བོད་ཡིག

e-texts based on the Adarsha Input

This is a blank page without text @#/ /rgya gar skad du/ Ar+ya sad d+harma smri t+yu pa s+thA na/ bod skad du/ 'phags pa dam pa'i chos dran pa nye bar gzhag pa/ bam po dang po/ sangs rgyas dang byang chub sems dpa' dang rang sangs rgyas dang 'phags pa nyan thos thams cad la phyag 'tshal lo/ /'di skad bdag gis thos pa dus gcig na/ bcom ldan 'das rgyal po'i khab na la ti'i grong gi bram ze'i grong na bzhugs so/ /de'i tshe na tshe dang ldan pa sha ra dwa ti'i bu/ dge slong rab tu mang po dag dang lhan cig tu snga dro'i dus kyi tshe rgyal po'i khab tu bsod snyoms kyi phyir dong ngo / /de'i tshe dge slong rab tu mang po dag bsod snyoms kyi phyir rgyu ba na gzhan mu stegs can spyod pa pa kun tu rgyu ba dag ga la ba der dong ste/ gzhan mu stegs can spyod pa pa kun tu rgyu ba dag dang lhan cig tu yang dag par dga' bar 'gyur ba dang yang dag par mgu bar 'gyur ba'i chos kyi gtam byas nas gzhan mu stegs can spyod pa pa kun tu rgyu ba dag gis dris pa/ kye shAkya pa dag khyed cag gi dge sbyong gau ta ma lus kyi chad pa mi dge ba mi 'dod pa mi sdug pa yid du mi 'ong ba ston cing gzhan dag gi la yang rjes su yi rang bar mi byed pa bden nam/ nged cag kyang lus kyi chad pa mi 'dod pa mi sdug pa yid du mi 'ong ba ston cing gzhan dag gi la yang rjes su yi rang bar mi byed do/ /kye khyed cag gi dge sbyong gau ta ma ngag gi chad pa mi 'dod pa mi sdug pa yid du mi 'ong ba ston cing gzhan dag gi la yang rjes su yi rang bar mi byed/ nged cag kyang ngag gi chad pa mi 'dod pa mi sdug pa yid du mi 'ong ba ston cing gzhan dag gi la yang rjes su yi rang bar mi byed do/ /khyed cag gi dge sbyong gau ta ma yid kyi chad pa mi 'dod pa yid du mi 'ong ba ston cing gzhan dag gi la yang rjes su yi rang bar mi byed/ nged kyang yid kyi chad pa mi 'dod pa mi sdug pa yid du mi 'ong ba ston cing gzhan dag gi la yang rjes su yi rang bar mi byed na/ khyed kyi dge sbyong gau ta ma'i chos 'dul ba dang nged kyi tha dad du bya ba ci yod/ bsam pa ni ci yod/ khyad par ni ci yod/ gang gis na dge sbyong gau ta ma'i chos 'dul ba ni nged kyi las khyad par du 'phags/ dge sbyong gau ta ma de ni thams cad mkhyen pa yin no zhes bdag nyid sgrogs/ gzhan mu stegs can spyod pa pa kun tu rgyu ba dag gis de skad dris pa dang / dge slong gsar du rab tu byung ba dag tshe dang ldan pa shA ri'i bu dang bral bas rjes su yi rang bar yang mi byed lan yang ma btab bo/ /de nas dge slong rab tu mang po tshe dang ldan pa sha ra dwa ti'i bu dang bral ba dag bsod snyoms kyi bya ba byas nas na la ti'i grong ga la ba der dong ste phyin nas/ dge slong rab tu mang po dag zas kyi bya ba byas nas 'khod do/ /de nas tshe dang ldan pa sha ra dwa ti'i bu phyi zhig na bsod snyoms blangs te na la ti'i grong ga la ba der song ngo / /de nas dge slong rab tu mang po tshe dang ldan pa sha ra dwa ti'i bu ga la ba der dong ste phyin nas dge slong rab tu mang po dag gis tshe dang ldan pa shA ra dwa ti'i bu la bsnyad do/ /de nas tshe dang ldan pa sha ra dwa ti'i bus dge slong rab tu mang po dag la 'di skad ces smras so/ /gal te bdag tshe dang ldan pa khyed dang lhan cig rgyal po'i khab kyi lam srang dang bzhi mdo dang / sum mdo gcig tu rim gyis dong ba las/ gzhan mu stegs can spyod pa pa kun tu rgyu ba rnams dang phrad par gyur na ni des na bdag gis gzhan mu stegs can spyod pa pa kun tu rgyu ba de dag chos dang 'thun pas tshar bcad zin pa zhig na/ kye ma bdag kyang lam srang dang bzhi mdo dang sum mdo gzhan nas bsod snyoms la rgyu rgyu nas 'dir phyin te gang tshe dang ldan pa dag gzhan mu stegs can spyod pa pa kun tu rgyu ba rnams dang lhan cig gtam byas pa'i dri ba'i tshul de ni bdag gis tshor yang ma tshor ro/ /tshe dang ldan pa dag bcom ldan 'das kun tu spyan mnga' ba thams cad mngon sum pa/ las dang 'bras bu dang rnam par smin pa mkhyen pa de ha cang mi ring ba zhig na mu stegs kyi lta ba can thams cad zil gyis mnan nas/ nyan thos dang dge bsnyen dang lha dang mi rnams la las dang 'bras bu rnam par smin pa'i chos ston gyis khyed de la zhus shig dang de yang las dang rnam par smin pa thams cad ston par mdzad de/ gang lha dang bcas pa/ bdud dang bcas pa/ tshangs pa dang bcas pa/ dge sbyong dang bram zer bcas pa'i skye dgu dag gis ma mthong ba de khyed la ston par mdzad cing gang bdag cag gi mngon sum du ma gyur pa de yang khyod la bcom ldan 'das shin tu mngon sum tu gyur pa/ las dang 'bras bu rnam par smin pa mkhyen pa ston par mdzad do/ /de nas dge slong rab tu mang po dag bcom ldan 'das ga la ba der dong ngo / / de nas dge slong de dag gis bcom ldan 'das nyin mo'i gnas pas bzhugs pa/ ri rab ltar rang gi 'od kyi dra bas mngon par 'bar ba/ nyin mo'i nyi ma ltar snang bas rab tu gsal ba/ mtshan mo'i zla ba ltar zhi bas rab tu sim par mdzad pa/ mtsho ltar shin tu gsal ba/ rgya mtsho ltar zab pa/ ri rab ltar mi g.yo ba/ seng ge ltar dpa' ba/ pha ma ltar 'byung po thams cad kyi skyabs su gyur pa thugs rje chen pos brlan pa'i thugs sems can thams cad kyi gnyen gcig par gyur pa/ byams pa dang snying rje dang dga' ba dang btang snyoms kyi rten du gyur pa/ byang chub kyi phyogs kyi chos chen po sum cu rtsa bdun gyis sku brgyan pa/ rab tu dang bas lus can thams cad kyi mig mgu bar mdzad pa/ zla ba dang nyi ma'i 'od zil gyis gnon pa/ shAkya'i rgyal po'i sras kun tu spyan mnga' ba/ spyan dri ma gsum dang bral ba bden pa gnyis gsung ba/ sdug bsngal gnyis mkhyen pa/ bsgom pa gnyis bsgoms shing mngon sum du mdzad pa/ lam gyi 'bras bu mngon du mdzad pa/ 'gog pa'i de nyid mkhyen pa/ khams gsum mngon sum du mdzad pa'i spyan mnga' ba/ khams gsum gzhan yang dag par ston pa/ khams bcwa brgyad kyi de nyid mkhyen pa/ mos pa yid la byed pa'i de nyid mkhyen pa/ yon tan gyi klung rang gi yon tan bcwa brgyad dag dang ldan pa/ srid pa'i 'ching ba las rnam par grol ba/ stobs bcu dang ldan pa/ bsnyengs pa mi mnga' ba bzhis mi bsnyengs pa/ thugs rje chen po dang ldan pa/ dran pa nye bar gzhag pa gsum dang rtag tu ldan pa de mthong ngo / /de nas dge slong rab tu mang po dag chos gos phrag pa gcig la gzar nas pus mo g.yas pa'i lha nga sa la btsugs te/ bcom ldan 'das kyi zhabs la mgo bos phyag 'tshal nas dul bas mgo btud de phyogs gcig tu 'khod do/ /de nas dge slong rab tu mang po dag gis dge slong gcig cig bsgo ba dang bcom ldan 'das ga la ba der shin tu nye bar phyin nas/ yang de bzhin du bcom ldan 'das kyi zhabs la mgo bos phyag 'tshal te/ bcom ldan 'das la 'di skad ces gsol to/ /bcom ldan 'das 'dir bdag snga dro'i dus su lhung bzed dang chos gos 'tshal nas rgyal po'i khab tu bsod snyoms la mchi mchi na zhes bya ba snga ma bzhin te/ gzhan mu stegs can spyod pa pa kun tu rgyu ba rnams dang lhan cig lus kyi chad pa dang ngag gi chad pa dang yid kyi chad pa sngon du 'gro ba'i gtam 'dri ba'i bar snga ma bzhin te/ de dag bcom ldan 'das la gsol to/ /de nas bcom ldan 'das kyis de'i tshe dge slong de dag dang na la ti'i grong gi bram ze la sogs pa la 'di skad ces bka' stsal to/ /dge slong dag khyed cag la chos bshad par bya ba 'di lta ste/ dam pa'i chos dran pa nye bar gzhag pa zhes bya ba'i chos kyi rnam grangs thog mar dge ba/ bar du dge ba/ tha mar dge ba/ don bzang po/ tshig 'bru bzang po/ ma 'dres pa/ yongs su rdzogs pa/ yongs su dag pa/ yongs su byang ba/ tshangs par spyod pa/ yang dag par rab tu bstan par byas/ de legs par rab tu nyon la yid la zung shig dang bshad par bya'o/ /bcom ldan 'das de ltar 'tshal lo zhes gsol te/ dge slong de dag bcom ldan 'das la nyan pa dang bcom ldan 'das kyis de dag la 'di skad ces bka' stsal to/ /dge slong dag dam pa'i chos dran pa nye bar gzhag pa zhes bya ba'i chos kyi rnam grangs de gang yin zhe na/ 'di lta ste/ chos la yang chos nyid du/ chos ma yin pa la yang chos ma yin pa nyid du mthong ba de dran pa rtag tu nye bar gnas par 'gyur zhing 'di la the tshom yang mi skye/ chos nyan pa la mngon par dga' bar yang 'gyur/ rgan rabs la yang rim gro byed do/ / de ni lus kyi las dang ngag gi las dang yid kyi las gsum gyi las kyi 'bras bu dang 'chi ba dang skye ba'i rnam par smin pa shes par 'gyur te/ lta ba ma log pa yin zhing gzhan gyis kha mi phyin par 'gyur ro/ /dge slong dag de la lus kyi chad pa rnam pa gsum ste/ srog gcod pa dang ma byin par len pa dang 'dod pas log par g.yem pa'o/ /de la srog gcod pa ji lta bu yin zhe na/ sems can pha rol la sems can du 'du shes shing bsams bzhin du srog chags bsad de srog dang bral bar byas pa yin no/ /de yang rnam pa gsum ste/ chen po dang 'bring dang tha ma'o/ /de la chen po ni dgra bcom pa la sogs pa bsad pa ste mnar med par 'gro ba'o/ /'bring ni lam la gnas pa bsad pa'o/ /tha ma ni dud 'gro dang tshul khrims 'chal pa spyad pa bsad pa'o/ /yang rnam pa gsum ste/ 'das pa dang ma 'ongs pa dang da ltar byung ba'i 'o/ /yang rnam pa gsum ste/ 'dod chags kyis byas pa dang zhe sdang gis byas pa dang gti mug gis byas pa'o/ /de la 'dod chags kyis byas pa ni ri dgas la sogs pa la'o/ /zhe sdang gis byas pa ni sbrul dang ne'u le la sogs pa la'o/ /gti mug gis byas pa ni mchod sbyin la sogs pa la'o/ /yang rnam pa gsum ste/ rang gis byas pa dang gzhan gyis bcol ba dang gnyi gas byas pa'o/ /rgyu lngas srog gcod pa byas kyang kha na ma tho bas gos par mi 'gyur te/ 'di lta ste/ lam du 'gro bar zhugs pa mi shes pas srog chags phra mo dang grog sbur la sogs pa srog dang bral bar byed pa dang / gzhan la mtshon cha gzas pa las bsam pa dang mi ldan par gzhan la phog ste de srog dang bral ba dang / nad pa la sman pa phan par 'dod pas nyes par ma mthong ste sman byin pa las de shi ba dang / de bzhin du mas bu gdul bar bya ba'i phyir brdeg pa las de srog dang bral ba dang me 'bar ba'i nang du srog chags mi 'dod bzhin du lhung ba ste rgyu rnam pa de lngas srog bcad par gyur kyang gos par mi 'gyur ro/ /yang srog gcod pa rnam pa gsum ste/ gzhan la bsgo ba dang bdag nyid byed pa dang gnyi gas byed pa'o/ /gzhan yang ma byin par len pa rdzogs pa ji lta bu yin zhe na/ rnal 'byor spyod pa chos la chos kyi rjes su lta zhing gnas pa des/ thos pa las byung ba'i shes pa 'am lha'i mig gis mthong ste pha rol gyis yongs su bzung ba la bdag gir bya ba'i bsam pas rku bar byed pa 'di ni ma byin par len pa rdzogs pa yin no/ /'bras bu chung ba ji lta bu yin zhe na/ 'di lta ste/ rgyal po'i chad pas nyen pa dang bla ma'i don dang / pha ma nad pa dang rang sangs rgyas dang dgra bcom pa dang phyir mi 'ong ba dang rgyun tu zhugs pa la sogs pa dang nad pa dang ltogs pa de dag gi don du ma byin par blangs pa 'di ni 'bras bu chung ba yin no/ /ma byin par len pa'i sdom pa ma blangs pas ma byin par len pa 'di ni rnam par smin pa chung ba yin no/ /gzhan yang 'bras bu chung bar 'gyur b a ni ma byin par len pa byas nas sems kyis 'chags par byed 'gyod la phyir zhing mi byed pha rol yang ma byin par len pa las phyir zlog par byed sdom pa'i lung yang 'bogs par byed lam la yang 'jog par byed ma byin par len pa spong ba dag la 'jog par byed cing las kyi nyer bsdogs dang las kyi 'jug mi byed pa'o/ /ma byin par len pa'i las kyi nyer bsdogs ji lta bu yin zhe na/ 'di la ma byin par len pa pos pha rol la g.yo sgyu byed cing gsang thabs su smra ba dang 'jal lugs la g.yo byed pa dang mi rigs pa'i las lhag par spyod pa rnam pa 'di dag ni las kyi nyer bsdogs yin no/ /las ji lta bu yin zhe na/ gang gi tshe pha rol gyis yongs su bzung ba'i rdzas kyi rnam pa ma byin par len pa 'di ni las yin no/ /las kyi 'jug ji lta bu yin zhe na/ 'di la byas nas rjes su yi rang bar byed cing goms par byed la mang du thos te rjes su yi rang ba kun tu 'chab par byed/ tshul khrims dang ldan pa gzhan ma byin par len pa la rab tu 'jog par byed pa 'di ni las kyi mjug yin no/ /rnam pa 'di gsum gyis ma byin par len pa'i las kyi nyer bsdogs dang mjug dang bral ba ma byin pa len pa'i chad pa'i 'bras bu chung bar 'gyur te myong bar 'gyur bar nges pa ma yin no/ /gzhan yang 'dod pas log par g.yem pa ji lta bu yin zhe na/ rnal 'byor spyod pa chos la chos kyi rjes su lta bas mthong ste/ 'di la 'dod pas log par g.yem pa kun tu spyod pa na rang gi chung ma 'am gzhan gyi chung ma dag gi skye gnas ma yin par 'jug par byed/ gzhan byed pa la yang rjes su yi rang bar byed/ mi byed pa yang thabs kyis byed du 'jug pa 'di ni 'dod pas log par g.yem pa zhes bya'o/ /'dod pas log par g.yem pa'i 'bras bu chung bar 'gyur ba ji lta bu yin zhe na/ 'di la byas nas 'gyod cing 'chags te/ rjes su yi rang bar mi byed/ gzhan 'dod pas log par g.yem pa yang phyir zlog par byed/ lam la 'jog par byed/ las kyi nyer bsdogs dang las kyi mjug dang bral ba'i sems yin zhing tshul khrims dang ldan pa yin te/ 'di ni 'dod pas log par g.yem pa'i 'bras bu chung bar 'gyur zhing myong bar 'gyur bar ma nges pa yin no/ /lus kyi chad pa rnam pa gsum po de dag ni 'bras bu chung ba dang 'bras bu zhan par 'gyur ro/ /de dag ni nga yi nyan thos sam nga las thos nas las dang 'bras bu rnam par smin pa shes shing gzhan gyis kha drang du mi rung ba gzhan la rag ma las pa ma gtogs pa/ gzhan mu stegs can spyod pa pa kun tu rgyu ba rnams sam lha dang bcas pa'i 'jig rten nam bdud dang bcas pa 'am tshangs pa dang bcas pa 'am dge sbyong dang bram zer bcas pa'i skye dgu 'am lha dang mi dang lha ma yin du bcas pas rtogs pa'i yul ma yin no/ /gzhan yang ngag gi chad pa lci ba ji lta bu yin zhe na/ rnal 'byor spyod pa chos dang las dang rnam par smin pa shes pa yin te/ ngag gi chad pa rnam pa bzhi la 'di lta ste/ brdzun dang phra ma dang tshig rtsub po dang tshig kyal pa dang bzhi'o/ /de la brdzun gang zhe na/ bdag nyid la bdag nyid slu zhing gzhan yang slu ba yin te/ smras pa'i tshe rgyal po 'am blon po'i mngon sum du gzhan dag la gnod pa 'am 'phrog par byed pa log pas bskyed pa'i brdzun gyi skyon rab tu 'jug pa 'di ni brdzun du smra ba ngag gi chad pa rdzogs pa yin te/ sems can dmyal ba myong bar 'gyur ba yin no/ /gzhan yang ngag gi chad pa phra ma zhes bya ba ni don gcig la 'thun par zhugs pa rnams la dbyen bya ba'i bsam pas tshig rjod par byed pa 'di ni phra ma'i ngag gi chad pa yin no/ /phra ma'i 'bras bu chung ba ji lta bu yin zhe na/ bdag gti mug gis ngan pa byas so zhes 'chags par byed gzhan phra ma la mngon par dga' ba zlog par byed lam la yang dag par 'jog par byed la las kyi nyer bsdogs dang las kyi 'jug mi byed pa yin no/ /las kyi nyer bsdogs ji lta bu yin zhe na/ 'di la phra ma la mngon par dga' ba nyon mongs pa rgyags pa la mngon par zhugs pa'i tshig gzhan du btags nas gzhan la smra ba 'di ni las kyi nyer bsdogs yin no/ /phra ma'i las kyi lam dang yang dag par rab tu ldan pa ji lta bu yin zhe na/ 'di la sdang ba'i sems kyis yang dang yang du gzhan 'byed la rjes su yi rang zhing kun dga' bar byed pa 'di ni phra ma'i las kyi lam dang yang dag par ldan pa yin no/ /las kyi mjug dang bcas pa ji lta bu yin zhe na/ 'di la phra ma byas nas rjes su yi rang bar byed phyir zhing byed byed pa la rjes su yi rang bar byed yid kyis kun tu rtog par byed de nyid la mngon par dga' bar byed ngang tshul gzhan du mi byed pa yin/ sdang ba'i sems yin/ gzhan dag gis btsal cing yid ches pa'i gnas su mi 'gyur ba yin/ smod pa yin/ ngo tsha bar mi byed cing khrel med la bdag nyid la smod par mi byed pa 'di ni phra ma'i chad pa yin no/ /gzhan yang tshig rtsub po'i chad pa ji lta bu yin zhe na/ rnal 'byor spyod pa chos dang las dang kun 'byung ba mthong ba des thos pa las byung ba'i shes pas mthong ste/ 'di ni tshig rtsub pos bdag gdung bar byed cing yid du mi 'ong ba rna bar thos la glags skyed par byed/ de gzhan la gnas te/ mkhyud pa dang 'chags pa dang dgod pa dang khro ba'i bsam pas rnam par smin pa du ma rnam pa du ma'o/ /de la tshig rtsub po chen pos ni sems can dmyal ba'i tshor ba myong bar 'gyur/ tshig rtsub po 'chags pas ni myong bar 'gyur bar ma nges pa yin te 'di dag ni ngag gi chad pa gsum pa yin no/ /las kyi nyer bsdogs dang las kyi mjug dang yang dag par ldan pa zhes bya ba ni snga ma bzhin no/ /gzhan yang ngag gi chad pa bzhi pa ji lta bu yin zhe na/ rnal 'byor spyod pa las dang chos dang rnam par smin pa'i rnam pa du ma shes pa yin te/ tshig khyal pa zhes bya ba snga phyi 'brel pa med pa'i tshig kyal pa snga ma dang phyi mar mi sbyor ba yin te/ myong bar 'gyur bar ma nges shing kha na ma tho ba mi mang ba yin pa 'di ni ngag gi chad pa bzhi pa yin no/ /gzhan yang yid kyi chad pa ji lta bu yin/ rnam pa ni du zhig yod ce na/ rnal 'byor spyod pa las dang chos dang rnam par smin pa la rjes su lta ba des thos pa las byung ba'i shes pas yid kyi chad pa rnam pa gsum mthong ste 'di lta ste/ brnab sems ni gzhan gyi 'byor pa mthong nas shin tu rtog par byed/ sems kyis 'dod par byed rdzas 'di ni bdag gir bya'o snyam ste/ brnab sems 'di ni yid kyi chad pa dang po yin no/ /gzhan yang yid kyi chad par 'gyur ba ni pha rol gyi phun sum tshogs pa mthong nas yid rab tu sdang ba gnod sems te/ yid kyi chad pa gnyis pa yin no/ /gzhan yang yid kyi chad pa gsum pa ni log par lta bas phyin ci log tu mthong ba log par lta ba'i chad pa'o/ /de yang rnam pa gnyis te yod pa 'jig pa dang / log par shes pa'o/ /de la yod pa 'jig pa ni 'di ltar sbyin pa med/ sbyin bsreg med mchod sbyin med/ legs par byas pa dang nyes par byas pa dag gi las kyi 'bras bu rnam par smin pa med do zhes bya ba rgya cher sbyar ro/ /log par shes pa zhes bya ba ni/ bde ba dang sdug bsngal gang yin pa de ni lhas byas kyi las kyi 'bras bus ni ma byas so zhes zer ba ste/ 'di ni log par lta ba rnam pa gnyis pa yin no/ /gzhan yang j i ltar na lus dang ngag dang yid rnam pa gsum gyi chad pa rnam pa bcu kun tu bsten cing bsgoms te mang du byas na tshe 'di nyid la las kyi 'bras bu myong bar 'gyur bar nges pa dang shi nas gzhan du skyes na de'i rgyu can gyi las kyi 'bras bu gang yin pa dang rgyu 'thun pa'i 'bras bu ji lta bu yin pa dang yang 'jig rten 'dir skyes na yang de dag ci 'dra bar 'gyur zhe na/ rnal 'byor spyod pa las dang chos dang rnam par smin pa la rjes su lta ba des thos pa las byung ba'i shes pa 'am lha'i mig gis mthong ste/ lus kyi srog gcod pa dang po'o/ /srog gcod pa kun tu bsten cing bsgoms te mang du byas pas sems can dmyal ba dang dud 'gro dang yi dags kyi yul rnams su skye bar byed do/ /gal te mi dag dang skal ba mnyam par mi'i nang du skyes na de tshe thung ba yin no/ /gal te rngon pa lta bu la chags pas srog gcod pa byas na/ srog gcod pa byas pa de nyams par 'gyur te/ de ri dgas dang phag dang sreg pa dang khyim bya dang gong ma sreg dang nya la sogs par gyur pa na/ rgya 'am mchil bas gsod do/ /'khor ba na las de lta bu'i rgyus 'brel pa gal te yang mi rnams dang skal ba mnyam par mi'i nang du skyes na de tshe thung bar 'gyur zhing / mkhas pa rnams kyi yul du skye bar mi 'gyur la mtshon mang pos 'khrug pa'i yul du myur ba nyid du gsod do/ /srog gcod pa chung ngu dang 'bring dang chen po'i tshigs su bcad pa/ kha cig mngal dang de bzhin gzhan/ /btsas pa'i khyim dang gzhan dag ni/ /gog pa tsam dang de bzhin du/ /gzhan dag yongs su rgyug na 'chi/ /de ltar srog gcod pa ni da ltar gyi tshe la rnam par smin pas dbang du byas pa'i las yin no/ /gzhan yang ma byin par len pa kun tu bsten cing bsgoms te mang du byas pa'i rnam par smin pa rnam pa gsum po 'di lta ste/ sems can dmyal ba myong ba dang tshe 'di dang rgyu 'thun pa'i 'bras bu ji lta bu yin zhe na/ rnal 'byor spyod pa las dang chos dang rnam par smin pa la rjes su lta ba des thos pa las byung ba'i shes pas mthong ste/ de la ma byin par len pa kun tu bsten cing bsgoms te mang du byas pas sems can dmyal ba dang dud 'gro dang yi dags rnams kyi yul du skye bar 'gyur ro/ /gal te mi rnams dang skal ba mnyam par mi yi nang du skyes na yang dbul bar 'gyur te longs spyod bsgrubs pa gang dag yod pa de dag rgyal po'i chad pa dang chu dang me dang mtshon dang chom rkun gyi 'jigs pa dag gis bsags bsags pa dag chud za bar 'gyur/ nams kyang bde bar mi 'gyur te 'di ni ma byin par len pa'i chad pa'i 'bras bu rnam pa gsum pa yin no/ /gzhan yang nang gi 'dod pas log par g.yem pa kun tu bsten cing bsgoms te mang du byas pa'i 'bras bu rnam pa gsum pa ji lta bu yin zhe na/ rnal 'byor spyod pa las dang chos dang rnam par smin pa la rjes su lta ba des thos pa las byung ba'i shes pa 'am lha'i mig gis mthong ste/ 'dod pas log par g.yem pa kun tu bsten cing bsgoms te mang du byas pas sems can dmyal ba dang / dud 'gro dang yi dags rnams kyi yul du skye'o/ /gal te mir skyes na yang rgyu 'thun pa'i 'bras bus de'i chung ma gus pa med par 'gyur mtshan gnyis par 'gyur 'jig rten pas brnyas par 'gyur ro/ /'di ni lus kyi chad pa rnam pa gsum pa'i rnam par smin pa'i 'bras bu rnam pa gsum yin te/ gzhan mu stegs can spyod pa pa kun tu rgyu ba rnams kyi lus kyi chad pa mi 'dod pa nas rgyas par las kyi rnam par smin pa'i bar ni de lta bu ma yin no/ /de ci'i phyir zhe na/ gti mug dang 'grogs pa bsgoms pa'i sems dang ldan pa gzhan gyis ni nga'i las dang chos dang rnam par smin pa'i gang yin pa 'di mi mthong gi/ 'di ltar nga'i nyan thos/ nga'i rnal 'byor spyod pa dag gis rjes su mthong ngo / / gzhan yang tshig dang ngag gi chad pa ji lta bu yin rnam pa ni du yod ce na/ rnal 'byor spyod pa chos la chos kyi rjes su lta ba des thos pa las byung ba'i shes pas ngag gi chad pa rnam pa bzhi mthong ste 'di lta ste/ brdzun dang phra ma dang tshig rtsub po dang tshig kyal pa'o/ /de la brdzun kun tu bsten cing bsgoms te mang du byas pas sems can dmyal ba dang dud 'gro'i skye gnas rnams su skye'o/ /gal te mi rnams dang skal ba mnyam par mi'i nang du skyes na yang / sems can thams cad kyis tshig gzung bar mi 'gyur te/ rgyal po'i pho brang 'khor dang khyim bdag gi 'khor dang rgyal rigs kyi 'khor dang rang gi bu dang chung mas kyang tshig gzung bar mi 'gyur/ de'i kha nas dri mnam pa 'byung / so dang kha dang mdog dang lpags pa mi sdug par 'gyur/ 'jig rten pa kun gyis kyang log pa'i mngon par spyod pas mngon par sbyor bar 'gyur/ rtag tu 'jigs par yang 'gyur/ de'i mdza' bshes dang gnyen dang skye bo snying du sdug pa dag bsten par mi 'gyur byed pa brtsams pa thams cad 'bras bu med par 'gyur/ don med pa thams cad spyod par 'gyur te 'di ni brdzun gyi las kyi 'bras bu mi 'dod pa mi sdug pa yid du mi 'ong ba yin no/ /gzhan yang ngag gi chad pa gnyis pa kun tu bsten cing bsgoms te mang du byas pa'i 'bras bu ji lta bu yin zhe na/ rnal 'byor spyod pa chos la chos kyi rjes su lta ba des thos pa las byung ba'i shes pa 'am lha'i mig gis mthong ste/ phra ma kun tu bsten cing bsgoms te mang du byas pas sems can dmyal ba dang dud 'gro dang yi dgas rnams kyi yul du skye'o/ /gal te mi rnams dang skal ba mnyam par mi'i nang du skyes na yang de lkugs par 'gyur/ 'on par 'gyur/ de'i kha nas dri mnam pa 'byung / de'i tshig la su yang yid mi ches shing de skye bo kun gyi bzhad gad par 'gyur/ gdong gi mdog mi sdug par 'gyur/ gnas gcig la mngon par dga' bar mi 'gyur/ sems g.yo bar 'gyur/ sems mtha' yas par 'gyur te 'di ni phra ma'i chad pa yin no/ / tshig rtsub po kun tu bsten cing bsgoms te mang du byas pa'i chad pa ji lta bu yin zhe na/ des thos pa las byung ba'i shes pa 'am lha'i mig gis mthong ste/ tshig rtsub po kun tu bsten cing bsgoms te mang du byas pas sems can dmyal ba dang dud 'gro dang yi dags rnams kyi yul du skye'o/ /gal te mi rnams dang skal ba mnyam par mi'i nang du skyes na yang su las kyang dbugs phyin pa mi 'thob/ skye bo kun gyis kyang rtag tu mngon par gtse bar 'gyur te sus kyang dbugs 'byin par mi 'gyur/ bu dang chung ma las dga' ba'i tshig gcig tsam yang mi 'thob/ ri dgas ltar rtag tu skye bo kun gyis 'jigs par 'gyur/ dge ba'i bshes gnyen dang spyod par mi 'gyur/ sdig pa'i grogs por 'gyur te/ rnam pa gsum po 'di ni tshig rtsub po'i 'bras bu yin no/ /gzhan yang tshig kyal pa kun tu bsten cing bsgoms te mang du byas pa'i chad pa ji lta bu yin zhe na/ rnal 'byor spyod pa nang gi chos la chos kyi rjes su lta ba des thos pa las byung ba'i shes pa 'am lha'i mig gis mthong ste/ tshig kyal pa kun tu bsten cing bsgoms te mang du byas pas sems can dmyal ba dang dud 'gro dang yi dags rnams kyi yul du 'gro'o/ /gal te mi rnams dang skal ba mnyam par mi'i nang du skyes na yang skye bo kun mi dga' zhing yang bar 'gyur/ rgyal po'i pho brang dang mdza' bshes dang gnyen dag gi khyim du yang smyon thabs mkhan lta bur 'gyur te/ de ni tshig khyal pa'i chad pa yin no/ /gzhan yang yid kyi mi dge ba rnam pa gsum po kun tu bsten cing bsgoms te mang du byas pa'i chad pa ji lta bu yin zhe na/ rnal 'byor spyod pa nang gi chos la chos kyi rjes su lta ba des thos pa las byung ba'i shes pa 'am lha'i mig gis mthong ste/ brnab sems kun tu bsten cing bsgoms te mang du byas pas sems can dmyal ba dang dud 'gro dang yi dags rnams kyi yul du skye'o/ /gal te mi rnams dang skal ba mnyam par mi'i nang du skyes na de'i rdzas bsags bsags pa dag rgyal po dang chu dang me'i gnod pas 'phrog par 'gyur rtag tu dbul bar yang 'gyur ro/ /gzhan yang gnod sems kun tu bsten cing bsgoms te mang du byas pas yid kyi chad pa ji lta bu yin zhe na/ rnal 'byor spyod pa nang gi chos la chos kyi rjes su lta zhing gnas pa des thos pa las byung ba'i shes pa 'am lha'i mig gis mthong ste/ gnod sems kun tu bsten cing bsgoms te mang du byas pas sems can dmyal ba dang dud 'gro'i skye gnas dang yi dags rnams kyi yul du skye'o/ /gal te mi rnams dang skal ba mnyam par mi'i nang du skyes na yang ri brags dang / kla klo rtag tu mtshon gyis 'khrug cing rtag tu 'jigs pa rnams su skye bar 'gyur/ rtag tu g.yang sa rnams su ltung bar 'gyur/ de'i sems nams yang bde bar gnas par mi 'gyur zhing / gnod pa dag gis rtag tu gnod par 'gyur ro/ /gzhan yang log par lta ba kun tu bsten cing bsgoms te mang du byas pa'i yid kyi chad pa ji lta bu yin zhe na/ rnal 'byor spyod pa nang gi chos la chos kyi rjes su lta zhing gnas pa des thos pa las byung ba'i shes pa 'am lha'i mig gis mthong ste/ log par lta ba kun tu bsten cing bsgoms te mang du byas pas sems can dmyal ba mnar med pa la sogs par sdug bsngal gyi tshor ba thams cad myong bar skye/ dud 'gro'i skye gnas su tshe bye ba brgya phrag du mar 'pho zhing skye/ de bzhin du yi dags kyi yul du yang skye'o/ / gal te brgya la mi rnams dang skal ba mnyam par mi'i nang du skyes na yang de ji skad bshad pa'i mi dge ba'i las kyi lam gyi skyon stong du sgyur ba thams cad de la 'byung ngo / /gzhan yang rnam pa gzhan gang gis na mi dge ba bcu'i chos dag shin tu phra ba rjes su sems na yang 'khor ba na sems can dmyal ba dang / yi dags dang / dud 'gro rnams su 'khyam pa/ rnal 'byor spyod pa nang gi chos la chos kyi rjes su lta zhing gnas pa des thos pa las byung ba'i shes pa 'am/ lha'i mig gis mthong ste/ srog gcod pa ji ltar kun tu sten/ ji ltar bsgoms/ ji ltar mang du byed ce na/ 'di la srog gcod pa grogs po ngan pa 'am/ slob ma 'am/ de'i grogs la kun tu bstan par byed/ de dang lhan cig kun tu dga' bar byed/ rtse bar byed/ yongs su spyod par byed/ kun tu gnas par byed/ de la yang yid ches pa'i gnas su byed/ thams cad yon tan du lta bar byed/ de'i tshul gyis rjes su 'jug par byed/ mi dge ba'i bshes gnyen nam/ slob ma des mi srog gcod pa'i tshul can de srog gcod pa'i rgyu byed pa gtam sna tshogs lam ma yin par gyur pa dang / srog gcod pa la rab tu 'jog par byed de/ de bzhin du mchod sbyin gyi gtam 'am/ de bzhin du ri dgas kyi gtam 'am/ de bzhin du ro la chags pa rab tu nyes pa'i gtam 'am/ de bzhin du dgra bo mi mdza' ba dang 'brel ba la lan ldon pa'i gtam 'am/ de bzhin du de'i rdzas la chags pa'i gtam 'am/ de bzhin du nyon mongs pa la rab tu spro ba rdzas la chags pa dang / grags pa'i las kyi gtam rnams la rab tu 'jog par byed/ de yang de la yid ches pa'i gnas su 'jug pa na/ srog gcod pa kun tu bsten par byed do/ /de ltar srog gcod pa bsten pa ni/ sems can dmyal bar 'gro/ yi dags kyi 'jig rten du 'gro/ dud 'gro'i 'jig rten du 'gro ste/ mi 'dod pa/ mi sdug pa/ yid du mi 'ong ba skye bo mkhas pa kun gyis smad par 'gyur ro/ /mir skyes na yang tshe thung ba'i rgyur 'gyur ro/ /de ltar bshes gnyen ngan pa'i sa bon can gyi srog gcod pa de ni srog gcod pa kun tu sten par byed do/ /mi ngan pa goms par byed pa ji lta bu yin pa dang / mi ngan pa srog gcod pa bsten pa zhes bya ba snga ma bzhin sbyar te/ srog gcod pa byas nas yid kyis dga' bar byed/ mgu bar byed/ yid kyis kun tu rtog par byed/ yon tan du lta ba'i blo can du byed/ srog gcod pa nyid la kun tu rtog par byed/ rnam pa mang pos gzhan gyi srog 'phrog par byed/ de skyon du mi 'grang / de la smod par mi byed/ de la dga' ba dang 'bral bar mi byed/ phyir zhing de'i ngang tshul du byed/ srog mi gcod pa'i tshul can gzhan dag kyang srog gcod pa de la rab tu 'jog par byed/ gtam rgyud dang bcas pa sna tshogs dag gis snga ma bzhin du sbyar te/ de ltar srog gcod pa goms par byed do/ /mang du byed pa ji lta bu yin zhe na/ 'di na gang srog gcod pa byas nas goms par byed pa snga ma bzhin du sbyar te/ 'di la srog gcod pa byed pa na/ de la goms pa dang / sdig pa'i grogs po dang phrad pas rgya 'dre bar byed/ de la dug mda' byed/ khyi sogs par byed/ srog gcod pa'i bya sdud par byed/ gtum po dang bsten par byed/ 'thabs mo la dga' ste/ ya lad dang / mtshon cha dang / ral gri dang / mda' bo che dang / ste'u ka dang / 'khor lo dang / go mtshon la sogs pa'i ngang tshul can yin/ srog gcod par byed pa'i rgyu gzhan gang yin pa de thams cad kyang yongs su 'dzin par byed do/ /mi de lta bu ni srog gcod pa mang du byed pa yin no/ /rgyu de dang / gzhi de dang / rkyen des sems can dmyal ba dang / dud 'gro dang / yi dags rnams kyi yul du skye ste/ gnod pa mi bzad pas gnod do/ /srog gcod pa tha ma dang / 'bring dang / chen pos rnam par smin pa tha ma dang / 'bring dang / chen po nye bar spyod par 'gyur ro/ /las byas la bsags pas ni las kyi rnam par smin pa myong bar mi 'gyur ba med de/ de ltar na bdag nyid kyis byas pa'i las ni bdag nyid kyis nye bar spyod par 'gyur ro/ /de lta bas na gal te 'khor ba la yid byung na sdig pa spang nas dge ba kun tu spyad par bya ste/ 'di ni srog gcod pa kun tu sten cing mang du byed pa yin no/ /ji ltar na ma byin par len pa kun tu bsten cing sgom ste mang du byed pa yin/ kun tu bsten cing bsgoms te mang du byas pas/ sems can dmyal ba ji ltar myong bar 'gyur zhe na/ 'di la tshul khrims 'chal ba'i mi ni ngo bo nyid kyis ma byin par len pa'i ngang tshul can yin te/ grogs po ngan pa 'am/ slob ma dang 'brel pas ma byin par len pa tha ma dang / 'bring dang / chen po kun tu spyod do/ /de la tha ma ni rgyal po'i chad pas skrag nas gzhan gyi len pa yin te snga ma bzhin no/ /'bring ni dngos po chung ngu yin te/ zhing bzang po la brkus pa ma yin pa 'di ni ma byin par len pa 'bring yin no/ /sangs rgyas dang / chos dang dge 'dun dag las ni chung ngu zhig blangs na yang chen por 'gyur te/ sangs rgyas dang / chos dang dge 'dun gyi ma byin par blangs pa de dag las kyang ris su 'thun par slar phul na/ sangs rgyas dang / chos kyi ni dag par 'gyur la/ dge 'dun gyi brkus pa ni tshor ba ma myong bar dag par 'gyur ba med de zhing lji ba'i phyir gal te zhal du 'du ba'i sgo zhig na ni de sems can dmyal ba chen por ltung la gal te zhal du 'du ba'i sgo ma yin na ni de'i nang gi bar mnar med pa'i 'khor mun nag chen po la sogs par skye bar 'gyur ro/ /gal te ma byin par len pa chung ngu zhig blangs nas kyang kun tu bsten cing sems la dga' bar byed de/ goms par byed la mang du byed na/ ma byin par len pa chung ngu des kyang sems can dmyal ba dang / dud 'gro dang / yi dags kyi nang du skye bar 'gyur ro/ /gal te 'chags par byed cing rjes su yi rang bar mi byed la 'gyod na de'i myong bar 'gyur bar ma nges pa yin no/ / gal te ma byin par len pa'i ngang tshul can zhig de thabs du mas ma byin par len pa kun tu spyod na/ 'di ni ma byin par len pa kun tu bsten pa yin no/ /goms par byed pa ji lta bu yin zhe na/ 'di la ma byin par len pa'i rdzas thob nas mgu bar 'gyur zhing chom rkun la mngon par dga' bar byed do/ /de rdzas de thob nas bza' ba dang / bgo ba byas shing dga' bar 'gyur te/ yon tan du bzung nas gzhan dag kyang ma byin par len pa la rab tu 'jog par byed/ yang dag par 'jug par byed/ yang dag par 'dzin du bcug cing byed du 'jug pa de lta bu ni ma byin par len pa goms par byed pa yin no/ /ma byin par len pa mang du byed pa ji lta bu yin zhe na/ 'di la ma byin par len pa byas nas/ mal cha dang / bza' ba dang / bca' ba dang / gos dang / rgyan dang / btung ba dang / smad 'tshong ba dang / rgyan po mang po dag la mngon par dga' bar byed do/ /de sems kyis mngon par dga' bar byed de bde ba thams cad kyi nang na 'di lta ste/ ma byin par len pa zhes bya ba 'di ni legs par byas pa yin no/ /rgyu des bdag mal cha dang / bza' ba dang / bca' ba dang / gos dang / rgyan dang / btung ba dang / smad 'tshong ba dang / rgyan po mang po dag gis mchog tu bde ba myong ngo / /ma byin par len pa de bdag gis kun tu spyad par bya ste/ de bdag la bde ba rab tu mang po dag tu 'gyur ro snyam na snga ma bzhin du sbyar te/ 'di ni ma byin par len pa mang du byed pa yin te/ de ni sems can dmyal ba rnams su myong bar 'gyur bar nges pa yin no/ /'dod pas log par g.yem pa kun tu bsten cing bsgoms te/ mang du byed pa ji lta bu yin zhe na/ 'di la tshul bzhin ma yin pa yid la byed pas zil gyis non pa ni 'dod chags dang bcas pa'i ris 'thun pa gzhan 'di lta ste/ bye'u mchil pa dang / ngur ba dang / gong ma sreg dang / ne tso dang / rma bya dang / sreg pa dang / nya dang / srog chags dud ka dag ni lha ma yin gyi ris dag nas 'dir skyes pa yin te/ 'dod chags shas che ba'i grogs po ngan pa dang lhan cig yan lag ma yin par spyod pa yin no/ /de tshul bzhin ma yin pa nyis 'gyur gyis mngon par zhen la de 'dod chags tshim pa med pa dang bcas pa'i sems kyis tshul bzhin ma yin pa kun tu spyod de/ gang dri za der nye bar 'gyur zhing gang gis der skye bar 'gyur ba tshul bzhin pa de ni skye gnas kyi zhing la skyon yod pa'i phyir der skye bar mi 'gyur ro/ /rgyu des na tshul bzhin ma yin pa dang bcas pa'i 'dod pas log par spyod pa ni ngan pa yin no/ /mi de reg bya'i 'dod chags shas che bas de dang de nyid la mngon par dga' ste/ de ni 'di ltar 'dod pas log par g.yem pa 'di yang dang yang du sten cing reg bya ngan pa la mngon par dga' ba yin te/ 'di ni 'dod pas log par g.yem pa kun tu bsten pa yin no/ /'dod pas log par g.yem pa goms par byed pa ji lta bu yin zhe na/ 'di las 'dod pas log par g.yem pa yang dang yang du sten cing yid kyis yang dag par rtog par byed/ de'i yid la mngon par dga' ba gzhan spangs te/ de 'dod pas log par g.yem pa 'di nyid goms par byas nas/ yang yul bde ba de goms par byed pa yin no/ /mang du byed pa ji lta bu yin zhe na/ 'di la tshul bzhin ma yin pa yid la byed pas brlan pa'i byis pa so so'i skye bo ni/ 'di ltar 'dod pas log par g.yem pa ni mchog tu bzang ba yin la 'dod pas log par mi g.yem pa ni ma yin zhes yon tan mchog dang 'dra bar yang dag par 'dzin par byed do/ /de gzhan shin tu mang po dag kyang 'dod pas log par g.yem pa la mngon par 'jug ste 'di ni 'dod pas log par g.yem pa mang du byed pa yin no/ /lus kyi rnam pa gsum po 'di dag ni byis pa so so'i skye bo rnams kyi mi dge ba yin no/ /ngag gi ni rnam pa bzhi ste/ brdzun dang / tshig rtsub po dang / phra ma dang / tshig kyal pa'o/ /de la brdzun gang zhe na/ 'di lta ste/ bdag nyid la bdag nyid slu zhing gzhan yang slu bar byed pa yin te/ brdzun du smra ba 'di ni bdag dang gzhan slu bar byed pa yin no/ /de yang rgyu lnga dang ldan pa yin te/ 'di lta ste/ 'dod chags dang / zhe sdang dang / 'jigs pa dang / rnyed pa dang / chos log pa'i 'dul ba yongs su sdud pa'o/ /brdzun du smra ba ji lta bu yin zhe na/ 'di la rgyal po'i pho brang 'khor na 'dug kyang rung / khyim bdag gi 'khor gyi nang na 'dug kyang rung / nye du'i nang na 'dug kyang rung ste/ mdza' bshes dang / mdza' bshes ma yin pa dag smra ba na/ mdza' bshes kyi phyir ni 'dod chags kyis brdzun smra la/ mdza' bshes ma yin pa'i phyir ni zhe sdang gis kyang brdzun smra'o/ /rnyed pa'i phyir yang brdzun smra ste/ nor la chags pa de brdzun smra'o/ /chos log pa'i tshig yongs su sdud pas kyang brdzun smra ste/ 'di la bram ze rnams yon tan gyi phyir dang / nor 'phrog pa'i phyir dang / rang gi srog la gnod pa dang / bag ma len pa dag gi phyir brdzun smras kyang mi gos so zhes zer ro/ /de ni chos log pa'i tshig yongs su sdud pa'i brdzun smra ba yin te/ mi gti mug pa log par lta ba'i tshig yongs su sdud pa 'di ni sems can dmyal ba mi bzad par yang 'gyur ro/ /sems can dmyal ba 'grub par 'gyur ba'i sa bon dag ni 'di lta ste/ brdzun smra ba yin pas rang gi srog gi phyir ram/ gzhan gyi srog gi phyir brdzun chung zad kyang smra bar mi bya ba 'di ni mchog yin no/ /'jigs pas kyang brdzun smra ste/ gang bdag gis brdzun 'di ma smras na de bdag gi srog la dman pa don med pa chen po 'thob par 'gyur ro snyam nas de gang las 'jigs par 'gyur ba de'i don du brdzun smra ba yin te/ rgyu lnga po 'di dag gis byis pa dag brdzun smra ba smra ste/ gti mug ni thams cad la gnas pa yin no/ /'dir tshigs su bcad pa/ 'jig rten pha rol khyad gsod cing / /chos gcig las ni 'da' byed pa/ /brdzun du smra ba'i lus can gyis/ /sdig pa mi bya ci yang med/ /mi yi lus su skyes ma thag /kha nas sta re lta bu yi/ /tshig 'byung ngan par brjod smra ba/ /de yis bdag nyid gcod par byed/ /bden par smra zhing 'khrug mi bya/ / bslangs na chung yang sbyin par bya/ /gnas 'di gsum dang ldan pa ni/ /lha rnams dag gi drung du 'gro/ /de lta bas na rgyu thams cad dang / rkyen thams cad kyis brdzun du smra bar mi bya zhing gzhan brdzun smra ba na rjes su yi rang bar mi bya/ brdzun smra ba dang lhan cig 'bel ba'i gtam zer du mi 'gro/ mi gnas/ 'dug par mi bya'o/ /gzhan du na 'di yang brdzun smra ba mngon du zer ba yin no zhes skye bo gzhan dag gis bsams par 'gyur te/ de ltar na las dri ma can la mngon par dga' ba'i mi rnams dang 'grogs pas las dri ma can du gzhan dag sems so/ /de lta bas na sdig pa'i grogs po dang 'grogs par mi bya ste/ 'di lta ste/ sdig pa'i grogs po dang 'grogs pa ni 'khor ba'i 'ching ba sems can dmyal ba dang / yi dags dang / dud 'gro rnams kyi gnas yin la/ dge ba'i bshes gnyen dang 'grogs pa 'di ni thar pa mchog yin te/ 'di dag ni brdzun du smra ba mdor bshad pa yin no/ /gzhan yang phra ma ji lta bu yin/ rnam pa du yod ce na/ rnal 'byor spyod pa nang gi chos la chos kyi rjes su lta zhing / gnas pa des thos pa las byung ba'i shes pa 'am/ lha'i mig gis mthong ste/ phra ma zhes bya ba ni 'thun zhing 'byor pa dag la dbye ba'i bsam pas tshig brjod pa ni phra ma yin no/ /de rnam pa gnyis te/ pha rol dang sbyor ba dang / mi sbyor ba'o/ /de la khyod kyis mi gnyis dang dbye ba'i sbyor ba gyis shig ces dgra 'am/ dgra chung ngu gzhan dag gis sbyor ba byed pa dang / bdag nyid kyis 'byed par 'dod pa'o/ /gzhan yang tshig rtsub po ji lta bu yin/ rnam pa du yod ce na/ rnal 'byor spyod pa chos la chos kyi rjes su lta zhing / gnas pa des thos pa las byung ba'i shes pa 'am lha'i mig gis mthong ste/ tshig rtsub po zhes bya ba ni bdag dang gzhan la gnod pa byed pa/ khro ba'i rgyu 'thun par gyur pa/ yid du mi 'ong ba/ mi sdug pa/ mi dga' ba'i tshig brjod pa nyan pa dang / mi mthun pa/ 'dod chags dang / zhe sdang dang / gti mug dang bcas pa/ byis pa so so'i skye bo thams cad dang lhan cig spyod pa'i tshig smra ba 'di ni tshig rtsub po zhes bya ste/ rnam pa du ma dmigs pa du ma/ rgyu du ma/ sems kyi kun nas ldang ba du ma/ bde 'gror 'gro ba rnam par 'jig pa du ma/ skye bo thams cad mi dga' bar byed pa/ 'jig rten ldang ba'i rgyur gyur pa/ 'thun par gyur pa/ rnam par 'jig par byed pa/ yid mi ches pa'i gnas su gyur pa/ yid gcugs pa ma yin pa/ lce dug lta bur gyur pa'i tshig rtsub po dag gi dri ma ni tshangs pa mtshungs par spyod pas rnam par spangs pa yin no/ /'dir tshigs su bcad pa/ brtan pas tshig rtsub spang bya zhing / /rtag tu yang dag tshig smros shig /tshig snyan mngon par dga' ba'i mi/ /mya ngan 'das la nye bar gnas/ /tshig zhi rtag tu smra bya zhing / /dri ma yod pa rnam par spang / /tshig gi dri mas zil non pa/ /mi gang de ni dmyal bar 'gro/ / tshig gi dri mas zil non pa/ /gang yin de la bde ba med/ /seng ge sbrul ni 'phags min ltar/ /de dag la ni mtho ris med/ /gang dag tshig rtsub mi smra zhing / /gang dag g.yo ni rnam spangs pa/ /de dag thams cad dga' skyed cing / / bde ba dag dang dbugs 'byin byed/ /skye bo de ni 'jig rten 'di/ /dga' zhing pha rol mtho ris 'gro/ /de 'dra ba'i mi dag ni/ /mkhas pa de la phyag byar 'os/ /bden tshig rtag tu zhi ba dang / /g.yo sgyu med cing drang po'i sems/ /gzhan la gnod pa'i byed dang bral/ /de ni chos kyi rgyal mtshan dga'/ /lag pa brdabs pa'i sgra lta bur/ /mi ni chung bar gyur pa yin/ /gang dag de thob chos mi shes/ /mi ni rmongs pa dag gis bslus/ /gang dag bdag sdug mi 'gyur dang / /gang dag bde ba mi 'dod pa/ /de ni sdig gi las byed cing / /sred pa'i rgyu yis rnam par bslus/ /gang du las kyi rjes 'gro ba/ /nor dang bu dang chung ma dang / /mdza' bshes nye du gnyen 'dab dang / /der ni 'gro bar mi nus so/ /legs par byas dang nyes par byas/ /de dag 'gro ba'i rjes su 'gro/ /mkha' la bya dag gnas pa yin/ /de grib lhan cig 'gro ba bzhin/ /ji ltar lam rgyags nyung ba dag /lam zhugs sdug bsngal 'gro ba ltar/ /de bzhin las bzang ma byas pa'i/ / sems can dag ni ngan 'gror 'gro/ /ji ltar lam rgyags mang bdog pa/ /lam zhugs bde bar 'gro ba ltar/ /de bzhin las bzang byas pa yi/ /sems can dag ni bde 'gror 'gro/ /yun ring yul gzhan gnas pa yi/ / mi dag bde bar 'ongs pa ltar/ /gnyen dang sdug pa mdza' bshes dag /'dir 'ongs mngon par dga' ba ltar/ /de bzhin bsod nams byas pa'i mi/ /'jig rten 'di nas phar 'gro ba/ /bsod nams nyid kyis mngon dga' ste/ / gnyen sdug dag ni 'ongs pa bzhin/ /de lta bas na tshe phyi ma'i/ /bsod nams dag ni bya zhing bsags/ /bsod nams 'jig rten pha rol tu/ /srog chags rnams ni dran gnas yin/ /spyod pa mthun par gang spyod pa'i/ /bsod nams dag la lha bstod cing / /de dag 'dir ni mngon dga' la/ /pha rol mtho ris dga' bar 'gyur/ /gnas 'di gzhan gyis mthong ba yi/ /mkhas pa dag gis tshul khrims bsrungs/ /'phags pa mthong ba phun sum tshogs/ / 'jig rten 'dir ni zhi ba bsten/ /gzhan yang rnal 'byor spyod pa nang gi chos la chos kyi rjes su lta zhing gnas pa mi dge ba'i las kyi lam gyi tshig bzhi pa'i tshig kyal pa la rtog par byed de de la tshig kyal pa rnam pa du yod ce na/ tshig 'byung ba snga phyi 'brel pa med pa'i tshig kyal pa dang / sems 'jug pa yang bas snga phyi 'brel pa'i tshig brjod pa'i tshig kyal pa'o/ /rgyags pa dang bcas pa dang / rgyags pa med pa'i dus kyis bslang pa yang byed pa'i rgyu'i ngo bo skyed pa de tshe 'di la yid gcugs pa'i gnas su mi 'gyur zhing tshe 'di'i las kyi lam skyed pa 'jig rten pa kun gyis smed pa'i gnas kyi rgyu/ don med par smra ba ni tshig kyal pa ste/ tshig gi dri ma bzhi pa 'di ni mi dge ba'i las kyi lam bskyed pa dang / skyed par byed pa smra bar mi bya zhing rjes su yi rang bar mi bya ba la gzhan gyi tshig kyal pa smra ba de la gnas par mi bya'o/ /yid kyi mi dge ba'i las kyi lam ni brnab sems dang / gnod sems dang / log par lta ba'o/ /de la brnab sems ni gzhan gyis yongs su bzung ba'i nor rdzas dang / nor rdzas kyi rnam pa la/ ngag dang yid kyis shin tu rtog par byed de/ 'di ni bdag gir bya'o snyam pa yang dag pa ma yin pa'i tshul bzhin yid la byed cing de gzhan gyi phun sum tshogs pa la 'phral la sems ldang ste/ don la 'chums pa rgyu med pa yin no/ /de ni brnab sems yid kyi mi dge ba'i las kyi lam yin te/ mi 'dod pa/ mi sdug pa/ yid du mi 'ong ba'i rnam par smin pa/ yid ma zhi ba/ ma sbyangs pa'i byis pa skye bo brnab sems kyis rab tu bslus pa de gzhan gyi phun sum tshogs pa la 'phral la yid kyis shin tu rtog par byed/ ro myang bar byed/ yang dang yang du byed/ yongs su sgyur bar byed/ rtag tu 'dod par byed/ rtag tu dga' bar byed cing gzhan gyi nor rdzas phun sum tshogs pa mthong na sdug bsngal ba yin no/ /'di ni brnab sems shes bya ste yid kyi mi dge ba'i las kyi lam gyi dri ma chen po yin no/ /gzhan yang sems las byung ba gnod sems mi dge ba'i las kyi lam la sogs pa ji lta bu yin zhe na/ rnal 'byor spyod pa nang gi chos la chos kyi rjes su lta zhing gnas pa des/ thos pa las byung ba'i shes pa 'am/ lha'i mig gis mthong ste/ gzhan dag gis sgyu ma yin pa yid kyi nyes pa'i gnod sems dang / gzhan dag gi phun sum tshogs pa 'am/ phun sum tshogs pa ma yin pa mthong nas/ sgyu ma yin pa ji ltar 'dod pa bzhin byas pa yid kyi nyes pa mi bzad pa chen po skye bar 'gyur te/ gnod sems de ni sems can dmyal ba myong bar 'gyur/ dge ba'i chos kyi lo tog tu gyur pa rnams kyi ser ba yang dag pa'i shes rab kyi mig gi mi mthun par gyur pa mun nag snying la gnas pa'i me de tshul khrims thams cad sreg par byed pa/ mdog ngan pa'i rgyu/ chos kyi stegs gcod pa/ 'jig rten 'di dang / 'jig rten pha rol gyi dgra nang du zhugs pa/ sems rtse gcig pa nyid 'jig par byed pa/ byams pa dang mi mthun zhing / 'phags pa'i bden pa bzhi po sdug bsngal dang / kun 'byung dang / lam dang / 'gog pa rnams 'jig par byed pa yin no/ /gnod sems zhes bya ba sems can dmyal ba'i pho nya mchog yin te/ de skyes bu dam pa dang / 'phags pa nyan thos dang / thos pa don du gnyer ba rnams kyis spong bar 'gyur ro/ /gzhan yang log par lta ba dam pa'i chos kyi mi mthun par gyur pa lta ba ngan pa thams cad kyi mun gnag snying la yang dag par skye bar 'gyur ba ji lta bu yin zhe na/ rnal 'byor spyod pa nang gi chos la chos kyi rjes su lta zhing gnas pa des thos pa las byung ba'i shes pa 'am lha'i mig gis mthong ste/ thog ma med pa'i dus nas zhugs shing skyes pa/ sems can dmyal ba dang / yi dags dang / dud 'gro'i 'gro ba'i rgyu bskyed pa/ mun pa mun nag tu gyur pa/ lta ba ngan pa la mngon par dga' ba/ yang dag pa'i lam gyi mi mthun par gyur pa/ mtshon dang / me dang / dug dang / g.yang sa lta bu/ skye bo thams cad rnam par 'jig par byed pa/ phyin ci log tu lta zhing log par lta ba yin no/ /de yang rnam pa gnyis te/ rkyen yod pa dang / las dang 'bras bu la skur pa 'debs pa'o/ /de la rkyen yod pa ni bde ba dang / sdug bsngal gang yin pa de dag nyid kyis byas kyi las dang / 'bras bus byas pa ni ma yin no zhes zer ro/ /las dang 'bras bu la skur pa 'debs pa mi sbyin pa med do zhes bya ba la stsogs pa ste/ de ltar de dag log par lta ba mi dge ba bcu'i las kyi lam 'di dag thams cad don thams cad med par byed pa'i rtsa ba yin no// // 'phags pa dam pa'i chos dran pa nye bar gzhag pa/ bam po gnyis pa/ gzhan yang mi dge ba bcu'i las kyi lam 'di dag bzlog nas/ zag pa dang bcas pa dang / zag pa med pa dag gi las byed par 'gyur ba ji lta bu yin zhe na/ rnal 'byor spyod pa nang gi chos la chos kyi rjes su lta zhing gnas pa des thos pa las byung ba'i shes pa 'am/ lha'i mig gis mthong ste/ 'di ni re shig 'khor ba'i 'ching ba/ chos zad par byed pa/ 'di lta ste/ 'ching ba'i rgyu mi dge ba'o/ / thar pa'i rgyu'i dngos po ni dge ba yin te/ de la srog gcod pa spangs pas/ 'khor bar gtogs pa'i sems can rnams la mi 'jigs pa sbyin par 'gyur te/ de tshe 'di nyid la bsngags par 'gyur/ de'i bzhin gyi mdog dang dbang po rnams gsal bar 'gyur/ tshe ring por 'gyur ba'i las byed par 'gyur/ gang srin po dang / sha za dang / grul bum gyi rigs dang / gzhan yang sems can 'tshe bar byed pa de dag kyang nyin mtshan srung bar byed/ phyi bzhin du lha dag kyang mngon par srung bar byed la/ lus dang bral nas kyang bde 'gro mtho ris lha'i 'jig rten du skye bar 'gyur te/ gal te rnam par smin pa'i 'bras bu myong bar 'dod na yang / ji ltar brtson 'grus brtsams pa bzhin myong bar 'gyur ro/ /gal te byang chub kyi lam tha ma dang / 'bring dang / chen po rnams kyi so so yang dag par 'dod na/ de rnam pa gsum po 'dir 'gyur te/ gal te nyan thos kyi byang chub tu yongs su bsngo na/ de dgra bcom par gyur nas/ yongs su mya ngan las 'da'o/ / gal te byang chub 'bring du yongs su bsngo na/ de rang sangs rgyas su 'gyur ro/ /gal te bla na med pa yang dag par rdzogs pa'i byang chub tu yongs su bsngo na/ de yang dag par rdzogs pa'i sangs rgyas su 'gyur te/ rig pa dang zhabs su ldan pa/ bde bar gshegs pa/ 'jig rten mkhyen pa/ skyes bu 'dul ba'i kha lo sgyur ba/ bla na med pa/ lha dang mi rnams kyi ston pa/ sangs rgyas bcom ldan 'das su 'gyur ro/ /chos thams cad kyi rtsa ba ni srog yin te/ gang srog de mngon par srung ba des ni bde ba thams cad sbyin par 'gyur la/ sbyin pa rnams kyi nang na mchog ni 'di yin te/ 'di lta ste/ sems las byung ba so sor bsgoms pa srog byin pa'o/ /tshul khrims kyi nang na mtho ris su skye ba'i mchog ni 'di yin te 'di lta ste srog byin pa'i tshul khrims so/ /gal te yul gyi bde ba kun nas nyon mongs pa sred pa'i rgyur 'gyur bar yongs su bsngo na/ de tshangs pa 'am/ bdud dam/ brgya byin du 'gyur/ gal te mi'i bdag nyid chen por yongs su bsngo na/ de 'khor los sgyur ba'i rgyal po rin po che sna bdun dang ldan pa/ gling bzhi la spyod par 'gyur/ gal te lha ma yin gyi bdag nyid chen por yongs su bsngo na/ de lha ma yin gyi rgyal srid byed par 'gyur/ gal te gnod sbyin gyi bdag nyid chen por yongs su bsngo na/ de gnod sbyin gyi rgyal srid byed par 'gyur ro/ /snying rje chen po 'di ni dam pa'i chos kyi sa bon du gyur pa/ 'khor ba'i skyabs su gyur pa/ 'khor ba'i mun gnag tu zhugs pa rnams kyi sgron mar gyur pa yin te/ 'di lta ste/ srog gcod pa spong ba zhes bya'o/ /srog gcod pa spangs pa byams pa bsgoms par 'gyur zhing / snying rje'i rgyud la gnas pa yin te/ bsams nas srog gcod pa spangs na gtsang zhing dga' bar 'gyur/ gang gi tshe pha rol yang dag par bsrung bar ma nus pa de'i tshe btang snyoms su 'gyur zhing / de tshangs pa'i gnas bzhi la gnas pa'i rgyud du 'gyur/ srog gcod pa spangs pa'i dge ba'i rtsa ba'i snying po ni bsam gyis mi khyab pa ste/ rnam pa gang dang gang gis ji lta ji ltar yongs su bsngo ba de lta de ltar yongs su 'grub bo/ /dper na/ gser mgar mkhas pa de ni gser bzang po blangs nas/ ji lta ji ltar 'dod pa de lta de ltar gser de la byed de/ de las rgyan nam/ de las bum pa 'am/ de las mi'i gzugs sam/ de las sangs rgyas kyi gzugs byed do/ /de bzhin du srog gcod pa yang dag par bsrungs te/ ma nyams shing ma ral la/ ma zhig na ji lta ji ltar yongs su bsngo ba de lta de ltar yongs su 'grub bo/ /de lta bas na srog gcod pa spangs pa'i sems can gang yin pa de ni mya ngan las 'das pa dang / nye bar gnas shing / de dge ba'i bshes gnyen dang yang dag par spyod/ sems can de bdag dang gzhan la phan pa'i skal ba dang ldan zhing / de sems can dmyal ba dang / dud 'gro dang / yi dags rnams kyi 'gro ba la bsod nams kyi zhing du gyur pa yin/ des 'khor ba na chos dang ldan pa'i chos kyi rjes su 'jug pa/ chos dang ldan pa'i kun rtog pa rnams 'grub par 'gyur zhing / grub pa yang brtan par 'gyur la/ rgyal po dang / chom rkun dang / chu dang / mes 'jigs pa dang / thun mong ma yin par 'gyur te/ bdag nyid nye bar spyod par 'gyur ro/ /chos dang ldan pa'i 'gren zla gzhan dag gis mi non par mthong ste/ de lta bas na srog gcod pa spang bar bya'o/ /de nas gzhan yang ma byin par len pa spangs pas legs par byas pa mthong ba ji lta bu yin zhe na/ rnal 'byor spyod pa nang gi chos la chos kyi rjes su lta zhing gnas pa des thos pa las byung ba'i shes pa 'am/ lha'i mig gis mthong ste/ ma byin par len pa spangs pa ni/ gzhan gyis yongs su bzung ba'i chags pa chen po'i dra ba las grol bar 'gyur/ tshe 'di nyid la de dbugs 'byung bar 'gyur/ rgyal po 'am/ blon po'i yid brtan par 'gyur/ rgyal po'i 'khor dang / khyim bdag gi 'khor dang / rgyal rigs kyi 'khor dang / dge sbyong gi 'khor dang / bram ze'i 'khor du yid brtan pa dang / dga' ba dang / sdug pa dang / yid du 'ong zhing tshig yongs su gzung bar 'os par 'gyur/ de'i longs spyod gang yin pa de dag rtag cing gzhan la gnod pa med par 'gyur la/ rgyal po dang / chu dang / chom rkun dang / me'i 'jigs pa med par 'gyur/ ma bsams par de dag 'phral la 'byung bar 'gyur la/ byung nas kyang zhing dang tshul khrims dang ldan pa dang / lam bzang po la zhugs pa dang / 'jig rten pa rnams la yang dag par nye bar sbyor bar 'gyur/ lus dang bral nas kyang bde 'gro mtho ris kyi lha'i 'jig rten rnams su skye bar 'gyur ro/ /gal te nges par 'byung ba'i lam gyis yongs su bsngo na/ nges par 'byung bar 'gyur la snga ma bzhin du tshangs pa 'am/ bdud dam/ brgya byin nam/ 'khor los sgyur ba'i rgyal po gling bzhi la dbang ba/ rin po che sna bdun dang ldan par 'gyur te/ 'di ltar tshul khrims la mngon par dga' ba de byang chub rnams 'thob par 'gyur ro/ /de nas gzhan yang 'dod pas log par g.yem pa spangs pa'i 'bras bu ji lta bu yin zhe na/ rnal 'byor spyod pa nang gi chos la chos kyi rjes su lta zhing gnas pa des thos pa las byung ba'i shes pa 'am/ lha'i mig gis mthong ste/ 'dod pas log par g.yem pa spangs pa ni dge ba'i las kyi lam bzang po spyod cing / tshe 'di nyid la de spangs par 'gyur/ yid ches pa'i gnas su yang 'gyur/ bud med kyi nang na 'dug kyang dogs pa med par 'gyur/ de rgyal po 'am/ blon po'i yid brtan par 'gyur/ de'i chung ma nam yang gzhan gyis 'phrog par mi 'gyur zhing rtag tu de'i rim gro byed par brtson par 'gyur la bsam pa dang 'thun par yang 'gyur/ nyam thag par gyur pa na yang khyad du gsod par mi 'gyur zhing tshul dang mi 'thun par mi 'gyur la gcig la gcig gnod pa byed pa la mngon par dga' bar mi 'gyur/ de'i chung ma de la brnyas pa byed par mi 'gyur zhing 'jig rten thams cad la ma dang sring mo lta bur kun tu spyod par 'gyur la de'i chung ma 'jig rten la khro ba med par 'gyur te/ snga ma bzhin du lus dang bral nas bde 'gro mtho ris kyi lha'i 'jig rten du skye bar 'gyur ro/ /gang gi tshe lha dag las 'chi bar 'gyur ba de'i tshe/ lha'i bu gzhan zhig der skye bar 'gyur ro/ /gang gis 'dod pas log par g.yem pa byas par gyur na de'i tshe ma 'phos par lha gzhan zhig lha'i bu mo de dag gi nang du skye bar 'gyur la de yang de dang mngon sum du 'gyur te/ de dang lha gzhan dag dang lhan cig tu rgod par byed/ 'dzum par byed/ dga' mgur spyod par byed do/ /de 'chi ba na de'i chung mas mthong nas gzhan du 'gro bar byed de/ phrag dog gi zhags pas yongs su bzung ba dag sems can dmyal ba rnams su skye bar 'gyur ro/ /'dod pas log par g.yem pa spyod pa kun tu bsten cing bsgoms te mang du byas pa 'di ni bar chad chen po yin no/ /de lta bas na 'dod pas log par g.yem pa spong ba yin pa de ni dge ba'i las kyi lam chen po yang dag par 'dzin cing mya ngan las 'das pa'i skal ba dang ldan par 'gyur ro/ /de nas gzhan yang dge ba'i phyogs thams cad dang mi mthun par gyur pa'i brdzun spangs pas dge ba'i phyogs chen po yang dag par 'dzin pa tshe 'di'i 'bras bu rnam par smin pa ji lta bu yin zhe na/ rnal 'byor spyod pa nang gi chos la chos kyi rjes su lta zhing gnas pa des thos pa las byung ba'i shes pa 'am/ lha'i mig gis mthong ste/ brdzun smra ba spangs pa de ni skye bo kun gyi mig dang rna ba'i lkog tu gyur kyang yid ches pa'i gnas chen por 'gyur zhing nor rdzas med na yang skye bo kun dang rgyal pos ji ltar 'dod pa bzhin mchod par 'gyur te/ ji ltar nam mkha' la gza' dang / rgyu skar gyi dbus na zla ba rab tu gsal ba de ltar 'jig rten gyi nang na bden par smra ba de rab tu gsal lo/ /rin po che thams cad kyi nang na bden pa rin po che mchog tu bzang ngo / /'khor ba thams cad las sgrol ba'i nang na bden par sgrol ba khyad par du 'phags so/ /ngan 'gro thams cad las phyir zlog pa'i nang na bden pas phyir zlog go/ /sgron ma thams cad kyi nang na bden pa sgron ma yin no/ /lam ston pa thams cad kyi nang na bden pa lam ston pa yin no/ /'du byed kyi rdzas 'byung ba thams cad kyi nang na bden pa'i rdzas gzhan gyi nad 'phrog pa yin no/ /rtsal thams cad kyi nang na bden pa rtsal yin no/ /skyob pa thams cad kyi nang na bden pa skyob pa yin no/ /mdza' bshes thams cad kyi nang na bden pa mdza' bshes khyad par 'phags pa yin no/ /gang bden pa'i nor kun tu 'dzin pa de ni nams kyang 'khor ba'i ngan 'gro log par ltung ba dbul bar mi 'gyur zhing / lha rnams dang nye bar 'gyur la/ gang dang gang du skye ba de dang der skye ba'i rigs che zhing / gzugs bzang por 'gyur te/ skye bo thams cad la sdug pa dang / dga' ba dang / yid du 'ong ba dang / tshig yid ches par 'gyur/ de gnod sbyin dang / sha za dag gis mi mthong la gtse bar mi nus shing / yul gzhan du phyin na yang mal cha dang / na ba'i gsos sman gyi rkyen mang po phun sum tshogs par 'gyur/ des 'dod pa gang dag yid la bsams pa de dag kyang de las 'grub par 'gyur te/ des mi'i bde ba mchog myong nas gal te 'chi ba'i dus byed na/ de lus dang bral nas bde 'gro mtho ris lha rnams kyi 'jig rten du tshe ring ba dang / shin tu rdzu 'phrul che ba dang / shin tu gnas mtho bar skye bar 'gyur ro/ /snga ma bzhin du gal te rnam par byang ba zag pa med pa'i lam gyis yongs su bsngo bar byed na/ mya ngan las 'das pa'i mthar 'gyur ro/ /de nas gzhan yang dge ba'i las kyi lam la spyod pa/ phra ma spangs pas tshe 'di dang pha rol gyi las kyi 'bras bu rnam par smin par ji ltar 'gyur zhe na/ rnal 'byor spyod pa nang gi chos la chos kyi rjes su lta zhing gnas pa des/ thos pa las byung ba'i shes pa 'am lha'i mig gis mthong ste/ phra ma spangs pas tshe 'di la las kyi 'bras bu rnam par smin pa myong bar 'gyur ba ni mdza' bshes dang / gnyen 'dab dang / rtsa lag dang / chung ma dang / bran pho dang / bran mo dang / las byed pa dang / zho shas 'tsho ba brtan par 'gyur/ gzhan gyis kha drang du mi rung zhing bshes pa dang / rgyal po'i pho brang 'khor dang / spun mi mthun pa dag gis dbye bar mi nus so/ /gal te nor dang bral bar 'gyur te/ nor dang bral bar gyur na yang mi gtong zhing mu ge dang / 'brog dgon pa dang / ri dang g.yang sa dang / gnas skabs mi mthun par chud na yang mi gtong ste/ nams kyang 'bral bar mi 'gyur la gang dag de'i skyon smra na de dag de la thabs kun gyis nyan par mi byed do/ /de rgyal po'i pho brang 'khor du brtan par 'gyur zhing chu dang / mtshon cha dang / mi mdza' ba'i 'jigs pa med par 'gyur te/ dri ma chen po phra ma spangs pa'i yon tan ni de dag yin no/ /lus dang bral nas shi ba'i 'og tu yang bde 'gro mtho ris lha'i 'jig rten du skye bar 'gyur te/ de der yang lha'i ris 'thun pa'i lha mo'i tshogs mang po rtag tu rjes su chags pa rnams kyis yongs su bskor cing me tog phreng dang / phye ma dang byug pa dang rgyan thogs pa rnams kyis rtag tu dga' ba'i mchog byed par 'gyur ro/ /snga ma bzhin du gal te phra ma spangs pa rnam par byang ba zag pa med par yongs su bsngo na/ de zag pa med pa'i bsam gtan gyi lam yongs su mya ngan las 'das pa thob par 'gyur ro/ /de nas gzhan yang mi dge ba'i las kyi lam 'jig rten thams cad skyo bar byed pa tshig rtsub po spangs pa'i 'bras bu rnam par smin pa ji ltar 'thob par 'gyur zhe na/ rnal 'byor spyod pa nang gi chos la chos kyi rjes su lta zhing gnas pa des thos pa las byung ba'i shes pa 'am lha'i mig gis mthong ste/ tshig rtsub po spangs pa de ni dge ba mthong bar 'gyur/ drang po'i rang bzhin dang / dbugs dbyung ba'i gnas dang / 'jig rten kun gyis rtogs pa dang / tshig 'jam zhing des la snyan pa dang / gzhan la rnam par 'tshe bar mi byed cing / skye bo thams cad kyi dbugs 'byung ba byed par 'gyur/ de rgyang ring po nas mthong nas/ skye bo kun nye bar 'gro bar byed/ mdza' bshes kyang mang bar 'gyur/ nor rdzas med na yang skye bo kun de'i bran dang 'dra bar 'gyur ro/ /gal te de las gzhan zhig gis nyon mongs pa byung na yang de dag gis de nams kyang gtong bar mi byed cing / de'i don thams cad nyon mongs pa med par nye bar sgrub la de la mi mdza' ba dang / rgyal po dang / chu dang me dang / mtshon gyis 'jigs pa med par 'gyur ro/ /lus dang bral nas kyang bde 'gro mtho ris kyi lha rnams kyi 'jig rten du skye bar 'gyur te/ der skyes nas kyang tshig gi rgyu 'jam pa dang / phan pa dang / snyan pa dang ldan par 'gyur zhing rdzu 'phrul che ba dang / mthu che bar 'gyur ro/ / snga ma bzhin du gal te nges par 'byung ba'i bsam gtan bde ba'i gnas zag pa med par yongs su bsngo na de byang chub gsum 'thob par 'gyur ro/ /de nas gzhan yang mi dge ba'i las kyi lam tshig kyal pa spangs pas tshe 'di la ji ltar 'thob par 'gyur ba dang / phyi ma la gang du skye bar 'gyur zhe na/ rnal 'byor spyod pa nang gi chos la chos kyi rjes su lta zhing gnas pa des thos pa las byung ba'i shes pa 'am lha'i mig gis mthong ste/ tshig kyal pa spangs pa ni 'jig rten na rigs btsun par 'gyur zhing de bkur bar yang 'gyur/ tshig snga phyi 'brel par 'gyur zhing tshig la skye bo thams cad mngon par dga' bar 'gyur/ de la skyon gyis su yang rnam par 'tshe bar mi byed la tshig shin tu 'brel cing 'jig rten na btsun par 'gyur te/ dal ba dang / snyan pa dang / chos dang ldan pa dang / 'jam pa dang / zab mo'i rgyu'i tshul dang / chos nyid dang mi 'gal ba'i gtam smra ba 'jig rten na bla ma dang 'dra bar lta zhing nor rdzas brtan par yang 'gyur/ log par spangs pa yang skye bo pha rol dag gis yon tan du 'dzin par 'gyur zhing de'i yon tan des skye bo dag bzung bar 'gyur ro/ /lus dang bral nas kyang bde 'gro mtho ris lha rnams kyi 'jig rten du skye bar 'gyur te/ der skyes nas kyang lha'i bu thams cad sems par 'gyur zhing rdzu 'phrul che ba dang / lha'i bde ba dpe med pa la spyod par 'gyur ro/ /snga ma bzhin du gal te rnam par byang ba zag pa med pa'i bsam gtan gyi bde bar yongs su bsngo na/ de byang chub gsum 'thob par 'gyur ro/ /de ltar lus kyi rnam pa gsum dang / ngag gi rnam pa bzhi mi dge ba yongs su spangs na mthar mya ngan las 'das par 'gyur ro/ /de ni dge ba'i las kyi rgyu yin la 'jig rten na yang bsngags par 'gyur zhing lha rnams kyi nang du yang skye bar 'gyur ro/ /de lus dang ngag gi las yang dag par gyur pa'i las kyi 'bras bu rnam par smin pa'i rgyu ni rnal 'byor spyod pa nang gi chos la chos kyi rjes su lta ba nang gi yang dag par gyur pa rjes su mthong ngo / /de nas gzhan yang yid kyi las ji ltar dge bar 'gyur zhe na/ rnal 'byor spyod pa nang gi chos la chos kyi rjes su lta zhing gnas pa des thos pa las byung ba'i shes pa 'am lha'i mig gis mthong ste/ yid kyi mi dge ba de rnam pa gsum po de dag zlog pas dge ba'i tshe 'di la bde ba gnas pa myong bar 'gyur zhing lus dang bral nas kyang bde 'gro mtho ris lha rnams kyi 'jig rten du skye bar 'gyur/ gal te 'khor ba la yid byung na de rgyu des phung po lhag ma med pa'i mya ngan las 'das pa'i dbyings su 'jug par 'gyur ro/ / yid kyi las ni rnam pa gsum ste/ brnab sems dang / gnod sems dang / log par lta ba'o/ /de nas gzhan yang brnab sems spangs pas dge ba'i las kyi 'bras bu rnam par smin pa ji lta bu zhig 'byung zhe na/ rnal 'byor spyod pa nang gi chos la chos kyi rjes su lta zhing gnas pa des thos pa las byung ba'i shes pa 'am/ lha'i mig gis mthong ste/ brnab sems spangs pa ni rgyal po 'am/ rgyal po'i blon po'i nor rdzas kyi rnam pa mang po thams cad gang la yang yid kyis dbrog pa'i don du sems par mi byed pa yin no/ /de'i nor rdzas gzhig tu stor na yang gzhan gyis rnyed cing de la skye bo de dang / gtso bor gyur pa zhig na yang slar sbyin par byed de/ nor dang rtag tu ldan zhing gzhan dag gis mi thub par 'gyur ro/ /lus dang bral nas kyang bde 'gro mtho ris lha rnams kyi 'jig rten du skye bar 'gyur la der skyes nas kyang lha dang lha ma yin du g.yul 'gyed pa'i lha ma yin gang gis kyang yongs su thub par mi 'gyur zhing rdeg par mi 'gyur la/ rnam par tho 'tsham par mi 'gyur ro/ /de dag las rnam par phye bar mi 'gyur te/ lha'i bu thams cad la 'dod pa dang / sdug pa dang / yid du 'ong bar 'gyur zhing / sgra dang / reg bya dang / ro dang / gzugs dang / dri sdug pa dpe med pa nye bar spyod par 'gyur ro/ /snga ma bzhin du gal te nges par 'byung ba zag pa med pa'i bsam gtan gyi 'bras bu'i lam du yongs su bsngo na/ de byang chub gsum 'thob par 'gyur ro/ / de nas gzhan yang gnod sems mi dge ba'i las kyi lam spangs pas dge ba'i las kyi 'bras bu ji ltar 'thob par 'gyur zhe na/ rnal 'byor spyod pa nang gi chos la chos kyi rjes su lta zhing gnas pa des thos pa las byung ba'i shes pa 'am/ lha'i mig gis mthong ste/ gnod sems spangs pas tshe 'di nyid la 'byor pa dang bde bar gnas par 'gyur la/ skye bo thams cad dga' ba dang / yid du 'ong bar 'gyur/ pha rol gyis 'jigs shing nyam nga ba mi bzad pa chen po dang rnam par gtse bar mi nus shing / rgyal po'i 'khor gyi 'jigs pa dang / chom rkun dang / g.yang sa'i 'jigs pa dang / me'i 'jigs pa dang / gnod pa'i 'jigs pa dang / g.yo'i 'jigs pa dang / chu'i 'jigs pa dang / 'jigs pa du ma nyam nga ba dag dang bral zhing 'jigs pa dang nyam nga ba dag las kun du thar te/ skye bo thams cad kyi sdug pa dang / mchog tu dga' bar 'gyur/ sdig pa'i skye bo dang / dge ba'i skye bo la bu dang spun dang 'dra bar sdug par 'gyur ro/ /lus dang bral nas kyang bde 'gro mtho ris lha rnams kyi 'jig rten du skye bar 'gyur te/ der yang rdzu 'phrul che ba dang / mthu che bar 'gyur/ gzugs dang / sgra dang / reg bya 'dod pa thams cad 'byor pa la gnas par 'gyur zhing dga' ba'i tshal dang / yongs su 'du ba dang / rnam par mdzes pa dang / shing rta sna tshogs kyi tshal chen po rnams su lha'i bu mo'i tshogs kyis yongs su bskor bar 'gyur/ de'i lus dang ngag dang yid la lha gang gis kyang rnam par gtse bar mi nus shing de la lha 'bum snyed dag gis dga' ba skyed par 'gyur la/ lha'i rgyal po brgya byin gyi 'dod pa dang sdug pa dang dga' ba dang yid du 'ong bar 'gyur/ lha dang lha ma yin gyi g.yul 'gyed pa'i nyon mongs pa dag kyang med cing 'khrug pa dag dang 'bral bar 'gyur ro/ /gal te nges par 'byung ba 'jig rten las 'das pa'i lam nyon mongs pa med par yongs su bsngo na de lha'i 'jig rten de nas shi nas 'khor los sgyur ba'i rgyal po'i gling bzhi la dbang ba rin po che sna bdun la nye bar spyod pa rnam pa du mar 'gyur te/ 'di lta ste/ bud med rin po che ni de'i bud med kyi lus las tsan dan dang spos 'byung zhing kha nas ud pa la'i dri 'byung / bya ka ling ga ltar reg na bde bar 'gyur te/ bya ga ling ga zhes bya ba ni rgya mtsho'i gling la gnas pa'i bya yin no/ /de ltar 'di'i mthus gang la reg pa nyid kyi lus kyi nyon mongs pa med par 'gyur zhing / gling de na gnas pa'i skye bo bkres pa dang / skom pa dang / mya ngan dang bral bar 'gyur/ bud med de lta bu de 'khor los sgyur ba'i rgyal pos mthong nas grang ba'i dus su ni dro bar byed cing dro ba'i dus su ni bsil bar byed de/ de la mi gzhan gang gis kyang reg par bya bar mi nus so/ /de gnod sems spangs pa'i mthus dge ba'i las kyi rjes su zhugs pa dge ba thams cad yang dag par rtog pa'i mi de dag thams cad kyis ma dang sring mo ltar mthong ngo / /de yang rgyal po de'i yid du 'ong zhing de la gus par byed la de'i snying du sdug pa dang / rtag tu bde ba'i rjes su 'jug par 'gyur ro/ /bud med kyi skyon rnam pa lnga spangs pa yin te/ 'di lta ste/ skyes pa gzhan la sems pa dang / ser sna dang / mi rigs par chags pa dang / mi rigs pa'i gnas la rjes su dga' ba dang / khyim thab kyi srog gcad par 'dzin pa'o/ /bud med rin po che'i yon tan lnga dang ldan par 'gyur te/ 'di lta ste/ bsam pa dang 'thun par 'gyur ba dang / bu mang po btsa' bar 'gyur ba dang / rigs 'thun par 'gyur ba dang / srid mtho bar 'gyur ba dang / khyim thab bud med gzhan la sems na phrag dog mi byed pa'o/ /gzhan yang bud med chen mo'i yon tan gsum dang ldan par 'gyur te/ 'di lta ste/ tshig cal col med par 'gyur ba dang / log par lta ba med par 'gyur ba dang / khyim thab med kyang sgra dang / dri dang / ro dang / reg bya dag gi dbang du mi 'gyur ba'o/ /de rgyu des lus dang bral nas bde 'gro mtho ris kyi lha rnams kyi 'jig rten du skye bar 'gyur te/ de ltar 'khor los sgyur ba'i rgyal po bud med rin po che la nye bar spyod par 'gyur ro/ /de nas gzhan yang gnod sems kyi dri ma chen po spangs pas dge ba'i las kyi rnam par smin pas 'khor los sgyur ba'i rgyal por ji ltar 'gyur zhe na/ rnal 'byor spyod pa nang gi chos la chos kyi rjes su lta zhing gnas pa des thos pa las byung ba'i shes pa 'am/ lha'i mig gis mthong ste/ gzhan gyi mi dge ba'i las kyi rgyu 'thun pa gnod sems chen po spangs pas/ rin po che gnyis pa nor bu rin po che la nye bar spyod par 'gyur te/ de'i yon tan brgyad dang ldan pa yin no/ /'di lta ste/ mtshan mo rab tu gsal ba yin te/ ji ltar ston ka'i zla ba nya ba ni/ ston ka 'od gsal bar 'gyur ba de ltar nor bu yang mtshan mo'i mun pa mun nag la dpag tshad brgyar 'od byung zhing nyin par tsha bas gdungs pa rnams la ni 'od bsil ba 'byung ste/ tsha ba sel bar byed pa 'di ni nor bu de'i yon tan gcig yin no/ /gzhan yang yon tan gnyis pa ni gang gi tshe lam du zhugs pa la chu dang bral ba de'i tshe/ skom pas gdungs pa rnams la chu chen po yan lag brgyad dang ldan pa rab tu 'byung bar 'gyur la des skom pa de dag thams cad sel bar 'gyur te/ 'di ni nor bu de'i yon tan gnyis pa yin no/ /gzhan yang nor bu de'i yon tan gsum pa ni gang 'khor los sgyur ba'i rgyal pos bsams pa nor bu de las 'byung ste/ 'di ni nor bu de'i yon tan gsum pa yin no/ /gzhan yang nor bu de'i yon tan bzhi pa ni yan lag brgyad par 'gyur te/ de'i cha re res 'od kyi kha dog sna tshogs gtong ste/ sngon po dang / ser po dang / dkar po dang / dmar po dang / btsod ka'i kha dog lta bu'o/ /gzhan yang nor bu de'i yon tan lnga pa ni nor bu de gang na 'dug pa dpag tshad brgyar nye ba dag gi nad med par 'gyur/ rtag tu yid mnyam par gzhag pa dang / de'i 'dod pa thams cad las ji lta ba bzhin du 'bras med par mi 'gyur ro/ /gzhan yang nor bu de'i yon tan drug pa ni klu ngan pas char mi bzad pa mngon par 'bab par mi nus so/ /gzhan yang nor bu de'i yon tan bdun pa ni mya ngam dang / g.yang sa dang / dgon pa dang / shing ljon pa dang / mtshe'u dang / tshal dang / pad ma dang / nags tshal dang / ne'u sing phun sum tshogs par 'gyur ro/ /gzhan yang nor bu de'i yon tan brgyad pa ni mi gang yang dus ma yin par 'chi bar mi 'gyur zhing / dud 'gro'i 'gro bar mi 'gyur te/ dud 'gro'i 'gro ba dag gis kyang gnod par mi 'gyur ro/ /mi mthun pas yang mi mthun pa la gnod par mi 'gyur te/ 'di lta ste/ sbrul dang / ne'u le dang / sbrul lta bu ste yon tan chen po brgyad po de dag dang ldan no/ /'khor los sgyur ba'i rgyal po de'i gnod sems spangs pa dge ba'i las kyi rnam par smin par 'gyur ba ni de'i bu yang stong tham par 'byung ste/ dpa' zhing rtul phod la yan lag mchog gi gzugs dang ldan pa/ pha rol gyi sde mngon par 'joms pa/ bsam pa'i rjes su 'jug pa/ chos dang ldan zhing chos kyi rjes su 'jug pa/ rigs mthun pa/ 'khor gyi skye bo thams cad dga' zhing rang bzhin gyis rjes su chags pa yin no/ /de nas gzhan yang gnod sems spangs pas gsum pa 'jig rten du 'khor lo rin po che ji ltar 'byung zhe na/ rnal 'byor spyod pa nang gi chos la chos kyi rjes su lta zhing gnas pa des thos pa las byung ba'i shes pa 'am lha'i mig gis brtags na 'khor lo rin po che yon tan lnga dang ldan par mthong ste/ 'di lta ste/ 'dzam bu'i chu bo'i gser las byas pa dang / tshad dpag tshad lnga brgya yod/ rtsibs stong yod cing / 'jig rten na nyi ma gnyis pa lta bu mdzes te/ 'di ni de'i yon tan dang po yin no/ /gzhan yang 'khor lo rin po che'i yon tan gnyis pa ni nam mkha' la dpag tshad 'bum du nyi ma gcig gis thogs pa med par 'gro'o/ /gzhan yang 'khor lo rin po che de'i yon tan gsum pa ni 'di lta ste/ 'khor los sgyur ba'i rgyal po nub kyi ba lang spyod dang / shar gyi lus 'phags dang / byang gi sgra mi snyan dang / rgyal chen bzhi'i lha'i gnas gang du 'gro bar 'dod pa de dang der nam mkha' la 'khor lo rtsibs stong yod pas 'gro zhing / de'i mthus de'i dpung gi tshogs yan lag bzhi pa glang po dang / rta dang / shing rta dang / rkang thang ba dang lhan cig tu nam mkha' la 'gro'o/ /gzhan yang 'khor lo rin po che de'i yon tan bzhi pa ni 'khor los sgyur ba'i rgyal po gang mi thos pa de 'khor lo rin po che des grogs byas te thos par byed do/ /gzhan yang 'khor lo rin po che de'i yon tan lnga pa ni sngo ba gang yang med de/ chos dang ldan pa'i chos kyi rjes su 'jug pa'i rgyal po la/ rgyal po 'am/ blon po'i chos kyi grogs pos mthong ma thag tu de dag thams cad 'bul te/ de ltar 'khor lo rin po che yon tan lnga dang ldan no/ /rin po che chen po gsum pa bshad zin to/ /de nas gzhan yang gnod sems spangs pa'i dge ba'i las kyi mtha' spyad pa dag 'khor los sgyur ba'i rgyal po'i bzhi pa glang po rin po che ji ltar 'jig rten du 'byung bar 'gyur zhe na/ rnal 'byor spyod pa nang gi chos la chos kyi rjes su lta zhing gnas pa des thos pa las byung ba'i shes pa 'am lha'i mig gis mthong ste/ 'di la 'khor los sgyur ba'i rgyal po chos dang ldan zhing chos kyi rjes su 'jug pa'i glang por 'gyur ba ni cang shes pa/ mchog tu bka' mnyan pa/ pha rol gyi sde las rgyal bar byed pa/ yan lag bdun legs par gnas pa yin te/ 'di lta ste/ rkang lag bzhi dang mjug ma ma zegs pa dang / rlig pa mdoms kyi gnas na 'dug pa dang / sna legs par gnas pa ste/ de dag la sogs pa de'i yan lag bdun dag sa'i steng na legs par rab tu gnas pa yin stobs che ba yin te/ rang bzhin gyis glang po che stong gi stobs yang dag par 'dzin par byed rkan 'jam pa yin zhing mdog dkar ba kha ba dang dngul gyi mdog lta bu yin te/ 'di lta ste/ brgya byin gyi glang po che lta bu yin la/ glang po che gzhan dag de'i dri tshor nas mdun du 'dug par mi byed do/ /gnas gsum du g.yul 'gyed par 'gyur te/ 'di lta ste/ chu dang / skam sa dang / bar snang la'o/ /shugs phun sum tshogs pa dang ldan pa yin te/ nyin gcig gis 'dzam bu'i gling lan gsum skor bar byed do/ /skud pas kyang dkrir rung bar 'gyur la gang gi tshe 'khor los sgyur ba'i rgyal po glang po cang shes la zhon pa de'i tshe sems dang 'thun par 'gyur te/ 'khor los sgyur ba'i rgyal po gang du sems 'jug par 'gyur ba der glang po cang shes pa de ma bskul kyang 'jug go/ /dal gyis 'gro zhing 'gying bas spyi bor bskyod pa/ gnod pa med cing 'khrug pa med la/ sdug pa dang mdzes par 'gro ba yin/ byis pa'i nang du song na yang byis pa rnams la 'jigs par mi byed/ lam srang dang / bzhi mdo dang / ba gam gyi nang du song ste/ phan tshun 'gro ba na bud med kyis kyang reg par bzod pa yin/ g.yul 'gyed pa'i dus su drag la gnas pa'i dus su ni skud pas dkrir rung ba yin te/ rgyal po'i glang po che'i yon tan ni de dag yin no/ /'khor los sgyur ba'i rgyal pos dge ba bcu'i las kyi lam re re spyad pas kyang 'khor los sgyur ba'i sa bon 'di dag 'grub na dge ba bcu'i las kyi lam mtha' dag gi rjes su zhugs pa lta smos kyang ci dgos/ de ltar rnal 'byor spyod pa lha'i mig gis 'khor los sgyur ba'i bzhi pa glang po rin po che mthong ngo / /de nas gzhan yang 'khor los sgyur ba'i rgyal po'i rta rin po che'i yon tan ni du zhig dang ldan par 'gyur zhe na/ rnal 'byor spyod pa nang gi chos la chos kyi rjes su lta zhing gnas pa des thos pa las byung ba'i shes pa 'am/ lha'i mig gis mthong ste/ rta rin po che ngang pa dang me tog ku mu da ltar dkar ba yin/ kun nas lha'i nor bu'i gtsug la sogs pa mtshan bzang pos brgyan pa yin/ bong stong dang mdog dang dbyibs phun sum tshogs pa yin/ bsgo na nyin gcig gis 'dzam bu'i gling lan gsum du skor bar byed la de'i lus dag la shin tu nad med pa yin te/ 'di ni 'khor los sgyur ba'i rgyal po'i rin po che lnga pa yin no/ /de nas gzhan yang 'khor los sgyur ba'i rgyal po'i blon po rin po che ji lta bu yin zhe na/ rnal 'byor spyod pa nang gi chos la chos kyi rjes su lta zhing gnas pa des thos pa las byung ba'i shes pa 'am lha'i mig gis mthong ste/ blon po rin po che'i yon tan ni 'di dag yin te/ 'di lta ste/ gang rgyal po'i bya ba'i rnam pa yid la sems pa de nyid ma bsgos kyang de'i yid kyis shes nas/ rgyal po la yongs su 'bul bar byed de/ shin tu rdzogs pa dang / de bsags pa dang / ma chags pa dang / chos ma yin pa rnam par spangs pa dang / shin du rigs pa brtsams pa dang / yul dang / dus dang ldan pa dang / nyon mongs med pa dang / gzhan la gnod pa med pa dang / skye bo la rnam par mi 'tshe ba dang / yang dag pa'i tha snyad dang ldan pa'i rang bzhin la skyo ba med do/ /rgyal po'i bya ba'i rnam pa 'am chos kyi don gyi bya ba 'dod pa dang ldan zhing ma 'ongs pa'i bya ba dang ldan pa thams cad yongs su 'bul bar byed do/ /'di ni 'khor los sgyur ba'i rgyal po'i blon po rin po che yin te/ lhag pa'i gnod sems spangs pa'i dge ba bcu'i las kyi lam spyod pa dag ni 'jig rten thams cad la pha ma ltar phan par 'dod par gnas pa yin no/ /de nas gzhan yang ji ltar na bdun pa khyim bdag rin po che 'byung bar 'gyur/ khyim bdag rin po che de'i yon tan ni du zhig yod ce na/ rnal 'byor spyod pa nang gi chos la chos kyi rjes su lta zhing gnas pa des thos pa las byung ba'i shes pa 'am lha'i mig gis mthong ste/ rgyal po'i bka' nyan pa'i khyim bdag rin po che'i yon tan ni 'di dag yin te/ 'di lta ste/ rdo rje dang / rin po che mthon ga dang / mar gad dang / spug la sogs pa rin po che rnams kyis ngam grog dang / g.yang sa dang / ri khrod dang / mi mthun pa gzhan dag tu ma bskos kyang shin du 'gengs la rin po che rnams kyang zad pa med par 'gyur na/ gser dang dngul lta zhig smos kyang ci dgos/ khyim bdag rin po che 'di'i 'byor pa ni shin tu gnas pa yin te/ g.yo med pa dang / sgyu med pa dang / gzhan la mi gnod pa dang / skye bo thams cad dga' ba ni khyim bdag rin po che yin no/ / de ltar rgyal po rin po che sna bdun dang ldan pa ni mi'i gnas bzhi rnams la sgo bar byed cing klu dang / lha'i ris gnyis dang / rgyal chen bzhi dang / sum bcu rtsa gsum gyi lha rnams kyi dbang po'i stan phyed 'phrog pa yin te/ de ltar 'khor los sgyur ba'i rgyal po rin po che sna bdun dang ldan pa yin no/ /de'i nye ba'i rin po che sna bdun ni rin po che de dag las chung zad dman pa yin te/ 'di lta ste/ ral gri nye ba'i rin po che dang / lpags pa nye ba'i rin po che dang / mal cha nye ba'i rin po che dang / tshal nye ba'i rin po che dang / khyim nye ba'i rin po che dang / gos nye ba'i rin po che dang / lham nye ba'i rin po che'o/ /de la 'khor los sgyur ba'i rgyal po'i ral gri nye ba'i rin po che'i yon tan ni 'di lta ste/ yul 'khor gang dag rgyal po'i yid dang / tshig las 'gal bar byed 'dod pa der ral gri nye ba'i rin po che 'gro ste/ des btab pa med cing ral gri rin po ches su la yang btab pa med kyis kyang yul 'khor kun gyis mthong nas 'dud par byed do/ /nye ba'i rin po che de'i yon tan ni 'di yin te/ bzang ba mi zad pa/ chad pa med cing mtshon gyis bda' ba med kyang yul 'khor de dag thams cad 'dud par byed de/ 'di ni ral gri nye ba'i rin po che'i yon tan yin no/ /lpags pa nye ba'i rin po che'i yon tan ji lta bu yin zhe na/ lpags pa rin po che ni rgya mtsho nas 'byung ste/ de byung bar gyur pa dang / tshong pa dag gis rgyal po la 'bul bar byed de/ de'i yon tan ni 'di dag yin no/ /de rgya mtsho'i klu'i lpags pa yin te/ zheng du dpag tshad lnga la chur dpag tshad bcu ste/ de char gyis mi rlan/ rlung gis mi bskyod/ mes mi 'tshig /grang na dro bar byed cing / dro na bde ba bsil bar byed la/ 'khor los sgyur ba'i rgyal po 'khor dang bcas pa gang du 'gro ba der blon po rin po ches de khyer bar byed de/ ji ltar so so nas byed pa ltar de rgyal po'i 'khor gyi khyim gyi bya ba thams cad byed do/ /bud med mi sdug pa dag mi mthong zhing dkar ba de dang ldan par 'gyur la zla ba dang / nyi ma'i 'od snang ba de dang yang ldan par 'gyur ro/ /gsum pa rgyal po'i mal cha rin po che ni yang zhing 'jam la mtho dma' can yin te/ de'i rgyu mtshan ni bteg na 'phar ba dang mnan pa nem byed pa yin no/ /gal te bsam gtan sems na de'i bsam gtan rnam par grol zhing blo gros gsal bar byed/ gal te 'dod chags kyis zil gyis non pa yin na de mal cha'i steng du 'dug na/ de'i tshe 'dod chags dang bral zhing chags pa med par byed do/ /zhe sdang dang gti mug dag la yang de bzhin te/ mal cha nye ba'i rin po che ni bsam gtan gyi gnas dang 'dra'o/ /rgyal po mal cha rin po che'i nang na 'dug pa bud med kyis mthong la de'i tshe mchog tu dga' ba skyes kyang yid la shin tu 'dod chags par mi 'gyur te/ gsum pa 'di ni mal cha nye ba'i rin po che 'i yon tan yin no/ /bzhi pa tshal nye ba'i rin po che yon tan du yod ce na/ 'di lta ste/ gal te rgyal po tshal du bsam gtan la dga' bar 'gyur te/ de der nye bar 'gro na tshal de'i mthu dang / rgyal po'i dge ba'i las kyis gang lha'i 'jig rten gyi tshal gyi dga' ba'i rnam pa me tog dang / 'bras bu dang bya dang / pad ma dang / lteng ka dang / 'bab pa'i chu ngogs bde ba dang / lha'i bu mo dag rol mo byed cing / rgod la mdzes pa/ de dag thams cad lha'i ris de nas tshal der nye bar 'ong ste/ rgyal po de yang lha bzhin du lha'i 'dod pa'i yon tan lnga dag dang ldan par 'gyur/ tshal nye ba'i rin po che der bud med dang lhan cig shin du dga' zhing dga' mgur spyod par byed de/ dge ba'i las kyi rnal 'byor spyod pa de bzhi pa tshal nye ba'i rin po che mthong nas gnas so/ / 'khor los sgyur ba'i rgyal po'i khyim nye ba'i rin po che ji lta bu yin/ yon tan ni du zhig dang ldan zhe na/ 'di lta ste/ gang 'khor los sgyur ba'i rgyal po'i khyim nye ba'i rin po che'i nang du nyal bar gyur na/ mtshan mo nyal ba de'i tshe zla ba lta bar 'dod na 'ong zhing gza' dang / rgyu skar dang / skar mda' dag kyang de'i khyim der nye bar 'ong bar 'gyur/ de'i nor bu yang mthong na dga' bar 'gyur/ lha mo dag kyang lha'i rol mo byed par 'gyur/ gang mya ngan mang po dang bral ba'i mi de bde bar gnyid log par 'gyur/ gnyid log pa na rmi lam dge ba mchog tu dga' ba dag mthong bar 'gyur/ grang ba'i dus su ni rlung dro ba ldang zhing / dro ba'i dus su rlung bsil ba reg na bde zhing 'jam pa ldang ngo / /mtshan mo thun gsum las thun gnyis la nyal zhing thun gsum pa las gnyid dang bral nas langs te/ bde ba'i chos la gnas par 'gyur te/ 'di ni 'khor los sgyur ba'i rgyal po'i khyim nye ba'i rin po che yin no/ /gos rin po che rnam pa du yod yon tan ni du zhig dang ldan zhe na/ 'di lta ste/ thags bzang zhing mchog tu 'jam la dri mas ma gos pa yin te/ gyon nas grang ba dang / dro ba dang / bkres pa dang / skom pa dang / nyam chung ba dang / ngal ba dang / dub pa'i gnod pa med la/ me dang mtshon dag gis bsreg pa dang / gcad par mi nus so/ /de nas gzhan yang 'khor los sgyur ba'i rgyal po'i lham nye ba'i rin po che ji lta bu yin zhe na/ rnal 'byor spyod pa nang gi chos la chos kyi rjes su lta zhing gnas pa des thos pa las byung ba'i shes pa 'am lha'i mig gis brtags na/ lham nye ba'i rin po che 'khor los sgyur ba'i rkang pa la gyon na ji ltar skam sa la rkang pa mi 'bying ba de bzhin du chu la yang mi 'bying bar 'gyur ro/ / gal te dal gyis sngon du 'gro bar 'dod na dpag tshad brgyar yang 'gro bar 'gyur zhing lus la ngal ba med de/ 'di dag ni 'khor los sgyur ba'i rgyal po rin po che sna bdun dang / nye ba'i rin po che sna bdun dag la spyod pa yin te/ mi'i gnas bzhi dang / lha'i rigs gnyis la nye bar spyod pa yin no/ /de'i bu dpa' zhing rtul phod la pha rol gyi sde rab tu 'joms pa stong tham pa yod de/ de dag 'khor los sgyur ba'i rgyal po la phyag byed do/ /gnod sems mi dge ba'i las spangs pa ni dge ba bcu'i las kyi lam gyi rgyu 'thun pa bde ba de dag myong bar 'gyur ro/ /de nas gzhan yang 'khor ba thams cad kyi sa bon du gyur pa/ thog ma med pa'i dus nas mun pa mun nag tu gyur pa/ yang dag par sbyor ba thams cad bag la nyal du gyur pa log par lta ba spangs pa ji lta bu yin/ yang dag pa'i lta bas 'khor ba las grol ba ji lta bu yin zhe na/ rnal 'byor spyod pa nang gi chos la chos kyi rjes su lta zhing gnas pa des thos pa las byung ba'i shes pa 'am lha'i mig gis mthong ste/ rnal 'byor spyod pa des chos la chos kyi rjes su mthong ba ni 'di la log par lta ba spangs shing / de'i yang dag pa'i lta bas don med pa thams cad spangs la/ yang dag pa'i sbyor ba'i bag la nyal 'dor bar 'gyur/ de mya ngan las 'das pa nye bar 'gyur zhing 'khor ba dang ring bar 'gyur/ 'di la log par lta ba rnam pa lnga mthong nas dbang po lnga bsgribs par 'gyur ba ni skyes bu dam pa dam pa'i chos la mngon par dga' ba de thog ma nas 'di ltar sangs rgyas kyi yon tan de dag rnar thos nas de'i tshe 'di ltar 'khor ba'i sdug bsngal rnam pa sna tshogs la dmigs shing 'gro ba lnga rnams la 'jigs pa chen po lnga dmigs te/ lha rnams la bag med pas 'chi ba'i sdug bsngal dang / mi rnams la 'dod pa'i sdug bsngal dang / sems can dmyal ba rnams la gnod pa'i sdug bsngal dang / yi dags rnams la bkres pa dang skom pa'i sdug bsngal dang / dud 'gro rnams la gcig la gcig za ba'i sdug bsngal te/ de ltar rnam pa lnga po de dag rnam pa du ma yod cing sdug bsngal gyi yan lag dbye ba dag dpag tu med par dmigs so/ /de'i tshe 'di ltar thog ma nyid du 'khor ba thams cad las nges par byung bar gyur cing snang bar gyur la dam pa'i chos nges par 'byed pa'i cha lam rab tu 'byung bar sems bskyed de/ de'i sems bskyed pa gcig las dge ba'i chos kyi rgyun nyid skye'o/ /gang gis de'i sems bskyed pa de dang yang dag par ldan pa la bar snang la spyod pa'i gnod sbyin rab tu mgu zhing kun du dga' la rab tu dga' ste/ sems rangs par gyur nas yid la rigs kyi bu 'di'i ming ni 'di zhes bya/ rigs ni 'di zhes bya ste/ de thog ma med pa'i dus nas 'dod chags zhe sdang gti mug rnams spang bar 'dod la bdud kyi yul gyi dngos po mi 'dod par zhugs pa/ kun nas nyon mongs pa'i yul dag gis dga' ba'i 'dod chags kyi mod las skyes pa'i sred pa dag la kun du dga' ba yin no snyam mo/ /gzhan yang log par lta ba dang bral ba'i rigs kyi bu de ni de ltar rtag tu rab tu 'byung ba'i sems kun du bstan par byed cing goms par byed la mang du byed/ dge ba'i bshes gnyen la bsnyen bkur byed/ dam pa'i chos nyan pa la dga' bar 'gyur/ sangs rgyas kyi chos la phyir zhing sems gsal la phyag 'tshal bar byed/ lus dang ngag gi las kyi mtha' zhi zhing shin tu gsal ba yin te/ de ltar de'i lus dang ngag dang yid zhi bas nyin mo mnyam par gzhag par bar snang la spyod pa'i gnod sbyin gyis rig nas kun du dga' bar 'gyur te/ rigs kyi bu 'di dge ba'i bshes gnyen la sems rab tu dang zhing khyim gyi gnas gzeb lta bur gyur pa la sems kun du mi chags/ des bdud kyi yul r nams la thog ma med pa'i dus nas zhugs pa'i 'dod chags zhe sdang gti mug dag gis 'dod pa'i lha dang lhan cig tu 'du shes dag la chags pa med cing bdud dang lhan cig g.yul 'gyed par 'dod la nyon mongs pa spong bar 'dod pa de bar snang la spyod pa'i gnod sbyin gyis rig nas kun du dga' bar 'gyur ro/ /gzhan yang rigs kyi bu de de ltar 'khor ba'i sdug bsngal la dmigs nas ches shin du rab tu 'byung ba'i sems skyed par byed de/ de srog gcod pa dang / ma byin par len pa dang / 'dod pas log par g.yem pa dang / chang dang / sbyar ba'i chang dang / brdzun du smra ba spangs nas sdom pa len par 'gyur ro/ /de gang gi tshe dge bsnyen gyi sdom pa rdzogs par spyod par 'gyur ba de'i tshe/ bar snang la spyod pa'i gnod sbyin kun du dga' ste/ rigs kyi bu che ge mo zhig ming ni 'di zhes bya/ rus ni 'di zhes bya ba grang khyer che ge mo zhig dang / grong rdal ga ge mo zhig dang / yul ga ge mo zhig tu skra dang kha spu bregs te chos gos ngur smrig bgos nas yang dag pa'i dad pas khyim nas khyim med par rab tu byung ste/ bdud kyi phyogs ni dmas par byed cing / dam pa'i chos kyi phyogs ni mtho bar byed/ bdud kyi 'ching ba ni rnam par gcod par byed cing nyon mongs pa chen po 'dod chags zhe sdang gti mug las grol bar byed do zhes mngon par sgrogs so/ /log par lta ba ni kun du sbyor ba'i bag la nyal thams cad kyi gzhi yin la/ yang dag par lta ba ni mtha' las 'das pa'i gzhi yin te/ rnal 'byor pas chos de rjes su mthong ngo / /de'i tshe 'di ltar thog ma nyid du yang dag pa'i lta ba la mngon par stod par byed de/ mi rgod mi smod skyon du mi 'grang la pha rol dag la ston par byed cing rab tu 'jog par byed do/ /log par lta ba la smod de/ stod par mi byed la smod par byed do/ /yang dag par lta bas ni log par lta ba las dang / chos dang / rnam par smin pa yang dag par mngon par ston par byed cing 'jog par mi byed do/ /'ching ba rnams kyi rtsa ba ni log par lta ba yin te/ byis pa so so'i skye bo rnams kyi 'ching ba yin zhing 'byung po rnams dang / sems can dmyal ba dang / dud 'gro dang / yi dags kyi yul du gnas pa'i mtha' yin no/ /rigs kyi bus de spangs na dge ba du ma de dag thob par 'gyur ro/ / gzhan yang rigs kyi bu de 'di ltar khyim gyi gnas ni sdug bsngal ba nyam nga ba 'ching bar gyur pa du ma yin te/ rang dbang med par rig nas khyim nas 'byung zhing rab tu 'byung bar 'dod la bdud dang lhan cig g.yul 'gyed par 'dod pa'i skyes bu dam pa de sa bla dang / bar snang la spyod pa'i lha dag gis rig nas kun du dga' ste/ rgyal po chen po bzhi rnams la kun du dga' ba'i yid kyis rigs kyi bu 'di zhes bya ba grong che ge mo zhig dang / grong rdal mang ge mo zhig dang / yul ga ge mo zhig tu skra dang kha spu bregs te/ gos ngur smrig bgos nas yang dag pa'i dad pa nyid kyis khyim nas khyim med par rab tu byung ngo / /de khyim nas byung bas bdud kyi phyogs ni dmas par byed cing dam pa'i chos kyi phyogs ni mngon par mtho bar byed do zhes mngon par bsnyad do/ /de nas rgyal po chen po bzhi po de dag gis sa bla dang / bar snang la spyod pa'i lha dag dang / gnod sbyin de dag las de skad thos nas yid dga' la bar snang la spyod pa'i gnod sbyin dag rab tu dga' bar 'gyur ro/ / de ltar 'dzam bu'i gling gi mi dam pa'i chos dge ba'i gtam gyis spro ba skyes nas/ rigs kyi bu de ji ltar rigs par 'phags pa dge sbyong gi mkhan po la bsnyen bkur byed do/ /bsnyen bkur byas nas kyang skra dang kha spu bregs shing gos ngur smrig bgos te so sor thar pa'i sdom pa len to/ /sdom pa blangs pas sa bla dang / bar snang la spyod pa'i gnod sbyin rnams lhag par kun du dga' ste/ rgyal po chen po bzhi la 'dzam bu gling na rigs kyi bu che ge mo zhig ces bya ba grong mang ge mo zhig dang yul ga ge mo zhig tu log par lta ba spangs nas yang dag par lta ba'i las dang / chos yang dag par blangs pa/ bu dang chung ma la sred pa dug lta bu don med cing nyam nga ba thams cad spangs nas/ skra dang kha spu bregs gos ngur smrig bgos shing so sor thar pa blangs te/ bdud dang lhan cig g.yul 'gyed par 'dod pa/ dga' ba'i 'dod chags kyi mod las skyes pa spong bar 'dod pa min no zhes mngon par bsnyad do/ /de nas de'i tshe rgyal po chen po bzhi kun du dga' nas rgyal chen bzhi'i ris kyi lha rnams la 'dzam bu'i gling du rigs che ge mo zhig las grong mang ge mo zhig dang / yul ga ge mo zhig tu rigs kyi bu che ge mo zhig log par lta ba spangs nas yang dag par lta bas skra dang kha spu bregs/ gos ngur smrig bgos nas dad pa nyid kyis khyim nas khyim med par rab tu byung ste/ dge slong ga ge mo zhig gi drung du gnas so zhes mngon par sgrogs so/ /de lha rnams kyis thos nas bdud kyi phyogs dmas par 'gyur zhing dam pa 'i chos kyi phyogs ni 'phel bar 'gyur ro zhes yid dga' bar 'gyur ro/ /de nas rgyal po chen po bzhi las rgyal chen bzhi'i lha rnams kyis thos nas shin du dga' bar 'gyur ro/ /gzhan yang rigs kyi bu de 'di ltar kha na ma tho ba rdul tsam la yang 'jigs par lta la bzod cing dul te/ sems yang dag par sdom pa/ 'du 'dzi la mi dga' zhing nye bar khro ba med pa/ rigs nas rigs su nye bar sten cing sdig pa'i grogs po dang 'grogs par mi byed la yul gyi rnam par rtog pa la lta bar mi byed/ bza' ba zhim po mang du mi 'dod cing tshogs ngan pa dang spyod par mi byed/ yul gyi spyod pa la mngon par dga' bar mi byed cing nam du yang mdza' bshes su lta ba'i ngang tshul can du mi byed/ yul la spyod pa'i tshul khrims su mi byed cing dran pa nye bar gzhag pa la rtag tu brtson par 'gyur/ zhi ba'i zas kyis gnas shing bdud kyi 'ching ba gcod pa la rtag tu brtson par 'gyur/ yang dag par lta ba la rtag tu brtson zhing skyes bu dam pa 'jig rten thams cad la phan par 'dod pa yin no/ /'dir tshigs su bcad pa/ 'byung po rnams la gang mi 'tshe/ /rtag tu byams sems bzod ldan pa/ /'byung po kun gyi pha lta bur/ /de la 'jig rten rjes su lta/ / ma byin len pa spangs pa ni/ /rtag tu shes ldan dbang po thul/ /lus kyi las mtha' dge ba dang / /srid pa dag las de rgal lo/ /ri mor bris pa'i bud med la/ /mig gis lta bar mi byed de/ /'jig rten 'dod pa dam bcom pa/ / de lta bu ni grol zhes bya/ /dpa' la bong ba gser du 'dra/ /mya ngan bral zhing mnyam par gzhag /nyon mongs 'dod chags ma 'dres pa/ /de ni mtha' yas sgo thob bo/ /gang la don dang don min mnyam/ /de bzhin rnyed dang ma rnyed dang / /bde dang sdug bsngal sems mnyam pa/ /de ni dge slong zhes bya 'o/ /mdza' bshes mi bshes gnyi ga spangs/ /sems ni mnyam zhing dbang po thul/ /gang dag yul gyis nyon mi rmongs/ /de 'ang bram zer shes par bya/ /yul ni gang dag dug 'dra la/ /sdang ba dpa' bo nyon mongs bral/ /rdzogs sangs rgyas kyis bshad pa yi/ /de yi mya ngan 'das mi ring / /skye dang 'jig pa'i de nyid shes/ /yang dag lta la chags pa med/ /gang ri lta bur blo mi g.yo/ /de ni 'khor ba las grol lo/ /tsan dan dang ni ral grir mnyam/ /zas ni zhim dang mi zhim mnyam/ /zab dar snam bu mnyam pa ni/ /sred pas gnod par mi 'gyur ro/ /rnyed dang bkur sti mi dga' zhing / /rtswa stan tsam gyis chog shes la/ /rnyed dang bkur sti me lta bur/ /gang gis mthong ba de mthong ngo / /gang dag yul gyi dbang mi 'gyur/ /sred pa'i chu bor mi 'jug la/ /rang gi las 'bras de nyid shes/ /de ni dge slong sangs rgyas gsungs/ /gang dag 'das pa'i dus mi 'dod/ /ma 'ongs pa la blo mi dga'/ /rnal 'byor pa ni da ltar la/ /mi dga' de yi blo gros med/ /gang gi blo gros phyir log pa/ /chos la rtag tu gnas par 'gyur/ /dkar po chos la mnyam gzhag pa/ /de ni 'khor bar mi 'jug go/ /gang gis sems la rnyog mi byed/ /rig pa me lta bu yin no/ /gang la yul ni bran lta bu/ / de la sdug bsngal med pa yin/ /gang gis dbang po dbang byed cing / /dbang po'i dbang du mi 'gro la/ /gang dag gzugs sogs mi 'phrogs shing / /nyon mongs med pa thub dang 'dra/ /gang gis bsams pa dge ba dag / bzod ldan mthong na dga' ba dang / /sems ni rab tu dga' byed pa/ /mi de zla 'dra thub pa yin/ /gang dag dgon par mngon dga' ba/ /khang bzangs mchog la chags pa med/ /thang gi shing la mngon dga' zhing / / zas slong dge slong zhes bya'o/ /dpa' bo zhi dul blo bzang ba/ /bde dang sdug bsngal de nyid rig /de ni bla med gnas 'gro zhing / /gang du song bar nyon mi mongs/ /snying brtse ldan zhing blo gros drang / /rtag tu bsam gtan pha rol 'gro/ /phal pa rnams dang mnyam mi 'gro/ /rnal 'byor de ni bden tshig ldan/ /log par lta ba'i chos de dag /spangs pas de dag 'thob par 'gyur/ /gzhan yang log par lta ba spangs pas yang dag par lta ba sngon du 'gro ba'i yid rnam par rtog pa spangs pa'i rim gyis zag pa med pa'i bsam gtan la mngon par dga' ba la sa bla dang bar snang la spyod pa'i lha dang / gnod sbyin dang / rgyal po chen po bzhi rnams ji ltar dga' bar 'gyur zhe na/ rnal 'byor spyod pa nang gi chos la chos kyi rjes su lta zhing gnas pa des thos pa las byung ba'i shes pa 'am lha'i mig gis mthong ste/ rgyal po chen po bzhi po de dag gis rgyal po chen po bzhi'i lha de dag dang / lha rnams kyi dbang po brgya byin la sgrogs par byed pa ni lha 'di ltar 'dzam bu'i gling na rigs che ge mo zhig las/ grong ga ge mo zhig dang / grong rdal ga ge mo zhig tu rigs kyi bu ming 'di zhes bya ba skra dang kha spu bregs te/ gos ngur smrig bgos nas dad pas khyim nas khyim med par rab tu byung ste/ de tshul khrims dang / yang dag par sdom pa spyod pa/ spobs pa rigs pa dang grol ba/ dran pa nye bar bzhag pa/ kha na ma tho ba rdul tsam la yang 'jigs par lta ba/ bdud kyi phyogs dmas par byed cing dam pa'i chos kyi phyogs ni mngon par mtho bar byed de/ de bdag cag gis lha rnams la gsol ba lags so/ /de thos nas lha rnams kyi dbang po brgya byin shin du yid dga' ba dang / brgya byin gyi mdun na 'don de dang sum bcu rtsa gsum gyi lha rnams kun du dga' bar 'gyur ro/ /dge ba bcu'i las kyi lam le'ur bcad pa'o// // 'phags pa dam pa'i chos dran pa nye bar bzhag pa/ bam po gsum pa/ de nas gzhan yang zag pa rim gyis spangs pa'i dge slong dag dang po mi dge ba'i chos spong zhing dge ba'i chos ji ltar sgom par byed gcig gu snyam nas/ rnal 'byor spyod pa nang gi chos la chos kyi rjes su lta zhing gnas pa des thos pa las byung ba'i shes pa 'am/ lha'i mig gis brtags na dge slong de thog ma nyid du yul dang dbang po 'di dag phan tshun rgyu rkyen du gyur pa dag gis skye bo kun thog ma med pa'i dus nas 'khor bar zhugs shing yongs su 'khyam pa de dag nyid kyi skye ba'i rgyur gyur pa yul gyi rgya mtsho la rnam par rtog par byed de/ nang dang yul de dag gis skye bo 'di dag 'khyam mo snyam mo/ /de re shig thog ma nyid du de ltar dben pa la mngon par dga' ba goms par byed de/ dgon pa dang / tshal gyi nang dang / kun dga'i ra ba dang / sog ma'i khrod dang / shing drung dang / dur khrod dben pa rnams su sems spre'u lta bu gdul ba'i phyir goms par byed de/ dben pa la mngon par dga' ba'i sems shin du dang bar byed do/ /de grong dag tu rgod rgod/ sgeg sgeg /rtse rtse ba dag la mngon par mi dga' zhing pha rol gyi bud med de la lta bar mi byed la/ 'du 'dzi la mngon par dga' bar mi byed do/ /tshangs par spyod pa la tshogs gnyis 'dra ste/ 'du 'dzi dang smad 'tshong ngo / /de tshogs gnyis spangs nas dang por de'i yid rtse gcig la dga' zhing rab tu dang bar byed de/ de thog ma nyid du ji ltar na sems 'di bsdu ba dang gzung bar nus snyam du yang dag par rtog par byed do/ /de thog ma nyid du 'di ltar yid kyi dpyod pa bcwa brgyad dag gis dge ba dang / mi dge ba dang / lung du ma bstan pa la yid 'jug par byed do/ /bcwa brgyad gang zhe na/ 'di lta ste/ mig gis gzugs mngon nas yid bde ba'i gnas su 'gyur ba ni kun nas nyon mongs pa mi dge ba'i rnam par smin par 'gyur ba so sor myong bar byed cing yang dag par rab tu rtog par byed do/ /yid mi bde ba'i gnas su 'gyur ba ni 'dod chags dang bral ba yin te/ de'i dge ba'i rnam par smin pa yin no/ /btang snyoms kyi gnas su 'gyur ba ni lung du ma bstan pa'i rnam par smin pa yin no/ /de ltar rna bas sgra thos nas yid bde ba'i gnas su 'gyur ba ni kun nas nyon mongs pa mi dge ba'i rnam par smin pa yin no/ /yid mi bde ba'i gnas su 'gyur ba ni rnam par byang ba la dmigs pa dge ba'i rnam par smin pa yin no/ /btang snyoms kyi gnas su 'gyur ba ni lung du ma bstan pa'i rnam par smin pa yin no/ /de bzhin du snas dri bsnams nas yid bde ba'i gnas su 'gyur ba ni kun nas nyon mongs pa mi dge ba'i rnam par smin pa yin no/ /yid mi bde ba'i gnas su 'gyur ba ni rnam par byang ba dge ba'i rnam par smin pa yin no/ /btang snyoms kyi gnas su 'gyur ba ni lung du ma bstan pa'i rnam par smin pa yin no/ /de bzhin du lus kyis reg bya la reg nas yid bde ba'i gnas su 'gyur ba ni kun nas nyon mongs pa mi dge ba'i rnam par smin pa yin no/ / yid mi bde ba'i gnas su 'gyur ba ni rnam par byang ba dge ba'i rnam par smin pa yin no/ /btang snyoms kyi gnas su 'gyur ba ni lung du ma bstan pa'i rnam par smin pa yin no/ /de bzhin du yid kyis chos shes nas/ yid bde ba'i gnas su 'gyur ba ni kun nas nyon mongs pa mi dge ba'i rnam par smin pa yin no/ /yid mi bde ba'i gnas su 'gyur ba ni rnam par byang ba dge ba'i rnam par smin pa yin no/ /btang snyoms kyi gnas su 'gyur ba ni lung du ma bstan pa'i rnam par smin pa yin no/ /de ltar yid kyi spyod pa bcwa brgyad kyi rnam par smin pa dag gis 'khor ba na 'chi ba dang skye bar 'gyur ro snyam mo/ /gang gi tshe dge slong de yid kyi dpyod pa bcwa brgyad dag mthong ba de'i tshe bar snang la spyod pa'i gnod sbyin kun du dga' nas sa bla'i gnod sbyin rnams la mngon par bsnyad do/ /bar snang la spyod pa dang / sa bla'i gnod sbyin yid rab tu dga' bas rgyal po chen po bzhi la mngon par bsnyad do/ /rgyal po chen po bzhi po de dag gis rgyal chen bzhi'i lha rnams la gang 'dzam bu'i gling du grong che ge mo zhig dang / grong rdal mang ge mo zhig dang / yul ga ge mo zhig tu rigs che ge mo zhig gi rigs kyi bu skra dang kha spu bregs te/ gos ngur smrig bgos nas dad pas khyim nas khyim med par rab tu byung ste/ de yid kyi dpyod pa bcwa brgyad dag la rab tu rtog par byed cing mngon sum du byed la dben pa la mngon par dga' ste/ mtha' gcig la spyod pa yin no zhes mngon par bsnyad do/ /rgyal po chen po bzhi dag las rgyal chen bzhi'i lha dag gis de thos nas bdud kyi phyogs ni dmas par 'gyur la/ dam pa'i chos kyi phyogs ni mngon par mtho bar 'gyur ro/ /kun du dga' bar 'gyur ro/ /rgyal chen bzhi'i lha de dag gis lha'i dbang po brgya byin la/ lha gang 'dzam bu'i gling na rigs che ge mo zhig las zhes bya ba nas/ rigs kyi bu che ge mo zhig skra dang kha spu bregs gos ngur smrig bgos nas dad pas khyim nas khyim med par rab tu byung ste/ de dben pa nas dur khrod kyi bar la dga' ba yid kyi dpyod pa bcwa brgyad la rab tu rtog par byed cing mngon sum du byas nas nye bar bsgrubs te gnas so zhes mngon par bsnyad do/ /rgyal chen bzhi'i lha de dag las lha'i dbang po ko'u shi kas de thos nas yid mchog tu dga' bar 'gyur ba mthong ngo / /de nas gzhan yang dge slong de yid kyi dpyod pa bcwa brgyad rab tu mthong ba/ 'dod pa las gzhan pa'i sa ji ltar yid la byed cig gu snyam nas/ rnal 'byor spyod pa nang gi chos la chos kyi rjes su lta zhing gnas pa des thos pa las byung ba'i shes pa 'am lha'i mig gis brtags na/ 'phags pa'i byin gyi brlabs bzhi mthong ste/ 'di lta ste/ shes rab kyi byin gyi brlabs dang / bden pa'i byin gyi brlabs dang / gtong ba'i byin gyi brlabs dang / nye bar zhi ba'i byin gyi brlabs so/ /dge slong gis shes rab kyi byin gyi brlabs ji ltar mthong zhe na/ 'di la dge slong ni dge slong bdag nyid kyi lus ji ltar gnas pa de chos nyid kyis mthong ste/ lus 'di la sa'i khams dang / chu'i khams dang / me'i khams dang / rlung gi khams dang / nam mkha'i khams dang / rnam par shes pa'i khams de dag rab tu shes shing rnam par 'byed la so sor rtog go/ /de la sa'i khams gang zhe na/ sa'i khams rnam pa gnyis te/ nang na yod pa dang / phyi rol na yod pa'o/ /de la nang na yod pa gang zhe na/ lus 'di la gang chung zad nang na so so'i nang du bzung ba dang zin pa'o/ /de la bzung ba ni lpags pa dang / sha la sogs pas bsdus pa'o/ /zin pa ni skra dang / spu dang / sen mo dang / sos bsdus pa'o/ /sra ba dang mkhrang ba'i rnam pa ni bzung ba dang zin pa ste/ de yang gang zhe na/ 'di lta ste/ skra dang / spu dang / sen mo dang / so dang / rngul dang / rang gi sha dang / rus pa dang / rtsa dang / rgyus pa dang / snying dang / mchin pa dang / glo ba dang / mkhal ma dang / mcher pa dang / mchil ma dang / pho ba dang / long ka dang / rgyu ma dang / gnye ma dang / lto dang / lto ba dang / glad pa dang / glad rgyas rnams so/ /gang gzhan yang lus 'di la nang dang / so so'i nang du sra ba dang / mkhrang ba'i rnam pa bzung ba dang / zin pa 'di ni nang gi sa'i khams shes bya'o/ /de la phyi rol gyi sa'i khams gang zhe na/ phyi rol la gang chung zad sra ba dang mkhrang ba'i rnam pa ma bzung ba/ ma zin pa 'di ni phyi rol gyi sa'i khams shes bya'o/ /de la gang sa'i khams de gcig tu bsdus pa'i khams 'di ni khams tsam ste/ tshor bas gnas su ma byas shing 'dod rgyal gyis ma byas pa'i sa'i khams rtag par ma yin/ bde bar ma yin/ gtsang bar ma yin par mthong zhing / de bdag tu mi lta ba'i shes rab kyi byin gyi brlabs la lhag par mos pa'i dge slong de ni 'di dag thams cad bdag gi ma yin de dag bdag ma yin/ de dag bdag dang bdag gi ma yin no snyam mo/ /'di dag yang dag pa'i shes rab kyis yang dag pa ji lta ba bzhin mthong nas/ sa'i khams la sems 'di 'dod chags dang bral bar 'gyur te/ de ltar dge slong shes rab kyi byin gyis brlabs la lhag par mos par 'gyur ro/ /de la chu'i khams gang zhe na/ chu'i khams kyang rnams pa gnyis te/ nang na yod pa dang / phyi rol na yod pa'o/ /de la nang na yod pa ni lus 'di la gang chung zad chu dang chu'i rnam pa 'byung ba'i mtshan nyid yin te/ chu'i khams ni lus la gsher ba'i bdag nyid du yod pa rdul dang / mchil ma dang / snabs dang / glad pa'i pri dang / khrag dang / zhag dang / chu ser dang / tshil dang / rkang dang / mkhris pa dang / gcin dang / glad rgyas rnams so/ /gang gzhan yang lus 'di la nang so so'i nang du chu dang chu'i rnam pa bzung ba dang zin pa gang chung zad yod pa 'di ni nang gi chu'i khams shes bya'o/ /phyi rol gyi gang zhe na/ gang chung zad phyi rol gyi chu dang chu'i rnam par gsher ba dang / gsher ba'i rnam pa ste/ ma bzung ma zin pa 'di ni phyi rol gyi chu'i khams shes bya'o/ /de la gang nang gi chu'i khams dang / gang phyi rol gyi chu'i khams de dag gcig tu bsdus pa'i khams 'di ni khams tsam ste/ 'di dag thams cad bdag gi ma yin/ de dag bdag dang bdag gi ma yin/ chu'i khams yang dag par mthong nas chu'i khams la sems 'dod chags dang bral bar 'gyur te/ de ltar dge slong shes rab kyi byin gyis brlabs la 'jug pa yin no/ /de la me'i khams gang zhe na/ me'i khams kyang rnam pa gnyis te/ nang na yod pa dang / phyi rol na yod pa'o/ /de la nang gi me'i khams ni lus 'di la gang chung zad nang dang / so so'i nang gi me dang / me'i rnam pa bzung ba dang zin pa'o/ /de dag gang zhe na/ 'di lta ste/ gang gis gdung bar byed pa dang / gang gis yongs su sreg par byed pa dang / gang gis 'bar bar byed pa dang / gang gis zos pa dang / 'thung pa dang / 'chos pa dang / myangs pa rnams legs par bde bar 'jug bar 'gyur ba dang / gang gzhan yang lus 'di la nang gi dang / so so'i nang gi me dang me'i rnam pa bzung ba dang zin pa 'di ni nang gi me'i khams shes bya'o/ /de la phyi rol gyi me'i khams gang zhe na/ phyi rol gyi me'i khams gang chung zad me dang / me'i rnam pa dang / dro ba dang dro ba'i rnam pa ste/ ma bzung ma zin pa 'di ni phyi rol gyi me'i khams shes bya'o/ /de la gang nang gi me'i khams dang / gang phyi rol gyi me'i khams de dag gcig tu bsdus pa'i khams 'di ni khams tsam ste/ de dag thams cad bdag gi ma yin/ de dag bdag ma yin/ de dag bdag dang bdag gi ma yin/ 'di ltar de dag yang dag pa'i shes rab kyis yang dag pa ji lta ba bzhin mthong nas me'i khams la sems 'dod chags dang bral bar 'gyur ro/ /de byed pa pos gnas su ma byas kyang me'i khams rab tu 'jug go/ /de la rlung gi khams gang zhe na/ rlung gi khams kyang rnam pa gnyis te/ nang na yod pa dang / phyi rol na yod pa'o/ /de la nang gi gang zhe na/ lus 'di la gang chung zad nang dang / so so'i nang gi rlung dang / rlung gi rnam pa yang ba dang / yang zhing g.yo ba bzung ba dang / zin pa ste/ de dag kyang gang zhe na/ steng du 'gro ba'i rlung dang / 'og tu 'gro ba'i rlung dang / ngos su 'gro ba'i rlung dang / ltor 'gro ba'i rlung dang / de bzhin du ral gri dang / khab dang / mtshon cha lta bu'i rlung dang / rlung skran dang / srin bu dang / lhan cig rgyu ba'i rlung brgyad bcu dag yod do/ /rlung brgyad bcu dag yan lag dang nying lag dag gi rjes su 'jug go/ /gang lus 'di la gzhan yang nang dang so so'i nang gi rlung dang / rlung gi rnam pa yang zhing g.yo ba bzung ba dang zin pa 'di ni nang gi rlung gi khams shes bya'o/ /de la phyi rol gyi rlung gi khams gang zhe na/ phyi rol gyi gang chung zad rlung dang / rlung gi rnam pa yang zhing g.yo ba ma bzung ma zin pa 'di ni phyi rol gyi rlung gi khams shes bya'o/ /de la nang gi rlung gi khams dang gang phyi rol gyi de dag thams cad mngon par bsdus pa'i khams 'di ni khams tsam ste/ de dag bdag ma yin/ de dag bdag dang bdag gi ma yin la byed pa pos gnas su ma byas shing tshor ba pos gnas su ma byas te/ de ltar 'di dag yang dag pa'i shes rab kyis yang dag pa ji lta ba bzhin mthong nas rlung gi khams de la sems 'dod chags dang bral bar byed de 'di ni shes rab kyi byin gyi brlabs mngon sum du byed pa'i dge slong yin no/ /de la nam mkha'i khams gang zhe na/ nam mkha'i khams kyang rnam pa gnyis te/ nang na yod pa dang / phyi rol na yod pa'o/ /de la nang gi lus 'di la gang chung zad nang dang / so so'i nang gi nam mkha' dang / nam mkha'i rnam pa bzung ba dang zin pa mi gnas shing gzugs kyi rnam pas khyab par bya ba dang / zos pa dang 'thungs pa dang / 'chos pa dang / myangs pa rnams nang du 'jug par skabs 'byed pa dang / mid pa'i sbubs dang / mig phugs dang / sna'i bu ga dang / lce'i bu ga dang / zas nang du 'gro ba lces skabs 'byed par byed pa 'di ni nang gi nam mkha'i khams shes bya'o/ /de la phyi rol gyi nam mkha'i khams gang zhe na/ gang chung zad ma bzung ba ma zin pa mi gsal zhing khyab par byed pa ma yin pa ste/ 'di lta ste/ shing lo'i bar gyi gseb dang ri phug gi bu ga'i gseb dang / chu bo'i gseb dang / gang phyi rol gyi bu ga yod pa ni phyi rol gyi nam mkha'i khams shes bya'o/ /de la gang nang gi gzugs kyi rnam pa'i nam mkha'i khams dang / gang phyi rol gyi de dag gcig tu bsdus pa'i khams 'di ni khams tsam ste/ de dag thams cad bdag gi ma yin/ de dag bdag ma yin/ de dag bdag dang bdag gi ma yin te/ 'di ltar de dag yang dag pa'i shes rab kyis yang dag pa ji lta ba bzhin mthong nas nam mkha'i khams la sems 'dod chags dang bral zhing de dag mthong nas 'jug par mi 'gyur