བོད་ཡིག

e-texts based on the Adarsha Input

/ // rgya gar skad du/ Ar+ya ka raN Da byu ha nA ma ma hA yA na sU tra/ bod skad du/ 'phags pa za ma tog bkod pa zhes bya ba theg pa chen po'i mdo/ bam po dang po/ 'di skad bdag gis thos pa dus gcig na/ bcom ldan 'das mnyan du yod pa'i 'dze ta'i tshal mgon med pa la zas sbyin pa'i kun dga' ra ba na dge slong brgya phrag phyed dang bcu gsum gyi dge slong gi dge 'dun chen po dang / byang chub sems dpa' sems dpa' chen po mang po rnams dang yang thabs gcig pa la 'di lta ste/ byang chub sems dpa' sems dpa' chen po rdo rje blo gros dang / byang chub sems dpa' sems dpa' chen po ye shes mthong ba dang / byang chub sems dpa' sems dpa' chen po rdo rje'i sde dang / byang chub sems dpa' sems dpa' chen po gsang sben dang / byang chub sems dpa' sems dpa' chen po nam mkha'i snying po dang / byang chub sems dpa' sems dpa' chen po nyi ma'i snying po dang / byang chub sems dpa' sems dpa' chen po brtson 'grus mi gtong ba dang / byang chub sems dpa' sems dpa' chen po lag na rin po che dang / byang chub sems dpa' sems dpa' chen po kun tu bzang po dang / byang chub sems dpa' sems dpa' chen po mthu chen thob dang / byang chub sems dpa' sems dpa' chen po sgrib pa thams cad rnam par sel ba dang / byang chub sems dpa' sems dpa' chen po kun du dpa' ba dang / byang chub sems dpa' sems dpa' chen po sman gyi sde dang / byang chub sems dpa' sems dpa' chen po spyan ras gzigs kyi dbang po dang / byang chub sems dpa' sems dpa' chen po lag na rdo rje dang / byang chub sems dpa' sems dpa' chen po rgya mtsho mching rnam blo gros dang / byang chub sems dpa' sems dpa' chen po chos 'dzin dang / byang chub sems dpa' sems dpa' chen po sa'i spyan mchog dang / byang chub sems dpa' sems dpa' chen po dbugs phyin pa'i lag pa dang / byang chub sems dpa' sems dpa' chen po byams pa dang / de lta bu dag la sogs pa byang chub sems dpa' sems dpa' chen po bye ba rnams kyang tshogs so/ /gzhan yang dbang phyug dang / mthu bo che la sogs pa lha'i sde sum bcu rtsa gnyis kyi lha'i sras po rnams kyang tshogs so/ /gzhan yang lha'i sde sum bcu rtsa gsum gyi lha'i bu rnams tshogs te/ lha'i bu dbang phyug chen po dang / nyi ma dang zla ba dang / rlung gi lha dang / chu'i lha la sogs pa lha'i bu de dag tshogs pa dang lhan cig tu brgya byin lha'i dbang po dang / tshangs pa mi mjed kyi bdag po dag kyang tshogs so/ /'khor de na klu'i rgyal po brgya stong du ma tshogs pa rnams 'di lta ste/ klu'i rgyal po ud pa la dang / klu'i rgyal po shing e la'i lo ma can dang / klu'i rgyal po nya zan dang / klu'i rgyal po ba lang gi bdag po dang / klu'i rgyal po mgo brgya pa dang / klu'i rgyal po hu lu ta dang / klu'i rgyal po 'jog po dang / klu'i rgyal po glang mgo dang / klu'i rgyal po ri dgas mgo dang / klu'i rgyal po dga' bo dang / bsnyen dga' bo dang / klu'i rgyal po bad sa'i rigs kyi bu dang / klu'i rgyal po ma dros pa dang / klu'i rgyal po rgya mtsho mching rnam dang / de lta bu dag la sogs pa klu'i rgyal po brgya stong du ma dag kyang tshogs so/ /dri za'i rgyal po brgya stong du ma dag kyang tshogs pa 'di lta ste/ dri za'i rgyal po rnga'i dbyangs kyi rgyal po dang / dri za'i rgyal po yid du 'ong ba'i dbyangs dang / dri za'i rgyal po lag pa stong pa dang / dri za'i rgyal po blo gros chen po dang / dri za'i rgyal po lus sim par byed pa dang / dri za'i rgyal po sil snyan sgra bsgrags dang / dri za'i rgyal po rgyan gyis brgyan pa dang / dri za'i rgyal po gzhon nur snang ba dang / dri za'i rgyal po lag pa bzang po dang ldan pa dang / dri za'i rgyal po chos dga' dang de lta bu la sogs pa dri za'i rgyal po brgya stong du ma dag tshogs so/ /'khor der mi 'am ci brgya stong du ma tshogs pa 'di lta ste/ mi 'am ci'i rgyal po bzhin bzangs dang / mi 'am ci'i rgyal po cod pan can dang / mi 'am ci'i rgyal po sa ri'i bzhin dang / mi 'am ci'i rgyal po rab tu dga' byas dang / mi 'am ci'i rgyal po 'khor lo bkod pa dang / mi 'am ci'i rgyal po me tog gtor ba dang / mi 'am ci'i rgyal po nor bu dang / mi 'am ci'i rgyal po gsus shol dang / mi 'am ci'i rgyal po brtson 'grus brtan pa dang / mi 'am ci'i rgyal po shin du 'thad pa dang / mi 'am ci'i rgyal po bzhin brgya pa dang / mi 'am ci'i rgyal po shing rlon dang / de lta bu la sogs pa mi 'am ci'i rgyal po brgya stong du ma dag tshogs so/ /lha'i bu mo brgya stong phrag du ma dag tshogs pa 'di lta ste/ lha'i bu mo ta la mchog ces bya ba dang / lha'i bu mo shin du bkod pa zhes bya ba dang / lha'i bu mo gser gyi ska rags shes bya ba dang / lha'i bu mo rgyan pa zhes bya ba dang / lha'i bu mo gdos 'dzin ces bya ba dang / lha'i bu mo bdud rtsi'i thigs pa zhes bya ba dang / lha'i bu mo lus yongs su mdzes pa zhes bya ba dang / lha'i bu mo nor bu'i 'od ces bya ba dang / lha'i bu mo gtsug phud can zhes bya ba dang / lha'i bu mo lha'i bzhin ston pa zhes bya ba dang / lha'i bu mo sil snyan lnga mngon pa zhes bya ba dang / lha'i bu mo gser gyi phreng ba zhes bya ba dang / lha'i bu mo me tog ud pa la sngon po zhes bya ba dang / lha'i bu mo chos mngon pa zhes bya ba dang / lha'i bu mo shin du rol pa zhes bya ba dang / lha'i bu mo ma lus 'byung gnas shes bya ba dang / lha'i bu mo shin du bkod pa'i blo gros shes bya ba dang / lha'i bu mo dpung rgyan 'dzin pa zhes bya ba dang / lha'i bu mo sbyin pa sbyin byed ces bya ba dang / lha'i bu mo zla ba can dang / de lta bu la sogs pa lha'i bu mo brgya phrag du ma dag tshogs so/ /klu'i bu mo brgya phrag du ma dag kyang tshogs pa 'di lta ste/ klu'i bu mo rgyan 'dzin ces bya ba dang / klu'i bu mo pu la ni da zhes bya ba dang / klu'i bu mo ral pa gsum pa zhes bya ba dang / klu'i bu mo sa ri'i bzhin zhes bya ba dang / klu'i bu mo rgyal ba'i dpal zhes bya ba dang / klu'i bu mo glog gi mig ces bya ba dang / klu'i bu mo glog gi 'od ces bya ba dang / klu'i bu mo sa ri zhes bya ba dang / klu'i bu mo g.yog brgya pa zhes bya ba dang / klu'i bu mo sman chen po zhes bya ba dang / klu'i bu mo thigs pa zhes bya ba dang / klu'i bu mo mgo gcig ma zhes bya ba dang / klu'i bu mo bzhon pa brgya pa zhes bya ba dang / klu'i bu mo za byed ces bya ba dang / klu'i bu mo ma lus 'ongs shes bya ba dang / klu'i bu mo shin tu brgyan ma zhes bya ba dang / klu'i bu mo sprin dkar mo zhes bya ba dang / klu'i bu mo de bzhin du chags pa shes bya ba dang / klu'i bu mo gtong ldan ma zhes bya ba dang / klu'i bu mo 'khor mi phyed pa zhes bya ba dang / klu'i bu mo pu lin da zhes bya ba dang / klu'i bu mo rgya mtsho mching rnam mngal zhes bya ba dang / klu'i bu mo gdugs kyi bzhin zhes bya ba dang / klu'i bu mo chos la dga' ba zhes bya ba dang / klu'i bu mo bde byed ces bya ba dang / klu'i bu mo brtson 'grus shes bya ba dang / klu'i bu mo rgya mtsho mching rnam ltar zab pa zhes bya ba dang / klu'i bu mo ri rab lhun po'i dpal zhes bya ba dang / de lta bu la sogs te klu'i bu mo brgya stong du ma dag tshogs so/ /dri za'i bu mo brgya stong du ma dag kyang tshogs pa 'di lta ste/ dri za'i bu mo dga' ba'i bzhin zhes bya ba dang / dri za'i bu mo dga' ba'i sbyin byed ces bya ba dang / dri za'i bu mo mi ston pa zhes bya ba dang / dri za'i bu mo rdo rje'i dpal zhes bya ba dang / dri za'i bu mo rdo rje'i phreng ba zhes bya ba dang / dri za'i bu mo phreng ba bzang po can zhes bya ba dang / dri za'i bu mo nags tshal zhes bya ba dang / dri za'i bu mo me tog brgya pa zhes bya ba dang / dri za'i bu mo me tog 'bus pa zhes bya ba dang / dri za'i bu mo rin po che'i phreng ba zhes bya ba dang / dri za'i bu mo dus pa'i me tog ces bya ba dang / dri za'i bu mo mngal bzang mo zhes bya ba dang / dri za'i bu mo rgyal po'i dpal zhes bya ba dang / dri za'i bu mo rnga zhes bya ba dang / dri za'i bu mo phreng ba bzang mo zhes bya ba dang / dri za'i bu mo rgyan gyis brgyan ces bya ba dang / dri za'i bu mo mngon par btud pa zhes bya ba dang / dri za'i bu mo chos 'dod ces bya ba dang / dri za'i bu mo chos sbyin zhes bya ba dang / dri za'i bu mo me tog u dum ba ra'i lto ba zhes bya ba dang / dri za'i bu mo rnam pa brgya pa zhes bya ba dang / dri za'i bu mo me tog pad ma'i dpal zhes bya ba dang / dri za'i bu mo me tog pad ma'i dmigs zhes bya ba dang / dri za'i bu mo lus yongs su mdzes pa zhes bya ba dang / dri za'i bu mo cha bas dbang po bzhin du 'gro ba zhes bya ba dang / dri za'i bu mo sa sbyin zhes bya ba dang / dri za'i bu mo 'bras bu sbyin zhes bya ba dang / dri za'i bu mo seng ge'i 'gros shes bya ba dang / dri za'i bu mo me tog ku mu da zhes bya ba dang / dri za'i bu mo yid dga' zhes bya ba dang / dri za'i bu mo sbyin byed ces bya ba dang / dri za'i bu mo lha'i tshig ces bya ba dang / dri za'i bu mo bzod dga' zhes bya ba dang / dri za'i bu mo mya ngan 'das dga' zhes bya ba dang / dri za'i bu mo rin chen myu gu zhes bya ba dang / dri za'i bu mo dbang po'i dpal zhes bya ba dang / dri za'i bu mo skye dgu'i bdag mo'i gnas shes bya ba dang / dri za'i bu mo ri dgas kyi rgyal po can zhes bya ba dang / dri za'i bu mo dpal 'dab zhes bya ba dang / dri za'i bu mo 'bar ba'i rtse mo zhes bya ba dang / dri za'i bu mo 'dod chags las yongs su grol zhes bya ba dang / dri za'i bu mo zhe sdang las yongs su grol zhes bya ba dang / dri za'i bu mo gti mug las yongs su grol zhes bya ba dang / dri za'i bu mo 'khor ba grungs ma zhes bya ba dang / dri za'i bu mo rin po che'i khri'u zhes bya ba dang / dri za'i bu mo 'ong ba dang 'gro ba zhes bya ba dang / dri za'i bu mo me'i 'od ces bya ba dang / dri za'i bu mo zla ba'i gzugs kyi 'od ces bya ba dang / dri za'i bu mo nyi ma'i mig ces bya ba dang / dri za'i bu mo gser ltar snang ba zhes bya ba dang / dri za'i bu mo dam pa'i dpal zhes bya ba dang / de lta bu la sogs pa dri za'i bu mo brgya phrag du ma dag tshogs so/ /'khor der mi 'am ci'i bu mo brgya phrag du ma dag tshogs pa 'di lta ste/ mi 'am ci'i bu mo yid ces bya ba dang / mi 'am ci'i bu mo yid las byung ba zhes bya ba dang / mi 'am ci'i bu mo rlung gi shugs shes bya ba dang / mi 'am ci'i bu mo namakha'i gzings shes bya ba dang / mi 'am ci'i bu mo mgyogs pa'i shugs shes bya ba dang / mi 'am ci'i bu mo dpal sbyin pa zhes bya ba dang / mi 'am ci'i bu mo mche ba bzang mo zhes bya ba dang / mi 'am ci'i bu mo mi g.yo ba'i dpal zhes bya ba dang / mi 'am ci'i bu mo khams la dga' ba zhes bya ba dang / mi 'am ci'i bu mo 'bar ba la dga' ba zhes bya ba dang / mi 'am ci'i bu mo shin du dpal zhes bya ba dang / mi 'am ci'i bu mo rin po che 'byung gnas shes bya ba dang / mi 'am ci'i bu mo spyan ras gzigs kyi dpal zhes bya ba dang / mi 'am ci'i bu mo stan can zhes bya ba dang / mi 'am ci'i bu mo rdo rje'i khu tshur zhes bya ba dang / mi 'am ci'i bu mo ser skya zhes bya ba dang / mi 'am ci'i bu mo rgyan rab brgyan pa zhes bya ba dang / mi 'am ci'i bu mo 'bral ba 'byes chen zhes bya ba dang / mi 'am ci'i bu mo nges pa yongs su bsten pa zhes bya ba dang / mi 'am ci'i bu mo blo gros chen mo zhes bya ba dang / mi 'am ci'i bu mo nam mkha' srung zhes bya ba dang / mi 'am ci'i bu mo bkod pa rgyal po'i dbang zhes bya ba dang / mi 'am ci'i bu mo gtsug na nor bu zhes bya ba dang / mi 'am ci'i bu mo nor bu 'dzin ces bya ba dang / mi 'am ci'i bu mo nor bu 'bar ma zhes bya ba dang / mi 'am ci'i bu mo skye bo mkhas pas bsten ces bya ba dang / mi 'am ci'i bu mo mdog ma zhes bya ba dang / mi 'am ci'i bu mo tshe sbyin zhes bya ba dang / mi 'am ci'i bu mo de bzhin gshegs pa'i mdzod yongs su skyong ma zhes bya ba dang / mi 'am ci'i bu mo chos kyi dbyings yongs su srung ba zhes bya ba dang / mi 'am ci'i bu mo rkang pa'i gdub bu'i rnga zhes bya ba dang / mi 'am ci'i bu mo skad cig sgrol zhes bya ba dang / mi 'am ci'i bu mo rtag tu chos len par 'dod ces bya ba dang / mi 'am ci'i bu mo rtag tu dus dus su ston ma zhes bya ba dang / mi 'am ci'i bu mo dbugs 'byin ces bya ba dang / mi 'am ci'i bu mo rnam par thar byed ces bya ba dang / mi 'am ci'i bu mo yod pa mi 'phrogs pa zhes bya ba dang / mi 'am ci'i bu mo skyo 'dzin ces bya ba dang / mi 'am ci'i bu mo ral gri 'bar zhes bya ba dang / mi 'am ci'i bu mo sa la 'gro zhes bya ba dang / mi 'am ci'i bu mo lha dbang phreng ba zhes bya ba dang / mi 'am ci'i bu mo lha ma yin gyi dbang mo zhes bya ba dang / mi 'am ci'i bu mo rus bzod ces bya ba dang / mi 'am ci'i bu mo sbyin ldan zhes bya ba dang / mi 'am ci'i bu mo mang po'i gnas shes bya ba dang / mi 'am ci'i bu mo lag cha brgya pa zhes bya ba dang / mi 'am ci'i bu mo rgyan gyis brgyan pa ces bya ba dang / mi 'am ci'i bu mo yid 'phrog ces bya ba dang / de lta bu la sogs pa mi 'am ci'i bu mo brgya phrag du ma dag tshogs so/ /dge bsnyen dang / dge bsnyen ma brgya phrag du ma dag tshogs so/ /mur 'dug spyod pa dang / kun du rgyu ba dang / gcer bu pa brgya phrag du ma dag kyang tshogs te gang gi tshe na 'dus pa cher gyur pa de'i tshe sems can dmyal ba chen po mnar med par 'od zer byung ngo / /byung nas 'dze ta'i tshal gyi gtsug lag khang du song ba dang / de dag gis gtsug lag khang de yongs su mdzes par snang ste/ ka ba ni lha'i nor bu rin po ches brgyan par snang ngo / /rtsig pa brgya dag kyang gser gyis mdzes par byas par snang ngo / /gnas khang so so dag na ni gser dang dngul las byas pa'i sgo dag snang ngo / /gnas khang so so na skas gser dang / dngul las byas pa dag kyang snang ngo / /dngul gyi khang pa dag na ni gser gyi ka ba rin po ches brgyan/ gser gyi khang pa dag na ni dngul gyi ka ba rin po ches brgyan pa dang / 'dze ta'i tshal gyi phyi rol na shing dpag bsam rnam pa sna tshogs dag snang ste/ gser gyi sdong po dang / dngul gyi lo ma dang / rgyan rnam pa sna tshogs rab tu 'phyang ba dag dang / yul ka shi ka nas byung ba'i gos rab tu 'phyang ba dag dang / rgya'i gos brgya stong rab tu 'phyang ba dang / mu tig gi se mo do brgya stong rab tu 'phyang ba dang / cod pan dang / rna cha dang phreng ba'i lda ldi dang / dpung rgyan dang / rkang pa'i gdu bu rab tu 'phyang ba dang / phyi rol na rin po che'i gdub bu steng rin po che las byas pa/ de la 'phyang ba'i shing dbang gi bsam gyi shing de lta bu brgya dag kyang byung ngo / /'dze ta'i tshal gyi gtsug lag khang de nyid na skas dag kyang rdo rje las byas par snang ngo / /sgo rgyab na mu tig dang / dar gyi tshogs rab tu spyangs so/ /rdzing bu du ma dag kyang byung ste/ la la ni chu yan lag brgyad dang ldan pas yongs su gang / la la ni me tog rnam pa sna tshogs kyis yongs su gang ba dag 'di lta ste/ me tog ud pa la dang / pad ma dang / ku mu da dang / pun da ri ka dang / man dA ra ba dang / man dA ra ba chen po dang / u dum ba ra dag gis yongs su gang ngo / /gzhan yang shing gi me tog rnam pa sna tshogs skye ba 'di lta ste/ me tog tsam pa ka dang / ka ra bi ra dang / pa ta la dang / a ti mug ta ka dang / dbyar gyi dri dang / gzhan yang shing gi me tog yid dga' ba dag byung ste/ 'dze ta'i tshal gyi gtsug lag khang de yongs su mdzes par byas pa nyid du snang ngo / /de nas 'khor de nyid kyi nang nas byang chub sems dpa' sgrib pa thams cad rnam par sel ba stan las langs te bla gos phrag pa gcig tu gzar nas pus mo g.yas pa'i lha nga sa la btsugs te/ bcom ldan 'das ga la ba de logs su thal mo sbyar ba btud de/ bcom ldan 'das la 'di skad ces gsol to/ /bcom ldan 'das bdag ni shin du ngo mtshar rmad du byung ba thob bo/ /bcom ldan 'das 'od zer chen po 'di dag ga las mchis/ rdzu 'phrul gyi yul gyi mthu 'di su'i lags/ bcom ldan 'das kyis bka' stsal pa/ rigs kyi bu byang chub sems dpa' spyan ras gzigs kyi dbang po 'di ni mnar med pa'i sems can dmyal ba chen por zhugs nas sems can rnams yongs su smin par byed de/ yongs su smin par byas nas yi dags kyi grong khyer du 'dug go/ /de nas bcom ldan 'das la byang chub sems dpa' sgrib pa thams cad rnam par sel bas 'di skad ces gsol to/ /bcom ldan 'das mnar ma mchis pa'i sems can dmyal ba chen po na mnar mi gda' na/ bcom ldan 'das ji ltar na byang chub sems dpa' sems dpa' chen po spyan ras gzigs kyi dbang po 'jug par bgyid/ sems can dmyal ba chen po lcags kyi brtsig pas bskor la/ lcags kyi dog sa la shin du 'bar ba/ me lce gcig tu 'dus pa/ rnam par g.yo ba de na 'bod grogs pa dag gnas pa'i snod za ma tog 'dra ba mchis te/ snod der sems can bye ba khrag khrig brgya stong phrag du ma bstsal to/ /nam chu mang po mchis pa'i snod na sran chung dkar ru 'am/ na gu gyen du mchi na/ yang brel ba dang / smin par 'gyur/ thur du mchi na yang brel ba dang smin par 'gyur ba de bzhin du sems can de dag kyang mnar ma mchis pa'i sems can dmyal ba chen po der lus kyi sdug bsngal nyams su myong na/ bcom ldan 'das ji ltar na byang chub sems dpa' sems dpa' chen po spyan ras gzigs kyi dbang po mnar ma mchis pa'i sems can dmyal ba chen por 'jug par bgyid/ bcom ldan 'das kyis bka' stsal pa/ rigs kyi bu ji ltar 'khor los sgyur ba'i rgyal po lha'i nor bu rin po che las byas pa'i skyed mos tshal du 'jug pa de bzhin du/ rigs kyi bu byang chub sems dpa' spyan ras gzigs kyi dbang po yang mnar med pa'i sems can dmyal ba chen por 'jug mod kyi de'i lus la gzhan du 'gyur ba med do/ /nam mnar med pa'i sems can dmyal ba chen po dang nye bar 'gro ba de'i tshe mnar med pa'i sems can dmyal ba chen po de bsil bar 'gyur te/ de'i tshe gshin rje'i mi de dag mnar med pa'i sems can dmyal ba chen por ci mi dge ba'i ltas shig /nam byang chub sems dpa' spyan ras gzigs kyi dbang po 'ongs pa de'i tshe me tog pad ma shing rta'i 'khor lo tsam byung zhing snod de yang gas me de'i 'obs de nyid du yang rdzing bu byung bar gyur zhes skyo bar gyur to/ /de nas gshin rje'i skyes bu de dag ral gri dang / gtun dang mtshon cha b+hiN+Di pA la dang / to mar dang / 'ga' da dang / 'khor lo dang / rtse gsum pa la sogs pa thogs nas gshin rje'i rgyal po ga la ba der song ste/ phyin nas 'di skad ces smras so/ /lha bdag cag gi sug las kyi dog sa de yongs su bas par mkhyen par mdzod cig / ci'i phyir khyed kyi las kyi sa yongs su zad dam/ lha ci lags mi mkhyen tam/ mnar ma mchis pa'i sems can dmyal ba der thog ma kho nar mi dge ba'i ltas byung ste/ skyes bu ji ltar 'dod pa'i gzugs can ral pa'i cod pan can lus rgyan thams cad kyis brgyan pa phyin pa dang bsil bar gyur to/ /gang gi tshe de phyin pa de'i tshe me tog pad ma shing rta'i 'khor lo tsam yang byung / snod de yang gas/ zhugs kyi 'obs der yang rdzing bu byung bar gyur to/ /de nas gshin rje'i rgyal po sems par gyur te/ mthu 'di lha gang gi yin yang na lha'i bu dbang phyug chen po dang / mthu bo che las dam pa thob pa zhig sa 'dir 'ongs sam/ yang na srin po mthu bo che lha'i bal glang gi stobs dang 'gran pa nyid skyes sam zhes des lha'i mig gis rnam par bltas na lha'i sde'i nang na dam pa de lta bu ma mthong ngo / /de nas slar yang mnar med pa'i sems can dmyal ba chen por bltas so/ /des bltas pa dang mnar med pa'i sems can dmyal ba chen po de na byang chub sems dpa' spyan ras gzigs kyi dbang po bzhugs pa nyid mthong ngo / /de nas gshin rje'i rgyal po byang chub sems dpa' sems dpa' chen po ga la ba der dong ste phyin pa dang / zhabs la mgo bos phyag 'tshal nas bstod pa'i khyad par byed par rtsom pa/ spyan ras gzigs kyi dbang po dbang phyug chen po/ pad ma la dgyes pa/ dam pa stsol ba/ dbang du mdzad pa/ sa'i spyan dam pa mdzad pa/ dbugs 'byin par mdzad pa/ phyag brgya stong pa/ spyan bye ba brgya stong pa/ dbu bcu gcig pa/ rgod ma'i bzhin lta bu'i mthar phyin pa/ chos la dgyes pa/ sems can thams cad yongs su thar bar mdzad pa ru sbal dang / chu srin dang / nya rnams dbugs 'byin par mdzad pa/ ye shes kyi phung po dam pa mdzad pa/ dga' ba stsol ba/ rin po che'i dpal dam pa/ mnar med pa kun skems par mdzad pa/ ye shes kyi dpal gyis brgyan pa/ ye shes la dgyes pa/ lha thams cad kyis mchod pa/ phyag 'tshal ba/ bkur sti bgyis pa/ mi 'jigs pa stsol ba/ pha rol du phyin pa drug ston par mdzad pa/ nyi ma lta bu'i spyan mchog mdzad pa/ chos kyi sgron ma mdzad pa/ ji ltar dgyes pa'i gzugs kyi gzugs mchog /dri za'i gzugs dang ldan pa/ gser gyi ri'i gzugs dang mtshungs pa/ rgya mtsho mching rnam gyi glong bzhin du zab pa/ don dam pa'i rnal 'byor rjes su thob pa/ bdag gi zhal ston par mdzad pa/ ting nge 'dzin brgya stong du ma dang ldan pa/ mngon par dgyes par mdzad pa/ sku rgyan pa skyes bu'i khyu mchog /khu sgo dang / khong sgril dang / 'khrul 'khor gyi lam las yongs su thar bar mdzad pa/ srid pa thams cad dang ma 'brel ba/ /'khor mang po 'byung bar 'gyur ba bsags pa/ yid bzhin gyi nor bu rin po che mdzad pa/ mya ngan las 'das pa'i lam ston par mdzad pa/ yi dags kyi grong khyer skems par mdzad pa/ skye bo la gdugs su gyur par mdzad pa/ nad las yongs su thar bar mdzad pa/ klu'i rgyal po dga' bo dang nye dga' bo'i mchod phyir thogs pa/ don yod par 'gyur ba'i zhags pa ston par mdzad pa/ sngags brgya phrag du ma dang ldan pa/ lag na rdo rje skrag par mdzad pa/ 'jig rten gsum po skrag par mdzad pa/ gnod sbyin dang / srin po dang / 'byung po dang / sha za dang phra men pha dang / phra men ma dang / ro langs dang / grul bum dang / rjed byed rnams skrag par mdzad pa/ spyan ud pa la sngon po lta bu/ zab cing brtan par mdzad pa/ rig pa'i bdag po nyon mongs pa thams cad las rnam par grol bar mdzad pa/ lam sna tshogs bsags pa/ thar pa'i dam pa la zhugs pa/ sku la byang chub kyi lam bsags pa/ yi dags yongs su thar bar mdzad pa/ ting nge 'dzin rdul phra rab lta bu brgya stong dang ldan pa la phyag 'tshal lo zhes de ltar gshin rje'i rgyal pos khyad par dam pa'i bstod pas bstod nas/ slar yang gshin rje'i rgyal pos lan gsum bskor te de nyid nas song ngo / /de nas bcom ldan 'das la byang chub sems dpa' sgrib pa thams cad rnam par sel bas 'di skad ces gsol to/ /bcom ldan 'das byang chub sems dpa' sems dpa' chen po spyan ras gzigs kyi dbang po mchi 'am/ bcom ldan 'das kyis bka' stsal pa/ rigs kyi bu de ni mnar med pa'i sems can dmyal ba chen po nas byung ste/ yi dags kyi grong khyer du song nas mgal shing lta bu dang / keng rus bsgreng ba dang / bdag gi skra dang spus g.yogs pa dang / lto ri dang 'dra ba dang / kha khab kyi mig lta bu'i yi dags brgya stong du ma mdun nas rgyug go/ /byang chub sems dpa' sems dpa' chen po spyan ras gzigs kyi dbang po nam yi dags kyi grong khyer du song ba de'i tshe yi dags kyi grong khyer de bsil bar 'gyur/ rdo rje'i ser ba de yang rab tu zhi bar 'gyur ro/ /sgo ba de yang byin pa thag thug can la mig dmar zhing lag na khar ba thogs pa las kyi sa 'di 'dra ba ni bdag gi bya ba ma yin no zhes byams pa'i sems skyed do/ de nas byang chub sems dpa' sems dpa' chen po spyan ras