CLOSE WINDOW

Gpb054.013
བོད་ཡིག

/ // a ti spyi gcod kyi rgyud bzhugs so// @##// rgya gar skad du/ a ti la b+ha ti/ bod skad du/ a ti spyi gcod kyi rgyud/ dpal rdo rje sems dpa' la phyag 'tshal lo// ro langs bde ba rangs pa na// pan tsa a rmir tha bin du phra sha b+hin tu/ na ma shrI pha la mun tra man+ta tra e ka 'du ti hi la na ma/ rol pa rgyun gyi thig le'i klong nas// byang chub shing drung du sku sprul nas// de yi 'jam dpal bshes gnyen dag la rgyud// mthing gi shu gu dag la bris pa'i gleg bam 'di// 'jam dpal bshes gnyen khyod la gdams par bya// zhes gsungs so// gleng gzhi'i le'u ste dang po'o//// thog ma'i sangs rgyas 'od mi 'gyur ba/ rtogs te sangs rgyas ma byung/ ma rtogs te sems can ma byung pa'i dus na// gzhi dngos po'i gnas lugs ji ltar lags/ snang ba na ji ltar snang/ ming du 'dogs na ji ltar 'dogs// de las 'khrul pa ji ltar lags/ ces zhus pas/ a ti spyi gcod bstan par bya/ ces gsungs so// a ti spyi gcod kyi rgyud las// gling gzhi'i le'u ste gnyis pa'o//// de nas bka' stsal pa/ snang ba ni rang bzhin gyi snang pa zhes bya'o// dus de tsam na gnas pa'i rtogs med kun gzhi zhes kyang bya'o// ming du 'dogs na mi zad pa'i mdzod kyang bya'o// spyi pa chen mo 'khor ba'i gzhi la// sems can gyi thugs/chos nyid spangs pa'i klong zhes kyang bya// rang snang gi nam mkha' zhes kyang bya'o// de'i rtsal las shes pa rkyang pa khyab pa'i shes pa/ rgyu ba'i shes pa/ mi rgyu ba'i shes pa/ lung la bstan pa'i shes pa zhes kyang bya ste// dus de tsam na thog mtha' med pa'i snying po zhes kyang bya'o/ zhais gsungs so// a ti spyi gcod kyi rgyud las gleng gzhi'i le'u ste gsum pa'o//// g.yo ba ni spyi sa chos kyi sku rtog med kyi sbubs nas g.yos// sgo ni gsum nas 'byung ste/ gsal ba rtog med kyi sgo// stong pa mtshan med kyi sgo// gsal stong btsad med kyi sgo nas/ rnon po'i sgo bye nas khyab pa'i rig pa byung ste/ rig pa rkyang pa de la 'gro ba'i sgo med pas/ma ning gi sgo bye/ rgyu ba'i rig pa'i phyir thon/ rtul po'i sgo phye/ mtshan ma'i rig pa shar/ rno rtul gnyis med kyi sgo 'gags pas/ myong pa'i rig pa smon no// yan lag gi sgo bye/ rig pa dngos su smin te/chos dbyings rang byung gi sbubs ces bya ste/ sna tshogs la 'jug go/ ces gsungs so// a ti spyi gcod kyi rgyud las/ rig pa dngos su smin nas 'khrul pa'i dpe ste le'u bzhi pa'o//// de nas mtshan dang dpe byad longs skur 'khrul pa bka' stsal pa/gsal ba snod kyi sgo// stong pa bcud kyi sgo// 'dzin pa ma zhugs pa'i sgo/ kha dog gsal ba yan lag gi sgo// mtshan ma ma rig par shar/ myong ba'i rig pa skyes/ rgyu ba'i rig pa yul 'od lnga ru shar te/ dang po rtsi yin mnyam du shes pas/ bar du yin min gyi shes pa/ tha mar yin gdengs kyi shes pas gcad bas yid 'khor lo gsum zhes de la bya'o// dus de tsam na yar sangs ma rgyas/mar 'khor bar ma 'khyams pas lung ma bstan gyi sgo zhes bya'o// bar