CLOSE WINDOW

Gpb054.006
བོད་ཡིག

lcags 'brel bzhugs so// ! dpal rdo rje sems dpa' la phyag 'tshal lo// chos nyid kyi skabs 'chad te/ rang bzhin gyis gnas pa'i don ston to// zhes pa ni/ nam mkha'i rang bzhin ni/ dper na nyungs 'bru mar gyis khyab pa dang 'dra bar kun la khyab par gnas pa ste/ rdo rje ni 'dus ma byas pa'i don to// sems dpa' ni snying po byang chub la dgongs pa nges par 'grel te/ che ba rnam pa lnga dang ldan par bzhugs so// lnga gang zhe na/ mngon pa'i sangs rgyas pa'i che ba dang// bdag nyid chen po sangs rgyas pa'i che ba dang// chos kyi dbyings su sangs rgyas pa'i che ba dang// de yin pas sangs rgyas pa'i che ba dang// thams cad nas thams cad du sangs rgyas pa med pa'i che ba'o// kun bzang yangs pa chos kyi dbyings// zhes pa ni/ ma 'dres pa dang yongs su rdzogs pa ni/ chos kyi dbyings te/ kun tu bzang po'o// de yang bya ba thams cad dang bral ba'i phyir/ mi gnas pa'i dbyings la rnam par gnas so// rnam dag lam chen kun sgrol phyir// zhes pa ni/ btsal ba thams cad dang bral ba ni lam chen po ste/ rnam par dag pas sgrol ba'i phyir ro// mi skye mi 'gag cir mi dgongs// zhes pa ni/ ji bzhin pa'i mnyam pa nyid la dmigs pa'i yul med pas skye ba med de/ de bzhin du bzung ba dang 'dzin pa'i mtha' spangs pas/ yul gang la yang mi gnas pa'i phyir/ cir yang mi dgongs pa yin no// byams pas don nyid rnam sbyang phyir// zhes pa ni/ bdag dang sems can du ma mthong ba ni// byams pa chen po'i don to// phyi nang gi yul thams cad mi dmigs pas rnam par sbyangs te/de mngon sum du bya ba'i chos thams cad dang bral bas/ chos thams cad la mi gnas pa ni/ snying rje chen po'o// gang ltar yang bdag dang gzhan gyi don du mi dmigs pas// snying rje chen po cir mi mdzad// ces gsungs pa yin no// che bas che ba'i zab mo yi// zhes pa ni/ che ba ni chos nyid do// che ba'i che ba ni sems can thams cad/ zab mo byang chub kyi zhing yin pas so// de yang 'khor ba dang mya ngan las 'das pa mnyam pa nyid kyi snying po yin pa dang/ yon tan rgya mtsho la legs pa dang// sa yi rim pa la stsogs par sgros mi 'dogs pa'i phyir na// yon tan cir yang bsngags pa med// ces 'byung ba yin no// don rnams ji bzhin mi skyed de// zhes pa ni/ chos thams cad nam mkha' dang 'dra ba la/ bya ba dang tha snyad de/ ji bzhin pa la mi gnas pa'i phyir/ bya ba'i yul thams cad dang bral ba'o// bya ba med pas grol bas sgrol// zhes pa ni/ zhi ba chen po la bya ba med de/ ci'i phyir/ 'gro ba thams cad zhi ba'i rang bzhin yin pas na/ rang las 'byung ba'i mthu des grol la/thob pa med pa'i dbyings mngon sum du gyur pas grol ba yin no// rang 'byung ye shes rtsal med pas/ zhes pa ni/ gzhan gyi mthu la mi brten cing rang las 'byung bas rtsol ba med pa'o// grol nas grol pa'i lam yang ston// zhes pa ni/ de ltar rig pa'i rgyal po rang dbang du gyur ba na grol ba ste/ mngon sum pa'i chos nyid des grol ba nyid du snang ba'i phyir ro// chos nyid kyi skabs rdzogs so//// skabs dang po'o// da ni rang bzhin gyis gnas pa'i skabs 'chad te/ ji ltar sems can thams cad la sangs rgyas rang bzhin gyis gnas pa'i don ston to// 'byung ba chen po bcom ldan 'das// zhes pa ni/ 'byung ba lnga po ni chen po lnga ste/ji ltar zhe na/ sa rdo rje dang/ chu rdo rje dang/ me rdo rje dang/ rlung rdo rje dang/ nam mkha' rdo rje/ de la nam mkha' rdo rje ni chos nyid snang ba ston pa'i sangs rgyas so// sa rdo rje ni chos nyid ye nas gnas gzungs 'dzin pa'i sangs rgyas so// me rdo rje ni chos nyid rin po che'i sangs rgyas kyi rang bzhin no// chu rdo rje ni chos nyid mtha' yas pa'i sems can thams cad la thugs rje chen pos brlan par mdzad pa'i sangs rgyas so// rlung rdo rje ni gti mug chen pos khebs pa'i sems can rnams la/ shes rab chen pos skyod ste/ 'od pa chen po las sgrol ba'i sangs rgyas so// de ltar 'byung ba chen po lnga po 'di yang/ sangs rgyas rnams kyi sku dang/ gsung dang/ thugs so// 'gro ba khal gyi ni lus dang ngag dang yid gsum ste/ chub par gnas pas 'byung ba chen po bcom ldan 'das so// 'gro ba kun la rang bzhin gnas/ zhes 'byung ba yin no// de la phyin ci log tu bslang pas khrid kyang/ gzhan las mi 'byung gi/ rang gi rig pa las byang chub 'byung bas na/ byin ci log tu rnam brtags kyang// grol ba rang 'byung gzhan las men/ces 'byung ba yin no// skabs gnyis pa'o//// da ni rang bzhin gyis che ba la gnas pa'i skabs 'chad ste/ de yang yongs su rdzogs pa dang/ gzhan gyi dbang las mi 'gyur ba dang/ rang bzhin gyis che ba la gnas pa'i don ston to// che ba'i ye shes rnyed dka' ba/ zhes pa ni/ sangs rgyas kyi chos nyid ni/ shin tu zab cing 'phra la rtogs par dka' ste/ mi snyed pa'i rnyed par dka' ba la sgyu mar gnas pas/ mngon sum rnyed pa ni shin tu dka' ba'i phyir ro// shes rab thabs la brten pas 'grub/ ces 'byung ba ni/ mi dmigs pa'i klung las chos nyid kyi rang bzhin du 'char ba ni shes rab/ de las kun tu bzang po'i/longs spyod rdzogs par sbyor bas thabs yin te// mnyam pa nyid du bdag mang pa'i bde ba la dus gsum du gnas pas 'grub pa yin te/ de ltar sgyur ma'i spyod pas/ de la ming tsam du gnas shing sbyor gyis kyang// rang bzhin gyi ye shes bde ba chen po// rang gi rig pa las 'byung ba'i phyir// ming tsam gzhan la brten 'dra yang// mngon sum bde ba rang las byung// zhes gsungs pa yin no// skabs gsum pa'o//// da ni btsal ba dang bral ba'i skabs 'chad te/ rtsol ba'i sgrib pas nyid du gyur pa'i don ston to// cho 'phrul chen pos dka' ba min// zhes pa ni/ ji bzhin pa la mi g.yo bar gnas pa ni cho 'phrul lo// yon tan kun dang stobs kyi rnams// zhes 'byung ba ni/ yon tan ni sangs rgyas rnams kyi che ba/ stobs dang ma 'dres pa dang/ gzungs dang/ rnam par thar pa/ sgyu mar ming du'ang grags pa'i rnams la dmigs pa ste sgrib pa'o// mi dmigs pa'i shes rab la brten pas/ rang gi ye shes kyi mar me 'byung bas/ de bzhin du rtogs pa'i mthus// sgyu ma'i 'jig rten sbyong ba dang/ sgyu mar ston pa dang/bde ba dang sdug bsngal du snang ba rnams zhi bar ston pa'i thabs der 'char bar mdzad pas na/ ji bzhin rtogs pa phra ba las// de ma thag tu rang las byung// zhes gsungs pa yin no// phra ba ni dmigs pa'i yul ma yin te/nam mkha'i rang bzhin no// snang ba med pa'i chos nyid