gzigs kyi dbang po'i phyag gi sor mo bcu las chu bo chen po bcu byung / zhabs kyi sor mo bcu las chu bo chen po bcu byung ste/ byang chub sems dpa' spyan ras gzigs kyi dbang po shin du thugs brtse ba'i zil gyis non nas ba spu'i khung bu nas chu bo byung ngo / /gang gi tshe na de dag gis chu myong ba de'i tshe de dag mgrin pa yangs par gyur/ lus kyang yongs su rdzogs par gyur/ lha'i zas ro'i nang na ro mchog tu byung ba dang ldan pas tshim par gyur nas de'i tshe 'khor ba'i bsam pa la sems te/ kye ma'o 'dzam bu'i gling gi mi 'di dag ni grib ma bsil ba la yongs su bsten to/ /yang 'dzam bu'i gling gi mi 'di dag ni rtag tu pha ma la yongs su 'dzin cing bsnyen bkur byed de bde ba dang ldan pa'o/ /gang rtag tu dge ba'i bshes gnyen dang sten cing skyong ba'i skyes bu de dag ni bde ba dang ldan pa'o/ /gang rtag tu theg pa chen po rtag tu khong du chud par byed pa'i skyes bu dam pa de dag ni bsam pa dang ldan pa'o/ /gang 'phags pa'i lam yan lag brgyad pa la gnas par byed pa de dag ni skyes bu dam pa'o/ /gang chos kyi gaN Di rdung ba de dag ni skyes bu dam pa'o/ /gang gtsug lag khang gas pa dang gogs pa rnams slar 'chos pa de dag ni skyes bu dam pa'o/ /gang sngon gyi mchod rten gyi gzugs gas pa dang / gogs pa rnams slar 'chos pa de dag ni skyes bu dam pa'o/ /gang chos smra ba dang rten pa de dag ni skyes bu dam pa'o/ /gang de bzhin gshegs pa 'chag pa mthong ba de dag ni skyes bu dam pa'o/ /gang rang sangs rgyas 'chag pa mthong ba de dag ni skyes bu dam pa'o/ /gang byang chub sems dpa' 'chag pa mthong ba de dag ni skyes bu dam pa'o zhes de ltar lus kyi rjes su sems pa dang / de'i tshe theg pa chen po'i mdo za ma tog bkod pa dkon mchog gi rgyal po'i sgra byung ngo / /de'i tshe de dag gi 'jig tshogs la lta ba'i ri'i rtse mo nyi shu byung ba ye shes kyi rdo rjes bcom nas de dag thams cad bde ba can gyi 'jig rten gyi khams su skye ste/ byang chub sems dpa' 'dod pa'i bzhin zhes bya bar skyes nas gang gi tshe des sems can yongs su smin par byas pa de'i tshe slar yang song ngo / /de nas bcom ldan 'das la sgrib pa thams cad rnam par sel bas 'di skad ces gsol to/ /bcom ldan 'das byang chub sems dpa' sems dpa' chen po spyan ras gzigs kyi dbang po mchi 'am/ bcom ldan 'das kyis bka' stsal pa/ rigs kyi bu nyi ma re re zhing sems can bye ba khrag khrig brgya stong du ma yongs su smin par byed de/ rigs kyi bu ji ltar byang chub sems dpa' sems dpa' chen po spyan ras gzigs kyi dbang po'i spobs pa de 'dra ba ni de bzhin gshegs pa rnams la med do/ /sgrib pa thams cad rnam par sel bas gsol pa/ bcom ldan 'das ci'i slad du/ bcom ldan 'das kyis bka' stsal pa/ rigs kyi bu de bzhin gshegs pa dgra bcom pa yang dag par rdzogs pa'i sangs rgyas lhag mthong zhes bya ba rig pa dang rkang par ldan pa/ bde bar gshegs pa/ 'jig rten mkhyen pa/ skyes bu 'dul ba'i kha lo sgyur ba/ bla na med pa lha dang mi rnams kyi ston pa sangs rgyas bcom ldan 'das sngon 'jig rten du 'byung bar gyur to/ /de'i tshe de'i dus na sgrib pa thams cad rnam par sel ba nga ni spos kyi bzhin zhes bya ba'i tshong pa'i bur gyur te/ de'i tshe ngas de bzhin gshegs pa lhag mthong las spyan ras gzigs kyi dbang po'i yon tan brjod pa thos so/ /de nas bcom ldan 'das la sgrib pa thams cad rnam par sel bas 'di skad ces gsol to/ /bcom ldan 'das kyis byang chub sems dpa' sems dpa' chen po spyan ras gzigs kyi dbang po'i yon tan brjod pa ji skad du gsan/ bcom ldan 'das kyis bka' stsal pa/ mig las ni nyi ma dang zla ba byung / 'phral ba las ni dbang phyug chen po/ phrag pa las ni tshangs pa/ snying las ni mthu bo che/ mche ba gnyis las ni lha mo/ kha nas ni rlung rnams byung / rkang pa las ni sa/ lto ba las ni chu'i lha byung ste/ gang gi tshe spyan ras gzigs kyi dbang po'i lus las lha de dag byung ba de'i tshe bcom ldan 'das kyis lha'i bu dbang phyug chen po la 'di skad ces gsungs te/ dbang phyug chen po khyod dus ngan pa'i tshe sems can gyi khams ma rungs pa dag byung ba na khyod thog mar byed pa po/ gtong ba po'i lhar grags par 'gyur ro/ /sems can de dag ni byang chub kyi lam yongs su spangs par 'gyur ro/ /so so'i skye bo'i nang du ni nam mkha' ni de'i rtags so/ /sa ni de'i khri'o/ /sems can thams cad kyi ni gnas so/ /zhu bar 'gyur bas na rtags so zhes zer bar 'gyur ro zhes rigs kyi bu ngas de bzhin gshegs pa lhag mthong las de skad thos so/ /de 'das nas de bzhin gshegs pa dgra bcom pa yang dag par rdzogs pa'i sangs rgyas gtsug ldan zhes bya ba rig pa dang rkang par ldan pa/ bde bar gshegs pa/ 'jig rten mkhyen pa/ skyes bu 'dul ba'i kha lo sgyur ba bla na med pa/ lha dang mi rnams kyi ston pa sangs rgyas bcom ldan 'das byung bar gyur to/ /de'i tshe de'i dus na sgrib pa thams cad rnam par sel ba nga ni byang chub sems dpa' sbyin pa zhes bya bar gyur te/ de las kyang ngas byang chub sems dpa' spyan ras gzigs kyi dbang po'i yon tan brjod pa thos so/ /de nas bcom ldan 'das la sgrib pa thams cad rnam par sel bas 'di skad ces gsol te/ /bcom ldan 'das kyis byang chub sems dpa' sems dpa' chen po spyan ras gzigs kyi dbang po'i yon tan brjod pa ji skad du gsan/ bcom ldan 'das kyis bka' stsal pa/ lha dang klu dang gnod sbyin dang / lha ma yin dang / lto 'phye chen po dang / mi thams cad 'dus par gyur te/ gang gi tshe na bcom ldan 'das kyis 'dus pa chen po gzigs nas 'khor de'i nang du chos kyi gtam bya bar brtsams pa de'i tshe bcom ldan 'das kyi zhal gyi sgo nas 'od zer kha dog sna tshogs byung ba sngon po dang / ser po dang / dmar po dang / dkar po dang / ja hong dang / shel dang dngul gyi kha dog rnams byung ste/ phyogs bcu'i 'jig rten gyi khams thams cad du snang bar byas nas slar 'ongs te bskor nas bcom ldan 'das kyi zhal gyi sgor song ngo / /de nas 'khor der byang chub sems dpa' lag na rin po che stan las langs te/ bla gos phrag pa gcig la gzar nas pus mo g.yas pa'i lha nga sa la btsugs te/ bcom ldan 'das ga la ba de logs su thal mo sbyar ba btud nas/ bcom ldan 'das la 'di skad ces gsol to/ /bcom ldan 'das ci'i slad du ltas 'di lta bu bstan par gyur/ bcom ldan 'das kyis bka' stsal pa/ rigs kyi bu byang chub sems dpa' sems dpa' chen po spyan ras gzigs kyi dbang po de 'jig rten gyi khams bde ba can nas 'ong ste/ de 'ong ba'i tshe ltas 'di 'dra ba ston to/ /gang gi tshe byang chub sems dpa' sems dpa' chen po spyan ras gzigs kyi dbang po 'ong ba de'i tshe shing dpag bsam rnams kyang 'phel bar 'gyur/ shing tsu ta ka yang 'phel bar 'gyur/ shing kun da'i me tog kyang 'byung bar 'gyur/ shing tsam pa ka yang 'phyang bar 'gyur/ rdzing bu me tog gis shin du gang ba yang 'byung bar 'gyur/ de las rin po che'i shing rnams kyang 'byung bar 'gyur/ char sna tshogs kyang 'bab par 'gyur te/ nor bu dang / mu tig dang / bai dUr+ya dang / dung dang man shel dang / byi ru rin po che'i char yang 'bab/ lha'i gos kyi char yang 'bab par 'gyur ro/ /lha gang de dang nye ba nyid du rin po che bdun yang 'byung ba 'di lta ste/ 'khor lo rin po che dang / bal glang rin po che dang / rta rin po che dang / nor bu rin po che dang / bud med rin po che dang / khyim bdag rin po che dang / blon po rin po che bdun rnams so/ /de dag byung nas sa gser du snang ngo / /gang gi tshe byang chub sems dpa' sems dpa' chen po spyan ras gzigs kyi dbang po 'jig rten gyi khams bde ba can nas byung ba de'i tshe sa rnam pa drug tu rab tu g.yos so/ /de nas bcom ldan 'das la byang chub sems dpa' lag na rdo rjes 'di skad ces gsol to/ /bcom ldan 'das gang gi ltas lags/ bcom ldan 'das kyis bka' stsal pa/ rigs kyi bu byang chub sems dpa' spyan ras gzigs kyi dbang po de 'ongs ste/ de'i ltas 'di 'dra ba dag byung ngo / /gang gi tshe na bskyod pa de'i tshe yid dga' ba'i me tog pad ma'i char rab tu bab ste/ de'i tshe byang chub sems dpa' sems dpa' chen po spyan ras gzigs kyi dbang pos me tog pad ma 'dab ma stong pa sdong bu gsar du snang ba thogs nas bcom ldan 'das ga la ba der song ste phyin pa dang / bcom ldan 'das kyi zhabs la mgo bos phyag 'tshal nas me tog 'di dag de bzhin gshegs pa snang ba mtha' yas kyis bskur to zhes pad ma phul te bsnyung ba ma mchis sam/ 'o ma brgyal tam/ bzhengs pa yang ngam/ reg par gnas sam zhes kyang gsung ngo / / de nas pad ma de blangs te g.yon phyogs su bzhag nas de'i tshe byang chub sems dpa' spyan ras gzigs kyi dbang po'i yon tan rjod pa mdzad do/ /spyan ras gzigs kyi dbang po'i las kyi sa ji lta bur bsgrubs pa yin/ sems can yi dags dag dang / bstir med par skyes pa dag dang / thig nag po can dang / 'o dod 'bod pa dag dang / ha ha zhes 'bod pa thams cad dang / gdung ba'i sems can dmyal ba chen po dang / me'i bum pa'i sems can dmyal ba chen po dang / sems can dmyal ba chen po sham ba la dang / sems can dmyal ba chen po chu grang ba dang / sems can dmyal ba chen po de dag tu sems can gang dag skyes pa dag ni bdag gi las kyi sa ste/ bdag gis sems can yongs su smin par bgyi'o/ /bgyis nas bla na med pa yang dag par rdzogs pa'i byang chub la dgod par bgyi'o/ /de nas byang chub sems dpa' sems dpa' chen po spyan ras gzigs kyi dbang pos dris pa'i lan btab nas/ bcom ldan 'das kyi zhabs la mgo bos phyag 'tshal te phyogs gcig tu song ngo / /song nas me'i phung po 'bar ba bzhin du sa dang nam mkha' la mi snang bar song ngo / /de nas bcom ldan 'das la byang chub sems dpa' lag na rin po ches 'di skad ces gsol to/ /bcom ldan 'das zhu ba lung bstan pa bshad pa bdag zhu na/ byang chub sems dpa' sems dpa' chen po spyan ras gzigs kyi dbang po'i bsod nams kyi tshogs ji lta bu lags/ bcom ldan 'das kyis bka' stsal pa/ de bzhin gshegs pa dgra bcom pa yang dag par rdzogs pa'i sangs rgyas gang gA'i klung gi bye ma snyed la lha'i bskal par na bza' dang / bshos dang / mal stan dang / na ba'i rkyen kyi sman dang / yo byad rnams kyis bsnyen bkur byas nas/ gang de bzhin gshegs pa de dag las bsod nams 'phel bar gyur pa'i bsod nams de byang chub sems dpa' sems dpa' chen po spyan ras gzigs kyi dbang po'i ba spu gcig gi rtse mo la gnas so/ /rigs kyi bu 'di lta ste dper na gling chen po bzhir zla ba bcu gnyis kyi lor nyin mtshan du char pa bab kyang thigs pa re re nas bgrang nus kyi/ rigs kyi bu byang chub sems dpa' sems dpa' chen po spyan ras gzigs kyi dbang po'i bsod nams kyi tshogs ni ngas bgrang bar mi nus so/ /rigs kyi bu 'di lta ste dper na rgya mtsho mching rnam chen po zabs dpag tshad brgyad khri bzhi stong yod la/ zheng du dpag tu med la/ rta rgod ma'i kha lta bu'i mthar thug pa'i thigs pa re re nas ngas bgrang nus kyi/ rigs kyi bu byang chub sems dpa' sems dpa' chen po spyan ras gzigs kyi dbang po'i bsod nams kyi tshogs ni ngas bgrang bar mi nus so/ /rigs kyi bu 'di lta ste dper na/ gling chen po bzhi na seng ge dang stag dang dred dang / ta rak+Sha dang / ri dgas la sogs pa dang / ba lang dang / bong bu dang / phyugs dang / bal glang dang / rta dang ma he dang / byi la la sogs pa rkang pa bzhi pa de dag gi spu re re nas ni ngas bgrang nus kyi/ rigs kyi bu byang chub sems dpa' sems dpa' chen po spyan ras gzigs kyi dbang po'i bsod nams kyi tshogs ni ngas bgrang bar mi nus so/ /rigs kyi bu 'di lta ste dper na/ rdul phra rab kyi rdul snyed kyi de bzhin gshegs pa dgra bcom pa yang dag par rdzogs pa'i sangs rgyas rnams kyi sku gzugs lha'i gser rin po che las byas nas nyin gcig tu ring bsrel bcug na/ rigs kyi bu de'i bsod nams kyi phung po ni ngas bgrang nus kyi/ byang chub sems dpa' sems dpa' chen po spyan ras gzigs kyi dbang po'i bsod nams kyi tshogs ni ngas bgrang bar mi nus so/ /rigs kyi bu 'di lta ste dper na/ shing shri sha pa'i tshal gyi lo ma ni ngas bgrang nus kyi/ byang chub sems dpa' sems dpa' chen po spyan ras gzigs kyi dbang po'i bsod nams kyi tshogs ni ngas bgrang bar mi nus so/ /rigs kyi bu 'di lta ste dper na/ gling chen po bzhi na gnas pa'i bud med dang / skyes pa dang / khye'u dang / bu mo gnas pa de dag thams cad rgyun du zhugs pa'i 'bras bu dang / lan cig phyir 'ong ba'i 'bras bu dang / phyir mi 'ong ba'i 'bras bu dang / dgra bcom pa nyid dang / rang byang chub la bkod na/ gang de dag gi bsod nams kyi phung po ni snga ma bzhin du byang chub sems dpa' sems dpa' chen po spyan ras gzigs kyi dbang po'i ba spu'i rtse mo'i bsod nams kyi phung po dang mnyam mo/ / de nas bcom ldan 'das la byang chub sems dpa' lag na rin po ches 'di skad ces gsol to/ /bcom ldan 'das bdag gis ni byang chub sems dpa' sems dpa' chen po spyan ras gzigs kyi dbang po'i bsod nams kyi phung po ci 'dra ba de lta bu de bzhin gshegs pa rnams la yang gang na yang ma mthong ma thos na byang chub sems dpar gyur pa lta ci smos/ bcom ldan 'das kyis bka' stsal pa/ rigs kyi bu gang nga 'dra ba'i de bzhin gshegs pa dgra bcom pa yang dag par rdzogs pa'i sangs rgyas rnams su gyur la/ de dag kyang gnas gcig tu gzhog cing na bza' dang / bshos dang / mal stan dang / na ba'i rkyen gyi sman dang / yo byad rnams kyis bskal par gzhog kyang de bzhin gshegs pa dgra bcom pa yang dag par rdzogs pa'i sangs rgyas de dag gis byang chub sems dpa' sems dpa' chen po spyan ras gzigs kyi dbang po'i bsod nams kyi phung po bgrang mi nus na/ rigs kyi bu nga gcig pu 'jig rten gyi khams 'di na gnas pas lta ci smos/ gang 'jig rten na spyan ras gzigs kyi dbang po'i ming dran pa de dag ni bde ba dang ldan pa yin no/ /de dag ni rga ba dang / 'chi ba dang / na ba dang / sdug bsngal ba las yongs su thar ba yin no/ /de dag ni 'khor ba'i tha ma gzhan med pa'i sdug bsngal las thar bar 'gyur ro/ /de dag ni gos dkar po dang skya bo bzhin du bya ngang pa'i rgyal po mgyogs pa dang rlung gi shugs 'ong ba bzhin du bde ba can gyi 'jig rten gyi khams su de bzhin gshegs pa snang ba mtha' yas las chos mngon du nyan pa'i phyir 'gro'o thos nas kyang de dag gi lus la 'khor ba'i sdug bsngal mi 'byung / 'dod chags dang zhe sdang dang / gti mug mi 'byung rga ba dang / shi bar mi 'gyur/ de dag gi lus la bkres par mi 'gyur/ mngal na gnas pa'i sdug bsngal ba shes par mi 'gyur te/ chos kyi ros bskyod nas de nyid du pad ma'i nang du skye bar 'gyur te/ byang chub sems dpa' sems dpa' chen po spyan ras gzigs kyi dbang po'i yid dam brtan po yongs su rdzogs pa dang / sems can thams cad thar pa la bzhag gi bar du 'jig rten gyi khams de na rtag tu 'dzin cing gnas so/ /de nas bcom ldan 'das la byang chub sems dpa' lag na rin po ches 'di skad gsol to/ /bcom ldan 'das gang gi dus na yid dam brtan pa de yongs su rdzogs pa lags/ bcom ldan 'das kyis bka' stsal pa/ sems can mang po 'khor ba na 'khor ba'i sems can de dag yongs su smin par byed pa dang / byang chub kyi lam ston par byed cing / gang dang gang gi gzugs kyis 'dul ba'i sems can rnams dul bar 'gyur ba de dang de'i gzugs kyis chos 'chad de/ de bzhin gshegs pas 'dul ba'i sems can rnams la ni de bzhin gshegs pa'i gzugs kyis chos 'chad rang sangs rgyas kyis 'dul ba'i sems can rnams la ni/ rang sangs rgyas kyi gzugs kyis chos 'chad/ dgra bcom pas 'dul ba'i sems can rnams la ni dgra bcom pa'i gzugs kyis chos 'chad/ byang chub sems dpas 'dul ba'i sems can rnams la ni byang chub sems dpa'i gzugs kyis chos 'chad/ dbang phyug chen pos 'dul ba'i sems can rnams la ni dbang phyug chen po'i gzugs kyis chos 'chad/ mthu bo ches 'dul ba'i sems can rnams la ni mthu bo che'i gzugs kyis chos 'chad/ tshangs pas 'dul ba'i sems can rnams la ni tshangs pa'i gzugs kyis chos 'chad/ /dbang pos 'dul ba'i sems can rnams la ni/ dbang po'i gzugs kyis chos 'chad/ nyi mas 'dul ba'i sems can rnams la ni nyi ma'i gzugs kyis chos 'chad/ zla bas 'dul ba'i sems can rnams la ni zla ba'i gzugs kyis chos 'chad/ me lhas 'dul ba'i sems can rnams la ni me lha'i gzugs kyis chos 'chad/ chu lha'i gzugs kyis 'dul ba'i sems can rnams la ni chu lha'i gzugs kyis chos 'chad/ rlung gi lha'i gzugs kyis 'dul ba'i sems can rnams la ni rlung lha'i gzugs kyis chos 'chad/ klus 'dul ba'i sems can rnams la ni klu'i gzugs kyis chos 'chad/ bgegs med pa'i bdag pos 'dul ba'i sems can rnams la ni/ bgegs med pa'i bdag po'i gzugs kyis chos 'chad/ gnod sbyin gyi 'dul ba'i sems can rnams la ni gnod sbyin gyi gzugs kyis chos 'chad/ ngal bso po'i gzugs kyis 'dul ba'i sems can rnams la ni ngal bso po'i gzugs kyis chos 'chad/ rgyal po'i gzugs kyis 'dul ba'i sems can rnams la ni rgyal po'i gzugs kyis chos 'chad/ pha dang mas 'dul ba'i sems can rnams la ni pha dang ma'i gzugs kyis chos 'chad de sems can dag ji lta ji ltar 'dul ba de lta de ltar chos ston to/ /rigs kyi bu byang chub sems dpa' sems dpa' chen po spyan ras gzigs kyi dbang po ni de ltar sems can yongs su smin par byed cing mya ngan las 'das pa'i chos ston to/ /de nas bcom ldan 'das la byang chub sems dpa' lag na rin po ches 'di skad ces gsol to/ /bcom ldan 'das bdag ni shin du ngo mtshar thob par gyur te/ bdag ni nam yang 'di 'dra ba'i yul mthong ba 'am thos par ma gyur te/ byang chub sems dpa' sems dpa' chen po spyan ras gzigs kyi dbang po'i yul ji 'dra ba de 'dra ba ni de bzhin gshegs pa rnams la yang ma mchis so/ /bcom ldan 'das kyis bka' stsal pa/ rigs kyi bu 'dzam bu'i gling 'di nyid na rdo rje'i mngal zhes bya ba'i phug yod pa de na lha ma yin bye ba khrag khrig brgya stong du ma gnas te/ de na byang chub sems dpa' sems dpa' chen po spyan ras gzigs kyi dbang po lha ma yin rnams la lha ma yin gyi gzugs kyis chos 'chad de/ theg pa chen po'i mdo rin po che'i rgyal po za ma tog bkod pa 'di nyid 'chad do/ /khyed cag nyon cig /gang lha ma yin gzhan pa de dag kyang byams pa'i sems dang zhi ba'i sems su byas shing / lag pa'i thal mo sbyar nas byang chub sems dpa' sems dpa' chen po spyan ras gzigs kyi dbang po la chos kyi rnam grangs 'di nyid nyan to/ /gang 'jig rten na mdo sde'i rgyal po 'di lta bu mngon du byed pa de dag ni bde ba dang ldan pa yin no/ /thos nas kyang mtshams med pa lnga dag zad par byed do/ /'chi ba'i tshe yang de bzhin gshegs pa bcu gnyis gshegs nas rigs kyi bu ma 'jigs shig / khyod kyis theg pa chen po'i mdo sde'i rgyal po za ma tog bkod pa thos so/ /bde ba can du 'gro ba'i phyir lam sna tshogs kyang / sta gon byas so/ /gdugs sna tshogs dang / cod pan dang / rna cha dang / se mo do rnams kyang sta gon byas so zhes dbugs 'byin par mdzad do/ /ltas de lta bu 'byung zhing 'chi ba'i dus kyi tshe bar chad med par bde ba can du 'gro bar 'gyur ro/ /lag na rin po che de ltar byang chub sems dpa' spyan ras gzigs kyi dbang po de ni lha ma yin rnams la mya ngan las 'da' ba'i chos ston par byed/ sgo ston par byed do/ /de nas byang chub sems dpa' lag na rin po ches bcom ldan 'das kyi zhabs la mgo bos phyag 'tshal te de nyid nas song ngo / /de yang 'das nas de bzhin gshegs pa dgra bcom pa yang dag par rdzogs pa'i sangs rgyas rig pa dang rkang par ldan pa/ bde bar gshegs pa/ 'jig rten mkhyen pa/ skyes bu 'dul ba'i kha lo sgyur ba bla na med pa/ lha dang mi rnams kyi ston pa/ sangs rgyas bcom ldan 'das thams cad skyob pa zhes bya ba sngon byung bar gyur to/ /de'i tshe de'i dus na sgrib pa thams cad rnam par sel ba nga ni mi mi rgyu ba'i sa'i phyogs ri khrod kyi bar ri brags shig na gnas shing bzod pa smra bar gyur te/ de'i tshe dus dus su ngas de bzhin gshegs pa las byang chub sems dpa' sems dpa' chen po spyan ras gzigs kyi dbang po'i yon tan brjod pa thos te/ 'di lta ste/ gser gyi sa la song nas sems can spyi'u tshugs su 'dug pa rnams la 'phags pa'i lam yan lag brgyad pa'i lam mya ngan las 'da' ba ston par byed pa dang ldan pa'i chos ston to/ /de nas gser gyi sa las byung ste/ dngul gyi sa la song nas/ de na skyes bu gang zag rkang pa bzhi yod pa de dag la byang chub sems dpa' sems dpa' chen po spyan ras gzigs kyi dbang po khyed cag bsam pa dam pa rab kyis mya ngan las 'da' ba'i rgyags kyi rjes su sems shing mngon pa'i chos kyi rnam grangs nyon cig ces chos 'chad do/ /de nas skyes bu de dag spyan ras gzigs kyi dbang po'i mdun du 'dug ste 'di skad ces smras so/ /long ba rnams la ni lam ston cig mgon ma mchis pa rnams la ni mgon dang skyabs mdzod cig /pha dang ma ma mchis pa rnams la ni pha dang mar mdzod cig / ngan song gsum gyi mun pa la ni sgron me mdzod cig /tshor bar bgyid pa'i thar pa'i lam ston cig /sems can gang dag rtag tu khyod kyi mtshan rjes su dran zhing yongs su len pa de dag la bde bar ldan pa lags so/ /bdag cag myong ba lta bu sdug bsngal las kyang thar bar 'gyur ro/ /de nas sems can de dag gi rna ba'i bu gar theg pa chen po'i mdo sde za ma tog bkod pa'i sgra byung ba dang / skyes bu de dag gis de thos nas phyir mi ldog pa'i sa bsgrub shing shin du bde ba dang ldan par gyur to/ / // bam po gnyis pa/ de nas byang chub sems dpa' sems dpa' chen po spyan ras gzigs kyi dbang po byung nas sa gzhan lcags las byas par song ste/ gang du lha ma yin gyi rgyal po gtor ma zhes bya ba mchis pa der song ba dang / de nas lha ma yin gyi rgyal po gtor mas byang chub sems dpa' sems dpa' chen po spyan ras gzigs kyi dbang po rgyang ma nas 'ong ba mthong nas slas dang / 'khor dang / lha ma yin sgur po dang / thung ngu la sogs pa du ma dang 'grogs shing 'khor dang bcas te dong nas byang chub sems dpa' sems dpa' chen po spyan ras gzigs kyi dbang po'i rkang pa la phyag 'tshal te 'di skad ces smras so/ /de ring du ni bdag gi tshe'i 'bras bu mchis so/ /de ring du ni bdag gi bsam pa rdzogs so/ /de ring du ni bdag gi bsam pa yongs su rdzogs te/ gang bdag gis khyod yang dag par mthong bas de'i tshe lus thams cad bde ba dang ldan par gyur to/ /de nas byang chub sems dpa' sems dpa' chen po spyan ras gzigs kyi dbang po la rin po che'i khri phul te/ bcom ldan 'das sdig pa la dga' ba/ gzhan gyi chung ma la chags pa/ srog gcod pa la brtson pa/ pha rol gyi srog gcod pa/ rga ba dang 'chi bas 'jigs pa rnams la thugs rje gzigs shig / 'khor bas skyo ba rnams la skyabs mdzod cig /mgon po khyod ni pha dang mar gyur pa lags kyis bdag cag bcing bas bcings pa rnams la lam ston cig /rigs kyi bu 'di lta ste/ dper na gang dag de bzhin gshegs pa dgra bcom pa yang dag par rdzogs pa'i sangs rgyas la bsod snyoms 'bul ba de dag gi bsod nams kyi phung po 'di bshad do/ /rigs kyi bu 'di lta ste/ dper na nga dang 'dra ba'i byang chub sems dpa' gang gA'i klung gi bye ma snyed bcu gnyis yod par gyur la/ de dag kyang gnas gcig tu bde ba'i yo byad thams cad kyis lha'i bskal par gnas su bcug na de dag gis kyang bsod nams kyi phung po de bgrang bar mi nus na/ nga gcig pu lha ma yin gyi gnas na gnas pas lta ci smos/ rigs kyi bu 'di lta ste/ dper na rdul phra rab kyi tshad ni ngas bgrang bar nus kyi/ rigs kyi bu bsod snyoms kyi bsod nams kyi phung