/ rgya gar skad du/ Ar+ya b+ha ba sang krAn ti nA ma ma hA yA na sU tra/ bod skad du/ 'phags pa srid pa 'pho ba zhes bya ba theg pa chen po'i mdo/ sangs rgyas dang byang chub sems dpa' thams cad la phyag 'tshal lo/ / 'di skad bdag gis thos pa dus gcig na/ bcom ldan 'das rgyal po'i khab na 'od ma'i tshal bya ka lan ta ka gnas pa na/ dge slong stong nyis brgya lnga bcu'i dge slong gi dge 'dun chen po dang / byang chub sems dpa' chen po rab tu mang po dang thabs cig tu bzhugs te/ de nas bcom ldan 'das 'khor brgya stong du mas yongs su bskor cing mdun gyis bltas nas chos ston te/ tshangs par spyod pa/ thog mar dge ba/ bar du dge ba/ tha mar dge ga don bzang ngo po// tshig 'bru bzang ngo // ma 'dres pa/ yongs su rdzogs pa/ yongs su dag pa/ yongs su byang ba yang dag par ston to// de'i tshe yul ma ga d+ha'i rgyal po bzo sbyangs gzugs can snying po rgyal po'i khab kyi grong khyer chen po nas byung ste/ rgyal po'i 'byor pa chen po dang / rgyal po'i dbang ba chen po dang / rgyal po'i mthu chen pos 'od ma'i tshal ga la ba dang / bcom ldan 'das ga la ba der song ste phyin nas/ bcom ldan 'das kyi zhab la mgo bos phyag 'tshal te/ lan gsum bskor ba byas nas phyogs gcig tu 'dug go// phyogs gcig tu 'dug nas/ yul ma ga d+ha'i rgyal po bzo sbyangs gzugs can snying pos/ bcom ldan 'das la 'di skad ces gsol to/ / bcom ldan 'das ji ltar na las bgyis shing bsags pa 'gags nas yun ring du lags pa 'gum pa'i dus kyi tshe nye bar gnas shing yid la mngon du 'gyur ba lags 'du byed thams cad stong pa la ji ltar las rnams chab mi 'tshal bar gda'/ de skad ces gsol pa dang / bcom ldan 'das kyis/ yul ma ga d+ha'i rgyal po bzo sbyangs gzugs can snying po la 'di skad ces bka' stsal to/ / rgyal po chen po 'di lta ste/ dper na mi zhig nyal ba'i rmi lam na yul gyi bud med bzang mo dang lhan cig tu yongs su spyod pa rmis la/ de nyal ba las sad nas/ yul gyi bud med bzang mo de dran na/ rgyal po chen po 'di ji snyam du sems/ rmi lam gyi yul gyi bud med bzang mo de yod dam/ gsol pa// bcom ldan 'das de ni ma mchis lags so// bcom ldan 'das kyis bka' stsal pa/ rgyal po chen po 'di ji snyam du sems/ 'o na gang rmi lam gyi yul gyi bud med bzang mo de la mngon par zhen pa'i mi de ci mkhas pa'i rang bzhin can yin nam gsol pa/ bcom ldan 'das de ni ma lags te/ de ci'i slad du zhe na/ bcom ldan 'das rmi lam gyi yul gyi bud med bzang mo'ang shin tu ma mchis shing mi dmigs lags na/ de dang yongs su spyod pa lta ga la mchis te/ 'di ltar mi de ni 'phongs shing dub pa'i skal ba can du 'gyur lags so// bcom ldan 'das kyis bka' stsal pa/ rgyal po chen po de bzhin du byis pa so so'i skye bo thos pa dang mi ldan pa'ang / mig gis gzugs rnams mthong na/ yid bde bar 'gyur ba'i gzugs rnams la mngon par zhen te/ mngon par zhen par gyur nas/ rjes su chags par 'gyur ro/ / kun tu chags par 'gyur ro// kun tu chags nas 'dod chags las byung ba dang / zhe sdang las byung ba dang / gti mug las byung ba dang / lus dang / ngag dang / yid kyis mngon par 'du byed do// las de mngon par 'du byas par gyur nas 'gag go// 'gag pa ni shar phyogs su brten te gnas pa ma yin/ lho phyogs su ma yin/ nub phyogs su ma yin/ byang phyogs su ma yin/ steng du ma yin/ 'og tu ma yin/ phyogs mtshams rnams su brten te gnas pa ma yin no// dus gzhan