bid+hi sa na nA ma ma hA yA nA sU tra// / bod skad du/ 'phags pa phyog b cu'i mun pa rnam par sel bzhes bya ba theg pa chen po'i mdo/ sangs rgyas dang byang chub sems dpa' thams cad la phyag 'tshal lo/ / 'di skad bdag gis thos pa dus gcig na/ bcom ldan 'das shAkya rnams kyi nang na ser skya'i gnas shing n+ya gro d+hu'i kun dga' ra ba na/ dge slong stong nyis brgya lnga bcu'i dge slong gi dge 'dun chen po dang / byams pa dang / 'jam dpal la sogs pa byang chub sems dpa'i 'khor chen po dang thabs gcig tu bzhugs so/ / de nas bcom ldan 'das snga dro'i dus kyi tshe/ sham thabs gsol nas/ lhung bzed dang / chos gos bsnams te/ dge slong gi dge 'dun gyis yongs su bskor cing / dge slong gi dge 'dun gyis mdun du bdar nas/ ser skya'i gnas kyi grong khyer chen por bsod snyoms la gshegs so// de'i tshe na shAkya gzhon nu bzhin rab gsal zhes bya ba zhig/ bya ba 'ga' zhig gi phyir shing rta la zhon nas/ ser skya'i gnas kyi grong khyer chen po nas phyir byung ba dang / shAkya gzhon nu bzhin rab gsal gyis/ bcom ldan 'das thag ring po kho na nas @gshegs pa mthong ngo / / mthong nas kyang / shing rta de las babs nas/ bcom ldan 'das ga la ba der song ste phyin nas/ bcom ldan 'das ga la ba de logs su thal mo sbyar ba btud de/ bcom ldan 'das kyi zhabs gnyis la mgo bos phyag 'tshal nas/ bcom ldan 'das la lan gsum bskor ba byas te/ thal mo sbyar nas/ bcom ldan 'das kyi sman sngar 'dug go/ de nas bcom ldan 'das la/ shAkya gzhon nu bzhin rab gsal gyis 'di skad ces gsol to/ / bcom ldan 'das 'di na bdag gi pha ma gnyis gnyid log pa dang ma log pa dag la/ mi ma lags pa rnams rnam par 'tshe bar bgyid la/ bcom ldan 'das bdag kyang gang gi tshe/ ljongs kyi phyogs gzhan du mchi ba'i tshe/ bdag la 'ang chom rkun pa dag rnam par 'tshe bar bgyid cing / gcan gzan dag kyang rnam par 'tshe bar bgyid na/ de'i slad du bcom ldan 'das de bzhin gshegs pa dgra bcom pa yang dag par rdzogs pa'i sangs rgyas kyis bdag la thugs brtse ba'i slad du/ ci nas kyang bdag la mi 'am/ mi ma lags pa dang / dud 'gro'i/ skye gnas su gtogs pa 'ga' yang rnam par 'tshe bar mi bgyid pa de ltar/ bdag la legs par bsrung bar mdzad du gsol/ bsrung ba'i cho ga'ang mdzad du gsol/ de skad ces gsol pa dang / bcom ldan 'das kyis/ shAkya gzhon nu bzhin rab gsal la 'di skad ces bka' stsal to// gzhon nu de'i phyir legs par rab tu nyon la yid la zung zhig dang / ngas khyod la bshad do// bcom ldan 'das de ltar 'tshal lo zhes gsol nas/ shAkya gzhon nu bzhin rab gsal bcom ldan 'das la nyan pa dang / bcom ldan 'das kyis de la 'di skad ces bka' stsal to// gzhon nu shar phyogs logs su sangs rgyas kyi zhing 'di nas sangs rgyas kyi zhing brgyad khri 'das pa na/ 'jig rten gyi khams nyon mongs pa thams cad bskyod pa zhes bya ba zhig yod de/ de na de bzhin gshegs pa dgra bcom pa yang dag par rdzogs pa'i sangs rgyas rje spyod ces bya ba da ltar bzhugs