po ni ngas bgrang mi nus so/ /rigs kyi bu 'di lta ste/ dper na rgya mtsho mching rnam chen po'i thigs pa ni ngas re re nas bgrang nus kyi/ rigs kyi bu bsod snyoms kyi bsod nams kyi phung po ni ngas bgrang mi nus so/ /rigs kyi bu 'di lta ste/ dper na gling chen po bzhi pa'i skyes pa dang / bud med dang / khye'u dang / bu mo de dag thams cad rnams kyi las la brtson par gyur la/ gling chen po bzhi pa'i mi de dag rnams gzhan ni mi byed kyi yungs kar 'ba' zhig byed la dus dus su klu'i rgyal pos kyang char pa'i rgyun phab ste/ yungs kar de dag kyang legs par grub nas g.yul gcig tu byas te skyes pa dang / bud med dang / khye'u dang / bu mo de dag thams cad kyis khur shing rta dang / bam po dang / skon pa dang / rnga mo dang / bong bu dang / ba lang dang / de dag thams cad la bkal te g.yul chen po der spungs nas bong bu dag dang / ba lang dag gis bcags te phung po chen por byas kyang / rigs kyi bu de ni ngas 'bru re re nas bgrang nus kyi/ rigs kyi bu bsod snyoms kyi bsod nams kyi phung po ni ngas bgrang mi nus ste/ /rigs kyi bu 'di lta ste/ dper na ri rab lhun po dpag tshad brgyad khri bzhi stong 'og tu nub pa dang / 'phang gi srid du dpag tshad brgyad khri bzhi stong yod pa de ni rigs kyi bu gro ga'i phung por gyur la/ rgya mtsho mching rnam chen po ni snag tshas yongs su gang bar gyur/ gling bzhi na gnas pa'i skyes pa dang / bud med dang / khye'u dang / bu mo de dag thams cad ni yi ge bar gyur te/ ri rab lhun po dang mnyam pa mtha' yas mu med pa de yi ger bris kyang rigs kyi bu yi ge de re re nas ngas bgrang nus kyi/ rigs kyi bu bsod snyoms kyi bsod nams kyi phung po de ni bgrang mi nus so/ /rigs kyi bu 'di lta ste/ dper na yi ge ba de dag thams cad byang chub sems dpa' sa bcu la gnas par gyur na/ gang byang chub sems dpa' sa bcu la gnas pa rnams kyi bsod nams kyi phung po ji tsam pa bsod snyoms kyi bsod nams kyi phung po de yang de tsam mo/ /rigs kyi bu 'di lta ste/ dper na rgya mtsho mching rnam gyi bye ma ni bye ma re re nas ngas bgrang nus kyi/ rigs kyi bu bsod snyoms kyi bsod nams kyi phung po ni ngas bgrang mi nus so/ /de nas lha ma yin gtor ma mchi ma dang bcas/ ngom zung gnags dbugs kyis brnangs shing skad ra ra por gyur la/ shugs 'byin cing byang chub sems dpa' sems dpa' chen po spyan ras gzigs kyi dbang po la 'di skad ces gsol to/ /bdag gtor ma slas dang / 'khor dang bcas pas sbyin pa ji lta bu zhig bgyis nas/ tshe 'di nyid la bcings pa thob par gyur/ bdag gis zhing ngan pa la sbyin pa byin te/ las de'i 'bras bu myong ba 'di lags pa lta/ thams cad mkhyen pa'i zhing la ni thal ba spar ba gang gtor kyang bdud rtsi 'grub par 'gyur na/ bdag gis ma 'tshal bas mchod sbyin mchod pa'i tshe mi'u thung gi gzugs kyis slong ba mchis nas bdag gis bal glang dang / rta'i theg pa cod pan dang rna cha dang / se mo do mang po dang / ldan pa ni bshams/ g.yag rnga'i rdul yab rin po ches spras pa ni spyangs mu tig gi se mo do dag dang mu tig las bgyis pa'i mjug ma dag ni mu tig gi dra ba dag gis g.yogs/ gser gyi dril bu dag ni dngul gyis brgyus te sgra sil sil mchi zhing / gzhan yang glang ser skya stong dag rmig pa ni dngul las bgyis/ rwa ni gser las bgyis shing mu tig gi dra bas g.yogs te mchi ba de 'dra ba'i glang ser skya dag dang / gzhan yang bud med gzhon nu shin du kha dog bzang zhing sha rgyas pa dang ldan pa/ shin du sdug pa lha'i bu mo dang 'dra zhing 'gran pa/ lha'i rgyan gyis brgyan pa/ cod pan dang / rna cha dang / se mo do mang po thogs pa/ dpung rgyan dang / gdub bu dang / rkang pa'i gdub bu dang / rked pa'i ska rags kyi rgyan dang / sor gdub dang / se ral gyi rgyan dang / mthe bo g.yon pa sor gdub dang ldan pa/ sgra sil sil mchi ba dang ldan pa/ gos tshon sna tshogs su bcos pa gyon pa stong dag dang / gzhan yang rin po che'i khri'u brgya stong dag dang / gser gyi phung po dang / dngul gyi phung po dang / rin po che'i phung po du ma dag ni bzhag /gos dang rgyan gyi phung po du ma dag ni bzhag /ba lang gi rigs brgya stong du ma rdzi dang ldan pa dag ni sta gon bgyis/ zas dang skom mang po dag ni bzhag /lha'i zas ro'i ro mchog dang ldan pa dag ni sta gon bgyis/ gser dang dngul gyi dril bu rin po ches spras pa dag ni rtag tu bzhag /gser dang dngul gyi seng ge'i khri'u du ma dag ni rin po ches spras/ lha'i g.yag rnga'i rdul yab kyi rtsa ba dang / gdugs dang / lha ma dag ni gser gyis brgyan/ gser gyi cod pan stong phrag du ma dag ni rin po ches brgyan cing bzhag pa dang / de'i tshe rgyal po ni stong tshogs/ bram ze ni 'bum tshogs/ rgyal rigs ni 'bum phrag du ma tshogs te/ de'i tshe bdag gis sa'i gdugs gcig tu bgyis pa bdag ngo mtshar du gyur te/ de bas na thog ma'i sdig pa mthol lo bshags so/ /rgyal rigs kyi chung ma rnams ni snying kar dral te/ khye'u dang bu mo gzhon nu dag srog bcad/ rgyal rigs chen po dag thams cad ni khu sgo dang / lcags kyis bcings nas zangs kyi brag phug tu khrid de/ rgyal rigs 'bum phrag du ma ni zangs kyi brag phug der stsal/ kha sha dang pan da pa la sogs pa'i rgyal rigs de dag ni lcags thag lcags kyi phur pa dang ldan pas rkang lag bcings nas phug der bzhag ste/ de'i tshe bdag gis chab sgo thams cad kyang bkum mo/ /dang po ni shing gi sgo'o/ /gnyis pa ni seng ldeng gi sgo'o/ /gsum pa ni 'khar ba'i sgo'o/ / bzhi pa ni zangs kyi sgo'o/ /lnga pa ni lcags kyi sgo'o/ /drug pa ni dngul gyi sgo'o/ /bdun pa ni gser gyi sgo ste/ gser gyi sgo der ri bdun gcig gi steng du gcig brtsegs te bzhag go/ /de nas bdag gis shing rta bcu pa'i bu tshol zhing gdugs la la la ni sbrang bu'i gzugs kyis/ gdugs la la la ni bung ba'i gzugs kyis/ gdugs la la la ni phag gi gzugs kyis/ gdugs la la la ni mi'i gzugs kyis de ltar bsgyur te/ gdugs re re zhing gzhan dang gzhan gyi gzugs kyis mchi yang mngon du ma mthong nas/ de'i tshe bdag gis rjes su bsams te mchod sbyin bgyi bar brtsams pa dang / de'i tshe shing rta bcu pa'i bu glags tshol ba mchis te/ des ri bdun dral cing gshegs nas myur du phyogs gzhan du bor te rgyal rigs de dag la skad cher smras pa dang / rgyal po de dag gis sgra de thos so/ /thos nas dbugs phyin par gyur te gnas pa dang / khyed cag gson nam shi zhes smras pa dang / de dag gis bcom ldan 'das bdag cag ni gson no zhes smras so/ /de nas skyes bu dpa' bo chen po des sgo de dag thams cad bcom nas zangs kyi phug de dag mthong ba dang / rgyal po bcings pa de dag thams cad kyis mthu bo che mthong nas yang na ni lha ma yin gtor ma shi'o/ /'chi ba'i dus byas so/ /yang na ni bdag cag bsad pa'i dus la bab pa lta zhig ces phan tshun du sems pa las/ de nas de dag gis bdag cag ni g.yul gyi sar shi na legs kyi bcing bas bcings bzhin du shi na ma legs te/ bdag cag ni bcing bas bcings bzhin du shi ba'i dus byas par gyur na rgyal rigs kyi chos kyang med par 'gyur gyi/ g.yul gyi sar shi ba'i dus byas na ni bdag cag mtho ris su skye bar 'gyur ro/ / zhes gcig la gcig de skad smra'o/ /de nas rgyal po chen po de dag thams cad bdag bdag gi khab tu dong ste shing rta 'dren pa'i rta du ma sta gon bgyis so/ /gang gi tshe na de dag gis shing rta dang mtshon cha rin po che chen po dag sta gon bgyis pa de'i tshe shing rta bcu pa'i bu mi'u thung gi gzugs su sprul nas ri dgas kyi lpags pa se ral du thogs/ smig ma'i mkhar ba thogs/ khri'u 'tshal te bdag gi drung du mchis nas chab sgor phyin pa dang / sgo bas bram ze mi'u thung ma 'gro shig ces bsgrags na/ des bdag ni shul ring po nas mchis so shes smras so/ /de nas sgo bas de la bram ze sa gang nas 'ongs shes de skad smras pa dang / bdag ni zla ba'i gling nas rgyal po drang srong gi drung du mchis so/ / de nas skyes bu sgo ba de song ste/ gtor ma la lha khyod kyi zhal sngar bram ze mi'u thung zhig mchis so zhes smras so/ /de nas lha ma yin gyi dbang po gtor mas ci'i dngos po zhig slong zhes de skad smras pa dang / lha ma 'tshal te zhes smras so/ / de nas rgyal po gtor mas khyod song la bram ze de khrid de shog shig ces de skad smras pa dang / sgo ba des de bos te bram ze chen po bzhud cig ces smras nas de nang du song ba dang rin po che'i khri'u la bzhag ste/ pa ba sangs kyang de'i tshe na de na gnas so/ /de yang de'i mkhan por grags nas des gtor ma la 'di ni dus kyi skyes bu 'dra ba zhig phyin te khyod la nges par bar chad byed do zhes de skad smras so/ /bcom ldan 'das ji ltar mkhyen/ ngas ni ltas dang mtshan ma las shes so/ / bdag cag gi thabs ji lta bu zhig bgyi/ de nas mthu bo ches nges par sbyin pa la 'gyod par 'gyur ro snyam du bsams nas des de'i khar sa ra swa ti bcug pa dang / de'i tshe des smras pa/ bram ze tshur shog /khyod ji lta bur sems/ bram ze des de la 'di skad ces smras so/ /gom pa gnyis shig gsol to/ /bram ze chen po khyod kyis ji ltar gom pa gnyis blangs na ngas ni gom pa gsum sbyin no/ /de nas blang ba blangs nas bkra shis so zhes smras te/ des chu dang til dang gser du bcas pa blangs so/ /de nas mi'u thung de'i gzugs mi snang bar byas so/ /de nas pa ba sangs des 'di skad ces smras so/ /rgyal po'i drang srong kho bos dus kyi skyes bu 'ongs so zhes byas na khyod kyis nga'i tshig ma mnyan te/ las de'i 'bras bu myong bar gyis shig /des bdag gi lus chen por bsgyur ba dang nyi ma dang zla ba ni de'i phrag pa la gnas/ lag na ni ral gri dang / gzhu dang / 'khor lo dang / mtshon cha dag thogs so/ /de nas lha ma yin gyi dbang po gtor ma kha bub tu 'gyel nas dran pa nyams te 'dar 'dar por byas nas bdag gis ci bgyis rang gi lag nas dug 'tshal ba lta zhes smras so/ /gom pa gnyis ni tshang na gsum pa byin cig ces smras pa dang / gsum pa ma mchis so zhes des smras so/ /kho bos blang ba yang blangs so/ /bdag gis thabs ji lta bu zhig bgyi/ ngas gar bzhag pa der khyod kyis 'dug par gyis shig /de nas lha ma yin gyi dbang po gtor mas 'di skad ces smras so/ /bdag ni bka' ci stsal pa de bzhin du bgyid do/ /med do med do zhes bgyis des smras pa/ mad do mad par bgyid do/ /des bden pa'i zhags pas bcings nas mchod sbyin gyi gnas de yang bshig go/ /snod de dag kyang lhag ma can du bgyis so/ /bu mo gzhon nu de dag kyang pan da pa dang / ko'u ra ba dag gis mnol bar bgyis so/ /seng ge'i khri de dag dang / lha'i gdugs de dag dang / lham rin po ches brgyan pa de dag dang / gos dang rgyan de dag dang / gser gyi dpung rgyan rin po ches spras pa de dag dang / glang ser skya de dag kyang pan da pa dang ko'u ra ba de dag gis 'tshal to/ /bdag gis gzhi de dag kyang bcom mo/ / de nas lha ma yin gyi dbang po gtor ma lus la sems shing gtor ma ni mchod sbyin rgya cher bgyid na/ thabs ma 'tshal bas dus ma lags par sbyin pa byin pas bcings pa nyid thob par gyur te/ lha la phyag 'tshal lo snyam mo/ / de khrid nas byed pa po bzhin du slas dang 'khor dang bcas te sa'i 'og tu bzhag go/ /bdag gis sngon zhing ngan pa la sbyin pa bgyis so zhes gsol ba lags te/ phyag na me tog pad ma bzang po thogs pas skyabs mdzod cig / pad ma'i dpal gyis brgyan pa/ skra'i cod pan thogs pa/ thams cad mkhyen pa dbu na bzhugs pa/ sems can mang po dbugs 'byin par mdzad pa/ dman pa dang phongs pa la thugs rje ba/ gdugs bzhin du spyan bzang ba/ sa'i spyan dam pa/ sman gyi rgyal po'i mchog /sems can shin du dag pa/ rnal 'byor rab tu thob pa/ thar pa rab mchog can/ thar pa la dgyes pa/ nor bu yid bzhin dang 'dra ba chos kyi mdzod yongs su skyong bar mdzad pa/ pha rol du phyin pa drug ston par mdzad pa/ bsam pa legs par mdzad pa la bdag gis bstod pa 'di bgyis so/ /gang byang chub sems dpa' sems dpa' chen po spyan ras gzigs kyi dbang po khyod kyi mtshan rjes su dran pa'i sems can de dag ni bde ba dang ldan pa lags so/ /thig nag po can dang / 'o dod 'bod pa dang / sems can dmyal bar skyes pa dang / yi dags kyi grong khyer du skyes pa gang dag khyod kyi mtshan rjes su dran pa de dag ni ngan song gi sdug bsngal chen po las thar ba lags so/ /gang khyod kyi mtshan rjes su dran pa'i sems can de dag ni bsam pa legs pa dang ldan pa lags te/ de dag ni bde ba can gyi 'jig rten gyi khams su mchis nas de bzhin gshegs pa snang ba mtha' yas las chos nyan par 'gyur ro/ /de nas byang chub sems dpa' sems dpa' chen po spyan ras gzigs kyi dbang pos lha ma yin gyi dbang po gtor ma la lung bstan pa/ khyod ni de bzhin gshegs pa dgra bcom pa yang dag par rdzogs pa'i sangs rgyas/ rig pa dang rkang par ldan pa/ bde bar gshegs pa/ 'jig rten mkhyen pa/ bla na med pa skyes bu 'dul ba'i kha lo sgyur ba/ lha dang mi rnams kyi ston pa/ sangs rgyas bcom ldan 'das lha ma yin gyi dbang po'i dpal zhes bya bar 'gyur te/ lha ma yin thams cad 'dul bar 'gyur ro/ /khyod kyi sangs rgyas kyi zhing na 'dod chags kyi sgra med/ zhe sdang gi sgra med/ gti mug gi sgra med par 'gyur ro/ /yi ge drug pa'i rig pa chen po 'thob pa thob par 'gyur ro/ /des de la chos kyi sbyin pa/ mu tig gi se mo do mdom stong pa rin brgya stong ri ba dang / cod pan rin po che sna tshogs kyis brgyan pa phul lo/ /de nas byang chub sems dpa' sems dpa' chen po spyan ras gzigs kyi dbang po chos 'chad par rtsom ste/ rgyal po chen po nyon cig /mi mi rtag pa'i nang na gang rtag tu yongs su len par sems pa dang / longs spyod chen po'i rjes su sems pa dang / bran pho dang / bran mo dang / las byed pa'i mi dang / gang yang nor dang / 'bru dang / mdzod dang / bang ba rin po che dag dang / gang bu dang / bu mo dang / chung ma dang / pha dang ma la sems pa'i sems can de dag ni mi shes pa yin te/ gang dngos po de dag la chags pa'i sems can de dag ni rmi lam lta bur snang ste/ 'chi ba'i dus kyi tshe yang skyabs byed pa su yang med par 'gyur ro/ /gang gi tshe na srog dang bral ba de'i tshe 'dzam bu'i gling la log par mthong bar 'gyur ro/ /chu bo chen po la yang khrag dang rnag gis gang bar mthong bar 'gyur ro/ /gang shing chen po de dag kyang 'bar ba/ rab tu 'bar ba/ yang dag par shin du 'bar bar mthong bar 'gyur ro/ / mthong nas kyang skrag par 'gyur zhing de nas gzhan gyis zhags pas bcings te khrid par 'gyur ro/ /spu gri'i so'i lam chen por rkang pa yang 'chad par 'gyur ro/ /rkang pa bteg pa dang rkang pa gzhan 'byung bar 'gyur ro/ / bya rog dang / bya rgod dang / bya ku ra ra dang / khyi du ma dag gis kyang zos shing sems can dmyal ba'i sdug bsngal gyi tshor ba chen po myong bar 'gyur ro/ /de nas spu gri'i so'i lam chen po las babs nas rkang pa re re la yang tsher ma sor bcu drug tsam yod pa lnga brgya lnga brgya zug par 'gyur te/ bdag cag gis sdig pa'i las ci zhig byas shes 'khang bar 'gyur ro/ /de nas gshin rje'i mi de dag 'di skad ces zer te/ grogs po khyed kyis de bzhin gshegs pa la bsod snyoms ma phul lo/ /khyed kyis gaN Di rdung ba yang ma thos so/ /khyod kyis sa phyogs gang du yang mchod rten gyi gzugs la ma bskor to/ /de dag gis smras pa/ bdag cag ni ma dad pa sdig pa can sangs rgyas dang / chos dang / dge 'dun gyis spangs par gyur pa'o/ /de dag gis smras pa/ las de'i 'bras bu 'di myong bar gyis shig ces de dag gshin rje'i skyong bas/ gshin rje'i rgyal po'i drung du khrid do/ /khrid nas phul lo/ / de nas gshin rje'i rgyal pos smras pa/ khyed deng la las kyis 'di ston cig /de nas gshin rje skyong ba'i skyes bu de dag gis de rnams khrid nas thig nag po can gyi sems can dmyal ba chen por bcug go/ /bcug nas lus la mtshon shag ti brgyas btab kyang mi 'chi'o/ /lus la mtshon shag ti brgya pa gnyis pas btab kyang mi 'chi'o/ /lus la mtshon shag ti brgya pa gsum pas btab kyang mi 'chi'o/ /gang gi tshe 'chi ba'i dus mi byed pa de'i tshe me'i 'obs su 'jug ste/ 'on kyang 'chi ba'i dus mi byed pa dang / de dag kha phyi nas lcags kyis thu lum bsregs pa 'jug ste/ mchu yang tshig so yang lhags/ rkan yang gas/ gre ba dang / lkog ma dang / snying dang / gzhang dag kyang sgra 'ur 'ur zer zhing lus thams cad kyang tshig par 'gyur ro/ /de lta bas na rgyal po chen po 'jig rten gzhan na skyabs byed pa su yang med kyis rgyal po chen po da nan tan du bsod nams gyis shig ces de ltar 'thun pa'i chos bstan to/ /de nas byang chub sems dpa' sems dpa' chen po spyan ras gzigs kyi dbang pos de la rgyal po chen po de ring 'dzi ta'i tshal gyi gtsug lag khang 'dir phal cher 'du bar 'gyur gyis nga ni 'gro'o zhes de skad smras so/ /de nas byang chub sems dpa' sems dpa' chen po spyan ras gzigs kyi dbang pos 'od zer kha dog sngon po dang / ser po dang / dmar po dang / dkar po dang / shel dang / dngul gyi kha dog rnam pa du ma btang ba dang / de dag song ste de bzhin gshegs pa thams cad skyob pa'i spyan sngar 'dug go/ /de'i tshe lha dang / klu dang / gnod sbyin dang / lto 'phye chen po dang / mi dag kyang 'dus so/ /de nas byang chub sems dpa' de dag gi nang nas/ nam mkha' mdzod ces bya ba'i byang chub sems dpa' stan las langs te/ bla gos phrag pa gcig la gzar nas pus mo g.yas pa'i lha nga sa la gtsugs te/ bcom ldan 'das ga la ba de logs su thal mo sbyar ba btud nas/ bcom ldan 'das la 'di skad ces gsol to/ /bcom ldan 'das 'od zer 'di dag ga las mchis/ bcom ldan 'das kyis bka' stsal pa/ rigs kyi bu byang chub sems dpa' sems dpa' chen po spyan ras gzigs kyi dbang po 'di lha ma yin gyi dbang po gtor ma'i khang pa na gnas te de la 'od zer 'di dag byung ngo / /de nas bcom ldan 'das la byang chub sems dpa' nam mkha' mdzod kyis 'di skad ces gsol to/ /bdag gis byang chub sems dpa' spyan ras gzigs kyi dbang po blta ba'i thabs gang zhig mchis/ bcom ldan 'das kyis bka' stsal pa/ rigs kyi bu de ni 'di nyid du 'ong ngo / /gang gi tshe byang chub sems dpa' sems dpa' chen po spyan ras gzigs kyi dbang po lha ma yin gtor ma'i gnas nas byung ba'i tshe 'dze ta'i tshal gyi gtsug lag khang du lha'i me tog dag lhags so/ /lha'i shing dpag bsam shin du mdzes pa rgyan brgya stong du mas spyangs pa/ mu tig gi se mo do brgya stong spyangs pa/ yul ka shi ka'i gos dang / rgya'i gos dang phreng ba'i chun po rab tu spyangs pa/ sdong po ni dmar po/ /lo ma ni gser dang dngul las byas pa dag dang / byi ru'i shing du ma dag dang / me tog gi shing du ma dag dang / rdzing bu me tog gis yongs su gang ba brgya phrag du ma dag byung bar gyur to/ /de nas bcom ldan 'das la byang chub sems dpa' nam mkha' mdzod kyis 'di skad ces gsol to/ /bcom ldan 'das byang chub sems dpa' spyan ras gzigs kyi dbang po mi mchi 'am/ bcom ldan 'das kyis bka' stsal pa/ rigs kyi bu de ni lha ma yin gyi dbang po gtor ma'i khang pa nas byung ste/ mi mi rgyu ba'i sa phyogs mun pa mun nag ces bya ba'i sar 'gro ste/ rigs kyi bu de na nyi ma dang zla ba mi snang ste/ nor bu yid bzhin rin po che dam pa sbyin pa zhes bya ba de snang bar byed do/ /gling de na gnod sbyin dang / srin po brgya stong du ma dag gnas s o gang gi tshe na byang chub sems dpa' sems dpa' chen po spyan ras gzigs kyi dbang po song ba de'i tshe de dag dga' mgu zhing snying rab tu dga' bar gyur nas byang chub sems dpa' sems dpa' chen po spyan ras gzigs kyi dbang po'i mdun du rgyug go/ /brgyugs nas kyang rkang pa la phyag 'tshal te/ khyod ni mnyel to/ /dub bo/ /khyod ni yun ring mo zhig nas mun pa mun nag gis 'drir gshegs so/ /zhes de skad smra'o/ / des kyang ngas sems can du ma yongs su smin par byas so zhes smras nas gnod sbyin dang srin po de dag gis de khrid nas lha'i gser dang / rin po che'i seng ge'i khri la bzhag ste/ ngal bsos nas gnod sbyin dang / srin po de dag la chos 'chad pa khyed cag nyon cig / gang theg pa chen po'i mdo dkon mchog gi rgyal po 'phags pa za ma tog bkod pa 'di'i rtsa ba bzhi pa'i tshigs su bcad pa gcig nyan pa dang / 'dzin pa dang / kun chub par byed pa dang / tshul bzhin yid la byed pa de dag ni bsod nams kyi phung po la skul bar 'gyur ro/ /rigs kyi bu 'di lta ste dper na/ rdul phra rab kyi tshad ni ngas gzung nus kyi/ rigs kyi bu theg pa chen po'i mdo dkon mchog gi rgyal po za ma tog bkod pa'i bsod nams kyi phung po ni ngas bgrang mi nus so/ /rigs kyi bu 'di lta ste/ dper na rgya mtsho mching rnam chen po ni ngas thigs pa re re nas bgrang nus kyi/ rigs kyi bu theg pa chen po'i mdo dkon mchog gi rgyal po za ma tog bgod pa'i tshigs su bcad pa gcig gi bsod nams kyi phung po ni ngas bgrang mi nus te/ rigs kyi bu 'di lta ste/ dper na de bzhin gshegs pa dgra bcom pa yang dag par rdzogs pa'i sangs rgyas gang gA'i klung gi bye ma phrag bcu gnyis snyed gnas gcig tu bskal pa bcu gnyis su na bza' dang / bshos dang mal stan dang / na ba'i rkyen kyi sman dang / yo byad kyis bkur sti byas pa de dag gis kyang de ltar mi nus na nga gcig pu mun nag gi nang du 'dug pas lta ci smos so/ /rigs kyi bu 'di lta ste/ dper na gling chen po bzhir khyim re re zhing yang lha'i gser dang rin po che'i gtsug lag khang brtsigs la/ gtsug lag khang der mchod rten stong byas la nyin gcig tu de dag gi nang du ring bsrel bcug na/ gang de dag tu ring bsrel bcug pa'i bsod nams kyi phung po de bas theg pa chen po'i mdo dkon mchog gi rgyal po za ma tog bkod pa 'di'i bsod nams kyi phung po shin du mang bar 'gyur ro/ / rigs kyi bu 'di lta ste/ dper na chu bo chen po lnga brgya mtsho mching rnam chen por 'bab pa de bzhin du/ rigs kyi bu theg pa chen po'i mdo dkon mchog gi rgyal po za ma tog bkod pa'i bsod nams kyi phung po yang de dang 'dra bar 'gyur ro/ /de nas byang chub sems dpa' sems dpa' chen po spyan ras gzigs kyi dbang po la gnod sbyin dang / srin po de dag gis 'di skad ces smras so/ /sems can gang dag theg pa chen po'i mdo dkon mchog gi rgyal po snod bkod pa 'di 'dri ba de dag gi bsod nams kyi phung po ji lta bu lags/ rigs kyi bu de dag gi bsod nams kyi phung po ni dpag tu med par 'gyur ro/ /gang theg pa chen po'i mdo dkon mchog gi rgyal po za ma tog bkod pa 'drir 'jug pa de dag ni chos kyi phung po brgyad khri bzhi stong 'drir 'jug par 'gyur ro/ /'khor los sgyur ba'i rgyal po gling bzhi la dbang ba/ bu dpa' ba/ mthu che ba/ gzugs kyi yan lag mchog dang ldan pa/ pha rol gyi sde 'jom par byed pa stong dang ldan par 'gyur ro/ /gang theg pa chen po'i mdo dkon mchog gi rgyal po za ma tog bkod pa rtag tu 'dzin cing ming gi rjes su dran par byed pa de dag ni 'khor ba'i sdug bsngal las yongs su thar bar 'gyur ro/ /skye ba dang / rga ba dang / na ba dang / 'chi ba dang / mya ngan dang / smre sngags 'don pa dang / sdug bsngal ba dang / yid mi bde ba dang / 'khrug pa las yongs su thar bar 'gyur ro/ /gang la lar skye ba de dang de dag tu tshe rabs dran par 'gyur ro/ /de dag gi lus la ba lang gi spos kyi tsan dan snam par 'gyur ro/ /kha nas me tog ud pa la sngon po'i dri 'byung bar 'gyur ro/ /lus yongs su rdzogs par 'gyur ro/ /stobs po che'i stobs kyi shugs dang ldan par 'gyur ro zhes de ltar de dag la mthun pa'i chos bstan pa dang / gnod sbyin dang / srin po de dag las