dge slong shAkya 'od kyis bsgyur// // rgya gar skad du/ rA dza kA ny+dza bA hu dri pa s+ya pra kyi yu pra Ni d+ha sU tra/ bod skad du/ rgyal po gser gyi lag pa'i mar me'i lo rgyus dang smon lam gyi mdo/ dkon mchog gsum la phyag 'tshal lo// sngon sangs rgyas mar me mdzad kyis ston pa mdzad pa'i dus na/ rgyal po gser gyi lag pa zhes bya bas/ bcom ldan 'das mar me mdzad la 'di skad ces gsol to// btsun pa khyod sngon gyi dus na dge ba'i rtsa ba ci zhig sprad na/ da ltar mtshan dang dpe byad du ldan te/ sku las 'od zer mtha' las pa 'byung ba'i rgyu gang lags/ rkyen gang lags/ bcom ldan 'das kyis bka' stsal pa/ rgyal po chen po nyon cig/ nges so so skye bo'i dus na/ phyogs bcu'i sangs rgyas thams cad la byang chub tu sems bskyed nas/ lus la ras bal gyi le'u til mar gyi nang du bcos pa stong btsugs te/ phyogs bcu dus gsum gyi sangs rgyas thams cad la gtan pa med pa'i mchod par phul bas/ da ltar nga nyid sangs rgyas mar me mdzad ces bya bar gyur pa yin no zhes gsung ba dang / de la rgyal po chen po shin tu yi rang ste/ de nas rgyal po des rang gi lag pa g.yas pa ras ba la mar gyis btsos pas dkris te me gtang nas/ lag pa g.yon pa bar snang la brkyang ste/ phyogs bcu'i sangs rgyas thams cad dang / bdag gi ston pa bcom ldan 'das mar me mdzad dgos su gsol lo/ / 'gyod pa med pa'i sems kyis phyogs bcu'i sangs rgyas thams cad yid kyis mngon sum du dmigs te/ gtan pa med pa'i mchod par bsngos nas/ smon lam 'debs te 'di skad do/ / mar me'i snod ni stong gsum gyi stong chen po'i 'jig rten gyi khams tsam du gyur cig/ snying po ni ri'i rgyal po ri rab tsam du gyur cig/ 'od kyis ni srid pa'i rtse mo man chad nas/ mnar med pa'i sems can dmyal ba yan chad nas/ gzhan yang lcags ri chen po'i phyi rgyab na/ sems can rang gi las kyis sgrib pas bsgribs pa'i mun nag chen po'i nang na/ rang gi lag pa brkyang bskum yang mi mthong ba'i gnas tshun chad snang zhing gsal bar gyur cig/ yun ni dus gsum gyi sangs rgyas ji srid bzhugs la de srid du gnas par gyur cig/ grangs ni phyogs bcu 'jig rten gyi khams mtha' yas pa na bzhugs pa'i sangs rgyas grangs med par re re'i spyan lam du gsal bar gyur cig/ mar me 'di gzugs med par gnas su snang zhing gsal bar gyur cig/ de ltar gsal ba'i mo da la gzugs med pa'i lnga rnams mar me'i 'od kyis bskul ma thag tu/ mtshan dang dpe byad du ldan nas snyoms par 'jug pa'i skye mched bzhi las grol te/ de bzhin gshegs pa'i bsam gtan la sogs pa 'jug pa'i skal ba dang ldan par gyur cig/ mar me 'di gzugs na spyod pa lha rnams kyi gnas su gsal bar gyur cig/ gzugs na spyod pa'i lha rnams ting nge 'dzin gyi dga' bde rtse gcig pa nyams su myong nas/ phyir mi ldog pa'i sa thob par gyur cig/ mar me 'di 'dod khams kyi lha rnams kyi gnas su snang zhing gsal bar gyur cig/ 'dod khams kyi lha rnams kyang / lha'i 'dod pa'i longs spyod la sems ma chags shing / rang gi sems la lta zhing bsam gtan bzhi la rims kyis snyoms par 'jug pa'i skal ba dang ldan par gyur cig/ mar me 'di lha ma yin rnams kyi gnas su snang zhing gsal bar gyur cig/ lha ma yin gyi nga rgyal dang / khro gtum dang / sems kyi gdugs pa zhi nas tshad med pa bzhi dang ldan nas/ zhi gnas kyi sems yid la byed pa dang ldan par gyur cig/ mar me 'di gling bzhi'i mi rnams kyi gnas su snang zhing gsal bar gyur cig/ gling bzhi'i mi rnams kyang sdug bsngal brgyad las thar nas/ brtson 'grus kyi pha rol tu phyin pa dang ldan par gyur si// mar me 'di byol song rnams kyi gnas su snang zhing gsal bar gyur cig/ byol song de dag