te 'tsho zhing gzhes so/ / gzhon nu khyod gang gi tshe bya ba 'ga' zhig gi phyir shar phyogs su 'gro na/ de'i tshe khyod kyis de bzhin gshegs pa de la phyag 'tshal te/ dran par byas shing mdun du byas te/ sems kyi rgyun gyis de mngon du byed cing song na khyod la 'jigs pa 'byung bar mi 'gyur ro// de'i tshe ma yengs par de yid la/ byas na/ khyod bya ba gang gi phyir 'gro ba'i bya ba de 'grub par 'gyur ro// de nas bcom ldan 'das kyis de'i tshe tshigs su bcad pa 'di bka' stsal to// rdzogs pa'i sangs rgyas thub pa che/ / rje la rab tu phyag 'tshal te// rtag tu de ni mngon byed cing // 'gro na khyod la 'jigs mi 'byung // gzhon nu lho phyogs logs su sangs rgyas kyi zhing 'di nas sang+yas kyi zhing dgu khri 'das pa na/ 'jig rten gyi khams mun pa dang / mun nag gi tshogs bcom pa zhes bya ba zhig yod de/ de na de bzhin gshegs pa dgra bcom pa yang dag par rdzogs pa'i sangs rgyas sems dang po bskyed pa yid la mdzad pa rnam grangs bsnyengs pa dang / bag tsha ba dang bral bas mngon par 'phags pa'i rgyal po zhes bya ba da ltar bzhugs te 'tsho zhing gzhes so/ / gzhon nu khyod gang gi tshe bya ba 'ga' zhig gi phyir lho phyogs su 'gro na/ de'i tshe khyod kyis de bzhin gshegs pa de la phyag 'tshal te/ dran par byas shing mdun du byas te// sems kyi rgyun gyis de mngon du byed cing / khyim la sogs pa'i yid la byed pa dang bral ba/ rnam par ma g.yengs pa'i yid la byed pas song na/ khyod bya ba gang gi phyir 'gro ba'i byang de 'grub par 'gyur zhing / khyod 'jigs pa gang nas kyang 'byung bar mi 'gyur ro// de nas bcom ldan 'das kyis de'i tshe tshigs su bcad pa 'di bka' stsal to// khyim gyi bsam/ ba rnams dang ni// kun nas ldang ba kun bral zhing // lho phyogs su ni 'gro ba na// khyod la 'jigs pa 'byung mi 'gyur// gzhon nu nub phyogs logs su sangs rgyas kyis zhing 'di nas sangs rgyas kyi zhing gang+gA'i klung gi bye ma snyed 'das pa na/ 'jig rten gyi khams yul phebs pa zhes bya ba zhig yod de/ de na de bzhin gshegs pa dgra bcom pa yang dag par rdzogs pa'i sangs rgyas kho na dang rgyags pa rnam par gnon pa zhes bya ba da ltar bzhugs te 'tsho zhing gzhes so/ / gzhon nu khyod gang gi tshe bya ba 'ga' zhig gi phyir nub phyogs su 'gro na/ de'i tshe khyod kyis de bzhin gshegs pa de la phyag 'tshal te/ dran par byas shing mdun du byas nas/ sems kyi rgyun gyis de mngon du byed cing / zag pa med pa dang / rnam par ma g.yengs pa dang dran pas song na// khyod la 'jigs pa gang nas kyang 'byung bar mi 'gyur ro// de nas bcom ldan 'das kyis de'i tshe tshigs su bcad pa 'di bka' stsal to// chos dga' skyes pa yod min zhing // 'ga' yang 'gag par mi 'gyur te/ / gang gis chos rnams de ltar shes// de la 'jigs pa ci yang med// gzhon nu byang phyogs logs su sangs rgyas kyi zhing 'di nas sangs rgyas kyi bye ba phrag stong 'das pa na/ 'jig rten gyi khams sangs rgyas kyi spobs pa can zhes bya ba zhig yod de/ de