'i khyim dang mtshan mo dang // yang na dben pa'am pas mtha' ru// sgom pa bzang por brjod par bya/ / cung zad drod ni thob pa na// gal te spyod pa byed 'dod pas// gal te 'grub 'gyur 'dod yod na// 'dis ni spyod pa spyad pa nyid// shin tu bzhin bzang mig yangs ma rang gis dbang bskur snying rje can/ / rdo rje'i bu mo 'di khyer nas// spyod pa bya bar rtogs par bya// rdo rje rigs kyi dngos med na// rang 'dod lha yi rigs kyis bya// yang na gzhan gyi rigs byung ba byang chubs bon gdob pa dang / / sbyang ba yis ni gzung bar bya// gal te dga' bas gru brang ste// de tshe rdo rje mchog ldan no// gal te dga' ba skyes pa na// thar pa'i rgyur ni gar byaste/ rdo rje rkang pas gar// yo gis mnyam par bzhag pas byed// 'khor lo'i gzugs kyis mi bskyod pa// rna cha'i bdag nyid 'od dpag med// mgul gyi 'phreng ba rin chen bdag/ lag par rnam par snang mdzad brjod// ska rags la ni don yod gnas// kha T+wAM ga gzugs shes rab ste// thabs kyi gzugs kyis cang te'u nyid// zhe sdang rnam dag rnal 'byor pa// glu ni rnam dag sngags su gnas// gar ni bsgom pa byas pa nyid// de yi phyir na klu dang gar// yo gis rtag tu rtag tu byas// sman ni rnam par bza' ba ste// chu ni rtag par btung ba nyid// rga shrIs zil gyis mi non cing / / rtag tu srung bar 'gyur ba yon// rkun ma'i sgra las cod pan byas// de la hUM byung sbyar bar bya// sangs rgyas lnga yi thod pa rnams// rnal 'byor spyod pas rnam par 'dzin// thod pa sor lnga pa yi tshad// byas pas cod pan 'dzin par byed// thabs dang shes rab rang bzhin las// skra yi ska rags nyis bskor nyid// thal ba skra yi mchod phyir thogs// rnal 'byor pa yi spyod pas 'dzin/ / cang te'u sgra ni bzlas pa ste// kha T+wAM ga sgom shes rab nyid// rdo rje thod pa'i spyod pa yis// 'di dag bzlas dang sgom pa yin// brkam dang rmongs dang 'jigs dang khro// ngo tsha'i 'bras bu rnam par spang // bdag nyid kyis ni gnyid spangs nas// the tsom med par spyod pa bya// lus kyis sbyin pa byin nas ni// phyi nas spyod pa yang dag spyad// skal dang skal min rnam spyad pas/ / de phyir sbyin pa sbyin mi bya// bza' bca' de bzhin btung ba nyid// ji ltar rnyed pa rab tu bza'// yid 'ong mi 'ong rnam chog phyir// zhen pa tsam du mi bya'o// bza' dang bza' min spyod pa dang / / de bzhin btung dang btung min nyid// bgrod dang bgrod min sngags pa yis// rnam rtog nyid du mi bya'o// dngos grub rnyed pa'i slob ma gang // yang dag ye shes snang ba po// mnar med spang ba'i rgyu yi phyir// grub pas bla ma mngon phyag btsal// bslab dang dbang las rnam par grol// de bzhin ngo tsha'i 'bras bu nyid// dngos po kun gyi rang bzhin gyi// yo gis rnam dpyang snying rje che/ / sbyin sreg mchog sbyin dka' thub 'das// sngags dang bsam gtan rnam par spangs// dam tshig sdom las rnam par grol// rnal 'byor ldan pas spyod pa byed// nges par sngon du lnga min gang / / brgya byin lta bu yin na yang // de la 'jigs par mi bya ste// seng ge'i gzugs kyis rnam par rgyu// sems can kun gyi don gyi phyir// rtag tu snying rjes btung bar bya// rnal 'byor btung dga' rnal 'byor pa/ / gzhan gyi btung bas bzi ba med// spyod pa'i le'u ste drug pa'o// de nas ts+tsho ma'i le'u bshad par bya'o// gang gis spun dang sring mor yang / / the tshom med par shes par bya// gang zhig sor mo gcig sngon dang // gnyis kyis legs par 'ongs pa yin// g.yon pa'i mthe bong bcangs pa las// bskur gyi phyag rgyar rnam par shes/ / gang zhig srin lag ster ba la// de yi mthe'u chung rnam par sbyin// gang zhig gung mo ston pa la// de yi mdzub mo rnam par sbyin// gang zhig srin lag ston pa la/ de yi mgrin pa rab tu bstan// gang zhig gos ni ston pa la// de yi rtse gsum rab tu bstan// gang zhig nu ma ston pa la// de yi mtshams ni rab tu bstan// gang zhig so ni ston pa la// de yi kha ni rab tu bstan// gang zhig khro gnyer ston pa la// gtsug pud dgrol bar brjod par bya// gang zhig dpral ba ston pa la// de yi rgyab ni rab tu bstan// gang zhig rkang mthil ston pa la// lnga yos rnam par rtse bar bya// phyag rgya phyag rgya'i lan gyis ni// dam tshig gis ni rnam par dbye// de la rnal 'byor mas smras pa// e ma bu ni snying rje che// gal te 'phreng ba lag ston na// 'du bar bya zhes smra ba yin/ / 'phreng ba mngon par gtang byas na// dam tshig la gnas brtul zhugs bzang // de la phyi rol zhes 'du ba// bzang po'i spyod yul gnas pa ni// de la 'du bar rnal 'byor mas/ / gang smras de ltar thams cad bya// kye bcom ldan 'das 'du ba'i gnas du lags/ bcom ldan 'das kyis bka' stsal pa// gnas dang nye ba'i gnas dang ni// zhing dang nye ba'i ning nyid dang // tsAn+do 'i ba'i ts+tshan+do dang // de bzhin 'du ba nye 'du ba// 'thung gcod nye ba'i 'thung gcod nyid// dur khrod nye ba'i dur khrod nyid// 'di rnams sa ni bcu gnyis te/ sa bcu'i dbang phyug mgon po nyid// 'di ni gzhan gyis brjod mi bya// kye bcom ldan 'das gnas la sogs pa gang lags/ bcom ldan 'das kyis bka' stsal pa// gnas ni dzA lan d+ha ra ra bshad/ / de bzhin du ni u Di nyid// gnas ni ko lpa gi rI nyid// de bzhin du ni kA rU nyid// nye gnas mA la wa zhes brjod// sin d+hu na ga ra nyid do// zhing ni mum+bu nir bshad de zhing ni byed pa'i grangs nyid do/ / de wi ko Ta de bzhin zhing // zhing ni lhags pa'i grangs nyid do// nye zhing ku lu ta zhes brjod// de bzhin arbu ta nyid dang // bA yi mchog sbyin lta ba'i ri/ nye ba'i zhing ni mdor bsdus pa'o// tsun+do ha ri ke la dang // lan tshwa rgya mtsho'i nang skyes dang // lam pa kA dang kAny+tsi nyid// de bzhin sor lnga nyid do// nye ba'i tsAn+do ka ling ka/ gser dang ldan pa'i gling dang ni/ / kong ka NA yang nyets+tshan+dor// mdor bsdus pas ni brjod par bya// 'thung gcod grong khyer gyi dang yang // 'thung gcong grong gi mthar gnas pa// tsa ri tra dang ko sa la bin d+ha gnon nu'i grong khyer ro/ / rdo rje snying po snying rje che// zhi ba'i 'thung gcod ngo' ba'o// dur khrod rab son dge 'dun dang // dur khrod rgya mtsho'i 'gram nyid do// phreng tshal rab rdzing bu'i 'gram/ / nye ba'i dur khrod brjod par bya// sems can kun gyi don gyi phyir// rnal 'byor ma rgyud kye rdo rje// rnal 'byor ma yi legs 'du ba// nyin par nyid kyang rab bshad bya/ kye bcom ldan 'das nyi ma gang lags/ bcom ldan 'das kyis bka' stsal pa// yi dgas zla phyed bcu bzhi dang // de bzhin du yang brgyad pa nyid// rgyal mtshan/ dang ni mtshon bskun nyid// lan bdun pa yang bza' bar bya// 'bad pas snying rje bskyed pa yis// gsang par bya bar brjod pa nyid// snying rje med na mi 'grub pas// de phyir snying rje bskyed pa nyid/ / thams cad gdug par gzhug pa ste// cho ga'i gtso bos dgag par bya// de la 'di ltar blta ba nyid// nyin mo bcom ldan rdo rje can// mtshan mo shes rab brtag par bya// mi bya/ cung zad yod ma yin// rtag tu mi bza' yod ma yin// 'di la mi bsam yod ma yin// bzang ngan mi smra gang yang med// ji ltar bdag nyid de ltar gzhan// de bzhin bdag nyid nga mchog nyid/ / 'di ltar sems pa'i rnal 'byor bdag/ bza' dang btung ba la sogs spyad// yan lag ji snyed bsgyur ba dang // tshig rnams rab tu rgyas pa nyid// he ru ka dpal gnas bzhugs pas/ / de snyed sdug dang phyag rgya yin// shrI ni gnyis med ye shes te// he ni rgyu sogs stong pa nyid// ru ni tshogs dang bral ba nyid// ka ni gang du'ang mi gnas pa'o// rdo rje thong ba'i spong ba yis/ / skye bo gang dang gang rnams kyi// sha ni mkhas pas bza' bar bya// sems can de de'i dbang du 'gyur// brda dang gnas gtan la phab pa'i le'u ste bdun pa'o// / de nas rnal 'byor ma'i 'khor lo bshad par bya'o// nam mkha'i khams su b+ha ga bsam// dbus su rnam par sgom pa ni// 'khor lo sngon du ci rigs par// lnga rnams ji lta 'byung ba nyid/ / 'khor lo sa dang chu ni sngon// ji ltar rigs par byin za dang // lha rnams kyis ni rlung chen dang // ji ltar sgom pa po 'byung ba'ang // chos 'byung las skyes 'khor lo 'di// 'phar ma gnyis dag skyon med pa// ze'u 'bru las ni gcig 'gyur te// gru gsum gyi ni phyi mar brjod// de dbus shi ba bco lnga yi// gdan gyi bdag nyid rnam par bsam// de yi steng du zla ba yin/ / zla ba'i steng du sa bon nyid// phyi nas bdud las rgyal bas mnan// gnyis 'dus pa las bde chen po// A li zla ba'i gzugs kyis gnas// kA li'i gzugs kyis snang byed do// zla banyi ma 'dus pa las// dkar mo la sogs rab tu grags// zla ba me long ye shes ldan// bdun gyi bdur pa mnyam nying ldan// rang lha'i sa bon phyag mtshan no// so sor rtog par brjod par bya/ / thams cad gcig gyur nan tan nyid// rdzogs pa chos dbyings dag pa ste// mkhas pas cho ga gsungs pa yis// rnam pa lnga po sgom pa nyid// A liM kA li mnyam sbyor bas/ / rdo rje sems dpa' nyid kyi gdan// yi ge las byung gong bu la// hUM phaT rnam pa'ang 'dod mi bya// sems dpa'i gzugs brnyan las byung ba'i// dkyil 'khor bdag po rnam par sgom/ / phyag mtshan zhal sogs gong ma bzhin// zla ba chu shel nor bu'i 'od// thabs dang shes rab rang bzhin las// 'di ltar thams cad rdzogs pa nyid/ zla ba nyi ma'i rab dbye bas// A li shes rab kA li thabs// 'di las dkar mo la sogs pa// kha dog dbye bas so so yin// re zhig nang gi 'phar ma la// rnal 'byor ma lnga nges gnas pa/ phung po lnga yi rang bzhin gyis// rnal 'byor rig pas rtag tu sgom// dbang por rdo rje gshin rje dkar// chu bdag chu yi rnal 'byor ma// lus ngan rdo rje mkha' 'gro ma// dbus su bdag med / rnal 'byor ma// phyi rol gyi ni 'phar ma la// dkar mo chom rkun ro langs ma// g+hasma rI dang puk+ka sI// ri khrod ma dang gdol pa mo// brgyad pa Dom+b+hi ni ru brjod// 'og ldan ma dang steng ldan nyid// mkha' spyod ma dang sa spyod brjod// srid dang zhi ba'i rang bzhin gyis// snying rje chen po 'di dag gnas// lha mo thams cad kha dog gnag/ drag chen phyag rgya lnga yis brgyan// zhal gcig spyan ni dmar ba dang / / lag par gri gug thod pas khyab// 'khor lo rna cha mgul rgyan dang // lag par lag gdub ska rags na// sangs rgyas lnga ni rnam dag pas// 'di lnga phyag rgya dag pa'o/ / ji ltar bdag med rnal 'byor ma// de ltar thams cad rnam par bshad// lag pa gcig ni thod pas brel// g.yas pa na ni gri gug 'dzin// g.yon pas kha T+wAM ga nyid do// stag gi pags pas rnam dkris shing / / ro la zhon zhing gzi brjid 'bar// phyag gnyis gyer du dbu skyes ser// nga rgyal la sogs skyon drug rnams// gcod phyir gri gug rnam par gnas// dngos dang dngos med rnam rtog gi/ mgo bo pad+ma'i snod du ni// bdud rnams rnam pa bzhi yi khrag/ dngos grub phyir ni btung bar bya// stong pa'i rnam pas kha T+wAM ga/ thabs kyis ro ni rnam par brtag/ 'dis ni 'khor lo rnam bsgoms na// dngos grub myur du thob par 'gyur// dang por nag po rab tu bsgom// gnyis par dmar po rnam par bsgom// gsum pa la ni ser po bsgom// bzhi par ljang ku de bzhin no/ / lnga par kha dog sngon po dang // drug par dkar po'i lus can te// yan lag drug bsgom rnal 'byor pas// dga' bral mthar yang de bzhin no// bskyed pa'i rim panyid dang ni/ / rdzogs pa yi yang rim pa nyid// rim gnyis mnyam par gnas nas ni// rdo rje can gyis chos 'chang do// bskyed pa yi ni cha bshad do// nam mkha'i khams ni pad+ma la// b+ha ga zhes bya ye shes brjod/ / sgom pa zhes bya snyoms 'jug nyid// de yi bde ba 'khor lor brjod// sngon du byung ba zhu ba nyid// rig pa ji bzhin rang rig nyid// lha zhes bya ba byang chub sems// ji ltar 'byung ba khu ba yin// lhan cig skyes pa rnam pa gnyis// re zhig btsun mo shes rab yin// skyes bu thabs su brjod pa nyid// kun rdzob don dam dbye ba las// phyi nas de yi rnam pa gnyis/ / re zhig skyes bu rnam pa gnyis// de yi khu ba'ang bde ba nyid// skyes bu ji bzhin shes rab la'ang // de yi khu ba bde ba