kha cig ni lan cig phyir 'ong ba'i 'bras bu la kha cig ni phyir mi 'ong ba'i 'bras bu la bkod nas/ de dag gis smras pa/ gtsug lag khang 'di nyid na bzhugs shig / gnas gzhan gang du yang ma bzhud cig /mun pa mun nag gi sa 'di nyid du bdag cag gis lha'i gser gyi mchod rten bgyi'o/ /gser gyi 'chag sa bgyi'o/ /de nas byang chub sems dpa' sems dpa' chen po spyan ras gzigs kyi dbang pos de dag la 'di skad ces smras so/ /ngas sems can du ma dag byang chub kyi lam la dgod dgos so/ /de nas gnod sbyin dang srin po de dag lag pa la 'gram pa brten te sems shing 'khod nas gcig la gcig 'di skad smra'o/ /bdag cag gi spyan ras gzigs kyi dbang po gshegs par 'gyur bas chos kyi gtam spong bar 'gyur ro/ /de nas byang chub sems dpa' spyan ras gzigs kyi dbang po song ba dang / gnod sbyin dang / srin po de dag kyang phyi bzhin du 'brang nas byang chub sems dpa' sems dpa' chen po spyan ras gzigs kyi dbang pos de dag la 'di skad ces smras so/ /khyed shin du ring du 'ongs kyis slar log shig / de nas gnod sbyin dang srin po de dag byang chub sems dpa' sems dpa' chen po spyan ras gzigs kyi dbang po'i rkang pa la phyag 'tshal te de nyid nas slar log go/ /de nas spyan ras gzigs kyi dbang phyug me'i phung po 'bar ba bzhin du nam mkha' la mi snang bar gyur to/ /de nas bram ze'i gzugs su sprul te gnas gtsang ma'i ris kyi lha'i bu dag gi drung du song ste phyin nas/ lha'i ris de na lha'i bu rna cha'i mchog ces bya ba dbul po sdug bsngal ba zhig 'dug go/ /de nas spyan ras gzigs kyi dbang po bram ze de'i gzugs kyis lha'i bu de'i drung du song ste/ phyin nas 'di skad ces smras so/ / bdag ni bkres so/ /skom mo/ /de nas lha'i bu des bram ze de la 'di skad ces smras so/ /bram ze chen po bdag la ni cung zad kyang ma mchis so/ /bdag la chung zad cig ni nges par stsal 'tshal lo/ / de nas lha'i bu gzhal med khang du song ste snod dag bltas pa dang / snod rnams lha'i nor bu rin po che rin thang med pas yongs su gang ba dang / snod gzhan dag kyang ro'i ro mchog gi zas dag gis yongs su gang ba dang / g.yon phyogs kyi gzhal med khang na yang gos dang rgyan gyis yongs su gang ba mthong ngo / /de nas lha'i bu de sems par gyur nas 'di 'dra ba'i dpal thob pa las na bdag gi sgo na nges par snod bzang po zhig 'dug go snyam mo/ /de nas des bram ze de bos te gzhal med khang gi nang du song nas lha'i rin po ches kyang bstabs/ lha'i ro mchog gi zas kyang byin te zos nas bkra shis pa byas so/ /de nas lha'i bu des de la 'di skad ces smras so/ /bram ze chen po khyod sa ga las 'ongs bdag ni 'dze ta'i tshal zhes bgyi ba'i gtsug lag khang nas mchis so/ /de nas lha'i bu des de la 'di skad ces smras so/ /sa de ji lta bu zhig de nas bram ze des de la 'di skad ces smras so/ /sa de ni dga' bar byed pa/ lha'i nor bu rin po ches yongs su brgyan pa lha'i shing dpag bsams kyis yongs su mdzes par byas pa/ me tog yid du 'ong ba dag byung ba/ rdzing bu rnam pa du ma gda' ba tshul khrims dang ldan pa yon tan dang ldan pa'i sbyin gnas sna tshogs dag gda' ba/ de bzhin gshegs pa thams cad skyob kyi cho 'phrul dag gda' ba ste/ lha'i bu sa de ni de ltar dga' bar bgyid pa'o/ /de nas lha'i bu des de la 'di skad ces smras so/ /bram ze khyod kyis nges par bden par smros shig /ci khyod lha yin nam 'on te mi mi la ni ji ltar khyod la ltas snang ba de 'dra ba'i ltas med do/ /de nas des de la 'di skad ces smras so/ /nga ni lha yang ma yin/ mi yang ma yin te/ phongs pa dang / brel ba la thugs rje bar byed pa byang chub kyi lam ston par byed pa ste/ byang chub sems dpa'o/ /de nas lha'i bus cod pan dang rna cha phul nas tshigs su bcad de smras pa/ kye ma'o yon tan dag gi zhing / /nyes pa thams cad rnam spangs pa/ /de ring nyid du sa bon btab/ /de ring nyid du 'bras bu grub/ /de nas lha'i bu des tshigs su bcad pa de smras nas de nyid du song ngo / /de nas bram ze chen po de lha'i ris de nas babs te sing g+ha la'i gling du song ngo / /song nas 'dod pa'i gzugs su sprul te srin mo rnams kyi mdun du 'dug pa dang / gzugs bzang po mthong nas de'i tshe 'dod pa'i sems skyes so/ /gang gi tshe na 'dod pa'i sems skyes pa de'i tshe de'i drung du song ste phyin nas bdag cag dang bsten cig / bdag cag ni bud med gzhon nu'o/ /bdag cag la ni khyim thab ma mchis so/ /bdag po ma mchis pa'i ni bdag por gyur cig /mgon ma mchis pa'i ni mgon du gyur cig / rten ma mchis pa'i ni rten du gyur cig /'di ni khyod kyis zas kyi khab bo/ /na bza'i khab bo/ /skyed mos tshal dga' bar bgyid pa dag lags so/ /rdzing bu dga' bar bgyid pa dag lags so/ /des smras pa/ gal te bdag gis bsgo ba bzhin du byed na'o/ /bdag cag bgyid do/ /des de dag la 'phags pa'i yan lag brgyad dang ldan pa'i lam yang bstan/ zhal nas gsungs pa bzhi yang kha ton byed du bcug nas lan cig phyir 'ong ba'i 'bras bu yang thob/ phyir mi 'ong ba'i 'bras bu yang thob nas srin mo de dag la 'dod chags kyi sdug bsngal mi ldang sems zhe sdang bar yang mi byed/ su la yang srog gi bar chad byed par mi 'dod/ chos la mngon par dga' zhing gnas la sdom pa blangs te slan chad bdag cag srog gcod par mi bgyid do/ /'dzam bu'i gling gi mi dag ji ltar zas dang skom gyis 'tsho ba bdag cag kyang de bzhin du 'tsho'o/ /slan chad srin mo'i tshul du mi bgyid do zhes de 'dra ba'i bslab tshig gi sdom pa blangs te 'khod do/ /de nas byang chub sems dpa' sems dpa' chen po spyan ras gzigs kyi dbang po sing ga la'i gling nas byung nas yul khor mor 'jig gi grong khyer chen po na bshang ba dang / gci ba'i gnas de na srin bu'i rigs brgya stong du ma gnas nas/ de'i tshe byang chub sems dpa' sems dpa' chen po spyan ras gzigs kyi dbang po bung ba'i gzugs su sprul nas sgra bung bung du phyung ste/ sangs rgyas la phyag 'tshal lo zhes byas pa dang / de dag sangs rgyas la phyag 'tshal lo zhes bya ba la rjes su dran nas 'jig tshogs su lta ba'i ri rtse mo nyi shu byung ba ye shes kyi rdo rjes bcom nas/ de dag thams cad byang chub sems dpa' kha na spos kyi dri zhes bya bar gyur te 'jig rten gyi khams bde ba can du skyes so/ /de'i tshe sems can yongs su smin par byas te/ khor mor 'jig gi grong khyer chen po nas song nas yul ma ga d+hAr mngon du phyogs te song ba dang / yul ma ga d+hAr phyin nas lo nyi shur dgon pa na gnas pa'i sems can gcig la gcig sha za ba dag mthong ngo / /de nas byang chub sems dpa' sems dpa' chen po spyan ras gzigs kyi dbang po bdag gis thabs gang gis sems can 'di dag tshim par bya snyam du sems par gyur to/ /de nas byang chub sems dpa' sems dpa' chen po spyan ras gzigs kyi dbang pos lha'i char pa dbab par brtsams te/ thog mar ni chu'i char pa'o gang gi tshe na chus ngoms par gyur pa de'i 'og tu lha'i zhal zas ro mchog dang ldan pas skon pa yongs su gang ba dag bab po/ /gang gi tshe na zas kyis yongs su tshim par gyur pa de'i tshe 'bras kyi char bab po/ /gzhan yang til dang / 'bras rme'u dang / ku lad ta'i 'bru dang / 'bras so ba dag bab po/ /gang dang gang gi tshe na sems can de dag gi dgos pa sems par gyur pa de'i tshe de dag gi bsam pa grub par gyur to/ /de nas yul ma ga d+hA'i sems can de dag ngo mtshar du gyur nas de thams cad gnas gcig tu ngal bsos so/ /ngal bsos nas gcig la gcig 'di lha gang gi mthu zhig ces smras pa dang / de nas skyes bu de dag gi nang na rnyis pa/ rgan pa/ rgas pa/ sgur ba/ ba lang gi sna ltar gug pa/ lo brgya stong du ma lon pa zhig yod pa des de dag la smras pa/ byang chub sems dpa' sems dpa' chen po spyan ras gzigs kyi dbang po ma gtogs par lha gzhan gang gi yang mthu 'di 'dra bar mi 'gyur ro/ / de nas 'khor de dag gis byang chub sems dpa' sems dpa' chen po spyan ras gzigs kyi dbang po'i mtshan ma ji lta bu zhes dris so/ /de nas skyes bu des yon tan bshad par brtsams pa mun par gyur pa rnams kyi ni sgron mar gyur pa'o/ /nyi mas gdungs shing tshig pa rnams kyi ni gdugs su gyur pa'o/ /skom gyis gdungs pa rnams kyi ni chu bor gyur pa'o/ /'jigs shing skrag par gyur pa rnams la ni mi 'jigs pa sbyin par byed pa'o/ /nad kyis btab pa rnams la ni sman par gyur pa'o/ /sems can sdug bsngal ba rnams kyi ni pha dang mar gyur pa'o/ /sems can bstir med par skyes pa rnams la ni mya ngan las 'das pa ston par byed pa ste/ de'i yon tan gyi khyad par ni 'di lta bu'o/ /gang de'i mtshan gyi rjes su dran pa de dag ni 'jig rten na bde ba dang ldan pa yin no/ /de dag ni 'khor ba'i sdug bsngal gyi tha ma yongs su spong ba'o/ /gang spyan ras gzigs kyi dbang po la rtag tu me tog dang / pog bsdus shing 'bul ba'i skyes bu gang zag de dag ni sems pa dang ldan pa yin na/ /gang byang chub sems dpa' sems dpa' chen po spyan ras gzigs kyi mdun du dkyil 'khor gru bzhi byed pa de dag ni 'khor los sgyur ba'i rgyal po rin po che sna bdun dang ldan par 'gyur te/ 'di lta ste/ 'khor lo rin po che dang / rta rin po che dang / bal glang rin po che dang / nor bu rin po che dang / bud med rin po che dang / khyim bdag rin po che dang / blon po rin po che dang / bdun te/ rin po che de bdun dang ldan pa 'gyur ro/ /gang byang chub sems dpa' sems dpa' chen po spyan ras gzigs kyi dbang po la me tog 'bul ba de dag ni lus dri zhim zhing / gang la lar skyes par lus yongs su rdzogs par 'gyur ro/ /zhes skyes bu des de ltar yon tan gyi khyad par bshad nas 'khor de dag bdag bdag gi khang par dong ngo / /de nas skyes bu rnyis pa des mthun pa'i chos bshad nas de yang bdag gi khang par song ngo / /de nas byang chub sems dpa' sems dpa' chen po spyan ras gzigs kyi dbang po de nyid du nam mkha' la mi snang bar gyur to/ /de nas de nam mkha' la gnas bzhin du bdag gis de bzhin gshegs pa thams cad skyob ma mthong nas yun ring ngo snyam du bsams nas de mthar gyis 'dze ta'i tshal gyi gtsug lag khang du phyin pa dang / 'ong ba bcom ldan 'das kyis gzigs so/ / byang chub sems dpa' sems dpa' chen po spyan ras gzigs kyi dbang po 'dze ta'i tshal gyi gtsug lag khang du byin nas lha dang klu dang / gnod sbyin dang / dri za dang lha ma yin dang / nam mkha' lding dang / mi 'am ci dang / lto 'phye chen po dang mi dang mi ma yin pa dag dang / byang chub sems dpa' brgya phrag du ma dag tshogs pa yang mthong ngo / /de nas bcom ldan 'das la byang chub sems dpa' nam mkha' mdzod kyis 'di skad ces gsol to/ /bcom ldan 'das byang chub sems d pa' de gang zhig mchi bcom ldan 'das kyis bka' stsal pa byang chub sems dpa' sems dpa' chen po spyan ras gzigs kyi dbang po de 'ong ngo nas byang chub sems dpa' spyan ras gzigs kyi dbang pos bcom ldan 'das kyi zhabs la mgo bos phyag 'tshal te/ lan gsum bskor nas g.yon phyogs su ngal bsos so/ /de nas bcom ldan 'das kyis khyod ngal lam/ 'chad dam/ rigs kyi bu khyod kyis las kyi sa ji lta bu zhig bsgrubs/ des sngon ji ltar gyur pa gsol to/ /de nas byang chub sems dpa' nam mkha' mdzod shin du ngo mtshar du gyur to/ /bdag gis byang chub sems dpa'i yul 'di lta bu ma mthong ngo / /de bzhin gshegs pa dag la yang yul 'di lta bu ma mchis na byang chub sems dpar gyur pa la lta ci smos snyam mo/ /de nas byang chub sems dpa' nam mkha' mdzod byang chub sems dpa' sems dpa' chen po spyan ras gzigs kyi dbang po'i drung du song ste/ mdun du 'dug go/ /'dug nas byang chub sems dpa' sems dpa' chen po spyan ras gzigs kyi dbang po la 'di skad ces smras so/ /khyod ngal lam/ 'chad dam/ bdag ni mi ngal lo nyon ma mongs so zhes phan tshun du gtam byas nas kha rog ste 'khod do/ /de nas bcom ldan 'das kyis pha rol du phyin pa drug bshad par brtsam pas rigs kyi bu dag nyon cig /byang chub sems dpar gyur pas sbyin pa'i pha rol du phyin pa yongs su rdzogs par bya'o/ /de bzhin du tshul khrims kyi pha rol du phyin pa dang / bzod pa'i pha rol du phyin pa dang / brtson 'grus kyi pha rol du phyin pa dang / bsam gtan gyi pha rol du phyin pa dang / shes rab kyi pha rol du phyin pa yongs su rdzogs par bya'o/ /zhes chos de bshad nas cang mi gsung bar bzhugs so/ /de nas 'khor de dag bdag bdag gi gnas su dong ngo / /byang chub sems dpa' de dag kyang bdag bdag gi sangs rgyas kyi zhing du dong ngo / /'di ni theg pa chen po'i mdo dkon mchog gi rgyal po za ma tog bkod pa'i le'u dang po ste rdzogs so// // de nas bcom ldan 'das la byang chub sems dpa' sgrib pa thams cad rnam par sel bas 'di skad ces gsol to/ /bcom ldan 'das byang chub sems dpa' sems dpa' chen po spyan ras gzigs kyi dbang pos sngon ting nge 'dzin gang dag la mnyam par bzhag par gyur pa bshad du gsol/ bcom ldan 'das kyi bka' stsal pa/ rigs kyi bu 'di lta ste/ rnam par byed ces bya ba'i ting nge 'dzin dang / 'od byed ces bya ba'i ting nge 'dzin dang / rdo rje gyen du 'phags shes bya ba'i ting nge 'dzin dang / nyi ma'i 'od ces bya ba'i ting nge 'dzin dang / 'thor ba zhes bya ba'i ting nge 'dzin dang / dpung rgyan ces bya ba'i ting nge 'dzin dang / rdo rje rgyal mtshan mchog ces bya ba'i ting nge 'dzin dang / rgyan ces bya ba'i ting nge 'dzin dang / bkod pa'i rgyal po zhes bya ba'i ting nge 'dzin dang / phyogs bcur rnam par lta zhes bya ba'i ting nge 'dzin dang / yid bzhin gyi nor bu lta bu spyan mchog ces bya ba'i ting nge 'dzin dang / chos kyi rgyal po zhes bya ba'i ting nge 'dzin dang / shin du gnas pa zhes bya ba'i ting nge 'dzin dang / dga' ba sbyin par byed ces bya ba'i ting nge 'dzin dang / rdo rje rgyal mtshan zhes bya ba'i ting nge 'dzin dang / 'jig rten gyi khams thams cad rnam par lta ba zhes bya ba'i ting nge 'dzin dang / ma lus par 'ongs shes bya ba'i ting nge 'dzin dang / mngon par chud ces bya ba'i ting nge 'dzin dang / spyi bor 'khyil pa zhes bya ba'i ting nge 'dzin dang / zla ba ltar spyan mchog ces bya ba'i ting nge 'dzin dang / g.yog skye bo mang po zhes bya ba'i ting nge 'dzin dang / lha'i spyan zhes bya ba'i ting nge 'dzin dang / bskal pa'i gling zhes bya ba'i ting nge 'dzin dang / cho 'phrul ston ces bya ba'i ting nge 'dzin dang / pad ma'i bla zhes bya ba'i ting nge 'dzin dang / rgyal po'i dbang po zhes bya ba'i ting nge 'dzin dang / bstir med pa skems shes bya ba'i ting nge 'dzin dang / 'bar zhes bya ba'i ting nge 'dzin dang / lha'i rna cha zhes bya ba'i ting nge 'dzin dang / bdud rtsi thigs pa zhes bya ba'i ting nge 'dzin dang / 'od dkyil 'khor zhes bya ba'i ting nge 'dzin dang / rgya mtshor 'jug ces bya ba'i ting nge 'dzin dang / gzhal med khang gi sgo zhes bya ba'i ting nge 'dzin dang / bya ka la ping ka'i sgra zhes bya ba'i ting nge 'dzin dang / ud pa la ston po zhes bya ba'i ting nge 'dzin dang / zhon zhes bya ba'i ting nge 'dzin dang / rdo rje'i go cha zhes bya ba'i ting nge 'dzin dang / bal glang dga' zhes bya ba'i ting nge 'dzin dang / seng ge rnam par rol ces bya ba'i ting nge 'dzin dang / bla na med ces bya ba'i ting nge 'dzin dang / 'dul ba zhes bya ba'i ting nge 'dzin dang / zla ba'i bla zhes bya ba'i ting nge 'dzin dang / snang bar byed ces bya ba'i ting nge 'dzin dang / 'od zer brgya pa zhes bya ba'i ting nge 'dzin dang / bskus pa zhes bya ba'i ting nge 'dzin dang / 'od byed ces bya ba'i ting nge 'dzin dang / rnam pa bzang po zhes bya ba'i ting nge 'dzin dang / lha ma yin la skul ba zhes bya ba'i ting nge 'dzin dang / bsgom pa zhes bya ba'i ting nge 'dzin dang / mya ngan las 'da' ba skul ba zhes bya ba'i ting nge 'dzin dang / gling chen po zhes bya ba'i ting nge 'dzin dang / tshor ba rnam par grol zhes bya ba'i ting nge 'dzin dang / rnal 'byor byed ces bya ba'i ting nge 'dzin dang / don dam pa ston ces bya ba'i ting nge 'dzin dang / glog ces bya ba'i ting nge 'dzin dang / klu bkod pa zhes bya ba'i ting nge 'dzin dang / seng ge glal zhes bya ba'i ting nge 'dzin dang / sa ri bkod pa zhes bya ba'i ting nge 'dzin dang / 'ong ba zhes bya ba'i ting nge 'dzin dang / dran pa'i dbang po 'phel ba zhes bya ba'i ting nge 'dzin dang / mos pa zhes bya ba'i ting nge 'dzin dang / rgyal ba'i theg pa zhes bya ba'i ting nge 'dzin dang / lam ston pa zhes bya ba'i ting nge 'dzin dang / rigs kyi bu byang chub sems dpa' sems dpa' chen po spyan ras gzigs kyi dbang po ni ting nge 'dzin de dag dang ldan te/ de'i ba spu'i khung bu re re na yang ting nge 'dzin brgya stong dag gnas so/ /rigs kyi bu de ltar byang chub sems dpa' sems dpa' chen po spyan ras gzigs kyi dbang po'i bsod nams kyi tshogs ni dpag tu med do/ /bsod nams kyi tshogs de 'dra ba dag ni de bzhin gshegs pa dag la yang med na byang chub sems dpa' dag la lta ci smos// // bam po gsum pa/ rigs kyi bu sngon byung ba nga byang chub sems dpar gyur pa de'i tshe/ nga tshong pa lnga brgya dang 'grogs nas sing g+ha la'i gling du song ste/ shing rta dang / khur dang / bam po dang / skon pa dang / rnga mo dang / ba lang dang / bong bu la sogs pas zong mang du bskyas te sing g+ha la'i gling du song ba las/ grong dang / grong khyer dang / grong mdab dang / grong ye'u dang / tshong dus dag tu song ba las sing g+ha la'i gling du ma phyin par gru bo che bzang po zhig rnyed nas/ ngas gdos 'dzin pa la gling gang logs su rlung langs/ ci rin po che'i gling du rlung langs sam/ yang na ni nas kyi gling du rlung langs sam/ 'on te srin mo'i gling du rlung langs shes smras pa dang / gdos 'dzin pa 'di skad ces zer te/ bser ma ni sing g+ha la'i gling du langs kyis lha mkhyen par mdzod cig /de nas gru bo che btang ste sing g+ha la'i gling du song ba las sing g+ha la'i gling na gnas pa'i srin mo dag gis dus ma yin pa'i rlung btang ba dang gru bo che de dum bu dum bur lhags nas tshong pa de dag chu'i nang du ltung ba dang / brkyal nas chu'i 'gram du nye bar phyin to/ /de nas srin mo lnga brgya gzhon nu'i gzugs su bsgyur te sgra ca co zer zhing byung nas chu 'gram de dang nye ba zhig tu 'ong te bla gos kyi ras byin nas bslang ba dang / de dag bdag bdag gi gos 'tshir ro/ /btsir nas de dag gnas de nas gnas gzhan du shing tsam pa ka chen po yod pa de'i drung du ngal bsos so/ /ngal bsos nas bdag cag la thabs ci yod ces gtam byas pa dang / de dag gis bdag cag la thabs ma mchis so zhes de skad smras nas kha rog ste 'khod do/ /de nas srin mo de dag de rnams kyi mdun du 'dug nas khyo ma mchis pa'i khyo mdzod cig / gnas ma mchis pa'i ni gnas mdzod cig /rten ma mchis pa'i ni rten mdzod cig /'di dag ni khyod kyi zas kyi khyim mo/ / skom gyi khyim mo/ /skyed mos tshal dga' bar bgyid pa'o/ /rdzing bu dga' bar bgyid pa'o/ /zhes de skad smras nas srin mo de dag gis skyes pa re re khrid de bdag bdag gi khyim du song ngo / /gang srin mo de dag nang na shin du rgan pa des bdag gi khyim du nga khyid nas lha'i ro'i ro mchog dang ldan pas tshim par byas so/ /tshim par byas nas rtse bar rtsom ste/ de la des mi'i bde bas tshim par byas nas de bzhin du nyi ma gnyis gsum nas bdun 'das so/ /re shig nub mo nyal te gnyid kyis log pa dang gad mo snyan par rgod pa ngas mthong nas nga ngo mtshar du gyur te/ gnyid log bzhin du gad mo snyan par rgod pa ngas nam yang ma mthong / ma thos so/ /snyam nas de'i tshe ngas de la khyod ci'i phyir/ rgod ces smras pa dang / mo na re 'di dag ni sing g+ha la'i gling na gnas pa'i srin mo lags te/ khyed kyi srog bcad da re zhes zer nas de'i tshe ngas de la 'di dag srin mo yin par kho bos ji ltar shes par bya zhes dris pa dang / de ste yid mi ches na g.yas phyogs kyi lam srang zung ste bzhud cig dang / de na lcags kyi grong khyer mthong ba bskor ba skar khung dang rta babs med pa zhig mchis te/ de na tshong pa brgya phrag du ma 'tshal cing bor nas la la ni gson/ la la ni gum ste/ khyod de ltar thugs mi ches na lam der bzhud cig /lam der bzhud nas rtogs shig dang / de'i tshe nga la yid ches par 'gyur ro zhes zer nas/ de'i tshe des glen pa'i dra ba zhes bya ba'i gnyid kyis non par byas so/ /de nas byang chub sems dpa' de nub mo'i dus kyi tshe song nas ral gri zla ba ltar snang ba bdag 'tsho bar byed pa zhes bya/ thogs nas g.yas phyogs kyi lam srang bzung ste/ song ba las rim gyis lcags kyi grong khyer du phyin nas kho ra khor yug tu bskor kyang des sgo ma mthong ngo / /de nas lcags kyi grong khyer chen po de na shing tsam pa ka zhig 'dug pa de la 'dzegs te/ de nas ngas lud pa'i sgra byas pa dang / skyes bu tshong pa de dag na re tshong dpon chen po mkhyen par mdzod cig /bdag cag ni lcags kyi grong khyer du stsal to/ /zhes smras nas de'i tshe nyi ma re re zhing yang mi brgya khrid de za'o/ /zos nas rus pa rnams lcags kyi grong khyer de nyid du 'dor ba yang de dag gis nga la sngon byung ba bzhin du smras nas ngas tshe shing tsam pa ka las babs te g.yas phyogs kyi lam srang de bzung nas myur du myur bar song ba ste/ de nas slar phyin to/ /de nas snyan par byed pa de na re ded dpon chen po khyod kyis gzigs sam zhes zer nas ngas mthong ngo / /zhes smras so/ /khyod la bdag gis gtam bgyis pa khyod kyis rtags la bab bam/ de'i tshe ngas de la de nga la thabs ci yod ces dris na/ de nas snyan par byed pa des 'di skad ces smras te/ lha thabs gang gis bde ba dang / nyon mongs pa med par sing g+ha la'i gling nas 'byung zhing slar 'dzam bu'i gling mthong bar 'gyur ba'i thabs mchis so/ /ngas de la lam gang gis sing g+ha la'i gling nas 'byung bar 'gyur ba'i lam de ston cig ces byas pa dang / snyan par byed pa des 'di skad ces smras so/ /lha rta'i rgyal po ba la ha zhes bgyi ba dman pa dang phongs pa la sman pa zhig mchis te/ rta'i rgyal po ba la ha de sman sbed thams cad ces bgyi ba 'tshal te/ gser gyi bye ma'i thang bu la phar 'gre tshur 'gre bar bgyid do/ /phar 'gres tshur 'gres nas lus sprug go/ /sprugs nas pha rol du su 'gro/ pha rol du su 'gro zhes smra'o/ /khyod kyis lha bdag pha rol du mchi'o zhes bgyis shig ces de skad bsgo ba thos nas de srin mo'i drung du nye bar song nas lhan cig tu nyal ba dang / de sad nas 'phags pa'i sras lus re grang ba zhig ces zer nas ngas de la grong khyer gyi phyi rol du bshang gci byed du song bas/ de'i phyir lus grang mo grang bar gyur to/ /zhes smras so/ /mos kyang smras nas slar de gnyid kyis log ste nyi ma shar ba'i tshe langs so/ / de nas skyes bu tshong pa rnams la khyed tshur shog shig /grong khyer gyi phyi rol du 'dong ngo zhes bsgo ba dang / de dag thams cad grong khyer gyi phyi rol du 'dong ngo / /de dag grong khyer gyi phyi rol du dong nas ngal bsos so/ /ngal bsos nas su'i chung ma dag ji lta bus mdza' bar gyur ces dris pa dang / kha cig gis ni bdag la shin du mdza' bar byed do zhes smras so/ /kha cig gis ni bdag la lha'i ro'i ro mchog dang ldan pa'i zas kyis 'dzin par bgyid do zhes smras so/ /kha cig gis ni gos rnam pa sna tshogs kyis 'dzin to zhes smras so/ /kha cig gis ni bdag la cod pan dang / rna cha dang se mo do'i chun pos 'dzin to zhes smras so/ /kha cig gis ni bdag gi lus la brel ba ma mchis so zhes smras so/ /kha