CLOSE WINDOW

Gpb054.001
བོད་ཡིག

bai ro'i rgyud 'bum bzhugs so// bcom ldan 'das dpal rdo rje sems dpa' la phyag 'tshal lo// chos nyid kyi skabs 'chad de// rang bzhin gyis gnas pa'i don ston te/ rdo rje sems dpa' nam mkha' che/zhes pa ni/ nam mkha'i rang bzhin ni/ dpe yungs 'bru mar gyis khyab pa dang 'dra bar/ kun tu khyab par gnas te/ rdo rje ni 'dus ma byas pa'i don/ sems dpa' ni snying po byang chub la dgongs pa nges par 'grel te/che ba rnam pa lnga dang ldan nas bzhugs so// lnga gang zhe na/ mngon pa'i sangs rgyas pa'i che ba dang/ bdag nyid chen po sangs rgyas pa'i che ba dang/chos kyi dbyings su sangs rgyas pa'i che ba dang/ de yin pa'i sangs rgyas pa'i che ba dang/ thams cad nas thams cad du sangs rgyas pa med pa'i che ba'o// kun bzang yangs pa chos kyi dbyings// ma 'dres pa dang/ yongs su rdzogs pa ni/ chos kyi dbyings te kun tu bzang po'o// de yang bya ba thams cad dang bral ba'i phyir// mi gnas pa'i dbyings la rnam par gnas so// rnam dag lam chen kun sgrol phyir// zhes pa ni/ rtsol ba thams cad dang bral ba'i lam ste/ rnam par dag pas sgrol ba'i phyir ro// mi skye mi 'gag cing mi dgongs// zhes pa ni/ ji bzhin pa mi gnas pa'i mnyam pa nyid la/ dmigs pa'i yul med pas skye ba med de// de bzhin du bzung ba dang// 'dzin pa'i mtha' spangs pas// yul gang la mi gnas pa'i phyir// cir yang mi dgongs pa yin no// byams pas don nyid rnam sbyangs phyir// zhes pa ni/ bdag dang sems can du ma mthong ba ni/ byams pa chen po'i don to// phyi nang gi yul thams cad la mi dmigs pas/ rnam par sbyangs pa ste/ mngon du bya ba'i chos thams cad dang bral bas// chos thams cad la mi gnas pa ni snying rje chen po'o// gang ltar yang bdag dang gzhan gyi don du mi dmigs pas// snying rje chen po cir mi mdzad// ces bya'o// che bas che ba'i zab mo yis// zhes pa ni/ che ba ni chos nyid do// sems can thams cad ni zab mo byang chub kyi rang bzhin pas// de yang 'khor ba dang mya ngan las 'das pa'i// mnyam pa nyid kyi snying po yin pa dang/ yon tan rgya mtsho la legs pa dang/ sa'i rim pa la sogs par sgro mi 'dogs pas na// yon tan cir yang bsngags pa med// ces 'byung ba yin no// don rnams ji bzhin mi bskyod de// zhes pa ni/ chos thams cad nam mkha' dang 'dra ba la// bya ba dang tha snyad med de// ji bzhin pa la mi gnas pa'i phyir// bya ba'i yul thams cad dang bral ba'o// bya ba med pas/ grol bas dgrol/ zhes pa ni/ zhing chen po la bya ba med de// 'gro ba thams cad zhi ba'i rang bzhin bas na// rang las 'byung ba'i mthu des grol la// thob pa med pa'i dbyings mngon du gyur pas na dgrol ba yin no// rang 'byung ye shes brtsal med pas// zhes pa ni/ gzhan gyi mthu la mi brten cing rang 'byung bas brtsal ba med pa'o// grol bas grol ba'i lam yang ston// zhes pa ni/ de ltar rig pa'i rgyal po rang dbang du gyur pas na grol ba ste// mngon sum pa'i chos nyid des dgrol ba nyid du snang ba'i phyir ro// chos nyid kyi skabs so// da ni rang bzhin gyis gnas pa'i skabs 'chad de// ji ltar sems can thams cad la sangs rgyas pa rang bzhin gyis gnas pa'i don ston to// 'byung ba chen po bcom ldan 'das/ zhes pa ni/ 'byung ba chen po lnga ste/ ci lta zhe na/ sa rdo rje/chu rdo rje/ me rdo rje/ rlung rdo rje/ nam mkha' rdo rje ste/ de la nam mkha' rdo rje ni snang ba ston pa'i sangs rgyas so// sa rdo rje ni chos nyid ye nas gnas pa'i gzugs 'dzin pa'i sangs rgyas so// me rdo rje ni chos nyid rin po che sangs rgyas pa'i rang bzhin no// chu rdo rje ni mtha' yas pa'i sems can rnams la/ snying rje chen pos brlan par mdzad pa'i sangs rgyas so// rlung rdo rje ni/ gti mug chen pos khebs pa rnams// shes rab chen pos bskyod de// 'dod pa chen po las sgrol ba'i sangs rgyas so// de ltar 'byung ba lnga po 'di ni// sangs rgyas kyi sku dang/ gsung dang/ thugs so/ 'gro ba phal gyi ni/ lus dang ngag dang yid gsum ste/chub par gnas pas/ 'byung ba chen po bcom ldan 'das// 'gro ba kun la rang bzhin gnas// zhes gsungs pa yin no// de la phyin ci log du bslad pas khrid kyang gzhan las mi 'byung gi rang gi rig pa las byang chub 'byung bas na/phyin ci log du rnam bslad kyang// grol ba rang 'byung gzhan las min// zhes 'byung ba yin no// da ni rang bzhin gyis che ba la gnas pa'i skabs 'chad de// de yang yongs su rdzogs pa dang// gzhan gyi dbang las mi 'byung gi/ rang bzhin gyis che ba la gnas pa'i don ston to// che ba'i ye shes rnyed par dka' bas/ zhes pa ni/ sangs rgyas kyi chos nyid ni shin tu zab cing phra/ rtogs par dka' ste/ mi rnyed pa'i rnyed pa la sgyu mar gnas te/ mngon du rnyed par ni shin tu dka' ba'i phyir ro// shes rab thabs la brten pas 'grub/ ces 'byung ba yin te/ mi dmigs pa'i klung las/ chos nyid rang bzhin du 'char ba ni shes rab/de la kun tu bzang po longs spyod rdzogs par sbyor bas thabs yin te/ mnyam pa nyid du bdag med pa'i bde ba la/ dus gsum du gnas pas grub pa yin// de ltar sgyu ma'i spyod pas/de la ming tsam du gnas shing sbyor gyis kyang/ rang bzhin gyi ye shes bde ba chen po rang gi rig pa las 'byung ba'i phyir/ ming tsam gzhan la brten 'dra yang// mngon sum bde ba rang las 'byung// zhes gsungs pa yin no// da ni rtsol ba dang bral ba'i skabs 'chad de// rtsol ba sgrib pa nyid du 'gyur ba'i don ston to// cho 'phrul chen po dka' ba min/ zhes pa ni/ ji bzhin pa la mi g.yo bar gnas pa ni cho 'phrul 'phel lo// yon tan kun dang stobs kyi rnams/ yon tan ni sangs rgyas kyi che ba dang/ stobs dang ma 'dres pa dang/ gzungs dang rnam par thar pa dang/ sgyu ma ming du grags pa rnams la dmigs pa ste sgrib pa'o// mi dmigs pa'i shes rab la brten nas/ rang gi shes rab kyi mar me byung bas/ de bzhin nyid du rtogs pa'i mthus sgyu ma'i 'jig rten sbyong ba dang/ sgyu mar ston pa dang/bde ba dang sdug bsngal du snang ba rnams/ ji lta bar ston pa'i thabs des 'chad par mdzad pas na// ji bzhin rtogs pa phra ba yis// de ma thag du rang las 