nyid// de nyid phyir na dga' ba nyid// bzhi yi rab tu dbye ba yis// skye med rim pa'i phyogs las ni// 'di ltar lhan cig skyes rnam bzhi// dga' ba dang po dpa' bo nyid// mchog tu dga' ba rnal 'byor ma// shin tu bde dga' thams cad nges/ / de ba de'i thabs las thams cad rig/ dga' ba'i bde ba cung zad de// mchog tu dga' ba de bas lhag/ dga' bral dga' bas chags bral yin// lhag ma lhan cig skyes dga' nyid/ / dang po reg par 'dod pa dang // gnyis pa bde bar 'dod pa dang // gsum pa 'dod chags 'jig pa nyid// des na bzhi pa bsgom par bya// mchog tu dga' ba srid par brjod// dga' bral las ni mya ngan 'das// dbu ma dga' ba tsam nyid de// 'dis ni lhan cig skyes pa spangs// 'dod chags med cing chags bral med// dbu mar dmigs par mi 'gyur ro// 'di la thabs dang shes rab med/ / yang dag de nyid snang ba'o// gzhan gyis brjod min lhan cig skyes// gang du yang ni mi rnyed de// bla ma'i dus thabs bsten pa dang // bdag gi bsod nams las shes bya/ / dman pa 'bring dang mchog rnams dang // gzhan dang gang rnams de rnams kyang // ro mnyam de nyid bsgoms pa yis// 'di kun mnyam pa nyid du blta// dman pa rnams ni dra ba'i don/ / mchog ni dngos por brjod par bya// dbu ma gnyis kyis spangs pa nyid// gzhan rnams zhes bya dbang po drug/ gang rnams de rnams brtan dang g.yo// 'di kun zhes bya ba nyid de/ ma'am nyid mtshungs par 'dod pa nyid// ro mnyam de nyid bsgoms pa ni// mnyam zhes bya ba mtshungs par brjod// de yi 'khor lo ro zhes brjod// sgom pa ro gcig mnyam pa nyid// 'dis ni don gyis brjod par bya/ / nga las 'gro ba thams cad 'byung // nga las gnas gsum po yang 'byung // nga yis 'di kun khyab pa ste// 'gro ba'i rang bzhin gzhan ma mthong // de ltar rnal 'byor pas shes na/ / shin tu ma'am gzhag gang goms pa// bsod nams chung ba'i mi yis kyang // de ni 'grub par the tsom med// bza' dang btung dang blugs pa dang // nyal dang log dang sems pa na// phyag rgya chen po mngon 'dod pas// de nas mngon du 'gro bar 'gyur// gang phyir yid kyis mi sgom par// 'gro ba thams cad bsgom par bya// thams cad chos ni yongs shes na// sgom pa nyid ni/ sgom pa min// brdar dang g.yo ba'i dngos po gang // rtswa lcug 'khri shing la sogs pa// bdag gi dngos po'i rang bzhin las// dam pa'i de nyid nges bsgom bya// de rnams dam pa gcig yod min rang rig bde ba chen po nyid/ / rang rig nas ni byang chub 'gyur// rang rig phyir na sgom pa nyid// rang gis rig par 'gyur ba las// mnan pa las ni las skyes te// rang gis 'phrog cing rang gis byed/ rang rig rgyal po rang gtso bo// 'dod chags zhe sdang phrag dog dang // de bzhin gti mug nga rgyal nyid// de kun de gnas nyams dga' bar// bcu drug char yang mi phod do/ / chos 'byung las skyes ye shes ni// mkha' mnyam lhan cig thabs dang bcas// thabs dang shes rab rang bzhin las// 'jig rten gsum po de las skyes// khu ba'i rnam pa bcom ldan yin/ / de yi bde ba 'dod mar brjod// gcig dang du ma bral ba ste// skad cig gcig las mchog dga' ba// rang gis rig pa'i ye shes 'di// ngag gi lam 'das spyod yul te// 'di ni byin rlabs rim pa'i phyir/ / kun mkhyen ye shes de lta bu// sa dang chu dang rlung dang ni// me dang nam mkha' nyid dag ni// rang gzhan rig pa'i tshor ba yis// kun gyis skad cig mi gnod de// mtho ris mi yul rkang 'og gi/ skad cig las ni gzugs gcig 'gyur/ / rang gzhan cha yi rnam rtog gis// gnod pa nyid ni rus pa min// thams cad rig byed grub mtha' dang // de bzhin las rgyas la sogs pas// srid pa dag pa'i dngos grub min/ / yang ni srid mthar skye bar 'gyur// 'jig rten 'di dang pha rol tu// de med pas kyang dngos grub med// gang gis mi shes kye'i rdo rje// de ni ngal ba don med 'gyur// chu bo'i rgyun ni rab 'bab dang / / mar me'i rtse mo rab bcings ltar// rtag tu de nyid rnal 'byor gyis// nyin dang mtshan du mnyam par gzhag/ rnal 'byor ma'i 'khor lo zhes bya ba 'du ba'i le'u ste brgyad pa'o// / de nas mchog tu rnam par dag pa'i le'u bshad par bya'o// nges par dngos po thams cad kyi// dag pa de bzhin nyid du brjod// phyi nas re re'i dbye ba yis// lha rnams kyis ni brjod par bya/ / phung po lnga dang dbang po drug/ skye mched drug dang 'byung chen lnga// rang bzhin gyis ni rnam par dag/ nyon mongs shes bya'i sgrib byang bya// rang rig bdag nyid dag pa nyid// dag pa gzhan gyis rnam grol min/ / yul gyi dngos po dag pa'i phyir// rang gis rig pa'i bde chen mchog/ gzugs la sogs pa'i yul rnams dang // gzhan yang rnal 'byor pas mthong ba// dngos po de kun dag pa ste/ / 'di ltar 'gro ba sangs rgyas 'gyur// kye bcom ldan 'das rnam par ma dag pa gang lags/ bcom ldan 'das kyis bka' stsal pa/ gzugs la sogs pa'o// ci'i slad du zhe na/ gzung ba dang 'dzin pa'i dngos po'i phyir ro// rdo rje snying pos gsol pa/ kye bcom ldan 'das gzung ba dang 'dzin pa'ang gang lags/ bcom ldan 'das kyis bka' stsal pa/ mig gis gzugs ni gzung bar bya// sgra ni rna bas mnyan par bya// dri ni sna yis tshor bar bya// lce yis ro ni rig par bya// dngos po lus kyis reg par bya// yid kyis bde sogs thob pa ni// dag pas dug med byas nas ni// bsten bya 'di dag bsten pa nyid// gzugs phung rdo rje ma yin te// tshor ba la yang dkar mor brjod// 'du shes chu yi rnal 'byor ma// 'du byed rdo rje mkha' 'gro ma/ / rnam shes phung po'i tshul gyis ni// bdag med rnal 'byor ma gnas so// rtag tu 'di dag rnam dag pas// de nyid rnal 'byor pas 'grub 'gyur// de ni nang gi 'bar/ ma la'o// de nas phyi yi 'phar ma bshad// dbang ldan du ni puk+ka sI// mer ni de bzhin ri khrod ma// bden bral gdol pa mo gzhag cing // rlung du g.yung mo rnam par gzhag/ phyi ma lha mo dkar mo sogs/ / dbang dkar gshin rjer chom rkun ma// chu bdag phyogs su ro langs ma// lus ngan por ni g+hasma rI// 'og tu sa spyod ma zhes brjod// steng du mkha' spyod ma zhes bshad// bskyed pa'i rim pa nyid kyi phyogs/ / srid dang zhi ba'i rang bzhin gyis// lha mo 'di gnyis rnam par gnas// gzugs la dkar mor rtag tu bshad// sbal chom rkun ma rab grags// dri yi cha la ro langs ma/ / ro la g+hasma rI rab grags// reg la sa spyod ma zhes bshad// chos kyi dbyings la mkha' spyod ma// rtag tu 'di dag rnam dag pas// de nyid rnal 'byor pas 'grub 'gyur// phyag gi dag pa stong pa nyid/ / bdud dag pa las zhabs rnams nyid// rnam thar brgyad kyis zhal rnams nyid// rdo rje gsum gyis dag pa'i spyan// sa ni puk+ka sI zhes bshad// chu khams rngon pa ma zhes brjod/ / me ni gtum mor shes par bya// rlung ni g.yung mor rab tu grags// zhe sdang zhes bshad rdo rje ma// 'dod chags chu yi rnal 'byor ma// phrag dog rdo rje mkha' 'gro ma// ser sna gsang ba'i dkar mo nyid/ / gti mug de bzhin rdo rjer bshad// zhe sdang la sogs rnam sbyong ba// bskyed pa'i rim pa'i phyogs las ni// 'dis ni phung po sbyang bar bya// gang dang gang gis 'jig rten 'ching 'gyur ba/ / de dang des ni 'ching ba las grol te// de nyid mi shes 'jig rten mi grol zhing // de nyid rnam spangs dngos grub rnyed mi 'gyur// de phyir dri med sgra med gzugs nyid med// ro dang sems kyi rnam par dag pa med/ / reg med chos med thams cad rnam par dag/ rang bzhin dag pa'i 'gro la 'gro bar shes// rnam par dag pa'i le'u ste dgu pa'o// // de nas ji ltar dkyil 'khor gyi/ / rim pa yang dag rab tu bshad// gang gis slob ma dbang bskur ba'i// cho ga'ang rab tu bshad par bya// dang po lha yi bdag nyid kyi// rnal 'byor pas ni nor 'dzin sbyang / / 'bad pas hUM las rdo rje can// byas te phyi nas dkyil 'khor bri// tshal dang skye bo med gnas dang // byang chub sems dpa'i khyim dang ni// dkyil 'khor khang pa'i nang du yang // dkyil 'khor dam pa rab tu bzhengs/ / rdul tshon dam pa'i tshon dang ni// yang na 'bring po nyid kyis te// rin chen lnga yi phye ma 'am// yang na 'bras la sogs pas so// de nas dkyil 'khor khru gsum dang / / mthe bong gsum ni lhag par bya// der ni rigs lnga las byung ba'i// rig ma babang mo rnam par gzhug/ yang na ji ltar gang rnyed de// de ltar bcu drug lon pa nyid// ji srid khu ba ldan gyur pa/ / de srid phyag rgya bstan par bya// phyag rgya'i gdong yang bcing ba dang // thabs kyi gdong yang de bzhin no// bsten pa de las gang byung ba// slob ma'i khar ni btung bar bya/ / ro mnyam slob ma'i spyod yul nyid// de nyid la yang bya bar bya// rang rig ye shes nyid du 'gyur// rang gzhan yang dag rig pa spangs// mkha' mnyam rdul bral stong pa nyid// dngos dang dngos med bdag nyid mchog/ thabs dang shes rab shin tu 'dres// chags dang chags bral rnam par 'dres// de nyid srog chags rnams kyi srog/ de nyid yi ge dam pa nyid// de nyid 'gro ba'i bdag nyid de/ / de nyid thams cad khyab pa po// thams cad lus la rnam par gnas// dngos dang dngos med de las byung // gzhan dang gang rnams de rnams dang // rnam par shes pa kun gyi tshul/ / skyes bu sngon rabs dbang phyug dang // bdag dang gso ba sems can dang // dus dang gang zag nyid dang ni// dngos po kun gyi rang bzhin 'di// sgyu ma'i gzugs kyis yang dag gnas/ / dang po dga' ba tsam nyid de// gnyis pa'i grangs la mchog dga' nyid// gsum pa las ni dga' bral bshad// bzhi pa lhan cig skyes par brjod// de bzhin gshegs/ pa rnams dang ni// rdo rje snying po la sogs kun// mkhas pas de skad nges thos nas// mchog tu ngo mtshar gyur nas ni// brgyal zhing sa la 'gyel bar gyur// dang po dga' ba 'gro ba'i gzugs/ / de bzhin mchog dga' 'gro ba nyid// dga' bral dga' ba'ang 'gro ba nyid// gsum pa lhan cig skyes pa med// bcom ldan bka' stsal kye'i rdo rje// sangs rgyas kun gyi sku gcig pa/ / rdo rje snying pos rtogs bya'i phyir// the tshom legs par sel ba ni// 'dod chags med cing chags bral med// dbu mar dmigs par mi 'gyur ro// gsum po spangs pa nyid kyi phyir/ / lhan cig skyes pa byang chub brjod// yang na de nyid thams cad bdaka/ yang na kun gyis rnam par spangs// de yang dga' bral dang por mtshon// dga' ba gsum po rnam par spangs// dang po sprin dang 'dra ba yin/ / grub pa sgyu ma lta bur 'gyur// gnyid log sad par mi byed par// nyal dang log pa'i khyad par las// rtag tu rmi lam 'dra bar 'gyur// dngos grub mtshan nyid mi phyed pa'i/ / phyag rgya rnal 'byor pa yis 'grub// ston pas dkyil 'khor 'di skad gsungs// gru bzhi yang dag 'bar ba nyid// sgo bzhi gzi brjid chen po ste// do shal ngo shal phyed pas brgyan/ / 'phreng ba sna tshogs rnga yab ldan// ka ba brgyad kyis nye bar brgyun// rdo rje srang bu mnyam par ldan// ma tog sna tshogs nye bar brgyan// bdug pa mar me de bzhin dri// bum pa brgyad la sogs pas ldan/ / de yang yal ka la sogs ldan// mgrin pa gos kyis dgab pa dang // rin chen lnga ni yongs su gzhug/ rnam par rgyal ba shar du sbyin// rang 'dod lha yi gzugs kyis ni/ / gsar pa legs par bkal ba dang // shin tu tshad ma mdzes pa mi// srad bus shes rab can gyis gdag/ 'khor lo'i bdag po'i bzlas pa 'bum/ dkyil 'khor can gyi de bzhin khri// gong du gsungs pa'i sngags nyid kyis// mkhas pas nor 'dzin rnam par sbyang // gong gi a sogs sngags kyis ni// de la gtor ma rnam par sbyin// ji ltar bsam gtan de bzhin 'dir/ / srung ba ji ltar gsungs pa nyid// gang zhig dbang ni rab phye ba// rang gi dkyil 'khor cho gas sbyin// mchod dang gsol ba gdab pa nyid// ji ltar bshad pa de bzhin 'dir/ / 'phar ma gnyis bzang rnam bris nas// myur du dkar mo la sogs bri// shar du gri gug rnam par bri// lho dang nub tu'ang de bzhin no// byang dang me yi mtshams dang ni// bden bral rlung du'ang de bzhin no/ / dbang ldan du ni ci gsungs pa// de lta de ltar 'og dang steng // rdo rje sems dpa'i snyems byas nas// rkang pa g.yas pa brkyang byas te// phyag gnyis kye yi rdo rjer sbyor// slob dpon dkyil 'khor 'jug pa