cig gis ni bdag la tsan dan dang / gla rtsi dang / ga pur gyis 'dzin to zhes smras te/ de ltar de dag gis gtam byas nas ngas de'i tshe skyes bu tshong pa de dag la gang bdag cag srin mo la chags par bya ba'i ni mi rigs so zhes smras pa dang / de dag myos nas tshong dpon chen po sing g+ha la'i gling na gnas pa'i srin mo lags mad mad ces zer nas/ de'i tshe ngas de dag la sangs rgyas dang / chos dang / dge 'dun bden no bden no/ /'di ni mi ma yin te srin mo'o zhes smras so/ /de nas skyes bu tshong pa de dag gis bdag cag la skyabs ci yod/ rten ci yod ces smras pa dang / ngas de dag la sing g+ha la'i gling na rta'i rgyal po ba la ha zhes bya ba dman pa dang phongs pa la snying rje bar byed pa zhig yod de/ sman sbed thams cad ces bya ba zos nas gser gyi bye ma'i thang bu la phar 'gre tshur 'gre byas te lus sprug go/ /lus sprugs nas de'i tshe su pha rol du 'gro/ su pha rol du 'gro zhes tshig lan gsum smra/ bdag cag der 'dong zhes smras so/ /de nas skyes bu tshong pa de dag nga la bdag cag nam bzhud ces zer nas/ ngas de dag la nyi ma gsum na nges par 'dong gis skyes bu so so nas rgyags dang chos shig ces de bdag dang dam bcas nas slar grong khyer du dong ste bdag bdag gis khyim du phyin pa dang / de dag la srin mo rnams kyis ngal lam/ chad dam/ khyed kyis skyed mos tshal dga' bar byed pa mthong ngam zhes smras pa dang / de dag gis nged kyis chung zad kyang ma mthong ngo zhes smras so/ /de nas srin mo de dag gis 'di skad ces smras so/ /'phags pa'i sras sing g+ha la'i gling 'di na skyed mos tshal dga' bar byed pa me tog gis yongs su gang ba rnam pa sna tshogs dang / rdzing bu brgya phrag du ma mchis so zhes smras nas/ des nyi ma gsum na skyed mos tshal gyis de dag dang rdzing bu me tog gis yongs su gang ba rnam pa sna tshogs de dag ltar 'gro'o/ /de'i tshe me tog bzang po dag kyang khyer te 'ong gis rgyags bzang du gyis shig ces smras pa dang / des 'phags pa'i sras de bzhin du bgyi'o zhes smras so/ /de nas des lus la bsams te/ srin mo 'di dag gis rgyus shes par gyur na ni bdag cag gi srog gcod do snyam du de ltar lus kyi rjes su bsams nas kha rog ste 'dug pa dang / mos zas bzang po byin nas zos te shugs phyung nas/ srin mo des 'phags pa'i sras ci'i slad du shugs 'byin ces smras so/ /de nas des mo la 'dzam bu'i gling gi mi dag ni bdag gi yul la dga' 'o zhes smras pa dang / 'phags pa'i sras bdag gi yul gyis ci zhig bgyi/ sing g+ha la'i gling 'di nyid na khyod kyi zas kyi khang pa dang / skom gyi khang pa dang / gos kyi khang pa sna tshogs dang / khyed kyi skyed mos tshal dga' bar bgyid pa sna tshogs mchis kyis lha'i bde ba myong bar mdzod cig /'dzam bu'i gling la mya ngan bgyir ci mchis shes zer nas de'i tshe nga kha rog ste 'dug go/ /de'i nyin mo 'das nas phyi de nyin zas bzang po rgyags dang ldan pa/ de dag thams cad sta gon byas nas nyi ma gsum pa la nang par sngar de dag thams cad dong nas grong khyer gyi sgor byung ngo / /byung nas slar sus kyang sing g+ha la'i gling du mi blta bar dam bcas so/ /de 'dra ba'i dam bcas nas myur ba myur bar skyen pa skyen par dong ba dang / rim gyis rta'i rgyal po ba la ha ga la ba der phyin nas/ rta'i rgyal po ba la ha sman sbed thams cad ces bya ba la myangs so/ /sman myangs nas gser gyi bye ma'i thang bu la phar 'gre tshur 'gre bar byed do/ /byas nas lus sprug go / gang gi tshe na lus sprugs pa de'i tshe sing g+ha la'i gling yang 'gul lo/ /des pha rol du su 'gro/ pha rol du su 'gro zhes tshig lan gsum smras pa dang / de nas skyes bu tshong pa de dag gis bdag cag pha rol du mchi'o zhes smras so/ /de nas rta'i rgyal po ba la ha des khyed las sus kyang sing g+ha la'i gling la mi blta bar bya'o/ /sus kyang mig gis mi brtag par bya'o/ /zhes de skad smras te de 'dra ba'i dam bcas nas de'i tshe thog ma kho nar nga zhon no/ /de'i 'og tu tshong pa lnga brgya zhon no/ /gang gi tshe de dag zhon pa de'i tshe sing g+ha la'i gling na gnas pa'i srin mo dag sgra ca co zer zhing phyir bzhin du snyeg go/ /ngu zhing snying rje rje ltar smra ba dang / de nas de dag gis slar log ste bltas so/ /gang gi tshe de dag gis bltas pa de'i tshe de dag kha bub tu lhung ngo / /gang gi tshe na de dag chu'i nang du lhung ba de'i tshe srin mo dag gis drangs shing drangs shing zos so/ /de'i tshe nga gcig pus 'dzam bu gling du phyin te/ de'i tshe 'gram du nye ba dang rta'i rgyal po ba la has nga la lan gsum bskor te/ phyag byas nas de nyid du song ngo / /de nas nga yang song nas rim gyis bdag gi khyim du phyin te/ de'i tshe pha dang mas nga'i mgul nas 'jus nas ngus pa dang / rlangs pas de gnyis kyi mig rugs nas mthong bar gyur to/ /de nas pha ma dang lhan cig tu ngal bsos nas de dag la sngon ji ltar byung ba thams cad bzlas pa dang / pha mas de la smras pa/ bu khyod gson bzhin du rnyed de/ nged la nor ni mi dgos so/ /rgas pa'i tshe khar bar gyur pa'o/ /rgas pa'i tshe lam ston pa'o/ /'chi ba'i tshe zas sbyin par byed pa'o/ /shi nas mgon yod par byed pa'o/ /bu ni rlung bsil bar byed pa'o/ /zhes pha dang mas smras te/ sgrib pa thams cad rnam par sel ba nga ded dpon du gyur pa'i tshe 'di lta bu'i sdug bsngal ba myong ngo / /'di lta ste sgrib pa thams cad rnam par sel ba byang chub sems dpa' sems dpa' chen po spyan ras gzigs kyi dbang po rta ba la har gyur pas nga 'chi ba'i 'jigs pa de 'dra ba las yongs su thar bar byas so/ /'di lta ste sgrib pa thams cad rnam par sel ba byang chub sems dpa' sems dpa' chen po spyan ras gzigs kyi dbang po'i bsod nams kyi tshogs ni ngas bgrang mi nus te/ ba spu'i khung bu re re'i gtam chung zad cig bshad do/ /'di lta ste/ sgrib pa thams cad rnam par sel ba gser zhes bya ba'i ba spu'i khung bu de na dri za bye ba khrag khrig brgya stong dag gnas te/ de dag 'khor ba'i sdug bsngal bar mi 'gyur zhing bde ba dam pa dang / ldan pa yin te/ lha'i dngos po dag 'byung bar 'gyur gyi/ 'dod chags can du mi 'gyur/ zhe sdang can du mi 'gyur/ khong khro ba'i sems mi skyed/ de dag las gang la yang gsod pa'i sems mi skyed de/ de dag dus thams cad du 'phag pa'i lam yan lag brgyad la gnas pa yin te/ dus thams cad du chos 'dod pa yin no/ /'di lta ste/ sgrib pa thams cad rnam par sel ba gser zhes bya ba'i ba spu'i khung bu na snang ba zhes bya ba'i yid bzhin gyi nor bu rin po che yod de/ gang dang gang gi tshe dri za de dag bsam pa sems pa de'i tshe de dag gi bsam pa grub par 'gyur ro/ /de'i tshe gser zhes bya ba'i ba spu'i khung bu las 'das nas nag po zhes bya ba'i ba spu'i khung bu de na drang srong bye ba khrag khrig brgya stong du ma yod de/ la la ni mngon par shes pa gcig pa la la ni mngon par shes pa gnyis pa la la ni mngon par shes pa gsum pa la la ni mngon par shes pa bzhi pa la la ni mngon par shes pa lnga pa/ la la ni mngon par shes pa drug pa/ /ba spu'i khung bu de na dngul gyi sa gzhi la gser gyi ri dngul gyi rtse mo pad mo dmar pos brgyan pa de 'dra ba'i ri bdun bcu rtsa bdun yod de/ ri re re zhing yang drang srong brgyad khri gnas so/ /drang srong de dag gi shing dpag bsams ni 'di 'dra ste/ sdong po ni dmar po 'dab ma gser dang / dngul las byas pa rin po cher snang ba'o/ /shing dpag bsams re re dang / nye ba na rdzing bu bzhi yod de/ la la ni chu yan lag brgyad dang ldan pas yongs su gang ba/ la la ni lha'i me tog gis yongs su gang ba'o/ /phyogs de dang nye ba na lha'i byi ru'i shing gis yongs su mdzes par byas pa'i dpag bsams gyi shing dag snang ste/ lha'i rgyan dag ni 'phyang cod pan dang rna cha dag kyang rab tu 'phyang / se mo do dang / se mo do'i phyed pa dag kyang rab tu 'phyang / /gdub bu dag kyang rab tu 'phyang ste/ lo ma ni rin po che dang / gser las byas pa 'o/ /de na shing dpag bsams re re zhing yang dri za brgya brgya gnas te/ gang gi tshe de dag gis sil snyan dkrol ba de'i tshe ri dgas dang / bya dag kyang sems can 'di dag ni sdug bsngal te/ 'dzam bu'i gling na ji lta bu'i sdug bsngal dag myong bar gyur/ skye ba dang / rga ba dang / 'chi ba dag kyang mthong ngo / /sdug cing mdza' ba dang / mi mdza' ba las 'du ba dang bral bar yang mthong ngo / /mi dag kyang sdug bsngal mang du myong ngo zhes skyo bar byed do/ /de ltar ri dgas dang / bya dag stong pa'i rjes su bsams pa dang / de'i tshe theg pa chen po'i mdo dkon mchog gi rgyal po za ma tog bkod pa 'di rjes su dran nas de dag la lha'i ro'i ro mchog gi zas dag kyang 'byung bar 'gyur/ lha'i rdzas dri zhim po dag kyang 'byung bar 'gyur/ lha'i gos dag kyang 'byung bar 'gyur ro/ /gang gi tshe na de dag bsam pa sems pa de'i tshe bsam pa grub par 'gyur ro/ / de nas bcom ldan 'das la sgrib pa thams cad rnam par sel bas 'di skad ces gsol to/ /bcom ldan 'das gang gi tshe theg pa chen po'i mdo dkon mchog gi rgyal po za ma tog bkod pa'i ming gi rjes su dran na/ de'i ming tsam gyis kyang 'di 'dra ba'i rdzas dag 'byung bar 'gyur na gang theg pa chen po'i mdo dkon mchog gi rgyal po za ma tog bkod pa nyan pa dang / 'dzin pa dang / klog pa dang / kun chub par bgyid pa dang / tshul bzhin du yid la bgyid pa'i sems can de dag ni bde ba dang ldan pa lags so/ /gang theg pa chen po'i mdo za ma tog bkod pa las yi ge gcig kyang 'drir 'jug pa'i sems can de dag ni bde ba dang ldan pa lags te/ de dag ni 'khor ba'i sdug bsngal 'di dag mthong bar mi 'gyur ro/ /de dag ni phyag dar pa dang / sme sha can gyi rigs su mi skye/ dbang po nyams par mi 'gyur/ theng po dang / sgur po dang / gug pa dang / pus mo'i nang 'thab pa dang / lus po che dang / mdze can du mi 'gyur/ de dag gi lus la nad dag gis btab par mi 'gyur te/ nad med pa dang / mthu che ba dang / dbang po gsal bar 'gyur ro/ /de nas bcom ldan 'das kyis legs so zhes bya ba byin nas sgrib pa thams cad rnam par sel ba khyod 'di 'dra ba'i spobs pa dang / lha dang klu dang / gnod sbyin dang / dri za dang / lha ma yin dang / nam mkha' lding dang mi 'am ci dang / lto 'phye chen po dang mi dang mi ma yin pa dang / dge bsnyen dang / dge bsnyen ma 'dus pa la khyod kyis 'di 'dra ba'i chos kyi gtam rgya chen po byas pa legs so legs so/ /zhes gsungs so/ /de nas bcom ldan 'das la sgrib pa thams cad rnam par sel bas 'di skad ces gsol to/ /bcom ldan 'das gang gi tshe na bdag gi zhu ba 'di bstan pa de'i tshe lha'i bu rnams mi phyed pa'i dad pa skyes par gyur to/ /de nas bcom ldan 'das kyis legs so zhes bya ba byin te/ rigs kyi bu khyod phyi phyir zhing gsol ba legs so legs so 'di lta ste/ sgrib pa thams cad rnam par sel ba ba spu'i khung bu nag po 'das nas ba spu'i khung bu rin po che'i rna cha zhes bya ba de na dri za'i bu mo bye ba khrag khrig brgya stong phrag du ma dag gnas te/ dri za'i bu mo de dag kyang byad bzang ba/ mdzes pa/ blta na sdug pa/ kha dog shin du bzang zhing rgyas pa dang ldan pa/ lus lha'i rgyan gyis brgyan pa/ lha'i bu mo 'gran par byed pa dang 'dra ba de lta bur shin du bzang yang 'dod chags kyi sdug bsngal gyis gzir bar mi 'gyur/ zhe sdang gi sdug bsngal gyi gzir bar mi 'gyur/ gti mug gi sdug bsngal gyis gzir bar mi 'gyur/ de dag gi lus la mi'i sdug bsngal yang med de dri za'i bu mo de dag dus gsum du byang chub sems dpa' sems dpa' chen po spyan ras gzigs kyi dbang po'i mtshan gyi rjes su dran par byed de/ de'i tshe rdzas de dag thams cad 'byung ngo / /de nas bcom ldan 'das la sgrib pa thams cad rnam par sel bas 'di skad ces gsol to/ /bcom ldan 'das bdag ba spu'i khung bu de lta 'tshal gyis bdag der mchi'o/ /bcom ldan 'das kyi bka' stsal pa/ rigs kyi bu ba spu'i khung bu de ni gzung du mi rung ste/ ji ltar nam mkha'i khams gzung du mi rung / reg par mi rung ba de bzhin du rigs kyi bu ba spu'i khung bu de yang gzung du mi rung / reg par mi rung ste/ byang chub sems dpa' sems dpa' chen po kun du bzang po ba spu'i khung bu der lo bcu gnyis su kun du song yang ba spu'i khung bu de ma mthong ste/ gang ba spu'i khung bu re re na gnas pa des kyang ma mthong na byang chub sems dpar gyur pa gzhan dag gis lta ci smos/ de nas bcom ldan 'das la sgrib pa thams cad rnam par sel bas 'di skad ces gsol to/ /bcom ldan 'das gang gi tshe/ byang chub sems dpa' kun du bzang po yang ma mthong na ci bdag mchi bar bgyi 'am/ rigs kyi bu nga ni g.yo med pa/ sgyu med pa/ phra ba nyid du snang ste/ bltar med pa/ gzugs med pa/ gzugs che ba/ lag pa brgya stong pa/ mig bye ba brgya stong pa/ mgo bcu gcig pa/ rnal 'byor chen po/ rnal 'byor dam pa/ mya ngan las 'das pa'i sa la gnas pa/ sems pa med pa/ shes rab che ba/ srid pa las sgrol bar byed pa/ rigs kyi dbang po/ bltar mi snang ba ston pa la shes rab dang ldan pa dang / chos thams cad la grib mar gyur pa'o/ / de bzhin du rigs kyi bu byang chub sems dpa' sems dpa' chen po spyan ras gzigs kyi dbang po yang sus kyang mi mthong ste/ de'i rang bzhin gyi lus ni de bzhin gshegs pa nyid kyis kyang mi gzigs na kun du bzang po la sogs pa byang chub sems dpa' gzhan gyis lta ci smos/ rigs kyi bu byang chub sems dpa' sems dpa' chen po 'di ni cho 'phrul bsam gyis myi khyab pa dag ston te/ sems can bye ba khrag khrig brgya phrag stong du ma dag yongs su smin par byed do/ /de dag thams cad byang chub kyi lam la 'jog go/ /bzhag nas bde ba can gyi 'jig rten gyi khams su 'gro zhing de bzhin gshegs pa snang ba mtha' yas pa la chos nyan to/ /de nas bcom ldan 'das la sgrib pa thams cad rnam par sel bas 'di skad ces gsol to/ /bcom ldan 'das thabs gang gis na bdag gis mthong bar 'gyur/ bcom ldan 'das kyis bka' stsal pa/ rigs kyi bu gal te nga la blta ba dang / phyag bya ba dang / bsnyen bkur ba'i phyir mi mdzad pa'i 'jig rten gyi khams 'di nyid du 'ong na'o/ /de nas bcom ldan 'das la sgrib pa thams cad rnam par sel bas 'di skad ces gsol to/ /bcom ldan 'das byang chub sems dpa' sems dpa' chen po spyan ras gzigs kyi dbang po mchi bar gnang bar mdzod cig /bcom ldan 'das kyi bka' stsal pa/ rigs kyi bu gang gi tshe na sems can yongs su smin par 'gyur ba de'i tshe thog ma kho nar byang chub sems dpa' sems dpa' chen po spyan ras gzigs kyi dbang po 'ong ngo / /de nas byang chub sems dpa' sems dpa' chen po sgrib pa thams cad rnam par sel ba bdag stig pa dang / ldan zhing yun ring du gson la/ spyan ras gzigs kyi dbang po mthong ba dang 'bral zhing long bar gyur/ lam gsum du 'gro bar gyur pa lta ci rung snyam du sems shing 'dug go/ /de nas bcom ldan 'das la yang byang chub sems dpa' sgrib pa thams cad rnam par sel bas 'di skad ces gsol to/ /bcom ldan 'das byang chub sems dpa' sems dpa' chen po spyan ras gzigs kyi dbang po gang gi tshe na mchi/ de nas bcom ldan 'das bzhad nas rigs kyi bu byang chub sems dpa' sems dpa' chen po spyan ras gzigs kyi dbang po 'ong ba'i dus ma yin no/ /'di lta ste/ rigs kyi bu ba spu'i khung bu de nas babs nas bdud rtsi zhes bya ba'i ba spu'i khung bu de na lha'i bu bye ba khrag khrig brgya stong du ma gnas te/ kha cig ni sa cig pa/ kha cig ni sa gnyis pa/ kha cig ni sa gsum pa/ kha cig ni sa bzhi pa/ kha cig ni sa lnga pa/ kha cig ni sa drug pa/ kha cig ni sa bdun pa/ kha cig ni sa brgyad pa/ kha cig ni sa dgu pa/ kha cig ni byang chub sems dpa'i sa bcu pa yin no/ /'di lta ste/ sgrib pa thams cad rnam par sel ba bdud rtsi'i thigs pa'i ba spu'i khung bu de na gser dang dngul gyi ri drug bcu yod de/ ri re re zhing yang 'phang du dpag tshad drug khri yod do/ /ri re re zhing yang rtse mo gser gyis brgyan pa dgu khri yod do/ /ngos ngos dag la ni byang chub sems dpa' sems dang po bskyed pa dag gnas so/ /ri'i rgyal po de dag la dri za bye ba khrag khrig brgya stong phrag du ma gnas te/ de dag ba spu'i khung bu de na rtag tu rgyun mi 'chad par sil snyan gyi sgra grag par 'dzin to/ /'di lta ste/ sgrib pa thams cad rnam par sel ba bdud rtsi'i thigs pa'i ba spu'i khung bu de na gzhal med khang brgya stong phrag du ma lha'i nor bu dang mu tig gis yongs su brgyan pa/ shin du mdzes pa blta na sdug pa rnam pa sna tshogs pa/ mu tig gi se mo do brgya stong gis brgyan pa dag yod de/ byang chub sems dpa' de dag gzhal med khang der ngal bsos nas chos kyi gtam byed do/ /de nas gzhal med khang nas byung nas bdag bdag gi 'chag sar 'gro ste/ 'chag sa re re zhing yang rdzing bu bdun bcu bdun bcu yod pa la la ni chu yan lag brgyad dang ldan pas yongs su gang ngo / /la la ni me tog gis yongs su gang ste/ me tog ud pa la dang / pad ma dang / ku mu da dang / pun da ri ka dang / dri zhim pa dang / man dA ra ba dang / man dA ra ba chen po dag gis yongs su gang ngo / /'chag sa de dag na shing dpag bsams yid du 'ong ba sdong po ni dmar po/ lo ma ni gser dang dngul las byas pa lha'i rgyan gyis brgyan pa/ cod pan dang rna cha dang / phreng ba'i chun po rab tu 'phyang ba/ se mo do dang / se mo do phyed pa rab tu 'phyang ba dpung rgyan rab tu 'phyang ba/ gzhan yang rgyan sna tshogs dag 'phyang ba yod do/ /'chag sa de na byang chub sems dpa' de dag nub mo 'chag cing theg pa chen po rnam pa sna tshogs kyi rjes su dran par byed/ mya ngan las 'da' ba'i sa'i rjes su dran par byed/ 'khor ba'i sdug bsngal kun la sems par byed do/ / bsams nas byams pa la sgom ste/ sgrib pa thams cad rnam par sel ba de ltar ba spu'i khung bu de na de 'dra ba'i byang chub sems dpa' dag yod do/ /de las babs nas rdo rje'i sgo zhes bya ba'i ba spu'i khung bu de na mi'am ci brgya stong phrag du ma gnas pa/ mgul rgyan dang / rna cha dang / phreng ba dang / rgyan sna tshogs dang / byug pa shin du bzang ba dag snang ngo / /de dag rtag tu sangs rgyas dang / chos dang / dge 'dun la mngon par dad/ chos la sems rtse gcig par byed pa/ byams pa la gnas par byed pa/ bzod pa sgom par byed pa/ mya ngan las 'da' ba sems par byed la/ mi dag gis skyo bar byed pa ste/ rigs kyi bu de 'dra ba'i mi 'am ci mngon par dga' ba dag gnas so/ /ba spu'i khung bu de nyid na ri brgya phrag du ma yod do kha cig ni rdo rje'i'o/ /kha cig ni dngul gyi'o/ /kha cig ni gser gyi'o/ /kha cig ni shel gyi'o/ /kha cig ni me tog pad ma dmar po'i'o/ /kha cig ni rin po che an dri nI la'i 'o/ / kha cig rin po che sna bdun gyi ste/ rigs kyi bu ba spu'i khung bu de na mtshan ma de 'dra ba dag snang ngo / /rigs kyi bu ba spu'i khung bu de na shing dpag bsams du ma dang / byi ru'i shing dang / tsan dan gyi shing dang / spos kyi shing du ma dag dang / rdzing bu brgya stong phrag du ma dag dang / lha'i gzhal med khang shel dang dngul dang ldan pa/ shin du bzang ba yid du 'ong ba mdzes pa/ de 'dra ba'i gzhal med khang dag tu mi 'am ci rnams ngal bso'o/ /ngal bsos nas chos kyi gtam byed de/ 'di lta ste/ sbyin pa'i pha rol du phyin pa'i gtam byed/ tshul khrims kyi pha rol du phyin pa'i gtam byed/ bzod pa'i pha rol du phyin pa'i gtam byed/ brtson 'grus kyi pha rol du phyin pa'i gtam byed/ bsam gtan gyi pha rol du phyin pa'i gtam byed/ shes rab kyi pha rol du phyin pa'i gtam byed de/ de ltar pha rol du phyin pa drug gi gtam byas nas/ bdag bdag gi 'chag sar 'chag ste/ 'chag sa kha cig ni gser gyi ri'o/ /'chag sa kha cig ni dngul gyi ri'o/ /'chag sa de dag gi khor ra khor yug na dpag bsams kyi shing sdong po ni dmar po/ lo ma ni gser dang dngul las byas pa/ lha'i brgyan rab tu 'phyang ba/ cod pan dang / rna cha dang phreng ba'i chun po rab tu 'phyang ba/ dpung rgyan rab tu 'phyang ba/ rkang pa'i gdub bu rab tu 'phyang ba/ se mo do dang se mo do phyed pa rab tu 'phyang ba/ rin po che'i se mo do rab tu 'phyang ba dag yod de 'chag sa de na shing dpag bsams de dag khang pa brtseg ma lta bur 'dug ste/ 'chag sa de na mi 'am ci dag 'chag go/ /'chag pa'i tshe 'khor ba la skyo ba la rjes su sems te/ kye ma'o sdug bsngal lo/ kye ma'o sdug bsngal lo/ /'chi ba sdug bsngal lo/ /kye ma'o sdug bsngal lo/ /dbul ba de yang sdug bsngal lo/ /kye ma'o sdug bsngal lo 'dod cing mdza' ba dang bral ba dang / mi 'dod cing mi mdza' ba dang phrad pa de shin du mi zad par sdug bsngal lo/ /thig nag po gdab par skyes pa dang / 'o dod 'bod par skyes pa dang / ha ha zhes zer ba'i sems can dmyal ba chen por skyes pa dang / me'i rdza mar skyes pa dang / rdo rje'i ri la skyes pa dang / yi dags kyi grong khyer du skyes pa'i sems can de dag shin du sdug bsngal lo/ /zhes de ltar mi 'am ci de dag lus la sems so/ /bsams nas mya ngan las 'da' ba'i dbyings la sems te/ rigs kyi bu de ltar mi 'am ci chos la mngon par dga' ba dag tu byang chub sems dpa' sems dpa' chen po spyan ras gzigs kyi dbang po'i ming gi rjes su dran par byed de/ de'i tshe de dag la yo byad thams cad kyis bsnyen bkur byed do/ /rigs kyi bu de lta bas na byang chub sems dpa' sems dpa' chen po spyan ras gzigs kyi dbang po ni dkon pa'o/ / sems can rnams kyi pha dang mar gyur pa'o/ /sems can thams cad la mi 'jig pa sbyin par byed pa'o/ /sems can thams cad la lam ston par byed pa'o/ /sems can thams cad la dge ba'i bshes gnyen du gyur pa ste/ rigs kyi bu byang chub sems dpa' sems dpa' chen po spyan ras gzigs kyi dbang po ni de lta bu'o/ /de'i ming 'dzin pa yang dkon te/ de dag de'i yi ge drug pa'i rig sngags kyi ming gi rjes su dran na de'i tshe ba spu'i khung bu de dag tu skye'o/ /slar 'khor bar mi 'khor ro/ /ba spu'i khung bu nas ba spu'i khung bur 'gro'o/ /ba spu'i khung bu de dag na yang mya ngan las 'da' ba'i sa tshol ba'i bar du gnas par 'gyur ro/ /de nas bcom ldan 'das la sgrib pa thams cad rnam par sel bas 'di skad ces gsol to/ /bcom ldan 'das yi ge drug pa'i rig sngags ga las btsal bar bgyi/ bcom ldan 'das kyis bka' stsal pa/ rigs kyi bu yi ge drug pa'i rig sngags chen mo ni de bzhin gshegs pas yang mi mkhyen na byang chub sems dpas lta ci smos/ de nas bcom ldan 'das la sgrib pa thams cad rnam par sel bas 'di skad ces gsol to/ /bcom ldan 'das de bzhin gshegs pa dgra bcom pa yang dag par rdzogs pa'i sangs rgyas dag kyang mi mkhyen tam/ bka' stsal pa/ rigs kyi bu yi ge drug pa'i rig sngags de ni byang chub sems dpa' sems dpa' chen po spyan ras gzigs kyi snying po dam pa'o/ /gang dag snying po dam pa shes pa de dag ni thar pa shes pa'o/ /de nas bcom ldan 'das la sgrib pa thams cad rnam par sel bas 'di skad ces gsol to/ /bcom ldan 'das sems can 'ga' la yang yi ge drug pa'i rig sngags 'tshal ba ma mchis sam/ bcom ldan 'das kyis bka' stsal pa/ rigs kyi bu yi ge drug pa'i rig sngags chen mo ni su yang mi shes te/ 'di ni rnal 'byor dpag tu med pa'i phyir bsgrub dka' ba'o/ /de bzhin gshegs pa nyid kyang mi mkhyen na byang chub sems dpar gyur pa lta ci smos rigs kyi bu yi gi drug pa'i rig sngags 'di'i phyir de bzhin gshegs pa thams cad kyang bskal pa bcu drug tu kun du gshegs na byang chub sems dpar gyur pas lta ci smos te ga la zhig shes/ 'di ni byang chub sems dpa' sems dpa' chen po spyan