rgya gar gyi mkhan po ga yang+ga ra dang / lo nub dge slong shAkya mi shes kyis bsgyur ba'o// rgya gar skad du/ shrIk+Sha yabAk+tsit+ta tan+t+ra rA dzA/ bod skad du/ dpal sku gsung thugs kyi rgyud kyi rgyal po/ dpal rdo rje sems dpa' la phyag 'tshal lo// 'di skad bdag gis 'dod chags che// mtshon gyur la ni yang dag gnas/ mgon po thugs rje che ldan pa// khyod kyis bdag la bshad du gsol// rdo rje 'dzin pas bka' stsal pa// sku ni bum pa'i ngo bo ste// gsung ni gsang ba'i ngo bo yin// thugs kyang shes rab ye shes te// sangs rgyas spyan dang mA ma kI/ / dam tshig sgrol ma gos dkar mos// rdo rje 'dzin la 'di skad gsol// rgyud kyi don la rab goms shing // smra ba'i tshig gis ma rmongs shing // gzhan gyi rtsod pas mi rdzi yang // dbang dang man ngag ma thob par/ / dbang bskur rab gnas sbyin sreg sogs// sngags spyod ngal ba don med de// shi nas sems can dmyal bar skye// de phyir gtso bos dbang gsum gyi// man ngag yang dag bshad du gsol// rdo rje 'dzin pas bka' stsal pa// dang por bum dbang rim pa yang // gnas ni shin tu bsngags pa btsal// bkra shis yid dga' shin tu snum// bkra shis bya rnams skad snyan sgrogs// dpag bsam shing rgyas yod par 'dod/ / gzhan yang dur khrod shing gcig gam// chu ngogs dag la sogs pa ru// sa bdag sa yi lha mo la// gtor ma sbyin sreg mchod yon gyis// sa bslang phyir ni mtho rnams gzugs/ de nas dang po bsnyen pa dbul// bsnyen pa gsum ni rab 'bring tha// mtshan ma grangs dang dus su gsungs// re re la yang gsum gsum ste// mtshan ma gzugs dang 'od dang sgra// grangs ni stong dang khri dang 'bum/ / dus ni bco lnga bcu gsum dang // bdun du bsnyen pa rdzogs pa dang // lha rnams bsnyen pas mnyes byas nas// lha dang slob ma rdzas rnams kun// lhag par gnas pa tshul bzhin bya// bkra shis lo grangs ldan pa yi// bu mo ku sha'i phyogs mthun pa'i// ku sha btsal la mtshan ma brtags// so shing rtse mor me tog dri// srung skud la sogs mtshan ma brtag/ dbang gi dkyil 'khor bskyed par bya/ / dkyil 'khor slob ma rab 'thing za// ting 'dzin me tog rdul tshon rim// gang dang ldan pa de nyid do// de nas mchod rdzas rim pa dgram// khaM bir mi sngags kyis kya // de la rdo rjes byab par bya// de nas ku sha la sogs la// spogs pa'i cho ga dang bcas bya// gzhan yang sngon du 'gro ba'i rdzas// bla ma mnyes par bya ba dang // dkyil 'khor lha rnams mchod pa'i phyir// rta dang glang po ma he dang / / rin chen la sogs gter rnams dang // spos dang mar me la sogs pa// brgya 'am stong ngam khri 'am 'bum// bla re rgyan dang ba dan sogs// byin brlabs tshogs bsags phyi ru dgod// de nas slob ma gzhug par bya// khrus dang yan lag dri yis byug/ kye ho khyod ni ji lta bu// 'jig rten 'khrul pa las sad na// he ru kar grags chen po yi// dkyil 'khor chen por khyod rol lam// dad pa dang bcas spro bar gyis/ / rnam rtog dang bral rdo rje sems// dga' chen khyod bdag ston pa po// rdo rje 'dzin pa dgongs su gsol// byang chub chen por lung ston pa// mgon po chen po bdag 'tshal lo// dam tshig de nyid bdag la stsol// byang chub sems ni bdag la stsol// pad+ma las byung bdag la stsol// gsang ba las byung bdag la stsol// thar pa chen po'i grong