der kun tu bzang pos rig pa ye shes lde mig cig/ 'phags pa blo gros mi zad pa zhes bya ba mun pa dmag tu gyur pa khang dgu rim gyi nang na yod do// de lta ru phyin pa/ khang pa dang po na mun pa gnag la 'jigs/ gnyis pa na ya ma nag po za tshul gyi dbu/ gsum pa na bdud sbyin gyis srog gcod/ bzhi pa na srin po'i rgyal po'i dbugs len// lnga pa ni gang la dkar po phyag na dung gi mkhar ba bsnams nas brdeg cing gsod// drug pa mun pa'i nang na me rlung gis ma bskyod bar du 'dug/ bdun pa na nyi zla phrug cig la shar nub med par 'dug/brgyad pa na nor bur rin po che la lha'i bu rnams rtse zhing snang/ dgu bar phyin pas yid bzhin gyi nor bu/ rin po che 'od 'bar ba'i rtsar 'phags pa blo gros mi zad pa zhugs nas/ kun tu bzang pos bka' stsal pa/'gro ba'i lam nor thar pa'i go yang 'gag/ ma rig rmongs pa thugs rje'i zhags pa bzung/ 'phrul gyi sgo ma phyed pas mun pa'i nang du 'khyams/ ces zhus bas 'phrul gyi sgo phyed pas/ mun pa'i nang du 'khyams/ ces zhus pas/ 'phags pa blo gros mi zad pas bka' stsal pa/ thams cad 'byed pa 'khrul gyi lde mig 'di// yid bzhin nor bu'i nang nas ston la sbyin// nyi zla'i sgo phye snang stong dbyer med 'byung// shes rig sgro brtags dgra la ltos// me mar 'od la lta nam mkha' gser gyi sgron ma ltos// ces gsungs nas/ 'phags pa blo gros mi zad pa mi snang bar 'gyur ro// mtshan dang dpe byad las kun tu bzang por sangs rgyas pa'i le'u ste lnga pa'o//// khams gsum gyi sems can sems can du 'khrul pa gsungs pa ni/ gzhi rin po che gser gyi sgron ma nas/ mi zad pa'i nor la sbyang pas/ kun la snyoms pa'i zad ma la sbyin/las kyi lus blangs rgyu rkyen dus kyang mtshungs/ ma rig le los snyoms las dmar la sbyar/ srid len gnyis kyi dus mtshungs/ rig pa yul dang mtshungs/ 'byung du thabs med ri dwags rgyar chud 'dra/ma rig rmongs pa'i sems chags sdug bsngal med skyes dang/ las kyi phyir thon bag chags sna tshogs brtas/ pha dang mar bltas dgra dang gnyen du bzung/ yul khang khyim khang dag la rten bcas nas/ma bcad yul lung dang bdag gir bzung 'dzin/ mi sdod dbugs chad gar 'gro shes par gyis// 'gro drug las kyi sdug bsngal cha mchis sam// 'gro drug rtag tu 'khyams pas don dang rtsang phrad de// de bas man ngag gdams pa 'di la ltos// ces gsungs so// a ti spyi gcod kyi rgyud las khams gsum du 'khrul pa'i le'u ste drug pa'o//// man ngag gdams pa bstan du gsol/ bka' stsal pa/ phyi'i me long ltas tsam na/ 'gro drug srid pa wa le gas la/ 'gro drug snying po sbubs na gnas// ma dag 'khrul pa'i snang ba de// rang grol yin par rtogs tsam na// rang byung ye shes dgongs pa thob// nang gi me long ltas tsam na// rgyud drug chags sdang wa le gsal// rgyud drug rang gi sbubs su gsal// rgyud drug rang grol du shes tsam na// rang rig ye shes kyi dgongs pa thob// gsang ba'i me long ltas tsam na// 'gyu ba thogs med du wa le gsal// rang shar ye