ji tsam zhig na 'chi ba'i dus dang tshong nye bar gnas pa'i tshe/ de dang bskal pa 'dra ba'i las zad nas/ rnam par shes pa tha ma 'gag pa'i tshe/ 'di lta ste/ dper na nyal nyal ba las sang pa'i mi'i yul gyi bud med bzang mo lta bur las de yid la mngon du 'gyur ro/ / rgyal po chen po de ltar rnam par shes pa tha ma 'gag cing skye ba'i char gtogs pa'i rnam par shes pa dnga'o// yang na ni lha'i nang du yang na ni mi'i nang du/ yang na ni sems can dmyal ba rnams su/ yang na ni dud 'gro rnams su/ yang na ni yi dgas rnams su 'byung bar 'gyur ro// rgyal po chen po rnam par shes pa dang po de 'gags ma thag tu/ gang la rnam par smin pa myong bar 'gyur ba mngon pa de dang skal ba 'dra ba'i sems kyi rgyud 'byung ngo // rgyal po chen po de la chos gang yang 'jig rten 'di nas 'jig rten pha rol tu 'pho ba'ang med la/ 'chi 'pho dang skye bar mngon pa'ang yod de/ rgyal po chen po de la gang rnam par shes pa tha ma 'gags pa de ni 'chi 'pho zhes bya/ gang rnam par shes pa dang po 'byung ba de ni skye ba zhes bya'o// rgyal po chen po rnam par shes pa tha ma 'gag pa'i tshe yang gang du'ang mi 'gro// rnam par shes pa dang po skye ba'i char gtogs par 'gyur ba'i tshe gang nas kyang mi 'ong ngo // de ci'i phyir zhe na/ ngo bo nyid dang bral ba'i phyir ro// rgyal po chen po de la rnam par shes pa tha ma ni rnam par shes pa thams stong / 'chi 'pho ni 'chi 'phos stong / khas ni las kyis stong / rnam par shes pa dang po ni rnam par shes pa dang pos stong / skye ba ni skye bas stong la/ las rnams chung mi za bar mngon par yang yod do// rgyal po chen po rnam par shes pa dang po skye ba'i char gtogs pa 'gags mthag tu/ bar ma chad par gang la rnam par smin pa myong bar 'gyur ba mngon pa'i sems kyi rgyud 'byung ngo // bcom ldan 'das kyis de skad ces bka' stsal te/ bde bar gshegs pas de skad gsungs nas/ ston pas gzhan yang 'di skad ces bka' stsal to// 'di dag thams cad ming tsam ste// 'du shes tsam du gnas pa yin// brjod pa las ni bzhin gyur pa// brjod par bya ba yod ma yin// ming ni gang dang gang gis su// chos rnams gang dang gang brjod pa// de la de ni yod ma yin// 'di ni chos rnams chos nyid do// ming gis ming nyid stong pa ste// ming ni ming gis yod ma yin// ming med pa yi chos rnams kun// ming gis yongs su brjod par byas// chos rnams 'di dag yod min te// rtogs pa las ni kun tu 'byung // gang gis stong par rnam rtog pa/ / rtog pa de yang 'di na med// mig gis gzugs ni mthong ngo zhes// yang dag gzigs pas gang gsungs pa// 'jig rten log pa'i dang can la// kun rdzob bden par de gsungs so/ / 'tshogs nas mthong zhes gang dag tu// 'dren pas rab tu bstan mdzad pa// de ni don dam gdags pa'i sar// blo dang ldan pas bka' stsal to// mig gis gzugs rnams mi mthong zhing / / yid kyis chos rnams ma rig pa// de ni bden pa mchog yin te// de la 'jig rten mi dpogs so// bcom ldan 'das kyis de skad ces bka' stsal nas/ yul ma ga d+ha'i rgyal po bzo sbyangs gzugs can snying po dang / byang chub sems dpa' de dag dang / dge slong dang / lha dang / mi dang / lha ma yin dang / dri zar bcas pa'i 'jig rten yi rangs te/ bcom ldan 'das kyis gsungs pa la mngon par bstod do// 'phags pa srid pa 'pho ba zhes bya ba theg pa chen po'i mdo rdzogs so// / rgya gar gyi mkhan po dzi na mi tra dang /

CLOSE WINDOW