mchog tu// mgon pos bdag ni gzhug tu gsol/ / legs so legs so rigs kyi bu// rgyal sras kun gyi nang na mchog/ rnam rtog thams cad 'jig byed pa// gnyis med khyod kyis blang bar bya// mi bskyod bcom ldan dang mtshung pa'i zil gyis mi non khyod kyis blang / / dam tshig spyod pa spyad na ni// mchog gi de nyid thang bar bya// thabs dang shes rab zung du 'jug/ nam yang khyod kyis spang mi bya// tshangs spyod de bzhin bsam gtan la/ / 'bad pas sems ni brtan par bya// chang ni rtag btung khro mi bya// de bzhin sha yang shes par bya// gzhan gyi phyag rgya brten par bya// 'di ni dam tshig brgyad yin no// dkon mchog gsum la snabs su 'gro/ / thun mong sdom dang sems bskyed sbyin// bskor ba lan gsum phyag gsum bya// yol bas bar du gcad nas ni// mig la sogs pa lnga bkab la// lha grangs du yod me tog sbyin// kun byed chu yis bsal dag bya/ / me tog dang bcas rdo rje yang // de yi snying la bzhag la bsgom// slob dpon la ni brnyas byed sogs// lhung ba'i nyes pa brjod par bya// phyi yi rdo rje 'dzin pa dbab// sngon du sdig pa lan gsum dral/ / mig gis gzugs rnams mthong ba dang // rna bas sgra dang sna yis dri// lce yis ro dang lus kyis reg/ dngos grub 'phrin las so so ru// mkhas pas shes shing brtag par bya/ / me tog dor te lha yang sbyin// 'khor rnams gtso bo'i yan lag yin// gtso bo'i mtshan nyid shes par bya// ji ltar gso ba'i sman pa yis// dbang po lnga yi zug rngu 'byin// de bzhin sems dpa' chen po yis/ / mi shes pa yi rab rib kun// rgyal ba rnams kyis yang dag bsal// de la gzugs brnyan dkyil 'khor bstan// dbang gi dkyil 'khor byang shar du// pad+ma 'dab ma brgyad pa ru bzhag la rig pa'i dbang lnga bskur/ / chu khams mi bskyod me long gis// rdo rje rigs kyi 'phrin las 'grub// dbu rgyan rin chen 'byung ldan te/ mnyam nyid ye shes rang bzhin gyis/ / rin chen rigs kyi 'phrin las 'grub// 'od dpag med pa rdo rje'i dbang // so sor rtog pa'i rang bzhin gyis// pad+ma'i rigs kyi 'phrin las byed// dril bu don yod grub pa ste// bya ba nan tan ye shes kyis/ / 'phrin las sna tshogs byed par 'gyur// rigs las dras nas ming gi dbang // rdo rje dang sbyar rdo rje sems// rnam snang chen po'i ngo bo sde// chos dbyings ye shes rang bzhin las// de bzhin nyid kyi mtshan nyid 'dzin/ / mi 'jigs seng ge'i khri stengs su// rig byed slob dpon dbang sbyin bya// bdud bzhi 'joms pas rgyal mtshan bzhi// chos rnams mi nub rgyal mtshan 'dzugs// chos kyi sku yis kun la khyab/ / gdugs kyis steng nas dgab par bya// rdo rje dril bu brtul zhugs gnyis// phyag rgya'i dam tshig gsum yin te// dbugs dbyung ba dang lung bstan dang // rjes su gnang dang phyir mi ldog/ brtan par byed dang rnam pa lnga/ / gzhan yang rdzas kyi bye brag rnams// rin chen bdun la sogs pa kun// thun mong yin pa rang yis gsungs// bum pa'i dbang la rnam gsum ste// dkyil 'khor du 'jug dang po yin/ gnyis pa rig pa'i dbang yin te// brtan par byed pa gsum pa'o// de nas gsang ba bshad bya ba// lus ni ri rab lhun po la// byang chub sems kyi gnas bcas nas// bde ba'i stan la gnas nas su// gsang ba'i dbang gis rten gyur pa// rig ma dang po btsal bar bya// dang po shes pas brtag pa dang // bdag dbang