ro/ /de dag thams cad bdag gi ma yin/ de dag bdag ma yin/ de dag bdag dang bdag gi ma yin te/ byed pa pos gnas su ma byas shing / tshor ba pos gnas su ma byas pa'i nam mkha'i khams la sems 'dod chags dang bral bar 'gyur ro/ /de la yid kyi khams gang zhe na/ skye mched bcu gnyis dang / yang dag par ldan pa ni yid kyi khams te/ mig gi rnam par shes pas don mthong ba yid kyi rnam par shes pas rjes su myong ste/ de bzhin du rna ba dang / sna dang / lce dang / lus dang / yid kyi rnam par shes pa dag ni yid kyi rnam par shes pa'i khams rab tu 'byung ba'i rtsa ba yin no/ /'dir tshigs su bcad pa/ yid ni sngon du 'gro ba'i chos/ /yid mgyogs yid ni 'gro ba'i chos/ /yid ni shin du gsal ba yis/ /smra ba dang ni byed par 'gyur/ /sdig pa'i mtshan nyid bsal ba yis/ /'chi dang skye ba rnam shes shing / /las 'bras de nyid shes pa ni/ /'chi ba med pa'i gnas 'thob bo/ /gang dag dbang po kun 'dzin pa/ /'byung po kun la phan par dga'/ /dbang po bde zhing zhi la dul/ /de lta bu ni dge slong yin/ /ji ltar dbang po drug la gnas/ /'dod chags dgra ni zlog par byed/ /dpa' bo shes rab byed ldan gang / /de ni zhi ba'i gnas 'thob bo/ /dgon par gnas la dga' byed cing / /mnyam bzhag sa la gnas pa ni/ /mkha' sprin rlung gis gtor ba ltar/ /sdig pa'i chos rnams 'jig par byed/ /lus ngag las kyi mtha' dge zhing / /spyod pa dge la yang dag dga'/ de nyid lta zhing bya ba mkhas/ /bdud kyis sgrub pa 'jig par byed/ /'dod chags la sogs mi gnod cing / /dge ba'i sems la brkam chags med/ /byams dang snying rje mang ba ni/ /dge slong nges par 'byung la gnas/ /gang dag yul gyi 'ching ba'i rgyu/ /gzugs la sogs pa mi 'dod pa/ /de ni zhi ba mchog 'gro zhing / /gang du song bar nyon mi mongs/ /de nas gzhan yang ci dge slong 'di dang yid kyi spyod pa bcwa brgyad kyi dang po'i sa las sa gzhan g nyis pa la 'dug pa ni khams drug gi de nyid shes pa'i sa la ci da ltar chos rjes su dran pa'i sa la 'jug gam snyam nas rnal 'byor spyod pa nang gi chos la chos kyi rjes su lta zhing gnas pa des thos pa las byung ba'i shes pa 'am lha'i mig gis brtags na/ sa gzhan gsum pa la 'jug go/ /dge slong de nyid mthong ba de'i sa gzhan gang zhe na/ sems phan tshun du 'gyur ba ni sa gzhan yin te/ de bde ba skyes pa rnam par shes shing sdug bsngal skyes pa rnam par shes/ yid bde ba rnam par shes shing yid mi bde ba rnam par shes/ btang snyoms rnam par shes shing bde ba chung zad rnam par shes te/ bde ba myong bar 'gyur ba'i reg pa la brten nas bde ba'i tshor ba skye'o/ /de bde ba'i tshor ba 'di myong ba na bde ba'i tshor ba myong ngo zhes yang dag pa ji lta ba bzhin du rab tu shes so/ /de nas de bde ba myong ba'i reg pa gang 'gags na de bde ba myong ba'i reg pa la brten nas tshor ba skyes pa myong ba na bdag gi bde ba'i tshor ba nub bo zhes tshor ba nub pa so sor mngon par shes so/ /bdag gi bde ba'i tshor ba nye bar zhi zhing sdug bsngal gyi tshor ba skye ste/ brten nas 'byung ba'i sdug bsngal gyi tshor ba so sor mngon par shes so/ /bdag gi bde ba'i tshor ba skyes te/ de dag so sor mngon par shes so/ /ji ltar bde ba myong bar 'gyur ba'i reg pa bshad pa de ltar sdug bsngal myong bar 'gyur ba yang rgya cher yang dag par brjod par bya'o/ /yid bde ba rnam par shes pa ji lta bu yin zhe na/ yid bde ba'i gzhir 'gyur ba'i reg pa la brten nas yid bde ba skyes pa'o/ /yid mi bde ba so sor mngon par shes pa ji lta bu yin zhe na/ yid mi bde ba'i gzhir 'gyur ba'i reg pa la brten nas yid mi bde ba skyes pa'o/ / de nas 'di ltar de'i yid bde ba'i gzhir 'gyur ba'i tshor ba ji lta ba bzhin rjes su rtog ste/ yid bde ba'i gzhir 'gyur ba 'gog pa mthong nas yid bde ba las 'dod chags dang bral bar 'gyur ro/ /gang bdag gi yid bde ba'i tshor ba sngon skyes pa de zad cing zhi la rnam par bral ba de las de'i 'dod chags dang bral ba skye ste/ yang dag pa ji lta ba bzhin so sor myong bar byed do/ /de bzhin du yid mi bde ba la yang brjod par bya zhing btang snyoms la yang de bzhin du brjod par bya'o/ /de'i sa gzhan gsum pa 'di la 'jug pa la sa bla'i gnod sbyin shin du dga' nas bar snang la spyod pa'i gnod sbyin rnams la mngon par bsnyad do/ /de dag gis kyang rgyal po chen po bzhi la mngon par bsnyad do/ / de dag gis kyang rgyal chen bzhi'i lha rnams la mngon par bsnyad do/ /de dag gis kyang lha rnams kyi dbang po brgya byin ko'u shi ka la gang 'dzam bu'i gling na rigs kyi bu de skra dang kha spu bregs te/ dad pas khyim nas khyim med par rab tu byung ba/ yul che ge mo zhig dang / grong khyer mang ge mo zhig tu rigs che ge mo zhig las rigs kyi bu ming che ge mo zhig ces bya ba skra dang kha spu bregs te dad pas khyim nas khyim med par rab tu byung zhing de sa gzhan gsum pa la zhugs te bdud dang lhan cig g.yul 'gyed par 'dod pas bdud kyi phyogs ni dmas par byed la dam pa'i chos kyi phyogs ni mngon par mtho bar byed do zhes mngon par bsnyad do/ /lha rnams kyi dbang p o brgya byin ko'u shi kas de thos nas mchog tu dga' zhing glang po che sa srung gi bu la zhon te rdzu 'phrul che ba'i lha'i tshogs la sogs pas bskor nas 'thab bral gyi lha rnams la 'dzam bu'i gling na rigs kyi bu zhes bya ba nas rgya cher sbyar te sa gzhan gsum pa la zhugs pa'i bar dang / bdud dang lhan cig g.yul 'gyed par 'dod pa/ bdud kyi phyogs dma' bar byed cing dam pa'i chos kyi phyogs mngon par mtho bar byed do zhes bsnyad do/ /lha'i dbang po brgya byin las de thos nas 'thab bral gyi lha rnams shin tu yid dga' bar 'gyur ro/ /de nas gzhan yang dge slong de sa gzhan gsum pa las sa gzhan bzhi pa la ji ltar 'jug cig gu snyam nas/ rnal 'byor spyod pa nang gi chos la chos kyi rjes su lta zhing gnas pa des thos pa las byung ba'i shes pa 'am lha'i mig gis brtags na/ de sa gzhan bzhi pa la 'jug pa ni reg pa'i rkyen gyis bde ba myong bar 'gyur ba bde ba'i rgyu dang / bde ba'i gzhi dang / bde ba'i rkyen gyis bdag gi tshor ba skyes so/ /de 'gags shing rnam par zhi la nang du nub pa de ma thag tu sdug bsngal gyi reg pa dang / sdug bsngal gyi gzhi dang / sdug bsngal kun 'byung ba dang / sdug bsngal nyid kyis bdag gi sdug bsngal gyi tshor ba skyes so/ /de bzhin du btang snyoms kyi rkyen dang / reg pa'i rkyen gyis tshor ba so sor mngon par shes so/ /skad cig skad cig la bdag gi reg pa'i tshor ba'i grogs dang reg pa 'byung ba skye ste/ de bde ba'i tshor ba la mi dga' zhing chags par mi byed la tshor ba de la mngon par mi dga' zhing mang du mi byed de ro myong bar mi byed do/ /de bzhin du sdug bsngal gyi tshor bas kyang gnod par mi byed cing rnam par 'tshe bar mi byed la rnyog pa can du mi byed do/ /de btang snyoms la gnas te dran pa dang shes bzhin dang ldan pa yin na ni tshor ba gsum po 'di dag gis gal te gtan du sems 'dod chags dang bral bar 'gyur/ yang btang snyoms khyad par can gzhan du 'gyur te yongs su dag pa dang rnam par byang bar 'gyur ro/ /de 'di snyam du sems te/ kye e ma bdag gis nam mkha' mtha' yas skye mched kyi btang snyoms 'di ltar yongs su dag pa/ 'di ltar rnam par byang ba 'di rdzogs par bya zhing bdag gi sems dang 'thun par bya ste/ bdag gi btang snyoms kyi mthar gtugs pa dang 'brel pa mngon sum du byas la/ de la mchog tu lhag par gnas par bya/ bdag nam mkha' mtha' yas skye mched kyi btang snyoms kyis bsdus pa de rdzogs par byas te gnas so/ /bdag gis 'di ltar yongs su dag cing 'di ltar rnam par byang ba rnam shes mtha' yas skye mched dang / nam mkha' mtha' yas skye mched dang / ci yang med pa'i skye mched dang / 'du shes med 'du shes med min skye mched kyi btang snyoms 'di rdzogs par byas te gnas par bya'o snyam mo/ /de 'du shes med 'du shes med min skye mched rdzogs par byas te gnas pa de dang bdag gi sems 'thun par byed la btang snyoms de la gnas shing 'dug ste/ de la lhag par chags pa dang / de nye bar len pa bdag gi 'du shes med 'du shes med min skye mched kyi btang snyoms rdzogs par byas te gnas par bya'o snyam mo/ /'di lta ste dper na/ gser mgar ram/ gser mgar gyi slob ma mkhas pa de sol mal du gser 'jug par byed do/ /bcug nas phra skam gyis bzung zhing yang shing gis 'bud kun du 'bud do/ / las legs par byas pa'i gser de dge zhing bkra shis la kha dog bzang ba/ las byed pa/ thams cad stod pa/ kha bzang bar bsngags pa/ yul thams cad du rjes su mthun par 'jug pa de dri ma dang bral zhing skyon lhag ma yang med la dul zhing bkra shis te/ rin po che'i 'od kyang zil du rlag par byed do/ /de gser mgar ram/ gser mgar gyi slob ma mkhas pa gzhan zhig gis gser legs par sbyang ba byas par rig nas ci 'dod par byed de/ gal te bgo bar bya ba dag la dril bu'i rgyan byed/ gal te shin du lta na sdug pa dag byed/ gal te dpung rgyan du byed/ gal te snying kar mdzes pa'i rgyan byed/ gal te glegs bam la mdzes par byed/ gal te mgo rgyan du byed/ gal te sor gdub du byed/ gal te gser gyi phreng bar byed/ gal te rgyan cod pan du byed de/ gang dang gang du khyer ba de dang der las dang ldan par 'gyur ro/ /de bzhin du dge slong shin du tshul khrims dang ldan pa shes rab can ni bdag gis 'di ltar yongs su dag cing 'di ltar rnam par byang ba gal te nam mkha' mtha' yas skye mched kyi btang snyoms de rdzogs par byas la bdag de dang 'thun par de la gnas te/ de dang 'brel pa dang / de la lhag par gnas pa dang / de nye bar len cing de nam mkha' mtha' yas skye mched kyi btang snyoms rdzogs par byas te gnas/ rnam shes mtha' yas skye mched dang / 'du shes med 'du shes med min skye mched rdzogs par byas te gnas so/ /de 'di snyam du sems te gang bdag gi btang snyoms 'di ni mi rtag pa mi brtan pa ther zug ma yin pa yongs su 'gyur ba'i chos can yin par de gzugs med pa'i skye mched bzhi po de nyid la dmigs nas bdag gi btang snyoms mi rtag cing mi rtag par dmigs/ mi brtan zhing mi brtan par dmigs te 'dus byas su rig par bya'o snyam mo/ /nam mkha' mtha' yas skye mched mi rtag cing rnam shes mtha' yas skye mched dmigs su med pa dang / ci yang med pa'i skye mched dmigs su med pa dang / 'du shes med 'du shes med myin skye mched kyi btang snyoms 'di ni g.yo ba dang bral ba yin/ 'di ni zhi ba yin/ 'di ni nye bar phan pa yin no snyam mo/ /de lus kun du tshor ba skye zhing myong ba na so sor mngon par shes shing skyes pa rnams kyang so sor mngon par shes so/ /'gags pa so sor mngon par shes shing 'gag pa yang so sor mngon par shes so/ /mig gi reg pa las byung ba so sor mngon par shes te/ de bzhin du rna ba'i reg pa las byung ba so sor mngon par shes/ sna'i reg pa las byung ba so sor mngon par shes/ de bzhin du lce dang / lus dang / yid kyi reg pa las byung ba'i tshor ba so sor mngon par shes so/ /dge slong tshor ba mngon sum du byas pa de tshor ba de dag nyid shin du rgyas par rtog ste/ de mig gi reg pa las byung ba'i tshor ba skye ba na skyes pa la gnas shing myong bar byed la 'gag pa na bdag gi tshor ba 'gagaso zhes so sor mngon par shes so/ /gzhan yang rna ba'i reg pa las byung ba'i tshor ba so sor mngon par shes te/ gang bdag gi mig gi reg pa las byung ba'i tshor ba de 'gags shing / nub la med par 'gyur te yang mi 'byung ngo / /de dag 'gags nas gzhan yang rna ba'i reg pa las byung ba'i tshor ba skyes pa bde ba 'di bde ba la dmigs pas sdug bsngal ma yin/ bde ba dang sdug bsngal la dmigs pas bde ba ma yin zhing sdug bsngal ma yin no snyam mo/ /de rna ba'i reg pa las byung ba'i tshor ba ji lta ba bzhin rjes su mthong zhing rnam par shes nas/ rna ba dang 'brel pa'i tshor ba dag la kun du chags pa med la de tshor ba myong ba na 'dod chags dang bral te/ rnam par grol bar 'gyur ro/ /rna ba'i reg pa las byung ba'i tshor ba de 'gags na sna'i dmigs pa'i tshor ba skye ste/ de snas kun nas bslang ba snas kun nas so sor myong bar byed de bdag sna'i reg pa las byung ba'i tshor ba skyes pa bde ba la dmigs pa ni bde ba'o/ /sdug bsngal la dmigs pa ni sdug bsngal lo/ /sdug bsngal yang ma yin bde ba yang ma yin pa la dmigs pa ni sdug bsngal yang ma yin bde ba yang ma yin no snyam mo/ /de sna'i dmigs pa'i tshor ba yang dag pa ji lta ba bzhin so sor myong bar byed de/ nub pa yang so sor myong bar byed do/ /de 'gags na sna'i dmigs pa'i tshor ba bde ba dang / sdug bsngal dang / sdug bsngal yang ma yin bde ba yang ma yin pa skye ste/ de so sor myong bar byed do/ /bdag gi sna'i dmigs pa'i tshor ba skye ste/ ji ltar lhag par chags pa skyes pa de ltar bdag gi 'gog pa 'di dag kyang skye ste/ de 'gags nas lce'i dmigs pa'i tshor ba rnam pa gsum skye ba nas yid kyi dmigs pa'i tshor ba rnam pa gsum snga ma bzhin no/ /de sa gzhan bzhi pa la tshor ba yang dag par rgya che ba la 'jug ste/ de'i brtson 'grus brtsams pa spro ba chen po bdud kyi 'ching ba gcod par 'dod pa la sa bla'i gnod sbyin shin du dga' nas bar snang gi gnod sbyin rnams la mngon par bsnyad do/ /de dag gis kyang rgyal po chen po bzhi la mngon par bsnyad do/ /de dag gis kyang rgyal chen bzhi'i lha rnams la mngon par bsnyad do/ /de dag gis kyang lha rnams kyi dbang po brgya byin la mngon par bsnyad do/ /brgya byin gyis kyang 'thab bral gyi lha rnams la mngon par bsnyad do/ /gang 'dzam bu'i gling na rigs kyi bu yul che ge mo zhig dang / grong mang ge mo zhig dang / rigs ga ge mo zhig las rigs kyi bu che ge mo zhes bya ba skra dang kha spu bregs te/ gos ngur smrig bgos nas dad pas khyim nas khyim med par rab tu byung ste/ de 'bad pa dang / brtson pas rim gyis sa gzhan bzhi pa'i tshor ba yang dag par rgya che ba la zhugs pa bdud kyi phyogs ni dma' bar byed cing yang dag pa dam pa'i chos kyi phyogs ni mngon par mtho bar byed pa de bdag lha rnams la bsnyad do snyam mo/ /brgya byin glang po che sa srung gi bu la zhon pa de 'thab bral gyi lha dag gis mthong nas dga' ste brgya byin la smras pa/ brgya byin gang 'dzam bu'i gling gi mi chos dang ldan zhing chos kyi rjes su 'jug pa de brgya byin khyod kyi dam pa'i chos dang 'thun par gyur pa nyid yin no/ /gzhan yang dge slong de bdud kyi 'ching ba spong zhing rab tu spong ba'i tshor ba la ji ltar rtog ce na/ rnal 'byor spyod pa nang gi chos la chos kyi rjes su lta zhing gnas pa des thos pa las byung ba'i shes pa 'am lha'i mig gis brtags na/ dge slong de yang dag pa'i tshor ba nyid la 'di ltar rnam par rtog par byed de/ de mig gi rnam par shes pa'i dmigs pa mi dge ba skyes pa de langs pa na dge ba la dmigs pa gnyis pas 'gags so/ /dge ba skyes pa de yang lung du ma bstan pa la dmigs pas 'gags shing lung bstan pa yang 'gags la lung du ma bstan pa skyes so/ /de bzhin du rna ba'i reg pa las byung ba'i tshor ba dang / sna'i reg pa las byung ba'i tshor ba dang / lce'i reg pa las byung ba'i tshor ba dang / lus kyi reg pa las byung ba so sor myong bar byed do/ /so sor myong bar byed pa na dge ba'i chos rnams yongs su rdzogs par 'gyur zhing de'i nyon mongs pa bsrabs par 'gyur ro/ /de de ltar sgom pa na tshor ba phra mo de dag so sor shes so/ /de chos kyi tshor ba dang lhan cig 'gag pa mthong ste/ ji ltar mar me'i 'od nyi ma'i 'od kyis 'gag pa de bzhin du tshor ba gnyi ga 'gag go/ /gzhan yang dge ba dang mi dge ba'i tshor ba rgyas pa so sor myong bar byed de/ dper na mar me'i 'od la mar me'i 'od gnyis pas gsal bar byed pa bzhin no/ /gzhan yang tshor ba rab tu rnam par 'byed par byed de/ tshor ba gang zhig dang / tshor ba gzhan gang zhig gi tshor ba dang lhan cig gtan du mi mthun par 'gyur ram snyam pa las dge ba'i tshor ba dang / mi dge ba'i tshor ba lhan cig gtan du mi mthun par mthong ste/ dper na mar me'i 'od dang / skar ma'i 'od lhan cig mi mthun pa bzhin no/ /gzhan yang dge slong de rab tu rnam par 'byed par byed de tshor ba gang zhig la tshor ba gang zhig gis gtan du sel bar byed ce na/ de zag pa med pa la dmigs pa'i tshor bas zag pa dang bcas pa la dmigs pa'i tshor ba gtan sel ba nyid du mthong ste dper na me'i 'od kyis kha ba zhu ba bzhin no/ /tshor ba gang zhig la tshor ba gang zhig gis gnod zhig gu snyam nas yang 'di rgyas par byed de gang gi tshe mi bde ba'i tshor ba la bde ba'i tshor bas zil gyis gnon par mthong ngo / /de yang rgyas par byed de/ dper na nyi mas nyin mo'i zla ba'i 'od zil gyis gnon par 'gyur zhing zla ba'i 'od de yang mtshan mo rgyas par 'gyur ba bzhin no/ /de nas gzhan yang dge slong de tshor ba rab tu rnam par 'byed par byed de gang tshor ba mang po dang ldan pa dag tshor ba gcig gi dran pa rtse gcig pa'i tshor ba dang lhan cig mi mthun pa zil gyis gnon par 'gyur ram snyam na de 'jig rten pa byed pa'i tshor ba mang po dag 'jig rten las 'das pa zag pa med pa'i tshor bas zil gyis gnon par mthong ste/ dper na mtshan mo rgyu skar dang / gza' dang / skar ma mang po'i 'od dag zla ba'i 'od gcig gis gnon pa bzhin no/ /gzhan yang dge slong de tshor ba rjes su mthong ba'i tshor ba ches phra ba la rtog par byed de/ mig dang / rna ba dang / sna dang / lce dang / lus kyis kun nas bslang ba zag pa dang bcas pa'i tshor ba mang ba ni gang yin/ dge ba ni ji ltar rtsom zhig snyam na de 'jig rten pa'i zag pa dang bcas pa'i tshor ba mang ba yang zag pa med pa'i snang bas thub par 'gyur te/ dper na mtshan mo rgyu skar dang / gza' dang / skar ma rnams kyi 'od zla ba'i snang ba gnas pas thub pa bzhin no/ /de nas gzhan yang dge slong de tshor ba de la rtog ste bdag gi tshor ba gzhan yun ji srid gcig tu gnas snyam mo/ /de skad cig la bdag gi tshor ba gzhan skye zhing 'jig par gnas par mthong ste/ dper na glog bzhin no/ /gzhan yang dge slong de 'di ltar rab tu rnam par rtog pa ste/ ci mig gi tshor ba sna'i tshor ba'i rkyen du 'gyur ram snyam mo/ /de blo gcig bzhin du dbang po tha dad pa'i dmigs pa'i tshor ba dbang po de dag thams cad kyir mthong ste/ dper na ba lang gcig cig rta dang / rnga mo dang / bong bu dang / ma he'i rigs tha dad pa rnams kyi rkyen du mi 'gyur ba de bzhin du thog ma med pa nas brtson pa'i dbang po lngas kun nas bslang ba'i yul gyi bye brag tha dad pa'i dbang po rnams kyi dmigs pa ni gcig tu mi 'gyur te/ dper na/ glang dang / rta dang / rnga mo dang / bong bu dang / ma he dang / phag bzhin no/ /de ltar tshor ba rjes su mthong ba'i dge slong de dag ni shes pa ches zhib pa skye bar 'gyur te/ de shes pa de la kun tu bsten cing sgom ste mang du byed do/ /de kun du bsten pa na tshor ba rjes su mthong zhing zad pa dang 'jig pa rjes su mthong nas 'di snyam du sems te/ bdag gi mig dang / rna ba dang / sna dang / lce dang / lus dang / yid kyis kun nas bslang ba'i tshor ba gang nas 'ong zhing gang du song / 'gag pa na gang du sogs par 'gyur snyam mo/ /dge slong tshor ba zad pa dang / 'jig pa rjes su mthong ba de rab tu sems pa na/ lam gyi rnam pa la 'di snyam du sems te/ mig gi tshor ba gang nas kyang skye ba med cing 'ong ba med la/ 'gag pa na yang gang du yang sogs par mi 'gyur te/ mig gi tshor ba ma byung ba las 'byung zhing / byung nas kyang so sor 'bral bar 'gyur ro/ /mig gi 'byung khung la sogs pa mi 'byung ste/ dper na rgya mtsho bzhi las chu 'byung ba bzhin no/ /'gag pa na yang gang du yang mi sogs te/ dper na chu bo gzhol bar 'gro ba rgya mtshor 'du ba bzhin te/ mig gi tshor ba ma byung ba las 'byung zhing byung nas kyang so sor 'jig par 'gyur ro snyam mo/ /mig dang / rna ba dang / sna dang / yid kyi tshor ba dag ni rten cing 'brel bar 'byung ba yin te/ dper na rdza mkhan nam/ rdza mkhan gyi slob ma mkhas pa zhig 'khor lo la yang brten/ 'jim pa la yang brten/ rtsol ba la yang brten/ chu la yang brten nas rgyu 'jim pa la brten pa'i bum pa 'byung bar 'gyur te/ bum pa de 'byung khung gang nas kyang ma 'ongs shing 'jig pa na yang gang du yang sogs par mi 'gyur mod kyi/ rgyu rkyen las bum pa 'byung ba de bzhin du/ mig la yang brten/ rna ba la yang brten/ sna la yang brten/ nam mkha' la yang brten/ yid la byed pa la yang brten nas/ mig gi tshor ba bde ba 'am/ sdug bsngal ba 'am/ sdug bsngal yang ma yin bde ba yang ma yin pa skye'o/ /dper na bum pa gal te rgyu rkyen bzang po las byung na bum pa de legs par 'gyur zhing gal te ngan na de'i tshe bum pa ma legs par 'gyur ba de bzhin du gal te dmigs pa'i rgyu dang rkyen bzang na de'i mig la sogs pa tshor ba bzang po skye bar 'gyur te/ chos dang ldan pa'i dge ba'i rim gyis mya ngan las 'das par 'gro bar 'gyur ro/ /gal te rgyu dang rkyen mi bzang na de'i tshe mig la sogs pa'i tshor ba ngan pa skye bar 'gyur te/ 'dod chags zhe sdang gti mug la dmigs pa 'khor ba na sems can dmyal ba dang / yi dags dang / dud 'gror 'gro bar 'gyur ro/ /las dang 'bras bur 'brel ba thams cad la mkhas par sems pa'i dge slong ni tshor ba rjes su tshol ba na tshor ba du ma la gnas par mthong ste/ byed pa pos gnas su ma byas shing rgyu med pa las kyang ma byung la 'dod rgyal gyis kyang ma byas/ ther zug du gnas pa ma yin/ rtag pa ma yin/ brtan pa ma yin/ ther zug ma yin/ yongs su 'gyur ba'i chos can yin zhing / de'i tshor ba'i phung po de mthong nas yang 'byung ba'i sred pa dga' ba'i 'dod chags kyi mod la skyes pa'i dri ma can yongs su nyams par byed de/ 'khor ba thams cad mi rtag par rjes su mthong ba'i dge slong ni lam kun du sten par byed cing goms par byed la mang du byed do/ /de de ltar sgom pa na kun du sbyor ba dag spong bar byed cing bag la nyal 'dor bar byed de/ kun du sbyor ba dag gang zhe na/ rjes su chags pa'i kun du sbyor bar byed pa dang / khong khro ba'i kun du sbyor ba dang / nga rgyal gyi kun du sbyor ba dang / ma rig pa'i kun du sbyor ba dang / lta ba'i kun du sbyor ba dang / mchog tu 'dzin pa'i kun du sbyor ba dang / the tsom gyi kun du sbyor ba dang / phrag dog gi kun du sbyor ba dang / ser sna'i kun du sbyor ba ste/ kun du sbyor ba de dag spong bar byed do/ /bag la nyal 'dor bar byed pa gang zhe na/ 'di lta ste/ 'dod pa'i 'dod chags kyi bag la nyal dang / lta ba'i bag la nyal dang / khong khro ba'i bag la nyal dang / ma rig pa'i bag la nyal dang / the tsom gyi bag la nyal te/ 'di dag ni gtso bo ji lta ba bzhin du srid pa gsum du yongs su 'jug par byed pa/ sa gsum du yongs su rgyu bar byed pa/ nyes pa gsum la yongs su 'jug par byed pa/ dus gsum gyi rjes su 'gro ba/ bar ma gsum gyi tshor ba gsum rjes su bsgoms pa/ skye ba gsum du 'pho bar byed pa ste/ 'khor ba'i rgyur gyur pa yin no/ /de nas gzhan yang ji ltar dge slong de rgyu dang rkyen du bcas pa 'di dag khong du chud par 'gyur/ mig gi rkyen ni gang / rgyu ni gang las skyes/ gzhi gang la lta bar byed cig gu snyam nas rnal 'byor spyod pa nang gi chos la chos kyi rjes su lta zhing gnas pa des thos pa las byung ba'i shes pa 'am lha'i mig gis brtags na mig gi rgyu ni las las byung zhing las kyis skye ba mngon par bsgrubs te/ dper na shing ba Ta'i sa bon chung ngu las shing ljon pa skye la shing ljon pa'i rgyu rkyen las yang shing ba Ta'i sa bon phra mo 'byung bar 'gyur ro/ / de bzhin du mi shes pa las las mngon par 'grub par 'gyur la/ las las kyang skye ba mngon par 'grub par 'gyur te/ skye ba dang / rga ba dang / na ba dang / 'chi ba dang / mya ngan dang / smre sngags 'don pa dang / sdug bsngal ba 'am/ 'khrug pa rnams yod cing 'byung bar 'gyur te/ de ltar las kyi rgyu sred pa'i zhags pa des bcings pa'i byis pa so so'i skye bo ni 'khor lo lta bu'i rgya mtshor yongs su 'khyam mo/ /tshor ba de dag thams cad kyi rgyu dang rkyen 'di dag la 'du shes kyi las su bya ba med de las med na sred pa 'byung bar mi 'gyur la de med na tshor ba med par 'gyur ro/ /rgyu rkyen ni dper na snying po la yang brten/ kong bu la yang brten/ me la yang brten nas mar me'i 'od skad cig la mngon par 'grub par 'gyur ro/ /de bzhin du dge slong de tshor ba'i rgyu dang rkyen mthong ba/ las kyi rgyu tshol zhing las kyi rjes su 'brang ba/ las kyi mthus tshor ba thams cad skye bar 'gyur ro/ /de la lus ni kong bu lta bu yin/ dbang po dag ni mar lta bu yin/ 'dod chags zhe sdang gti mug ni me lta bu yin te/ shes pa skad cig ma ni mar me'i 'od 'bar ba lta bu yin no/ /rnal 'byor pa gang gis srid pa gsum du 'gro ba'i tshor ba de nyid tshol zhing mthong ba ni shes pa yin te/ dper na gser mgar gser blangs nas las dang las su byas pa'i gser las rgyan gyi rnam pa legs par mngon par 'grub par byed do/ /de bzhin du rnal 'byor spyod pa gser mgar lta bu de dmigs pa gser lta bu la dmigs te/ gal te dmigs pa bzang na de las bzang po mngon par 'grub par 'gyur zhing / mya ngan las 'das par 'gro'o/ /gal te dmigs pa ngan na de ngan pa 'grub par 'gyur ro/ /'dir tshigs su bcad pa/ rgyu rkyen de nyid shes pa ni/ /don zhi nges par byas pa yin/ /thar pa'i rgyun la mngon dga' na/ /sred pas khyer bar mi 'gyur ro/ /lus can thams cad las dag gi/ /rjes 'brang las kyi skye gnas dang / /las kyi 'bras bur sbrel nas su/ /srid pa nyam ngar kun du 'khyam/ /gang zhig mi dge mi len cing / /rtag tu dge ba'i las dga' ba/ /zla 'od dri ma med pa ltar/ /rnal 'byor 'gro ba de 'drar 'gyur/ / me yis shing skam bsregs pa ltar/ /sdig pa'i chos rnams rab bsregs pa/ /sdig las grol zhing nyon mongs rgyal/ /sa gsum dag tu rnam par mdzes/ /gang zhig yid ni thar 'dod cing / /nams kyang 'khor bar mi dga' ba/ / de ni 'khor bar mi 'ching ste/ /mkha' la bya ni 'gro ba bzhin/ /gang zhig tshor 'byung de nyid shes/ /tshor ba'i 'bras bu rig pa ni/ /de nyid grol bar shes par bya/ /de nyid rig pa srid gsum du/ /bde sdug gis ni de mi gnod/ /zhim dang nga bas gos pa med/ /gang dag srid pa 'bar ba ltar/ /rnal 'byor de ni bsam pa ldan/ /blo gros rtag tu mi rmongs shing / /rtag tu chos kyi pha rol 'gro/ /dge slong sdom la mngon dga' ba/ /de lta bu ni dge slong yin/ /gnyen lta ba la dga' med cing / /mkhas pa dag la lta 'dod la/ /khyim gyi skyon las nges 'byung ba/ /de lta bu ni dge slong yin/ /dbang po thams cad rab zhi zhing / /yul rnams la ni chags med la/ /gnya' shing gang tsam lta ba dag /de lta bu ni dge slong yin/ /khro med khyim la spyod med cing / /tshong zong nyo 'tshong mi byed la/ /srang dang bzhi mdor mi dga' ba/ /de lta bu ni dge slong yin/ /glu dang gar la mi lta zhing / /nyes rtsom rnams la chags med la/ /gang dag dur khrod dga' byed pa/ /de lta bu ni dge slong yin/ / nyi ma gcig la bsod snyoms mchog /blangs nas sang gir mi sems la/ /lto 'grangs tsam gyis chog byed pa/ /de lta bu ni dge slong yin/ /gang dag gos mchog rnam spong zhing / /phyag dar khrod kyis chog 'dzin la/ /gang dag rigs par zas za ba/ /de lta bu ni dge slong yin/ /gang dag las ni mi rtsom zhing / /las rnams kun la bsam med la/ /spro med 'dud pa med pa ni/ /de lta bu ni dge slong yin/ /'dod pa'i khro las rnam grol zhing / / gti mug 'dam ni rnam spangs la/ /sdig pa'i chos kyis ma gos pa/ /de lta bu ni dge slong yin/ /kun du sbyor ba kun las 'das/ /bag la nyal ba thams cad spangs/ /bsam pa kun las rnam grol ba/ /de lta bu ni dge slong yin/ /'phags lam yan lag brgyad pa yis/ /mya ngan 'das pa'i grong khyer gnas/ /gang dag nyon mongs kun bcom pa/ /de lta bu ni dge slong yin/ /dbang po dul zhing blo gros brtan/ /'dod pa'i 'dam ni rnam par spangs/ / rtse gcig yid ni legs gnas pa/ /de lta bu ni dge slong yin/ /gang dag sa yi rim shes la/ /sa yi de nyid ston byed cing / /gang dag phan tshun sa shes pa/ /de lta bu ni dge slong yin/ /zag bcas zag pa med pa'i chos/ / rgyu dang rkyen du 'byung ba dag /rnam pa bzhin du kun shes pa/ /de lta bu ni dge slong yin/ /tshangs par spyod pa drang zhing zhi/ /rmugs dang gnyid ni rnam spangs la/ /nang par ldang zhing mkhas gtsang ba/ /de lta bu ni dge slong yin/ /gang zhig zhi gnas lhag mthong la/ /dga' zhing bsam gtan bzhi la dga'/ /dgon pa kun dgar dga' ba dag /de lta bu ni dge slong yin/ /nam mkha' la ni bya gnas pa/ /de grib rtag tu rjes 'gro ltar/ /gang blo dam pa'i chos la gnas/ /de lta bu ni dge slong yin/ /gang zhig nyon mongs nye nyon mongs/ /bcom zhing zhi lta blo gros gtsang / /dbugs dbyung rngub pa'i rnam pa shes/ /de lta bu ni dge slong yin/ /gang zhig rig pa'i cho ga shes/ /rnal 'byor rig cing de nyid ston/ /lam dang lam min rim shes pa/ /de lta bu ni dge slong yin/ /gang zhig dga' la mi chags shing / /'jigs pa dag la 'jigs med la/ /dpa' bo dga' dang 'jigs mnyam pa/ /de lta bu ni dge slong yin/ /rga dang 'chi ba'i de nyid shes/ /lha dang lha min phyag byas pa/ /sems kyi rnam pa phan tshun shes/ /de lta bu ni dge slong yin/ /gang zhig snam sbyar lhung bzed kyis/ /chog 'dzin sogs 'jog mi byed la/ /'dod pa chung zhing tshangs par spyod/ /de lta bu ni dge slong yin/ /dri med stan gcig zas za zhing / /zhim pa'i ro la mi chags la/ /rnyed dang bkur sti spangs pa dag /de lta bu ni dge slong yin/ /btang snyoms snying rje dag la dga'/ /'chab dang skyon ni rnam spangs shing / /nyes pa'i rdzas kun nges bsregs pa/ /de lta bu ni dge slong yin/ /dge slong de nang gi chos la chos kyi rjes su lta zhing tshor ba de dag ji lta ba bzhin du rjes su rtog ste/ de shes pa shin du zhib mos mig gi 'dus te reg pa las byung ba'i tshor ba'i dmigs pa rjes su rgyu ba med par mthong ngo / /dmigs pa gnyis pas lhan cig 'gag cing 'jig pa mthong ste/ mig gi 'dus te reg pa las byung ba'i tshor ba'i dmigs pa 'das nas bdag sgra la dmigs pa dang bcas pa'i tshor ba sdug pa 'am mi sdug pa skye ste/ bdag gi sems de dang lhan cig gyur pa med do snyam nas/ des sems kyi dmigs pa de brtan par byas nas 'dzin par byed do/ /rna ba'i tshor ba sgra la dmigs pa dang bcas pa de 'gags nas sna'i tshor ba dri la dmigs pa skye ste/ de sna'i tshor ba la yang rtog par byed cing shin du rtog par byed de/ bdag gi sna'i tshor ba dri dang bcas pa dge ba 'am/ mi dge ba 'am/ lung du bstan pa 'am/ lung du ma bstan pa skye ste/ bdag gi sna'i tshor ba de'i sems gyur pa gal te des sems gyur pa mthong na des yang dmigs pa de nyid la goms par byed cing spyod la 'bad cing brtson te las su rung bar byed la dge ba'i chos zag pa med pas sems goms par byed do/ /gal te mi g.yo na lce'i dmigs pa dge ba 'am/ mi dge ba 'am/ lung du bstan pa 'am/ lung du ma bstan pa la dmigs par byed de/ de dmigs pa de mngon sum du byas nas bde ba 'am sdug bsngal dang / sdug bsngal yang ma yin pa'i tshor ba la lta bar byed cing ci 'dis bdag gi sems gyur tam snyam mo/ /gal te ro la dmigs pa'i tshor ba skyes pas sems gyur pa mthong na des yang sems dmigs pa'i ka ba la mos pa'i thag pas bcing nas ji ltar sems 'di lce'i tshor ba dang bcas shing sred pa dang bcas pas mi 'phrogs par bya snyam nas spyod cing 'bad la nan tan du byed do/ / //'phags pa dam pa'i chos dran pa nye bar gzhag pa/ bam po bzhi pa/ de nas gzhan yang dge slong de lus kyi reg bya dang bcas pa'i reg bya'i tshor ba dmigs pa'i ka ba la bcings nas dge ba dang / mi dge ba dang / lung du ma bstan pa la rtog par byed de/ gal te de reg bya'i tshor ba des sems gyur par mthong na yang ji ltar dmigs pa'i ka ba la bcings nas las su rung bar byed cing gyur pa med pa de ltar byed do/ /yang dge slong de yid la 'ong ba'i yid dang shin du 'brel pa'i chos kyis tshor ba dge ba dang / mi dge ba dang / lung du bstan pa dang / lung du ma bstan pa la lta bar byed de/ gal te tshor ba de dag gis yid gyur na de dmigs pa'i ka ba de la mos pa'i thag pas bcings nas las su rung bar byed de gyur pa med pa de ltar byed do/ /yul drug lus la yod pa'i tshor ba la lta ba'i dge slong yang dag pa'i tshor ba 'byung ba dang zad pa de nyid mthong ba ni gnas lnga pa la 'jug ste/ de mig gi 'dus te reg pa las byung ba'i tshor ba shes pa las byung ba'i tshor ba shes pa'i sgron mas tshor ba myong bar byed pa'i tshor ba 'di dag gang zhig yin zhes rnam par rtog par byed do/ /de yid kyi rnam par shes pa'i tshor ba 'di ni rten cing 'brel par 'byung ba yin te/ yid dang shin du 'brel par mthong la/ byis pa so so'i skye bo thams cad ni yid kyi rnam par rtog pas 'phrogs shing shin du rtog pa'i mes bsregs te/ 'di la tshor ba po dang / byed pa po ni gang yang med kyi rgyu rkyen dang 'brel pa'i 'du byed kyi phung po 'di nyid skye/ 'du byed kyi phung po 'di nyid 'gag go snyam mo/ /de mig gi 'dus te reg pa las byung ba'i tshor ba ji lta ba bzhin rjes su mthong zhing rjes su 'jug pa des sems mi 'phrogs shing rnam par mi g.yo la skyon du 'gyur bar mi byed de dri ma can du mi byed do/ /yang dge slong de rna ba'i tshor ba la rtog par byed de/ tshor ba rjes su myong zhing rig pa'i tshor ba 'di gang yin snyam mo/ /de rna ba'i tshor ba 'di yid kyi rnam par shes pa dang shin du 'brel par mthong ste/ yid dang shin du 'brel pa de la gnas par zad kyi 'di la byed pa po dang tshor ba po med cing rna ba'i tshor ba rten cing 'brel par 'byung ba la byed pa po dang / tshor ba po med de/ 'du byed kyi phung po stong pa 'di rgyu rkyen gyi dbang gis skye zhing 'gag go snyam mo/ /yang dge slong de sna'i tshor ba la rtog par byed de tshor ba 'di myong zhing rig pa gang zhig yin snyam mo/ /de tshor ba yid kyi rnam par shes pa dang shin du 'brel par mthong ste/ de la dmigs pa de la gnas pa de rgyu dang rkyen las byung zhing rjes su myong ba'i mtshan nyid yin gyi 'du byed kyi phung po stong pa 'di byed pa pos gnas su ma byas shing tshor ba pos gnas su ma byas pa rgyun chags par 'jug pa yin no snyam ste/ de sna'i tshor ba rtogs nas byed pa po dang tshor ba po med cing don gyi bar du gcod par gyur pa ni med do snyam mo/ /yang dge slong de lce'i tshor ba la rnam par rtog ste/ lce'i tshor ba 'di myong zhing rig pa gang yin snyam mo/ /de lce'i tshor ba 'di yid kyi rnam par shes pa dang shin du 'brel par mthong ste/ de la gnas pa de dang 'brel pa de la dmigs pa de'i rgyu las byung zhing / de la brten pa yin gyi/ 'di la byed pa po dang / tshor ba po dang / don gyi bar du gcod par 'gyur ba med de 'du byed kyi phung po 'di'i rgyu dang rkyen gyi dbang gis skye'o snyam mo/ /yang dge slong de lus kyi reg bya'i tshor ba la rtog par byed de lus kyi tshor ba myong zhing rig pa 'di gang yin snyam mo/ /de lus kyi tshor ba 'di yid kyi rnam par shes pa dang 'brel par mthong ste/ 'di la byed pa po'am tshor ba po don gyi bar du gcod par 'gyur ba ni med de 'du byed kyi phung po stong pa 'di rgyu dang rkyen gyi dbang gi 'jug go snyam mo/ /yang dge slong de yid kyi tshor ba la rnam par rtog par byed de/ yid kyi tshor ba myong zhing rig pa 'di gang yin snyam mo/ /de yid dang chos la brten nas yid kyi rnam par shes pa skye bar mthong ste gsum 'dus pa'i reg pa reg pa dang lhan cig byung ba'i tshor ba/ dper na rdzas dri zhim pa du ma bsdus pa las spos bzang po 'byung ngo / /spos de'i rgyu mi 'byung ba gcig kyang med pa de bzhin du rgyu dang rkyen 'dus pa las tshor ba thams cad 'byung gi/ byed pa pos gnas su ma byas shing tshor ba pos gnas su ma byas pa yin no/ /dper na lo ma la yang brten/ ze ba la yang brten/ sdong bu la yang brten/ ze 'bru la yang brten nas pad ma zhes bya ba'i me tog 'byung ste/ pad ma de'i rgyu gcig kyang med do/ /de bzhin du dmigs pa la yang brten/ nam mkha' la yang brten/ yid la byed pa la yang brten/ snang ba la yang brten nas mig gi 'dus te reg pa las byung ba'i tshor ba 'byung ste/ mig las skyes pa/ mig la brten pa'i tshor ba de rigs gcig pa ma yin/ rdzas gcig pa ma yin/ 'byung ba gcig pa ma yin zhing ther zug tu gnas pa ma yin la sprul pa ma yin no snyam mo/ /de ji lta ji ltar de nyid tshol ba'i dge slong de ni de ltar de'i chos dkar po 'byung bar 'gyur te/ dper na bu ram shing snod kyi nang du bcug nas mes bskol ba 'ang de dang po zhu zhing dri mar 'gyur ba ni bu ram dri ma can zhes bya'o/ /lan gnyis su bskol ba dang / dkar bar 'gyur zhing bu ram du shes so/ /lan gsum pa la shin du dkar bar 'gyur te/ de ji lta ji ltar bu ram shing bskol ba de lta de ltar shin du dri ma dang bral bar 'gyur ba de bzhin du dge slong dmigs pa'i snod du ye shes me lta bus sems kyi rgyun bu ram shing lta bu yongs su skol bar byed do/ /de'i dbu ba lta bu bsam gtan dang po thob par 'gyur zhing de'i dkar ba lta bu bsam gtan gnyis pa thob par 'gyur te/ de bzhin du ji lta ji ltar dge slong gi sems kyi rgyun ye shes kyi mes skol bar byed pa de lta de ltar zag pa med pa'i chos shin du dkar zhing shin du dri ma med la shin du skyon med par 'gyur te/ las phyir phyogs pa dri ma dang bral zhing dkar la dag pa skye bar 'gyur ro/ /gzhan yang dge slong de tshor ba de dag la shin du rnam pa phra ba gzhan gyis rtog par byed de/ sems can che ge mo zhig gi tshor ba mig gi 'dus te reg pa las byung ba phra ba 'am rags pa dri ma can gti mug dang ldan pa skyes pa de/ tshor ba rags pa che ge mo zhig gis bsal cing spangs te lhag ma dang bcas par bas so/ /rna ba'i tshor ba dang / sna'i tshor ba dang / lce'i tshor ba dang / lus kyi tshor ba yang de bzhin no/ /dge slong de de ltar brtson zhing spro la bdud kyi sde 'joms pa na/ sa bla'i gnod sbyin dang / bar snang la spyod pa'i gnod sbyin de dag gis kyang rgyal po chen po bzhi la mngon par bsnyad do/ /sa bla'i gnod sbyin dang / bar snang la spyod pa'i gnod sbyin de dag dang / rgyal po chen po bzhi po de dag gis kyang rgyal chen bzhi'i lha rnams la mngon par bsnyad do/ /sa bla'i gnod sbyin de dag dang / bar snang la spyod pa'i gnod sbyin de dag dang / rgyal po chen po bzhi po de dag dang / rgyal chen bzhi'i lha de dag gis kyang lha'i dbang po rgya byin la mngon par bsnyad do/ /lha'i dbang po brgya byin yang glang po che sa srung gi bu la zhon nas yid dga' bas 'thab bral gyi lha rnams la mngon par bsnyad de/ snga ma bzhin no/ /'thab bral gyi lha de dag kyang brgya byin la dga' nas rin po che sna tshogs thogs shing lus lha'i phreng ba dang / spos rnam pa sna tshogs kyis brgyan pa/ sgra dang / reg bya dang / gzugs dang / dri yid du 'ong zhing bde ba dpe med pa/ rab tu dga' ba'i shugs kyis dga' ldan gyi lha'i ris na rin po che sna bdun las byas pa'i khang pa dang / gzhal med khang dang / grong khyer rnam pa sna tshogs kyis brgyan cing dpag tshad stong phrag bzhi bcu yod pa/ yid kyis brtags pa zhes bya ba der byang chub sems dpa'i khang bzangs dpag tshad khri yod pa/ zag pa med par 'gro ba zhes bya ba de na bcom ldan 'das byams pa byang chub sems dpa' lnga brgya dang thabs gcig tu bzhugs pa de la 'thab bral gyi lha dag yid rab tu dga' bas gos phyogs gcig tu bgos te pus mo sa la btsugs mgo btud thal mo sbyar nas gsol pa/ lha 'di ltar 'dzam bu'i gling na las kyi sa la gnas pa/ grong che ge mo zhig dang / grong rdal mang ge mo zhig dang yul ga ge mo zhig tu rigs che ge mo zhig las rigs kyi bu che ge mo zhig skra dang kha spu bregs te/ gos ngur smrig bgos nas dad pas khyim nas khyim med par rab tu byung ste/ de spyod pa la nan tan bgyid cing bla ma la bsnyen bkur bgyid pa/ zag pa med pa'i chos kyi de nyid tshol zhing tshor ba'i de nyid mthong ba zhes bgyi ba sa gzhan bzhi pa la zhugs nas bdud kyi phyogs 'joms par bgyid cing dam pa'i chos kyi zam pa brtan par bgyid cing bla ma la bsnyen bkur bgyid pa/ zag pa med pa'i chos kyi de nyid tshol zhing tshor ba'i de nyid mthong ba zhes bgyi ba sa gzhan bzhi pa la zhugs nas bdud kyi phyogs 'joms par bgyid cing dam pa'i chos kyi zam pa rtan par bgyid/ chos dkar po rab tu ston par bgyid cing bdud kyi phyogs smod par bgyid la lha'i phyogs 'phel bar bgyid pa de bdag cag gis lha rnams la mngon par gsol lo/ /'thab bral gyi lha rnams la byams pas lha'i phyogs 'phel bar gyur pa de thos nas/ kye lha dag 'di ltar gang bdud kyi phyogs dma' bar byed cing / dam pa'i chos kyi phyogs mngon par mtho bar byed la/ nyon mongs pa rnams las rab tu grol bar byed cing bdud kyi sde rnam par 'jig par byed pa la bdag rab tu dga'o zhes gtam du byed do/ /gzhan yang dge slong des tshor ba'i tshogs drug mdor bsdus pa ji lta ba bzhin mthong nas tshor ba'i phung po'i sa'i chos sa gzhan lnga pa la ji ltar 'dug ce na/ rnal 'byor spyod pa nang gi chos la chos kyi rjes su lta zhing gnas pas brtags na/ yang dge slong de tshor ba'i de nyid mthong zhing tshor ba'i tshogs drug gi las kyi mthar byas pa 'du shes kyi phung po yang dag par rab tu rnam par 'byed cing mtshan mar byed do/ /sa gzhan 'du shes dang bcas pa gang yin snyam na/ bdag chos dkar po dben pa la spyod cing phan pa dang mi phan pa las dben par spyod pa'i 'du shes kyis 'du shes su byed cing de yang dag par sems par byed la de chos dkar po mtshan mar byed pa ni 'di ltar thog ma nyid du chos rnams rab tu rnam par 'byed de/ dmigs pa bstan du yod cing thogs pa dang bcas pa dang / bstan du med cing thogs pa'i 'du shes ji ltar skye bar 'gyur ba gang yin zhig gu snyam nas de shin du dben pas 'du shes de la rtog par byed cing de 'du shes des gzugs rnam pa bcu gcig la mtshan mar dmigs te/ 'di lta ste/ ring ba dang / thung ba dang / gru bzhi dang / zlum po dang / zur gsum dang / sngon po dang / ser po dang / dmar po dang / dkar po dang / gtsod ka'o/ /de la 'du shes kyi mtshan mas ring por byed pa ni/ kye ma byis pa blo zhan pa rnams kyis thog ma dang tha ma med pa'i skye ba dang / 'chi ba dang / las dang / 'bras bu dang / 'chi 'pho dang / 'byung ba dang / sdug pa dang / bral ba dang / grang ba dang / tsha ba dang / bkres pa dang / skom pa dang / dub pa dang / na ba dang / gzhan gyis bsgo ba dang / brnyas pa dang / bran gyi ngo bo dang / gcig la gcig za ba dang / sogs par byed cing don med par gyur pa dpag tu med pa 'di kun ni bzod par dka' ba yin te/ lus dang / ngag dang / yid kyis kun nas bslangs pa'i nyes par byas pa'i las kyi bye brag bye ba khrag khrig brgya stong phrag dpag tu med pa dag gis byis pa so so'i skye bo dag yang dang yang du khyab par byas shing rnam par gces pa'i 'khor ba 'di ni ring ngo snyam mo/ /de la mir gyur pa rnams la 'dod pas nyon mongs shing gcig la gcig 'drid pa dang / gzhal blugs dang / shags dang / tshong pa dang / rgyal po'i pho brang du sten pa dang / mtsho dang / ngam grog dang / yul gzhan du 'gro ba dang / 'thab mo dang / zhing rmed pa dang / phyugs skyong ba dang / kla klor skye ba dang / log par lta ba dang / dbang po ma tshang ba dang / dam pa'i chos dang bral ba dang / sangs rgyas 'byung ba dang bral ba dang / rkyen ma tshang ba dang / mi khom pa dang / chang 'thung ba dang / ma byin par len pa dang / brdzun du smra ba dang / 'dod pas log par g.yem pa dang / brnab sems dang / gnod sems dang / phra ma dang / tshig rtsub po dang / tshig kyal pa la yid rnam par zhen pa'i 'khor ba 'di ni ring ngo snyam du 'du shes kyi mtshan ma la dmigs par byed do/ /lha rnams kyi 'khor ba yang ring bar 'du shes kyi mtshan ma la dmigs par byed de/ yul sdug pa dang / sgra dang / ro dang / gzugs dang / dri la rab tu chags shing / 'dod chags dang / zhe sdang dang / gti mug dang / bag med pa dang / bud med kyi nyon mongs pa dang / dga' ba'i tshal dang / yongs su 'du dang / rnam par mdzes pa dang / shing rta sna tshogs dang / tshal dang / nags tshal dang / lteng ka dang / dal gyis 'bab pa dang / kun du rtse ba dang / me tog dang / spos dang / bdud rtsi'i ro dang rnam pa sna tshogs su rtse ba dang / kha zas dang / gnas khang la rab tu chags pa dang / tsan dan dang / lha'i me tog phreng dang / phye ma dang / byug pa dang / me tog mAn dA ra ba dang / lha'i rol mo dang / lha'i glu dbyangs la sems rab tu chags shing / dam pa'i chos la kha phyir phyogs pa'i 'khor ba ni ring ngo snyam mo/ /yi dags rnams kyi 'khor ba yang ring bar 'du shes kyi mtshan ma la dmigs par byed de/ nyes par byas pa'i las kyis 'gro ba bkres pa dang / skom pa dang / dub pa dang / nyam chung ba dang / me'i char rab tu 'bab pa dang / mid pa khab tsam la lto ri tsam pa dang / lto sgal ba la zhar ba dang / phrag dog dang / ser sna skyes shing gcig la gcig mtshon gyis 'debs pa dang / mun nag tu 'jug cing g.yang sar rab tu ltung ba dang / chu bo dang / lteng ka dang / 'bab chu'i dngo dang / mtshor rgyug pa dang / gshin rje'i mis ral gri dang / dbyig pa dang / gzhor dang / mdung gis btab cing sdug bsngal ba/ skyugs pa dang / ngar snabs kyi kha zas lo 'bum phrag du mar za ba/ sdug bsngal rnam pa sna tshogs kyis mchi ma rab tu 'byung zhing bzod par dka' ba/ yul ngan byung zhing gdong dang lus skras khebs pa/ lus la srin bu 'bum zhugs pa/ lus nad thams cad 'byung ba'i gzhir gyur cing thebs pa/ 'khor bar yun ring du zhugs pa/ lcags kyi bya rog mchu 'bar ba dag gis mig phyung ba/ lus shing bsregs pa 'dra zhing pha rol gyis gnon pa/ gcig la gcig za ba/ dgon pa dpag tshad bye ba brgya phrag sum bcu rtsa drug tu zhugs pa/ mgon med cing zas dang / skom gyi mes lus bsregs pa/ mun nag tu zhugs pa'i yi dags dag ni dam pa'i chos mnyan pa la kha phyir phyogs pa yin te/ log par lta bas bslus pa rnams kyi 'khor ba ni ring ngo snyam du 'du shes kyi mtshan ma la dmigs par byed do/ /gcig la gcig za zhing khong du chud par bya ba dang / khong du chud par bya ba ma yin pa shes pa la kha phyir phyogs pa rnams ni chu dang chu la spyod pa rnams rtag tu skom pas gdungs shing yongs su skams pa dang / gzung bas 'jigs pa chu srin byis pa gsod dang / chags brkam dang / sram dang / ru sbal dang / nya dang / nya mid dang / nya mid mid dang / chu srin kum b+hi ra dang / chu srin na kra dang / chu srin ma ka ra dang / chu srin na kra dang / chu srin nya phyis dang / chu srin dung la sogs pa chen po dang / chung ngu rtag tu gcig la gcig za ba dang / de las gzhan pa rgyas bshor zhing bzung bas 'jigs pa rnams dang / de bzhin du skam sa la rgyu ba ri dgas dang / ma he dang / phag rgod dang / glang po dang / khyu mchog dang / rta dang / bong bu dang / ba lang dang / ri dgas ru ru dang / dred mo dang / bse la sogs pa sdug bsngal sna tshogs kyis 'ching zhing mtshon gyis gsod pa dang / nad dang / rga ba dang / 'chi bas gcig la gcig gnod pa brgya phrag stong gis nyen pa rnams dang / de bzhin du nam mkha' la rgyu ba bya rog dang / 'ug pa dang / ngang pa dang / rma bya dang / khyim bya dang / bya rko ma sh+ti ka dang / phug ron dang / bya daM t+yu ha dang / bya tsa sha dang / bya 'dab brgya dang / bya tsha ya ba yin dang / bya shang shang te'u dang / bya san ta pa la sogs pa gzhan yang bya'i rigs dag gsod pa dang / 'ching ba dang / bkres pa dang / skom pa dang / gcig la gcig za ba dang / grang ba dang / tsha bas gnod pa rnams dang / gnas gsum la gnas pa skam sa dang / chu dang bar snang la rgyu ba'i dud 'gror gyur pa rnams la mi bzad cing so so'i 'jigs pa rnams kyi 'khor ba ni ring bar 'du shes kyi mtshan ma la dmigs par byed do/ /de bzhin du yang sos dang / thig nag dang / bsdus gzhom dang / ngu 'bod dang / ngu 'bod chen po dang / tsha ba dang / rab tu tsha ba dang / mnar med pa rnams kyi mi bzod pa/ bsam pa shin du ngan pa rnams kyi so so'i 'jigs pa brgya stong du ma yod pa/ me dang / mtshon dang / g.yang sa dang / brkyal pa'i chu bo dmar po'i nang du lus rab tu 'jug pa/ lo ma'i ral gri'i nang du 'jug cing 'dab mas so sor nyams su myong ba/ ba tshwa'i chu'i nang du 'jug cing sa rab tu 'bar ba la 'gro ba/ sreg par byed pa'i pad ma mi bzad pa/ gnod par byed pa/ bzod par dka' ba rnam pa du ma mtshungs pa med pa'i sems can dmyal ba rnams kyi 'khor ba ni ring bar 'du shes kyi mtshan ma la dmigs par byed do/ /dge slong de 'du shes kyi phung po rab tu rnam par dpyod pa la bstan du yod cing thogs pa dang bcas pa yun ring po'i gzugs 'phags pa'i bden pa bzhi la las dang 'bras bu'i rgyu'i gzhi dmigs pa sems can rnam pa sna tshogs dpag tshad brgya phrag stong gi 'gro bar song ba rnams la lta bar byed cing / mtshan mar byed la/ rnam par 'byed par byed/ gzhi la dmigs pa'i 'du shes rab tu gsal bas mthong ste/ 'khor ba la yid 'byung bar byed do/ /gzhan yang ji ltar na dge slong de thung ngu rnam par 'byed cing mngon sum du byed ce na/ rnal 'byor spyod pa nang gi chos la chos kyi rjes su lta zhing gnas pa des thos pa las byung ba'i shes pa 'am lha'i mig gis brtags na/ dge slong de bdud kyi sde rnam par 'jig par byed de/ ji ltar thung ba rnam par 'byed ce na/ 'khor ba thung ba'i brtul zhugs dang / sdom pa dang / sbyin pa dang / tshul khrims dang / chog shes pa dang / bla ma la gus pa dang / yid drang ba dang / yang dag pa'i lta ba pha ma la gus pa dang / sangs rgyas la chos nyan cing lta la bsnyen bkur byed pa dang / g.yo byed pa dang / gzhal glugs dang / 'drid pa dang / dge ba'i bshes gnyen gyi spyod pa ma yin pa spong ba dang / phyug pa dang / yid drang ba dang / snying brtse ba dang / lus dang / ngag dang / yid las su rung ba dang ldan zhing mi'i snying dang ldan pa rnams kyi 'khor ba ni thung bar 'du shes kyi mtshan ma la dmigs par byed do/ /de bzhin du gang dag bag med pa la zhugs pa rnams kyi dga' ba'i tshal dang / rnam par mdzes pa dang / shing rta sna tshogs dang / yongs 'du dang / nags tshal dang / lteng ka dang / pad ma sna tshogs dang / rgyan dang / do shal dang / bro gar dang / khron pa dang / shin du mdzes pa'i dpag bsam gyi shing dang / 'bab chu dang / chu mig tshag tshig dang / tshal dang / bdud rtsi dang / zas dang / gnas kyi khyad par dag spangs nas gang dag tshul khrims kyi rnam pa'i bsam gtan dang / klog pa la gnas shing legs par lta pa la kha ton du 'don pa dang / sbyin pa dang / dul ba dang / yang dag par sdom pa dang / tshangs par spyod pa dang / dbang po dul ba dang / smra ba'i tshig nyung ba dang / chos 'dod pa dang / zhi ba'i zas la gnas pa dang / lha gang yin pa de dag gi 'khor ba ni thung ngo / /ji skad bshad pa bzhin du sdug bsngal gyi rnam pa bkres pa dang / skom pa dang / kha skams pa dang / tshal shing bsregs pa bzhin du dman zhing zhum la skra dang / gdong shing bsregs pa lta bu'i lus can gang yin pa de dag sdug bsngal du mi bgrang bar gang dag skad cig tsam zhig kyang sangs rgyas dang / chos dang / dge 'dun la dbang po rab tu dang bas dad pa chung ngu zhig byas pa de dag gi 'khor ba ni thung bar 'du shes kyi mtshan ma la dmigs par byed do/ /gcig la gcig za zhing rdeg pa dang / grang ba dang / tsha ba dang / yul ngan dang / 'jigs pas 'jigs pa de dag gal te nus na skad cig tsam du rnam par gnod pa mi bgrang bar skad cig tsam zhig kyang sangs rgyas dang / chos dang / dge 'dun la sems dang bar byas pa'i dud 'gro de dag gi 'khor ba ni thung bar 'du shes kyi mtshan ma la dmigs par byed do/ /yang sos dang / thig nag dang / bsdus gzhom dang / ngu 'bod dang / ngu 'bod chen po dang / tsha ba dang / rab tu tsha ba dang / mnar med pa la sogs pa'i sems can dmyal ba rnams su skyes pa gang dag sdug bsngal shin du gnod pa rnam pa sna tshogs de dag sdug bsngal du mi bgrang bar/ gang dag skad cig tsam du tshul khrims la sems dad par byed pa'i sems can dmyal ba de dag gi 'khor ba ni thung bar 'du shes kyi mtshan ma la dmigs par byed de/ de de ltar 'khor ba thung bar sems so/ /'khor ba gru bzhi po ji lta bu zhig snyam na/ de byang gi sgra mi snyan gyi mi rnams ni bdag gi ba med cing bdag tu nga rgyal med la nges par gong du 'gro ba de rnams kyi 'khor ba ni gru bzhi po yin par 'du shes kyi mtshan ma la dmigs par byed do/ /sems can dmyal ba dang / yi dags dang / dud 'gro mi shes pas yongs su 'gyur zhing sems bzang po ma yin pa'i rjes su 'jug pa'i 'khor ba ni zlum po yin par 'du shes kyi mtshan ma la dmigs so/ /dge ba dang / mi dge ba dang / lung du ma bstan pa'i las 'dren ma dag ni sems can dmyal ba dang / lha dang / 'dren ma mi rnams su skye bar 'gyur te/ de la mi dge ba'i las kyis ni sems can dmyal ba rnams su'o/ /dge ba'i las kyis ni lha rnams su'o/ /'dren mas ni mi rnams su skye ste/ las gsum nye bar 'gro'o/ /gang dag gnas gsum gyi skye bar skyes pa de rnams kyi 'khor ba ni zur gsum po yin par 'du shes kyi mtshan ma la dmigs par byed do/ /rgyal chen bzhi pa dang / 'thab bral gyi lha dang / gzhan 'phrul dbang byed kyi las lta bur skyes pa'i lha dag las shi nas lha rnams kyi nang du skye bar 'gyur/ gang dag mi las shi nas mi rnams kyi nang du skye bar 'gyur ba mi khom pa med pa'i sa de dag gi 'khor ba ni zlum po yin par 'du shes kyi mtshan ma la dmigs par byed do/ /las dmar pos yongs su bzung ba dag ni dud 'gro yin te/ de dag kyang gcig la gcig za zhing dmar po la dga' ba'i 'du shes kyi mtshan ma la dmigs par byed do/ /las kha dog dkar pos yongs su bzung ba ni lha dang mi yin te/ gtsang zhing dge ba'i las kyi lam rin po che las byung ba'i rim gyis lha dang mir skye ba 'dzin te/ lha 'chi ba na de la lha dag bde 'gro mi'i 'jig rten du bzhud cig ces smra'o/ /de bzhin du mi 'chi ba na gnyen dang / mdza' bshes dang / chung ma dag mig mchi mas gang zhing ngom zung gnag pa dag bdag cag thong la bde 'gro mi'i 'jig rten dgyes par bzhud cig ces smra'o/ /de 'di snyam du sems te/ mi de nyid thob kyang gang dge ba dang / sbyin pa dang / tshul khrims dang / shes rab la brtson 'grus med pa de ni sems can dmyal ba dang / yi dags dang / dud 'gro'i dgon par gtses shing yongs su 'khyam ste/ so so'i skye bo ni las kyi lam gyis bslus shing chud gzan pa yin no snyam mo/ /dge slong de tshor ba'i de nyid mkhyen pa/ 'du shes kyi phung po la tshul bzhin yid la byed pa la dmigs pa'i de nyid mthong ba ni 'di ltar de nyid tshol bar byed de/ mig dang gzugs la brten nas mig gi rnam par shes pa skye'o/ /gsum 'dus pa las reg pa brjod pa'i 'du shes rnam par 'byed de/ gzugs mthong na bzang ba dang / mi bzang ba dang / nye ba dang / bskal pa dang / ring ba dang / thung ba dang / gru bzhi dang / zlum po dang / dkar po dang / zur gsum dang / gzugs kyi dbyibs 'du shes kyis yang dag par rnam par 'byed cing mtshan mar byed la gzhi la lta bar byed do/ /phung po dang / khams dang / skye mched kyi gzhi 'du shes su byed cing rnam par 'byed/ dge ba dang / mi dge ba'i las kyi rnam par smin pa shin du 'byed cing mngon sum du byed do/ /rgyu dang ldan pa la dmigs shing / rgyu ma yin pa dang ldan pa shes nas rnam par spong bar byed/ phan pa dang mi phan pa'i mtshan nyid mi 'dra ba 'das pa la 'du shes su byed de/ ji ltar 'dis bdag gi byas pa nyes pa byas pa'i 'du shes kyis 'du shes par byed de/ snga ma bzhin no/ /gal te 'du shes med na dran pa yang med de/ dran pa de dang 'du shes su 'brel pa ni de'i dmigs pa yin zhing de'i rkyen yin te/ dper na 'od de'i rkyen de'i gzhi de'i rgyu mar me yin pa de bzhin du dran pa ni 'du shes kyi rgyu 'du shes rab tu byung ba 'du shes kyi bdag po yin no snyam mo/ /dge slong de sa gzhan lnga pa 'du shes su reg pa zhes bya ba la 'jug ste/ de yang dag pa'i tshor ba bde ba la 'du shes su byed kyang de la dga' ba med la sems can dmyal ba rnams kyi las byas pa sdug bsngal de yang 'jigs pa med par de mtshungs par rtog ste/ gser bzang po bzhin no/ /dge slong 'du shes can de 'du shes kyi rnam pa gzhan gyis rtog par byed de/ de 'du shes las rnam par grol zhing rtog par byed pa gzhan ma yin pa bdag gi 'du shes kyi rkyen ni gang yin/ rgyu ni gang yin gzhi ni gang yin snyam mo/ /de 'du shes 'di ni rten cing 'brel par 'byung ba yin te/ rkyen tshogs pa des 'di skye zhing de 'gog pa las 'gag par 'gyur te/ dper na zla ba la yang brten/ chu shel la yang brten nas/ nor bu chu shel las chu dang ba 'byung ba de bzhin du rgyu dang rkyen la brten nas 'du shes 'byung bar 'gyur te/ 'du shes 'di ni rgyu med pa las 'byung ba ma yin zhing / byed pa po dang tshor ba pos ma byas/ 'dod rgyal bas ma byung bar 'di skye'o snyam mo/ /dge slong de 'du shes kyi phung po'i de nyid tshol ba yin te/ de 'du shes kyi de nyid mthong zhing de skye ba dang / 'jig pa'i de nyid shes pa rim pa shin du phra mos tshol ba yin no/ /chu bo'i rgyun 'bab pa ltar 'du shes la zhugs pa dge ba 'byung zhing rkyen gyi dbang gis mi dge ba 'byung la rgyu dang rkyen gyi dbang gis mi dge bar 'gyur ba skyes so/ /de yang sems spre'u lta bu nyams pas lung du ma bstan pa 'gyur ba lung du ma bstan pa skyes so/ /de bde ba'i 'du shes la bde bar mi lta ste/ zag pa med pa'i bde ba la bde bar 'du shes shing bde ba la yang bde ba ma yin par 'du shes te bde ba de dag ni chung ngur shes so/ /ji ltar na dge ba'i phung po dang / khams dang / skye mched kyi phung po skye ba dang / 'gog par lta zhing tshor ba dag pa dang mngon par chags pa med ce na/ tshor ba nub pa des 'du shes mngon par dga' ba med cing 'du shes nub pa des 'du byed rnams 'byung bar 'dod pa med de/ gnas pa med cing 'jig pa med la gzhan du 'gyur ba med pa'i rnam par shes pa 'byung ba la mngon par 'dod pa med do/ /gnas pa med cing 'jig pa med la/ gzhan la 'gyur ba med pa'i ngo bo 'di ni dge slong phung po'i de nyid shes pa yin te/ bdud kyi yul la mi gnas shing / 'dod chags zhe sdang gti mug rnams kyis gnod pa med pa yin/ de rtag pa dang / bde ba dang / gtsang ba dang / bdag tu lta ba ma yin/ 'khor ba na sgra dang / reg pa dang / gzugs dang / dri sdug pa dra ba'i zhags pa lta bu dag gis 'ching bar mi 'gyur zhing dran pa nyams par mi 'gyur te/ de dran pa nye bar gnas pa rnam par shes shing zag pa zad par bya ba nus la mya ngan las 'das pa la mngon du phyogs par 'gyur ro/ /'dir tshigs su bcad pa/ dge slong brtson 'grus zhan pa dang / /le lo byed cing lta ba la/ /gang zhig rtag tu spro dga' med/ /de lta bu ni dge slong yin/ /mal cha stan la longs mi spyod/ /dge slong yin zhes sangs rgyas gsungs/ / gang zhig le lo mngon dga' ba/ /de ni dge ba'i 'os min no/ /nyon mongs rnams kyi gzhi gcig ni/ /le lo yin te gang la yod/ /gang la le lo gcig yod pa/ /de la chos ni med pa yin/ /bgo ba tsam gyis chog 'dzin pa/ / de ni dge slong yin zhes brjod/ /gang gi blo gros brjod med cing / /bsam gtan med la zag zad med/ /cha byad tsam gyis chog 'dzin pa/ /de lta bu ni dge slong min/ /gtsug lag khang dang kun dgar brtson/ /chos kyi spyod yul dga' med cing / /bud med chang la chags pa'i blo/ /de lta bu ni dge slong min/ /gang zhig bdud kyi 'ching gcod pa/ /sdig pa'i las dag gcod byed la/ /dge 'dun spyod yul mi spyod pa/ /de ni dge slong sangs rgyas gsungs/ /sbrul gdug dang ni ta mra dag /smin pa za ba nyis na rung / /tshul khrims 'chal na dge 'dun gyi/ /bza' btung spyod pa mi rung ngo / /gang zhig nyon mongs bsdus pa ni/ /de ni bsod snyoms 'os min zhing / /de ni bsod snyoms rigs min te/ /de ni dmyal ba'i 'os yin no/ /sbrul gdug khung na 'dug lta bu'i/ /nye ba gang gis bcom zhing spangs/ /dge slong de ni bsod snyoms spyod/ /de ni bud med lta ba med/ / gal te bdag nyid gtar bzhag cing / /sdig pa rnams la chags pa ni/ /dge 'dun rin chen sun byed pa/ /de ni dge slong ji ltar shes/ /gang zhig rnyed dang bkur sti dang / /gang zhig yul sdug sems byed la/ /bud med lta zhing de 'dod pa/ /dge min khyim min g.yon can yin/ /ji ltar me yis tshal bsregs bzhin/ /gang gis nyon mongs tshal bsregs pa/ /bram ze de yin de dge zhing / /sdig pa'i zas la mi chags so/ /rtag par grong du 'gro spro zhing / /g.yon can rtag tu khrus byed pa/ /rmongs pa bdag dang gzhan slu ste/ /dam chos lam la rmongs pa yin/ /yid ni zhi zhing dgon pa ru/ /rtag tu bsam gtan pha rol 'gro/ /bram ze de yin de dge zhing / / dge ba'i lam gyi spyod yul yin/ /dgon pa dag tu dga' byed pa/ /der ni 'dod chags bral ba dga'/ /'dod pa tshol ba'i yid dag ni/ /der ni dga' bar mi 'gyur ro/ /gang zhig 'bel ba'i gtam dga' zhing / /yul gyi sred pas mngon dga' ba/ /gang na 'chi ba med pa yi/ /zhi ba'i grong du mi 'gro 'o/ /rgyal po bsten cing zas dang skom/ /shin du zhim 'dod rtag khro ba/ /ming gi dge slong g.yo thabs kyis/ /gang dag rgyal po'i sgor 'dug cing / /khyim pa dag dang nye rtsom bcas/ /de nas de dag sun 'byin cing / /sbyin bdag bden sems slu bar byed/ /ji ltar glang chen tshal gnas bzhin/ /gang dag bu smad yongs spangs na/ /zhi ba'i tshal na gnas pa ni/ /de dag sred spangs bsam pa mnyam/ /dge slong de nyes pa de dag spangs nas de nyid mthong ba de las gzhin pa gzugs la sogs pa phung po'i de nyid mthong ba/ thar pa la 'bad cing spyod de bla ma la yongs su 'dri/ lam dang lam ma yin pa'i de nyid shes shing 'phags pa'i lam yan lag brgyad pas thar pa'i grong khyer de tshol ba ni lam brtson pa'i ngang tshul can mnyam par lta zhing dri ma med pa'i sems dang / zhi ba'i sems kyis lam de kun du bsten cing sgom ste mang du byed do/ /de zag pa med pa'i las kyi lam gyi dge ba dang yang dag par ldan pa des bdud kyi phyogs ni dmas par byed cing dam pa'i chos kyi phyogs ni 'phel bar byed do zhes sa bla'i gnod sbyin dag gis shes nas bar snang la spyod pa'i gnod sbyin dag la mngon par bsnyad do/ /de dag gis kyang rgyal po chen po bzhi la mngon par bsnyad do/ /de dag gis kyang rgyal chen bzhi pa nas snga ma bzhin du sbyar te/ 'thab bral dang dga' ldan gyi lha dag gis dga' ldan gyi gnas na byams pa bzhugs pa'i bar la mngon par bsnyad do/ / de nas byang chub sems dpa' gcig cig mchog tu dga' ches nas gzhan 'phrul dbang byed kyi lha rnams la mngon par bsnyad de/ 'dzam bu'i gling du rigs kyi bu che ge mo zhig skra dang kha spu bregs te/ gos ngur smrig bgos pa nas snga ma bzhin du sbyar te/ de nas gzhan 'phrul dbang byed kyi lha rnams yid mchog tu dga' ba'i bar du snga ma bzhin du sbyar ro/ /de nas gzhan yang dge slong des gzhan yang lnga pa la ji ltar 'jug cig gu snyam nas rnal 'byor spyod pa nang gi chos la chos kyi rjes su lta zhing gnas pa des thos pa las byung ba'i shes pa 'am lha'i mig gis brtags na/ skye mched gzugs can bcu la rtog par byed do/ /bcu gang zhe na/ 'di lta ste/ mig gi skye mched dang / gzugs kyi skye mched dang / rna ba'i skye mched dang / sgra'i skye mched dang / sna'i skye mched dang / dri'i skye mched dang / lce'i skye mched dang / ro'i skye mched dang / lus kyi skye mched dang / reg bya'i skye mched de/ skye mched gzugs can bcu po de dag la rtog par byed do/ /bdag gi mig gi skye mched la yang brten/ gzugs kyi skye mched la yang brten nas 'du shes su ji ltar 'gyur zhe na/ mig la yang brten gzugs la yang brten nas/ mig gi rnam par shes pa skye bar mthong ste/ gsum 'dus pa las reg pa/ reg pa dang lhan cig skyes pa tshor ba dang / 'du shes dang / sems pa 'byung ngo / /de la tshor ba gang yin pa de ni myong ba'o/ /sems pa gang yin pa de ni sems par byed/ /de la 'du shes pa yin te/ 'di ltar gzugs 'di ni ring po/ /gzugs 'di ni thung ngu / gzugs 'di ni sdug pa/ gzugs 'di ni mi sdug pa/ gzugs 'di ni bstan du yod pa gzugs 'di ni thogs pa dang bcas pa gzugs 'di ni bstan du med pa/ gzugs 'di ni thogs pa med pa zhes rnam par rig byed ma yin pa'i bar rnam pa bcu gcig po 'di ni 'du shes kyi gzugs su rnam par dbye ste/ de ltar gsum 'dus pa las reg pa skye'o/ /de reg pa dang lhan cig skyes pa'i tshor ba dang sems pa 'byung ste/ de la mig gi 'dus te reg pa las byung ba'i tshor ba dang / 'du shes dang / sems pa myong ba'i don ni tshor ba'i don no/ /'du shes kyi don ni tshor ba'i tshe yang dag par shes pa yin te/ chos 'di dag la yid 'jug pa skye ba'i mtshan nyid mi 'dra zhing ngo bo nyid mi 'dra ba yin te/ dper na sa chen po bcu'i chos lta bu'o/ /sems pa'i mtshan nyid mi 'dra ba yang de bzhin te/ rnam par rtog pas yid la byed pa dang / dpyod pa dang / dran pa dang / tshor ba dang / 'du shes dang / sems pa dang / reg pa dang / brtson 'grus dang / ting nge 'dzin de dag ni dmigs pa gcig la mtshan nyid mi 'dra ba nyid yin no/ /de bzhin du tshor ba'i mtshan nyid kyang mi 'dra zhing de bzhin du 'du shes kyi mtshan nyid kyang mi 'dra ba yin te/ dper na nyi ma'i gzhi gcig yin kyang 'od kyi ngo bo tha dad pa de bzhin du tshor ba'i ngo bo nyid kyang gzhan yin la/ sems pa'i ngo bo nyid kyang gzhan yin no/ /de mig gi 'dus te reg pa las byung ba'i tshor ba dang / 'du shes dang / sems pa'i de kho na nyid shes nas/ mig 'di ni gsog tu mthong / gsob tu mthong / snying po med par mthong ngo / /yang dag par mthong ba'i dge slong de ni lam gyi de kho na nyid shes nas log par lta ba spangs te/ de yang dag pa'i lta ba sngon du btang bas de mig dang lhan cig skyes pa'i 'du shes kyi gti mug rnyog pa can gyi ngo bo nyid du gyur pa spong ngo / /sha'i gong bu'i de kho na nyid mthong ste/ tshil dang / rnag dang / khrag dang / mchi ma'i gnas yin par rig nas/ 'dod chags spong zhing mi rtag par rig nas rtag par mi lta ba yin la/ rus pa'i bu ga'i nang na sha'i gong bu yod par rig nas 'dod chags dang bral bar 'gyur/ rgyus pas sbrel bar rig cing mig gi skye mched 'di ni gcig la gcig 'brel par rtogs te/ 'di la snying po med cing bdag med par rig la/ mdor na mig 'di ni sdug bsngal du gyur pa yin no zhes rnam par shes shing mthong nas mig gi skye mched kyi 'dod chags dang bral bar 'gyur ro/ /de mig gi skye mched yang dag pa ji lta ba bzhin rtogs shing gzugs la rnam par dpyod par byed de/ gal te yang dag pa ma yin pa'i gzugs 'di sdug pa dang / mi sdug pa dang / lung du ma bstan pa yongs su rtog ste/ 'di ci la snying po yod dam/ ci gtsang ngam/ ci rtag gam/ ci bde ba yod dam snyam mo/ /de gzugs lta zhing shes te/ rtog pas gzugs su mi dmigs te/ 'di la snying po med do/ /gzugs sdug pa dang / mi sdug pa 'di ni kun du rtog pa tsam ste/ 'di la sdug pa dang / mi sdug pa'i ngo bo ni med la/ sdug pa dang / khong khro ba kho nar kun du rtog pas bzung ba'i 'jig rten 'di ni sdug pa dang sdang bar sems so snyam mo/ /de mig gi skye mched mthong nas/ rna ba'i skye mched la lta bar byed de/ de sgra la so sor rtog go/ / sgra skyes pa dbang po'i yul la 'jug ste/ des rna ba la yang brten/ sgra la yang brten/ de skyed pa'i yid la byed pa la yang brten nas rna ba'i rnam par shes pa skye ste/ gsum 'dus pa las reg pa/ reg pa dang lhan cig skyes pa'i tshor ba dang / 'du shes dang / sems pa 'byung ngo / /de la reg pa dang / lhan cig skyes pa gang gis myong bar byed/ de la reg pa dang lhan cig byung ba'i 'du shes byung ba'i 'du shes gang gis kun du shes par byed/ reg pa dang lhan cig byung ba'i sems gang gis sems par byed snyam na/ 'du shes ni 'di lta ste/ 'di ni ring ngo snyam pa'i mtshan nyid do/ /sgra 'byung ba'i rkyen 'di las skyes pa'i sgra mi gsal ba dang chung ba dang / chen por snyan pa dang mi snyan pa 'di 'byung ste/ de sgra byung ba de la so sor rig par byed cing yang dag par sems par byed la 'du shes kyis rnam par 'byed par byed/ yid kyis rnam par shes par byed cing tshor bas shes par byed la/ som nyis rnam par dpyod par byed do/ /de rna ba'i skye mched la mngon par zhen pa na rtog par byed/ rtog pa na rnam par dpyod par byed/ rnam par dpyod pa na so so yang dag par rig par byed de/ 'di la sgra ngo bo nyid kyis snyan pa 'am mi snyan pa ni med do/ /sgra snyan pa 'am mi snyan pa 'di ni kun du rtog pa tsam kho na ste/ sgra 'di ni ngo bo nyid kyis rtag pa 'am/ bde ba 'am/ snying po 'am/ bdag dang bcas pa ni med la/ sgra snyan pa 'am mi snyan pa 'di ni 'dod chags zhe sdang gti mug kho na'o snyam mo/ /de sgra'i skye mched la mngon par kun du rtog pa na/ sgra thos pa na rmongs pa med cing chags pa med la snying po med par rtogs so/ /de rna ba dang / sgra'i skye mched la mngon par rtog pa na/ rna ba'i rnam par shes pa la chags pa med cing 'dod chags dang bral ba 'thob ste/ rna ba'i rnam par shes pa ni bdag ma yin zhing / rna ba'i rnam par shes pa ni bdag gi ma yin snyam mo/ /reg pa dang / tshor ba dang / sems pa yang de bzhin no/ /yang dge slong de sna dang / dri'i skye mched la lta ste/ sna la yang brten/ dri la yang brten/ de skyed pa yid la byed pa la yang brten nas sna'i rnam par shes pa skye ste/ nye ba 'am/ ring ba 'am/ yid du 'ong ba 'am/ yid du mi 'ong ba 'am/ dri zhim pa 'am/ dri mi zhim pa 'am/ rlung gis khyer te 'ongs pa 'am/ khyer te mi 'ong ba'i dri so sor snom mo/ /de la sna'i skye mched la phyi rol gyi dri de sbyor bar byed de/ de la gsum 'dus pa las reg pa/ reg pa dang lhan cig skyes pa'i tshor ba dang / 'du shes dang / sems pa 'byung ngo / /de la myong ba'i mtshan nyid ni tshor ba'o/ /shes pa'i mtshan nyid ni 'du shes so/ /de rna ba dang / sgra'i skye mched mthong nas nang gi reg pa'i mtshan nyid ni reg pa/ shes pa'i mtshan nyid ni 'du shes/ de sems pa'i mtshan nyid ni 'du shes de sems par byed pa yin te/ chos 'di dag ni skad cig ma gcig la dmigs pa yin la/ bya ba ni tha dad par rtsom pa yin te/ dper na ji ltar ngo bo nyid mi 'dra ba sa chen po'i chos bcu pa lta bu'o/ /de bzhin du chos 'di dag thams cad kyi mtshan nyid tha dad cing skad cig ma gcig la gzhan bya ba gcig rtsom pa yin no snyam ste/ snga ma bzhin no/ /dge slong de sna dang dri'i skye mched kyi de kho na nyid shes par de nyid 'di ltar tshol te/ ci 'di la skye mched 'di rtag pa dang / brtan pa dang / ther zug pa med cing yongs su 'gyur ba yin te/ sna dang / dri'i skye mched mi rtag pa dang / sdug bsngal ba dang / stong pa dang / bdag med par shes la/ de dag thams cad la bdag med cing bdag gi med do zhes rig nas sna dang / dri'i skye mched 'di ni kun du rtog pa kho na tsam yin la/ des so so'i skye bo thams cad bcings pa yin te/ blo zhan pa dag ni rnam pa la so sor rtog go snyam mo/ /yang dge slong de lce'i skye mched tshol bar byed de/ lce la yang brten/ ro la yang brten/ de skyed pa yid la byed pa la yang brten nas/ lce'i rnam par shes pa skye ste/ gsum 'dus pa reg pa reg pa dang lhan cig skyes pa'i tshor ba dang / 'du shes dang / sems pa 'byung ngo / / de la myong ba'i mtshan nyid ni tshor ba/ shes pa'i mtshan nyid ni 'du shes/ reg pa'i mtshan nyid ni reg pa/ sems pa'i mtshan nyid ni sems par byed pa yin te/ chos 'di dag ni 'du shes kyi mtshan ma la dmigs pa yin zhing rang gi mtshan nyid dang spyi'i mtshan nyid du gyur pa/ bya ba tha dad pa rtsom zhing thams cad kyang don gcig rab tu bsgrub pa yin te/ dper na shing la yang brten/ skam pa la yang brten/ the'u la yang brten/ thab la yang brten/ mgar ba la yang brten nas lag pa'i rgyan sor gdub gcig byed de/ chos de dag thams cad kyi mtshan nyid mi 'dra ba de bzhin du lce'i skye mched kyi chos 'di yang / lce'i skye mched dang ro'i skye mched bskyed do/ /yang dge slong de lce'i skye mched kyi de kho na nyid mthong ba 'di ltar rab tu rtog par byed de/ lce'i skye mched la rtag pa 'am/ bde ba 'am/ gtsang ba 'am/ bdag dang bcas pa chung zad yod pa rnam pa thams cad du rnam par bsams na gang mtshan nyid de lta bu dang ldan pa'i chos chung ngu tsam yang mi dmigs te/ de lce dang ro'i skye mched kyi 'dod chags dang bral lo/ /de sems can rgya mtsho de dag thams cad gang du zhugs shing chags pa/ mi dang / lha dang / sems can dmyal ba dang / dud 'gro dang / yi dags 'gro ba lnga po dag gcig la gcig gnod cing zhugs te 'ching ngo / /de lce dang ro'i skye mched las rnam par grol zhing 'dod chags dang bral te/ lce'i skye mched dag la bdag med cing lce dang ro'i skye mched dag la bdag gi med de/ bdag rtag pa 'am/ brtan pa 'am/ ther zug pa med cing yongs su 'gyur ba'i chos can yin te/ lce dang ro'i skye mched ni med pa yin no snyam ste/ de de las kyang 'dod chags dang bral lo/ /gzhan yang dge slong de lus dang / reg bya'i skye mched la lta bar byed de/ de lus la yang brten/ reg bya la yang brten nas/ lus kyi rnam par shes pa skye bar mthong ste/ gsum 'dus pa las reg pa/ reg pa dang lhan cig skyes pa'i tshor ba dang / 'du shes dang / sems pa 'byung ste/ chos 'di dag ni snga ma bzhin du shes par bya'o/ /ji ltar mig gi dbang po'i skye mched rnams bshad pa de bzhin du/ lus kyi reg pa yang khong du chud par bya'o// // 'phags pa dam pa'i chos dran pa nye bar gzhag pa bam po lnga pa/ de nas gzhan yang ji ltar na dge slong de skye mched gzugs can bcu brtags nas chos kyi skye mched kyi de kho na nyid rtog cing chos kyi skye mched la lta bar byed ce na/ rnal 'byor spyod pa nang gi chos la chos kyi rjes su lta zhing gnas pa des thos pa las byung ba'i shes pa 'am lha'i mig gis brtags na/ chos gang chos kyi skye mched du bsdus pa ni so sor brtags pas 'gog pa dang / so sor brtags pa ma yin pas 'gog pa dang nam mkha'o/ /de la chos gang chung zad med pa'i chos de bsdus pa ni nam mkha' yin no/ /so sor brtags pas 'gog pa zhes bya ba ni mya ngan las 'das pa la so sor rtog pa'i shes rab yin te/ de rnam pa du ma mngon sum du byas nas gnas so sor rtog pas nyon mongs pa sel zhing zad par byed la 'jig par byed/ zag pa med pa thams cad la phyogs par byed cing mngon du byed pa yin no/ /so sor brtags pa ma yin pas 'gog pa ni so sor brtags pa ma yin pa zhes bya ba gang mi shes shing shes pa med la/ so sor reg pa med/ shes pa ma yin zhing shin du khong du chud pa med la/ rab tu rtog pa med/ gzhan gyi rnam par shes pa brgya phrag stong skyes pa dag kyang 'jig par byed cing / mig dang / rna ba dang sna dang / lce dang / lus dang / yid kyi rnam par shes pa de la bdag 'jig par byed la/ yang 'byung bar mi byed pa gsum pa 'di ni so sor brtags pa ma yin pas 'gog pa ste/ nam mkha' dang chos gsum po 'di dag ni skye ba med la rtag pa de dag dus kyis ma bskyed cing skye bar mi 'gyur la mi skye'o/ /de nas gzhan yang ji ltar na dge slong de chos kyi skye mched gzugs dang gzugs ma yin pa rnam pa gnyis rnam par 'byed ce na/ de la gzugs can bcu ni skye mched gzugs can yin no/ /de la ji ltar na bstan du med cing thogs pa med pa'i mig gi rnam par shes pas bstan du yod cing thogs pa dang bcas pa'i gzugs ji ltar na dmigs par 'gyur/ de bzhin du ji ltar na rna ba'i rnam par shes pa bstan du med cing thogs pa med pas sgra 'dzin par 'gyur/ de bzhin du ji ltar na sna'i rnam par shes pa bstan du med cing thogs pa med pas dri 'dzin par 'gyur/ de bzhin du lce'i rnam par shes pa bstan du med cing thogs pa med pas ro rnam par shes par 'gyur/ de bzhin du lus kyi rnam par shes pa bstan du med cing thogs pa med pas phyi rol gyi skye mched lnga dang / gzhan nang gi skye mched lnga po 'di dag ji ltar na bstan du med cing thogs pa med pa dag gis bstan du yod cing thogs pa dang bcas pa'i skye mched dag ji ltar dmigs par 'gyur zhe na/ dge slong de ji tsam du dmigs pa'i rnam par 'gyur ba de tsam du rnam par mthong zhing de rnam par shes pa skye ste/ rgya dang rgya'i 'bur bzhin no/ /de la rgya de'i mi 'dra ba mkhrang ba dang / rgya'i 'jam pa dang / rnyi ba dang / mkhrang ba dang / mi mkhrang ba de las rgya'i 'bur 'byung ngo / /de bzhin du bstan du med cing thogs pa med pa'i rnam par shes pa bstan du yod cing thogs pa dang bcas pa la dmigs pa 'dzin to/ /gsum pa rgya'i 'bur 'byung ba bzhin du mi 'dra ba de dag thams cad las mi 'dra ba 'byung ste/ de ltar mi 'dra ba las mi 'dra ba 'byung ba ni mtha' dang po yin no/ /mtha' gnyis pa ni 'dra ba dag las 'dra ba 'byung ba yin te/ dper na thags dkar po dag las gos kyi snam bu dkar por shes pa lta bu'o/ /mtha' gsum pa ni mi mthun pa dag las mi mthun pa 'byung ba yin te/ dper na gtsub shing las me 'byung zhing me dang shing mi mthun par mthong ba lta bu'o/ /mtha' bzhi pa ni sla ba las bska ba 'byung ba yin te/ dper na 'o ma sla ba las zho bska ba 'byung ba ni ji ltar 'o ma sla ba las zho bska ba 'byung ba de bzhin du dngos po mi 'dra ba mig gi rnam par shes pa la sogs pa rgyu rkyen gyi bye brag gis mig gi rnam par shes pa la sogs pa skye'o/ /'dir tshigs su bcad pa/ chos rtogs pa la mngon dga' zhing / / bsam gtan kun dgar gnas ldan la/ /de yi mtshan nyid shes pa ni/ /mya ngan 'das pa mchog 'thob bo/ /byams la rtag par kun du dga'/ /chos kyi spyod yul brtson byed cing / /lus kyi mtshan nyid de shes pa/ /de nyid kho na dge slong yin/ /gang gi blo gros tshul bzhin sems/ /'dod dang khro bas mi nyams pa/ /dge slong de yin shes par bya/ /de las bzlog na gzhan du 'gyur/ /'byung po kun la brtse zhing zhi/ /chags pa thams cad rnam spangs la/ /'ching ba kun las nges grol ba/ /de nyid rig pa dge slong yin/ /gang gi rnam shes las rung bzhin/ /gang dag yul gyis mi nyams pa/ /gser la dri ma med pa bzhin/ /dkar ba dge slong zhes bya 'o/ /gang gi yid la dga' ba dang / /mi dga' ba yis gos med cing / /skyon rnams thams cad rnam spangs pa/ /de ni dge ba'i gter du blta/ /tshul khrims nye bar khro med cing / /chos spyod pa dag dbang po thul/ /sems can mi dman blo gros ldan/ /de lta bu ni dge slong yin/ / gang dag bstan bcos bstan bcos don/ /rtag tu rnam shes blo gros dga'/ /bza' btung dag la dga' med pa/ /zhi ba'i yid de dge slong yin/ /gang dag tshal dgon gtsug lag khang / /dur khrod dang ni rtswa bting la/ / yid ni dga' bar byed pa dag /de lta bu ni dge slong yin/ /skyon rnams de nyid las shes shing / /'bras bu'i bye brag rig pa dang / /rgyu dang rkyen gyi de nyid shes/ /sdig dang bral ba dge slong yin/ / sdig pa'i dgon pa bcom byas shing / /skyon bcom dbang po thul ba dang / /yang srid rnam pa shes pa ni/ /zhi ba'i yid de dge slong yin/ /bsngags pas snying la dga' med la/ /smad pas zhum pa med pa ni/ /rgya mtsho lta bur zab pa ste/ /rnal rig dge slong zhes bya 'o/ /blo gros brtan pa bdag mi stod/ /snyan par smra zhing dus su smra/ /brkam med grags pa mkhas pa dag /dge slong de ni zhi zhes bya/ / 'dod pa'i khams su 'gro ba'i rgyu/ /de bzhin gzugs kyi khams dang ni/ /gzugs med khams kyi de nyid shes/ /bstan rig dge slong zhes bya 'o/ /'jig rten gtam la chags med cing / /gang gi yul dag dug lta bu/ /chags pa'i skyon dag rtag 'joms pa/ /dge slong de ni sangs rgyas bstan/ /gang gi blo gros 'dod rnams la/ /'dam lta bur ni rtag tu lta/ /brtan pa blo gros nges grol zhing / /de ni 'khor ba'i 'ching las grol/ /gang zhig le lo thag srings pa/ /bsam gtan kha ton las rung zhing / /sems can rnams la phan byed pa/ /dgon gnas dge slong zhes bya'o/ /gang gi blo gros dris lan ldon/ /spobs dang ldan zhing dbang po thul/ /de ni chos kyi gtam shes te/ /gang dag bzlog na rtswa dang 'dra/ /gang gi blo gros lus dub pas/ /rnam pa kun du skyo med cing / /don du bya ba kun shes pa/ / de ni dge 'dun sogs pa byed/ /tshong zong phyir min longs phyir min/ /grags pa'i don du ga la zhig /gang blo dge 'dun don sems pa/ /de ni 'khor ba'i 'ching las grol/ /gang gi brtul zhugs mtho ris dang / / rnyed dang grags pa'i don du min/ /thams cad mya ngan 'das don byed/ /dge slong de ni zhi zhes bya/ /sdig pa dag ni rtag tu spangs/ /legs par byed la rtag dga' zhing / /sdig pa'i bshes dang mi 'dre ba/ /sangs rgyas bstan la dge slong yin/ /sems ni byams par bsgoms byas shing / /mkhas pa drang po'i sems ldan la/ /bslab pa'i gzhi la nyams med pa/ /mya ngan 'das pa yong mi ring / /'khor ba'i skye dang rga ba yi/ /'jigs las kha ni phyir phyogs shing / /bsam gtan ldan la bag yod pa/ /mya ngan 'das pa yong mi ring / /mi rtag stong pa bdag med dang / /bya ba'i rnam pa shes pa dang / /bsam gtan 'phel ba'i rnam shes pa/ /mya ngan 'das pa yong mi ring / /de nas gzhan yang dge slong de sa gzhan lnga pa las sa gzhan drug pa la ji ltar 'jug ce na/ rnal 'byor spyod pa nang gi chos la chos kyi rjes su lta zhing gnas pa des thos pa las byung ba'i shes pa 'am lha'i mig gis brtags na/ dge slong de mu bzhi pa la lhag par mos pa yin no/ /ji ltar na chos 'di dag gi rgyu 'dra ba dag las 'dra ba 'byung ba dang / mi 'dra ba dag las mi 'dra ba dang / 'dra ba ma yin pa dag las 'dra ba ma yin pa dang / phyed 'dra ba dag las phyed 'dra ba 'byung / ji ltar rgyu 'dra ba dag las 'dra ba 'byung zhe na/ dper na 'bru dang 'bru'i rgyur gyur pa dag las 'bru nyid skye ba de bzhin du/ nang gi dge ba'i las 'dra ba dag las 'dra ba'i 'bras bu nyid lha dang mi rnams la dmigs pa ni mu dang po yin no/ /rgyu mi 'dra ba dag las mi 'dra ba 'byung ba ni dper na 'o ma las zho skyur ba 'byung ba de bzhin du nang gi yang 'jig rten 'dir kun nas nyon mongs pa sgra dang / reg pa dang / ro dang / gzugs dang / dri 'dod pa sdug pa dag byas pas/ zho skyur ba 'byung ba de bzhin du mi 'dod cing mi sdug la yid du mi 'ong ba'i 'bras bu rnam par smin pa sems can dmyal ba dang / yi dags dang / dud 'gro rnams la dmigs pa ni mu gnyis pa yin no/ / rgyu mi 'dra ba dag las mi 'dra ba 'byung ba ni dper na tshon sngon po dang / bab lar sbyar na kha dog mi 'dra ba 'ba' shig tu 'gyur ba de bzhin du nang gi chos la yang las dang 'bras bu rnam par smin pa'i las dang / 'bras bu mi 'dra ba 'byung ba ste/ las dang 'bras bu mi 'dra ba ni dper na/ log par lta ba mchod sbyin pa dag mtho ris 'dod pa'i phyir phyugs dag gsod de de dag sems can dmyal bar 'gro ba ni mu gsum pa yin no/ /rgyu phyed 'dra ba dag las phyed 'dra ba 'byung ba ni/ thags phra mo dkar po nyid las snam bu dkar po stug po nyid du byed de/ phra mo dang / stug po gnyis mi 'dra ba nyid du yod pa de bzhin du rgyu phyed 'dra ba dag las phyed 'dra ba 'byung ba ni mi dge ba'i las bsags pa phra mor gyur pa dag gis sems can dmyal ba chen po dag byed pa ni mu bzhi pa yin no/ /dge slong de las dang 'bras bu 'ong ba dang 'gro ba'i byed pa'i rjes su bsams pa mthong nas/ las dang 'bras bu 'khor lo bzhin du srid par 'gro ba'i mu bzhi pa sems par byed de/ ris dang ldan pa'i mi la gnod par byed pa'i las thob pa med pa yin pa de ni mu dang po yin no/ /mi la gnod par byed pa'i las thob pa gang yin pa ni mu gnyis pa yin no/ /gnod par byed pa'i las thob pa dang ma thob pa gang yin pa ni mu gsum pa yin no/ /gnod par byed pa'i las thob pa yang ma yin ma thob pa yang ma yin pa gang yin pa ni mu bzhi pa yin no/ /ris dang ldan par gnod par byed pa'i las thob pa med pa gang yin pa de ni yod de/ dper na 'jig rten par gyur pa dag tu rgyu skar ma thob par mi dag la gnod par byed pa lta bu'o/ /'jig rten las 'das pa mig gi rnam par shes pa las kyi rgya mtsho thob pa med pa'i mi la 'dod pa dang mya ngan la sogs pas gnod par byed pa ni mu dang po yin no/ /mi la gnod par byed pa'i las thob pa gang yin pa ni/ dper na 'jig rten pa dag me 'am ral gri dang phrad na sreg go zhe 'am gcod do zhes zer ba lta bu'o/ /'jig rten las 'das pa ni mi dge ba'i las thob na sems can dmyal ba dang / dud 'gro dang / yi dags rnams su gnod pa byed pa ni mu gnyis pa yin no/ /gnod par byed pa'i las thob pa dang ma thob pa gang yin pa ni/ dper na 'jig rten pa dag rig sngags dang / dug gi mthu thob pa dang / ma thob pa sbyin par byed pa lta bu'o/ /'jig rten las 'das pa ni 'chi ba'i yul gyi dus su sems can dmyal ba rnams kyi mtshan ma'i gzugs brnyan thob pa ni mu gsum pa yin no/ /gnod par byed pa'i las thob pa yang ma yin ma thob pa yang ma yin pa gang yin pa ni/ dper na 'jig rten pa dag sman gyi sa bon btab pa skye bar 'gyur ba thob pa yang ma yin ma thob pa yang ma yin pa lta bu'o/ /'jig rten las 'das pa ni dper na/ dge slong dgra bcom pa la nges par myong bar 'gyur ba'i las ri rab tsam yod kyang dgra bcom pa mya ngan las 'das te/ dgra bcom pa la yod pa'i las de dag thob par byed cing gnod par yang mi 'gyur la grol ba ni mu bzhi pa yin no/ /tshe 'di la myong bar 'gyur la skyes nas myong bar 'gyur ba ma yin pa'i las ni mu dang po yin no/ / skyes nas myong bar 'gyur la/ tshe 'di la myong bar 'gyur ba ma yin pa ni mu gnyis pa yin no/ /skyes nas myong bar 'gyur ba dang / tshe 'di la 'ang myong bar 'gyur ba ni mu gsum pa yin no/ / tshe 'di la yang myong bar 'gyur ba ma yin pa dang / skyes nas kyang myong bar 'gyur ba ma yin pa'i mu bzhi pa yin no/ /tshe 'di la myong bar 'gyur la/ skyes nas myong bar 'gyur ba ma yin pa'i las gang yin zhe na/ dper na 'jig rten pa dag rgyal po la gnod pa byas na chad pas gcod pa ni tshe 'di la myong bar 'gyur ba yin la/ skyes nas myong bar 'gyur ba ma yin pa lta bu'o/ /'jig rten las 'das pa ni sbyin pas de bsngags par 'gyur ba tshe 'di la myong ba yod pa de dang 'jig rten pha rol du lhan cig mi 'gro ba ni mu dang po yin no/ /skyes nas myong bar 'gyur la/ tshe 'di la myong bar 'gyur ba ma yin pa ni dper na 'jig rten pa dag me dong du zhugs pas mtho ris thob par 'gyur ro zhes zer ba lta bu'o/ /'jig rten las 'das pa ni tshe 'di la dge ba 'am mi dge ba byas pas gzhan du rgyu dang 'bras bu mngon sum du mthong ba thob pa ni mu gnyis pa yin no/ /tshe 'di la myong bar 'gyur zhing skyes nas kyang myong bar 'gyur ba ni mu gsum pa yin te/ dper na 'jig rten pa dag tshe 'di la myong bar 'gyur ba dang / skyes nas myong bar 'gyur ba lta bu'o/ /'jig rten las 'das pa ni mu gsum pa bzhin no/ /tshe 'di la myong bar 'gyur ba ma yin zhing skyes nas kyang myong bar 'gyur ba ma yin pa ni dper na/ 'jig rten pa dag mi smra ba'i brtul zhugs lta bu yin te/ mi smra ba'i brtul zhugs dang / sbyin pa dang / tshul khrims dag ni tshe 'di la myong bar 'gyur ba yin no/ /'jig rten las 'das pa ni lung du ma bstan pa'i sems kyi las yin te/ lung du ma bstan pa'i las des tshe 'di la myong bar 'gyur ba'i 'bras bu rnam par smin pa yang mi dmigs shing skyes nas kyang myong bar 'gyur ba ma yin pa ni mu bzhi pa yin no/ /de ltar dge slong de phyogs gcig tu 'dug nas sems can dmyal ba dang / lha dang mi rnams kyi las dang 'bras bu dang / rnam par smin pa'i dra ba mang po yan lag tu ma mthong nas yang dag pa'i chos la chos kyi rjes su lta zhing gnas so/ /de nas gzhan yang dge slong de las kyi 'bras bu rnam par smin pa shes pa ji lta bu yin zhe na/ rnal 'byor spyod pa chos la chos kyi rjes su lta zhing gnas pa de/ las dang las kyi 'bras bu dge ba dang mi dge ba shes pa yin te/ 'di ltar sems can 'di dag lus kyis nyes par spyod pa dang ldan/ ngag gis nyes par spyod pa dang / yid kyis nyes par spyod pa dang ldan pa ni 'phags pa rnams la skur pa 'debs shing log par lta ba yang dag par blangs pa yin te/ de rgyu de dang rkyen de dag gis ngan 'gro log par ltung ba sems can dmyal ba 'am/ dud 'gro'i skye gnas sam/ yi dags rnams kyi yul du skye'o/ /gzhan yang sems can 'di dag lus kyis legs par spyad pa dang ldan pa dang / ngag gis legs par spyad pa dang / yid kyis legs par spyad pa dang ldan pa ni 'phags pa rnams la skur pa 'debs pa ma yin te/ de dag rgyu de dang / rkyen de dag gis lus dang bral nas bde 'gro lha rnams kyi nang du skye'o/ /rang gi las dang / chos dang / rnam par smin par yang dag pa ji lta ba bzhin mthong ba'i dge slong de ni gzhan dag las thos pa la rnam par rtog cing / bdud kyi dbang du song ba'i sems can dag dang spyod pa mtshungs par mi spyod la mya ngan las 'das pa'i mthar gtugs pa'i spyod pa la yid 'byung ba dang / dge ba dang 'khor ba'i mthar gtug pa dang ldan pa dang / 'khor ba 'di las ji ltar bdag nyid kyis bdag dang / sbyin bdag dang / sbyin pa po dag sgrol ba ltar gzhan dag la yang phan gdags pa byed par gyur pas spyod do/ /chos dang las dang rnam par smin pa shes pa'i dge slong de sems can dmyal ba dang / yi dags dang / dud 'gro dang / lha dang / mi rnams kyi las dang / chos dang / rnam par smin pa la rtog cing dpyod par byed de/ dper na nor bu shin du dang zhing gsal ba/ nor bu bai dUr+ya'i bu ga'i nang du skud pa bcug pa ser po 'am/ btsod ka 'am/ dkar po ji ltar snang ba de bzhin du/ las kyi nor bu'i nang du rnam par smin pa'i skud pa yod pa de dge slong thos pa las byung ba'i shes pa 'am/ lha'i mig rnam par dag pa des mthong ngo / /yang dge slong de thos pa las byung ba'i shes pas nor bu lta bu'i las dang / chos dang / rnam par smin pa mthong ste/ dper na nor bu dkar zhing shin du dkar ba gang zhig kun nas gsal zhing rma med la/ dang zhing dbug bzod pa/ las su byar rung zhing kun du sgor gyur la skye bo thams cad kyis bsngags pa/ nor dang ldan zhing rgyal po la 'os pa/ yon tan rnam pa de dag dang ldan pa'i nor bu de rgyal po 'am/ rgyal po'i bus de'i yon tan shes shing de'i rin shes par gyur nas/ rgyan du bya ba nas gdags pa'i bar du byas pa de bzhin du dge slong de phyogs dkar po dge ba bcu'i las kyi lam gyi nor bu 'di kun nas dkar zhing shin du gsal la sdig pa med pa/ kha na ma tho ba med cing dang la dbug bzod pa/ chos kyi phyogs dang gnyen po skyed pa/ dri ba dang lan ldon pa la chos kyi thur mas 'bigs par bzod cing las su rung ba sbyin pa dang / tshul khrims dang / shes pa dag ji lta ji ltar yongs su sngo bar byed pa de lta de ltar dge ba bcu'i las kyi lam gyi nor bu 'di las su rung ba nyid du de 'khor los sgyur ba'i rgyal srid dam/ bdud kyi rgyal srid dam/ de tshangs pa'i rgyal srid dam/ de zag pa med pa'i bsam gtan gyi ting nge 'dzin sgom pa'i rgyal srid 'grub par byed de/ de de ltar dam pa'i chos kyi nor bu 'di las su rung zhing kun du sgor gyur pa yin no/ /kun du sgo ni lha dang mi'i sgor gyur pa yin te/ de ltar dam pa'i chos kyi kun du sgor gyur pa ni 'khor ba'i grong khyer las 'byung zhing mya ngan las 'das pa'i sgo'i rjes su 'jug pa yin/ skye pa thams cad kyis bsngags pa zhes bya ba ni yang dag pa'i lta ba dang ldan pa slob pa rnams kyis bsngags pa'o/ /rgyal po la 'os pa zhes bya ba ni dam pa'i chos kyi lam bsgrub pa shes pa'i sems kyi dbang phyug tu rung ba'o/ /der zhugs pa zhes bya ba ni nor bu bai dUr+ya dang / dam pa'i chos kyi nor bu yon tan thams cad phun sum tshogs pa de dang / chos 'thun par dmigs pa'o/ /yang dge slong de las dang / chos dang / rnam par smin pa nor bu bzhin du mthong ste/ dper na nor bu gzhan zhig rma yod cing thams cad du bzang ba ma yin la/ kun gyi sgo ma yin/ dkar ba ma yin zhing dbug tu mi bzod la/ las su byar mi rung / skye bo kun gyis bsngags pa ma yin zhing / rgyal po 'am/ rgyal po'i bu la rung ba ma yin pa de bzhin du gzhan mu stegs can chos kyi gzugs brnyan gyi chos kyi nor bu rma yod pa de'i rma gcig po ni 'jig tshogs la lta ba dang / tshul khrims dang / brtul zhugs mchog tu 'dzin pa dang / the tsom yod pa yin no/ /kun gyi sgo ma yin pa ni sems can dmyal ba dang / yi dags dang / dud 'gro'i sgo yin no/ /nor dang mi ldan pa ni zag pa med pa'i bkra shis dang mi ldan pa'o/ /dbug par mi bzod pa ni legs par 'dri ba dang lan glan pa'i chos kyi gtam 'bugs pa'i thur mar mi rung ba'o/ /rgyal po 'am rgyal po'i bu la 'os pa ma yin pa ni sems can thams cad kyi dbang phyug dam pa'i chos kyi lam du zhugs pa skyes bu gang zag brgyad rnams su mi rung ba ste/ rnam pa de lta bu'i chos kyi gzugs brnyan chos ma yin pa mgul du thogs so/ /de dag nor bu de'i gzugs brnyan gyi nor bu thogs nas sems can dmyal ba dang / yi dags dang / dud 'gro rnams kyi 'khor ba thog ma med pa'i dus nas zhugs te yongs su 'khyam mo/ /de lta bas na dge slong nor bu de lta bu'i nor bur gyur te/ dper na byis pa so so'i skye bo ni bai dUr+ya dang 'dra ba'i nor bu mching bu mthong nas bai dUr+ya yin no snyam du sems pa bzhin no/ /dge slong de chos dang chos ma yin pa'i brtag pa'i de kho na shes pa sa gzhan bdun pa la 'jug ste/ de la zhugs pa'i brtul zhugs sa bla'i gnod sbyin dag gis mthong nas bar snang la spyod pa'i gnod sbyin dag la mngon par bsnyad do/ /de dag gis kyang rgyal po chen po bzhi la'o/ /de dag gis kyang rgyal chen bzhi'i lha rnams la'o/ /de dag gis kyang / sum bcu rtsa gsum pa rnams la'o/ /de dag gis kyang brgya byin la'o/ /brgya byin gyis ni 'thab bral ba rnams la'o/ /'thab bral ba dag gis ni dga' ldan pa rnams la'o/ /dga' ldan pa dag gis kyang byams pa la'o/ /byams pas kyang 'phrul dga' ba rnams la'o/ /'phrul dga' ba rnams kyis kyang gzhan 'phrul dbang byed pa rnams la 'dzam bu'i gling du rigs kyi bu che ge mo zhig ces bya ba snga ma bzhin du sbyar ro/ /de nas gzhan yang dge slong de las dang / chos dang / rnam par smin pa rnam par rig byed ma yin pa'i 'du shes kyi gzugs bcu gcig rjes su ji ltar mthong zhe na/ rnal 'byor spyod pa nang gi chos la chos kyi rjes su lta zhing gnas pa gang gi tshe chos thams cad kyi byed pa dang ldan pa gang sdom pa nyid blangs te/ de phan chad gnyid log gam/ myos sam/ rab tu myos kyang dge ba'i chos nyid kyi rgyun nyid rab tu 'jug ste/ dper na chu bo'i rgyun bar chad med pa rtag tu 'bab pa de bzhin du skyes bu de gnyid log gam/ myos sam/ rab tu myos pa'i 'jug pa yang de bzhin no/ /de ltar rnam par rig byed ma yin pa'i gzugs bstan du med pa thogs pa med par 'dod do/ /gzugs de ji lta bu yin zhe na/ las kyi ngo bo nyid yod pa nyid yin te/ de lta bas na gzugs de yang gzugs rnam pa bcu gcig po de dag yin la/ dge ba'i chos thams cad kyi rten du gyur pa yin no/ / dge slong des sems can 'di dag gi gzugs tha dad pa/ gnas skabs tha dad pa/ ming dang 'gro ba tha dad pa/ gnas kyi rnam pa tha dad pa ji lta bur mthong zhe na/ 'di ltar de sems can de dag gi/ sems tha dad pa/ gnas kyi rnam pa dang / mos pa dang / las kyi rnam pa tha dad pa mthong ba de'i phyir gzugs tha dad pa dang / gnas skabs tha dad pa dang / ming dang 'gro ba tha dad pa dang / gnas kyi rnam pa tha dad pa de dag ni dper na ri mo mkhan nam/ ri mo mkhan gyi slob ma mkhas pa zhig sa yid du 'ong zhing 'jam la mkhrang ba zhig mthong nas 'dug ste/ tshon sna tshogs dag gis ri mo'i r nam pa sna tshogs gzugs legs shing legs pa'i rnam pa sna tshogs sems kyi dbang gis 'dri ba de bzhin du sems ri mo mkhan nam ri mo mkhan gyi slob ma lta bu 'di lhag par mos pas khams gsum gyi sa shin du 'jam zhing mkhrang ba dag la las kyi 'bras bu rnam par smin pa dag gi 'khor ba'i sar gnas skabs tha dad pa dang / ming dang 'gro ba tha dad pa dang / rnam pa tha dad pa dang / sems can gyi gnas kyi rnam pa tha dad pa dag /sems ri mo mkhan lta bu des mngon par 'grub par byed do/ /yang ji ltar tshon dkar pos ni gzugs dkar por 'dri bar byed la/ dmar pos ni dmar por 'dri bar byed/ ser pos ni ser por 'dri bar byed/ tshon phug ron kha lta bus ni phug ron kha lta bu 'dri bar byed/ nag pos ni nag por 'dri bar byed pa de bzhin du sems ri mo m khan lta bu 'di sems kyi dmigs pa dkar po nye bar bzung nas zag pa dang bcas pa 'dod chags la sogs pa'i dri ma dag gis nyon mongs pa med pa'i chos dkar po lha dang mi rnams kyi gzugs dkar po mngon par 'grub par byed do/ /ri mo mkhan gyis tshon dmar po blangs nas/ lha dang mi rnams kyi gzugs dmar po mngon par 'grub par byed de/ dmar po zhes bya ba ni/ sgra dang / ro dang / reg pa dang / gzugs dang / dri stug po dag gis ri mo'i gzhi la tshul bzhin du byas pa'o/ /yang sems ri mo mkhan lta bu des tshon ser po blangs nas dud 'gro mngon par 'grub par byed de/ de dag kyang ser po'i dbang gis gcig la gcig khrag 'thung bar byed cing sha za bar byed la/ gcig la gcig tshon ser po lta bur gyur pa'i 'dod chags zhe sdang gti mug gis gsod do/ /yang sems ri mo mkhan lta bu des tshon phug ron kha lta bu la dmigs pa mthong nas tshon phug ron kha lta bu'i las dri ma can yi dags kyi 'gro ba byed de/ de dag kyang lus tsha la shing bsregs pa lta bu yin la/ sems ri mo mkhan lta bu ser sna la dmigs shing / gti mug rab rib kyi sgrib pa'i dbang gis bkres shing skom/ sdug bsngal rnam pa sna tshogs yongs su nyams pas zil gyis non pa yin no/ /yang sems ri mo mkhan lta bu des tshon rtsi nag po lta bu'i las kyi ngo bo blangs nas sems can dmyal ba'i gzugs nag po 'dri ba lta bur de dag kyang las nag pos lcags nag po'i ra ba 'bar bas bskor ba der skyes te/ lus nag po la nad dang / gnod pa dang / bkres shing skom pa rnam pa sna tshogs kyi gzhir gyur cing / rang gis nyes par byas pa gzhan yang mtshungs pa med pa'i gnod pa'i sdug bsngal gyis nyam thag pa yin no/ /yang dge slong rnal 'byor spyod pa de tshon rtsi lnga'i ri mo'i gzhi lta bu'i 'khor ba khams gsum du 'gro ba lngar kun du gnas shing sa gsum po 'dod pa'i khams kyi sa dang / gzugs kyi khams dang / gzugs med pa'i khams la kun du gnas te/ de la sems ri mo mkhan lta bu de 'dod pa bstan cing 'dod pa'i khams la dmigs pas gzugs rnam pa nyi shu rnam pa sna tshogs 'dri'o/ /'dod pa'i khams dang bral ba dag ni gzugs kyi khams la dmigs shing gnas pa de la brten pa'i sa'i gnas skabs bcu drug po dag ni bsam gtan bzhi'i bar gyis gzugs kyi khams mngon par 'dri'o/ /gzugs kyi khams la dmigs pa dang bral ba dag ni snyoms par 'jug pa bzhi'i sred pa la mnyam par dmigs pa'i sems ri mo mkhan lta bus gzugs med pa'i khams mngon par 'dri ste/ khams gsum gyi gzhi 'di ni rgya che ba yin no/ /yang dge slong des sems can gzhan gyi sems ri mo mkhan lta bu rnam pa gzhan gyis mthong ste/ de la sems ni ri mo mkhan lta bu yin no/ /lus ni ri mo'i tshon rtsi'i snod lta bu yin no/ / 'dod chags zhe sdang gti mug dag ni las brtan par byas pa lta bu yin no/ /dmigs pa ni khri lta bu yin no/ /dbang po ni pir lta bu yin no/ /phyi rol gyi yul sgra dang / reg pa dang / ro dang / gzugs dang / dri sna tshogs dag ni tshon rtsi sna tshogs lta bu yin no/ /'khor ba ni rtsig pa lta bu yin no/ /shes pa ni snang ba lta bu yin no/ /brtson 'grus rtsom pa ni lag pa lta bu yin no/ /las kyi 'bras bu rnam par smin pas byas pa'i gzugs mang po dag ni ri mo'i gzugs cha byad dang / dbyibs dang / mdog dang / 'byor par gyur pa mang po dag lta bu yin no/ /yang dge slong bsam gtan la zhugs pa de/ sems ri mo mkhan lta bu de nyid rnam pa gzhan gyis mthong ste/ dper na gang ri mo mkhan de mgu na tshon rtsi'i rnam pa legs par sbyang ba byas pa gsal bar 'gyur zhing pir gyis yang dang yang du legs par 'dri na de'i tshe/ gzugs legs par 'dri ba de bzhin du gang sems ri mo m khan lta bu 'di mgu na bsam gtan gyi bya ba la tshon rtsi lta bu'i bsam gtan gyi rnam pa yongs su sbyang ba byas pa tshon rtsi lta bur gsal bar 'gyur zhing pir gyis yang dang yang du legs par 'dri ba lta bu'i dmigs pa lung phog pa yongs su sbyang ba byas pas/ 'og dang steng du mnyam par 'jog pa dang / ldang ba la skyo ba med na/ sems ri mo mkhan lta bu de bsam gtan gyi sar gzugs legs par 'dri'o/ / gal te mi dga' na sems ri mo mkhan lta bu de/ sems can dmyal ba dang / yi dags dang / dud 'gro'i sa ngan pa der 'gro ba'i ris dang / gnod pa dang / lcags kyi gtun shing pir lta bus mi dge ba'i tshon rtsi blangs nas snod lta bur gyur pa'i sems can dmyal ba dang / dud 'gro dang / yi dags kyi gzugs de dud 'gro'i 'gro ba'i gzugs ma legs pa 'dri ste/ rgya cher snga ma bzhin du sbyar ro/ /yang dge slong de sems spre'u lta bur mthong ste/ ji ltar spre'u ni 'phyar ba yin te/ shing dang / lcug ma dang / me tog dang / 'bras bu dang / ri brags kyi bu ga dang / sman ljong tha dad pa thogs pa med par 'gro ba de bzhin du/ sems spre'u ltar 'phyar ba 'di yang tha dad pa lta bu'i sems can dmyal ba dang / yi dags dang / dud 'gro dag gi 'gro ba lngar 'gro ste/ sems can ni shing lta bu'o/ /sred pa'i lcug ma ni lcug ma'i rnam pa du ma lta bu yin/ rtog pa ni me tog gi yal ga lta bu yin no/ /sgra dang / ro dang / gzugs dang / dri dang / ri sul dang / bu ga dang / spyod pa sdug pa dang mi sdug pa'i khams gsum ni 'bras bu lta bu yin no/ /lus ni phug pa lta bu yin no/ /sems spre'u lta bu sems can dmyal ba dang / yi dags dang / dud 'gro dang / lha dang / mi rnams kyi gnas rnams su thogs pa med par 'gro ste/ sems spre'u lta bu de 'khor ba'i sar 'khyam mo/ /yang dge slong bsam gtan la zhugs pa de sems gar mkhan lta bur mthong ste/ ji ltar gar mkhan dag cha byad dang / tshon rtsi dang / sa dang / gos dang / sil snyan sna tshogs dag thogs nas/ gar mkhan gar byed pa de bzhin du/ sems gar mkhan lta bu 'di yang sa dang 'gro ba'i ris kyi sa sna tshogs su las kyis sprul pa'i cha byad sna tshogs thogs shing rgyu dang rkyen rnam pa sna tshogs 'dzin pa ni cha byad sna tshogs thogs pa lta bu yin no/ /byed pa dag ni sil snyan rnam pa sna tshogs lta bu yin no/ /'khor ba gar mkhan lta bu ni rang gi yul gar mkhan lta bu yin te/ gar nyid kyis sems gar mkhan lta bu 'khor ba thog ma med cing yun ring ba rnam pa sna tshogs du mar gar byed do/ /yang dge slong de sems nya lta bu chu bo'i nya lta bur mthong ste/ ji ltar nya ni ri'i chu bo 'gyur zhing dba' rlabs 'khrugs pa gting zab la rgyun drag ste/ bzod par dka' zhing 'bab pa'i rgyun gyis shing ljon pa mang po rtsa nas 'byin par nus la 'gyur ba'i shugs drag po bzlog par dka' ba'i las mi bzad par 'byung zhing 'jug pa de bzhin du/ sems nya lta bu 'di yang srid pa gsum gyi dba' rlabs 'khrugs pa ni 'gyur zhing dba' rlabs 'khrugs pa lta bu yin la/ mnar med pas mchog tu zab pa ni 'dod pa'i khams kyi chu bo rab med ltar gting zab pa yin/ byis pa so so'i skye bo thams cad kyi dge ba dang mi dge ba'i las kyi rgyun bzod par dka' ba'i 'gro ba dag tu pha rol du 'gro ba ni rgyun drag po bzod par dka' ba lta bu yin la/ 'gro ba lnga'i chu bor rgyu ba'i rgyun drag pos bskal pa du ma tsam du 'dren par 'gyur ba mi bzod pa ni 'bab pa'i rgyud 'gyur ba'i shugs drag pa lta bu yin/ mi rtag pa nyid kyis 'gyur ba'i shugs bzlog par dka' ba lta bu yin te/ srid pa chu bo lta bur sems nya lta bu 'byung zhing 'jug ste/ lha dang mi dag tu ni 'byung la sems can dmyal ba dang / yi dags dang / dud 'gro rnams su ni sred pa chu bo lta bur sems nya lta bu 'jug go/ /de nas gzhan yang ji ltar na dge slong rnal 'byor la gnas pa de las dang chos dang rnam par smin pa shes shing sems can thams cad sems la rag las pa mthong la/ sems kyi rnam pa sems kyi dbang du gyur cing sems kyis bslus pa mthong ste/ rnal 'byor spyod pa nang gi chos la chos kyi rjes su lta zhing gnas pa des thos pa las byung ba'i shes pa 'am lha'i mig gis sems can thams cad sems kyi las la rag las shing sems kyi las kyi rnam pa la sems rag las pa mthong ste/ kye ma 'khor ba thog ma dang tha ma med pa nas 'gro ba du mar rab tu rgyu ba'i sems can 'di dag ji ltar 'gyur snyam mo/ /de thos pa las byung ba'i shes pa 'am lha'i mig gis sems can gyi sems kun nas nyon mongs pas 'ching zhing rnam par byang bas 'grol bar mthong ngo / /de la sems kyi rnam pa mang ste/ dmigs pa'i bye brag dang / ngo bo nyid kyi bye brag dang / 'gro ba'i ris kyi bye brag gis 'gro ba lha rnams kyi rnam pa lnga'o/ /rten bzang po'i bye brag gis dal 'byor dang ldan pa dang / kun du sbyor ba'i 'du byed dang / yang dag par ldan pa'i sems bag la nyal dang ldan pa dang / nam mkha' la sogs pa gsum dang rtag tu mi ldan pa ste/ rnam pa lnga yin no/ /de yang dbang po'i bye brag gis ni dpag tu med la/ sred pa'i gnas sna tshogs kyi bye brag gis mdor na kun nas nyon mongs pa 'di'i phyogs 'di ni sems las byung ba lngar 'gyur ro/ /ji ltar na rnam par byang ba'i phyogs su 'gyur zhe na/ nyon mongs pa'i rtsa ba gsum dag gi gnyen po gsum yin no/ /'das pa dang / ma 'ongs pa'i yang dag par rdzogs pa'i sangs rgyas thams cad kyi gsung rab yang dag pa'i lam ston pa ni 'di lta ste/ 'dod chags la ni mi sdug pa'o/ /zhe sdang la ni byams pa'o/ /gti mug la ni rten cing 'brel par 'byung ba'o/ /de lus la 'dod chags skye ba na/ de lus de la dmigs nas gnas shing rnam par 'byed de/ rkang pa dang / sor mo dang / mdog dang / yan lag dang / nying lag rags pa'i bar la rnam par 'byed pa ni bdag gang yin/ bdag gi ci yin zhes de rang gi yan lag gi phyogs la rkang pa dang / sen mo lus tha dad par lta ste/ gang la bdag tu nga rgyal 'jug pa 'di ni sen mo dang lus ma yin zhing / rkang pa'i sen mo lus sam bdag ma yin/ gang la bdag tu nga rgyal 'jug pa 'di ni/ rkang pa'i mthil lus ma yin zhing long bu bdag gam lus ma yin/ rkang pa'i rting ba bdag gam lus ma yin zhing bsdus pa bdag gam lus ma yin/ sta zur dang dpyi bdag gam lus ma yin/ gzhang bdag gam lus ma yin/ sgal ba'i rus par gyur pa bzhi bcu rtsa lnga bdag gam lus ma yin/ ltag pa bdag gam lus ma yin/ bzhin gyi rus par gyur pa bdag gam lus ma yin te/ dge slong des rnam par phye na don gzhan du gyur pa'i lus ma mthong zhing so so la yang lus ma mthong la/ rnam par phye na yang lus ma mthong ngo / / mig dang / rna ba dang / sna dang / lce dang / lus dang / yid la yang lus sam bdag mi mthong zhing bdag nyid med do/ /de ltar lus rdul phra mor so sor rnam par 'byed de/ de bdag gi lus yungs kar tsam dang phye ma lta bur mthong ngo / /de 'byung ba chen po rnams rnam par 'byed de bdag ni gang zhig / ci sa'i khams bdag yin nam/ chu'i khams bdag yin nam/ me'i khams bdag yin nam/ rlung gi khams bdag yin nam snyam mo/ /de don dam par na bdag gi khams ma mthong zhing bdag gi khams mthong ba med pa na don gzhan du gyur pa ma mthong ste/ dper na shing ljon pa du ma 'dus pa la tshal mthong la shing ljon pa re re la tshal med do/ /don dam par na tshal zhes bya ba shing ljon pa ma gtogs par tshal med la yang dag par na shing ljon pa yang shun pa dang / rtsa ba dang / yal ga dang / lo ma dang / lcug ma ma gtogs par don gzhan du gyur pa med de/ kun rdzob tu ni tshal yod do/ /de ltar lus 'di yang lag pa la sogs pa 'dus pa tsam 'di la kun rdzob tu 'di ni lus yin no zhes 'du shes 'jug go snyam nas de lus de'i chos kyi de kho na nyid shes nas lus la 'dod chags dang bral zhing lus kyi yan lag dang nying lag dag la 'dod chags dang bral bar 'gyur ro/ / de 'dod chags dang bral na dga' ba'i 'dod chags kyi mod las skyes pa yang 'byung ba'i sred pas gnod pa med de/ de ltar 'dod chags kyi gnyen po la rab tu brtson no/ /ji ltar na zhe sdang gi gnyen po la rab tu brtson zhe na/ de byams pa la gnas par 'gyur te/ kye ma sems can 'di dag ni nyam nga bar zhugs pa yin te/ 'di lta ste/ 'gro ba lnga rnams su skye ba dang / 'chi ba dang / 'chi 'pho dang / 'byung ba dag 'jigs pa lngar zhugs shing shi ba'i lus rus pa lta bu de dag la ma lta bur snying rje skye'o/ /rma la ba tshwas byugs pa lta bu'i sems can sdug bsngal ba 'di dag la ji ltar khro ba skyed de sems can de dag ni rang bzhin gyis sdug bsngal ba yin no snyam ste/ de nyon mongs pa'i rnam pa chen po gnyis pa la gnas so/ /yang dge slong de ji ltar na nyon mongs pa chen po gsum pa so sor 'jig pa la rab tu brtson zhe na/ gti mug gis bsgribs pa'i sems can ni lus kyis nyes par spyad pa spyod pa dang / ngag gis nyes par spyad pa spyod pa dang / yid kyis nyes par spyad pa spyod pa yin te/ lus dang bral nas ngan 'gro log par ltung ba sems can dmyal ba rnams su skye'o/ /gang gi tshe yang dag pa'i lta ba sngon du song bas gti mug dang bral bar 'gyur ba de'i tshe lus kyis legs par spyad pa dang / ngag gis legs par spyad pa dang / yid kyis legs par spyad pa spyod pa de chos dang chos ma yin pa'i de kho na nyid shes par 'gyur ro/ /gang gi tshe chos dang chos ma yin pa de dag gi de kho na nyid shes shing / rnam par shes par 'gyur ba de'i tshe nyon mongs pa chen po gsum pa'i ngo bo nyid med par 'gyur ro/ /dge slong de nyon mongs pa gsum po de dag gzhig pa'i gnyen po gsum ni nyon mongs pa dang nye ba'i nyon mongs pa thams cad kyi kun du sbyor ba dang / bag la nyal so sor gnas pa 'jig par 'gyur ba yin te/ dper na/ shing ljon pa'i rtsa ba bcad na shun pa dang / rtsa ba dang / 'dab ma dang / lo ma dang / sdong po dang / yal ga dang / me tog dang / 'bras bu la sogs pa de dag thams cad rul pa dang / rnyis par 'gyur ba de bzhin du gsum po de dag bcom na/ nyon mongs pa thams cad bcom par 'gyur ro snyam mo/ /de nas gzhan yang ji ltar na dge slong de sa gzhan bdun pa las sa gzhan brgyad pa la 'jug ce na/ rnal 'byor spyod pa de nang gi chos la chos kyi rjes su lta zhing gnas pa de thos pa las byung ba'i shes pa 'am/ lha'i mig gis mthong ste/ ji ltar na dge slong thog ma nyid du 'di ltar mig gis yang dag pa ji lta ba bzhin mthong zhing ji ltar na mig gis rnam par shes par bya ba'i gzugs rnams la byis pa so so'i skye bo kun du chags shing rnam par chags la shin du rmongs shig gu snyam na/ de la kun du chags pa'i gnas su 'gyur ba ni mdza' bshes mthong ba 'am/ gzugs sam/ bud med dam/ de las gzhan pa mthong na kun du chags par 'gyur ro/ /zhe sdang gi gnas su 'gyur ba ni 'gran zlar gyur pa 'am/ 'gran zla'i gnas su 'gyur ba dag la zhe sdang bar 'gyur ro/ /'dod chags dang zhe sdang gis bsgribs pa'i mig dag ni yang dag pa ji lta ba bzhin mi mthong ste/ gti mug gis bsgribs pa'i byis pa so so'i skye bo'i sems ni kun du rtog pa tsam gyi mig gi rnam par shes par bya ba la kun du chags shing rnam par chags la shin du rmongs so/ /sred pas bslus pa'i mi ni rang gi 'dod pa'i rnam par rtog pas bdag nyid la bdag nyid kun du chags par byed de/ dper na khyi ni sha med pa'i rus pa blangs te khar bcug go/ /de 'gram so'i bar du rus pa bcug pa'i kha chu 'dzag pas gsher ba la za la/ de la chags pa'i khyi yang rang gi kha'i so'i bar nas khrag 'ong ste/ de rus pa de'i ro yin par sems kyi ro 'di ni bdag nyid kyi khrag la bdag nyid myong bar byed do snyam du mi sems shing ro la chags pa'i khyi de lce yang za'o/ / ro la chags pa'i bsgribs pa rus pa yin par sems pa de ni kun du rtog pa tsam kho na yin te/ de bzhin du byis pa so so'i skye bo mig gi rnam par shes par bya ba'i gzugs mig tu sdug pa'i gzugs dag la kun du chags par 'gyur ro/ /de kha chu lta bu'i rnam par rtog par blo gros bsgribs pa yin la/ rnam par dpyod pa ni rus pa lta bu yin/ mig ni khar bcug pa lta bu yin te/ de lta de ltar za'o/ /de'i sred pa ni gang gis khrag 'dzag pa lta bu yin te/ 'di ni gzugs yin no snyam du sems pa 'di ni/ sred pa khrag gi ro la chags pa lta bu yin te/ de ro de la chags so/ /de la khyi ji lta ba bzhin du byis pa so so'i skye bo yang de dang 'dra/ rus pa ji lta ba bzhin du mig gi rnam par shes par bya ba'i gzugs kyang de dang 'dra/ 'gram sos za bar byed pa de ji lta ba bzhin du rnam par rtog pa yang de dang 'dra/ so ji lta ba bzhin du yul yang de dang 'dra ste/ de lta bas na mig gi rnam par shes par bya ba'i gzugs rus gong lta bu dag gis byis pa so so'i skye bo thams cad rnam par slu bar byed do snyam mo/ /yang dge slong de sems par byed do/ /ji ltar na 'khor bar yid byung ba'i dge slong dag sred pa'i 'jigs pas 'jigs shing / 'dod pa thams cad rab tu spong zhig gu snyam mo/ /ji ltar glang po che lo drug lon pa glang po che'i cho ga shes pa'i mis bskor cing lus chen po de shing thags kyis bskor te/ bcing ba lnga yis bcings nas bu ram shing dang / la du dang / bu ram chang dang / bza' ba dang / btung