shes kyi sbubs su gsal// 'gyu ba rang grol du shes tsam na// lhag mthong ye shes kyi dgongs pa shar// lhun grub srid pa'i me long gi nang na thams cad gsal// ye shes dri med kyi dkyil 'khor du thams cad rgyas// mtshan ma sna tshogs kyi me long du thams mchi// chos sku me long gi nang na rtog pa skye mi srid// sprul sku mi long gi nang nas// 'gyu ba med na ye shes gsal mi srid// 'bras bu thig le nyag cig la// sku gsum 'grub mi srid// rnal 'byor ye shes ngos zin dus su shes pa rgyun gnyis su 'char mi srid do// ces gsungs so// a ti sbyi gcod kyi rgyud las/me long gnad tu brdeg pa'i le'u ste bdun pa'o//// yang bka' stsal pa/ rig pa chos kyi sku'i don rtogs na/ 'gyu ba zang thal gcad pas dmyal ba yang rdzogs pas phyir gcad// thig le rang grol du shar bas lha ma yin rdzogs te spyir gcad/byang chub sems kyi 'ong gsal rin po che la longs spyad pas lha rdzogs ri spyir gcad/ 'gro drug rang grol du shes na/ khams gsum lus dang bag chags 'khrul te mchi'o// ces gsungs so// a ti spyi gcod kyi rgyud las/ 'gro drug g.yang sa gcad pa'i le'u ste brgyad pa'o//// yang bka' stsal pa/ 'od gsal du mu gcad nas rig pa la stegs bcas pas mu stegs kyi lta ba spyir gcad/thig le zang thal yid la 'dogs pas yi dwags rdzogs te phyir gcad/ thig le sbyor ba las byol nas zang thal du song pas/ byol song rdzogs te phyir gcad/ de la zhen pa mi mnga' bas/ mi yang rdzogs te phyir gcad/ rang don 'od gsal zab mo la spyad pas rang sangs rgyas sangs rgyas kyi lta ba spyir gcad/ sgrib pa thams cad zang thal du byang nas 'od gsal du sems dpa'/ byang chub sems dpa'i lta ba spyir gcad/kri ya ni 'od gsal du bskri nas yang dag pa'i don rtogs pas/ kri ya'i lta ba spyir gcad/ 'od gsal rgya chung du ma yin te/ snang srid yo ga 'od gsal du rtogs pas yo ga'i lta ba spyir gcad/thams cad ma lus par 'od gsal chen po'i ngang du rdzogs pas yo gsal bas ma hA yo ga'i lta ba spyir gcad/ skye ba med pas A gnyis su med pas nu rtses byas te/ thams cad gnyis su med pas/A nu'i lta ba spyir gcad// thams cad 'od gsal ngang rdzogs pas/ lta ba thams cad che bas na/ rdzogs chen gyi lta ba spyir gcad pas/ bde bar gshegs pa sku dang ye shes su 'khrul pa'i gol sa gcad/ces gsungs so// A ti spyi gcod kyi rgyud las mtshan ma lam gyi gol sa gcad pa'i le'u ste dgu pa'o//// yang bka' stsal pa ye shes ngos bzung bshad par bya/ ces gsungs so// de nas 'gag pa med pas ye shes kyi skye ba bshad pa/dang po ye shes ngos bzung ba la gsum ste/ 'gyu ba de la zhag cig tu lta ba dang gcig/ nub gnyis pa 'od gsal thun du bcug la bskor ba dang gnyis/ nub gsum pa 'od gsal gyi mal du bzung ba dang gsum mo// dang po zhag cig tu ltas pas/ 'gyu ba bun long gi song bas/ mtshan ma zhi ba ni zhi gnas rtse cig gi bsam gtan zhes byas te/ gang zag bdag med nyan thos dang khyad med do// snang ba 'di stong pa la me long gi skar ma