CLOSE WINDOW

Gpb049.003
བོད་ཡིག

rgya gar skad du// shrI d+ha pi kla li swa na ba tra tan tra// bod skad du// dpal lha mo nag mo gser gyi sbram bu zhes bya ba'i rgyud// dpal phyag na rdo rje phyag 'tshal lo// ri rab chen po'i byang phyogs su// dpal ldan phyag na rdo rje ni/ 'khor gyi lha srin dbye ba dang/ rab tu 'jigs pa'i gnas na bzhugs// de tshe 'khor gyi gtso bo ni/ dpal ldan mgon po nag po su/ bcom ldan 'das la phyag 'tshal te// mchod pa rgya chen phul byas nas// bskor ba lan gsum byas nas su// mdun du 'dug nas 'di skad zhus// kye ho gsang bdag rdo rje bsnams// bdag gi sring mo nag mo ni// dpal ldan lha mo zhes bya ga// byang shar mtshams kyi pha mtha' na// gnod spyin ma'i chung ma byed// de yi skye brgyud ji ltar lags// bsgrub cing bsnyen pa bya ba dang// sid+d+hi blang zhing dgra la rbad// bstod bskul la sogs ji ltar lags// grub pa'i rtags rnams ji ltar lags// bar du gcod pa'i dul thabs gang// zor dang spyin sreg mnan pa ci// thun dang 'khor lo bskor ba dang// 'jig rten snang byed mig mthong gang// drag po sngags su bsgrub pa na// de la rnam pa du zhig mchis// rtags dang mtshan ma bzlog pa dang// ltas bsgrub bskang zhing ji ltar mchod// ltas ngan cho 'phrul gtang ba dang// thog ser ji ltar dbab par bya// tshe dang mdos la sogs pa yi// rnal 'byor pa dang 'khor rnams la// bsrung zhing gso ba ji ltar lags// b+ha ga wan gyis bshad du gsol// zhes zhus so// lha mo gser gyi sbram bu las// zhus pa'i le'u ste dang po'o// de nas yang dag bshad bya ba// b+ha ga wan phyag na rdo rje ni// rdo rje rab ces bya ba yis// ting nge 'dzin la snyoms zhugs nas// snying pau 'di ni bka' stsal to// trag rag sha ma hi dun b+h+yo// mahA yag sha tig sna nag po dun b+h+yo// de skad gsungs ma thag tu ni// byang shar mtshams kyi pha mtha' na// dpal ldan lha mo nag mo ni// dus bzhi'i rgyal mo la sogs pa// 'khor gyi ma mo 'bum stong dang/ skad cig de la 'dus par gyur// de tshe dpal ldan nag po ches// dpal ldan lha mo nag mo la// 'di skad ces ni bka' stsal to// nyon cig lha mo nag mo ni// skye bdud la sogs ye shes bshad// sngon gyi yar 'das bskal pa la// 'dod khams lha dang lha ma'i 'khrugs// lha rnams 'pham ste lha min rgyal/ de tshe lha rnams mdangs las su// sbrul pa'i lha mo mdangs ldan ma/ de yi lte ba'i rdzong la ni// lha rnams kun gyi dmag dpung bcas// lha ma yin gyis g.yung ngo bzlog/ skye ba de yi phyi ma la// lha mo bde tshogs mar gyur te// lha rnams kun gyi 'dod pa bskangs// skye ba de yi phyi ma la// me tog dag gi sbyin pa gtang// lha mo 'od zer can du gyur// de la sogs pa'i skye ba ni// brgya dang rtsa brgyad bzlas pa na// byang phyogs mya ngan rnam du ru// tri li tra'i chung ma byas// las kyi phag rdzi nag mo ni// dum bu byin gyi byi'i chags// de yis yi chad brang bkab nas// bong bu zhon nas ral gri khyer// rgya mtsho'i nang du mchongs pa las// e ka dza Ti sid+d+hi thob// skye ba sngam rjes su dran// las la yid ches bden pa mthong// shwakya thub pa'i zhabs drung du// sems bskyed sdom pa rab blangs te// srog gi snying po phul nas su// sangs rgyas bstan pa srungs pa dang// dkar po'i phyogs kyi mgon bgyid cing// bdud dang mu stegs 'dul bas su// lha mo nyid kyi khas blangs so// shes gsungs so// gser gyi sbram bu las// skye brgyud bstan pa'i le'u ste gnyis pa'o//// de nas yang dag bshad bya ba// dpal ldan lha mo grub 'dod pa'i// rnal 'byor pa yi mtshan nyid ni// shes rab snying rje dang ldan zhing// dpa' zhig bstan la sogs pa dang// lha dang bla ma la gus shing// dam tshig srog ltar bsrungs pa des// gnas ni ri bo'i rtse mo 'am// chu gsum 'dus sam brag nag gam// dur khrod dben pa'i 'dre gnas su// dgos pa'i yo byad kun bsags te// sbyin gtor la sogs rgya cher bya// bden bdar gnas kyi bdag mo mchod// de nas skyes pa g.yul gsad dam// phung shul dag nas sa blangs te// sa la stegs bu legs par brtsig/ de nas mchod pa'i dam rdzas dang// bskang ba'i rdzas dang bsgrub pa'i rdzas// thams cad ma lus 'tshogs par bsag/ dur khrod ro yi ras la ni// mtshan nyid ldan pa'i 'dri mkhan gyis// dpal ldan lha mo nag mo yi// 'bar ba gdong gi dkyil 'khor ni// ji skad bshad pa bzhin bris la// de drung dbang po'i me tog dang// spos chen mar me chen po dang// bdud rtsi'i dri mchog la sogs pa// rak+ta'i gsang nan bdud rtsi dang// ltag sprod rnga dung rkang gi dung// zhing rgyan ba su ta'i zhags pa bsham// de nas bskyed pa'i rim pa ni// rang nyid lhag pa'i lha ru sgom// gong du bris pa'i gzugs brnyan de// dmigs su med par gyur pa las// ting las dren nag kham nag