'byung// zhes gsungs pa yin te/ phra ba ni dmigs pa'i yul ma yin te// nam mkha'i rang bzhin no// snang ba med pa'i chos nyid ni// ma brtsam bzhag pas bsgoms pa yin/ zhes pa ni/ chos nyid gdod ma nas ma gsungs pas rgyu'i rang bzhin dang// rkyen gyi rang bzhin med pa'i phyir snang ba med pa yin// bya ba med pa'i chos rnams la byed par rtsol ba ni// sdug bsngal chen po'i rgyal mtsho mtha' med pa la 'bogs pa ste/ de ni rgal bar shin tu dka'o// de bas na chos ji bzhin pa la gnas nas/mnyam pa nyid kyi rgyal sa bzhugs shing/ kun tu bzang po'i rol pa la mi nyams par gnas pa ni// sgom pa chen po'o// de dang der ni rnam rtsal na// de las de bzhin de mi 'byung// zhes pa ni/ de ni de bzhin nyid do// de dang brtsad pa ni nam mkha' la khang bu 'bubs pa dang 'dra ste// phyi ci log du gyur pas// de las de bzhin de mi 'byung// zhes gsungs pa yin no// da ni brjod pa dang bral ba'i skabs 'chad de/byang chub sems kyi rang bzhin mi brjod pas tha snyad dang bral ba'i don ston to// mchog du gsang ba'i chos nyid ni/ zhes pa ni/ ci yang mi dmigs pas rang bzhin med// mtshan ma thams cad dang bral bas bza' ba'i yul med de// brjod du med pa'i phyir phal gyis mi rtogs pas// gsang ba yin no// de bas tshig 'bru thams cad dang bral te/ chos nyid du gnas shing nam mkha'i rgya dang 'dra bar gyur pas na/bdag dang gzhan mi 'grub ste/ brnyed pa med cing thob par 'gyur ba'i mthu mi 'byung bas/ rna dbang gzhan las thob mi 'gyur/ de bzhin lce'i dbang pos kyang/ de la brjod du rdul tsam med/ces 'byung ba yin no/ da ni 'gro ba las kyis mi 'khol ba'i skabs 'chad de// byang chub sems kyi rang bzhin la/ gzhan gyis mi 'khol ba'i don ston to// 'gro ba'i sdug bsngal byang chub sems/kun tu chub pas rnam par rol/ zhes pa ni/ 'gro ba thams cad kyi rgyu ni byang chub sems kyi rang bzhin no// bslad pas na sdug bsngal yin no// de la yang bde bas kun tu chub pa dang/ sdug bsngal gyis g.yen bcos te/'khor ba rtsed mo dang 'dra bar gnas te/ chos thams rang bzhin kun tu chud par rol/ de yang bdag med pa dang mnyam pa nyid la mi bskyod par gnas pa'i bde ba len pas na/de la bskyod pa med bzhin du// nam mkha'i mtha' ltar mnyam par gnas// zhes 'byung ba yin no// khyad par cir yang mtshungs pa la// las so zhes ni rnam par brtags// zhes pa ni/ las zhes bya ba ni phyin ci log du mthong ba'i ming bla dgas te de yang yod pa ma yin no// sems can byang chub kyi zhing la kun tu bzang po'i bde bas mtshungs par gnas te// las kyis mi 'khol lo// de yang ci'i phyir zhe na/ma bltas pa'i phyir ro// gal te las kyi mthu brtan zhing rdo rje dang 'dra ba yin na ni/ las ni snga la sems can ni 'phyi bas/ 'gro ba las kyis 'khol zhes bya ba'i dbang du 'gyur te/ grol thar ba med par gyur ro// de la sems can ni snga la las ni 'phyi ba'i phyir/ las nyid byang chub kyi rang bzhin yin te/ nyon mongs pa'i dbang du mi 'gyur ba'i phyir/ ci ste de'i dbang gyur na/ rang byung ye shes yod ma yin/ zhes gsungs pa yin no// rgyu nyid rdo rje rkyen dang 'dra/ zhes pa ni/ rgyu ni mi gnas pa'i byang chub kyi sems so// de las mi skye ba'i chos kun tu bzang po'i rnam par rol pa 'byung bas na rkyen yin te/ chos thams cad kyi rang bzhin ni mi skye ba chen po'i mthu dang ldan pa'i phyir/ma bsgrubs pas grub pa'i byang chub chen po'i snying po las mi g.yo bas na/ ma skyes pas na 'jigs pa med// gdod nas snying po byang chub la// zhes bstan te/ de yang don dam pa'i brtsal ba dang/ 'dus byas kyi re ba thams cad dang bral ba'i phyir/ chos nyid kyi gnas chen por 'gyur te/ mnyam pa nyid la gnas bas na/ rtsal ba'i bsam pas dbyings mi bskyod/ces 'byung ba yin no// da ni brtsal sems dang bral ba'i skabs 'chad de/ re ba 'jog pa dang smon lam la gnas pa dang/ skye ba khyad par du gyur pa'i don ston to// yon tan chen po'i bsam gtan ni/zhes pa ni/ 'jig rten 'di'i nyon mongs pas zin pa la/ sems kyi rang dbang bde ba skad cig mas// bsod nams dang ye shes kyi tshogs bsags pas// bsam gtan chen po'i gnas bzung nas spyod pa rnams so// bsam gtan nyid pas bsam du med/ ces pa ni/ bde ba'i bgrod pa'i bsam gtan de/ gang de la 'gog pa'i yul de bsam du med par blta/ ma bsams ma sbyangs chos bzhin du/ zhes pa ni/ ma bsams pa'i cha dang/ma sbyangs pa'i cha gnyis ka rnam par rtog pa'i mthus 'khrul pa'i shes pa skye ste/ skyon yin pa'i phyir/ rnam rtog nyid las ye shes skye/ zhes 'byung ste/ bgrod cing sbyong ba la mi bltos par/ rig pas ji bzhin pa'i ye shes rang las 'byung bar 'gyur ro// phra ba'i sgo mor ming brtags nas/ zhes pa ni/ yul med pa la yod par rtog pa ni phra ba'i sgo mo'o// sems kyi dben pas lam tshol zhing// zhes pa ni/ 'khrul pa'i phra bas sems bslad de/ dben zhing dgon pa la chags shing lam du mthong bas// dgon pa'i rgyud du dben 'dzin te/ brtags na rnam par rtog rgyu sgom/ zhes 'byung ba yin te/rgyu dang 'bras bur ming 'dogs shing// dge sdig gnyis ka rnam par sel// zhes pa ni/ rnam par ma byang ba'i chos thams cad rgyur blta/ de las nyon mongs pa 'byung ba ni 'bras bur ming btags pa'i phyir ro// dge ba dang sdig pa'i rgyu gcig pa'i las rnam par phye ste/ nam mkha' la bgo bsha' byed pa dang 'dra bar 'gyur ro// 'jig rten 'di las 'byung ngo zhes// blang dor brod pa mchod du skyed// zhes 'byung ba yin no// chags dang ma chags tshig gi lam// dbu ma yin te brag cha 'dra// zhes pa ni/ gong ma'i skyon dang bral ba'i don ston to// chags ni rang dbang med pa'i mthu'o// ma chags pa ni de nyid 'jil ba'i thabs kyi snying po yin no// de ltar thabs dang shes rab zung du 'brel ba'i phyir/ tshig gi lam ltar snang ngo// chags pa'i mi gnas pa dang mi chags pa'i mi gnas pas/ chos kyi dbyings su ro cig pa'i phyir/ khyad par du gnang gis kyang/ gang ltar yang ma grub pa'i phyir brag cha dang 'dra'o// bde dang sdug bsngal rgyu mthun zhes// 'gro ba'i mgon po sems dpas gsungs// zhes 'byung ba yin