ni// ma btsal bzhag bas bsgoms pa yin// zhes 'byung ba ni/ chos nyid ni/ gdong nas ma gsungs pas/ rgyu'i rang bzhin dang/rkyen gyi rang bzhin med pa'i phyir/ snang ba med pa yin na/ bya ba med pa'i chos rnams la byed par rtsol ba ni/ sdug bsngal chen po'i rgya mtsho mtha' med pa la 'bog pa ste/ de ni shin tu dgal bar dka'o// de bas na chos ji bzhin pa la gnas nas/ mnyam pa nyid kyi rgyan gyis bzhag cing/ kun tu bzang po rol pa la/ mi nyams par gnas pa ni bsgom pa chen po'o// de dang der ni rnam brtsal na// de las de bzhin de mi 'byung// zhes pa ni/ de ni bzhin nyid do// de dang der brtsal ba ni/ nam mkha' khang pa 'bubs pa dang 'dra ste// phyin ci log tu gyur pas na// de las de bzhin de mi 'byung zhes gsungs pa yin no// skabs bzhi pa'o//// da ni brjod pa dang bral ba'i skabs 'chad ste byang chub sems kyi rang bzhin mi brjod pas na tha snyad thams cad bral ba'i don ston to// mchog tu gsang ba'i chos 'di ni// zhes pa ni/cir yang mi dmigs bas rang bzhin med/ mtshan ma thams cad dang bral bas gza' ba'i yul med de/ brjod du med pa'i phyir/ phal gyis mi gtogs pas gsang ba chen po yin no// de bzhin du tshig gi 'bru thams cad dang bral te/chos nyid du gnas shing/ nam mkha'i rgya dang 'dra bar gyur pas na// bdag dang gzhan du mi 'grub ste/ bsnyad pa'i rgyu med cing thos par gyur pa'i mthu mi 'byung bas na/rna dbang gzhan las thos mi 'gyur// de bzhin lce'i dbang pos kyang// de la brjod du rdul tsam med// zhes 'byung ba yin no// skabs lnga pa'o//// da ni 'gro ba las kyis mi 'khol ba'i skabs 'chad de/byang chub sems kyi rang bzhin la gzhan gyis mi 'khol ba'i don ston to// 'gro ba'i sdug bsngal byang chub sems// kun tu chub pas rnam par rol// zhes 'byung ba ni/ 'gro ba thams cad kyi rgyu ni byang chub kyi sems kyi rang bzhin yin no// bslad pas na sdug bsngal yang yin no// de la yang bde bas kun tu chub pa dang/ sdug bsngal gis g.yen spyod de/ 'khor ba na rtsed mo dang 'dra bar gnas te/ chos thams cad la rang bzhin kun tu chub bar rol lo// de la yang bdag med pa dang/ mnyam pa nyid la mi bskyod par gnas pa'i bde ba len pas na/ de la bskyod pa med bzhin du// nam mkha'i mtha' dang mnyam par gnas// zhes 'byung ba yin no// khyad par cir yang mtshungs pa la// las so zhes ni rnam par brtags// zhes pa ni/ las zhes bya ba ni phyin ci log tu mthong ba'i ming bla dgas te/ de yang yod pa ma yin no// sems can byang chub kyi zhing la kun tu bzang po'i bde bas mtshungs par gnas te/ las kyis mi 'khor ro// de yang ci'i phyir zhe na/ ma ltos pa'i phyor ro// gal te las kyi mthu btsan zhing rdo rje dang 'dra ba yin na ni/las ni snga la sems can ni 'chi bas 'gro ba las kyi dbang gis 'khor zhes bya ba'i dbang du 'gyur te/ grol thar ba mda' bar 'gyur ro// de la sems can ni snga la/ las ni 'chi ba'i phyir/ las nyid byang chub kyi rang bzhin te/ nyon mongs pa'i dbang du mi 'gyur ba'i phyir/ ci ste de lta'i dbang 'gyur na// rang 'byung ye shes yod ma yin// ces 'byung ba yin no// rgyu nyid rdo rje rkyen dang 'dra// zhes pa ni/rgyu ni mi gnas pa'i byang chub kyi sems so// de las mi skye ba'i chos kun tu bzang po'i rnam par rol pa'i 'byung bas na rkyen yin te/ chos thams cad kyi rang bzhin mi skye ba'i chos chen po'i mthu dang ldan pa'i phyir ro// ma bsgrubs par grub pa'i byang chub chen po'i snying po las mi g.yo bas na/ ma skyes pas na 'jig pa med// gdod nas snying po byang chub la// zhes bstan pa ste/ de la yang don dam pa'i btsal pa dang// 'dus ma byas kyi re ba thams cad dang bral ba'i phyir/ chos kyi gnas chen por 'gyur te/ mnyam pa nyid la gnas pas na// btsal ba'i bsam pas dbyings mi bskyod// ces 'byung ba yin no// skabs drug pa'o//// da ni btsal sems dang bral ba'i skabs 'chad te/ re ba 'jog pa dang smon lam gnas dang/ skye ba khyad par gyur pa'i don ston to// yon tan chen po'i bsam gtan ni// zhes pa ni/'jig rten 'di'i nyon mongs pas zin pa la sems kyi rang dbang bde ba skad cig mas/ bsod nams dang ye shes kyi tshogs bsags pas/ bsam gtan chen po'i gnas su bzung nas spyod pa rnams so// bsam gtan nyid pas bsam du med// zhes pa ni/ bde ba'i gnas su bgrod pa ni bsam gtan te/ gang de la 'gog pa'i yul de bsam du med pa ltar// ma bsams ma sbyangs chos nyid bzhin// zhes pa ni/ma bsams pa'i cha dang/ ma sbyangs pa'i cha gnyis ka/ rnam par rtog pa'i mthus 'khrul ba'i shes pa skye ste// skyon yin pa'i phyir/ rnam rtog nyid las ye shes skye/ zhes 'byung ba yin te/ bgrod cing sbyong ba la mi ltos par rig pas ji bzhin ba'i ye shes rang las 'byung bar 'gyur ro// 'phra ba'i sgo mor ming btags nas// zhes pa ni/ yul med pa la yod par rtogs pa ni 'phra ba'i sgo mo'o// sems kyi dben pas lam 'tshol zhing// zhes pa ni/ 'khrul pa'i dbang gis 'dra bas sems bslang ste/ dben zhing dgon pa la chags shing lam du mthong bas/ dgon pa'i rgyud du dben 'dzin te// brtags na rnam par rtog 'gyur bsgom// zhes 'byung ba yin no// rgyu dang 'bras bur ming 'dogs shing// dge sdig gnyis pa rnam par sel// zhes pa ni/ rnam par ma byang ba'i chos thams cad ni rgyur lta/ de las nyon mongs pa 'byung ba ni 'bras bur ming btags pa'i phyir ro// dge ba dang sdig pa gnyis rgyu gcig pa las rnam par phye ste/ nam mkha' la bgo bsha' byed pa dang 'dra bar skye ba med bzhin du/ 'jig rten 'di las 'byung ngo zhes// blang dor brod pa mchog tu skye// zhes 'byung ba yin no// skabs bdun pa'o//// gnyis su med pa'i skyon dang bral ba'i skabs 'chad ste/ gong ma'i skyon dang bral ba'i don ston to// chags dang ma chags tshig gi la// dbu ma bzhin te brag cha 'dra// zhes pa ni/ chags pa ni rang dbang med pa'i mthu'o// ma chags pa ni de nyid 'jil ba'i thabs kyi snying po'o// de ltar thabs dang shes rab zung du 'brel ba'i phyir/tshig gi lam ltar snang ngo// chags pa mi gnas pa dang/ mi chags pa mi gnas pas/ chos kyi dbyings su ro gcig ba'i phyir// khyad par du snang gis kyang gang ltar yang ma grub ba'i phyir brag cha dang 'dra'o// bde dang sdug bsngal rgyu mthun zhes// 'gro ba'i mgon po sems dpas gsungs// zhes 'byung ba ni/ byang chub chen por rtsol ba ni sdug bsngal lo// zhi ba mnyam pa chen po ni bde ba ste// mi dmigs pa thun mongs pa'i phyir// rnam par mi 