CLOSE WINDOW

H350
བོད་ཡིག

//rgya gar skad du/ AR+ya mai tri ya byA ka ra Na/ bod skad du/ 'phags pa byams pa lung bstan pa/ 'phags pa byams pa la phyag 'tshal lo/ /chos kyi sde dpon khyab bdag dpal/ /shes rab chen po shA ri'i bus/ /'jig rten rnams la snying brtse'i phyir// ston pa la ni yongs zhus pa/ /sngon dang phyi mtha'i mdo las ni/ /ma 'ongs pa yi sangs rgyas gang / /'jig rten 'dren par mdzad pa po/ /byams pa zhes bya bstan pa de/ /'dren pa bdag ni de'i mthu dang / /rdzu 'phrul dang ni don thams cad/ /rgyas par rab tu nyan 'tshal ni/ /de ni mi mchog bdag la gsungs/ /de la ston pas bka' stsal pa/ /sangs rgyas byams pa'i mchog de'i/ /'byor pa rgyas par khyod la ngas/ /lung bstan bya yi nga la nyon/ /de yi tshe na rgya mtsho ni/ /khor yug tu ni dpag tshad brgya/ /skam par 'gyur te de yang ni| |'khor los bsgyur ba'i lam bzang yin/ /de tshe dzam+bu'i gling 'di yang / /chu zheng tha gru mnyam par ni/ /dpag tshad stong phrag bcu pa ste/ /'byung po kun gyi gnas su 'gyur| |de yi tshe na yul gyi mi/ /dar cing 'byor la chad pa med/ /'tshe med mi ni de dag kyang / /dge ba byed pa dag tu 'gyur/ /sa gzhi tsher ma med pa dang / /mnyam zhing ne'u gsing sngo dang ldan/ /'phar zhing nem zhes byed pa ste/ /shing bal 'dab ma bzhin du 'jam/ /mngar zhing dri ni zhim pa yi/ /sA lu ma rmos par skye'o/ /sna tshogs tshon gyis mdzes byas pa'i| |gos kyi ljon shing 'byung bar 'gyur/ /me tog lo ma 'bras ldan pa'i/ /ljon shing 'phang du rgyang grags 'byung / /de dag rnams kyi tshe lo ni/ /brgyad khri kho na thub par 'gyur/ / sems can de dag skyon med cing / /nyes bral spro ba tshe dang ldan pa/ /lus chen kha dog ldan pa ste/ /tshan po cho yi stobs dang ldan/ /nad ni gsum zhig 'byung bar 'gyur/ /'dod dang mi za rga ba'o| |bu mo la ni lnga brgya dag /lon nas khyo la bag mar 'gro /de tshe tog ldan zhes bya ba'i/ /rgyal po'i pho brang 'byung 'gyur te/ /srog chags dge ba'i las byed pa'i/ /sems can rnams kyi gnas yin no/ /chur ni dpag tshad bcu gnyis te/ /rgyar ni dpag tshad bdun yod pa'i/ /bsod nams byas pa rnam dag gi /grong khyer yid 'ong 'byung bar 'gyur/ / rin chen bdun las byas mtho ba'i/ /ra ba 'phang du rgyang grags 'byung / /shing thags dang ni sgo khang rnams/ /rin chen sna tshogs dag gis brgyan/ /rin chen so phag gis brtsegs shing / /pad+ma ut+pal gcal du bkram/ /dur pas mdzes par byas pa yi/ /'obs kyang 'byung ba kho nar 'gyur/ /khor yug tu ni ta la yi/ /phreng ba bdun gyis yongs su bskor/ /dril bu'i dra bas mdzes byas pa/ /rin chen bzhi rgyu'i ta la dag /rlung bskyod ta la de dag las/ /snyan pa'i sgra ni 'di ltar dper/ /sil snyan yan lag lnga ldan bzhin/ /de las yid 'ong sgra grag 'gyur/ /mi rnams gang dag grong khyer der/ /rtse dga' bde don gnyer ba rnams/ /de dag ta la'i sgra de yis/ /rab tu mgu zhing rtsen par byed| |ut+pal ku mu das gang ba'i/ /rdzing bu dag kyang 'byung bar 'gyur/ /grong de skyed mos tshal dang ni/ /nags tshal phun sum tshogs par 'gyur/ /der ni dung zhes bya ba yi/ / rgyal po gzi brjid che ldan zhing / /stobs che gling bzhi'i dbang phyug pa/ /mnga' bdag 'khor los bsgyur