ba'i ro mang po sbyar cing / sil snyan dang / glu dang sgra dbyangs dag gis de rnam par 'dul bar byed de/ gang gis de tshal gyi bde ba brjed par bya ba brjed nas/ der glang po che tha mal pa dag dang lhan cig gnas par byed cing de gzhan gyis bkrir rung bar byed do/ /de nas glang po che'i cho ga shes pa des de ltar yongs su spyod pa na rang gi tshal gyi bde ba 'dod pa'i gnas ri dang / sman ljongs dang / tshal dang / me tog dang / 'bras bu dang / bya'i sgra dang / chu'i rgyun dang / sa phyogs dga' ba rjes su bsams shing bcings pa thams cad kyang bde ba de dag rjes su dran nas/ bcings pa thams cad bcad de/ glang po che'i cho ga shes pa'i mi la yang 'dzem pa med par byas/ shing thags btsugs pa yang bcom/ bu ram shing gi dum bu dang / la du dang / bu ram chang dang / btung ba'i ro dag ni 'thungs la glu dbyangs dag gis gzhag par ma nus shing de'i yid rnam par gdul ba dang / de'i tshal gyi bde ba brjed par bya bar ma nus/ glang po che tha mal pa dang lhan cig 'dra bar 'gro bar mi 'dod cing yang tshal de dag dran pa de bzhin du rnal 'byor spyod pa'i dge slong de thog ma med pa'i dus nas zhugs pa/ 'ching ba lnga dag gis bcings te/ lnga gang zhe na/ 'di lta ste/ sgra dang / reg pa dang / ro dang / gzugs dang / dri sdug pa dag yin no/ /glang po che cho ga shes pa'i mis bskor ba lta bu gang zhe na/ 'di lta ste/ mig dang / rna ba dang / sna dang / lce dang / lus dang / yid kyi rnam par shes pa kun nas nyon mongs pa rnams yin/ rang gi blo gros khyim gyi gzeb lta bus bskor ba ni 'di lta ste/ bu dang / chung ma dang / kun dga' ra ba dang / bran mo dang / bran pho dang / longs spyod dang / khyim gyis bskor ba yin/ bu ram shing dang / la du dang / bu ram chang dang / btung ba'i ro zhes bya ba ni kun du rtog pa'i la du 'dod chags kyi skom zhes bya ba de'i tshig bla dgas so/ /sred pa la rnam par chags pa ni glu dbyangs lta bu yin no/ /dga' ba'i 'dod chags ni bcings pa lta bu yin/ glang po che tha mal pa dang 'dra bar zhes bya ba ni mi tha mal pa log par lta ba glang po che zhes bya ba de'i tshig bla dgas yin no/ /lhan cig gnas shes bya ba ni de dag dang lhan cig 'jig tshogs la lta zhing tshul khrims dang / brtul zhugs mchog tu 'dzin pa dang / yang dag par 'brel pa mi tha mal pa'i khar sbyang lta bu log par lta ba'i gtam dag gis rab tu dga' ba'o/ /gzhan gyis bkrir rung ba zhes bya ba ni 'dod chags zhe sdang gti mug gi dbang du gyur pa zhes bya ba'i tshig bla dgas so/ /glang po che'i cho ga shes pa zhes bya ba ni rnal 'byor spyod pa zhes bya ba de'i tshig bla dgas yin no/ /yongs su spyod pa na zhes bya ba ni gti mug nyon mongs pa thams cad dang 'grogs pa zhes bya ba de'i tshig bla dgas so/ /nges par 'byung ba'i ri dran zhing ri'i sman ljongs zhes bya ba ni bsam gtan dang / snyoms par 'jug pa zhes bya ba de'i tshig bla dgas so/ /me tog dang 'bras bu zhes bya ba ni yang dag pa'i lam la sems bskyed pa'i 'bras bur gyur pa mya ngan las 'das pa'o/ /bya'i sgra zhes bya ba ni chos kyi gtam gyi sgra zhes bya ba de'i tshig bla dgas so/ /chu bo'i rgyun dga' ba zhes bya ba ni shes rab kyi chu bo zhes bya ba de'i tshig bla dgas so/ /rgyun ces bya ba ni sems rtse gcig ces bya ba de'i tshig bla dgas so/ /sa phyogs shes bya ba ni tshangs pa'i gnas shes bya ba de'i tshig bla dgas te/ 'di lta ste/ byams pa dang / snying rje dang / dga' ba dang / btang snyoms so/ /rjes su bsams nas shes bya ba ni bsam gtan gyi bde ba rjes su bsams pa yin te/ rnal 'byor spyod pa de glang po che'i tshogs lta bu'i rjes su 'gro'o/ /de lta bas na glang po che lta bur rnal 'byor spyod pas bya'i/ khyi lta bur ni mi bya'o/ /de nas gzhan yang ji ltar na dge slong de sa gzhan brgyad pa las sa gzhan dgu pa la 'jug ce na/ rnal 'byor spyod pa nang gi chos la chos kyi rjes su lta zhing gnas pa des thos pa las byung ba'i shes pa 'am lha'i mig gis brtags na/ khams gsum pa 'di dag thams cad ni mi rtag pa dang / sdug bsngal ba dang / stong pa dang / bdag med pa dang / mi gtsang ba'i snod du gyur pa 'dod pa thams cad kyang mthong ste/ dper na nags tshal gyi khrod na ri chen po'i ngam grog la shing 'bra go skye ba skyon du ma dang ldan pa yin te/ de la 'bras bu chung ngu yod pa blang bar dga' zhing nyes pa mang por 'gyur ba dang / ngam grog tu ltung ba'i nyes pas srog la the tsom za bar byed pa dang / khong stong gi nyes pas g.yang sa'i phyogs su ltung ba dang / shing mthon po la 'dzegs pa dag gi srog 'chad par byed pa'o/ /gal te mi byis pa so so'i skye bo rmongs shing mun par gyur pa dag ro la chags pa de 'bras bu de dag mthong nas/ ngam grog dang / g.yang sa dang / shing khong stong mthon po ltung ba'i sar 'gro ste 'chi bar 'gyur ba mi sems so/ /byis pa so so'i skye bo blo zhan pa ro chung ngu myong bas phrogs pa de dag shing de la 'dzegs so/ /de shing de las 'bras bu dag ma thob par de'i srog ni g.yang sar gtong ngo / /gal te rang bzhin gyis thabs gzhan dang ldan pa 'am/ dge ba'i las byed pa kha cig ni de 'dod chags kyi ro ches chung bas byis pa'i blo'i nyes dmigs ches mang ba bcings par mthong ba de bzhin du/ dge slong des nags tshal gyi khrod lta bur 'gro ba lnga'i rim pa mthong ngo // // 'phags pa dam pa'i chos dran pa nye bar gzhag pa/ bam po drug pa/ ngam grog chen po zhes bya ba ni nyes pa thams cad ngam grog lta bu yin no/ / shing 'bra go zhes bya ba ni 'dod pa'i shing zhes bya ba de'i tshig bla dgas so/ /skyon brgya phrag du ma zhes bya ba ni nyon mongs pa brgya phrag stong du ma ste de dag tshor ba sdug bsngal zhes bya ba'i tshig bla dgas so/ /shing la yod pa'i 'bras bu zhes bya ba ni sgra dang / reg pa dang / ro dang / gzugs dang / dri sdug pa 'dod pa de dag la rnam par chags pa'i blo zhes bya ba de'i tshig bla dgas so/ /blang bar dka' zhes bya ba ni 'dod pa'i 'bras bu blang bar dka' ba yin te/ dper na rgya mtshor 'jug pa dang / mtshon gyis 'khrug pa dang / rgyal po la bsten pa dang / chom rkun dang / tshong pa la sogs pa'i nyon mongs pas thob pa bzhin no/ /'dod pa'i 'bras bu lta bu nyes pa mang po zhes bya ba ni 'dod chags zhe sdang gti mug ces bya ba de'i tshig bla dgas so/ /ngam grog dang / g.yang sa zhes bya ba ni sems can dmyal ba dang / dud 'gro dang / yi dags kyi g.yang sa zhes bya ba de'i tshig bla dgas so/ /srog la the tsom za bar 'gyur zhes bya ba ni chos kyi srog ces bya ba de'i tshig bla dgas so/ /shing khong stong gi nyes pa zhes bya ba ni stong pa dang / gsog dang / gsob dang / snying po med pa zhes bya ba de'i tshig bla dgas so/ /rmongs pa'i mi 'gro'o zhes bya ba ni byis pa log par lta ba zhes bya ba de'i tshig bla dgas yin te/ de lta bas na skyon mang po du ma 'bras bu med pa'i 'dod pa mnog chung ba mthong nas dge slong de 'dod pa thams cad la kun du rtog par mi byed do/ /yang dge slong de 'dod pa me 'bar ba lta bur mthong ste/ ji ltar mar me mthong na dga' la reg na mchog tu tsha ba la/ phye ma leb rmongs pa mar me kha dog sdug par mthong nas mar me de'i nang du song ba dang / de 'chi bar 'gyur ba de bzhin du 'dod chags zhe sdang gti mug gis bsgribs pa'i byis pa so so'i skye bo phye ma leb lta bu dag ni 'dod pa thams cad la kun du dga' bar lta'o/ /mar me lta bu zhes bya ba ni gal te mar me der lus song ba'i phye ma leb bzhin du sems can dmyal ba dang / dud 'gro dang / yi dags rnams su sreg par 'gyur te/ de lta bas na 'dod pa dag gis chog go snyam nas/ dge slong de 'dod pa dag las 'dod chags dang bral bar 'gyur ro/ /de nas gzhan yang dge slong de sems can dag 'ching ba gang gis bcings shing 'khor bar kun du 'khor snyam nas/ rnal 'byor spyod pa nang gi chos la chos kyi rjes su lta zhing gnas pa de thos pa las byung ba'i shes pa 'am lha'i mig gis brtags na/ 'jig rten 'di ni 'ching ba gnyis kyis bcings te/ zas kyi 'ching ba dang / reg pa'i 'ching ba'o/ /de la zas kyi 'ching ba ni rnam pa bzhi ste/ kham gyi zas gang zhe na/ 'di lta ste/ mi'i gnas dang / 'dod pa na spyod pa'i lha'i ris drug dang / sems can dmyal ba chen po brgyad dang / dud 'gro dang / yi dags kyi phyogs gcig go/ /yid la byed pa'i zas yod pa de dag mthong ste/ 'di lta ste/ gzugs na spyod pa'i lha'i bsam gtan gyi zas so/ /reg pa'i zas ni bya dang / mig gis lta ba dag gi'o/ /de'i rnam pa gzhan ni 'dod pa'i khams kyi byis pa so so'i skye bo mi dang / yi dags dang / dud 'gro dang / sems can dmyal ba 'di dag thams cad ni 'khrig pa'i reg pa la rab tu chags pa yin te/ gang 'dod pa la sten pa de ni 'dod pa'i khams su 'byung ngo / /mnyam par dmigs pa'i zas ni gzugs med pa'i snyoms par 'jug pa yin te/ de lta bas na 'jig rten 'di ni gnyis kyis bcings te/ kun du sbyor ba dang / bag la nyal ba thams cad kyi 'ching ba dag las de 'dod chags dang bral ba ma yin no/ /de mig gi rnam par rig par bya ba'i gzugs rnams la/ rnam pa gzhan gyis mig gis yang dag pa ji lta ba bzhin mthong ste/ mig gi 'dus te reg pa las byung ba gang yin pa de las bde bar 'gyur ba dang / dmigs pa bde ba la rnam par smin pa mi bde ba'i las byung ba de yang yang dag pa ji lta ba bzhin du mthong ngo / /de b zhin du mig gi rnam par rig par bya ba yid mi bde bar 'gyur ba'i gnas gang yin pa de mig gi 'dus te reg pa las byung ba'i sdug bsngal rnam par smin pa bde ba las byung ba de yang yang dag pa ji lta ba bzhin rab tu shes so/ /mig gi rnam par rig par bya ba de gang yin zhe na/ gzugs la dmigs pa bde ba ni rnam par smin pa mi bde ba yin te/ 'di la nang gi chos la chos kyi rjes su lta ba'i mig gis tshul bzhin ma yin pa yid la byed pa dmigs pa'i gzugs mthong ste/ da ltar byung ba'i rnam par smin pa bde ba la bde'o zhes rab tu shes shing / rtog par byed la ro myong bar byed do/ /yongs su 'gyur bas rnam par smin pa sdug bsngal ba ni sems can dmyal ba dang / yi dags dang / dud 'gror yang dag par 'grub par 'gyur ro/ /gang dag da ltar byung ba la rnam par smin pa bde ba ma yin pa ma yin la yongs su 'gyur bas rnam par smin pa bde ba'i las de gang yin zhe na 'di l a mig gis rnam par rig par bya ba'i gzugs rnams mthong nas mig gi 'dus te reg pa las byung ba'i tshul bzhin yid la byed pa la mngon du phyogs pa'i sems de la chags pa med cing yid 'jug pa med pa de ni da ltar byung ba la rnam par smin pa sdug bsngal ba yin la/ yongs su 'gyur bas lha dang mi'i bde bar skye zhing mya ngan las 'das pa'i mthar phyin par 'gyur ro/ /de bzhin du rna ba dang / sna dang / lce dang / lus dang / yid kyi rnam par shes pa'i chos rnam par shes pa'i chos rnams la yang sbyar ro/ /de nas gzhan yang ji ltar na dge slong de mig gis rig par bya ba'i gzugs rnams la btang snyoms su gnas zhe na/ rnal 'byor spyod pa nang gi chos la chos kyi rjes su lta zhing gnas pa'i dge slong gi mig gis 'di la gzugs mthong nas/ ma chags shing rnam par ma chags la rnyog pa can du ma yin/ smod pa med cing dga' bar mi byed la yid la mi byed/ tshul bzhin ma yin pa yid la byed pas bsgribs pa ma yin zhing btang snyoms pa yin te/ de ni btang snyoms su 'gyur ba'i gnas la sdug bsngal dang / bde bar 'gyur ba'i gnas mi dmigs so/ /yang dge slong de sa drug pa'i rab tu dbye ba'i ngo bo sa gzhan bcu pa la 'jug ste/ 'di lta ste/ mi lcogs pa med pa dang / bsam gtan dang po'i sa khyad par can dang / bsam gtan bzhi pa ste/ sa drug pa'i rab tu dbye ba la 'jug go/ /de skyes nas 'gog par 'gyur ba'i lam 'phags pa'i lam yan lag brgyad pa'i sgo rtogs shing khong du chud pa'i chos skye ba dang / 'jig pa mthong zhing yang dag par thob nas rab tu 'bad do/ /de de ltar rab tu 'bad pa na sa bla'i gnod sbyin dag gis bdud kyi 'ching ba phal cher spa gong bar mthong nas dga' ste/ bar snang la spyod pa'i gnod sbyin dag la mngon par bsnyad do/ /de dag gis kyang rgyal po chen po bzhi la mngon par bsnyad do/ /de dag gis kyang rgyal chen bzhi'i lha rnams la mngon par bsnyad do/ /rgyal chen bzhi'i ris pa rnams kyis kyang sum bcu rtsa gsum pa rnams la'o/ /sum bcu rtsa gsum pa rnams kyis kyang 'thab bral ba rnams la'o/ /'thab bral ba rnams kyis kyang dga' ldan pa rnams la'o/ /dga' ldan pa rnams kyis kyang 'phrul dga' ba rnams la'o/ /'phrul dga' ba rnams kyis kyang gzhan 'phrul dbang byed pa rnams la'o/ /gzhan 'phrul dbang byed pa rnams kyis kyang tshangs ris pa rnams la mngon par bsnyad de/ de ltar 'dzam bu'i gling du rigs kyi bu che ge mo zhig ces bya ba rgya cher snga ma bzhin du sbyar ba nas sa gzhan brgyad pa la 'jug pa dag sa drug pa'i nang du lhag par zhugs pa de tshangs ris kyi lha dag gis thos nas mchog tu dga' la bsam gtan la bde bar gnas pa btang ste/ kun du dga' bar gyur pa'i bar de thos nas shin du dga' bar 'gyur ro/ /'dir tshigs su bcad pa/ dge dang mi dge dag gi las/ /bdag gis byas pa'i las kun gyi/ /'bras bu nges par spyod 'gyur te/ /lus can dag dang 'brel pa yin/ /nyon mongs sa ni dang por mngar/ /rnam par smin pa tsha ba yin/ /de dag don med byed pas na/ /dug dang 'dra bar spang bar bya/ /nyon mongs dbang du mi 'gro zhing / /ye shes dbang du 'gro bya ste/ /ye shes ldan pa tshe 'di dang / /pha rol dag tu bde ba 'thob/ /ji ltar rtswa la mes bsregs bzhin/ /shes pas rtag tu nyon mongs gzhom/ /tshangs pa dkon mchog gsum ston pa/ /ye shes me lce mchog yin no/ /gang dag ye shes spyod yul dga'/ /de dag zhi ba'i lam la gnas/ /gang dag nyon mongs sbrul bsregs pa/ /de dag thams cad zhigs par gyur/ /dpa' bo gang dag phan tshun shes/ /mkhas pa de nyid mthong ba ni/ /de dag gnas ni dam par 'gro/ /skye dang 'chi ba spangs pa yin/ /gang dag 'khor la mngon dga' zhing / /mgu ba nyon mongs dgra dag gis/ /rtag tu bcing bas bcings pa ste/ /de dag sred pa nyam ngar 'khyam/ /gang dag nges 'byung blo yod cing / /gang dag rtag tu zhi spyod pa/ /de ni lha yi ris dag gi/ /tshangs pa'i 'jig rten 'byung bar 'gyur/ /'dod la sogs la gang sdang ba/ /sangs rgyas la sogs rtag tu mchod/ /shing skam me yis bsregs pa ltar/ /de ni 'khor ba 'jig par byed/ /gang dag sems kyi dbang mi 'gro/ / rtag tu de rjes sems 'gro ba/ /mun la nyi ma shar ba ltar/ /de ni nyon mongs nges par 'joms/ /sems ni dgra ngan dgra chen te/ /de las gzhan pa'i dgra med do/ /ri ni dus su bsregs pa ltar/ /sems can rtag tu sems kyis bsregs/ /byis pa blun po sems dbang song / /dbang po ma thul gang yin pa/ /de yi sdug bsngal zhi med cing / /de yi mya ngan 'das pa ring / /sdug bsngal sdug bsngal rnam smin dang / / sdug bsngal rgyu ni rnam shes pa/ /kun nas nyon mongs 'dus pa yi/ /'ching ba thams cad 'jig par byed/ /snang ba'i nang na shes pa mchog /mun pa'i nang na gti mug ste/ /de ltar gang zhig snang la dga'/ / de ni mkhas pa zhes bya 'o/ /don rnams mchog kun med byed pa/ /dpa' bos gti mug rnam par spongs/ /gang zhig gti mug dbang song ba/ /de la zhi ba med pa yin/ /gal te che bar bdag 'dod na/ /me yis reg par gyur kyang rung / /sbrul dang lhan cig 'dug kyang sla'i/ /nyon mongs lhan cig sbyor mi bya/ /bdud rtsi'i nang na shes pa mchog /che ba'i nang na gter mchog yin/ /gnyen gyi nang na gnyen mchog ste/ /nor gyi nang na nor mchog go/ /de lta bas na ye shes mes/ /rtag tu nyon mongs ri bsreg go/ /nyon mongs ri dag bsregs pa ni/ /bde ba'i gzhi la gnas pa yin/ /mi gang blo ni zhan pa dag /chos ma yin pa nyon mongs gzeb/ /'khor ba dag las ma rgal ba/ /mun pa mun nag nang du 'jug /gang dag chos la blo rtag pa/ /de dag dam pa rtag tu mchod/ /de dag tshe rabs 'bras bur ldan/ /de dag blo yis gtse ba med/ / de ltar dge slong de chos dang chos ma yin pa de dag gi rnam pa yang dag pa shes par gyur nas gnas te/ de ltar de shin du dri ma med pa'i sems kyis tshe 'bum phrag du ma'i 'khor ba'i ri'i rtse mo 'jig par byed cing spong bar byed la 'jom par byed de/ yang 'byung bar mi byed/ de'i nyon mongs pa'i dgra 'joms par byed cing / de'i mya ngan las 'das pa'i mthar byed do/ /de nas gzhan yang dge slong de las kyi chos kyi rnam par smin pa gzhan rjes su sems par byed de/ ji ltar na nyes par byas pa'i sems kyi rgyu'i rgyun rnam pa du ma chu bo'i rgyun ltar 'bab pa'i sems can rnams kyis nyes par byas pa'i las kyi 'bras bu'i sa mngon du gyur pa sems can dmyal ba'i tshor ba mi bzad pa tsha ba rtsub pa dag myong bar 'gyur snyam nas nang gi chos la chos kyi rjes su lta ba de legs par byas pa dang / nyes par byas pa'i de kho na nyid dpyod pa'i blos rtog par byed de/ kye ma srog chags 'di dag ni sems kyis bslus shing sred pas bslus nas yang sos dang / thig nag dang / bsdus gzhom dang / ngu 'bod dang / ngu 'bod chen po dang / tsha ba dang / rab tu tsha ba dang / mnar med pa'i gnod pa'i nyen 'khor gyi sems can dmyal bar ji ltar skye bar 'gyur/ ji ltar las mngon sum du gyur pa sems can dmyal ba'i 'khor ni gang zhig /sems can dmyal bar las gang gis srog chags rnams sems can dmyal ba'i 'khor du 'gro snyam nas/ dge slong des thos pa las byung ba'i shes pa 'am lha'i mig gis brtags na sems can dmyal ba chen po yang sos na yod pa'i 'khor gyi ming ni 'di lta ste/ mi gtsang ba'i 'dam dang / lcags kyis bsgyur ba dang / snod du btso ba dang / gnod pa rnam par ma zhi ba dang / mun pa dang / kun du mi dga' ba dang / tshor ba bdo ba dang / nad thams cad pa dang / mtshon 'bab pa dang / gnod pa drag pa dang / ne'u le nag po lta bu dang / gzhan du 'gyur ba dang / sdug bsngal gyis gnod pa dang / pad ma'i phreng ba dang / mtshe'u dang / gnod pa mtho ba ste/ yang sos kyi 'khor bcu drug yin no/ /de la las gang gis sems can dmyal ba yang sos kyi 'khor du skye bar 'gyur snyam nas/ dge slong des thos pa las byung ba'i shes pa 'am/ lha'i mig gis brtags na srog gcod pa kun du bsten cing bsgoms te mang du byas pa'i las dang las kyi nyer bsdogs dang / las kyi mjug dang ldan pas sems can dmyal ba yang sos su skye bar 'gyur te/ 'di ltar srog gcod pa chen po dang / 'bring dang / tha mas gnod pa chen po dang / 'bring dang / tha mar 'gyur ro/ /de la sems can dmyal ba chen po ni mi tshul khrims dang ldan pa 'am sdom pa blangs pa 'am/ tshul khrims kyi phyogs spyod pa'i sems can gzhan sems can du yang shes la bsams bzhin du srog bcad de las kyi mjug kyang sogs shing 'chags par mi byed la sems 'gyod par mi byed/ gzhan dag la yang rung bar rjod cing phyir zhing byed/ gzhan dag kyang srog gcod pa de la gcod du 'jug cing rab tu spro bar byed/ dga' bar byed cing rab tu gnas par byed la slob par byed/ gzhan dag gis byas pa la rjes su yi rang bar byed pa'i mi gti mug can yang dang yang du byed pa'o/ /de sems can dmyal ba'i gnas der skye bar 'gyur te/ mi rnams kyi lo lnga bcu gang yin pa de ni rgyal chen bzhi'i nyin zhag gcig go/ /bgrang ba'i tshul de lta bu'i nyin zhag sum bcu la zla ba gcig go/ /zla ba bcu gnyis la lo gcig ste/ rgyal chen bzhi pa dag ni lo lnga brgyar 'tsho la de ni sems can dmyal ba chen po yang sos kyi nyin zhag gcig yin no/ /sdig pa tha ma dang / 'bring dang chen pos tshe thung ngu dang 'bring dang ring por 'gyur te/ dus ma yin par 'chi ba ni yod do/ /gal te sdig pa'i sa bon mi bzad pa byas na de'i 'khor gcig gam/ gnyis sam/ gsum 'am/ bzhi 'am/ lnga 'am/ drug nas de bzhin du 'khor bcu drug gi bar du smin par 'gyur ba nas sdig pa'i las bcom zhing bsal la zad par ma byas kyi bar du 'byung ngo / /sems can dmyal ba gzhan dag gi lo lnga brgya ni lha'i bgrang ba'i tshul dang 'thun te mi'i ni ma yin no/ /de nas gzhan yang ji ltar na dge slong de sems can dmyal ba'i 'khor dag gi las mngon sum du gyur pa yin zhe na/ rnal 'byor spyod pa nang gi chos la chos kyi rjes su l ta zhing gnas pa sems ri mo mkhan lta bus ri mo lta bu'i rang gi las kyi 'bras bu'i sa'i cha sems kyi bsam pa'i gnas kyi rnam pa gnod pa bye ba khrag khrig 'bum phrag dag gi 'jigs pa gzhan dang mtshungs pa med pa'i sems can dmyal ba yang sos kyi 'khor dag rab tu 'byed par byed do/ /las gang gis 'khor mi gtsang ba'i 'dam du skye bar 'gyur snyam nas de thos pa las byung ba'i shes pa 'am lha'i mig gis brtags na mi gtsang ba'i 'dam du skye bar 'gyur ba ni/ mi dge ba'i las kyi sa bon du gyur pa srog gcod pa yin te/ gal te 'dod chags kyis byed na bya yis bya la 'am/ mig dud ka lta bus mig dud ka lta bu la 'am/ dud ka lta bus dud ka lta bu la 'am/ rgya 'am gdos kyis ri dgas dang ri dgas dag gsod par byed la/ 'chags par mi byed cing / las kyi nyer bsdogs dang / las kyi mjug sogs pa snga ma bzhin du sbyar te de der skye bar 'gyur ro/ /de'i gnod pa'i phyogs gcig tu 'gyur ba ni 'di lta ste/ mi gtsang ba'i 'dam gyi 'khor du mi gtsang ba rab tu 'bar ba ro tsha ba zangs bzhus pa lta bu dang ldan zhing srin bu mchu rdo rje lta bu dang ldan pa dag gis kun du gang ste/ de gal te mi gtsang ba de dag za na/ de'i srin bu de dag gis lus de'i nang du song ste sngar mchu za'o/ /phyis lce za ste/ de'i 'og tu rkan za/ rkan gyi 'og tu ol gong / ol gong gi 'og tu snying / snying gi 'og tu mchin pa/ mchin pa'i 'og tu mtsher pa/ mtsher pa'i 'og tu bA rash+ma/ ba rash+ma'i 'og tu bA k+sha li ka /'bA k+sha li ka'i 'og tu gnye ma/ gnye ma'i 'og tu rgyu ma/ rgyu ma'i 'og tu long ka'i nang du song nas gnad thams cad dang / so'i gnad rgyus pa dang / sha dang / glo ba dag ste/ mi gtsang ba'i lus las srin bu 'byung ba de dag gis za'o/ /de sems can dmyal ba'i tshor ba tsha ba/ rtsub pa/ mi bzad pa/ mi'i bgrang ba'i tshul gyis lo du ma lo 'bum phrag du mar tshor ba myong bar 'gyur te/ ji tsam du sdig pa bya'i/ srog gcod pa ni byas gsod srog chags dud ka lta bu ni dud ka lta bus gsod/ rgya dang gdos kyis ri dgas gsod pa rngon pa spyod pa'i ngang tshul can ni de dag gis gsod cing / de dag gis dbang du byas nas za ste/ de'i las kyi 'bras bu rnam par smin pas ji ltar de dag gis de zos pa de ltar srin bu de dag gis de'i nang du song nas za'o/ /rang gi las dge ba dang / mi dge ba'i 'bras bu 'dra ba ni gang gi tshe de'i sdig pa'i las bcom zhing spangs par gyur na/ de de'i tshe mi gtsang ba'i 'dam gyi 'khor gyi sems can dmyal ba las thar bar 'gyur zhing / sems ri mo mkhan lta bu de yang ri mo bris pa lta bu 'jig par 'gyur ro/ /de de las thar nas gal te lan grangs gzhan la myong bar 'gyur ba'i las su mi 'gyur na de dud 'gro byar skye bar 'gyur te/ de bya der gyur nas de bzhin du bya des gsod do/ /ri dgas su gyur na yang des sngon ji ltar rgya 'am/ gdos dag gis bya 'am ri dgas dag bsad pa'i las kyi 'bras bu des sems can dmyal bar smin pa'i rgyu 'thun pa'i 'bras bus dud 'gror skye'o/ /gal te lan grangs gzhan la myong bar 'gyur ba'i las kyis lha 'am mir skyes na las de dang rgyu 'thun par de tshe thung bar 'gyur ro/ /de nas gzhan yang dge slong de sems can dmyal ba yang sos kyi 'khor gnyis pa lcags kyis bsgyur ba zhes bya ba la rtog par byed de/ srog gcod pa'i las gang gis der skye bar 'gyur snyam nas/ de thos pa las byung ba'i shes pa 'am lha'i mig gis brtags na/ gal te rnyed pa dang / btsong ba dang / blang ba'i rgyu'i sems can dag srog gcod par byed de/ mtshon gyis gzhan bsad cing srog dang bral na/ de rgyu de dang / rkyen de dang / gzhi de 'chags par mi byed cing rab tu spro bar byed pa'i las dang / las kyi nyer bsdogs byas pa ni snga ma bzhin du sbyar te/ lus dang bral nas ngan 'gro log par ltung ba sems can dmyal ba lcags kyis bsgyur bar skye bar 'gyur ro/ /de na lcags kyi ra ba rab tu 'bar ba 'phang du dpag tshad bcu yod pa sems can dmyal ba'i mes rab tu 'bar te/ de'i drung na mi dag gi me ni sprin dang mtshungs so/ /mtshon rab tu 'bar ba'i shugs kyis kyang de dag gi lus la rab tu 'bab ste/ gang gis lus de dag yungs kar bzhin du gcod cing 'jig /sreg cing gsheg go/ /thams cad du mtshon gyi char rab tu 'bab ste/ dper na 'dzam bu gling du dus su char gyi rgyun 'bab pa ltar phyogs bcur mtshon gyi char gyis mngon par khebs te/ gang gis sems can dmyal ba de dag gshegs kyang 'chi bar ni mi 'gyur ro/ /de'i sdig pa'i las kyi 'bras bu rnam par smin pas yan lag rnams bcad cing gtubs pa dang / lcags kyis bsgyur ba'i sems can dmyal ba de na ral gri lo ma lta bu'i tshal yod de/ steng dang 'og gi so rno ba/ ba tshwa lta bu'i tshal de rgyang ring po nas tshal nag po'i phung po lta bu mthong nas/ de dag bkres pa dang / skom pas gdungs pa kun du rgyug cing cho nges 'debs pa na de gang du zhugs par gyur pa de dag kun nas mtshon gyi char gyis rnam par gsheg par byed do/ /der las kyi rgyu ni phyugs de dag l a zas kyis brid nas bslus pa de'i las de dang 'bras bu de ni 'di ltar sems ri mo mkhan lta bus sems can dmyal ba'i ri mo'i gzhi la sems can dmyal ba pa'i mi dge ba'i las mngon par 'dri ba de lta de ltar sems can dmyal bar 'grub pa'i las so sor myong bar 'gyur ro/ /der sems can dmyal ba de dag ji tsam du de'i sdig pa'i las bcom zhing spangs la zad par ma byas pa de srid du/ lo 'bum phrag du mar gsheg par byed de/ gang sems ri mo mkhan lta bu des mngon par 'dri ba ni snga ma bzhin no/ /de nas gzhan yang dge slong de yang sos kyi 'khor gsum pa snod du btso ba zhes bya ba de'i 'bras bu rnam par smin pa la rtog par byed de/ las gang zhig gis der skyes par 'gyur snyam nas/ des thos pa las byung ba'i shes pas brtags na sems can rnga mo 'am/ phag gam/ mA ta la ka 'am/ ri bong du gyur pa 'am/ mA to la ka 'am/ dri sh+ya b+hu te gson pa dag bza' ba'i don du spu dbyi bar bya ba'i phyir der 'jug cing rab tu bskol te/ 'jog par byed pa de dag lus dang bral te/ shi nas ngan 'gro log par ltung bar sa bon dang mtshungs pa'i 'bras bu snod du btso bar skye bar 'gyur ro/ /de rab tu btso ba lcags kyi snod kyi nang du rab tu bcug nas sran ma mud ka bzhin du 'tshed de lo 'bum phrag du mar sems can dmyal ba pa'i me mi bzad pas 'tshed do/ /sems ri mo mkhan lta bu'i gzhi bcom zhing spangs te zad par byas na de de las yongs su thar bar 'gyur te/ sems can dmyal ba myong bar 'gyur ba dang / lan grangs gzhan la myong bar 'gyur ba dang / skyes nas myong bar 'gyur ba'i 'bras bu ni snga ma bzhin du sbyar te/ gang lha dang mi'i bar dag tu skye bar 'gyur la de tshe thung bar 'gyur ro/ /de 'khor snod du btso ba mthong nas yang dag pa ji lta ba bzhin nang gi chos la chos kyi rjes su lta zhing gnas pa'i dge slong de ji ltar na sems can dmyal ba'i 'khor la lta zhe na/ de thos pa las byung ba'i shes pa 'am/ lha'i mig gis brtags na/ 'di ltar dge slong de ni mchog tu dpa' ba/ bdud kyi sde mngon par 'joms shing 'khor ba'i rgya mtsho las sgrol ba/ tshul khrims kyi chus 'dod chags kyi me gsod par byed pa/ byams pa'i chu'i bum pas zhe sdang gi me gsod par byed pa/ rten cing 'brel par 'byung ba'i sgron mas gti mug gi rab rib sel bar byed de/ zab mo khong du chud pa'i dge slong ni 'khor ba'i rgya mtsho las rgal ba yin no/ /de nas gzhan yang dge slong de yang sos kyi 'khor bzhi pa gnod pa rnam par ma zhi ba zhes bya ba la rtog par byed de/ de rgyu dang 'bras bu rnam par smin pa ni sa bon dang / 'bras bur mtshungs te/ gang gis mir gyur pa'i yang sos gzhan gnod pa rnam pa du ma byas par 'gyur te/ 'di lta ste/ shing gi bar du btsir ba'i tshor ba dang / lum pa ka'i tshor ba dang / dud pa'i tshor ba dang / lam gyi tshor ba dang / dbang po'i lam 'dren pa'i tshor ba dang / sa'i tshor ba dang / rab tu ltung ba'i tshor ba dang / khab kyi tshor ba dang / thag pas 'dren pa'i tshor ba dang / glang po che'i steng nas ltung ba'i tshor ba dang / bye mas 'thor ba'i tshor ba dang / gtun shing gi tshor ba dang / lcag gzhus pa'i tshor ba dang / glad pa na ba'i tshor ba dang / bus pa dang / khye'u pang bar btsir ba lta bu'i tshor ba dang / grang ba dang dro ba'i tshor ba dang / chu'i tshor ba dang / khar gongs sam/ chu blugs pa'i tshor ba dang / shing la spyangs pa'i tshor ba dang / ngam grog dang g.yang sar rnam par 'jigs pa'i tshor ba dang / dgra'i dbang du gyur pa'i tshor ba dang / sba ba gcod pa'i tshor ba dang / sor mo la rab tu gnod pa'i tshor ba dang / spu 'thog pa'i tshor ba dang / mgo 'khor los bskor ba'i tshor ba dang / zha nye dang ro nye dang zangs bskol bar 'jug pa'i tshor ba dang / snar lcags rnon po 'jug pa'i tshor ba dang / sba ba'i gnas su sbrul 'jug pa'i tshor ba dang / bong bas 'phen pa'i tshor ba dang / sred pa'i tshor ba dang / lus la me'i phreng ba'i tshor ba dang / skra 'bal ba'i tshor ba dang / srog chags mar ko ta ka 'jug pa'i tshor ba dang / lpags pa gtubs pa'i tshor ba dang / tsAlbI na ka'i tshor ba dang / 'dus pa'i tshor ba dang / lus gtub pa'i tshor ba dang / rdza ma dang bum par btsos pa'i tshor ba dang / so phag gi tshor ba dang / lus phyed du ba tshwa blugs pa'i tshor ba dang / phyag dar gyi phye'i tshor ba dang / rab tu bsregs pa'i tshor ba dang / rkang pa'i mthe bo mtshon gyis bcad cing rab tu bsreg pa'i tshor ba dang / phyi phyi ling gi tshor ba dang / rgya mtsho sum bcu'i dbu ba'i tshor ba dang / lag pa dang / rkang pa'i tshor ba dang / ring du 'gro ba'i tshor ba dang / 'gram so'i tshor ba dang / snum gyi tshor ba dang / gser rdung ba'i tshor ba dang / tshabs cher skrangs pa'i tshor ba dang / bslang ba dang dbab pa'i tshor ba ste/ tshor ba de dag gis gang sdug bsngal gyi tshogs rnam pa sna tshogs du ma kun du spyod pa de dag ni lus dang bral nas ngan 'gro log par ltung ba sems can dmyal ba gnod pa rnam par ma zhi ba de ni der rgyu dang mtshungs pa'i 'bras bu myong bar 'gyur te/ sems can dmyal ba de'i rnam par smin pa dpe med pa bye ba stong phrag bcur bsgyur ba/ sngar ji skad bshad pa'i gnod pa de dag thams cad rang gi las kyi 'bras bu mngon sum du gyur pa'i sems can dmyal ba'i sa der de dag myong bar 'gyur ro/ /gang sems ri mo mkhan lta bus sreg pa'i pir dang / mi dge ba kun du rtog pa sna tshogs kyi tshon rtsi snod kyi gzhi lta bu'i snying la kun du 'dri ste/ bu dang chung ma'i mtshan ma dam pos de rjes su myong bar 'gyur ro/ /rang gis legs par byas ba'i las ni pha mas byas pa ma yin te/ ji tsam du sdig pa'i las bcom zhing spangs la zad par ma byas pa de srid du 'chi bar mi 'gyur ro/ /de nas shi nas gal te lan grangs gzhan la myong bar 'gyur ba'i las gang gis dud 'gro dang / yi dags dag tu ma skyes la gal te mi rnams dang skal pa mnyam par gyur na/ rgyu 'thun pa'i 'bras bus de rtag tu bcing ba dang / gtse ba dang / gnod pa dang / rgyal po'i pho brang 'khor nas 'tshe ba dang / mi bde bar 'gyur/ skye bo kun gyis kyang mngon par gtse ste/ rtag tu sdug bsngal mi bzad par 'gyur/ gnyen 'dab dang / mdza' bshes dang / chung ma dang / bu dag dang yang zhe 'gras par 'gyur ro/ /de nas gzhan yang dge slong de sems can dmyal ba yang sos kyi 'khor lnga pa mun pa zhes bya ba la rtog par byed de/ sems can dag las kyi rnam par smin pa gang gis skye bar 'gyur snyam nas des thos pa las byung ba'i shes pas brtags na/ sems can gang dag log par lta ba las dang 'bras bu phyin ci log tu ston pa mchod sbyin dag la phyugs bsubs nas gsod par byed pa dang / rus sbal dag so phag gis mngon par g.yogs shing mun par 'jug par byed pa de dag lus dang bral nas ngan 'gro log par ltung ba sems can dmyal ba mun par skye bar 'gyur ro/ /der skyes nas kyang mun pa 'byung ba'i mes sreg par byed/ rdo rje lta bu'i ri shugs drag po dag 'ongs shing las kyi rlung gis bdas nas de gnyis kyi dbus su bcug la bya ma snyim pa nas gtor ba bzhin du thal bar rlog ste/ ji ltar skra'i rtse mo bsdus pa phan tshun skyabs med pa de ltar rtag tu gnod pa byed cing spu gri lta bu'i rlung rab tu 'bar ba langs pa gang gis 'di yan lag dang nying lag zhigs par byed do/ /skom pa dang / bkres pas lus rab tu 'bar ba de dag de ni de na ngud mo 'byin te ji ltar de dag gis rusbal me'i nang du bsregs shing / so phag dag gis mnar med pa der lo 'bum phrag du mar 'khrul 'khor la khab kyi bu ga tsam gyi snang ba med pa bzhin du snang ba med par byed la rang gi lus las byung ba'i spu rab tu 'bar ba dag gis kun du sreg par byed do/ /sems spre'u lta bus bag la nyal ri lta bu la rnam par rgyu zhing rgyu ri'i ngos ltar brtan pas rgyags pa ri'i rtse mo lta bu la gnas pa lta ba ngan pa'i ri khrod lta bu la rnam par rgyu zhing nga rgyal las byung ba shing ljon pa thibs po lta bur spyod pa/ khro ba brag gseb lta bu la gnas pa/ phrag dog yon tan bsags pa lta bu'i 'bras bu dang sred pa chu bo'i dbang du song ba lta bus gang mi dge ba'i rlabs byas pa de dag ji tsam du rnam par bcom zhing spangs la zad par ma byas pa de srid du 'chi ba'i dus mi byed do/ /de sems can dmyal ba'i 'khor mun pa de las thar nas/ gal te yi dags dang dud 'gror ma skyes la mi dag dang skal ba mnyam par mi rnams kyi nang du skyes na/ de rgyu 'thun pa'i 'bras bus rtag tu bcing bas bcings par 'gyur zhing tshe thung bar 'gyur ro/ /de nas gzhan yang dge slong de sems can dmyal ba yang sos kyi 'khor drug pa kun du mi dga' ba zhes bya ba la rtog par byed de/ las gang gis sems can dmyal ba kun du mi dga' bar skye bar 'gyur snyam nas des thos pa las byung ba'i shes pas brtags na sems can la mngon par 'khu ba'i bsam pa yod pa ni rtag tu srog gcod pa la brtson pa yin te/ de dung dang / rnga pa Ta ha dang / bung bu'i skad kyis nags khrod na rnam par rgyu ba'i sems can ri dgas dang / bya dang / seng ge dang / dred dang / gung dang / spre'u la sogs pa bag tsha ba med par rgyu ba dag sgra de dag gis kun du skrag par byed cing rgyal po 'am/ blon po phal po cher yid kyis bsam pa yod pa'i rjes su rngon pa gsad pa'i bsam pa yod pa 'gro ba de ni lus dang bral nas ngan 'gro log par ltung ba sems can dmyal ba kun du mi dga' bar skye bar 'gyur ro/ /rgyu dang 'thun par 'bras bu 'byung ste/ ji ltar sems can de dag gis kun du mi dga' ba byas pa de ltar sems can de dag sems can dmyal ba'i me'i nang du bcug nas/ bya rog dang / 'ug pa dang / bya rgod dang / srin po dang / wa rnams kyi mchu rno la sgra mchog tu 'jigs pa rnams kyis rna ba drungs nas bcad cing za la/ mchog tu 'jigs pa mi 'dod cing mi sdug la yid du mi 'ong ba skye bo thams cad skrag par byed pa'i sgra des kun du mi dga' ba phal cher yid la gcags par 'gyur zhing srog chags mar ko ta ka'i mchu rdo rje lta bus yang dang yang du rus pa'i gseb dang nang du zhugs pa dag gis rna ba la za'o/ /sems nya lta bu d e sred pa chu bo lta bu rnam par rgyu zhing khro ba dba' rlabs lta bur 'khrug pas 'khor ba ri bo'i gseb lta bu la gnas shing 'dod chags zhe sdang gti mug gi phyogs kyi sa 'dod pa'i ro chung ba mchil pa lta bu'i 'ching ba dang / lta ba ngan pa chu ltar zab pa la rnam par rgyu ba skye ba dang / 'chi ba'i 'gro ba'i lus 'di sgra dang / reg pa dang / ro dang / gzugs dang / dri la rtag tu sred pa gang mi dge ba'i las des dgod cing byas la de'i ngud mo 'byin pa ni mi myong gi bar du 'chi ba'i dus mi byed do/ /'dir tshigs su bcad pa/ rang gi sred pa grong gnas pa/ /sems ni nya 'dra rmongs pa yis/ /las byed tshe na dgar 'dzin la/ /myong ba'i tshe na ngu bar byed/ /gang tshe mi dge de yi las/ /lhag ma med par bcom zhing spangs/ /med gyur de ni de nas su/ /shi nas yi dags dud 'gror skye/ /lan grangs gzhan la myong ba'i las/ /gang gis gal te der mi skye/ / gal te der ni mi rnams dang / /skal mnyam mi ru skye bar 'gyur/ /de ni rtag tu dman pa yin/ /zil gyis non cing nams kyang ni/ /de sems dga' ba skye mi 'gyur/ /gang dang gang ni byed pa dag /don med dga' ba med byed dang / /bu dang chung ma nor dang 'bru/ /gsod dang 'ching bar byed pa dang / /de ni mi dge las kyis su/ /dga' med rgyu 'thun 'bras bu yi/ /kun du mi dga' rtag tu thos/ /yang dge slong de sems can dmyal ba yang sos kyi 'khor bdun pa tshor ba bdo ba la rtog par byed de/ sems can dag las gang gis der skye bar 'gyur snyam nas des thos pa las byung ba'i shes pas brtags na sems can bag la nyal bdo ba dang / zhe 'gras pa bdo ba dang / sems zab pa bdo ba'i sems can srog gcod pa mang po bag med pa la 'jug ste/ de dag lus dang bral nas ngan 'gro log par ltung ba sems can dmyal ba tshor ba bdo bar skye bar 'gyur ro/ /der ba tshwa dang / mtshon dang / me dang / ngam grog dang / g.yang sa dang / phur bu dang / me 'bar ba'i phreng ba'i rgyan byas pa'i tshor ba la rtag tu rgyun mi 'chad par nyin gcig bzhin du 'jug par 'gyur ro/ /de nas gzhan yang dge slong de las kyi 'bras bu'i de kho na nyid shes pa mya ngan las 'das pa'i grong khyer tshol ba na 'khor ba'i sdug bsngal gyi de kho na nyid shes pa sems can dmyal ba chen po thig nag gi 'khor la rtog par byed de/ ji ltar thig nag gi 'khor gzhan gang zhig yod snyam nas des thos pa las byung ba'i shes pas brtags na sems can dmyal bar sreg pa mi bzad pa'i tshor ba rtag tu 'dus pa zhes bya ba'i sems can dmyal ba mthong ste/ sems can dag las gang gis sems can dmyal ba der skye bar 'gyur snyam nas des thos pa las byung ba'i shes pas brtags na gang lta ba ngan pa'i bstan bcos kyi gtan tshigs dang dpe dag gis tshul khrims spangs pa'i mi ngam grog gam g.yang sar rab tu ltung ba yang dag pa ma yin pa thams cad kyi dbang du song ba de lus dang bral nas/ ngan 'gro log par ltung ba sems can dmyal ba tshor ba 'dus par skye bar 'gyur ro/ /der gnod pa 'di dag 'byung bar 'gyur te/ 'di lta ste/ mi de thag pa rab tu 'bar bas bcings nas dpag tshad du mar gyen du bteg bteg ste ngam grog dag tu 'dor bar byed/ skyes nas spu gri dang mtshon gyi sa phyogs rnams su yang de dag 'dor bar byed/ yan lag dang nying lag thams cad nas sgra 'byin pa na rang gi sems kyis bslus shing 'khor ba'i 'khor lor zhugs nas 'khyam pa/ gti mug gis mun pas log par byas shing tshal kun nas bsregs pa lta bu'i lus dag la khyi mche ba rab tu rno ba rnams kyis kun du za bar byed kyang gang de na 'dug pa de dag la skyob pa 'am dpung gnyen nam bde bar byed pa 'am/ dbugs 'byin par byed pa gang yang med do/ /gshin rje'i 'jig rten pa'i gshin rje'i mi de dag gis ci rigs par tshigs su bcad de smras pa/ log par lta ba'i gti mug gis/ /gti mug zhags bsgribs skye bo khyod/ /sems can dmyal ba'i gnod pa dag /shin du mi bzad 'dus pa thob/ /mi yi skyes bu tha ma dag /log par lta bas dge kun bsregs/ /de yis sems can dmyal dang 'brel/ /gnod pa mi bzad khyer te 'ongs/ /gang dag log pa'i dbang song ba/ /sems kyis yongs su bslus pa yi/ /skyes bu blo zhan de dag ni/ /sems can dmyal bar kun du 'gro/ /dgra gzhan shin du spang bar sla'i/ /sems kyi dgra ni spang bar dka'/ /de yis bcings pa'i mi dag ni/ /gshin rje'i gnas su khrid par byed/ /yul rnams la ni rtag rgyug cing / /dam pa'i chos la mi rgyug la/ /dam chos lam la rmongs pa ni/ /sems can dmyal ba chen por khrid/ /gdul ba'i nang na sems gdul dka'/ /me yi nang na me mchog ste/ /gdul dka' myur du 'gro ba ni/ /dmyal ba'i nang na dmyal ba yin/ /gang dag sems kyi dbang song ba/ /mi de sems can dmyal bar 'gro/ /gang dag mi bzad de zlogs pa/ /de dag sdug bsngal rjes mi 'gro/ /'dod chags mi bzad me gcig yin/ /gti mug mun pa zhes bya'o/ /zhe sdang mi bzad dgra yin te/ /'gro ba dgra gsum dbang du song / /sngon gyi sems kyi rjes zhugs pa/ /khyod kyis mi dge gang byas pa'i/ /rmongs pa de yi 'bras bu spyod/ /khyod kyis legs pa dag ma byas/ /rang gi sems kyis yongs bslus pa/ /gzhan gyi nor dag phrogs pa dang / /gzhan gyi bud med bsten pa yis/ /skye bo dag ni rtag tu bcings/ /de yi las kyi rnam smin gyis/ /khyod ni de ring dbang du gyur/ /mi yi tha ma rang gis su/ /las ngan byas pas ngur ci yod/ /mi gang gis ni nyes byas pa/ /phyi nas blo la 'gyod par 'gyur/ /tshwa sgor sa bon btab pa ltar/ /de la de yi 'bras bu med/ /'dod pa dngar ba chung ldan pa/ /rnam par smin pa tsha ba yin/ /rmongs pa gang zhig de sten pa/ /de ni mun pa mun nag 'gro/ /bu dang chung ma bde bya'i phyir/ /rmongs pas ngan pa gang byas pas/ /sems can dmyal bar gcig pu sreg /rang gi las kyi 'bras bus bslus/ /gang zhig bu smad dbang song ba/ /mi ni ngan par byas pa sten/ /de ni dmyal ba 'dir 'gro ste/ /khyod kyis de yi rjes su myong / /bu dang chung ma'i don mi 'dod/ /mdza' bshes don lta ga la yod/ /'chi ba'i dus ni byung ba na/ /nye bar gnas shing bsrung ba med/ /gang dag kun nas nyon mongs sems/ /gang dag sred pas yongs bslus pa/ /de dag de ltar grogs su 'gyur/ /ci phyir khyed ni bsreg mi bya/ /sngon ni yul gyi dbang byas shing / /sred pa dag gis yongs su bslus/ /bdag nyid ngan pa bdag nyid kyis/ /byas pas bdag nyid ci ngur yod/ /de ltar sems can dmyal ba tshor ba 'dus pa la gshin rje'i mi dag gis sems can dmyal ba de dag las rjes su bstan pa na/ ji tsam du de'i sdig pa'i las byas shing bsags pa bcom zhing spangs la zad par ma byas pa de srid du gnod pa drag cing mi bzad pa du ma dag lo 'bum phrag du mar myong bar 'gyur ro/ /de phyis de las grol zhing thar nas gal te mi dag dang skal ba mnyam par lan grangs gzhan la myong bar 'gyur ba'i las kyis phrogs pa med na/ de rgyu 'thun pa'i 'bras bus 'gro lding ba dang / bar ba ra'i yul dang / rgya mtsho'i dbus kyi yul dang sin du'i yul dang / zhar ba'i gling gi yul dang / gang na bran mchog tu sdug bsngal bar 'gyur zhing dbul ba'i bran du 'gyur/ sgo srungs dang yan lag dang / nying lag thams cad nyams shing ma tshang ba dang / lus skom pa dang / bkres pas yongs su gdungs shing grang ba dang tsha ba'i gzhir gyur pa dang / shin du sdug bsngal zhing gzhan gyis rtag tu gtse ba dang / byis pa dag gis dbyug pa dang / bong ba dag gis brdeg cing skye bo kun gyis brnyas par 'gyur/ bu dang chung mas kyang rnam par spangs par 'gyur zhing mngal nas skyes tshun chad mchog tu sdug bsngal bar 'gyur/ las kyi rnam par smin pa'i 'bras bu ni rgyu dang mtshungs pa dang / rkyen dang mtshungs pa yin te ji ltar sngar byas pa de phyis de bzhin du spyod par 'gyur ro/ /de nas dge slong de nyes par byas pa myong bar 'gyur ba'i las de mthong nas sems can dmyal ba mun pa la dmigs pa dang / 'khor ba la phal cher shin du yid byung bar 'gyur ro/ /yang rnal 'byor spyod pa'i dge slong de rtog par byed de 'di ltar las kyi 'bras bu'i de kho na nyid mthong ba la rtag tu brtson zhing 'gro ba shin du bsdams pa la rab tu spyod pa/ 'khor ba thams cad la yid byung ba/ bdud kyi 'ching ba mchog tu dam pa gcod pa/ bdud kyi yul gyi dngos po mi 'dod cing nyon mongs pa 'dod chags dag gi dngos po dang lhan cig 'dug par mi 'dod pa/ dga' ba'i 'dod chags kyi mod las byung ba'i sred pa la mngon par mi dga' ba'i dge slong yon tan gyi rnam pa de lta bu dag dang ldan pa de sa bla'i gnod sbyin dag gis mthong nas bar snang la spyod pa dag la mngon par bsnyad do/ /de ltar snga ma bzhin du sbyar te/ tshangs ris dag gis thos pa'i bar rgya cher snga ma bzhin du sbyar ro/ /de nas gzhan yang dge slong de sems can dmyal ba thig nag gi 'khor la lta bar byed de/ sems can dmyal ba thig nag gi 'khor gzhan yang gang zhig yod snyam mo/ /de sems can dmyal ba rab tu mi bzad pa zhes bya ba mthong ste/ des sems can dag las gang gis der skye bar 'gyur snyam na khyim pa gang gis 'os pa ma yin pa'i gnas mal dang / na ba'i gsos sman gyi rkyen gyi yo byad mang po dag la spyad pa 'chab pa dang / gzhan la snyad btags te phyugs gsod pa 'am/ lha la snyad btags pa 'am/ bram ze 'dod pa'i sdig pas de lus dang bral nas ngan 'gro log par ltung ba sems can dmyal ba rab tu mi bzad par skye bar 'gyur ba mthong ngo / /der gnod pa 'di dag 'byung bar 'gyur te/ 'di lta ste/ bya rog dang / bya rgod dang / phag rgod gtum po dag gis mig 'byin cing / phag dang 'khrugs pa'i sgra dang / gtun shing dang / me rab tu 'bar ba dang / dmyal ba'i srungs ma drag pa rab tu mi bzad pa yod do/ /sems can dmyal ba rab tu mi bzad par skye ba'i gnod pa 'byung ba ni 'di lta ste/ mig 'byin pa dang / lce gcod pa dang / yan lag dang nying lag thams cad gcod pa dang / lcags kyi snod rab tu 'bar ba dag nas zangs kyi khu ba ldud pa dang / lus thams cad la phur bu 'dzugs pa dang / rkang pa gcod pa dang / bya rog gis za ba dang / nad thams cad kyis gnod pa byed par 'gyur te/ ji tsam du de'i sdig pa'i las bcom zhing spangs la zad par ma gyur pa de srid du sems can dmyal ba mi bzad par lo 'bum phrag du mar ngu ba na mgon med cing grogs med la/ gshin rje'i mi dag gis gsod par 'gyur ro/ /de sems can dmyal ba de nas thar bar 'gyur te/ thar nas kyang gal te lan grangs gzhan la myong bar 'gyur ba'i las gang gis dud 'gro dang yi dags dag tu ma skyes la/ mi dag dang skal ba mnyam par mir skyes na/ de lag rdum dang long bar 'gyur zhing yun ring du gnas par mi 'gyur/ shi nas kyang srog chags las kyi lu gu rgyud kyis sbrel ba dag yang ngan song de dag kun du 'gro bar 'gyur la legs par byas pas ni legs pa dang / nyes par byas pas ni nyes pa 'thob par 'gyur te/ 'khor ba na skye zhing 'byung ba'i 'bras bu ni rgyu 'thun pa'i 'bras bu dang 'brel ba yin no/ /de nas gzhan yang dge slong de sems can dmyal ba thig nag gi 'khor lta bar byed de/ las gang gis sems can dmyal ba bya rgod kyis 'jigs par skye bar 'gyur snyam nas brtags na/ mi gang gis don du bya ba'i phyir mi bsad dam/ bcings sam/ bkres pa 'am/ skom par byas na/ de lus dang bral nas/ ngan 'gro log par ltung ba sems can dmyal ba bya rgod kyis 'jigs par skye bar 'gyur bar mthong ngo / /der gnod pa 'di dag 'byung bar 'gyur te/ 'di lta ste/ sems can dmyal ba pa'i sa gzhi lcags las byas pa dpag tshad brgya s tong phrag bcu yod pa mes rab tu bsregs shing lcags las byas pa'i 'bras bu zur gsum pa kha dog chu lta bu rab tu 'bar ba rnams kyis kun du gang ba de na sems can dmyal ba pa dag gshin rje'i chad pas gcod par byed pa rab tu mang po dag gis kun du gsod par byed pa na ral gri dang mda' bo che yod pa'i lus kyi shugs drag po dag gis gsod cing nyin mtshan du gnod pa byed do/ /mtshon rnams kyis gsod pa na/ gang gi tshe mgon med pa 'bros par 'dod pa de'i tshe/ gshin rje'i mi de dag gis ral gri dang / mda' bo che dang / mda' rab tu 'bar ba dag gis kun du gsod par byed cing thang la yang bkres pa dang skom pa yod pa'i 'tsho ba dang 'brel la chu med cing mgon med/ dbugs 'byin pa med cing skyabs med la/ pha rol gyi gnod pas bkol ba na/ kun du sdug bsngal thams cad dang ldan par 'gyur ro/ /'dir tshigs su bcad pa/ grogs mang dag dang lhan cig tu/ / nyes par byas pa'i las byed pa/ /de yi las kyi 'bras bu ni/ /gcig pu srid pa srid par spyod/ /ji ltar mi dag 'jig rten du/ /bdag nyid ngan byas rgyug pa ltar/ /de ltar me dang mtshon dag dang / /dug dang dgra dag gnas pa min/ /las dang 'bral ba ma yin gyi/ /rang gi gnyen 'dab kun dang 'bral/ /'jig rten pha rol dge ba dang / /mi dge 'gro zhing rjes su 'gro/ /gang na me tog yod pa yi/ /der ni dri dag rjes su 'gro/ /de ltar dge dang mi dge ba'i/ /las ni 'gro zhing rjes su 'gro/ /ji ltar phyogs char dri 'gro zhing / /nags tshal dag tu 'dus pa yis/ /bya dag nang par gyes pa ltar/ /srog chags 'dus pa de dang 'dra/ / dpal che ba dag chud gsan cing / /'jig rten gyi ni nyes byas pa/ /gti mug gis ni yongs su bslus/ /mi dge'i las dag ci mi byed/ /gang dag zhi ba mchog mi 'gro/ /gang dag lha'i gnas mi 'gro/ / de yi rgyu la mchog rmongs pa/ /mun pa'i nang na de mun gnag /de ltar dmyal bar btso ba na/ /de ni bye ba du ma ru/ /rang gis nyes par byas pa yis/ /sems can dmyal bar yongs su 'khyam/ /ji srid de yi mi dge ba/ /ngan byas bcom zhing spangs pa dang / /zad par ma gyur de srid du/ /'chi ba'i dus ni byed mi 'gyur/ /gang tshe de yi las kyis der/ /thams cad du ni byang gyur na/ /dmyal ba bya rgod 'jigs de las/ /de ni grol bar 'gyur ba yin/ /gal te de las de grol shing / /yi dags dud 'gror ma skyes la/ /mi rnams dang ni skal mnyam par/ /gal te mi ru skyes gyur na/ /de ni rnga mo spyod 'gyur zhing / /khal glang dag la spyod par 'gyur/ /rgod ma dag la spyod 'gyur zhing / /glang po kha sgyur rta rdzi 'am/ /bshor ba dag gi rgya thogs pa/ /dbul zhing tshe ni thung bar 'gyur/ /ngan par byas pa'i las dag dang / / skyon du bgrang ba'i las rnams ni/ /rgyu dang 'bras bu 'thun pas na/ /'bras bu de dang 'thun par 'gyur// //'phags pa dam pa'i chos dran pa nye bar gzhag pa bam po bdun pa/ de nas gzhan yang dge slong de sems can dmyal ba chen po thig nag gi 'khor la rtog par byed de/ sems can dmyal ba de'i 'khor la gzhan dang gzhan nas kun du lta bar mi byed do/ /sems can dmyal ba chen po thig nag gi 'khor bcu drug po 'di yang ji ltar sems can dmyal ba chen po yang sos kyi 'khor bzhin no/ /yang dge slong de sems can dmyal ba'i 'khor gnyis pa dag la brtags na las kyi chos kyi rnam par smin pa shes shing / nyes par byas pa'i las kyi 'bras bu rnam par smin pa'i snying po thams cad rig ste/ byas la bsags pa dang / bsags la mi byed pa dang / byas la ma bsags pa'o/ /de la byas las bsags ni myong bar 'gyur bar nges pa yin/ bsags la mi byed pa ni myong bar 'gyur bar nges pa ma yin/ byas la ma bsags pa 'di yang myong bar 'gyur bar nges pa ma yin no/ /dge slong des sems can dmyal ba gzhan la brtags na/ des thos pa las byung ba'i shes pas mthong ste/ las kyi thag pas rgyud phan tshun sbrel ba'i 'khor dag gi las kyi 'bras bu rnam par smin pa rnam pa gsum gyi de kho na nyid shes pa ni de yang las rnam pa du ma sna tshogs du ma dag dang / sems phal cher dmigs pa'i dbang du gyur pa sems kyi dbang du gyur pa'i sems can dag mthong nas skyo bar gyur to/ /dge slong des sems can dmyal ba gzhan la brtags na des thos pa las byung ba'i shes pas sems can dmyal ba chen po gsum pa bsdus gzhom zhes bya ba mthong ngo / /der las bsags pa gang gis sems can dag nyes par byas pa'i las k yis smin par 'gyur snyam nas des thos pa las byung ba'i shes pas brtags na mi dge ba'i las rnam pa gsum po byas la bsags pa so sor myong bar 'gyur ba'i 'bras bus sems can dag sems can dmyal ba'i bsdus gzhom du skye bar 'gyur ro/ /'di lta ste/ srog gcod pa dang / ma byin par len pa dang / 'dod pas log par g.yem pa mi dge ba gsum po 'di dag gi las kyis srog chags dag sems can dmyal ba bsdus gzhom du skye bar 'gyur ro/ /der sdig pa chen pos ni sems can dmyal ba'i gzhir skye bar 'gyur/ 'bring dang chung ngu dag gis ni 'khor du'o/ /de dag gi chen po dang 'bring dang chung ngu rnams kyis ni gnod pa yang chen po dang 'bring dang chung ngur 'gyur ro/ /de dag gi sems kyi dbang du song ba'i las kyis kyang tshe ring po dang 'bring dang thung ngur 'gyur/ de dag gi sems kyi dmigs pa chen po dang 'bring gi dbang gis kyang gnod pa chen po dang / 'bring du 'gyur ro/ /las rnam pa gsum du rnam par gzhag ste lus dang ngag dang yid kyi'o/ /dus gsum du rnam par gzhag ste/ 'bring dang chen po dang tha ma'o/ /yang rnam pa gsum ste/ 'dod pa'i khams su skyed pa dang / gzugs kyi khams su skyed pa dang / gzugs med pa'i khams su skyed pa'o/ /yang rnam pa gsum ste/ da ltar byung ba dang 'das pa dang ma 'ongs pa'o/ /yang rnam pa gsum ste/ tshe 'di la myong bar 'gyur ba dang / skyes nas myong bar 'gyur ba dang / lan grangs gzhan la myong bar 'gyur ba'o/ /yang rnam pa gsum ste/ dge ba dang mi dge ba dang lung du ma bstan pa'o/ /yang rnam pa gsum ste/ tshe dang 'brel pa dang / srid pa bar ma dang 'brel pa dang / tshe gzhan dang 'brel pa'o/ /yang rnam pa gsum ste/ mi dang mi ma yin par 'brel pa rab tu 'byung ba dag yin te/ mi dang mi ma yin par 'brel pa ni/ 'di lta ste/ mir gyur pa las sems can dmyal bar las kyis 'phangs pa'o/ /byed pa'i khyad par zhes bya ba ni gang ci tsam du byed pa rtsom pa de'i byed pa'i rnam pa de tsam du las kyi rnam pa nyid skye bar 'gyur te/ dge slong dag ji ltar mos pa'i rdzu 'phrul thob pa bzhin no/ /yang rnam pa gsum ste/ byed pa byas pa dang / mi byed pa byas pa dang / 'brel par byas pa'o/ /de la byed pa byas pa ni ji ltar sngar dge sbyong du gyur pa phyis de'i rjes su 'thun par dgra bcom pa'i bar du byas pa'o/ /mi byed pa byas pa ni gang dag dge sbyong du gyur nas legs par bya ba mi byed pa'o/ /'brel pa byas pa ni ji ltar tshe 'di las shi nas tshe rabs gzhan du skye bar 'gyur ba'o/ /yang rnam pa gsum ste/ bsam gtan dang 'brel pa dang / bsam gtan dang 'brel pa ma yin pa dang / rnam par smin pa dang 'brel pa ma yin pa'o/ /de la bsam gtan dang 'brel pa zhes bya ba ni ji ltar bsam gtan dang po'i sa nas/ bsam gtan gnyis pa'i sar 'brel pa yin te/ bsam gtan gsum pa 'am/ bzhi par ma yin no/ /bsam gtan dang 'brel pa ma yin pa ni sbyin pa dang / tshul khrims la sogs pa'o/ /rnam par smin pa dang 'brel pa ma yin zhes bya ba ni ji ltar dgra bcom pa zag pa zad pa'i rnam par smin pa myong bar 'gyur bar nges pa/ tshe dang 'brel pa med pa yin te/ de ltar 'jig rten las kyi dra ba dang 'brel pa rgya mtsho lta bu 'di kun phan tshun rag las shing skye ba'i rim pa'i las kyi rnam par smin par 'gyur te/ 'di la byed pa po 'am tshor ba po 'am 'dod rgyal gyi las ni gang yang med do snyam mo/ /dge slong de de ltar sems pa na bdud kyi sde rnam par 'jigs par byed cing dge ba'i chos sgrub par byed do/ /sems can dmyal ba bsdus gzhom gyi las kyi rnam par smin pa chen po yang rjes su mthong ste/ ji ltar na sems can dmyal ba bsdus gzhom gyi gzhir skye bar 'gyur snyam na des srog gcod pa dang / ma byin par len pa dang / 'dod pas log par g.yem pa kun du bsten cing bsgoms te mang du byas pa dang / las kyi nyer bsdogs pa dang / las kyi mjug dang / las mngon par bsten cing bsgoms te mang du byas pas sems can dmyal ba bsdus gzhom gyi 'khor du skye bar 'gyur ba mthong ngo / /der sems can dmyal ba gzhi'i gnod pa 'di dag 'byung ste/ 'di lta ste/ shing ljon pa'i khrod du bya rgod mchu rab tu 'bar ba dag gis bzung nas rgyu ma brus te za bar byed do/ /chu bo phur bus gang ba zhes bya ba na/ phur bu ring po rab tu 'bar ba der bcug nas gshin rje'i mis yang ral gri rab tu 'bar ba mang po dag gis gsod par byed do/ /de der 'dug pa na tshor ba drag cing rtsub pa gzhan dang mtshungs pa med pa dpe zla med pa dag myong bar 'gyur ro/ /'di lta ste/ phur bu rab tu 'bar ba'i tshor ba ni phur bu rab tu 'bar ba dag gis 'bigs par byed cing sems can dmyal ba de dag gshin rje'i mi de dag gis bzung nas de bzhin du skyod de sems can dmyal ba de dag phan tshun du bskyod pas rnam par 'khrugs shing ngu bar byed do/ /de na zangs dmar po bskol cing bzhus pa rab tu 'bar bas lus shing skam lta bur byed de/ rmongs par byed cing sreg par byed do/ /phur bus gang ba'i chu bo der bskol ba na/ sems can dmyal ba de dag kha cig ni lus rtswa ltar rab tu sreg go/ /kha cig ni rdo'i lci ba lta bur nub bo/ /kha cig ni lus nya lcibs ltar chu 'gram du byung ngo / /kha cig ni lus nya lta bu la bya rgod kyi mchu rab tu 'bar ba des za'o/ /kha cig ni lus mar sar gyi gong bu ltar zhu'o/ /kha cig ni lcags rab tu 'bar ba lta bu'i rdo bas lus kyi khog pa bye ma snyim pa nas gtor ba bzhin dum bu brgya 'am stong du rlog go/ /kha cig ni ba tshwas sreg pa na zangs sam lcags dag nang du bcug pa bzhin du zhu'o/ /kha cig ni phra skam rab tu 'bar ba dag gis bzung nas yang mtshon spu gri lta bus kun du gsod do/ / kha cig ni lus thags ltar cher brgyangs nas gsod do/ /kha cig ni khas bub tu bzhag nas gsod do/ /kha cig ni bum pa'i nang du 'jug par byed do/ /kha cig ni bum pa de'i nang du bcug nas der mon sran gre'u btso ba bzhin du steng du 'byung zhing 'og tu 'jug go/ /kha cig ni steng du byung nas ngu'o/ /kha cig ni gcig la gcig 'jus nas ngu'o/ /mgon med pa kha cig ni bya rgod dang / khwa dang / wa dang / khyi rab tu 'bar ba dag gis sa gzhi rab tu 'bar ba na gnas pa dag bzung nas za ste/ nyin gcig bzhin du tshor ba rnam pa sna tshogs myong ngo / /de ltar rang gi sems kyis bslus pa de lta bu de dag ni 'dod pas log par g.yem pa kun du spyod cing ma byin par len pas kun nas bslang ba la dmigs pa de dag ni tshor ba'i rnam pa 'bum phrag du ma myong bar 'gyur ro/ /yang sems can dmyal ba kun nas mgon tshol ba/ skyabs tshol ba de dag bdag cag nyon mongs pa 'di las skyob pa su zhig yod snyam nas kun du rgyug cing ngu ba na/ gshin rje'i mi de dag gis gtun shing rab tu 'bar ba dag gis bsnun cing chu bo dang / shing ljon pa dang / brag rab tu 'bar ba'i gseb dang / sman ljong dang / phu chu'i gseb dang / ri gseb dag tu shin du bcug nas gnod pa rnam pa sna tshogs dag byed de/ 'di lta ste/ shing ljon pa shin du mtho ba'i khar khrid nas yang de nas sa gzhi phur bu btsugs pa'i steng du rab tu 'bar bar byed cing de der yan lag bye brag tu nyams pa brgya 'am stong du 'gyur ro/ /yang sems can dmyal ba de dag gshin rje'i mi dag gis bzung nas/ lo ma ral gri'i nags tshal lta bur bcug ste/ 'dab ma spu gri lta bu 'bar bas gtser to/ /rang gi las kyis shing ljon pa de la bud med nyams dga' ba cha byad me tog gi phreng ba dang / phye ma dang byug pas lus rnam par glubs pa/ rgyan gyi cha byad mchog tu bzang bas mngon par brgyan pa/ shin tu gzhon zhing sen mo gtsang la sgeg bag can du chas pa byis pa so so'i skye bo thams cad kyi yid 'phrog par byed cing dga' ba sna tshogs dang ldan pa/ rin po che rnam pa sna tshogs kyi rgyan bkod pa thogs pa mthong ngo / /mthong nas sems can dmyal ba de shing drung du song ste/ 'di snyam du sems so/ /'di ni gang mir gyur cing mi byed pa na bdag gi yin no snyam nas rang gi las kyis bsgribs pa de shing de la 'dzeg par byed do/ /de shing de la 'dzeg pa na lo ma ral gri lta bu de dag gis sha gcod par byed do/ /sha bcad nas rgyus pa gcod do/ /rgyus pa bcad nas rus pa gcod do/ /rus pa bcad nas rkang 'byin par byed do/ /de ral gris kun du gshegs pa na/ bud med de la mchog tu chags pa'i blos shing de la 'dzeg par byed do/ / de las gnod pa 'di dag myong bzhin du sems kyis bslus pa de shing de la 'dzeg par byed do/ /shing de'i thor to la 'dzegs pa dang bud med de sa'i steng na gnas shing skyes bu la lta ba mthong ngo / /skyes bu la kun du chags pa'i mig gis rnam par lta bar byed cing skyes bu de la tshig snyan pas 'bod la sngar 'dzum zhing snyan par smra ste/ 'di ltar bdag ni khyod kyi slad du 'dir mchis na ci'i slad du bdag la tshig mi gsung zhing bdag gi lus dang mjal bar mi mdzad/ de nas sems can dmyal ba des las sprul pa byas pa de mthong nas yang kun du 'dod chags kyi sems kyis shing lo ma ral gri lta bu de las 'bab par byed do/ /de 'bab pa na lo ma spu gri rab tu 'bar ba lta bu de dag la kha gyen du lta ste/ de dag gis kyang sems can dmyal ba de dag sngar sha btogs so/ /phyi nas rgyus pa gcod do/ /de nas rus pa/ rus pa'i 'og tu gnad thams cad gcod do/ /de nas rkang brus te shin du gnod par byas so/ /de nas sems can dmyal ba snying la 'dod pa'i sred pas yongs su gdungs pa de dag gis bcad cing gsheg la gnad dang gnad gcod bzhin du bud med de la lta'o/ /'di ltar de la lta ba na bya rgod kyi mchu rab tu 'bar bas mig 'byin cing spu gri rnon po lta bus de'i rna ba yang gcod/ ngu ba na 'dab ma rab tu 'bar ba dag gis lce gcod cing de'i sna yang gcod de/ de'i yan lag dang / nying lag thams cad gcod do/ /'dod chags kyi sred pas yid phrogs pa yang sa la 'bab par byed pa dang yang bud med de shing khar 'dzeg go/ /'dzegs pa dang / de mthong nas yang de shing gi thor to de la 'dzeg par byed pa snga ma bzhin du sbyar te/ de ltar las kyi dbang gis 'phangs par rang gi sems kyis yongs su bslus pa'i sems can dmyal ba de lo 'bum phrag du ma lo bye ba 'bum phrag du mar sems can dmyal bar yongs su 'khyam mo/ /de ltar sems can dmyal ba de don gang gi phyir yongs su gdungs shing de ltar 'dod pas log par g.yem pa'i rgyus bsregs kyang de dag 'dod chags dang bral bar mi byed do/ /de ltar sems 'di ni thog ma med pa'i dus nas sems can dmyal ba dang / dud 'gro dang / yi dags su song ba yin te/ de lta bas na sems can dmyal ba dag tu 'gro ba'i sems can gyi sems 'di la yid brtan par mi bya'o/ /yang sems can dmyal ba bsdus gzhom de na ri bya rgod dang nye ba zhes bya ba yod de/ de na sems can dmyal ba skom pa dang bkres pas gdungs pa de dag gis brgyugs pa dang / de'i tshe ri bya rgod dang nye ba la bya rgod lcags kyi mchu rab tu 'bar ba lus che zhing lto che ba dag gnas te/ de dag gi lto'i nang na me mdag yod do/ /gang gi tshe sems can dmyal ba dag mgon med cing skyabs med pa na ri de la 'dzeg par 'gyur ro/ /de nas mgon med pa ngu 'bod pa dag la bya rgod de dag gis glad pa btogs shing glad rgyas brus la mig kyang 'byin par byed do/ /gang gi tshe de'i glad pa dang glad rgyas dag 'thungs nas mgo yang 'dor bar byed do/ /klad rgyas dang mig phyung ba de dag sems can dmyal ba'i mun pa thibs po'i nang du brgyugs pa dang de las gzhan pa las kyis byas pa'i bya rgod lus che zhing kho lag che ba lto'i nang na me mdag yod pa'i bya rgod 'ongs te/ des sems can dmyal ba de dag bzung nas za'o/ /de ltar lto'i nang du song ba de dag lo 'bum phrag du mar sreg kyang de srog gcod pa kun du bsten cing bsgoms te mang du byas pa'i mthus 'chi ba'i dus mi byed do/ /'dod pas log par g.yem pa kun du bsten cing bsgoms te mang du byas pa'i mthus ni lo ma ral gri lta bu'i nags su bud med mthong ba yin no/ /ma byin par len pa kun du bsten cing bsgoms te mang du byas pa'i mthus ni sems can dmyal ba'i phyogs gzhan du 'gro'o/ /de na yul chu bo mtha' yas pha rol zhes bya ba zangs bskol cing bzhus pas rab tu gang ba'i chu bo de'i pha rol na sems can dmyal ba dag gis bza' ba dang / bca' ba dang / gnas mal mang zhing bzang ba dang / grib ma dang / nags tshal shin du gsal ba dag mthong zhing chu bo rab tu 'bab pa dang / lteng ka'i phyogs bsil ba dag mthong ste/ des de dag mthong nas snga ma bzhin du sbyar te brgyugs pa dang / gcig la gcig ngu zhing 'khrugs so/ /grogs po dag tshur shog tshur shog /bza' ba dang / bca' ba dang / gnas mal bde ba dag rnyed pa snga ma bzhin sbyar te/ de nas sems can dmyal ba de dag sgra thos nas sems can dmyal ba gzhan mgon 'dod pa/ skyabs 'dod pa/ dpung gnyen 'dod pa dag kun du rgyug go/ /de nas sems can dmyal ba de dag 'dus nas/ kye bdag cag gi bde ba dang mgon skyabs de phyogs gang nas thob par 'gyur zhes smra'o/ /de nas sems can dmyal ba de dag gis sems can dmyal ba gzhan dag mthong nas smras pa/ kye grogs po dag chu bo mtha' yas pha rol zhes bya ba'i pha rol na/ bza' ba dang / bca' ba dang / gnas mal dang / tshal dang / nags tshal mang po dag la ltos shig ces bya ba snga ma bzhin du sbyar te/ de nas sems can dmyal ba de dag thams cad la chu bo mtha' yas rab med des phan tshun gnod pa ro nye rab tu bskol ba bzhu ba'i dbu bas khebs pa dag tu de dag thams cad der lhung ngo / /lhung nas kha cig ni mar sar gyi gong bu ltar zhu'o/ /kha cig ni khwa mchu rab tu 'bar ba dag gis za'o/ /kha cig ni nya'i kha rab tu 'bar bas mid de lus kyi yan lag dang nying lag zhu ba de dag thams cad chu bo de'i nang du de dag thams cad zhu bar gyur to/ /de dag gi las ji ltar rigs pa rjes su bstan pa tshigs su bcad de smras pa/ khyod ni sems kyis bslus nas su/ /bu smad gang gi don byed pa/ /sdig las byung ba'i zhags pa yis/ /sems can dmyal ba'i gnas su khrid/ /blo ngan zhen pa khyed rnams kyis/ /gang gi don du sdig byas pa'i/ /bu dang chung ma grogs po dang / /gnyen 'dab rtsa lag gang du song / /mi yi sar ni khyod kyis su/ /bdag la nges par sdug ma byas/ /mi yi tha ma bu yi don/ /des na sdig pa khyod kyis byas/ /gang gis sngan chad sdig byas pa/ /phyis ni gnod par mi 'gyur min/ /bu dang chung mas bslus pa de/ /sems can dmyal ba drag por 'gyur/ /chung ma gnyen gyis ci byed cing / /bu des ci zhig byed par 'gyur/ /las kyi lam rgyags yod pa ni/ /gcig pu sems can dmyal bar sreg /bde ba 'byung ba ma smad pa/ /dge ba'i las ni ma byas pas/ /byis pa gti mug gis bslus pa/ /phyi nas don byed ci mi gdung / /gang zhig gti mug gis bslus pa/ /'dod chags zhe sdang rjes su 'gro/ /bu dang chung ma bde bya'i phyir/ /de dag kun gyi 'og tu 'gro/ / srog chags las kyi skye gnas dang / /rang gi las kyi 'bras bu spyod/ /legs byas lha yi 'jig rten du/ /nyes par byas pas de bzhin dma'/ /de ltar gshin rje'i mi de dag gis sems can dmyal ba bsdus pa de dag la rjes su bstan pa/ gang khyed cag gis byas pa'i las 'di dag su zhig spyod par 'gyur te dge ba 'am/ mi dge ba rang gis byas pa spyod par 'gyur zhing ma byas pa ni 'ong bar mi 'gyur la byas pa ni chud za bar mi 'gyur ro/ /de ltar sems can dmyal ba de dag ji srid du sdig pa'i las bcom zhing spangs la zad par ma gyur pa de srid du/ sems can dmyal ba bsdus gzhom du lo 'bum phrag du mar btso bar 'gyur ro/ /de ltar srog gcod pa dang / ma byin par len pa dang / 'dod pas log par g.yem pa kun du bsten cing bsgoms te mang du byas pa dag gi 'bras bu 'thob par 'gyur ro/ /ji ltar khyed cag gis de dag nyid thob pa 'di ltar sems can dmyal ba de dag las thar nas/ gal te lan grangs gzhan la myong bar 'gyur ba'i las kyis yi dags dang dud 'gro dag tu ma skyes la mi rnams dang skal ba mnyam par mir skyes na de tshe thung zhing dbul la chung ma ngan pa dang / de gzhan gyi chung ma la rab tu chags par gyur pa 'am de chung ma med par 'gyur la brnyas shing gzhan gyis bkol bar 'gyur te/ de ltar las de dang rgyu 'thun pa'i 'bras bu'i las kyi mthus bslus pa'i sems can dmyal bar 'gro ba la 'di dag thams cad 'byung bar 'gyur ro/ /de nas gzhan yang dge slong las kyi 'bras bu rnam par smin pa shes pa des sems can dmyal ba chen po bsdus gzhom gyi 'khor la brtags na/ des tshor ba tshad med pa dang / 'bras bu a la bud lta bur gcod pa dang / gnad dang / gnad gcod pa dang / bsdus pa dang / 'jigs par lta ba dang / nyam nga ba mang ba dang / gnod pa mi bzod pa dang / a tsa zer ba dang / kyi hud zer ba dang / rgyob shig pa dang / mchi ma'i rgyun me lta bur mi 'chad pa dang / dbang po thams cad 'gags pa dang / pad ma ltar gas pa dang / pad ma chen po ltar gas pa dang / me thab dang / lcags kyi me'i ra ba mthong ste/ 'di dag ni sems can dmyal ba chen po bsdus gzhom gyi 'khor bcu drug yin no/ /de las gang gis der skye bar 'gyur snyam nas dge slong de sems par byed de/ gang mi dge ba byas pa rnam pa gsum du 'gyur ba mthong ste/ 'di lta ste/ srog gcod pa dang / ma byin par len pa ni snga ma bzhin no/ /'dod pas log par g.yem pa kun du bsten cing bsgoms te mang du byas pa de ni de'i myong bar 'gyur bar nges pa yin te/ sems can dmyal ba'i las kyis tshor ba tshad med par skye bar 'gyur ro/ /gang bud med 'os pa ma yin pa la tshul bzhin ma yin pa'i 'dod pas log par bsten pa de ni sems can dmyal ba tshor ba tshad med par skye bar 'gyur te/ der gnod pa 'di dag 'byung bar 'gyur ro/ /'di lta ste gsal shing rab tu 'bar bas ro smad du 'bigs par byed de/ ro smad du bcug pa'i gsal shing de yang gal te rgyab 'bigs par byed/ gal te ltor/ gal te dbus su/ gal te rked pa'i phyogs su/ gal te phrag par/ gal te dpung mgor/ gal te mid par/ gal te khar/ gal te glad rgyas 'bigs/ gal te rna bar 'bigs te/ de ltar sems can dmyal ba de'i gsal shing de ni yan lag dang / nying lag thams cad 'bigs par byed/ gnod pa chen por byed/ sreg par byed/ yan lag thams cad 'tshed par byed de/ de gnod pa de dag myong bar byas nas tshor ba mi bzad pa yang rjes su myong bar byed do/ /'di lta ste/ lcags kyi phra skam rab tu 'bar bas rlig pa 'byin par byed cing bya rgod kyis kyang bzung nas za ste/ ji tsam du byas la bsags pa'i las bcom zhing spangs la zad par ma gyur pa de srid du ngu skad 'don to/ /gang gi tshe de'i las zad par gyur pa de'i tshe sems can dmyal ba de las thar par 'gyur ro/ /thar nas kyang gal te lan grangs gzhan la myong bar 'gyur ba'i las kyis yi dags dang dud 'gro dag tu ma skyes la mi rnams dang skal ba mnyam par mir skyes na/ de'i mi dge ba'i las kyi rgyu 'thun pa'i 'bras bu des ma ning du 'gyur ro/ /de nas gzhan yang dge slong des sems can dmyal ba chen po bsdus gzhom gyi 'khor la brtags na/ des sems can dmyal ba 'bras bu a la bud lta bur gcod pa zhes bya ba mthong ngo / /der sems can dag las gang gis skye bar 'gyur snyam na des srog gcod pa dang / ma byin par len pa dang / 'dod pas log par g.yem pa kun du bsten cing bsgoms te mang du byas pas de sems can dmyal ba 'bras bu a la bud lta bur gcod par skye ba mthong ngo / /der 'dod pas log par g.yem pa rnam pa du zhig byas pa yin snyam na gang bud med 'os pa ma yin pa'i khar bcug na de lus zhig nas ngan 'gro log par ltung ba sems can dmyal bar skye ste/ de la gnod pa 'di dag 'byung bar 'gyur ro/ /'di lta ste/ gshin rje'i mis de'i khar phur bu bcug nas brdung bas rdung bar byed de/ de phur bu brdungs pa des gal te ltag par phug nas 'byung bar byed pa bsgul ba dang rna bar 'byung ngo / /lcags kyi snod kyi nang du zangs rab tu bskol ba khar blugs so/ /des de'i mchu bsregs nas lce sreg go/ /lce bsregs nas rkan sreg ste de ltar mid pa bsregs pa nas lto'i bar du bsregs te ro smad du 'byung ngo / /'di dag ni 'dod pas log par g.yem pa kun du bsten cing bsgoms te mang du byas pa'i las kyi 'bras bu rnam par smin pa yin no/ /sems can dmyal ba de tshor ba'i rnam pa de dag myong ba ni ji srid du de'i sdig pa'i las bcom zhing spangs la zad par ma byas pa de srid du lo bye ba 'bum phrag du mar sreg cing 'tshed do/ /de de las thar bar 'gyur te/ thar nas kyang gal te lan grangs gzhan la myong bar 'gyur ba'i las kyis ma phrogs te/ yi dags dang dud 'gro dag tu ma skyes la/ mi rnams dang skal ba mnyam par mir skyes na/ las de dang rgyu 'thun pa'i 'bras bus de'i kha nas dri rul pa lta bu 'byung ste/ srog chags gang gis tshor ba kun yid 'byung bar 'gyur ro/ /de nas gzhan yang dge slong las kyi 'bras bu rnam par smin pa shes pa des sems can dmyal ba chen po bsdus gzhom gyi 'khor la brtags na sems can dmyal ba gnad dang / gnad gcod pa zhes bya ba mthong ngo / /der sems can dag las gang gis skye bar 'gyur snyam na/ gang gis srog gcod pa dang / ma byin par len pa kun du bsten cing bsgoms te mang du byas pa des de sems can dmyal ba chen po gnad dang gnad gcod pa skye bar mthong ngo / /gang 'dod pas log par g.yem pa la mngon par dga' bar byas pa'i rnam pa ni 'di dag yin te/ 'di lta ste/ bud med gzhan 'dod chags mi 'dod pa de'i mngal ma yin par mthus bcug na/ de lus dang bral nas ngan 'gro log par ltung ba sems can dmyal ba gnad gcod par skye bar 'gyur ro/ /de la srog gcod pa dang / ma byin par len pa dag gi tshor ba gang yin pa ni snga ma bzhin du sbyar ro/ /'dod pas log par g.yem pa'i bye brag ni 'di lta ste/ dza ra dza ra nyis 'gyur du byas pa bsregs pa rab tu 'bar ba dag gis kha 'gengs te/ ji srid du de'i sdig pa'i las bcom zhing spangs la zad par ma gyur pa de srid du mgon med pa lo 'bum phrag du mar ngu 'bod do/ /de phyis sems can dmyal ba de las thar bar 'gyur te/ thar nas kyang gal te lan grangs gzhan la myong bar 'gyur ba'i las kyis yi dags dang dud 'gro dag tu ma skyes la/ mi rnams dang skal ba mnyam par mir skyes na las de dang rgyu 'thun pa'i 'bras bus de'i chung ma gzhan dag la rab tu chags par 'gyur ba bzlog par mi nus te/ byas la bsags pa'i las kyi rnam par smin pa ni tshor ba ma myong gi bar du chud za bar mi 'gyur ro/ /de nas gzhan yang dge slong des sems can dmyal ba bsdus gzhom gyi 'khor la brtags na das sems can dmyal ba 'jigs par lta ba zhes bya ba mthong ngo / /der srog chags dag las kyi rnam par smin pa gang gis skye bar 'gyur snyam na des srog gcod pa dang / ma byin par len pa dang / 'dod pas log par g.yem pa bsgoms te mang du byas pa/ byas la bsags pa de ni sems can dmyal ba 'jigs par lta bar skye bar 'gyur ba mthong ngo / /de la ji ltar na srog gcod pa dang / ma byin par len pas 'gyur snyam na snga ma bzhin du sbyar ro/ /'dod pas log par g.yem pa ni gang gis byis pa gzhan du bzhin du mthus lba ba'i gnas su bcug pa ni de lus dang bral nas ngan 'gro log par ltung ba sems can dmyal ba 'jigs par lta bar skye bar 'gyur ro/ / der gnod pa 'di dag 'byung bar 'gyur te/ 'di lta ste/ sems can dmyal ba der sngon mir gyur pa na de'i bu gang yin pa mthong ste/ las kyis byas pa de la 'di ltar de ni mir gyur pa na mir gyur pa bdag gi yin no snyam du sred pa'i yon tan 'byung ngo / /de nas bu de la gshin rje'i mi rnams kyis phur bu dag 'debs shing de ltar sba ba'i gnas su phur bu dag btab pa mthong ngo / /de mthong nas bu de la 'di ltar gnod pa 'byung ba de'i rnam pa yod pa de srid du yid la sdug bsngal skye zhing / gang la sdug bsngal gnod pa'i me 'byung ba de'i sdug bsngal gyi cha bcu drug yid la sdug bsngal gyis gnod pa skye bar 'gyur te/ yid kyi sdug bsngal khyad par che'o/ /lus kyi sdug bsngal 'di dag 'byung ste/ de la gnod pa 'byung bar 'gyur ba ni 'di lta ste/ gshin rje'i mi dag gis kha sbub du bzhag nas/ lcags rab tu 'bar ba'i snod kyi nang du zangs rab tu 'bar bas de'i sba ba'i gnas su ldugs so/ /de la de blugs pa dang / sba ba'i gnas nas long ka sreg go/ /long ka bsregs nas rgyu ma sreg go/ /de yang bsregs nas snying sreg go / snying yang bsregs nas mcher ba sreg go/ /mcher ba yang bsregs nas glo ba sreg go/ /glo ba bsregs nas ol kong sreg go/ /ol gong bsregs nas mid pa sreg ste/ mchil ma yang bsregs nas lce'i drung du sreg go/ /lce'i drung du yang bsregs nas lce sreg go/ /lce bsregs nas rkan sreg go/ /rkan bsregs nas glad pa sreg go/ /glad pa bsregs nas glad rgyas sreg ste/ 'bar ba de 'og tu byung nas 'gro'o/ /de ltar 'dod pas log par g.yem pa 'di ni lo 'bum phrag du mar las kyis byas pa'i bu dag mthong ste/ de lus dang yid la sdug bsngal gyis gnod pa na ji srid du de'i sdig pa'i las bcom zhing spangs la zad par ma byas pa de srid du lo 'bum phrag du mar sreg ste/ 'chi ba'i dus mi byed do/ /de phyis de las thar par 'gyur te/ thar nas kyang gal te lan grangs gzhan la myong bar 'gyur ba'i las kyis yi dags dang / dud 'gro dag tu ma skyes la de mi rnams dang skal ba mnyam par mir skyes na las de dang rgyu 'thun pa'i 'bras bus das khu chu nyams par 'gyur zhing de bu med par 'gyur la de ma ning zhes bya ste skye bo kun gyis smad par 'gyur ro/ /de nas gzhan yang dge slong de sems can dmyal ba chen po bsdus gzhom gyi 'khor la rtog par byed de/ 'khor gzhan gang zhig yod snyam mo/ /de thos pa las byung ba'i shes pas sems can dmyal ba gzhan 'khums pa zhes bya ba 'khums pa'i rang bzhin can yod par mthong ngo / /der sems can dag las gang gis skye bar 'gyur zhe na/ gang gis de phyugs rmig zlum po gcig gi mngal du bud med gzhan zhig yin par bsams te/ de la spyad do snyam pas bcug na de lus dang bral nas ngan 'gro log par ltung ba sems can dmyal ba 'khums par skye bar 'gyur ro/ /der gnod pa 'di dag 'byung bar 'gyur te/ 'di lta ste/ ba de dag gam/ rta rgod ma de dag la bdag gi snying gis gang sngon chags pa'i lus yin par bsam pa'i ba 'am/ rta rgod ma las kyis byas pa sems can dmyal bar mthong ngo / /de 'dod chags kyis zil gyis non pa'i sems kyis ba 'am rta rgod ma de la bsnyags so/ /de dag gi khong pa'i nang na lcags kyi me mdag rab tu 'bar ba dag gis gang ste/ gal te de dang phrad na de tshul bzhin ma yin pa'i las byas pa'i sgo des khong pa'i nang me mdag gis gang ba der 'jug par 'gyur te/ de de'i khong pa mun pa der lo 'bum phrag du mar sreg cing 'tshed de ngu bar yang mi nus so/ /de ji srid du rnam pa du mar bcom zhing spangs la zad par ma gyur pa de srid du 'tshed do/ / de phyis de las thar bar 'gyur te/ thar nas kyang gal te lan grangs gzhan la myong bar 'gyur ba'i las kyis dud 'gro dang yi dags dag tu ma skyes la gal te mi rnams dang skal ba mnyam par mir skyes na gang du rang gi chung ma ma yin pa gzhan dag la byas la bsags pa/ 'dod pas log par g.yem pa rgyu 'thun pa'i 'bras bus de yul de lta bur skye bar 'gyur ro/ /de nas gzhan yang dge slong des gang sems can dmyal ba chen po de'i 'khor la brtags na/ des thos pa las byung ba'i shes pas sems can dmyal ba nyam nga ba mang ba zhes bya ba mthong ngo / /der sems can dag las gang gis skye bar 'gyur snyam na de dag gang gis srog gcod pa dang / ma byin par len pa dang / 'dod pas log par g.yem pa kun du bsten cing bsgoms la mang du byas pas 'gyur ba mthong ste/ srog gcod pa dang / ma byin par len pa ni snga ma bzhin no/ /'dod pas log par g.yem pa ni skyes pa gang zhig skyes pa la 'jug par byed na/ de lus dang bral nas ngan 'gro log par ltung ba'i sems can dmyal ba nyam nga ba mang bar skye bar 'gyur ro/ /byas la bsags pa'i las kyi mthus der gnod pa 'di 'byung bar 'gyur te/ 'di lta ste/ skyes pa de nyid sems can dmyal ba der mthong ste/ skra rab tu 'bar zhing lus thams cad rab tu 'bar la lus rdo rje ltar sra ba des 'dzin pa ni ji ltar bye ma chang ba nas gtor ba de ltar yan lag dang nying lag thams cad gnod pa byed do/ /de mi dge ba'i las kyis shi nas yang 'tsho bar 'gyur te/ de skyes pa rab tu 'bar ba des 'jigs shing zhum par byed do/ /des ngam grog de dag mthong ste/ de'i nang du lhung ngo / /de nam mkha' la gnas pa dang / ji ltar de yungs 'bru tsam du yang mi snang ba de ltar khwa mchu rab tu 'bar ba dag 'ongs nas dum bur gcod do/ /de yang byung bar gyur nas sa la lhung ba dang der wa kha rab tu 'bar ba dag 'ongs nas za bar byed do/ /gal te de'i rus pa dag zad par btogs na yang skye bar 'gyur te/ de byung ba dang / gshin rje'i mi dag gis lcags kyi rdza ma rab tu 'bar ba dag gi nang du 'tshed do/ /de ltar ji srid du mi dge ba'i las byas shing bsags pa bcom zhing spangs la zad par ma byas pa de srid du lo 'bum phrag du mar 'tshed cing za la phye mar rlog go/ de phyis sems can dmyal ba nyam nga ba mang ba de las thar bar 'gyur te/ thar nas kyang de gal te lan grangs gzhan la myong bar 'gyur ba'i las kyis yi dags dang / dud 'gro dag tu ma skyes la mi rnams dang skal ba mnyam par mir skyes na/ 'dod pas log pas log par g.yem pa'i rgyu 'thun pa'i 'bras bus de'i chung ma du ma chud za zhing chung ma gcig kyang mi 'grub la kun mi gzhan gyi drung du 'gro bar 'gyur ro/ /de nas gzhan yang dge slong des sems can dmyal ba chen po bsdus gzhom gyi 'khor la rtog par byed de sems can dmyal ba chen po bsdus gzhom gyi 'khor gzhan gang zhig yin snyam mo/ /de thos pa las byung ba'i shes pas sems can dmyal ba gnod pa mi bzad pa zhes bya ba mthong ngo / /der sems can dag las gang gis skye bar 'gyur snyam nas des brtags na/ gang gis srog gcod pa dang / ma byin par len pa dang / 'dod pas log par g.yem pa kun du bsten cing bsgoms te mang du byas pas 'gyur la de la srog gcod pa dang / ma byin par len pa ni snga ma bzhin no/ /'dod pas log par g.yem pa ni sde'i tshogs gzhan gyi bud med thob nas skyes pa mang po dag la byin zhing bdag nyid kyang mngal lam mngal ma yin par 'jug na de lus dang bral nas ngan 'gro log par ltung ba sems can dmyal ba gnod pa mi bzad par skye bar 'gyur ro/ /der gnod pa 'di dag 'byung bar 'gyur te/ 'di lta ste/ gshin rje'i mi rnams kyis rkang pa gyen du shing khar btags shing de gyen du btags pa la mes sreg ste/ gang gis de'i kha la sogs pa lus thams cad sreg cing de'i tshe de'i mig shin du sdug gu byung zhing skyes pa dag mes sreg go/ de ltar na sems can dmyal ba de'i tshor ba drag pa tsha ba rtsub pa bzod par dka' ba yin no/ /de tshor ba des nyam thag pa na 'bod cing ngu skad 'byin la ngu zhing khro'o/ /sems can dmyal ba de skad 'byin pa de'i khar me bcug ste/ kha'i nang du me bcug pas glo ba dang / mcher ba dang / pho ba dang / long ka dang / 'doms dang / gzhang bsregs pa nas rkang pa'i bar du bsregs so/ /de sreg pa na yang nyam thag pa'i tshor ba myong bar 'gyur ba'i khwa de dag 'ongs nas de'i lus la za bar byed do/ /de tshor ba gnyis kyis zhen nas sreg cing ngu ste/ de ltar sreg pa na ji srid du de'i sdig pa'i las bcom zhing spangs la zad par ma byas pa de srid du de 'di ltar lo 'bum phrag du mar sems can dmyal ba de'i tshor ba drag cing tsha la mi bzad pa gzhan dang mtshungs pa med pa lo 'bum phrag du mar myong bar 'gyur ro/ / de sems can dmyal ba de las thar par 'gyur te/ thar nas kyang gal te lan grangs gzhan la myong bar 'gyur ba'i las kyis yi dags dang dud 'gro dag tu ma skyes la mi rnams dang skal ba mnyam par mir skyes na las de'i mthus de'i chung ma mchog tu dga' zhing mchog tu blta na sdug pa yang sde'i tshogs gzhan dag gis phrogs pa dang / de 'o dod 'bod cing ngu la mya ngan byed do/ /'dod pas log par g.yem pa'i rgyu 'thun pa'i 'bras bus chung ma de'i phyir 'jig rten 'di dang pha rol du yang 'o dod 'bod cing ngu bar byed la yongs su gdung bar byed do/ /de nas gzhan yang dge slong des sems can dmyal ba chen po bsdus gzhom gyi 'khor la rtog par byed de las gang gis sems can dmyal ba a tsa zer bar skye bar 'gyur snyam nas de thos pa las byung ba'i shes pas brtags na/ sngon tshul bzhin ma yin pa yid la byed pas bud med gzhan ma rnyed nas lug ma mo 'am/ bong mo la 'jug par byed cing mchod rten nam/ mchod rten gyi phyogs sam/ sangs rgyas la gus pa tsam yang byed pa med pa de lus dang bral nas ngan 'gro log par lhung ba sems can dmyal ba a tsa zer bar skya bar 'gyur ro/ /der gnod pa 'di dag 'byung bar 'gyur te/ 'di lta ste/ lcags kyi grog sbur tshor ba chen po bskyed pa dag gis yan lag dang nying lag thams cad la za bar byed do/ /sems can dmyal ba de dag gi lto yang mes gang bar 'gyur te/ rang gi las kyi rnam par smin pa drag cing mi bzad pas lo 'bum phrag du mar phyi nang sreg cing za'o/ / srin bu a tsa zer zhes bya bar yang skye bar 'gyur te/ gang sems can dmyal ba'i mi de dag gi sha la za'o/ /sha zos nas khrag 'thung ngo / /khrag 'thung nas rgyus pa gcod do/ /rgyus pa bcad nas rus pa 'cha'/ rkang 'jib cing rgyu ma dang / gnye ma dag la za bar byed do/ /de sreg cing 'tshed la za ba na/ 'o dod 'bod cing ngu la cho nges 'debs shing snying rje rje skad du smre sngags 'don to/ /ji srid du rnam par smin pa'i 'bras bu nye bar ma spyad kyi bar du de'i nyes par spyad pa'i las drag cing mi 'dod la mi sdug cing yid du mi 'ong bar 'gyur te/ ji srid du de'i sdig pa'i las bcom zhing spangs la zad par ma byas pa de srid du de lo 'bum phrag du mar sreg cing 'tshed la za bar byed do/ /de phyis sems can dmyal ba de las thar bar 'gyur te/ thar nas kyang gal te lan grangs gzhan la myong bar 'gyur ba'i las kyis yi dags dang dud 'gro dag tu ma skyes la mi rnams dang skal ba mnyam par mir skyes na/ mi de'i las kyi rgyu 'thun pa'i 'bras bu'i rgyus de la 'gran zla mang zhing / rgyal po'i pho brang 'khor du de'i 'grub pa med par 'gyur/ dbul zhing nor rdzas thams cad nyams par 'gyur la tshe thung bar 'gyur ro/ /de nas gzhan yang dge slong de sems can dmyal ba chen po bsdus gzhom gyi 'khor la rtog par byed de/ las kyi rnam par smin pa byas la bsags pa las kyi nyer bsdogs dang / las kyi mjug gang gis sems can dmyal ba kyi hud zer bar skye bar 'gyur snyam nas des thos pa las byung ba'i shes pas brtags na/ srog gcod pa dang / ma byin par len pa dang / 'dod pas log par g.yem pa kun du bsten cing bsgoms te mang du byas pa ni/ de lus dang bral nas ngan 'gro log par ltung ba sems can dmyal ba kyi hud zer bar skye bar 'gyur ro/ /der las kyi rnam par smin pa gang gis skye bar 'gyur snyam na/ de la srog gcod pa dang / ma byin par len pa ni snga ma bzhin no/ /'dod pas log par g.yem pa ni gang kla klo dag tu skye bar 'gyur te/ de skye ba'i ris 'thun pa'i skyon gyis de gal te sring mo 'am/ gzhan 'os pa ma yin pa de lta bu dag la spyod par byed na de lus dang bral nas ngan 'gro log par ltung ba sems can dmyal ba kyi hud zer bar skye bar 'gyur ro/ /der gnod pa 'di dag 'byung bar 'gyur te/ 'di lta ste/ sems can dmyal ba der sems can dmyal ba pa dag sreg cing 'tshed la gshin rje'i mi rnams kyis gsod pa na/ gang gis dpag tshad lngar gang ba'i sgra de lta bu 'byin to/ /srid pa bar ma la gnas pa'i sems can dmyal ba des gzhi de las snying rje zhing 'jigs par thos pa las kyi dbang gis mi mthun pa log par thos te/ de'i ngu ba glu dbyangs snyan pa'i sgra lta bu dang / pheg rdob par thos so/ /de de ltar lta ba na bdag kyang 'gro'o snyam du sems so/ /sems bskyed ma thag tu srid pa nye bar len pa'i rkyen las byung bas der skye bar 'gyur ro/ /gang dang gang du srid pa bar ma pa'i nye bar len par byed pa de dang der skye bar 'gyur te/ nye bar len pa de byas pas der skyes so/ /lhan cig skyes ma thag tu sems can dmyal ba'i sdug bsngal 'byung bar 'gyur te/ sgra de dag sems can dmyal ba pa dag gi ngo bo nyid du thos te/ tshor ba mi bzad cing drag la tsha ba gzhan dang mtshungs pa med cing dpe zla med pa dag myong ba na sgra de nyis 'gyur gyis snying la 'bigs par byed do/ /gnod pa 'di dag kyang 'byung bar 'gyur te/ 'di lta ste/ lcags kyi ri rab tu 'bar ba khwa spungs pa zhes bya ba yod de/ de dpag tshad stong lnga brgyar 'bar la ring khyad gnam la thug pa zhig yod do/ / de la lcags kyi shing ljon pa dang / lcags kyi khwa rab tu 'bar ba dag gis gang ste/ ri de thams cad kyang rab tu 'bar ba me lce gcig tu gyur cing kun nas de'i las kyis byas pa'i mes rgyun mi 'chad par rab tu 'bar ba na/ nyes par byas pa'i las kyis ri de pad ma'i tshal gyis khebs par mthong zhing pad ma'i 'dab ma de dag 'od 'phro bar mthong nas de dag gcig la gcig bos te/ grogs po dag tshur shog tshur shog /ri tshal grib bsil ba can du 'dong / tshal sdug pa dag nye bar bsten par bya'o zhes smra'o/ /de nas sems can dmyal ba pa de dag la gshin rje'i mi rnams kyis rdo'i char dag gis rdeg pa na/ skyob pa 'dod pa/ skyabs 'dod pa/ mgon 'dod pa dag ri ga la ba der de dag rgyug go/ /ji ltar ri de la de ltar 'dzegs pa dang ri de yang 'bar ba'i phreng bas 'khrugs shing kun nas rab tu 'bar la khwa rab tu 'bar ba mchu shin du rno ba rnams kyis sems can dmyal ba shin du gang ba de dag mthong nas rgyug cing sems can dmyal ba de dag la za bar byed de/ kha cig ni glad pa dang glad rgyas la 'thog /kha cig ni mig la/ kha cig ni sna la/ kha cig ni 'gram pa'i lpags pa la/ kha cig ni rked pa'i ngos la/ kha cig ni lce la/ kha cig ni mgrin pa la/ kha cig ni mgrin pa'i lpags pa la/ kha cig ni mid pa la/ kha cig ni snying la/ kha cig ni glo ba la/ kha cig ni mtsher pa la/ kha cig ni rgyu ma la/ kha cig ni gnye ma sbom po la/ kha cig ni lto ba'i lpags pa la/ kha cig ni rna ba'i rus pa la/ kha cig ni brla la/ kha cig ni brla'i sbubs la/ kha cig ni rkang pa'i rting pa la/ kha cig ni rting pa'i lpags pa la/ kha cig ni rkang mthil la kha cig ni gzhang la kha cig ni rkang pa'i sor mo la 'thog go/ /rnam par phye nas za bar byed de/ kha cig ni mdun gyi ngos la/ kha cig ni glo la/ kha cig ni glo'i lpags pa la/ kha cig ni lag pa'i rgyab kyi rus pa la/ kha cig ni yan lag dang nying lag thams cad dang rkang yod pa'i sems can dmyal ba de dag so so so sor phye nas khwa de rnams kyis za bar byed do/ /yang las kyi dbang gis skye bar 'gyur te/ skyes nas kyang gshin rje'i mis 'jigs shing khwas 'jigs la skyob par 'dod pa/ skyabs 'dod pa dag ri khwa spungs pa ga la ba der rgyug go/ /de dag gang gi tshe las kyis byas pa'i mes 'bar ba'i phreng ba'i ri spungs pa de la 'dzeg pa na/ 'bar ba'i phreng bas lus yongs su dkris pa de dag ri de la lo 'bum phrag du mar sreg par 'gyur ro/ /ji srid du de'i sdig pa'i las bcom zhing spangs la zad par ma byas shing ji srid du de'i srog gcod pa dang / ma byin par len pa dang / 'dod pas log par g.yem pa/ kun nas bslang b a la kun du bsten cing bsgoms te mang du byas pa'i las bcom zhing spangs la zad par ma byas pa de srid du lo 'bum phrag du mar de'i las drag cing tsha ba byas la bsags pa'i mthus gang dag khwas spungs pa'i ri de'i rtse mo la yang gang gis byung ba dag 'dzeg par byed de/ de dag la 'bar ba de dag gis dpag tshad stong lnga brgyar gyen du bteg bteg ste/ phye ma leb bzhin du sreg par byed kyang cig car 'chi ba'i dus ni mi byed do/ /gang gi tshe de bcom zhing spangs la zad par byas pa de'i tshe/ sems can dmyal ba de las thar par 'gyur te/ thar nas kyang gal te lan grangs gzhan la myong bar 'gyur ba'i las kyis yi dags dang dud 'gro dag tu ma skyes la mi rnams dang skal ba mnyam par mir skyes na/ de'i las byas la bsags pa'i rgyu 'thun pa'i 'bras bus de'i yan lag dang nying lag thams cad las dri rul pa 'byung zhing mdze 'am de la sha bkra 'byung bar 'gyur/ 'gran zla mang zhing phal che la dbul ba dang / yul ngan par skye bar 'gyur ro/ /de nas gzhan yang dge slong des sems can dmyal ba chen po bsdus gzhom gyi 'khor la brtags na/ des thos pa las byung ba'i shes pas 'khor gzhan mchi ma'i rgyun me lta bu zhes bya ba yod par mthong ngo / /der sems can las kyi rnam par smin pa gang gis skye bar 'gyur snyam nas/ des thos pa las byung ba'i shes pas brtags na/ gang gis srog gcod pa dang / ma byin par len pa dang / 'dod pas log par g.yem pa kun du bsten cing bsgoms te mang du byas pas 'gyur te/ de la srog gcod pa dang / ma byin par len pa ni snga ma bzhin no/ /'dod pas log par g.yem pa ni dge slong ma tshul khrims ral cing spyod pa ngan pa la sngar gzhan gang zhig gis lhan cig mi tshangs par spyad pa byas la/ phyis gzhan zhig de dang lhan cig byed na/ de lus dang bral nas ngan 'gro log par ltung ba sems can dmyal ba mchi ma'i rgyun me lta bur skye bar 'gyur ro/ /der gnod pa 'di dag 'byung bar 'gyur te/ 'di lta ste/ tsha ba rtsub pa mi 'dod pa'i las kyi rnam pa de lta bu byas par 'gyur te/ gang gis kun nas rab tu 'bar ba'i mes sreg pa na/ mchi ma gang 'byung ba de dag me'i mchi mar 'byung ste/ de dag gis lus de dag sreg cing sems can dmyal ba de dag la gnod pa'i rnam pa de lta bus nyen par 'gyur ro/ /de yang gnod pa gzhan dag myong bar 'gyur te/ mig gi nang du seng ldeng gi mdag mas kun du 'gengs shing gshin rje'i mi rnams kyis rus pa rdung so sor 'byed la smyig ma lta bur 'bud cing sems can dmyal ba so sor 'jigs pa la/ lcags kyi phur bu dang gtun shing dang mda' bo che rnams kyis sems can dmyal ba de dag gi lus gcod cing 'bigs la dum bur rlog go/ /phra skam rab tu 'bar bas gzhang gdangs pa'i nang du zha nye bskol bas kun du bkang ste/ de'i nang zha nye bskol bas rab tu sreg la/ phyi rol me shin du 'bar bas rab tu sreg go/ /de gnyi gas sreg pa na tshor ba shin du tsha zhing mi bzad pa rnam pa du ma myong bar 'gyur ro/ / //'phags pa dam pa'i chos dran pa nye bar gzhag pa/ bam po brgyad pa/ 'dir tshigs su bcad pa/ dmyal ba'i sdig pa'i las kyis su/ /zha nye dag gis nang blugs shing / /me 'bar ba yis phyi rol du/ /sreg pa shin du sdug bsngal yin/ /gang dag sdug bsngal las 'bras skyes/ /tsha ba 'byung ba skye ba ni/ /khams gsum dag tu de yi dpe/ /bya bar sla ba ma yin no/ /rnam gsum 'bras bu gsum skyes pa/ /khams gsum dag tu skye ba ni/ /sems gsum las bslang nyes gsum skyes/ /gnas gsum dag tu smin par 'gyur/ /rgyu dang rkyen ni tshogs pa yis/ /kun bslang so so de nyid dag / de yi las kyi rnam smin ni/ /khams gsum dag na snang ba yin/ /ji lta ji ltar sems 'byung ba/ /de lta de ltar yongs 'gyur te/ /dge ba yis ni dge byed cing / /sdig pa yis ni sdig pa byed/ /las ni sems dang 'brel pa ste/ /srid pa las dang 'brel pa yin/ /sems dang las kyis kun bslang ba/ /'di ni 'khor bar yongs su bsgrags/ /sred pa gang gis bslus pa yis/ /sdang ba'i sems dang ldan pa'i las/ /'dir ni mi dag de byed de/ /de ni sems can dmyal bar 'tshed/ /gzhan gyis byas pa'i sdig pa ni/ /gzhan la yongs su smin myi 'gyur/ /srog chags kun gyis bdag nyid kyi/ /las kyi 'bras bu dag la spyod/ /khyod cag rang gi sems kyis su/ /'di dag thams cad bslus pa yin/ /me yis yongs su gdungs pa yis/ /ngu skad don med ci zhig 'byin/ /de ltar sems can dmyal ba de dag la gshin rje'i mi de dag gis rang gi las dag rang nyid kyis ma myong bar grol ba med do zhes rjes su bstan te/ de ltar las dang 'bras bur 'brel pa ni de thams cad srid pa bar mar dmigs so/ /de ltar rjes su ston pa na ji srid du de'i sdig pa'i las byas shing bsags pa bcom zhing spangs la zad par ma byas pa de srid du sems can dmyal ba de dag la gshin rje'i mi de rnams kyis lo 'bum phrag du mar sreg cing 'tshed do/ /phyis sems can dmyal ba de las thar bar 'gyur te/ thar nas kyang gal te lan grangs gzhan la myong bar 'gyur ba'i las kyis yi dags dang / dud 'gro dag tu ma skyes la mi rnams dang skal ba mnyam par mir skyes na/ las byas la bsags pa'i rgyu 'thun pa'i 'bras bu'i mthus skran can du 'gyur zhing skem po 'am/ byad ngan pa 'am/ sgo ba 'am/ lus tshal shing bsregs pa lta bur 'gyur ro/ /de nas gzhan yang dge slong las kyi 'bras bu rnam par smin pa shes pa des sems can dmyal ba chen po bsdus gzhom gyi 'khor la brtags na/ des thos pa las byung ba'i shes pas sems can dmyal ba dbang po thams cad kun du 'gags pa zhes bya ba ji ltar 'dug par mthong ngo / / der sems can dag las gang gis skye bar 'gyur snyam nas des brtags na gang gis srog gcod pa dang / ma byin par len pa dang / 'dod pas log par g.yem pa kun du bsten cing bsgoms te/ mang du byas par gyur pa de dag sems can dmyal bar skye bar 'gyur ro/ /de la srog gcod pa dang / ma byin par len pa'i rnam par smin pa ni sngar bshad pa bzhin no/ /'dod pas log par g.yem pa kun du bsten cing bsgoms te mang du byas pa rnam pa dur 'gyur snyam na shin du 'dod chags bdo ba gang gis bud med kyi skye gnas ma yin pa kha 'am/ rkub tu lan cig 'dod pas log par kun du bsten na/ de lus dang bral nas ngan 'gro log par ltung ba sems can dmyal ba dbang po thams cad kun du 'gags pa zhes bya bar skye bar 'gyur ro/ /der gnod pa 'di dag 'byung bar 'gyur te/ 'di lta ste/ khar me'i khams kyis gang bar bkang zhing lcags kyi snod kyi nang du zangs dmar po bzhus pa blugs nas brdzang bas brdzangs la/ 'og nas kyang srog chags mar ko ta ka'i mchu rab tu 'bar bas za'o/ / me 'bar ba'i phreng ba bcu gcig gis bskor ba'i dbus gdungs shing sreg ste/ yang sos shing yang sreg go/ /grog sbur rab tu 'bar ba dag gis ni mig za la zha nyes ni rna ba gang / ral gris ni sna bcad/ spu gris ni lce bcad/ spu gri'i char gyis ni lus gshegs te dbang po thams cad sdug bsngal chen po myong ba ni sems can dmyal ba pa'i rnam par smin pa bde ba med cing / sdug bsngal 'byung ba mi bzad la tsha ba gzhan dang mtshungs pa med cing dpe zla med pa de'i phyogs 'ga' zhig brjod na/ 'di lta ste/ ji ltar nyi ma'i 'od las mar me'i 'od de bas chung ba de ltar sems can dmyal ba pa'i sdug bsngal rjes su dpag par bya zhing lha rnams kyi bde ba dpe zla med pa bzhin du sems can dmyal ba pa rnams kyi sems can dmyal ba pa'i sdug bsngal yang dpe zla med do/ /de ci'i phyir zhe na/ lha'i 'jig rten dang / sems can dmyal ba'i bde ba dang / sdug bsngal ni gzhan dang mtshungs pa med de/ 'di ni phyogs 'ga' zhig brjod pa yin no/ /ji srid du de'i sdig pa'i las byas shing bsags pa byang zhing zhi la spangs shing zad par ma byas pa de srid du der tshor ba mi bzad cing tsha la drag pa dag myong bar 'gyur ro/ /de sems can dmyal ba de las thar bar 'gyur te/ thar nas kyang gal te lan grangs gzhan la myong bar 'gyur ba'i las kyis yi dags dang / dud 'gro dag tu ma skyes la/ mi rnams dang skal ba mnyam par mir skyes na de'i las byas shing bsags pa'i rgyu 'thun pa'i 'bras bu'i mthus/ de'i chung ma sdom pa med par 'gyur la/ chung ma des kyang de ltar chom rkun pa dag gnyer nas gsod par byed/ de bzhin du rgyal po'i pho brang 'khor du g.yo thabs sbyar nas gsod par byed/ de bzhin du dug gis gsod par byed cing de gnyid log pa dang / mtshon gyis gsod par byed de/ byas shing bsags pa'i las kyi rnam par smin pa ma myong bar thar pa med do/ /de nas gzhan yang dge slong des sems can dmyal ba chen po bsdus gzhom gyi 'khor la rtog par byed de/ des thos pa las byung ba'i shes pas sems can dmyal ba tshor ba mtha' med ces bya ba mthong ngo / /der sems can dag las gang gis skye bar 'gyur snyam nas des brtags na srog gcod pa dang / ma byin par len pa'i 'bras bu ni ji skad bshad pa bzhin no/ /gang shin du 'dod chags kyi sems kyis bud med 'os ma yin pa rjes su dran nas lag pas 'dod pas log par g.yem pa byas na de lus dang bral nas ngan 'gro log par ltung ba sems can dmyal ba tshor ba mtha' med par skye bar 'gyur ro/ /der gnod pa 'di dag 'byung bar 'gyur te/ byas shing bsags pa'i las kyis tshor ba shas che bar 'gyur ba ni 'di lta ste/ me'i tshor ba dang / mtshon gyi tshor ba dang / ba tshwa'i tshor ba dang / nad kyi tshor ba ste/ tshor ba de dag gting dpag dka' zhing mtha' dpag dka' la mtha' yas pa yin te/ ji skad bshad pa'i tshor ba de dag ni dpe bya bar sla ba ma yin no/ /de ltar sems can dmyal ba pa dag der rang gi sems kyis yongs su bslus pa yin te/ ji srid du de'i nyes par byas pa'i las bcom zhing spangs la zad par ma byas pa'i bar du lo 'bum phrag du mar sreg cing 'tshed do/ /de sems can dmyal ba de las thar bar 'gyur te/ thar nas kyang gal te lan grangs gzhan la myong bar 'gyur ba'i las yi dags dang dud 'gro dag tu ma skyes la mi rnams dang skal ba mnyam par mir skyes na/ de dbul por 'gyur zhing ri brags dang / dgon pa dang / 'jigs pa dang / ri brags pa dag gi g.yog bran du 'gyur/ nad rnams kyis rtag tu na bar 'gyur ro/ /de nas gzhan yang dge slong des sems can dmyal ba chen po bsdus gzhom gyi 'khor la brtags na/ des thos pa las byung ba'i shes pas sems can dmyal ba chen po pad ma ltar gas pa zhes bya ba mthong ngo / /der sems can dag las gang gis skye bar 'gyur snyam na/ de gang gis ma byin par len pa dang / 'dod pas log par g.yem pa byas la bsags pas de sems can dmyal ba pad ma ltar gas par skye bar mthong ngo / /de la srog gcod pa dang / ma byin par len pa ni snga ma bzhin no/ /'dod pas log par g.yem pa ni dge sbyong du dam bcas pa gang zhig sngon gyi 'dod pa dag la sems gtong zhing ro myong bar byed la yid la byed/ tshul bzhin ma yin pa yid la byed pa'i ro myang bar byas pas mtshan mo nyal ba na de'i rmi lam du bud med de nyid dang lhan cig 'khrig par byed do/ /sad nas kyang mi tshangs par spyod pa rmi lam du rmis pa de nyid kyi ro myong bar byed cing yang yid la byed/ rjes su yi rang zhing gzhan dag la yang yon tan 'dzin la de dang lhan cig goms par byed/ mang du byed cing de dang de nyid la dga' bar byed na/ lus dang bral nas ngan 'gro log par ltung ba sems can dmyal ba pad ma ltar gas par skye bar 'gyur ro/ /der gnod pa 'di dag 'byung bar 'gyur te/ 'di lta ste/ ji ltar pad ma'i mdog nyid du gyur pa de ltar de'i snang ba kun du dmar po nyid du gyur te/ der sems can dmyal ba de dag bum pa dag gi nang du 'tshed cing lcags kyi bre bo'i nang du lcags kyi gtun shing rnams kyis 'tshog go/ de dag las thar nas mtsho chen po'i nang na pad ma sngon po skyes pa de rgyang ring po nas mthong nas de nas sems can dmyal ba pa skyabs 'dod pa mgon 'dod pa/ bkres pa dang skom pas yongs su gdungs pa'i lus can dag gnod pa de dag las thar nas bdag cag gis bde ba thob par bya'o zhes der dong ngo / /de nas brgya 'am stong yod pa de dag pad ma ga la ba der dong ngo / /der dong ba dang lam du phur bu btsugs pa dag gis rkang pa la zug go/ rkang pa nyams pa de khas bub du lhung ngo / /khas bub du lhung ba de dag la phur bu rnams kyis zug go/ /gal te phyis gan du 'gyel na de dag gi rgyab la phur bu de rnams kyis zug cing 'bigs par byed do/ /gal te glos 'gyel na phur bu de rnams kyis de dag gi glo yang 'bigs par byed do/ /gal te 'dug na de'i 'og nas 'dzug go/ /de dag sreg cing 'tshed pa na gcig la gcig skad 'byin te/ skom pa dang bkres pas shin du gdungs pa'i lus can dag gcig la gcig skad 'byin cing ngu'o/ /mya ngan byed cing smre sngags 'don pa'i yid du gyur pa de dag thams cad pad ma de la lta zhing 'khod pa ni rgyab nas gshin rje'i mi rnams kyis ral gri dang / dgra sta dang / mda' bo che dang / mdung thung rnams kyis 'debs te/ de ltar sems can dmyal ba pa mgon 'dod pa/ skyabs 'dod pa/ bsil ba 'dod pa dag thabs 'ga' zhig gis pad ma de'i drung du phyin te/ de la 'dzegs pa dang / pad ma de yang seng ldeng gi me'i mdag ma lta bus gang zhing / rdo rje ltar sra ba'i lo ma rnams la de dag 'dzeg ste/ de yang kha zhum par 'gyur ro/ /de ltar las kyi mtha' nyes par spyad pa dang / nyes par byas pa'i las kyis ji srid du de'i sdig pa'i las byas shing bsags pa bcom zhing spangs la zad par ma byas pa de srid du las kyi dbang gis de dag sems can dmyal ba pad ma ltar gas pa der lo brgya phrag du ma 'am/ lo stong phrag du ma 'am/ lo bye ba phrag du mar bskol cing 'tshed kyang de dag dus las 'da' bar mi byed do/ /phyi nas thar bar 'gyur te/ thar nas kyang gal te lan grangs gzhan la myong bar 'gyur ba'i las kyis yi dags dang / dud 'gro dag tu ma skyes la mi rnams dang skal ba mnyam par mir skyes na de'i las byas shing bsags pa dag gis mthus de mig yon du 'gyur/ tshul khrims 'chal cing dbul la tshe thung bar 'gyur ro/ /de nas gzhan yang dge slong des sems can dmyal ba chen po bsdus gzhom gyi 'khor la brtags na/ des sems can dmyal ba pad ma chen po ltar gas pa zhes bya ba mthong ngo / /der sems can dag las gang gis skye bar 'gyur snyam na de dag gis srog gcod pa dang / ma byin par len pa dang / 'dod pas log par g.yem pa kun du bsten cing bsgoms te/ mang du byas pas de sems can dmyal ba pa pad ma chen po ltar gas par skye bar 'gyur ba mthong ngo / /de la srog gcod pa dang / ma byin par len pa ni snga ma bzhin no/ / 'dod pas log par g.yem pa ni dge sbyong dge sbyong du dam bcas pa gang zhig tshul khrims ral la lud bong ltar spyod pa/ mya ngan las 'das par 'gro ba la smod pa ni 'di ltar tshangs par spyad pa spyod de 'dir bdag lha 'am lha gzhan zhig tu 'gyur bar bya snyam ste/ bdag lha'i 'jig rten der lha mos yongs su bskor bar gyur cig snyam ste/ de ltar tshangs par spyad pa de tshangs par spyod pa log par yongs su bsngo'o/ /de sred pa la spyod pa yin te/ de 'khor ba'i rgyur spyod cing sred pa'i rgyur spyod la de sdig pa spyod pa yin/ de na ba dang / rga ba dang / 'chi ba dang / mya ngan dang / smre sngags 'don pa dang / sdug bsngal ba dang / yid mi bde ba dang / 'khrug pa la sogs pa dag las yongs su thar bar mi 'gyur ro/ /shi ste lus dang bral nas kyang ngan 'gro log par lhung ba sems can dmyal ba pad ma chen po ltar gas par skye bar 'gyur ro/ /der gnod pa 'di dag 'byung bar 'gyur te/ 'di lta ste/ ba tshwa'i chu bo'i rlabs shes bya ba gang du ba tshwas gang bar ma gyur pa ni/ de na khab kyi bu ga tsam yang med pa/ zheng du dpag tshad lnga yod la/ chur dpag tshad brgya yod par 'jug go/ sems can dmyal ba'i chu bo der de dag zhugs pa dang / tshor ba shin du tsha ba/ shin du rtsub pa/ shin du bzod par dka' ba dag myong ste/ de'i rus pa gang yin pa de dag rdor gyur/ skra gang yin pa de dag ni nya lci bas su gyur/ sha gang yin pa de dag ni 'dam du gyur/ ro nye bskol ba gang yin pa de dag ni chur gyur/ sems can dmyal ba gang yin pa de dag ni nyar gyur te/ chu bo des khas bub tu ded cing bskol to/ /'gram dag tu chags na khwa mchu rab tu 'bar ba rnams kyis za'o/ /gal te mgon 'dod pa/ skyabs 'dod pa dag chu bo de las thar nas 'bros pa na gshin rje'i mi rnams kyis lcags kyi mdung rab tu 'bar ba dag gis btab nas chu bo'i rlabs de nyid kyi nang du 'jug par byed do/ /de ltar de dag steng du byung ba na/ rkang pa 'tshed par byed la/ brla'i sbubs dang / rgyab kyi sha dag 'tshed par byed/ mgul pa'i sha yang chad par 'gyur/ rus pa yang bskol bar 'gyur/ mgo'i sha chad cing mgo'i thod pa yang chad par 'gyur te/ de ltar sems can dmyal ba pa de dag ji lta ji ltar chu bo der 'jug cing ji lta ji ltar zhugs pa de dag de lta de ltar lo 'bum phrag du mar sreg cing bskol la 'tshed do/ /yang sems can dmyal ba de dag nyon mongs pa'i chu bo de las thar nas mtsho dang me tog dang / pad ma sngon po yod par mthong ste/ mgon 'dod pa/ skyabs 'dod pa/ bde ba 'dod pa dag de'i drung du 'gro bar 'dod de de'i drung du dong ngo / /pad ma'i tshal de dag kyang lcags kyi pad ma yin/ de dag gi reg pa ni spu gri lta bu yin la sems can dmyal ba pa gang dag gis lus de la reg pa de dag ni gsheg par byed cing gcod par byed la za bar byed cing rdung bar byed do/ /de ltar gshin rje'i mi rnams kyis mngon par gtses pa dag pad ma'i tshal de dag la 'dzeg par byed de/ pad ma de dag gi nang me mdag gis rab tu gang ba yin la/ steng gi lo ma lcags las byas pa dag gis 'chums par byed de/ de'i nang du lan du mar sems can dmyal ba pa las byas pa de dag skye bar 'gyur te/ me mdag des lan 'bum phrag du mar sreg go/ /khwa dag gis sems can dmyal ba pa de dag gi mig za bar byed cing lce gcod par byed/ rna ba 'bigs par byed/ lus rnam par zad par byed do/ / de ltar rang gi las kyi 'bras bu la spyod pa'i sems can dmyal ba pa de dag ji srid du de'i sdig pa'i las bcom zhing spangs la zad par ma byas pa de srid du sems can dmyal ba chen po pad ma chen po ltar gas pa der 'tshed par byed do/ /de nas sems can dmyal ba de las thar bar 'gyur te/ thar nas kyang gal te lan grangs gzhan la myong bar 'gyur ba'i las kyis yi dags dang dud 'gro dag tu ma skyes la/ mi rnams dang skal ba mnyam par mir skyes na/ las de dang rgyu 'thun pa'i 'bras bus dmu rdzing can du 'gyur zhing / rtag tu bkres pa dang skom pas gdungs la/ khro bar yang 'gyur ba mthong ngo / /de nas gzhan yang dge slong des sems can dmyal ba chen po bsdus gzhom gyi 'khor la brtags na/ des thos pa las byung ba'i shes pas sems can dmyal ba me thab ces bya ba mthong ngo / /der sems can dag las gang gis skye bar 'gyur snyam nas des brtags na/ gang gis srog gcod pa dang / ma byin par len pa ni snga ma bzhin no/ /'dod pas log par g.yem pa ni dge sbyong dge sbyong du dam bcas pa des sngon gyi khyim na gnas pa'i bud med dag dang lhan cig tu rgod cing rtses pa dag de'i tshe de tshul bzhin ma yin pa yid la byed pas dran zhing yang dang yang du dran pa nyid du byed/ de la chags shing yongs su rtog par byed/ de 'dod chags de nyid la yang dang yang du sems par byed cing dge ba'i chos la sems par mi byed la chos dang 'thun pa'i chos mi sgrub/ sdug bsngal ba dang / kun 'byung ba dang / 'gog pa'i chos rjes su sems par mi byed cing rjes su mi slob la rjes su mi sgrub/ der las su rung bar mi byed cing sangs rgyas dang / chos dang / dge 'dun rjes su dran par mi byed 'chi ba rjes su dran par mi byed cing / 'khor ba la yid 'byung bar mi byed la/ kha na ma tho ba rdul tsam la yang 'jigs par mi lta/ gnas mal dang na ba'i gsos sman gyi rkyen mang po 'chang bar byed cing gnas mal dang / na ba'i gsos sman gyi rkyen mang po 'os pa ma yin pa'i gnas mal dang na ba'i gsos sman gyi rkyen rab tu mang po de dag des 'chang bar byed de/ rnam pa de lta bu byas pa ni de lus dang bral nas ngan 'gro log par ltung ba sems can dmyal ba me thab tu skye bar 'gyur ro/ /me thab kyi sems can dmyal ba de 'bar rab tu 'bar/ kun tu rab tu 'bar zhing / me lce gcig tu gyur par sreg ste/ der 'bar/ rab tu 'bar/ kun tu rab tu 'bar zhing me lce gcig tu ma gyur pa ni skra'i rtse mo tsam yang med do/ /der sems can dmyal ba pa de dag shing ljon pa lta bur rab tu 'bar te/ de 'bar rab tu 'bar/ kun du rab tu 'bar zhing me lce gcig tu gyur pa der skad 'byin to/ /de ltar skad 'byin pa na khar mes bkang ngo / /de tshor bas nyam thag pa dang yang de skad 'byin to/ /de'i rna bar me 'bar ba 'jug ste/ bcug nas skad 'byin cing ngu la smre sngags 'don to/ /de'i rna bar yang me 'bar ba 'jug cing de'i lus kyang kun nas rab tu 'bar bar 'gyur te/ de yang shin du 'khrugs shing skad 'byin la smre sngags 'don to/ /gal te tshul khrims dang mi ldan par gyur pa zhig pha rol gyi bsod snyoms zos la de'i lce lcags rab tu 'bar ba'i glegs mas sreg go/ /gal te tshul khrims can tshul bzhin ma yin pa yid la byed pas bud med dag mthong na de'i mig sreg par 'gyur ro/ /gang shin du chags pa'i sems kyis bud med gzhan dag dgod cing glu dbyangs len la sgra 'byin pa dag thos na de'i rna ba ro nye rab tu bskol bas 'gengs par 'gyur ro/ /tshul khrims 'chal pa 'os par 'gyur ba ma yin pa gang gis dge 'dun rnams kyi bdug spos yongs su bzung bas sna bcad cing sreg par 'gyur te/ de ltar tshul khrims 'chal pa de'i dbang po lnga car la sbyar te/ sems can dmyal bar las dang mtshungs pa'i chad pa drag po rab tu 'byung ngo / /las kyi mtha' nyes par spyad pa byas pa de ni ji srid du de'i sdig pa'i las bcom zhing spangs la zad par ma byas pa de srid du sems can dmyal ba kun nas me lce 'bar ba'i phreng bas 'khrugs pa'i sems can dmyal ba me thab der sreg cing 'tshed do/ /de de las thar nas gal te l an grangs gzhan la myong bar 'gyur ba'i las kyis yi dags dang dud 'gro dag tu ma skyes la mi rnams dang skal ba mnyam par mir skyes na de'i sdig pa'i las de dang rgyu 'thun pa'i 'bras bus de byad lag ngan cing long ba dang / zha zhing dbul bar 'gyur la dar la bab pa nyid kyi tshe 'chi bar 'gyur ro/ /de nas gzhan yang dge slong las kyi 'bras bu rnam par smin pa shes pa des sems can dmyal ba chen po bsdus gzhom gyi 'khor la brtags na des thos pa las byung ba'i shes pas 'khor gzhan lcags kyi phye ma me mdag gi ra ba zhes bya ba yod pa mthong ngo / /der sems can dag las kyi rnam par smin pa gang gis skye bar 'gyur snyam nas des thos pa las byung ba'i shes pas brtags na gang gis srog gcod pa dang / ma byin par len pa ni snga ma bzhin no/ /dge sbyong dge sbyong du dam bcas pa gang gis mi'i gar dang glu dbyangs dang rgyan dag gi sgra thos nas tshul bzhin ma yin pa yid la byed pa g.yengs pa'i blos dgod pa dang / bsgegs pa dang / rtses pa de thos nas khu ba byung la byung nas kyang ro myong bar byed cing sogs na/ de lus dang bral nas ngan 'gro log par ltung ba sems can dmyal ba lcags kyi me mdag tu skye bar 'gyur ro/ /der gnod pa 'di dag 'byung bar 'gyur te/ 'di lta ste/ sems can dmyal ba pa de lcags kyi ra ba gru bzhi pas bskor ba dpag tshad lnga brgya yod pa de'i nang du sems can dmyal ba pa rang gi las kyis sreg cing der me'i char dang lcags kyi char rgyun mi 'chad par 'bab bo/ /der sems can dmyal ba pa dag lcags kyi char pas yan lag dang nying lag thams cad phye mar