ras gzigs kyi dbang po'i snying po dam pa'o/ /'gro ba'i dkyil 'khor na yongs su 'khyam yang sus kyang yi ge drug pa'i rig sngags chen mo sus kyang mi shes so/ /gang yang yi ge drug pa'i rig sngags chen mo 'di rtag tu 'dzin cing zlos pa la brtson pa'i sems can de dag ni bsod nams dang ldan pa yin no de dag zlos par byed pa'i tshe sangs rgyas bcom ldan 'das gang gA'i klung gi bye ma snyed phrag dgu bcu rtsa dgu 'du bar 'gyur ro/ / byang chub sems dpa' rdul phra ba dang mnyam pa dag 'du bar 'gyur ro/ /rold phyin pa drug sgo na gnas par 'gyur ro/ /gzhan yang lha'i sde sum bcu rtsa gnyis kyi lha'i bu dag 'du bar 'gyur ro/ /rgyal po chen po bzhi po dag kyang phyogs bzhi srung bar 'gyur ro/ /klu'i rgyal po rgya mtsho mching rnam dang / klu'i rgyal po ma dros pa dang / klu'i rgyal po 'jog po la sogs te/ klu bye ba khrag khrig brgya stong phrag du ma ni sa yongs su srung bar byed do/ /gzhan yang sa bla'i gnod sbyin dag ni bla gab med par srung bar byed do/ /rigs kyi bu de'i ba spu'i khung bu re re la yang de bzhin gshegs pa bye ba dag bzhugs so/ /bzhugs nas rigs kyi bu khyod 'di 'dra ba'i yid bzhin gyi nor bu rnyed par bya ba thob par gyur cing khyod kyis rus kyis rigs bdun brgyud du thob par byas pa legs so legs so/ /rigs kyi bu khyod kyi sngon srog chags gnas pa de thams cad kyang byang chub sems dpa' phyir mi ldog par 'gyur te legs so zhes bya ba sbyin par mdzad do/ /yi ge drug pa'i rig sngags chen mo 'di la la zhig gi lus la 'chang na rigs kyi bu de'i lus ni rdo rje'i lus su rig par bya'o/ /ring bsrel gyi mchod rten du rig par bya'o/ /de bzhin gshegs pa'i ye shes bye bar rig par bya'o/ / rigs kyi bu'am rigs kyi bu mo la la zhig yi ge drug pa'i rig sngags chen mo 'di zlos pa byed na de ni spobs pa mi zad par 'gyur ro/ /ye shes kyi phung po rnam par dag par 'gyur ro/ /byams pa chen po dang snying rje chen po dang ldan par 'gyur ro/ /de nyi ma re re zhing yang pha rol du phyin pa drug yongs su rdzogs par 'gyur ro/ /de rig 'dzin gyi 'khor los sgyur ba'i dbang thob par 'gyur ro/ /la la zhig la dbugs phyir 'byung ba dang nang du rdub par byed na byams pas kyang rung zhe sdang bas kyang rung ste/ de dag thams cad byang chub sems dpa' phyir mi ldog par 'gyur ro/ /bla na med pa yang dag par rdzogs pa'i byang chub kyang myur du mngon par rdzogs par 'tshang rgya bar 'gyur ro/ /la la zhig lag gis reg pas kyang reg par byed na de dag thams cad byang chub sems dpa' srid pa tha ma par 'gyur ro/ /bud med dang skyes pa dang khye'u dang bu mo dag gis mthong ba tsam dang / ri dgas dang bya dang ba lang dang bong bu la sogs pas kyang mthong na de dag thams cad byang chub sems dpa' srid pa tha ma par 'gyur ro/ /skye ba dang rga ba dang na ba dang 'chi ba dang mdza' ba dang bral ba'i sdug bsngal med par 'gyur ro/ /rnal 'byor bsam gyis mi khyab pa dang ldan par 'gyur ro/ /de ltar yi ge drug pa'i rig sngags chen mo 'di zlos par byed na skul bar 'gyur ro/ /de nas bcom ldan 'das la sgrib pa thams cad rnam par sel bas 'di skad ces gsol to/ /bcom ldan 'das yi ge drug pa'i rig sngags chen mo rnal 'byor bsam gyis mi khyab pa dang bsam gtan dpag tu ma mchis pa zil gyis gnon par bgyid pa bla na med pa yang dag par rdzogs pa'i byang chub tu mya ngan las 'da' ba ston par bgyid pa thar bar 'jug par bgyid pa/ chos kyi mdzod yongs su gang bar bgyid pa/ 'khor ba rtsa ba nas 'byin par bgyid pa/ 'gro ba lnga skems par bgyid pa sems can dmyal ba dang nyon mongs pa rnams 'joms par bgyid pa dang / byol song gi skye gnas su gtogs pa rnams sgrol bar bgyid pa/ chos kyi ro myong bar bgyid pa/ thams cad mkhyen pa'i ye shes bshad pa bas ma 'tshal ba bdag gis ji ltar thob par bgyi/ bcom ldan 'das gang bdag la yi ge drug pa'i rig sngags stsol ba de la 'dzam bu'i gling rin po che sna bdun gyis yongs su bkang ste dbul bar 'tshal lo/ /bcom ldan 'das gal te brir gro ga dang smyig gu ma mchis na bdag gi khrag las snag tshar bgyis/ lpags pa bshus te gro gar bgyis/ rus pa bcom ste smyig gur bgyis kyang / bcom ldan 'das bdag gi lus la skyo ba ma mchis te de ni pha ma dang / bla ma'i yang bla mar 'gyur ro de nas bcom ldan 'das kyis sgrib pa thams cad rnam par sel ba la 'di skad ces bka' stsal to rigs kyi bu yi ge drug pa'i rig sngags 'di'i phyir 'jig rten gyi khams rdul phra rab dang mnyam pa'i 'jig rten gyi khams su song bar nga dran te/ de bzhin gshegs pa bye ba khrag khrig brgya stong phrag du ma la bsnyen bkur byas pas kyang ngas de bzhin gshegs pa de dag las ma thob ma thos nas/ de'i tshe de bzhin gshegs pa dgra bcom pa yang dag par rdzogs pa'i sangs rgyas rig pa dang rkang par ldan pa/ bde bar gshegs pa 'jig rten mkhyen pa/ skyes bu 'dul ba'i kha lo sgyur ba bla na med pa lha dang mi rnams kyi ston pa/ sangs rgyas bcom ldan 'das dmar po'i mchog ces bya ba de'i spyan sngar ngas mchi ma phyung ba dang / de'i tshe de bzhin gshegs pa dgra bcom pa yang dag par rdzogs pa'i sangs rgyas kyis rigs kyi bu de ltar s nying rje rje ltar mchi ma ma 'byin par rigs kyi bu de bzhin gshegs pa dgra bcom pa yang dag par rdzogs pa'i sangs rgyas pad ma dam pa zhes bya ba bzhugs te 'tsho zhing gzhes pa de yi ge drug pa'i rig sngags chen mo 'di mkhyen gyis song zhig ces bka' stsal nas rigs kyi bu de bzhin gshegs pa pad ma dam pa'i drung du song ngo / /de bzhin gshegs pa pad ma dam pa'i sangs rgyas kyi zhing ga la ba der song ste phyin nas/ bcom ldan 'das kyi zhabs la mgo bos phyag 'tshal te spyan sngar thal mo sbyar nas bcom ldan 'das yi ge drug pa'i rig sngags chen mo de'i ming gi rjes su dran pa tsam gyis sdig pa thams cad 'byang bar 'gyur ba/ byang chub sems dpa' rnyed par dka' ba thob par 'gyur ba thob par 'tshal lo/ /de'i slad tu bdag 'jig rten gyi khams nyon mongs pa can du mar phyin te 'dir mchis kyang don ma mchis pa'i tshegs su gyur to/ /de nas de bzhin gshegs pa pad ma'i mchog yi ge drug pa'i rig sngags chen mo 'di'i yon tan bsngags pa gsung ba rigs kyi bu 'di lta ste dper na ngas rdul phra rab kyi tshad ni gzung nus kyi/ rigs kyi bu yi ge drug pa'i rig sngags chen mo lan cig zlos pa'i bsod nams kyi phung po ni bgrang mi nus so/ /rigs kyi bu rgya mtsho mching rnam gyi bye ma ni re re nas bgrang nus kyi/ rigs kyi bu yi ge drug pa'i rig sngags chen mo lan cig zlos pa'i bsod nams kyi phung po ni bgrang mi nus so/ /rigs kyi bu 'di lta ste dper na skyes bu la la zhig gis khyim dpag tshad brgya tham par byas te/ 'phang du dpag tshad lnga brgyar byas la/ de til gyi 'bras bus yongs su gang bar byed do de na khab tsam gyi bu ga yang med la/ de'i sgor skyes bu mi rga mi 'chi ba zhig gzhag ste/ des bskal pa brgya 'das shing til gyi 'bras bu gcig phyir 'dor te/ rnam grangs des khyim gyi rmang dang gzhi yan chad zad cing med par 'gyur gyi/ rigs kyi bu yi ge drug pa'i rig sngags chen mo lan cig zlos pa'i bsod nams kyi phung po ni bgrang mi nus so/ /rigs kyi bu 'di lta ste dper na gling bzhir mi rnams kyi las nas dang / gro dang 'bras dang / rgya sran dang bal sran la sogs pa dang / rgya shug dang / sran chung la sogs pa rnam pa sna tshogs pa byas te/ klu'i rgyal pos kyang der dus dus su char pa'i rgyun phab nas 'bru de dag grub pa dang smin cing smin cing brngas nas 'dzam bu'i gling du g.yul gcig byas la/ shing rta dang khur dang bam po dang skon pas bskyas te g.yul de'i nang du bcug nas ba lang dang bong bu dag gis bcags te phung po chen por byas kyang / rigs kyi bu ngas 'bru re re nas bgrang nus so/ /rigs kyi bu 'di lta ste/ dper na chu bo chen po 'dzam bu'i gling du nyin mtshan du 'bab pa 'di lta ste/ si ta dang gang gA dang / ya mu na dang / sin d+hu dang / pak+Shu dang sha ta dru dang tsan dra b+ha ga dang / e'i ra ba ti dang / su ma ga da dang / hi ma ka la dang / ko da pa ri rnams chu bo re re zhing 'khor lnga brgya yod pa nyin mtshan du rgya mtsho mching rnam du 'bab bo/ /rigs kyi bu yi ge drug pa'i rig sngags chen mo lan cig zlos pa'i bsod nams kyi phung po yang de bzhin du 'phel lo/ /de bas na chu bo chen po de dag ni ngas thigs pa re re nas bgrang nus kyi/ rigs kyi bu yi ge drug pa'i rig sngags chen mo lan cig zlos pa'i bsod nams kyi phung po ni ngas bgrang bar mi nus so/ /rigs kyi bu 'di lta ste dper na rkang pa bzhi pa'i rigs ba lang dang / bong bu dang ma he dang / rta dang / ba lang dang khyi dang wa dang ra dang phyugs de dag dang / de bzhin du seng ge dang / stag dang ta rak+Sha dang / ri dgas dang spre'u dang / ri bong dang phag la sogs pa dang / byi ba dang / byi la la sogs pa de dag gi spu ni ngas re re nas bgrang nus kyi/ yi ge drug pa'i rig sngags chen mo lan cig zlos pa'i bsod nams kyi phung po ni ngas bgrang mi nus so/ /rigs kyi bu 'di lta ste dper na rdo rje'i lcags kyu zhes bya ba'i ri'i rgyal po 'phang du dpag tshad dgu khri dgu stong / 'og tu dpag tshad brgyad khri bzhi stong yod de/ ri'i rgyal po rdo rje'i lcags kyu de'i ngos re re zhing dpag tshad brgyad khri bzhi stong yod la ri'i rgyal po de'i ngos la skyes bu mi rga mi 'chi ba zhig yod nas des bskal pa gcig 'das shing yul ka shi ka nas byung ba'i gos kyis lan cig phyis te/ de ltar byas kyang de zad cing de ngas par 'gyur gyi/ yi ge drug pa'i rig sngags chen mo lan cig bzlos pa'i bsod nams kyi phung po ni ngas bgrang mi nus so/ /rigs kyi bu 'di lta ste dper na rgya mtsho mching rnam chen po zabs su dpag tshad brgyad khri bzhi stong zhing du rta rgod ma'i gdong gi mtha' bar du dpag tu med pa ngas skra'i rtse mo'i brgya'i chas thigs pa re re nas bgrang nus kyi rigs kyi bu 'di yi ge drug pa'i rig sngags chen mo lan cig bzlas pa'i bsod nams kyi phung po ni ngas bgrang mi nus so/ /rigs kyi bu 'di lta ste dper na shing shir sha'i tshal gyi lo ma ni re re nas ngas bgrang nus kyi yi ge drug pa'i rig sngags chen mo'i bsod nams kyi phung po ngas bgrang mi nus so/ /rigs kyi bu 'di lta ste dper na gling chen po bzhi na gnas pa'i skyes pa dang bud med dang / khye'u dang bu mo de dag thams cad byang chub sems dpa' sa bdun pa la gnas par gyur na/ gang byang chub sems dpa' de dag gi bsod nams kyi phung po de bas yi ge drug pa'i rig sngags chen mo lan cig bzlas pa'i bsod nams kyi phung po shin du che'o/ /rigs kyi bu 'di lta ste dper na/ zla ba bcu gnyis pa'i lo 'am/ zla ba lhag pa dang bgrangs pas zla ba bcu gsum gyis lo tshang bar gyur par nyin mtshan du char pa bab na rigs kyi bu ngas thigs pa re re nas bgrang nus kyi rigs kyi bu yi ge drug pa'i rig sngags chen mo lan cig bzlas pa'i bsod nams kyi phung po ni ngas bgrang mi nus so/ /'di lta ste rigs kyi bu mang du brjod mi dgos kyi nga dang 'dra ba'i de bzhin gshegs pa bye ba gnas gcig tu lha'i bskal par na bza' dang / bshos dang mal stan dang / na ba'i rkyen gyi sman gyi yo byad kyis gnas par byas te/ bsnyen bkur thams cad byas kyang de bzhin gshegs pa de dag gis yi ge drug pa'i rig sngags chen mo'i bsod nams kyi phung po bgrang mi nus na/ nga gcig pu 'jig rten gyi khams 'di na gnas pas lta ci smos/ bsam gtan gyi gnas su ldang ba ni bsam gyis mi khyab ste/ rigs kyi bu nga ni sgom pa'i brtson pa la brtson par gyur pa yin/ byang chub sems dpa' sems dpa' chen po spyan ras gzigs kyi dbang po'i chos de yang phra ba/ mi gsal ba'i chos ma 'ongs pa/ shin du snying por gyur pa'i chos te de dge ba la gnas pa de bzhin du rigs kyi bu yi ge drug pa'i rig sngags chen mo yang thabs mkhas pa'o/ /rigs kyi bu ngas kyang 'jig rten gyi khams bye ba khrag khrig brgya stong phrag du mar 'khyam zhing song nas de bzhin gshegs pa snang ba mtha' yas kyi spyan sngar thal mo sbyar te chos kyi shugs kyis mchi ma byung ba de'i tshe de bzhin gshegs pa snang ba mtha' yas pas da ltar dang ma 'ongs pa mkhyen te/ des kyang rigs kyi bu yi ge drug pa'i rig sngags chen po'i rig pa'i rgyal mo bsgom pa'i brtson 'grus bya bar 'dod dam zhes bka' stsal nas/ bcom ldan 'das bdag 'tshal lo/ /bde bar gshegs pa bdag 'tshal te/ ji ltar skom gyis gdungs nas chab tshol ba de bzhin du bcom ldan 'das bdag kyang yi ge drug pa'i rig sngags chen mo tshol du 'jig rten gyi khams su mchis te/ de bzhin gshegs pa bye ba khrag khrig brgya phrag stong du ma la bsnyen bkur bgyis kyang gang las kyang yi ge drug pa'i rig sngags chen mo'i rgyal mo ma thob kyis/ bcom ldan 'das khyod ni mgon no/ /khyod ni skyabs so/ /rten no/ /dbang po nyams pa'i ni mig tu gyur cig /lam stor ba'i ni lam du gyur cig /nyi ma tsha bas tshig pa rnams kyi ni gdugs su gyur cig /shul gyi bzhi mdo chen por ni shing sA la chen po bzhin du gyur cig / chos kyis yongs su skom pa la ni mtha' yas pa ston par gyur cig /sems shin du brtan pa'i ni go char gyur cig /de nas de bzhin gshegs pa dgra bcom pa yang dag par rdzogs pa'i sangs rgyas snang ba mtha' yas kyis byang chub sems dpa' sems dpa' chen po spyan ras gzigs kyi dbang po la bya ka la ping ka'i dbyangs kyis bka' stsal pa/ rigs kyi bu ltos de bzhin gshegs pa dgra b com pa yang dag par rdzogs pa'i sangs rgyas pad ma'i mchog yi ge drug pa'i rig sngags chen mo'i phyir 'jig rten gyi khams bye ba khrag khrig brgya phrag stong du mar gshegs kyis rigs kyi bu yi ge drug pa'i rig sngags chen mo'i rgyal mo gsol cig / de bzhin gshegs par gyur bzhin du kun du gshegs so/ /de nas bcom ldan 'das la byang chub sems dpa' spyan ras gzigs kyi dbang pos 'di skad ces gsol to/ /dkyil 'khor brgyad kyis stsal bar bgyi ste/ bcom ldan 'das ji ltar na me tog pad ma lta bu'i phyag rgya 'dzin ji ltar na nor bu 'dzin pa'i phyag rgya rtogs par 'gyur/ ji ltar na rgyal po'i dbang po thams cad kyi phyag rgya rtogs par 'gyur/ ji ltar na dkyil 'khor yongs su dag pa rtogs par 'gyur zhe na/ dkyil 'khor gyi mtshan ma ni 'di lags te/ gru bzhi la khru lnga khor yug tsam du bgyis te/ dkyil 'khor gyi dbus su ni snang ba mtha' yas bri'o/ /de bzhin gshegs pa snang ba mtha' yas kyi sku la nor bu rin po che in dra nI la'i phye ma dang / pad ma rA ga'i phye ma dang / shel gyi phye ma dang / gser dang dngul gyi phye ma gtor bar bgyi'o/ /g.yas phyogs su ni byang chub sems dpa' nor bu rin po che 'dzin par bgyi'o/ / g.yon phyogs su ni yi ge drug pa'i rig sngags chen mo bgyi ste/ phyag bzhi pa kha dog 'dam bu'i mda' bzhin du dkar ba/ rgyan sna tshogs kyis brgyan pa phyag g.yon par pad ma bgyi'o/ /pad ma'i steng du nor bu bgyi'o/ / phyag g.yas par sngags kyi nor bu bgyi'o/ /phyag gnyis thal mo sbyar ba rgyal po'i dbang po thams cad ces bya ba'i phyag rgya bgyi'o/ /yi ge drug pa'i rig sngags chen mo de'i zhabs kyi 'og tu rig 'dzin bgyi ste/ lag pa g.yas pa na pog phor thogs shing bdug par bgyi'o/ /lag pa g.yon pa na rgyan rnam pa sna tshogs kyis gang ba'i skon bu thogs par bgyi'o/ /dkyil 'khor de'i grwa bzhir rgyal po chen po bzhi ste lag cha sna tshogs thogs par bgyi'o/ /dkyil 'khor de'i grwa bzhir bum pa gang ba nor bu rin po che sna tshogs stsal ba gzhag go/ /rigs kyi bu 'am rigs kyi bu mo gang la la zhig dkyil 'khor du 'jug par 'tshal na des rus chags kyi rgyud thams cad kyi ming bris la thog ma kho nar dkyil 'khor der ming de dag stsal bar bgyi ste/ de dag thams cad mi'i sdug bsngal thams cad spangs shing srid pa tha ma pa'i byang chub sems dpar 'gyur ro/ /bla na med pa yang dag par rdzogs pa'i byang chub kyang myur du mngon par rdzogs par 'tshang rgya bar 'gyur ro/ /de la slob dpon gyis gnas ma lags pa la stsal bar mi bgyi ste/ yang na ni dad pas mos pa la stsal bar bgyi'o/ /yang na ni theg pa chen po la dad pas mos pa dag la stsal bar bgyi'o/ /mu stegs can la stsal bar mi bgyi'o/ /de nas de bzhin gshegs pa dgra bcom pa yang dag par rdzogs pa'i sangs rgyas snang ba mtha' yas kyis byang chub sems dpa' sems dpa' chen po spyan ras gzigs kyi dbang po la 'di skad ces bka' stsal to/ /rigs kyi bu gal te nor bu rin po che in dra ni la'i phye ma dang / ma ra ka ta dang / gser dang dngul gyi phye ma dag rigs kyi bu 'am rigs kyi bu mo dbul po la med do/ / bcom ldan 'das phye ma de dag tshon sna tshogs las sbyar zhing / me tog sna tshogs dang / bdug pa sna tshogs su bgyi'o/ /rigs kyi bu gal te yul gzhan du song ngam/ gnas dang thabs las babs pa dag la med do/ / de'i tshe slob dpon gyis yid la dkyil 'khor bgyi ste/ slob dpon gyis phyag rgya'i mtshan ma bstan par bgyi'o/ /de nas de bzhin gshegs pa dgra bcom pa yang dag par rdzogs pa'i sangs rgyas pad ma'i mchog gis byang chub sems dpa' sems dpa' chen po spyan ras gzigs kyi dbang po la 'di skad ces bka' stsal to/ /rigs kyi bu yi ge drug pa'i rig sngags chen mo'i rgyal mo nga la byin cig /ngas sems can bye ba khrag khrig brgya phrag stong du ma dag des 'khor ba las yongs su thar cing myur du bla na med pa yang dag par rdzogs pa'i byang chub mngon par rdzogs par 'tshang rgya bar bya'o/ /de nas de bzhin gshegs pa dgra bcom pa yang dag par rdzogs pa'i sangs rgyas pad ma'i mchog la byang chub sems dpa' sems dpa' chen po spyan ras gzigs kyi dbang pos yi ge drug pa'i rig sngags 'di byon no/ /oM ma Ni pad me hU~M// // bam po bzhi pa ste tha ma/ gang gi tshe na yi ge drug pa'i rig sngags chen mo 'di byin pa de'i tshe gling bzhi dang lha'i gnas dang bcas te/ shing chu skyes kyi 'dab ma bzhin du 'gul lo/ /rgya mtsho mching rnam bzhi yang 'khrugs so/ /bgegs dang bar chad byed pa thams cad kyang skrag go/ / gnod sbyin dang / srin po dang / nag po chen po bud med mang po dang bcas pa yang bros so/ /de nas de bzhin gshegs pa pad ma'i mchog gis bal glang gi sna dang 'dra ba'i dpung pa phyung nas byang chub sems dpa' sems dpa' chen po spyan ras gzigs kyi dbang po la mu tig gi se mo do rin brgya stong ri ba phul lo/ /des kyang blangs nas de bzhin gshegs pa dgra bcom pa yang dag par rdzogs pa'i sangs rgyas snang ba mtha' yas la phul lo/ /des kyang blangs nas de bzhin gshegs pa dgra bcom pa yang dag par rdzogs pa'i sangs rgyas pad ma'i mchog la phul lo/ /de nas de bzhin gshegs pa dgra bcom pa yang dag par rdzogs pa'i sangs rgyas pad ma'i mchog gis yi ge drug pa'i rig sngags chen mo 'di blangs nas 'jig rten gyi khams pad ma ga la ba der gshegs so/ /rigs kyi bu de ltar ngas sngon de bzhin gshegs pa dgra bcom pa yang dag par rdzogs pa'i sangs rgyas pad ma'i mchog las thos so/ /de nas bcom ldan 'das la sgrib pa thams cad rnam par sel bas 'di skad ces gsol to/ /bcom ldan 'das yi ge drug pa'i rig sngags chen mo rnal 'byor spyod pa bdag gis ji ltar thob par bgyi/ bcom ldan 'das dper na bdud rtsi thob na ro myong bas chog ma 'tshal ba de bzhin du/ bcom ldan 'das bdag kyang yi ge drug pa'i rig sngags chen po thos pa tsam gyis chog ma 'tshal to/ /sems can gang dag yi ge drug pa'i rig sngags chen mo 'di 'dzab tu bgyid pa dang / nyan pa dang / sems pa dang / bsam pa lhag pas 'dzin pa de dag ni bsod nams dang ldan pa lags so/ /bka' stsal pa/ rigs kyi bu gang yi ge drug pa'i rig sngags chen mo 'di 'drir 'jug pa des ni chos kyi phung po brgyad khri bzhi stong 'drir 'jug par 'gyur ro/ /de bzhin gshegs pa dgra bcom pa yang dag par rdzogs pa'i sangs rgyas rdul phra rab dang mnyam p a lha'i gser rin po che las byed cing byas nas nyin gcig tu ring bsrel 'jug pa de'i 'bras bu rnam par smin pa ni yi ge drug pa'i rig sngags chen mo'i yi ge 'bru gcig gi 'bras bu rnam par smin pa ste yon tan bsam gyis mi khyab bo/ /thar par shin du gnas pa'o/ /rigs kyi bu 'am rigs kyi bu mo gang yi ge drug pa'i rig sngags chen mo 'di zlos par byed pa de ni ting nge 'dzin 'di dag thob par 'gyur ro/ /'di lta ste/ nor bu rin po che 'dzin ces bya ba'i ting nge 'dzin dang / sems can dmyal ba dang byol song skems shes bya ba'i ting nge 'dzin dang / rdo rje'i go cha zhes bya ba'i ting nge 'dzin dang / rkang pa shin du gnas pa zhes bya ba'i ting nge 'dzin dang thabs mkhas pa thams cad ces bya ba'i ting nge 'dzin dang / 'thor ba zhes bya ba'i ting nge 'dzin dang / chos thams cad 'jug pa zhes bya ba'i ting nge 'dzin dang / bsam gtan gyi rgyan ces bya ba'i ting nge 'dzin dang / chos kyi shing rta la 'jug pa zhes bya ba'i ting nge 'dzin dang / 'dod chags dang zhe sdang las yongs su thar bar byed ces bya ba'i ting nge 'dzin dang / mtha' yas be'u zhes bya ba'i ting nge 'dzin dang / pha rol du phyin pa drug 'chang ces bya ba'i ting nge 'dzin dang / ri rab chen po 'dzin ces bya ba'i ting nge 'dzin dang / sems can srid pa las sgrol zhes bya ba'i ting nge 'dzin dang / sangs rgyas kyi zhing thams cad ston ces bya ba'i ting nge 'dzin dang / de bzhin gshegs pa thams cad gzigs shes bya ba'i ting nge 'dzin dang / gnas shin du gnas pa zhes bya ba'i ting nge 'dzin rnams te/ rigs kyi bu gang yi ge drug pa'i rig sngags chen po'i rgyal mo 'dzin pa ni de lta bu la sogs te ting nge 'dzin brgya rtsa brgyad thob par 'gyur ro/ /de nas bcom ldan 'das la sgrib pa thams cad rnam par sel bas 'di skad ces gsol to/ /bcom ldan 'das bdag gang du mchi bar bgyi/ yi ge drug pa'i rig sngags chen mo gang du 'thob par 'gyur/ rigs kyi bu yul khor mor 'jig pa'i grong khyer chen po na gang yi ge drug pa'i rig sngags chen mo 'dzin par byed/ klog par byed/ tshul bzhin yid la byed pa'i chos smra ba yod do/ /bcom ldan 'das yul 'khor mor 'jig gi grong khyer chen por chos smra ba de la blta ba dang / phyag bgyi ba dang / bsnyen bkur bgyi ba'i slad tu bdag mchi'o/ /legs so/ /legs so/ /rigs kyi bu de ltar gyis shig /gang yi ge drug pa'i rig sngags chen mo 'di 'dzin pa'i chos smra ba de dag ni dkon pa'o/ /chos smra ba de dag ni de bzhin gshegs pa dang mnyam par blta bar bya'o/ /'gro ba'i bsod nams kyi 'gram dang 'dra bar blta bar bya'o/ /phung po bzhin du blta bar bya'o/ /phyin ci log par gsung ba bzhin du blta bar bya'o/ /rin po che'i phung po bzhin du blta bar bya'o/ /dam pa sbyin par byed pa'i yid bzhin gyi nor bu bzhin du blta bar bya'o/ /chos kyi mdzod bzhin du blta bar bya'o/ /'gro ba sgrol bar byed pa bzhin du blta bar bya'o/ /rigs kyi bu chos smra ba de'i byed pa mthong nas the tsom mi skye bar bya'o/ /rigs kyi bu khyod byang chub sems dpa'i sa nas 'phos shing ngan song du skyes sa re/ chos smra ba de ni tshul khrims nyams pa/ spyod pa nyams pa/ chung ma dang / bu dang / bu mos yongs su bskor ba/ ngur smrig kyang bshang ba dang gci bas yongs su gang ba/ spyod lam ma bsdams pa yin no/ /de nas bcom ldan 'das la sgrib pa thams cad rnam par sel bas 'di skad ces gsol to/ /bcom ldan 'das kyis bka' stsal pa bzhin du 'tshal lo/ /de nas byang chub sems dpa' sems dpa' chen po sgrib pa thams cad rnam par sel ba byang chub sems dpa' khyim pa dang / rab tu byung ba dang / khye'u dang / bu mo brgya phrag stong du mas yongs su bskor te song nas chos