CLOSE WINDOW

Gpb038.024
བོད་ཡིག

o rgyan Da ki brda'i skad du/ rgya gar skad du/ sarba ta thA ga ta bAg tsit+ta gar+b+ha ta da ya ti dz+nya a la ha tan tra gu h+ya sam san nA ma/ bod skad du/ de bzhin gshegs pa thams cad kyi sku gsung thugs kyi snying po de kho na nyid nges pa ye shes mchog gi rgyud chen gsang ba yongs rdzogs zhes bya ba/bcom ldan 'das rig pa 'dus ma byas pa'i dpal kun tu bzang po la phyag 'tshal lo// 'di skad bdag gis thos pa'i dus cig na/bcom ldan 'das de bzhin gshegs pa thams cad kyi bdag nyid chen po// chos kyi dbyings b+ha ga yangs pa'i klong nas// sku gsum gyi ngo bo thams cad ldan pa'i 'khor rnams dang lhan cig tu bzhugs so// de'i tshe chos sku'i ngang las ma g.yos bzhin du/ gzugs sku'i ye shes 'chad pa po dang// zhu ba po gnyis ka rang las byung ste// rang 'byung sprul pa'i rdo rje snying po la 'di skad ces gsol to// e ma ho/ thams cad mkhyen pa'i bcom ldan 'das dpal kun tu bzang po de bzhin nyid kyi chos nyid/ kun la khyab pa byang chub kyi sems rang rig pa'i ye shes/ sku gsum gyi rang bzhin phun sum tshogs pa'i sangs rgyas de gang lags/thams cad dang ldan pa'i 'khor rnams la bshad du gsol// bcom ldan 'das rang rig pa'i rgyal pos bka' stsal pa/ legs so dpal ldan rdo rje 'chang// rdo rje snying po khyod zhus pas// nga yis bshad kyis thams cad mkhyen pa'i ye shes de// ma rtogs gdul bya snang ba ru// gcig dang du ma bral ba yi// bye brag rnam pa gsum du byung// chos sku longs sku sprul sku'o// chos sku'i ston pas kun la khyab// chos sku'i gnas ni chos kyi dbyings// chos sku'i 'khor ni thams cad kun// chos sku'i chos ni de bzhin nyid// byin gyis rlabs kyis ngo bo bshad// smra bsam brjod med rgyun mi 'chad// chos sku'i ngang las longs spyod rdzogs// longs sku'i ston pa kun tu snang// longs sku'i gnas ni kun tu gsal// longs sku'i 'khor ni dag pa'i sems// longs sku'i chos ni 'od zer tshul// rang gi ngo bo'i brda yis bshad// dag snang shar ba'i dus su rtogs// longs sku'i mdzad pa sprul pa'i sku// sprul sku'i ston pa gang 'dul sku// sprul sku'i gnas ni 'khor ba'i gnas// sprul sku'i 'khor ni mos pa can// sprul sku'i chos ni ma nges pa// gang 'dod tshig don sdebs nas bshad// dus gsum dus med dus kun ston// chos sku'i zhing khams nam mkha'i khams// longs sku'i zhing khams 'dod yon lnga// sprul sku'i zhing khams rigs drug gnas// sku gsum 'dul ba'i zhing khams yin// sku gsum thams cad mkhyen pa yi// rang 'byung rig pa'i byang chub sems// 'khor ba myang 'das gnyis su med// chos kyi dbyings dang dbyer med du// ma bcom lhun grub kun tu bzang// gang la gang dgos tshogs pa ni// bde chen phun sum tshogs par bzhugs// ces gsungs so// gleng gzhi'i le'u ste dang po'o//// kye thams cad 'dus pa'i tshogs chen da yang nyon// sku gsum gyis bsdus pa'i chos thams cad kyi rang bzhin rtsa ba 'di lta ste// dang po chos nyid rig pa byang chub sems// thams cad kun mkhyen rgyal po nga yin te// nga yi rang bzhin las ni gzhan ma mchis// ston pa gsum yang nga yi rang bzhin yin// dus gsum sangs rgyas nga yi rang bzhin yin// byang chub sems dpa' nga yi rang bzhin yin// nyan thos rang rgyal nga yi rang bzhin yin// yon tan ye shes nga yi rang bzhin yin// 'khor gnas chos bstan nga yi rang bzhin yin// 'jig rten 'jig rten 'das pa nga/ khams gsum sems can bde sdug nga// lus ngag yid gsum phyi nang nga// skye shi bar do nga yi rang bzhin yin// rtag dang mi rtag thams cad gcig/ 'byung ba lnga yang nga yi rang bzhin yin// sgo lnga yul lnga nyon mongs lnga yang nga// snod bcud gtan g.yo thams cad nga yi rang bzhin yin// ma rig gzung 'dzin 'khrul pa thams cad dang// srid dang zhi ba thams cad dang// dge sdig rgyu 'bras bde sdug nga yi rang bzhin yin// skyon yon legs nyes thams cad nga// dgag sgrub spang blang thams cad nga yi rang bzhin yin// snang stong bden rdzun thams cad nga// dug gsum snga phyi thams cad nga yi rang bzhin yin// theg pa gcig dang du ma thams cad nga// thams cad ma lus nga yi rang bzhin yin// chos rnams kun gyi rtsa ba nga la 'dus// chos rnams kun gyi mtshan nyid nga la rdzogs// nga la 'dzin pa med pas skye med yin// nga la mi 'dzin med pas 'gag med yin// nga la gcig tu med pas gnas med yin// nga la du ma bral bas gnas med yin// ngas ni kun la khyab pas chos nyid dbyings// kun tu 'char bas snying po'i ye shes te// gnyis su med pas rig pa byang chub yin// byang chub sems kyi chos nyid de// sku dang ye shes ma gyur cing// yul dang yul can ma 'khrul pa'i// rnam par mi rtog btang snyoms ni// snang min mun min na bun bzhin// gnas pa bag la nyal gyi sems// so sor rtog min 'gog pa yin// gzung dang 'dzin pa'i yul gnyis su// bdag dang gzhan du rtog pa mi// chags gdangs kun rdzob 'khrul pa'i sems// sems can 'khor bar 'khyams pa yin// rig pa'i don cig ma rtogs na// ma rig las rkyen tshogs pa yi// 'khrul pa'i mtha' la zad pa med// rang rig ye shes mngon gyur na// don dam 'gyur med byang chub sems// rnam par mi rtog don kun ldan// spros pa med pa'i chos nyid de// 'dus ma byas shing lhun grub 'gyur// ma rig las dang nyon mongs sems// rig dang stong dang ye shes sems// sems kyi de nyid rtogs pa'i phyir// theg pa sna tshogs thams tshul gyis// lam gyi 'jug sgo du ma rnams// theg pa gcig gi 'bras bu ru// byang chub chen po'i lam la bzhugs// byang chub phyir mi ldog pa yi// byang chub sems la lta spyod pa'i// sems bsgoms pas ni sangs rgyas so// byang chub sems las ma gtogs pa'i// sangs rgyas med cing sems can med// rtog dang mi rtog la sogs pa'i// gzung 'dzin gnyis med gang yang med// thams cad chos nyid rig pa'i klong// sku gsum thams cad mkhyen pa yin// ma yin yul ni rdul tsam med// skad cig tsam yang yod ma yin// chos thams cad kyi rtsa ba byang chub sems kyi gleng bslang ba'i le'u ste gnyis pa'o//// ma bcos lhun gyis grub pa yi// byang chub sems kyi chos nyid de// ngo bo rang bzhin mtshan nyid gsum// thog mtha' med par mnyam pa nyid// gnas lugs sku gsum rgyud mi 'chad// nam mkha' bzhin du kun la khyab// yin kyang rang ngo ma shes pa'i// sems can dbus na bzhugs tsam na// rang gis rang nyid bsgribs pa yin// sgrib bcas chos kyi sku ru snang// ming yang kun gzhi byang chub sems// 'khor 'das thams cad bskyed pa yin// rang ngo rang gis rig pa yis// byang sems dbus na bzhugs tsam na// rang gi rang nyid dag pa yin// sgrib sbyong chos kyis sku ru snang// ming yang lhag mthong ye shes zer// yon tan thams cad rtsal rdzogs byed// gnyis med lhun grub rtsal rdzogs pa'i// sangs rgyas dbus na bzhugs tsam na// lhun grub ye shes 'gyur med pas// sgrib med chos kyi sku ru snang// rnam dag de bzhin gshegs pa la// kun gzhi'i ming yang mi grags te// kun gzhi kun gyi gzhi yin yang// rnam par byang ba'i gzhi ma yin// 'bras bu gzhi ru mi ldog ste// mar nyid 'o mar mi bzlog mtshungs// gzhi las phags pa'i lam byung ste// 'bras bu lam gyis mi 'ching ba// nam langs pa yi nyi ma la// mun pas sgrib par mi nus bzhin// thams cad mkhyen pa'i ye shes la// 'khrul pa bya ba'i ming med do// thams cad sangs rgyas de nyid yin// sngar yang de bzhin phyis de bzhin// yin yang gzhi las 'das pa ni// thun mong theg pa ltar du na// rtsol bas grol ba ma yin te// rang byung rang dag rang grol du// lhun grub rtsal rdzogs 'gyur med sku// ma dag dag pa rnam dag tu// sems can byang sems sangs rgyas la// go rims bzhin du ngo bo nyid// yon tan rtsal ni rdzogs pa yis// rdzogs pa'i sangs rgyas der sangs rgyas// kun rtog ma yin yang dag tu// thog med 'gyur kyang tha ma ru// ma 'ongs sngon 'di sus rtogs pas// phyir mi ldog pa rdo rje'i sku// mkhyen brtse'i bdag nyid bcom ldan 'das// mngon par rdzogs sangs rgyas la 'dud// sku gsum gyi mdo byang bsdus pa'i le'u ste gsum pa'o//// 'khor ba dang ni mya ngan 'das// gnyis su med pa chos kyi dbyings// gang du mi gnas mnyam pa nyid// ngo bo spros med lhan cig skyes// thams cad ma lus bskyed pa'i gzhi// ye thog gzhi yi gnas lugs ni// ka dag lhun grub kun khyab pa'i// ngo bo stong pa spros dang bral// ma rig pa zhes sgrib pa med// ma bcos pa'i chos nyid la// ye shes tsam du grub med pa'i// rang bzhin lhun grub 'od gsal ba// mi skye mi 'gag cir mi dgongs// gnyis 'dzin mtshan ma med pa'i sa// rang rtsal 'gag med snang ba la// phyogs rigs med pas kun la khyab// thog mtha' med par rgyun mi 'chad// ma bcos sna tshogs kun tu char// phyi nang phyogs rigs dus tshod med// rtag pa ma yin ngo bo stong// skye ba med pa'i chos nyid dbyings// chad pa ma yin rang bzhin gsal// 'gag pa med pa rig pa'i don// gnyis su med pas mtha' dang bral// dngos po'i chos su skye ma myong// stong pa'i chos su 'gag mi 'gyur// cir yang ma grub cir yang byung// snang la gzugs su ma grub pa// stong la mtshan nyid mi sgrib pa// stong gsal rig pa'i snying po can// yod med sgros skur bral ba yis// rgya ru ma chad kun la khyab// phyogs su ma lhung mnyam pa nyid// sems can ma yin 'khrul rtog med// sangs rgyas ma yin rtsal ma rdzogs// ma dmigs nam mkha' lta bu'i dbyings// 'grib med nyi ma'i snying po bzhin// gnas lugs rang gsal blo 'das de// sems can blun po bslad pa med// sangs rgyas mkhas nas bcos pa med// 'khor 'das gang du ma grub pa'i// yin la grub pa med pa'i dbyings// 'gyur med thams cad 'byung ba'i klong// gcig dang du ma bral ba'i gshis// lhun grub 'gyur med ngo bo de// bsam gyis mi khyab brjod las 'das// chos kyi sku yi gnas lugs yin// rang bzhin gsal la rtog med pa'i// so sor ma 'dres ngo bo nyid// kun tu gsal bas longs spyod rdzogs// ma byas rang byung rtsol bral du// cir yang ma nges cir yang snang// snang tsam nyid na spros bral mkha'// sna tshogs sgyu ma bzhin du 'byung// sprul pa sku yi gnas lugs yin// dbyer med ngo bo nyid kyi sku// kun gzhi'i chos dbyings snying po yi// chos nyid kun la khyab pa'i dbyings// rig pa 'gag pa med pa'i rtsal// gnyis med kun byed byang chub sems// 'khor 'das ma lus kun brten pas// gzhi'i gnas lugs zhes su brjod// ma rtogs rnam shes tshogs bskyed pas// ma dag 'khor ba kun gyi gzhi// rig pa'i ye shes kun bskyed pa'i// dag pa mya ngan 'das pa'i gzhi// chos sku khyab pa cig pa yi// gnas lugs gzhi yi sangs rgyas zhes// kun la khyab pas nam mkha' 'dra// thams cad bskyed pas sa gzhi bzhin// gsal la mi 'gag nyi zla'i dpe// rgyun chad med pa chu bo'i rgyun// don la mi 'gyur rdo rje'i ri// ma 'dres yongs rdzogs za 'ug dpe// du ma gcig 'dus rgya mtsho'i chu// gcig po mang snang chu zla'i gzugs// skyon med shel sgong lta bu yis// byang chub sems kyi dkyil 'khor 'di// thams cad mkhyen pa'i gzhi'i rtsa// gzung dang 'dzin pa 'khor ba ste// gzung 'dzin bral na mya ngan 'das// gnyis med rtogs pa sangs rgyas so// kun gzhi nga med gong rol na// sems can bya ba'i ming yang med// 'byung ba bya ba'i yul ma grub// sems can med pa'i gong rol na// sangs rgyas bya ba bshad mkhan med// ye shes bya ba ngos ma zin// rnam shes rtog pas ye shes yin// ye shes 'khrul pas rnam shes byung// gang yang med pas bag la nyal// gnyis med gcig gi ngo bo la// dper na lag pa'i lto rgyab bzhin// ma rig 'khrul pa'i snang ba la// gnas skabs 'khor 'das gnyis su gyes// ye 'khrul min te blo bur yin// 'khrul pa sangs tshe gnyis med du// gdod nas dag pa'i chos kyi sku// gzhi las grol ba'i lhun grub dang// dbyer med chu la chu bzhag bzhin// mi gnas mya ngan 'das pa po// sangs rgyas kun gyi spyi mes yin// rang bzhin gzhi'i gnas lugs bstan pa'i le'u ste bzhi pa'o//// gnas lugs skye ba med pa'i ngang// rang bzhin 'khrul ni ma myong bar// rang rtsal rig pa 'gag med de// kun tu gsal la 'dzin pa med// nam mkha' lta bu'i ngang nyid nas// rang gsal nyi ma 'od bzhin las// ma rig 'khrul bas ma bsgribs par// rang nyid nyi zla'i snying po bzhin// rang rig ye shes phyogs med du// gzhan snang ma yin rang snang la// rang ngo shes bzhin gzhan 'dzin med// lhan cig skyes pa'i ye shes shar// shes bya'i yul med der shes kyi// rig pa dngos med ngo bo nyid// sgro skur bral ba'i thams cad mkhyen// lhun grub 'gyur ba med par rtogs// gzhi ni 'khrul dang grol min la// rang ngo shes pas gzhi las grol// 'gyur med rtogs pas phyir mi ldog/ gsal 'grib med pas 'od kyi sku// brjod mi dgos pas don gyi gsung// rtog med thams cad mkhyen pa'i thugs// kun la khyab pas chos kyi sku// sangs rgyas kun tu bzang po yin// rang bzhin gsal bas longs spyod rdzogs// chos sku'i ngang las gzugs kyi sku// me long nang du bzhin shar bzhin// rang dang bzhin la gsal ba yin// rtsol ba med par gzhan gyi don// nor bu rin chen bzhin du 'byung// thog ma'i sangs rgyas gzhi thog grol// ye shes rang rtsal rgyas pa yis// bar skabs gzung 'dzin 'khrul pa'i blo// gdod ma nyid nas ma grub pas// sangs rgyas chos las yongs mi 'da'// sdug bsngal kun 'byung 'gog pa yi// bsag sbyang lam gyi dge ba ni// ba spu tsam cig ma byas par// 'bras bu sku gsum lhun gyis grub// rgyu las ma byung 'bras bu ni// dang po'i sangs rgyas rgyu med pa// gdod nas rang bzhin lhun grub yin// rkyen gyis ma bcos rang shar la// rang 'byung rtsol med kun shes pa// rang byung ye shes sangs rgyas yin// ma bsgrubs pa ru lhun grub pas// lam ma bgrod par rtsal rdzogs pa'i// rig pa 'dus ma byas pa'i sku// 'khrul ma myong bar grol ba yi// de bzhin gshegs pa chos kyi sku// dang po'i sangs rgyas bcom ldan 'das// sangs rgyas rnam par snang mdzad che// thub pa chen po thub chen ldan// sku ni mi 'gyur kun tu bzang// gsung ni mi 'gag smra brjod bral// thugs ni mi g.yos mnyam pa nyid// sku gsung thugs ldan rang gsal gyi// thams cad mkhyen pa'i yon tan mtsho// dkyil 'khor ma lus kun gyi bdag/ rang bzhin don gnyis sgrib med gsal// sangs rgyas nyi ma de la 'dud// dang po'i sangs rgyas gzhi thog nas grol bar bstan pa'i le'u ste lnga pa'o//// ma bcos gzhi'i gnas lugs kyi// gdod nas dag pa'i chos sku de// dag pa nam mkha' lta bu la// de nyid rab rib mig bzhin du// rang ngo yin par ma shes pas// 'di ni 'khor bar thog med// ngo bo rang bzhin mtshan nyid gsum// dper na mun pa'i gzugs brnyan bzhin// gzhan gyi byed po ma yin par// rang gi rgyu rkyen 'bras bu yin// chos dbyings gti mug ma rig pas// yul du yul can ma yin pa'i// kun gzhi