na de bzhin gshegs pa dgra bcom pa yang dag par rdzogs pa'i sangs rgyas rin chen gzugs bkod 'od gnon ces bya ba da ltar bzhugs te 'tsho zhing gzhes so/ / gzhon nu khyod gang gi tshe bya ba 'ga' zhig gi phyir byang phyogs su 'gro na/ de'i tshe khyod kyis de bzhin gshegs pa de la phyag 'tshal te/ dran par byas shing mngon du byas te/ sems kyi rgyun gyis de mngon du byed cing / rnam par ma g.yengs par yid la byed pas song na/ khyod bya ba gang gi phyir 'gro ba'i bya ba de 'grub par 'gyur zhing / khyod la 'jigs pa gang nas kyang 'byung bar mi 'gyur ro// de nas bcom ldan 'das kyis de'i tshe tshigs su bcad pa 'di bka' stsal to/ / rtag tu sems can thams cad la// mnyam pa nyid kyi sems byos la// sems can de la ma brnyas dang // khyod la 'jigs pa 'byung mi 'gyur// gzhon nu byang shar gyi phyogs logs su sangs rgyas kyi zhing 'di nas sangs rgyas kyi zhing brgyad khri 'das pa na/ 'jig rten gyi khams bdud kyi sde bcom pa zhes bya ba zhig yod de/ de na de bzhin gshegs pa dgra bcom pa yang dag par rdzogs pa'i sangs rgyas bdud dang yid gnyis kun 'joms rnam gnon ces bya ba da ltar bzhugs te 'tsho zhing gzhes so/ / de bzhin gshegs pa de byang chub kyi shing drung du bzhugs pa tsam gyis stong gsum gyi stong chen po'i 'jig rten gyi khams na/ bdud kyi ris kyi lha ji snyed yod pa de dag thams cad bla na med pa yang dag par rdzogs/ pa'i byang chub las phyir mi ldog par mdzad de/ gzhon nu de ni de bzhin gshegs pa de byang chub kyi shing drung du bzhugs pa'i skyes bu rtsal de lta bu byung ba yin no// gzhon nu khyod gang gi tshe bya ba 'ga' zhig gi phyir byang shar gyi phyogs su 'gro na/ de'i tshe khyod kyis de bzhin gshegs pa de la phyag 'tshal te/ dran par byas shing mdun du byas te/ sems kyi rgyun gyis de mngon du byed cing / rnam par ma g.yengs par song na/ khyod bya ba gang gi phyir 'gro ba'i bya ba de 'grub par 'gyur zhing / khyod la 'jigs pa gang nas kyang 'byung bar mi 'gyur ro// de nas bcom ldan 'das kyis de'i tshe tshigs su bcad pa 'di bka' stsal to// gang gis dang po'i thugs kyis ni// bdud rnams pham mdzad sangs rgyas te// dran bzhin du ni khyod song na/ / khyod la 'jigs pa 'byung mi 'gyur// gzhon nu shar lho'i phyogs logs su sangs rgyas kyi zhing 'di nas sangs rgyas kyi zhing nyi khri 'das pa na/ 'jig rten gyi khams rtag tu snang zhes bya ba zhig yod de/ de na de bzhin gshegs pa dgra bcom pa yang dag par rdzogs pa'i sangs rgyas sems dang po bskyed pas/ phyir mi ldog pa'i 'khor lo 'byung ba'i dpal zhes bya ba da ltar bzhugs te 'tshe zhing gzhes so/ / gzhon nu de bzhin gshegs pa des dang po thugs bskyed pa nas bzung ste/ sangs rgyas pa nyid kyi bar du tshad med par sbyin pa byin/ tshul khrims bsrungs/ bzod pa kun tu bsten/ brtson 'grus brtsams/ bsam gtan bsgrubs/ shes rab spyad de/ gzhon nu de ni de bzhin gshegs pa de'i skyes bu'i rtsa la de lta bu byung ba yin no/ / gzhon nu