rlog la/ me mdag gi char pas gdungs shing sreg go/ der char pa gnyis kyis nyam thag pa dag gnod pa de dag myong bar 'gyur te/ ji ltar sems can dmyal ba pa'i myong ba de dag gi gnod pa gang yin pa de ni dpe bya bar sla ba ma yin no/ /ji srid du de'i sdig pa'i las bcom zhing spangs la zad par ma byas pa de srid du dus las 'da' bar mi byed de/ rtsub cing mi bzad pa tsha ba 'jig rten thams cad 'jigs par byed cing mi 'dod la mi sdug cing yid du mi 'ong ba'i las byas pa'i tshor ba de lta bu myong bar 'gyur ro/ /de phyis de las yongs su thar bar 'gyur te/ gal te lan grangs gzhan la myong bar 'gyur ba'i las kyis yi dags dang dud 'gro dag tu ma skyes la de mi rnams dang skal ba mnyam par mir skyes na las de dang rgyu 'thun pa'i 'bras bus de rtag tu chu bo chen po'i mnyan par 'gyur/ rtag tu 'jigs pa dang / nad bu can du 'gyur/ glang po che'i sos 'tsho zhing de rtag tu 'chi bas nyen par 'gyur ro/ /de nas gzhan yang dge slong des sems can dmyal ba chen po bsdus gzhom gyi 'khor la brtags na/ de 'khor gzhan gcig pa bcu bdun pa ma mthong la/ sems can dmyal ba chen po bsdus gzhom gyi 'khor gyi nyen kor bcu drug pa las kyi chos kyi rnam par smin pa yod pa mthong ngo / /de sems can rnams kyi las dang 'brel pa las kyi 'bras bu rnam par smin pa rnam pa sna tshogs dag mthong nas 'khor ba la yid byung ngo / /yang dge slong de ji ltar sems can dmyal ba chen po gsum gyi 'khor gyi las kyi 'bras bu'i de kho na nyid rig cing de las kyi 'bras bu rnam par smin pa dag 'dzin par byed la/ de lta zhing dmigs par byed de/ srid pa dag la yid byung ba thob cing bdud kyi yul gyi dngos po la mi 'dod pa rnal 'byor spyod pa nang gi chos la chos kyi rjes su lta zhing gnas so/ /de ltar brtson pa'i dge slong de sa bla'i gnod sbyin dag gis mthong nas/ bar snang la spyod pa'i gnod sbyin rnams la bsnyad do/ /de dag gis kyang rgyal po bzhi la bsnyad pa nas/ de ltar snga ma bzhin du sbyar te/ tshad med 'od kyi bar gyi lha rnams la bsnyad do/ /snga ma bzhin du sbyar te/ 'dzam bu'i gling du rigs kyi bu grong khyer che ge mo zhig ces bya ba nas skra dang kha spu bregs/ gos ngur smrig bgos te/ dad pas khyim nas khyim med par rab tu byung nas/ de sa gzhan dgu pa'i bar la zhugs pa de tshad med 'od kyi lha dag gis thos nas dga' bar gyur to/ /kye lha dag bdud kyi phyogs ni dma' bar 'gyur zhing dam pa'i chos kyi phyogs ni mtho bar 'gyur ba bdag cag dga'o zhe'o/ /de nas gzhan yang dge slong des sems can dmyal ba gsum mthong nas sems can dmyal ba bzhi pa ngu 'bod ces bya ba la rtog par byed do/ /der sems can dag las gang gis skye bar 'gyur snyam nas/ des thos pa las byung ba'i shes pas srog gcod pa dang / ma byin par len pa dang / 'dod pas log par g.yem pa dang / chang 'thung ba bzhi kun du bsten cing bsgoms te mang du byas pa dag gi las dang / nyer bsdogs dang / mjug byas shing bsags pa dag gis lus dang bral nas ngan 'gro sems can dmyal ba chen po ngu 'bod du skye bar 'gyur ba mthong ngo / /de la srog gcod pa dang / ma byin par len pa dang / 'dod pas log par g.yem pa'i 'bras bu rnam par smin pa ni sngar bshad pa bzhin no/ /chang dang sbyar ba'i chang kun du bsten cing bsgoms te mang du byas pa ni sems can dmyal ba ngu 'bod du skye bar 'gyur ro/ /gang gis khyim gyi gnas nas byung ste/ sdom pa blangs/ bsam gtan gyi bde sems sbyangs shing zhi ba'i dge slong gi dge 'dun dag gi 'khor du chang brims te ra ro bar byas na de lus dang bral nas ngan 'gro log par ltung ba sems can dmyal bar rab tu gdung ba chen pos byas pa'i tshor ba myong bar 'gyur ro/ /der gnod pa 'di dag 'byung bar 'gyur te/ 'di lta ste/ phra skam gyis kha gdangs pa'i nang du/ zangs dmar po bskol ba rab tu 'bar ba ldugs so/ /de 'thung ba ni de'i tshe sngar mchu sreg go/ /mchu bsregs nas rkan sreg go/ /rkan bsregs nas lce sreg go/ /lce bsregs nas mid pa sreg go/ / de bzhin du ol gong / de bzhin du gnye ma dang rgyu ma/ de bzhin du pho ba dang long ka bsregs nas ro smad du 'byung bar 'gyur la/ de ltar chang 'thung ba de ni mi dge ba myong bar 'gyur te/ de 'o dod 'bod cing ngu 'khrug cing smre sngags 'don to/ /de shin du 'khrug pa na gshin rje'i mi dag gis rjes su bstan pa tshigs su bcad de smras pa/ sdig pa dag ni byed pa na/ /'bras bu tsha ba shes par gyis/ /rmongs pa gang zhig bdag mi shes/ /phyi nas de ni yongs gdung 'gyur/ /ji ltar blo gros ngan pa dag /sdig pa dag gis las byas pa/ /ma ngu de ltar la gor spyod/ /smre sngags don med ci zhig 'don/ /sdig pa'i las kyi 'bras bu ni/ /mi ni kun gyis thob par 'gyur/ /gal te bdag nyid bde 'dod na/ /de ltar sdig pa bsten mi bya/ /dmyal ba drag po chen po ba/ /de dag las kyang sdig pa'i sems/ /thar kyang gti mug dbang song ba/ /yang dang yang du sdig pa byed/ /'di yis dmyal bar mi 'gro zhes/ /sdig pa la ni yid ma rton/ /me chung bas ni ri dang tshal/ /ljon par bcas pa sreg pa bzhin/ /rmongs pa sdig pa byed 'dod pa/ / gnod pa 'byung la 'dod mi byed/ /sdig pa'i rjes su 'bras bu 'jug /rgyu dang rkyen las byung ba mthong / /chos ni ci phyir bsten mi bya/ /sdig pa 'ang ci phyir rnam mi spong / /sdig pa spangs pa'i mi dag ni/ / sems can dmyal ba nyid mi mthong / /bdag gi sdig las 'bras bu dag /rmongs pa gang dag mi shes pas/ /de yis nyes pa 'di thob ste/ /blo ngan khyod ni de dag spyod/ /sdig pas sems can dmyal bar 'gro/ /sdig pas yongs su sreg 'gyur te/ /sdig pas mya ngan 'das mi 'thob/ /sdig pa lta bu'i dgra gzhan med/ /sdig pas sngon ni bslus pa dag /sdig pas yongs su sreg 'gyur te/ /sdig pa dag ni mi byed pa/ / de yi mdun du 'gro mi 'gyur/ /lam 'di zhi ba gtso bo ste/ /gang dag sred dbang mi gnas pa'o/ /sred pa spangs pa'i mi dag ni/ /mya ngan 'das dang nye bar gnas/ /sdig pa dag ni byed ldan zhing / /dge ba rnams kyang mi byed pa/ /sdig pas sreg 'gyur de lta bas/ /sdig pa yid la ma byed cig /sdig pa spyod pa'i mi dag ni/ /nams kyang bde ba mi 'thob bo/ /de ltar gal te bdag nyid kyis/ /bde 'dod chos la rtag tu sten/ /gang dag sdig pa sten byed pa/ /sdug bsngal de las sdug bsngal med/ /de lta bas na sdig mi bsten/ /gal te sdug bsngal dag gis skyo/ /legs pas legs pa'i don bya'o/ /legs la sdig pa'i bya ba dka'/ /sdig la sdig pa'i bya ba sla/ /'phags la sdig pa'i bya ba dka'o/ /de ltar gshin rje'i mi de rnams kyis sems can dmyal ba pa de dag la yang dang yang du bshad/ yang dang yang du bsgo zhing gnod pa rnam pa sna tshogs pa dag byed de/ 'di lta ste/ ri rab tu 'bar la kun du 'bar zhing mkhregs pa gnyis shugs kyis rgyug ste/ phan tshun 'dus pa de gnyis kyi bar du sems can dmyal ba pa de dag 'jug ste/ 'di lta ste/ ri de gnyis kyis 'thag pa ni ji ltar mngon pa med par de ltar shin du 'thag go/ /yang 'byung bar 'gyur te/ byung nas kyang yang ri de gnyis kyi dbus su bcug nas 'thag go/ /de'i sdig pa'i las zad par ma gyur gyi bar du lo 'bum phrag du ma'i bar du byung zhing 'thag go/ /de sems can dmyal ba'i phyogs de nas thar nas skyabs 'dod pa/ mgon 'dod pa/ dpung gnyen 'dod pa dag gzhan du rgyug pa dang / de dag gshin rje'i mi gzhan rnams dang phrad nas lcags kyi rdza ma'i nang du kha bub du bcug go/ /ji srid du de'i sdig pa'i las bcom zhing spangs la zad par ma gyur pa de srid du de dag der kha bub tu lo 'bum snyed du sreg par 'gyur ro/ /skyabs 'dod pa/ mgon 'dod pa/ bde ba 'dod pa de dag rdza mar btso ba de dag las thar nas gar bab bab tu 'bros so/ /ji srid du de'i sdig pa'i las bcom zhing spangs par ma gyur pa de srid du lo 'bum phrag du mar de dag gi mdun du lcags kyi khwa rab tu 'bar ba de dag gis bzung nas de dag gi yan lag dang yan lag / gnad dang gnad/ tshigs dang tshigs su brgya 'am stong du za'o/ / skyabs 'dod pa/ mgon 'dod pa/ dpung gnyen 'dod pa de dag de las thar nas kyang gar bab bab tu 'bros so/ /bkres pa dang / skom pas gdungs pa de dag mtsho'i chu rab tu dang ba zhig rgyang ring po nas mthong ste/ de dag der brgyugs pa dang / de dag kyang ro nye rab tu bskol bas gang ba yin te/ der khrus bya ba'i phyir 'jug go/ /gang gi tshe zhugs par gyur pa dang / sa phyogs de dag las kyis byas pa'i chu srin rnams kyis bzung nas khas bub tu drangs te/ ji srid du de'i sdig pa'i las bcom zhing spangs la zad par ma byas pa de srid du lo 'bum phrag du mar de dag ro nye de'i nang du skol lo/ /phyis las kyis byas pa'i chu srin de dag las thar par 'gyur te/ thar nas kyang tshor bas nyen pa skyabs 'dod pa/ mgon 'dod pa/ dpung gnyen 'dod pa dag gar bab bab tu 'bros so/ /gal te mdun na 'khod pa'i gshin rje'i mi rnams kyis mthong na de dag der 'dzin te/ bzung nas kyang mdung rtse rab tu 'bar ba dag gis 'bigs par byed do/ /de dag la mdung rtse de dag bar 'ga' rgyab tu phyung nas 'byung / bar 'ga' glor phug nas 'byung / bar 'ga' mgrin par phug nas 'byung ste/ sems can dmyal ba pa tshor bas nyen pa de dag gi sgra de sems can dmyal ba pa gzhan dag gis phyogs de nas glu dbyangs kyi sgrar thos so/ /de yang ngu ba'i sgra yin na las kyi dbang gis snyan par thos te/ skyabs 'dod pa/ mgon 'dod pa/ dpung gnyen 'dod pa de dag gnas der 'gro'o/ /ji srid du de'i sdig pa'i las byas shing bsags pa bcom zhing spangs la zad par ma byas pa de srid du lo 'bum phrag du mar de dag gshin rje'i mi de dag gis bzung nas mda' bo che dang mdung rab tu 'bar ba dag gis 'bigs par byed do/ /de dag de las thar bar 'gyur te/ thar nas kyang skyabs 'dod pa/ mgon 'dod pa dag gar bab bab tu 'bros so/ /de dag gis rgyang mi ring ba na grong dang khyim phun sum tshogs pa dang / chu bo dang lteng ka phun sum tshogs pa mthong ste/ de yi phyogs su de dag rgyug cing de dag grong de'i nang du 'jug go/ /grong de thams cad kyang rab tu bskol ba 'bar ba yin la/ nang na yang srog chags mar ko ta ka kha rdo rje lta bu la mche ba rno ba rnams kyis shin du gang ba yin te/ de dag gang gi tshe grong de'i nang du zhugs par gyur pa dang / khyim de'i sgo gcod par gyur te/ de dag der srog chags mar ko ta ka kha mche ba rno la rab tu 'bar ba rnams kyis ji srid du de'i sdig pa'i las bcom zhing spangs la zad par ma byas pa de srid du lo 'bum phrag du mar za bar byed do/ /gnod pa rgya mtsho lta bur gyur pa de las thar nas/ gal te lan grangs gzhan la myong bar 'gyur ba'i las kyis yi dags dang / dud 'gro dag tu ma skyes la/ mi rnams dang skal ba mnyam par mir skyes na/ chang btung ba ldud pa gang yin pa de'i nyes par byas pa'i las kyi rgyu 'thun pa des/ de sems 'khrul bar 'gyur zhing dbul ba dang / lam po che dang bzhi mdo'i tshong pa dang / byis pa thams cad kyi bzhad gad par gyur cing bzhin gyi mdog ngan pa dang / so 'ba' shig snang ba dang / rkang pa shin du rdol ba dang / lus rtag tu bkres pa dang skom pas gdungs pa dang / bu dang chung ma dang pha dang ma dang gnyen bshes rnams kyis btang bar 'gyur ro/ /gang chang de sdom pa blangs pa dag gis 'thungs na de dag sems can dmyal ba chen po ngu 'bod du rnam par smin pa myong bar 'gyur bar rig par bya'o/ /de nas gzhan yang dge slong las kyi 'bras bu rnam par smin pa shes pa des sems can dmyal ba chen po ngu 'bod kyi 'khor la brtags na des 'khor sgra chen po zhes bya ba mthong ngo / /der sems can dag las gang gis skye bar 'gyur/ snyam nas des brtags na/ gang gis srog gcod pa dang / ma byin par len pa dang / 'dod pas log par g.yem pa dang / chang 'thung ba kun du bsten cing bsgoms te mang du byas par 'gyur ro/ /de la srog gcod pa dang / ma byin par len pa dang / 'dod pas log par g.yem pa ni snga ma bzhin no/ /chang 'thung ba ni gang gis gso sbyong ba rnams la chang blud na des ni lus dang bral nas ngan 'gro log par ltung ba sems can dmyal ba sgra chen por skye bar 'gyur ro/ /der gnod pa 'di dag 'byung bar 'gyur te/ 'di lta ste/ ro nye rab tu bzhus pas thog ma nyid du khar ldugs so/ / ji ltar de dag gis gso sbyong ba rnams la blud pa de ltar lcags kyi phor pa rab tu 'bar ba'i nang nas ldud pa na/ ji ltar sems can dmyal ba gzhan dag na med pa snying rje ba'i sgra de lta bu 'byung bar 'gyur ro/ / de ltar snying rje ba'i sgra kun du 'byin pa na gang sgra 'byung ba des nam mkha' de thams cad shin du gang bar 'gyur ro/ /las kyi dbang gis sems can dmyal ba pa de rnams de ltar khro ba na khro ba de gshin rje'i mi rnams kyis thos nas kyang nyis 'gyur gyis khro bar byed do/ /de ltar chang btung ba'i 'thung ba de ma legs pa thams cad byed pa yin te/ sems mnyam par bzhag pas dge ba'i tshogs 'dzin par gyur pa'i sems de chang gis rnam par 'khrug par byed do/ /rnam par 'khrugs pa'i sems des ni bya ba dang bya ba ma yin pa so so'i ngo mi shes so/ /des na mi dge ba'i tshogs thams cad slong bar 'gyur ro/ /gang chang btung ba ldud pa ni de'i rgyu mi dge bar 'gyur te/ rgyu ji ltar byas pa de ltar 'bras bu nyes pa dang bcas par 'gyur la de gnod pa des shin du rno ba dang shin du yun ring bar gnod pa du ma 'byung ngo / /ji srid du de'i sdig pa'i las bcom zhing spangs la zad par ma byas pa de srid du/ sems can de dag sems can dmyal ba sgra chen po der gnod pa chen po'i sgra 'byin pa du ma dag 'byung bar 'gyur te/ des na sems can dmyal ba de sgra chen po zhes bya'o/ /de dag phyis thar bar 'gyur te/ thar nas kyang gal te lan grangs gzhan la myong bar 'gyur ba'i las kyis yi dags dang dud 'gro dag tu ma skyes la de mi rnams dang skal ba mnyam par gal te mir skyes na/ rgyu dang 'thun pa'i 'bras bus de yid mi gzhungs par 'gyur zhing de dus thung ngus kyang brjed par 'gyur/ de'i yid gzhungs pa chung bas longs spyod med par 'gyur zhing skye bo yang dga' bar mi 'gyur/ de'i nor de dag med par 'gyur zhing nad chung ngus kyang 'chi bar 'gyur ro/ /de nas gzhan yang dge slong las kyi 'bras bu rnam par smin pa shes pa des sems can dmyal ba chen po ngu 'bod kyi 'khor la brtags na des kye ma sems can dmyal ba ngu 'bod kyi 'khor bcu drug mthong ste/ 'di lta ste/ sgra chen po dang / thams cad sgra 'byin pa dang / skra me 'bar dang / me'i phye ma srin bu dang / lcags kyi me 'bar ba'i gtun shing dang / rdo me 'bar ba char ltar 'bab pa dang / gsod med dang / lcags tshal dgon pa dang / rab rib kun bsags dang / gshin rje'i mtshams kyi dgon pa dang / shing shal ma la'i tshal chen dang / chu shing bsregs pa dud pa'i tshal dang / me mdag dud pa'i tshal dang / glog gi na bun tshal dang / kun du rtog byed de/ de dag ni sems can dmyal ba chen po ngu 'bod kyi 'khor bcu drug yin no/ /der las kyi rnam par smin pa gang gis skye bar 'gyur snyam nas dge slong des brtags na/ sems can dmyal ba sgra chen po'i 'khor mthong nas 'khor gnyis pa thams cad sgra 'byin la rtog par byed do/ /des brtags na srog gcod pa dang / ma byin par len pa dang / 'dod pas log par g.yem pa ni snga ma bzhin no/ /chang 'thung ba ni gang gis kun du bsten cing bsgoms te mang du byas pa dang / dang po sdom pa blangs ma thag la chang blud na de lus dang bral nas ngan 'gro log par ltung ba sems can dmyal ba thams cad sgra 'byin du skye bar 'gyur ro/ /der gnod pa 'di dag 'byung bar 'gyur te/ ji lta ji ltar sems can dmyal ba pa rnams lcags kyi gtun shing gis rdeg pa nas de lta de ltar sgra chen po 'byin te/ des sems can dmyal ba'i 'khor de dag thams cad gang bar 'gyur ro/ /gal te khor yug dang / khor yug chen po'i ri dag dang / chu bo'i 'khor dag med na/ sgra des 'dzam bu'i gling la sogs pa mi'i gnas bzhi po der thams cad du 'byung bar 'gyur ro/ /de'i ngud mo'i sgra 'byin pa des ji srid du de'i sdig pa'i las bcom zhing spangs la zad par ma byas pa de srid du snying rje zhing de srid du ro med pa yin te/ de dag rang gi las dang 'thun par sems can dmyal ba pa de dag gis de srid du ngu ba'i sgra 'byin to/ /de dag phyis sems can dmyal ba de las thar bar 'gyur te/ thar nas kyang gal te lan grangs gzhan la myong bar 'gyur ba'i las kyis yi dags dang / dud 'gro dag tu ma skyes la/ mi rnams dang skal ba mnyam par mir skyes na chu dkon pa'i yul dang 'brog tu skye bar 'gyur te/ srog gcod pa dang / ma byin par len pa dang / 'dod pas log par g.yem pa'i 'bras bu ni snga ma bzhin no/ / de nas gzhan yang dge slong las kyi 'bras bu rnam par smin pa shes pa des/ sems can dmyal ba ngu 'bod kyi 'khor la brtags na/ des thos pa las byung ba'i shes pas 'khor skra me 'bar ba zhes bya ba mthong ste/ /der sems can dmyal ba pa dag las kyi rnam par smin pa gang gis skye bar 'gyur snyam nas des brtags na/ gang gis srog gcod pa dang / ma byin par len pa dang / 'dod pas log par g.yem pa kun du bsten cing bsgoms te mang du byas pa ni snga ma bzhin no/ /dge bsnyen bslab pa'i gzhi lnga yod pa la chang 'thung ba yon tan yin par bslab pa'i gzhi 'dzin du bcug na/ de lus dang bral nas ngan 'gro log par ltung ba sems can dmyal ba skra me 'bar bar skye bar 'gyur ro/ /der me'i char rab tu 'bar ba gang yin pa des sems can dmyal ba pa dag gi skra la sogs pa nas rkang pa'i bar dag tu sreg cing 'tshed la rab tu 'bar ro/ / sems can dmyal ba pa de dag gi rkang pa dag la ni khyi dang / glad pa la ni bya rgod mchu rab tu 'bar ba dang / dbus su ni wa dag gis za ste/ de ltar rang gi mi dge ba'i las byas pas sreg cing za'o/ /nyon mongs pa de dag ngu bzhin du/ gshin rje'i mi rnams la 'di skad ces smras so/ /bdag cag snying rje'i gnas su gyur/ /khyod la snying rje med dam ci/ /khyod la zhi ba med dam ci/ /bdag la khyed cag snying mi rje/ /de dag gis de skad smras pa dang / gshin rje'i mi dag gis slar smras pa/ /ji ltar khyed cag gti mug gis/ /bsgribs pa'i sdig las mang po byas/ /mi bzad pa yis khyed cag bdas/ /de ni nged kyi rgyu ma yin/ /rmongs pas tshul khrims ma bsrungs shing / /sdig pa mang po bsags pa byas/ /sdig pa mang po bsags pa yi/ /'bras bu de ni nye bar gnas/ /de la bdag cag rgyu med de/ /'di ni khyed cag nyid kyi rgyu/ /gang dag sdig pa'i las byed pa/ /de ni las de'i rgyu yin no/ /sred pa'i zhags pas bslus pa yi/ /khyed kyis sdig pa gang byas pa/ /de ni khyed la drag tu 'tshed/ /nged la ci zhig smra bar byed/ /sdig pa rgyu med ma yin te/ /sdig ma byas la rnam mi smin/ /gang gis sdig pa gang byas pa/ /de la de ni yongs su smin/ /chang ni dug gi mchog yin te/ /chang 'thung ba la bsten mi bya/ /chang 'thung ba la bsten pa ni/ /dge ba'i chos rnams nyams par 'gyur/ /gang gis rtag tu chang bsten pa/ /de yi blo ni mi brtan zhing / / blo yo ba la chos med de/ /de lta bas na chang spongs shig /nyams byed nang na nyams mchog ni/ /chang zhes mkhas pa rnams kyis bshad/ /mi las nyams pas nyams byed pa/ /de lta bas na chang mi bsten/ /chang 'thung ba la sten byed pa/ /mi sdug sdig pa'i chos yin te/ /de lta bas na dug lta bu'i/ /chang 'thung ba ni rnam par spongs/ /chang 'thung ba la gnas pa'i skyon/ /nor zad ngan par rjod byed cing / /le lo shin du skyed byed pas/ /de lta bas na de spongs shig / chang gis 'dod chags skyed byed cing / /de bzhin khro dang gti mug dag /yang dang yang du skyed byed pas/ /de lta bas na chang spongs shig /de ltar ji srid du de'i sdig pa'i las bcom zhing spangs la zad par ma byas pa de srid du rang gi las kyi 'bras bu la spyod pa'i sems can dmyal ba pa dag sems can dmyal ba skra me 'bar bar 'tshed do/ /de dag sems can dmyal ba de las thar bar 'gyur te/ thar nas kyang gal te lan grangs gzhan la myong bar 'gyur ba'i las kyis yi dags dang dud 'gro dag tu ma skyes la/ mi rnams dang skal ba mnyam par mir skyes na/ de dang rgyu 'thun pa'i 'bras bus gang du rnam pa thams cad du chang med pa'i yul de lta bur skye bar 'gyur zhing gzugs dang ro mngon par shes par mi 'gyur ro/ /de nas gzhan yang dge slong las kyi rnam par smin pa shes pa des sems can dmyal ba ngu 'bod kyi 'khor la rtog par byed de/ sems can dmyal ba chen po ngu 'bod kyi 'khor gzhan gang zhig yod snyam mo/ /des thos pa las byung ba'i shes pas sems can dmyal ba me'i phye ma srin bu zhes bya ba mthong ngo / /der sems can dag las kyi rnam par smin pa gang gis skye bar 'gyur snyam nas des brtags na/ gang gis srog gcod pa dang / ma byin par len pa dang / 'dod pas log par g.yem pa kun du bsten cing bsgoms te mang du byas pa ni snga ma bzhin no/ /chang 'tshong ba ni chu mang bar byed la rin thang gzhan yin na gzhan du 'tshong ste/ de la skyon kha na ma tho ba brdzun dang / ma byin par len pa dang / chang 'thung ba de dag byung ngo / /de lus dang bral nas ngan 'gro log par ltung ba sems can dmyal ba me'i phye ma srin bur skye bar 'gyur ro/ /der gnod pa 'di dag 'byung bar 'gyur te/ 'di lta ste/ nad bzhi brgya rtsa bzhi 'byung ste/ rlung las gyur pa brgya rtsa gcig dang / mkhris pa las gyur pa brgya rtsa gcig dang / bad kan las gyur pa brgya rtsa gcig dang / 'dus pa las gyur pa brgya rtsa gcig ste/ sems can dmyal ba pa dag dang 'thun par 'byung ngo / /gang nad gcig gis nyi ma gcig tu 'dzam bu'i gling dang / byang gi sgra mi snyan dang / nub kyi ba lang spyod dang / shar gyi lus 'phags kyi mi de dag kun ma lus par 'chi bar byed pa'i nad kyi rnam pa de lta bu dag sems can dmyal ba pa de dag la 'byung bar 'gyur ro/ /gnod pa gzhan dag yang dang yang du 'byung ste/ 'di lta ste/ sems can dmyal ba pa rang gi lus de dag la smin pa 'byung bar 'gyur te/ gang lpags pa dang / khrag dang / sha dang / tshil dang / rus pa dang / rkang dag la phug cing phug cing 'thung ngo / /de ltar mgon med pa/ gshin rje'i mis 'jigs shing ngu skad 'byin pa na me'i gnod pa rnam pa du ma 'byung ste/ ji srid du de'i sdig pa'i las bcom zhing spangs la zad par ma byas pa de srid du me des sreg cing 'tshed la rab tu 'bar bar byed do/ /de dag sems can dmyal ba de las thar bar 'gyur te/ gal te lan grangs gzhan la myong bar 'gyur ba'i las kyis yi dags dang / dud 'gro dag tu ma skyes la/ mi rnams dang skal ba mnyam par mir skyes na/ de chang gi nyo tshong gi rgyu 'thun pa'i 'bras bus sdug bsngal ba dang dbul bar 'gyur ro/ /de nas gzhan yang dge slong las kyi 'bras bu rnam par smin pa shes pa des sems can dmyal ba ngu 'bod kyi 'khor la brtags na sems can dmyal ba lcags kyi me 'bar ba'i gtun shing zhes bya ba mthong ngo / /der sems can dag las gang gis skye bar 'gyur snyam nas des brtags na/ gang gis srog gcod pa dang / ma byin par len pa dang / 'dod pas log par g.yem pa kun du bsten cing bsgoms te mang du byas pa ni sems can dmyal ba lcags kyi me 'bar ba'i gtun shing du skye bar 'gyur te/ snga ma bzhin no/ /seng ge dang / stag dang / gzig dang / ri skegs dang / shang shang te'u dag chang gis brid de nyams par byas la bzung nas bsad pa gang yin pa de ni der skye bar 'gyur ro/ /der gnod pa 'di dag 'byung bar 'gyur te/ 'di lta ste/ lcags kyi gtun shing rab tu 'bar ba dag 'byung ngo / /las kyis byas pa'i gtun shing rnams kyis yan lag dang nying lag thams cad phye mar rlog cing gsod de ji ltar bye ma'i tshad tsam du de ltar yan lag dang nying lag thams cad phye mar rlog go/ /tshor ba des nyam thag pa dag 'o dod 'bod ngu skad 'byin/ smre sngags 'don cing phan tshun du rgyug ste/ brgyugs pa dang / gtun shing rab tu 'bar ba rnams kyis kun du 'tshog go/ /ji srid du de'i sdig pa'i las byas shing bsags pa bcom zhing spangs la zad par ma byas pa de srid du tshor bas nyen pa'i sems can de dag gshin rje'i mi rnams kyis bzung nas spu gri dag gis yan lag dang nying lag thams cad 'jog cing gsheg la 'dral lo/ /de phyis sems can dmyal ba de las thar bar 'gyur te/ thar nas kyang gal te lan grangs gzhan la myong bar 'gyur ba'i las kyis yi dags dang / dud 'gro dag tu ma skyes la mi rnams dang skal ba mnyam par mir skyes na/ las de dang rgyu 'thun pas dreg can du 'gyur/ las de dang rgyu 'thun pas dbul bar 'gyur zhing sman pa dang / sman sbyor ba dang bral ba'i yul ngan pa dang / rtswa dang / mya ngan dang / mes tshig pas 'jig pa mang ba'i yul ngan pa dag tu skye bar 'gyur ro// // 'phags pa dam pa'i chos dran pa nye bar gzhag pa/ bam po dgu pa/ de nas gzhan yang dge slong las kyi 'bras bu rnam par smin pa shes pa des sems can dmyal ba chen po ngu 'bod kyi 'khor la brtags na/ des thos pa las byung ba'i shes pas 'khor rdo me 'bar ba char ltar 'bab pa zhes bya ba mthong ngo / /der sems can dmyal ba dag las gang gis skye bar 'gyur snyam nas des brtags na/ gang gis srog gcod pa dang / ma byin par len pa dang / 'dod pas log par g.yem pa kun tu bsten cing bsgoms te mang du byas pa ni sems can dmyal ba rdo me 'bar ba char ltar 'bab par skye bar 'gyur ro/ /chang ni g.yul 'gyed pa'i don du ji ltar glang po che chen pos g.yul du mi mang po gsod par 'gyur te/ de las bdag cag rgyal bar 'gyur bar bya'o snyam nas glang po che dag la chang blud de/ mi bsad na de dag las de'i rnam par smin pas sems can dmyal ba rdo me 'bar ba char ltar 'bab par skye bar 'gyur ro/ /der gnod pa 'di dag 'byung bar 'gyur te/ 'di lta ste/ sems can dmyal ba der las las skyes pa me rab tu 'bar ba'i glang po che srog thams cad 'phrog par byed pa 'byung ste/ des mi de bzung nas yan lag dang nying lag thams cad phug cing phye mar rlog par byed 'phen par byed cing rnam par 'tshe bar byed/ rnam par 'khrug par byed cing yan lag dang nying lag so sor 'byed par byed do/ /de nas de thar bar 'gyur te/ phyi nas de gshin rje'i mi rnams kyis gzung ngo / /bzung nas zangs dmar po rab tu bskol ba'i nang du bcug ste/ ji srid du de'i sdig pa'i las bcom zhing spangs la zad par ma byas kyi bar du de lo 'bum phrag du mar sreg cing 'tshed la gsod par byed do/ /de sems can dmyal ba de las thar bar 'gyur te/ thar nas kyang gal te lan grangs gzhan la myong bar 'gyur ba'i las kyis yi dags dang / dud 'gro dag tu ma skyes la mi rnams dang skal ba mnyam par mir skyes na/ las de dang rgyu 'thun pa'i 'bras bus des glang po che bsad par bshams kyang glang po che des gsod par 'gyur/ dbul zhing byad bzhin ngan la rkang pa dang lag pa bong bu'i rkang pa ltar 'gyur zhing lus rtag tu rtsub par 'gyur ba mthong ngo / /de nas gzhan yang dge slong las kyi 'bras bu rnam par smin pa shes pa des sems can dmyal ba chen po ngu 'bod kyi 'khor la brtags na/ des thos pa las byung ba'i shes pas sems can dmyal ba 'chi med ces bya ba mthong ngo / /der mi dag las gang gis skye bar 'gyur snyam nas des brtags na/ gang gis srog gcod pa dang / ma byin par len pa dang / 'dod pas log par g.yem pa kun du bsten cing bsgoms te mang du byas pa ni snga ma bzhin no/ /chang ni bud med gzhan 'os pa ma yin pa la blud de blud nas kyang myos pas 'khrul par byas la/ de dang lhan cig tu mi tshangs par spyad na de lus dang bral nas ngan 'gro log par ltung ba sems can dmyal ba 'chi med du skye bar 'gyur ro/ /der gnod pa 'di dag 'byung bar 'gyur te/ 'di lta ste/ khyi rab tu 'bar ba dag gis rlig pa 'byin par byed do/ /phyung zhing bton nas kyang yang shin du 'jam zhing sdug pa skye bar 'gyur ro/ /yang 'byin par byed de/ gnod pa don gyis byed pas ngu skad 'byin par byed do/ /de ltar de dag de las thar nas gar bab bab tu 'bros so/ /de dag bros pa'i mdun na ngam grog chen po de la bya rog dang / bya rgod dang / 'ug pa dang / bya d+ha mi ka lcags kyi mchu dang sen mo rab tu 'bar ba rnams kyis gang ba mthong ngo / /ngam grog de las sems can dmyal ba 'khams te bzhin gyur pa mgon 'dod pa/ skyabs 'dod pa de dag rab tu lhung ngo / /de nas bya rog dang / bya rgod dang / 'ug pa mchu dang sen mo rab tu 'bar ba rnams kyis yan lag dang nying lag so sor phye ste za'o/ /ji srid du de'i sdig pa'i las bcom zhing spangs la zad par ma byas pa de srid du lo 'bum phrag du mar yang skye bar 'gyur ro/ /de dag sems can dmyal ba de las thar par 'gyur te/ thar nas kyang lan grangs gzhan la myong bar 'gyur ba'i las kyis yi dags dang / dud 'gro dag tu ma skyes la mi rnams dang skal ba mnyam par mir skyes na snga ma bzhin du sbyar te/ las de'i rgyu dang 'thun pa'i 'bras bus rgyal pos bzung zhing lus mdog ngan pa dang / bzhin mdog ngan par gyur cing de nyid du 'chi ba'i dus byed par 'gyur ba mthong ngo / /de nas gzhan yang dge slong las kyi 'bras bu rnam par smin pa shes pa des sems can dmyal ba chen po ngu 'bod kyi 'khor la brtags na/ gang gis srog gcod pa dang / ma byin par len pa dang / 'dod pas log par g.yem pa kun du bsten cing bsgoms te mang du byas pa snga ma bzhin du des mthong ngo / /chang ni dug dang sbyar nas dgra gsad par bya ba'i phyir blud na de lus dang bral nas ngan 'gro log par lhung ba 'khor lcags tshal dgon par skye bar 'gyur ro/ /'di lta ste/ lcags kyi 'khor lo 'khor ba rab tu 'bar ba der sems can dmyal ba pa de dag lcags kyi thag pas bcings nas lcags kyi 'khor los skor bar byed do/ /skor ba na dgra gshin rje'i mi rnams kyis yan lag dang nying lag thams cad la mtshon cha dag gis 'debs par byed de/ ji ltar yungs 'bru tsam du sems can dmyal ba pa de dag gi las kyis sha de dag la lhag ma ma lus par byed kyang de'i las nyes par byas pa'i rnam par smin pas dus las 'da' bar ni mi byed do/ /gal te de dag las zad nas 'khor lo 'khor ba de las thar nas gar bab bab tu 'bros pa dang / de dag las kyis byas pa'i lcags kyi sbrul rnams kyis bzung bar 'gyur te/ ji srid du de'i sdig pa'i las bcom zhing / spangs la zad par ma byas pa de srid du lo 'bum phrag du mar za'o/ /de phyis sems can dmyal ba de dag las thar bar 'gyur te/ thar nas kyang gal te lan grangs gzhan la myong bar 'gyur ba'i las kyis yi dags dang d ud 'gro dag tu ma skyes la mi rnams dang skal ba mnyam par mir skyes na las de dang rgyu 'thun pa'i 'bras bus sbrul 'dzin pa 'am mgo'i nor bu 'byin par 'gyur yang las de dang rgyu 'thun pa'i 'bras bus sbrul rnams kyis srog dang 'bral bar 'gyur ba mthong ngo / /de nas gzhan yang dge slong las kyi 'bras bu rnam par smin pa shes pa des sems can dmyal ba ngu 'bod kyi 'khor la brtags na des 'khor rab rib kun bsags shes bya ba mthong ngo / /der sems can dag las gang gis skye bar 'gyur snyam nas des brtags na gang gis srog gcod pa dang / ma byin par len pa dang / 'dod pas log par g.yem pa kun du bsten cing bsgoms te mang du byas pa snga ma bzhin no/ /sems can so so 'tsho bar bya ba'i phyir chang 'thung ba'i zong ngam rin byin na de lus dang bral nas ngan 'gro log par ltung ba sems can dmyal ba rab rib kun bsags su skye bar 'gyur ro/ /der gnod pa 'di dag 'byung bar 'gyur te/ 'di lta ste/ sems can dmyal ba de thams cad mun pa yin te/ der gnod pa myong ba ni gshin rje'i mi dag kyang mi mngon la 'di dag sus byas shes gnod pa yang mi mngon te/ mun gnag las byung ba'i me'i nang du 'jug go/ /me de'i 'od kyang shin du mi gsal ba yin te/ bar skabs skra'i rtse mo tsam yang med pa'i me de'i nang du de dag sreg cing 'tshed la gdungs so/ / ngu zhing skad 'byin pa na ji srid du de'i sdig pa'i las byas shing bsags pa bcom zhing spangs la zad par ma byas pa de srid du sog le dag gis kyang mgo la sogs pa nas rkang pa'i bar du phyed mar gsheg go/ /phyis sems can dmyal ba de las thar bar 'gyur te/ thar nas kyang gal te lan grangs gzhan la myong bar 'gyur ba'i las kyis yi dags dang dud 'gro dag tu ma skyes la mi rnams dang skal ba mnyam par mir skyes na/ las de dang rgyu 'thun pa'i 'bras bus rtag tu skom pa dang bkres pas gdungs par 'gyur zhing der nor rdzas dang 'bral bar 'gyur la gang na bza' btung nyung ba'i gling de dag tu skye bar 'gyur ba mthong ngo / /de nas gzhan yang dge slong las kyi 'bras bu rnam par smin pa shes pa des sems can dmyal ba chen po ngu 'bod kyi 'khor la brtags na/ des thos pa las byung ba'i shes pas sems can dmyal ba gshin rje'i mtshams kyi dgon pa zhes bya ba mthong ngo / /der sems can dag las gang gis skye bar 'gyur snyam nas des brtags na/ gang srog gcod pa dang / ma byin par len pa dang / 'dod pas log par g.yem pa kun du bsten cing bsgoms te mang du byas pa ni snga ma bzhin no/ /gang gis nad mi bzad pas thebs pa dang / bu btsas pa dag la chang 'thung ba'i zong dang rin gyi don du gos kyi rgyu 'am zas kyi rgyu byin na/ de lus dang bral nas ngan 'gro log par ltung ba sems can dmyal ba gshin rje'i mtshams kyi dgon par skye bar 'gyur ro/ /der gnod pa 'di dag 'byung bar 'gyur te/ 'di lta ste/ rkang pa dang / sen mo la sogs pa gshin rje'i mi'i kha 'bar rab tu 'bar ba dag gis za bar byed do/ /zos nas kyang gnod pa 'byung bar 'gyur te/ 'di lta ste/ ji srid du de'i sdig pa'i las bcom zhing spangs la zad par ma byas pa de srid du mdung thung gi rtse mo rab tu 'bar ba dag gis lo 'bum phrag du mar 'tshed cing sreg la gsheg cing gsod do/ /de sems can dmyal ba de las thar bar 'gyur te/ thar nas kyang gal te lan grangs gzhan la myong bar 'gyur ba'i las kyis yi dags dang dud 'gro dag tu ma skyes la mi rnams dang skal ba mnyam par mir skyes na las de dang rgyu 'thun pa'i 'bras bus de yul ngan pa dang / gnas ngan pa dang / ri brags ngan pa dag tu phag 'tsho ba dang long bar 'gyur ba mthong ngo / /de nas gzhan yang dge slong las kyi 'bras bu rnam par smin pa shes pa des sems can dmyal ba chen po ngu 'bod kyi 'khor la brtags na des thos pa las byung ba'i shes pas sems can dmyal ba shing shal ma li'i tshal zhes bya ba yod pa mthong ngo / /der sems can dag las gang gis skye bar 'gyur snyam nas des brtags na gang gis srog gcod pa dang / ma byin par len pa dang / 'dod pas log par g.yem pa ni snga ma bzhin no/ /chang 'thung ba ni mchog tu mang pos chang shin du ra ro bar 'gyur ba'i rdzas de dag sbyor bar byed de/ de'i chang ji ltar kha cig ni dar ba lta bu dang / kha cig ni chu lta bu dang / kha cig ni zhog chu lta bu de ltar bcos nas 'brog dgon par zhugs pa'i ded dpon dag la blud de/ de yang ra ro zhing shin du ra ro bar 'gyur ba/ de kun gyis shin du ra ro bar byas te ra ro ba de dag des bsad nas nor gang dang gang yod pa de dang de dag phrogs na des bslus pa yin pas de 'jig rten na chom rkun pa zhes bya'o/ /de'i las kyis bskyod pas de lus dang bral nas ngan 'gro log par ltung ba sems can dmyal ba shing shal ma li chen po'i nags su skye bar 'gyur ro/ /der gnod pa 'di dag 'byung bar 'gyur te/ 'di lta ste/ me rab tu 'bar ba'i rdo'i char gyi tshogs kyis lus dag kun du sreg cing 'bigs la gcod par byed de sa'i bar du sreg par byed do/ /chu bo rab tu bskol ba'i me mdag ma dmar po tsha bas bzhus pa'i chu rtag tu 'jigs pa zhes bya ba yod de/ ji srid du de'i sdig pa'i las bcom zhing spangs la zad par ma byas pa de srid du zangs dang ro nyer bsres pa rab tu bskol ba'i chu bo der lo 'bum phrag du mar sreg cing 'tshed la gshin rje'i mi rnams kyis kyang ral gri dang mda' bo che rab tu 'bar ba dag gis kun du 'debs par byed do/ /de phyis thar bar 'gyur te/ thar nas kyang gal te lan grangs gzhan la myong bar 'gyur ba'i las kyis yi dags dang / dud 'gro dag tu ma skyes la mi rnams dang skal ba mnyam par mir skyes na las de dang rgyu 'thun pa'i 'bras bus mig gi mdog gnag cing rtag tu khro la phrag dog mang por 'gyur ba mthong ngo / /de nas gzhan yang dge slong las kyi 'bras bu rnam par smin pa shes pa des sems can dmyal ba chen po ngu 'bod kyi 'khor la brtags na/ des thos pa las byung ba'i shes pas shing shal ma li chen po'i tshal yod pa mthong ngo / /der sems can dag las gang gis skye bar 'gyur snyam nas des brtags na/ gang gis srog gcod pa dang / ma byin par len pa dang / 'dod pas log par g.yem pa kun du bsten cing bsgoms te mang du byas pa ni de lus dang bral nas ngan 'gro log par ltung ba sems can dmyal bar skye bar 'gyur te/ snga ma bzhin no/ /chang gi dbang du byas nas sings po ltar bcos te/ 'brog dgon pa'i skye bo mang po dag la blud na lus dang bral nas ngan 'gro log par ltung ba sems can dmyal ba shing shal ma li chen por skye bar 'gyur ro/ /de chang blud pa'i 'bras bus der gnod pa 'di dag 'byung bar 'gyur te/ 'di lta ste/ las kyis byas pa'i shing shal ma li'i 'phang du dpag tshad gcig tsam yod pa 'byung ste/ 'dab ma spu gri lta bu yin la/ yal ga me 'bar ba lta bu yin/ dud pa bdug cing rlung dug lta bu 'byung ste/ de ltar chang gi las kyis byas pa de 'byung ngo / /gang dpag tshad gcig tshun chad du rlung dug lta bus gnod par byed kyang srog dang 'bral bar ni mi 'gyur ro/ /ji lta ji ltar shing shal ma li chen po'i nags dpag tshad sum stong yod par chud na/ de lta de ltar mdag ma dang du bar bsres pa dug lta bu'i shugs kyis sdug bsngal 'bum snyed myong yang dus las 'da' bar ni mi 'gyur ro/ /gang gi tshe shing shal ma li chen po'i tshal du sems can dmyal ba pa gshin rje'i mi rnams kyis 'jigs par byas pa chud par gyur pa de'i tshe shing rnams las kun nas spu gri lta bu'i char rab tu 'bab ste/ gang lag na ral gri dang mda' bo che mang po thogs pa 'khrugs pa dag gis yan lag dang nying lag thams cad dang rgyus pa dang / gnad dang / ka ran da ra dang / rus pa dang / rkang thams cad yang dang yang du rnam par gshig cing 'dral la dum bur byed do/ / gshin rje'i mis 'jigs shing skrag pa de dag lcags kyi shing shal ma li chen po'i nags khrod na kha cig ni grib ma'i nang na zhum zhum por 'dug /kha cig ni shing khar 'dzeg /kha cig ni gshin rje'i mi de dag dang phrad nas ral gri dag gis 'debs shing gsheg go/ de chang 'thung ba'i 'bras bus gang dag gi grib ma'i nang na zhum zhum por 'khod pa de dag gi mig kyang bya rgod kyis 'byin cing khu ba yang 'thung ngo / /chang 'thung ba de'i 'bras bus shing de la 'dzeg pa de dag kyang shing de dag las yal ga lhung bas de dag dum bu brgya 'am yang na stong du phye mar rlog go/ gang dag tshal de'i thor to la 'dzegs pa de dag ba tshwa'i chu bo bzhus par 'jug ste/ ji srid du de'i sdig pa'i las bcom zhing spangs la zad par ma byas pa de srid du lo 'bum phrag du mar rgyus pa dang / rus pa dang / lus nyid kyis gnod pa myong bar 'gyur te/ 'di ni de'i phyogs 'ga' zhig bstan pa yin no/ /de de las thar bar 'gyur te/ thar nas kyang gal te lan grangs gzhan la myong bar 'gyur ba'i las kyis de mi rnams kyi skal ba dang mnyam par mir skyes na las de dang rgyu 'thun pa'i 'bras bus de yid rnam par g.yengs shing nad drag po 'am gal te snying nad dam/ gal te ngal skyen pa mang ba 'am/ gal te rkang bam gyis 'debs par 'gyur zhing gal te long bas nyam thag par 'gyur ba mthong ngo / /de nas gzhan yang dge slong las kyi 'bras bu rnam par smin pa shes pa des sems can dmyal ba chen po ngu 'bod kyi 'khor la brtags na des thos pa las byung ba'i shes pas sems can dmyal ba chu shing bsregs pa'i dud pa'i tshal zhes bya ba mthong ngo / /der sems can dag las gang gis skye bar 'gyur snyam nas des thos pa las byung ba'i shes pas brtags na/ srog gcod pa dang / ma byin par len pa dang / 'dod pas log par g.yem pa kun du bsten cing bsgoms te mang du byas pa ni snga ma bzhin no/ / chang 'thung ba ni bud med yon tan can dag la thabs gzhan gyi spyod pas brid de blud nas ra ro bar byas te sems 'khrul bar gyur na 'di lta ste/ sems can dmyal ba de ni las de'i rnam par smin pas kun nas dpag t shad lnga yod pa de'i nang dud pas 'khrigs shing rgya mtsho'i klong gi me'i mun gnag gis gtibs pa zabs su kun nas rgyang grags gsum du sa brkos pa der me mdag khrol bu rab tu 'bar bas shin du gang ba'i sa'i bu ga der sems can dmyal ba pa de dag nyin gcig bzhin du 'jug ste ngu skad 'byin par yang mi nus shing de bzhin du 'dzag sgo thams cad kyang mes gang bar 'gyur ro/ /de las thar nas chu shing gi dud pa des de ltar yang dang yang du 'dzag sgo thams cad gang bar 'gyur la 'di ltar me de la bde bar sems te/ du ba de'i mthu ni de ltar shin du rno ba nyid yin no/ /de las kyang thar nas ji srid du de'i sdig pa'i las bcom zhing spangs la zad par ma byas pa de srid du bya du ba'i mdog gi phreng ba zhes bya ba'i mchu shin du rno ba de dag gis rus pa phug nas rkang dag la za bar byed do/ /de phyis sems can dmyal ba de las thar bar 'gyur te/ thar nas kyang gal te lan grangs gzhan la myong bar 'gyur ba'i las kyis yi dags dang / dud 'gro dag tu ma skyes la mi rnams dang skal ba mnyam par mir skyes na/ las de dang rgyu 'thun pa'i 'bras bus glo dang mjug do dag la gdon gyi nad kyis thebs shing dbul ba dang tshe thung bar 'gyur bar mthong ngo / /de nas gzhan yang dge slong las kyi 'bras bu rnam par smin pa shes pa des sems can dmyal ba chen po ngu 'bod kyi 'khor la brtags na/ des thos pa las byung ba'i shes pas sems can dmyal ba me mdag dud pa'i tshal zhes bya ba mthong ngo / /der sems can dag las gang gis skye bar 'gyur snyam nas des brtags na/ gang gis srog gcod pa dang / ma byin par len pa dang / 'dod pas log par g.yem pa kun du bsten cing bsgoms te mang du byas pas ni snga ma bzhin no/ /chang 'thung ba ni dgra gsad pa'i phyir dang / chom rkun dang rgyal pos bkrabs pa gsad pa'i phyir blud na/ de lus dang bral nas ngan 'gro log par ltung ba sems can dmyal ba me mdag dud pa'i tshal du skye bar 'gyur ro/ /der gnod pa 'di dag 'byung bar 'gyur te/ 'di lta ste/ der las kyis byas pa'i me mdag spu gri lta bu'i rlung ldang la/ rlung des sems can dmyal ba pa de dag phan tshun gyi shugs kyis thug cing shin du thug go/ /de dag gi lus phan tshun thug pa na ji ltar bye ma chang ba nas gtor ba bzhin du de ltar lus de dag phye mar rlog go/ /yang las kyi dbang gis skye bar 'gyur te/ ji srid du de'i sdig pa'i las bcom zhing spangs la zad par ma byas pa de srid du lo 'bum phrag du mar gnod pa thams cad myong bar 'gyur te/ 'di lta ste/ spu gris gsheg cing me'i tshor ba dang / nad kyi tshor ba dang / mtshon cha'i tshor ba dang / ba tshwa'i tshor ba ste/ tshor ba mchog tu tsha ba/ mchog tu 'jigs pa de dag ji srid du de'i sdig pa'i las bcom zhing spangs la zad par ma byas pa de srid du lo 'bum phrag du mar myong bar 'gyur ro/ /phyis sems can dmyal ba de las thar bar 'gyur te/ thar nas kyang gal te mi rnams dang skal ba mnyam par mir skyes na/ las de dang rgyu 'thun pa'i 'bras bus gzhang 'brum rim gsum pas thebs par 'gyur zhing / rtag tu grang ba'i rims kyis thebs par 'gyur ba mthong ngo / /de nas gzhan yang dge slong las kyi 'bras bu rnam par smin pa shes pa des sems can dmyal ba chen po ngu 'bod kyi 'khor la brtags na/ des thos pa las byung ba'i shes pas sems can dmyal ba glog gi na bun tshal zhes bya ba ji ltar 'dug pa mthong ngo / /der sems can dag las gang gis skye bar 'gyur snyam nas des brtags na/ gang gis srog gcod pa dang / ma byin par len pa dang / 'dod pas log par g.yem pa kun du bsten cing bsgoms te mang du byas pa ni snga ma bzhin no/ /chang 'thung ba ni phyi rol la blo mngon par zhen pa'i ngang tshul can dag slu ba'i bsam pas blud na lus dang bral nas ngan 'gro log par ltung ba sems can dmyal ba glog gi na bun tshal du skye bar 'gyur ro/ /de dag la gnod pa 'di dag 'byung bar 'gyur te/ 'di lta ste/ sems can dmyal ba de khru nyis brgyar sems can dmyal ba pa'i mes rab tu gang ba der sems can dmyal ba pa dag gshin rje'i mi rnams kyis bzung nas 'jug ste/ rkang pa nas mgo la sogs pa'i bar bteg cing bzhus so/ /las kyi rlung gis yang skye bar 'gyur la me de ni lo ma sdud pa lta bu yin te/ ji tsam du phyogs bcur thag pas dkris pa bzhin du sems can dmyal ba pa de dag dkris nas ji ltar thal ba yang mi mngon pa de ltar sreg par byed do/ /yang 'byung bar 'gyur te/ ji srid du de'i sdig pa'i las bcom zhing spangs la zad par ma byas pa de srid du de ltar lo 'bum phrag du mar sreg go/ /de phyis sems can dmyal ba de las thar bar 'gyur te/ thar nas kyang gal te lan grangs gzhan la myong bar 'gyur ba'i las kyis yi dags dang dud 'gro dag tu ma skyes la mi rnams dang skal ba mnyam par mir skyes na de chang 'thung ba'i rgyu 'thun pa'i 'bras bus yul ya ba na dang / ba lhi ka der skyes shing bkol bas nyams par 'gyur te/ shugs drag pas bkol bar 'gyur ba mthong ngo / /de nas gzhan yang dge slong las kyi 'bras bu rnam par smin pa shes pa des sems can dmyal ba ngu 'bod kyi 'khor la brtags na des 'khor kun du rtog byed ces bya ba mthong ngo / /der sems can dag las kun du bsten cing bsgoms te mang du byas pa gang gis skye bar 'gyur snyam nas des brtags na/ gang gis srog gcod pa dang / ma byin par len pa dang / 'dod pas log par g.yem pa ni snga ma bzhin no/ /chang 'thung ba ni ji ltar 'di dag chang gis yid g.yengs na lam du 'jug pa la ngal bar mi 'gyur ro snyam nas lam du 'jug pa'i ched dang / rngon pa dag ri dgas gsad pa la 'gro ba mgyogs par 'gyur ro snyam nas blud na de lus dang bral nas ngan 'gro log par ltung ba sems can dmyal ba kun du rtog byed du skye bar 'gyur ro/ /de dag la gnod pa 'di dag 'byung bar 'gyur te/ 'di lta ste/ 'dod pa gang dang gang nyid du kun du sems pa de dang de nyid gshin rje'i mi dag gis brgya 'am yang na stong ngam/ bye ba brgya 'am yang na stong du byed de/ sems can dmyal ba'i 'khor gzhan du gnod pa gang dang gang 'byung ba de thams cad kyang bzhi 'gyur du der 'byung ste snga ma bzhin no/ /sems can dmyal ba pa rnams la gshin rje'i mi dag gis rjes su bstan pa'i tshigs su bcad de smras pa/ de yi las ni rnam gsum gyis/ /gnas skabs dgur ni 'tshed byed ces/ /rnam par smin pa bzhi bcu tham/ / drag po rab tu g.yos par 'gyur/ /don med gzhi ni chang yin te/ /sems can dmyal ba'i bzhad gad pa/ /dbang po thams cad rnam nyams shing / /don med pa yi rgyur gyur to/ /tshig la shin du dga' ba dang / /chags pa dang ni 'jigs pa dang / /ngag gi skyon dang rlom pa dang / /tshig rtsub gzhi ni de yin no/ /chang gis kun du g.yengs pa'i yid/ /bya dang mi bya mi shes pa/ /mi de phyugs dang mtshungs pa yin/ /de lta bas na chang spongs shig /chang gis g.yengs pa'i mi dag ni/ /gson yang shi ba dag dang mtshungs/ /gang zhig rtag tu gson 'dod pas/ /rtag par chang ni rnam par spongs/ /chang ni nyes pa kun gyi gzhi/ /rtag par don kun med par byed/ /ngan song gsum gyi them skas te/ /mun nag gnas ni chen po yin/ /chang gis sems can dmyal bar 'gro/ /de bzhin yi dags 'jig rten dang / /chang gi skyon gyis bslus pa yi/ /mi dag dud 'gro rnams su 'gro/ /dug gi nang du dug ni chang / / de bzhin dmyal ba'i nang na dmyal/ /nad kyi nang na nad mchog ni/ /chang zhes mkhas pa rnams kyis bshad/ /blo dang dbang po nyams byed cing / /rin chen chos ni zad byed la/ /tshangs par spyod pa 'jig byed pa/ /mi bzad chang ni skye gnas gcig / rgyal po dang ni bstan bcos mkhas/ /chang gis yang bar byed 'gyur na/ /tha mal mi dag chang 'thung ba/ /bslus par 'gyur ba ci zhig smos/ /chang la bsten pa'i mi dag ni/ /chos rnams kun gyi sta re yin/ /ngo tsha med par byed pa'i mchog /yang ba dag tu nye bar bstan/ /chang gis phrogs par gyur pa'i sems/ /bya ba dang ni mi bya ba/ /mi shes rnam par mi shes shing / /thams cad mi yis mi shes so/ /gang zhig chang la sten byed pa/ /skye bo res 'ga' dga' byed cing / /res 'ga' yongs su gdung byed la/ /res 'ga' sdig pa byed pa yin/ /blo ni shin du rmongs skyed cing / /'jig rten gnyis ni rnam 'jig byed/ /thar pa'i chos la me lta bur/ /sreg byed kho na chang yin no/ /mi gang dag ni chang spong ba/ /chos kyi ngang tshul mnyam par bzhag /gang na 'chi ba med pa yi/ /gnas mchog dag tu de 'gro'o/ /chang 'thung ba yis bslus pa dag /de ni byed pa dman pa yin/ /mi bzad sems can dmyal bar ltung / /don med ci zhig yongs su gdungs/ /'thung ba'i tshe na chang zhim ste/ /rnam smin tshe na mchog tu tsha/ /kim pa ka nang kim pa ka /chang zhes mkhas pa rnams kyis bshad/ /bdag la 'di yis mi gnod ces/ /blo ldan chang la yid ma rton/ /myong na bsil yang rnam smin tsha/ /chang ni dmyal bar 'gro bar byed/ /sdig pa'i chos rnams byed pa la/ /sems g.yeng ba dag dga' bar byed/ /phyi nas rnam smin tsha ba ru/ /blo ngan yongs su gdung bar 'gyur/ /'dod pa rnams la blo mi gtang / /'dod pa mchog tu slu ba yin/ /'khor ba'i 'ching ba drag po ste/ /sems can dmyal ba kun gyi rgyu/ /gang zhig 'dod pa rnams la dga'/ /de yi sdug bsngal mtha' med do/ /'dod pa'i sbrul gyis zin pa la/ /bde ba nams kyang ga la yod/ /khyed cag 'dod pa mi bzad cing / /drag po sems can dmyal bar 'ongs/ /gnod pa shin du mi bzad la/ /don med ci zhig yongs su gdung / /gang tshe 'dod pas bslus pa yi/ /khyed cag gis ni sdig byas pa/ /de tshe ci phyir khro mi byed/ /de ring ci zhig yongs su gdung / /byas la bsags pa brtan pa yi/ /las dag gi ni 'bras bu snang / /sdig pa'i tshor ba mi bzad pa/ /de lta bas na sdig mi bya/ /sdig pa sdig pa'i rnam smin de/ /rtag tu sdig pa rnams su smin/ /sdig mi byed la sdig med do/ /de lta bas na sdig pa spongs/ / sdig pa yongs su spangs pa la/ /sdig pa'i 'jigs pa med pa yin/ /sdig pa rang gis byas pa gnod/ /gzhan gyis spyod par mi 'gyur ro/ /de ltar gshin rje'i mi de dag sems can dmyal ba pa de rnams la rjes su ston pa rjes su bstan nas ji srid du de'i sdig pa'i las bcom zhing spangs la zad par ma byas pa de srid du gnod pa rnam pa sna tshogs dag byed du 'jug go/ phyis sems can dmyal ba de las thar bar 'gyur te/ thar nas kyang gal te lan g rangs gzhan la myong bar 'gyur ba'i las kyis yi dags dang dud 'gro dag tu ma skyes la mi rnams dang skal ba mnyam par mir skyes na las de dang rgyu 'thun pa'i 'bras bus de mchog tu khro bas khro bar 'gyur zhing bka' blo mi bde bar 'gyur ba mthong ngo / /de nas gzhan yang dge slong las kyi 'bras bu rnam par smin pa shes pa des sems can dmyal ba chen po ngu 'bod kyi 'khor la rtog par byed kyi/ sems can dmyal ba chen po'i 'khor gyi nyen kor la kun du mi rtog ste/ las kyi 'bras bu rnam par smin pa yang mi mthong ngo / /de 'di snyam du sems te/ kye e ma sems can dmyal ba'i 'khor bcu drug po 'di yang ji ltar yang sos dang / thig nag dang / bsdus gzhom bzhin te/ bye brag tu na sems can dmyal ba der gnod pa gzhan gang dang gang dag yod pa sems can dmyal ba de la tshor ba de dag thams cad bcu 'gyur du 'gyur te/ las byas pa'i rgyu gang brtan pa srog gcod pa dang / ma byin par len pa dang / 'dod pas log par g.yem pa dang / sdom pa blangs pas chang ldud pa 'am 'thung ba'i las ngan pa bzhi 'gyur byas pas der skye bar 'gyur te/ las de'i 'bras bu rnam par smin pa bzhi 'gyur gyis tshe shin du ring por de dag la tshor ba shin du drag pa 'byung ngo / /dge slong des bzhi 'gyur mthong nas las kyi 'bras bu rnam par smin pa ji lta ba bzhin du rjes su bsams pa dang / 'khor ba la yid 'byung ba yang bcu 'gyur du yid 'byung ngo / /yang dge slong de sems can dmyal ba ji lta ba bzhin mthong nas 'khor ba la shin du 'jigs shing skrag ste/ sa gzhan bcu pa la zhugs pa/ rnal 'byor spyod pa nang gi chos la chos kyi rjes su lta zhing gnas so/ /de yang sa bla'i gnod sbyin dag gis shes nas/ bar snang la spyod pa'i gnod sbyin dag la mngon par bsnyad do/ /snga ma bzhin du sbyar te/ tshangs ris dang / tshangs pa mdun na 'don dang / tshangs pa chen po'i bar gyis thos nas bdud kyi phyogs ni dma' bar 'gyur zhing dam pa'i chos kyi phyogs ni mngon par mtho bar 'gyur ro zhes tshangs pa chen po'i ris kyi lha dag dga' ste/ rgya cher snga ma bzhin du sbyar ro/ /de nas gzhan yang dge slong las kyi 'bras bu rnam par smin pa shes pa des sems can dmyal ba gzhan la brtags na/ de thos pa las byung ba'i shes pas sems can dmyal ba ngu 'bod chen po zhes bya ba yod pa mthong ngo / /der sems can dag las gang gis skye bar 'gyur snyam nas/ des thos pa las byung ba'i shes pas brtags na/ gang gis srog gcod pa dang / ma byin par len pa dang / 'dod pas log par g.yem pa dang / chang 'thung ba dang / brdzun smra ba kun du bsten cing bsgoms te mang du byas pa rdzogs pa de ni sems can dmyal ba ngu 'bod chen por skye bar 'gyur te/ de la srog gcod pa dang / ma byin par len pa dang / 'dod pas log par g.yem pa dang / chang 'thung ba ni snga ma bzhin no/ /mchog tu bya bar dka' ba skye bo mkhas pa kun gyis rab tu smad pa/ ngan song kun gyi sgor gyur pa rnam pa du zhig gis brdzun du smra ba rdzogs par 'gyur snyam nas/ 'di lta ste/ rgyal po 'am/ blon po 'am/ 'khor gyi nang du 'dug kyang rung ste/ gnyis shig chos kyi srang la zhon nas rtsod pa'i tshe dpang po 'di ni tshad ma yin te/ gang 'dis smras pa de bdag cag gi tshad ma yin no zhes smras pa las de yang dran bzhin du don gzhan du smra 'am/ gal te nor gyi phyir ram/ gal te phyogs bzung ngam/ gal te 'dod chags kyis bdag nyid slu ba ni snga ma bzhin te/ 'di ltar brdzun 'di las kha na ma tho bar 'gyur ba chung zad kyang med de/ bdag gis brdzun de bya'o snyam nas/ de ltar de grub pa na nyes pa don med pa byas pa de las de gnyis kyi nang nas gcig la chad pa gcod de/ gal te bsad du dgos pa 'am/ gal te gsod pa 'am/ gal te khyim 'phrog ste/ ji ltar nyes pa'i tshul dang 'thun par brdzun du smras na/ de'i rgyus sdig pa'i mi de lus dang bral nas ngan 'gro log par ltung ba sems can dmyal ba ngu 'bod chen por skye bar 'gyur ro/ /der shin du tshe ring bar 'gyur te/ gang 'phrul dga'i lha rnams kyi tshe ni lha'i lo brgyad stong ngo / /gang mi'i bgrang ba'i tshul gyis na/ mi lo brgyad brgya la nyin zhag gcig ste/ de 'phrul dga' ba rnams kyi nyin zhag gcig yin no/ /de nyin zhag sum bcu la zla ba gcig go/ /zla ba bcu gnyis la lo gcig ste/ lha de rnams kyi tshe ni lha'i lo brgyad stong yin la de ni sems can dmyal ba ngu 'bod chen po'i nyin zhag gcig yin te/ der brdzun smra ba sdig can rnams gnas so/ /bdag dang gzhan la slu ba ni dge ba'i rtsa ba thams cad ma rung bar byed cing mun pa chen por gyur pa/ skye bo chen po'i yid ches par mi byed la skye bo mkhas pa kun dang lo stong du mi mthun pa/ nyan thos dang rang sangs rgyas dang yang dag par rdzogs pa'i sangs rgyas kyis smad pa/ 'jig rten pa dang 'jig rten las 'das pa'i lam gyis skyon du bgrang ba/ dge ba'i rtsa ba'i stegs thams cad la sta re lta bur gyur pa/ rtag tu gnod pas yongs su 'gyur ba/ ro myags pa snying po med pa las dug lta bur langs pa/ 'khor ba'i 'gro ba ngan pa'i rgyur gyur cing nyal nyil du gyur pa/ kha nas dri mnam pa skyed pa/ rtag tu sdug bsngal gyi dra ba'i rgyur gyur pa/ mi 'dod cing mi sdug la yid du mi 'ong ba sems can dmyal ba 'jigs pa chen po'i pho nya/ 'chi ba'i tshe rnam par spangs pa chen por byed pa/ gshin rje'i mi'i yul du phyin pa rnams kyi mi mdza' ba chen por gyur pa/ yi dags dang / dud 'gro'i 'gro ba dag las g.yang sa lta bur gyur pa/ nyes par byas pa'i las kyi mtha'i rgyur gyur pa/ sems can dmyal ba'i 'jigs pa chen po byed pa/ dud 'gro dag gcig la gcig za ba'i rkyen du gyur pa/ thog ma med pa'i dus nas zhugs pa/ 'khor ba'i sa bon du gyur pa/ brdzun smra ba'i 'bras bus der skye bar 'gyur ro/ /sems can dmyal ba chen po de'i 'khor ni 'di lta ste/ sgra 'byin shin du sgra 'byin dang / tshor ba dpag tu med dang / tshor ba rtsub cing tsha la bzod par dka' dang / gnod pa dpe med pa dang / thams cad mun pa dang / 'jig rten bar gyi du ba dang / phye ma leb ltar rab tu ltung ba dang / srog 'chi ba dang bcas pa dang / gzhan du 'gyur ba dang / bsam pa dga' med dang / phan tshun gnod pa 'jug pa dang / nags tshal mes mched pa'i rgyud lta bu dang / tshor ba ring ba dang / tshor ba mtha' yas dang / khwa'i mchu rdo rje lta bu dang / khrag dang rkang za ba dang / me lce bcu gcig ste/ de dag ni sems can dmyal ba ngu 'bod chen po'i 'khor bcu drug yin no/ /sems can dmyal ba ngu 'bod chen po der sems can dag las byas shing bsags pa gang gis skye bar 'gyur snyam na las kyi nyer bsdogs dang las kyi lam dang / las kyi mjug kun du bsten cing bsgoms te mang du byas pas so sor 'jigs pa chen po sems can dmyal ba ngu 'bod chen por skye bar 'gyur ro/ /der gnod pa 'di dag 'byung bar 'gyur te/ 'di lta ste/ lce pad ma'i 'dab ma ltar shin du 'jam pa de kha nas drangs te rgyang grags gsum du brgyangs pa gshin rje'i mi 'jigs 'jigs ltar 'dug pas de bzung nas gshin rje'i mi rnams kyis lcags kyi thong gshol rab tu 'bar ba dag gis 'bugs shing rmed la yongs su 'dral lo/ /zangs dmar po rab tu 'bar bas chag chag 'debs shing lce las byung ba'i srin bu kha rab tu 'bar ba dag skye ste/ gang lce dag la za yang brdzun smra ba des lce de dag phyir kha'i nang du gzhug par mi nus so/ /de'i kha'i nang gi so gang yin pa de dag la so srin u lu ka la zhes bya ba byung ste/ de dag gis 'byin par byed cing de'i rkan yang las kyis byas pa'i rlung gis bye ma'i phye mar rlog go/ /de'i mid pa yang spu gri lta bu'i rlung gis 'jog par byed la/ de'i snying yang srin bu'i mchu rab tu 'bar ba dag gis za bar byed do/ /brdzun smra ba'i lus can ni sems can dmyal ba ngu 'bod chen po'i gzhir skyes nas sreg ste/ las byas pas kun nas bslang ba'i lus las byung ba'i srin bu rnams kyis lus rab tu 'bar ba'i rgyu ma dag la za'o/ / de'i nang na 'dug pa'i srin bu rnams dang / nad rnams kyis tshor ba mi bzad cing tsha la drag pa rnams myong ngo / /phyi rol du yang sdug bsngal rnam pa gnyis kyis gnod de/ 'di lta ste/ me las byung ba'i sems can dmyal ba pa dag la gshin rje'i mi rnams kyis tshor ba'i rgyu rnam pa sna tshogs dag gis 'jigs pa bskyed do/ /phur bu dag gis kyang yan lag dang nying lag thams cad dang lus kyi rtsa dang / rgyus pa dang / rus pa'i gseb thams cad 'bugs par byed do/ /gzhan yang tshor ba rnams kyis mngon par gtses par 'gyur te/ 'di lta ste/ ste'u yis yan lag nas rus pa la sogs pa'i bar thams cad 'jog go/ / brdzun smra ba smras pa de ni mchog tu don ma yin pa byed cing chos kyi stegs kun las rgal ba yin te/ brdzun smra ba ni don med pa thams cad kyi sgor gyur pa/ dge ba'i lo tog thams cad la ser ba lta bur gyur pa/ ngan 'gro thams cad kyi sgor gyur pa/ bya ba ma yin pa thams cad kyi gzhir gyur pa/ sems can thams cad kyi yid ches par 'gyur ba ma yin pa/ 'phags pa'i skye bo kun gyis mi gtsang ba dang 'dra bar smad par gyur pa/ rdzogs pa'i sangs rgyas dang nyan thos dang rang sangs rgyas dang dgra bcom pa dag gis dug bzhin du rnam par spangs pa/ 'jig rten pa dang 'jig rten las 'das pa'i lam gyi mun par gyur cing su yang 'dod pa med pa/ gcig tu sems can dmyal ba mngon du gyur cing gzhan dang mtshungs pa med pa/ mun nag du gyur pa yin te/ rnam pa de dag tu gyur pa don med pa 'byung ba yin no/ /gang dag smra zhing gang dag smras pa ni sems can dmyal ba ngu 'bod chen por rgyu de dang mtshungs par 'bras bu 'byung ste/ de'i rkang pa mes mar sar bzhin du 'ju zhing de'i bar yang sog le rab tu 'bar bas gsheg go/ /de lus dang yid thams cad du sdug bsngal zhing don med pa rgyu 'thun pa'i 'khor de'i mes sems can dmyal ba chen po dag 'tshed pa na/ nad thams cad kyis sems can dmyal ba mtshungs par kun du ngu skad 'byin to/ / nad mi bzad pa de dag gi ming gzung bar sla ba yang ma yin te/ de ni ji ltar bstan pa bzhin du ji srid du de'i sdig pa'i las byas shing bsags pa bcom zhing spangs la zad par ma byas pa de srid du lo 'bum phrag du ma brgya stong bye ba bye ba khrag khrig khrig tu sems can dmyal ba pa'i sdug bsngal myong bar 'gyur ro/ /de phyis sems can dmyal ba las thar bar 'gyur te/ thar nas kyang gal te lan grangs gzhan la myong bar 'gyur ba'i las kyis yi dags dang / dud 'gro dag tu ma skyes la mi rnams dang skal ba mnyam par mir skyes na/ de ltar srog gcod pa dang / ma byin par len pa dang / 'dod pas log par g.yem pa dang / chang 'thung ba dang / brdzun du smra ba dag gi rgyu 'thun pa'i 'bras bus de dbul zhing tshe thung la sems g.yengs pa/ ma ning skye bo kun gyis smad cing yid brtan pa'i gnas su mi 'gyur ro/ /'dir tshigs su bcad pa/ lus can brdzun du smra ba yi/ /chos gcig las ni 'gal byas pa/ /'jig rten pha rol rnam rgal ba'i/ /sdig pa don med gang med min/ /kun la yid ches mi byed pa/ /brdzun gyi tshig ni ma smra shig / 'khor bar gang gis gnod pa ni/ /bde 'gro nyid ni mthong mi 'gyur/ /brdzun tshig rab tu 'jug pa ni/ /'jig rten gnyis la gnod byed cing / /kun gyi rnam par ldang byed la/ /chos rnams kun gyi dgon pa yin/ /gang gis bdag nyid gcod byed pa/ /nyes smra gang dag smras pa ni/ /mi dag skyes ma thag tu ni/ /kha nas sta re lta bu 'byung / /gang dag brdzun tshig smra ba ni/ /de ni don med kun gyis brtags/ / ngan song kun gyi rgyud yin zhing / /de ni mun nag skye gnas gcig /bden pas dman pa'i mi dag ni/ /mkhas pa kun gyis rnam par spangs/ /'jig rten 'dir ni rtswa ltar 'gyur/ /pha rol ngan song rnams su 'tshed/ / dpa' bo shin du brdzun mi smra/ /nyon mongs brdzun tshig smra ba dag /kha nas rul ba'i dri 'byung la/ /phyi nas lus kyis gdungs par 'gyur/ /bden pa rin chen rnam spangs pa/ /de la chos ni med pa yin/ / chos ni rnam par spangs pa la/ /sdug bsngal mtha' med gnas pa yin/ /chos rnams kun gyi sgron yin zhing / /khams rnams rin chen lta bur dga'/ /mtho ris lam gyi dam pa ni/ /bden pa yin zhes rims bral gsung / /bden pa yis ni mtho ris dang / /bden par smra ba thar par 'gro/ /bden pas dman pa'i mi dag ni/ /khyi dang 'dra bar rab tu bsgrags/ /gang la bden pa med pa ni/ /tha shal nang na de tha shal/ /bden pa chos kyi them skas te/ /snang ba'i 'byung khung chen po yin/ /thar pa'i chos kyi lam yin zhing / /nor gyi nang na nor mchog la/ /skyabs kyi nang na skyabs mchog ni/ /bden pa yin zhes mkhas pas bshad/ /snang ba'i nang na snang ba mchog /mig gi nang na 'ang mig dang ldan/ /nor rdzas med la nor rdzas te/ /rgyan gyi nang na 'ang rgyan bzang yin/ /bden pa mi zad gter yin te/ /rgyal po kun gyis dbrog mi nus/ /mi dag gang gis smra ba ni/ /'gro ba mchog tu 'gro ba yin/ /ji ltar bden pas skyes bu dag /brgyan pa mdzes te lha 'dra 'o/ /sna tshogs rgyan gyis skyes bu dag /brgyan pa de ltar mdzes pa myin/ / ji ltar 'jig rten pha rol du/ /pha med ma med don med cing / /bshes med gnyen med skyabs med pas/ /de ltar rtag tu bden pa smros/ /me yi nang na me mchog la/ /dug gi nang na dug mchog ste/ / ngan 'gro rnams kyi them skas ni/ /brdzun pa yin zhes yongs su bsgrags/ /reg na dug dang me 'dra ba/ /brdzun pa rnam par spang bar gyis/ /brdzun gyis bsregs pa'i mi dag ni/ /bsregs pa yin zhes mngon par brjod/ /de ltar mngon par 'bad kun gyis/ /mi dag brdzun ni ma smra shig /'jigs la sogs pa nyon mongs kun/ /brdzun las byung zhes yongs su brjod/ /de ltar dge slong de brdzun gyi las kyi 'bras bu'i de kho na lkog tu ma gyur pa mthong ba/ bden pa'i yon tan gyi de kho na mthong ba/ dge ba dang mi dge ba'i de kho na mthong ba/ sems can dmyal ba chen po ngu 'bod chen po'i 'khor la rtog par byed de/ des sems can dmyal ba sgra 'byin shin du sgra 'byin zhes bya ba mthong ngo / /der sems can dag las gang gis skye bar 'gyur snyam nas des thos pa las byung ba'i shes pas brtags na/ gang srog gcod pa dang / ma byin par len pa dang / 'dod pas log par g.yem pa dang / chang 'thung ba ni snga ma bzhin no/ /brdzun smra ba ni rtsod pa'i tshe rang gi gnyen 'dab kyi phyir ram phyogs gzung ba'i phyir ram/ phyogs su gyur pas smras la/ de smras nas kyang 'chags par mi byed skyon du mi 'dzin la kun du bsten cing bsgoms te mang du byas na/ de lus dang bral nas ngan 'gro log par ltung ba sems can dmyal ba sgra 'byin shin du sgra 'byin du skye bar 'gyur ro/ /der gnod pa 'di dag 'byung bar 'gyur te/ 'di lta ste/ de'i lce gang gis brdzun smras pa de la chad pas gcod par byed de/ gshin rje'i mi rnams kyis spu gris mid pa dral nas der 'byin te/ phyung nas ba tshwa'i chu rab tu tsha bas chag chag 'debs so/ /nang na yod pa'i lce la rul pa'i dri rab tu 'byung zhing srog chags mar ko ta ka'i kha rab tu 'bar bas kyang lce de la za'o/ /lus kyi tshor ba yang gang sems can dmyal ba yang sos la sogs pa'i bshad pa de thams cad kyi mtha' dag snga ma bzhin du ji srid du de'i brdzun gyi las de bcom zhing spangs la zad par ma byas pa de srid du sems can dmyal ba pa de la 'byung bar 'gyur ro/ /de phyis sems can dmyal ba de las thar bar 'gyur te/ thar nas kyang gal te lan grangs gzhan la myong bar 'gyur ba'i las kyis yi dags dang / dud 'gro dag tu ma skyes la mi rnams dang skal ba mnyam par mir skyes na de smyon par 'gyur zhing dbul bar 'gyur/ sems rnam par g.yengs pa dang / tshe thung ba dang / dbang po ma tshang ba dang / skye bo kun gyis smad pa dang / don thams cad med pa'i skal ba can du 'gyur ba mthong ngo / /de nas gzhan yang dge slong las kyi 'bras bu rnam par smin pa shes pa des sems can dmyal ba ngu 'bod chen po'i 'khor la brtags na/ des thos pa las byung ba'i shes pas ji ltar sems can dmyal ba ngu 'bod chen po'i 'khor tshor ba dpag tu med pa zhes bya ba yod pa mthong ngo / /der sems can dag las gang gis skye bar 'gyur snyam nas des thos pa las byung ba'i shes pas brtags na/ 'di ltar gang gis srog gcod pa dang / ma byin par len pa dang / 'dod pas log par g.yem pa dang / chang 'thung ba byas pa ni snga ma bzhin no/ /brdzun smra ba ni 'dod chags kyi rgyu 'am zhe sdang gi rgyu mi bzad pas smras shing / gzhan la yang 'di ltar 'di ni bdag cag gi mdza' bo mchog tu sdug pa bdag cag la byams pa yin te/ phyogs bzung bar bya yis bden par ma smra shig ces bsgo ste/ der gzeng bstod cing rab tu bkod de btsud na de lus dang bral nas ngan 'gro log par ltung ba sems can dmyal ba tshor ba dpag tu med par 'gyur ro/ /der gnod pa 'di dag 'byung bar 'gyur te/ gang sems can dmyal ba yang sos la sogs pa'i bshad pa de mtha' dag sems can dmyal ba ngu 'bod chen por 'byung ste/ gang las kyi rgyu lci ba'i phyir gnod pa yang lci ba nyid du 'gyur ro/ /gnod pa lci ba nyid kyis las kyi 'bras bu rnam par smin pa yang dag par ston to/ / de ltar 'di ni dus mtha' med pa nas 'jigs pa dang rab tu ldan pa'i las dang nyon mongs pa dang bcas pa zo chun gyi rgyun ltar 'khor ba'i 'khor lor rab tu 'jug go/ /sdig pa gzhan thams cad kyi gnod pa gzhan du 'jug pa na brdzun du smra ba ni ches sdig po che yin no zhes brjod do/ /brdzun du smra ba rdzogs pa ni dge ba'i rtsa ba rton pa gcod par byed de/ rgyu ji lta ji lta ba bzhin du 'bras bu yang de lta de ltar 'gyur te/ rgyu 'dis sems can dmyal ba tshor ba dpag tu med par tshor ba 'byung ba gang yin pa de dag brjod par mi nus so/ /der gnod pa ni sems can dmyal ba pa gzhan thams cad dang yang mtshungs pa me dang / sems can dmyal ba pa sdig po che'i tshor ba 'byung ba ni 'di lta ste/ srin bus bslang ba'i tshor ba dang / srin bu'i tshor ba dang / skom pa dang bkres pa'i tshor ba dang / re thag chad pa'i tshor ba dang / so so'i mun nag gi sdug bsngal mtha' yas pa'i tshor ba dang / phan tshun phog pa'i tshor ba dang / sgra dang / reg pa dang / ro dang / gzugs dang / dri mi 'dod pa'i tshor ba dang / tshe rabs dran pa'i dgra bgegs kyi mtshon chas rab tu gcod pa'i tshor ba dang / ba tshwa'i chu bo las shin du sgrol ba'i tshor ba dang / phur bu rnams kyis 'debs pa'i tshor ba dang / rmog thag mes bsregs pa'i tshor ba dang / rtswa dar ba ltar gcod cing rdo rjes reg pa'i tshor ba dang / kun nas me dang tshal bsregs pa'i me 'bar ba'i phreng ba'i tshor ba ste/ de la sogs pa sems can dmyal ba dang 'thun pa'i tshor ba ji srid du brdzun smra ba nyes par spyad pa bcom zhing spangs la zad par ma byas pa de srid du g.yang sa chen po lta bu'i brdzun gyi 'bras bu sems can dmyal bar tshor ba dpag tu med pa 'byung ngo / /de phyis sems can dmyal ba de las thar bar 'gyur te/ thar nas kyang gal te lan grangs gzhan la myong bar 'gyur ba'i las kyis yi dags dang / dud 'gro dag tu ma skyes la mi rnams dang skal ba mnyam par mir skyes na/ de brdzun smra ba'i rgyu 'thun pa'i 'bras bus de rtag tu nad kyis mngon par 'debs shing sker bgegs pa dang / kha nad la sogs pa 'byung la/ dbul bar 'gyur/ sbyin pa po 'am/ sbyin bdag la sman slong ba na de yid mi ches par 'gyur te/ 'di yang ngag log par smra'o snyam nas mi thob ste/ de ni nad mi bzad pas thebs nas 'chi ba'i dus byed par mthong ngo / /de nas gzhan yang dge slong las kyi 'bras bu rnam par smin pa shes pa des sems can dmyal ba ngu 'bod chen po'i 'khor la brtags na/ des thos pa las byung ba'i shes pas sems can dmyal ba tshor ba rtsub cing tsha la bzod par dka' ba zhes bya ba mthong ngo / /der sems can dag las gang gis skye bar 'gyur snyam nas des thos pa las byung ba'i shes pas brtags na/ rgyal po 'am/ blon pos bdag rang gi don du rgyal srid kyi phyir ram/ nor rdzas kyi phyir ram/ srog gi phyir mngon sum du yid ches par smras la/ shin du mngon par gnod pa byas na/ de lus dang bral nas ngan 'gro log par ltung ba sems can dmyal ba tshor ba rtsub cing tsha la bzod par dka' bar skye bar 'gyur ro/ /der gnod pa 'di dag 'byung bar 'gyur te/ 'di lta ste/ rang gi lus las las kyis byas pa'i srin bu dag skye ste/ lus thams cad la zhugs shing gnad thams cad la zhugs la/ chu rgyus thams cad gcod cing rnam par gcod do/ /sems can dmyal ba grub pa dag / sha thams cad za zhing / glo ba za la mi bzad par yongs su 'gyur ba dag /sems can dmyal ba der tshor ba me ltar shin du drag pa dag tshor ba chen po 'phel ba dang / dug gi tshor ba me lta bu dang / tshor ba shin du drag pa ji skad bshad pa dag ni tshor ba rtsub cing tsha la bzod par dka' ba yin te/ sems can dmyal ba sdig pas 'tsho ba de'i mi bzad pa gang yin pa dag brjod par mi nus so/ /sems can dmyal ba pa de ji srid du de'i sdig pa'i las bcom zhing spangs la zad par ma byas pa de srid du 'tshed do/ /de phyis sems can dmyal ba de las thar bar 'gyur te/ thar nas kyang gal te lan grangs gzhan la myong bar 'gyur ba'i las kyis yi dags dang dud 'gro dag tu ma skyes la gal te mi rnams dang skal ba mnyam par mir skyes na/ las de dang rgyu 'thun pa'i 'bras bus de ma'i mngal du zhugs nas de'i nyes par byas pa'i las des ji srid du de'i nyes par byas pa'i las kyi mtha' spyad pa btsa' bar 'gyur ba de srid du/ ma yang rtag tu nad bu can du 'gyur/ gang gi tshe ma'i mngal de nas byung nas de phan chad de yang byis pa nas rtag tu nad bu can du 'gyur te/ sman pa thams cad kyis nad gso bar mi nus pa mthong ngo // // 'phags pa dam pa'i chos dran pa nye bar gzhag pa/ bam po bcu pa/ de nas yang dge slong las kyi 'bras bu rnam par smin pa shes pa des sems can dmyal ba chen po ngu 'bod kyi 'khor la brtags na des sems can dmyal ba gnod pa dpe med pa zhes bya ba mthong ngo / /der sems can dag las byas shing bsags pa gang gis skye bar 'gyur snyam nas des brtags na/ gang gis srog gcod pa dang / ma byin par len pa dang / 'dod pas log par g.yem pa dang / chang 'thung ba dang / brdzun du smra ba kun du bsten cing bsgoms te mang du byas pas 'gyur ro/ /'di lta ste/ bu ram shing dang / sa bsdu ba'i don du zhing gi rnang sgal la sogs pa brdzun dang g.yo thabs kyis 'phrog cing rtsod la gzhan la yang brdzun gyis slu na de lus dang bral nas ngan 'gro log par ltung ba sems can dmyal ba gnod pa dpe med par skye bar 'gyur ro/ /der gnod pa 'di dag 'byung bar 'gyur te/ gang sems can dmyal ba yang sos la sogs pa de dag thams cad kyi snga ma bzhin du 'byung ngo / /gang sems can dmyal ba pa rnams kyi yang gnod pa 'byung ba ni 'di lta ste/ lcags mgar sbud pa dbugs kyis bkang ba gnyis kyis lcags rdung zhing gleb pa de bzhin du gshin rje'i mi rnams kyis sems can dmyal ba pa de sems can dmyal ba der sbud pa gnyis kyis 'bud cing 'ju'o/ /las kyis bsgrubs pa'i tsha ba thams cad kyis 'bud cing 'ju'o/ /brdung zhing gleb pa ni lcags bzhin kun du rdung ngo / /yang skye bar 'gyur te de nas phyung nas rdza ma'i nang du bcug ste/ ji srid du de'i sdig pa'i las bcom zhing spangs la zad par ma byas pa de ji srid du mon sran gre'u bzhin du bskol to/ /de sems can dmyal ba de las thar bar 'gyur te/ thar nas kyang gal te lan grangs gzhan la myong bar 'gyur ba'i las kyis yi dags dang / dud 'gro dag tu ma skyes la gal te mi rnams dang skal ba mnyam par mir skyes na/ las de dang rgyu 'thun pa'i 'bras bus de rtag tu skom pas gdungs shing khro la skye bo thams cad yid ches par mi 'gyur ba mthong ngo / /de nas gzhan yang dge slong las kyi 'bras bu rnam par smin pa shes pa des sems can dmyal ba chen po ngu 'bod kyi 'khor la brtags na des sems can dmyal ba thams cad mun pa zhes bya ba mthong ngo / /der sems can dag las kun du bsten cing bsgoms te mang du byas pa gang gis skye bar 'gyur snyam nas des brtags na/ gang gis srog gcod pa dang / ma byin par len pa dang / 'dod pas log par g.yem pa dang / chang 'thung ba kun du bsten cing bsgoms te mang du byas par 'gyur ro/ /brdzun smra ba yang gzhan gyi bud med la nyal nas de rgyal po'i pho brang 'khor du 'di ltar bdag gis bud med 'di la ma nyal zhes smra la/ bud med kyi khyim thab mi de la yang gnod pa byed par mngon par sgrub na/ de lus dang bral nas ngan 'gro log par ltung ba sems can dmyal ba thams cad mun par skye bar 'gyur ro/ /der gnod pa 'di dag 'byung bar 'gyur te/ 'di lta ste/ spyi bor phug nas der lce 'byin te phyung nas kyang ral gri dag gis gcod do/ /bcad cing bcad cing yang skye bar 'gyur ro/ /yang mtshon cha hu lu ka rab tu 'bar ba dag gis ji srid du de'i sdig pa'i las bcom zhing spangs la zad par ma byas pa de srid du lo 'bum phrag du mar gcod do/ /de sems can dmyal ba de las thar bar 'gyur te/ thar nas kyang gal te lan grangs gzhan la myong bar 'gyur ba'i las kyis yi dags dang dud 'gro dag tu ma skyes la/ mi rnams dang skal ba mnyam par mir skyes na/ las de dang rgyu 'thun pa'i 'bras bus de dmus long dang 'on par 'gyur zhing de skyes ma thag tu kha zas lam po che dang bzhi mdor sdug phongs pas 'tsho bar 'gyur/ khyim gyi sgo du mar kha zas slongs mos 'tsho zhing tshe thung la bu dang chung mas kyang spangs par 'gyur ba mthong ngo / /de nas yang dge slong las kyi 'bras bu rnam par smin pa shes pa des sems can dmyal ba chen po ngu 'bod kyi 'khor sems can dmyal ba mun pa dang dud pa zhes bya ba la brtags te/ der sems can dag las gang gis skye bar 'gyur snyam nas des thos pa las byung ba'i shes pas brtags na gang gis srog gcod pa dang / ma byin par len pa dang / 'dod pas log par g.yem pa dang / chang 'thung ba kun du bsten cing bsgoms te mang du byas par 'gyur ro/ /brdzun smra ba yang tshong pa khe spogs kyis 'tsho ba'i phyir/ rdzas 'di ni tshong pa'i nang khrims kyis bdag dbang ste/ 'di gzhan mi dbang zhes des brdzun smra zhing g.yo thabs kyis rdzas 'phrog na de lus dang bral nas ngan 'gro log par ltung ba sems can dmyal ba'i 'jig rten mun pa dang dud pa zhes bya bar skye bar 'gyur ro/ /der gnod pa 'di dag 'byung bar 'gyur te/ 'di lta ste/ snga ma bzhin du gang sems can dmyal ba yang sos la sogs pa la 'byung ba ltar yan lag dang nying lag shin du 'jam pa thams cad bcad cing gtubs pa dang / yang rab tu ngu'o/ / de'i sdig pa'i las kyi rgyu 'thun pa rnam par smin pa tsha ba rnam par smin pa chen pos shin du 'jam pa de dag kyang bcad nas skye'o/ /sems can dmyal ba pa de cho nges 'debs pa na/ zla ba drug lus pa'i rus pa gang yin pa de dag kyang rang gi lus las byung ba'i srin bu rdo rje mchu can la kha rab tu 'bar zhing kha dog sna tshogs can dag gis za la gnod pa sna tshogs dang / gnod pa'i tshor ba byed de/ de ltar ji srid du de'i sdig pa'i las bcom zhing spangs la zad par ma byas pa de srid du lo brgya stong phrag du mar ro/ /de phyis sems can dmyal ba de las thar bar 'gyur te/ thar nas kyang gal te lan grangs gzhan la myong bar 'gyur ba'i las kyis yi dags dang / dud 'gro dag tu ma skyes la mi rnams dang skal ba mnyam par mir skyes na/ las de dang rgyu 'thun pa'i 'bras bus de'i lus las dri nga ba 'byung / de'i mgo 'am gos la yang drod gsher las skyes pa'i srin bu skye bar 'gyur zhing dbul bar 'gyur ro/ /mchu dang bzhin khab ltar phra la tshe thung bar yang 'gyur/ tshig yid mi ches shing skye bo thams cad mi dga' la sdug phongs par 'gyur ba mthong ngo / /de nas gzhan yang dge slong las kyi 'bras bu rnam par smin pa shes pa des sems can dmyal ba chen po ngu 'bod kyi 'khor la brtags te/ der sems can dag las gang gis skye bar 'gyur snyam nas/ des thos pa las byung ba'i shes pas sems can dmyal ba phye ma leb ltar 'jug pa dang 'dra ba zhes bya ba la brtags na/ gang gis srog gcod pa dang / ma byin par len pa dang / 'dod pas log par g.yem pa dang / chang 'thung ba kun du bsten cing bsgoms te mang du byas pas 'gyur ro/ /brdzun smra ba yang dge 'dun gyi rdzas kyi rnam pa nyo ba dang btsong ba zas sam gos cung zad cig blangs la/ dge 'dun gzhan la rin thang chen por 'debs shing chags pa dang ldan pa dag dge 'dun de dag la slu bar yang byed de/ 'di ltar bdag gis nyos pa 'di de bzhin du khyod la sbyin no zhes kyang smra zhing skyes bu rmongs pa de tshong pa'i bde la chags nas brdzun smra'o/ /de lus dang bral nas ngan 'gro log par ltung ba sems can dmyal ba phye ma leb ltar 'jug pa dang 'dra ba zhes bya bar skye bar 'gyur ro/ /der gnod pa 'di dag 'byung bar 'gyur te/ 'di lta ste/ khyis lto phug nas rgyu ma dag za'o/ /gshin rje'i mi rnams kyis ste'u rab tu 'bar ba dag gis rgyab kyi sha bzhogs nas srang gcig gam srang phyed du srang gis bcal nas khyi dag la sbyin par byed cing rkang dbyung ba'i phyir ste'u rnon po dag gis rus pa yang bzhog par byed do/ /skam pa rab tu 'bar bas mgul ba'i phyogs phug nas lce 'byin to/ /yan lag dang nying lag thams cad la phur bu rab tu 'bar ba dag btsugs nas sha dag bcad cing rgyus pa 'byin te/ de nyes par byas pa'i las kyi mtha' spyad pa rang gis byas pa'i las spyod cing brdzun smra ba de rnam par 'tshed do/ /sems can dmyal ba pa dag gshin rje'i mi rnams las thar nas me rtag tu 'bar bas gang ba'i sems can dmyal ba der ji srid du de'i sdig pa'i las bcom zhing spangs la zad par ma byas pa de srid du lo 'bum phrag du mar phye ma leb bzhin du skye zhing skye zhing sreg go/ de phyis sems can dmyal ba de las thar bar 'gyur te/ thar nas kyang gal te lan grangs gzhan la myong bar 'gyur ba'i las kyis yi dags dang / dud 'gro dag tu ma skyes la/ mi rnams dang skal ba mnyam par mir skyes na/ las de dang rgyu 'thun pa'i 'bras bus de dbul zhing dman la bkren pa dang / gzhan gyis bkol ba'i rigs su skye bar 'gyur/ de byis pa nas kun nas shin du bsrungs kyang mes tshig par 'gyur ba mthong ngo / /de nas gzhan yang dge slong las kyi 'bras bu rnam par smin pa shes pa des sems can dmyal ba chen po ngu 'bod kyi 'khor la brtags na/ des sems can dmyal ba shi ma thag tu 'tsho ba zhes bya ba mthong ngo / /der sems can dag las gang gis skye bar 'gyur snyam nas des thos pa las byung ba'i shes pas brtags na/ gang gis srog gcod pa dang / ma byin par len pa dang / 'dod pas log par g.yem pa dang / chang 'thung ba dang brdzun du smra ba kun du bsten cing bsgoms te mang du byas na/ de lus dang bral nas ngan 'gro log par ltung ba sems can dmyal ba shi ma thag tu 'tsho bar skye bar mthong ngo / /der sems can dmyal ba yang sos la sogs pa rnams kyi tshor ba gang yin pa de dag thams cad snga ma bzhin du 'byung ba'i steng du khyad par du na tho ba dag gis kun du btags pa na/ phog ma thag tu 'chi bar 'gyur zhing / btag pa dang yang 'tsho bar 'gyur la/ phog pa dang yang 'chi bar 'gyur te/ de ltar sems can dmyal ba pa dag lo 'bum phrag du mar skye zhing 'chi'o/ /de nyes par spyad pa'i las kyi mtha' spyad pa de las thar nas/ me tog ud pa la'i tshal mthong ste/ skyabs 'dod pa de der brgyugs pa dang / me tog ud pa la dag me sngon pos shin du gang bar gyur to/ /brdzun smra ba de'i 'bras bu de gang yin snyam na 'jigs sar 'gro ba'i tshong pa gsad pa'i phyir/ chom rkun pa gang zhig dge slong gi tshul du zhugs nas 'jigs sa na chom rkun med do zhes smras pa dang / de dag nang der dong ste phyin pa dang / rkyen des bcom pa'i las de'i 'bras bus me tog ud pa la gang yin pa de dag 'dab ma sngon pos gang bar zhugs pa yin te rkang pa med cing phyir 'byung bar mi nus so/ /de'i las kyi tshul de lta bu'i mthus de lag pa dang / rkang pa dang / mig dang bral zhing ji srid du de'i sdig pa'i las bcom zhing spangs la zad par ma byas pa de srid du lo 'bum phrag du mar me tog ud pa la mdag mes gang ba der sreg cing 'tshed la gsod cing yang 'tsho bar byed do/ /de sems can dmyal ba de las thar bar 'gyur te/ thar nas kyang gal te lan grangs gzhan la myong bar 'gyur ba'i las kyis yi dags dang / dud 'gro dag tu ma skyes la/ mi rnams dang skal ba mnyam par mir skyes na las de dang rgyu 'thun pas de rtog pa po dang / g.yo thabs smra bar 'gyur/ de'i nor rdzas bsags pa rgyal pos 'phrog cing de yang bcings pa'i tshe 'chi ba'i dus byed par 'gyur ba mthong ngo / /de nas gzhan yang dge slong las kyi 'bras bu rnam par smin pa shes pa des/ sems can dmyal ba chen po ngu 'bod kyi 'khor la brtags na/ des thos pa las byung ba'i shes pas sems can dmyal ba chen po ngu 'bod kyi sems can dmyal ba gzhan du 'gyur ba zhes bya ba mthong ngo / /der sems can dag las gang gis skye bar 'gyur snyam nas des brtags na/ gang gis srog gcod pa dang / ma byin par len pa dang / 'dod pas log par g.yem pa dang / chang 'thung ba kun du bsten cing bsgoms te mang du byas pas 'gyur ro/ /brdzun smra ba yang de dbye ba 'am gsod pa 'am pha rol las rgyal bar bya ba'i phyir g.yo sgyu smra ba yin na/ 'di lta ste/ bdag ni rtag tu bden par smra ba yin te/ bdag bden pa smra'o zhes 'jig rten kun dad pa bskyed nas/ de de'i tshe brdzun sna tshogs smras pa gang gis yul 'khor 'joms par byed/ skyes bu dam pa gsod par byed/ dgra gzhan gyi nor rdzas 'phrog par byed do/ /sngon bden pa smra'o zhes 'jig rten yid ches pa thob par byas shing dad pa bskyed de/ de nas brdzun smra ba ni de cha lugs bzang por bsgyur cing rkun ma brdzun smra ba yin te/ de lus dang bral nas ngan 'gro log par ltung ba sems can dmyal ba gzhan du 'gyur bar skye bar 'gyur ro/ /der gnod pa 'di dag 'byung bar 'gyur te/ 'di lta ste/ rgyang ring po nas de'i ma dang pha dang bran dang bsten grogs dang sdug pa'i mi de dag mthong ngo / /sems can dmyal ba des mthong ba dang / de dag gi kha nas des tshig snyan pa dag thos pa dang / de dag gi drung du mgon 'dod pa/ skyabs 'dod pa/ dpung gnyen 'dod pa/ dpung gnyen tshol bas rgyug go/ / de ji lta ji ltar de dag gi drung du rgyug pa de lta de ltar mdag me mtsho lta bu'i nang du nub ste/ ji ltar rdo chur bo ba bzhin du nub bo/ /de nas 'byung la yan lag dang nying lag thams cad shin du bsregs te/ tshor bas nyam thag nas ngu skad 'don pa na/ de'i pha dang ma dang bu dang bsten grogs dag mthong ba dang yang rgyug go/ /de nas yang las kyis byas pa'i gshin rje'i mi sog le thogs pa dag lam nas byung ste/ de gshin rje'i mi de dag gis bzung ngo / /bzung nas shing bzhin du dbus gshog go/ /de res 'ga' de las thar na lpags pa dang / rus pa tsam lus pa yan lag dang nying lag thams cad phug cing dral ba'i lus rma mtshan can dag gar thar du 'bros so/ /de bros na yang gshin rje'i mi gzhan dag gis bzung ngo / /bzung nas las las byung ba'i zo chun rgyud ma'i nang rdos bkang ba der de bcug go/ /de nas zo chun rgyud mo rab tu 'bar ba 'khor lo ltar bskor te/ der brdzun smra ba de phye bzhin du 'thag cing phye mar rlog go/ /de zo chun rgyud mo de las byung ste/ thar nas ma dang pha dang sten grogs dang / snying du sdug pa mthong ste/ mgon 'dod pa/ skyabs 'dod pa/ dpung gnyen 'dod pa de/ de dag gi drung du brgyugs rjes su brgyugs pa dang / las kyis byas pa'i lam du phur bu dang / las kyi stag byung ste/ de des bzung ngo / /bzung nas khar bcug ste/ de 'gram so'i bar du bcug nas phur bu rno zhing rab tu 'bar ba rnams kyis gzer nas 'dren to/ /de sems pa dang ldan nas rgyug pa dang / de'i rkang pa yang gcog cing 'thub/ byin pa yang gcod cing 'thub la sreg go/ /de'i yan lag dang nying lag thams cad phug cing dral la lus bsregs shing lus nyams la rnam par nyams pa dang / rtsa dang / rgyus pa dang / rus pa dang / lus kyi lhag ma lus pa dag shin du rgyug ste/ de ltar brdzun smra ba kun du bsten cing bsgoms te mang du byas pa'i 'bras bus rgyu dang 'thun pa'i 'bras bu grub bo/ /'di ltar de bden par smra bar bsgrubs la/ de nas brdzun smra zhing g.yo thabs smra la shur lung smra ba dag de ltar de ma dang pha dang / sten grogs dang / snying du sdug pa mthong ngo / /brdzun smra ba de 'di ltar tshor ba rtsub pa tsha ba/ tshor ba rno ba/ mtha' yas pa dag ji srid du de'i sdig pa'i las bcom zhing spangs la zad par ma byas pa de srid du lo 'bum phrag du mar sreg go/ /'tshed do/ /gcod do/ /gsod do/ /de sems can dmyal ba de las thar bar 'gyur te/ thar nas kyang gal te lan grangs gzhan la myong bar 'gyur ba'i las kyis mi rnams dang skal ba mnyam par mir skyes na/ las de dang rgyu 'thun par de dbul zhing nad bu can dang / dman pa dang / dbang po ma tshang bar 'gyur/ skye bo thams cad la yid mi ches shing zhe 'gras pa dang mi mthun par 'gyur/ de'i bsam pa thams cad mi 'grub cing log par 'gyur ba mthong ngo / /de nas yang dge slong las kyi 'bras bu rnam par smin pa shes pa des sems can dmyal ba chen po ngu 'bod kyi 'khor la brtags na/ des thos pa las byung ba'i shes pas/ sems can dmyal ba kun dga' la re ba med pa zhes bya ba mthong ngo / / der sems can dag las gang gis skye bar 'gyur snyam nas des thos pa las byung ba'i shes pas brtags na/ gang gis srog gcod pa dang / ma byin par len pa dang / 'dod pas log par g.yem pa dang / chang 'thung ba kun du bsten cing bsgoms te mang du byas pa ni snga ma bzhin no/ /brdzun smra ba ni rnam pa 'di dag smra ba yin te/ sdug bsngal ba dang / nad bu can dang / ltogs pa dang / dman pa dang / mgon med pa dang / bkren pa dag la nor rdzas sbyin par khas blangs pa las ma byin pa yin te/ 'bras sA lu'i bza' ba dang / btung ba dang / gos dang / mal cha dang / khyim sbyin par khas blangs pa las ma byin pa de ni rgyu des re ba med par 'gyur te/ de lus dang bral ba'i 'og tu ngan 'gro log par ltung ba sems can dmyal ba kun dga' la re ba med pa zhes bya bar skye bar 'gyur ro/ / der gnod pa'i rnam pa 'di dag 'byung bar 'gyur te/ 'di lta ste/ gang gis bza' ba sbyin par khas blangs pa las ma byin pa de ni sems can dmyal bar bza' ba dang / bca' ba zhim po dang / rgyan sna tshogs kyis klubs pa dag mthong ngo / /sems can dmyal ba pa ltogs pas nyen pa de dag rgyang ring po na bza' ba nyams dga' zhing smon pa'i bza' ba de dag mthong ste/ bza' ba de dag gi phyogs su rgyug pa dang / lam phur bu dang / spas gang zhing lam du sog le rab tu 'bar bas gsheg pa na phyogs der rgyug pa ni snga ma bzhin du sbyar ro/ /nam zas de thob pa dang / de dag lcags kyi thu lum rab tu 'bar ba lta bur gyur cing dri nga la mdog mi sdug pa las kyis byas pa tshul log par mthong ste/ de nye bar bltas pa dang / mig gi 'bras bu ltung ngo / /gang gi tshe bsnams pa dang dri des sna tshig nas byid do/ /reg pas yan lag dang nying lag thams cad rab tu tshig ste/ de'i lus srin bu me khyer lta bur byed do/ /ro bro ba lcags kyi thu lum bsregs pa lta bus lce sreg go/ /de sregs nas yang mid pa dang / snying dang / mchin pa dang / gnye ma dang / rgyu ma dang / pho ba dang / long ka nas ro smad kyi bar du bsregs nas 'byung ngo / /yang gang gis mal cha dang / khyim sbyin par khas blangs pa las brdzun smras pa de grang ba dang tsha bas gdungs shing re ba med par byas so/ /sems can dmyal ba pa de sa gzhi zangs kyi glegs ma rab tu bzhus par bzhag ste/ des yan lag dang nying lag thams cad rnam par 'ju zhing sreg go/ /des khyim sbyin par byas pa las ma byin pa de yang 'byung bar 'gyur te/ khyim gyi brdzun smra ba de lcags kyi khyim dga' ba dang / nye bar dga' ba tshad dpag tshad lnga bcu par lcags khu rab tu bskol ba'i nang du 'jug go/ /de der 'og nas steng du/ steng nas 'og tu bskol ba na/ steng nas steng du 'byung zhing / 'og nas 'og tu 'byung bar bskol ba dang / rab tu tshos te yan lag dang nying lag thams cad rnam par zhigs shing sha dang / rgyus pa dang / lpags pa dang / rus pa dang / tshigs lhag ma lus pa thams cad kyang rnam par zhigs nas rab tu bskol bas gang ba'i rdza ma mun pa mun nag de gnyis kyi nang du 'byung ste/ gdungs shing rnam par khro la smre sngags 'don to/ /gang rdza ma gong ma der btsos pa dang / de'i 'og tu lcags kyi rdza ma 'og ma der rab tu 'tshed de/ 'di ltar 'og tu 'byung zhing de dag gi shugs kyis gcig la gcig phog ste/ lus dum bu brgya 'am gal te stong du gyes so/ /de nas yang 'byung ste/ sems can dmyal ba pa gzhan dag la phog ste/ ji srid du brdzun smra ba de'i las bcom zhing spangs la zad par ma byas pa de srid du las kyi zhags pas bcings pa dag yang lan 'bum snyed du rnam par zhigs so/ /de de las thar bar 'gyur te/ thar nas kyang gal te lan grangs gzhan la myong bar 'gyur ba'i las kyis yi dags dang dud 'gro dag tu ma skyes la/ mi rnams dang skal ba mnyam par mir skyes na las de dang rgyu 'thun pa'i 'bras bus de bran gyi rigs sam de dang 'thun par de nyid du skye bar 'gyur te/ gang khas blangs pa las brdzun du smras pa de ni de dang 'thun par las gzhan dang gzhan du 'gyur ro/ /de la 'khor ba thog ma med pa nas gnod pa gang zhugs pa thog ma med pa nas dge ba dang mi dge ba'i las kyis byas pa'i rgyud kyi 'khor ba'i mtha' kun du zhugs pa las kyi rgyud kyis dga' ba'i 'dod chags kyi mod la sred pa gang byung ba'i gnod pa des gzhan dag gi bran du 'gyur te/ bza' ba dang / btung ba dang / mal stan dang / nad kyi rkyen gso sman med cing / jo bo des rtag tu spyo bar 'gyur ba mthong ngo / /de nas gzhan yang las kyi 'bras bu rnam par smin pa shes pa des/ sems can dmyal ba chen po ngu 'bod kyi 'khor la brtags na/ gang gis srog gcod pa dang / ma byin par len pa dang / 'dod pas log par g.yem pa dang / chang 'thung ba ni des snga ma bzhin du mthong ngo / /brdzun smra ba ni bzo bo tshogs shing 'dus pa'i nang du song nas rgyags pa bdo ba 'am zhe sdang ngam phan tshun mi mthun pas gang du tshogs shing 'du ba'i khrims bcas te chad pas gcad par bya ba las/ de nyes pa med bzhin du bdag dang gzhan bslus nas chad pas gcod par byed cing de yang goms par byed/ lan mang du byed la las kyi mjug bsags pa de ni lus dang bral nas ngan 'gro log par ltung ba sems can dmyal ba phan tshun gnod pa 'jug par skye bar 'gyur te/ gang gi tshe tshogs shing 'dus pa de dag gi nang du song nas gnod pa byas pa'i rgyu de dang rkyen des lus dang bral nas ngan 'gro log par ltung ba sems can dmyal ba phan tshun gnod pa 'jug par 'gyur ro/ /der gnod pa 'di dag 'byung bar 'gyur te/ gang yang sos dang / thig nag dang / bsdus gzhom dang / ngu 'bod la sogs par bshad pa snga ma bzhin du 'byung ba'i steng du bye brag tu 'byung ba ni 'di lta ste/ las byas pa'i sems can dmyal ba der seng ge mche ba rab tu 'bar ba 'byung ste/ de sems can dmyal ba pa brdzun smra ba de la sngon smras pa'i tshor ba dang ldan pas yang nas yang du za'o/ /de 'gram pa phye ba dang 'tsho bar 'gyur la btsums pa dang yang lus thams cad za ste/ de sos pa dang za'o/ /de sos pa dang za bar 'gyur te/ de'i las kyis byas pa'i seng ge'i so gtams pa'i bar du chud pa dang / de'i kha mdag ma rab tu 'bar bas gang ste/ de sos ni za la mes ni cig car sreg go/ /de ltar brdzun zer ba de srid du de'i sdig pa'i las bcom zhing spangs la zad par ma byas pa de srid du lo 'bum phrag du mar gnod pa dpe med pa rjes su myong bar 'gyur ro/ /de phyis sems can dmyal ba de las thar bar 'gyur te/ thar nas kyang gal te lan grangs gzhan la myong bar 'gyur ba'i las kyis yi dags dang dud 'gro dag tu ma skyes la mi rnams dang skal ba mnyam par mir skyes na/ las de dang rgyu 'thun pa'i 'bras bus de sbrul lam seng ge 'am stag gam dom gyis gsod par 'gyur ba mthong ngo / /de nas gzhan yang dge slong las kyi 'bras bu rnam par smin pa shes pa des sems can dmyal ba chen po ngu 'bod kyi 'khor la brtags na/ des thos pa las byung ba'i shes pas gang gis srog gcod pa dang / ma byin par len pa dang / 'dod pas log par g.yem pa dang / chang 'thung ba dang / brdzun zer ba mthong ste/ de skyes pa'i rigs gcig pa'i spun gyi nor gyi phyir ram/ pha dang mes po gcig pa'i spun de gnyis nor gyi phyir rtsod pa na/ de spun gnyis pa 'am/ khu bo 'am/ de dang rigs gcig pa'i ched du g.yo thabs kyi blo dang / brgyad pa'i blos brdzun mngon du zer zhing shes par byas rig par byas la las dang las kyi mjug dang / nyer bsdogs dang ldan par gyur na de lus dang bral nas ngan 'gro log par ltung ba sems can dmyal ba phan tshun gnod pa 'jug par skye bar 'gyur ro/ /der gnod pa 'di dag 'byung bar 'gyur te/ gang yang sos la sogs pa'i snga ma bzhin du 'byung ba'i steng du khyad par du 'byung ba ni las byas pas shan par 'gyur te/ gang rang gi gnyen 'dab de la bslus shing brdzun byas pas sha de bcad cing bdag gi kha der 'jug ste/ sems can dmyal ba pa nyes par byas pa'i las des rang ga sha de yang lcags ltar rab tu 'bar zhing ro bro ba med pa yin no/ /de la gnod pa gnyis 'byung ste/ shan pa byas pas lus la tshor ba 'byung ba dang / bkres shing skom pa byas pa gnyis te/ der sha bcad pa dang / de las byung ba'i srin bu dag skyes te/ gang rus pa gzhan dag dang / rkang tshun chad la yang za'o/ /de ltar nyes par byas pa'i las kyi mtha' spyad pa de srid du de'i sdig pa'i las bcom zhing spangs la zad par ma byas pa de srid du lo 'bum phrag du mar sems can dmyal ba phan tshun gnod pa 'jug par skye bar 'gyur ro/ /de sems can dmyal ba de las thar bar 'gyur te/ thar nas kyang gal te lan grangs gzhan la myong bar 'gyur ba'i las kyis yi dags dang / dud 'gro dag tu ma skyes la/ mi rnams dang skal ba mnyam par mir skyes na las de dang rgyu 'thun pa'i 'bras bus de rnams kyang pha dang mes po'i nor 'thob par mi 'gyur/ yid ches pa'i gnas su mi 'gyur zhing dbul por 'gyur ba mthong ngo / /de nas gzhan yang dge slong las kyi 'bras bu rnam par smin pa shes pa des sems can dmyal ba chen po ngu 'bod kyi 'khor la btags na/ des thos pa las byung ba'i shes pas sems can dmyal ba nags tshal mes mched pa'i rgyud lta bu zhes bya ba mthong ngo / /der sems can dag las gang gis skye bar 'gyur snyam nas des brtags na/ gang gis srog gcod pa dang / ma byin par len pa dang / 'dod pas log par g.yem pa dang / 'bru'i chang dang / sbyar ba'i chang myos par 'gyur ba blud pas 'gyur ro/ /brdzun smra bar 'gyur ba ni gyad tshogs shing 'du ba'i nang du song ste/ nyes pa byas nas chad pas 'jigs pa'i phyir bdag gis nyes pa ma byas shes smra na de lus dang bral ba'i 'og tu ngan 'gro log par ltung ba sems can dmyal ba nags tshal mes mched pa'i rgyud lta bur skye bar 'gyur ro/ /der gnod pa 'di dag 'byung bar 'gyur te/ 'di lta ste/ sems can dmyal ba yang sos la sogs pa'i gnod pa bsdus pa gang yin pa de dag thams cad sems can dmyal ba 'dir 'byung bar 'gyur ro/ /khyad par du 'byung ba ni lcags kyi glegs ma rab tu 'bar bas 'khrigs te/ de kun nas khrag dang sha 'dam lta bur gyur cing shing ljon pa keng shu ka ltar mtshon 'bab ste/ de'i tshe de'i lus de la lcags kyi glegs ma de 'byar bar 'gyur ro/ /gang gi tshe ngu skad 'don na de'i sha dang / tshil dang / khrag lcags kyi glegs ma de la 'khris pa gshin rje'i mi dag gi shugs kyis de'i lus las 'chu bar byed do/ /de sems can dmyal ba de las thar pa dang / mgon 'dod pa/ skyabs 'dod pa/ kun nas gtses pa gshin rje'i mi rnams kyis 'jigs shing skrag pa/ lus shig shig por gyur pa des ba tshwa'i chu bo gnod skyes shes bya ba mthong ste/ der rab tu 'jug go/ /de ltar gshin rje'i mi rnams kyis 'jigs pa'i zil gyis gnon pa de dag zhugs ma thag tu yan lag dang nying lag thams cad dang / lus chu rgyus mang pos brgyus shing sbrel ba dang / lpags pa dang / rus pa kun rnam par nyams shing lus kyi sha snyil ba'i lus de mar sar gyi gong bu bzhin rab tu 'ju yang de'i nyes par byas pa'i las kyi mthus de 'chi bar mi 'gyur ro/ /ji ltar 'od ma'i lo mas khengs pa/ bar med pa'i nags tshal mes mched pa'i rgyud kun nas rtag tu 'bar bar byas pas gang la mes ma mched pa 'am/ gang du sems can mi sreg pa 'am/ mi 'tshed pa med pa de ltar sems can dmyal ba nags tshal mes mched pa'i rgyud lta bu la khab kyi bu ga tsam gyi phyogs kyang mi dmigs te/ gang du sems can dmyal ba mgon 'dod pa/ skyabs 'dod pa dag mi sreg pa 'am/ mi 'tshed pa 'am/ ngu skad mi 'don pa 'am/ mi rgyug pa med do/ / de dag ji srid du de'i sdig pa'i las bcom zhing spangs la zad par ma byas pa de srid du sdug bsngal de dag las re shig thar par mi 'gyur ro/ /de phyis sems can dmyal ba de las thar par 'gyur te/ thar nas kyang gal te lan grangs gzhan la myong bar 'gyur ba'i las kyis yi dags dang / dud 'gro dag tu ma skyes la mi rnams dang skal ba mnyam par mir skyes na/ las de dang rgyu 'thun pa'i 'bras bus de'i kha nas tshig 'khums pa 'byung ste/ smra mi nus shing 'phral skad kyang smra bar mi nus na/ legs par sbyar te smra ba lta zhig nus par lta ga la 'gyur ba mthong ngo / /de nas gzhan yang dge slong las kyi 'bras bu rnam par smin pa shes pa des sems can dmyal ba chen po ngu 'bod kyi 'khor la brtags na/ des thos pa las byung ba'i shes pas sems can dmyal ba tshor ba ring ba zhes bya ba mthong ngo / /der sems can dag las gang gis skye bar 'gyur snyam nas des brtags na/ mi dge ba srog gcod pa dang / ma byin par len pa dang / 'dod pas log par g.yem pa dang / chang 'thung ba byas shing bsags par 'gyur ro/ /brdzun smra ba yang rnam pa 'di dag smras par 'gyur te/ sngar dran bzhin du chung zad khas blangs pa ni/ dge 'dun la dngos po chung zad khas blangs pa 'am/ de bzhin du sangs rgyas dang chos la gsal bar khas blangs la des phyis mi bzod pa byung nas bdag gis khas blangs pa med do zhes smra la dge 'dun la yang de'i khas blangs pa gang yin pa des gnod par gyur na/ de'i brdzun du smra ba de byas shing bsags la 'dus byas pa'i 'bras bus sems can dmyal ba tshor ba ring ba zhes bya ba der skye bar 'gyur ro/ / der gnod pa 'di dag 'byung bar 'gyur te/ 'di lta ste/ sems can dmyal ba yang sos la sogs par bshad pa gang yin pa de dag thams cad snga ma bzhin du 'byung ba'i steng du khyad par 'byung ba ni 'di yin te/ 'di lta ste/ gshin rje'i mi rnams kyis khab kyi rtse mo rab tu ring ba rno zhing phra la rab tu 'bar ba dag gis 'bigs par byed de/ de tshor bas nyam thag cing ngu skad 'byin to/ /de ngu skad 'byin pa ni 'di lta ste/ dong ba'i nang mdas bkang ba de ltar de'i kha dang lce la khab de dag nyid kyis rtag tu 'gengs te/ de tshor bas nyam thag par gyur kyang ngu skad 'don pa 'am smre sngags 'don par mi nus so/ /rang gi sems la brdzun smra bas bslang zhing bdag gzhan slu bar byed pa rtag tu tshor ba gzhan dang mi 'dra ba'i tshor ba myong bar 'gyur ro/ /sems can dmyal ba'i 'gro ba las thar nas kyang yan lag dang nying lag thams cad ba spu'i khung bu 'dra zhing lus thams cad nyams pa dag der gar bab bab tu tshor ba ring bas nyam thag par ltung ngo / /de ji lta ji ltar ltung ba de lta de ltar khab shin du rno bas de'i lus la 'dzugs par byed de/ de khab de dag gis yang dang yang du nyam thag par byed cing ches shin du sgra 'byin par byed la kha bkab pas zil gyis non pa ni 'khun zhing nang du 'khun par byed do/ /gal te khab de dag res 'ga' kha nas byung na de ngu skad 'byin par nus la/ gzhan du na kha bkag pas zil gyis non pa dag 'khun par byed do/ /lcags kyi sa gzhi rab tu 'bar ba dag la gred cing 'gre ldog /rab tu 'bying zhing rab tu 'jug la g.yo bar byed de/ gshin rje'i mis nyam thag pa sta re dang / mdung thung mda' bo che dang / gtun shing dang / mtshon chas lus thams cad shig shig por byas so/ /de ltar brdzun smras pa de ji srid de'i sdig pa'i las bcom zhing spangs la zad par ma byas pa de srid du lo 'bum phrag bye ba du mar tshor ba de dag myong bar 'gyur ro/ /de phyis sems can dmyal ba de las thar bar 'gyur te/ thar nas kyang gal te lan grangs gzhan la myong bar 'gyur ba'i las kyis yi dags dang / dud 'gro dag tu ma skyes la/ mi rnams dang skal ba mnyam par mir skyes na las de dang rgyu 'thun pa'i 'bras bus de dbul zhing tshig yid mi ches par 'gyur/ gang dang gang la don bcol ba'i de dang de khas len pa tsam du yang mi btub cing de shin du dbul bar byas pas yid re ba med par 'gyur ba mthong ngo / /de nas gzhan yang dge slong las kyi 'bras bu rnam par smin pa shes pa des sems can dmyal ba chen po ngu 'bod kyi 'khor la brtags na/ des thos pa las byung ba'i shes pas/ sems can dmyal ba tshor ba mtha' yas pa zhes bya ba mthong ngo / /der sems can dag las gang gis skye bar 'gyur snyam nas des brtags na/ gang gis srog gcod pa dang / ma byin par len pa dang / 'dod pas log par g.yem pa dang / chang 'thung bas 'gyur ro/ /brdzun smra bar 'gyur ba ni 'di ltar tshong pa rgya mtshor zhugs pa dag gis mnyan pa gdos pa 'dzin pa la chom rkun pa rnams kyis snying brkam bcug gam/ nor rdzas kyis dbyen byas pa yin te/ chom rkun pa de dag nyid kyis sam tshong pa de dag gi nang nas kha cig gis dbyen byas pas tshong pa de dag la gdos pa 'dzin pas/ 'di ltar khyed cag rin po che'i gling du bkri'o zhes smras la de dag la de ltar dam bcas nas brdzun byas te/ thang gi gling la khrid pa las der gal te ba dan sngon po mthong bzhin du chom rkun pa 'ong ngo zhes tshong pa de dag la ma sbran te/ de dag kyang gdos pa 'dzin pa bden pa smra ba de bdag cag la slu bar mi byed do zhes yid brtan cing 'dug 'dug pa las gdos pa 'dzin pa des c hom rkun pa dag tshong pa de dag gi nor med par byed du 'jug cing bdag kyang nor rdzas de 'phrog par byed na brdzun smras pa de lus dang bral nas ngan 'gro log par ltung ba sems can dmyal ba tshor ba mtha' yas par skye bar 'gyur ro/ /der gnod pa 'di dag 'byung bar 'gyur te/ 'di lta ste/ sems can dmyal ba yang sos la sogs par sngar bshad pa bzhin de dag thams cad der 'byung ba'i steng du khyad par du 'byung ba ni sems can dmyal ba pa der skyes pa de dag gi mig phra skam 'dren pa rab tu 'bar ba dag gis 'dren to/ /mig 'dren pa dag gis drangs pa dang / de nas yang shin du gzhon sha can sdug par skyes te/ gnod pa ches mang ba dag gis de 'byin par byed do/ / de dag gi rna ba yang ro nye rab tu bskol bas bkang la gshin rje'i mi rnams kyis yan lag dang nying lag thams cad spu gri dag gis 'jog par byed do/ /srin bu ta la la lwa la ka zhes bya bas de'i gnye ma dang rgyu ma'i nang du zhugs nas rab tu za'o/ /phyi rol du ni mun pa kun nas shin du gnag pa der 'jug la phyi nang de dag thams cad du yang las kyis byas pa'i chu srin rab tu 'bar ba dag 'byung ste/ de dag gis za bar byed/ kha dang sen mo dang so rdo rje ltar rno zhing 'bar ba dag gis yan lag dang nying lag thams cad 'byed par byed/ phye mar rlog par byed de/ bye ma chang pa nas gtor ba bzhin byed do/ /de so'i bar de nas thar nas chu srin rab tu 'bar ba de dag gi lto'i nang du 'jug par byed do/ /de ltar de dag chu srin gyi lto der lo 'bum phrag du mar lo bye ba phrag du mar chu srin de dag gi lto rab tu 'bar bar dbugs med pa 'am/ dbugs chung bar sreg cing 'tshed do/ /brdzun smras pa dag tshor ba drag pa tsha ba rtsub pa myong zhing las kyi rgyu brdzun smra ba rang gi lces kun nas bslang bas sreg la phyis sems can dmyal ba pa'i mes kun du sreg go/ /'di ltar chu srin de dag gis yan lag dang nying lag thams cad dkris nas lus phye mar byas pa kha nas 'byin te/ de nas yang phyi rol du me mdag sngon pos sreg go/ /bsreg pa na gshin rje'i mi rnams kyis tshigs su bcad de bstan pa/ sems can dmyal ba'i rgyur gyur pa/ /brdzun du smra ba ston pa yin/ /sngon chad rgyu ni bsten byas pa/ /don med smre sngags yongs su 'don/ /me yi nang na me mchog ste/ /rgya mtsho dag kyang sreg byed na/ /gang dag brdzun smra shing dang rdo/ /rang bzhin 'dra ba smos ci dgos/ /mi gang bden pa spangs nas su/ /brdzun du smra ba sgrub byed pa/ /de ni rin chen spangs nas su/ /sdig pa'i bdag nyid rdo 'dra sgrub/ /bdag la sdug par mi byed gang / /de ni sems can dmyal la dga'/ /brdzun gyis rang lus me 'byung ste/ /blo dang mi ldan de bsten to/ /bden tshig legs par rnyed yin te/ /lus can kun gyi rgyan yin no/ /bden pa spangs nas brdzun smra ba/ /blo med ci phyir chags par byed/ /bden pa yon tan bdag nyid mchog /brdzun smra dran pa skyon yin te/ /rmongs pa yon tan btang nas su/ /ci phyir skyon la yongs su rgyug / sems can dmyal bar rtag 'gro ba/ /skyon gyi 'bras bu nyes pa yin/ /khyed cag yon tan de dang 'gras/ /mi bzad dmyal bar kun du gnas/ /sdug bsngal kun gyi sa bon ni/ /brdzun du smra bar rab tu grags/ /de bzhin bde ba bden yin te/ /de bas su zhig brdzun du smra/ /bden par smra ba'i mi dag ni/ /lus can kun gyi dga' ba yis/ /brdzun smra mi dang 'gras pa ste/ /de bas su zhig brdzun du smra/ /bden par smra ba'i mi dag ni/ / lha ltar rtag tu dga' ba yin/ /dmyal bar de ltar rmongs pa dag /de bzhin sems kyis brdzun du smra/ /legs pa'i las ni ma byas la/ /sdig pa du ma byas pa na/ /sdug bsngal mtha' yas skyes pa dag /ci zhig sdig pas yongs su gdung / /dge ba'i 'bras bu legs pa yin/ /sdig pas nyon mongs 'tshed par byed/ /blo ldan mi yis sdig byas kyang / /dge ba rjes su sten par byed/ /dge ba'i nang na bden pa mchog /skyon gyi nang na de bzhin brdzun/ /skyon spangs yon tan tshol byed pa/ /mi yi nang na mi mchog yin/ /bde 'byung bde ba'i 'bras bu ni/ /bden pas yongs su 'grub par 'gyur/ /bden pas bde ba 'thob 'gyur te/ /bden pas mya ngan 'das par 'gro/ /sdug bsngal 'byung ba 'bras bu tsha/ / sdug bsngal mod la 'tshed par 'gyur/ /sdug bsngal kun mtha' brdzun yin na/ /mi yis ci phyir spang mi bya/ /bden pa don gyis 'thob min te/ /nyon mongs pas kyang 'thob med na/ /ci phyir bden pa yongs spangs nas/ /brdzun smra ba la dga' bar byed/ /yul gzhan dag nas bden mi 'ong / /de ni gzhan du btsal ba med/ /chu la stegs btags stegs myin te/ /bden pa stegs kun mchog yin no/ / sgron ma'i nang na sgron ma mchog /bden pa yin zhes sangs rgyas gsung / /sman gyi nang na sman mchog ste/ /de yis rtag tu sdug bsngal sel/ /nged kyis sdig pa bzung ba med/ /khyed cag rmongs pa'i sems kyis su/ /ngan pa khyed kyis byas pas na/ /khyed cag yongs su gdungs pa yin/ /sems can dmyal bar skyes pa ni/ /sdig pa byang bas rnam par 'grol/ /kun du skad 'don pa yi mi/ / nams kyang thar bar ga la 'gyur/ /rang gi las kyis rnam bslus pa/ /rmongs pa khyed cag ci zhig ngu / /byis pa rang gi sems kyis bslus/ /blo med khyed cag ngu skad 'don/ /de ltar sems can dmyal ba'i srungs ma de dag gis/ sems can dmyal ba pa de dag la so sor rjes su bstan nas ji srid du de'i sdig pa'i las bcom zhing spangs la zad par ma byas pa de srid du gnod pa mi bzad pa'i rnam pa brgya phrag du ma ji ltar sngar bshad pa bzhin du 'byung ngo / /de phyis sems can dmyal ba de las thar bar 'gyur te/ thar nas kyang gal te lan grangs gzhan la myong bar 'gyur ba'i las kyis yi dags dang / dud 'gro dag tu ma skyes la mi rnams dang skal ba mnyam par mir skyes na/ las de dang rgyu 'thun pa'i 'bras bus de rtag tu gzhan du zhugs nas slu bar byed cing nor rdzas thams cad kyang 'phrog par byed/ de'i bya ba gzhan gang yin pa dag kyang tshegs chen por 'gyur zhing de'i tshig 'jig rten pa yid ches par mi 'gyur ba mthong ngo / /de nas gzhan yang dge slong las kyi 'bras bu rnam par smin pa shes pa des/ sems can dmyal ba chen po ngu 'bod kyi 'khor la brtags na/ des thos pa las byung ba'i shes pas sems can dmyal ba khwa mchu rdo rje lta bu zhes bya ba mthong ngo / /der sems can dag las gang gis skye bar 'gyur snyam nas des thos pa las byung ba'i shes pas brtags na/ gang gis srog gcod pa dang / ma byin par len pa dang / 'dod pas log par g.yem pa dang / chang 'thung ba dang / brdzun smra ba kun du bsten cing bsgoms la mang du byas pas 'gyur te/ de lus dang bral nas ngan 'gro log par ltung ba sems can dmyal ba khwa mchu rdo rje lta bu'i nang du skye bar 'gyur ro/ /der gang sems can dmyal ba yang sos la sogs pa'i gnod pa de dag thams cad 'byung bar 'gyur ro/ /brdzun ni gang zhig dge 'dun gyi 'khor gyi nang du song nas nad kyi rkyen gyis gsos sman sbyar bar khas blangs pa las ma byin na de lus dang bral nas ngan 'gro log par ltung ba sems can dmyal ba khwa mchu rdo rje lta bu'i nang du skye bar 'gyur ro/ /der gnod pa 'di dag 'byung bar 'gyur te/ 'das pa'i dus su las byas pa de dag khwa mchu rdo rje lta bus sha bcad cing bcad cing za'o/ /gang gi tshe sha bcad par gyur pa'i skad cig de nyid dang gnas de nyid du yang ches shin du gzhon sha can pad ma ltar 'jam pa skye bar 'gyur te/ de ci nas kyang tshor ba ches drag par bya ba'i phyir de nyid phyung zhing btogs pa dang / de nas yang ches shin du gzhon sha can sar pa gzhan dag skye bar 'gyur ro/ /de ltar sems can dmyal ba pa de dag lo 'bum phrag du mar khwa'i mchu rdo rje lta bus za bar byed do/ /de nas thar ba dang bye ma'i nang nas lcags rab tu 'bar ba 'byung la de bye ma de dag la rkang pas 'gro ste/ de ji ltar thal ba yang mi mngon pa de ltar des sreg par byed do/ /de nas langs pa dang yang thams cad 'byung bar 'gyur te/ gang gis brdzun de smras shing sdig pa'i rjes su smras pa brdzun smra bas brdzun zer ba smras pa de yang 'byung zhing 'byung zhing bdag nyid kyi lce yang bdag nyid za'o/ /'dir tshigs su bcad pa/ bdud rtsi dang ni dug nyid dag /mi rnams kyi ni lce la gnas/ /bden par smra ba bdud rtsi yin/ /brdzun gyi tshig ni dug dang 'dra/ /gang zhig bdud rtsi mngon 'dod pa/ /de ni rtag tu bden la gnas/ /gang zhig dug la mngon dga' ba/ /de ni brdzun gyi tshig la dga'/ /dug gis gnod par nges med kyi/ /brdzun du smra bas nges par 'gyur/ /gang zhig brdzun ni mngon smra ba/ /skyes bu de ni 'chi bar 'gyur/ /brdzun gyis bdag la mi phan na/ /gzhan la phan par ga la 'gyur/ /bdag dang gzhan gang sdug bsngal ba/ /de ni mi yis ci phyir bsten/ / de ltar brdzun la bsten pa ni/ /sdig pa sdig par 'grub 'gyur te/ /mtshon dang me dang ngam grog las/ /mi yi sdug bsngal de 'dra med/ /lus gcig 'phrog pa mthong ba ni/ /'chi ba dus las 'byung 'gyur te/ /tshe rabs snga phyi stong dag tu/ /brdzun gyi tshig gis chud gzon to/ /btsun pa'i rigs la mthor byed cing / /dma' ba'i rigs la rgyan du byed/ /thar pa'i lam dag ston byed pa/ /bden pa yin zhes mngon par brtags/ /sems can rnams kyi