'gyur ba'i dbyings la/ gdon mi za bar gnas pa yin pas na/ gzhan las ma byung gi 'byung gi 'gro ba'i mgon po sems dpas gsungs zhes 'byung ba yin no// skabs brgyad pa'o//// da ni ye shes rang las 'byung ba'i skabs 'chad de/ byang chub kyi sems rang bzhin bdag nyid chen po'i don ston to// 'dod chags zhe sdang gti mug kyang// byang chub chen po'i lam las 'byung// zhes pa ni/ 'dod chags su grags pa thams cad kyang sku'i rgyan/ bde ba chen po kun tu bzang po'i rol pa las// mtha' yas gdon mi za ba'i ting nge 'dzin/ pad+ma rigs kyi gtso bo// sems can gyi zhing yogs su sbyong ba'i rang bzhin no// de bzhin du zhe sdang dang gti mug kyang/ snying rje chen pos rgyud 'dul ba dang/ sgrol ba'i thabs su gnas pas/ che ba'i sku ste/ byang chub kyi yan lag bde ba chen po mi dmigs pa'i rang bzhin de las 'byung bas lam yin pa'i phyir ro// kun spyod yon tan rnam lnga yang// chos nyid dbyings kyi rgyan zhes gsungs// zhes pa ni/ zhi ba ni chos kyi sku ste/ mnyam pa nyid du gnas so// rnam par mi rtog pa ni/ thabs kyi rol pa'i byang chub sems te/ kun bzang ba dang/ kun spyod pa'i rgyan du gyur pa'i chos/ 'dod pa'i yon tan lnga yang mi 'gog la/ rang bzhin gyis dmigs su med pa/ snying rje chen po las byung ba'i bdud rtsi byang chub kyi sems mngon du 'char bar byed pa dang/ dug gsum sku gsung thugs su rdzogs par gyur ba'i phyir/ chos nyid dbyings kyi rgyan zhes gsungs zhes 'byung ba yin no// nam mkha' rtog pa skye med cing// rtog pa de nyid nam mkha' 'dra// zhes pa ni/ nam mkha' ni mi skye ba'i rang bzhin la/ skye bar rtog pa ni/ mtshan nyid mi 'gyur bas skye ba med do// rtog pa yang snga ma dang rjes bzhin du 'byung ba'i rtog pa la yang/yul med pas nam mkha' dang 'dra'o// mi chags nam mkha'i bsngo ba las// zhes pa ni/ mi chags pa ni/ byang chub kyi sems don chen po la gnas pa'o// thams cad kyi rgyu gcig pa'i phyir// bsngo ba med pa ste/ rang gis rig pa'i rgyal po nang nyid du 'char ba ni/ rang 'byung gi don po ste/ rang don chen po nam mkha' 'byung// zhes gsungs pa yin no// skabs dgu pa'o//// da ni mngon par byang chub pa las bzhengs te/ rdo rje dbyings kyi snying po na/ sems can 'dul bar dgongs nas/ shin tu bde ba chen po thams cad du mnyam pa nyid du spyod pa'i chos nyid/ rang gi sku las 'dus ma byas kyi rang bzhin/zla gsang thig le'i dkyil nas/ gzungs kyi rang bzhin don mi gtong ba dang/ don du mdzad pa dang/ don ltar ston pa dang/ don gyi rjes su 'jug pa'i thabs kyi rang bzhin yi ge a li/ka li zhes bya ba ston te/ gzungs kyi rol pa'i skabs 'di gsungs so// nga ni yongs su rdzogs pa dang gzungs kyi sbyor thabs kyi sgo lta ba'i khyad par gyi dgongs pa nyi tshe'i skabs 'chad te/thabs dang shes rab gnyis su med pa'i don ston to// rtog med mnyam nyid chos kyi sku// gzung bas mi zin chu zla 'dra// zhes pa ni/ rnam par mi rtog pa ni mnyam pa nyid de/ de la bya ba dang brtsal ba'i yul med pas chos nyid de/ji bzhin pa'i sku ni mtha' med par khyab pas chos kyi sku'o// de la dus gsum gyi de bzhin gshegs pa ming tsam du gnas la/ 'dul ba'i dbang gi rdzu 'phrul chen po dang/ mthu bsam gyis mi khyab pa yang med pa ma yin te/ gzugs thams cad dang bral bas na gzung bas mi zin/ sgyu mas dbang bsgyur zhing/ don mdzad pa yang med pa ma yin pa'i phyir chu zla dang 'dra ste/ de ltar thabs kyi rol pas kun tu bzang po'i rgyal la dgod par mdzad pa'i phyir/thams cad kun tu bzang po rol pa'i gzugs su bstan te/ a li ka li zab tu bstan/ ces gzungs kyi rang bzhin a li ka li zab tu bstan pa yin no// nga ni chos thams cad kyi rang bzhin mi dmigs pa'i dpe bstan pa yi ge a zhes pas bstan bar bya ste/ byed pa thams cad dang bral bas/ bye ba'i don mi 'grub pa la/ thabs dang shes rab tu bstan te/res shig yi ge ma skye par bstan nas/ de nas gzungs kyi rang bzhin bstan par bya'o// de la ni a nud pa b+ha na swa ba b+ha sarba d+harma te/ chos thams cad ma skyes pa'i rang bzhin la ni chos kyi dbyings mi 'gyur ba'i rang bzhin/gu gu ni snying rje chen po ste mi gtong ba'o// ka ni kar ma ste thams cad byed pa'i don te/ mnga' bsnyes pa'o// li ni la la gsha' na zab mo'i gsang ba ste/ don thams cad byed pa'o// de la a ni/ snying rje chen po ste/ shes rab bo// li ni thabs kyi rang bzhin te gzungs so// ka ni gnas nas gnas su bskyod pa'i rang bzhin gyi mthu'o// li ni thams cad thun mongs pa'i don to// de la sems can thams cad kyi don mdzad pa'i thabs ston te/de ni a dang mdzes pa'i nga// pa dang yan lag spros pa bzhin// zhes pa ni/ ya ni bdag nyid chen po'i rang bzhin/ bde ba chen po la rol ba'o// mdzes pa'i ta zhes pa ni/shes rab kyi rang bzhin/ zla ba'i dkyil 'khor la gnas te/ thabs kyis rgyal po shes rab kyi rang bzhin la gnas pa'i don to// pa zhes pa ni grol mthar ba'i don ston te/ pad+ma'i rang bzhin de la 'gro ba thams cad skye bo dang gnas pa dang/bde ba dang sdug bsngal du gyur kyi/ yan lag tu 'gyur ba'i chos rnams kun tu spro zhing gnas te/ de lta bas na gzhan gyi 'dod chags kyang bdag gi la/ bdag gi 'dod chags kyang gzhan gyi'o zhes 'byung la/kun tu bzang po'i rang bzhin ni thams cad na bde bar gnas so zhes 'byung ste/ mi dmigs pa'i zab mo la bslang ba'i rnam sgrol ba'i phyir ro// spyod yul thun mongs yang rang gi rkyen gyis gsang bar 'gyur pas/ 'jig rten yongs kyi spyod yul la// sangs rgyas gsung gi zab mo 'byung// ces gsungs pa yin no// e ma ho sangs rgyas spyod yul 'di// btsal bas rnyed pa'i gnas med ste/ zhes pa ni/ chos kyi rang bzhin dngos po ci yang med cing/ shin tu 'phra ba'i phyir btsal nas sleb par mi 'gyur te/ ci'i phyir zhe na/ sangs rgyas kyi spyod yul mthas glags shing rnyed bar dka' ba'i phyir ro// drug gi chos bzhin yul med pas// mdongs pas nam mkha' bsnyabs pa bzhin// zhes pa ni/ de la chos drug ni gzugs sgra dri ro reg chos so// 'di ni chos thams cad sgyu mar ston pa'i gzhi ste/sangs rgyas thams cad kyi che ba nyid do// gang gis chos 'di drug phyin ci log tu mthong ba ni mdongs pa ste/ bdud rtsi spangs nas dug phyir 'brang ba ni// mdongs pas nam mkha' bsnyabs pa bzhin// zhes 'byung ba yin no// gong nas gong du tshangs pa'i lam// bya bral chos dang mthun pa med// zhes pa ni/ 'jig rten 'di las 'byung ba'i