/ dgra bcom pa dge 'dun 'phel gyis lung bstan pa/ 'phags pa 'jam dpal gnon nur gyur pa la phyag 'tshal la 'di skad bdag gis slob dpon gyis bshad pa thos pa na/ yul 'di'i gtsug lag khang brub zhes bya ba'i dgra bcom pa dge 'dun 'phel zhes bya ba gsum rig pa/ mngon par shis pa thob pa/ rnam par thar pa brgyad la bsam gtan pa zhig/ dus gzhan zhig na/ slob ma zhig dang thabs cig tu dbyar zla ba gsum 'jig tshogs kyi ri zhes bya ba la bzhugs te/ slob ma ban+de chos 'dul ba la slob bcig lags na/ sangs rgyas mya ngan las nas lo nyis stong lon pa dang / sangs rgyas kyi bstan pa rgya gar gyi yul ko'u sha ma bi zhes bya bar nub par 'gyur ro zhes thos nas/ 'di snyam du rgya gar yul gyi chos de tsam zhig na yul ko'u sham bir nub par 'gyur ba lta zhig na/ li yul la sogs pa gzhan gyi chos yun ji srid cig tu gnas par 'gyur/ nam 'jig/ rkyen ni gang gi 'jig par 'gyur snyam du the tsom skyes so/ / de nas dgra bcom pa de phyi 'brid kyi dus kyi tshe/ nang du yang dag 'jog pa las 'azhengs pa dang / slob ma des mkhan po'i zhabs la yan lag lngas phyag btsal nas/ 'di skad ces the tsom nus so/ / slob dpon snyan pa bcom ldan 'das shAkya thub pa'i bstan pa lo nyis stong na 'jig par lung bstan na/ li yul 'di la sogs pa yul gzhan gyi bstan pa ji srid du gnas par 'gyur/ 'jig/ rkyen gang gis 'jig par 'gyur ba lags/ de nas mkhan pos bka' stsal pa/ bu khyod kyis li yul la sogs pa'i skye bo mang po'i don dang / bde bar ga pa'i bstan pa yun ring du gnas par bya ba'i phyir the tsom dris pa legs kyis/ legs par nyon la yid la zung zhig dang / li yul la sogs pa'i bstan pa ji srid du gnas par 'gyur/ nam 'jig dang / rkyen gang gis 'jig par 'gyur bas ngas so sor lung bstan par bya'o// bcom ldan 'das shAkya thub pa ni/ bcom ldan 'das mya ngan las 'das nas lo stong lnga brgya lon pa dang / yul yul du dad pa med pa rnams 'byung zhing / dam pa'i chos 'jig tu rgol lo// de'i tshe li yul 'dir dad pa med pa'i rgyal po'ang 'byung bar 'gyur zhing / yul yang rgyal pos phan tshun rtod cing 'phrog par 'gyur ro/ / de phyin chad ni yul yang nyin gcig bzhin du nyams par 'gyur/ grong dang gtsug lag khang la sogs pa'ang phal cher stongs par 'gyur/ mi rnams kyang nyin gcig bzhin du phyir yang dkon mchog gsum la dad pa bri bar 'gyur ro/ / rgyu des na dkon mchog gsum dang / chos smra ba dang / bsam gtan pa kun kyang mchod gnas su mi byed cing / mu stegs kyi rgyal po dang / blon po dang / yul 'dzin pa dang / khyim bdag rnams kyang chos dang mi mthun pa'i phyogs 'dzin cing dge ba bcu'i las kyi lam yal bar 'dor bar 'gyur ro// chos dang 'thun pa ma yin pa dang / ma brtags pa dang ba bcol gyi longs spyod kyang sogs par byed par 'gyur ro/ / de nas de'i 'og tu dge slong dang / dge slong ma rnams 'tshe ba'i yo byad kyi phyir dbyen spro bar 'gyur te/ chos 'dul ba las 'byung ba dge sbyong gi tshul spyod pa ni zhi ba dang / dul ba dang / ngo tsha shes pa dang / khrel yod pa la sogs pa yal bar 'gyur zhing / zhing dang / ldu ma ra dang / nyo tshang dang / bskyi ba rA dang / slongs mo pa rnams kyis 'tsho bar byed do/ / khyim pas bslab par bya ba'i bzo dang / khyim gyi so na ma dang / 'thab rtsod dang / sgo gsol rngams po che'ang byed par 'gyur/ pho nyar yang 'gro bar byed las kyi go 'phang dang / rtswa 'jing yang tshol bar byed par 'gyur te/ de'i tshe ni gtsug lag khang dang dgon pa la mi gnas shing / bde bar gshegs pa'i gdams ngag