CLOSE WINDOW

Gpb050.004
བོད་ཡིག

yak+Sha ba su a pa ra pa ti gu h+ya tan tra nA ma/ bod skad du/ gnod sbyin nor bdag gsang ba'i rgyud ces bya ba/ bcom ldan 'das dpal phyag na rdo rje la phyag 'tshal lo// 'di skad bdag gis thos pa'i dus gcig na/bcom ldan 'das gsang ba'i bdag po ri rab kyi rtse mo na 'dus pa'i 'khor rnams dang thabs cig tu bzhugs so// gleng bzhi'i le'u ste dang pa'o//// de nas gsang ba'i bdag pos thams cad 'dus pa'i ting nge 'dzin la bzhugs te/byin gyis brlabs kyis gsang sngags 'di bka' stsal to// oM badzra tsaN+Da ma hA ro Sha Na hUM phaT/ ces bka' stsal pa dang/ 'jig rten gyi khams thams cad 'dar zhing g.yos par gyur te thams cad dbang du gyur to// de'i tshe de'i dus na gnod sbyin nyi ma'i mig can sring mo dang bcas pa gsang ba'i bdag po'i spyan sngar 'dzum pa'i mdangs phyungs te 'di skad ces gsol to// e ma ho gsang ba'i bdag po// bdag cag gi rig pa 'di byin gyis brlab tu gsol// oM d+hi 'di a pa ra tsit+ta swA hA/ oM shri ri hUM/ zhes rig pa dngos su smras te 'di skad ces gsol to// e ma ho/ bdag ni gsang ba'i bka' nyan cing// dngos grub myur du bsgrub par bgyid// zhes smras so// dam la btags pa'i le'u ste gnyis pa'o//// de nas dpal gsang ba'i bdag pos gnod sbyin la dmigs te/'dus pa'i 'khor rnams la bka' stsal pa/ nor bdag sgrub par 'dod pa yi// tshes gcig la 'jug nya la gdon// zas ni dkar chos bza' byas la// dkar gsum dang ni 'bras chan dang// mngar gsum dang ni dri sna tshogs// ka to ra ni bkang la bzhag/ nya yi nub mo kho 'ong pas// bdag nyid nyams ni 'jigs pa yang// phyag rgya mi bshig gul bsreg/ sor mo rnams ni nang du bsnol// gong mo pad+ma'i tshul du byas// kho yi gzugs la nges pa med// res tshe byis pa khye'u'i gzugs// res 'ga' mi reng chen po cig/ mig ni bag tsam lhung la khad// des na nyi ma'i mig tu grags// kho yi gzugs la brtag tu med// ji ltar byung yang sid+d+hi blang// yid la byung na yid kyis te// dngos su byung na tshig gis bskul// 'dod yon lnga la longs spyod dang// ci bsam lhun gyis grub pa dang// dngos grub chen po bdag la stsol// de ltar bskul la dngos grub blang// ma grub bar du lan gsum skyar// des ni kho nyid dngos su 'grub// ces gsungs so// gnod sbyin gyi de kho nyid bstan pa'i le'u ste gsum pa'o//// de nas yang dag bshad bya ba// sgrub pa'i dus kyi dam tshig ni// sha chang sgog btsong bud med spang// rgyun du bsrung ba'i dam tshig ni// mi nag yugs mo 'grogs la men// dad med chos la mi mos shing// 'dod pa'i dbang gis 'di sgrub pa// sgrubs kyang mi 'grub rang tshi chad// dngos grub ci byung sum cha yis// pha ma bla ma dkon mchog mchod// sum cha 'gro ba yongs la sbyin// sum cha bdag dang gnod sbyin la// zas kyi dngos grub ci byung ba// a pa ra la bla sder grang// snying rje'i dam tshig ldan par bya// zhes gsungs so// dam tshig bstan pa'i le'u ste bzhi pa'o//// de nas gsang ba'i bdag pos gsang sngags 'di rnams bka' stsas to// oM d+hi a pa ra tsit+ta dza dza/ rtsa ba'i snying po'o// sa ma ya/ dam tshig gi snying po'o// ma hA sid+hi/ dngos grub blang ba'o// ba ling grih+Na kha kha khA hi/ gtor ma dbul ba'i snying po'o// oM shrI hUM dza