bsam pas bsod nams dang ye shes kyi tshogs bsags te/rim pas bgrod pas/ byang chub kyi sa dang/ tshangs pa dang/ rgya byin gyi gnas dang/ 'khor lo sgyur ba'i rgyal po la sogs pa/ gang ji tsam du bgrod pa'i yul can ni/ nyon mongs pa'i lam ste 'ching ba'o// bya ba thams cad dang bral bas nam mkha' dang 'dra ba/ yongs su zhi ba/ kun tu mnyam zhing mtha' yas pa'i bde ba/ rang bzhin gyis yongs su rdzogs pa ste rdzogs pa chen po/ ma bsams ma sbyangs ma bsgrubs ma bsgoms te/rang bzhin du gnas la/ gzhan la rag lus pa med de/ dper na yid bzhin nor bu rin po che'i rgyal po ltar/ chos dang chos ma yin pa'i gter thams cad 'byin nus pa'i phyir/mnyam par bzhag pa ste/ ci ste lam la bgrod 'gyur na// nam mkha'i mtha' bzhin thug pa med// ces 'byung ba yin no// skabs bcu pa'o//// nga ni yongs rdzogs pa'i skabs 'chad te/ byed pa med pa'i don ston to// de ltar de bzhin de'i phyir// de la de bstan de yang thob// zhes pa'i don ni/ de bzhin nyid ni 'gro ba thams cad la mnyam pa'i dbyings gcig tu gnas pa'o// de ltar gnas pa de yang ci'i phyir mngon sum du mi 'gyur zhe na/de bzhin nyid ni rtogs pa'i chos thams cad dang bral ba yin te/ rang las 'byung ba'i chos nyid dang// de bzhin bstan pas thob par 'gyur ro// de'i snying po de bas na// de las de byung ngo mtshar che// zhes pa ni/ de bzhin nyid ni byang chub kyi sems te/ byang chub kyi sems de ni chos thams cad kyi snying po yin pa'i phyir ro// snying po de las mngon sum pa'i bde ba kun tu bzang po'i rol pa 'byung bar 'gyur la/de dang dus thams cad du mi 'bral ba'i yon tan dang ldan pa'i phyir de las de byung ngo mtshar che zhes 'byung ba yin no// sngon gyi de dang da ltar de// de bzhin de'i gnas su che// zhes pa ni/ 'das pa dang ma 'ongs pa dang/ da ltar byung ba'i de bzhin nyid ni/ gnas 'gyur ba'am/ 'pho ba med ba'i che ba nyid de/ sngon zhes bya ba'i tha tshig ni/ phyi ma'i mtha' med pa'i don ston pa ste/ de bzhin nyid ni sems can thams cad sangs rgyas kyi zhing du gyur pa'i dbyings gcig pa'i phyir te de'i gnas su che ba'o// de ltar de'i lam 'dra bar/ zhes pa ni/ de ltar bgrod pa thams cad dang bral ba'i lam ni/rnam par grol ba chen po'o// rnam par grol ba ni mang po ma yin te/ gcig pa'i phyir ro// 'gro ba thams cad chos nyid mnyam pa nyid kyi dbyings la bgrod pa'i lam 'dra ba'i phyir/ de ni de'i rang bzhin no// zhes 'byung ba yin no// de dang 'dra ba yongs kyi lam// zla ba las byung rten dang bcas// zhes pa ni/ chos thams cad kyi de bzhin nyid ni/ mnyam pa nyid kyi rlung la 'dra ba'i phyir/ yongs kyi lam mo// skye ba med pa'i skye ba la sems can chen po yan chad thun mong du gnas te/chu zla'i gzugs brnyan dang 'dra bar brten cing chos kyi dbyings su ro gcig pa'i phyir/ mnyam pa nyid yin pa'i phyir te/ kun gyi mnyam nyid yin pa la// phyogs su bltas pas 'grub pa med// ces 'byung ba yin no// skabs bcu gcig pa'o//// nga ni bde ba chags pa dang bral ba'i skabs 'chang ste/ chags na skyon du 'gyur ba'i don to// da lta'i bde dang phyi ma'i bde// mngon sum pa dang rgyab nas 'byung// zhes pa ni/ chos thams cad kyi bde ba'i rgyu ni/ nam mkha' dang 'dra bas/ bde ba snga ma dang phyi ma zhes bya ba med do// de la sangs rgyas su bya ba'i yan lag/ye shes chen po mdun nas 'byung ba dang/ rgyab nas brnyes pa'i ye shes dang/ sangs rgyas kyi che ba'i yon tan grangs med pa rnams len pas thob par bya ba dang/ thob zin pa'i rnam pa thams cad kyang mtshan ma med pa'i dbang gis bltas pa'i mthus 'grub mod kyi/de yang rnam pa'i skyon yin pas de la brten par mi bya'o// ces 'byung ba yin no// skabs bcu gnyis pa'o//// nga ni gdong ma nas che ba nyid kyi snying po rang bzhin gyis gnas pa'i skabs 'chad ste/bya ba med pa'i don ston to// dus gsum gcig ste khyad par med// sngon med phyis mang gdong nas 'byung// zhes pa ni/ mi gnas pa'i dbyings la chos thams cad 'du ba dang bral ba med pa'i phyir/dus gsum gcig ste khyad par med do// chos kyi dbyings ni/ gcig char 'char ba ste/ mtha'i mun pa med pa'i phyir// sngon yang med la/ phyi ma yang med/da ltar yang med/ gdod ma nas gnas par rang byung ba nyid do// chos skus khyab pas gcig pa'i phyir// zhes pa ni/ mi gnas pa'i dbyings la mnyam pa nyid kyi phyir// chos kyi sku ni nam mkha' dang 'dra ste/nam mkha' mkha' ni kun la khyab la/ nam mkha' ni gnyis su med de/ gcig pa'i phyir ro// de ltar bas na che ba'i rgyan dpal phun sum tshogs pa mnyam par gnas pa'i phyir/ che bas chen po'i rang bzhin gnas// zhes 'byung ba yin no// skabs bcu gsum pa'o//// nga ni kun tu smon lam chen po dang bral ba'i skabs 'chad ste/ ci la yang mi gnas pa'i don ston to// srid pa gsum na sbyong ba yang// ming tsam sgyu mar snang ba ste// zhes pa ni/ srid pa gsum mi dmigs pas sgyu ma dang sprul pa lta bur sbyor ba'o// de la mi gnas pa'i thabs kyis gnas pa ni/ ming tsam du sgyu ma nyid du gnas pa'o// 'khor lo sgyur ba'i gnas chen yang// zhes pa ni/ 'khor los bsgyur ba ni gling bzhi'i rgyal por grags pa ste/ 'khor lo ni mi gnas pa/ sgyur ba ni rnam par sbyong ba'i mtshan ma ste/ de yang mngon par byang chub pa'i gnas thob pa med pa'i dbyings su gyur pa'i rgyu nges 'dul te de bas na/sgyu mas sbyong ba'i bsti gnas yin/ zhes 'byung yin no// rnam spyod dus la ltos pa'i rnams// dus der 'byung bar mi 'gyur te// zhes pa ni/ chos nyid ni ye nas gnas pa gcig car rdzogs pa yin pas/dus med do// dus med pa las 'byung bar 'dod pa rnams ni shin tu 'khrul pa ste/ dper na 'o ma 'dod bas rwa la zho 'jo bar byed pa bzhin no// ma bral smon pa spyod pas na/zhes pa ni/ ma bral ba ni chags pa mi gtong ba ste/ rmi lam gyi nor dang 'dra bas/ spyad pa la sman par mi 'gyur ro// de ltar chos thams cad stong pa nyid kyi rang bzhin snang bar mi 'gyur ba dang/mngon sum du 'gyur ba'i mthu med par de la/ gzas shing 'khrul pa'i blos btsal bar 'gyur na/ ji ltar bcom ldan 'das kyis stong pa'i rang bzhin gsungs pa bzhin te/ ci yang med pas/ stong pa'i mtshan nyid gsungs pa bzhin// zhes 'byung ba yin no// skabs bcu bzhi pa'o//// nga ni lung ston pa'i skabs 'chang ste/ lung ni rna ba nas rna bar brgyud pa ste/ mngon sum bzhag par mi chags bas// brta ci rig pa tsam gcig bshad pa yin no// gcig