rang gi las/ /sred pas khyer bar gyur pa na/ /gzings 'dra bden smra mchog yin zhes/ /bde bar gshegs pas bka' stsal to/ /'jig rten thog ma tha ma med/ /sred pa'i zhags pa'i dbang du song / /'di ltar skyabs gzhan bden pa las/ /med ces chos la mkhas pas rig /gcer bu mtshon gyis gcod pa ltar/ /bden pas rtag tu nyon mongs gcod/ /mtshon gyis btab pas ngu bar 'gyur/ /bden pas nams kyang ngu ba med/ /'jig rten gnyis la phan byed pa/ /bden pa mi zad gter zhes bya/ /chos so cog gi khrims yin zhing / /nor gyi gzhi yi mchog yin no/ /bden pa'i yon tan rab bsgrubs pa/ /bde 'byung 'bras bu chen po yin/ /blo ldan ngan g.yo rnams spongs shig /de nyid mthong bas spangs pa yin/ /bden pa spangs pa'i mi dag khwa mchu rdo rje lta bus ji srid du/ de'i sdig pa'i las bcom zhing spangs la zad par ma byas pa de srid du lo 'bum phrag du mar 'tshed do/ /de phyis sems can dmyal ba de las thar bar 'gyur te/ thar nas kyang gal te lan grangs gzhan la myong bar 'gyur ba'i las kyis yi dags dang / dud 'gro dag tu ma skyes la mi rnams dang skal ba mnyam par mir skyes na/ las de dang rgyu 'thun pa'i 'bras bu tsha ba sems can dmyal bar 'gro ba bden pa de dang mi mthun par gyur pa brdzun smras pas/ de rtag tu 'thab pa dang / rtsod pa mang zhing rtag tu gzhan rgyal bar 'gyur la/ tshig gis 'jig rten pa'i yid mi ches par 'gyur ba mthong ngo / /de nas gzhan yang dge slong las kyi 'bras bu rnam par smin pa shes pa des sems can dmyal ba chen po ngu 'bod kyi 'khor la brtags na/ des thos pa las byung ba'i shes pas sems can dmyal ba khrag dang rkang za ba zhes bya ba mthong ngo / /sems can dmyal ba khrag dang rkang za ba der sems can dag las gang gis skye bar 'gyur snyam nas/ des thos pa las byung ba'i shes pas brtags na/ gang gis srog gcod pa dang / ma byin par len pa dang / 'dod pas log par g.yem pa dang / chang 'thung ba dang / brdzun smra ba byas shing bsags pas 'gyur te/ 'di lta ste/ rgyal po 'am blon po 'am rje dpon du gyur pas dpya thang las lhag par phab la 'di ltar ngas lhag par phab pa med do zhes smra zhing dpya 'bebs na de lus dang bral nas ngan 'gro log par ltung ba sems can dmyal ba khrag dang zhag za bar skye bar 'gyur ro/ /der gnod pa 'di dag 'byung bar 'gyur te/ 'di lta ste/ gang sems can dmyal ba yang sos dang thig nag la sogs par 'byung ba rnams 'byung ba'i steng du khyad par du 'byung ba ni 'di lta ste/ shing rab tu 'bar ba lo ma spu gri lta bu yod par brdzun smra ba de gshin rje'i mi rnams kyis lcags kyi thag pa rab tu 'bar ba dag gis bcings nas kha sbub tu spyangs so/ /kha sbub tu spyangs pa de'i rkang pa dag la mchu dang sen mo rdo rje ltar rno ba dag gis za ste/ kha sbub tu spyangs pa de dag khrag 'byung ba gang yin pa de la za ba des gnas par byed do/ /tshor ba thams cad kyi nang na kha zas kyi tshor ba mi bzad par bshad de/ de rang gi khrag la 'thung ngo / /de tshor ba gnyis dag gis yongs su gnod de me'i tshor ba dang / bkres pa dang skom pa'i tshor ba'o/ /'dir tshigs su bcad pa/ ji ltar bkres shing skom pa ni/ /las kyis shin du g.yengs pas gdungs/ /de ltar sreg pas sreg min zhing / /rlung drag pa yis khyer mi byed/ /de ltar lo brgya stong phrag du mar de rang gi khrag dang rkang dag la za ste/ 'di ltar ro smad me mchog tu tsha bas bsregs so/ /de ji srid du de'i sdig pa'i las bcom zhing spangs la zad par ma byas pa de srid du/ sems can dmyal ba der sreg go/ /de phyis sems can dmyal ba de las thar bar 'gyur te/ thar nas kyang gal te lan grangs gzhan la myong bar 'gyur ba'i las kyis yi dags dang / dud 'gro dag tu ma skyes la/ mi rnams dang skal ba mnyam par mir skyes na/ las de dang rgyu 'thun pa'i 'bras bus de dbul bar 'gyur zhing ngag yid mi ches pa dang / rtag tu de'i sna nas khrag 'dzag cing so shing 'cha' ba na khrag 'byung bar 'gyur ba mthong ngo / /de nas gzhan yang dge slong las kyi 'bras bu rnam par smin pa shes pa des sems can dmyal ba chen po ngu 'bod kyi 'khor la brtags na/ des thos pa las byung ba'i shes pas mthong ste/ gang gis srog gcod pa dang / ma byin par len pa dang / 'dod pas log par g.yem pa dang / chang 'thung bas 'gyur ro/ /brdzun smra ba ni gnyis shig rtsod pa na rgyal po 'am/ blon po 'am/ gzhan yid ches pa'i gnas su bya bas nor blangs sam/ mdza' bshes sam/ 'dod chags sam/ zhe sdang gis phyogs bzung ste/ zhal ce yon por bcad na de lus dang bral nas ngan 'gro log par ltung ba sems can dmyal ba me lce bcu gcig pa der skye bar 'gyur ro/ /phyogs bzung ste/ brdzun smra ba de la gang sems can dmyal ba yang sos la sogs pa'i tshor ba gnod pa 'di dag thams cad bcu 'gyur du 'byung ba'i steng du khyad par du 'byung ba ni 'di lta ste/ rang gi lus las phyogs bcur me lce'i phung po bcu gcig 'byung bar 'gyur ro/ /brdzun smra ba'i lce'i kha las bkres pa dang skom pa 'byung bar 'gyur te/ zhal ce yon por gcod pa ni skad cig skad cig la skye zhing sreg go/ sreg pa na tshor ba'i rnam pa de lta bu myong bar 'gyur te/ gang me lce'i phung po bcu gcig po de dag ni bcu drug gi char yang mi phod do/ /las kyis byas pa'i tshor ba de dag ji srid du de'i sdig pa'i las bcom zhing spangs la zad par ma byas pa de srid du 'di ltar de sems can dmyal ba me lce bcu gcig par lo 'bum phrag du mar sreg go/ /'tshed do/ /de phyis sems can dmyal ba de las thar bar 'gyur te/ thar nas kyang gal te lan grangs gzhan la myong bar 'gyur ba'i las kyis yi dags dang / dud 'gro dag tu ma skyes la/ mi rnams dang skal ba mnyam par mir skyes na de zhal che yon por bcad pa'i rgyu 'thun pa'i 'bras bus de rtag tu bkres pa dang skom pas gdungs shing yan lag thams cad rnam par sreg pa dang / dbul zhing tshe thung ba dang / ngag yid mi ches pa dang / shin du glen pa dang / gzugs mi sdug pa dang / rkang lag nyams pa dang / dri ma can dang / gnas ngan pa sum mdo dang / bzhi mdo'i khyim du 'jug cing tshe gcig gi bar du shin du sdug bsngal bar 'gyur ro/ /de nas gzhan yang dge slong las kyi 'bras bu rnam par smin pa shes pa des sems can dmyal ba chen po ngu 'bod kyi 'khor la brtags na/ des sems can dmyal ba chen po de'i 'khor bcu bdun pa ni gcig kyang ma mthong ngo / / //'phags pa dam pa'i chos dran pa nye bar gzhag pa/ bam po bcu gcig pa/ de nas gzhan yang rnal 'byor spyod pa nang gi chos la chos kyi rjes su lta zhing gnas pa'i dge slong de 'di ltar zhi ba/ rga ba med cing 'chi ba med pa/ zag pa med pa/ mya ngan las 'das pa'i lam la 'jug pa de'i brtson pa sa bla'i gnod sbyin dag gis mthong nas bar snang la spyod pa'i lha rnams la bsnyad pa nas/ rgya cher sbyar te/ 'od chung gi lha rnams kyi bar la bsnyad de/ 'di ltar 'dzam bu gling du rigs kyi bu che ge mo zhig ces bya ba nas rgya cher sbyar te/ sa gzhan bcu pa'i bar la zhugs pa bdud kyi yul gyi gzhi la mi 'dod cing / dga' ba'i 'dod chags kyi mod las byung ba'i sred pa'i dngos po dang lhan cig gnas pa dang / kun nas nyon mongs pa'i yul gyi dngos po rnams dang lhan cig mi gnas pa de 'od chung gi lha rnams kyis thos nas bdud kyi phyogs dma' bar 'gyur zhing / dam pa'i chos kyi phyogs mngon par mtho bar 'gyur ro zhes yid dga' bar 'gyur ro/ /de nas gzhan yang dge slong las kyi 'bras bu rnam par smin pa shes pa 'khor ba'i 'ching ba gcod pa la brtson pa de 'di snyam du sems te/ kye ma sems can 'di dag ni sdug bsngal ba yin te sred pas bslus pa/ gti mug gi kun du sbyor bas bcings pa/ sems bag la nyal rnams dang yang dag par ldan pa/ dus gsum du 'tshed kyang 'khor ba gcad pa'i phyir 'bad par mi byed pa'i sems can 'di dag la snying med dam ci/ 'on te snying la mi shes pa zhig yod dam/ 'on te shes pa yod kyang yid 'byung bar mi byed dam/ sems can 'di dag gi rnam par shes pa de gang zhig yin/ gal te sems can 'di ltar mtho ris su yun ring du gnas kyang yid 'byung bar bya ba yin na/ 'di ltar sems sra zhing mkhrang ba de lta ci smos/ gang gnod pa'i rnam pa du ma kun gyis sdug bsngal rjes su myong yang skyo bar mi byed do/ /yun ring po nas bag la nyal rjes su 'brang ba'i sems la mi mthun pa lnga yod de/ 'di lta ste/ rga ba dang / na ba dang / 'chi ba dang / mi sdug pa dang phrad pa dang / sdug pa dang bral ba'o/ /gzhan yang nyes dmigs kyi gnod pa bcu 'byung ste/ bkres pa dang / skom pa'i nyes dmigs dang / sdug pa dang bral ba'i nyes dmigs dang / yul nas yul du 'gro ba'i nyes dmigs dang / 'chi ba dang skye ba'i nyes dmigs dang / gzhan gyis brnyas pa'i nyes dmigs dang / gzhan gyis bcom pa'i nyes dmigs dang / grang ba dang tsha ba'i nyes dmigs dang / zlas dbye ba'i nyes dmigs dang / 'byor ba rgud pa'i nyes dmigs dang / 'dod pa'i nyes dmigs te/ de ltar mdor na nyes dmigs bcu dag gis sems mngon par gnod par byas kyang / kye mi dga' bar mi byed pa'i sems can 'di dag ni/ e ma thog ma med pa'i dus nas sems dgra lta bu g.yos pa dang / rna ba dang snying med cing rdo dang rdo rje lta bu'i sems yul rnam pa mang pos dam pa'i chos la nams kyang dga' bar mi byed pa/ yul gzugs dang / sgra dang reg pa dang / ro dang dri dug dang mtshon dang me lta bu'i sred pas rtag tu chog mi shes pas dug lta bu'i yul lnga dang / chom rkun lta bu'i skye mched drug dang / byang chub kyi yan lag bdun mi shes pa dang / 'phags pa'i lam yan lag brgyad par 'gro bar mi spro ba dang / sems can gyi gnas dgu mi shes pa dang / dge ba bcu'i las kyi lam mi shes pa dang / sa bcu gcig gi rnam par dpyod pa la blun pa dang / skye mched bcu gnyis kyi skye ba dang gnas pa la rab tu rnam par spyod pa mkhas pa dang / mi mkhas pa la rnam par spyod pa/ sa gong ma bcu gsum gyi spyod pa la blun pa/ sems kyi dmigs pa bcu bzhi dang 'grogs pa/ gnod pa bcwa lnga mi bzod pa/ gnod pa sdig pa'i mun pa bcu drug gis gnas pa/ byis pa'i shin du rnam par dpyod pa bcu bdun dang / tshor ba rab tu 'byung ba'i bu ga bcwa brgyad dang / 'gro ba rnam par rgyu ba'i srang bcu dgu dang / dgra gnas pa nyi shus sems de rnam pa nyi shur bslus par rig nas de sems can la snying rje bar sems so/ /dge slong de las kyi chos kyi rnam par smin pa la rab tu rnam par dpyod par byed de/ 'di ltar de bdud kyi 'ching ba gcod pa dag la rtag tu brtson par byed cing de nas yang blo skyed par byed de/ sems c an dmyal ba ngu 'bod las gzhan pa sems can dmyal ba ches sdig pa che ba yod pa de'i thos pa las byung ba'i shes pas sems can dmyal ba chen po gzhan tsha ba zhes bya ba nyes par byas pa'i las rab tu bdo bas kun nas bslang ba/ sems can dmyal ba chen po ngu 'bod las gnod pa bcu 'gyur gyis lhag pa zhig yod pa mthong ngo / /'khor bcu drug la 'di lta ste/ rab tu sreg pa chen po dang / pad ma dkar po lta bu dang / sbrul 'khyil ba lta bu dang / zangs bzhus par nya 'khyug pa lta bu dang / lcags kyi bum pa dang / chu bo dmar po 'bab pa dang / rkang dang rus pa la srin bu mang ba dang / skye bo thams cad sreg pa dang / sar 'byin mtha' yas dang / pad ma chen po lta bu dang / mtha' drag dang / rus pa rdo rje lta bu 'byung zhing 'du ba dang / lcags nag po'i skud pas 'dral zhing gcod pa tsha ba dang / srin bu na kra dang / 'khor lo dang / me 'jigs 'jigs ltar skyes pa dang / nags tshal gyi me mun pa ltar 'khrigs pa dang / bung ba rdo rje lta bus gnod pa'i go cha zhes bya ste/ 'di dag ni sems can dmyal ba chen po tsha ba'i 'khor bcu drug yin te/ der tshe ni bgrang du mi lang ngo / /der sems can dag las gang gis skye bar 'gyur snyam nas/ des thos pa las byung ba'i shes pas brtags na/ gang gis srog gcod pa dang / ma byin par len pa dang / 'dod pas log par g.yem pa dang / chang 'thung ba dang / brdzun smra ba dang / log par lta ba kun du bsten cing bsgoms te mang du byas pas 'gyur la/ las kyi nyer bsdogs dang las kun gyi mjug kun du bsten cing bsgoms te mang du byas pas 'gyur ro/ /de lus dang bral nas ngan 'gro log par ltung ba sems can dmyal ba chen po tsha bar skye bar 'gyur ro/ /de la srog gcod pa dang / ma byin par len pa dang / 'dod pas log par g.yem pa dang / chang 'thung ba dang / brdzun smra ba rnams kyi 'bras bu rnam par smin pa ni bshad zin to/ /log par lta ba ni gang gis kun du bsten cing bsgoms la pha rol la yang bstan pa yin te/ 'di lta ste/ sbyin pa med do/ /mchod sbyin med do/ /legs par byas pa dang / nyes par byas pa rnams kyi las kyi 'bras bu rnam par smin pa med do/ /'jig rten 'di med do/ /'jig rten pha rol med do/ /ma med do/ /pha med do/ /zhes de skad chad par smra ba ni las yod pa 'jig pa yin te/ gzhan dag la yang ston cing yang dag par rab tu 'jog par byed la yang dag par rab tu dga' bar byed pa log par lta ba bskyed nas/ pha rol dag la las kyi lam gyi rgyu med par ston pa ni chom rkun pa tshul bzang por 'chos pa yin te/ de lus dang bral nas ngan 'gro log par ltung ba sems can dmyal ba chen po tsha bar skye bar 'gyur ro/ de la las kyi lam dang las kyi 'bras bu yod bzhin du rnam par slu ba yin te/ de 'chi ba'i dus na srid pa bar ma'i bar du skye ba na/ ltas ngan pa'i mtshan ma 'byung bar 'gyur ba ni 'di lta ste/ 'jigs pa mchog tu mi bzad pa mun par nges par gyur pa dang / so so nas 'jigs par byed pa seng ge dang / stag dang / dred dang / gung dang / sbrul mang po phug dang / mun pa med pa na 'dug pa dang / des gzhan yang ri che zhing mtho ba de'i mgo'i steng du myur bar 'ong ba mthong ba dang / stag dang seng ge de dag kyang so so nas 'jigs par byed cing sgra 'byin pa thos pa dang / gzhan dag kyang gzugs mchog tu dman zhing snying rje rje ltar 'dug pa mthong ba dang / de dag la nag po lta bu mthong zhing me rab tu 'bar ba de'i steng na 'dug pa mthong ba dang / wa brgyal ba'i sgra drag po thos pa dang / gshin rje'i mi gzugs mi sdug par bsgyur ba dag mthong ba dang de skrag go/ /log par smra ba/ rgyu ngan pa smra ba/ phyogs ngan pa smra ba/ lta ba ngan pa smra ba/ las kyi 'bras bu rnam par slu ba smra ba/ ngam grog dang g.yang sa'i rgyu smra ba/ bdag nyid la bdag slu bar byed cing sdig pa chen po byed pa de'i las rtag tu bsten cing bsgoms te mang du byas la bsags pa'i 'bras bu ni 'chi khar mthong bar 'gyur te/ de 'jigs shing dbang po blong blong por 'gyur ba dang / bshang ba 'byung bar 'gyur ba 'am/ de bzhin du gci ba 'byung bar 'gyur ba 'am/ de bzhin du skad 'byin pa 'am/ de bzhin du kha gdong bar byed pa 'am/ de bzhin du mal gyi mtha' la nom par byed do/ /ri de bdag gi steng du 'ong ba mthong nas lag pas gzung bar 'dod pa de la mi dag na re 'di ltar 'di ni nam mkha' la reg par 'dod do zhes smra ste/ 'di ltar ri 'ong ba de yang dang yang du mthong ba dang / bdag nyid kyi lus thams cad kyis reg par byed do/ /'di ltar de nyes par byas pa'i las spyad cing las kyi 'bras bu bslus pa ni de ltar sems can dmyal ba yang dag par myong bar 'gyur ba'i ltas mang po 'byung bar 'gyur te/ 'di lta ste/ dper na mi zhig mi gtsang ba'i phung po da dung gi bar du ma mthong gis kyang dri nga ba'i dri mnam pa de bzhin du sems can dmyal ba da dung gi bar du ma mthong gis kyang sems can dmyal ba chen po'i mtshan ma mchog tu 'jigs shing drag pa dag 'byung bar 'gyur ro/ /ngan par lta zhing smra ba thams cad skrag par byed de/ skye bo byis pas bsgrubs pa nyes par byas pa'i zong / sems can dmyal bar brin pa'i rin/ der gnas pa'i rnam par smin pas de'i rlung bib pa la ka dang / su tsa ka shin du drag pa dag gis yan lag dang nying lag rnam par skul bar byed/ rnam par rdung bar byed/ rnam par gsheg par byed do/ /de'i lus bdo ba na/ de'i sems srid pa tha ma la tshor ba gnyis kyis gdungs pa yin te/ de srid pa tha ma pa la sems kyi dmigs pa legs par spyad pa'i 'du shes su byed do/ /de lta bas na mi'i 'jig rten nas rang gis byas shing bslus pa srid pa bar ma la sems can dmyal bar myong bar 'gyur ba'i ltas dag 'byung bar 'gyur ba ni 'di lta ste/ snying gi lam la sgra dang reg pa dang / ro dang gzugs dang dri mi 'dod pa dag 'byung bar 'gyur te/ sems can dmyal ba pa dag gi gzugs mi sdug pa'i sgra skad thos pa dang / rlung reg pa spu gri lta bus reg par byed pa dang / ro tsha ba'i ro myong bar byed pa dang / gzugs 'jigs par ston pa rab tu gdung lta bur byas pa dag kyang mthong bar 'gyur/ dri nga ba'i rdzas bsags pa'i dri dag mnam par 'gyur ro/ /de ltar yul thams cad kyis skrag pa sems can dmyal ba shin du log par lta bas mthong bar 'gyur te/ ji ltar des chos log par bstan pa de ltar sems can dmyal ba des mthong bar 'gyur ro/ /de 'di snyam du sems te/ kye ma yul grong khyer gyi tshul dang 'thun pa 'di re dga' der bdag ji ltar 'jug par bya snyam ste/ de la 'dod par byed do/ /de srid pa'i yan lag myong bar 'gyur ba rig nas der skye bar 'gyur te/ nye bar len pa'i rkyen gyis srid pa 'byung ba der sems bskyed ma thag tu skye bar 'gyur ro/ /der skyes ma thag tu gang sems can dmyal ba yang sos la sogs pa'i sdug bsngal de dag thams cad bcu 'gyur du 'byung ngo / /nad bzhi brgya rtsa bzhi yang 'byung ste/ drag pa sems can dmyal ba dang mtshungs pa/ gcig gi dper gcig rung ba/ don thams cad med par byed cing 'jigs par byed pa nyes par byas pa'i las kyi 'bras bur gyur pa dag yin no/ /me'i rnam pa 'di lta bu 'byung bar 'gyur te/ gang til 'bru tsam gyis ri dang nags tshal dang / tshong rdal dang gling dang bcas pa dag sreg na sems can dmyal ba pa'i lus dag lta smos kyang ci dgos te/ des mar gyi gong bu bzhin du sreg go/ /de nas yang 'byung bar 'gyur te/ nyin dang mtshan mor mi mngon zhing mun par zhugs pa na lo 'bum phrag du mar gnod pa'i rgya mtshor bying ba thams cad mun pa mun gnag tu gyur pa/ log par lta ba byas shing bsags la bsten pa dag gi 'bras bus de 'di ltar lo dpag tu med cing bgrang gis mi lang bar de'i sdig pa'i las bcom zhing spangs la zad par ma byas pa de srid du sdug bsngal dang tsha ba dpe med pas 'tshed do/ /sreg go/ /de sems can dmyal ba'i yun ring po de las 'das nas gal te sems can dmyal ba de las thar bar 'gyur te/ thar nas kyang tshe rabs lnga brgyar yi dags ser sna can zhes bya ba der skye bar 'gyur ro/ /de nas thar nas kyang tshe rabs lnga brgyar dud 'gro thams cad kyis sdug bsngal ba gang yin pa der skye bar 'gyur ro/ /gal te brgya la gnya' shing bu gar rus sbal 'jug pa lta bur lan grangs gzhan la myong bar 'gyur ba'i las kyis mi rnams dang skal ba mnyam par mir skyes na log par lta ba de dang rgyu 'thun pa'i 'bras bus de kla klo'i rigs su skye bar 'gyur zhing dbul ba dang / nad dang / long ba dang / lag rdum dang / nad bu can du 'gyur/ tshe thung ba dang / tshig yid mi ches par 'gyur ba mthong ngo / /de nas gzhan yang dge slong las kyi 'bras bu rnam par smin pa shes pa des sems can dmyal ba chen po tsha ba'i 'khor la brtags na/ des thos pa las byung ba'i shes pas sems can dmyal ba rab tu sreg pa chen po zhes bya ba yod pa mthong ngo / /der sems can dag las gang gis skye bar 'gyur snyam nas des thos pa las byung ba'i shes pas brtags na/ gang gis srog gcod pa dang / ma byin par len pa dang / 'dod pas log par g.yem pa dang / chang 'thung ba dang / brdzun smra ba dang / log par lta ba las dang 'bras bu mi mthun par ston pa kun du bsten cing bsgoms te/ mang du byas pas 'gyur ro/ /'di lta ste/ srog gcod pa byas na srog gcod pa po tshe phyi ma la lha rnams su skye'o zhes zer ba de ni 'di ltar las dang 'bras bu mi mthun par ston pa yin no/ /de ci'i phyir zhe na/ srog chags rnams kyi snying la ches sdug bsngal ba med pa ma yin la 'di ltar lha rnams su skyes pa dag la ches bde ba med pa ma yin te/ sdug bsngal gyi rgyu srog gcod pa dang yang dag par ldan pa ni bde ba'i rgyur mi 'gyur sdug bsngal yang bde ba'i las kyi 'bras bur mi 'gyur te/ log par lta ba'i rnam pa de dag ston par byed pa de ni las de dang 'bras bu mi mthun par ston pa yin no/ /de lus dang bral nas ngan 'gro log par ltung ba sems can dmyal ba rab tu sreg pa chen por skye bar 'gyur ro/ /der gnod pa 'di dag 'byung bar 'gyur te/ 'di lta ste/ gang sems can dmyal ba yang sos la sogs par ji ltar bstan pa'i sdug bsngal de dag thams cad bcu 'gyur du 'byung ngo / /rang gi lus las kyang kun nas me 'byung ste/ rnam pa de lta bur rab tu sreg pa ni/ gang las byas pa'i sems can dmyal ba pa'i me'i phyi rol na gnas pa bcu drug gi char yang mi phod do/ /me de'i mdog kha ba 'dra la rnam pa de lta bus de rab tu sreg par byed de/ de'i phyi nang thams cad rab tu tshig go/ /yid la gcags pa las byung ba'i me gzhan gsum pa 'byung bar 'gyur te/ des kyang sems can dmyal ba pa de sreg go/ /log par lta ba de phyis 'di ltar log par lta ba'i 'bras bu ni tsha'o/ /rnam par smin pa'i 'bras bu ni che'o/ /ro myang ba ni cha 'o zhes mngon par shes par 'gyur ro/ / me de gsum gyis mngon par sreg pa ni skad cig tsam yang bde ba mi 'thob ste/ sems can dmyal ba tsha ba'i 'khor rab tu sreg pa chen por 'di ltar nyes par byas pa'i las kyi mtha' dpyad pa de/ der lo grangs med par yun ring mo zhig tu 'tshed de de'i sdig pa'i las bcom zhing spangs la zad par ma byas pa de srid du de sreg go/ /'tshed do/ /rnam par 'jig par byed do/ /de phyis sems can dmyal ba de las thar bar 'gyur te/ thar nas tshe rabs sum brgyar yi dags rnams su skye bar 'gyur ro/ /tshe rabs nyis brgyar dud 'gro rnams su skye bar 'gyur ro/ /de de las thar nas gal te brgya la mi rnams dang skal ba mnyam par mir skyes na de pha ma la rim gro bya ba btang zhing sgra skad 'byin par 'gyur/ mi gtsang ba za zhing yul nas yul gzhan du rgyu ba dang / dam pa'i chos dang bral ba dang / skye bo kun gyis smad pa dang / bza' ba dang gnas pa'i khyi'i spyod lam dang mtshungs pa dang / rkang lag la thor pa 'byung ba dang / pha rol gyi bsod snyoms kyi zas gsob gsog tu gyur pa zos nas mi'i tshe 'di nyid la 'chi bar 'gyur te/ de ltar log par lta ba ni thog ma dang bar ma dang tha mar mi 'dod pa 'byung ba dge slong des mthong ngo / /yang dag pa'i lta ba ni blo'i sngon du 'gro zhing de kho na nyid mthong la yang dag pa'i lam la rab tu gnas pa mya ngan las 'das par 'gro ba na sngon du 'dren pa yin par mthong ngo / /de nas yang dge slong las kyi 'bras bu rnam par smin pa shes pa des sems can dmyal ba chen po tsha ba'i 'khor la brtags na des thos pa las byung ba'i shes pas 'khor pad ma dkar po lta bu zhes bya ba mthong ngo / /der sems can dag las gang gis skye bar 'gyur snyam nas des thos pa las byung ba'i shes pas brtags na/ gang gis srog gcod pa dang / ma byin par len pa dang / 'dod pas log par g.yem pa dang / chang 'thung ba dang / brdzun smra ba kun du bsten cing bsgoms te mang du byas pas 'gyur ro/ /log par lta ba yang rnam pa 'di dag kun tu bsten cing bsgoms te mang du byas pas 'gyur ba ni 'di lta ste/ zas mi za bas mtho ris thob par 'gyur ro/ /snyam nas de gzhan yang 'dzin du 'jug cing rjes su dga' bar byed du 'jug la rab tu 'jog par byed pa/ rgyu ngan pa dang / lta ba ngan pa gzhan gyis sems bcings pa dag bstan bcos ngan pa byed cing gzhan yang 'dzin du 'jug go/ /'dzin du bcug zas mi za ba la bkod nas srog dang bral bar byed do/ /de lus dang bral nas ngan 'gro log par ltung ba sems can dmyal ba pad ma dkar po lta bur skye bar 'gyur ro/ /de der skyes nas gang sems can dmyal ba yang sos la sogs pa'i sdug bsngal de dag thams cad nyis 'gyur du 'byung ba'i steng du gnod pa khyad par du 'byung ba ni 'di lta ste/ yan lag dang nying lag thams cad rtag tu 'bar ba'i phreng bar 'gyur te/ lus de la rgyu las dang 'thun pa'i rno ba dpe med pa'i rgyu des me rab tu 'bar ba yungs kar gyi tshad tsam yang ma khyab pa med de/ des rtag tu rab tu 'bar ro/ /ji ltar mi gtsang ba thams cad kyi nang na log par lta ba kun mi gtsang ba de bzhin du me thams cad kyi nang na me 'di kun tsha'o/ /me'i gnod pa dpe med pa des sems can dmyal ba pa de dag la rgyu dang 'thun pa'i 'bras bu 'byung ste/ des yun ring du sreg go/ /de gal te las kyi dbang gis me tog pad ma dkar po'i tshal na bya'i tshogs du mas kun du bsten pa chu 'bab pa phun sum tshogs pa mthong ba dang / sems can dmyal ba pa gzhan dag la smras pa/ kye 'di ltar rgyugs rgyugs/ pad ma dkar po'i tshal der bdag cag chu bsil ba btung bar bya'o/ /tshal grib bde ba dag bsten par bya'o zhes de dag gis de spro ba bskyed nas/ de dag nyid dang lhan cig tu pad ma dkar po'i tshal der rgyug go/ /brgyugs pa dang kha cig mdag me'i chu bo gang ba dag tu bying ngo / /bying nas yan lag dang nying lag thams cad rnam par zhigs so/ /rnam par zhigs nas yang 'byung bar 'gyur te/ byung nas de ltar pad ma dkar po'i tshal la sreg pas de nyid du rgyug go/ /brgyugs pa dang / sba'i lcug ma rab tu 'bar ba dag 'byung bar 'gyur te/ de dag gis yan lag dang nying lag thams cad dkri dkris nas nyams par byas te/ rus pa dang rkang tsam zhig yod par byas so/ /de nas yang skye bar 'gyur te/ skyes nas kyang de bzhin du pad ma dkar po'i tshal du rgyug pa dang / de'i sha la las kyis byas pa'i srin bu dag byung ste/ de la za'o/ /de la de dag thams cad kyis snga ma bzhin du re shig mig la 'phyang 'phyang nas mig za'o/ /sred pas nyam thag pa long bar gyur pa de der rgyug go/ /brgyugs pa na srin bu gzhan dag 'byung bar 'gyur te/ de dag gi lus mun par bsgribs pa ngu skad 'don pa de la rtag tu za'o/ /de nas yang mig nas 'byung ste/ de la yang za ste/ de ltar lo 'bum phrag du ma'i bar du za za nas skye bar 'gyur ro/ /yongs su rgyug pa na yang gal te yang pad ma dkar po'i tshal de dag dang phrad na/ de'i bsam pa dang lus thams cad rab tu sim pa dang / bdag gi bsam pa bzhin du pad ma dkar po'i tshal de dang phrad do snyam du sems skye'o/ /de der zhugs pa dang / pad ma dkar po de dag 'phang du dpag tshad lnga'o/ /rgyar dpag tshad gnyis kyi tshad de me 'bar ba'i pad ma dkar po de la las kyis bslus pa dag 'dzeg go/ /lhag ma gzhan dag ni 'dzeg cing 'khod la sems can dmyal ba pa de dag gi lus 'bar ba'i phreng ba'i yan lag dang ldan par 'gyur te/ 'dzeg bzhin du de dag re ba med cing shin du sdug bsngal la bkres pa dang skom pas nyen pa de dag me mdag pad ma dkar po lta bus sreg go/ /'tshed do/ /'chi zhing skye'o/ /lus kyi yan lag dang / nying lag thams cad bsregs pa shing ki shu ka lta bu'i lus dag ji srid du de'i sdig pa'i las bcom zhing spangs la zad par ma byas pa de srid du yun ring por gnod pa myong bar 'gyur ro/ /de phyis sems can dmyal ba de las thar bar 'gyur te/ thar nas kyang tshe rabs bzhi brgyar yi dags bkres shing skom par 'gyur ro/ /de las thar nas kyang tshe rabs sum brgyar dud 'gro rnams su skye bar 'gyur ro/ /gal te gnya' s hing bu gar ru sbal 'jug pa lta bur lan grangs gzhan la myong bar 'gyur ba'i las kyis mi rnams dang skal ba mnyam par mir skyes na des log par lta ba spyad cing nyes par byas pa'i las de dang rgyu 'thun pa'i 'bras bus de mtshon gyis 'khrug cing mu ge dang chom rkun rab tu mang ba'i yul rnams su skye bar 'gyur/ der skyes nas kyang dbul zhing nad bu can dang gzhan gyis bskol cing sdug phongs par gyur la dbang po ma tshang bar 'gyur ba mthong ngo / /de nas yang dge slong las kyi 'bras bu rnam par smin pa shes pa des sems can dmyal ba chen po tsha ba'i 'khor la brtags na des thos pa las byung ba'i shes pas sems can dmyal ba sbrul 'khyil ba lta bu zhes bya ba mthong ngo / /der sems can dag las gang gis skye bar 'gyur snyam nas des brtags na/ gang gis srog gcod pa dang / ma byin par len pa dang / 'dod pas log par g.yem pa dang / chang 'thung ba dang / brdzun smra ba kun du bsten cing bsgoms te mang du byas pas 'gyur ro/ /log par lta ba yang kun du bsten cing bsgoms te mang du byas pas 'gyur ba ni 'di ltar tsog tsog por sgyings par 'dug la skom 'thung zhing lag pa la ldag na mya ngan las 'das pa 'thob ste/ 'dod chags zhe sdang gti mug spangs pas ma yin zhing dbang po zhi bas ma yin no zhes smra na de lus dang bral nas ngan 'gro log par ltung ba'i sems can dmyal ba sbrul 'khyil pa lta bur skye bar 'gyur ro/ /der gnod pa 'di dag 'byung bar 'gyur te/ 'di lta ste/ sems can dmyal ba de sbrul gdug pa gdengs ka can rab tu 'bar bas kun du gang ba de na sbrul dpag tshad tsam yod cing sbrul gdug pa dpag tshad tsam yod pas kyang shin du gang ba yin la kha cig ni lta ba'i dug / kha cig ni reg pa'i dug / kha cig ni mche ba'i dug ste/ de dag gis sems can dmyal ba de gang ngo / /der sems can dmyal ba kha cig gi nang du sbrul de dag 'byung bar 'gyur te/ gang dag nang du skyes pa la de'i tshe sbrul de dag gi lus reg pas chad pa'i phye bzhin 'thag go/ /gang dag kha'i nang du skyes pa ni mche ba dang 'dres pa'i dug rab tu 'bar ba de dag gis skye zhing skye zhing yang 'chi'o/ /shi nas yang 'tsho ste/ de dag me gsum gyis sreg go/ 'di lta ste/ dug gi me dang / sems can dmyal ba pa'i me dang / bkres pa dang skom pa'i mes de dag rang gi las dang 'thun par me gsum gyi dbus su bcug nas tshor ba tsha ba rtsub pa dag myong bar 'gyur ro/ /gzhan yang nad las byung ba'i tshor ba brjod par yang mi nus pa'i nad bzhi las byung ba'i mes de sreg go/ /de ltar nyes par byas pa'i las kyi mtha' spyad pa dag ji srid du de'i sdig pa'i las bcom zhing spangs la zad par ma byas pa de srid du yun ring por me'i nang du bcug nas sreg go/ 'thag go/ skems so/ /rnam par zhigs par byed do/ /de phyis sems can dmyal ba de las thar bar 'gyur te/ thar nas kyang tshe rabs brgya lnga bcur yi dags khab mgrin du skye bar 'gyur/ tshe rabs nyis brgyar me dang chu med pa'i gnas ri sul dpag tshad bcu gnyis par bkres pa dang / skom pa thams cad kyis yongs su gdungs pa'i dud 'gro seng ge dang / stag dang / dred dang / gung du skye bar 'gyur ro/ /gal te gnya' shing gi bu gar rus sbal 'jug pa lta bur mi rnams dang skal ba mnyam par mir skyes na/ las de dang rgyu 'thun pa'i 'bras bus de 'brog dgon pa'i mir 'gyur te/ gang dag gis nam yang kha zas mthong bar mi 'gyur na bza' ba lta smos kyang ci dgos te/ gzhan du na der rngad dang / rtswa dang / tshal gyi 'bras bus srog 'tsho bar 'gyur ba mthong ngo / /de nas gzhan yang dge slong las kyi 'bras bu rnam par smin pa shes pa des/ sems can dmyal ba chen po tsha ba'i 'khor la brtags na/ des sems can dmyal ba zangs bzhus par nya 'khyug pa lta bu zhes bya ba mthong ngo / /der sems can dag las gang gis skye bar 'gyur snyam nas/ des thos pa las byung ba'i shes pas brtags na/ gang gis srog gcod pa dang / ma byin par len pa dang / 'dod pas log par g.yem pa dang / chang 'thung ba dang / brdzun smra bas 'gyur ro/ /log par lta ba yang 'di ltar kun du bsten cing bsgoms la mang du byas pas 'gyur te/ 'dir 'gro ba 'di dag thams cad dbang phyug gis sprul te las kyis ma byas so zhes smra na/ de lus dang bral nas ngan 'gro log par ltung ba sems can dmyal ba zangs bzhus par nya 'khyug pa lta bur skye bar 'gyur ro/ /sems can de yang zangs bzhus pa rab tu 'bar bas rgya mtsho ltar gang ba'i sems can dmyal bar skye bar 'gyur te/ der yang las kyis byas pa'i lcags kyi nya rab tu 'bar ba dag rnam par rgyu zhing zangs bskol ba de'i dbus su shing lo ma spu gri dang mdung thung lta bu dag 'byung ste/ der sems can dmyal ba pa de dag skyes nas 'chi zhing skye ste/ yan lag dang nying lag thams cad zhigs so/ /zhugs pa na nub cing 'byung ste tshor bas nyen pa dag phan tshun rgyug cing ngu skad 'don to/ /gcig la gcig log par smras pas de dag de ltar ngu skad 'don pa na las kyis byas pa'i nya de dag sems can dmyal ba de dag gi drung du kha gdangs shing rgyug go/ /de nas nya de dag gis sems can dmyal ba pa de dag kha chu'i zhags pas bzung ste za zhing / de'i tshe so'i bar du phye mar rlags so/ /de dag gi lus phyed nya rnams kyis zos shing / phyed zangs bskol bar 'tshed do/ /de dag tshor ba drag pas nyen la/ tsha ba rtsub pa'i tshor ba gnyis myong bar 'gyur te/ de nya de rnams kyis phyed za ba dang / phyed zangs bskol bar 'tshed do/ /yun ring mo zhig 'das nas nya'i kha de nas thar ba dang / zangs bskol ba'i bum pa'i nang du 'jug go/ /zhugs pa dang / srin bu a pa ma si ka zhes bya ba rdo rje lta bur mche ba rno ba dug dpag tu med pa yod pa de dag gis bzung ngo / /bzung ba rnams zangs bzangs bskol ba'i bum pa mun par gyur pa der phye mar rlog go/ /phye mar rlags nas phye ma'i dum bu tsam du za'o/ /gang tshor bas nyen pa ngu skad 'don pa na/ de dag gis 'dzag sgo zangs bskol ba des 'gengs shing 'gog la 'tshed cing rnam par zhigs par byed do/ /zangs bskol ba de las yun ring mo zhig 'das nas yang rkyal lo/ /rkyal nas kyang las kyis byas pa'i rlung spu gri lta bu rnams kyis ji srid du de'i sdig pa'i las bcom zhing spangs la zad par ma byas pa de srid du log par smra ba las dang 'bras bu la slu bar zhugs pa dag phye mar rlog go/ /de phyis sems can dmyal ba de las thar bar 'gyur te/ thar nas kyang tshe rabs sum brgyar yi dags kha zas med pa rnams kyi nang du skye bar 'gyur ro/ /yi dags kyi yul de las thar nas kyang tshe rabs sum brgyar dud 'gro glang po che dang / dom dang grog sbur la sogs pa shin du sdug bsngal ba rtag tu bkres pa dang / skom pa dang / grang ba dang / tsha ba dang / rlung dang / gdung ba rnams su skye bar 'gyur ro/ /dud 'gro de las thar nas kyang gnya' shing gi bu gar rusbal 'jug pa lta bur gal te lan grangs gzhan la myong bar 'gyur ba'i las kyis mi rnams dang skal ba mnyam par mir skyes na las de dang rgyu 'thun pa'i 'bras bus de khyis 'tsho ba 'am shing thun nam nya bar skye bar 'gyur ba mthong ngo / /de nas yang dge slong las kyi 'bras bu rnam par smin pa shes pa des sems can dmyal ba chen po tsha ba'i 'khor la brtags na/ des thos pa las byung ba'i shes pas sems can dmyal ba lcags kyi bum pa zhes bya ba mthong ngo / / der sems can dag las gang gis skye bar 'gyur snyam nas des brtags na/ gang gis srog gcod pa dang / ma byin par len pa dang / 'dod pas log par g.yem pa dang / chang 'thung ba dang / brdzun smra ba kun du bsten cing bsgoms te mang du byas pas 'gyur ro/ /log par lta ba ni 'di ltar mtho ris su mi 'di dbang du 'gyur ro zhes mchod sbyin dag la mi dag gsod par byed pa dang / 'jig rten pha rol du de na dbang du bya ba'i phyir rus sbal dag gsod par byed cing gzhan dag kyang rab tu 'jog par byed pa nas skye ba'i bar du byed pa yin te/ lam bzang po sun par byed cing lam ngan pa la 'jog par byed pa'i las kyi rnam pa 'di dag ni log par lta ba yin no/ /de lus dang bral nas ngan 'gro log par ltung ba sems can dmyal ba lcags kyi bum par skye bar 'gyur te/ der sems can dmyal ba yang sos la sogs pa'i gnod pa 'di dag thams cad bcu 'gyur du 'byung ngo / /bum pa dpag tshad bcu pa drug 'byung ste/ de dag gi ming ni 'di dag yin te/ 'di lta ste/ zhugs ma thag tu sdug bsngal ba dang / skyabs med pa dang / rtag tu mes bskor ba dang / chu sog le lta bu dang / spu gri'i phreng ba dang / chu bskol ba'i nang du sbrul zhugs pa'o/ /der gang dag sdug bsngal mtshungs par 'tshed pa de dag la rnam pa de lta bu'i sdug bsngal 'byung ste/ gang du sems can dmyal ba pa de dag 'tshed pa na tshor ba'i sdug bsngal yang mtha' dag 'byung bar 'gyur ro/ /gang skyabs med pa/ 'tshed pa de dag la lus kyi skyabs kyang med cing yid dang chos kyi skyabs kyang med de/ gang ngan 'gro'i skyabs can de dag thams cad de na skyabs med do/ /gang rtag tu mes bskol ba yun ring por 'tshed pa de dag ni mes bskol ba'i zangs bzhus pa las byung bas ji ltar thal ba yang mi mngon pa de ltar lus rnam par zhigs par byed do/ /de nas yang lus de skye bar 'gyur te/ chu sog le lta bu der 'jug par byed do/ /zangs bskol ba'i chu de sog le lta bu yin te/ de dag thams cad me 'bar ba mched pa der bcug pa dang / 'og nas steng du 'byung zhing zangs bskol ba'i chu sog le lta bur gnad dang gnad dag la gnod par byed/ gshig par byed do/ /de nas yang de las steng nas 'og tu 'byung ste/ sog le de dag nyid kyis gsheg cing 'dral lo/ /mon sran gre'u lta bu'i rigs de dag lus steng dang 'og dang sa'i ngos la yun ring du 'joms so/ /gsheg go/ /sreg go/ /spu gri'i phreng ba'i nang du 'jug pa de dag la gnod pa 'byung ste/ 'di lta ste/ bum pa de spu gri rnams kyis gang ba yin te/ der sems can dmyal ba pa dag spu gri dug gis gos pa de dag gis yen lag dang nying lag gsheg par byed do/ /chu skol ba'i nang du sbrul zhugs pa de dag la gnod pa 'byung ba ni 'di lta ste/ chu bskol ba dpag tshad phyed du bskol ba shin du tsha ba 'byung ste/ der dbu ba'i nang na sbrul gnas pa mche ba mchog tu rno ba dag reg pa dang mthong bas me bzhin du sreg go/ / reg pas spu gri bzhin du gcod do/ /sems can dmyal ba pa de dag sbrul de dag gis gcod par byed de/ reg pas rus pa tsam lus par byed cing mthong bas skol bar byed la dbu ba bzhin du zhu bar byed do/ /chu bskol bas skol bar byed de/ sems can dmyal ba pa dag sdug bsngal shin du tsha zhing rtsub pa dag myong bar 'gyur ro/ /gal te gshin rje'i mi dag gzhan du dong bar gyur na de'i tshe bum pa de dag gi kha 'og ma'i bu ga med par 'gyur te/ des sems can dmyal ba pa dag 'bros par byed mi nus so/ /de nas gshin rje'i mi de dag 'di snyam du sems te/ 'di ltar sems can dmyal ba pa bu ga med pa'i bum pa'i nang 'dir zhugs pa dag rdo rje lta bu'i brkyang nul gyis bu ga med par byas te/ gnod pa rnam pa sna tshogs kyis sems can dmyal ba pa dag 'bros mi nus par bya'o snyam du sems so/ /de nas gshin rje'i mi de dag 'di snyam du sems te/ las kyis byas pa'i bum pa 'di dag thams cad kyi kha 'og ma bdag cag gis nges par yang me 'bar ba'i phreng ba mched pas nyis 'gyur du rab tu 'bar bar bya'o snyam nas/ de nas sems can dmyal ba pa de dag la gnod pa de dag gis gnod par byed do/ /de nas gshin rje'i mi de dag khros nas yang bum pa de dag lcags kyi shing de dag gis nyis 'gyur du rab tu sreg par byed do/ / de nas sems can dmyal ba pa de dag gyen du 'gro ba na zangs dmar po bskol bas phan tshun gnod par byed de/ sdug bsngal gyi gnod pa sna tshogs kyi nyam thag pa dag ji srid du de'i sdig pa'i las bcom zhing spangs la zad par ma byas pa de srid du kha cig ni rnam par zhigs so/ /kha cig ni sbrul gdug pa me ltar tsha bas skol cing sreg par byed do/ /de dag bum pa'i gnod pa de las thar bar 'gyur te/ thar nas kyang tshe rabs sum brgyar yi dags dri za rnams kyi nang du skye bar 'gyur ro/ /gal te mi rnams dang skal ba mnyam par mir skyes na las de dang rgyu 'thun pa'i 'bras bus de bstan bcos ngan pa'i gtan tshigs kyis rmongs pa blo gros ngan pas don gyi phyir ram mtho ris kyi phyir sha dag la sogs par byed do/ /sred pa'i bag la nyal gyis 'brel bas de dag yang sdug bsngal de nyid don du gnyer bar byed pa mthong ngo / /de nas yang dge slong las kyi 'bras bu rnam par smin pa shes pa des sems can dmyal ba chen po tsha ba'i 'khor la brtags na/ des thos pa las byung ba'i shes pas sems can dmyal ba chu bo dmar po 'bab pa zhes bya ba mthong ngo / /der sems can log par lta ba'i las byas pa gang gis skye bar 'gyur snyam nas/ des thos pa las byung ba'i shes pas brtags na/ tshul khrims 'chal pa gang gis tshul khrims 'chal pa mang du byas nas phyis de 'di snyam du sems te/ bdag dka' thub ba byas pa dang / bdag gis nyes par byas pa dang / nyes par ma byas pa de dag thams cad 'byang bar 'gyur ro snyam nas de tshal du song ste/ shing la rkang pa btags nas mig mthur du spyangs te/ mtshon chas sna'am dpral ba gcod de/ de las gang khrag byung ba de dag mer bsreg lugs byed do/ /sreg pas mtho ris 'dod pa lam ngan par zhugs pa bye ma dag las til mar 'byung bar 'dod pa de khrag zad nas 'chi ste/ de lus dang bral nas ngan 'gro log par ltung ba sems can dmyal ba chu bo dmar po 'bab par skye bar 'gyur ro/ /der gnod pa 'di dag 'byung bar 'gyur te/ 'di lta ste/ gang sems can dmyal ba yang sos la sogs pa'i sdug bsngal bsdus pa de dag thams cad lnga 'gyur du 'byung ba'i steng du khyad par 'byung ba ni/ 'di ltar gshin rje'i mi dag tho ba dang / ral gri dang / mda' bo che dang / rdo rnams kyis ji ltar khrag dang / glad rgyas 'byung zhing 'bab pa de ltar phye mar rlog ste/ ji ltar chu bo des ded pa de ltar sems can dmyal ba pa skra dang rus pas mu khebs pa gzhan dag kyang chu bo des ded do/ /zangs bskol ba'i chu bo rab tu mi bzad cing mchog tu 'jigs pa zhes bya ba gnyis pa 'bab ste/ chu bo de'i nang na srog chags kyi rigs lang ku di ka zhes bya ba reg na me ltar tsha ba zhig yod pa des sems can dmyal ba pa de dag rab tu bsregs shing bsregs shing za'o/ /de ltar chu bo dmar po 'bab pa'i sems can dmyal ba pa dag gi lo bgrang gis mi lang ste/ ji srid du de'i log par lta ba sdig pa'i las bcom zhing spangs la zad par ma byas pa de srid du chu bo dmar po 'bab pa'i sems can dmyal bar yun ring du gnod pa dag myong bar 'gyur ro/ /de phyis sems can dmyal ba de las thar bar 'gyur te/ thar nas kyang las de dang rgyu 'thun pas tshe rabs lnga brgyar yi dags bdug spos za ba rnams kyi nang du skye bar 'gyur ro/ /de las thar nas kyang tshe rabs bzhi brgyar dud 'gro rgya mtsho'i byar skye ste/ de chu bo'i sgor gnas pa 'am/ gal te mgo dmar por 'gyur ro/ /de gal te mi rnams dang skal ba mnyam par mir skyes na/ las de dang rgyu 'thun pa'i 'bras bus de dbul zhing nad bu can du 'gyur ba mthong ngo / /de nas gzhan yang dge slong las kyi 'bras bu rnam par smin pa shes pa des sems can dmyal ba chen po tsha ba'i 'khor la brtags na des thos pa las byung ba'i shes pas sems can dmyal ba rkang dang rus pa la srin bu mang ba zhes bya ba ji ltar 'dug pa mthong ngo / / der sems can dag las gang gis skye bar 'gyur snyam nas des thos pa las byung ba'i shes pas brtags na/ lus sam/ ngag gam/ yid kyi chad pa mi dge ba mang du byas nas/ de phyis thos pa ngan pas rmongs pa/ tshangs pa'i 'jig rten la sred pa/ lam ngan pa la rab tu gnas pa/ tshul khrims rnam par spangs pa/ tshul khrims 'chal pa'i rang bzhin dang ldan pa/ g.yo can pha rol la gnod pa dag tshul khrims spangs nas lci ba'i me thab byed de/ sdug bsngal ba tshe 'di la mi'i mes sreg go/ /de lus dang bral nas ngan 'gro log par ltung ba sems can dmyal ba rkang dang / rus pa la srin bu mang bar skye bar 'gyur ro/ / der gnod pa 'di dag 'byung bar 'gyur te/ 'di lta ste/ lcags las byas pa'i brdung bas de'i tshe mgo man chad kyi bar dag rdung bar byed do/ /ngu skad 'don pa na ji ltar sbyang rtsi'i tshigs ma bzhin du byed de/ yan lag dang nying lag thams cad mngon par dmigs su med par byed kyang log par lta bas de dang rgyu 'thun pa'i 'bras bus 'chi ba'i dus ni mi byed do/ /sems can dmyal ba pa de dag gi lus bsags par gyur pa dag ji ltar rkang dang rus pa chen po'i tshogs kyi ri 'phang du dpag tshad lnga yod cing rgyar dpag tshad gsum yod pa de ltar bsags par gyur te/ de dag la srin bu drod gsher las skyes pa sems can gyi grangs su bgrang ba zhig 'byung bar 'gyur ro/ /gang dag las ci zhig byas pas 'gyur snyam na/ skyes pa 'am/ bud med gang dag gis rang gi lus sam/ gzhan gyi lus las byung ba'i shig gam/ srog chags ma ko ta ka 'am/ rkang la za ba 'am/ gzhan yang rnam pa de lta bu bsad par gyur na de dag kyang lus dang bral nas ngan 'gro log par ltung ba sems can dmyal ba srin bu zhes bya ba der skye bar 'gyur ro/ / de dag gi 'du shes 'byung ba ni 'di lta ste/ las de dang rgyu 'thun pa'i 'bras bus lus 'byung zhes bya ba'i ri de la de dag skye bar 'gyur te/ de dag kyang sems can dmyal ba rkang dang rus pa la srin bu mang ba'i gshin rje'i mi gzhan dag 'ongs nas las kyis byas pa'i mes rab tu sreg par byed do/ /lus 'byung ba zhes bya ba'i srin bu yod pa der sems can dmyal ba pa lci ba'i me thab kyis bslus pa de dag de ma thag tu mes sreg go/ /de'i ri de sreg pa na 'phang du mes dpag tshad bcu tsam du 'bar bar byed de/ sems can dmyal ba pa de dag rang gi lus las byung ba'i me dang srin bu de dag gis lhan cig sreg par byed do/ /lus 'byung ba'i srin bu bong chung ba dag 'byung bar 'gyur te/ de las sdug bsngal ches mang ba 'byung ba ni sems can dmyal ba pa dag bsdus nas de dag mngon pa med par byed de/ phan tshun me 'bar ba'i phreng bas lus yongs su gdungs pa dag yun ji srid du de'i sdig pa'i las bcom zhing spangs la zad par ma byas pa de srid du lo bgrang gis mi lang bar sreg go/ /de phyis sems can dmyal ba de las thar bar 'gyur te/ thar nas kyang las de dang rgyu 'thun pa'i 'bras bus tshe rabs lnga brgyar ri gseb tu yi dags khab mgrin du skye bar 'gyur ro/ /tshe rabs lnga brgyar rgya mtsho'i sa'i 'og gi chu grang mo ba tshwa'i chu'i nang gi nyar skye bar 'gyur ro/ /de dag de las thar nas gal te brgya la gnya' shing gi bu gar ru sbal 'jug pa lta bur mi rnams dang skal ba mnyam par mir skyes na de tshal na spyod cing tshal gyi nang na gnas pa 'am/ nags khrod na 'tsho ba 'am/ dbul zhing de tshal gyi mes sreg par 'gyur ba mthong ngo / /de nas dge slong las kyi 'bras bu rnam par smin pa shes pa des sems can dmyal ba chen po tsha ba'i 'khor la brtags na/ des thos pa las byung ba'i shes pas sems can dmyal ba skye bo thams cad sreg pa zhes bya ba ji ltar 'dug pa mthong ngo / /der sems can dag las gang gis skye bar 'gyur snyam nas des brtags na/ gang gis srog gcod pa dang / ma byin par len pa dang / 'dod pas log par g.yem pa dang / chang 'thung ba dang / brdzun smra ba snga ma bzhin kun du bsten cing bsgoms te mang du byas pas 'gyur ro/ /log par lta ba yang thos pa ngan pas rmongs pa lus kyi chad pa dang / ngag dang / yid kyi chad pas rnam par rmongs pa/ rtag tu chad pa rnam pa gsum gyis nyam thag pa/ log par lta ba yang mtshungs par spyod pa dag tshal lam/ ri 'am/ mtshams kyi bar ram/ chu 'am/ lcug ma'i tshal dag la mes sreg par byed pa dag 'di ltar me tshim par byas pas lha dag dga' bar 'gyur te/ de dag dga' ba dang / lha yul du khrid par byed de/ bdag lha'i 'jig rten de thob pa dang / me tshim par byas pas bdag der lha'i dga' ba thob par 'gyur ro snyam ste/ rmongs pa thos pa ngan pas bslus pa de lus dang bral nas ngan 'gro log par ltung ba sems can dmyal ba skye bo thams cad sreg pa zhes bya ba der skye bar 'gyur ro/ /der gnod pa 'di dag 'byung bar 'gyur te/ 'di lta ste/ gang sems can dmyal ba yang sos la sogs pa'i gnod pa de dag thams cad lnga gyur du 'byung ba'i steng du khyad par du 'byung ba ni/ 'di ltar der skyes pa gang dag las kyis sprul pa'i bu dang bu mo dang / chung ma dang / dga' ba'i bsten grogs dang / pha ma dang / de las gzhan pa dga' ba dang 'brel pa de dag 'tshed pa na/ bu dang / chung ma dang / sten grogs dang / pha ma'i tshogs de dag thams cad mthong ngo / /de dag kyang de ltar sems can dmyal bar 'tshed pa mthong ste/ 'tshed pa de mthong ba dang / yid kyi sdug bsngal mi bzad pa tsha ba rtsub pa dag myong bar byed do/ /dga' ba'i tshogs de dag thams cad mthong nas mya ngan gyi me'i rnam pa 'di lta bu 'byung bar 'gyur te/ gang sems can dmyal ba pa'i me de dag sreg pa'i me'i bcu drug gi char yang mi phod do/ /sems can dmyal ba pa'i me thams cad kyi nang na sred pa'i me thams cad ches shin du tsha'o/ /me rnams kyi nang na yang 'di me yin no/ /zhags pa rnams kyi nang na 'di zhags pa mchog yin no/ /'ching ba rnams kyi nang na 'di 'ching ba dam pa yin te/ 'ching ba des so so'i skye bo byis pa thams cad bcings so/ /gang log pa'i las kyis byas pa'i dga' ba'i tshogs sems can dmyal ba pa dag mthong nas kyang sred pas de bzhin sreg ste/ gang me de dag las byung ba'i sems can dmyal ba pa kha ba lta bur gyur pa de yang de'i bu dang chung ma'i tshogs dang / pha ma'i tshogs ngu skad 'don te/ 'di ltar bdag cag la yongs su bskyab pa gyis snying rje rje skad du ngu skad 'don kyang de dag yongs su bskyab par ga la nus te/ gang sems can dmyal ba pa dbang med pa mes sreg cing 'tshed do/ /de ltar ji srid du de'i sdig pa'i las bcom zhing spangs la zad par ma byas pa de srid du de yun ring po lo bgrang gis mi lang bar lus dang yid kyis mes sreg go/ /de phyis sems can dmyal ba de las thar bar 'gyur te/ thar nas kyang las de dang rgyu 'thun pa'i 'bras bus de lo sum brgyar yi dags gtor ma za bar skye bar 'gyur/ tshe rabs lnga brgyar dung ma lta bu'i nang der de'i bus pa pho mo nya pa dag gis gsod par byed do/ /gal te gnya' shing gi bu gar ru sbal 'jug pa lta bur mi rnams dang skal ba mnyam par mir skyes na/ de dbul zhing tshe thung ba dang / dbang po ma tshang ba dang / bu dang chung ma dang bral zhing lha gang dag tu bran g.yog tu 'gyur ba mthong ngo / /de nas yang dge slong las kyi 'bras bu rnam par smin pa shes pa des sems can dmyal ba chen po tsha ba'i 'khor la brtags na/ des thos pa las byung ba'i shes pas sems can dmyal ba sar 'bying mtha' yas shes bya ba ji ltar 'dug pa mthong ngo / /der sems can dag las gang gis skye bar 'gyur snyam nas des brtags na/ gang gis srog gcod pa dang / ma byin par len pa dang / 'dod pas log par g.yem pa dang / chang 'thung ba dang / brdzun smra ba kun du bsten cing bsgoms te mang du byas pas 'gyur te/ mdor na lus kyi chad pa 'am/ ngag gi chad pa'i las kyi nyer bsdogs dang / las kyi mjug kun du bsten cing bsgoms te mang du byas pas 'gyur ro/ /de lus dang bral nas ngan 'gro log par ltung ba sems can dmyal ba sar 'bying mtha' yas su skye bar 'gyur ro/ /der sems can dmyal ba yang sos la sogs pa'i sdug bsngal bsdus pa de dag thams cad lnga 'gyur du 'byung ngo / /log par lta bar gyur pa ni thos pa ngan pa gang gis srin bu phre'u dang / grog sbur dang / sbrul dang / sbrul shin du gdug pa dang / ri dgas dang / bya rnams me'i nang du bcug na me de dag ni dga' bar 'gyur ro/ /dga' nas kyang 'jig rten mtha' yas pa sbyin par byed de/ mer bsregs pa de dag gis kyang drag po'i 'jig rten mi bzad par byed do/ /gang mer bcug pa de dag de'i chos chen po thob par 'gyur ro zhes bsgrags shing / de ltar 'dzin du 'jug pa ni chos log pas rnam par bslus pa log par lta ba yin te/ de lus dang bral nas ngan 'gro log par ltung ba sems can dmyal ba sar 'bying mtha' yas su skye bar 'gyur ro/ /der gnod pa 'di dag 'byung bar 'gyur te/ 'di lta ste/ mdag ma'i ri rgyar dpag tshad lnga yod pa kun nas sems can dmyal ba pa'i mes rab tu 'bar ba de la sems can dmyal ba pa de dag gshin rje'i mi rnams kyis 'deg cing 'dor bar byed de/ rkang pa dang / rked pa dang / 'doms dang / rgyab dang / dpung pa dang / mgrin pa dang / lag pa dang / mig dang / rna ba dang / mgo dang / glad pa'i bar bsregs nas de nas yang 'byung bar 'gyur te/ sreg pa na ji srid du de'i sdig pa'i las bcom zhing spangs la zad par ma byas pa de srid du/ dus du ma yun ring po lo bgrang gis mi lang bar sreg go/ /de phyis sems can dmyal ba de las thar bar 'gyur te/ thar nas kyang log par lta ba mi bzad pas las de dang rgyu 'thun par tshe rabs lnga brgyar yi dags mi gtsang ba za ba lus thams cad rab tu 'bar ba mtshan mo rgyu ba na skye bo kun gyis mthong ba dang / las ngan pa byas pa dbang du gyur par skye bar 'gyur ro/ /yi dags kyi ris de las thar nas kyang dud 'gro lus thams cad la srin bu me lce rab tu 'bar ba 'byung zhing nyin mtshan du skye bo kun gyi mngon sum du 'gyur ba dang / khong pa'i nang du me zhugs pas sreg cing nyi ma'i 'od zer dag gis zil gyis non par 'gyur ba mthong ngo // //'phags pa dam pa'i chos dran pa nye bar gzhag pa/ bam po bcu gnyis pa/ de nas yang dge slong las kyi 'bras bu rnam par smin pa shes pa des sems can dmyal ba chen po tsha ba'i 'khor la brtags na/ des sems can dmyal ba pad ma chen po lta bu zhes bya ba mthong ngo / / der sems can dag las gang gis skye bar 'gyur snyam nas des thos pa las byung ba'i shes pas brtags na/ gang gis srog gcod pa dang / ma byin par len pa dang / 'dod pas log par g.yem pa dang / chang 'thung ba dang / brdzun smra ba kun du bsten cing bsgoms la/ mang du byas pas 'gyur te/ mdor bsdu na lus kyi chad pa dang / ngag gi chad pa'i las kyi nyer bsdogs dang / las kyi mjug dang ldan pa de ni lus dang bral nas ngan 'gro log par ltung ba sems can dmyal ba pad ma chen po lta bur skye bar 'gyur ro/ /log par lta ba yang rnam pa 'di dag byas pas 'gyur te/ 'di ltar mis gsang gi mchod sbyin byas pas 'jig rten nyams pa med pa thob par 'gyur ro zhes zer ba de ni lus dang bral nas ngan 'gro log par ltung ba sems can dmyal ba pad ma chen po lta bur skye bar 'gyur ro/ / der gnod pa 'di dag 'byung bar 'gyur te/ 'di lta ste/ sems can dmyal ba de'i byed gzugs pad ma lta bu yin te/ gang de dag gi ze ba'i bar rdo rje lta bu'i tsher mas gang ba der sems can dmyal ba dpag tshad lnga brgya tsam pa de tsher ma'i bar de dag tu skye bar 'gyur ro/ /skyes ma thag tu de dag gi lus thams cad tsher ma rnams kyis shin du phug ste/ gang ma phug pa gcig med pa ni der khab kyi bu ga tsam gyi phyogs kyang med de/ gang sems can dmyal ba pa'i mes rmas ma gang ba med do/ /de ltar ji srid du de'i srid pa'i las bcom zhing spangs la zad par ma byas pa de srid du yun ring por 'tshed do/ /sreg go/ /de phyis sems can dmyal ba de dag las thar bar 'gyur te/ thar nas kyang las de dang rgyu 'thun pa'i 'bras bus tshe rabs nyis brgyar yi dags ljan ljin za bar 'gyur/ de de las shi nas kyang tshe rabs lnga brgyar rma bya dug za ba'i rigs su skye bar 'gyur ro/ /gal te de nas shi nas gnya' shing gi bu gar rusbal 'jug pa lta bur mi rnams dang skal ba mnyam par mir skyes na/ de rtag tu dbul zhing rtag tu phan tshun rag las pa mang ba dang / gal te ltad mo pas 'tsho ba'i gar mkhan nam/ gang rnam pa de las gzhan pa'i ltad mo pas 'tsho bar 'gyur te/ ji srid 'tsho'i bar du bkren pa rab tu 'gyur ba mthong ngo / /de nas yang dge slong las kyi 'bras bu rnam par smin pa shes pa des sems can dmyal ba chen po tsha ba'i 'khor la brtags na/ des thos pa las byung ba'i shes pas sems can dmyal ba mtha' drag ces bya ba mthong ngo / /der sems can dag las gang gis skye bar 'gyur snyam nas des brtags na/ gang gis srog gcod pa dang / ma byin par len pa dang / 'dod pas log par g.yem pa dang / chang 'thung ba dang / brdzun smra ba kun du bsten cing bsgoms te mang du byas pa ni snga ma bzhin no/ /log par lta ba kun du bsten cing bsgoms te mang du byas pas 'gyur ba ni 'di ltar chur zhugs pas nyes par byas pa thams cad 'byang bar 'gyur zhing khyab 'jug gi 'jig rten du skye bar 'gyur la gnas de nams kyang mi g.yo ste/ g.yo ba med pa der skye bar 'gyur ro zhes de pha rol dag kyang de nyid la 'jog par byed cing yang dag par dga' bar byed la/ chur zhugs pas srog dang bral bar byed na/ de chur zhugs pas 'chi ba'i dus byas nas sems can dmyal ba mtha' drag tu skye bar 'gyur ro/ /lus kyi chad pa dang / ngag gi chad pa dang / yid kyi chad pas nyams pa der skyes pa dag la gang sems can dmyal ba yang sos la sogs pa'i sdug bsngal thams cad snga ma bzhin du 'byung ba'i steng du khyad par du 'byung ba ni/ sems can dmyal ba de kun nas rdo zur shin du rno ba rnams kyis khebs pa kun nas ri rad rod shin du rno ba 'phang du dpag tshad bcu yod pas bsgribs pa de la bya yang 'gro bar mi nus na/ sems can dmyal ba pa dag ri de la rgal bar lta ga la nus te/ kun nas 'bar rab tu 'bar kun du rab tu 'bar te/ ri de dag kun nas me lce gcig tu gyur pa dang / sems can dmyal ba pa de las gcig gis sems can dmyal ba pa mtha' dag la/ kye grogs po dag ri'i rtse mor sems can dmyal ba 'di dag ri 'di dag las rgal ba dang bde ba thob bo zhes smra ste/ de ltar las ngan pas bskul ba'i sems can dmyal ba pa de sems can dmyal ba pa de dag la smra'o/ / smras ma thag tu sems can dmyal ba pa las ngan pas bskul ba de dag ri thag thug zar zur shin du mi bde zhing kun nas rab tu 'bar ba ga la ba der de dag rgyug kyang de dag 'dzeg par mi nus te/ de dag kha cig ni de nyid du mes 'tshig go/ /'jigs skrag pa kha cig ni de nyid du rdo dang ra ba la 'ju bzhin du sreg go/ /skrag cing dngangs pa'i sems can dmyal ba mgon 'dod pa/ skyabs 'dod pa/ dpung gnyen 'dod pa de kha cig ni gshin rje'i mi rnams kyi lag pa nas ral gri dang / tho bas yang nas yang du btags te/ de ltar sems can dmyal ba pa lus kyi chad pa dang / ngag gi chad pa dang / yid kyi chad pas nyen pa dag ji srid du de'i sdig pa'i las bcom zhing spangs la zad par ma byas pa de srid du shin du yun ring por 'tshed do/ /bsreg go/ /de phyis sems can dmyal ba de las thar bar 'gyur te/ thar nas kyang las de dang rgyu 'thun pa'i 'bras bus lo sum brgyar yi dags khrag za ba'i ris dang 'thun par skye bar 'gyur/ de las thar nas kyang lo sum brgyar dud 'gro sbrul chen po'i rigs su skye bar 'gyur ro/ /gal te mi rnams dang skal ba mnyam par mir skyes na de dbul zhing nad bu can dang / yul ngan par skye zhing dbang po ma tshang ba dang / rtag tu 'jigs pa mang ba'i yul dag tu skye bar 'gyur ba mthong ngo / / de nas yang dge slong las kyi 'bras bu rnam par smin pa shes pa des/ sems can dmyal ba chen po tsha ba'i 'khor la brtags na/ des thos pa las byung ba'i shes pas sems can dmyal ba rus pa rdo rje lta bu 'byung zhing 'du ba zhes bya ba mthong ngo / /der sems can dag las gang gis skye bar 'gyur snyam nas des brtags na/ gang gis srog gcod pa dang / ma byin par len pa dang / 'dod pas log par g.yem pa dang / chang 'thung ba dang / brdzun smra ba kun du bsten cing bsgoms te mang du byas pas 'gyur ro/ /log par lta ba yang kun du bsten cing bsgoms la mang du byas pas 'gyur te/ 'di ltar dngos po dag ni 'dod rgyal las 'byung zhing 'dod rgyal las 'gag ste/ 'di ltar tsher ma rno ba dang / rma bya dag gi bkra ba dang / 'di ltar smig rgyu dang dri za'i grong khyer dag gi rgyu rkyen ni med kyi 'dod rgyal las 'byung zhing 'gag ste/ dngos po thams cad ni de lta bu yin no zhes de de ltar gzhan dag kyang 'dod rgyal du lta bar gyur pa der rab tu 'jog par byed cing / yang dag par ston par byed la/ lus kyi chad pa dang / ngag gi chad pa dang / yid kyi chad pas nyams par byed pa de ni lus dang bral nas ngan 'gro log par ltung ba sems can dmyal ba rus pa rdo rje lta bu 'byung zhing 'du bar skye bar 'gyur ro/ /der sems can dmyal ba yang sos la sogs pa'i sdug bsngal bsdus pa de dag thams cad 'byung ba'i steng du khyad par du 'byung ba ni 'di ltar gshin rje'i mi rnams kyis gang gi tshe sems can dmyal ba pa de dag mtshon cha hu lu rnon po dag gis de'i sha med par byas la gang dgra gzhan byung bas rus pa de dag blangs te/ dgra des rus pas phan tshun btags so/ /rus pa de dag kyang de dag gi las nyes par byas pa des rdo rje lta bur gyur te/ kha cig gi mgo phug /kha cig gi rked pa phug /kha cig gi yan lag dang / nying lag thams cad thal bar rlog / kha cig gi khrag tsam lus par byed/ kha cig gi yan lag gcig 'jig par byed/ kha cig la phan tshun sbron par byed/ rus pa dang / rus pas sam/ rdo rab tu 'bar ba dag gis sems can dmyal ba pa de dag gcig la gcig rdeg cing gsod de/ sems can dmyal ba pa las kyis bskul ba de dag 'di ltar ji srid du de'i sdig pa'i las bcom zhing spangs la zad par ma byas pa de srid du yun shin du ring po/ /lo bgrang gis mi lang bar sems can dmyal ba de dag gcig la gcig gsod do/ /de phyis sems can dmyal ba de las thar bar 'gyur te/ thar nas kyang las de dang rgyu 'thun pa'i 'bras bus yi dags rang gi glad rgyas za ba'i nang du skye bar 'gyur/ de nas shi nas kyang tshe rabs sum brgyar dud 'gro'i 'jig rten rtsangs pa dang / skyin 'khor dang / srog chags b+hi la kar skye bar 'gyur ro/ /de nas shi nas kyang gal te brgya la gnya' shing gi bu gar ru sbal 'jug pa lta bur mi rnams dang skal ba mnyam par mir skyes na de tshal du gnas pa dang / 'gro lding ba'i yul dang / an d+ha ka'i yul gyi dbus dag tu dbul ba dang / nad bu can dang / gzhan gyis bkol bar 'gyur ba mthong ngo / /de nas gzhan yang dge slong las kyi 'bras bu rnam par smin pa shes pa des/ sems can dmyal ba chen po tsha ba'i 'khor la brtags na/ des thos pa las byung ba'i shes pas sems can dmyal ba skud pa nag pos 'dral zhing gcod pa tsha ba zhes bya ba mthong ngo / /der sems can dag las gang gis skye bar 'gyur snyam nas des thos pa las byung ba'i shes pas brtags na/ gang gis srog gcod pa dang / ma byin par len pa dang / 'dod pas log par g.yem pa dang / chang 'thung ba dang / brdzun smra ba kun du bsten cing bsgoms te mang du byas pas 'gyur ro/ /log par lta bas ni mtshan ma dang mtshan ma las byung ba byas pa ston par byed/ sgom par byed/ mang du byed na/ de lus dang bral nas ngan 'gro log par ltung ba sems can dmyal ba lcags nag po'i skud pas 'dral zhing gcod pa tsha bar skye bar 'gyur ro/ /der gang sems can dmyal b a yang sos la sogs pa'i gnod pa bsdus pa de dag thams cad lnga 'gyur du 'byung ba'i steng du khyad par du 'byung ba ni rang gis byas pa nyes par byas pa'i las las byung ba'i skad pa nag pos gcal nas gshin rje'i mi rnams kyis mtshon cha'i so rno zhing rab tu 'bar ba dag gis rkang pa la sogs pa nas mgo'i bar du gcod do/ /de ltar de dag gcod pa na/ snying rje zhing rnam par khro la skad 'byin cing ngu'o/ /mtshon chas gsheg cing lcags nag po'i skud pas 'di ltar yungs kar tsam du yang mi mngon par ches phra bar gcod do/ /de ltar sems can dmyal ba pa de dag ji srid du de'i sdig pa'i las bcom zhing spangs la zad par ma byas pa de srid du yun shin du ring por gnod pa myong bar 'gyur ro/ /de phyis sems can dmyal ba de las thar bar 'gyur te/ thar nas kyang las de dang rgyu 'thun pa'i 'bras bus tshe rabs lnga brgyar yi dags gtor ma za ba rnams kyi nang du skye bar 'gyur/ tshe rabs lnga brgyar dud 'gro chu'i srin bu dang / sdig pa dang / grog spur gyi skye gnas dag tu skye bar 'gyur/ gal te mi rnams dang skal ba mnyam par mir skyes na/ de de dag gi rgyu 'thun pas de tshe rabs su bkres pa dang / skom pas gdungs par 'gyur zhing gang rgyal po gzhan gyis gnod pa byas par 'gyur ba mthong ngo / /de nas gzhan yang dge slong las kyi 'bras bu rnam par smin pa shes pa des sems can dmyal ba chen po tsha ba'i 'khor la brtags na/ des thos pa las byung ba'i shes pas sems can dmyal ba srin bu na kra dang 'khor lo dang / me 'jigs 'jigs ltar skyes pa zhes bya ba mthong ngo / / der sems can dag las gang gis skye bar 'gyur snyam nas/ des thos pa las byung ba'i shes pas brtags na/ gang gis srog gcod pa dang / ma byin par len pa dang / 'dod pas log par g.yem pa dang / chang 'thung ba dang / brdzun smra ba kun du bsten cing bsgoms te mang du byas pas 'gyur ro/ /log par lta ba yang bsams shing bsgoms la mang du byas pas 'gyur te/ 'di ltar 'jig rten 'di rtag go/ /'jig rten 'di ther zug go/ /chos thams cad rtag go/ /chos rnams ni rtag ste/ phyin ci ma log pa'o zhes de ltar de phyin ci log tu lta ba ni log par lta ba yin te/ pha rol dag kyang log par lta ba de nyid la yang dag par 'jog par byed/ yang dag par 'dzin du 'jug par byed/ yang nas yang du ston cing 'khor la smra ba dang / rgyu ngan pa dang lta ba'i mtha' 'khor 'dzin du 'jug cing chos ma yin pa chos kyi tshul du ston pa de lus dang bral nas ngan 'gro log par ltung ba sems can dmyal ba srin bu na kra dang 'khor lo dang / me 'jigs 'jigs ltar skyes par skye bar 'gyur ro/ /der skyes nas gang sems can dmyal ba yang sos la sogs pa'i gnod pa bsdus pa de dag thams cad 'byung ba'i steng du khyad par du 'byung ba ni 'di ltar lcags kyi ka ba 'byung bar 'gyur te/ de'i glad par brgyab nas rkub tu 'byung ngo / / de nas byung nas kyang sa'i nang du lhan cig nub po/ /gsal shing gis phug nas srin bu na kra zhes bya bas lpags pa dang sha dang tshil thams cad za la/ de'i yan lag dang nying lag dag za zhing 'thung ste/ khrag 'byin par byed pa dang / lus sgul bar byed pa dang / sha gcod par byed pa dang / mig 'byin par byed pa dang / gzhungs pa dang / rgyus pa 'byin cing rtsa yang gcod pa dang 'dzag sgo sreg pa dang / spu 'thog pa dang / lpags pa 'dral ba dang / rgyus pa mang po'i nang du 'jug pa dang / snying dral nas 'thung ba dang / glo ba dang / rgyab dang / gnad dang / gnad dag la za bar byed do/ /de'i mid pa dang / lce dag phra skam rab tu 'bar bas drangs nas khyi zar 'jug go/ /rgyu ngan pa dang / lta ba ngan pa'i mthar chud pa ngan par smras pa gang de de'i nyes pas de dag thams cad sdug bsngal gyi dra bar chud pa yin te/ sems can dmyal ba pa log par lta ba g.yo sgyu'i lta ba/ g.yo sgyus 'gyed pa de dag log par smra ba chen po yin te/ gang de dag des der rab tu btsud cing lus kyi chad pa dang / ngag gi chad pa dang / yid kyi chad pas nyams pa de dag thams cad ji srid du de'i sdig pa'i las bcom zhing spangs la zad par ma byas pa de srid du yun shin du ring zhing lo bgrang gis mi lang bar sems can dmyal bar sreg go/ /de phyis sems can dmyal ba de las thar bar 'gyur te/ thar nas kyang las de dang rgyu 'thun pa'i 'bras bus tshe rabs sum brgyar yi dags mi ro za bar skye bar 'gyur ro/ /de las thar nas kyang gal te gnya' shing gi bu gar rus sbal 'jug pa lta bur mi rnams dang skal ba mnyam par mir skyes na/ las de dang rgyu 'thun pa'i 'bras bus gang rgyal po gzhan gyis nyes pa byas pa de de'i lus la 'bab pa dang / de dbul zhing nad bu can dang / gzhan gyis bkol bar 'gyur zhing mi'i sha la za ba dang / lus snang ba'i 'du shes mi 'thob par 'gyur ba mthong ngo / /de nas gzhan yang dge slong las kyi 'bras bu rnam par smin pa shes pa des sems can dmyal ba chen po tsha ba'i 'khor la brtags na/ des thos pa las byung ba'i shes pas sems can dmyal ba nags tshal gyi me mun ltar 'khrigs pa zhes bya ba mthong ngo / /der sems can dag las gang gis skye bar 'gyur snyam nas des thos pa las byung ba'i shes pas brtags na/ gang gis srog gcod pa dang / ma byin par len pa dang / 'dod pas log par g.yem pa dang / chang 'thung ba dang / brdzun smra ba kun du bsten cing bsgoms la mang du byas pas 'gyur te/ las kyi nyer bsdogs dang las kyi mjug dang ldan pas 'gyur ro/ /de lus dang bral nas ngan 'gro log par ltung ba sems can dmyal ba nags tshal gyi me mun ltar 'khrigs pa zhes bya bar skye bar 'gyur ro/ /log par lta ba kun du bsten cing bsgoms te mang du byas pas 'gyur ba ni 'di ltar kha cig ni mi rtag go/ kha cig ni rtag go/ de la mi rtag pa ni lus yin no/ /rtag pa ni sa la sogs pa 'byung ba rnams yin te/ de mthar 'dzin pa lta ba gnyis kyi rgyu ngan pa/ lta ba ngan pa'i mtha' gzhan dag 'dzin du 'jug cing yang dag par dga' bar byed du 'jug la yang dag par rab tu 'jog / 'khor la chos ma yin pa'i tshul gyis chos ston cing rab tu 'jog par byed pa de lus dang bral nas ngan 'gro log par ltung ba sems can dmyal ba nags tshal gyi me mun ltar 'khrigs par skye bar 'gyur ro/ /der gang sems can dmyal ba yang sos la sogs pa'i gnod pa de dag thams cad lnga 'gyur du 'byung ba'i steng du khyad par du 'byung ba ni 'di ltar gang gi tshe gshin rje'i mi'i gnod pa dag las gal te thar nas kyang phyis de'i las kyis byas pa'i mun pa mun nag gi tshogs kyi rlung ldang ste/ des sems can dmyal ba pa de dag dmigs pa med pa nam mkha' la ji ltar de'i lus kyang mi mngon pa de ltar skor ro/ /yongs su skor ba dang rlung gzhan spu gri lta bur ldang ste/ des lus de chang pa nas bye ma 'thor ba ltar phyogs bcur 'thor ro/ /de nas yang skye bar 'gyur te/ yang 'thor ro/ /de ltar ji srid du de'i sdig pa'i las bcom zhing spangs la zad par ma byas pa de srid du yun shin du ring ba lo bgrang gis mi lang bar sdug bsngal drag cing tsha la rtsub pa dag myong bar 'gyur ro/ /de phyis de las thar bar 'gyur te/ thar nas kyang las de dang rgyu 'thun pa'i 'bras bus tshe rabs bzhi brgyar yi dags skyugs pa za ba rnams kyi nang du skye bar 'gyur ro/ /de las thar nas kyang gang dud 'gro lhag ma za ba bkres pa dang skom pas yongs su gdungs pa'i lus su 'gyur ba mthong ngo / /de nas gzhan yang dge slong las kyi 'bras bu rnam par smin pa shes pa des sems can dmyal ba chen po tsha ba'i 'khor la brtags na/ des thos pa las byung ba'i shes pas sems can dmyal ba bung ba rdo rje lta bus gnod pa'i go cha zhes bya ba ji ltar 'dug pa de mthong ngo / /der sems can dag las gang gis skye bar 'gyur snyam nas des thos pa las byung ba'i shes pas brtags na/ gang gis srog gcod pa dang / ma byin par len pa dang / 'dod pas log par g.yem pa dang / chang 'thung ba dang / brdzun smra ba kun du bsten cing bsgoms te mang du byas pas 'gyur ro/ /log par lta ba ni 'di ltar 'khor ba 'di ni thog ma yod cing rgyu yod pa'o/ /gang 'di dag thams cad kyi rgyu rtag pa dang mi rtag pa gnyis te/ des bskyed do zhes brdzun de rgyu ngan pa dang / lta ba ngan pa'i mthas bslad pa de chos ma yin pa chos kyi tshul du ston cing pha rol rab tu 'jog par byed yang dag pa'i lam las skol bar byed cing chos las phyir zlog par byed la log par lta ba yang dag par 'dzin du 'jug par byed kyang de de ltar ma yin te/ rgyur gyur pa rtag pa gang yang med do/ /rtag pa ni dus dang bral ba/ 'gyur ba med pa/ de skyed pa ma yin pa/ nam mkha' lta bu yin na de yang gzhan du rtog ste/ de lus dang bral nas ngan 'gro log par ltung ba sems can dmyal ba bung ba rdo rje lta bus gnod pa'i go char skye bar 'gyur ro/ /de lus kyi chad pa dang / ngag gi chad pa dang / yid kyi chad pas nyen pas nyams pa/ skyes bu ngan pa/ log par lta ba/ yang dag par smra ba phyir 'gog pa/ yang dag par ma yin pa smra ba la rab tu 'jog pa/ rmongs pas lam ngan par zhugs pa/ shes rab kyi nga rgyal can rang gis yongs su brtags pa smra ba ni gnod pa dag dang phrad de/ gang sems can dmyal ba yang sos la sogs pa'i gnod pa bsdus pa dag lnga 'gyur du 'byung ba'i steng du khyad par du 'byung ba 'di lta ste/ gshin rje'i mi phra skam phra mo thogs pas sha ba spu tsam du btogs btogs nas de nyid zar 'jug go/ /bung ba'i mchu rdo rje lta bu dag 'byung bar 'gyur la/ gang de'i lus la lan tshwa ltar drag par byed de de la khrag dron po 'byung ngo / /de gshin rje'i mi rnams kyis de nyid zar 'jug ste/ zas des de'i srog 'tsho bar byas so/ /nyes par byas pa'i las kyis bslus pa de yang bkres pa dang / skom pas lus dang snying bcu 'gyur du gdungs so/ /de nas yang las de dang rgyu 'thun par rang gi sha dang khrag de nyid 'byung bar byed de/ rang gi las kyis 'chi ba'i dus byed do/ /de nas yang rang gi sha dang khrag de nyid 'byung bar byed de/ ji srid du de'i sdig pa'i las bcom zhing spangs la zad par ma byas pa de srid du las kyis bslus pa de yun shin du ring po lo bgrang gis mi lang bar gnod pa myong bar 'gyur ro/ /de phyis sems can dmyal ba de las thar bar 'gyur te/ thar nas kyang las de dang rgyu 'thun pa'i 'bras bus tshe rabs bzhi brgyar yi dags lhag ma za bar skye bar 'gyur ro/ /tshe rabs lnga brgyar dud 'gro tsi lin da dang / ba lang gi nags tshal la sogs par bkres pa dang / skom pas gdungs pa'i lus su skye bar 'gyur ba mthong ngo / /de nas yang dge slong las kyi 'bras bu rnam par smin pa shes pa des sems can dmyal ba chen po tsha ba'i 'khor la brtags na/ des bcu bdun pa ni gcig kyang ma mthong la/ 'di ltar sems can dmyal ba chen po tsha ba'i 'khor 'di'i mtha' ni 'di yin/ gnas pa ni 'di yin/ log par lta ba ngan par byas pa'i las byas pa rnams kyi gnas ni 'di yin no snyam ste/ des sems can dmyal ba chen po drug pa la brtags nas yang dag pa ji lta ba bzhin nang gi chos la chos kyi rjes su lta zhing gnas pa'i rnal 'byor spyod pa de rab tu dga' ba dang / sa bla ba'i gnod sbyin dag gis de mthong nas/ kye e ma dge slong 'di ni brtson pa ma nyams pa sa gzhan bcu gcig pa la zhugs shing 'khor ba'i dus rnam par gcod par byed pa de yang shes nas dga' ste/ bar snang la spyod pa'i gnod sbyin dag la snga ma bzhin mngon par bsnyad nas/ 'od chung gi lha'i bar dag la 'di ltar rigs kyi bu che ge mo zhig ces bya ba snga ma bzhin du sbyar te/ sa gzhan bcu gcig pa la zhugs pa/ bdud kyi gzhi dang lhan cig gnas par mi 'dod pa/ nyon mongs pa 'dod chags rnams dang lhan cig rtse bar mi 'dod pa/ yul la gnas pa'i 'gro ba sdug bsngal gyi gzhi mtha' yas pa mi 'dod pa'i bar dag bsnyad do/ /de nas yang dge slong des sems can dmyal ba yang sos dang / thig nag dang / bsdus gzhom dang / ngu 'bod dang / ngu 'bod chen po dang / tsha ba'i 'khor la brtags nas sems can dmyal ba gzhan dag la yang brtags na/ des thos pa las byung ba'i shes pas sems can dmyal ba rab tu tsha ba zhes bya ba mthong ngo / /der sems can dag las gang gis skye bar 'gyur snyam nas des brtags na/ gang gis srog gcod pa dang / ma byin par len pa dang / 'dod pas log par g.yem pa dang / chang 'thung ba dang / brdzun smra ba dang / log par lta ba kun du bsten cing bsgoms te mang du byas pas 'gyur ro/ /dge slong ma gzhon nu sdom pa la gnas pa/ tshul khrims ma nyams pa/ brkam pa med par spyod pa/ 'dod pa med pa'i brtul zhugs nyams par byas shing de bzhin gshegs pa'i bstan pa las 'khrul par byas la de sangs rgyas la mi dad par byas te/ 'di ltar sangs rgyas ni thams cad mkhyen pa ma yin na de'i dge slong ma'i dge 'dun rnam pa 'di lta bus ci zhig du 'gyur/ de dag thams cad ni brdzun yin te/ bstan pa de ni ngan pa yin zhing de ni dman pa yin te/ de la byin pas chos su mi 'gyur zhing de la byin pas mya ngan las 'das pa yang 'thob par mi 'gyur te/ dge 'dun 'di ni dmangs yin no zhes dge slong ma gzhon nu'i brtul zhugs las bskyod cing chos ma yin pa med do zhes de de ltar rjes su sems su bcug nas dge slong ma gzhon nu de brtul zhugs las skyod par byed/ chos ma yin pa med do zhes tshul khrims 'khrul pa dang lta ba 'khrul par byed na/ de lus kyi chad pa dang / ngag gi chad pa dang / yid kyi chad pas lus dang bral nas ngan 'gro log par ltung ba sems can dmyal ba rab du tsha bar skye bar 'gyur te/ lus kyi bong tshod dpag tshad tsam la mar sar 'ju ba lta bur lus shin du gzhon sha can du 'gyur/ de bzhin du mig dang / sgra dang / reg pa dang / ro dang / gzugs dang / dri shin du chung bas srog chad par byed de/ ji lta ji ltar sdig pa'i shas cher byas pa de lta de ltar lus dang yid ches shin du gzhon sha can du 'gyur ro/ /de'i las ngan pa byas pa dang mi dge ba'i las kyi mthus 'di ltar tshe 'di la sdug bsngal shin du drag pa dag myong bar 'gyur te/ 'chi ba'i dus kyi tshe nges par myong bar 'gyur ba ni/ ji ltar sems can dmyal ba yang sos su skyes pa de ltar 'chi ba'i dus kyi tshe myong bar 'gyur ro/ /nyi ma gsum lon nas 'chi ba'i bar du de'i lce lkugs par 'gyur zhing 'jigs pa'i 'du shes su 'gyur/ 'du byed rnams nyam chung bar 'gyur/ rnam par shes pa shin du skrag par 'gyur te/ tshul de lta bur 'byung ba chen po bzhi rnams kyis dkrugs nas shin du sdug bsngal bar 'gyur ro/ /sa'i khams sra ba'i ngo bo 'khrugs pas lus dang rtsa dang / rgyus pa dang / mid pa thams cad shin du 'gog par byed/ 'bugs par byed/ rab tu 'bugs par byed/ rnam par tho 'tsham par byed/ mar sar gyi gong bu bzhin du gnod par byed/ shin du 'thag par byed cing 'thas par byed do/ /chu'i khams 'khrugs pas kyang lus dang rtsa thams cad dang / rgyus pa brgya dag gis 'ching bar byed/ ches mkhrang bar byed/ chu ser du byed/ lhod lhod por byed/ dri skyed par byed/ srin bu gsod par byed/ 'dzag sgo thams cad 'gag par byed/ sgra ngar ngar po 'byin par byed/ mid pa dang / lce'i 'dzag sgor gyur pa'i tshor ba gnod par byed/ yan lag dang nying lag thams cad las rngul 'byung bar byed do/ /me'i khams 'khrugs pas kyang lus dang rtsa dang / rgyus pa thams cad sreg par byed/ 'tshed par byed/ sdug bsngal gyis nyam thag par byed/ lpags pa zangs kyi mdog lta bu byed/ nang du sreg pa skyed par byed/ phyi rol du rnam par sreg pa skyed par byed/ sred pa'i stobs rab tu skyed par byed/ kha skam par byed/ snying sreg par byed do/ / rlung gi khams 'khrugs pas kyang yang ba'i ngo bo g.yo ba las nam mkha' la bteg nas 'dor ba bzhin byed/ rtsub pa'i dngos pos yan lag dang nying lag thams cad dang / khams thams cad shin du rtsub par byed do/ /yan lag dang / nying lag thams cad dang / gnad thams cad kyi bar bar du rlung pib pa la ka dang / sU tsa ka khab lta bur gyur pa rgyu ste/ rlung pib pa la ka khab lta bu rab tu 'bar ba dag gis ba spu'i khung bu la sogs pa nas/ kha chu dang / lpags pa dang / sha dang / tshil dang / rus pa dang / rkang pa dang / khu chu'i bar dag la 'jog par byed de/ ste'u bzhin du gcod par byed/ 'jog par byed/ dbang po'i lam thams cad 'gog par byed/ bshang ba dang / gci ba'i gnas 'gog par byed/ srog chags kyi dbugs yang dag par 'gog par byed/ mid par mid pa'i sgo'i lam log par byed/ lta bas 'du shes phyin ci log tu byed/ rna bas sgra mi snyan pa thos/ de'i snar chu 'byung zhing de'i sen mo dag sngon por byed/ sna yon por byed cing rlig pa 'doms su 'phyang bar byed/ rkub kha na ba dang / pho mtshan na ba dang / reg pa mdag me dang mtshungs pas sdug bsngal bar byed/ lpags par gtogs pa dang / lpags pa dag skrangs par byed/ de'i skra dang / spu dag shig shig por byed de/ nyes par byas pa mi mthun par spyad pa dag 'chi dus su sdug bsngal mi bzad pa 'byung ba'i phyogs tsam zhig bshad pa yin te/ de ltar nyin zhag gsum du 'byung ba chen po bzhi 'khrugs pa rnams kyis rnam par 'tshe'o/ /gang gi tshe dus tha ma 'bab par 'gyur ba na/ sems can dmyal ba pa de'i 'jig rten pha rol gyi mtshan ma 'di dag 'byung bar 'gyur te/ 'di lta ste/ de'i gnas thams cad phyar ba ngan pa rab tu 'bar bas khebs par snang zhing rmi lam gyi gzugs lta bu dag mthong ngo / /gnas med pa'i seng ge dang / stag gi gzugs 'jigs 'jigs ltar 'dug pa'i rnam pa de lta bu dang / gzhan yang shin du 'jigs 'jigs ltar 'dug pa mi sdug pa dag mthong ngo / /rna bas sgra 'ur 'ur po 'jigs shing mi dga' ba'i tshig dag thos so/ /de'i lpags pa mtshon nyid kyis gcod do/ / srid pa tha ma par bab pa na rlung de de'i steng du 'byung bar 'gyur te/ sen mo dag btang nas rkang pa dag gtong / rkang pa dag btang nas byin pa gtong / byin pa btang nas brla gtong / brla btang nas 'doms gtong / 'doms btang nas lto gtong / lto btang nas snying gtong / snying btang nas sgra ngar ngar por byed de/ mchil ma dag skams par byed la mig ya gcig dmar por byed do/ /gshin rje'i mi lag na ral gri dang / tho ba thogs pa nam mkha' la 'gro ba dag mthong ba dang / de'i mdza' bshes dang / nye du dag na re nam mkha' la reg par 'dod do zhes smra'o/ /de dbugs chen pos nyam thag cing lus thams cad bral/ dbugs chad nas mar me ngan pa snying po di ma can bsregs pa ltar 'jig rten 'di nas srid pa bar mar skye ste/ rgyu dang mtshungs par 'bras bu dag 'byung ngo / /nyes par byas pa'i las kyi mtha' spyod pa de srid pa bar ma pa'i sdug bsngal rnams kyis mngon par nyams par 'gyur ro/ /des bdag nyid ji ltar mi lo brgyad khri bzhi stong thub pa'i byis pa lo brgyad lon pa'i tshad de lta bur mthong ste/ skye bo dag ni thams cad nas thams cad du mi snang ngo / /'byung ba chen po phra ba dang / rags pa dag 'byung ste/ phra mo bltar med cing thogs pa med pa de lta bu byung bas gang ri rab phug nas 'gro yang bdag nyid dang ri rab la yang gnod pa med na/ ri gzhan dag la lta smos kyang ci dgos/ de ltar de dag nyid lcags nag po lta bu'i kha dog dang mun pa mun nag gi rdzong gi nang du zhugs par mthong ste/ de bdag nyid kyis las byas pa/ des spu thams cad 'bar bar mthong ngo / /bdag nyid gshin rje'i mi rnams kyis lcags kyi thag pa nag pos phyin ci log tu dam par rab tu bcings par mthong ste/ rkang pa dag kyang shin du drag cing dug gis reg pa ltar mkhrang ba/ gzugs shin du 'jigs 'jigs ltar 'dug cing thags thogs med par 'gro ba gzhan yod pas thams cad kyi nang na bcing ba dam pos bdag nyid bcings par mthong ste/ ji ltar skra'i rtse mo'i phyogs tsam yang bcings pa dam po des de ltar ma bcings pa med do/ /sgra dang / reg pa dang / ro dang / gzugs dang / dri mi 'dod pa dag 'byung bar 'gyur te/ mig gis gzugs mig dang mi mthun pa/ kha dog mi sdug pa/ 'jigs 'jigs ltar 'dug cing rab tu 'bar ba mang po dag mthong ngo / /rna bas kyang gang tshig de la dga' bar mi 'gyur ba mi snyan pa mi 'dod pa yid du mi 'ong ba dag thos so/ /'di lta ste/ nyes par byas pa'i las kyi mtha' spyad pa lus kyi chad pa dang / ngag gi chad pa dang / yid kyi chad pa mi phan pa byed pa 'di dag 'thog ste/ mis legs par byas pa'i rin po che'i gling gis bslus shing mi dge ba bcu'i las kyi lam mi gtsang ba bsams bzhin du spyod pa/ phyin ci log gis rin po che'i gling nyams pa/ mtshon dang / me dang / dug dang / g.yang sa lta bu'i 'dod pas bslus pa/ gzhan gyi bud med kyi tshig gis rnam par bslus shing de la 'dod pa des mi dge ba rnam pa gsum byas so/ /blo ngan pas rang gi las byas par spyad pa de de ltar s ems can dmyal ba rab tu tsha bar sdug bsngal sna tshogs nyam thag pa dag ji ltar bu dang chung ma mthong bas bslus pa nyes par spyad pa'i chad pa rnam pa 'di lta bu yang mi 'byung bar bya ba'i phyir bdag cag gis rnam pa brgya stong phrag du mar gnod pa bya'o snyam nas gshin rje'i mi rnams kyis srid pa bar ma pa dag la rjes su bstan pa'i tshigs su bcad pa smras pa/ gnyen bshes tshul ni dgra yin te/ /mi phan phan pa'i tshul gyis khyod/ /bcom nas mi yi 'jig rten nas/ /de ring mun nag chen por 'gro/ /ji ltar las ni rnam gsum byas/ /nyes gsum byas pa dgra gzhan med/ /las rnam gsum gyis khrid de 'ongs/ /gshin rje'i gnas su khrid par byed/ /las dag gcig cig byed pa ni/ /'bras bu gcig cig myong bar 'gyur/ /skye bo skye bo'i grogs med par/ /rdzong ni gcig cig rgal bar 'gyur/ /skye bo gang zhig skye bo 'dod/ /nyes par byas pa mang du byed/ /skye bos skye bo skyob mi nus/ /skye bo rang gis byas la spyod/ /skye bo bu yi 'du shes kyis/ /rmongs pa ci yi phyir na bslus/ /rmongs pas bslus pa khyod kyis su/ /sbyin la sogs pa'i blo ma bskyed/ /'jig rten 'di dang pha rol gyi/ /'jig rten de bzhin 'brang ba'i dgra/ /dgra yi nang na dgra dang po/ /ngan song thams cad rnam ston pa/ /dug dang me dang mtshon lta bu/ /rang gis byas pa ngan pa yin/ /khyod kyis las ni byas pa dag /khyod nyid rjes su spyod pa yin/ /gzhan gyis byas pa'i las de ni/ /pha rol dag la 'pho ba med/ /mi yis nyes par spyad byas pa/ /'jig rten 'di dang pha rol dang / /thog ma bar dang tha ma ru/ /bde 'byung bde ba'i ro mi myong / /de nyid 'dod par mi byed pa'i/ /sems ni rnam par dkrugs pa byas/ /byis pa'i sems dang yid 'phrogs pa/ /mi dge'i chos ni rnam par 'phel/ /yid kyis bslus pa'i sems can ni/ /yid kyis rab tu rnam par chags/ /mun pa nas ni mun pa ru/ /sems can dmyal bar sdig can 'gro/ /'khor bar mun pas bsgribs pa dag / sangs rgyas bstan pa rnyed par dka'/ /gang dag chos ni mi 'dod pa/ /sdug bsngal shin du sdug bsngal 'gro/ /gang zhig rtag tu sems ma zhi/ /yul rnams kyis ni nges par 'joms/ /gnas 'di dag tu de 'gro ste/ /'di ltar khyod nyid rjes su ltos/ /de ltar nyes par byas pa'i las kyi mtha' spyad pa/ rang gi lus dang ngag dang sems kyis bslus shing nyes par byas pa ni gshin rje'i mi de dag gis rjes su bstan nas sems can dmyal ba chen po rab tu tsha bar song ste/ snas ni ljan ljin dang rul pa dang mi gtsang ba'i tshogs kyi dri shin du mi zhim pa dag mnom mo/ /lces ni zangs rab tu tsha zhing mkhrang la ro bro ba med pa dang / dri dang ro dang gzugs yid du mi 'ong ba dag myong ngo / / sems can dmyal ba pa'i lus kyis kyang rlung spu gri dang me lta bu dang bcas pas reg go/ /yul 'jigs pa lngas mi 'jigs pa'i yid kyang sems can dmyal ba chen po sngar bstan pas shin du rnam par slong bar byed do/ /mid pa yang gshin rje'i mis rab tu dam por bcings shing las kyi rlung langs pa'i sems can dag gis dbang med par khrid do/ /gshin rje'i mi bzhin bsgyur cing lag pa dang rkang pa dang lto dang sen mo so so na 'jigs pa/ 'brug gi 'ur sgra 'jigs shing lag na mtshon cha thogs pa sprin nag po lta bu dang / mig 'bar zhing rab tu 'bar la mche ba 'khor lo ltar rno ba/ gsus pa rab tu che zhing lag pa thung ba/ sen mo mkhrang zhing rno la spred pa/ lus thams cad rtsa sbom pos khyab par sbrel ba'i rnam pa de lta bu dag gis nyes par byas pa'i las kyi mtha' dpyad pa de de ltar dpag tshad bye ba sum bcu rtsa drug dang / 'og tu dpag tshad bye ba bcu dang / sa dang rgya mtsho dang gling dang tshong 'dus dang ldan pa dpag tshad stong phrag drug bcu rtsa brgyad du khrid de rgya mtshor gtogs par de 'dug go/ /rnam pa 'di lta bu'i las kyi rlung gis 'phangs pa ni gang du yid kyis kyang dpe bya bar sla ba ma yin no/ /nyi ma dang zla ba dang / rlung 'gro ba med de/ rlung rnams kyi nang na ni las kyi rlung mchog yin te/ gzhan rlung ma yin pa de lta bur nyes par byas pa'i las kyi mtha' spyad pa de khrid de/ gshin rjes snga ma bzhin bstan to/ /nyes par byas pa'i las kyi zhags pas bcings pa gshin rje'i gnas de nas byung nas/ sems can du bgrang ba lus dang ldan pa'i las mi gtsang ba rnams kyis bcings pa sems can dmyal ba rab tu tsha ba der khrid do/ /sems can dmyal ba de rgyang ring po na kun rab tu 'bar ba mun pa mun nag dang / rgyang ring po na me 'bar ba/ rang gi bong tshod dpag tshad lnga stong yod pa/ skye 'grib med pa/ ches nyung ba dang / ches mang ba mthong ngo / / dpag tshad sum stong na sems can dmyal ba pa rnams kyi sgra 'byin pa thos te/ so so ni snying rje rje skad dang / 'jigs shing dman la gdangs mi snyan pa dga' ba med cing sdug bsngal tsha ba rtsub pa bzod par dka' zhing ro bro ba med pa rnam pa du ma dag lo 'bum phrag bye ba du mar lo bgrang gis mi lang bar rgyun du sgra 'byin pa thos so/ /sems can dmyal ba pa de rab tu tsha bar sgra 'byin pa des thos nas yid bcu 'gyur du 'jigs shing skrag go/ /sems can dmyal ba chen po rab tu tsha ba ga la ba de'i phyogs su yang gshin rje'i mi rnams kyis khrid nas tshigs su bcad pa 'di dag smras so/ /'di ni sems can dmyal ba'i sgra/ /thos nas blo ngan khyod 'jigs sam/ /gang du khyod ni me yis su/ /shing ltar bsregs na ji ltar bya/ /me yis bsregs pa bsregs pa min/ /ngan par byas pas khyod bsregs so/ /me ni zhi bar 'gyur srid kyi/ /nams kyang ngan byas me mi zhi/ /me yis 'jig rten mthar mi khyer/ /me yi phyi bzhin me mi 'brang / /ngan byas sdig pa'i me 'di yis/ /khyod dang bcas par myur bar sreg /ngan byas me yis gang bsregs pa/ /mi de dag ni dmyal bar sreg /ngan byas me ni gang spong ba/ /de dag dmyal ba'i 'jigs pa med/ /gang dag bdag tu gces 'dod dang / /gal te dmyal bar rnam 'jigs na/ /sdig pa dag ni rnam par spangs/ /de las sdug bsngal 'byung mi 'gyur/ /sdig pa shin du rnam spangs pa/ /sems ni rtag tu gtsang ba dang / /lus dang ngag gi tshogs zhi ba/ /mya ngan 'das pa yong mi ring / /sems can rtag tu sdig sems pa/ /rtag tu gti mug dbang du song / /sems can dmyal ba drag po thob/ /ci phyir rab tu mchi ma 'byin/ /ngan byas thog ma bar tha mar/ /sdug bsngal sdug bsngal rnam smin dang / /de bzhin sdug bsngal 'gro ba dang / /legs pa yongs su smin mi 'gyur/ / 'jig rten pha rol khyod kyis sdig /sdig pa gang dag ngan byas mang / /de yi 'bras bu rnam smin ni/ /de ring mi bzad nye bar spyod/ /mi yis ngan byed byas pa ni/ /mi bzad shin du mi bzad 'gro/ /mi yis legs byed byas pa ni/ /bde las shin du bde bar 'gro/ /sdig pa'i 'bras bu mi bzad pa/ /bde ba 'thob par 'gyur ba med/ /bde ba dag gi 'bras bu yang / /mi bzad log par smin mi 'gyur/ /'khor ba thog ma med pa nas/ /legs byas 'bras bu bde ba dang / /ngan par byas pa'i las dag ni/ /de bzhin sdug bsngal 'bras bu dran/ /rgyu rkyen 'dra bar 'byung 'gyur gyi/ /log par rtog par mi byed de/ /ji ltar sngon gyi rgyu byas pa/ /de ltar 'bras bu thob par 'gyur/ /de ltar srid pa bar ma der las kyis byas pa'i gshin rje'i mi rnams kyis rjes su bstan nas de sems can dmyal ba der khrid do/ /thos na yang spu zing zhes byed cing shin du ' jigs pa mthong na lta smos kyang ci dgos pa srid pa bar ma des mthong nas gzugs la sogs pa'i phung po de dag ji ltar sems can dmyal bas byas pa dro ba 'dod pa de ltar grang bar byas pa'i sdug bsngal mi bzad pas sdug bsngal lo/ /de nye bar len pa nyid las srid pa 'byung la de ltar srid pa'i yan lag la gnas pa de las skye ba 'byung ste/ de'i mi dge ba'i las gang yin pa srog gcod pa dang / ma byin par len pa dang / 'dod pas log par g.yem pa dang / chang 'thung ba dang / brdzun smra ba dang / log par lta bas dge slong ma zhe sdang med pa/ tshul khrims dang ldan pa/ 'dod pa med pa/ 'os pa ma yin pa la rung bar bzung ste/ sun phyung na de'i mi dge ba'i las byas shing bsags pa'i rnam par smin pa lci ba'i shugs gang yin pa des me'i phung po 'bar ba rgyar dpag tshad lnga brgya yod cing 'phang du dpag tshad nyis brgya yod pa der las ngan pa byas pas 'phangs te/ ji ltar ri mthon po la lcags kyi mda' 'phangs pa thags thogs med par 'gro ba shugs kyis 'phen pa de ltar sems can dmyal ba pa de me thab der 'dor ro/ /'dor ba na las kyis byas pa'i phur bu rnams 'byung bar 'gyur te/ gang byung ba tsam gyis kyang lus yongs su mi gtong ngo / /de ltar de'i mgo thur du spyangs shing rkang pa gyen du bsgreng ste/ 'dor ba na dang po kho nar mes mig dang mgo'i lpags pa sreg go/ /de nas mgo'i thod pa/ de nas 'gram pa'i rus pa/ de nas so/ /so'i 'og tu so drung / so drung gi 'og tu mgrin pa'i rus pa/ mgrin pa'i rus pa'i 'og tu rgyab kyi rus pa dang / brang rus/ brang rus kyi 'og tu mgrin pa dang / mid pa/ de'i 'og tu mchin pa/ mchin pa'i 'og tu mcher pa/ mcher pa'i 'og tu rgyu ma/ rgyu ma'i 'og tu gnye ma/ gnye ma'i 'og tu mdoms/ mdoms kyi 'og tu pho mtshan/ pho mtshan gyi 'og tu brla/ brla'i 'og tu pus mo'i lha nga / pus mo'i lha nga'i 'og tu pus mo gnyi ga /pus mo gnyi ga'i 'og tu sor mo ste/ de ltar dang po las byed pa ngan pa byas pa de sems can dmyal ba pa'i me'i dong du 'dor ba na sreg cing 'tsho yang sdug bsngal rgyun myi chad par 'byung ste/ ji lta ji ltar ngan pa byas pa'i las yang dang yang du byas pa de lta de ltar sems can dmyal ba pa'i sdug bsngal yang dang yang du 'byung la de shugs kyis 'bar ba'i phreng ba'i thab tu 'dor zhing sa gzhi rdo rje lta bu la phyer btags pa dang / skyes nas de nas yang ji ltar pho long dang por sa la brdabs nas/ brtud de brdabs pa de lta de ltar de'i ro stod snga la ro smad phyis 'dor ba ngu skad 'don pa na de nas yang 'dor ro/ /'bar ba'i phreng bas phangs pa'i lus de de nas yang sreg pa na/ snga ma bzhin du me lce'i nang du 'jug go/ /de ltar de lo 'bum phrag du mar sems can dmyal ba'i me thab der sreg go/ /bsregs nas de nas yang dus zad kyi bar du 'byung ngo / /de nas me thab de las sems can du bgrang ba ma yin pa gshin rje'i mi phra skam rab tu 'bar ba thogs pas mi de bzung nas 'dren to/ /phra skam rab tu 'bar ba'i rnam pa de lta bu de bas gang me thab ches grang ste/ phra skam nyis 'gyur gyis tsha ba gang yin pa de'i rgyu ni gang rkyen ni gang yin snyam nas de la rgyu ni 'di yin te/ gang srog gcod pas me thab tu sreg la/ srog gcod pa dang / ma byin par len pa ngan pa byas pa dag phra skam gyis nyis 'gyur du rab tu sreg ste/ rgyu ni de yin rkyen ni de yin/ gzhi ni de yin no/ / phra skam gyis nyis 'gyur du rab tu sreg pa gang yin pa'i phra skam des drangs nas sems can du bgrang ba ma yin pa gshin rje'i mi de rnams kyis lcags kyi sa gzhi rab tu 'bar ba'i steng du 'jog go/ /phur bu rab tu 'bar ba'i phur bu des de'i rgyab dang / mdoms snga ma bzhin phug nas de'i steng du bzhag la ral gri shin du rnon po rab tu 'bar bas rlig pa dang pho mtshan lhan cig gcod de sdug bsngal sum 'gyur du myong ngo / / de'i rgyu ni gang yin/ rkyen ni gang yin/ gzhi ni gang yin snyam na/ de la rgyu ni 'di yin/ rkyen ni 'di yin/ gzhi ni 'di yin te/ 'di lta ste/ srog gcod pa dang / ma byin par len pa dang / 'dod pas log par g.yem pa rgyu dang rkyen dang gzhir gyur te/ rgyu des sdug bsngal sum 'gyur du myong ngo / /'di lta ste/ lcags mgar gyi sa na lcags mgar ram/ lcags mgar gyi slob mas sbud pa blangs te dbugs kyis bkang nas ji lta ji ltar dbugs kyis 'bud pa de lta de ltar nyes par byed pa'i las kyi mtha' byas pa de bzhin du sreg go/ /nyes par byas pa'i mgar ba ni las dang mjug ces bya ba'i tshig bla dgas so/ /mgar ba'i slob ma nyes par byas pa'i las zhes bya ba ni las kyi nyer bsdogs shes bya ba'i tshig bla dgas so/ /rlung zhes bya ba ni las kyi rlung zhes bya ba'i tshig bla dgas so/ /sbud pa zhes bya ba ni lta ba ngan pa zhes bya ba'i tshig bla dgas so/ /mdag ma rab tu 'bar ba zhes bya ba ni sems can dmyal ba pa zhes bya ba'i tshig bla dgas so/ /ji lta ji ltar sbud pa 'bud pa de lta de ltar sreg ces bya ba ni sems can dmyal ba pa dag kyang ji lta ji ltar shin du mi dge ba'i las byas pa de lta de ltar sdug bsngal shin du mi bzad pa myong bar 'gyur te/ de ni rgyu yin de ni rkyen yin no/ /ral gri'i gnod pa gang gis de shin du mi bzad pa sum 'gyur du 'byung bar 'gyur te/ srog gcod pa dang / ma byin par len pa dang / 'dod pas log par g.yem pa kun du bsten cing bsgoms te mang du byas pa rnams kyi 'bras bu de yin par rig par bya'o/ /sems can dmyal ba pa de 'jigs pas mig blong ba rnam par sgra 'byin cing 'phags pa ma byin pa'i las kyis 'tshed pa na dris pa/ kye grogs po dag khyed cag la ni ci zhig gnod/ sdug bsngal de dag gis mngon par nyam thag pa des gshin rje'i mi rnams la 'di ltar sdug bsngal tsha ba dag gis nyam thag pa'i sdug bsngal 'di dag ni sdug bsngal ba med kyi 'di ltar mdag cag ni skom pas gdungs so zhes smras pa dang / de gshin rje'i mi de dag gis thos nas 'jigs pa'i rlabs shes bya ba zangs dang zha nye bsregs pa rab tu bskol ba/ 'gram gnyi ga gnong pa na/ chu bo'i rlabs kyis sgra mthong zhing thos na/ 'jigs shing dngang ba de nas lcags kyi snod kyi nang du zangs dang zha nyer bsregs te bskol ba der blugs nas khyer te 'ongs nas/ 'di ltar kye grogs po dag 'thung zhes smras so/ /de skom pas gdungs pa'i bsam pas btung ba yin no snyam nas/ de lag pa gnyi gas blangs nas las kyis bsgribs pa skom pas gdungs pa 'thung ba dang de'i mchu sreg cing lce sreg pa nas mgul ba dang mid pa'i bar nas ro smad kyi bar du 'byung ste/ de sdug bsngal bzhi 'gyur du myong ngo / /bzhi 'gyur du bsregs pa de'i las kyi 'bras bu gang yin snyam na/ gang gis srog gcod pa dang / ma byin par len pa dang / 'dod pas log par g.yem pa dang / chang 'thung ba ni sdom pa blangs pas 'thungs shing khyim gyi gnas nas byung ba sdom pa blangs pa'i dge slong ma dag la blud pa de'i 'bras bu ni 'di yin te/ 'di ltar sems can dmyal ba pa de zangs dmar po rab tu bskol ba de la 'thung ba'i bsam pas len pa de yin no/ /de bzhin du dge slong tshul khrims dang ldan pas btung ba rung ba yin no snyam nas chang de yang dug ha la ha la lta bu yin te/ dge slong blo zhan pa des sbyin pa po dang sbyin bdag dag gi sa la dbo bar ma nus shing dge 'dun la 'jigs nas 'thungs pa de'i 'bras bu ni 'di yin te/ sems can dmyal ba pa'i zangs bzhus pa de sa dag la dbo bar mi nus te/ las de'i 'bras bu ni de yin no// //'phags pa dam pa'i chos dran pa nye bar gzhag pa/ bam po bcu gsum pa/ de nas yang gshin rje'i mi de dag gis sems can dmyal ba pa de dag la dris pa 'di ltar kye grogs po dag khyed la ci zhig gnod/ sems can dmyal ba pa de dag gis smras pa/ bkres pas rab kho nar gnod de sdug bsngal 'di yang bdag gi gnod pa de dag thams cad zil gyis non te/ bkres pa'i sdug bsngal gnas so/ /de nas gshin rje'i mi dag chu bo'i rlabs 'jigs pa nas lcags kyi thu lum lnga 'gyur du rab tu 'bar ba blangs te/ 'ongs pa dang / de nas sems can dmyal ba pa las gyis rnam par rmongs pa'i blo gros can de dag lcags kyi thu lum de dag bza' ba yin no snyam nas blangs te za ba dang / snga ma bzhin du de'i mchu sreg pa nas ro smad kyi bar du byung gis kyang 'chi bar mi byed do/ /de'i las ngan par byas pa'i dbang gis lce de yang slar 'byung bar 'gyur la pad ma'i 'dab ma ltar shin du 'jam zhing de'i lus kyang 'byung bar 'gyur te/ de'i las kyi 'bras bu ni de yin no/ /de nas yang dge slong des thos pa las byung ba'i shes pas de bzhin gshegs pa'i sgron ma lta bur gyur pa la gang gis srog gcod pa dang / ma byin par len pa dang / 'dod pas log par g.yem pa dang / chang 'thung ba dang / brdzun smra ba de'i 'bras bu ni 'di yin te/ gang tshul khrims 'chal pa lud bong ltar spyod pa tshul khrims dang ldan no snyam nas yul 'khor gyi bsod snyoms la yongs su spyod pa de'i 'bras bu ni de yin par shes so/ /de nas yang sems can dmyal ba pa de gshin rje'i mi de dag gis mthong nas de dag gi lce bsregs shing las kyis rnam par rmongs pa'i blo gros can de dag gi lce de kha de nas 'byin par byed de/ de yang brdzun du smra ba'i rgyu des pad ma'i 'dab ma ltar shin du 'jam pa rgyar dpag tshad phyed khebs so/ /de nas gshin rje'i mi de dag gis lce de bzung nas las kyis bsgrubs pa'i rmon pa brgya phrag du ma rnams kyis nyes par byas pa log par smra ba ngu zhing skad 'byin bzhin du shin du rmed do/ /de ltar lo 'bum phrag du ma lo bye ba brgya phrag bgrang gis mi lang ba'i bar du myong bar 'gyur te/ las byas shing bsags pa de dag gi 'bras bu rnam par smin pa dag ma myong bar sems can dmyal ba las thar pa med do/ /de nas gshin rje'i mi de dag gis sems can dmyal ba pa de dag la tshigs su bcad pa 'di dag rjes su bstan to/ /ji ltar khyod la srog gces pa/ /gzhan la 'ang de ltar rab tu gces/ /sdig pa dag gi rjes 'brang ba/ /khyod kyis ci phyir srog gcod byas/ / mi yis srog dang sdom byas nas/ /nor ni gang zhig yang dag bsgrubs/ /gzhan gyi nor la 'dod pas su/ /de ni khyod kyis ci phyir 'phrog /kun gyi nang na sdug pa ste/ /srog pas phongs pa'i chung ma de/ /khyod kyis 'dod chags chags pa yi/ /stobs kyis ci'i phyir na dbrog /skye bo rnam par rmongs pa'i blo/ /chos la mchog tu sun 'byin pa/ /sdig pa'i chang ni 'thung ba dag /khyod kyis ci phyir yongs ma spangs/ /dug lta bu yi lce las byung / /gang kun yid ches mi byed pa/ /brdzun du smra ba'i sdig pa dag /khyod kyis ci phyir yongs ma spangs/ /de ltar sdig pa rnam lnga yis/ /gang phyir rjes su chags ldan khyod/ /de phyir ma ngu legs par zo/ /smre sngags don med ci zhig 'don/ /dug lta bu yi sdig pa'i chos/ /gang phyir yongs su ma spangs par/ /de phyir 'bar ba'i phreng ba yis/ /dmyal ba 'khrugs pa chen po 'thob/ /de ltar sems can dmyal ba pa de dag la gshin rje'i mi de rnams kyis rjes su bstan pa bstan nas/ rang gis byas pa'i las rgya'i 'bur lta bur gyur pa'i gnod pa drag pa sna tshogs dang rnam pa du ma dag gis rdeg cing gsod de ji ltar mi dge ba'i rnam pa du ma kun du spyad pa de ltar sdug bsngal rnam pa du ma yang so sor myong bar 'gyur la rgyu dang mtshungs par 'bras bu 'byung zhing sa bon dang mtshungs par 'bras bu 'byung ngo / /'di ltar sems can dmyal ba chen po rab tu tsha ba der mi dge ba'i las byed pas shin du gang ba'i 'bras bu mi dge bas kyang shin du gang ba de lta bu la spyod de/ de ltar lo 'bum phrag du mar sdig pa'i las dgra lta bur gyur cing mi phan par 'dod pa des sems can dmyal ba de 'tshed do/ /de gal te de las thar nas mgon 'dod pa/ skyabs 'dod pa/ dpung gnyen 'dod pa rgyug pa dang / des rgyang ring po nas khyi'i tshogs chen po dag kha gdangs shing spro ba che la shin du mgyogs pa so rdo rje ltar rno zhing shin du 'jigs pa'i sgra 'byin pa'i khyi de khyi rnams kyis bskor nas rgyug cing 'ong ba mthong ngo / /mthong nas sems can dmyal ba pa de 'bros par brtsams pa dang / de nas khyi de dag thams cad kyis brgyugs nas de bzung ngo / /bzung nas kyang ma lus par za ste/ rgyus pa'i tshogs nas rgyus pa'i tshogs dang / gnad kyi bar nas gnad kyi bar dang / rus pa'i tshigs nas rus pa'i tshigs te/ ji ltar de yungs 'bru tsam yang ma lus pa de ltar yan lag dang nying lag thams cad za'o/ /de nas yang 'byung bar 'gyur te/ de ltar de yun ring du khyi de rnams za'o/ /de'i las kyi 'bras bu de gang zhig yin snyam na gang des sha stor bya ba'i phyir sems can bsad cing srog bcad pa'i 'bras bu ni de yin no/ /ma byin par len pa'i 'bras bu 'byung ba yang 'di ltar sems can dmyal ba pa des las kyis byas par gyur pa'i nor rdzas dag mthong ba dang / de dag kyang las las byung ba'i rmongs pa yin te/ 'di ltar 'di dag ni bdag gi yin na pha rol dag gis phrogs pa lta snyam du khong du chud nas de der rgyug pa dang / de gshin rje'i mi gzhan rnams kyis bzung ngo / /bzung nas kyang mtshon rnam par gcod pas gnad nas gnad shin du gcod cing sreg go/ /de sems can dmyal ba pa gzhan dag gi drung du rgyug la/ sems can dmyal ba pa de mthong nas de dag kyang gshin rje'i mi de rnams kyis bzung ste/ ral gri dang / mdung thung dang / mda' bo che dang / rdo rab tu 'bar ba rnams kyis rnam par gsheg par byed do/ /de dag kyang ma byin par len pa de'i 'bras bus ji srid du ma byin par len pa'i 'bras bu bcom zhing spangs la zad par ma byas pa de srid du lo 'bum phrag du mar gsheg par byed do/ /de phyis de las thar bar 'gyur te/ 'dod pas log par g.yem pas bud med ba tshwa'i chu bos khyer zhing shin du rtsub rtsub skad smra la rlabs kyis bdas pa na bar 'ga' ni steng du 'byung / bar 'ga' ni 'og tu 'jug cing sems can dmyal ba pa de la 'di ltar bdag la mgon med pa de ba tshwa'i chu bo'i nyon mongs pa 'di las bdag yongs su skyobs shig ces smra ba mthong ngo / /de nas sems can dmyal ba pa des bud med de'i sgra de thos nas las kyis rmongs pas ba tshwa'i chu bo der 'jug go/ /der zhugs ma thag nyid du de'i lus ba tshwa'i chu bo'i shugs kyis ji ltar rus pa yungs 'bru tsam yang ma lus pa de ltar khyer ro/ /de nas yang 'byung bar 'gyur te/ yang bud med de nyid rgyang ring po nas ba tshwa'i chu bo de nyid kyis khyer ba na bdag la mgon med na bdag yongs su skyobs shig ces sgra 'byin pa mthong ngo / /de nas yang bud med de la dmigs pa de'i drung nyid du rgyug go/ /de nas bud med de de la 'ju ste/ de'i sen mo lcags las byas pa'i mtshon rnon po rab tu 'bar ba lta bu dag gis mi de la 'jug pa dang / ji ltar de'i lus yungs 'bru tsam yang ma lus par de ltar rnam par 'thub po/ /lus kun du khrag gis chag chag ltar btab cing lus rgyus pa'i dra ba lus pa 'dod chags dag gi zil gyis non pa yang bud med de nyid kyi phyir rgyug ste/ de ba tshwa'i chu bo de'i nang du ji srid du de'i sdig pa'i las bcom zhing spangs la zad par ma byas pa de srid du ded do/ /de phyis sems can dmyal ba de las thar bar 'gyur la/ thar nas de nas yang 'byung bar 'gyur te/ bkres pas yongs su gdungs pa'i lus de gar bab bab tu yongs su rgyug go/ /de phyis chu bsil ba 'dod pa'i phyir chu bo'i dngo rab tu dang ba der rgyug go/ /de gang gi tshe phyin pa dang / chu dngo de yang zha nye rab tu skol ba 'jigs 'jigs ltar 'dug pa chen po yin zhing thams cad du dug rab tu drag pa dang / sbrul rnams kyis khebs te skom pas gdungs pa de dug dang sbrul de rnams dang lhan cig 'dres pa'i zha nye de la 'thung ngo / /de dag kyang las las byung ba yin te/ sbrul phra mor gyur pa'i mgo mi de la rab tu 'jug go/ /gang gi tshe sems can dmyal ba pa'i lto der zhugs par gyur pa de'i tshe/ lus chen por 'gyur te/ de lus de'i nang na rgyu ma dang gnye ma la sogs pa thams cad 'cha'o/ /'jib po/ /za'o/ /chang 'thung ba'i sdom pa de las 'das pa las kyis rmongs pa de lo 'bum phrag du mar de la 'thung zhing zha nye dang sbrul du 'dres pa des kyang sreg go/ /gsod do/ /shi zhing shi nas yang 'byung bar 'gyur la/ de'i chang gi sdom pa las 'das pa'i nyes pas lce yang sbrul de rnams kyis za bar byed de/ de ni brdzun du smra ba'i 'bras bu yin no/ /de ltar ji srid du de'i sdig pa'i las bcom zhing spangs la zad par ma byas pa de srid du lo 'bum phrag du mar sdug bsngal myong bar 'gyur ro/ /yang de nas thar nas gar bab bab tu 'bros so/ /byams par mi lta ba'i 'bras bu ni 'di ltar sems can dmyal ba pa de'i las las byung ba'i sems can gyis smras pa/ 'di ltar khyod 'dir rgyu med par ci ste 'tshed gnas 'di las gzhan dag kyang yod la de ngas khyod la bstan par bya ste/ der khyod bde ba 'thob par 'gyur ro/ /de nas mi des sems can dmyal ba pa de khrid de/ 'khor rnams kyi nang du 'jug par byed do/ /der yang mi des sems can dmyal ba pa de dag la gang gnod pa tha dad pa de dag myong bar byed de/ 'di lta ste/ phyogs thams cad rab tu sreg pa gang du gnod pa mang po dag gi phyogs thams cad rab tu 'bar zhing sreg go/ / lus chen po shin du sgra 'byin pa 'jigs 'jigs ltar 'dug pa gang du de'i lus dpag tshad bcu yod cing shin du gzhon pa 'tshed do/ /me spyi gtsug lta bu gang du me lce las byung ba'i sreg pa gzhan thams cad dang mtshungs pas 'tshed do/ /me mdag bye ma lta bu'i char rtag tu 'bab pa'i sgo gang du char rab tu 'bab pa ltar bye ma'i char rab tu 'bar ba 'bab pa'i nang na 'dug pa 'tshed do/ /me mdag gang du bus pa'i lus lta bu 'jug pa/ sems can dmyal ba pa'i mdag mes 'tshed do/ /sems can dmyal ba a la la zer bar phan tshun gyi yan lag dang nying lag thams cad phan tshun gcad pa'i sdug bsngal myong ngo / /shar gyur pa thams cad sdug bsngal bas 'tshed do/ /der gang gzhan yang so sor 'jigs shing bag tsha ba/ khyi dang seng ge dang / phag rgod dang / khwa dang / bya rgod dang / sbrul dag gis de rnam pa thams cad du sdug bsngal bar byed do/ /chu bo rab med rab tu tsha bar yang 'tshed do/ /sreg go/ /ba tshwa dang zangs dmar po dang / zha nye rab tu skol ba'i chu bo gang du brgya 'am yang na stong du rab tu ded cing de dag tu yang 'tshed do/ / rtag du mun pa mun nag las byung ba'i me'i gnod pa rnam pa sna tshogs dag gis kyang 'tshed do/ /sems can dmyal ba gnod pa'i phreng bar yang 'tshed do/ /mgo gang la 'khor lo rab tu 'bar ba 'khor zhing yan lag dang nying lag thams cad kyang sog le dag gis rnam par gsheg par byed do/ /de las thar nas srad bu'i rgyud 'dre ba dud pa ltar 'khrigs pa der gnod par byed de/ gang du kun nas thig skud rab tu 'bar ba dag gis brgya 'am yang na stong du btab btab nas gshin rje'i mi dag gis sems can dmyal ba pa de dag mtshon cha hu lu rab tu 'bar ba rnams kyis gcod par byed do/ /de las rnam par thar nas sems can dmyal ba skra shad 'dzings pa dang / bya khwa yod par gnod pa byed de/ gang du lus tshal shing bsregs pa lta bu'i rang gi lus las byung ba'i mes sreg go/ /gcig la gcig kyang sems can dmyal ba pa'i lo 'bum phrag du mar mtshon cha char ltar 'bab pas gcig la gcig 'jog go/ /de las thar nas kyang sems can dmyal ba snying rje rje skad sgra 'byin par 'tshed de/ gang du gnod pa'i rnam pa 'di lta bus nyam thag cing sgra 'byin par gyur pa ni gang sems can dmyal ba gzhan thams cad na yang rnam pa de lta bu med do/ /de las thar nas kyang sems can dmyal ba snying rje chen por skye bar 'gyur te/ der chos ngan pa gang dag chos su ston cing lta ba ngan pa rab tu ston pa de der bu sdug pa'i gzugs de dag sreg cing bskul ba na de yongs su smre sngags 'don te/ 'di ltar pha dang spun dang bu dang mdza' ba mgon med na/ bdag la yongs su skyobs shig ces de'i lag pa gnyi ga stod nas shin du snying rje rje skad 'byin pa mthong ngo / /de mthong nas mya ngan gyi me sreg pa'i bud shing gis sbar ba rnam pa de lta bu 'byung ste/ gang khyad par ni sems can dmyal ba pa'i me de kha ba dang mtshungs so/ /de shin du tsha ba rnam pa de lta bu gnyis kyis sreg cing shin du tsha ba'i sgra skad 'byin pa na gshin rje'i mis rjes su bstan pa'i tshigs su bcad pa smras pa/ sred pa'i me 'di'i drung na ni/ /'bar ba dag ni grang zhes bya/ /dmyal bar dmyal ba pa yi me/ /khams gsum dag ni sreg pa'i me/ /sems can dmyal bar gang 'byung ba/ /me 'di chung bar gyur pa yin/ / sreg pa'i rgyu las byung ba yi/ /me 'bar ba ni mang por mched/ /sems can dmyal ba sdig spyad pa/ /las zad nas ni rnam par grol/ /sred pa'i dbang du song ba'i me/ /khams gsum dag tu sreg par byed/ /'khor ba thog ma med dus nas/ /sred pa'i me yi rjes 'brang ba/ /sems can dmyal ba sred pa'i me/ /ci phyir dmyal ba'i me mi 'byung / /sems can dmyal ba pa yi me/ /lus ni shin du sreg par byed/ /sred pa'i me yis mi rnams kyi/ /lus yid shin du sreg par byed/ /de lta bas na sred rgyu las/ /byung ba'i me ni khyad par che/ /dmyal ba pa yi kha ba 'dra/ /sred pa'i me ni khyab par dran/ /sred 'brang rgyu ni gsum las byung / / las gsum dag ni yongs su bstan/ /dus gsum 'byung bar shes par byed/ /de ltar sred me gzhan du min/ /'dod chags mes ni mtho ris sreg /zhe sdang mes ni dud 'gro dran/ /gti mug mes ni dmyal ba sreg / sred pa'i mes ni kun du gnas/ /de ltar sred pa'i me yis su/ /gnas gsum thams cad rab 'bar bar/ /mthong nas chos ni ma spyad pa/ /de ring ci zhig yongs su gdungs/ /de ltar sems can dmyal ba snying rje chen por sems can dmyal ba pa gshin rje'i mi de rnams kyis rjes su bstan nas sdug bsngal dang gnod pa sna tshogs dag byed do/ /de de las thar nas kyang sems can dmyal ba tsha ba pa'i sar 'tshed do/ / der yang sems can dmyal ba pa dag gi lus kun nas bsregs nas/ lus shing king shu ka ltar byas so/ /de las thar nas kyang sems can dmyal ba shing skam ltar 'jigs par 'tshed de/ de ltar log par lta bas zin pa'i dge slong ma sun 'byin pa de 'khor bcu drug tu 'tshed do/ /de der ji srid du de'i sdig pa'i las bcom zhing spangs la zad par ma byas pa de srid du dus dpag tu med par sreg go/ / de phyis sems can dmyal ba de las thar bar 'gyur te/ thar nas kyang dge slong ma sun phyung ba'i las de'i rgyu dang 'thun pa'i 'bras bus tshe rabs stong phrag du mar yi dags dang dud 'gro dag tu 'tshed par 'gyur te/ bkres pa dang / skom pas gcig la gcig za ba dang / lus brgya phrag stong du dud 'gro dag gis za bar 'gyur/ log par lta ba dge slong ma sun phyung ba de 'on kyang gal te de gnya' shing gi bu gar ru sbal 'jug pa lta bur mi rnams dang skal ba mnyam par mir skyes na/ de tshe rabs lnga stong du mir gyur pa za mar 'gyur ba mthong ngo / /de nas gzhan yang dge slong las kyi 'bras bu rnam par smin pa shes pa des sems can dmyal ba rab tu tsha ba'i 'khor la brtags na/ des thos pa las byung ba'i shes pas sems can dmyal ba phyogs thams cad rab tu sreg pa zhes bya ba mthong ngo / /der sems can dag las gang gis skye bar 'gyur snyam nas des brtags na/ gang gis srog gcod pa dang / ma byin par len pa dang / 'dod pas log par g.yem pa dang / chang 'thung ba dang / brdzun smra ba dang / log par lta ba ni snga ma bzhin no/ /dge bsnyen ma bslab pa'i gzhi lnga yod pa sun phyung na de lus dang bral nas ngan 