mun pa'i sems zhes pa// mtshan mo'i nam mkha' lta bu 'byung// de ni chos sku'i ngo bo ste// don la dus gsum 'gyur med kyang// de nyid ma rig gzhi'i sems// kun la khyab pa'i chos nyid de// rang gis rang nyid ma shes pa// lhan cig skyes pa'i ma rig pa// rang gi rang nyid ma mthong ba// mig gis mig ni mi mthong 'dra// gzhan gyi yul yang mi mthong ba// rgan long thang las 'khyams pa 'dra// bde gshegs snying pos kun khyab cing/ khams gsum sems can thams cad kyis// sdig pa spu tsam ma byas kyang// rgyal bu rkang 'khyams lta bu ru// blo bur 'khrul pa ma shes pa// 'khor bar 'khyam pa'i rtsa ba ni// bdag nyid cig pa'i ma rig pa// kun la khyab pa'i sems cig po// nam mkha' gar khyab sems can khyab// sems can gar khyab ma rig khyab// ma rig gar khyab chos skus khyab// rig pa'i don yang de tsam mo// ngo bo stong pa'i rang rtsal des// rang bzhin 'gog pa med pa yi// 'od dang mdangs su shar ba las// ma rig 'char sgo ma 'gags pas// 'du byed g.yo ba las kyi rlung// bdag dang gzhan du rtog pa yi// gzung 'dzin gnyis kyi 'khrul pa shar// rang gi rgyu rkyen las byung ba'i// kun tu brtags pa'i ma rig pa'i// de ma thag tu rang las su// gzhan du gnyis 'dzin 'khrul pa ni// med pa yod 'dzin ri dwags kyis// smig sgyu'i chu la snyog pa'am// yod la med mthong thag pa sbrul// mthong yang thag pa sbrul ma yin// thag pa spang nas sbrul yod min// de bzhin 'khrul pa'i tshe na yang// ma 'khrul logs nas yod ma yin// ngo bo gcig la rnam pa gnyis// tha dad bzung ba 'khrul pa ste// 'khrul pa'i rnam shes sna tshogs la// ming med pa la ming du rtags// de la a 'thas bdag tu bzung// gzung 'dzin gnyis las spros pa yis// kun rdzob don dam 'khor 'das dang// 'khrul dang ma 'khrul ltos pa'i chos// bde sdug sna tshogs de ru byung// rang ngo ma shes 'khrul pa ste// 'khrul snang rang sems 'khrul ba la// 'khrul pa rang la longs spyad pas// rang sems longs spyod rdzogs sku ru// 'khrul pa'i chos la 'gag pa med// 'gag med rtogs na sangs rgyas yin// ma rig dar gyi srin bu bzhin// rang gis rang nyid bcings pa yin// gzhan gyis 'ching byed ma mchis pas// 'jur bus bcings pa'i sems nyid 'di// dper na sbrul gyi mdud pa bzhin// glod na rang grol the tshom med// thams cad gsal la 'gag med pa'i// thugs rjes ci yang 'char ba 'di// ma shes rnam shes sna tshogs pa'i// ming gzugs phyi nang rten 'brel tshogs// chags sdang rmongs gsum rtog tshogs kyi// ma rig pa'i sbrul te// de yi las dang bag chags rnams// ma dag 'khor bar rgyun du 'khyams// de nyid kho na la rmongs pa'i// ma rig 'khrul pa'i 'bras bu ste// nyon mongs pa ni 'khor ba la// las kyis rgyu 'bras snang ba yis// smyon pa lha mthong 'dre mthong bzhin// bde sdug sna tshogs ci yang byung// sems nyid gcig gi sprul pa ste// rang la rang 'khor 'khor ba zhes// rang bzhin shes na mya ngan 'das// 'khor 'das lag pa'i lto rgyab 'dra// de ltar kun gzhi gcig nyid las// rang byung ma rig gsum du byung// ngo bo stong par ma rig pas// lhan cig skyes pa'i ma rig pa// rgyu byas 'khor ba de las byung// dper na skyes bu gnyid log 'dra// rang bzhin gsal bar ma rig pas// nga dang bdag tu 'dzin pa yis// kun tu brtags pa'i ma rig pas// rkyen byas 'khrul snang chags sdang byung// dper na gnyid kyis rmi lam 'dra// thugs rjes kun khyab ma rig pas// sna tshogs rtogs pa so sor bzung// de nyid kho na ma rig pas// las kyis bag chags rnam smin byung// de nyid sems su ma rig pas// rgyu 'bras rmongs pa'i ma rig pa// thugs rje'i mtshan nyid sna tshogs te// rmi lam sna tshogs rmis pa bzhin// 'khrul pa'i 'bras bu 'khor ba ste// 'khor ba spangs nas gzhan du ni// mya ngan 'das pa yod min pa// yang dag don la 'khrul pa med// 'khrul pa'i rtog pa blo bur ba// gnas skabs tsam las rtag tu min// dper na skyes bu gnyid sad bzhin// chos sku rnam gnyis shes bya ste// me nyid du bas mi gsal bzhin// gzhi yi chos sku nyon mongs bsgribs// sems can nyon mongs rang dgar spyod// shel nyid shel gyis sgrib pa bzhin// lam gyi chos sku shes byas bsgribs// 'phags pa'i gnyen po'i chos kyis 'khrul// spang blang gnyen po grol tsam na// dri ma med pa'i chos sku ni// nam langs nyi ma shar ba bzhin// thams cad sgrib med rtsol med gsal// bde gsal bar ni rgyun par gnas// bar do'i grong khyer de la med// chos dbyings shin tu dri ma med// de yi rgyu ni gsal ba yi// sna tshogs tshul ston ro gcig pas// 'khor 'das kun mkhyen sku gsum gyi// der 'dzin bag chags dag tsam na// sems can thams cad sangs rgyas nyid// sangs rgyas sems la ma gtogs par// gzhan nas 'tshol ba 'khrul pa'i blo// phyin ci log ste thar pa bral// 'khor ba 'di ni mu mtha' med// sku gsum ngang las ma 'das kyang// rang snang 'khrul pa'i glen pa bzhin// rang la rang la sdug bsngal bskyed// rang las rang byung zad med pa// rang snang 'khor ba spyi tsam la// ma rig 'khrul pa zad pa med// rang rig rtogs na skad cig ma// zad par skyol te 'khor dong sprugs// 'gro kun ye sangs rgyas nas gda'// ma rig 'khrul pa'i dus 'dir yang// ma rig ngos su bzung med de// ngo bo stong pas chos sku yin// de la bdag 'dzin ye re ba// mngon sum gsal ba rig pa de// rang bzhin longs spyod rdzogs sku yin// rang bzhin sna tshogs snang ba ste// mtshan nyid thugs rjes sprul sku yin// de ltar ma rig 'khrul dus na// sku gsum ma bcos lhun grub pas// snang srid thams cad sangs rgyas zhing// rang byung rnam shes ye shes yin// ye shes ye shes khyad par che// rnam mkhyen ye shes kun mkhyen bdag/ kun tu bzang po'i dgongs pa'o// kun gzhi gsal stong rnam shes te// rang gdangs 'od lngar gsal ba la// der 'dzin gzung 'dzin gnyis 'khrul pas// phyi nang 'byung ba lnga byung zhing// nyon mongs lnga skyes a 'thas pas// rgyud lnga'i lam las 'gro lnga byung// 'byung ba lnga po dngos su grub// snod bcud phyi nang rnam shes gsum// lhan cig skyes par nyams du snang// kun brtags sems kyi bzung ba'i yul// mkha' la rlung rten de la chu// de la sa rten drod kyis smin// rtsi shing me tog 'bras bcud ldan/ kha dog dbyibs bcas bebs snang sems// ri rab ri bdun rol mtsho bdun// gling bcas nyi zla stong gsum sogs// snod kyi 'jig rten khams gsum chags// chags las 'gyur med rtog med ni// 'byung ba chos sku'i ngo bo yin// rnam par rtogs med lhun gyis grub// mi g.yo mi 'gag skye ba med// 'byung ba'i snod las 'das pa med// nam mkha' kun la khyab pa'i sku// snang stong kun bzang yab yum yin// 'byung lnga so sor ma 'dres par// kun gyi rang rang spyod yul du// chos kyi dbyings na longs spyod pa// sku lnga ye shes dar shar ba'i// rigs lnga longs spyod rdzogs sku yin// 'byung ba lnga po re re bzhin// 'gro ba rang rang 'dod pa bzhin// de dang de yi don grub par// snang ba sprul pa'i sku yin te// 'gro don mi grub gcig kyang med// thams cad sangs rgyas sprul pa'i mchog/ 'byung ba chen po bcom ldan 'das// longs spyod rdzogs sku kun gyi rgyal// chos kyi dbyings dang dbye ba med// gnyis med ye shes chos kyi sku// snod kyi 'jig rten rang snang yin// chags 'jig stongs gnas la sogs pa// nges med rnam pa sna tshogs kun// rang snang 'gyur ba'i chags 'jig yin// rang snang 'dzin pa ma gyur na// snod kyi 'jig rten chags 'jig med// dper na nyi ma'i nyi 'od kyang// nyi ma gar snang nyi 'od 'du// gnyis med gnyis su brtags pa bzhin// rang gzhan snod bcud de dang 'dra// 'khrul rtogs gnyis su phye ba las// don la dbyer med dngos su snang// rnam par snang mdzad gang chen mtsho// sangs rgyas kun gyi zhing khams te// sangs rgyas kun gyi sku yang yin// sems can khams kun dag pa'i phyir// sangs rgyas zhes su ming du btags// snod la brten nas nang gi bcud// gzung 'dzin nyon mongs 'dod pa'i khams// yul la nyon mongs gzugs khams pa// 'dzin pa'i nyon mongs gzugs med khams/ khams gsum gnas pa'i sems can rnams// rgyu ni ma rig las dbang gis// rkyen ni chags sdang rmongs pa yi// rgyud lnga lam la 'tshogs pa yis// de yi rang snang rang gzugs su// shel dang 'dra ba'i sems nyid de// de dang de yi rgyu mthun du// 'gro rigs lnga'am drug tu snang// so so'i las dang bag chags kyis// lus dang ngag dang yid du grub// de dang de yi spyod par snang// snang ba sna tshogs tha dad cing// gnas lugs cig la spyod pa yi// sems can thams cad sems gcig ste// rang snang dge ba kun yang dge/rang snang mi dge kun mi dge/ ngan song bde 'gro de yi khyad// stong pa nyid kyis chos nyid la// rgyu 'bras bden pa de yi gnad// rgyu 'bras bden med rtogs pa na// gzung 'dzin bral bas chos sku yin// chos sku kun la khyab pa la// bral dang ma bral gnyis su med// phyi nang gzung 'dzin yul gnyis la// 'dod yon lnga ru longs spyod pas// longs sku'i rol pa de nyid yin// de yang ma zad rnam shes ni// sna tshogs 'gag med sprul pa'i sku// sems can rnams kyi cho 'phrul te// sangs rgyas sprul pa'i sku 'chang ba// sems can sems can don gnyis 'grub// 'o ma'i nang nas mar bzhin du// sems can rnams kyi snying dkyil na// thams cad mkhyen pa'i sangs rgyas bzhugs// sangs rgyas ma yin sems can ni// gcig kyang yod pa ma yin pas// gser ni rang g.yas bsgribs pa bzhin// rang gi shes bya'i sgrib pa yis// sems can lam du 'khrul pa yin// 'khrul snang mthar thug dmyal ba ste// sku gsum ngang la 'das pa med// ngo ma shes pa dmyal bar bzung// ngo shes dmyal ba'i rig pa de// spangs nas gzhan na sku gsum med// dmyal snang de ka sku gsum yin// ma rig pa dang rig pa gnyis// rang gi lus dang longs spyod rnams// mun pa'i yul dang snang yul bzhin// khyad par med la khyad par che// de bzhin nyid du shes par byos// rang gzhan cha yi rnam rtog gi/ phyi nang snod bcud gzung 'dzin sems// phung po lnga dang 'byung ba lnga// sgo lnga dang ni yul lnga dang// nyon mongs lnga dang ye shes lnga// rgyud lnga dang ni sku lnga sogs// gzung 'dzin dag gis bzung nas ni/ khams gsum pa'i khang pa ru// ming dang gzugs kyis btson rar tshud// ma rigs nyon mongs lcags sgrog bsdams// phyin ci log snang dmag gis bskor// bag chags snga phyi'i dug ro langs// rnam smin las dang lag pa sbrel// las kyi rgyu 'bras 'tshams sbyar nas// nyin par rmi lam gnyid log sad// 'di phyi bar do thams cad du// gcig nas gcig tu zo chu bzhin// bzang ngan rim pa'i lus blangs nas// de dang de ru snang ba ni// rtog pa thams cad chos sku yin// chos nyid ma khyab rtog pa med// thad ka'i rtog pa longs sku yin// de dang de yi snang ba spyod// gnas lugs sems kyi rgyud gcig kyang// lam rgyud rtog pa tha dad pas// nges pa med pa sprul pa'i sku// so sor rigs kyis rtog pa'i gzugs// mi la bde sdug btang snyoms dang// lha la 'dod pa'i yon tan dang// lha min go mtshon 'khrug pa dang// byol song blun cing gnod 'jigs dang// yi dwags bkres skom sdug bsngal dang// dmyal ba me chu la sogs pa'i// sdug bsngal rnam pa sna tshogs pa// snang ba mi gcig so sor byung// rang rtog rang gi sprul pa yin// gzhan gyi byed yul byed mkhan med// rgyal po gdan las ma g.yos kyang// sgyu ma mkhan gyis bslus pa bzhin// chos sku ngang la ma g.yos bzhin// bde sdug sna tshogs shar ba yin// shar yang ngo bo nyid kyis dag/ sems can sku gsum rang bzhin la// shes na thams cad de yin te// de las gzhan pa sangs rgyas kyis// btsal yang rnyed par mi 'gyur bas// rtog pa nyid ni chos kyi sku// sems can thams cad sangs rgyas nyid// 'khrul pa rnams ni ye shes dngos// ma rig pa ni chos kyi dbyings// snang grags 'dzin gsum sku gsung thugs// thams cad rang 'byung ye shes yin// rang 'byung rtsol ba'i khar ma lus// rtsol sgrub 'das pa'i byang chub sems// thams cad mkhyen pa khyod yin no// ngo bo stong pa'i rang bzhin te// gsal ba 'gag med thugs rje'i 'od// don dam kun rdzob gzugs can no// kun rdzob 'khor ba'i rang bzhin la// don dam mya ngan 'das pa'o// gnyis su med pa phyag rgya che// rdzogs pa'i sangs rgyas de las byung// rang 'byung rdzogs pa chen po'o// ma rig 'khrul pa'i byung khungs bstan pa'i le'u ste drug pa'o//// chos nyid skye med dbyings kyi klong// rig pa 'gag med rang gdang de// gnyis med byang chub sems kyi rtsal// ye shes 'od lnga'i gdangs su shar// ma rig 'byung lnga gzung 'dzin gyis// bag chags snga phyi 'das pa yi// bar dor yid kyi lus zhes pa// shes pa phyad phyod yal yol gyis// 'dod zhen sred pa'i snang ba yi/ khams gsum rtogs pa'i skye gnas bzhi// rmi lam lta bu'i gzung 'dzin byed// khyad par 'dzam gling mngal gnas rnams// pha ma 'khrigs pa gnas su mthong// sngon gyi las kyis 'brel pa rnams// sha rul la ni sbrang 'du bzhin// lus mthun gang dag rgyu mthun te// dug gsum dug lngas rkyen byas nas// rlung sems pha ma'i rgyu rkyen lnga// dbyer med 'dres pa rtog pa'i gzugs// kun rdzob 'byung ba dngos su byung// sa yis gzugs la rlung gis g.yo// me yis drod la chu yis khrag/ nam mkha' go 'byed 'du 'phro yis// mer mer nur nur ltar ltar po// gor gor 'khrang 'gyur khyab 'jug dang// sbal pa mi thung ngang pa can// sha rus khrag gi lus grub nas// rtsa rlung thig le lus ngag yid// chu las chab rom bzhin du ni// dngos med dngos po can du grub// de dang don dam byang chub sems// til dang mar bzhin dbyer med gnas// dngos por ma grub rig pa ni// chos sku gsang ba sbubs kyi sku'i// rtsa tshang lus rdzogs dngas ma rlung// stobs bskyed nus pa 'khams rgyas pas// phung po lnga dang dbang po lnga// yan lag lnga dang don snying lnga// yul lnga nyon mongs phyi nang lnga// sems lnga rten 'brel 'tshogs bsdus pas// mi rtag rnam smin rgyu lus grub// 'od gsal dngos por longs spyod cing// dngos po mi rtag dngos med du// skye 'gag med pa'i chos nyid la// skye 'gag gnyis su longs spyod pa// longs sku sgyu ma'i sku yin pas// zag bcas nyid kyang zag med du// ye shes chen po'i glong na bzhugs// chos kyi sku las 'gyur ba med// mngal zhugs byang chub rnam lnga ste// zla ba bcu ni sa bcu'i tshul// skyes pa rang bzhin sprul pa'i sku// bya ba sna tshogs mdzad pa de// sku gsum bdag nyid lhun grub lus// 'od gsal las ni rnam smin lus// sgyu lus yid lus 'od kyi lus// ma rig 'khrul pa de nyid 'khor// dus gsum rgyal ba'i sku nyid du// ma rig grol tshe 'byung ba'i lus// lhag med ye shes ngang du bzlog/ ye shes lus can de bzhin gshegs// thog ma'i rig rtsal ye shes lnga// 'od lnga ma rig 'byung lus grub// lus la ye shes chen po gnas// lus can kun la bzang