nyid// khrus dang gtsang sbra dri zhim lus// sna tshogs rgyan gyis rnam par brgyan// hUM hUM snyems pa byas nas ni// hi hi rnam par 'jig byed bdag/ phyi nas de nyid yang dag bshad/ / rnam dag ye shes gzugs can dang // 'khor ba dang ni mya ngan 'das// khyab par cung zad yod ma yin// mchog dgar sgom pa med cing sgom pa po'ang med// lus kyang med cing gzung ba med dang 'dzin pa'ang med/ / sha dang khrag kyang med cing bshang dang gci ba'ang med// skyug bro rmongs med gtsang sbra mchod phyir thogs med dang // chags med sdang ba med dang rmongs med phrag dog med/ / ser sna med dang nga rgyal med cing mthong bya med// sgom dang sgom pa po med bshes dang dgra med cing // rlom sems med pa'i lhan cig skyes pa sna tshogs nyid// rdo rje snying pos 'di skad gsol/ / gzod nas rang bzhin med pa yi// lus kyi rang bzhin dag pa ni// ci slad 'byung ba'i bdag nyid lags// de nas bcom ldan rdo rje can// mkha' 'gro bde ba sbyin pas gsungs// rlom sems med pa'i rang bzhin bdag/ thams cad lus la rnam par gnas// kye bcom ldan 'das ci'i slad du 'byung ba chen po las gyur pa'i phung po lags/ bcom ldan 'das kyis bka' stsal pa/ bo la ka k+ko la sbyor bas// reg pa sra ba'i chos kyis ni// sa ni de las skye bar 'gyur// byang sems khu ba'i rnam pa las// chu yi khams ni 'byung bar 'gyur// bskyod pa las ni drod skye ste// 'gro ba rlung du rab tu grags/ / bde ba nam mkha' nyid kyi khams// lnga po rnams kyis yongs su bskor// gang phyir 'byung ba che bde ba// de phyir bde ba de nyid mni// lhan cig skyes pas gang skyes pa// lhan cig skyes par de brjod bya// rang bzhin lhan cig skyes zhes brjod// rnam pa thams cad sdom pa gcig/ phyag rgya rgyu dang bral ba las// yo gi snying rje thabs su 'gyur// stong nyid snying rje dbyer / med pa// byang chub sems zhes rab tu brjod// sngags kyi bzlas med dka' thub med dang sbyin sreg med// dkyil 'khor can yang med cing dkyil 'khor yang ni med// de ni sngag bzlas de dka' thub dang de sbyin sreg/ de ni dkyil 'khor can dang de ni dkyil 'khor nyid// mdor bsdus nas ni sems ni 'dus pa'i gzugs can no// dbang gi le'u zhes bya ste bcu pa'o// / mnyam par ma rungs dpral ba can// rtag tu ltung bar byed par brjod// dbang gi lta stangs g.yon na gnas// g.yon pa nas ni gzugs brnyan gnyis// g.yas pa'i cha la dgug pa/ nyid// steng nas kyang ni gzugs brnyan gnyis// dbu ma rengs pa'i lta stangs nyid// sna yi rtse mo'i dbus su gnyis// 'byung ba nyid kyis ltung bar byed// rngub pa yis ni dbang du byed// dgang ba yis ni dgug pa nyid/ / zhi ba yis ni rengs par byed// rlon pa'i shing la ltung byed nyid// dbang ni me tog rab tu grags// rdo rje'i shing la dgug pa nyid// g.yo bcas rtswa la rengs byed nyid// rma drug goms pa'i sbyor ba yis/ / 'grub 'gyur 'di la the tsom med// 'di la 'khrul par mi bya ste// sangs rgyas rdzu 'phrul bsam mi khyab// lta stangs bzhi po bsgrubs nas ni// mkhas pas sems can gzhug par bya/ / gsad par 'di la bya ma yin// dam tshig nges par nyams par 'gyur// sems can bslu ba spangs nas ni// bya ba ma yin thams cad bya// sems can gnod pa tsam gyis ni// phyag rgya'i dngos grub rnyed mi 'gyur// de la dam tshig bza' bya ba// na dang ga ha dang po dang // mtha' yi shwa dang dang po'i shwa// kye yi rdo rje'i dngos grub phyir// bdud rtsi lnga yang de bzhin bza'/ kye yi rdo rjes gsungs mtshan nyid// skye ba bdun pa'ang de nas mtshon// dga' bral dga' ba la smod pa// lan bdun pas ni 'grub par 'gyur// skad snyan mig dang ldan pa dang // dri lus gzi brjid chen po dang / / de yi grib ma bdun du 'gyur// mthong nas rnal 'byor pa yis mtshon// de ni zos pa tsam gyis ni// skad cig la ni mkha' spyod 'gyur// ku ru kul+le'i sgrub thabs bshad par bya ste/ / gong du brtag pa bcu gnyis par// rgyas par gsungs pa mdo ru bsdu// hrIHlas byung ba'i lha mo ni// kha dog dmar zhing phyag bzhi ma// mnga' dang gzhu yi lag pa ma// ut+pa la dang lcag kyu 'dzin/ / 'di ni bsgoms pa tsam gyis ni// 'jig rten gsum po dbang du byed// 'bum phrag gcig gis rgyal po rnams// khri yis 'jig rten phal pa nyid// bye bas phyugs dang gnod sbyin sogs/ / 'bum phrag bdun gyis lha ma yin// 'bum phrag gnyis kyis lha rnams nyid// brgya phrag gcig gis sngags pa nyid// kye'i rdo rje mkha' 'gro ma dra ba'i sdom pa las rdo rje snying po mngon par byang chub pa zhes bya ba brtag pa'i rgyal po rdzogs so/ / // rdo rje'i snying pos gsol pa/ bcom ldan rdo rje snying po bdag/ sangs rgyas thams cad gcig bsdus pa/ rab gnas mtshan nyid bzang po nyid// rim pa ji bzhin bshad du gsol// bcom ldan 'das kyis bka' stsal pa// ci gsung sbyin sreg byas nas ni// dkyil 'khor dam pa bzhengs pa dang / / snga bar sku gzugs sbyang ba dang // sta gon la sogs byas nas ni// nam mkhar bzhugs pa'i sangs rgyas kun// sku gzugs snying khar rab tu gzhug/ rang 'dod lha mnyam rnal 'byor pa/ / rab mthong sngags kyi pha rol son// oM badz+ra puSh+pe AHhUM swA hA/ oM badz+ra d+hU pe AHhUM swA hA/ oM badz+ra dI pe AHhUM swA hA/ oM badz+ra gan+d+he AHhUM swA hA/ oM badz+ra nai wi d+ye AHhUM swA hA/ sna tshogs hUM ni rdzogs pa dang // me tog la sogs dbul ba nyid// gong ma'i rgyud kyi cho ga rim pas// mchod yon zhabs bsil gong ma bzhin// zhi ba'i thab khung zlum po nyid// rgyas pa nyid kyi gru bzhi pa/ / gsad pa la ni gru gsum brjod// 'di nyid la ni lhag ma sgrub// khru gang dang ni khru phyed nyid// zhi ba'i steng dang 'og tu yin// khru do dang ni khru gang nyid// rgyas pa'i steng dang 'og tu brjod/ / sor mo nyi shu'am de yi phyed// gsad pa'i steng dang 'og tu yang // zhi bar kha dog dkar por 'gyur// rgyas par ser po de bzhin no// gsad pa la ni kha dog gnag/ dbang la dmar por rab tu grags/ / dbang la ji bzhin de ltar dgug/ gsad la ji ltar zhe sdang sogs// zhi la til dang rgyas la zho// gsad la tsher ma de bzhin no// sdang la sogs pa'ang tsher mar brjod/ / dbang dang dgug la ut+pa la// oM ag+na ye ma hA te dza sarba kArma pra sA d+ha kaH/ ka ru Ni kr-i ta sa twAr+tha a smin san+ni hi to b+ha bA/ me dgug pa'o// ma ma rin chen sna tshogs 'dzin// kye yi rdo rje / khros mchod pa'i// lha mo khyod ni dpang du 'gyur// che ge bdag ni dkyil 'khor 'dri// swAr+thany+tse ba pa rAr+thany+tsa sA d+hi tAM gats+tsha ha bya b+hu ka/ A ga mi Sh+ya si ya thA kA le sarba sid+d+hi ku ru ShA me/ me dga' ba'i sngags so/ / oM dzaHhUM baM hoHkhaM raM/ mchod yon gyi sngags so// oM ni ri ti hUM khaM/ zhabs bsil gyi sngags so// oM d+hU dz+nyA/ lha bshos kyi sngags so// kye'i rdo rje mkha' 'gro ma dra ba'i sdom pa las brtag pa gnyis pa rab gnas kyi le'u ste dang po'o/ / // rdo rje snying pos gsol pa/ nam mkha' lta bu'i chos kun la// rgya mtshor bkur ba ji lta bar// rang 'dod lha yi gzugs las ni/ / sems can ji ltar 'grub par 'gyur// bcom ldan 'das kyis bka' stsal pa// bdag med rnal 'byor ldan pa 'am// yang na he ru ka dpal brtson// gzhan pa'i sems kyis skad cig kyang / / dngos grub 'dod pas mi gnas so// dang po goms par byed dus kyi// gnas ni gang du bsngags pa'i sems// gcig tu mnyam gzhag 'grub 'gyur ba'i// gnas ni bzang por nges par brtag/ rang gi khyim du mtshan dus su// bdag nyid 'grub pa'i sems kyis ni// rnal 'byor ma sgom shes rab can// yang na he ru ka dpal gzugs// rkang pa 'khrud dang za ba dang / / 'thor 'thung so rtsi za ba dang // tsan ngan gyis ni lag nyed dang // smad g.yogs kyis ni rked 'gebs dang // 'byung dang sgra dang 'gro ba dang // 'dug dang khro dang rgod pa dang / / bcom ldan 'das ma bsten pa dang // shes rab brtul zhugs can nyid kyis// rnal 'byor ma ni rnam par sgom// gzhan gyi tshul gyis skad cig kyang // 'dug pa'i sems ni ma rigs pas/ / dngos grub 'dod pas dngos grub phyir// mkhas pas 'bad pas mi gnas so// bsam gtan nyon mongs 'jigs byed pa// rdo rje snying po nga yis bshad// brtse bas dngos grub don du yang / zla ba phyed du yongs su rtogs// bsam pa thams cad yongs spangs nas// lha yi gzugs su sems pa yis// nyi ma gcig tu ma chad par// sgom pas yongs su brtag par bgyis// rang gzhan don ni rab sgrub phyir/ / 'khor bar thabs gzhan yod ma yin// rig ma lhan cig goms byas pas// 'phral du mngon du byed pa nyid// 'jigs spro de bzhin sdug bsngal dang // mya ngan gdung ba 'tshe ba dang / / 'dod chags zhe sdang gti mug che// sgrub pa po ni nyon mi mongs// phan dang gnod pa'i 'bras 'byung bar// de ltar nges par shes nas ni// ji ltar de ni skad cig kyang // rnal 'byor pa rnams ngu 'bod gnas/ / mtshams med lnga ni byed pa dang // srog chags gsod la dga' ba dang // gzhan yang skye ba dman gang dang // rmongs dang ma rungs las byed dang // gzugs ngan yan lag ma tshang bas/ / bsams pas de rnams 'grub par 'gyur// dge ba bcu la goms pa dang // bla ma la gus dbang po dul// nga rgyal khro las rnam par grol// des ni re zhig nges 'grub 'gyur// rtag tu goms pa'i rnal 'byor gyis// mnyam par gzhag pas dngos grub thob// zla ba gcig tu gsang la sprad// ji srid phyag rgya ma rnyed par// gnang ba rnyed 'gyur sngags pa la// rnal 'byor ma yis bstan par bya/ / phyag rgya che ge mo khyer la// sems can don gyis rdo rje 'dzin// rnyed pa de yang mig yangs ma// gzugs dang lang tshos rnam par brgyan// si h+la ga pur yang dag ldan// byang chub sems kyis rnam par sbyang / / dge ba bcu las brtsams nas ni// de la chos ni rab tu dbye// lha yi gzugs kyi sems dang ni// dam tshig sems kyang gcig pa nyid// zla ba gcig gis skal ldan par/ / 'gyur ba 'di la the tshom med// mchog thob pa yi bud med gang // rtog pa thams cad yang dag spangs// yang na bdag gi nus pa yis// lha dang lha min mi rnams dang // gnod sbyin mi 'am ci las kyang / / phyag rgya bkug la rab tu brtag/ de yang khyer la spyod pa spyad// bdag gi dal ba mngon du'i phyir// gang bshad 'jigs pa'i gzugs can gyi// spyod pa longs spyod phyir ma gsungs/ / yid ni brtan nam g.yo 'am ci// rang gi sems ni so sor brtag/ rdo rje snying pos gsol pa// bdag med rnal 'byor ldan pa yis// phyag rgya nyid ces ji ltar brjod// phyag rgya phyag rgya nyid dag gis/ / phyag rgya'i dngos grub ji ltar 'grub// bcom ldan 'das kyis bka' stsal pa// bud med gzugs ni spangs nas ni// bcom ldan 'das gzugs su bya/ / nu ma spangs pa po lar 'gyur// kak+ko la dbus yang dag gnas// 'gram gnyis dril bu nyid du 'gyur// be'u 'bru bo la can du 'gyur// lhag ma bdag nyid chen po nyid// dga' chen he ru ka yi gzugs// he ru ka sbyor skyes bu nyid// 'bad pa med par skyes bur 'gyur// gsal bar nus pa'i rnal 'byor pas// de phyir phyag rgya'i dngos grub 'gyur// chags dang 'jig pa dag gis kyang / / thabs dang shes rab gnod mi 'gyur// gang phyir thabs ni 'byung ba nyid// 'jig pa shes rab srid mthar byed// des na rab 'jig yod ma yin// de nyid la ni chags pa med/ / la la 'jig pas 'jig par 'gyur// 'jig pa'i dngos med zad pa med// bskyed pa'i rim pa'i rnal 'byor gyis// brtul zhugs can gyis spros pa sgom// spros pa rmi lam ltar byas nas/ / spros pa nyid ni spros med byed// ji ltar sgyu ma rmi lam dang // ji ltar bar ma'i srid yin pa// rtag tu goms pa'i sbyor ba las// dkyil 'khor nyid ni de bzhin 'dod// phyag rgya chen por dbang bskur bar// ji ltar shes pa'i bde chen po// 'di ni de yi byin rlabs yin// gzhan las dkyil 'khor 'byung ba med// bde ba gnag cingabade ba ser/ bde ba nga mar pob de ba da ka ra// bde ba ljang ku bde ba sngo// bde ba rgyu dang mi rgyu kun// bde ba shes rab bde ba thabs// de bzhin kun tu ru skyes bde// bde ba dngos po dngos med bde/ / rdo rje sems dpa' bde bar brjod// rdo rje snying pos gsol pa/ rdzogs pa'i rim pa'i rnal 'byor 'di// de yi bde ba bde