te/ byang chub chen por rtsol ba na sdug bsngal lo// zhi ba mnyam pa chen po ni bde ba ste// mi dmigs pa'i thun mong ba'i phyir// rnam par mi 'gyur ba'i dbyings la gdon mi za bar gnas pa yin pas/ gzhan las ma byung gi/ 'gro ba'i mgon po sems dpas gsungs/zhes 'byung ba yin no// da ni ye shes rang las 'byung ba'i skabs 'chad de// byang chub sems kyi rang bzhin bdag nyid chen po'i don ston to// 'dod chags zhe sdang gti mug kyang// byang chub chen po'i lam las 'byung/ zhes pa ni/ 'dod chags su grags pa thams cad kyang/ sku'i rgyan bde ba chen po kun tu bzang po'i rol pa las/ mtha' yas gdon mi za ba'i ting nge 'dzin pad ma rigs kyi gtso bo sems can gyi zhing yongs su sbyong ba'i rang bzhin no// de bzhin du zhe sdang dang gti mug kyang/ snying rje chen pos rgyun du 'dul ba dang/ sgrol ba'i thabs su gnas pas che ba'i sku ste// byang chub kyi yan lag bde ba chen po mi dmigs pa'i rang bzhin/ de las byung bas lam yin pa'i phyir ro// kun spyod yon tan rnam lnga yang/ chos nyid dbyings kyi rgyun zhes gsungs/ zhes pa ni/ zhi ba chos kyi sku ste mnyam pa nyid du gnas pa'o// rnam par mi rtog pa ni thabs kyi rol pa'i byang chub kyi sems te/ kun bza' ba dang/ kun spyad pa'i rkyen du 'gyur ba'i chos 'dod pa'i yon tan lnga yang mi 'gog la/rang bzhin gyi dmigs su med pa'i snying rje chen po las byung ba'i bdud rtsi/ byang chub kyi sems yongs su 'bar bar byed pa dang/ 'khor gsum sku gsum du rdzogs par 'gyur ba'i phyir// chos nyid dbyings kyi rgyan zhes gsungs/zhes 'byung ba yin no// nam mkha' rtog pa skye med cing// rtog pa de nyid nam mkha' 'dra// zhes pa ni/ nam mkha' mi skye ba'i rang bzhin skye bar rtog pa ni/ mtshan nyid mi 'gyur bas skye ba med de/rtogs pa snga ma dang/ rjes bzhin du 'byung ba'i rtog pa la yang yul med pas nam mkha' dang 'dra'o// mi chags pa nam mkha'i bsngo ba la/ zhes pa ni/ mi chags pa ni byang chub kyi sems don chen po la gnas pa'o// thams cad kyi rgyu gcig pa'i phyir bsngo ba med de// rang rig pa'i rgyal po nang nyid du 'char ba ni// rang byung gi don chen po ste/ rang don chen po nam mkha' 'byung/ zhes gsungs pa yin no// da ni mngon bar byang chub pa las bzhengs te/ rdo rje dbyings kyi snying po nas sems can 'dul bar dgongs nas/ shin tu bde ba chen po thams cad mnyam pa nyid du spyod pa chos nyid// rang gi yul la 'dus ma byas kyi rang bzhin zla gsang thig le'i dkyil nas/gzungs kyi rang bzhin don mi gtong ba dang/ don du mdzad pa dang/ don ltar ston pa dang/ don kyi rjes su 'jug pa'i thabs kyi rang bzhin/ yi ge a li ka li zhes bstan te/gzungs kyi rol pa'i skabs 'di gsungs so// rtog med mnyam nyid chos kyi sku// gzung bas mi zin chu zla 'dra// zhes pa ni/ rnam par mi rtog pa ni mnyam pa nyid de/ de la bya ba dang btsal ba'i yul med pas chis nyid de/ji bzhin pa'i sku ni mtha' med par khyab pas chos kyi sku'o// de la dus gsum gyi de bzhin gshegs pa mi tsam du gnas la/ 'dul ba'i dbang gis rju 'phrul chen po dang mthu bsam gyis mi khyab pa yang med pa ma yin te/gzugs thams cad dang bral bas gzung bas mi zin/ sgyu mas dbang bsgyur zhing don mdzad pa yang med pa ma yin pa'i phyir/ chu zla dang 'dra ste/ de ltar thabs kyi rol pas kun tu bzang po'i rgyal la dgongs par mdzad pa'i phyir/gzungs kyi rang bzhin/ kun tu bzang po'i rol pa'i gzungs/ a li ka li zab du bstan/ zhes 'byung ba yin no// da ni chos thams cad kyi rang bzhin mi dmigs pa'i dpe bstan pa/yi ge a zhes pa bstan par bya ste/ byed pa thams cad dang bral bas bya ba'i don mi 'grub pa la/ thabs dang shes rab tz bstan te/ re shig yi ge ma skyes pa bstan de nas gzungs kyi rang bzhin bstan par bya'o// de la a ni a A nud pa/ ba pa na swa b+ha ba ste/ chos thams cad ma skyes pa'i rang bzhin la ni chos kyi dbyings mi 'gyur ba'i rang bzhin/ gu gu ni snying rje chen po ste mi stong ba'o// ka ni thams cad byed pa'i don la mnga' brnyes pa'o// la ni zab mo'i gsang ba ste don thams cad byed pa'o// de la a ni snying rje chen po ste shes rab po// li mi thabs kyi rang bzhin te gzungs so// ka ni gnas nas gnas su bskyod pa'i rang bzhin gyi mthu'o// li ni thams cad du thun mong ba'i don no// de la don mdzad pa'i ma thabs ston te// de ni a dang mdzes pa'i ta/ ba dang yan lag spros pa bzhin/zhes pa ni/ a ni bdag nyid chen po'i rang bzhin bde ba chen po la rol pa'o// mdzes pa'i ta zhes pa ni/ shes rab kyi rang bzhin zla ba'i dkyil 'khor la gnas pa ste/ thabs kyi rgyal po shes rab kyi rang bzhin la gnas pa'i don to// pa zhes ba ni grol thar ba'i don te/ pad+ma'i rang bzhin/ de la 'gro ba thams cad skye ba dang gnas pa/ bde ba dang sdug bsngal gyi yan lag du gyur pa'i chos rnams la kun tu spros shing gnas te/de lta bas na gzhan gyi 'dod chags kyang bdag gi la/ bdag gi 'dod chags kyang gzhan gyi'o zhes 'byung la// kun tu bzang po'i rang bzhin ni thams cad bde bar gnas so zhes 'byung te// mi dmigs pa'i zab mo la/ bslad pa'i rnams dgrol ba'i phyir// spyod yul thun mong yang rang gi rkyen gyis gsang bar gyur pas/ 'jig rten yongs kyi spyod yul la/ sangs rgyas gsung gi zab mo 'byung// zhes gsungs pa yin no// e ma'o sangs rgyas spyod yul 'di btsal bas rnyed pa'i gnas med de// zhes pa ni/ chos kyi rang bzhin dngos po ci yang med cing shin tu phra ba'i phyir// btsal kyang rnyed par mi 'gyur te/ci phyir zhe na sangs rgyas kyi spyod yul mtha' klas shing rnyed par dka' ba'i phyir ro// drug gi chos bzhin yul med pas// mdongs pas nam mkha' brnyab pa bzhin zhes pa ni/ chos drug ni/ gzugs/ sgra/ dri/ reg chos so/ 'di na thams cad sgyu mar ston pa'i gzhi ste/ sangs rgyas thams cad kyi che ba nyid do// gang gis chos 'di drug phyin ci log du mthong ba ni/ mdongs pa ste/ bdud rtsi spangs nas dug phyir 'breng ba ni// mdongs pas nam mkha' brnyab ba bzhin/ zhes gsungs pa yin no// gong nas gong du tshangs pa'i la/ bral chos dang mthun ba min/ zhes