yal bar bor te/ yang dang yang du mkhar dang / grong dang / tsheng dus dang / srang dang / mdo sum na gnas par sems dga' bar 'gyur/ bran dang / bran mo dang / rkang 'gros kyang tshol bar byed do// rgyu des na khyim bdag dang / yul 'dzin pa dang / blon po la sogs pas kyang de dag la rim gro mi byed cing dad pa phyir log nas/ dkon mchog gsum dang / dge 'dun gyi dkor la'ang 'phrog par byed / / khyim pa de dag gis kyang nor rdzas de dag la bsten cing spyad pas bsod nams 'bri bar 'gyur ro// rgyu des na li yul la sogs par gnod pa sna tshogs 'byung zhing le re zhing dmas par 'gyur te rtsod pa dang / nad dang / dus ma yin pa'i char pa dang / rlung dang / dgra mang po'ang 'byung bar 'gyur ro// dus ma yin pa'i sad dang / srin bu dang / bye ba dang byi ba'ang 'byung bar 'gyur ro/ / de'i tshe sems can rnams nang mi mthun par 'gyur zhing / dus tshigs kyang 'chol bar 'gyur te/ de ltar na yul gang dang gang du chos lugs log pa byed pa der ni gnod pa de dag 'byung bar 'gyur ro/ / de'i tshe li yul la sogs pa'i rgyal po dang / blon po la sogs pa ya rabs las kyang / dkon mchog la snying thag pa nas dad pa 'ga' tsam las mi 'byung na/ pha la la lta smos kyang ci dgos te/ rgyu de lta bus na li yul la sogs pa'i dkon mchog gsum gyi mchod gnas thams cad kyi thams cad du smeg med par 'gyur ro// de nas li yul la sogs par dge slong gi gnas/ sngon rgyal po la sogs pa dad pa can gyis byas pa'ang / blon po la sogs pa dang pa med pa rnams kyis btsan phrogs su phrogs nas bdag nyid gnas par byed do// dge slong rnams kyang 'khyams nas/ 'tsho ba dang / chos gos dang / gnas kyis 'phongs par 'gyur ro// blon po la sogs pa de dag gis dge slong gi zhing chu dang / ldu mar la sogs pa mo byad rnams kyang btsan thabs su 'phrog par byed/ lha 'bangs dang / nang gi ga yog rnams kyang dge slong gi ngag mi nyan cing gnya' rengs su byed par 'gyur ro// de nas dge slong rnams kyis kyang de lta bur gyur par shes nas/ yi mug ste li yul gyi dge slong rnams phan tshun du gcig la gcig 'di skad du/ yu bu cag rnams gtsug lag khang tshar ma zhes bya ba dang po dang chos 'byung ba'i gnas der 'du'o zhes sbran nas gtsug la khang der 'dus te/ dpyid zla tha chung tshes bco lnga'i nub mo gso sbyong byas nas/ gcig la gcig 'di skad du/ yu bu cag rnams sngon lag med par gyur nas/ mkhas pa chos dang 'thun pa rnams la dbang zos pa'i rgyus da ltar khyim pa rnams kyis kyang rtsis lo'ang med par byas te/ da ni 'tshe ba'ang mi 'byor na/ phyin chad gang du 'dod thabs ni gang gis 'tsho bar bya zhes smras te/ de'i tshe thams cad kyis tshe nge chen po 'debs par 'gyur ro// de nas de'i tshe bde bar gshegs pa'i bstan pa bsrung ba'i lnga/ bcom ldan 'das kyi byas pa gzo ba thams cad kyang gtsug lag lang der 'dus te/ gcig la gcig blta zhing 'di skad du/ bde bar gshegs pa'i bstan pa ni ring po mi gnas so// yul pa 'di'ang stongs par 'gyuraro zhes mya ngan byed cing ngu bar 'gyur ro/ / de'i tshe dge slong de dag 'di snyam du yul 'dir ni 'tshe ba ma 'byor na 'di bor te/ yul gzhan du 'gro bar bya'o snyam du sems 'thun par gyur nas/ gang du 'dong bar bya zhes gros byas te/ yul nye ba gzhan dang gzhan na ni dad pa med pa gang gis gang / rgya gar yul du 'dong du ni lam mi thar pas bod kyi yul na dkon mchog gsum la mchod gnas su byed ces gra pa der 'gro bar byas nas/ nyi ma 'di la 'dong ngo zhes dus btab nas/ de'i nub mo gtsug lag khang tshar mar zhag