ngan med// thams cad rgyal ba'i snying po can// sems can lus ngag yid gsum po// sangs rgyas sku gsum thugs nyid dngos// rang lus rdo rje'i sangs rgyas ni// dngos po kun la khyab pa po// gzhan nas sangs rgyas bstan du med// ngag tu brjod pa'i rnam pa kun// gsang sngags rdo rje'i bzlas pas te// chos nyid gsung la rgyun chad med// yid kyi dran rtog gang dran pa// de nyid ye shes rig pa'i thugs// sems can rang rgyud rtog tshogs na// phung po sangs rgyas mnga' bdag mchog/ phung po 'byung ba yab yum lnga// tshogs brgyad sems dpa' yab yum brgyad// dug lnga ser sna thub pa drug/ dbang po sgo bzhi sgo ma bzhi// g.yas g.yon nyi zla yid chos nyid// chos nyid rang gnas zhi ba'i sku// rig rtsal ngar ldan khro tshogs te// rtsa khams skyed byed lha sku'i tshogs// rang lus dkyil 'khor chen por rdzogs// sems can kun la dbyer med khyab// lus ngag yid las ma gtogs pa// sku gsum gzhan nas btsal mi dgos// rang la lhun gyis grub pa la// gzhan nas 'tshol 'dod 'khrul pa'i blo// gnyen po'i chos rnams rang gis bsgribs// rang 'byung ye shes kun la khyab// de ngo shes pa rig pa yin// bdag rig gzhan rig sangs rgyas la// dngos po'i gnas lugs lam dang ni// 'bras bu ye shes ngo 'phrad pa// rig pa ye shes sku lnga ste// rang 'byung rig pa'i rang rtsal las// rnam pa thams cad kun snang bas// rnam par snang mdzad rang nyid sku// der gsal 'dzin med ye shes lam// 'bras bu de ka sangs rgyas yin// de nyid gzhan nas btsal mi dgos// mi 'gyur rig pa'i ye shes de// rtog pa'i rlung gis mi bskyod pas// mi bskyod rdo rje rang rig nyid// der gsal 'dzin med ye shes lam// 'bras bu de ngo sangs rgyas so// rig pa stong gsal 'gag med pas// nyams snang yon tan dpag med 'phel// rin chen 'byung ldan rang 'byung sku// rig pa rang gdangs rang 'od ni// stong gsal ma 'dres kun gsal bas// snang ba mtha' yas 'od dpag med// rig pa kun don kun grub pas// rig rtsal don yod grub pa'i sku// der 'dzin dri ma bral ba lam// de don myang 'das ye shes te// 'bras bu yin te kun la sbyar// rig pa skye med dbyings kyi ngang// 'gag med gshegs shing thim pa na// de bzhin gshegs pa'i rigs yin no// gzhi'i rig pa mi 'gyur bas// gsal stong rdo rje rigs yin zhing// yon tan lhun grub rang byung bas// rin po che yi rigs yin la// de la skyon gyis ma gos pas// dri ma med pa pad+ma'i rigs// rig pa de nyid ma gtogs pa// gzhan nas sangs rgyas mi 'byung zhing// thams cad rig pa'i cho 'phrul bas// las kyi rigs ni thams cad yin// rig pa ye shes lnga gnas te// chos spyi rang gi mtshan nyid rnams// rig pa'i ngang las kun gsal bas// me long lta bu'i ye shes yin// chos can rnam pa sna tshogs pas// chos nyid ngang du dbyer med pas// mnyam pa nyid kyi ye shes yin// de nyid ngang las yon tan cha// bye brag so sor gsal ba yis// so sor rtog pa'i ye shes yin// gang ltar shar ba de nyid las// logs nas 'bad rtsol bsgrub mi dgos// ye nas rang la lhun grub pas// bya ba grub pa'i ye shes so// de rnams thams cad tha dad du// ma yin chos nyid stong pa'i rtsal// ro gcig chos dbyings ye shes so// rig pa'i ye shes 'od lnga gsal// rig pa nyid las gzhan ma yin// nyon mongs dri mas ma gos pas// dkar po'i 'od du snang ba'o// de las yon tan kun mdangs shar// ser po nyid du shar ba'o// ma bcos ma btsal ngang de ru// thams cad rig pa dbang sdud sems// dmar po'i kha dog ltar yang snang// rtsol sgrub 'das pa ljang khu'o// sna tshogs shar yang ngo mi 'gyur// kun la khyab pas mthing ka'o// gdod nas rig pa'i rang gdangs las// 'od lnga'i mdangs kyi kha dog byung/ kha dog lnga ldan gsal ba de// ye shes lnga yi rang gdangs yin// rig pa 'byung ba lnga ru byung// ci yang ma grub stong gsal bas// 'byung ba nam mkha'i dbyings su byung// gsal cha sna tshogs g.yos pa rlung// de la rang bzhin mdangs yod me// gdangs las yul du 'dzin pas sa// ye shes brlan dang ma bral chu// sems las byung ba 'byung ba yin// rig pa dngas ma lngar snang ste// rig pa 'dzin byed nam mkha'i dngas// 'dzin byed de yi dngas ma rlung// rlung gi dngas ma drod byung me// me yi dngas las rlung byung chu// chu yi dngas ma gzugs byung ba// 'byung dngas rgyu yi thig le 'byung// de la dngas snyigs lus sems grub// ye shes ngang las ma 'das so// rig pa'i ye shes yul lnga shar// snang la rang bzhin ma grub pa'i// dmigs yul gsal la ma 'gags snang// sgra yi mtshan nyid grag stong du// rna ba'i yul du ma 'gags grag/ tshor la dngos med snang yul dri// rang bzhin ma grub lce yul ro// lus la reg bya 'jam rtsub gang// snang yang 'dzin byed rang bzhin stong// yid la bde sdug gang snang yang// rang shar rang grol dus mnyam yul// yul sems gnyis med gcig pa nyid// rig pa nyid ni rlung lnga byung// rig pa'i ye shes drod 'bar phyir// me dang mnyam pa'i rlung zhes bya// rig pa 'khor 'das srog yin pas// tshe srog 'dzin pa'i rlung zhes bya// yul dang dbang po bye brag gang// 'khor 'das la sogs shan 'byed pa// dngas snyigs 'byed pa'i rlung zhes bya// rig pas kun la khyab pa'i rtsal// kun la khyab byed rlung zhes bya// gnas skabs 'khor bar 'khyams gyur kyang// 'khor ba'i srog rtsa ma rig bcad// mya ngan 'das pa'i sar skyel bas// snying rje med pas las kyi rlung// rlung zhes bya bas las kun byed// rig pa'i sems la ming du brtags// chos nyid rig pa'i shes rab lnga// 'khor gnas kun 'byung gzhi gyur pas// 'byed pa med pa'i shes rab yin// thams cad rig par rang gsal bas// ma 'das bsdus pa'i shes rab ste// thams cad de yi ngo bor gyur/ khyab par byed pa'i shes rab yin// de nyid gsal cha'i ye shes rlung// kun tu bskyod pas skyod byed rlung// 'khor 'das gzhi rtsa des bcad nas// grol ba sgrol byed shes rab bo// de ltar shes rab lnga ldan yang// thams cad rang 'byung ye shes so// rig pa sa lam ye shes lnga// rang gis rig pa'i mos gus la// byin brlabs 'jug pa tshogs kyi lam// gzhi gnas rigs pa'i ye shes te// gzhan rkyen bla mas ngor sprad pas// gnyis med rtogs pas sbyor ba'i lam// rig pa dri med kun gsal de// 'gyur med gsal cha mthong ba'i lam// 'pho 'gyur med pa'i ye shes la// gsal 'grib med pa bsgoms pa'i lam// lhun gyis grub pa'i rig pa la// rtsol grub bral ba mthar phyin lam// sa dang lam du bsgrangs na yang// rig pa gcig gi spyod yul las// sa lam rtsi ba 'khrul pa yin// dper na nam mkha' bsgrangs dang mtshungs// gzhi ni ma rig lus grub nas// dper na mun la 'khyams pa bzhin/ khams gsum 'khor bar 'khyams gyur kyang// sku gsum ngang las 'das pa med// rig pa stong ngas chos kyi sku// rang chas gsal ba longs spyod rdzogs// ci yang byung bas sprul pa'i sku// ma rig pa yi dus nyid na// dbyer med ngo bo nyid kyi sku// sku gsum ngang na skrong nge yod// lam du blangs pas ngo sprad kyang// lus can sems kyis khyab tshad la// sku gsum ngang na lam me yod// 'bras bu 'di nyid rig pa na// sngon du 'tshams med lnga byas kyang// sku gsum ngang du lhag gis rtogs// bde chen ngang du lhun gyis grub// las dang bag chags grol ba na// phyin chad sdig pa byed don med// bya rgyu 'dug na der snang 'char// rig pa dge sdig 'das pa don// rig pa dri ma med pa la// gang gi lam du nyams len pa// mnyam par bzhag pa chos sku ste// mnyam rjes gnyis spyod longs spyod rdzogs// rjes kyi dus su sprul sku'o// mnyam rjes bral ba de bzhin gshegs// gzhi rig ka dag chos kyi sku// lam rig lug rgyud longs spyod rdzogs// 'bras bu thugs rjes sprul pa'i sku// snying po'i ye shes gsum brtsegs te// dbyer med rdzogs pas sangs rgyas pas// rig pa thog mtha' med pa ru// 'khrul dang ma 'khrul gang yin yang// sangs rgyas dgongs pa 'bral med nas// gnas med gnas yin rgyal bas gsungs// rang sems ye nas sangs rgyas so// yang dag sangs rgyas dgongs pa ni// sems can kun gyi rang rgyud la// sku dang ye shes tshul du gnas// 'o na sku dang ye shes ni// stong gsal ci yang ma grub pas// 'jig rten skye shi bral ba la// snod bcud phung po 'jig pa ni// sems can sangs rgyas gcig pa 'gal// mnyam byed de ltar ma yin te// snod ni nam mkha' 'jig med la// 'byung gzhi 'jig pa rten pa ni// nam mkha'i ngang las 'das pa med// bcud ni sems nyid 'jig med pa// sgyu lus 'jig pas rten pa ni// dbyings rig gnyis med cho 'phrul la// ma rig ltos pa'i chos kyi rtags// chos nyid rig pa sku gsum las// gang du yang ni 'pho 'gyur med// 'gyur ba med pa don de la// 'gag med rol pa sna tshogs shar// chu dang chu yi chu rlabs bzhin// rang shar rang la grol bya'i phyir// 'jig rten zhes su brtag pa de// de yi gzung 'dzin grol ma grol// 'jig rten 'das dang ma 'das zhes// rig pa cig la brtags pa las// lus sems phyi nang gnyis med do// rig stong gsal ba'i 'od lnga ste// der 'dzin ma rig 'byung lnga byung// phyi nang rtog pa'i gzung 'dzin gyis// chags sdang pha ma'i rgyu rkyen las// kun rdzob rgyu yi thig le dang// don dam lhan skyes thig le dang// rkyen ni las kyi thig le gsum// dbyer med lhan cig skyes pa lus// dngos su rtsa la dngos med rlung// thig le 'od kyi tshul du grub// lus dang ngag yid sems kyi sku// snyigs ma 'byung ba lnga yi gzugs// dngas ma dbang po'i sgo lnga byung// de la yul lnga 'dzin pa lnga// ye shes lnga ni dngos yin kyang// long bas rang yul ma mthong bzhin// ma rig 'khrul pas de ma rtogs// bem rig gnyis su ltas pas nor// de la 'jig rten 'khrul pa zer// gser dang kha dog ji bzhin du// lus sems gnyis ni dbyer med pas// 'dzam gling mngal byung rdo rje'i lus// 'byung ba'i dngas mas lus grub cing// lus kyi dngas ma rtsa gnas pas// lus la bde ba 'byung ba yin// log pa rnams la sdug bsngal 'byung// rtsa yi dngas ma rlung yod pas// ngag la chos tshig nus pa 'byung// sangs rgyas bstan pa'i snying por gyur// rlung gi dngas ma thig le'i gnas// sems la bde ba'i rig rtsal che// chos dang chos min bye brag mkhas// bag la ma nyal rnam rtog rags// nyon mongs rags pas ye shes rags// zag bcas lus de ma spangs par// zag med nyid du tshe gcig la// sangs rgyas pa ni rdo rje'i lus// lus la ye shes chen po khyab// de yi 'od kyis stong gsum gang// gdangs ni 'od la rang bzhin sku// sa bon thig le bcud du 'dril// rang lus ma rig sgo nga'i sbubs// dngas ma rtsa yi gzhal yas na// rig pa rlung gi stobs dang bcas// thig le bde ba'i mdangs dang bcas// lus dkyil rtsa nang pho brang dbus// ye shes sku ni zhi khro'i tshul// phra ste rdul gyi cha tsam la// rags te nam mkha' khyab pa yis// rang shes rig pa'i rgyal po ste// rang gis rang nyid sgrib pa'i dus// dper na bum sku lta bu la// rang 'od bum nang mar me de/ kha la gsal yang gzhan du min// bum pa bcag na kun gsal bzhin// rig pa dbang por sgo gsal yang// phyogs med kun tu mi gsal ba// lus kyi gzung 'dzin grol tsam na// ma rig las kyi rlung dag pas// rang rig phyogs med kun tu gsal// rnam par snang mdzad kun tu zhal// rdo rje sems dpa' de nyid yin// rdul gcig rdul snyed sangs rgyas zhes// ngos ma zin te rtogs dka' bas// phra ba'i sku ru bstan pa yin// rnam pa grangs kyis mi langs pas// bsam gyis mi khyab rgyal ba'i sku// kun la khyab pas dpag par dka'// kun tu bzang po kun bdag nyid// ma dag dag dang rnam dag dang// 'od dang thig le sku ru snang// kun khyab nam mkha' lta bu la// rang gsal nyi ma'i snying po bzhin// gsal byed gzhan la ma ltos pa'i// lus dang sems la thogs med rdzogs// rdzogs pa'i sangs rgyas rkang gnyis gtso// rdo rje'i lus la brten nas su// rdo rje'i sku ru rdzogs sangs rgyas// rang la gnas pa'i ye shes de// bla ma'i drin gyis rtogs bya ba// 'jig rten zhen pa'i bya ba btang// shes rab gsum la nan tan bskyed// phyi nang gsang gsum sgro 'dogs bcad// chos dang gang zag gnyis med du// rig pa'i rnal 'byor chen po la// mtshon bya don gyi gnas lugs de// mtshon byed tshig gis ma bstan na// blo dman rnams kyis ma rtogs pas// kun tu bzang po'i dgongs pa de// rdo rje sems dpas byin brlabs nas// rang byung tshig don lhun grub de// shes rab kyis ni rtogs byed pa// ma yengs dad pa'i blo gros kyis// thos pas tshig la nyan par bya// tshig zin don du go ba yi// mdo rgyud dgongs pa lon pa na// the tshom yid gnyis bral ba yis// tshig gis spros pa'i mtha' chod pa'i// tshig dang yi ge'i sgra don la// sgro 'dogs chod pas sprul sku'o// bsam pas chos dang chos min rnams// bye brag phyed cing mnyam nyid du// nyams su myong zhing yid ches pas// bsam pa'i shes pa rdzogs pa yi// theg pa rnam pa sna tshogs kyang// kun la rtogs spyod tshud pa dang// 'gyur med yid ches gcig tu 'dres// the tshom med pa'i nyams myong ni// ltos dang bral ba'i longs sku yin// ji srid gnyis snang gzung 'dzin gyis// rtog pa yod rin don de la// ma yengs dran pa bsgom pa'i lam// tshig phyir ma shor don thog na// chos dang chos min dbyer med 'dres// nyon mongs rnam rtog zad tsam na// bsgom pa'i shes rab rdzogs pa yin// rnam pa gla glog gyur kyang ni// mnyam bzhag rjes thob khyad med cing// nyon mongs grol ba'i ye shes la// drod rtags rdzogs pa'i chos nyid dang// bsgom du med pa sgro 'dogs chod// lhun gyis grub par gtan la phebs// shes rab chen po'i skad cig la// chos kun khong du chud pa ni// bsgom pa'i shes rab chos sku thob// phyi nang snang srid snod bcud kyis// phyis ltas yul gyi 'khrul pa rnams// ltas pas yul med rang gsal du// mthong ba phyi yi lta ba dang// mthong byed nang gi sems la ltos// sems ni kun khyab spros dang bral// theg pa sna tshogs rang gi sems// sems las ma gtogs snang srid med// snang srid gzung 'dzin 'khrul pa'i blo// gnas lugs gcig tu rtogs pa yis// 'khrul dang ma 'khrul gnyis su med// gnyis med chos sku'i snang ba 'di// phyogs su ma lhung rgyar ma chad// kun la khyab pa nam mkha' bzhin// ci yang 'byung ba thams cad yin// ngo bo gcig pas bzang ngan med// rgyun chad med pas 'phel 'grib bral// skye med dbyings la mthong du med// ma mthong ba de dngos na gsal// thams cad de yi ngang la lta// ltas pas ma mthong bzhag pas gsal// rig pa rang gsal kun snang la// blta bya lta byed 'dod pa kun// dmus long thang la 'khyam pa 'dra// nga dang bdag tu 'dzin pa yin// phyogs cha'i lta ba'i 'khor ba yin// phyogs med rtogs pas mya ngan 'das// skye med spros dang bral ba yin// yul med rig pa lta ba'i mchog/ gdod nas lhun grub chos sku yin// 'di la gsal 'grib ci yang med// ma skyes ma 'gag ngo bo nyid// so sor