chen brjod// rdzogs pa sgom pa med pa ste/ bskyed pa yis na ci zhog 'tshal// bcom ldan 'das kyis bka' stsal pa// e ma'o byang chub sems dpa' che// dad pa'i shugs kyis rab tu nyon// lus kyi dngos med gang las ba de// bde ba smra bar mi nus so// khyab dang khyab byed tshul gyis ni// bde bas 'gro ba khyab pa nyid// ji ltar me tog la gnas dri// me tog dngos med shes mi 'gyur// de bzhin gzugs sogs dngos med pas/ / bde ba nyid kyang dngos med 'gyur// dngos po dngos po med pa nga // dngos po rtogs phyir sangs rgyas pa// gang zhig le los bsnun pa dang // rmongs pa gang gis nga mi shes// / rdo rje btsun mo'i b+ha ga ni// e yi rnam pa'i cha byad gzugs// sangs rgyas rin chen za ma tog/ bde ba can du rtag tu bzhugs// 'chad pa po nga chos kyang nga// rang gi tshogs ldan nyan pa dag 'jig rten ston pa bsgrub bya nga / / 'jig rten 'jig rten 'das pa nga // lhan cig skyes dga'i rang bzhin nga // mchog mtha' dga' bral dang por ni// mun pa la ni mar me ltar// de bzhin bus kyang yid ches gyis/ / btsun mo'i b+ha ga bde chen du// ston pa sum cu rtsa gnyis mtshan// gtso bo dpe byad brgyad cur ldan// khu ba zhes bya'i rnam par gnas// de med pas na bde med 'gyur/ / bde ba med na de med 'gyur// nus pa med phyir ltos dang bcas// lha yi rnal 'byor las bde ba// de phyir sangs rgyas dngos po min// de nyid dngos med tshul yang min/ / zhal phyag rnam pa'i gzugs can nyid// mchog tu bde ba gzugs med pa// de phyir 'gro kun lhan cig skyes// rang bzhin lhan cig skyes par brjod// rnam dag rnam pa'i sems kyis ni/ / rang bzhin mya ngan 'das pa nyid// lha yi rnam pa'i gzugs kyis ni// bzhin lag kha dog gnas pa ni// skyes pa tsam gyis rnam par gnas// 'on kyang bag chags pal pas so// / dug gi dum bu gang nyid kyis// skye bo thams cad 'chi bar 'gyur// dug gi de nyid shes pa des// dug gis dug ni 'bigs par byed// ji ltar rlung gis zin pa la// mon sran sde'u yi bza' ba sbyin/ / bzlog pa'i sman ni brtags pa yis// rlung gis rlung la snun par byed// rnam rtog las ni rnam rtog dang // srid pa nyid kyis srid pa dag/ ji ltar rna bar chu zhugs pa// chu gzhan dag gis 'gugs par byed/ / de bzhin dngos po'i rnam rtog kyang // rnam par nges pas sbyang bar bya// ji ltar 'tshed pas tshig pa yang // me yis kyang ni gdud par bya// de bzhin 'dod chags mes 'tshig pa/ / 'dod chags me yis gdung bar bya// skye bo mi bzad pa yi las// gang dang gang gis 'ching 'gyur ba// thabs dang bcas na de nyid kyi// srid pa'i 'ching ba las grol 'gyur/ / chags pas 'jig rten 'ching 'gyur pa// 'dod chags nyid kyis rnam grol 'gyur// bzlog pa'i sgom pa 'di nyid ni// sangs rgyas mu stegs kyis mi shes 'byung ba lnga yi rang bzhin las/ / kun tu rul lnga ru 'gyur// dga' ba chen po gcig nyid las// dbye bas lnga ru 'gro bar 'gyur// bo la kak+ko la sbyor bas// reg pa sra ba'i bag chags nyid/ / sra ba gti mug chos kyi phyir// gti mug rnam par snang mdzad brjod// gang phyir byang sems gsher ba nyid// gsher ba chu yi khams su brjod// chu ni mi bskyod gzugs kyi phyir/ zhe sdang 'dren pa mi bskyod pa// gnyis kyis bskyod pa'i sbyor ba las// drod ni rtag tu skye bar 'gyur// 'dod chags dpag med rdo rje yin// 'dod chags drod las 'byung bar 'gyur// kak+ko lar ni gang zhig sems/ / de ni rlung gi rang bzhin can// phrag dog don yod grub pa yin// don yod rlung las 'byung ba nyid// bde ba 'dod chags khrag tu 'gyur// dga' ba nam mkha'i mtshan nyid do/ / nam mkha' ser sna rdo rjer 'gyur// ser sna nam mkha' las byung nyid// sems ni chen po gcig nyid la// lnga yi gzugs kyis rnam par mtshon// rigs ni lnga po de nyid las// stong phrag du ma skyes pa nyid// de phyir 'di dag rang bzhin gcig/ bde chen mchog tu rtag pa nyid// 'dod chags la sogs sems lnga yi// dbye bas lnga ru 'gro bar 'gyur/ gang+gA'i klung ni bcu yi bye snyed nyid// rigs gcig la ni de bzhin gshegs pa'i tshegs// rigs kyi tshogs la rigs ni du ma rnams// de rnams rigs la rigs ni rnam pa brgya// de rnams la yid 'bum phrag rigs chen rnams/ / bye ba'i rigs la grangs ni med par 'gyur// de la rigs la grangs med rigs rnams nyid// mchog tu dga' ba'i rigs las byung ba rnams// kye'i rdo rje mkha' 'gro ma dra ba'i sdom pa las dngos grub gtan la dbab pa'i le'u ste gnyis pa'o// // de nas rdo rje can gyis rnal 'byor ma rnams la rgyud thams cad kyi zla gzhi zhes bya ba'i thabs bka' stsal pa/ sdom pa dang ni dbang dang yang // de bzhin dgongs pa'i skad nyid dang // dga' dang skad cig dbye ba dang // gzhan yang bza' ba la sogs pa// de la sdom pa bka' stsal pa/ / sangs rgyas kun gyi sdom pa ni// e baM rnam par rab tu gnas// e baM rnam pa'i bde chen po// dbang las yang dag shes par 'gyur// de nas rnal 'byor ma rnams kyis/ / bcom ldan 'das rdo rje sems dpa' la 'di skad ces gsol to// bcom ldan ston pa 'gro ba'i bla// mkha' 'gro ma yi sdom pa nyid// e baM rnam pa ci zhes brjod// rim pa ji bzhin bshad du gsol/ / bcom ldan 'das kyis bka' stsal pa// e yi cha byad bzang po gang // dbus su baM gyis rnam par brgyan// bde ba thams cad kyi ni gnas// sangs rgyas rin chen za ma tog/ skad cig dbye bas phye ba nyid// dga' ba de las skye bar 'gyur// skad cig shes nas bde shes pa// e baM rnam par rab tu gnas// sna tshogs dang ni rnam smin dang // rnam nyed de bzhin mtshan nyid bral/ / skad cig bzhi ni rab shes pas// de ltar rnal 'byor pas shes 'gyur// 'khyud dang 'o byed la sogs pa// sna tshogs rnam pa sna tshogs bshad// rnam par smin pa de las bzlog/ bde ba'i ye shes za ba nyid de// bdag gi bde ba zos pa yi// gros ni rnam par nyed par brjod// mtshan nyid bral ba gsum las gzhan// chags dang chags bral rnam par spangs/ / sna tshogs dang po'i dga' ba nyid// rnam smin la ni mchog dga' nyid// rnam nyed dga' ba dga' bral nyid// mtshan bral lhan cig skyes dga' nyid// slob dpon gsang ba shes rab dang / / bzhi pa de yang de bzhin no// dbang ni bzhi yi grangs kyis ni// dga' ba la sogs rim shes bya// dgod pa dag pa slob dpon nyid// lta ba gsang ba de bzhin no// lag bcangs las ni shes rab nyid/ / gnyis gnyis 'khyud la de yang nyid// sems can rnams kyi dngos grub phyir// dbang ni rnam pa bzhi ru bshad// gtor dang blugs pa zhes bya 'dis// des na dbang zhes brjod par bya/ / shes rab bcu drug lon pa la// lag pa dag gis yang dag 'khyud // rdo rje dril bu mnyam sbyor bas// slob dpon dbang du rab tu brjod// shin tu ba bzang mig yangs ma/ / gzugs dang lang tshos rnam par brgyan// mthe bong srin lag dag gis ni// slob ma'i kha ru ltung bar bya// de nyid du ni mnyam pa'i ro// slob ma'i spyod yul dag tu bya// ston pas shes rab rab tu mchod// rjed par byas nas gtad par bya// ston pas smras pa sems dpa' che// phyag rgya bde ba ldan pa khyer// phrag dog khro ba rnam spangs pa'o// slob ma cher gyur shes nas ni/ / ston pas de la gnang ba sbyin// kun tu ru gyis rdo rje 'dzin// ji ltar dbang bskur gsol btab pa'i// slob ma'i bya ba bshad par bya// bla ma phyag rgya ldan mthong nas// bstod dang mchod pa ji bzhin bya// bcom ldan zhi ba chen po kye// rdo rje rnal 'byor gcig bzhed pa// mi phyed phyag rgya sgrub pa po// rdo rje rnal 'byor las byung ba// ji ltar khyod ni bdag nyid che// mnga' bdag bdag la'ang de ltar mdzod// 'khor ba 'dam gyi tshogs dag tu// bying ba skyabs med bdag la skyobs// zhim pa'i bza' ba btung ba dang // ba la che mchog ma da na// bdug palha bshos 'phreng ba dang / / dril bu rgyal mtshan byug pa yis// 'di rnams mchod pa rnams kyis ni// slob mas rdo rje 'dzin pa mchod// mchog tu dga' ba yang dag thob// sna tshog spangs pa'i skad cig la/ / ston pas smras pa sems dpa' che// bde ba chen po rnam par zung // ji srid byang chub bar du ni// sems can don gyis rdo rje 'dzin// slob ma snying rje can mthong nas// / rdo rje can gyis 'di skad smras// 'di ni ye shes chen po nyid// thams cad lus la rnam par gnas// gnyis dang gnyis su med pa'i tshul// dngos po dngos med bdag nyid gtso// brtan dang g.yo ba khyab nas gnas/ / sgyu ma'i gzugs can nyid du 'dod// dkyil 'khor 'khor lo'i thabs kyis ni// rtag tu nges par 'gro bar 'gyur// de nas rdo rje snying pos rnal 'byor ma rnams la bzod par gsol nas/ bcom ldan 'das la 'di skad ces gsol to// dkyil 'khor 'khor lo ci zhes brjod// sangs rgyas kun bdag grong khyer la// bcom ldan bdag ni 'khrul gyur pas/ / rim pa ji ltar bshad du gsol// bcom ldan 'das kyis bka' stsal pa// dkyil ni snying po zhes byar brjod// byang chub sems ni bde chen po// dang po mthar byed ces bya ba// 'dus pa dkyil 'khor nyid du brjod/ / 'khor lo zhes bya nam mkha'i khams// yul la sogs pa rnam par sbyong // bo la kak+ko la sbyor bas// de yi bde ba shes par 'gyur// rdo rje snying pos gsol pa sdom pa zhes bya gang gis dang / / dam tshig gang gis gnas par bgyi// bcom ldan 'das kyis bka' stsal pa// khyod kyis srog chags gsad pa dang // brdzun gyi tshig kyang smra ba dang // / khyod kyis ma byin par yang long // pha rol bud med bsten par gyis// sems gcig srog chags gsod pa nyid// gang phyir srog ni sems su brjod// 'jig rten bsgral ba zhes bya ba/ / brdzun gyi tshig tu rab tu bsgrags// btsun mo'i khu ba ma byin par// gzhan gyi bud med rang mtshungs mdzes// de nas rnal 'byor ma thams cad kyis bcom ldan 'das la 'di skad ces gsol to/ / yul de rnams kyang ci lags/ dbang po rnams ni gang lags/ skye mched ni ci lags/ phung po rnams ni gang lags/ khams rnams de'ang ci lags// 'di rnams kyi rang bzhin ni ci lags/ bcom ldan 'das kyis bka' stsal pa/ yul drug ni/ gzugs sgra de bzhin dri dang ni// ro dang de bzhin reg bya nyid// chos kyi khams kyi rang bzhin nyid/ / 'di rnams yul ni drug tu brjod// dbang po rnams ni drug ste/ mig dang rna ba sna dang ni// lce dang lus dang de bzhin yid// 'di rnams dbang po drug po ni// gti mug rdo rje la sogs ldan/ / yul dang yul can dag gis ni// skye mched bcu gnyis dag tu 'gyur// phung po lnga ni gzugs la sogs// mthar ni rnam shes snying rje che// dbang po dang ni yul nyid dang / / dbang po'i rnam par shes pa nyid// rnal 'byor ma rnams go cha'i phyir// khams ni bco brgyad rnams su bshad// rang bzhin gdod nas ma skyes pa// brdzun min bden min de bzhin du/ thams cad chu yi zla ba ltar// 'dod pas rnal 'byor mas shes gyis// 'di lta ste/ gtsub shing dang / gtsub stan dang / skyes bu'i lag pa'i rtsol ba las glo bur du me skye bar 'gyur ro/ / me de gtsub shing la'ang mi gnas/ gtsub stan la'ang ma yin/ skyes bu'i lag pa dag la'ang ma yin te/ rnam pa thams cad du yongs su btsal na gcig na'ang yod pa ma yin pas/ me de'ang bden pa'ang ma yin zhing brdzun pa'ang ma yin no// de ltar chos thams cad rnal 'byor mas yid la gyis shig/ de nas rnal 'byor ma bdag med ma la sogs pa rdo rje mkha' 'gro ma thams cad bdud rtsi lnga thogs shing dam tshig gi rdzas thogs pas bcom ldan 'das rdo rje sems dpa' la mchod par byed/ kun tu ru'i sbyor bas rjes su chags par byed// bdud rtsi lnga'i ro'ang 'thung bar byed do/ / de nas bcom ldan 'das dgyes nas rang byin gyis brlabs pa bstan pa/ kye kye rdo rje mkha' 'gro ma// sangs rgyas kun gyis phyag mdzad pa// de nyid bdag gis gsang mdzad pa/ / rdo rje mchod pa'i byin rlabs kyis// bshad kyis 'dod pas rab tu nyon// lha mo thams cad dga' bar gyur/ rangs par gyur te/ pus mo g.yas pa'i lha nga sa la btsugs nas bcom ldan 'das ga la ba der thal mo sbyar ba btud nas/ bcom ldan 'das kyi gsung nyan no// bcom ldan 'das kyis bka' stsal pa// bza' btung ji ltar rnyed pa dang // bgrod dang 'grod min mi spang zhing / / khrus dang gtsang sbra mi bya ste// grong gi chos ni rab tu spang // blo