go// nam langs pa dang / bud med dad pa can zhig gis gdan chung la spyan drangs te/ de nas gaN+DI de brdungs nas/ dge 'dun spyis gtsug lag khang bskor te mchod pa byas pa dang / sangs rgyas kyi gzugs brnyan gyi gdan khri zhig gas pa'i gseb nas sgrom bu tha rabs can zhig snang bar 'gyur te/ de nas sgrom bu de phye ba dang / de'i nang nas gser las byas pa'i kha zas sder cha bdun byung ste/ dge slong kun gyis de blangs te/ 'brur bsgyur nas dge 'dun kun dbyar zla ba gsum gtsug lag khang tshar mar tshul du 'jug pa'i 'tsho ba sbyar nas/ zong lhag ma las yul byung ste/ 'gro ba'i lam brgyags dang khur kha la sbyar ro// dbyar zla ba gsum 'das nas 'di skad du/ yu bu cag rnams byin gyis brlabs brlabs pa'i yul 'di bltas la 'gro bar bya'o zhes smras te song nas/ 'phags pa sa'i snying po'i gnas gtsug lag khang ye shes ri zhes bya ba'i drung du phyin pa dang / de'i tshe brag la mchod rten gyi 'og gzhi rnying pa zhig yod pa rdib pa'i nang nas gser khor ched po mu tig gis gang ba zhig byung ba dang / de'ang blangs te 'brur bsgyur nas/ phyogs der dgun zla ba gsum gnas pa'i 'tsho ba sbyar te/ de nas dpyid byung ste 'gro ba'i dus la bab nas song ste/ shes chu 'og ma rgal ba dang / yul mi stod pa rnams kyis lam yogs su gdugs chod sbyar nas/ nyi ma re re zhing gtsug lag khang dag tu gdugs tshod gsol bar 'gyur ro// de'i tshe yul mi smad pa rnams kyis kyang dge slong rnams yul byung ste 'gro'o zhes thos nas/ dge 'dun de dag gtsug lag khang tsong zhes bya bar spyan drangs nas zhag bdun gyi bar du bshos sbyor bar 'gyur ro/ / de'i tshe li yul na gnas pa'i klu thams cad 'di snyam du/ bde bar gshegs pa'i bstan pa ni rmeg med par gyur la thug go snyam du mya ngan byed cing bstan pa gnas par bya ba'i phyir char chen po phab ste/ char pa des gtsug lag khang tsong zhes bya ba'i nang na mchod rten gyi gzhi zhig yod pa nas/ gser por gser phyes gang ba zhig byung ba dang / de'ang dge 'dun gyis btsongs nas/ dpyid kyi 'tsho ba'i yo byad rnams sbyor bar 'gyur ro// de nas yang yul gyi smad pa rnams kyis gtsug lag lang sa la'i tshal zhes bya bar dge 'dun rnams spyan drangs nas/ zhag bdun gyi gdugs tshod gsol nas/ zhag bdun len pa'i nyin par yul stod smad kyi mi thams cad gtsug lag khang sa na ba nar 'dus nas/ dge 'dun la rdzongs dang khur khal 'bul lo// de'i tshe mi rgan rgon rnams ni bslab pa 'dzin par byed/ gzhon nu rnams ni rgyang ma nas lta zhing gad mos 'debs pa dang 'grogs par 'gyur ro// de'i tshe mkhar dge ba can gyi nang nas kyang mi rgan rgon kha cig gis gos kha dog bsgyur ba dang / lam du 'jug pa'i yo byad so so nas thogs nas/ so so'i dge ba'i bshes gnyen dge slong de dag gi mdun du lhags nas/ 'phags pa rnams bzod par bshags shig ces smra zhing mchis te phyag 'tshal bar 'gyur ro// de'i tshe mchod pa de ni dper na ku sha'i grong khyer gyi mi rnams bcom ldan 'das mya ngan las 'da' bar shes nas/ mya ngan byed bzhin du mchod pa dang 'dra bar yi yul du dkon mchog gsum mchod pa'i tha ma yin no// de'i 'og tu dge slong rnams gtsug lag khang de nas bod yul ngos su chas pa dang / la ma ka na mchod rten rnying pa zhig gi drung du/ dpal lha mo chen mos dge 'dun gyi ched du gser gyi dong tse phu rung gang bzhag pa rnyed nas/ dge 'dun gyis de bgos te/ lam gyi cha rdzas sbyor bar 'gyur ro/ / de'i tshe li yul gyi mkhar gtsug lag khang ka sar zhes bya ba na/ rgyal rigs las skyes pa'i yon bdag gcig 'byung