rang rig spyod yul du// gang gang mthong ba'i chos nyid du// rang 'byung ye shes lta ba yin// 'di las ma gtogs lta bu ni// sangs rgyas rnams kyis bstan pa med// sems can kun gyis mthong ba med// ma bcos ma bslad ma bsgyur ba// rnal ma'i lta ba de nyid yin// khyad par rang gi rig pa 'di// kun rtog ma yin yang dag tu// dus gsum kun tu 'gyur med pa'i// phyi nang med par kun tu gsal// phyogs ris med par thams cad byed// ma bcos bzhag na kun la khyab// bcos ma'i rkyen gyis phyogs der 'khrul// ma rtogs pas ni grib ma'i 'dre// rtogs na me long byad bzhin 'dra// rang gis rang nyid mtshon de shes// kye ho 'di ni rang rig la// sus kyang ma byas rang 'byung yin// rang 'byung ye shes skad gcig las// bskal par bsgrub pa'i lta ba nor// drung na 'ben bzhag rgyang 'phen mda'// thog tu mi phebs ji bzhin du// sangs rgyas rig pa'i sems yin pa// de nyid ma rtogs de nyid kyi// yon tan ldan pa'i bzang po gcig/ sa dang lam gyis sgrub 'dod 'gyangs// rdzings nas 'phur ba'i bya rog dang// ji tsam skor yang rdzing thog 'babs// de bzhin sna tshogs thag rings lam// spyad kyang 'bras bu rig thog thob// rig pa mngon sum lta ba 'di// ma rtogs yid dpyod lta ba kun// bar snang mun pa'i dbyug skor yin// theg pa'i khyad par lta bas bstan// rig pa kun mkhyen lta ba la// rang gis rang lta ngo mtshar che// lta byed rtog par rang sar grol// gzung 'dzin bral ba'i sems la ltos// ma bcos pa yi ngang la zhog/ phyi rol yul lnga'i snang ba kun// lham me lhan ne lhang nge ba// der 'dzin med pa'i snang stong bsgom// phyi yi dran pa rgyun zad pas// bem snang grol ba'i rig pa la// nang gi gang 'gyu khungs gcod pa// rab kyis dran pa'i gzhi rtsa bcad// ye nas skye med ngang la gnas// 'bring gis bsam pa rang dag tu// ma yengs glod nas bzhag pas grol// tha ma gang dran gnyen po yis// de dang de yi rtog pa 'joms// rig pa rang gsal lta ba la// don ma 'khrul ba bsgom yin te// dmigs pa med pa 'od gsal mchog/ ma yengs pa yi ngang bsgom de// nam zla dros pa'i chab rom bzhin// snang ba'i gzung dzin rang sa ru// ma bcos shugs las grol ba'i phyir// bsgom du med pa'i sgo mthar phyin// bsgom bya sgom byed bral tsam na// snang srid gzhi bzhengs lta ba'i ngang/ khams gsum yongs grol bsgom pa'i mchog/ ji ste mtshan ma 'dod pa na// byang chub 'dod pa'i bsgom ma yin// mtshan med phyag rgya chen po 'di// bsgom pa ma yin goms pa yin// yengs su med la bsgom du med// dper na nam mkha'i dkyil dang 'dra// bsgoms kyang de las gsal mi 'gro// ma bsgoms bzhag kyang 'grib rgyu med// med bzhin rang gi rang rig rnams// gsal phyir rang la gsal cig 'debs// de bzhin nyid kyi ting nge 'dzin// ye nas ma skyes stong pa'i ngang// kun la khyab pa'i byang chub sems// rang rig thig le'i 'od zer las// thams cad rgyal ba'i dkyil 'khor du// sku dang zhing khams rang bzhin gnas// gnas pa de nyid spros dang bral// de bzhin nyid la longs spyad pas// bsgom pa longs spyod rdzogs pa'i sku// rang snang lha skur gtan la phebs// yengs med rtse gcig mnyam bzhag la// rang bzhin shes pa rjes shes te// dbyer med gyur pa mnyam rjes 'dres// bsgom du med pa chos skur grol// chos sku mnyam rjes mi mnga' yang// bsgom du brtags pa longs sku yin// bsgom du 'dod pa 'khrul pa'i blo// blo dang bral na rig pa dngos// mtshan dpe ldan pa'i longs sku dang// chos sku mngon sangs rgyas pa'o// rig pa mngon sum lta ba la// re 'jog med pa 'od gsal bsgom// de nyid ngang la rgyun pa ru// bral 'phrad med pa'i chos nyid la// gzung 'dzin rtog pa sdig che ba// mi dge gzhan na ma mchis pas// rang rig ye shes rang la spyad// gzung 'dzin sbrul mdud bzhin du grol// rang snang nyi ma bzhin du gsal// rin chen gser gling sa rdo bzhin// don cig nyid las ma 'das pas// spang blangs dgag sgrub kun dang bral// thams cad rang shar rang grol du// shugs 'byung spyod pa bde chen klong// mkha' la bya 'phur bzhin du spyod// skye med sgrib pa med pa'i ngang// 'gag med rol pa blang dor bral// 'dod yon dge ba'i rang bzhin la// chags zhen med par kun bral ba'i// brtul zhugs dbang bsgyur rang dga' yin// sna tshogs spyod pa sprul pa'i sku// 'bad pa med par kun la spyod// sna tshogs spyod pas don cig 'grub// don cig de'i kun byed pa'i// du ma'i nyams kyi gar mdzad pa// kun tu bzang po'i spyod pa yin// phyogs med kun las rnam par rgyal// spyod pas pha rol phyin mchog nyid// sangs rgyas kun gyi mdzad pa yin// mdor na phyi rol snod bcud dang// nang na chos dang chos min gyis// gnyis med 'khor ba mya ngan 'das// sangs rgyas sems can thams cad kun// kun la khyab pas skye med dbyings// kun gsal 'gag med rig pa 'di// nam du'ang ni sgrib pa med// dper na nyi ma'i snying po de// sa yis dbyibs kyang mi 'grib bzhin// sgrib pa med de ma shes pas// ma rig pa zhes rtags pa las// don la rig pa 'grib pa med// gdod nas gsal bas 'od gsal te// ma bcos pa yis chos nyid yin// 'dus ma byas pas lhun grub la// phyogs lhung med pas mtha' dang bral// rang bzhin shes pas ye shes te// thams cad mkhyen pa'i lta ba 'di// nam mkha'i klong yangs lta bu la// snying po byang chub sems kyi don// kun la khyab pa'i rig pa 'di// bstan du mtshar ma'i dngos po med// sgom du dmigs pa'i yul las 'das// bsgrang du rang gzhan gnyis ma grub// smra bsam brjod pa'i yul las 'das// spang du gang yang 'gag pa med// sgrub tu ci yang 'phel ba med// bcos bslad bral ba'i gnas lugs 'di// ma bsgom bzhag pas bsgom dang phrad// don la bsgom med dpe don rtags// dpe yis bsgom du med pa ni// chos sku'i dpe ni nam mkha' ste// nam mkha' stong zhing bdag tu med// dpe yi mtshon pa'i bsgom du med// chos sku'i don ni skye ba med// skye med bsgom pa'i yul dang bral// rtags la sgom du med pa ni// rang 'byung ye shes 'gag med de// ye shes thams cad rang gsal ba// mtshan ma'i yul na mi gnas pas// bsgom med bsgom pa po yang med// lha med sngags kyang yod ma yin// spros pa med pa'i rang bzhin las// lha dang sngags ni yang dag gnas// ma bsgoms pa ru lhun gyis grub// de ni rang 'byung bsgom gyi mchog/ rnal 'byor bsgom gyis ma bcings na// gzhan gyis gnas lugs 'ching mi 'gyur// ma bcings ma grol bsgom pa'i lam// gnyis med rtogs na 'bras bu yin/ khams gsum gnas pa'i sems can gyi// lus dang bag chags gzung 'dzin gyis// dus gsum bzhugs pa'i sangs rgyas kyis// sku dang zhing khams ye shes tshogs// snang srid chos sku'i rol pa la// blang dor med pa mnyam pa nyid// byang chub sems kyi nam mkha' cig/ sems can 'khrul pa'i sdug bsngal dang// sangs rgyas ye shes thugs rje gnyis// rtogs dang ma rtogs khyad par las// sems mchog rgyal ba'i sku ru gcig/gcig la gnyis su byar med la// spyod pa spang blang byed pa 'khrul// spang blang med pa'i chos nyid la// ye shes rigs pas spyod pa de// sangs rgyas mdzad pa'i spyod pa yin// de lta snying po byang chub sems// rig pa kun byed rgyal po 'di// dam chos rdzogs pa chen po zer// bstan pa'i sgron mer gyur pas na// sangs rgyas kun gyis rab tu bsngags// dam chos dkon mchog kun gyi mchog/ dge 'dun lam la zhugs pa rnams// tshogs ni ma bsags rang rdzogs dang// bsags shing bsod nams ldan pa rnams// blo mchog bla ma mchog dang mjal// yang na rang rig bla mar byon// rig pa 'dzin pa sngags kyi lam// cig char rtogs pa mngon gyur du// skad cig ma la rgyud grol nas// rang 'byung thams cad mkhyen pa de// kun rtags lam la ma bgrod par// yongs grub sku gsum sangs rgyas la// gzhan dbang rkyen dang bral ba'i ngang// bya byed rtsol grub mi mnga' bar// bde chen klong na lta spyod kun// ji bzhin nyid la spyod pa yis// lam la bgrod mi dgos par ni// spang blang sgros skur bral ba yi// ci yang mi dgongs thabs kyis rol// kun dang mi mthun spangs pa'i chos// rten yang gang zag nyon mongs can// 'tshams med lnga byas sdig can dang// bud med la sogs chags pa'i gnas// gdol pa rigs ngan la sogs pa// 'di nyid don la zhugs pa rnams// sdig sgrib 'khor ba'i bag chags dang// tshul khrims sdom pa dam tshig dang// spang sgrub spyod pa sna tshogs pas// ji srid rnam par grol ba'i lam// de ni bde bar gshegs pa'i yum// skad cig rdzogs sangs rgyas pa yis// phyogs bcu'i sangs rgyas sras bcas rnams// thams cad de yi sprul pa yin// rig pa rtsal med bsod nams dman// blo dman slob dpon dman la dad// rtog bcas rims kyis chos la spro// dngos po mtshan ma'i rtags la re// nyan thos rang rgyal 'dod dman pa// spang blang chos kyis 'bras bu bsgrub// blo ldan byang chub sems dpa' yang// dang po'i sa las ma g.yos bzhin// sa bcu kun rtags mtshan ma yis// spangs thob yon tan lam gyi bcings// rten yang bram ze rgyal rigs sogs// gtsang ma'i lus dag ma gtogs pa// kun gyis spyod par mi nus pas// lta ba mtha' bral mtha' ru lhung// bsgom pa dmigs med dmigs pa sgrib// spyod pa spang blang sgrog tu tshud// 'bras bu phyi dus sgrub pas 'gyangs// byar med don la byas bcos nas// mdzad pa mthar 'don rims kyis su// bskal par bsgrungs nas sangs rgyas 'dod// gnyen po'i chos kyi 'khrul pa la// bzang rtog bslus pa'i lam rings yin// nga bdag med pa snying po'i don// ma shes nyon mongs sgribs pa la// nyon mongs gnyen po'i chos rnams kun// shes bya'i sgrib pa yin pa'i phyir// de yi dri ma ma dag tshe// sangs rgyas sa la thag mi nye// mig gis gzugs ni kun mthong yang// rang gi byad ni ma mthong bzhin// shes bya'i chos rnams kun shes kyang// de don ma mthong sgribs pa yin// sgrib pa dag na mngon sangs rgyas// 'bras bu lam byed rigs 'dzin rnams// mkhas pas me long dkyil 'khor du// rang gi byad bzhin mthong ba bzhin// gdod ma nyid nas rang rig 'di// snang rig sems gsum dbyer med du// skad cig rtogs grol lhun grub don// rtogs phyir bla med theg pa dgos// gzhan rnams byas bcos lam gyi chos// 'di ni byar med don gyi rgyud// sangs rgyas kun gyi snying po yin// rang mdangs rig pa'i 'od lnga las// b+ha ga bde ba'i pho brang du// rgyu gnyis rkyen gsum 'tshogs pa'i sku// gzung 'dzin 'byung ba'i lus grub ste// lus kyi rtsa ba sku gsum rtsa// rkyang ma ro ma kun 'dar ma// de la brten nas lus kun bskyed// lus kun rtsa yi dra ba las// 'byung bzhi'i dngas ma rtsa yi gtso// rkyang ma rlung gi dngas mas bskyed// g.yon na gnas te myang 'das rtsa// zla ba'i cha las stong nyid 'char// ro ma chu yi dngas mas skye// g.yas na gnas te 'khor ba rtsa// nyi ma'i cha 'bab bde ba skye// kun d+har sa yi dngas mas bskyed// dbus na gnas te ye shes rtsa// byang chub sems 'bab 'od gsal rtsa// 'byung bzhi'i dngas ma me las skyed// shel sbugs can ni kun la khyab// dbang po'i sgo gsal rig pas 'char// bde chen rtsa 'dab so gnyis gyes// ro 'dus bcu drug dran pa brgyad// skye mched drug cu rtsa bzhi gyes// gsang 'dus nyi shu brgyad rnams kyis// lte ba'i rtsa mdud lnga pa la// rlung sems 'dus pa'i thig le ni// kun rdzob rgyu yi thig le rnams// rtsa mdud yi ge'i gzugs can la// don dam bde ba'i rang bzhin gyis// ye shes rlung dang las kyi rlung// yar lta rgyal ba'i sa bon la// mar lta rgyud lnga'i sa bon du// rang bzhin sku la thugs rje'i 'od// dbang po lnga yi longs spyod ldan// ye shes lnga yi 'od zer 'phro// lus sems dbyer med chos sku'i ngang// lus ni gzugs sku'i sangs rgyas te// chos sku gsang ba'i mdzod yin no// lus gnas rtsa yi pho brang na// sems kyi rnam rtog las kyi rlung// dran par byed pas sems zhes zer// ye shes rlung ni kun la khyab// rlung dang sems lus dbyer med pas// 'gyur bas rlung zhes brtags pa las// don la rlung sems gnyis med pas// rlung bsgoms sems grol de yi gnad// gnad de ma gtogs rtsa rlung bsgom// 'khrul pa'i chos yin grol mi 'gyur// rtsa la brten nas grol byed pa// dbugs su 'gyu ba'i rlung dag ni// nyi khri chig stong drug brgya 'gyu// rkyen rnams 'tshogs pas las rlung yin// gzung 'dzin dag na las rlung dag/ ye shes rlung ni rig pa yin// nam du'ang ni 'gyur ba med// rlung gi dngas ma thig le'i 'od// rgyu yi thig le yi ge'i dbyibs// bskyed pa'i sa bon lta bu la// don gyi thig le 'khor 'das kyi// bde sdug thams cad de yi rtsal// ma rig nyams na 'khor bar ltung// rig cing 'phel bas mya ngan 'das// bde ba'i ngo bo stong pa la// stong pa'i mtshan nyid bde ba ste// bde stong gnyis med rig pa de// rang lus rgyal ba'i dkyil 'khor du// ngo bo stong la rang bzhin gsal// rnam pa lha dang lha mo ru// ma dag pa yi dus nyid du// zag bcas zag med tshul du bzhugs// zag bcas lus la zag med sems// gnyis med ye shes chos sku la// bde stong longs spyod rdzogs sku ste// thig le mtha' bral bde stong de// 'jig rten 'das dang ma 'das pa'i// thams cad kun gyi srog yin pas// phyi ltar ma rtogs 'byung ba lnga// nang ltar rtogs pas sku lnga yin// gsang ba ye shes lnga nyid dngos// thams cad sangs rgyas rang bzhin gyis// rtsa khams dpa' bo mkha' 'gro la// rgyu yi thig le dngas ma ni// til 'bru tsam cig nyams gyur na// bde stong ye shes yon tan gyi// mya ngan 'das pa'i srog bcad pas// mkha' 'gro khri 'bum du dir 'ong// dngos grub dam pa nyams par 'gyur// de nyid ma nyams longs spyod na// bde stong ye shes yon tan 'phel// rang rig bde ba chen po'i ngang// mkha' 'gro thams cad dgyes gyur nas// 'khor 'das thams cad dbang du sdud// kun gyi srog yin grogs byed de// dbang po'i yul du gyur tshad kun// 'dod yon bde ba chen po ru// phyi ru mi spong nang du ni// rang lus rgyal ba'i dkyil 'khor du// gsal btab mchod pa'i bsod nams kyis// dpag cing bsgrang bar mi nus te// longs spyod rdzogs sku dngos nyid yin// de ltar mi shes thig le spangs// yi dam phyi nas bsgom pa dang// tshogs dang mchod pa phyir 'bul zhing// ye shes sdod kyis thob 'dod rnams// grangs med gsum du tshogs bsags kyang// ye shes rang la rang gsal du// yod bzhin gnad de ma rig pas// 'khor ba'i bag chags grol mi 'gyur// thabs la mkhas pa'i rig pa yis// mtshan ldan bde ba bskul ba ni// rtsa nas thig le ma nyams g.yos// mkha' 'gro brda bskul rgyal ba rnams// bde ba chen por mnyes pa yis// bsod nams tshogs rdzogs ye shes tshogs// rang rig bde ba chen po dngos// dpag tu med pa'i byin rlabs 'byung// sangs rgyas stong dang grangs 'das pa// bla ma yi dam mkha' 'gro yis// zhal mthong dbang bskur dus gcig thob// rig pa'i rtsal dbang der thob pa// lus ni rgyal ba sku nyid dngos// ngag ni ci smras sngags yin