'gro log par ltung ba sems can dmyal ba phyogs thams cad rab tu sreg par skye bar 'gyur ro/ /der gnod pa 'di dag 'byung bar 'gyur te/ 'di lta ste/ sems can dmyal ba de ji ltar khab kyi bu ga tsam yang med pa de ltar kun nas rtag tu nam mkha' la yang rab tu 'bar bar 'gyur ba der sngar de'i lag pa me'i nang du 'jug ste/ ngu skad 'byin pa na me tsha zhing rtsub pa shin du drag pa'i stobs kyis ji ltar de'i thal ba yang mi mngon pa de ltar sreg go/ /de nas yang 'byung bar 'gyur te/ lo 'bum phrag du mar sreg go/ /de las thar nas mgon 'dod pa/ skyabs 'dod pa/ de gar bab bab tu 'bros pa dang / gshin rje'i mi rnams kyis bzung ngo / / bzung nas kyang lcags kyi thag pa kun nas rab tu 'bar ba dag gis rkang mthil gyi bar nas mgo'i bar de dag 'ching ste/ de'i khrag de dag thams cad de'i mgo la bsdus so/ /de phyis sems can dmyal ba pa de dag la gzugs pa'i phur pa blangs te mgor btsugs nas shugs kyis btab ste/ 'di ltar phur pa de mgul par byung ngo / /byung nas kyang shugs kyis phyung ba dang / de'i khrag de ji ltar sems can dmyal ba pa'i mgo las zangs bskol ba'i khrag 'byung ba de dang chung zad kyang khyad par med pa de ltar tsha ba 'byung ngo / /de rang gi lus las byung ba'i khrag des lo 'bum phrag du mar 'khru'o/ /sreg go/ /'chi'o/ /de'i las kyi mthus 'byung bar 'gyur te/ ji srid du de'i sdig pa'i las bcom zhing spangs la zad par ma byas pa de srid du/ sdig pa'i las des sreg go/ /'tshed do/ /de phyis sems can dmyal ba pa de las thar bar 'gyur te/ thar nas kyang las de dang rgyu 'thun pa'i 'bras bus lo 'bum phrag du mar yi dags dang dud 'gro dag tu skye bar 'gyur te/ der yi dags bkres pa dang skom pa'i sdug bsngal dag myong bar 'gyur ro/ / dud 'gro rnams su gcig la gcig lus brgya phrag du ma dag za zhing pha rol dag gis rnam par 'jig par 'gyur ro/ /de sdug bsngal de dag myong nas gal te gnya' shing gi bu gar ru sbal 'jug pa lta bur mi rnams dang skal ba mnyam par mir skyes na de dbul zhing nad bu can dang / pha rol gyis gnod pa dang / sems g.yengs pa dang / tshe thung bar 'gyur zhing tshe rabs bzhi brgyar za mar 'gyur ba mthong ngo / / de nas yang dge slong las kyi 'bras bu rnam par smin pa shes pa des sems can dmyal ba chen po rab tu tsha ba'i 'khor la brtags na/ des thos pa las byung ba'i shes pas sems can dmyal ba lus chen po shin du sgra 'byin 'jigs 'jigs ltar 'dug pa zhes bya ba mthong ngo / /der sems can dag las gang gis skye bar 'gyur snyam nas des brtags na/ gang gis srog gcod pa dang / ma byin par len pa dang / 'dod pas log par g.yem pa dang / brdzun smra ba dang / log par lta ba ni snga ma bzhin no/ /gang gis tse lu rab tu sun 'byin par byed na/ de lus dang bral nas ngan 'gro log par ltung ba sems can dmyal ba lus chen po shin du sgra 'byin 'jigs 'jigs ltar 'dug par skye bar 'gyur ro/ /der gang sems can dmyal ba yang sos la sogs pa'i gnod pa 'byung ba bsdus pa de dag thams cad sems can dmyal ba lus chen po shin du sgra 'byin 'jigs 'jigs ltar 'dug par 'byung ba'i steng du khyad par du 'byung b a ni 'di ltar gang gi lus dpag tshad tsam la mar sar ltar shin du snyi ba'i lus de de dag gis bzung nas spu 'byin pa'i phra skam gyis ji ltar yungs dkar gyi 'bru tsam du de ltar sen mo la sogs pa nas rkang pa'i bar dag gcod par byed do/ /sdug bsngal gyis nyam thag pa de ji ltar sgra sems can dmyal ba pa gzhan dag thos nas kyang snying zags shing rdol ba de ltar sgra skad 'byin to/ /thog ma med pa'i dus nas de'i las kyi 'bras bus bslus shing sems kyi dgras yongs su bslus pa'i sems can dmyal ba pa shin du sdug bsngal bas nyam thag pa de dag nyid mthong nas 'di ltar gshin rje'i mi rnams kyis rjes su bstan pa'i tshigs su bcad pa smras pa/ 'dod pa yang dag ston pa'i tshig / snyan cing yid 'ong sna tshogs dag /smras pa sdig pa chen po yin/ /de yi 'bras bu 'dir 'ongs so/ /'dod par gyur pa'i tshig smra bas/ /spu gri rnon por brdar ba yi/ /so yis bdag rang bdag nyid kyi/ / lce ni yang dag bcad kyang sla/ /sems can 'dod chags kyis bslus shing / /zhe sdang gis ni yongs gdungs la/ /gti mug dbang du song ba dag /tshig mi snyan par smra bar byed/ /'dod chags chung bas zin pa gang / / nyes par byed pa mang du byed/ /rmongs pa gti mug dbang song ste/ /sdug bsngal las ni sdug bsngal 'thob/ /'dod pa'i dga' ba yud tsam ste/ /de ni bden med brtag pa'ang min/ /'gyur ba shin du mi bzad de/ /de ltas de ni yongs su spongs/ /'dod chags zil gyis non pa'i mi/ /sems can dmyal ba'i gnas su gnas/ /gang dag 'dod chags dbang mi 'gro/ /de dag dmyal ba'i 'jigs pa med/ /de ni sdig pa'i las byas pas/ /ngan song nges par myong ba yin/ /slong zhing dman pa snying rje'i skad/ /ci zhig de ring yongs su gdung / /sems can dmyal ba sdig byed pa/ /las zad nas ni thar 'gyur gyi/ /rnam par sgra 'byin mang 'gyur ba/ /thar pa dag tu ga la 'gyur/ / mi 'dod ngan 'gror 'gro ba'i las/ /byas pas 'dod chags dbang du gnas/ /rmongs pa gang zhig smre sngags 'don/ /de ni don med yongs su 'don/ /gang zhig ma 'ongs 'bras bu shes/ /da ltar byung ba'i dge la dga'/ / de ni dmyal bar skad mi 'byin/ /de ni ji ltar rjes su gdung / /de ltar yang de la ston pa dang / las byed pa ngan pa byas pa de gshin rje'i mi de rnams kyis rjes su bstan nas kyang ji srid du de'i sdig pa'i las bcom zhing spangs la zad par ma byas pa de srid du gnod pa rnam pa tha dad pa sna tshogs du ma dag gis gnod par byed do/ /de sems can dmyal ba de las thar nas las de dang rgyu 'thun pa'i 'bras bus tshe rabs stong phrag du mar dud 'gror skye bar 'gyur/ gal te brgya la gnya' shing gi bu gar rusbal 'jug pa lta bur mi rnams dang skal ba mnyam par mir skyes na tshe thung zhing dbul ba dang / sems g.yengs pa dang / ngag skye bo kun gyi yid mi ches par 'gyur zhing tshe rabs bzhi stong du za mar 'gyur ba mthong ngo / /de nas yang dge slong las kyi 'bras bu rnam par smin pa shes pa des sems can dmyal ba chen po rab tu tsha ba'i 'khor la brtags na des thos pa las byung ba'i shes pas sems can dmyal ba me spyi gtsug lta bu zhes bya ba mthong ngo / /der sems can dag las gang gis skye bar 'gyur snyam nas des brtags na/ gang gis srog gcod pa dang / ma byin par len pa dang / 'dod pas log par g.yem pa dang / chang 'thung ba dang / brdzun smra ba dang / log par lta ba kun du bsten cing bsgoms te mang du byas pas 'gyur ro/ /gang gis zhe sdang ba med cing spyod pa dang ldan pa'i bu mo'i skye gnas ma yin pa'i sgo sun phyung na/ de lus dang bral nas ngan 'gro log par ltung ba sems can dmyal ba me spyi gtsug lta bur skye bar 'gyur ro/ /der gang sems can dmyal ba c hen po yang sos la sogs pa'i sdug bsngal de dag thams cad bcu 'gyur du 'byung ba'i steng du khyad par du 'gyur ba ni sems can dmyal ba me spyi gtsug lta bu de spyi gtsug 'dra la srog chags spyi gtsug ces bya ba byad gzugs gzhu rgyud ltar ring zhing shin du drag pa yod la mthong na yang shin du drag pa gnas so/ /de nas sems can dmyal ba pa de gshin rje'i mi rnams kyis bzung nas lcags kyi sa gzhi rab tu 'bar bar phor bu'i nang du lus thams cad dang / lag pa dang / rkang pa thams cad nub par bcug cing me shin du tsha bas rgyab sreg pa na ngu skad 'byin cing cho nges 'debs so/ /de nas gshin rje'i mi de rnams kyis srog chags me spyi gtsug lta bu zhes bya ba de dag blangs nas sems can dmyal ba pa de rnams kyi rkub tu 'jug par byed do/ /de dag gi lus gzhu rgyud lta bu yin zhing dug rnon po shin du mkhrang la tsha ba yod pa'i lus can de 'jug par byed do/ /de rab tu 'jug pa na reg pa me lta bur tsha ste/ sems can dmyal ba pa de dag thog ma nyid du de'i rkub sreg par byed do/ /bsregs nas za'o/ /de zos nas nang du 'jug ste long ka sreg go/ /bsregs nas kyang za'o/ /long ka zos nas lhag ma med par byas te/ gyen du byung nas pho ba sreg cing za'o/ /mtsher pa sreg nas za'o/ /de yang zos nas rgyu ma dang pho ba'i gnas ga la ba der 'gro'o/ /song nas pho ba'i gnas dang / gzhan rgyu ma dang gnye ma dag 'cha' zhing za'o/ /thams cad lhag ma med par bsregs shing zos pa dang sems can dmyal ba pa de'i rus pa seng seng por byas kyang srog dang ni mi 'bral lo/ /de phyis mid pa ga la ba der song nas de snying la 'cha' zhing yongs su sreg par byed do/ /de sreg cing kun nas za ba na ngu skad 'byin cing cho nges 'debs la yongs su smre sngags 'don to/ /de'i nang na me spyi gtsug lta bu 'bar zhing phyi rol tu sems can dmyal ba pa'i me ste me de gnyis kyis sreg cing za'o/ /de nas me spyi gtsug lta bu des de'i mid pa'i nang zos nas kha ga la ba der song ste/ de dang por lce drung 'cha' zhing za'o/ / de zos nas rna ba'i phyogs su song ste/ de yang za'o/ /glad pa dang glad rgyas ga la ba der song ste/ des glad pa dang glad rgyas de dag zos shing thod pa dang mgor gtogs pa zos nas thod pa dang mgor gtogs pa phug ste 'gro yang de'i las kyi mthus sems can dmyal ba pa de 'chi bar ni mi byed do/ /de'i lus nas bu ga yod de/ bu ga de dag tu zhugs nas sems can dmyal ba pa de mes sreg par byed cing rab tu 'bar bar byed do/ /nyes par byas pa'i las kyi mtha' spyad pa de'i lus kyi nang dang phyi rol kun nas rab tu 'bar ba yin te/ de ltar lo 'bum phrag du mar za zhing za'o/ /de nas yang 'tsho bar 'gyur la de nas 'chi bar 'gyur ro/ /de nas yang 'tsho ste/ de ltar mi 'di de'i nyes par byas pa byas shing bsags pa'i mthus gnod pa dag myong bar 'gyur ro/ /de de las thar nas gar bab bab tu 'bros pa dang / des sbrul chen po'i tshogs 'ong ba mthong ngo / /des de mthong nas shin du skrag cing yi mug ste gar bab bab tu 'bros so/ /de nas las kyis byas pa'i rlung gi shugs lta bu'i sbrul de dag mi de la 'dzin to/ /bzung nas mche ba chen po rno zhing dug chen po drag pas kun nas bskor nas sems can dmyal ba pa de lan brgya 'am yang na lan stong du sreg par byed do/ /sdug bsngal gyis kun nas nyam thag pa de bkres pa dang / sgom pa'i me dang / sbrul gyi dug gi me dang / sems can dmyal ba pa'i me ste/ me gsum gyis sreg go/ /de ltar de srid du de'i sdig pa'i las bcom zhing spangs la zad par ma byas pa de srid du lo 'bum phrag du ma lo bgrang gis mi lang bar sreg go/ /de phyis sems can dmyal ba de las thar bar 'gyur te/ thar nas kyang las de dang rgyu 'thun pa'i 'bras bus tshe rabs stong phrag du mar yi dags dang dud 'gro dag tu skye bar 'gyur te/ yi dags rnams su shin du bkres pa dang / skom pas gdungs par 'gyur/ yi dags dang dud 'gro dag tu dud 'gror 'gyur ba thams cad du yang tshe rabs tshe rabs su 'byung zhing za bar 'gyur ro/ /de de las thar nas kyang gal te gnya' shing gi bu gar rusbal 'jug pa lta bur mi rnams dang skal ba mnyam par mir skyes na de tshe rabs lnga brgyar ma ning du 'gyur ba mthong ngo / /de nas yang dge slong las kyi 'bras bu rnam par smin pa shes pa des sems can dmyal ba chen po rab tu tsha ba'i 'khor la brtags na/ des thos pa las byung ba'i shes pas sems can dmyal ba mdag me bye ma lta bu'i char rtag tu 'bab pa zhes bya ba mthong ngo / /der sems can dag las gang gis skye bar 'gyur snyam nas des brtags na/ gang gis srog gcod pa dang / ma byin par len pa dang / 'dod pas log par g.yem pa dang / chang 'thung ba dang / brdzun smra ba dang / log par lta ba kun du bsten cing bsgoms te mang du byas pas 'gyur ro/ /gang gis tse lu ma sun 'byin par byed cing sun phyung nas kyang rjes su dga' bar byed la de nyid la shin du chags par byed na de lus dang bral nas ngan 'gro log par ltung ba sems can dmyal ba mdag me bye ma lta bu'i char rtag tu 'bab par skye bar 'gyur ro/ /der gang sems can dmyal ba yang sos la sogs pa'i gnod pa bsdus pa de dag thams cad dmyal ba 'dir 'byung ba'i steng du gnod pa khyad par du 'byung ba dag ni/ 'di lta ste/ sems can dmyal ba pa de'i 'khor ni dpag tshad lnga brgya yod la de thams cad rab tu 'bar ba/ bye ma rdo rje'i me mdag lta bu dag gis der dpe bya bar yang mi nus par gang ste/ 'di ltar 'tshed pa po yang nub par 'gyur na sems can dmyal ba pa las lci ba lta smos kyang ci dgos te/ de ji ltar chu 'bab pa'i shugs kyis ded pa de ltar der 'jug go/ /de nas yang las kyis nub pa 'byung bar 'gyur te/ de bye ma rdo rje'i gzegs ma lta bur zur gsum yod cing so rno ba de dag gis ji ltar de'i rus pa lhag ma yang med pa de ltar 'thag go/ /de nas yang 'tsho bar 'gyur la de nas yang 'thag ste 'chi zhing skye'o/ /de kun nas dga' ba med cing bye ma rab tu 'bar ba'i nang du nub ste/ sreg cing 'tshed pa dang skad 'byin cing yongs su smre sngags 'don te/ las kyis bsgribs pa sdug bsngal de las bdag nyid thar bar mi nus so/ /de yun ring mo zhig 'das la gal te las zad nas sems can dmyal ba de las thar bar 'gyur te/ de las de dang rgyu 'thun pa'i 'bras bus de tshe rabs stong phrag du mar yi dags dang dud 'gro dag tu bkres pa dang skom pas gdungs par 'gyur/ dud 'gro gcig la gcig za bar srog lan stong 'chad par 'gyur/ de las thar nas kyang gal te gnya' shing gi bu gar ru sbal 'jug pa lta bur mi rnams dang skal ba mnyam par mir skyes na de tshe rabs lnga brgyar dbul zhing nad bu can dang / smyo ba dang / ngag yid mi ches pa dang / gzhan gyis bkol ba dang / za mar 'gyur ba mthong ngo / /de nas yang dge slong las kyi 'bras bu rnam par smin pa shes pa des sems can dmyal ba chen po rab tu tsha ba'i 'khor la brtags na/ des thos pa las byung ba'i shes pas sems can dmyal ba nang na me mdag yod pa zhes bya ba ji ltar 'dug pa mthong ngo / /der sems can dag las gang gis skye bar 'gyur snyam nas des brtags na/ gang gis srog gcod pa dang / ma byin par len pa dang / 'dod pas log par g.yem pa dang / chang 'thung ba dang / brdzun smra ba dang / log par lta ba kun du bsten cing bsgoms te mang du byas pa ni snga ma bzhin du 'gyur ro/ /gang gis dge bsnyen ma bslab pa'i gzhi lnga yod pa stobs k yis mnan nas mi tshangs par spyad pas bslab pa dral cing 'di snyam du srung ma mo bslab pa'i gzhi las 'das pa chos ma yin pa gang yang med do snyam du blo skye zhing las kyi 'bras bu la yid mi ches na de lus dang bral nas ngan 'gro log par ltung ba sems can dmyal ba nang na me mdag yod par skye bar 'gyur ro/ /der gang sems can dmyal ba yang sos la sogs pa'i gnod pa bsdus pa de dag thams cad sems can dmyal ba 'dir 'byung ba'i steng du khyad par du 'byung ba ni 'di ltar sems can dmyal ba pa de kun nas me mdag gi ri lnga la 'di lta ste/ kun sreg dang / gting zab dang / mun nag thibs dang / me mdag tsha ba lta bu dang / las mngon sum pa rnams kyis yongs su bskor ba der sems can dmyal ba de kun nas dpag tshad stong yod la/ ri de dag kyang kun nas ri khor yug dang khor yug chen po dag dang ha cang mi ring ba na yod de/ der sems can dmyal ba pa des ri de dag me tog ud pa las gang ba lta bu dang / shing ljon pa dang / nags tshal dang / lteng ka phun sum tshogs pa lta bur mthong ste/ de dag bde ba myong bar bya ba'i phyir de gang gi tshe brgyugs pa dang / de'i tshe las kyi rlung me lta bu langs pas bdas so/ /me mdag de dag kyang rlung des bus so/ /bus pa des sems can dmyal ba pa de kun nas yongs su dkris so/ /lus thams cad bsregs pa de yang ri de dag gi gzugs sngon por mthong ste/ tsha bas gdungs pa mgon 'dod pa/ skyabs 'dod pa/ dpung gnyen 'dod pa de yang rgyug go/ /de gang gi tshe ri de'i drung du phyin pa dang / de 'di ltar kun nas byi brun la lcags kyi mda' 'phen pa 'phangs pa tsam gyis 'gro ba mi mngon pa de ltar sems can dmyal ba pa de me mdag gi nang du 'gro ba'i 'gros kyang gar song gtol med par mi mngon no/ / de der song ma thag tu 'di ltar sreg cing 'tshed la skol ba na mun pa mun nag gi nang du song nas dbang po thams cad 'gags shing sdug bsngal thams cad kyi gzhir gyur te/ nyes pa byas pa'i 'bras bu thams cad mngon sum du byung la des gang mi dge ba byas shing bsags pa de dag de'i las kyi shugs kyis 'ongs pa'i 'bras bu la nye bar spyod do/ /de ltar me mdag gi mun pa'i nang na dpung gnyen med cing grogs med pa sdug bsngal mi bzad pas nyam thag par gyur pa/ yun ring du rang gis byas pa'i las kyi 'bras bu la spyod par zhugs pa yun ring du 'tshed do/ /de gal te yang las kyi rlung de dag nyid kyis me mdag de dag gi nang nas 'byin par byed de/ lus thams cad bskol cing sdug bsngal thams cad kyis nyam thag pa de rkang pa gar bab bab tu 'dor ro/ /de nas yang 'byung bar 'gyur te/ gshin rje'i mi rnams kyis bzung ngo / /bzung nas kyang de'i rkub sog le rab tu 'bar bas gcod do/ /bcad cing gtubs nas yang shin du gzhon sha can du skye bar 'gyur te/ de ltar lo 'bum phrag du mar de sog le'i sdug bsngal myong zhing de 'di skad du rnam par sgra 'byin par byed do/ /bdag gis las dag byas pa yi/ /'bras bu de dag bdag nyid yin/ /'dod chags dgra yis gdungs pa na/ /phyi nas sems can dmyal bar 'ongs/ /'dod chags gdungs pa'i las can gyi/ /bag med sa na mi gtsang ba'o/ / zhags pa de yis bcings pa yis/ /bdag ni gnas 'di dag tu 'ongs/ /sngon chad bdag ni 'dod chags kyi/ /'bras bu tsha snyam mi byed de/ /mi shes pa yis bdag bslus pas/ /'dir ni bdag gis byas la spyod/ /brtse med shin du drag pa yi/ /sdig pa dag gi dbang du song / /sdug bsngal rgya mtsho mtha' yas pa/ /'di las bdag nyid ji ltar thar/ /sdug bsngal dag las sdug bsngal las/ /'di yis bdag ni yongs su 'tshed/ /bdag ni sems can dmyal bar zad/ /bde ba 'thob pa ma mthong ngo / /de ltar sems can dmyal ba pa de nang na me mdag yod pa'i sems can dmyal bar shin du sdug bsngal bas nyam thag cing ngu skad 'don te/ sems can dmyal ba pa de ji srid du de'i sdig pa'i las bcom zhing spangs la zad par ma byas pa de srid du sdug bsngal myong bar 'gyur ro/ /de phyis sems can dmyal ba de las thar bar 'gyur te/ thar nas kyang las de dang rgyu 'thun pa'i 'bras bus tshe rabs brgya phrag du mar yi dags dang dud 'gro dag tu skye bar 'gyur te/ yi dags rnams su bkres pa dang skom pas gdungs pa'i lus can dag gcig la gcig lta ba kho nar zad do/ /dud 'gro rnams su gcig la gcig za ba lus lan brgyar 'chi bar 'gyur ro/ /de de las thar nas gal te gnya' shing gi bu gar rus sbal 'jug pa lta bur mi rnams dang skal ba mnyam par mir skyes na de'i las kyi mthus rtag tu rims kyis 'debs shing dbul ba dang / nad bu can dang / yan lag ma tshang bar 'gyur ba mthong ngo / /de nas yang dge slong las kyi 'bras bu rnam par smin pa shes pa des sems can dmyal ba chen po rab tu tsha ba'i 'khor la brtags na/ des thos pa las byung ba'i shes pas/ sems can dmyal ba a la la zer zhes bya ba mthong ngo / /der sems can dag las gang gis skye bar 'gyur snyam nas/ des brtags na/ gang gis srog gcod pa dang / ma byin par len pa dang / 'dod pas log par g.yem pa dang / chang 'thung ba dang / brdzun smra ba dang / log par lta ba kun du bsten cing bsgoms te mang du byas pas 'gyur ro/ /des 'di ltar bslab pa'i gzhi gcig gam/ gnyis sam/ gsum 'am/ bzhi 'am/ lnga las gzhan pa blangs pa dang / bu sring ngam/ bu sring dang 'dra ba 'am/ grogs kyi chung ma 'os pa ma yin pa dag la des 'di ltar brda byas nas slu bar byed na de lus dang bral nas ngan 'gro log par ltung ba sems can dmyal ba a la la zer bar skye bar 'gyur ro/ /der skyes nas kyang gang sems can dmyal ba yang sos la sogs pa'i gnod pa bsdus pa de dag thams cad 'byung ba'i steng du khyad par du 'byung ba ni 'di ltar rlung shin du drag cing shin du rtsub la shin du mi bzad pa shugs kyis mgyogs pa dang ldan pa ldang la/ gang gis sems can dmyal ba de dag gi lus so sor khyer bar byed de/ ji ltar rlung chen po shin du mi bzad cing rtsub pas ras bal gyi spu 'am/ spu'i snod glongs na spu rnams kyi gdags pa yang mi mngon par khyer ro/ /gang gis khyer ba'i ras bal de dag gi spu rnams rlung des phyogs bcur bdas shing khyer ba phan tshun thug pa de ltar sems can dmyal ba de dag gi lus sems can dmyal ba'i rlung spu gri lta bu des 'di ltar bye ma'i tshad tsam du yang mi mngon par khyer ro/ /gang gis lus de dag spu tsam dang nyung nyung ngur nyung nyung ngur byed de/ yan lag dang nying lag thams cad gdags par yang mngon par mi byed do/ /las ngan pa byas pas yang lus de dag 'byung bar 'gyur te/ de ltar ji srid du de'i sdig pa'i las bcom zhing spangs la zad par ma byas pa de srid du yang 'dod chags kyi dbang gis snga ma bzhin du khyer ro/ /yun ring mo zhig 'das nas gal te brgya la de'i rlung gi gnod pa las thar na de la byi ba mche ba rdo rje lta bu yod pa 'byung la gang de'i rkub yungs 'bru tsam du rlog ste/ brlags nas ngu skad 'don bzhin du za bar byed do/ /de zos nas rgyu ma dag za'o/ /long ka thams cad kyang za'o/ /long ka de dag zos nas rgyab tu 'byung la de'i rgal tshigs za ste/ de ltar de'i las kyi mthus sems can dmyal ba de lo 'bum phrag du mar sdug bsngal myong bar 'gyur ro/ /de gal te de las thar bar 'gyur te/ de yun ring mo zhig 'das nas gal te nyon mongs pa de las thar nas de gar bab bab tu 'bros so/ /de nas rang gi lus las byung ba'i srog chags mar ko ta ka rnams kyis gang zhing de'i rkub kyang de nas 'cha' zhing za'o/ /de ji srid du de'i sdig pa'i las bcom zhing spangs la zad par ma byas pa de srid du srog chags mar ko ta ka de rnams kyi sdug bsngal mi bzad pas ngu bar byed de/ 'o dod 'bod/ sgra skad 'byin/ smre sngags 'don to/ /de phyis sems can dmyal ba de las thar bar 'gyur te/ thar nas kyang las de dang rgyu 'thun pa'i 'bras bus tshe rabs stong phrag du mar yi dags rang gi sha la za bar skye bar 'gyur te/ ji ltar de'i tshe des bdag nyid kyi bud med ma yin pa la mi tshangs par spyod pas rang gi sha la za ste/ des bdag nyid 'tsho bar byed do/ /gal te brgya la yi dags kyi 'jig rten de las thar nas kyang de phag gi skye gnas su skye bar 'gyur te/ ji ltar des rang gi ma dag la chos ma yin pa byas pas gang du skyes par rang gi mas za bar byed do/ /de gal te de las thar nas gnya' shing gi bu gar rusbal 'jug pa lta bur mi rnams dang skal ba mnyam par mir skyes na/ de rtag tu skyes pa'i nad kyis 'debs shing de nad drag po mi bzad pas gnod pa byed la de'i pho mtshan gcod par byed do/ /gal te brgya la de'i chung ma zhig yod par gyur na yang ji ltar pha rol gyi bud med 'os pa ma yin par phrogs pa ltar/ de yang rung ba ma yin pa'i mi dag gis de 'phrog par byed de/ mi'i don 'di thams cad med par byed pa ni 'di lta ste/ 'jig rten dang 'jig rten las 'das pa'i chos rnams dang 'gal ba 'os pa ma yin pa'i drung du 'gro ba'o/ /de nas yang dge slong las kyi 'bras bu rnam par smin pa shes pa des sems can dmyal ba chen po rab tu tsha ba'i 'khor la brtags na/ des thos pa las byung ba'i shes pas sems can dmyal ba chen po rab tu tsha ba'i 'khor sems can dmyal ba shar gyur pa thams cad sdug bsngal ba ji ltar 'dug pa mthong ngo / /der sems can dag las gang gis skye bar 'gyur snyam nas des brtags na/ gang gis srog gcod pa dang / ma byin par len pa dang / 'dod par log par g.yem pa dang / chang 'thung ba dang / brdzun smra ba dang / log par lta ba kun du bsten cing bsgoms te mang du byas pas 'gyur ro/ /bud med sdom pa blangs pa gang gis 'os pa ma yin pa'i dge slong dbang du byas te/ chang blud nas de 'khrul par byas shing yid la gcags pa bskyed na/ de lus dang bral nas ngan 'gro log par ltung ba sems can dmyal ba shir gyur pa thams cad sdug bsngal bar skye bar 'gyur ro/ / der gang sems can dmyal ba yang sos la sogs pa'i sdug bsngal dang gnod pa bsdus pa de dag thams cad 'byung bar 'gyur te/ gang gis rtag tu tshul khrims dang ldan pa 'os pa ma yin pa la 'os pa nyid du goms par byed na/ de rtag tu mi dge bar zhugs pa des lam ngan pa de nyid rjes su bsten par byed do/ /las kyi gzhi ngan pa byas pa'i ngang tshul can mi dge ba'i las kyi mtha' dpyad pa des mi dge ba'i lam de rjes su bsten cing goms par byed do/ /sems can dmyal ba de sdug bsngal ches drag pa dang / sdug bsngal ches mi bzad pa dang / sdug bsngal ches rtsub cing tsha ba dag shin du so sor myong bar 'gyur te/ der gang sems can dmyal ba yang sos la sogs pa'i sdug bsngal bsdus pa de dag thams cad 'byung ba'i steng du khyad par du 'byung ba ni 'di lta ste/ rkang pa'i mthe bo la sogs pa nas mgo'i bar du mtshon cha hu lu rab tu 'bar ba dag gis sha ma gtogs par lpags pa gcod par byed de/ de ltar de'i yan lag dang nying lag thams cad dang / lpags pa dag gcod par byed pa'i sdug bsngal shin du mi bzad do/ /de'i lpags pa de dag kyang sa'i nang du bcug nas sreg par byed de/ de'i lus lpags pa med pa'i lus de dag la gshin rje'i mi de rnams kyis lcags kyi snod kyi nang du ba tshwa rab tu skol ba khyer nas ldugs par byed de/ des de speg par byed/ skol bar byed do/ /sdug bsngal gyis nyam thag cing sdug bsngal tsha ba rtsub pas/ nyam thag pa de ngu skad 'byin cing cho nges 'debs la yongs su smre sngags 'don to/ /de ltar de lo 'bum phrag du mar sdug bsngal myong bar 'gyur zhing lo bgrang gis mi lang ba'i bar du myong bar 'gyur te/ ji srid du de'i sdig pa'i las bcom zhing spangs la zad par ma byas pa de srid du sdug bsngal tsha ba shin du mi bzad pas gdungs so/ /de phyis sems can dmyal ba de las thar bar 'gyur te/ thar nas kyang gal te yi dags dang dud 'gro dag tu ma skyes la gnya' shing gi bu gar rus sbal 'jug pa lta bur mi rnams dang skal ba mnyam par mir skyes na/ las de dang rgyu 'thun pa'i 'bras bus de dbul zhing nad bu can dang / lus dag la nad shin du mi bzad pas thebs par 'gyur/ de rgya mtsho'i nang gi bar dag tu gang ras 'thun par 'gyur ba mi ma tshang ba 'di lta ste/ rkang pa gcig pa dang / sna gcig pa dang / lag pa gcig pa dang / lus chung ba dang / tshe thung ba rnams te/ 'di lta ste/ der skyes pa nyi ma gcig cig thub par 'gyur ba mthong ngo // //'phags pa dam pa'i chos dran pa nye bar gzhag pa/ bam po bcu bzhi pa/ de nas yang dge slong las kyi 'bras bu rnam par smin pa shes pa des sems can dmyal ba chen po rab tu tsha ba'i 'khor la brtags na/ des thos pa las byung ba'i shes pas sems can dmyal ba chu bo rab med rab tu tsha ba zhes bya ba yod pa mthong ngo / /der sems can dag las gang gis skye bar 'gyur snyam nas des brtags na/ gang gis srog gcod pa dang / ma byin par len pa dang / 'dod pas log par g.yem pa dang / chang 'thung ba dang / brdzun smra ba dang / log par lta ba kun du bsten cing bsgoms te mang du byas pas 'gyur ro/ /stegs bu'i dbus su me bus nas lag pas bzung ste bskor nas sna blan pa grogs kyi chung ma nyams pa med pa la sun 'byin par byed cing sun phyung nas kyang mngon par dga' bar byed/ yang dag par dga' bar byed la/ mi dge ba de nyid la kun du spyod na/ de lus dang bral nas ngan 'gro log par ltung ba sems can dmyal ba chu bo rab med rab tu tsha bar skye bar 'gyur ro/ /der skyes nas gang sems can dmyal ba yang sos la sogs pa'i 'khor gyi gnod pa bsdus pa de dag thams cad 'byung ba'i steng du gnod pa khyad par du 'byung ba ni mun nag thibs pos nam mkha' gang ba nas las kyis byas pa'i dbyug pa dang / ral gri shin du rno ba dag rab tu 'bar ba der sems can dmyal ba pa de'i lus nang du nub bo/ /nang du nub nas sreg par byed cing yan lag dang nying lag thams cad shin du 'bugs par byed/ gsheg par byed/ 'tshed par byed/ yan lag dang / nying lag thams cad phan tshun 'bral bar byed do/ /de'i phyi rol me'i sdug bsngal gyis kyang sreg par byed cing nang du dbyug pa dang ral gris gsheg pa'i sdug bsngal ba na/ sdug bsngal shin du mi bzad cing tsha la rtsub pa gzhan dang mtshungs pa myong ngo / /sdug bsngal des bsgribs pa gar bab bab tu 'bros pa dang / des ngam grog chen po na chu bo rab med rab tu tsha ba zhes bya bar las las byung ba'i sbrul gdug pa rnams kyis rab tu gang bar mthong ngo / /der sdug bsngal gyis gdungs pa des 'khrul par mthong ste/ mi tho 'tsham par byed pa de rnams kyis de rab tu so sor phye nas sbrul gdug pa rnams kyis za bar byed do/ /sbrul gdug pa'i mche ba rnon po rnams kyis kun nas shin du sdug bsngal gyis nyam thag pa de/ der ji srid du de sdig pa'i las bcom zhing spangs la zad par ma byas pa de srid du ngu skad 'byin cing cho nges 'debs la yongs su smre sngags 'don to/ /de phyis de las yun ring mo zhig 'das shing lo bgrang gis mi lang ba na thar bar 'gyur te/ thar nas kyang gal te yi dags dang dud 'gro dag tu ma skyes la gnya' shing gi bu gar rus sbal 'jug pa lta bur mi rnams dang skal ba mnyam par mir skyes na/ las de dang rgyu 'thun pa'i 'bras bus de dbul zhing nad bu can dang / yongs su smre sngags 'don pa dang / gzhan gyis bkol ba dang / dbang po ma tshang bar 'gyur/ mi byad gzugs rta rgod ma 'dra zhing tshang tshing gangs ri lta bu'i nang du skye la/ der kha zas 'bras bu'i rtsa ba 'ba' shig gis 'tsho bar byed de/ de gzhan las skyes pa'i kha zas nams kyang mngon par shes par mi 'gyur ba mthong ngo / /de nas yang dge slong las kyi 'bras bu rnam par smin pa shes pa des sems can dmyal ba chen po rab tu tsha ba'i 'khor la brtags na/ des thos pa las byung ba'i shes pas sems can dmyal ba rtag tu mun pa zhes bya ba mthong ngo / /der sems can dag las gang gis skye bar 'gyur snyam nas des brtags na/ gang gis srog gcod pa dang / ma byin par len pa dang / 'dod pas log par g.yem pa dang / chang 'thung ba dang / brdzun smra ba dang / log par lta ba kun du bsten cing bsgoms te mang du byas pas 'gyur ro/ /phyi rol pa'i 'dod chags dang bral ba de phyis 'dod chags mngon par spangs te 'dod chags zhe sdang gti mug dang bral ba de bud med dag gis bslus nas yang 'dod pa rnams la 'jug par byed na/ de lus dang bral nas ngan 'gro log par ltung ba sems can dmyal ba rtag tu mun pa zhes bya bar skye bar 'gyur ro/ /der skyes nas kyang gang sems can dmyal ba yang sos la sogs pa'i gnod pa drag pa bsdus pa de dag thams cad 'byung ba'i steng du khyad par du ' byung ba ni 'di ltar srin bu sa rko zhes bya ba dag gis de ji ltar dbu ba la 'bigs pa de ltar mchu rdo rje ltar rno ba de dag sems can dmyal ba pa de'i nyes par byas pa'i las des 'byung bar 'gyur la gang dag pas ches mi bde ba byed pa yin te/ ches sdug bsngal ba yin no/ /sa rko de rnams kyis rus pa dag phug pa nas rkang gi bar du za ste/ ji ltar sems can dmyal ba pa'i sdug bsngal bsdus pa de dag thams cad de ltar brgya'i cha dang / stong gi cha dang / brgya phrag stong gi char yang mi phod de/ de ltar bdag nyid de dag las thar bar byed mi nus so/ /de gang dang gang du 'bros pa de dang de nyid du srin bu dag gis mi gtong bar byed de/ de ltar de lo 'bum phrag du mar sreg go/ /'tshed do/ /sems can dmyal ba pa'i sdug bsngal ba dag gis nyam thag pa sems can dmyal ba der yun ring du sreg cing 'tshed kyang de'i las byas shing bsags pa sems can dmyal bar grub pa'i mthus 'chi ba'i dus ni mi byed do/ /de ji srid du de'i sdig pa'i las byas shing bsags pa bcom zhing spangs la zad par ma byas pa de srid du 'tshed do/ /de gal te yi dags dang / dud 'gro dag du ma skyes la gnya' shing gi bu gar ru sbal 'jug pa lta bur mi rnams dang skal ba mnyam par mir skyes na/ las de dang rgyu 'thun pa'i 'bras bus de mdog ngan cing rkang lag rdol ba dang / tshong pa mo'i bran pho dang / bran mo bum pa thogs par 'gyur ba mthong ngo / /de nas yang dge slong las kyi 'bras bu rnam par smin pa shes pa des sems can dmyal ba chen po rab tu tsha ba'i 'khor la brtags na/ des thos pa las byung ba'i shes pas sems can dmyal ba gnod pa'i rgyud ces bya ba mthong ngo / /der sems can dag las gang gis skye bar 'gyur snyam nas des brtags na/ gang gis srog gcod pa dang / ma byin par len pa dang / 'dod pas log par g.yem pa dang / chang 'thung ba dang / brdzun smra ba dang / log par lta ba kun du bsten cing bsgoms te mang du byas pas 'gyur ro/ /tshul khrims dang ldan pa chos kyi lam las nyams pa med pa'i dge slong bag tsha ba med pa'i sar song ba las/ bud med sbyar ma zhig na re bdag la ci dga' ba mdzod cig /gal te dge slong khyod bdag dang lhan cig mjal bar mi mdzad na de bdag gis dge slong 'di bdag la 'dod par byed pa las de kho mos mi 'dod do zhes smra bar bya'o/ /des na khyod la chad pa chen pos gcod par 'gyur te/ gal te rgyal po'i 'khor nas sam/ gal te bdag gi khyim thab kyis gcod par byed do/ /gal te mdzad na de bdag gis khyod la bza' ba dang bca' ba mang po dbul bar bya ste/ de ltar 'o skol shin du dgyes par 'gyur zhing gzhan gyis kyang mi tshor bar 'gyur ro/ /'jig rten pa dag la yang dge slong 'di ni shin du tshul khrims dang ldan pa yin te/ 'di la mal cha dang / na ba'i rkyen gsos sman gyi yo byad mang po dag phul cig ces smra bar bgyi ste/ sbyin pa po dang / sbyin bdag tu 'gyur ro zhes de ltar 'jigs pas bsdigs nas brid de dge slong yang dag pa'i lam las nyams par byed na/ bud med de lus dang bral nas ngan 'gro log par ltung ba sems can dmyal ba gnod pa'i rgyud ces bya ba der skye bar 'gyur ro/ /der gang sems can dmyal ba chen po yang sos la sogs pa'i gnod pa bsdus pa de dag thams cad 'byung ba'i steng du gnod pa khyad par du 'byung ba dag ni 'di ltar gshin rje'i mi dag gis bud med de bzung ste btsir btsir nas lpags pa 'thog par byed do/ /lpags pa de dag btogs nas kyang yang g.yogs par 'byung zhing yang shin du gzhon nur skye ste/ kha dog shin du mi sdug par skye'o/ /de gshin rje'i mi rnams kyis dam por bzung nas lcags kyi so mangs rab tu 'bar ba blangs te de'i lus thams cad 'chad par byed/ rnam par gsheg par byed/ yongs su 'dral bar byed do/ /sdug bsngal gyis nyam thag pa'i bud med de nyes par byas pa'i las kyis bslus pa yun ring du ngu skad 'don cing cho nges 'debs la yongs su smre sngags 'don to/ /de ltar gnod pa myong bas gar bab bab tu 'bros pa dang / de nas las kyis sprul pa'i dge slong 'ong ba mthong ste/ sems 'dod pas bsgribs pa sems kyis yongs su bslus pa de de'i drung nyid du rgyug la/ de ltar 'dod pa dgra lta bu las rgyal bar bya bar dka' ba gang de'i gnas su rgyug par byed la de de dang phrad pa dang yongs su 'ju bar byed do/ /de yang me thab tu gyur nas kun nas rab tu 'bar ba der de rab tu 'jug par byed do/ /de mi des lo 'bum phrag du mar sems can dmyal ba gnod pa'i rgyud du ji srid du de'i sdig pa'i las byas shing bsags pa bcom zhing spangs la zad par ma byas pa de srid du sdug bsngal drag cing rtsub la shin du mi bzad pa myong bar 'gyur ro/ /de phyis sems can dmyal ba de las thar bar 'gyur te/ thar nas kyang las de dang rgyu 'thun pa'i 'bras bus tshe rabs lnga brgyar dud 'gro dag tu skye bar 'gyur ro/ /gal te gnya' shing gi bu gar rus sbal 'jug pa lta bur mi rnams dang skal ba mnyam par mir skyes na de yang bud med du 'gyur te/ grong khyer dang / grong khyer thams cad kyi ljan ljin 'phyag pa dang / grong khyer pa thams cad kyis smad pa dang / dbul zhing mdog ngan la rkang lag rdol ba dang / byad bzhin mthong na 'jigs su rung ba dang / pha ma dang / gnyen 'dab kyis spangs par 'gyur rtag tu chu phye bkra tsam gyis 'tsho zhing dri ma can dang / bgo ba ngan pa dang / lus kyi phyogs gcig nyams pa dang / lus shin du chad pa dang / 'gro ba na byis pa rnams kyis rdo dang / bong ba dag gis mngon par 'tshog ste/ sdug bsngal bas 'tsho bar 'gyur ba mthong ngo / /de nas yang dge slong las kyi 'bras bu rnam par smin pa/ shes pa des sems can dmyal ba chen po rab tu tsha ba'i 'khor la brtags na/ des thos pa las byung ba'i shes pas sems can dmyal ba srad bu'i rgyud 'bab pas dkrugs pa zhes bya ba mthong ngo / /der sems can dag las gang gis skye bar 'gyur snyam nas des brtags na/ gang gis srog gcod pa dang / ma byin par len pa dang / 'dod pas log par g.yem pa dang / chang 'thung ba dang / brdzun smra ba dang / log par lta ba kun du bsten cing bsgoms te kun du byas pas 'gyur ro/ /rgyal po snyems pas sam rgyal srid gzhan gyi yul 'khor 'phrog pa'i tshe dge slong ma nyon mongs pa med pa mthus sun phyung na de lus dang bral nas ngan 'gro log par ltung ba sems can dmyal ba srad bu'i rgyud dkrugs par skye bar 'gyur ro/ /der skyes nas kyang gang sems can dmyal ba yang sos la sogs pa'i gnod pa bsdus pa de dag thams cad ' byung ba'i steng du khyad par du 'byung ba ni 'di ltar sems can dmyal ba de thams cad 'di ltar dra ba rdo rje ltar sra ba'i nang du bcug nas der yan lag dang nying lag gi phyogs gang dang gang reg pa de dang der spu gri lta bus kun nas gcod par byed do/ /der yang ji ltar sbrang bu dag spu la rab tu 'phyang ba de ltar srad bu rdo rje lta bu'i dra ba la 'phyang ngo / /de nyid du skye zhing skye zhing 'chi ste/ gshin rje'i mi rnams kyis yan lag dang nying lag thams cad mda' rab tu 'bar ba dag gis sdog par byed do/ /de dra ba rdo rje ltar sra ba'i nang du bcug cing mda' dag gis kyang sdog pa na sdug bsngal shin du tsha ba drag cing mi bzad pa dag myong bar 'gyur te/ de ngu skad 'don cing cho nges 'debs la yongs su smre sngags 'don to/ /sdug bsngal mtha' yas pa dag gis nyam thag cing kun nas dbyer med la bcing ba kun gyis bcings pa na/ de gal te las kyi rkyen gyis thar na shin du sdug bsngal ba yin te/ gar bab bab tu 'bros so/ / de me mdag gi rlung dag gi nang du 'jug ste/ rab tu zhu zhing sreg la yongs su smre sngags 'don cing ngu skad 'byin pa na/ gnyis su med la grogs med pa des rgyang ring po na sgo chen po kun nas gsal ba zhig mthong nas der rgyug cing der rab tu 'jug par byed do/ /de yang sbrul chen po shugs rab tu drag cing gdug pa zhig yin te des mid do/ /sems can dmyal ba pa de lus kyi nang der sreg pa na skad 'byin par yang mi nus so/ / sbrul de yang las las byung ba yin te/ ji lta ji ltar bdag nyid yongs su dkri bar byed pa de lta de ltar sems can dmyal ba pa'i lus nang du zhugs pa de dag thams cad sgra skad 'byin par mi nus shing lus rtsa dang rgyus pa dang bral ba de dag thams cad bye ma ltar zhib mor byed de de ltar lo 'bum phrag du ma lo bye ba grangs med par de sbrul gyi lto der 'tshed do/ /'thub bo/ /de gal te yang sbrul des skyugs pa dang / lus shin du ma tshang ba/ lus rtsa dang / rgyus pa thams cad shig shig por gyur pa'i lus gar bab bab tu 'bros pa dang / des gshin rje'i mi rnams 'ong ba mthong ste/ de dag gis bzung nas de mtshon rnon po rnams kyis yan lag dang nying lag thams cad chu srin byis pa gsod ltar rnam par zhigs par byed do/ /de ltar ji srid du de'i sdig pa'i las bcom zhing spangs la zad par ma byas pa de srid du lo 'bum phrag du ma lo bgrang gis mi lang bar yun ring du sdug bsngal myong bar byed do/ /de phyis sems can dmyal ba de las thar bar 'gyur te/ thar nas kyang las de dang rgyu 'thun pa'i 'bras bus tshe rabs lnga brgyar yi dags dang dud 'gro dag tu skye bar 'gyur ro/ / gal te gnya' shing gi bu gar ru sbal 'jug pa lta bur mi rnams dang skal ba mnyam par mir skyes na de dbul zhing nad bu can dang gzugs mi sdug par 'gyur/ rtag tu sgra mi snyan pa dag gis gnod par 'gyur la lus thams cad dug gis yog cing nyam thag par 'gyur ba mthong ngo / /de nas yang dge slong las kyi 'bras bu rnam par smin pa shes pa des sems can dmyal ba chen po rab tu tsha ba'i 'khor la brtags na/ des sems can dmyal ba skra shad 'dzings pa dang / bya khwa yod pa zhes bya ba mthong ngo / /der sems can dag las gang gis skye bar 'gyur snyam nas des brtags na/ gang gis srog gcod pa dang / ma byin par len pa dang / 'dod pas log par g.yem pa dang / chang 'thung ba dang / brdzun smra ba dang / log par lta ba kun du bsten cing bsgoms te mang du byas pas 'gyur ro/ /sring mo chang gis ra ro bar gyur pa la mi rigs par byas na de lus dang bral nas ngan 'gro log par ltung ba sems can dmyal ba skra shad 'dzings pa dang / bya khwa yod par skye bar 'gyur ro/ /der gang sems can dmyal ba chen po yang sos la sogs pa'i sdug bsngal bsdus pa de dag thams cad 'byung ba'i steng du khyad par du 'byung ba ni 'di lta ste/ zangs kyi zhi ga dag gi nang du 'jug par byed do/ /zhugs nas kyang der 'ju bar byed do/ /de nas yang 'tsho bar 'gyur ro/ /de nas yang 'ju bar byed de/ zhi ga de dag gi nang du bcug nas 'tsho yang 'tsho la 'chi yang 'chi ste/ 'chi ba dang 'tsho bar byed do/ /de 'di ltar gshin rje'i mi rnams kyis sbud pa gnyis kyis 'bud de/ ji ltar de'i sol ba dang / de'i zhi ga dag dang / sems can dmyal ba de'i lus kyang mi mngon par 'bud do/ /de ltar de lo 'bum phrag du mar zhi ga dag gi nang du bcug nas ji ltar mes gser 'ju ba ltar 'tshed do/ /de ltar de sems can dmyal ba der nyes par byas pa'i las kyi mtha' dpyad pas 'tshed de/ de gal te las zad pas zhi ga de dag gi zhabs kyi nang du lhung ste/ gshin rje'i mi rnams kyis bzung nas brdung ba rnams kyis ji ltar lcags mgar sa dag la lcags gong bur byas te/ lcags mgar gyis kun du rdung ba de ltar kun du rdung ngo / /de ltar kun du rdung ba na brdungs pa dang srog chad la de nas yang brdung ba bteg pa dang 'tsho ste/ de ltar sems can dmyal ba pa de yun ring du lo bgrang gis mi lang bar 'tshed do/ /de brgya la de las thar na gshin rje'i mi rnams kyis rnga bo che'i nang du 'jug par byed do/ /bcug nas kyang las kyis byas pa'i rnga bo che'i sgra gang gis de'i snying zhigs par byed pa rnam pa de lta bu 'byung bar 'gyur te/ snying rnam par zhigs pa de yang 'tsho bar 'gyur la de nas yang 'chi bar 'gyur te/ de ltar de ji srid du de'i sdig pa'i las byas shing bsags pa bcom zhing spangs la zad par ma byas pa de srid du 'tsho zhing 'chi'o/ /de phyis sems can dmyal ba de las thar bar 'gyur te/ thar nas kyang las de dang rgyu 'thun pa'i 'bras bus tshe rabs drug brgyar dud 'gro dag tu skye bar 'gyur ro/ /gal te brgya la mi rnams dang skal ba mnyam par mir skyes na de rtag tu snying skrag par 'gyur/ ri dgas kyi sems ltar rnam par 'khrul cing rgyal po'i 'khor nas rtag tu 'tshe bar 'gyur/ gzhan gyis sgra 'byin par byed cing bcing bas kyang tshe zad par byed de/ nams kyang sems bde bar mi 'gyur ba mthong ngo / /de nas yang dge slong las kyi 'bras bu rnam par smin pa shes pa des sems can dmyal ba chen po rab tu tsha ba'i 'khor la brtags na/ des thos pa las byung ba'i shes pas sems can dmyal ba snying rje rje skad sgra 'byin pa zhes bya ba mthong ngo / /der sems can dag las gang gis skye bar 'gyur snyam nas des brtags na/ gang gis srog gcod pa dang / ma byin par len pa dang / 'dod pas log par g.yem pa dang / chang 'thung ba dang / brdzun smra ba dang / log par lta ba kun du bsten cing bsgoms te mang du byas pas 'gyur ro/ /mchod sbyin gyi lam log par lta ba log par mthong ba'i lam gyis sring mo gzhon nu sun 'byin par byed pa ni ji ltar bram ze'i smrang las bud med gzhon nu 'dod chags langs pa gang bag mar blangs n a des mi'i srog gcod pa dang 'dra ba 'thob par 'gyur ro zhes de ltar smrang ngan pas bslus pas 'os pa ma yin pa la byed pa de lus dang bral nas ngan 'gro log par ltung ba sems can dmyal ba snying rje rje skad sgra 'byin par skye bar 'gyur ro/ /der gang sems can dmyal ba yang sos la sogs pa'i gnod pa bsdus pa de dag thams cad 'byung ba'i steng du khyad par du 'byung ba ni 'di ltar gshin rje'i mi rnams kyis lag pa dag gis mde'u ste'u ka rab tu 'bar ba 'phen pa de ltar sems can dmyal ba pa 'phen te/ ji ltar bu sa la'i 'dab ma tsam du lus gang nyams pa dang rnam par nyams pa ma yin pa la lhag ma med par byed de/ de ltar y an lag dang nying lag thams cad nyams rnam par nyams shing rab tu 'bar la kun nas sdug bsngal mi bzad pas nyam thag pa mgon med cing grogs med la gnyis su med pa yun ring du lo bgrang gis mi lang bar sdug bsngal tsha ba rtsub pa myong bar 'gyur ro/ /gal te yang las zad pa'i rkyen gyis dbang gis mde'u ste'u ka dang / ral gri nyam nga ba de las thar na lcags kyi sa gzhi'i steng na me mdag rab tu 'bar ba'i phung por 'bying bzhin du 'bros so/ /sdug bsngal gyi gdung ba mang pos nyam thag cing ngu skad 'byin pa'i tshe/ thag nye ba na nags tshal chen po sprin nag po lta bu yod de/ kun nas bya skad snyan pas yongs su bskor cing de'i thag nye ba zhig na mtsho chen po chu rab tu dang ba zhig yod pa mthong nas de 'di snyam du sems so/ /kye e ma nag po 'di ni nags tshal yin la mtsho sngon po dang yang ldan pa zhig ste/ bdag ni 'dir bde ba thob par 'gyur ro snyam nas mgon 'dod pa/ skyabs 'dod pa/ dpung gnyen 'dod pa de nags tshal de'i drung du sa gzhi me mdag rab tu 'bar ba'i phung por 'bying bzhin du rgyug go/ /de gang gi tshe thag nye ba na/ nags tshal yod pa de dang bya dag gis kyang bskor ba mthong ba dang / shin du bde ba 'dod pa dpung gnyen 'dod pa de yang nags de dag nyid kyi drung du rab tu rgyug go/ /de gal te tshegs chen pos nags de'i drung du phyin pa dang / sngar gzhan du mthong la/ de gzhan zhig tu mthong ste sbrul shin du gdug cing rab tu 'jigs pa mgo stong yod pa/ mig rab tu 'bar ba/ byad bzhin 'jigs 'jigs ltar 'dug pa zhig dang / bya gang yin pa de dag kyang lus rab tu 'bar la de dag thams cad sems can dmyal ba pa'i sgra skad rab tu 'byin par mthong la sbrul des mod bzhin du bzung nas za bar byed de/ sdug bsngal sna tshogs kyis nyam thag pa cho nges 'debs pa na de yang sbrul de'i kha rab tu 'bar bas bzung nas kha'i bar du bcug ste za bar byed do/ /de las kyis byas pa'i sbrul de nyid kyis za ba ni yun ring po lo bgrang gis mi lang bar za bar byed do/ /de gal te las zad nas sbrul de nas thar nas skom pas gdungs pas mtsho de'i drung du rgyug go/ /mtsho de yang dud pa nag pos bsgribs shing nang yang sems can dmyal ba pa'i mes gang ste de mtsho der nub bo/ /mtsho de zabs su dpag tshad tsam ste/ der nub cing der sdug bsngal mi bzad pa myong ngo / /ji srid du de'i sdig pa'i las bcom zhing spangs la zad par ma byas pa de srid du rang gi las dang 'thun pa gzhan dang mi 'dra ba'i sdug bsngal myong bar 'gyur ro/ /de phyis sems can dmyal ba de las thar bar 'gyur te/ thar nas kyang las de dang rgyu 'thun pa'i 'bras bus tshe rabs bdun brgyar yi dags dang / dud 'gro dag tu skye bar 'gyur ro/ /de gal te gnya' shing gi bu gar rus sbal 'jug pa lta bur mi rnams dang skal ba mnyam par mir skyes na de dbul zhing nad bu can dang / gzhan gyis bkol ba dang / lam gyi bzhi mdo dang / lam po cher sprad pa dang / mi'u thung du 'gyur ba mthong ngo / /de nas gzhan yang dge slong las kyi 'bras bu rnam par smin pa shes pa des sems can dmyal ba chen po rab tu tsha ba'i 'khor la brtags na/ des thos pa las byung ba'i shes pas sems can dmyal ba snying rje chen po zhes bya ba mthong ngo / /der sems can dag las gang gis skye bar 'gyur snyam nas des brtags na/ gang gis srog gcod pa dang / ma byin par len pa dang / 'dod pas log par g.yem pa dang / chang 'thung ba dang / brdzun smra ba dang / log par lta ba kun du bsten cing bsgoms te mang du byas pas 'gyur ro/ /gang gis slob tu bcug la slob pa'i tshig de yang dag pa'i lam rab tu ston pa yin na de 'dod chags bdo bas mkhan po de'i chung ma nyes pa med pa sun 'byin par byed cing 'jig rten pa dag la yang 'di ltar 'di ni mkhan mo ma dang 'dra ste/ bdag ni bu dang mtshungs so zhes kyang brjod la yid gcugs par 'dod na/ de lus dang bral nas ngan 'gro log par ltung ba sems can dmyal ba snying rje chen por skye bar 'gyur ro/ /der gang sems can dmyal ba yang sos la sogs pa'i gnod pa bsdus pa de dag thams cad 'byung ba'i steng du khyad par du 'byung ba ni 'di ltar gong dang 'og na so mi mthun pa'i kha gcod pa mtshon 'dzugs pa lta bus yang dang yang du gcod par byed do/ /de gcod pa na nang du gtogs pa'i sha dang / rgyus pa dang / lpags pa dang / chu ser dang / rus pa dang / rkang gi bar thams cad mtshon cha dag gis gcod par byed de/ de ltar snying rje rje skad du ngu zhing yongs su smre sngags 'don to/ /ji ltar sems can dmyal ba pa gzhan dag kyang ngus pa'i sgra des de ltar sdug bsngal mi bzad pas nyam thag ste/ shin du snying rje rje skad nyam thag pa na sdug bsngal de dag thams cad myong ngo / /gcod pa na srog chad par mi 'gyur te/ de ltar des ji srid du de'i sdig pa'i las bcom zhing spangs la zad par ma byas pa de srid du lo 'bum phrag du ma kun du bcad cing bcad cing yang 'byung bar 'gyur ro/ /de phyis sems can dmyal ba de las thar bar 'gyur te/ thar nas kyang las de dang rgyu 'thun pa'i 'bras bus tshe rabs drug stong du sems can dmyal ba dang / yi dags dang / dud 'gro dag tu skye bar 'gyur ro/ /de las thar nas kyang gal te gnya' shing gi bu gar rusbal 'jug pa lta bur mi rnams dang skal ba mnyam par mir skyes na/ de gal te mngal du 'am/ gal te btsas nas sam/ gal te gan kyal du bzhag pa na 'am/ gal te gog tsam na 'am/ gal te rgyug nus tsam na 'chi bar 'gyur zhing gang dang gang du skyes par dbang po thams cad ma tshang bar 'gyur ba mthong ngo / /de nas yang dge slong las kyi 'bras bu rnam par smin pa shes pa des sems can dmyal ba rab tu tsha ba'i 'khor la brtags na/ des thos pa las byung ba'i shes pas sems can dmyal ba snying rje med pa'i sa zhes bya ba mthong ngo / /der sems can dag las gang gis skye bar 'gyur snyam nas/ des brtags na gang gis srog gcod pa dang / ma byin par len pa dang / 'dod pas log par g.yem pa dang / chang 'thung ba dang / brdzun smra ba dang / log par lta ba kun du bsten cing bsgoms te mang du byas pas 'gyur ro/ /mna' ma la mi rigs par byas na/ de lus dang bral nas ngan 'gro log par ltung ba sems can dmyal ba snying rje med pa'i sar skye bar 'gyur ro/ /der skyes nas gang sems can dmyal ba yang sos la sogs pa'i gnod pa bsdus pa de dag thams cad 'byung ba ni 'di ltar de dag sa'i steng du phung po brtsegs mar byas te/ gshin rje'i mi rnams kyi zangs kyi sa gzhi rab tu bsregs par brgya 'am yang na stong gcig gi steng du gcig phung por byas pa ni ji ltar skra'i rtse mo la skabs med pa de ltar gcig gi steng du gcig bsdus nas sreg go/ /de ltar de dag gcig gi steng du gcig bcer bas gnod pa na ji ltar de dag gcig gi steng du gcig shin du thags dam por bcer ba'i bar mi mngon pa de ltar bsdu bar byas nas gshin rje'i mi rnams tho ba thogs te kun du 'tshog go/ /de ltar ji srid du sdig pa'i las bcom zhing spangs la zad par ma byas pa de srid du lo 'bum phrag du mar sdug bsngal mi bzad pa tsha ba rtsub pa myong bar 'gyur ro/ / de phyis sems can dmyal ba de las thar bar 'gyur te/ thar nas kyang las de dang rgyu 'thun pa'i 'bras bus tshe rabs dgu brgyar yi dags dang / dud 'gro dag tu skye bar 'gyur ro/ /de las thar nas gnya' shing gi bu gar ru sbal 'jug pa lta bur mi rnams dang skal ba mnyam par mir skyes na/ de dbul zhing nad bu can dang / 'gran zla gzhan gyis bsad par 'gyur/ yul ngan par chu 'gram gyi mi kla klor skye bar 'gyur te/ der yang thams cad kyi tha mar 'gyur zhing tshe thung bar 'gyur ba mthong ngo / /de nas gzhan yang dge slong las kyi 'bras bu rnam par smin pa shes pa des sems can dmyal ba rab tu tsha ba'i 'khor la brtags na/ des thos pa las byung ba'i shes pas sems can dmyal ba shing skam bsdus pa lta bu zhes bya ba mthong ngo / /der sems can dag las gang gis skye bar 'gyur snyam nas/ des brtags na gang gis srog gcod pa dang / ma byin par len pa dang / 'dod pas log par g.yem pa dang / chang 'thung ba dang / brdzun smra ba kun du bsten cing bsgoms te mang du byas pas 'gyur ro/ /mi 'jigs pa sbyin pa byin pa'i chung ma nyes pa med par 'phrog pa ni de gsod pa'i sar khrid cing bsad du dogs pa na gang gis srog phyung ste/ mi de btang ba las des kyang drin med par byas nas de'i chung ma 'phrog par byed na/ de lus dang bral nas ngan 'gro log par ltung ba sems can dmyal ba shing skam bsdus pa lta bur skye bar 'gyur ro/ /der skyes nas gang sems can dmyal ba yang sos la sogs pa'i gnod pa bsdus pa de dag thams cad du 'byung ba'i steng du khyad par du 'byung ba ni 'di ltar sems can dmyal ba de chu bo sgra chen zhes bya ba de'i nang du 'jug par byed do/ /der sems can dmyal ba pa brgya stong du ma dag kyang 'jug par byed do/ /sems can dmyal ba pa de dag gi nang du 'jug par byed do/ /de de ltar de dag gi nang du zhugs shing shugs drag pos bdas pa rnams kyi 'og tu bcug nas de ji ltar skra'i rtse mo tsam yang mi mngon pa de ltar de dag gis steng nas steng du 'dug nas gnod par byed de/ de'i steng na sems can dmyal ba pa rnams 'khod do/ /'og tu ni zha nye rab tu bskol bas 'tshed cing sreg la gsod do/ /cho nges 'debs shing rtag tu sdug bsngal bas nyam thag ste/ de ltar sdug bsngal bas nyam thag pa phyir zhing las kyis byas pa'i chu srin dag nye bar 'ong ste/ gang dag gis sems can dmyal ba pa de yan lag dang nying lag thams cad za zhing 'byung ngo / /de shing skam ltar bsdus pa'i sdug bsngal myong ba na ji srid du de'i sdig pa'i las bcom zhing spangs la zad par ma byas pa de srid du yun ring por las kyis byas pa'i tshor ba shin du mi bzad pa'i sdug bsngal myong bar 'gyur ro/ /de phyis sems can dmyal ba de las thar bar 'gyur te/ thar nas kyang las de dang rgyu 'thun pa'i 'bras bus tshe rabs lnga brgyar yi dags dang dud 'gro dag tu skye bar 'gyur ro/ /de de las thar nas kyang gal te mi rnams dang skal ba mnyam par mir skyes na/ de bud med kun gyi yid chags par mi 'gyur te/ de ji ltar bu'i ngo bo dang pha'i ngo bo dang / ming po'i ngo bo lta bu dang / tshe rabs lnga brgyar pho mtshan dang bral bar 'gyur ba mthong ngo / /de nas yang dge slong las kyi 'bras bu rnam par smin pa shes pa des sems can dmyal ba chen po rab tu tsha ba'i 'khor la brtags na/ des 'khor bcu drug pa dag las bcu bdun pa ma mthong ste/ sems can dmyal ba chen po rab tu tsha ba ni 'khor bcu drug dag gis yongs su bskor to/ /sems can dmyal ba chen po rab tu tsha ba'i mi bzad pa chen po ni de dag yin/ mjug ni de dag yin/ mtha' ni de dag yin te/ de rang gis byas pa'i las kyi 'bras bu'i sa la spyod pa'i mi dag 'tshed cing sreg ste/ 'di ltar gzhan gyis byas pa 'thob pa ma yin pa las dang 'thun par gnod pa myong ngo / /rang gis byas pa chud za bar mi 'gyur la gzhan gyis byas pa dang phrad pa med de/ byas pa chud za bar mi 'gyur zhing rang gis byas pa dang 'thun par 'bras bu dag 'byung bar 'gyur ro/ /rang gis byas pa'i skye gnas las skyes pa'i sems can dag ni rang gi las la spyod pa yin te/ 'di ltar dge ba 'am sdig pa'i las su 'gyur ba de'i las kyi bgo skal la spyod pa yin no/ /de ltar dge slong de sems can dmyal ba rnams la sems can dmyal bar gtogs pa'i rjes su sems pa srid pa mngon par grub pa la cung zad kyang bde ba med de/ rtag pa med la ther zug pa med cing bdag dang bcas pa ma yin par mthong ste/ 'khor ba thams cad mi rtag pa dang / sdug bsngal ba dang / stong pa dang / bdag med par mthong ngo / /de de ltar mthong ba na/ 'dod pa thams cad dang 'dod pa kun du sbyor ba dang / 'dod pa so sor 'brang ba dang / 'dod pa la rnam par rtog pa dang / 'dod pa'i gzhi dag la rab tu 'dod chags dang bral bar 'gyur ro/ /de phyir zhing yang 'dod pa'i nyes dmigs dag la ches shin du 'jigs par 'gyur te/ de ltar lus dang ngag dang yid kyi g.yo ba shin du bsdams pa de la bdud dang bdud kyi 'khor gyis rab tu mi tshugs so/ /de lta de ltar goms par byed pa de 'khor ba'i tshe rabs mang po'i rgyud zhigs par 'gyur/ bsrabs par 'gyur/ spangs par 'gyur/ lhod lhod por 'gyur ro/ /de nas yang rnal 'byor spyod pa nang gi chos la chos kyi rjes su lta zhing gnas pa'i dge slong 'di ni/ kye ma spro ba ma bri ba yin te/ sa gzhan bcu gcig pa la zhugs pa yin no snyam mo/ /de ltar spro ba ma bri ba de la sa bla'i gnod sbyin dag dga' nas bar snang la spyod pa'i gnod sbyin dag la mngon par bsnyad do/ /de dag gis kyang rgyal chen bzhi pa dag la mngon par bsnyad pa nas snga ma bzhin du sbyar te/ tshangs ris kyi lha'i bar dag la 'di ltar 'dzam bu'i gling du rigs che ge mo zhig las rigs kyi bu zhig grong che mo zhig dang / grong rdal mang ge mo zhig dang / ming ga ge mo zhig ces bya ba skra dang kha spu bregs nas gos ngur smrig bgos te dad pas khyim nas khyim med par rab tu byung ba de bdud kyi yul gyi dngos po mi 'dod cing 'dod chags kyi dga' ba'i mod las skyes pa'i sred pa'i dngos po dang lhan cig gnas par mi 'dod/ nyon mongs pa sbrul lta bu dang lhan cig dga' bar mi byed la/ gzhan gyi nyon mongs pa dag mthong nas 'khor ba thams cad las yid byung ngo zhes mngon par bsnyad do/ /de thos nas tshangs chen gyi ris kyi lha rnams bdud kyi phyogs ni dma' bar gyur to/ /dam pa'i chos kyi phyogs ni mngon par mtho'o zhes dga' ba skyes so/ /de ltar sa gzhan bcu gcig pa la zhugs pa/ rnal 'byor spyod pa'i lha'i mthong ba dang yang dag pa'i lam mthong ba/ las kyi chos kyi rnam par smin pa shes pa/ lus kyi chad pa dang / ngag gi chad pa dang / yid kyi chad pa'i de kho na nyid mthong ba de 'di snyam du sems te/ 'di ltar lus kyi chad pa dang / ngag gi chad pa dang / yid kyi chad pa shin du zhib mor rab tu rnam par 'byed pa na/ dge slong dag lha dang bcas pa'i 'jig rten dang / bdud dang bcas pa dang / tshangs pa dang bcas pa dang / dge sbyong dang / bram ze dang / skye dgur bcas pa dang / lha dang mir bcas pa dag gis de ltar rab tu rnam par 'byed pa mi shes na/ gzhan mu stegs can kun du rgyu ba pa dag gis shes pa lta smos kyang ci dgos te/ gnas med cing skabs med la/ nga'i slob ma dang / gang nga las thos pa ni ma gtogs so snyam mo/ /de ltar chad pa gsum shin du phra ba rab tu rnam par 'byed pa de ni de ltar shin du phra ba yin no/ /dge slong dag gzhan mu stegs can kun du rgyu ba dag gis dris na lan de ltar gdab par bya'o/ /gzhan mu stegs can kun du rgyu ba pa dag ni dris pa'i lan la shin du rmongs par 'gyur te/ de ci'i phyir zhe na/ dge slong dag 'di ltar 'khor bar gtogs pa'i sems can thams cad kyi yul ma yin pa'i phyir ro/ /de dag gi lus kyi chad pa dang / ngag gi chad pa dang / yid kyi chad pa rnam pa gsum po de ni rigs pa yin te/ nyes pa dang bcas pa/ dri ma dang bcas pa/ khyad du gsod pa dang bcas pa la sems pa yin/ skye ba dang / rga ba dang / na ba dang / 'chi ba dang / mya ngan dang / smre sngags 'don pa dang / sdug bsngal ba dang / yid mi bde ba rnam par gcod pa ma yin/ 'phags pa rnams kyi chos mngon sum du byed pa yang ma yin/ mya ngan las 'das pa'i mthar thug pa ma yin/ gtan zad par byed pa ma yin/ zhi ba ma yin/ bde ba ma yin/ lha'i 'jig rten du skye bar byed pa yang ma yin te/ de dag lus kyi chad pa dang / ngag gi chad pa dang / yid kyi chad pa rnam pa gsum po la sems par byed do/ /dge slong dag gzhan mu stegs can kun du rgyu ba pa dag ni rang gi lus kyis mgu nas nga rgyal 'ba' shig byed par zad de/ skyon dang yon tan dpyod par mi byed do/ /de ltar lus kyi chad pa dang / ngag gi chad pa dang / yid kyi chad pa rnam pa gsum po de dag ni mi bzad pa chen po yin te/ de dag dang / nga'i dang / chung zad kyang 'dra ba med pa ni dper na mya ngan las 'das pa dang 'khor ba gnyis chung zad kyang mi 'dra ba bzhin te/ de ltar de dag gi chad pa rnam pa gsum dang nga'i dang 'dra ba med do/ /dge slong dag de de ltar lan gdab par bya ste/ phas kyi rgol ba dag gi ni stong pa yin la/ nga'i lam ni bde ba yin no/ /mya ngan las 'das pa ni zhi ba'o/ /'dus byas thams cad ni g.yo ba'o/ /'khor ba thams cad na bde ba med de/ gang rtag pa dang / brtan pa dang / ther zug dang / mi 'gyur ba'i chos can de dag la de ltar bsam par bya'o/ /dge slong dag de ltar lus kyi chad pa dang / ngag gi chad pa dang / yid kyi chad pa rnam pa gsum gyi de kho na nyid mthong ba'i dge slong de ni che ba yin no/ /rnal 'byor spyod pa'i dge slong thar pa'i grong khyer gyi de kho na nyid mthong ba de yang rtog par byed de/ dge slong de ji ltar na sa gzhan bcu gnyis pa la zhugs zhig gu snyam nas rnal 'byor spyod pa des brtags na/ dge slong 'di ni brtson pa ma bri ba yin la da dung du las ngan pa byas pa rnams kyi rgyu dang 'bras bu'i de kho na nyid la rtog par byed de/ sems can dmyal ba chen po bdun gyi 'khor dmyal ba mnar med pa zhes bya ba stong 'gyur du 'byung ba mthong ngo / /der sems can dag las gang gis skye bar 'gyur snyam nas des thos pa las byung ba'i shes pas brtags na/ gang gis bsams bzhin du ma bsad pa dang / pha bsad pa dang / bskal pa'i lhag mar gnas par 'gyur ba ni gang bskal pa'i tha mar nyes par byas pa'i las byas pa mnar med par 'grub par 'gyur ba de bskal pa'i lhag ma der smin to/ /gnod pa gang 'gags pa'i dus ni yang 'byung bar 'gyur ba med de/ de lta bas na byas pas bskal pa'i lhag mar smin te las khyad par can byas pas gnod pa drag pa rtsub pa tsha ba khyad par can 'byung bar 'gyur ro/ / gang mnar med pa'i las gcig byas pas ni sems la gnod par mi 'gyur te/ 'jam zhing bsam pa 'jam par 'gyur la/ 'di ltar mnar med pa 'di'i las gcig cig byas na gal te yang sems rtsub cing sems kyi bsam pa rtsub na/ de'i sdug bsngal drag pa dang rtsub par 'gyur te/ de'i gnod pa rnam pa de lta bur ni mi 'gyur ro/ /las kyi 'bras bu rnam par smin pa thams cad ni sems la rag las te sems kyi dbang du song zhing sems kyi kun du sbyor ba yin no sems kyi kun du sbyor bas 'ching ba'i sems can dag ni bcings pa yin la/ sems rnam par byang bas ni grol bar 'gyur ro/ /rim pa ji lta ba bzhin du mnar med pa rnams kyi gnod pa'i rim pa yang de ltar 'byung ste/ de'i sdug bsngal ba yang lus sbom zhing gzhon sha can du 'byung ngo / /de la mtshams med pa lnga'i las kyis ni lus dpag tshad lngar 'grub bo/ /las bzhis ni bzhi'o/ /las gsum gyis ni gsum mo/ /las gnyis kyis ni gnyis so/ /las gcig gis ni lus dpag tshad gcig 'grub par 'gyur ro/ /de nas yang dge slong des sems can dmyal ba chen po mnar med pa'i 'khor la brtags te/ sems can dmyal ba chen po'i 'khor 'di ni spu zing zhes byed pa yin no/ /des thos pa las byung ba'i shes pas sems can dmyal ba'i 'khor bcu drug pa ji ltar 'dug pa bzhin mthong ste/ gang dag gis sems can dmyal ba chen po de yongs su bskor ba ni 'di lta ste/ bya rog kha zhes bya ba dang / sa kun gyi 'og dang / tshor ba mtha' med ring dang / wa ltar sgra 'byin pa dang / lcags dang / lce spyang za dang / bya rog lto dang / lus zhum dang / sgra 'jigs ston dang / me tog kha ma bye ba lta bu dang / ri brtsegs 'bab dang / chu sgra dang / 'gram dang / ra dang / sdug bsngal kun dkris dang / dri 'dod dang / lcags snam dang / 'gro ba mer 'jig ste/ 'di dag ni sems can dmyal ba chen po mnar med pa'i 'khor bcu drug yin no/ /de nas yang dge slong des 'chi ba'i dus la sogs pa nas srid pa bar mar skye ba'i bar la rtog ste/ ji ltar na sems can dmyal ba pa mnar med par 'gro ba sdug bsngal las sdug bsngal nyid du 'byung bar 'gyur snyam nas des brtags na/ 'dod chags dang / zhe sdang dang / gti mug gi zil gyis non pa'i srog chags ngan pa byed pa byas pa dag ni mnar med par 'gro'o snyam mo/ /de la mnar med par ni kha cig 'di ltar de lha'i 'jig rten 'dod pa'i phyir mer 'jug par byed/ gang dag ri ngos g.yang sa las 'dor bar byed/ gang dag chur 'jug par byed/ gang dag zas mi sbyin pas gsod par byed de/ lam ngan pas rnam par rmongs pa thos pa ngan pas rnam par bslus shing gti mug pa dag ma gsod par byed do/ /kha cig mtho ris 'dod pas 'di ltar zas mi sbyin pas sam/ ri la g.yang du gtong bas sam/ mer 'jug pas sam/ chur 'jug pas ma bsad na mtho ris 'thob bo snyam nas de mtho ris la sred pas srog dang bral bar byed do/ /kha cig ni zhe sdang ba sems mi brtan pa'i ngo bo nyid kyi rkyen gyis te/ de ltar nyes pa gsum gyi zil gyis non pa'i srog chags dag gis srog gcod par byed pa ni mnar med par 'gro'o/ /de la mnar med pa ni kha cig zhing chen por gyur pa de ma shes nas khrag 'byin par byed pa dang / de bzhin du dge 'dun dbyen byed pa dang / dgra bcom pa yang srog dang bral bar byed pa ni phyir zhing zhe sdang gis zil gyis non pa yin te/ de ltar don thams cad med cing rab tu gcod par byed pa de dag ni sems can dmyal ba chen po mnar med par skye bar 'gyur ro/ /de dag 'chi ba'i dus kyi tshe kha cig rang gi lus nyid la mnar med pa'i me gnas shing 'byung bar 'gyur/ kha cig 'chi ba'i dus byas ma thag tu srid pa bar mar 'byung bar 'gyur la/ de'i 'og tu mnar med par skye bar 'gyur ro/ /gang gi tshe mnar med pa'i las byas pa de'i tshe de phan chad rab tu 'byung ba myong bar 'gyur ba'i las kyi skal ba nges par bsregs par 'gyur/ de'i sdom pa so sor skye bar mi 'gyur/ dge ba'i las kyi mtha' spyad pa bsregs pa myong bar 'gyur bar ma nges pa dang / lan grangs gzhan la myong bar 'gyur ba dang / skyes nas myong bar 'gyur ba de nges par sems can dmyal bar 'byung bar 'gyur/ de tshe thung bar yang 'gyur/ gang gis lo brgya thub par 'gyur ba de lo nyi shu zhig thub par 'gyur/ gang yid kyis rtog cing sems par byed pa de dag thams cad kyang ji ltar tshwa sgo la sa bon btab pa bzhin 'bras bu med par 'gyur/ de phan chad lha gang phyi bzhin du 'brang ba des de yongs su spong bar byed/ de'i las kyi mtha' 'bras bu med par 'gyur/ de'i dbang po yul rnams la zhan par 'gyur/ rtag tu rmi lam ngan pa dag kyang mthong bar 'gyur/ don med pa kun la yang sbyor bar 'gyur/ gal te de'i bu dang chung ma dang / bran dang bran mo dag yod na de thams cad kyis yongs su spong bar 'gyur/ rtag tu bkres pa dang / skom pas phongs par 'gyur/ gal te zas zhim po zhig sbyar na de yang ji lta ba bzhin du mi 'gyur skad kyang 'gag 'gag por 'gyur/ rtag tu bzhin gyi mdog ngan cing rtsub pa dang / rtag tu sems 'khrul pa dang / rang gi nye du dang / gnyen 'dab kyi tshogs thams cad kyis kyang yongs su brnyas pa dang / de'i sems la glo bur du skrag pa 'byung bar 'gyur/ 'jig rten 'di dag thams cad dud pas 'khrigs par mthong bar 'gyur/ de'i khams sngon ltar nams kyang mnyam par mi 'gyur/ rgyang ring po na gzugs mi sdug pa med bzhin du mthong bar 'gyur/ rlung chung ngus ded par 'gyur/ rtag tu bdag nyid tsha bas gdungs par 'gyur/ rtag tu mkhris pa'i nad kyis nyam thag par 'gyur/ de'i kha rtag tu kha ba dang / lan tshwa bro bar 'gyur/ mal gyi gzhi thams cad 'jam pa yin yang rtsub par 'gyur/ gling bu dang / khar rnga dang / rdza rnga dang / pi bang gi sgra dag kyang 'jigs shing bag tsha bar thos par 'gyur na sgra gzhan dag lta smos kyang ci dgos/ de'i sna yang rtag tu nyams par 'gyur te/ des rdzas dri zhim po dag kyang mi tshor ro/ /de'i lus thams cad las kyang dri nga ba 'byung bar 'gyur/ de'i skra dang / spu thams cad 'byi zhing de'i so dag mdog ngan par 'gyur/ rkang pa dang / lag pa rab tu rdol bar 'gyur/ bde ba thams cad las yongs su nyams par 'gyur/ rmi lam na lha dag gis rtag tu gtse bar 'gyur/ de rtag tu snying nad kyis 'debs par 'gyur/ de'i snying gas par 'gyur/ lus rnams kyang sdug par mi 'gyur/ gal te brgya la me tog dag btags na/ de dag myur du rnyis par 'gyur/ de'i gos dag kyang myur du zad par 'gyur te/ lus dang gos dag bkrus kyang dri ma can du 'gyur/ glo bur du lam gol bar 'gro na 'gyel bar 'gyur te/ de'i lus 'gyel bas nyams shing de'i lus la rma mang po 'byung bar 'gyur la yun ring pos 'tsho bar 'gyur/ gnyid log na mgul skams shing sad nas kyang chu 'thung ba nyid du 'gyur/ sbyin byed ma'i bus gnod par gyur pa na grong dang grong khyer dag stong pa nyid du mthong bar 'gyur/ gza' dang / skar ma dang / rgyu skar dag gi gzugs log par mthong bar 'gyur/ rlung chung ngu langs pa kun dang phrad na yang mtshon gyis btab pa lta bur drag par 'gyur/ me chung ngu dag gis reg na yang sreg par 'gyur/ nyi ma yang nyis gyur gyis tsha bar 'gyur/ zla ba yang dro bar 'gyur te/ zla ba shin du dro ba myong bar 'gyur/ chu bsil ba thams cad kyang dro bar 'gyur/ tshal dang nags tshal bde ba dag la 'jigs 'jigs ltar 'dug par mthong bar 'gyur/ bya'i skad snyan pa dag wa skad 'jigs pa lta bur thos par 'gyur/ 'jig rten thams cad dur khrod lta bur rig cing rtag tu dga' ba med par 'gyur/ de chang gis mchog tu dga' bar skye bar mi 'gyur/ ngo tsha med cing tshul med par 'gyur te/ srang dang bzhi mdo dag tu skye bo'i mngon sum du bshang gci byed par 'gyur// //'phags pa dam pa'i chos dran pa nye bar gzhag pa/ bam po bcwa lnga pa/ lha thams cad kyis kyang yongs su spangs par 'gyur/ don thams cad med pa'i skal ba can du 'gyur/ mdog tshal shing bsregs pa lta bur 'gyur/ skye bo dang yul mi kun dang zhe 'gras par 'gyur te/ de dag ni mnar med pa de'i mtshan ma tshe 'di la sngar 'byung ba yin no/ /de'i 'og tu de 'chi ba'i mtshan ma 'byung ba ni nyin par zla ba mthong zhing mtshan mo nyi ma mthong bar 'gyur/ rang gi grib ma mi mthong bar 'gyur/ glo bur du sgra mi snyan pa thos par 'gyur/ de'i sna yon por 'gyur/ de'i skra dang kha spu 'dzings par 'gyur/ thog mar rims kyis 'debs shing 'chi ba'i bar du nad kyis 'debs te/ de kun nas me mdag rab tu 'bar ba lta bu'i rims kyis shin du gdungs shing nad bzhi brgya rtsa bzhi lta bu ma yin pa dag gis nyam thag pa/ kun nas me mdag gi klung dag tu 'tshed pa na srin bu'i rigs brgyad bcu dag la rlung brgyad bcu dag lus dang rtsa dang / rgyus pa dang / lpags pa dang / rus pa dang / sha dang / tshil dag tu zhugs nas gnod par byed do/ /'di lta ste/ srin bu'i rigs brgyad bcu dag la rlung brgyad bcu dag gis gnod par byed do/ /srin bu spu can la rlung spu sun 'byin gyis gnod par byed do/ /srin bu kha gnag la rlung dag gi rjes su 'thun pas gnod par byed do/ /srin bu sbro med la rlung mi lam 'khrul ston gyis gnod par byed do/ /srin bu rab phye byed la rlung bzod med kyis gnod par byed do/ /srin bu rnam par rmongs byed la rlung lces brjed pa mi bzod kyis gnod par byed do/ /srin bu med mdog byed la rlung ro bro khrid byed kyis gnod par byed do/ /srin bu 'gred byed la rlung mchin pa 'jigs byed kyis gnod par byed do/ /srin bu 'og 'gro la rlung bshang ba steng 'gros gnod par byed do/ /srin bu ud ting ga la rlung gzhang rgyus gnod par byed do/ /srin bu kun rtog mthong la rlung dran pa nyams byed kyis gnod par byed do/ /srin bu dri nga la rlung lpags pa 'jig byed kyis gnod par byed do/ /srin bu rus pa legs skyes la rlung ro bro ba 'jigs byed kyis gnod par byed do/ /srin bu kha dmar la rlung sha 'jig byed kyis gnod par byed do/ /srin bu brtson bcas la rlung rgyags pa 'jig byed kyis gnod par byed do/ /srin bu gnad rgyu za la rlung rus pa 'jig byed kyis gnod par byed do/ /srin bu mtshon cha kha la rlung rus khu 'jig byed kyis gnod par byed do/ /srin bu spu gri kha la rlung gnyer mar song gis gnod par byed do/ /srin bu spu med la rlung mgo skya byed kyis gnod par byed do/ /srin bu khab gdong la rlung rdul 'jig gis gnod par byed do/ /srin bu s+phi s+phi dza la rlung gci ba shin du 'jug byed kyis gnod par byed do/ /srin bu rkang med la rlung zas ldan gyis gnod par byed do/ /srin bu bshang ba g.yeng byed la rlung so 'gas byed kyis gnod par byed do/ /srin bu gsum byed la rlung rtse'u chung la sogs kyis gnod par byed do/ /srin bu rgyu ma 'jig byed la rlung 'og tu 'gros gnod par byed do/ /srin bu dbos byed la rlung gyen du 'gros gnod par byed do/ /srin bu mdog bzang la rlung ngos ldang gis gnod par byed do/ /srin bu gzhang rkang la rlung mid par 'gros gnod par byed do/ /srin bu lpags byed la rlung sems sun 'byin gyis gnod par byed do/ /srin bu tshil gnod la rlung 'khrug byed kyis gnod par byed do/ /srin bu bsags byung la rlung mig 'dzums 'byed byed kyis gnod par byed do/ /srin bu dri mi zhim la rlung phan tshun phrad pa lngas gnod par byed do/ /srin bu sa ha tsu ra ba la rlung snying po 'jig byed kyis gnod par byed do/ /srin bu gnod byed la rlung snying po 'chags byed kyis gnod par byed do/ /srin bu snying po me tog skyed la rlung 'ong ba dang / 'gro ba dang gnas pa dang rgyug par byed pas gnod par byed do/ / srin bu ku ha ka chen po dang / phag 'tshong dang / nag po dang / za chen dang / srin bu rkang dro dag la rlung mig dang rna ba dang / sna dang lce 'jig gis gnod par byed do/ /srin bu rus pa 'jig byed la rlung mkhris pa 'jig byed kyis gnod par byed do/ /srin bu rkang gnag la rlung bad kan 'jig byed kyis gnod par byed do/ /srin bu tshigs gcod la rlung gzhungs pa 'jig byed kyis gnod par byed do/ /srin bu glad par rgyu la rlung srin mo gnas kyis gnod par byed do/ /srin bu glad rgyas za la rlung rkang pa ngos gnas kyis gnod par byed do/ /srin bu thod par rgyu la rlung sems med byed kyis gnod par byed do/ /srin bu skra za la rlung 'byed byed kyis gnod par byed do/ /srin bu rna rgyu la rlung 'gro ba nyams byed kyis gnod par byed do/ /srin bu snabs 'khri la rlung long bu 'jig gis gnod par byed do/ /srin bu tshil nad rgyu la rlung 'byin pa 'jig byed kyis gnod par byed do/ /srin bu kha chu 'debs la rlung tshigs 'byed kyis gnod par byed do/ /srin bu so drung za la rlung 'byin pa 'jig pa tshor med byed kyis gnod par byed do/ /srin bu kha chu za la rlung spro ba 'jig byed kyis gnod par byed do/ /srin bu bad kan rlan byed la rlung sna 'phul rengs byed kyis gnod par byed do/ /srin bu rab tu skyug byed la rlung ro bro ba bcu khyer ba nang du rgyu zhing du sh+ya ga ta ldog byed kyis gnod par byed do/ /srin bu sbrang rtsi myos la rlung tshigs 'khrugs byed kyis gnod par byed do/ /srin bu ro drug sred la rlung spu dang sen mo dang bshang ba 'jig byed kyis gnod par byed do/ /srin bu bar bur la rlung kha chu 'khrul byed kyis gnod par byed do/ /srin bu ro yid 'byung la rlung shig shig byed kyis gnod par byed do/ /srin bu rmi lam sred la rlung 'doms rengs kyis gnod par byed do/ /srin bu spu za la rlung bshang ba skams byed kyis gnod par byed do/ /srin bu so su ra la rlung rtsib logs 'ching byed kyis gnod par byed do/ /srin bu skye ba'i ma la rlung khwa bu ga drug gis gnod par byed do/ /srin bu u ma ba ra la rlung yan lag dang nying lag 'thung byed kyis gnod par byed do/ /srin bu rab zag la rlung me 'jig byed kyis gnod par byed do/ /srin bu spu gling la rlung yan lag dang nying lag kun byed kyis gnod par byed do/ /srin bu spu zan la rlung brtan 'gems kyis gnod par byed do/ /srin bu si mi si ma la rlung yan lag kun khyab kyis gnod par byed do/ /srin bu u ma bu ga la rlung sreg byed kyis gnod par byed do/ /srin bu rmas bslad la rlung 'jig byed kyis gnod par byed do/ /srin bu tsun tsu sgra la rlung steng 'og gis gnod par byed do/ /srin bu rgyus pa gcod la rlung mi'i srog gang la song ba 'chi byed kyis gnod par byed do/ /srin bu rtsa gcod la rlung mig 'byed kyis gnod par byed de/ ji ltar srog chags thams cad 'chi ba'i dus su srin bu dag la rlung dag gis so so nges par gnod pa byed pa de ltar mnar med pa ma yin te/ de'i las ngan pa byas pas 'og dang steng du mi mthun pa'i las kyis byas pa'i rlung rab tu drag pa dag so sor ldang ste/ de ltar rlung brgyad bcu dag gis srin bu brgyad bcu dag la gnod par byed do/ /rlung dag gis ji lta ji ltar srin bu dag la gnod par byed pa bzlog pa de lta bu mi byed do/ /dang por rlung pib pa la ka dri zhim pa dag gis de'i lus thams cad ji ltar bu ram shing dbang shing gis btsir ba de ltar skams par byed do/ /khrag thams cad skams par byed/ gnad thams cad du gnod par byed/ rgyus pa thams cad gcod par byed/ sdug bsngal gyis rkang thams cad rab tu 'ju bar byed do/ /nyes par byas pa las kyi mtha' spyad pa 'chi ba'i dus kyi tshe mnar med pa de'i khar srin bu gsal bar 'byung bar 'gyur ro/ /sems can dmyal ba pa de'i khyim ni 'di lta ste/ ko ba nag pos g.yogs shing phyogs gcig tu rab tu 'bar ba dang / yang ko ba nag po de'i phyogs gcig nas me 'byung ste/ khang pa'i nang thams cad rab tu 'bar bar mthong ngo / /des khyim rab tu 'bar bar mthong nas bzhin mog mog por gyur te/ ngu zhing skad 'byin la lag pa g.yob par byed/ mig 'gul bar byed/ kha nas kha chu 'dzag par 'gyur/ so dag gis so dag la 'debs par byed/ mchus mchu la reg par byed do/ /snang ba gnyis pa mthong ba ni mun pa mun nag thibs por gyur cing ri brag chen po la so sor 'jigs pa chen po seng ge dang / stag dang / dred dang / gung dang / sbrul 'jigs pas gang ba steng du 'ong ba mthong nas bshang ba 'byin to/ /de'i steng du ri de 'ong ba'i 'jigs pas lag pa rkyong bar byed pa dang / de nye du dag gis mthong nas nam mkha' la reg par 'dod do zhes smra'o/ /de'i 'og tu de bzhin du brag dang / nags tshal dang / ri 'or dang / lcug tshal mang po 'bar ba'i phreng ba steng du 'ong bar mthong ste/ shin du 'khrul pa ngu skad 'byin cing sgra ngar ngar po 'thon la bshang ba 'byin to/ /mig 'gyur bar byed cing 'jigs bzhin mog mog por mchi ma 'byin par byed/ spu tsher ma ltar 'greng / de'i rlig pa yang gyen du 'greng la khu chu gtong bar byed do/ /de'i 'og tu yang de 'byung ba chen po bzhi dag kun du 'khrug par 'gyur te/ 'di lta ste/ sa'i khams dang / chu'i khams dang / me'i khams dang / rlung gi khams so/ /de la sa'i khams 'khrugs pas yan lag thams cad sra ba'i ngo bos rdung bar byed de/ dper na rdo gnyis dag gi dbus su dbu ba'i gong bu bzhin gnod par byed pa dang / dper na bye ma chang pa nas gtor ba bzhin lus kyi dbyibs thams cad dang / yan lag dang nying lag thams cad kun nas gnod par byed/ rnam par zhigs par byed/ rnam par gcod par byed de/ de'i sa'i khams 'khrugs pas de sdug bsngal shin du tsha ba myong bar 'gyur ro/ /de'i 'og tu de'i las nyes par byas pas chu'i khams kyang rab tu 'khrugs par 'gyur te/ de 'khrugs pas de ngu skad 'byin cing sgra ngar ngar po 'don to/ /de'i rgyus pa dang shar bcas pa rlan cing lhod lhod por 'gyur te/ chu'i rgyun mang du 'byung bar 'gyur/ de'i rna ba dang mig nas kyang chu'i rgyun mang po byung ba nub par 'gyur ro/ /de'i 'og tu me'i khams kyang 'khrug par 'gyur te/ de me mdag gi tshogs mang po'i nang du bcug nas sreg go/ /de'i sdug bsngal ni yan lag dang nying lag thams cad sdug bsngal drag cing tsha la rtsub cing gdung ba skye bar 'gyur te/ 'jigs pas nyam thag pa de ngu skad 'byin/ 'o dod 'bod/ glo g.yas g.yon 'gyur bar byed/ lag pa g.yob par byed de/ mgo skad cig kyang 'jog mi phod do/ /de'i 'og tu rlung gi khams kyang 'khrugs par 'gyur te/ de'i rlung gi khams sra ba rtsub pa/ mang ba/ yang ba/ grang bas yan lag dang / nying lag thams cad mkhrang ba nyid kyis rdung bar byed/ mang ba nyid kyis gleb par byed/ yang ba nyid kyis nam mkha' la 'deg pa ltar byed cing g.yang sa chen por 'dor ba ltar byed/ grang ba nyid kyis rgyus pa dag skum par byed do/ /de 'chi ba'i dus kyi tshe sbrul rab tu gdug pa lta bur 'byung ba chen po bzhi dag rab tu 'khrugs pa'i sdug bsngal gyi rnam pa de lta bu 'byung bar 'gyur te/ gang dpe bya bar yang sla ba ma yin no/ /de'i lus thams cad bu ba'i gong bu bzhin du myur du 'gyes par 'gyur/ rnam par 'jig par 'gyur/ sreg par 'gyur/ 'tshed par 'gyur te/ kun nas sdug bsngal gyi tshor ba mi bzad pas nyam thag pa mal gyi mtha' ma nam mkha' la nyug ste/ de'i srid pa tha ma pa'i sems nye bar 'gyur ro/ /de ri brag che zhing mtho ba'i khar bteg bteg nas 'dor bar byed de bor nas de rten med pa nam mkha' la kun du 'khyam zhing yongs su 'khyam mo/ /de nas rgya'i 'bur lta bur de srid pa tha ma'i sems dang ldan par 'gyur te/ des gshin rje'i mi byad bzhin dang / rkang lag mi sdug par bsgyur ba/ kha gdong glang po che dang / rta dang / bong bu dang / phag dang / gung dang / seng ge dang / stag dang / gzig dang / ne'u le dang / wa dang / skyugs pa za ba lag na mtshon cha sna tshogs thogs pa dag gis sems can dmyal ba pa de la bsdigs pa na/ de gcig pus mthong gi gzhan gang gis kyang de mi mthong ngo / /de 'jigs pa mi bzad pas mig 'gyur zhing mar me'i snum zad nas 'chi ba bzhin du 'chi bar 'gyur te/ srid pa bar mar de'i gzugs bltar snang la thogs pa med pa byas pa byis pa lo brgyad lon pa lta bur skye bar 'gyur ro/ /'chi ba'i dus byas ma thag tu gshin rje'i mi rnams kyis 'dzin par byed de/ bzung nas kyang lcags kyi thag pa rab tu 'bar bas mgul nas 'ching zhing lag pa gnyi ga phyin ci log tu bcings so/ /des phyogs dang phyogs mtshams dang sa gzhi dang nam mkha' dag rtag tu 'bar rab tu 'bar ba kun du rab tu 'bar bar mthong ngo / /me'i nang de dag na gshin rje'i mi byad bzhin mi sdug par bsgyur ba du ma dag kyang mthong ste/ me'i nang de dag tu 'dor bar byed do/ /'dor zhing sems can dmyal ba pa de dag la bsdigs pa na lag na mtshon cha sna tshogs pa de dag mthong nas thag pa'i bcing bas bcings te gshin rje'i mi mchog tu 'jigs shing skrag par byed pa de dag gis spyo zhing lho phyogs dag tu khrid pa na/ 'di ltar snying rje rje skad yongs su smre sngags 'don to/ /ded dpon mi mkhas 'khrul pa ltar/ /gson pa'i sa nas bdag nyams so/ /byad bzhin bsgyur bas yongs bskor cing / /dbang med 'jigs pa dag tu khrid/ /rtag tu bar snang phyogs dag dang / /phyogs mtshams nyid dang sa rnams dag / thams cad bar chad med par ni/ /'bar ba'i phreng ba dag gis 'khrugs/ /sdug bsngal dbang med gang du khrid/ /bdag gis gnas ni mi shes so/ /'brog dgon dag tu bdas pa na/ /kun nas grogs ni byed pa med/ /sdug bsngal 'di las rnam grol bar/ /mgon skyabs byed pa gang yang med/ /nus pa med cing dbang med la/ /sdug bsngal me yis yongs gdungs so/ /bcing bas lag pa bcings nas su/ /dbang med bdag ni gang du khrid/ /don rnams dang ni mdza' bshes dang / /bu dag dang ni chung ma la/ /kyi hud bdag drin chud zos te/ /sdug bsngal 'di las skyob mi byed/ /dga' ba med cing nyams gyur la/ /sems ni sdug bsngal dag gis nyams/ /'chi ba'i zhags pas bzung ba yi/ /skyabs ni nye bar mi mngon no/ /bdag la khros ltar tshig smra ba/ / kun nas spyo ba brgyad par byed/ /'di gang yin zhig kun nas su/ /'ching ba 'di ni gang zhig yin/ /bdag gis gang dang gang mthong ba/ /yul dang de bzhin dgon pa ste/ /de dang de dag kun gyi nang / /thams cad me yis yongs su bskor/ /phyogs rnams kun na dga' med de/ /'khrug pa dag gis yongs su bskor/ /skyabs su 'gyur ba yong med cing / /bdag la kun nas grogs med do/ /mun gnag mi bzad nang du 'jug / me mdag phung por bcas pas bsgribs/ /nam mkha' rgyu skar gza' dag dang / /skar ma dag kyang mi mthong ste/ /'di dag thams cad log pa yin/ /mun gnag dag gis yongs su bskor/ /dbang po lnga ni thams cad dag /kun nas phyin ci log tu gyur/ /bdag gi lus ni thams cad dag /sog les yongs su gsheg par byed/ /skyabs su 'gyur ba yong med de/ /bdag gi gnas ni gar 'gyur zhig / sdug bsngal tshogs ni 'phel 'gyur te/ /bdag ni kun nas yongs su bskor/ /lus dang sems las skyes pa yi/ /sdug bsngal yang dang yang du 'phel/ /sdug bsngal gyis ni non pa na/ /de la kun nas grogs med do/ /rang gi las kyi 'bras bus dkrugs/ /las kyis bskyed pa'i gshin rje dang / /'khor dag shin du 'khrugs nas su/ /bltas te de nas tshig smras pa/ /sngon chad bya ba gang byed pa/ /de ni phyi nas yongs su sems/ /gti mug gis ni yongs bslus pa/ /phyi nas ci zhig yongs su gdung / /gnod las gnod pa gang che ba/ /sdig pa las ni sdig pa che/ /khyod kyis ngan byas gang byas pa/ /sdug bsngal las ni sdug bsngal che/ /bskal pa 'am bskal pa'i lhag ma ru/ /khyod ni me yis sreg par byed/ /ngan byas mang po ci byas pa/ /gti mug yongs su bsam par gyis/ /las kyi zhags pas bcings pa la/ / lha dang lha min dri za dang / /sha za lto 'phye srin po dag /khyod la yongs su skyob mi byed/ /las kyi zhags pas gang bcings pa/ /mi de sems can dmyal bar bcings/ /rgyu dang rkyen gyis 'gro ba yi/ /thams cad dbang med khrid par byed/ /las byas nges par 'gro ba ni/ /ma ni gsod par byed pa ste/ /sdig pa 'di ni shin du sdig /sdig las sdig pa chen po yin/ /gang gis khyod ni sngon bskyed pa/ /pha yi khu chu las bskyed na/ /de la khyod kyis gnod byas shing / /dbang med mtshon gyis srog bcad byas/ /gang zhig khams gsum khyad par 'phags/ /nyes pa thams cad rnam spangs shing / /'ching ba kun las nges grol ba/ / de la khyod kyis sdig pa byas/ /chos rnams kun gyi gter yin zhing / /thar pa'i sgo ni rnam 'byed pa/ /khyod kyis dge 'dun dbyen byas sdig /de yi 'bras bu 'dir 'ongs so/ /sbyor ba thams cad las 'das shing / / bag la nyal ba kun spangs pa/ /rmongs pas dgra bcom gnod bskyed pa'i/ /de yi 'bras bu nye bar spyod/ /chos rnams kun la me lta bu/ /bden pa rin chen rnam 'jig pa/ /rtag tu khyod kyis brdzun smras pa'i/ /de yi gnod pa spyad par gyis/ /phan tshun dbyen ni bya ba'i phyir/ /bsams bzhin du ni yang dang yang / /phra ma de ni mngon smras pa/ /de yi 'bras bu 'dir 'ongs so/ /gang gi rgyud la gdung byed mchog / mtshon dang me dang dug lta bu'i/ /khyod kyis rtag tu tshig rtsub smras/ /de yi 'bras bu nye bar spyod/ /snga phyi 'brel pa med pa'i tshig /don med rigs pa med pa dang / /'brel myed mang du smras pa yi/ /de yi 'bras bu 'dir thob po/ /srog ni rtag tu lhur len pa/ /srog chags dbang med 'jigs byas shing / /khyod kyis mang du rnam par gtses/ /de yi 'bras bu mang po thob/ /chags pas non pa'i yid kyis su/ /khyod kyis gzhan gyi nor rdzas phrogs/ /gang dag 'dod pa'i dbang song ba/ /de yi dus ni 'dir 'ongs so/ /rnam rtog bud shing byung gyur pa/ /me ni gnyis pa 'dra ba yin/ /'dod pa dag la log par spyad/ /don med ci zhig yongs su gdung / /gzhan gyi nor la chags sems pa/ /rang nyid kyi ni bsam pas bsams/ /de la bya bar nus pa med/ /de yi 'bras bu de ring spyod/ /gang la gnod sems mang yod pa/ /de yis gnod sems yongs su bsams/ /dmyal dang nye ste de lta bas/ /nged cag gis ni yongs su 'dren/ /log par ston pa mi bzad de/ /las gnyis rnam par 'jig byed pa/ /khyod kyis log par lta ba la/ /gzhan gyi yid dag mngon par bcug /lus dang ngag dang yid rnams kyis/ /sdig pa'i chos ni 'di dag ste/ /gti mug rjes su zhugs khyod kyis/ /byas shing gzhan dag rab tu sbyar/ /byas pas nges par 'gro ba yi/ /dmyal ba drag po 'di thob ste/ /nged cag gis ni yongs bskor ba/ /gti mug ci zhig yongs su gdung / /rgya mtsho'i khyad par gang yin pa/ /gang gi khyad par chu thigs tsam/ /gang dag mi bzod thob pa yi/ /sdug bsngal 'di ni de tsam mo/ /mi ni gang zhig sdig byed pa/ /de bdag nges par phangs mi byed/ /bdag gi yid la sdig pa byas/ /sdig pas sems can dmyal bar 'tshed/ /sdig pas sdig pa'i rjes su 'gro/ /de bzhin dge bas dge bar mthong / /sdig byed dge la sdang ba ni/ /sems can dmyal bar skye bar 'gyur/ /mi dge'i blo yis dge ba dag /btang nas ci phyir sdig par 'gro/ /rmongs pas rin chen bor nas su/ /ci phyir rdo'i rjes su rgyug /sangs rgyas rin chen la sogs pa/ /sna tshogs chos kyis mtshungs par gang / /mi yi chos ni thob pa dag /ci phyir mang du spyad mi bya/ /sdig pa yongs su spangs pa yin/ / sems ni rtag tu dge ba dag /mya ngan 'das pa lag na yod/ /rtog pa rnams kyis mi mthong ngo / /thog ma dbus dang mthar dge ba/ /bde ba'i chos ni rtag tu 'byung / /thog ma dbus dang mthar mi dge/ /sdig pa'i las kyi 'bras bu yin/ /de ltar rtag tu sdig spangs shing / /rtag tu dge la dmigs par gyis/ /sdig pa yongs su spangs pa ni/ /rtag tu bde la gnas pa yin/ /'khor ba thog ma med pa nas/ /yang dang yang du sdig pas gdungs/ /byis pa gti mug dbang song ba/ /ci yi phyir na skyo mi bya/ /sdig pa yis ni sngon bsregs shing / /phyi nas me yis sreg par byed/ /sdig pa'i rgyu las byung ba'i dmyal/ /sdig pa rnams su yongs su 'tshed/ /sdig pa don med smra ba ni/ /sems ni yang bas smra bar byed/ /tsha ba gang gis yongs sreg pa/ /ci yi phyir na sdig par byed/ /khyod ni sgo dag du mar gyur/ /de lta bas na sdug bsngal 'gyur/ / de ltar de ni bsdigs pa na/ /gshin rje'i pho nya du ma yis/ /las kyi zhags pa'i dbang song la/ /mi bzad dmyal bar 'khrid par byed/ /de yi yan lag dang nying lag thams cad shing khong stong gi nang na me 'bar ba lta bus bsregs shing thag nye ba na sems can dmyal ba chen po'i sgo gang dpe bya bar yang mi nus pa mthong ngo / /'dir tshigs su bcad pa/ gru bzhi pa la sgo bzhi yod/ /dpag med sbrul gyis rnam par phye/ /sems can dmyal ba du ma dag /dbang med der ni 'tshed par byed/ /de ltar de sems can dmyal ba pa rnams kyi sgra chen po shin du mi bzad pa rtsub pa tsha ba mi snyan pa tha dad pa 'jigs su rung zhing gzhan dang mtshungs pa med pa thos nas mi mthun pa dag dpag tshad nyi khri lnga stong nas de mngon par thos so/ /thos nas gang sems can dmyal ba gzhan du skyes pa'i sems can de dag kyang sems can dmyal ba'i sdug bsngal de thams cad brjed nas sems 'khrugs par gyur cing de las gzhan pa sems can dmyal ba pa thams cad kyang byas pa'i sdug bsngal brjed nas 'chi ba'i dus byed na/ gang gis sngon gyi sgra de dag rnams kyang ma thos pa lta smos kyang ci dgos/ sems can dmyal ba pa'i snang ba byas pa'i srid pa bar ma la sdug bsngal sna tshogs kyis nyen pa de'i sems rnam par rmongs te/ yang phyir zhing sgra des bcu 'gyur du rnam par rmongs so/ /de yi sdug bsngal gyi rnam pa mtha' dang mu med pa lus dang yid la sdug bsngal gyis nyam thag pa'i sems de phyir zhing rmi lam gyi gzugs brnyan lta bur rnam par 'khrug par 'gyur ro/ /de mnar med pa dang nye bar gnas pa de'i tshe/ las kyis bskyed pa las kyis byas pa'i rlung grang ba ldang ste/ khyad par gang sa'i 'og na chu yod cing / sa'i 'og gi bar na chu gnas pa bar gyi bskal pa'i nyi ma thams cad kyis kyang sngon ma reg pa de lta bu bas kyang de grang ste/ gang mi'i chab ram shin du grang ba dang 'dra'o/ /chu de dag pas shin du grang ba las kyis byas pa'i spu gri lta bu'i rlung de ri dpag tshad bcu pa yang sgyel nus par ldang ste/ phal cher rlung de'i nang du bcug nas srid pa bar ma'i grang ba rnam pa de lta bus gzugs la sogs pa'i phung po bdas so/ /'di ltar de dang mthun pa'i nyi ma bdun shar ba'i tsha ba stong pas lhag par tsha ba'i me mngon par 'bar ro/ /srid pa'i yan lag ni 'di yin te/ 'di lta ste/ nye bar len pa'i rkyen gyis srid pa 'byung ngo / /de 'dod pa bskyed ma thag nyid du srid pa bar ma'i phung po 'gag par 'gyur la srid pa gzhan du skye ba'i tshor ba'i phung po dag 'byung bar 'gyur te/ dper na sum bcu rtsa gsum pa'i lha rnams kyi mig lnga dang / bzhi dang / gsum 'byung ba de bzhin du las kyi dbang gis mi 'dra ba'i lus dpag tshad gcig pa mngon par 'grub par 'gyur ro/ /de mgo thur du bstan cing rkang pa gyen du bsgreng ste ltung ba na mnar med pa'i me lce rab tu 'bar ba'i shugs kyis brdabs shing rab tu nyams pa lo nyis stong du 'gro'o/ /de ltar spyi'u tshugs su de mnar med pa'i sar song ste/ de'i 'og na de las gzhan pa 'di lta ste/ mnar med pa med do/ /'dod pa'i khams 'di'i mtha' ni mnar med pa yin la gzugs kyi khams kyi mtha' ni gyen du drangs te 'og min gyi lha'i bar yin te khams gnyis so/ /de ltar de ltung ba na skye ba'i srid pa thob nas de ma thag pa'i rkyen gyis rtag tu gnod cing sdug bsngal gyi shugs rab tu 'byung ste/ de'i drung na rab tu tsha bar skyes pa'i sems can dmyal ba pa dag gzhan 'phrul dbang byed kyi lha dang 'dra bar mngon no/ /de 'bar ba 'khrugs shing mi bzad pa'i sems can dmyal ba'i nang du skyes so/ /skyes ma thag tu sems can dmyal ba pa'i mes yud tsam zhig gdungs te/ de'i tshe lus yongs su bsregs shing tsha bar 'gyur ro/ /de'i gnas de yongs su tshol bar byed de/ gal te ri'i rgyal po ri rab la 'khyud cing / de ltar de stong phrag drug bcur yongs su bskor la/ de chu bo dang / shing ljon pa dang / lteng ka dang / nags tshal du bcas pa bskor ba tsam gyis sems can dmyal ba pa'i me du mas sreg par byed de/ sems can dmyal ba pa gzhan yun ring du skyes pa dag ni ma gtogs so/ /de ltar sreg pa 'di chung z ad 'dra ba bstan pa ni 'di ltar me shin du tsha bas dog le yongs su bsregs pa'i nang du snum gyi thigs pa bsregs pa de bzhin du las kyi rgyu gcig gis mnar med par skyes pa'i lus las 'byung po ri tshogs gnas dang bcas pa dang / ri dang / lha dang / lha ma yin dang / ri chen po dang / sman ljongs dang / gling dang / tshal du bcas shing rgya mtsho dang bcas pa sreg go/ /gang gis las gnyis byas na des rgya mtsho gnyis snga ma bzhin sreg go/ /gang gis gsum byas na rgya mtsho gsum sreg go/ /de ltar bzhis rgya mtsho bzhi ste/ lus la dog le bsregs pa bzhin lhung ma thag tu sreg go/ /ri khor yug dang / khor yug chen po dang / rgya mtshor gtogs pa dag ni klu dang / lha ma yin dang / dud 'gror skyes pa'i tshogs dang bcas pa dang / mi'i gnas bzhi dang / 'dod pa na spyod pa'i lha drug dag gi skyabs yin no/ /de ci'i phyir zhe na/ mnar med pa'i sems can dmyal ba pa dag gi lus dri nga ba des de dag thams cad ma rung bar 'gyur te/ de ltar sems can dmyal ba pa dag dri nga ba'i lus las dri 'byung ngo / /ri mthon po dag gis dri de yong mi tshor te/ sems can dmyal ba pa de las byas shing bskyed pa dang / ma bskyed pa dang / rnam par phye ba'i dri nga ba de dri gzhan gyis dpe bya bar mi nus so/ /de'i tshe sems can dmyal ba pa rnams kyi bya'i rigs dag 'byung bar 'gyur te/ mchu rab tu 'bar ba mkhrang zhing rno la shugs ser ba myur du 'bab pa lta bu'i shugs kyis sems can dmyal ba pa de dag thams cad kyi lus dang / lpags pa dang / sha dang / tshil dang / rus pa dang / rkang rnams rab tu 'dren te/ 'di lta ste/ me las me 'byung ba de bzhin du 'byung zhing der gnas der 'gro de la za'o/ /sems can dmyal ba pa rnams kyi sha zos/ rus pa phug /sha drangs nas khrag la 'thung ngo / /de dag kyang zos nas rkang dag la za'o/ /de nas ngu zhing cho nges 'debs la yongs su smre sngags 'don cing rmongs pa na bya'i rigs gzhan dag 'byung bar 'gyur te/ 'di lta ste/ bya me lce spyod pa zhes bya bas gang me lce'i nang du zhugs nas sreg ste/ mthong ma thag tu sems can dmyal ba pa rnams kyis glad pa phug nas khrag 'thung ngo / /bya glad pa'i bar na rgyu zhes bya bas glad pa phug nas mchu rab tu 'bar bas glad rgyas 'thung ngo / /bya zas su lce za zhes bya bas lce kha gnyis su drangs nas rab tu za bar byed do/ /de yang zos shing yang pad ma'i 'dab ma ltar shin du 'jam pa skye'o/ /bya so 'byin zhes bya bas mchu gnyi ga phra skam ltar 'dzin cing rab tu 'bar bas so thams cad 'byin par byed do/ /bya mid pa la sogs pa 'dren pa zhes bya bas gang mid pa'i sha dag zhib mor 'thub cing za bar byed do/ /bya glo ba za ba zhes bya bas gang glo ba dag za bar byed do/ /bya pho ba za ba zhes bya bas gang snying dag gshags nas der zhugs te ro bro ba za bar byed do/ /bya mchin pa 'jig byed ces bya bas gang mchin pa dag za bar byed do/ /bya bu gar za ba zhes bya bas gang sems can dag gi bu ga za bar byed do/ /bya sgal tshigs dga' zhes bya bas gang sgal tshigs dag phug nas gzhungs pa dag zos te phyir 'byung ngo / /bya gnad gsang zhes bya bas gang gnad kyi bar thams cad phug cing gnad dag phye ste/ bar du zhugs nas ngu bzhin du rkang gi bcud 'thung ngo / /bya khab ltar 'bigs zhes bya bas gang mchu khab lta bus khrag 'thung ngo / / de bzhin du bya 'gram rus kyi bar du zhugs shing rus pa gzhan dag phug nas rus pa'i bar na gnas shes bya bas phyi rol na yang za bar byed do/ /bya lpags pa rnam drug za zhes bya bas gang lpags pa rnam pa drug za bar byed do/ /bya sen mo 'byin zhes bya bas gang sen mo thams cad 'byin to/ /bya tshil za zhes bya bas gang lpags pa dag phug nas tshil za bar byed do/ /bya rgyus pa 'byin zhes bya bas gang rgyus pa thams cad phyung nas za'o/ /bya shad 'dzings zhes bya bas skra drung nas 'byin par byed do/ /de ltar de mnar med pa'i phyogs dpag tshad sum stong na bya 'jigs 'jigs ltar 'dug pa zhes bya ba des sems can dmyal ba pa de las gzhan pa rnams kyis de ma thag tu lo 'bum phrag du mar za bar byed cing yang slar 'byung bar byed do/ /de gal te yang mnar med pa na bya 'jigs 'jigs ltar 'dug pa'i phyogs de dag las thar na sdug bsngal gyi dra ba thams cad kyis yongs su dkris pa ngam grog dang g.yang sa zhes bya ba'i phyogs gnyis pa yod de/ der mgon 'dod pa/ skyabs 'dod pa/ skyob par 'dod pa 'gro ba na/ kun nas me lce'i phung po bcu gcig gis khebs shing grogs med la las kyi zhags pa'i bcing bas bcings nas phyi nang kun du dgras gang ba'i dgon par zhugs so/ /sems can dmyal ba'i tshogs thams cad pas ches shin du nyon mongs par zhugs la ngam grog dang g.yang sa zhes bya ba'i phyogs su rgyug ste/ der lhung nas rkang pa rab tu sreg go/ /bteg pa dang shin du 'jam zhing gzhon sha can du 'gyur te/ sdug bsngal tsha zhing mi bzad pa'i sdug bsngal gyis mngon par gdungs so/ /de ltar de 'jigs shing bzhin mdog mog mog por gyur pa'i rkang lag dang yan lag thams cad rab tu zhum pa na ngam grog dang g.yang sa zhes bya ba'i yul de 'byung bar 'gyur te/ ngam grog dang g.yang sa dpag tshad sum stong yod pa'i yul der de lhung bar 'gyur ro/ /yang las kyis byas pa'i rlung gis 'deg cing de 'dor ba na/ bya kang ka dang / khwa dang / bya rgod dang / 'ug pa rnams kyis za bar byed do/ /de nas yang rlung spu gri dang me lta bus gyen du 'deg cing 'dor ba na/ de dag nyid kyis za bar byed de/ de ltar de 'deg cing 'dor ba lo 'bum phrag du mar byed do/ /de la gal te yang de las thar na 'khor lo ltar yongs su bskor ba mtshan ma'i bar zhes bya ba'i phyogs su rgyug go/ /phyogs der yang 'khor lo'i rtsibs stong yod la lte ba rdo rje las byas pa shin du 'bar zhing myur bar 'khor ba 'byung ste/ de dang lhan cig 'gro ba nyid kyis 'khor lo de lus la bab nas 'khor ro/ /mgo'i 'khor lo gcig gis glad pa 'thag par byed/ de nas glad rgyas rab tu 'bar ba dag 'byung ba nas mig gi bar du 'byung bar byed do/ /phrag pa gnyis ka la 'khor lo gnyis 'khor te des rus pa dang rkang dag phye mar rlog go/ /lag pa gnyis la yang 'byung ste/ des gtsub shing bzhin du lag pa gnyi ga la me 'byung la/ de me nyis 'gyur gyis sreg go/ /de bzhin du de'i brang la 'khor lo rab tu 'bar ba yongs su 'khor te des de'i rus pa thams cad bcom bcom nas 'thag ste/ bye ma'i phye ma bzhin du byed do/ /de'i rgyab la yang lcags kyi me mdag gis reg cing 'khor lo rtsibs stong pa 'khor te/ des brang gi phyogs dang / rgyab kyi rus par gtogs pa la sogs pa thams cad 'joms so/ /de nas de'i 'doms su lcags kyi mtshon brang kol li ka 'byung ste/ des mdoms thams cad gtsub shing bzhin du gtsubs nas 'dren par byed cing de'i long ka thams cad 'bigs par byed do/ /phug nas kyang rgyu ma dag la yang 'bigs par byed do/ /pus mo'i lha nga la yang 'khor lo 'byung ste/ des pus mo'i lha nga de 'bigs par byed do/ /de bzhin du long bu la yang 'byung ste/ des de'i rus pa dag phug nas rkang dag za bar byed do/ /de'i rkang mthil la yang phur bu rnams kyis 'bigs par byed de/ des kyang gdung ba cher byas shing sdug bsngal skyed par byed do/ /de ltar las kyi mtha' nyes par byas pa spyod pa mnar med pa'i sdug bsngal rang gi las kyis byas pa thun mong ma yin pa mi bzad pa tsha ba rtsub pa'i gnod pa dag lo 'bum phrag du mar 'byung bar 'gyur ro/ /de gal te yang de las thar na gnod pa myong bzhin du 'bros par byed do/ /mgon 'dod pa/ skyabs 'dod pa/ dpung gnyen 'dod pa de bros pa na ri chen po zhig yod par mthong nas de la rgyug go/ /ri de yang srin bu mar ko ta ka yan lag dang nying lag rab tu 'bar ba rnams kyis gang la/ de ltar de srin bu mar ko ta ka reg na rtag tu me ltar tsha ba rnams kyi nang du skye bar 'gyur te/ de rnams kyis de kun nas yongs su bskor nas rdul phran tsam du za bar byed do/ /cho nges 'debs pa na srin bu mar ko ta ka kha'i nang du yang zhugs nas mid par song ste/ pho ba dang / long ka'i nang du zhugs nas za bar byed cing de sdug bsngal mi bzad pa tsha ba rtsub pa dag myong ngo / /gang sngon shin du nyes par spyad pa byas pa dang / gang mnar med pa byas pa dang / mi dge ba bcu'i las kyi lam dang ldan pa de ni rgyu de dang 'thun pa'i 'bras bu nye bar spyod par 'gyur te/ de ltar de srin bu mar ko ta ka'i ri der lo 'bum phrag du mar sdug bsngal myong bar 'gyur ro/ /gal te yang de las thar na sha za ba seng ge dang / stag dang / dred dang / gung dang / dom gyis gang ba'i tshal du rgyug pa dang / de rnams kyis de bzung ngo / /bzung nas kyang yan lag rab tu za bar byed de/ la la ni glad pa brtol nas glad rgyas za bar byed/ la la ni brla'i ngos la/ la la ni rgyu ma la/ la la ni gnye ma la/ la la ni long ka la/ la la ni pho ba la/ la la ni byin pa'i spu la/ la la ni pus mo la/ la la ni rkang pa la/ la la ni rkang mthil la za ste/ de ltar de bza' bza' nas yang shin du gzhon sha can du 'byung bar 'gyur ro/ /shin du gzhon sha can de la yang dang yang du lhag par sdug bsngal myong bar 'gyur la yang zos na yang de'i sha rdzogs par skye bar 'gyur te/ des srog gcod pa byas shing bsags pa'i 'bras bu ni de yin no/ /de ltar de rang gis byas pa gzhan dang mi 'dra ba'i sdig pa'i las de lo 'bum phrag du mar myong bar 'gyur ro/ /de nas yang dge slong de ma byin par len pa kun du bsten cing bsgoms te mang du byas pa'i 'bras bu so so yang dag par myong ba la rtog par byed de/ des thos pa las byung ba'i shes pas brtags na/ 'di ltar de nyes par byas pa'i las kyi mtha' la spyod pa mgal me'i 'khor lo dang / dri za'i grong khyer dang / ri dgas skom pa lta bu dag la don gyi rnam pa chen po dbyig dang / nor bu dang / gos dang / nor dang / 'bru'i tshogs su lta'o/ /de ltar de chags pas zil gyis non la/ las kyi rmongs pa dag 'di snyam du sems te/ 'di dag ni bdag gi yin no snyam mo/ /de ltar rmongs pa sdig pa byed pa de me mdag rab tu 'bar ba'i chu bo dag las rgal nas rdzas kyi rnam pa de dag gi drung du rgyug pa dang / las kyis byas pa'i gshin rje'i mi rnams kyis bzung ste/ de mtshon cha'i dra ba'i nang du bcug nas yan lag dang nying lag thams cad gsheg cing gcod la sreg ste rus pa'i lhag ma ma lus par byed kyang de thog ma med pa'i dus nas zhugs pa de gnas skabs de dag tu yang 'dod pa de spong bar mi byed do/ /'dir tshigs su bcad pa/ bud shing lta bu'i rtog byung bas/ /nga rgyal phrag dog me ltar 'bar/ /shing gi mes ni mi sreg gi/ /'jig rten 'dod pa'i mes sreg go/ /'dod pa'i dug gis zin pa gang / /de dag la ni bde ba med/ /'dod pa bsnyen cing bsten byas na/ /phyir yang de bzhin rab tu 'phel/ /ji lta ji ltar 'dod gyur na/ /'dod pa du ma 'phel bar 'gyur/ /me las 'bros par nus srid kyi/ /'dod pa'i me las mi nus so/ /'dod pas yongs su bslus pa yis/ /'jig rten 'khor lo bzhin du 'khyam/ /thog ma med pa'i 'jig rten la/ /'dod pa lta bu'i dgra med do/ /'dod pas yongs su bslus pa dag / rgya mtsho'i chu nang 'jug par byed/ /mtshon cha thigs pa 'bab pa yi/ /g.yul du yang dag rab tu 'jug /'dod pa'i rgyu yis sa bdag rnams/ /phan tshun dag tu 'jig par byed/ /nor la sred pas ma bu yang / / 'thab mo'i g.yul ni 'gyed par byed/ /sred pa'i dug las rnam grol ba/ /'dod pa'i me mdag rnam par spangs/ /bong ba gser ltar mnyam pa de/ /mya ngan 'das pa'i mthar 'gro'o/ /nor gyi nang na tshul khrims mchog / nyi ma 'od dang ldan pa bzhin/ /nor dang bral nas 'gro 'gyur gyi/ /tshul khrims 'di ni mdun na gnas/ /tshul khrims kyis ni sum bcu gsum/ /de bzhin bsam gtan spyod yul 'gro/ /'jig rten 'di dang pha rol du/ /tshul khrims gzi dang mtshungs pa med/ /mnar med par ni skyes pa dag /nor la 'dod pas bsregs pa yin/ /'dod pa'i me ni gang 'byung ba/ /yul der me ni 'byung mi 'gyur/ /mkhas pa'i ye shes chu yis su/ /bsgrims te 'dod pa'i me mdag sod/ /'dod pa med par ma byas na/ /mya ngan 'das pa thag ring ngo / /de ltar sems can dmyal ba pa de 'dod pa'i me des sreg pa na yang mnar med pa'i me gnyis pa mtshon 'bab pa dang bcas pas sum 'gyur du sreg go/ /der yang mgal me bskor ba dang / dri za'i grong khyer dang / ri dgas skom pa lta bu'i nor dag la 'phrog par byed pa dang / log par bsgyur ba rmi lam gyi mi lta bu sems can dmyal ba pa gshin rje'i mi de dag gis ma byin par blangs pa'i sems can dmyal ba de lo 'bum phrag du mar sdug bsngal myong bar byed do/ /de nas yang dge slong de 'dod pas log par g.yem pa'i mnar med pa de'i 'bras bu la rtog par byed de/ des brtags na/ 'di ltar sdig pa byed pa de mtshon cha nyam nga ba de las thar na/ ji ltar yang las kyis 'khrul pa me mdag gi chu bo las rgal nas log par rnam par lta ba zhes bya ba'i phyogs gzhan du zhugs so/ /des las kyis byas pa'i bud med dag gang sngon gyi dran pa nyams pa des mthong ngo / /de dag mthong nas de thog ma med pa'i dus nas goms pa'i 'dod chags kyi me 'byung ste/ de der rgyug par byed do/ /gang na bud med 'khor ba de dag las kyis byas pa/ lcags kyi bud med dag yin te/ de dag gis de bzung ngo / /bzung nas kyang lce la sogs pa la za ste ji ltar de'i lus de la yungs 'bru tsam gyi lhag ma yang ma lus par de ltar za'o/ /de nas yang 'byung bar 'gyur te/ yang za'o/ /de sdug bsngal tsha ba rtsub pa myong bzhin du 'dod chags kyi me de dag las ldog par mi byed kyi/ gang na bud med de dag gnas pa der yang dang yang shin du rgyug par byed do/ /de ji ltar 'dod chags kyi mes gnod pa de ltar sdug bsngal gnod par mi rtsi'o/ /de nas bud med de dag yang lus rdo rje dang lcags rab tu 'bar ba'i lus kyis mi de bzung nas 'bar ba'i phreng ba 'khrugs pa'i lus kun gyis sems can dmyal ba de bye ma chang pa nas gtor ba bzhin du gtor to/ /lus thams cad phye mar byas pa de slar yang 'byung bar 'gyur te/ de nas shin du rgyug kyang de'i 'dod chags zhi bar mi 'gyur ro/ /de'i gnas de lta bu mthong nas dge slong des bsams te/ thos pa las byung ba'i shes pas 'di ltar tshigs su bcad de smras pa/ bud med ngan song gzhi yin zhing / /kun nas nor ni zad par byed/ /mi gang bud med tshig nyan pa/ /de la bde ba ga la yod/ /don med chos la dga' ba ni/ /bud med g.yo dang phrag dog mang / /'jig rten gnyis ni rnam 'jig pa/ /skyes pa rnams kyi mdun na gnas/ /de'i tshig shin du mi brtan te/ /rtag tu 'dod chags skyed la mkhas/ /de yi snying ni gzhan sems la/ / gzhan gyi tshul gyis smra bar byed/ /dang por mnyen zhing srun byed la/ /phyi nas sems ni rdo rje 'dra/ /sems ni yang la phan pa med/ /bkur sti dag ni dran mi byed/ /legs pa brgya ni chud gzon la/ /ma legs gcig pu dran par byed/ /sdig pa'i sa gzhi bud med yin/ /snying ni glog gi ngo bo bzhin/ /skyes pa chags pa'i sems yod pa/ /'jig pa'i rgyu ni bud med byed/ /'jig rten 'di dang pha rol tu/ / 'jig byed nang na bud med 'jig /gal te bde ba'i mchog 'dod na/ /de ltar bud med rnam par spongs/ /bud med rtag tu spangs pa ni/ /'jig rten 'di dang pha rol bde/ /gang zhig dbul ba spong 'dod cing / / gang zhig bdag ni 'byor 'dod dang / /gang zhig mya ngan 'das 'gro 'dod/ /mi des bud med spang bar byos/ /de ltar phyin ci log tu mthong ba snying rnam par rmongs pa de lo 'bum phrag du mar sreg go/ /gsheg go/ / gsod do/ /de nas yang slar 'byung bar 'gyur te/ de gal te de las thar nas de nas yang me mdag gi chu bo'i nang du bying zhing 'tshed pa na bkres pa dang / skom pas gdungs te/ gar bab bab tu 'bros so/ /de nas yang dge slong de mnar med pa'i mi dge ba byed pas gang brdzun du smra ba de kun du bsten cing bsgoms te mang du byas pa'i 'bras bu la brtags na des thos pa las byung ba'i shes pas mthong ste/ 'di ltar sems can dmyal ba lus bkres pa dang skom pas 'khrugs shing gdungs pa de gshin rje'i mi stobs po che rnams kyis bzung ngo / /bzung nas kyang kye grogs po dag khyed la ci gnod ces 'dri'o/ /las kyi dbang gis bskul ba de dag bdag cag bkres so zhes smra'o/ /de nas de dag gshin rje'i mi de rnams kyis bzung ngo / /bzung nas kyang de'i kha gsheg par byed de/ de nas lce 'byin par byed do/ /lce de yang las kyi dbang gis dpag tshad lnga brgya tsam du 'gyur ro/ /brdzun du smra ba de'i 'bras bus de phyung ma thag tu/ de gshin rje'i mi rnams kyis bzung nas lcags kyi sa gzhi rab tu 'bar ba la ldag tu 'jug cing las kyis byas pa'i thong gshol rtse mo rab tu 'bar ba dang bcas pa'i rmon glang stobs dang ldan pa stong byung ste/ lce de'i steng du song nas rmod par byed do/ /de las rnag dang khrag dang srin bu 'dzag pa chu bo ltar 'bab bo/ /rnag dang srin bur 'dres pa'i lce de yang ji ltar lha rnams kyi mig bzhin du gzhon sha can du 'gyur te/ de'i lce'i phyogs la rmos pa de dag slar yang tha mal par 'gyur ro/ /de nas yang lo 'bum phrag du ma 'am/ lo bye bar rmod de lce de la sdug bsngal mi bzad pa 'byung ngo / / tsha zhing rtsub la rab tu rtsub pa/ drag pas kyang shin du drag pa/ sdug bsngal mi bzad pa dag gis nyam thag pa de ku cho 'don/ cho nges 'debs ngu skad 'byin kyang de'i sdug bsngal de sus kyang sel bar mi byed do/ / gang bdag gis byas pa de dag ni pha mas ma byas/ lhas ma byas/ mi gzhan gyis ma byas/ 'dod rgyal las ma byung / gzhan nas ma 'ongs/ byas pa chud mi za ste/ rang gis byas pa'i las kyi 'bras bu yod do/ /de nas de dag ngu skad 'byin bzhin du 'di ltar gshin rje'i mi rnams kyis rjes su bstan pa tshigs su bcad de smras pa/ rtsub shing drag la bde med pa/ /brdzun du smra ba rnam par spongs/ /brdzun du smra ba'i mi rnams ni/ /sems dag la yang rnam par 'jig /de ni yid ches gnas ma yin/ /mkhas pa kun gyis rnam par spangs/ /bdag nyid la ni bslus byas nas/ /pha rol la ni brdzun smra ba/ / skyes bu dpa' sems can dag gis/ /dgra bzhin du ni rnam par smad/ /gang tshe bdag dang gzhan 'jig pa/ /dang por mi mthun kha nas smra/ /mi yis rnam par ma spangs na/ /lha rnams kyis kyang gtong bar byed/ /yid la brdzun gyi tshig sems na/ /dma' zhing 'og mar 'gro bar 'gyur/ /mi gang log pas mngon nyams pa/ /de dag bde ba'i gnas med do/ /'jig rten 'jig rten 'das lam la/ / brdzun du smra ba rnam par smad/ /'byed pas 'byed pa'i rnam smin te/ /brdzun du smra ba rnam par spongs/ /de ltar de la gnas pa'i mi/ /dmyal ba yin par nye bar brtag /mi mchog bden pa smra ba ni/ / 'jig rten kun gyis mchod par 'gyur/ /brdzun du smra ba rnam par spongs/ /'on tang bden pa'i mchog tu 'gyur/ /'tshe med bden tshig smra ba ni/ /'byung po kun la brtse zhing mnyen/ /bden pa mtho ris skas yin zhing / /chos rnams 'byung khung chen po yin/ /mi gang gshin rje'i 'jig rten dang / /de bzhin dmyal bar 'gro ba yi/ /de'i rgyu brdzun du smra ba ste/ /mi mkhas pa dag smra bar byed/ /dug dang zhags pa gdos 'dra zhing / /de ni mtshon dug me dang 'dra/ /brdzun du smra bar mi bya ste/ /de yi 'bras bu sdug bsngal mang / /de ltar las 'bras zhe 'gras pa/ /de ni rnam ston 'chi bar byed/ / zhi ba'i tshig ni smra bar gyis/ /smad par bya ba rnam par spongs/ /de ltar sems can dmyal ba pa de sdug bsngal mi bzad pa myong ba na de lo 'bum phrag du mar de'i lce 'byin par byed do/ /de gal te yang sems can dmyal ba pa de'i kha'i nang du ldud par byed de/ 'jigs shing skrag la byad bzhin mog mog po de me mdag gi chu bo'i nang du sreg bzhin du gar bab bab tu 'bros so/ /de ltar sdug bsngal