dza/ sring mo'i snying po'o// gsang sngags bstan pa'i le'u ste lnga pa'o//// de nas yang dag bstod pa ni// phyag na rdo rje'i dam tshig can// gnod sbyin chen po nor gyi bdag/ sku mdog dkar po byis pa'i gzugs// phyag na dngos grub bum pa 'dzin// rin chen rnams kyi rgyan dang ldan// yid bzhin 'bru yi char 'bebs mdzad// nor gyi bdag la dad pas bstod// mchod pa'i gtor ma bzang po dang// sder bzangs dam pa 'di bzhes la// nga yi bka' las ma 'da' zhig/ gal te bka' las 'das 'gyur na// dam tshig dag la 'gal bar 'gyur// zhes pas bstod cing mchod pa dang// dam tshig bsdar zhing dngos grub blang// zhes gsungs so// mchod bstod bstan pa'i le'u ste drug pa'o//// de nas yang dag bshad bya ba// sring mo dag ni sgrub 'dod na// maN+Dal byas la gtor ma bsham// dkar gsum dag gis brgyan la bzhag/ sngags ni 'bum phrag gsum du 'don// de nas mngon du gyur pa dang// tshig gis bskul la dngos grub blang// 'dod pa'i don la khol mo gyis// rin chen 'bru yi dngos grub gsol// des ni dngos grub chen por 'gyur// zhes gsungs so// sring mo bsgrub pa'i le'u ste bdun pa'o//// de nas gnas kyi don nyid 'di stsal to// rdo ba dkar po gru bzhi la// gnod sbyin sngags bris mgul du bcang// las rnams byed du ma 'dod na// dam tshig snying po bzlas la gzir// 'chil ma btab la mnol du bzhug/ de yis las rnams grub par byed// gzhan yang ras mchog ma nyams la// tshon rtsi sbyin med bzang po yis// nor bdag ming sring sku gzugs bri// dben pa'i gnas su gzhug par bya// gzhan la mi bstan dngos grub blang// zhes gsungs so// bla rdo gzung ba'i le'u ste brgyad pa'o//// de nas bcom ldan 'das gsang ba'i bdag pos rgyud yongs su bzung ba 'di bka' stsal to// rgyud 'di'i yon tan bsam mi khyab// thams cad 'du bar 'gyur ba yin// lha 'dre mi gsum dbang du 'dus// de nas bsod nams bskyed pa yin// gang na 'dug pa'i sa phyogs der// dgra yi gnod pa mi 'byung ngo// rkyen gyi sbyor ba zhi ba dang// khros pa thams cad zhi bar 'gyur// sum cu rtsa gsum lha dang mnyam// lha ma yin gyi lo tog dang// rin chen gter rnams bdag la ster// tha skar dri med lha mo yang// bdag la chags 'gyur dngos grub mthong// dngos grub yon tan bsam mi khyab// de phyir rgyud 'di bcang bar bya// zhes gsungs so// rgyud yongs su bzung ba'i le'u ste dgu pa'o//// de nas bcom ldan 'das gsang ba'i bdag po la 'khor rnams yi rang nas bstod pa/ e ma ho gsang bdag rdo rje 'chang// gtum po chen po gzi dang ldan// sangs rgyas kun gyis dbang bskur ba// yon tan thams cad ldan la bstod// ces pas bstod par gyur to// de nas bcom ldan 'das nyid chos kyi dbyings su gshegs te 'khor thams cad rjes su yi rang bar gyur to// 'khor gyis bstod pa'i le'u ste bcu pa'o//// gnod sbyin a pa ra tsit+ta gsang ba'i rgyud ces bya ba rdzogs so//// gu ru pad+mas bi ma la la bshad/des gnyags dz+nyA na la bshad// des rdo rje yang dbang gter la bshad/ des gter du sbas so// man ngag la dam tshig snying po rtsa ba'i sngags kyi dza dza'i gong du gzhug/ dngos grub blang ba yang de ltar shes par bya// gtor ma'i snying po dza dza 'og tu gdags// kun dka' rtsa ba'i sngags la sbyar zhes gu ru bi ma las gsungs so////

CLOSE WINDOW