la// snang ba lha yi dkyil 'khor du// nyon mongs thams cad ye shes 'char// zag bcas mi snang 'ja' 'od du// gzhan snang rang snang bde bar yal// 'di la the tshom ma mchis na// sangs rgyas nyid du gdon mi za// yid gnyis zos na rgyab kyis phyogs// thabs mang dka' med lhun grub pa'i// rtsa dang rlung dang thig le yi// sna tshogs bde ba sprul pa'i sku// gzhi bde lam bde 'bras bu bde// bde ba'i don cig rtogs pas na// thams cad bde ba'i rang bzhin la// dka' thub sdug bsngal mi dgos pas// lam mchog mthar phyin 'bras bu'i lam// phrad mchog don gyi rgyal po 'di// snga phyi gnyis su 'byung ba dka'// da ltar byung ba rdzogs sangs rgyas// mdor bsdus rtsa rlung thig le gsum// sku gsum rig pa gcig tu 'dus// kun rdzob sprul sku'i rtsa ni lus// don dam longs sku'i rtsa de bsgom// rang bzhin chos sku dbu ma'i rtsa// lus ngag yid gsum dbyer med pa'i// rtsa yi dngas ma rlung bcud ni// sprul sku las byed rlung ni 'gyur// longs sku ye shes rlung ni gnas// chos sku khyab byed mi rtog rlung// sems dang gnyis med gcig pa'i rtsal// thig le nyag gcig chos kyi sku// ngo bo ka dag nyid du gnas// don dam longs sku'i thig le ni// rang bzhin lhun grub 'od du gsal// kun rdzob rgyu yi thig le ni// dkar dmar 'phel zad sna tshogs pa// sprul sku'i sa bon thig le ste// de rnams dbyer med bde stong gis// spros bral thig le chen po ni// skye 'gag med pa'i chos nyid de// rig pa byang chub sems yin no// ma rig rig pa kun shes pa'i// shes rab chen po'i skad cig gis// chos kun mngon par rtogs pa ni// thog med gzhi'i rig pa de// rang bzhin lhun gyis grub pa la// ma rig ngo bo ka dag byung// thugs rje'i mtshan nyid kun la khyab// 'gro kun bde gshegs snying po can// thams cad ngo bo nyid sku la// ma rig 'khrul pa'i der 'dzin gyis// 'od kyis sgyu ma'i lus grub cing// de 'dzin shes pa'i lus sems la// gang gis dran du snying yin pas// rtsa rlung thig le 'dus pa'i sku// lus kun mnyam gnas snying gi dkyil// rang rig dang po'i sangs rgyas bzhugs// rang bzhin 'od dang thig le sku// stong gsal dus gsum 'gyur med kyang// rang gis rang gi rtog tshogs bcom// rtog med lhun grub don rtogs pas// rdo rje gdan du byang chub mdzad// byang chub chen po'i sku de yis// che bas nam mkha'i mtha' dang mnyam// kun la dbyer med khyab par gnas// chung ba rta rnga brgya gshags tsam// kun la bye brag phyed par gsal// gsal ba'i tshad ni nyi zla 'dra// nam yang ma 'gribs sa le ba// gzi brjid lhun sdug gang yang grub// 'pho 'gyur med pa'i 'gro 'ong cing// mnyam pa nyid la so sor ston// ston pa de bzhin gshegs pa'i sku// spyan dang zhal dang snyan shangs ldan// thams cad mkhyen pa'i ye shes mnga'// sems can kun gyi lus la gnas// sku de gdos bcas sha khrag min// sems can 'khrul bas khams kyi gzugs// rigs byed 'od kyi lus khyad med// snyam byed rtog pa'i sku ma yin// sku ni 'od gsal stong pa'i sku// rtag pa ma yin dngos po med// chad pa ma yin rang 'od gsal// tha dad ma yin phyi nang med// snang ba yod la reg pa med// skye shi 'pho 'gyur med pa'i sku// rang gzhan gnyis kyi snang ba ru// mkha' zla chu zla bzhin du yod// gsung ni skye med don gyi gsung// tshig tu mi gsung don du gsung// thugs ni gzung 'dzin mkha' ltar dag/ yid med sems su gsal ba med// tshor ba med cing myong ba med// 'du shes med pas ngar 'dzin med// stong nyid ye shes snying po can// ye shes sku ste rang 'byung ba// zhi khro ma nges sems dpa' tshul// rang bzhin gnas pa'i ye shes de// rkyen gyis nyams su blangs pa na// lhag med dag tu mya ngan 'da' 'o// gang gi rang rkyen rang 'byung ba// rang 'byung ye shes lta sgom gyis// nyams su blangs pas gzung 'dzin gyi// rnam smin rnam shes 'khrul rtog rnams// rang zhi rang dag rang yal du// rang sar grol nas gzhi thog tu// gzhi grol lam las 'das pa yis// sku gsung 'bras bu thob par 'gyur// snang srid rang sgribs lus su 'khrul// kun la khyab kyang rig pa de// lus dang yid kyis gzung 'dzin bcings// dper na khang pa'i phyi nang na// nam mkha' mnyam pa ris med kyang// nang nas phyi ru ltas pa'i tshe// bu ga phra mo rnams la ni// nam mkha' skar ma'i zer tsam snang// 'bring po rnams la nyi zla tsam// phyi rol mthong na phyogs bcu yi// mtha' dbus med par snang ba bzhin// lus sems phyi nang med pa la// lus su bzung nas sems bcings pas// rig pa srog rtsa snying la gnas// snying nas dbang po'i rtsa sgo ni// phra mo khong stong zang thal la// phyi nas yul lnga'i snang ba ni// der snang 'phra mo'i ye shes 'char// dbang po'i dwangs ma mig la ni// rtsa ni 'phra yang 'dangs la gsal// rig pa'i ye shes stong gsal de// skar khung nang gi nyi zhur bzhin// gsal stong thig le'i sku ru gsal// chung yang 'od kyi dkyil 'khor can// de nyid mkha' dang mnyam gyur kyang// rang gi gzung 'dzin lus rgyas 'thums// sgrib pa de nyid gsal ba'i gnad// lus gnad dngas ma'i rtsa gcun cing// rtsa rlung dngas ma'i thig le yi// rig pa lta stangs dbyings la gcun// dbyings rig gnyis med rig pa de// rgya mthongs steng gi nam mkha' bzhin// je che je gsal nam zhig na// gzung 'dzin 'ja' lus mkha' ltar dag/rig pa ye shes 'od gsal sku// shel sgong dag pa shubs med bzhin// phyogs bcu kun tu rang gsal ba'i// rang gis ji ltar ltas bzhin gyis// ngo bo stong zhing dngos po med// rang bzhin gsal zhing chad pa med// dngos po'i chos su skye ma myong// dngos med chos su 'gag ma myong// gnyis med gcig gi mtha' dang bral// cir yang ma grub cir yang rung// ma byas pa ru lhun gyis grub// phyogs ris med de mtha' dang bral// nam mkha' dngas pa'i dkyil bzhin du// thams cad rgyal ba'i sku ru snang// ji lta ba yi ngang nyid nas// mdangs kyis sku ni rnam pa lnga// so so rigs kyi mtshan nyid 'dzin// ye shes 'od lnga'i klaung na bzhugs// chos sku'i ngang las ma g.yos bzhin// gsal la 'gag med longs spyod pas// chos nyid dbyings kyi ye shes sku// ye nas ngo bo kun gsal bas// gsal dag me long ye shes sku// gnas lugs gcig las ma 'das pas// mnyam pa nyid kyi ye shes sku// chags pa med par kun shes pas// so sor rtog pa'i ye shes sku// rtsol ba med par lhun grub pas// bya ba grub pa'i ye shes sku// ye nas ji bzhin de nyid la// rgyu las ma bskyed rkyen mi shigs// 'gro 'ong bral te dus thams cad// rtag par bzhugs pa'i ye shes sku// 'di ni zhing khams chen po ru// phyogs med rgyun gyi thugs rje ni// rang snang ye shes gzhan snang du// sku lnga'i 'gro don 'phrin las ni// thog ma med pa'i dang po 'di// gnad la brten nas grol ba'i lam// bgrod mi dgos pa cig char gnad// rtogs pa mngon gyur sangs rgyas so// tha mal dang po'i las can gyis// gnad 'di nyams blangs grol ba yi// rig pa sku ru grol ba'i rtags// thig le stong pa'i sgron mar 'char// sku dang ye shes shar ba'i rtags// rang bzhin gsal mdangs 'od du 'char// 'od de zhing khams gsal ba'i rtags// rig pa dbyings kyi sgron ma 'char// de rnams chos skur grol ba'i rtags// shes rab rang 'byung sgron ma 'char// don gyis rtags su brda shar bas// rgyang zhag chu yi sgron ma 'o// sgron ma rnam bzhi'i rtags mthong nas// bden pa mthong bas phyir mi ldog/ dper na sbrul gyi rkang lag de// bcus pas gsal ba bzhin du ni// lus gnad rtsa yi pho brang du// rdo rje'i lus sems gnad bcun pas// rang la gnas pa'i ye shes de// gnas pa tsit+ta'i dkyil na gnas// gsal ba nam mkha'i dbyings na gsal// khyab pa 'khor 'das yongs la khyab// yin pa thams cad rang rig yin// rang rig rtog pas mngon sangs rgyas// sangs rgyas gzhan nas brtsal du med// rang ngo shes na de rang dngos// ma btsal bzhag pas rang btsal rdzogs// 'khor ba ma spangs rang sar grol// mngon sum rtogs pa'i skal ldan la/ khams gsum 'khor ba'i ming med pas// sangs rgyas med pa ma mchis so// thog med dang po'i rig pa 'di// gzhan gyi byed mkhan ma yin par// me nyid du bas rang bsgribs bzhin// rang gi rang rtsal ma rig pa'i// sgrib bcas gzhi'i sku gsum ste// dri mas dri ma 'khru ba bzhin// rang gi gnyen por rang nyid kyi// rtog pas rtog pa bcom pa yi// rtog gnyis rang sar dag tsam na// dri ma med pa'i nor bu bzhin// sangs rgyas sems can gnyis med pa// lam gyis bcos su ga la yod// thams cad rang shar rang grol gyis// rang gsal rig pa'i ye shes la// gzung 'dzin sbrul mdud bzhin du grol// rang snang nyi zla'i 'od bzhin gsal// rang ngo sngar 'dris mi bzhin shes// the tshom me long byad bzhin chod// rang dbang rgyal po bzhin du thob// rtogs pa'i ye shes skad gcig la// phyir mi ldog pa bden pa'i don// mngon sum mthong bas sa rnams ni// kun rdzob tsam du bstan pa las// yang dag don du rab las ni// sa zhes bya ba gud na med// sgrod du med de rang rig la// mun pa'i dkyil du nyi shar bzhin// thams cad ma lus dus gcig rdzogs// lam pa rnams dang sgo bstun na// sdug bsngal bde bar mthong ba yis// sa ni dang po rab tu dga'// the tshom dri ma ma mchis pas// gnyis pa dri ma med pa'i sa// rang snang gsal 'grib med pa yis// gsum pa 'od byed sa thob bo// 'od snang phyogs bcur khyab pa yi// sa ni bzhi pa 'od 'phro ba// nyon mongs snang ba dag pa yis// sa ni lnga pa sbyang dka' ba// rang rig thig le'i sku gsal pa// drug pa mngon du gyur pa'i sa// de la goms pas 'khor ba dag/ bdun pa ring du song ba'o// sku yi 'od dang zhing khams rgyas// brgyad pa mi g.yo'i sa non pa// de nyid mi g.yo bstan par gnas// dgu pa legs pa'i blo gros sa// ye shes snang ba lam me ba'i// chos nyid rang gsal lhug par shar// bcu pa chos kyi sprin gyi sa// bden pa mthong ba'i gang zag gis// dbugs 'di ma bor sa de non// gzung 'dzin lus rgya grol ba'i tshe// snang srid chos sku'i dkyil 'khor du// ye shes sku yi 'od kyis brgyan// bcu gcig kun tu 'od kyi sa// de la zhen chags med pa yis// bcu gnyis ma chags pad+ma spyan// sku dang zhing khams 'khor gyi tshogs// gsal la 'dzin med 'od kyi tshul// bcu gsum 'khor lo tshogs chen sa// ye shes snang ba 'gyur med gnas// bcu bzhi bde ba chen po'i sa// lhun grub 'gyur med rtsal rdzogs pas// bco lnga rdo rje 'dzin pa yis// rnam par mi rtog ye shes ldan// sa rnams ma lus sa gcig ste// lhag bcas tshul du mngon sangs rgyas// de yi rtags kyis byung tshul ni// rang snang sku dang ye shes kyi// zhing khams 'od gsal dkyil 'khor la// gzhan gyi snang bar rtags 'di 'byung// sku la goms pas 'ja' tshon dang// lha yi sku dang sa g.yos 'byung// gsung la goms pas yi ge dang// chos kyi sgra dang rol mo 'byung// thugs la goms pas gdung dang ni// ring bsrel nam mkha' dngas pa 'byung// yang dag rdzogs pa'i sangs rgyas ni// lhag ma med par mya ngan 'das// rang gzhan 'khor 'das thams cad kun// chos sku bde ba chen po ru// thams cad mkhyen par sangs rgyas pas// gdul bya skor tshe'i snang ba ru// sku gdung 'ja' 'od la sogs pas// gang gi rtags yang mi 'byung ste// rgyal ba nam mkha'i sku can la// sha rus khrag ni med pa ru// ring bsrel 'byung bar ga la 'gyur// 'on kyang gdul bya'i mos snang gis// thabs kyi ring bsrel 'byung ba srid// 'gro la phan pa'i thabs tsam las// rdo rje sku gsung thugs nyid du// sangs rgyas pa la ring bsrel med// bye ma la ni mar byung ngam// 'bras btab til 'bru smin pa ni// de tshe ring bsrel yod par 'gyur// sha khrag rus pa'i dngas ma rnams// ting nge 'dzin nam shugs kyis 'dus// bcud du dril ba'i gzugs brnyan yin// byung dang ma byung don la 'dra// rgyal ba mya ngan 'das kyang ni// ring bsrel mchod pas 'gro don byed// lam dri ma grol byed kyi le'u ste bdun pa'o//// gdod nas rang ngam sku gsum 'di// yin min rtags pa byis pa yin// mkhas pa rnams ni the tshom bral// sgra dang tshad ma la sogs pa'i// rang phyogs 'dzin pa'i sgrub mtha' yis// 'di nyid gtan la phebs pa med// rig pa rang byung rang grol gyis// don 'di rtogs na sngon sangs rgyas// gzhi dang lam gyi skyon dag pas// 'bras bu ming du brtags pa la// sku gsum gzhi la gnas gyur kyang// rang ngo ma shes 'khrul pa yin// sems can nyon mongs 'byung ba las// 'khrul pa sangs pas sems can grol// sems nyid spangs bya thob byed kyis// gnyen po lam gyis bsgribs pa la// spangs thob med pa'i ye shes la// gnyis 'dzin bag chags zad tsam na// lam gyi mtha' ru phyin pa yis// sku gsum ye shes mngon 'gyur du// yon tan phyogs med rgyas pa la// sangs rgyas sku gsum dpal du 'bar// sku gsum ngo bo gcig pa la// 'khor ba dang ni mya ngan 'das// rig dang ma rig khyad par gyis// sangs rgyas sems can ldog cha yin// skye 'gag med pa'i 'od gsal de// ma rig 'od las byung bar 'khrul// rig na 'byung ba 'od du ldog/ dang po sku las lus su 'khrul// da ni lus las sku ru ldog/ dang po ka dag sems su 'khrul// rtogs na sems nyid rig par ldog/dang po ye shes rig par shar// shes nas ci shar ye shes dngos// ngo bo gcig la rnam pa gnyis// zlog cha tha dad byung gyur kyang// dper na mun pas bsgribs tsam na// rang gzhan yod kyang mi snang la// 'od kyi sgron mas mun bsal na// rang gzhan thams cad snang ba bzhin// ma rig pa yis kun bsgribs la// sgrib pa gsal bas thams cad du// rang rig sku gsum mngon sum rtogs// ngo bo rang bzhin thugs rje gsum// ngo bo stong par ma shes pas// ma dag nyon mongs 'khrul snang byung// rig pa bzung yul ngo bo stong// dmigs med 'od gsal rgyas pa yis// sprin med nam mkha'i dbyings bzhin du// ngo bo nyid kyi sangs rgyas yin// de yi rang bzhin 'gag med 'di// ma shes rang gi sgrib pa g.yogs// brtan g.yos snod bcud gzugs brnyan kun// so sor rtogs pa'i gzung 'dzin 'khrul// rig pa dngos po mtshan ma yi// der 'dzin sangs nas snang ba kun// nam langs nyi ma'i 'od bzhin du// zhing khams 'od dang rig pa sku// gnyis med ye shes rgyas pa yi// rang bzhin lhun grub sangs rgyas yin// de yi thugs rje kun khyab ni// ma shes rang bzhin gnyis 'dzin la// a 'thas nye ring phyogs cha yi// zhen chags 'khor ba'i bag chags 'khrul// de nyid ngo shes thams cad kun// rang 'byung ye shes rang rig pas// thugs rjes gang la gang 'dul du// bsam gyis mi khyab sprul pas te// rgyu rkyen 'tshogs pa'i sa gzhi la// dgos 'dod sna tshogs skye ba bzhin// mkhyen pa'i ye shes rgyas pa yi// thugs rjes kun khyab sangs rgyas yin// kun gzhi kun la khyab pa de// ma shes kun gzhi'i rnam shes 'khrul// shes pa rnam mkhyen ye shes su// thams cad mkhyen pa'i sangs rgyas byung// gzhi ni ma rig 'khrul pa'i dus// tshogs drug snang ba 