khyod gang gi tshe bya ba 'ga' zhig gi phyir shar lho'i phyogs su 'gro na/ de'i tshe khyod kyis de bzhin gshegs pa de la yan/ lag lngas phyag 'tshal te/ phyis khyim nas song zhig dang / khyod la phyis 'gyod pa 'am/ 'jigs pa gang nas kyang 'byung bar mi 'gyur ro// rnam par ma g.yengs pas yid la byed na khyod gang gi phyir 'gro ba'i bya ba de 'grub par 'gyur ro/ / de nas bcom ldan 'das kyis de'i tshe tshigs su bcad pa 'di bka' stsal to// yan lag lngas ni phyag 'tshal te// phyis nas khyim nas song zhig dang // chom rkun rnams kyis khyod kun tu// zil gyis mi non 'gro bar 'gyur// gzhon nu lho nub kyi phyogs logs su sangs rgyas kyi zhing 'di nas sangs rgyas kyi zhing sum khri 'das pa na/ 'jig rten gyi khams gser gyi dra bas g.yogs pa zhes bya ba zhig yod de/ de na de bzhin gshegs pa dgra bcom pa yang dag par rdzogs pa'i sangs rgyas rin chen gdugs 'phags snang zhes bya ba da ltar bzhugs te 'tsho zhing gnas so/ / gzhon nu khyod gang gi tshe bya ba 'ga' zhig gi phyir lho nub kyi phyogs su 'gron/ de'i tshe khyod kyis de bzhin gshegs pa de la phyag 'tshal te/ dran par byas shing mdun du byas te/ sems kyi rgyun gyis de mngon du byed cing / rnam par ma g.yengs pa'i yid la byed pas song na/ khyod la 'jigs pa gang nas kyang 'byung bar mi 'gyur zhing / khyod bya ba gang gi phyir 'gro ba'i bya ba de 'grub par 'gyur ro// de nas bcom ldan 'das kyis de'i tshe tshigs su bcad pa 'di bka' stsal to/ / rdzogs sangs rgyas la phyag byas nas// me tog sil mas gtor cig dang // khyod ni lho nub 'gro ba na// 'jigs pa 'byung bar mi 'gyur ro// gzhon nu nub byang gi phyogs logs su sangs rgyas kyi zhing 'di nas sangs rgyas kyi zhing ga d+hA'i klung drug gi bye ma snyed 'das pa na/ 'jig rten gyi khams yongs dag rab gnas mngon 'phags zhes bya ba zhig yod de/ de na de bzhin gshegs pa dgra bcom pa yang dag par rdzogs pa'i sangs rgyas byang chub sems dpa' 'dul ba zhes bya ba da ltar bzhugs te 'tsho zhing gzhes so// gzhon nu de bzhin gshegs pa de'i sangs rgyas kyi zhing ni mi gtsang ba med pa/ 'khrig pa med pa/ bud med med pa/ tsher ma dang / gseg ma dang / gyo mo med pa/ snyigs ma/ lnga med pa yin no// gzhon nu khyod gang gi tshe bya ba 'ga' zhig gi phyir nub byang gi phyogs su 'gro na/ tshangs par spyod pa yang dag par blangs nas/ phyis khyim nas rnam par ma g.yengs pa'i yid la byed pas song zhig dang / gzhon nu khyod bya ba gang gi phyir 'gro ba'i bya ba de 'grub par 'gyur zhing / khyod la 'jigs pa gang nas kyang 'byung bar mi 'gyur ro/ / de nas bcom ldan 'das kyis de'i tshe tshigs su bcad pa 'di bka' stsal to// tshangs spyod yang dag blangs byas te// phyis nas khyim nas song zhig dang // khyod ni gang dang gar 'gro yang // chom rkun rnams kyis zil mi non// gzhon nu steng gi phyogs logs su sangs rgyas kyi zhing 'di nas sangs kyi zhing gang+gA'i klung drug cu'i bye ma snyed 'das pa na/ 'jig rten gyi