bar 'gyur te/ yon bdag des dge 'dun rnams zhag bdun du mchod ston gsol bar 'gyur ro/ / de'i tshe mchod ston gsol ba de ni li yul du dge 'dun mchod ston gsol pa'i tha ma yin no// de nas dge slong rnams me skar gyi lam du zhugs te song ba dang / de'i tshe dge slong pho mo gsar bu las phal cher rang rang gi slob dpon dang mkhan po la chos gos phul te/ bzod par gsol nas slar yul du ldog par 'gyur ro// dge slong po mo gsar bu kha cig ni rab tu byung ba'i dngos po mi gtong zhing / pha ma la sogs pa'i gnyen skyel du 'ongs pa rnams la mya ngan gyi tshig smra zhing dus nas/ gnyen rnams phyir zlog ste/ dge 'dun dang lhan cig tu mi dga' ba'i yid kyis phyir byin gyis brlabs pa'i yul dang / gnyen gyi rjes bzhin du lta bzhin du me skar gyi lam du zhugs te 'gro bar 'gyur ro// de ltar song ba dang / de'i tshe rnam thos kyi bu dang / dpal lha mo chen mo gnyis mchog tu snying rje skyes te/ 'brog mi po smos kyi lus su bsgyur te/ dge 'dun rnams spyan drangs te/ yul me skar du zla ba gsum gyi bar du gdugs tshod gsol te/ lam du 'jug pa'i yo byad ci dgos pa'ang rdzong par 'gyur ro// de nas dge slong de dag mdo lo'i lam du zhugs pa nas/ ri dang lung pa'i su la gtugs te song ba dang / 'brog dgon par lam stor nas ngu zhing phyogs bcu'i sangs rgyas kyi mtshan dang / li yul gyi lha thams cad kyi ming nas 'bod par 'gyur ro// de'i tshe rnam thos kyi bu snying rje skyes nas g.yag dkar po skal pa dang snal chu can gcig tu sprul nas dge slong de dag gi drung du 'ongs pa dang / dge slong rnams kyis de mthong nas g.yag 'di ni me'i khal g.yag gcig yin te/ 'di'i phyi bzhin song na gdon mi za bar mi rnams dang phrad par 'gyur bas/ da ni mi 'chi'o snyam du yid sos te/ g.yag des kyang lam drangs nas gseb lam du byung ste/ tshal phyir bskyal nas g.yag nyid mi snang bar gyur to// de'i tshe dge slong rgan rgon mang po zhig ni lam kar 'chi bar 'gyur ro/ / de nas yul tshal byi'i bod rnams kyis dge slong de dag mthong nas bsu ste/ 'phrang du yo byad rnams sbyar nas/ bod yul 'dir li yul gyi dge slong mang po lpags na ji ltar bgyi zhes pho nyar gtong bar 'gyur ro/ / de'i tshe na rgya rje'i bu mo byang chub sems dpa'i rigs can gcig btsas pa bod kyi rgyal po'i khab tu len cing btsun mo dam pa byed par 'gyur te/ de ni dad pa shin tu che ba/ snying rje dang ldan pa/ skad snyan pa/ nges pa/ bslab pa'i yan lag lnga gzung ba zhig 'byung bar 'gyur ro// btsun mo des nyi 'og gzhan nas dge slong mang po bod kyi yul du lhags par mthong nas/ sangs rgyas kyi bstan pa ni ring du mi gnas so snyam nas/ mya ngan chen pos non nas/ rang gi 'khor bud med nyis brgya dang / skyes pa sum brgya dang / ru ru ma dang / bzo bo dang / gnang chen rnams drung du bos te/ ngus nas 'di skad ces bde bar gshegs pa'i bstan pa ni de'i tshe 'jig par 'gyur gyis/ khyed rnams myur du bsod nams ma byas/ tshul khrims ma bsrungs na 'phyis par 'ong ngo zhes smra bar 'gyur ro// de nas btsun mo des rgyal po la 'di skad du dge 'dun de rnams bdag gis bzhon pa dang gos la sogs pa'i yo byad sbyar na 'dir spyan drang bar cig nang zhes gsol pas/ rgyal pos kyang gnang bar 'gyur te/ tshul de lta bus dge slong de dag bod yul du 'gro bar 'gyur ro// de'i tshe bod kyi rgyal po dang / blon po rnams kyis dge slong de dag mthong nas/ dad pa chen po skye zhing gtsug lag khang chen po bdun yang brtsigs par 'gyur ro// de bzhin du dge slong an tse pa dang / gus tig pa