CLOSE WINDOW

Gpb051.010
བོད་ཡིག

rgya gar skad du/ kri yi badzra u kra na bi man khad kha mA la tsakra tan tra nA ma// bod skad du/ rdo rje gtsug lag drag po ngan sngags spu gri 'phreng ba'i 'khor lo'i rgyud ces bya ba// bcom ldan 'das dpal kun tu bzang po la phyag 'tshal lo// de nas bcom ldan 'das gsang ba drug gi bdag po 'jigs pa'i rgyan bcu drug dang ldan pa/ gsang ba'i mkha' drug nas bzhengs te/ drag po e drug gdan la bzhugs pa/gsang ba rigs kyi 'khor drug gis bskor te bzhugs so// de'i nang nas gsang ba drug gi bdag po lag na rdo rje e waM las bzhengs te// bcom ldan 'das la gsang ba drug gi mchod pas mchod de/bcom ldan 'das la 'di skad ces gsol to// e ma bde gshegs bcom ldan 'das// gong du gsungs pa'i rgyud rgyal gyi/ phyi ba'i rgyud drug rjes 'brengs nas// drag sngags rme bzlog ji ltar lags// las kyi 'khor lo rnam grangs su// bskor thabs rim pa ji ltar lags// gtad pa'i rim pa ji ltar lags// ldog mtshams rim pa rnam pa du// drag po'i sngags bdag ji ltar bskang// dregs pa spyi dang sgos sgos su// gnad ma'i rim pa ji ltar lags// gcig gsad pa dang sde gsad pa// 'di la khyad par mi 'tshal lam// mA ra ya yi 'phreng ba la// bsnyen bsgrub rim pa mi 'tshal lam// spyi yi gsang sngags gsang ba gang// rgyud 'di'i lde mig rnam grangs du// rgyud 'di ji ltar bzung bar bgyi// bcom ldan 'das kyis bka' drin gsungs// de nas bcom ldan 'das dpal kun tu bzang po mkha' drug gi gsang ba las bzhengs nas// sku gsung thugs kyi rdo rje las// dug lnga sel ba'i bdud rtsi mchog/ log pa'i rtog pa 'joms byed pa// ma 'ongs rnams kyi don du bshad// lus ngag yid gsum gus par nyon// phyi ma'i rgyud drug rjes 'brangs nas// rme bzlog sum bcu tham pa ni// spu gri 'phreng ba'i 'khor lo ste// gsang chen dang po spu gri ni// dus thug man ngag ma grub na// ting 'gyur las sngags srin pho mo// de la bar dang bsnyen pa gdags// de la sgrol sngags btags pas 'grub// nang thugs man ngag ma 'grub na// grub pa'i drag sngags srin pho mo// de la las dang bsnyen pa gdags// de la sgrol sngags gdags par bya// gzhan thun man ngag ma grub na// bsnyen pa'i drag sngags srin pho mo// de la las sngags bsgrub pa gdags// de la sgrol sngags gdags par bya// dus thug ma bzlog rkyen byung na/ khro mo'i las sngags srin pho mo// de la sgrol sngags gdags par bya// nang thug ma bzlog rkyen byung na// bsgrub pa'i sngags la srin pho mo// de la las dang bsnyen pa gdags// de la sgrol sngags gdags par bya// gzhan thug ma bzlog rkyen byung na// bsnyen pa'i drag sngags srin pho mo// de la las dang bsgrub pa gdags// de la sgrol sngags gdags par bya// cis kyang ma thub bgegs gnod na// dus thug phur las srin pho mo// de la bar dang bsnyen pa gdags// de la sgrol sngags gdags par bya// nang thub ma thub bgegs gnod na// bsgrub pa'i sngags la srin pho mo// de la bsnyen pa las gdags bya// de la sgrol sngags gdags par bya// gzhan thug ma thub bgegs gnod na// bsnyen pa'i sngags la srin pho mo// de la las dang bar gdags bya// de la sgrol sngags gdags par bya// dus drug bzlas pa'i long med na// las kyi sngags la srin pho mo// de la bar dang bsnyen pa gdags// de la sgrol sngags gdags par bya// nang thub bzlas pa'i long med na// bsgrub pa'i sngags la srin pho mo// de la bsnyen pa las gdags bya// de la sgrol sngags gdags par bya// dus thug blo bur dgra byung na// las kyi sngags la srin pho mo// de la bar dang bsnyen pa gdags// de