bskyed// de yi sga gong nyid dkyil du// k+sha las sngags brjod bskyed par bsam// oM nag mo ti lam mam ma dung ting b+h+yo// zhes pas nag mo zhal gcig la// phyag bzhi g.yas pa kha T+waM kha/ g.yon gyi gong ma me long 'dzin/ g.yas kyi 'og ma lcags phur la// g.yon 'og sbrul zhags 'dzin pa'o// dre 'u gong dag na tsam dkyil bzhugs// ral pa'i thor tshugs gyen 'grengs ba'i gseb na dus bzhi'i rgyal mo bzhi// ral pa gser dang mi tig brgyan// zhing lpags stag sbrul sgrog pa can// gong mtshan g.yu yi rgyal gram can// nag mo 'bum dang bcas pa bsgom// de nas spyan drang pa 'di skad do// nag mo ting lam ma dung ti b+h+yo// dzaH hU~M baM ho nag mo dun b+h+yo// oM oM hU~M e h+ye hi dza a ra li hU~M hrong hi// gzugs brnyan la bstim// rak+sha sa ma ya tiSh+tha lhan// bzhugs su gsol pa'o// rag mo dun ting na ma ya ha hi// phyag btsal pa'o// nag mo san ta pan ta ku lu ku lu ha ha ha// mahA maM sa khA hi// mahA rag ta khA hi// mahA pany+tsa sha a mr-i ta khA hi// b+hun dza ho// po pa to// sa ma ya swA hA// bza' btung bstab pa'o// hU~M// ma cig srin mo nag mo'i sku yi cha lugs ni// mi 'gyur gnag pa'i ral pas sa gzhi khyab// gdug pa rtsad gcod sprul pa'i phyag mtshan bsnams// bong bu ga zhon gti mug dgra bgegs 'dul// srin mo nag mo gsung mo gi cha lugs ni// ha ha hi hi dgyes pa'i gad mo sgrogs// ru lu'i b+h+yo sgrog srid gsum zil gyis gnon// gsod cing gcod pa'i ngan sngags char du 'bebs// srin mo nag thugs kyi cha lugs ni// ma mthun bgegs la zhe sdang phyogs ris mnag/ rnal 'byor dam tshig can la dgongs shugs dang ldan// khros tshul nag mo 'jigs pa'i gzugs dang ldan// sku gsung thugs ldan ma la bdag bstod do// zhes sku gsung thugs kyi sgo nas bstod do// de nas don rtags kyi sgo nas bstod pa ni// hU~M// bskal pa me ltar 'bar ba'i klong dkyil nas// rlung nag 'tshub ma'i nang gshed nas// ma cig 'dod pa khams kyi dbang phyug ma// bdud kyi yum la gshin rje'i lcam gcig ma// nag mo mi srin rngam pa'i mche ba can// sku mdog mthing nag gcer bu ral pa can// sku mdog nag mo'i tshul du bzhugs pa ni// chos kyi dbyings la bskyod pa med pa'i rtags// ral pa g.yas nas g.yon du 'khyil ba ni// chos nyid de bzhin gcig tu dgongs pa'i rtags// ral pa'i gseb nas me stag 'phro ba ni// thugs kyi sprul pa phyogs bcur 'gyed pa'i rtags// thod rlon 'phreng ba dbu la bcings pa ni// thugs rje'i sprul skus 'gro don mdzad pa'i rtags// g.yas kyi snyan nas seng ge 'phyo ba ni// sman mo thams cad zil gyis gnon pa'i rtags// g.yon na sbrul gyi gdengs ka 'phyo ba ni// zhe sdang ma spangs dbyings su dag pa'i rtags// snyan cha gser gyi dril bu khrol ba ni// sangs rgyas kun la bsnyen bkur mdzad pa'i rtags// spyan rtsa dmar po sdang mig bgrad pa ni// dgra bgegs thams cad rtsad nas gcod pa'i rtags// shangs kyis khrag dang zhag gis dri snom pa// dgra bo'i khrag dang zhag gi dri tshor na// dpag tshad brgyad khri gnas nas len par byed// zhal gyi drag po'i hoM khung gdengs pa ni// dam nyams dgra bo zhal du gsol pa'i rtags// rno sdug mche ba zur gsum gtsigs pa ni// dgra bgegs sha rus chem chem gsol ba'i rtags// gong mtshan g.yu yi rdo rje rgya gram la/ 'ja' tshon sna lnga'i 'phur lce 'phyo pa ni// ye shes rnam lngas 'gro don mdzad pa'i rtags// thugs rje chags rtags rak+ta thig les mtshan// don dam bcu rtags zhag gi zo ris mtshan// 'dul byed las rtags thal chem chem mtshan ma btab// zhing lpags rlon pa sku la gsol ba ni// chos nyid yang dag don dang ldan pa'i rtags// glang chen ko rlon gnam phyed dkris pa ni// theg pa mchog gi don dang ldan pa'i rtags// re lde nag pos sa phyed dkris pa ni// 'jig rten 'di ni che btsan ldan pa'i rtags// lte ba'i dkyil na nyi ma 'char ba 'di// sdug bsngal rgya mtsho ma lus skems pa'i rtags// lcags sgrog 'bar ba zhabs la 'khrol ba ni// 'dod khams 'dul ba'i dbang dang ldan pa'i rtags// g.yas pa kha T+wAM rtse gsum bsnams pa ni// dam nyam khams gsum rdul du rlog pa'i rtags// 'go ma lcags kyi phur pa bsnams pa ni/ dam nyams klad pa'i rgyas su 'debs pa'i rtags// g.yon pa 'khrul ba'i me long brnams ni// snang srid gsum po la gzigs pa'i rtags// 'og ma sbrul nag zhags pa bsnams pa ni/ dam nyams dgra bo ma lus 'ching ba'i rtags// rta men bong men dre'u zhon pa ni// chos nyid dbu ma'i don dang ldan pa'i rtags// srin po ma mkhal snga ru byas pa ni// bdud dang srin po zil gyis gnon pa'i rtags// sbrul nag chun pos gong rmed byas pa ni// zhe sdang dbang gis dgra bgegs 'joms pa'i rtags// rus sbal nag po'i thor bur brgyan pa ni// klu rigs thams cad dbang du sdud pa'i