ba 'byung / /dpung gi yan lag bzhi 'byor cing / /rin chen bdun dang yang dag ldan/ /rgyal po de yi sras rnams ni/ /stong du tshang bar 'byung bar 'gyur/ /mi yi dbang po de yang ni/ /sa 'di rgya mtsho'i mtha' klas par/ /chad pa med cing chos dang ni/ / mthun pas yongs su skyong bar 'gyur/ /de tshe dung zhes bya ba yi/ /sa bdag rgyal po de la ni/ /rin chen khrag khrig brgyas mtshon pa'i/ /gter chen bzhi ni 'byung bar 'gyur/ /su yi mtshan ni ser skya sta/ /bcom brlag na ni dkar po yin/ /sa 'dzin na ni e la'i 'dab/ /wA ra NA si'i grong khyer dung / /gter ni bzhi po kho na dang / /rgyal po yang dag ldan par ni| |'byung 'gyur dpa' po chen po de/ /bsod nams brgya lo stobs las skyes/ /de tshe rgyal de'i mdun na 'don/ /bram ze tshangs rab ces bya ba/ /thos mang rig byed bzhi 'don pa'i/ / mkhan po zhig ni 'byung bar 'gyur/ /'don du 'jug dang gsang tshig 'dzin/ /dran ldan rig byed gzhung 'grel dang / /sgra nges sbyor bcas pha rol phyin/ /brda sprod pa dang tshig dang ldan// de tshe de yi chung ma ni/ /tshangs ldan ma zhes bya ba ste/ /mdzes shing blta na sdug pa dang / /gzugs mthong grags dang ldan pa 'byung / /byams pa gang zag mchog gyur pa/ /dga' ldan gnas nas shi 'phos nas/ /de tshe de yi lhums su ni/ /nges par nying mtshams sbyor bar 'gyur/ /gzi brjid chen po zla ba bcu/ /tshangs par lhums su zhugs nas kyang / /byams pa'i yum ni skyed mos tshal/ /me tog bzang rgyas nang gshegs nas/ /chos ston ma de mi 'dug cing / /mi nyal 'greng bzhin dag tu ni/ /shing gi yal ga la bzung nas/ / byams pa bltams pa nyid du 'gyur/ /mi yi mchog tu gyur pa de/ /glo g.yas nas ni 'byung 'gyur te/ /dper na sprin gyi phung po nas/ /nyi ma byung ba bzhin du gsal/ /ji ltar chu yi pad+ma bzhin/ /mngal gyi 'dam gyis mi gos so/ /khams gsum 'di ni thams cad du/ /'od kyis rgyas par 'gengs par 'gyur/ /de nas brgya byin lha dbang po/ /bde sogs mnga' bdag dga' gyur nas/ /byams pa rkang gnyis mchog gyur pa/ /bltams pa'i tshe na lon par 'gyur/ /de ni bltams ma thag tu yang / /gom pa bdun dag 'dor bar 'gyur/ /gom pa re rer gter dang ni/ /pad+ma re re 'byung bar 'gyur/ /phyogs bzhi dag tu gzigs nas ni/ /bdag gi skye ba tha mas ni| |'di yin yang srid yod ma yin/ /yang dang yang du phyir mi 'ong / /zag mad mya ngan 'das 'gro zhes/ /gsung yang rab tu bka' stsal to/ /klu rnams kyis ni chu yi rgyun| |bsil dang 'jam pas sku bsil 'gyur/ /nam mkha'i ngos nas lha rdzas kyi/ /gos dang me tog 'bab par 'gyur/ /de yi dbu la gdugs dkar po/ /lha rnams kyis ni 'dzin par 'gyur/ /mtshan mchog sum cu gnyis mnga' ba/ /byams pa dpal gyis 'bar ba de/ /ma mas yang dag blangs nas su/ /yum gyi phyag tu 'bul bar 'gyur/ /rin chen sna tshogs kyis brgyan pa'i/ /khyogs ni yid du 'ong ba la/ /sras dang bcas par bzhugs gsol nas/ /lha rnams kyis ni khyer bar 'gyur/ /sil snyan stong phrag du ma dag /sgra 'byin 'khrol ba'i grong khyer der/ /byams pa gshegs pa tsam gyis ni/ /me tog char ba 'bab pa 'gyur/ / de yi nyin par sbrum pa yi/ /bud med rnams kyang btsa' bar 'gyur/ /de dag thams cad nyams bde zhing / /bde legs su ni btsa' bar 'gyur/ /tshangs rab tshen