khams dmigs pa med pa yid la byed pa can zhes bya ba zhig yod de/ de na de bzhin gshegs pa dgra bcom pa yang dag par rdzogs pa'i sangs rgyas skrag med mun bral ting nge 'dzin mngon 'phags rgyal po zhes bya ba da ltar bzhugs te 'tsho zhing gzhes so/ / gzhon nu khyod kyis de bzhin gshegs pa de la phyag 'tshal te/ dran par byas shing mdun du byas te/ 'dug kyang rung / 'greng yang rung / sems can thams cad la byams pas khyab par byas nas/ rdzogs par byas shing gnas na/ khyod la 'jigs pa gang nas kyang 'byung bar mi 'gyur ro/ / de nas bcom ldan 'das kyis de'i tshe tshigs su bcad pa 'di bka' stsal to// khyod kyis ma g.yengs yid byed kyis// rtag tu rgyal ba de dran zhing // rtag tu byams pa'i sems byos dang / / khyod la 'jigs pa 'byung mi 'gyur// gzhon nu 'og gi phyogs logs su sangs rgyas kyi zhing 'di nas sangs rgyas kyi zhing dgu khri nyis stong 'das pa na/ 'jig rten gyi khams yon tan thams cad kyis brgyan pa zhes bya ba zhig yod de/ de na de bzhin gshegs pa dgra bcom pa yang dag par rdzogs pa'i sangs rgyas dang po sem bskyed de/ tsom gcod mdzad nyon mongs bskyod ces bya ba da ltar bzhugs te 'tsho zhing gzhes so// gzhon nu khyod kyis de bzhin gshegs pa de la bya ba rtsom pa thams cad dang / 'greng yang rung / 'dug kyang rung / 'chag kyang rung ste/ spyod lam thams cad du phyag tshol cig/ yid la byos shig/ sems can rnams la byams pa'i sems dang / phan pa'i sems sgrubs shig dang / gzhon nu khyod la 'jigs pa 'byung bar mi 'gyur zhing / dgos pa thams cad kyang 'bad mi dgos par 'grub par 'gyur ro// de nas bcom ldan 'das kyis de'i tshe tshigs su bcad pa 'di dka' stsal to/ / bya ba kun la nyin mtshan du// sangs rgyas de ni dran bya zhing // byang chub sems kyang ma btang dang // khyod la 'jigs pa 'byung mi 'gyur/ / gzhon nu khyod kyis de bzhin gshegs pa dgra bcom pa yang dag par rdzogs pa'i sangs rgyas de dag gi mtshan legs par gzung bar gyis shig/ legs par bcang bar gyis shig/ legs par kun chub par gyis shig dang / 'jigs pa'am/ bag tsha ba 'am/ spu zing zhes byed pa gang ci'ang rung ba de dag thams cad khyod la 'byung bar mi 'gyur ro/ / de skad ces bka' stsal pa dang / bcom ldan 'das la/ shAkya gzhon nu bzhin rab gsal gyis 'di skad ces gsol to// bcom ldan 'das bdag gis de bzhin gshegs pa dgra bcom pa yang dag par rdzogs pa'i sangs rgyas de dag gi mtshan rnams gzung lags te/ bcom ldan 'das bdag la 'jig rten gyi khams de dag mun pa ma mchis shing / bcom ldan 'das bdag gis 'jig rten gyi khams de dag dang / de bzhin gshegs pa dgra bcom pa yang dag par rdzogs pa'i sangs rgyas de dag kyang / dper na de bzhin gshegs pa da ltar 'khor rnams la chos ston pa bzhin du mthong ngo / / de nas 'khor de las shAkya gzhon nu bzhin rab gsal la sogs pa skye bo phal po che'i tshogs bcom ldan 'das la blta ba dang / phyag 'tshal ba dang / mchod pa dang / rim gro bya ba dang / chos kyi rnam grangs 