ltar mthong ba ni/ chos kyi bdag med bsam gtan de/ des kyang sangs mi rgya bas/ phal chen lta ba kha rkyangs dang de gnyis na gnas so// dbu ma'i lta bar kyang ma bslebs so// nub gnyis pa 'od gsal du bskor ba la gsum ste/ snang ba 'od gsal du thun gsum du bskor bas ni phyi nang rang snang du ngo sprad de/ rta dkyus pa'i 'drog la me tog chad pa dang 'dra'o// thun gsum tshogs bdun bskor bas nang snang bar rang grol te/ dug la sngags kyi thebs pa dang 'dra'o// thun gsum du 'gyu ba gsang lam 'od gsal du bskor bas gsung snang ba rang grol du shar te ga bur tshab nad kyis zos pa dang 'dra'o// de ni thun tshad bzang ba bstan pa'o// da ni 'od gsal lam du bzung ba bstan te/ nub tha ma la thun gong du bshad pa 'khor lo de bskor ba'i gting la ji tsam gnas lta ba shin tu gces te/'khor lo dang gnas pa gsum cha gsum gnyis mgo la 'char ram phyed 'char ram/ bzhi car 'char ram/ lnga cha'am drug cha'am ji tsam 'char ba ni/ lam du 'jud pa yin te/ dbang po rab 'bring rtags dang sbyar/mi 'khor ba'i dbang med pa'i thabs ni/ gong ma snang ba bun ne ba de lam bzhag par/ mig rtsa mthong byed tu gyur pa la snang ba gtad pas/ 'gyur ba de kyus tser byung ba'i dus su/ 'bras bu dril sku la bskor bskul/ snang ba la yan du chug/ yang bskul gyin bskor/ btsun ma zo chu rgyud ma 'dra ba mi dmigs/ skyi ser 'dra ba'i 'gyu ba/ 'khor lo lta bu'i nyams/ nyi zla lta bu'i don/ dper na/ 'khor lo sgyur ba'i rgyal po de rin po che gser gyi khang pa la sogs pa dang/ rin po che'i steng rnams nas 'gro ba las thog mi 'gro ba bzhin/ 'gyu ba 'od gsum du bskor na 'od gsal gyi mal las mi 'da'o// gsal gdab sgrar 'gyur du bskor/ wal gyi byung pa'i dus su mal du gzhug/ chu bo rgyun gyi rnal 'byor ces kyang de la bya// rdzogs pa spyi gcod ces kyang de la bya/ ces gsungs so// ye shes ngos bzung ba'i le'u ste bcu pa'o//// yang bka' stsal pa/ rtags kyi rim pa bshad par bya/ 'gyu ba ngos zin na ye shes mi 'char mi srid de/ dang po lus 'dar ba snyam byed pa dang/ 'gyu ba de ngos zin pa'i rtags/de nas lus 'gul mi shes pa mnyam byed pa'am thang de ma 'ong ste/ 'gyu ba de sangs te 'ong ba'i rtags/ de nas 'dag pa la skor phor btab pa'am// sbos dang sbos rgya lta bu 'ong ste/ ye shes 'char ba'i rtags/'gyu ba de la 'khor lo ma bskor kyang 'od gsal skam du zhugs pa ni/ 'od gsal lam du tshud nas brtan pa thob pa'o// bkrag shes mdangs gsal rig pa khong nas grol// skran dang nad kyang 'byang bar byed pa'i gdams pa 'di// rnal 'byor nyams su len pa 'ga' rnams la// bla ma dam pa'i rkyen du shar nas kyang// myur du gdams pa 'di dang phrad par shog/ ces gsungs so// 'jam dpal bshes gnyen rjes su yi rang pa'i le'u ste bcu gcig pa'o//// a ti rdzogs pa gsang ba spyi gcod kyi rgyud las nyams kyi gdams ngag lhug pa rin po che sgron me zhes bya ba a ti spyi rgyud rdzogs so//// sang+ga laM/

CLOSE WINDOW