yod par blang ba dang // nyes pa dag par snang ba dang // dkyil 'khor bskyed par bya ba dang / bar chod bgegs rnams zhi ba dang // srung dang de la tshogs kyis mchod// dri yi thig le du ma bya// g.yon na gnas pa de nyid dang // srub dang bsrub thabs sbyor ba dang // bsrubs las bde ba'i chu rgyun gyis// lus kun khyab na gsang ba ru/ / dkar la rtsa dmar lta bur 'dzag/ dkyil 'khor du 'jug gong dang 'dra// ro ma'i 'khor lor d+ha bsams la// lce de pad+mar byin brlabs te// lce yi rtse mor b+ha bsams la// si h+la ga pur 'dres pa yis/ / b+ha la gzhag ste de la bstim// sor gnyis longs spyod mnyam sbyor la// dbus su mi dmigs bsgom par bya// gsang ba'i dbang la rnam gsum ste// rdo rje gtso mos sbyin pa dang // khro mo sbom pos sbyin pa dang / / rdo rje gre tshangs sbyin pa'o// shes rab ye shes dbang la yang // dang por shes rab brtag pa ni// lus dang ngag dang yid dang gsum// mkhas pas brtag cing shes par bya// de nas khyad par lnga brtags te/ / rigs dang lang tshe longs spyod dang // rgyan dang gzugs kyi khyad par lnga// phyi yi brtag pa yin par gsungs// sems brtan rdo rje yi ni rigs// khyad par yin par nga yis gsungs// rnam rtog chung ba'i rdo rje yi// lang tshe'i khyad par yin par gsungs// mi rtog pas brgyan shes pa ste// rdo rje'i rgyan gyi khyad par yin// de nyid dus gsum du mi 'gyur// mi nub chos kyi rgyal mtshan te// rdo rje'i gzugs kyi khyad par yin/ / chos rnams thams cad stong pa nyid// de yi rol longs spyod pas// rdo rje'i longs spyod khyad par ro// kun 'dar ma ste thugs kyi rigs// rigs kyi khyad par yin pa'o/ / de nyid mda' lhar mkhrang ba ni// thugs kyi lang tsho'i khyad par ro// rtsa de dmar la dngas pa dang // byang chub sems ni dkar la dngas// gnyis su med la dkar ba'i tshul// dper na nor bu ke ke rudar la brgyus pa ji bzhin du/ / thugs kyi gzugs kyi khyad par ro// la la nA dang ra sa nA// a ba d+hU tir gnyis med la// spyod thugs longs spyod khyad par ro// dang por phyi la gnyis pa nang // gsum pagasang ba'i brtag pa'o/ / lus brtag pa ni sku yin te// ngag brtag pa ni gsung du 'gyur// yid brtag thugs su 'gyur ba'o// sgyu ma tsam gyi dgongs pa'i don// kun la khyab par shes par bya/ lus kyi drug la ngag gi dun// sems kyi bdun po sgyu ma'i tshul// dang por smig rgyu chur 'khrul dang // gnyis pa smig rgyu nyid yin te// gsum pa smig rgyu mi snang bzhin// de bzhin zhal nas shes par bya// tshuchul bdun no mar la gcig/ dri ni bdun te sha la gnyis// sgo nga bzhi ste 'o ma gsum// 'di rnams btsal ba'i rten gyur pa// lo ni gsum bzhi yin par gsungs// ka ra gnyis te bu ram gcig chang ni gnyis su shes par bya/ / rgyan ni bye brag sna tshogs so// dgun dang de bzhin ston gyi sha// zhag gcig na ni bcud dang ldan// dbyar dang dpyid kyi sha rnams kyang // drod dang ldan zhing bcud dang ldan// rang bzhin shi ba'i sha yin te/ / 'dun pa byas na dam tshig nyams// rtsa ba lnga dang yan lag bcas// gzhan yang 'bras bu la sogs sman// mar dang bcas pas sbyar bar bya// sha yang mar gyis de bzhin no/ bas kun gyi bcud skyed de// mngar ba kun gyis ro rtsa byed// bcud skyed sha ni gzhon nu ste// ro rtsa sha ni bco lnga yin// bcud