ste rnam pa yongs kyis med// rnal 'byor nam mkha'i bya lam 'dra// zhes pa ni/ de bzhin nyid ni gcig ste/ rnam pa dang khyad par gyi ming med do// de ltar gleng gzhi thams cad bral bar sbyor bas rnal 'byor yin te/de yang mi gnas pa'i tshul gyis kun tu bzang po'i bde ba la rol pa ni/ nam mkha'i bya lam bzhin du mi chags mi gnas pa'i phyir ro// ma byung mi skye'i snying po la// zhes pa ni/ de bzhin nyid ni rten pa thams cad dang bral bas na ma byung ba'o// brjod pa'i mtha' thams cad dang bral bas skye ba med pas/ mtha' dang dbus gnyis ga la yang mi gnas pa'i phyir/snying po yin la/ smra ba dang bsam pa'i yul med de/ rang bzhin che bas bde ba la gnas pa'i phyir/ sgros btags chos kun ga la yod// ces 'byung ba yin no// phyi nang gnyis ka phyi nyid nang// zhes pa ni/ phyi ni brtsol ba'i byang chub sems so// nang ni de'i bde ba la gnas pa'o// brtsol ba med pa ni bdag med pas zhi ba ste nang ngo// nang de'i bde ba la gnas ba ni rgyu med pa'i dbyings la gnas pa/thob pa'i bsam pa dang ldan pas phyi'o// de ltar phyi nang gnyis ka la thob pa'i re ba ni/ phyi'i yul la mi 'byung gi nang nyid du bltas pas/ 'khrul pa'i phyi ma dag par 'gyur te/ 'di dang ni nang ma dag pa la phyi rol bsgom pa la brtsol ba'i nad do// zab mo'i cha shas rtogs yul med// zhes pa ni/ zab mo ni zhi ba chen po ste/ rnam par dag pa'i dbyings so// de la byang chub kyi sems mngon bar 'char bar byed pa ni cha shas 'phra ba ste/mi dmigs pas rtogs pa'i yul med do// srid pa ming tsam ldog pa'i stobs// zhes pa ni/ snang ba'i chos 'di dag thams cad rang bzhin gyis che ba nyid de mnyam pas zhi ba'o// de la yang 'khrul pas chags pa'i lta bas/srid pa ming tsam mo zhes 'khor ba'i phyir ro// rnam pa kun tu zin pa'i chos la mnyam par bzhag pa dang/ dgongs pa'i dbang dang/ rnam par dgong pa dang/ ting nge 'dzin la sogs pa sgyu ma'i rnam par thar pa thams cad 'ching ba ste/de bas ting nge 'dzin mnyam dang bral/ zhes 'byung ba yin no// de la tha tshig phyi dang nang// rang bzhin phung po khams bzhin gnas/ zhes 'byung ba ni/de la tha tshig ni rnam pa lnga ste/ lnga gang zhe na/ sa dang/ chu dang/ me dang/ rlung dang/ nam mkha' ste 'di lnga'o// 'byung ba chen po lnga po 'di/ de bzhin gshegs pa thams cad kyi che ba nyid de/ zab mo'i thabs kyis sems can thams cad la khyab par gnas te/thams cad kyang che ba nyid mi gtong ba'i dam tshig gi rjes su skyong ngo// de yang rang bzhin thams cad kyi gnas kun la gsang ba'i tshul gyi gnas te/ phung po ni mnyam pa nyid kyi gtso bo lnga'i mtshan nyid do/khams ni kun tu bzang po'i rol pa'i byang chub kyi che ba'o/ de bzhin du skye mched la sogs pa de'i rgyus sgyu ma la sogs pa la rol pa'-i thabs so// de bzhin du chos kyi rgyal po ltar dbang mdzad pas rtag tu bde ba la gnas pa dang mi 'bral bas blangs pa dang// dor ba med pa'i phyir dam tshig tu blang ba yang/ dus gsum de dang mi 'bras bas// tha tshigs mang du btags pa med// ces 'byung ba yin no// bam po bco lnga pa'o//// da ni mnyam pa nyid kyi chos la dbang bsgyur ba'i skabs 'chad de/ mi rtsol mi sems dpas lhun gyis grub pa'i don ston to// mi g.yo ba ni sku'i rgya// mi bskyod pa ni ye shes te// zhes pa ni/ chos thams cad skye 'gag med pa'i mnyam pa nyid la gnas pa ni/ sku nam mkha' dang 'dra bas kun la khyab pa ste// de ni phyag rgya chen po'o// de la len pa'i bsam pa dang/ mngon par rtogs pa'i yul med pas/ mi bskyod pa ni ye shes te// shes pa med pa'i dbang thob pas so// mi len pas na bdag med cing// mi 'dor tshig bral mnyam nyid do// zhes pa ni/ mi lon pa ni bdag med pas blang ba'i yul med pa'i phyir ro// smra bsam las 'das pas na/ ming dang tshig dang tshig gi don la sogs pa dbye gsal 'byed pa med pa'i phyir mi 'dor ba'i mnyam pa nyid do// gang dang gang gi gang du yang// kun 'khol kun spyod bdag las 'byung// zhes pa ni/ gang dang zhes pa ni 'das pa'o// gang gi zhes pa ni da ltar gyi'o// gang du zhes pa ni ma 'ongs pa'i don te/ de rnams la ming gis bgrang ba'i rnam pa dang bral te/dper na yid bzhin gyi nor bu rin po che/ mngon du gyur pa na ji tsam du spyod pa dang/ gzhan la ston pa dang 'dra ba ra/ rang dbang gi ye shes chen po dang ldan pa'i dus na/rnam pa brgya stong du spyod pa yang mi zad pa'i gter bdag las 'byung ba'i phyir/ kun 'khol kun spyod bdag las byung zhes 'byung ba yin te/ de bzhin du skye ba mi mthun pa'i dbyings ma yin pa'i phyir dang/chos thams cad kyang gcig pa dang/ kun tu bzang po'i thabs kyis 'jig rten kun la mnyam pa nyid du rol ba'i phyir/ 'di las skyes pa bud med ces/ mnyam pa'i rgyal pos sa yod ma gsungs/ zhes 'byung ba yin no// skabs bcu drug pa//// da ni dngos grub chen po'i bde ba thams cad len pa dang/ chags pa spong ba'i skabs 'chad te// de'i zhor la dka' thub las chos kyi don mi 'byung ba dang/ sems kyi gdung ba dang nyon mong pa'i don ston to// 'di la brtul zhugs drag shul gyis// gnas su bya ba mi med de// zhes pa ni/ chos nyid kun tu bzang po la shin tu bde ba dang bla 'og gi mchog gi thabs kyis dbyings la rol pa'o// dka' thub ni nyon mong pa len pa dang// sems kyi gdung ba ste/ 'khrul pa'i nad do// de lta bas na dka' thub ni/ brjod pa yang mi bya'o// de la mtshan ma med pa'i dbang gis na/thabs gang du rol kyang/ bde ba rang 'byung ba dang/ sgyu ma ltar gang du bskyed kyang/ thabs kyi mthu bsam gyis mi khyab pas de bzhin du 'gyur ba dang/ de bzhin du snang ba'i dmigs ston te/ de ni 'ching ba'o// a dang par ni rnam ldan na// sgyu ma'i bde ba 'byung bar 'dod// zhes bya ba ni/ a ni chos thams cad ma skyes pa'i rang bzhin gong du bshad pa nyid do// pa ni chos thams cad skyed pa'i bdag nyid pad+ma'i rang bzhin te/de ltar thabs dang shes rab tu ldan pas/ sgyu ma'i rang bzh-in bde ba gang 'dod pa ltar skye bar 'gyur ro// de ni zin pa'i skyon yin te/ rang bzhin du ma skyes pa'i skye ba ni ma yin pa'i phyir ro// rang bzhin gcig tu ma nges pas// ji ltar bltas pas der snang ste// zhes bya ba ni/ ci'i phyir zhe na/ rang bzhin gcig tu ma nges la// bzung ba dang 'dzin pa'i mtha' ma spangs pa'i phyir skye bar 'gyur bas/bltas par gyur pa'i skyon snang ba ste/ chos nyid kyi 'khrul pa ni 'gyur ba yin la/ ming 'dogs