pa ni/ 'jig rten las 'byung ba'i bsam pa/ bsod nams dang ye shes kyi tshogs bsags te/ rim pas bgrod pa/ byang chub kyis dang/ tshangs pa dang brgya byin gyi gnas dang/ 'khor lo bsgyur ba'i rgyal po la sogs te/ gang ci tsam du bgrod pa'i yul can ni nyon mongs pa ste 'ching ba'o// bya ba thams cad dang bral ba nam mkha' dang 'dra ba yongs su zhi ba/ kun tu mnyam zhing mtha' yas pa'i bde ba/ rang bzhin gyis yongs su rdzogs pa chen po// ma bsams/ ma spyad/ ma bsgoms te/ rang bzhin gyis gzhan la rag lus pa med de/ dper na yid bzhin gyi nor bu rin po che rgyal po ltar// chos dang chos ma yin ba'i gter thams cad 'byin nus pa'i phyir/mnyam par bzhag pa ste/ ci ste lam la bgrod 'gyur na/ nam mkha'i mtha' bzhin thob pa med/ ces 'byung ba yin no// da ni yongs su rdzogs pa'i skabs 'chad de/ byed pa med pa'i don ston to// de ltar de bzhin de'i phyir/de la de bstan de dang thob/ ces pa ni/ de bzhin nyid ni 'gro ba thams cad la mnyam ba'i dbyings cig du gnas pa'o// de ltar gnas pa de yang ci'i phyir mngon sum du mi 'gyur zhe na/ de bzhin nyid ni rtog pa'i chos thams cad dang bral ba yin te/rang las 'byung ba'i chos nyid dang/ de bzhin nyid du nang du bstan pas thob par 'gyur ro// de ni snying po de bas na/ de las de 'byung ngo mtshar che/ zhes pa ni/ de bzhin nyid ni byang chub kyi sems te/ byang chub kyi sems de ni chos thams cad kyi snying po yin pa'i phyir ro// snying po de las mngon sum pa'i bde ba kun tu bzang po 'byung bar 'gyur la// de dang dus thams cad du mi 'bral ba'i yon tan dang ldan pa'i phyir/de las de byung ngo mtshar che/ zhes 'byung ba yin no// sngon gyi de dang da ltar de// de bzhin de'i gnas su che/ zhes pa ni/ 'das pa dang ma 'ongs pa dang da ltar 'byung ba'i de bzhin nyid ni/gnas gyur pa'am 'pho ba med pa'i che ba nyid de/ sngon zhes pa'i tshig ni phyi ma'i mtha' med pa'i don ston te/ de bzhin ni sems can thams cad sangs rgyas kyi zhing du 'gyur ba'i dbyings cig pa'i phyir/de'i gnas su che'o// de ltar de'i lam 'dra bar/ zhes pa ni/ de la bgrod pa thams cad dang bral ba'i lam ni rnam par grol ba chen po'o// rnam par grol ba ni ma yin te cig pa'i phyir// 'gro ba thams cad chos mnyam pa nyid kyi dbyings la bgrod pa'i lam 'dra ba'i phyir// de ni de'i rang bzhin no// zhes 'byung ba yin no// de dang 'dra ba yongs kyi lam/ zla ba las byung rten dang bcas// zhes pa ni/ chos thams cad kyi rang bzhin de bzhin nyid ni/ mnyam pa'i klung las 'dra ba'i phyir yongs kyi lam mo// skye ba med pa'i skye ba la/ sems can chen po man chad thun mong du gnas te/ chu zla'i gzugs brnyan dang 'dra bar rten cing/chos kyi dbyings su ro cig pa'i mnyam pa nyid yin te/ kun gyi mnyam nyid yin pa la/ phyogs su bltas pas 'grub pa med/ ces 'byung ba yin no// da ni bde ba la chags pa dang bral ba'i skabs 'chad de// chags na skyon du 'gyur ba'i don ston to// de lta'i bde dang phyi ma'i mngon sum pa dang rgyab las byung// zhes pa ni/ chos thams cad kyi bde ba'i rgyu ni// nam mkha' dang 'dra bas bde ba snga ma dang phyi ma zhes bya ba med do// de las sangs rgyas su bya ba'i yan lag ye shes chen po mdun nas 'byung ba dang/ rgyab nas rnyed pa'i ye shes dang/ sangs rgyas kyi che ba'i yon tan grangs med pa rnams len pas thob par bya ba dang/thob zin pa rnams thams cad kyang/ mtshan ma med pa'i dbang gis lta ba'i mthus 'grub mod kyis/ de yang rnam pa'i skyon yin pas/ de la brten par mi bya'o// zhes 'byung ba yin no// da ni gdod ma nas che ba nyid kyi snying po la/ rang bzhin gyis gnas pa'i skabs 'chad de/ bya ba med pa'i don ston to// dus gsum cig ste khyad par med// sngon med phyis med gdod nas byung/zhes pa ni/ chos thams cad 'du ba dang 'bral ba med pa'i phyir/ dus gsum cig ste khyad par med do// chos kyi dbyings ni cig char 'char te/ mtha'i mun pa med pa'i phyir/ sngon yang med phyis yang med gdod ma nas byung ba nyid do// chos sku khyab pas cig pa'i phyir/ zhes pa ni/ mi gnas pa'i dbyings la mnyam pa nyid kyi phyir/ chos kyi sku ni nam mkha' ste/ nam mkha' ni kun tu khyab pa la/ nam mkha' la gnyis su med de/ cig pa'i phyir ro// de lta bas na che ba'i rgyan dpal phun sum tshogs pa mnyam par gnas pa// thams cad la khyab ste gnyis su med pa'i phyir/ che bas chen po rang bzhin gnas/ zhes 'byung ba yin no// da ni kun tu smon lam chen po dang/ bral ba'i skabs 'chad de// ci la yang mi gnas pa'i don ston to// srid pa gsum na sbyor ba yang// ming tsam sgyu mar snang ba ste// zhes pa ni/ srid pa gsum mi dmigs pas sgyu ma dang sprul pa lta bur sbyor ba'o// de la mi gnas pa'i thabs kyis gnas pa ni// ming tsam sgyu ma nyid du snang ngo// 'khor lo bsgyur ba'i gnas chen yang// zhes pa ni/ 'khor lo bsgyur ba ni gling bzhi'i rgyal por grags te/'khor lo ni mi gnas pa// bsgyur ba ni rnam par sbyong ba'i mtshan ma ste/ de yang mngon par byang chub pa'i gnas thob pa med pa'i dbyings su 'gyur ba'i rgyu des 'dul te/ de bas na/ sgyu mas sbyong ba'i gnas chen yin// zhes 'byung ba yin no// rnam smin dus las bltos pa'i rnams// dus de 'byung bar mi 'gyur te/ zhes pa ni/ chos nyid ni ye nas gnas pa cig par rdzogs pa yin pas dus med do// dus med pa la 'byung bar 'dod pa rnams ni shin tu 'khrul pa ste// dper na 'o ma 'dod pa rwa la bzhos pa bzhin no// ma bral smon pa spyod pas na/ zhes pa ni/ ma bral ba ni chags pa mi gtong ba ste// rmi lam gi nor dang 'dra ste spyad pa la sman par mi 'gyur ro// de ltar chos thams cad stong pa nyid kyi rang bzhin snang bar mi 'gyur ba dang/ mngon du gyur pa'i mthu med par// de la gzas shing 'khrul pa'i blos btsal bar gyur pa ni ji ltar bcom ldan 'das kyis stong pa'i rang bzhin/ci yang med pas/ stong pa'i mtshan nyid gsungs pa bzhin/ zhes 'byung ba yin no// de ni lung ston pa'i skabs 'chad de// lung ni rna bar brgyud pa ste/ mngon du gzhag par mchi bas// brda ci rigs pa tsam zhig bshad