dang / ba ra wa na pa dang / shu lig pa rnams kyang sdug bsngal chen pos non nas bru sha'i yul du 'gro bar 'gyur ro// zong kar yul dang / kha che yul gyi dge slong rnams kyang dad pa med pa'i mi rnams kyi gtses te/ ma gcags bru sha'i yul du 'gro bar 'gyur ro// dge slong de dag thams cad kyis bru sha'i yul du phyin nas/ bod yul na gtsug lag khang mang po brtsigs pa dang / rgyal mo byang chub sems dpa' zhig gnas pas/ dkon mchog gsum la mchod pa dang / rim gror byed pa thos nas yid dga' ste/ thams cad bod yul du 'gro bar 'gyur ro// bod yul du lhags nas lo gsum gyi bar du ni mchod pa chen po la sogs pa skyid pa nyams su myong bar 'gyur ro/ / lo gsum lon pa dang bod kyi yul du bdud kyi ris kyi lha dang / lha ma yin dang / klu dang / gnod sbyin dang / dri za rnams kyis nad chen po 'bras dang / phol mig dang / 'brum bu gdug pa dag gtong bar 'gyur ro// nad des zhang blon dang dmag du ma dag 'chi bar 'gyur ro// de'i tshe rgyal mo de'i snying kar 'bras gsum pa byung ste/ shi nas lha yul du skye bar 'gyur ro// de'i tshe bod kyi zhang blon rnams khros 'khrugs te/ 'di skad ces bdag cag gi yul 'di sngon gya nom pa las/ phyis mi bkra mi shis pa 'khyams pa sha stag 'dir lpags nas/ da ni yul yang 'di lta bur gnod pa rnam pa sna tshogs pa 'byung bar 'gyur gyis/ rdzas lhag ma 'di rnams kyang yu la 'dir mi gzhug cing sa mtshams 'das te bskrad par bya'o zhes gros byas nas dge slong gcig kyang bod yul du gnas su mi gnang ngo zhes glo bur du bsgo bar 'gyur ro/ / rgyal mo de nad kyis thebs pa'i tshe bdag nyid mi 'tsho bar tsher nas rgyal po la kha chems su bdag gum na/ bdag gi nor rdzas ril gyis dge 'dun la 'bul ba ci gnang zhes gsol nas/ rgyal pos kyang gnang ste/ btsun mo'i rdzas thams cad dge 'dun la 'bul zhing / des rgya gar gyi yul ga na d+ha ra zhes bya bar 'gro ba'i rdzas byas nas 'gro bar 'gyur ro// de'i tshe bod kyi dge slong rnams kyang yi chang nas/ nyi 'og gi dge slong rnams dang gros gcig tu bas nas lhan cig tu 'gro bar 'gyur ro/ / skye bo dang rtsod pa'i dus de'i tshe rgya yul gyi dge slong rnams kyang shin tu sdug bsngal bas gzir nas yul gan dA rar 'gro bar 'gyur ro// de ltar dong ba dang dge slong de dag tha cad yul gan dU ra bar 'gro ba'i lam kar phrad par 'gyur ro/ / de'i tshe bod kyi dmag gis rjes bzhin bsnyags nas/ lam kar bran g.yog dang nor phyugs dag phrogs te/ dge slong dag kyang gsod par 'gyur ro/ / de ltar dge slong dag bod kyi dmag gis bdas nas/ klu'i rgyal po e la'i 'dab kyi gnas drung du phyin pa dang / klu'i rgyal po e la'i 'dab kyis mi rgan zhig gi gzugs la ba dge 'dun gyi mdun du 'ongs nas phyag btsal te/ skyes bu dam pa khyed rnam pa gar gshegs zhes dris pa dang / dge slong rnams kyis 'di skad du bdag cag gi yul na dad pa med pa sha stag gis gang bas/ 'tshe ba'i yo byad la sogs pas 'phongs te/ da yul ga na d+ha rar 'tsho ba'i yo byad tsam zhig ci rnyed snyam nas lhags so// de nas de'i tshe klu'i rgyal po de bde bar gshegs pa'i bstan pa 'jig pa'i mtshan ma rtogs nas/ mchi ma khrag tu 'dzag cing ngus nas/ dge 'dun rnams la yul der gshegs na shul brgyags ji tsam mnga' zhes ma rmed par 'gyur ro// dge 'dun kun kyang zhib tu brtsis na/ zhag bco lnga'i brgyags yod do zhes smra bar 'gyur ro// klu'i rgyal pos 'di skad du 'di nas yul gan d+ha rar/ mtsho 'di'i g.yas g.yon du bskor na zhag bzhi bcu rtsa lnga'i shul mchis na/ rgun bco lnga'i brgyags kyis 'tshal