rtags// dre'u'i gong na btsan dkyil bzhugs pa ni// 'jig rten 'di na 'gram zla med pa'i rtags// bdud kyi khram bam rgyab la khur ba ni// dam nyams dgra bo khram la 'debs pa'i rtags// nad kyi rkyal pa snga shar bcings pa ni// dkon mchog dbu 'phangs smod pa'i dgra bo la// nad ka 'bebs shing dal ka bsgyur ba'i rtags// 'phongs la tshon gyi gru gu bkal ba ni// dgra la mtshon nad sna tshogs gtong ba'i rtags// gong na shod rdo dkar nag bsnams pa ni// dgra bgegs ma lus shor la 'debs pa'i rtags// nag mo 'bum phrag bran du 'khol ba ni// gang la bya ba'i snying nas 'dren pa'i rtags// bu gcig bdag gi dgra bo khrid la shog/ ma cig kha ba na me 'bar rgya mtsho skam// ma cig lag na rdo 'phyar ri rab bsnyil// ma cig ral nag mun pa stong khams khengs// ma cig kha nas mi sha rlon pa za// ma cig zhal nas khrag gi rgya mtsho 'khyil// bdag gi dgra bo dam nyams sdig can 'di// khong nas snying phyung gdong nas 'od 'phros la// bdun rgyud rtsad nas gcod pa'i las mdzod cig/ de nas bzlas pa bya ba ni// 'bar ba gdong gi dkyil 'khor la// rgyus chen sum sgril snying khar gdags// rtse mo bdag gis bzung byas la// de nas bzlas pa'i sngags rnams ni// thugs dang bskul dang sid+d+hi stsol// mgal me lta bu'i tshul du bya// trag rag sha ma hi dun b+h+yo// mahA yak+sha ti sna nag mo dun b+h+yo// rtags dang grangs dang dus kyi ni// bsnyen pa rnam pa gsum du bya// de nas bsgrub pa brtsams pa ni// dkyil 'khor 'dom gang gru bzhi la// dbus su gru gsum nag po bru// de mtha' zla gam dmar po dbang// mu khyud dkar po zhi ba ste// gru bzhi ser po rgyas pa'o// de nas bsgrub pa'i dam rdzas ni// ban d+ha lcang lo mtshan ldan du// bdud rtsi sman dang rak+ta chang// g+hi hang ga pur cong zhi ser// sha chen tshil chen ga pur gzhag/ mi dbang rak+ta tsit+tar bcas// pad+ma rak+ta byang chub sems// 'bru dang sbyar la dbus su gzhal// rigs bzang ban d+ha mtshan ldan du// dbus su yi ge k+sha bris la// de mtha' srog snying bskor ba ni// gong gi dam rdzas steng nas dgab// ma nu'i ba sus rgya gram bcings// de nas ba li la sogs pa// mchod dang bskang ba'i rdzas bshams nas// rang nyid lha bskyed rdzogs byas te// dpal ldan lha mo nag mo yang// gong gi ban d+ha'i yig 'bru las// snying po sngags kyis gong bzhin bskyed// bdag las bskyed pa'i lha mo yang// de la bstim nas mchod pa dang// 'dod pa'i don zhu gsol ba gdab// byang shar mtshams nas de 'dra'i sku// dgug dang gzhug dang brtan byas la// de nas mchod bstod gsol ba gdab// bsgrub pa'i sngags ni gong ltar drang// ma ma ma trag rag sha re ma ti snying kha rag tsi da tsa pe la a shug me b+h+yo dza// sum 'bum grangs ni thon gyur cing// mtshan ma bzang po mthong pa'i tshe// dam rdzas ban d+ha kha bzlog ste// 'dza 'gad bdud rtsis bkang byas la// 'di skad bstod de sid+d+hi blang// hU~M/ 'dod dgur bsgyur ba'i gzugs can 'phrul mo che// sku gsung thugs nyid rdzogs pa'i byin rlabs can// dam bcas bzhin du tshul bzhin bsgrub lags na// sgrub pa rtags kyi dngos grub nga la blang// theg pa'i rim dgu sbyor zhing gsang pa'i dam la gnas// thums dam rgyud bskul bcol ba'i 'phrin las mdzod// bstan pa'i sde snod kun las mdzad// bar chad zhi dang log lta dbang du sdud// tshe dbang rgyas dang dgra bgegs sgrol ba yis// mdzad pa 'phrin las dngos grub bdag la khol// tshe ring nad med lang tsho bde ba dang// bsam grub 'gro gang dbang du sdud pa dang// bu tsha 'phel zhing 'khor 'dab rgyas pa dang// yid bzhin bsgrub pa'i yon tan dngos grub stsol// khyed kyi sku gsung thugs kyi dngos grub de// sgrub pa'i gzhung la brten te bsgrubs lags na// dur khrod rdzas la brten te bdag la stsol// zhes brjod la// oM AHhU~M a la la ho// zhes ma mo mchod// oM AHhU~M kA ya bAk+ka tsit+ta a be sha/zhes rang btung zhing longs spyod// khyod dang bdag gnyis dam bsre na// dus 'di ni bzung byang chub snying po'i bar// bdag kyang dam la mi 'da' ste// lha mo khyod la mchod 'bul bstod// ma yang dam las ma 'da' ba// ma sring byams pa'i tshul gyis grogs mdzod cig/ sa ma ya a la la ho// zhes dam sre yi dam lha la dpang du gzugs// gal te rtags rnams log gyur na/ ngu zhing brang rdung phyag 'tshal lam// sems yengs rgaud dang du bro na// bzang mo sbyor ba byed pa na// grub pa'i rtags rnams ma yin pas// bskang ba'i cho ga rgya cher bya// lug nag spyi dkar khyi nag thod dkar ram// bya nag gshog rtsa dkar po dang// sogs kyi zhal zas kun bsags la// ma cig lha mo dpal lha mo// sku mdog nag mor bzhugs shing chos nyid spros dang bral// dre rta rkang gsum chibs shing stong gsum khyab par nyul// me long sbrul