pa yin no// gcig ste rnam pa yongs kyis med// rnal 'byor nam mkha'i bya lam gnas// zhes pa ni/de bzhin nyid ni gcig ste rnam pa dang khyad par gi ming med do// de ltar gleng gzhi thams cad dang bral bar sbyor bas rnal 'byor te// de yang mi gnas pa'i tshul gyis kun tu bzang po'i bde ba la rol pa ni// nam mkha'i bya lam bzhin du mi chags mi gnas pa'i phyir ro// ma byung mi skye snying po la/ zhes pa ni/ de bzhin nyid ni brten pa thams cad dang bral bas ma byung ba'o// brjod pa thams cad dang bral bas na skye ba med de// mtha' dang dbus gnyis ka la mi gnas pa'i phyir snying po yin la/ smra ba dang bsam pa'i yul med de// rang bzhin gyis che bas bde ba la gnas pa'i phyir// sgros btags chos kun ga la yod// ces 'byung ba yin no// phyi nang gnyis ka phyi nyid nang/ zhes pa ni/ phyi ni rtsol ba'i byang chub kyi sems so// nang ni bde ba la gnas pa'o// rtsol ba ni bdag med pas zhi ba ste nang ngo// nang ni bde ba la gnas pa ni// rgyu med pa'i dbyings la gnas pa na// thob pa'i bsam pa dang ldan pas phyi'o// de ltar phyi nang gnyis ka la thob pa'i rab ni// phyi'i yul mi 'byung gi/ nang nyid du blta bas 'khrul pa'i phyir 'gyur te/ 'di dag ni nang ma dag la phyi rol sgom pa la sgom ba'i nad do// zab mo'i cha shas rtogs yul med// zhes pa ni/ zab mo ni zhi ba chen po ste rnam par dag pa'i dbyings so// de la byang chub kyi sems mngon du 'char bar byed pa ni// cha shas phra ba ste mi dmigs pas rtog pa'i yul med do// srid pa ming tsam log pa'i stabs// zhes pa ni/ snang ba'i chos 'di dag thams cad rang bzhin gyis che ba nyid de mnyam pas zhi ba'o// de la yang 'khrul pas chags pa'i lta bas// srid pa ming tsam mo zhes 'khor ba'i phyir ro// de bas ting 'dzin mnyam dang bral// zhes pa ni/ rnam pa kun tu zin pa'i chos la mnyam par bzhag pa dang/ dgongs pa'i dbang dang/ rnam par bkod pa dang/ ting nge 'dzin la sogs pa/ sgyu ma'i rnam par thar pa thams cad 'ching ba ste/ de bas ting 'dzin mnyam dang bral// zhes 'byung ba yin no// de la tha tshig phyi dang nang/rang bzhin phung po khams bzhin gnas/ zhes pa ni/ de la tha tshig la rnam pa lnga ste/ gang zhe na/ sa dang/ chu dang/ me dang/ rlung dang/ nam mkha' dang 'dra'o// 'byung ba chen po lnga po 'di/de bzhin gshegs pa thams cad kyi che ba nyid de// zab mo'i thabs kyis sems can thams cad la khyab par gnas te/ thams cad kyang che ba nyid mi gtong ba'i dam tshig rjes su sbyong ngo// de yang rang bzhin thams cad kyi gnas kun la gsang ba'i tshul gyis gnas te/phung po ni mnyam pa nyid kyi gtso bo lnga'i mtshan nyid do/ khams ni kun tu bzang po'i byang chub kyi che ba'o// de bzhin du skye mched la sogs pa de'i rgyus sgyu ma la sogs pa'i thabs so// de bzhin du chos kyi rgyal po ltar dbang du mdzad pas/ rtag du de la gnas pa dang/ mi 'bral ba blangs pa dang/ dor ba med pa'i phyir dam tshig blang ba yang/ dus gsum de dang mi 'bral bas/tha tshig ming du btags pa med/ ces 'byung ba yin no// da ni mnyam pa nyid kyi chos la dbang bsgyur ba'i skabs 'chad de/ mi rtsol mi sems par lhun gyis grub pa'i don ston to// mi g.yo ba ni sku'i rgya/ mi bskyod de nyid ye shes te/ zhes pa ni/ chos thams cad skye 'gag med de mnyam pa nyid la gnas pa ni/ sku nam mkha' dang 'dra bas kun du khyab pa ste/ de ni phyag rgya chen po'o// de la len pa'i bsam pa dang/mngon par rtogs pa'i yul med pas/ mi bskyod pa nyid ye shes te/ shes pa med pa'i dbang thob pas so// mi len pas na bdag med cing mi 'dor tshig bral mnyam nyid do// zhes pa ni/mi len pa ni bdag med pas/ blang ba'i yul med pa'i phyir/ smra bsam las 'das pas na/ tshig dang yi ge'i don la sogs pa dbye bsal byed pa med pa'i phyir// mi 'dor ba'i mnyam pa nyid do// gang dang gang gi gang du yang// kun 'khol kun spyod bdag las byung/ zhes pa ni/ gang dang zhes pa ni 'das pa'i/ gang gi zhes pa ni da ltar gyi/ gang du zhes pa ni ma 'ongs pa'i don te/ de rnams la ming gis bgrang ba'i rnam pa dang bral ba ste/dper na yid bzhin gyi nor bu rin po che mngon du gyur pa na/ ci tsam du spyod pa dang/ gzhan la ston pa dang 'dra bar// rang dbang gi ye shes chen po dang ldan pa'i dus na/ rnam pa brgya stong du spyod na yang/mi zad pa'i gter bdag las byung ba'i phyir// kun 'khol kun spyod bdag las byung// zhes 'byung ba yin no// de bzhin du skye ba mi mthun ba'i dbyings ma yin pa dang/ chos thams cad kyang cig pa dang/kun tu bzang po'i thabs 'jig rten kun la mnyam pa nyid du rol pa'i phyir/ 'di la skyes pa bud med zhes/ mnyam pa'i rgyal pos yong ma gsungs/ zhes 'byung ba yin no// da ni dngos grub chen po bde ba thams cad len pa dang/chags pa spong ba'i skabs 'chad de// de'i zhor la dka' thub las chos mi 'byung ba dang/ sems mi gdung ba dang/ byang chub sems la dbyer med pa'i don ston to// 'di la brtul zhugs drag shul gyis// gnas su bya ba ming med de/ zhes pa ni/ chos nyid kun tu bzang po la shin tu bde ba dang/ bla 'og gi mchog gi thabs kyis dbyings la rol pa'o// dka' thub ni nyon mongs pa len pa dang/sems gdung ba ste 'khrul pa'i nad do// de bas na dka' thub kyi gnas ni brjod par yang mi bya'o// de la mtshan ma med pa'i dbang gis thabs gang du rol kyang bde ba 'byung ba dang/sgyu ma ltar gang du bskyed kyang thabs kyi mthu bsam gyis mi khyab pas/ de bzhin du 'gyur ba dang/ de bzhin du snang ba'i dmigs pas ston te/ de ni 'ching ba'o// a dang par ni rnam ldan bas/ sgyu ma'i bde ba skye bar 'dod/zhes pa ni/ a ni chos thams cad ma skyes pa'i rang bzhin gong du bshad pa nyid do// pa ni chos thams cad bskyed pa'i bdag nyid pad mo'i rang bzhin te/ de ltar thabs dang shes rab tu ldan pas sgyu ma'i rang bzhin bde ba gang 'dod pa ltar skye bar 'gyur ro// de ni zin pa'i skyon yin te/ rang bzhin du ma skyes pa'i skye ba ni ma yin pa'i phyir ro// rang bzhin gcig du ma nges pas// ji ltar bltas pa der snang ste/zhes pa ni/ ci'i phyir zhe na/ rang bzhin gcig du ma nges la/ gzung ba dang 'dzin pa ma spangs pa'i phyir skye bar 'gyur bas// bltas par gyur pa'i skyon snang ba ste// chos nyid kyi 'khrul pa ni 'gyur pa yin la// ming 'dod pas bskal pa'i rgya mtsho'i rlabs kyis kun tu snang bar 'dod cing rtsol ba ni// sangs rgyas su btsal na yang skyon no// sems de'i bde ba la gnas pa bus pa'i spyod yul 'khrul pa yin pas/snang 'dod rtsol sems bde ba yang// de ni de sgrib skyon chen yin// zhes 'byung ba yin no// byang chub yan lag kun kyi sgo/ chu lugs sgom pa chu zla bzhin/ zhes pa ni/ byang chub kyi lam sa bcu bgrod pa dang/thabs kyi snying po dang/ yi ge 'brus byang chub kyi cha lugs ji bzhin bar 'dzin cing/ chu zla dang 'dra bar 'byung yang bya ba dang ma bral ba'i mtha'o// de bas na/ ma chags ma gos 'byung 'gyur yang/ sgom pas byas pa'i spyod yul bzhin/ zhes 'byung ba ste/ de bzhin du byang chub kyi che ba'i sku/ dmigs su med pa mngon du 'char te 'byung ba yang/ bsgoms pa dang re ba'i mthu las gyur pa'i phyir/ skyon chen po yin te/bslad pa'i byis pa'i spyod yul bzhin no// dkyil 'khor khro gnyer cha lugs kyis/ khro bdag chen po'i lugs bzung nas// yi ge mngon du byung na yang/ zhes pa ni/ de bzhin du gong ma ltar sgom pa dang sgrub pa'i yan lag zhal nas gsungs pa'i dkyil 'khor sgrub pa'i mthus// khro bo'i sku yi rang bzhin yi ge'i cha lugs mngon du byung na yang// sgom pa dang mngon du gyur pa'i skyon re/ zhi ba de bzhin nyid med pa'i phyir ro// zhi ba de bzhin nyid mthong ba min// zhes gsungs pa min no// ta la'i mgo bo bcad pa dang/ sa bon me yi bsregs pa bzhin/ zhes pa ni/ nyon mongs pa'i dbang gis 'khor ba chen por mi 'gyur ba'i thabs bstan pa/yan lag du sgom pa'i thabs kyi skabs 'dis ston te/ rnam grangs brgya stong phrag yas pa/ gang ltar bskyed kyang mi tog skye/ zhes pa ni/ sgrub pa dang dngos grub rtsol ba la yang rnam pa gnyis te/nges pa'i lung dang rang bzhin no// nges pa'i lung ni mnyam pa nyid chos kyi dbyings la mnga' bsnyes pa na/ gang ltar bsgrubs gang du dmigs pas// mngon sum pa dang 'dra bar mngon du gyur kyang/chos kyi dbyings la 'char ba dang/ dbang chen gyi mangs bsgyur ba ste 'ching ba med do// sprul pa ni kun tu bzang po rol pa'i rgyan las 'dul bar mdzad pa'i sgyu ma'i sprul pa bdag nyid chen po las gtong ba'i phyir// sgrib pa dang 'ching bar mi 'gyur ro// mtshan ma med pa'i dbang gis na// bsti gnas de las 'byung mi 'gyur// zhes pa ni/ chos nyid kyi byin rlabs kyi mthu la brten pa ni/ dper na yid bzhin gyi nor bu rin po che la brten nas/de nyid las yid bzhin gyi nor bu rin po che 'byung ba dang 'dra bar/ skabs 'dir mtshan ma med pa'i chos nyid dbyings kyi dbang gis byang chub sems dpa' chen po rnams kyi/sku dang gsung dang thugs kyi rang bzhin bsgrubs te grub pa'i skyon gyis bde ba'i bsti gnas su 'gyur gyi/ rnam par grol ba chen po ni ma yin no// da ni rtsol ba dang bral zhing mnyam pa nyid du mi g.yo bar gnas pas/bde ba chen po thob par 'gyur ba'i skabs 'chad de/ byang chub sems kyi rang bzhin gleng gzhi thams cad dang bral ba'i don ston to// gleng bral 'di la gnas pa'i/ rnal 'byor de ni skal pa bzang/zhes pa ni/ mi skye ba'i chos nyid la bya ba med de/ bya ba med pa ni gleng gzhi dang bral ba'o// de la bde bar gnas pa'i rnal 'byor te/ chos kyi gter nam mkha' dang ldan pas skal ba bzang po'o// bdag dang gzhan don mi 'byed pas// sgyu ma lhun grub yul la rol/ zhes pa ni/ gzung ba dang 'dzin pa'i mtha' spangs pas/ chos kyi dbyings su la 'khrul pa med pas rnam par dbyer med do// mi gnas pa'i snang ba thams cad ni sgyu ma chen po ste/de'i mnyam pa nyid kyi yul la rol pas// lhun gyis grub pa'i dbang chen no// da ni chos nyid kun tu mi 'gyur bar gnas pa'i skabs 'chad de/ byang chub kyi sems nam mkha' ltar mi 'gyur ba'i don ston to// lhag ma med pas yongs su rdzogs/ 'gyur ba ma yin drang por gnas/ zhes pa ni/ chos thams cad mtha' dang dbus med pas/ byang chub snying po yongs su rdzogs pa'i dbyings cig pa'i phyir ro// chos nyid la gzugs med de nam mkha'i rang bzhin du ye nas gnas pa la// g.yo ba'i mtha' thams cad dang bral ba'i phyir// de bsrang ba'i mthu dang ldan pa gang nas kyang mi 'byung bas na/dus gsum du ma nor ba'i dbyings drang por gnas pa yin no// nam mkha' bzhin te mtha' mnyam zhing// gzhan la ltos 'gyur chos ma yin// zhes pa ni/ rang bzhin chen po'i ye shes ni// mi dmigs pa'i mtha' nam mkha' dang 'dra ste/ rnam pa kun du mnyam pa chen po'i phyir ro// mnyam pa nyid ni gzhan las 'byung bar mi 'gyur te/ smra ba dang bsam pa'i yul thams cad las 'das par sbyor ba ni/mtshungs pa med pa'i chos nyid ni/ rang gis mthu'i rig pa las/ zhes 'byung ba'i phyir/ sgom pa dang bsgrub pa'i stobs gzhan la brten pas/ chos ni 'byung bar mi 'gyur ro// zhes gsungs pa yin no// sla zhing dka' la sla phyir dka'/ zhes pa ni/ ye nas snying po byang chub la gnas pa dang/ rdul tsam bya ba med pa'i phyir sla'o// mi dmigs pa nam mkha'i spyod yul la/ thabs med pas bgrod pa ni shin tu dka'o/ de ltar yongs su rdzogs pa'i rang bzhin la/ 'di ni sangs rgyas so// 'di ni chos so// 'di ni dge 'dun no// zhes 'bras bu gcig la rgyu gsum du phye ba ni bslad pas gsungs pa'i phyir dka' bar 'gyur la/ mi g.yo bar sla ba las rnam par btsal ba'i dka' ba 'byung ngo// mngon sum mi gnas kun la khyab/ zhes pa ni/ chos nyid de ma thag gi bde ba ni mtshan ma med pa ste// dmigs pa'i yul ma yin pa'i phyir/ mig gis mthong ba dang/ rna bas thos pa'i yul med do// de bzhin du kun tu khyab pa dang/ snying rje chen po la gnas pa'i mthu tha mi dad cing/ mngon par 'char ba cig pa'i phyir// kun du khyab pa yin no// de la yang thob pa dang btsal ba dang bcas pa rnams ni/dper na ri 'ong gi rwa dang mo gsham kyi bu bzhin thob pa med de// gnas med pa'i phyir/ ming tsam 'di zhes bstan par ni// rdo rje sems dpas mtshon du med/ ces gsungs pa yin