la ma gzhan yang shul ka na la ka mthon po dang / nag sa tshal stug po dang / gcan gzan gdug po dang / sbrul gdug po dang sdig sbrul la sogs pa dang / chom rkun pa'ang mchis pas phyin tshur yang dmag gis bsnyegs pa dang / mtsho 'di'i nang na'ang bdag gi 'khor gtum po dad pa ma mchis pas/ bdag gis phu bzlog par ma nus te/ mi de'i shul du bzhud par mi dga' zhing mchis so// de'i tshe dge slong pho mo mang po dag thams cad 'di snyam du bdag cag rnams 'chi ba'i dus la dbab pa 'dra snyam nas ngu zhing mya ngan byed par 'gyur ro/ / de'i tshe klu'i rgyal po e la'i 'dab kyis dge 'dun gyi mdun du pus mo btsugs nas/ dge 'dun ma bshums shig/ bdag gis dge 'dun rnams kyi slad du srog yongs su gtang zhing bdag nyid kyi lus mtsho 'di'i steng du zam par bgyid lags so/ / bdag gis sngon bde bar gshegs pa'i bstan pa thog mar legs par ma bsrungs pa'i chad par srog gis bgod pa zhig gcod par 'tshal lo zhes smra bar 'gyur ro/ / de nas klu'i rgyal po des rang gi lus sbrul chen po zhig gi gzugs su bsgyur nas/ 'od yul ngos kyi ri'i rtse mo la ni mgos 'khyud/ yul ga na d+ha ra'i rtse mo la ni mjug mas 'khyud de lus kyi zheng du ni shing rta lnga'i khyon tsam gyi zam par btags so// de'i tshe dge slong de dag gis sbrul chen po de'i gzugs de mthong nas/ sngangs skrag ste phyogs su 'byer bar 'gyur ro/ / de nas klu'i rgyal po des mi'i skad phyung ste/ dge 'dun dag ma sngangs shig/ bdag gi lus 'di khyed kyi slad du zam par btags pa lags kyis/ ma bsnyengs par rje dgras choms su dogs pa ni 'bangs dang / phyag rjed dang / khur rnams sngon la dgyer du gsol/ de'i 'og dge 'dun gzhon rims gshegs su gsol/ bgres po rnams ni nang gis slad kyis gshegs su gsol zhes smra bar 'gyur ro/ / de'i tshe klu'i rgyal po de'i rgyab kyi pags pa phyugs kyi rmig pa dang mi'i rkang pas bshus te rma chen po byung ste/ mtsho'i nang du rnag khrag kyang 'dzag par 'gyur ro/ / mi phyugs pa la yang mtshe'i nang du lhung zhing 'chi bar 'gyur ro// tha mar dge 'dun rgan rabs rgal ba'i 'og tu klu'i rgyal po nyid kyang 'chi bar 'gyur te/ mtsho de'ang skams par 'gyur/ te/ mtsho bskams pa'i nang du klu'i rgyal po shi ba'i rus pa 'di lta bur 'dug par 'gyur ro// ma 'ongs pa'i dus na sangs rgyas byams pa 'khor lnga brgya dang thabs cig tu klu'i rgyal po e la'i 'dab kyi rus pa'i drung du gshegs te/ klu'i rgyal po e la'i 'dab kyi skyes pa'i rabs brjod pas/ byams pa'i 'khor dge slong lnga brgya po de dag thams cad kyis dgra bcom pa'i 'bras bu thob par 'gyur ro// de nas dge slong de dag yul ga na d+ha rar phyin nas/ lo gsum pa'i tshe yul de'i rgyal po dad pa can zhig yod pa 'chi bar 'gyur ro// rgyal po de shi ba'i 'og tu rgyal po de'i bu dad pa can zhig dang / dad pa med pa zhig rgyal srid la rtsod nas dmag gis g.yul bkye nas/ phyogs gnyis su 'chad par 'gyur ro// de'i tshe na dge slong de dag gi nang nas dge slong dpa' ba/ rtul phod pa/ tsham tshom med pa stong zhig yod pas rgyal bu dad pa med pa de dmag gis bstab ste pham par byas nas/ rgyal bu dad pa can de la rgyal srid 'bul bar 'gyur ro// rgyal bu dad pa can de zla ba lnga rgyal po byas nas yang dge slong stong po de dag bsad nas/ dge slong gcig rgyal por bcug ste/ lo gnyis kyi bar du rgyal po byed par 'gyur ro// de'i yul gan dA ra'i blon po dang / yul mi thams cad 'dus te gsangs nas/ ci'i phyir nyi 'og gi mi bdag cag gi yul stongs par 'bros/ ngan pa 'di bdag cag rgyal po zhes gros nas 