smra ba de la mchod pa'i las bya ba'i phyir lha'i gdugs dang / lha'i lham dang / cod pan dang / rna cha dang / phreng ba'i chun po dang / dpung rgyan dang / se mo do dang / se mo do phyed pa phrag pa nas 'phyang ba dang / snyan gyi gong rgyan dang / sor gdub kyi rnam pa dang / gzhan yang gos rnam pa sna tshogs pa rgya'i yul nas byung ba dang / rig 'dzin gyis bskul ba dang / yul ka shi nas byung ba'i gos dang / mes bkru ba'i gos dang / gzhan yang me tog sna tshogs pa 'di lta ste/ me tog ud pa la dang / ku mu da dang / pun da ri ka dang / man dA ra ba dang / man dA ra ba chen po dang / man 'dzu Sha ka dang / man 'dzu Sha ka chen po dang / u dum ba ra dang / gzhan yang shing gi me tog rnam pa sna tshogs pa tsam pa ka dang / ka ra bi ra dang / bad ta la dang / a ti mug ta dang / pa ra shi ka dang / kun da d+h+ya shi ta dang / su ma na dang / bi mi ni ka la sogs pa dang / mdab ma brgya pa ngur pas mdzes par byas pa/ bya sha ri ka dag mos par byas pa/ sngon po dang / ser po dang / dmar po dang / dkar po dang / shel gyi kha dog dang / gzhan yang 'bras bu dang / me tog gi rnam pa sna tshogs dag khyer nas yul khor mor 'jig gi grong khyer chen po ga la ba der song ste/ mthar gyis 'khor mor 'jig gi grong khyer chen por phyin pa dang / chos smra ba ga la ba der song ste phyin nas rkang pa la mgo bos phyag 'tshal te/ des de tshul khrims nyams pa/ spyod pa nyams pa/ spyod lam ma bsdams pa mthong nas gdugs dang / lham de dag dang / gos dang / rgyan dang / dri dang / byug pa dag gis mchod pa chen po byas nas chos smra ba de'i mdun du thal mo sbyar te/ kye ma'o chos kyi gter myong bar mdzad pa/ bdud rtsi'i gter bsags pa lta bu rgya mtsho dang mnyam pa khyod la dpag mi nus so/ /mir gyur pa thams cad kyi snod du gyur pa'o/ /lha dang / klu dang / gnod sbyin dang / lha ma yin dang / nam mkha' lding dang / mi 'am ci dang / lto 'phye chen po dang / mi dang / mi ma yin pa dag khyod las chos nyan te/ khyod la chos nyan pa'i tshe thams cad 'du bar bgyid do/ /khyod ni rdo rje chen po dang mnyam pa'i chos kyi rnam grangs 'chad par mdzad do/ /sems can 'khor bas bcings pa'i bcings pa mang po dag yongs su thar bar mdzad do/ /sems can gang khor mor 'jig gi grong khyer chen po na gnas shing rtag tu yongs su sdud par mthong ba de dag ni bsod nams dang ldan pa lags so/ /de mthong ma thag tu sdig pa thams cad 'phrog par mdzad pa dper na mes nags kyi 'dab ma myur du 'tshig par bgyid pa de bzhin du khyod mthong ma thag tu sdig pa thams cad 'phrog par mdzad do/ /de bzhin gshegs pa dgra bcom pa yang dag par rdzogs pa'i sangs rgyas rnams kyis kyang mkhyen to/ /gzhan yang byang chub sems dpa' bye ba khrag khrig brgya stong phrag du ma dang / tshangs pa dang / 'jug sred dang / dbang phyug chen po dang / nyi ma dang / zla ba dang / rlung gi lha dang / chu'i lha dang / me'i lha dang / chos kyi rgyal po gshin rje dang / rgyal po chen po bzhi dag kyang khyod la mchod pa'i las bya ba'i phyir mchi'o/ /de nas chos smra ba des de la 'di skad ces smras so/ /rigs kyi bu khyod 'gyod pa ma skyed cig /grogs po nyon mongs pa ni chags pa'o/ /spyad pa'o/ /'khor ba'i mtshan ma'o/ /skye dgu'i 'khor lo skyed par byed pa'o/ /gang yi ge drug pa'i rig sngags chen mo shes pa de ni 'dod chags dang / zhe sdang dang / gti mug gis mi gos te/ dper na 'dzam bu'i chu bo'i gser dri mas mi gos pa de bzhin du rigs kyi bu gang gi lus la yi ge drug pa'i rig sngags kyi rgyal mo chen mo thogs pa de'i lus la 'dod chags dang / zhe sdang dang gti mug gis mi gos so/ /de nas sgrib pa thams cad rnam par sel bas rkang pa la dam du bzung ste 'di skad ces gsol to/ /dbang po nyams pa'i mig tu gyur cig / lam stor ba la lam ston par mdzod cig /bdag chos kyis skom pa la chos kyi ros ngoms par mdzod cig /bdag la bla na med pa yang dag par rdzogs pa'i byang chub kyi sa bon stsol cig /chos kyi skabs dang / shin du gnas pa'i tshul gyi gnas yongs su dag pa stsol cig /mi phyed pa'i dge ba thob pa'i zhes 'gro ba thams cad mchi'o/ /tshig snyan pa bla mas bdag la yi ge drug pa'i rig sngags chen mo stsol cig /des bdag bla na med pa yang dag par rdzogs pa'i byang chub tu mngon par rdzogs par 'tshang rgya bar bgyi'o/ /chos kyi 'khor lo rnam pa bcu gnyis bskor bar bgyi'o/ /sems can thams cad 'khor ba'i sdug bsngal las yongs su thar bar bgyi'o/ /sngon ma thos pa'i chos thos par bgyi'o/ /yi ge drug pa'i rig sngags chen mo'i rgyal mo 'thob pa thob par bgyi'o/ /yi ge drug pa'i rig sngags chen mo'i rgyal mo bdag la stsol cig / mgon dang / skyabs dang / rten du gyur cig /gnas ma mchis pa rnams kyi gnas su gyur cig /de nas chos smra ba des de la 'di skad ces smras so/ /yi ge drug pa'i rig sngags chen mo'i rgyal mo ni dkon pa'i tshig ste/ 'di ni rdo rje'i tshig go/ /rdo rje mi phyed pa'i tshig go/ /bla na med pa'i ye shes kyi tshig go/ /mi zad pa'i ye shes kyi tshig go/ /ltag na med pa'i tshig go/ /thar par 'jug par byed pa'i tshig go/ /de bzhin gshegs pa'i ye shes rnam par dag pa'i tshig go/ /'dod chags dang / zhe sdang dang / gti mug dang / 'khor ba'i sdug bsngal yongs su spong ba'i tshig go/ /thabs mkhas pa thams cad kyi tshig go/ /bsam gtan dang / rnam par thar pa dang / ting nge 'dzin dang / snyoms par gzhog pa'i tshig go/ /chos thams cad la 'jug par byed pa'i tshig go/ /rtag tu lha rnams 'dod par byed pa'i tshig go/ /rigs kyi bu gang thar bar 'dod pa gnas sna tshogs su rab tu byung ba/ bsgo ba sna tshogs su rab tu 'byung ba 'di lta ste/ dbang po'i bgo ba dang / dkar po'i bgo ba dang / bsten pa'i bgo ba ste/ nyi ma brtags nas dbang phyug chen po la rab tu 'byung ngo / /'jug sred dang / namakha' lding dang / gcer bu pa dang / ri mi dang / gnas de dag tu rab tu 'byung ste/ de dag la yang thar pa med do/ /mgon yang ma yin/ /brtul zhugs can yang ma yin no/ /lha mang po dang / tshangs pa dang / 'jug sred dang / dbang phyug chen po dang / brgya byin lha'i dbang po dang / nyi ma dang / zla ba dang / rlung g-i lha dang / chu'i lha dang / me'i lha dang / chos kyi rgyal po gshin rje dang / rgyal po chen po bzhi dag rtag tu yi ge drug pa'i rig sngags kyi rgyal mo chen mo slong ngo / /de dag yi ge drug pa'i rig sngags kyi rgyal mo chen mo ji ltar bslang bar bgyi/ bcom ldan 'das ji ltar na yi ge drug pa'i rig sngags kyi rgyal mo chen mo bdag cag gis thob par 'gyur/ thar pa la gzhol bar 'gyur/ /sgrib pa thams cad rnam par sel ba 'di lta ste/ dper na shes rab kyi pha rol du phyin pa ni de bzhin gshegs pa thams cad skyed par grags pa ste/ de yang thal mo sbyar nas yi ge drug pa'i rig sngags kyi rgyal mo chen mo la phyag 'tshal na de bzhin gshegs pa dgra bcom pa yang dag par rdzogs pa'i sangs rgyas byang chub sems dpa' mang po dang bcas pa lta ci smos/ rigs kyi bu 'di ni 'bras lta bur snying por gyur pa yin te/ rigs kyi bu 'di la chung zad bzlas pas kyang theg pa chen po'i rnam pa mang po mdo dang / dbyangs kyis bsnyad pa dang / lung bstan pa dang / tshigs su bcad pa dang / ched tu brjod pa dang / gleng gzhi dang / rtogs pa brjod pa dang / 'di lta bu 'das pa dang skyes pa'i rabs dang / shin du rgyas pa dang / chos rmad du byung ba dang / gtan la phab ba bstan pa dang / zhi ba dang / thar pa yang thob par 'gyur ro/ /mang du bshad ci dgos te gzhan ma byed cig /sa'i nang du gtogs pa la snying por 'dzin pa ci yin zhe na/ de ltar 'bras ni snying por 'dzin te/ khyer nas bdag gi khyim du snod rnams yongs su bkang ste 'jog go/ /bzhag nas nyi ma'i tshul bzhin du nyi ma tsha ba la skems so/ /bskams nas gtun la brdungs shing phub ma rnams sel to/ /de'i snying po ni 'bras rme'u yin no zhes de ltar 'jog ste/ de bzhin du rnal 'byor gzhan dag phub ma dang 'dra'o/ /rnal 'byor thams cad kyi nang na yi ge drug pa'i rig sngags kyi rgyal mo chen mo 'di ni 'bras rme'ur gyur pa'o/ /rigs kyi bu de'i phyir byang chub sems dpa' sbyin pa'i pha rol du phyin pa'i phyir/ tshul khrims kyi pha rol du phyin pa'i phyir/ bzod pa'i pha rol du phyin pa'i phyir/ brtson 'grus kyi pha rol du phyin pa'i phyir/ bsam gtan gyi pha rol du phyin pa'i phyir/ shes rab kyi pha rol du phyin pa'i phyir tshogs 'byin to/ /rigs kyi bu bzlas pa gcig byas pas pha rol du phyin pa drug yongs su rdzogs par 'gyur ro/ /la la zhig gis lag pas reg pas reg na de dag kyang phyir mi ldog pa'i sa 'thob par 'gyur ro/ /rigs kyi bu yi ge drug pa'i rig sngags kyi rgyal mo chen mo 'di yang de lta bu ste/ de'i ming 'dzin pa yang dkon no/ /ming lan cig bzung na de bzhin gshegs pa thams cad la na bza' dang / bshos dang / mal stan dang / na ba'i rkyen gyi sman gyi yo byad dang / yo byad thams cad kyis bkur stir byas par 'gyur ro/ /de nas chos smra ba de la sgrib pa thams cad rnam par sel bas 'di skad ces smras so/ /yi ge drug pa'i rig sngags kyi rgyal mo chen mo bdag la stsol cig de nas chos kyi mkhan po de sems shing 'dug pa las de la nam mkha' las yi ge drug pa'i rig sngags kyi rgyal mo chen mo byin cig ces sgra byung ngo / /de nas chos smra ba de sgra ga las byung zhes bsams pa dang / de nas yang nam mkha' las byang chub sems dpa' 'dis dka' ba spyod pa du ma la brtson par byas kyis yi ge drug pa'i rig sngags kyi rgyal mo chen mo byin cig ces sgra byung ngo / /de nas chos smra ba des nam mkha' la bltas pa dang / 'dam bu'i mda' bzhin du kha dog dkar ba/ ral pa'i cod pan 'chang ba/ thams cad mkhyen pa mgo la bzhag pa/ lag pa na me tog pad ma bzang po thogs pa/ pad ma'i dpal gyis brgyan pa de 'dra ba'i gzugs mthong nas byang chub sems dpa' sgrib pa thams cad rnam par sel ba la rigs kyi bu byang chub sems dpa' sems dpa' chen po spyan ras gzigs kyi dbang pos yi ge drug pa'i rig sngags kyi rgyal mo chen mo khyod la sbyin par gnang ngo zhes smras pa dang / gus shing thal mo sbyar te len par rtsom mo/ /oM ma Ni pad me hU~M/ 'di byin ma thag tu sa rnam pa drug tu g.yos so/ /ting nge 'dzin 'di dag kyang sgrib pa thams cad rnam par sel bas thob ste/ mi zad pa'i chos nyid ces bya ba'i ting nge 'dzin dang / byams pa dang / snying rje dang / dga' ba zhes bya ba'i ting nge 'dzin dang / rnal 'byor spyod ces bya ba'i ting nge 'dzin dang / thar pa la 'jug par 'jog ces bya ba'i ting nge 'dzin dang / thams cad snang bar byed ces bya ba'i ting nge 'dzin dang / bkod pa'i rgyal po zhes bya ba'i ting nge 'dzin dang / chos 'dzin pa zhes bya ba'i ting nge 'dzin dang / ting nge 'dzin de dag thob bo/ /byang chub sems dpa' sems dpa' chen po sgrib pa thams cad rnam par sel bas blangs ma thag tu mkhan po la yon du gling bzhi rin po che sna bdun gyis yongs su gang ba 'bul bar rtsom pa dang / de nas chos kyi mkhan po des de la 'di skad ces smras so/ /yi ge gcig gi yon du yang med na yi ge drug pa'i rig sngags chen mo'i lta ci smos/ rigs kyi bu nga ni khyod las len pa yang med do/ /khyod kyang byang chub sems dpar gyur pa ste/ khyod ni 'phags pa yin gyi ma 'phags pa ma yin/ rigs kyi bu khyod ni ngas 'dul ba yin no/ /des de la mu tig gi phreng ba rin brgya stong ri ba phul ba dang / des smras pa/ rigs kyi bu nga'i tshig gis de bzhin gshegs pa dgra bcom pa yang dag par rdzogs pa'i sangs rgyas shAkya thub pa la phul cig /de nas sgrib pa thams cad rnam par sel bas chos smra ba de'i rkang pa la mgo bos phyag 'tshal te song ngo / /rnyed par bya ba rnyed cing bsam pa yongs su rdzogs nas 'dze ta'i tshal gyi gtsug lag khang ga la ba der song ste phyin pa dang bcom ldan 'das shAkya thub pa'i zhabs la phyag 'tshal nas phyogs gcig tu 'dug go/ /de nas bcom ldan 'das de bzhin gshegs pa dgra bcom pa yang dag par rdzogs pa'i sangs rgyas shAkya thub pas de la 'di skad ces bka' stsal to/ /rigs kyi bu khyod kyis rnyed pa rnyed dam/ bcom ldan 'das de bzhin te/ ji ltar bcom ldan 'das kyis mkhyen pa bzhin no/ /de nas yang dag par rdzogs pa'i sangs rgyas bye ba phrag bdun bcu rtsa bdun tshogs te/ de bzhin gshegs pa de dag gis gzungs sngags 'di gsungs so/ /na maH sab ta nA~M/ sa~M myag sa~M bud d+ha ko Ti nA~M/ tad ya thA oM tsa le tsun de swA hA/ gzungs sngags 'di ni yang dag par rdzogs pa'i sangs rgyas bye ba phrag bdun bcu rtsa bdun gyis gsungs so/ /ba spu'i khung bu de 'das nas nyi ma'i 'od ces bya ba'i ba spu'i khung bu de na byang chub sems dpa' bye ba khrag khrig brgya stong du ma gnas te/ nyi ma'i 'od ces bya ba'i ba spu'i khung bu de na gser gyi ri khri yod de/ ri re re zhing yang rtse mo khri nyis stong nyi khri nyis stong yod la/ ri de re re'i ngos ni rin po che pad ma rA gas brgyan/ ngos re re zhing yang lha'i nor bu rin po che'i skyed mos tshal shin du mdzes pa/ shin du dga' bar byed pa rnam pa sna tshogs dang lha'i rdzing bus brgyan/ khang pa brtseg ma brgya phrag stong du ma ni lha'i gser dang rin po che las byas shing mu tig dang dar gyi lda ldi ni bres/ mu tig gi se mo do brgya dag ni 'phyang ngo / /khang pa brtseg ma de'i nang na yid bzhin gyi nor bu rin po che sha ri da ka yod pas ni byang chub sems dpa' de dag la yo byad thams cad kyis bsnyen bkur byed do/ /de'i tshe byang chub sems dpa' de dag khang pa brtsegs ma der 'gro'o/ /der song nas kyang yi ge drug pa'i rig sngags kyang rjes su dran no/ /gang gi tshe na rjes su dran pa de'i tshe mya ngan las 'da' ba rtogs par 'gyur ro/ /mya ngan las 'da' ba'i sa de la de bzhin gshegs pa bdun mthong ngo / /byang chub sems dpa' sems dpa' chen po spyan ras gzigs kyi dbang po de yang mthong ngo / /mthong nas kyang sems dad pa skyed do/ /bskyed nas de'i tshe byang chub sems dpa' de dag khang pa brtseg ma de nas 'byung ngo / /byung nas kha cig ni 'chag sar 'gro'o/ /kha cig ni yid bzhin gyi nor bu rin po che'i skyed mos tshal du 'gro'o/ /kha cig ni rdzing bu dag tu 'gro'o/ /kha cig ni nor bu rin po che pad ma rA ga'i ri'i ngos la 'gro'o/ /dong nas skyil mo krung bcas/ lus drang por bsrang ste dran pa mngon par gzhag nas 'khod do/ /rigs kyi bu ba spu'i khung bu de na byang chub sems dpa' de lta bu dag gnas so/ /rigs kyi bu de 'das nas dbang po'i rgyal po zhes bya ba'i ba spu'i khung bu de na byang chub sems dpa' phyir mi ldog pa brgya phrag stong du ma gnas te/ dbang po'i rgyal po'i ba spu'i khung bu de na lha'i gser gyi ri brgyad khri yod do/ /ri de dag gi dbus na nor bu rin po che me tog pad ma ltar snang ba zhes bya ba zhig yod de/ gang gi tshe byang chub sems dpa' de dag sems par gyur pa de'i tshe de dag gi bsam pa grub par 'gyur ro/ /de ltar byang chub sems dpa' de dag ri'i rgyal po de la gnas shing zas dang skom gyi dran pa mi sgom mo/ /de dag 'khor ba'i sdug bsngal gyis gzir bar yang mi 'gyur ro/ /de dag 'khor ba'i sdug bsngal gyis gos par yang mi 'gyur ro/ /dus thams cad du mya ngan las 'das pa la sems shing gnas kyi/ de dag gi lus la gzhan sems pa med do/ /rigs kyi bu de 'das nas sman chen po zhes bya ba'i ba spu'i khung bu de na byang chub sems dpa' sems thog ma bskyed pa bye ba khrag khrig brgya phrag stong du gnas so/ /rigs kyi bu ba spu'i khung bu de na ri dgu khri yod de/ la la ni rdo rje'o/ la la ni dngul gyi'o/ /la la ni gser gyi'o/ /la la ni nor bu rin po che in dra nI la'i'o/ /la la ni pad ma ra ga'i'o/ / la la ni ma ra ka ta'i'o/ /la la ni shel gyi'o/ /ri'i rgyal po de lta bu dag yod do/ /ri re re zhing yang rtse mo brgyad khri yod de/ rin po che sna tshogs kyis brgyan pa/ shin du mdzes par byas pa rnam pa sna tshogs pa yid tu 'ong ba dag go/ /rtse mo de dag la dri za dag gnas te/ de dag dus thams cad du ba spu'i khung bu nas sil snyan 'byung ba 'dzin to/ /gang sems thog ma bskyed pa'i byang chub sems dpa' de dag kyang stong pa nyid dang mtshan ma med pa la sems te/ kye ma'o sdug bsngal lo/ /skye ba dang / rga ba dang / na ba dang / 'chi ba sdug bsngal lo/ /sdug cing mdza' ba dang bral zhing mi sdug cing mi mdza' ba dang phrad pa ni sdug bsngal lo/ / bstir med par skyes pa ni sdug bsngal lo/ /thig nag po 'debs par skyes pa ni sdug bsngal lo/ /sems can yi dags kyi grong khyer du skyes pa rnams ni sdug bsngal lo zhes de lta bu'i lus la skyo ba dag bsams nas de'i tshe skyil mo krung bcas te/ lus drang por bsrang nas dran pa mngon par gzhag ste ri de dag la gnas so/ /rigs kyi bu de 'das nas sna tshogs kyi rgyal po zhes bya ba'i ba spu'i khung bu de na rang sangs rgyas bye ba khrag khrig brgya phrag stong du ma gnas te rab de dag ni 'ab dang / gdung ba dang / char 'bebs pa dang / glog gtong ba'i cho 'phrul dag byed de/ ba spu'i khung bu de na ri'i rgyal po brgya phrag stong dag yod do/ /ri'i rgyal po de dag thams cad kyang rin po che sna bdun las byas pa'o/ /ri'i rgyal po de dag la shing dpag bsam rnam pa sna tshogs par yod de/ sdong po ni mu tig dmar po dang / lo ma ni gser dang / dngul las byas pa'o/ /rin po che rnam pa du ma dang rgyan rnam pa sna tshogs pa dag ni 'phyang ngo / /cod pan dang / rna cha dang / phreng ba'i chun po dang / dpung rgyan dang / se mo do dang / se mo do phyed pa dag kyang rab tu 'phyang ngo / /yul ka shi ka nas byung ba'i gos dag kyang rab tu 'phyang ngo / /gser dang dngul gyi dril bu dag kyang sgra sil grag ste/ de 'dra ba'i ri'i rgyal po de dag la rang sangs rgyas de dag gnas te/ mdo dang / dbyangs kyis bsnyad pa dang / lung bstan pa dang / tshigs su bcad pa dang / ched du brjod pa dang / gleng gzhi dang / rtogs pa brjod pa dang / de lta bu 'das pa dang / skyes pa'i rabs dang / shin du rgyas pa dang / chos rmad tu byung ba dang / chos gtan la dbab pa bstan pa'i gtam rnam pa du ma dag phan tshun du smra ste/ de'i tshe sgrib pa thams cad rnam par sel ba ba spu'i khung bu de 'das nas thams cad kyi tha ma na ba spu'i khung bu rgyal mtshan gyi rgyal po zhes bya ba zhig yod de/ ba spu'i khung bu de yang dpag tshad brgyad khri bzhi stong yod do/ ba spu'i khung bu de na ri brgyad khri bzhi stong yod de/ /rin po che sna tshogs kyis brgyan pa yid tu 'ong ba rnam pa sna tshogs pa'o/ /ri'i rgyal po de la shing dpag bsams brgya phrag stong du ma yod do/ / tsan dan gyi shing brgya phrag stong du ma yod do/ /byi ru'i shing brgya phrag stong du ma dag yod do/ /ba spu'i khung bu de nas ni rdo rje las byas pa'o/ /ba spu'i khung bu de na gser dang rin po che las byas pa'i khang pa brtseg ma dgu khri dgu stong yod de/ mu tig dang dar gyi lda ldi ni bres/ mu tig gi se mo do ni spyangs/ dril bu'i phreng ba ni spyangs/ zla ba bzhin du bzang ba'i rin po ches ni snang bar byas te/ khang pa brtseg ma de na gser gyi skas rin po ches yongs su spras pa rnam pa sna tshogs pa dga' bar byed pa dag kyang yod do/ /khang pa brtseg ma de dag na de bzhin gshegs pa'i sku 'dzam bu'i gling du mngon par phyogs shing chos 'chad pa yang bzhugs te/ 'di lta ste/ pha rol tu phyin pa drug bstan pa ston par mdzad de/ 'di lta ste/ sbyin pa'i pha rol tu phyin pa bstan pa ston par mdzad/ tshul khrims kyi pha rol du phyin pa bstan pa ston par mdzad/ bzod pa'i pha rol du phyin pa bstan pa ston par mdzad/ brtson 'grus kyi pha rol du phyin pa bstan pa ston par mdzad/ bsam gtan gyi pha rol du phyin pa bstan pa ston par mdzad shes rab kyi pha rol du phyin pa bstan pa ston par mdzad de/ de ltar de dag 'dzam bu'i gling na gnas pa'i mi rnams la chos rnam pa sna tshogs dag dus su 'chad do/ /de ltar rigs kyi bu de dag gis byang chub sems dpa' sems dpa' chen po spyan ras gzigs kyi dbang po'i ba spu'i khung bu de dag 'dze ta'i tshal gyi gtsug lag khang du phyin pa'i lha dang / klu dang / gnod sbyin dang / lha ma yin dang / nam mkha' lding dang / mi 'am ci dang / mi dang / mi ma yin pa dang / dbang phyug chen po dang / mthu bo che la sogs te lha'i bu tshogs pa dag dang / byang chub sems dpa' bye ba khrag khrig brgya phrag stong du ma dag gis mthong ngo / /de nas bcom ldan 'das la sgrib pa thams cad rnam par sel bas 'di skad ces gsol to/ /bcom ldan 'das ba spu'i khung bu gzhan dag mchis sam ma mchis/ bcom ldan 'das kyis bka' stsal pa/ rigs kyi bu de 'das nas byang chub sems dpa' sems dpa' chen po spyan ras gzigs kyi dbang po'i rkang pa g.yas pa'i mthe bo de las mtsho chen po bzhi 'byung ste gting dpog mi nus so/ /gang gi tshe na rkang pa g.yas pa'i mthe bo las chu 'byung ba de'i tshe rta god ma'i gdong lta bur 'bab ste/ de'i tshe thal ba'i phung por 'gro'o/ /rigs kyi bu de ltar byang chub sems dpa' sems dpa' chen po spyan ras gzigs kyi dbang po'i byin gyis brlabs ni de 'dra'o/ /de nas bcom ldan 'das la sgrib pa thams cad rnam par sel bas 'di skad ces gsol to/ /bcom ldan 'das ba spu'i khung bu de yang ma mchis pa lags sam/ bcom ldan 'das kyis bka' stsal pa/ rigs kyi bu de yang med pa yin no/ /de nas bcom ldan 'das la sgrib pa thams cad rnam par sel bas 'di skad ces gsol to/ /bcom ldan 'das byang chub sems dpa' spyan ras gzigs kyi dbang po mchi 'am/ bcom ldan 'das kyis bka' stsal pa/ byang chub sems dpa' sems dpa' chen po spyan ras gzigs kyi dbang po ni 'dze ta'i tshal gyi gtsug lag khang 'di nyid tu nga la blta ba dang / phyag bya ba dang / bsnyen bkur bya ba dang / dbang phyug chen po rgyu dang bcas te lung bstan pa'i phyir 'ong ngo / /de nas byang chub sems dpa' sems dpa' chen po 'phags pa spyan ras gzigs kyi dbang pos 'od zer sngon po dang / ser po dang / dmar po dang / dkar po dang / shel gyi kha dog dang / dngul gyi kha dog btang nas kha dog de dag 'dze ta'i tshal gyi gtsug lag khang du song ngo song nas bcom ldan 'das la lan gsum bskor te/ bstir med pa'i sems can dmyal ba chen por song ngo / /song nas bstir med pa'i sems can dmyal ba chen po bsil bar gyur to/ /de'i tshe 'dze ta'i tshal gyi gtsug lag khang du ltas bzang po byung bar gyur pa 'dze ta'i tshal gyi gtsug lag khang de lha'i gser rin po cher snang bar gyur te/ 'dze ta'i tshal gyi gtsug lag khang de ltar snang ngo / /de nas byang chub sems dpa' sems dpa' chen po spyan ras gzigs kyi dbang po bde ba can gyi 'jig rten gyi khams nas byung ste/ 'dze ta'i tshal gyi gtsug lag khang ga la ba de logs su song nas rim gyis 'dze ta'i tshal gyi gtsug lag khang ga la ba der phyin to/ /de nas 'dze ta'i tshal gyi gtsug lag khang du song ba dang / de'i tshe bcom ldan 'das kyis bya ka la ping ka'i dbyangs kyis bka' stsal pa/ rigs kyi bu khyod nga la lam/ khyod nyon mongs sam/ khyod kyis sems can yongs su smin par byas sam de nas bcom ldan 'das la byang chub sems dpa' sems dpa' chen po spyan ras gzigs kyi dbang pos 'di skad ces gsol to/ /bcom ldan 'das kyis ji ltar bka' stsal pa bzhin te/ bdag gis de lta bu'i las kyis bsgrubs so/ /de nas bcom ldan 'das kyis rigs kyi bu gang khyod kyis de 'dra ba'i las kyis bsgrubs pa legs so legs so/ /zhes bya ba byin no/ /de nas byang chub sems