ldan sngags nyid mi bkra zhing // bsam gtan nyid ni dmigs mi bya// gnyid ni spang bar mi bya ste/ / dbang po rnams ni mo dgag go// ba la thams cad bza' bar bya// kha dog lnga la mnyam par spyad// dogs pa med pa'i sems kyis ni// btsun mo thams cad dga' bar bya// mdza' bo sdug par mi bya zhing / / de bzhin gdug la zhe sdang nyid// rdo shing 'jim pa'i bdag nyid kyi// lha 'di rnams la phyag mi bya// g.yung mo gdol pa ko lpags mkhan// phyag bdar mkhan sogs reg rim dang / / bram ze rgyal rigs rje'u dmangs rnams// bdag gi lus ltar reg pa nyid// bdud rtsi lnga dang bu ram chang // dug dang nim pa bu btsas skyes// skyur dang dngar dang bska la sogs// kha ba lan tshwa tsha ba dang // dri nga dri zhim mchi rnag dang // byang chub sems kyis rab tu bza'// gnyis med ye shes sems kyis ni// mi bza' cung zad yod ma yin// rang byung me tog rnyed nas ni// pad+ma'i snod du gzhag pa dang // lud pa dang ni snabs dag gis// bsres nas brtul zhugs can gyis btung // smad g.yogs kha dog sna tshogs dang // ro bsregs thal bas de bzhin brgyan// me tog rab song gnas rnyed pas// mgo skyes legs par bcing bar bya// de nas rdo rje snying po sa gsol pa/ thams cad yul gyi rnam dag pa// bcom ldan 'das kyis sngar gsungs na/ nges par dbang po drug gi grangs// rnam par dag par ma mdzad pa/ bcom ldan 'das kyis bka' stsal pa// mig la gti mug rdo rje ma// rna bar zhe sdang rdo rje ma// sna la ser sna ma zhes bshad// kha la 'dod chags rdo rje ma/ / lus la phrag dog rdo rje ma// yid la bdag med rnal 'byor ma// dbang po rnams ni dag bya'i phyir// 'dis ni go cha sems dpa' che// rdo rje snying pos gsol pa/ dgongs pa skad ni ci zhes bgyi/ / bcom ldan 'das kyis nges gsung gsol// rnal 'byor ma yi dam tshig che// nyan thos la sogs mi shes pa// dgod dang lta ba dag gis dang // 'khyud dang de bzhin gnyis gnyis kyi/ / rgyud kyang rnam pa bzhi rnams kyis// dgongs pa'i skad ni ma bsgrags pa// bcom ldan nges par gsung du gsol// dgongs pa'i skad ni skad chen po// dam tshig brda ni rgyas pa ru// rdo rje snying po ngas bshad kyis// khyod ni rtse gcig sems kyis nyon// ma da na chang ba la sha// 'du ba ma la ya dzaM brjod// 'gro ba khe Ta ro na shrI pa// rus pa'i rgyan ni ni r-i shu// 'ong ba pr-i kha Na ru brjod// cang te'u kr-i pi ti ru brjod// skal med du du ra zhes brjod// skal ldan ka li dza ra brjod// reg min Din Di ma zhes brjod// zod pa pad+ma b+hAny+dza naM// bza' bkr-i pi ta zhes bya// tshong ma mA la tin+t+ra naM/ bshang ba tsa tu sa maM brjod// gci ba kastu ri zhes brjod// rang byung si h+lar shes par bya// khu ba ka pu ra zhes brjod// sha chen shA li dza zhes brjod// dbang po gnyis sbyor kun tu ru/ rdo rje bo la zhes bshad de/ / pad+ma kak+ko la zhes zer// kha dog dbye bas phye ba las// rigs ni rnam pa lnga ru bshad// 'di ni gsang ba'i skad yin no// phyag rgya lnga ni bsdus pa nyid/ / g.yung mo rdo rje'i rigs su bshad// gar ma de bzhin pad+ma'i rigs// ras 'tshed ma ni rin chen rigs// skye gnyis de bzhin gshegs par brjod// chos ma las kyi rigs nyid de// phyag rgya 'di rnams dngos grub sbyin// 'di rnams khu ba rdo rjer 'gyur// brtul zhugs can gyis mchod nas btung // rdo rje snying po sems dpa' che// gsang ba'i skad ni mtshar che ba// nga yis khyod la gang bshad pa/ / de rnams thams cad gus pas zung // kye rdo rje 'dir dbang bskur gang // gsang ba'i skad kyis mi smra ba// de yi dam tshig nyams par ni// 'gyur ba 'di la the tshom med/ / 'tshe ba dang ni rkun ma dang // gdon dang rims dang dug gis kyang // gal te sangs rgyas gsang ba'i skad// mi gsung na yang 'grongs par 'gyur// rang gi dam tshig rigs rnyed na// gal te tshig 'di mi smra ba// gnas bzhi las skyes rnal 'byor ma// de yi tshe na khro bar byed// kye'i rdo rje mkha' 'gro ma dra ba'i sdom pa las rgyud thams cad kyi gleng gzhi dang gsang ba'i skad ces bya ba'i le'u ste gsum pa'o/ / / de nas rdo rje snying po la sogs pa'i rdo rje mkha' 'gro ma thams cad the tshom du gyur/ yid gnyis su gyur te bcom ldan 'das rdo rje sems dpa' la 'di skad ces gsol to/ / bcom ldan the tshom bsal du gsol// spyod pa'i le'u las gang bshad pa// glu dang gar ni dngos grub sbyin// de la bdag ni the tshom mchis// glu ni ci lags gar yang ci/ / lha yi le'u las gang gsungs pa// zhe sdang la sogs phyag rgya rnams// de la bdag ni the tshom mchis// gang gi phyag rgya phyag rgya ci// sngags btu ba las gang gsungs pa/ bdag med la sogs sa bon nyid// de la bdag ni 'khrul par gyur// gang gi sa bon sa bon gang // rigs kyi le'u las gang bshad pa// bcu drug gnyis kyi bdag nyid rtsa// bcom ldan bdag ni 'khrul gyur pas/ / de rnams rnam dag bshad du gsol// bcom ldan 'das kyis bka' stsal pa// kol+la i reT+Ti a bo lA mum+ma Ni re kak+ko l+la/ g+ha Na ki pi Ta ho bA dzA i ka ru Ne ki a i na ro lA/ ta hi ba la khadz+dza i ga Do ma a NA pidzA a i/ ha liM kA liny+dza ra pa Ni a i du d+hu ra badz+dzi a i/ tsa u sa ma kAts+tsha ri si hA kap+sa ra lA i a i/ mA la i in+na Na shA lany+dzi ta hi b+ha ru khA i a i/ phreM kha Na khe Ta ka ran+te shud+d+ha a shud+d+ha na mu Ni a i/ ni ra shu aM ga tsan+da wI ta hi dza sa rA ba pa Ni a i/ ma la ya dze kun+du rU bA Ta i DiNI ma ta hir+b+ha bI dz+dza a i/ dran pa mi 'phrogs rnal 'byor pas/ / he ru ka yi gzugs kyis gar// chags bral min goms sems kyis ni// 'dod chags sems kyis bsgom pa nyid// rdo rje chos dang sangs rgyas dang // rnal 'byor ma dang ma mo yis/ / glu dang gar ni 'di dag gis// legs par glu blang gar yang bya// 'di nyid kyis ni tshogs srung zhing // de bzhin bdag kyang srung ba nyid// 'dis ni 'jig rten dbang du byed/ / 'dis ni sngags kyi bzlas pa nyid// gang du gus pas glu len dang // gang du gus bcas gar byed pa// tshogs kyi bdag pos sngar byas nas// de la dri ni mtshon par bya/ / sgog pa'i dri ni dang po nyid// de nas yang ni bya rgod dri// ga pur ma la ya dza nyid// ngang pa dang ni bung ba'i sgra// glu yi mtha' nas mnyan par bya// ba lang 'tshe yi sgra yang ni// phyi rol du ni mtshon bya ba/ / glu yi byin rlabs mtshan nyid do// phyag rgya rtags dang mtshan ma ste// 'dis ni rigs ni mtshon par bya// rigs 'tshol sgom pa'i sbyor ba las// dngos grub med cing sgrub po'ang med/ / zhe sdang phyag rgyas bdag med ma// gti mug phyag rgyas rdo rje ma// ser sna'i phyag rgyas dkar mo nyid// chags pas chu ma phyag rgyas gdab// phrag dog phyag rgyas mkha' 'gro ma/ / zhe sdang phyag rgya puk+ka sI// gti mug phyag rgyas ri khrod ma// ser sna'i phyag rgyas gdol pa mo// 'dod chags phyag rgyas g.yung mo nyid// yang ni dkar mo zhe sdang las// gti mug phyag rgyas chom rkun ma/ / ser sna'i phyag rgyas ro langs ma// 'dod chags phyag rgyas g+hasma rI// gti mug phyag rgyas sa spyod ma// 'dod chags phyag rgyas mkha' spyod ma// 'dod pas phyag rgyar shes par bya/ / a li dang po bdag med ma// a li gnyis pa rdo rje ma// a li gsum pa dkar mo nyid// bzhi pa chu yi rnal 'byor ma// lnga pa rdo rje mkha' 'gro ma// drug pa puk+ka/ sI zhes brjod// bdun pa nyid ni ri khrod ma// brgyad pa sme sha can du brjod// dgu pa yang ni g.yung mo nyid// yang ni lnga gnyis dkar mo nyid// bcu gcig chom rkun ma zhes bshad// bcu gnyis ro langs ma zhes brjod/ / bcu gsum pa ni g+hasma rI// bcu bzhi pa ni sa spyod ma// bco lnga pa ni mkha' spyod ma// rnal 'byor ma yi sa bon nyid// rigs kyi le'u las rtsa rnams gang // bcu drug gnyis kyi bdag nyid gsungs// rtsa ni gnyis gnyis rnal 'byor ma// re re rnam pa gsum du brjod// brkyang ma ro ma kun 'dar ma// bdag med rnal 'byor ma zhes brjod// gang phyir bcu drug cha med pas/ / 'bad pas kun gyi lhag ma spangs// de ci'i slad du zhe na khyod// don gyi bya ba mi phyed phyir// bco lnga'i cha yi bdag nyid kyi// zla ba byang chub sems su 'gyur// bde ba chen po a li'i gzugs// rnal 'byor ma rnams de yi cha// rdo rje snying pos gsol pa/ rnal 'byor ma kun las byung ba// lhan cig skyes dga'i rang bzhin nyid// 'grib med btung mchog nam mkha' nyid/ / ga pur nges par cis mi spang // bcom ldan 'das kyis bka' stsal pa// ji skad smras pa de bzhin no// rdo rje snying pos gsol pa/ thabs gang gis byang chub kyi sems bskyed pa lags/ bcom ldan 'das kyis bka' stsal pa// dkyil 'khor 'khor lo'i thabs dang ni// rang byin brlab pa'i rim pas kyang // kun rdzob don dam gzugs can gyi/ / byang chub sems ni rab tu bskyed// kun rdzob kun da lta bu nyid// don dam bde ba'i gzugs can no// bud med kak+kol bde ba can// e baM rnam pa'i rang bzhin du// bde ba srung ba nyid kyi phyir/ / bde ba can zhes rab tu bsgrags// sangs rgyas byang chub sems dpa' dang // rdo rje 'dzin pa rnams kyi gnas// 'di nyid 'khor ba zhes bya ste// 'di nyid mya ngan 'das pa nyid// 'khor ba spangs nas gzhan du ni// mya ngan 'das pa rtogs mi 'gyur// 'khor ba gzugs dang sgra la sogs// 'khor ba tshor ba la sogs pa// 'khor ba dbang po rnam nyid do// 'khor ba zhe sdang la sogs pa// 'di rnams chos ni mya ngan 'das/ / rmongs phyir 'khor ba'i gzugs can nyid// rmongs med 'khor ba dag pas ni// 'khor ba mya ngan 'das par 'gyur// byang chub sems ni mya ngan 'das// kun rdzob don dam tshul can no// / shin tu bzhin bzang mig yangs ma// gzugs dang lang tshos rnam par brgyan// sngo bsangs dal ma rigs bzang ma// si h+la ga pur 'byung ba'i gnas// rang gis dbang bskur kye'i rdo rje// sgra bzang sgrub pa po la dga'/ / de yi chang yang btung bar bya// de nas rang yang btung ba nyid// rang gzhan don ni rab sgrub phyir// phyi nas phyag rgya rjes chags bya// bo la kak+ko lar bcug nas// kun tu ru byed brtul zhugs can/ / der ni sbyor ba las byung ba'i// ga pur mkhas pas mi spang ste// de ni lag tu mi blang zhing // nya phyis dung chos nyid du min// nges par blo dang stobs kyi phyir// mi 'chi lce yis blang ba nyid/ / ga pur nyid ni bdag med ma// bde ba bdag med tshul can nyid// de yi bde ba phyag rgya che// lte ba'i dkyil 'khor nyid du gnas// dang po'i dbyangs yig rang bzhin te// blo zhes sangs rgyas rnams kyis brtags/ / rdzogs pa'i rim pa'i rnal 'byor las// de nyid bcom ldan shes rab ma// de ni ring min thung ba min// gru bzhi ma yin zlum po min// dri dang ro dang mya ngan 'das// lhan cig skyes dga' byed pa can// de las skyes pa'i rnal 'byor pas// de yi bde ba myong ba nyid// de dang lhan cig phyag rgya che// bde ba sbyin pa'i dngos grub 'gyur// gzugs sgra de bzhin dri dang ni/ ro dang de bzhin reg bya nyid// chos kyi dbyings kyi rang bzhin yang // shes rab nyid kyis dpyad par bya// de nyid lhan cig skyes pa'i gzugs// bde chen bzang po'i rnal 'byor ma// de ring dkyil 'khor 'khor lo dang / / ye shes lnga yi rang bzhin can// de ni me long ye shes gzugs// mnyam nyid ye shes dngos po can// yang dag gyur pa so sor rtog/ de nyid bya ba nan tan te// chos dbyings shin tu rnam dag pa// de nyid dkyil 'khor bdag po nga // de nyid bdag med rnal 'byor ma// chos kyi dbyings kyi rang bzhin can// rdo rje snying pos gsol pa/ 'khor lo bsgoms pa'i lam dang ni/ / lha rnams ji ltar 'byung ba nyid// thams cad bcom ldan 'das gsungs na// sdom pa yang dag bshad du gsol// bcom ldan 'das kyis bka' stsal pa/ / rnal 'byor ma yi lus dbus su// a yi rnam pa'i sdom pa gnas// ji ltar phyi rol de bzhin nang // sdom pa de nyid rab tu phye// bo la'i bde ba phyag rgya che// rdo rje skye mched thabs chen nyid/ / 'dis ni gsang ba'i snyoms 'jug pas// phyi rol gnyis ni bstan du med// sku gsum lus kyi nang du ni// 'khor lo'i gzugs kyis brjod par bya// sku gsum yongs su shes pa ni// bde ba chen po'i 'khor lor brjod// chos dang longs spyod sprul