zhags bsnams nas dam nyams sgrol zhing 'ching// kha T+wAM phur pa thogs nas dam nyams rdul du rlog/ stong gsum khram la 'debs shing srid gsum bshod la grangs// mtshon gyi gru gu skying zhing nad kyi rkyal bu 'bud// mi nad phyugs nad gtong zhing khams gsum rtsis la 'debs// stong gsum ma dang sgrangs rgyas dam la sdud// 'gro don ci mdzad chos nyid dbyings su mkhyen// rgyu gsum bsgral pa'i sha khrag rus// 'byor dang tshogs kyi zhal zas dang// mchod pa'i dam rdzas bsgrub rdzas kyis// bskang ngo bskal pa'i thugs dam bskang// nag sngo ser smug dkar nag pho nya dam can tshogs// phyag rgya sna tshogs sku yi rgyan du mdzad// phyag rgya sna tshogs ma'i thugs dam skong gyur cig/ nag mo kha la dza ya du sa ma ya ru lu ru b+h+yo dza snying kha la ti thun b+h+yo// hU~M// ting 'dzin g.yel bas ma cig sku ma gsal// phyag rgya ma gsang thugs kyi dam las 'das// 'dzab zlos ma tshang gsung gi dam tshig nyams// sku gsung thugs la bdag gi mthol bshags na// 'phangs pa'i dbang gis mchod pa rgyu chungs nas// ser sna'i dbang gi dam rdzas ma tshang ste// thugs rje che bas dmigs pa'i sgra ma sgrol// dam can khyod nyid la ni bshags pa bgyi// zhes bskang zhing bshags pa rgya cher bya'o// zhes gsungs so// ma mo gser gyi sbram bu las// bsgrub pa'i le'u ste gsum pa'o//// de nas yang dag bshad bya ba/ dkyil 'khor de yi lho nub tu// 'brub khung gru gsum nag por bya// zabs su khru gang rgyar khru do// dur sol khrag chen sbyar pa yis// zhal zhal nag po byas nas su// zla gam rnam gsum dmar por bya/ mu khyu dkar po gru bzhi ser// tha ma me ri'i 'phreng ba can// gru gsum par rim dang po la// thod pa yi ni 'phreng ba btang// gnyis pa ral gri gsum pa gtad// nang du yugs sa'i dor rta gding// dri ma drug la dgra gzugs bya// tsha ba gsum gyi khu bas byug/ thod pa mtshan ngan nang du ni// ra rta khyi dang phag khrag blugs// spyang dug ngag kyang blugs par bya// thod pa de'i nang du ni// lcags kyi phur pa sor brgyad bdun// rtse mo gnam du bstan la gzhag/ gtor ma la sogs kong ltar bsham// de nas de'i bsam pa ni// gcer bu mdog nag khros pa bdun// khrag gi mtsho la 'bogs bskyal nas// lag pa khrag la rtse bar bsgom// bdag las phyung la de la bstim// mchod bstod la sogs gong ltar bya// de nas snying po 'di nyid bzlas// re ma ti pa sha tsa pa la// dun dun rag sha rag sha mu tra ru lu ru lu b+h+yo dza dza// 'bum grangs mtshan ma mthong ba'i tshe// bskul tshig 'di yang gtang bar bya// hU~M// bzhengs cig bzhengs cig dbyings nas bzhengs// khrag mtsho 'khyil pa'i nang nas bzhengs// khrag gi bud med nag mo bdun// gcer bu ral pa spyi bcings nas// khros pa'i spyan mig dmar po ni// sdang pa'i dgra la 'bru tshugs lta// khros pa'i shangs kyi bu ga gnas// sho na rak+ta dgra la 'thor// khros pa'i zhal nas mche bdar nas// dug gi kha chu dgra la 'thor// g.yas pa khrag gi lcags kyu yis// dam tshig nyams pa'i snying nas 'dren// g.yon pa lcags kyi phur pa yis// bka' las 'da' ba'i snying la 'debs// dam bcas bzhin du bdag bskul gyis// khas blangs bzhin du 'phrin las mdzod// de nas gnyer gtad pa'i sngags 'di bzlas// ma ma snying khrag tshal pa dun ting ha la dun b+h+yo// de nas drag sngags 'di yang gtang// rag mo rag mo ma ma dun dun her ma he dgra bo rnir mA ra ya dza dza// sod pa'i mtshan ma byung nas ni// nang nub nyin mtshan gung la ni// khrag dang ling ga dag la ni// yungs kar yungs nag ske tshe brab// rag mo ni sha ku ru thum ril rbad// rag mo kha la tsa tsa thun b+h+yo// che ge mo rak+ta thun rbad// kha la tsa tsa thun b+h+yo b+h+yo// 'ur ka ma sha ma thun b+h+yo b+h+yo sod// rtags ma byung bar du bzlas// snying kha rag mo nag mo dun b+h+yo// nag mo dun ting ma las la b+h+yo// re ma ti pa sha tsa pa la dza dza// dun dun rag sha rag sha mu ta ru lu ru lu ma b+h+yo// bskul tshig dag kyang drag tu gtang// de nas ma mo rbad pa ni// yungs kar dag la sngags bzlas la// ma mo dag la brab par bya// ma mo rag mo snying la dza dza// rag mo har hur ma ru la cho cho// 'ur ko ma sha mar kha kha ru ru tra ti ti dza dza// dus bzhi dag tu bskul bar bya// gsur chen gu gul sbyar mas bdug// lcags phur bdun gyi rtse mo la// dug khrag bskus la gdab par bya// badzra ka ru na brad// snying khrag tshal pa rbad// gtub tsit+ta rbad// myogs mugs rbad// snying khrag kha la rbad// tshal bu se na se du rbad hur thu ma srog la rbad// rang nyid bdud mor gsal ba yis// lte ba snying la dpung g.yas dang// dpung g.yon spyi mgo g.yas g.yon dang// dpral pa'i dbyings su rim bzhin gdab// de nas ban d+ha'i khrag gis