'di mnyan pa'i phyir 'khor der 'dus par gyur pa'i srog chags stong tshang ba de dag thams cad stan las langs te/ bla gos phrag pa gcig la byas nas pus mo g.yas pa'i lha nga sa la btsugs te/ bcom ldan 'das ga la ba der logs su thal mo sbyar ba btud nas/ bcom ldan 'das la 'di skad ces gsol to// bcom ldan 'das bdag cag gi don gyi slad du/ de bzhin gshegs pas chos kyi rnam grangs 'di bshad pas/ bcom ldan 'das bdag cag la phyogs de dang / 'jig rten gyi khams de dag kyang mun pa ma mchis par gda' la/ bcom ldan 'das 'jig rten gyi khams de dag dang / sangs rgyas bcom ldan 'das de dag kyang / dper na da ltar de bzhin gshegs pa chos ston pa 'di bzhin du gda' 'o// de nas sangs rgyas kyi mthus tshe dang ldan pa shA ri'i bu stan las langs te/ bla gos phrag pa gcig tu byas nas/ pus mo g.yas pa'i lha nga sa la btsugs te/ bcom ldan 'das ga la ba de logs su thal mo sbar ba btud nas/ bcom ldan 'das la 'di skad ces gsol to/ / bcom ldan 'das rigs kyi bu 'am/ rigs kyi bu mo gang dag chos kyi rnam grangs 'di bshad pa na/ sangs rgyas bcom ldan 'das de dag gi mtshan rnams thos nas/ mig rnam par dag cing phyogs bcu dag na/ 'jig rten gyi khams gang dag mchis pa de dag dang / sangs rgyas bcom ldan 'das de dag gi mig rnam par dag pa'i bsod nams de dag bcom ldan 'das ci lags/ tshe rabs gzhan du tshe 'phos na'ang 'bral bar 'gyur ram/ 'on te mi 'gyur/ bcom ldan 'das kyis bka' stsal pa/ shA ri'i bu byang chub sems dpa'i theg pa la yang dag par zhugs pa'i rigs kyi bu 'am/ rigs kyi bu mo gang dag 'di ltar mig rnam par dag pa de dag ni sgrib pa med pa'i tshul gyis shin tu rnam par dag pa nyid du 'gyur ro/ / shA ri'i bu khyod kyi srog cha ga stong tshang ba 'di mthong ngam/ shA ri'i bu 'di dag thams cad ni sangs rgyas rnams kyi mtshan bzung ba'i dge ba'i rtsa ba 'dis re res kyang 'khor los sgyur ba'i rgyal srid kang+gA'i klung gi bye ma snyed dag byed du bcug nas/ srid pa tha ma dang / lus tha ma la byang chub kyi tshogs thams cad rdzogs par byas te/ bskal pa gcig l a de bzhin gshegs pa dgra bcom pa yang dag par rdzogs pa'i sangs rgyas spyan dag pas brgyan pa zhes bya ba mtshan mthun pa sha stag bla na med pa yang dag par rdzogs pa'i byang chub mngon par rdzogs par 'tshang rgya bar 'gyur ro/ / bcom ldan 'das kyis rigs kyi bu de rnams lung bstan pa bshad pa 'di bka' stsal ma thag tu/ stong gsum gyi stong chen po'i 'jig rten gyi khams 'di rnam pa drug tu g.yos par gyur te/ 'gul/ rab tu 'gul/ kun tu rab tu 'gul/ g.yos/ rab tu g.yos/ kun tu rab tu g.yos/ bur 'ur/ rab tu 'ur 'ur/ kun tu rab tu 'ur 'ur/ ldeg/ rab tu ldeg/ kun tu rab tu ldeg/ chem chem/ rab tu chem chem/ kun tu rab tu chem chem/ 'khrugs/ rab tu 'khrugs kun tu rab tu 'khrugs so/ / sa bla'i lha rnams kyis kyang / kye ma grogs po dag 'di ltar rigs kyi bu 'di rnams kyis de bzhin gshegs pa'i mtshan bzung ba tsam gyis bla na med pa yang