'khrul pa la// rang ngo shes pa sprul sku yin// sgo lnga'i yid byed 'khrul pa la// rang bzhin shes na grol ba ste// kun gzhi rnam shes 'khrul pa la// rdo rje lta bu'i ting nge 'dzin// mi rtogs kun shes sangs rgyas yin// de la lam gyi 'khrul grol gnyis// chos dang chos min mi shes 'khrul// spang blang shes pa sprul sku la// nyon mongs gnyen po brten pas 'khrul// spang gnyen gnyis med longs sku ste// de bzhin shes bya'i sgrib pa la// bag chags dag pa chos kyi sku// de don mthar phyin 'bras bu la// da rung re dogs 'khor ba'i cha// the tshom chod pa sprul sku yin// the tshom med kyang spang thob kyis// sbyang sgrod dgos pa 'khor ba'i cha// gnas lugs spyod pa longs sku yin// zad pa skyol bas 'khor ba dag/ lhun gyis grub pas chos kyi sku// zad med dbyings nas don kun mdzad// ngo bo rang bzhin mtshan nyid kyis// ka dag lhun grub kun khyab ste// gzhi dang 'bras bu dbyer med pa'i// ngo bo nyid du gcig gyur kyang// bag la nyal gzhi ma rig lam// 'bras bu de nyid mthar phyin pas// thog ma nyid ni grol ba ste// dper na gser gyi ser po bzhin// 'bras bu gzhi thog rang grol kyang// 'bras bu rgyu ru mi ldog ste// til mar til du mi ldog bzhin// sangs rgyas sems can ldog mi srid// mkhyen pa bag la nyal mi 'gyur// 'od gsal ba la sgrib pa bral// rdo rje'i sku la 'pho 'gyur med// rdo rje gdan du byang chub pas// dus gsum sangs rgyas der sangs rgyas// thog ma med nas tha ma'i bar// rig pa gdod nas sku gsum du// ngo bo bzhi yi sku gsum la// rang bzhin lam la mthar phyin pas// mtshan nyid shes pa 'bras bu ste// rang sems ci yang ma grub pa// spros dang bral ba'i chos sku yin// bem stong had stong ma yin pa// rang rig rang rtsal longs sku la// gsal dngas 'gag med sna tshogs su// nges med 'char ba sprul pa'i sku// de nyid ma rig rig thog tu// bla mas rang ngo sprad pa yis// yin lugs shes pas chos kyi sku// go ba'i yul du ma lus par// rgyud thog nyams myong longs spyod dang// re dogs dum bur ma chad par// sna tshogs gcig shes sprul pa'i sku// dbyer med rtogs pa 'bras bu'i don// 'khor 'das gnyis med gcig tu 'dres// mkha' la sprin phung yal ba bzhin// thams cad de yi ngo bor grol// spros bral kun khyab chos kyi sku// 'khor ba bya ba'i yul med pas// mya ngan 'das pa'i ming yang med// sems can rtogs pa'i rgyud zad pas// sangs rgyas yin pa'i rtog pa med// rnam par rtog med lhun gyis grub// spros dang bral ba'i ye shes de// yul med rangs gsal bde ba la// rang sar spyod pa longs sku la// 'gag pa med pa'i smon lam dang// rtsol ba med pa'i thugs rje yis// rang bzhin rang snang sprul pa'i sku// sku gsum dbyer med gcig pa de// don gnyis ldan pa'i sangs rgyas yin// gdod nas lhun grub chos kyi dbyings// spros dang bral ba'i rig pa la// rnam par mi rtog ye shes kyis// 'khor ba'i mtha' la mi gnas shing// stong pa nyid la zhen pa yis// mya ngan 'das pa'i skyon ma gos// dmigs pa med pa'i thugs rjes ni// yul med kun la khyab pa yi// rtsol med 'gro don mtha' med mdzad// sems can rnams kyis don kun 'grub// mya ngan 'das pa'i mtha' mi gnas// 'khor ba'i skyon gyis gos pa med// chos nyid ngang las ma g.yos par// rnam rtog mi mnga' cir yang du// sa lo thams cad mkhyen par snang// dang po'i lam la zhugs nas su// theg pa bsam gyis 'dzeg pa yi// lam rnams rims kyis bsgrod pa de// mdzad pa mthar 'don sangs rgyas yin// gdod nas 'bras bu gzhi thog nas// sku gsum rig pa gcer bu ru// cig char rgyud la rtog pa de// lta ba yas nas 'bubs pa yin// rtogs pa mngon 'gyur sangs rgyas yin// rang bzhin lhun grub dkyil 'khor du// thams cad mkhyen par sangs rgyas pa'o// dbang thob dus na khyad par med// gnyis med chos sku rdzogs sangs rgyas// gzugs sku 'gro don rgyun mi 'chad// sku gsum zhes brjod tshig don ni// blo 'das ngo bo chos nyid du// chos su gnas pas chos sku la// zag pa med pa'i bde chen la// longs spyod pa ni longs sku ste// de yis gang la gang 'dul du// sna tshogs 'byung phyir sprul pa'i sku// de rnams tha dad ma mchis pas// sku gsum ro gcig ces su brjod// chos sku'i ngo bo kun la khyab// dbyer med ka dag ye shes yin// longs sku'i ngo bo mtshan nyid 'dzin// rang bzhin lhun grub ye shes yin// sprul sku ngo bo ci yang 'char// du ma ro gcig ye shes yin// sku gsum ngo bo khyab brdal glong// thams cad mkhyen pa'i ye shes yin// chos sku dpe ni nam mkha' 'dra// thams cad de yi ngang las byung// longs sku'i dpe ni nyi zla 'dra// thams cad de yis gsal bar ston// sprul sku'i dpe ni 'od zer 'dra// gcig gis du ma 'byed par byed// 'byed med dpe ni bar snang 'dra// thams cad ma lus ston par byed// sku gsum lhan cig skyes pa la// sems can rnams ni dbang po yi// rtog pa'i rang bzhin gsum du rgyu// chos sku sa bcu rgyun mtha' dang// rnal 'byor dbang phyug sangs rgyas mthong// sa bcu la gnas sems dpa' yis// chos sku longs sku sprul sku mthong// gang zag mos spyod la sogs rnams// chos sku sprul pa'i sku ru mthong// btang snyoms log sred can rnams la// dmus long nyi ma mi mthong bzhin// sangs rgyas snang bar mi 'gyur ro// chos sku'i ye shes rnam gsum ste// ngo bo 'gyur ba med pa yis// ngos bzung ka dag ye shes yin// de nyid 'gag med rang gsal du// rang bzhin lhun grub ye shes yin// de nyid kun dang dbyer med du// de dang de ru kun shes pas// thugs rjes kun khyab ye shes yin// ye nas thams cad ji bzhin du// yul med rang rig shes pa 'di// thams cad mkhyen pa'i ye shes yin// yul can rnam pa shes pa 'khrul// gnyis med rtogs pa sangs rgyas yin// longs sku ye shes rnam lnga ste// de yi rang gzugs sku lnga yin// 'khor 'das gnyis med ye shes su// gsal ba me long ye shes la// gnyis bsdus chos rnams dbyer med dang// gcig gyur mnyam nyid ye shes la// thams cad ma 'dres yongs rdzogs su// dngos gsal sor rtogs ye shes te// ma bcos bzo med lhun grub pas// bya ba grub pa'i ye shes yin// chos med mtshan ma med pa'i dbyings// 'gag med chos dbyings ye shes te// tha dad ming la don gcig go/ sprul sku'i ye shes rnam pa gnyis// 'khor 'das ma lus thams cad kun// chos nyid rang gi rig pa de// sgrib pa med par mngon sum du// rang ngo shes la 'dzin med do// ji lta mkhyen pa'i ye shes yin// de nyid rang snang gzhan snang gi/ shes bya'i chos can ji snyed rnams// bye brag ma lus thams cad kun// sa la gsal bar mkhyen pa de// ji snyed pa'i ye shes te// rang snang gzhan snang ye shes gnyis// lhan cig skyes pa kun mkhyen yin// lam pa'i dus na ting 'dzin la// sems can dus la rnam rtog tshogs// sangs rgyas mkhyen pa'i ye shes so// thams cad rgyal ba'i sku las ni// chos sku dbyings rig gnyis med sku// nam mkha'i sku can kun la khyab// 'od gsal bde chen 'gyur ba med// 'khor 'das kun gyi rten byed pa'o// longs sku snang la rang bzhin med// mtshan dang dpe byad 'od kyi sku// sprul sku gang la gang 'dul ba// sems can rnams kyi bag chags sku// sangs rgyas thams cad sku gcig ste// bde bar gshegs pa chos kyi sku// sems can mos pa tha dad pas// 'dul byed sku yang tha dad snang// sangs rgyas mtshan yang tha dad rtags// theg pa sna tshogs thabs tshul gyis// sangs rgyas gsung yang tha dad byung// ma hA a nu a ti gsum// chos sku gsung gi theg pa yin// dgongs pa tshe gcig chos sku sgrub// kri ya u pa yo ga gsum// longs sku gsung gi theg pa yin// 'bras bu tshe bdun longs sku sgrub// nyan thos rang rgyal byang chub sems// sprul sku gsung gi theg pa yin// bskal par 'phro 'thud sprul sku sgrub// rgyal ba'i gsung dbyangs gcig las su// theg pa sna tshogs byung ba ste// don la theg pa gcig las med// 'bras bu thig le gcig tu rgyas// thugs dgongs thams cad mkhyen pa la// gdul bya'i rtog pa gsum du phye// chos sku'i thugs ni spros bral dang// bsam pa yongs rdzogs kun mkhyen no// longs sku'i thugs ni kun khyab la// gsal la 'dzin med mkhyen pa'o// sprul sku'i thugs rje phyogs rigs med// sems can bsam pa mkhyen pa'o// sems can rnams kyi rang snang de// sprul pa sku yi bden pa yin// thams cad rgyal ba'i zhing khams la// chos sku'i gnas ni chos kyi dbyings// bsam gyis mi khyab tshad las 'das// longs sku'i gnas ni 'og min gyi// mdzes ldan 'od kyi gzhal yas khang// 'thug po bkod pa'i zhing khams so// sprul sku'i gnas ni gang 'dul zhing// bya rgod phung po'i ri la sogs// 'khor yang de dang mthun pa ste// rdul gcig rdul snyed sangs rgyas kyi// rigs lnga bde bar gshegs pa'i tshogs// bsam gyis mi khyab chos sku'i 'khor// rigs lnga zhi khro'i tshogs rnams dang// byang chub sems dpa' longs sku'i 'khor// rgyal sras rnams dang 'phags pa'i tshogs// 'khor sde bzhi dang sde brgyad sogs// las ldan sprul pa'i sku yi 'khor// thams cad rgyal ba'i dkyil 'khor yin// chos sku'i gdul bya rgya 'chad dang// 'jig rten bkod pa med pa yis// nam mkha' gar khyab chos sku'i zhing// longs sku 'thug po bkod pa'i zhing// me tog snying pos brgyan pa'o// sprul sku stong gsum mi mjed zhing// bye ba phrag brgya la sogs so// nyi ma'i 'od dang 'od zer bzhin// sku gsum gdul bya'i 'phrin las ni// chos sku gcig gi mdzad pa yin// gnas lugs mnyam pa nyid yin kyang// bye brag ma phye btang snyoms pas// chos sku med na chos dang ni// chos min bye brag mi phyed pas// chos kyi sku yi 'thad pa yin// longs sku med na ye shes lnga// rang bzhin mtshan nyid mi shes la// sprul sku med na gzhan don gyis// 'phrin las mdzad pa mi shes pas// chos nyid las grub chos sku 'thad// de nyid longs spyod longs sku 'thad// de las sprul la sprul sku 'thad// dbyer med ngo bo nyid kyi sku// gser dang kha dog gzugs bzhin du// lhan cig skyes pa'i byang chub sku// 'gyur ba med pas rdo rje'i sku// mchog gi dang po sku gsum 'chang// sangs rgyas sku lnga'i bdag nyid can// ye shes sku mchog rang 'byung cig/ de yi bye brag mtshan nyid la// chos sku spros pa'i mtha' dang bral// ngo bo skye ba med pa la// longs sku rang bzhin med bzhin du// 'gag pa med par mkhyen pa yis// sprul sku mtshan nyid ngos med du// sna tshogs ci yang ston pa la// rtag pa ma yin nges pa med// 'khrul rtog mi mnga' mnga' ba'i tshul// dper na nam mkha'i kha dog 'dra// chos sku lhun gyis 'grub pa dang// spros pa med par gcig pa dang// kun la khyab pa'i yan lag go/ longs sku mtshan dpe 'od kyi ngang// yab yum 'khor dang zhing khams la// bde bas gang ba'i yan lag go/sprul sku dmigs med kun khyab la// 'gag pa med pa'i snying rje 'di// rgyun chad med pa'i yan lag go/ ngo bo mnyam pa ris med la// dbye ba yon tan sgo nas phye// rgyal ba'i sku la dpag med kyang// sems can blo yis bcad pa'i yul// chos sku kun la khyab pa la// 'di zhes nges pa'i mtshan ma med// gnas la nges med chos kyi dbyings// 'khor la nges med 'khor 'das rnams// chos la nges med srid zhi kun// dus la nges med mnyam pa nyid// chos sku bsam gyis mi khyab pas// sangs rgyas rnams la snang ba'o// longs sku rigs lnga'i sangs rgyas la// gnas nges 'thug po bkod pa dang// 'khor nges dag pa'i sa pa yis// byang chub sems dpa' rigs gsum dang// chos ni theg chen brda yis ston// dus ni sgrib gnyis dag dus der// 'khor gyi snang ba dag pa yis// longs sku skye 'gag mi snang ngo// sprul pa'i sku ni ma nges te// ston pa gang la gang 'dul ba// rigs drug don du thub pa drug/ de'ang mdzad pa bcu gnyis tshul// gnas ni 'dzam gling bye phrag brgya// de yang ma nges sna tshogs gnas// 'jig rten 'das dang ma 'das pa'i// 'khor ni rigs tshogs bsam mi khyab// chos kyang theg pa du ma ston// dus la nges med gsum du bsgrang// sems can snang ba ma dag pas// rgyal ba'i sku yang der snang ston// ston pa mya ngan 'das tshul ston// dam pa'i chos kyang nub par 'gyur// 'on kyang sangs rgyas mi 'da' zhing// dam pa'i chos kyang nub mi 'gyur// sems can rnams la phan pa'i phyir// sangs rgyas mdzad pa gang yang ston// don dam dbyings las g.yos pa med// thub pa chos kyi sku can yin// gnas lugs stong pa chos kyi dbyings// yin par grub med rang rig 'di// rang snang 'char tshul ma 'gags pas// snang srid chos sku'i zhing du shar// rang shar rang grol chos kyi sku// stong nyid spros dang bral ba yis// nam mkha' lta bu'i gshis de yin// de nyid ye shes rig pa'i sku// rtag pa ma yin mtshan ma med// chad med 'od gsal stong pa'i sku// gsal la hrig chags phyi nang med// phyogs bcur ye shes spyan gyis gzigs// snang cha yod la 'dzin cha med// dus gsum bde gshegs chos kyi sku// nam mkha' lta bu'i sku mnga' ba'i// thams cad rgyal ba'i sku rdo rje// bde chen 'od gsal dpal du 'bar// gsung ni tshig tu ma brjod par// don gyis gsung ni rgyun mi 'chad// thams cad rgyal ba'i gsung rdo rje// tshangs pa gsung gis don kun 'grub// thugs ni sgrib gnyis mi mnga' bar// snang srid rgyal ba'i dkyil 'khor du// dper na nyi ma'i dkyil 'khor bzhin// rang snang 'od kyi zhing khams na// bde chen 'khor gyis tshogs kyis bskor// zag med ngang las 'gyur med du// rang snang longs spyod ye shes ni// chos nyid ji lta thams cad mkhyen// gzhan snang gzugs sku'i ye shes ni// chos can ji snyed mkhyen pa de// rnam rtog mi mnga' rtsol med 'byung// sku gsung thugs dang zhing khams 'khor// rang nyid min pa gzhan med pas// gnyis su ma mchis 'khor 'das kun// nor bu dri ma med pa bzhin// rang snang chos sku'i sangs rgyas yin// gang dag nga la gzugs su mthong// sgra thos mtshan mar 'dzin pa kun// log par rtog pa zhugs pa ste// rmongs pa de dag nga mi mthong// nga ni rang 'byung chos kyi sku// 'dus ma byas shing lhun gyis grub// mkhyen dang brtse ba'i bdag nyid can// chos nyid rig pa'i sku ru ltos// thams cad nga yi rang bzhin la// logs na lta rgyu ci yang med// sangs rgyas sems can gnyis med du// thams cad bde gsal chos kyi sku// gcig tu rtogs na nga mthong yin// nga las 'khor ba myang 'das med// 'khor ba myang 'das su yi chos// nga la bzang ngan gnyis su med// bzang ngan gnyis 'dzin su yi chos// nga la phyi nang phyogs rigs med// phyi nang phyogs rigs su yi chos// nga la snga phyi 'pho 'gyur med// dus dang 'pho 'gyur su yi chos// nga la bdag dang gzhan du med// bdag gzhan 'dzin pa su yi chos// nga la gsal 'grib skye 'gag med// skye 'gag 'phel 'grib su yi chos// nga la che chung 'du 'bral med// 'du 'bral dus tshod su yi chos// nga la rig dang ma rig med// 'khrul grol gnyis po su yi chos// nga la rgyu rkyen 'bras