CLOSE WINDOW

H342
བོད་ཡིག

/ //rgya'i skad du/ cu'i b+hau'i yA ni go gying / bod skad du/ las kyi rnam par smin pa'i 'bras bu'i mdo/ sangs rgyas dang byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das rgyal po'i khab bya rgod kyi phung po'i ri la/ byang chub sems dpa' sems dpa' chen po mang po khri phrag bcu'i 'phags pa'i tshogs rnams dang / dge slong dang / dge slong ma dang / dge bsnyen dang / dge bsnyen ma dang / klu chen brgyad dang / phyogs skyong rnams dang / srin po dang / lha ma yin dang / mi'am ci dang / lha dang / mi dang / dri zar bcas pa'i tshogs thams cad bcom ldan 'das la sems rab tu dang cing chos nyan pa'i phyir 'khod do/ /de'i tshe byang chub sems dpa' shes rab ye shes zhes bya ba stan las langs te thal mo sbyar nas bcom ldan 'das la 'di skad ces gsol to/ /bcom ldan 'das/ 'jig rten gyi khams khri phrag brgyad dang stong phrag bzhi'i zhing khams blta bar byas pas der skyes pa'i mi rnams la dge ba'i rtsa ba rnam par smin pa'i 'bras bu du ma yod de/ 'dod chags dang / zhe sdang dang / phrag dog dang / zhen pa dang / brjed ngas pa dang / mi tshangs spyod la sems rtag tu skyes pa dang / gang la la gtsug lag khang bzhengs pa dang / dge 'dun bsnyen cing bkur ba dang / sku'i rten la yon tan gyis rab tu brgyan pa dang / tshul khrims bsrung ba dang / gsung rab sgrog pa dang / dbul po la phan pa dang / sdug bsngal ba la snying rje ba dang / rang lus sbyin par gtong ba dang / spos 'bul ba la sogs pa de rnams bcom ldan 'das thugs rje dang ldan pas rgya chen po bshad du gsol/ de skad ces gsol pa dang / bcom ldan 'das kyis byang chub sems dpa' shes rab ye shes la 'di skad ces bka' stsal to/ /shes rab ye shes/ rigs kyi bu'am/ rigs kyi bu mo gang la la zhig bde bar gshegs pa'i mtshan nas brjod pa'i sems skye ba dang / ma 'ongs pa'i dus na rnam par smin pa dang / spos dang / me tog dang / mar me dang / rnam par dag pas mchod par bya'o/ /blon po thob par 'dod na bsod nams dang / ye shes kyi tshogs bsags par bya'o/ /lus longs spyod 'dod nas sangs rgyas kyi sku gzugs la rgyan bkod par bya'o/ /shes rab che bar 'dod na chos kyi sbyin pa byin par bya'o/ /gzugs bzang bar 'dod na de bzhin gshegs pa'i sku tshon gyis bris sam/ brko bar bya'o/ /tshe ring bar 'dod na snying rje dang ldan zhing srog mi gcod par bya'o/ /mi lus 'thob par 'dod na gsung rab sgrog pa dang / tshul khrims bsrung bar bya'o// bsod nams che bar 'dod na mchod rdzas dbul bar bya'o/ /nor phyug po 'dod na dbul po la phan par bya'o/ /nad med par 'dod na sman sbyin par bya'o// yang bcom ldan 'das kyis byang chub sems dpa' shes rab ye shes la bka' stsal pa/ gang la la tshe snga ma la sdig pa byas na tshe 'di la sdug bsngal bar 'gyur ro/ /lus rtag tu na ba ni bde bar gshegs pa la ma gus pa dang / dge 'dun la smad pa yin no/ /mig rtag tu long ba ni tshul khrims srung ba 'chal du bcug pa yin no/ /rkang lag zha ba ni me sbar bas bsdigs pa yin no/ /skad kyi don mi gsal ba ni sangs rgyas dang / chos la smad pa yin no/ /rna ba 'on pa dang / ngag lkugs pa ni gsung la sdang ba dang / dam pa'i chos la smad pa yin no/ /snas dri mi tshor ba ni dri mi zhim pa'i spos ngan pa bsregs pa yin no/ /mig dmar ba ni theg pa chen po'i chos la smad pa yin no/ / gzugs dkar zhing dmar ba ni mchod pa rgya chen po byas pa yin no/ /lus kha dog gnag cing rid pa ni de bzhin