dag par rdzogs pa'i byang chub yongs su bzung zhing / chos thams cad ji lta ba bzhin du mkhyen pas/ don thams cad thugs su chud pa'i de bzhin gshegs par 'gyur ba ni ngo mtshar cha ste/ su zhig sangs rgyas la dad par mi 'gyur zhes sgra bsgrags so// rgyal chen bzhi'i ris kyi lha rnams dang / sum cu rtsa gsum pa rnams dang / 'thab bral ba rnams dang / dga' ldan pa rnams dang / 'phrul dga' ba rnams dang / gzhan 'phrul dbang byed kyi bdud kyi ris rnams dang / tshangs ris rnams dang / tshangs pa mdun na 'don rnams dang / tshangs pa chen po rnams nas/ 'og min gyi lha rnams kyi bar gyi sa bla'i lha rnams kyi sgra de thos nas/ yi rangs shing rab tu dga' la/ dga' ba dang / yid bde ba skyes nas tshig 'di skad ces/ kye ma grogs po dag 'di ltar rigs kyi bu 'di rnams kyis de bzhin gshegs pa'i mtshan bzung ba tsam gyis bla na med pa yang dag par rdzogs pa'i byang chub yongs su bzung zhing chos thams cad ji lta ba bzhin du mkhyen nas/ don thams cad thugs su chud pa'i de bzhin gshegs par 'gyur ba ni ngo mtshar che ste/ su zhig sangs rgyas la dad par mi 'gyur zhes smras so/ / de nas bcom ldan 'das kyis/ tshe dang ldan pa kun dga' bo la bka' stsal pa/ kun dga' bo byang chub sems dpa'i theg pa la yang dag par zhugs pa'i rigs kyi bu 'am/ rigs kyi bu mo gang la la chos kyi rnam grangs 'di thos nas 'dzin par byed/ 'chang bar byed/ klog par byed/ kun chub par byed cing / gzhan dag la'ang rgya cher yang dag par rab tu ston par byed pa dang / tha na glegs bam la bris te 'chang bar byed na/ rigs kyi bu 'am/ rigs kyi bu me de dag sangs rgyas kyis byin gyis brlabs dang / sngon gyi rgyal ba la lhag par bya ba byas par yin par rig par bya'o// de dag la 'chi ba'i 'jigs pa mi 'byung bar rig par bya'o// de dag gshis ngan du 'chi bar mi 'gyur ro/ / de dag pha rol gyi gnod pas 'chi bar mi 'gyur ro// de dag la chom rkun dang / dug dang / mtshon gyi 'jigs pa mi 'byung bar yid ches par bya'o// de nas lha'i dbang po brgya byin byang chub sem dpa' sems dpa' chen po rnams kyi bsrung ba lung bstan pa 'di shes nas/ chos kyi rnam grangs 'di gzung ba'i phyir lha'i bu stong tshang bas yongs su bskor cing mdun du bdar nas/ bcom ldan 'das ga la ba der song ste phyin pa dang / bcom ldan 'das kyi zhabs gnyis la mgo bos phyag 'tshal te/ bcom ldan 'das la lan gsum bskor ba byas nas/ bcom ldan 'das dang srog chags stong tshang ba gang dag bcom ldan 'das kyis ma 'ongs pa'i dus na bla na med pa yang dag par rdzogs pa'i byang chub tu lung bstan pa de dag la/ lha'i tsan dan gyi phye ma dang / lha'i me tog man+da ra ba dang / man+da ra ba chen po rnams kyis mngon par gtor nas/ thal mo sbyar te/ phyogs gcig tu 'dug nas 'di skad ces kyang gsol to/ / bcom ldan 'das bdag gis rigs kyi bu 'am/ rigs kyi bu mo gang chos kyi rnam grangs 'di 'dzin par bgyid pa dang / 'chang bar bgyid pa dang / klog par bgyid pa dang / kun chub par