gcig la gcig za ba dang / brdeg brdung dang / bsad pa dang / bkol ba'i sdug bsngal dang / blun rmongs las thar nas/ shes rab rnam pa gsum dang ldan par gyur cig/ mar me 'di ga shin rje'i 'jig rten du snang zhing gsal bar gyur cig/ gshin rje'i rnams gsod gcod byed pa dang / brdeg brdung gi las thar nas/ de bzhin gshegs pa thams cad kyis pha rol tu phyin pa bsgrags pas/ sems can thams cad gtong ba'i sems 'byung bar gyur cig/ mar me 'di pre ta'i gnas su gsal bar gyur cig/ pre ta rnams kyang bkres skom gyi sdug bsngal las thar nas/ byang chub sems dpa' nam mkha' mdzod kyi thugs rje chen po'i byin gyi rlabs kyis/ zas dang skom gyis 'phongs pa'i longs spyod zad mi shes pa dang ldan zhing sbyin pa'i pha rol tu phyin pa'i dbang dang ldan par gyur cig/ mar me 'di na rag rnams kyi gnas su gsal bar gyur cig/ na rag ni sngon gyi las ngan pa'i rnam par smin pas tshe grang gi sdug bsngal bzod par dka' ba nyams su myong ba las/ 'phags pa spyan ras gzigs dbang phyug gi thugs rje'i byin gyi rlabs kyis/ dmyal ba'i sdug bsngal tshad med pa las thar nas bzod pa'i pha rol tu phyin pa dang ldan par gyur cig/ mar me 'dis 'dzam bu gling gi phyi rol na mun nag gi nang na 'joms pa'i sems can rang gi nang na 'joms pa'i sems can rang gi lag pag yas pa brkyang ba'ang mi mthong ba'i gnas su gsal bar gyur cig/ de dag sngon gyi las ngan pa'i rnam par smin pas zas dang skom 'dod pa las/ nam mkha' la rang gi lcags kyi sen mo yod pas brnyogs pas zas dang skom ma rnyed nas/ rang gi lus zin pa dang sha bcad de za ba de dag de bzhin gshegs pa 'od dpag med kyi thugs rje'i byin gyi rlabs kyis mun nag chen po raM 'joms pa las thar nas/ bde ba can gyi zhing khams su skye bar gyur cig/ gzhan yang mar me 'di klu'i gnas su snang zhing gsal bar gyur cig/ de rnams gti mug dang ser sna'i mdud pa bkrol te gtong ba'i blo dang ldan zhing / nam mkha' lding gis 'jigs pa dang / me tshan bye tshan la sogs te 'jigs pa chen po brgyad las thar nas/ sangs rgyas dang / chos dang / dge 'dun la skyabs su 'gro zhing / srog 'tsho ba'i zhi gnas kyi chu'i thig le snying la gnas nas klu rnams 'dod pa'i yon tan dang ldan par gyur cig/ mar me 'di lto 'phye chen po'i gnas su snang zhing gsal bar gyur cig/ des lto 'phye chen po'i sdug bsngal zhi nas dga' ba rgya mtsho rnam par 'phrul pa'i shugs dang ldan par gyur cig/ mar me 'dis 'dzam bu gling gi spyir gnas pa'i sa bdag dang / lha dang / klu dang / sa bdag gi rgyal po pa ti li dang / sa'i rgyal chen mo dang / rgya mtsho chen po dang / mtsho bran dang rdzing dang / khron pa la gnas pa dang / klung chen po dang / klung phra mo dang / chu mig dang / lu ma la gnas pa dang / gangs ri mthon po'i rgyud la gnas pa dang / ri nag po dang / gala' dang / sha srang dang / spang ri dang / nags chen po dang / shing gcig pa dang / gtsug lag khang dang / mchod rten dang / grong khyer dang / ljongs na gnas pa'i gnas su snang zhing gsal bar gyur cig/ de dag so so'i khrul pa'i rtog pa thams cad byang nas/ dkon mchog gsum la mi phyed pa'i dad pa dang ldan te/ byang chub kyi sems dang ldan nas thar pa thob pa'i rgyur gyur cig/ de ltar deng mar me 'di'i yon bdag gis kyang / gtan pa med pa'i mchod pa 'di phul bas/ bdag dang mtha' yas pa'i sems can rnams de bzhin gshegs pa mar me mdzad kyi zhabs drung du skyes te/ mngon par rdzogs par sangs rgyas nas/ sems can thams cad kyi dpal mgon du gyur cig/ rgyal po gser gyi lag pa'i mar me'i smon lam gyi mdo rdzogs so// / rgya gar skad du/

CLOSE WINDOW