pa dang // de bzhin du yang bde chen nyid// skye gnas snying mgrin mgo bor yang // sku gsum po ni rnam par gnas// ma lus pa yi sems can gyi/ / skye ba gang la brjod par bya// gang phyir sprul pa gnas brtan phyir// lte ba sprul pa'i sku nyid yin// gang gis bskyed dang sprul byed pa'i// sku ni sprul pa can zhes brjod// sems ni chos kyi rang bzhin te/ / chos kyi sku yang snying kar 'gyur// ro rnam drug gi gzugs can gyi// bza' ba nges par longs spyod brjod// mgrin par longs spyod 'khor lo'o// spyi bor bde ba chen po gnas/ / e baM rnam par rgyu mthun nyid// rnam smin chos kyi 'khor lo las// longs spyod skyes bu'i byed pa nyid// bde ba'i 'khor lo dri med nyid// rgyu mthun sogs par rab phye ba'i// 'bras bu rnam pa bzhi zhes brjod/ / las kyi rlung gis bskul ba yi// las la bcom ldan shes rab spyod// ji ltar byas pa de bzhin spyod// rgyu mthun zhes ni rab tu bsgrags// las chung 'bras bu che ba'i phyir/ / rnam par smin pa de las bzlog/ rnal 'byor dag phyir dri med nyid// bskyed pa skyes bus byed pa nyid// gang phyir sprul pa gnas brtan phyir// sprul pa'i 'khor lor gnas brtan nyid// chos ni smra ba 'byung ba'i phyir// chos kyi 'khor lor thams cad yod// gang phyir mgrin par kun bkur phyir// longs spyod 'khor lor kun bkur nyid// gang phyir bde chen mgor gnas pas// bde ba'i 'khor lor dge 'dun che// sde pa zhes bya sku ru brjod// lto ba gnas su brjod par bya// skye gnas 'dod chags bral bar 'gyur// mngal gyi phru ma chos gos nyid// de bzhin ma ni mkhan/ po nyid// mgo bor thal mo sbyar ba phyag/ 'gro ba'i bya ba khrims kyi gnas// sngags kyi bzlas pa a dang haM// skye gnas 'khor lo'o rnam pa a// bde chen gyi yang rnam pa haM// gcer bu skra dang kha spu bregs/ / sngags 'don skyes pa dge slong nyid// 'di dag rkyen gyis sems can rnams// sangs rgyas nyid du the tshom med// zla ba bcu yang sa rnams yin// sems can sa bcu'i dbang phyug go/ / de nas rnal 'byor ma bdag med ma la sogs pa'i lha mo thams cad la 'di lta ste// spyan ma dang / mA ma kI dang / gos dkar mo dang / sgrol ma dang / khro gnyer can dang / tsun dA dang par+N+Na ri khrod ma dang / 'og zhal ma dang / de dag la sogs pa ri rab kyi rdul phra rab dang mnyam pa'i rnal 'byor ma rnams tshig 'di dag thos nas mchog tu ngo mtshar du gyur cing brgyal ba dang / skrag pa dang / sa la 'gyel ba dang / 'dar bar gyur to// yang rdo rje can gyis lha mo de rnams thams cad gzigs nas bslang ba'i phyir yang dag par bstod pa/ sa dang chu rlung byin za yi/ / lha mo snod can khyed nyid la// gang zhig sus kyang mi shes pa// de nyid nga yis spro yis nyon// bcom ldan 'das kyi gsung rmi lam lta bu nye bar thos nas de rnams thams cad srog rnyed par gyur to/ / bcom ldan 'das kyis bka' stsal pa// sems can rnams ni sangs rgyas nyid// 'on kyang glo bur dri mas bsgribs// de nyid bsal na sangs rgyas nyid// lha mos gsol pa/ bcom ldan 'das de de bzhin te/ bden pa'ang ma mchis shing brdzun pa'ang ma mchis so// bcom ldan 'das kyis bka' stsal pa// gang zhig mi shes 'jig rten pa// btsan dug zos pas brgyal bar 'gyur// rmongs spangs de nyid yid kyis ni// de yis de nyid yongs su gcod// de bzhin zhi ba'i thabs shes shing // kye yi rdo rjer ngal bsos na// ma rig sog/ pas mi 'dzin cing // gti mug la sogs 'ching bas min// rang dang rang gis rtogs pa las// sangs rgyas ma yin sems can ni// gcig kyang yod pa ma yin no// dmyal ba yi dgas byol song dang / / lha dang lha min mi rnams dang // bshang ba'i srin bu la sogs pa// lha dang lha ma yin gyi yang // bde ba gang phyir mi shes pa// rtag tu rang bzhin bde ba can// 'jig rten khams ni gang du yang / / sangs rgyas gzhan du rnyed mi 'gyur// sems ni rdzogs pa'i sangs rgyas nyid// sangs rgyas gzhan du bstan du med// gdol pa smyig mkhan la sogs pa// gsod don don du sems pa po/ de rnams kyi rdo rjer shes na// 'grub 'gyur 'di la the tshom med// byis pa mi shes pas bsgribs pa// 'di yi bgrod pa mi shes pa// 'gro ba drug gi srid pa'i mthar// gang zhig rmongs pa 'khor bar 'gyur/ / rdo rje snying po snying rje che// kye yi rdo rje'i thabs rnyed pas// gang zhig yul rnams rnam sbyong ba// de ni bla med rnyed par 'gyur// rdo rje snying pos gsol pa/ sa ni puk+ka sI bshad pa/ / gang phyir gti mug sra ba nyid// sku ni rnam snang nyid gsungs pa// ji ltar mi bskyod phyag rgya lags// bcom ldan 'das kyis bka' stsal pa// sems spangs nas ni lus kyis ni/ mdzes pa gzhan du mi 'gyur ro// de phyir rnam par snang mdzad sems// sku la thugs kyi phyag rgyas gdab// rdo rje snying pos gsol pa/ chu khams ri khrod mar bshad pa// mi bskyod khu ba'i gzugs can nyid/ / gtso bo mi bskyod phyag rgyas ni// ri khrod ma la phyag rgyar rigs// bcom ldan 'das kyis bka' stsal pa// lus spangs nas ni sems kyis ni// gnas pa gzhan du mthong mi 'gyur/ / de phyir sems ni gti mug 'gyur// thugs la gti mug phyag rgyas gdab// rdo rje snying pos gsol pa/ me ni gdol pa mor bshad pa/ 'dod chags phyag rgyas gdol pa mo// rigs te phyag rgya gzhan min na// ji ltar rin chen phyag rgya lags/ bcom ldan 'das kyis bka' stsal pa// gang phyir 'dod chags khrag bshad pa/ / khrag ni rin chen 'byung gnas nyid// drod ni khrag gi rang bzhin phyir// 'dod chags ser sna'i phyag rgyas gdab// rdo rje snying pos gsol pa/ gang phyir g.yung mo rlung nyid do// don yod rlung gi gzugs can nyid/ / don yod phyag rgyas g.yung mo la// gtso bo phyag rgya rigs par 'gyur// bcom ldan 'das kyis bka' stsal pa// 'dod chags ma gtogs phrag dog ni// gzhan du 'byung ba ma yin te// de phyir 'dod chags phyag rgya yis// mkhas pas g.yung mo phyag rgyas gdab// gang phyir gzugs ni sra ba nyid// dkar mo snang mdzad gsungs pa nyid// sngar gsungs nyid kyi rim pa yis/ / sems kyi bdag po phyag rgyas gdab// de nyid rim pas chom rkun ma// de bzhin ro langs ma nyid dang // de yi rigs pas g+hasma rI// ma log pa las phyag rgya'o// kye yi rdo rje rdo rje 'dzin// snyoms 'jug gnas pa'i lha nyid la// sems can don phyir gtor ma che// de la bdag med mas zhus pa// e baM rnam par bzhugs nas ni// bgegs dang log par 'dren pa las/ / sems can rnams kyi srog bsrung phyir// rdo rje sems dpas gtor ma bstan// oM in+da dza ma dza la dzak+Sha/ b+hU da ba h+ni bA u rak+Sha/ tsan+da sudz+dza mA da bA p+pa ta la pA tA le aT+TA sa p+pa swA hA/ i daM ba liM b+huny+dza dzi g+ha pul+la d+hU pa mAM sa pa~M g+ha/ aM b+ha sa p+pa kadz+dza sA da khan+ti khu Ni phe Da gA da/ oM a kA ro mu khaM sar+b+ba d+har+m+ma NAM A d+ya nut+pan+na tASha oM AHhUM phaT swA hA/ gang gi tshe 'di'i gtor mas 'byung po thams cad mchod par byed na rnal 'byor pa rnams legs par 'gyur te/ de rnams la bde ba dri ma med pa dang / lha mo rnams dang / 'gro ba rab tu 'byor pa rnams dga' bar 'gyur ro// gal te 'dir 'byung po'i tshogs kyi phyir rtag tu gtor ma byin na dbang dang / mngon spyod dang / dgra'i sde 'jigs pa dang / bskrad pa dang / gsad pa dang / dgug pa dang / zhi ba dang / rgyas par yang 'gyur ro// rdo rje snying pos gsol pa/ phyag rgya gang gis mkha' spyod ma// gang gi phyag rgyas sa spyod ma// gtso bo bdag gis sngar ma 'tshal// bcom ldan ji ltar phyag rgya bgyi// bcom ldan 'das kyis bka' stsal pa// gsang gsum 'khor lo'i dbus su ni// sku gsung thugs su phye ba las// steng dang 'og dang dbus gnas pa'i// 'khor lo'i dbus su rnam par gnas// sa spyod sku yi phyag rgya can// steng zhal sku yi rdo rje ma// mkha' spyod 'dod chags phyag rgya can// 'og zhal gsung gi rdo rje ma// thugs kyi rdo rje bdag med ma// sems ni bdag med tshul can nyid// sems ni dbus kyi gnas su ste// des na bdag med ma dbus skye// rgyas par rab tu phye ba las// rigs ni rnam pa drug tu brjod// rnam gsum rnam pa lnga nyid kyang // bshad kyis rnal 'byor ma nyid nyon// mi bskyod rnam snang rin chen 'byung // dpag med phrag dog rdo rje sems// zhe sdang gti mug ser sna dang // 'dod chags phrag dog bde ba dag/ 'dis ni rim pas sgom pa nyid/ / rdo rje sems dpa' spangs nas ni// phyi nas rigs ni rnam pa lnga// 'dod chags zhe sdang gti mug gis// de rjes rnam pa gsum du 'gyur// mi bskyod zhe sdang gzugs can gyi/ / thugs kyi bdag po rigs gcig nyid// zhe sdang rdo rje'i byin rlabs 'di// rigs ni drug dang lnga ru brjod// kye'i rdo rje las rgyud thams cad kyi phyag rgya bsdus pa'i don zhes bya ba'i le'u ste/ bzhi pa'o// // phyag ni bcu drug zhal brgyad pa// zhabs bzhi pa dang 'jigs pa po// dpa' bo thod pa'i 'phreng ba can// bdag med mas ni mgul nas 'khyud// phyag rgya lnga ni 'dzin lha la/ / bdag med ma ni nyid kyis zhus// bco lngas yongs su bskor ba yi// bdag gi 'khor lo khyod bshad na// khyod kyi dkyil 'khor ji ltar lags// gtso bo bdag gis sngar ma 'tshal/ / bdag med tsum b+ha na mdzad nas// rdo rje thod par stsal nas ni// lha yi nu ma mnyed mdzad de// dkyil 'khor yang dag rab tu dbye// 'khor lo ji ltar sngar gsungs pa// do shal do shas phyed pas brgyan/ / mtshams bzhi pa la sgo bzhi pa// rdo rje srad bus yang dag brgyan// 'dod chags chen po'i rjes chags pas// lhan cig skyes dga'i rang bzhin las// khyod dang lhan cig bzhin bzang ma/ / de la dbus su nga yod de// zhal brgyad pa la zhabs bzhi pa// phyag ni bcu drug dag gis brgyan// bdud bzhi mnyam par mnan pa nyid// 'jigs pa yang ni 'jigs pa po// mgo bo'i 'phreng ba'i do shal mdzad/ / nyi mar bzhugs shing rol mor bcas// kha dog nag po 'jigs pa po// sna tshogs rdo rje spyi bor 'dzin// nyid kyi zhal nas hUM spro zhing // thal bas lus la byugs pa nyid// bdag med lhan cig mnyam sbyor zhing // dga' ba gnyis gnyis snyoms 'jug pas// dpa' rlabs med pa'i bde ba thob// rlom sems med pa'i rang bzhin can// rtsa ba'i zhal ni nag po che// g.yas pa la ni kun da mtshungs/ / g.yon pa dmar zhing cher 'jigs pa// spyi bo'i zhal ni gtsigs pa can// spyan ni nyi shu rtsa bzhi che// lhag ma'i zhal ni bung ba bzhin// grong khyer nyams dgar khyod dang // dga' bas shin tu rol pa las// dkar mo dbang po'i phyogs phyung nas// shar gyi sgo ru yang dag gnas// srub dang srub pa'i sbyor ba las// chom rkun ma yang phyung nas ni// phyung nas lho yi sgo ru ni/ chom rkun ma ni sgo srungs ma// bo la kak+ko la sbyor bas// ro langs ma yang phyung nas ni// phyung nas nub kyi sgo ru ni// bdud 'joms ma ni rnam par gnas// dga' ba chen po'i snyoms 'jug las/ g+hasma rI yang phyung nas ni// phyung nas byang gi sgo la ni// 'jigs pa'i gzugs can ma nyid gnas// gnyis kyis bskyod pa'i sbyor ba las// puk+ka sI yang phyung nas ni// phyung nas dbang ldan mtshams su ni// drag po'i gzugs can ma nyid gnas// yang ni srub pa'i sbyor ba yis// 'tshed pa'i mtshams su ri khrod ma// srin po'i mtshams su gdol pa mo// rlung gi mtshams su g.yung mo nyid/ / de nas rdo rje chags chen las// rig mar bcas pa khu bar 'gyur// sna tshogs glu yi mchod pa las// de nas lha mo rnams kyis bskul// rje btsun snying rje'i yad bzhengs shig/ puk+ka sI ni bdag la skyobs// stong pa'i rang bzhin nyid spongs la// bdag la bde chen sbyor bzhed mdzod// khyod med na ni bdag 'gum pas// kye yi rdo rje khyod bzhengs shig/ stong pa'i rang bzhin nyid spongs la/ / ri khrod ma 'bras grub par mdzod// dga' gtso 'jig rten mgron gnyer ba// stong pa nyid la bzhugs sam ci// khyod med phyogs ni mi 'tshal bas// gdol pa mo bdag zhu ba bgyid/ / bdag gis khyod kyi thugs 'tshal gyis// mig 'phrul mnga' ba khyod bzhengs shig/ g.yung mo bdag ni dran nyams pas// snying rje rgyun chad ma mdzad cig/ glang po rta bong glang rnga mo/ / mi dang sha ra b+ha byi la// g.yas pa'i thod pa brgyad rnams la// gnyis 'thung la sogs rim shes bya// sa dang chu dang