la sgrol sngags gdags par bya// nang thug blo bur dgra byung na// bsgrub pa'i sngags la srin pho mo// de la bsnyen pa gdags par bya// de la sgrol sngags gdags par bya// gzhan thug blo bur dgra byung na// bsnyen pa'i sngags la srin pho mo// de la las dang bar gdags bya// de la sgrol sngags gdags par bya// pra ni mi la 'khor lo gzhug/ dang po thems la de sbyor bya// rdo rje gtsug lag drag po ngan sngags spu gri 'khor lo'i rgyud phyi ma las/ rme bzlog gsum cu'i rtsis bstan pa'i le'u ste dang po'o//// las kyi 'khor lo bstan pa yin// bka' dang sgra dang dur khrod dang// drag sngags phyi la nang 'khor lo// gsang ba 'khrul 'khor yin par bshad// rtsa ba 'khor lo chos sogs bzhi// yan lag chos sogs byin brlabs bzhi// spu gri las phye 'phrin las bzhi// de las bcur 'gyur brgya rtsa 'bum// rdo rje gtsug lag spu gri 'phreng ba'i rgyud las// 'khor lo dbye ba bstan pa'i le'u ste gnyis pa'o//// las 'khor bskor ba bcu gcig yin// dge 'dun sde kyang sde chen la// rang rang rgyud bshad 'khor lo la// thun mong par bu phyir bzlog bya// sngags pa sde kyang sde chen la// rang rang rgyud bshad 'khor lo dang// sdig pa kha 'thab 'khor lo bskor// rgyal po bram ze la sogs la// rang rang rgyud bshad 'khor lo dang// srog mda' dmar po'i rim pa dang// bdud la sogs pa'i gnyen por sbyar// gang 'dod nad ni 'khor los so// 'phrin las bsrung sogs rim par sbyar// bgegs la sde dpon 'khor lo dang// gnyen po rim pa sbyar bar bya// sgra sogs rtsod pa gsum la sbyar// de la las grangs sbyar ba ni// rang dang gzhan dang nyan thos dang// mu stegs can la las 'bum sbyar// rdo rje gtsug lag drag po ngan sngags spu gri 'phreng ba'i 'khor lo'i rgyud las/ 'khor lo bskor thabs bstan pa'i le'u ste gsum pa'o//// gtad pa gsum las dbye ba ni// dgra bla bsnyen pa gtsor bsgrub yin// grogs ni bsgrub pa gtsor bsgrub pa'o// las ni las sbyar gtsor byed do// rdzas dang ting 'dzin de dang 'dra// grub pa sngags skyes las grub pa// 'brel pa rang rang rigs rgyud mgo/ rten 'brel ma tshor rdzas kyis gtad// gang du rjes med smyo byas la// tha ma rdzas bdun bsreg 'bros bya// zil gnan rang bzhin 'bru bzhis gzir// bcu pa drag po 'bru bzhis gzer// gsad pa brtsan thabs 'bru bzhis gzer// trig nan hU~M phaT rang bzhin no// tsit+ta rbad nan drag po'o// rbad nan phaT rbad btsan thabs so// sde dpon bco brgyad rim bzhin sbyar// rdo rje gtsug lag drag po ngan sngags spu gri 'phreng ba'i 'khor lo'i rgyud las/ gtad thabs bstan pa'i le'u ste bzhi pa'o//// sngon ldog lha gdon phyed byas la// rgyud drug rjes 'brengs bsnyen gsum 'jug/gsang rdzas bdun gyis lus bsrung bya// thug phrad nyams gsum bstan pa ni// rdzas dang sngags dang ting 'dzin dang// rdzas ni srung ba'i rdzas yin la// sngags ni bsrung sngags rab tu drang// bstan 'dzin srung pa go mgo bsrung// rjes 'jug ldog pa bzhi yin te// sngags dang rdzas dang ting 'dzin dang// phyag rgya rnam bzhi gsang ba'o// sngags mtshams gcad bcing bskrad pa'i sngags// rdzas dang rjes gcad rten 'brel bdun// ting 'dzin shugs kyis 'phangs pa yin// phyag rgya stang stabs bsrung bar bya// brtags pa bsngags bzla sbyor bzhi gshig/ rdo rje gtsug lag drag po ngan sngags spu gri 'phreng ba'i 'khor lo las/zlog mtshams bstan pa'i le'u ste lnga pa'o//// gnam sa bar dang gsum rnams ni// dus la sogs pa thug pa dang// rtags dang sbyar la bskang ba ste// lugs byung ru log dngas snyigs 'byed// lugs 'byung grub