kyang// ling ka de la gdab bar bya// tsa thun mA ra thun sod/ shag thun mA ra ya thun sod// ru ru rag mo dgra bo mA ra ya thun sod// ma ma mugs ti gri na dgra bo mA ra ya thun sod// ma ma thun sha thun ti dgra bo mA ra ya thun sod// ma ma rbad thun dgra bo mA ra ya sod// shag shan rag mo thun mugs shag sod// dgra bo mA ra ya thun sod// ces khrag thun ling ga dag la gdab// de nas ling ga rmas ma de// mi gsad ral gris gtub par bya// rag mo shan ting ku ru rbad// dgra bo mA ra ya// rag mo nA sha ku ru rbad// dgra bo mA ra ya// nag mo kha so ba ti yam rbad// dgra bo mA ra ya// nag mo kha so ba ti yab rbad// dgra bo mA ra ya// zhes pa mgo dang lag pa g.yas pa dang// lag g.yon rkang pa g.yas g.yon dang// rkang pa dag tu rims kyis gdab// drug tu gtubs pas bdun du 'gyur// re re la yang gsum gsum du// drag po'i sngags 'dis gtub par bya// rag mo rag mo ma ma dun ting her ma hed// che ge mo ltar 'bar ba'i dur khrod nas// nag mo ral pa khebs pa srin mo'i tshogs// sa 'du ba gal ni za byed chen mo ste// rdo rje dra ba mo dang glog 'gyur ma// srin mo'i tshogs rnams bsdus shing bos pa'i tshe// ru lu ru lu'i sgra skad drag mo dang// nag mo kro d+ha sha yis bos pa'i tshe// sgrol byed chen mo khyod kyi thugs dam dus la bab// yul gyi dpal dang mgon du khyod brtag na// btang snyoms yal bar mi dgongs yal gab can// ma g.yel ma g.yel lha mo g.yar dam can// ma dang sring mo chung ma bran mo'i tshogs// ci bgyi bka' nyan las tshogs kyis// dngos grub stsal pa'i dus la bab// b+h+yo// dpal ldan nag mo re ma ti// khyod kyi mtshan nas bos pa'i tshe// nyi ma byang shar pha gi na// brag dang chu 'bab mar 'das na// mtsho mu le dngis kyi nang shed na// mthing shog sngon mo'i sbra phub nas// mi ro rta ro'i gcal stengs na// ma mo yongs kyi nang shed na// gcig pur bzhugs pa'i 'gying bag can// bam chen gdan la brkyang bskum tshul du bzhugs// bar snang khams nas gshegs pa'i tshe// gser gyi rnge'u chung ldi ri ri// gser gyi rnge'u chung rngir tsam na// nag mo'i 'khor bcas sha ra ra// nag mo'i 'khor bcas shar tsam na// bdud kyi lcam la gshin rje'i yum// chibs su dre'u rta rkang gsum bcibs// g.yu mthur sngon mo breng se brengs// bse sga dmar po wangs se wangs// sbrul nag stong gi gong rmed can// mchong gi blo nan khyugs se khyug/ zla ba gcig la 'od gsum du// stong khams ma lus khyab par mdzad// dpag tshad brgyad khri bzhi stong yang// thang tsam cig la yud kyis phyin// sku mdog mthing nag 'jigs tshul can// dbu skra ral pa thor tshugs can// ral pa'i cod pan re re la// gser g.yu mu tig chun 'phyang can// g.yas kyi phyag gi dang po ni// kha T+wAM kha ni rtse gsum bsnams// dgra bo ma lus thal bar rlog/ g.yon gyi phyag gi dang po na// 'phrul gyi me long phyis shing lta// srid pa gsum yang sa le gzigs// g.yas kyi 'og ma'i phyag mtshan ni// lcags kyi phur ba bdun 'dril ma// g.yon gyi 'og ma'i phyag mtshan ni// sbrul nag stong gi zhags pa 'phen// dam las 'das pa 'ching bar byed// dre'u rta chibs kyi snga long la// nad kyi rkyal pa sngo dmar bkal// dre'u rta chibs kyi phyi long na// tshon gyi gru gu sngo dmar bkal// nad dang rims kyi bskos 'debs ma// mdun na shog rde'u dkar nag 'grems// rgyab na bdud kyi khram bam bkal// skye 'gro yongs kyi skag rtsi ma/ legs nyes gnyis kyi ltang 'dzin ma// dam tshig nyams pa'i rjes gcod ma// dus bzhi rgyal mo sku la shar// dpyid kyi rgyal mo byon pa'i tshe// shrI dur khrod gnas nyul ma// rlung nag tshub ma'i sna 'dren ma// 'khyag pa'i mig tu sa 'debs ma// ming po rdo rje las bcol na// sring mo rdo rje las mdzod cig/ yid la brnag pa'i dgra bo la// khram la bab na khram thob cig/ shod la bab na shod khye cig/ nad mo rkyang pa kha phye zhig/tshon gyi gru gu der skyong zhig/ nyes pa ltebs su ma btang bar// rtags dang mtshan ma myur du phyung// dbyar gyi rgyal mo byon pa'i tshe// b+ha ga hri sti mkha' la char 'bebs ma// 'brug dang glog gi sgra sgrogs ma// sad dang ser pa'i sna 'dren ma// ming po rdo rje[× ]/ sring mo rdo rje [×]// yid la[×]// khram la [×]// shod la [×]// nad kyi[×]// tshon gyi [×]// nyes pa[×]// rtags dang [×]// ston gyi rgyal mo byon pa'i tshe// mahA shrI ri du ru lu// rlung nag tshub ma'i sna 'dren ma// ri rab zoms la gnas bcas nas// phyag na gser gyi zor ba bsnams// ser kha spang po kha ser la// 'bras bu lo tog bcud len ma// rdo rje bka' nyan pho nya'i tshogs// mi rnams kun gyi bdud gcod ma// ming po [×]// sring mo// yid la [×]// khram la [×]// shod la [×]// nad kyi[× ]/ tshon gya[×]// nyes pa// rtags dang [× ]// dgun