bu med// rgyu 'bras gnyen po su yi chos// thams cad rang las ma 'das par// rang gi rang nyid gnyis 'dzin bsgribs// ltad mo sna tshogs yul yod kyang// mig gcig bkab pas thams cad 'gag/ de bzhin thams cad mkhyen pa yang// rang sems ma rig cig gis 'gags// ma rig ling thog bsal tsam na// ye shes mig gcig dri med de// thams cad gzigs shing thams cad mkhyen// de bzhin gshegs la phyag 'tshal lo// dbyings gsal dri med chos kyi sku// brtan g.yo'i gzugs brnyan kha dog kun// rnam snang gang chen ye shes sku// sku la zhing khams thams cad snang// zhing khams thams cad skus khyab pas// longs spyod rdzogs sku'i rang bzhin yin// rang rang nus pas gzhan don mdzad// sprul pa'i skur yang de nyid brjod// de las dag snang can rnams la// byang chub snying po'i zhing khams na// sems nyid sna tshogs mdzes pa brgyan// chos dbyings 'od kyi ri bo la// ston pa rnam par snang mdzad la// rdo rje 'dzin pa'i skyes bu yis// byang chub sems dpa' bsam 'das bskor// sems kyi rang bzhin 'od gsal ba'i// gsang sngags don gyi ngo bos te// rang gi ston pa la nyan cing// rang gi 'khor la chos dbyings kyis// de nyid kho na nges pa'i sgo// ye shes chen po ston par byed// sangs rgyas mi bskyod pa yin zhing// mngon par dga' ba zhes bya ba// rdo rje phung po'i ri bo la// rdo rje'i 'od zer rnam par brgyan// rnam par snang mdzad de nyid las// ston pa rdo rje mi bskyod pa// skyes bu sems dpa' rdo rje'i rigs// byang sems bye ba mtha' yas bskor// sems kyi dkyil 'khor 'od gsal ba'i// gsang sngags ngo bo de nyid ni// nyan cing rang gi ston pa yi// ji bzhin nyid kyi sgo nas su// me long lta bu ye shes ston// sangs rgyas rin chen 'byung ldan zhing// dpal dang ldan pa zhes bya ba// rin chen gser 'od ri bo la// rin chen phung po rnam par bkod// ston pa rin chen 'byung ldan la// skyes bu rin chen rdo rje'i rigs// byang chub sems dpa' mtha' yas bskor// sems nyid rang bzhin 'od gsal ba'i// gsang sngags don gyi ngo bo ste// nyan cing rang gi 'khor rnams la// ma bcos pa yi sgo nas su// mnyam nyid ye shes gsal bar ston// sangs rgyas 'od dpag med kyi zhing// bde ba can zhes bya ba na// pad+ma 'od kyi ri bo la// pad+mo bkod pas mdzes par brgyan// ston pa snang ba mtha' yas la// skyes bu pad+ma rdo rje'i rigs// byang chub sems dpa' dpag med bskor// sems nyid rang bzhin 'od gsal ba'i// gsang sngags don gyi ngo bo de// nyan cing rang gi 'khor rnams la// ji lta ba'i sgo nas su// so sor rtogs pa'i ye shes ston// sangs rgyas don yod grub pa'i zhing// rnam par dag pa zhes bya ba// rin chen sna tshogs ri bo la// in dra nI la'i dra bas brgyan// ston pa gdon mi za bar grub// skyes bu rdo rje las kyi rigs// byang chub sems dpa' mtha' yas bskor// sems nyid rang bzhin 'od gsal ba'i// gsang sngags don gyi ngo bo de// 'khor gyis nyan cing ston pa yi// nor pa med pa'i sgo nas su// bya grub ye shes ston par byed// 'khor dang rang gi gdul bya rnams// rang rang gi ni ston pa la// rang gi chos su go ba yi// zhing khams de ru snang ba las// skye shi med par longs spyod pa'i// rang gzhan 'dod dgu'i sangs rgyas ni// sangs rgyas rnam par snang mdzad che// chos sku'i ngo bo nyid longs spyod// thugs rje chen po 'jig rten gzugs// mi 'byed la sogs 'jig rten du// bcom ldan thub pa'i dbang po ni// chos kyi sku las ma g.yos par// 'og min longs sku'i rol pa de// rtsol ba med par 'gro ba'i don// gang la gang 'dul der byon zhing// mos pa spyod pa'i lha mi la// byang chub lam la rgyud pa'i// tshogs bsags pa dang sgrib sbyang tshul// skye ba mngon par skye ba dang// dga' ldan gnas nas 'pho ba dang// yum gyi lhum 'jug bltams pa dang// bzo gnas rig pa mkhas pa dang// rgyal srid btsun mo dgyes rol dang// nges 'byung dka' ba spyad pa dang// byang chub snying por gshegs pa dang// bdud sde 'joms dang byang chub dang// rdzogs pa'i sangs rgyas chos 'khor bskor// mya ngan 'das par gshegs pa rnams// ma dag gnyis 'dzin zhing rnams su// srid pa ji srid gnas par ston// de'ang gcig tu ma nges te// mi mjed 'di la ma 'phos par// 'jig rten 'di yang chags 'jig ston// la la dag la stong gnas ston// rgas dang na dang 'chi med kyang// sems can snang bar skye shi ston// dam pa'i don la mi 'da' yang// srid gsum skyo ba bskyed pa'i phyir// ston pa mya ngan 'das tshul ston// la lar lhums zhugs bltams pa'i tshul// la lar chos 'khor bskor la sogs// mdzad pa rnam pa sna tshogs ston// sdig las nges par bzlog pa'i phyir// bdud srin dmyal ba'i 'jigs pa ston// tshogs gnyis dge la 'jug pa'i don// lha dbang mi yi dbang phyug ston// phyin ci log las blo zlog ste// nges pa'i lam la 'jug don du// bdud sde 'joms dang cho 'phrul ston// kun tu rgyal bar gyur nas kyang// da dung mchod pa'i 'du shes dang// thub pa byang chub lam la spyod// dri ma med pa'i chu shel de/ kha dog rkyen gyis bsgyur ba bzhin// thub pa chos kyi sku can yang// gdul bya rang gi bsam pa dang// mthun 'jug de yi sku byon pas// sems can nam mkha' mnyam pa las// sprul pa'i sku yang de dang mnyam// 'gro kun rtog pa tha dad la// sangs rgyas mdzad pa tha dad byung// mkha' la nyi ma gcig shar bas// chu snod grangs las 'das pa ru// nyi ma re re snang ba bzhin// chos sku gcig gi mdzad pa yis// gzugs sku sems can re re'i mdun// sna tshogs sku re ston par byed// de bzhin gsung dang brda tshig yang// rang rang so so'i skad dag tu// dper na lha yi rnga sgra yi// lha rnams kun gyis don go ltar// rang rang 'dod don gsung du go/ de bzhin thugs kyi dgongs pa yang// mkhyen pa'i ye shes gcig nyid la// so so rang rang theg pa'i don// 'jug pa de yi 'bras bu go/ sku gsung thugs kyi mdzad pa rnams// sems can lus ngag yid gsum dang// rigs dang mthun pa'i thugs rje ni// gtsang dang mi gtsang ljan ljin la// nyi ma mnyam par shar ba bzhin// sems can tha ma 'bring 'gyur la// mnyam pa rigs med kun khyab kyang// ji ltar chu yi snod chag na// nyi ma'i gzugs ni mi snang bzhin// log sred can gyi rigs rnams la// sangs rgyas gzugs ni snang mi 'gyur// gnyis med 'brel yang so sor mthong// mos spyod 'dod pa sna tshogs la// sangs rgyas rnam par mi rtog pa// nam mkha' bzhin du g.yo med pa'i// mnyam pa nyid du bzhugs gyur kyang// sangs rgyas byon dang bzhud pa dang// bzhugs dang bzhengs pa mnyes mi mnyes// rnam pa mi gcig du ma ni// zhal ni ston dang mi ston dang// mthong rgyu can dang mthong rgyu min// dngos su yod dang dngos med dang// gzhan ni ma bzhugs bdag drung yod// 'di ru med cing gzhan na bzhugs// la la sangs rgyas rmi lam du// mthong zhing sad nas mi mthong dang// gnyis log mi mthong sad dus mthong// nye bar mi mthong rgyang du mthong// rgyang du mthong zhing nye mi mthong// mnyam bzhag mthong yang yengs mi mthong// yengs pas mi mthong mnyam bzhag mthong// de bzhin sku gzugs kha dog rtags// so so rigs kyi rtog pa bzhin// sku yi bkod pa sna tshogs snang// chos tshig gcig kyang ma gsungs kyang// sems can rnams ni 'di snyam ste// la la chos gsung mi brjod snyam// la lar gsungs pa mdzad par snang// la lar gsungs par 'gyur ro snyam// la las zhal nas gsungs so snyam// la las yi ge byung ba dang// la las sgra dang dbyangs su thos// la las brda dang 'od las byung// la las nam mkha' dbyings nas byung// 'di rnams de bzhin gshegs pa'i gsung// bdag cag rnams kyis thos so snyam// chos rnams ston pa bdag gis shes// go bo rtogs so rig go snyam// gsung dbyangs mtha' yas don gcig 'byung// mi rtog ye shes thugs la ni// 'ga' zhig rtog pa yod do sems// 'ga' zhig rtog pa med par 'dod// 'ga' zhig ye med stong par 'dod// 'ga' zhig mngon par shes par 'dod// 'ga' zhig rtog bral sgyu mar 'dod// 'ga' zhig nyan rang ye shes 'dod// 'ga' zhig byang chub sems dpar 'dod// 'ga' zhig sangs rgyas mkhyen pa ni// rtsol med lhun gyis grub par 'dod// 'ga' zhig rtsal rtog thugs rjer 'dod// 'dzam gling bye ba phrag brgya na// shAka thub bye ba phrag brgya bzhugs// sku gsung thugs kyi mdzad pa ni// rgyal bas ci yang ma mdzad kyang// rang bzhin thugs rje'i nyi 'od kyis// sems can bsams pa tshim mdzad pa'i// gang la gang 'dul zhing khams na// de dang de yi ston par bzhugs// sku yi 'dul ba dngos dang gzugs// mig gi mthong bas don thob bo// gsung gi yi ge dbyangs dang tshig/ rna bas thos pas don grub bo// thugs kyis ting 'dzin 'dul byed pa// yid la dran pas 'bras bu thob// rang bzhin sprul pa mchog yin pas// byang chub lam la 'khod par 'gyur// gdul bya bung ba lta bu la// 'dul byed me tog lta bu yi// so so'i 'dod pa tshim byed pa'i// gang la gang 'dul der ston pa'i// la lar rab byung cha byad dang// skyes pa bud med mi yi gzugs// brgya byin srin po'i cha lugs dang// bdud dang dmag dpon rgyal po'i rigs// bram ze gtsang gnas mu stegs dang// dud 'gro'i cha byad sna tshogs pa'i// skye ba'i sprul pa sna tshogs kyis// gnas skabs 'dod pa'i blo tshim nas// yang dag lam la dad byed 'gyur// 'dod pa'i yul can 'gro ba la// med pa dag las yod byed pa'i// rgyur byed bzo yi gnas rnams dang// rang bzhin 'byung ba lnga rnams las// rdzas dang yo byad dngos po 'dod// phyi nang longs spyod 'dod yon lnga// ma bcos rang sprul rang 'byung gis// rang rang thad ka'i don 'byung bas// thams cad sangs rgyas sprul pa ste// gang gis gang gi dan byed pa// don ldan sprul sku'i 'gro don ni// sems can kun gyi rgyud la yod// ting 'dzin rig dang rgyud rig pa// de ni don gyi 'bras bu'o// 'khor bar snang ba gzugs kyi sku// yang dag snang ba chos kyi sku// gnyis su med pa'i ye shes te// sngar 'das sangs rgyas de bzhin la// ma 'ongs 'byung ba de bzhin te// de ltar byung ba rdzogs sangs rgyas// dus gsum sangs rgyas ngo bo gcig/ de yi rang bzhin rang gi sems// lhun grub 'gyur med rtsal rdzogs pas// rdzogs pa'i sangs rgyas zhes pa ni// ma rig 'khrul pa'i rtog tshogs kyis// 'byung lus dngos po'i sdos bcas rnams// rang sar sangs nas ngo bo de// skur rgyas sku gsum 'du 'bral med// rang bzhin mkhyen pa'i ye shes su// rgyas pas chos sku thams cad mkhyen// sku ni dngos po mtshan ma med// med pa ma yin stong gsal dbyings// 'gag med rig pa 'gyur med sku// smra brjod bral ba'i brjod bya don// bsam gyis mi khyab rgyun mi 'chad// 'khrul dang ca co la sogs pa'i// dran nyams rnam rtog 'du shes dang// ma rtogs btang snyoms mi mnga' zhing// rnam par mi rtog ye shes su// sgrib pa med par kun gsal du// thams cad mkhyen pa'i thugs rje can// 'jig rten 'jig rten 'das pa'i// bdud bzhi rang bcom sku gsum ldan// sku dang zhing khams ye shes tshogs// nor bu rin chen rang 'od mdog/ dbyer med bzhin du gnyis su med// gnyis med chos sku'i gzugs sku de// chu nang nam mkha' zla shar bzhin// gdul bya kun las mnyam par ston// ston pas 'gro don byed pa ni// sgyu mkhan sgyu ma ston pa bzhin// rtog pa med par gzhan la ston// mkhyen brtse dmigs med nus pa yis// nor bu rin chen dgos 'dod bzhin// rtsol ba med par 'gro rnams la// gang la gang 'dod dgos 'dod 'byung// rang bzhin dag dang smon lam gyis// gang zhig rdzogs par sangs rgyas tshe// sems can 'du shes med phyi ru// ma rtogs 'khrul pa'i 'gro ba la// nyi ma'i dkyil 'khor 'od shar bas// pad tshal me tog kha bye ltar// rang gi bsod nams bde ba 'byung// sems can khams rnams chos nyid der// sangs rgyas thugs rje'i gter kha 'byed// yon tan mi zad rgya mtsho ru// 'gro rnams phun tshogs rang la spyod// ma rig shes sgrib sprin 'dra la// thugs rje'i rlung gis rab gtor bas// 'gro kun rang 'byung ye shes rtogs// sems can skyabs med nus pa la// thugs rje'i pha mas bskyangs pa na// rang gis rtsal rdzogs gzhan don 'byung// sa bon gyur pa'i 'gro ba la// thugs rje'i drod gsher bskyed pa yin// dge tshogs yon tan gong du 'phel// gnas skabs mthar thug 'bras bu smin// nyon mongs nad kyi sdug bsngal rnams// thugs rje bden pa'i bdud rtsi sman// gang gis 'thungs pa bde bar grol// 'gro rnams las kyi byed bzhin de// thugs rje'i me long gzugs brnyan gsal// las kyi dri ma phyis pa yis// rang rig sku gsum zhal ngo mthong// thams cad mkhyen pa'i sangs rgyas de// 'khor 'das gnyis la dbyer med pas// nyi mas rang la mun med 'od// gzhan gyis mun pa sel ba bzhin// rang la 'khor ba'i bag chags med// thams cad rgyal ba'i zhing khams la// srid par gnas pa'i 'gro rnams la// thugs rje'i sprul sku rgyun du 'byung// don gnyis thams cad mkhyen grub ste// gnas lugs gcig gi rang ngo yin// sangs rgyas thams cad sku gcig mchog/sku gcig thams cad mkhyen pa yin// de yi che ba'i yon tan ni// re re nas su brjod gyur na// nam mkha' ma zad par mi 'dzad// mdor bsdus sku gsung thugs la 'dus// sku ni nam mkha'i mtha' dang mnyam// mtshan dpe 'od kyi rang bzhin la// bsam gyis mi khyab dpag mi nus// thams cad rgyal ba'i sku rdo rje// gsung ni skye med don gyi sgra// gsung dbyangs yan lag drug cu yis// tshangs pa'i gsung ni bsam mi khyab// thams cad rgyal ba'i gsung rdo rje// thugs kyis mkhyen brtse yul med du// rang snang chos nyid ji lta ba'i// gsal 'grib med pa'i ngang nas su// rang gzhan gnyis su med pa la/ khams gsum 'khor ba srid tshad kyis// rgyu rkyen 'bras bu'i tshogs rnams kyis// so sor ma 'dres tha mi dad// ji snyed mngon sum mkhyen pa yi// chos nyid ngang las ma g.yos bzhin// gsal dang bzlog dang sprul mkhyen nas// sems can smin grol rgyun mdzad pas// de nyid bsam mi khyab pa'i don// byang chub sems dpa' ma rtogs na// nyan thos rang rgyal ci la rtogs// mu stegs byed kun log pa'i lam// cha tsam rtogs nas yang dag gi/lam sna zin pa bde 'gro bas// rigs dang cig char gong bzhin thob// sangs rgyas sems can gnyis po ni// rig dang ma rig khyad pa las// gnas lugs sku gsung lhan cig skyes// rtogs pa'i ye shes thugs rje can// 'gro ba kun la 'bral med du// rtogs pa rgyun gyi thugs rje ni// chu dang rlan bzhin rgyun chad med// rang bzhin shugs kyi thugs rje ni// nyi ma'i 'od bzhin shugs la 'byung// yul dang phrad pa'i thugs rje ni// 'gro ba bzang mo lta bu la// bskul zhing gsol btab thugs rje ni// yid bzhin nor bu'i dgos 'dod bzhin// rtog pa med pa'i sangs rgyas la// gdul byas gsol ba btab pa yis// thugs rjes lhun grub yod pa 'byung// chos sku skye med rang gdang gis// gnyis med dag pa'i thugs rje gzhi// lam dus smon lam mthar phyin rgyus// 'dod mdun