skyed sha dang mar gnyis kyang // lnga dang lnga yi cha yis bsres// chang ni mnyam por gsungs pa'o/ / ro rtsa ba yi sha la yang // 'o ma sgong cha mnyam par// lnga gsum lnga gnyis gtso bor bya// kha ra'i chang ngam 'o ma'am// sha dang mnyam por sbyin par bya// 'di ni yan lag spros pa so/ / de nas mtshams gcad bsnyen pa dang // dam tshig sna tshogs bya ba yang // spros pa med pa'i yan lag yin// dbang bskur sngon du sgom pa'i don// dbang thob phyir ni nga yis gsungs// rig ma gtad dang man ngag sbyin/ / brda rnams bya zhing 'dod pa'i rtags// rtag pa shin tu spros pa med// phyag dang zhabs la sogs pas 'khyud// dang po'i sbyor thags zhes gsungs so// dbu rgyan mgul rgyan la sogs pa/ / sbyor thabs chen po zhes bya ste// langs pa tsog pu gan rgyal dang // kha srub 'phred dang lnga yin te// 'di rnams kun gyi dgongs pa zab// dgongs med spyad pa spyod byed pa/ / 'di ni mnar med skye ba'i rgyu// tha mal pa las brgya 'gyur gyis// bum pa'i dbang dang 'brel ba'o// bum pa dang ni gsang ba ste// gsang ba las gzhan gsum pa ste// de yi rnam smin brjod mi lang dkyil 'khor du 'jug rim pa ni/ / bla ma'i zhal las shes par bya// yan lag bdun bsgoms sbyor ba dngos// khyad par rnam pa gsum las byung // sngags dang / sman ni dang po ste// gnyis pa sbyor thabs yin par gsungs// gsum pa ting 'dzin yin pa ste// sngags dang sman gyis kun da drang // rked shing tshad dang gnas pa'i tshad// drang ba'i tshad rnams shes par bya/ / 'byung ba bzhi dang rigs mthun pa'i// rked shing rkeng pa'i tshad dang mnyam// sor gsum sor bzhi dar ram men// gnas pa'i tshad ni rnam pa drug/ rnam thar gsang ba'i pho brang gnas// skye mched rig par gnas pa'o/ / stong pa rta mgrin 'khor lor gnas// khams rnams gsang ba bde skyong gnas// 'dab la sprul pa'i 'khor lo gnas// yang dag spong ba snying khar gnas// he ru kar nim gshegs shing / / rdo rje mda' yis ma brgyab pa'o// drang ba'i tshad ni sor bzhi dbyug/ dang por khrus byas gnyis pa la// sman dang snum dang dri dang gsum// sum cha sum gnyis stod smad du// lus la bsku zhing me la bdug/ rtse gsum rtse ni shin tu zab// ba spu ba dang lta ba dang // ra mnye ba dang nye'u shing dang // ra mo shags dang yan lag bcas// rdo rje la sogs lnga sbyar dang // gzhan yang sman dang snum dang dri// dar la sogs pa'i nang du blugs// sgo gnyis nas ni thi ldos 'dug/ zab pa'i sngags btab bsgoms byas nas// dang por mtshan ma shes par bya// chags pa'i gzi ldan sna tshogs 'byung // tha ma'ang gsum mam bdun na 'byung / / dgongs pa'i bye brag shes gyur nas// sngags dang sman gyi khyad par ro// dgongs pa mi shes 'dod chags phyir// sman la sogs pa btsal mi bya// 'di yi sdig pa bsam mi khyab/ / gdug pa'i sbyor thabs shes gyur na// dbus kyi rtsa yi kha 'byed pa// sgor thabs khyad par yin par gsungs// bde chen go bzlog sbyor ba dang // 'khor lo'i go bzlog sbyor ba dang // sku yi go bzlog sbyor ba dang / / ye shes go bzlog sbyor ba dang // 'byung ba go bzlog sbyor ba dang // yum gyi go bzlog sbyor ba dang // thig le go bzlog sbyor ba dang // bsam gtan go bzlog sbyor ba dang // yi ge go bzlog sbyor ba dang / stong pa'i go bzlog sbyor ba dang // dbugs kyi go bzlog sbyor ba dang // dga' ba'i go bzlog sbyor ba dang // gtum mo'i go bzlog sbyor ba dang // rtsa yi go bzlog sbyor ba dang // byang sems go bzlog sbyor ba dang // g.ya g.yon go bzlog sbyor ba dang / / brda yi go bzlog sbyor ba dang // rten gyi go bzlog sbyor ba dang // kun mkhyen gyis kyang ma gzigs pa// sangs rgyas rnams kyi thugs kyi gsang // byang chub sems dpa' kun gyi yum sras rnams thun mong ma yin bskyed/ / ting nge 'dzin gyi khyad par ro// 'di yi khyad par ma dpags par// zab pa'i don ni yod ma yin// dbang bskur ba yi sngon du yang // gdams ngag sbyin par gsungs pa yin/ gdams ngag de yis dbang thob 'gyur// shes rab ma la brten nas su// bde ba'i ye shes bskyed pas ni// shes rab ye shes dbang du gsungs// si h+la ga pur shes rab ste// de yi bde ba ye shes yin// si h+la shes rab ces bya ste/ / ga pur ye shes su ni bshad// rtsa gsum 'dus pa shes rab ste// de yi thig le ye shes yin// la la nA ni ye shes so// ra sa nA ni shes rab ste// rtsa ni shes rab ces bya ste/ / byang chub sems ni ye shes so// mkha' 'gro ma ni shes rab ste// dpa' bo ye shes su ni bshad// dga' ba gsum ni ye shes te// rang bzhin dga' ba shes rab yin// 'og ni shes rab ces bya ste/ / steng la ye shes su yang bshad// g.yon pa shes rab ces bya ste// g.yas pa ye shes su yang bshad// chos dbyings shes rab ces bya ste// ye shes bzhi ni ye shes yin// phyag mtshan ming dang yi ge rnams/ / gzhan yang bye brag shes par bya// shes rab ye shes la yang gsum// tshig la bslab pa'ang gnang ba yin// gzugs brnyan la ni bshad pa ste// mngon par rtogs pas bsgom pa gsungs// / e baM ma ya'i rnam pa yang // e ni sa ste baM ni chu// ma ni me ste ya ni rlung // e ni snying rje baM ni bya mas// ma ni dga' ba ya btang snyoms// e ni spyan pa mA ma kI// ma ni gos dkar ya sgrol ma/ a ni sbyin pa baM / tshul khrims// ma ni bzod pa ya bsam gtan// e ni phyag rgya chen po ste// baM ni dam tshig phyag rgya yin// ma ni chos kyi phyag rgya ste// ya ni shes rab phyag rgya'o// e ni shar te baM lho phyogs// ma ni nub sti ya byang phyogs/ / e ni sku yi thig le ste// ba ni gsung la ma ni thugs// ya ni ye shes thig le'o// oM ni sngon po baM ljang ku// ma ni dmar po ya ser po// e ni mkha' 'gro ba lA ma// ma ni dum skyes ya gzugs can/ e ni ye shes mkha' 'gro ste// baM ni rdo rje'i mkha' 'gro yin// ma ni sha za'i mkha' 'gro ste// ya ni las kyi mkha' 'gro'o// e ni 'gog pa baM ni lam// ma ni sdug bsngal ya kun 'byung // e ni bde chen baM longs spyod/ / ma ni chos la ya sprul pa// e ni mtshan ma baM stong pa// ma ni rnam thar ya dpe byad// e ni rnam pa sna tshogs te// baM ni rnam par smin pa'o// ma ni rnam par nyed pa ste// ya ni rnam pa mtshan nyid bral/ e ni chung ngu baM 'bring po// ma ni lhag pa ya cher lhag/ e ni g.yas nas me rgyu ste// baM ni g.yon nas rlung rgyu'o// ma ni 'og nAs rlung rgyu// ya ni steng nas chu rlung rgyu// e ni gnas brtan baM phal chen/ ma ni bku ra ba ya thams cad// e ni bsnyen pa baM nye bsnyen// ma ni sgrub pa ya sgrub chen// e ni shar lho bai lho nub// ma ni shar mtshams ya nub mtshams// a ni rgyud la baM ni sngags// ma ni ye shes yags