gyi rgyal mo byon pa'i tshe// ral gcig rgya mtsho klong na dpal gyi bka' sdod ma// rgya mtsho'i gting nas klu rnams kun la mnga' mdzad ma// dpag tshad brgyad khri bzhi stong khrag gi dri snom ma// ming po[×]// sring mo[×]// yid la [×]// khram la// shod la[×]// nad kyi[×]/ tshon gyi [×]// nyes pa ka [×]// rtags dang [× ]// khyod kyi spyi po'i gtsug rum na// nyi ma zla ba'i 'od zer 'phro// nag mo mi bzad cho 'phrul can// dus la bab po da tshur spyon// khyod kyi thugs kyi dkyil 'khor nas// 'dod khams ma mo brgya brgya 'phro// khyod kyi gsang ba'i b+ha ga las// las kyi ma mo stong stong 'gyed// khyod kyi zhabs ni g.yas g.yon nas// pho nya stong phrag drug cu 'gyed// bdud dang lha 'dre'i sna 'dren ma// dgra bo ma lus kun 'dul ma// dpal ldan nag mo ral gcig gshegs su gsol// oM e h+ya hi dza a ra li hri hri// zhes sbyan drang ngo// arga sbreng zhing mchod pa dbul// thugs dam gnyan bskang 'phrin las kyi// tshig 'di dag kyang brjod par bya// dus gsum kun nas ma bsgribs ye shes can// ma sring chung ma bu mo bran mo'i tshogs/// ye shes mngon shes ldan pa'i thugs brtse ma// mthu rtsal rmad byung phan pa'i dgongs pa can// sngon tshe dam bcas nyid kyi zhal 'ches ma// bstan ma bsrung phyir rtag tu grogs mdzod cig/ ma ma trag sha mu tra ru lu b+h+yo dza hU~M// zhes pas las gnyer gtad// ces gsungs so// nag mo gser gyi sbram bu las// las la sbyar ba'i le'u ste bzhi pa'o//// de nas yang dag bshad bya ba// rtags kyi drod tshad rnam gsum ste// bsnyen pa bsgrub pa las sbyor ro// snyen pa'i rtags rnams bstan pa ni// bud med bzang sdud rtags mi dang// 'od dang sgra dang dri zhim dang// nyams dga' byin che ting 'dzin gsal// nam mkha' 'od kyis gang ba dang// phyag 'tshal gus pa byed pa dang// bya nag mang po rmi ba dang// lha mo nye ba'i rtags su bshad// btsun mo lta bur 'ong pa dang// che 'gying phyag bsgugs gyong tshul ston// da rung bsgrub pa bskyar la bya// mig 'dzum ting 'dzin mi gsal na// lce ston sngags la lhag chad byung// phyag rgya ston na bsgrub pa nor// bza' bca' ster na b+ha ling nang// mdze mo srang mo nyams bsgribs rtags// rlung dmar khrag tu 'bab pa dang// khrag gi char pa 'bab rmi na// bka' chad 'ong pas bskang gso bya// de rnams bsnyen pa'i rtags su bshad// bsgrub pa'i rtags su bshad pa na// rgya khur ri dgas shor ba dang// khri skyogs 'dzugs dang dmag gshoms byed// mtshon dung phar la sgrol ba dang// dgra bo dngos sam sprul pa ni// khrid nas 'ong ba rmi ba ni// bsgrub pa'i rtags su bshad pa'o// las la sbyar ba'i rtags rnams ni// bya bye ri dwags gsad pa dang// g.yag gi sprul la gsod pa rmi// rta dang bong bu phyi thal che// lugs gsad 'khor gyi rgyan yin pas// bzlog pa'i rim pa ci rigs bya// zhes gsungs so// nag mo ser gyi sbram bu las// rtags kyi rim pa'i le'u ste lnga pa'o//// de nas yang dag bshad bya ba// lha mo nag mo sgrub dus su// bar du gcod pa'i skyon dag ni// nyid kyi skyon bzhi 'khor skyon bzhi// dang po nyid kyi skyon la// lha mo yin pas chags pa che// bdud mo yin pas zhes sdang che// klu mo yin pas nor la rngam// srin mo yin pas gsod la dga'// de yi rtags dang bzlog thabs ni// dkar mo mdangs ldan lha yi bu/ chags pa bsnyags pa'i tshul du 'ong// de la rta mgrin rgyul po bskyed// nag mo khas blangs mche ba can// 'bru tshugs lta ba'i tshul du 'ong// de la bdud rtsi 'khyil pa bskyed// bud med chen po bu smad mtsho// de la gzhan gyis mi thub bskyed// ser mo ral pa can du 'ong// de la gshin rje gshed po bskyod// oM badzra kro d+ha ha ya grI ba hu lu hu lu hU~M phaT// oM badzra kro d+ha a ra dzi ta hU~M ti Sh+tha ti Sh+tha hU~M phaT// oM badzra kro d+ha ya mA na ta ka hU~M pa tsa pa tsa hU~M phaT// oM badzra kro d+ha a mr-i ta kun+Da li hU~M tshin d+ha tshin d+ha hU~M phaT// oM badzra kro d+ha bi dza ya hU~M ha na ha na hU~M phaT// de nas 'khor gyi skyon bzhi ni// khol po rang bzhin nag po ste// rta dang bong bur brdzus nas byung// 'khor dang longs spyod dag la gnod// khol mo lte phur nag mo bsre// rlung nag tshub mar spul nas su// ting nge 'dzin gyi drol nyul byed// chen ma byang ma chu nag de// bya dang khyi ru sprul nas su// rnal 'byor ma'i nus pa 'phrog/ chun ma ho mgo nag mo de// sbrang mo byis par brdzus byas nas// bsgrub pa rdzas kyi bcud rnams len// de rnams bcos shing sngags 'di gzir// ha ha he he hi hi ho ho// mA ra ya mA ra ya// khA hi// khro da du na pa la dun// sha tham dun// trag mo tad kyang ma dun// du nga ma b+h+yo du nga ma b+h+yo// nag mo gser gyi sbram bu las// bar chad gdul ba'i le'u ste drug