mos pa'i gdul bya rnams// tshogs pa gcig tu gyur pa las// 'phrin las rtsol med lhun grub tu// rgyun mi 'chad par 'gro don du// sku gsung thugs kyi gdul bya 'dul// sku yi 'dul ba longs sku dang// bla ma yi dam mkha' 'gro yi// zhi khro dkyil 'khor lha tshogs dang// byang sems rang rgyal nyan thos dang// lha mi so so'i skye bo ni// rgyal po bram ze ded dpon dang// shan pa smad 'tshong kun tu rgyu// stag dang ri bong glang chen sogs// rigs drug so so'i gzugs can du// sems can tshul gyis don mdzad snang// ri mo lugs ma 'bur la sogs// sku gsung thugs kyi gzugs brnyan gyis// mchod rten las dang bya ba dang// 'byung ba lnga dang phyi nang gi/longs spyod 'bebs pa'i rdzas rnams kyis// rtog pa med par 'gro don 'byung// sangs rgyas sku yi 'phrin las yin// gsung gi 'dul ba chos nyid sgra// dbyangs dang tshig dang don gyi gsung// sngags dang theg pa che chung gsung// tshig bshad lhug pa snyan ngag dang// lha mi dud 'gro la sogs pa'i// 'dod pa'i gtam sogs brjod 'das kyis// tshul gyi khyab par kun don 'byung// yi ge'i gzugs dang rol mo'i sgra// 'byung ba so so'i rgyu rkyen gyis// bem po'i sgra yi don rnams 'byung// rdo rje gsung gi 'phrin las te// thugs kyi 'dul ba rang 'byung gis// ye shes nyams rtogs shes rab dang// ting nge 'dzin dang spobs pa dang// dad mos snying rje skyo shas kyis// nges 'byung bsam pa legs po yi// rgyud la skyes pa'i tshul gyis 'byung// brda bstan rtags mthong bslab pa dang// gang gi yid byed mthar phyin pas// sems can rnams kyi yid tshim dang// byang chub sa lam yon tan dang// rigs 'dzin nyams rtags brtul zhugs dang// sku gsum mngon gyur sangs rgyas pa// rgyal ba thugs kyi 'phrin las yin// don dam kun rdzob 'khor 'das kyi// dge sdig rgyu 'bras bde sdug dang// 'khrul grol gzhi lam 'bras gsum rnams// ma 'dres tha dad ma yin par// thams cad mkhyen pa'i ye shes kyis// thams cad kun gyi don 'grub pas// rnam mkhyen sangs rgyas 'phrin las la// thogs pa ma mchis rtsol sgrub bral// lhun grub 'gyur med kun tu bzang// thams cad thams cad khyod la 'dud// 'bras bu dri med thams cad mkhyen pa'i le'u ste brgyad pa'o//// thogs med dngos po'i chos nyid de// sprin med nam mkha'i dbyings bzhin du// stong gsal ci yang grub med la// rang mdangs 'gag pa med pa'i 'od// rang ngo ma shes sprin bzhin byung// de la gzung 'dzin gnyis snang skyes// bar snang bu yug tshub ma bzhin// nyon mongs sna tshogs sems dkrugs nas// ma rig 'khor bar 'khyams pa yin// sems can sangs rgyas yin gyur kyang// rang ngo ma shes bu chung bzhin// rang bzhin gnyis ka mi rigs la// pha mas bskyangs pas sems rnyed bzhin// bla ma'i drin gyis rang sems rtogs// thabs shes tshogs gnyis yon tan skyed// bu chung che mir rtsal rdzogs nas// rang dang gzhan gnyis skyong ba bzhin// chos nyid bden pa'i rang rtsal rdzogs// rig pa sku gsum lcer bur 'gyur// 'gyur med ye shes rang sa yin// chos sku dri med rnam dag de// dper na nor bu rang gsal bzhin// rang snang bde bar rang longs spyod// nor bu 'od cher gzhan la phog/ gzhan gyi kha dog rkyen gyis 'gyur// de bzhin rang snang 'gag med kyis// thugs rje gzhan dang 'bral med pa// sprul pa'i sku ni 'gro don 'byung// 'gro ba rang rang rtog pa dang// mthun pa'i chos sku sprul sku ru// sna tshogs der 'byon don mdzad kyang// dri med chos kyi dbyings dkyil na// skad cig mi g.yo nam mkha' bzhin// kun la khyab pa'i sangs rgyas de// dper na rgyal bu rgyal rigs bzhin// gdod nas sangs rgyas yin gyur kyang// rgyal rigs rgyal po rkang 'khyams bzhin// sangs rgyas ma rig sems can 'khrul// rgyal por ngo shes rgyal sar ston// rang rig rtogs pas rdzogs sangs rgyas// rgyal bu rgyal rigs dbang byed lta// sku gsum thams cad mkhyen pa yis// bdag gzhan don gnyis 'phrin las mdzad// de nyid rtsol med lhun grub de// gser dang ser po gzugs dang gsum// dbye yang don la gser du gcig/ de bzhin ngo bo chos sku dang// rang bzhin bde chen longs spyod rdzogs// thugs rjes sprul pa'i sku dang gsum// ming la so sor brtags gyur kyang// skad cig dbyer med lhan cig skyes// yang dag ye shes 'gyur med par// thams cad kun mkhyen lhun gyis grub// kun tu bzang po kun bdag nyid// rnam par snang mdzad gang chen mtsho// thub pa chen po chos kyi rgyal// rdzogs sangs rgyas dang de yi sras// thams cad mkhyen la phyag 'tshal bstod// 'jug bsdus dpe'i don gyi le'u ste dgu pa'o//// gnas lugs 'od gsal chos kyi dbyings// ji bzhin rig pa sku gsum la// ma rig 'khrul pas gol ba ste// rang ngo ma shes sgrib pa yin// rang shes 'dod pa'i theg pa kun// 'og mas gong ma'i yon tan de// ma mthong rtsod pa sgrib pa de// gong mas 'og ma'i theg pa yi// gnas lugs mi shes snan na gol// gol sgrib ma dag 'khor ba las// mya ngan 'das pa mi rtogs pas// rig pa dri med gtan la phob// chos nyid rig pa khyab brdal yang// nga dang bdag tu bzung ba yis// bzung ba'i yul la 'dzin pa'i sems// gnyis 'dzin rtog pas sems can 'khrul// rang sems rtogs na 'khor mtha' chod// 'khrul pa med na sangs rgyas yin// skye 'gag med pa'i chos nyid de// rtag chad phyogs char bzung ba yis// phyin ci log tu rang snang 'khrul// yang dag don la gol zhing sgrib// lta spyod nor pas mnar med ltung// gnas lugs rtogs na 'jig rten 'das// snang ba sems kyi rang gzugs la// gzung yul spong ba'i 'dzin sems 'khrul// stong nyid bsgom pas 'od gsal bsgribs// nyon mongs spong ba'i ye shes med// gzung 'dzin grol na theg chen yin// snang stong gnyis med ye shes la// gzung yul mi dmigs 'dzin sems dang// rnam rtog bkag pa'i mi rtog 'khrul// rang rig sems su ma mthong bsgribs// gnyis med rtogs na ye shes 'char// rig pa phyogs med thang yan la/ khams gsum sems su 'dod pa 'khrul// sems dang sems byung gnyis med gsum// mtha' dang bral ba ma mthong bsgribs// bden gnyis rtogs na gol sa chod// chos nyid rig pa mngon sum la// kun rdzob don dam mi dmigs pa'i// stong nyid bsgoms pa'i dbu ma 'khrul// sngon sum don gyi gnas lugs bsgribs// thabs kyis zin na sngon sangs rgyas// don dam mtshan ma med pa la// mtshan bcas lha ru ltas pas 'khrul// dmigs med rang gsal ma mthong bsgribs// rang snang dag ni sku ru 'gyur// rig pa skye med spros bral la// spros pa'i gzugs brnyan sna tshogs kun// bskyed rim bsgom pa'i rnal 'byor 'khrul// rang snang sku ru ma mthong bsgribs// gnyis ka'i lta spyod gol sgrib can// gnyis 'dzin bral ba'i sems la ltos// ye shes rig pa ngo mtshar che// mi gnas zung 'jug chos sku la// thabs shes sbyor ba'i bskyed rim 'khrul// lhan skyes ye shes ma mthong bsgribs// ma bskyed rdzogs pa chen po de// rtogs par 'dod na ji bzhin zhog/dbyings dang rig pa gnyis med la// bskyed rdzogs sgom pa'i rnal 'byor 'khrul// ma bcos lhun grub ma mthong bsgribs// rang 'byung ye shes ma rtogs gol// 'khor 'das ma lus rdzogs pa che// rin chen gling na rdo med bzhin// thams cad sangs rgyas ma yin pa// gcig kyang yod par ngas ma mthong// gol sa gol rgyu'i sgrib pa yang// chos nyid ngang las ma 'das pas// chos sku'i rol pa chen po yin// de nyid ma rtogs rdul tsam med// thams cad rang 'byung lhun grub la// bcos ma med pa'i ngang la zhog/ gnyis su med pa'i don la ltos// rtsol ba med pa'i ye shes spyod// rnam par dag pa'i 'bras bu'o// gol sgrib mtha' gcod kyi le'u ste bcu pa'o//// rgyal ba thams cad mkhyen pa yi// ji ltar mos pa tha dad la// 'khrid par bya ba'i thabs tsam du// theg pa dpag med bstan pa yang// lam la 'khrid pa'i thabs su zad// rdo rje'i theg pa nges pa'i don// nam mkha' lta bur khyab pa la// phyogs bcu'i sangs rgyas kun 'dus nas// bka' sgros snying po'i rgyud 'di gsungs// gsang ba'i bdag po nyid la gtad// rgyud chen gsang ba yongs rdzogs 'di// 'khor ba dang ni mya ngan 'das// gnyis su ma yin tha dad min// de bzhin nyid du nges pa'i don// theg pa ma lus 'dir 'dus shing// rgyal ba'i dgongs pa 'dus pa'i bcud// yid bzhin nor bu chen po 'di// gang zhig nyi ma'i dkyil 'khor des// mun pa ma lus sel ba dang// snang gsal 'od kyis kun gsal bzhin// yang dag rgyud 'di sus mthong ba// 'khrul dang ma 'khrul rnam rtog gi/ sgrib pa'i tshogs rnams rang sar dag/ dus gsum kun mkhyen ye shes ni// phyi dus ma yin da ltar du// mthong bas grol te mngon sangs rgyas// sems can rtog pa tha dad la// rgyal ba'i gsung yang de bzhin te// tshig gi rgya mtsho mtha' yas kyang// tshig 'bru tha dad don gcig ste// tshig gcig rnam par rtogs na ni// de dag thams cad rtogs dang 'dra// rgyal ba'i gsung dbyangs gcig las su// chos kyi sgo mo thams cad byung// de rnams 'di nyid don la 'dus// thos pas grol te byang chub thob// thos pa rang rig ye shes yin// dpag bsam shing gi yal ga de// gcig shes sdong po kun shes bzhin// rgyu 'di'i don shes gang dran kun// dag pa ye shes bde chen gyis// dri med chos sku ma rtogs pa// gzhan med rang byung lhun grub la// sku gsum 'bras bu rtsol med 'byung// dran pas 'khor 'das kun don 'grub// ri rgyal lhun po'i rtse non na// ri bo ri phran gling kun non// de bzhin ye shes bla ma'i sa// rig pa sku gsum lhun grub kyis// rgyud 'di'i don dang su 'phrad pa// theg pa kun don chos kyis don// sa lam ma lus dus gcig tu// bgrod mi dgos par kun tu non// rdzogs pa'i sangs rgyas sa gcig la// mang por bgrod kyang don gcig 'babs// chu bran rgya mtshor bsleb dang mtshungs// rgyal po rang gi yul nas su// ma 'phags phyogs kun dbang bsgyur ltar// de bzhin sangs rgyas thams cad kyis// rgyud kyi dgongs pa nges don 'di// gdod nas sku gsum lhun grub kyis// sa lam ma g.yos 'khor 'das yis// don kun mnyam pa nyid du byed// phyogs med rnam par rgyal ba yi// thams cad sangs rgyas mdzad pa yin// de phyir gsang ba'i rgyud chen 'di// mthong thos dran reg 'gro ba kun// dman pa'i lus la rgyal ba'i sku// dbang bskur dam pa sngon du 'gyur// dus gsum sangs rgyas kun sgros pas// 'di las lhag pa'i don ma rnyed// ma byung mi 'byung 'byung mi 'gyur// 'di yod 'gro ba sangs rgyas yin// ston pas chos 'di lung bstan pa// dper na nyi mas kun snang yang// dmus long mig gis mi mthong ba// mig ldan thams cad mthong 'gyur zhing// rgyud 'di 'jig rten kun khyab kyang// blo dman rnams kyis ma rtogs pas// kun gyis rtogs phyir gsang ba'i rgyud// rdo rje snying po khyod kyis zung// nam mkha' lta bu'i chos nyid las// nyi ma'i snying po bzhin du bsdus// 'od kyis kun la khyab pa yi// rtse gcig ma rig mun tshogs sel// dag pa'i ye shes 'od gsal ba// mngon par rtogs phyir dga' ldan dang// 'dzam gling o rgyan yul du dar// byas bcos chos nyid nyams pa'i dus/ khyag pa chu 'khyags yul du 'byung// tshe lo bcu pa'i bar du gnas// yi ge 'di yi phyi mo rnams// o rgyan mkha' 'gro'i gnas su 'dzin// lan cig dus kyi tha ma la// skal pa ldan pas mthong ba srid// nam mkha'i dbyings la yal yang 'gro// rgyal sras phyi rabs rjes 'jug go/ dman pas rgyal ba'i don 'dod rnams// skal ba ldan pas las 'phro 'thud// byang chub don du gnyer ba yi// bla ma la gus snying rje che// dam tshig la gnas shes rgyud dag/shes rab rig rtsal ldan la gtad// mi shes rmongs pa phyin ci log/ skal med log lta'i sgrib pa bcings// bstan pa'i ru dra nyams pa'i rigs// chos skal chad la gsang rgyas gdab// 'di ni gsang chen nges pa'i bka'// zhes ni ston pas bka' stsal pas// de 'khor rigs can rang gi tshogs// rjes su yi rang chos nyid dang// mtsho la kha ba babs pa bzhin// rang rang thad khar rang babs su// dbyer med bde ba chen por grol// ston pa'i gsung la mngon par bstod// e ma thams cad mkhyen pa'i rje// de bzhin gshegs pa kun gyi gnas// sangs rgyas ma lus skyed pa'i sku// tshangs pa'i gsung mchog seng ge sgra// ma lus kun mkhyen de bzhin thugs// che mchog yon tan kun gyi dpal// 'phrin las thogs med me long gsal// 'khor 'das theg kun gsal bar ston// zab dang rgya che kun gyi bcud// rmad byung ngo mtshar snying po rgyud// sangs rgyas bstan pa'i spyi mes po// kun tu bzang po khyod la bstod// ces nges pa dam par bstod do// yongs su gtad pa rjes su yi rang ba'i le'u ste bcu gcig pa'o//// de nas 'khor thams cad ci la yang mi dmigs pa'i ngang nas/ kun tu gsal bar bstan te/ khyad par lha'i 'jig rten du grags shing// o rgyan gnas nas kun smin cing grol bar gyur to// de bzhin gshegs pa thams cad kyi sku gsung thugs kyi snying po de kho na nyid nges pa/ ye shes mchog gi rgyud chen po/ gsang ba yongs rdzogs zhes bya ba rdzogs so//// o rgyan gyi pan Ti ta chen po pad+ma 'byung gnas kyis/o rgyan dang/ rgya gar dbus kyi skad las/ rdo rje gdan du rang 'gyur mdzad/ de nas bod yul lha sa 'phrul snang gi gtsug lag khang du/ mnga' bdag rje blon gsum la don rgyud gnang nas/tshig brgyud don gyi dpe'i yi ge phyi mo// d+ha ki'i gnas nas blangs te bris nas/ phyi rabs don du gtsug lag khang de nyid du gter du sbas so// skal ldan las can cig dang phrad par shog cha/ m+laSh+lad+h+yadAtra/ tra/ ta ma da na gya/ sa ma ya/ rgya rgya rgya/ e ma chos dbyings nam mkha'i dkyil 'khor nas// rgyud sde skar tshogs rnams kyi mchog/ snying po nyi zla lta bu 'di// bdag 'dra pad+ma 'byung gnas kyis// phyi rabs dus kyi lnga brgya la// mtshan nyid sde chos sngags sde dar dus su// tshig la dred cing don la rmongs pa yi// dar la ma smin grong bsnyen byed dus su// phan par bya phyir rgyal bas lung bstan nas// d+ha ki'i lag nas dpe blangs gter du sbas// don gyi shes rab blo ldan snying rje can// chos sam rad na'i ming can las ldan dang// rgyal ba'i dgongs pa 'di nyid 'phrad par shog/ dpe rnying mi la ma bstan gter du sbas// dam can tshogs kyis bka' 'di thub par srungs// gtad rgya/ Ta rgya rgak+Sha/ gter rgya/ rdA/ Da/ cha nya/ sbas rgya/ shah+ye/ thad/ gsang rgya/ d+ha la DaSha dbang rgya/ Ta nyA gwa Ta Sha tha Sha/ kha thaM/ Shatha/ e ma bdag 'dra rin chen gling pa yis// rgyal ba'i dgongs pa bla na med// rgyud sde'i mthar thug snying po'i don// o rgyan lung bstan gter nas bton// ma yig shog ser dngos la bshus// sems can don du dgongs pa la// gzhan gyis rang 'dod ma yin pas// bla ma d+ha ki'i tshogs rnams kyis// bka' chad ma mdzad byin gyis rlobs// 'di nyid nyams len rigs 'dzin gyis// gtso byas mkha' mnyam 'gro ba kun// mkhyen gnyis yon tan myur thob shog/sa ma ya/ pa thA/ rgya rgya rgya/ g+hU h+ya/ shog ser tsha'o//// h+ya/

CLOSE WINDOW