ba.e ni snang ba baM snang mched/ / ma ni snang thob ya 'od gsal// e ni bdag gi bzang po yin// ba ni dus kyi bzang po yin// ma ni ye shes bzang por gsungs// ya ni rlung gi bzang po yin// e ni bdag gi gnas yin te/ / baM ni rnal 'byor gnas su bstan// ma ni gzhan gyi gnas yin te// ya ni rgyad kyi gnas yin no// e ni dga' ba baM mchog dga'// ma ni lhan cig ya dga' bral// e ni me long ba mnyam nyid ma ni kun rtogs ya nan tan/ / e ni chos sku baM longs spyod// ma ni sprul sku ya bde chen// e ni zhi ba baM ni dbang // ma ni rgyas pa ya gsod pa// yi ge btus pa'i sngags tshan gsum// oM ni sku yi 'khor lo ste/ AHni chos gsung 'khor lo'o// hUM ni thugs kyi 'khor lo yin// oM ni rnam snang AH'od dpag med// hUM ni mi bskyod rang bzhin no// oM ni phyag g.yon hUM ni g.yas// AHni dbus kyi snying ka yin/ oM ni g.yon gyi spyan yin te// hUM ni g.yas pa AHdbus ma// oM ni srog la hUM rtsol ba// AHni gnas par shes par bya// oM ni sku la hUM ni thugs/ A ni gsung du shes par bya// oM ni lus la AHni ngag/ hUM ni yid du shes par bya// oM ni thabs la hUM shes rab// AHni gnyis su med pa'o// oM ni g.yon gyi la la nA// hUM ni g.yas kyi ras nA// AHni a bad+hU ti yin// oM ni g.yas kyi ras na// hUM ni g.yon gyi la la nA// Ani de bzhin dbus na gnas/ oM ni ga pur hUM si hUM// A ni dkar dmar rtsa dag yin// oM ni mchog dga' hUM khyad dga'// AHni rang bzhin dga' ba'i don// dga' ba lhan cig/ skyes dgar 'gyur// lhan cig skyes pa dga' bar 'gyur// rgyu la 'bras bu sbyor ba dang // 'bras bu la ni rgyu sbyor dang // rgyu la rgyu yi sbyor ba dang // 'bras bu la yang 'bras bur sbyor// rgyu 'bras gnyis su med par sbyor/ / thabs la shes rab sbyor ba dang // shes rab la yang thabs kyis sbyor// thangs la thabs kyis sbyor ba dang // shes rab shes rab sbyor ba dag/ thabs dang shes rab gnyis med sbyor// sbyor ba 'di yi dgongs pa yang // kun mkhyen gyis kyang rtogs par dka'// a ni rnam snang mi bskyod pa// na ro rin chen 'byung ldan te// bla tshes 'od dpag med pa yin// thig le don yod grub pa'o// ma ni bde gshegs lnga rang bzhin/ / zhabs bskyed don yod grub pa ste// ba ni de bzhin 'od dpag med// ha ni rnam par snang mdzad de// zla tshes rin chen 'byung ldan yin// thig le mi bskyod rang bzhin no// zhabs bskyed sgrol ma'i rang bzhin de/ / 'a ni gos dkar ngo bo yin// ha ni rdo rje dbyings phyug ma// zla tshe sa mA ma kI rang bzhin// thig le spyan du shes par bya// 'byung ba lnga dang sku lnga dang // 'khor lo lnga dang dga' ba lnga/ go rim bzhin du shes par bya// zhabs bskyed bya ba nan tan yin// 'a ni mnyam nyid ye shes so// ha ni chos kyi dbyings yin te// zla tshes so sor rtog pa'o// thig le me long ye shes so// 'di dag kun gyi dgongs pa'i don/ / sangs rgyas kun gyi thugs kyi gsang // kun tu gsang zhes dpyad par dka'/ yi ge'i tshul gyis rgyas btab pa'o// de nas byang chub sems dpa' rdo rje snying po dang / mkha' 'gro ma'i tshogs kyis mchod pas mchod nas mi snang bar gyur to/ / mkha' 'gro ma dra ba'i sdom pa sku gsung thugs kyi rgyud kyi rgyal po rdzogs so// / paN+Di ha ga ya d+ha ra dang / lots+tsha ba dge slong shAkya ye shes kyis bsgyur ba'o/

CLOSE WINDOW