pa'o//// de nas yang dag bshad bya ba// drag po zor gyi sgrub pa ni// 'brub khung nag mo gru gsum du// rabs chad nag po'i ban d+ha ru// khrag dang dug sna rdo phye dang// mi mthun gdug pa'i rdzas rnams la// drag po sngags 'dis bsgrub par bya// rag mo ni sha ku ru thum rbad// nag mo kha la tsa tsa dun b+h+yo// rag ta rbad kha la tsa tsa dun b+h+yo// tsit+ta rbad// snying la dun ting ta bam ril// sa ma ya dun b+h+yo// zhag bdun par du bzlas pa bya// bdud kyi chas zhugs zor lam dbye// dgra bo'i grong ngam phyogs su 'phang// yang cig zor gyi rim pa ni// rabs chad thod pa dag la ni// b+h+yo drug bris pa de nang du// ra khyi mi yi khrag blugs la// oM ma ma snying kha rag ma ma b+h+yo b+h+yo dza dza// sngags la 'od zer 'phro ba yis// ma mo stong bkug thun la bstim// yungs kar yungs nas skye sha sngags// zor lam phye la dgra la 'phang// 'phen kar drag sngags 'di yang gdags// ma kha d+ha ma b+h+yo// che ge mo mA ra ya hU~M phaT// ces gsungs so// nag mo gser gyi sbram bu'i rgyud las// zor thun gyi le'u ste bdun pa'o//// de nas yang dag bshad bya ba// spyin sreg dag gi las byed na// bsgrub pa'i dkyil 'khor byang shar du// hoM khung gru gsum brkos byas te// tsher shing ri sho ra dug brtser// me spar lha mo nyid du bsam// nyi shu nyer gcig gsum cha la// bsreg rdzas byas la zhal du dbul// ma mos sha truM gsol bar bsam// bskyed pa'i snying po lan gsum ste// spyan drang snying po nyi shu gcig/ phyag 'tshal bcu gnyis bzhugs gsol bdun// dam rdzas snying po brgya rtsa brgyad// las bcol snying po stong rtsa brgyad// zer sngags gtung ba'i drag sngags gnyis// nyi shu rtsa gcig bzlas par bya// de nas gnan pa'i bya ba ni// tha ba sum cha chu la bskur// sum cha dang ni dam rdzas kyi// ba ling ri gsum rtser khyer la// sngags kun brjod la gad+ha ar bya// sum cha cig pa ling ga bya// ming bya snying khar bcug byas te// thod pa nag po'i nang bcug la// re bas gri la dkar nag dkri// kA la nag po'i zhabs 'og gnan// spyin sreg gnan pa de ltar bya// zhes gsungs so// nag mo gser gyi sbram bu las// spyin sreg mnan pa'i le'u ste brgyad pa'o//// de nas yang dag bshad bya ba// lha mo nag mo'i thun drug ni// rgyud gzhan du bstan shes par bya// gsang pa'i thugs kyi thun che ni// rang nyid lha mo nag mor bsgom// lce stengs nyi zla'i steng dag tu// mu rag sha tsa mun kha la b+h+yo rbad// drag po bcu gnyis bzlas pa yis// ma mo dpag med 'phros pa las// sha truM bkug la thun dong bstim// thun snod drag po'i snod chen du// khrag nas dug sna ming rus gzhug/ yungs kar yungs nag skye sha la// bsngags la thun la brab par bya// nad dang mtshon gyi rnam par bsam// thun gyi grong la brdeg par bya// de nas tsakris gsad pa ni// gro ga 'am ni ro ras la// 'khor lo rtsibs brgyad gnyis bris te// lte bar dgra yi ling ga bris// mu khyud nang ma bod pa la// rtsibs rnams mod pa'i gsad sngags bri// mu khyud drag sngags bdun pa bri// de dril ling kha'i snying khar gzhug/ thod par bcug la thun gyis brab// sngags ni mda' rdzogs drag tu bzlas// thod pa re bas gril byas te// lam chen sum mdor mnan pa bya// zhes gsungs so// lha mo nag mo gser gyi sbram bu las// thun dang 'khor los gsad pa'i le'u ste dgu pa'o// de nas yang dag bshad bya ba// lha mo nag mo drag sngags kyis// gdug pa bsgral pa'i thabs dag ni// mthing nag gru gsum 'brub khung du// thod pa nag po dag la ni// dug khrag ro sol bsres pa yis// tsakra rtsibs ni lnga pa bri// dkyil du sha truM ling ga pri// rtsibs pa spu gri ngan sngags bri// yungs kar yungs nag ske tshes brab// lcags kyi phur ba gnas bdun gdab// nyi shu rtsa gcig par du bsgrub// tri ni tsit+ta ga'u thun su kar ti ra drang shin ti// ka la ti tsa// trag rag sha khru mu tra snying kha rag badzra dun b+h+yo// rag mo kha rag sha tsit+ta kha la rag sha sin du// che ge mo mA ra ya// snying tshal pa kha shag mA ra du ma du ma sen sen b+h+yo trig nan 'dir yang shag/sen sen mA ra ya phaT// snying za ba tsit+ta ma sha ro la khrag 'thung// kang ka sha zan ya ha sa la ho// sha la khyi spyang gri ha gri ha badzra ban d+ha b+h+yo// thang mu le thang mu le// rtsa thang rtsa thang rbad rbad// muM sni muM snaM nan nan// rag mo ni rag mi ni kha lo rbad rbad// dug rni dug rni kha lo rbad rbad// kyi kha lo kyi kha lo rbad// tsa ti tsa ti// rbad// nir ti nir ti// kha 'dar yed yed// kha mo mu kha le rbad rbad// oM rag mo rag mo ni// thang mu le thang mu le// ru ru rag ma rbad// e ra tsi ra rbad// du ni du ti rbad// dul ya ya dza rbad// du ru dza la ma ni// ru na badzra b+h+yo rbad// kyi