mchog sum cu gnyis/ /ldan pa'i sras de mthong nas ni/ /gsang tshig dgal rab brtags nas/ /de yi 'og tu dga' bar 'gyur/ /ji ltar gsang tshig las 'byung bzhin| |gzhon nu'i 'gro ba gnyis yin te/ /mi dbang 'khor los bsgyur ba'am/ /sangs rgyas rkang gnyis mchog tu 'gyur/ /byams pa rkang gnyis mchog gyur pa| |dpal de na tshod rdzogs nas ni/ /skye rgu 'di ni sdug bsngal snyam/ /chos kyi bdag nyid dgongs par mdzad/ /dbyangs che tshangs pa'i dbyangs dang ldan/ /'od che gser gyi mdog dang ldan/ /steng phel che zhing thal gong rgyas/ /pad+ma'i 'dab ma 'dra ba'i spyan/ /de yi sku yi khrun du ni/ /khru ni brgyad cu dag tu 'gyur/ /zheng ni khru rnams nyi shu ste| |zhal gyi dkyil 'khor de yi phyed/ /byams pa de ni bram ze'i bu/ /stong phrag bzhi po dag dang ni/ /brgyad cus mdun du bdar nas ni/ /gsang tshig dag kyang 'don du 'jug /de nas rgyal po chen po dung / /sboms su 'dom ni drug cu bzhi/ /'phang du 'dom ni stong yod pa'i/ /mchod sdong zhig ni 'dzugs par 'gyur/ /mi dbang de yis mchod sdong de/ /rin chen sna tshogs kyis brgyan nas/ /mchod sbyin gyis ni spyan drangs te/ /bram ze dag la rab tu 'bul/ /mchod sdong yid 'ong rin chen rgyu/ /de ni phul ma thag tu yang / /bram ze stong po rnams kyis ni/ /de mi mod la bged par gyur/ /byams pas mchod sdong de yi ni/ /mi rtag nyid de mthong nas kyang / /'khor ba mtha' dag rnams bsam ste/ /rab tu 'byung bar 'dod par 'gyur/ /'dir bdag rab tu byung nas ni/ /bdud rtsi'i go 'phang reg 'gyur dang / /skye bo 'chi bdag nad rga ba'i/ /'jigs las 'grol bar 'gyur snyam zhes/ /skye bo rab dang gzigs nas ni/ /sdug bsngal sdug bsngal kun 'byung dang / /sdug bsngal yang dag 'gog pa dang / /bde ba mya ngan las 'das 'gro/ /'phags lam yan lag brgyad pa yi/ /bden pa dag kyang ston par 'gyur/ /de yi chos de thos nas kyang / /bstan pa la ni nan tan sgrub/ /byams pa gang zag mchog gyur de/ /stong phrag bzhi po dag dang ni/ /brgyad cu dag gis mdun bdar nas/ /rab tu 'byung bar nges 'byung 'gyur| |de tshe de yi byang chub shing / /klu shing zhes bya 'byung 'gyur te/ /de yi yal ga gnam 'phang du/ /dpag tshad tsam du yang dag 'phags/ /de ni byang chub shing de yi| |yal ga gel pa thams cad du/ /kho ra khor yug rgyang grags drug /khebs pa kho na dag tu 'gyur/ /byams pa rkang gnyis mchog gyur de/ /de yi drung du gshegs nas su| |bla med byang chub zhi ba ni/ /thob 'gyur 'di la the tshom med/ /gang gi nub mo kho na la/ /rab tu 'byung bar mngon 'byung ba/ /de yi nub mo kho na la/ /byang chub dam pa 'thob par 'gyur| |de yi 'og tu thub mchog go /dam chos sdug bsngal kun spong zhing / /zhi ba yan lag brgyad ldan pa'i/ /gsung gis ston par mdzad par 'gyur/ /me tog mdzes pa brgyus pa yi| |skyed mos tshal du de yi 'khor/ /dpag tshad brgya khyon gang ba dag /yang dag 'du ba kho nar 'gyur/ /de nas mi dbang rgyal po dung / /grags pa chen pos thos nas ni/ /sbyin pa grangs med byas nas kyang / /rab tu 'byung bar 'dod par 'gyur/ /rgyal po stong phrag bzhi dang ni/ /brgyad cu dag gis mdun bdar te/ /khyim nas des par byung nas ni/ /rab tu 'byung bar 'gro bar 'gyur/ /byams pa'i yab kyang de bzhin