gyis nyen cing mgon med/ skyabs med/ dpung gnyen med pa de la yang gshin rje'i mi rnams 'byung bar 'gyur te/ gshin rje'i mi lag na tho ba dang ral gri thogs pa de rnams kyis mi de ngu skad 'don cing yang dang yang du mnar med pa'i mes sreg pa na glad pa la sogs pa nas rkang pa'i bar du phye mar byed do/ /de nas dge slong de phra ma kun du bsten cing bsgoms te mang du byas pa'i rnam par smin pa la rtog par byed de/ des thos pa las byung ba'i shes pas brtags na/ 'di ltar phra ma'i las kyi 'bras bus bskul ba'i sems can dmyal ba pa de shin du mi bzad pa'i sa gzhan la 'jug par byed de/ de gshin rje'i mi drag shul chen po ston pa gzhan rnams kyis bzung ngo / /bzung nas sems can dmyal ba pa de la/ gshin rje'i mi rnams kyis smras pa/ grogs po dag khyed la ci gnod/ de dag gis smras pa/ bdag cag la bkres pa gnod do/ / de nas gshin rje'i mi de rnams kyis de'i kha de gdangs nas lag pas lce 'byin par byed do/ /de yang dpag tshad sum brgyar 'gyur te de ltar phyir zhing rgya cher 'gyur ro/ /gshin rje'i mi rnams ral gri so rab tu 'bar ba dag blangs te lce de la gcod par byed do/ /khyi dang wa rnams kyang phyogs gzhan dag la za bar byed de/ de ltar sdug bsngal mchog tu tsha ba myong ba dag so sor myong ngo / /de lce dang bral ba'i tshig mi gsal bas ngu skad 'byin cing cho nges 'debs te/ de ltar de ngu skad 'byin pa na 'di ltar gshin rje'i mi rnams kyis rjes su bstan pa tshigs su bcad de smras pa// // 'phags pa dam pa'i chos dran pa nye bar gzhag pa/ bam po bcu drug pa/ dbyen gyi bsam pa mang po yis/ /khyod kyis mang du gang smras pa/ /chos rnams kyi ni sdig par 'gyur/ /de yi 'bras bu 'dir 'ongs so/ /mi mthun pa la gang dga' ba/ /de ni rtag tu mdza' bshes dang / /gnyen 'dab rtsa lag 'byed pa yin/ /dam pas phra ma rnam par smad/ /srid pa nyam ngar gar skyes pa/ / rtag tu dman par skye bar 'gyur/ /phra ma la ni gang sbyor ba/ /phyir zhing gti mug dbang du 'gro/ /phra ma la ni gang 'jug pa/ /sdig pa sten par byed pa ste/ /sdig pa'i las kyis dmyal ba ru/ / yang dang yang du 'tshed par byed/ /phra ma'i kha ni gnyis su mthong / /phyi ma'i sha la shin du za/ /yid gcugs dam pa med par byed/ /gsang ba'i tshig ni sun 'byin to/ /gang dag phra ma spangs pa ni/ /de la rtag tu grub pa gnas/ /mdza' bshes gnyen 'dab rtsa lag dang / /de ni nams kyang 'bral mi 'gyur/ /phra ma spangs pa zhi ba ni/ /legs shing sdig dang bral ba yin/ / de ni rtag tu sa bdag gi/ /gsang ba 'dzin par byed pa yin/ /chos ni ma spyad gang yang med/ /phra ma dag kyang ma spangs pa/ /phra ma'i 'bras bu myong bar gyis/ /de ring ci zhig yongs su smre/ /de ltar rjes su bstan cing lce'i sdug bsngal myong ba na de lo 'bum phrag du mar sdug bsngal gyi nang du song ste bying ngo / /de sdug bsngal tsha ba rtsub pa myong ba na gal te yang de'i lce 'jam por 'gyur te gshin rje'i mi de dag kyang mi snang bar 'gyur ro/ /de dag de las thar na sems can dmyal ba pa shin du mi bzad cing drag pa las kyi shing gi mthu dang / rnam par smin pa'i rlung dmar langs pa'i mes sreg pa na gar bab bab du 'bros so/ / de nas gshin rje'i mi gzhan dag gis sems can dmyal ba de bzung ngo / /bzung nas kyang smras pa/ grogs po dag khyed la ci zhig gnod/ las kyi 'bras bus bskul ba de dag gis smras pa/ lce'i sdug bsngal gnod do/ /de nas lce de brgyangs nas bzung ngo / /bzung nas mtshon cha so bdar ba rnams kyis gtub gtub nas yang de nyid zar gzhug pa'i phyir kha'i nang du 'jug ste/ bkres pa dang skom pas gdungs shing kha gdong nyams pa de rang gi khrag dang / kha chu 'dzag pa dang / rang gi lce de nyid la za'o/ /lce gtub gtub pa de las kyi dbang gis yang skye bar 'gyur te/ de nas yang sdug bsngal gyis nyam thag pa dag sa la 'phye zhing 'gre ldog la yongs su ngu skad 'byin to/ /de ltar sdug bsngal gyis nyam thag pa de'i mig gi 'bras bu ni 'gyur/ sdug bsngal gyis nyam thag cing dman la grogs med pa gcig pu rang gis byas pa la nye bar spyod do/ /'di ltar gshin rje'i mi rnams kyis rjes su bstan pa tshigs su bcad de smras pa/ tshig rtsub zhes bya gang mthong ba/ /mda' ltar rno ba khyod kyi tshig /gzhu lta bu yi lce las 'phangs/ /de yi 'bras bu 'dir 'ongs so/ /gang la tshig rtsub 'byung ba ni/ /dug lta bu yi lce las 'byung / /'jig rten la ni sha za 'dra/ /de dag yongs su spang bar gyis/ /ji ltar yid 'byung 'gyur ba ni/ /nyam ngar tshig rtsub smra ba ste/ /me mtshon dug ni 'byung ba la/ /mi dge de ltar yid mi 'byung / /gtsub shing lta bu'i lce las byung / /shing lta bu yi snying gis spel/ /'jig rten tshig rtsub me ltar 'bar/ /shing skam lta bur sreg par byed/ /gang dag snyan par smra la dga'/ /'jig rten kun gyis phyag byed do/ / 'jig rten kun la ma dang 'dra/ /de ni pha dang 'dra bar dga'/ /dang por snyan par smra ba dge/ /bde 'jam bde ba 'byung ba yin/ /sdig pa mi zad sel ba yin/ /mi sdug sa kun sbyong ba yin/ /tshig snyan mtho ris skas yin te/ /tshig snyan dge ba'i gter yin no/ /tshig snyan 'jig rten gnyen yin te/ /tshig snyan legs pa mngon par 'grub/ /khyod kyis tshig rtsub de smras pas/ /sems can dmyal ba drag por 'ongs/ /lce de dag la'ang gnod par byed/ /de ring ci zhig yongs su smre/ / de ltar rjes su bstan pa na brdzun du smras pa de kun du bsten cing bsgoms te/ mang du byas la rjes su yi rang zhing ma bshags pa dang / lo 'bum phrag du mar lhan cig gnas so/ /de gal te yang de las thar na gar bab bab tu 'bros pa dang / de nas mdun nas gshin rje'i mi rnams kyis bzung ste/ de sdug bsngal mi bzad la drag pas yongs su gdungs shing tshor bar byed pa mthong ngo / /de nas yang dge slong de tshig kyal pa kun du bsten cing bsgoms te/ mang du byas pa'i sdig pa mi dge ba'i las kyi 'bras bu'i rnam par smin pa la rtog par byed de/ des thos pa las byung ba'i shes pas brtags na/ sems can dmyal ba pa 'di dag rang gi las kyi 'bras bu la spyod pa sdug bsngal gyis nyam thag cing shin du mi bde ba de dag gshin rje'i mi rnams las thar nas kyang gar bab bab tu 'bros so/ /de nas gshin rje'i mi gzhan dag gis bzung nas smras pa/ kye grogs po dag khyed la ci gnod/ de dag gis smras pa/ bdag cag la bkres pa dang / skom pa gnod do zhes smras nas tshigs su bcad de smras pa/ tha mar gyur pa stong phrag dag /rang gi lus las gtsub shing 'byung / /bkres dang skom las byung ba'i mes/ /bdag la mi bzad sreg par byed/ /kha ba me ltar khyad par che/ /de ni ri rab yungs 'bru bzhin/ /sems can dmyal bar sreg pa ni/ /bkres pa'i khyad par de 'dra 'o/ /sems can dmyal ba'i me byung ba/ /de ni gzhan du gnod par byed/ /bkres dang skom las byung ba'i me/ /lha dag la yang yod pa min/ /gnod pa mi bzad gang yin pa/ /de dag dmyal bar bdag la byung / / bkres pa'i me yis gnod pa ltar/ /de dag de ltar mi gnod do/ /de'i tshig de thos nas gshin rje'i pho nya dag phra skam rab tu 'bar ba dag blangs nas kha gdangs pa'i nang du snod rab tu 'bar bar zangs shin du bzhus pa khyer nas blugs te/ tshig kyal pa smras pa'i 'bras bu des ji ltar kha ba chal chol me'i nang du 'ju ba de bzhin du de'i lce yang de ltar sreg go/ de sreg pa mi 'dra ba gnyis kyis sreg pa na ngu skad 'byin cho nges 'debs ku cho 'don cing mig shin du 'gyur bar byed de/ zangs dmar po rab tu 'bar ba des de'i lce sreg par byed do/ /lce bsregs nas mid pa sreg go/ mid pa bsregs nas snying sreg go/ snying bsregs nas rgyu ma sreg go/ de dag kyang sregs nas long ka sreg go/ long ka yang bsregs nas thur du byung ngo / /de ltar de sreg pa na 'di ltar gshin rje'i mi rnams kyis rjes su bstan pa tshigs su bcad de smras pa/ snga phyi 'brel pa med pa'i tshig /don med thog tu mi phebs te/ /'brel med khyod kyis gang smras pa/ /de yi 'bras bu 'di 'dra 'o/ /gang dag rtag tu bden mi smra/ /tshig don bzang po ma yin zhing / /lce de mkhas pas mi mthong ste/ /sha yi gong bu tsam du zad/ /gang dag rtag tu bden smra ba/ /yon tan brtan zhing rtag tu legs/ /de ni mtho ris skas yin te/ /de la lce zhes mi brjod do/ /de nas gshin rje'i mi de dag gis sems can dmyal ba pa de la rjes su bstan nas zangs dmar po rab tu bskol ba de dag sems can dmyal ba pa'i khar ldugs te/ lo 'bum phrag du mar 'brel pa med par smra ba de'i rnam par smin pa snying rje rje ltar myong ngo / /de nas gal te sems can dmyal ba pa de gshin rje'i mi de dag gis btang nas gar bab bab tu 'bros so/ /me mdag gi chu bo'i nang dag tu bying ste/ rab tu 'ju ba na rkang pa dang / byin pa dang rked pa dag me mdag gi chu bo de dag gi nang du mar sar gyi gong bu lta bur rab tu 'ju bar byed do/ /de nas yang 'byung bar 'gyur te/ de ltar mgon 'dod pa/ skyabs 'dod pa/ dpung gnyen 'dod pa de gar bab bab tu 'bros so/ /de nas las kyis byas pa'i nor rdzas mang po gsob gsog snying po med pa gzhan gyis yongs su bzung ba dag las kyis bskul ba rmongs pa de 'di ni bdag gi yin no snyam mo/ /de nas sems can dmyal ba pa de nor rdzas ga la yod pa de nyid du rgyug go/ de brnab sems mi dge ba kun bsten cing bsgoms te mang du byas pa'i 'bras bu 'di ni gang sems can dmyal ba pa des de ltar log par mthong ba yin no/ /de ltar brnab sems mang por mthong ba de'i lag tu mtshon cha 'byung bar 'gyur te/ des brgyugs pa dang / sems can dmyal ba pa gzhan dag gis lag tu yang mtshon cha 'byung bar 'gyur te/ de dang de dag lhan cig mtshon gyis 'gyed do/ /sems can dmyal ba pa de dang de dag mtshon rnon po rnams kyis 'jog par byed do/ /bzhog pa de dag kyang rus gong gi lhag ma de tsam zhig lus par byed do/ /de nas yang slar skye bar 'gyur te/ yang de bzhin du gzhog par byed cing de dag yang skye bar 'gyur ro/ /de nas lo 'bum phrag du ma 'das pa dang / las kyis byas pa'i gshin rje'i mi rnams 'ongs nas de dag gi mtshon cha rnon po blangs te/ sems can dmyal ba pa de rnams dang / sems can dmyal ba pa gzhan de rnams la ji ltar yungs 'bru bas kyang phra ba de ltar lus kyi sha la 'jog ste/ de ltar rus gong gi lhag ma tsam zhig lus par byed do/ /de ngu skad 'byin cho nges 'debs/ ngu zhing smre sngags 'don pa bzhog bzhog nas yang skye bar 'gyur te/ ji ltar chu srin byis pa gsod bzhog bzhog nas chu'i nang du bcug pa dang / de nas yang slar skye bar 'gyur ba de bzhin du sems can dmyal ba pa de dag la yang slar skye bar 'gyur ro/ /de ltar sdug bsngal gyis nyam thag cing ngu skad 'byin pa de dag la 'di ltar gshin rje'i mi rnams kyis rjes su bstan pa tshigs su bcad de smras pa/ brnab sems kyis ni nyams pa'i mi/ /brnab sems kyis ni yongs su bslus/ /gzhan nor bdag gir bya snyam pa/ / de ltar de ni bslus pa yin/ /brnab sems sdig pa yid byed pa/ /'dzangs pa rnams kyis ma bsten to/ /mar me 'bar ba'i me bzhin du/ /bdag gis byas pas sreg par byed/ /brnab sems sdig pa yid byed pa/ /gnod pa dag ni nye bar byed/ /tsha bar smin cing dug 'byung ba/ /gang yin de ni rtag tu spongs/ /gzhan gyi phun sum tshogs mthong nas/ /bdag gir bya snyam bsams pa ni/ /brnab sems de yis bslang pa yi/ /dug gi 'bras bu 'dir 'ongs so/ /de ltar de gshin rje'i mi de rnams kyis spyo spyo brgyad brgyad nas lo 'bum phrag mang por gnod pa nyid kyis gnod par byed de/ de'i sdig pa'i las kyis 'byang bar mi 'gyur ro/ /de nas yun ring mo zhig 'das nas sems can dmyal ba pa de me mdag gi chu bo'i nang du bying zhing 'bros pa na/ gar bab bab tu 'bros pa dang / lcags kyi sa gzhi rab tu 'bar ba'i steng du bab nas de nas yang dang yang du 'gre ldog ste/ langs nas kun du rgyug pa na/ gcig pu gnyis su med cing grogs med pa las kyi dbang gis gyur pa'i sems can dmyal ba pa las kyis dgra'i nang du song ngo / /gal te yang gshin rje'i mi de dag las thar nas gar bab bab tu 'bros so/ /de nas gnod sems kun du bsten cing bsgoms te mang du byas pa de'i 'bras bu nye bar gnas pa ni mgon 'dod pa/ skyabs 'dod pa/ dpung gnyen 'dod pa de skyabs dang dpung gnyen 'dod cing las kyis byas pa'i seng ge dang / stag dang / sbrul shin du khros pa dag mdun du 'dug pa dang / de de dag la 'jigs nas gar bab bab tu 'bros kyang de mi dge ba'i las kyis 'bros par ga la nus te/ de de dag gis bzung ngo / /bzung nas kyang shin du 'khrugs pa rnams kyis dang por re shig glad pa la za'o/ /de'i glad pa la za ba na ngu skad 'byin cing smre sngags 'don la 'gre ldog par byed do/ /de'i rtsib logs la yang mche ba dug ltar rno ba kun gyis brad brad nas za zhing stag dag gis kyang rgyab tu zos/ rkang pa ni mes bsregs shing gshin rje'i mi rnams kyis kyang rgyang ring po la sogs par 'phangs so/ /de ltar snying rje chen po'i shugs thob pa de la 'di ltar gshin rje'i mi rnams kyis rjes su bstan pa tshigs su bcad de smras pa/ mi yi skyes bu tha ma la/ /gnod sems me 'dra yod pa ni/ / sreg pa dag las sreg pa thob/ /don med ci zhig yongs su smre/ /sems can dmyal bar skye ba yi/ /rgyu ni mi bzad gnod sems yin/ /thag pa gang gis bcings pa yi/ /mi ni yongs su khrid par byed/ /gnod sems dag gis rmongs pa'i mi/ /rtag tu de la yid 'jug pa/ /zhi bar shin du mi 'gyur te/ /bu ga'i nang na sbrul 'dug bzhin/ /mi gang gnod sems mi bzad cing / /shin du drag pa'i ngo bo ni/ /nyi ma la ni mun pa bzhin/ /de dag la ni bde ba med/ /gnod sems snying la yod pa ni/ /kun gyis bsrung bar mi nus te/ /bshes grogs gnyen gyi mis ma yin/ /chos dang don gyi tshogs kyis min/ /gnod sems 'di ni mun pa yi/ /tshogs dang 'dra zhes brjod pa yin/ /gnod sems skyed par byed pa ni/ /gnod sems zhes ni yongs su sgrogs/ /gnod sems med pa ji ltar 'gyur/ /gnod sems med pa mchog tu dge/ /gnod sems yod pa pha rol tu/ /mi bzad 'chi bar de dag 'gro/ /gnod sems kyis ni drangs pa dag /sems can dmyal ba drag por 'ongs/ /las zad nas ni thar 'gyur zhing / /dmyal bar 'gre ldog mi byed do/ /de ltar bstan cing rjes su bstan nas gshin rje'i mi rnams dang seng ge dang / stag gnod sems mang du yod pa rnams kyis 'thun par rdeg cing za bar byed de/ sa bon las 'bras bu 'byung ba bzhin du de'i gnod sems dang 'thun par las kyi rnam par smin pa 'byung ste/ de ltar sems can dmyal ba de las de'i 'bras bus 'tshed cing za'o/ /de gal te yang de las thar na mgon 'dod pa/ skyabs 'dod pa/ gar bab bab tu 'bros so/ /sdig pa chen pos bskul ba log par lta ba mtshams med pa lnga'i lam ni 'di yin te/ mnar med par skyes nas de nas nges par myong bar 'gyur ba'i mtshams med pa gzhan dag yod pa der skye la skyes ma thag tu las so sor myong bar 'gyur ro/ /sems can dmyal ba pa de mu stegs kun du rgyu dang / rdzogs byed dang / lhas byin dang / ko ka li ka gang du 'tshed pa'i gnas der sems can dmyal ba chen po 'di yang 'gro bar 'gyur te/ gang na sdug bsngal nges par myong bar 'gyur ba mi zad pa tsha ba drag pa bas kyang shin du drag pa/ de dag rjes su myong ngo / /de'i sdug bsngal sems can thams cad kyis dpe bya bar sla ba ma yin te/ mnar med pa'i sdug bsngal de myong bar 'gyur ro/ /sdig pa byed pa de mun pa'i tshogs su gyur pa dang / sems can thams cad spu zing zhes byed pa mnar med pa chen po ga la ba der de'i 'tshed do/ /sreg go/ gsheg go/ mtshon char ltar 'bab pas bzhog go/ de nas yang 'byung bar 'gyur te/ yang 'jog go/ gsheg go/ sreg go/ mda' bo che dang / rdo rje dang / ser ba dang / rdo char ltar 'bab pas gsod do/ /de ltar mtshams med pa lnga byed pa de dag sreg pa na/ me'i phung po bcu gcig byung ste/ de dag shin du sdug bsngal bar byed do/ /der phyogs bcu'i me 'bar ba bcu dang / me'i phung po bcu gcig 'byung ste/ bkres pa dang / skom pa byas nas khar 'byung ngo / /de'i lus kyi steng 'og dang / rtsib logs su 'bar ba'i phreng ba mched pas ji ltar de'i lus kyi gseb phra mo yang mi mngon pa de ltar sreg go/ /me de yang ji ltar skra de dag gi rtse mo'i bar yang mi mngon pa de ltar phan tshun shin du nyon mongs par 'tshed pas mnar med do/ /bde ba'i bar skabs kyi dus chung zad kyang med pas mnar med do/ /dbang po thams cad yul kun la 'tshed cing yid dang 'gal bas mnar med de 'jig rten de nas shi nas sems can dmyal ba chen po mnar med pa ma gtogs par de las gzhan du mi skye ste/ mnar ba'i gzhi med cing gnod pa'i grangs kyi bar med pa'i phyir mnar med do/ /'dod pa'i khams su gtogs pa'i sems can thams cad kyi 'og tu gyur pa ni mnar med pa de dag yin te/ gzhan dag mnar med pa yin pas mnar med do/ /sems can dmyal ba chen po de'i mgo la ji ltar steng nas gnod pas kun nas nyon mongs pa ltar de'i mgo la yang de'i bar skabs kyi gzhi med pas mnar med do/ /sa gzhi zangs dmar po rab tu bskol ba dang / khrag dang / sha dang rus par 'dres shing 'khrugs pa dag la bar med pa de bzhin du mnar med pa yang lpags pa dang / sha dang / tshil dang / rus pa dang / rkang du gtogs pa thams cad rab tu 'bar te/ de ltar kun nas rab tu 'bar ba dag la mngon pa yang med cing mnar ba'i gzhi chung zad kyang med pa'i phyir mnar med do/ /ri las chu 'bab pa'i shugs ltar nyin gcig bzhin du gnod pa dpe med pa 'phel zhing 'byung ste/ de ltar gnod pa rnams mnar ba'i gzhi cung zad kyang med pas mnar med do/ /srid pa bar ma 'gag pa dang / dus mnyam du lan grangs gzhan la myong bar 'gyur ba'i las kyis der skyes nas mnar ba'i gzhi'i bar shin du chung ba yang med pa'i phyir mnar med de/ de ltar gnod pa brjod par mi nus kyang chung zad cig dper bya na rgya mtsho'i chu'i thigs pa bgrang bar sla ba ma yin pa de bzhin du mnar med pa rnams kyi las nyes par byas pa lnga'i gnod pa bgrang ba 'am/ brjod par sla ba ma yin no/ /'di lta ste/ ji ltar mnar med pa'i las lci ba'i mthus de'i tshe sdug bsngal gyi gnas gzhan ci yang med de sdug bsngal de yang de lta bu yin no/ /gang gis mnar med pa'i las gcig byas na/ de'i sdug bsngal chung bar 'gyur ro/ /gang gis las gnyis byas na de'i tshad thams cad bas lus che bar 'gyur te/ sdug bsngal yang de ltar rgyu dang rgyu yis 'bras bu lci bar 'gyur ro/ /bde ba dang sdug bsngal gyi rgyu ni dpe med par 'gyur te/ 'dod pa rnams kyi ni bde ba yin mi 'dod pa rnams kyi ni sdug bsngal ba yin te/ gnas 'di gnyis ni steng dang / 'og dang mtha' dag tu dpe bya bar mi nus so/ /de ci'i phyir zhe na/ legs par byas pa dang / nyes par byas pa'i mtha' dag ni rgyu 'thun par 'bras bu 'byung ste/ sems can dmyal ba pa rnams kyang de dang 'dra bar dpe bya bar mi nus so/ /de ltar de bskal pa 'am/ bskal pa las lhag par bsregs nas las de zad nas thar bar 'gyur te/ rgyu rkyen zad na 'bras bu yang zad par 'gyur ro/ /ji ltar me shi na tsha ba med par 'gyur ba dang / sa bon zad na 'bras bu yang zad par 'gyur ba de bzhin du gang gi tshe mnar med pa'i mi dge ba'i las de bcom zhing spangs la zad par gyur pa de'i tshe sems can dmyal ba de las thar bar 'gyur ro/ /thar nas kyang rgyu 'thun pa'i 'bras bu ri gseb khab rtse lta bu'i nang du yi dags rnams su skye bar 'gyur ro/ /der skyes nas bkres pa dang skom pas gdungs shing lus tshal shing sregs pa lta bur 'gyur ro/ /de las thar nas kyang dud 'gro 'am chu srin byis pa gsod pa dag tu skye bar 'gyur ro/ /de bzhin du ljan ljin gyi tshogs phyi sa mi gtsang ba 'jig par byed pa'i srin bur 'gyur ro/ /tshe rabs nyis stong du yi dags bkres shing skom pa dag gis gdungs par 'gyur zhing bsregs par 'gyur/ tshe rabs nyis stong du dud 'gro rnams su skye ste/ yang las kyi dbang gis rgyu dang 'thun pa'i 'bras bus dud 'gro'i ris sdug bsngal rnam pa sna tshogs kun dang za ba dang gsad pa'i bsam pa tha dad pa rnams kyi nang du skye bar 'gyur ro/ /de gcig la gcig za ba'i sdug bsngal de las thar nas gal te lan grangs gzhan la myong bar 'gyur ba'i las kyis mi'i nang du skyes na las de dang rgyu 'thun par tshe rabs lnga brgyar mngal du 'chi bar 'gyur ro/ /tshe rabs lnga brgyar byung ma thag tu 'chi bar 'gyur/ tshe rabs lnga brgyar gog thal thul tsam na 'chi bar 'gyur ro/ /gal te yang phyis rgyu dang 'thun pa'i 'bras bu ma lus par 'byung ste de lus mtha' yas pa nas zhugs pa/ las kyi dra ba dang 'thun pa'i 'bras bu chung ngu dang 'bring dang chen po dmigs par 'gyur ro/ /'dir dge slong gis tshigs su bcad de smras pa/ 'khor ba thog ma med pa nas/ /las kyi dra bas bsgribs pa'i mi/ /rang gi las kyi rgyu 'bras las/ /byung ba skye zhing 'chi ba yin/ /lha las dmyal bar skye 'gyur zhing / /dmyal las de bzhin lha yul du/ /mi rnams yi dags yul du 'am/ / sems can dmyal bar rab tu 'gro/ /gzhan dang gzhan du 'byung zhing skye/ /gzhan dang gzhan du 'byung zhing bde/ /sred pa'i las gyis byung ba'i tshe/ /dbang phyug la sogs de ma byas/ /'khor bar srog chags rnams kyis ni/ /rtag tu las ni grangs med byas/ /de bzhin gshegs pa ma gtogs pas/ /mkhas pas nam yang mi shes so/ /las de'i rnam pa bdag gis shes/ /rgyu dang rkyen ni rtag tu rig / stobs de bdag dang ldan pas na/ /srog chags kun la so sor phan/ /dge slong dag de ltar dge slong des mnar med pa'i sdug bsngal dag so sor mthong ba na 'khor ba thams cad la yid 'byung zhing byams pa mchog gi bdag nyid dang / snying rje yongs su bsgos pa'i sems nye bar gzhag pas sa gzhan bcu gcig pa la zhugs so/ /de sa gzhan de la zhugs pa dang / sa bla ba dag dga' nas bar snang la spyod pa'i gnod sbyin rnams la mngon par bsnyad do/ /de dag gis kyang rgyal po chen po bzhi la bsnyad do/ /de dag gis kyang rgyal chen bzhi'i lha rnams la bsnyad de/ de ltar snga ma bzhin du sbyar nas/ tshangs pa chen po'i lha rnams kyi bar dag gcig la gcig sgrogs te/ 'di ltar lha 'dzam bu'i gling na yul che ge mo zhig na rigs kyi bu mang ge mo zhig skra dang kha spu bregs gos ngur smrig bgos nas dad pas khyim nas khyim med par rab tu byung ste/ de bdud dang lhan cig g.yul 'gyed par 'dod la de yul gyi dngos po la mi 'dod de/ kun nas nyon mongs pa'i shul rnams la dga' bar mi byed de/ de sa bcu gcig pa la zhugs pa de thos nas lha tshangs pa chen po bdud kyi phyogs ni dmas so/ /dam pa'i chos kyi phyogs ni mtho'o/ /dge ba'i phyogs ni 'phel to/ /chos la chos kyi rjes su 'jug pa ni kun nas byung ngo zhes yid rab tu dga'o/ /dge slong dag de nas yang rnal 'byor spyod pa nang gi chos la chos kyi rjes su lta zhing gnas pa mnar med pa ji lta ba bzhin mthong nas/ de'i 'khor ji ltar 'dug snyam nas rtog par byed de/ kye ma sems can dmyal ba chen po'i 'khor ji snyed cig yod snyam du yongs su rtog par byed do/ /des thos pa las byung ba'i shes pa 'am lha'i mig gis 'di ltar mnar med pa dge slong gi yid byung ba de mthong nas de'i 'khor gzhan la rtog par byed do/ /de nas yang dge slong las kyi 'bras bu rnam par smin pa shes pa des/ sems can dmyal ba chen po mnar med pa'i 'khor la rtog par byed de/ kye ma sems can dmyal ba chen po'i 'khor ji snyed cig yod snyam mo/ /des thos pa las byung ba'i shes pas ji ltar sems can dmyal ba chen po gzhan dag gi 'khor bcu drug pa yod pa de bzhin du mnar med pa yang 'khor bcu drug gi bar du yod par mthong ste/ 'di lta ste/ bya rog kha dang / thams cad sa 'og dang / sdug bsngal mtha' yas mang dang / wa skad 'byin dang / lcags kyi lce spyang gi zas dang / lto gnag dang / lus zhum dang / rmi lam 'jigs byed ston dang / lus zhum mi bzad 'phyang dang / ri brtsegs char ltar 'bab dang / bya 'dzam pa skad 'byin dang / skar phreng dang / sdug bsngal kun gyis nyen dang / gos dri dang / lcags glebs dang / 'gro ba mes sreg ste/ 'di dag ni sems can dmyal ba chen po'i 'khor bcu drug yin no/ /de la mi dge ba bcu'i las kyi lam dang / sems can dmyal ba chen por 'gro ba lnga dag gis mnar med pa 'grub pa mthong ste/ nang du lnga dag byas pas mnar med pa der skye bar 'gyur ro/ /de dang 'thun pa'i las chung ngu byas pas ni de'i 'khor du skye bar 'gyur te/ ji ltar las byas shing bsags pa las kyi nyer bsdogs dang / las kyi mjug byas pa bsten cing bsgoms te mang du byas pa bzhin du sems can dmyal ba'i 'khor gzhan du skye bar 'gyur ro/ /de la mang du mnar med pa lnga 'byung ste/ 'di lta ste/ bsams bzhin du ma la ngan sems kyis khrag 'byin par byed cing 'byin pa de la dga' bar byed/ goms par byed/ mang du byed/ pha rol dag la ston par byed/ de nyid la rab tu 'jog par byed cing de nyid kyi las byed du 'jug na/ de lus dang bral nas ngan 'gro log par ltung ba sems can dmyal ba bya rog kha zhes bya bar skye bar 'gyur ro/ /der skyes nas mnar med pa ma gtogs par gang yang sos la sogs pa bdun gyi gnod pa thams cad brgya 'gyur du 'byung ngo / / khyad par 'byung ba ji ltar bya rog gi kha ltar gdangs nas gshin rje'i mi nag po zhes bya bas ba tshwa'i chu bo de dag len par byed do/ /ba tshwa'i chu bo de dag ni shugs drag pa yin te/ ba tshwa'i chu bo de la kha zed du 'jug go/ / ba tshwa'i chu bo des mchu dang / rkan dang / so dang / mid pa dang / rna ba dang / snying dang / mchin pa dang / rgyu ma dang / pho ba dang / long ka dang / glo ba dag bsregs nas thur du byung ngo / /de tsha ba'i chu bo'i nang du song ste/ khong ba'i nang du song zhing bu ga'i nang du song ba des gsog du gyur cing phyi rol 'ba' shig lus te las kyi chad pas bzung zhing sdug bsngal tsha ba rtsub pa dag myong ba na/ dus yun ring po lo bgrang gis mi lang bar 'tshed par byed de/ de ji srid du de'i sdig pa'i las bcom zhing spangs la zad par ma gyur pa de srid du 'tshed do/ /de de las thar na las de dang rgyu 'thun par tshe rabs stong du yi dags lto gug du skye bar 'gyur/ tshe rabs stong du dud 'gro glang po che dang / sri ma ra dang / d+hu na d+hu dang / ma ra dang / sre mo dang / sbrul dang / 'ga' la dang / go ta ka dang / sa rko dang / sbrang bu dang / phye ba dang / ba glang gi rigs rnams su skye bar 'gyur ro/ /gal te yang de las thar nas mi rnams dang skal ba mnyam par mir skyes na/ de rngon pa'i rigs su skye bar 'gyur te/ tshe rabs nyis brgyar mngal du gnas pa nyid na 'am/ gog thal thul na 'am/ kha spu skyes tsam na 'chi bar 'gyur te/ bag chags des de phyir zhing sdig pa byed pa mthong ngo / /de nas yang dge slong las kyi 'bras bu rnam par smin pa shes pa des sems can dmyal ba chen po mnar med pa'i 'khor la brtags na/ des thos pa las byung ba'i shes pas sems can dmyal ba thams cad sa 'og ces bya ba mthong ngo / /der sems can dag las gang gis skye bar 'gyur snyam nas des thos pa las byung ba'i shes pas brtags na/ gang gis bsams pa bzhin du dge slong ma dgra bcom pa zag pa zad pa la kun du bsten cing bsgoms te mang du byas na/ de lus dang bral nas ngan 'gro log par ltung ba sems can dmyal ba thams cad sa 'og tu skye bar 'gyur ro/ /der skyes nas kyang de la gang sems can dmyal ba yang sos la sogs pa bdun gyis gnod pa bsdus pa de dag thams cad brgya 'gyur du 'byung bar 'gyur ro/ /khyad par du 'byung ba ni 'di lcags kyi sa gzhi de brkos nas gshin rje'i mi rnams kyis mgo thur du bstan te sa brkos par de'i mgo gang yin pa thur du bstan cing rkang lag gang yin pa de dag gyen du ston par byed do/ / de sdug bsngal gyis nyam thag nas ngu skad 'don mi nus/ cho nges 'debs mi nus/ ku cho 'byin mi nus so/ /de'i lus thur du bstan pa gang yin pa de dag thams cad gshin rje'i mi rnams kyis ste'u thogs te rus pa lhag ma ma lus pa'i bar du bzhog par byed do/ /rus pa de dag la yang ba tshwa'i chus chag chag 'debs te de dag la chag chag btab nas kyang 'gre ldog go/ de'i ba tshwa'i chag chag btab pa de dag las de phyung na srog gi lhag ma chung zad cig lus pa zangs dmar po rab tu bskol ba 'khrigs pas bdas shing lcags kyi snod rab tu sreg par par byed do/ /de der mon sran gre'u dang / rgya sran 'tshed pa ltar steng 'og du 'byung ba na lcags kyi bum pa kun bltar mi snang bar kun nas rlangs pas 'khrigs te/ ji srid du de'i sdig pa'i las bcom zhing spangs la zad par ma byas pa de srid du lo 'bum phrag du mar rdung zhing 'tshed do/ /de phyis sems can dmyal ba de las thar nas bskal pa 'am bskal pa'i lhag mar bsreg pa'i gnod pa bsam gyis mi khyab pa chung zad cig 'byung bar 'gyur ro/ /de de las thar nas tshe rabs stong du yi dags kha zas med pa'i nang du skye bar 'gyur te/ de'i lus bkres pa dang / skom pas gdungs shing kun nas thams cad du mar me'i snying po 'bar ba ltar rab tu 'bar ro/ /de de las thar na las de dang rgyu 'thun par tshe rabs stong du dud 'gro mya ngam gyi bya bkres pa dang / skom pas gdungs pa 'di lta ste/ bye'u mchil pa dang / wa dang / zin pa dang / 'ba' sa ka dang / skyin gor dang / tung ka dang / ri dgas mA tri ka dang / ba ra po ta dang / khyi dang / mche ba gtsigs la sogs pa'i dud 'gro rnams su skye bar 'gyur ro/ /de las kyang thar nas gal te mi rnams dang skal ba mnyam par mir skyes na de mi rta gdong can gyi yul du skye bar 'gyur/ tshe rabs nyis brgyar yang mngal du 'chi bar 'gyur/ gal te yang byang nas 'tsho na de dbul zhing nad kyis nyon mongs par 'gyur/ de bzhin du tshe rabs lnga brgyar za ma dang ma ning du 'gyur ba mthong ngo / /de nas yang dge slong las kyi 'bras bu rnam par smin pa shes pa des sems can dmyal ba chen po mnar med pa'i 'khor la brtags na/ des thos pa las byung ba'i shes pas sems can dmyal ba sdug bsngal mtha' yas mang zhes bya ba ji ltar gnas pa mthong ngo / /der sems can dag las gang gis skye bar 'gyur snyam nas des thos pa las byung ba'i shes pas brtags na/ shin du chags pa'i snying gis yul la sems 'jug pa 'am/ sdig pa'i grogs po dang phrad pas sam/ ra ro ba'i nyes pas ma la 'khrig pa byas shing sad nas kyang shin du chags pa'i 'dod chags dang ldan pas 'khrig pa byas la sdig pa'i grogs po'i tshig gis de nas chags nas yang de nyid la 'khrig par byed/ kun du sten cing sgom la mang du byed/ gzhan dag kyang de nyid la rab tu 'jog par byed na de lus dang bral nas ngan 'gro log par ltung ba sems can dmyal ba sdug bsngal mtha' yas mang du skye bar 'gyur ro/ /der skyes nas kyang gang sems can dmyal ba yang sos la sogs pa'i gnod pa de dag thams cad 'byung ngo / /khyad par du 'byung ba ni 'di ltar de'i rkub tu phur bu rab tu 'bar ba rnams dang / tsher ma gang yin pa dag 'jug par byed do/ /snar yang tho ba dag blangs nas phur bu rnams 'debs par byed/ rna gung du yang tho ba dag gis phur bu rnams 'debs par byed/ khar yang tho ba blangs nas phur bu so rno zhing 'bar rab tu 'bar ba rnams kyis rab tu 'gengs par byed/ de'i 'og tu kha'i sdug bsngal rab tu 'bar ba dang / 'og tu gyur pa'i sdug bsngal dag gis sdug bsngal bar byed/ sreg par byed/ gsheg par byed/ rdeg par byed/ rngo bar byed do/ /nang gi mnar med pa'i kun nas rnam pa thams cad du sdug bsngal gyis nyen te ji ltar de dpe bya bar sla ba ma yin pa de ltar ji srid du de'i sdig pa'i las bcom zhing spangs la zad par ma byas pa de srid du sdug bsngal myong bar 'gyur ro/ / de phyis sems can dmyal ba bskal pa 'am/ bskal pa las lhag par bsregs pa de las thar na sdig pa'i las de dang rgyu 'thun pa'i 'bras bus tshe rabs bzhi stong du yi dags kha thur du bltas pa mdag ma za ba'i nang du lus bkres pa dang / skom pas gdungs pa'i lus su skye bar 'gyur ro/ /mya ngam chu dang / grib ma med pa smyig ma'i tshal gyi dud 'gro dag tu yang skye bar 'gyur/ srog chags ri la gnas pa grib ma 'jigs byed dang / mun pa can dang / zin pa gnas pa de dag gi dud 'gro kha gdong nyams shing shi la thug pa'i rnam pa de lta bur skye bar 'gyur ro/ /gang 'od ma'i tshal du rlung gi dud pas me 'byung ste/ me des tshe rabs bzhi stong du sreg cing 'tshed do/ /de las kyang thar nas gal te mi rnams dang skal ba mnyam par mir skyes na/ de'i chung ma bsrungs par mi 'gyur/ gzhan gyi chung ma dang lhan cig 'dug par 'gyur/ de rgyal po 'am/ blon pos de'i rlig pa 'byin par byed/ khyim thams cad yongs su spangs par 'gyur/ lam po che 'am/ bzhi mdo 'am/ grong khyer ram/ gzhan gyi sgor rag lus par 'gyur/ rtag tu skom slong zhing bkres la lus chung bar 'gyur/ de yang dang yang du nad chen pos thebs par 'gyur te/ de srang ngam bzhi mdo 'am dur khrod du sdug bsngal mi bzad pas nyam thag nas 'chi bar 'gyur ba mthong ngo / /de nas yang dge slong las kyi 'bras bu rnam par smin pa shes pa des sems can dmyal ba chen po mnar med pa'i 'khor la brtags na/ des thos pa las byung ba'i shes pas sems can dmyal ba wa skad 'byin zhes bya ba mthong ngo / /der sems can dag las gang gis skye bar 'gyur snyam nas/ des thos pa las byung ba'i shes pas brtags na/ gang thams cad mkhyen pa 'am/ rang sangs rgyas sam/ dgra bcom pa 'am/ chos dang 'dul ba la ngan du brjod cing chos ma yin pa la chos lta bur brjod la gzhan dag kyang chos ma yin pa la rab tu 'jog par byed/ shin du dga' bar byed/ rab tu dga' bar byed la/ de chos ma yin pa de nyid la yang dang yang du chos lta bur ston par byed cing 'phags pa rnams la rtag tu mi snyan par brjod na de lus dang bral nas ngan 'gro log par ltung ba sems can dmyal ba wa skad 'byin par skye bar 'gyur ro/ /der skyes nas kyang sems can dmyal ba yang sos la sogs pa bdun gyi gnod pa bsdus pa de dag thams cad rang gi las kyi 'bras bu dang 'thun par 'byung ngo / / khyad par du 'byung ba ni 'di ltar sems can dmyal ba de'i las kyis byas pa'i wa kha rab tu 'bar ba rnams kyis shin du gang la der skyes ma thag tu wa mche ba rab tu 'bar ba rnams rgyug ste/ 'phags pa la skur pa 'debs pa de la 'dzin par byed do/ /sdig pa byed pa de'i mgo yang gzhan/ lce yang gzhan/ glad pa yang gzhan/ brang zhol yang gzhan/ snying yang gzhan/ mcher pa yang gzhan/ rgyu ma yang gzhan/ gnye ma yang gzhan/ lto yang gzhan/ sta zur yang gzhan/ brla'i rus sbubs kyang gzhan/ byin pa'i sbubs kyang gzhan/ pus mo'i lha nga yang gzhan/ lag pa dang rkang pa yang gzhan/ sor mo yang gzhan/ rkang pa'i sor mo yang gzhan du khyer te/ de ltar yan lag dang nying lag zhigs pa thams cad so sor khyer ro/ /de nas yang de'i sdig pa'i las kyis byas shing bsags pa so so yang dag pa myong ba'i 'bras bu skye bar 'gyur te/ de ltar na yun ring du 'bras bu de myong bar 'gyur ro/ /de gal te yang thar nas gar bab bab tu 'bros pa dang / gshin rje'i mi gzhan dag gis bzung nas de'i kha de gdangs te lce bzung nas mtshon hu lu dag gis dum bur dum bur gcod do/ /bcad nas kyang yang skye bar 'gyur te/ de'i ngag mi gtsang ba 'byin pa gang gis 'phags pa la skur pa btab pa dang / pha rol dag la chos ma yin pa la chos lta bur bstan pa ni de ltar de yun ring du sdug bsngal gyi tshor ba tsha ba dag myong bar 'gyur ro/ /de gal te yang de las thar nas mgon 'dod pa/ skyabs 'dod pa/ dpung gnyen 'dod pa/ gar bab bab tu 'bros pa dang / de'i las kyis byas pa gshin rje'i mi dag 'byung bar 'gyur te/ de dag gis yang bzung ngo / /bzung nas kyang phyin ci log tu smra ba dang / g.yo thabs smra ba sdig pa smra ba/ chos ngan pa'i chos kyis sems can dag lam bzang po las skyod par byed cing smra ba de de rnams kyis bzung ste kha gdangs nas de'i lce phyung ngo / /de yang 'jam zhing zangs kyi mdog ltar dmar ba rgyang grags tsam du skyes te/ de yang lcags kyi sa gzhi rab tu 'bar ba la ldag du 'jug go/ /ldag du bcug nas thong gshol gyi so rno zhing 'bar la rab tu 'bar ba brgya dang / rmon glang rmig pa 'dor ba rno zhing rab tu 'bar ba thong mkhan dang ldan pa rnams kyis don ma yin pa byed pa 'jig rten pha rol tu 'gro ba ba'i dbang du gyur cing don ma yin pa'i skye gnas lcer ming btags pa de la rmed par byed de/ de ltar de yun ring du 'tshed cing sreg go/ /de'i lce gnod pa dang phrad pa de ngu bar byed/ 'khun par byed/ ku cho 'don par byed/ ngu skad 'byin par byed/ mig yongs su 'gyur bar byed do/ /de ltar de ngu skad 'byin pa na 'di ltar gshin rje'i mi rnams kyis rjes su bstan pa tshigs su bcad de smras pa/ sdig tshig yid la bsams nas su/ /'phags pa smod gang dmyal bar ni/ /bye ba lnga bcu rtsa drug dang / /de bzhin bye ba phrag drug gnas/ /chos ma yin pa chos tshul dang / /sdig byed legs pa'i tshul du ni/ /khyod kyis sngon ni gang smras pa/ /me des khyod la skrag par byed/ /ji ltar sems can khyad par can/ /chos 'dod dag las khyod kyis su/ /nges par ngan 'gror 'gro ba yin/ /bde med sdig pa rab tu smras/ /gang zhig rtag tu brdzun smra zhing / /chos ma yin smra chos ldan min/ /de yul kun gyi rkun ma yin/ /rkun ma tha mal rkun ma min/ / chos smra ba yi mi dag gang / /chos nyid la ni spyod pa ste/ /gang du 'gro ba gnod med pa'i/ /rtag pa'i gnas su de 'gro 'o/ /'khrug med mi zad nor yin te/ /skye bo kun gyi jo bor che/ /bden pa mtho ris skas yin te/ /de nyid mya ngan 'das pa'i sgo/ /de ltar bden pa mchog brtags pa/ /rtag tu chos shes dran pa ni/ /mya ngan dga' ba med gnas su/ /mi mchog 'di ni 'gro bar 'gyur/ /khyod kyis chos ni rnam spangs pa/ /mkhas pa rnams kyis smad pa yin/ /khyod kyis mi bzad gang bsgrags pa/ /de 'dir khyod la rnam par 'tshed/ /de ltar 'phags pa la skur pa 'debs pa'i mi de gshin rje'i mi de rnams kyis rjes su bstan nas gnod pa snga ma dag pas mang bar gnod par byed de/ gang de'i ming yang shes par sla ba ma yin no/ /'phags pa la ngan du brjod pa de nyid kyi gnod pa mi zad pa gang yin pa rgyu dang 'thun par 'bras bu 'byung ba ni de bzhin gshegs pas gsung ste/ de ltar ji srid du de'i sdig pa'i las bcom zhing spangs la zad par ma byas pa de srid du 'tshed do/ /de sems can dmyal ba de las thar na/ las de dang rgyu 'thun par tshe rabs 'bum du yi dags bzlums pa'i nang du skye bar 'gyur la gang dag gi lus sha'i gong bu ltar bzlums par 'gyur te/ mthong ba med/ thos pa med/ mnom pa med/ smra ba med do/ /de de las thar nas kyang tshe rabs sum stong du ljan ljin gyi srin bur 'gyur/ de las kyang thar nas gal te mi rnams dang skal ba mnyam par mir skyes na/ de tshe rabs lnga brgyar dbul zhing tshig kun gyis yid mi ches pa dang / brjed ngas pa dang / lkug pa dang / 'on par 'gyur ba mthong ngo / /de nas yang dge slong las kyi 'bras bu rnam par smin pa shes pa des/ sems can dmyal ba chen po mnar med pa'i 'khor la brtags na/ des thos pa las byung ba'i shes pas sems can dmyal ba lcags kyi ce spyang gi zas shes bya ba mthong ngo / /der sems can dag las gang gis skye bar 'gyur snyam nas des thos pa las byung ba'i shes pas brtags na/ gang gis shin du 'khrugs pa'i sems dang sems rtsub mos bsam bsam ste/ dga' nas dge 'dun gyi gtsug lag khang la me sbar la der yang sangs rgyas kyi sku gzugs bsregs shing dge 'dun gyi gnas na mal stan dang / gos dang / nor dang / 'bru'i 'byor ba mang po dag me'i nyes pas tshig la tshig pa de la yang rjes su dga' bar byed cing 'gyod par mi byed/ gzhan dag kyang de nyid la 'jog par byed/ shin du dga' bar byed/ yang dag par rab tu dga' bar byed la las dang las kyi nyer bsdogs dang / las kyi mjug dang ldan par byed na/ de lus dang bral nas ngan 'gro log par ltung ba sems can dmyal ba lcags kyi lce spang gi zas shes bya bar skye bar 'gyur ro/ /der skyes nas kyang gang sems can dmyal ba yang sos la sogs pa'i sdug bsngal bsdus pa gang yin pa de dag thams cad 'byung ste/ thams cad stong 'gyur du 'byung ngo / /khyad par du 'byung ba ni ji ltar las lci bas gnod pa yang lci bar 'gyur te/ gang gnod pa'i rgyu dang 'thun par 'bras bu 'byung zhing sa bon dang 'thun par 'bras bu 'byung ngo / /'di ltar der skyes pa'i las kyi rkyen gyis lus thams cad kun nas rab tu 'bar bar 'gyur lus de las mgo bcu gcig byung ba dpag tshad bcu bcu yod de/ sems can dmyal ba thams cad pas shin du drag cing mi bzad pa 'byung ngo / /de'i dbus na 'dug pa mi ri lta bur kun nas rnam pa thams cad du rab tu 'bar kun du rab tu 'bar te/ bkres pa dang skom pas gdungs pa'i lus dag 'tshed do/ / sreg go/ /gsod do/ /kun nas lag pa gyen du bsgreng ste/ de'i lag pa de yang dpag tshad lnga brgya tsam du 'bar ba'i phreng bas 'khrugs shing de'i rwa'i ri ltar sreg go/ /de kun nas sreg pa na ngu skad 'byin 'o dod 'bod ku cho 'don cing yongs su smre sngags 'don to/ /de ngu skad 'don pa na me lce des de'i kha thams cad 'gengs par byed do/ /de'i kha phye ba dang / phyi rol du kun nas rab tu 'bar zhing rtag tu me lce gcig tu gyur pa yang dang yang du 'phel ba'i mes sreg pa na yun ring du 'tshed do/ /de gal te yang de las thar nas gar bab bab tu 'bros so/ /mgon 'dod pa/ skyabs 'dod pa/ dpung gnyen 'dod pa/ bde ba 'dod pa de 'bros pa dang / legs par byas pa dang / nyes par byas pa'i las kyis 'brel pa sems can dmyal ba de las gnas gzhan du 'byung ste/ mtshan mo ri la char 'bab pa'i chu ltar gnod pa 'phel lo/ /de'i lcags kyi rdo rgyang grags tsam rab tu 'bab ste de dag gis de'i glad pa la sogs pa nas rkang pa'i bar ji ltar bca' sga btags pa lta bur de ltar phye mar byed de de'i mngon pa med par byed do/ /de ltar de lcags las byas pa'i rdo mi bzad pa char ltar 'bab pas btags pa na de nas yang slar 'tsho bar 'gyur te/ lce spyang gi mche ba rab tu 'bar ba dag gis de'i lus bca' sga ltar srab mor byas shing za'o/ /de nas yang byung zhing skyes nas lce spyang mi bzad pa de dag gis za ste/ de ltar yang yun ring du 'tshed cing sreg go/ /slar yang skye bar 'gyur te/ de ltar de las de myong bar 'gyur/ so so yang dag par tshor bar 'gyur/ de sdug bsngal tsha ba rtsub pa gnod pa dag myong bar 'gyur te/ rang gis byas shing gzhan gyis ma byas pa ma byas pa phrad pa ma yin/ byung ba rnams kyis byas pa chud za ba ma yin/ rgyu med pa ma yin/ 'dod rgyal las byung ba ma yin/ rgyu dang rkyen mi mthun pa las byung ba ma yin/ byed pa pos byin gyis ma brlabs/ tshor ba pos byin gyis ma brlabs te/ ji srid du de'i sdig pa'i las bcom zhing spangs la zad par ma byas pa de srid du rang gi rgyu rkyen gyis byas pa myong bar 'gyur ro/ /de sems can dmyal ba de las thar na las de dang rgyu 'thun par tshe rabs stong du yi dags mchog tu mi bzad par smin te/ lus kun nas rab tu 'bar zhing ngu skad 'byin ku cho 'don pa na skye bo kun gyi gnas grong du mtshan mo ngu zhing nyin par yang nyi ma'i 'od mdag me char ltar 'bab pas ji srid du de'i steg pa'i las kyi me 'byung ba bcom zhing spangs la zad par ma byas pa de srid du sreg par byed do/ /de las kyang thar na dgon pa'i dud 'gro rkang pa brgya bar 'gyur te/ rtag tu bkres pa dang / skom pas gdungs la kha gnyis kyis bdag nyid nyon mongs par 'dren cing de'i lus thams cad srin bu mar ko ta ka rnams kyis za bar byed do/ /de gal te yang dud 'gro'i skye gnas de las thar la gal te mi rnams dang skal ba mnyam par so sor myong bar 'gyur ba'i las kyis mir skyes na/ de sprin nag po 'dra bar 'gyur zhing nyams par gyur pa yongs su spangs pa dbul ba yun ring du rngo mong gis nyon mongs shing gzhan la rag las pa mang zhing lus bkres pa dang / skom pas gdungs la de'i srog gi 'tsho ba yang gzhan la rag las par 'gyur te/ de ltar tshe rabs stong du yi dags rnams dang / tshe rabs stong du dud 'gro rnams dang / gnas skabs de dag gi mir 'gyur ba mthong ngo // // 'phags pa dam pa'i chos dran pa nye bar gzhag pa/ bam po bcu bdun pa/ de nas yang dge slong las kyi 'bras bu rnam par smin pa shes pa des/ sems can dmyal ba chen po mnar med pa'i 'khor la brtags na/ des thos pa las byung ba'i shes pas sems can dmyal ba lto gnag ces bya ba mthong ngo / /der sems can dag las gang gis skye bar 'gyur snyam nas des thos pa las byung ba'i shes pas brtags na/ gang gis sangs rgyas kyi dkor nor ma byin par blangs te/ de la yang spyod la spyad nas kyang dag par mi byed/ las de'i 'bras bu la yid mi ches te/ de nas yang spyod par byed gzhan dag kyang de nyid la rab tu 'jog par byed/ sangs rgyas kyi gtogs pa sangs rgyas kyi dkor nor yin la yang bar sems na/ de lus bral nas ngan 'gro log par ltung ba sems can dmyal ba lto gnag tu skye bar 'gyur ro/ /der skyes nas kyang gang sems can dmyal ba yang sos la sogs pa bdun gyi gnod pa de dag thams cad brgya 'gyur du 'byung ngo / /khyad par du 'byung ba ni 'di ltar lus bkres pa dang skom pas gdungs te/ rang gi sha nyid la za'o/ / de nas yang slar skye bar 'gyur te/ de ltar lo brgya stong bye ba phrag du mar za zhing slar skye bar 'gyur ro/ /sdug bsngal nyis 'gyur gyis gdungs pa de'i sdug bsngal gyi las byas pa de brgya gyur du 'gyur te/ bkres pa dang skom pa'i sdug bsngal gyis kyang sdug bsngal lo/ /rang gi lus las byung ba'i sdug bsngal gyis kyang sdug bsngal te/ de ltar de rang gi sha dag la za bar byed cing gar bab bab tu 'bros pa dang / de sbrul po che lto gnag la mdog sprin ltar 'dug pa dang phrad de/ des de'i sen mo la sogs pa dang rus pa la sogs pa mthar chags kyis za'o/ /de nas sos pa dang yang za ste/ de ltar gang zhig thams cad kyi mchog tu gyur pa sangs rgyas kyi ma rung bar byas pa'i las des yun ring du sdug bsngal myong bar 'gyur ro/ /de gal te de las thar nas phyogs seng ldeng gi mdag ma rab tu 'bar ba'i gong bu bsags pa na dpag tshad tsam gyi nang du 'jug ste/ de mdag ma de'i nang du song nas lo brgya stong bye ba phrag du mar sreg cing 'tshed do/ /de nas yang slar skye bar 'gyur te/ de ltar des mthong nas gal te thar na mgon 'dod pa/ skyabs 'dod pa/ dpung gnyen 'dod pa'i drung du gshin rje'i mi dag 'ongs nas phra skam rab tu 'bar ba de dag gis bzung ngo / /des bzung nas lcags kyi bum pa 'bar ba'i nang du bcug ste/ de der mon sran dang / sran chung bzhin du sreg cing 'tshed la yongs su skol te/ steng 'og tu 'byung ba'i sdug bsngal shin du 'jigs shing tsha ba myong ba ni de'i dpe bya bar yang sla ba ma yin no/ /sems can dmyal ba pa de'i sdug bsngal ni khams gsum thams cad kyi rgyu 'bras 'thun pas kyang brgya dang stong gi char yang mi phod de/ de ltar de gnod pa brgya phrag stong yod pa sdug bsngal gyi rgya mtsho shugs dang ldan pa shin du tsha bar bdas pa na/ rang gi las kyi 'bras bu mngon sum du gyur te/ ji srid du de'i sdig pa'i las bcom zhing spangs la zad par ma byas pa de srid du 'tshed par byed do/ /de phyis sems can dmyal ba lto gnag de las thar bar 'gyur te/ thar nas kyang las de dang rgyu 'thun par tshe rabs nyis brgyar yi dags kha zas mi gtsang ba za rnams su skye bar 'gyur/ de gal te de las thar nas kyang tshe rabs bdun brgyar dud 'gro skyugs pa za bar skye bar 'gyur/ de las thar nas kyang gnya' shing gi bu gar ru sbal 'jug pa lta bur mi rnams dang skal ba mnyam par mir skyes nas de yang ba lang rdzir gyur nas mi gtsang ba za bar 'gyur ba mthong ngo / /de nas yang dge slong las kyi 'bras bu rnam par smin pa shes pa des sems can dmyal ba chen po mnar med pa'i 'khor la brtags na/ des thos pa las byung ba'i shes pas sems can dmyal ba lus zhum zhes bya ba mthong ngo / /der sems can dag las gang gis skye bar 'gyur snyam nas des thos pa las byung ba'i shes pas brtags na/ gang gis chos kyi dkor nor la spyad cing byas pa bsags la/ las dang las kyi nyer bsdogs dang las kyi mjug dang yang bcas par gyur/ gzhan dag kyang de la gzengs stod par byed na/ de lus dang bral nas ngan 'gro log par ltung ba sems can dmyal ba lus zhum du skye bar 'gyur ro/ /der skyes nas kyang gang sems can dmyal ba yang sos la sogs pa'i gnod pa de dag thams cad brgya 'gyur du 'byung ste/ gang de dag gi ming yang shes par sla ba ma yin no/ /khyad par du 'byung ba ni 'di ltar lcags kyi ljon shing rab tu 'bar zhing rab tu mched pa gnyis 'byung ste/ de dag kyang las kyi rlung gi shugs drag pos phan tshun 'drud par byed do/ /de gnyis kyi dbus su sems can dmyal ba pa'i lus de g.yas g.yon su shugs drag po kun gyis gnod par byed/ rnam par zhum par byed/ ta la'i 'dab ma ltar byed do/ /de nas yang slar 'byung ste yang rnam par zhum par byed do/ /de tshal chen po'i shing ljon pa shin du mi bzad pa gnyis kyi bar du bcug nas phan tshun bsgul ba dang lus las byung ba'i sdug bsngal myong bar 'gyur la/ gal te ma bsgul na rnam par zhum par byas pa ltung bar 'gyur ro/ /de de las ltung ba dang / lcags kyi bya rdo rje'i mchu can dag shing de dag gi yal ga la gnas te/ de dag gis sems can dmyal ba pa de'i mgo dang glad pa btog btog nas 'bigs par byed do/ /phug nas mig dag la za bar byed do/ /snying rje rje skad du ngu skad 'byin cing smre sngags 'don pa na de'i mig zos nas mgo dang glad pa 'bigs so/ /de phug nas glad rgyas kyang zos nas snying gsheg par byed do/ /de yang gshegs nas nang du song ste/ khrag 'thung ngo / /'thungs nas rgyu ma la za'o/ /de dag kyang zos nas mcher pa la za'o/ /mcher pa zos nas long ka la za'o/ /de dag kyang zos nas 'doms la za'o/ /brla'i sbubs la yang za'o/ /pus mo'i lha nga la yang za'o/ /rkang pa dag gi sor mo la yang za la de ltar de sdug bsngal drag po de dag yun ring po lo bgrang gis mi lang bar myong bar 'gyur te/ gang gi ming lo brgyar yang shes pa sla ba ma yin no/ /phyogs gcig cig shes par bya na/ ji ltar rgya mtsho'i chu khyor gang blangs pa de'i phyogs tsam du brjod pa de bzhin du 'di yang phyogs gcig tsam zhig brjod de/ de ltar de ji snyam du de'i sdig pa'i las byas shing bsags pa so sor myong bar 'gyur ba bcom zhing spangs la zad par ma byas pa de srid du sdug bsngal de dag myong bar 'gyur ro/ /de sems can dmyal ba de las thar par 'gyur te/ thar nas kyang las de dang rgyu 'thun par tshe rabs stong du yi dags mchil ma za ba rnams su skye bar 'gyur ro/ /de gal te srog gis 'tsho ba tsam du 'gyur zhing lus shin du bkres pa dang / skom pas gdungs pa yi dags kyi 'jig rten de las shi nas kyang ba tshwa'i chu'i nang du dud 'gro nyar skye bar 'gyur/ rtag tu rgya mtsho'i chu'i gseb kyi nang na spyod pa'i chu srin na kra'am/ ma ka ra'am/ rus sbal du 'gyur/ tshe rabs stong du kun du rtag tu bkres pa dang / skom pas gdungs shing ba tshwa'i chu la yongs su spyod par 'gyur/ de las thar nas gal te so sor myong bar 'gyur ba'i las kyis mi rnams dang skal ba mnyam par mir skyes na/ de de'i tshe yul gnyis kyi bar du skye bar 'gyur te/ gang du sa bdag gnyis kyi mtshams phan tshun thab mo 'gyed pa'i yul du skye bar 'gyur ro/ /der de'i nor rdzas bsags bsags pa de dag gzhan gyis 'phrog par byed cing rgyal po'i chad pas kyang de gzung ngo / /bzung nas kyang btson rar 'jug par 'gyur/ lus bkres pa dang skom pas gdungs par 'gyur/ srog tsam gyis 'tsho ba gzhan la rag las shing shin du sdug bsngal bar 'gyur ba mthong ngo / /de nas yang dge slong las kyi 'bras bu rnam par smin pa shes pa des sems can dmyal ba chen po mnar med pa'i 'khor la brtags na/ des thos pa las byung ba'i shes pas sems can dmyal ba rmi lam 'jigs byed ston ces bya bar mthong ngo / /der sems can dag las gang gis skye bar 'gyur snyam nas des thos pa las byung ba'i shes pas brtags na/ gang gis lo nyes byung ba'i tshe dge 'dun gyi 'du ba'i sgo la dge slong zas 'dod pa dag nye bar lhags pa'i zas dang skom zos shing nye bar spyad la mi sdig pa byed pas de yang phrogs te kha zas de dag kyang bcad/ kha zas bcad pas de dag gi lus la gnod cing dge ba'i chos yid la byed mi nus par gyur/ bsam gtan la dga' ba med par gyur/ sems mi sbyong bar gyur/ mi sdig pa byed pa de yang dge 'dun gyi 'du ba'i sgo de phrogs nas 'chags par mi byed cing 'gyod par mi byed la de nas slar yang 'du ba'i sgo de nyid la mi dge ba'i las mngon par byed par dga' zhing gzhan dag kyang de nyid la byed du 'jug rjes su dga' bar byed cing de'i las dang las kyi nyer bsdogs dang / las kyi mjug byas na de lus dang bral nas ngan 'gro log par ltung ba sems can dmyal ba mi lam 'jigs byed ston du skye bar 'gyur ro/ /der skyes nas kyang gang sems can dmyal ba yang sos la sogs pa'i gnod pa bsdus pa de dag thams cad 'byung ngo / /khyad par du 'byung ba ni byas pa brgya 'gyur du 'byung ste/ gang de ltar sems can thams cad kyi gnod pa de dag de ltar mi zad pa de ltar rtsub pa de ltar bzod par dka' ba de ltar sdug bsngal mtha' med pa rang gis byas pa'i las byung zhing bslang ba de'i ming yang shes par sla ba ma yin te/ de'i phyogs tsam zhig brjod na 'di lta ste/ rgya mtsho las chu skyor gang blangs pa de bzhin du brjod do/ /ji ltar mi dag gi rmi lam 'jigs pa dag mthong ba de bzhin du sems can dmyal ba rmi lam 'jigs byed ston der yang / gshin rje'i mi lag na tho ba sna tshogs thogs pa de dag 'byung ste/ sdig pa byed pa'i mi de bzung nas lcags kyi sa gzhi'i steng du 'jog par byed do/ /lcags kyi lung pa'i nang du yang de'i lus bcug nas gtun shing gis phye mar rlog ste rus pa de 'di ltar sbrang rtsi'i tshigs ma'i gong bu ltar byed do/ /de nas yang slar skye bar 'gyur te/ yang tho ba rnams kyis phye mar rlog ste/ de'i sdig pa'i las byas shing bsags pa so so yang dag pa myong bar 'gyur ba'i mthus 'bras bu de nye bar spyod do/ /lung pa gnod pa de las thar na gal te yang rang gi las kyis mtshon cha'i nags tshal gyi nang du khrid nas 'gro ste/ mtshon cha'i nags tshal der phyin nas lus la mtshon 'bab pas gnod pa mang du byed/ gsheg par byed/ 'joms par byed/ phye mar rlog par byed/ de'i lus kyi lpags pa thams cad hral hrol du byas nas rgyug par byed do/ /mgon 'dod pa/ skyabs 'dod pa/ dpung gnyen 'dod pa de rgyug pa de dang / der mtshon cha chen po char ltar 'bab pas gsheg par byed/ 'joms par byed do/ /rtsa dang rgyus pa thams cad shad shad por byas te/ lus gang la lpags pa bya sgro tsam yang ma lus par byas nas lus kyi rus pa'i dra ba tsam zhig 'jog go/ /rgyus pa sbrel ba'i gnad de dag tu yang mtshon char ltar 'bab pas gcod cing gsheg par byed de/ de gcod pa na snying rje rje skad du ku cho 'don cing yongs su smre sngags 'don la thams cad du 'bros so/ /rang gi lus dang yid kyis kun nas bslang ba'i mi dge ba'i las kyis bslus pa de bdag nyid thams cad du las des shin du 'tshed par byed do/ /rnam par smin pa ma myong bar de dag 'gag par mi 'gyur zhing mi dge ba'i las de ma myong bar thar ba med de/ gang gi tshe so sor myong na de sems can dmyal ba de las thar bar 'gyur ro/ /thar nas kyang las de dang rgyu 'thun par tshe rabs stong du yi dags mchil ma za ba rnams kyi nang du skye bar 'gyur ro/ /de las thar nas kyang tshe rabs lnga brgyar 'od ma'i tshal du srin bur skye bar 'gyur te/ gang dang gang du skyes par rdo 'bab pas 'dam bu srab mor brdungs pa ltar lus shin du srab mor rdung ba'i gnod pa myong bar byed do/ / de las thar nas kyang gal te mi rnams dang skal ba mnyam par mir skyes na/ de dbul zhing nad bu can dang / gzhan gyis mngag pa dang / yul bye ma can dang / mya ngam dang / g.yang sa dang / chu med pa dang / rtswa med pa dang / nags tshal med pa dang / ne'u gsing med pa dang / lteng ka med pa'i 'khor rtag tu gnod par skye bar 'gyur ba mthong ngo / /de nas yang dge slong las kyi 'bras bu rnam par smin pa shes pa des sems can dmyal ba chen po mnar med pa'i 'khor la brtags na/ des thos pa las byung ba'i shes pas sems can dmyal ba la lus zhum mi zad 'phyang zhes bya ba mthong ngo / /der sems can dag las gang gis skye bar 'gyur snyam nas des thos pa las byung ba'i shes pas brtags na/ sbyin pa po 'am sbyin bdag gang gis 'di ltar rdzas 'dis nad pa de dag nyid kyi don du 'gyur bar bya'o snyam nas gus pa dang / dad pa dang / dang ba dang / yid gsal bas nad pa khyim gyi nang nas byung ba de'i nad zhi bar bya ba'i phyir rdzas byin pa sdig pa can lung bong ltar spyod pa khong gsog tu 'dug pa gos ngur smrig bgos pa des nad pa'i gsos sman gyi rkyen gyis yo byad du byas pa 'phrog par byed do/ /phrogs nas kyang rang nyid za'o/ /zos nas kyang 'chags par mi byed/ 'gyod par mi byed/ sbyong bar mi byed cing de nas yang byed la gzhan dag kyang dad par byed/ rab tu 'jug par byed/ rjes su dga' bar byed cing yang dang yang du sems kyis ro myong bar byed na de lus dang bral nas ngan 'gro log par ltung ba sems can dmyal ba lus zhum mi zad 'phyang du skye bar 'gyur ro/ /der skyes nas kyang gang sems can dmyal ba yang sos la sogs pa'i gnod pa bsdus pa de dag thams cad 'byung ngo / /khyad par du 'byung ba ni 'di ltar sems can dmyal ba de na lcags kyi shing ljon pa yal ga rab tu rgyas shing rab tu 'bar ba dpag tshad tsam yod de rab tu mched cing 'bar ba'i rnam pa de lta bu de khong pa'i nang du 'tshed do/ /gang gis sems can dmyal ba de la rdo reg na rdo rje ltar sra zhing rab tu 'bar bas yal ga rgyas shing rab tu 'bar bas yang brgya 'gyur du rab tu sreg ste shing gi me de'i rnam pa ni de lta bu yin no/ /shing de'i rtsa ba'i 'og tu sems can dmyal ba pa de skye bar 'gyur te/ nad bzhi brgya rtsa bzhis gnad par byas shing 'phel bar byed pa na/ gcig pu zla med cing grogs med par sdug bsngal myong ngo / /gang de'i mgo de thur du bstan cing rkang pa gyen du bsgreng ba'i shing de'i me'i mthu de ni me gzhan gang yin pa de dag chu bsil ba dang 'dra ste/ de'i rtsa bar de de ltar gnod par byed de/ ji ltar skra'i rtse mo'i bar tsam yang med pa de ltar gnod par byed do/ /de nad de dag gis kyang nyon mongs shing me brgya 'gyur gyis sreg la shing gi 'og tu song bas kyang shin du gnod pa na yun ring po lo bgrang gis mi lang bar gnod pa myong ngo / /de ltar de gnod pa myong ba na yang gshin rje'i mi lag na mtshon cha thogs pa dag mtshon cha blangs nas/ gnad dang / gnad dag gcod par byed cing lpags pa 'dral bar byed do/ /de gnod pa lnga yis gnod par byed de/ nad dang / shing gi me dang / mtshon cha dang / bkres pa dang / skom pas yun ring po lo bgrang gis mi lang bar sdug bsngal myong ngo / /spu zing zhes byed pa brgya phrag khri dang ldan pa de mngon par brjod pa des ji srid du de'i sdig pa'i las bcom zhing spangs la zad par ma byas pa de srid du sdug bsngal tsha ba mi bde ba rtsub pa dag myong bar 'gyur ro/ /gang gi tshe las de zad na sems can dmyal ba de las thar bar 'gyur la thar nas kyang de las de dang rgyu 'thun par yi dags me mdag dang dud pa za ba rnams kyi nang du skye bar 'gyur te/ lus bkres pa dang skom pas gdungs shing bsregs pa lta bur 'gyur/ yi dags kyi 'jig rten de las thar nas kyang tshe rabs lnga brgyar dud 'gro me mdag char ltar 'bab pa dang bye ma char ltar 'bab pas sreg cing 'tshed do/ /dud 'gro'i 'jig rten de las thar nas kyang gal te mi rnams dang skal ba mnyam par mir skyes na 'du ba'i gzhir gnas shing rdo la za ste/ skyes nas shin du sdug bsngal la nams kyang lto 'drangs par mi 'gyur lce'i rtse mos kyang zas zhim po myong bar mi 'gyur te thos pa tsam 'ba' shig tu zad do/ /gzhan gyis bkol zhing dbul ba dang / nad bu can dang smad par 'gyur ba mthong ngo / /de nas yang dge slong las kyi 'bras bu rnam par smin pa shes pa des sems can dmyal ba chen po mnar med pa'i 'khor la brtags na/ des thos pa las byung ba'i shes pas sems can dmyal ba ri brtsegs char ltar 'bab pa zhes bya ba mthong ngo / /der sems can dag las gang gis skye bar 'gyur snyam nas des thos pa las byung ba'i shes pas brtags na/ gang gis rang sangs rgyas bkres pa'i zas phrogs na de lus dang bral nas ngan 'gro log par ltung ba sems can dmyal ba ri brtsegs char ltar 'bab pa zhes bya bar skye bar 'gyur ro/ /der skyes nas kyang sems can dmyal ba yang sos la sogs pa'i gnod pa bsdus pa de dag thams cad brgya 'gyur du 'byung ngo / /khyad par du 'byung ba ni tho ba dang / mdung thung dang / rdza ma dang / lung pa'i sdug bsngal dang / mtshon cha 'bab pa'i sdug bsngal sna tshogs myong bar byas shing ri brtsegs char ltar 'bab pa de'i steng du bab po/ /de'i steng du ri brtsegs pa dpag tshad tsam yod pa bab pa gang gis de bye ma chang pa nas gtor ba bzhin phye mar rlog go/ /phye mar brlags pa dang yang slar skye bar 'gyur ro/ /de nas yang phye mar rlog par byed do/ /me'i phung po bcu gcig gis dbus su bcug nas me thab kyi nang du lus ma lus par bsregs so/ /de'i mig skyes pa yang phyung nas gtubs shing bcad de gtor to/ /de'i lce yang gshin rje'i mi rnams kyis bcad do/ /bcad nas kyang slar skye'o/ /de'i sna yang bcad cing zha nye rab tu bskol bas 'gengs so/ /de'i rna ba yang zangs dmar po bzhus pas 'gengs so/ /ba tshwa rab tu bskol bas lcags kyi snod rab tu bsregs pa bkang ste/ khyer nas de la chag chag 'debs shing yang spu gri rnams kyis shin du 'jog par byed do/ /nad bzhi brgya rtsa bzhi rnams kyis rtag tu gnod par byed do/ /de kun nas sdug bsngal gyis nyam thag cing thams cad nas rab tu 'bar ba me lce gcig tu gyur pa na sems can dmyal ba pa'i sdug bsngal tsha bas rtsub pa dag ji srid du de'i sdig pa'i las byas shing bsags pa so sor myong bar 'gyur ba bcom zhing spangs la zad par ma byas pa de srid du yun ring po lo bgrang gis mi lang bar 'gyur ro/ /de phyis sems can dmyal ba de las thar bar 'gyur te/ thar nas kyang las de dang rgyu 'thun par tshe rabs lnga brgyar yi dags grog sbur yan lag rno ba 'bab pas nyam thag cing tsan da ni ka za ba'i nang du skye bar 'gyur ro/ / de gal te de las thar nas kyang tshe rabs bdun brgyar tsi ri ka dgon pa na gnas pa ma rungs pa sgra 'byin pa'i nang du ri dgas ru rur skye bar 'gyur te/ lus rtag tu bkres pa dang skom pas gdungs par 'gyur/ de gal te de las thar nas kyang gal te mi rnams dang skal ba mnyam par mir skyes na/ de rtag tu khur 'khur zhing gzhan gyis bkol bar 'gyur/ gnod pa sna tshogs kyis lus shig shig por gyur cing mtshan mo dang nyin par bde bar gnas par mi 'gyur/ rkang pa dang lag pa dag rdol cing gdong rtag tu rtsub par 'gyur/ lus kyi mdog ngan pa dri ma can la rtag tu gos dang bral bar 'gyur/ las de dang rgyu 'thun par mir gyur na yang tshe rabs lnga brgyar mi yi dags kyi gzugs lta bur 'gyur/ mtshan mo dang nyin par lus dang yid bde bar gnas par mi 'gyur ba mthong ngo / /de nas yang dge slong las kyi 'bras bu rnam par smin pa shes pa des sems can dmyal ba chen po mnar med pa'i 'khor la brtags na/ des thos pa las byung ba'i shes pas sems can dmyal ba bya 'dzam pa sgra 'byin ces bya ba mthong ngo / /der sems can dag las gang gis skye bar 'gyur snyam nas des thos pa las byung ba'i shes pas brtags na/ gang gis yul dgon dung na chu nyung ngu zhig yod pa dang srog chags rnams su 'bral te/ de la srog ltos/ de la rag las shing / 'dren pa srog 'tsho ba de dag dang 'brel ba'i chu de mi ngan pa sdang ba'i sems kyis bcad do/ /de'i chu bcad pas yul de thams cad ma rung bar byas pa nas yi dgas dang bya'i bar thams cad kyang shi la grong dang / grong khyer gyi dge sbyong dang bram ze kun la gnod par byas/ skom gyis gdungs par byas shing de'i chu bcad pas yul ma rung bar byas pa de lus dang bral nas ngan 'gro log par ltung ba sems can dmyal ba bya 'dzam pa sgra 'byin du skye bar 'gyur ro/ /der skyes nas kyang gang sems can dmyal ba yang sos la sogs pa'i gnod pa bsdus pa de dag thams cad 'byung ngo / /khyad par du 'byung ba ni 'di ltar dgon pa dpag tshad bdun brgya yod pa dang / lcags kyi shing ljon pa dang / ri brags rab tu 'bar zhing mi bzad pa de la sems can dmyal ba des phyin ci log tu chu dang shing ljon pa dang nags tshal dang lteng ka phyun chogs par mthong ngo / /de yang bkres pa dang skom pa dpe med cing shin tu mi bzad pa'i me des bsregs nas ngu skad 'byin yongs su smre sngags 'don bzhin du bdag gis btung ngo snyam nas lteng ka de'i drung du rgyug pa dang / de yang ba tshwa rab tu bskol bas gang ngo / /de nas yang gshin rje'i mi lag na mtshon thogs pa brgya 'byung ste/ de dag gis de bzung ngo / /bzung nas kyang mtshon cha rnams kyis gshegs shing 'dral to/ /de sdug bsngal gnyis kyi sdug bsngal ba yin te/ mtshon cha dang bkres skom gyi sdug bsngal lo/ /de ltar yun ring du mtshon cha dang dgon pa'i sdug bsngal myong ngo / /de gal te de las thar nas kyang bkres pa dang / skom pas nyen pa gar bab bab tu 'bros pa dang / des chu bsil ba dag cig mthong nas der song ngo / /der song ba dang chu de dag kyang bya 'dzam pa skad 'byin ces bya ba glang po che tsam la mchu rno ba zhig yin te des bzung ngo / / gzung nas kyang gnam du 'phangs so/ /'phangs pa na 'khrul cing dran pa dang bral bas slar log pa dang sa gzhi rab tu 'bar la sra zhing reg par mi bzod pa'i steng du rdo bzhin du lhung ste/ de der dum bu brgyar gyes so/ / de nas yang slar 'dus te sos pa dang / bya dag gis bzung nas de sngon bzhin du sdug bsngal bar byed do/ /nad thams cad kyis kyang thabs nas da ltar sngon bzhin du lo bye ba 'bum phrag du mar byas pa'i sdug bsngal gyi rnam pa de dag myong ngo / /de gal te de las thar nas kyang yang gshin rje'i mi rnams kyis bzung ngo / /bzung nas kyang zangs dmar po rab tu bskol ba chu bo'i klong lta bur bcug go/ /de bcug nas dbu ba'i gong bu bzhin du rab tu bzhus so/ /de nas yang slar 'byung ste/ nyes par byas pa'i las kyi mtha' spyad pa de de ltar yun ring du lo bgrang gis mi lang bar 'tshed do/ /de gal te de las thar nas kyang lus bkres pa dang / skom pas gdungs pa yul ma rung bar byed pa de rang gi las kyis byas pa myong bzhin du gar bab bab tu 'bros pa dang / lam du phur bu rtse mo shin du brdar cing rno ba byung ste/ des de'i rkang mthil la sogs pa brtol ba nas pus mo'i lha nga'i bar du brtol to/ /rkang pa brtol ba de lus ni rab tu 'bar/ sdug bsngal gyis nyam ni thag /snying rje rje skad du ku cho ni 'byin/ yongs su smre sngags ni 'don/ ngu zhing rang gi khrag gi nang du lhung zhing bying ngo / /de nas yang lus kyi yan lag thams cad bsregs pa langs nas de ltar sems blong blong por gyur pa de 'gro ba dang / khyi so rab tu 'bar ba dag 'ongs nas de dag gis bzung ste/ de'i yan lag dang nying lag thams cad dang / lpags pa dang khrag dang sha dang tshil dang rkang yan chad la za'o/ /de ltar yul ma rung bar byed pa de ji srid du de'i sdig pa'i las byas shing bsags pa so sor myong bar 'gyur ba ma zad cing ma spangs pa de srid du rang gi gnod pa yun ring du myong bar 'gyur ro/ /de phyis las de dang 'thun par tshe rabs lnga brgyar dud 'gro 'phye bo rnams kyi nang du skye bar 'gyur te/ gar skyes par ser bas sam/ sbrul dag gis gsod pa 'am/ rlung dag gis gsod par 'gyur/ de de las thar nas kyang gal te mi rnams dang skal ba mnyam par mir skyes na de ri khrod pa'i rigs su skye zhing skye bo kun gyis smad par 'gyur ba mthong ngo / /de nas yang dge slong las kyi 'bras bu rnam par smin pa shes pa des sems can dmyal ba chen po mnar med pa'i 'khor la brtags na/ des thos pa las byung ba'i shes pas sems can dmyal ba skar phreng zhes bya ba mthong ngo / /der sems can dag las gang gis skye bar 'gyur snyam nas des thos pa las byung ba'i shes pas brtags nas/ gang nyon mongs pa thams cad zad par byed 'dod pa 'gog pa las langs pa'i dge slong dang por shin du bkres pa de'i kha zas phrogs te phrogs nas kyang mgu zhing yid rab tu dga' la yang dang yang du ro myong bar byed/ legs par sems/ de nyid la gzhan dag kyang gzeng stod par byed la las dang las kyi nyer bsdogs dang / las kyi mjug dang yang dag par ldan pa byas shing bsags pa'i las mi bzad pa rnam pa de lta bu byed na/ de lus dang bral nas ngan 'gro log par ltung ba sems can dmyal ba skar phreng du skye bar 'gyur ro/ /der skyes nas kyang gang sems can dmyal ba yang sos la sogs pa'i gnod pa bsdus pa de dag thams cad brgya 'gyur du 'byung ngo / /khyad par du 'byung ba ni 'di ltar sems can dmyal ba de'i gnas grwa gnyis pa yod de kun nas rdza mas yongs su bskor to/ /grwa gcig na rdza ma rab tu 'bar ba skar ma bkram pa lta bur lo bye ba khrag khrig sum bcu rtsa dgu dang / ther 'bum dgu stong dang / bye ba dung phyur phrag drug bcu dang / skyang 'phyes bye ba sum bcu sa dzA li ni dang / kod TU di kod TU dang / ke sa ra stong phrag nyi shu ste/ grangs kyi tshad de snyed kyi bar du 'tshed cing bsreg ste/ nya ltar 'gre ldog go/ /zangs dmar po bskol ba rab tu 'bar ba rdza mar blugs par nyin gcig bzhin du tsha bar byas shing sdug bsngal drag pa rtsub pa mi bzad pa 'phel te ngu skad 'don cing cho nges 'debs so/ /de ltar de nyes par byas pa'i las smad par bya ba rang gi sems las byung bas yun ring du snga ma bzhin du 'tshed do/ /de gal te phyogs gcig las thar nas kyang rlung sems dang phrag par 'jug ces bya ba spu gri lta bus gnad thams cad dang / gnad so so dag bcad nas des sems can dmyal ba pa de'i steng du phyung ste/ sems can dmyal ba pa'i grwa gnyis pa der bcug go/ sems can dmyal ba pa rlung gis bdas nas grwa gnyis su bcug pa'i lus kyi khams su gtogs pa thams cad bye ma snyed du gtubs shing bcad de lus la rtsa rgyus tsam lus par byed do/ /de ltar de bcad pa'i lhag ma de gshin rje'i mi rnams kyis bzung ngo / /bzung nas rdza ma skar ma'i phreng ba lta bur rlung gis bdas te bcug go/ de yang dang yang du der bcug pa na rkang pa gyen du bsgreng zhing mgo thur du bstan pa dang thog ma nyid du mgo ltung ngo / /de'i 'og tu zangs dmar po rab tu bskol bas mig ltung bar byed do/ /de'i 'og tu de'i kha'i lpags pa ltung bar byed do/ /de'i mid par zangs dmar po bzhus pas gang ste/ de'i mid pa thams cad khyab par sreg pa na ngu skad 'byin pa 'am 'bros par mi nus so/ /de ltar de'i lus kyi sdug bsngal gyis nyam thag pa yang dang yang du gshin rje'i mi de dag gis tho ba blangs nas mgo slar byung ba dag la rdeg par byed do/ /glad pa nyams pa des de'i lus thams cad khyab ste mgo dang lus dang khog pa yun ring du 'gre ldog pa ltar 'gre ste/ de ltar de sems can dmyal ba skar phreng gi grwa gnyis par ji srid du de'i sdig pa'i las byas shing bsags pa bcom zhing spangs la zad par ma byas pa de srid du 'tshed do/ /de'i las byas shing bsags pa zad nas de de las thar bar 'gyur te/ thar nas kyang las de dang rgyu 'thun par tshe rabs stong du yi dags zas la re bar skye bar 'gyur te/ de ltar tshe rabs bdun brgyar tshegs chen pos lo brgyar bsgrubs na zas lan gcig cig rnyed par skye bar 'gyur/ tshe rabs lnga brgyar ri 'or na gnas pa'i ri dgas rnams kyi nang du skye bar 'gyur te/ rtag tu 'khrul pas 'jigs shing skye bo kun gyis 'jigs pa dang / ri 'or gyi gseb mi med par yang rtag tu 'khrul cing lus skem la mdog ngan par 'gyur ro/ /de phyis las kyi lhag ma des lings pa dag 'ong ba'i gnod pas srog dang bral bar 'gyur ro/ /de de nas shi nas kyang gal te so sor myong bar 'gyur ba'i las kyis mi rnams dang skal ba mnyam par mir skyes na/ de rtag tu tshong pa'i lam ston par byed par 'gyur/ rtag tu lus bkres shing skom la dub pa dang / yi chad pa dang / gzhan la rag las pa mang ba dang / srog tsam gyis 'tsho ste/ de ltar mi'i gzugs brnyan du gyur pa/ rtag tu sdug bsngal gyis sdug bsngal bar gyur pa mthong ngo / /de nas yang dge slong las kyi 'bras bu rnam par smin pa shes pa des sems can dmyal ba chen po mnar med pa'i 'khor la brtags na/ des thos pa las byung ba'i shes pas sems can dmyal ba sdug bsngal kun gyis nyen zhes bya ba mthong ngo / /der sems can dag las gang gis skye bar 'gyur snyam nas des thos pa las byung ba'i shes pas brtags na/ gang gis thams cad mkhyen pa'i gsung rab glegs bam la bris pa sdang ba'i sems dang log par lta ba dang / log par 'khu ba'i s ems kyis 'di ltar sangs rgyas la srog chags dag chos de nyan pa dad pa med par bya ba'i phyir chos kyi gzhi bshig te btang ngo snyam nas bor na de log par lta ba byas shing bsags pa'i las kyis sems rnyog par byas shing gzhan dag kyang de la rab tu 'jog par byed/ yang dag par dga' bar byed la de nas yang chos kyi glegs bam du gtogs pa sdang ba'i sems kyis 'dor bar byed de/ las dang las kyi nyer bsdogs dang las kyi mjug la phyi phyir zhing de nyid la dga' bar byed na/ de lus dang bral nas ngan 'gro log par ltung ba sems can dmyal ba sdug bsngal ba kun gyis nyen par skye bar 'gyur ro/ /der skyes nas kyang gang sems can dmyal ba yang sos la sogs pa bdun gyis gnod pa bsdus pa de dag thams cad 'byung ngo / /khyad par du 'byung ba ni 'di ltar dmyal ba pa'i mig la zangs dmar po rab tu bzhus te chag chag btab pas rab tu zhu ba dang / de bzhin du bye ma rab tu 'bar ba reg na/ rdo rje ltar sra ba rnams kyis mig de la btab nas lag pas bzung ste mi bzad pas mnyes so/ /de ltar mig la mnyes pa gang yin pa de bye ma reg pas rab tu zhu'o/ /de nas yang slar skye bar 'gyur te/ yang mnyes so/ /sog le rab tu 'bar ba yang blangs nas lag pa gnyis bcad do/ /de nas yang slar 'byung bar 'gyur te/ phyed rdza ma rab tu 'bar ba'i nang du lhung ste 'tshed do/ /de'i phyed kyang mtshon gyis bzhog par byed cing gcod par byed do/ /de'i mig gnyis kyis dam pa'i chos mthong nas bor ba de'i rnam par smin pa ni de yin no/ /gang lag pas bor ba de'i rnam par smin pa ni de'i lag pa bcad pa yin no/ /gang gis nyes par spyad pa de bsags pa ni rdza ma'i nang du bcug pa ste/ 'tshed pa na bya'i mchu rno la rab tu 'bar bas gzas te phug za zhing steng gi khu ba la 'thung bar byed do/ /de'i 'og tu song ba'i lpags pa lhag ma rdza ma'i nang du ma bcug pa phyed po de ni gshin rje'i mi rnams kyis ste'u yis bzhog go/ /phyed bzhogs nas shin du srab mor byed do/ /de nas ba tshwa'i chus kyang chag chag 'debs so/ /khab rtse mo rno zhing rab tu 'bar ba 'bigs par byed pas skabs yod yod du lus la 'bigs par byed do/ /de'i mgo yang 'khor los yongs su 'khor ro/ /de las thar ba dang kun nas rab tu bzhus pa'i rgyun mi 'chad pa'i 'bab pa de la 'thung bar byed do/ /de ltar de gnod pa myong ba na der las mi bzad pa byas shing bsags pa ji srid du de'i sdig pa'i las byas shing bsags pa bcom zhing spangs la zad par ma byas pa de srid du myong bar 'gyur ro/ /de phyis sems can dmyal ba de las thar bar 'gyur te/ thar nas kyang las de dang rgyu 'thun par tshe rabs lnga brgyar yi dags dud pa za ba rnams kyi nang du skye bar 'gyur te/ de'i snying ngan song gis bsgribs la lus la gnod par 'gyur ro/ /gal te de las thar nas kyang tshe rabs bdun brgyar dud 'gro mtshan mo rgyu ba 'ug pa thur du lta bar skye bar 'gyur/ de las thar nas kyang so sor myong bar 'gyur ba'i las kyis gal te mi rnams dang skal ba mnyam par mir skyes na/ tshe rabs bdun brgyar gangs khrod du gnas shing zas su ko dra ba za la dbul ba dang kla klor 'gyur ba mthong ngo / /de nas yang dge slong las kyi 'bras bu rnam par smin pa shes pa des sems can dmyal ba chen po mnar med pa'i 'khor la brtags na/ des thos pa las byung ba'i shes pas sems can dmyal ba gos dri zhes bya ba mthong ngo / /der sems can dag las gang gis skye bar 'gyur snyam nas des thos pa las byung ba'i shes pas brtags na/ log par lta ba gang gis ched du bsams/ ched cher byas/ dga' bar byas/ shes par byas shing mngon par zhen pa'i blos 'di ltar yo byad 'di dag bsregs pas dge slong de dag ma rung bar bya'o snyam nas dge 'dun gyi zhing ngam/ bu ram shing ngam/ ldum ra 'am/ kun dga'i ra ba 'am/ de las gzhan pa dge 'dun gyi 'tsho ba'i yo byad rnams mes bsregs la de las dang las kyi mjug dang ldan na de lus dang bral nas ngan 'gro log par ltung ba sems can dmyal ba gos drir skye bar 'gyur ro/ /der skyes nas kyang gang sems can dmyal ba yang sos la sogs pa bdun gyi gnod pa bsdus pa de dag thams cad brgya 'gyur du 'byung ngo / /khyed par du 'byung ba ni 'di ltar sems can dmyal ba de kun nas dra ba rab tu 'bar bas 'khor te kun nas dra ba khab kyi bu ga tsam gyis khebs pa der skyes so/ /sems can dmyal ba de gshin rje'i mi rnams kyis mda' rab tu 'bar zhing rno la shugs drag pas glo gnyi gar brgyab pa na dra ba de'i nang nas 'bros pa dang de dra ba'i mig nas 'bros par mi nus shing de dra ba der shin du thogs te/ de'i dra ba rno ba'i mthus bdag nyid 'byin par mi nus so/ /dra ba des lag pa yang gcod par byed/ rtsib logs kyang bzhog par byed/ yan lag dang nying lag thams cad kyang rus pa la thug gi bar du bzhog par byed do/ /dra ba des bzhog pa na yang yang du gshin rje'i mi de rnams kyis mde'u yi rtse mo shin du bdar bas lan brgya 'am yang na stong du gsod do/ /las kyi dra bas bsgribs pa de mda'i sdug bsngal gyis yun ring du nyon mongs te/ sems can dmyal ba der ji srid du de'i sdig pa'i las byas shing bsags pa bcom zhing spangs la zad par ma byas pa de srid du sdug bsngal mi zad pa rtsub pa gzhan dang mi 'dra ba dag myong bar 'gyur ro/ /de phyis sems can dmyal ba de las thar bar 'gyur te/ thar nas kyang las de dang rgyu 'thun par tshe rabs bdun brgyar yi dags khyim gyi nang na bu 'byin pa'i skad ngan 'don pa rnams kyi nang du skye bar 'gyur/ de las thar nas kyang tshe rabs lnga brgyar dud 'gro'i skye gnas khyim bya dang rma bya dang ba lang dag gi lci ba'i nang du skye bar 'gyur/ de las thar nas kyang de mi rnams dang skal ba mnyam par mir skyes na/ de las de dang rgyu 'thun par gtum po'i bu btsa' ba'i khyim du skye bar 'gyur ba mthong ngo / /de nas yang dge slong las kyi 'bras bu rnam par smin pa shes pa des sems can dmyal ba chen po mnar med pa'i 'khor la brtags na/ des thos pa las byung ba'i shes pas sems can dmyal ba lcags glebs shes bya ba mthong ngo / /der sems can dag las gang gis skye bar 'gyur snyam nas des thos pa las byung ba'i shes pas brtags na/ mi brtan pa dang / mi brtan pa'i sems kyi blo ngan pa bslu ba'i bsam pa gang gis 'di ltar dbyar zas med pa'i tshe/ dge slong dag la nad kyi gsos sman gyi rkyen dang zas dag sbyar gyis dge slong dag sems las chung ngur gyis shig / tshegs chung ngus gnas par gyis shig /yid kyi las chung bar gyis shig ces smras nas/ dge slong dag spyan drangs la/ dge slong de dag kyang de'i dad pa bskyed pa des zas med pa'i tshe yang de'i dad pa bskyed pa des yon bdag gzhan du ma btsal to/ /de nas yang mi ngan pa des dge slong de dag gi re ba med par byas pa dang / zas med pa de'i tshe la la ni 'chi ba'i dus byed/ la la ni dge ba'i chos bskyed par mi nus/ la la ni shin du sdug bsngal bar gyur/ la la ni yul gzhan du 'gro bar byed de/ de ltar gang dge slong de dag la brdzun byas pa de sems can dmyal ba lcags glebs su skye bar 'gyur ro/ / der skyes nas kyang sems can dmyal ba yang sos la sogs pa'i gnod pa bsdus pa de dag thams cad 'byung bar 'gyur ro/ /khyad par du 'byung ba ni 'di ltar sems can dmyal ba pa de me'i phung po bcu gcig gis yongs su bskor cing bkres pa dang skom pas yongs su gdungs la/ gshin rje'i mi rnams kyis yang dang yang du zangs dmar po bskol ba dang / lcags kyi thu lum rab tu 'bar bas sems can dmyal ba lus zhum pa de pad ma chen po kha btsums pa dang phye ba ltar sreg go/ /'tshed do/ /skems so/ /gsod do/ /de nas yang slar skye bar 'gyur te/ gnod pa khyad par du 'byung ba ni ji ltar las byas pa bzhin du de'i lcags glebs pa chu zheng dpag tshad lnga yod pa kun nas rab tu 'bar la kun nas me lce gcig tu gyur pa khyer te des slu bar byed pa de yongs su dkris shing du mar bskor to/ /lus kun nas rab tu 'bar ba ku cho 'don pa na so sor nyams shing thams cad nas bde ba khab kyi bu ga tsam yang med do/ /me dang lcags glebs pa des rtag tu khyab ste/ de ltar de sdug bsngal drag pa rtsub pa shin du mi bzad pa dag myong ngo / /bkres pa dang skom par gyur cing lcags glebs pa dang me 'byung bas de ltar de ji srid du de'i sdig pa'i las byas shing bsags pa bcom zhing spangs la zad par ma byas pa de srid du gnod pa de dag myong bar 'gyur ro/ /de de las thar na las de dag dang rgyu 'thun par tshe rabs bdun stong du yi dags glad rgyas za ba rnams kyi nang du skye bar 'gyur ro/ /de las thar nas kyang tshe rabs bdun stong du dud 'gro kha zas med pa 'am me za ba rnams kyi nang du skye bar 'gyur ro/ /de las thar nas kyang gal te so sor myong bar 'gyur ba'i las kyis mi rnams dang skal ba mnyam par mir skyes na/ de rtag tu rgyal pos btson rar bcug cing tshe rabs lnga brgyar bkres pa dang skom pa dag gis 'chi ba'i dus byed par 'gyur ba mthong ngo / /de nas yang dge slong las kyi 'bras bu rnam par smin pa shes pa des sems can dmyal ba chen po mnar med pa'i 'khor la brtags na des thos pa las byung ba'i shes pas sems can dmyal ba 'gro ba mes sreg ces bya ba mthong ngo / /der sems can dag las gang gis skye bar 'gyur snyam nas des thos pa las byung ba'i shes pas brtags na/ gang gis 'di ltar 'phags pa dang 'phags pa'i gang zag mi gnas par bya'o snyam nas sangs rgyas kyi gtsug lag khang 'jig par byed dam/ de sangs rgyas kyi gsung rab yi ger bris pa 'byid dam/ klan ka btsal ba'i phyir m khas pa dag la mi mkhas pa'i bdag nyid can gyis sangs rgyas kyi gsung rab nyan par byed de thos nas kyang chos 'dul ba de la 'jug par mi byed cing yongs su mi snyan par brjod la brjod nas kyang kun du bsten cing bsgoms la mang du byed na de lus dang bral nas ngan 'gro log par ltung ba sems can dmyal ba 'gro ba mes sreg tu skye bar 'gyur ro/ /der skyes nas kyang gang sems can dmyal ba yang sos la sogs pa'i gnod pa bsdus pa de dag thams cad brgya 'gyur du 'byung ngo / /khyad par du 'byung ba ni 'di ltar sems can dmyal ba de la khyad par thams cad stong 'gyur du 'byung ste/ sbrul rnams kyis 'khris shing kun nas dra bar gang ba der sems can dmyal ba der 'gro bar byed do/ /'gro ba na gshin rje'i mi lag na tho ba thogs pa de dag thams cad kyis sreg par byed de dug gi me tshan po ches kyang sreg par byed do/ /de dug dang sems can dmyal ba'i me gnyis kyi nang du sreg pa na snying rje rje skad du ngu skad 'byin smre sngags 'don cho nges 'debs so/ /de de ltar cho nges 'debs pa dang / 'di ltar gshin rje'i mi rnams kyis rjes su bstan pa tshigs su bcad de smras pa/ glen pa dam pa'i chos yul la/ /rmongs pa'i shugs kyis thams cad du/ /sred pa'i dug gis myos pa dag /don med ci zhig yongs su smre/ /sdig byed dga' bar mthong ba ni/ /bzlog na mthong ba med pa yin/ /sdig pa byed tshe bde ba ni/ /bzlog na me dang 'dra ba yin/ /sdig pa byed pa'i mi dag ni/ /'jig rten kun gyis rnam par smad/ /dge ba byed pa rtag tu bstod/ /de bas sdig pa rnam par spongs/ /mi 'dod mi phan sdang ba yi/ /rnam par smin pa sdug bsngal cha/ /sdig pa sdig pa'i rnam smin te/ /de ltar blo ldan de spongs shig /sdig la rtag tu sdig pa yod/ / sdig pa med la sdig med do/ /byed la ltos la sdig yod de/ /byed pa rnams kyi rjes su 'jug /sdig pa sems la rag las shing / /'bras bu sems la rag las te/ /sems ni rkyen las skyes par mthong / /rgyu dang rkyen las shin du byung / /sems can sems kyis bslus nas su/ /sdig pa'i dbang gis 'ongs pa dag /gnod pa'i mchog ste stobs po che/ /sems can dmyal ba drag por 'gro/ /sems dbang gyur pa mi 'gro ste/ /rtag tu chos dbang 'gyur mi 'gro/ /chos spyod pa ni rtag tu bde/ /sdig spyod pa ni mi bde 'o/ /chos ma yin pas legs med cing / /log par 'tshed par mi byed de/ / rgyu dang 'dra bar de mthong zhing / /'bras bu sna tshogs 'grub par 'gyur/ /rgyu dang 'bras bu 'thun par 'byung / /nams kyang log par 'byung med de/ /'dus byas kyi ni chos 'di dag /rgyu dang 'bras bur shin du 'byung / /rgyu med 'bras bu yod ma mthong / /sems can dmyal bar rnam par phye/ /rgyu sbyor las ni 'bras bur sbyor/ /sems can dmyal bar rnam par 'tshed/ /byas shing bsags pa drag pa dang / /nges par ngan 'gror 'gro ba yi/ /las dang 'bras bur 'brel pa ni/ /sems can dmyal bar rnam par 'tshed/ /so sor bshags pa rnam pa yis/ /las gang rnam par bzlog bya ba/ /de mi 'dod pa lam de nyid/ /rnam par mthong bas 'bras bu mthong / /'od gang sgron la rag las te/ /de bzhin 'bras bu las la thogs/ /gzhan dang gzhan las 'bras 'byung ste/ /'dus byas thams cad de 'dra 'o/ /gzhan dang gzhan las de mthong ste/ /gzhan dang gzhan du dbang sbyor ro/ /'thun par rjes su 'brel pa ni/ /de nyid mthong ba dag gis mthong / /rgyud la rgyu 'bras med min te/ /dbang phyug la sogs gnas pa med/ /'dus byas chos kun 'byung ba ni/ /de nyid mthong ba dag gis bstan/ /'khor ba thog ma med pa nas/ /rgyu dang rkyen las byung ba ste/ /las rnams dang ni 'thun par mthong / /log par brtag par mi bya 'o/ /gang 'dod las kyi dbang song ba/ /srog chags las kyi rgyu las skyes/ /las 'bras de nyid shes pa de/ /dag pa yin zhes mngon par rtogs/ /gti mug zhags pa'i dbang song ba/ /khyod kyis sdig de rtag tu byas/ /sdig dang bcas pa'i las byas pas/ /byis pa don med ci zhig gdung / /sdig la sdig pa rtag tu gnas/ /de bzhin chos la chos gnas te/ /de nyid las ni ston byed pa/ /brtan pa dag gis gnyi ga spong / /sangs rgyas bstan la rmongs pa dang / /lam dang lam min rmongs pa gang / /de dag la ni zhi med de/ /mun pa la ni nyi ma bzhin/ /rtag tu chos dang chos min dang / /rgyu dang rkyen la rmongs pa dang / /gnod mchog shin du mi bzad pa/ /sems can dmyal ba drag po thob/ /gtan tshigs ldan pa'i tshig rnams kyis/ /de la bsgo nas gshin rje'i mi/ /mdung thung gtun shing thogs nas su/ /de nas khro zhing rngam par 'gyur/ /de nas yang m tshon cha rnam pa du ma dag thogs nas ji srid du de'i sdig pa'i las byas shing bsags pa bcom zhing spangs la zad par ma gyur pa de srid du lo 'bum phrag du ma'i dus nas bskyed pa rang gi las kyis byas pa la spyod pa'i sems can dmyal ba de dag la gsod do/ /de phyis sems can dmyal ba de las thar bar 'gyur te/ thar nas kyang las de'i mthus tshe rabs bdun brgyar yi dags gtor khung nas 'bab pa 'thung ba rnams kyi nang du skye bar 'gyur/ de de las thar nas kyang las de dang rgyu 'thun par tshe rabs lnga brgyar dud 'gro si mi si mi rnams kyi nang du skye bar 'gyur te/ de las thar nas kyang mi rnams kyi nang du bya rog ltar dman par skye bar 'gyur te/ der rtag tu kha zas snying po med pa za zhing skom yang rnyog ma can 'thung bar 'gyur la skom de yang lan 'ga' zhig 'thung bar 'gyur ba mthong ngo // // 'phags pa dam pa'i chos dran pa nye bar gzhag pa/ bam po bcwa brgyad pa/ de nas yang dge slong las kyi 'bras bu rnam par smin pa shes pa des sems can dmyal ba chen po mnar med pa'i 'khor la brtags na/ des 'og dang thad kar phra ba 'am rags pa 'am rjes su zhugs pa'i 'khor gang bcu bdun pa gcig kyang ma mthong ngo / /de de ltar sems pa na lam mthong ba'i dge slong de 'di snyam du sems te/ kye e ma bdag gis sems can dmyal ba brgyad po dag gi 'khor bcu drug rnams kyi mtha' mthong ste/ nyes par byas pa'i las kyis 'di de tsam zhig pa lta snyam mo/ /byis pa so so'i skye bo thams cad kyis byas shing bsags pa'i gnod pa'i sa dang / las ngan pa byas shing mngon du gyur pa'i sems can dmyal ba chen po brgyad kyi 'khor las skyes pa 'am/ de bzhin du ches shin du lci ba'i rnam pa mnar med pa gang du sems can dmyal ba chen po mnar med pa ma gtogs par srog chags dag sreg pa'i sems can dmyal ba chen po gzhan dgu pa ma mthong ngo / /gang du 'di'i phyogs gcig las stong gi cha gcig cig bstan te/ rgyu gang ngas bshad pa 'am/ mnyan pa'am/ dpe bya bar yang sla ba ma yin no/ /de ltar sems can dmyal ba pa'i sdug bsngal bzod par dka' ba de ltar gzhan dang mtshungs pa med pa sdug bsngal dpe med pa de rgyu gang dang / mnyam pa gang dang / gang de nyid khong du chud cing shes par byas na gang khrag tu skyugs nas 'chi bar 'gyur te/ de ltar sems can dmyal ba pa de'i gnod pa sdug bsngal bas ches sdug bsngal ba mi 'dod pa mi sdug pa yid du mi 'ong ba yin no/ /de nas dge slong des sems can dmyal ba de mthong nas 'khor ba'i sdug bsngal thams cad la yid byung ste/ 'dus byas thams cad la mi rtag pa dang / sdug bsngal ba dang / stong pa dang / bdag med par mthong ngo / /de'i 'og tu 'phags pa'i bden pa 'di la rnam par dpyad pas 'khor ba la sems shin du 'dod chags dang bral bar byed/ yid byung bar byed/ mi dga' bar byed cing 'khor ba la smod par byed do/ /rnam pa de dag gis 'khor ba mi bzad pa shin du 'jigs par mthong nas/ de 'di snyam du sems te/ kye e ma sems can 'di dag ni lha'i lta ba dang shin du bral zhing mig dang bral ba yin te/ yang dang yang du sems can dmyal ba shin du mi bzad pa/ shin du tsha ba shin du 'jigs par skyes kyang skyo bar mi byed de/ byis pa so so'i skye bo 'di dag 'khor ba thog ma med pa nas sred pa'i zhags pas bcings pa yin snyam mo/ /de nas yang rnal 'byor spyod pa nang gi chos la chos kyi rjes su lta zhing gnas pa 'di ltar dge slong rgyun mi 'chad par spro ba de mi bzad pa bas kyang shin du mi zad pa sems can dmyal ba yang sos la sogs pa mnar med pa'i bar gyi las kyi 'bras bu rnam par smin pa thams cad kyis sa gzhan bcu gsum pa la zhugs te/ bdud kyi yul la mi dga' zhing bdud kyi dbang du mi 'gro bdud kyi 'ching ba thams cad rnam par gcod cing bdud kyi yul la gnas par mi byed de rtag tu brtson pa'i dge slong de bag la nyal gyi sbyor ba ma lus par bcad nas mya ngan las 'das pa'i grong khyer du 'jug par byed do/ /de'i spro ba sa bla ba'i gnod sbyin dag gis mthong nas bar snang la spyod pa'i gnod sbyin rnams la bsnyad de/ 'di ltar gang rigs che ge mo zhig las rigs kyi bu de grong mang ge mo zhig dang / grong rdal ga ge mo zhig dang / yul ga ge mo zhig nas skra dang kha spu bregs gos ngur smrig bgos nas dad pas khyim nas khyim med par rab tu byung ste/ rtsol zhing 'bad pa na yang dag pa'i lam gzhan dang mi 'dra ba'i lta ba thun mong ma yin pa 'jig rten las 'das pa las kyi chos kyi rnam par smin pa shes pa sa gzhan bcu gcig pa zhugs te/ sems can dmyal bar zhugs pa rnams kyi thog ma dang tha ma'i sdug bsngal shes so/ /de ltar sa bla'i gnod sbyin dag gis bar snang la spyod pa'i gnod sbyin dag la bsnyad do/ /de dag gis kyang de ltar snga ma bzhin du rgyal po chen po bzhi la bsnyad do/ /de dag gis kyang sum bcu rtsa gsum pa rnams la/ de dag gis kyang 'thab bral rnams la/ 'thab bral ba rnams kyis kyang dga' ldan pa rnams la/ dga' ldan pa rnams kyis kyang 'phrul dga' rnams la/ 'phrul dga' rnams kyis kyang gzhan 'phrul dbang byed pa rnams la bsnyad do/ /de ltar rim gyis snga ma bzhin du 'od chung gi lha rnams kyi bar la bsnyad de 'di ltar lha khyed cag sems shin du mnyam par bzhag pas nyon cig /'di ltar 'dzam bu'i gling na rigs che ge mo zhig las rigs kyi bu mang ge mo zhig yul ga ge mo zhig nas skra dang kha spu bregs gos ngur smrig bgos nas dad pas khyim nas khyim med par rab tu byung ste/ de rtsol z hing 'bad la sgrim pa na spra ba mi 'dri zhing bdud kyi dngos po mi 'dod la dga' ba'i 'dod chags kyi mod las byung ba'i sred pa dang lhan cig shin du chags par mi byed kun nas nyon mongs shing mi sdug pa gzugs dang / sgra dang dri dang ro dang / reg bya rnams kyis shin du chags par mi byed de/ de sa gzhan bcu gsum pa la zhugs so/ /sems can dmyal ba brgyad po kun gyi las kyi chos kyi rnam par smin pa shes pa'i dge slong gis 'khor ba ma rig pa'i mun pa'i sdug bsngal thams cad shes nas ji lta ba bzhin du yid byung ste/ bdud kyi phyogs kyi dngos po ni dmas so/ /dam pa'i chos kyi phyogs ni mngon par mtho'o zhes de thos nas 'od chung gi lha rnams mchog tu dga' zhing 'khod do/ 'di ltar bdud kyi phyogs ni dmas so/ /dam pa'i chos kyi phyogs ni mngon par mtho'o snyam mo/ /de ltar lha r nams dga' ba'i yid kyis dam pa'i chos nyan par 'gyur na gang dad pa dang dad pa'i rjes su 'brang zhing de kho na nyid mthong ba'i skyes bu dam pa de dag las de dang rgyu 'thun par dam pa'i chos 'phel zhing rgyas pa yid dga' bar 'gyur ba lta smos kyang ci dgos/ de nas yang dge slong las kyi 'bras bu rnam par smin pa shes pa des sems can dmyal ba'i gnod pa rgya mtsho'i chu lta bu kun du sred pa glong lta bur g.yo ba sems can dmyal ba chen po yang sos la sogs pa nas mnar med pa'i bar rgya che ba'i nang sa'i 'og 'jigs par rdzogs byed dang / kun du rgyu dang / ko ka li ka dang / lhas byin dag nya dang chu srin chen po ltar zin cing sems can dmyal ba pa'i lhag ma zha mid dang / nya mid chen po dang / chu srin na kra dang / chu srin kum b+hi ra dang / chu srin byis pa gsod dang / rus sbal dang / sram ' khrugs pa lta bu dag 'dod chags zhe sdang gti mug rlung gi shugs dang klong 'khyil pa lta bus sems g.yo ba'i rlabs klong lta bur 'khyil pa de'i dus kyi mtha'i shugs dbu ba lta bus sems can dmyal ba pa gnod pa rab tu mang ba mchi ma ltar gang bar ngu zhing smre sngags 'don la cho nges 'debs/ ha ha'i sgra skad kyi shugs dang sems kyi shugs rlabs ltar mang ba nyes par byas pa'i las klu'i shugs lta bus sdug bsngal char ltar 'bebs shing mnar med pa zab mor bskal pa'i mtha'i me 'bar ba'i shugs kyis khor yug dang chu btsos pa lta bu'i sems can dmyal ba chen po'i sdug bsngal rgya mtsho lta bur mtha' med la mi bzad pa mthong nas/ dge slong de yid byung ste/ 'di ltar tshigs su bcad de smras pa/ sred pas yongs su bslus byas shing / /rmongs pas rmongs pa'i sems can dag /skye zhing 'chi ba nyam nga ba/ /'og du 'jig rten 'gro bar 'gyur/ /mi yul las ni dmyal bar 'gyur/ /dmyal ba las ni lha yul du/ /mi nyid las ni dud 'gror 'gro/ /de nas yi dags 'gro bar 'gyur/ /sems can 'dod chags dbang song ba/ /rang gi las kyis 'gro ba 'khrul/ /gti mug zhags pas bcings pa dag /srid pa'i mtshor ni rnam par 'khyam/ /'khor bar mi ni sdug bsngal 'di/ /rnam pa sna tshogs goms byas te/ /der ni rgyu de goms pas na/ /ji ltar mchog tu skye mi 'gyur/ /lha dag bag med pa yis nyams/ /mi dag yongs su tshol bas nyams/ /yi dags bkres dang skom pas nyams/ /dud 'gro gcig la gcig za'o/ /sems can dmyal ba dmyal ba'i mes/ /yi dags rmongs pas rtag tu nyams/ /'khor ba khyab kyi rtse tsam yang / /bde ba nyid ni cung zad med/ /rmongs pa'i sems kyis skye bo dag /sdug bsngal las ni bde la chags/ /sdug bsngal 'di las thar ba gang / /yang dag lam ni ston pa med/ /gang dag rtag tu chos mi bsgrub/ /gang dag rtag tu bden mi bsgrub/ /bsam gtan rtag tu mi bsgrub gang / / de dag sdug bsngal bral mi 'gyur/ /'jig rten 'di dang pha rol du/ /rtag tu ma 'dra pha 'dra zhing / /gnyen dang 'dra zhing sgron 'dra ba/ /sangs rgyas kyis ni chos bstan to/ /rtag tu nyes gsum dbang song ba/ / phung po gsum nas sems can dag /rtag tu khams gsum dag tu 'jug /de ni sdug bsngal gsum dang ldan/ /las gsum dbang song 'khrul pa dag /de ni ngan song gsum na rgyu/ /srid gsum chags pa'i 'gro ba dag / rim pa gsum du rnam par rgyu/ /gang zhig dkon mchog mchog gsum dang / /gang zhig byang chub gsum dbang song / /gang zhig lta ba gsum spangs pa/ /de dag la ni sdug bsngal med/ /dus skabs gsum la rtag gnas shing / /dga' ba gsum gyi de nyid mthong / /gsum gyi cha yis lto 'drangs pa/ /de ni mya ngan bral bar 'gyur/ /phung po gsum la sems mnyam zhing / /las gsum rnam par dpyod pa gang / / de ni 'khor bar mya ngan gyi/ /rnam pa bral zhing rims med 'gyur/ /lam dang lam min rnam pa shes/ /dngos dang dngos med rnam sems pa/ /byams pa'i sems ni bsgoms pa gang / /de ni 'gro ba mchog tu 'gro/ / kun nas rab tu rnam gsal zhing / /dpa' bo rnyog pa med pa yi/ /yid ni sdig dang ma 'dres pa/ /mi de rnam par rab tu grol/ /gang zhig yang dag lam zhugs shing / /dran dang ldan pa stobs che la/ /srid pa dag la 'dod bral ba/ /de ni nges par grol bar 'gyur/ /srid pa 'dod cing dga' ba la/ /mi gang mngon par mi dga' ba/ /de la srid las skyes pa yi/ /sdug bsngal shin du chung ba 'ang med/ /mi zad pas ni mi zad 'byung / /mi zad pa yis yongs bsgyur ba/ /'dod pa dug dang me lta bu/ /rab tu bsgrims te spang bar gyis/ /'dod pa yongs su spang byas shing / /rtag tu thar la dga' ba ni/ /nyi ma shar bas mun med ltar/ /mi dge'i chos rnams 'jig par 'gyur/ /de ltar rtag tu dge bsten zhing / /mi dge ba nyid spang bar gyis/ /mdor na nges par bstan pa ni/ /dge dang mi dge yongs su rtogs/ /de ltar dge slong de 'jig rten 'di dang 'jig rten pha rol de la phan par 'dod pa'i blos sems can dmyal ba'i sdug bsngal mngon par brtags nas/ sems can rnams la snying brtse ba rjes su 'jug par byed de/ byams pa bsgoms pa'i sems kyis de sems can dmyal ba 'jigs shing nyam nga ba thams cad la mngon par brtags shing las kyi 'bras bu rnam par smin pa yang shes nas mchog tu yid byung ba'i sems kyis rtog par byed de/ e ma sems can 'di dag ji ltar srid pa'i dgon par 'jigs shing sdug bsngal sna tshogs kyi nang du bying zhig gu snyam nas de snying rje'i blo 'di ltar nye bar 'jog par byed de/ 'di ltar mi dag de ma thag tu ngan song du 'gro ba ni las ngan pa byas pa rang gi ser snas bslus shing / longs spyod ngan pa 'dod la/ rnyed pa ngan pas zil gyis non pa rnams sbyin pa dag ma byin par gyur te/ de dag gis dge sbyong dang bram ze dang / phongs pa dang / long ba dang / bkren pa slongs mo ba rnams la ser sna'i dri mas sbags pa'i sems kyis sbyin pa dag ma byin zhing bsod nams dag ma byas la 'jig rten 'di dang pha rol du tshul khrims mtsho lta bur gyur pa ma bsrungs/ bu dang chung ma dang / bran pho dang / bran mo dag la yang sbyin pa ma byin la ser snas 'jig rten pha rol la bslus pa de yi dags rnams kyi nang du skye bar 'gyur te/ yi dags kyi rgyud du skyes pa yang phal cher yi dags mor skye bar 'gyur ro/ /mi thab mo dang phrag dog gi dri ma gang gis nang gi sems nyams par byas pa 'dis na yi dags mo rnams kyi nang du skye bar 'gyur ro snyam mo/ /de nas yang las kyi 'bras bu rnam par smin pa shes pa des yi dags kyi yul la rtog par byed de yi dgas kyi yul 'di gang zhig snyam mo/ /des thos pa las byung ba'i shes pas brtags na yi dags ni mdor bsdu na rnam pa gnyis te/ 'jig rten na rgyu ba dang / yi dags kyi yul na gnas pa'o/ /de la rgyu ba ni mtshan mo dag gal te mi rnams kyis mthong bar 'gyur ro/ /yi dags kyi yul na gnas pa ni gang du sa'i 'og dpag tshad lnga brgya na gnas te/ yi dags kyi yul gyi rkyen ma gtogs par 'dzam bu'i gling gi mtha' nas dpag tshad sum stong drug brgya yod do/ /de dag 'dzam bu'i gling dang thag nye ba dang ring ba ni nges pa med do/ /de nas yang dge slong las kyi 'bras bu rnam par smin pa shes pa des yi dags kyi 'gro ba la rtog par byed de/ yi dags kyi yul ci tsam yod snyam nas des thos pa las byung ba'i shes pas brtags na/ yi dags rnam pa mang ste mdor bsdu na rnam pa sum bcu rtsa drug yod do/ /de dag thams cad phrag dog dang ser sna'i rgyus der skye bar 'gyur la bsam pa sna tshogs skyed pa dang / sdug bsngal ba dang / bsam pa dang / bza' ba sna tshogs dang / g.yo ba sna tshogs dang / gnas sna tshogs dang / lus bkres pa dang skom pas gdungs pa yin no/ /de dag thams cad mdor bsdu na rnam pa sum bcu rtsa drug yod de/ 'di lta ste/ yi dags lto gug dang / yi dags kha khab ltar phra ba dang / yi dags bshang ba za ba dang / yi dags kun ston dang / yi dags dri za ba dang / yi dags chos za ba dang / yi dags sbyin pa za ba dang / yi dags chu 'thung ba dang / bsam pas 'tsho ba dang / mchil ma za ba dang / phreng ba za ba dang / khrag za ba dang / sha za ba dang / bdug pa za ba dang / drag shul spyod pa dang / glags lta ba dang / sa'i 'og na gnas pa dang / yi dags mthu bo che dang / mtshan mo lus rab tu 'bar ba dang / mi rnams la glags lta ba dang / 'dod pa'i gzugs can dang / gling gi bar na gnas pa dang / gshin rje'i dbyug pa dang / byis pa la za ba dang / tshangs pa'i srin po dang / 'bru drus pa'i shun pa za ba dang / mi gtsang ba za ba dang / lam po che na gnas pa dang / mang du za ba dang / me mdag za ba dang / dug za ba dang / dgon pa na gnas pa dang / dur khrod na gnas pa dang / shing la gnas pa dang / lam gyi bzhi mdo na gnas pa dang / bdud kyi sde ste de ltar mdor bsdu na yi dags kyi rigs sum bcu rtsa drug yod do/ /rgya cher ni sems kyi bsam pa'i las kyi cha'i bye brag dang bsam pa sna tshogs kyi bye brag gis dpag tu med do/ /de nas yang dge slong las kyi 'bras bu rnam par smin pa shes pa des yi dags shin tu bkres pa dang / skom pas gdungs pa'i lus can rnams phal cher phrag dog dang ser snas nyams pa dag yin zhing rgya cher ni lus dang ngag dang / yid kyi las gsum gyis skye la bye brag tu dbye na mi dge ba'i las kyi lam rnam pa bcu dang yang dag par ldan pas yi dags rnams kyi nang du skye bar 'gyur ro/ /de mdor bsdu na mi dge ba'i las kyi lam rnam pa bcu'i mi dge ba'i rgyu gang yin pa la srog chags kyi sdug bsngal thams cad de la rag las/ de la spyod/ de las skye zhing 'byung de'i phyi bzhin 'brang de dang 'brel/ rgyu de las byung ba yin te/ ngan song gis kun du 'khor yang 'khor ba la yid 'byung bar mi byed do/ / sems spre'u lta bu thog ma med pa'i dus nas 'khor bar zhugs shing sdug bsngal gzing gzing ba'i bar na gnas pa la goms pa yan lag dang nying lag gi dra ba sna tshogs can gyi nang na sdom zhing 'khor ba'i ri la myur du gnas pa sems gzing gzing ba'i bag chags kyi rtog pa yang gcig tu shes par sla ba ma yin la de ltar 'gro ba myur du 'gro ba 'di sems spre'u lta bu yin te/ de lta bas na sems 'di re shig thog ma nyid du shin du dul bar bya'o/ /de ltar ma byas na ngan song gis mi bzad pa rnams su sems can dag shin du sdug bsngal bar 'gyur zhing de ltar ma byas na 'khor bar sems kyi dgras zin te/ bde ba 'thob par mi 'gyur ba mthong ngo / /de ltar dge slong de so sor rab tu rnam par 'byed pa na yang dang yang du 'khor ba 'di la yid byung zhing mi dga' la 'khor bar gtogs pa'i sdug bsngal thams cad la rnam par smod par byed do/ / dge slong de de ltar sems par byed cing yi dags rnam pa du ma dag la sems pa na 'di ltar rab tu rnam par 'byed pa ni las dang las kyi rnam par smin pa'i byed rgyu gang yin pa'i cha gcig cig rab tu rnam par 'byed de skye ba rgyu med pa ma yin zhing bde ba dang / sdug bsngal dang / 'thun pa dang mi mthun pa dang / skye ba ngan pa dang / bzang ba dang / rigs bzang ba dang / rigs ngan par skye ba ni srog chags thams cad kyi tshe 'chi ba dang skye ba 'dod rgyal gyis chung zad kyang byas pa med do snyam mo/ /las kyi chos kyi rnam par smin pa shes pa'i dge slong des yi dags rnams kyi las kyi chos rnam par dbye ba dag rnam par 'byed de/ des thos pa las byung ba'i shes pas brtags na yi dags lto gug ces bya ba rang gi lus nyis 'gyur gyis che zhing kha dang lag pa dang rkang pa nyams la thams cad du lto gug pa yin te/ bu ga'i gseb dag tu me mdag gis rab tu bkang / lus bkres pa dang skom pas gdungs/ lus tshal shing bsregs pa lta bu 'gro ba'i dus mtha' med pa nas bcings pa dag dga' ba med cing grogs med la mgon med pa yin no/ /de dag las gang gis der skye bar 'gyur snyam nas des thos pa las byung ba'i shes pas brtags na/ gla mi nor 'dod pa gang gis 'di ltar bdag gis gla dag khyim du bsag go snyam nas srog gcod pa byed cing phyugs la 'tshe 'am/ de snying rje med pa chags pa'i dbang gis srog gcod pa byed la sgom zhing sten te mang du byed na de lus dang bral nas ngan 'gro log par ltung ba sa'i 'og dpag tshad lnga brgya na yi dags lto gug gi rigs rnams su skye bar 'gyur ro/ /de sa'i phyogs mun pa'i nang der skyes pa dang / steng gi phyogs nas ri rnams kyis btsir cing 'og gi phyogs nas ri gnyis pas bteg ste de ri gnyis kyi bar du rang gi ngo bo'i lus kyi dpag tshad tsam la leb leb por byas shing bkres pa dang / skom pas shin du gdungs so/ /tshe'i tshad kyi mtha' ni tshe rabs lnga brgya yin te/ mi'i lo bcu la yi dags kyi bgrang ba'i tshul gyis nyin zhag gcig ste bar du 'chi ba'i dus byed pa ni yod do/ /mi dge ba'i las gzhan gnyis pa byas pa ni 'di lta ste/ skyes pa'am/ bud med la nor rdzas bcol ba bcabs nas 'di ltar bdag la bdag med do zhes smra na las de'i rnam par smin pas der skye bar 'gyur la zang zing gi sbyin pa yang ma byin/ chos kyi sbyin pa yang ma byin/ mi 'jigs pa'i sbyin pa yang ma byin te/ sbyin pa gsum po de dag dang bral la ser sna dang phrag dog gis sems rtag tu zil gyis non pa ni der skye bar 'gyur ro/ /de nas yang dge slong las kyi 'bras bu rnam par smin pa shes pa des yi dags rnams la brtags nas des thos pa las byung ba'i shes pas yi dags kha khab ltar phra ba zhes bya ba ji ltar 'dug pa mthong ngo / /der sems can dag las gang gis skye bar 'gyur snyam nas des thos pa las byung ba'i shes pas brtags na/ nor rdzas kyi phyir mi rnams gsod pa'i gshed ma gang pha rol la phrag dog dang ser sna yang dag par blangs shing rtag tu mngon par brtson la bkren pa bkren pa'i rang bzhin can 'di lta ste/ zang zing gi sbyin pa dang / chos kyi sbyin pa dang / mi 'jigs pa sbyin pa ste/ sbyin pa rnams spangs pa ni de lus dang bral nas ngan 'gro log par ltung ba yi dags kha khab ltar phra ba rnams kyi nang du skye bar 'gyur ro/ /rang gi las kyi 'bras bus bslus pa der skyes pa de dag gi kha'i sgo khab ltar phra zhing lto ri tsam du che bar 'gyur la rtag tu bkres pa dang skom pa'i nyon mongs pas gdungs par 'gyur/ lus kyi mes kyang bkres pa dang skom pas dkrugs la phyi rol du yang tshal shing gi me mched pas dkrugs par 'gyur/ grang ba dang / tsha ba dang / sha sbrang dang / sbrang bu dang / srog chags mar go ta kas za ba dang / rims la sogs pas de ltar skyes pa dang bud med der skyes pa'i lus dang yid las byung ba'i sdug bsngal sna tshogs kyis mi'i lo bcu la yi dags kyi bgrang ba'i tshul gyis nyin zhag gcig pa'i tshe rabs lnga brgyar mngon par gdungs te tshe bar chad du 'gyur ba ni yod do/ /der skye bar 'gyur ba'i las gnyis pas kyang yang der skye bar 'gyur te/ 'di ltar dge sbyong dang bram ze dag bdag cag gi der zan sbyin no zhes byas la bza' ba dang bca' ba dag kyang yod bzhin du bud med ser snas mngon par zin pa de khyim thab la bslu ba'i bsam pas 'di ltar ci yang med na/ dge sbyong dang bram ze dag la sbyin du ga la yod ces smras na de yang lus dang bral nas ngan 'gro log par ltung ba yi dags kha khab ltar phra ba rnams kyi nang du skye bar 'gyur ro/ /ser sna de kun du bsten cing bsgoms te mang du byas pas bud med phal cher yi dags rnams kyi nang du brdzus te skye bar 'gyur ba de ltar mi'i nang du skye bar mi 'gyur te/ 'dod pa la phrag dog dang / ser snas nyams pa'i rgyu gang gis yi dags mor 'gyur ba de ltar mi'i nang du skye bar mi 'gyur ro/ /bud med ni sems chung zhing sems yang ba yin la de ltar rgyu de dang rkyen des yi dags mo rnams kyi nang du skye bar 'gyur te/ de ji srid du ser sna dang phrag dog byas pa'i sdig pa de bcom zhing spangs la zad par ma byas pa de srid du der skye bar 'gyur ro/ /de phyis yi dags kyi 'jig rten de las thar bar 'gyur te/ thar nas kyang las de dang rgyu 'thun par gal te lan grangs gzhan la myong bar 'gyur ba'i las kyis dud 'gro rnams kyi nang du skye bar 'gyur ro/ /bya khug rta rnams kyi nang du skyes nas de rtag tu bkres pa dang skom pas gdungs par 'gyur/ de las thar nas kyang gal te lan grangs gzhan la myong bar 'gyur ba'i las mir 'grub pa'i las kyis mi rnams dang skal ba mnyam par mir skyes na/ skyes pa 'am bud med de rtag tu bkres pa dang skom pas gdungs par 'gyur/ rtag tu sdug bsngal zhing zas gzhan du tshol la lam po che dang / bzhi mdor 'tsho bar 'gyur ba mthong ngo / /de nas yang dge slong las kyi 'bras bu rnam par smin pa shes pa des yi dags kyi 'jig rten la brtags na des thos pa las byung ba'i shes pas yi dags skyugs pa za ba zhes bya ba ji ltar 'dug pa mthong ngo / /der skyes pa 'am bud med dag las gang gis skye bar 'gyur snyam nas des thos pa las byung ba'i shes pas brtags na/ bud med gang bza' ba dang / bca' ba dang ro myang bas khyim thab la mngon par gnod par byed cing bdag nyid ni de dag la za bar byed la phrag dog dang ser snas kyang rtag tu zil gyis non/ bu dang bu mo gzhan dang mi 'dra bar mi dga' ba ma yin la/ dga' ba dang slu ba ma yin te/ mi slu ba la mngon par gnod pa byas na de yang lus dang bral nas ngan 'gro log par ltung ba yi dags skyugs pa za ba rnams kyi nang du skye bar 'gyur ro/ /der skyes nas kyang de rtag tu de'i lus kyi bdag nyid dpag tshad p hyed tsam yod pa bkres pa dang skom pas gdungs te dgon pa chen por gcig pu chu btsal ba'i phyir rgyug cing thams cad du cho nges 'debs smre sngags 'don pa na de chos sbyin pa dang zang zing sbyin pa dang mi 'jigs pa sbyin pa ma byas te/ sbyin pa gsum dang bral ba dag der skye bar 'gyur ro/ /tshe'i mtha' ni snga ma bzhin te/ de ji srid du ser sna byas pa'i sdig pa de bcom zhing spangs la zad par ma byas pa de srid du bkres pa dang / skom pas gdungs par 'gyur ro/ /de phyis sdig pa de las thar bar 'gyur te/ thar nas kyang las de dang rgyu 'thun par gal te dud 'gro rnams kyi nang du skyes na de skyugs pa za bar 'gyur te/ ji ltar yi dags rnams kyi nang du skyugs pa za bas srog chung zad kyang 'tsho bar gyur pa de ltar dud 'gro rnams su yang 'gyur ro/ /de las thar nas kyang gal te mi rnams dang skal ba mnyam par mir skyes na de mchod ston gyi tshe dge sbyong dang bram ze bkad pa rnams kyi gral du slongs mos de'i srog 'tsho ba thub par 'gyur ba mthong ngo / /de nas yang dge slong las kyi 'bras bu rnam par smin pa shes pa des yi dags kyi 'jig rten la brtags na/ des thos pa las byung ba'i shes pas yi dags bshang ba za ba zhes bya ba mthong ngo / /der skyes pa 'am bud med dag las gang gis skye bar 'gyur zhig gu snyam nas de thos pa las byung ba'i shes pas brtags na/ gang gis ser sna kun du bsten cing bsgoms te mang du byas par gyur/ snga ma bzhin du sbyin pa dang bral la dge sbyong dang bram ze dag la yang kha zas lhag mar byas pa byin te/ de dag kyang gtsang ma zhig yin no snyam nas zos na skyes pa 'am bud med de lus dang bral nas yi dags bshang ba za ba rnams kyi nang du skye bar 'gyur ro/ /de'i las kyi mthus de'i tshe yang snga ma bzhin la de'i lus bkres pa dang skom pas gdungs te/ gal te de rnyed na yang rtag tu mi rnyed la de yang chung ste/ lto tshim par mi 'gyur ro/ /gal te yang yi dags rnams kyi nang du bshang ba rnyed na srin bu zhugs shing zos la bu gar byas pa ngan ngon zhig rnyed de/ rgyang ring zhing tshegs chen pos rnyed pa de yang chog par mi rnyed do/ /de ltar de'i tshe'i mtha' sdug bsngal ba 'thob ste/ de ji srid du de'i sdig pa'i las yi dags kyi 'jig rten 'grub pa ser sna byas pa bcom zhing spangs la zad par ma byas pa de srid du bkres pa dang skom pa de byas pa'i sdug bsngal myong bar 'gyur/ de phyis yi dags kyi 'jig rten bshang ba za ba de las thar bar 'gyur te/ thar nas kyang las de dang rgyu 'thun par ji ltar las nye bar 'gro bas 'khor ba na yongs su 'khyam mo/ /de gal te yang mi rnams kyi nang du gnya' shing gi bu gar rusbal 'jug pa lta bur mi rnams dang skal ba mnyam par mir skyes na/ de dbul zhing nad bu can la bza' ba nyung ba dang / srog gi 'tsho ba rtag tu gzhan la rag las shing tshegs chen pos 'tsho ba 'thob la don du ma med pa'i snod du 'gyur/ sems shes pa dang mi shes pa phal pa yin zhing lus rma mtshan dang dri ma can mi sdug pa skye bo kun gyis smad par 'gyur/ de'i kha nas kyang dri mnam po 'byung zhing glo bur du so nag por 'gyur ba mthong ngo / /de nas yang dge slong las kyi 'bras bu rnam par smin pa shes pa des ser sna'i gnas su gyur pa'i yi dags kyi 'jig rten la brtags na/ des thos pa las byung ba'i shes pas ser sna thams cad kyi gnas su gyur