rlung dang ni// me dang zla ba nyi ma nyid// mthar byed dang ni nor sbyin nyid// g.yon pa'i thod pa brgyad na'o// sgeg cing dpa' bo mi sdug pa// rgod cing drag shul 'jigs rung ba// snying rje rngam dang zhi ba yis// gar dgu'i ro dang ldan pa nyid// aM dang hUM gi rdo rje che// ba'i gzugs las bzhengs nas ni// zhabs rnams sa la rdeb pa dang // lha dang lha min bsdigs par mdzad// gaM tsaM baM g+haM paM shaM laM DaM// 'di yi sa bon phyung ba dang // bdag po'i sa bon dag gis ni/ aM hUM sngon po 'bar 'jigs pas// ma mo'i 'khor lo grong nyams dgar// kha dog nag po 'jigs chen po// bdag med bde ba sbyin pa po// gtso bo 'di ltar sgom pa nyid// dkar mo'i g.yas na gri gug ste/ / de bzhin g.yon na ro hi ta// chom rkun ma g.yas cad te'u ste// g.yon pa'i phyag na phag pa nyid// ro langs ma g.yas rus sbal te// g.yon pa yis ni pad+ma'i snod// g+hasma rI yi g.yas na sbrul// g.yon pas rnal 'byor lhung bzed nyid// puk+ka sI g.yas seng ge ste// g.yon pas dgra sta de bzhin no// ri khrod ma g.yas dge slong ste// g.yon pas gsil byed de bzhin no/ / gdol pa mo g.yas 'khor lo ste// g.yon pas thod pa de bzhin no// g.yung mo'i g.yas na rdo rje nyid// g.yon na sdigs mdzub de bzhin no// skyil krung phyed pa'i gar gyis gnas/ / dkar mo la sogs phyag gnyis brjod// spyan gsum sgra ni gyen du ste// phyag rgya lnga yis rnam par brgyan// gau rI kha dog nag por 'gyur// chom rkun ma ni btsod dang mtshungs/ ro langs ma ni gser bcos bzhin// g+hasma rI ni mar gang mtshungs// puk+ka sI ni dbang sngon mtshungs// ri khrod ma ni zla nor 'od// gtum mo nam mkha'i sngo bsangs ma/ g.yung mo sna tshogs pa zhes brjod// tshangs pa dbang po nye dbang drag/ gshin rje dang ni nor bdag dang // bden bral dang ni thags bzang ris// gau rI la sogs pa yi gdan// bo la gzhib par mdzad nas ni/ / ngam du 'khyud cing 'o mdzad pas// bcom ldan gus pas mchod nas ni// bdag med ma yis sngags zhus so// bud med rnams kyi dbang byed sngags// de bzhin gdug pa bsdigs pa dang / / klu rnams sdigs par byed pa nyid// lha dang lha min rnam nyed pa// de ni nga yis bshad bya yis// lha mo bde ba sbyin ma nyon// sangs rgyas byang chub sems dpa' la// bdag gis gzhan du ma bstan no/ / 'di yi sngags kyis gang byung dang // rdo rje sems dpas gang mdzad pa// lha mo shin tu 'jigs pa ste// ngo mi chog pas khyod la bshad// 'bar ba'i 'phreng ba 'khrug pa yis// dkyil 'khor rab tu bzhengs nas ni// rdo rje snying po dbang sbyin phyir// thig le mchog ni bkug pa nyid// bzlas pa khri yis gsal ba dang // sgra ring ba dang bzang ba yis// kye yi rdo rje sbyor ldan pas/ / btsun mo thams cad dgug par bya// bzlas pa 'bum gyis rnal 'byor bdag/ kye yi rdo rje'i rnal 'byor gyis// dogs pa med pa'i sems kyis ni// 'di yis las rnams thams cad byed// rig byed rnams kyi dang po sbyin// zla phyed thig les rnam par brgyan// de nas/ alpA na nA ya pi ga Ur+d+ha ke sha bar+t+ta ne/ tsa turbi sha ti ne tA ya/ de'i rjes su/ Sho Da Sha b+hu dzA ya/ kr-iSh+TA dzI mU ta wa pu She ka pA la mA lA ne kaM d+hA ri Ne/ a d+hA ta krU ra tsit+tA ya ar+d+hen du daMSh+mi Ne/ oM mA ra ya mA ra ya/ kA ra ya kA ra ya/ gar+dz+dza ya gar+dz+dza ya/ tar+dz+dza ya tar+dz+dza ya/ sho Sha ya sho Sha ya/ sap+ta sA ga rA na/ ban+d+ha ban+d+ha na gAny+dza kAM gr-ih+Na gr-i h+Na sha hUM/ / ha hA hi hIM/ hu hU/ he haM/ ho hau/ haM haHphaT swA hA/ de nas lha mo de dgyes nas// srub dang srub pa'i sbyor ba las// dam du 'khyud dang 'o byed pas// dkyil 'khor yid du 'ong ba zhus/ / de la ston pa ye shes che// rdo rje pad+ma mnyam sbyar nas// dgyes pa'i thugs kyis mnyam bzhag pas// nyid kyi dkyil 'khor bri bar mdzad// 'phar ma gcig dang sgo bzhi pa// sna tshogs 'od kyis yang dag 'khrug/ rta babs bzhi dang yang dag ldan// rdo rje srad bus mnyam par brgyan// re khA lnga dang yang dag ldan// de nas bum pa brgyad po bri/ rin chen lnga yi phye ma'am// yang na 'bras la sogs pa 'am// dur khrod kyi ni so phag gam// de bzhin dur khrod sol ba yis// de dbus pad+ma 'dab ma ni// brgyad pa ze bar bcas pa bri/ snying por skyes pa'i thod pa nya mdog dkar cha ni gsum pa bri/ / dbang ldan du ri sha ra b+ha// me yi mtshams su dge slong bri// bden bral du ni 'khor lo bri// rlung du rigs kyi bdag po bri// shar sgor de bzhin gri gug nyid// lho ru cang te'u bri ba nyid// nub tu rus sbal bri ba nyid// lto 'phye byang du de bzhin no// lha mo kha dog dbye ba yis// phyag mtshan brgyad du rab tu grags// dbus su thod pa dkar po yang / / sna tshogs rdo rjes mtshan pa bri// de nas rnam rgyal bum pa nyid// yal ga'i rtse mo gos bzang can// lto ba rin chen lngas gang ba// sA lu skyes pas yongs bkang gzhag/ mang du rab tu brjod pas ci// ji ltar de nyid bsdus pa yi// dkyil 'khor cho ga de bzhin bya// bcu gnyis brgyang gnyis lon pa yi// rig ma bde chen brgyad po nyid// do shal rkang gdub kyis brgyan nas/ / dkyil 'khor du ni rab tu gzhug/ ma dang sring mo nyid dang yang // bu mo sring mo'i bu mo dang // de bzhin zhang po'i chung ma dang // ma yi spun dang sgyug mo dang // de bzhin pha yi srid mo nyid/ / rig ma brgyad du rab tu grags// dam du 'khyud dang 'o byed pas// 'di rnams rnal 'byor pa yis mchod// de las ga pur btung ba nyid// des ni dkyil 'khor bsang gtor bya// de rnams rnal 'byor pas btung bya// dngos grub myur du thob par 'gyur// de la chang yang btung ba dang // sha dang sA lu skyes pa bza'// de yang gos dang bral byas nas// b+ha gar 'o ni yang yang byed/ / des kyang po la gzhib par bya// gar bya glu yang blang bar bya// bo la kak+ko la sbyar nas// de la rtsed mo rtse bar bya// de nas thun tshod gnyis pa la// gos kyis mig ni bkab nas su/ / der ni slob ma gzhug pa nyid// phyi nas dkyil 'khor rab tu bstan// mtshan mo skye bo med khyim du// slob dpon la sogs rab phye nas// dbang ni ji ltar gsungs pa nyid// de la dbang ni sbyin par bya/ / ji ltar mchod dang bstod bshad pa// slob ma bzang pos sngar shes bya// de la de nyid bstan pa ni// dga' bral dang po mchog mtha' can// thams cad rgyud du sbas pa ste// mtha' yi mtha' yis phye ba nyid// rdo rje mchod pa rab sbyar nas// de la lha mo des zhus pa// lha de'i skad cig ji ltar lags// gtso bo chen po bshad du gsol// bcom ldan 'das kyis bka' stsal pa/ / der ni thog ma dbus mtha' med// srid med mya ngan 'das pa med// 'di ni mchog tu bde chen nyid// bdag med gzhan yang med pa nyid// longs spyod kyi ni rlabs gnyis/ la/ rang gi g.yas dang lag gzhan gyi// mthe bong dang ni srin lag gis// de ni rnal 'byor pa yis btsir// de nas ye shes skye bar 'gyur// de las ci zhig skye zhe na// gzhon nu'i dga' ba ji lta 'am/ / lkugs pa'i rmi lam ji lta ba'o// mchog gi mtha' dang dga' bral dbus// stong dang stong min he ru ka/ kye'i rdo rje las kye'i rdo rje mngon par 'byung ba zhes bya ba'i le'u ste lnga pa'o/ / / lha mo la ni dam 'khyud cing // bo la thod par bcug nas ni// dam du nu ma bzung mdzad nas// skyes pa'i sna ni gzhibs nas kyang // tshems kyis ma mchu bci nas ni/ / mtshan khung sen mos rma mdzad de// mnyam sbyor bde ba myang mdzad nas// phyag rgya lnga ni rab phye ba// bla ma slob dpon 'dod lha la// phyag 'tshal don du 'khor lo 'dzin/ / bla ma rdo rje 'dzin pa la// smod tshig mi nyan pa yi phyir// rna ba dag tu rna cha 'dzin// sngags kyi bzlas pa'ang mgul rgyan nyid// gdub bu srog chags gsod pa spangs// phyag rgya bsten pa ska rags nyid/ / sangs rgyas lnga yi phyag rgyas ni// rtag tu lus la phyag rgyas gdab// de nas rab tu bzhang mdzad nas// tshems kyis ma mchu btsir nas ni// kye yi rdo rje zhes bya ba// ldan cig skyes pa'i gzugs can nyid// de la lha mo des zhus pa// gtso bo cho ga gang gis dang // de bzhin bya ba gang gis ni// kye yi rdo rje'i bris sku yi// byed pa bde ba chen pos gsungs// bcom ldan 'das kyis bka' stsal pa// 'dir na 'bri mkhan dam tshig can// sgrub po'ang dam tshig can gyis ni// bris sku 'jigs pa bri ba nyid// skyes pa'i thod gnas kha dog lnga// ro yi/ sgra yi pir nyid kyis// bris sku bla ma bri ba nyid// gang gang skud pa 'khal ba dang // gang gang ras yugs 'thag pa yang // de yang dam tshig can nges pas// dam tshig byin brlabs rnal 'byor las/ / zla ba zla ba'i mar ngo yi// bcu bzhi pa la khyim dben par// phyed na ma rung sems kyis ni// chang gi btung ba cung zad las// lus la ni raM shu bsams nas// de bzhin / gcer bur gyur pas kyang // 'bags pa dang ni ma dag pas// de nas dam tshig rab tu bza'// bzhin bzang snying rje ldan pa dang // gzugs dang lang tsho skal bzang ma// me tog bcas shing sgrub por dga'/ / rang gi phyag rgya g.yon du gzhag/ kye'i rdo rje las bris sku'i cho ga'i le'u ste drug pa'o// / de nas de la lha mos zhus// bo la kak+ko la sbyar nas/ / tshems kyis ma mchu btsir nas ni// glegs bam yang ni ji ltar 'gyur// rdo rje pad+ma mnyam sbyar nas// dgyes pas lha yis rab phye ba// glegs bam nga yis bshad bya yis// lha mo skal ba chen mo nyon// sbrang chen snag tsha byas nas ni// mi yi rus pa'i sbu gus ni// glegs bam sor ni bcu gnyis pa// gro gar dam tshig can gyis bri// glegs bam dang ni bris sku nyid/ / gal te skal med mthong na ni// skye ba 'dir ni dngos grub med// 'jig rten pha rol spyod yul med// yang dag rab sbyin ldan pa la// res 'ga' tsam zhig bstan pa nyid// glegs bam lam gyi spyod yul du// skra dang mchan khung nyid du sba// b+ha gar ling ga rab bzhag nas// yang dang yang du'o mdzad nas// bde chen mnyam par myang mdzad de// rdo rje can gyis bza' ba bsngar/ / tshogs kyi dkyil 'khor bza' ba ni// nyon cig lha mo mig yangs ma// gang du zos pas 'dod don kun// sgrub pa can gyis dngos grub 'gyur// dur khrod ri yi bya skyibs dang / / de bzhin mi med grong khyer dang // yang na dben pa'am rgya mtsho'i mthar// bza' ba 'di ni rab tu bza'// de la gdan du brtags pa ni// ro yi gzugs can dgu dang ni/ / yang na stag gi pags pa dang // dur khrod ras ni de bzhin no// dbus su kye yi rdo rje'i gzugs// ji ltar sngar bzhin gnas shes nas// phyogs dang phyogs bral dag tu yang // / de nas rnal 'byor ma rnams dgod// dam tshig mA la tin+t+ra naM// stag gi pags pa'i steng du bza'// 'bad nas rgyal po'i sA lu yi// bza' ba der ni bza' ba nyid// der ni zos nas zos nas kyang / / der ni ma mo mchod par bya// sring mo bu mo sgyug mo dang // gal te ma sring yin na yang // de rnams rtag tu legs mchod na// tshogs kyi dkyil 'khor 'grub par 'gyur// skyes pa'i thod chen cha gcig par// chang ni bzang pos yongs bkang ste// bla ma la dbul skal chen ma// phyag 'tshal nas ni rang yang btung // pad+ma'i lag pas blang ba dang // de nyid kyi ni lag pas dbul/ / yang nas yang du rab 'dud pa// de ltar sgrub pa po yis bya// kye'i rdo rje las bza' ba'i le'u ste bdun pa'o// / de nas rnal 'byor mas zhus pa/ phyag rgya chen po ji lta bu// kun rdzob rnam pa'i gzugs kyis ni// bde ba sbyin pas bshad du gsol// bcom ldan 'das kyis bka' stsal pa// shin tu ring min thung ba min// gnag pa ma yin dkar ba min/ / pad+ma'i 'dab ma'i rnam pa 'dra// de yi dbugs ni dri zhim ldan// rdul yang dri zhim ldan 'gyur te// ri dwags lte ba'i dri dang mtshungs// pad+ma la yang dbang mchog dri/ skad cig pad+ma khA bur 'byung // de yi ga pur sih+la dag/ mkhas pas dri bzang mtshon par bya// ut+pa la yi drir 'gyur zhing // a ka ru ni nag po mtshungs// dal zhing mi g.yo ba nyid dang / snyan par smra zhing yid 'ong ma// skra bzang dbus su gnyer ma gsum// phal pa pad+ma can du brjod// lhan cig skyes pa'i gzugs can ma// de rnyed nas ni dngos grub 'gyur// de nas rnal 'byor ma bdag med mas gsol pa/ bcom ldan 