du/ /de yi tshad dang mnyam pa yi/ /bram ze rnams kyis mdun bdar nas/ /rab tu 'byung bar 'gro bar 'gyur/ /de nas de tshe khyim bdag ni/ / nor bzang tshogs ni rnam grags pa/ /chos kyi bdag nyid stong dag gis/ /bskor nas rab tu 'byung bar 'gyur/ /dung gi bud med rin po che/ /sa ga zhes ni rnam grags pa/ /bud med stong phrag bzhi dang ni/ /brgyad cu dag gis mdun bdar te/ /de yi 'og tu mngon byung nas/ /rab tu 'byung bar 'gro bar 'gyur/ /de yi tshe na byams pa yi/ /bstan pa la ni srog chags dag /stong phrag dang ni brgya phrag rnams/ /rab tu 'byung bar 'gro bar 'gyur/ /de yi 'og tu thugs rje can/ /ston pa byams pa rkang gnyis mchog / 'khor lo rnam par gzigs nas ni/ /shAkya seng+ge thub pa ste/ /gtso bo skyob par mdzad pa po/ /dam pa'i chos dbyings gzigs gyur pa/ /'jig rten mgon pos 'di dag kun/ / thar pa'i lam de bskyed nas kyang / /don gyis nga yi bstan la btang / /gdugs dang rgyal mtshan pa dan dang / /dri dang phreng ba byug pa yis/ /shAkya thub la mchod nas ni/ / nga yi bstan la lhags pa yin/ /gur gum chu yis gdab pa dang / /tsan+dan gyi ni byug pa yis/ /shAkya thub pa'i mchod rten la/ /mchod nas nga yi bstan la lhags/ /de tshe sangs rgyas chos dang ni/ /dge 'dun la yang skyabs song zhing / /dge ba'i las kyang byas nas ni/ /nga yi bstan la lhags pa yin/ /shAkya seng+ge'i bstan pa la/ /bslab gzhi yang dag blangs nas su/ /ji ltar gsung bzhin bsgrubs nas ni/ /nga yi bstan la lhags pa yin/ /dge 'dun la yang chos gos dang / /zhal zas dang ni btung ba dang / snyun gsos sna tshogs sbyin pa rnams/ /phul nas nga yi bstan la lhags/ /bcu bzhi dang ni bco lnga dang / /de bzhin zla gcig tshes brgyad dang / /cho 'phrul wa yi zla ba la/ / yan lag brgyad legs mnyam bzhag cing / /bsnyen gnas gso sbyong byas nas ni/ /nga yi bstan la lhags so zhes/ /don 'di rab tu gsung bar 'gyur/ /de yi nyan thos rnams kyang ni/ / cho 'phrul gsum gyis 'dul bar 'gyur/ /de tshe de dag thams cad ni/ /zag zad 'grogs na bde bar 'gyur/ /de yi 'dus pa dang po ni/ /nyan thos srid pa bcad gyur pa/ /dung phyur phrag dgu bye phrag drug /tshang ba'i nyan thos 'byung bar 'gyur/ /de yi 'dus pa gnyis pa ni/ /nyon mongs 'ching ba las grol ba'i/ /dung phyur phrag dgu bye phrag bzhi/ /tshang ba'i nyan thos 'byung par 'gyur/ /de yi 'dus pa gsum pa ni/ /sems zhi rnam par grol gyur pa/ /dung phyur phrag dgu bye phrag gnyis/ /tshang ba'i nyan thos 'byung bar 'gyur/ /chos kyi 'khor lo rab bskor nas/ / lha dang mi rnams rnam btul te/ /nyan thos dge 'dun thabs cig tu/ /grong du bsod snyoms spyod la rgyu/ /de nas rtog ldan dga' lta yi/ /grong khyer der ni gshegs pa na/ /grong khyer mchog tu man+dA ra'i/ /me tog char chen 'bab par 'gyur/ /thub pa grong der gshegs pa la/ /lha yis me tog 'thor bar 'gyur/ /rgyal po chen po bzhi dag dang / /brgya byin sum cu rtsa gsum dbang / /tshangs pa lha sogs thabs cig tu/ /de la mchod pa byed par 'gyur/ /lha yi bu ni mthu chen gyis/ /ut+pal pad+ma ku mu ta/ /pad+ma dkar po dri zhim dang / /a ga ru dang tsan+dan dang / /de bzhin lha rdzas phreng ba dang / /lha rdzas gos kyang 'thor par 'gyur/ /'jig rten