bcom ldan 'das mnyan yod na rgyal byed tshal mgon med zas sbyin gyi kun dga' ra ba na bzhugs so// de nas lha du ma rnams mtshan mo kha dog sna tshogs pa dang ldan pa'i 'o da rnams kyis dus gcig la rgyal byed tshal 'od kyis snang bar byas nas/ bcom ldan 'das gang du bzhugs pa der lhags te lhags nas/ bcom ldan 'das la phyag byas nas phyogs gcig tu 'khod do/ / phyogs gcig tu 'khod nas/ lha de rnams kyis bcom ldan 'das la tshigs su bcad pa mang du zhus so// lha dang mi rnams mang po yis// bkra shis pa ni bsam gyur pa/ / bkra shis pa la the tshom skyes// bkra shis mchog ni gsung du gsol// lha'i yang lha yis bka' stsal pa// sdig pa thams cad rnam par 'joms// 'jig rten kun la phan pa'i don/ / bkra shis de rnams khyed la bshad// byis pa rnams la bsnyen mi bya// mkhas pa rnams la bsnyen par bya// mchod la mchod pa'i lan bya ba// 'di ni mchog gi bkra shis so/ / sngar byas pa yi bsod nams kyis// 'thun pa'i yul du gnas pa dang // bdag nyid mchog gi smon lam bya// 'di ni mchog gi bkra shis so// bden dang lag pa'i bzo dang ni/ / 'dul ba'i sbyor bas legs par bslab// gang gis 'di ni legs par bslab// gang gis legs par bshad pa'i tshig/ 'di ni mchog gi bkra shis so// pa dang ma la bsnyen bkun bya/ bu dang chung ma rjes su gzung // mi mthun pa yi las mi bya// 'di ni mchog gi bkra shis so// sbyin pa chos kyi spyod pa dang // gnyen 'dun rnams ni rjes su gzung // kha na ma tho'i las mi bya/ 'di ni mchog gi bkra shis so// sdig la dga' ba spang bar bya// chang gi btung ba rnam par spang // gang zhig chos la bag yod pa// 'di ni mchog gi ba/ shis so// glo bur bla ma gus par bya// byas pa shes shing gus par bya// dus su chos ni mnyan par bya// 'di ni mchog gi bkra shis so// tshig ngan pa ni bzod par bya// dge sbyong rnams ni mthong bar bya/ / dus su chos kyi 'bel gtam bya// 'di ni mchog gi bkra shis so// dka' thub dang ni tshangs spyod bya// 'phags pa'i bden pa mthong bar bya// mya ngan 'das pa mngon sum bya/ / 'di ni mchog gi bkra shis so// 'jig rten chos la dris pa na// gang zhig sems ni g.yo mi bya// mya ngan mi dga' med bzod bya// 'di ni mchog gi bkra shis so// de ltar bshad par byas pa rnams/ / thams cad du ni rgyal ba dang // thams cad du ni zhi bar 'gro// de rnams de la mchog bkra shis// bcom ldan 'das kyis de skad ces bka' stsal nas/ lha de rnams bcom ldan 'das kyis gsungs pa la mngon par bstod do// bkra shis chen po'i mdo rdzogs so// paN+Di ta chen po A nan+da shri'i zhal snga nas/ mang du thos pa'i lo tsA ba shAkya'i dge slong nyi ma rgyal mtshan dpal bzang pos skad gnyis smra ba rnams kyi gdan sa gtsug lag khang chen po dpal thar pa gling du bsgyur cing nus te gtan la phab pa'o/ / sa'i steng du nyi ma dang zla ba ltar gyur cig/

CLOSE WINDOW