rtags mi 'grub rtags// mig dang rna ba sna dang yid// rim pa bzhi ru brtag par bya// 'byung ba dngas snyigs gsang khrag rtags// 'khor ba ru log spyi tshugs dang// 'bred 'byung mgo rnams mang dang med/kha dog la sogs bzhir brtag bya// de dus thabs bzhis bskang bar bya// rten pa'i gnas gsum rdzas yin la// bskang ba'i gnas gsum skabs dang sbyar// rdo rje gtsug lag drag po ngan sngags spu gri 'phreng ba'i 'khor lo'i rgyud las/bskang dus bstan pa'i le'u ste drug pa'o//// dregs pa'i spyi dang sgos sgos kyi// gsad pa drag po rgod kyi sngags// trig nan e hur thums dza/ sarba duSh+tan/ trig nan hU~M phaT/ tsit+ta rbad thum ril ma ra ya phaT/ trig nan/ a hur thums dza/ tsit+ta rbad nan/ tsit+ta thums ril ma ra ya rbad/ trig nan/ e hur thums dza/ rbad nan phaT/ rbad/ tsit+ta thums ril ma ra ya rbad/dkrug pa'i rim pa dgu ru sbyar// rdo rje gtsug lag drag po ngan sngags spu gri 'phreng ba'i 'khor lo'i rgyud las/ gnad dang gshed ma'i rim pa bstan pa'i le'u ste bdun pa'o//// gcig gsad sde gsad bstan pa la// trig nan/ e hur thums dza/ sarba duSh+tan/ trig nan hU~M phaT/ sha truM tsit+ta rbad/ thuM ril mA ra ya phaT/ trig nan/ e hur thuM dza/ sarba du Sh+tan/ trig nan hU~M phaT/ hri che ge mo tsit+ta rbad thuM ril mA ra ya phaT/rdo rje gtsug lag drag po ngan sngags spu gri 'phreng ba'i 'khor lo'i rgyud las/ gcig gsad sde gsad bstan pa'i le'u ste brgyad pa'o//// mA ra ya yi bsnyen pa ni// 'byung ba drag sngags dbye ba yis// bsnyen pa'i 'phreng ba bzhi ru gsungs// drag sngags bsnyen pa gnyis yin te// spyi dang bye brag gnyis su bstan// spyi ni oM drangs mA ra ya// sgo sgos rang rang rtsa ba'i sngags// 'byung ba 'das dang ma 'das gnyis// 'das pa'i 'byung ba oM drangs nas// 'byung bzhag dza yis mtha' brten pa'o// bsgrub pa'i las rnams de bzhin sbyar// drag sngags gcig bsgrub bstan pa yin// lha yi sbyor ba rigs drug sogs// sde dpon la sogs sbyar bya ba// sdebs dang bcad pa'i las su bshad// rdo rje gtsug lag drag po ngan sngags spu gri 'phreng ba'i 'khor lo'i rgyud las/ mA ra ya 'phreng ba'i bsnyen bsgrub bstan pa'i le'u ste dgu pa'o//// spyi yi gsang sngags gsang ba ni// rang bzhin la sogs drag sngags la// stong nyid gnyis drangs dbyangs bcu drug/ tha ma stong pa gnyis kyis mdzes// rdzogs pa'i sna grangs gsal byed dang// rang gi lha dang sbyar ba ni// chos sku longs sku sprul sku sbyar// rang bzhin drag po btsan thabs dril// drag sngags gsum zhes bya ba yin// bse dung lcags la drug dbye gsum// de la gang byed rtag byas nas// gnad zlog lnga ru 'gyur ba yin// sa rnams btags pas las 'grub 'gyur// rdo rje gtsug lag drag po ngan sngags spu gri 'phreng ba'i 'khor lo'i rgyud las/ spyi'i gsang sngags bstan pa'i le'u ste bcu pa'o//// rdzas dang 'khor lo mtshon cha gsum// dang po bar mthar bshad pa yin// tshig don sngags don man ngag gsum// gab sbas gsang bar bshad pa yin// thems dang rtsis dang tshad ma gsum// 'byed 'grol 'byin par bshad pa yin// rdo rje gtsug lag drag po ngan sngags spu gri 'phreng ba'i 'khor lo'i rgyud las/ lde mig bstan pa'i le'u ste bcu gcig pa'o//// dpag bsam shing dang bum pa dang// nor bu lta bu'i rgyud du bzung// rdo rje gtsug lag drag po ngan sngags spu gri 'phreng ba'i 'khor lo'i rgyud las/ rgyud yongs su bzung ba'i le'u ste bcu gnyis pa'o//// rdo rje gtsug lag drag po ngan sngags spu gri 'phreng ba'i 'khor lo'i man ngag rdzogs so/

CLOSE WINDOW