mgon de grong khyer gyi/ /mchog tu gshegs pa mthong nas ni| |shing bal 'dab ltar 'jam pa yi/ /sa der gding brgya cher 'ding / /de dag lam gar phreng ba ni/ /sna tshogs mdzes pa rnam par 'grem/ /lha yi bu ni mthu chen dang / /mi rnams yid ni rab dang ba/ /gdugs dang rgyal mtshan ba dan dang / /spos dang phreng ba byug pa dang / /rol mo sgra snyan bsgrags pa yis/ /ston pa la ni mchod par 'gyur/ /brgya byin mig stong lha rnams kyi/ /rgyal po bde sogs bdag po de/ /rab mgu thal mo sbyar nas ni/ /'jig rten mgon la bstod par byed/ /skyes bu cang shes khyod la 'dud/ /skyes mchog khyed la phyag 'tshal lo/ /gang zag mchog gyur bcom ldan 'das/ /skye rgu la ni thugs brtser mdzod/ /de yi tshe na lha yi bu/ /mthu chen bdud ces bya ba 'byung / /de yang thal mo rab sbyar nas/ /'jig rten mgon la bstod par byed/ /tshangs pa'i 'khor gyis yongs bskor cing / /tshangs pas kyang ni mdun bdar te/ /tshangs pa'i dbyangs ni sgrog bzhin du/ /dam pa'i chos ni gsung bar 'gyur/ /zag zad nyes pa rnams bral zhing / /srid pa'i 'ching ba rab spangs pa'i/ /dgra bcom rnams kyis sa 'di ni/ /thams cad kun tu gang bar 'gyur| |lha dang mi dang dri za dang / /gnod sbyin dang ni srin po klu/ /mthu chen rnams ni mgu gyur nas/ /ston la mchod pa byed par 'gyur/ /gang dag byams pa'i bstan pa la/ /tshangs par spyad pa spyod gyur pa/ /de dag gdon mi za bar ni/ /nyon mongs med cing the tshom med/ /gang dag byams pa'i bstan pa la/ /tshangs par spyod pa spyod gyur pa/ /de dag gdon mi za bar ni| |nga yi med cing yongs 'dzin med/ /gser dang dngul la 'dzin med cing / /gnas med chags pa'ang yod pa min/ /gang dag byams pa'i bstan pa la/ /tshangs par spyad pa spyod gyur pa| |de dag gdon mi za bar ni/ /sred pa'i dra ba bcad pa dang / /bsam gtan rdzogs par byas nas ni/ /dga' dang bde dang yang dag ldan/ /'byung po kun la thugs brtse ba/ /byams pa rkang gnyis rnams kyi mchog /lo ni drug khri dag tu yang / /dam pa'i chos ni ston par 'gyur/ /de na srog chags brgya stong dang / /'bum phrag rnam par 'dren pa ste/ /dam pa'i chos la btul nas ni/ /de nas mya ngan 'da' bar 'gyur/ /thub pa chen pos gsungs pa de/ /yongs su mya ngan 'das nas kyang / /de tshe de yi dam chos ni/ /lo khri dag tu gnas par 'gyur| |rgyal ba shAkya thub de la/ /sems ni rab tu dad par gyis/ /des na byams pa rkang gnyis mchog /rdzogs pa'i sangs rgyas mthong bar 'gyur/ /de phyir sangs rgyas chos dag dang / /dge 'dun tshogs kyi mchog la ni/ /sems ni rab tu dad gyis dang / /don chen rab tu 'grub par 'gyur/ /thugs rje che ldan de lta bu'i/ / byams pa rkang gnyis mchog gyur pa/ /de tshe mnyes par byas nas ni/ /de nas mya ngan 'da' bar 'gyur/ /ya mtshan 'di dag thos gyur cing / /'byor pa mi nyung mthong mdzad de/ /nag po'i rigs kyang dad 'gyur na/ /mkhas pa su zhig dad mi 'gyur/ /de phyir 'di na bdag nyid che/ /'dod cing bdag la legs 'dod pas/ /sangs rgyas bstan pa dran bzhin du/ /dam pa'i chos la gus par bya/ /'phags pa byams pa lung bstan pa rdzogs so// //rgya gar gyi mkhan po dzi na mi tra dang / lots+tsha ba ban+d+he dpal brtsegs rak+Shi tas bsgyur/ / empty page

CLOSE WINDOW