'phral da ma ga drangs te rgyal po zhes gros byas nas 'phral dmag drangs te rgyal po gtub par 'gyur ro/ / de'i tshe yul na gnas pa'i dge slong thams cad mthong dgu bsad de/ dge slo gang zhig yul dbus su bros te thar pa de 'ba' zhig gson par 'gyur ro// de'i 'og tu yul dbus ma gtogs par 'dzam bu'i gling 'di ni/ rgyal po dad pa med pa gsum 'byung bar 'gyur te/ gcig ni sogs pa mang po zhig gis rgyal po ni stag gzig gi rgyal po byed par 'gyur ro// drugu ru sna tshogs su mi'i rgyal po ni dru gu byed par 'gyur ro/ / gzhan mang po zhig gis rgyal po ni bod kyi rgyal po byed par 'gyur te/ rgyal po de gsum ka'ang sems 'thun par 'gyur ro// rgyal po gsum la dmag dpa' ba/ rtul bod pa sum 'bum zhig yod pas/ yul dbus ma gtogs pa gzhan yang dag pa'i lta ba 'dzin pa'i yul thams cad bcom nas mi mang po kha btags nas/ grong la la'ang stongs par 'gyur ro/ / de nas rgyal po de gsum 'dus nas yul dbus su dmag drang zhes gros byed par 'gyur ro// de'i tshe na yul dbus ko'u sham bi zhes bya ba na/ rgyal po bzod dka' zhes bya ba zhig 'byung bar 'gyur te/ de btsas pa'i tshe na khrag gi char pa'ang ba ba/ lag pa gnyis kyang gru mo man chad khrag gis bskus pa lta bur dmar ba zhig yin no// de'i blon po ya na lag mchog dang ldan pa lnga brgya dang / dmag mi g.yul ngor dpa' ba nyis 'bum 'byung bar 'gyur ro// de'i tshe stag gzig gi rgyal po la sogs pa gsum yul dbus ko sham+bir song song nas rgyal po bzod dka' tshol bar byed do/ / de nas rgyal po bzod dkas de skad thos nas dmag dang chas te/ rgyal po de dag gi mdun du bsgugs nas/ zla ba gsum gyi bar du rgyun du g.yul chen po sprad pa dang rgyal po dang pa med pa de gsum dmag dang bcas te gtan med par rlag par 'gyur ro/ / rgyal po bzod dka' dmag dang bcas pa slar yul 'khor nas rgyal po de 'di snyam du bdag gis mi mang po la btags na/ bdag gi 'gro ba ni ji lta bu zhig tu skye bar 'gyur/ nam zhig ngan song gsum las thar par mi 'gyur snyam du 'gyod pa skye bar 'gyur ro// de nas rgyal po de la/ blon po rnams kyis gsol pa/ ma bsnyengs par dmar bu can gyi yul dge slong dkir sha ka zhes bgyi ba sde snod gsum la mkhas pa zhig bzhugs pa de spun drongs dang / des lha khyod kyi las ngan pa de bshags par 'gyur ro zhes smra bar 'gyur la/ rgyal pos kyang dge slong de spyan drangs nas/ de'i mdun du las ngan pa ji ltar byas pa thams cad lo rgyus smra bar 'gyur ro// dge slong des kyang 'di skad du/ rgyal po khyod kyis shin tu ma legs pa byas kyis/ che zang du 'gyod la/ 'dzam bu gling gi dge slong thams cad 'dir spyan drongs la/ rtag tu yo byad lnga phul te skyabs su 'gro ba dang / nyin gcig bzhin du dge 'dun gyi mdun du sdig pa bshags shig/ khyod kyis mi mang po kha btags pa'i las bsabs par 'gyur ro zhes smra bar 'gyur ro// de nas de'i tshe rgyal po de yul yul du dge slong rnams sman 'dren ba gtong bar 'gyur ro/ / dge slong rnams kyis kyang yul kau sha mI zhes bya ba na rgyal po bzod dka' zhes bya ba dge 'dun la yo byad 'bul ba zhig yod do zhes thos nas yi rangs te/ yul kau sha mI zhes bya bar 'gro bar 'gyur ro// de'i tshe yul kau sham+bir dge slong 'bum 'dus par 'gyur ro// de nas tshes bco lnga'i nub mo dge slong rnams gso sbyong la 'dus te/ dge slong shir sha ka bos nas khyod kyis so sor thar pa'i a do thon cig ces smra bar 'gyur ro/ / dge slong shir sha kas kyang slar 'di skad du khyed rnams la so sor thar pas ci zhig bya/ mi sna dang rna ba bcad pa kha me