dpa' sems dpa' chen po spyan ras gzigs kyi dbang pos bcom ldan 'das la me tog pad ma phul nas/ bcom ldan 'das la de bzhin gshegs pa snang ba mtha' yas pas me tog pad ma 'di dag gsol te bsnyung ba ma mchis sam/ 'o brgyal ba ma mchis sam/ bzhengs pa yang ngam bde ba la reg par gnas sam zhes kyang gsung ngo zhes smras nas/ bcom ldan 'das kyis bzhes te g.yon phyogs su bzhag go/ /de nas lha'i bu dbang phyug chen po bcom ldan 'das ga la ba der song ste phyin nas/ bcom ldan 'das kyi zhabs la mgo bos phyag 'tshal te 'di skad ces gsol to/ /bcom ldan 'das bdag gis lung ston pa'i bshad pa thob par mdzad tu gsol/ bcom ldan 'das kyis bka' stsal pa/ song shig dang khyod la byang chub sems dpa' sems dpa' chen po spyan ras gzigs kyi dbang pos lung ston par 'gyur ro/ /de nas lha'i bu dbang phyug chen po song ste/ byang chub sems dpa' sems dpa' chen po spyan ras gzigs kyi dbang po'i rkang pa la phyag 'tshal nas spyan ras gzigs kyi dbang phyug chen po chos 'dzin pa/ pad ma'i zhal/ pad ma la dgyes pa/ phyag na me tog pad ma bzang po mnga' ba/ pad ma'i dpal dang ldan pa/ yongs su bskor ba 'gro ba dbugs 'byin par mdzad pa/ sa'i spyan mchog mdzad pa/ sim par mdzad pa la phyag 'tshal lo zhes lha'i bu dbang phyug chen pos byang chub sems dpa' sems dpa' chen po spyan ras gzigs kyi dbang po la de ltar bstod nas kha rog ste 'dug pa dang / de nas byang chub sems dpa' sems dpa' chen po spyan ras gzigs kyi dbang pos dbang phyug chen po de la 'di skad ces smras so/ /rigs kyi bu khyod ci'i phyir kha rog ste 'dug /de nas lha'i bu dbang phyug chen pos 'di skad ces smras so/ /bdag bla na med pa yang dag par rdzogs pa'i byang chub tu lung bstan pa stsal du gsol/ /de nas bcom ldan 'das kyis gsungs pa/ rigs kyi bu khyod 'jig rten gyi khams phye ba zhes bya bar de bzhin gshegs pa dgra bcom pa yang dag par rdzogs pa'i sangs rgyas/ rig pa dang rkang par ldan pa/ bde bar gshegs pa/ 'jig rten mkhyen pa/ bla na med pa skyes bu 'dul ba'i kha lo sgyur ba/ lha dang mi rnams kyi ston pa/ sangs rgyas bcom ldan 'das dbang phyug ces bya bar 'gyur ro/ /de nas lha mo u ma song nas byang chub sems dpa' sems dpa' chen po spyan ras gzigs kyi dbang po'i rkang pa la mgo bos phyag 'tshal nas/ byang chub sems dpa' sems dpa' chen po spyan ras gzigs kyi dbang po la bstod par rtsom pa/ byang chub sems dpa' sems dpa' chen po spyan ras gzigs kyi dbang po chen po srog sbyin par mdzad pa/ sa'i spyan mchog mdzad pa/ pad ma bzang po phyag na mnga' ba/ pad ma'i dpal dang ldan pa/ yongs su bskor ba/ mya ngan las 'da' ba'i sa ston pa/ legs par dgongs par mdzad pa/ chos 'dzin pa/ la phyag 'tshal lo zhes de ltar lha mo u mas byang chub sems dpa' sems dpa' chen po spyan ras gzigs kyi dbang po la bstod de gsol pa/ bud med kyi lus smad pa las bdag yongs su thar bar mdzad du gsol/ mngal na gnas shing sha ma gang ba'i sdug bsngal ba dang rtag tu 'dzin pa las bdag yongs su thar bar mdzad du gsol/ de nas byang chub sems dpa' sems dpa' chen po spyan ras gzigs kyi dbang pos de la 'di skad ces smras so/ /sring mo khyod 'jig rten gyi khams gangs kyi ri'i g.yas phyogs kyi ngos su u ma'i dbang phyug ces bya ba'i de bzhin gshegs pa dgra bcom pa yang dag par rdzogs pa'i sangs rgyas/ rig pa dang rkang par ldan pa/ bde bar gshegs pa/ 'jig rten mkhyen pa/ bla na med pa skyes bu 'dul ba'i kha lo sgyur ba/ lha dang mi rnams kyi ston pa/ sangs rgyas bcom ldan 'das 'jig rten du 'byung bar 'gyur ro/ /de nas lha mo u mas lung bstan pa thob bo/ /ltos shig sgrib pa thams cad rnam par sel ba byang chub sems dpa' sems dpa' chen po spyan ras gzigs kyi dbang pos de dag thams cad bla na med pa yang dag par rdzogs pa'i byang chub tu lung bstan te/ dbang phyug chen po'i le'u 'di yang bshad do/ /de nas bcom ldan 'das la sgrib pa thams cad rnam par sel bas 'di skad ces gsol to/ /bcom ldan 'das spyan ras gzigs kyi dbang po mchis te/ long ba dag gis ni mig thob bo/ /de ring bdag ni tshe'i 'bras bu mchis par gyur to/ /bdag de ring ni bsam pa bzhin du grub bo/ /bdag de ring ni bsam pa yongs su rdzogs so/ /bdag de ring ni byang chub kyi lam la bar chad ma mchis par gyur to/ /legs par dgongs pa chos kyi sku mya ngan las 'das pa ston to/ /de nas bcom ldan 'das la yang sgrib pa thams cad rnam par sel bas 'di skad ces gsol to bcom ldan 'das de ring bdag la spyan ras gzigs kyi dbang po'i yon tan gyi bye brag bshad du gsol/ bcom ldan 'das kyis bka' stsal pa/ sgrib pa thams cad rnam par sel ba 'di lta ste/ dper na ri'i rgyal po khor yug dang / khor yug chen po dang / ri'i rgyal po mu tsa di dang / ri'i rgyal po chen po dang / ri'i rgyal po gsus shol dang / ri'i rgyal po mi ston pa dang / ri'i rgyal po thams cad du gtogs pa dang / ri'i rgyal po 'bar ba'i kha dang / ri'i rgyal po rtse mo brgya pa dang / ri'i rgyal po khang pa dang / ra'i rgyal po nor bu rin po che chen po dang / ri'i rgyal po ston pa dang / ri'i rgyal po dus ma yin par ston pa dang / ri'i rgyal po de dag srang gcig la btab na/ rigs kyi bu ngas ri'i rgyal po de dag srang 'di snyed cig go zhes sam/ srang brgya'o zhes sam srang stong ngo zhes sam/ bye ba khrag khrig brgya phrag stong zhes sam/ grangs su yang / char yang / bgrang bar yang nus kyi/ rigs kyi bu byang chub sems dpa' sems dpa' chen po spyan ras gzigs kyi bsod nams kyi phung po bgrang mi nus so/ /rigs kyi bu 'di lta ste/ dper na rdul phra rab kyi tshad ni ngas bgrang nus kyi/ byang chub sems dpa' sems dpa' chen po spyan ras gzigs kyi dbang po'i bsod nams kyi tshogs ni ngas bgrang bar mi nus so/ /rigs kyi bu 'di lta ste/ dper na rgya mtsho mching rnam chen po ni ngas thegs pa re re nas bgrang nus kyi/ byang chub sems dpa' sems dpa' chen po spyan ras gzigs kyi dbang po'i bsod nams kyi tshogs ni bgrang mi nus so/ /rigs kyi bu 'di lta ste dper na shing shir sha'i tshal ni ngas 'dab ma re re nas bgrang nus kyi/ byang chub sems dpa' sems dpa' chen po spyan ras gzigs kyi dbang po'i bsod nams kyi tshogs ni bgrang bar mi nus so/ /sgrib pa thams cad rnam par sel ba 'di lta ste/ dper na ri rab ri'i rgyal po ni gro ga'i phung por gyur/ rgya mtsho mching rnam chen po na snag tshar gyur/ gling chen po bzhi ni gnas pa'i skyes pa dang / bud med dang / khye'u dang / bu mo de dag thams cad ni yi ge par gyur te/ ri'i rgyal po mtha' yas mu med pa yi ger bris kyang yi ge 'brum bu re re nas bgrang nus kyi/ byang chub sems dpa' sems dpa' chen po spyan ras gzigs kyi dbang po'i bsod nams kyi tshogs ni bgrang mi nus so/ /rigs kyi bu 'di lta ste/ dper na de bzhin gshegs pa dgra bcom pa yang dag par rdzogs pa'i sangs rgyas gang gA'i klung gi bye ma phrag bcu gnyis dang mnyam pa'i na bza' dang / bshos dang / mal stan dang / na ba'i rkyen gyi sman gyi yo byad thams cad kyis de bzhin gshegs pa de dag la bsnyen bkur byas na/ de bzhin gshegs pa de dag la bsnyen bkur byas pa'i bsod nams kyi phung po de ni rigs kyi bu byang chub sems dpa' sems dpa' chen po spyan ras gzigs kyi dbang po'i skra'i nyag ma gcig gi rtse mo la gnas pa'i bsod nams dang mnyam mo/ /sgrib pa thams cad rnam par sel ba 'di lta ste/ byang chub sems dpa' sems dpa' chen po spyan ras gzigs kyi dbang po ni ting nge 'dzin brgya phrag tu ma dang ldan te/ 'di lta ste/ rab tu 'jom zhes bya ba'i ting nge 'dzin dang / rgyan par byed ces bya ba'i ting nge 'dzin dang / rgyan par mi byed ces bya ba'i ting nge 'dzin dang / glog gi spyan zhes bya ba'i ting nge 'dzin dang / bzod par byed ces bya ba'i ting nge 'dzin dang / gzi can chen po zhes bya ba'i ting nge 'dzin dang / rnam par byed ces bya ba'i ting nge 'dzin dang / rdo rje'i phreng ba zhes bya ba'i ting nge 'dzin dang / dam pa sbyin byed ces bya ba'i ting nge 'dzin dang / mthu brgya pa zhes bya ba'i ting nge 'dzin dang / bkod pa mtha' yas pa shes bya ba'i ting nge 'dzin dang / spobs pa'i phung po zhes bya ba'i ting nge 'dzin dang / rgyal po'i dbang po zhes bya ba'i ting nge 'dzin dang rnam pa mang po zhes bya ba'i ting nge 'dzin dang / rdo rje'i sgo zhes bya ba'i ting nge 'dzin dang / rtag tu dam pa'i sbyin byed ces bya ba'i ting nge 'dzin dang / dbang po yongs su thar byed ces bya ba'i ting nge 'dzin dang / zhe sdang yongs su thar byed ces bya ba'i ting nge 'dzin dang / dbang po dam pa'i mig ces bya ba'i ting nge 'dzin dang / nyin byed dam pa'i mig ces bya ba'i ting nge 'dzin dang / chos la mngon pa zhes bya ba'i ting nge 'dzin dang / rdo rje mngal zhes bya ba'i ting nge 'dzin dang shin du ston pa zhes bya ba'i ting nge 'dzin dang / mya ngan 'da' byed ces bya ba'i ting nge 'dzin dang / 'od zer mtha' yas sgrub ces bya ba'i ting nge 'dzin dang / rnal 'byor ces bya ba'i ting nge 'dzin dang / 'thor ba zhes bya ba'i ting nge 'dzin dang / 'dzam bu'i gling gi dam pa'i mig ces bya ba'i ting nge 'dzin dang / sangs rgyas kyi zhing gi dam pa'i mig ces bya ba'i ting nge 'dzin dang / bya ba byas pa la mngon pa zhes bya ba'i ting nge 'dzin dang / skye dgu'i gnas shes bya ba'i ting nge 'dzin dang / mi zad par byed ces bya ba'i ting nge 'dzin dang / bstir med skems shes bya ba'i ting nge 'dzin dang / rgya mtsho ltar zab pa zhes bya ba'i ting nge 'dzin dang / 'khor brgya pa zhes bya ba'i ting nge 'dzin dang / rigs kyi bu byang chub sems dpa' sems dpa' chen po spyan ras gzigs kyi dbang po ni ting nge 'dzin de dag dang ldan no/ /sgrib pa thams cad rnam par sel ba 'di lta ste/ log par dad sel ces bya ba'i de bzhin gshegs pa rig pa dang rkang par ldan pa/ bde bar gshegs pa/ 'jig rten mkhyen pa/ skyes bu 'dul ba'i kha lo sgyur ba/ bla na med pa/ lha dang mi rnams kyi ston pa/ sangs rgyas bcom ldan 'das 'jig rten du byung ba de'i tshe de'i dus nas byang chub sems dpar gyur te/ de'i tshe de bzhin gshegs pa de'i spyan sngar byang chub sems dpa' sems dpa' chen po spyan ras gzigs kyi dbang po'i yon tan brjod pa de lta bu ngas thos so/ /byang chub sems dpa' kun du bzang po la sogs pa dang 'di 'dra bar ting nge 'dzin gyis 'gyes pa yang ngas mthong ngo / /gang gi tshe na kun du bzang po rdo rje gyen du 'phags pa'i ting nge 'dzin la zhugs pa de'i tshe byang chub sems dpa' sems dpa' chen po spyan ras gzigs kyi dbang po 'thor ba zhes bya ba'i ting nge 'dzin la zhugs so/ /gang gi tshe na byang chub sems dpa' sems dpa' chen po kun du bzang po zla ba dam pa'i mig ces bya ba'i ting nge 'dzin la zhugs pa de'i tshe na byang chub sems dpa' sems dpa' chen po spyan ras gzigs kyi dbang po nyi ma dam pa'i mig ces bya ba'i ting nge 'dzin la zhugs so/ /gang gi tshe na byang chub sems dpa' sems dpa' chen po kun du bzang po byugs pa zhes bya ba'i ting nge 'dzin la zhugs pa de'i tshe byang chub sems dpa' sems dpa' chen po spyan ras gzigs kyi dbang po nam mkha' mdzod ces bya ba'i ting nge 'dzin la zhugs so/ /gang gi tshe na byang chub sems dpa' sems dpa' chen po kun du bzang po rnam par byed ces bya ba'i ting nge 'dzin la zhugs pa de'i tshe byang chub sems dpa' sems dpa' chen po spyan ras gzigs kyi dbang po rdo rje'i lcags kyu zhes bya ba'i ting nge 'dzin la zhugs so/ /gang gi tshe byang chub sems dpa' sems dpa' chen po kun du bzang po dbang po'i 'gros shes bya ba'i ting nge 'dzin la zhugs pa de'i tshe byang chub sems dpa' sems dpa' chen po spyan ras gzigs kyi dbang po rgya mtsho ltar zab ces bya ba'i ting nge 'dzin la zhugs so/ /gang gi tshe na byang chub sems dpa' sems dpa' chen po kun du bzang po seng ge glal ces bya ba'i ting nge 'dzin la zhugs pa de'i tshe byang chub sems dpa' sems dpa' chen po spyan ras gzigs kyi dbang po seng ge rnam par rol ces bya ba'i ting nge 'dzin la zhugs so/ /gang gi tshe na byang chub s ems dpa' sems dpa' chen po kun du bzang po dam pa sbyin par byed ces bya ba'i ting nge 'dzin la zhugs pa de'i tshe byang chub sems dpa' sems dpa' chen po spyan ras gzigs kyi dbang po bstir med pa skems shes bya ba'i ting nge 'dzin la zhugs so/ /gang gi tshe na byang chub sems dpa' sems dpa' chen po kun du bzang po ba spu'i khung bu thams cad 'byed par byed pa de'i tshe byang chub sems dpa' sems dpa' chen po spyan ras g zigs kyi dbang po yang ba spu'i khung bu thams cad 'byed par byed nas de'i tshe byang chub sems dpa' sems dpa' chen po kun du bzang pos byang chub sems dpa' sems dpa' chen po spyan ras gzigs kyi dbang po la spyan ras gzigs kyi dbang po khyod kyi spobs pa de 'dra ba legs so legs so zhes smras so/ /de nas de bzhin gshegs pa log par dad sel gyis byang chub sems dpa' sems dpa' chen po kun du bzang po la 'di skad ces bka' stsal to/ /rigs kyi bu khyod kyis byang chub sems dpa' sems dpa' chen po spyan ras gzigs kyi dbang po'i spobs pa chung zad cig mthong du zad de/ byang chub sems dpa' sems dpa' chen po spyan ras gzigs kyi dbang po'i spobs pa ci 'dra ba de lta bu ni de bzhin gshegs pa dag la yang mi mnga'o zhes ngas log par dad sel las de skad thos so/ /de nas bcom ldan 'das la sgrib pa thams cad rnam par sel bas 'di skad ces gsol to/ / bcom ldan 'das theg pa chen po'i mdo'i rgyal po za ma tog bkod pa bshad du gsol/ /de'i slad du bdag cag chos kyi ros ngoms shing dga' bar bgyid do/ /bcom ldan 'das kyis bka' stsal pa/ rigs kyi bu gang dag theg pa chen po'i mdo'i rgyal po za ma tog bkod pa'i ming thos pa de dag la sngon gyi las kyi sgrib pa med do/ /gang dag pha rol kyi bud med la chags shing zhen pa'i las la brtson pa dang / gang pha dang ma gsod pa dang / dgra bcom pa gsod pa dang / mchod rten 'jom pa dang / de bzhin gshegs pa la ngan sems kyis khrag 'byin pa dang / de lta bu'i sdig pa la dga' ba dag la yang theg pa chen po'i mdo'i rgyal po za ma tog bkod pas sdig pa las thar bar byed do/ /de nas bcom ldan 'das la sgrib pa thams cad rnam par sel bas 'di skad ces gsol to/ /bcom ldan 'das bdag gis ji ltar theg pa chen po'i mdo za ma tog bkod pa sdig pa thams cad las thar bar bgyid pa 'tshal bar bgyi/ bcom ldan 'das kyis bka' stsal pa/ rigs kyi bu ri rab ri'i rgyal po'i g.yas phyogs kyi ngos la yang dag par rdzogs pa'i sangs rgyas drug gis dri ma med pa'i mthar brtags pa yod de/ de ltar ngas kyang brtags so/ /gang gos dkar po sngon por 'gyur ba dang / gang gos sngon po dkar por 'gyur ba ni/ gang gos dkar po de sngon por 'gyur ba de ni sdig pa'i phung por blta'o/ / gang gos sngon po de dkar por 'gyur ba de ni chos kyi phung por blta'o/ /rigs kyi bu de bzhin du theg pa chen po'i mdo'i rgyal po za ma tog bkod pa de ni sdig pa thams cad sreg cing dkar por byed do/ /sgrib pa thams cad rnam par sel ba 'di lta ste/ dper na dbyar kyi dus kyi tshe rtswa dang nags tshal dag shin du sngo bar 'gyur te/ de nas klu'i rgyal po kha brgya pa zhes bya ba gnas nas langs te rtswa dang shing gel pa dang sman dang nags tshal dag sreg par byed do/ /rigs kyi bu de bzhin du theg pa chen po'i mdo'i rgyal po za ma tog bkod pa 'di ni sdig pa thams cad sreg par byed do/ /gang theg pa chen po'i mdo'i rgyal po thos pa'i sems can de dag ni bde ba dang ldan pa yin te/ rigs kyi bu de dag ni so so'i skye bo ma yin par rig par bya'o/ /byang chub sems dpa' phyir mi ldog pa dang 'dra bar blta'o/ /de dag 'chi ba'i dus kyi tshe de bzhin gshegs pa bcu gnyis gshegs te/ rigs kyi bu ma 'jigs shig ma 'jigs shig /khyod kyis theg pa chen po'i mdo'i rgyal po thos so/ /khyod slar 'khor bar mi 'khor bar 'gyur ro/ /slar skye ba dang rga ba dang 'chi ba mi mthong bar 'gyur ro/ /'ga' zhig 'dod pa dang bral la mi dga' zhing mi 'dod pa dang phrad par mi 'gyur ro/ / rigs kyi bu bde ba can gyi 'jig rten gyi khams su song zhing de bzhin gshegs pa snang ba mtha' yas pa las dam pa'i chos thos par 'gyur ro zhes dbugs 'byin par mdzad de/ rigs kyi bu de ltar sems can de dag bde bar mchi bar 'gyur ro/ /de nas byang chub sems dpa' sems dpa' chen po spyan ras gzigs kyi dbang pos bcom ldan 'das kyi zhabs la mgo bos phyag 'tshal te phyogs gcig tu song ngo / /de nas sgrib pa thams cad rnam par sel ba cang mi zer bar 'dug go/ /lha dang klu dang gnod sbyin dang / lha ma yin dang nam mkha' lding dang / mi 'am ci dang lto 'phye chen po dang / mi dang mi ma yin pa de dag thams cad kyang dong ngo / /gang gi tshe na de dag dong ba de'i tshe bcom ldan 'das la tshe dang ldan pa dga' bos 'di skad ces gsol to/ /bcom ldan 'das bdag cag gi bslab pa'i sdom pa bshad du gsol/ bcom ldan 'das kyis bka' stsal pa/ dge slong gang dag bsnyen par rdzogs par byed 'dod pa des thog ma kho nar song ste sna tshogs pa dag gi gnas brtag par bya'o/ /brtags nas dge slong dag la btsun pa sna tshogs kyi gnas ni dag ste/ sna tshogs kyi gnas de na rus pa yang ma mchis so/ /bshang gci yang ma mchis te/ sna tshogs kyi gnas de ni yongs su dag go/ /dge slong dag kyang bsnyen par rdzogs par bgyir rung ngo zhes sbran to/ /bcom ldan 'das kyis bka' stsal pa/ tshul khrims dang mi ldan pas ni bsnyen par rdzogs par mi bya'o/ /gsol pa dang bzhi pa yang sbyin par mi bya'o/ /bar gyi gsol ba yang mi bya'o/ /mang du bshad ci dgos te/ dge slong dag tshul khrims dang mi ldan pa'i dge slong gis ni sna tshogs kyi gnas su yang 'gro bar mi bya na gsol ba dang bzhi ba ba blta ci smos te/ de dag ni ston pa'i bstan pa 'jig par byed pa'o/ /tshul khrims dang mi ldan pa de dag ni sbyin gnas dag gi nang du gnas sbyin par mi bya'o/ /de dag ni gtsug lag khang gi phyi rol du gnas su gzhug ste/ de dag la dge 'dun gyi zas kyang mi sbyin no/ /de dag la dge 'dun gyis yang 'os pa ma yin no/ /de dag la ni dge slong gi dngos po chung zad kyang med do/ /de nas bcom ldan 'das la tshe dang ldan pa dga' bos 'di skad ces gsol to/ /bcom ldan 'das gang gi tshe na de 'dra ba'i sbyin gnas dag 'byung bar 'gyur/ bcom ldan 'das kyis bka' stsal pa/ nga mya ngan las 'das nas lo sum brgya na de 'dra ba'i sbyin gnas dag 'byung ste/ gang gtsug lag khang la khyim du 'du shes par 'dzin pa de dag ni bu pho dang bu mo dag gis yongs su bskor bar 'gyur ro/ /de dag ni dge 'dun gyi khri dang / khri'u dang tshang thur dang sngas dang / mal stan dag la spyod par ma 'os pa la spyod par byed do/ /dge 'dun dag gi nye bar spyod pa la bshang ba dang gci bar byed do/ /mchil ma dag kyang 'dor zhing las kyi rnam par smin pa mi shes so/ /gang dge 'dun gyi nye bar spyod pa la mchil ma 'dor ba de dag ni lo bcu gnyis su shing sA la'i tshal du kha khab kyi mig tsam gyi srog chags su skye'o/ /gang dge 'dun gyi so shing la spyod du ma 'os pa la spyod pa de dag ni ru sbal dang / chu srin dang nya'i nang du skye'o/ /gang dge 'dun gyi til dang 'bras dang rgya shug dang / ku lan tha la sogs pa gang spyod par ma 'os pa la spyod pa de dag ni yi dags kyi grong khyer du skye ste/ mgal ba 'dra zhing king rus bsgreng ba lta bu bdag gi skra dang spus khebs pa/ kha khab kyi mig tsam du gyur pa'i sdug bsngal de dag lus la myong bar 'gyur ro/ /gang dge 'dun gyi zas kyis khyi gso bar byed pa de dag ni rigs dma' bar skye bar 'gyur ro/ /dbang po nyams par 'gyur ro/ /sgur po dang khyor por skye'o/ /gzhan gyi bzhin la lta zhing slongs mo byed par 'gyur ro/ /de nas shi 'phos nas kyang nad bu can du 'gyur ro/ /lus las rnag dang khrag 'dzag par 'gyur ro/ /chu ba rnams 'khums par 'gyur ro/ /gang gi tshe na langs pa de na sha rnams sa la lhags shing rus pa rnams snang bar 'gyur te/ de ltar de dag lo mang por/ lo brgya stong mang por lus kyi sdug bsngal myong bar 'gyur ro/ /gang dge 'dun gyi sa la mi 'os par spyod pa de dag ni bskal pa bcu gnyis su 'o dod 'bod pa'i sems can dmyal ba chen por skye ste/ lcags kyi thu lum bsregs pa khar bcug nas mchu dang so dag kyang lhags/ rkan yang gas mgul pa yang tshig /snying dang rgyu ma dag kyang thams cad du thams cad tshig nas rus pa'i lhag ma lus par 'gyur te/ dge slong dag de'i tshe las kyi rlung langs nas shi nas kyang slar 'tsho'o/ /de nas slar yang gshin rje skyong ba'i skyes bus bzung ngo / /de nas de dag gi las bdag gis bya ba'i las kyi dbang gis lce chen po 'byung bar 'gyur zhing lce de'i steng du gshol brgya stong gis rmo bar 'gyur te/ de ltar lo brgya phrag stong du sems can dmyal ba'i sdug bsngal myong bar 'gyur ro/ /de nas shi 'phos nas me'i rdza ma'i sems can dmyal ba chen por skyes te/ de nas gshin rje skyong ba'i skyes bu dag gis bzung nas lce de nyid la khab brgya stong gis 'bigs par byed do/ /de nas kyang las kyi dbang gis sos nas me'i 'obs su 'dor ro/ /me'i 'obs de nas kyang phyung nas chu bo be'i da ra ni chen por 'dor ro/ /de nas 'chi ba'i dus byas nas sems can dmyal ba gzhan dag tu skyes te/ de ltar 'khyam pa las bskal pa gsum zad nas shi 'phos te 'dzam bu gling du dbul po dang / dmus long gi nang du skye bar 'gyur ro/ /dga' bo de lta bas na dge 'dun dag gi rdzas ni bsrung bar bya'o/ /dge slong dag gang bslab pa sdom pas chos gos gsum bcang bar bya ste/ chos gos gcig ni dge 'dun la yid brtan cing dge 'dun gyis spyad pa'i phyir ro/ /chos gos gnyis pa ni rgyal po'i pho brang du 'gro ba'i phyir ro/ /chos gos gsum pa ni grong dang / grong khyer dang grong 'dab dang / ye 'ur 'khod pa dang tshong 'dus dag gi phyir te/ dge slong dag gis chos gos de gsum bcang bar bya'o/ /gang tshul khrims dang ldan pa dang yon tan dang ldan pa'i dge slong dag gis ni des bslab tshigs bcas pa 'di gzung bar bya'o/ /dge slong dag dge 'dun gyi rdzas la spyod par mi 'os pa dag gis ni yongs su spyad par mi bya'o/ /dge 'dun gyi ni me'i 'obs lta bu'o/ /dge 'dun gyi ni dug lta bu'o/ /dge 'dun gyi ni rdo rje lta bu'o/ /dge 'dun gyi ni khur lta bu'o/ /dug la ni gnyen po bya nus kyi dge 'dun gyi la ni gnyen po bya mi nus so/ /de nas bcom ldan 'das la tshe dang ldan pa dga' bos 'di skad ces gsol to/ /bcom ldan 'das kyis bka' stsal pa'i bslab tshigs la dge slong gang dag 'dzin par bgyid pa ni so sor thar pa'i sdom pas bsdams pa lags so/ /'dul ba la mngon pa lags so/ /bcom ldan 'das kyi bslab tshigs kyi rjes su bsrungs pa lags so/ /de nas tshe dang ldan pa dga' bos bcom ldan 'das kyi zhabs la mgo bos phyag 'tshal te song ngo / /de nas nyan thos chen po de dag bdag bdag gi sangs rgyas kyi zhing du dong ngo / /lha dang klu dang / gnod sbyin dang / dri za dang nam mkha' lding dang / mi 'am ci dang lto 'phye chen po dang / mi dang mi ma yin pa de dag kyang dong ngo / /bcom ldan 'das dgyes shing de skad ces bka' stsal pa dang / thams cad yod pa'i 'khor de dang lha dang mi dang / lha ma yin dang / dri zar bcas pa'i 'jig rten rnams bcom ldan 'das kyis bka' stsal pa la mngon par dga'o/ /'phags pa za ma tog bkod pa zhes bya ba theg pa chen po'i mdo rdzogs so// // rgya gar skad du/ Ar+ya rad na ka raN Da nA ma ma hA yA na sU tra/

CLOSE WINDOW