bgyid pa de dag bsrung bar bgyi'o// bcom ldan 'das rigs kyi bu 'am/ rigs kyi bu mo de dag khyim na mchis sam/ dgon pa na mchis sam/ shing drung na mchis sam/ khyim stong pa na mchis sam/ 'brog dgon pa na mchis sam/ lam dang lam gol ba na mchis sam/ gnyid log gam gnyid ma log pa dag na yang / de dag pha rol gyi gnod pas 'gum par mi 'gyur bar bdag gis bsrung bar bgyi'o// de nas bcom ldan 'das kyis/ tshe dang ldan pa kun dga' bo la bka' stsal pa/ kun dga' bo da ltar de bzhin gshegs pa dgra bcom pa yang dag par rdzogs pa'i sangs rgyas bzhugs te 'tsho zhing gzhes pa la rigs kyi bu'am/ rigs kyi bu mo gang zhig gis ji srid 'tsho'i bar du chos gos dang / bsod snyoms dang / gnas mal dang / snyun gyi gsos sman dang / yo byad rnams kyis bsnyen bkur byed na/ kun dga' bo de tsam gyis ni de bzhin gshegs pa la bkur sti byas par mi 'gyur/ bla mar byas par mi 'gyur/ ri mor byas par mi 'gyur/ mchod pa byas par mi 'gyur gyi/ byang chub sems dpa'i theg pa la yang dag par zhugs pa'i rigs kyi bu 'am/ rigs kyi bu mo gang zhig chos kyi rnam grangs 'di thos nas/ 'dzin par byed dam/ 'chang bar byed dam/ klog par byed dam/ kun chub par byed dam/ gzhan dag la'ang rgya cher yang dag par rab tu ston tam/ tha na glegs bam la bris te 'chang na/ kun dga' bo de tsam gyis ni de bzhin gshegs pa la bkur sti dam pa dang / bla mar bya ba dam pa dang / ri mo dam pa dang / mchod pa dam pas bkur sti byas pa yin/ bla mar byas pa yin/ ri mor byas pa yin/ mchod pa byas pa yin no// de nas tshe dang ldan pa kun dga' bo stan las langs te/ bla gos phrag pa gcig tu byas nas/ pus mo g.yas pa'i lha nga sa la btsugs te/ bcom ldan 'das ga la ba der logs su thal mo sbyar ba btud nas/ bcom ldan 'das la 'di skad ces gsol to// bcom ldan 'das chos kyi rnam grangs 'di'i ming ci lags/ 'di ji ltar gzung bar bgyi/ de skad ces gsol ba dang / bcom ldan 'das kyis kun dga' bo la 'di skad ces bka' stsal to// kun dga' bo de'i phyir khyod kyis chos kyi rnam grangs 'di phyogs bcu'i mun pa rnam par sel ba zhes bya bar zung zhig/ 'di de bzhin gshegs pa'i mtshan yang dag par brjod pa zhes bya ba dang / dngos po med par rtogs pa zhes bya ba dang / mtshan nyid med par rtogs pa zhes bya bar yang zung zhig/ bcom ldan 'das kyis de skad ces bka' stsal nas/ tshe dang ldan pa kun dga' bo dang / tshe dang ldan pa shA ri'i bu dang / shAkya gzhon nu bzhin rab gsal dang / srog chags stong tshang ba de dang / lha'i dbang po brgya byin dang / dge slong de dag dang / byang chub sems dpa' de dag dang / lha dang / mi dang / lha ma yin dang / dri zar bcas pa'i 'jig rten yi rangs te/ bcom ldan 'das kyis gsungs pa la mngon par bstod do// 'phags pa phyogs bcu'i mun pa rnam par sel ba zhes bya ba theg pa chen po'i mdo rdzogs so// / rgya gar gyi mkhan po bi shud d+ha sing ha dang / lo tsA ba ban+d+ha rtsangs de ben d+ha rak+Shi tAs 'asgyur/

CLOSE WINDOW