gshegs pa'i sku la du ba btang ba yin no/ /rgas nas mig mi gsal ba ni sems can gyi mig la gnod pa byas pa yin no/ /tshe 'di la bu med pa ni sems can du ma bsad pa yin no/ /lus yon po dang / yan lag na ba ni sems can du ma bcings pa dang / dol la sems can bzung ba yin no/ /'od gsal ba yang mi mthong ba ni bya'i mig la khab skud kyis brtsems pa yin no/ /rgas nas rabs chad pa ni sgo nga bcag pas yin no/ /tshe 'di la pho reng du gyur pa ni chung ma la sems sdang bas yin no/ /bud med khyim thab med pa ni khyim thab la sems sdang bas yin no/ / pho mo rtag tu so sor nges pa ni pha ma la ma gus pa dang spyod pa ngan pa byas pas yin no/ /tshe 'di la dbul ba ni zas dang / nor la sdang ba yin no/ /mi'i lus yan lag tshang ba dang ldan pa ni dkon mchog gsum la dad pa thob pas yin no/ /rigs kyi bu dang / rigs kyi bu mo rnams la brtse bas smra bar bya'o/ /rtag tu dang ba dang / gus par bya'o/ / gnyen mtshams la mthun par bya'o/ /pha mar dad par bya'o/ /skye ba gcig srog mi gcod na mi mthun pa'i dgra rnams kyang med do/ /tshe gcig tu mi rkun rgyal po'i chad pa mi 'byung ngo / /skye ba gcig la chags sdang mi rtsod na chad pa'i rigs dang / btson khang yang mi mthong ngo / /skye ba gcig la sems mnyam pa nyid bsgoms na dmyal bar mi lhung ngo / /yang byang chub sems dpa' shes rab ye shes la bka' stsal pa/ rigs kyi bu dang / rigs kyi bu mo gang la la zhig las kyi rnam par smin pa'i 'bras bu'i mdo 'di thos nas lag tu 'chang ba dang / 'don pa dang / spos dang / me tog dang / mar me rnams ci 'byor pas mchod par byed na/ gal te de la tshe snga ma'i lan chags pa dang / tshe 'di la sdig pa bsags pa thams cad rnam par dag cing byang bar 'gyur ro/ /de ltar byas na ma 'ongs pa'i rnam par smin pa'i 'bras bu ni longs spyod dang ldan pa dang / dbang phyug kyang mi 'byung bar dogs par mi bya'o/ /skye ba thams cad du gzugs bzang ba dang ldan par 'gyur ro/ /ye shes dang / shes rab dang / mchog tu dga' ba thob pa'i phyir las kyi rnam par smin pa yon tan bsam gyis mi khyab pa'i tshigs su bcad pa las shes par bya'o/ /mi yi lus ni thob pa dka'/ /sangs rgyas bstan pa thos pa dka'/ /dge ba'i sems ni bskyed pa dka'/ /dam pa'i chos ni shes pa dka'/ /sangs rgyas 'dod na gsung rab sgrog brtson bya/ /dge sems 'dod na zhe sdang mi bya'o/ /'bras bzang 'dod na mchod pa rtag tu bya/ /tshe ring 'dod na srog gcod spang bar bya/ /sems ni bud med dag na zhen mi bya/ /yid ni gzhan la gnod pa skyel mi bya/ /ngag gis gzhan gyi sdig pa brjod mi bya/ /gzhan nor rtswa chu bzhin du rku mi bya/ /rna bas gzhan gyi tshig ngan mnyan mi bya/ /mig gis bud med gzugs la blta mi bya/ /lce ni gzhan gyi ro la myong mi bya/ /bya ba kun la yid ni mig bzhin bya/ / sems can srog ni don med gcod mi bya/ /skye bar nor phyug rtag tu 'dod pa na/ /nad pa dbul po rnams la phan par bya/ /de nas 'phags pa'i tshogs dang ldan pa'i 'khor rnams bcom ldan 'das kyis gsungs pa la yi rangs shing mngon par bstod do/ /las kyi rnam par smin pa'i 'bras bu'i mdo rdzogs so// //sangs rgyas kyi sprul pa rgya'i lo tsA ba thang sam tsa zhes byas rgya gar dngos las rgya nag tu legs par bsgyur cing phyis gzhi thams cad yod par smra ba'i sde pa las rab tu byung ba rgya nag chen po'i lha btsun chos kyi rin chen gyis dpal ldan sa skya'i gtsug lag khang chen por bsgyur cing zhus te gtan la phab pa'o/

CLOSE WINDOW