ma srog gi ma tsa rbad// na ga rag sha rbad// tse tse na ma ra rbad// ces pas bdun gsum bar du brab// spu gri so'i drag sngags so// tha ma lung mthun gnas su gnan// rgyun du bsnyen pa'i drag sngags ni// ba ling gcig la rten bcas nas// sngas kyi 'og tu 'brub khung bru// thod pa mtshan ngan nang ngag tu// ra khyi rta phag khrag nad blugs la// g.yam pas kha bcad bug pa dbug/ yungs kar yungs nag ske tshe dang// lcags bzang du sna'i phye ma la// bod rbad gsad pa dril la brab// nya gsum dag la zor du 'phang// rang nyid byes su 'gro ba na// thun rdzas khag lar bru gsal bsngags// log nas slar yang thun du brab// gtor ma'i nang du brab par bya// dus dus phyi mchod mdos kyis bya// nag mo gser gyi sbram bu las// drag sngags kyi le'u ste bcu pa'o//// de nas yang dag bshad bya ba// bsgrub cing bsnyen pa'i dus dag tu// mtshan rtags ngan pa sna tshogs ston// bud med ngu dang brang rdung dang// bya nag nang 'thab sgo khyi ngu// ngu 'bod khro 'dod mchi ma 'byung// nyams mi dga' dang 'jigs la sogs// mtshan rtags ngan na mdos kyis bskang// ma mo'i gsang mdos 'di ltar bya// ri rab bang rim bzhi pa yi// rtse la ma mo dre'u zhon ma// zhal gcig phyag bzhi dgod par bya// bang rim dang po dre nag dang// mdzo dang bya nag lug nag dang// nam cha nag po dar nag can// bya nag dag ni drug drug dgod// bang rim par pa bud med dang// ngar glud ldem bu 'phang bkra dang// pho gdong mo gdong bzhi rnams dgod// tha ma spyan gzigs sna tshogs dgod// gtor ma rak+ta mngon cha bsham// bdag nyid lhar bskyed mchod bstod bya// ma mo'i 'phrin las gzhung bsrangs nas// skabs dang mtshams su bab pa na// mdos bdag chen mo mdos bzhes cig/ glud bdag chen mo glud bzhes cig/ 'bul lo mthun pa'i dam rdzas 'bul// bzhengs cig mthun pa'i rdzas bzhes cig/ rkyen dang bar chad dgra bgegs bzlog/ de skad brjod de gtang bar bya// zhes gsungs so// ka li ser gyi sbram bu las// bskang ba mdos kyi le'u ste bcu gcig pa'o//// de nas yang dag bshad bya ba// dam las 'das pa'i dgra bo la// ltas ngan cho 'phrul gtang ba ni// kham pa smin po dag la ni// mon mo'i gzugs ni khru gang ba// gdong ba dmar por byug pa la/// sha chen gtor bsham zhag gcig bsgrub// tra ga ra ga sha mu khra tra mu ru lu ru lu hU~M b+h+yo hU~M/ byung nas dgra la sngags 'dis rbad// re'u re'u rnal ma rnal bu sha la ni spyang rtsi ma shag/ ka ka ya to ma phar la 'ubs 'ubs gro gu la ya la ya// de skad brjod de dgra la rbad// theg ser dag gi dbab pa ni// dre'u'i thod pa byi gang dang// dkar kod sron can yungs kar dang// mi khrag gu gul khyi lud dang// mdzo'i snga ma blugs la bsgrub/ phyi ba'i mjug mas thog bsrung bya// phyi lam tsha tshas gcad par bya// e ha ha ra ra ra ri ri// sha sha shra shu// hu ya hu ya// nA ga le nA ga le// duM bu duM// bra ta rag sha phob phob// shar shar dzo ha// zhes pas zhag bdun bsgrub bya ste// sha truM 'ong ba'i dkyil du sba// zhes gsungs so// ka li gser gyi sbram bu las// thod ser dbab pa'i le'u ste bcu gnyis pa'o//// de nas yang dag bshad bya ba// rnal 'byor tshe sring cho ga ni// mtshan ldan ga'u mdzes pa ru// dkar gsum mngar gsum sman dang 'bru// blugs te gzungs thag dkar po gdags// tshe rdzas bdud rtsi rnam par bsam// tshe yi snying po 'di dag drang// oM bruM hU~M tri traM bruM hri/ bruM a bruM// de bi kA la pru pa skan rta a yu la sid+d+hi sa ma ya s+t+waM// zhes pa brgya dang brgyad du bgrang// spro dang bsdu ba ci rigs bya// lha mo bstod bskul 'phrin las bcol// bsgrub pa'i dkyil 'khor g.yon du bsgrub// dpal ldan nor bsgrub rim pa ni// ne'u le rkyal pa rin chen lnga// nor rdzas sna tshogs bcug byas nas// ga 'u mdzes pa'i nang dag tu// 'bru sna bkang la rkyal bu gzhug/dus bzhir ma la mchod bstod bya// de bim hA kA la ba su da ra pu Sh+tiM ku ru pha la pha la ti ti sid+d+hi// bsgrub pa rgyun gyis dus dag tu// bskang dang mchod pa rgya cher bya// rang 'dod pa'i gsol la gdab// u rni sha ya// oM d+ha ra d+hi ri d+ha ye swA hA// sri'u gso na 'di ltar bya// lha mo'i thugs kar ma bris la// de las lha mo nag mor bskyed// za 'dre lha mo'i zhal du bstab// lcags sam seng ldeng phur bu yis// ma 'am bu la gdags par bya// dbang sbyin snying po bzlos su gzhug/ ces gsungs so// gser gyi sbram bu las// dngos grub kyi le'u ste bcu gsum pa'o// de nas 'khor gyi mkha' 'gro ma rnams dpal phyag na rdo rje gsung pa la yirang ste mngon par bstod do// dpal lha mo nag mo'i rgyud gser gyi sbram bu zhes bya ba rdzogs so// rgya gar gyi gu ru pad+ma 'byung gnas dang// lots+tsha pa sa ma tis bsgyur pa'o//

CLOSE WINDOW