long gis ci zhig bya zhes smra bar 'gyur ro/ / de nas de'i tshe dge slong de dag gi nang nas dgra bcom pa su ra ta zhes bya ba langs nas seng ge lta bu'i skad kyis dge slong shir sha ka la 'di skad ces khyod ci'i phyir de skad ces smra/ kho bo ni bde bar gshegs pas bka' stsal pa bzhin du bslab pa gcig kyang ma nyams so zhes smras pa dang / dge slong shir sha ka shin tu skyengs par gyur to// de nas dge slong shir sha ka'i slob ma a kan bi zhes bya bas dgra bcom pa de la 'di skad du/ khyod ci'i phyir nga'i slob dpon la mi mang sar de skad smra zhes khros nas/ lag pa gnyis kyis sgo gangan blangs nas/ dgra bcom pa de gsod par 'gyur ro// de nas dgra bcom pa de'i slob ma dge slong ka ra ta zhes bya ba la'ang rang gi slob dpon bsad par mthong nas shin tu khros te dbrug pa blangs nas dge slong shir sha ka gsod par 'gyur ro/ / de'i tshe dge slong dag ril gyis khros nas phyogs gnyis su chad de/ gcig gis gcig gsod par 'gyur ro// de'i tshe gnas gzhan sum cu rtsa gsum gyi lha thams cad der lhags te/ dge slong shi ba'i ro de dag mthong nas/ ngud mos 'debs shing mchod pa byed par 'gyur ro// dge slong de dag gos kha dog bsgyur ba dang / sgra dang sen mo 'ang lha'i gnas su khyer bar 'gyur ro/ / de'i tshe yul der rlung dmar nag po dang ser po 'dres par ldang zhing / dus dus su me'i char pa 'bab pa dang / sa g.yo ba dang / 'ur sgra dang / tug tshem dag kyang 'byung bar 'gyur ro/ / de nas rgyal po des skya rengs shar ba'i tshe 'di skad du/ dge slong thams cad kha btags pa mthong nas/ mya ngan gyis gdungs pa'i rgyus/ mig res 'ga' ni mthong res 'ga' ni mi mthong bar gyur pa bzhin du/ mod la gtsug lag khang du brgyugs nas cho nges btab ste/ dgra bcom pa dang dge slong sde snod gsum pa'i ming nas 'bod cing / de gnyis kyi ro phang gis 'khyud de 'di skad du/ kye sde snod gsum pa khyod ni bde bar gshegs pa'i dam pa'i chos kyi mdzod 'dzin pa lags/ kye dgra bcom pa khyod ni bde bar gshegs pa'i bslab pa'i gzhi 'dzin pa lags na/ da khyod gnyis nongs pas 'jig rten 'di stongs par gyur to zhes smra bar yang 'gyur ro// dam pa'i chos nub pa'i nub mo sum cu rtsa gsum pa'i lha rnams kyang lha ma srin gyis 'pham par byas nas 'bros par 'gyur ro/ / de nyid kyi nub mo lha rtag tu myos pa'i nang nas lha 'di ni zhes bya ba 'chi 'bo bar 'gyur ro// de nas 'dzam bu'i gling 'di'i bu ras shing dang / rgun 'brum dang / sbrang rtsi thams cad kyang nub par 'gyur ro/ / bdud dbang sgyur zhes bya ba'ang 'chi bar 'gyur te/ de nas nas dang / gro dang / 'bras thams cad nub par 'gyur te/ 'dzam bu gling gi mi rnams kyi zas su sre de dang / khre rgod dang / rtswa'i 'bras bu sna tshogs za bar 'gyur ro// dar dang / za 'og dang / men dri dang / ras bzang po la sogs pa'ang nub nas/ gos su gso ras dang / re phur la sogs pa gyon par 'gyur ro/ / gser la sogs pa'i rin po che sna tshogs kyi rgyan rnams kyang nub nas/ rgyan du rtsa las byas pa thogs par 'gyur ro// tshen bzang po dang / ro zhim po rnams kyang rab par 'gyur ro// de bzhin gshegs pa'i sku gzugs rnams kyang klu'i gnas su khyer bar 'gyur ro// li yul gyi mkhan po rnams 'dus nas/ li rje btsan legs kyi ring la yos bu'i lo la brtsis nas/ de nas lo brgya rtsa gnyis na dam pa'i chos nub par 'gyur ro/ / dge 'dun 'phel gyis lung bstan pa rdzogs so// // li yul byung nas li'i rgyal po rabs drug ni 'das/ rabs bdun ni rgyal po ba dza yi karti zhes bya ba'i tshe na/

CLOSE WINDOW