pas rkam pa'i rgya mtsho'i brlabs kyis/ kun tu snang bar 'dod cing rtsol ba ni sangs rgyas su rtsol na yang skyon te/sems de'i bde ba la gnas pa 'khrul pa ni/ bus pa'i spyod yul 'khrul pa yin pas/ snang 'dod rtsol sems bde ba yang/ de ni de sgrib skyon chen yin// zhes 'byung ba yin no// byang chub yan lag kun gyi sgo// cha lugs bsgoms chu zla bzhin// zhes bya ba ni/ byang chub kyi lam la sa bcur bgrod pa dang/ thabs kyi snying po dang/ yi ge'i 'bras bus/ byang chub kyi cha lugs ji bzhin par 'dzin cing/ chu zla dang 'dra bar 'byung ba yang// bya ba dang ma bral ba'i mtha'o// de bas na/ ma gos ma chags 'byung 'gyur yang// bsgoms pas byis pa'i spyod yul bzhin// zhes 'byung ba yin no// de bzhin du byang chub kyi che ba'i sku// dmigs su med pa mngon du 'char te/ de byung ba yang bsgoms pa dang/ re ba'i mthu las gyur pa'i phyir// skyon chen po yin te/ de bas na bsgoms pas byis pa'i spyod yul bzhin zhes gsungs pa yin no// dkyil 'khor khro gnyer cha lugs kyis// khro bdag chen po'i lus bzung nas// yi ge mngon du byung na yang// zhes bya ba ni/ de bzhin du gong ma ltar bsgoms pa dang/ sgrub pa'i yan lag zhal nas gsungs pa'i dkyil 'khor bsgrubs pa'i mthus khro bo chen po'i sku'i rang bzhin/yi ge'i cha lugs kyi rang bzhin mngon du byung na yang/ bsgoms pa dang mngon du gyur pa'i skyon te/ zhi ba de bzhin nyid ni med pa'i phyir// zhi ba de nyid mthong ba med/ zhes gsungs pa yin no// de la yang ta la'i mgo bo bcad pa dang/ sa bon mes bsregs pa dang 'dra bar/ nyon mongs pa'i dbang gis/ 'khor ba chen por mi 'gyur ba'i thabs su bstan te/yan lag tu bsgoms pa'i thabs kyi skabs 'di ston to// rnam grangs brgya stong phrag yas pa/ gang ltar skyed kyang me tog skye/ zhes bya ba ni/ bsgrub pa dang/ dngos grub tu stsol ba la yang rnam pa gnyis te/nges pa'i lung dang rang bzhin no// de la nges pa'i lung ni// mnyam pa nyid kyi chos kyi dbyings la mnga' brnyes pas na/ gang ltar bsgrubs gang du dmigs 'char ba dang/ dbang chen gyi mangs bsgyur ba ste/'ching ba med pa'o// sprul pa ni kun tu bzang po'i rol pa'i rgyan las 'dus bar mdzad pa'i/ sgyu ma'i sprul pa bdag nyid chen po las gtong ba'i phyir/ sgrib pa dang 'ching bar mi 'gyur ro// mtshan ma med pa'i dbang gis na/bsti gnas de la 'byung mi 'gyur/ zhes bya ba ni/ chos nyid kyi byin gyis brlabs kyi mthu la rten pa ni/ dper na yid bzhin gyi nor bu rin po che la rten nas/ de nyid las yid bzhin gyi nor bu rin po che 'byung ba dang 'dra bar/skabs 'dir mtshan ma med pa'i chos kyi dbyings kyi dbang gis/ byang chub sems dpa' chen po rnams kyis sku gsung thugs kyi rang bzhin bsgrubs te/ 'grub pa'i rkyen gyis bde ba'i bsti gnas su 'gyur gyi/rang bzhin gyis shin tu gzhan la rag ma lus pa'i che ba nyid/ rnam par grol ba chen po ni ma yin no// skabs bcu bdun pa'o//// da ni rtsol ba dang bral zhing mnyam pa nyid du/mi g.yo bar gnas pas/ bde ba chen po thob par 'gyur ba'i skabs 'chad de/ byang chub kyi sems kyi rang bzhin gleng gzhi thams cad dang bral ba'i don ston to// gleng bral 'di la gnas pa ni/rnal 'byor 'di ni bskal ba bzang// zhes bya ba ni/ mi skye ba'i chos nyid la bya ba med de/ bya ba med pa ni gleng gzhi dang bral ba'o// de la bde bar gnas pa ni rnal 'byor te/ chos kyi gter nam mkha' dang ldan pas bskal ba bzang po'o// bdag dang gzhan don mi phyed pas// sgyu ma lhun grub yul la rol/ zhes pa ni/ mi skye ba'i chos la 'byed pa med de/ gzung ba dang 'dzin pa'i mtha' spangs pas/ chos kyi dbyings su ro gcig pa'o// chos kyi dbyings la 'khrul pa med pas/ rnam par dbyer med do// mi gnas par snang ba'i rnams ni/ sgyu ma chen po ste/ de'i mnyam pa nyid kyi yul la rol pas lhun gyis grub pa'i dbang chen no// skabs bco brgyad pa'o//// da ni chos nyid kun tu mi 'gyur bar gnas pa'i skabs 'chad de/ byang chub kyi sems nam mkha' lta bur mi 'gyur ba'i don ston to// lhag ma med pas yongs su rdzogs// 'gyur ba ma yin drang por gnas// zhes pa ni/ chos thams cad la mtha' dang dbus med pas byang chub kyi snying po yongs su rdzogs pa'i dbyings gcig pa'i phyir ro// chos nyid la gzugs med de/ nam mkha'i rang bzhin ye nas gnas pa la/ g.yo ba'i mtha' thams cad dang bral ba'i phyir/ de bsrang ba'i mthu dang ldan pa gang nas kyang mi 'byung bas na/ dus gsum du ma nor ba'i dbyings drang por gnas pa yin no// nam mkha' bzhin du mtha' mnyam zhing// gzhan las ltos 'gyur chos ma yin// lhun gyis gnas pas bde chen te/ mtshungs pa med pa'i ye shes kyi// rang gi mthu'i rig pa las// zhes pa ni/rang bzhin chen po'i ye shes ni mi dmigs pa'i nam mkha' dang 'dra ste/ rnam pa kun tu mnyam pa chen po'i phyir ro// mnyam pa nyid ni gzhan las 'byung bar mi 'gyur te/ smra ba dang bsam pa'i yul thams cad las 'das par sbyor ba ni/mtshungs pa med pa'i chos nyid kyi mthu/ rang gi rig pa las 'byung ba'i phyir/ sgom pa dang sgrub pa'i thabs dang stobs gzhan las mi rten pas chos ni gzhan las 'byung mi 'gyur// zhes gsungs pa yin no// sla zhing dka' la sla phyir dka'/ zhes pa ni/ ye nas snying po byang chub la gnas pa dang/ rdul tsam yang bya ba med pa'i phyir sla'o// mi dmigs pa ni nam mkha'i spyod yul la mtha' med pas/bgrod pa ni shin tu dka'o// de ltar yongs su rdzogs pa'i rang bzhin la/ 'di sangs rgyas so// 'di ni chos so// 'di ni dge 'dun no// zhes 'bras bu cig las rgyu gsum du phye ba ni bslad par gsungs pa'i phyir/bka' bar 'gyur la/ mi g.yo ba'i sla ba las/ rnam par brtsad pa'i bka' 'byung ngo// mngon gsum mi gnas kun tu khyab/ zhes pa ni/ chos nyid de ma thag pa'i bde ba ni mtshan ma med pa ste/dmigs pa'i yul ma yin pa'i phyir/ mig gis mthong ba dang/ rna bas thos pa'i yul med do// de bzhin du kun tu khyab pa dang/ snying rje chen po la gnas pa'i mthu tha mi dad cing mngon par 'char ba cig pa'i phyir/kun tu khyab pa yin no// de la yang thob pa dang btsal ba dang bcas pa'i rnams ni dper na ri 'ong gi rwa dang mo sham gyi bu bzhin du thob pa med de gnas pa med pa'i phyir/ ming tsam 'di zhes bstan par ni// rdo rje sems dpa' mtshon du med// ces gsungs pa yin/ de ni rgyu rkyen las ma grub pa'i phyir ro// skabs bcu dgu pa'o//// da ni rgyu rkyen las ma grub pa'i phyir de bzhin nyid rang las gnas