'das smon lam ji ltar gdab par bgyi/ bcom ldan 'das kyis bka' stsal pa// rigs su skye dang dam tshig can// smyo med kye yi rdo rje ston// bla ma la gus snying rjer ldan// skye zhing skye bar 'gyur bar shog/ lag pas rdo rje dril bu 'khrol// zab mo'i chos ni klog pa dang // btsun mo'i khu ba mnyam zas can// skye zhing skye bar 'gyur bar shog/ de nas lha mo de dgyes nas// tshig ni 'di nyid yang zhus pa// skal med sems can gdul dka' ba// gang gis 'dul bar 'gyur ba lags// bcom ldan 'das kyis bka' stsal pa/ dang por gso sbyong sbyin par bya// de rjes bslab pa'i gnas bcu nyid// de la bye brag smra ba bstan// mdo sde pa yang de bzhin no// de nas rnal 'byor spyod pa nyid// de yi rjes su dbu ma bstan// sngags kyi rim pa kun shes nas// de rjes kye yi rdo rje brtsam// slob mas gus pas blangs nas ni// 'grub 'gyur 'di la the tshom med// kye'i rdo rje las 'dul ba'i le'u ste brgyad pa'o/ / // de nas kha sbyar 'byed pa yi// mtshan nyid yang dag rab tu bshad// gang gis rnam par shes tsam gyis// sgrub pos dngos grub thob 'gyur ba// bsgrub bya'i lte ba'i rtsa ba la/ / brtul zhugs can gyis lag pas gdon// he ru ka mnyam rnal 'byor gyis// nang gi ma rungs sems kyis ni// 'di ni bsgoms pa tsam gyis ni// sangs rgyas kyang ni nges par 'jig/ bstan la gnod pa byed pa dang // bla ma sangs rgyas 'jig pa ni// bla ma thub pa la zhus nas// snying rjes gsad par bya ba nyid// ji ltar phyugs kyi gzugs mthong nas/ khrag ni skyug pa nyid dang yang / / 'dar zhing mgo skyes grol ba dang // kha ni 'og tu rnam par sgom// de yi lam du khab ni me'i// gzugs can 'jug par bsam pa ste// snying kar byin za'i sa bon nyid// dmigs nas skad cig gsod par byed// rgyud 'di la ni sreg blugs med// phyag rgya bcing dang bya ba'ang med// rgyud chen bklags pas 'grub pa nyid// bsam gtan tsam gyis 'grub par 'gyur/ / rtog med dngos grub sbyin pa po// srid pa sbyong ba nyams dga' bar// gsang ba mchog ni bshad bya yasi// nyon cig lha mo bzhin bzang ma// rin chen gzi brjid 'bar ba yi// 'phreng ba 'khrug pa lha mo ltos// ma phug pas ni sbyor bral 'gyur// phug pas dga' ba sbyin pa po// de ltar 'khor bar 'dod pa yi// yon tan lnga ldan rin chen nyid// ma dag pas ni dug tu 'gro/ / dag pas bdud rtsi lta bur 'gyur// 'khor ba'i rnam pa he ru ka/ 'gro ba sgrol ba'i gtso bo nyid// gang gi gzugs kyi 'gyur ba nyid// de ni nga yis smra yis nyon// snying rje'i spyan ni dmar po la/ / byams pa'i thugs las yan lag gnag/ bsdu ba'i dngos po bzhi yis ni// zhabs ni rnam pa bzhi zhes brjod// zhal brgyad rnam par thar pa brgyad// phyag ni stong pa bcu drug nyid/ / gug skyed kyis ni sangs rgyas lnga// gdug pa 'dul phyir khro bo nyid// de nyid gsum ni spyan gsum mo// sha ni puk+ka sI ru brjod// de bzhin khrag ni ro khrod ma// gdol pa mo ni khu bar brjod/ / g.yung mo rkang dang tshil bu dag/ pags pa byang chub yan lag bdun// rus pa bden pa bzhi po nyid// bdag med mas gsol pa/ sngags btub ni ji ltar 'gyur// gang gi sngags kyis skye bo yi// las kyi dngos grub 'gyur ba nyid// bde ba chen pos bshad du gsol// bcom ldan 'das rdo rje can chen po rdo rje snying po gzi brjid chen pos bka' stsal pa/ sngags ni khyod la ngas bshad kyis// lha mo shes rab chen mo nyon// dang po rnam par snang mdzad sbyin// uSh+ma rnams kyi bzhi pa la// puk+ka sIs brgyan stong pas mnan// mdog dkar mthar ni swA hA sbyar/ / 'dis ni bzlas pa 'bum gyis ni// 'gro ba rtag tu rengs par byed// dang por yi ge'i bdag po gzhag/ de rjes mkha' spyod ma de nas/ mthar ni swA hA sbyar byas na// sangs rgyas rnams kyang dbang du byed// rig byed rnams kyi dang po sbyin// dang po yi ni gnyis pa la// stong bcas mthar ni swA hA sbyar// sangs rgyas kyang skrod shes rab can/ / dang po rnam par snang mdzad sbyin// gnyis pa yau ni gsum pa la// ra dang ldan zhing chu mas brgyan// stong bcas swA hA yang dag ldan// mi rnams thams cad sdang bar byed// dang por yi ge'i dbang phyug gzhag/ lnga pa nyid kyi gsum pa la// stong pa mkha' 'gro ma dang ldan// mthar ni swA hA mngon spyod che// yang ni yi ge'i thu bo sbyin// hUM ni khrag dang 'dra ba la/ mthar ni swA hA thig le mchog/ dga' bzang ma sogs rtag tu 'gugs// gti mug rigs ni dang por sbyin// g+hu ni yang dag rab tu sbyar// mthar ni swA hA yang byas na// lha dang mi rnams gsod par byed/ / dang por rnam par snang mdzad gzhag/ dang po nyid kyi dang po la// rdo rje mkha' 'gro ma dang sbyar// mthar gnas pa yi gnyis pa la// rdo rje mkha' 'gro ma dang ldan// yang ni dang po'i rtse mo la/ / rdo rje mkha' 'gro ma dang ldan// mthar gnas pa yi gsum pa la// yang ni de nyid yang dag ldan// steng du chom rkun ma yis brgyan// de rjes hrIHyi rnam par sbyar// mthar yang swA hA spyod pa nyid/ / ku ru kul+le'i sngags so// oM ni dang po bzhi pa yi// gsum pa chom rkun ma yis brgyan// mthar gnas pa yi bzhi pa la// pi tsu badz+ra sbyar ba dang // uSh+ma rnams kyi brda pa la/ / puk+ka sI yis rnam par brgyan// spong pas mnan cing sum 'gyur nyid// lnga pa yin gnyis pa dang // gsum pa'i dang po mthar swA hA// kye yi rdo rje'i snying po'o// snang mdzad dang po la gnyis/ / sbyar nas lnga pa'i bzhi pa la// mthar gnas rnams kyi dang po ldan// g+hasma rIs ni rnam par brgyan// uSh+ma rnams kyi bzhi pa la// rdo rje mkha' 'gro ma yis brgyan// stong pas mnan cing sum 'gyur nyid/ / lnga pa yi ni gnyis pa dang // gsum pa'i dang po mthar swA hA// phyag bzhi pa'i sngags so// dang por rnam snang dang po yi// dang po nang gi dkar mos brgyan// gsum pa nyid kyi dang po la/ / nang gi dkar mos rnam par brgyan// nyis 'gyur lnga pa'i gsum pa dang // gnyis pa'i gsum pa me yis brgyan// hUM gi rnam pa gsum sbar nas// lnga pa nyid kyi gnyis pa dang // gsum pa'i dang po mthar swA hA/ phyag drug pa'i sngags so// dang po rnam snang bzhi pa yi// dang po byin za yang dag ldan// ro langs ma yis rnam par brgyan// mthar gnas pa yi gsum pa la// g+hasma rI yis rnam par brgyan// dang po yi ni dang po la// mthar gnas pa yi dang po dang // rdo rje ma yis rnam par brgyan// k+Sha ni chom rkun ma yis brgyan// lnga pa nyid kyi dang po dang // uSh+ma rnams kyi bzhi pa la/ / rdo rje mkha' 'gro ma yis brgyan// stong pas mnan cing sum 'gyur te// phaT dang mthar ni swA hA nyid// phyag gnyis pa'i sngags so// bdag med dang po'i dang po dang / / gnyis pa nyid kyi dang po dang // gsum pa nyid kyi dang po dang // bzhi pa yi ni dang po dang // lnga pa yi ni dang po dang // mthar gnas rnams kyi dang po dang // uSh+ma rnams kyi dang po nyid/ / dang por rnam snang mthar swA hA// grong khyer dkrug pa'i sngags kyi bzlas pa ni 'bum mo// mthar gnas rnams kyi gnyis pa dang // k+Sha yi rkang pa gnyis 'gyur nyid// hUM gi rnam pa gsum dang ldan dang po rnam snang phaT nyid kyi/ / rnam pa nang bcug mthar swA hA// sa sbyong ba'i sngags so// dang por rnam snang de rjes su// rdo rje ma yi mtha' ru hUM// bza' ba dang datung ba byin gyis brlab pa'o// dang por rnam par snang mdzad nyid/ / de rjes a kA ro mu khaM// uSh+ma rnams kyi gsum pa dang // mthar gnas pa yi bzhi pa ni// steng du me yis rnam par brgyan// d+har+m+ma NAM de rjes rdo rje ma// byin la d+ya nut+pan+na tAtra/ oM AHhUM phaT swA hA/ 'byung po thams cad kyi gtor ma'i sngags so// kye'i rdo rje las sngags btu ba'i le'u sde dgu pa'o// de nas chos kun sdom cig pa'i// rdo rje sems dpa' zhes byas gsungs/ / bdag med ma la 'o mdzad nas// bzlas pa'i yul ni rab tu dbye// shel gyis rengs pa'i bzlas pa nyid// dbang la tsan dan dmar po nyid// lung tang gis ni mngon spyod nyid/ / ni raraM shus ni sdang ba la// rta yi rus pas skrod pa nyid// bram ze'i rus pas dgug pa nyid// glang po'i rus pas char pa la// ma he yis kyang gsad pa la// rengs par 'o ma'i btung ba nyid/ / dbang la rang gi 'dun pas spyad// gsad pa la ni si h+la nyid// dgug pa la ni bzhi mnyam nyid// sdang la sA lu skyes pa brjod// bskrad pa nyid la gla rtsir brjod// yang na mtha'i sha dang / dang po'i sha dang / na dang po dang / ga dang po dang / ha dang po nyid kyang de bzhin no// kye'i rdo rje las bzlas pa'i le'u zhes bya ste bcu pa'o// / kye'i rdo rje la dam 'khyud cing / tshems kyis ma mchu btsir nas ni// lus can rnams kyi rigs kyi gzugs// de la bdag med mas zhus pa// b+ha gar ling ga bzhag nas ni// 'khor lo'i 'dren pas 'di skad gsungs// lus can rang gi rigs bshad kyis/ / shes rab pha rol phyin ma nyon// bud med dam ni skyes pa yi// gang gi srin lag rtsa ba la// rdo rje rtse dgu par gyur pa// mi bskyod pa yi rigs mchog nyid// rnam snang mdzad kyi 'khor lor gyur/ / dpag med mgon gyi 'dam skyes nyid// rin chen 'byung gi rin chen nyid// las kyi rigs kyi ral gri nyid// rnal 'byor pa gang nag po nyid// de yi lha ni mi bskyod pa// rnal 'byor pa gang dkar po che/ / de yi ldan rnam snang mjed// rnal 'byor pa gang sngo bsangs che// de yi lhani don yod nyid// rnal 'byor pa gang ser po che// rin chen bdag po rigs kyi lnga// rnal 'byor pa gang dkar dmar nyid/ / 'od dpag med pa rigs kyi lnga// rnal 'byor pa gang dkar dang ser// de ni sems dpa'i rigs su 'gyur// skye bo rnal 'byor mthar phyin pas/ nga rgyal mi bcag mtho mo btsam// kun rdzob gzugs su gnas nas ni// de rnams bde gshegs rigs su 'gyur// bud med rnams kyi mtshan nyid ni// ji ltar skyes pa de bzhin no// kun rdzob tha spyad tshul las ni/ / de yi rigs su'ang de 'gyur ro// b+ha gar ling ga'i 'o mdzad nas// de la rdo rje che mnyes nas// bdag med ma yis go mdzad pa// lha mo rab tu mchod pa nyon// tshal dang skye bo med gnas dang / / bdag gi khyim gyi nang du yang // gcer bus phyag rgya che byas nas// rnal 'byor rig pas rtag tu mchod// 'o dang 'khyud pa byas nas ni// de bzhin b+ha gar reg pa nyid// skyes pa'i sna ni gzhib pa dang // ma mchu'i sbrang rtsi btung ba nyid// rtag tu myos pa'i mtshan ma las// bo la ldan pas lag pas bya// khyogs dang brla zhes bya ba dang // de bzhin shin tu skal ba yis/ / yang yang rdo rjes 'dod pa bya// steng dang 'og tu lta ba nyid// dngos grub rgyas pa thob pa ste// sangs rgyas kun dang mnyam par 'gyur// de la ga pur btung bar bya// de la ga pur rgyu yi phyir/ / sha ni bza' ba nyid du 'gyur// khyad par du ni chang nyid do// kye'i rdo rje las lhan cig skyes pa'i sbyor ba'i don gyi le'u zhes bya ba ste bcu gcig pa'o// // de nas rje can gyis dbang / / bzhi pa'i don ni bka' stsal pa// rdo rje rab gnas rdo rje nyid// tshe dang dril bu chen po zung // ngi ring rdo rje slob dpon 'gyur// slob ma bsdu ba nyid du gyis// ji ltar 'das pa'i sangs rgyas kyis/ / byang chub sras rnams dbang bskur ba// bdag gi gsang ba'i dbang gis ni// sems kyi rgyun gyis dbang bskur ro// lha mos dga' sbyin gnas sbyin ma// sna tshog gzugs can yid 'ong ma/ / khyer cig khyer cig sems dpa' che// khyer la mchod pa rtag tu gyis// ye shes 'di ni ches phra zhing // rdo rje nam mkha'i dkyil lta bu// rdul bral mthar phyin zhi ba nyid/ / khyod rang yang ni de yi pa// rdo rje dang pad+ma byin gyis brlab pa'i sngags ni/ oM pad+ma su khA d+hA ra ma hA rA ga su khaM da da tsa tu rA nan+da b+hA ga bi shwa hUM hUM hUM kAr+yaM ku ru Sha me/ oM badz+ra ma hA dwe ShaH / tu rA nan+da dA ya kaH/ kha ga mu khaM ka ra so nA tha hUM hUM hUM kAr+ya ku ru Sha me oM AHhUM/ spyi bor ni oM gyi rnam pa/ snying kar ni hUM gi rnam pa/ ze 'bru la ni AH'i rnam pa'o// rgyud kyi rgyal po sgyu ma'i brtag pa zhes bya ba brtag pa sum curtsa gnyis las phyung ba brtag pa gnyis kyi bdag nyid kyi'i rdo rje mkha' 'gro ma dra ba'i sdom pa'i rgyud kyi rgyal po chen po rdzogs so/ /

CLOSE WINDOW