no// da ni rgyu rkyen las ma grub pa'i phyir/ rnam par mi rtog pa'i dga' ba la chags pa'i skyon bstan pa'i skabs 'chad de/ bde ba chen po rgyu rkyen las mi 'grub pa'i don ston to// ngo mtshar smad byung rol pa 'di// bya bral nam mkha' ji bzhin te/ zhes pa ni/ bcom ldan 'das kyi sku dang gsung dang thugs kyi bdag nyid med pa las/ kun tu bzang po'i rol pa la mnyam par gnas pa ni/ ngo mtshar che'o// mi gnas pa'i sprul pa sgyu ma'i 'jig rten gyi 'dul ba rmad du 'byung ste// bya ba med pa las bde ba'i mchog nam mkha' dang 'dra bar mi 'gyur bar gnas pa ni/ chos nyid kyi mangs sems can gyi zhing la rol cing ci yang mi mdzad pa'o// cir yang mi dmigs gti mug la// de ma thag du rang las 'byung// zhes pa ni/ de bzhin du rang byung ba nam mkha' dang 'dra'o// nam mkha' ni cir yang mi dgongs te gti mug chen po'o// de ltar gti mug chen po de las de ma thag du shes rab kyi rang bzhin chos kyi dbyings su 'char bar 'gyur te// de bas na/ cir yang mi dmigs gti mug la// de ma thag du rang las byung/zhes gsungs pa yin no// 'di ni thams cad mtshungs pa'i lam// 'gro ba kun gyi rang bzhin gnas/ zhes pa ni/ sems can thams cad mi dmigs pa la mnyam par gnas pa dang// mtshan nyid grangs med par ston kyis kyang/snying po byang chub kyi rang bzhin cig pa la/ phyin ci log gis bslad pas bsgribs pa'i phyir/ skad cig ma la gnas te/ de yang byang chub kyi rgyu'i phyir/ byis pas bslad pas 'khrul pa'i phyir// sman nyid sman pa tshol ba bzhin/ zhes pa ni/ dper na sman zhes bya ba'i ming gis sems can thams cad kyi sdug bsngal sel bar byed pa yin na/ de yang sman pa zhes bya ba'i ming thob pas ma sbyar ma btad na/bsod par mi 'gyur ba dang 'dra bar/ phyin ci log kyang byang chub kyi rang bzhin yin mod kyi/ phyin ci ma log pa yang byang chub ste/ thabs mkhas pa'i yul yin pas/ de bas na/ sman nyid sman pa tshol ba bzhin/zhes 'byung ba yin no// da ni 'gro ba thams cad rang bzhin gyis sangs rgyas pa'i che ba nyid du gnas pa'i skabs 'chad de// byang chub kyi sems ye nas rnam par dag pa'i don ston to// go ba'i yul na bde ba che// de nyid rnam dag 'jig rten yin// zhes pa ni/ chos thams cad zhi ba dang bya ba med par gyur pa na/ bde ba chen po ste kun tu bzang po'o// gang de bzhin du gnas pa dang/ gnas pa de nyid gzung ba dang 'dzin pa la mi ltos pa ni/dus thams cad du rnam par dag pa'i 'jig rten na gnas pa zhes bya ste/ de la yang ming tsam du chos thams cad la mnga' brnyes pa'i dbang gis phyogs mtshams dang/bla 'og la sogs pa gnyis su med pa'i bde ba las 'od 'dus pas/ phyogs bcu'o zhes sgyu ma'i mtshan nyid du rnam par bsgrags te/ de yang las dang rang bzhin no// de la rang bzhin ni chos kyi dbyings ye nas gnas pa'i mthus/mi 'gyur ba'i 'jig rten sgyu mar gnas pa'o// las ni bltos pa'i mthu las sgyu mar snang bas/ de la phyogs kyi 'od 'dus pas/ phyogs bzhi mtshams dang bla 'og 'grub/ ces 'byung ba yin no// ma nges 'ja' tshon kha dog las/ rigs kyi khyad par mngon bar snang/ zhes pa ni/ 'ja' tshon ni ma nges pa'i dpe ste/ kha dog rnam pa sna tshogs pa sems can du snang du snang ba rnams so// de la skye ba'i rgyu de mi mthun pa'i kha brgyud cing skye ba rnams ni/ rigs kyi khyad par snang ba rnams so// de bzhin g.yo rdul mi g.yo ba/ 'byung ba lnga bas gtso chen yin/ zhes pa ni/ de la g.yo ba'i rdul ni ma lus pa'i sems can no// mi g.yo ba ni snod kyi 'jig rten te// gzhan gyi dbang gis ni g.yo zhing spyod la/ rang gi mthun ni mi g.yo ba'o// rdul zhes pa ni mi dmigs par don cig pa'i phyir ro// 'byung ba lnga ni snying rje chen po lnga ste// de bzhin du g.yo ba dang mi g.yo ba'i rdul la mtshungs par gnas shing lhag pa'i bsam pa thams cad dang bral ba'i phyir sangs rgyas chen po lnga yin no// nga ni tshogs dbul ba dang/ rnal 'byor gyi dbang phyug 'das pa dang/da ltar gyi dang ma byon pa'i rnams mchod cing bskul ba dang/ rgyud dang gal po'i rnams las sngags dang phyag rgya dang ting nge 'dzin du bya bas// spyan drang ba dang bshos gsang sbyar ba dang/sems can gyi don du 'gyur ba'i thabs su gsungs pa yang mang mod kyi// de ni lung dang man ngag nges pa ma thob pa rnams la bstan pa ste/ sbyang ba'i don no// da ni rang bzhin gyis gnas pa dang/ yongs su rdzogs pa'i skabs 'chad de/ byed pa thams cad dang bral ba'i don ston to// 'das dang ma byon da ltar gyi/ tha snyad ming la mi gnas te/ skye 'gag med par rnam brtags shing/ 'di nyid dus gsum chen por sbyor/zhes pa ni/ 'das pa dang ma 'ongs pa dang da ltar 'byung ba'i ming yang sgyu ma'i bla dgas te/ dus zhes bya ba ci yang med pa la/ dus gsum du gses pas 'khrul pa ste/ tha snyad dang ming tsam mo// skye 'gag med pa'i chos la byang chub nyid kyang len pa med/ sangs rgyas su yang gnas par mi 'dzin na/ dus dang khyad par lta ci smos te/ de ma thag gcig las yang gsum 'byung ste/ de ma thag gcig sngon ma ni 'das pa'o// de'i bar pa ni da ltar gyi'o// de'i 'og ma ni ma 'ongs pa ste/ de bzhin du gcig nas gcig du skyes pa mi rtag pas zhi bar 'gyur te/ de ni chos nyid kyi rol pa ste/ chos kyi dbyings dang 'dra bar thams cad du gnas pa yin no// de bas na/ skye 'gag med par rnam brtags shing/ de nyid dus gsum chen por sbyor/ zhes 'byung ba yin no// mnyam pas rin par bkod pa med/ gcig pas phyogs su sngo dang bral/zhes pa ni/ mnyam pa nyid ni yongs su rdzogs pa ste/ mchod sbyin dang tshogs la sogs pa rim par che ba dang dus nges pa med do// kun tu bzang po'i spyod pa ni/ rnam par mi dbye zhing phyogs thams cad gcig pa'i phyir/'di'o zhes bsngo ba lhag pa med do// chos kyi rgyan dang bkram pa yang// rang bzhin gnas pas 'grems pa med// ces 'byung ba yin te/ bcud kyi 'jig rten 'dod pa'i yon tan lnga la sogs te/kun tu bzang po'i rgyan du gyur pas na/ chos thams cad kyi rgyan zhes 'byung ba yin no// de rnams da gzod 'grems zhing rim par dgod mi dgos te/ ye nas gnas pa'i phyir 'grems pa med