par mi shes te/rnam par mi rtog pa'i dga' ba la chags pa'i skyon bstan pa'i skabs 'chad de/ bde ba chen po'i rgyu rkyen las mi 'grub pa'i don ston to// ngo mtshar rmad 'byung rol pa 'di// bya bral nam mkha' ji bzhin te// zhes pa ni/ bcom ldan 'das kyi sku dang gsung dang thugs kyi bdag nyid med pa las/ kun tu bzang po'i rol pa la mnyam par gnas pa ni ngo mtshar che'o// mi gnas pa'i sprul pas sgyu ma'i 'jig rten 'dul ba cho 'phrul smad du 'byung ba ste/bya ba med pa las bde ba'i mchog nam mkha' dang 'dra ba la mi 'gyur bar gnas pa ni/ chos nyid kyi mangs sems can kyi zhing la rol cing cir yang mi mdzad pa'o// cir yang mi dmigs gti mug las// de ma thag tu rang las 'byung// zhes pa ni/ de bzhin du rang las 'byung ba ni// nam mkha' dang 'dra'o// nam mkha' ni cir yang mi dgongs te/ gti mug chen po'o// de ltar gti mug chen po de las// de ma thag tu shes rab kyi rang bzhin chos kyi dbyings su 'char bar 'gyur te/ de bas na de ma thag tu rang las 'byung zhes gsungs pa yin no// 'di ni thams cad mtshungs pa'i lam// 'gro ba kun la rang bzhin gnas// byis pas bslad pas 'khrul pa'i phyir// zhes pa ni/ sems can thams cad mi dmigs pa las mnyam par gnas pa dang/ mtshan nyid grangs med par ston gyis kyang// snying po byang chub kyi rang bzhin gcig pa la/ phyin ci log gis bslad pas bsgribs pa'i phyir/ skad cig ma la gnas te/ de yang byang chub kyi rgyu yin pa'i phyir/ dper na sman zhes bya ba'i ming gis sems can thams cad sdug bsngal sel bar byed pa yin na/de yang sman pa zhes bya ba'i ming thob pas/ ma sbyar ma btang nas sos par mi 'gyur ba dang 'dra bar/ phyin ci log kyang byang chub kyi rang bzhin yin mod kyi/phyin ci ma log pa yang byang chub kyi rang bzhin te/ thabs mkhas pa'i spyod yul yin pas/ de bas na/ sman nyid sman pa 'tshol bzhin/ zhes 'byung ba yin no// skabs nyi shu pa'o//// da ni 'gro ba thams cad rang bzhin gyis sangs rgyas kyi che ba nyid du gnas pa'i skabs 'chad de/byang chub kyi sems ye nas rnam par dag pa'i don ston to// go ba'i yul na bde ba che// de nyid rnam dag 'jig rten yin// zhes pa ni/ chos thams cad zhi ba dang bya ba med par gyur pa na/ bde ba chen po ste/ kun tu bzang po'o// de yang de bzhin nyid du gnas de nyid kyang bzung ba dang/ 'dzin pa la mi ltos pa ni/ dus thams cad du rnam par dag pa'i 'jig rten na gnas pa zhes bya ste/de la yang ming tsam du chos thams cad la mnga' brnyes pa'i dbang gis/ phyogs mtshams dang/ bla 'og la sogs pa gnyis su med pa'i bde ba las 'od 'dus pas/phyogs bcu'o zhes sgyu ma'i mtshan nyid du rnam par grags te/ de yang las dang rang bzhin no// de la rang bzhin chos kyi dbyings ye nas gnas pa'i mthus mi 'gyur ba'i 'jig rten na sgyu mar gnas pa'o// las ni bltas pa'i mthu las sgyu mar snang bas// de la phyogs kyi 'od 'dus pas// phyogs bzhi mtshams brgyad bla 'og 'grub// zhes 'byung ba yin no// rigs kyi khyad par mngon par snang/ zhes pa ni/ 'ja' tshon ni ma nges pa'i dpe ste/ kha dog rnam pa sna tshogs pa'i// sems can kun tu snang ba rnams so// de la skye ba'i rgyud mi mthun pa'i kha rgyud cing skye ba rnams ni/ rigs kyi khyad par gyi snang ba rnams so// de bzhin g.yo gdul mi g.yo ba'i// 'byung ba lnga las gtso chen yin// zhes pa ni/ de la g.yo ba'i rdul ni/ ma lus pa'i sems can rnams te// g.yo ba de ni mi rtag pas so// mi g.yo ba ni snod kyi 'jig rten te/gzhan gyi dbang gis ni g.yo zhing skyod// rang gi mthus ni mi g.yo ba'o// rdul zhes bya ba ni mi dmigs par don gcig pa'i phyir ro// 'byung ba lnga ni/ snying rje chen po ste/ de bzhin g.yo ba'i rdul mtshungs par gnas shing lhag pa'i bsam pa thams cad dang bral ba'i phyir sangs rgyas chen po lnga yin no// skabs nyer gcig pa'o//// da ni tshogs dbul pa dang/ rnal 'byor gyi dbang phyug las 'das pa dang/da ltar dang ma 'ongs pa rnams/ mchod cing bskul ba/ rgyud dang gal po rnams las sngags dang phyag rgya dang/ ting nge 'dzin du bya bas spyan drangs ba dang/ bshos sangs sbyar ba dang/ sems can gyi don du 'gyur bar bya ba'i thabs su/ gsungs pa yang mang mod kyi/ de ni lung dang man ngag gi nges pa ma thob pa rnams la bstan pa ste/ sbyang ba'i don to// da 'dir ni rang bzhin gyis gnas pa dang/yongs su rdzogs pa'i skabs 'chad de/ byed pa thams cad dang bral ba'i don ston to// 'das dang ma byon da ltar gyi// tha snyad ming la mi gnas te// skye 'gag med par rnam brtags shing// de nyid dus gsum chen por sbyor// zhes pa ni/ 'das pa dang/ ma 'ongs pa dang/ da ltar byung ba'i ming yang sgyu ma'i bla dgas te/ dus zhes bya ba ci yang med pa la// dus gsum du gtses pas 'khrul pa ste tha snyad dang ming tsam mo// skye 'gags med pa'i chos nyid la byang chub nyid kyang len pa med de/ sangs rgyas su yang gnas par mi 'dzin na/ dus dang khyad par lta ci zhig smos te/ de ma thag gcig la dus gsum du phyung ste/ de ma thag snga ma ni 'das pa'o// de'i bar ni da ltar gyi'o// de'i 'og ma ni ma 'ongs pa ste/ de bzhin nyid du gcig nas gcig tu skyes pa ni mi rtag pas/ zhi bar gyur pa de ni chos nyid kyi rol pa zhes bya ste/ chos nyid dbyings ma dang 'dra bar thams cad du gnas pa yin no// de bas na skye 'gag med par rnam brtags shing/ de nyid dus gsum chen por sbyor zhes 'byung ba yin no// mnyam pas rim par bkod pa med// gcig pas phyogs su bsngo dang bral// zhes pa ni/ mnyam pa nyid ni yongs su rdzogs pa ste// mchod sbyin dang tshogs la sogs pa rim par dbye ba dang dus nges pa med do// kun tu bzang po'i spyod pa ni/ rnam par mi dbye zhing/phyogs thams cad du gcig pa'i phyir/ 'di'o zhes bsngo ba lhag pa med do// tshogs kyi rgyan rnams bkram pa yang// rang bzhin gnas pas 'grim pa med// zhes 'byung ba yin te/bcud kyi 'jig rten 'dod pa'i yon tan lnga la sogs te/ kun tu bzang po'i rgyan du gyur pas na/ chos thams cad kyi rgyan du zhes 'byung/ de rnams da bzod 'grim zhing rim par bgod mi dgos te/ ye nas gnas pa'i phyir 'grim pa med do// lhun gyis gnas pas mi bsngo zhing// gdod nas dag pas bdud rtsi yin// zhes pa ni/ thams cad kun tu bzang po'i rgyan yin pa'i phyir/ lhun gyis grub pa ste khyad par med pas bsngo ba med la/khyad par med pa'i chos nyid ni/ sdug bsngal gyi nad thams cad dang bral ba'i phyir bdud rtsi