pa yi dags kha zas med pa zhes bya ba mthong ngo / /der las gang gis skye bar 'gyur snyam nas des thos pa las byung ba'i shes pas brtags na/ skyes pa'am bud med ser snas zil gyis non cing phrag dog gi zil gyis non pa dang / g.yo thabs sam slu bar byed pa stobs dang ldan pa gang gis sems can dag bcing bas bcings te/ kha zas ma byin pas srog dang phral la/ srog dang phral nas kyang snying nas 'chags par mi byed la 'gyod par mi byed/ yang las de nyid byas nas rjes su dga' bar byed cing gzhan dag kyang de nyid la rab tu 'jog par byed/ las dang las kyi nyer bsdogs dang / las kyi mjug dag byas nas yang de nyid byed na de lus dang bral nas ngan 'gro log par ltung ba yi dags kha zas med pa rnams kyi nang du skye bar 'gyur ro/ /skyes pa 'am/ bud med de der skyes nas kha zas med par byas nas bkres pa dang skom par byas pa me des sreg pa na yang dang yang du ri las chu 'bab pa'i shugs ltar bkres pa dang skom pa'i sdug bsngal mang du 'phel lo/ /de'i kha zas med par byas pa'i mthu des ji ltar thal ba yang mi mngon pa de ltar de'i nang dang yan lag dang nying lag thams cad sreg go/ /de nas yang yan lag dang nying lag de dag slar 'byung bar 'gyur te/ yang sreg par byed do/ /de bkres pa dang skom pas gdungs pa dang / lus bsregs pa ste/ sdug bsngal gnyis kyis sreg pa na rang gi las kyi 'bras bu nyes par byas pas bslus pa de sdug bsngal gyis nyam thag nas shin du ngu skad 'byin/ cho nges 'debs/ smre sngags 'don cing phyogs dang phyogs mtshams su rgyug ste de ni de'i nang du 'byung ba'i sdug bsngal yin no/ /phyi rol du 'byung ba yang las kyis byas pa'i mes yan lag dang nying lag thams cad sreg par byed do/ /me nang du song ba slar byung nas phyi rol gyi lus kyang sreg par byed de/ dper na shing khong stong gi nang du me zhugs pa shing gi nang bsregs nas phyi rol sreg pa de bzhin du me des yi dags de'i nang du bsregs nas phyi rol yang sreg par byed do/ /de nang dang phyi rol thams cad tshal shing bsregs pa lta bur rab tu bsregs te me lce gcig tu gyur pas ngu skad 'byin cing cho nges 'debs so/ /de der cho nges 'debs pa na khar me 'byung ste/ de yang dang yang du de'i lus thams cad 'bar ba nyis 'gyur gyis ches rab tu 'bar bar byed do/ /gang dang gang du 'gro ba'i lam de dang der rtswa dar b+ha rab tu 'bar ba khab lta bu 'byung bar 'gyur la gang de'i rkang pa gnyis bor ba ma rung bar byed de rkang pa ma rung ba de ngu skad 'byin/ cho nges 'debs/ yongs su smre sngags 'don to/ /de yongs su smre sngags 'don pa na de'i lce mar sar gyi gong bu ltar zhu bar byed de/ de nas yang nyes par byas pa'i las des slar 'byung bar 'gyur ro/ /de gang dang gang du rgyug pa de dang der de'i nyes par byas pa'i las des chu dang / lteng ka dang / 'bab chu'i dngo dang / mtsho dang / chu 'dzag pa dang / chu bo dang / khron pa thams cad dang bral bar 'gyur/ tshal dang / nags tshal dang / khyim dang ne'u gsing gi sa gzhi dang bral bar 'gyur/ tshal dang nags tshal dag kyang log par mthong ste/ ri dang ljon shing dang / ri sul gyi sa phyogs thams cad kyang rab tu 'bar bar mthong ngo / /kun nas yi dags kyi chang pa lag na ral gri dang gtun shing khyer ba rnams kyis gtse bar byed cing spyo bar byed pas mchog tu sdug bsngal te/ rang gi phrag dog dang ser snas bslus shing sems kyi dgra dang lhan cig ldan pas tshe yang snga ma bzhin no/ /de ltar de nyes pa byas pa'i las byas pas ji srid du de'i sdig pa'i las byas shing bsags pa bcom zhing spangs la zad par ma byas pa de srid du yi dags kha zas med pa'i sdug bsngal myong bar 'gyur/ de phyis yi dags kyi yul de las thar bar 'gyur te/ thar nas kyang las de dang rgyu 'thun par rang gis byas pa'i las spyad pa ji ltar las nye bar 'gro bas 'khor bar yongs su 'khyam mo/ /de gal te mi rnams kyi nang du gnya' shing gi bu gar rusbal 'jug pa lta bur mi rnams dang skal ba mnyam par mir skyes na de mngal na gnas pa na ma de zas 'dod pa med par 'gyur/ gang gis ma de'i lus dang bzhin kha dog mchog tu mi sdug par 'gyur/ de gal te mngal de nyid du gnas pa na las rab tu mthu che ba dang srog bcad pa rab tu mthu che ba des 'chi ba'i dus byed par 'gyur/ gal te yang brgya la btsa' bar gyur na de ltar ngan pa byas pa 'dus byas de'i ma rtag tu dri nga zhing mdog mi sdug la mdangs med par 'gyur/ de srog gi 'tsho ba dus thung zhing tshegs chen pos thob par 'gyur/ yul gyi bdag po rgyal pos kyang de ltar btson rar bcug nas bkres pa dang / skom pa dag gis 'chi ba'i dus byed par 'gyur ba mthong ngo / /de nas yang dge slong las kyi 'bras bu rnam par smin pa shes pa des yi dags kyi 'jig rten la brtags na/ des thos pa las byung ba'i shes pas yi dags dri za ba zhes bya ba ji ltar 'dug pa mthong ngo / /der las gang gis skye bar 'gyur snyam nas des thos pa las byung ba'i shes pas brtags na/ gang gis bza' ba dang btung ba mang po shin du bsdus nas bdag 'ba' shig za la/ bu dang chung ma dag la yang dag par 'ged par mi byed/ de dag ro bro ba 'dod na dri tsam zhig la snom du 'jug /de bu dang chung ma de'i mdun du rang 'ba' shig za bar byed la/ phrag dog dang ser snas zin pas yang dag par 'ged par mi byed de/ de ltar bu dang chung ma ris 'thun pa lhan cig 'khod pa la brnyas par byed cing gzhan dag kyang de nyid la rab tu 'jog par byed pa la rjes su dga' zhing de nas yang bdag gcig pu za bar byed la de byas nas kyang skyon du mi 'gyur zhing / ngo tsha bar mi byed na de lus dang bral nas ngan 'gro log par ltung ba yi dags dri za ba rnams kyi nang du skye bar 'gyur ro/ /der skyes nas lus rtag tu bkres pa dang skom pas gdungs shing gar bab bab tu rgyug ste ngu skad 'byin cho nges 'debs/ smre sngags 'don to/ /de gal te yang lha khang ngam/ mchod rten nam/ khyim gzhan du yon bdag dad pas bdug spos dri zhim po dag bdugs pa dang de des dga' bar 'gyur/ de bzhin du dri gzhan gyis kyang dga' bar 'gyur/ de ltar 'di ni yi dags dri za ba'i phyogs gcig yin no/ /dri za'i phyogs gzhan yang 'di ltar mi dag la nad byung ba na nad pa gang yin pa de dag gi phyir lha khang ngam/ kun dga' ra ba dag tu bdug spos gang bdugs pa'i dri des de tshim par 'gyur te/ des srog 'tsho ba 'thob cing de'i phyi bzhin 'brang / gzhi des lus kyi srog 'tsho ba 'thob ste/ de ltar de'i las kyi mthus yi dags de dri za bar 'gyur zhing srog gi tshegs chen pos za ba de 'thob par 'gyur/ der skyes nas kyang ji srid du sdig pa'i las de bcom zhing spangs la zad par ma byas pa de srid du bkres pa dang skom pa'i sdug bsngal myong bar 'gyur/ de phyis yi dags kyi 'jig rten de las thar bar 'gyur te/ thar nas kyang las de dang rgyu 'thun par las kyi 'bras bu la spyod pa 'khor ba na yongs su 'khyam mo/ /gal te mis byas pa'i myong bar 'gyur ba'i las kyis brgya la mi rnams kyi nang du gnya' shing gi bu gar rus sbal 'jug pa lta bur mir skyes na de dbul zhing nad bu can la lus thams cad las dri de 'byung bar 'gyur ba mthong ngo / /de nas yang dge slong las kyi 'bras bu rnam par smin pa shes pa des yi dags kyi 'jig rten la brtags na/ des thos pa las byung ba'i shes pas yi dags chos kyi sbyin pa za ba zhes bya ba der 'jug pa thob pa des srog 'tsho ba 'thob par 'gyur ba ji ltar 'dug pa mthong ngo / /der las gang gis skye bar 'gyur snyam nas des thos pa las byung ba'i shes pas brtags na gang rang bzhin gyis ser sna dang / phrag dog gis zil gyis non pa yin la srog gso ba kho na'i thabs sam rgyu des dad pa med cing dad pa med la pha rol phan gdags pa'i bsam pa med pa'i rgyus skyon du bgrang ba'i chos ston par byed cing de tshul khrims dang ldan pa ma yin te/ 'di lta ste/ srog gcod pa'i chos kyi gtam dang / g.yul du 'chi ba'i chos dang / nor rdzas nan gyis 'phrog pa'i chos dang / khyu mchog bag yangs su gtang ba'i chos te/ des skyon du bgrang ba'i chos kyi rnam grangs de dag pha rol dag la bstan nas de las rnyed pa gang yin pa de sbyin par mi byed cing stsogs pa 'ba' zhig byed na phrag dog gi zil gyis non pa mi ngan pa de lus dang bral nas ngan 'gro log par ltung ba yi dags chos kyi sbyin pa za ba rnams kyi nang du skye bar 'gyur te/ de'i tshe ni snga ma bzhin no/ /de ri'i yul nas ri'i yul du yongs su rgyug cing lus bkres pa dang skom pas gdungs la thams cad du ngu skad 'byin pa/ shing skam 'dra zhing skra ring la ngom zum gnag pa lus thams cad spu zing pos khebs shing rtsa dang rgyus pa'i dra bas dkris la lpags pa dang rus pa tsam lus pa/ lus ring zhing sen mo mi sdug pa/ rang gis nyes par byas pas yongs su bslus pa/ mig gi khung ring zhing bskums la gdong mchi mas yog pa/ lus sprin nag po 'dra zhing mi sdug pas mngon par khebs pa/ yan lag dang nying lag thams cad dang spu rnams kyi nang du sbrang bu dang / sha sbrang dang / srog chags mar ko ta ka rnams zhugs nas za ba na thams cad du yongs su rgyug go/ gal te brgya la dge 'dun gyi gtsug lag khang gi nang du song nas yongs su rgyug pa na/ de gal te dge 'dun gyi 'am dge 'dun gyi gtsug lag khang du tshes gcig la gnod sbyin la byin pa'i rnyad pa 'thob cing dge 'dun gyi gnas brtan nam/ gzhan gyis chos kyi sbyin pa byin pas mngon par mgu bar 'gyur la de des shin du tshim par 'gyur/ des srog 'tsho ba 'thob par 'gyur/ des 'tsho ba rnyed par 'gyur te/ ji srid du sdig pa'i las de bcom zhing spangs la zad par ma byas pa de srid du yi dags kyi sdug bsngal myong bar 'gyur/ de de las thar nas kyang las de dang rgyu 'thun par rang gi las la spyod pa sna tshogs dang rnam pa sna tshogs byas pa 'khor ba na tshe sna tshogs myong bar 'gyur/ de gal te brgya la gnya' shing gi bu gar rus sbal 'jug pa lta bur mi rnams dang skal ba mnyam par mir skyes na/ de gzugs bram ze lta bu yin zhing lha rten gyi drung du phyugs gsod pa byed dam za bar byed/ srog 'tsho ba gzhan la rtag tu rag las shing des srog 'tsho ba thob par 'gyur/ de nas yang de nyes par byas pa rjes su 'brel pas sems can dmyal bar 'gro bar 'gyur ba mthong ngo / /de nas yang dge slong las kyi 'bras bu rnam par smin pa shes pa des yi dags kyi 'jig rten la brtags na/ des thos pa las byung ba'i shes pas yi dags kyi 'jig rten yi dags chu 'thung ba zhes bya ba ji ltar 'dug pa mthong ngo / /de dag las gang gis skye bar 'gyur snyam nas des thos pa las byung ba'i shes pas brtags na/ 'di ltar mi rigs par chags pa'i zil gyis non pa'i sems can chang 'tshong ba gang gis khyim na chang yod pa dang / sbyar ba'i chang dang / bu ram gyi chang 'tshong bar byed pa ser sna dang phrag dog gis mngon par nyams pa de chang de dag chus bslad de chang btung ba pha rol po de dag la 'drid par byed/ rnam par 'tshe bar byed cing des sbyin pa dag ma byin/ bsod nams dag mi byed/ tshul khrims mngon par mi srung / chos mi nyan/ chos mi spyod/ gzhan dag kyang mi rigs par chags pa de la 'jog cing rjes su dga' bar byed la las dang las kyi nyer sdogs dang las kyi mjug dang bcas pas byed na/ de nyes par byas pa des lus dang bral nas ngan 'gro log par ltung ba yi dags chu 'thung ba rnams kyi nang du skye bar 'gyur ro/ /lus rtag tu bkres pa dang skom pas gdungs pa de yul chu med pa'i ri brags dang 'brog dang dgon pa chen po rnams su yongs su 'khyam mo/ /mdog bung ba dang sol ba 'dra zhing yan lag dang nying lag thams cad sra la rtsub ste shin du rdol ba dang / de'i lus 'bar bas 'khrigs shing kha gdong skra ring po rnams kyis mun par khebs te rtag tu bkres pa dang skom pa las byung ba'i mes gdungs pa na gal te res 'ga' brgya la chu dang nye bar gyur pa de'i tshe chu rgal ba gang 'bog pa/ rkang pa'i chu'i gzer ma 'byung ba dang / chos spyod pa gang dag chu 'gram du lag pa dag gis chu 'thor zhing gang skom pa de dag la sbyin no zhes smra ba de dag gis de srog 'tsho ba 'thob par 'gyur ro/ /gal te ma byin par 'dod nas de chu 'gram du 'dug ste/ btung ba 'thung ba dang / chu'i rgyun de srung ba'i yi dags rnams kyis mngon par 'tshe bar byed cing lus kyang kun nas gze gze btog btog pa lta bur byed do/ /sdug bsngal gyis nyam thag pa de de nas yang ngu skad 'byin/ smre sngags 'don cing yongs su rgyug go/ nyes par byas pa'i las kyis bslus pa de ji srid du de'i sdig pa'i las byas shing bsags pa de bcom zhing spangs la zad par ma byas pa de srid du der sdug bsngal de myong bar 'gyur ro/ /de phyis yi dags kyi 'jig rten de nas thar bar 'gyur te/ thar nas kyang las de dang rgyu 'thun par rang gi las rlung lta bus 'khyam pa na 'khor ba na yongs su 'khyam mo/ /de gal te brgya la mi rnams kyi nang du gnya' shing gi bu gar rus sbal 'jug pa lta bur mi rnams dang skal ba mnyam par mir skyes na de chu dang / lteng ka dang / nags tshal dang bral ba ri brags dang 'brog dang / grong ngan par skye bar 'gyur/ rtag tu khron pa'i chu la 'thung bar 'gyur/ mkhris pa'i nad kyis 'debs par 'gyur/ nyin mtshan du skom med pas gnod par 'gyur ba mthong ngo / /de nas yang dge slong las kyi 'bras bu rnam par smin pa shes pa des yi dags kyi 'jig rten la brtags na/ des thos pa las byung ba'i shes pas yi dags kyi 'jig rten na yi dags kun ston ces bya ba mthong ngo / /de dag las gang gis skye bar 'gyur snyam nas des thos pa las byung ba'i shes pas brtags na/ mi ngan pa phrag dog dang ser snas z il gyis non cing mi rigs par chags pa la brkam pa la brkam pa gang gis mkhas pa dbul po'i 'tsho ba tshegs chen pos bsgrubs pa dag la rin thang steng du ma bab pa'i rin mi 'dra ba zang zing byin la de rtag tu de la dga' zhing slu bar byed de/ gzhan dag kyang las ngan par byed pa de nyid la 'god par byed cing 'jog par byed la sbyin pa dag ni mi gtong ngo / /bsod nams kyang mi byed/ tshul khrims la mi gnas/ dad pas nye bar 'gro bar mi byed/ chos dang 'thun pa'i chos mi spyod/ drang po dang dul bar mi byed/ dge ba'i bshes gnyen gyi ngang tshul can du mi byed cing yang dang yang phrag dog dang ser snas zil gyis non par gyur na de lus dang bral nas ngan 'gro log par ltung ba'i yi dags kun ston rnams kyi nang du skye bar 'gyur te/ de la 'jig rten pa de dag pha zhes brjod do/ /de rtag tu lus dang bkres pa dang / skom pas gdungs shing lus tshal shing bsregs pa 'dra la dga' ba med pas nyams par 'gyur/ mchi mas gdong yog cing rkang pa dang lag pa shin du rdol la/ skras kha gdong mun pa ltar khebs pa/ lto'i mdog sprin nag po 'dra zhing ngu skad 'byin/ smre sngags 'don pa na 'di ltar smre sngags yongs su 'don te/ ma byin pas lta ga la 'thob/ /ma btab 'bras bu ga la 'byung / /sgron ma med na 'od med ltar/ /ma byin bde ba ga la yod/ /ji ltar lus can long ba yi/ /mig gis lta bar nus med ltar/ /sbyin dang bral ba de 'dra ste/ /yi dags bde ba mi rnyed do/ /yi dags 'jig rten yi dags gang / /de bzhin nor med 'jigs gsum du/ /shin du mi dga' 'khyam byed pa/ /de ni ser sna'i 'bras bu yin/ /rang gi las 'bras za ba yi/ /srog chags las la longs spyod pa/ /ma byin ci yang mis 'thob ste/ /byas pa chud ni za ba med/ /yi dags 'jig rten gnas pa dag / ngan byas rnams kyis bdag cag bsregs/ /bkres dang skom las byung ba yi/ /me yis 'dir ni yongs su spyad/ /bdag cag rnams ni skom pa las/ /nam bral bde ba 'byung bar 'gyur/ /yongs su gdung las bdag cag rnams/ /nam na yongs su thar bar 'gyur/ /lam dang lam min mi shes shing / /las kyi 'bras bu dag mi shes/ /bkres dang skom las byung ba'i me/ /tsha ba 'byung ba ma shes so/ / bzhin ni skra yis mun ltar khebs/ /re ba med cing srog rnams btang / /lpags pa rgyus pa'i dra bas sbrel/ /bdag 'tsho kyi hud sdug bsngal lo/ /dgon par chud pa'i lus can rnams/ /thams cad du yang sdug bsngal te/ /'dir ni skyob pa gang yang med/ /bdag cag sdug bsngal zhugs par gyur/ /de ltar yi dags kun ston par byed pa de dag ngu skad 'byin/ smre sngags 'don cing thams cad yongs su 'khyam mo/ /de dag gal te yang yongs su rgyug pa na dge slong des mthong nas sems par byed de/ kye e ma khyad par du 'dod pa'i khams kyi 'khor ba rab tu 'bar ro snyam mo/ /de ltar yongs su rgyug pa de dag la gal te dad pa can zhig gis kyang byin la de 'di rigs der skyes pa zhig kyang yin na de 'byung bar 'gyur te/ de de las srog gi 'tsho ba 'thob par 'gyur zhing skyob pa de yin la skyabs de yin te de la rten to/ / de ltar de srid du sdig pa'i las de bcom zhing spangs la zad par ma byas pa de srid du 'tsho bar 'gyur ro/ /de phyis yi dags kyi 'jig rten de las thar bar 'gyur te/ thar nas kyang las de dang rgyu 'thun par rang gi las kyi 'bras bu la spyod pa rang gi las rlung lta bus ded par byed do/ /de dag gal te yang mi rnams kyi nang du gnya' shing gi bu gar rus sbal 'jug pa lta bur mi rnams dang skal ba mnyam par mir skyes na de rdza rnga rdung ba 'am/ dril sgra sgrogs pa 'am/ gtsug lag khang gi srungs mar 'gyur ba mthong ngo / /de nas yang dge slong las kyi 'bras bu rnam par smin pa shes pa des yi dags kyi 'jig rten la rnam par brtags na/ des thos pa las byung ba'i shes pas yi dags kyi 'jig rten na yi dags mchil ma za ba zhes bya ba ji ltar 'dug pa mthong ngo / /de dag las gang gis skye bar 'gyur snyam nas des thos pa las byung ba'i shes pas brtags na/ 'di ltar mi ngan pa skyes pa 'am bu med phrag dog dang ser snas zil gyis non pa dge 'dun nam gzhan mkhas pa'i rnam pa de lta bu dag gi kha zas lhag mar byas la de 'di ltar lhag mar ma byas so zhes smras nas de dag kyang yid ches pa'i dbang gis kha zas mi 'dra ba de za bar byed do/ /mi ngan pa de yang dang yang du de ltar de nyid la dga' bar byed cing gzhan dag kyang de nyid la rab tu 'jog par byed la sbyin pa dag gtong bar mi byed/ tshul khrims la mi gnas/ mkhas pa la mi bsten/ chos dang 'thun par mi spyod/ yang dang yang du kha zas lhag mar byed pa'i las de nyid la mngon par dga' bar byed na de lus dang bral nas ngan 'gro log par ltung ba yi dags mchil ma za ba rnams kyi nang du skye bar 'gyur ro/ /der skyes nas lus bkres pa dang skom pas gdungs pa'i mchil ma bor ba ljan ljin nam brtsig pa la reg pa 'am sa la bor ba de kham gyis za bar byed de des srog 'tsho ba 'thob par 'gyur zhing de'i phyi bzhin 'brang la skyabs de yin zas de yin te/ ji srid du sdig pa'i las de bcom zhing spangs la zad par ma byas pa de srid du der 'byung bar 'gyur ro/ /de phyis yi dags kyi 'jig rten de las thar bar 'gyur te/ thar nas kyang las de dang rgyu 'thun par rang gi las kyi 'bras bu la spyod pa 'khor ba na yongs su 'khyam mo/ / de gal te brgya la mi rnams dang skal ba mnyam par mir skyes na de dbul zhing nad bu can la sna rul bar 'gyur/ rtag tu dge 'dun gyi nang na ljan ljin 'phyag par 'gyur/ las kyi 'tsho ba dang lhag ma za bar 'gyur ba mthong ngo / / //'phags pa dam pa'i chos dran pa nye bar gzhag pa/ bam po bcu dgu pa/ de nas yang dge slong las kyi 'bras bu rnam par smin pa shes pa des yi dgas kyi 'jig rten la brtags na/ des thos pa las byung ba'i shes pas yi dags kyi 'jig rten na nyes par byas pa spyod pa/ bkres skom chung zhing lus gos med pa ji ltar 'dug pa mthong ngo / /de las gang gis der skye bar 'gyur snyam nas des thos pa las byung ba'i shes pas brtags na/ des gnod sems kyi phyir ni ma yin gyi/ gtsang ba 'dod pa'i phyir sangs rgyas la phreng ba phul ba rku ba dang / de bzhin du bla ma dag gi phreng ba yang rku bar byed na de lus dang bral nas ngan 'gro log par ltung ba yi dags phreng ba za ba rnams kyi nang du skye bar 'gyur te/ de mchod rten nam gnod sbyin gyi gnas su skye bar 'gyur zhing de mthu che ba dang dbang che bar yang 'gyur ro/ /de legs par byas pa dang nyes par byas pa'i rmi lam dag ston par nus so/ /gal te mi gang la rang bzhin gyi mi dge ba zhig byung la yi dags de la kha zer na/ de gzhi des mi de la 'tshe bar byed pa dang / 'jig rten pa de dag gnod sbyin 'di ni rdzu 'phrul che ba mthu che ba zhig go zhes brjod do/ / de phreng ba mang po thob ste/ de des shin du tshim par 'gyur zhing lus bkres pa dang skom pas gdungs par yang mi 'gyur/ 'jig rten gyis kyang mngon par bstod par 'gyur te/ de des rtag tu rab tu dga' bar 'gyur ro/ /der yi dags phreng ba za ba de srid du sdig pa'i las sdig pa chung ba de bcom zhing spangs la zad par ma byas pa de srid du 'tsho bar 'gyur ro/ /de phyis yi dags kyi 'jig rten de las thar bar 'gyur te/ thar nas kyang las de dang rgyu 'thun par byas pa nye bar 'gro ba ji lta ba bzhin de la spyod cing 'khor ba na yongs su 'khyam mo/ /de gal te brgya la mi rnams dang skal ba mnyam par mir skyes na de phreng ba mkhan du 'gyur te mu dang mtha' dang / mjug des de'i 'tsho ba nye bar 'grub pa mthong ngo / /de nas yang dge slong las kyi 'bras bu rnam par smin pa shes pa des yi dags kyi 'jig rten la brtags na/ des thos pa las byung ba'i shes pas yi dags kyi 'jig rten na yi dags khrag za ba zhes bya ba khrag gis srog 'tsho bar byed pa ji ltar 'dug pa mthong ngo / /der sems can dag las gang gis skye bar 'gyur snyam nas des thos pa las byung ba'i shes pas brtags na/ mi gang la la de'i lus brtan par bya ba'i phyir sha'i khrag 'thung la de la dga' zhing gtum pa dang / phrag dog dang ser snas mngon par nyams pa/ bu dang chung ma la slu bar byed cing srog gcod par byed na khrag la 'chums pa'i ngang tshul can te/ de lus dang bral nas ngan 'gro log par ltung ba yi dags khrag za ba rnams kyi nang du skye bar 'gyur ro/ /der skyes nas kyang de las de nyid kyis bskyed pa'i yul du skye bar 'gyur la de la mi dag 'di ni gnod sbyin zhig yin no zhes rjod de/ de la mchod pa yang byed do/ /de la kun nas bskor nas khrag gi gtor mas kyang mchod par byed de/ de phyir zhing khrag 'thung bas myos nas mi dag la gnod pa byed do/ /de la mi dag yang dang yang gnod sbyin 'di ni rdzu 'phrul che zhing mthu che ba zhig yin no zhes brjod de/ de ltar de gcig nas gcig tu rjod par byed do/ /tshe yang snga ma bzhin te/ de ltar de ji srid du sdig pa'i las de bcom zhing spangs la zad par ma byas pa de srid du de ltar yi dags rdzu 'phrul che ba de nyid byed do/ /de de las thar na las de dang rgyu 'thun par rang gi las la spyod pa las nye bar 'gro ba ji lta ba bzhin du 'khor ba na yongs su 'khyam mo/ /de gal te brgya la mi rnams dang skal ba mnyam par mir skyes pa 'am bud med du skyes na mi de mkha' 'gro ma 'am mkha' 'gror 'gyur ba mthong ngo / /de nas yang dge slong las kyi 'bras bu rnam par smin pa shes pa des yi dags kyi 'jig rten la brtags na/ des thos pa las byung ba'i shes pas yi dags kyi 'jig rten na yi dags sha za ba zhes bya ba ji ltar 'dug pa mthong ngo / /de las gang gis skye bar 'gyur snyam nas des thos pa las byung ba'i shes pas brtags na/ ser sna la chags pa'i zil gyis non pa gang gis ba lang ngam/ rta 'am/ ri dgas sam/ phag gam/ lug shi ba'i sha rin thang ngam/ srang la g.yo byas nas rin chen por btsongs na de lus dang bral nas ngan 'gro log par ltung ba yi dags sha za ba rnams kyi nang du skye bar 'gyur ro/ /de bzhi mdo dang / sum mdo dang / tshong 'dus dang / lam bzhi dang / srang dang / grong khyer dang / gtsug lag khang gi gnas rnams kyi gnod sbyin du skye bar 'gyur te/ ngo bo nyid gtum la gyur pa shes so/ /yi dags rdzu 'phrul che ba mi dge ba'i las shin du mi zad pa yang ma yin la/ de sbyin pa tsher ma lta bu yang byin te/ rgyu des rdzu 'phrul che ba nyid du 'gyur ro/ /de la mi phal pa dag ma he dang / ri dgas dang / sbrul dang / lug la sogs pa dag srog bcad nas shas shin du tshim par byed do/ /de ltar de nyes par byas pa'i ngo bo nyid kyis ji srid du mi dge ba'i las phrag dog byas pa de bcom zhing spangs la zad par ma byas pa de srid du der 'byung bar 'gyur ro/ /de phyis yi dags kyi 'jig rten de las thar bar 'gyur te/ thar nas kyang las de dang rgyu 'thun par las nye bar 'gro ba dang / las so sor 'brang ba ji lta ba bzhin du 'khor ba na yongs su 'khyam mo/ /gal te brgya la las legs par byas pa des gnya' shing gi bu gar rus sbal 'jug pa lta bur mi rnams dang skal ba mnyam par mir skyes na sha za ba shan pa phal pa 'am dum bur byed pa'i mir 'gyur ba mthong ngo / /de nas yang dge slong las kyi 'bras bu rnam par smin pa shes pa des yi dags kyi 'jig rten la brtags na/ des thos pa las byung ba'i shes pas yi dags bdug pa za ba zhes bya ba de thob pas des srog 'tsho ba 'thob pa ji ltar 'dug pa mthong ngo / /de las gang gis der skye bar 'gyur snyam nas des thos pa las byung ba'i shes pas brtags na/ 'di ltar lhus cher ser snas zil gyis non cing las kyi 'bras bu mngon par mi shes pa/ sangs rgyas zhes bya ba 'di zhing ma yin no snyam nas zhing du mngon par ma shes pa gang gis bdug spos bzang po bzhag la bdug spos ngan pa khyer te/ sems dang ba med cing dad pa med par gyur pa/ las kyi 'bras bu yang dag par myong bar 'dod pa/ gzhan gyi ngor 'di ltar bdug spos phul bas bdag gi las kyi 'bras bur 'gyur snyam na de lus dang bral nas ngan 'gro log par ltung ba yi dags rdzu 'phrul che ba me tog phreng ba dang / phye ma dang / byug pa dang / spos dang rol mo'i sgra la rab tu dga' zhing bdug pa za ba'i gnod sbyin du 'gyur te/ gnod sbyin gyi gnas sum mdo dang / bzhi mdo 'am/ lam po che 'am/ srang ngam/ gtsug lag khang ngam/ kun dga' ra ba 'am/ bskyed mos tshal lam/ khyim 'am/ mkhar ram/ pu shu dag tu a ga ru nag po'i bdug spos kyis myos par 'gyur zhing skye bo kun gyis phyag byas par 'gyur ba ni sems dang rdzas kyi yon gyis ma yin gyi zhing bzang po'i yon yin te/ sangs rgyas dang chos dang dge 'dun la chung ngu zhig phul na yang 'bras bu chen por 'gyur ro/ /dper na gang gi tshe shing n+ya gro d+ha'i sa bon chung ngu zhing gshin pa la btab pa de'i tshe shing ljon pa yal ga bzang zhing lo ma'i tshogs chen por 'gyur ro/ / de bzhin du de zhing bzang po sangs rgyas dang / chos dang dge 'dun la phul ba'i 'bras bu yang zhing gi yon tan dang mthus chen por 'gyur ro/ /de ltar yi dags rdzu 'phrul che ba de bde ba nyams su myong ste las zad pas yi dags kyi 'jig rten de las thar bar 'gyur te/ thar nas kyang las de dang rgyu 'thun par las nye bar 'gro ba ji lta ba bzhin du 'khor ba na yongs su 'khyam mo/ /de gal te mi'i nang du gnya' shing gi bu gar rus sbal 'jug pa lta bur mi rnams dang skal ba mnyam par mir skyes na/ de rtag tu de dbul ba'i rigs su skye zhing rtag tu me tog phreng ba dang / phye ma dang / byug pas lus byugs te lus shin du dri zhim par 'gyur ba mthong ngo / /de nas yang dge slong las kyi 'bras bu rnam par smin pa shes pa des yi dags kyi 'jig rten la brtags na/ des thos pa las byung ba'i shes pas yi dags drag shul spyod pa zhes bya ba ji ltar 'dug pa mthong ngo / /der sems can dag las gang gis skye bar 'gyur snyam nas des thos pa las byung ba'i shes pas brtags na/ mi ngan pa ser snas zil gyis non cing dge sbyong gi t shul 'dzin pa tshul khrims 'chal pa gang gis dge sbyong gzhan la tha snyad btags nas 'di ltar dge sbyong zhig shin du nad mi bzad pas thebs te de sbyin bdag khyod kyis na ba'i gsos sman gyi rkyen gyi yo byad dag byin cig ces smras nas/ de blangs te bdag nyid za bar byed de zla des ngan g.yo byed par gyur nas tshul sna tshogs bzung ste yul nas yul du rgyug cing sbyin bdag rnams la slu bar byed na de lus dang bral nas ngan 'gro log par ltung ba yi dags drag shul spyod pa rnams kyi nang du skye bar 'gyur ro/ /der skyes nas kha zas ljan ljin mi gtsang ba za bar 'gyur/ rtag tu lus bkres pa dang skom pas gdungs par 'gyur/ mi gang mi gtsang ba de la brnyas par byed cing de ltar nga rgyal med par byed/ glags mthong ba nyid kyis gzhan dag gi rmi lam du 'jigs pa ston par byed cing dur khrod rnams su dga' bar byed/ lus dang spu thams cad rab tu 'bar la yul 'jig pa'i tshe rab tu dga' bar 'gyur/ drag shul du spyod pa'i rig sngags dag gis gzhan dag drangs nas rnam par 'tshe bar byed/ yud tsam cig gis dpag tshad brgya phrag stong nas kyang drangs te 'ong bar byed do/ /de ltar drag shul spyod pa'i yi dags de gnod sbyin gyi ming thob ste de la skye bo phal pa dag gnod sbyin 'di ni rdzu 'phrul che zhing gnod sbyin mthu che ba yin no snyam nas mchod pa byed do/ /de ltar de skye bo rnam pa sna tshogs la gnod pa byed cing rnam par 'tshe ba na ji srid du tshe ma zad pa de srid du 'tsho bar 'gyur ro/ /de phyis de las 'chi bar 'gyur te shi nas kyang las de dang rgyu 'thun par rang gi las la spyod pa 'khor ba na yongs su 'khyam mo/ / de gal te brgya la mi rnams dang skal ba mnyam par mir skyes na de 'byung po mi bzad pa gnod sbyin mo skyong bar 'gyur ba mthong ngo / /de nas yang dge slong las kyi 'bras bu rnam par smin pa shes pa des yi dags kyi 'jig rten la brtags na/ des thos pa las byung ba'i shes pas yi dags kyi 'jig rten na yi dags glags lta ba zhes bya ba rang gi ngo bo nyid kyis kyang glags lta ba ji ltar 'dug pa mthong ngo / /de las gang gis der skye bar 'gyur snyam nas des thos pa las byung ba'i shes pas brtags na/ 'di ltar phrag dog dang ser snas zil gyis non pas gzhan gyi nor rdzas la g.yo thabs dang ngan g.yo dang / slu ba dang 'khu ba byas shing grong dang / grong khyer dang / tshong 'dus pa la brid de glags rnyed pa dang / pha rol 'jig par byed cing sbyin pa dag mi gtong / bsod nams kyang mi byed/ mkhas pa la lhur mi lta/ rtag tu ser snas zil gyis non cing gzhan la 'khu ba'i bsam pas gzhan gyi phun sum tshogs pa mthong nas yid gzhan du sems/ bshes grogs dang / gnyen 'dab dang / rtsa lag dang mi mthun zhing yul la zhe 'gras pa skye bo thams cad kyi mngon sum du gyur pa de lus dang bral nas ngan 'gro log par ltung ba yi dags glags lta ba rnams kyi nang du skye bar 'gyur ro/ /lus dang spu rtag tu rab tu 'bar zhing lus bkres pa dang skom pas gdungs la/ lus shing ljon pa king shu ka 'dra ba ngu skad 'byin smre sngags 'don cing sa phyogs gang na chu yod cig gu/ gzhan gang na bdag gis bza' ba'i kha zas kyi rnam pa cung zad yod cig gu snyam nas rgyug par byed do/ /de res 'ga' gal te mi blo zhan pa zhig dang phrad la/ mi de mchod rten skor bar mi byed pa dang / de'i phyi bzhin du 'brang ba'i lha des gtong bar 'gyur la/ de'i tshe mi de'i phyi bzhin 'brang ba'i lha dang bral bar 'gyur te yi dags glags lta ba des glags rnyed nas rnam par 'tshe bar byed cing de bzung nas de'i tshe srog 'tsho bar byed do/ /de bzhin du mi gzhan gang dag bud med dang phrad pa btsog gi nyes pa 'am kha zas dang btung ba zos pa'i lhag ma mi gtsang ba'i nyes pa ma bkrus na lha yang rnam par 'tshe bar byed la yi dags de de nyid kyis srog 'tsho ba 'thob par 'gyur zhing de'i mgon de yin la skyabs de yin te/ ji srid du sdig pa'i las de bcom zhing spangs la zad par ma byas pa de srid du 'tsho bar 'gyur ro/ /de phyis yi dags kyi 'jig rten de las thar bar 'gyur te/ thar nas kyang las de dang rgyu 'thun par las la spyod pa 'khor ba na yongs su 'khyam mo/ /de gal te mi rnams dang skal ba mnyam par mir skyes na/ de rtag tu rgyal po dang / chu dang / chom rkun dang / me dang dgon pa dag gis ma rung bar byed cing rtag tu dbul ba dang nad bu can dang dman par 'gyur ba mthong ngo / /de nas yang dge slong las kyi 'bras bu rnam par smin pa shes pa des yi dags kyi 'jig rten la brtags na/ des thos pa las byung ba'i shes pas yi dags kyi 'jig rten na yi dags sa'i 'og na gnas pa zhes bya ba mthong ngo / / der sems can dag las gang gis skye bar 'gyur snyam nas des thos pa las byung ba'i shes pas brtags na/ mi blo gros ngan pa ser snas zil gyis non pa'i gzhi gang gi btson ra bya ba'i phyir sa brkos pa mun nag gi nang du sems can bcings pa gang dag phan tshun blta bar yang mi mthong ste/ de dag ngu skad 'byin cing ku cho 'don/ so so mgon med la shin du sdug bsngal ba dag mi ngan pa gang gis btson rar 'jug par byed na de lus dang bral nas ngan 'gro log par ltung ba yi dags sa'i 'og na gnas pa sa gzhi mun pa mun gnag gi nang du 'byung bar 'gyur te/ de lus kyi tshad dpag tshad gsum yod la kun nas sbrul gdug pas dkris shing de rlung grang la mi mthun pa rnams kyis shin du gnod par byed/ lus spu can bkres pa dang skom pas mchog tu gdungs pas ngu la lus skra ring pos khebs pa/ yang dang yang du sdug bsngal rnam pa sna tshogs rnam pa du ma rnams kyis mngon par gdungs shing dgon pa mi bzad par zhugs/ sdug bsngal drag cing mi bzad pa myong bzhin du yongs su rgyug la/ gcig pu zla med cing grogs med pa/ rlung spu gri lta bus bdas pa na ji srid du nyes par byas pa'i las bcom zhing spangs la zad par ma byas pa de srid du de myong bar 'gyur ro/ /de phyis de las thar bar 'gyur te/ thar nas kyang las de dang rgyu 'thun par las nye bar 'gro ba ji lta ba bzhin du 'khor ba na yongs su 'khyam mo/ /de gal te mi rnams kyi nang du gnya' shing gi bu gar rus sbal 'jug pa lta bur mi rnams dang skal ba mnyam par mir skyes na de ri gseb dang rgya mtsho'i ri dang nyi ma dang zla ba med pa'i yul rnams su long bar 'gyur zhing srog 'tsho ba gzhan dag la rag las pa dang / dbul por 'gyur ba mthong ngo / /de nas yang dge slong las kyi 'bras bu rnam par smin pa shes pa des yi dags kyi 'jig rten la brtags na/ des thos pa las byung ba'i shes pas yi dags kyi 'jig rten na yi dags rdzu 'phrul che ba zhes bya ba rang bzhin gyis rdzu 'phrul che zhing mthu che ba ji ltar 'dug pa mthong ngo / /de las gang gis der skye bar 'gyur snyam nas des thos pa las byung ba'i shes pas brtags na/ sems can ser snas nyams pa gang g.yo thabs dang sgyus sam/ mthus gzhan gyi nor phrogs te/ gzhan dag la byin pa dang / sems dang ldan pa ma yin zhing / zhing bzang po ma yin pa la sbyin pa tsher ma lta bu/ mtshungs pa'i sbyin pa 'gran pa dang / dbang med pa dang / sba ba dang / spogs dang / ngo chen dang / sten sten pa dang / slar re ba la sogs pa'i sbyin pa tsher ma lta bu dang mtshungs pa dag byin na de lus dang bral nas ngan 'gro log par ltung ba yi dags mthu bo cher 'gyur ro/ /de der skyes nas yi dags lus bkres pa dang skom pas gdungs pa rnams kyis yongs su bskor ba/ 'brog dgon pa 'am/ ri zad zed kyi gseb bam/ rgya mtsho'i mtha'i gling dag tu yi dags rdzu 'phrul chen por 'gyur te/ bdag gcig pu mchog tu bde bar 'gyur ro/ /gzhan lus tshal shing bsregs pa lta bu dang / lus bkres pa dang skom pas gdungs shing lus gdungs pa bkren pa'i mig gis lta ba rnams kyis mngon par bskor ba bdag gcig pu mchog tu bde bar 'gyur te/ sbyin pa ngan pa de'i 'bras bu bdag gcig pu nye bar spyod do/ /shin du sdug bsngal bas 'khrigs shing yongs su bskor ba gang gi tshe las de zad par gyur pa de'i tshe de de las thar bar 'gyur te/ thar nas kyang las de dang rgyu 'thun par rang gi las kyi 'bras bu la spyod pa 'khor ba na 'gro ba sna tshogs su skye bar 'gyur ro/ /de gal te mi rnams kyi nang du gnya' shing gi bu gar rus sbal 'jug pa lta bur mi rnams dang skal ba mnyam par mir skyes na de lo nyes byung ba'i yul dag tu rgyal po 'am rgyal phran du 'gyur ba mthong ngo / /de nas yang dge slong las kyi 'bras bu rnam par smin pa shes pa des yi dags kyi 'jig rten la brtags na/ des thos pa las byung ba'i shes pas yi dags kyi 'jig rten na/ yi dags mtshan mo lus rab tu 'bar ba zhes bya ba ngo bo nyid kyis kyang mtshan mo rab tu 'bar te ngu bzhin du grong gi 'dab dang / grong khyer gyi 'dab dang / tshong 'dus kyi 'dab dang / ri'i gnas rnams su rgyug pa/ shing ljon pa rab tu 'bar ba 'dra zhing lus bkres pa dang / skom pas gdungs pa ji ltar 'dug pa mthong ngo / /de las gang gis der skye bar 'gyur snyam nas des thos pa las byung ba'i shes pas brtags na/ ji ltar phrag dog gis zil gyis non pa gang pha rol la gnod par byed pa g.yo thabs dang sgyu byed pa/ yul ma rung bar byed pa/ ljongs 'jig par byed pa/ mi gsod pa/ gnyen mdab dang / bshes grogs dang / rtsa lag 'jig par byed pa/ de dag bshig nas kyang rgyal po 'am/ blon po la 'bul bar byed de/ de las yang thabs thob nas de nas yang sdig pa byed pa'i mi yul de dag nyid snga ma bzhin du 'jig par byed la sbyin pa dang / tshul khrims dang / thos pa dang bral ba mkhas pa la sdang bar byed cing gnod par byed pa de de lus dang bral nas ngan 'gro log par ltung ba yi dags mtshan mo lus rab tu 'bar ba rnams kyi nang du skye bar 'gyur ro/ /des ji ltar de dag mtshan mo btson rar bcug ste/ lus la gnod pa byas pa de bzhin du las de dang rgyu 'thun par las mi zad pa des de'i lus kyang mtshan mo rab tu 'bar bar 'gyur ro/ /ji ltar des btson rar bcug nas ngu zhing ngu skad 'byin la cho nges 'debs pa de bzhin du yi dags de'i lus mtshan mo rab tu 'bar bar 'gyur te/ de ltar de ji srid du sdig pa'i las de bcom zhing spangs la zad par ma byas pa de srid du las de myong bar 'gyur ro/ /de phyis yi dags kyi 'jig rten de las thar bar 'gyur te/ thar nas kyang las de dang rgyu 'thun par las nye bar 'gro ba ji lta ba bzhin du 'khor ba na yongs su 'khyam mo/ /de gal te mi rnams kyi nang du gnya' shing gi bu gar rus sbal 'jug pa lta bur mi rnams dang skal ba mnyam par mir skyes na/ de rtag tu gzhan gyis gnod pa byas par 'gyur/ nor rdzas bsags bsags pa yang rtag tu rgyal po'i 'khor nas kyang 'phrog par byed/ shing ljon pa'i kha nas rtag tu lhung bar 'gyur te/ de lhung nas lus snad par 'gyur ba mthong ngo / /de nas yang dge slong las kyi 'bras bu rnam par smin pa shes pa des yi dags kyi 'jig rten la brtags na/ des thos pa las byung ba'i shes pas yi dags kyi 'jig rten na/ yi dags mi rnams kyi bus pa la glags lta ba zhes bya ba bus pa gang btsas ma thag tu 'phrog par byed pa ji ltar 'dug pa mthong ngo / /de las kyi 'bras bu gang gis der skye bar 'gyur snyam nas des thos pa las byung ba'i shes pas brtags na/ gang gis sngon gzhan du skyes pa na de'i bus pa bsad pa dang skyes pa 'am bud med de sems can de la zhe sdang skyes nas 'di ltar bdag gnod sbyin du gyur te de dag gi bus pa gsad par bya'o snyam du sems na/ de lus dang bral nas ngan 'gro log par ltung ba yi dags gzhan la glags lta ba rnams kyi nang du skye bar 'gyur ro/ /de khro ba de la mngon par zhugs pa'i blos rtag tu de yid la byed par 'gyur te/ gal te bud med de bu btsa' bar gyur na de'i bus pa de de las bdag gis glags rnyed nas dbrog par bya'o snyam du sems so/ /yi dags de mgyogs par skyes te ji ltar dpag tshad brgya phrag stong dag na khrag gi dri tshor na yang der yud tsam gyis phyin par 'gro ste/ de gang gi tshe bud med de btsa' bar 'gyur ba de'i tshe yi dags glags lta ba 'khon du 'dzin cing dgra'i glags lta ba de chung ngur gyur nas gnas so/ /de gang gi tshe thams cad du tshol te glags tshol/ dmigs pa tshol/ gsab gseb tshol/ gzhi tshol/ rgyu tshol/ nyes pa tshol/ spyod pa tha dad pa tshol/ bkra shis ma yin pa tshol/ skar khung gi bu ga tshol/ sgo'i bu ga tshol/ gzhir 'jug pa tshol/ chu mi gtsang ba tshol/ gsang sngags la glags tshol/ rig sngags la glags tshol/ bkra shis la glags tshol/ grib ma la glags tshol/ dngos po la glags tshol/ me mdag gi bu ga tshol/ sa'i bu ga tshol/ mtshon cha'i bu ga tshol/ khang pa'i pu shu dang / ngam grog dang / g.yang sa'i bu ga tshol te/ de ltar yi dags snying la 'khon du 'dzin pa chen po yod pa de glags rnam pa sna tshogs dag tshol lo/ /de gal te ji skad bstan pa'i glags dag rnyed na de btsa' ba'i khyim na gnas pa nyid 'phrog par byed do/ /gal te ma rnyed na glags rnam pa sna tshogs tshol ba de lo bcu 'das kyi bar du yang 'phrog par byed do/ /de ltar snying la 'khon du 'dzin pa mi dge ba dang 'brel pa mi dge ba nyid kun du spyod bzhin du lus bkres pa dang / skom pas gdungs pa des gal te nus na de'i bus pa de phrogs nas gsod par byed do/ / ji ste lus kyi dbang ngam srung ba'i dbang gis ma nus na snying la 'khon du 'dzin pa de 'chi ba'i dus byed de/ de ltar shi nas las nye bar 'gro ba ji lta ba bzhin du las kyi dbang gis 'khor ba na yongs su 'khyam mo/ / de gal te yang brgya la mi rnams kyi nang du gnya' shing gi bu gar rus sbal 'jug pa lta bur mi rnams dang skal ba mnyam par mir skyes na/ sngon 'brel pa'i sgra de dang rgyu 'thun par de sngar bshad pa'i snying la 'khon du 'dzin pa des rgyu med bzhin du thabs rnam pa sna tshogs kyis rab tu gsod pa'i dgra 'byung bar 'gyur ba mthong ngo / /de nas yang dge slong las kyi 'bras bu rnam par smin pa shes pa des yi dags kyi 'jig rten la brtags na des thos pa las byung ba'i shes pas yi dags kyi 'jig rten na yi dags 'dod pa'i gzugs can zhes bya ba ji ltar 'dug pa mthong ngo / /de las gang gis der skye bar 'gyur snyam nas des thos pa las byung ba'i shes pas brtags na/ bud med dam/ ma ning gang bud med kyi cha byad du zhugs shing de bud med smad 'tshong ma'i cha byad sna tshogs su zhugs nas pha rol dag 'dod chags skyed par byed cing de nas yang 'dod pa de nyid la g.yengs nas 'jug par byed la bcug nas kyang phrag dog dang ser snas zil gyis non pas pha rol las gla nor rdzas dag len par byed do/ /blangs nas kyang res 'ga' zhing ngan pa dang snod ngan pa dang yul ngan pa la sbyin pa'i dngos po ngan pa tsher ma lta bu dang ldan pa cung zad tsam sbyin par byed de rgyu des de 'chi ba'i dus byas pa na yi dags 'dod pa'i gzugs can rnams kyi nang du skye bar 'gyur ro/ /der skyes nas kyang yi dags kyi gzugs kyi tshul sna tshogs 'dzin te/ tshul bzang ba 'am/ tshul ngan pa 'am/ gzugs bzang ba 'am/ gzugs ngan pa 'am/ sdug pa 'am/ skyes pa'i gzugs sam/ bud med kyi gzugs sam/ dud 'gro'i gzugs dag byed par nus so/ /de tshul sna tshogs dag bzung nas yul nas yul dag tu 'gro bar nus so/ /de rgyu dang bcas rkyen dang bcas par gyur na kha zas bza' bar nus so/ /rgyu'i gzugs de shin du chung bar byas nas khyim du 'jug par byed de zhugs nas kha zas de la za bar byed do/ /khyim na gnas pa de gzhan la bdag cag gi kha zas yi dags kyis zos so zhes smra'o/ /res 'ga' yang lha 'am mi'i tshul du gnas nas dus kyi dga' ston dag gi kha zas la za bar byed do/ /res 'ga' yang byar sprul nas dur 'thor ba'i kha zas dag la za bar byed do/ /res 'ga' yang mi snang bar byas nas 'phrog par byed de/ de ji ltar 'dod pa de bzhin du gzugs rnam pa sna tshogs su byed do/ /de la 'jig rten dag gnod sbyin ji ltar 'dod pa'i gzugs can zhig yin no zhes brjod do/ /de res 'ga' yang bud med du sprul nas grong mi'i chos kyis skyes pa 'dren par byed do/ /de ltar de tshul sna tshogs bzung nas 'jig rten slu bar byed de/ de ji srid du yi dags dang ldan pa'i sdig pa'i las de bcom zhing spangs la zad par ma byas pa de srid du de ltar 'jig rten bslus nas yi dags kyi 'jig rten du skye bar 'gyur ro/ / de phyis yi dags kyi 'jig rten de las thar bar 'gyur te/ thar nas kyang las de dang rgyu 'thun par rang gis byas pa'i las la spyod pa la 'khor ba na yongs su 'khyam mo/ /de gal te yang brgya la mi rnams kyi nang du gnya' shing gi bu gar rus sbal 'jug pa lta bur mi rnams dang skal ba mnyam par mir skyes na/ de bro gar mkhan tshul sna tshogs 'dzin par 'gyur zhing de bzhin du spyod pa'i tshul gzhan sna tshogs 'dzin par 'gyur te/ de tshul sna tshogs 'dzin pa'i las des 'tsho ba de bzhin du bdag nyid 'tsho bar byed de bdag gi chung ma gzhan dag la byin nas tshegs chen pos 'tsho ba 'grub par 'gyur ba mthong ngo / /de nas yang dge slong las kyi 'bras bu rnam par smin pa shes pa des yi dags kyi 'jig rten la brtags na/ des thos pa las byung ba'i shes pas yi dags rgya mtsho'i gling gi bar na gnas pa zhes bya ba ji ltar 'dug pa mthong ngo / /de dag las gang gis der skye bar 'gyur snyam nas des thos pa las byung ba'i shes pas brtags na/ dgon par zhugs pa gang 'jigs shing bzhin mog mog por gyur/ nad kyis nyam thag ste/ mgon med cing bshes pa med pa can de la sems can gzhan phrag dog dang ser snas nyams shing mi rigs par chags la brkam pa gang gis zong ngan pas nor rdzas bzang po la rin 'dra bar 'debs shing slu bar byed na/ mi ser snas nyams pa de 'chi ba'i dus byas nas rgya mtsho dang nye ba'i dgon pa mang po dang / shing ljon pa dang / lteng ka dang / chu bo dang / tshal dang / nags tshal med pa'i yul dag tu grang ba'i tshe ni brgya 'gyur du grang la tsha ba'i tshe ni brgya 'gyur du tsha ste/ lus bkres pa dang skom pas gdungs pa 'am/ zil pa'i thigs pas srog 'tsho ba'i yi dags su 'gyur ro/ /rgya mtsho'i chu yang btung bar mi thob la/ de dag gi las ngan par byas pa des rgya mtsho yang thams cad du skams par 'gyur te/ ri dang nags tshal dang rgya mtshor bcas pa de yang rab tu 'bar bar mthong ngo / /de re ba med cing thams cad nas gnod pa/ lus bkres pa dang skom pas gdungs pa ngu zhing smre sngags 'don bzhin du gnas nas gnas dag tu rgyug la/ ngu skad 'byin/ smre sngags 'don/ cho nges 'debs kyang de la grogs su gyur pa su yang med de de la skyob pa med/ dpung gnyen med do/ /rang gi las kyis sems bslus pa de skras mun pa ltar khebs shing lus kyi yan lag dang nying lag thams cad rgyus pa'i dra bas sbrel ba lag pa gnyis so sor phral te brgyangs pa dang / ku cho 'don pa kun nas mgon 'dod cing dpung gnyen 'dod kyang de'i mgon du 'gyur ba su yang med de/ de ltar de ji srid du sdig pa'i las de bcom zhing spangs la zad par ma byas pa de srid du 'tsho bar mi 'gyur ro/ /de phyis yi dags kyi 'jig rten de las thar bar 'gyur te/ thar nas kyang las de dang rgyu 'thun par gal te mi rnams kyi nang du gnya' shing gi bu gar rus sbal 'jug pa lta bur mi rnams dang skal ba mnyam par mir skyes na/ de de bzhin du gling gi bar na gnas pa'i mir 'gyur te/ gling chu nyung ba der rkang pa gcig pa 'am lus thung bar 'gyur ba mthong ngo / /de nas yang dge slong las kyi 'bras bu rnam par smin pa shes pa des yi dags kyi 'jig rten la brtags na/ des thos pa las byung ba'i shes pas yi dags kyi 'jig rten na yi dags gshin rje'i chad pa zhes bya ba ji ltar 'dug pa mthong ngo / /de las gang gis der skye bar 'gyur snyam nas des thos pa las byung ba'i shes pas brtags na/ mi gang phrag dog dang ser snas nyams shing rgyal po'i mi mna' byed pa sems drag shul can snying rje med pa/ chos kyi tshul btang ba/ 'jig rten thams cad kyis smad pa de lus dang bral nas ngan 'gro log par ltung ba yi dags kyi yul na yi dags gshin rje'i chad pa zhes bya bar 'gyur te/ gang mi'i 'jig rten na mi nyes par byas pa'i las kyis gshin rje'i bsgo ba nyan par 'gyur ro/ /de'i nyes par byas pa'i las kyis gshin rje'i mi nye bar 'dug ste shin du dngangs par byed cing cha byad bsgyur ba 'chang ba/ lus bsgyur ba 'chang ba/ lus bsgyur ba/ lag tu mtshon cha thogs pa/ lus skras mun pa ltar khebs pa/ mchu dang lto 'phyang ba/ rna ba 'phyang ba/ ha ha'i sgra dang mtshon cha 'debs pa rnams kyis mi de la 'jigs par byed do/ /de dag gis mi de mthong nas phyis lag pa bcing bas bcings te gshin rje'i 'jig rten gshin rje'i drung du khrid do/ /'di ltar de lha dang mi'i 'jig rten nas yi dags kyi yul du khrid de lus kyis nyes par spyad pa dang / ngag gis nyes par spyad pa dang / yid kyis nyes par spyad pa dang ldan pa de la lhas rjes su bstan par gsol zhes smras so/ /de nas gshin rje'i rgyal pos mi de la 'di ltar rjes su bstan pa/ mkhas pa rang gi las kyis su/ /mi dag tu ni khyod skyes na/ /rin chen gling du khyod bslus pa/ /ci yi phyir na chos ma spyad/ /bde ba las la rag las mthong / /yid ni de bzhin bde ba las/ / 'chi dang skye ba rnams spyad pa/ /chos ni yid dang rjes su 'brel/ /'du byed thams cad mi rtag ste/ /chu yi chu bur lta bu yin/ /'jig rten 'di dang pha rol du/ /de ltar legs pa'i las spyod do/ / gang zhig rtag tu dge byed pa/ /kun du mi dge yong mi byed/ /de ni ngar lta lam mi 'dod/ /mtho ris skas la kun du gnas/ /byis pa gang dag sems med pa/ /rtag tu nyes par spyod la dga'/ / sdig pa nges par rnam spangs pa/ /'gro ba bzang por 'gro bar 'gyur/ /'jig rten las kyi 'bras bu mthong / /lha la rnam pa sna tshogs mthong / /gang zhig bag med shin du rtsub/ /de dag nges par 'phags mi byed/ /gang gi don du lus dang ngag /yid kyis mang du sdig byas pa/ /de dag thams cad gzhan du dong / /gnas 'dir khyod ni gcig pu 'dug /mi ni rnyed dka' thob nas su/ /gang zhig sdig pa mang byed pa/ /shin du slu ba mi zad de/ /ngan 'gror nges par 'gro ba yin/ /gang zhig sdig las bral ba ni/ /shin du dge la dga' 'gyur te/ /de ni bde las bde 'thob cing / /mya ngan 'das par rab tu 'gro/ / gang zhig dge la nyer bsten pa/ /mi ni shin du bkra shis 'gyur/ /gang zhig sdig la nyer bsten pa/ /de ni shin du bkra mi shis/ /thog ma bar dang mthar ngan pa/ /dam pas de ni rnam par smad/ /sdig pa sdig par 'gro ba mthong / /sems can dmyal ba nye bar rtog /las dge dbang po thul ba ni/ /'jig rten dag na shin du bzang / /lus dang bral nas bde 'gro ste/ /lha yi 'jig rten skye bar 'gyur/ /khyod ni bcing ba dam pos bcings/ /gshin rje'i pho nyas dbang du byas/ /gshin rje'i 'jig rten bsten dka' ba/ /drag po mi bzad khyod kyis thob/ /khyod kyis ngan byas gang byas pa/ /las de 'dir ni spyad par gyis/ /byis pa rang gis byas la spyad/ /gzhan gyis spyod pa nyid mi 'gyur/ /de ltar de gshin rjes rjes su bstan pa na gshin rje'i chad pa de dag mngon sum du gyur to/ /de nas de bstan nas gshin rje'i mis nyes par byed pa byas pa rang gi las kyi 'bras bus bslus pa de phyir byung nas las nye bar 'gro ba ji lta ba bzhin du khrid de ji srid du sdig pa'i las byas shing bsags pa de bcom zhing spangs la zad par ma byas pa de srid du zas rlung la za bar byed do/ / de phyis yi dags kyi 'jig rten de las thar bar 'gyur te/ thar nas kyang gal te mi rnams dang skal ba mnyam par mir skyes na las de dang rgyu 'thun par ri nyam nga ba dang chu mi bde ba'i 'gram du gnas te lam du 'gro ba skyed par 'gyur ba mthong ngo / /de nas yang rnal 'byor spyod pa nang gi chos la chos kyi rjes su lta zhing gnas pa dge slong des sa gzhan bcu bzhi pa la ji ltar 'jug snyam nas des thos pa las byung ba'i shes pa 'am lha'i mig gis gzugs kyi skye mched bcu mthong ste/ 'di lta ste/ mig gi skye mched dang / gzugs kyi skye mched dang / rna ba'i skye mched dang / sgra'i skye mched dang / sna'i skye mched dang / dri'i skye mched dang / lce'i skye mched dang / ro'i skye mched dang / lus kyi skye mched dang / reg bya'i skye mched do/ /de 'di snyam du sems te/ mig dang gzugs la brten nas bdag gi 'du shes byung ngo snyam ste/ des brtags na mig dang gzugs la brten nas mig gi rnam par shes pa skye ste/ gsum 'dus pa las reg pa/ reg pa dang lhan cig skyes pa tshor ba dang / 'du shes dang / sems pa dang / rnam par shes pa 'byung ste/ reg par byed pas reg pa/ tshor bar byed pas tshor ba/ shes par byed pas 'du shes te/ 'di ltar gzugs 'di ni ring ngo thung ngo / /sdug go mi sdug go/ /bstan du yod pa'o/ /thogs pa dang bcas pa'o snyam pa'o/ /sems par byed pas sems pa'o/ /yang rnam par shes par byed pas rnam par shes pa ste/ chos de dag dmigs pa gcig la 'jug cing 'byung bar 'gyur te/ mtshan nyid gzhan dang gzhan/ ngo bo nyid gzhan dang gzhan yin no/ /'di ltar sa chen po'i chos bcu ni tshor ba dang / 'du shes dang / sems pa dang / reg pa dang / yid la byed pa dang / 'dun pa dang / mos pa dang / dran pa dang / ting nge 'dzin dang / shes rab ste/ de ltar dmigs pa gcig la mtshan nyid gzhan du 'dod do/ /rnam par shes pa la sogs pa chos bcu gcig po de dag kyang ji ltar nyi ma'i 'od zer gcig tu 'du yang 'on kyang ngo bo nyid gzhan pa de bzhin du rnam par shes pa'i ngo bo nyid gzhan pa nas sems pa'i bar du gzhan no snyam ste/ dge slong gzugs kyi skye mched kyi de kho na nyid shes pa des mig gsog dang / gsob dang snying po med pa dang / yang dag pa ma yin par mthong ngo / /phyogs bcur lam gyi de nyid shes shing log par lta ba spangs pa yang dag pa'i lta ba sngon du 'dren pas mig gi rnam pa gti mug gi rnyog par gyur pa spong ste de kho na nyid mthong ba des sha'i gong bur byas pa rnag nyung ngu dang 'chi ma mang po'i gnas yin no snyam du rig nas de la 'dod chags skye ba rab tu spong ngo / /mi rtag pa yin no snyam nas mi rtag par lta bar byed/ sha'i gong bu dang rus pa'i bu ga'i rnam pa yin no snyam nas 'dod chags dang bral bar byed/ rgyus pas sbrel pa yin no snyam nas mig gi skye mched phan tshun rag las pa 'di la rtog ste/ 'di la snying po med cing bdag med par rig go/ /mdor na mig 'di ni sdug bsngal yin no bar shes shing mthong nas mig gi skye mched kyi 'dod chags dang bral lo/ /de mig gi skye mched ji lta ba bzhin rtogs nas gzugs la yang rnam par dpyod par byed de/ gzugs gang sdug pa dang mi sdug pa dang lung du ma bstan pa 'di ni kun du rtog pa tsam ste/ 'di la snying po ci yod/ gtsang ba ci yod/ rtag pa ci yod/ mi rtag pa ci yod ces lta ba na rnam par rtog cing dpyod par byed do/ /dpyod pa na so so yang dag par rig par byed de gzugs 'di la ngo bo nyid kyis bde ba med pa des gzugs mthong zhing shes la rtog pa 'thob bo/ /gzugs 'di la snying po med de gzugs sdug pa dang mi sdug pa 'di ni kun du brtags pa tsam mo/ /'di la sdug pa dang mi sdug pa'i ngo bo med de/ 'jig rten 'di 'ba' shig sdug pa dang mi sdug par 'dod do/ /gzugs 'di ni ngo bo nyid kyis rtag pa 'am/ brtan pa 'am/ ther zug pa 'am/ bde ba 'am/ snying po 'am/ bdag dang bcas pa ma yin te/ 'dod chags dang zhe sdang dang gti mug gis bsgribs pa na gzugs sdug go mi sdug go snyam du sems so snyam nas de gzugs kyi skye mched yang dag par brtags te/ mig dang gzugs mthong nas chags par mi byed/ rmongs par mi byed/ snying po yod par mi sems so/ /mig dang gzugs kyi skye mched la mngon par brtags nas mig gi rnam par shes pa la chags par mi byed cing 'dod chags dang bral bar byed do/ /mig gi rnam par shes pa bdag ma yin/ mig gi rnam par shes pa bdag gi ma yin te de bzhin du reg pa dang / tshor ba dang / 'du shes dang / sems pa bdag ma yin/ sems pa bdag gi ma yin no bar rig go/ /de nas yang dge slong las kyi 'bras bu rnam par smin pa shes pa des yi dags kyi 'jig rten la brtags na/ des thos pa las byung ba'i shes pas yi dags kyi yul na yi dags byis pa la za ba zhes bya ba ji ltar 'dug pa mthong ngo / /de las gang gis der skye bar 'gyur snyam nas des thos pa las byung ba'i shes pas brtags na/ nad pa rnams k yi lha mchod pa 'am gnod sbyin mchod pa'i phyir las mi zad pa drag po gang gis gzhan dag bslus nas nor rdzas phrogs sam lug bsad na de lus dang bral nas ngan 'gro log par ltung ba sems can dmyal ba yang sos su skye bar 'gyur ro/ /de nas thar nas kyang yi dags byis pa la za ba'i nang du skye bar 'gyur la gang srog gcod pa gzhan zhig gal te mi'i so so yang dag par myong bar 'gyur ba'i las kyis mi'i skye gnas su skyes na/ de srog gcod pa mang du byas pa ji lta ba bzhin du yi dags des gsod par byed de/ de mngal na gnas pa na gsod pa 'am/ de btsas pa'i khyim du gsod pa 'am/ de gog thal thul na gsod pa 'am/ de phud bu bcas pa na gsod pa 'am/ de yongs su rgyug pa na gsod par byed de/ de ltar yi dags des rim gyis bus pa de gsod par byed do/ /de gang gi tshe nyes par byas pa'i las des yi dags de glags tshol te glags rnyed nas bus pa de la za bar byed do/ /'dir tshigs su bcad pa/ kha cig mngal te de bzhin du/ /gzhan ni btsas pa'i khyim dang gzhan/ /de bzhin gog ni thal thul dang / / yongs su rgyug na 'chi bar 'gyur/ /de ltar skom pa dang bkres pas gdungs pa'i lus de rang gis nyes par byas pa'i las myong bar 'gyur te/ 'di ltar byis pa'i srog 'tsho bar gyur pa na nyes par byas pa las nyes par byas pa nye bar sgrub cing de ltar byis pa la za ba'i yi dags de nyes par byas pa las shin du nyes par byas pa'i las gzhan rgyun mi 'chad pa na yi dags kyi 'jig rten de myong bar 'gyur te/ de ltar de ji srid du de'i sdig pa'i las byas shing bsags pa bcom zhing spangs la zad par ma byas pa de srid du yi dags kyi 'jig rten der skye bar 'gyur ro/ /gal te mi rnams dang skal ba mnyam par mir skyes na las de dang rgyu 'thun par de'i bus pa rim gro byas kyang 'tsho bar mi 'gyur ro/ /'dir tshigs su bcad pa/ nyes par byas pa'i las 'brel bas/ /nyes par byas pa'i 'bras bur brjod/ /de bzhin legs byas 'bras bu ni/ /rnam par smin pa bde bar mthong / /las kyi thag pa ring po yis/ /byis pa dam du bcings pa'i rnams/ /mya ngan 'das pa'i grong mchog tu/ /'gro bar mi 'gyur thar bar dka'/ /ye shes mtshon gyis de bcad nas/ /gang du de ni mi 'jug cing / /nges par grol bar rims nad bral/ /dam pa mya ngan 'das par 'gro/ /ji ltar nya dag rgyas bcus na/ /bde bar yongs su dbyung du rung / /de ltar sems can sred bcings pa/ / 'chi bdag gis ni nye bar 'dren/ /dug dang bcas pa'i mdas phog pa'i/ /ri dgas gang dang gar 'gro ba/ /de dang der ni dug 'gro ste/ /de bzhin mi'i dug sred pa yin/ /'gro ba 'gro bar rjes 'brang ba/ /sred pa dug 'dra spang bar gyis/ /shing skam me yis sreg pa ltar/ /byis pa rnams la de yis sreg /re shig dga' ste shes par dka'/ /rnam par smin pa me pa 'dra/ /gal te bde ba nyid 'dod na/ /sred pa de las thar bar gyis/ /ji ltar mchil pas zin pa yi/ /nya ni 'chi ba'i dbang du 'gro/ /de ltar sred pas zin pa yi/ /mi rnams yi dags dbang du 'gro/ /yi dags yul du yi dags gang / /sdug bsngal ba dag yongs su rgyug /dmyal bar sems can dmyal ba rnams/ /de dag sred pa chen pos bskyod/ /mi gang nyon mongs nor bral zhing / /gzhan gyi drin gyis 'tsho ba yi/ /phal pa de ni sred pa yis/ /bskyod ces thub pa rab tu gsung / /de ltar dge slong des ser sna dug lta bu kun gyis bskyod pa de dpyad nas yang 'khor ba las yid 'byung bar byed do/ /de nas yang dge slong las kyi 'bras bu rnam par smin pa shes pa des yi dags kyi 'jig rten la brtags na/ des thos pa las byung ba'i shes pas yi dags kyi yul na yi dags mdangs za ba zhes bya ba ji ltar 'dug pa mthong ngo / /de las gang gis der skye bar 'gyur snyam nas des thos pa las byung ba'i shes pas brtags na/ dgra mdza' bo ltar bcos pa ngo gnyis pa gang gis 'di ltar khyod g.yul 'gyed par zhugs shig dang khyod kyi phyi bzhin bdag gis yang dag par bsrung bar bya'o zhes yongs su bslus nas de gzi byin dang mthu nyid skyes so/ /skyes nas g.yul 'gyed par zhugs pa dang / yongs su gtong bar byed cing 'di ltar de 'dir bzung na de'i nor gang yin pa de dag rgyal po'i 'khor du gsol te bdag gir bya'o snyam nas mis bslus pa de des bsad na slu slu ba de lus dang bral nas ngan 'gro log par ltung ba yi dags mdangs za ba rnams kyi nang du skye bar 'gyur te/ de lus bkres pa dang skom pas gdungs shing lus mtshon gyis rtag tu gsheg la lus kyi lpags pa dang / sha dang rus pa rnam par nyams pa mtshon cha 'bab pa rnams kyi phyogs su 'gro ba na gar bab bab tu 'bros so/ /de rnam pa gzhan du 'bros pa na mi mi gtsang ba gang gzhan nam mchod rten skor bar mi byed pa de'i glags yi dags des rnyed nas de'i gzi brjid 'phrog par byed do/ /des gal te lo bcu 'am gal te lo nyi shur de 'tsho bar byed de de ltar shin du sdug bsngal bar 'gyur te/ ji srid du de'i sdig pa'i las byas shing bsags pa nges par myong bar 'gyur ba las kyi nyer bsdogs dang / las kyi dngos gzhi dang / las kyi mjug dang yang dag par ldan pa bcom zhing spangs la zad par ma byas pa de srid du rang gi las kyi 'bras bu la spyod pa rang gis byas pa la za ba rang gi las kyis skye ba'i rgyun shin du 'khor ro/ /de phyis yi dags kyi 'jig rten de las thar bar 'gyur te/ thar nas kyang gal te lan grangs gzhan la myong bar 'gyur ba'i las kyis mi rnams kyi nang du skyes na/ las de dang rgyu 'thun par de lha rten gyi sar 'tsho ba dang / rtog ge pa dang / tshegs chen pos 'tsho ba dang / gzhan la rag las pas 'tsho bar 'gyur ba mthong ngo // //'phags pa dam pa'i chos dran pa nye bar gzhag pa/ bam po nyi shu pa/ de nas yang dge slong las kyi 'bras bu rnam par smin pa shes pa des yi dags kyi 'jig rten la brtags na/ des thos pa las byung ba'i shes pas yi dags kyi yul na yi dags tshangs pa'i srin po zhes bya ba ji ltar 'dug pa mthong ngo / /de las gang gis der skye bar 'gyur snyam nas des thos pa las byung ba'i shes pas brtags na/ mchod sbyin ngan par byed pa gang gis srog gcod pa dang / yang dag par ldan pa shin du gsod par dga' ba'i mchod sbyin byas pa dang / zas dang skom so sor khe spogs byed pa dang / rin chung ngus nyos la rin chen por 'tshong ba dang / phrag dog dang ser snas nyams pa de lus dang bral nas ngan 'gro log par ltung ba yi dags kyi 'jig rten na lus bkres pa dang skom pas gdungs pa tshangs pa'i srin por 'gyur ro/ /de ltar de mi yi gzugs kyis yongs su rgyug cing sems can rnams la nye bar 'tshe bar byed de/ de sum mdo 'am/ bzhi mdo dben par 'dug go/ /'dug nas kyang glags lta ba de mi rnams la nye bar 'tshe bar byed do/ /phal cher bram ze 'dra bar 'gyur la de nas mi snang bar 'gyur zhing yang mi rnams la nye bar 'tshe bar byed de/ yi dags la sems pa dag na re/ 'di ltar de ni gdon gyis zin to zhes 'jig rten pa de dag brjod do/ /de ltar de sdig pa dang 'brel cing sdig byed la lus bkres pa dang skom pas gdungs pa yin te/ de ltar tshangs pa'i srin po de ji srid du de'i sdig pa'i las byas shing bsags pa phrag dog dang ser sna dang yang dag par ldan pa bcom zhing spangs la zad par ma byas pa de srid du yi dags kyi yul de na gnas par byed do/ /de phyis yi dags kyi 'jig rten de las thar bar 'gyur te/ thar nas kyang gal te lan grangs gzhan la myong bar 'gyur ba'i las kyis mir skyes na las de dang rgyu 'thun par de mi la za ba 'am/ de mkha' 'gro ma mi'i khrag 'thung bar 'gyur ba mthong ngo / /de nas yang dge slong las kyi 'bras bu rnam par smin pa shes pa des yi dags kyi 'jig rten la brtags na/ des thos pa las byung ba'i shes pas yi dags kyi yul na yi dags me'i khung bur za ba zhes bya ba ji ltar 'dug pa mthong ngo / /de las gang gis der skye bar 'gyur snyam nas des thos pa las byung ba'i shes pas brtags na/ phrag dog dang ser snas nyams pa dge ba'i bshes gnyen lta bur bcos nas dge 'dun gyi zas skom zos na/ de lus dang bral nas ngan 'gro log par ltung ba sems can dmyal bar skye bar 'gyur ro/ /de nas shi nas yi dags me'i khung bur za ba rnams kyi nang du skye bar 'gyur ro/ /der skyes nas kyang lus tshal shing bsregs pa 'dra zhing lus bkres pa dang skom pas gdungs la rang gi las kyis yongs su bslus pa gcig pu thams cad du rgyug pa na de'i srog gi 'tsho ba 'di ltar 'gyur te/ gang gi tshe me'i nang du gzhan 'ga' zhig lhung na phyed tshig par 'gyur te/ de me dang 'dra zhing me'i char lta bu la za'o/ /de me'i khung bu de dang 'dra ste bkres pa dang skom pas gdungs pa de dag dang me des nyis 'gyur du sreg go/ /de sreg pa na gang mi dge ba'i las de byas shing bsags pa nges par myong bar 'gyur ba de'i las kyi mthus ngu skad 'byin cing ku cho 'don to/ /de der ji srid du de'i sdig pa'i las byas shing bsags pa bcom zhing spangs la zad par ma byas pa de srid du sdug bsngal myong zhing nye bar spyod par 'gyur ro/ /de las zad de de las thar nas gal te mi rnams dang so so yang dag par myong bar 'gyur ba'i las kyis mir skyes na/ las de dang rgyu 'thun par de dbul zhing nad bu can du 'gyur la mes bsreg pa'i khung bur sreg par 'gyur ba mthong ngo / /de nas yang dge slong las kyi 'bras bu rnam par smin pa shes pa des yi dags kyi 'jig rten la brtags na/ des thos pa las byung ba'i shes pas gang gis ser sna kun du bsten cing bsgoms te mang du byas pa'i las kyi dngos gzhi dang las kyi mjug yang dag par blangs pa de lus dang bral nas ngan 'gro log par ltung ba yi dags kyi 'jig rten srang mi gtsang ba rnams su skye bar 'gyur ba mthong ste/ yi dags de las gang gis skye bar 'gyur snyam nas des thos pa las byung ba'i shes pas brtags na/ dge 'dun gyi rim gro byed pa phrag dog dang ser snas nyams pa gang gis bza' ba dang bca' ba la sogs pa zhim po dag la yang dag par spyod par byed cing tshangs par spyod pa dang ldan pa gtsang ma rnams la kha zas ngan pa sbyin par byed na de srang mi gtsang bar yi dags gnas pa rnams kyi nang du skye bar 'gyur ro/ /der skyes nas kyang nyin par lus bltar mi mthong zhing / mtshan mo mthong ba nyid du 'gyur ro/ / de dag gang grong ngam/ grong khyer ram/ ri brags sam/ 'tsho skyong gi gnas sam/ bya rog gi gnas sam/ gsher sa na gnas pa kun gyis bshang ba dang gci ba'i sa dang / gcig tu nyal nyil dang / ljan ljin gyi sa dang / phyi sa bsags par gyur pa 'am/ kun nas srin bus khebs shing dri nga ba shin du 'jigs pa/ skye bo kun mthong ma thag tu skyug bro bar 'gyur ba/ srin bu yun ring du gnas pa/ myags pa der dge 'dun gyi kha zas zhim po za bar byed pa yi dags su skye bar 'gyur ro/ /shin du sdug bsngal ba dag der skyes nas kyang gang las kyis byas pa'i gshin rje'i mi rnams kyis ral gri rab tu 'bar ba thogs pa de dag las mi gtsang ba de dus thams cad du bza' bar mi 'thob bo/ /gal te zla ba phyed na 'thob cing gal te zla ba gcig na thob pa gang yin pa de yang tshim par mi 'thob cing zos nas kyang skyug par 'gyur te/ lus bkres pa dang skom pas gdungs pa de dag 'di ltar ngu skad 'byin cing cho nges 'debs phan tshun rgyug cing smre sngags 'don te sa bon mi gtsang gyur pa las/ /shin du mi bzad yongs su 'gyur/ /sdig pa'i las kyi 'bras bu ni/ /rgyu dang 'dra bar mthong ba yin/ /sdig pas drangs pa'i skye bo ni/ /mchil pas log par drangs pa bzhin/ /mchil las nya ni thar srid kyi/ /sdig las sdig pa mi 'thar ro/ /sdig pa'i thag pa mi zad pas/ /glo bur du ni 'dren pa na/ /yi dags gnas su 'dren byed de/ /bkres dang skom pa chen pos bsgribs/ /bkres dang skom las byung ba'i mes/ /mi zad gdungs par 'gyur ba ltar/ /me dang mtshon dang dug rnams kyis/ /de ltar mi zad gdung mi 'gyur/ /gang du bde ba chung gyur pa/ /skad cig med cing thang cig med/ /yud tsam med cing mtshan mo med/ /rtag tu bdag ni sdug bsngal bsgribs/ /sdug bsngal gyi ni rgyu bsten pas/ /sdug bsngal las ni sdug bsngal thob/ /sdug bsngal las ni rnam grol te/ /bdag la bde ba 'byung bar 'gyur/ /gang du bdag ni rgyug pa der/ /'bab chu'i dngo dang chu mi mngon/ /lteng ka rnams kyang skams gyur cing / /chu bo dag kyang med par gyur/ /bdag ni rtag tu chu 'dod nas/ /sa la yongs su rgyug pa na/ /brag dang nags tshal stug por bcas/ /chu bo de dag skams par gyur/ /bdag gi lus ni bsregs pa ste/ /bkres dang skom pa'i me yis gdungs/ /lhag par skyabs su 'gro med de/ /nyon mongs shin du mi bzad 'ongs/ /de ltar rang gi las kyi 'bras bus bslus pa'i yi dags de ji srid du de'i sdig pa'i las byas shing bsags pa bcom zhing spangs la zad par ma byas pa de srid du ngu skad 'byin cing smre sngags 'don to/ /de phyis yi dags kyi 'jig rten de las thar bar 'gyur te/ thar nas kyang gal te lan grangs gzhan la myong bar 'gyur ba'i las kyis mir skyes na las de dang rgyu 'thun par gal te bud med dam bud med smad 'tshong mar 'gyur ro/ /gal te skyes par gyur na de grong khyer gyi ljan ljin 'phyag pa 'am/ de bud med kyi cha byad du zhugs nas des nye bar 'tsho bar 'gyur ba mthong ngo / /de nas yang dge slong las kyi 'bras bu rnam par smin pa shes pa des yi dags kyi gnas na yi dags gzhan gang zhig skye bar 'gyur snyam nas yi dags kyi 'jig rten la brtags na/ des thos pa las byung ba'i shes pas yi dags kyi yul na yi dags rlung za ba zhes bya ba ji ltar 'dug pa mthong ngo / /de las gang gis der skye bar 'gyur snyam nas/ des thos pa las byung ba'i shes pas brtags na/ lto bo che lto 'ba' shig sems pa gang gis dge sbyong dang bram ze dang nyon mongs pa dang sdug bsngal ba dag la nyi ma 'ga' tsam gyi zas sbyin par khas blangs te/ dam bcas nas brdzun byas la de dag kyang de'i nyin par bkres pa dang skom pas shin du gdungs par gyur nas rlung bsil bas reg par gnas na/ brdzun zer zer ba de lus dang bral nas ngan 'gro log par ltung ba yi dags rlung za ba rnams kyi nang du skye bar 'gyur ro/ /der skyes nas kyang de yongs su rgyug pa na de'i kha zas med cing re ba med la gnas med de/ mgon med par rang gi sems kyis yongs su bslus pa de'i mig gi yul du gang yang sos la sogs pa'i rdzas bza' ba dang / btung ba dang / gnas khang dang / kun dga' ra ba nyams dga' ba mang po dag rgyang ring po nas mthong ste bza' ba dang btung ba'i don du der rgyug go/ /de der rgyug pa na ngal dub pas bkres pa dang skom pa nyis 'gyur du 'gyur te/ de kha gdang bar byed do/ /de'i kha gdangs par rlung 'jug ste/ de rlung de 'ba' shig kha'i nang du song bas bkres pa gang sel bar byed cing gang gis lus mi gtsang ba de 'dzin par byed do/ /de'i bza' ba dang btung ba de dag kyang ri dgas skom pas phyin ci log tu mthong ba ltar gsob dang / gsog dang / snying po med pa dang / mgal me'i 'khor lo dang 'dra bar snang ba kho na tsam du zad do/ /ji ltar des sbyin pa snying po med pa gsog byin pa de bzhin du gsog rjes su mthong ngo / /'dir tshigs su bcad pa/ rgyu dang 'thun par 'bras bu zhes/ /blo gros ldan pa de skad gsung / /rgyu dang mi mthun 'bras bu ni/ /lus can rnams la smin mi 'gyur/ /skye ba lug rgyud mang po yi/ /rgyu dang rkyen gyis shin du 'brel/ /'khor bar gang gis sbrel ba yi/ /lus can 'gro bar mi 'gyur ro/ /shin du sbrel ba dam po dang / /mchog tu mi bzad de bkrol nas/ /gang na sdug bsngal mi gnas pa/ /zhi ba mchog tu 'gro bar 'gyur/ /de ltar rgyu dang 'thun pa'i 'bras bu la nye bar spyod cing rgyug pa na/ sems bslus pa de ji srid du de'i sdig pa'i las byas shing bsags pa so so yang dag par myong bar 'gyur ba'i las bcom zhing spangs la zad par ma byas pa de srid du rlung 'ba' shig za ba'i lus bdag nyid 'dzin par byed do/ /de phyis yi dags kyi 'jig rten de las thar bar 'gyur te/ thar nas kyang gal te lan grangs gzhan la myong bar 'gyur ba'i las mi yis so so yang dag par myong bar 'gyur ba'i las kyis mir skyes na las de dang rgyu 'thun par de rtag tu dbul por 'gyur/ gang de la shes bzhin du nor dang bza' ba dang btung ba dang ston mo dang gnas dang chu dag med par 'gyur zhing sbyin par mi byed la yid mi gcugs par 'gyur/ kha zas med par byas pa'i sems ni re ba la dga' zhing re ba med pa la yang dga' ste/ mngon par nyams pa'i lus shin du sdug bsngal bar 'tsho bar mthong ngo / /'dir tshigs su bcad pa/ 'dir ni sdig pa'i bag chags kyis/ /thams cad du ni sdug bsngal byed/ /lus can rnams dang mi mthun pa/ /mi gtsang ba yi dri bzhin no/ /yun ring ngan 'gro bcom pa yi/ /dge ba'i bag chags dga' byed de/ /me tog nyams kyang til dag la/ /bag chags snang ba ji bzhin no/ /de nas yang dge slong las kyi 'bras bu rnam par smin pa shes pa des/ yi dags kyi 'jig rten la brtags na/ des thos pa las byung ba'i shes pas yi dags kyi yul na yi dags mdag me za ba zhes bya ba ji ltar 'dug pa mthong ngo / /de las gang gis der skye bar 'gyur snyam nas des thos pa las byung ba'i shes pas brtags na/ zhal che bar bskos pa phrag dog dang ser snas 'jungs pa gang gis gzung bar bya ba nyes pa med pa dag bzung nas bcings te/ bkres pa dang skom pas yongs su gnod par byas la de yang gzung ba'i sdug bsngal gyis nyam thag par byas shing / shin du gnod par byas pa re ba m ed la bkres pa dang skom pas gdungs nas thal ba za la de'i las kyi rnam par smin pas gzhi de las shi bar gyur na zhal che bar bskos pa'i mi sdig pa'i las de'i mthus lus dang bral nas ngan 'gro log par ltung ba yi dgas mdag me za ba rnams kyi nang du skye bar 'gyur ro/ /las mi bzad pa da ltar bde la rnam par smin pa sdug bsngal mi 'dod pa mi sdug pa yid du mi 'ong ba dug nag po lta bu dang 'dres pa'i mthus de rtag tu dur khrod kyi mdag me la za yang mdag me des tshim par mi 'gyur ro/ /de mdag me'i zas des lus kyi me shin du tsha ba chung zad zhi bar byed de/ me la chus bsad pa bzhin no/ /de lta bas na dug nag po lta bu dang shin du rtse rtse bas chog ste/ nag po dang 'dres pa spangs na 'dod chags dang bral bar 'gyur ro/ /gang du byis pa nag po'i dbang du song ba dag ni me'i sdug bsngal bsil bar gyur kyang sdug bsngal ni me gzhan gyis dpe bya bar nus pa gang yang med do/ /de ltar de ji srid du de'i sdig pa'i las so so yang dag par myong bar 'gyur ba bcom zhing spangs la zad par ma byas pa de srid du yi dags kyi yul de na gnas so de phyis yi dags kyi yul de las thar bar 'gyur te/ thar nas kyang mi dang so so yang dag par myong bar 'gyur ba'i las kyis mir skyes na/ las de dang rgyu 'thun par de ri 'or gang du lo nyes byung zhing gsog za ba rnams kyi nang du skye bar 'gyur la res 'ga' yang kha zas zhim por mi 'gyur zhing rtag tu kha zas lan tshwa med par 'gyur ba mthong ngo / /de nas yang dge slong las kyi 'bras bu rnam par smin pa shes pa des yi dags kyi 'jig rten la brtags na/ des thos pa las byung ba'i shes pa des yi dags kyi yul na yi dags dug za ba zhes bya ba rang bzhin gyis dug za ba ji ltar 'dug pa mthong ngo / /de las gang gis der skye bar 'gyur snyam nas des thos pa las byung ba'i shes pas brtags na/ ser snas nyams pa gang gis nor rdzas kyi phyir pha rol dag la dug blud la de yang shi na dug ldud ldud pa lus dang bral nas ngan 'gro log par ltung ba sems can dmyal ba yang sos su skye bar 'gyur ro/ /de nas thar nas kyang yi dags dug za ba rnams kyi nang du skye bar 'gyur te/ de ri 'bigs byed kyi ri sul dang / ri yongs 'du'i ri sul dang / ri kha ba can gyi rtse mo dang / ri ma la ya'i gseb gang yin pa de dag dang / ri'i rtse mo dug mang zhing chu med pa dang / sbrul gnas pa'i dgon pa dang / grang lhags che ba'i dgon pa dog cing shin du 'jigs pa dang / shing ljon pa yal ga 'phyang ba med pa dang / rdo ngan pa 'ba' shig yod pa dang / seng ge dang / stag gis gsod pa shin du 'jigs pa gang yin pa de dag tu skye bar 'gyur ro/ /der skyes nas kyang grang ba'i dus su grang ba brgya 'gyur myong bar 'gyur la/ tsha ba'i dus su tsha ba brgya 'gyur myong bar 'gyur ro/ /las byas pa tsha ba'i dus su zhag lngar me'i char pa lus rnams la 'bab cing grang ba'i dus su zhag lngar lhags pa char pa lta bu 'bab bo/ /nyes par byas pa'i las des me mdag de dag dang mi dga' ba dgon pa lta bu de dag gi nang na lus bkres pa dang skom pas gdungs pa dag ku cho 'don ngu skad 'byin/ cho nges 'debs smre sngags 'don te/ lus bkres pa dang skom pas gdungs pa dag la dug gi reg pa lcags kyi thu lum rab tu 'bar ba lta bu gang yin pa de dag mid par byed do/ /mid ma thag tu shi'o/ /de nas yang nyes par byas pa'i las des skye bar 'gyur te/ skyes nas kyang bkres pa dang skom pa de sdug bsngal nyis 'gyur bas lhag par myong bar 'gyur ro/ /de ltar de ngu skad 'byin pa na/ bya'i mchu rnon pos kyang de'i mig phyung nas za bar byed de/ de phyir zhing sdug bsngal gyis nyam thag nas ngu skad 'byin/ ku cho 'don/ cho nges 'debs/ /mig phyung ba de dag skye bar 'gyur la de nas yang 'byin par byed de/ de ltar ji srid du de'i sdig pa'i las byas shing bsags pa so so yang dag par myong bar 'gyur ba bcom zhing spangs la zad par ma byas pa de srid du sdug bsngal myong bar 'gyur ro/ /de phyis yi dags kyi 'jig rten de las thar bar 'gyur te/ thar nas kyang gal te lan grangs gzhan la myong bar 'gyur ba'i las kyis mir skyes na/ las de dang rgyu 'thun par de lam po che dang bzhi mdor 'tsho bar 'gyur/ dug ldud ldud pa'i las kyi lhag ma des yang de'i srog chad par 'gyur ba mthong ngo / /de nas yang dge slong las kyi 'bras bu rnam par smin pa shes pa des yi dags kyi 'jig rten la brtags na/ des thos pa las byung ba'i shes pas yi dags kyi yul na yi dags dgon pa na 'dug pa zhes bya ba ji ltar 'dug pa mthong ngo / /de las gang gis der skye bar 'gyur snyam nas des thos pa las byung ba'i shes pas brtags na/ chom rkun pa gang gis 'brog dgon pa chen po dang / chu med pa dang / shin du dog pa dang / nyi ma'i 'od kyis kun du tsha ba dag tu lteng ka dang nags tshal dag gi lam byas nas chom rkun pa de dag gis lteng ka de dag 'dzeg par byed de/ 'di ltar bdag cag gis 'dir 'gron po 'ongs te skom gyis gdungs shing mthu chung ba dag nor rdzas kyi phyir gsad par bya 'o snyam nas de dag phrag dog dang ser snas nyams shing sbyin pa dang bral ba dag gis de ltar 'dron po de dag gsod par byed do/ /de dag lus dang bral nas ngan 'gro log par ltung ba yi dags dgon pa na 'dug pa rnams kyi nang du skye bar 'gyur ro/ /der skyes nas kyang mar me'i shing ltar 'brog rab tu 'bar ba rnams kyi nang nyid du nyi ma'i gdung bas gdungs te mgon 'dod pa/ skyabs 'dod pa/ dpung gnyen 'dod pa dag chu dang bza' ba'i phyir rgyug cing ku cho 'don to/ /de dag las kyi nyes pa des rgyang ring po na ri dgas skom pa lta bur chu dang ba 'dra ba zhig yod par mthong ngo / /de dag gis de mthong ste chu rnyed do snyam nas rgyug ste/ re ba dang bcas pa'i sems kyis ngal ba grangs su yang mi rtsi ba na de ji lta ji ltar rgyug pa de lta de ltar ri dgas skom pa lta bur ngo bo nyid kyis gsog tu 'dug pa de dag ga la zhig thob par 'gyur/ de dag ngal ba'i nyes pas rtsa dar b+ha'i rtse mos rkang pa'i rting pa dag tu zug nas 'gyel zhing na nas kha cig 'chi ba'i dus byed do/ /de nas yang las kyi lhag ma des 'tsho bar 'gyur te/ de ltar lus bkres pa dang skom pa bcu 'gyur gyis gnas par byed do/ /bya rog dang 'ug pa dang / bya rgod brgya snyed kyis lus dang mig dag pa can bcos su 'thob cing za ste/ rus pa la thug gi bar du 'bigs par byed do/ /mgon med pa/ dpung gnyen med pa de dag sdug bsngal sum 'gyur gyis shin du sdug bsngal te/ phan tshun der song nas 'di ltar smre sngags 'don te/ bya rog 'ug pa thams cad nas/ /rdo rje chen po'i mchu rnon gyis/ /mngon par gtses so skyabs med cing / /bde bar blta bar mi mthong ngo / /ji ltar bdag gis 'dron po bcom/ /de yi las de nye bar gnas/ /'di ni gzugs brnyan lta bu ste/ /de bzhin 'bras bu 'dir 'ongs so/ /las kyi zhags pas bcings gyur cing / /las kyi thag pas gnod par byas/ /las zad ma gyur bar du ni/ /dpung gnyen byed pa mi mthong ngo / /skye bo las kyis khrid byed cing / /las kyis yongs su 'dren par byed/ /gang du las ni rnam smin pa/ /der ni las kyis 'phen par byed/ /gnas gsum du ni las kyis 'phangs/ /'khor lo bzhin du rtag tu 'khyam/ /de lta bas na dge bya zhes/ /sdig pa mi phan rtag tu spongs/ /sdig pa gang dag mi 'dod cing / /de dag me dang 'dra bar mthong / /bkres dang skom pa'i mes gdungs pa/ /de ni yi dags gnas su khrid/ /skom pa'i sdug bsngal 'byung ba ni/ /yang dang yang du rab tu 'phel/ /bdag ni me yi phreng ba yis/ /mched pa'i ri dang 'dra bar 'gyur/ /ri la me 'bar chu bo yi/ /rgyun gyis thams cad gsad nus kyi/ /rgya mtsho'i klung gis bdag gi me/ /'di ni gsad par mi nus so/ /las kyi shing skam byung nas su/ /sred pa'i rlung gis grogs byas te/ /bdag ni kun nas yongs bskor nas/ /las kyi me yis shin du bsregs/ /tshul khrims brtson 'grus ye shes chu/ /sbyin pa'i snod ni rab bzung nas/ /srid gsum rjes 'gro las kyi me/ /bdag nyid chen pos 'jig par byed/ /gang dag las kyi dbang song zhing / /las gsum gyis ni yongs su bsgyur/ /gsum nyid kyis ni rmongs pa dag / de ni gnas gsum rgyu bar byed/ /las dbang sum bcu rtsa drug dang / /bzhi bcur song zhing rnam par rgyu/ /dgu bcu rtsa brgyad ma bcom pa/ /khams gsum du ni de 'gro'o/ /gang dag brgya rtsa brgyad shes shing / /bcu gnyis don la sems pa po/ /chos dang chos min rnam shes gang / /de dag bde ba mtha' yas so/ /mtshan nyid gnyis kyi rnam shes shing / /brgyad gnyis yongs su shes pa po/ /bcu drug skye ba rig pa gang / / skye bo de ni sdig pas bsregs/ /brtan po lam gnyis lta ba dang / /gzhi rnams yongs su mthar phyin cing / /chu bo bzhi las rnam grol ba/ /mkhas pa de ni sdig pa bsregs/ /lam brgyad de nyid 'jug rig cing / /stobs bcu dag ni mthong ba dang / /sdug bsngal gnyis kyi rgyu rig pa/ /zad pa med pa'i gnas su 'gro/ /gang dag bden gnyis pha rol phyin/ /dran pa bzhi la rnam par dpyod/ /brtan po dus gsum don sems pa/ /de ni bdud kyi dbang mi 'gro/ /dkar po'i chos ni rnam spangs shing / /rang gi las kyi 'bras bus rmongs/ /de ni bdag gi sdig las kyis/ /yi dags 'jig rten 'dir phyin to/ /de ltar yi dags de dag gi nang nas kha cig sngon dge ba'i las chung zad byas pas shes rab shin du rno bar 'gyur te/ de la dmigs par gyur pa'i yi dags de dag la de skad du rjes su bstan to/ /rjes su bstan nas kyang ji srid du de'i sdig pa'i las byas shing bsags pa bcom zhing spangs la zad par ma byas pa de srid du rang gi sdug bsngal so sor myong bar byed do/ /de phyis yi dags kyi 'jig rten de las thar bar 'gyur te/ thar nas kyang gal te lan grangs gzhan la myong bar 'gyur ba'i las kyis mi rnams dang skal ba mnyam par mir skyes na las de dang rgyu 'thun par de yi dags kyi brtul zhugs dang yi dags kyi rjes su 'brang bar 'gyur ba mthong ngo / /de nas yang dge slong las kyi 'bras bu rnam par smin pa shes pa des yi dags kyi 'jig rten la brtags na/ des thos pa las byung ba'i shes pas yi dags kyi yul na yi dags dur khrod na 'dug pa zhes bya ba ji ltar gnas pa mthong ngo / /de las gang gis der skye bar 'gyur snyam nas des thos pa las byung ba'i shes pas brtags na/ sems can ser snas nyams pa gang gis sangs rgyas la gzhan gyis me tog phul ba dag des brkus so/ /brkus nas kyang khe 'dod pa'i phyir btsongs na de lus dang bral nas ngan 'gro log par ltung ba lus bkres pa dang skom pas gdungs pa yi dags dur khrod na 'dug pa rnams kyi nang du skye bar 'gyur ro/ /dur khrod na 'dug pa de dag gi kha zas ni 'di lta ste/ dur khrod kyi phyag dar gang yang rung ba du ba'i rgyun med pa de la de dag zla ba gcig gi bar du za zhing 'dug la/ de nas kha zas med par 'khod do/ /rtag tu de'i mgo lcags kyi phreng ba rab tu 'bar bas bcings shing de gang nas gang du skyes pa'i glad pa rab tu 'ju bar byed la mgo yi thod pa yang sreg par byed do/ /lcags las byas pa'i phreng ba gnyis pas kyang de'i mid pa bcings shing des de'i mid pa dang brang yang sreg ste/ sangs rgyas kyi me tog brkus pa'i rgyu des na yan lag dang nying lag thams cad kyi nang du me de dag song nas sreg par byed do/ /lus kyang srin bus yog cing sdug bsngal mi bzad pas nyam thag la srin po gzhan zhig dur khrod der 'ongs nas des kyang de dag tho ba dang / ral gri dang / gtun shing rnams kyis kun nas phye mar rlog go/ /de ngu skad 'byin cing smre sngags 'don pa na sdug bsngal gsum gyis nyam thag ste/ bkres pa dang skom pa'i sdug bsngal dang / lcags kyi phreng ba'i sdug bsngal dang / gzhan gyis ral gri dang / tho bas brdegs pa'i sdug bsngal te/ de ltar de dag myong zhing nyes par byed pa de 'bral bar byed la smre sngags 'don pa na 'di ltar tshigs su bcad de smras pa/ bkres dang skom pa'i sdug bsngal dang / /gnyis pa me'i sdug bsngal 'byung / /gsum pa tho ba ral gri yi/ /sdug bsngal de ni bdag gis myong / /rang gi sems dang las kyis su/ /'dir ni bslus shing yongs su rmongs/ /yi dags gnas su skyes gyur cing / /mdza' bshes gnyen dang bral bar 'gyur/ / stobs dang bral ba'i las dag gi/ /zhags pa yis ni khrid pa na/ /bshes gnyen bu dang chung ma dang / /rtsa lag gis kyang skyob mi byed/ /ji ltar las bzhin skyob gzhan med/ /rnam pa gsum ni bdag gis myong / /sbyin dang tshul khrims thos dang gzhan/ /rnam pa gsum ni yongs su bsgribs/ /gti mug dra bas bsgribs pa 'dir/ /bdag gis ngan byas gang ma byas/ /mi bzad rgyur ni gyur pa yi/ /las rnams kyi ni 'bras bu 'ongs/ /shin du mi bzad yi dags yul/ /sdig las gal te bdag grol na/ /yang dang yang du sdig pa'i las/ /bdag gis nams kyang mi bya 'o/ /de ltar yi dags smra pa de dag ji srid du de'i sdig pa'i las byas shing bsags pa so so yang dag par myong bar 'gyur ba bcom zhing spangs la zad par ma byas pa de srid du der sdug bsngal chen po des gnod cing yid la gcags par 'gyur ro/ /de phyis yi dags kyi 'jig rten de las thar bar 'gyur te/ thar nas kyang gal te mi rnams dang yang dag par myong bar 'gyur ba lan grangs gzhan la myong bar 'gyur ba'i las kyis mi rnams dang skal ba mnyam par mi rnams kyi nang du skyes na/ las de dang rgyu 'thun par de gtum zhing dur khrod kyi gos kyis 'tsho bar 'gyur ba mthong ngo / /de nas yang dge slong las kyi 'bras bu rnam par smin pa shes pa des yi dags kyi 'jig rten la brtags na/ des thos pa las byung ba'i shes pas yi dags kyi yul na yi dags shing gi nang na gnas pa zhes bya ba ji ltar 'dug pa mthong ngo / /de las gang gis der skye bar 'gyur snyam nas des thos pa las byung ba'i shes pas brtags na/ gang gis dge 'dun gyi 'tsho ba'i shing ljon pa 'am/ de bzhin du skye bo bkres pa dang skom pa dang / lus ngal ba kun gyi 'tsho ba'i don du rdzing bu dang / khron pa byas pa de dag ser snas nyams pa des ma rung par byas sam/ shing skam 'dod pa'i phyir 'di ltar 'di dag ni bdag gi shing bya'o snyam nas gcod par byed cing de de bzhin du byed na lus dang bral nas ngan 'gro log par ltung ba yi dags shing gi nang na 'dug par 'gyur ro/ /der skyes nas kyang de'i las kyis shing gseb tu skyes pa de shin du grang ba dang tsha bas gnod de/ ji ltar srin bu shing skam gyi nang du skyes pa thams cad nas gnod pa bzhin no/ /shin du sdug bsngal bas nyam thag pa de gal te brgya la sdug bsngal de rtse zhil bar byed na de shing skam gyi gseb na srin bu mar ko ta ka dang / a sho ta ra rnams kyis za zhing de'i zas su 'gyur ro/ /gang kha cig gis bsams nas gtor ma gtor na des srog 'tsho bar byed de/ yi dags kyi yul de na ji srid du de'i sdig pa'i las byas shing bsags pa so so yang dag par myong bar 'gyur ba bcom zhing spangs la nyams par ma byas pa de srid du sdug bsngal rab tu mi bzad pa de myong bar 'gyur ro/ /de phyis yi dags kyi yul de las thar bar 'gyur te/ thar nas kyang gal te lan grangs gzhan la myong bar 'gyur ba'i las kyis mi rnams dang skal ba mnyam par mir skyes na/ las de dang rgyu 'thun par de tshal dang rtswa dang sman dang / nags khrod dang / shing skam dang / me tog gis srog 'tsho ste/ 'tsho ba gzhan la rag las shing shin du sdug bsngal bar 'gyur ba mthong ngo / /de nas yang dge slong las kyi 'bras bu rnam par smin pa shes pa des yi dags kyi 'jig rten la brtags na/ des thos pa las byung ba'i shes pas yi dags kyi yul na yi dags lam gyi bzhi mdo na gnas pa zhes bya ba ji ltar 'dug pa mthong ngo / /de las gang gis der skye bar 'gyur snyam nas des thos pa las byung ba'i shes pas brtags na/ rkun po gzhan la gnod pa bya ba'i blo dang ser snas nyams pa gang gis zas dang skom brnogs shing de 'gron po dag gi zas dang skom ma byin nas dgod la de dag kyang gnas der shin du sdug bsngal bar gyur nas rkun po de las kyi mthu des shi nas lam gyi bzhi mdo na gnas pa'i yi dags su 'gyur ro/ /pha rol gyi yid bcugs pa bcom pa'i las de'i mthus sog le dag 'byung bar 'gyur te/ de dag gis nyin gcig bzhin du de'i lus bkres pa dang skom pas gdungs pa de rnam pa bzhir gcod par byed/ gsheg par byed/ yan lag rnams gtub par byed do/ /gang gi tshe skye bo dag 'jig par 'gyur b a de'i tshe byis pa phal byis pa'i rang bzhin can las dang 'bras bu mngon par mi shes shing 'bras bu dang rgyu ngan pa la lta ba de dag de'i tshe lam gyi bzhi mdor gtor ma 'dor bar byed de 'di ltar 'dis nad pa'i nad rab tu zhi bar 'gyur ro snyam nas gtor ma de lam gyi bzhi mdo de dag tu 'thor bar byed do/ /de des dga' bar 'gyur te/ des srog 'tsho bar 'gyur zhing des gnas par 'gyur la des so sor ston par byed de/ ji srid du de'i sdig pa'i las byas shing bsags pa so so yang dag par myong bar 'gyur ba bcom zhing spangs la zad par ma byas pa de srid du yi dags kyi yul der gnas so/ /de phyis yi dags kyi 'jig rten de las thar bar 'gyur te/ thar nas kyang gal te lan grangs gzhan la myong bar 'gyur ba'i las dang mi so so yang dag par myong bar 'gyur ba'i las kyis mir skyes na las de dang rgyu 'thun par de rigs ngan pa phyugs gsod pa byed par 'gyur ba mthong ngo / / de nas yang dge slong las kyi 'bras bu rnam par smin pa shes pa des yi dags kyi 'jig rten la brtags na/ des thos pa las byung ba'i shes pas yi dags kyi yul na yi dags bdud kyi ris shes bya ba ji ltar 'dug pa mthong ngo / /de las gang gis der skye bar 'gyur snyam nas des thos pa las byung ba'i shes pas brtags na/ las ngan pas 'tsho ba/ g.yos gzhan la gnod par byed pa/ rgyu ngan pa dang lta ba ngan pa'i mtha' la de nyid yin no bar mngon par zhen pa gang gis lam bzang po sun par byas na/ de lus dang bral nas ngan 'gro log par ltung ba yi dags bdud kyi ris rnams kyi nang du skye bar 'gyur ro/ /der skyes nas kyang rtag tu dge slong bsam gtan gyi zas kyis gnas pa rnams kyi sems rnyog pa can du byed rnam par 'tshe bar byed/ sgra bo che 'don par byed/ de rmi lam du bgegs dag byed de dam pa'i chos la sdang ba ni bdud kyi dbang du 'gro bar 'gyur ro/ /de ltar yang dag pa ma yin pa'i lam du zhugs pa de ni tshe 'di la myong bar 'gyur ba yi dags kyi yul du skye bar 'gyur te/ kha zas ni lcags kyi thu lum za bar 'gyur ro/ /de de dag gis sreg cing shin du sdug bsngal ba myong ba na/ shin du sdug bsngal ba de las skyo bar mi byed de/ de de nas shi nas sems can dmyal ba'i nang du skye bar 'gyur ro/ /de nas bskal pa mang po zhig gis mi lus thob par 'gyur te/ gal te bskal pa khri 'am/ gal te bskal pa nyi khris 'thob la/ de ltar nges par ngan song gsum rnams su 'tshed do/ / sreg go/ za'o/ /gal te yang de nas lan grangs gzhan la myong bar 'gyur ba'i las kyis gnya' shing gi bu gar rusbal 'jug pa lta bur mi rnams dang skal ba mnyam par mir skyes na/ las de dang rgyu 'thun par de long ba dang / 'on pa dang / lkug pa dang / dran pa nyams pa dang / nad du mas lus nyams pa dang / shin du dbul bar 'gyur ba mthong ngo / /de nas yang dge slong las kyi 'bras bu rnam par smin pa shes pa des yi dags kyi 'jig rten la brtags na/ des thos pa las byung ba'i shes pas 'di ltar yi dags kyi 'jig rten las kyi 'bras bu rnam par smin pa'i bye brag g is yi dags kyi 'gro ba rags pa de tsam dag ni mthong na 'khor 'bum phrag du ma ni ma mthong ste/ gang rgya mtsho'i mtha'i bar rnams dang / gang rgya mtsho'i gling rnams dang / gang 'dzam bu'i gling rnams dang / nub kyi ba lang spyod dang / shar gyi lus 'phags dang / byang gi sgra mi snyan la sogs pa'i gling chen po rnams kyi bar na gnas pa de dag gi ming gi rnam grangs tsam shes so/ /srin po dang / sha za dang grul bum de dag gi las kyi 'bras bu rnam par smin pa dag ni shin du phra bar shes par bya ste/ gang las gang gis der skyes/ kha zas ni ci za/ spyod pa ni ci yin/ rgyu ni ci zhig yin snyam mo/ /de dag gi gnas na sems ni spre'u ltar sdom pa med par rnam par g.yo la/ ba lang gi rna ba 'gul zhing ldog pa chu shing tshal du zhugs na rna ba shin du 'gul ba ltar ni rab tu rgyug / bum pa rdol ba ltar yul thams cad la ni khyab/ rlung chen pos rdul bslang ba ltar shin du g.yo bar ni byed/ seng ge dang stag dang sbrul gdug pa dag pas kyang shin du gdul ni dka'/ gang g.yos pa ni de'i pha rol du 'bras bu de dang 'thun par thob ste/ sems can rnams kyi sems kun nas nyon mongs pa las ni kun nas nyon mongs la/ sems rnam par byang ba las ni rnam par grol bar 'gyur te shes par dka'o/ /sems ni rgyal po 'dra la/ dbang po rnams ni zhabs 'bring ba lta bu yin te/ de la rag las pa ni las yin la/ las la rag las pa ni 'bras bu yin/ 'bras bu la rag las pa ni 'gro ba lnga dag yin no/ /sems 'khrul 'khor mkhan 'dra zhing lus ni 'khrul 'khor 'dra la/ dbang po rnams dang dbang po'i don ni skud pa 'dra ste/ sems ma dul ba de ni ngan song du 'gro la/ shin du dul zhing legs par yongs su sbyang ba byas pa ni lha dang mi'i 'gro bar 'gro ba dang / g.yo ba med pa'i gnas mya ngan las 'da' bar 'gro'o snyam ste/ de ltar dge slong de sems kyi rnam pa shin du phra ba la rnam par dpyad nas 'khor ba rnams la shin du skyo ba skyes te/ sems can dmyal ba 'khor dang bcas pa dag la skyo la/ de ltar yang yi dags kyi 'jig rten dag la lhag par shin du skyo ste/ sdug bsngal 'phags pa'i bden pa rtogs/ sdug bsngal 'phags pa'i lam rtogs shing lam bzang po dang lam la gnas pa rtogs so/ /yi dags kyi le'u ste gnyis pa rdzogs so// // de nas yang rnal 'byor spyod pa nang gi chos la chos kyi rjes su lta zhing gnas pa 'di ltar dge slong las kyi 'bras bu'i de kho na nyid mthong ba des sems can dmyal ba 'khor dang bcas pa rnams la brtags shing 'gro ba gnyis pa la yang brtags nas 'khor ba mi bzad pa yang dag pa ji lta ba bzhin mthong ste yid la yang 'jog par byed do/ /'di ltar dge slong de bdud kyi yul na mi gnas shing / de mya ngan las 'das pa'i mtha' la gnas la de'i spro ba mi ldog ste/ 'bras bur gyur pa sa gzhan bcwa lnga pa la zhugs so/ /de zhugs pa dang sa bla'i gnod sbyin dag dga' nas bar snang la rgyu ba'i gnod sbyin rnams la bsnyad do/ / de dag gis kyang rgyal chen bzhi rnams la'o/ /de dag gis kyang sum bcu rtsa gsum pa rnams la'o/ /sum bcu rtsa gsum pa rnams kyis kyang 'thab bral ba rnams la'o/ /'thab bral ba rnams kyis kyang dga' ldan pa rnams la'o/ /dga' ldan pa rnams kyis kyang 'phrul dga' ba rnams la'o/ /'phrul dga' ba rnams kyis kyang gzhan 'phrul dbang byed pa rnams la'o/ /de ltar 'dod pa'i khams kyi sgra dag gzugs kyi khams su yang grag pa nas tshangs ris la sogs pa'i bar dag dang / 'od gsal gyi bar rnams su sgra grag ste/ 'di ltar kye lha dag 'dzam bu'i gling du rigs kyi bu che ge mo zhig dang / grong mang ge mo zhig dang / grong khyer ga ge mo zhig dang / grong rdal che ge mo zhig dang / yul mang ge mo zhig na ming ga ge mo zhig ces bya ba skra dang kha spu bregs nas gos ngur smrig bgos te dad pas khyim nas khyim med par rab tu byung ngo / /de bdud kyi gzhi dang lhan cig gnas par mi 'dod la de'i yul gyi dngos po yang mi 'dod/ bdud kyi sde ni 'joms par byed/ bdud kyi g.yog ni 'jig par byed/ nyon mongs pa'i ri ni shin du g.yo bar byed/ dam pa'i chos kyi lam du ni 'jug par byed/ de'i 'od ni rab tu 'byung bar 'gyur te/ de ltar sa gzhan bcwa lnga pa la zhugs so/ /de thos nas 'od gsal gyi lha rnams dga' ste/ lha gzhan dag la smras pa/ 'di ltar kye lha dag bdag cag ni mchog tu dga' ste/ gang bdud kyi phyogs ni dma'o/ /dam pa'i chos kyi phyogs ni mngon par mtho'o/ /bdud kyi 'khor ni yongs su nyams so/ /dam pa'i chos kyi chu bo ni rab tu 'bab po/ /mu stegs kyi mtsho ni rnam par skems so/ /'dod chags dang zhe sdang dang gti mug rnams ni rab tu rtse zhil lo/ /chos ma yin pa'i phyogs ni zhig go/ dam pa'i chos kyi phyogs ni rab tu 'phel lo/ /'khor ba ni 'jig ste/ kye de dag bdag cag gis thos nas mchog tu dga'o/ /de ltar dam pa'i chos kyi sgra 'od gsal gyi lha'i ris kyi bar du gcig nas gcig tu grag ste/ dge slong de brtson 'grus ni brtsams sems ni dge zhing mi g.yo la brtan/ g.yo med cing drang po'i rang bzhin can yin te/ de ltar de'i dge ba'i sgra mya ngan las 'das pa'i grong khyer gyi sngon du 'dren par grag go/ /de n as yang dge slong las kyi 'bras bu rnam par smin pa shes pa des sems can dmyal ba'i las kyi chos kyi rnam par smin pa yang dag pa ji lta ba bzhin shes shing sems can dmyal ba rnams kyi 'khor brgya sum bcu rtsa drug gi tshe ring ba dang tshe'i lhag pa'i tshad dang bcas pa de yang yang dag pa ji lta ba bzhin shes nas 'gro ba gnyis pa la yang rtog par byed de/ yi dags rnam pa yod pa yang mdor bsdu na rnam pa sum bcu rtsa drug yod pa la rtog par byed do/ /rim par 'khod pa'i de dag gi de kho na nyid la rtog ste/ des thos pa las byung ba'i shes pas dud 'gro'i rnam pa bye ba sum bcu rtsa bzhi mthong nas/ 'di ltar 'gro ba lnga dag ni sems kyi kha na las shing rag lus pa yin la phal cher kun kyang cha byad dang gzugs dang 'gro ba dang kha zas sna tshogs 'chang ba/ 'thun pa dang mi mthun pa dang / sdang ba dang mi sdang ba dang / bshes pa dang mi bshes pa dang / lhan cig spyod pa dang lhan cig mi spyod pa'i rigs can dag yin no/ /de dag gi nang nas 'dab ma yod par gyur pa ni 'di lta ste/ ri dgas kyi tshogs dang bya'i tshogs bya rog dang ngang pa la sogs pa yin te/ 'thun pa dang myi mthun par gyur pa dag ni 'di ltar wa dang / khyi lta bu ste de la sogs pa'o/ /sdang ba dang mi sdang ba dag ni 'di lta ste/ bya rog dang 'ug pa dang / rta dang ma he dang / sbrul dang ne'u le la sogs pa lta bu dag go/ de la srog chags dag las gang gis cha byad dang gzugs dang 'gro ba dang kha zas sna tshogs su 'gyur snyam nas des thos pa las byung ba'i shes pas brtags na/ 'di ltar srog chags dag sems sna tshogs dang / srog chags dag rag las pa dang / las rnam pa sna tshogs byed de/ de dag gi 'gro ba rnam pa sna tshogs su 'gyur zhing kha zas rnam pa sna tshogs su 'gyur ro/ / de la gang 'thun pa dang mi mthun pa'i rgyu gang yin snyam nas de dag gi las la rnam par dpyod de des thos pa las byung ba'i shes pas brtags na/ mir gyur pa gang gis lta ba log pa'i bstan bcos brjod la mkhas pa nga rgyal can gnyis pas kyang bstan bcos ngan pa gnyis pa brjod na de gnyis kyi thos pa de don med pa dang / bde ba ma yin pa dang / bde 'gror 'gro ba ma yin te/ bstan bcos ngan pa dang rgyu ngan pa dang lta ba ngan pa'i mtha' de gnyis kyis phan tshun dga' bar byed na de gnyis shi nas sems can dmyal ba rnams kyi nang du skye bar 'gyur ro/ /gal te dud 'gro rnams kyi nang du skyes na de'i tshe 'thun pa dang mi mthun pa'i rgyus phan tshun rab tu sdang bar 'gyur te 'di lta ste/ sbrul dang / ne'u le dang / rta dang / ma he dang / bya rog dang / 'ug pa dag lta bu'o/ /de nas yang dge slong las kyi 'bras bu rnam par smin pa shes pa des dud 'gro'i 'jig rten la rtog par byed de rgyu gang dang las gang gis dud 'gro dag lhan cig spyod pa'i grogs su 'gyur snyam nas/ des thos pa las byung ba'i shes pas brtags na/ 'khor ba la mngon par chags pa'i sbyin bdag gang gis 'di ltar las 'dis ni bdag dud 'gro'i skye gnas gzhan dag tu skyes na yang khyod bdag gi khyim thab tu 'gyur zhing bdag kyang khyod kyi chung mar gyur cig snyam nas sbyin pa byin na/ de lus dang bral nas ngan 'gro log par ltung ba dud 'gro bde ba rnams kyi nang du skye bar 'gyur te/ 'di lta ste shang shang te'u dang / thi ba dang / ngur pa de dag las yongs su byas pa'i rgyus 'khrig pa la dga' ba yin no/ /de nas yang dge slong las kyi 'bras bu rnam par smin pa shes pa des wa la sogs pa'i mi mthun pa la rtog par byed de de dag las gang gis wa dang / khyi dag tu skye bar 'gyur snyam nas de thos pa las byung ba'i shes pas brtags na/ gang gis mkhas pa dang sdom pa dang ldan pa rnams kyi kha zas zhim po phrogs shing dus rtag tu 'dod par sems la/ brnab sems kyi shas che na de lus dang bral nas ngan 'gro log par ltung ba dud 'gro rnams kyi nang du skye bar 'gyur te/ wa dag dang 'thab 'dod cing phan tshun rab tu rtsod par 'gyur ba mthong ngo / /de nas yang dge slong las kyi 'bras bu rnam par smin pa shes pa des ri dgas rnams la brtags na des thos pa las byung ba'i shes pas sngon mir gyur la d ung dang rnga sgra dag gis sbungs byed pa gang gis grong dang grong khyer dang tshong rdal pa dag bskrad cing sgra des pha rol dag la 'jigs pa bskyed na de lus dang bral nas ngan 'gro log par ltung ba sems can dmyal bar skye bar 'gyur ro/ /de nas thar nas ri dgas rnams kyi nang du skye bar 'gyur te/ las de'i mthus sems rtag tu skrag par 'gyur zhing ji ltar grong dang grong khyer dang tshong rdal pa dag bskrad nas dgon par byas pa de bzhin du dgon par gnas pa 'am nags tshal gyi nang du gnas par 'gyur ro/ /de gal te mi rnams dang skal ba mnyam par mir skyes na las de dang rgyu 'thun par de rtag tu sems skrag par 'gyur/ sems shin du zhan pa dang / sems rmongs par 'gyur ro/ /des phyogs tsam du dud 'gro'i 'jig rten la rtog par byed de dra ba mang po'i dud 'gror 'gyur la/ de ltar lhag ma yang las kyi mthus phan tshun mi mthun par 'gyur ba mthong ngo / /de nas yang dge slong las kyi 'bras bu rnam par smin pa shes pa des/ dud 'gro'i 'jig rten la rtog par byed de/ rdzus te skyes pa de dag las gang gis skye bar 'gyur snyam nas des thos pa las byung ba'i shes pas brtags na/ mir gyur pa gang gis zab dar bya ba'i phyir srin bu rnams chu'i nang du skol bar byed do/ / de dag bskol ba na rdzus te skye ba'i srin bu gtsug ces bya ba gzhan bye ba tshogs du ma dag skye bar 'gyur te/ phra mo de dag mchod sbyin byed pas mchod sbyin bya ba'i phyir mer sreg na/ de lus dang bral nas ngan 'gro log par ltung ba sems can dmyal ba rnams kyi nang du skye bar 'gyur ro/ /de nas thar nas dud 'gror rdzus te skye ba dar gyi srin bu la sogs pa rnam pa du mar skye bar 'gyur ba mthong ngo / / de nas yang dge slong las kyi 'bras bu rnam par smin pa shes pa des dud 'gro'i 'jig rten la rtog par byed de/ dud 'gro drod gsher las skyes pa de dag las gang gis skyes par 'gyur snyam nas des thos pa las byung ba'i shes pas brtags na/ mi ngan pa lta ba log pa gang gis nor rdzas 'dod pa'i phyir nya dang ru sbal dang srog chags d+hun du gsod pa dag sa brkos nas 'jug gam/ de bzhin du sram dang bcas pa gzhan dag kyang sa brkos nas 'jug cing der srin bu drod gsher las skyes pa rnams skyes la de dag mi ngan pa des mchod sbyin gyi phyir ram/ nor rdzas 'dod pa'i phyir gsod na de lus dang bral nas ngan 'gro log par ltung ba sems can dmyal ba rnams kyi nang du skye bar 'gyur ro/ /de nas thar nas kyang srin bu drod gsher las skye ba sbrang bu dang / shig la sogs pa'i nang du skye bar 'gyur ro/ /skye gnas gnyis pa la yang dag pa gzhan ma yin pa'i lam gyis lta ba dang blo gros gzhan ma yin pa khong du chud pa shin du zhib mos so sor rtog par byed do/ /de nas yang dge slong las kyi 'bras bu rnam par smin pa shes pa des/ dud 'gro'i 'jig rten la rtog par byed de/ las gang gis dud 'gro sgo nga las skye bar 'gyur snyam nas des thos pa las byung ba'i shes pas brtags na/ gang la la 'jig rten pa'i bsam g tan thob pas 'dod chags dang zhe sdang dang gti mug rab tu zhi ba las gal te rkyen zhig gis zhe sdang skyes la de yid kyi nyes pas yul 'jig par byed na de lus dang bral nas ngan 'gro log par ltung ba sems can dmyal ba rnams kyi nang du skye bar 'gyur ro/ /de nas thar nas kyang dud 'gro sgo nga las skye ba bya rgod dang khwa la sogs pa'i nang du skye bar 'gyur ro/ /de nas thar nas kyang gal te mi rnams dang skal ba mnyam par mir skyes na de rtag tu khro zhing 'jigs par 'gyur ba mthong ngo / /de nas yang dge slong las kyi 'bras bu rnam par smin pa shes pa des dud 'gro'i 'jig rten la rtog par byed de/ las gang gis dud 'gro mngal nas skye bar 'gyur snyam nas des thos pa las byung ba'i shes pas brtags na/ 'dod chags la zhen pa gang gis gseb rgod ma la gtong ba dang / glang khyu ba la gtong ba dang / nags tshal la me gtong ba dang / mi sbyar po 'os ma yin pa la byed na de lus dang bral nas ngan 'gro log par ltung ba sems can dmyal ba'i nang du skye bar 'gyur ro/ /de nas thar nas kyang dud 'gro mngal nas skye ba rnams kyi nang du skye bar 'gyur ro/ /de nas thar nas kyang gal te mi rnams dang skal ba mnyam par mir skyes na las de dang rgyu 'thun par de 'gro ba gsum par skye bar 'gyur ba mthong ngo / /de ltar dge slong des dud 'gro rnam pa bcu gcig la brtags na/ de nas yang zas rnam pa bzhi kham gyi zas dang / yid la sems pa dang / reg pa dang / dga' ba rnams la rtog par byed cing zas rnam pa bzhi'i 'bras bu rnam par smin pa la rjes su sems par byed de/ des thos pa las byung ba'i shes pas brtags na/ gang gis tshul ngan pa dang ldan pa chom r kun pa dag la kham gyi zas byin te 'di ltar 'di zo la bdag gi dgra sod cig ces byas pa dang kha zas la brkam pas nyams pa de dag gis kyang de bzhin du srog bcad na de lus dang bral nas ngan 'gro log par ltung ba sems can dmyal ba'i nang du skye bar 'gyur ro/ /de nas thar nas kyang las de'i mthus dud 'gro kham gyi zas za ba rnams kyi nang du skye bar 'gyur te/ 'di lta ste/ ba lang dang / ma he dang / bong bu dang / phag dang / khyi dang / wa dang / rnga mo dang / rta dang / lug dang / ri dgas dang / ra dang / srog chags sri mar dang / khwa dang / bya rgod dang / ngang pa dang / srog chags ti ti b+ha dang / skyar mo dang / srog chags rA ma dang / dgo ba dang / srog chags ku rang ga dang / ri dgas mo dang / srog chags ka ta ma b+ha dang / nor bu'i mchu dang / shang shang te'u dang / sbrul dag gnas tsher ma can dang / ngam grogs la sogs pa mtha' yas pa rnams su skye bar 'gyur ro/ /phyogs dag la yang rab tu dpyod par byed cing reg pa'i zas la yang rjes su sems par byed de/ sgo nga las skye bar gtogs shing 'byung ba dag ni 'di lta ste/ bya dang / chu na gnas pa dang / shug tu 'brel pa dang / rgya mtsho'i 'gram nas skye ba dang / rgya mtshor skyes pa dang / klu dang / sbrul dang / khung na gnas pa la sogs pa de dag las gang gis reg pa'i kha zas za bar 'gyur zhig gu snyam nas dge slong de rnam par dpyod par byed do/ /des thos pa las byung ba'i shes pas brtags na/ gang gis pha rol dag la sbyin pa sbyin no snyam du bsams la ma s mras par yid kyis phyin te 'chi ba'i dus byas na de gal te lan grangs gzhan la myong bar 'gyur ba'i las kyis dud 'gro rnams kyi nang du skyes na bsam pa 'ba' shig gi las de nyid kyi mthus de reg pa'i zas de za bar 'gyur ba mthong ngo / /de nas yang dge slong las kyi 'bras bu rnam par smin pa shes pa des dud 'gro'i 'jig rten la rtog par byed de/ zas gsum pa yid la sems pa zhes bya ba des sems can de dag ji ltar bdag nyid 'tsho bar byed snyam nas des thos pa las byung ba'i shes pas brtags na/ 'di ltar sgo nga las skye ba nya dang / chu srin ma ka ra dang / kum b+hi ra dang / na kra dang / nya phyis dang / dung la sogs pa'i sgo nga las skye ba skyes pa rnams yid la sems pa'i zas des 'tsho bar byed do/ /gal te ma 'am/ gal te phas rang gi bu dran na dran pa des tshim par byed de/ de nas yang 'phel bar byed cing 'tsho bar byed la kha zas kyi bya ba yang byed do/ /de las gang gis 'gyur snyam nas dge slong de rab tu dpyod de des thos pa las byung ba'i shes pas brtags na/ blo zhan cing las dang 'bras bu dag mngon par mi shes pa gang gis gzhan dag la 'di ltar ngas khyod la zla ba phyed dam zla ba gcig na nor rdzas kyi rnam pa 'am/ kha zas kyi rnam pa 'am/ nor gyi dbyig gi rnam pa chung zad sbyin no zhes khas blangs la de'i tshig de dbul po des thos nas dga' bar 'gyur te/ 'di ltar sbyin bdag 'dis bdag dbul po la khas blangs pa de bdag la sbyin par byed do snyam nas de yid mchog tu dga' nas de bzhin du zla ba phyed dam zla ba gcig gi dus su de 'ongs nas de'i drung du phyin pa dang / mi ngan pa des kha stongs par byas na de lus dang bral nas ngan 'gro log par ltung ba sems can dmyal ba dga' ba dang dga' ba med pa'i nang du skye bar 'gyur ro/ /de nas thar nas kyang gal te dud 'gro rnams kyi nang du skyes na 'di ltar des de la brdzun byas nas yid dga' bar byas pa de'i mthus de yid la sems pa'i zas 'thob par 'gyur ro/ /gal te mi rnams kyi nang du skyes na las de dang rgyu 'thun par de de'i bran nyid du 'gyur ba mthong ngo / /de nas yang dge slong las kyi 'bras bu rnam p ar smin pa shes pa des dud 'gro'i 'jig rten kha zas bzhi pa dga' ba zhes bya ba la rtog par byed de des thos pa las byung ba'i shes pas 'di ltar dud 'gro'i yul na dud 'gro kun nas nyon mongs pa can gyi dga' ba'i zas kyis 'tsho ba yod de/ nags khung na sbrul po che a dza ga ra zhes pa dag pa'i zas dang rlung za zhing 'tsho ba dang / srog chags ga la go li ka dang / ri zhol gnas zhes bya ba la sogs pa dang gzhan yang yod de/ de la 'od gsal gyi lha rnams kyi dga' ba'i zas ni gnod sems med pa'i dga' ba'i zas kyis 'tsho ba yin gyi dud 'gro'i dga' ba'i zas ni 'khon gyi lta ba dang / 'khon dam du 'dzin pa'i sems dang ldan pa yin na de dag las gang gis der skye bar 'gyur snyam nas des thos pa las byung ba'i shes pas brtags na/ zhe sdang gi rang bzhin can gang yin pa ste/ 'khon gyi rgyu dang 'thun pa dang / gti mug gi shas che ba des srog gcod par byas na de lus dang bral nas ngan 'gro log par ltung ba sems can dmyal ba rnams kyi nang du skye bar 'gyur ro/ / de 'khon dang dga' ba'i gzhi yod pa des dud 'gro rnams kyi nang du skyes na dga' ba'i zas dang rlung za bar 'gyur ro/ /de gal te mi rnams dang skal ba mnyam par mir skyes na/ las de dang rgyu 'thun par de rtag par glo bur du pha rol dang / lhan cig rgyu med par 'thab pa dang 'brel par 'gyur ba mthong ngo / /de nas yang dge slong las kyi 'bras bu rnam par smin pa shes pa des rnam pa gzhan gyis dud 'gro'i 'jig rten mtha' yas pa la rtog par byed de/ yang chu'i nang na rgyu ba dag ji ltar skye bar 'gyur snyam nas des thos pa las byung ba'i shes pas brtags na/ gang blo zhan cing rnam par shes pa zhan pa skom gyis gdungs bzhin du 'chi ba'i dus byed na de lus dang bral nas ngan 'gro log par ltung ba chu'i nang na rgyu bar 'gyur ro/ /de bzhin du nya'i skye gnas rnam pa sna tshogs kyi nang na gcig pu skye bar 'gyur ro/ /de skom gyis gdungs nas srid pa bar ma la chu de mthong bar 'gyur te/ don du gnyer ba des da ni bdag 'dir skye bar 'gyur snyam nas sems bskyed ma thag tu de nyid du skye bar 'gyur te/ srid pa ni rgyu dang rkyen gyis 'byung la srid pa'i yan lag la gnas pa ni de lta bu yin no/ /gang de sbyin pa ma yin zhing bsod nams ma bsgrubs pa'i las kyi rnam par smin pa des chu rtag tu dro bar 'gyur zhing / de'i kha yongs su skam par 'gyur la reg pa ba tshwa dang 'dra bar 'gyur ba mthong ngo / /de nas yang dge slong las kyi 'bras bu rnam par smin pa shes pa de bya skam sa la rgyu ba dang / bar snang la rgyu ba dag la rtog par byed de/ las gang gis bya dag bar snang la 'phur zhing nam mkha' rten med pa la rten par byed snyam nas des thos pa las byung ba'i shes pas brtags na/ 'di ltar rdzu 'phrul ni rnam pa gsum ste/ 'di lta ste/ mos pas bsgyur ba dang / lus kyis 'gro ba dang / yid ltar mgyogs pa'o/ /de la mos pas bsgyur ba ni rdzu 'phrul can dag gi yin te ji ltar mos pa de ltar 'gro ba dang / gal te sa'i khams su rab tu mos pa na de'i tshe nam mkha' sa'i khams su mthong nas 'gro bar byed pa lta bu'o/ /lus kyis 'gro ba ni chos nyid kyi khyad par las gyur pa ste bya rnams lta bu'o/ /yid ltar mgyogs pa ni de bzhin gshegs pa sangs rgyas kyi yin la/ yid kyis ji ltar gzas pa de bzhin du gnas gzhan du phyin par byed pa yin te/ de yang khams gsum gyi las so so'i bye brag gis de ltar rdzu 'phrul rnam pa gsum du 'gyur ba mthong ngo / / de ltar bsgrubs pa'i dge ba 'di yi skye bo kun/ /bsod nams yeng shes tshogs bsags te/ /bsod nams ye shes las byung ba'i/ /dam pa gnyis ni thob par shog / //

CLOSE WINDOW