do// lhun gyis grub pas mi bsngo zhing/ gdod nas dag pas bdud rtsi la// zhes pa ni/ thams cad kun tu bzang po'i rgyan yin pa'i phyir// lhun gyis grub ste khyad par med pas bsngo ba med la// khyad par med pa'i chos ni/sdug bsngal gyi nad thams cad dang bral ba ste/ bdud rtsi dang 'dra'o// de yang gdod ma nas grub pa'i bdag nyid can no// 'du mched bcu gnyis khyad bar du/ lhag pa'i bsam pas gzung ba med/zhes pa ni/ 'du ba dang mched pa ni dbang sgyur ba'i chos can te/ gzungs kyi rang bzhin no// mi gnas pa'i bde ba la/ chos kyi dbyings su 'du ba dang/ bdag gi rol pas kun tu bzang po'i rgyan thams cad du longs spyod pas mched pa ste/mched pa ni sems can thams cad mi gtong ba'i snying rje shes rab kyi mes// sdug bsngal gyi rgya mtsho skems pa la mched pa ste/ nang gi rol pa drug dang/ phyi'i bde ba len pa drug ste bcu gnyis so// de rnams kyang rang bzhin gyis gnas pa dang/ 'jig rten thams cad mtshungs par sbyor ba dang/ rgyu gcig pa las kun tu 'byung ba'i phyir/ lhag pa'i bsam pas bsngo zhing gzung du med do// zhes bstan pa yin no// da ni lhun gyis grub pa'i skabs 'chad de// bya ba med pa'i don ston to// yud kyis bsam pa yon bdag ste/ bltas pa'i stobs kyi bkram pa'o// zhes pa ni/ mi gnas pa'i ting nge 'dzin la yud tsam du gnas pa ni/chos kyi dbyings la dbang ba ste/ dper na chos thams cad kyi rgyal po ni yon bdag chen po zhes bya'o// de ltar bltas pa'i yul med pas/ grub pa'i stobs su gyur pa ni chos thams cad tshogs su bkram pa'o// mthong bar gyur pas dngos grub la// de ni mnyam bzhag rdzogs pa'o// zhes pa ni/ tshogs de dmigs par mthong ba ni mi 'gyur ba'i dngos grub chen po'o// de la mi gnas pa'i yongs su rdzogs pa'i mnyam pa nyid do// yud tsam bzung bas sbyor ba yin// dga' bar gyur pa dam tshig ste/ thabs kyi gar thabs bskyod pa yis// gnyis med sbyor ba phul ba yin// zhes pa ni/ bdag dang gzhan du mi dmigs pa ni chos kyi dbyings la sbyor ba ste/sbyor ba chen po zhes bya'o// de bzhin bde ba la gnas pa ni/ kun tu bzang po ste dga' ba chen po'o// chos kyi dbyings ma dang dga' bar ldan pa na/ mi gtong ba'i shugs nam mkha' dang 'dra bar sbyor bas// dam tshig ste nyams pa med do// sgyu ma'i sprul pa 'gyed pa ni thabs kyi gar thabs so// gzungs dang bde bar ldan pa'i don las 'byung bas na// bskyod pa ni chos kyi dbyings rang bzhin gyis dmigs su med pa dang/ chos kyi dbyings la kun tu bzang po mi dmigs pas// gnyis dang gnyis su med pa'i sbyor ba yin zhes 'byung ba yin no// da ni las rgya mtsho mnyam par bzhag pas 'grub pa'i skabs 'chad de// gzungs de dang bdag dang bcas pa'i gtor ma ston to// mi gzung gtor bas gtor ma yin// bya ba med pas las rnams zin// mi rtog ye shes bgegs bsal nas// mi gsung mnyam bzhag sngags tshig go/ zhes 'byung ba yin ste// de la chos thams cad ni gzung ba dang 'dzin pa'i mtha' spangs te/ mnyam pa nyid la gnas pa mnyam ba nyid kyang mi rtog pa/'di ni gtong ba chen po ste sdug bsngal thams cad zhi bar byed pa'i gtor ma'o// bya ba thams cad bral ba mi lhun gyis grub pa ste/ chos kyi dbyings kyi mthu dang ldan bas/ 'khor ba dang mya ngan las 'das par gyur pa'i las thams cad zil gyis mnan pa yin no// de la rnam par rtog na 'khor ba'i rgya mtsho ste bgegs chen po'o// mi rtog pa ni ye shes kyi nyi ma ste/ chos thams cad la mnga' brnyes pas/ phyi nang gi bgegs thams cad zil gyis mnan pa dang bsal zin pa'o// mnyam pa nyid las chos cig byung bas// rgyud 'dzin pa'i mthar 'gyur te/ bgegs kyi gnas so// de la gzung ba dang bral ba ni byang chub ste chos kyi dbyings kyi mthu'o// de bzhin du mi gsung bar 'dul ba ni sngags kyi tshig dam pa'o// da ni thabs med cing mi mkhas pas/ bdag dang bcas pa'i sbyin ba dang/ gtong ba dang/ bsod nams kyi tshogs bsags pa rnams la/nyon mongs par 'gyur ba'i skabs 'chad de/ de bzhin gshegs pa la chags pa dang ma chags pa'i don ston to// bla ma mchod dang gtong ba dang/ de bzhin bsod nams thams cad kyang// ma chags mi g.yo stobs med na// byas na 'ching ba chen por 'gyur/ zhes 'byung ba yin te/ bla ma zhes pa ni byang chub kyi snying po de// rang gi rig pa las byung ba'i sangs rgyas so// ci tsam du bdag chos nyid bde bar gnas pa na// 'khor gsum chen po yongs su tshim pa'i mchod pa chen po ste/ de mi byang chub kyi snying pos mchod pa'i rang bzhin no// de la rdo rje slob dpon ni chos nyid kyi rang bzhin te/ chos nyid de slob ma la 'byin bar mdzad pas/ston pa po sangs rgyas kyi spyan kyi yang spyan zhes bya'o// chos kyi mchod pa 'bul ba dang/ yid bzhin gyi nor bu rin po che rang las mchod pa dbul bar bya'o// de bzhin du bsod nams su bya ba yang/zin pa med pa'i gdeng dang/ chags pa med pa la mi dmigs par mi sbyor gyi/ bsod nams so zhes g.yo ba'i sems dang ldan na/ nyon mongs pa'i sa bon 'debs kyi/bsod nams mi byed do// de la ma chags pa ni rgyu/ mi dmigs pa ni sbyin pa chen po ste/ de bzhin du bsod nams thams cad nang du bsam par bya'o// de lta bas na/ byas na 'ching ba chen por 'gyur/ zhes 'byung ba yin no// da ni lung 'grel pa ming dang brdar bstan pa'i skabs 'chad de/ de bas lung de de nyid las/ de bas de bya sgrib par 'gyur/ de ltar de las de rtog na/ de la de nyid grub pa med/ ces 'byung ba yin te/de ni de bzhin nyid de lung de nyid la bya'o// de bzhin nyid la de bzhin nyid tshol bas sgrib bar 'gyur te// btsal ni sgrib par 'gyur ro// de bzhin nyid de las de bzhin nyid blangs te/ thob pa'i de bzhin nyid de la gnas na/rtog pa chen po ste/ nyon mongs pa'o// ci'i phyir zhe na/ zin pa'i chos nyid la bya bar rtsol ba ni/ nam mkha'i khams gzod bkod pa dang 'dra ste grub pa'i mtha' med do// de ltar bas na zhi ba mnyam pa chen po la ci dgar spyod cing// kun tu bzang po'i spyod yul la gnas na chos nyid yin no// zhes bcom ldan 'das lung thams cad kyi rang bzhin/ dpal rdo rje sems dpa'i gsungs pa rdzogs so//// mang+galaM////

CLOSE WINDOW