dang 'dra'o// de yang gdod ma nas grub pa'i bdag nyid can no// 'du byed bcu gnyis khyad par du// lhag pa'i bsam pas bzung ba med// zhes pa ni/ 'du ba dang mched pa ni dbang bsgyur ba'i chos can te/ gzugs kyi rang bzhin no// mi gnas pa'i bde ba la chos kyi dbyings kyi rang bzhin gyis 'du ba dang/bdag gi rol pas kun tu bzang po'i rgyan thams cad du longs spyod pa mi mched pa ste/ mched pa ni/ sems can thams cad mi gtong ba'i snying rje'i shes rab kyi sems/ sdug bsngal gyi rgya mtsho skems pa la mched pa ste/nang gi rol pa drug dang/ phyi'i bde ba len pa drug ste/ bcu gnyis so// de rnams kyang rang bzhin gyis gnas pa dang/ 'jig rten thams cad dang mtshungs par sbyor ba dang/ rgyu gcig pa las kun tu 'byung ba'i phyir lhag pa'i bsam pas/bsngo zhing bzung ba med do// zhes bstan pa yin no// skabs nyi shu gnyis pa'o//// da ni tshogs kyi rgyan rnams rang bzhin lhun gyis grub pa'i skabs 'chad de/bya ba med pa'i don ston to// yid kyi bsams pas yon dag ste// bltas pa'i stobs ni bkram pa'o// zhes pa ni/ mi gnas pa'i ting nges 'dzin la yud tsam du gnas pa ni/ chos kyi dbyings la dbang byed pa ste/dper na chos thams cad kyi rgyal po chen po ni yon dag chen po zhes bya'o// de ltar bltas pa'i yul med pa la/ grub pa'i stobs su gyur pa na/ chos thams cad tshogs su bkram pa'o// mthong bar gyur pas dngos grub la// de'i mnyam bzhag rdzogs pa'o// zhes pa ni/ tshogs te/ mi dmigs par mthong ba ni// mi 'gyur ba'i dngos grub chen po'o// de la mi gnas pa ni yongs su rdzogs pa'i mnyam pa nyid do// skabs nyer gsum pa'o//// da ni lhun gyis grub pa'i skabs 'chad de/ byang chub kyi sems mi dmigs pa'i ngang du yul yul can med pa'i don ston te// yud tsam bzung bas sbyor ba yin// dga' bar gyur bas dam tshig ste// thabs kyi gar thabs bskyod pa yis// gnyis med sbyor ba phul ba yin// zhes pa ni/ bdag dang gzhan du mi dmigs pa ni/ chos kyi dbyings la sbyor ba ste/ sbyor ba chen po zhes bya'o// de bzhin du bde ba la gnas pa ni/ kun tu bzang po ste dga' ba chen po'o// chos kyi dbyings ma dang dga' bar ldan pa'i dus na/ mi gtong ba'i shugs nam mkha' dang 'dra bar sbyor bas/ dam tshig ste/nyams pa med pa'o// sgyu ma'i sprul pa 'gyed pa ni thabs kyi gar thabs so// gzungs dang bde bar ldan pa'i don las 'gyur bas na/ bskyod pa ni chos kyi dbyings rang bzhin gyis dmigs su med pa dang/chos kyi dbyings la kun tu bzang po mi dmigs pas/ gnyis dang gnyis su med pa'i sbyor ba phul ba yin no// zhes 'byung ba yin no// skabs nyi shu bzhin pa'o// ni las rgya mtsho mnyam par bzhag pas 'grub pa'i skabs 'chad de/gzungs de dang bdag dang bcas pa'i gtor ma ston to//// mi bzung gtong bas gtor ma yin// bya ba med pas las rnams te// mi rtog ye shes bgegs bsal nas// mi gsung mnyam bzhag dam tshig go/zhes 'byung ba yin te/ de la chos thams cad kyi bzung ba dang/ 'dzin pa'i mtha' spangs te/ mnyam pa nyid la gnas pas/ mnyam pa nyid kyang mi rtog pa 'di ni gtong ba chen po ste/sdug bsngal thams cad zhi bar byed pa'i gtor ma'o// bya ba thams cad dang bral ba ni lhun gyis grub pa ste/ chos kyi dbyings kyi mthu dang ldan pas na/ 'khor ba dang ngan 'das par gyur pa'i las thams cad zil gyis mnan pa yin no// de la rnam par rtog pa ni 'khor ba'i rgya mtsho ste/ bgegs chen po'o// mi rtog pa ye shes kyi nyi ma ste/ chos thams cad la mnga' mnyes pas na/ phyi nang gi bgegs thams cad zil gyis non pa dang bsal zin pa'o// mnyam pa nyid la chos cig 'byung bas rgyud// 'dzin pa'i mthar 'gyur te/ bgegs kyi gnas so// de la gsung ba dang bral ni byang chub ste/ chos kyi dbyings kyi mthu'o// de bzhin du mi gsung bar 'dul ba ni/ sngags kyi tshig dam pa'o// skabs nyi shu lnga pa'o//// nga ni thabs med cing mi mkhas pas bdag dang bcas pa'i sbyin pa gtong ba dang/ gtor ma dang bsod nams dang ye shes tshogs la sogs pa rnams las dang nyon mongs par gyur pa'i skabs 'chad de/de bzhin gshegs pa la chags pa dang ma chags pa'i don ston to// bla ma mchod dang gtong ba dang// de bzhin bsod nams thams cad kyang// ma chags mi g.yo'i stobs med na// byas na 'ching ba chen por 'gyur// zhes 'byung ba yin to// bla ma zhes bya byang chub kyi snying po ste/ rang gi rig pa las 'byung ba'i sangs rgyas so// ji tsam du bdag chos kyi dbyings kyis bde bar gnas pas na/ 'khor gsum chen po yongs su tshim pa'i mchod pa chen po ste/ de ni snying po byang chub kyi snying pos mchod pa'i rang bzhin no// de la rdo rje slob dpon ni chos nyid kyi rang bzhin yin te/chos nyid de slob ma la 'byin par mdzad pas/ ston pa po sangs rgyas kyi spyan gyi yang spyan zhes bya ste/ chos kyi mchod pa dbul ba dang/ lto pi ye shes yid bzhin gyi nor bu chen po rang la yod pas mchod pa dbul bar bya'o// de bzhin du bsod nams su bya ba yang zin pa med pa'i gdeng dang chags pa med pa la mi dmigs par mi sbyor gyis/ bsod nams so zhes g.yo ba'i sems dang ldan na/nyon mongs pa'i sa bon 'debs kyi bsod nams mi byed do// de la ma chags pa ni rgyu/ mi gnas pa ni gtong ba/ mi dmigs pa ni sbyin pa chen po ste/ de bzhin du bsod nams thams cad kyang nang du bsam par bya'o// de lta bas na byas na 'ching ba chen por 'gyur zhes 'byung ba yin no// skabs nyi shu drug pa'o//// da ni lung 'brel pa ming tsam brdar bstan pa'i skabs 'chad de/ de bzhin nyid la rtsol ba sgrib par 'gyur ba'i don ston to// de bas de lung de nyid las// de las de dbyar sgrib par 'gyur// de ltar de la de rtog na// de la de nyid 'grub pa med// ces gsungs pa yin te/ de ni de bzhin nyid de/des na lung 'di nyid la bya'o// de bzhin nyid de las// de bzhin 'tshol bas sgrib par 'gyur te/ de rtsal na sgrib par 'gyur ro// de bzhin nyid de las de bzhin nyid blangs te/ thob pa'i de bzhin nyid de la gnas na rtog pa chen po ste/nyon mongs pa'o// de ci'i phyir zhe na/ zin pa'i chos nyid la bya bar rtsol ba ni/ nam mkha'i khams bzod bgod pa dang 'dra ste/ grub pa'i mtha' med do// de lta bas na zhi ba mnyam pa chen po la ni ci dgar spyod cing/kun tu bzang po'i spyod yul la gnas na chos nyid yin no zhes/ bcom ldan 'das lung thams cad kyi bdag nyid/ dpal rdo rje sems dpas de skad gsungs so// skabs nyer bdun pa'o//// lcags 'brel rdzogs so//// dge'o//// @##//

CLOSE WINDOW